Holy Sites of Kham - Volume I

༄༅། །སྨད་ཀྱི་ཕྱོགས་སུ་གནས་ཆེན་ཉེར་ལྔ་སྟེ་མདོ་བྱང་རབ་ཏུ་བསྟན་ཏེ་འདིར་བཤད་བྱ། བོད་ཀྱི་ས་ཕྱོགས་ལྷོ་ཟླ་ཞེས་བྱ་རུ༔ སྐྱོ་ཞེས་བྱ་བ་དུང་སེང་གནམ་མཆོངས་འདྲ༔ གནས་ཀྱི་ལྟེ་བ་སེང་གེ་རྫོང་ཞེས་བྱ༔ ཨོ་རྒྱན་པདྨ་བདག་གིས་ཟླ་གསུམ་བསྒྲུབ༔ ཕུག་པའི་སྒོ་རུ་གྲུབ་རྟགས་ཞབས་རྗེས་ཡོད༔ གཡས་ཀྱི་བྲག་ལ་ཐུགས་རྗེ་ཆེན་པོ་དང༔ གཡོན་གྱི་བྲག་ལ་རྡོ་རྗེ་ཕག་མོ་བཞུགས༔ གཡས་གཡོན་དབུས་གསུམ་ཨོཾ་གྱི་ཚུལ་དུ་གནས༔ བོད་ཡུལ་སྤྱི་ལ་དགོས་པའི་གཏེར་གསུམ་སྦས༔ སོ་སོར་དབང་བའི་གཏེར་ཁ་ཉི་ཤུ་སྦས༔ གང་འདོད་འདོན་པར་རུང་བའི་གཏེར་བཅུ་སྦས༔

༄༅། །དེ་ལ་མདོ་ཁམས་གནས་ཆེན་ཉེར་ལྔའི་ཐོག་མ་སྐུའི་གནས་ཀྱི་གཙོ་བོ་སྐྱོ་ཞེས་བྱ་བ་རྫ་ཆུ་ཕ་རི་སྐྱོ་བྲག་སེང་གེ་རྫོང་ཡོངས་གྲགས།

༄༅།།ན་མོ་གུ་རུ་པདྨ་རཱ་ཛ་སརྦ་སིདྡྷི་ཧཱུྃ།དུས་གསུམ་སངས་རྒྱས་ཐམས་ཅད་ཀྱི་སྤྱི་མེས་དཔལ་ཀུན་ཏུ་བཟང་པོ་ཉིད་ཀྱི་རྣམ་པར་འཕྲུལ་བ་དཔལ་ལྡན་སངས་རྒྱས་པདྨ་ལས་འཁྲུངས་པ་དེ་ཉིད་ཀྱི་ཞབས་ལ་ཕྱག་འཚལ་ཞིང་ཉེ་བར་སྐྱབས་སུ་མཆིའོ། །དུས་རྣམས་ཀུན་ཏུ་ཐུགས་བརྩེ་ཆེན་པོས་སྐྱོང་ཞིང་བྱིན་གྱིས་བརླབ་ཏུ་གསོལ། རྒྱལ་བའི་རྒྱལ་ཚབ་པདྨ་འབྱུང་གནས་ཀྱི། །རྣམ་འཕྲུལ་རིག་འཛིན་མི་འགྱུར་རྡོ་རྗེ་ཡི། །ཁམས་ཀྱི་སྤྱི་འབྱམས་གནས་ཀྱི་ཞལ་གཟིགས་རྣམས། །དུས་ལས་མ་ཡོལ་རྟེན་འབྲེལ་འཛོམས་པས་བཀོད། །གནས་སྲུང་དགེ་བསྙེན་ཆེན་པོས་རྒྱ་གྲོལ་མཛོད། །དེ་ཡང་ཨོ་རྒྱན་རིན་པོ་ཆེ་བོད་དུ་ཕེབས་ནས་ས་གཞི་རྟ་རྨིག་ཙམ་མ་ལུས་པ་ཞབས་ཀྱིས་བཅགས། ཁྱད་པར་དུ་བོད་ཁ་བ་ཅན་གྱི་རྒྱལ་ཁམས་སུ་ཕྱོགས་བཞིར་སྦས་པའི་ཡུལ་ཆེན་པོ་བཞི། གངས་ཆེན་ཉི་ཤུ་རྩ་གཅིག་སྒྲུབ་གནས་བརྒྱ་དང་རྩ་བརྒྱད་ལ་སོགས་པ་རྣམས་སུ་སྒྲུབ་པ་མཛད་པའི་རབས་ནི། བཀའ་ཐང་རྣམས་ལས་གསལ་བར་འབྱུང་ལ། ལུང་བསྟན་ཆེན་པོ་བཀའ་རྒྱ་མ་ལས། ལ་ལར་སངས་རྒྱས་རྣམས་ཀྱི་སྤྲུལ་པ་ནི། །ས་རྡོ་རི་བྲག་ལམ་འཕྲང་ལ་སོགས་སུ། །སྐུ་གསུང་ཐུགས་ཀྱི་སྤྲུལ་པ་རང་བྱུང་འབྱོན། །དེ་མཐོང་ཐོས་དང་གང་འབྲེལ་ངན་སོང་མེད། །ཕྱོགས་ནི་མ་ངེས་ཕྱོགས་མཚམས་ཀུན་ལ་སོགས། །ཉེ་རིང་མེད་ཕྱིར་ཀུན་ཏུ་འབྱོན་པར་འགྱུར། །དེ་བཞིན་དུས་ནི་མ་ངེས་འབྱོན་པར་འགྱུར། །ཡུལ་ལ་ཚད་བཟུང་མེད་དེ་འཁོར་མཐའི་བར། །ཞེས་དང་། ཨོ་རྒྱན་རིན་པོ་ཆེའི་རྣམ་ཐར་གསེར་གྱི་ཕྲེང་བ་རཏྣ་གླིང་པའི་གཏེར་མ་ལས། མཆིམས་ཕུས་སྣ་དྲངས་བོད་ཀྱི་ཡུལ་གནས་མ་ལུས་པ། གངས་ཏི་སེ་མན་ཆད། ཁམས་གཙང་བ། ལྕིན་བྲག རྒྱ་ནག་རི་བོ་རྩེ་ལྔ། གན། འཇང་། ཧུ་དང་། མི་ཉག ཧོར། ལི་ཡུལ། གྲུ་གུ། ཀོང་པོ། རྒྱ་ལ། མོན་སྟག་སྒོ། བུམ་ཐང་། སྤ་གྲོ་ལ་སོགས་ཐམས་ཅད་དུ་སྒྲུབ་གནས། གཏེར་ཁ་ས་གཞི་ཐམས་ཅད་བྱིན་གྱིས་བརླབས་ཤིང་འགྲོ་བ་ཐམས་ཅད་སྨིན་གྲོལ་ལ་བཀོད་དོ། །ཞེས་སོགས་གསུངས་པའི་ཕྱིར། བོད་ཁ་བ་ཅན་གྱི་རྒྱལ་ཁམས་སུ་ཨོ་རྒྱན་ཆེན་པོས་བྱིན་གྱིས་བརླབས་པའི་ལུང་པ་ལྔ། ལྗོངས་གསུམ། གླིང་བཞི། གངས་ཆེན་ཉི་ཤུ་རྩ་གཅིག གྲུབ་པའི་གནས་བརྒྱད། ངོ་མཚར་བའི་གནས་མཆོག་ཉི་ཤུ་རྩ་ལྔ། གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་ཡོད། དེ་རྣམས་སུ་སྐུ་ཚབ་བྱིན་བརླབས་ཅན་རྣམས། གསུང་ཚབ་ཤོག་སེར། ཐུགས་རྟེན་མཆོད་རྟེན་དང་རིང་བསྲེལ། ཡོན་ཏན་གྱི་རྟེན་ནོར་བུའི་རིགས་བྱེད། ཕྲིན་ལས་མྱོང་གྲོལ་དམ་རྫས་ཀྱི་གཏེར་ཁ་མང་དུ་སྦས་ནས་ཡོད་དོ། །གནས་དེ་རྣམས་ཀྱིས་ནང་ནས་ཁྱད་པར་མཆོག་ཏུ་གྱུར་པ། གྲུབ་པའི་གནས་བརྒྱད་ཀྱི་ཡ་གྱལ་ཟླ་སྤྱི་འབྱམས་ཀྱི་གཡས་ཕྱོགས། བྲག་སེང་གེ་གནམ་མཆོངས་ཞེས་ཀྱང་བྱ། རི་བོ་གར་མཛད་ཅེས་ཀྱང་བྱ་བ་དེའི་གནས་སྒོ་ཇི་ལྟར་ཕྱེས་པའི་ལོ་རྒྱུས་ནི། སྤྲུལ་སྐུ་མི་འགྱུར་རྡོ་རྗེ་ཞེས། གཏེར་ཁ་དུ་མ་ནས་ལུང་བསྟན་ཅིང་། བྱང་བར་བཀའ་ཐང་འབྲིང་པོ་ལས། རྡོ་རྗེ་ནང་དམེ་དམག་འཁྲུག་བྱེད་པའི་ཡུལ། །གཙུག་གི་བླ་མཆོད་སྤྱི་ཡི་དཔོན་དུ་འགྱུར། །མཐུ་དང་དུག་ནད་ནང་འཁྲུགས་དར་བའི་དུས། །རྟེན་མཆོད་རང་བྱོན་སྤྱི་འབྱམས་ཞེས་བྱའི་གནས། །གཡས་རི་བྲག་དཀར་གནམ་མཆོངས་གཏེར་ཁ་འདི། །མི་བཞག་འདོན་པའི་རྟགས་དེར་བསྟན་ནས་འབྱུང་། །གཏེར་སྟོན་མི་འགྱུར་རྡོ་རྗེ་ཞེས་བྱ་འབྱོན། །ཁམས་ཕྱོགས་ཀྱི་གཏེར་ཁ་བརྒྱ་ལ་དབང་། །ཞེས་དང་། རཏྣ་གླིང་བའི་ལུང་བསྟན་ལས། ཁམས་ཀྱི་སྤྱི་འབྱམས་ཞེས་བྱ་དེར། །གཏེར་སྟོན་མི་འགྱུར་རྡོ་རྗེ་འབྱོན། །གནས་མཆོག་དེ་ཡི་གཏེར་རྣམས་འདོན། །ཁམས་ཀྱི་གཏེར་ཁ་བརྒྱ་ལ་དབང་། །གནས་མཆོག་དེ་ཡི་གཡས་ཕྱོགས་ན། །ཐང་ཆེན་མཎྜལ་ཕུབ་པ་འདྲ། །དབུས་སུ་རི་རྒྱལ་ལྷུན་པོ་ནི། །དུང་དཀར་གཡས་སུ་འཁྱིལ་འདྲ་ཡོད། །རྒྱ་གར་བྱ་རྒོད་སྤུངས་པ་འདྲ། །པདྨ་ང་ཡི་གནས་མཆོག་ཡིན། །ཞེས་དང་། རིག་འཛིན་གཏེར་བཞེད་སྙིང་པོའི་བསམ་ཡས་རྡོ་རྗེའི་ཀློང་སྒྲོམ་གྱི་ལུང་བྱང་ལས། ཆེ་མཆོག་ཤུད་བུ་དཔལ་སེང་ཁྱོད། །ཤར་གྱི་ཕྱོགས་ནས་བདུད་འདུལ་རོལ་རྩལ་ཞེས། །སྤྱི་འབྱམས་སེང་གེའི་རྫོང་ནས་གཏེར་སྒོ་འབྱིན། །དམ་སྲི་འབྱུང་པོའི་བར་ཆད་མ་བྱུང་ན། །ཟབ་ཆོས་འདི་འཕྲོད་ཉམས་སུ་བླངས་པ་ན། །སྐུ་ཚེ་མཛད་ཕྲིན་ནམ་མཁའི་མཐའ་མཉམ་འཕེལ། །ཞེས་སོགས་དང་། ཉིད་ཀྱི་གནམ་ཆོས་ལས། རིག་འཛིན་ལྔའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་སྤྲུལ་པར་ལུང་བསྟན་ཅིང་སྐྱེ་བ་ཉིས་བརྒྱ་ཙམ་ཐོགས་མེད་དུ་དྲན་པ་དང་། ཞེས་དང་། གཞན་ཡང་ལུང་བྱང་ལ་ལ་ནས། མཐོང་ཐོས་སྐྱེ་འགྲོ་ངན་སོང་མེད་པར་འགྱུར། གནས་གཏེར་སྒོ་འབྱེད་ཇིང་དུར་བཟློག །ང་ཉིད་དངོས་སྤྲུལ་མི་འགྱུར་རྡོ་རྗེ་དང་། །ཞེས་སོགས་གསུངས། སྤྲུལ་སྐུ་ཉིད་དགུང་ལོ་བཅུ་དྲུག ཀུན་ལྡན་གྱི་ལོ་ཧོར་ཟླ་ལྔ་པའི་ཚེས་བཅོ་བརྒྱད་ལ་ཚོགས་འཁོར་དང་བསང་མཆོད་རྣམས་ལེགས་པར་བགྱིས་ཏེ་བཀའ་སྩལ་པ་ནི། གནས་ཉིད་ཡི་གེ་ཨོཾ་གྱི་ཆགས་ཚུལ་མདུན་དུ་ཧཱུྃ། གཡས་སུ་ཏྲཾ། རྒྱབ་ཏུ་ཧྲཱིཿ གཡོན་དུ་ཨཱཿ སྟེ་རྒྱལ་བ་རིགས་ལྔའི་ས་བོན་གྱི་ཚུལ་དུ་བཞུགས་སོ། །གནས་འདི་བྱིན་རླབས་ཆེ་ཞིང་དངོས་གྲུབ་མྱུར་བའི་གནས་མཆོག་ཡིན། དེའི་རྟགས་ལ་རྡོ་རྗེ་ཕག་མོའི་སྐུ་རང་བྱོན་ཡོད། དེའི་གཉའ་དེར་ཡེ་ཤེས་མཚོ་རྒྱལ་གྱི་ཞབས་རྗེས་ཡོད། རིན་ཆེན་གསེར་གྱི་ཕ་ཝཾ་ཡོད། སྐུ་ལྔ་ཡེ་ཤེས་ལྔ་ཡི་ངོ་བོ་ཡིན། གནས་རྣམས་ཀུན་གྱི་མགོ་བོ་ཡིན། དེ་ཡི་རྟགས་ལ་ཡིག་མགོ་དང་ཨོཾ་གསལ་བར་ཡོད། བདུད་དང་མུ་སྟེགས་འདུལ་བའི་གནས་མཆོག་ཡིན། དེ་ཡི་རྟགས་ལ་སེང་གེས་ཉི་ཟླ་ཕྲག་ལ་ཁུར་བ་ཡོད། མཁའ་འགྲོ་མ་རྣམས་ཀྱིས་གར་མཛད་རྗེས་ཡོད། དེའི་མཆན་དེར་རྗེ་འབངས་ལང་གྲོ་ལོ་ཙཱའི་ཞབས་རྗེས་ཡོད། དམ་ཅན་མགར་བ་ཕྱག་བཞི་པའི་སྐུ་རྗེས་ཡོད། ཨོ་རྒྱན་རིན་པོ་ཆེའི་ཕྱག་རྗེས། སྲིན་པོ་བསྒྲལ་བའི་ཁོག་པ་ན། ཞི་ཁྲོ་དམ་པ་རིགས་བརྒྱ་བཞུགས། དེ་ཡི་གཡས་སུ་རྡོ་རྗེ་བྱ་བའི་ཡི་གེ་གསལ་བར་ཡོད། ལུང་བསྟན་ཡི་གེ་ངོ་མཚར་ཆེ། མཁའ་འགྲོ་མའི་ཚོགས་གཞོང་། གུ་རུ་རིན་པོ་ཆེའི་ཕྱག་མཛུབ་ཀྱིས་བྲིས་པའི་གཟུངས་སྔགས་གསལ་བར་ཡོད། ཨོ་རྒྱན་རིན་པོ་ཆེའི་སྤྲུལ་པ་བྲག་ལ་ཐིམ་མལ་དུ་སྐུ་གསུང་ཐུགས་མཚོན་པ་དེ་ལ་སྨོན་ལམ་གང་བཏབ་འགྲུབ། ཡི་གེ་ཨོཾ་གསལ་པོ། ཡེ་ཤེས་མཚོ་རྒྱལ་གྱི་ཞབས་རྗེས། མཁའ་འགྲོ་སུ་ཀ་སིདྡྷིའི་ཞབས་རྗེས་གཤིན་རྗེས་བདག་ཏུ་བཟུང་ཕྱིར་ཤིན་ཏུ་གཉེན། དེ་ཡི་རྟགས་ལ་གཤིན་རྗེ་འཆར་ཁ་ནག་པོ་སྲིད་གསུམ་ལྟོ་བར་གསལ་བ་ཡོད། སྲིན་པོའི་མགོ་རྗེས། གནས་ལ་ཞལ་ཟས་ཕུལ་བ། སྟོབས་ལྡན་སྡིག་པ་ནག་པོ་རྣམས་ཡོད། ཡེ་ཤེས་མཚོ་རྒྱལ་གྱི་ཕྱག་མཛུབ་ཀྱིས་བྲིས་པའི་ཡི་གེ་འབྲུ་གསུམ། མཁའ་འགྲོའི་འཕྲུལ་ཡིག་ཡོད། གནས་མཆོག་དེ་ཡི་ཤར་ཕྱོགས་ན། བཻ་རོ་ཙ་ནའི་ཞབས་རྗེས། སྲིན་པོའི་ཀླད་པས་བྲིས་པའི་འབྲུ་གསུམ་དང་། ཐུགས་རྗེ་ཆེན་པོའི་སྙིང་པོ་ཡིག་བདུན་ཡོད། མཁའ་འགྲོ་མ་རྣམས་བྱོན་པའི་ཞབས་རྗེས། བདུད་འདུལ་རྡོ་རྗེ་གྲོ་ལོད་ཀྱི་སྲིན་པོ་འདུལ་བའི་ཆེད་དུ། གཟུངས་སྔགས་བྲག་ལ་བྲིས་པ། འདི་ལས་ལྷག་པའི་གནས་གཞན་ན་མེད། དེའི་རྟགས་ལ་ཡི་གེ་ཨོཾ་རང་བྱོན་ཡོད། ཡེ་ཤེས་མཚོ་རྒྱལ་གྱི་ཞབས་རྗེས། སྲིན་པོ་ཐུར་དུ་དེད་མལ། རྗེ་འབངས་ཤུད་བུ་དཔལ་སེང་གི་ཞབས་རྗེས། སྲིན་པོ་དམ་ལ་བཏགས་དུས་བྲག་ལ་གྲུ་གསུམ་ཤར། ལྷོ་ཕྱོགས་པོ་ཏ་ལ་དང་བྱིན་རླབས་མཉམ། དེའི་རྟགས་ལ་ཐུགས་རྗེ་ཆེན་པོ་གཙོ་འཁོར་གསུམ། སྲིན་པོ་ཕོ་མོ་མང་དུ་དེད་ནས་གཙོ་བོ་གཉིས་གབ་པ། དེ་གཉིས་བསྒྲལ་ནས་ཁོག་སྟོད་སྨད་ཕར་ཁ་ཚུར་ཁར་འཕངས་པ། དེའི་ཤར་ཕྱོགས་ན་མཁའ་འགྲོ་མའི་བྲོ་ར་གསལ་བར་ཡོད། རྗེ་འབངས་སྣ་ནམ་ཡེ་ཤེས་ཀྱི་ཞབས་རྗེས། མཁའ་འགྲོ་དང་ཕྱོགས་སྐྱོང་ཐམས་ཅད་འཚོགས་པའི་གནས་ཡིན། དེའི་རྟགས་དུར་ཁྲོད་བརྒྱད་ཀྱི་ཆགས་ཚུལ། བཅུ་གཅིག་ཞལ་གྱི་སྤྱི་བླུགས་རྗེས། ཅོག་རོ་ཀླུའི་རྒྱལ་མཚན་གྱི་ཞབས་རྗེས། ཡི་གེ་ཨོཾ་རང་བྱོན་ཡོད། ཚེ་གཅིག་ལུས་གཅིག་ལ་སངས་རྒྱས་པའི་གནས་ཡིན། དེའི་རྟགས་ལ་མཁའ་འགྲོ་ཡེ་ཤེས་མཚོ་རྒྱལ་གྱི་ཕྱག་རྗེས། དགེ་སློང་ནམ་མཁའི་སྙིང་པོའི་ཞབས་རྗེས། རྒྱལ་བ་ཤཱཀྱ་ཐུབ་པས་བྱིན་གྱིས་བརླབས་པའི་གནས་ཡིན། དེའི་རྟགས་ལ་བྱང་ཆུབ་ཆེན་པོའི་མཆོད་རྟེན་ཡོད། གུ་རུ་རྡོ་རྗེ་གྲོ་ལོད་དྲག་ཏུ་ཁྲོས་པའི་ཞབས་རྗེས། དག་པ་མཁའ་སྤྱོད་གནས་དང་བྱིན་བརླབས་མཉམ། དེའི་རྟགས་ལ་མཁའ་འགྲོ་བདེ་ཆེན་རྒྱ་མཚོའི་ཞབས་རྗེས་ཡོད། གཤིན་རྗེ་གཤེད་དམར་གྱི་སྐུ་རང་བྱོན། བྱང་ཆུབ་སེམས་དཔའ་ཉེ་བའི་སྲས་བརྒྱད་ཀྱི་གནས་ཡིན། དེའི་རྟགས་ལ་བྱང་ཆུབ་སེམས་དཔའ་ས་ཡི་སྙིང་པོའི་ཞབས་རྗེས། རྟ་མགྲིན་དང་རྡོ་རྗེ་གྲོ་ལོད་གཉིས་ཀྱི་ཞབས་རྗེས་དང་སྲིན་པོ་དེད་རྗེས། རྒྱལ་འགོང་མཆེ་བ་ཡ་གཅིག་ཅན་དམ་ལ་བཏགས་པའི་གནས་ཡིན། དེའི་རྟགས་ལ་ཡི་གེ་ཙ་དམར་པོ་རང་བྱོན། གུ་རུ་པདྨ་རྒྱལ་པོའི་ཞབས་རྗེས། རྗེ་འབངས་སངས་རྒྱས་ཡེ་ཤེས་ཀྱི་ཞབས་རྗེས། ཨོ་རྒྱན་རིན་པོ་ཆེ་སེང་གེར་བཅིབས་ནས་བྲོ་བརྡུངས་རྗེས། བཻ་རོ་ཙ་ནའི་ཞབས་རྗེས། བློ་ལྡན་མཆོག་སྲེད་ཀྱི་ཞབས་རྗེས། རྗེ་འབངས་ཁྱེའུ་ཆུང་ལོ་ཙཱའི་ཞབས་རྗེས། དེའི་སྟེང་དུ་མཆོད་རྟེན་རང་བྱོན། གཡོན་དུ་ལྷ་འདྲེ་རྣམས་དམ་ལ་བཏགས་པའི་སྣ་ལུང་དང་། ས་མ་ཡའི་ཡི་གེ་གསལ་བར་ཡོད། དེའི་གཡས་ཕྱོགས་སུ་བདུད་སྡིག་ཅན་དུག་སྦྲུལ་མགོ་གསུམ་པར་སྤྲུལ་ནས་སོང་བ། གུ་རུ་དྲག་པོས་དེད་ནས་མགོ་དབུས་མ་བཅད་པས་བྲག་ནང་དུ་བྲོས། ཕྱག་གི་མགོ་གཅིག་ལ་ཁ་ཊྭཱཾ་བརྒྱབ་ནས་བཅད་པ། ཤཱཀྱ་སེང་གེས་བདུད་བཏུལ་བའི་ཞབས་རྗེས། ཉི་མ་འོད་ཟེར་གྱི་ཞབས་རྗེས། སྲིན་པོ་ཕོ་མོ་མགོ་མཇུག་ལྡོག་པའི་གཟུགས། རྡོ་རྗེ་གྲོ་ལོད་ཀྱི་ཕྱག་གཡོན་པའི་རྗེས། རྗེ་འབངས་དྲན་པ་ནམ་མཁའི་ཞབས་རྗེས། ཨོ་རྒྱན་རིན་པོ་ཆེས་མུ་སྟེགས་པ་དང་རྫུ་འཕྲུལ་ཚད་དུས་ཀྱི་སེང་གེའི་རྗེས་དང་མུ་སྟེགས་པ་རྦབ་ལ་བཏང་མལ། མཁའ་འགྲོ་རྣམས་ཀྱིས་གནས་ལ་བསྐོར་བ་བྱེད་དུས་ཀྱི་བཞུགས་ས་ཉི་ཟླ་ཕུག སེང་གེ་སྒྲ་སྒྲོགས་ཀྱི་ཞབས་རྗེས། གུ་རུ་རིན་པོ་ཆེའི་ཞབས་རྗེས། སོག་པོ་དཔལ་གྱི་ཡེ་ཤེས་ཀྱི་ཞབས་རྗེས། ཚེའི་ལྷ་མོ་མགྱོགས་མ་བཞིའི་ཞབས་རྗེས། འོ་བྲན་དཔལ་གྱི་དབང་ཕྱུག་གི་ཞབས་རྗེས། རྨ་ཐོག་རིན་ཆེན་གྱི་ཕྱག་ཞབས་རྗེས་རྣམས་ཡོད་དོ། །གཉག་སྟོན་དབང་གི་རྒྱལ་པོའི་སྐུ་གཟུགས་དང་ཞབས་རྗེས། དེའི་གོང་དུ་ཁྲི་སྲོང་ལྡེའུ་བཙན་གྱི་ཞབས་རྗེས། རྒྱལ་བ་མཆོག་དབྱངས་ཀྱི་ཞབས་རྗེས། གླང་ཆེན་དཔལ་གྱི་སེང་གེའི་ཞབས་རྗེས། འབྲོག་བན་ལོ་ཙཱའི་ཞབས་རྗེས། རྡོ་རྗེ་གྲོ་ལོད་ཀྱིས་སྲིན་པོ་དེད་རྗེས། རྗེས་དེའི་གོང་ན་རིགས་གསུམ་མགོན་པོའི་ཞབས་རྗེས། དེའི་གོང་ན་ཨོ་རྒྱན་རིན་པོ་ཆེའི་ཞབས་རྗེས། དེའི་གོང་དུ་རྗེ་འབངས་ལྡན་མ་རྩེ་མང་གི་ཞབས་རྗེས། དེའི་གོང་ན་མཁའ་འགྲོ་བཀྲ་ཤིས་ཁྱེའུ་འདྲེན་གྱི་ཞབས་རྗེས་ཆ་གཅིག འདི་ན་ཨོ་རྒྱན་རིན་པོ་ཆེས་ལྷ་འདྲེ་ལ་ཆོས་གསུངས་མལ་ཆོས་ཁྲི་ཕུག་ཅེས་བྱའོ། །དེའི་གོང་དུ་བྱ་རྒོད་ཀྱི་གཟུགས། དེའི་གོང་དུ་གཡུ་འབྲུག་གི་གཟུགས། དཔལ་མགོན་མ་ནིང་གི་ཕྱག་མཚན་སྙིང་གི་རྗེས། རྗེ་འབངས་ཤྲཱི་བཛྲའི་ཞབས་རྗེས། ཡེ་ཤེས་མཚོ་རྒྱལ་གྱི་ཕྱག་གཡས་པའི་རྗེས་དང་ཡང་ཕྱག་རྗེས། གུ་རུ་རིན་པོ་ཆེའི་སེང་གེ་ཁྲིད་པའི་རྗེས་དང་ཞབས་རྗེས། བྱང་ཆུབ་སེམས་དཔའ་རྡོ་རྗེ་ལེགས་པའི་རྫུ་འཕྲུལ་གྱི་ཞབས་རྗེས། མཆོད་རྟེན་ཉིན་བྱེད་རང་བྱོན། ཨོ་རྒྱན་རིན་པོ་ཆེས་བྲག་ལ་ཕུར་པ་བརྒྱབ་པའི་རྗེས། དེའི་གཡས་ཕྱོགས་སུ་མགོན་པོ་སྤྱན་རས་གཟིགས་ཀྱི་སྐུ་གསལ་བར་བཞུགས། དེའི་འགོ་རུ་རྡོ་རྗེ་ཕག་མོའི་དཀྱིལ་འཁོར། ལྕང་ལོ་ཅན་གྱི་ཕོ་བྲང་ན་ཕྱག་ན་རྡོ་རྗེ་བཞུགས་པའི་ཚུལ། ལྷ་ལྕམ་མནྡ་ར་བའི་རྫུ་འཕྲུལ་གྱི་ཞབས་རྗེས། མགོན་པོ་འཇམ་དབྱངས་ཀྱི་སྐུ་གཟུགས་ཉི་ཟླའི་རྗེས། སྲིན་པོ་འདུལ་བའི་ཆེད་དུ་ཨོ་རྒྱན་རིན་པོ་ཆེས་སྲིན་པོའི་ཚུལ་དང་མཐུན་པར་ཁྱུང་ཆིབས་པའི་སྐུ་རྗེས། ཨོ་རྒྱན་རིན་པོ་ཆེའི་སྤྲུལ་པ་བྱང་ཆུབ་སེམས་དཔའ་རྡོ་རྗེ་ལྟ་བུའི་ཞབས་རྗེས། དེའི་གཡོན་ཕྱོགས་སུ་དུག་སྦྲུལ་ཐུར་དུ་རྒྱུགས་པ་འདྲ་བ་ཡོད། དེ་ཨོ་རྒྱན་རིན་པོ་ཆེ་ཉི་ཟེར་ལ་ཆིབས་པའི་བྱོན་རྗེས་ཡིན། ཨོ་རྒྱན་རིན་པོ་ཆེས་སྲིན་པོ་དེད་ནས་རྗེས་སུ་རྡོ་རྗེ་འཕངས་པའི་རྗེས། དེའི་གོང་དེར་མཆོད་རྟེན་རྗེས་ཡོད། སྲིན་པོའི་ཀླད་པས་བྲིས་པའི་ཡི་གེ་ལ། བཻ་རོ་ཙ་ནའི་ཞབས་རྗེས་ཆ་གཅིག ཤུད་བུ་དཔལ་སེང་གི་ཞབས་རྗེས། དཔལ་ལྷ་ལས་བབས་པའི་མཆོད་རྟེན་གསལ་བ་ཨོ་རྒྱན་རིན་པོ་ཆེའི་ཞབས་རྗེས། ཁྱུང་གི་སྤྱི་གཙུག་ན་བུམ་པ་དང་ཉི་ཟླས་མཚོན་པའི་རྗེས་ཡོད། དེའི་གཡས་སུ་རིག་འཛིན་གུ་རུ་མཚོ་འབུམ་གྱིས་མཚན་བརྒྱད་ཞལ་གཟིགས་པ་བྲག་ལ་ཐིམ་མལ་དུ་མཚན་བརྒྱད་ཀྱི་སྐུ་དང་གུ་རུ་མཚན་འབུམ་གྱི་ཞབས་རྗེས་ཡོད། མཚན་བརྒྱད་ཕུག་ཅེས་བྱ་བ་ཡིན། དེའི་གཡས་སུ་མཚོ་རྒྱལ་གྱི་སྒྲུབ་ཕུག་ཉི་ཟླ་ཕུག་ཡོད། དེ་ན་ཡེ་ཤེས་མཚོ་རྒྱལ་གྱི་ཞབས་རྗེས། དེའི་སྟེང་མཚོ་རྒྱལ་གྱི་ཕྱག་རྗེས། མཁའ་འགྲོ་ཀ་ལ་སིདྡྷིའི་ཞབས་རྗེས་ཆ་གཅིག ཨོ་རྒྱན་རིན་པོ་ཆེའི་ཞབས་རྗེས། དེའི་འོག་མཚོ་རྒྱལ་གྱི་གསོལ་ཞལ་བཞག་རྗེས། ཅོག་རོ་ཀླུའི་རྒྱལ་མཚན་གྱི་ཞབས་རྗེས། མཚོ་རྒྱལ་གྱི་ཞབས་རྗེས། གནས་འདི་རྒྱ་གར་རྡོ་རྗེ་གདན་དང་བཀོད་པ་མཉམ། དེའི་རྟགས་ལ་སངས་རྒྱས་ཤཱཀྱ་ཐུབ་པའི་སྐུ། དེ་ལས་ཕན་དུ་མགོན་པོ་ཚེ་དཔག་མེད་ཀྱི་སྐུ། དེའི་གཉའ་ན་བྱང་ཆུབ་སེམས་དཔའ་མཐུ་ཆེན་ཐོབ་ཀྱི་སྐུ་གསལ་བ་ཡོད། དེ་གོང་ཨཱཿརང་བྱོན། དེའི་གཡས་སུ་འཇམ་དབྱངས་སེང་གེ་ཆིབས་པ་དང་ཡི་གེ་དྷིཿརང་བྱོན་ཡོད། གྲུབ་ཆེན་པདྨ་བཛྲའི་ཞབས་རྗེས། ཤཱཀྱ་སེང་གེའི་སྐུ་གཟུགས་གཙུག་ཏུ་པཎ་ཞྭ་ཅན། པདྨ་འབྱུང་གནས་བེར་མཐིང་ནག་མནབས་པ། གྲུབ་ཆེན་ཉ་ལྟོ་བའི་ཞབས་རྗེས། གནས་འདི་རྟ་ཕག་ཡབ་ཡུམ་གྱི་གནས་ཡིན། དེའི་རྟགས་ལ་རྟ་ཞལ་དང་ཕག་ཞལ་གསལ་བ་ཡོད། བྱང་ཆུབ་སེམས་དཔའ་པདྨ་སིདྡྷིའི་ཞབས་རྗེས། གཡས་ཀྱི་བྲག་ལ་དུང་དཀར་གྱི་རྗེས། དེ་ན་རྒྱ་ནག་བཀྲ་ཤིས་ཀྱི་ཡི་གེ རྒྱལ་ཆེན་རྣམ་སྲས་ཀྱི་ཕྱག་མཚན་ནེའུ་ལེའི་ལུས་པོའི་རྗེས། སངས་རྒྱས་འོད་དཔག་མེད་ཀྱི་སྐུ་གཟུགས། མནྡ་ར་བ་བཞེངས་ནས་ཚེ་བུམ་བསྣམས་པའི་གཟུགས། གནས་བརྟན་དྷརྨ་ཏ་ལའི་སྐུ་གཟུགས། སློབ་དཔོན་ཨཱརྱ་དེ་ཝའི་རྫུ་འཕྲུལ་གྱི་ཞབས་རྗེས། རྗེ་འབངས་ཤྲཱི་བཛྲའི་ཞབས་རྗེས། དེ་གོང་ན་སློབ་དཔོན་ཀླུ་སྒྲུབ་ཀྱི་རྫུ་འཕྲུལ་གྱི་ཞབས་རྗེས། དེའི་གོང་ན་ཛམ་བྷ་ལ་རང་བྱོན་ཡོད། དངོས་གྲུབ་ཕུག་ཅེས་བྱ་བ་ཡིན། བྱང་ཆུབ་སེམས་དཔའ་ཀུན་འཕགས་ཀྱི་ཞབས་རྗེས། དེའི་གོང་དུ་བླ་མ་སྐུ་གསུམ་གྱི་ཞབས་རྗེས་ངོ་མཚར་ཅན་ཡོད། གནས་འདིར་མཇལ་ན་ངན་སོང་གི་སྐྱེ་སྒོ་ཆོད། དེའི་རྟགས་ལ་ཆོས་ཀྱི་རྒྱལ་པོའི་སྐུ་ཡོད། སློབ་དཔོན་དབྱིག་གཉེན་གྱི་རྫུ་འཕྲུལ་གྱི་ཞབས་རྗེས། དེའི་གཡས་སུ་མཚལ་གྱིས་བྲིས་པའི་ཡི་གེ་ཨཱཿཡོད། དེའི་འོག་ཏུ་གནས་བརྟན་མི་ཕྱེད་པའི་སྐུ་གཟུགས། དེའི་འོག་གནས་བརྟན་ཡན་ལག་འབྱུང་གི་སྐུ་རྗེས། རྒྱལ་པོ་ཡུལ་འཁོར་སྲུང་གི་སྐུ་གཟུགས། དེའི་སྟེང་གནས་བརྟན་རྡོ་རྗེ་མོ་བུའི་སྐུ་གཟུགས། དེའི་སྟེང་རྒྱལ་པོ་ཧྭ་ཤང་གི་སྐུ་གཟུགས། རྡོ་རྗེ་དྲིལ་བུའི་རྫུ་འཕྲུལ་གྱི་ཞབས་རྗེས། སློབ་དཔོན་ཐོགས་མེད་པའི་རྫུ་འཕྲུལ་གྱི་ཞབས་རྗེས། སློབ་དཔོན་ཡོན་ཏན་འོད་ཀྱི་ཞབས་རྗེས། པདྨ་སཾབྷའི་རྫུ་འཕྲུལ་གྱི་ཞབས་རྗེས། གྲུབ་ཐོབ་རལ་གྲི་པའི་རྫུ་འཕྲུལ་ཞབས་རྗེས། སློབ་དཔོན་ཤཱཀྱ་འོད་ཀྱི་ཞབས་རྗེས། གནས་བརྟན་བ་ཀུ་ལའི་སྐུ་གཟུགས། ཕྱོགས་ཀྱི་གླང་པོའི་སྐུ་གཟུགས། གནས་བརྟན་སྦེད་བྱེད་ཀྱི་སྐུ། གྲུབ་ཆེན་ཌོམ་བིའི་ཞབས་རྗེས། སློབ་དཔོན་ཆོས་ཀྱི་གྲགས་པའི་ཞབས་རྗེས། འབིར་བ་པའི་ཞབས་རྗེས། ཨིནྡྲ་བོ་དྷིའི་ཞབས་རྗེས། གྲུབ་ཆེན་ཤ་བ་རི་པའི་ཞབས་རྗེས། ཏཻ་ལོ་ན་རོའི་རྫུ་འཕྲུལ་གྱི་ཞབས་རྗེས། གནས་བརྟན་ལམ་ཕྲན་བསྟན་གྱི་སྐུ། ཀུ་ཀུ་རི་བའི་རྫུ་འཕྲུལ་གྱི་ཞབས་རྗེས། མཁའ་འགྲོ་མས་ཚོགས་ལ་བྲོ་བརྡུང་མལ། དེའི་ནང་ན་ཡེ་ཤེས་མཚོ་རྒྱལ་གྱི་ཞབས་རྗེས། རྒྱལ་བ་མཆོག་དབྱངས་ཀྱི་ཞབས་རྗེས། གྲུབ་ཆེན་ས་ར་ཧའི་ཞབས་རྗེས། བྱང་ཆུབ་སེམས་དཔའ་སྤྱན་རས་གཟིགས་ཀྱི་ཞབས་རྗེས། ལྷའི་དབང་པོ་བརྒྱ་བྱིན་གྱིས་ལྷ་ཡུལ་ན་དད་རྟེན་རྡོ་བཀོག་ནས་ཁྱེར་མལ། དུང་དཀར་གཡས་འཁྱིལ་གྱི་རྗེས། རིག་འཛིན་གུ་རུ་མཚོ་འབུམ་གྱི་ཞབས་རྗེས། གྲུབ་ཆེན་ཡེ་ཤེས་རྡོ་རྗེའི་ཞབས་རྗེས། གནས་བརྟན་ལམ་བརྟན་གྱི་སྐུ། དེའི་གོང་དུ་ཕུག་པ་རྫ་རྔ་ལྟ་བུ་ནས་མཁའ་འགྲོ་མ་རྣམས་ཉིན་བཞིན་གནས་གཞན་དུ་ཁྱེར་ཞིང་། མཚན་མོ་ཚོགས་འཁོར་བསྐོར་བའི་གནས་ཕྲན་ལྷ་བཤོས་ལྟ་བུ། གྲུབ་ཆེན་གཡི་དྷ་རའི་ཞབས་རྗེས། གྲུབ་ཆེན་ཨ་ཝ་དྷུ་ཏའི་རྫུ་འཕྲུལ་གྱི་ཞབས་རྗེས། ཨོ་རྒྱན་རིན་པོ་ཆེའི་ཕྱག་མཁར་རྗེས་ལ་ཡི་གེ་ཨཿས་མཚན་པ། བྱང་ཆུབ་སེམས་དཔའ་རྡོ་རྗེ་ལྟ་བུའི་ཞབས་རྗེས། ཨོ་རྒྱན་རིན་པོ་ཆེའི་ཞབས་རྗེས། ཆོས་སྐུ་ཀུན་ཏུ་བཟང་པོའི་སྐུ་རང་བྱོན། དེའི་གཡས་སུ་རིན་ཆེན་དུང་ཞལ་དཀར་པོ་ལ། འཆི་མེད་ཚེའི་ལྷ་ཚོགས་གསལ་བར་བཞུགས། པཎྜི་ཏ་ཡན་ལག་མེད་པའི་རྡོ་རྗེའི་ཞབས་རྗེས། ཇོ་བོ་ཚོགས་བདག་གི་སྐུ་གསལ་པོ། སྤྲིན་ནག་འཁྲུགས་པའི་ཀློང་ནས་མགར་བ་དམར་པོའི་སྐུ་རང་བྱོན། མཁའ་འགྲོ་ཤཱཀྱ་དེ་ཝའི་ཞབས་རྗེས། གུ་རུ་པདྨ་སཾ་བྷའི་ཞབས་རྗེས། རིང་བསྲེལ་གྱིས་མཚན་པ། ལྷ་ལྕམ་མནྡ་ར་བའི་རྫུ་འཕྲུལ་གྱི་ཞབས་རྗེས། རིག་འཛིན་དགའ་རབ་རྡོ་རྗེའི་ཞབས་རྗེས། དེའི་གཡས་སུ་རྟ་ཕག་ཡབ་ཡུམ་གྱི་སྐུ། གནས་བརྟན་གསེར་དེའུའི་སྐུ། ཝརྡྷ་ནའི་ཡི་གེ་ཨཱོཾ། གུ་རུ་རིན་པོ་ཆེའི་ཕྱག་མཁར་རྗེས། བློ་ལྡན་མཆོག་སྲེད་ཀྱི་ཞབས་རྗེས། གནས་འདི་ལྷོ་ནུབ་པདྨ་འོད་དང་བྱིན་རླབས་མཉམ། དེའི་རྟགས་ལ་གུ་རུ་པདྨ་འབྱུང་གནས་ཀྱི་སྐུ་རང་བྱོན། རིན་ཆེན་དུང་གི་མཆོད་རྟེན་རང་བྱོན། རྒྱ་ནག་གི་ཡི་གེ་ཧྲཱིཿབྱི་རུའི་མཆོད་རྟེན་རང་བྱོན། རྡོ་རྗེ་ཕག་མོའི་སྐུ་རང་བྱོན། གྲུབ་ཆེན་མཻ་ཏྲི་པའི་ཞབས་རྗེས། ཕག་མོ་དབུ་ཅན་མའི་སྐུ། གྲུབ་ཆེན་ཆུ་བོ་རི་པའི་ཞབས་རྗེས། གྲུབ་ཆེན་ཨོ་རྒྱན་པའི་སྐུ་རང་བྱོན། དེའི་གཡས་སུ་ཨོ་རྒྱན་གྱི་སྐུ་དང་། ཞབས་རྗེས། དེའི་གཡས་སུ་ཐུགས་མཚོན་པའི་ཡི་གེ་ཧཱུྃ། དེའི་འོག་ཏུ་གསུང་མཚོན་པའི་ཡི་གེ་ཨཱཿ དེའི་འོག་ཏུ་སྐུ་མཚོན་པའི་ཡི་གེ་ཨོཾ། ཨོ་རྒྱན་རིན་པོ་ཆེའི་ཕྱག་མཚན་རྡོ་རྗེའི་གཟུགས། གནས་བརྟན་མ་ཕམ་པའི་སྐུ། གྲུབ་ཆེན་ཨ་ཡིག་དོན་རྟོགས་ཀྱི་རྗེས། མར་པ་ལོ་ཙཱའི་སྐུ། རྟ་མགྲིན་ལྕགས་རལ་ཅན་གྱི་སྐུ། འཇམ་དབྱངས་ཀྱི་རྫུ་འཕྲུལ་གྱི་ཞབས་རྗེས་སྐུ་རྣམས་གསལ་བར་བཞུགས། གྲུབ་ཐོབ་ཕྱག་ཆེན་པའི་ཞབས་རྗེས། རིག་འཛིན་ཤྲཱི་སེང་ཧའི་ཞབས་རྗེས། ཨོ་རྒྱན་པའི་ཞབས་གཡོན་པའི་རྗེས། གནས་མཆོག་དེ་ཡི་ཤར་ལྷོ་ན། རྒྱལ་ཆེན་སྤྱན་མི་བཟང་གི་སྐུ་རང་བྱོན། ཀླུའི་ནོར་བུ་དུང་དཀར་གཡས་འཁྱིལ་རྗེས། གནོད་སྦྱིན་ཤན་པ་དམར་ནག་གི་སྐུ། ཐོད་རྒལ་ཡེ་ཤེས་དང་། རྡོར་སེམས་དངོས་གྲུབ་དང་། ཟླ་བའི་བློ་གྲོས་གསུམ་གྱི་ཞབས་རྗེས་བཞུགས། རྡོ་རྗེ་སེམས་དཔའ། འོད་དཔག་མེད། ཚེ་དཔག་མེད་གསུམ་གྱི་སྐུ་གསལ་པོ། གྲུབ་ཐོབ་འབར་བའི་དབང་པོའི་ཞབས་རྗེས། ཕྱག་ན་རྡོ་རྗེའི་སྐུ་རང་བྱོན། གྲུབ་ཐོབ་ཆོས་རྔ་ཅན་གྱི་ཞབས་རྗེས། ཨེ་ཝཾ་དབུ་ཅན་རང་བྱོན་གྱི་སྟེང་དུ་འཇམ་དབྱངས་རང་བྱོན། གྲུབ་ཐོབ་ཡེ་ཤེས་ཀྱི་ཞབས་རྗེས། གསུང་མཆོག་ཚངས་དབྱངས་མཆོག་གི་ཞབས་རྗེས། གྲུབ་ཐོབ་དཔལ་དཔེ་མཆོག་གི་ཞབས་རྗེས། གྲུབ་ཆེན་བསྐོ་རེ་བའི་ཞབས་རྗེས། གྲུབ་ཐོབ་ཡོན་ཏན་སྨན་མཛད་ཀྱི་ཞབས་རྗེས། བྱང་སེམས་རྡོ་རྗེ་སེམས་དཔའི་ཞབས་རྗེས། གྲུབ་ཐོབ་ཕྲིན་ལས་འགྲོ་འདུལ་ཀྱི་ཞབས་རྗེས། གྲུབ་ཐོབ་ཡེ་ཤེས་མཆོག་གི་ཞབས་རྗེས། དུང་དཀར་རང་བྱོན། གྲུབ་ཐོབ་རྡོ་རྗེ་འབྱུང་གནས་ཀྱི་ཞབས་རྗེས། རྫོགས་ཆེན་གྲུབ་ཐོབ་དྷརྨ་དྷ་རའི་ཞབས་རྗེས། མགོན་པོ་ཚེ་གཏེར་གྱི་ཞབས་རྗེས། གྲུབ་ཐོབ་ཨ་འགའ་རའི་ཞབས་རྗེས། མ་གཅིག་ཁྲོས་མ་ནག་མོ་རང་བྱོན། ཡི་གེ་ཧྲཱིཿརང་བྱོན། རྟ་མགྲིན་དམར་པོའི་སྐུ། ལེགས་པའི་དངོས་གྲུབ་ཞབས་རྗེས། རྒྱ་གར་གྱི་ཤིང་ཐོག་གི་གཟུགས། སྐྱོ་ཁོག་འགག་མཇུག་ཏུ་སྲིན་པོ་བཏགས་པའི་སྣ་ལུང་། སྲིན་པོའི་ཀླད་པས་བྲིས་པའི་ཡི་གེ་དྲུག ཨཿརང་བྱོན། པཎ་ཆེན་ཤཱཀྱ་ཤྲཱིའི་ཞབས་རྗེས། སྲིན་ཀླད་ཀྱི་བྲིས་པའི་ཧཱུྃ། ཨོ་རྒྱན་རིན་པོ་ཆེས་རྫུ་འཕྲུལ་གྱི་ཞབས་ཀྱིས་བཅགས་པའི་རྗེས། ཤཱཀྱ་དྷེ་ཝས་ཕྱག་མཛུབ་ཀྱིས་བྲིས་པའི་ཡིག་དྲུག ཨོ་རྒྱན་རིན་པོ་ཆེས་ཆུ་འདྲེ་དམ་ལ་བཏགས་པའི་ཞབས་རྗེས། བྲག་སྲིན་མོ་དམ་ལ་བཏགས་པའི་ཞབས་རྗེས། གསང་སྔགས་ཀུན་གྱི་མགོ་བོ་ཡི་གེ་ཨོཾ། སྐུ་གསུང་ཐུགས་ཀྱི་སྙིང་པོ། དེའི་གཉའ་ན་ཧྲཱིཿརང་བྱོན་ཡོད། སྐུའི་རིག་འཛིན་རྡོ་རྗེ་འབྱུང་གནས་ཀྱི་ཞབས་རྗེས། རྡོ་རྗེ་དྲག་རྩལ་གྱི་སྲིན་པོ་དམ་ལ་བཏགས་པའི་ཞབས་རྗེས་ཆུ་ནང་དུ་ཡོད། སྲིན་ཀླད་ཀྱིས་བྲིས་པའི་ཡི་གེ་ཨ་དང་ས་དང་ཡིག་དྲུག་མང་པོ་ཡོད། གོང་ཡ་ཀིར་ཡེ་ཤེས་སེམས་དཔའི་ཞབས་རྗེས། དེའི་གོང་རྒྱ་གར་གྲུབ་ཐོབ་སྙན་པའི་ཞབས་རྗེས། དེ་གོང་ཕུག་པར་ཤཱཀྱ་ཐུབ་པ་དང་ཨོ་རྒྱན་གྱི་སྐུ། ཨོ་རྒྱན་གྱི་བཞུགས་ཁྲི་དང་ཞབས་རྗེས། སྐྱོ་བྲག་ཆོས་རྗེའི་ཞབས་རྗེས། ཡི་གེའི་མགོ་ཀ་རང་བྱོན། ལུང་བསྟན་དང་ཡི་གེ་ཆ། སྲིན་པོའི་ཀླད་པས་བྲིས་པའི་ཡིག་དྲུག་དང་གཟུངས་སྔགས་མང་པོ། ཧྲཱིཿདང་ཨོཾ་རང་བྱོན། ཨོ་རྒྱན་གྱི་རྫུ་འཕྲུལ་ཞབས་རྗེས། ཨ་དང་མ་དང་གཡུང་དྲུང་རང་བྱོན། སྲིན་ཀླད་ཀྱིས་བྲིས་པའི་བཛྲ་གུ་རུ། ཡང་ཨ་རང་བྱོན། བོན་སྐུ་སྣང་བ་ཀུན་ཁྱབ་དང་བོན་ཡིག་མང་པོ་རང་བྱོན། དམ་ཅན་གྱི་ཆིབས་པ་ར་ཡི་རྗེས། རྒྱ་གར་གྱི་རིག་འཛིན་བརྒྱད་ཀྱི་ཞབས་རྗེས། ཡང་ཆུད་ཨ་རང་བྱོན་ཆེན་པོ། གནས་བསྟན་བཟང་པོའི་སྐུ། མཚོ་རྒྱལ་ཞབས་རྗེས་ཆ་གཅིག བཻ་རོ་ཙཱ་ནའི་ཕྱག་བྲིས་ཝཾ་གཱི་ཤྭ་ར། བྲག་འགག་དེར་ཡི་གེ་རང་བྱོན་དཔག་མེད། དགོས་འདོད་ཀུན་འབྱུང་ཡི་གེ་ཨཱཿསྨོན་ལམ་གང་བཏབ་འགྲུབ་པར་འགྱུར། ཅོག་རོ་ཀླུའི་རྒྱལ་མཚན་གྱིས་གནས་བརྟན་བ་ཀུ་ལ་ཞག་ལྔ་ལ་བསྒྲུབ་པའི་ཕུག་པ། ཞབས་རྗེས་ཆ་གཅིག ཨ་རང་བྱོན། གྲུབ་ཐོབ་ཆོས་དཔལ་གྱི་ཞབས་རྗེས། ཡི་གེ་ཨ་དང་རིང་བསྲེལ་གྱི་མཚན་པ། ཡེ་ཤེས་མཚོ་རྒྱལ་གྱི་ཕྱག་ཞབས་རྗེས། ཨོ་རྒྱན་ཆིབས་པ་ཤིང་བྱ་ལྟར་མཛེས་ཀྱི་ཞབས་རྗེས། གྲུབ་ཐོབ་སེ་བོ་པའི་ཞབས་རྗེས། དེའི་ཡན་དུ་ཡི་གེ་ཧཱུྃ་དང་གྲུབ་ཐོབ་རལ་གྲི་པའི་ཞབས་རྗེས། དེའི་གོང་རྡོ་རྗེ་གྲོ་ལོད་ཀྱི་སྐུ་དང་པདྨ་སཾ་བྷའི་ཞབས་རྗེས། ཨོཾ་རང་བྱོན། ཕྱག་ན་རྡོ་རྗེའི་སྐུ་རང་བྱོན། གྲུབ་ཆེན་ཏཻ་ལོ་པའི་ཞབས་རྗེས། ཨོ་རྒྱན་བརྡའི་ཡི་གེ་མ་རང་བྱོན། གྲུབ་ཆེན་མགར་བ་པའི་ཞབས་རྗེས། རྣམ་བཅུ་དབང་ལྡན་གསལ་པོ་རང་བྱོན། རྡོ་རྗེ་རང་བྱོན། རྗེ་འབངས་ཉེར་ལྔས་བྲིས་པའི་མཁའ་འགྲོའི་བརྡ་ཡིག་ཉེར་ལྔ། ཨོ་རྒྱན་གྱི་བྷནྡྷའི་རྗེས། འབྲུ་གསུམ་རང་བྱོན། ས་མ་ཏི་རང་བྱོན། ཨོ་རྒྱན་གྱི་ཕྱག་མཁར་རྗེས། ཧཱུྃ་བཛྲ་ཕཊཿརང་བྱོན། བློ་ལྡན་མཆོག་སྲེད་ཀྱི་ཞབས་རྗེས། ཨ་རང་བྱོན། གྲུབ་ཐོབ་པཀྴི་མཆོག་དང་མདུང་མགོ་པ་གཉིས་ཀྱི་ཞབས་རྗེས། ཨོ་རྒྱན་གྱིས་ཕྱག་དམ་བརྒྱབ་རྗེས་ཀརྨ་པའི་ཞབས་རྗེས། རྟེན་འབྲེལ་གྱི་ཆ་ལ་ཨོཾ་བྲག་སྲུབ་ཏུ་དོད་པ། གྲུབ་ཐོབ་རྟོགས་ལྡན་པའི་ཞབས་རྗེས། ཀོང་བྲག་པའི་ཞབས་རྗེས། ཆོས་སྐུ་མགོན་པོའི་ཞབས་རྗེས། སྲིན་ཀླད་ཀྱིས་བྲིས་པའི་ཡིག་དྲུག་ནོར་བུ་རང་བྱོན། དབང་དེ་ཕུག་ཏུ་ཨོ་རྒྱན་གྱི་སྒྲུབ་ཕུག ནང་དུ་ཨོ་རྒྱན་རིན་པོ་ཆེས་སྒྲུབ་པ་བཀའ་བརྒྱད་ཀྱི་ལྷ་ཚོགས་བསྒྲུབ་པའི་གནས་དེའི་སྟེང་ཕྱོགས་ན་པདྨ་དཀར་པོ་ཁ་ཐུར་དུ་སྦུབས་པ་འདྲ་བ་ཡོད། དེ་སྤྱི་གཙུག་བདེ་ཆེན་འཁོར་ལོའི་གནས་ཡིན། དེ་འོག་ལུང་པ་ཟངས་མའི་སྦུ་གུ་འདྲ་བ་ཡོད། དེ་མགྲིན་པ་ལོངས་སྤྱོད་འཁོར་ལོ་ཡིན། དེ་ལ་བྱང་ཆུབ་མཆོད་རྟེན་རང་བྱོན་ཡོད། རྒྱལ་བ་ཤཱཀྱ་ཐུབ་པའི་སྐུ་རང་བྱོན་ཡོད། རིགས་གསུམ་མགོན་པོའི་སྐུ་རང་བྱོན་ཡོད། རྡོ་གཏེར་གྱི་སྒྲོམ་བུ་འདྲ་བ་ཡོད། དེའི་ངོས་ལ་གུ་རུ་རིན་པོ་ཆེའི་སྐུ་ཡི་ཡེ་གེ་ཨ་རང་བྱོན། བཀའ་བརྒྱད་ཀྱི་ལྷ་ཚོགས་ཐམས་ཅད་བཞུགས། དེའི་འོག་ཏུ་འཁོར་ལོ་རྩིབས་བཞི་ཁ་གྱེན་དུ་བསླངས་པ་འདྲ་བ་ཡོད། དེ་སྙིང་ག་ཆོས་ཀྱི་འཁོར་ལོའི་གནས་ཡིན། དེར་རྡོ་རྗེ་ཕག་མོའི་སྐུ་དང་ཨ་རང་བྱོན། སློབ་དཔོན་བ་རུ་ཎ་ཡི་སྐུ་རྣམས་གསལ་བར་བཞུགས། ཚེ་བུམ་རང་བྱོན། ཨ་རང་བྱོན། སེང་གེའི་གཟུགས། ཨཾ་ཡིག་རྣམས་བཞུགས། དེའི་སྟེང་དུ་དཔལ་ཕྱག་ན་རྡོ་རྗེའི་སྐུ་གསལ་བར་བཞུགས། ཇོ་བོ་སྤྱན་རས་གཟིགས་ཀྱི་སྐུ་དང་། ཛཾ་བྷ་ལ་ནག་པོའི་སྐུ། དུང་དཀར་རང་བྱོན། སྒྲོལ་མ་དཀར་མོའི་སྐུ་དང་། རྡོ་རྗེ་ཕག་མོའི་གསང་བ་བཞུགས། གྲུབ་ཆེན་ཨིནྟྲ་བྷོ་དྷིའི་སྐུ། སངས་རྒྱས་རྣམ་པར་སྣང་མཛད་ཀྱི་སྐུ། མཁའ་འགྲོ་རིགས་བཞིའི་སྐུ་དང་། ཨ་དང་པ་རྣམས་གསལ་བར་བཞུགས། དེའི་འོག་ཏུ་ཕུག་པ་ཡངས་ལ་སྤྲོ་བ་གཞལ་ཡས་ཁང་ལྟ་བུ་ཡོད། དེ་ལྟེ་བ་སྤྲུལ་པའི་འཁོར་ལོའི་གནས་ཡིན། དེ་ན་ཟངས་མདོག་དཔལ་རིའི་བཀོད་པ་དང་ཡི་གེ་ཧཱུྃ་ཡོད། མཁའ་འགྲོ་སེང་གདོང་མའི་སྐུ་ཡོད། མགོན་པོ་གུར་གྱི་སྐུ། མ་གཅིག་ལབ་སྒྲོན་གྱི་སྐུ། ཡི་གེ་འབྲུ་གསུམ། ཡེ་ཤེས་མཚོ་རྒྱལ་གྱི་ཞབས་རྗེས། རྗེ་འབངས་ཤུད་བུ་དཔལ་སེང་གི་ཞབས་རྗེས། དྲན་པ་ནམ་མཁའི་ཞབས་རྗེས་དང་། ཉི་ཟླ་རྣམས་གསལ་བར་བཞུགས། མ་དང་ཨ་དང་ཨེ་རི་གསལ་བར་བཞུགས། དེའི་སྟེང་དུ་སྒྲུབ་པ་བཀའ་བརྒྱད་ཀྱི་ལྷ་ཚོགས་རྣམས་སྤྲིན་འཁྲིགས་པ་ལྟར་བཞུགས། རྡོ་རྗེ་སེམས་དཔའི་སྐུ་དང་། བཀའ་བརྒྱད་ཆེ་མཆོག་གི་སྐུ། རིན་ཆེན་བྲག་གི་ཕུང་པོ་ན། ཐབས་དང་ཤེས་རབ་མཚོན་ཕྱིར་གྱེན་དང་ཐུར་དུ་ཡོད། ཨ་ཡིག དེ་འོག་ཏུ་ཕུག་པ་གྲུ་གསུམ་ཁ་བྱང་དུ་བསྟན་པ་ཡོད། དེ་གསང་གནས་བདེ་སྐྱོང་གི་འཁོར་ལོ་ཡིན། དེ་ན་མགོན་པོ་ཤིང་བྱ་ལ་ཆིབས་པའི་སྐུ་གཟུགས། གླང་ཆེན་ཞོན་པའི་མགོན་པོ་དང་། མགོན་པོ་འཇམ་དབྱངས་དང་། ཨོ་རྒྱན་ཡི་གེ་མ་དང་། རིན་པོ་ཆེའི་ཕུང་པོ་རྒྱབ་མལ་ཡོད། དེ་འོག་ན་སྲིན་ཀླད་ཀྱིས་བྲིས་པའི་ཡིག་དྲུག་དང་། ཕྱག་རྡོར་སྙིང་པོ་དང་། བཀྲ་ཤིས་རྟགས་བརྒྱད་ཡོད། ཨོ་རྒྱན་གྱི་སེང་གེ་ཆིབས་པའི་ཆིབས་རྗེས། མཆོད་རྟེན་ཨཿས་མཚན་པ། ལ་ཁ་དེར་གྲུབ་ཆེན་ཡེ་ཤེས་མཚོ་རྒྱལ་གྱི་ཞབས་རྗེས། མནྡ་རའི་རྫུ་འཕྲུལ་གྱི་ཞབས་རྗེས་ཆ་གཅིག དེའི་སྟེང་ཡི་གེ་ཧཱུྃ། གྲུབ་ཆེན་ཆུ་བོ་རི་བའི་ཕྱག་རྗེས། འབར་བའི་དབང་པོའི་ཞབས་རྗེས། ཨོ་རྒྱན་གྱི་ཕྱག་མཁར་རྗེས་ལ་ཨོཾ་གྱིས་མཚན་པ། ཨ་རང་བྱོན། མ་རང་བྱོན། མཆོག་སངས་རྒྱས་ཡེ་ཤེས་ཀྱི་ཞབས་རྗེས། ཨོ་རྒྱན་གྱི་བསྒྲུབ་པའི་གསང་ཕུག ཨ་རང་བྱོན། རྒྱ་ཡིག་ཧཱུྃ། ཡིག་དྲུག་རང་བྱོན། ཨོ་རྒྱན་རིན་པོ་ཆེའི་ཞབས་རྗེས། ཡིག་དྲུག་རང་བྱོན། པཎྜི་ཏ་འཇིགས་མེད་སྦས་པའི་ཞབས་རྗེས། གནས་འདི་དགེ་འདུན་ཀུན་གྱི་སྲོག་ཤིང་ལྟ་བུའི་གནས་ཡིན། དེའི་རྟགས་སུ་ཡི་གེ་སཾ་རང་བྱོན། སངས་རྒྱས་ཐམས་ཅད་ཀྱི་གསུང་གི་རྟགས་ཡི་གེ་ཨཿདམར་པོ་རང་བྱོན། གུ་རུ་རི་པའི་ཞབས་རྗེས། ཀུ་ཀུ་རཱ་ཙའི་རྗེས། ཨོཾ་དང་ཨཱཿརང་བྱོན། རྒྱ་ཡིག་ལཉྩའི་ཧཱུྃ་རང་བྱོན། ཡང་ཧཱུྃ་རང་བྱོན། ཨརྱ་དེ་ཝའི་རྫུ་འཕྲུལ་གྱི་ཞབས་རྗེས། ཙ་མེ་སངས་རྒྱས་གྲགས་པའི་རྫུ་འཕྲུལ་གྱི་ཞབས་རྗེས། ཨཱཿརང་བྱོན། སྲིན་ཀླད་ཀྱིས་བྲིས་པའི་ཡིག་དྲུག ཨོཾ་དང་ཧཱུྃ་རང་བྱོན། ལྡན་མ་རྩེ་མང་གི་ཕྱག་ཞབས་ཀྱི་རྗེས། བཻ་རོ་ཙ་ནའི་ཞབས་རྗེས། ཨཱཿརང་བྱོན། རྗེ་འབངས་ཉི་ཤུ་རྩ་ལྔའི་ཕྱག་བྲིས། ཨཱཿཉེར་ལྔ་ཡོད་པའི་ཀ་ཅོག་གཉིས་ཀྱི་ཕྱག་བྲིས། སྲིན་ཀླད་ཀྱིས་བྲིས་པའི་ཨཱཿབྷ་ར་དྷཱ་ཛའི་སྐུ། སྒྲོལ་མ་སྔོན་མོའི་སྐུ། རྒྱ་གར་གྲུབ་ཆེན་རྡོ་རྗེ་དཔལ་གྱི་ཞབས་རྗེས། རྗེ་འབངས་ཁྱེའུ་ཆུང་གི་ཕྱག་བྲིས། ཤུད་བུ་དཔལ་གྱི་སེང་གེའི་ཕྱག་བྲིས་ཨཱཿ ཕག་མོ་ཕྱག་བཞི་མའི་སྐུ། སྲིན་པོ་བསྒྲལ་བའི་ཁོག་པ། ཐུབ་པ་དང་ཨོ་རྒྱན་གྱི་སྐུ། རྡོ་རྗེ་ཐོད་ཕྲེང་རྩལ་གྱི་རྗེས། མཆོད་རྟེན་མཐོང་གྲོལ། སྲིན་ཀླད་ཀྱིས་བྲིས་པའི་ཨཱཿདང་གཡུང་དྲུང་། ཧྲཱི༔རང་བྱོན། ཨོ་རྒྱན་གྱི་ཕྱག་བྲིས་རིགས་གསུམ་མགོན་པོའི་སྙིང་པོ། གསང་སྔགས་མགོ་བོ་ཡི་གེ་ཨོཾ། འབྲུ་གསུམ་རང་བྱོན། ཨ་ཙཱརྱ་ས་ལའི་ཞབས་རྗེས། རི་ཁྲོད་མ་ཡི་ས་བོན་བཾ་རང་བྱོན། ཡིག་དྲུག་རང་བྱོན། དཀོན་མཆོག་འབྱུང་གནས་ཀྱི་ཞབས་རྗེས། པདྨ་སཾ་བྷའི་སྐུ། པཎྜི་ཏ་ཡན་ལག་མེད་པའི་རྡོ་རྗེའི་རྫུ་འཕྲུལ་གྱི་ཞབས་རྗེས། ཨོ་རྒྱན་རིན་པོ་ཆེས་སྲིན་ཀླད་ཀྱིས་བྲིས་པའི་ཡི་གེ་མང་པོ། ཨཱཿ རང་བྱོན་གཉིས། མ་རང་བྱོན། མཚོ་རྒྱལ་གྱི་ཞབས་རྗེས། ཡིག་དྲུག་རང་བྱོན། བཀྲ་ཤིས་སྐྱེ་མེད་ཕུག མཆོད་རྟེན་རང་བྱོན། འོད་ཟེར་ཅན་དང་ཨོ་རྒྱན་རང་བྱོན། ཁྲོ་བོ་མི་གཡོ་བ་རང་བྱོན། སྐྱོ་བྲག་པའི་ཕྱག་རྗེས། སྤུ་གྲི་རང་བྱོན། ཚེ་དཔག་མེད་རང་བྱོན། པཎྜི་ཏ་བདེ་བའི་རྡོ་རྗེའི་ཞབས་རྗེས། སྐུ་འབུམ་སར་ཨཱཿ དང་མཆོད་རྟེན་རང་བྱོན། སངས་རྒྱས་ཀྱི་རིང་བསྲེལ་རང་བྱོན། ཨཱཿརིང་བསྲེལ་ལས་གྲུབ་པ། སྐུ་གསུང་ཐུགས་ཀྱི་སྙིང་པོ་འབྲུ་གསུམ་རང་བྱོན། ལཉྩའི་ཧཱུྃ་དང་རྡོ་རྗེ་འཆང་རང་བྱོན། གཉེན་སྟོང་ཞབས་རྗེས། མཚོ་རྒྱལ་གྱི་རྫུ་འཕྲུལ་གྱིས་བྲིས་པའི་ཨཱཿ སྲིན་པོའི་ཀླད་པས་བྲིས་པའི་ཡི་གེ་མང་པོ། གཡུང་དྲུང་གཡས་འཁྱིལ། ཨོ་རྒྱན་གྱི་ཕྱག་མཛུབ་ཀྱི་རྗེས། ཨོ་རྒྱན་གྱི་སྲིན་ཚོགས་དམ་ལ་བཏགས་དུས་རྫུ་འཕྲུལ་གྱི་ཞབས་རྗེས། མཚོ་རྒྱལ་གྱི་ཤངས་མཚལ་གྱིས་བྲིས་པའི་ཨཱཿ བིར་ཝ་པའི་སྐུ་གཟུགས། སེང་གེ་གནམ་དུ་བལྟས་པའི་གཟུགས་ལ་ཉི་ཟླས་མཚན་པ། པདྨ་རྒྱལ་པོའི་ཞབས་རྗེས། རྡོ་རྗེ་གྲོ་ལོད་ཀྱི་སྐུ། མེ་ཏོག་དང་ཨེ་ཝཾ་མ་ཡ་རང་བྱོན། ཡེ་ཤེས་རྡོ་རྗེའི་ཞབས་རྗེས། མཁའ་འགྲོ་བདེ་བའི་རྡོ་རྗེའི་ཞབས་རྗེས། དབང་ཕྱུག་གི་ཞབས་རྗེས། ཡེ་ཤེས་མཆོག་གི་ཞབས་རྗེས། སྲོག་བདུད་ཀྱི་ཕྱག་མཚན་ལྕགས་གཞུ་ལྕགས་མདའ་རང་བྱོན། ཧཱུྃ་བཛྲ་ཕཊ་རང་བྱོན། སྲིན་པོའི་མཆེ་བས་བྲིས་པའི་ཨཱཿ གྲུབ་ཆེན་བློ་གྲོས་རིན་ཆེན་གྱི་ཞབས་རྗེས། ཨོཾ་ཡིག་ཐིག་ལེ་དཀར་པོས་མཚན་པ། གྲུབ་ཆེན་ཕག་མོ་དངོས་གྲུབ་ཀྱི་ཞབས་རྗེས། དུང་དཀར་ཧཱུྃ་གིས་མཚན་པ། མཁའ་འགྲོ་ཚོགས་དཔོན་ཞབས་རྗེས། རི་རབ་རང་བྱོན། རྡོ་རྗེ་འོད་ཀྱི་ཞབས་རྗེས། གྲུབ་ཆེན་དཔལ་གྱི་ཞབས་རྗེས། དུང་དཀར་རྗེས། གྲུབ་ཆེན་ཤྲཱི་བཛྲའི་ཞབས་རྗེས། རྟ་མགྲིན་གྱི་སྐུ། རྒྱ་གར་མཁའ་འགྲོ་ཤིང་གི་རལ་པ་ཅན་གྱི་རྫུ་འཕྲུལ་གྱི་ཞབས་རྗེས་གནས་འདིའི་བཀའ་སྲུང་གཟའ་ཡི་རྒྱལ་པོ་རཱ་ཧུ་ལ་ཡིན། དེའི་རྟགས་ལ་ཡི་གེ་རཱ་གསལ་བར་ཡོད། དཔལ་བེའུ་རང་བྱོན། སྲིན་ཀླད་ཀྱིས་བྲིས་པའི་ཡི་གེ་འབྲུ་བདུན། ཨོ་རྒྱན་གྱི་ཞབས་རྗེས་ལམ་དུ་ཡི་གེ་ཨཱཿདང་བྱང་ཆུབ་མཆོད་རྟེན་རྗེས། གྲུབ་ཆེན་ག་ཡ་དྷ་རའི་ཞབས་རྗེས། ཨོ་རྒྱན་གྱི་ཆིབས་པའི་རྗེས་དང་ཡི་གེ་ཨཱཿཨོ་རྒྱན་གྱི་ཞབས་རྗེས། ཕག་མོའི་ཕྱག་མཚན་ཐོད་ཁྲག་གི་རྗེས། རྡོ་རྗེ་གྲོ་ལོད་ཞབས་རྗེས། རིང་བསྲེལ་གསུམ་མཚམས་ཡི་གེ་ཧཱུྃ་རང་བྱོན། ཡང་འབྲུ་གསུམ་རང་བྱོན། སྒོ་བ་བཞིའི་ཞབས་རྗེས། སྲིན་ཀླད་ཀྱིས་བྲིས་པའི་བཛྲ་གུ་རུ། ཨོཾ་ལྔ་ཚོམ། གྲུབ་ཆེན་བརྒྱད་ཅུའི་ཞབས་རྗེས། རྗེ་འབངས་ཉེར་ལྔའི་ཞབས་རྗེས། འདིའི་བྲག་སྐོར་འདིར་གནས་བརྟན་བཅུ་དྲུག་གི་སྐུ་ཐམས་ཅད་བཞུགས། ཇོ་བོ་ཁ་སར་པཱ་ཎི། ཨོ་རྒྱན་སྐུ། ཨོ་རྒྱན་གྱི་སྲིན་པོ་ཕོ་མོ་དམ་ལ་བཏགས་ནས་ཞབས་ཀྱིས་ཡི་གེ་བྲིས་པ། སྲིན་པོ་མགོ་དགུ་ལག་པ་བཅོ་བརྒྱད་དུ་སྤྲུལ་ནས་བསྡད་པས་ཨོ་རྒྱན་གྱིས་དྲུད་རྗེས་དང་མནན་རྗེས་ཡོད། ཨོ་རྒྱན་གྱི་སྐུ། ཆོས་སྐུ་འོད་དཔག་མེད། ལོངས་སྐུ་ཐུགས་རྗེ་ཆེན་པོ། རྡོ་རྗེ་རྣམ་འཇོམས་དཔག་བསམ་ལྗོན་པའི་ལྷ། ཨོ་རྒྱན་པདྨ་ཞི་བ་དུང་ཁྲབ་ཅན་སྨོན་ལམ་གང་བཏབ་འགྲུབ། ཨཱཿརང་བྱོན། རྣམ་སྲས་ལུས་ངན་པོ། བྱམས་པ་མེ་ཏྲིའི་སྐུ། ཚེ་བུམ་རང་བྱོན། མགོན་པོ་རྒྱུད་གུར། འཇམ་པའི་རྡོ་རྗེ། ཨོ་རྒྱན་རིན་པོ་ཆེ། དུད་སོལ་མའི་སྐུ། རྡོ་རྗེ་ཕག་མོའི་སྐུ། འཇིགས་བྱེད་མེའི་སྤུ་གྲི། གནོད་སྦྱིན་ལྔས་ཙན། རྡོ་རྗེའི་ཞགས་པ། ཨཱཿརང་བྱོན། བྲམ་ཟེ་ཟླ་བའི་སྒྲོན་མའི་ཞབས་རྗེས། པདྨ་གིང་གི་སྐུ། ཚེ་དཔག་མེད་གཙོ་འཁོར་གསུམ། ཨོ་རྒྱན་གཙོ་འཁོར་གསུམ། སྲིན་པོ་བསྒྲལ་རྗེས་ཨཾ། ཨོ་རྒྱན་གྱི་ཆིབས་པའི་རྗེས་རྣམས་བཞུགས། དེ་རྣམས་ཐོ་རམ་པའོ། །སེང་གེ་གནམ་མཆོངས་སུ་ཨོ་རྒྱན་རིན་པོ་ཆེའི་རྡོ་རྗེ་དང་བྷནྡྷའི་ཕྲེད་དུ་བརྐྱངས་ནས་བཟུང་བ་རྡོ་རྗེའི་སྣེ་ལ་ཨ་དཀར་པོ་ཡོད་པ་སྤྲིན་ནང་དུ་ཞལ་གཟིགས་སོ། །ཕན་ཚུན་གཉིས་ཀ་ལ་ཕྱི་སྐོར་བྱེད་པའི་བསྐོར་བ་བཞི། དེའི་ཚེ་ཡི་གེ་དྲུག་གམ་བཛྲ་གུ་རུ་དུ་ཐོན་དང་བརྒྱ་ཕྱག་གཅིག་བྱའོ། །དེ་དུང་ཕྱུར་དུ་འགྱུར་བར་ཐེ་ཚོམ་མེད། མངྒལཾ། །

མཆན། ༡.གནས་ཡིག་འདི་ནི་གནམ་ཆོས་མི་འགྱུར་རྡོ་རྗེའི་བཀའ་འབུམ་ཝཾ་པོད་ལས་ཞལ་བཤུས་པའོ། །

༄༅། །གནས་སེང་གེ་གནམ་མཆོང་མཚན་གསོལ་ནས། །ཡུལ་སྤྱི་འབྱམས་ཟུང་འབྲེལ་གནས་མཆོག་འདི། །བྲག་དཀར་གསལ་དར་དཀར་ཡོལ་བྲེས་འདྲ། །རྩེ་ལ་ལྷོ་སྤྲིན་འཇའ་སྤྲིན་འཁྲིགས། །ཕ་བརྒྱུད་པ་སུམ་ལྡན་བླ་མ་བཞུགས། །ལོགས་ལ་རྩི་ཤིང་ནགས་ཚལ་བརྗིད། །རྒྱུད་སྡེ་ལྷ་ཚོགས་ཐེམ་མེར་བཞུགས། །ཉིན་བཞིན་དུ་རོལ་མོའི་སྒྲ་དབྱངས་སྒྲོགས། །མ་གནས་གསུམ་མཁའ་འགྲོའི་ཚོགས་འཁོར་སྐོར། །བྲག་ཆུ་ཤིང་གྲམ་ཁྲོད་དུར་ཁྲོད་གནས། །མགོན་ཆོས་སྐྱོང་སྲུང་མ་ཁྲོམ་ལྟར་ཚོགས། །གནས་གཡས་ལོགས་གསང་སྔགས་རྙིང་མའི་རྫོང་། །དཔལ་རྒྱུད་སྡེ་དྲུག་གི་ལྷ་ཚོགས་བཞུགས། །རི་དཀྱིལ་རྫོང་གསང་སྔགས་གསར་མའི་རྫོང་། །ལྷ་བདེ་དགྱེས་གསང་དུས་ཡང་དག་བཞུགས། །གནས་གཡོན་ལོགས་ལྕང་ལོ་ཅན་གྱི་གནས། །དཔལ་ཕྱག་རྡོར་དང་རྡོ་རྗེ་ཕུར་པ་བཞུགས། །གནས་སྤྱི་འབྱམས་ཉི་ཟླ་གསལ་ཡངས་ལ། །རྗེ་པད་འབྱུང་གྲུབ་ཆེན་བརྒྱད་ཅུས་བསྐོར། །གནས་ས་སྤྱོད་དག་པ་མཁའ་སྤྱོད་ལ། །ཡུམ་རྡོ་རྗེ་ཕག་མོ་མཁའ་འགྲོ་འབུམ། །བྲག་སེང་གེ་གནམ་ལ་མཆོང་འདྲ་ལ། །གྲུབ་ཆེན་བཀའ་བརྒྱད་ལྷ་ཚོགས་བཞུགས། །བྲག་གདུགས་དཀར་འདྲ་བའི་གཞལ་ཡས་ན། །ལྷ་ཐུགས་རྗེ་ཆེན་པོ་སངས་རྒྱས་སྟོང་། །བྲག་པདྨ་བརྩེགས་འདྲའི་ནང་ཤེད་ན། །ཡུམ་སྒྲོལ་མ་དཀར་སྔོན་ཌཱཀི་དུང་། །རི་གསེར་བུམ་འདྲ་བའི་ནང་ལོགས་ན། །དཔལ་དགོངས་པ་འདུས་པའི་ལྷ་ཚོགས་བཞུགས། །བྲག་འཁོར་ལོ་འདྲ་བའི་རྩིབས་སྟོང་ལ། །སྐལ་བཟང་གི་སངས་རྒྱས་སྟོང་རྩ་བཞུགས། །རི་རྩེ་ལ་དུང་དཀར་འཕྱར་འདྲ་ལ། །མགོན་རྒྱལ་བ་རིགས་ལྔ་ཡུམ་བཅས་བཞུགས། །བྲག་རྒྱལ་མཚན་བསྒྲེངས་འདྲའི་ཕོ་བྲང་ན། །དཔལ་འཁོར་སྡོམ་དྲུག་ཅུ་རྩ་གཉིས་བཞུགས། །སྤང་གསེར་ཉ་འཁྱུག་འདྲའི་རི་ལོགས་ན། །ཡུམ་རྡོ་རྗེ་ཕག་མོ་མཁའ་འགྲོ་འབུམ། །གཡའ་དཔལ་བེའུ་འདྲ་བའི་རེའུ་མིག་ལ། །སྐྱབས་ཉེ་བའི་སྲས་ཆེན་བརྒྱད་པོ་ཡོད། །བྲག་རི་ལོགས་ནོར་བུ་འབར་འདྲ་ལ། །མགོན་རྒྱལ་བ་རིགས་གསུམ་མགོན་པོ་བཞུགས། །དེ་ཆ་ལུགས་བཀྲ་ཤིས་རྟགས་བརྒྱད་ཚུལ། །རི་རྩེ་མོ་བྱ་ཁྱུང་ལྡིང་འདྲའི་གནས། །ཕ་བཀའ་བརྒྱུད་བླ་མ་སྤྲིན་ལྟར་འཁྲིགས། །བྲག་གཡུ་འབྲུག་ཚང་ནས་ལང་འདྲ་ལ། །རྗེ་ཨོ་རྒྱན་རྗེ་འབངས་ཉེར་ལྔ་བཞུགས། །ས་སེང་གེ་འདྲ་བའི་རི་ལོགས་ལ། །དཔལ་ཐུབ་པའི་གནས་བརྟན་ཉན་རང་འཁོར། །ཕྱི་བྲག་དཀར་རྩི་ཤིང་སྟུག་པོའི་ཚུལ། །ནང་རྩ་གསུམ་ལྷ་ཚོགས་ཁྲ་ཐིམ་གསལ། །ཕྱི་གཡའ་སྤང་བྲག་རོང་ན་བུན་འཐིབས། །ནང་རྒྱུད་སྡེ་བཞི་དྲུག་ཐོམ་མེར་གང་། །ཕྱི་བྲག་རི་རླུང་ནག་འུར་སྒྲ་སྒྲོགས། །ནང་དུར་ཁྲོད་རབ་འཇིགས་ཆོས་སྐྱོང་ཚོགས། །ཕྱི་སྤང་ལྗོངས་རྩི་ཤིང་མེ་ཏོག་བཀྲ། །དཔལ་ཆེན་པོའི་བཀའ་ཉན་རི་རབ་རྡུལ། །རྡོ་ཐེ་བོང་ཙམ་ལ་དཔའ་བོ་རེ། །ཤིང་གཡག་རྔ་ཙམ་ལ་མཁའ་འགྲོ་རེ། །གནས་ས་སྤྱོད་དག་པ་མཁའ་སྤྱོད་ལ། །སྐུ་ཆེ་བའི་ཡོན་ཏན་བསམ་མི་ཁྱབ། །ཕ་རྩ་གསུམ་འཇའ་བཞིན་འཁྲིགས་པའི་རྫོང་། །མ་གནས་གསུམ་སྤྲིན་ལྟར་འདུ་བའི་གནས། །མགོན་ཆོས་སྐྱོང་ཁྲོམ་ལྟར་འཁྲིགས་པའི་གུར། །བྲན་སྡེ་བརྒྱད་རྡུལ་བཞིན་འཚུབ་པའི་མཁར། །མི་ལས་དག་ངོ་མཚར་སྐྱེ་བའི་གནས། །བུ་དད་ལྡན་ཉམས་རྟོགས་འཁྲུངས་པའི་ཡུལ། །དཔལ་ཕུན་ཚོགས་ལྔ་ལྡན་རྒྱལ་བའི་ཞིང་། །སྐུ་རང་བྱོན་དང་ཞབས་རྗེས་ཕྱག་མཚན་བཀྲ། །གསུང་ཡིག་འབྲུ་དང་གཟུངས་སྔགས་སྙིང་པོ་ཤར། །ཐུགས་རིང་བསྲེལ་དང་མཆོད་རྟེན་རྟེན་གྱི་གཟུགས། །བྱ་འདབ་ཆགས་ཐམས་ཅད་དཔའ་བོ་སྟེ། །དེ་རི་དྭགས་སྣ་ཚོགས་དཔའ་མོ་སྟེ། །གྲོགས་གཅན་གཟན་སྣ་ཚོགས་གནས་སྲུང་ཡིན། །གནས་འབྲེལ་བ་ཐོབ་ཚད་བྱང་ཆུབ་བགྲོད། །ཡུལ་དེར་སྐྱེས་སྐྱེ་འགྲོ་ཚོགས་རེ་བསགས། །དོན་ངེས་པ་ལྔ་ལྡན་མཁའ་སྤྱོད་གནས། །གནས་གཞན་གྱི་འགྲན་ཟླ་ཡེ་ནས་མེད། །མི་ང་ཡི་སྣང་སེམས་ཤིན་ཏུ་སྐྱོ། །ཤར་རི་བོ་པོ་ཏའི་ཕོ་བྲང་དང་། །ལྷོ་དཔལ་གྱི་རི་དང་ཙ་རི་ཏྲ། །ནུབ་གངས་དཀར་ཏི་སེའི་གནས་མཆོག་དང་། །བྱང་ལ་ཕྱི་ཆུ་དབལ་དབེན་གནས་དང་། །དོན་ཁྱད་པར་མེད་པ་ངོ་བོ་གཅིག །གནས་འདི་ལ་འབྲེལ་བ་ཕྱག་བསྐོར་དང་། །ངག་དད་འདུན་གྱིས་གསོལ་འདེབས་བསྟོད་གསོལ་དང་། །ཡིད་མ་གཡེང་རྩེ་གཅིག་མོས་གུས་དང་། །མ་ཎི་དང་ཚྭ་ཚྭ་དར་ལྕོག་དང་། །རེ་རེ་ལ་བྱེ་བ་འབུམ་འགྱུར་ཡོད། །བུ་དད་ལྡན་འདུན་པའི་རྟེན་མཆོག་ཡིན། །རབ་དག་པ་མཁའ་སྤྱོད་ཞིང་ཁམས་བགྲོད། །འབྲིང་མི་ལུས་རྟེན་བཟང་ངེས་པར་འཐོབ། །ཐ་མ་ངན་སོང་གི་སྐྱེ་སྒོ་ཆོད་པར་ངེས། །ཚིག་འདི་སྐད་ཀུན་གྱི་རྣ་བར་ཤོད། །དཔལ་བཀྲ་ཤིས་ཟླ་བ་ཡར་རྒྱས་ངོས། །གནས་ཁམས་གསུམ་ཡོངས་ལ་ཁྱབ་པར་ཤོག །གནས་དག་པ་རབ་འབྱམས་ཆེན་མོ་ཡི། །མ་འགྲོ་དྲུག་མཁའ་མཉམ་འབྲེལ་ཐོག་ཀུན། །དོན་འགྲོ་དོན་ཕྱོགས་མེད་འབྱུང་བར་ཤོག །ཅེས་ཚིག་རྐང་བརྒྱ་དང་བརྒྱད་ཀྱི་མགུར་མ་རྡོ་རྗེའི་ཤོ་ལོ་ཀ་ཉེར་བདུན་གྱི་སྨྲས་པ་འདི་ཉམས་དང་རྨི་ལམ་འདྲེས་པའི་མཚམས་ནས་འདི་ལྟར་ཐོལ་བྱུང་དུ་སྨྲ་བའི་ཌཱཀྐི་ནི་འཇའ་ཡལ་བ་བཞིན་མི་སྣང་བར་གྱུར་ཏོ། །དེའི་སྐབས་རང་ཅག་ཀྱང་ཉིན་དུས་དང་མི་འདྲ་བའི་སེམས་ལ་དགའ་སྤྲོ་ཆེན་པོ་བྱུང་ཞིང་། དེ་ལོ་དབྱར་མཐར་ཚེས་བཅུ་ལ་གནས་འབྲེལ་དུ་མི་འགྲོ་བའི་ཐབས་མེད་སྙམ་ནས་བྱོན་སྐབས། གོང་གི་ཚིག་གི་ནང་ལས་ལྷག་པའི་མཐོང་སྣང་དཔག་ཏུ་མེད་པར་བྱུང་ཞིང་། ནམ་མཁའ་ཐམས་ཅད་ནི་འཇའ་ཟེར་ཁྲ་ལམ་མེ། རི་བྲག་ས་རྡོ་ཐམས་ཅད་ནི་ཡི་དམ་དཔའ་བོ་མཁའ་འགྲོ་ཉི་ཟེར་གྱི་རྡུལ་བཞིན། ས་གཞི་ཐམས་ཅད་དཔའ་བོ་མཁའ་འགྲོ་ཆོས་སྐྱོང་མ་མགོན་ལྕམ་དྲལ་འགྲོ་བའི་ལམ་མི་རྙེད་པའི་ཁྲོམ་བཞིན་ཚོགས་ཤིང་། བྲག་ས་རྡོ་རྩྭ་ཕོ་ཐུར་མོ་ཐུར་རེ་རེ་ལའང་སངས་རྒྱས་ཡི་དམ་ཞི་ཁྲོའི་སྐུ་གཟུགས་དེ་དང་ཡིག་འབྲུ་གཟུངས་སྔགས་མཆོད་རྟེན་རིང་བསྲེལ་གྲངས་དང་བརྗོད་ལས་འདས་པར་སྣང་ཞིང་། སྒྲ་ཐམས་ཅད་མ་ཎི་བཛྲའི་རང་སྒྲ་འུ་རུ་རུ་དགེ་འདུན་སྟོང་གིས་ཚོགས་པ་འདྲ་བའི་སྒྲ་སྒྲོགས་ཤིང་གོམ་པ་བགྲོད་པ་ལ་རྡོག་པ་སྤོ་ཐབས་མེད་པ་བྱུང་ཞིང་། ཉམས་སྤྲོ་ཤེས་པ་འཕྱོ་ཞིང་དགའ་སྤྲོ་དེ་སྔོན་ཡོང་མ་མྱོང་བ་བྱུང་ཞིང་དེའི་ནུབ་མོ་ཚེས་བཅོ་ལྔ་རང་ཉལ་བའི་བསམ་གཞིགས་བྱས་ནས། གནས་འདི་བདག་ཏུ་བཟུང་བའི་ལས་ཅན་སུ་ཡིན་ཨང་སྙམ་ཚེ། རྐྱེན་མེད་པའི་ནམ་མཁའ་ནས། སྒྲ་གཅིག་བྱུང་སྣང་ཐོབ་པར། གནས་འདི་ཡི་སྲུང་མ་གྲངས་མང་སྟེ། གསང་སྔགས་རྙིང་མའི་ཚུལ་དུ་ནང་གི་བཀའ་སྲུང་ཨེ་ཀ་ཙ་ཏྲི། ཕྱི་ཡི་སྲུང་མ་དམ་ཅན་རྡོར་ལེགས། གསང་བའི་བཀའ་སྲུང་མཁའ་འགྲོ་སེང་གདོང་མ། གསང་སྔགས་གསར་མའི་དཀྱིལ་འཁོར་ཡིན་པས། ནང་གི་སྲུང་མ་མགོན་པོ་ཕྱག་བཞི། ཕྱི་ཡི་བཀའ་སྲུང་ཀེང་རུས་དུར་བདག གསང་བའི་སྲུང་མ་མགོན་པོ་བྱ་རོག་མཚན་ཅན། ཆེ་མཆོག་ཧེ་རུ་ཀའི་ཕོ་བྲང་ཡིན་ཕྱིར། ཕྱི་ཡི་བཀའ་སྲུང་དབང་ཕྱུག་ཉེར་བརྒྱད། ནང་གི་བཀའ་སྲུང་དཔལ་མགོན་མ་ནིང་། གསང་བའི་བཀའ་སྲུང་ཏྲཀྴད་ནག་པོ། སྤྱི་ཁྱབ་གནས་ཀྱི་སྲུང་མ་ཕྱི་ཡི་སྲུང་མ་དགེ་བསྙེན་སྦ་བ་ནག་པོ། ནང་གི་བཀའ་སྲུང་ཞིང་སྐྱོང་མེ་ལོང་སེང་ཕྲུག གསང་བའི་བཀའ་སྲུང་གཟའ་བདུད་རཱ་ཧུ་ལ་ཡིན་ཕྱིར་དྲག་རྩལ་ཤིན་ཏུ་ཆེ། དམ་ལྡན་རྣམས་བུ་བཞིན་སྐྱོང་དཀར་པོ་གནས་འཁོར་སྲུང་མ། ཀླུ་བདུད་རི་དམར་ལྕམ་བདུད་དེ། བཀའ་སྲུང་སྤུ་གྲི་མཆེད་གསུམ་རྣོ་མྱུར་ཐོག་ལྟར་འབེབས་ནུས་པ་ཡིན།

མཆན། གནས་ཡིག་འདི་ནི་སྐྱོ་བྲག་དགོན་པས་འདོན་སྤྲོད་གནང་བའི་རྣམ་ཐར་སྒོ་གཉིས་མ་ལས་ཞལ་བཤུས་པའོ། །

༄༅། །ན་མོ་པདྨ་བཛྲ་ཡེ། སྐྱབས་གནས་ཨོ་རྒྱན་པདྨ་འབྱུང་། །རིག་འཛིན་མཁའ་འགྲོའི་ཚོགས་ལ་འདུད། །གནས་མཁའ་སྤྱོད་དག་པའི་སེང་ཧ་རྫོང་། །མི་བདག་གིས་མཇལ་བའི་འཁྲུལ་སྣང་ངོར། །ཉམས་ཤར་ཚུལ་བརྗོད་ལ་བཀའ་གནང་རྩོལ། །གནས་སེང་རྫོང་ཀེའུ་ཚང་ཕུག་པའི་ནང་། །བདག་མཉམ་བཞག་ཅུང་ཟད་འདུག་པའི་དུས། །རྗེ་པད་འབྱུང་གྲུབ་ཐོབ་མི་གཟུགས་ཚུལ། །བྱིན་གཟི་བྱིན་འབར་བ་དངོས་སུ་མཐོང་། །སྐུ་གཡས་གཡོན་ཕུག་པའི་ངོས་ལོག་ལ། །རྒྱ་ཡིག་དང་བོད་ཡིག་བརྡ་ཡིག་སོགས། །སྒྲ་གྲགས་སྟོང་ཡི་གེར་སྣང་སྟོང་ཤར། །ཕྱག་གསེར་གྱིས་རྡོ་རྗེ་རྩེ་ལྔ་དང་། །གཡོན་དངུལ་གྱིས་དྲིལ་བུ་ཡུམ་གྱིས་ཚུལ། །མི་འགྱུར་བའི་ཐིག་ལེ་དགའ་བ་འཁྱིལ། །རྟ་ཕག་དགོས་སྒྲུབ་ཀྱིས་སྤོ་ཏི་བཞུགས། །ཟབ་ཆོས་ཀྱིས་གཏེར་ཁ་འགའ་ཡང་མཐོང་། །ཨོཾ་པདྨ་བཛྲ་ཧཱུྃ་གི་སྒྲ། །དུས་རྒྱུན་ཆད་མེད་པར་རང་སྒྲ་ཐོས། །བྲག་ཤེལ་གྱིས་མཆོད་སྡོང་ལྟ་བུ་ལ། །བཀའ་རྒྱུད་སྡེ་བཞི་ཡིས་ལྷ་ཚོགས་བཞུགས། །དཔའ་བོ་དང་མཁའ་འགྲོ་སྤྲིན་ལྟར་འཁྲིགས། །སྟེང་ནམ་མཁའི་ཁམས་ལ་ཡར་བལྟས་པས། །སྤྲིན་འཇའ་ཚོན་འོད་གུར་འཁྱིལ་བའི་དབུས། །རྗེ་རིག་འཛིན་པདྨ་འབྱུང་གནས་དང་། །འཁོར་གྲུབ་ཐོབ་རྒྱ་མཚོ་དངོས་སུ་མཇལ། །ཡིད་མོས་གུས་གསོལ་བ་ཡང་ཡང་བཏབ། །ལེགས་ཉེས་ཀྱིས་རྟེན་འབྲེལ་སྨོན་འབྲས་འགྲུབ། །དོན་བདེན་གཉིས་ཚོགས་ཀྱིས་འཁོར་ལོ་བསྐོར། །དོན་གཉིས་ལྷུན་གྲུབ་ཀྱི་འབྲས་བུ་སྨིན། །སྐུ་གསུམ་མངོན་གྱུར་གྱིས་རྟོགས་པ་ཤར། །རིག་འཛིན་གྲུབ་ཐོབ་ཀྱི་ཚོགས་གྲལ་འགྲིགས། །མགོན་བྱ་རོག་གདོང་གིས་དཀར་གཏོར་ཁྱེར། །བཀའ་རྒྱུད་ཀྱི་རྒྱལ་མཚན་རྩེ་མོར་རོལ། །ཡ་མཚན་རྨད་བྱུང་གིས་ལྟད་མོ་མཐོང་། །བར་སྣང་གི་དབྱིངས་སུ་ཕར་བལྟས་པས། །མ་མཁའ་འགྲོ་རྣམ་གཉིས་བྱ་རྒོད་སྤྲུལ། །སྐྱེ་མེད་ཨ་ཡིག་གི་དཀྱིལ་འཁོར་བསྟན། །འཁོར་འདས་མཉམ་ཉིད་ནམ་མཁའི་ཚུལ། །མཐའ་དབུས་མེད་པའི་བརྡ་ཆོས་བསྟན། །ང་རྣལ་འབྱོར་ས་གཞིའི་སྟེང་དུ་འདུག །ཁོང་ཌཀྐི་རྣམ་གཉིས་དབྱིངས་སུ་འཕྱོ། །ལར་ནམ་མཁའ་ས་གཞི་ཐབས་ཤེས་ཚུལ། །ཁོང་དཔའ་བོ་དང་མཁའ་འགྲོ་འབྲལ་མེད་རྟགས། །མདུན་ནམ་མཁའི་དབྱིངས་སུ་ཡང་ཡང་མཇལ། །བདག་སྐྱོ་ཤས་ཀྱི་མཆི་མ་ཁོང་ནས་འཁྲུགས། །སྔོན་ཕ་མའི་འདུ་བྱེད་སྐྱེས་ཚུལ་ཤར། །དུས་ད་ལྟ་མིག་གིས་བལྟས་དང་མཚུངས། །སྐྱོ་བ་དང་མཚར་བ་འདྲ་འདྲ་བྱུང་། །ཁོང་དཔལ་འདྲེན་མ་ཡིས་འདི་སྐད་ཟེར། །ཁྱེད་ང་དང་འབྲལ་མེད་འདུག་ས་ལ། །བྱུང་ཚུལ་དང་སྐྱེས་ཚུལ་ཡི་གེར་ཐོབ། །ལོ་དྲུག་ཅུ་ཡན་མན་ཅི་འདྲ་ཨཾ། །དེ་ཚུན་ལ་ཡང་ཅི་ཡོང་ཅི་ཆ་མེད། །ཁོ་རྡོ་རྗེ་མན་ཆད་ལུས་ཀྱི་བུ། །ཧ་ཧ་ཧ། །དེ་མིན་གནས་བསིལ་བ་ཚལ་ནས་འོང་། །ཁོང་གྲུབ་པའི་དཔལ་མོས་འདི་སྐད་ཟེར། །ཁྱོད་གཉིས་ལས་མཚར་བའི་མི་མི་འདུག །གོ་ཆེན་པོ་ཆོད་ས་ང་ཡིས་ཤེས། །ང་འབྲལ་མེད་ཡོད་རྟེན་ལྟ་བ་ལས། །སེམས་སྐྱོ་ཤས་ཀྱི་ངོ་ཤེས་ད་ལྟ་ཙམ། །ང་བྱ་ཐུལ་གྱོན་ཚེ་ངོ་མཚར་མཐོང་། །གོས་ཧྲུལ་པོ་གྱོན་ནས་བྲན་གཡོག་བྱེད། །མི་ལས་ཅན་བདེ་ཆེན་མཚན་མས་འདྲེན། །མི་སྐལ་མེད་དམ་ལོག་མཚན་མས་འདུལ། །མི་དད་ལྡན་གྱི་ཉམས་ཆགས་མཚན་མས་བསྐང་། །མི་དྲིན་ཅན་མ་བྱུར་རྟོགས་པས་འདྲེན། །ཉམས་རྩ་རླུང་ཐུགས་རྗེའི་ཉམས་རྟོགས་སྤེལ། །ཡུལ་ས་བཅུད་བསོད་ནམས་གཡང་གིས་བདག །ཆོས་ཟབ་རྒྱས་འཁོར་ལོ་རྣལ་འབྱོར་མ། །ང་གཉིས་ཉི་ཟླ་ལྟར་འགྲོ་བའི་མགོན། །ཡུམ་ཆོས་སྐུ་ཀུན་ཏུ་བཟང་མོ་ཡིན། །ཁྱེད་འཁོར་བ་མེ་འོབས་ཀྱི་གྲོང་ཁྱེར་ལ། །ཁྱེད་འགྲོ་འདྲེན་ཆུ་ཤེལ་ཟླ་བ་ཤར། །ཐུགས་རྗེས་བསིལ་བའི་ཆུ་རྒྱུན་ཕོབས། །གྲོགས་ཨུ་དུམྺ་རའི་མེ་ཏོག་ཁྱོད། །ལམ་རྒྱ་ལམ་དུ་འདུག་ས་ང་རེ་སྐྱིད། །ཞེས་མི་མོ་མཛེས་མའི་གཟུགས་སུ་བསྟན། །ཞལ་མཛེས་པའི་འཛུམ་མདངས་བསྟན་ནས་སུ། །མགྲིན་གཅིག་ཏུ་བསྡད་དབྱངས་འདི་སྐད་ཟེར། །ཨ་ཧམ། ལུས་འདི་ལྟར་སྤྲུལ་རྒྱུར་མ་ནུས་ན། །མིང་འཇའ་ལུས་ཟེར་ཡང་སྒྱུ་ལུས་ཡིན། །ལུས་འབྱུང་བཞི་མི་རྟག་ཆུ་བུར་ཟེར། །རྐྱེན་གློ་བུར་ཟེར་མའི་རླུང་དང་འདྲ། །ཚེ་ཡད་ཡུད་པ་ལ་བློ་གཏད་ཆུང་། །ནོར་དངོས་རྫས་རྟག་པ་མེད་ལགས་ཀྱང་། །མཆོག་རྣམ་གཉིས་ཀྱི་དངོས་གྲུབ་ཡིན་ནོ་སྙམ། །ང་ཀོ་ལོང་དམ་པས་བཏང་སྙོམས་བཞག །ཚོགས་རྫོགས་པ་མ་གཏོགས་སྤང་མི་འཚལ། །སེམས་ཏིང་འཛིན་ཡིད་བཞིན་ནོར་བུ་དེ། །བྷ་གའི་ཆོས་དབྱིངས་མཁའ་ལ་གནས། །དེ་ཕྱིར་ཀུན་ཏུ་བཟང་མོ་ཡིན། །ཁྱོད་ངེས་མེད་འགྲོ་དོན་ཕྱོགས་བཅུར་སྤེལ། །རིགས་དྲུག་གི་སེམས་ཅན་ལམ་སྣ་དྲོངས། །ང་རང་སེམས་ཡངས་པ་མཁའ་སྤྱོད་ཞིང་། །རང་རིག་ཆོས་སྐུ་རྡོ་རྗེ་འཆང་། །ད་སངས་རྒྱས་ཟེར་བ་དེ་ཀ་ཡིན། །དེ་གཞན་ནས་འཚོལ་བ་འཁྲུལ་པའི་རྒྱུ། །ད་ཐེ་ཚོམ་སྤངས་ལ་འགྲོ་དོན་སྤྱོད། །གནས་འདི་ལ་ལན་གཅིག་ཕྱག་བསྐོར་བྱས། །ལས་མཚམས་མེད་སྤྱད་པའི་སྡིག་སྒྲིབ་བྱང་། །ཚོགས་འཁོར་ལོ་སོགས་ལ་བརྩོན་བྱས་ན། །ང་རང་དེར་འབྲལ་མེད་འོང་གསུངས་སོ། །དེ་ལྟར་མདོར་བསྡུས་སུ། རིག་འཛིན་བླ་མ་དམ་པ་པདྨ་ལྷུན་གྲུབ་གང་གིས་དགོངས་བཞེད་ལྟར་བྲིས་པ་དགེ་ལེགས་འཕེལ། འབྲུག་པ་རྟོགས་ལྡན་གྱི་རྫུན་གཏམ་ལགས་སོ། །

མཆན། ༡.གནས་ཡིག་འདི་གཏེར་ཆེན་རིག་འཛིན་ཆོས་རྒྱལ་རྡོ་རྗེའི་རང་རྣམ་བཀའ་འབུམ་ལས་ཞལ་བཤུས་པའོ། །

༢.གནས་འདི་བཞུགས་ཡུལ་ནི་མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་སྐྱོ་བྲག་ཞང་སྐྱོ་བྲག་དགོན་པའི་མདུན་ཕྱོགས་ཀྱི་རྫ་ཆུའི་ཕ་རོལ་ཏུ་ཡོད་ཅིང་། རྫོང་ཐོག་ནས་ནུབ་བྱང་ཕྱོགས་སུ་རྫ་ཆུ་བརྒྱུད་དེ་སྤྱི་ལེ༦༠ཙམ་གྱི་མཚམས་སུ་བསྐྱོད་ན་སླེབས་ཤིང་། ཉིན་གཅིག་ལ་མི་ཕལ་བས་མཐའ་བསྐོར་གཅིག་དང་རྩེ་བསྐོར་གཅིག་བསྐོར་ཚེ་རང་བྱོན་རྣམས་ཞིབ་ཏུ་མཇལ་ཐུབ།

༄༅། །སྐུ་ཡིས་སྐུ་ཡི་གནས་མཆོག་བསྟན་པ་ནི༔ སྐྱི་ཞེས་བྱ་བ་བྲག་དེ་ཆད་པ་རུ༔ བདག་གིས་ལོ་གཅིག་སྒྲུབ་གནས་ཉི་ཟླ་ཕུག༔ ཀླུ་བདུད་ནག་པོའི་ཕོ་བྲང་སྟེང་དུ་ཡོད༔ མ་འོངས་དུས་སུ་གནས་མཆོག་འདི་ཉིད་དུ༔ གྲགས་པའི་མིང་འབྱུང་དེ་དུས་བཀུར་སྟི་བྱེད༔བདག་གིས་བཞེངས་པའི་མཆོད་རྟེན་ནག་པོ་དེ༔ རལ་ཞིང་འོག་ནས་རིལ་བུ་ནག་པོ་འབྱུང༔ བོད་ཁམས་ཕུང་བའི་མགོ་བོ་དེ་ནས་ཚུགས༔ དེ་ལ་ཕན་ཕྱིར་དེ་ནས་མདའ་རྒྱངས་བརྒྱད༔ ཕ་ཝང་ནག་པོར་རྫ་ཡི་མཆོད་རྟེན་སྦས༔ དེ་ཉིད་ཐོན་ནས་མཆོད་རྟེན་ཞིག་གསོ་བྱ༔ འདོན་པའི་སྐྱེས་བུ་གྲུབ་ཅེས་བྱ་བ་འབྱུང༔

༄༅། །སྐུའི་སྐུ་གནས་སྐྱི་ཞེས་བྱ་བ། རྫ་ཆུ་ཚུ་རི་སྤྱི་འབྱམས་ཉི་ཟླ་ཕུག །དེ་རུ་གྲགས་པའི་མིང་འབྱུང་སོགས་ཀྱི་དོན། །གྲགས་པའི་མིང་ནི་སྐྱོ་གྲགས་བླ་མར་གྲགས། །དེས་གནས་དེ་ལ་བསྐུར་སྟི་ཆེན་པོ་བྱེད། །དེ་རྗེས་མི་རབས་ལྔ་ཙམ་གྱི་མཚམས་ནས་ཨོ་རྒྱན་གྱིས་བཞེངས་པའི་རྡོ་ནག་པོའི་མཆོད་རྟེན་དེ་ཞིག་པའི་འོག་ནས་རྡོའི་རིལ་བུ་ནག་པོ་ཞིག་བྱུང་བའི་དུས་སུ་སོག་དམག་གི་ཡོ་ལངས་སོགས་བོད་ཁམས་སྡུག་པའི་དུས་ཡིན་ཅེས་པར་གསུངས། མཆོད་རྟེན་ཞིག་གསོ་བྱེད་མཁན་གྲུབ་ཅེས་བྱ་བ་ནི་ལྷུན་གྲུབ་རབ་བརྟན་ནམ་རྣམ་རྒྱལ་རྡོ་རྗེ་ཡིན་པར་གསུངས། གནམ་ཆོས་མི་འགྱུར་རྡོ་རྗེས་སྐྱོ་བྲག་གི་གནས་སྒོ་ཐོག་མར་ཕྱེས། དེ་རྗེས་ཡོང་དགེ་མི་འགྱུར་རྡོ་རྗེས་སྤྱི་འབྱམས་ནས་ཚེ་སྒྲུབ་སོགས་གཏེར་ནས་སྤྱན་དྲངས། གནས་ཡིག་ཀྱང་ཡོད།

༄༅། །གུ་རུ་རིན་པོ་ཆེ་ལ་ན་མོ། སྤྱི་འབྱམས་ཉི་མ་ཕུག་གི་གནས་འདི་ལ། ཨོ་རྒྱན་རིན་པོ་ཆེས་རྫོགས་ཆེན་ཉི་མའི་ཁྲིད་མཛད་ནས་བཞུགས་པའི་ཕུག་པ། སྒོ་གདོང་གཡོན་དུ་ཨོ་རྒྱན་གྱི་སྐུ་རྒྱབ་མཆོད་རྟེན་གྱིས་མཚན་པ་བཞུགས། དེའི་འོག་རྡོ་རྗེ་ཕག་མོའི་སྐུ། དེའི་སྟེང་ནོར་བུ་མིག་གསུམ་པ། རྒྱ་ནག་གི་ཡི་གེ་ཨེ་ཝཾ། སྒོ་གདོང་གཡས་སུ་པདྨ་སཾ་བྷའི་སྐུ། བདུད་ཧ་ལའི་གདོང་པ་ཅན་འདུལ་བའི་ཆེད་དུ་ཨོ་རྒྱན་རིན་པོ་ཆེ་འཇིགས་བྱེད་མའི་སྤུ་གྲི་སྤྲུལ་པའི་སྐུ། བྱང་ཆུབ་མཆོད་རྟེན། ཕག་མོ་ལྷན་ཅིག་སྐྱེས་མའི་སྐུ། སྲིན་པོའི་བྲ་ཟོས་པ་ལ་ཨོ་རྒྱན་རིན་པོ་ཆེའི་སྐུ་གསུང་ཐུགས་ཀྱི་འོད་ཟེར་འཕྲོས་པས་སྲིན་པོ་བརྒྱལ། བརྒྱལ་དུས་ཕྱག་འཚལ་བའི་གནས་ལྔ་བཙུག་རྗེས། ཨོ་རྒྱན་རིན་པོ་ཆེའི་དབུ་སྐྲ་སྲིན་པོའི་ཀླད་པ་ལ་བསྒྲེས་ནས་བྲིས་པའི་ཡི་གེ་འབྲུ་གསུམ། ཡེ་ཤེས་ཀྱི་བྱ་ཁྱུང་སྙིང་གར་ཡི་གེ་ཨཿས་བརྒྱན་པ་ཡོད། གུ་རུ་དྲག་པོ་དམར་ནག་མེ་ཕྲེང་ཅན་གྱི་སྐུ། ཐུགས་རྗེ་ཆེན་པོ་ཕྱག་སྟོང་གི་སྐུ་དང་། བཅུ་གཅིག་ཞལ་གྱི་སྐུ། རྡོ་རྗེ་ཕག་མོའི་སྐུ། འཕགས་པ་འཇིག་རྟེན་དབང་ཕྱུག་གི་སྐུ། དེའི་གོང་དུ་མགོན་པོ་ཕྱག་བཞི་པའི་སྐུ། ཨོ་རྒྱན་གྱི་སྐུ། གུ་རུ་རྡོ་རྗེ་གྲོ་ལོད་ཀྱི་སྐུ། མཁའ་འགྲོ་གསང་བ་ཡེ་ཤེས་ཀྱི་སྐུ། དེ་རྣམས་གསལ་བར་བཞུགས། གནས་འདིར་མཇལ་ན་ཚེ་གཅིག་ལ་སངས་རྒྱས་པ་ཡིན་གསུངས་ནས་ཨོ་རྒྱན་ཡབ་ཡུམ་གྱི་ཕྱག་དམ་ཡོད། གནས་བདག་སྦལ་པ་ལ་སྤྲུལ་ནས་འོང་བས་ཨོ་རྒྱན་གྱིས་དེད་རྗེས། རྡོ་རྗེ་ཆེན་པོའི་སྐུ། ཨོ་རྒྱན་གྱི་སྐུ། མཁའ་འགྲོ་ལེགས་པ་ཡེ་ཤེས་ཀྱི་སྐུ། བྱང་ཆུབ་མཆོད་རྟེན། རྟ་ཕག་ཡབ་ཡུམ་གྱི་སྐུ་རང་བྱོན། ཆོས་སྐུ་ཀུན་ཏུ་བཟང་པོའི་སྐུ། པཎ་ཆེན་བི་མ་ལ་མི་ཏྲའི་སྐུ། བེར་ནག་ཅན་གྱི་སྐུ། མཚོ་བདག་སྦྲུལ་ལ་སྤྲུལ་ནས་འོངས་པ་ཨོ་རྒྱན་གྱིས་དེད་རྗེས་དང་བསྒྲལ་རྗེས་རྣམས་ཡོད། ཨོ་རྒྱན་རིན་པོ་ཆེས་རྡོ་རྗེ་གྲོ་ལོད་དུ་སྤྲུལ་ནས་དེའི་སྔགས་བཟླས་ཏེ་བདུད་འདུལ་བའི་ཏིང་ངེ་འཛིན་ལ་བཞུགས་པས་ཏིང་འཛིན་ཕུག་ཅེས་བྱ། ཕྱག་ན་རྡོ་རྗེ་རང་བྱོན། སྒྲོལ་མ་དཀར་མོ་རང་བྱོན། གྲོ་ལོད་ཕུར་ཤམ་ཅན། དྲག་པོ་མཐིང་ག་རིགས་བདག་འོད་དཔག་མེད་ཀྱིས་བརྒྱན་པ། བདུད་རྩི་འཁྱིལ་པ། སྒྲོལ་མ་སྔོན་མོའི་སྐུ། དཔག་བསམ་རྩེར་ག་རུ་ཊ་རང་བྱོན། གུ་རུ་པདྨས་བདུད་ཐུལ་ནས་ཧོམ་ཁུང་གྲུ་གསུམ་ནང་དུ་བདུད་ཀྱི་རྣམ་ཤེས་བཀུག་པའི་ཧོམ་ཁུང་། དགེ་བསྙེན་གྱི་ཀླུ་ཆུང་ངུ་སྦྲུལ་དུ་བསྒྱུར་ནས་བཏང་བ་ཨོ་རྒྱན་གྱིས་བྲག་ལ་བསྒྱུར་བ། དེ་བཞིན་གཤེགས་པ་ཆོས་བསྒྲགས་རྒྱ་མཚོའི་སྐུ་རང་བྱོན། ཉི་ཟླ་རང་བྱོན། ཚེ་དཔག་མཚོ་སྐྱེས་རྡོ་རྗེ་པད་སྡོང་ལས་འཁྲུངས་པ། ཨོ་རྒྱན་རིན་པོ་ཆེ་ཧེ་རུ་ཀའི་ཆ་བྱད་རིགས་གསུམ་མགོན་པོ་བཞེངས་སྟབས་ཀྱིས་བསྐོར་བ། མཚོ་རྒྱལ་སྐུ་རང་བྱོན། གུར་དྲག་དང་ཕག་མོ་རང་བྱོན། བྲག་འོག་གི་ཤུག་པ་གཉིས་ཀླུས་མཆོད་སྡོང་ཕུལ་བ་གཅིག་སྲིན་པོས་ཟོས། གཅིག་ལ་སོ་བཏབ་དུས་ཨོ་རྒྱན་གྱིས་རྡོ་རྗེས་བརྒྱབ་པ། ཨོ་རྒྱན་གྱིས་ལྷ་འདྲེར་ཆོས་གསུང་དུས་སྲིན་པོ་ཧ་ལའི་གདོང་ཅན་འོངས་པ་ཆུ་ནང་ལ་འཕང་མལ། ཨོ་རྒྱན་གྱི་ཞབས་རྗེས། ཨོ་རྒྱན་ཆེན་པོས་སྲིན་པོ་སྦྲུལ་གྱི་གདོང་བསྒྲལ་བའི་ཀླད་པས་བྲིས་པའི་ཨོཾ་དང་ཡིག་དྲུག་རྡོ་རྗེ་གྲོ་ལོད་ཀྱི་སྐུའི་ཚུལ། ཧཱུྃ་རང་བྱོན། བྲག་ཐམས་ཅད་ཡིག་དྲུག དེའི་སྟེང་ཡིག་དྲུག་ཡིག་མགོའི་ཚུལ། རྟ་མཆོག་ངང་པ་གསེར་ལྡན་གྱི་ཚུལ། སྲིན་པོ་ཀ་བུ་ཕོ་མོ་བསྒྲལ་མལ། ཧོམ་ཁུང་ཆེ་ཆུང་གཉིས། ཨོ་རྒྱན་གྱི་གསང་རྡོར་རྗེས་ཨཱཿས་མཚན་པ། མཚོ་རྒྱལ་ཞབས་རྗེས། ཀ་བུའི་ཀླད་པས་བྲིས་པའི་ཡིག་དྲུག ཨོ་རྒྱན་གྱི་ཞབས་རྗེས། ཡེ་ཤེས་མཚོ་རྒྱལ་གྱིས་སྲིན་པོ་དུག་གི་ཁ་རླངས་ཅན་བཀུག་ནས་ཇ་ཤིང་ལོ་མར་བསྒྱུར་ནས་བརྡུངས་རྗེས། ཨོ་རྒྱན་གྱིས་རྟ་བྲོ་བརྡུངས་པའི་འོག་ཏུ་ཁྱུང་གི་སྐུ། ཡེ་ཤེས་མཚོ་རྒྱལ་གྱི་པུས་མོའི་རྗེས། ཞབས་རྗེས། གཏུན་ཤིང་གི་རྗེས། གུ་རུ་རིན་པོ་ཆེ་ཁྱུང་དུ་སྤྲུལ་ནས་ཀླུ་བཟུང་རྗེས། སྲིན་པོའི་ནང་ཆ་དྲུད་མལ། ཨོ་རྒྱན་གྱི་པུས་མོའི་རྗེས། མཚོ་རྒྱལ་གྱི་ཞབས་རྗེས། ཨོ་རྒྱན་དབུ་དོམ་བཞག་རྗེས། མཚོ་རྒྱལ་གྱི་ཞབས་རྗེས་གཉིས་དང་ན་བཟའི་རྗེས། ཨོ་རྒྱན་གྱི་ཞབས་རྗེས། སྲིན་པོའི་རྒྱུ་མ་དྲུད་རྗེས། གུ་རུ་དྲག་པོའི་སྐུ། རྡོ་རྗེ་གྲོ་ལོད་ཀྱི་སྐུ། པད་འབྱུང་ཡེ་ཤེས་སེམས་དཔའི་རྫུ་འཕྲུལ་གྱི་ཞབས་རྗེས། ཨོ་རྒྱན་གྱི་ཞབས་རྗེས། དྷཱུཿདམར་སེར་རང་བྱོན། མཚོ་རྒྱལ་གྱི་ཞབས་རྗེས། མཚོ་རྒྱལ་གྱིས་སྲིན་པོ་དུག་གི་ཁ་རླངས་ཅན་གྱི་གློ་སྙིང་བརྒྱབ་རྗེས། དཔའ་བོ་མཁའ་འགྲོའི་བྲོ་བརྡུངས་རྗེས། ཕྱག་མཚན་རྡོ་རྗེའི་རྗེས། རིག་འཛིན་པདྨ་ཐོད་ཕྲེང་རྩལ་གྱི་ཞབས་རྗེས། ཐེའུ་རང་གི་རྗེས། རླུང་ལྷ་དམ་ལ་བཏགས་པའི་ཡི་གེ་ཡ་རང་བྱོན། ཉི་ཟླ་ཐང་ལ་བབས་རྗེས། ཨོ་རྒྱན་གྱི་སྐུ། མཁའ་འགྲོ་མ་ཚོགས་བྲོ་བརྡུངས་པའི་རྗེས། སྲིན་པོའི་སྙིང་བརྒྱབ་རྗེས། སྤྱན་རས་གཟིགས་ནམ་མཁའ་རྒྱལ་པོའི་སྐུ། རྒྱ་གར་རྡོ་རྗེ་གདན་གྱི་བཀོད་པ། ཨོ་རྒྱན་གྱི་སྐུ་རྗེས། མཁའ་འགྲོའི་ཡི་གེ གདུགས་དཀར་ལྷ་མོ་དང་ཕྱག་རྡོར་གྱི་སྐུ། མཚོ་རྒྱལ་གྱི་སྲིན་པོ་བསྒྲལ་བའི་བཤགས་པ་སྲིན་ཀླད་ལ་ཛམ་བུ་ཆུ་བོའི་གསེར་བསྲེས་ནས་མཆོད་རྟེན་བྲིས་པ། ཨོ་རྒྱན་གྱི་རྫུ་འཕྲུལ་གྱིས་ཞབས་རྗེས་ཆ་གཅིག སྐུ་རྗེས། མཚོ་རྒྱལ་གྱི་སྐུ་རྗེས། ཚེ་དཔག་མེད་ཀྱི་སྐུ་ཡོད། རྡོ་རྗེ་ཕག་མོའི་ཞབས་རྗེས། རིང་བསྲེལ་ཅན། བཅུ་གཅིག་ཞལ་སྐུ། རྡོ་རྗེ་འཆང་གི་སྐུ་རང་བྱོན། ཕུག་དྲྭ་བ་མ་ན་ཨོ་རྒྱན་གྱིས་མུན་ཁྲིད་གནང་ནས་རྗེ་འབངས་ཉེར་ལྔ་འཕུར་རྗེས། སྔགས་ཆེན་ཧཱུྃ་ཆེན་ཀ་རས་རྔ་བཏགས་མལ། ཛམ་ལྷ་ནག་པོ། བཻ་རོ་ཙ་ནའི་ཞབས་རྗེས། དུང་དཀར་རང་བྱོན། སྒྲོལ་མ་དཀར་མོའི་སྐུ། རྡོ་རྗེ་གྲོ་ལོད་སྐུ། མཁའ་འགྲོའི་བརྡ་ཡིག་རང་བྱོན། ལྷ་འདྲེས་གཏེར་སྣོད་ཕུལ་བ། ལྷ་འདྲེ་གཤར་མལ། ཨོ་རྒྱན་གྱི་བཞུགས་ཁྲི། མཁའ་འགྲོའི་ཀ་བ། རྡོ་རྗེ་ཕག་མོ། ཡུམ་བདག་མེད་མ། རྡོ་རྗེ་གྲོ་ལོད་ཀྱི་ཆིབས་པའི་རྗེས། རྡོ་རྗེ་ཕུར་པའི་སྐུ། གནས་བདག་དམ་ལ་བཏགས་རྗེས་དང་། མཇལ་དུ་འོངས་རྗེས། ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྐུ། ཀིང་ཀང་གི་ཕྱག་མཚན་དགྲ་སྟ། མདར་ནག་གི་སྐུ། མཚོ་སྐྱེས་རྡོ་རྗེའི་སྐུ། ཉི་མ་འོད་ཟེར། ཌོམྦི་ཧེ་རུ་ཀ གུ་རུ་དྲག་པོའི་སྐུ། སེང་ལྡེང་གི་ཕུར་པ། སྲིན་པོ་མ་ཏ་ནག་པོ་དེད་རྗེས། ཕྱག་ན་རྡོ་རྗེའི་སྐུ། ཤཱཀྱ་ཐུབ་པའི་སྐུ། ཚེ་དཔག་མེད་ཀྱི་སྐུ། དམ་ཅན་མགར་དམར་སེང་གེ་ལ་ཆིབས་པ། རྒྱལ་པོ་དམར་པོ་གེར་རྒྱུག ཨོ་རྒྱན་ཡབ་ཡུམ་གྱི་བྱང་སེམས། རྣམ་སྲས་སེར་ཆེན། རྡོ་རྗེ་འཆང་གི་སྐུ། རྣམ་སྲས་མདུང་དམར་ཅན། ཨོ་རྒྱན་པདྨས་ཕུར་པ་བརྒྱབ་མལ། ཨོ་རྒྱན་སྐུ། གནས་འདི་མཇལ་ན་སྐྱེ་བ་གསུམ་ལ་ངན་སོང་གི་སྐྱེ་སྒོ་ཆོད་གསུང་ནས་ཨོ་རྒྱན་གྱི་ཕྱག་དམ་གནང་བ། ལྷ་འདྲེས་ཨོ་རྒྱན་ལ་གཏེར་སྒོ་ཕུལ་རྗེས། གཤིན་རྗེ་དམར་པོའི་སྐུ། དེའི་ཐུགས་ཀར་རྟ་མགྲིན་དམར་པོའི་སྐུ། དཔག་བསམ་ལྗོན་ཤིང་། དེའི་གཡས་མཐོ་སར་ལྷ་མིན་འཐབ་རྩོད་གནས། དེ་ན་ལྷ་མིན་ཐུབ་པ་ཐག་བཟང་རིས། གཡོན་དུ་ལྷ་དང་ལྷ་མིན་གྱི་ལྗོན་ཤིང་རྩོད་ནས་འཐབ་པ། ངན་སོང་གསུམ་དུ་འགྲོ་བའི་གོ་ཆོད་པས། ཤལ་མ་རིའི་སྡོང་པོ། ཨོ་རྒྱན་གྱིས་སྲིན་པོ་མ་ཏང་ནག་པོ་དྲུད་རྗེས། སྲིན་ཀླད་ཀྱིས་བྲིས་པའི་མཆོད་རྟེན་དང་ཡི་གེ་གསལ་བ། ཉི་ཟླ་རང་བྱོན། སྲིན་ཀླད་ཀྱིས་བྲིས་པའི་ཡིག་དྲུག ཨོ་རྒྱན་གྱིས་སྲིན་པོ་མ་ཏང་ནག་པོའི་རྒྱུ་མ་དྲུད་རྗེས། ནམ་མཁའ་སྔོན་པོ་ཐད་ལ་ཕོག སྤྱི་འབྱམས་གནས་ཀྱི་རྒྱན་དུ་བཀོད། ཨོ་རྒྱན་གྱིས་སྲིན་པོ་བསྒྲལ་ཚར་ནས་འབར་བའི་ཆེད་དུ། སྲིན་པོའི་ཀླད་པས་བྲིས་པའི་མཆོད་རྟེན། སྲིན་པོའི་གློ་སྙིང་མིག་ཏུ། ཨོ་རྒྱན་གྱི་སྐུ། རྒྱལ་བ་ཤཱཀྱ་ཐུབ་པའི་སྐུ། ཡེ་ཤེས་མཚོ་རྒྱལ་གྱི་ཞབས་རྗེས་ཆ་གཅིག མཁའ་འགྲོ་ཀླུའི་དབང་མོས་ཀླུ་ཡུལ་གྱི་ནོར་བུ་ཉི་འབར་ཟླ་འབར་མའི་དད་རྟེན་དུ་གདན་དྲངས་པ། བཀའ་ཡི་མཆོད་རྟེན་ནག་པོ་ཀླུ་དང་ས་བདག་ཐམས་ཅད་ཀྱི་ཁ་ནོན་དང་། འགྲོ་བ་མིའི་སྐྱབས་མགོན་དུ་བཞེངས་པ། སེང་གེ་སྒྲ་སྒྲོགས་ཀྱི་ཞབས་རྗེས། སྤྱི་འབྱམས་མི་འགྱུར་རྡོ་རྗེ་ཡི་སྨེ་བ། ཀླུ་ཡུལ་གྱི་ནོར་བུ་རིན་པོ་ཆེའི་ལྟ་བ། རྒྱ་གར་ཙན་དན་གྱི་སོལ་བ་ལ་དཔེ་བླང་། ཨོ་རྒྱན་རིན་པོ་ཆེས་ཀླུ་ཡུལ་ནས་ཆོས་གོས་ཀྱི་ནང་དུ་བཏིམ་ནས་གདན་དྲངས། གནས་འདིར་མཇལ་ན་ཨོ་རྒྱན་རིན་པོ་ཆེའི་དྲུང་དུ་ངེས་པར་སྐྱེ། དེའི་རྟགས་ལ་ཨོ་རྒྱན་རིན་པོ་ཆེའི་ཕྱག་དམ་གྱིས་མནན་ནས་ཡོད། དེའི་ངོས་ལ་རིགས་གསུམ་མགོན་པོའི་སྐུ་གསལ་བོར་བཞུགས། ཨོ་རྒྱན་རིན་པོ་ཆེའི་ཕྱག་མཛུབ་ཀྱིས་བྲིས་པའི་ཡིག་དྲུག ཨོ་རྒྱན་རིན་པོ་ཆེས་སྲིན་པོ་མ་ཏང་ནག་པོ་མནན་ནས་བསྒྲལ་རྗེས། ཨོ་རྒྱན་རིན་པོ་ཆེས་བྱ་བྲལ་ལ་སྤྲུལ་དུས་ཀྱི་ཞབས་རྗེས་ཆ་གཅིག རྟེན་སྒམ་བཞག་རྗེས། ཨོ་རྒྱན་རིན་པོ་ཆེས་སྲིན་པོ་མ་ཏང་ནག་པོ་མནན་དུས་ཟག་པ་ཤོར་རྗེས། ཨོ་རྒྱན་གྱི་ཕྱག་བྲིས་མཆོད་རྟེན། སྲིན་པོའི་སྙིང་དང་མཁལ་མའི་རྗེས། སྲིན་པོ་གཤས་མ། ཨོ་རྒྱན་པདྨའི་ཕྱག་མཚན་དང་ཞབས་རྗེས། ཤཱཀྱ་སེང་གེའི་སྐུ། རྒྱལ་པོ་ཟླ་བ་དཀར་པོ། གུ་རུ་དྲག་པོ། རྡོ་རྗེ་གྲོ་ལོད། རྗེ་འབངས་ཉེར་ལྔ་རྣམས་འབུར་དོད་ལ་བྱས་སྲིན་པོའི་ཨོལ་ཁྲད། སྲིན་པོའི་ཀླད་པས་བྲིས་པའི་ཡི་གེ ཁ་སར་པཱ་ཎིའི་སྐུ། རྒྱ་ནག་པོ་གླང་གི་ཡུལ་ན་ནུབ་ཤིང་གི་དྲུང་དུ་འཕགས་པ་འཇམ་དབྱངས་རང་བྱོན། རྒྱ་མཚོ་མེ་རབ་ཀླུའི་གནས། རྡོ་རྗེ་མཁའ་འགྲོ་དང་དཔལ་ལྡན་ལྷ་མོ་རང་བྱོན། ཆོས་སྐུ་ཀུན་ཏུ་བཟང་པོའི་སྐུ་རང་བྱོན་ཡོད། བན་བོན་གཉིས་ཀྱི་གནས་རྩོད་དུས་ཨོ་རྒྱན་གྱིས་བདེན་སྟོབས་བརྗོད་ནས་བྲག་བཀག་པས། ཡེ་ཤེས་ཀྱི་བྱ་ཁྱུང་ནག་པོ། དེའི་གོང་དུ་ཁྱུང་དམར་པོ། དེ་སྟེང་ཁྱུང་ཁྲ་ལ་འཁོར་མང་པོས་བསྐོར་བ། ཨོ་རྒྱན་གྱི་སྐུ་རང་བྱོན། ཀླུ་དམ་ལ་འདོགས་ཕྱིར་ཁྱུང་དུ་སྤྲུལ་ནས་བྱོན་རྗེས་ཀྱི་ཕུག་པ་ཡིན། ཁྱུང་གི་སྐུ་གསུང་ཐུགས། ཆོས་སྐུ་སྣང་བ་མཐའ་ཡས་དང་། ལོངས་སྐུ་ཐུགས་རྗེ་ཆེན་པོ་དང་། སྤྲུལ་སྐུ་པདྨ་འབྱུང་གནས་གསུམ་གྱི་སྐུ། ཁྱུང་དཀར་ནག་ཁྲ་གསུམ། ཨོ་རྒྱན་གཙོ་འཁོར་གསུམ། རྡོ་རྗེ་ཕག་མོའི་སྐུ། འཇམ་དབྱངས་ཀྱི་སྐུ། ཤཱཀྱ་ཐུབ་པའི་སྐུ། རྡོ་རྗེ་གྲོ་ལོད། ཨོ་རྒྱན་སྐུ་རང་བྱོན། དབྱངས་གསལ་གྱི་ཡི་གེ་རྣམས་ཡོད། པདྨ་རྒྱལ་པོའི་སྐུ། རྟ་ཕག་ཡབ་ཡུམ་རང་བྱོན། མགོན་པོ་ཤིང་རང་བྱོན། གཡུང་དྲུང་གཡས་འཁྱིལ། དུར་ཁྲོད་བདག་མོ་ངེ་ནེ་མ་རང་བྱོན། ཡི་གེ་ཧཱུྃ་རང་བྱོན། སྲིན་མོའི་རྒྱུ་མ་དྲུད་རྗེས། ཨོ་རྒྱན་ཆེན་པོའི་ཅོག་ཙེའི་རྗེས། ཕྱག་མཁར་གྱི་རྗེས་རིང་བསྲེལ་གྱིས་མཚན་པ། ཆིབས་པའི་རྗེས། ཕྱག་མཁར་རྗེས་ལ་ཡི་གེ་རས་མཚན་པ། ཨོ་རྒྱན་གྱི་ཞབས་རྗེས། སྲིན་པོའི་སྙིང་བརྒྱབ་རྗེས། སྲིན་མོའི་གློ་བའི་རྗེས། ཟངས་མདོག་དཔལ་རི་ན་སྲིན་པོ་བརྟུལ་བའི་འདྲ་དཔེ་རྣམས་གསལ་བར་བཞུགས། ལྷ་ལུང་ནང་ན་པདྨ་སཾ་བྷའི་སྐུ། ཡང་རྡོ་གཅིག་ལ། ཕག་མོ་གྲུ་པའི་སྐུ། རྒྱལ་བ་འོད་མཚན་པའི་སྐུ། སངས་རྒྱས་མར་མེ་མཛད། རྒྱལ་པོ་རྣམ་ཐོས་སྲས། གྲུབ་ཐོབ་གཉེན་པ་དབང་ཕྱུག རྒྱལ་སྲིད་སྣ་བདུན། རྨ་བྱའི་གཟུགས། དུག་གསུམ་མནན་པའི་མཆོད་རྟེན་རྣམས་གསལ་བོར་བཞུགས། རྒྱ་དཀར་ནག་བོད་སོག་རྣམས་ཀྱི་ཡི་གེ་རྟེན་འབྲེལ་སྙིང་པོ་དབྱངས་གསལ་རྣམས་བྱོན་པ། ཀླུའི་དབང་ཕྱུག་གིས་ཨོ་རྒྱན་ལ་ཕུལ་བ་སྐུའི་ནང་ན་གཏུམས་ནས་གདན་དྲངས་པ། བྱང་ཆུབ་ཆེན་པོའི་མཆོད་རྟེན། ཚེ་དཔག་མེད། རྣམ་སྲས་རྟ་ཞོན་གྱི་སྐུ། ཐུབ་པ་གྲོང་ཁྱེར་མ། ཁྲོས་མ་ནག་མོ། སྒྲོལ་མ་དཀར་མོ། རྟ་ཕག་ཡབ་ཡུམ། ནོར་བུ་དགའ་འཁྱིལ། ཕྱག་ན་རྡོ་རྗེ། སངས་རྒྱས་འོད་དཔག་མེད། དེ་བཞིན་གཤེགས་པ་ཆོས་བསྒྲགས་རྒྱ་མཚོའི་དབྱངས་ཀྱི་སྐུ། ཨོ་རྒྱན་རིན་པོ་ཆེའི་སྐུ། དེ་ལས་མན་དུ་དྲག་པོས་རྡོ་ཟོར་འཕངས་པ་ལ། ཕྱག་སྟོང་སྤྱན་སྟོང་རང་བྱོན། གུ་རུ་དྲག་པོའི་སྐུ། ཨོ་རྒྱན་རིན་པོ་ཆེའི་ཕྱག་སྒོམ་རང་བྱོན། ཨོ་རྒྱན་གྱི་ཕྱག་དམ། རྗེ་བཙུན་མི་ལ་རས་པའི་སྐུ་རྣམས་གསལ་བོར་བཞུགས། ཡང་ཆུ་ཁ་དར་ཐབས་ཤེས་ཉི་ཟླས་མཚན་པའི་ཕུག་པར་རྡོ་རྗེའི་དབྱུག་པ་མཚོ་རྒྱལ་གྱི་སྐུ། ཨོ་རྒྱན་གྱི་ཕྱག་སྒོམ་རང་བྱོན། མཚོ་རྒྱལ་གྱི་ཞབས་རྗེས། གནོད་སྦྱིན་རྔ་མོང་ལ་ཞོན་པའི་གཟུགས། སིནྡྷུ་ར། ཨོ་རྒྱན་གྱི་ཆིབས་པའི་རྗེས། ཨོ་རྒྱན་གྱི་སྐུ། བདག་མེད་ལྷན་སྐྱེས་ཀྱི་སྐུ། ཨོ་རྒྱན་གྱི་བྷནྡྷའི་རྗེས། ཕུག་པ་བྱ་ཁྱུང་གི་བཞུགས་མིག ཡི་གེ་ཨ་རང་བྱོན། མཚོ་རྒྱལ་གྱི་ཞབས་རྗེས་རྣམས་གསལ་བོ་བཞུགས་སོ། །ཞེས་པ་འདི་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་དྲུག་པ་ཀུན་ལྡན་གྱི་ལོ་ཧོར་ཟླ་དྲུག་པའི་ཡར་ཚེས་ལ་གནས་ནང་རྣམས་སུ། དྲུང་ཡིག་པ་ཀརྨ་ཚུལ་ཁྲིམས་ཡང་དག་དང་ཨོ་རྒྱན་ཞི་གནས་གཉིས་ཀྱིས་འཕྲལ་དུ་ཡི་གེར་བཀོད་པ་འདི་མཐོང་ཐོས་ཐམས་ཅད་བདེ་བ་ཅན་གྱི་ཞིང་ཁམས་སུ་བགྲོད་པའི་རྒྱུར་གྱུར་ཅིག མངྒལཾ།

མཆན། གནས་ཡིག་འདི་ནི་གནམ་ཆོས་མི་འགྱུར་རྡོ་རྗེའི་བཀའ་འབུམ་ཝཾ་པོད་ལས་ཞལ་བཤུས་པའོ། །

༈ ན་མོ་གུ་རུ་པདྨ་སཾ་བྷ་ཝ་ཧཱུྃ། གནས་རི་བོ་གར་མཛད་ཨོཾ་གྱི་ཚུལ། །ཨཱཿསྐྱེ་མེད་ཆོས་སྐུའི་ཡིག་འབྲུས་བརྒྱན། །ཆོས་སྐུ་སྣང་བ་མཐའ་ཡས་ལ་གསོལ་བ་འདེབས། །རང་སེམས་ཆོས་སྐུར་རྟོགས་པར་བྱིན་གྱིས་རློབས། །གནས་རྡོ་རྗེའི་བྲག་ལ་འབྲུ་དྲུག་ཤར། །གསུང་ཡིག་དྲུག་མགོན་པོ་སྤྱན་རས་གཟིགས། །ལོངས་སྐུ་ཐུགས་རྗེ་ཆེན་པོ་ལ་གསོལ་བ་འདེབས། །རིགས་དྲུག་སྐྱེ་སྒོ་ཆོད་པར་བྱིན་གྱིས་རློབས། །གནས་སྤྱི་འབྱམས་ཨོ་རྒྱན་སྒྲུབ་པའི་ཕུག །གནས་དེ་ན་སྤྲུལ་པ་རྒྱུན་དུ་འབྱོན། །སྤྲུལ་སྐུ་པདྨ་འབྱུང་གནས་ལ་གསོལ་བ་འདེབས། །ཚེ་ཡི་རིག་འཛིན་ཐོབ་པར་བྱིན་གྱིས་རློབས། །སྐུ་མི་ཟད་རྒྱན་གྱི་འཁོར་ལོའི་གནས། །སྐུ་རང་བྱོན་དང་སྐུ་ཚབ་མང་དུ་བཞུགས། །དུས་གསུམ་རྒྱལ་བའི་སྐུ་ལ་གསོལ་བ་འདེབས། །ལུས་ཀྱི་སྒྲིབ་པ་དག་པར་བྱིན་གྱིས་རློབས། །གསུང་མི་ཟད་རྒྱན་གྱི་འཁོར་ལོའི་གནས། །གསུང་ཡིག་འབྲུ་དང་ཤོག་སེར་དཔག་མེད་བཞུགས། །དུས་གསུམ་རྒྱལ་བའི་གསུང་ལ་གསོལ་བ་འདེབས། །ངག་གི་སྒྲིབ་པ་དག་པར་བྱིན་གྱིས་རློབས། །ཐུགས་མི་ཟད་རྒྱན་གྱི་འཁོར་ལོའི་གནས། །ཐུགས་མཆོད་རྟེན་དང་རིང་བསྲེལ་མང་དུ་བཞུགས། །དུས་གསུམ་རྒྱལ་བའི་ཐུགས་ལ་གསོལ་བ་འདེབས། །སེམས་ཀྱི་སྒྲིབ་པ་དག་པར་བྱིན་གྱིས་རློབས། །གནས་དག་པ་མཁའ་སྤྱོད་དང་གཉིས་སུ་མེད། །སྐུ་ཡིག་འབྲུ་དང་ཕྱག་མཚན་བསམ་མི་ཁྱབ། །ཡི་དམ་ཞི་ཁྲོ་རབ་འབྱམས་ལ་གསོལ་བ་འདེབས། །མཆོག་གི་དངོས་གྲུབ་ཐོབ་པར་བྱིན་གྱིས་རློབས། །གནས་སྒྲུབ་ཕུག་མཁའ་འགྲོའི་ཚོགས་ཁང་ན། །ལྷ་མཁའ་འགྲོ་ཆོས་སྐྱོང་སྤྲིན་ལྟར་འཁྲིགས། །གནས་གསུམ་དཔའ་བོ་མཁའ་འགྲོ་ལ་གསོལ་བ་འདེབས། །རྐྱེན་ངན་བར་ཆད་ཞི་བར་བྱིན་གྱིས་རློབས། །གནས་བདག་དང་ཞིང་སྐྱོང་སྲུང་མའི་ཚོགས། །རྐྱེན་ཕྱི་དང་ནང་གི་བར་ཆད་སོལ། །འཇིག་རྟེན་ཀུན་བདེ་ཞིང་སྐྱིད་པ་དང་། །བཀྲ་ཤིས་དང་བདེ་ལེགས་མཛད་དུ་གསོལ། །ཅེས་པ་རཱ་ག་ཨ་སྱས་གནས་འབྲེལ་དུས་བྲིས་པའོ། །མངྒ་ལཾ།

མཆན། གནས་ཡིག་འདི་ནི་མཁས་གྲུབ་ཀརྨ་ཆགས་མེད་ཀྱི་གསུང་འབུམ་པོད་གི་ལས་ཞལ་བཤུས་པའོ། །

༄༅། །ན་མོ་གུ་རུ་ཤཱཀྱ་མུ་ནེ་པདྨ་ཀཱ་ར་ཡེ། །སྐྱབས་དཀོན་མཆོག་གསུམ་ལ་གུས་པས་འདུད། །མགོན་ཐུབ་པའི་དབང་དང་པདྨ་འབྱུང་། །རྗེ་སངས་རྒྱས་བསྟན་པའི་གཙུག་གི་རྒྱན། །མ་འགྲོ་བའི་སྐྱབས་གཅིག་རིན་པོ་ཆེ། །བདག་སྒོ་གསུམ་གུས་པས་གསོལ་བ་འདེབས། །གནས་འདི་ན་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་ཐོབ་པ་ཡིས། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །གནས་འོག་མིན་ཆོས་དབྱིངས་ཞིང་ཁམས་སུ། །རྗེ་རྡོ་རྗེ་འཆང་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །ཤར་ཟ་ཧོར་ནོར་བུའི་དགོན་པ་ནས། །ཏིལླི་ཤེས་རབ་བཟང་པོ་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །བྱང་པུལླ་ཧ་རིའི་དགོན་པ་ནས། །རྗེ་ནཱ་རོ་པཎ་ཆེན་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །ལྷོ་གྲོ་བོ་ལུང་གིས་དགོན་པ་ནས། །རྗེ་མར་པ་ལོ་ཙཱ་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །ནུབ་ལ་ཕྱི་གངས་ཀྱི་ར་བ་ན། །རྗེ་བཞད་པའི་རྡོ་རྗེ་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །ཤར་དྭགས་ལྷ་དཔལ་གྱི་དགོན་པ་ན། །རྗེ་སྨན་པའི་རྒྱལ་པོ་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །གནས་གདན་ས་ཡ་བཞིའི་བསྟི་གནས་སུ། །རྗེ་བཀའ་རྒྱུད་ཡ་བཞི་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །གནས་གར་བཞུགས་ཆོས་ཉིད་དགོན་པ་རུ། །རྗེ་འབའ་རོམ་ཡབ་སྲས་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །གནས་སྤྱི་གཙུག་པད་ཟླའི་གདན་སྟེང་ན། །རྗེ་རྩ་བའི་བླ་མ་ལ་གསོལ་བ་འདེབས། །གནས་འདི་ནས་གྲུབ་པ་ཐོབ་པ་དང་། །ཚེ་གཅིག་ལ་སངས་རྒྱས་འགྲུབ་པ་ཡི། །མཆོག་ཕྱག་རྒྱ་ཆེན་པོའི་དངོས་གྲུབ་སྩོལ། །སྤྱིར་འཛམ་གླིང་ཐུབ་པའི་ཞིང་ཁམས་འདིར། །གནས་བྱེ་བྲག་བརྒྱ་ཡི་ཡང་སྙིང་མཆོག །སྒོས་མདོ་ཁམས་ཡུལ་གྱི་སྦས་ཡུལ་གནས། །ཞིང་པདྨ་འོད་དང་དབྱེར་མེད་པའི། །གནས་མཁའ་སྤྱོད་བདེ་ཆེན་སྤྱི་འབྱམས་འདིར། །མགོན་རྗེ་བཙུན་པདྨ་ཐོད་ཕྲེང་རྩལ། །མངོན་སུམ་དུ་འདུ་འབྲལ་མ་མཆིས་པས། །འཁོར་རིག་འཛིན་རྗེས་འབྲང་གྲུབ་ཐོབ་ཚོགས། །བཀའ་རྒྱུད་སྡེ་བཞི་དྲུག་ཐེག་རིམ་དགུའི། །ལྷ་ཡི་དམ་དཔའ་བོ་མཁའ་འགྲོ་དང་། །བརྒྱ་སྟོང་ཕྲག་བྱེ་བ་དུང་ཕྱུར་འབུམ། །གྲངས་བསམ་འདས་བརྗོད་ཀྱིས་མི་ལངས་པ། །མགོན་ཆོས་སྐྱོང་ཞིང་བདག་གཏེར་སྲུང་རྣམས། །མངོན་སུམ་དུ་བཀྲ་གསལ་ལམ་མེ་བ། །ཕྱི་བྲག་རི་ལྷ་སྐུ་ཡིག་འབྲུས་བརྒྱན། །ནང་བདེ་ཆེན་དག་པའི་ཞིང་ཁམས་དངོས། །བར་རིན་ཆེན་གཏེར་གྱིས་ཕྱུར་བུར་གཏམས། །ཕྱི་འབྱུང་བ་ལྔ་ཡིས་རང་སྒྲ་ལ། །སྒྲ་གྲགས་སྟོང་གཟུངས་སྔགས་རང་སྒྲ་སྒྲོགས། །ཡུལ་རྩི་ཤིང་རྡོ་བྲག་ལྷ་སྐུར་ཤར། །བྱ་རི་དྭགས་གཅན་གཟན་ཆུ་གནས་ཀུན། །ཞིང་དག་པར་སྐྱིད་ཕྱིར་ངན་འགྲོ་སྤངས། །ས་ཆུ་རླུང་ཤིང་དང་འབྲུ་རིགས་ཀུན། །ལར་མྱོང་དང་རེགས་དང་དྲི་ཚོར་བས། །ལས་སྒྲིབ་དང་བག་ཆགས་སྡིག་ཀུན་བྱང་། །མི་སྐལ་ལྡན་མངོན་སངས་རྒྱས་པའི་ས། །སྐལ་དམན་ཡང་བདེ་འགྲོར་འདྲེན་པའི་ས། །གནས་འདི་ལས་ལྷག་པ་གཞན་ན་མེད། །གནས་འདི་ན་བསྐལ་བརྒྱའི་བསྐལ་པའི་བར། །སྤྱིར་སངས་རྒྱས་ཀྱི་བསྟན་པ་སྤེལ་བ་དང་། །སྒོས་ཟབ་གསང་སྙིང་པོའི་བསྟན་འཛིན་མཆོག །རྗེ་རིགས་གསུམ་མགོན་པོ་དངོས་བྱོན་པ། །སྐྱབས་འདྲེན་བྲལ་སྤྲུལ་པའི་སྐུ་མཆོག་གསུམ། །འཁོར་བྱང་སེམས་ཉན་ཐོས་དགྲ་བཅོམ་ཚོགས། །ངེས་ཅན་དང་ངེས་མེད་མང་པོ་བཞུགས། །སྒོམ་རྩ་རླུང་ཕྱག་རྫོགས་སྒོམ་སྒྲུབ་ལ། །རྐྱེན་བར་ཆད་མེད་པར་མཐར་ཕྱིན་པར། །སྔོན་གྲུབ་ཐོབ་གོང་མའི་རྣམ་ཐར་ལ། །དུས་ད་ལྟ་རྣམ་ཐར་སྐྱོང་བའི་དུས། །ཡིན་བཞིན་པར་ད་ལྟའི་དུས་འདི་ལ། །སྒོམ་ཉམས་ལེན་བྱས་ཚད་ཕྱག་རྒྱ་ཆེས། །ཉམས་རྟོགས་པའི་ས་ལམ་མྱུར་དུ་རྫོགས། །དུས་དེ་ཕྱིར་དགའ་བདེ་སྤྲོ་བའི་གླུ། །གནས་ཆོས་དབྱིངས་མཛོད་ནས་བླངས་པ་ལགས། །ཕ་བཀའ་བརྒྱུད་འབྲུག་པའི་སྙིང་པོའི་བསྟན། །དཔལ་དབྱར་མཚོ་ལྟར་རྒྱས་ས་སྟེང་ཁྱབ། བཀྲ་ཤིས་པའི་དཔལ་དང་ལྡན་གྱུར་ཅིག །ཅེས་གསུངས་པ་ལས་འབྲས་བཟང་པོའི་བསྐལ་པར་ལྡན་པ། པདྨ་དབང་ཕྱུག་གི་ཞལ་སྔ་ནས་སྐུལ་མ་མཛད་པ་དང་། འཕྲལ་དུ་གནས་འཛིན་གྱིས་རིམ་གྲོ་ཚོགས་བརྒྱ་བགྱིས་སྐབས། ཀརྨ་ཉི་མས་འབྲུ་ཡིས་མཎྜལ་བཅས་བསྐུལ་བས། གནས་དེར་སྐྱེ་སྔོན་བསྒྲུབ་པའི་སྐྱེ་བ་ཕྱི་མ། རིག་འཛིན་ཆོས་རྒྱལ་རྡོ་རྗེས་ས་ལུག་ལོའི་ཟླ་ཚེས་བཟང་པོ་ལ་བྲིས་པས་འབྲེལ་ཐོག་ཨུ་རྒྱན་མཁའ་སྤྱོད་ཀྱི་ཞིང་དུ་ཚོམ་བུ་འབུམ་དང་བཅས་ནས་སངས་རྒྱས་པར་གྱུར་ཅིག

མཆན། ༡.གནས་ཡིག་འདི་གཏེར་ཆེན་རིག་འཛིན་ཆོས་རྒྱལ་རྡོ་རྗེའི་རང་རྣམ་བཀའ་འབུམ་ལས་ཞལ་བཤུས་པའོ། །

༢.གནས་འདི་ནི་མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་སྐྱོ་བྲག་ཞང་སྐྱོ་བྲག་དགོན་གྱི་གཡས་ཕྱོགས་སུ་ཡོད། རྫོང་ཐོག་ནས་སྤྱི་ལེ༦༠ཙམ་སར་གནས་ཤིང་། གནས་དང་རང་བྱོན་དགོན་པ་སོགས་ཞིབ་མཇལ་བྱས་ན་ཉིན་གཅིག་ལ་མཇལ་ཚར་ངེས།

༄༅། །སྐུ་ཡི་གསུང་གི་གནས་མཆོག་བསྟན་པ་ནི༔ བོད་ཀྱི་མདོ་ཁམས་ལྷོ་ཟླ་ཞེས་བྱ་རུ༔ གླེ་ཞེས་བྱ་བ་ཀ་ཡིག་ཡོད་པའི་རི༔ བྲག་རི་ཟླ་གམ་ཡོད་པའི་རྒྱབ་ལོགས་སུ༔ ཨོ་རྒྱན་བདག་གིས་དབང་ཆེན་སྒྲུབ་པའི་ཕུག༔ མི་འགྱུར་རྟགས་ལ་མཚལ་གྱི་གཡུང་དྲུང་ཡོད༔ གོང་མོ་འདྲ་བའི་བྲག་ལ་ཟབ་བདུན་སྦས༔ རི་བོ་འདི་འདབ་ཀརྨ་པ་ཞེས་འབྱུང༔ སྐྱེ་བ་བདུན་དང་སྤྲུལ་རྒྱུད་བཅུ་གསུམ་འབྱུང༔

༄༅། །སྐུའི་གསུང་གི་གནས་གླེ་ཐུ་ཀརྨ་ནི་ཡོངས་གྲགས་ལྟར་དྭགས་པོ་ལྷ་རྗེས་ཀརྨ་པ་དུས་གསུམ་མཁྱེན་པ་ལ། ས་སྤྱོད་གསུང་གི་གནས་སུ་ལུང་བསྟན་པ་ལྟར་གདན་ས་བཏབ། ཀརྨ་པ་ཡབ་སྲས་ན་རིམ་དང་ཆགས་མེད་དང་ཡོང་དགེ་སོགས་ཀྱིས་ངོས་འཛིན་གཟེངས་བསྟོད་མཛད་མཆོག་གྱུར་གླིང་པས་དམ་ཅན་བྲག་འགག་ནས་ཟབ་བདུན་དང་དཔལ་གྱི་དེའུ་ནས་མ་མོ་སྤྱི་བསྡུས་སོགས་ཟབ་གཏེར་སྤྱན་དྲངས་ཤིང་གནས་ཡིག་ཀྱང་གཏེར་ནས་བཞེས། ཆགས་མེད་རིན་པོ་ཆེའི་གནས་རྟེན་གྱི་ཆེ་བཤད་རྒྱས་པར་བཀོད་པའང་ཡོད།

༄༅། །སྤྱན་རས་གཟིགས་ལ་ཕྱག་འཚལ་ལོ༔ བདག་འདྲ་པདྨ་འབྱུང་གནས་ཀྱིས༔ བོད་ཀྱི་རི་བྲག་དཔལ་ལྡན་རྣམས༔ སྐུ་གསུང་ཐུགས་ཡོན་ཕྲིན་ལས་ཀྱི༔ གནས་སུ་བྱིན་གྱིས་བརླབས་ནས་སུ༔ ཕྱི་ལྟར་རིན་ཆེན་རི་བྲག་ལ༔ ནང་ལྟར་རིན་ཆེན་གཞལ་ཡས་སུ༔ གསང་བ་ཡེ་ཤེས་ཕོ་བྲང་དུ༔ རྩ་བ་གསུམ་གྱི་ལྷ་ཚོགས་རྣམས༔ དངོས་སུ་བཞུགས་པར་བདག་གིས་སྤྲུལ༔ དེ་དག་རྣམས་སུ་སུས་སྒྲུབ་པ༔ མཆོག་དང་ཐུན་མོང་ངེས་པར་འགྲུབ༔ ཁྱད་པར་གསུང་གི་གནས་ཆེན་མཆོག༔ གླེ་ཡི་རི་བོ་དཔལ་འབར་ལ༔ ཡ་མཚན་ཀ་ཡིག་བཀྲ་བ་འདི༔ རྒྱལ་བ་ཀུན་གྱི་གསུང་གི་གནས༔ བྲག་རི་ཟླ་གམ་འབར་བ་རུ༔ གསང་ཕུག་ཟླ་གམ་ལྟ་བུའི་ནང༔ བདག་གིས་ཡང་དག་ཧེ་རུ་ཀ༔ ཟླ་གམ་ལྔ་བཅུ་རྩ་བརྒྱད་བསྒྲུབས༔ དཀྱིལ་འཁོར་མངོན་སུམ་ནམ་མཁར་བྱོན༔ ཟླ་གམ་འདྲ་བའི་བྲག་ལ་ཐིམ༔ ལུང་པ་དཔལ་ཆེན་སྐུ་ཡི་དབྱིབས༔ ཐུགས་ཀྱི་དཔལ་བེའུ་དེའུ་ལ༔ རྣམ་ཐར་གསུམ་ལྡན་ཕུག་པའི་ནང༔ ཧེ་རུ་ཀ་ཡི་གསང་སྒྲུབ་བགྱིས༔ ཧེ་རུ་ཀ་དང་མཁའ་འགྲོའི་ཚོགས༔ དངོས་སུ་བྱོན་ནས་གནས་འདིར་བཞུགས༔ ཤར་ལྷོའི་བྲག་རི་དཔལ་འབར་ལ༔ མན་ངག་ཐུགས་ཀྱི་གཏེར་ཀ་སྦས༔ འདོན་དུ་མི་རུང་གཏེར་བཅུ་སྦས༔ དགོས་པའི་གཏེར་གསུམ་གཏེར་ཕྲན་སྦས༔ ཤར་གྱི་ཕྱོགས་ཀྱི་བྲག་རི་ལ༔ དཔལ་གྱི་གནས་མཆོག་ཀེའུ་ཚང་དགུ༔ དུང་དཀར་འདྲ་བའི་བྲག་རི་ལ༔ བདུད་རྩི་ལྔ་ཡི་ནགས་ཚལ་གཏིབས༔ བདུད་རྩིའི་ཆུ་བོ་ལྷུང་ལྷུང་འབབ༔ བདག་དང་ནམ་མཁའི་སྙིང་པོ་དང༔ བཻ་རོ་གཉག་ལོ་མཚོ་རྒྱལ་དང༔ ཟབ་མོའི་བཀའ་བབས་མི་བདུན་བཅས༔ རང་རང་ཡི་དམ་སྒྲུབ་པ་ཡིས༔ ང་ཡིས་རྫུ་འཕྲུལ་གྱིས་ཕུག་པ༔ ཀེ་ཚང་ཉམས་དགའ་རྣམ་དགུ་དང༔ སྐུ་གསུང་ཐུགས་ཀྱི་རྟགས་རྣམས་གསལ༔ ལྷོ་ནུབ་ཐོད་སྐམ་འདྲ་བའི་བྲག༔ མ་མགོན་ཡབ་ཡུམ་བརྟེན་པའི་ཤིང༔ སྔགས་ཀྱི་རང་སྒྲ་སྒྲོག་པ་དང༔ ཁྲག་ཞག་འཁྲུགས་པའི་ཆུ་མིག་ཡོད༔ དྲིལ་བུ་གཡེར་ཁ་ལྟ་བུའི་རིགས༔ སྟེང་ལ་ང་ཡི་ཞབས་རྗེས་ཡོད༔ བྲག་དང་ལྗོན་ཤིང་འདྲེས་པའི་གནས༔ ཀླུ་བཙན་འབར་བ་སྤུན་བདུན་གནས༔ བྲག་རི་དཔལ་གཏོར་བཤམས་འདྲ་བར༔ མན་ངག་ཐུགས་ཀྱི་གསང་བའི་གཏེར༔ ཟབ་པ་སྐོར་བདུན་ཨ་ཐམ་རྒྱ༔ ཕ་བོང་གཡག་ཆུ་འབྲང་འདྲ་ལ༔ སྐུ་གསུང་ཐུགས་མཚན་དཔག་མེད་བྱོན༔ བྱ་རྒོད་འཚོགས་འདྲའི་ཕ་བོང་ལ༔ གསང་སྔགས་ཡི་གེ་དུ་མ་བྱོན༔ མེ་ལོང་ལྟ་བུའི་བྲག་ངོས་སུ༔ ལྷ་སྐུ་ཕྱག་རྒྱ་དུ་མ་གསལ༔ འཆི་མེད་བདུད་རྩིའི་བུམ་པ་ལ༔ ལྗོན་ཤིང་འབྲས་བུ་ལྡན་པ་སྐྱེས༔ ཚེ་ཆུ་སྨན་ཆུ་དུ་མ་ལུད༔ བྱང་ཕྱོགས་པདྨ་ལྟ་བུའི་བྲག༔ རིན་ཆེན་དབང་གི་མདོག་ཏུ་འཚེར༔ ཁྲོ་རྒྱལ་རྟ་མགྲིན་སྐུ་གསུང་ཐུགས༔ རྟགས་ཀྱི་རང་བཞིན་ཀུན་གསལ་ཞིང༔ ཕུག་པ་ཟླ་གམ་དབང་གི་གནས༔ བྱང་ཤར་གཅོང་རོང་བྲག་སྒོ་རུ༔ ཁྲོ་བོ་བཅུ་དང་ཁྲོ་མོ་བཅུ༔ སྤྲུལ་པའི་སྒོ་སྲུང་དུ་མ་བཞུགས༔ རིན་ཆེན་འདྲ་བའི་རི་བོ་ལ༔ ཡེ་ཤེས་མཁའ་འགྲོ་དུ་མ་གནས༔ ལྗོན་ཤིང་ལྷ་མོ་དར་ཕྱར་ལ༔ ཞིང་སྐྱོང་མཁའ་འགྲོ་དུ་མ་གནས༔ མཚོན་ཆ་གཟིངས་འདྲའི་བྲག་རི་ལ༔ བཀའ་སྡོད་ཆོས་སྐྱོང་སྲུང་མ་གནས༔ ཆུ་བོ་སུམ་རིམ་ལྕགས་རི་ལ༔ ཀླུ་ཡི་རིག་འཛིན་དུ་མ་གནས༔ ཐང་ཆེན་གསེར་གྱི་མཎྜལ་ལ༔ མ་མོ་མཁའ་འགྲོ་འབུམ་ཚོ་འདུ༔ གཡའ་སྤང་གངས་བྲག་བས་མཐའ་ལ༔ ལྷ་ཡི་དགེ་བསྙེན་དུ་མ་གནས༔ འབྲུ་བཅུད་ཚོགས་ཀྱི་བཟའ་བཏུང་ལ༔ ཡེ་ཤེས་ལྔ་ཡི་བདུད་རྩི་གནས༔ ས་ལ་སྐྱེས་པའི་སྐྱེ་འགྲོ་ལ༔ དཔའ་བོ་མཁའ་འགྲོའི་བྱིན་བརླབས་འཇུག༔ རི་དྭགས་བྱ་གཅན་སྣ་ཚོགས་པ༔ དཔའ་བོ་མཁའ་འགྲོའི་ཚོགས་གྲལ་ཐོབ༔ སངས་རྒྱས་བྱང་སེམས་རྟག་ཏུ་བཞུགས༔ རིག་འཛིན་གྲུབ་ཐོབ་འབྱོན་པའི་གནས༔ དཔའ་བོ་མཁའ་འགྲོ་སྤྲིན་ལྟར་གཏིབས༔ ཆོས་སྐྱོང་སྲུང་མ་འདུ་བའི་གནས༔ དྲེགས་པ་ལས་ལ་འགྱེད་པའི་གནས༔ བར་ཆད་རྐྱེན་ལས་གྲོལ་བའི་གནས༔ དངོས་གྲུབ་རྣམ་གཉིས་འདུ་བའི་གནས༔ སྒྲུབ་ན་རྟོགས་པ་འཆར་བའི་གནས༔ ཆོས་སྐུའི་རྒྱལ་ས་ཟིན་པའི་གནས༔ ཚོགས་ཀྱི་འཁོར་ལོ་བསྐོར་བའི་གནས༔ བདེ་སྟོང་རྒྱུན་ཆད་མེད་པའི་གནས༔ ཟག་མེད་འཇའ་ལུས་འགྲུབ་པའི་གནས༔ གནས་དང་གྲུབ་ཐོབ་མ་བྲལ་ན༔ སྙིང་པོའི་བསྟན་པ་འཛིན་པའི་གནས༔ སུ་འབྲེལ་བདེ་ཆེན་ཞིང་དུ་སྐྱེ༔ གནམ་ནི་འཁོར་ལོ་རྩིབས་བཞིའི་དབྱིབས༔ ས་ནི་པདྨ་འདབ་བཞིའི་དབྱིབས༔ བྲག་ནི་ཟླ་གམ་ཁ་སྦྱོར་མིག༔ ཆུ་ནི་ཡི་གེ་ཨེ་ཡི་དབྱིབས༔ ལྗོན་ཤིང་འཁོར་ལོ་བཞི་ཡི་དབྱིབས༔ བྲེ་གུ་ཚེ་ཡི་བུམ་པའི་དབྱིབས༔ བྲག་རི་དཔལ་གྱི་གཏོར་མའི་དབྱིབས༔ མཚོ་ནི་སྨན་དང་རཀྟའི་མཚོ༔ ཆུ་མིག་ནེའུ་གསིང་བདུད་རྩིའི་མཚོ༔ ནེའུ་གསིང་པདྨ་འདབ་སྟོང་བཀྲ༔ རི་ནི་རྒྱལ་སྲིད་སྣ་བདུན་ལ༔ བྲག་ནི་བཀྲ་ཤིས་རྟགས་བརྒྱད་དབྱིབས༔ ལྗོན་ཤིང་བཀྲ་ཤིས་རྫས་བརྒྱད་གནས༔ སཱ་ལའི་ལྗོན་ཤིང་གཏིབས་པའི་ཚེ༔ ང་ཡི་བསྟན་པ་དེ་རུ་གནས༔ འདིར་ཕྱིན་ངན་སོང་སྐྱེ་སྒོ་ཆོད༔ ཚོགས་འཁོར་གཅིག་གིས་སྒྲིབ་པ་བྱང༔ ཚོགས་འཁོར་གཉིས་ཀྱིས་ཉམས་ཆགས་བསྐང༔ ཚོགས་འཁོར་གསུམ་གྱིས་བསོད་ནམས་འཕེལ༔ ཚོགས་འཁོར་བརྒྱ་ཡིས་ཡེ་ཤེས་མཐོང༔ ཕྱག་དང་བསྐོར་བས་ལུས་སྒྲིབ་དག༔ བཟླས་བརྗོད་གསོལ་འདེབས་ངག་སྒྲིབ་དག༔ དད་མོས་བསྒོམས་པས་ཡིད་སྒྲིབ་དག༔ ལེགས་ཉེས་སྟངས་འཛིན་བྱེད་པའི་གནས༔ དམ་ཉམས་རྣམས་ལ་ཆད་པ་གཅོད༔ དམ་ཚིག་ལྡན་ལ་དངོས་གྲུབ་སྩོལ༔ བསྒྲུབ་ན་སྒྲུབ་པ་མཐའ་རུ་ཕྱིན༔ མཆོད་ན་བསོད་ནམས་ཚོགས་ཆེན་རྫོགས༔ དགེ་བ་གང་བྱས་འབུམ་དུ་འགྱུར༔ གནས་འདིར་སྒྲུབ་པའི་རྣལ་འབྱོར་ལ༔ ཚེ་རིང་ནད་མེད་བདེ་བ་འཕེལ༔ དངོས་གྲུབ་ལོ་དང་ཟླ་བས་འགྲུབ༔ ཟབ་མོའི་གནས་འདི་ཁྱད་པར་འཕགས༔ རྣལ་འབྱོར་དམ་ཚིག་ལྡན་པ་ལ༔ དག་པའི་སྣང་བ་ཅི་ཡང་འཆར༔ སྐུ་གསུང་ཐུགས་རྟགས་དུ་མ་ཤར༔ ལེགས་ཉེས་བལྟས་ཀྱང་སྟོན་པའི་གནས༔ སྒྲུབ་པ་རྩེ་གཅིག་བྱས་པ་ལ༔ ཡེ་ཤེས་ཁྱད་འཕགས་མཆོག་དང་ནི༔ ཐུན་མོང་ཚེ་དང་རིག་སློབ་འཕེལ༔ དུས་གསུམ་རྒྱལ་བ་ཐམས་ཅད་ཀྱིས༔ ཡོངས་སུ་བསྔགས་པའི་གནས་ཡིན་པས༔ འབྲེལ་ཚད་དོན་ལྡན་འགྲོ་དོན་འབྱུང༔ གཞན་དོན་འཕེལ་བའི་གནས་ཡིན་པས༔ དྲང་སྲོང་རྣམས་ཀྱིས་སྨོན་ལམ་བཏབ༔ མཁས་གྲུབ་མང་པོ་འབྱུང་བའི་གནས༔ ར་བ་བཞི་ཡི་ཚེས་བཅུ་ལ༔ གནས་གསུམ་དཔའ་བོ་མཁའ་འགྲོ་བྱོན༔ ཚེས་བརྒྱད་ཞི་བའི་ཕྲིན་ལས་འགྲུབ༔ བཅོ་ལྔ་རྒྱས་པའི་ཕྲིན་ལས་འགྲུབ༔ འབྲིང་པོ་བཞི་ཡི་ཉེར་ལྔ་ལ༔ དབང་གི་ལས་རྣམས་ཐམས་ཅད་འགྲུབ༔ ཐ་ཆུང་བཞི་ཡི་ཉེར་དགུ་ལ༔ དྲག་པོའི་ལས་རྣམས་ཐམས་ཅད་འགྲུབ༔ སྤྲེལ་ལོ་སྤྲེལ་ཟླ་སྟོན་ར་བ༔ ཚེས་བཅུ་མཆོག་གི་དངོས་གྲུབ་སྩོལ༔ ར་བ་བཞི་ཡི་བཅུ་གསུམ་ལ༔ འཆི་མེད་ཚེ་ཡི་དངོས་གྲུབ་འགྲུབ༔ གནས་ཀྱི་ཡོན་ཏན་བསམ་མི་ཁྱབ༔ དཀར་ཆག་ཡི་གེར་བཏབ་པ་འདི༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔གནས་མཆོག་དེའི་དཔལ་གྱི་དེའུ་ནས་མཆོག་གྱུར་གླིང་པས་སྤྱན་དྲངས་པ་མཁའ་འགྲོའི་བརྡའི་ཡི་གེ་ལས་ལེགས་པར་ཕབ་པའི་ཡི་གེ་པ་ནི་རང་སློབ་སྔགས་ཀྱི་སྐལ་ལྡན་ཤེས་རབ་རྒྱལ་མཚན་གྱིས་བགྱིས་པའོ། །མངྒ་ལཾ།

མཆན། གནས་ཡིག་འདི་མཆོག་གླིང་བཀའ་འབུམ་ས་པོད་ནས་ཞལ་བཤུས་པའོ། །

༄༅། །ཀརྨའི་རྒྱབ་ཡོལ་དེ་དཔལ་འཁོར་ལོ་སྡོམ་པའི་དཀྱིལ་འཁོར་ཡིན༔ དེ་ན་དཔལ་ཆེན་རྟ་མགྲིན་གྱི་སྐུ༔ རིན་ཆེན་བྲག་གི་ངོས་སྒང་ན༔ ཀརྨ་པའི་འོད་ཟེར་ཕོག་པ་ལས་ཡི་གེ་ཀ་རང་བྱོན༔ ཨོ་རྒྱན་རིན་པོ་ཆེ་དཀར་འཛང་ཕུག་གོང་ན་བཞུགས་པ༔ མཁའ་འགྲོ་མས་ཞལ་མཇལ་དུས་ཞབས་རྗེས༔ སྐྱག་ལྡེམ་ཉ་ཡག་ན་ཤཱཀྱ་ཐུབ་པ་ལ་ཉེ་བའི་སྲས་བརྒྱད་ཀྱིས་བསྐོར་བ་དང༔ རྒྱལ་བ་རིགས་ལྔ་ལ་ཕྱོགས་བཅུའི་སངས་རྒྱས་ཀྱིས་བསྐོར་བ་བཞུགས༔ རྡོ་རི་བྲག་ལ་ཀརྨ་པ༔ གཙོ་འཁོར་གསུམ་དང་རྒྱལ་ཆེན་སྡེ་བཞིའི་སྐུ་རྣམས་བཞུགས༔ ཡངས་དགོན་ཕུག་ན་ཨོ་རྒྱན་ཡི་གེའི་ཀརྨ་ཟེར་བ་སྤང་ལ་ཡོད༔ ཡངས་དགོན་ནག་ལ་ཉི་ཟླ་རང་བྱོན༔ བྲག་ལ་ནོར་བུ་རང་བྱོན༔ དམ་ཅན་སྐུ་མཁར་གྱི་ངོས་ན་ཀརྨའི་ཞབས་རྗེས་དང་དམ་ཅན་གྱི་ས་བོན་ཡི་གེ་ཏྲི་རང་བྱོན་བཞུགས༔

༈ ན་མོ་པདྨ་ཀཱ་ར་ཡེ༔ ཡང་རྒྱལ་པོ་བྱམས་པའི་ལོ་ཧོར་ཟླ་བརྒྱད་པའི་མར་ངོའི་བཅུ་གཅིག་ཉིན་གདན་ས་ཆེན་པོ་ཀརྨར་སླེབས་པའི་དགོང་མོ༔ ཀརྨ་པའི་སྐུ་མི་ཚད་ལས་ཆེ་ཙམ་གཅིག་ལ་དབུ་གཙུག་ཏོར་གྱིས་མཚན་པ་ལ་དབུ་ཞྭས་གཙུག་ཏོར་མི་སྒྲིབ་པ་དབུ་གཙུག་ཏུ་གུ་རུ་པདྨ་འབྱུང་གནས་སྐུ་མཐོ་དོའི་ཚད་ཙམ་གྱིས་མཚན་པ་དཔོན་སློབ་ལྔ་པ་གཅིག་གིས་འདི་སྐད་གསུངས༔

༈ ཤྲཱི་ཙཀྲ་སཾ་ཝ་ར་ན་མཧཱུྃ༔ གདན་ས་ཆེན་པོ་ཀརྨ་འདི་ཡི་རྒྱབ་ཀྱི་བྲག་འདི་དཔལ་འཁོར་ལོ་སྡོམ་པའི་དཀྱིལ་འཁོར་ཡིན༔ རྒྱབ་ཕྱོགས་ཀྱི་བྲག་སེང་གེ་གནམ་དུ་བལྟས་པ་འདྲ་བ་ཡོད༔ དེ་དུང་དཀར་རང་བྱོན་ཡིན༔ གནས་མཆོག་དེ་ཡི་གཡས་ཀྱི་ཕྱོགས༔ རི་དགོས་འདོད་ཡིད་བཞིན་གྱི་ནོར་བུ་འདྲ༔ ལྕང་ལོ་ཅན་དང་ཁྱད་པར་མེད༔ དཔལ་ཆེན་ཕྱག་ན་རྡོ་རྗེའི་ཐུགས་ཀྱི་གནས་མཆོག་ཡིན༔ གནས་དེའི་མདུན་གྱི་རི་ལོགས་སུ༔ ནགས་ཉི་ཟླ་ནོར་བུ་འདྲ་བ་ཡོད༔ རྒྱ་ནག་རི་བོ་རྩེ་ལྔ་དང་དབྱེ་བ་མེད༔ མགོན་པོ་འཇམ་དཔལ་གཞོན་ནུའི་སྐུ་ཡི་གནས་མཆོག་ཡིན༔ རི་བོ་དེའི་དབུས་མ་ནི༔ བྱ་ཁྱུང་མཁའ་ལ་ལྡིང་བ་འདྲ༔ པོ་ཏ་ལ་དང་གཉིས་སུ་མེད༔ འཕགས་པ་སྤྱན་རས་གཟིགས་ཀྱི་གསུང་གི་གནས་མཆོག་ཡིན༔ མདུན་དུ་ཐང་ཆེན་མཎྜལ་ཕུལ་བ་འདྲ༔ བཀྲ་ཤིས་རྟགས་བརྒྱད་ཀྱི་མཚན་ནས་ཡོད༔ ཡང་དབུས་ཕྱོགས་བྲག་དེའི་རྩ་བ་ན༔ ཐུགས་ཀྱི་དགོངས་པས་གཏེར་བྱིན་གྱིས་བརླབས་པའི་ཡི་གེ་འབྲུ་དྲུག་ཡོད༔ གཡོན་ཕྱོགས་སུ་བྲག་ཁང་བུ་བརྩེགས་པ་འདྲ་བ་ཡོད༔ བླ་མ་སྐུ་གསུམ་གྱི་བཞུགས་གནས་ཡིན༔ ལྷ་འདྲེ་རྣམས་ཀྱི་བང་མཛོད་ཡིན༔ འཕགས་པ་གནས་བརྟན་བཅུ་དྲུག་ཡོད༔ ཀར་ཞེས་མཆོད་པ་རྣམ་ལྔ་ཡོད༔ ཐུབ་པ་མཆོག་ཟུང་བཅས་པ་ཡོད༔ ཤར་ཕྱོགས་རི་ཡི་རྩེ་མོ་ན༔ ཡི་གེ་ཨ་དང་གྲུབ་ཆེན་བརྒྱད་ཅུ་ཡོད༔ དེ་ལས་དག་པ་རྣམས་ཀྱི་རབ་མཐོང་ཞིང༔ མ་དག་པ་ནི་མཐོང་མི་འགྱུར༔ ཞེས་གསུངས་འཇའ་ཡལ་བ་ལྟར་སོང་ངོ་༔ ཤུཔྟ༔

༈ ཡང་དེའི་ཉི་ཤུ་བརྒྱད་ཀྱི་ཚེ༔ གནས་ཆེན་དེ་ལ་བསྐོར་བ་བརྒྱབ་སྟེ་མཇལ་ནས་དམ་ཅན་འགག་ཏུ་སོང་སྟེ་སྐུ་མཁར་དེའི་གོང་དེར་བསྡད་ཚེ༔ བྱང་ཤར་གྱི་ཕྱོགས་སུ་འཇའ་ཚོན་སྣ་ལྔ་དང་མེ་དཔུང་གི་དབུས་སུ་དམ་ཅན་མགར་ནག་ར་སྐྱེས་ལ་ཆིབས་པ་ཐོ་བ་ནུབ་ཕྱོགས་སུ་གཡུག་པ་གཅིག་ཡུད་ཙམ་སྣང༔ དེ་ལ་བདག་གིས་ཁྱོད་སློབ་དཔོན་པདྨའི་དམ་ལས་མ་འདའ་བར་སངས་རྒྱས་ཀྱི་བསྟན་པ་རིན་པོ་ཆེ་དར་བ་དང་བསྟན་འཛིན་གྱི་སྐྱེས་བུ་དམ་པ་རྣམས་ཀྱི་ཕྲིན་ལས་ཕྱོགས་བཅུར་རྒྱས་པའི་ཕྲིན་ལས་མཛོད༔ ཅེས་སོགས་ཀྱི་ཕྲིན་ལས་འགའ་ཞིག་བཅོལ་བས༔ དེ་ལྟར་བྱ་ཡི་ཟེར་ནས་འཇའ་ཚོན་དེར་ཐིམས་སོང༔ ཡུད་ཙམ་ནས་འཇའ་ཚོན་ཡང་ཡལ་ནས་སོང་ངོ༔ མཾལཾཝཾ༔ ཞེས་པ་རིག་འཛིན་ཆེན་པོ་མི་འགྱུར་རྡོ་རྗེས་བཀའ་བསྩལ་པ་ལྟར་དྲུང་ཡིག་པ་ཀརྨ་ཚུལ་ཁྲིམས་ཡང་དག་གིས་བཀོད་པའོ། །མངྒ་ལཾ།

མཆན།གནས་ཡིག་འདི་གནམ་ཆོས་མི་འགྱུར་རྡོ་རྗེའི་བཀའ་འབུམ་ཝཾ་པོད་ནས་ཞལ་བཤུས་པའོ། །

༄༅། །ན་མོ་གུ་རུ་ཀརྨ་ཀ་ཡེ། །པོ་ཏ་ལ་རུ་མགོན་པོ་སྤྱན་རས་གཟིགས། །རྔ་ཡབ་གླིང་དུ་ཨོ་རྒྱན་སྤྲུལ་པའི་སྐུ། །ཁ་བ་ཅན་དུ་དཔལ་ལྡན་ཀརྨ་པ། །ཞྭ་ནག་ཅོད་པན་འཛིན་པ་རྣམས་ལ་འདུད། །འཕགས་ཡུལ་གྲུབ་པའི་ཌོམ་བྷི་ཧེ་རུ་ཀ །གངས་ཅན་ལྗོངས་སུ་སྒོམ་ཆུང་རས་ཆེན་དང་། །ད་ལྟ་རྒྱལ་བའི་ཕྲིན་ལས་མངའ་མཛད་པ། །སི་ཏུ་སྤྲུལ་པའི་སྐུ་ལ་ཕྱག་འཚལ་ལོ། །གནས་གདན་ས་ཆེན་པོ་འོག་མིན་ཀརྨའི་གནས་བཤད་འདི་ལ་ལོ་རྒྱུས་སྤྱི་དང་བྱེ་བྲག་གཉིས་ཏེ། སྤྱིར་ནི་འཕགས་པ་འཇིག་རྟེན་དབང་ཕྱུག་ཀརྨ་པ་དེ་ཉིད། འོག་མིན་ཆོས་དབྱིངས་ལྷུན་གྱིས་གྲུབ་པའི་གནས་ན་ཐུགས་ཆོས་སྐུའི་ངོ་བོ་འཁོར་འདས་སྣང་སྲིད་ཐམས་ཅད་ཁྱབ་པར་བཞུགས་ཏེ། དེ་ནི་ས་བཅུའི་སེམས་དཔའ་རྣམས་ཀྱིས་ཀྱང་མུན་པ་ནང་གི་གཟུགས་ཙམ་ལས་མཇལ་བའི་བསྐལ་པ་མེད་པར་གསུངས་ན། བདག་ལྟ་བུའི་བརྗོད་པར་ཡང་ག་ལ་ནུས་ཏེ་དོན་དེ་ལ་དགོངས་ནས། བསམ་བརྗོད་རེ་བ་ལས་འདས་པ་ལ་གསོལ་བ་འདེབས་སོ། །ཞེས་གདམས་པར་མཛད་དོ། །ཟ་མ་ཏོག་བཀོད་པའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེའི་བ་སྤུའི་བུ་ག་གཅིག་ནས་ཀྱང་། སངས་རྒྱས་ཀྱི་ཞིང་ཁམས་བསམ་གྱིས་མི་ཁྱབ་པ་ཞིག་སྤྲུལ་ནས་འགྲོ་དོན་མཛད་པར་གསུངས་པས། དེ་ལྟ་བུའི་གནས་དེ་དག་བཤད་པར་ག་ལ་ནུས་ཏེ། དོན་དེ་ལ་དགོངས་ནས། རབ་འབྱམས་ཞིང་གི་བདག་པོ་ལ་གསོལ་བ་འདེབས་སོ། །ཞེས་རྗེས་འཇུག་རྣམས་ལ་གདམས་པར་མཛད་དོ། །ཆུ་ཀླུང་སྣ་ཚོགས་པའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དང་མཉམ་པའི་འཇིག་རྟེན་གྱི་ཁམས་རྣམས་སུ་སངས་རྒྱས་སྟོང་རྩ་གཉིས་སྤྲུལ་ནས་སེམས་ཅན་གྱི་དོན་མཛད་པར་གསུངས་པ་དང་། པུན་དྷ་རི་ཀའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བཀོད་པ་བར་མའི་འཇིག་རྟེན་གྱི་འབྱུང་བ་ཆེན་པོའི་རྡུལ་ཕྲ་རབ་དང་མཉམ་པའི་མཛད་པ་བཅུ་གཉིས་སུ་སྤྲུལ་ནས་སེམས་ཅན་གྱི་དོན་མཛད་པར་གསུངས་པ་དང་། སྙིང་རྗེ་སྣ་ཚོགས་རོལ་པ་ཞེས་སམ། སྙིང་རྗེ་རྣམ་པར་རྒྱལ་བའམ། སྙིང་རྗེ་རྣམ་པར་རོལ་པའི་མདོ་ལས། འཕགས་པ་འཇིག་རྟེན་དབང་ཕྱུག་ཀརྨ་པ་དེས། འཛམ་གླིང་བྱེ་བ་ཕྲག་བརྒྱའི་རྡོ་རྗེ་གདན་བྱེ་བ་ཕྲག་བརྒྱ་ན། ཤཱཀྱ་ཐུབ་པ་བྱེ་བ་ཕྲག་བརྒྱ། པོ་ཏ་ལ་བྱེ་བ་ཕྲག་བརྒྱ་ན་བྱང་ཆུབ་སེམས་དཔའ་སྤྱན་རས་གཟིགས་བྱེ་བ་ཕྲག་བརྒྱ། ར་ས་འཕྲུལ་སྣང་བྱེ་བ་ཕྲག་བརྒྱ་ན། སྤྲུལ་པའི་ཆོས་རྒྱལ་སྲོང་བཙན་སྒམ་པོ་བྱེ་བ་ཕྲག་བརྒྱར་སྤྲུལ་ནས་སེམས་ཅན་གྱི་དོན་མཛད་པར་གསུངས་པའི་ཕྱིར། དོན་དེ་ལ་དགོངས་ནས། ཞིང་ཁམས་སྤྲུལ་པས་ཁྱབ་པ་ལ་གསོལ་བ་འདེབས་སོ། །ཞེས་རྗེས་འཇུག་རྣམས་ལ་གདམས་པར་མཛད་པའོ། །དེ་དང་མཚུངས་པར་དྭངས་སྙིགས་འབྱེད་པའི་མདོ་བསྡུས་པ་ལས། འཇིག་རྟེན་བྱེ་བ་ཕྲག་བརྒྱ་ན། །ཀརྨ་པ་ཞེས་བྱ་བ་ཡི། །སྤྲུལ་པ་བྱེ་བ་ཕྲག་བརྒྱ་འབྱུང་། །ཞྭ་ནག་གྱོན་ནས་འགྲོ་བ་འདུལ། །ཞེས་དང་། མདོ་སྡེ་རྒྱན་ལ་སོགས་པ་རྣམས་ནས། མཆོག་གི་སྤྲུལ་སྐུ་སངས་རྒྱས་ཤཱཀྱ་ཐུབ་པ་བྱེ་བ་ཕྲག་བརྒྱ་པོའི་འགྲོ་དོན་དང་བསྟན་པ་མཉམ་པར་གསུངས་པའི་ཕྱིར། འཛམ་གླིང་བྱེ་བ་ཕྲག་བརྒྱ་ན། གནས་ཆེན་ཀརྨ་ཡང་བྱེ་བ་ཕྲག་བརྒྱ། རྒྱལ་བ་ཀརྨ་པ་རབས་བཅུ་གསུམ། བྱེ་བ་ཕྲག་བརྒྱ། སི་ཏུ་སྤྲུལ་པའི་སྐུ་ན་རིམ་ཡང་བྱེ་བ་ཕྲག་བརྒྱ་འབྱོན་པར་ངེས་པའི། དེ་ལྟ་བུའི་རྣམ་ཐར་རྒྱ་ཆེ་བ་ནི། རང་རེའི་སོ་སོའི་སྐྱེ་བོ་རྣམས་ཀྱི་བློ་ལ་ཤོང་བར་དཀའ་བས་སྤྲོས་པ་སྐྱུང་། ༈ སྤྱི་དོན་གཉིས་པ། གདན་ས་ཆེན་པོ་འདི་ཉིད་ཀྱི་ལོ་རྒྱུས་ཁོལ་བུར་ཅུང་ཙམ་ཞུ་ན། དེ་ལ་དང་པོ་གནས་ཀྱི་འབྱུང་ཁུངས་དང་། གཉིས་པ་གནས་བྱིན་གྱིས་བརླབས་ཚུལ། གསུམ་པ་གནས་སྒོ་ཕྱེ་ཞིང་བསྟན་པའི་གཞི་མ་གདན་ས་བཞེངས་ཚུལ། བཞི་པ་གནས་བཤད་དཀར་ཆག ལྔ་པ་ཕན་ཡོན་དགོས་ཆེད་དང་བཅས་པའོ། །

༈ དང་པོ་གནས་ཀྱི་འབྱུང་ཁུངས་ནི། དང་པོ་སྲིད་པ་ཆགས་པའི་དུས། ཀུན་ཏུ་བཟང་མོའི་སྤྲུལ་པ་ལས་རྡོ་རྗེ་དབྱིངས་ཕྱུག་མའི་ངོ་བོ་ནམ་མཁའ་སྟོང་པའི་ངང་ལས། ཡུམ་ཆེན་མོ་དམ་ཚིག་སྒྲོལ་མའི་སྤྲུལ་པ་རླུང་གི་དཀྱིལ་འཁོར་ཆགས་སོ། །དེ་བཞིན་དུ་གོས་དཀར་མོའི་སྤྲུལ་པ་མེ་དང་། མ་མཱ་ཀིའི་སྤྲུལ་པ་ཆུ་དང་། སངས་རྒྱས་སྤྱན་མའི་སྤྲུལ་པ་ས་རྣམས་བྱུང་སྟེ། དེ་རྣམས་འདུས་ཤིང་འཚོགས་པ་ལས། གླིང་བཞི་རི་རབ་དང་བཅས་པ་ཆགས། འབྱུང་བའི་དྭངས་བཅུད་འདུས་པ་ལས། ཉི་ཟླ་ནོར་བུ་དཔག་བསམ་གྱི་ཤིང་དང་། གནས་ཆེན་དང་གནས་ཕྲན་རྣམས་གྲུབ་སྟེ། དེ་དག་ཐམས་ཅད་ཀྱང་ཕྱི་ལྟར་ན་སེམས་ཅན་སྤྱི་མཐུན་གྱི་ལས་ལ་འབྱུང་། ནང་ལྟར་ན་ཡུམ་ཆེན་ལྔ་ཡི་རྫུ་འཕྲུལ་ལས་སྤྲུལ། གསང་བ་ལྟར་ན་འཕགས་པ་འཇིག་རྟེན་དབང་ཕྱུག་ཀརྨ་པའི་རྫུ་འཕྲུལ་ཆ་གཅིག་ཙམ་ཡིན་ཏེ། དེའི་དོན་རྒྱས་པར་ནི། སངས་རྒྱས་ཕལ་པོ་ཆེ་དང་། གསང་བ་རྡོ་རྗེ་ཐེག་པའི་རྒྱུད། བཀའ་ཐང་སྡེ་ལྔ་དང་། ལུང་བསྟན་བཀའ་རྒྱ་མའི་དབུ་རྣམས་ལས་རྒྱ་ཆེར་གསུངས་སོ། །དེ་ལ་འཇིག་རྟེན་ཆགས་ནས་རིང་པོར་མ་ལོན་པར། སྲིད་པའི་མེས་པོ་ལྷ་ཆེན་དབང་ཕྱུག་ཆེན་པོས་དྲག་པོ་འཇིགས་བྱེད་ནག་པོ་དང་། ལྷ་མོ་ཨུ་མས་དུས་མཚན་དམར་མོར་སྤྲུལ། འཇིགས་བྱེད་དེས་དྲག་པོ་ཉི་ཤུ་རྩ་བཞི་དང་། ཨུ་མས་དྲག་མོ་ཉི་ཤུ་རྩ་བཞི་སྤྲུལ་ནས། ཡུལ་ཉི་ཤུ་རྩ་བཞི་བདག་ཏུ་བཟུང་། དེ་དག་རེ་ལ་ཡང་སྤྲུལ་པ་དཔག་ཏུ་མེད་པ་སྤྲུལ་ནས་གནས་ཆེན་དང་གནས་ཕྲན་ཐམས་ཅད་བདག་ཏུ་བཟུང་བའི་ཕྱིར། དབང་ཕྱུག་གི་རྒྱུད་དང་སྒྲུབ་ཐབས་བཤད་ནས་མི་རྣམས་མུ་སྟེགས་ཀྱི་ལམ་ལ་བཀོད་དོ། །དེའི་ཚེ་གནས་འདི་ཡང་དབང་ཕྱུག་དྲག་པོའི་གསུང་གི་སྤྲུལ་པ་ཞིག་གིས་བདག་ཏུ་བཟུང་བའི་ཕྱིར། བྲག་རི་ཁྲོ་བོའི་ཆ་བྱད་འདྲ་བ་དང་། རྡོ་རྣམས་དུར་ཁྲོད་ཀྱི་ཀེང་རུས་འཁྲོལ་མའི་ཚུལ་དུ་ཡོད་དོ། །དེ་ནས་འོག་མིན་སྟུག་པོ་བཀོད་པའི་ཞིང་ཁམས་ནས། འཕགས་པ་འཇིག་རྟེན་དབང་ཕྱུག་ཀརྨ་པ་ལོངས་སྤྱོད་རྫོགས་པའི་སྐུ་དང་། སངས་རྒྱས་རྣམ་པར་སྣང་མཛད་ཆེན་པོ་བཅོམ་ལྡན་འདས་འཁོར་ལོ་སྡོམ་པར་སྤྲུལ། ཡུམ་རྡོ་རྗེ་དབྱིངས་ཕྱུག་མ་རྡོ་རྗེ་ཕག་མོར་སྤྲུལ། བྱང་ཆུབ་སེམས་དཔའ་ཉི་ཤུ་རྩ་བཞི་དཔའ་བོ་ཉི་ཤུ་རྩ་བཞིར་སྤྲུལ། བྱང་ཆུབ་སེམས་མ་ཉི་ཤུ་རྩ་བཞི་དཔའ་མོ་ཉི་ཤུ་རྩ་བཞིར་སྤྲུལ་ནས། འཁོར་ལོ་སྡོམ་པ་ལྷ་དྲུག་ཅུ་རྩ་བཞིའི་དཀྱིལ་འཁོར་གཅིག་འོག་མིན་ནས་འཛམ་བུ་གླིང་འདིར་བྱོན་ཏེ། འཇིགས་བྱེད་དང་ཡུམ་ཨུ་མ་གཉིས་ཞབས་འོག་ཏུ་མནན། དཔའ་བོ་ཉེར་བཞིས་དྲག་པོ་ཉེར་བཞི་དང་། དཔའ་མོ་ཉེར་བཞིས་དྲག་མོ་ཉེར་བཞི་བཏུལ་ནས་ཐིམ་པ་དང་། ལོངས་སྤྱོད་རྫོགས་པ་དང་། བདག་པོའི་ཚུལ་གྱིས། དབང་ཕྱུག་ཡབ་ཡུམ་གྱི་གནས་ཐམས་ཅད་བདེ་མཆོག་ཡབ་ཡུམ་གྱི་གནས་སུ་བྱིན་གྱིས་བརླབས་པ་སྟེ། རྒྱས་པར་ནི་བདེ་མཆོག་གི་རྒྱུད་འགྲེལ་རྣམས་ནས་གསུངས་སོ། །དེ་ལ་བོད་ཁ་བ་ཅན་འདིར། ཕག་མོ་ཡུམ་གྱི་གནས་གསུམ་བདེ་མཆོག་ཡབ་ཀྱི་གནས་གསུམ་དང་དྲུག་པོ་གཙོ་ཆེ་བ་ལས། ཡུམ་གྱི་གནས་གསུམ་ནི། སྟོད་ན་རྒྱ་ཆེ་བ་གངས་དཀར་གྱི་རྒྱལ་པོ་ཏི་སེ། སེང་གདོང་དཀར་མོ་སྐུ་ཡི་གནས། བར་དུ་ཡིད་ཆེས་ཤིང་ཁུངས་བཙུན་པ་ལ་ཕྱི་ཆུ་བར། སྟག་གདོང་དམར་མོའི་གསུང་གི་གནས། སྨད་ན་ས་གསུམ་འགྲན་ཟླ་དང་བྲལ་བ་ལྷོ་གནས་མཆོག་དཔལ་གྱི་ཙཱ་རི་ཏྲ། ཕག་གདོང་ནག་མོ་ཐུགས་ཀྱི་གནས། ཡབ་ཀྱི་གནས་གསུམ་ནི། ཤར་ཕྱོགས་ཀ་མ་རུ་པ་ཀཾ་པོ་གངས་ཀྱི་ར་བ་འཁོར་ལོ་སྡོམ་པ་སྐུ་ཡི་གནས། ས་སྤྱོད་སྐུའི་འཁོར་ལོ། མཚུར་མདོ་བོ་ལུང་ནི་བདེ་མཆོག་ཐུགས་ཀྱི་གནས་ཏེ། མཁའ་སྤྱོད་ཐུགས་ཀྱི་འཁོར་ལོ། བདེ་མཆོག་གི་གནས་འོག་མིན་ཀརྨ་ས་སྤྱོད་གསུང་གི་འཁོར་ལོ་ཡིན་ཏེ། རྒྱབ་རི་བྲག་བདེ་མཆོག་ཡབ་ཡུམ་གྱི་ཚུལ་དུ་ཡོད་དོ། །དོན་དེ་ལ་དགོངས་ནས་མི་བསྐྱོད་ཞབས་ཀྱི་བཀའ་འབུམ་ནས། རང་བདེ་མཆོག་ཡབ་ཡུམ་བསྒོམ་པའི་རྩ་དབུ་རྐྱང་རོ་གསུམ་གྱི་ནང་དུ་མཚུར་ཕུ་དང་ཀཾ་པོ་གནས་ནང་ཀརྨ་རི་གླིང་གསུམ་བསྒོམ། དེ་གསུམ་གྱི་དབུས་སུ་དུས་མཁྱེན་དང་གྲུབ་ཆེན་པཀྴི་དང་སངས་རྒྱས་མཉན་པ་གསུམ་བསྒོམ་ཞིང་། བདེ་མཆོག་དང་མཉན་པ་ཡབ་སྲས་དབྱེར་མེད་དུ་སྒྲུབ་པའི་ཟབ་ཆོས་རྒྱ་ཆེར་བཞུགས་སོ། །གནས་དེ་གསུམ་གྱི་བྱ་དང་རི་དྭགས་ཡན་ཆད་དཔའ་བོ་ཌཱཀིའི་རང་བཞིན་དུ་རྣམ་པར་དག་ཚུལ་ཡང་གསུངས་སོ། །ཡང་སངས་རྒྱས་འོད་སྲུང་གི་བསྟན་པ་རྫོགས་ནས་ཤཱཀྱ་ཐུབ་པའི་བསྟན་པ་མ་བྱུང་གི་གོང་དུ། རུ་ཏྲ་ཐར་པ་ནག་པོ་ཞེས་བྱ་བ། ལུས་གཅིག་ལ་མགོ་གསུམ། ལག་པ་དྲུག་དང་གཤོག་པ་ཅན། བ་སྤུ་མཚོན་ཆར་སྐྱེས་པ་ལ་མེ་འབར་བ་ཞིག་ལས་ཀྱི་དབང་གིས་བྱུང་སྟེ། དེས་ཡུལ་ཉི་ཤུ་རྩ་བཞིའི་ཞིང་སྐྱོང་དང་ཕྱོགས་སྐྱོང་དང་། འཇིག་རྟེན་སྐྱོང་བ་དང་། འཇིག་རྟེན་དཔའ་བོ་ཌཱཀི་དྲེགས་པ་ཅན་ལྷ་སྲིན་བགེགས་རིགས་ཐམས་ཅད་བྲན་དུ་བཀོལ་ནས་གནས་ཆེན་དང་གནས་ཕྲན་ཐམས་ཅད་བདག་ཏུ་བཟུང་། ལྷ་མ་ཡིན་དང་སྲིན་པོའི་རྒྱལ་པོ་ཡང་བསད་ཅིང་ཟོས། རྫུ་འཕྲུལ་གྱི་སྟོབས་ཀྱིས་རི་རབ་ཀྱང་མཛུབ་མོའི་རྩེ་ལ་ལན་གསུམ་བསྐོར། སེམས་ཅན་རྣམས་བསད་ཅིང་ཟོས་ནས་འཇིག་རྟེན་སྟོང་ལ་ཁད་དུ་གྱུར་ཏེ། དེའི་ཚེ་སངས་རྒྱས་ཐམས་ཅད་བཀའ་བགྲོས་ནས་བདུད་དེ་འདུལ་བའི་གཉན་པོར་འཕགས་པ་འཇིག་རྟེན་དབང་ཕྱུག་ཀརྨ་པར་བྱིན་གྱིས་བརླབས་ནས་བཏང་ངོ་། །དེར་བདུད་དེ་ཐབས་ཀྱིས་འདུལ་བར་དགོངས་ནས་རྟེའུ་སྔོན་པོ་གཅིག་ཏུ་སྤྲུལ་ནས་བྱོན་པ་ལ། བདུད་ཀྱིས་རྟེའུ་ཁྱུར་མིད་དུ་བྱས་པ་དང་། ཁོག་ཏུ་སླེབས་ནས་ཁོའི་རྣམ་པར་ཤེས་པ་འོག་མིན་དུ་གནས་སྤར། བདུད་ཀྱི་ལུས་དེ་ཡེ་ཤེས་ཀྱི་ལུས་སུ་བྱིན་གྱིས་བརླབས། སྤྱི་བོ་ནས་རྟའི་དབུ་བསྟན་ནས་ཁམས་གསུམ་དབང་དུ་བསྡུས། རུ་ཏྲའི་འཁོར་ཐམས་ཅད་དམ་ལ་བཏགས། དེའི་ཚེ་གནས་ཆེན་གནས་ཕྲན་ཐམས་ཅད་ཀྱི་ཞིང་སྐྱོང་ཐམས་ཅད་དབང་དུ་བསྡུས། རྟ་མགྲིན་ལ་སྤྲུལ་ནས་རྟ་མགྲིན་གྱི་གནས་སུ་བྱིན་གྱིས་བརླབས་སོ། །དེའི་ཚེ་གནས་འདི་ཡང་རྟ་མགྲིན་པདྨ་དབང་ཆེན་གྱི་གནས་སུ་བྱིན་གྱིས་བརླབས་པའི་ཕྱིར་རྒྱབ་རིའི་བྲག་ལ་ཟླ་གམ་དབང་གི་དཀྱིལ་འཁོར་འབུར་དུ་དོད་པ་གསལ་བར་ཡོད་དོ། །དེ་ནས་རྒྱལ་བ་ཤཱཀྱ་ཐུབ་པ་སྐུ་མྱ་ངན་ལས་འདའ་བའི་ཚུལ་སྟོན་པར་ཉེ་བ་ན། བདེ་བ་ཅན་གྱི་ཞིང་ཁམས་ནས་སངས་རྒྱས་འོད་དཔག་ཏུ་མེད་པས་གསེར་གྱི་པདྨའི་སྡོང་པོ་ཞིག འཕགས་པ་འཇིག་རྟེན་དབང་ཕྱུག་ཀརྨ་པ་ལ་བསྐུར་ནས། ཁྱེད་སོང་ལ་སངས་རྒྱས་མྱ་ངན་ལས་མི་འདའ་བའི་གསོལ་བ་ཐོབ་གསུངས། དེ་ནས་སྤྱན་རས་གཟིགས་བྱོན་ནས་གསོལ་བ་བཏབ་པས། ཐུབ་པས་ངའི་གདུལ་བྱ་རྫོགས་པས་མྱ་ངན་ལས་འདའ་འོ་གསུངས་སོ། །ད་དུང་བོད་ཁ་བ་ཅན་ཞབས་ཀྱིས་མ་བཅགས། སྐུའི་འོད་ཟེར་གྱིས་མ་ཁྱབ་པས་མྱ་ངན་ལས་མི་འདའ་བར་བཞུགས་པར་ཞུས་པས། བྱང་ཕྱོགས་ཁ་བ་ཅན་ནི་བྱང་ཆུབ་སེམས་དཔའ་ཁྱོད་ཀྱིས་འདུལ་ཞིང་ཡིན་པས་ཐུལ་ཅིག་གསུངས་ནས། ཐུབ་པའི་ཞལ་ནས་འོད་ཟེར་ཁ་དོག་སྣ་ཚོགས་འཇའ་ཚོན་ལྟ་བུར་འཕྲོས་ཏེ་བོད་ཁ་བ་ཅན་དུ་སོང་བས། འོད་དེ་གར་ཕོག་ས་ན་རང་བྱོན་རྣམས་བྱུང་ཚུལ་རྒྱས་པར་མ་ཎི་བཀའ་འབུམ་རྒྱས་པ་ནས་གསུངས་ཏེ། གནས་འདིར་ཡང་འོད་ཟེར་ཕོག་པའི་རྟགས། གཡོན་རིའི་ཀརྨ་སྤོས་ཤེའི་ལོགས་ལ། ཐུབ་པ་གནས་བཅུ་དང་བཅས་པ་སེར་ཕྲེང་གི་ཚུལ་དུ་བྱོན་ཏེ། དེ་ཐུབ་པ་དང་གནས་བཅུ་རང་བྱོན་ཡིན་པ་མི་འགྱུར་རྡོ་རྗེས་གསུངས་སོ། །དེ་ནས་འཕགས་པ་འཇིག་རྟེན་དབང་ཕྱུག་ཀརྨ་པ་ལ་སངས་རྒྱས་འོད་དཔག་ཏུ་མེད་པས་བཀའ་སྩལ་པ། བོད་ཁ་བ་ཅན་གྱི་འོག་ན་གྲང་བའི་དམྱལ་བ་ཟ་མ་ཏོག་ཁ་བཅད་པ་ལྟ་བུ་དེ་དྲོངས་ལ་དེ་ནས་མི་ཡི་འགྲོ་བ་སྤེལ། དེ་ནས་ཆོས་ཀྱི་ཐུལ་ལ། སེམས་ཅན་དེ་དག་མཐར་ང་ཡི་དྲུང་དུ་ཁྲིད་ལ་ཤོག་ཅིག་གསུངས་སོ། །དེ་ནས་ང་ལ་འབྲེལ་བ་ཆེར་གྱིས་ཐུལ་བཞག་པ་རྣམས་ཁྲིད་ནས་འོང་ངོ་ཞུས་ནས། རི་པོ་ཏ་ལའི་རྩེ་ནས་ཞལ་བོད་དུ་གཟིགས་ནས་འོད་ཟེར་བཀྱེས་ཏེ། བོད་ཀྱི་འོག་ཏུ་གྲང་བའི་དམྱལ་བ་ཟ་མ་ཏོག་ཁ་བཅད་པ་ལྟ་བུ་དེ་ཚལ་པ་བཞིར་བཀས་ནས་དྲངས་སོ། །དེར་གངས་ཞུ་ནས་ས་གཞི་བྱུང་ངོ་། །དེ་ནས་སྐུ་ལས་འོད་ཟེར་ཆེན་པོ་སྤྲོས་ཏེ་བོད་ཁ་བ་ཅན་ཁྱབ་པར་མཛད་དེ་ས་གཞི་བྱིན་གྱིས་བརླབས་སོ། །དེའི་འོད་གང་དུ་ཐིམ་པའི་སར་རང་བྱོན་དང་གནས་རྣམས་བྱུང་སྟེ། དེ་ཡང་མ་ཎི་བཀའ་འབུམ་དང་། རྒྱལ་པོའི་བཀའ་ཆེམས་འགའ་ཞིག་ནས་རྒྱས་པར་གསུངས་ཏེ། གནས་འདིར་ཡང་སྤང་ལ་གསེར་ཉ་རང་བྱོན་ཡོད་ཅིང་ཁྱད་པར་བོད་ཀྱི་ས་ཆ་ལ་ལེགས་སྦྱར་སཾ་སྐྲྀ་ཏ་ཡི་སྐད་དུ་ཀརྨ་ཞེས། ས་ཕྱོགས་འདི་ལ་ཀརྨ་མིང་དུ་ཆགས་པ་ནི། དེ་ཡང་སྒྲ་འགྱུར་ལ་ལས། དོན་འགྱུར་ལ་སངས་རྒྱས་ཐམས་ཅད་ཀྱི་ཕྲིན་ལས་ཏེ། འཕགས་པ་འཇིག་རྟེན་དབང་ཕྱུག་ཀརྨ་པའི་གནས་སུ་བྱིན་གྱིས་བརླབས་པའི་ཕྱིར། སྲིད་པ་ཆགས་ནས་ས་ཕྱོགས་འདི་ལ་ཀརྨ་ཞེས་མིང་ཐོགས་ཤིང་གནས་འདི་ལ་ཡུན་རིང་དུ་བཞུགས་པའི་དབང་གིས། གྲུབ་ཆེན་ཆོས་ཀྱི་བླ་མ་ལ་ཀརྨ་པ་ཞེས་ཡོངས་སུ་གྲགས་པའི་མཚན་དུ་ཆགས་པའི་ཕྱིར། ཀརྨ་པའི་གདན་ས་གནས་ཐམས་ཅད་ཀྱི་གཙོ་བོ་འདི་ཉིད་ཡིན་ནོ། །གནས་ཀྱི་བྱུང་ཚུལ་ལོ། །

༈ གཉིས་པ་གནས་བྱིན་གྱིས་བརླབས་པའི་ཚུལ་ནི། དེ་ཡང་སངས་རྒྱས་ཀྱི་ཞབས་ཀྱིས་མ་བཅགས་ལྷ་སྲིན་བྱེ་བའི་ཡུལ་དུ་སོང་བས་ཆོས་དར་དུ་མ་བཅུག་པས། མངལ་སྐྱེས་ཤ་ཁྲག་གི་ལུས་ཀྱིས་ལྷ་འདྲེ་མི་ཐུལ་བས་འཕགས་པ་འཇིག་རྟེན་དབང་ཕྱུག་ཀརྨ་པ་དེ་ཉིད། རྫུས་སྐྱེས་ཀྱི་སློབ་དཔོན་པདྨ་འབྱུང་གནས་ཞེས་བྱ་བར་སྤྲུལ་ནས་བྱོན་ཏེ། བོད་ཀྱི་ལྷ་སྲིན་ཐམས་ཅད་དམ་ལ་བཏགས། དཔལ་གྱི་བསམ་ཡས་ལ་སོགས་གཙུག་ལག་ཁང་ཆེ་བ་བརྒྱ་དང་རྩ་བརྒྱད། ཕྲན་བུ་སྟོང་དང་རྩ་གཉིས་བཞེངས། མདོ་རྒྱུད་མན་ངག་ཐམས་ཅད་བོད་དུ་བསྒྱུར། སངས་རྒྱས་ཀྱི་བསྟན་པ་དར་ཞིང་རྒྱས། གྲུབ་ཐོབ་གནམ་གྱི་སྐར་མ་ཙམ་བྱུང་ངོ་། །དེར་རྒྱལ་པོ་ཁྲི་སྲོང་ལྡེའུ་བཙན་གྱིས་ཞུས་པའི་ངོར། བསྟན་པའི་དར་རྒུད། སེམས་ཅན་གྱི་བདེ་སྡུག་འབྱུང་ཚུལ་ལུང་བསྟན་ཅིང་། རྒྱལ་པོའི་བཞེངས་པའི་གཙུག་ལག་ཁང་རྣམས་རིམ་པར་འཇིག་ཚུལ་གསུངས་པས་རྒྱལ་པོའི་ཐུགས་ཧ་ལས། སྤྱན་ཆབ་ཐབས་སུ་བཏོན། དབུ་ས་ལ་བརྡབས་ནས་ང་ཡིས་བཞེངས་པའི་གཙུག་ལག་ཁང་རྣམས་མི་རྟག་ཅིང་འཇིག་ན། མ་འོངས་པའི་དུས་སེམས་ཅན་རྣམས་ཀྱིས་བསོད་ནམས་བསགས་པ་དང་། སྡིག་སྒྲིབ་སྦྱངས་པའི་རྟེན་འཇིག་རྒྱུ་མེད་པའི་རྟེན་ཁྱད་པར་ཅན། སློབ་དཔོན་ཐབས་མཁས་ཤིང་ཐུགས་རྗེ་ཆེ་བས་བྱིན་བརླབས་དགོས་ཞེས། མཎྜལ་མཆོད་པ་རྒྱ་ཆེར་ཕུལ་ནས་ཞུས་པས། ཨོ་རྒྱན་རིན་པོ་ཆེས་རྒྱལ་པོ་རྗེ་འབངས་རྣམས་སྤྲུལ་པ་དཔག་ཏུ་མེད་པ་སྤྲུལ་ནས། ཡུལ་ལྔ། ལྗོངས་གསུམ། གླིང་གཅིག སྒྲུབ་གནས་བརྒྱད། ཀཾ་པོ་གངས་ར་ལ་སོགས་གངས་ཉི་ཤུ་རྩ་གཅིག ངོ་མཚར་བའི་གནས་མཆོག་ཉི་ཤུ་རྩ་ལྔ། འོག་མིན་ཀརྨ་ལ་སོགས་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་བྱིན་གྱིས་བརླབས་པར་མཛད་དོ། །དེ་དག་རྒྱས་པར་ཙཱ་རིའི་གནས་ཡིག་རྒྱས་པ་དང་། ཨོ་རྒྱན་རིན་པོ་ཆེའི་རྣམ་ཐར་རྒྱས་པ་དང་། འབྲས་མོ་ལྗོངས་ཀྱི་གནས་ཡིག རིག་འཛིན་རྒོད་ལྡེམ་གྱི་གཏེར་མ་དང་། ལུང་བསྟན་ཆེན་པོ་བཀའ་རྒྱ་མ་སོགས་ལས་རྒྱ་ཆེར་གསུངས་ཤིང་། ཁྱད་པར་ཐུགས་རྗེ་ཆེན་པོ་གསང་འདུས་ཀྱི་ཆོས་ཚན་གུ་རུའི་རྣམ་ཐར་གསེར་གྱི་ཕྲེང་བ་དང་། དཀོན་མཆོག་སྤྱི་འདུས་ཀྱི་ཆོས་ཚན་བླ་མའི་རྣམ་ཐར་གཉིས་ཚིག་མཐུན་པར། དེ་ནས་བསམ་ཡས་མཆིམས་ཕུ་ནས་བཟུང་བོད་ཡུལ་གྱི་ས་མ་ལུས་པར། གངས་ཏི་སེ་མན་ཆད་ནས། མདོ་ཁམས། ཙོང་ཁ། རྒྱ་ནག གན་འཇང་། ཞང་ཞུང་དང་། མི་ཉག ཧོར། ལི་ཡུལ། གྲུ་གུ། ཀོང་པོ། རྒྱ་ལ། མཆིལ། ཉོང་ཁ། ལོང་བྲག མོན་སྟག་སྒོ། བུམ་ཐང་། སྤ་གྲོ་ལ་སོགས་པ་ཐམས་ཅད་དུ་སྒྲུབ་གནས་སུ་བྱིན་གྱིས་བརླབས་ཤིང་འགྲོ་བ་དཔག་ཏུ་མེད་པ་སྨིན་གྲོལ་དུ་བཀོད་དོ། །དེ་ཡང་མཆོག་གི་སྒྲུབ་གནས་ལྔ། ངོ་མཚར་བའི་གནས་མཆོག་ཉི་ཤུ་རྩ་ལྔ་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་རྣམས་སུ། མ་འོངས་པའི་དུས་སུ་མཐོང་ཐོས་དྲན་རེག་ཀུན་གྲུབ་པ་ཐོབ་ཅིང་དངོས་གྲུབ་བརྙེས་སོ། །ཞེས་འབྱུང་བའི་ནང་ནས། གནས་ཆེན་བརྒྱ་རྩ་བརྒྱད་ཀྱི་ནང་ནས་ཡ་གྱལ་གཅིག འོག་མིན་ཀརྨ་འདི་ཡིན་པར་འདུག་ཅེས་མི་འགྱུར་རྡོ་རྗེས་ཀྱང་གསུངས་སོ། །དེ་ནི་གནས་བྱིན་གྱིས་བརླབས་པའི་ཚུལ་ལགས་སོ། །

༈ དེ་ཡང་ཨོ་རྒྱན་རིན་པོ་ཆེས་ཡེ་ཤེས་དང་ལས་ཀྱི་མཁའ་འགྲོ་དང་། ཇོ་བོ་སྔགས་ཀྱི་བདག་པོ་དང་། ཡུལ་ལྷ་གཞི་བདག་དང་བཅས་པ་ལ་བཀའ་བསྒོས་ནས་སྲུང་མར་བསྐོས་ཏེ། དུས་ལ་བབ་དུས་ལས་ཅན་སྐྱེས་བུ། གནས་འདི་ལ་དབང་བའི་གང་ཟག་ལ་གཏོད། དུས་ལ་མ་བབས་སྐལ་མེད་ཀྱིས་ཕྱེས་ན་དབང་པོ་བསྣུབས་ཞེས། དམ་ལ་བཞག་པའི་ཕྱིར། གནས་འདི་ཡང་རང་བཞིན་གྱིས་གབ་ཅིང་སྦས་པའི་ཚུལ་དུ་གནས་པའི་ཕྱིར། གནས་འདི་ལ་གནས་ཆེན་ཡིན་པར་སུས་མ་ཤེས་ཤིང་། གལ་ཏེ་ཤེས་ཀྱང་སུ་ཡིན་གྱིས་མི་ནོན་ཅིང་སྡོད་དུ་མི་དབང་བ་ཡིན་ནོ། །

༈ དོན་གསུམ་པ་གནས་ཀྱི་སྒོ་ཕྱེ་བའི་ཚུལ་ནི། ཏིང་འཛིན་རྒྱལ་པོའི་མདོ་ལས། བྱང་ཆུབ་སེམས་དཔའ་ཟླ་འོད་གཞོན་ནུས་ལུང་བསྟན་པའི་སྐབས་སུ། འདི་ནི་ཕྱི་དུས་འཇིགས་པ་ཆེན་པོ་ལ། །འདི་ལ་མ་ཕམ་ཁྱོད་ཀྱི་ང་ཡིས་དབང་། །རྟག་ཏུ་ཚངས་སྤྱོད་གཙང་ལ་རབ་གནས་ནས། །ཏིང་འཛིན་འདི་ནི་ཤིན་ཏུ་རྒྱས་བྱེད་འགྱུར། །འདི་ལ་མ་ཕམ་ཁྱེད་ཉིད་ང་ཡིས་སྤྲོད། །ཏིང་འཛིན་དམ་པ་འདི་ནི་རབ་འཚོལ་ཞིང་། །ལམ་འདིར་ཞུགས་པས་བྱང་ཆུབ་དེ་ཐོབ་འགྱུར། །ཞེས་སོགས་ནས། ཡེ་ཤེས་བླ་མེད་དེ་ནི་རབ་བསྒྲུབས་ནས། །ཕྱི་མའི་དུས་ན་དེ་ཉིད་འཇིག་རྟེན་མཆོག །རྒྱལ་བ་དྲི་མེད་འོད་ཅེས་བྱ་བར་འགྱུར། །ཞེས་དང་། མདོ་སྡེ་གཞན་དག་ལས། རྡོ་རྗེ་གདན་གྱི་བྱང་ཕྱོགས་ཁ་བའི་ལྗོངས། །ཆུ་བོ་མ་ཧཱ་ལོ་ཧི་ཏ་ཡི་འགྲམ། །རི་བྲག་ཚང་ཚིང་ཅན་ན། །དགེ་སློང་འཚོ་བྱེད་ཅེས་གྲགས་པ། །དག་པའི་འཁོར་དང་མ་དག་པའི་འཁོར་འདྲེས་མ་ཞིག །བུ་ལྔ་བརྒྱ་ལས་མི་ཉུང་བ་ལ་ལྷན་དུ། དེ་བཞིན་གཤེགས་པའི་ཡེ་ཤེས་ལ་སྤྱོད་པ། ཞེས་དང་། ཨོ་རྒྱན་རིན་པོ་ཆེས། མེ་ཏོག་ཟླ་མཛེས་བྱང་སེམས་སྤྲུལ་པ་གཅིག །གདུལ་བྱའི་མངའ་བདག་དྭགས་པོ་ལྷ་རྗེ་འབྱུང་། །ཞེས་བཀའ་གཏེར་གཉིས་ཀ་ནས་རྒྱ་ཆེར་ལུང་བསྟན་པའི་མཉམ་མེད་དྭགས་པོ་ལྷ་རྗེ་དེ་ཉིད་ཀྱི་སྲས་ཀྱི་ཐུ་བོ། དཔལ་ལྡན་དུས་གསུམ་མཁྱེན་པ་ལ། གནས་འདི་ཡི་ཁ་བྱང་ལུང་བསྟན་པ་རྒྱ་ཆེར་ནི། ཁྱེད་ཁམས་ཕྱོགས་གདུལ་བྱའི་དོན་དུ། སྔོན་གྱི་ཌཱཀི་རྣམས་ཀྱི་མཚན་དོན་དང་མཐུན་པ། གླེ་ཐུའམ་ཀརྨ་ཞེས་གྲགས་པ། སངས་རྒྱས་བྱང་སེམས་རྣམས་ཀྱི་བྱིན་གྱིས་བརླབས་པའི། བྲག་ཚེས་བརྒྱད་ཀྱི་ཟླ་བ་ལྟ་བུའི་རྩ་བ་དཔའ་བོ་དང་མཁའ་འགྲོ་ངང་གིས་འདུ་བ། ཕྱོགས་དེར་སྐལ་ལྡན་སློབ་མ་པདྨའི་མཚོ་ལ་རྐང་དྲུག་འདུ་བ་བཞིན་ཡོད་ཀྱི། དེར་གདན་ས་གྱིས་དང་བསྟན་པ་དང་འགྲོ་བའི་དོན་ཡིད་ལ་སྨོན་དགུ་འགྲུབ་པར་འགྱུར་རོ། །ཞེས་ལུང་བསྟན་ཏོ། །དེ་ཡང་ཏིང་འཛིན་རྒྱལ་པོའི་མདོ་ལས། ང་འདས་ལོ་ནི་ཉིས་སྟོང་ལ། །གདོང་དམར་ཡུལ་དུ་བསྟན་པ་འབྱུང་། །སྤྱན་རས་གཟིགས་ཀྱི་གདུལ་བྱར་འགྱུར། །དེ་ཡི་བསྟན་པའི་སྙིགས་མ་ལ། །བྱང་ཆུབ་སེམས་དཔའ་སེང་གེའི་སྒྲ། །ཏིང་འཛིན་དབང་ཐོབ་འགྲོ་བ་འདུལ། །མཐོང་ཐོས་དྲན་རེག་བདེ་ལ་བཀོད། །ཅེས་དང་། ལང་ཀར་གཤེགས་པ་བསྡུས་པ་ལས། བྱང་ཆུབ་སེམས་དཔའ་སྤྱོད་པ་མ་ངེས་པས་འགྲོ་བ་འདུལ་བ། གནས་མ་ངེས་པ་ཀུན་ཏུ་རྒྱུ་བ། ཞེས་དང་། སྲོང་བཙན་སྒམ་པོའི་ལུང་བསྟན་ལས། ཐུགས་རྗེ་ཆེན་པོའི་སྤྲུལ་པ་ཞིག །རྣལ་འབྱོར་ཞྭ་ནག་འཛིན་པ་གཅིག །ཐོག་བབས་ཚུལ་གྱིས་བྱོན་ནས་ཀྱང་། །བོད་ཡུལ་ཁ་བ་ཅན་དུ་འབྱུང་། །ཞེས་དང་། ཨོ་རྒྱན་རིན་པོ་ཆེའི་ལུང་བསྟན་འགྲོ་མགོན་ཞང་གིས། འཕྲང་སོ་བྲག་ནས་བཏོན་པའི་ཤོག་སེར་ལས། །དུས་གསུམ་མཁྱེན་པའི་བླ་མ་འདི། །མཚན་ནི་དྷརྨཱ་ཀཱིརྟི་ཡིན། །བྱམས་པའི་བསྟན་པའི་རྗེས་ཐོག་ཏུ། །སངས་རྒྱས་སེང་གེ་ཞེས་བྱ་བ། །བསྟན་པ་རབ་ཏུ་རྒྱས་པར་འགྱུར། །དྷརྨཱ་ཀཱིརྟི་ཉིད་ཡིན་ནོ། །དེ་ནས་ཚེ་འཕོས་ཕྱི་མ་ལ། །ཀཱིརྟི་ཀ་ཡི་གྲོང་ཁྱེར་དུ། །ཁྲི་ཕྲག་དྲུག་དང་སྟོང་ཚོ་དྲུག །ཐེ་ཚོམ་མེད་པར་ཤེས་པར་གྱིས། །ཞེས་དང་། ཨོ་རྒྱན་རིན་པོ་ཆེའི་ལུང་བསྟན་ལས། ཆོས་རྒྱལ་རིན་ཆེན་གླིང་པས། མོན་རྟག་སྒོ་དོམ་ཚང་ནས་གཏེར་བཏོན་པ་ལས། ཨེ་མ་ཧོཿ སྣང་མཐའ་རང་བྱུང་ཀུན་བཟང་ཀློང༔ ཐུགས་རྗེ་ཆེན་པོའི་འོད་ཟེར་གྱིས༔ པདྨ་འབྱུང་གནས་རྒྱས་པར་འགྱུར༔ སྐུ་གསུང་ཐུགས་དང་ཡོན་ཏན་དང༔ ཕྲིན་ལས་གསུམ་པོའི་དཀྱིལ་འཁོར་ནས༔ སྤྲུལ་པ་གྲངས་མེད་མཐའ་ཡས་སྤྲོ༔ མཁའ་མཉམ་འགྲོ་བའི་དོན་དུ་བྱོན༔ བྱེ་བྲག་མི་མཇེད་འཇིག་རྟེན་འདིར༔ སྤྲུལ་པ་ཡང་སྤྲུལ་བསམ་མི་ཁྱབ༔ ཁྱད་པར་འཇིག་རྟེན་འཛམ་གླིང་འདིར༔ རྒྱ་གར་བལ་ཡུལ་ཨོ་རྒྱན་དུ༔ འགྲོ་དོན་ཉི་ཟླ་ལྟ་བུ་འབྱུང༔ སྒོས་སུ་བོད་འདིར་ཆོས་གཏེར་གྱིས༔ སངས་རྒྱས་བསྟན་པ་གསལ་བར་བྱེད༔ ང་ཡི་སྤྲུལ་པ་དུ་མ་འབྱུང༔ འགྲོ་དོན་མ་ངེས་གར་ཡང་སྤྱོད༔ ང་ཡི་གནས་མཆོག་སྦྱངས་ནས་ནི༔ ཐུགས་རྗེ་ལས་བྱུང་རྟ་མགྲིན་དབང༔ དབྱིངས་ནས་བསྐྱེད་པའི་ཕག་མོ་གཉིས༔ གཉིས་མེད་ཡེ་ཤེས་མཆོག་གི་སྲས༔ སྐྱེ་བ་མངལ་ནས་སྐྱེ་བ་ཡི༔ ཆོ་འཕྲུལ་ཅིར་ཡང་སྤྲུལ་ནས་སུ༔ མི་མཇེད་ཁམས་སུ་སྤྲུལ་པ་བསྟན༔ འགྲོ་དོན་ཨོ་རྒྱན་ཡུལ་དུ་མཛད༔ དགོངས་པ་ལྷ་ཡི་ཡུལ་དུ་རྫོགས༔ དངོས་ཉིད་འཛམ་གླིང་གདུལ་བྱ་སྐྱོང༔ སྐྱེ་བ་བཅུ་གཅིག་རྒྱ་བོད་དུ༔ མཁས་གྲུབ་རྟོགས་ལྡན་ཚུལ་བཟུང་ནས༔ བསྟན་པ་ཀུན་ཏུ་དར་བ་ཡིས༔ ཟབ་རྒྱས་ཆོས་ཀྱི་ས་བོན་ཐེབས༔ ཨོ་རྒྱན་ང་ཡི་ཟབ་ཆོས་ལ༔ རྩལ་དང་ཡོན་ཏན་རྫོགས་པར་བསྟན༔ མ་འོངས་ལྔ་བརྒྱའི་ཐ་མ་ལ༔ མ་རུངས་གདུལ་བྱར་འདུལ་བ་ཡི༔ ཐུགས་རྗེ་ཆེན་པོ་སྤྱན་རས་གཟིགས༔ རྒྱལ་བ་རྒྱ་མཚོའི་ཕྲིན་ལས་ཀྱིས༔ རྒྱ་བོད་ཧོར་གསུམ་འདུལ་བ་ཡིས༔ དུས་གསུམ་མཁྱེན་པ་མཚུར་ཕུ་ཞེས༔ གྲགས་པ་ཀརྨའི་མིང་ཅན་འབྱུང༔ ཞེས་དང་། མ་གཅིག་ལབ་སྒྲོན་གྱི་གཅོད་ཀྱི་རྣམ་བཤད་ལས། དགེ་སློང་གྲགས་པའི་མཚན་ཅན་ཞེས། །དྭགས་པོ་འཛམ་གླིང་གྲགས་པ་དང་། །རྒྱལ་བ་འབྲོམ་གྱི་སྐྱེ་བ་དུས་གསུམ་མཁྱེན་པ་ཡིན་པར་གསུངས་པ་ནི། དགེ་སློང་གྲགས་པའི་མཚན་ཐོགས་པར་འབྱུང་བ་དང་། གཞན་ཡང་དེ་བས་སྔོན་ཅུང་ཞིག་བྱུང་དུས། རྒྱལ་བའི་རྒྱལ་ཚབ་དམ་པ་དེ་བོད་དུ་འབྱུང་སྟེ་རྒྱལ་བའི་མཚན་ཐོགས་པ་དང་། འདི་གཉིས་ནི་བྱང་ཆུབ་སེམས་དཔའ་ཆེན་པོ་ཡིན་པས། འདི་གཉིས་དང་ཁ་ཐུག་པའི་སེམས་ཅན་དེ་དག་ནི། སྙིགས་དུས་བོད་དུ་སྐྱེས་ཀྱང་བསོད་ནམས་ཆེ་རབ་ཏུ་གདའ་ཡི། འདི་གཉིས་ཀྱི་ཡོན་ཏན་བརྗོད་ན། ཕ་མཐའ་ཡས་པ་ནི་རྙེད་དཀའ་དེ་འདུག་གོ །དེ་ཡང་དགེ་སློང་གྲགས་པའི་མཚན་ཅན་ནི། བོད་དུ་སྐྱེ་བ་དེ་ལས་མི་བཞེས་ལ། རྒྱལ་བའི་མཚན་ཅན་ནི་སྐྱེ་བ་ཐོག་མ་ཡིན་ལ། དེ་ཡི་སྐྱེ་བ་ཕྱིར་འབྱུང་བ་ནི། མཁྱེན་པ་གསུམ་དང་ལྡན་པའི་མཚན་ཐོག་པ་འབྱུང་བ། དེ་ནས་སྐྱེ་བ་མཚན་གཅིག་པར་བརྒྱུད་དེ་སྐྱེ་བ་འགའ་ཟུང་བར་ལ། བོད་དུ་བསོད་ནམས་བསགས་པའི་ཞིང་གི་མཚན་དུ་འབྱུང་བ་ཡིན་མོད། བྱང་ཆུབ་སེམས་དཔའ་འདི་ནས་བཟུང་སངས་རྒྱས་ཀྱི་བསྟན་པ་འཇིག་མཐར་བསྡུས་པའི་བར། འདི་གཉིས་དང་མཚུངས་པའི་བྱང་ཆུབ་སེམས་དཔའ་མི་འབྱུང་ལ། སེམས་ཅན་ཡ་ཟུང་ལ་ཕན་ཐོགས་པའི་སྐྱེས་བུ་དམ་པ་ནི་འགའ་རེ་འབྱུང་སྟེ། ཚིག་གི་འཇིགས་པས་ལན་གཅིག་ཕ་མཐར་བཞག་གོ །ཞེས་གསུངས་སོ། །དེ་ལྟར་སྟོན་པའི་བཀའ་དང་། ཨོ་རྒྱན་རིན་པོ་ཆེའི་གཏེར་ལུང་དང་། ཡེ་ཤེས་མཁའ་འགྲོའི་གསུངས་རྣམས་མཚུངས་པར། འཕགས་པ་འཇིག་རྟེན་དབང་ཕྱུག་ཀརྨ་པ། དུས་གསུམ་མཁྱེན་པ་དེ་ཉིད་ནི་ངོ་བོ་ཐུགས་རྗེ་ཆེན་པོ་ལ། རྣམ་པ་བསྐལ་བཟང་གི་སངས་རྒྱས་དྲུག་པ་སེང་གེ་སྒྲ་དེ་ཉིད་དུ་ཐེ་ཚོམ་མེད་པ་དེས། གནས་ཆེན་པོ་འོག་མིན་ཀརྨ་འདིའི་གནས་སྒོ་ཕྱེ་བར་བཞེད་དེ། དགུང་ལོ་བདུན་ཅུ་དོན་གསུམ་ལ་ཀཾ་པོ་ནས་འདིར་ཕེབས་ཏེ། སློབ་དཔོན་རྣམས་གླེ་ཐུ་ནས་ཡར་ཕེབས་ཤིང་། འགག་རོང་འདིར་ཕེབས་པ་ན། སྔོན་གྲུབ་ཆེན་ཏཻ་ལོ་པས་ཨོ་རྒྱན་གྷནྡྷོ་ལའི་གནས་སུ་ཕེབས་པ་ན། སྒོ་སྲུང་ལས་དང་འཇིག་རྟེན་གྱི་ཤ་ཟ་ཌཱཀི་རྣམས་ཀྱིས་ཆོ་འཕྲུལ་ཆེན་པོ་བསྟན་ཞིང་ལམ་བཀག་པ་ལྟར། འདིའི་སྒོ་སྲུང་མཁའ་འགྲོ་མ་རྣམས་ཀྱིས་སྟག་དང་གཟིག་ཏུ་སྤྲུལ་ནས་ལམ་བཀག་པ་ན། རྗེ་དྭགས་པོ་རིན་པོ་ཆེས་ལུང་བསྟན་པའི་གནས་ཆེན་དེ་འདིར་ཡོད་པར་འདུག་དགོངས་ནས། གཡས་ལུང་མེ་རག་གི་ལ་ཁ་ནས་གཟིགས་པས། འབུམ་ཐང་སྤང་ལྗོངས་ཡིད་དུ་འོང་བར་མཁའ་འགྲོ་རྣམས་ཀྱིས་བྲོ་གར་བྱེད་པར་གཟིགས། ངར་གདོང་གི་མདོ་འདིར་ཕེབས་ནས་གཟིགས་པས། ལུང་པ་ཐམས་ཅད་སངས་རྒྱས་བྱང་སེམས་དཔའ་བོ་ཌཱཀི་རྣམས་ཏིལ་གྱི་གོང་བུ་ཁ་བྱེ་བ་ལྟར་གང་བར་གཟིགས། ཤུག་སྡོང་ལ་སྐུ་རྒྱབ་བརྟེན་ཏེ་བཞུགས་པས་བྱིན་བརླབས་ཀྱི་ཚན་ཁ་བླ་ལྷག་ཏུ་འཕེལ་ཏེ། དཔེར་ན་བྱང་ཆུབ་སེམས་དཔའ་རྒྱལ་བུ་དོན་གྲུབ་བྱང་ཆུབ་ཤིང་དྲུང་དུ་སྐྱིལ་མོ་ཀྲུང་བཅས་པ་ལྟ་བུའོ། །ཡེ་གདོད་མ་ནས་གནས་འདི་ཡི་བདག་པོ་རྗེ་ཉིད་ཡིན་མོད་ཀྱང་། འདུལ་བ་ནས་ས་ཡི་བདག་པོས་མ་བྱིན་ན་སྤོང་བའི་ཁང་པ་དང་གཙུག་ལག་ཁང་སོགས་བྱས་ན་ལྟུང་བར་བཤད་པས། རྒྱུད་སྡེ་རྣམས་ནས་ཀྱང་དཀྱིལ་འཁོར་དང་སྒྲུབ་པའི་ས་གཞི་མི་དང་ས་དེའི་གནས་བདག་ལ་སློང་དགོས་པར་བཤད་པ་དང་མི་འགལ་བར་བྱ་བའི་ཕྱིར། རུ་བ་འགའ་རེ་ཡོད་པ་ལ་འདིར་སྤྱིལ་པོ་བྱ་ཆོག་གམ་གསུངས་པས། ཆོག་པར་ཞུས། ཀླུ་ཡི་རྒྱལ་པོ་ཇོ་བོ་སྔགས་ཀྱི་བདག་པོ་ཁྱེའུ་ཡིད་དུ་འོང་བ་ཞིག་ཏུ་སྤྲུལ་ནས་ཕྱག་འཚལ་ཞིང་། ཞབས་ཀྱི་ཆུ་མིག་འདི་བདག་གི་ཕོ་བྲང་ལགས་ཏེ། འདིར་གདན་སའི་གཙུག་ལག་ཁང་མཛད་པར་ཞུ། བསྟན་པ་བདག་གིས་བསྲུང་ངོ་ཞེས་ཁས་བླངས། ཆུ་མིག་གི་མགོ་དེར་ཐུགས་དམ་གཏོར་མ་མཛད་ནས། གདན་ས་མཛད་པར་དགོངས་པ་གཏད་པས། མཉམ་མེད་དྭགས་པོ་ལ་སངས་རྒྱས་བྱང་སེམས་ཀྱིས་བསྐོར་བ་དང་། དཔའ་བོ་ཌཱཀྐི་མང་པོའང་གར་བསྒྱུར་བ་གཟིགས། བུ་སློབ་ནམ་མཁའི་སྐར་ཚོགས་ཙམ་འདུས་ཏེ་ཕྲིན་ལས་ཀྱི་སྒོ་བྱེ། བླ་མ་དང་ཡི་དམ་གྱིས་ལུང་བསྟན་པ་ལྟར། དཀར་འཛང་བསྒྲུབ་ཕུག་ཏུ་ཟླ་བ་དྲུག་ཕག་མོ་བསྒྲུབས་པས་ནུབ་ཕྱོགས་ནས་འོད་དམར་པོའི་སྣ་ལ། བཅོམ་ལྡན་འདས་མ་འཁོར་དང་བཅས་པ་ཞལ་གཟིགས་པས་གདན་ས་ཕག་མོའི་སྒྲུབ་གནས་མཆོག་ཏུ་གྱུར་ཏེ། དགུང་ལོ་བདུན་ཅུ་དོན་དྲུག་རབ་བྱུང་གསུམ་པའི་ཤིང་མོ་སྦྲུལ་གྱི་ལོ་ལ། ཆུ་མིག་གི་སྟེང་ལ། ད་ལྟ་བླ་མ་ལྷ་ཁང་འདི་དང་། ཕྱི་ཁྱམས་དགེ་འདུན་གྱི་འདུ་ཁང་གི་རྣམ་པ་ཙམ་མཛད་དེ། གཞི་བདག་ལ་བཀའ་བསྒོས་པ་དང་། གནས་སྒོ་ཕྱེས་ཤིང་གདན་ས་ཆགས་བཏབ་པའི་ལེའུ་སྟེ་གསུམ་མོ། །

བཞི་པ་གནས་བཤད་དཀར་ཆག་ལའང་གཉིས་ཏེ། ཕྱིའི་གནས་བཤད་དང་ནང་གི་རྟེན་བཤད་དོ། །དང་པོ་གནས་བཤད་ནི། འཕགས་པ་འཇིག་རྟེན་དབང་ཕྱུག་ཀརྨ་པའི་གནས། སྐུ་ཡི་གནས་ཀཾ་པོ་གངས་ཀྱི་ར་བ། གསུང་གི་གནས་ཀརྨ་རི་གླིང་། ཐུགས་ཀྱི་གནས་སྟོད་ལུང་མཚུར་ཕུ། ཡོན་ཏན་གྱི་གནས་འདབ་སྤང་ཕུག ཕྲིན་ལས་ཀྱི་གནས་ཤར་ཕྱོགས་སྤུངས་རི། ཞེས་ཡོངས་སུ་གྲགས་ཤིང་། གཞན་ཡང་ཀརྨ་པའི་གནས་དང་གདན་ས། དགོན་གནས་སྒྲུབ་སྡེ་རྣམས་གསར་རྙིང་དཔག་ཏུ་མེད་པ་ཡོད་ཅིང་། དེ་རྣམས་ཀྱི་ནང་ནས་གནས་དང་གདན་སའི་གཙོ་བོ་ནི། འོག་མིན་ཀརྨ་འདི་ཉིད་ཡིན་ཏེ། གནས་འདིར་བཞུགས་པ་ལ་བརྟེན་ནས་གནས་ཀྱི་མིང་གང་ཟག་ལ་ཐོགས་ནས་བླ་མ་ཀརྨ་པ་ཞེས་ཡོངས་སུ་གྲགས་པའི་ཕྱིར་ཏེ། དཔེར་ན་ས་སྐྱ་པ་ལ་གདན་ས་དཔག་ཏུ་མེད་ཀྱང་། གཙང་ས་སྐྱ་ལ་བརྟེན་ནས་ས་སྐྱ་ཞེས་མིང་ཐོགས་པས་གཙང་ས་སྐྱ་གདན་སའི་གཙོ་བོ་ཡིན་པ་ལྟ་བུའོ། །

དེ་ལ་མདའི་ལུང་པ་འདི་གསུམ་དབུ་རྐྱང་རོ་གསུམ་གྱི་མཚོན་བྱེད་ཡིན་ནོ། །

མདའ་ཡི་འགག་འདི་ནང་ཕྱིའི་སྒོ་སྲུང་གི་ཚུལ་དུ་དམ་ཅན་སྐྱེས་བུའི་ཕོ་བྲང་ཡོད་པས། དམ་ཅན་འགག་ཅེས་གྲགས། དེ་ནས་དཔལ་ལྡན་ལྷ་ཡི་ཕོ་བྲང་། རྗེ་དུས་མཁྱེན་གྱི་དབུ་རྗེས་སོགས་ཡོད། གྲུབ་ཆེན་ཀརྨ་པ་རྒྱ་ནག་ནས་བྱོན་དུས་སྐྱེས་བུ་ཆེན་པོས་རྟག་ཏུ་ཆིབས་ཁ་བྱེད་པ་ལ། ཡར་བྱོན་དུས་བྲག་འདི་ལ་ཐིམ་པར་གྲགས་སོ། །ལུང་མདའ་འདི་ན་རྗེ་དུས་མཁྱེན་གྱི་ལུས་མཆོད་སྦྱིན་གྱིས་ཏིང་ངེ་འཛིན་མཛད་པས། དངོས་སུ་གྱུར་པའི་རྗེས་ཕ་ཝང་ལ་གསལ་བར་ཡོད་པར་གྲགས་ཏེ་དུར་ཁྲོད་ཀྱི་མཚོན་བྱེད་རང་བྱུང་གི་དུར་ཁྲོད་ཡིན་ནོ། །

རྗེ་དུས་མཁྱེན་གྱི་དབུ་ལོ་གཏོར་བ་ལས་སྐྱེས་པར་གྲགས་པའི་ནགས་རི་གསུམ་པོ་གདུགས་ཕུབ་པའི་ཚུལ། སྤངས་ལ་གསེར་ཉ་རང་བྱོན། དུས་མཁྱེན་གྱི་གྲུབ་ཆུ་ལ་དགུན་འཁྱག་ལ་དུང་དཀར་རང་བྱོན་གྱི་གཟུགས། རྒྱབ་རིའི་བྲག་གཉིས་བདེ་མཆོག་ཡབ་ཡུམ་གྱི་ཚུལ། དེའི་རྩེ་ལ་དུས་མཁྱེན་རང་བྱོན། རྗེ་ཞྭ་དམར་པས་གཟིགས་པ་ཡོད་དེ། འདི་ཤིན་ཏུ་གསལ་ཞིང་བྱིན་བརླབས་ཀྱང་དཔག་ཏུ་མེད་པ་འབྱུང་བ་ཡིན་ཏེ། ཕལ་བས་གསལ་པོར་མི་མཐོང་བ་དེ་ཅི་ཡིན་ཨང་། ཞེས་སྤྲུལ་སྐུ་མི་འགྱུར་རྡོ་རྗེས་ཀྱང་གསུངས་སོ། །རྒྱབ་རིའི་བྲག་རྩ་ན་རྗེ་དོན་ལྡན་ཞབས་ཀྱི་རྫུ་འཕྲུལ་གྱིས་བྲིས་པའི་ཡི་གེ་དྲུག་པ་དང་། གཞན་ཡང་རྒྱབ་རིའི་བྲག་ལ་རང་བྱོན་མང་དུ་ཡོད་དེ། དེ་རྣམས་དུས་ལ་མ་བབ་ན་སྟོན་མི་རུང་གསུངས་སོ། །གཏེར་ཁ་ཡང་མང་དུ་ཡོད་དེ་འདོན་མི་རུང་གསུངས། བཅུད་ཀྱི་གཏེར་ཡིན་པས་འདོན་རྒྱུ་མེད་གསུངས་སོ། །རྗེ་དྭགས་པོའི་ལུང་བསྟན་པའི་བྲག་ཚེས་བརྒྱད་ཀྱི་ཟླ་བ་འདྲ་བ་འདི་ནི། ཐུགས་རྗེ་ཆེན་པོ་རྒྱལ་བ་རྒྱ་མཚོའི་དཀྱིལ་འཁོར་པདྨ་དབང་གི་ཟླ་གམ་རང་བྱུང་ཡིན་པས་གནས་འདི་པདྨ་གསུང་གི་གནས་ཡིན་ནོ། །སྤྱིར་བྲག་སོགས་ས་འོག་ཏུ་གནས་མཇལ་རྒྱུ་ཡོད་པ་རྣམས་ནི། ས་འོག་སྐུའི་འཁོར་ལོའི་གནས། གངས་ཏི་སེའི་རི་རྩེ་ན་བདེ་མཆོག་གི་དཀྱིལ་འཁོར་ཡོད་པ་ལྟ་བུ་ནི། མཁའ་སྤྱོད་ཐུགས་ཀྱི་འཁོར་ལོའི་གནས་སོ། །ས་ཡི་སྟེང་ན་དཔའ་བོ་ཌཱཀི་འདུ་བའི་གནས་རྣམས་ས་སྤྱོད་གསུང་གི་འཁོར་ལོའི་གནས་ཡིན་པས། འབུམ་ཐང་གི་སྤང་ལྗོངས་ཉམས་དགའ་བ། འབུ་སྲིན་སོགས་མེད་པ་འདི་ནི། གནས་འདི་ཡི་གཙོ་བོ་ཡིན་ཏེ། ལས་དག་པ་རྣམས་ཀྱི་གཟིགས་ངོར་གསུང་གི་བདེ་མཆོག་དམར་པོ་ཡབ་ཡུམ། ས་སྤྱོད་གསུང་གི་འཁོར་ལོ་དཔའ་བོ་བརྒྱད་དང་། དཔའ་མོ་བརྒྱད། རེ་རེ་ལ་འཁོར་དཔའ་བོ་ཌཱཀི་འབུམ་ཕྲག་གིས་བསྐོར་ནས་བཞུགས་སོ། །རྗེ་དུས་གསུམ་མཁྱེན་པས་མཁའ་འགྲོ་མ་འབུམ་ཕྲག་གིས་བྲོ་གར་བྱེད་པར་གཟིགས་པས་འབུམ་ཐང་དུ་གྲགས་སོ། །གནས་འདི་ཡི་འོག་གཞི་སའི་འོག་ཏུ་དེ་བཞིན་གཤེགས་པ་ཀླུ་དབང་རྒྱལ་པོའི་ཕྲིན་ལས་སྤྲུལ་པ། ས་དྲུག་ལ་གནས་པའི་བྱང་ཆུབ་སེམས་དཔའ་ཀླུ་ཡི་རྒྱལ་པོའི་མི་ཡི་ཚུལ་འཛིན་པ། ཇོ་བོ་སྔགས་བདག་སོག་མ་མེད་ཀྱི་ཕོ་བྲང་ཡོད་དེ། ཕྱག་ན་རྡོ་རྗེས་མཆོད་རྟེན་སྔོན་པོའི་རྒྱུད་ཆེན་པོ་དང་། རས་ཆུང་གི་ལུགས་ཀྱི་ཁྱུང་གི་ལོ་རྒྱུས་དང་། སྒྲུབ་པ་བཀའ་བརྒྱད་ཀྱི་རྒྱུད་དང་འདུལ་བ་སོགས་ལས་སྔགས་བདག་ཀླུ་ཐམས་ཅད་ཀྱི་གཙོ་བོ་དང་རྒྱལ་པོ་ཡིན་ཞིང་། ཀླུ་ཆེན་བརྒྱད་ཀྱང་འདི་ཡི་འཁོར་ཡིན། ཀླུ་རིགས་ཐམས་ཅད་འདིའི་བྲན་དང་ཕོ་ཉ་ཡིན་ལ། འཇིག་རྟེན་གྱི་བདེ་སྡུག་དང་སྐྱེ་འགྲོའི་དར་རྒུད། ལོ་ལེགས་ཉེས་ཐམས་ཅད་འདིའི་དབང་ཆེ་བར་བཤད་ཅིང་། འདིའི་སྲས་རི་བོ་ཞེས་བྱ་བ་ཤིན་ཏུ་ཁྲོ་གཏུམ་ཆེ་བ་ཞིག་ཡོད་པ་དེ་ལ་བཅོམ་ལྡན་འདས་ཀྱིས་ཀྱང་དགེ་བསྙེན་གྱི་སྡོམ་པ་མ་གནང་བར་ལས་མཁན་དུ་བཞག་པར་བཤད་པས། འདི་ཡི་གཡས་གཡོན་གྱི་ཆུ་མིག་རྣམས་ཤིན་ཏུ་གཉན་པས། གཤང་ལྕི་སོགས་ཆུ་མིག་གི་ཉེ་ལོགས་སུ་མ་སོང་བ་གལ་ཆེ། ཀླུ་གཏོར་དང་། ཀླུ་མཆོད་སོགས་བྱས་ན། ཀླུ་ནད་ཐམས་ཅད་ཞི་བ་དང་། ལོངས་སྤྱོད་མངའ་ཐང་རྒྱས་པའི་དངོས་གྲུབ་ཐམས་ཅད་ངེས་པར་འབྱུང་སྟེ། པཎ་ཆེན་ཤཱཀྱ་ཤྲཱིའི་ཛམ་བྷ་ལ་སེར་པོ་དང་སྔགས་བདག་གཉིས་ངོ་བོ་གཅིག་པར་གསུངས་སོ། །གནས་འདིའི་ཞིང་སྐྱོང་བཀའ་སྲུང་ནི། ཡེ་ཤེས་ཀྱི་མ་མགོན་ལྕམ་དྲལ་དང་། ལས་ལ་གྲུབ་པའི་ཀླུ་རྒྱལ་གཞོན་ནུ་གཏུམ་པོ། འཇིག་རྟེན་གྱི་དགེ་བསྙེན་དཔལ་ལྡན་ཤེས་རབ་དང་པདྨ་ཚུལ་ཁྲིམས་རྣམས་ཡིན་ཏེ། དཔལ་ལྡན་ཤེས་རབ་འདི་ནི་སངས་རྒྱས་སྟོང་གིས་བསྟན་པ་སྲུང་པའི་དགེ་བསྙེན་ཆེན་པོ་གཅིག་ལགས་སོ། །དེ་ནི་ཕྱིའི་གནས་བཤད་མདོར་བསྡུས་པའོ། །

༈ །གཉིས་པ་ནང་གི་རྟེན་བཤད་ནི་འདིར་མ་བཀོད། རྒྱས་པ་རྟེན་ཡིག་ལས་ཤེས་པར་བྱ།

༈ སྤྱི་དོན་ལྔ་པ་ཕན་ཡོན་དགོས་ཆེད་བསྟན་པ་ལ་ཡང་། ས་བཅད་བཞི་སྟེ། གནས་ལ་ཡིད་ཆེས་པའི་ལུང་། གནས་ཀྱི་ཕན་ཡོན། བཀུར་སྟིའི་ཕན་ཡོན། ཞར་བྱུང་བསྟན་པའི་མཐའ་རྒྱས་ཚུལ་དང་གསུམ་སྟེ། དང་པོ་འདུལ་བ་ལུང་ལས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་བྱང་ཕྱོགས་གངས་རའི་ཁྲོད་ནས། རྡོ་བེམ་པོས་ཀྱང་སེམས་ཅན་གྱི་དོན་བྱེད་པ་ཡོད་དོ། །གཤིན་རྗེ་གསལ་ཤིང་གི་རྒྱུད་ལས། ཉི་ཤུ་རྩ་བཞི་གནས་ཀྱི་མཆོག །ཉི་མ་བྱང་ཤར་མཚམས་ཤེད་ནས། །འདི་ནས་རི་བོ་བཅུ་གསུམ་འདས། །གངས་རིས་བསྐོར་བའི་ར་བ་ན། །རྡོ་རྗེ་ཕག་མོའི་དཀྱིལ་འཁོར་གནས། །ཞེས་དང་། མངོན་འབྱུང་གི་རྒྱུད་ལས། ཀུན་དགའ་གཞོན་ནུའི་གྲོང་ཁྱེར་ན། །བདེ་གཤེགས་ཞི་ཁྲོའི་ཕོ་བྲང་གནས། །ཞེས་དང་། ཨོ་རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། ལ་ལར་སངས་རྒྱས་རྣམས་ཀྱི་སྤྲུལ་པ་ལས༔ ས་རྡོ་རི་བྲག་ལམ་འཕྲང་ལ་སོགས་སུ༔ སྐུ་གསུང་ཐུགས་ཀྱི་སྤྲུལ་པར་རང་བྱོན་འབྱུང༔ དེ་མཐོང་ཐོས་དང་གང་འབྲེལ་ངན་སོང་མེད༔ ཕྱོགས་ནི་མ་ངེས་ཕྱོགས་མཚམས་དབུས་ལ་སོགས༔ ཉེ་རིང་མེད་ཕྱིར་ཀུན་ཏུ་འབྱུང་བར་འགྱུར༔ དེ་བཞིན་དུས་ལ་ངེས་མེད་ནམ་ཡང་འབྱོན༔ ཡུན་ལ་ཚད་བཟུང་མེད་དེ་འཁོར་མཐའི་བར༔ ཞེས་དང་། ཡིག་དྲུག་ལ་སོགས་རང་བྱོན་བསམ་མི་ཁྱབ༔ དེ་སོགས་རྣམ་པ་དུ་མར་སྤྲུལ་ནས་ཀྱང༔ འགྲོ་བའི་དོན་མཛད་བསྟན་པ་གནས་པར་འགྱུར༔ ཞེས་གསུངས་པ་དང་། རྗེ་རང་བྱུང་རྡོ་རྗེས་མཛད་པའི་ཙྭ་རིའི་གནས་བསྟོད་ལས། སྨད་རོང་བཙན་ཁ་བ་དཀར་པོ་ལ་ཐུག་ཅིང་། སྟོད་བལ་པོའི་ཡུལ་གྲུབ་པའི་གནས་ཆེན་ལ་ཐུག་གི་བར་དང་། ལྷོ་ཕྱོགས་ཀ་མ་རུ་ཡི་མཐར་ཐུག་གི་གནས་ལ་སོགས་པ་ཚུན་ཆད། གནས་དེ་དང་ཉེ་བའི་གནས་ལ་སོགས་གནས་ཕྲན་སྟོང་ཡོད་པར་བཤད། ཅེས་གསུངས་པ་དང་། ཨོ་རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། དེ་བཞིན་གནས་དང་གནས་ཕྲན་ལ་སོགས་པ༔ ཡུལ་དང་ཡུལ་འདྲ་སྦས་པའི་ཚུལ་རྣམས་སུ༔ བསྒྲུབས་པ་བྱས་པའི་ཡོན་ཏན་བསམ་མི་ཁྱབ༔ ཕལ་པའི་གནས་སུ་ལོ་གཅིག་སྒྲུབ་པ་བས༔ དེ་དག་རྣམས་སུ་ཞག་གཅིག་འགྲུབ་ཐག་ཉེ༔ དེ་དོན་ཤེས་པར་མཛོད་ཅིག་རྗེས་འཇུག་རྣམས༔ ཞེས་གསུངས་པས། གཞན་དུ་ལོ་གསུམ་སྒྲུབ་པ་དང་། འདིར་ཞག་གསུམ་སྒྲུབ་པ་ཕན་ཡོན་མཉམ། གཞན་དུ་མར་མེ་སུམ་བརྒྱ་དང་དྲུག་ཅུ་ཕུལ་བ་དང་། འདིར་གཅིག་ཕུལ་བ་མཉམ། གཞན་དུ་དར་ལྕོག་སུམ་བརྒྱ་དྲུག་ཅུ་བཙུགས་པ་དང་། འདིར་གཅིག་བཙུགས་པ་མཉམ། གཞན་དུ་བསྐོར་བ་སུམ་བརྒྱ་དྲུག་ཅུ་བྱས་པ་དང་། འདིར་བསྐོར་བ་གཅིག་མཉམ། དེ་བཞིན་དུ་ཚོགས་བརྒྱ། ཆོས་སྤྱོད། བསྐང་གསོལ། ཡིག་དྲུག་ལ་སོགས་པ་དགེ་བའི་བྱ་བ་གང་དང་གང་བྱས་པ་ཐམས་ཅད་སུམ་བརྒྱ་དྲུག་ཅུའི་འགྱུར་ཡོད་དོ། །ཁྱད་པར་སྐྱེས་མཆོག་ཀརྨ་པཀྴིའི། གཙུག་ལག་ཁང་འདི་མཇལ་བ་དང་། འབུམ་ཐང་ལ་རྡོག་པ་བཞག་ཚད་ཐམས་ཅད་ལ་ངན་སོང་མེད་ཅེས་དབུ་བསྙུང་བཞེས་པར་གྲགས་སོ། །དེས་གནས་ཀྱི་ཕན་ཡོན་དགོས་ཆེད་སོང་ནས། བཀུར་སྟིའི་ཕན་ཡོན་ནི། བཅོམ་ལྡན་འདས་ཀྱིས་གསུངས་པའི། མཆོད་རྟེན་བསྐོར་བའི་ཕན་ཡོན་ཚིགས་སུ་བཅད་པའི་མདོ་སྡེ་ལས། སྐད་ཅིག་ཙམ་གྱི་བར་དུ་ཡང་། །མཆོད་རྟེན་བསྐོར་བ་བྱས་པས་ནི། །མི་ཁོམ་བརྒྱད་རྣམས་སྟོང་བར་འགྱུར། །མཆོད་རྟེན་བསྐོར་བ་བྱས་པས་ནི། །རིན་ཆེན་བདུན་དང་ལྡན་པ་ཡི། །འཁོར་ལོས་སྒྱུར་བའི་རྒྱལ་པོ་ཡིས། །ཆོས་ཀྱི་འཁོར་ལོ་སྐོར་བར་བྱེད། །མཆོད་རྟེན་བསྐོར་བ་བྱས་པས་ནི། །འཇིག་རྟེན་དག་ཏུ་དེ་བཞིན་གཤེགས། །མཚན་རྣམས་ཀྱིས་ནི་བརྒྱན་པ་དང་། །གསེར་གྱི་སྐུ་མདོག་ཐོབ་པར་འགྱུར། །ཞེས་སོགས་མཐར་ཐུག་གི་ཕན་ཡོན་དང་། མཆོད་རྟེན་བསྐོར་བ་བྱས་པ་ཡི། །ཤ་ཟ་དང་ནི་གྲིབ་རྣམས་ཀྱིས། །དེ་དག་གནོད་པར་མི་ནུས་སོ། །ལོངས་སྤྱོད་དག་ལ་སྐྱོན་མེད་སྤྱོད། །ཅེས་བར་ཆད་སེལ་ཞིང་དངོས་གྲུབ་ཐོབ་ཚུལ། མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མཆོད་པ་གཅིག་བོར་ན། །འཛམ་བུ་ཆུ་ཀླུང་གསེར་སྲང་འབུམ་གྲངས་རྙེད། །དེ་ནི་དེ་དང་མཚུངས་པ་ཡོད་མ་ཡིན། །ཞེས་གསུངས་པས་ན། གསེར་སྲང་འབུམ་ཕྲག་གཅིག་བས་ནི། རང་འཆི་བའི་ནང་བར་བསྐོར་བ་ཅུང་ཟད་ཅིག་དགའ་ཞིང་མཆོག་ཡིན་ནོ། །རྒྱས་པར་མདོ་དེ་ཉིད་ལ་བལྟ་བར་བྱའོ། །མར་མེ་ཕུལ་བའི་མདོ་ལས། མར་མེ་ཕུལ་བའི་རྣམ་སྨིན་འདི་ཡིན་ནོ། །འཆི་དུས་བྱས་ཚེ་རྣམ་སྨིན་སྡུག་བསྔལ་དེས་མི་མྱོང་། །བྱང་ཆུབ་དམ་པ་མཆོག་ལ་སེམས་ཀྱང་དགའ། །དེ་ལ་འཆི་བའི་འཇིགས་པ་འབྱུང་མི་འགྱུར། །དྲང་སྲོང་མཆོད་རྟེན་མར་མེ་ཕུལ་བ་ནི། །དེ་ཡི་ལུས་ནི་རབ་ཏུ་འོད་གསལ་ཞིང་། །གཞན་གྱིས་མི་ཚུགས་དཔལ་དང་ལྡན་པ་དང་། །ལྷ་སྟོང་གིས་ནི་གཙོ་བོར་དེར་འགྱུར་རོ། །དེ་ནི་དེ་ཡི་མར་མེ་ཕུལ་བའི་འབྲས། །དེ་དང་དེ་ནི་ཚེ་རབས་དེས་དྲན་འགྱུར། །བྱ་བའི་འོས་མིན་ལ་ནི་དེས་མི་སྤྱོད། །གདོན་མི་ཟ་བར་དེ་ནི་ཁྱིམ་ནས་འབྱུང་། །ལོང་བར་མི་འགྱུར་ཞ་བར་མི་འགྱུར་ཞིང་། །དེ་ཡི་མིག་ནི་མེད་པར་འགྱུར་མ་ཡིན། །བདེ་གཤེགས་མཆོད་རྟེན་མར་མེ་ཕུལ་བའི་འབྲས། །རྣམ་གྲོལ་བློ་ལྡན་སྟོབས་བཅུ་རྣམས་ལྡན་ཞིང་། །དེ་བཞིན་མ་འདྲེས་ཆོས་ཀྱི་ཕ་རོལ་སོན། །ཀུན་ལས་སྤྱན་ལྡན་བདེ་བར་གཤེགས་པར་འགྱུར། །ཞེས་སོགས་རྒྱ་ཆེར་གསུངས་པ་ཡང་རྒྱས་པར་མདོ་དེ་ཉིད་ལ་བལྟའོ། །

༈ །འདི་ཡི་གནས་བཤད་དང་མཇལ་ཁ་ལེགས་པར་བྱས་ན། སྐྱེ་བ་ཐམས་ཅད་དུ་སྐད་སྙན་པ་དང་། སོ་སོ་ཡང་དག་པའི་རིགས་པ་བཞི་ཐོབ་པར་འགྱུར་ཏེ། གསལ་རྒྱལ་གྱིས་ཞུས་པའི་མདོ་ལས། སུ་དག་རྒྱལ་བའི་མཆོད་རྟེན་སྟོན་བྱེད་པ། །དེ་དག་གླིང་བུའི་སྒྲ་དང་གླུ་སྙན་དང་། །སྒྲ་སྙན་ཡིད་དུ་འོང་བར་ཐོབ་པ་དང་། །སོ་སོ་ཡང་དག་རིག་པ་ཐོབ་པར་འགྱུར། །ཞེས་གསུངས་སོ། །

༈ སྙན་དར་ཕུལ་བའི་ཕན་ཡོན་མདོ་དེ་ཉིད་ལས། རྒྱལ་བའི་མཆོད་རྟེན་ལ་ནི་གོས་ཕུལ་བས། །བསོད་ནམས་བྱམས་པ་ཆེ་བའི་གོས་གྱོན་ཏེ། །དགའ་ཞིང་ཡོན་ཏན་ཀུན་ལྡན་སེར་སྣ་མེད།  །མདོག་ཀྱང་འཇམ་ཞིང་ཁ་དོག་གསེར་འདྲར་འགྱུར། །ཞེས་གསུངས་སོ།  །ཕྱག་འཚལ་བའི་ཕན་ཡོན་ནི།  འཕགས་པ་སྤྱན་རས་གཟིགས་ཀྱི་མདོ་ལས། གང་ཞིག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ལ། །བསྐལ་པ་བྱེ་བ་བརྒྱ་སྟོང་བསྟི་སྟང་བྱེད་པ་བས། །གང་ཞིག་ཕྱི་དུས་བསྐལ་པ་མི་ཟད་འདི་ལ་ནི། །མཆོད་རྟེན་ཕྱག་འཚལ་དེ་ཡི་བསོད་ནམས་ཆེས་མང་ངོ་། །ཞེས་དང་། གསལ་རྒྱལ་གྱིས་ཞུས་པའི་མདོ་ལས། མི་རྣམས་གང་དག་སངས་རྒྱས་མཆོག་རྣམས་དང་། །སྐུ་གཟུགས་དག་ལ་མགོས་བཏུད་གུས་ཕྱག་འཚལ། །དེ་དག་ལྷ་རྣམས་དང་ནི་མི་རྣམས་ཀྱིས། །ཆེར་ཡང་རྟག་ཏུ་བཀུར་བའི་གནས་སུ་འགྱུར། །ཞེས་དང་། དམ་པའི་ཆོས་པདྨ་དཀར་པོའི་མདོ་ལས། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའི་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པའམ། །གང་གིས་རིང་བསྲེལ་གནས་པ་དེ་དག་ལ། །དྭངས་བའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་ཉིད་ཐོབ། །ཅེས་གསུངས།

༈ དར་ལྕོག་གི་ཕན་ཡོན་ནི། དགོངས་འདུས་རྩ་བའི་རྒྱུད་ལས། དུག་ཤིང་མིན་པའི་དར་ཤིང་ལ། །དྲི་མེད་དར་ལ་གཟུངས་སྔགས་བྲི། །རི་མཐོ་དགོན་གནས་གྲོང་ཡུལ་དང་། །ཚོང་འདུས་མི་མང་འདུ་སར་བཙུགས། །བདེ་བ་ལྡན་ཞིང་སྡུག་བསྔལ་བྲལ། །རླུང་རྟ་བསྐྱེད་ཅིང་བསོད་ནམས་ལྡན། །རླུང་གིས་གང་ཕོག་སེམས་ཅན་ཀུན། །གཟུངས་སྔགས་དེ་ཡིས་ཞིང་དུ་སྐྱེ། །འདི་ཡི་ཕན་ཡོན་བརྗོད་མི་ནུས། །ཞེས་གསུངས་སོ། །

༈ ཞིག་གསོ་བྱས་པའི་ཕན་ཡོན་ནི། ལུང་བསྟན་ཆེན་མོ་བཀའ་རྒྱ་མ་ལས། ཨོ་རྒྱན་རིན་པོ་ཆེས་གསུངས་པ། ད་དུས་གཙུག་ལག་རྟེན་བཞེངས་བསོད་ནམས་ལས། །མ་འོངས་ལྔ་བརྒྱ་དུས་ཀྱི་མཐའ་མ་ལ། །གང་གིས་གཙུག་ལག་རྟེན་ཉམས་གསོ་བྱེད་པ། །བརྒྱ་སྟོང་ཆར་མི་ཕོད་ཅིང་དེ་དོན་ཆེ། །གང་ཞིག་ཞིག་གསོས་བྱེད་པའི་གང་ཟག་ནི། །སྔགས་པ་བླ་དཔོན་སྐྱེ་བོ་བྱ་བྲལ་བ། །རིགས་དང་རུས་དང་ཆོ་འབྲང་ཅི་འདྲ་ཡང་། །དེ་རྣམས་རྒྱལ་བའི་ཡུལ་ལམ་སྐལ་ལྡན་མཆོག །ཐ་མལ་མ་ཡིན་ཁྱད་པར་ཅན་ཡིན་པས། །བཀུར་སྟི་རིམ་གྲོ་ཕུ་དུད་གུས་པས་མཆོད། །ཅེས་གསུངས་སོ། །དེ་ལྟར་ཞིག་གསོས་དུས་ལས་མི་རྣམས་ཀྱིས། །དགའ་ཞིང་གུས་པར་བྱས་ན་ཕན་ཡོན་ནི། །གསལ་རྒྱལ་གྱིས་ཞུས་པའི་མདོ་ལས། མི་རྣམས་སུ་དག་དགའ་ཞིང་གུས་པ་ཡིས། །བླ་མེད་མཆོད་རྟེན་རྣམས་དང་སྐུ་གཟུགས་ལ། །ལུས་ཀྱི་ལས་རྣམས་བྱེད་པ་དེ་དག་གི །སྲིད་པ་ཀུན་ཏུ་མཛོད་རྣམས་ཤིན་ཏུ་རྒྱས། །ཞེས་གསུངས་སོ། །

༈ གཞན་ཡང་ལེགས་ཉེས་ཀྱི་རྒྱུ་དང་འབྲས་བུ་བསྟན་པའི་མདོ་བསྡུས་ཏེ་བཤད་ན། མཆོད་རྟེན་ལ་མེ་ཏོག་ཕུལ་ན། ལུས་མཛེས་ཤིང་དྲི་ཞིམ་པ་དང་། མཐོ་རིས་སུ་སྐྱེ་ཞིང་འཁོར་དང་ལོངས་སྤྱོད་ཆེ་བ་དང་། མྱུར་དུ་དགྲ་བཅོམ་པ་ཐོབ་པ་སོགས་ཕན་ཡོན་བཅུ་དང་། སྤོས་ཕུལ་བས་གཟུགས་མཛེས་དྲི་ཞིམ་འཁོར་འདུ་བ། ལོངས་སྤྱོད་ཆེ་ཞིང་མཐོ་རིས་སུ་སྐྱེ་བ་དང་། མྱུར་དུ་མྱ་ངན་ལས་འདས་པ་སོགས་ཕན་ཡོན་བཅུ་དང་། དེ་བཞིན་རོལ་མོ་ཕུལ་བ་དང་། ཐལ་མོ་སྦྱར་བ་དང་། ན་བཟའ་འབུལ་བ་སོགས་ལ་ཕན་ཡོན་བཅུ་རེ་ཡོད་པར་གསུངས་སོ། །ཡོན་ཆབ་ཀྱི་ཕན་ཡོན་ནི། མདོ་སྡེ་མཛངས་བླུན་ལས། གང་ཞིག་དད་པའི་སེམས་ཀྱིས་ཆུ་སྙིམ་པ་གང་ཙམ་སངས་རྒྱས་ལ་མཆོད་དམ། དགེ་འདུན་ལ་ཕུལ་བའམ། དབུལ་ཕོངས་ལ་སྦྱིན་ན། བསོད་ནམས་འདི་ནི་བསྐལ་པ་དུ་མར་ཡང་མི་ཟད། ཅེས་གསུངས་སོ། །དེ་ཡིས་ཕན་ཡོན་དགོས་ཆེད་སོང་ནས། ཞར་བྱུང་བཤད་པ་ནི། རྗེ་ནཱ་རོ་པས། མར་པ་ལ་ལུང་བསྟན་པ་ནི། རིགས་རྒྱུད་ནམ་མཁའི་མེ་ཏོག་ཡལ། །ཆོས་བརྒྱུད་ཆུ་བོའི་གཞུང་བཞིན་རྒྱས། །ཞེས་དང་། མར་པས་མི་ལ་ལ་ལུང་བསྟན་པ་ནི། སངས་རྒྱས་བསྟན་པ་གནས་ཀྱི་བར་དུ་ཉམས་དང་རྟོགས་པའི་བརྒྱུད་པ་མི་ཆད་གསུངས་པ་དང་། རྗེ་ཀརྨ་པཀྴིའི་ཞལ་ནས། ཡང་དུས་གསུམ་མཁྱེན་པའི་རིང་བསྲེལ་མང་དུ་བྱོན་སྙམ་བྱེད་དེ། ད་དུང་སྒོམ་ཆེན་མང་པོ་འབྱུང་བའི་བརྡར་འདུག་གསུངས་པ་དང་། རླུང་སེམས་ནར་སོན་པའི་སྟོབས་ཀྱིས་དག་སྣང་དཔའ་བོ་མཁའ་འགྲོ་རྣལ་འབྱོར་ཕོ་མོའི་ཚོགས་འོད་དང་གཟུགས་བརྙན་གྱི་ཚུལ་དུ་སྣང་ཞིང་། རྣལ་འབྱོར་དབང་ཕྱུག་གྲངས་མཐའ་ཡས་རྒྱུན་མི་ཆད་པར་འབྱུང་ཞེས་དང་། གྲུབ་ཆེན་ཀརྨ་པ་ལ། རྗེ་བཙུན་སྒྲོལ་མས་ལུང་བསྟན་པ་ལ། རྣལ་འབྱོར་རང་བྱུང་རྡོ་རྗེ་ལ། །མོས་གུས་བྱེད་པའི་གདུལ་བྱ་རྣམས། །བརྒྱུད་འཛིན་རྣམ་ཐར་སྐྱོང་བ་འོང་། །བུ་སློབ་རྣམས་ཀྱིས་གོ་བར་མཛོད། །ཅེས་དང་། བརྒྱུད་པའི་མཆོག་གྱུར་འདི་ཉིད་ས། །སྔགས་འཆང་རྣལ་འབྱོར་དཔག་མེད་འབྱུང་། །མཐོང་ཐོས་དྲན་པའི་སྐལ་ལྡན་ཀུན། །ཡུན་མི་རིང་བར་སྨིན་གྲོལ་འགྱུར། །དུས་གསུམ་དུས་མེད་ཐམས་ཅད་ཀྱི། །སྐལ་ལྡན་རྣམས་ཀྱིས་མཁྱེན་པར་མཛོད། །ཅེས་དང་། གཞན་ཡང་སེམས་དཔའ་རང་བྱུང་རྡོ་རྗེ། ཚད་མ་དེའི་ཐུགས་རྗེ་ཕྲིན་ལས་རབ་འབྱམས་ལས། ཀརྨ་པའི་ཆོས་གདམས་ངག་བུ་སློབ་གདུལ་བྱའི་ཚོགས་དང་། སྐུ་གསུང་ཐུགས་ཀྱི་རྟེན་རིས་སུ་བྲིས་པ། ལུགས་སུ་བླུགས་པ། འབུར་དུ་བཏོད་པ། ཆོས་ཁྲི། བཞུགས་མལ། སྐྲ་དང་སེན་མོ་ལ་སོགས་པ་རྣམས་དང་། འཛམ་གླིང་ཡུལ་ཁམས་སྣ་ཚོགས་ཁྱབ་པར་དུས་གསུམ་འགྲོ་དོན་རྒྱུན་ཆད་མེད་པར་འབྱུང་སྟེ། ཐུགས་རྗེ་ཆེན་པོའི་མཚན་ལས་ཀྱང་། བ་སྤུའི་ཉག་མ་རེ་རེ་ཡང་། །སེམས་ཅན་ཀུན་གྱིས་གསོས་སུ་འགྱུར། །ཞེས་གསུངས་པ་བཞིན་ནོ། །ཞེས་གྲུབ་ཆེན་ཀརྨ་པ་ཉིད་ཀྱིས་གསུངས་སོ། །

༈ དེ་ལྟ་བུའི་བསྟན་པ་དང་ཕྲིན་ལས་ཀྱི་མཐའ་དར་རྒྱས་སུ་བྱེད་པ་ཡང་། སི་ཏུ་སྤྲུལ་པའི་སྐུ་ཡིས་མཛད་དགོས་པ་སྟེ། རྗེ་དུས་གསུམ་མཁྱེན་པས། འགྲོ་མགོན་རས་ཆེན་ལ། ཁྱེད་ཀྱིས་གདན་ས་འདི་ཟུང་ལ་དར་རྒྱས་སུ་གྱིས་ལ། ཚེ་རབས་ཐམས་ཅད་དུ། ཁོ་བོ་དང་འབྲལ་བ་མེད་ཅིང་ཁོ་བོའི་ཕྲིན་ལས་ཀྱི། མཐའ་ཡང་ཁྱེད་ཀྱིས་སྐྱོང་དགོས་པ་ཡིན། ཞེས་གསུངས་པའི་ཕྱིར་རོ། །དེས་ཕན་ཡོན་དང་དགོས་ཆེད་སོང་ནས།

༈ དེ་ནས་བརྩམས་དོན་ནི། འོད་དཔག་མེད་མགོན་མི་གཟུགས་ཅན། །ཀུན་མཁྱེན་ཆོས་ཀྱི་དབང་ཕྱུག་གི །ཞབས་རྡུལ་སྤྱི་བོར་རེག་པའི་མཐུས། །ལྡོག་མེད་དད་པའི་གདུང་ཤུགས་ཅན། །དགེ་སློང་རཱ་ག་ཨ་སྱ་བདག །ཕག་ལོ་ཐ་སྐར་ཟླ་བ་ལ། །འོག་མིན་ཀརྨ་མཇལ་འདོད་ཕྱིར། །ཡོར་དུ་འོང་ནས་ཆོས་རྭ་བྱས། །ཉེར་གཅིག་འོང་རྒྱུའི་ཉི་ཤུའི་ནུབ། །དགེ་འདུན་རྣམས་དང་མཐུན་མི་མཐུན། །མཇལ་ཁ་ཅུང་འོང་བརྟགས་པའི་ཚེ། །ཉམས་དང་རྨི་ལམ་འདྲེས་པའི་མཚམས། །མདུན་དེར་མ་མགོན་མགར་གསུམ་ནི། །སྐུ་ཆེ་ཆ་ལུགས་མཐུན་པར་སྣང་། །གཡས་ཕྱོགས་ལྷ་མོ་བཞུགས་པ་ཡིས། །བདག་ལ་ཤིན་ཏུ་དགྱེས་ཚུལ་གྱིས། །ལན་གསུམ་ལྷག་ལྷག་བཞད་པ་མཐོང་། །དེ་ནང་ཐོག་ཏུ་རང་མདུན་དུ། །བྱིས་པ་མང་པོས་སྐྲ་ཕུད་ཕུལ། །ཕྱིར་ཉིན་ཀརྨར་ཕྱིན་པ་ཡི། །ཉེར་གཉིས་ལྷ་བབས་དུས་ཆེན་དང་། །རྒྱལ་ཕུར་འཛོམ་པའི་སྔ་དྲོ་ལ། །བཀྲ་ཤིས་གསར་མར་གདན་འདྲེན་བྱུང་། །སྙན་དར་སྔགས་དམིགས་རྟེན་འབྲེལ་བསྒྲིགས། །སྒར་དུ་རྒྱས་པའི་སྦྱིན་སྲེག་དང་། །གསོལ་ཁ་རྒྱས་པར་བྱེད་བཅུག་ཅིང་། །རང་ཡུལ་གསོལ་ཁ་རྟེན་འབྲེལ་བསྒྲིགས། །དེ་ནུབ་ཉམས་དང་རྨི་ལམ་མཚམས། །ནམ་ཕྱེད་ཉི་མ་མཚན་མོ་ཤར། །ཡར་བལྟས་ནམ་མཁའི་དཀྱིལ་དབུས་ན། །ཉི་ཟླ་གཉིས་པོ་གཅིག་གྱུར་ནས། །ཆེ་ཆུང་ཉི་མ་བཞི་འགྱུར་ཙམ། །ཁ་དོག་བཅོ་ལྔའི་ཟླ་བའི་མདོག །འོད་ཟེར་དབྱར་ལས་བཞི་འགྱུར་ཚ། །དེ་འདྲ་ཤར་རྨིས་བསྟན་པ་ནི། །དར་ཞིང་རྒྱས་པའི་རྟགས་སུ་གོ །དེ་ནས་འཚོགས་དབུས་གདན་ཁ་རུ། །སྡོད་ཟེར་རང་ཡང་རུས་སྒོག་ཆེ། །བོད་རྗེའི་གདུང་རིགས་ཡིན་རློམས་བསྡད། །དེ་ནུབ་ཉལ་ཁའི་རྣམ་རྟོག་ལ། །རུང་ངམ་མི་རུང་བརྟགས་པ་ཡིས། །རྨི་ལམ་འཚོགས་དབུས་བདག་འདུག་པའི། །མདུན་གཡས་འཚོགས་འཇུག་བུད་མེད་ནི། །ལྟ་བས་མི་ངོམ་རྒྱན་ལྡན་གསུམ། །ལྷ་མོས་སྤྲུལ་པར་ངོས་ཟིན་ནས། །འཚོགས་དབུས་བསྡད་པ་ལེགས་ཟེར་བའི། །བརྡའ་ཡང་བསྟན་ཞིང་དགའ་ཚུལ་བསྟན། །སྡོམ་ལུང་མང་དུ་ཕོག་པའི་ནུབ། །ལྷ་མོ་དགེ་སློང་མ་ཡི་ཚུལ། །བལྟ་བས་ཆོག་མི་ཤེས་པར་སྤྲུལ། །མདུན་དུ་དགྱེས་པའི་ཚུལ་གྱིས་བཞུགས། །ལྷ་མོ་རང་བྱུང་རྒྱལ་མོ་ཡིས། །སྤྲུལ་པ་ཡིན་པར་འདུག་སྙམ་ནས། །དེ་ཉིད་དངོས་ཡིན་ཟེར་བའི་སྒྲ། །ནམ་མཁའི་མཐོངས་ནས་གསལ་བར་གྲག །དེ་མ་ཐག་ཏུ་བུད་མེད་དེ། །མོ་རང་འདྲ་བ་གསུམ་དུ་སྤྲུལ། །རེ་ཏི་མཆེད་གསུམ་ཡིན་པར་གོ །སྐུ་རིམ་སྦྱིན་སྲེག་འགའ་བླུགས་པས། །དམ་སྲི་རྒྱལ་འགོང་གཟུགས་ཅན་ཞིག །ང་ཡི་གནས་དང་ལོངས་སྤྱོད་བཅས། །མེ་ཡིས་ཚིག་ཅེས་སྨྲེ་ངག་འདོན། །རོད་ངན་བྱོལ་ཏེ་འགྲོ་བ་རྨིས། །ཅུང་ཞིག་ནུས་པ་ཉམས་སམ་སེམས། གྲགས་གྲས་ལྷ་གཉེར་ལ་སོགས་ཀྱིས། །བསྐུལ་ཏེ་ལེགས་པར་བསྒྲིགས་པ་ཡིན། །འགལ་བར་གྱུར་ན་མཁས་ལ་བཤགས། །དགེ་བས་འདི་ཉིད་མཐོང་ཐོས་རྣམས། །བདེ་བ་ཅན་དུ་རྫུས་ཏེ་སྐྱེས། །ལུས་རྟེན་དེ་ལ་བྱང་ཆུབ་ཤོག །ཀརྨ་པ་དང་དབྱེར་མེད་ཤོག །སརྦ་མངྒ་ལཾ། བཀྲ་ཤིས་དཔལ་འབར་འཛམ་གླིང་རྒྱན་དུ་ཤོག །

མཆན། ༡.གནས་ཡིག་འདི་ནི་མཁས་གྲུབ་ཀརྨ་ཆགས་མེད་ཀྱི་གསུང་འབུམ་གི་པོད་ལས་ཞལ་བཤུས་པའོ།།

༢.གནས་ཆེན་འདི་ནི་བོད་ལྗོངས་ཆབ་མདོ་ཁུལ་ཆབ་མདོ་རྫོང་ཀརྨ་ཞང་ཀརྨ་དགོན་པའི་རྒྱབ་རི་ཡིན་ཞིང་། མི་ཕལ་པས་བསྐོར་བ་བྱས་ཚེ་ཉིན་གཅིག་ལ་སླེབས་ཐུབ།

༄༅། །སྐུ་ཡི་ཐུགས་ཀྱི་གནས་མཆོག་བསྟན་པ་ནི༔ བོད་ཀྱི་མདོ་ཁམས་འབྲི་ཀླུང་གཉན་ཞེས་སུ༔ པདྨའི་བྲག་རི་སུམ་བརྩེགས་ཡོད་པ་རུ༔ དབུས་སུ་ཨོ་རྒྱན་བདག་གི་སྒྲུབ་པའི་གནས༔  བྲག་ཕུག་ཆོས་འབྱུང་ཟུར་དྲུག་དབྱིབས་ཅན་ཡོད༔ རང་བྱུང་མཆོད་རྟེན་ངོ་མཚར་ཅན་བཞུགས་ལ༔ ཀློང་ཐང་སྒྲོལ་མ་ཞེས་བྱར་འབྲེལ་བའོ༔ མ་འོངས་ང་སྤྲུལ་ནམ་མཁའ་ཞེས་བྱ་འབྱུང༔

༄༅། །སྐུའི་ཐུགས་ཀྱི་གནས་ལས་འབྲི་ཀླུང་ཕྱོགས་ཀྱི་མཉན་ནི། ཕ་རིའི་མཉན་པ་ཚང་སྔར་ས་དེའི་བདག་པོ་ཡིན་པས་དེའི་སྒྲས་བསྡུས། པདྨའི་བྲག་རི་སུམ་བརྩེགས་ནི་ཚུ་རིའི་པདྨ་རི་མཐོ། དེར་ངག་སྤྲུལ་ནམ་མཁའི་མིང་ཅན་ནི་རྫོགས་ཆེན་བཞི་པ་མི་འགྱུར་ནམ་མཁའ་རྡོ་རྗེ།

༄༅། །གནས་ལ་རྩེ་མཐོ་པདྨའི་རི། །ལྷ་གཅིག་སྒྲོལ་མའི་ཞིང་ཁམས་ཡིན།།ཐུགས་རྗེ་ཆེན་པོའི་ཕོ་བྲང་ཡིན། །པདྨ་རྒྱལ་པོའི་སྒྲུབ་གནས་ཡིན། །རི་ལ་ལྟོས་དང་འཕགས་པའི་སྐུ། །སེམས་ཉིད་ངལ་གསོའི་བཀོད་པ་རྫོགས། །བྲག་ལ་ལྟོས་དང་འཕགས་པའི་གསུང་། །རང་བྱོན་ཡིག་དྲུག་བགྲང་ལས་འདས། །ཤིང་ལ་ལྟོས་དང་སྔོ་ལྗང་ཚལ། །གཡུ་ལོ་བཀོད་པའི་ཁྱད་ཆོས་རྫོགས། །དུག་སྦྲུལ་གདུག་པས་མཐའ་ནས་བསྐོར། །སྐལ་དམན་བློ་ཆུང་བགྲོད་པར་བཀའ། །གྲུ་འཛིན་རི་བོའི་མཚན་ཉིད་རྫོགས། །མདུན་ན་ཐུགས་སྤྲུལ་པདྨ་སྐྱེས། །འགྲོ་བའི་དོན་ལ་སྤྲུལ་པ་འགྱེད། །འདབས་ན་འཕགས་མའི་ཕོ་བྲང་མཛེས། །ལྷ་མོའི་འགྲོ་དོན་དུས་ལ་བབས། །ཐུགས་རྗེ་ཆེན་པོའི་ཐུགས་ཀ་ན། །པདྨ་དགྱེས་པའི་སྒྲུབ་ཕུག་ཡོད།  །ལྷ་ལ་སྤྱན་རས་གཟིགས་དབང་བསྟེན།  །སྔགས་ལ་ཡི་གེ་དྲུག་མ་བཟླ།  །ཆོས་ལ་བྱམས་དང་སྙིང་རྗེ་བསྒོམ།  །ལམ་ལ་རྒྱལ་སྲས་བདེ་ལམ་སྙོགས།  །སྡུག་བསྔལ་འདོད་ཀྱང་བདེ་བ་འབྱུང་། །འདི་བདེ་ཕྱི་སྐྱིད་ཨ་ལ་ལ། །བདེ་ནས་བདེ་བའི་གནས་སུ་འགྲོ། །གཏན་བདེ་མི་འགྱུར་ཨ་ལ་ལ། །གསོལ་བ་བླ་མ་རྗེ་ལ་འདེབས། །ཐུགས་རྗེ་མི་གཡེལ་ཨ་ལ་ལ། །ཡི་དམ་སྤྱན་རས་གཟིགས་ལ་ཞུ། །དངོས་གྲུབ་མི་འགྱང་ཨ་ལ་ལ། །ཨ་ལ་ལ་སྟེ་ངོ་མཚར་ཆེ། །

མཆན། གནས་ཡིག་འདི་རྫ་དཔལ་སྤྲུལ་གྱི་བཀའ་འབུམ་ཀ་པོད་ཀྱི་གཏམ་པདྨའི་ཚལ་གྱི་ཟློས་གར་ལས་ཞལ་བཤུས་པའོ། །

༄༅། །སྒྲུབ་པ་བཀའ་བརྒྱད་ལས་གསུང་པདྨའི་རིགས་ཟངས་མདོག་དཔལ་གྱི་རི་བོ། ནང་ལྟར་ན་འཕགས་མཆོག་ཐུགས་རྗེ་ཆེན་པོའི་གནས། གསང་བ་ལྟར་ན་པདྨ་གསུང་དབང་དྲག་རྟ་མགྲིན་རོལ་པའི་དཀྱིལ་འཁོར་གྱི་གནས་ཡིན། ཨོ་རྒྱན་ཆེན་པོས་གསུང་པདྨ་རིགས་ཀྱི་གནས་མཆོག་རྟ་མགྲིན་གྱི་གནས་སུ་བྱིན་གྱིས་བརླབས་པའི་སྟོབས་ཀྱིས་གནས་ཀྱི་མཚན་ལ་ཡང་པདྨ་རི་མཐོ་རུ་གྲགས། གནས་རིའི་རྩེ་ཨོ་རྒྱན་ཆེན་པོའི་སྒྲུབ་ཕུག་ཏུ་ཨ་མོ་ལི་ཀའི་རྡོ་ལེབ་ཤེལ་ལས་གྲུབ་པའི་ཁང་བཟང་ཉམས་དགའ་བ་རུ། ཡི་དམ་རྒྱུད་སྡེ་གསར་རྙིང་གང་ལ་མོས་པ་དེའི་དཀྱིལ་འཁོར་རང་བྱོན་ཡོད་པ་པདྨ་ཤེལ་ཕུག་ཏུ་གྲགས། འདི་ལ་རྩེ་བསྐོར་གཅིག་བྱས་ན་ཙོང་རྒྱལ་མ་ཎི་པདྨེ་ནས་སྟེང་དུ་རི་རྩེར་བསྐོར་ནས་ཀླུ་མོ་རྒྱས་མདའ་ནས་སྒྲོལ་མ་དཀར་མོ་རང་བྱོན་དང་ཡིག་དྲུག་རྣམས་མཇལ་ནས་དུར་ཁྲོད་ཆེན་པོ་བརྒྱད་དང་བྱིན་རླབས་མཉམ་པའི་དུར་ཁྲོད་ཀླུ་མོ་རྒྱལ་ཡོད་ས་དེ་ནས་ལ་སྟེང་དུ་སོང་ན་རྩེ་བསྐོར་གཅིག་ཡིན། དེ་ལ་མ་ཎི་བྱེ་ཆུང་གཅིག་གི་ཕན་ཡོན་ཡོད། བར་བསྐོར་གཅིག་བྱས་ན་བྱེ་ཆེན་གཅིག་གི་ཕན་ཡོན་ཡོད། བར་བསྐོར་ལ་ཀློང་སྒྲོལ་མ་ལྷ་ཁང་མཇལ་ནས་ནུབ་ཕྱོགས་འབྲུ་རྒྱུད་ཀྱི་ཙོང་རྒྱལ་པདྨོ་མཇལ་ཉི་ཟླ་མ་བརྒལ་བར་པདྨ་རི་མཐོ་བཅས་བསྐོར་བ་ལ་བར་བསྐོར་དུ་གསུངས། མཐའ་བསྐོར་ལ་གནས་ཀྱི་ཡན་ལག་ཐམས་ཅད་བསྐོར་དགོས་ཞེས་གསུངས་སོ། །

མཆན། གནས་ཡིག་འདི་གྲུབ་དབང་ལུང་རྟོགས་རྒྱལ་མཚན་དཔལ་བཟང་པོའི་གསུང་འབུམ་གླེགས་བམ་བཞི་པ་ལས་ཞལ་བཤུས་པའོ། །

༄༅། །གནས་མཆོག་པདྨ་རི་མཐོ་ནོར་བུ་ཡོངས་རྫོང་གི་གཞི་བདག་ལ་བསང་དང་ཕུད་གཏོར་འབུལ་བའི་རིམ་པ་བཀྲ་ཤིས་དགའ་སྟོན་བཞུགས། ཧཱུྃ་བཀྲ་ཤིས་མཛེས་ལྡན་ནོར་བུ་ཡོངས་རྫོང་གི། །རྩེ་མོར་རྣམ་འཕྲུལ་ལྷ་ཡི་བཀོད་པ་ལྟར། །རིན་ཆེན་གཞལ་མེད་དབུས་ན་དགྱེས་རོལ་པའི། །དམ་ལྡན་གཉན་ཆེན་རྡོ་རྗེ་བློ་གྲོས་ནི། །ནོར་བུའི་ཐོར་ཚུགས་དར་ཐོད་དབུ་ལ་བཅིངས། །བཻ་ཌཱུརྱ་སྣོད་མཆོག་བདུད་རྩིའི་བཀང་བ་བསྣམས། །ཟ་བེར་གོས་གྱོན་རབ་བརྗིད་རྒྱལ་པོའི་ཆས། །བཙུན་མོ་སྲས་བློན་འཁོར་དང་བཅས་པ་རྣམས། །བདག་གིས་འབོད་པའི་གནས་འདིར་གཤེགས་སུ་གསོལ། །ཡི་གེ་ཨོཾ་ཨཱཿཧཱུྃ་གིས་བྱིན་རླབས་པའི། །བསང་མཆོད་འདོད་དགུར་འཆར་བའི་དུད་སྤྲིན་གྱིས། །ནམ་མཁའ་ཁྱབ་པར་འབུལ་ལོ་བཞེས་སུ་གསོལ། །ཟག་མེད་འདོད་དགུར་འཆར་བའི་ཕུད་མཆོད་ཀྱིས། །སྟོང་གསུམ་གང་བར་འབུལ་ལོ་བཞེས་སུ་གསོལ། །ཁྱེད་ལ་བདག་གི་ཕྲིན་ལས་བཅོལ་བ་ནི། །གློ་བུར་རྐྱེན་ཀག་བར་ཆད་ཞི་བ་དང་། །ཚེ་བསོད་དཔལ་འབྱོར་སྐྱེ་འགྲོ་དབང་དུ་བསྡུས། །ལོག་འདྲེན་དགྲ་བགེགས་མ་ལུས་རྡུལ་དུ་རློག །མདོར་ན་ཡིད་ལ་འདོད་པའི་རེ་བ་ཀུན། །འབད་མེད་འགྲུབ་པའི་སྡོང་གྲོགས་མཛད་དུ་གསོལ། །གསོལ་མཆོད་འདི་ཉིད་སྒྲུབ་བརྩོན་བླ་མ་བློ་གྲོས་དབང་ཕྱུག་གིས་བསྐུལ་ངོར༧རྡོ་རྗེ་བདེ་ཆེན་གླིང་པས་གླིང་ཤེས་པདྨ་ཤེལ་རི་དབང་ཆེན་ཡེ་ཤེས་རོལ་པའི་སྒྲུབ་གནས་སུ་ཤིང་བྱི་ལོའི་སྨིན་དྲུག་ཟླ་བའི་ཉེར་དགུ་ལ་བྲིས་པ་དགེ་ཞིང་བཀྲ་ཤིས་པར་གྱུར་ཅིག །

༄༅། །ཨོཾ་སྭ་བྷ་ཝས་སྦྱང་སྟོང་པའི་ངང་ལས་བསང་རྫས་འདོད་པའི་ཡོན་ཏན་ལྔ་དང་ལྡན་པ་ཟད་མི་ཤེས་པའི་བརྒྱན་དུ་གྱུར། ན་མ་སརྦ་ཏ་ཐཱ་སོགས་བརྗོད་ཀྱེེ་གནས་ཀྱི་མཆོག་གྱུར་རྩེ་མཐོ་པདྨ་རི། །ཕྱི་ལྟར་གྲུ་འཛིན་ཞིང་གི་བཀོད་པ་རྫོགས། །ནང་ནས་རྩ་གསུམ་རྒྱལ་བའི་དཀྱིལ་འཁོར་གྲུབ། །དེ་ན་བཞུགས་པའི་སངས་རྒྱས་བྱང་སེམས་དང་། །ཁྱད་པར་རྗེ་བཙུན་སྒྲོལ་མ་སྤྲུལ་འཁོར་དང་། །བླ་མ་ཡི་དམ་མཁའ་འགྲོ་ཆོས་སྐྱོང་བསང་། །ཡུལ་སྐྱོང་དགེ་བསྙེན་པདྨ་མཆོག་རབ་རྩལ། །བཙུན་མོ་སྲས་དང་བློན་འཁོར་གྲངས་མེད་བསང་། །མདུན་འཁོད་དཔལ་གྱི་དཀོད་ལྡན་སེངྒེ་འཁྲིག །གནས་པའི་རྩ་གསུམ་རྒྱལ་བ་རབ་འབྱམས་དང་། ཁྱད་པར་གནས་བརྟེན་ཆེན་པོ་འཁོར་བཅས་བསང་། །གནས་བདག་ཞོམ་རོལ་བོན་ཆུང་འཁོར་བཅས་དང་། །མ་བཟའ་དམ་ཅན་གནོད་སྦྱིན་ཁོལ་བོ་ལ། །ཁྱད་པར་ལྷ་བཙན་རྡོ་རྗེ་ཐོག་རྒོད་བཅས། །ཕྱོགས་དེར་གནས་པའི་ལྷ་ཀླུ་གཞི་བདག་བསང་། །འདན་ལུང་ཉིན་སྲིབ་གནས་གཞི་གཏེར་གྱི་བདག །སྤྲུལ་པ་ཡང་སྤྲུལ་སྲས་བློན་བཙུན་མོ་བཅས། །འདིར་གཤེགས་འདོད་ཡོན་ལྔ་ལྡན་བསང་མཆོད་བཞེས། །ཀུན་ཏུ་བཟང་པོའི་རྣམ་འཕྲུལ་ལས་བྱུང་བའི། །ཕྱི་ནང་གསང་གསུམ་མཆོད་པའི་སྤྲིན་ཆེན་པོ། །རང་རང་ཡིད་ལ་གང་དགོས་འདོད་དགུའི་ཆར། །ཟག་མེད་བདེ་བས་ནམ་ཡང་ཚིམ་གྱུར་ཅིག །སྔོན་ཚེ་པདྨ་ཐོད་ཕྲེང་སྤྱན་སྔ་རུ། །ཁས་བླང་བཞིན་དུ་སངས་རྒྱས་བསྟན་པ་སྲུངས། །དཔལ་ལྡན་བླ་མའི་ཞབས་པད་བརྟན་པ་དང་། །ཆར་ཆུ་དུས་འབབས་ལོ་ཕྱུག་རྟག་ཏུ་ལེགས། །རྒྱལ་ཁམས་མཐའ་དབུས་བདེ་བའི་ཕྲིན་ལས་མཛོད། །ཅེས་པ་ཀརྨ་པ༧རྒྱལ་མཆོག་བཅུ་དྲུག་པ་རང་བྱུང་རིག་པའི་ཡེ་ཤེས་རྡོ་རྗེས་ཤར་མར་གསུང་པ་ཇི་བཞིན་བཀོད་པའོ།།

༄༅། །ཧྲཱིཿ གྲུབ་པའི་གནས་མཆོག་རྩེ་མཐོ་པདྨ་རི། །རྩ་གསུམ་ཞི་ཁྲོ་གནས་སྐྱོང་རྒྱ་མཚོ་ལ། འདོད་ཡོན་བདུད་རྩིས་བསང་གི་མཆོད་པ་འབུལ། །དགྱེས་པ་ལེགས་བཞེས་མཆོག་ཐུན་འབད་མེད་རྩོལ། །ཨོཾ་གུ་རུ་དཱེ་བ་ཌཱཀྐི་ཎི་བྷུ་མི་པ་ལ་སཱ་པ་རི་ཝ་ར་པུ་ཛ་མི་གྷ་ཨ་ལ་ལ་ཧོཿ གསེར་སྐྱེམ་ལ་འདོད་ཡོན་གསེར་སྐྱེམ་མཆོད་པ་འབུལ་བ་དང་། ཚོགས་ཀྱི་མཆོད་པ་དང་། ཕུད་ཀྱི་མཆོད་གཏོར་གསུར་གྱི་མཆོད་པ་ཁ་སྒྱུར་རོ། ཞེས་ཁྱེའུ་ཀུ་རུ་དྷཱི་ཡིས་རྨི་ལམ་ཚོགས་སུ་པདྨ་ཤེལ་ཀྱི་བྱ་སྐྱིབས་སུ་བྲིས། ཀྱེེཿ རྒྱལ་བའི་བཀའ་སྡོད་རྡོ་རྗེ་བློ་གྲོས་གཉན། །འཁོར་བཅས་འདིར་སྤྱོན་བསང་གི་མཆོད་པ་བཞེས། །ལྗོངས་འདིར་ནད་འཁྲུགས་ལོ་ཉེས་མ་གཏང་ལ་། །བདག་གི་གང་བཅོལ་མངོན་དུ་འགྲུབ་པར་མཛོད། །ཨོཾ་བྷུ་མི་པཱ་ལ་ཡཀྵ་བྷ་ཝནྟུ་ཨེ་དཾ་བ་ལིངྟ་ལ་ཁ་ཁ་ཁཱ་ཧི་ཁཱ་ཧིཿ གོང་ལྟར་ཁ་སྒྱུར་འཇམ་དབྱངས་བཞད་པ་རྡོ་རྗེས་ཤེར་དཀའ་པདྨ་ཕུག་དུ་གནས་འགྲེལ་གྱིས་ཚུལ་དུ་སྡོད་སྐབས་ཁྱེའུ་ཀུན་ཏུ་རྒྱུ་བས་སྤེལ་བ་དགེའོ།།

༄༅། །གང་ཟག་གི་རྒྱུད་ཚོད་མཐོ་དམན་དང་བསྟུན་པའི་མཐོང་སྣང་མི་འདྲ་བ་གསུམ་འབྱུང་སྟེ། སྐྱེ་བོ་ཕལ་བ་ལམ་ལ་མ་ཞུགས་པ་རྣམས་ཀྱི་སྣང་ངོར། ལྷུན་སྟུག་རིའི་རྩེ་མོ་མཁའ་ལ་བསྙེགས་པ་ལྟ་བུ་ལ། སྣ་ཚོགས་པའི་ནགས་ཚལ་དང་ནེའུ་གསིང་ཡིད་དུ་འོང་བས་ཀུན་ནས་མཛེས་པ། དབྱར་དགུན་ཀུན་ཏུ་ཁམས་དྭངས་ཤིང་རིག་པ་སྤྲོ་ལ། རི་མཐར་འབྲས་བུ་བཟང་པོས་བཀླུབས་པའི་ཞིང་ས་དང་། འགག་གཡས་གཡོན་གྱི་ཆུ་གཉིས་མདུན་དུ་འདུས་པ་སོགས་ཕྱི་རོལ་ཡུལ་ལྟར་བསྔགས་པར་འོས་པ་ཙམ་ཞིག་ཡོད། ལམ་ཞུགས་ཐེག་དམན་ཉན་རང་གི་རིགས་ཅན་རྣམས་ཀྱི་སྣང་ངོར། ཕྱི་ཚུལ་དབེན་པའི་རི་བོ་ལ། ནང་ཚུལ་འཕགས་པའི་གནས་བརྟན་ཆེན་པོ་ནགས་ན་གནས་འཁོར་དགྲ་བཅོམ་སྟོང་དང་བཞི་བརྒྱ་བཅས་པ་བདེན་བཞིའི་དེ་ཁོ་ན་ཉིད་ཀྱི་དོན་དུ་ཐུགས་གཞོལ་ཏེ་གནས་པ་ཡོད། ལས་ཅན་གསང་སྔགས་རྡོ་རྗེ་ཐེག་པའི་སྐྱེས་བུ་གྲུབ་བརྙེས་རྣམས་ཀྱི་སྣང་ངོར། རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོས། རི་ལ་བལྟས་ན་འཕགས་པའི་སྐུ། །འཕགས་པ་སེམས་ཉིད་ངལ་གསོའི་ཚུལ། །ཞེས་གསུངས་པ་ལྟར། ཕྱི་ཚུལ་འཕགས་པ་སེམས་ཉིད་ངལ་གསོའི་རྣམ་པ་ལ། ནང་ལྟར་རིག་འཛིན་དུ་མའི་བསྟི་གནས། གསང་བ་ལྟར་ན་སློབ་དཔོན་པདྨ་འབྱུང་གནས་ཀྱི་ཡང་གསང་སྐུ་ཐུགས་ཀྱི་དཀྱིལ་འཁོར་གདོད་མ་ནས་ལྷུན་གྱིས་གྲུབ་པ་སྟེ། མདོ་ཁམས་གནས་ཆེན་ཉེར་ལྔའི་ཡ་གྱལ་སྐུ་གསུང་ཐུགས་ཀྱི་གནས་ཡིན་པར་ཡོངས་སུ་བསྔགས་ཤིང་ལུང་བསྟན་པ་ལྟར་ཤེས་པར་བྱའོ། །གཞན་ཡང་སྒྲུབ་པའི་བསྟི་གནས་དེའི་ལྷོའི་ལྡེབས་ངོས་སྤང་དང་ནགས་ཚལ་སྤེལ་མའི་ཆ་ལ་ཕུར་པ་རྡོ་རྗེ་གཞོན་ནུའི་སྒྲུབ་ཕུག་རྡོ་རྗེ་རྫོང་དང་། དེའི་གཡོན་ཟུར་རྒྱང་གྲགས་ཕྱེད་ཀྱི་མཚམས་ན་རྟ་མགྲིན་སྒྲུབ་ཕུག་ཡོད། རྟ་མགྲིན་སྒྲུབ་ཕུག་ནས་ཅུང་ཟད་སོང་བས་སློབ་དཔོན་གྱི་སྒྲུབ་གནས་པདྨ་ཤེལ་གྱི་ཕུག་པ་ཞེས་བྱ་བ་ཕྱི་ཚུལ་རྣམ་ཐར་སྒོ་གསུམ་མཚོན་བྱེད་ཆོས་འབྱུང་གི་དབྱིབས་ཅན་ལ། ནང་དུ་རྡོ་ལེབ་ཤེལ་ལྟར་དྭངས་པའི་ངོས་སུ་ཡི་དམ་གསར་རྙིང་གི་དཀྱིལ་འཁོར་གདོད་མ་ནས་རང་ཆས་སུ་བཞུགས་པ་ཡོད། དེའི་ཀླད་དུ་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོའི་མཚམས་ཁང་ཡོད་ལ། ཕུག་པ་དེ་རུ་ལྷ་ཆོས་དང་མཐུན་པའི་གཏམ་པདྨའི་ཚལ་གྱི་ཟློས་གར་ཞེས་གྲགས་པའི་བསྟན་བཅོས་བརྩམས། དེ་ནས་ཐུར་དུ་ཕྱིན་པས་མ་གཟའ་དམ་གསུམ་གྱི་སྒྲུབ་ཕུག་དང་། མཁའ་འགྲོ་ཡེ་ཤེས་མཚོ་རྒྱལ་གྱི་སྒྲུབ་ཕུག་ཟེར་བ་ཡོད། དེའི་འོག་ཏུ་སྟག་བྲོ་གཟིག་བྲོ་མ་ཞེས་བྱ་བ་སྔོན་ཚེ་སློབ་དཔོན་པདྨ་འབྱུང་གནས་རྗེ་འབངས་དང་བཅས་པ་གནས་འདིར་བྱོན་པ་ན། ཡུལ་སྐྱོང་དགེ་བསྙེན་པདྨ་མཆོག་རབ་རྩལ་དང་། འདན་གྱི་འབར་ལྷ་རྩེ་རྒྱལ། ལྷའི་དགེ་བསྙེན་རག་བཀྲ་བྲག་དཀར་ལ་སོགས་པའི་བསུ་མ་རྣམས་ཀྱིས་ཕྱི་ཚུལ་སྟག་གཟིག་དོམ་དྲེད་སོགས་ཀྱི་རྣམ་པར་རྫུས་ནས་སྲ་མཁྲེགས་རྡོ་རྗེའི་བྲག་ལ་བཞག་པའི་གར་འགྲོས་རྗེས་ཤུལ་དང་། གུ་རུ་མཚོ་སྐྱེས་རྡོ་རྗེའི་ཡབ་ཡུམ་གྱི་རང་བྱོན་ལོངས་སྐུ་མཐོང་བ་རང་གྲོལ་ཞེས་པ་ཡོད། དེ་ནས་གཡས་སྐོར་དུ་གྱེན་དུ་ཕྱིན་པས་ད་ལྟ་མདོ་མཁྱེན་བརྩེའི་མཚམས་ཁང་ཞེས་མདོ་མཁྱེན་ཡེ་ཤེས་རྡོ་རྗེས་ཟབ་ཆོས་གཏེར་དུ་བཞེས་པའི་ཕུག་པ་དང་། སློབ་དཔོན་གྱི་ཕྱག་རྗེས་སྐྱབས་སྦྱིན་པ་ཞེས་བྱ་བ་དཔོག་དཀའ་ཞིང་མཆོག་ཏུ་ངོ་མཚར་བའི་བཀོད་པ་འབུམ་གྱིས་གཏམས་པ་ཡོད། གཞན་ཡང་ཕྱོགས་དེར་གནས་བརྟན་ཆེན་པོ་ནགས་ན་གནས་ཀྱི་སྐུ་རྗེས་དང་། ནང་དུ་རྟ་ཕག་ཡབ་ཡུམ་གྱི་རང་བྱོན་འབུར་དུ་དོད་པའི་སྒྲུབ་གནས་ཕུག་ལེབ་མ་ཟེར་བ་སོགས་རང་བྱུང་གི་ཕུག་པ་དང་རང་བྱོན་གྱི་རྣམ་པར་བཀྲ་བ་དུ་མ་ཡོད་ཅིང་། དེའི་གཤམ་དུ་གཡས་ཀྱི་ཆ་ལ་ཀླུ་མོ་དགྱེས་པའི་དུར་ཁྲོད་དང་གཡོན་གྱི་ཆ་ལ་མཁའ་འགྲོའི་བྲོ་ར་ཟེར་བའི་དུར་ཁྲོད་ཡོད་ལ། ཀླུ་མོ་དགྱེས་པའི་དུར་ཁྲོད་ནི་དུར་གྱི་ཡོན་ཏན་མཐའ་དག་ཐད་ཀར་ཚང་ཞིང་། ཁྱད་པར་རྒྱ་གར་རྡོ་རྗེའི་གདན་གྱི་ཤར་ལྷོའི་མཚམས་སུ་ཡོད་པའི་དུར་ཁྲོད་ཆེན་པོ་བསིལ་བའི་ཚལ་ནས་དུར་ས་དུམ་བུ་ཞིག་ཆད་དེ་བྱིན་གྱིས་བརླབས་པར་གྲགས་པས་འབྲེལ་ཚད་དོན་ལྡན་གྱི་དུར་ཁྲོད་ཁྱད་པར་ཅན་དུ་ངེས་ཤིང་། ཡང་མཁའ་འགྲོའི་བྲོ་ར་ནི་སློབ་དཔོན་གྱི་གསང་སྔགས་ལམ་རིམ་ལས་ཇི་སྐད་འབྱུང་བ་ལྟར། ནུབ་མཐོ། བྱང་སྐྱོབ། ཤར་གཞོལ། ལྷོ་འདུས། མདུན་ཐང་། ཆུ་བོ་དབང་གི་ཕྱོགས་ནས་འབབ་པ། ཉི་མ་རྟག་ཅིང་གངས་མཐོང་བ། གསལ་ཆ་ཆེ་ཞིང་སོ་ཐུབ་པ། ཚ་གྲང་སྙོམས་ཤིང་གཞི་བདག་འཇམ་པ། ཐག་ཉེ་རིང་རན་ཞིང་ས་བཙན་པ། བཀྲ་ཤིས་ཤིང་གྲུབ་ཐོབ་ཀྱི་ཞབས་ཀྱིས་བཅགས་པ། དཔའ་བོ་དང་མཁའ་འགྲོ་མའི་ཁྱུ་བསྟི་ཞིང་དགྱེས་རྒུར་སྤྱོད་པའི་དུར་ཁྲོད་དེ། དུར་ཁྲོད་དེ་ལྟ་བུ་ལ་ཕུང་པོ་བསྐྱལ་བའི་ཕན་ཡོན་ནི། ཆགས་མེད་རི་ཆོས་ལས། སྲོག་དང་བླ་དང་རྣམ་ཤེས་གསུམ། །སྲོག་ནི་གཤེད་མ་འདྲེ་ཡིས་བཅད། །རྣམ་ཤེས་ལས་ཀྱི་རྗེས་སུ་འབྲང་། །བླ་དེ་ཚེ་འདས་གཟུགས་བཟུང་ནས། །དུར་ས་དེ་ལ་གནས་པ་ཡིན། །དུར་ས་ལེགས་ན་བླ་དེ་དར། །གསོན་པོ་རྣམས་ལ་མགོན་སྐྱབས་ནུས། །ཕ་མེས་བླ་ཡིས་བསྲུང་ཞེས་བྱ། །དུར་ས་ངན་ན་བླ་དེ་གུད། །གསོན་པོ་རྣམས་ལ་སྐྱབས་འཚོལ་བས། །མི་ཁྱག་ན་ཚ་གོད་ཁ་འབྱུང་། །དེ་ཕྱིར་དུར་ས་གལ་ཆེ་སྟེ། །ས་དཔྱད་ངན་པར་རོ་བསྐྱལ་ན། །དུད་འགྲོ་ཡིན་ཀྱང་རྡུལ་དུ་བརླག །དེ་སྐད་འཕགས་པ་འཇམ་དཔལ་གྱི། །རྒྱ་ནག་གཙུག་ལག་རྒྱུད་ནས་གསུངས། །ཞེས་གསུངས་པ་ལྟར་ཡིན་ལ། ཡང་སྒོས་དུར་ཁྲོད་ཆེན་པོ་འདི་ལྟ་བུ་དང་འབྲེལ་བ་ཐོབ་ན་སྨོས་མ་ཐག་པའི་ཕན་ཡོན་མཆིས་པ་གཞིར་བྱས་པའི་སྟེང་། གཤིན་པོ་ཁོ་རང་གི་ལས་ཀྱིས་བསྐྱོད་པའི་རྣམ་ཤེས་ཀྱང་ཕན་པར་གསུངས་པས་དེས་ན་ཀུན་གྱི་ཆོག་ཤེས་སྤངས་ཏེ་འདི་ལྟ་བུའི་དུར་ཁྲོད་ལ་བསྟེན་པ་ཤིན་ཏུ་གལ་ཆེ་བ་ལགས། དུར་ཁྲོད་འདི་ནས་པདྨ་ཤེལ་ཕུག་བརྒྱུད་དེ་རིའི་ཤར་གྱི་ཕྱོགས་སུ་སོང་བས་གྲུབ་ཆེན་ས་ར་ཧ་པའི་སྒྲུབ་གནས་དང་། གུ་རུ་རྡོ་རྗེ་གྲོ་ལོད་སོགས་ཀྱི་དྲག་པོའི་སྒྲུབ་གནས་དུ་མ་ཡོད་ཅིང་། གནས་དེ་ནི་གྲུ་གསུམ་ཧམ་ཁུང་གི་དབྱིབས་སུ་གནས་ལ། མིང་ཡང་ཧམ་ཁུང་ནང་ཞེས་གྲགས། ཨ་སྤྲུལ་འགྱུར་མེད་རྡོ་རྗེ་སོགས་ཀྱི་མཚམས་ཁང་ཡང་དེའི་ཉེ་འདབས་བཀྲ་ཤིས་མཚེར་ཞེས་འབོད་པ་ན་ཡོད། གཞན་ཡང་གནས་འདིར་བསྟན་པ་ཕྱི་དར་ལ་པཎྜི་ཏ་སྨྲྀ་ཏི་དང་། ལྷ་ལུང་དཔལ་གྱི་རྡོ་རྗེ། སྨ་གཡོ་གཙང་གསུམ། བླ་ཆེན་དགོངས་པ་རབ་གསལ། བླ་མ་སེ་བཙུན་པ། ཁུ་རྔོག་འབྲོམ་གསུམ། དཔལ་ལྡན་དགོན་པ་བ། སྐྱུ་ར་ཨ་སེང་། ཁམས་པ་ཨ་སེང་། འགྲོ་མགོན་ཆོས་འཕགས། སྒ་ཨ་མྱེ་དམ་པ། སྐྱོབ་པ་འཇིག་རྟེན་གསུམ་མགོན། སྤྱན་སྔ་ཆོས་ཀྱི་གྲགས་པ། རྒྱལ་བ་བསོད་ནམས་རྒྱ་མཚོ། པཎ་ཆེན་སངས་རྒྱས་མཉན་པ། ཞུ་ཆེན་ཚུལ་ཁྲིམས་རིན་ཆེན། གཏེར་སྟོན་ཉི་མ་གྲགས་པ། ངོར་མཁན་ཆེན་དཔལ་ལྡན་ཆོས་སྐྱོང་། རྫོང་སར་འཇམ་དབྱངས་མཁྱེན་བརྩེ། མི་འགྱུར་ནམ་མཁའི་རྡོ་རྗེ། ཀོང་སྤྲུལ་ཡོན་ཏན་རྒྱ་མཚོ། མི་ཕམ་ཕྱོགས་ལས་རྣམ་རྒྱལ། གཏེར་སྟོན་ལས་རབ་གླིང་པ། རང་བྱུང་རིག་པའི་རྡོ་རྗེ་སོགས་སྐྱེས་ཆེན་དམ་པ་དུ་མའི་ཞབས་ཀྱིས་བཅགས་ནས་བཞུགས་ཡུལ་རྡོ་རྗེ་རྫོང་དང་པདྨ་ཤེལ་ཕུག་སོགས་སུ་བཞུགས་པས་རྟོགས་པའི་ཡོན་ཏན་དཔག་ཏུ་མེད་པ་བརྙེས་ཤིང་ཀོང་སྤྲུལ་ཡོན་ཏན་རྒྱ་མཚོས་གནས་ཆེན་བྱིན་འབེབ་མཛད་ལ། འཇུ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་རྒྱུད་རྒྱལ་དུས་ཀྱི་འཁོར་ལོའི་ཊཱིཀ་ཆེན་མཛད་ནས་མཐར་དེ་དང་ཉེ་བའི་གནས་དིལ་མགོའི་རི་ཁྲོད་དུ་སྐུའི་བཀོད་པ་བསྡུས་པར་གྲགས། མདོར་ན་རིའི་ལྡེབས་སུ་ཡོད་པའི་བྱ་སྐྱིབས་དོད་ཙམ་རེའི་ནང་དུ་ཐབ་རྡོ་རེ་དང་དུད་དྲེག་ཆགས་ཚུལ་ལ་གཞིགས་པས་ཀྱང་རི་སུལ་ཐམས་ཅད་བྱ་བཏང་རྣལ་འབྱོར་གྱིས་ཁྱབ་པའི་ལོ་རྒྱུས་ལྡན་པར་དཔོག་ཐུབ་ཅིང་། དེ་ལ་ཕྱག་སྐོར་སོགས་བགྱིས་པའི་ཕན་ཡོན་ནི། འདུལ་བ་ལུང་ལས། གང་ཞིག་དད་ཅིང་མོས་པའི་སེམས་ཀྱིས་སུ། །སངས་རྒྱས་མཆོད་རྟེན་ལ་ནི་གོམ་འདོར་ན། །མཛམ་བུའི་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་འཛམ་བུ་ཆུ་བོའི་གསེར་སྲང་སྟོང་ཕྲག་བརྒྱ་སྦྱིན་པར་བྱིན་པ་བས་ཀྱང་། གང་ཞིག་དད་པའི་སེམས་ཀྱིས་སངས་རྒྱས་ཀྱི་གདུང་བཞུགས་པའི་མཆོད་རྟེན་ལ་གོམ་པ་གཅིག་འདོར་བ་བསོད་ནམས་ཁྱད་པར་དུ་འཕགས་པར་གསུངས་ལ། འདིར་ནི་རབ་འབྱམས་རྒྱལ་བའི་དཀྱིལ་འཁོར་ཐམས་ཅད་མ་ལུས་ཤིང་ལུས་པ་མེད་པ་ཏིལ་གྱི་གང་བུ་ཁ་ཕྱེས་པ་ལྟ་བུ་དངོས་སུ་བཞུགས་པས་སྔར་གྱི་ཕན་ཡོན་མཆིས་པ་གཞིར་བྱས་པའི་སྟེང་། དེ་བས་ཀྱང་ཕན་ཡོན་ཆེ་བར་གྲུབ་ལ། མ་མཐོང་མ་བསྐོར་བར་ལུས་ངག་ཐ་མལ་དུ་བསྡད་ན། སྦས་པའི་གནས་ཆེན་རང་ཡུལ་ཡོད་པ་ལ། །གཞན་ཡུལ་གནས་མཇལ་འགྲོ་རྣམས་སྙིང་རེ་རྗེ། །རྒྱལ་བའི་བཞུགས་གནས་སྒོ་རྩར་ཡོད་པ་ལ། །ས་རྡོ་ཡིན་སྙམ་འཚོལ་རྣམས་སྙིང་རེ་རྗེ། །ཞེས་པར་སོང་བས་མི་རིགས་ཤིང་། དེའི་སྐོར་ཚད་ནི་ངག་སྒྲོས་ལ་བཅུ་གཅིག་ཡིན་ཟེར་ཡང་། ལར་ནི་སྒྲིབ་པ་དག་མ་དག་གི་རྟགས་ལ་སྐོར་ཚད་བྱེད་པ་དོན་ལ་གནས་ཤིང་གཏན་ཚིགས་ཀྱང་དེ་ཆེ་བས་ཤིན་ཏུ་འཐད་པར་སེམས་སོ། །

མཆན། ༡ གནས་ཡིག་འདི་ཐུབ་བསྟན་ལུང་རྟོགས་ཉི་མས་བརྩམས་པའི་མདོ་ཁམས་འདན་མའི་ཡུལ་གྱི་ལོ་རྒྱུས་ཁྱད་ནོར་ངོ་མཚར་སུམ་ལྡན་ཨ་འབྲུ་གཡང་གི་ནོར་བུ་ཞེས་པའི་དེབ་ལས་ཞལ་བཤུས་པའོ། །

༢.གནས་འདི་བཞུགས་པའི་ཡུལ་ནི་སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་འདན་ཁོག་གྲོང་བརྡལ་འདན་སྒྲོང་མ་ལྷ་ཁང་གི་རྒྱབ་རི་ཡིན། བསྐོར་ལམ་བདེ་ཞིང་མི་ཕལ་བས་ཉིན་གཅིག་ལ་སྔ་མོ་བསྐོར་ཐུབ། དེ་ཡི་ཞོར་སེང་གེ་གནམ་རྫོང་དང་འདན་སྒྲོལ་མ་ལྷ་ཁང་བཅས་མཉམ་དུ་འཁོད་ཡོད།

༄༅། །སྐུ་ཡི་ཡོན་ཏན་གནས་མཆོག་བསྟན་པ་ནི༔ བོད་ཀྱི་མདོ་ཁམས་ལྷོ་ཟླ་ཞེས་བྱ་བར༔ ཁམས་དབུས་ས་མཚམས་ཁ་ཞེས་བྱ་བ་རུ༔ བྲག་རི་དཔལ་ཆེན་ཧེ་རུ་ཀ་ཡི་ཚུལ་༔ དབུ་ཡི་གསེང་དུ་བདག་གི་སྒྲུབ་གནས་དང༔ དེ་ཡི་ལོགས་སུ་སྐུ་གསུང་ཐུགས་རྟེན་དང༔ མིང་ཅན་མིང་མེད་གཏེར་ཁ་བཅོ་ལྔ་སྦས༔ ལུང་པ་བརྒྱད་ནི་ཕོ་བྲང་གླིང་དགུ་སྟེ༔ ཡང་དག་ལ་སོགས་དཔལ་ཆེན་བརྒྱད་རྣམས་བཞུགས༔ ཞི་ཁྲོ་བྱོན་པའི་ལུང་པའི་མདའ་དག་ནི༔ གྲིབ་ཀྱི་ཕྱོགས་སུ་གཏེར་ཆེན་བརྒྱད་ཙམ་སྦས༔ ཀླུང་ཤོད་མདའ་རུ་མཆོད་རྟེན་བརྒྱད་བཞེངས་པ༔ ཉམས་པའི་དུས་ན་དཀར་ཆག་ས་སྟེང་འབྱུང༔

༄༅། །སྐུའི་ཡོན་ཏན་གནས་ཁ་ཞེས་བྱ་བ་ནི། ནང་ཆེན་ཕྱོགས་རྫ་ཆུའི་རྒྱུད་གཏམ་ཁོག་ཁ་བྲག་གམ་ཁ་ལ་རོང་སྒོ། ཕ་རི་ཟངས་མདོག་དཔལ་རི་ཚུ་རི་ཁྲོ་བོ་དབུ་དགུར་གྲགས་པ། འདི་ནས་གཏེར་ཆེན་ཉིད་ཀྱིས་ཐུགས་སྒྲུབ་བར་ཆད་ཀུན་སེལ་དང་། གནས་ཡིག་སྤྱན་དྲངས་ཤིང་གནས་སྒོ་ཕྱེས་ཞེས་གསུངས་སོ། །

༄༅། །ན་མོ་གུ་རུ་དྷེ་ཝ་ཌཱ་ཀི་ནི་ཧཱུྃ༔ ཤིང་ཕོ་འབྲུག་གི་ལོ་སྤྲེལ་ཟླ་བའི་ཚེས་བཅུ་ལ༔ མདོ་ཁམས་སྐྱི་འབྱམས་སེངྒེ་རྫོང་གི་གཡས་ལོགས་ཀླུ་བདུད་ནག་པོའི་ཕོ་བྲང་གི་སྟེང༔ རང་བྱུང་གི་རྟེན་མཆོག་བཞུགས་པའི་གནས་ཉི་ཟླ་འདྲ་བའི་ཕུག་པར༔ ཨོ་རྒྱན་རིན་པོ་ཆེ་བཞུགས་པའི་དུས་ལྷ་སྲས་བདག་གི་ཚོགས་ཀྱི་འཁོར་ལོ་རྒྱ་ཆེར་བཤམས༔ གསེར་གྱི་མཎྜལ་ཕུལ་ཏེ༔ ཕྱག་དགུ་ཕྲུགས་སུ་མཚལ་ནས་གསོལ་པ༔ ཀྱེ་ཧོཿ དུས་གསུམ་གྱི་སངས་རྒྱས་ཐམས་ཅད་ཀྱི་བདག་ཉིད༔ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་འབྱུང་གནས༔ ཐེག་པ་ཆེ་ཆུང་གི་དགེ་འདུན་རྣམས་ཀྱི་མངའ་བདག༔ རིག་འཛིན་ཡོངས་ཀྱི་རྒྱལ་པོ༔ དཔལ་ཧེ་རུ་ཀ་དང་གཉིས་སུ་མེད་པ༔ མཁའ་འགྲོ་ཀུན་ལ་དབང་བསྒྱུར་བ༔ རིག་འཛིན་པདྨ་འབྱུང་གནས་དར་གཅིག་བདག་ལ་གསན་དུ་གསོལ༔ སྤྱིར་གསང་སྔགས་ལ་གནས་དུས་འཁོར་ཡོ་བྱད༔ ཕུན་སུམ་ཚོགས་པ་འཛོམས་དགོས་པ་དང༔ དེའི་ནང་ནས་སྒྲུབ་པའི་གནས་མཆོག་གལ་ཆེ་བར་གསུངས་གདའ་བས༔ དེ་ལ་སྔར་གུ་རུ་རིན་པོ་ཆེ་ཉིད་ཀྱི་མི་ཟད་པ་རྒྱན་འཁོར་ལྔ་ཡི་བྱིན་གྱིས་བརླབས་པའི་མདོ་ཁམས་འདི་ཡི་གནས་ལྔ་ཕྲག་ལྔ་རྣམས་གསུངས་པའི་ནང་ནས་ཡོན་ཏན་གྱི་གནས་སྒྲུབ་པ་བཀའ་བརྒྱད་ཀྱི་ཕོ་བྲང་དེ་ལ༔ དཔལ་མགོན་རང་བྱོན་ཡོད་པར་ལུང་བསྟན་པ་དེ་ཉིད་ཡོད་པའི་ཕྱོགས་མཚོན་དང༔ དབྱིབས་རྟེན་མཆོག་དེར་ཡོད་པའི་རང་བྱོན་རྣམས་གསུང་དུ་གསོལ༔ ཅེས་ཞུས་པས༔ ཨོ་རྒྱན་རིན་པོ་ཆེ་དར་གཅིག་དགོངས་པ་ལ་བཞུགས་ནས་བཀའ་སྩལ་པ༔ ཀྱེ་ཧོཿ གསོན་ཅིག་ལྷ་སྲས་མུ་རུབ་བཙན༔ ཚེ་དབང་རིག་འཛིན་བརྙེས་པའི་པདྨ་བདག༔ ཆོས་སྐུའི་སངས་རྒྱས་རྣམས་ཀྱི་ཀློང་དུ་གཅིག༔ ལོངས་སྐུའི་བདེ་བར་གཤེགས་པ་ཀུན་རྫོགས་ནས༔ སྤྲུལ་སྐུའི་སངས་རྒྱས་ཤཱཀྱ་ཐུབ་པར་བསྟན༔ སླར་ཡང་བསྟན་གཉིས་ཟུང་འཇུག་སྐྱོང་བའི་ཕྱིར༔ ཨོ་རྒྱན་རྒྱལ་པོའི་སྲས་ཀྱི་ཚུལ་དུ་སྤྲུལ༔ རྒྱ་གར་ཡུལ་དུ་ཐོས་བསམ་མཐར་ཕྱིན་ནས༔ རྒྱལ་བའི་བསྟན་པ་ཉི་མ་ཤར་བཞིན་བྱས༔ ལས་འཕྲོའི་དབང་གིས་བོད་ཀྱི་ཡུལ་དུ་འོངས༔ ས་བཏུལ་གཙུག་ལག་ཁང་བཞེངས་ཆོས་ཀྱང་བསྒྱུར༔ མི་ཟད་རྒྱན་འཁོར་ཉི་ཤུ་རྩ་ལྔ་ཡི༔ བྱིན་གྱིས་བརླབས་པའི་གནས་ཆེན་ལྔ་ཕྲག་ལྔ༔ ཡོན་ཏན་ལྔ་ཡི་ཡོན་ཏན་མཆོག་གི་གནས༔ ལྷོ་ཟླའི་ལུང་པ་པདྨ་ཁ་བྱེ་འདྲ༔ མཚན་ནི་ཁ་ལའི་ཁ་རག་གནས་ལས་ཏེ༔ ཁམས་ཀྱི་ཟླ་ཉིན་ཁ་ལ་རོང་སྒོ་ཞེས༔ དབྱིབས་ནི་ནམ་མཁའ་འཁོར་ལོ་བཀྲ་ཤིས་གནས༔ ས་གཞི་པདྨ་འདབ་བརྒྱད་བཀྲ་ཤིས་གནས༔ ཡུལ་གྱི་དགེ་བཅུ་བཀྲ་ཤིས་ཀུན་ནས་བསྐོར༔ གསང་སྔགས་རྣལ་འབྱོར་ཐམས་ཅད་འབྱོན་པའི་ས༔ ཧེ་རུ་ཀ་ཡི་ཕོ་བྲང་ཆེན་པོ་ལ༔ དེ་དབུས་དཔལ་ཆེན་པོ་དང་གཉིས་མེད་པའི༔ བྲག་རི་ཁྲོ་བོ་དབུ་དགུ་ཕྱག་བཅོ་བརྒྱད༔ ཡངས་རི་བདེ་གཤེགས་ཞི་བའི་ལྷ་ཚོགས་གསལ༔ ཤར་རི་ཡང་དག་ཧེ་རུ་ཀ་ཡི་གནས༔ རི་འདབས་པདྨ་བདག་གིས་བཞེངས་པ་ཡིས༔ སྐུ་གདུང་ཆ་བརྒྱད་དེ་རུ་ཚེ་ཆུ་ཡོད༔ ཤར་ལྷོ་མ་མོའི་གནས་མཆོག་ན་བུན་རྫོང༔ ལྷོ་ཕྱོགས་གཤིན་རྗེའི་ཕོ་བྲང་གཏམ་གྱི་བྲག༔ ལྷོ་ནུབ་ཟངས་མདོག་དཔལ་རི་རིག་འཛིན་གནས༔ ནུབ་ཕྱོགས་པདྨ་གསུང་གི་ཕོ་བྲང་ནི༔ བྲག་རི་དམར་པོ་བ་གམ་བརྩེགས་པ་འདྲ༔ ནུབ་བྱང་བྲག་རི་ནག་པོ་མཆོད་བསྟོད་གནས༔ བྱང་ཕྱོགས་བྲག་རི་རྩེ་མཐོ་ཕུར་པའི་གནས༔ བྱང་ཤར་ཁྱུང་ཆེན་ལྡིང་འདྲ་དྲག་སྔགས་གནས༔ དབུས་ཀྱི་དཔལ་ཆེན་དབུ་ཡི་གསེང་དག་ཏུ༔ ཨོ་རྒྱན་བདག་གི་སྒྲུབ་ཕུག་ངོ་མཚར་ཅན༔ བདུད་རྩི་ཡོན་ཏན་བསྒྲུབས་པའི་གནས་ཡིན་པས༔ བདུད་རྩིའི་ཐོད་པ་རྡོ་ལ་རང་གྲུབ་ཡོད༔ བདུད་རྩིའི་ཟེགས་མ་འཐོར་བའི་ཐིག་ལེ་དང༔ བདུད་རྩིས་བྲིས་པའི་ཡི་གེ་ཨཱཿདཀར་ཡོད༔ རིག་འཛིན་བྲག་ལ་པདྨའི་སྒྲུབ་ཕུག་དང༔ བརྟན་མ་བཅུ་གཉིས་དམ་ལ་བཏགས་རྗེས་ཡོད༔ ཨོ་རྒྱན་བདག་གིས་རྫུ་འཕྲུལ་བསྟན་པ་ནི༔ སྐུ་དང་སྐུ་ཡི་ཆ་ཤས་རྒྱན་རྣམས་གསལ༔ བདེ་བར་གཤེགས་པ་རྣམས་ཀྱིས་བྱིན་བརླབས་པའི༔ སྐུ་གསུང་ཐུགས་རྟེན་རང་བྱུང་རྣམ་པར་བཀྲ༔ ཡར་ལུང་ཤེལ་གྱི་བྲག་ཕུག་ཉིད་དང་མཚུངས༔ གནས་འབྲེལ་བྱས་ཚད་རིག་འཛིན་གྲལ་ལ་ཚུད༔ ཚོགས་འཁོར་བྱས་ན་ངན་སོང་སྐྱེ་སྒོ་ཆོད༔ ཕྱག་བསྐོར་གང་བྱེད་ལས་ངན་སྡིག་སྒྲིབ་འདག༔ མཐོང་བ་ཙམ་གྱིས་ཆོས་ཉིད་མངོན་མཐོང་ནས༔ རྩེ་གཅིག་བསྒྲུབ་ན་མཆོག་ལ་ལྟ་ཅི་སྨོས༔ བརྟན་མ་བཅུ་གཉིས་ལྷན་ཅིག་བྲན་དུ་གནས༔ མཐའ་དམག་བཟློག་པའི་ལས་རྣམས་འདི་ནས་བྱ༔ དེ་ལྟ་བུ་ཡོན་ཏན་ལྡན་པའོ༔ དཀར་ཆག་ཐོབ་ལ་གཏེར་དུ་སྦ་བར་མཛོད༔ མ་འོངས་འགྲོ་དོན་ཆེན་པོ་འབྱུང་བར་ངེས༔ ལྷ་སྲས་ཡབ་ཡུམ་ཐུགས་ལ་དེ་ལྟར་ཞོག༔ ཅེས་གསུངས་པས༔ ངང་ཚུལ་རྒྱལ་མོས་སྒྲོན་མེ་བཏེགས་ཏེ༔ ལྷ་སྲས་བདག་གིས་ཡི་གེར་མགྱོགས་པར་བྲིས༔ ཕྱིས་སྒྲུབ་གནས་དེ་ཡི་སྒོ་ཁར་གཏེར་དུ་སྦས༔ འདི་མ་འོངས་པའི་དུས་གནས་འདིའི་ཉེ་བའི་ཆར་སྐྱེ་བར་འདུག་གོ༔ དེའི་དུས་སུ་འཕྲད་པར་ཤོག་ཅིག༔ རྒྱལ་བློན་ཐུགས་འགལ་སྤྱུགས་ན་ཡང༔ ད་དུང་བློ་སེམས་མ་ལོག་པས༔ བོད་ལ་ཕན་ཐབས་འདི་བཞིན་བྱ༔ ཕྱི་རབས་པ་རྣམས་དྲན་པར་གྱིས༔ ས་མ་ཡ༔ རྒྱ་རྒྱ་རྒྱ༔ ཁོ་བོ་མཆོག་གྱུར་གླིང་པ་རང་ལོ་ཉེར་དགུ་ཁྲུམས་ཟླ་བའི་ཚེས་བཅུ་ལ་ཀུན་དགའ་དཔལ་བཟང་ངེད་གཉིས་ཀྱིས་ཁྲོ་བོ་དབུ་དགུའི་དབུའི་གསེང་ཨོ་རྒྱན་གྱི་སྒྲུབ་ཕུག་གི་སྒོ་གདོང་ནས་སྤྱན་དྲངས་པའོ། །ཤོག་དྲིལ་ཞེང་སོར་བཞི། དཀྱུས་མཐོ་གང་བཞི་འདུག གནས་དེར་ཕབ་པའི་ཡི་གེ་པ་ནི་མཁས་དབང་གཞན་དོན་དང་ཉེ་གནས་རིན་ཆེན་གཉིས་ཀྱིས་བུ་ཡིག་གཉིས་བྲིས། མ་ཕྱིའི་ཕྱེད་ཀ་གཏེར་ཚབ་ཏུ་སྦས། ལྷག་མ་བྱིན་བརླབས་ཞུས། གཏེར་ཤོག་གི་བུ་དཔེ་ལས་བཤུས་པའོ། །དགེ་ལེགས་འཕེལ།

མཆན། ༡. གནས་ཡིག་འདི་ནི་མཆོག་གྱུར་གླིང་པའི་བཀའ་འབུམ་ཀ་པོད་ལས་ཞལ་བཤུས་པའོ། །

༢.གནས་འདི་བཞུགས་པའི་ཡུལ་ནི་མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་ཤར་མདའ་གྲོང་རྡལ་ནས་ནུབ་བྱང་ཕྱོགས་སུ་སྤྱི་ལེ༢༩ཙམ་ཕྱིན་པའི༢༡༤རྒྱ་ལམ་གྱི་འགྲམ་དུ་ཡོད། མི་ཕལ་བས་ཆུ་ཚོད་དྲུག་ཙམ་ལ་གནས་བསྐོར་བྱས་ཚེ་རང་བྱོན་དང་དགོན་པ་སོགས་ཞིབ་མཇལ་བྱེད་ཐུབ།

༄༅། །སྐུ་ཡི་ཕྲིན་ལས་གནས་མཆོག་བསྟན་པ་ནི༔ འབྲི་ཀླུང་ཕྱོགས་སུ་ཧེ་ཞེས་བྱ་བ་རུ༔ བྲག་རི་དཀར་པོ་རྡོ་རྗེ་གནམ་བསླངས་འདྲ༔ རྒྱབ་ཀྱི་ཕྱོགས་སུ་ཨོ་རྒྱན་བདག་ཉིད་ཀྱི༔ སྒྲུབ་པ་བྱས་པས་བྲག་ཕུག་གྲུ་བཞི་ཡོད༔ ཕུག་པའི་ནང་ནས་བྲག་སྒོ་བྱེ་བ་ན༔ དཔལ་ཆེན་རྡོ་རྗེ་གཞོན་ནུའི་སྐུ་ཡང་གསལ༔ དེ་ཉིད་སྐུ་ཡི་གནས་མཆོག་ལྔ་རུ་ཤེས༔ སྐུ་ཡི་གནས་གཙོ་སྐུ་གནས་གཅིག་ཏུ་བསྡུ༔ གནས་ཀྱི་སྒོ་འབྱེད་མི་འགྱུར་རྡོ་རྗེ་འབྱུང༔

༄༅། །སྐུ་ཡི་ཕྲིན་ལས་གནས་ཧེ་ཞེས་བྱ་བ་ནི། འབྲི་རྒྱུད་ས་ངན་ཕྱོགས་ཧེ་པ་ཆོས་འབྱུང་བཞུགས་གནས་ཧེ་བྲག་དཀར་ཡིན། དེའི་ཡན་ལག་སྒ་སྟོད་ཕྱོགས་ཀྱི་གཡུ་བྲག་ཡིན་པར་བཞེད། ཡང་ཀུ་སེ་སྡེ་གཞུང་མདོར་ཆུ་བརྒྱུད་དུ་ཧེ་བྲག་ཅེས་གྲགས་པ་ཁྱུང་གྲགས་རྡོ་རྗེས་གནས་སྒོ་ཕྱེས་ཤིང་གཏེར་ཀའང་བཞེས་སྐད་པ་ཞིག་ཀྱང་ཡོད་དོ། །

མཆན། གནས་འདི་བཞུགས་པའི་ཡུལ་ནི་དཀར་མཛེས་ཁུལ་དཔལ་ཡུལ་རྫོང་རོང་དགེ་ཞང་རོང་དགེ་གྲོང་ཡིན།

༄༅། །གནས་མཆོག་ཡོངས་སུ་གྲགས་པ་གཡུ་བྲག་ཅེས་པ་ནི། བྲག་རྡོའི་ཁ་དོག་སོགས་གཡུ་དང་མཚུངས་པ་ཟུར་བཞི་པ་གནས་གཞན་ལ་མེད་པའི་ཁྱད་མཚར་ཞིག་ཡོད་པས། ཁྱད་ཆོས་ཀྱིས་མིང་ལས་དེ་ལྟར་གྲགས། སྤྱི་ལོ་བདུན་བརྒྱ་སུམ་ཅུ་པའི་ཡར་སྔོན་དུ། བོད་ཀྱི་ཡུལ་གཞན་དང་འདྲ་བར། བོད་ཀྱི་གནའ་རབས་ཆོས་ལུགས་བོན་གྱི་གནས་གཞི་མཆོག་ཏུ་གྱུར་པ་ཞིག་ཆགས་ཡོད་ལ། དེའི་དུས་ཚོད་ནི་ཧ་ལམ་སྤྱི་ལོ་སྔོན་གྱི་ལོ་ལྔ་བརྒྱ་སོ་དགུ་ཡས་མས་ཙམ་དུ་མངོན། གནས་ཀྱི་གཡོན་ཕྱོགས་སུ་སྟག་ལ་མེ་འབར་གྱི་གནས་རི་ཡོད། མཁྱེན་བརྩེ་རིན་པོ་ཆེ་ནས་མདོ་ཁམས་གནས་ཆེན་ཉེར་ལྔའི་ཡ་གྱལ་ཧེ་བྲག་ཅེས་པ་དེ་གནས་གཡུ་བྲག་ལ་ངོས་འཛིན་མཛད། མཁྱེན་བརྩེ་དབང་པོ་ནས། སྒ་སྟོད་གཡུ་བྲག་གི་གནས་འདི་བདུད་འདུལ་རྡོ་རྗེ་ནས་གནས་སྒོ་ཕྱེས་ཤིང་གནས་ཡིག་ཀྱང་ཡོད། གཏེར་ཆེན་མཆོག་གྱུར་གླིང་པ་ནས། གནས་ཆེན་ཉེར་ལྔའི་ནང་ཚན། སྐུའི་ཕྲིན་ལས་ཀྱི་གནས་ཧེ་བྲག་ཏུ་ངོས་འཛིན་པར་མཛད། ཅེས་གསུངས། གནས་རིའི་མིང་ལ་ཧེ་བྲག་དང་། གཡུ་བྲག གནས་མཆོག་རྡོ་རྗེ་རྩེ་རྒྱལ་ཞེས་གྲགས་ལ། བདུད་འདུལ་རྡོ་རྗེའི་གནས་ཡིག་ཀྱང་ད་ལྟ་སྣང་བ་འདི་མེད་དུ་འགྲོ་བར་ཕངས་ཏེ་འོག་ཏུ་བཀོད་ཡོད། ལབ་ཡུལ་ཚོའི་ཁོངས། འབྲི་ཆུའི་རྒྱུད་ཀྱི་འོག སྒྱུ་པ་གྲོང་དང་སྡེ་རྟ་གྲོང་གཉིས་ཀྱི་བར་ན་ཡོད། མཚོ་ངོས་ལས་རྨིད༤༢༠༠ཡས་མས་ཡིན། གནས་དེ་ཤར་ནས་བལྟས་ན་རྡོ་རྗེ་དང་འདྲ་བ། ལྷོ་ནས་བལྟས་ན་རིན་པོ་ཆེ་འབར་བའི་དབྱིབས། ནུབ་ནས་བལྟས་ན་མེ་ཏོག་པདྨ་ལྟ་བུ། བྱང་ངོས་ནས་བལྟས་ན་རལ་གྲི་གྱེན་དུ་ལངས་པ་དང་མཚུངས། དེའི་སྐེད་གཡོན་གྱི་གུ་རུ་པདྨའི་གསང་ཕུག་ནང་ན། སྟེང་དུ་གསང་བ་འདུས་པ་དང་། ཀྱེ་རྡོ་རྗེ། རྡོ་རྗེ་དབྱིངས། རྡོ་རྗེ་རྣལ་འབྱོར་མའི་དཀྱིལ་འཁོར་དང་། དེའི་འོག་ཏུ་ཐུགས་རྗེ་ཆེན་པོ། དེའི་འོག་ཏུ་ཤཱཀྱ་ཐུབ་པ། སྤྱན་རས་གཟིགས་དང་སྒྲོལ་མའི་ལྷ་ཚོགས། དེའི་འོག་ཁྲོས་ནག་དང་། དེའི་འོག་ཏུ་ཕྱག་ན་རྡོ་རྗེའི་ལྷ་ཚོགས། སྒོ་སྲུང་རྟ་མགྲིན་སོགས་རང་བྱོན་ཏུ་བཞུགས། མཁྱེན་བརྩེ་དབང་པོ་ནས། གུ་རུའི་གསང་ཕུག་འདི་ནས་གཏེར་ཆེན་མཆོག་གྱུར་བདེ་ཆེན་གླིང་པས་ཐུགས་ཐིག་སྙིང་པོ་དང་། བི་མ་མི་ཏྲའི་ཚེ་རྫས་ཟླ་བའི་སྙིང་པོ་སོགས་གཏེར་བཞེས་པའི་ཤུལ་ཡོད་ཅེས་གསུངས། གཡས་ཀྱི་གསང་ཕུག་ན། ཀུན་བཟང་ཡབ་ཡུམ་ལ་མངོན་རྫོགས་རྒྱལ་བོ་ལྷ་བཅུ་གསུམ་དང་། མགོན་པོ་དྲུག་ཅུ་རྩ་གཉིས་ཀྱིས་བསྐོར་བ་དང་། སངས་རྒྱས་སྟོང་། སྨན་ལྷའི་ལྷ་ཚོགས་རང་བྱོན་གསལ་བོར་བཞུགས་པར་བཤད། མཁའ་ལ། ཚེ་དཔག་མེད། ཞི་ཁྲོ་གུ་རུ་མཚན་བརྒྱད། གྲུབ་ཆེན་བརྒྱད། ཞི་ཁྲོ་གསང་འདུས། ཐོད་ཕྲེང་སྡེ་ལྔ། རིག་འཛིན་བརྒྱད། རྡོ་རྗེ་ཕག་མོ། གུ་རུའི་དྲག་པོའི་རིགས། སངས་རྒྱས་ཐོད་པ། གདན་བཞི། དུས་འཁོར་སོགས་དང་། རྒྱལ་བ་རིགས་ལྔ། ནོར་ལྷ། སྒོ་སྲུང་མི་གཡོ་བ་དང་། བདུད་རྩི་འཁྱིལ་པ་སོགས་ཀྱི་རང་བྱོན། རིའི་གོང་བར། རིག་འཛིན་གསང་ཕུག་ཅེས་པར། གུ་རུ་ཡབ་ཡུམ་གྱི་ཕྱག་ཞབས་རྗེས། བདེ་ཆེན་རང་གྲོལ་གསང་ཕུག་ཏུ་གུ་རུ་ཡབ་ཡུམ་དང་། མཁའ་འགྲོ་མའི་ཞབས་རྗེས་གསལ་བར་བཞུགས། དེའི་འོག་ངོས་སུ་ཡང་མཁའ་འགྲོའི་ཞབས་རྗེས་དང་། གོང་དུ་བི་མ་མི་ཏྲའི་སྐུ་རྗེས། གྲུབ་ཆེན་བརྒྱད་ཅུའི་ཞབས་རྗེས་སོགས་དང་། ཕར་ནང་བྲག་དཀར་རྩེར། པདྨ་འབྱུང་གནས་ཀྱི་སྐུ་རྗེས། དེའི་འོག་དམར་ནག་གྲུ་གསུམ་ན། གུ་རུ་ཡབ་ཡུམ་སྐུ་རྗེས་དང་། མཁའ་འགྲོའི་ཞབས་རྗེས། དེའི་འོག་མ་མོའི་གསང་ཕུག་ཏུ། རྟ་ཕབ་ཡབ་ཡུམ་རང་བྱོན། ལ་ཡི་འོག་ཤར་ངོས་ཀྱི་ཕུག་པར་འཇམ་དཔལ་སྨྲ་སེང་དང་། ཡེ་ཤེས་མཚོ་རྒྱལ་རང་བྱོན། དེའི་འོག་བཀྲ་ཤིས་རྟགས་བརྒྱད་དང་། སིདྡྷི་འབྲུ་བཅུ་གཉིས་རང་བྱོན་དང་། དུར་ཁྲོད་བརྒྱད་གསལ། གཞུང་གི་ཕ་ཝང་ལ་བསམ་ཡས་ཆགས་ཚུལ་རང་བྱོན་དང་། སྐུ་གསུང་ཐུགས་རྟེན་རང་བྱོན། རུ་ཏྲ་བསྒྲལ་བའི་ཞབས་རྗེས་བཅས་ཡོད།

གནས་གཡུ་བྲག་གནས་ཀྱི་དཀར་ཆག་ལ་རིག་འཛིན་པདྨ་འབྱུང་གནས་ནས། གནས་མཆོག་རྡོ་རྗེ་རྩེ་རྒྱལ་དང་། གསང་ཕུག་གི་གནས་ངོ་སྤྲོད་མཛད་པ་ནི། ང་ཡི་སྒྲུབ་གནས་ཁྱད་འཕགས་ཅན། །ཧེ་བྲག་ཅེས་བྱ་སྒྱུ་ཡི་གནས། །རི་བོ་ཟངས་མདོག་དཔལ་རིའི་དབྱིབས། །ཤར་ནས་མཇལ་ན་རྡོ་རྗེ་འདྲ། །ལྷོ་ནས་མཇལ་ན་རིན་ཆེན་འདྲ། །ནུབ་ནས་མཇལ་ན་པདྨ་འདྲ། །བྱང་ནས་མཇལ་ན་རལ་གྲི་འདྲ། །ཞི་རྒྱས་དབང་དྲག་བཞི་ཡི་ཚུལ། །རྡོ་རྗེ་གདན་དང་རྔ་ཡབ་གླིང་དང་ནི། །པོ་ཏ་ལ་དང་དབྱེར་མ་མཆིས་པའི་གནས། །ཏི་སེ་ཆུ་བོ་རི་དང་ཙཱ་རི་དང་། །ཤེལ་བྲག་མཁར་ཆུ་ཡེར་བ་ཟླ་བ་ཕུག །བྲག་དཀར་ལྷ་སའི་སྤོ་བོ་བྲག་དཀར་དང་། །སྤྱི་འཇོམས་གོ་བོ་ཕུག་དང་སྒམ་པོའི་གནས། །རོང་བཙན་ཁ་བ་དཀར་དང་རྩེ་ལྔ་སོགས། །གནས་ཆེན་སྟོང་དང་གནས་ཕྲན་བྱེ་བ་ཡིས། །ཉི་ཟླ་འོད་ལ་འགྲན་ཟླ་མ་མཆིས་བཞིན། །རྡོ་རྗེ་རྩེ་རྒྱལ་ཞེས་བྱའི་གནས་མཆོག་ནི། །མཆོག་དང་ཐུན་མོང་དངོས་གྲུབ་ཐོབ་པའི་ཕུག །སེམས་ཅན་ཐམས་ཅད་སྨིན་གྲོལ་བཀོད་པའི་ཕྱིར། །ཕྱི་ནང་གསང་གསུམ་དཀྱིལ་འཁོར་བཞུགས་པའི་གནས། །རྒྱ་གར་རྡོ་རྗེ་གདན་གྱི་དབྱིབས་དང་མཚུངས། །ཕྱི་ཡི་ཕྱོགས་བཞི་ཁོར་ཡུག་དག་ལ་ནི། །དུར་ཁྲོད་ཆེན་པོ་བརྒྱད་ཀྱི་ཆགས་ཚུལ་ནི། །མེ་བརྒྱད་ཆུ་བརྒྱད་མཆོད་རྟེན་བརྒྱད། །ཤིང་བརྒྱད་སྤྲིན་བརྒྱད་ཁྲོ་བོ་བརྒྱད། །གྲུབ་ཐོབ་བརྒྱད་དང་ཞིང་སྐྱོང་བརྒྱད། །ཕྱོགས་སྐྱོང་རྣམས་ནི་བཞུགས་པ་ཡིན། །རྡོ་རྗེ་རྩེ་རྒྱལ་གཡོན་གྱི་གསང་ཕུག་གི །དཀྱིལ་འཁོར་ལྷ་ཚོགས་མང་པོའི་བཞུགས་ཚུལ་ནི། །དཔལ་འཁོར་ལོ་སྡོམ་པའི་ལྷ་ཚོགས་དང་། །དེ་བཞིན་གསང་བ་འདུས་པ་མི་བསྐྱོད་པའི་ལྷ་ཚོགས་དང་། །དཔལ་འཇམ་དཔལ་རྡོ་རྗེའི་ལྷ་ཚོགས་དང་། །དཔལ་རྡོ་རྗེ་དབྱིངས་ཀྱི་ལྷ་ཚོགས་དང་། །ཡི་དམ་ཀྱེ་ཡི་རྡོ་རྗེའི་ལྷ་ཚོགས་དང་། །དཔལ་རྡོ་རྗེ་གུར་གྱི་ལྷ་ཚོགས་དང་། །མ་གཅིག་རྡོ་རྗེ་རྣལ་འབྱོར་མའི་ལྷ་ཚོགས་དང་། །ཇོ་བོ་འཁོར་བ་དབྱིངས་སྒྲོལ་གྱི་ལྷ་ཚོགས་དང་། །དེ་ཡི་འོག་ཏུ་ཐུགས་རྗེ་ཆེན་པོ་ནམ་མཁའ་རྒྱལ་པོའི་ལྷ་ཚོགས། དེའི་འོག་ཏུ་འཇིག་རྟེན་དབང་ཕྱུག་གི་ལྷ་ཚོགས། དེའི་འོག་ཏུ་ཇོ་བོ་ཤཱཀྱ་མུ་ནེའི་ལྷ་ཚོགས་དང་། འཁོར་བ་དོང་སྤྲུགས་ཀྱི་ལྷ་ཚོགས། ཇོ་བོ་ངན་སོང་ཀུན་སྐྱོབ་ཀྱི་ལྷ་ཚོགས། རྗེ་བཙུན་འཕགས་མ་སྒྲོལ་མའི་ལྷ་ཚོགས་རྣམས་དང་། སྒྲོལ་མ་དཀར་སྔོན་སོགས་ལྷ་ཚོགས་མང་དུ་བཞུགས། དེའི་འོག་ཏུ་ཡུམ་ཆེན་ཁྲོས་མ་ནག་མོའི་ལྷ་ཚོགས་རྣམས་དང་། དེའི་འོག་ཏུ་འབྱུང་པོ་འདུལ་བྱེད་ཀྱི་ལྷ་ཚོགས་དང་། སྒོ་སྲུང་རྟ་མགྲིན་དྲེགས་པ་ཀུན་འདུལ་གྱི་ལྷ་ཚོགས་རྣམས་དང་། སྒོ་སྲུང་གཡུ་བཙན་དང་། གཞན་ཡང་ལྷ་མང་དུ་བཞུགས། རྡོ་རྗེ་རྩེ་རྒྱལ་གསང་ཕུག་གཡས་པ་ན། ཆོས་སྐུ་ཀུན་ཏུ་བཟང་པོ་ཡབ་ཡུམ་ལ། མགོན་པོ་དྲུག་ཅུ་རྩ་གཉིས་དང་། མངོན་རྫོགས་དཔའ་བོ་བཅུ་གསུམ་འཁོར་གྱིས་བསྐོར་ནས་བཞུགས། བསྐལ་པ་བཟང་པོའི་སངས་རྒྱས་སྟོང་གསལ་བར་བཞུགས། སངས་རྒྱས་སྨན་གྱི་ལྷ་ཚོགས་ཕྱི་ནང་གཉིས་ཀ་གསལ་བར་བཞུགས། མཁའ་ལ་མགོན་པོ་ཚེ་དཔག་མེད་པའི་ལྷ་ཚོགས་དང་། ཞི་ཁྲོ་བདེ་བཤེགས་འདུས་པའི་ལྷ་ཚོགས་དང་། གྲུབ་ཆེན་བརྒྱད་ཀྱི་ལྷ་ཚོགས། ཞི་ཁྲོ་གསང་བ་འདུས་པའི་ལྷ་ཚོགས་དང་། སྤྲུལ་པའི་གུ་རུ་མཚན་བརྒྱད་ཀྱི་ལྷ་ཚོགས། ཐོད་ཕྲེང་སྡེ་ལྔའི་ལྷ་ཚོགས་བཅས་གསལ་བར་བཞུགས། མཆོག་སྤྲུལ་རིག་འཛིན་བརྒྱད་དང་མ་གཅིག་རྡོ་རྗེ་ཕག་མོའི་ལྷ་ཚོགས། ཡི་དམ་གུ་རུ་དྲག་པོའི་ལྷ་ཚོགས་དང་། གུ་རུ་རྡོ་རྗེ་དྲག་པོའི་རྩལ་གྱི་ལྷ་ཚོགས་དང་། སངས་རྒྱས་ཐོད་པའི་ལྷ་ཚོགས་དང་། མ་ཧཱ་མཱ་ཡའི་ལྷ་ཚོགས། རྡོ་རྗེ་གདན་བཞིའི་ལྷ་ཚོགས་དང་། དཔལ་དུས་ཀྱི་འཁོར་ལོའི་ལྷ་ཚོགས་རྣམས་གསལ་བར་བཞུགས། དེའི་འོག་ཏུ་སངས་རྒྱས་རྣམ་པར་སྣང་མཛད་དང་། རྒྱལ་བ་རིགས་ལྔའི་དཀྱིལ་འཁོར་བཞུགས། རྡོ་རྗེ་རྣམ་པར་འཇོམས་པའི་སྐུ་གསུམ་དང་། གཏུམ་པོ་བཞི་བཞུགས། བཀྲ་ཤིས་ལྷ་མོ་བརྒྱད། ཁྲོ་བོ་བཞི། སྒོ་མ་བཞི་གསལ་བར་བཞུགས་ལ། ཁྲོ་བོ་དང་ཁྲོ་མོ་མང་པོ་བཞུགས། དེའི་འོག་ཏུ་གནོད་སྦྱིན་ར་གདོང་ཅན་དང་། གནོད་སྦྱིན་ཀུ་བེ་ར་དང་། ནོར་ལྷ་ཛཾ་བྷ་ལ་དང་། ཁྲོ་བོའི་རྒྱལ་པོ་སྟོབས་པོ་ཆེ་ལ་སོགས་ཁྲོ་བོ་མང་པོ་དང་། སྒོ་སྲུང་ལ་ཁྲོ་བོ་མི་གཡོ་བ་དང་། བདུད་རྩི་འཁྱིལ་པའི་ལྷ་ཚོགས་རྣམས་དང་། བཀའ་སྲུང་དང་གཏེར་སྲུང་། དཔལ་མགོན་དང་དྲེགས་པ་སྡེ་བརྒྱད་ལྷ་ཚོགས་རྣམས་དང་། ཡང་ལྷ་ཚོགས་ལ་ལ་ནི་སྐུ་གཟུགས་ཀྱི་ཚལ་དང་། ལ་ལ་ནི་རིང་བསྲེལ་གྱི་ཚུལ་དུ་བཞུགས། ལ་ལ་མཆོད་རྟེན་ཀྱི་ཚུལ་དང་། ལ་ལ་ནི་ཡིག་འབྲུའི་ཚུལ་དུ་བཞུགས། རིའི་གོང་ཕུག་རིག་འཛིན་གསང་ཕུག་ཏུ་གུ་རུ་ཡབ་ཡུམ་གྱི་ཕྱག་ཞབས་རྗེས་གསལ་བར་བཞུགས་ཤིང་། གཞན་ལྷ་ཚོགས་ཀྱང་མང་དུ་བཞུགས། བདེ་ཆེན་རང་གྲོལ་གསང་ཕུག་ཏུ། པད་འབྱུང་ཡབ་ཡུམ་སྐུ་དང་ཕྱག་རྗེས་དང་། ཌཱཀི་རྣམས་ཀྱི་ཞབས་རྗེས་གསལ་བར་ཡོད། མཚན་ནི་མ་ཟིན་ལྷ་ནི་འབུམ་ཚོགས་དུ་མ་ཡོད། རྡོ་མཐེ་མོ་ཙམ་ལ་ལྷ་རེ་ཡོད། ཁྲོ་རྒྱལ་ཁྲོ་མོ་མང་དུ་བཞུགས། དེའི་འོག་མ་རུང་གདུག་པ་འདུལ་བའི་ཕྱིར། ཞིང་སྐྱོང་ཀུན་དགའ་གཞོན་ནུ་བཞུགས། དེའི་གཡས་སུ་སངས་རྒྱས་སྨན་བླའི་ལྷུང་བཟེད་དང་། གཡས་གཡོན་མཁའ་འགྲོའི་ཕྱག་ཞབས་རྗེས་གསར་པ་མང་པོ་བཞུགས། དེའི་གོང་དུ་སློབ་དཔོན་བི་མ་ལ་མི་ཏྲའི་སྐུ་རྗེས་གསལ་བར་བཞུགས་ཡོད། དེའི་གོང་དུ་གྲུབ་ཆེན་བརྒྱད་ཅུའི་ཞབས་རྗེས་བཞུགས། དེའི་འོག་དམ་ཅན་ར་གདོང་ཅན་དང་བཅས་པའི་གུ་རུ་མཚན་བརྒྱད་དཀྱིལ་འཁོར་གསལ་བར་བཞུགས། དེའི་གཡས་ཀྱི་ཆོས་ལུང་ནང་དུ་རྡོ་རྗེ་ཕུར་པའི་ལྷ་ཚོགས་རྣམས་དང་། རྡོ་རྗེ་ཕག་མོའི་དཀྱིལ་འཁོར་རྒྱས་པར་ཡོད། ཞིང་སྐྱོང་ལ་ལ་མགོན་པོའི་དཀྱིལ་འཁོར་བཞུགས། ཕར་ནང་བྲག་དཀར་རྩེ་ལ་ཨུ་རྒྱན་རིན་པོ་ཆེའི་སྐུ་རྗེས་དང་། ཆོས་སྐྱོང་བྱ་རོག་གདོང་ཅན་བཞུགས། དེའི་འོག་དམར་ནག་གྲུ་གསུམ་འབར་བའི་གཞལ་ཡས་ན། སློབ་དཔོན་པདྨ་ཡབ་ཡུམ་སྐུ་རྗེས་གསལ། དཔའ་བོ་མཁའ་འགྲོའི་ཞབས་རྗེས་མང་དུ་བཞུགས། དེའི་འོག་ཏུ་དབུས་སུ་སངས་རྒྱས་སྟོང་གི་སྐུ་དང་། རིང་བསྲེལ་མང་དུ་བཞུགས། དེའི་འོག་མ་མོའི་གསང་ཕུག་ལ་ཁྲོ་མོ་འབུམ་ཕྲག་གི་སྐུ་བཞུགས། མ་བདུན་གསང་བའི་ཕོ་བྲང་ལ། རྟ་ཕག་ཡིད་བཞིན་ནོར་བུའི་སྐུ་དངོས་སུ་བཞུགས། དེའི་འོག་ཏུ་འབྱུང་པོ་འདུལ་བྱེད་སྐུ་དང་། ཞི་ཁྲོ་བདེ་གཤེགས་འདུས་པའི་དཀྱིལ་འཁོར། དེའི་གོང་དུ་ཨོ་རྒྱན་པདྨའི་སྐུ་དང་། པད་ཞྭ། རྔ་ལ་སོགས་པ་བཞུགས། བཀྲ་ཤིས་ལ་ཁར་ཆོས་ཀྱི་རྒྱལ་པོ་བཞུགས། ལ་ཡི་འོག་གི་ཤར་གྱི་ཕུག་ལ་ནི། འཇམ་དཔལ་སྤྲུལ་པའི་སེང་གེ་དང་། ཡེ་ཤེས་མཚོ་རྒྱལ་བཞུགས། དེའི་འོག་ཏུ་བཀྲ་ཤིས་པའི་རྟགས་བརྒྱད་ཡོད། ཨོཾ་ཨཱཿཧཱུྃ༔བཛྲ་གུ་རུ་པདྨ་སིདྡྷི་ཧཱུྃ༔ གནས་ཆེན་མདུན་གྱི་ཤེལ་གྱི་ཕ་ཝང་ལ་དུར་ཁྲོད་ཆེན་པོ་བརྒྱད་ཀྱི་ཆགས་ཚུལ་བཞུགས། གཞུང་གི་ཕ་ཝང་ལ་བསམ་ཡས་ཆགས་ཚུལ་བཞུགས། སྐུ་ཡི་རྟེན་དང་། གསུང་གི་རྟེན་དང་། ཐུགས་ཀྱི་རྟེན་ཡང་མང་དུ་བཞུགས། མཆོད་རྟེན་རེ་ལ་གཞལ་ཡས་ཁང་རེ་བཞུགས། མ་ཚོགས་མཁའ་འགྲོས་ཚོགས་འཁོར་བསྐོར་བ་དང་། །དཔའ་བོ་མཁའ་འགྲོ་ཚོགས་འཁོར་བསྐོར་བ་ཡིན། །ཁྲོ་བོ་ཁྲོ་མོས་རུ་ཊ་བསྒྲལ་བ་ཡིན། །དེ་ཡི་རྟགས་སུ་ཞབས་རྗེས་ཁྲིགས་སེ་ཡོད། །མ་ཏྲཾ་རུ་ཏྲའི་ཀླད་པ་སྙིང་ཁྲག་གིས། །སྐུ་གསུང་ཐུགས་ཀྱི་རྟེན་རྣམས་བཞེངས་པ་ཡིན། །རིག་འཛིན་བདག་ལ་ལུང་བསྟན་བྱུང་བ་ལྟར། །གནས་ཆེན་དག་གི་མདུན་དུ་ཕྱིན་པའི་ཚེ། །ཡོན་བདག་ལྷན་ཅིག་ཆོས་མཛད་མང་པོ་བཅས། །ཟབ་མོ་ཚོགས་ཀྱི་འཁོར་ལོ་བསྐོར་བའི་དུས། །ནམ་མཁའ་དབྱིངས་ཀྱི་དཀྱིལ་འཁོར་དུ། །ཡི་དམ་ལྷ་ཚོགས་སྤྲིན་ལྟར་འཁྲིགས། །མ་ཚོགས་མཁའ་འགྲོ་ཆར་ལྟར་འབེབས། །དེར་བྱོན་པ་ཀུན་གྱིས་མངོན་སུམ་མཐོང་། །ཉི་མས་གུར་ཕུབ་ཡེ་ཤེས་ལྔ་ཡི་གཟུགས། །འཇའ་འོད་སྣ་ལྔའི་གུར་ཁང་ཕུབ། །ཟླ་བས་གུར་ཕུབ་གཡུ་ཡི་ན་བུན་གཏིབས། །དུང་གི་ཁུ་འཕང་བཀྲ་ཤིས་རྫས་བརྒྱད་འཆར། །གནས་དེར་སྨིན་གྲོལ་སྟོན་པའི་དུས། །འགྲོ་ལ་བདེ་སྐྱིད་འབྱུང་བའི་སྒོ། །གནས་ཆེན་བྱིན་འབེབས་བྱེད་པའི་ཕྱིར། །ཡ་མཚན་ལྟད་མོ་ཀུན་གྱིས་མཐོང་། །མི་བདེན་བསམ་པའི་སེམས་ཅན་རྣམས། །མིག་གི་ལྟོས་ལ་སེམས་ཀྱིས་དཔྱོད། །ལྷ་དང་འདྲེ་གཉིས་མ་ནོར་ཅིག །ཆོས་དང་ཆོས་མིན་མ་ནོར་ཅིག །ཚེ་ཚད་དྲུག་ཅུ་ཁ་རལ་དུས། །བདུད་ཀྱི་སྤྲུལ་པ་ཕོ་མོ་འབྱུང་། །མགོ་གཡོག་བསླུ་བས་དེ་ལ་ཞེན། །སངས་རྒྱས་ཆོས་མི་བདེན་ཟེར་འོངས། །སེར་གཟུགས་ཆོས་མིན་བསླུ་བྲིད་མཁས་པ་དེས། །རྒྱལ་འགོང་སེམས་ཞུགས་འགྲོ་ལ་གནོད་པ་སྐྱེལ། །མཁའ་འགྲོ་ཆོས་སྐྱོང་རི་རབ་ལ་ཞལ་གཟིགས། །སེམས་ཅན་མང་པོའི་སྲོག་ལ་ཧབ་ཐོབ་བྱེད། །དེ་ལ་བློ་གཏད་མཆོད་གནས་བྱེད་པའི་དུས། །དེ་ནི་མི་བདེན་བདུད་ཀྱི་ལུང་བསྟན་ཡིན། །བློ་གཏད་མ་བྱེད་སྐལ་ལྡན་སློབ་མ་རྣམས། །ཨེ་མ་ཧོ༔ གནས་འདིར་ཕྱག་བསྐོར་འབྲེལ་བའི་ཕན་ཡོན་ནི། །མཁའ་འགྲོའི་ལུང་བསྟན་བླ་མའི་ཞལ་རྒྱུན་དང་། །རྣལ་འབྱོར་བདག་གི་ཉམས་རྟོགས་གང་བྱུང་དེ། །མདོར་བསྡུས་ངེས་པའི་སྒོ་ནས་ལེགས་པར་བཀོད། །བསྐོར་བ་བཅུ་གཉིས་བརྒྱ་ཕྱག་བཅུ་གཉིས་ལ། །མ་ཎི་དུང་རྒྱུན་བཟླས་པའི་ཕན་ཡོན་ཡོད། །སེམས་ཅན་ཐམས་ཅད་བདེ་ལྡན་ཆོས་སྤྱོད་ཕྱིར། །བསྟན་འཛིན་སྐྱེས་བུ་སྐུ་ཚེ་བརྟན་པའི་ཕྱིར། །འབྲུ་ནོར་འཕེལ་ཞིང་བསོད་ནམས་རྒྱས་པའི་ཕྱིར། །བསྐོར་བ་གསུམ་དང་བརྒྱ་ཕྱག་གསུམ། །བཛྲ་གུ་རུ་ཁྲི་ཚོ་གསུམ། །དེ་གསུམ་གཅིག་བསྡུས་བཅོ་ལྔ་པོར། མ་ཎི་དུང་ཕྱུར་གཅིག་དང་བྱེ་བ་ལྔ་ནི་ངེས་པར་ཡོད། ཨོཾ་ཨཱཿཧཱུྃ༔བཛྲ་གུ་རུ་པདྨ་སི་དྡྷི་ཧཱུྃ༔ གང་ཞིག་གནས་མཆོག་འདི་ལ་ཕྱག་བསྐོར་སུས་བྱས་པ། །ཤན་པ་ཡིན་ཀྱང་མཐོ་རིས་གནས་སུ་སྐྱེ། །གང་ཞིག་གནས་མཆོག་འདི་ལ་སྒོམ་སྒྲུབ་སུས་བྱས་པ། །ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར། །གང་ཞིག་གནས་མཆོག་འདི་ཡི་མཚན་ཉིད་ཙམ། །རྣམ་ཐོས་མཚན་ཉིད་དེ་ནི་བརྗོད་པ་ན། །ཐོས་པའི་མི་རྣམས་ནད་གདོན་ཀུན་ལས་གྲོལ། །གནས་མཆོག་འདི་ལ་མོས་གུས་སུས་བྱས་པ། །མཆོག་དང་ཐུན་མོང་དངོས་གྲུབ་ཐོབ་པར་འགྱུར། །གནས་མཆོག་འདི་ལ་མར་མེ་བདུག་སྤོས་ཕུལ། །ཚོགས་གཉིས་རྫོགས་ལ་ལྷ་ཡི་ཞལ་མཐོང་ངོ་། །གནས་བསྐོར་མཁན་ལ་འཚོ་བ་སྦྱར་བ་དང་། །ཆུ་དང་མེ་ཤིང་མཐུན་སྦྱོར་སུས་བྱས་ཀྱང་། །ཡི་དྭགས་མི་སྐྱེ་ཚེ་རིང་ནད་མེད་འགྱུར། །ཇོ་དར་སྙན་དར་མར་མེ་སུས་གསོལ་བ། །ལོངས་སྤྱོད་ཆེ་ཞིང་ལྷ་ཡི་གོ་འཕང་ཐོབ། །གནས་འདིར་ཞིག་གསོ་ལམ་འཕྲང་སུས་བཅོས་པ། །མྱ་ངན་མེད་པའི་བྱང་ཆུབ་ཐོབ་པར་འགྱུར། །གཞན་གྱི་བྱས་པར་རྗེས་སུ་ཡི་རང་ན། །དམ་ཆོས་སྤྱོད་པའི་འབྲས་བུ་ཐོབ་པར་འགྱུར། །གནས་མཆོག་འདི་ལ་ཚོགས་འཁོར་སུས་ཕུལ་པ། །མི་ནོར་ཟས་ཀྱི་དངོས་གྲུབ་འབྱུང་བར་ངེས། །བསོད་ནམས་བསགས་པས་གནས་མཆོག་འདི་དང་མཇལ། །དད་པ་ཅན་རྣམས་བསོད་ནམས་གསོག་པར་ངེས། །ཕྱག་བསྐོར་མཛོད་ཅིག་ཐེ་ཚོམ་མ་ཟ་ཞིག །སྔོན་གྱི་གྲུབ་ཐོབ་རྣམས་ཀྱིས་དེ་ལྟར་གསུངས། །ད་ལྟ་འབྱོན་པ་རྣམས་ཀྱིས་འདི་ལྟར་གསུངས། །ཐེ་ཚོམ་མ་མཛད་སྐལ་ལྡན་ཕོ་མོ་རྣམས། །དད་པར་ཐང་ལྷོད་མ་མཛད་སྐལ་ལྡན་རྣམས། །རྒྱང་ཉེ་རིང་མེད་པར་གསོལ་བཏབ་ན། །མཆོག་ཐུན་མོང་དངོས་གྲུབ་ཐོབ་པར་ངེས། །གནས་མཆོག་འདི་ལ་གུས་པས་སྲུང་སྐྱོབ་བྱེད། །ཨོ་རྒྱན་དག་པ་མཁའ་སྤྱོད་གནས་སུ་སྐྱེ། །གནས་མཆོག་འདི་ཡི་ཕྱོགས་བཞི་མཚམས་བརྒྱད་ནས། །བྱ་ཚང་རློག་དང་རི་དྭགས་སུས་བསད་དང་། །གནས་འདི་མི་བཞུགས་ངག་འཆལ་སུས་སྨྲས་དང་། །གནས་བསྐོར་མཁན་ལ་བརྐུ་འཕྲོག་ངན་སེམས་བྱེད། ཡུལ་ཕྱོགས་འདི་དང་ལྷག་པར་གནས་རི་ལ། །བསམ་ངན་སྦྱོར་རྩུབ་ངང་ནས་གནོད་འཚེ་དང་། །གནས་རྡོ་རིང་བསྲེལ་བརྡུང་ཞིང་རྩི་ཤིང་ནགས་ཚལ་བྲེག །རི་དྭགས་བྱ་གཅན་སྣ་ཚོགས་གསོད་ཅིང་ཀླུ་ཤིང་འཐུ། །དེ་འདྲ་བྱེད་དང་དམ་ཚིག་ཉམས་པ་སྟེ། །བླ་མ་ཡི་དམ་མཁའ་འགྲོའི་བདེན་སྟོབས་དང་། །ཆོས་སྐྱོང་ཕོ་རྒྱུད་མོ་རྒྱུད་མཐུ་སྟོབས་དང་། །ཀླུ་བདུད་རྡོ་རྗེ་དགྲ་འདུལ་ནུས་སྟོབས་དང་། །ཆོས་སྐྱོང་ར་ཧུ་ལ་ཡི་དྲག་རྩལ་གྱིས། །བདེན་རྫུན་མྱུར་སྟོན་ལས་མཁན་དཔའ་ཟས་མཛོད། །བཛྲ་ས་མ་ཛཿམ་ཧཱ་ཀ་ལ་པུཥྚཾ། ར་ཧུ་ལ་ར་ར༔ ཞེས་གཏེར་སྟོན་བདུད་འདུལ་རྡོ་རྗེ་དང་། གཏེར་སློབ་ཀུན་དགའ་རྡོ་རྗེ་རྣམ་གཉིས་ཀྱིས། གནས་སྒོ་ཕྱེས་ནས་དཀར་ཆག་ཏུ་རྒྱས་པར་བཀོད་པའོ། །

མཆན། ༡ གོང་གི་གནས་ཡིག་འདི་གཉིས་ནི་ཡུལ་ཤུལ་ཁུལ་ཁྲི་འདུ་རྫོང་གི་ཁྲི་འདུ་ཆོས་འབྱུང་ཞེས་པའི་དཔེ་དེབ་ལས་ཞལ་བཤུས་པའོ། ། ༢.གནས་འདི་ནི་ཡུལ་ཤུལ་ཁུལ་ཁྲི་འདུ་རྫོང་ལབ་ཞང་གཞི་བ་གྲོང་གི་མདུན་ཕྱོགས་སུ་ཡོད། འབྲི་ཆུ་ཟམ་ཆེན་ཁ་ནས་གཞི་བ་ལུང་མདའ་རུ་སྤྱི་ལེ༡༩ཡོད། གཞི་བ་ལུང་མདའ་ནས་གནས་བར་དུ་སྤྱི་ལེ༤ལྷག་ཙམ་ཡོད། བསྐོར་བ་གཅིག་ལ་མི་ཕལ་བས་དུས་ཚོད༤ཙམ་བྱེད་དགོས།

༄༅། །ད་ནི་གསུང་གི་གནས་ལྔ་བསྟན་པ་ནི༔ བོད་ཀྱི་མདོ་ཁམས་སྤོ་བོ་ཞེས་བྱ་བ༔ གསུང་གི་གནས་གཙོ་དགའ་བ་ལུང་ཞེས་བྱ༔ ལུང་པ་ཨ་ཡིག་ཚུལ་གྱི་དབུས་མ་རུ༔ རང་བྱུང་ཁྱད་འཕགས་རྡོ་སྐུ་རྣམ་ལྔ་བཞུགས༔ འདོན་པའི་སྐྱེས་བུ་བསམ་གཏན་གླིང་ཞེས་འབྱུང༔

༄༅། །གསུང་གི་གནས་གཙོ་སྤུ་བོ་དགའ་བ་ལུང་ནི། པདྨ་བཀོད་ཆེན་གྱི་བྱང་ཕྱོགས་དྲག་པོ་བཀོད་ཆུང་ཞེས་བྱ་བ་གཏེར་ཆེན་སྟག་ཤམ་རྡོ་རྗེས་གནས་སྒོ་ཕྱེས། སྐུ་རྟེན་རྟ་ཕག་ཡབ་ཡུམ་སྐུ་ངོ་མཚར་བ་དང་།

༄༅། །དགའ་བ་ལུང་གི་གནས་ཡིག་གསལ་བར་བྱེད་པའི་མེ་ལོང་ཞེས་བྱ་བ་བཞུགས་སོ། །

༈ན་མོ་ཨ་མི་ཏཱ་བྷ་ལོ་ཀེེ་ཤྭ་ར་པདྨ་ཀཱ་ར་ཡེ། །ངོ་བོ་གདོད་ནས་མཁའ་ལྟར་རྣམ་དག་དག་པ་གཉིས་ལྡན་ཆོས་ཀྱི་སྐུ། །རང་བཞིན་ལྷུན་གྲུབ་མཚན་དཔེའི་རབ་སྤྲས་ངེས་པ་ལྔ་ལྡན་ལོངས་སྤྱོད་རྫོགས། །ཐུགས་རྗེས་གང་འདུལ་སོ་སོར་སྐུར་སྟོན་མ་ངེས་ལྔ་ལྡན་སྤྲུལ་པའི་སྐུ། །སྐུ་གསུམ་དབྱེར་མེད་རང་རིག་བླ་མར་སྙིང་ནས་འདུད་དོ་བརྩེ་བས་གཟིགས། །ནུབ་ཕྱོགས་བདེ་ཅན་རྣམ་དག་ཞིང་ཁམས་ན། །སྲས་བཅས་རྒྱལ་བ་རྒྱ་མཚོའི་མགོན་པོ་མཆོག །གསུང་གི་རིགས་གཙོ་བཅོམ་ལྡན་འོད་དཔག་མེད། །ཆོས་སྐུ་སྣང་བ་མཐའ་ཡས་ལ་ཕྱག་འཚལ་ལོ། །ཤར་ཕྱོགས་རི་བོ་གྲུ་འཛིན་ཕོ་བྲང་ན། །མཁྱེན་བརྩེའི་མངའ་བདག་བྱང་སེམས་འགྲོ་བའི་གཉེན། །འཁོར་བ་དུང་སྤྲུགས་ལོངས་སྐུ་ཐུགས་རྗེ་ཅན། །འཕགས་མཆོག་སྤྱན་རས་གཟིགས་ལ་ཕྱག་འཚལ་ལོ། །དེ་ཉིད་ཐུགས་རྗེས་སིནྡྷུ་རོལ་པའི་མཚོར། །གེ་སར་ལས་འཁྲུངས་སྤྲུལ་སྐུ་མཐུ་སྟོབས་བདག །ལོག་འདྲེན་ཚར་གཅོད་རྒྱ་བོད་ཆོས་ལ་བཀོད། །རྗེ་བཙུན་པད་མ་ཐོད་ཕྲེང་སྤྱི་བོས་མཆོད། །མཚུངས་མེད་དྲིན་ཅན་ཀརྨའི་མཚན་ཅན་དང་། །ཚེ་རབས་ལྷ་སྐལ་རྡོ་རྗེ་རྣལ་འབྱོར་མ། །སྤྲུལ་སྐུ་མཚོ་རྒྱལ་མ་གཅིག་ལབ་སྒྲོན་སོགས། །འགྲོ་བའི་དོན་མཛད་རྣམས་ལ་གུས་ཕྱག་འཚལ། །རྡོ་རྗེ་འཆང་དང་རྡོ་རྗེ་དབྱིངས་ཕྱུག་མ། །པདྨའི་སྤྱན་སྔར་ཁས་བླང་དམ་བཅས་པ། །ཁྱད་པར་གནས་འདིའི་བཀའ་སྲུང་དམ་ཅན་རྣམས། །ཉེ་བར་བརྟེན་ནོ་དམ་ཚིག་ཚུལ་བཞིན་སྲུངས། །བདེ་ཆེན་ཞིང་ཁམས་དབྱེར་མེད་དགའ་བ་ལུང་། །དག་སྣང་དཔའ་བོ་ཌཱཀྐིའི་ལུང་བསྟན་དང་། །ཞལ་གཟིགས་ཡི་གེར་བཀོད་འདིས་གནས་སྲུང་ཚོགས། །རུ་ང་མ་བྱེད་བདག་གི་གྲོགས་མཛོད་ཅིག །

༈ དེ་ལ་ཁོ་མོའི་ལོ་རྒྱུས་བརྗོད་པ་ནི། །སྔོན་གྱི་ལས་འཕྲོ་ཡུལ་གྱི་སྐལ་བ་ཡང་། །སྤོ་བོའི་ལུང་དུ་ཇི་ལྟར་སྐྱེས་ཚུལ་དང་། །སྔོན་གནས་རབ་རིབ་རྗེས་སུ་དྲན་པ་དང་། །ལས་ཀྱི་འཕྲོ་སད་བླ་མ་བསྟེན་ཚུལ་དང་། །གདམས་ངག་ཇི་ལྟར་ཞུས་དང་ཉམས་ལེན་དང་། །སྒོམ་རྟགས་ལག་རྗེས་ཇི་ལྟར་བྱུང་བ་དང་། །དུས་གསུམ་ཀུན་མཁྱེན་སློབ་དཔོན་པདྨ་དང་། །ཌཱཀྐི་མ་ཡིས་ལུང་བསྟན་བརྡ་སྟོན་དང་། །ཡང་དག་དོན་གྱི་དབང་བསྐུར་ཐོབ་ཚུལ་དང་། །གཞན་ཡང་གསང་བའི་ལུང་བསྟན་དག་སྣང་སོགས། །གསང་སྒྲོག་འགྱུར་ཕྱིར་ཟུར་དུ་བཀོད་པར་སྤྲོ། །གསང་སྔགས་སྣོད་ལྡན་རྣམས་ཀྱིས་དེ་རུ་གཟིགས། །སྐྱེ་བ་དམན་པས་བསོད་ནམས་ཆུང་སྙམ་ཀྱང་། །འདི་ཡང་སྟོན་པ་སངས་རྒྱས་ཞལ་ནས་སུ། །བྱང་ཆུབ་སེམས་ལ་ཕོ་མོ་མེད་ཅེས་གསུངས། །ཟ་ཧོར་རྒྱལ་པོའི་སྲས་མོ་མནྡྷ་རས། །མི་ཕྱེད་ཡིན་ཀྱང་བྱང་ཆུབ་སྒྲུབ་ཏུ་ཡོད། །ཅེས་གསུངས་རྒྱ་གར་འཕགས་ཡུལ་བོད་ལ་སོགས། །སྐྱེས་དམན་རྟེན་ལ་གྲུབ་ཐོབ་མང་དུ་བྱོན། །ཁྱད་པར་གསང་སྔགས་བླ་མེད་སྐབས་སུ་ནི། །བྱང་ཆུབ་སྒྲུབ་པའི་གྲོགས་སུ་བསྔགས་པ་མང་། །དེ་ཕྱིར་ཆོས་ལ་འཇུག་འདོད་བཙུན་མའི་གྲོགས། །སྐྱེ་བ་དམན་ཞེས་ཞུམ་ཞུམ་མི་དགོས་ཏེ། །སྙིང་རུས་བརྩོན་འགྲུས་སྡུག་བསྲན་སྒྲུབ་ནུས་ན། །འབྲས་བུ་སངས་རྒྱས་ལག་པའི་མཐིལ་ན་གདའ། །དམ་ཆོས་འདུལ་བར་དགག་བྱར་གསུངས་ནའང་། །ཐེག་པ་དེ་ཡིས་ལུགས་སུ་གོ་དགོས་སོ། །བླ་མེད་སྐབས་སུ་སྨོད་ན་རྩ་ལྟུང་གསུངས། །རྣམ་པ་ཀུན་ཏུ་དགག་པར་རུང་མ་ཡིན། །ཆོས་དང་མི་མཐུན་བསྟན་པའི་ཞབས་འདྲེན་པའི། །སྐྱེ་རྒྱལ་བཙུན་གཟུགས་ཡིན་རུང་ཅི་ཞིག་སྨོན། །འོན་ཀྱང་དག་པའི་སྣང་བ་སྦྱོང་ན་འཐད། །ལར་ན་མི་ལུས་དོན་ཡོད་མ་གྱུར་ན། །རིན་ཆེན་གསེར་ལས་གྲུབ་ཀྱང་དགོས་པ་ཅི། །དེ་ཕྱིར་རང་དོན་སྒྲུབ་ན་མི་ལེགས་སམ། །བདག་ནི་འཁོར་བའི་ཆོས་ལ་ཞན་ལོག་སྟེ། །ཉིན་མཚན་ཐུན་སྒྲིལ་ལུས་ངག་དགེ་སྦྱོར་དང་། །ཁྱད་པར་ཉེར་སྒྲུབ་རིམ་གཉིས་ཟུང་འཇུག་གི །བླ་མའི་མན་ངག་སྒྲུབ་ལ་ལྷུར་བླངས་ཏེ། །དབེན་པར་བཅད་རྒྱ་ངག་མཚམས་དུས་འདའ་ཞིང་། །བྱ་དཀའ་དོན་ཆུང་དགོས་དགོས་མང་པོ་ཡང་། །མཆིལ་མའི་ཐལ་བ་ཙམ་དུ་མ་ཆགས་པར། །སྐད་ཅིག་རིག་པའི་སྟེང་དུ་དམར་ཐག་བཅད། །ཆོས་སྐུ་རྒྱལ་པོས་གཏན་སྲིད་དེ་ནས་ཟིན། །འཁོར་འདས་ཆོས་ལ་རེ་དང་དོགས་པ་ཟད། །འབྲས་བུ་འདི་ལས་ལྷག་པ་ཡོད་སྙམ་མེད། །དེ་ཡང་མ་འགགས་རོལ་པའི་རྟེན་འབྲེལ་ལས། །སྣང་བའི་བདག་ཉིད་དཔལ་ཆེན་ཧེ་རུ་ཀ །སྟོང་པའི་བདག་ཉིད་རྡོ་རྗེ་དབྱིངས་ཕྱུག་མཁའ། །སྙོམས་པར་ཞུགས་ལས་རྒྱལ་སྲས་རིག་པ་འཛིན། །ཇི་ལྟར་སྣང་ཡང་རྒྱལ་བའི་ཞིང་རབ་འབྱམས། །གང་ལྟར་སྲིད་པ་ཐམས་ཅད་ཞི་ཁྲོའི་སྐུར། །རྡུལ་སྙེད་ཤར་ཡང་ཤར་མཁན་རང་རིག་མདངས། །མཁའ་དབྱིངས་འཇའ་ཟེར་ཀློང་ན་མེར་མེར་གསལ། །གསལ་སྟོང་ཟུང་འཇུག་དབྱིངས་རིག་འདུ་འབྲལ་མེད། །མེད་བཞིན་སྣང་བ་བདེན་གཉིས་དབྱེར་མེད་དོན། །དོན་གྱི་གནས་ལུགས་རང་བཞིན་འདུས་མ་བྱས། །བྱས་པ་དོན་ཡོད་ཁོ་མོ་ཨེ་མ་མཚར། །འདི་ཉིད་ཉམས་སྣང་འལ་འོལ་བྱུང་བ་རྣམས། །ཡི་གེར་འབྲིར་ཡང་མི་ལོང་དགོས་པ་ཅི། །འོན་ཀྱང་དྲིན་ཆེན་བླ་མ་དམ་པ་དེས། །བྲིས་གསུངས་ཡི་གེ་ཉུང་ངུར་བྱས་པ་ལ། །སླད་ནས་འབྲོག་བན་ལོ་ཙཱའི་སྐྱེ་བཞེས་པའི། །རིག་འཛིན་ཆེན་པོ་ནུས་ལྡན་རྡོ་རྗེ་ཡིས། །གནས་ཡིག་ལ་སོགས་དག་སྣང་ལུང་བསྟན་རྣམས། །ཞིབ་རྒྱས་བཀོད་ཅེས་བཀའ་གནང་བསྩལ་ལགས་ཀྱང་། །བདག་ནི་སྐྱེ་དམན་ཐོས་བསམ་སྦྱང་སྟོབས་ཆུང་། །དམ་པ་དགྱེས་པའི་ལེགས་བཤད་ལྟ་ཞོག་གི །སྐྱེ་བོ་ཕལ་པའི་རྣར་སྙན་ཙམ་ཞིག་ཀྱང་། །སྒྲིག་པར་ནུས་པའི་ཡོན་ཏན་མ་མཆིས་མོད། །འོན་ཀྱང་བཀའ་ཡི་ཁུར་ལྕི་དབང་བཙན་པས། །རྨི་ལམ་དག་སྣང་བྱུང་བ་རགས་རིམ་ཙམ། །དཀོན་མཆོག་དཔང་བཞུགས་ཟོལ་མེད་འབྲི་བར་བྱ། །

༈ དེ་ཡང་སྐུ་གསུམ་ཞིང་ཁམས་ཇི་ལྟར་ན། །ཆོས་སྐུ་ཞིང་ཁམས་ཁྱབ་བརྡལ་ཡངས་པའི་ཀློང་། །ལོངས་སྐུའི་ཞིང་ཁམས་གཞི་སྙིང་མེ་ཏོག་བརྒྱན། །སྤྲུལ་སྐུའི་ཞིང་ཁམས་མི་མཇེད་འཇིག་རྟེན་ཁམས། །ཉེར་ལྔའི་བར་ལ་བཅུ་གསུམ་ས་འདི་ལ། །རི་རབ་ལྷོ་ཕྱོགས་འཛམ་གླིང་ལྟེ་བ་ནི། །རྡོ་རྗེ་གདན་ནས་དཔག་ཚད་བརྒྱ་ལྷག་བྱང་། །ཁ་བ་ཅན་ཞེས་ཐུགས་རྗེ་ཆེན་པོའི་ཞིང་། །བོད་ཡུལ་འདི་ལ་གནས་ཆེན་བསམ་མི་ཁྱབ། །ཁྱད་པར་མདོ་སྟོད་སྤོ་བོའི་ལུང་པ་འདི། །ཨོ་རྒྱན་ཆེན་པོའི་ལུང་བསྟན་གནས་མཆོག་ཡིན། །རྒྱབ་ལ་དཔལ་རིའི་གངས་ཅན་ཤར་གྱི་ཕྱོགས། །ཆོས་རྒྱལ་བཞེངས་པའི་འདོང་ཆུའི་གཙུག་ལག་དང་། །ཀུང་ལུང་མཁའ་འགྲོ་འདུ་བའི་ཤར་ལྷོ་མཚམས། །གནས་ཆེན་སྦས་ཡུལ་གཡག་གུ་ལུང་གི་ལྷོ། །རྒྱལ་བའི་གཞལ་ཡས་ཐོག་རྒྱལ་ལྷོ་ནུབ་དང་། །དེ་བི་ཀོ་ཊ་ཟངས་མདོག་དཔལ་རིའི་ནུབ། །སྦས་ཡུལ་མངོན་པར་དགའ་བའི་བཀོད་ཆེན་བྱང་། །གནས་མཆོག་དགའ་བ་ལུང་ཞེས་བྱ་བ་བཞུགས། །འདི་ཡི་ལོ་རྒྱུས་མདོར་བསྡུས་བརྗོད་པར་བྱ། །

༈ དེ་ཡང་ངོ་མཚར་བ་ལས་ཀྱང་ཆེས་ཆེར་རྨད་དུ་བྱུང་བ། ཐོས་པ་ཙམ་གྱིས་དགྲ་དགེགས་གདུག་པ་ཅན་རྣམས། ཉེ་བར་མི་ནུས་པའི་ཁྲོ་བོའི་ཕོ་བྲང་། དྲག་པོའི་གནས་དགའ་བ་ལུང་གི་དག་སྣང་དང་ཞལ་གཟིགས་ལུང་བསྟན་བྱུང་ཚུལ་མདོར་ཙམ་བརྗོད་ན། བླ་མའི་གདན་ས་འོག་མིན་དགའ་བའི་ཚལ། །དབེན་གནས་རྒྱ་མཁར་བཀྲ་ཤིས་རི་ཁྲོད་དུ། །མོས་ལྡན་ཨོ་རྒྱན་བུ་ཁྲིད་ཁོ་མོ་ཡིས། །འཆི་བ་མི་རྟག་ལས་འབྲས་བསླུ་མེད་དྲན། །ངན་སོང་འཁོར་བའི་སྡུག་བསྔལ་དོས་རེ་དྲག །དུས་ངན་སྐྱེ་བོའི་སྤྱོད་འགྲོས་ཡིད་སྐྱོ་ཞིང་། །དམ་ཆོས་མ་གཏོགས་ཅིས་ཀྱང་དགོས་མེད་སྙམ། །ཐུན་མོང་ཆོས་སྤྱོད་ལུས་ངག་དགེ་སྦྱོར་དང་། །ཁྱད་པར་བླ་མ་དམ་པའི་གདམས་ངག་ལ། །འདུན་པ་ཆིག་དྲིལ་སྒྲུབ་ལ་བརྩོན་པའི་ཚེ། །རྡོ་རྗེ་ལུས་ཀྱི་ཕྱི་ནང་རྟེན་འབྲེལ་གྱིས། །ནང་དུ་རླུང་སེམས་ཐིག་ལེ་དྷུ་ཏིར་འཁྱིལ། །གདོས་བཅས་འབྱུང་ལྔའི་རྟོག་ཚོགས་རང་སར་དག །ཕྱི་ཡུལ་རི་བྲག་རྩི་ཤིང་ས་དང་ཆུ། །རག་པའི་དངོས་པོ་མ་གྲུབ་སྟོང་གསལ་བརྡལ། །སྒོ་ལྔ་ཧར་སངས་གནས་ལུགས་ཡུག་གཅིག་ཏུ། །ལྟ་སྒོམ་སྤྱོད་སོགས་རྩིགས་གཞི་བྲལ་བའི་ངང་། །མ་བལྟས་བཞག་པས་དག་པ་རབ་འབྱམས་སུ། །ཉིན་དང་མཚན་མེད་ཉམས་སྣང་འོད་གསལ་ལས། །དགའ་བ་ལུང་གི་ཕར་རྒྱབ་ས་ཁྱོན་ཀུན། །ལག་པའི་མཐིལ་དུ་སྐྱུ་རུ་ར་བཞག་བཞིན། །སྒྲིབ་མེད་ཟང་ཐལ་གང་སྣང་སངས་རྒྱས་ཞིང་། །ནམ་མཁའི་དབྱིངས་ཀུན་འཇའ་ཟེར་དྲྭ་བ་འཁྲིགས། །དཔའ་བོ་མཁའ་འགྲོ་གྲངས་མེད་ལྷ་ལམ་ལ། །ལྷ་དང་ལྷ་ཕྲན་རྒྱན་ཆ་དུ་མས་ལྷུབས། །མཆོད་པའི་ལྷ་མོ་རྣམས་ཀྱི་རྩེ་གར་རོལ། །གནམ་ས་བར་སྣང་འོད་ཀྱི་ཐིབ་ཐིབ་ཀློང་། །ལྟད་མོ་སྣང་བས་གང་ཡང་ཆོས་སྐུར་མཐོང་། །དེ་མཐོང་མི་ཡུལ་སྣང་བ་ཡུད་གཅིག་འགག །ཁོ་མོ་བག་དྲོ་ཉམས་འབར་ཤེས་པ་འཕྱོ། །ཕྱོགས་དེར་འགྲོ་བའི་འདུན་པ་ཤར་ནའང་། །དྲིན་ཅན་བླ་མས་བཀའ་བཀྱོན་ཡོང་གི་དོགས། །ཞུ་བར་མ་ནུས་སྡོད་པའི་སྐབས་ཤིག་ཏུ། །ཉམས་སྣང་སྐྱ་བོའི་ཆ་ལུགས་ལྡན་པ་ཞིག །མདུན་དུ་བྱུང་སྟེ་ལག་ན་རྒྱ་སྲན་དབྱིབས། །ཁ་དོག་དཀར་པོ་འགྲོན་བུ་ཆུང་ཙམ་ཞིག །ཞི་དུལ་ལྡན་པས་གུས་པའི་ཚུལ་གྱིས་ནི། །བདག་ལ་གཏད་སྟེ་འདི་སྐད་ཅེས་ཀྱང་ཟེར། །འདི་ནི་སངས་རྒྱས་འོད་སྲུང་འཕེལ་གདུང་ཡིན། །སྐྲ་ལ་བརྒྱན་ན་རྟེན་འབྲེལ་དངོས་གྲུབ་ནི། །དེ་ཡི་གྲངས་ཀྱི་ལྷ་ཚོགས་ཞལ་གཟིགས་འགྱུར། །གནས་མཆོག་ངོ་མཚར་དགའ་བ་ལུང་གི་རྒྱབ། །ཐབས་དང་ཤེས་རབ་ཟུང་འཇུག་གསུམ་གྱིས་བརྡའ། །མཚོ་ཆེན་བརྗིད་ཆེ་གཏིང་ནས་ཟབ་པ་དེ།  །ཡི་དམ་འཁོར་ལོ་བདེ་མཆོག་ཕོ་བྲང་ཡིན། །མཚོ་སྔོན་དྭངས་ཤིང་ལྟ་ན་སྡུག་པ་དེ། །ཡུམ་ཆེན་རྡོ་རྗེ་ཕག་མོའི་ཕོ་བྲང་ཡིན། །མཎྜལ་འདྲ་བའི་མཚོ་ཆུང་མཛེས་པ་དེ། །ཡབ་ཡུམ་ཟུང་དུ་འཇུག་པའི་ཕོ་བྲང་ཡིན། །ད་ལྟ་ཉིད་དུ་གནས་ཆེན་ནང་དུ་སོང་། །བླ་མས་ཁྱེད་ལ་བཀྱོན་པ་མི་ཡོང་ཞེས། །དེ་ལྟར་ལུང་བསྟན་གསལ་བར་བྱུང་བ་དང་། །ད་ནི་གསང་ཐབས་དགའ་ལུང་མཚོ་ལྟས་སུ། །འགྲོ་སྙམ་བཙུན་མ་གཅིག་ཁྲིད་ཆས་པའི་ཚེ། །བཙུན་མ་དྲུག་ཙམ་རྗེས་སུ་འབྲང་བྱུང་ཞིང་། །རང་ལོ་སོ་གཉིས་ལྕགས་ཕོ་འབྲུག་ལོ་ཡི། །ཡོས་ཟླ་ཉེར་གསུམ་ལམ་ཞུགས་སོང་བའི་ཚེ། །གནས་སྒོར་དུང་སྐད་སྙན་པར་ཐོས་པ་དང་། །འདི་ནི་གནས་བདག་མཁའ་འགྲོ་མ་རྣམས་ཀྱིས། །སྤྲོ་དགའི་རོལ་མོ་མདུན་ནས་བསུ་བ་ཡིན། །རྟེན་འབྲེལ་བཟང་སྙམ་དེ་མ་ཐག་ཏུ་ནི། །རྡོ་ལ་དུང་དཀར་གསལ་བར་བྱོན་ནས་འདུག །གནས་སྒོ་ངེས་པར་འབྱེད་པའི་བརྡའ་རུ་གོ །

༈ དེ་ནས་གནས་ཆེན་དགའ་ལུང་ནང་། །བདག་གི་གཙོར་བྱས་བཙུན་མ་བརྒྱད། །ལྟད་མོ་ལྟ་རུ་སོང་བའི་ཚེ། །སྦས་ལུང་ལྷའི་ཞིང་ཁམས་མཇལ། །ཉིན་མཚན་མེད་པར་འཇའ་ཚོན་འཁྲིགས། །འཇའ་འོད་འཁྱིལ་བའི་གུར་ཁང་དུ། །ལྷ་དང་ལྷ་མོ་དཔག་མེད་ནི། །ཟ་འོག་གུར་ཁྱིམ་བཀྲམ་པ་ལྟར། །ཕྱོགས་མཚམས་ཤིག་ཤིག་གང་བ་དང་། །རྡོ་ལ་མཁའ་འགྲོའི་ཞབས་རྗེས་མཇལ། །ཡར་ཡར་འགྲོ་བའི་བརྡའ་རུ་གོ། ཁྱད་པར་གནས་ཆེན་འདི་ཉིད་ཕྱི། །ཤིང་གི་སྒོ་མོའི་ནང་ཤེད་ན། །གནས་མཆོག་ཤེལ་སྟོད་སྒྲུབ་གནས་སུ། །མེ་ཏོག་སྣ་ཚོགས་སྐྱེས་པའི་ས། །བདུད་རྩིའི་ཆུ་རྒྱུན་སྔགས་སྒྲ་སྒྲོག །བྱ་རིགས་སྐད་སྙན་མགྲིན་གླུ་ལེན། །ཏིང་འཛིན་ཉམས་རྟོགས་འཕེལ་བའི་ས། །རྩེ་གཅིག་སྒྲུབ་ལ་བརྩོན་པའི་ཚེ། །ནུབ་གཅིག་བདག་གི་ཉམས་སྣང་ལ། །རྒན་མོ་དབུ་སྐྲ་དཀར་བ་གཅིག །ཁོ་མོ་བདག་གི་མདུན་དུ་བྱུང་། །ཁྱོད་ལ་ཅི་མིང་བྱས་ཙ་ན། །རིན་ཆེན་སྐྱེད་མོ་མིང་ཅེས་ཟེར། །དེ་ལ་ཞུས་ལེན་མང་བྱས་པས། །བདག་ལ་འདི་སྐད་གསུངས་པ་ཐོས། །རྒྱབ་རི་ཟས་རི་མཆོག་རྒྱན་ངོས། །སངས་རྒྱས་ཤཱཀྱ་ཐུབ་པ་ལ། །ཉེ་བའི་སྲས་བཞིས་བསྐོར་བ་དང་། །ཨོ་རྒྱན་པདྨ་འབྱུང་གནས་དང་། །མཁའ་འགྲོ་ཡེ་ཤེས་མཚོ་རྒྱལ་གྱིས། །གཏེར་གྱི་སྒྲོམ་བུ་སྟོན་པ་དང་། །ལོ་ཙཱ་སྐ་ཅོག་རྣམ་གཉིས་བཞུགས། །ཆོས་སྐྱོང་རྔ་བརྡུང་ཁྲིགས་སེ་ཡོད། །སྒྲ་སྙན་རོལ་མོ་སྣ་ཚོགས་པ། །རྒྱུན་ཆད་མེད་པར་རྟག་ཏུ་སྒྲོག །གནས་མཆོག་དེ་ཡི་མདུན་རི་ལ། །རྒྱ་གར་དམ་པ་སངས་རྒྱས་དང་། །རྗེ་བཙུན་མི་ལ་ཡབ་སྲས་ཀྱིས། །མཇལ་འཕྲད་རྫུ་འཕྲུལ་མཛད་ཚུལ་ཡོད། །གྲུབ་ཐོབ་ཐང་སྟོང་རྒྱལ་པོ་དང་། །སྐྱེས་བུ་ཡེ་ཤེས་རྡོ་རྗེ་དང་། །དཔའ་བོ་མཁའ་འགྲོ་འཁོར་གྱིས་བསྐོར། །ཞིང་ཁམས་བྱོན་པའི་ཚུལ་ཀྱང་ཡོད། །བསྟན་སྐྱོང་ཚེ་རིང་མཆེད་ལྔ་བཞུགས། །རི་དྭགས་རྒྱལ་པོ་སེང་གེ་དང་། །ལྷ་བྱ་དཀར་མོ་དུང་གི་མདོག །གཞན་ཡང་བྱ་རིགས་མང་དུ་ཡོད། །རྔ་ཆེན་ཁམས་གསུམ་འབྲུག་གྲགས་དང་། །མཁའ་འགྲོའི་ཚོགས་དུང་རྒྱང་གྲགས་སོགས། །རོལ་མོའི་བྱེ་བྲག་སྣ་ཚོགས་ཡོད། །ཅེས་པས་ལུང་བསྟན་བྱུང་བ་བཞིན། །བྲག་ལ་ཞལ་གཟིགས་གསལ་བར་བཞུགས། །སྟག་ཕྲད་ཤལ་གྱི་དབུ་རྩེ་རུ། །མཆོད་པའི་ལྷ་མོས་གར་སྟབས་མཛད། །རྒྱལ་བ་རིགས་ལྔ་གཙོ་འཁོར་བཞུགས། །གནས་མཆོག་དེ་ཡི་གཡས་ཕྱོགས་སུ། །འཕགས་པ་ཀླུ་སྒྲུབ་ཡབ་སྲས་བཞུགས། །མར་པ་ཡབ་ཡུམ་སྲས་གསུམ་དང་། །རས་ཆེན་རས་ཆུང་ལ་སོགས་པའི། །རས་པ་བརྒྱ་དང་རས་མ་བརྒྱ། །གར་སྟབས་ཁྲིགས་སེ་བཞུགས་པ་ཡོད། །གནས་མཆོག་དེ་ཡི་ཐང་དཀྱིལ་ན། །དུར་ཁྲོད་ཀླུ་མོ་རྒྱལ་ཆེན་མ། །བམ་རོའི་ཚོགས་འཁོར་བསྐོར་བ་དང་། །ཡུམ་མཆོག་རྡོ་རྗེ་ཕག་མོ་ཉིད། །ཚོགས་མཆོད་བྱིན་བརླབས་མཛད་པ་མཇལ། །མཁའ་འགྲོ་ཁྲོས་མ་ནག་མོ་ཡང་། །བམ་རོའི་གད་དར་བཅད་པ་དང་། །མ་རུང་གནོད་པར་བྱེད་པ་རྣམས། །མཁའ་འགྲོ་སེང་གེའི་གདོང་ཅན་ལ། །སྲོག་སྙིང་ཚོགས་འཁོར་ཕུལ་བ་མཇལ། །ཅང་ཤེས་རྟ་མཆོག་བྷ་ལ་ཧ། །སྒ་སྔ་གསེར་གྱི་པ་ཏྲ་དང་། །ཞབས་རྗེས་རྡོ་རྗེ་རྒྱ་གྲམ་ལ། །མེ་ཏོག་ཚོམ་བུ་བཀོད་པ་ཡོད། །ལྷ་ཚོགས་མ་དང་མཁའ་འགྲོ་རྣམས། །སེང་གེ་རི་དྭགས་སོགས་ཆིབས་ནས། །དུར་ཁྲོད་འབྱོན་པའི་ཚུལ་དུ་ཡོད། །ཚོགས་བྲོ་བརྡུང་བའི་ཞབས་རྗེས་ནི། །ངོ་མཚར་ཆེ་བ་མང་དུ་ཡོད། །གནས་མཆོག་དེ་ཡི་འོག་རོལ་ཏུ། །གུ་རུ་རྡོ་རྗེ་གྲོ་ལོད་བཞུགས། །བཀའ་སྲུངས་ཕག་གདོང་ནག་མོ་ཡོད། །དུར་ཁྲོད་དེ་ཡི་དབུ་རྩེ་ན། །བྲག་དཀར་རྒོད་ཀྱི་སྐུ་འདྲ་བཞུགས། །དེ་ལ་རྒོད་གཅིག་ལྡིང་སྐོར་བྱེད། །སླར་ཡང་སྐུ་ལ་ཐིམ་པ་དང་། །བྱ་བྲན་མང་པོ་དུར་ཁྲོད་གཟིགས། །དེ་ནི་སྤྲུལ་བྱ་བཞི་བྱུང་ནས། །ནམ་མཁའི་དབྱིངས་ནས་ལྡིང་སྐོར་བྱེད། །ཤར་གྱི་འབྲོག་ལུང་གནས་སུ་སོང་། །ལུང་བསྟན་ཡིན་པའི་བརྡའ་རུ་གོ །གནས་མཆོག་དེ་ཡི་མདུན་རི་ལ་། །སེང་གེ་མ་བུ་འཛོམ་པ་ཡོད། །འཚམ་སྐོར་བྱ་རྒོད་སྤུང་རི་ལ། །རིག་འཛིན་རྒོད་ཀྱི་སྡེམ་འཕྲུ་བཞུགས། །དཔའ་བོ་མཁའ་འགྲོ་སྤྲིན་ལྟར་འཁྲིག །གཡས་རི་དཔའ་བོ་སྡེ་ལྔ་དང་། །གཡོན་རི་དཔའ་མོ་སྡེ་ལྔ་བཞུགས། །མཁའ་འགྲོའི་ཚོགས་དུང་འབུད་པ་དང་། །མཆོད་པ་རྣམས་ལྔ་བཤམ་པ་ཡོད། །ལྷ་འདྲེ་མི་གསུམ་འདུ་བའི་གནས། །སྒྲུབ་གནས་ཡིན་པའི་བརྡའ་རུ་གོ །

༈ ལྕིམ་རྩ་ཤར་གྱི་རྩེ་མོ་ན། །ཞི་བ་བཞི་བཅུ་རྩ་གཉིས་དང་། །ཁྲག་འཐུང་ལྔ་བཅུ་རྩ་བརྒྱད་དང་། །བྱང་ཆུབ་ལྟུང་བཤགས་ལྷ་ཚོགས་རྣམས། །མ་བཅོས་སྟོང་གསལ་ངང་དུ་མཇལ། །ཞིང་སྐྱོང་སྡེ་ལྔ་ཡབ་ཡུམ་རྣམས། །གཡག་གུ་ཚོགས་མཆོད་འབུལ་ཚུལ་ཡོད། །གནས་མཆོག་དེ་ཡི་འོག་རོལ་ན། །ཡི་གེ་ཨ་ཡིག་རང་བྱོན་ཡོད། །བསྐལ་པ་བཟང་པོའི་ནས་འབྲུ་ལ། །བྱམས་པ་མགོན་པོའི་ཕྱག་ནས་ཡོད། །ལུང་བསྟན་ཡང་ཡང་བྱུང་བའི་རྗེས། །དུས་ལ་བབ་སྟེ་ཞལ་གཟིགས་རྣམས། །འགགས་མེད་གསལ་སྟོང་ངང་དུ་མཇལ། །རྟ་ཚལ་ཁྲུས་ཀྱི་རྫིང་བུ་ལ། །ཆུ་བོ་ཡན་ལག་བརྒྱད་ལྡན་དང་། །མཚོ་ནང་བཀྲ་ཤིས་སྒོ་མང་མཇལ། །དཔའ་བོ་དཔའ་མོ་གར་སྟབས་བསྒྱུར། །ལྷ་དང་ལྷ་མོའི་མཆོད་སྤྲིན་གཏིབས། །ཕྱོགས་འཚམས་ཀུན་ཏུ་འཇའ་ཚོན་འཁྲིགས། །དེ་ཚེ་ཚོགས་ཀྱི་འཁོར་ལོ་བསྐོར། །ལྷ་དང་དཔའ་བོ་མཁའ་འགྲོ་རྣམས། །སྔོན་མོ་ནས་ཀྱི་རབ་གནས་འཐོར། །འབྲས་དཀར་མཆོད་པ་དངོས་སུ་བཞེས། །ལག་མཆོད་བདུད་རྩི་གཡོན་དུ་འཁོར། །དེ་བཞིན་མཚོ་ཡང་གཡོན་དུ་འཁོར། །མཚོ་ནང་རླབས་ཀྱི་ཕྲེང་བ་ནི། །བསྐོར་ཞིང་བདག་གི་མདུན་དུ་བྱུང་། །མཚོ་བདག་བརྙེས་པའི་རྟེན་འབྲེལ་གོ། རྒོད་ཐང་དཀར་ཐང་སྨུག་གཉིས་བྱུང་ནས། །མདུན་གྱི་མཁའ་ལ་ལྡིང་སྐོར་བྱས། །ཐང་དཀར་དེ་ཉི་མ་ནུབ་ཕྱོགས་སོང་། །ཐང་སྨུག་དེ་སྤྲུལ་སྒྱུར་བཤིག་ནས་འཆམ། །ཨེ་མ་ངོ་མཚར་ཆེའོ་སྙམ། །བློ་ལས་འདས་པའི་ཉམས་ཤིག་ཤར། །བརྗོད་དུ་མེད་པའི་དོན་ཞིག་རྟོགས། རྒྱལ་བོ་དྲི་མེད་ཀུན་ལྡན་དེ། །རྟ་མཆོག་ངང་པ་ཆིབས་ནས་སུ། །སྒ་སྔ་རུ་གསེར་གྱི་པ་ཏྲ་ལ། །ཞབས་རྗེས་རྡོ་རྗེ་རྒྱ་གྲམ་མཛེས། །མེ་ཏོག་ཚོམ་བུ་བཀོད་པ་ཡོད། །རྟེན་འབྲེལ་ཞབས་རྗེས་མང་དུ་བཞུགས། །དོང་གྲུབ་མི་རོ་མཁུན་ཤེས་ལ། །མར་དཀར་གྱིས་སྲུང་མར་བྱུག་པ་ལ། །ལོ་གཅིག་ཟླ་གཉིས་སོང་གྱུར་ཀྱང་། །ཐེབ་རྗེས་རི་མོ་མ་ཡལ་འདུག །དངོས་གྲུབ་འབྱུང་བའི་བརྡའ་རུ་གོ། མཚོ་ནང་ལྷ་མོ་གོས་དཀར་དང་། །མཚོ་བདག་རྒྱལ་མོ་སྤུན་གསུམ་དང་། །གཉེན་གྱི་ཕ་བོང་བདེ་ཆེན་ལ། །མི་འགྱུར་ཨ་དང་རྡོ་རྗེ་རང་བྱོན་ཡོད། །གཞན་ཡང་རྟགས་དང་རྟེན་འབྲེལ་མང་དུ་བྱུང་། །དཀར་རྩི་འཕྲང་རྒྱབ་རི་བོ་དེར། །རྒྱ་གར་གྲུབ་ཆེན་བརྒྱད་ཅུ་དང་། །རྒྱལ་བ་རིགས་ལྔ་ལྷ་ཚོགས་དང་། །བདེ་མཆོག་ཡབ་ཡུམ་དཀྱིལ་འཁོར་འཇལ། །ཕོ་བྲང་དེ་ཡི་ཁྲི་འགྱོག་ལ། །སེང་གེས་གླང་ཆེན་གཡུ་འབྲུག་དང་། །སྟག་མོ་རྨ་བྱའི་ཁྲི་དང་ནི། །གཞན་ཡང་རིན་ཆེན་སྣ་ཚོགས་ཁྲི། །མ་སྒྲིབ་དངོས་སུ་གསལ་བར་ཡོད། །ཕོ་བྲང་དེ་ཡི་འོག་རོལ་ན། །བདེ་ཆེན་བཀོད་པ་གཙོར་བྱས་པའི། །ས་ར་ཧ་དང་ཏི་པུ་པ། །འབིར་ཝ་ཆང་འཐུང་ཉི་མ་བཏོད། །ཐུགས་རྗེས་གསུང་སྤྲུལ་མ་ཎི་བསྐུལ། །རིགས་དྲུག་འདྲེན་པའི་ཚུལ་དུ་ཡོད། །ཆོས་སྐུ་ཡུམ་ཆེན་ཤེར་ཕྱིན་དང་། །ལོངས་སྐུ་རྡོ་རྗེ་ཕག་མོ་དང་། །སྤྲུལ་སྐུ་མ་གཅིག་གྲུབ་རྒྱལ་རྣམས། །ཕོ་བྲང་ཚེ་བུམ་བཅས་པ་འཇལ། །རྡོ་རྗེ་ཕག་མོའི་གསང་ཆུ་ལ། །རིག་འཛིན་འབྱོན་པའི་དར་ལམ་མཇལ། །ཉི་ཟླ་སྐར་གསུམ་འཛོམས་པ་དང་། །རྗེ་བཙུན་སྒྲོལ་མ་དཀར་སྔོན་དང་། །ནོར་སྦྱིན་ཛམ་ལྷ་སེར་ནག་དང་། །མཆོད་པའི་ལྷ་མོ་རོལ་མོ་འཛིན། །མཁའ་འགྲོ་མ་ཡི་ཚོགས་དུང་ནི། །དཀར་པོ་རྒྱང་གྲགས་གསལ་བ་དང་། །སྲིད་པའི་རྒན་ཁོག་བཅས་པ་ཡང་། །བྲག་གི་ལོགས་ལ་རང་བྱོན་ཡོད། །རུས་སྦལ་མ་བུ་གནམ་ལ་འཆོང་། །སྦྲུལ་ནག་མ་བུ་གྱེན་ལ་རྒྱུག །ས་བདག་ཀླུ་གཉན་ཆོ་འཕྲུལ་ཡིན། །དེ་ཡི་ཁ་གནོན་དྲག་པོ་ཡི། །མཆོད་རྟེན་མང་དུ་བཞུགས་པ་ཡོད། །གསང་བ་དངུལ་གྱི་སྒོ་མོའི་ནང་། །ཡང་རྒྱབ་ལྷའི་ཞིང་ཁམས་དང་། །ཕ་ཝང་གཞལ་ཡས་ཁང་དུ་མཇལ། །ཆོས་སྐུ་ཀུན་བཟང་ཡབ་ཡུམ་དང་། །དམ་པ་རིགས་བརྒྱ་ལྷ་ཚོགས་བཞུགས། །གནས་མཆོག་དེ་ཡི་དབུས་རི་ངོས། །སངས་རྒྱས་ཤཱཀྱ་ཐུབ་པའི་འཁོར། །དགྲ་བཅོམ་མང་པོའི་བསྐོར་བ་མཇལ། །གནས་མཆོག་དེ་ཡི་གཡོན་ཕྱོགས་སུ། །གུ་རུ་པདྨ་འབྱུང་གནས་ལ། །མཁའ་འགྲོ་སྡེ་ལྔས་བསྐོར་བ་དང་། །ལྷ་བུ་དམ་པ་ཏོག་དཀར་དང་། །རིག་འཛིན་གྲལ་ར་ཤིགས་སེ་མཇལ། །སངས་རྒྱས་སྨན་ལྷ་རྒྱལ་པོ་ལ། །ལྷ་མོ་མང་པོས་བསྐོར་བ་མཇལ། །བཅོམ་ལྡན་ཐུབ་པའི་དབང་པོ་ལ། །གནས་བརྟན་བཅུ་དྲུག་བསྐོར་བ་མཇལ། །མཁའ་འགྲོའི་བྲོ་ར་ནོར་བུ་ལྡེམས། །མཁའ་འགྲོ་བྲོ་གར་མཛད་པ་ཡིན། །ལམ་ནི་བསྐོར་མོར་གསལ་བར་ཡིས། །རྟེན་འབྲེལ་བྲོ་གར་བྱས་པའི་ཚེ། །ཁྱད་པར་གནས་མཆོག་མི་འགྱུར་བའི། །རྟགས་སུ་མཁའ་འགྲོའི་ཚོགས་གཞོང་རྙེད། །ལྷ་ཡི་སྤྲུལ་པ་བྱིའུ་གཅིག་བྱུང་། །ལྷའི་གསེར་བྱིའུ་ཁྲ་ཆུང་དེས། །མདུན་དུ་བྱུང་ནས་གུས་པའི་ཚུལ། །སྐད་སྒྲོག་སྐོར་བ་མང་དུ་བྱས། །སྨོན་ལམ་ཕྱེ་མར་མཆོད་པ་བླངས། །ལུང་བསྟན་ཡིན་པར་ངེས་ཤེས་སྐྱེས། །དེ་ནས་ཡར་ལ་སོང་བའི་ཚེ། །ལྷོ་སྒོ་བཀྲ་ཤིས་སྒོ་མང་དང་། །བཻཌཱུརྱའི་གླེགས་བམ་དང་། །མཆོད་རྟེན་མཐོང་བ་དོན་ལྡན་བཞུགས། །ཕྱིར་བལྟས་མཆོད་རྟེན་དབྱིབས་སུ་འདུག །ནང་བལྟས་གསང་སྔགས་བླ་མེད་ཀྱི། །དཀྱིལ་འཁོར་ལྷ་ཚོགས་ཐམས་ཅད་མཇལ། །ཁོ་མོ་མཆོད་རྟེན་སྟེང་དུ་ཕྱིན། །ནམ་མཁའི་དབྱིངས་ནས་འཇའ་གུར་ཕུབ། །འཇའ་སྣེ་མཆོད་རྟེན་སྟེང་དུ་ཟུག །ནམ་མཁའི་ཀློང་དུ་ཡར་བལྟས་པས། །ཨོ་རྒྱན་པདྨ་འབྱུང་གནས་ལ། །གཡས་སུ་ལྷ་ལྕམ་མཎྜ་ར། །གཡོན་དུ་ཡེ་ཤེས་མཚོ་རྒྱལ་ལ། །གཙོ་འཁོར་གསུམ་པོ་གསལ་བར་མཇལ། །ལ་སོ་བཞི་ཡི་དར་ལམ་ལ། །སེང་གེ་བར་སྣང་གང་བ་བྱུང་། །ཚོགས་ཀྱི་མཆོད་པ་བཤམས་པ་ལས། །བྱིན་བརླབས་དཔའ་བོ་མཁའ་འགྲོའི་མཛད། །མཁའ་འགྲོ་མཉེས་པའི་གཏོར་མ་དེ། །དཀར་པོ་དུང་དང་མར་བཞིན་གྱུར། །མ་དང་མཁའ་འགྲོའི་དངོས་གྲུབ་ནི། །མར་རྒྱན་དངོས་སུ་བརྒྱན་པའི་སྐབས། །བདག་གི་གཙོར་བྱས་བཙུན་མ་རྣམས། །དད་དང་མོས་གུས་དཔག་མེད་སྐྱེས། །ཁ་ཞེ་མེད་པའི་སྨོན་ལམ་བཏབ། །ཕྱག་འཚལ་མཎྜལ་ཕུལ་བ་དང་། །གསོལ་བ་བཏབ་ཅིང་དབང་བཞི་བླངས། །ཁོ་མོས་སྤྲོ་བ་དཔག་མེད་སྐྱེས། །འཁྲུལ་གྲོལ་གྱི་མདུད་པ་ཞིག་ཏེ་ཐལ། །ཆོས་དབྱིངས་དྲི་མེད་ཀྱི་རང་གཟུགས་གསལ། །ཀ་དག་ལྷུན་གྲུབ་ཀྱི་ཀློང་ཡངས་ན། །འགག་མེད་རོལ་པའི་ལྷ་ཚོགས་མཇལ། །རི་བྲག་གི་མདང་ཞལ་ལྷ་སྐུར་གསལ། །སྣང་བ་རང་རྩལ་ལས་ཤར་བ་ངོ་རེ་མཚར། །འཁོར་འདས་དབྱེར་མེད་རྟོགས་པ་རིག་པའི་གཤིས། །གཤིས་ལུགས་རྗེན་པར་རྟོགས་འདི་བླ་མའི་དྲིན། །དྲིན་ཅན་ཁྱེད་ཀྱིས་རྟག་ཏུ་བྱིན་གྱིས་བརློབས། །རྩ་གསུམ་པདྨའི་གདན་སྟེང་ན། །བླ་མ་ཡི་དམ་མཁའ་འགྲོའི་ཚོགས། །མི་འབྲལ་སྤྱི་གཙུག་རྒྱན་དུ་བཞུགས། །སྤྱིར་སེམས་ཅན་རྣམས་ལ་ཐུགས་རྗེས་གཟུང་། །སྒོས་མོས་ལྡན་བདག་ལ་དངོས་གྲུབ་སྩོལ། །སངས་རྒྱས་པའི་འབྲས་བུ་ཐོབ་པར་ཤོག །མཆོད་རྟེན་ཁྱུང་གཤོག་ལྡན་པ་དང་། །སྒྲོལ་མ་ཉི་ཤུ་རྩ་གཅིག་མཇལ། །བདུད་རྩི་ཡེ་ཤེས་ལྔ་ལྡན་ཆུས། །མཇལ་ཙམ་གྱི་ཚེ་ཡིས་དངོས་གྲུབ་ཐོབ། །ཁྲུས་བྱས་ནད་གདོན་སྡིག་སྒྲིབ་ཐམས་ཅད་དག །འཐུང་བ་ཙམ་གྱིས་མཁའ་སྤྱོད་གནས་སུ་སྐྱེ། །དེ་སོགས་ཡོན་ཏན་མང་ཡོད་བསྡུས་པ་ཡིན། །

༈ ཡང་རྒྱབ་ལ་ལ་ཡོང་བའི་ཚེ། །ལྷ་བྱ་གོང་མོ་མ་བུ་གསུམ། །ཤོག་ཤོག་ཟེར་ཞིང་སྔོན་དུ་འགྲོ། །ལུང་བསྟན་ཡིན་སྙམ་རྗེས་སུ་སོང་། །ལམ་སྣ་ཁྲིད་པ་བཞིན་བྱས་ནས། །གནས་ནང་ཕྱིན་པས་བྲག་གི་ལོགས། གཡས་སུ་མཁའ་འགྲོ་བདུད་འདུལ་མ། །ཁྲོས་མ་ནག་མོའི་སྐུ་གཉིས་བཞུགས། །གཡོན་དུ་ལབ་སྒྲོན་ཞི་མ་ཁྲོ། །ཌ་རུ་རྒྱན་ཆ་སྣ་ཚོགས་སྤྲས། །རལ་པའི་ལྕང་ལོ་ཉི་ལེར་རུ། །བཞུགས་པར་མཇལ་བཞིན་རང་བྱོན་ཡོད། །སྐན་སྒྲ་སྒྲོགས་པའི་དུར་ཁྲོད་ནས། །གནས་དེའི་དུར་ཁྲོད་བདག་མོ་ལ། །འདོད་ཡོན་གཏོར་མ་ཕུལ་བ་ལས། །བསྟན་པ་སྲུང་བའི་དམ་བཅའ་བྱས། །གྲམ་ཤལ་རྫ་རི་སྨུག་པོ་ལ། །རིག་འཛིན་འབྱོན་པའི་དར་ལམ་ཡོད། །རིན་ཆེན་མཎྜལ་ཕུལ་འདྲ་ཡོད། །བདུད་རྩི་ཡོན་ཆབ་བཤམས་འདྲ་ཡོད། །དོ་རི་གཡུ་ལོ་བཀོད་པའི་ཞིང་། །རྗེ་བཙུན་སྒྲོལ་མའི་བླ་མཚོ་དང་། །ལྷ་མ་ཡིན་གྱི་ཆགས་ཚུལ་ཡོད། །གནས་ཆེན་དེ་རུ་ཕྱིན་པ་ལས། །ནམ་མཁའི་དབྱིངས་ནས་འཇའ་གུར་ཕུབ། །འཇའ་དེ་བདག་གི་སྤྱི་བོར་ཟུག །མཁའ་དབྱིངས་ཀློང་ནས་ཡར་བལྟས་པས། །སྒྲོལ་མ་འཇིགས་པ་བརྒྱད་སྐྱོབ་མཇལ། །དོ་རི་ལ་ཡི་ཕར་རྒྱབ་ན། །རྒྱ་ནག་གནས་ཀྱི་བཀོད་པ་དང་། །མཁྱེན་རབ་འཕགས་པ་འཇམ་དབྱངས་ལ། །རང་འདྲའི་འཁོར་མང་བསྐོར་བར་མཇལ། །མཚོ་ཆེན་གཏིང་ནས་ཟབ་པ་དེ། །འཁོར་ལོ་བདེ་མཆོག་ཕོ་བྲང་མཇལ། །མཚོ་སྔོན་ཁ་དོག་ལེགས་པ་དེ། །རྡོ་རྗེ་ཕག་མོའི་ཕོ་བྲང་མཇལ། །མཚོ་ཆུང་མཎྜལ་འདྲ་བ་དེ། །ཡབ་ཡུམ་གཉིས་མེད་ཕོ་བྲང་མཇལ། །གནས་དེར་མཁའ་འགྲོ་མ་རྣམས་ཀྱིས། །ཞབས་བསྐོར་མཛད་པའི་ས་འབུར་ངོས། །མཁའ་འགྲོའི་ཞབས་རྗེས་མཛོ་མོ་ཡི། །དུང་ལུས་ཞབས་རྗེས་གཉིས་ཀྱང་རྙེད། །མ་འོངས་དུས་ལ་བབ་པའི་ཚེ། །གནས་སྒོ་འབྱེད་པའི་ལྟས་སུ་གོ། གནས་ཆེན་བརྒྱ་དང་རྩ་བརྒྱད་དང་། །མཚོ་ཆེན་བརྒྱ་དང་རྩ་བརྒྱད་རྣམས། །ཕར་རྒྱབ་གནས་ལ་བཞུགས་ཡོད་སྐད། །རེ་ཞིག་དུས་ལ་མ་བབས་སོ། །མཚལ་རི་ཟངས་མདོག་དཔལ་རི་རུ། །གུ་རུ་པདྨ་སམ་བྷ་ལ། །ཐོད་ཕྲེང་སྡེ་ལྔས་བསྐོར་བ་མཇལ། །གཡས་ཟུར་བདེ་ཆེན་ཞིང་ཁམས་ཤར། །སྣང་བ་མཐའ་ཡས་དངོས་སུ་མཇལ། །སེང་སྐྱོག་དུང་གི་སྒོ་མོ་ལ། །རྒྱུད་སྡེ་བཞི་ཡི་དཀྱིལ་འཁོར་དང་། །རྒྱལ་བ་རིགས་གསུམ་མགོན་པོ་མཇལ། །ཐུགས་རྗེ་ཆེན་པོ་ཕྱག་བཞི་པ། །མི་འཇིགས་སེང་ཁྲིར་བཞུགས་པ་ཡིས། །རིགས་དྲུག་སྐྱོབ་པའི་ཚུལ་དུ་བཞུགས། །རྗེ་བཙུན་བྱམས་པ་མགོན་པོ་ལ། །དཔའ་བོ་མཁའ་འགྲོ་ཆོས་སྐྱོང་དང་། །བརྟན་མ་བཅུ་ཡིས་འཁོར་བཅས་རྣམས། །ཞིང་ཁམས་འབྱོན་པའི་ཚུལ་དུ་ཡོད། །སྤྲུལ་པའི་ལྷ་བྱ་གོང་མོ་ཡིས། །ལུང་བསྟན་བྱེད་པའི་ཚུལ་དུ་ཡོད། །ཐོད་པ་ཁམས་གསུམ་དབང་སྡུད་ཡོད། །ནོར་བུ་རིན་ཆེན་འབར་བ་ལ། །ཉི་ཟླ་སྐར་གསུམ་བརྒྱན་པ་ཡོད། །རིན་ཆེན་དངུལ་གྱི་མཎྜལ་དང་། །ཁ་དོག་ལྔ་ལྡན་བཞུགས་ཁྲི་ཡོད། །གླང་པོ་ཆེ་ཡི་སྣ་ལྗགས་ལ། །བར་དོར་བགྲོད་པའི་ཐར་ལམ་ཡོད། །ལས་མཁན་གཏུམ་པོ་རབ་དྲག་ལ། །ལས་མཁན་བཞི་ཡིས་བསྐོར་བ་ཡོད། །ལས་ངན་བསགས་པའི་སྡིག་ཅན་རྣམས། །ཤ་མ་རི་ཡི་སྡོང་པོ་ལ། །སྡུག་བསྔལ་མྱོང་བའི་ཚུལ་དུ་ཡོད། །བྲག་ནག་གཡག་གི་གདོང་པ་ཅན། །དམྱལ་བ་བསྡུས་འཇོམ་ཆགས་ཚུལ་ཡོད། །ཚ་དམྱལ་མེ་རི་འབར་བ་ལ། །དམྱལ་ཟངས་ཆེན་པོ་བཙུག་པར་མཐོང་། །སེམས་ཅན་སྡུག་བསྔལ་གྲོལ་བའི་ཕྱིར། །དམྱལ་བའི་ཐུབ་པ་བཞུགས་པ་མཇལ། །དེ་སོགས་དམྱལ་བའི་སེམས་ཅན་རྣམས། །སྡུག་བསྔལ་མྱོང་ཚུལ་དཔག་མེད་མཐོང་། །ཀྱེ་མ་ཀྱི་ཧུད་ཐུབ་པ་རིན་པོ་ཆེ། །སེམས་ཅན་སྡུག་བསྔལ་འདི་རྣམས་སྙིང་རེ་རྗེ། །འདི་དག་མྱུར་དུ་ཞི་བར་བྱིན་གྱིས་བརློབས། །འགྲོ་དྲུག་སེམས་ཅན་ཐར་ལམ་འགོད་དུ་གསོལ། །

༈ ས་ཚིགས་བྱུང་བའི་དུས་ཤིག་ཏུ། །བཙུན་མའི་གྲོགས་གཅིག་བདག་ལ་ནི།།ཆར་འབོད་དགོས་ཞེས་བསྐུལ་བ་ལས། །ལུག་རའི་ཆུ་མིག་མགོ་མ་རུ། །ཀླུ་ཡི་བུ་མོ་མཛེས་ལྡན་ལ། །འདོད་དོན་གསོལ་བ་འདི་ལྟར་བཏབ། །ད་ལམ་ལུང་བསྟན་མཐོང་ཐོས་དག་སྣང་དང་། །ཉམས་སྣང་དྲན་རིག་ཞལ་གཟིགས་གནས་མཆོག་འདིར། །བདུད་ཀྱི་བསླུ་བ་བཙན་གྱིས་ཆོ་འཕྲུལ་དང་། །མི་མིན་འབྱུང་པོའི་བརྫུ་བ་མ་ཡིན་ཞིང་། །ཡེ་ཤེས་ལྷ་ཡིས་ལུང་བསྟན་ཡིན་ངེས་ན། །དངོས་གྲུབ་བདུད་རྩིའི་ཆར་ཆེན་འབེབས་པར་ཤོག །ལོ་ལེགས་ཕྱུགས་རྣམས་འཕེལ་ཞིང་འབྲུ་བཅུད་སྨིན། །སེམས་ཅན་ཀུན་ལ་ཕན་ཐོགས་རྒྱ་ཆེར་ཤོག །གཞན་དོན་ཁོ་ནར་དམིགས་ཏེ་སྨོན་ལམ་བཏབ། །དེ་མ་ཐག་ཏུ་ཉིན་མཚན་གསུམ་གྱི་བར། །བདེན་པ་མི་བསླུའི་རྟགས་སུ་ཆར་ཆེན་བབས། །དགེ་མཚན་བཟང་པོའི་རྟེན་འབྲེལ་དེ་ལྟར་བྱུང་། །

༈ སྦས་པའི་གནས་ཆེན་འདི་ཉིད་ལ། །ཕྱི་རུ་ཤིང་གི་སྒོ་མོ་ཡིན། །སྲུང་མ་བྱ་ཡི་མཚན་ཅན་ཡོད། །ནང་ནི་ལྕགས་ཀྱི་སྒོ་ཡིན་སྟེ། །སྒོ་སྲུང་ལྕགས་ཀྱི་མཚན་ཅན་ཡོད། །གསང་བ་དངུལ་གྱི་སྒོ་ཡིན་སྟེ། །སྒོ་སྲུང་སེང་གེའི་མཚན་ཅན་ཡོད། །ཤར་སྒོ་དུང་གི་སྒོ་མོ་ལ། སྒོ་སྲུང་ཁྲོ་བོ་ཁྲོ་མོ་ཡོད། །སྟག་གདོང་སེང་གདོང་ཕག་གདོང་གསུམ། །ཆོས་མཛད་ཡོངས་ཀྱི་བར་ཆད་སེལ། །ཕྱོགས་སྐྱོང་ཞིང་སྐྱོང་དམ་ཅན་ཚོགས། །དགྲ་བགེགས་མཐའ་དམག་བཟློག་ཏུ་གསོལ། །ཇི་ལྟར་བཅོལ་བཞིན་ཕྲིན་ལས་མཛོད། །ཁོ་མོའི་མཐོང་ཚུལ་སྣ་ཚོགས་ཀྱང་། །དོན་གྱི་དབྱིངས་ལས་གཡོ་བ་མེད། །དཔེ་ལས་འདས་པའི་ཉམས་ཤིག་ཤར། །བརྗོད་དུ་མེད་པའི་དོན་ཅིག་རྟོགས། །སེམས་ཀྱི་ནོར་བུ་རང་ལ་གནས་པ་དེ། །བླ་མའི་དྲན་གྱིས་རང་ངོར་རྟོགས། །གོམས་པའི་སྟོབས་ཀྱིས་རྗེས་ཤེས་དག །མཉམ་རྗེས་འདྲེས་པའི་ཤེས་པ་དེ། །ཕ་བླ་མ་རྣམས་ལ་མཆོད་པ་འབུལ། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །དེ་བཞིན་སྨོན་ལམ་མང་དུ་བཏབ། །ལུང་བསྟན་བརྡའ་རྟགས་དུས་བབ་པས། །གནས་སྒོ་ཕྱེ་རུ་སོང་བའི་རྗེས། །བཀའ་སྲུང་དང་གནས་བདག་ཁྲོས་ཚུལ་སྟོན། །གཞི་བདག་རྣམས་མ་བཟོད་ཀུན་གསལ་ཀློང་། །ཆུ་འཛིན་རྣམས་སྔགས་ནག་ཚོགས་པ་ལྟར། །གློག་ཞགས་གིས་རྗེས་ལ་འབྲུག་སྒྲ་སྒྲོག །ས་འཇོམས་ལྟར་གྲུ་ཆར་ཆེམ་ཆེམ་བབས། །ཤིང་བཅག་དང་རྡོ་བསྙིལ་རླུང་དམར་གཡོས། །ཡུལ་མི་རྣམས་ཤིན་ཏུ་བྲེད་ཅིང་དངངས། །བདག་ཅག་རྣམས་ལ་གནོད་མ་གྱུར། །ཁོ་མོའི་གཙོ་བྱས་བཙུན་མ་བརྒྱད། །མི་ཕལ་པ་ཉི་མ་གསུམ་གྱི་ལམ། །ཉིན་གཅིག་ཏུ་མྱུལ་ཞིང་ཚོགས་འཁོར་དང་། །མཆོད་གར་སོགས་དལ་དལ་གྱི་ངང་ནས་གྲུབ། །ཕ་བླ་མ་དམ་པའི་ཐུགས་རྗེ་དང་། །མ་མཁའ་འགྲོའི་བྱིན་བརླབས་ཡིན་པར་ངེས། །ངོ་བོ་འགྱུར་མེད་ཡེ་བབ་ཀློང་། །རང་བཞིན་གསལ་སྟོང་འཇའ་གུར་མེར། །ཐུགས་རྗེ་མ་འགག་རོལ་པ་ལས། །གདོས་བཅས་མཚན་མ་དབྱིངས་སུ་ནུབ། །དག་པ་རབ་འབྱམས་གསེར་གྱི་གླིང་། །གར་བལྟས་ལྷའི་གཞལ་གཡས་ཁང་། །ཅིར་སྣང་རྒྱལ་བའི་མཚན་དཔེའི་བཀྲ། །ལྷུན་གྲུབ་འོད་ཀྱི་དཀྱིལ་འཁོར་ལྟད་མོ་ཆེ། །འཛིན་ཆགས་ཀྱི་བློ་མདུད་ཁོང་ནས་གྲོལ། །འཁྲུལ་བྲལ་གྱི་འབྲས་བུ་རང་ཞལ་མཇལ། །གནས་མཐར་ཐུག་འོག་མིན་རྡོ་རྗེའི་མཁའ། །ཀུན་བཟང་གི་རྒྱལ་ས་ཟིན་པ་དང་། །གཟུགས་སྐུ་གཉིས་འགྲོ་བའི་དོན་བྱེད་ཤོག །དེ་ལྟར་འཁྲུལ་མེད་གནས་ཀྱི་ངོས་འཛིན་དང་། །ཞལ་གཟིགས་རྣམས་རིམ་པར་གཏན་ལ་ཕབ། །ཡ་མཚན་གྱི་རྟགས་མཚན་མང་དུ་བྱུང་། །དགའ་སྤྲོའི་གཏམ་སྙན་གླིང་ཞིང་ཡོང་། །བླ་མའི་དྲུང་དུ་ཕྱིན་པའི་ཚེ། །མཚན་ལྡན་གྱི་བླ་མ་དམ་པ་ལ། །གནས་ཡ་མཚན་ཆེ་བའི་ལོ་རྒྱུས་རྣམས། །འཕྲི་བསྣན་དང་སྦ་སྲི་མེད་པར་ཞུས། །ཕ་བླ་མས་དགྱེས་པའི་ངང་ཚུལ་བསྟན། །བདག་ལའང་ངེས་པའི་རྟགས་བྱུང་གསུངས། །བསླབ་བྱའི་ཞལ་གདམ་མང་དུ་གནང་། །ཁོ་མོ་ཡི་མཆེད་གྲོགས་བདུན་པོ་ལ། །གཞན་ཕལ་པ་ལ་རེ་ཞིག་གསང་བྱས་ཀྱང་། །གྲོགས་མཆེད་དང་ཡུལ་མི་རྣམས་ལ་བཤད། །ལ་ལས་ངོ་མཚར་ཆེའོ་ཟེར། །ལ་ལས་ཆོ་འཕྲུལ་ཆེའོ་གླེང་། །ལ་ལས་མི་དག་རྫུན་ཡིན་ཟེར། །ལ་ལས་ངེས་པ་མེད་ཞེས་སྨྲ། །བསམ་བློ་མི་གཅིག་མཚར་དགུ་གཏམ། །བདག་གིས་བདེན་སྟོབས་འདི་ལྟར་བརྗོད། །བདག་གིས་གཙོར་བྱས་བཙུན་མ་རྣམས། །དགའ་བ་ལུང་གི་གནས་མཆོག་ཏུ། །མཐོང་ཐོས་དངོས་སུ་བྱུང་བ་རྣམས། །རྫུན་དུ་སྨྲས་པ་ཡིན་ན་ནི། །ཁྲོས་མ་ནག་མོའི་བཀའ་ཆད་ཕོབ། །འདི་རྣམས་ཇི་ལྟར་བདེན་གྱུར་ན། །ཡུལ་ཁམས་འདི་རུ་བཀྲ་ཤིས་པའི། །དགེ་མཚན་རྟགས་རྣམས་བསྟན་དུ་གསོལ། །ཞེས་སོགས་བདེན་ཚིག་མང་དུ་བརྗོད། །དགའ་ལུང་གནས་སྒོ་འབྱེད་པ་ནས། །མི་ལོ་ཉི་ཤུ་རྩ་ལྔའི་བར། །ཕྱུགས་ལ་གཅན་གཟན་འཇིགས་པ་མེད། །ལོ་ལྔའི་བར་དུ་ལོ་ཡང་ལེགས། །འབྲུག་ནས་སྤྲེལ་གྱི་ཟླ་བའི་བར། །གནས་ཆེན་དགའ་ལུང་ཕུ་ནས་ནི། །རི་ཁྲོད་དབེན་གནས་ཁང་བའི་བར། །ཟླ་བ་ལྔ་ལ་འཇའ་རྒྱུན་འབྲེལ། །དེ་སོགས་ཡ་མཚན་ལྟས་མང་པོ། །བྱུང་ཀྱང་བརྗོད་ནས་ཅི་ཞིག་བྱ། །ལོག་ལྟ་ཅན་གྱི་མདུན་དག་ཏུ། །རྫོགས་པའི་སངས་རྒྱས་དངོས་བྱོན་ཀྱང་། །དད་པ་ཅུང་ཟད་ཡོད་མ་ཡིན། །ཆོས་ཀྱི་གྲགས་པའི་རྣམ་ངེས་ལས། །ལོག་པའི་ལམ་ལ་མཐའ་མེད་ཕྱིར། །དེ་དག་འདིར་ནི་སྤྲོ་བྱ་མིན། །ཞེས་གསུངས་ལྷག་པར་དེང་སང་དུས། །ལས་ལྡན་འགའ་ཞིག་མ་གཏོགས་པའི། །ཕལ་ཆེར་བདུད་ཀྱི་དབང་དུ་སོང་། །རྒྱུད་ལམ་ཐུར་དུ་བདེ་བ་ལྟར། །ངག་གི་ཉེས་པ་ཞར་ལ་བསགས། །འོན་ཀྱང་དེ་ཡང་ངན་འབྲེལ་སྟེ། །འཁོར་བ་མཐའ་ཅན་འགྱུར་བར་གསུངས། །དེ་བས་བཟང་འབྲེལ་འཇོག་པ་ལེགས། །བསྟོད་སྨད་སྒྲ་གྲག་བྲག་ཆ་འདྲ། །དོན་ལ་ཕན་གནོད་བྲལ་བཞིན་ཏུ། །བཟང་འབྲེལ་ངན་འབྲེལ་མཉམ་པའི་ཀློང་། །མ་བཅོས་གནས་ལུགས་རང་བབས་སུ། །བསམ་བརྗོད་བློ་འདས་ངང་དུ་བཞག །འདི་ཡི་དགེ་བས་འགྲོ་བ་ཀུན། །སྒྲིབ་གཉིས་བག་ཆགས་ལས་གྲོལ་ཞིང་། །སྤངས་རྟོགས་ཡོན་ཏན་མཐར་ཕྱིན་ཏེ། །རྡོ་རྗེ་འཛིན་པའི་ས་ཐོབ་ཤོག །

༈ ཁྱད་པར་དུ་འཕགས་པ་དྲག་པོའི་གནས་མཆོག་དགའ་བ་ལུང་འདི་ལ། དད་པ་དང་མོས་གུས་ཀྱི་སྒོ་ནས་གནས་སྐོར་བྱེད་པ། ཚོགས་འཁོར་ཕུལ་བ་ཚེ་ཐར་བཏང་བ། དར་ཅོག་བཙུག་པ། སྐར་མེ་བལྟམས་པ། ཕྱག་ཕུལ་བ། དགེ་བ་ཁས་ལེན་བྱེད་པ། སྡིག་པ་ཕུལ་བ། གནས་མཆོག་འདི་ཉིད་མཐོང་ཐོས་དྲན་རིག་ཏུ་གྱུར་པ་རྣམས་ཀྱི་ཚེ་རབས་ཐམས་ཅད་ནས་བསགས་པའི་སྡིག་སྒྲིབ་མ་ལུས་པ་དག ནད་གདོན་སྐྱེན་ངན་བར་ཆད་ཐམས་ཅད་སེལ་ཞིང་། ཚེ་རིང་ནད་མེད་བདེ་སྐྱིད་དཔལ་འབྱོར་ཕུན་སུམ་ཚོགས་པ་ཐོབ་པ་དང་། ཕྱི་མ་དག་པ་མཁའ་སྤྱོད་ཀྱི་ཞིང་དུ་སྐྱེ་བར་ཤོག ༈ མཁྱེན་བརྩེ་ནུས་པའི་དབང་ཕྱུག་བདག །འགྲོ་བའི་སྐྱབས་མགོན་རིན་པོ་ཆེ། །མཆོག་གསུམ་རྩ་གསུམ་སྐུ་གསུམ་གྱི། །རྒྱལ་བ་རྒྱ་མཚོའི་བཀྲ་ཤིས་ཤོག །རང་བྱུང་ཀུན་ཏུ་བཟང་པོའི་ཀློང་། །མཐའ་ཡས་སྤྱན་གཟིགས་པདྨ་འབྱུང་། །དགོངས་བརྡའ་གང་ཟག་སྙན་ཁུང་གིས། །བརྒྱུད་བཅས་བླ་མའི་བཀྲ་ཤིས་ཤོག །ཆོས་སྐུ་ཡུམ་ཆེན་ཀུན་བཟང་མོ། །ལོངས་སྐུ་དབྱིངས་ཕྱུག་ཕག་མོའི་སྐུ། །སྤྲུལ་སྐུ་མཚོ་རྒྱལ་ལབ་སྒྲོན་མ། །རྒྱལ་ཡུམ་རྣམས་ཀྱིས་བཀྲ་ཤིས་ཤོག །དག་པ་མཁའ་སྤྱོད་ཞིང་ཁམས་དང་། །རྣམ་དབྱེར་མེད་པའི་དགའ་བ་ལུང་། །གནས་པའི་དཔའ་བོ་དཔའ་མོ་དང་། །ཞིང་སྐྱོང་རྣམས་ཀྱི་བཀྲ་ཤིས་ཤོག །གང་ཞིག་བསྟན་ལ་རབ་སྡང་བའི། །མ་རུང་དགྲ་དགེགས་ཚར་གཅོད་ཅིང་། །རྣལ་འབྱོར་བུ་བཞིན་སྐྱོང་བ་ཡི། །ཆོས་སྐྱོང་རྣམས་ཀྱི་བཀྲ་ཤིས་ཤོག །བྱང་ཆུབ་སེམས་ཀྱིས་ཕྲིན་ལས་ཀྱིས། །ཐུགས་རྗེའི་འོད་ཟེར་ཕྱོགས་བཅུར་འཕྲོ། །བཅོ་ལྔ་ཟླ་བ་ཉ་རྒྱས་ལྟར། །འཛམ་གླིང་བདེ་བའི་བཀྲ་ཤིས་ཤོག །རྒྱལ་ཁམས་བདེ་ཞིང་སྐྱེ་འགྲོ་སྐྱིད། །བསྟན་པ་དར་དང་བསྟན་འཛིན་མཐུན། །ཇི་ལྟར་སྨོན་པ་ཀུན་འགྲུབ་པར། །སྐྱབས་གནས་རྣམས་ཀྱི་བྱིན་གྱིས་བརློབས། །

༈དགེ་བའི་རྩ་བ་འདི་ལ་བརྟེན་ནས་ཕ་མས་གཙོར་བྱས་སེམས་ཅན་ཐམས་ཅད་བདེ་ཆེན་པདྨ་འོད་ཀྱི་ཞིང་དུ་ཨོ་རྒྱན་པདྨའི་ཞབས་དྲུང་དུ་རྫུས་ཏེ་སྐྱེ་ཞིང་གསང་སྔགས་ཐེག་པ་ཆེན་པོའི་ཆོས་ལ་ལོངས་སྤྱོད་པར་གྱུར་ཅིག སརྦ་མངྒ་ལཾ།

ཞེས་ཡི་གེ་པ་ནི་མཚུངས་མེད་སྤྲུལ་པའི་སྐུ་རིན་པོ་ཆེ་རིག་འཛིན་ཆོས་ཀྱི་རྒྱ་མཚོའི་ཐུགས་རྗེས་འཛིན་པའི་རྒྱ་རའི་བཙུན་པ་བྷུདྡྷ་ས་མ་དྷི་བདག་གིས་ཡུམ་ཆེན་རྡོ་རྗེ་ཕག་མོའི་འགྲོ་བའི་དོན་དུ་གཟུགས་ཀྱི་སྐུར་བྱོན་པ་སྒྲུབ་པ་མོ་ཨོ་རྒྱན་བུ་ཁྲིད་དེ་ཉིད་ཀྱི་དྲུང་དུ་ཇི་ལྟར་གསུངས་པ་བཞིན་རྒྱ་མཁར་རི་ཁྲོད་ནས་ལྷག་ཆད་ནོར་འཁྲུལ་མེད་པར་རབ་ཏུ་གུས་པར་བྲིས་པ་འདིས་ཀྱང་བསྟན་པ་དང་སེམས་ཅན་ཐམས་ཅད་ལ་ཕན་ཐོགས་རྒྱ་ཆེན་པོ་འབྱུང་བར་ཤོག་ཅིག དགེ་བ་འདི་ཡིས་བདག་དང་འགྲོ་བ་ཀུན། །ལས་ཉོན་སྒྲིབ་ཚོགས་མ་ལུས་ཀུན་བྱང་ཞིང་། །བླ་མེད་ཐེག་ཆེན་ལམ་གྱི་སྒོར་ཞུགས་ནས། །དཔའ་བོ་མཁའ་འགྲོ་འདུ་བའི་གནས་མཆོག་ཏུ། །ཡེངས་མེད་རྩེ་གཅིག་སྒྲུབ་ལ་རབ་བརྩོན་ཏེ། །ཚེ་གཅིག་རྡོ་རྗེ་འཆང་དབང་ཐོབ་པར་ཤོག །བཀྲ་ཤིས་དགེའོ་ཞུས་སོ། །

༈ན་མོ་གུ་རུ་བྷྱ༔ མཁྱེན་པ་རབ་ཡངས་བརྩེ་དང་ནུས་པའི་བདག །དུས་གསུམ་སངས་རྒྱས་པདྨ་ཐོད་ཕྲེང་རྩལ། །བླ་མ་ལྷ་དང་ཌཀྐི་ཆོས་སྲུང་ལ། །སྒོ་གསུམ་རབ་ཏུ་གུས་པས་ཕྱག་འཚལ་ལོ། །དེ་ཡང་ལྷ་མོ་དྲི་མ་མེད་པས་ཞུས་པའི་མདོ་ལས་ལུང་བསྟན་པའི་བྱང་ཕྱོགས་ཁ་བ་ཅན་གྱི་ལྗོངས་ཐུགས་རྗེ་ཆེན་པོའི་ཞིང་ཁམས་འདི་ལ་གནས་མཆོག་ཁྱད་པར་ཅན་གངས་ཏི་སེ། ལ་ཕྱི་ཆུ་བར་མཁའ་སྤྱོད་ཙཱ་རི་ཏྲ་སྟེ་སྐུ་གསུང་ཐུགས་ཀྱི་གནས་གསུམ་དང་འབྲེལ་ཞིང་དཔའ་བོ་མཁའ་འགྲོ་རྒྱུན་མ་ཆད་པའི་དྲག་པོའི་ཕོ་བྲང་དགའ་བ་ལུང་གི་གནས་མཆོག་འདི་ཉིད་ཀྱི་ཞལ་གཟིགས་ལ། གནས་མཆོག་འདི་དག་ཕྱིའི་སྒོ། །ཕྱི་ལ་དུང་དཀར་རང་བྱོན་ཡོད། །ནང་ལ་མཁའ་འགྲོའི་ཞབས་རྗེས་བཞུགས། །གནས་མཆོག་ཤར་སྟོད་སྒྲུབ་གནས་ཀྱི། །རྒྱབ་རི་ཟས་རི་མཆོག་རྒྱན་ངོས། །སངས་རྒྱས་ཤཱཀྱ་ཐུབ་པ་ལ། །ཉེ་བའི་སྲས་བཞིས་བསྐོར་བ་དང་། །ཨོ་རྒྱན་པདྨ་ཡབ་ཡུམ་བཞུགས། །མདུན་རི་དམ་པ་སངས་རྒྱས་དང་། །རྗེ་བཙུན་མི་ལ་ཡབ་སྲས་སོགས། །ལྷ་ཚོགས་དཔག་ཏུ་མེད་པ་བཞུགས། །སྟག་ཕྲད་ཤར་གྱི་དབུ་རྩེ་རུ། །རྒྱལ་བ་རིགས་ལྔ་གཙོ་འཁོར་དང་། །ཀླུ་སྒྲུབ་ཡབ་སྲས་གཙོ་འཁོར་དང་། །རས་ཆེན་རས་ཆུང་རས་པ་བརྒྱ། །རས་མ་བརྒྱ་སོགས་མང་དུ་བཞུགས། །ཐང་ལ་དུར་ཁྲོད་བཀོད་པ་ཡོད། །དུར་ཁྲོད་དེ་ཡི་དབུ་རྩེ་ན། །བྲག་དཀར་རྒོད་ཀྱི་སྐུ་འདྲ་ཡོད། །མཚམས་སྐོར་བྱ་རྒོད་ཕུང་རི་ལ། །རིག་འཛིན་རྒོད་ཀྱི་ལྡེམ་འཕྲུ་དང་། །གཡས་རི་དཔའ་བོ་སྡེ་ལྔ་དང་། །གཡོན་རི་དཔའ་མོ་སྡེ་ལྔ་བཞུགས། །ལྕམ་རྩ་ཤར་གྱི་དབུ་རྩེ་ན། །ཞི་བ་བཞི་བཅུ་རྩ་གཉིས་དང་། །ཁྲག་འཐུང་ལྔ་བཅུ་རྩ་བརྒྱད་དང་། །བྱང་ཆུབ་ལྟུང་བཤགས་ལྷ་ཚོགས་བཞུགས། །རྟ་ཚལ་ཁྲུས་ཀྱི་རྫིང་བུ་ལ། །ཆུ་བོ་ཡན་ལག་བརྒྱད་ལྡན་སོགས། །ངོ་མཚར་ལྟས་བཟང་དཔག་མེད་མཇལ། །རྒྱལ་བོ་དྲི་མེད་ཀུན་ལྡན་དེ། །རྟ་མཆོག་ངང་པ་ཆིབས་པ་དང་། །དངོས་གྲུབ་མི་རོ་མཁུན་ཤེས་ཡོད། །གཉེན་གྱི་ཕ་བོང་བདེ་ཆེན་ལ། །ཨ་དང་རྡོ་རྗེ་རང་བྱོན་ཡོད། །དཀར་རྩི་འཕྲང་རྒྱབ་རི་བོ་ལ། །རྒྱ་གར་གྲུབ་ཆེན་བརྒྱད་ཅུ་དང་། །རིགས་ལྔ་བདེ་མཆོག་དཀྱིལ་འཁོར་དང་། །ཁྲི་འགྱོག་བཅས་པ་གསལ་བར་ཡོད། །འོག་ཏུ་བདེ་ཆེན་བཀོད་པ་དང་། །ས་ར་ཧ་སོགས་གྲུབ་ཆེན་གསུམ། །ཐུགས་རྗེས་གསུང་སྤྲུལ་མ་ཎི་བསྐུལ། །ཡུམ་ཆེན་ཕག་མོ་གྲུབ་རྒྱལ་མོ། །སྐུ་གསུམ་ཚུལ་དུ་བཞུགས་པ་དང་། །དེ་སོགས་ཞལ་གཟིགས་དཔག་མེད་ཡོད། །གསང་བ་དངུལ་གྱི་སྒོ་མོའི་ནང་། །ཡང་རྒྱབ་ཕ་ཝོང་གཞལ་ཡས་ཁང་། །ཆོས་སྐུ་ཀུན་བཟང་ཡབ་ཡུམ་དང་། །དམ་པ་རིགས་བརྒྱའི་ལྷ་ཚོགས་བཞུགས། །དབུས་རི་སངས་རྒྱས་ཤཱཀ་ཐུབ་ལ། །དགྲ་བཅོམ་མང་པོའི་བསྐོར་བ་ཡོད། །གཡོན་དུ་གུ་རུ་པདྨ་ལ། །མཁའ་འགྲོ་སྡེ་ལྔས་བསྐོར་བ་དང་། །ལྷ་བུ་དམ་པ་ཏོག་དཀར་དང་། །རིག་འཛིན་གྲལ་ར་ཤིག་སེ་ཡོད། །སངས་རྒྱས་སྨན་ལྷ་ལྷ་མོས་བསྐོར། །ཐུབ་དབང་གནས་བརྟན་བསྐོར་བ་བཞུགས། །ལྷོ་སྒོ་བཀྲ་ཤིས་སྒོ་མང་ལ། །བཻཌཱུརྱའི་གླེགས་བམ་དང་། །མཆོད་རྟེན་མཐོང་བ་དོན་ལྡན་ནི། །ཕྱི་ནི་མཆོད་རྟེན་རྣམ་པ་ལ། །ནང་དུ་གསང་སྔགས་དཀྱིལ་འཁོར་ལྷ། །དཔག་ཏུ་མེད་པར་བཞུགས་པ་ཡོད། །མཆོད་རྟེན་ཁྱུང་གཤོག་ལྡེམ་པ་དང་། །སྒྲོལ་མ་ཉི་ཤུ་རྩ་གཅིག་བཞུགས། །ཁྲུས་ཆུ་ཡོན་ཏན་བརྒྱད་ལྡན་ཡོད། །དུར་ཁྲོད་རྐན་སྒྲ་སྒྲོག་པ་ལ། །དུར་ཁྲོད་གནས་ཀྱི་བདག་མོ་ཡོད། །གྲམ་ཤལ་རྫ་རི་སྨུག་པོ་ལ། །རིག་འཛིན་འབྱོན་པའི་དར་ལམ་ཡོད། །དོ་རི་གཡུ་ལོ་བཀོད་པའི་ཞིང་། །རྗེ་བཙུན་སྒྲོལ་མའི་བླ་མཚོ་དང་། །ལྷ་དང་ལྷ་མིན་ཆགས་ཚུལ་ཡོད། །དོ་རི་ལ་ཡི་ཕར་རྒྱབ་ན། །རྒྱ་ནག་གནས་ཀྱི་བཀོད་པ་ཡོད། །འཕགས་པ་འཇམ་དབྱངས་བཞུགས་པ་མཇལ། །ངོ་མཚར་ཆེ་བའི་མཚོ་གསུམ་ནི། །བདེ་མཆོག་ཕག་མོའི་བླ་མཚོ་ཡིན། །ཡབ་ཡུམ་ཟུང་འཇུག་ཚུལ་དུ་བཞུགས། །མཚལ་རི་ཟངས་མདོག་དཔལ་གྱི་རི། །གུ་རུ་པདྨ་སམ་བྷ་ལ། །ཐོད་ཕྲེང་སྡེ་ལྔས་བསྐོར་བ་དང་། །གཡས་སུ་བདེ་ཆེན་ཞིང་ཁམས་སུ། །ཆོས་སྐུ་སྣང་བ་མཐའ་ཡས་བཞུགས། །སེང་སྐྱོག་དུང་གི་སྒོ་མོ་ལ། །ཡི་དམ་རྒྱུད་སྡེའི་དཀྱིལ་འཁོར་དང་། །རྒྱལ་བ་རིག་གསུམ་མགོན་པོ་སོགས། །ལྷ་ཚོགས་དཔག་ཏུ་མེད་པར་བཞུགས། །གླང་པོ་ཆེའི་སྣ་ལྗགས་ལ། །བར་དོར་བགྲོད་པའི་ཐར་ལམ་དང་། །དམྱལ་བའི་ཆགས་ཚུལ་འཇིགས་པར་ཡོད། །ཕྱི་སྒོ་ཤིང་གི་སྒོ་མོ་ལ། །སྒོ་སྲུང་བྱ་ཡིས་མཚན་ཅན་ཡོད། །ནང་སྒོ་ལྕགས་ཀྱི་སྒོ་མོ་ལ། །སྒོ་སྲུང་ལྕགས་ཀྱི་མཚན་ཅན་ཡོད། །གསང་སྒོ་དངུལ་གྱི་སྒོ་མོ་ལ། །སྒོ་སྲུང་སེང་གེའི་མཚན་ཅན་ཡོད། །ཤར་སྒོ་དུང་གི་སྒོ་མོ་ལ། །སྒོ་སྲུང་ཁྲོ་བོ་ཁྲོ་མོ་ཡོད། །གཞན་ཡང་ལྷ་ཚོགས་དཔག་ཏུ་མེད། །བཞུགས་ཀྱང་འདི་ནི་མདོར་ཙམ་བསྡུས། །ཞིབ་པར་གནས་ཡིག་ཆེན་མོ་དང་། །འབྲིང་པོ་གཉིས་སུ་གསལ་བར་ཡོད། །རྒྱས་པར་དེ་རུ་གཟིགས་པར་ཞུ། །ཁྱད་པར་གནས་མཆོག་འདི་ལ་ཡང་། །ཕྱི་ནི་ལུང་པའི་རྣམ་པ་ལ། །ནང་ན་ལྷའི་གཞལ་ཡས་ཁང་། །གསང་བ་རྒྱུད་སྡེའི་དཀྱིལ་འཁོར་ཡིན། །རི་བྲག་སྣང་བ་བླ་མ་ལྷ། །སངས་རྒྱས་བྱང་སེམས་ཌཱཀི་དང་། །དཔའ་བོ་དཔའ་མོ་ཆོས་སྐྱོང་སྐུ། །ཆུ་རླུང་རང་བྱུང་སྔགས་ཀྱི་སྒྲ། །རྒྱལ་བའི་གསུང་གི་རིག་འཛིན་ནོ། །དྲན་རྟོག་ཆོས་ཉིད་རོལ་པ་སྟེ། །བདེ་བཤེགས་ཐུགས་ཀྱི་རང་བཞིན་ཡིན། །ཤིང་ལོ་མཆོད་པའི་ལྷ་མོ་དང་། །རྫ་གངས་འུར་བ་ཆ་ལང་རྔ། །བྱ་ཚོགས་མགྲིན་གླུ་རོལ་མོའི་སྒྲ། །སྨན་ལྗོངས་མེ་ཏོག་ནེའུ་གསིང་དང་། །ལྗོན་ཤིང་ཆུ་མཚོ་ཡིད་འོང་རྒྱན། །ཞིང་ཁམས་བཀོད་པ་བླ་ན་མེད། །སྐལ་ལྡན་རྣམས་ཀྱིས་སྤྱོད་ཡུལ་ཡིན། །འདི་ལ་དད་དང་ཕྱག་འབུལ་དང་། །གནས་སྐོར་ཚོགས་འཁོར་དར་ལྕོག་གཙུག །ཚེ་ཐར་སྐར་མེ་སྡིག་པ་ཕུལ། །མཐོང་ཐོས་དྲན་རེག་གྱུར་པ་རྣམས། །ནད་གདོན་འགལ་རྐྱེན་བར་ཆད་ཞི། །ཚེ་དཔལ་ལོངས་སྤྱོད་སྙན་གྲགས་དང་། །བདེ་སྐྱིད་ཕུན་སུམ་ཚོགས་པར་ཐོབ། །ཕྱི་མ་རིག་འཛིན་གྲལ་དུ་སྐྱེ། །ཐེག་ཆེན་ཆོས་ལ་ལོངས་སྤྱོད་དེ། །རྣམ་མཁྱེན་གོ་འཕང་ཐོབ་པར་འགྱུར། །དེ་སོགས་ཡོན་ཏན་དཔག་ཏུ་མེད། །འདི་ལ་བསམ་སྟེ་བརྩོན་འགྲུས་མཛོད། །

༈ སངས་རྒྱས་ཆོས་དང་དགེ་འདུན་གསུམ། །དཀོན་མཆོག་གསུམ་གྱི་བཀྲ་ཤིས་ཤོག །བླ་མ་ཡི་དམ་མཁའ་འགྲོ་གསུམ། །རྩ་བ་གསུམ་གྱི་བཀྲ་ཤིས་ཤོག །ཆོས་སྐུ་ལོངས་སྐུ་སྤྲུལ་སྐུ་གསུམ། །སྐུ་གསུམ་རྣམ་དག་བཀྲ་ཤིས་ཤོག །དགྲ་བགེགས་སྒྲོལ་ཞིང་རྣལ་འབྱོར་སྐྱོངས། །ཆོས་སྐྱོང་རྣམས་ཀྱི་བཀྲ་ཤིས་ཤོག །གང་བསམ་ཕྲིན་ལས་མྱུར་སྒྲུབ་པའི། །གནས་སྲུང་རྣམས་ཀྱི་བཀྲ་ཤིས་ཤོག །ཡུལ་ཕྱོགས་དགེ་ལེགས་སྐྱོང་བ་ཡི། །གཞི་བདག་རྣམས་ཀྱི་བཀྲ་ཤིས་ཤོག །གནས་འདིར་ཉིན་མོ་བདེ་ལེགས་མཚན་བདེ་ལེགས། །ཅེས་སོགས་དང་། འབད་དང་རྩོལ་བ་མ་དགོས་པས། ཅེས་སོགས་དང་། སྐྱེ་བ་ཀུན་ཏུ་སོགས་དང་། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཅེས་སོགས་བྱའོ། །ཅེས་གནས་ཡིག་ཤིན་ཏུ་བསྡུས་པ་འདི་ཡང་སྒྲུབ་པ་མོ་དེ་ཉིད་ཀྱི་དྲུང་དུ་ཇི་ལྟར་གསུངས་པ་བཞིན་ནོར་འཁྲུལ་མེད་པར་བཀྲ་ཤིས་ཆོས་མཁར་དུ་གུས་པར་བྲིས་པའི་ཡི་གེ་པ་ནི་སངས་རྒྱས་ཏིང་འཛིན་ནོ། །

མཆན། གོང་གི་གནས་ཡིག་འདི་གཉིས་ནི་དྲང་དོན་དུ་ཡེ་ཤེས་མཚོ་རྒྱལ་ལམ་ཤེལ་དཀར་གཟའ་རྡོ་རྗེ་མཚོའི་སྐྱེ་བ་ངེས་དོན་དུ་རྡོ་རྗེ་རྣལ་འབྱོར་མའི་རྣམ་པར་སྤྲུལ་པ་སྒྲུབ་པ་མོ་ཨུ་རྒྱན་བུ་ཁྲིད་ཀྱི་བཀའ་འབུམ་ལས་ཞལ་བཤུས་པའོ། །

༄༅། །གནས་ཆེན་སྦས་ཡུལ་དགའ་བ་ལུང་གི་དཀར་ཆག་གནས་ཡིག་རྡོ་རྗེའི་གསང་ལམ་ཐར་ལམ་སྒོ་འབྱེད་བཞུགས་སོ། །

༄༅། །ན་མོ་གུ་རུ་པདྨ་སིདྡྷི་ཧཱུྃ། །བདེ་བ་ཆེན་པོ་ཆོས་སྐུ་སྣང་མཐའ་ཡས། །ལོངས་སྤྱོད་རྫོགས་སྐུ་འཕགས་པ་སྤྱན་རས་གཟིགས། །དྲེགས་པ་ཚར་གཅོད་སྤྲུལ་སྐུ་རྟ་ཕག་གར། །སྐུ་བཞིའི་སྣང་ཚུལ་མ་འགགས་པདྨ་འབྱུང་། །རབ་འབྱམས་སྨྲ་བའི་སེང་གེ་མཚོ་རྒྱལ་མ། བདེ་ལྡན་བསྟན་པའི་སྒྲོན་མེ་རྗེ་འབངས་ཚོགས། །ས་ལམ་མཐར་ཕྱིན་དེ་ལ་ཕྱག་མཚལ་ལོ། །དེ་ཡང་སྤྱིར་འཛམ་བུ་གླིང་ན་མཁའ་འགྲོ་མ་འདུ་བ་ངེས་པའི་གནས་དང་དུར་ཁྲོད་ཆེན་པོ་བརྒྱད་དང་སུམ་ཅུ་ཡོད་པ་ལ། རྒྱ་གར་ཡུལ་ན་སུམ་ཅུ་རྩ་གཉིས་ཡོད། དེ་ཡང་སྤྱོད་པ་བྱེད་པའི་གནས་དྲུག །ཉམས་མྱོང་སྐྱོང་བའི་གནས་བཅུ་བཞི་དང་། དམ་ཚིག་སྐྱོང་བའི་གནས་བརྒྱད་དང་། འདོད་ཅིང་འདུན་པ་དྲག་པོ་བསྐྱེད་པའི་གནས་བཞི་སྟེ། སུམ་ཅུ་རྩ་གཉིས་ལ། རང་བཞིན་དུ་མཁའ་འགྲོ་མ་དུས་རྟག་ཏུ་གནས་པའི་གནས་ནི་བརྒྱད་ཡོད། དེ་དག་ལ་མཆོད་རྟེན་རེ་ཆུ་རེ་ལྷ་སྟོབས་ལྡན་དྲག་པོ་རེ། རང་བྱོན་གྱི་ཡི་དམ་རེ། སློབ་དཔོན་གྲུབ་ཐོབ་རེ། ཕྲ་མེན་མ་མོ་དང་མཁའ་འགྲོ་རེ། ཞིང་སྐྱོང་དང་ཕྱོགས་སྐྱོང་སོགས་དུར་ཁྲོད་ཀྱི་མཚན་ཉིད་རྫོགས་པ་རེ་ཡོད། ཨུ་རྒྱན་གྱི་ཡུལ་དུ་བརྒྱད་ཡོད། ཁ་ཆེའི་ཡུལ་དུ་བཅུ་ཡོད། ལི་དང་ཧོར་ན་ལྔ་ཡོད། ཚ་བ་དམར་ཐ་དང་བང་ཐུང་གི་ཡུལ་དུ་ལྔ་ཡོད། མི་ཉག་དང་ཧོར་ཡུལ་ན་བཅུ། ཐོ་མི་དང་གར་བསམ་གྱི་ཡུལ་ན་བཅུ། བོད་ན་གཉིས་ལས་མེད་ཅེས་སློབ་དཔོན་བི་མ་ལའི་བབ་ཆེན་ལས་གསུངས། དེ་ཡང་བོད་དབུ་རུའི་ཏིལ་སྒྲོའི་བྲག་དཀར་པོ་ལ་ལས་ཀྱི་མཁའ་འགྲོ་མ་མོ་ཚུལ་བདུན་གནས། ཁྱད་པར་ཀོང་པོའི་ལྷོ་ནུབ་མཚམས་ན་བློ་དང་རྡོའི་བར་ན། བྱར་བོར་ནས་ཉི་མ་བདུན་ན་ཙ་རི་ཏྲ་ཞེས་པ། དེ་ནས་ལ་བཅུ་གཅིག་བརྒལ་བའི་འོག་ན་མཁའ་འགྲོ་མ་ཁྲུས་བྱེད་ཀྱི་མཚོ་དང་། དེའི་དབུས་སུ་རིན་པོ་ཆེ་ཤེལ་ལས་གྲུབ་པའི་མཆོད་རྟེན་བཀྲ་ཤིས་སྒོ་མང་གི་རྣམ་པ་སྒོ་བདུན་ཅུ་རྩ་བདུན་ན། མགོན་པོ་བདུན་ཅུ་རྩ་བདུན་ཤེལ་ལས་གྲུབ་པ་སོགས་ཐེག་པ་རིམ་དགུའི་ལྷ་ཚོགས་ཚངས་པ་མཁའ་འགྲོ་མའི་བརྟེན་གནས་ཡོད། དེའི་ཤར་ཕྱོགས་སུ་གནས་ཆེན་པདྨ་བཀོད་ཅེས་བྱ་བ་པདྨ་རྒྱས་པ་ལྟ་བུའི་གནས་ཡོད་དེ། གནས་དེ་ནི་མཁའ་འགྲོ་མ་ཐམས་ཅད་འདུ་བའི་གླིང་ཁྱད་པར་ཅན་ཏེ། དེ་ལ་ཕྱི་ཡི་གླིང་བཅུ་གཉིས་དེ་ཡང་བྱང་ཕྱོགས་དྲག་པོར་བཀོད་ཆུང་གི་ཕྱི་ཡི་ས་གཟེར་དུར་ཁྲོད་དགའ་བ་ཚལ་ཅེས་བྱ་སྟེ། དེ་ཡང་དུར་ཁྲོད་ཆེན་པོ་འདི་ལ་ཕྱི་ནང་མི་འགྱུར་ཞིང་དངོས་གྲུབ་སྟེར་བའི་མཁའ་འགྲོ་མ་བདུན། དུས་ཆེན་པོ་བཞི་ལ་འདུ་ཞིང་དེ་མོ་བྱེ་བའི་མཁའ་འགྲོ་མ་འབུམ་ཕྲག་ཉི་ཤུ་རྩ་དགུ་ཡོད་དེ། དུར་ཁྲོད་འདི་ཡི་དབྱིབས་ནི་ཕྱི་ལྟར་དུ་རུ་ཊ་གན་འགྱེལ་དུ་འགྱེལ་བའི་ཚུལ་ནང་ལྟར་དཀྱིལ་འཁོར་གྱི་ཚུལ་དུ་ཆགས་པ། གསང་བ་པདྨ་དགའ་བ་འཁྱིལ་བའི་ཚུལ་དུ་ཆགས་ཏེ། ཕྱི་ལྟར་ན་བྱ་ཁྱུང་རུ་ཊའི་མགོ་བོ་ལ་ཨ་རཾ་མགྲིན་པ་ལྕེའི་ཚུལ། ལྕགས་སྡིག་ཕུག་སྙིང་ཁ། དེའི་ཆུ་མིག་སྙིང་ཁྲག་ལ་ཀླུ་བདུད་དུང་མིག་གནས། ཚོགས་འཁོར་ལྟེ་བ་སྤྲུལ་འཁོར་ལ། གིང་ཕོ་གིང་མོ་རི་རབ་རྩེར་སྤྲུལ་པའི་མཁའ་འགྲོ་རྒོད་གདོང་མ་གནས། རྟ་ཚལ་གསང་གནས་ཟླ་གམ་བརྩེགས་པ་ལ་མཁའ་འགྲོའི་བསྟི་གནས་སྲོག་གི་རྟེན་མཆོད་གནས། འདོམ་ལ་རིགས་གསུམ་མགོན་པོའི་མཆོད་རྟེན་གནས། །ནོར་བུའི་རྩེ་ནས་བདུད་རྩི་ཨ་མྲི་ཏ་སོགས་བྱུང་བའོ། །ནང་དཀྱིལ་འཁོར་ལྟ་བུར་བཤད་ན། ཤར་སྒོ་འབྲོག་ལུང་སྟེ་སྐུའི་གནས། ལྷོ་སྒོ་དོ་རི་སྟེ་ཡོན་ཏན་གྱི་གནས། ནུབ་སྒོ་སེང་གེ་སྐྱོག་སྟེ་གསུང་གི་གནས། བྱང་སྒོ་ལུང་པའི་མདའ་སྟེ་ཐུགས་ཀྱི་གནས། ལྟེ་བར་རྟ་ཕག་ཡབ་ཡུམ་དབུས་འདི་ཐུགས་ཀྱི་གནས་སོ། །གསང་བ་པདྨོའི་ཚུལ་དུ་བཤད་ན། རྡོ་རྗེ་ཕག་མོ་གསང་བ་བྷ་གའི་ཚུལ་དེ་ཐབས་ཀྱི་རང་བཞིན་སེང་གེ་སྐྱོག་གི་བྲག་ནི་དགའ་བའི་གདོང་སྟེ་བདེ་བ་བསྐྱེད་པའི་རྟེན། གངས་རི་དགའ་བ་འཁྱིལ་བ་འདི་ནི་གསང་རྩ་དགའ་བ་འཁྱིལ་བ་དངོས་ཏེ་ཤེས་རབ་བདེ་སྟོང་གི་རྩ་བ་མཁའ་འགྲོའི་སྲོག་གོ །མཚོ་ཟླ་གམ་ཁྲུས་ཀྱི་རྫིང་བུ་དག་བྱེད་ཀྱི་བདུད་རྩི། ཐང་ཟླ་གམ་དངུལ་གྱི་མཎྜལ་མཆོད་པའི་ལོངས་སྤྱོད། རི་ཟླ་གམ་མཆོད་རྟེན་གྱི་བང་རིམ་རྟེན་གྱི་གཙོ་བོ་བཞུགས་པའི་གནས། མཆོད་རྟེན་གསུམ་པོ་གནས་ཀྱི་ས་གནད་པདྨའི་ཟེའུ་འབྲུ། ཡེ་ཤེས་ལྔ་ལྡན་རཀྟའི་དྭངས་མ་ཁམས་ཀྱིས་བདུད་རྩིའོ། །དེ་ལྟར་གནས་ཀྱི་ཆགས་ཚུལ་གླེང་ནས་སླར་གནས་ཆེན་འདི་ལ་དུས་གསུམ་སངས་རྒྱས་དངོས་ཀྱིས་བྱིན་གྱིས་བརླབས་ཏེ། སྔོན་སངས་རྒྱས་འོད་སྲུང་བྱོན་ནས་བྱིན་གྱིས་བརླབས། དེ་རྟགས་ཕྱག་གཡས་པའི་རྗེས་བཞག །དེ་རྗེས་བདུད་ཕོ་མ་ཏྲཾ་རུ་ཊ་བཏུལ་ནས་དུར་ཁྲོད་ཆེན་པོ་བརྒྱད་དུ་བྱིན་གྱིས་བརླབས། དེ་ཚེ་སྲིན་པོ་དགའ་བྱེད་གཞོན་ནུ་ཞེས་སྟོབས་དང་ལྡན་པ་དེ་དུར་ཁྲོད་རྦ་སེང་དུ་དབང་བྱེད་པས་རྟ་ཕག་གཉིས་ཀྱི་ཐུགས་རྗེའི་སྟོབས་ཀྱིས་དབང་དུ་བསྡུས་ཤིང་རྣམ་ཤེས་ཀུན་དགའ་གཞོན་ནུའི་གནས་སྤར། གནས་གསུམ་ཞིང་གསུམ་དུར་ཁྲོད་གསུམ་གྱི་སྲུང་མར་བསྐོས། ལུས་ཀྱི་ཕུང་པོ་ཡན་ལག་ཕྱི་ཤ་ནང་རོལ་རྣམས་ཅི་སྲིད་བསྐལ་བའི་བར་དུ་མཁའ་འགྲོ་མ་རྣམས་འདུ་བའི་དུར་ཁྲོད་དུ་བྱིན་གྱིས་བརླབས། ཁོང་པ་བྷྲཱུཾ་ལས་གཞལ་ཡས་ཁང་དུ་བྱིན་གྱིས་བརླབས་ནས། གནོད་སྦྱིན་ཕག་གདོང་མ་སྤུན་ལྔ་སོགས་གནོད་སྦྱིན་དང་མ་མོ་མཁའ་འགྲོའི་ཚོགས་ལ་རྒྱུད་སྡེ་མང་པོ་གསུངས་ནས་སྨིན་གྲོལ་དུ་བྱས། སླར་ཡབ་ཡུམ་རྡོ་སྐུའི་ཆ་ལུགས་སུ་གྱུར་ཏེ། འགྲོ་བ་གསུམ་ཀ་སྲིད་མཚོ་ལས་བསྒྲལ་བར་མཛད། ཁྱད་པར་གངས་རི་དགའ་བ་འཁྱིལ་བའི་ཕུག་པ་མཁའ་འགྲོ་འདུ་བའི་རྟེན་གཅིག་ཡོད། དེ་ནི་རྟ་ཕག་ཡབ་ཡུམ་དངོས་ཡིན་གཞན་མ་ཡིན། ཅེས་སོགས་རྒྱ་ཆེར་གསུངས་པ་དང་། འདིར་མཁའ་འགྲོ་འདུས་པའི་རྫས་ཕུད་ས་རྡོ་ཐམས་ཅད་ཡང་ཐ་མལ་མ་ཡིན་ཏེ། དུར་ཁྲོད་ཀྱི་རྫས་དང་ལྷ་དང་གཟུགས་ཐ་དད་དུ་མར་གྱུར་ཏེ། དུར་ཁྲོད་རྫས་སུ་མིང་ཅན་ནི། རོ་དངོས་གྲུབ་འབྱུང་བ་དང་དགའ་བྱེད་ཀྱི་ཙིཏྟ་སོགས་དོན་སྣོད་ལྔ་དང་། གླང་ཆེན་སོགས་ཤ་ཆེན་ལྔ་དང་། སིནྡྷུ་རའི་ཆུ་སོགས་ཁ་དོག་ལྔའི་ཆུ་དང་། རྟ་མགྲིན་ཡབ་ཡུམ་སོགས་རང་བྱོན་གྱི་སྐུ་མཆོག་ལྔ་དང་། ཡི་དམ་ཆོས་སྐྱོང་གི་ཞལ་ཟས་དབང་པོ་ལྔ་སོགས་འདོད་ཡོན་ལྔ་དང་ཆོས་སྐྱོང་བྱ་རོག་གདོང་སོགས་གདོང་ཅན་ལྔ་དང་། ཡིད་བཞིན་མཆོག་གི་རྟེན་སོགས་ཐུན་མོང་དངོས་གྲུབ་ཀྱི་རྟེན་ལྔ་དང་། ཕག་གདོང་མཁའ་འགྲོ་འབུམ་དིལ་སོགས་མཁའ་འགྲོའི་འདུ་ཁང་ལྔ་དང་། གསལ་ཁང་ཡང་ལེ་ཤོད་སོགས་སྒྲུབ་ཕུག་ལྔ་དང་། ཁྲུས་ཀྱི་རྫིང་བུ་སོགས་ཆུ་བོ་ཡན་ལག་བརྒྱད་ལྡན་དང་། གངས་རི་དགའ་བ་འཁྱིལ་བ་སོགས་མཁའ་འགྲོའི་ཉེ་ལམ་ལྔ་དང་། ཆེ་མཆོག་བདེ་ཆེན་གྱི་ཕོ་བྲང་སོགས་ཕྱོགས་བཞིའི་ཕོ་བྲང་ལྔ་དང་། གངས་རི་ཙིཏྟའི་གུར་ཁང་སོགས་མཁའ་འགྲོའི་ཏི་སེ་ལྔ་དང་། རོ་དངོས་གྲུབ་འབྱུང་བ་སོགས་དགོས་འདོད་ཀྱི་རྟེན་ལྔ་དང་། གཏེར་སྒྲོམ་ཁྱུང་ཆེན་ལྔའི་ཁྲི་སོགས་མ་བརྩིགས་པའི་ཁྲི་ལྔ་དང་། མཆོད་རྟེན་དགའ་བྱེད་བརྩེགས་པ་སོགས་ཐུགས་ཀྱི་རྟེན་ལྔ་དང་། ཕྱི་ནང་གསང་བའི་བཀོད་པ་ཁྱད་པར་འཕགས་པ་བྱིན་གྱིས་བརླབས་ནས། བར་སྐབས་ཅིག་ཏུ་གསང་སྔགས་ཆོས་ཀྱི་འཁོར་ལོ་བསྐོར་བའི་གནས་སུ་གྱུར། དེ་རྗེས་སངས་རྒྱས་ཤཱཀྱ་ཐུབ་པ་ཉིད་འཁོར་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་དང་བཅས་ཏེ་རྒྱ་ནག་རི་བོ་རྩེ་ལྔ་བོད་ཀྱི་ཙཱ་རི་ཏྲ་སོགས་ལ་རྫུ་འཕྲུལ་གྱིས་ནམ་མཁར་སྤྲིན་གྱི་ལམ་ལས་བྱོན་ནས། ཙཱ་རི་ཏྲ་ཡི་ཤར་ཕྱོགས་དུར་ཁྲོད་རྦ་སེང་ངམ་པདྨ་བཀོད་ཀྱི་བྱང་ཕྱོགས་ཀྱི་སའི་འཛེར་དུ་བསྡམས་ཏེ་ཕྱག་རྗེས་དང་། གནོད་སྦྱིན་གྱི་རྒྱུད་སོགས་གསུངས་ཤིང་བྱིན་གྱིས་བརླབས་ཤིང་། བོད་ཡུལ་སངས་རྒྱས་ཀྱི་བསྟན་པ་མ་འོངས་ཐ་མའི་དུས་འབྱུང་བའི་ཕྱིར་སྨོན་ལམ་ཐུགས་རྗེས་བྱིན་གྱིས་བརླབས། རང་བྱོན་སྐུ་ལ་རབ་གནས་དང་། དུར་ཁྲོད་ཀྱི་བདག་པོ་ཕྱག་བཞི་པ་ལ་གཉེར་དུ་མཛད། དེ་རྗེས་ཤ་བ་རི་པ། ཀུ་ཀུ་རི་པ། ལ་བ་པ། བཱི་མ་ལ་མི་ཏྲ། དྲོམྦྷི་པ། སློབ་དཔོན་ཀླུ་སྒྲུབ། པདྨ་སཾ་བྷ་རྣམས་བྱོན་ནས་གནས་ལ་སྒྲུབ་ཞག་དང་། རང་བྱོན་སྐུ་མཆོག་འདི་ཉིད་ལ་སྒྲུབ་རྟེན་མཛད་ནས་དངོས་གྲུབ་བརྙེས་པར་མཛད། དེ་རྗེས་བོད་ཡུལ་བསྟན་པ་སྔ་དར་གྱི་སྐབས་སུ་ཨུ་རྒྱན་གུ་རུ་ཉིད་དང་ཇོ་མོ་མཚོ་རྒྱལ་ནམ་མཁའི་སྙིང་པོ་སོགས་སྤྱོད་པ་ཐུབ་པའི་རྗེ་འབངས་འགའ་དང་བཅས་ནས་པདྨ་བཀོད་དང་ཙཱ་རི་ཏྲ་མ་ཀོང་ལུང་ཁྱད་པར་འདོང་ཆུའི་གཙུག་ལག་ཁངས་སོགས་བྱིན་གྱིས་བརླབས་ཅིང་། གནས་འདིར་སྐུ་གསུང་ཐུགས་རྟེན་གཏེར་དུ་སྦས་ཤིང་བྱིན་གྱིས་བརླབས་པར་མཛད། དེ་ནས་བར་དུ་སྦས་པས་སྦས་གནས་སུ་གྱུར་ཏེ་དེ་སྔོན་མ་གྲགས་ཤིང་མ་མངོན་པའོ། །དེ་ནས་དུས་ད་ལྟ་སྙིགས་མ་ལྔ་བདོ་ལ་རྩོད་ལྡན་ལྔ་བརྒྱ་ཐ་མའི་སྐབས་འདིར། འགྲོ་བ་སྐྱབས་མེད་ཡུངས་དོས་ཁ་ཕྱེས་མཐུར་ལ་སྟོན་པ་ལྟར་འགྲོ་བ་ལས་ངན་གྱིས་ནོན་པ་རྣམས་སྐྱོབ་ཅིང་འཁོར་བ་མཐའ་ཅན་དུ་བསྒྱུར་ཕྱིར། དྲང་དོན་དུ་ཡེ་ཤེས་མཚོ་རྒྱལ་ལམ་ཤེལ་དཀར་གཟའ་རྡོ་རྗེ་མཚོའི་སྐྱེ་བ། ངེས་དོན་དུ་རྡོ་རྗེ་རྣལ་འབྱོར་མའི་རྣམ་པར་སྤྲུལ་པ་སྒྲུབ་པ་མ་ཨུ་རྒྱན་བུ་ཁྲིད་ཅེས་པས། ཤར་འབྲོག་ལུང་རྡོ་རྗེ་མཁའ་འགྲོའི་གནས། ཕ་ཝང་རུ་སྦལ་ཅན་གཏེར་ནས་བཏོན་ཅིང་གནས་འདི་ཡི་རི་ཞལ་གཟིགས་སོགས་རྒྱས་པ་དེ་ཉིད་རང་གིས་མཛད་པའི་གནས་ཡིག་ཏུ་གསལ་ལོ། །དེ་རྗེས་ཁོ་བོ་སྟག་ཤམ་རྡོ་རྗེ་ལ་ཨུ་རྒྱན་རིན་པོ་ཆེའི་ཐུགས་རྗེས་བྱིན་བརླབས་དང་། ཡེ་ཤེས་དང་ལས་ལ་གྲུབ་པའི་མཁའ་འགྲོ་མའི་ལུང་བསྟན་རིམ་པར་བྱུང་ཡང་གནས་དགའ་བ་ལུང་གང་ཡིན་མ་ཤེས། སླར་རེ་ཞིག་ཁྱི་ལོ་ཤར་མཚམས་སུ་མ་ཀོང་ལུང་དུ་འགྲོ་དགོས་པའི་ལུང་བསྟན་ཡང་ཡང་བྱུང་བ་ལ་བརྟེན་ནས་ཕག་ལོར་ངེད་དཔོན་སློབ་བཅུ་གསུམ་འོང་ཡང་མ་ཀོང་ལུང་དུ་མ་ཐར་ནས་ཡར་མཚར་རིར་ལོག་སྐབས་འབྲོག་ལུང་དུ་སྒྲུབ་པ་མའི་སར་ཕྱིན་ནས་མ་བུ་འཕྲད་པ་ལྟ་བུའི་བྲོད་པར་གྱུར་ཅིང་། དགའ་བ་ལུང་གིས་གནས་ཡིག་སྒྲུབ་པ་མོས་མཛད་པ་འདི་མཇལ་ཚེ་གནས་དགའ་བ་ལུང་ཡིན་པར་ཐག་ཆོད་ཅིང་སྤྲོ་བ་འཕེལ། དེ་རྗེས་ཨུ་རྒྱན་གུ་རུའི་ཡང་ཡང་ལུང་བསྟན་གནང་བ་ཐོབ་པ་ལ་བརྟེན་ནས་ཧོར་ཟླ་བརྒྱད་པའི་ཚེས་ལ་འབྲོག་ལུང་དུ་ཕྱིན་ནས་སླར་དགའ་བ་ལུང་གནས་སྐོར་ལ་འོང་བས། དམ་ཅན་སྐྱེ་བོའི་ཆ་ལུགས་རྐང་དུང་གཅོད་དྲིལ་ཁུར་མཁན་གཅིག་གིས་ལུང་བསྟན་ཅིང་རང་གིས་མཐོང་སྣང་དུ་དཔལ་རྟ་མགྲིན་ཉིད་མེ་དཔུང་འབར་བའི་ཀློང་དུ་བཞུགས་པ་མཇལ་བཞིན་དེར་ཤིང་ཕུང་གཅིག་ལ་ཐིམས་སོང་བས་དེར་ས་བརྐོ་ཤིང་བསློག་བྱས་པའི་འོག་ནས། དཔལ་རྟ་མགྲིན་ཡབ་ཡུམ་ཚ་ཚ་སྤར་ནས་ཕྱུང་བ་ལྟ་བུར་བྱུང་སྟེ་དེ་མ་ཐག་ནམ་མཁའ་ལ་འཇའ་ཚོན་འཁྲུགས་ཅིང་འོད་དཔག་མེད་དངོས་སུ་ཞལ་མཇལ་བ་དང་། དེར་ལྷན་ཅིག་ཏུ་ཡོད་པའི་ཁྲོམ་པ་རྣམས་ངོ་མཚར་མཐོང་སྣང་ཡིད་ཆེས་པ་བྱུང་ཞིང་། དེར་ཕ་ཝང་ཕག་གདོང་མའི་འདོན་པར་སངས་རྒྱས་ཀྱིས་ཕྱག་རྗེས་དང་མཁའ་འགྲོ་འབུམ་ཐེར་གྱི་བྱང་ལོག་སྟག་མའི་སུབ་བསལ་བའི་ནང་ནས་བྱ་རོག་གདོང་དང་། དེའི་འོག་གིས་ཁྱི་ཤ་རྣམས་དང་། དམ་ཅན་གྱི་བླ་མཁར་ཟངས་ལྕགས་ལྡེམ་པའི་གོང་གི དགའ་བྱེད་ཀྱི་རོ་དངོས་གྲུབ་འབྱུང་བ་དང་། གཞན་ཡང་མཐོང་སྣང་གང་བྱུང་རྣམས་བསྟན་ཅིང་དེ་འཕྲོར་སྟག་ལུང་པས་གདན་འདྲེན་བྱུང་བས་ལུས། དེ་རྗེས་འབྲུག་ལོར་འོང་ནས་ལྕགས་སྡིག་ཕུག་དང་ཀླུ་སྒྲུབ་ཕུག་གི་མཐོང་སྣང་ལྟར་བསྟན་ཅིང་། འདིར་ཕ་ཝང་ནཱ་གའི་ཕོ་བྲང་གུ་རུ་རིན་པོ་ཆེའི་བཞུགས་ཁྲི་དང་འཁྲོས་ནག་མ། ཁྱད་པར་ཟབ་གཏེར་ཡི་དམ་དགོངས་འདུས་སོགས་གདན་དྲངས་ཤིང་གྲོགས་ཀྱི་སྤྱོད་པ་དང་ཕྱི་ནང་གང་གིས་ཆ་ནས་འདུག་པར་མ་ཕོད་པར་ཕར་ལོག ཕྱིས་སྤྲེལ་ལོར་སྒྲུབ་པ་ལ་གཙོར་བྱེད་དུ་ཕྱིན་ནས་སྔ་ཕྱི་རྨི་ལམ་མཐོང་སྣང་མང་དུ་བྱུང་བའི་སྟབས་ཀྱིས། ཆུ་བྱ་ཟླ་བ་བཞི་པའི་ཉི་ཤུ་བདུན་ལ་དཔལ་ཡེ་ཤེས་ཀྱི་མགོན་པོ་ཕྱག་བཞི་པ་བཏོན་ཅིང་། གཞན་ཡང་རྟ་ཤ་གླང་ཆེན་བྱ་ཤ་རྣམས་ལ་རླུང་རྟ་ཕྱར། མིང་བརྟག་པར་བྱས། གཞན་ཡང་གནས་ཀྱི་བང་རིམ་གསུམ་པར་བྱ་གདོང་གཅིག་དང་། གསང་རྗེས་གུ་རུ་ཡབ་ཡུམ་གྱི་ཞབས་རྗེས་དང་། དེ་ཡི་གཡས་དུར་ཁྲོད་ཀཱི་ལ་འབར་བའི་རྫ་ཁྲོད་དུ། རྡོ་རྗེ་གྲོ་ལོད་ཀྱི་ཞབས་རྗེས། ཇོ་མོ་མཚོ་རྒྱལ་གྱི་ཞབས་རྗེས། རྡོའི་ཕོ་ལྔ་མོ་ལྔ། བཞུགས་ཁྲི་ཟླ་གམ་བརྩེགས་པ། ཡབ་ཡུམ་གཉིས་ཀྱི་གསང་ཕུག་རྡོ་རྗེ་གྲོ་ལོད་རྣམས་དང་། དེའུ་འབུར་རིགས་གསུམ་མགོན་པོར་ཨུ་རྒྱན་ཧེ་རུ་ཀའི་འདུ་ཁང་། ལོགས་ལ་ཐེག་རིམ་གྱི་ལྷ་ཚོགས་དང་མཁའ་འགྲོ་མའི་བཞུགས་གནས། སྟེང་དུ་ཞབས་རྗེས་ནུབ་ལོགས་སུ་ཨུ་རྒྱན་སོགས་དང་། ཨུ་རྒྱན་དྷ་ཧེ་ནའི་གཙུག་ལག་ཀྱི་ཤར་ལོགས་སུ་འཕགས་པའི་གནས་བརྟན་སེར་ཕྲེང་ཚུལ་དང་། མཆོད་རྟེན་དཀར་མོ་མགུལ་ཤེལ་ལམ། རང་བྱུང་གཟི་སྤྲ་འབར་བའི་མཆོད་རྟེན་དང་། རི་པོ་ཏ་ལའི་བཀོད་པ། ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་སྐྱེས་རབས། སྐོར་ལམ་དུ་བྱམས་པའི་ཞབས་རྗེས། དཀར་རྩི་འཕྲང་ལ་གུ་རུ་རིན་པོ་ཆེ་དང་། ཆེ་མཆོག་དྭངས་ཕུག རྡོ་རྗེ་གྲོ་ལོད་མཁའ་འགྲོ་སྡེ་ལྔ། རྡོ་རྗེ་སེམས་དཔའ་ཉེ་བའི་སྲས་བརྒྱད་སོགས་ནས། ཐུགས་རྗེ་ཆེན་པོས་སྡིག་ཆེན་ཉ་ཁྲབ་དྲངས་ཚུལ། རྒྱ་དཀར་པོའི་མཆོད་རྟེན། སྒྲོལ་མ་ཉི་ཤུ་རྩ་གཅིག་ཐུགས་རྗེ་ཆེན་པོ་གཙོ་འཁོར། ཞི་ཁྲོའི་ཕོ་བྲང་བར་དུ་རྡོ་རྗེ་སེམས་དཔའ་གསང་བ་ཐུགས་ཀྱི་བུམ་པ། ཡས་གང་མི་ལ་རས་ཆེན་རས་ཆུང་། བདུད་རྩི་སྲུང་མ་ཞིང་སྐྱོང་དམ་ཅན་ཁྱུང་ཞོན་གསུམ་གྱི་ཕོ་བྲང་། ཕུག་གི་རི་བོ་ཕྱོགས་བཅུ་ཞིང་གི་ཕོ་བྲང་། མཁའ་འགྲོ་གསང་བ་འབུམ་ཐེར་ཐད་ཀར་རྡོ་རྗེ་ཕག་མོའི་བླ་མཚོ་རྣམས་ནས་ནགས་དགའ་བ་འཁྱིལ་པའི་སྐོར་ལམ་རྣམས་ཕྱེས་ནས། དེ་ལས་ཞིབ་པ་རང་རང་གིས་དཀར་ཆག་ཁོ་ལ་ཕྱུང་དང་གནས་ཡིག་རྒྱས་པ་རྒྱབ་སོར་བཀོད་ཐུབ་པའི་སྨོན་ལམ་བྱའོ། །ཞེས་དགའ་ལུང་གནས་ཡིག་མདོར་བསྡུས་པ། རྡོ་རྗེའི་གསང་ལམ་ཐར་ལམ་སྒོ་འབྱེད་ཅེས། །དཔའ་བོ་བསམ་གཏན་གླིང་གྲགས་སྟག་ཤམ་ཅན། །ནུས་ལྡན་རྡོ་རྗེ་རྩལ་གྱིས་སྦྱར་བའི་དགེས། །ཁམས་གསུམ་འགྲོ་བ་སྤྲུལ་པས་འདྲེན་པར་ཤོག །སརྦ་མངྒ་ལཾ།

༄༅། །གནས་མཆོག་དགའ་བ་ལུང་ཆགས་ཚུལ་གྱི་གནས་བསྟོད་བཞུགས་སོ། །

ན་མོ་གུ་རུ་པདྨ་སིདྷི་ཧཱུྃ། །ཞིང་གི་མཆོག་གྱུར་དགའ་བ་ལུང་། །དགའ་བྱེད་གཞོན་ནུའི་ཕུང་པོ་ཆེ། །བྷྲུཾ་ལས་བྱུང་བའི་གཞལ་ཡས་ཁང་། །གྲུ་བཞི་པ་ལ་སྒོ་ཡང་བཞི། །ཤར་སྒོ་འབྲོག་ལུང་རྡོ་རྗེའི་འཕྲང་། རྡོ་རྗེ་རིགས་ཀྱིས་ལྷ་ཚོགས་བཞུགས། །ལྷོ་སྒོ་དོ་རི་རིན་ཆེན་རིགས། །བསོད་ནམས་རྒྱས་པའི་ལྷ་ཚོགས་བཞུགས། །ནུབ་སྒོ་སེང་སྐྱོག་པདྨའི་ཞིང་། །པདྨ་རིགས་ཀྱིས་ལྷ་ཚོགས་བཞུགས། །དབང་གི་ལྷ་དང་ལྷ་མོ་བཞུགས། །བྱང་སྒོ་ལུང་མཇུག་ལས་ཀྱི་ཞིང་། །དྲག་པོའི་ལྷ་ཚོགས་དྲེགས་པ་འདུལ། །དབུས་གྱུར་རྟ་ཚལ་རྟ་མགྲིན་ཞིང་། །རྟ་མཆོག་ཧྱ་གྷྲྀ་ཝའི་ཞིང་། །ཞིང་མཆོག་འདི་འདྲ་ངོ་མཚར་ཆེ། །མགོ་ལ་སྐུ་ཡི་རྟ་མགྲིན་དབང་། །མཇལ་ཚད་སྐུ་ཡི་དངོས་གྲུབ་ཐོབ། །སྐུ་ཡི་ཞིང་ཁམས་རྡོ་རྗེ་དབྱིངས། །བྱོལ་སོང་གཙོ་བརྒྱད་འཁོར་ལོའི་སྟེང་། །ཆེ་མཆོག་དྭངས་མ་དབྱིངས་རིག་ཕུག །མཆོག་གི་དངོས་གྲུབ་ཐོབ་པའི་ཞིང་། །ཞལ་གཟིགས་སྣ་ཚོགས་བསམ་མི་ཁྱབ། །དགའ་བ་འཁྱིལ་བའི་དཀྱིལ་འཁོར་ལ། །གསུང་གིས་རྟ་མགྲིན་ལྷ་ཚོགས་བཞུགས། །གསུང་མཆོག་རིགས་ཀྱི་ལྷ་ལྷ་མོ། །གྲངས་མེད་བསམ་མི་ཁྱབ་པར་བཞུགས། །ཕྱིན་ཚད་ས་བརྒྱད་ནོན་པའི་ཞིང་། །ཕྱིར་མི་ལྡོག་པ་འདོན་མི་ཟ། །གཙུག་ཏོར་ཡང་རྒྱབ་བདེ་ཆེན་ཞིང་། །བདེ་བ་ཆེན་པོའི་མཆོད་རྟེན་མཆོག །དགའ་བ་མིག་དང་དགའ་བ་འཁྱིལ། །དགའ་ཞིང་ཡེ་ཤེས་མངོན་དུ་གྱུར། །གསང་སྔགས་ཡེ་ཤེས་དངོས་གྲུབ་ཅན། །ཡེ་ཤེས་ལྔ་ལྡན་བདུད་རྩི་འདི། །རེག་མྱོང་ཙམ་གྱིས་དུག་ལྔ་ལས། །གྱུར་པའི་ཕྱི་གདོན་གྲིབ་གདོན་སེལ། །ནང་གི་དུག་ལྔ་མ་རིག་དག །གསང་བའི་རྣམ་རྟོག་བག་ཆགས་སེལ། །ངོ་མཚར་འབྲེལ་ཚད་དོན་དང་ལྡན། །ཐུགས་གནས་ཚོགས་ཁང་དྲན་པ་བརྒྱད། །ཆོས་ཀྱི་འཁོར་ལོ་ཆོས་སྐུའི་གནས། །མཆོག་གི་ཏིང་འཛིན་འཕེལ་བའི་གནས། །ཞི་གནས་ལྷག་མཐོང་བསྒོམ་ན་མཆོག །བདུད་འདུལ་ལྕགས་སྡིག་ནུས་པའི་གླིང་། །ལྟེ་བ་སྤྲུལ་པའི་འཁོར་ལོའི་གནས། །རྩ་བའི་སྒྲུབ་ཕུག་བཞི་པོ་ནི། །དགའ་བཞི་ལྷན་སྐྱེས་མཆོག་གིས་གནས། །ཟུང་བརྒྱད་སྤྲུལ་པ་བཅུ་དྲུག་ཕུག །དགའ་བ་ཡེ་ཤེས་བཅུ་དྲུག་མཚན། །གསང་སྔགས་མཆོག་གིས་དངོས་གྲུབ་ཐོབ། །སྒྲུབ་པའི་གནས་ནི་ཁྱད་པར་འཕགས། །ཨ་རཾ་གསང་གནས་ཨ་ཤད་གནས། །གསང་བའི་ཆུ་མིག་གསང་སྔགས་ཆུ། དམ་ཚིག་བདུད་རྩིའི་ཆུ་ཡིན་པ། །གནས་མཆོག་བཞུགས་པ་མནའ་ཡི་ཆུ། །བསྒྲུབ་ཆེན་དབང་ལ་བཞུགས་པ་འདྲ། །དུ་ཧར་བདུད་བཙན་ཀླུ་གསུམ་དང་། །ལས་མཁན་དམ་ཅན་འཚོགས་པའི་ཞིང་། །འདི་ལྟར་དགའ་བའི་ལུང་ཁོག་འདི། །དོན་ལ་ཕག་མོ་ཁྲོས་མའི་སྐུ། །ཨ་རཾ་གསང་གནས་འཁོར་ལོ་ཡིན། །ནགས་འཁྱམས་ཆུ་མིག་གསང་ཆབ་ཡིན། །ལྕགས་སྡིག་ལྟེ་བའི་སྤྲུལ་པའི་ཞིང་། །ཚོགས་འཁོར་སྙིང་ཁར་ཆོས་འཁོར་ལོ། །རྟ་ཚལ་མགྲིན་པ་ལོངས་སྤྱོད་ལ། །དཀར་རྩི་སྤྱི་བོའི་འཁོར་ལོ་གྲགས། །ཡང་རྒྱབ་གཙུག་ཏོར་ནམ་མཁའི་འཁོར། །འཁོར་ལོ་དྲུག་ལ་རྟེན་དྲུག་ཡོད། །ཞིང་ཁམས་དྲུག་ལ་ལྷ་དྲུག་ཡོད། །གནས་མཆོག་དྲུག་ལ་བྱིན་བརླབས་དྲུག །ས་བཅད་དྲུག་ལ་དགོས་དོན་དྲུག །དྲུག་གསུམ་བཅོ་བརྒྱད་ཚང་བའི་ཞིང་། །འདིར་གནས་རྣམས་ནི་སྐྱེ་མཐའ་ཅན། །ཕྱིན་པ་ཙམ་གྱིས་སྡིག་སྒྲིབ་དག །མཆོག་ཐུན་དངོས་གྲུབ་ཐོབ་པར་འགྱུར། །རེག་ཚད་ལུས་ཀྱི་སྒྲིབ་པ་དག །སྡུག་བསྔལ་འཁོར་བའི་ཆུ་ལས་སྒྲོལ། །མཐོང་ཚད་ངན་སོང་གསུམ་ལས་ཐར། །དག་པ་ལྷ་ཡི་ཞིང་ཁམས་ཉུལ། །ཐོས་ཚད་མ་རིགས་ལས་ངན་དག །གསང་སྔགས་ཐེག་ཆེན་ཆོས་ལ་སྤྱོད། །ཚོར་ཚད་མི་དགེ་གནས་དག་ནས། །དགེ་བ་བཅུ་པོ་ལོངས་སྤྱོད་བྱེད། །མྱོང་ཚད་ལས་ལུས་སྡིག་པ་དག །ལས་དང་སྐལ་ལྡན་ཕྱིར་མི་ལྡོག །འབྲེལ་ཚད་དོན་ལྡན་གནས་མཆོག་འདིར། །འགྲོ་ཀུན་དད་པ་དག་སྣང་བསྐྱེད། །གསོལ་བ་ཐོབ་ལ་དངོས་གྲུབ་ཞུས། །མི་བསླུ་རྒྱལ་བའི་བཀའ་ཡིས་ཐེབས། །ཨོ་རྒྱན་པདྨས་བསླུ་མི་སྲིད། །བསླུས་ཀྱང་རྒྱལ་བ་དེ་ཡི་བཀའ། །རྒྱལ་བའི་བཀའ་ཡིས་བསླུ་མི་འགྱུར། དེ་ཕྱིར་གུས་པས་གསོལ་བ་ཐོབ། །ཚོགས་འཁོར་མར་མེ་རླུང་རྟ་དང་། །སྤྱན་གཟིགས་རྒྱལ་མཚན་ཇོ་དར་དང་། །ཚེ་ཐར་བསྐོར་ཕྱག་མཛད་པར་ཞུ། །ཞེས་གནས་མཆོག་ཆེན་པོ་དགའ་བ་ལུང་གི་ཕོ་བྲང་དུ་ཆུ་རྟ་ཟླ་བ་དགུ་པའི་ཚེས་བཅུ་ལ་དཀར་རྩི་འཕྲང་དུ་སྡོད་ཚེ་ཞིང་ཁམས་དཀྱིལ་འཁོར་གྱི་ཚུལ་དུ་མཇལ་འཕྲོ་ལ། ཕག་མོ་ཁྲོས་མའི་ལུས་བཀོད་ཡིན་ཟེར་བའི་ཤོག་བཀྲ་གཅིག་འདུག་པ་དང་། གཞན་འཕྲུལ་དབང་བྱེད་ཀྱིས་བཀོད་པ་སོགས་མཇལ་ཁ་མང་དུ་བྱུང་བས་དེ་ཡི་ཚིག་ཐོ་ཙམ་དུ་དཀར་རྩི་སྟག་ཤམ་པས་ཡར་ཚེས་ལ་བྲིས་པ་དགེ་བར་གྱུར་ཅིག །མངྒ་ལཾ། །

༄༅། །རྗེ་བཙུན་ཨོ་རྒྱན་རྗེ་ལ་འདུད། །གུ་རུས་ལུང་བསྟན་སྣ་ཞེས་པའི། །ས་གནད་དྲེད་ལ་མི་རོ་བཀལ། །བོད་ཀྱི་ས་མིག་རྟེན་འབྲེལ་ལས། །ངན་པའི་ལྟས་ལ་བཟང་པོར་བསྒྱུར། །དགོས་པའི་ལུང་བསྟན་བྱུང་བཞིན་དུ། །སྦྲུལ་ལོ་ཟླ་བ་དགུ་པར་ཕྱིན། །རྡོ་རྗེ་གཡུ་སྒྲོན་ཞང་བློན་ནི། །གནས་པའི་རི་ལ་ཕྱིན་པའི་ཚེ། །རྒྱལ་བློན་འབངས་གསུམ་ཆོ་འཕྲུལ་འཚུབས། །ལྕང་པོའི་རི་བོ་ཁྱུང་ཆེན་ནི། །རྒྱ་མཚོ་རྐྱལ་བའི་ཚུལ་དུ་ཡོད། །སྤྱི་བོར་མཚན་བརྒྱད་བཞེངས་གྱུར་ན། །རྒྱལ་ཁམས་བདེ་བའི་ལུང་ཡོད་ཀྱང་། །མགོ་ནག་འདུས་པའི་བར་ཆད་ལུས། །ཞལ་གཟིགས་ཐོར་ཙམ་བྱུང་ཚུལ་ནི། །རྒྱབ་རི་ཧྲཱིཿགཟུགས་གསལ་བ་ལས། །འོད་དཔག་མེད་དང་སྤྱན་རས་གཟིགས། །པདྨ་གཙོ་འཁོར་རྣམ་པ་གསུམ། །སྒོམ་ཞུ་གྱོན་པའི་བླ་སྐུ་དང་། །རྒྱལ་པོ་ཧཱ་ཤང་ཚེ་དཔག་མེད། །བིར་ཝ་པ་དང་གྲོ་བོ་ལོད། །རྒྱལ་པོ་བེ་དཀར་སྐུ་བཅས་གསལ། །སྣལ་རི་གེ་སར་སྟག་ཆས་དང་། །ཆོས་རྒྱལ་དམ་ཅན་སྐུ་ལ་སོགས། །རྟ་འགྲིན་ཞིང་སྐྱོང་ཕོ་བྲང་ལ། །རྡོ་རྗེ་གདན་གྱི་བཀོད་པ་དང་། །སྲིད་པ་འཁོར་ལོའི་བཀོད་པ་ཡོད། །ཞིང་སྐྱོང་ཡབ་ཡུམ་སྐུ་དང་ནི། །ཚུར་ཁ་ཕོ་ལྷའི་སྐུ་ཡང་གསལ། །གུ་རུ་རྟ་མཆོག་ཆིབ་བྱོན་པའི། །རྟ་མཆོག་རྗེས་དང་རྟེའུའི་རྗེས། །རྟ་མཆོག་གནས་རྡོར་གྱུར་པ་ཡིས། །སྟེང་དུ་གུ་རུའི་ཞབས་རྗེས་དང་། །མཚོ་རྒྱལ་ཞབས་རྗེས་ལ་སོགས་གསལ། །སེང་གདོང་ཡབ་ཡུམ་རྒྱུད་ཀྱི་ཚུལ། །གྲི་ཐོད་བདུད་རྩིའི་འོད་ཟེར་ལས། །ཕར་འཕྲོས་ཉི་ཟླ་ནོར་བུའི་ཚུལ། །ཚུར་འདུས་སེང་ཆུང་ཞིང་སྐྱོང་ཆེ། །ཀུན་བཟང་བཅུད་ལས་གླང་པོ་ཆེ། །ཉི་མ་པདྨ་ལ་སོགས་གསལ། །གཡས་སུ་ཛཾ་ལྷ་ནོར་རྒྱུན་མ། །ཏྲི་ཧྲིང་ཡི་གེ་བཅས་པ་གསལ། །གཡོན་ཏུ་གསང་བ་ཡེ་ཤེས་ལ། །རིགས་བཞི་མཁའ་འགྲོའི་བསྐོར་བ་དང་། །ཧེ་རུ་ཀ་དང་གྲོ་བོ་ལོད། །པདྨ་ཐོད་ཕྲེང་ཡབ་ཡུམ་བཅས། །མདུན་དུ་བདུད་མགོན་ཡབ་ཡུམ་ནི། །སྡེ་བརྒྱད་དྲེག་པ་ཤ་ཟའི་ཚོགས། །བམ་ཆེན་དམ་ཅན་རྭ་ཧུ་ལ། །འཁོར་དང་བཅས་པ་མངོན་སུམ་གསལ། །རྡོ་འདི་འཛམ་གླིང་སྲིད་པའི་བཅུད། །གསོལ་བ་གང་བཏབ་བདེན་གྲུབ་པས། །སྨོན་ལམ་འགྲུབ་པར་གདོན་མི་ཟ། །ཚོགས་འཁོར་གསོལ་ཁ་མཆོད་པའི་ཚོགས། །ཕུལ་ཚད་འབུམ་འགྱུར་བསོད་ནམས་འགྲུབ། །ཚོགས་འཁོར་བསྐོར་ཚད་ས་ཐོབ་སྟེ། །ཚེ་དབང་བརྒྱ་རྩ་ཐོབ་དང་མཉམ། །ཕར་ཀ་ཞིང་སྐྱོང་ཕུག་པ་དང་། །གྱེར་མོའི་རི་རྩེ་གཡུ་སྒྲོན་མ། །རྟ་བརྡུལ་རི་རྩེ་རྡོ་རྗེ་ལེགས། །སྣལ་གྱི་རི་རྩེ་ཚེ་དབང་རིགས། །ལྕང་པོའི་རི་རྩེ་གཟིམ་ཞུ་ཅན། །འདི་བཞིན་སྲུང་མ་སྡེ་བཞི་ཡིན། །ལྕང་པོ་མདུན་གྱི་སྙིང་ཆུ་འདི། །བདུད་རྩི་ཚེ་ཡི་ཆུ་མིག་ཡིན། །བློ་ལྡན་མཆོག་སྲེད་ཁྱུང་བསྒྲུབ་ཚུལ། །ཁྱུང་བཅས་སྐུ་གསལ་གྲོ་ལོད་དང་། །པདྨ་དྲྭ་བའི་བཀོད་པ་ཡོད། །ཇོ་མོ་མཚོ་རྒྱལ་སྐུ་དང་ནི། །སྐོར་ལམ་མཁའ་འགྲོ་སེང་གདོང་མ། །དྲག་པོ་མེ་ཕྲེང་སྐུ་དང་ནི། །མཁའ་འགྲོ་ཐིམ་པའི་བྲག་ལ་ནི། །ཕག་མོའི་དབུ་དང་ཞབས་རྗེས་དང་། །སྲིན་པོ་ཐོད་མཁར་ལ་སོགས་ཡོད། །བྱ་ཁྱུང་ཡབ་ཡུམ་ཀླུ་བརྒྱད་བརྫིས། །སློབ་དཔོན་མཚོ་རྒྱལ་ཞབས་རྗེས་གསལ། །དབུ་རྩེར་སྟག་གདོང་ཕག་གདོང་དང་། །ཞི་དྲག་ཞབས་ཕྱག་རྗེས་དང་ནི། །གུ་རུའི་བཞུགས་ཁྲི་རྒྱབ་ཡོལ་བཅས། །ཁྲི་འོག་དབང་ཕྱུག་གྱད་ཀྱི་སྐུ། །རྒྱབ་ཡོལ་རྒྱན་དྲུག་གྲོ་བོ་ལོད། །ནུབ་ངོས་དབང་ཕྱུག་གསང་བའི་རྟེན། །ཐུན་མོང་དངོས་གྲུབ་འབྱུང་བ་ལགས། །སྲུང་མ་གཟའ་བདུད་ཡབ་ཡུམ་སྟེ། །ཕ་ཝང་དྲང་སྲོང་རྭ་ཧུ་ལ། །གཟའ་བརྒྱད་གདོང་མོ་བཞི་ཡིས་བསྐོར། །འོག་ཏུ་ཡུམ་ཆེན་ཀླུ་མོ་ནི། །སྦལ་མགོ་རྒྱུ་སྐར་ཉེར་བརྒྱད་བསྐོར། །སྐོར་ལམ་འཕྲང་ལ་སྒོ་སྲུང་གསུམ། །འོག་ཏུ་སྲོག་ལེན་སྔགས་སྲུང་ཕུག །སྟེང་དུ་སྤྱང་ཞོན་དམར་ནག་སྟེ། །རྡོ་ཡི་ཀ་བ་པ་ཏྲ་འབར། །བསྒྲུབ་ཕུག་རྟ་མགྲིན་ཕོ་བྲང་ལ། །སྟེང་ནས་གཡང་གཞི་དཀྱིལ་འཁོར་ཚུལ། །སྲུང་མ་ཀླུ་ཡི་སྐུ་བཅས་དང་། །འོག་ཏུ་ཙིཏྟ་ཕག་མོའི་དཀྱིལ། །ཆོས་འབྱུང་པདྨ་གྲོ་བོ་ལོད། །རྡོ་རྗེ་ཕག་མོ་བཅས་པ་ཡོད། །འོག་ཏུ་རྟ་མགྲིན་དབྱུག་ཐོ་ཅན། །ཐུགས་རྗེ་ཁ་སར་པ་ཎིའི་སྐུ། །འབུར་དོད་ཤིན་ཏུ་གསལ་བར་ཡོད། །མཇལ་ཚད་གྲོང་གསུམ་ཁེག་པ་ཡིན། །ཚོགས་འཁོར་ཕུལ་ཚད་འཁོར་ལོས་སྒྱུར། །རྒྱལ་པོ་ཕྱི་མར་སྐྱེ་བ་དང་། །ཚེ་འདིར་བར་ཆད་ཐམས་ཅད་སེལ། །གཡས་སུ་མཚོ་རྒྱལ་གསང་བའི་ཕུག །ཡབ་ཡུམ་གསང་ལམ་འཕྲང་ཆུང་ཡོད། །བསྒྲོད་ཚད་བར་དོའི་འཕྲང་སྒྲོལ་ནས། །ངན་པའི་སྐྱེ་གནས་ཁེག་པར་འགྱུར། །མཚོ་རྒྱལ་ཕུག་པར་དུང་དཀར་ཡོད། །ཆོས་ཀྱི་སྙན་གྲགས་ཐོབ་པར་འགྱུར། །བར་དུ་ཡབ་ཡུམ་འཁྲིལ་བ་ཡི། །ཞབས་རྗེས་ཐར་ལམ་ལམ་ཀྱང་ཡོད། །ཀླུང་དུ་རུ་ཏྲའི་ཁོག་པ་ལ། །ལྕེ་ལ་རྡོ་རྗེ་མཁའ་འགྲོའི་རྔ། །ཚོགས་འཁོར་བསྐོར་ན་བསོད་ནམས་ཆེ། །མགོ་ལ་པད་མ་འདབ་མ་ལྔ། །མཁའ་འགྲོ་སྡེ་ལྔའི་དཀྱིལ་འཁོར་ཡིན། །ལྟོ་ཚིལ་རྣམ་ཐོས་སྲས་དང་ནི། །ཕ་ཝང་མགོ་ལ་མཁའ་སྤྱོད་ལ། །གཞན་ཡང་སྒྲུབ་ཕུག་ཡན་ལག་བདུན། །འདི་རྣམས་ལས་བྱེད་མཁའ་འགྲོ་འདུ། །འབྲེལ་ཚད་དོན་ལྡན་ཁྱད་པར་འཕགས། །མི་བསླུ་ལེགས་པའི་བདེན་པར་འབྱུང་། །དེ་ཕྱིར་ཚོགས་འཁོར་ཕུལ་བ་དང་། །རྣམ་ལྔ་མེ་ཏོག་མར་མེ་དང་། །ཞལ་ཟས་ཕུལ་ཚད་འབུམ་འགྱུར་འགྱུར། །བསྐོར་ཕྱག་ཐམས་ཅད་དེ་དང་མཚུངས། །དེ་ཕྱིར་དད་ལྡན་ཐམས་ཅད་ཀྱིས། །འདི་ཕྱིར་གཉིས་དོན་གནས་འདིར་སྒྲུབས། །སྣ་ནི་བོན་མཆོག་གཡུང་དྲུང་གནས། །སྐྱིད་མགུ་ཐབས་མཆོག་ཡབ་ཀྱི་གནས། །རྨིག་ན་ཤེས་རབ་ཡུམ་གྱི་གནས། །མགར་ཁང་དམ་ཅན་བཙན་བདུད་ཀླུ། །འབྲང་ཕུག་གྲིབ་སེལ་མཁའ་འགྲོའི་གནས། །ཆུ་རྩི་སྨན་བླ་ཚེ་ཡི་གནས། །སེང་གེ་ལ་རྩ་མན་ཆད་ནས། །སོག་པོ་སྣ་བྲག་འགགས་ཡན་ཆད། །གནས་གཅིག་གླིང་གི་ས་བཅད་འདུག །དེ་མིང་གཡུ་ཕུག་གནས་སུ་གྲགས། །དེ་ལྟར་ཀུན་གྱི་ཤེས་པར་མཛོད། །ཅེས་གནས་འདིར་འགོད་པོ་རྣམས་ཀྱིས་རྟེན་འབྲེལ་ཐམས་ཅད་དཀྲུགས་ཆེ་བས། གནས་ཡིག་སོགས་བཀོད་ཀྱང་ཕན་མི་ཐོགས་སྙམ་ཡང་། སྒོམ་ཆེན་ནམ་མཁའ་དབང་ཕྱུག་ཡབ་སྲས་ཀྱིས་ཨུ་ཚུགས་ནན་ཆེར་བསྐུལ་ངོར་ཐོ་ཙམ་དུ་སྟག་ཤམ་པས་ཆུ་རྟ་ཟླ་བའི་ཚེས་བཅུ་གཉིས་ལ་དགའ་བ་ལུང་དུ་བྲིས་པ་དགེ་བར་གྱུར་ཅིག མངྒ་ལཾ།

མཆན། ༡ གནས་ཡིག་འདི་གཏེར་སྟོན་སྟག་ཤམ་རྡོ་རྗེའི་བཀའ་འབུམ་ལས་ཞལ་བཤུས་པའོ། །༢.གནས་འདི་བཞུགས་པའི་ཡུལ་ནི་བོད་ལྗོངས་ཉིང་ཁྲི་ས་ཁུལ་སྤྲ་མོག་རྫོང་གི་ནུབ་ཕྱོགས་སྤྱི་ལེ༢༤སར་གནས་པའི་དགའ་ལུང་དགོན་པའི་རྒྱབ་རི་ཡིན། དགུན་དུས་བསྐོར་ལམ་གངས་ཀྱིས་བཀག་ཅིང་བགྲོད་པར་དཀའ་ལ། ཁ་བ་ཞུ་རྗེས་མི་ཕལ་བས་ཉི་མ་རེ་ལ་བསྐོར་བ་རེ་བྱེད་ཐུབ།

༄༅། །གསུང་གི་སྐུ་ཡི་གནས་མཆོག་བསྟན་པ་ནི༔ བོད་ཀྱི་མདོ་ཁམས་ཚ་བ་རོང་ཞེས་སུ༔ གངས་ཀྱི་ར་བ་དཀར་ཞེས་བྱ་བ་རུ༔ ཧེ་རུ་ཀ་ཡི་གྲོང་ཁྱེར་དངོས་སུ་བཞུགས༔ འདི་ཡི་དཀར་ཆག་སྤོ་ནེ་བྲག་ཏུ་སྦས༔

༄༅། །གསུང་གི་སྐུའི་གནས་ཚ་བ་རོང་ཁ་བ་དཀར་པོ་ནི་ཡོངས་གྲགས་ལྟར་ན། འདི་ནི་ཐོག་མར་ཀརྨ་པཀྴི་དང་དེ་རྗེས་རང་བྱུང་རྡོ་རྗེས་གནས་སྒོ་ཕྱེས་པར་གྲགས་ཤིང་རང་བྱུང་ཞབས་ཀྱིས་གནས་ཡིག་ཀྱང་ཡོད་སྐད། དཀར་ཆག་སྤོར་ཎེ་བྲག་ཏུ་སྦས་པར་གསུངས་པ་དེ་ནི་རི་བོ་ཆེའི་ཕྱོགས་སུ་ཡོད།

༄༅། །གླེགས་བམ་གནས་ཡིག་ཅེས་བྱ་བ་བཞུགས་སོ། །འདས་པར་བྱོན་པའི་སངས་རྒྱས་མར་མེ་མཛད། །ད་ལྟ་བྱོན་པའི་སངས་རྒྱས་ཤཱཀྱ་ཐུབ། །མ་འོངས་སངས་རྒྱས་རྒྱལ་བ་བྱམས་པ་མགོན། །དུས་གསུམ་སངས་རྒྱས་རྣམས་ལ་ཕྱག་འཚལ་ལོ། །སྙིང་རྗེ་ཚད་མེད་འཕགས་པ་སྤྱན་རས་གཟིགས། །ཞི་ཁྲོ་སྣང་ལྡན་ཕྱག་ན་རྡོ་རྗེ་འཆང་། །རྫུ་འཕྲུལ་རྣམ་པར་ཤར་བ་འཇམ་དཔལ་དབྱངས། །རིགས་གསུམ་མགོན་པོ་མཆོག་ལ་ཕྱག་འཚལ་ལོ། །དུས་གསུམ་འགྱུར་མེད་ནམ་མཁའ་ལྟ་བུའི་སྐུ། །འགྲོ་འདུལ་གསུང་དབྱངས་མཁའ་ལ་འབྲུག་སྒྲ་སྒྲོག །བྱིན་བརླབས་ཆར་གྱིས་སེམས་ཅན་སྨིན་མཛད་པའི། །རྒྱལ་སྲས་པད་འབྱུང་སྐུ་ལ་ཕྱག་འཚལ་ལོ། །སྟོན་པ་གཉིས་པ་རྒྱལ་བ་ཙོང་ཁ་པ། །མདོ་སྔགས་སྙན་པོ་ཡུལ་གྲུ་ཀུན་ཏུ་ཁྱབ། །བཙུན་པ་ཕོ་མོ་འདུལ་ཁྲིམས་རྐེད་རགས་བཅིངས། །རྒྱལ་བ་ཡབ་སྲས་གསུམ་ལ་ཕྱག་འཚལ་ལོ། །འཛམ་གླིང་ཡངས་པའི་རྒྱལ་ཁམས་བྱེ་བྲག་ཡུལ། །མདོ་ཁམས་སྒང་དྲུག་སྨད་དུ་འཇང་བོད་མཚམས། །གངས་ཅན་དག་པའི་ཡུལ་གྲུ་ཁ་བ་གནས། །མཆོད་རྟེན་རང་བཞིན་གྲུབ་ལ་ཕྱག་འཚལ་ལོ། །ཨེ་ཝཾ་གཉིས་མེད་དག་པའི་ཞིང་ཁམས་གནས། །ངོ་མཚར་མི་འདྲ་ཕྱོགས་ཀུན་མཎྜལ་ཕུལ། །རྩི་ཤིང་སྣ་ཚོགས་ཀུན་ནས་དྲི་བཟང་ཁྱབ། །གནས་ཆེན་ཁ་བ་དཀར་ལ་ཕྱག་འཚལ་ལོ། །གླེགས་བམ་ཡུལ་གྲུ་ཕྱོགས་ཀུན་དྲི་བཟང་ཁྱབ། །ཆུ་བོ་རྣམས་ཀྱིས་སངས་རྒྱས་མཚན་སྔགས་བགྲང་། །བྲག་རི་ཀུན་ལ་གྲུབ་མཐའི་ཕྱག་རྗེས་གསལ། །གནས་ཆེན་ཁ་བ་དཀར་ལ་ཕྱག་འཚལ་ལོ། །བདེ་མཆོག་ཕོ་བྲང་ལྟག་ལ་འཇའ་ཚོན་བཀྲ། །སངས་རྒྱས་གྲངས་མེད་དུས་རྒྱུན་ཁྲུས་གསོལ་མཛད། །རྩི་ཐོག་ཐམས་ཅད་བདུད་རྩི་དངོས་གྲུབ་ཐོབ། །གནས་ཆེན་ཁ་བ་དཀར་ལ་ཕྱག་འཚལ་ལོ། །དག་པའི་ལྷ་ཡུལ་གངས་ཅན་ཁ་བ་གནས། །དེ་ནང་ལས་སྒྲིབ་བསྙེན་བཀུར་སུས་སྦྱངས་ན། །བྱང་ཆུབ་ལམ་ལ་ཐོབ་པར་ཐེ་ཚོམ་མེད། །གནས་ཆེན་ཁ་བ་དཀར་ལ་ཕྱག་འཚལ་ལོ། །དང་པོ་དངོས་གཞི་གླེགས་བམ་སྨད་ཀྱི་ལ་རྩ་རྙིང་ནང་ལམ་ཁ་ན་ཀརྨ་པ་རང་བྱུང་རྡོ་རྗེའི་ཕྱག་རྗེས་དང་དབུ་ཞྭ་མངོན་སུམ་ཡོད། རྙིང་ནང་འདམ་རྩྭ་ཐང་དེ་ནི་ཁ་བ་དཀར་པོའི་རྩྭ་ར་ཡིན་ཟེར་སྲོལ་ཡོད་པར་མ་ཟད། ཕ་བོང་ཆེན་པོ་གཉིས་ཡོད་པ་དག་ནི་ཁ་བ་དཀར་པོའི་ཆུ་སྣོད་དང་སྦྲ་གུར་ཡིན་ཟེར་སྲོལ་ཡོད། ཕ་བོང་ཡར་དགྱེལ་མར་དགྱེལ་ཞབས་ལ་བླ་མ་བསང་རབ་ཀྱི་ཞབས་རྗེས་མངོན་སུམ་ཡོད། ཤུག་པ་ངལ་གསོ་ལམ་ཁ་ན་ཁ་བ་དཀར་པོ་དགུང་ལོ་བདུན་གྱི་ཞབས་རྗེས་དང་རྟའི་རྗེས་ཡོད། དེ་རྣམས་མཇལ་ན་རྐྱེན་ཕྱི་ནང་བར་ཆད་ཐམས་ཅད་སེལ་ཐུབ། རྡོ་དཀར་སྟེང་ལམ་ལྟག་ལ་བདེ་མཆོག་གི་ཕྱག་རྗེས་ཡོད། དེ་རྣམས་མཇལ་ཐུབ་ན་ཕན་ཡོན་བསམ་གྱིས་མི་ཁྱབ་པ་ཡོད།ནགས་མཛེས་སྨད་ཀྱི་ལ་ཁའི་ལ་བཙས་ལྟག་ཏུ་ཁ་བ་དཀར་པོའི་རལ་གྲི་ཡོད། ལམ་ཁ་ན་ཕ་བོང་ཆེན་པོ་རི་བོང་གི་དབྱིབས་མངོན་སུམ་ཅན་ཞིག་ཡོད། དེ་ཐམས་ཅད་མཇལ་ཐུབ་ན་བསྐལ་པ་གྲངས་མེད་ཀྱི་བར་ཆད་སེལ་ཐུབ། སྨད་ལ་ལ་ཡི་ཡར་ནང་གཤོང་ཤར་ནང་ལ་ཀརྨ་པའི་སྒྲུབ་ཆུ་དང་ཆུ་སྲིན་མགོ་ཆེན་ཡོད། གཤོང་དཀར་དཀྱིལ་ལ་དུང་དཀར་རང་བཞིན་ཡོད། དེ་རྣམས་མཇལ་རྒྱུ་བྱུང་ན་ཕན་ཐོགས་བསམ་གྱིས་མི་ཁྱབ་པ་ཐོབ་ཐུབ། རྡུལ་དཀར་འགོ་བྲག་དཀར་དེ་ནི་རྗེ་བཙུན་སྒྲོལ་མ་དཀར་མོའི་རང་བཞིན་ཡིན། དེའི་ཁ་སྤྲོད་ཕར་ཁ་བྲག་སྔོན་པོ་དེ་ནི་རྗེ་བཙུན་སྒྲོལ་མ་སྔོན་མོའི་རང་བཞིན་ཡིན། གླེགས་བམ་གྲོང་སྨད་ཟམ་ཆེན་ཞབས་ཀྱི་ཆུ་བོ་དེ་ནི་དམྱལ་བ་གྲང་དམྱལ་གྱི་ཆགས་ཚུལ་ཡིན། ཟམ་པ་དེ་བརྒལ་དུས་གསོལ་བ་རྩེ་གཅིག་ཏུ་བཏབ་ན། གྲང་དམྱལ་དུ་འགྲོ་གོ་ཆོད་ཟེར། ཟམ་ཆེན་གཡོན་ཕྱོགས་ཀྱི་རི་ལ་གཤིན་རྗེ་ཆོས་ཀྱི་རྒྱལ་པོའི་རང་བཞིན་ཡོད། དེའི་གཡས་ཕྱོགས་ལམ་ཁ་ན་ཀརྨ་པའི་སྒྲུབ་ཆུ་ཡོད། སྒྲུབ་ཆུའི་རྩ་ལ་གནས་ཆེན་གྱི་གཏེར་སྒམ་ཡོད་ཅིང་དེ་ལ་ཤི་གསོན་ཕྱེ་མ་ལ་ཞེས་ཟེར། ཕར་ཁ་ཕ་བོང་བྲག་ཆུང་དེ་ནི་བུ་ཆུང་དཀར་པོའི་རང་བྱོན་ཡིན། ཚུར་ཁ་བྲག་ཆུང་དེ་ནི་བུ་ཆུང་སྔོན་པོའི་རང་བྱོན་ཡིན། གྲོང་སྨད་ཐང་ཆུང་དེ་ནི་གནས་ཆེན་གྱི་མཆོད་གཤོམ་ཡིན་པར་གྲགས། མཆོད་གཤོམ་སྟེང་ལ་མཆོད་ཁྲི་སྒབ་སྟེང་ཟེར། མཆོད་ཁྲི་གཡོན་ཕྱོགས་ལ་གནས་ཆེན་གྱི་གཏེར་སྒམ་ཡོད། ཤར་གླེགས་བམ་རི་ཆུང་དེ་ནི་གནས་བརྒྱའི་ཐོག་སྤང་ཡིན། ནགས་ཚལ་ནང་གི་རྩི་ཤིང་རྣམས་གཅོད་མི་ཉན། དེ་ལ་གདུགས་དང་རྒྱལ་མཚན་བ་དན་བླ་བྲེའི་རང་བཞིན་ཡོད། ཤར་གླེགས་བམ་ལྟག་ལ་ཁ་བ་དཀར་པོ་དགུང་ལོ་བདུན་སྐབས་ཀྱི་ཕྱག་རྗེས་དང་མྱུར་འགྲོ་རྟ་ཡི་ཞབས་རྗེས་ཡོད། ལམ་ཁ་ལ་གནས་ཆེན་བརྒྱ་ཡི་ལྡེ་མིག་ཡོད། བར་དོ་འཕྲང་ལམ་ཡོད། དེའི་ནང་དུ་འགྲོ་ཐུབ་ན་རྐྱེན་ཕྱི་ནང་བར་ཆད་ཐམས་ཅད་སེལ་ཐུབ། དེར་མ་ཟད་ཀརྨ་པའི་དབུ་ཞྭ་དང་། ཤར་གླེགས་བམ་རྡོ་ལ་དུང་དཀར་རང་བྱོན་ཡོད། ནང་ལ་སངས་རྒྱས་སྟོང་རྩ་གཉིས་ཀྱི་རང་བྱོན། བྱ་རྒྱལ་ཁྱུང་གི་སྒོ་ང་དང་བསྐལ་པ་བཟང་པོའི་ནས་འབྲུ། རྒྱ་གར་ཆོས་འཁོར་གྱི་གཏེར་སྒམ་དང་རྒྱ་ནག་ཆོས་འཁོར་གྱི་གཏེར་སྒམ་ཡོད། དེར་མ་ཟད་རང་བྱོན་འདྲ་མིན་སྣ་ཚོགས་ཡོད། ཤར་གླེགས་བམ་མཇལ་རྒྱུ་བྱུང་ན་བསྐལ་པ་སྟོང་གི་ལས་སྒྲིབ་དག གྲོང་སྨད་རྒྱ་གྲོང་ལ་ཞི་ཁྲོ་དམ་པ་རིགས་བརྒྱའི་ཆགས་ཚུལ་ཡོད། བུ་དང་བུ་མོ་རྣམས་ལ་དཔའ་བོ་དཔའ་མོ་ཞེས་ཟེར། གྲོང་སྨད་སྤང་ཐང་དེ་ནི་ཆོས་འབྱུང་གྲུ་གསུམ་གྱི་རང་བཞིན་ཡིན། གྲོང་སྟོད་ལུང་ཆུ་དེ་ལ་འཕགས་པ་སྤྱན་རས་གཟིགས་ཀྱི་མཚན་སྔགས་ཡིག་དྲུག་ཨོཾ་མ་ཎི་པདྨེ་ཧཱུྃཿརྩ་སྔགས་འབུམ་འགྱུར་བགྲང་བ་ཡིན། གྲོང་སྨད་ལུང་ཆུ་ལ་ཨོ་རྒྱན་པདྨའི་མཚན་སྔགས་ཨོཾ་ཨཱཿཧཱུྃ་བཛྲ་གུ་རུ་པདྨ་སིདྷི་ཧཱུྃ། ཞེས་པའི་རྩ་སྔགས་འབུམ་འགྱུར་བགྲང་བ་ཡིན། གྲོང་སྨད་ཆུ་ཁ་ཕ་བོང་དེ་ལ་རང་བྱོན་སྣ་ཚོགས་ཡོད་པ་མ་ཟད་སྟག་གི་རྗེས་ཀྱང་ཡོད། གཡོན་ཕྱོགས་བྲག་རི་དེ་ལ་མཁའ་འགྲོ་མའི་རྒྱན་ཆ་སྣ་ཚོགས་ཡོད། གཡས་ཕྱོགས་བྲག་རི་དེ་ལ་རྟ་ཕག་ཡབ་ཡུམ་དང་གཞན་མིན་གྱི་རང་བྱོན་སྣ་ཚོགས་ཡོད། སྤྱན་རས་གཟིགས་ཁ་སར་པ་ཎི་རང་བྱོན། ཐང་ཆེན་མགོ་ལ་ཀླུ་ཤིང་དམ་པ་དགུ་བསྒྲིགས་དང་ཀླུ་མཚོའི་ཆུ་མིག་རྣམས་གསལ་པོ་ཡོད། གནས་ནང་ལ་རྩའི་ལམ་ཁ་ལ་གནས་ཆེན་གྱི་གཏེར་སྒམ་རང་བྱོན་དང་། ལ་རྩ་ལ་ཁ་བ་དཀར་པོའི་ཞབས་རྗེས་དང་རྟ་རྗེས། ལམ་ཁ་ལ་གནས་ཆེན་བརྒྱའི་ལྡེ་མིག་ཡོད། ལ་སྐེད་ཀྱི་ཆུ་དེ་ནི་བཛྲ་གུ་རུའི་སྒྲུབ་ཆུ་ཡིན། ངལ་གསོ་ཕ་བོང་ཐོག་ལ་ཀརྨ་པའི་ཞབས་རྗེས་ཁྲ་སིང་སིང་ཡོད། མཁའ་འགྲོ་གནས་གསར་རྩ་བྲག་ལ། ཨོཾ་མ་ཎི་པདྨེ་ཧཱུྃ་རང་བྱོན་ཁྲ་ལྷམ་མེར་གསལ། དེ་མཇལ་རྒྱུ་བྱུང་ན་འཕགས་པ་སྤྱན་རས་གཟིགས་དངོས་སུ་མཇལ་དང་མཚུངས། གནས་གསར་ཤར་ནང་ལུང་པ་གསུམ་ལ་ལུང་ཆུ་ཆུང་ཆུང་གསུམ་ཡོད། དེ་ནི་འཇམ་པའི་དབྱངས་དང་ཕྱག་ན་རྡོ་རྗེ་དང་འཕགས་པ་སྤྱན་རས་གཟིགས་བཅས་རིགས་གསུམ་མགོན་པོའི་གནས་ཆུ་ཡིན། དེ་བཏུང་ན་ནད་རིགས་མཐའ་དག་སེལ་ཐུབ། དེའི་ལམ་ལྟག་ན་མཁའ་འགྲོ་མའི་གཙུག་ཏོར་ཡོད། ཨོ་རྒྱན་པདྨའི་སྒྲུབ་ཕུག་ལམ་ཁ་ལ་ཀརྨ་པའི་ཞབས་རྗེས་དང་། ལོ་དགུ་ཚར་བའི་ཕྱག་རྗེས། བར་དོ་འཕྲང་ལམ་དུ་སངས་རྒྱས་མར་མེ་མཛད་ཀྱི་ཞབས་རྗེས་ཡོད། ལམ་ཁའི་རྡོ་གྲུ་བཞི་ཕ་བོང་ནི་བརྒྱ་བྱིན་གྱི་བང་མཛོད་ཡིན། སྒྲུབ་ཕུག་ཡར་ནང་ན་མཁའ་འགྲོ་མའི་ཚོགས་གཞོང་ཡོད། དེའི་རྩར་ཨོཾ་མ་ཎི་པདྨེ་ཧཱུྃ་ཞེས་པ་རང་བྱོན་ཡོད། དེའི་བྲག་རི་རྣམས་ནི་མཁའ་འགྲོ་མའི་སྤྲིན་ཐགས་ཡིན་པར་མ་ཟད་སངས་རྒྱས་བྱེ་བ་བརྒྱའི་རང་བྱོན་མང་པོ་ཡོད། ཕར་ཁ་བྲག་ལ་ཨོ་རྒྱན་པདྨ་རང་བྱོན་ཁྲ་སིང་སིང་མཆིས། རྦབ་ཆུ་ཤར་ན་བྲག་ལ་མཁའ་འགྲོ་མའི་ཚོགས་རྔ་ཡོད། རྦབ་ཆུ་གཡས་སུ་འབབ་པའི་ཆུ་དེ་ནི་ཚེ་དཔག་མེད་ཀྱི་ཚེ་ཆུ་ཡིན། དེ་བཏུང་ན་ཚེ་དཔག་མེད་ཀྱི་ཚེ་ཡི་རིག་འཛིན་ཐོབ་ཐུབ། ཚེ་དཔག་མེད་ཀྱི་ཚེ་ཆུ་འོག་མཁའ་འགྲོ་མའི་གསང་མཚན་དང་གསང་ཆབ་འབབ་གིན་ཡོད། རྦབ་ཆུ་དེ་ནི་མཁའ་འགྲོ་ཡེ་ཤེས་མཚོ་རྒྱལ་དང་སངས་རྒྱས་སྟོང་གི་ཁྲུས་གསོལ་མཛད་པ་ཡིན། ཚེ་རིང་སྐལ་ལྡན་རྣམས་ལ་དབྱར་མཚོ་རྒྱས་བཞིན་དངོས་གྲུབ་ཐོབ། ཚེ་ཆད་སྐལ་མེད་རྣམས་ལ་རྦབ་ཆུ་བྱོན་པར་དཀའ། རྦབ་ཆུ་གོང་གི་བྲག་ལ་སློབ་དཔོན་བཻ་རོ་ཙ་ནའི་སྒྲུབ་ཁང་སྟེང་འོག་གཉིས་ཡོད། གཡས་ཕྱོགས་ཀྱི་བན་དེ་རི་ལ་བཀའ་བསྟན་འགྱུར་ཆ་ཚང་རང་བྱུང་། གཡོན་ཕྱོགས་ཕར་ཁའི་བྲག་རི་ལ་འཕགས་པ་གནས་བརྟན་བཅུ་དྲུག་རང་བྱོན་ཡོད། ལ་ཁར་རྗེ་བཙུན་མི་ལ་རས་པའི་སྐུ་མངོན་སུམ་ཡོད། གྲོང་སྟོད་སྤང་ཐང་འགོ་ལ་མཁའ་འགྲོ་མའི་བྲོ་ར་ཡོད། ཞིང་སྐྱོང་གི་རང་བྱོན་ཡོད། ཛཾ་བྷ་ལ་རང་བྱོན་ཡོད། འདང་ཁྲི་གསུམ་རྩ་ལམ་ལ་མཁའ་འགྲོ་མའི་གཏེར་སྒམ་ཡོད། བྲག་འགག་ནང་ཞི་རྒྱས་དབང་དྲག་གི་གཏེར་སྒམ་རང་བྱོན་དང་། ལམ་གྱི་གཡོན་ཕྱོགས་སུ་བུ་ཆུང་དཀར་ནག་མངོན་སུམ་རང་བྱོན་ཡོད། ཁ་བ་དཀར་པོ་དགུང་ལོ་གསུམ་སྐབས་ཀྱི་ཞབས་རྗེས་ཡོད། བྲག་འགག་ལ་རྩ་ལ་བདེ་མཆོག་གི་རྟ་མགོ་ཡོད་ཅིང་། ནགས་མཛེས་སྟོད་ལ་ལམ་ནང་ཁ་བ་དཀར་པོའི་རྟ་སྒ་ཡོད།

རོང་སྐྱོང་ལུང་བའི་ནང་ཁ་བ་དཀར་པོའི་ལུ་གུ་ཡོད། ཡང་ཡར་ནང་ཁ་བ་དཀར་པོའི་བཞུགས་ཁྲི་མཆིས། ལ་ཁ་ལམ་ཞབས་སུ་ཀརྨ་པའི་སྒྲུབ་ཆུ་ཡོད་ཅིང་། ནགས་མཛེས་ནང་ན་ཀརྨ་པའི་སྒྲུབ་ཆུ་ཡོད། མགར་བ་དམ་ཅན་ནག་པོའི་ཐོ་རྫ་ཡོད། ལ་རྩར་བྱ་རྒྱལ་ཁྱུང་གི་ཆུ་ཚན་མངོན་སུམ་མཆིས། སྐྱེ་བོ་ཀུན་གྱིས་ལུས་གཟུགས་འཁྲུ་བ་ན། ནད་རིགས་མ་ལུས་འཇོམ་པར་ཐེ་ཚོམ་མེད་ཅེས་བརྗོད་དོ། །མི་འགྱུར་ལྷུན་གྲུབ་ལེགས་པའི་ཁ་བའི་གནས། །མི་གཡོ་བསམ་གཏན་གླིང་གི་ལྷ་ཚོགས་བཞིན། །བཀྲ་ཤིས་བྱིན་ཆེན་གཞན་གྱིས་འགྲན་ཟླ་མེད། །རང་བཞིན་གྲུབ་པའི་ཆོས་མཐུན་དངོས་གྲུབ་སྩོལ། །བླ་མ་ལ་སོགས་སྲི་ཞུའི་ཡུལ་གྲུ་གནས། །རང་ངོས་བསྙེན་བཀུར་ཞབས་ཏོག་འབད་ལ་བགྱིས། །ལྷ་ཡི་ཡུལ་གྱི་དཔག་བསམ་ལྗོན་ཤིང་འབྲུ། །མངོན་སུམ་གྲུབ་པར་ཆོས་མཐུན་དངོས་གྲུབ་སྩོལ། །མི་དགའ་ལྷ་དགྱེས་སྐྱིད་རྟགས་ཁྱད་ཆོས་ཡུལ། །བདེ་སྐྱིད་ཕུན་ཚོགས་ལོངས་སྤྱོད་དབྱར་མཚོ་རྒྱས། །དཔག་བསམ་ཤིང་ལྟར་ཆོས་བཟང་ལྷ་ཡུལ་མཚུངས། །འདོད་པའི་ཡོན་ཏན་ཆོས་མཐུན་དངོས་གྲུབ་སྩོལ། །རྣམ་པར་རིག་བྱེད་རྒྱུན་དུ་བསགས་པ་ན། །རྣམ་པར་ཤར་བ་གཞན་ཡུལ་མི་འདྲ་བར། །རྣམ་འཕྲུལ་མྱུར་དུ་གྲུབ་པར་གདོན་མི་ཟ། །རྣམ་པར་བཀྲ་བ་ཆོས་མཐུན་དངོས་གྲུབ་སྩོལ། །

མཆན། གླེགས་བམ་གནས་ཡིག་ནི་སྔོན་དུས་རྗེ་ཀརྨ་རང་བྱུང་རྡོ་རྗེས་མཛད་པའི་མུ་ཏིག་ཕྲེང་བ་ལྟ་བུ་ཞིག་ཡོད་ཀྱང་། རྗེས་སུ་བོར་བརླག་སོང་བ་རེད། འོན་ཀྱང་གླེགས་བམ་རྒན་བློ་བཟང་བསྟན་འཛིན་གྱིས་སྔོན་མའི་གནས་ཡིག་དེ་ངག་སྐྱོར་བཏང་མྱོང་བས། ད་ལོ་ཁོང་དགུང་ལོ་བདུན་ཅུར་ཕེབས་ཤིང་སྤྱན་ལ་སྐྱོན་ཕོག་ནས་ལོ་བཅུ་ལྷག་ཙམ་སོང་། ན་ནིང་ཟླ་བ་བདུན་པར་ཁོང་གིས་བློ་ལ་གང་ངེས་རྒན་རིན་ཆེན་རྡོ་རྗེ་ལ་གསུངས་པར། རྒན་རིན་ཆེན་རྡོ་རྗེས་ཕྱོགས་གཅིག་ནས་ཡི་གེར་ཕབ་པ་དང་། ཕྱོགས་གཞན་ཞིག་ནས་གླེགས་བམ་གནས་སའི་རི་ཀླུང་ཁག་ལ་ཕེབས་ཏེ་དཔྱད་ཞིབ་ཀྱིས་དཔྱད་གཞི་ལེགས་སྒྲིག་བྱས་པ་རེད།

༄༅། །གནས་ཀྱི་མཚན་ཉིད་རབ་ཏུ་གསལ་བར་བྱེད་པ་ལྷུན་པོའི་རྒྱན་ཞེས་བྱ་བའི་བསྟོད་པ། བླ་མ་དམ་པ་རྣམས་ལ་ཕྱག་འཚལ་ལོ། །བསྟན་པ་དྲི་མ་མེད་དང་རབ་བསྟན་ནས། །མ་རིག་དྲི་བསལ་དྲི་མ་མེད་ལམ་སྟོན། །ས་ལམ་དྲི་མ་ཀུན་བཅོམ་དྲི་མེད་བརྙེས། །ཤེས་བྱའི་དྲི་མ་བྲལ་ལ་ཕྱག་འཚལ་ལོ། །སྙིགས་མའི་དུས་ན་བྱང་ཆུབ་སེམས་དཔའ་རྣམས། །སྒྲུབ་པའི་སྙིང་པོ་ཉམས་སུ་ལེན་བྱེད་པ། །དེ་ཉིད་རྐྱེན་གྱུར་དབེན་པ་བརྟེན་བྱ་ཞིང་། །མདོ་ལས་བྱུང་བ་དེ་དང་མཐུན་གྱུར་པ། །རི་བྲག་བས་མཐའ་ཆེན་པོར་གནས་པ་རྣམས། །ཕྱོགས་སུ་བསྔགས་ཤིང་ཉི་ཤུ་རྩ་བཞིའི་གནས། །རྒྱུད་སྡེའི་མཆོག་ལས་སྙིང་པོར་གསུངས་པའི་ཕྱིར། །གནས་འདིའི་ཡོན་ཏན་ཅུང་ཞིག་བརྗོད་པར་བྱ། །བསིལ་ཟེར་འཕྲོ་བའི་ཆུ་གཏེར་པདྨོ་ལ། །རི་རབ་གླིང་བཞིར་བཅས་པའི་ཟེ་འབྲུ་བཀྲ། །ཁྱད་པར་དམ་ཆོས་རྩི་བཅུད་ལེགས་ལྡན་པའི། །འཛམ་གླིང་ཡོན་ཏན་ཚོགས་ཀྱིས་བཀྲ་བའི་དབུས། །རྡོ་རྗེ་གདན་ལས་བྱང་ཕྱོགས་གངས་རིའི་ཞོལ། །གྲུབ་པའི་གནས་མཆོག་མཁས་གྲུབ་གྱིས་བསྟེན་པ། །གངས་ཅན་པོ་ཏ་ཝ་རིའི་ཤར་གྱི་ཕྱོགས། །ཁྱད་པར་འཕགས་པའི་གནས་སུ་གྱུར་པ་ཡིན། །བྱང་ཕྱོགས་ལི་ཡི་ཡུལ་ཞེས་གྲགས་པ་ན། །རྒྱལ་བའི་བྱིན་བརླབས་གླང་རུའི་རི་དང་བཅས། བྱང་ཆུབ་སེམས་དཔའ་རྣམས་ཀྱི་བྱོན་པའི་གནས། །གྷྲི་ཧ་དེ་བའི་ཡུལ་ལས་སྷོ་ཕྱོགས་ཡིན། །ཤར་ཕྱོགས་གྷ་དྷ་ར་ཞེས་གྲགས་པའི་ཡུལ། །ཀླུའི་རྒྱལ་པོ་ཨེ་ལའི་འདབ་ཀྱིས་བསྲུངས། །རྒྱལ་བའི་བསྟན་ལ་དད་པ་རྒྱས་གྱུར་པའི། །ལོངས་སྤྱོད་ལྡན་པའི་ཡུལ་གྱི་ནུབ་ཕྱོགས་ཡིན། །དབུས་འགྱུར་འཆང་ལས་ཤར་གྱི་ཕྱོགས་གྱུར་པ། །གྲུབ་པའི་སྐྱེས་བུ་རྣམས་ཀྱིས་བསྟེན་པའི་ཞིང་། །འདོད་པའི་གཟུགས་ཅན་ལྷ་མོ་བྱུང་བའི་གནས། །ཀ་མ་རུ་པའི་གནས་ཀྱི་བྱང་ཕྱོགས་ཡིན། །དེ་དག་རྣམས་ཀྱི་དབུས་ཀྱི་ཆར་གནས་པ། །ཕྲེ་ཏ་པུ་རིའི་གནས་ཀྱི་མཚན་ཉིད་ལྡན། །སྙིགས་མའི་དུས་ཀྱི་སྒྲུབ་པའི་གནས་གྱུར་པ། །ཀུན་གྱི་བགྲོད་དཀའ་མ་མོ་མཁའ་འགྲོའི་གནས། །དཔལ་ལྡན་བླ་མ་རྣམས་ཀྱིས་ལུང་བསྟན་པའི། །རི་འདིའི་མཚན་ཉིད་མདོ་ཙམ་བརྗོད་པ་ནི། །རི་བོ་དྭངས་བསལ་ཤིན་ཏུ་དཀར་བའི་འོད། །ཀུ་མུ་ཏ་དང་ཟླ་བ་སྤུངས་པ་བཞིན། །རབ་དཀར་ལྷུན་མཐོ་མཐོ་ཁྱད་ལྷག་པར་འཕགས། །སྤྲིན་དཀར་ཞི་བའི་ཅོད་པན་རྣམ་པར་མཛེས། འདིའི་ཤར་ཕྱོགས་ལྷའི་ཁང་པ་སྟེང་། །རྡོ་རྗེ་དྲག་འདུལ་འཁོར་དང་འབཅས་པ་གནས། །ཕལ་གྱིས་བགྲོད་དཀའ་འཇིགས་པའི་སྒྲ་འབྱིན་པ། །ཆུ་རྣམས་རང་གི་སྦུ་བས་གཡོ་བར་འབབ། །རི་བྲག་རྣམས་ཀྱིང་མཚོན་ཆའི་རྣམ་པ་ལྟར། །རབ་འཛིགས་ནགས་ཚལ་ཚོགས་ཀྱིས་ལེགས་པར་བརྒྱན། །དེའི་དབུས་ན་ནེའུ་སིང་རབ་མཛེས་པ། །ཆོས་ཀྱི་འབྱུང་གནས་ལྟ་བུའི་དབྱིབས་ལྡན་པའི། །ཤིན་ཏུ་མཛེས་པའི་ལྟེང་ཀས་བརྒྱན་པ་ཡོད། །སྔོན་ཚེ་སློབ་དཔོན་པད་མ་འབྱུང་གནས་དང་། །བླ་མ་བཻ་རོའང་འདི་རུ་བྱོན་ཞེས་གྲགས། །འདི་ནི་མཁའ་འགྲོ་རྣམས་ཀྱི་གནས་མཆོག་སྟེ། །བཟང་པོའི་དུས་ལ་འདུས་ཤིང་ཚོགས་མཛད་དེ། །སྐལ་ལྡན་རྣམས་ལ་བྱིན་གྱིས་བརློབ་ཅེས་གྲགས། །དེའི་ལྷོ་ཕྱོགས་ངོས་ཀྱི་རྒྱུད་ལ་ནི། །རབ་འཇིགས་དུར་ཁྲོད་བདག་པོའི་ཆས་ལྡན་པ། །ལྷ་དམག་འབུམ་གྱིས་བསྐོར་བ་ཡོད་ཅེས་གྲགས། །འདི་ནའང་དྲག་པོའི་མངོན་སྤྱོད་གྲུབ་པའི་གནས། །དཔག་མེད་ཡོད་ཅིང་ཁྱད་པར་ལྷའི་གནས། །དེ་ཉིད་མཆོག་ཏུ་གྱུར་པར་བསྔགས་པ་ཡིན། །འདིའི་ནུབ་ཀྱི་ཕྱོགས་དང་ཉེ་བ་ན། །དམར་མོ་ཁྲག་མདོག་བསེའི་ལན་ཕྲན་ཅན། །མ་མོ་བྱེ་བའི་ཚོགས་ཀྱིས་ཡོངས་བསྐོར་བར། །ཐུན་མོང་ལས་རྣམས་ཐོགས་པ་མེད་འགྲུབ་པ། །གནས་ཤིང་དེ་ཡི་སྐུ་དང་བཅས་པའང་ཡོད། །འདི་ནི་རབ་ཏུ་ཆོ་འཕྲུལ་ཆེ་བའི་གནས། །བགྲོད་པར་དཀའ་ཞེས་དཔལ་ལྡན་བླ་མས་གསུངས། །འདིའི་བྱང་གི་ཕྱོགས་སུ་གནས་པ་ནི། །གནོད་སྦྱིན་དྲེལ་ལ་དགའ་བ་ཞེས་བྱ་པ། །གནོད་སྦྱིན་དུ་མའི་འཁོར་དང་བཅས་པ་གནས། །འདི་དང་ཉེ་བའི་གནས་ཀྱི་ཕུག་པ་ན། །སྒྲུབ་པའི་གནས་མཆོག་ཆོས་འབྱུང་གིས་བརྒྱན་པ། །ཆོ་འཕྲུལ་དུ་མ་སྟོན་པ་ཡོད་ཅེས་གྲགས། །དེ་ལྟར་གྲུབ་པའི་གནས་མཆོག་གིས་བསྟེན་པ། །འདི་ནི་རོང་བཙན་ཁ་བ་དཀར་པོ་ཞེས། །ཀུན་ཏུ་ཁྱབ་པའི་མིང་གིས་མཚན་པ་ཡིན། །འདིའི་ཕྱོགས་རྣམས་ཀུན་ནས་རབ་བསལ་བའི། །ཆུ་བོ་སྒྲ་སྙན་འབྱིན་པའི་ཚོགས་རྣམས་དང་། །ལྟ་བས་མི་ངོམས་ཤིན་ཏུ་རབ་མཛེས་པ། །མཚོ་དང་ལྟེང་ཀའི་ཚོགས་ཀྱིས་བཀྲ་བར་གནས། །འདིའི་འཁོར་དུ་གངས་རིའི་ཕྲེང་བ་ནི། །ཤར་ཕྱོགས་གྷན་དྷ་རི་ཡི་ས་མཚམས་ནས། །རྡོ་རྗེ་འབར་བའི་གནས་ཀྱི་བར་དུ་ཡིན། །གནས་འདིའི་ཉེ་འཁོར་ཁོ་ར་ཁོར་ཡུག་ན། །དུས་མིན་འཆི་དང་མུ་གེའི་འཇིགས་པ་བྲལ། །ཨ་ཀ་རུ་དང་ཙན་དན་རྒུན་འབྲུམ་ཤིང་རྩ་སོགས། །ཤིང་མཆོག་རིགས་ནི་དཔག་ཏུ་མེད་པ་ཀུན། །དེ་དག་རྣམས་ཀྱང་སྨན་གྱི་ནུས་པར་ལྡན། ཉི་མ་བྱང་བགྲོད་ཤིན་ཏུ་དྲོ་བའི་དུས། །འདི་ནི་རབ་བསིལ་གངས་རིའི་ཕྲེང་བར་ལྡན། །ཉི་མའི་ལྷོར་བགྲོད་ཤིན་ཏུ་བསིལ་བའི་ཚེ། །འདི་ནི་མྱུ་གུ་ལ་ལ་འབྲས་བུའི་ཚོགས། །སྨིན་ཅིང་ཨིན་ཏྲའི་མདངས་ཅན་ཉིད་དུ་གནས། །རབ་བསལ་ཚོན་རྣམས་ཀུན་གྱིས་བསྒྱུར་འདྲ་བའི། །དྲི་ཞིམ་མེ་ཏོག་བརྒྱ་ཕྲག་དུ་མ་དང་། །ལོ་མ་འབྲས་བུའི་ཚོགས་རྣམས་བསམ་མི་ཁྱབ། །ཕྱོགས་རྣམས་ཀུན་ནས་སྤོས་ཀྱི་ངད་ལྡན་པ། །ལྷའི་རོལ་མོ་སྒྲ་སྙན་བསྒྲོགས་པ་དང་། །ངོ་མཚར་ཆེ་བའི་རྣམ་པ་དུ་མ་རྣམས། །དག་པའི་ཡིད་ཅན་རྣམས་ཀྱིས་སྣང་བ་ཡིན། །འདིའི་རྣམ་པ་དཔག་མེད་ཡོད་མོད་ཀྱི། །འདིར་ནི་རེ་ཞིག་མདོ་ཙམ་བརྗོད་པ་ཡིན། །རྒྱས་པར་བླ་མ་རྣམས་ཀྱིས་མཛད་པ་ཡི། །གསུང་དང་གནས་འདི་ཉིད་ལ་རྟོགས་པར་བྱ། །འདི་ནི་རེ་ཤིག་གནས་ལ་དད་པ་ཡི། །སྐྱེས་བུ་རྣམས་ཀྱིས་ཅུང་ཟད་བསྐུལ་བའི་ངོར། །སྙན་ངག་སྡེབས་སྦྱོར་ཚིག་རྣམས་སྤངས་ནས་ནི། །ཉུང་བསྡུས་གསལ་བར་སྦྱར་བའི་དགེ་བ་དེ། །འགྲོ་རྣམས་ཉོན་མོངས་གཡེང་བ་རབ་སྤངས་ནས། །བསམ་གཏན་ནད་མེད་བདེ་བ་མཆོག་ཐོབ་ཤོག །མཐར་ཐུག་སྲིད་ཞི་གཉིས་ལས་འདས་པ་ཡི། །ཐམས་ཅད་མཁྱེན་པའི་གོ་འཕང་ཐོབ་པར་ཤོག །སྤྲེལ་ལོ་ཟླ་བ་གསུམ་པའི་ཚེས་བཅུའི་ཉིན་པར་རང་བྱུང་རྡོ་རྗེས་གནས་སྒོར་སྦྱར་བའོ། །

མཆན། གནས་ཡིག་འདི་ནི་ཀརྨ་པ་རང་བྱུང་རྡོ་རྗེས་བཀའ་འབུམ་ང་པོད་ལས་ཞལ་བཤུས་པའོ། །

༄༅། །གནས་མཆོག་ཁ་བ་དཀར་པོའི་ནང་གི་གནས་ཡིག་བཞུགས་སོ། །ཨོཾ་སྭ་སྟི། ཐབས་ཤེས་ཟུང་འབྲེལ་དངོས་གྲུབ་བཞི་ལྡན་མཆོག །ཆོས་དབྱིངས་དངོས་གྲུབ་རིགས་དྲུག་བྱང་ཆུབ་ཐོབ། །ཤེས་རབ་དངོས་གྲུབ་མཁས་གྲུབ་ཚོགས་ཀྱིས་བསྐོར། །བྱིན་རླབས་དངོས་གྲུབ་འདི་ཕྱིའི་ལས་སྒྲིབ་དག །ལོངས་སྤྱོད་དངོས་གྲུབ་རྒྱུ་ནོར་ཕུན་སུམ་ཚོགས། །དངོས་གྲུབ་བཞི་ལྡན་རོང་བཙན་ཁ་བ་གནས། །ཁ་བ་གནས་འདི་བརྒྱ་བྱིན་དཀྱིལ་འཁོར་དབྱིབས། །ཕུལ་བྱུང་གནས་མཆོག་ཡུལ་ནི་འཇང་བོད་མཚམས། །ཕྱོགས་བཞིར་བཞུགས་པའི་གྲུབ་ཆེན་དགྲ་ལྷ་བཞི། །ཤར་ན་བཞུགས་པའི་དགྲ་ལྷས་ཁྱུང་ཆེན་ཆིབས། །ལྷོ་ན་བཞུགས་པའི་དགྲ་ལྷས་རྨ་བྱ་ཆིབས། །ནུབ་ན་བཞུགས་པའི་དགྲ་ལྷས་སེང་གེ་ཆིབས། །བྱང་ན་བཞུགས་པའི་དགྲ་ལྷས་གཡུ་འབྲུག་ཆིབས། །དཀྱིལ་འཁོར་དབུས་སུ་འཁོར་བཅས་ཕྱོགས་བཅུ་བཞུགས། །མཁའ་འགྲོ་ཡེ་ཤེས་མཚོ་རྒྱལ་སྔོན་དུ་བཞུགས། །རྟག་ཏུ་གཡུ་ཡི་རྦབ་ཆུ་ཁྲུས་གསོལ་མཛད། །དམུན་པོ་ཀླ་ཀློ་ངག་ལྐུགས་རྨོངས་པ་གསལ། །བོད་ཁམས་སྨད་དུ་སྐྱེས་པའི་བུད་མེད་རྣམས། །གྲེ་བ་བཟང་ཞིང་སྙན་འགྱུར་ངག་ཀྱང་བདེ། །ཁྲུས་གསོལ་རྦ་ཀླུང་འབབ་པའི་མར་གཤམ་ན། །ཨོ་རྒྱན་པདྨའི་སྒྲུབ་ཁང་དངོས་སུ་ཡོད། །དེ་ནང་བསྙེན་བཀུར་ལས་སྒྲིབ་སུས་སྦྱངས་ན། །བྱང་ཆུབ་ལམ་ལ་ཐོབ་པར་ཐེ་ཚོམ་མེད། །སྒྲུབ་ཕུག་མར་གཤམ་དཔག་ཚད་གཅིག་ཙམ་ན། །མཁའ་འགྲོ་གནས་གསར་མཆོག་ཏུ་གྱུར་པ་ཡོད། །གནས་གསར་ནང་དུ་བར་དོ་འཕྲང་ལམ་ཡོད། །འཕྲང་ལམ་ནང་དུ་མངོན་སུམ་འགྲོ་ཐོབ་ན། །འདི་ཕྱི་བར་ཆད་སེལ་བར་ཐེ་ཚོམ་མེད། །ཕོ་ཡི་མཚན་མ་རང་བྱོན་མངོན་སུམ་ཡོད། །བུད་མེད་ཡུན་རིང་སྦྲུམ་མ་མི་ཆགས་ཀུན། །མཚན་མ་དེ་ལ་མངོན་སུམ་མཇལ་ཐུབ་ན། །མངལ་ལྡན་མྱུར་དུ་ཆགས་པར་ཐེ་ཚོམ་མེད། །གླེགས་བམ་རི་ཡི་སྟོད་སྨད་མ་ལུས་ཀུན། །ཐམས་ཅད་རང་བྱོན་གནས་རི་བསམ་མི་ཁྱབ། །ཤར་དུ་གླེང་འབུམ་ནུབ་ཏུ་བརྒྱ་བྱིན་བང་། །བྱང་དང་མཚོ་དཀར་ལྷོ་རུ་ཨ་གསལ་ལ། །མ་ལུས་ཀུན་རྣམས་རང་བྱོན་ངོ་མཚར་ཡོད། །འཁྲི་ཤིང་ཀུན་རྣམས་བྲག་རྣམས་འཐུམ་ནས་སྐྱེས། །ཤིང་རྩ་གཅིག་ལ་རྩེ་མོ་སྣ་གསུམ་སྐྱེས། །འདབ་ཆགས་སྡེར་ཆགས་རྨིག་ཟླུམ་ཐམས་ཅད་དང་། །རྨིག་པ་ཁ་དབྲག་འབྲིང་དུ་ཐམས་ཅད་ཀྱི། །འདི་ཕྱོགས་མ་ཚང་བ་ཡང་གཅིག་ཀྱང་མེད། །ཤིང་དང་རྩྭ་དང་སྲོག་ཆགས་རིགས་རྣམས་ཀྱི། །རོ་མཆོག་སྨན་ལྡན་མིན་པ་གཅིག་ཀྱང་མེད། །གནས་བསྐོར་བཞུང་ལམ་ནགས་རྫོགས་ལ་ཡི་ནང་། །འཁྲི་ཤིང་སྣ་ཚོགས་ལག་ལ་དར་དཀར་ལེན། །གདུགས་དང་རྒྱལ་མཚན་ལམ་གྱི་གཡས་གཡོན་གཡོ། །གནས་བསྐོར་མི་སྣ་རྒྱུན་དུ་བསུ་སྐྱེལ་བྱེད། །བྱ་རིགས་སྣ་ཚོགས་ངག་སྙན་གླུ་དབྱངས་ལེན། །འགྲོ་ཀུན་ཐོས་ཤིང་སྣང་བ་རབ་ཏུ་སྤྲོ། །ཤར་ཏང་ཆུ་ཕུག་ཆུ་ཚན་སྣ་ཚོགས་འབབ། །བྱ་རྒྱལ་ཁྱུང་གི་ཆུ་ཚན་མངོན་སུམ་ཡིན། །སྐྱེ་བོ་ཀུན་གྱིས་ལུས་གཟུགས་འཁྲུ་བས་ན། །ནད་རིགས་མ་ལུས་འཇོམས་པར་ཐེ་ཚོམ་མེད། །དཀྱིལ་འཁོར་གཡས་སུ་བཞུགས་པའི་ཕྱུག་རྒན་རྗེ། །དཔྲལ་བའི་མཚམས་ནས་མུ་ཏིག་ཁྲ་བོ་ཡོད། །དབུ་ཞྭའི་རྔམ་ཆེན་མཐོ་ནས་ལྷ་ལམ་མཉམ། །བོད་ཁམས་སེར་སྐྱ་མཆོག་དམན་སྐྱེ་བོ་རྣམས། །སྟོབས་ཆེ་གཟུགས་བཟང་ཡན་ལག་བདེ་བར་འགྱུར། །གངས་ལྡན་སྨན་གྱི་བཙུན་མོ་མཚམས་ནས་བཞུགས། །བོད་ཁམས་སྨན་ཆུང་ན་གཞོན་སྐྱེས་གཟུགས་ལེགས། །དཀྱིལ་འཁོར་གཡོན་དུ་བཞུགས་པའི་དམག་དཔོན་ནི། །གྲུབ་ཆེན་དམག་དཔོན་དགྲ་འདུལ་དབང་ཕྱུག་རྒྱལ། །ཁོར་ཡུག་ཡུལ་ཁམས་དགྲ་མེད་བདེ་སྐྱིད་འགྱུར། །དཀྱིལ་འཁོར་གཡས་མཐའ་རྦ་སྐྱོབ་ཕག་མོ་གནས། །ཕག་མོ་གནས་མཆོག་གཡས་གཡོན་བྲག་རི་ཀུན། །ངོ་མཚར་མི་འདྲ་ཕྱག་རྗེས་སྣ་ཚོགས་ཡོད། །སེང་ཆེན་རྒྱལ་པོའི་ཞབས་རྗེས་མངོན་སུམ་ཡོད། །ཆོས་རྒྱལ་གོང་མ་ནམ་མཁའ་རྒྱལ་མཚན་གྱིས། །ཕྱག་རྗེས་མངོན་སུམ་བྲག་ལ་བཏབ་པ་ཡོད། །བར་དོ་འཕྲང་ལམ་མི་འདྲ་སྣ་ཚོགས་ཡོད། །ཡངས་འཛོམས་གྲོང་དཀྱིལ་གཞུང་ལམ་གཡོན་ཕྱོགས་སུ། །ལྷ་ཤིང་ཤུག་པ་ནོར་བུ་འཚོགས་འདྲ་ཞིག །དབྱར་དགུན་མེད་པར་གཡུ་མདོག་བཞིན་དུ་སྔོ། །དེ་ནི་བློན་པོ་ཕྱིང་སྔོན་བླ་ཤིང་ཡིན། །གནས་མཆོག་གཡས་གཡོན་སྨན་ཆུ་སྣ་ཚོགས་འབབ། །མངར་སྐྱུར་ཁ་གསུམ་ཆུ་མིག་བདུད་རྩི་ཡིན། །རླུང་དང་བད་ཀན་མཁྲིས་པ་མ་ལུས་ཀུན། །ནད་རིགས་མཐའ་དག་འཇོམས་པའི་གནས་ཆུ་ཡིན། །དཀྱིལ་འཁོར་མདུན་དུ་རིན་ཆེན་གསུམ་གྱི་སྡེར། །གསེར་སྡེར་སྟེང་དུ་ཤེལ་གྱི་མཆོད་རྟེན་བཞུགས། །འོད་གསལ་རང་བྱོན་མཆོད་རྟེན་མཇལ་ཐུབ་ན། །འཆི་ཉེ་འཚེ་མེད་ཚེ་དབང་རབ་ཏུ་བསྲིང་། །ཤར་གྱི་སྨིན་དྲུག་ལ་ཁ་གཡུ་སྡེར་གྲགས། །གཡུ་སྡེར་སྟེང་ན་ཇོ་བོ་ནམ་མཁའ་བཞུགས། །ལྷ་སའི་ཇོ་བོ་མཇལ་དང་ཁྱད་པར་མེད། །ཤེལ་གྱི་སྡེར་མ་བདེ་ཆེན་ཁྲོམ་རྭ་གྲགས། །རྒྱ་བོད་སོག་རིགས་མ་འདུས་གཅིག་ཀྱང་མེད། །ཟས་ནོར་ལོངས་སྤྱོད་འོག་ཕྱོགས་ཀླུ་དང་མཚུངས། །དཀྱིལ་འཁོར་རྒྱབ་ཏུ་རིན་ཆེན་གཏེར་གྱིས་སྤུངས། །ཚ་བའི་ཡུལ་དུ་རྒྱུ་ནོར་ཕུན་སུམ་ཚོགས། །དཀྱིལ་འཁོར་སྤྱི་ལ་རྒྱལ་བ་རིགས་ལྔ་བཞུགས། །ཡུལ་ཁམས་སྤྱི་ལྟར་རྐྱེན་ངན་བར་ཆད་སེལ། །དཀྱིལ་འཁོར་མཐའ་རུ་སྤང་ལྗོངས་མེ་ཏོག་མཛེས། །དྲང་སྲོང་སྨན་ལྷ་མེ་ཏོག་སྨོན་ལམ་ཐོབ། །ནད་རིགས་བཞི་བརྒྱ་རྩ་བཞི་ཁྱད་པར་སེལ། །དཀྱིལ་འཁོར་དབུས་སུ་གངས་རིའི་དབང་པོ་བཞུགས། །གནས་ཆེན་ཁ་བ་དཀར་པོ་གངས་རིའི་རྗེ། །རྩ་བ་རབ་བརྟན་རིན་ཆེན་གཞི་ལ་གནས། །གངས་རི་རང་བཞིན་མཆོད་རྟེན་གྲུབ་དང་མཚུངས། །དབུ་ཏོག་མཐོ་བའི་ལྷ་ལམ་མཁའ་ལ་བསྙེག །རབ་གསལ་ཉི་ཟླ་གཡས་གཡོན་ཕྲག་ནས་འཁྱིལ། །རབ་དཀར་དྭངས་པའི་ཤེལ་གྱི་མཆོད་རྟེན་མཚུངས། །རབ་མདངས་གངས་ལྡན་གཡུ་མདོག་འཇའ་ཡི་གུར། །རབ་རིབ་ཆུ་འཛིན་དཀར་པོའི་ན་གཟའ་བཀླུབས། །རབ་མཛེས་རི་ཕྲན་བརྒྱ་ཕྲག་ཚོགས་ལྟར་སྤུངས། །རབ་རྒྱན་ལྗོན་ཤིང་སྣ་ཚོགས་མཐའ་ནས་རྒྱས། །རབ་སྙན་བྱ་རིགས་སྣ་ཚོགས་གླུ་དབྱངས་ལེན། །རབ་འབབ་ཆུ་བོ་དུ་མ་གཏེར་ལྟར་འབབ། །རབ་འཇིགས་གཅན་གཟན་ཚོགས་ཀྱིས་མཆེ་སྡེར་ངོམ། །རབ་སྔོན་སྦ་སྨྱུག་དབྱར་དགུན་རྟག་ཏུ་མཛེས། །རབ་རྒྱས་གཡུ་མཚོ་སྔོན་མོ་དབྱར་ལྟར་རྒྱས། །རབ་ཞིམ་ཤིང་འབྲས་སྣ་ཚོགས་མཎྜལ་ཕུལ། །རབ་གཙང་ཤུག་པ་མཁན་དཀར་རྒྱུན་ལྟར་བསངས། །རབ་གནས་དངོས་གྲུབ་རང་འགྲུབ་ཁ་བའི་གནས། །གནས་འདི་ཕོ་བྲང་རང་བྱུང་ངོ་མཚར་བརྒྱན། །བརྒྱན་པའི་གངས་རིའི་དབང་པོ་ཁྲི་ལྡན་མཚམས། །མཚམས་ལྡན་ལྷ་མོས་སྐྱོང་བའི་བྱུ་རུའི་སྡོང་། །སྡོང་པོ་ཡལ་འདབ་རྒྱས་པའི་མདོམ་གང་ཙམ། །ཙམ་པ་ཀ་ཡི་མེ་ཏོག་རྒྱུན་ལྟར་མཛེས། །མཛེས་པའི་གཡུ་མདོག་འཁྱག་ཀླུང་མཐའ་ལ་སྐྱེས། །སྐྱེས་པའི་འཁྱག་ཀླུང་སྐྱེ་འཆི་རྒྱུན་མི་ཆད། །མི་ཆད་སྒྲ་ཆེན་ཡངས་པའི་ས་གཞི་ཁེངས། །ཁེངས་ཟས་མཚུངས་པའི་འབྲུ་དཀར་བཞིན་དུ་སྐྱེས། །སྐྱེས་རབ་དུ་མར་བཞེངས་པའི་གཞལ་ཡས་ཁང་། །ཁང་བཟང་ཡིད་དབང་འཕྲོག་པའི་བདེ་མཆོག་གནས། །གནས་མཆོག་གོང་ལ་བཞུགས་པའི་ཁ་བ་དཀར། །ཁྱད་པར་བོད་དང་རྒྱལ་ཁམས་ཡོངས་སུ་སྐྱོངས། །ཀྱེཿཕུལ་བྱུང་བདེ་མཆོག་གནས་པའི་ཕོ་བྲང་དུ། །གསལ་ལ་མཛེས་པའི་ལྷའི་གནས་གཞལ་ཡས་ཁང་། །ཁྱད་པར་གཞལ་ཡས་ཁང་གི་སྒོ་མདུན་དུ། །རབ་བྱུང་བཞི་པའི་ལྕགས་མོ་སྦྲུལ་ལོའི་དུས། །ཆོས་རྒྱལ་གོང་མས་ལུང་བསྟན་རྡོ་རིང་བྲིས། །བསྐལ་པ་མཐའ་མ་དུས་ཀྱི་སྙིགས་མའི་དུས། །འཇིགས་པ་བརྒྱད་པོས་སེམས་ཅན་ཡ་ང་མནར། །འཇིགས་བརྒྱད་གནོན་པའི་སྒྲོལ་མ་བསྙེན་པོ་བཞེངས། །བདེ་མཆོག་གཞལ་ཡས་ཁང་དེ་བཙུགས་པ་ཡིན། །བདེ་མཆོག་ཕོ་བྲང་ལྷ་ཁང་གཡས་གཡོན་རྣམས། །རང་བྱོན་དུ་མ་རྩིས་ཀྱང་མི་ལངས་པའི། །ཀརྨ་པཀྴི་དགུང་ལོ་བརྒྱད་ཀྱི་དུས། །བསྐོར་ལམ་གཡས་ནས་ཞབས་རྗེས་མངོན་སུམ་ཡོད། །ལྷ་ཁང་རྒྱབ་ཏུ་དུར་ཁྲོད་ཆེན་པོའི་ནང་། །མེས་པོའི་རུས་རྣམས་དེ་ནང་བསྲེག་ཐུབ་ན། །དལ་འབྱོར་མི་ལུས་ཐོབ་པར་ཐེ་ཚོམ་མེད། །དུར་ཁྲོད་རྒྱབ་ནས་དཔག་ཚད་གཉིས་གསུམ་ནང་། །ཨོ་རྒྱན་པདྨའི་བཞུགས་ཁྲི་མངོན་སུམ་ཡོད། །གསོལ་བ་རྩེ་གཅིག་མེད་པར་བཏབ་པ་ན། །དངོས་གྲུབ་ལག་ཏུ་ལོན་པར་གདོན་མི་ཟ། །ལྷ་ཁང་དཀྱིལ་ལ་བདེ་མཆོག་དཀྱིལ་འཁོར་ཡོད། །དཀྱིལ་འཁོར་ནང་དུ་རང་བྱོན་སྣ་ཚོགས་ཡོད། །སྐལ་མེད་རྣམས་ལ་མཇལ་བར་ཤིན་ཏུ་དཀའ། །ཡངས་ཅན་ཕུན་ཚོགས་གླིང་དང་བདེ་ཆེན་གླིང་། །ཤར་གྱི་ཕྱོགས་ལ་དཔལ་ལྡན་དོན་གྲུབ་གླིང་། །ཡབ་ཡུམ་གཉིས་དང་སྲས་དགོན་གསུམ་གྱི་གླིང་། །དགོན་གསུམ་གནས་ཆེན་ཞབས་བརྟན་སྒྲུབ་མི་གླིང་། །རྒྱུན་དུ་གནས་མཆོག་ཕོ་བྲང་དཀྱིལ་འཁོར་དུ། །མཁས་གྲུབ་བླ་གྲྭ་བསྙེན་བཀུར་ཞིང་མཆོག་མཛད། །པཎྜི་ཏ་དང་དགེ་འདུན་གྲུབ་མཐའ་རྣམས། །ཞག་རེ་བཞུགས་ན་ཟླ་རེར་བྱིན་བརླབས་འབྱུང་། །ཚེས་བཟང་དུས་བཟང་ཡར་ཚེས་བཅོ་ལྔའི་དུས། །བདེ་མཆོག་ཕོ་བྲང་མཁའ་དབྱིངས་འཇའ་ཚོན་བཀྲ། །གནས་བདག་ཨོ་རྒྱན་པད་འབྱུང་མཁའ་དབྱིངས་བྱོན། །ཁ་དོག་སྣ་ཚོགས་བཀྲ་བའི་འཇའ་ཡི་གུར། །གནས་བདག་བཞུགས་པའི་མཁའ་ལ་གདུགས་ལྟར་འཁྱིལ། །མཚོ་སྐྱེས་རྡོ་རྗེ་མཚན་བཟང་གསལ་ལ་མཛེས། །རི་རབ་ལྟ་བུར་སྐུ་ནི་ལྷུན་མདངས་མཐོ། །རི་རྒྱལ་བུམ་པ་ལྟ་བུ་སྐུ་ནི་ཟླུམ། །བུམ་པ་ཨུཏྤལ་ལྟ་བུར་དབུ་སྐྲ་མཛེས། །ཟླ་བ་རྒྱས་པ་ལྟ་བུར་དཔྲལ་བའི་དབྱེས། །སྐར་ཆེན་ཤར་འདྲ་སྤྱན་གཉིས་ནག་ལ་རིང་། །འདི་ཡི་སྨིན་མ་ཁྱུང་ཆེན་ལྡིང་བ་འདྲ། །ཁྲ་གཤོག་བརྒྱངས་པ་ལྟ་བུ་རྫི་མ་ལེགས། །སྙན་ནི་གྲོ་ག་གཅུས་པ་ལྟ་བུར་འདྲ། །ཤངས་ནི་ལེགས་ཤིང་བལྟ་ན་སྡུག་པའི་ཤངས། །ཡ་མཆུ་མ་མཆུ་པདྨའི་ཟི་བ་འདྲ། །ལྗགས་རིང་སྲབ་མཉེན་པདྨའི་མདོག་ལྟར་དམར། །དཀར་ཚེམས་ཐགས་བཟང་དུང་མདོག་གངས་རི་འདྲ། །ཚེམས་ཕྲེང་ལྔ་བཅུ་རྩ་བརྒྱད་ཞལ་ལ་མཛེས། །ཞི་བའི་ཞལ་མཐོང་ཨོལ་ཀོ་ལྷམ་མེ་བ། །ཀ་ལ་པིངྐ་ལྟ་བུར་ཚངས་པའི་དབྱངས། །ཞལ་ཚོམས་དོམ་ནག་དཀྱུས་འདྲ་ལྟ་བུར་རིང་། །སྐུ་མདོག་དུང་ལ་ཕོ་ཚོས་བསྐུས་པ་འདྲ། །མགུལ་ནི་བུམ་པའི་མགྲིན་པ་ལྟ་བུར་ལེགས། །འདི་ཡི་སྐུ་སྟོད་སེང་གེ་འགྱིང་བ་འདྲ། །དཔུང་པའི་མགོ་ཟླུམ་ཕྲག་པ་རབ་ཏུ་རྒྱས། །ཕྱག་ཞབས་སོར་རིང་དྲ་བས་འབྲེལ་བ་དང་། །སེན་མོའི་མདོག་ནི་ཟངས་དམར་ཤེལ་འོད་དཀར། །པདྨའི་སྦུ་གུ་ལྟ་བུར་ལྟེ་བ་མཛེས། །སྦ་བ་སྦུབས་སུ་རྟ་གླང་ལྟ་བུར་ནུབ། །བྱིན་པ་ཨེ་ན་ཡ་འདྲ་ཞབས་ལུང་འདུར། །མཁའ་ལ་འཇའ་འགྱུར་ལྟ་བུར་འཕུར་རྩལ་འགྲོས། །གཞོན་ནུའི་རྩལ་ལྡན་སྐུ་ལུས་ཡན་ལག་རྒྱས། །འཛུམ་ཞིང་ཤིན་ཏུ་མཛེས་པའི་ཟླ་མེད་ཞལ། །གཟུགས་བལྟས་མི་ངོམས་སྐྱེ་བོ་ལྟ་ན་སྡུག །འོད་ཟེར་དུ་མ་འབར་བས་འོད་ཁྱིམ་འདྲ། །རི་མཆོག་འཇམ་ཞིང་རྔམས་པ་མཆོག་རབ་འཕགས། །མི་ཤིག་རྡོ་རྗེ་ལྟ་བུར་ཟད་པ་མེད། །མཚན་དཔེ་དཔེ་ཟླ་བྲལ་བའི་གཞོན་ནུའི་སྐུ། །ཚངས་དབྱངས་དབྱངས་ཀྱི་ཡན་ལག་དྲུག་ཅུའི་གསུང་། །མཁྱེན་རབ་རབ་འབྱམས་ཤེས་བྱ་ཀུན་མཁྱེན་ཐུགས། །སྐུ་དངོས་བདེ་མཆོག་མཁའ་དབྱིངས་བྱོན་པའི་དུས། །ལྷ་རྣམས་མེ་ཏོག་ཆར་བ་ལྷང་ལྷང་འབེབས། །རོ་བརྒྱ་ལྡན་པའི་ལྷ་ཡི་ཞལ་ཟས་ཚོགས། །ནམ་མཁའི་མཛོད་བཞིན་ཟད་པ་མེད་པར་སྤྱོད། །ལྷ་ཡི་རྔ་ཆེན་ནམ་མཁའི་དབྱིངས་ནས་གྲགས། །པི་ཝང་གླིང་བུ་རོལ་མོའི་ཚོགས་ཀྱིས་མཆོད། །དྲི་ཞིམ་བདུག་སྤོས་སྤྲིན་གྱིས་བར་སྣང་གང་། །གདུགས་དང་རྒྱལ་མཚན་བ་དན་ལྷབ་ལྷུབ་དང་། །དར་འཕན་ཚོགས་ཀྱིས་ནམ་མཁའི་ཁྱོན་ཀུན་ཁྱབ། །ཡིད་འོང་མཛེས་པའི་ལྷ་ཡི་བུ་མོ་རྣམས། །མཛེས་པའི་རྒྱན་ལྟར་ཆོས་རྫས་ཐོབ་པ་ཡིན། །གླུ་དང་གར་གྱི་ཀུན་རྣམས་མཆོད་པ་བྱེད། །དགའ་བདེ་སྐྱིད་པའི་གླུ་དབྱངས་སྣ་ཚོགས་ལེན། །དམ་པ་ཆོས་ཀྱི་རྔ་ཆེན་རྒྱུན་དུ་བརྡུང་། །ཡོན་ཏན་རྒྱ་མཚོ་མཐོང་བས་བསྟོད་ཅིང་བསྔགས། །བློ་གཏད་ཆོས་ལ་བྱེད་པས་འདི་ཕྱི་སྐྱིད། །སེམས་ཅན་ཕ་མར་ཤེས་པས་རྒྱུ་འབྲས་སྲུང་། །རྒྱལ་ཁྲིམས་རང་སྲུང་བྱེད་ན་འགལ་ཟླ་མེད། །ཆོས་ཁྲིམས་རྒྱལ་ཁྲིམས་ཁྱད་པར་གང་ཡང་མེད། །འབྲི་ཀློག་དར་བའི་མི་རྣམས་ཤེས་རིག་གསལ། །སྡིག་པའི་གྲོགས་མེད་དགེ་བཅུའི་ནོར་བུར་རྙེད། །ཆར་ཆུ་དུས་འབབ་རྩི་བཅུད་འབྲུ་ཚོགས་འཕེལ། །ཟས་ནོར་ལོངས་སྤྱོད་ཆར་པ་བཞིན་དུ་འབབ། །ཡུལ་ཁམས་མི་རྣམས་བདེ་སྐྱིད་ལྷ་དང་མཚུངས། །ཁྱད་པར་གནས་མཆོག་མཇལ་བའི་སྐྱེ་བོ་ཀུན། །གང་དག་འདི་ལ་བསྐོར་བ་སུས་བསྐོར་བ། །ཤན་པ་ཡིན་ཡང་མཐོ་རིས་གནས་སུ་སྐྱེ། །བྱང་ཆུབ་ལམ་དུ་ཐོབ་པར་ཐེ་ཚོམ་མེད། །བསོད་ནམས་མེད་པའི་དཔོན་དམངས་བྱིན་པོ་རྣམས། །བདེ་མཆོག་གནས་འདི་མཇལ་བའི་ལས་འབྲས་དཀའ། །གནས་བསྐོར་ཕེབས་པའི་རྒྱལ་དམངས་ཐམས་ཅད་ཀྱིས། །རྐུ་རྫུན་བརྣབ་སེམས་མ་བྱིན་ལེན་པ་སོགས། །དགེ་བ་མི་འགྲུབ་སྡིག་པའི་ལམ་དུ་ལྷུང་། །བསྐལ་བ་དུ་མར་དལ་འབྱོར་རྙེད་ཐབས་དཀའ། །ཁྱད་པར་གནས་རིར་གནོད་འཚེ་བྱེད་པ་སོགས། །ས་གཡོ་ཆུ་ཐན་བཙའ་སད་ཡུལ་དགྲ་ཀུན། །མྱུར་དུ་ཡུལ་ཁམས་གནོད་པར་ཐེ་ཚོམ་མེད། །ཡིད་ཆད་འགྱོད་ཀྱང་ལས་དབང་བཅོས་སུ་མེད། །འཇིག་རྟེན་དག་ན་ཚེ་ཐར་ཡོད་མ་ཡིན། །གསོན་པར་འདོད་ཀྱང་རང་དབང་ཅུང་ཟད་མེད། །ལུས་ནི་མི་རྟག་གཡང་ཁའི་སྡོང་པོ་འདྲ། །དབུགས་ནི་མི་རྟག་ལ་ཁའི་ན་བུན་འདྲ། །ཡིད་ནི་མི་རྟག་ནམ་མཁའི་གློག་དང་འདྲ། །ཚེ་འདི་མི་རྟག་རྩྭ་ཁའི་ཟིལ་པ་འདྲ། །སྐྱེ་བའི་མཐའ་འཆི་འདུས་པའི་མཐའ་མ་འབྲལ། །ས་སྟེང་འདུས་བྱས་ཐམས་ཅད་འདི་དང་འདྲ། །འདས་དང་མ་འོངས་ད་ལྟ་དུས་གསུམ་དུ། །བདེ་མཆོག་གནས་འདི་མཇལ་བའི་སྨོན་ལམ་ཤོག །དེ་ཚེ་བཀྲ་ཤིས་ཉམས་དགའ་ཕྲིན་ལས་མཛོད། །ཡུལ་ཁམས་བདེ་སྐྱིད་ཕུན་སུམ་ཚོགས་པར་ཤོག །དགེ་བཅུའི་ཁྲིམས་ལ་མི་ཀུན་འགྱུར་བར་ཤོག །དམ་པ་ཆོས་ཀྱི་སྣོད་དུ་འགྱུར་བར་ཤོག །རྒྱལ་དམངས་བསོད་ནམས་གསོག་པར་བྱིན་གྱིས་རློབས། །

༄༅། །གནས་མཆོག་ཁ་བ་དཀར་པོའི་རྒྱབ་གནས་གནས་ཡིག་བཞུགས་སོ།།ན་མོ་གུ་རུ་དེ་ཝ་ཌཀྐི་ཡི། ཐབས་ཤེས་ཟུང་འབྲེལ་ཨེ་ཝཾ་གཞི་དང་ལྡན། །བདེ་སྟོང་ཟུང་དུ་འཇུག་པའི་ཨེ་ཝཾ་ལམ་དག་ནས། །བདེན་གཉིས་མཐའ་དག་ཨེ་ཝཾ་འབྲས་མཆོག་ལྡན། །འདི་ཕྱིའི་སྐྱབས་གནས་ཀུན་འདུས་གནས་མཆོག་དམ་པ་འདི། །ཕྱི་ལྟར་གངས་རིའི་ལྷུན་ཆགས་ལྟ་ན་སྡུག་པའི་མཆོད་རྟེན་བརྒྱད། ནང་ལྟར་བཅོམ་ལྡན་འཁོར་ལོ་བདེ་མཆོག་གི་བསྐལ་པ་བཟང་པོ་སངས་རྒྱས་སྟོང་། དཔའ་བོ་མཁའ་འགྲོ་འབུམ་ཚོགས་མཐའ་རུ་བསྐོར། གསང་བ་བདེ་སྟོང་ཟུང་དུ་འཇུག་པ་མཆོག་ལ་འོག་མིན་གནས་མཆོག་ཁ་བ་དཀར། ཕྱི་ལྟར་གངས་རི་དཀར་པོ་མཆོད་རྟེན་ལྟར། །ནང་ལྟར་ངོ་མཚར་ལྷ་ཡི་ཕོ་བྲང་མཛེས། །བསྐལ་བཟང་སངས་རྒྱས་སྟོང་སྐུ་དབུས་ན་བཞུགས། །དཔའ་བོ་མཁའ་འགྲོ་འབུམ་ཚོགས་མཐའ་རུ་བསྐོར། རྨད་བྱུང་དཔལ་གྱི་ཡ་མཚན་ཆེ་བའི་གནས། །དམ་པ་རྣམས་ཀྱིས་མཇལ་ཚད་མེ་ཏོག་འཐོར། །ལས་ངན་སྡིག་ཅན་རྣམས་ཀྱིས་མཇལ་བར་དཀའ། །ཞེས་བརྗོད་དོ། །

དངོས་གཞི་ལ། དང་པོ་འབྲས་ཞིང་ཐང་གི་གཡས་གཡོན་ལ་རྡོའི་སེང་གེ་རང་བྱོན་ཡོད། ལམ་ཁ་ལ་བདེ་མཆོག་གི་ཆིབས་སྒ་དང་གཏེར་སྒམ་རང་བྱོན་ཡོད། ལུང་པ་ཁ་ལ་འཕགས་པ་གནས་བརྟན་བཅུ་དྲུག་རང་བྱོན་ཡོད། ཞི་ཁྲོ་དམ་པ་རིགས་བརྒྱའི་རང་བྱོན་ཡོད། དེའི་སྟེང་ལ་བདེ་བ་ཅན་གྱི་ཞིང་ཁམས་ཡོད། འབྲས་ཞིང་ཐང་གི་ལྷ་ཁང་དུ་བོད་ཟླ་གསུམ་པའི་ཚེས་བཅོ་ལྔའི་ཉིན་ཟླ་བ་སྒང་དུ་ནུབ་དུས་ཉམས་ཚར་གྱི་བྲག་མིག་ནང་གི་ཟླ་བ་གསལ་ཟླ་ལྷ་ཁང་དུ་ཕོག་ཐུབ། ཉིན་དེ་ནི་ལོ་འདིའི་གནས་སྒོ་དང་པོ་ཕྱེ་བ་རེད། ཉེ་འདབས་སུ་མཁས་གྲུབ་བླ་གྲྭ་རྣམས་ཀྱིས་བསྙེན་བཀུར་ཞིང་མཆོག་རྒྱ་ཆེར་མཛད་པར་མ་ཟད་དམངས་ཚོགས་ཁྲི་སྟོང་འོངས་ནས་ཕྱག་དང་བསྐོར་བ་བྱེད་པའི་སྔ་སྲོལ་དར་སྤེལ་བྱེད་ཀྱིན་ཡོད། གཡོན་ཕྱོགས་རྩྭ་ཐང་ལ་ནད་བརྒྱ་སེལ་བའི་སྨན་ཆུ་ཡོད། དེའི་གོང་མ་བྲག་ལ་སྒྲོལ་མ་དཀར་སྔོན་རང་བྱོན་ཡོད། ལམ་གཡས་ཕྱོགས་སུ་བྲག་ལ་ཀརྨ་པ་མཆོག་གི་ཞབས་རྗེས་ཁྲ་སིང་སིང་ཡོད། ལམ་ཁ་ལ་གུ་རུ་སྒྲུབ་ཕུག་ཡོད། གླང་འབྱོར་གྱི་ལམ་ལྟག་སློབ་དཔོན་གྱིས་ཕྱག་མཁར་བྲག་ལ་བཙུགས་པ་དང་ཕུར་བུ་རང་བྱོན་ཡོད། ལའི་རྒྱབ་ལ་བཻ་རོ་ཙ་ནའི་སྒྲུབ་ཆུ་ཡོད། དེའི་ལུང་པ་མདའ་ལ་ཆོས་འབྱུང་ཟུར་གསུམ་ཡོད། དེ་མཇལ་ན་བསིལ་བའི་ཚལ་གྱི་དུར་ཁྲོད་མཇལ་བ་དང་མཚུངས། རྒྱ་ལམ་ལྟག་ལ་བདེ་མཆོག་གི་ཕྱག་རྗེས་ཞབས་རྗེས་དང་། ཆུ་ཤག་གི་མགོ་ལ་རྒྱལ་བ་རིགས་གསུམ་མགོན་པོ་རང་བྱོན་ཡོད། དེའི་ལམ་ལྟག་ལ་གཤིན་རྗེ་འཇིགས་པའི་སྐུ་གདུང་རང་བྱོན་དང་། དེའི་རྒྱ་ལམ་ལམ་ལྟག་ལ་བཀའ་འགྱུར་དང་འབུམ་ཆ་རང་བྱོན། ལམ་འོག་ལ་མཆོད་རྟེན་དང་བུམ་པ་རང་བྱོན། ཨ་གསལ་རྒྱ་ལམ་ལྟག་ལ་བར་རྡོ་འཕྲང་ལམ། ལུང་ནགས་ཀྱི་ལུང་ཆུ་ཁ་ལ་ཆོས་སྐྱོང་བྱ་རོག་གདོང་ཅན་དང་ཡི་དམ་རྡོ་རྗེ་ཕག་མོ་དང་མཁའ་འགྲོ་མའི་སྔགས་ཆས་རང་བྱོན་ཡོད། དེའི་ལམ་ལྟག་ལ་མགོན་པོའི་བླ་མཚོ་དང་། སྟག་མ་དགབ་སྟེང་གཡས་ཕྱོགས་རི་མགོར་རྒྱ་གར་བྱ་རྒོད་ཕུང་རི། རྡོ་སྐས་ལམ་གྱི་གཡས་སུ་སངས་རྒྱས་དཔའ་བོ་རབ་བདུན་རང་བྱོན། གཡོན་དུ་མཁའ་འགྲོ་མ་ཚེ་རིང་མཆེད་ལྔ་བརྟན་མ་བཅུ་གཉིས་རང་བྱོན། མདུན་ངོས་སུ་སངས་རྒྱས་བཅོམ་ལྡན་འདས་རྒྱལ་བ་རིགས་ལྔ་རང་བྱོན། ཡང་ལ་ཁ་ལ་རྒྱལ་བ་རིགས་གསུམ་མགོན་པོ་དང་སྟག་ཕག་ཡབ་ཡུམ་དང་སྤྱན་རས་གཟིགས་ཁ་སརྤ་ཎིའི་རང་བྱོན། རྒྱབ་ཏུ་ཆོས་སྐྱོང་བྱ་རོག་གདོང་ཅན་དང་། ལྷ་མོ་དབྱངས་ཅན་མའི་དུང་གི་བླ་མཚོ་ཡོད། ལྷ་མོ་དབྱངས་ཅན་མའི་མཚོ་དེ་མཇལ་ན་རྐྱེན་ཕྱི་ནང་གི་བར་ཆད་ཐམས་ཅད་སེལ། འཇམ་དབྱངས་བྱམས་པ་མགོན་པོ་ཉེ་བའི་སྲས་ཆེན་བརྒྱད་དེ་ཁྲ་ལམ་རང་བྱོན་དང་། རྩྭ་སོག་ཐང་གཡས་ཕྱོགས་ལ་བདེ་མཆོག་གི་དཀྱིལ་འཁོར་ཡོད། མཁའ་འགྲོ་མ་གསང་བ་ཡེ་ཤེས་ཀྱི་ཞི་རྒྱས་དབང་དྲག་བཞི་ཡི་དཀྱིལ་འཁོར། རྩྭ་སོག་ཐང་ལམ་ཁ་ཕ་བོང་ཐོག་ཏུ་བདེ་མཆོག་གི་ཞབས་རྗེས་ཁྲ་སིང་སིང་། སྦྲང་ཆར་ལམ་ཁ་ལ་སནྡྷུ་ར་ཡི་སྨན་ཆུ་ཡོད། དེ་ན་སྦ་སྨྱུག་རྩི་ཤིང་མེ་ཏོག་ཐམས་ཅད་མཁའ་འགྲོ་མའི་བླ་ཤིང་ཡིན། བྱ་དང་བྱིའུ་རི་དྭགས་གཅན་གཟན་ཐམས་ཅད་དཔའ་བོ་དང་དཔའ་མོའི་སྤྲུལ་པ་ཡིན། ལ་ལ་ནི་སྒོ་ནོར་དང་སྒོ་ཁྱི་ཡིན། དེ་ལ་འཇིགས་སྐྲག་བྱེད་མི་ཉན། རྩི་ཤིང་ནགས་ཚལ་ཐམས་ཅད་གདུགས་དང་རྒྱལ་མཚན་བ་དན་བླ་བྲེས་རང་བྱོན་ཡོད། ལྷོ་འོད་གསལ་གཡས་གཡོན་མར་བལྟས་ན་བདེ་མཆོག་གི་དཀྱིལ་འཁོར་ཁྲ་ལམ་མཇལ་བར་མཐོང་། རྣམ་རྒྱལ་མཆོད་རྟེན་དཔག་ཚད་བརྒྱད་ཁྲི་བདག་པོ་ཡོད། དེ་མཇལ་ན་བསམ་ཡས་ལྷ་ཁང་མཇལ་དང་མཚུངས། ལྷོ་རུ་སྦས་ཀྱི་ཕོ་བྲང་དུ་རྗེ་བཙུན་མི་ལའི་སྐུ་རྗེས་ཡོད། མཁའ་འགྲོ་མའི་སེའུ་ཝང་དང་བཀའ་གདམས་དྲག་པོ་ཆོས་འབྱུང་གནམ་ལྕགས་ཕུར་བུ་རང་བྱོན་ཡོད། བཀའ་བསྟན་འགྱུར་དང་སྤྱན་རས་གཟིགས་ནོར་བུ་ཆ་གཉིས་ཡོད། དུར་ཁྲོད་ལྷུན་གྲུབ་ཡོད། རྩེ་ལ་རྡོ་རྗེ་ཕག་མོའི་བླ་མཚོ་དང་མགོན་པོ་ཚེ་དཔག་མེད་ཀྱི་སྐུ་རྗེའི་ཚེ་བུམ་བདུད་རྩི་བཅས་པ་ཡོད། སློབ་དཔོན་གྱི་ཀ་བ་ལ་བདུད་རྩི་དང་བཅས་པ་ཚེ་དཔག་མེད་ཀྱི་སྐུ་རྗེས་ཞབས་རྗེས་ཡོད། གཞན་ཡང་རང་བྱོན་སྣ་ཚོགས་ཡོད། དེ་རྣམས་མཇལ་ན་ཚེའི་བར་ཆད་ཐམས་ཅད་སེལ་བར་ཐེ་ཚོམ་མེད། ཆུ་སྲིན་མུ་ཏིག་སྔོན་མོ་གསེར་ར་སེར་པོ་འཕགས་པ་གནས་བརྟན་བཅུ་དྲུག་གི་ཕོ་བྲང་ཡོད། ཤིང་ཙན་དན་སྡོང་པོའི་དྲི་རྣམས་མཇལ་ན་རྒྱ་གར་བྱ་རྒོད་ཕུང་པོའི་རི་ལ་མཇལ་དང་མཚུངས། ཡང་ལབ་བཙས་དབུས་ལ་ཆོས་སྐྱོང་བྱ་རོག་མགོ་ཅན་དང་མཆོད་རྟེན་རང་བྱོན་དང་། ཆུ་ནག་ཐང་ལ་ཆོས་འབྱུང་གྲུ་གསུམ་དང་དྲག་པོ་གནམ་ལྕགས་ཕུར་བུ་རང་བྱོན་གསུམ། ཆུ་བོ་དེས་བདེ་མཆོག་གི་རྩ་སྔགས་ཆོས་སྒྲ་དང་འབུམ་བཀའ་འགྱུར་བགྲང་པ་ཡོད། ལ་ཁ་ཉེ་ལ་རང་བྱོན་མི་འདྲ་བ་སྣ་ཚོགས་ཡོད། ཡང་བདེ་མཆོག་གནས་ཡར་འགྲོ་བའི་སྐབས་སུ་ཆུ་གཡས་ཕྱོགས་ལ་དམར་ནག་གཤིན་རྗེའི་སྐུ་གདུང་དངོས་སུ་ཡོད། ལ་ཁ་ལ་ཨ་ཝ་གླང་མགོ་དང་། གཡོན་དུ་བྱ་རོག་རྒོད་གཤོག་པ་ལ་གཤིན་རྗེ་ཆོས་ཀྱི་རྒྱལ་པོ་དང་སངས་རྒྱས་ཐམས་ཅད་ཀྱི་སྐུ་རྗེས་དང་ཞབས་རྗེས་སྣ་ཚོགས་ཡོད། ཉེ་བའི་སྲས་བརྒྱད་བཅོམ་ལྡན་འདས་མར་མེ་མཛད་ཀྱི་སྐུ་རྗེས་དང་ཕྱག་རྗེས་སྣ་ཚོགས་དང་། ཤིང་ཁང་ལ་ཁ་ལ་ཀརྨ་པ་ཡི་སྒྲུབ་ཆུ་ཡོད་པ་དང་ཆོས་སྐྱོང་ཕག་གི་མགོ་ཅན་ཡོད། ལམ་ཁ་ལ་འབུམ་ཆ་རང་བྱོན་དང་། ཨ་བན་རི་ལངས་མདའ་ལ་ཨོ་རྒྱན་ཁ་ཊྭཱཾ་དང་མགོན་པོ་བེར་ནག་ཅན་གྱིས་དམ་སྲི་དམ་ཉམས་བསྒྲལ་བའི་ཤ་རུས་ཡོད། བྲག་རི་རྩེ་ལ་ཨ་ཡིག་རང་བྱོན་དང་། ཨོ་རྒྱན་པདྨ་ཡིས་སྲིན་མོ་འདུལ་སྐབས་ཕ་བོང་ཐོག་ཏུ་ཞབས་རྗེས་གསལ་ལྷམ་མེར་བཞག་ཡོད། ཕ་བོང་སྟེང་ལ་རྒྱུན་དུ་སྐམ་རྒྱུ་མེད་པའི་བདུད་རྩིའི་སྒྲུབ་ཆུ་དང་། ཨོ་རྒྱན་པདྨའི་བཞུགས་ཁྲི་དང་བར་དོ་འཕྲང་ལམ་རྣམས་ཁྲ་སིང་སིང་ཡོད། ལྷ་ཁང་རྭ་ཟམ་ཁ་ལ་དུང་དཀར་རང་བྱོན་དང་། སངས་རྒྱས་སྟོང་སྐུ་རྩ་གཉིས་རང་བྱོན། ལྷ་ཁང་རྭའི་ཕར་ཁ་ལ་ཨོ་རྒྱན་གྱི་སྐུ་རྗེས་ཡོད། དེ་མཇལ་ན་ཟངས་མདོག་དཔལ་རི་མཇལ་བ་དང་མཚུངས། ལྷ་འདྲེ་སྟོང་གི་མཆོད་རྟེན་དང་། ལྷ་ཁང་རྭ་ནི་རི་བཙན་བཞི་འཛོམས་དང་ཆུ་བཙན་གསུམ་འཛོམས་ཀྱི་ས་ཆ་ཞིག་རེད། སྔོན་དུས་ཨོ་རྒྱན་པདྨ་ཡུན་རིང་དུ་བཞུགས་མྱོང་བའི་གནས་མཆོག་ཅིག་རེད། ལྷ་ཁང་རྒྱབ་ཀྱི་ཕ་བོང་ཐོག་ལ་ཉི་མ་ཟླ་བ་རང་བྱོན་ཡོད། ཆུ་སྒྲོལ་ལམ་ཁ་ལ་འབུམ་ཆ་རང་བྱོན་ཡོད། ཐང་ཆེན་མགོ་ལ་མཁའ་འགྲོ་མའི་ཚོགས་གཞོང་ཡོད། དེ་མཇལ་ན་ནད་རིགས་ཐམས་ཅད་སེལ། ཚེ་བསྲིང་བར་ཐེ་ཚོམ་མེད། ལམ་ཁ་ལ་ཆུ་སྒྲོལ་མགོན་ལྔ་ཡོད། གནས་ཆེན་ལྔ་ཡི་ཞབས་ཆབ་ཡོད། དེ་འཐུང་ན་བསྐལ་བ་སྟོང་གི་སྡིག་སྒྲིབ་དག ལམ་ཁ་བར་དོ་འཕྲང་ལམ་ཡོད། སྡོད་ས་གོང་གི་བྲག་ལ་ཉི་མ་ཟླ་བ་རང་བྱོན་དང་ཡིག་དྲུག་རང་བྱོན་ཡོད། བྲག་རི་ཐམས་ཅད་དུ་ཀརྨ་པ་མཁྱེན་ནོ་ཞེས་པ་དང་། དེ་མིན་གསུང་རབ་ཡིག་ཆ་སྣ་ཚོགས་དང་བཅས་པ་བྲག་ལ་བརྐོས་པ་ཡོད། དེ་དག་མཇལ་ན་འཁྲུལ་སྣང་ཞི་ཞིང་། རྡུལ་དཀར་མགོ་ལ་རྒྱལ་བ་རིགས་ལྔ་སངས་རྒྱས་བྱེ་བ་ཁྲི་ཕྲག་བརྒྱ་ཐམས་ཅད་ཁྲ་སིང་སིང་ཡོད། རྒྱལ་བ་རིགས་གསུམ་མགོན་པོ་དང་བཀའ་བསྟན་འགྱུར་དང་འབུམ་ཆ་རང་བྱོན་ཡོད། རྡོ་འབྲུ་ཐམས་ཅད་སངས་རྒྱས་རྣམས་ཀྱི་ཕྱག་གནས་ཡིན། ཕར་ཁ་སྦྲུལ་ནག་དེ་ལ་ཁ་ནོན་མཛད་པ་ཡིན། སྐལ་ལྡན་རྣམས་ཀྱི་དངོས་གྲུབ་ལེན་པ་ཡིན། སྐལ་མེད་ཐམས་ཅད་ན་ཚ་སྡིག་སྒྲིབ་དག་པ་ཡིན། བྲག་སྣ་ཐང་གི་ཕུག་ལ་ལྷ་མོ་ནོར་རྒྱུན་མ་དང་ཡེ་ཤེས་ཀྱི་ཁྱུང་ཆེན་མཁའ་འགྲོ་སེང་གདོང་མ་རང་བྱོན་དང་། གདོང་དེ་ལ་སྦྲུལ་ནག་ཐུར་དུ་རྒྱུག་པ་ཡོད། དེ་མཇལ་ན་དུག་རིགས་སྣ་ཚོགས་ཀྱིས་མི་ཐུབ། ཆུའི་ཕུགས་ལ་བཻ་རོ་ཙ་ནའི་སྒྲུབ་ཕུག་ཚེ་ཆུ་དང་གཏེར་ལེན་པའི་རྟགས་སྣ་ཚོགས་དང་། ལུང་ཕུའི་རྡུལ་དཀར་དེ་ལ་ཆོས་ལོངས་སྤྲུལ་གསུམ་གྱི་ཕྱག་གནས་རང་བྱོན་དང་། སངས་རྒྱས་ཚེ་དཔག་མེད་ཀྱི་ཞབས་རྗེས་ཁྲ་སིང་སིང་ཡོད། དེ་མཇལ་ན་དུས་གསུམ་སངས་རྒྱས་ཐམས་ཅད་མཇལ་དང་མཚུངས། ལམ་ཁ་ལ་ཨོ་རྒྱན་པདྨ་ཡི་དབུ་ཞྭ་རང་བྱོན་དང་། ཐང་འདུས་ལ་ཡི་གཡས་ཕྱོགས་ལ་རྨ་བྱ་རང་བྱོན། དེའི་མགོ་ལ་སྤྱན་རས་གཟིགས་རང་བྱོན་ཡོད། ལ་རྒྱབ་ཆུ་ཕར་ཁ་ལ་མཁའ་འགྲོ་མའི་སྤྲིན་ཐག་རང་བྱོན་དང་། ལྟ་སྐོར་ལ་ཁ་ལ་བྱམས་པ་མགོན་པོ་རང་བྱོན། དགབ་རྩ་ལ་ལ་ཡེ་ཤེས་ཀྱི་ཁྱུང་ཆེན་དཀར་ནག་ཁྲ་གསུམ་རང་བྱོན། ལ་དུ་ཕར་ཁ་བྲག་ལ་གཤིན་རྗེའི་ཁྲོ་ཆུ་དུག་གདོང་དང་བཙན་རྒོད་རང་བྱོན། སྨན་མཆོག་སྤང་སྒང་ལ་སྨན་རིགས་མཆོག་ཏུ་གྱུར་པ་དང་། ཤོག་ལ་ལ་ཡི་གཡས་གཡོན་ཐམས་ཅད་ལ་ཆུ་བཙན་བྲག་བཙན་རོལ་པ་མཆེད་བདུན་སྤང་བཙན་ཀླུ་བཙན་དེ་རྣམས་དངོས་སུ་ཡོད། ཡང་མཚོ་དཀར་ཕུག་ཡར་ལ་འཇིགས་སྐྱོབ་རང་བྱོན་མང་པོ་དང་། ཆོས་སྐྱོང་མ་མགོན་ལྕམ་དྲལ་དང་རྒྱལ་པོ་ཆེན་པོ་རྣམ་ཐོས་སྲས་དང་ནོར་བུ་སྣ་ཚོགས། དམ་ཅན་རྡོ་རྗེ་ལེགས་པ་སོགས་དྲག་པོ་སྣ་ཚོགས་ཡོད། དུག་ལུང་ཐང་ཟམ་ཁ་ལ་ཁ་བ་དཀར་པོའི་ཞབས་རྗེས་དང་རྟ་རྗེས་ཡོད། ཤྭ་ཆུ་ཁ་ལ་བུམ་པ་བདུད་རྩིའི་ཁ་ཡར་ལུད་པའི་རང་བྱོན་ཡོད། དེ་ལ་དད་པ་རྩེ་གཅིག་བྱེད་ན་ནད་ཡམས་རིམས་ནད་ཐམས་ཅད་ཐུབ་པ་ཐེ་ཚོམ་མེད། ཀོ་ཤོད་བྲག་གཡས་གཡོན་གཉིས་ལ་དམ་ཅན་མགར་བ་ནག་པོ་དང་སངས་རྒྱས་སྟོང་གི་ཕྱག་རྗེས་དང་ཞབས་རྗེས་ཡོད། བྲག་གཉིས་ལ་གནམ་ལྕགས་ཀྱི་རལ་གྲི་ཐུར་དུ་བཙུགས་པའི་རང་བྱོན་ཡོད། དེ་ལ་དད་པ་རྩེ་གཅིག་བྱེད་ན་ཉོན་མོངས་པའི་ལས་སྒྲིབ་ཐམས་ཅད་རྩ་ནས་གཅོད་པར་ཐེ་ཚོམ་མེད། དེའི་རྒྱབ་ཕ་བོང་རི་བོང་འདྲ་བ་ཞིག་དང་། རྨུ་ཤོད་ཆུའི་གཡོན་ལ་གསང་བདག་ཕྱག་ན་རྡོ་རྗེ་རང་བྱོན། སྡོང་མདའ་རོང་གི་ཆུའི་མདུན་ལ་དྲག་པོ་གནམ་ལྕགས་ཀྱི་གཏུན་ཁུང་ཚ་ཤིང་བཙུབས་པ་དང་། རྫ་ལ་ལ་སྟེང་གི་ལམ་ཁ་བྲག་ལ་ཨོ་རྒྱན་སྒྲུབ་ཕུག་ཡོད། ལམ་ཕ་ཁར་བཻ་རོ་ཙ་ནའི་སྒྲུབ་ཕུག་དང་། ཡར་ཀི་བྲག་ཕུག་ལ་ཨ་གེ་སྤྲེའུ་རང་བྱོན། སྡོང་མདའ་རོང་གི་བྲག་རི་ཐམས་ཅད་མཁའ་འགྲོ་མའི་རྒྱན་ཆ་ལུགས་སྣ་ཚོགས། གཡས་སུ་རྒྱ་ནག་ལྕགས་རི་དང་བྱ་ཁྱུང་དམར་པོ་དང་བསྟན་སྲུང་གཟའ་བདུད་ཆེན་པོ་བཅས་པ་དེ་རྣམས་ཡོད། སྡོང་མདའ་རོང་བྲག་སྒོ་ཡི་སྣེ་ལ་རྒྱལ་བ་ཡབ་སྲས་གསུམ་གྱི་ཞབས་རྗེས་དང་། ཀརྨ་པ་རང་བྱུང་རྡོ་རྗེའི་ཆིབས་རྟའི་རྨིག་རྗེས། ལམ་ཕར་ཁའི་བྲག་ལ་ལྷ་འདྲེ་སྟོང་གི་མཆོད་རྟེན། འཇོལ་བར་རྩེ་གྲོང་གི་གཡས་ཕྱོགས་སུ་ནོར་བུ་དགོས་འདོད་དཔུང་འཇོམས། དེའི་རྩ་ལ་ནད་བརྒྱ་ཕན་པའི་སྨན་ཆུ། ཆུ་རྩེ་ཤོད་ཟམ་ཆེན་ཁ་ལ་བདེ་མཆོག་གི་རྟའི་ཆབ་ལ་བད་ཀན་འཇོམས་པའི་སྨན་ཆུ། འཇོལ་མདའ་ཕུག་གི་བྲག་འོག་ལ་སྒྲོལ་མ་སྔོན་མོ་རང་བྱོན། ཡང་ཆུ་ཕུག་ལ་མཁའ་འགྲོ་མ་ཆེ་ཆུང་སྐུ་རང་བྱོན་མང་པོ། འཇོལ་མདའ་དམ་ཅན་ར་ཆུ་བྲག་ལ་རྗེ་བཙུན་སྒྲོལ་མ་སྔོན་མོ་རང་བྱོན། དུག་ཡོད་ལམ་ཁ་ལ་ཁ་བ་དཀར་པོའི་ཞབས་རྗེས་དང་ཆིབས་རྟའི་རྨིག་རྗེས། སྒང་ཉག་ལམ་གཡོན་ཕྱོགས་ལ་དུག་ནད་སེལ་བའི་སྨན་ཆུ་ཡོད། དེ་འཐུང་ན་དུག་རིགས་སྣ་ཚོགས་ཀྱིས་མི་ཐུབ། སྨན་ཆུ་དགབ་ཞབས་ལམ་ཁ་ཕ་བོང་སེར་པོའི་ཐོག་ལ་བདེ་མཆོག་གི་ཞབས་རྗེས་ཡོད། ཕ་བོང་སྔོན་པོའི་ཐོག་ཏུ་མཆོད་རྟེན་རང་བྱོན་རིང་ཐུང་ཚུན་གསུམ་དང་ཕྱེད། བང་རིམ་ཚིགས་ཉེར་ལྔ་ཡོད་ཅིང་ཧ་ཅང་ཉམས་མཚར་ཞིག་ཡིན། དེ་མཇལ་རྒྱུ་བྱུང་ན་བསྐལ་བ་སྟོང་གི་སྡིག་གྲིབ་དག་ཐུབ། གཞིས་རྩེ་ལྕང་ཐང་སྟེང་ལ་བདེ་མཆོག་ཆིབས་རྟའི་རྨིག་རྗེས་མངོན་སུམ་ཡོད། ལ་རྩ་བྲག་ལ་རྟ་ཕྱག་ཁྱུང་གསུམ་རང་བྱོན། ཕར་ཁ་ཆུ་མཚམས་བྲག་ལ་ཨོ་རྒྱན་པདྨའི་དབུ་ཞྭ་རང་བྱོན། ལམ་ཁ་ལ་བྱ་ཁྱུང་གི་སྨན་ཆུ། ཀླུ་གཉན་ས་བདག་གི་ནད་སེལ་ཐུབ་པར་ཐེ་ཚོམ་མེད་ཅེས་སྨྲས་སོ། །

སྐལ་ལྡན་རྣམས་ཀྱིས་ལན་གཅིག་མཇལ་ཐུབ་ན། །དག་པའི་ཞིང་མཆོག་ཐུན་མོང་དངོས་གྲུབ་ཐོབ། །སྐལ་འབྲིང་རྣམས་ཀྱིས་ཕྱག་བསྐོར་མཆོད་འབུལ་ན། །ཉོན་མོངས་ནད་དང་སྟོང་ཕྲག་བགེགས་རྣམས་འཇོམས། །སྡིག་ཅན་རྣམས་ཀྱིས་ཕྱག་དང་སྐོར་བ་དང་། །ལམ་བཟོ་ཟམ་བཅོས་ལུས་ཀྱི་སྒྲིབ་སྦྱངས་པས། །གནས་སྐབས་བདེ་ཞིང་མཐར་ཐུག་བྱང་ཆུབ་རྙེད། །རྒྱབ་བསྐོར་གྱི་ཕན་ཡོན་འགྱུར་ཁྱད་ནི། །མ་ཎི་དུང་གཅིག་ལོ་གསུམ་མཚམས་འདུག་ནས། །མ་རྟོག་དུང་ཕྱུར་འགྲོ་བ་ངེད་མ་མཐོང་། །དེ་ལམ་གནས་མཆོག་ཁ་བ་དཀར་པོ་ཡི་ཕྱི་སྐོར་གཅིག་གི་དུང་ནི་སྟོང་ཕྲག་གཅིག་དང་བདུན་བརྒྱ་ཉི་ཤུ་ཡོད། ལུག་ལོ་མིན་ཡང་ལོ་དར་མ་ནི་དུང་བདུན་བརྒྱ་ཉེར་ལྔ་ཡོད་པར་ཕྱག་བསྐོར་མཛད། ཞག་བཅུ་ཟླ་བ་གཅིག་གི་སྒྲུབ་པ་འདི། །ལུས་ངན་ཐ་མལ་ཐབས་ཀྱིས་ཨེ་ཡོད་དམ། །ནམ་ཞིག་དུང་གཅིག་ཁ་ལ་བསྒྲང་ཚད་རྣམས། །བདེ་ཆེན་ཞིང་དུ་སྐྱེ་བར་རྒྱལ་བས་གསུངས། །སྟོང་ཕྲག་གཅིག་དང་བདུན་བརྒྱ་ཉི་ཤུ་ནི། །ཕན་ཡོན་རྒྱལ་བས་གསུངས་ཀྱང་བརྗོད་མི་ནུས། །སྡིག་ཅན་ཤན་པས་མི་རྟ་བརྒྱ་བསད་པ། །ཉེས་པ་སྙིང་ནས་གནོང་འགྱོད་མཐོལ་བཤགས་ན། །སྡིག་པ་བྱང་ཞིང་བདེ་ཆེན་ཞིང་དུ་འགྲོ། འདིར་བསླུ་མེད་པ་རྒྱལ་བའི་བཀའ་ལས་གསུངས། །ཐུགས་ལ་ཞོག་ཅིག་སྐལ་ལྡན་ཕོ་མོ་རྣམས། །རྒྱལ་ཁམས་ཀུན་རྣམས་རྣ་བར་གོ་བར་བྱེད། །བསྐོར་བར་ཡོང་མི་དྲག་ཞན་མཐོ་དམན་ཀུན། །མཐུན་འཇུག་འཛོམས་པའི་སྐྱབས་སུ་བྱུང་བ་ན། །དེ་དག་དགེ་བ་དུང་ཕྱུར་འགྱུར་བར་ངེས། །གནོད་འཚེ་དུག་དང་ཟམ་པ་འགག་བྱེད་པ། །ལམ་གླ་ཟམ་གླ་ངན་བྱེད་སུས་བྱེད་པ། །ཚེ་འདི་མུ་གེ་སྣ་ཚོགས་མང་བྱུང་དང་། །བཙའ་སད་ལ་སོགས་མུ་གེ་ནད་ཡམས་དར། །གནས་སྲུང་ཁྲོས་ནས་སྲོག་རྩ་མྱུར་དུ་ཆོད། །ཕྱི་མ་དམྱལ་བར་སྐྱེ་བར་ཐེ་ཚོམ་མེད། །དེ་ཕྱིར་ཀུན་གྱིས་བསྐོར་བར་འོང་ཚད་ལ། །དགེ་སེམས་དག་པར་རབ་ཏུ་སྦྱར་བ་ནས། །བཟང་སེམས་འཛོམས་པར་སྐྱེལ་བསུ་ལེགས་པར་བྱེད། །དགེ་བས་བྱ་བ་མཐུན་སྦྱོར་བསོད་ནམས་ཀྱིས། །ཚེ་འདིར་ནད་མེད་བདེ་སྐྱིད་ཕུན་སུམ་ཚོགས། །ཕྱི་མ་བདེ་བ་ཅན་དུ་སྐྱེ་བར་འགྱུར། །ཆུ་མོ་ལུག་གི་ལོ་ལ། རྒྱ་གར་རྒྱ་ནག་བལ་ཡུལ་ལི་ཡུལ་བྱང་ཤམ་བྷ་ལ་གངས་ཏི་སེ་གཙོར་བཅས་བོད་ཁམས་ཐམས་ཅད་ཀྱི་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས་སོགས་ཐམས་ཅད་ལུག་ལོའི་ནང་ཁ་བ་དཀར་པོ་གནས་ནང་དུ་བྱོན་ནས་བཞུགས་ཡོད་པ་ཡིན། དེའི་ཕྱིར་ཕྱག་དང་བསྐོར་བ་དད་པ་བྱེད་པ་དང་། ཚོགས་མཆོད་མར་མེ་ཇོ་དར་ཟམ་པ་བཙུགས་པ་མཚམས་བསྙེན་སྒྲུབ། གང་ཞིག་བསྒྲུབས་ཀྱང་དགེ་བ་འབུམ་འགྱུར་དུ་ཡོད་ཅེས་གསུངས།

སློབ་དཔོན་པདྨ་འབྱུང་གནས་ཀྱི་དག་སྣང་བཀའ་བབས་མཁའ་འགྲོའི་ལུང་བསྟན་ཐོབ་པའི་དཔའ་བོ་ཁྲག་འཐུང་ལས་རབ་རྡོ་རྗེ་ཡིས་བྲིས་པ་དགེའོ། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག །

མཆན། ༡ གནས་ཡིག་འདི་གཉིས་ནི་རིན་ཆེན་རྡོ་རྗེ་དང་ཚེ་རིང་ཆོས་འཕེལ་གཉིས་ཀྱིས་བརྩམས་པའི་གནས་ཆེན་ཁ་བ་དཀར་པོའི་བསང་མཆོད་དང་གནས་ཡིག་ནས་ཞལ་བཤུས་པའོ། ། ༢.གནས་འདི་ནི་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་བདེ་ཆེན་རྫོང་གི་མདུན་ཕྱོགས་སུ་བཞུགས་ཡོད། ད་ལྟ་གླང་འཇོམས་ལ་ནས་དུག་རི་གྲོང་བར་ལ་མི་ཕལ་བས་ཉིན་གསུམ་ལ་བསྐོར་ཐུབ།

༄༅། །གསུང་གི་གནས་མཆོག་བསྟན་པ་ནི༔ ལོ་ཧི་ཏ་ཡི་ཆུ་ཡི་མདོ་དག་ཏུ༔ སྦས་པའི་གནས་མཆོག་པདྨ་ཤེལ་གྱི་རི༔ འདི་ཡི་དཀར་ཆག་རུ་དམ་ནག་པོར་སྦས༔

༄༅། །གསུང་གི་གསུང་གནས་པདྨ་ཤེལ་རི་ནི། དངོས་དེ་ད་རུང་ཞལ་མ་འབྱེད། ཡན་ལག་རྟིང་ལྷུང་ཁང་མདོ་བྲག་དམར་ཟངས་ཡག་ནམ་མཁའ་རྫོང་དང་ཉེ་བའི་ཚུར་རི་ལ་ཡོད།

༄༅། །༔འཆི་མེད་པདྨ་ཤེལ་རིའི་གནས་ཀྱི་མདོ་བྱང་ཉི་མ་སྙིང་པོ་བཞུགས་སོ༔ རྩ་གསུམ་ཡོངས་རྫོགས་ལྷ་ལ་འདུད༔ ཀུན་བཟང་པདྨ་འབྱུང་གནས་ཀྱི༔ ཡོན་ཏན་རིན་ཆེན་འདོད་རྒུའི་གཏེར༔ མཉམ་པ་ཉིད་ཀྱི་ཡེ་ཤེས་རྩལ༔ མི་ཟད་རྒྱན་གྱི་འཁོར་ལོའི་ཚུལ༔ བདེ་གཤེགས་འདུས་པའི་རྫོང་ཆེན་པོའི༔ ལྷོ་ཕྱོགས་ངོ་མཚར་བཀོད་པའི་ཡུལ༔ ཁྲོ་བོ་འཆོལ་བའི་ཕོ་བྲང་གི༔ སྙིང་པོ་ཡེ་ཤེས་འོད་ལྔའི་ཞིང༔ འཆི་མེད་པདྨ་ཤེལ་གྱི་རི༔ ངོ་མཚར་མཐོང་བས་གྲོལ་བ་ཡོད༔ དེ་ན་རང་བྱུང་པདྨ་དང༔ ལོ་ཙཱ་ཆེན་པོ་རྣམ་སྣང་མཛད༔ གཟུངས་མ་ཡེ་ཤེས་མཚོ་རྒྱལ་ཆེ༔ ཆོས་ཀྱི་རྒྱལ་པོ་ཡབ་སྲས་བཅས༔ སྟོན་འཁོར་མཆོག་གི་ཚོམ་བུ་ཡིས༔ བྱིན་བརླབས་རང་བྱུང་བཀོད་པའི་རྒྱན༔ རྡོ་རྗེ་སེམས་དཔའི་མེ་ལོང་གི༔ འོད་གསལ་ཡེ་ཤེས་གཞལ་མེད་ལྔ༔ མཐོང་བས་ཉམས་ཀྱི་བབས་འབྱུང་ཞིང༔ ཐོས་པས་བདེ་ཆེན་ཡེ་ཤེས་སྐྱེ༔ ཡིད་ལ་དྲན་ཅིང་གསོལ་བཏབ་ན༔ ཀ་དག་ལྷུན་གྲུབ་དབྱེར་མེད་པའི༔ ཟབ་མོའི་དགོངས་པ་ལྷུག་པར་འཆར༔ ཉིན་མཚན་བྱེད་བཅིངས་རྣལ་འབྱོར་གྱིས༔ ཟླ་དྲུག་རྩེ་གཅིག་བསྒོམ་ནུས་ན༔ འཇའ་ལུས་རྡོ་རྗེའི་གོ་འཕང་འགྲུབ༔ ཁྱད་པར་ཚེ་ཡི་བསྙེན་སྒྲུབ་དང༔ རྡོ་རྗེ་ལུས་ཀྱི་བཅུད་བླངས་ན༔ གནས་སྐབས་ཚེ་ཡི་བར་ཆད་ཞི༔ མཐར་ཐུག་འཆི་མེད་རིག་འཛིན་འགྲུབ༔ གཞན་ཡང་འདུས་པ་ཕྱི་མ་ཡི༔ རྗེ་འབངས་ཚོམ་བུ་ཉེར་སུམ་གྱིས༔ བྱིན་གྱིས་བརླབས་པའི་ཕུག་པ་དང༔ ཐབས་དང་ཤེས་རབ་རང་བྱུང་རྟེན༔ ཨེ་ཝཾ་ཟུང་འཇུག་རྟགས་ཀྱི་རྒྱ༔ སྐུ་གསུང་ཐུགས་རྟེན་རང་བྱོན་དང༔ རྡོ་རྗེའི་ཕྱག་ཞབས་རྗེས་ལ་སོགས༔ དབང་པོ་བསྐལ་པའི་ཁྱད་པར་བཞིན༔ གྲངས་མེད་ཆུ་ཟླའི་གཟུགས་བཞིན་སྣང༔ དུས་རྣམས་ཀུན་དང་ཁྱད་པར་དུ༔ ཡར་མར་ཚེས་བཅུའི་ཉིན་དང་མཚན༔ ཨོ་རྒྱན་ཆེན་པོས་བྱིན་འབེབས་ཤིང༔ དཔའ་བོ་ཌཱཀི་དངོས་སུ་འདུ༔ རབ་ལ་ཉེ་རྒྱུའི་དབུགས་འབྱིན་མཛད༔ འབྲིང་ལ་བདེ་སྟོང་རྗེས་མཐུན་སྐྱེད༔ དད་དང་མོས་གུས་ལྡན་གྱུར་ན༔ དབང་པོ་ཐ་མ་ཡིན་ཡང་རུང༔ དངོས་གྲུབ་སྣ་རེ་ངེས་པར་འབྱུང༔ དེ་ཕྱིར་མ་འོངས་དད་ལྡན་རྣམས༔ ཕྱག་དང་བསྐོར་བ་གནས་འདིར་མཛོད༔ ལུས་ཀྱི་སྒྲིབ་པ་ངེས་པར་འདག༔ གསོལ་འདེབས་བཟླས་བརྗོད་གནས་འདིར་འབུངས༔ ངག་ལ་ནུས་པ་རྩོལ་མེད་འབར༔ ཏིང་འཛིན་རྩེ་གཅིག་གནས་འདིར་སྒོམས༔ སྤྱན་དང་མངོན་ཤེས་འཕྲལ་དུ་འབྱུང༔ ཁྱད་པར་འོད་གསལ་རྫོགས་པ་ཆེ༔ དབྱིངས་རིག་དབྱེར་མེད་ཉམས་བླངས་ན༔ ཚེ་གཅིག་སྣང་བཞི་མཐར་ཕྱིན་ནས༔ བསྟན་པའི་བཙས་ཆེན་དེ་ཡིས་བྱེད༔ ཚོགས་དང་གཏོར་མའི་ལོངས་སྤྱོད་ཀྱིས༔ འདོད་རྒུའི་འབྱོར་པ་སྤྲིན་ལྟར་གཏིབས༔ མཆོག་ཏུ་ཚེ་ཡི་སྒྲུབ་པ་ལ༔ བརྩོན་ན་འཆི་མེད་ངེས་འགྲུབ་བོ༔ ས་མ་ཡ༔ དེ་ལྟར་གྲོལ་བ་བཞི་ལྡན་གྱི༔ སྒྲུབ་ཕུག་ཀུན་གྱི་རྒྱལ་པོ་ནི༔ འཆི་མེད་པདྨ་ཤེལ་གྱི་རི༔ ལྷ་མི་ཀུན་གྱི་མཆོད་སྡོང་ཆེའི༔ དཀར་ཆག་ངེས་པའི་མདོ་བྱང་སྟེ༔ རྗེ་བཙུན་མ་ཧཱ་གུ་རུ་ཡིས༔ རྡོ་རྗེའི་རང་སྒྲར་བསྟན་པའི་ཚིག༔ རྗེ་འབངས་གྲོགས་ཀྱིས་བཟུང་བའི་བཅུད༔ འཕེལ་འགྲིབ་བྲལ་བའི་ཡི་གེ་འདི༔ བསྐལ་བཟང་རྣམས་ཀྱི་དཔལ་དུ་ཤོག༔ རྒྱ་རྒྱ་རྒྱ༔ ཞེས་སྤྲུལ་པའི་གཏེར་སྟོན་མཆོག་གྱུར་བདེ་ཆེན་གླིང་པ་དང་། པདྨ་འོད་གསལ་མདོ་སྔགས་གླིང་པ་ཟུང་གིས་གཏན་ལ་ཕབ་ཅིང་། པདྨ་གར་གྱི་དབང་ཕྱུག་གཡུང་དྲུང་གླིང་པ་རྩལ་གྱིས་ཡི་གེར་བྲིས་པ་འབྲེལ་ཚད་དོན་དང་ལྡན་པའི་ཕྲིན་ལས་མཁའ་ཁྱབ་ཏུ་འཕེལ་ཞིང་རྟག་པའི་རྒྱུར་གྱུར་ཅིག །

མཆན། ༡.གནས་ཡིག་འདི་ནི་གཏེར་ཆེན་མཆོག་གྱུར་གླིང་པའི་བཀའ་འབུམ་ཁ་པོད་ལས་ཞལ་བཤུས་པའོ། །༢.གནས་འདི་ནི་སི་ཁྲོན་ཞིང་ཆེན་དཀར་མཛེས་ཁུལ་དཔལ་ཡུལ་རྫོང་གཏེར་ལྷུང་ཞང་ཁང་དམར་དགོན་གྱི་མདུན་ཕྱོགས་ཡིན་ཏེ། དཔལ་ཡུལ་ནས་སྤྱི་ལེ༧༢ཙམ་གྱི་སར་གནས་ཤིང་། མཐའ་བསྐོར་ལ་པདྨ་ཤེལ་རི་དང་རི་བོ་དབང་ཞུ། རྫོང་ཤོད་བདེ་གཤེགས་འདུས་པའི་ཕོ་བྲང་བཅས་གནས་གསུམ་པོ་ཁྱབ་གཅིག་ཏུ་བསྐོར་ན་ཉིན་གསུམ་ལྷག་འགོར་ཞིང་། ནང་བསྐོར་པདྨ་ཤེལ་རི་ཁོ་ན་བསྐོར་ན་ཉིན་གཅིག་གིས་སྔ་མོར་སླེབས་ཐུབ།

༄༅། །གསུང་གི་ཐུགས་ཀྱི་གནས་མཆོག་བསྟན་པ་ནི༔ བོད་ཀྱི་མདོ་ཁམས་ལྷོ་ཟླ་ཞེས་བྱ་རུ༔ ན་བུན་ཞེས་བྱའི་བྲག་རི་དུག་སྦྲུལ་འདྲ༔ ནམ་མཁའི་སྙིང་པོ་བཻ་རོ་ཙ་ན་ཡིས༔ རྫུ་འཕྲུལ་ཕ་ཝང་བརྩིགས་པའི་ཕུག་པ་རུ༔ པདྨ་བདག་གིས་ཧཱུྃ་སྒྲུབ་ཟླ་གསུམ་བགྱིས༔ དེ་རུ་དམ་སྲི་རལ་ནག་བཏུལ་བ་ཡི༔ ཀླད་པས་བྲིས་པའི་ཡི་གེ་འབྲུ་བདུན་ཡོད༔ ཐུགས་ཀྱི་གཏེར་ལྔ་སྐུ་ཡི་གཏེར་ལྔ་སྦས༔ ཁྱད་པར་འཕགས་པའི་གསུང་གི་གཏེར་གཅིག་སྦས༔ ཞེས་གསུངས་སོ། །

༄༅། །གསུང་གི་ཐུགས་ཀྱི་གནས་ན་བུན་ཞེས་བྱ་བ་ནི། ནང་ཆེན་ཆམ་གཤིས་ན་བུན་རྫོང་བདུད་འདུལ་མི་འགྱུར་རྡོ་རྗེ་ཆགས་མེད་སོགས་ཕེབས་ནས་གནས་ཞལ་ཕྱེས་ཤིང་བདུད་འདུལ་བའི་གནས་ཡིག་ཀྱང་ཡོད། གཏེར་ཆེན་ཉིད་ནས་གཏེར་ཁའི་ཐོག་མ་པདྨ་གཙུག་ཏོར་དྲི་མེད་ཀྱི་སྐོར་སྤྱན་དྲངས་སོ། །

༄༅། །འཛམ་གླིང་གནས་ཀྱི་ཡ་གྱལ། །ཆམ་ཀྱི་ན་བུན་རྫོང་ཆེན། །བྲག་རི་ནོར་བུ་བརྩེགས་འདྲ། །ཤར་ཕྱོགས་ཤེལ་སྦྲུལ་གདེངས་ཁ། །པད་འབྱུང་ཡབ་ཡུམ་ཕྱག་གིས། །བྲིས་པའི་ཡི་གེ་འབྲུ་དྲུག །ཞབས་རྗེས་མཐོང་བ་རང་གྲོལ། །ངོ་མཚར་ཅན་འགའ་བཞུགས་ཡོད། །གུ་རུ་རྡོ་རྗེ་གྲོ་ལོད། །བྱོན་པ་སྟག་མོའི་ཞབས་རྗེས། །ཤར་ལྷོ་ཆོས་རྫོང་ཕུག་མོ། །ཙན་ལྡན་སྦྲུལ་གྱི་སྙིང་པོ། །ལྷ་རྟ་རྐྱང་སྐྱིད་གཏོད་ཕུར། །སྤོས་དྲི་ངད་ལྡན་བཞུགས་ཡོད། །ལྷོ་ཕྱོགས་བཻཌཱུ་ཡ་ལ། །མི་ལ་རས་པའི་སྒྲུབ་གནས། །ཨོ་རྒྱན་ཕྱག་གི་ཁ་ཊྭཱཾ། །མཐོང་བ་འཛུམ་ཤོར་བཞུགས་ཡོད། །ལྷོ་ནུབ་བསམ་འགྲུབ་གླིང་ན། །སྐྱོབས་པ་འཇིག་རྟེན་གསུམ་མགོན། །ས་ཁྲི་སྣང་སྲིད་ཟིལ་གནོན། །ཆོས་མིན་ཁ་ནོན་བཞུགས་ཡོད། །སྒྲུབ་ཕུག་པདྨ་འོད་ལ། །ཟངས་མདོག་དཔལ་རི་བཀོད་པ། །སྒོ་ལ་ཧཱུྃ་དམར་བཅུ་གསུམ། །གོང་ལ་རྗེ་འབངས་ཉེར་ལྔས། །ཆོས་བྲོ་བརྡུངས་པའི་ཞབས་རྗེས། །ངོ་མཚར་ཅན་འགའ་བཞུགས་ཡོད། །ནུབ་ཕྱོགས་པདྨ་འོད་ལ། །མགོན་པོ་ཚེ་དཔག་མེད་མགོན། །ཞིང་ཁམས་མཐོ་རིས་ཐར་ལམ། །གནས་ཆེན་རྩ་རི་འདྲ་འདུག །ནུབ་བྱང་ཤམ་བྷ་ལ་ལ། །གཏེར་མ་བརྒྱ་དང་རྩ་བརྒྱད། །ཤིང་ལོ་ཏ་ལའི་ལོ་མ། །མཐིང་ཤོག་བཻཌཱུ་ཡ་ལ། །ཨོ་རྒྱན་མཁའ་འགྲོའི་བརྡ་ཡིག །བྲིས་པའི་ཆུ་གཏེར་འགའ་བཞུགས། །བྱང་ཕྱོགས་ཨིནྡྲ་ནཱི་ལ། །རིན་ཆེན་གཏེར་གྱི་སྒྲོམ་བུ། །ཁ་ལེབ་རྡོ་རྗེ་ཕ་ལམ། །སྟོང་དང་རྩ་གཉིས་ནང་དུ། །གཏེར་རྫས་དངོས་གྲུབ་ཀུན་འབྱུང་། །སྐལ་ལྡན་རིན་ཆེན་གཟིགས་སོང་། །བྱང་ཤར་མ་ལ་ཡ་ལ། །སྐུ་གཟུགས་ཡིག་འབྲུ་ཕྱག་མཚན། །རྒྱ་གར་རྒྱ་ནག་བོད་ཀྱི། །ཡིག་རིགས་མང་པོའི་རང་བྱུང་། །ཡི་གེ་ཧ་རི་ནི་ས། །ར་ཙཱ་ཧྲཱི་ཡ་བརྒྱད་པོ། །སྐྱེས་བུ་མང་པོའི་མཇལ་འདུག །མདུན་རི་ཡོན་ཆབ་གཤམ་འདྲ། །ཆུ་བོ་ཡན་ལག་བརྒྱད་ལྡན། །ནང་གི་གཞལ་ཡས་ཁང་པ། །ཀུན་ཏུ་བཟང་པོའི་ཞིང་ཁམས། །ངན་སོང་འཁོར་བ་དོང་སྤྲུགས། །གངས་རྒྱལ་ཏི་སེ་འདྲ་སོང་། །པད་འབྱུང་རྒྱལ་བའི་རྒྱལ་ཚབ། །གཏེར་ཆེན་མཆོག་གྱུར་གླིང་པ། །སེང་ཁྲི་པདྨའི་གདན་ལ། ཐུགས་རྗེས་གཡོ་བ་མེད་པ། །ནམ་མཁའ་གཡའ་དག་ལྟ་བུ། །འགྱུར་བ་མེད་པར་བཞུགས་ཡོད། །འཛམ་གླིང་དར་བར་གྱུར་ཅིག །རྒྱལ་ལོ་རྒྱལ་ལོ་ལྷ་རྒྱལ་ལོ། །

༄༅། །ན་མོ་གུ་རུ་དེ་ཝ་ཌཱཀི་ནཱི་ཧཱུྃ། གནས་ན་བུན་ཡེ་ཤེས་ཀྱི་ཕུག་པ་ན། །རྟེན་སྐུ་ཚབ་དང་ཤོག་སེར་གཏེར་ཁ་མང་། །གནས་པདྨ་འོད་དང་གཉིས་སུ་མེད། །ཨོ་རྒྱན་རྗེ་འབངས་ཉེར་ལྔ་ལ་གསོལ་བ་འདེབས། །བྱིན་བརླབས་སེམས་ལ་འཇུག་པར་བྱིན་གྱིས་བརློབས། །གནས་རྩ་གསུམ་འཁོར་ལོ་ལྔ་ཡི་ཚུལ། །དག་པ་མཁའ་སྤྱོད་གནས་དང་གཉིས་སུ་མེད། །ཡི་དམ་ཞི་ཁྲོ་རབ་འབྱམས་ལ་གསོལ་བ་འདེབས། །མཆོག་གི་དངོས་གྲུབ་ཐོབ་པར་བྱིན་གྱིས་བརློབས། །གནས་ཧྲཱིཿམ་ཧཱུྃ་གིས་ཡིག་འབྲུ་གསལ། །རང་བྱུང་ཨོ་རྒྱན་གྱི་གནས་དང་གཉིས་སུ་མེད། །དབང་ཆེན་རྟ་ཕག་ཡབ་ཡུམ་ལ་གསོལ་བ་འདེབས། །འཇའ་ལུས་མཁའ་སྤྱོད་འགྲུབ་པར་བྱིན་གྱིས་བརློབས། །གནས་ཤར་ཕྱོགས་ཧཿདང་རཿཡིག་དཀར། །ཤར་གཏུམ་དྲག་གནས་དང་གཉིས་སུ་མེད། །རྡོ་རྗེ་མཁའ་འགྲོ་ཡབ་ཡུམ་ལ་གསོལ་བ་འདེབས། །ནད་གདོན་བར་ཆད་ཞི་བར་བྱིན་གྱིས་བརློབས། །གནས་ལྷོ་ཕྱོགས་རི་དང་ཙཿཡིག་སེར། །ལྷོ་གད་རྒྱངས་ཀྱི་གནས་དང་གཉིས་སུ་མེད། །རིན་ཆེན་མཁའ་འགྲོ་ཡབ་ཡུམ་ལ་གསོལ་བ་འདེབས། །ཚེ་དང་ལོངས་སྤྱོད་རྒྱས་པར་བྱིན་གྱིས་བརློབས། །གནས་ནུབ་ཕྱོགས་ནིཿདང་ཧྲཱི་ཡིག་དམར། །ནུབ་པདྨ་འཁྱིལ་དང་གཉིས་སུ་མེད། །པདྨ་མཁའ་འགྲོ་ཡབ་ཡུམ་ལ་གསོལ་བ་འདེབས། །རླུང་སེམས་དབང་དུ་འདུ་བར་བྱིན་གྱིས་བརློབས། །གནས་བྱང་ཕྱོགས་སཿདང་ཡཿཡིག་ལྗང་། །བྱང་ཀཱི་ལ་ཡ་དང་གཉིས་སུ་མེད། །ལས་ཀྱི་མཁའ་འགྲོ་ཡབ་ཡུམ་ལ་གསོལ་བ་འདེབས། །བདུད་བཞིའི་གཡུལ་ལས་རྒྱལ་བར་བྱིན་གྱིས་བརློབས། །དྷཱ་ཀི་དང་ཞིང་སྐྱོང་གནས་བདག་ཚོགས། །རྐྱེན་ཕྱི་ནང་གི་བར་ཆད་ཞི་བ་དང་། །དོན་ཆོས་མཐུན་གྱི་བསམ་པ་ཡིད་བཞིན་འགྲུབ། །བཀྲ་ཤིས་དང་བདེ་ལེགས་མཛད་དུ་གསོལ། །ཅེས་པ་འདི་རིག་སྔགས་འཆང་བའི་དགེ་སློང་རཱ་ག་ཨ་སྱས་གནས་འབྲེལ་བྱེད་དུས་བྲིས་པའོ། །སརྦ་མངྒ་ལཾ། །

མཆན། གོང་གི་གནས་ཡིག་འདི་གཉིས་ནི་མཁས་གྲུབ་ཀརྨ་ཆགས་མེད་ཀྱི་གསུང་འབུམ་གི་པོད་ལས་ཞལ་བཤུས་པའོ། །

༄༅། །ན་བུན་རྫོང་གི་ཡེ་ཤེས་ཕུག་སོགས་ཀྱི་གནས་ཡིག་རྣམས་བཞུགས་སོ། །ན་མོ་གུ་རུ་ཛྙན་ཌཱཀྐི་ཡེ། ཤུད་བུ་དཔལ་སེང་དངོས་སྤྲུལ་རིག་འཛིན་མི་འགྱུར་རྡོ་རྗེའི་ཞལ་གཟིགས་ལ། ན་བུན་རྫོང་གི་ཡེ་ཤེས་ཕུག་པ། མཁའ་འགྲོ་ཡེ་ཤེས་མཚོ་རྒྱལ་གྱི་ཞབས་རྗེས་བརྒྱད་དང་། ཞབས་རྗེས་ལ་ཨོཾ་ཨཱཿཧཱུྃ་ཧྲཱིཿས་མཚན་པ། ཕྱག་རྗེས། ཡི་གེ་ཧྲཱིཿ མཁའ་འགྲོ་སྡེ་བཞིའི་སྙིང་པོ་ཡི་གེ་ཧ་རི་ནི་ས། ཡི་གེ་ཨོཾ་དང་ཊ་ཧཱུྃ་རྒྱ་ཡིག མཁའ་འགྲོ་བདེ་ཆེན་རྒྱ་མཚོའི་སྐུ། རྗེ་འབངས་རྡོ་རྗེ་དཔལ་གྱི་ཞབས་རྗེས། གནུབས་ནམ་མཁའི་སྙིང་པོའི་ཞབས་རྗེས། ཆོས་འབྱུང་རང་བྱོན། ཕུག་སྒོ་ན་ཡེ་ཤེས་མཚོ་རྒྱལ་གྱི་བྷནྡྷའི་རྗེས། ཕུག་པ་རང་གྲོལ་གྱི་རྩ་དབུ་མ་རོ་མ་རྐྱང་མ་གསུམ་འཁོར་ལོ། བདེ་ཆེན་འཁོར་ལོ། ལོངས་སྤྱོད་འཁོར་ལོ། ཆོས་ཀྱི་འཁོར་ལོ། སྤྲུལ་པའི་འཁོར་ལོ། བདེ་སྤྱོད་འཁོར་ལོ། རང་དོད་ལ་ཚང་བ། ཨོ་རྒྱན་རིན་པོ་ཆེའི་ཞབས་རྗེས།  རྡོ་རྗེ་གྲོ་ལོད་ཀྱི་སྐུ། ཕག་མོ་ཞལ་གཉིས་མའི་སྐུ། ཁྱེའུ་ཆུང་ལོ་ཙཱའི་ཞབས་རྗེས། ཕུག་གོང་མར་ཡི་གེ་ཨ་དང་ཧཱུྃ་དང་ཧྲཱིཿགཉིས་ཡང་ཧཱུྃ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ་ཡོད། ཡི་གེ་དྷཱིཿ དེ་ལས་གོང་དུ་ཕུག་པ་ཆེ་བའི་བཀོད་པ་དབྱིབས་འདྲ་བ། སྒོ་གཡས་རྡོ་རྗེ་གྲོ་ལོད་ཀྱི་སྐུ། དེ་གོང་ཡེ་ཤེས་མཚོ་རྒྱལ་གྱི་ཞབས་རྗེས། ཨོཾ་གསལ་པོ། ཐབས་ཤེས་ཉི་ཟླའི་རྗེས། ཐར་པ་བྱང་ཆུབ་བགྲོད་པའི་ལམ། ཨོ་རྒྱན་རིན་པོ་ཆེའི་ཞབས་རྗེས། རྗེ་འབངས་ཉེར་ལྔའི་བྱོན་ལམ། ཨོ་རྒྱན་ཡབ་ཡུམ་གྱི་ཕྱག་མཛུབ་རྗེས། མཚོ་རྒྱལ་ཞབས་རྗེས། དུར་ཁྲོད་སོ་ས་གླིང་རྡོ་ལ་ཧྲཱིཿབྱོན་པ། ཨོ་རྒྱན་གྱི་ཞབས་རྗེས་འཁོར་ལོ་ལ་ཧཱུྃ་གིས་མཚན་པ་ཡོད། ཨོ་རྒྱན་རིན་པོ་ཆེའི་ཆིབས་པའི་རྗེས། འབྱུང་པོ་འདུལ་བྱེད་ཀྱི་སྤྲུལ་རྒྱན། ཕྱོགས་བཞིར་དཔའ་བོ་སྡེ་བཞིའི་ས་བོན་ཤར་དུ་ཡི་གེ་ར་དཀར་པོ། ལྷོར་ཙ་སེར་པོ། ནུབ་ཏུ་ཧྲཱིཿདམར་པོ། བྱང་དུ་ཡ་ལྗང་གུ་ཡོད། ཡང་ཤར་དུ་ཧ་དཀར་པོ། ལྷོར་རི་སེར་པོ། ནུབ་ཏུ་ནི་དམར་པོ། བྱང་དུ་ས་ལྗང་གུ་སྟེ་མཁའ་འགྲོ་སྡེ་བཞིའི་ས་བོན་གསལ་བོ་ཡོད། སྐོར་ལམ་དུ་ཡང་ལང་གྲོ་དཀོན་མཆོག་འབྱུང་གནས་ཀྱི་ཞབས་རྗེས་རིང་བསྲེལ་གྱིས་མཚན་པ་བཞུགས་སོ། །རི་མགོར་ཕེབས་པའི་ཚེ་འཇའ་གུར་དང་ཡོལ་བ། ཐམས་ཅད་ཀྱི་མཐོང་བའི་ལེགས་ཚོགས་ཀྱི་རྟེན་འབྲེལ་ངོ་མཚར་ཅན་འབྱུང་ངོ་། །ཞེས་པ་རིག་འཛིན་ཆེན་པོ་མི་འགྱུར་རྡོ་རྗེས་བཀའ་སྩལ་པ་ལྟར་དྲུང་ཡིག་པ་ཀརྨ་ཚུལ་ཁྲིམས་ཡང་དག་གིས་བཀོད་པའོ། །མངྒ་ལཾ།

མཆན། གནས་ཡིག་འདི་ནི་གནམ་ཆོས་མི་འགྱུར་རྡོ་རྗེའི་བཀའ་འབུམ་ཁྲོད་ཀྱི་ཝཾ་པོད་ལས་ཞལ་བཤུས་པའོ། །

༄༅། །ན་མོ་པདྨ་བཛྲ་ཡེ། སྐྱབས་གནས་ཨོ་རྒྱན་པདྨ་འབྱུང་། །རིག་འཛིན་མཁའ་འགྲོའི་ཚོགས་ལ་འདུད། །གནས་མཁའ་སྤྱོད་དག་པའི་སེང་ཧ་རྫོང་། །མི་བདག་གིས་མཇལ་པའི་འཁྲུལ་སྣང་ངོར། །ཉམས་ཤར་ཚུལ་བརྗོད་ལ་བཀའ་གནང་སྩོལ། །གནས་སེང་རྫོང་ཀེའུ་ཚང་ཕུག་པའི་ནང་། །བདག་མཉམ་བཞག་ཅུང་ཟད་འདུག་པའི་དུས། །རྗེ་པད་འབྱུང་གྲུབ་ཐོབ་མི་གཟུགས་ཚུལ། །བྱིན་གཟི་བྱིན་འབར་བ་དངོས་སུ་མཐོང་། །སྐུ་གཡས་གཡོན་ཕུག་པའི་ངོས་ལོག་ལ། །རྒྱ་ཡིག་དང་བོད་ཡིག་བརྡ་ཡིག་སོགས། །སྒྲ་གྲགས་སྟོང་ཡི་གེར་སྣང་སྟོང་ཤར། །ཕྱག་གསེར་གྱིས་རྡོ་རྗེ་རྩེ་ལྔ་དང་། །གཡོན་དངུལ་གྱིས་དྲིལ་བུ་ཡུམ་གྱི་ཚུལ། །མི་འགྱུར་བའི་ཐིག་ལེ་དགའ་བ་འཁྱིལ། །རྟ་ཕག་དགོས་སྒྲུབ་ཀྱིས་སྤོ་ཏི་བཞུགས། །ཟབ་ཆོས་ཀྱི་གཏེར་ཁ་འགའ་ཡང་མཐོང་། །ཨོཾ་པདྨ་བཛྲ་ཧཱུྃ་གིས་སྒྲ། །དུས་རྒྱུན་ཆད་མེད་པར་རང་སྒྲ་ཐོས། །བྲག་ཤེལ་གྱིས་མཆོད་སྡོང་ལྟ་བུ་ལ། །བཀའ་རྒྱུད་སྡེ་བཞི་ཡི་ལྷ་ཚོགས་བཞུགས། །དཔའ་བོ་དང་མཁའ་འགྲོ་སྤྲིན་ལྟར་འཁྲིགས། །སྟེང་ནམ་མཁའི་ཁམས་ལ་ཡར་བལྟས་པས། །སྤྲིན་འཇའ་ཚོན་འོད་གུར་འཁྱིལ་བའི་དབུས། །རྗེ་རིག་འཛིན་པདྨ་འབྱུང་གནས་དང་། །འཁོར་གྲུབ་ཐོབ་རྒྱ་མཚོ་དངོས་སུ་མཇལ། །ཡིད་མོས་གུས་གསོལ་བ་ཡང་ཡང་བཏབ། །ལེགས་ཉེས་ཀྱིས་རྟེན་འབྲེལ་སྨོན་འབྲས་འགྲུབ། །དོན་བདེན་གཉིས་ཚོགས་ཀྱིས་འཁོར་ལོ་བསྐོར། །དོན་གཉིས་ལྷུན་གྲུབ་ཀྱི་འབྲས་བུ་སྨིན། །སྐུ་གསུམ་མངོན་གྱུར་གྱི་རྟོགས་པ་ཤར། །རིག་འཛིན་གྲུབ་ཐོབ་དང་ཚོགས་གྲལ་འགྲིགས། །མགོན་བྱ་རོག་གདོང་གིས་དཀར་གཏོར་ཁྱེར། །བཀའ་རྒྱུད་ཀྱིས་རྒྱལ་མཚན་རྩེ་མོར་རོལ། །ཡ་མཚན་རྨད་བྱུང་གིས་ལྟད་མོ་མཐོང་། །བར་སྣང་གི་དབྱིངས་སུ་ཕར་བལྟས་པས། །མ་མཁའ་འགྲོ་རྣམ་གཉིས་བྱ་རྒོད་སྤྲུལ། །སྐྱེ་མེད་ཨ་ཡིག་གིས་དཀྱིལ་འཁོར་བསྟན། །འཁོར་འདས་མཉམ་ཉིད་ནམ་མཁའི་ཚུལ། །མཐའ་དབུས་མེད་པའི་བརྡ་ཆོས་བསྟན། །ང་རྣལ་འབྱོར་ས་གཞིའི་སྟེང་དུ་འདུག ཁོང་ཌཱཀྐི་རྣམ་གཉིས་དབྱིངས་སུ་འཕྱོ། །ལར་ནམ་མཁའ་ས་གཞི་ཐབས་ཤེས་ཚུལ། །ཁོང་དཔའ་བོ་དང་མཁའ་འགྲོ་འབྲལ་མེད་རྟགས། །མདུན་ནམ་མཁའི་དབྱིངས་སུ་ཡང་ཡང་མཇལ། །བདག་སྐྱོ་ཤས་ཀྱི་མཆི་མ་ཁོང་ནས་འཁྲུགས། །སྔོན་ཕ་མའི་འདུ་བྱེད་སྐྱེས་ཚུལ་ཤར། །དུས་ད་ལྟ་མིག་གིས་བལྟས་དང་མཚུངས། །སྐྱོ་བ་དང་མཚར་པ་འདྲ་འདྲ་བྱུང་། །ཁོང་དཔལ་འདྲེན་མ་ཡིས་འདི་སྐད་ཟེར། །ཁྱོད་ང་དང་འབྲལ་མེད་འདུག་པ་ལ། །བྱུང་ཚུལ་དང་སྐྱེས་ཚུལ་རྣམ་ཐར་ཡི་གེར་ཐོབ། །ལོ་དྲུག་ཅུ་ཡན་མན་ཅི་འདྲ་ཨཾ། །དེ་ཚུན་ལ་ཡང་ཅི་ཡོང་ཅི་ཆ་མེད། །ཁོ་རྡོ་རྗེ་མན་ཆད་ལུས་ཀྱིས་བུ། །ཧ་ཧ་ཧ། །དེ་མིན་གནས་བསིལ་བ་ཚལ་ནས་འོང་། །ཁོང་གྲུབ་པའི་དཔལ་མོས་འདི་སྐད་ཟེར། །ཁྱེད་གཉིས་ལས་མཚར་བའི་མི་མི་འདུག། །གོ་ཆེན་པོ་ཆོད་པ་ང་ཡིས་ཤེས། །ང་འབྲལ་མེད་ཡོད་རྟེན་ལྟ་བ་ལས། །སེམས་སྐྱོ་ཤས་ཀྱི་ངོ་ཤེས་ད་ལྟ་ཙམ། །ང་བྱ་ཐུལ་གྱོན་ཚེ་ངོ་མཚར་མཐོང་། །གོས་ཧྲུལ་པོ་གྱོན་ནས་བྲེན་གཡོག་བྱེད། །མི་ལས་ཅན་བདེ་ཆེན་མཚན་མས་འདྲེན། །མི་སྐལ་མེད་དམ་ལོག་མཚན་མས་འདུལ། །མི་དད་ལྡན་གྱི་ཉམས་ཆགས་མཚན་མས་བསྐང་། །མི་དྲིན་ཅན་མ་བྱུར་རྟོགས་པས་འདྲེན། །ཉམས་རྩ་རླུང་ཐུགས་རྗེའི་ཉམས་རྟོགས་སྤེལ། །ཡུལ་ས་བཅུད་བསོད་ནམས་གཡང་གིས་བདག ཆོས་ཟབ་རྒྱས་འཁོར་ལོ་རྣལ་འབྱོར་མ། །ང་གཉིས་ཉི་ཟླ་ལྟར་འགྲོ་བའི་མགོན། །ཡུམ་ཆོས་སྐུ་ཀུན་ཏུ་བཟང་མོ་ཡིན། །ཁྱོད་འཁོར་བ་མེ་འོབ་ཀྱི་གྲོང་ཁྱེར་ལ། །ཁྱེད་འགྲོ་འདྲེན་ཆུ་ཤེལ་ཟླ་བ་ཤར། །ཐུགས་རྗེས་བསིལ་བའི་ཆུ་རྒྱུན་ཕོབས། །གྲོགས་ཨུ་དུམ་ཝ་རའི་མེ་ཏོག་ཁྱོད། །ལམ་རྒྱ་ལམ་དུ་འདུག་པ་ང་རེ་སྐྱིད། །ཞེས་མི་མོ་མཛེས་མའི་གཟུགས་སུ་བསྟན། །ཞལ་མཛེས་པའི་འཛུམ་མདངས་བསྟན་ནས་སུ། །མགྲིན་གཅིག་ཏུ་བསྡད་དབྱངས་འདི་སྐད་ཟེར། །ཨ་ཧམ། །ལུས་འདི་ལྟར་སྤྲུལ་བརྒྱུད་མ་ནུས་ན། །མིང་འཇའ་ལུས་ཟེར་ཡང་སྒྱུ་ལུས་ཡིན། །ལུས་འབྱུང་བཞི་མི་རྟགས་ཆུ་བུར་ཟེར། །རྐྱེན་གློ་བུར་ཟེར་མའི་རླུང་དང་འདྲ། །ཚེ་ཡད་ཡུད་པ་ལ་བློ་གཏད་ཆུང་། །ནོར་དངོས་རྫས་རྟགས་པ་མེད་ལགས་ཀྱང་། །མཆོག་རྣམ་གཉིས་ཀྱིས་དངོས་གྲུབ་ཡིན་ནོ་ཨང་། །ང་ཀོ་ལོང་དམ་པས་བཏང་སྙོམས་ལ་བཞག །ཚོགས་རྫོགས་པ་མ་གཏོགས་སྤང་མི་འཚལ། །སེམས་ཏིང་འཛིན་ཡིད་བཞིན་ནོར་བུ་དེ། །བྷ་གའི་ཆོས་དབྱིངས་མཁའ་ལ་གནས། །དེ་ཕྱིར་ཀུན་ཏུ་བཟང་མོ་ཡིན། །ཁྱོད་ངེས་མེད་འགྲོ་དོན་ཕྱོགས་བཅུར་སྤེལ། །རིགས་དྲུག་གིས་སེམས་ཅན་ལམ་སྣ་དྲོངས། །ང་རང་སེམས་ཡངས་པ་མཁའ་སྤྱོད་ཞིང་། །རང་རིག་ཆོས་སྐུ་རྡོ་རྗེ་འཆང་། །ད་སངས་རྒྱས་ཟེར་བ་དེ་ཀ་ཡིན། །དེ་གཞན་ནས་ཚོལ་བ་འཁྲུལ་པའི་རྒྱུ། །ད་ཐེ་ཚོམ་སྤངས་ལ་འགྲོ་དོན་སྤྱོད། །གནས་འདི་ལ་ལན་གཅིག་ཕྱག་བསྐོར་བྱས། །ལས་མཚམས་མེད་སྤྱད་པའི་སྡིག་སྒྲིབ་བྱང་། །ཚོགས་འཁོར་ལོ་སོགས་ལ་ནན་ཏན་བྱས་ན། ང་རང་དེར་འབྲལ་མེད་འོང་གསུངས་སོ། དེ་ལྟར་མདོར་བསྡུས་སུ། རིག་འཛིན་བླ་མ་དམ་པ་པདྨ་ལྷུན་གྲུབ་གང་གིས་དགོངས་བཞེད་ལྟར་བྲིས་པས་དགེ་ལེགས་འཕེལ། འབྲུག་པ་རྟོགས་ལྡན་གྱིས་རྫུན་གཏམ་ལགས་སོ། །

༄༅། །།ན་མོ་ཤཱཀྱ་མུ་ནེ་ཡེ། །མཉམ་མེད་ཐུབ་པའི་དབང་པོར་འདུད། །སྡེ་སྣོད་གསུམ་གྱིས་བསྟན་པ་ནི། །ཡར་ངོའི་ཟླ་ལྟར་རྒྱས་གྱུར་ཅིག །ན་མོ་པདྨ་བཛྲ་ཡེ། །གསང་སྔགས་རྡོ་རྗེ་ཐེག་པ་ཡི། །བསྟན་པའི་གཙུག་རྒྱན་པདྨ་འབྱུང་། །གསང་སྔགས་མཛོད་འཛིན་མཚོ་རྒྱལ་ཡུམ། །མན་དྷ་ར་བ་བདེ་ཆེན་རྒྱལ། །གུ་རུ་མཚན་བརྒྱད་གྲུབ་ཆེན་བརྒྱད། །ཐོད་ཕྲེང་སྡེ་ལྔ་གྲུབ་ཆེན་བརྒྱ། །རྗེས་འབངས་ཉེར་ལྔ་གཏེར་ཆེན་བརྒྱ། །ཡང་སྤྲུལ་གཏེར་ཕྲན་སྟོང་རྩ་ལ། །མོས་གུས་གདུང་བས་གསོལ་བ་འདེབས། །དམར་མཐིང་ཅོད་པཎ་འཆགས་བ་ཡིས། །བསྟན་པའི་གཙུག་རྒྱན་ཀརྨ་པ། །རིམ་བྱོན་ཡབ་སྲས་བརྒྱུད་པ་དང་། །དོན་བརྒྱུད་སྙིང་པོའི་བསྟན་སྲོག་འཛིན། །རྒྱལ་བ་འབྲི་འབྲུག་འབམས་རོམ་པ། །མར་མི་དགས་པོ་བརྒྱུད་པར་བཅས། །མོས་གུས་གདུང་བས་གསོལ་བ་འདེབས། །མཁའ་མཉམ་འགྲོ་བ་ཐམས་ཅད་ཀྱིས། །ཕྱག་རྒྱ་ཆེན་པོའི་དོན་རྟོགས་ནས། །རྫོགས་པ་ཆེན་པོ་མངོན་གྱུར་ཤོག །ཅེས་གསོལ་བ་བཏབ། །ན་མོ་གུ་རུ་དང་རྗེ་བླ་མ་དམ་པའི་ཞབས་ལ་འདུད། །བདག་རྒྱལ་དབང་པདྨའི་བྱིན་རླབས་མཐུས། །གཉིད་འོད་གསལ་འདྲེས་པའི་སྣང་ངོ་ལ། །ཡུལ་མདོ་ཁམས་བར་མར་སྦས་པའི་གནས། །ཆམ་ན་བུན་རྫོང་ཞེས་ཁྱད་འཕགས་གནས། །རྒྱུ་རྡོ་རྗེའི་བྲག་གིས་རི་བོ་ལ། །ཕྱི་སྐུ་གཟུགས་ཡིག་འབྲུ་རང་བྱོན་བརྒྱན། །བར་ཟབ་མོའི་གཏེར་གྱིས་ཕྱུར་བུར་གཏམས། ། ནང་ཡེ་ཤེས་ལྷ་ཡི་གཞལ་ཡས་ཁང་། །རྗེ་རིག་འཛིན་པདྨ་བཛྲ་ཡིས། །ཐུགས་ཡང་སྙིང་ཧཱུྃ་བསྒྲུབ་མཛད་པའི་གནས། །བཀའ་བརྒྱད་ཀྱིས་མ་མོ་རྦོད་གཏོང་གནས། །ཡང་གསང་དུ་རྡོ་རྗེ་ཕག་མོའི་གནས། །སྟེང་བླ་མ་ཆོས་སྐུའི་ཞིང་ཁམས་ལ། །བར་དག་པ་ལོངས་སྐུའི་ཞིང་ཁམས་ཡིན། །འོག་ས་སྤྱོད་སྤྲུལ་སྐུའི་ཞིང་ཁམས་ཡིན། །འདི་སྐུ་གསུམ་མངོན་གྱུར་ཞིང་ཁམས་ཡིན། །སངས་རྒྱས་སྐུ་མཆོག་འཇམ་དཔལ་གནས། །གསུང་མཆོག་ཏུ་སྤྱན་རས་གཟིགས་ཀྱི་གནས། །ཐུག་མཆོག་ལྟར་ཕྱག་ན་རྡོ་རྗེའི་གནས། །ཕྲིན་ལས་སུ་རྡོ་རྗེ་ཕུར་པའི་གནས། །ཡོན་ཏན་ཏུ་མཁའ་འགྲོ་ཡང་གསང་གནས། །སྐུ་ལྔ་ཡི་རྒྱལ་བ་རིགས་ལྔའི་གནས། །ཞིང་ཁམས་ལྟར་རང་བཞིན་ལྷུན་གྱིས་གྲུབ། །དོན་ཆོས་སྐུ་ཐིག་ལེ་ཉག་གཅིག་གནས། །གནས་འདི་ཡི་ཡོན་ཏན་བརྗོད་ལས་འདས། །སྔོན་གཏེར་ཆེན་གྲུབ་ཐོབ་གོང་མ་ཡིས། །བསྐོར་ཚད་དང་ཡོན་ཏན་སྔགས་བརྗོད་པ། །མཛད་པ་དེ་བསླུ་མེད་བདེན་ཚིག་ལགས། །རྗེ་པད་འབྱུང་ཀྱིས་ལུང་བསྟན་མཛད་པ་ལས། །བདག་རྨོངས་པས་ཚོད་རྫོས་འོས་མེད་ཀྱང་། །ལས་སྐལ་པར་ལྡན་པས་ཡང་ཡང་བསྐུལ། །དེ་ཕྱིར་དུ་པད་འབྱུང་ཡབ་ཡུམ་དང་། །རྗེ་བླ་མར་གསོལ་བ་བཏབ་མཐུས་ལས། །མ་མཚོ་རྒྱལ་ལུང་བསྟན་འདི་འདྲ་བྱུང་། གནས་ཟངས་མདོག་དཔལ་རི་དང་གཉིས་སུ་མེད༔ གནས་འདི་ལ་ཚོགས་འཁོར་སུས་བསྐོར་བ༔ ཚེ་འདི་ལ་ཚེ་རིང་བདེ་སྐྱིད་ལྡན༔ དུས་འཕོས་ཚེ་བདེ་ཆེན་ཞིང་དུ་འདྲེན༔ གནས་འདི་ལ་ལུས་ངག་ཡིད་གསུམ་གྱིས༔ ཚུལ་བཞིན་དུ་དགེ་བའི་སེམས་ལྡན་པས༔ ལན་གསུམ་དུ་བསྐོར་བ་བགྱིས་པ་ནི༔ དུས་ཉ་སྟོང་བརྒྱད་གསུམ་དག་ལ་ནི༔ རང་མ་ཎི་བཛྲ་གང་བཟླས་པ༔ ཡིད་ཐེ་ཚོམ་མི་དགོས་དུང་ཕྱུར་ཡོད༔ དེ་བཞིན་དུ་མཆོག་དམན་སུས་བསྐོར་བ༔ ལན་བདུན་ལ་དུང་ཕྱུར་ངེས་པར་ཡོད༔ དུས་སྙིགས་མའི་སེམས་ཅན་གནས་ཀྱིས་འདྲེན༔ དོན་མ་ནོར་ཐར་པའི་ལམ་མཆོག་ཡིན༔ ལས་སྐལ་བར་ལྡན་པའི་ཐུགས་ལ་ཞོག༔ ལོ་སྤྲེལ་ལོ་གནམ་ཤར་དུས་ཆེན་ལ༔ གནས་སྤྱི་འབྱམས་གཙོར་བྱས་འདི་ཉིད་ལ༔ འཛམ་གླིང་གི་གནས་གསུམ་བསྐོར་དང་མཚུངས༔ བུ་ལྷ་སྲས་ཀྱིས་འདི་ལྟར་སྨྲོས་ཤིག་གསུངས༔ སྡིག་མི་དགེའི་ལས་བྱས་ཉེས་པ་དེ༔ ས་གཞན་ལས་བརྒྱ་འགྱུར་ཡོད་པས་སྤོང༔ ལས་དཀར་པོའི་དགེ་བཅུ་བསྒྲུབ་པ་ཡང༔ ས་འདི་ལ་ཁྲི་དང་འབུམ་འགྱུར་ཡོད་པས་བསྒྲུབ༔ ས་མ་ཡ་རྒྱ་རྒྱ་རྒྱ༔ ཞེས་གསུངས་ནས་བདག་གིས་སྙིང་ཁར་ཐིམ་པའི་ཉམས་ཤར་ནས། ལས་འབྲས་བཟང་པོའི་སྐལ་པར་ལྡན་པ། པདྨ་དབང་ཕྱུག་གིས་སྔ་ནས་བསྐུལ་མཛད་པ་དང་། འཕྲལ་དུ་གནས་འཛིན་གྱིས་རིམ་གྲོ་ཚོགས་བརྒྱ་བགྱིས་སྐབས། ཀརྨ་ཉི་མས་འབྲུ་ཡིས་མཎྜལ་བཅས་བསྐུལ་བས། གནས་དེར་སྐྱེ་སྔོན་བསྒྲུབ་པའི་སྐྱེ་བ་ཕྱི་མ། རིག་འཛིན་ཆོས་རྒྱལ་རྡོ་རྗེས་ས་ལུག་ཟླ༡༡པའི་ཚེས༡༢ལ་བྲིས་པས་འབྲེལ་ཐོག་ཨུ་རྒྱན་མཁའ་སྤྱོད་ཀྱིས་ཞིང་དུ་ཚོམ་བུ་འབུམ་དང་བཅས་ནས་སངས་རྒྱས་པར་གྱུར་ཅིག །

མཆན། གནས་ཡིག་འདི་ནི་རིག་འཛིན་ཆོས་རྒྱལ་རྡོ་རྗེའི་བཀའ་འབུམ་ལས་ཞལ་བཤུས་པའོ། །

༄༅། །གུ་རུའི་སྒྲུབ་གནས་ཁམས་ཀྱི་ན་བུན་རྫོང་གི་གནས་ཡིག་ཐོས་པ་རང་གྲོལ་ཞེས་བྱ་བ་བཞུགས་སོ། །ན་མོ་གུ་རུ་པདྨ་སིདྡྷི་ཧཱུྃ་ཧྲཱིཿཧྲཱིཿདུས་གསུམ་རྒྱལ་ཀུན་དབང་ཕྱུག་རིགས་ཀྱི་བདག༔ སྣང་སྲིད་ཟིལ་གནོན་གདུག་པ་ཚར་གཅོད་པ༔ གཞོམ་ཞིག་མི་མངའ་ཀུན་བཟང་ཐོད་ཕྲེང་རྩལ༔ མཚོ་པད་ལས་འཁྲུངས་ཀུན་བཟང་པདྨར་འདུད༔ རྒྱལ་བ་ཐུབ་པ་ཆེན་པོའི་ཞལ་སྔ་ནས༔ འདི་ནས་བྱང་གི་ཕྱོགས་རོལ་ནས༔ རི་བོ་ནག་པོ་བདུན་འདས་པར༔ པདྨ་འབྱུང་གནས་ཞེས་བྱ་བས༔ ང་ཡི་བཀའ་གསང་བསྟན་པ་དེ་རུ་འཕེལ༔ གཞན་ཡང་མདོ་རྒྱུད་ཐམས་ཅད་ནས༔ རྒྱལ་བ་རྣམས་ཀྱི་ལུང་བསྟན་བཞིན༔ རིག་འཛིན་པདྨ་འབྱུང་གནས་ཞེས་བྱ་བས༔ བོད་ཁམས་ཀུན་ཏུ་ཉི་ཟླ་དང་ནོར་བུ་ལྟར་གྲགས༔ དེ་ཉིད་སྐུ་རྗེ་ཁྲི་སྲོང་ལྡེའུ་བཙན་གྱིས༔ བོད་ཡུལ་ཁ་བའི་ལྗོངས་འདིར་སྤྱན་དྲངས་ནས༔ ལྷ་སྲིན་དྲེགས་ཚོགས་ཐམས་ཅད་ཚར་གཅོད་ཅིང༔ གངས་ཅན་རི་བྲག་ཐམས་ཅད་ཀུན༔ བསྒྲུབ་པའི་གནས་བྱིན་གཏེར་ཁ་དཔག་མེད་སྦས༔ ཆེད་དུ་གངས་ཅན་ཉེར་ལྔ་ཆུ་བཞི་དང༔ དྲག་པོའི་མཚོ་བཞི་ཡང་དབེན་ཆེན་པོ་བརྒྱད༔ ཕུག་བཞི་རྫོངས་བརྒྱད་གནས་མཆོག་གྲངས་མེད་ལས༔ ཁྱད་པར་འཕགས་པའི་སྒྲུབ་གནས་ན་བུན་རྫོངས༔ གནས་མཆོག་འདི་རུ་པད་འབྱུང་ཟླ་གསུམ་བཞུགས༔ དྲག་པོ་ཧཱུྃ་གི་སྒྲུབ་པ་མཛད༔ ལྷ་སྲིན་དྲེགས་པའི་ཚོགས་རྣམས་དམ་ལ་བཏགས༔ ཆེད་དུ་ཀླུ་བཙན་དམར་པོ་སྲོག་འཕྲོག་ཉིད༔ དམ་བཞག་གནས་གཏེར་འདིའི་སྲུང་མར་བཅོལ༔ གསང་མཚན་རྡོ་རྗེ་ཡེ་ཤེས་རྩལ་དུ་བཏགས༔ སྐལ་ལྡན་རྣམས་ཀྱིས་དངོས་གྲུབ་རྣམ་གཉིས་ལེན་པའི་གནས༔ སྐལ་མེད་དམ་ཉམས་རྣམས་ཀྱི་ཚེ་སྲོག་བསྟུང་བའི་གནས༔ ཕྱག་སྐོར་འབྲེལ་པས་སྡིག་སྒྲིབ་དག་པའི་གནས༔ ཚོགས་འཁོར་བསྐོར་བས་རིག་འཛིན་ས་ལ་བཀོད་པའི་གནས༔ གནས་འབྲེལ་རེག་པས་བདེ་ཆེན་ཐར་གླིང་བགྲོད་པའི་གནས༔ དེ་ནས་སྒྲུབ་ཕུག་གཡས་ཀྱི་སྒོ་ངོས་ལ༔ རྗེ་མ་ཧཱ་གུ་རུའི་ཕྱག་མཁར་གྱི་རྗེས་ལ་སྐྱེ་མེད་ཀྱི་ཡི་གེ་ཨ་དང༔ སྣ་ནམ་རྡོ་རྗེ་འཇོམས་ཀྱི་ཞབས་རྗེས་དང༔ གྲུབ་ཆེན་དྲན་པ་ནམ་མཁའི་ཞབས་རྗེས་དང༔ གྲུབ་ཆེན་འབྲོག་བན་ལོ་ཙཱའི་ཞབས་རྗེས་དང༔ དེའི་གོང་ཨོ་རྒྱན་རིན་པོ་ཆེའི་ཞབས་རྗེས་དང༔ རྟ་ཕག་ཡབ་ཡུམ་གཉིས་ཀྱི་སྐུ་དང༔ གསང་ལམ་དུ་ཡི་གེ་ཨཱོཾ་རྣམས་གསལ་བར་བཞུགས༔ དེའི་གོང་དུ་མཁའ་འགྲོ་ཡེ་ཤེས་འཚོ་རྒྱལ་གྱི་ཞབས་རྗེས་དང༔ ལོ་ཆེན་བཻ་རོ་ཙ་ནའི་ཞབས་རྗེས་དང༔ གྲུབ་ཆེན་ནམ་མཁའི་སྙིང་པོའི་ཞབས་རྗེས་དང༔ དེའི་གོང་དུ་རིག་འཛིན་པདྨ་འབྱུང་གནས་ཀྱི་ཞབས་གཡས་པའི་རྗེས་རྣམས་གསལ་བར་བཞུགས༔ དེ་ནས་གནམ་ཕུག་གི་བྲག་གདོང་ལ༔ རྗེ་མ་ཧཱ་གུ་རུའི་ཞབས་རྗེས་དང༔ གཏེར་གྱི་རྒྱ་ནོར་བུ་དགའ་བ་འཁྱིལ་པ་དང༔ ལོངས་སྐུ་རྡོ་རྗེ་ཕག་མོའི་སྐུ་རྣམས་གསལ་བར་བཞུགས༔ དེ་འོག་ཏུ་ཨོ་རྒྱན་རིན་པོ་ཆེའི་ཕྱག་གཡས་པའི་རྗེས་དང༔ འཁར་རྒྱལ་བ་དཔལ་གྱི་ཞབས་རྗེས་རྣམས་གསལ་བར་བཞུགས༔ དེ་ནས་སྒྲུབ་ཕུག་གི་གོང་དུ༔ གྲུབ་ཆེན་སྐ་བ་དཔལ་བརྩེགས་ཀྱི་ཞབས་རྗེས་དང༔ ལྡན་མ་རྩེ་མང་གི་ཞབས་རྗེས་རྣམས་བཞུགས༔ དེའི་གོང་དུ་སྲིན་མོ་བསྒྲལ་བའི་ཁོག་པ་རུ༔ ཨོ་རྒྱན་གྱི་ཕྱག་མཚན་གྱི་རྗེས་གསལ་བར་ཡོད་པས༔ དེ་ལ་གསོལ་བ་བཏབ་ན༔ སེམས་ཅན་བུ་འདོད་པ་རྣམས་ལ་བུ་ཐོབ༔ ནོར་འདོད་པ་རྣམས་ལ་ནོར་ཐོབ༔ ཡིད་ལ་རེ་བའི་འདོད་དགུ་མ་ལུས་པ་འབྱུང་བར་འགྱུར་རོ༔ དེའི་འོག་ཏུ་སྲིན་པོ་བསྒྲལ་བའི་ཁོག་པ་ལ༔ མ་དང་མཁའ་འགྲོ་རིག་འཛིན་རྣམས་གར་འཁྲབ་པའི་རྗེས་དང༔ ཨོ་རྒྱན་རིན་པོ་ཆེའི་ཆིབས་པ་རྟ་མཆོག་ངང་པ་གསེར་ལྡན་གྱི་རྗེས་དང༔ ཕུག་མདུན་དུ་ཕ་བོང་གི་ངོས་ལ༔ དུང་དཀར་རང་བྱོན་དང༔ གཞན་ཡང་གྲུབ་ཆེན་རྗེ་འབངས་ཉེར་ལྔའི་ཞབས་རྗེས་གསལ་བར་བཞུགས༔ ཁྱད་པར་དུ་འཕགས་པའི་གནས་མཆོག་འདི༔ ཕྱི་ལྟར་རིགས་གསུམ་མགོན་པོའི་གནས་མཆོག་ཡིན༔ ནང་ལྟར་འཕགས་མཆོག་ཐུགས་རྗེ་ཆེན་པོའི་གནས་མཆོག་ཡིན༔ གསང་བ་ཞི་ཁྲོ་དམ་པ་རིགས་བརྒྱའི་ཕོ་བྲང་ཡིན༔ ཞལ་གཟིགས་ནམ་མཁའི་སྐར་ཚོགས་འདྲ༔ སྲིན་པོའི་ཀླད་པས་བྲིས་པའི་ཡི་གེ་འབྲུ་དྲུག་དང༔ རིག་འཛིན་ཆེན་པོ་པདྨ་འབྱུང་གནས་ཀྱི༔ ཕྱག་མཛུབ་ཀྱིས་བྲིས་པའི་སྐུ་གསུང་ཐུགས་ཀྱི་སྙིང་པོ་ཡི་གེ་འབྲུ་གསུམ་པ་ལ་སོགས་ཡ་མཚན་གྱི་པྲ་རྟགས་དཔག་ཏུ་མེད་པ་རྣམས་བཞུགས༔ གནས་མཆོག་འདིར་བསྐོར་བ་བདུན་གཉིས་སུས་བསྐོར་བ༔ བཛྲ་གུ་རུའམ་ཡིག་དྲུག་དུང་ཕྱུར་འགྲོ་བ་ཐེ་ཚོམ་མེད༔ གནས་འདིར་མ་དད་དམ་ཉམས་ལོག་གཤེད་བདུད་རིགས་ཐམས་ཅད་ཀུན༔ སྲོག་རྩ་ཆོད་ལ་སྙིང་ཁྲག་མྱུར་དུ་ཕོས༔ གནས་འདིར་དད་པའི་གང་ཟག་སྐལ་ལྡན་ཀུན༔ ཚེ་གཅིག་ཉིད་ལ་རིག་འཛིན་མཆོག་འགྲུབ་ཤོག༔ ཅེས་གནས་ཡིག་མཐོང་བ་རང་གྲོལ་འདི༔ ཟོབ་དང་གཡོ་སྒྱུས་མ་གོས་པར༔ རིག་འཛིན་ཆེན་པོ་པདྨའི་ཐུགས་ཀྱི་འོད་ཟེར་ལས་སྤྲུལ་པ་ཁྲག་འཐུང་བདུད་འདུལ་རྡོ་རྗེས་བཀོད་པ༔ ཡི་གེའི་རིས་བྱེད་ཨོ་རྒྱན་རྒྱ་མཚོའོ༔ ས་ཕྱོགས་ཡུལ་རིས་རྒྱལ་ཁམས་འདི་དག་ཐམས་ཅད་དུ༔ བཀྲ་ཤིས་བདེ་ལེགས་དཔལ་འབྱོར་ཕུན་སུམ་ཚོགས་པར་ཤོག༔ སརྦ་མངྒལཾ༔ སྔོན་ཚེ་རིག་འཛིན་པདྨའི་བཀའ་བཞིན་དུ༔ དགེ་བསྙེན་ཆེན་པོ་ཡེ་ཤེས་རྩལ་ཁྱོད་ཀྱིས༔ བཀའ་དང་གནས་གཏེར་རྒྱུད་འཛིན་ཐམས་ཅད་སྲུངས་ཤིག་བཛྲ་ས་མ་ཡཱ༔ རྒྱ་རྒྱ་རྒྱ༔

མཆན།གནས་ཡིག་འདི་ནི་གཏེར་སྟོན་བདུད་འདུལ་རྡོ་རྗེའི་བཀའ་འབུམ་ལས་ཞལ་བཤུས་པའོ། །

༄༅། །འདིར་སྔོན་ཚེ་བཅོམ་ལྡན་འདས་མཉམ་མེད་ཤཱཀྱ་ཐུབ་པ། བདེ་མཆོག་ཡབ་ཡུམ། སྤྱན་རས་གཟིགས་དབང་རྣམས་ཀྱི་སྐུ་ཡི་འོད་ཟེར་ཕོག ཐུགས་ཀྱི་དགོངས་པ་གཏད་ནས་གནས་འདི་མཐོང་ཐོས་དྲན་རེག་ཏུ་གྱུར་པའི་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་ཞལ་གྱིས་བཞེས། དེ་ནས་སློབ་དཔོན་པདྨ། མནྡ་ར་བ། ཡེ་ཤེས་མཚོ་རྒྱལ། སངས་རྒྱས་ཡེ་ཤེས། ཕ་དམ་པ། བདུད་འདུལ་རྡོ་རྗེ། དྲུང་རྨ་སེ་བློ་གྲོས་རིན་ཆེན། མཆོག་གྱུར་གླིང་པ་རྣམས་ཀྱིས་ཡུན་རིང་དུ་སྒྲུབ་པ་མཛད་ཅིང་། ཟངས་མདོག་དཔལ་རིར་བྱིན་གྱིས་བརླབས་ཤིང་། གཞན་ཡང་ནམ་མཁའི་སྙིང་པོ་བཻ་རོ་ཙ་ན་ཡི། རྫུ་འཕྲུལ་ཕ་བོང་བརྩིགས་པའི་ཕུག་པ་རུ། པདྨ་བདག་གིས་ཧཱུྃ་སྒྲུབ་ཟླ་གསུམ་མཛད། རྗེ་འབངས་ཉེར་ལྔས་དེ་དང་འདྲ་བའི་སྒྲུབ་པ་མང་དུ་མཛད། ལྷོ་ཕྱོགས་བཻཌཱུརྱ་ཡི་སྒྲུབ་ཕུག་དུ། ཇོ་མོ་མཚོ་རྒྱལ་གྱིས་ཟླ་བ་དྲུག་ཏུ་སྒྲུབ་པ་མཛད། མི་ལ་རས་པས་ཀྱང་སྒྲུབ་པ་མང་དུ་མཛད། དེ་བཞིན་དུ་བླ་མ་དང་གྲུབ་ཐོབ། མཁའ་འགྲོ་སོགས་མང་པོས་སྒྲུབ་པ་མཛད་ཅིང་གནས་འདིར་སྤྱིར་སྐུ་གསུམ་གྱི་ཞིང་ཁམས་རབ་འབྱམས་སྒོས་བདེ་བ་ཅན། པོ་ཏ་ལ། ཟངས་མདོག་དཔལ་རི། དགའ་ལྡན་ལྷ་ཡུལ། གནས་ཉི་ཤུ་རྩ་བཞི། ཡུལ་ཆེན་སུམ་ཅུ་སོ་གཉིས། དུར་ཁྲོད་ཆེན་པོ་བརྒྱད། ཙ་རི། གངས་རི། ཁ་བ་དཀར་པོ། ལྷ་ས། བསམ་ཡས། ཁྲ་འབྲུག་སོགས་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་རྩ་རྣམས་དང་མཉམ་པར་ཞལ་གྱིས་བཞེས་པ་ཡིན་པས་ལུས་ངག་ཡིད་གསུམ་གྱི་སྒོ་ནས་ལུས་ཀྱིས་ཕྱག་དང་བསྐོར་བ། ངག་མ་ཎི་དང་སྐྱབས་འགྲོ། ཡིད་མོས་གུས་དང་དད་པ་དག་སྣང་། ཡིད་རྩེ་གཅིག་པོས་བྱས་ན་སངས་རྒྱས་པར་གསུངས་པ་ཡིན། གཞན་ཡང་ཤར་ཕྱོགས་རྡོ་རྗེ་བྲག་ལ། གུ་རུ་རིན་པོ་ཆེའི་ཞབས་རྗེས། གུ་རུ་རྡོ་རྗེ་གྲོ་ལོད་ཀྱིས་སྲིན་པོ་རལ་ནག་བཏུལ་བར་བྱོན་པའི་སྟག་མོའི་ཞབས་རྗེས་དང་། སྲིན་པོའི་ཀླད་པ་བྲག་ལ་བཏབ་པའི་མ་ཎི་དང་མཚོ་རྒྱལ་ཕྱག་གིས་བྲིས་པའི་མ་ཎི་བཅས་བཞུགས་ཡོད། ཤར་ལྷོ་གཡུ་འབྲུག་བྲག་ལ་གེ་སར་རྒྱལ་པོའི་ཆིབས་སྒ་འཛམ་གླིང་གཡས་བཞག་དང་། ཆིབས་པ་རྐྱང་སྐྱིད་གཏོད་ཕུར་བཅས་ཡོད། ལྷོ་ཕྱོགས་བཻཌཱུརྱ་ཡ་ལ། མཚོ་རྒྱལ་གྱི་སྒྲུབ་ཕུག གཡོན་ཕྱོགས་སུ་ཚེ་ཡི་བུམ་པ་ལ་དཔལ་གྱི་ཉི་ཟླས་བརྒྱན་པ་པ་ཊ་ལྟ་བུ། དེ་ཡི་གཡོན་ཕྱོགས་སུ་ཚེ་ཡི་ཆུ་བོ་བབས་པའི་རྗེས་བཅས་བཞུགས་ཡོད། ནུབ་ཕྱོགས་པདྨ་འོད་ལ་རྒྱལ་ཆེན་རྣམ་སྲས་ཀྱི་རང་བྱུང་གསལ་ལམ་མེར་བ་གཅིག་ཕ་ཝང་ཉ་ཡི་ཁོག་སྟོད་ལྟ་བུའི་སྟེང་ན། ཡེ་ཤེས་མཚོ་རྒྱལ་གྱི་ཞབས་རྗེས་ཡོད། ཞབས་རྗེས་དེ་ལ་རང་གིས་མོས་པས་བསྙེན་པ་བཏོན་ཞིང་བསྐོར་བ་གསུམ་བྱས་ན་བྱེ་བ་གཅིག་ཡོད་པར་གསུངས། བྱང་ཕྱོགས་ཨིནྡྲ་ནཱི་ལ། གུ་རུ་རིན་པོ་ཆེས་སྐུའི་རང་བྱོན་དང་། མ་མཁའ་འགྲོ་རྣམས་ཀྱི་བྲོ་ར་གཏེར་གྱི་སྒྲོམ་བུ་བཅས་ཡོད། མཛེ་དང་ཀླུ་ནད་ཞི་བའི་ཕྱིར་དུ། བྱ་ཁྱུང་གི་རང་བྱོན་གསུང་གྲག་པ་ལྟ་བུ་བཅས་ཡོད། ད་ནི་གནས་ཀྱི་ཕན་ཡོན་བརྗོད་པ་ནི། ཕྱག་བསྐོར་བྱས་ན་ངན་སོང་སྐྱེ་སྒོ་ཆོད། །བཀུར་སྟི་བྱས་ན་མཐོ་རིས་གནས་སུ་སྐྱེ། །ཚོགས་འཁོར་ལན་གཅིག་བསོད་ནམས་ཚོགས་ཆེན་རྫོགས། །ཚོགས་འཁོར་ལན་གཉིས་བྱས་ན་ལས་ངན་རྣམ་སྨིན་སྦྱོང་། །ཚོགས་འཁོར་ལན་གསུམ་ཨོ་རྒྱན་པདྨ་བདག དངོས་ཉམས་རྨི་ལམ་བརྡ་ཡི་ཚུལ་དུ་མཇལ། །ཚོགས་འཁོར་བརྒྱ་རྩས་མཁའ་སྤྱོད་གནས་སུ་སྐྱེ། །མཆོག་ཐོབ་འདོད་ན་རྩེ་གཅིག་སྒྲུབ་པས་འགྲུབ། །འབྲེལ་ཚད་དོན་ལྡན་གནས་མཆོག་ཨེ་མ་ཧོ། །ཞེས་དང་བསྐོར་བ་རེ་རེ་ལ་བཛྲ་དུང་ཕྱུར་བརྒྱ་ཡོད། ཕྱག་བསྐོར་རེ་བྱས་ན་བསྐོར་བ་བརྒྱ་དང་མཉམ་པར་སློབ་དཔོན་བཻ་རོ་ཙ་ན་ཡིས་གསུངས་པ་ལྟར། དུས་མཐའི་སེར་གཟུགས་ཚོགས་དྲུག་རང་གྲོལ་མིང་ཅན་གྱིས་བྲིས་པའོ། །གནས་འདི་མཐོང་ཐོས་དྲན་རེག་ཏུ་གྱུར་པའི་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པར་ཤོག དགེ་ལེགས་སྣང་བས་ས་གསུམ་ཁྱབ་གྱུར་ཅིག འགྲོ་དྲུག་སྡུག་བསྔལ་ཞི་ནས་པདྨ་འོད་འབར་གོ་འཕང་ཐོབ་པར་ཤོག སརྦ་མངྒ་ལཾ། ཚོགས་དྲུག་རང་གྲོལ་ནས།

མཆན། ༡.གནས་ཡིག་འདི་ནང་ཆེན་རྫོང་སྲིད་གྲོས་ཀྱིས་བསྒྲིགས་པའི་གནས་ཡིག་ཕྱོགས་བསྒྲིགས་ལས་ཞལ་བཤུས་པའོ། །༢.གནས་འདི་ནི་མཚོ་སྔོན་ཞིང་ཆེན་ཡུལ་ཤུལ་ཁུལ་ནང་ཆེན་རྫོང་ཤོར་མདའ་གྲོང་རྡལ་ཆམ་སྨད་གྲོང་གི་ཤར་ཕྱོགས་ཏེ། ནང་ཆེན་རྫོང་ནས་སྤྱི་ལེ༡༣ལྷག་གི་སར་ཡོད།

༄༅། །གསུང་གི་ཡོན་ཏན་གནས་མཆོག་བསྟན་པ་ནི༔ བོད་ཀྱི་མདོ་ཁམས་ལྷོ་ཞེས་བྱ་བ་རུ༔ སྤྲུལ་པའི་གནས་མཆོག་ནམ་མཁའ་མཛོད་ཅེས་བྱ༔ བྲག་རི་ཁྲ་བོ་གཡུ་འབྲུག་གནམ་འགྲོ་འདྲ༔ སྐལ་བཟང་སངས་རྒྱས་སྟོང་རྩ་རང་བྱོན་ཡོད༔ མཐའ་གྲུའི་ནོར་སྣ་བརྒྱ་དང་རྩ་བརྒྱད་སྦས༔ གསང་བའི་ཕུག་པ་མདའ་རྒྱང་གང་ཙམ་ཡོད༔ དེ་རུ་པདྨ་བདག་གིས་ལོ་བདུན་བསྒྲུབས༔ གསུང་གི་གཏེར་ལྔ་ཡོན་ཏན་གཏེར་ལྔ་སྦས༔ ཡུལ་གྱི་ཆགས་ཚུལ་དགའ་འཁྱིལ་ལྟ་བུ་ལ༔ དབུས་ཀྱི་ཆ་ལ་རྫུ་འཕྲུལ་ཞབས་རྗེས་ཡོད༔ གཡོན་གྱི་རི་ནི་དུང་སེང་འགྱིང་བ་འདྲ༔ དེ་རུ་གཉག་བན་སྤྲུལ（སངས་རྒྱས་ཡེལ་པ）པ་ཡེ་ཤེས་འབྱུང༔ （ཡེ་ཤེས་བརྩེགས）༔

༄༅། །གསུང་གི་ཡོན་ཏན་གནས་ནི་ཕར་ནང་རི་བོ་ཆེ་ཚུར་རི་ནང་ཆེན་ས་འབྲི་གུང་ཆོས་གྲགས་ཕེབས་ཁམས་ཀྱི་གླ་བ་རྐང་གཅིག་ཏུ་ངོས་འཛིན་མཛད་ཅིང་། ཡོངས་གྲགས་ལྷོ་ཡེལ་ཕུག་དང་ཉེ་བ་ཡེ་རྒྱལ་ནམ་མཁའ་མཛོད་ཅེས་མཛོད་ལྔ་སྒྲོམ་གསུམ་གྱི་ཟབ་གཏེར་ཆེན་པོ་བཞུགས་པ་ལས། གཏེར་ཆེན་ཉིད་ནས་ཀྱང་གཏེར་ཁ་དུ་མ་ཞིག་སྤྱན་འདྲེན་པར་མཛད། ཆགས་མེད་རིན་པོ་ཆེའི་གནས་ཡིག་ཀྱང་ཡོད། དེ་རུ་གཉག་བན་གྱི་སྤྲུལ་པ་ཡེ་ཤེས་འབྱུང་གསུངས་པ་ནི་ཡེལ་པ་ཡེ་ཤེས་བརྩེགས་པའི་གདན་སའི་གཙོ་བོ་ཉིད་ཡིན་པས་སོ། །

༄༅། །མདོ་ཁམས་གནས་ཆེན་ཉེར་ལྔའི་ནང་ཚན་ཡེ་རྒྱལ་ནམ་མཁའ་མཛོད་འདི་ཉིད་ནི་གསུང་གི་ཡོན་ཏན་གྱི་གནས་མཆོག་སྟེ། སངས་རྒྱས་གཉིས་པ་དཔལ་ཨོ་རྒྱན་ཆོས་ཀྱི་རྒྱལ་པོས་དང་པོར་ཞབས་ཀྱི་བཅགས་ཤིང་། ལྷ་སྲིན་དམ་ལ་བཏགས། ཡང་རྗེ་བཙུན་པདྨ་ཐོད་ཕྲེང་རྩལ། རྗེ་འབངས་ཉེར་ལྔ་སྟེ་འདུས་པ་ཕྱི་མ་དང་བཅས་པས་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ཞལ་ཕྱེས་ཏེ། སྨིན་བྱེད་ཀྱི་དབང་བསྐུར། གྲོལ་བྱེད་ཀྱི་གདམས་པ་གནང་། ཕྱོགས་བཞིར་རྗེ་འབངས་ཉེར་ལྔ་དང་བཅས་པས་རྩེ་གཅིག་ལོ་བདུན་དུ་སྒྲུབ་པ་མཛད་པ་ལས་མངའ་བདག་རྒྱལ་པོས་རི་བྲག་ཟངས་ཐལ་སོགས་གྲུབ་པའི་མཚན་མ་བསམ་གྱིས་མི་ཁྱབ་པ་བསྟན། དེ་ཡང་ཨོ་རྒྱན་བཀའ་ཐང་དཔག་བསམ་ལྗོན་ཤིང་ལས། བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང་། །ལྷ་སྲས་ཆེ་བ་མུ་ནེ་བཙན་པོ་དང་། །ལྷ་སྲས་འབྲིང་བ་མུ་རུབ་བཙན་པོ་དང་། །ལྷ་སྲས་ཆུང་བ་མུ་ཏིག་བཙན་པོ་དང་། །རྒྱལ་བ་མཆོག་དབྱངས་ལང་འགྲོ་ལོ་ཙཱ་དང་། །གཉགས་ཆེན་ཛྙཱ་ན་ཀུ་མཱ་ར་སོགས་དང་། །བཻ་རོ་ཙཱ་ན་ཤུད་བུ་དཔལ་སེང་དང་། །ཏིང་འཛིན་བཟང་པོ་རྡོ་རྗེ་བདུད་འཇོམས་དང་། །དཔལ་གྱི་དབང་ཕྱུག་འོ་བྲན་དབང་ཕྱུག་དང་། །ཨ་ཙར་ས་ལེ་ཤེལ་དཀར་རྡོ་རྗེ་མཚོ། །འབྲོག་བན་ལོ་ཙཱ་མཚོ་རྒྱལ་བྲན་གསུམ་དང་། །ལྷ་སྲས་གསུམ་གྱི་བཙུན་མོ་རྣམ་གསུམ་སོགས། །འཁོར་བཅས་ཁམས་ཀྱི་ནམ་མཁའ་མཛོད་དུ་བྱོན། །བཀའ་འདུས་ཆོས་ཀྱི་རྒྱ་མཚོ་ཞལ་ཕྱེས་ཏེ། །རྗེ་འབངས་རྣམས་ལ་སྨིན་བྱེད་དབང་བསྐུར་ཞིང་། །གྲོལ་བྱེད་མན་ངག་གནད་རྣམས་ལེགས་པར་བཀྲོལ། །འཁོར་བཅས་ལོ་བདུན་བར་དུ་རྩེ་གཅིག་བསྒྲུབས། །མངའ་བདག་རྒྱལ་པོས་རི་བྲག་ཟང་ཐལ་མཛད། །མུ་ནེ་བཙན་པོས་ལྷ་ཞལ་དངོས་སུ་གཟིགས། །མུ་རུབ་བཙན་པོས་བདེ་ཆེན་ཡེ་ཤེས་བརྙེས། །མུ་ཁྲི་བཙན་པོས་རང་སེམས་ངོ་བོ་མཐོང་། །བཻ་རོ་ཙ་ན་ནམ་མཁར་བྱ་ལྟར་ལྡིང། །རྒྱལ་བ་མཆོག་དབྱངས་སྐུ་ནི་མེ་དཔུང་བསྒྱུར། །ལང་འགྲོ་དཀོན་མཆོག་འོད་ཀྱི་ཕུང་པོར་གྱུར། །སངས་རྒྱས་ཡེ་ཤེས་ཀུན་འོད་ས་ལ་གཤེགས། །གཉགས་ཆེན་ཛྙཱ་ན་ཆོས་ཉིད་ཟད་སར་འཁྱོལ། །མཁར་ཆེན་མཚོ་རྒྱལ་བྲག་ལས་ཚེ་ཆུ་ཐོན། །ཨ་ཙར་ས་ལེས་ཕྱག་གིས་བྲག་རི་གཏོར། །འབྲོག་མི་དཔལ་གྱི་སྤྱན་གྱིས་ནགས་ཚལ་བསྲེགས། །འོ་བྲན་དབང་ཕྱུག་ཆུ་ལ་ཉ་ལྟར་ལྡིངས། །རྡོ་རྗེ་བདུད་འཇོམས་རླུང་ལྟར་ཐོགས་མེད་རྒྱུག །ཏིང་འཛིན་བཟང་པོས་རི་བྲག་ཟང་ཐལ་ཕུག། ཤེལ་དཀར་བཟའ་ཡིས་མ་མོ་བྲན་དུ་འཁོལ། །གཞན་ཡང་རྗེ་འབངས་རྣམས་ཀྱི་གྲུབ་རྟགས་མང་། །ཞེས་གསུངས་པ་ལྟར་རྗེས་ཤུལ་རྣམས་སོ་སོར་མཇལ་རྒྱུ་ཡོད་ཁར། དེ་ལྟར་ལུང་བསྟན་དུས་ལ་བབས་ཏེ་འགྲོ་མགོན་སངས་རྒྱས་ཡེལ་པས་གདན་ས་ཐོག་མ་མཛད་ནས་བགྲང་བྱ་བཅོ་བརྒྱད་ལ་བཞུགས། ཡེལ་བསྟན་ལོ་དྲུག་བརྒྱ་ལྷག་རིང་དར་རྒྱས་ཆེ་བར་བསྐྱངས། དེ་ནས་སྤྲུལ་པའི་གཏེར་ཆེན་མཆོག་གྱུར་གླིང་པས་མཛོད་ལྔ་དང་། སྒྲོམ་བདུན། སྐུ་ཚབ་རྣམ་གསུམ། ཟབ་པ་སྐོར་བདུན་གྱི་ཆ་ལག་ཐམས་ཅད་དང་ཁྱད་པར་རྩ་བའི་ཐུགས་སྒྲུབ་དགོངས་པ་ཀུན་འདུས། རྫོགས་ཆེན་གསེར་ཞུན་མ། རིགས་གསུམ་སྙིང་ཐིག བླ་མ་དངོས་གྲུབ་རྒྱ་མཚོ། བཀའ་འདུས་ཆོས་ཀྱི་རྒྱ་མཚོ། བསྟན་པ་སྲུང་བའི་སྐོར་བཞི། བོད་ཁམས་བདེ་ཐབས་ཀྱི་ཆོས་བཅུ་སོགས་ཟབ་ཆོས་གྲངས་ལས་འདས་པ་གཏེར་དུ་བཞེས། གནས་བརྟན་བཅུ་དྲུག་གི་གསོ་སྦྱོང་མཛད། ས་སོགས་དག་སྣང་མཐའ་ཡས་པ་གཟིགས་ཚུལ་ནི་གཏེར་གཞུང་ལས། ཁམས་ཕྱོགས་རི་བོ་དུང་སེང་འགྱིང༔ སྐལ་བཟང་སངས་རྒྱས་རང་བྱོན་གནས༔ ཞེས་དང་རྗེ་གཏེར་ཆེན་མཆོག་གི་གསུང་ལས། དང་པོ་ཡེ་མེད་སྟོང་པ་ཆོས་ཀྱི་དབྱིངས། །བར་དུ་རང་བྱུང་ཡེ་ཤེས་འོད་ལྔ་ལས། །སྐུ་གཉིས་ལྷུན་གྱིས་གྲུབ་པའི་ཞིང་ཁམས་ཤར། །དེ་ལས་མི་འབྱེད་འཇིག་རྟེན་ལྷོ་ཡི་ཕྱོགས། །འཛམ་གླིང་ཡུལ་གྲུ་དྲུག་གི་བོད་ཀྱི་ལྗོངས། །མདོ་ཁམས་ཟལ་མོ་སྒང་གི་དབུས་ཀྱི་ཆ། །དཔལ་གྱི་ལུང་པ་ཡིད་གཞུང་དགའ་འཁྱིལ་དབྱིབས། །རི་བོ་ཕྱི་ལྟར་སངས་རྒྱས་སྟོང་གི་སྐུ། །ནང་ལྟར་ཞི་ཁྲོ་དམ་པ་རིགས་མཆོག་བརྒྱ། །གསང་བ་ཧེ་རུ་ཀ་དཔལ་དྲུག་ཅུའི་གནས། ཞེས་གསུངས་པས། ལྷ་དེ་དག་གཞལ་ཡས་ཁང་རྟེན་དང་བརྟེན་པར་བཅས་པ་བཞུགས་ཡོད་ཁར། ཡེ་རྒྱལ་དབུ་རྩེ་མདུན་རྒྱབ་རྣམས་སུ་ཨོ་རྒྱན་རྗེ་འབངས་ཉེར་ལྔའི་སྒྲུབ་ཕུག་ཁ་བྱང་དང་བཅས་པ་དངོས་སུ་མཇལ་རྒྱུ་ཡོད། འགྲོ་མགོན་ཕག་གྲུ་རྡོ་རྗེ་རྒྱལ་པོ། སྟག་ལུང་པ་དང་སངས་རྒྱས་ཡེལ་པ་བཅས་ཀྱིས་ལུང་བསྟན་པའི་གནས། ནམ་རུ་དཀར་པོ་དུང་བརྒྱ་མ་ཞེས་གསུངས། རྗེ་གཏེར་ཆེན་མཆོག་ཡེ་རྒྱལ་གནས་སྐོར་ཕེབས་སྐབས་སངས་རྒྱས་གླིང་པ་དང་འབྲི་གུང་ཆོས་ཀྱི་གྲགས་པ་གཉིས་ཀྱི་སྐྱེ་བ་བཞེས་སྐབས་གནས་འདིར་ཕེབས་ཤིང་གནས་སྒོ་འབྱེད་མྱོང་བ་སྔོན་ལས་རྗེས་དྲན་དུ་གསུངས་པ་གཏེར་ཆེན་རྣམ་ཐར་དུ་གསལ་བ་ལྟར། རྗེ་དྲུང་བྱམས་པ་འབྱུང་གནས་དང་དཔའ་བོ་མཆོག་སྤྲུལ་རིན་པོ་ཆེ་སོགས་གཟིགས་སྣང་གཅིག་པར་གནས་འདི་ནི་རྔ་ཡབ་ཟངས་མདོག་དཔལ་གྱི་རི་བོ་དང་ཨོ་རྒྱན་རིན་པོ་ཆེ་སྟོན་འཁོར་གྱི་ཚོམ་བུ་གྲངས་ལས་འདས་པ་བཞུགས་ཚུལ་གཟིགས། འཇམ་དབྱངས་ཆོས་ཀྱི་བློ་གྲོས་མཆོག ཁ་བ་སྟེང་དུ་ཕེབས་ནས་ལྷ་སྲིན་དམ་བཏགས་པ་དང་གནས་ཆེན་བྱིན་འབེབས་མཛད་སྐབས་ཡེ་རྒྱལ་རྩེ་མོར་འཇའ་འོད་གྱི་ཀློང་ནས་གུ་རུ་ཡབ་ཡུམ་དཔའ་བོ་ཌཱཀྐིའི་འཁོར་གྱིས་བསྐོར་ཏེ་དྦྷ་ཡི་ལུང་བསྟན་དང་བྱིན་འབེབས་སོགས་མཛད་པའི་དག་སྣང་ཞལ་གཟིགས་མང་པོ་བྱུང་ཚུལ་ཁྲོམ་ཚོགས་ཀུན་ལ་གསལ་བར་གསུངས། དེ་བཞིན་མཁན་པོ་རིན་ཆེན་དར་རྒྱས་ཀྱི་གསུང་ལས་གཡུ་འབར་རྒྱལ་ཀུན་གསང་བའི་བདག་པོའི་གནས། །ཞེས་དང་། ཛམ་དམར་བྲག་རི་བདེ་ཆེན་དབང་གི་གནས། །པདྨ་མཁའ་འགྲོ་ཛམ་དམར་རང་བྱོན་ཡོད། །ཕྲ་མས་གསང་བའི་གཏེར་ཁའང་ཡོད། །ཅེས་གསུངས། ཞེས་དང་། ཡར་རྫོང་ངོས་ཡངས་ཀླུ་ཡི་བ་གམ་དུ། །གནས་བརྟན་ཀླུ་སྡེ་འཁོར་བཅས་རྟག་ཏུ་བཞུགས། །མི་འགྱུར་ཨ་ཡིག་ཤིན་ཏུ་གསལ་བར་བཀྲ། །ལྷ་སྐུ་ཕྱག་མཚན་རང་བྱོན་མང་དུ་ཡོད། །ཅེས་དང་།མར་རྫོང་བོད་ཀྱི་རི་བོ་རྩེ་ལྔ་རུ། །འཇམ་དཔལ་དབྱངས་དང་བི་མ་མི་ཏྲ་བཞུགས། །གངས་རྒྱལ་གངས་རིའི་གནས་ལག་སྤང་ངོས་སུ། །ཚེ་བུམ་ནོར་བུའི་མཚན་པའི་རང་བྱོན་གསལ། །ཞེས་དང་། དབལ་གནམ་རྡོ་རྗེ་གཞོན་ནུའི་གནས་མཆོག་དངོས། །རྗེ་འབངས་ཉེར་ལྔ་ཡོད་གསུངས་ཕལ་ཆེར་གསལ། །ཞེས་དང་དབུ་བྲག་མཚོ་ཡི་གནམ་ལྕགས་འབར་བའི་བྲག །ཀོ་ཀ་ཐང་དམར་རྒྱ་མཚོའི་དོ་ཡིན་པས། །ཅེས་དང་། དྲེད་མོང་རོང་དུ་མཁའ་འགྲོའི་གསང་དཀྱིལ་ཡོད། །གནས་ཀྱི་སྲུང་མ་དུར་ཁྲོད་མ་མོ་གནས། །གནས་དེའི་ནུབ་ཕྱོགས་ཁ་བ་སྟེང་ཞེས་པ། །ལྕི་ཡི་གད་པ་དམར་པོ་ཞེས་སུ་གྲགས། །ཞེས་བསམ་ཡས་ཀྱི་གནས་ཚབ་དང་། གསེར་ཟོ་ནི་ཧས་པོ་རི་དང་སྒོ་བ་ནི་མཆིམས་ཕུ། ཡེ་རྒྱལ་ནི་ཤེལ་བྲག་ཚེ་རྒྱལ་བྲག་ནས་ཟབ་གཏེར་ངོ་མཚར་བཞེས། ཚེ་རྟ་ཟུང་འབྲེལ་གསུང་གི་གནས་ཡིན་གསུངས། ཞེས་དང་། གཡའ་མ་ལུང་གི་གནས་ཚབ་ཡིན་ཚུལ་དང་། ཡེ་རྒྱལ་མཐའ་བསྐོར་རྒྱས་པ་བྱས་ཙ་ན། །མཚམས་མེད་ལྔ་ཡི་སྡིག་ཀྱང་བྱང་བར་གསུངས། །ཞེས་སོགས་གནས་ཀྱི་ཕན་ཡོན་དང་བཤད་པ་མཐའ་ཡས་ཀྱང་མདོར་ན་གདུལ་བྱ་སྐལ་བ་ལྡན་པ་རྣམས་ཀྱིས་ཕྱག་དང་བསྐོར་བ་བྱས་ན་མངོན་མཐོ་ངེས་ལེགས་ཀྱི་ལམ་ལ་འགོད་པ་དང་། དད་པ་མོས་གུས་དག་སྣང་དང་ལྡན་པས་ཕྱག་དང་བསྐོར་བ་བསྙེན་སྒྲུབ་སོགས་དགེ་བའི་ལས་བྱས་ན་ནི་ཕན་ཡོན་བསམ་གྱིས་མི་ཁྱབ་སྟེ། དེ་ཡང་གནས་ཆེན་མདོ་བྱང་ལས། ད་ནི་གནས་ཀྱི་ཕན་ཡོན་བརྗོད་པ་ནི༔ ཕྱག་བསྐོར་བྱས་ཚད་ངན་སོང་སྐྱེ་སྒོ་ཆོད༔ བཀུར་སྟི་བྱས་ན་མཐོ་རིས་གནས་སུ་སྐྱེ༔ ཚོགས་འཁོར་གཅིག་གིས་བསོད་ནམས་ཚོགས་ཆེན་རྫོགས༔ ཚོགས་འཁོར་ལན་གཉིས་ལས་ཀྱི་རྣམ་སྨིན་སྦྱོང༔ ཚོགས་འཁོར་ལན་གསུམ་ཨོ་རྒྱན་པདྨ་བདག༔ དངོས་ཉམས་རྨི་ལམ་བརྡ་ཡི་ཚུལ་དུ་མཇལ༔ ཚོགས་འཁོར་བརྒྱ་རྩས་མཁའ་སྤྱོད་གནས་སུ་སྐྱེ༔ མཆོག་ཐོབ་འདོད་ན་རྩེ་གཅིག་སྒྲུབ་པས་འགྲུབ༔ འབྲེལ་ཚད་དོན་ལྡན་གནས་མཆོག་ཨེ་མ་ཧོ༔ ཞེས་ཨོ་རྒྱན་རིན་པོ་ཆེའི་རྡོ་རྗེའི་གསུང་གི་བདེན་ཚིག་གིས་ཡང་ཡང་བསྔགས་པ་ཡིན་པས་སྐྱེ་བོ་མཐོ་དམན་དང་། དྲག་ཞན་སྐྱ་སེར་ཕོ་མོ་རྒན་གཞོན་སུ་ཡིན་ལ་མ་ལྟོས་པར་སེམས་དུག་ལྔ་དང་། ལུང་མ་བསྟན་དུ་མ་སོང་བར་ཡང་དག་པའི་ལྟ་བ་དང་། ལས་རྒྱུ་འབྲས་ལ་ཡིད་ཆེས་པའི་དད་པ་དང་། གནས་ཀྱི་ཡོན་ཏན་ལ་དང་བའི་དད་པ་དང་། རང་རྒྱུད་ལ་བྱིན་བརླབས་ཐོབ་པར་འདོད་པའི་དད་པ་སྟེ་དད་པ་གསུམ་དང་མ་བྲལ་བ། མཁའ་ཁྱབ་ཀྱི་ཕ་མ་སེམས་ཅན་ལ་དམིགས་པའི་སེམས་བསྐྱེད། མོས་གུས་དྲག་པོས་རྒྱུད་སྦྱངས་ཏེ་བསྐོར་བ་ལན་གཅིག་བསྐོར་ན་ཁ་ནས་བཏོན་པའི་བཛྲ་དུང་ཕྱུར་བརྒྱ་རེའི་ཕན་ཡོན་དང་། ཀུན་སློང་དེ་དག་ཅུང་ཟད་ཙམ་རེ་ཡོད་པར་བསྐོར་ན་བསྐོར་བ་རེར་དུང་ཕྱུར་བཅུ་རེ། གང་ཡང་མེད་པའི་ལུང་མ་བསྟན་གྱི་ངང་ནས་བསྐོར་ན་བསྐོར་བ་རེར་བཛྲ་དུང་ཕྱུར་རེ་ཡི་ཕན་ཡོན་ཡོད་པ་ནི་ངེས་པ་ཁོ་ནའོ། །ལུག་ལོ་དང་འབྲུག་ལོར་གནས་འདུས་ཆེ་བ། ཁྱི་ལོ་དང་རྟ་ལོར་གནས་འདུས་ཆུང་བ། དེ་བཞིན་སངས་རྒྱས་ཀྱི་ཆོ་འཕྲུལ་དུས་ཆེན་དང་སངས་རྒྱས་པ་དང་མྱ་ངན་འདས་པ། ཆོས་འཁོར། ལྷུམས་ཞུགས་སོགས་དུས་ཆེན་རྣམས་དང་། གུ་རུའི་སྤྲེལ་ཟླ་ཚེས་བཅུ་ཁྲུམས་སྟོད་ཟླ་བ། ཆུ་སྟོད་ཟླ་བ། ཐ་སྐར་ཟླ་བ་། ཉི་འཛིན། ཟླ་འཛིན། ཉི་མ་ལྡོག་འགྱུར་སོགས་ལ་བརྒྱ་སྟོང་ཁྲི་འབུམ་བྱེ་བ་སོགས་ཀྱི་འགྱུར་ཁྱད་ཡོད་པ་ནི་ཚང་མས་ཐུགས་གསལ་ལྟར་རོ། །དེ་ལས་ལྡོག་ཏེ་གནས་ལ་ལོག་ལྟ་དང་། ངན་སྨྲས། གོང་གསལ་གྱི་རྒྱུ་མཚན་རྣམས་ལ་མི་བདེན་ཟེར་བའི་སྐུར་འདེབས། གནས་ཀྱི་ཤིང་ནགས་གཅོད་པ་དང་། འབུ་དང་རྫ་ཡུངས་བརྐོ་བ། མི་ཕྱུགས་སེམས་ཅན་དང་རི་དྭགས་ཆེ་ཕྲ་གསོད་པ་སོགས་མི་དགེ་བའི་ལས་ངན་བསགས་ན། ཚེ་འདིར་གནས་སྲུང་གི་ཆད་པས་ལོ་ཉེས་པ་དང་། མི་ཕྱུགས་ལ་ནད་ཡམས་རྒྱུན་མི་ཆད་པ་སོགས་མི་དགེ་བ་དང་བཀྲ་མི་ཤིས་པ་འབྱུང་བ་དང་ཕྱི་མ་ངན་སོང་གསུམ་སོགས་སྡུག་བསྔལ་དོ་ཟླ་མེད་པའི་གནས་སུ་བསྐལ་པ་འབུམ་ཕྲག་མང་པོར་གནས་དགོས་པ་ནི་བཟློག་མེད་ངེས་ཅན་ཡིན་པས་སྤང་བླང་གོ་མ་ནོར་བར་བདག་གཞན་ཕ་མ་སེམས་ཅན་ཐམས་ཅད་གཏན་བདེ་སངས་རྒྱས་ཀྱི་གོ་འཕང་ལ་སྦྱོར་ཐབས་ཤིག་ཅི་ནས་གལ་ཆེ་ཞེས་ཞུ་བ་ལན་བརྒྱར་འབུལ་བ་ལགས་ན་ཐུགས་མི་ཁྲེལ་བར་མཐོང་ཐོས་དོན་ལྡན་དུ་འགྱུར་བ་ཞིག་མཆོག་གསུམ་རྩ་གསུམ་ཆོས་སྐྱོང་བའི་སྲུང་མ་དང་བཅས་པས་བྱིན་གྱིས་བརླབ་ཏུ་གསོལ་ལོ། །ཞེས་པ་འདི་ཡང་གཏེར་ཆེན་དབོན་རྒྱུད་ལྷ་རིས་པ་འགྱུར་མེད་པདྨ་བདེ་ཆེན་ནས་གོང་མ་རྣམས་ཀྱི་གསུང་རྒྱུན་གང་ཤེས་གང་མཇལ་རྣམས་ཆབ་མ་ཆོབ་ཏུ་བསྒྲིགས་ནས་བྲིས་པའི་དགེ་བས་བདག་དང་བདག་འདྲའི་སྐྱེ་བོ་བྱིས་པའི་བློ་ཅན་རྣམས་ལ་དགེ་བསྐུལ་རྒྱ་ཆེན་པོ་འབྱུང་བར་སྨོན་ནོ། །

དགེ་བའི་ཕན་ཡོན་སྡིག་པའི་ཉེས་དམིགས་དང་། །དམྱལ་བའི་སྡུག་བསྔལ་ཚེ་ཚད་ལ་སོགས་པ། །ཐོས་ཀྱང་མི་བདེན་བཤད་ཚོད་ཡིན་བསམ་པ། །ཐར་མེད་ལས་ངན་རྒྱུ་རུ་མི་འགྱུར་ཤོག །རྒྱལ་ཁམས་འགྲིམས་ལ་འདྲ་ཞིག་ཡོད། །ལྟད་མོ་བལྟ་བའི་མཚར་འདོད་གཅིག །དད་པ་མ་སྐྱེས་གནས་མཇལ་གཉིས། །ཕན་ཡོན་མི་ཤེས་བསྐོར་བ་གསུམ། །ཟ་འདོད་བསྙད་ཚོལ་ཁྲམ་པ་བཞི། །བསམ་བློ་མ་བཏང་བསྐོར་རྒྱུག་ལྔ། ། གནས་བསྐོར་འདྲ་སྟེ་གནས་བསྐོར་མིན། །

མཆན། ༡.གནས་ཡིག་འདི་ནང་ཆེན་རྫོང་སྲིད་གྲོས་ཀྱིས་བསྒྲིགས་པའི་ནང་ཆེན་གནས་ཡིག་ཕྱོགས་བསྒྲིགས་ལས་ཞལ་བཤུས་པའོ། །

ན་མོ་གུ་རུ་པདྨ་ཀ་ར་ཡེ། དུས་གསུམ་རྒྱལ་བའི་མཁྱེན་བརྩེ་ནུས་པའི་དཔལ། །གཅིག་ཏུ་བསྡུས་པ་སངས་རྒྱས་པདྨ་འབྱུང་། །རྗེ་འབངས་ཉེར་ལྔ་འཁོར་ཚོགས་མ་ལུས་པ། །སྒྱུ་འཕྲུལ་རོལ་པར་བཅས་ལ་གུས་ཕྱག་འཚལ། །དཀྱིལ་འཁོར་ཀུན་གཙོ་སྐུ་གསུམ་ངོ་བོ་ཉིད། །དུས་གསུམ་རྒྱལ་བའི་ཕྲིན་ལས་ཧེ་རུ་ཀ །སྣང་སྲིད་ཟིལ་གནོན་ལོག་འདྲེན་བདུད་བགེགས་འདུལ། །འདྲེན་མཆོག་པདྨ་ཐོད་འཕྲེང་གིས་སྐྱོངས་ཤིག །དགེ་ལེགས་ཡོན་ཏན་མ་ལུས་འབྱུང་བའི་གནས། །མཆོག་གསུམ་བླ་མ་ལྷ་དང་ཌཱཀྐཱི་ཚོགས། །ཆོས་སྐྱོང་གཏེར་བདག་རྣམས་ལ་ཕྱག་བྱས་ནས། །གནས་ཀྱི་ཞལ་གཟིགས་ཞིབ་པར་བཀོད་པར་བྱ། །འདིར་སློབ་དཔོན་ཆེན་པོ་པདྨ་འབྱུང་གནས་ཀྱིས་ལོ་བདུན་སྒྲུབ་གནས་ཡེ་རྒྱལ་ནམ་མཁའ་མཛོད་ཀྱི་ངོ་མཚར་གནས་བཤད་སྒྲོ་སྐུར་དང་བྲལ་བའི་སྒོ་ནས་ཇི་མ་ཇི་བཞིན་འགོད་པར་བྱ་བ་ནི། །དང་པོ་ལུང་གིས་ཟིན་ཚུལ་དང་གནས་ཀྱི་ཆེ་བ་དག་སྣང་སྐོར་བསྟན་པ། གཉིས་པ་གནས་ལ་ཕྱག་བསྐོར་བགྱིས་པའི་ཕན་ཡོན་བསྟན་པ་གཉིས་ལས། དང་པོ་འདུལ་བའི་ལུང་ལས་བཅོམ་ལྡན་འདས་ཤཱཀྱ་ཐུབ་པས་བཀའ་བསྩལ་པ། དགེ་སློང་དག་བྱང་ཕྱོགས་གངས་རིའི་ཁྲོད་ན་ས་རྡོ་དང་བེམ་པོས་ཀྱང་སེམས་ཅན་གྱི་དོན་བྱེད་པར་ཡོད་དོ། །ཞེས་གསུངས་པ་དང་། ཡང་ལུང་བསྟན་ཆེན་པོ་བཀའ་བརྒྱ་མ་ལས། ལ་ལར་སངས་རྒྱས་རྣམས་ཀྱི་སྤྲུལ་པ་ནི༔ ས་རྡོ་རི་བྲག་ལམ་འཕྲང་ལ་སོགས་སུ༔ སྐུ་གསུང་ཐུགས་ཀྱི་སྤྲུལ་པ་རང་བྱུང་འབྱོན༔ མཐོང་ཐོས་དང་གང་འབྲེལ་ངན་སོང་མེད༔ ཕྱོགས་ནི་མ་ངེས་ཕྱོགས་མཚམས་དབུས་ལ་སོགས༔ ཉེ་རིང་མེད་ཕྱིར་ཀུན་ཏུ་འབྱོན་པར་འགྱུར༔ དེ་བཞིན་དུས་ལ་མ་ངེས་ནམ་ཡང་འབྱོན༔ ཡུན་ལ་ཚད་བཟུང་མེད་དེ་འཁོར་མཐའི་བར༔ ཞེས་དང་། དེ་བཞིན་གནས་དང་གནས་ཕྲན་ལ་སོགས་དང༔ ཡུལ་དང་ཡུལ་འདྲ་སྦས་པའི་ཡུལ་རྣམས་སུ༔ བསྒྲུབ་པ་བྱས་པའི་ཡོན་ཏན་བསམ་མི་ཁྱབ༔ ཕར་ཆེར་གནས་སུ་ལོ་གཅིག་སྒྲུབ་པ་བས༔ དེ་དག་རྣམས་སུ་ཟླ་གཅིག་འགྲུབ་ཐག་ཉེ༔ དེ་དོན་ཤེས་པར་མཛོད་ཅིག་རྗེས་འཇུག་རྣམས༔ ཞེས་གསུངས་པ་ལྟར།

དེ་ལྟར་ཨོ་རྒྱན་ཆེན་པོས་བྱིན་གྱིས་བརླབས་པའི། ངོ་མཚར་གནས་ཆེན་ཉེར་ལྔ་ལས། གསུང་གི་ཡོན་ཏན་གནས་མཆོག་ནམ་མཁའ་མཛོད་འདིར། ཨོ་རྒྱན་གྱི་སློབ་དཔོན་པདྨ་འབྱུང་གནས་ཀྱི་ལུང་བསྟན་མི་འགྱུར་རྡོ་རྗེའི་སྒྲ་དབྱངས་ལས། གསུང་གི་ཡོན་ཏན་གནས་མཆོག་བསྟན་པ་ནི༔ བོད་ཀྱི་མདོ་ཁམས་ལྷོ་ཞེས་བྱ་བ་རུ༔ སྤྲུལ་པའི་གནས་མཆོག་ནམ་མཁའ་མཛོད་ཅེས་བྱ༔ བྲག་རི་ཁྲ་བོ་གཡུ་འབྲུག་གནམ་འགྲོ་འདྲ༔ བསྐལ་བཟང་སངས་རྒྱས་སྟོང་རྩ་རང་བྱོན་ཡོད༔ མཐའ་གྲུའི་ནོར་སྣ་བརྒྱ་དང་རྩ་བརྒྱད་སྦས༔ གསང་བའི་ཕུག་པ་མདའ་རྒྱང་གང་ཙམ་ཡོད༔ དེ་རུ་པདྨ་བདག་གིས་ལོ་བདུན་བསྒྲུབ༔ ཞེས་ལུང་དོན་དང་མཐུན་པར་མཆོག་གླིང་གཏེར་མ་དཔག་བསམ་ལྗོན་ཤིང་ལས། བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་དང༔ ལྷ་སྲས་ཆེ་བ་མུ་ནེ་བཙན་པོ་དང༔ ལྷ་སྲས་འབྲིང་བ་མུ་རུབ་བཙན་པོ་དང༔ ལྷ་སྲས་ཆུང་བ་མུ་ཏིག་བཙན་པོ་དང༔ རྒྱལ་བ་མཆོག་དབྱངས་ལང་གྲོ་ལོ་ཙཱ་དང༔ གཉགས་ཆེན་ཛྙཱ་ན་ཀུ་མ་ར་སོགས་དང༔ བཻ་རོ་ཙཱ་ན་ཤུད་བུ་དཔལ་སེང་དང༔ ཏིང་འཛིན་བཟང་པོ་རྡོ་རྗེ་བདུད་འཇོམས་དང༔ དཔལ་གྱི་དབང་ཕྱུག་འོ་བྲན་དབང་ཕྱུག་དང༔ ཨ་ཙར་ས་ལེ་ཤེལ་དཀར་རྡོ་རྗེ་མཚོ༔ འབྲོག་བན་ལོ་ཙཱ་མཚོ་རྒྱལ་བྲན་གསུམ་དང༔ ལྷ་སྲས་གསུམ་གྱི་བཙུན་མོ་རྣམས་གསུམ་སོགས༔ འཁོར་བཅས་ཁམས་ཀྱི་ནམ་མཁའ་མཛོད་དུ་བྱོན༔ བཀའ་འདུས་ཆོས་ཀྱི་རྒྱ་མཚོའི་ཞལ་ཕྱེས་ཏེ༔ རྗེ་འབངས་རྣམས་ལ་སྨིན་བྱེད་དབང་བསྐུལ་ཞིང༔ གྲོལ་བྱེད་མན་ངག་གནད་རྣམས་ལེགས་པར་བཀྲོལ༔ འཁོར་བཅས་ལོ་བདུན་བར་དུ་རྩེ་གཅིག་བསྒྲུབས༔ མངའ་བདག་རྒྱལ་པོས་རི་བྲག་ཟང་ཐལ་མཛད༔ མུ་ནེ་བཙན་པོས་ལྷ་ཞལ་དངོས་སུ་གཟིགས༔ མུ་རུབ་བཙན་པོས་བདེ་ཆེན་ཡེ་ཤེས་བརྙེས༔ མུ་ཁྲི་བཙན་པོས་རང་སེམས་ངོ་བོ་མཐོང༔ བཻ་རོ་ཙཱ་ན་ནམ་མཁར་བྱ་ལྟར་ལྡིང༔ རྒྱལ་བ་མཆོག་དབྱངས་སྐུ་ནི་མེ་དཔུང་བསྒྱུར༔ ལང་གྲོ་དཀོན་མཆོག་འོད་ཀྱི་ཕུང་པོར་གྱུར༔ སངས་རྒྱས་ཡེ་ཤེས་ཀུན་འོད་ས་ལ་གཤེགས༔ གཉགས་ཆེན་ཛྙཱ་ན་ཆོས་ཉིད་ཟད་སར་འཕྱོར༔ མཁར་ཆེན་མཚོ་རྒྱལ་བྲག་ལས་ཚེ་ཆུ་ཐོན༔ ཨ་ཙར་ས་ལེའི་ཕྱག་གིས་བྲག་རི་གཏོར༔ འབྲོག་མི་དཔལ་གྱི་སྤྱན་གྱིས་ནགས་ཚལ་བསྲེགས༔ འོ་བྲན་དབང་ཕྱུག་ཆུ་ལ་ཉ་ལྟར་ལྡིང༔ རྡོ་རྗེ་བདུད་འཇོམས་རླུང་ལྟར་ཐོག་མེད་རྒྱུགས༔ ཏིང་འཛིན་བཟང་པོས་རི་བྲག་ཟང་ཐལ་ཕུག༔ ཤེལ་དཀར་བཟའ་ཡིས་མ་མོ་བྲན་དུ་འཁོལ༔ གཞན་ཡང་རྗེ་འབངས་རྣམས་ཀྱི་གྲུབ་རྟགས་མང༔ ཞེས་གསུངས་པ་ལྟར་རྗེས་ཤུལ་རྣམས་ད་ལྟ་ཡང་སོ་སོར་མཇལ་རྒྱུ་ཡོད།

དེ་ཡང་གུ་རུ་པདྨ་འབྱུང་གནས་ཉིད་མི་ལོ་སུམ་སྟོང་ལྔ་བརྒྱར་རྒྱ་གར་དང་བལ་ཡུལ་ལ་བཞུགས་ནས་འགྲོ་དོན་མཐའ་ཡས་བསྐྱངས་ནས་བོད་ལ་མི་ལོ་བརྒྱ་དང་བཅུ་གཅིག་ཙམ་བཞུགས་ནས། རི་བྲག་མཚོ་རྣམས་ལ་སྒྲུབ་པ་མཛད་ཅིང་བྱིན་རླབས་རྒྱ་ཆེན་པོ་གནང་བའི་ནང་ཚན་ཡེ་རྒྱལ་ནམ་མཁའ་མཛོད་དུ་ལོ་བདུན། ཟླ་བ་བདུན། ཞག་བདུན་བཅས་བཀའ་འདུས་ཆོས་ཀྱི་རྒྱ་མཚོའི་དཀྱིལ་འཁོར་ཞལ་ཕྱེས་ནས་རྩེ་གཅིག་ཏུ་སྒྲུབ་ནས་གྲུབ་པའི་རྟགས་རྣམས་མངོན་དུ་གྱུར་པའི་གནས་ཁྱད་པར་དུ་འཕགས་པ་ཡིན་པ་དང་། མདོ་བྱང་ལས། གསུང་གི་གཏེར་ལྔ་ཡོན་ཏན་གནས་ལྔ་སྦས༔ ཡུལ་གྱི་ཆགས་ཚུལ་དགའ་འཁྱིལ་ལྟ་བུ་ལ༔ དབུས་ཀྱི་ཆ་ལ་རྫུ་འཕྲུལ་ཞབས་རྗེས་ཡོད༔ གཡོན་གྱི་རི་ནི་དུང་སེང་འགྱིང་བ་འདྲ༔ དེ་རུ་གཉགས་བན་སྤྲུལ་པ་ཡེ་ཤེས་འབྱུང༔ ཞེས་གསུངས་པའི་ལུང་བྱང་ལ་ཀོང་སྤྲུལ་མཆོག་ནས་ལུང་འབྲེལ་ཟིན་ཐུང་ལས་ཇི་སྐད་གསུངས་པའི་ཡོན་ཏན་གནས་ནི། ཕར་ནང་རི་བོ་ཆེ། ཚུར་རི་ནང་ཆེན་གྱི་ས་འབྲི་གུང་ཆོས་གྲགས་ཕེབས་ནས་ཁམས་ཀྱི་གླ་བ་རྐང་གཅིག་ཏུ་ངོས་འཛིན་མཛད་ཅིང་། ཡོངས་གྲགས་ཤར་ཡེལ་ཕུག་དང་ཉེ་བ་ཡེ་རྒྱལ་ནམ་མཁའ་མཛོད་ཅེས་མཛོད་ལྔ་སྦྲོམ་གསུམ་གྱི་ཟབ་གཏེར་ཆེན་པོ་བཞུགས་པ་ལས། གཏེར་ཆེན་ཉིད་ནས་ཀྱང་གཏེར་ཁ་དུ་མ་ཞིག་སྤྱན་འདྲེན་པར་མཛད། ཆགས་མེད་རིན་པོ་ཆེའི་གནས་ཡིག་ཀྱང་ཡོད། དེ་རུ་གཉགས་བན་སྤྲུལ་པ་ཡེ་ཤེས་འབྱུང་གསུངས་པ་ནི། ཡེལ་པ་ཡེ་ཤེས་བརྩེགས་པའི་གདན་སའི་གཙོ་བོ་ཉིད་ཡོད་པས་སོ། །ཞེས་ལུང་འབྲེལ་མཛད་པ་དང་། ཆགས་མེད་རིན་པོ་ཆེའི་གནས་ཡིག་ནི་དུས་འགྱུར་གྱི་དབང་གིས་འཇིག་རྟེན་ལ་མི་མངོན་པར་གྱུར། ཡང་སངས་རྒྱས་འཁོར་བ་འཇིག་ཕག་མོ་གྲུ་པའི་ལུང་བསྟན་ལས། ཤར་གྱི་གདན་ས་གཡུ་འབྲུག་གནམ་འཆོང་འདྲ། །ལྷོ་ཡི་གདན་ས་གླང་ཆེན་འགྱིངས་པ་འདྲ། །ནུབ་ཀྱི་གདན་ས་རྨ་བྱ་ཚང་ཉལ་འདྲ། །བྱང་གི་གདན་ས་རྟ་མཆོག་གནམ་བསླངས་འདྲ། །གནས་དེའི་མཚན་ཉིད་མ་ནོར་ན། །བཀའ་བརྒྱུད་བསྟན་པ་རྒྱས་པར་འགྱུར། །ཞེས་བསླུ་མེད་ལུང་གིས་བསྔགས་བཞིན། འགྲོ་མགོན་ཡེལ་པས་གདན་ས་མཛད་ནས་གནས་བསྟོད་དང་གནས་ཡིག་སོགས་མང་ཡང་དེང་སང་མཐོང་རྒྱུན་དུ་མ་བཞུགས་ཀྱང་། ཕག་གྲུ་རྡོ་རྗེ་རྒྱལ་པོ་དང་ཡེལ་པ་ཡེ་ཤེས་བརྩེགས་ཟུང་གི་དགོངས་པ་གཅིག་མཐུན་གྱི་ལུང་བསྟན་དོན། ཁ་བའི་ཞིང་འདིར་གནས་ཆེན་དཀར་པོ་བཞི། །སྟོད་ན་གྲགས་ཆེ་བ་ཏི་སེ་གངས་རི་དཀར་མོའི་གནས། བར་ན་ཡེ་རྒྱལ་ནམ་རི་དཀར་མོ་དུང་བརྒྱ་མ་དང་རྟ་བྲག་དཀར་མོ་དུང་བརྒྱ་ཞེས་པའི་གནས། སྨད་ན་ཁ་བ་དཀར་པོ་དུང་བརྒྱ་མ་ཞེས་གནས་ཆེན་དཀར་པོ་བཞི་ལྡན་ཏེ། དཀར་བཞི་བྱིན་རླབས་གནས་ཆེན་ནི། །རྡོ་རྗེ་གདན་གྱི་བྱང་གི་ཕྱོགས། །ཁ་བ་ཅན་གྱི་ཡུལ་འདི་ལ། །སྟོད་ན་གངས་རྒྱལ་ཏི་སེ་སྐུ་ཡི་གནས། །སངས་རྒྱས་སྐུ་ཡིས་གདུལ་བྱའི་གནས། །བར་ན་ནམ་རི་རྟ་བྲག་གསུང་གི་གནས། །ཐེག་ཆེན་གསུང་གི་གདུལ་གནས་ཡིན། །སྨད་ན་ཙ་རི་ཐུགས་ཀྱི་གནས། །ཏིང་འཛིན་སྒོམ་པའི་གདུལ་གནས་ཡིན། །དེ་ལས་གྱེས་པའི་གནས་ཕྲན་ནི། །གྲངས་མེད་གཞལ་མེད་ཡོད་ན་ཡང་། །གྲངས་ལྡན་གུ་རུ་པདྨ་ཡི། །སྒྲུབ་གནས་བྱིན་རླབས་གནས་ཆེན་ནི། །དཀར་བཞི་མཛོད་གཅིག་རྫོང་གསུམ་ལ། །ཁྱད་པར་གུ་རུ་པདྨ་འབྱུང་། །བྱིན་རླབས་རབ་གནས་སྒྲུབ་པ་བྱས། །ཕྱག་རྗེས་ཞབས་རྗེས་ངོ་མཚར་བཀོད། །ཞེས་གསུངས་པ་ལྟར། མ་བཞེངས་ལྷུན་གྱིས་གྲུབ་པའི་རྩ་གསུམ་འཁོར་ལོ་ལྔ་ཡི་ཕོ་བྲང་འདིར། སྤྲུལ་པའི་གཏེར་ཆེན་མཆོག་གྱུར་གླིང་པ་དང་། འགྲོ་མགོན་སངས་རྒྱས་ཡེལ་པ། འབྲི་གུང་ཆོས་གྲགས། ཀརྨའི་མཁན་པོ་རིན་ཆེན་དར་རྒྱས། གྲུབ་དབང་ཚོགས་གཉིས་སོགས་ཀྱི་དག་སྣང་ཞལ་གཟིགས་མང་པོ་བྱུང་ཚུལ་དད་འདུས་ཀུན་ལ་གསུངས་པའི་ངག་རྒྱུན་ལས། ཡེ་རྒྱལ་གནས་ཀྱི་ཕྱོགས་བཞིའི་རྡོ་ཕུར་བཞི། །རིན་ཆེན་སྣ་ཚོགས་ལས་གྲུབ་མདོག་མཚུངས་ནི། །ཤར་དུ་རྡོ་རྗེ་མཁའ་འགྲོའི་ཐག་ཕུར་དཀར། །ལྷོ་རུ་རིན་ཆེན་མཁའ་འགྲོའི་ཉིན་རྫོང་བྲག་ཕུར་སེར། །ནུབ་ཏུ་པདྨ་མཁའ་འགྲོའི་རྡོ་ཕུར་དམར། །བྱང་དུ་ལས་ཀྱི་མཁའ་འགྲོའི་བྲག་ཕུར་ནག་པོ་སྟེ་བཞིའོ། །

གཞན་ཡང་གནས་ཆེན་དེ་ཡི་མཚམས་བཞི་ལ། གནད་ཀྱི་རང་བྱོན་བཞི་ཡིས་བརྒྱན་པ་དག་ནི། གད་ཧུབ་རྟེན་མཆོག་སཙྪ་མཆོད་པའི་རྒྱན། །ཆུ་འཛུལ་གསུང་མཆོག་ཨ་ཡིག་དཀར་པོས་བརྒྱན། །སྲག་སྔོན་སྐུ་མཆོག་ཐུབ་པའི་རང་བྱོན་རྒྱན། །སྡོམ་བྲག་གུ་རུའི་ཞབས་རྗེས་མཛེས་པའི་རྒྱན་ཏེ་བཞིའོ། །ཕྱི་ན་སྒོ་བཞི་ནང་ན་གླིང་བཞི་ཡོད། དབུས་རི་ལྟེ་བར་རིན་ཆེན་ནམ་མཁའ་མཛོད། ཕྱི་ནས་མཇལ་ན་བུམ་པའི་སྒོ་གཟུགས་འདྲ། ནང་དུ་རིན་ཆེན་ནོར་སྣ་བརྒྱ་དང་རྩ་བརྒྱད་བཞུགས། གནས་འབྲེལ་ཙམ་གྱིས་མཆོག་གི་དངོས་གྲུབ་ཐོབ། ནམ་མཁའ་མཛོད་ཀྱི་སྒྲུབ་གནས་སུ། །མེ་ཏོག་སྣ་ཚོགས་སྐྱེ་བའི་ས། །བདུད་རྩིའི་ཆུ་རྒྱུན་སྔགས་སྒྲ་སྒྲོག །བྱ་བྱེའུ་རྣམས་ཀྱིས་མགྲིན་གླུ་ལེན། །ཏིང་འཛིན་ཉམས་རྟོགས་འཕེལ་བའི་གནས། །རྩེ་གཅིག་སྒྲུབ་ན་འགྲུབ་རྟགས་ཉེ། །ཆོས་ཀྱི་སྒྲ་སྙན་རྟག་ཏུ་སྒྲོག་པའི་གནས། །ཞེས་གསུངས་སོ། །ཡེ་རྒྱལ་དབུ་རྩེར་བཅོམ་ལྡན་ཐུབ་པ་དྲུག །གཙོར་བྱས་སངས་རྒྱས་སྟོང་རྩ་རང་བྱོན་བཞུགས། །རྩེ་སྐོར་ལམ་དུ་བར་དོའི་འཕྲང་ཆེན་ཡོད། །སུ་བགྲོད་བར་དོའི་འཇིགས་པ་ཞི་བར་གསུངས། །ཡེ་རྒྱལ་དབུ་རྩེའི་མདུན་རྒྱབ་རྣམས་སུ་ཨོ་རྒྱན་རིན་པོ་ཆེ་དང་རྗེ་འབངས་ཉེར་ལྔའི་སྒྲུབ་ཕུག་ཁ་བྱང་དང་བཅས་པ་དངོས་སུ་མཇལ་རྒྱུ་ཡོད། ལོགས་སུ་མཚོ་རྒྱལ་ཚེ་ཡི་སྒྲུབ་པ་མཛད། །གྲུབ་པའི་རྟགས་སུ་བྲག་གཡང་གཟར་བའི་ངོགས། །དྲི་མེད་ཡན་ལག་བརྒྱད་ལྡན་ཚེ་ཆུ་འབབ། །ཁྲུས་བྱས་ནད་གདོན་སྡིག་སྒྲིབ་དག་པར་ངེས། །གཏུང་བས་ཚེ་རིང་ནད་ཉུང་ལུས་སེམས་བདེ། །ཡེ་རྒྱལ་རྩེ་མོར་མི་མངོན་བྲག་འཁོར་ནང་། །མཚོ་མོ་དྭངས་མ་ཤིན་ཏུ་མཛེས་པ་ཡོད། །གུ་རུ་པདྨའི་བླ་མཚོ་ཡིན་པར་གསུངས། །དབྱར་དགུན་མེད་པར་ཆུ་ཆེན་རྩེ་ནས་འབབ། བཀྲུ་འཐུང་བྱས་པས་ནད་རྣམས་སངས་གྲགས་འགྱུར། ཡེ་རྒྱལ་རི་བོ་མཐོ་ཞིང་བརྗིད་ཉམས་ལྡན་ལ་རྩེ་མོ་སུམ་ཟུར་ནས་བལྟས་ན་བོད་ཀྱི་རི་རྣམས་ཕལ་ཆེར་མཐོང་ཞིང་། སྔ་མིའི་ཁ་རྒྱུན་ལ། རྒྱ་གར་ཡུལ་ནས་རྟ་སྟན་ཙམ། རྒྱ་ནག་ཡུལ་ནས་དྲེལ་སྟན་ཙམ་མཐོང་ཞེས་པའི་བཤད་སྲོལ་ཡོད་པ་དང་། རྩེ་མོ་དེ་རུ་སྔར་དགོན་ཁག་མང་པོས་ལྷ་གསོལ་རྟེན་མཁར་མང་པོ་བརྩིགས་པའི་ཤུལ་ཡོད་ལ། ད་ལྟ་ཤེས་ཚོད་ཙམ་ལ། གནས་བརྟན་མཆོག་གླིང་དགོན། ནང་ཆེན་ཚེས་བཅུ་དགོན། མགར་མགོན། བྱམས་མེ་དགོན་སོགས་ཀྱིས་བར་མ་ཆད་པར་ལྷ་གསོལ་བྱེད་པར་སྣང་། རྩེ་བསྐོར་ལམ་དུ། ཤེལ་རྡོ། ཅོང་ཞི། ཅུ་གང་། འབྲུག་རུས། སིནྡྷུ་ར་སོགས་སྨན་སྣ་གང་འདོད་ལེན་རྒྱུ་ཡོད། གནས་མཆོག་དེ་དང་འབྲེལ་བའི་གནས་ལག་ནི། ཇི་སྐད་དུ། ནམ་རུ་དཀར་མོ་དུང་བརྒྱ་ལ་གནས་ཕྲན་བརྒྱ་དང་རྩ་བརྒྱད་ཀྱིས་བསྐོར་ཞེས་གསུངས་པ་ལྟར། དཔའ་རྒྱལ་ནོར་བུ་ཚེ་དབང་རྩལ་ནི། གཏེར་ཆེན་གང་གི་བཀའ་ལུང་ལས། ཡེ་ཤེས་ལས་གྲུབ་ལོངས་སྐུའི་ཞིང་ཁམས་ཡིན། །གུ་རུ་ཚེ་དཔག་མེད་མགོན་སོགས། །ཚེ་ལྷའི་དཀྱིལ་འཁོར་ལྷ་ཚོགས་བཞུགས། །ཕྱག་སྐོར་བྱས་ན་ཚེ་ཡི་དངོས་གྲུབ་ཐོབ་ཞེས་སོ། །

༈ གནས་མཆོག་ཚེ་རྒྱལ་བྲག་ནི། གཏེར་ཆེན་གང་གིས་ཟབ་གཏེར་ངོ་མཚར་བཞེས། ཚེ་རྟ་ཟུང་འབྲེལ་གསུང་གི་གནས་ཡིན་གསུངས། ཚེ་སྒྲུབ་རྡོ་རྗེའི་ཕྲེང་བ་དང་། ཟབ་བདུན་གྱི་ཆ་ལག་རྟ་མགྲིན་བཅས་སྤྱན་དྲངས་པའི་གཏེར་གནས་ཡིན། དེའི་བྲག་སྐྱིབ་ལ་གཏེར་ཆེན་གྱི་གཟིམ་ཁང་དང་། སངས་རྒྱས་དབོན་གྱི་གཟིམ་ཁང་སོགས་ད་ལྟ་ཀུན་གྱིས་མཐོང་ལམ་དུ་ཡོད་དོ། །

༈ མཁྱེན་ཀོང་མཆོག་གསུམ་དུས་གཅིག་རྒྱས་འཛོམས་བྱུང་བའི་གནས་ཁ་བ་སྟེང་ཞེས་པ། ལྕི་ཡི་གད་པ་དམར་པོ་ཞེས་སུ་གྲགས། བསམ་ཡས་ཀྱི་གནས་ཚབ་དང་། གསེར་ཟོ་ནི་ཧས་པོ་རི་དང་། སྒོ་བ་བཀྲ་ཤིས་ལྷ་རྩེ་ནི་མཆིམས་ཕུའི་གནས་ཚབ་ཡིན་པར་གསུངས། གདུང་རྩེ་ནི་ཡེ་རྒྱལ་འཁོར་གྱི་བདུད་བཙན་གྱི་གནས་དང་། རྨོག་དཀར་ནི་གནོད་སྦྱིན་གྱི་གནས། དཀར་པོ་རི་ནི་ལྷ་ཡི་གནས། རྡོ་རྗེ་ནི་ཀླུ་སྨན་གྱི་གནས་ཡིན་པར་གསུངས།

༈ ཛྃ་དམར་བྲག་རི་བདེ་ཆེན་དབང་གི་གནས། པདྨ་མཁའ་འགྲོ་ཛྃ་དམར་རང་བྱོན་ཡོད། ཕྲ་མན་གསང་བའི་གཏེར་ཁ་ཡོད།

༈ གཡུལ་འབར་རྒྱལ་ཀུན་གསང་བའི་བདག་པོའི་གནས་ཡིན་ཏེ། གཡུལ་འབར་བྲག་ལ་ཞི་བ་བཞི་བཅུ་རྩ་གཉིས་དང་འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱི་རང་བྱུང་ཡོད་པ་ནི་ཀེ་ལ་མཆོག་གླིང་ཞལ་ནས་གསུངས། གཏེར་ཆེན་མཆོག་གྱུར་གླིང་པས། སྐུ་ཚབ་དངོས་གྲུབ་དཔལ་འབར། སྐུ་ཚབ་བདེ་བ་ཆེན་པོ། ཁྲ་མན་གཟི་ཡི་ཕུར་པ། སྨུག་པོ་མཆོང་གི་ཕུར་པ། རྡོ་རྗེ་སེམས་དཔའི་སྐུ་འཁྲུལ་མེད། ལེགས་སོ་གསུམ་གྱི་སྒྲོལ་མ་གསུང་འབྱོན་མ། སངས་རྒྱས་འོད་སྲུང་རིང་བསྲེལ། དམ་རྫས་ཧེ་རུ་ཀ་འདུས་པའི་རིལ་བུ། གུ་རུ་རྡོ་རྗེ་གྲོ་ལོད་ཀྱི་ཕྱག་མཚན་གནམ་ལྕགས་ཀྱི་རྡོ་རྗེ་ཁྲུ་གང་བ་ཁྲོམ་གཏེར་དུ་བཞེས། དམ་ཆོས་རྫོགས་པ་ཆེན་པོ་ཀུན་བཟང་ཐུགས་ཐིག་རྒྱབ་ཆོས་ཡེ་ཤེས་སྙིང་པོ་དམ་རྫས་རོལ་པ་ཆེན་པོ། ལྕགས་མིན་ཁྲོ་མིན་གྱི་མགོན་པོའི་སྐུ་སོགས་ཟབ་གཏེར་མང་དུ་བཞེས་པའི་གཏེར་གནས་ཡིན་ནོ། །

༈ ཡར་རྫོང་ངོས་ཡངས་ཀླུ་ཡི་བ་གམ་དུ། །གནས་བརྟན་ཀླུ་སྡེ་འཁོར་བཅས་རྟག་ཏུ་བཞུགས། །མི་འགྱུར་ཨ་ཡིག་ཤིན་ཏུ་གསལ་བ་བཀྲ། །ལྷ་སྐུ་ཕྱག་མཚན་རང་བྱོན་མང་དུ་ཡོད། །

༈ སྐེད་ཕུག་ཡེ་ཤེས་མཚོ་རྒྱལ་གྱི་སྒྲུབ་ཕུག་ནི་མ་ར་ཏི་ཀའི་གནས་ཚབ་ཡིན་པ་རྩེར་ཨ་ཡིག་དཀར་པོའི་རང་བྱོན་གྱིས་མཚན་པ། ཞབས་རྗེས་འགགས་ལ་ཨོ་རྒྱན་རིན་པོ་ཆེའི་སྒྲུབ་ཕུག་དང་བློན་གིང་ཆེན་གསལ་བ་འོད་ལྡན་གསོལ་ཐབ་མཛོད་སྡིས་ཁྲ་མོ། སྒོ་སྲུང་སྐུ་ལྷ་དཀར་ཡག ཤུག་བརྩེགས། ཆིབས་པ་བཏགས་ཤུལ། ཛོ་ཁེབ་འཁོར་བ་དུང་སྤྲུགས་ཀྱི་གནས་ཡིན་པ་བསྐོར་བ་རེ་བྱས་ཚེ་མ་ཎི་བྱེ་བ་བཏོན་པའི་ཕན་ཡོན་ཡོད་ཅེས་གསུངས་ནས་ཚོགས་གཉིས་མཆོག་གི་ཞལ་གྱིས་བཞེས།

༈ མར་རྫོང་བོད་ཀྱི་རི་བོ་རྩེ་ལྔ་རུ། །འཇམ་དཔལ་དབྱངས་དང་བི་མ་མི་ཏྲ་བཞུགས། །གངས་རྒྱལ་གངས་རིའི་གནས་ལག་སྤང་ངོས་སུ། །ཚེ་བུམ་ནོར་བུས་མཚན་པའི་རང་བྱོན་གསལ།

༈ དཔལ་གནམ་རྡོ་རྗེ་གཞོན་ནུའི་གནས་མཆོག་དོངས། །རྗེ་འབངས་ཉེར་ལྔ་ཡོད་ཅེས་ཕལ་ཆེར་གསལ།

༈ དབུ་བྲག་མཚོ་ནི་གནམ་ལྕགས་འབར་བའི་བྲག །ཀོ་ཀ་ཐང་དམར་རྒྱ་མཚོ་དོ་ཡིན། དེ་ཡང་སངས་རྒྱས་དབོན་ལ་མཁའ་འགྲོས་ལུང་བསྟན་པའི་གནས། ཆུ་ཨ་ཡིག་འདྲ་བའི་ཁུག་སོ་ལ། །དཔལ་མ་ཧཱ་ཀཱ་ལའི་སྒྲུབ་གནས་ཡོད། །སྟོན་ཟླ་ཆུ་ལ་མཁའ་འགྲོས་དར་ལམ་གཏོད། །ཅེས་པའི་གནས་འདིར་རྗེ་སངས་རྒྱས་དབོན་ཡུན་རིང་དུ་བཞུགས་པའི་གཟིམ་ཁང་ད་ལྟ་ཡང་མཇའ་རྒྱུ་ཡོད་པ་དང་རྗེ་སངས་རྒྱས་དབོན་ལ་མགོན་པོ་ཕྱག་བཞི་པའི་ཞལ་གཟིགས། གནས་དེར་སངས་རྒྱས་དབོན་བཞུགས་པའི་རིང་ལ། ཤར་ཡེལ་པ་དགོན། ལྷོ་རི་བོ་ཆེ། བྱང་རྟ་རྣ་རྣམས་ལ་ཡུན་རིང་ཞིག་བཞུགས་པའི་གནས་ཚད་མས་གྲུབ་པར་སྣང་། བོད་ཟླ་བཅུ་པའི་ཚེས་བཅོ་ལྔར་ཆུ་ལ་དར་འགྲིགས། བོད་ཟླ་དང་པོའི་ཚེས་གཅིག་ལ་རྒྱ་མཐོང་འབུག་རྒྱུ་ནི་མཐོང་བ་རྒྱུན་འཇགས་ལྟར་གནས་པས་དབུ་བྲག་ཁྲིམས་དར་ཞེས་བཤད་སྲོལ་ཡོད། དེ་ཡང་ལོ་འཁོར་ནང་ཟླ་ལྷག་ཡོད་མེད་ཁྲིམས་དར་དེས་གསལ་བོར་སྟོན་ཐུབ། གང་ཡིན་ཟེར་ན་རྗེ་སངས་རྒྱས་དབོན་ཆུ་ཕ་རོལ་ཕེབས་པར་དགོངས་པ་ཙམ་གྱིས་མཁའ་འགྲོ་མ་རྣམས་ཀྱིས་རྫུ་འཕྲུལ་གྱིས་ཆུ་ལ་དར་ལམ་འཐེན་པའི་ཤུལ་ལ་ཕྱིས་སུ་དེ་ཡི་དུས་ཚོད་ལ་དར་ཆགས་པས་སྟོན་ཟླའི་ཆུ་ལ་མཁའ་འགྲོའི་དར་ལམ་གཏོད་ཞེས་པའི་དོན་རྣམས་ངེས་དོན་ཚད་མས་གྲུབ་པའོ། །

༈ དྲེད་མོ་རོང་ནི་གཤིན་རྗེའི་གཏེར་གནས་ཡིན། བསྟན་པ་སྲུང་བའི་སྐོར་བཞི་དང་མཁའ་འགྲོའི་གསང་དཀྱིལ་ལ་སོགས་ཡོད། གནས་ཀྱི་སྲུང་མ་དུར་ཁྲོད་མ་མོའི་གནས། ཐེའུ་རང་དམ་ལ་བཏགས་ས་ཁམས་ཀྱི་གླ་བ་རྐང་གཅིག་དབའ་རྒྱ་བྲག་ཅེས་པར་གུ་རུའི་རྫུ་འཕྲུལ་གྱིས་ཐུན་རྡོ་གཏོར་བའི་ཕ་ཝམ་དང་གུ་རུའི་ཞབས་རྗེས་སོགས་ངོ་མཚར་བཞུགས། ཡུམ་ཆེན་མ་ཞེས་ཡེ་རྒྱལ་གྱི་གསང་ཡུམ་གྱི་གནས་ཡིན་པར་གསུངས་སོ། །

གཉིས་པ། གནས་འདིར་ཕྱག་བསྐོར་བགྱིས་པའི་ཕན་ཡོན་བསྟན་པ་ནི། འདུལ་བའི་ལུང་ལས། གང་ཞིག་དད་ཅིང་མོས་པའི་སེམས་ཀྱིས་སུ། །སངས་རྒྱས་མཆོད་རྟེན་ལ་ནི་གོམ་འདོར་ན། །འཛམ་བུའི་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་གསུངས་པ་ལྟར་གནས་མཆོག་འདིའི་ནང་ན་མཆོད་རྟེན་རང་བྱོན་དང་གང་ཟག་མང་པོའི་སྐུ་ཕྱག་ཞབས་རྗེས་ཀྱི་རང་བྱུང་མང་པོ་བཞུགས་པས། དེའི་ཕྱིར་དད་མོས་ཀྱི་སྒོ་ནས་དཀོན་མཆོག་གི་རྟེན་ལ་ཕྱག་བསྐོར་བྱ་སྙམ་པའི་འདུན་པས་གོམ་པ་གཅིག་འདོར་བའི་ཕན་ཡོན་ཡང་། གསེར་སྲང་སྟོང་ཕྲག་བརྒྱ་ཡིས་མཆོད་སྦྱིན་བྱས་པ་ལས་ཀྱང་ཕན་ཡོན་ཆེ་བར་གསུངས་ན། འདིར་དཔལ་འཁོར་ལོ་སྡོམ་པའི་དཀྱིལ་འཁོར་རྟེན་དང་བརྟེན་པ་བཞུགས་པའི་གནས་མཆོག་ལ་ཕྱག་བསྐོར་བགྱིས་ན། ཕན་ཡོན་བསམ་གྱིས་མི་ཁྱབ་པ་འབྱུང་བ་སྨོས་མ་དགོས་ཏེ། བདེ་གཤེགས་ཕག་མོ་གྲུ་པ་དང་། ཡེལ་པ་ཡེ་ཤེས་བརྩེགས་སོགས་གང་ཟག་མང་པོའི་དགོངས་པ་གཅིག་མཐུན་གྱིས་ཁ་བའི་ཞིང་གི་དཀར་པོ་བཞི་ལྡན་གནས་དག་ཕན་ཡོན་མཉམ་པར་གསུངས་པ་ནི། སྟོད་ཀྱི་གངས་རི་དཀར་པོ་དང་། བར་གྱི་ཡེལ་རྒྱལ་ནམ་རུ་དཀར་མོ་དུང་བརྒྱ་མ་དང་། བྱང་གི་རྟ་བྲག་དཀར་མོ་དུང་བརྒྱ་མ། སྨད་ཀྱི་ཁ་བ་དཀར་པོ་དུང་བརྒྱ་ཞེས་དཀར་པོ་བཞི་ལྡན་ཡིན་ཚུལ་སངས་རྒྱས་འཁོར་བ་འཇིག་དངོས་གཉགས་སྤྲུལ་ཡེ་ཤེས་བརྩེགས་སོགས་ཀྱིས་ལུང་བསྟན་བྱིན་གྱིས་རླབས་པའི་གནས་ལ་ཐེ་ཚོམ་མ་བྱེད་སེམས་ཅན་རྣམས་ཞེས་གསུངས་པ་ཡིད་ལ་བྱོས་ཤིག །གནས་ཁྲིད་བྱེད་ཅིང་རང་བྱོན་གྱི་རྟེན་དེ་དག་གཞན་ལ་བསྟན་ན་གསུང་དབྱངས་ཡན་ལག་དྲུག་ཅུ་ཐོབ་ཅིང་། སོ་སོ་ཡང་དག་པར་རིག་པ་རྒྱ་ཆེན་པོའི་དོན་ཡང་རྟོགས་ཏེ། གསལ་རྒྱལ་གྱིས་ཞུས་པའི་མདོ་ལས། སུ་དག་རྒྱལ་བའི་གསུང་ཉིད་སྟོན་བྱེད་པ། །དེ་དག་གླིང་བུ་སྒྲ་སྙན་དང་། །སྒྲ་སྙན་ཡིད་དུ་འོང་བ་ཐོབ་པ་དང་། །སོ་སོ་ཡང་དག་རིག་པ་ཐོབ་པར་འགྱུར། །ཞེས་གསུངས་སོ། །གཞན་ཡང་གནས་རི་བཟང་པོ་འདི་དག་ལ་དར་ལྕོག་འཛུགས་པ་དང་། ཚོགས་མཆོད་བགྱིས་པ་དང་། དཀར་མེ་འབུལ་བ་སོགས་བཀུར་བསྟི་སུས་བྱས་ན་འདི་ཕྱི་གཉིས་ལ་དངོས་གྲུབ་རྣམ་གཉིས་ཐོབ། གནས་འདི་ཉིད་གནས་འདུས་ཀྱི་དུས་ཆེན་ནི་རྟ་ལོར་ཡིན་པས་དུང་བརྒྱ་འགྱུར། རྟ་ཟླའི་ཉ་ལ་དུང་བྱེ་འགྱུར། ཟླ་བ་འབྱུང་ངོ་ཅོག་གི་ཡར་ཚེས་བཅུ་དང་། བཅོ་ལྔ། མར་ངོའི་ཉེར་ལྔ་དང་གནམ་གང་རྣམས་ལ་དུང་ཁྲི་འགྱུར་གྱི་ཕན་ཡོན་འབྱུང་ངོ་། །ལྷག་ཏུ་གནས་བསྐོར་གྱི་སྐབས་སུ་ཡང་སྦྱོར་དངོས་རྗེས་གསུམ་ཚང་བ་ཞིག་བྱེད་པ་གལ་ཆེ། ཐོག་མར་བསྐོར་བ་པས་མཁའ་ཁྱབ་སེམས་ཅན་ཐམས་ཅད་ཀྱི་དོན་དུ་དམིགས་པའི་སྦྱོར་བ་སེམས་བསྐྱེད་དམ་པ། བར་དུ་རང་སེམས་དུག་ལྔའི་རྟོགས་པ་ངན་པས་མ་བསླད་པར་དད་པ་དག་སྣང་གིས་གཞི་བཟུང་། གསོལ་འདེབས་མོས་གུས་དྲག་པོས་བརྒྱུད་བསྐུལ་ཏེ། ལུས་ངག་ཡིད་གསུམ་ཆིག་བསྒྲིལ་གྱིས་ཕྱག་བསྐོར་བ་ལ་འབད་པ་དངོས་གཞི་ཚོགས་བསགས་དམ་པ། ཐ་མར་ཕྱག་བསྐོར་བགྱིས་པའི་དགེ་ཚོགས་ཅི་མཆིས་པ་ཐམས་ཅད་མཁའ་ཁྱབ་སེམས་ཅན་རྣམས་གཏན་བདེ་རྫོགས་བྱང་ཐོབ་པའི་ཆེད་དུ་བསྔོ་བ་དང་སྨོན་ལམ་རྣམ་པར་དག་པས་རྒྱས་འདེབས་པ་ནི་མཇུག་བསྔོ་བ་དམ་པ་སྟེ། དམ་པ་གསུམ་གྱི་རྩིས་ཟིན་པ་ཞིག་བྱུང་ན་གནས་བསྐོར་ལྟ་བུ་ཟག་བཅས་ཀྱི་དགེ་བ་ཡང་ཐར་པ་ཆ་མཐུན་གྱི་དགེ་ཚོགས་རྒྱ་ཆེན་པོ་འཕེལ་བར་འགྱུར་རོ། །དེ་ལྟར་འབྲེལ་ཚད་དོན་ལྡན་པའི། །ངོ་མཚར་གནས་མཆོག་ནམ་མཁའ་མཛོད། །རིག་གྲོལ་རྒྱལ་བའི་ཕྲིན་ལས་མཐུས། །སྤྱི་མཐུན་བསོད་ནམས་དཔལ་དུ་ཤར། །དེ་ལྟའི་སྔོན་བྱུང་གནས་བཤད་དང་། །ཕྱི་ནང་གསང་བའི་བཀོད་པ་རྣམས། །གཏེར་ཆེན་མཆོག་དང་གང་ཟག་གི །རྡོ་རྗེའི་གསུང་ལ་གཞི་བྱས་ཏེ། །འགྲོ་ལ་ཕན་ཕྱིར་རགས་ཙམ་འགྲེལ། །འདི་ལ་ནོངས་པའི་ཆ་གང་མཆིས། །རྩ་གསུམ་ལྷ་ལ་བཤགས་བགྱི་ཞིང་། །དགེ་བ་གང་དེས་འགྲོ་བ་ཀུན། །མཁའ་སྤྱོད་གནས་སུ་སྐྱེ་བར་ཤོག །ཅེས་པ་འདི་ཡང་གནས་ཡིག་སྔར་ཡོད་དག་ལ་གཞི་བཅོལ་ཏེ། ཚད་ལྡན་གྱི་ལོ་རྒྱུས་སྨྲ་བ་རྒན་རབས་དག་གི་ངག་རྒྱུན་དང་། རྣམ་ཐར་དང་ལོ་རྒྱུས་ཚད་ལྡན་དག་ལ་ཁུངས་གཏུགས་ནས་ཆུ་སྐྱེས་རཱ་ཛ་གང་དེས་སྦྱར་བ་དགེའོ། །བཀྲ་ཤིས།

མཆན། ༡ གནས་ཡིག་འདི་གནས་རྟེན་དགོན་པས་འདོན་སྤྲོད་གནང་།

༢ གནས་འདི་ནི་དེང་གི་ནང་ཆེན་རྫོང་ལྕི་ཆུ་ཞང་དང་བོད་ལྗོངས་རི་བོ་ཆེ་རྫོང་གཉིས་ཀྱི་ས་མཚམས་སུ་གནས་ཤིང་། ནང་ཆེན་རྫོང་ནས་གནས་བར་དུ་སྤྱི་ལེ༨༠ལྷག་ཙམ་ཡོད། གནས་འདི་ལ་མཐའ་བསྐོར་དང་བར་བསྐོར། རྩེ་བསྐོར་གསུམ་ཡོད་པས། མི་ཕལ་བས་རྐང་ཐང་དུ་ཉི་མ་རེར་བར་བསྐོར་རེ་བསྐོར་ཞིང། མཐའ་བསྐོར་ལ་ཉིན་ཕྱེད་གཉིས་ཙམ་འགོར།

༄༅། །གསུང་གི་ཕྲིན་ལས་གནས་མཆོག་བསྟན་པ་ནི༔ བོད་ཀྱི་མདོ་ཁམས་ཀྲེ་ཞེས་བྱ་བ་རུ༔ ཐོད་དཀར་ཞེས་བྱ་རི་བོ་དུང་དཀར་འདྲ༔ ཤར་གྱི་ཕྱོགས་སུ་ང་ཡི་སྒྲུབ་ཕུག་དང༔ བྲག་ལ་ཧེ་རུ་ཀ་དཔལ་རང་བྱོན་བཞུགས༔ གཙོ་བོ་གསུང་གི་གནས་མཆོག་གཅིག་ཏུ་བསྡུས༔ དེ་དག་གསུང་གི་གནས་མཆོག་ལྔ་པའོ༔ འགྱེད་པའི་སྐྱེས་བུ་གླང་ལོ་པ་ཞིག་འབྱུང༔

༄༅། །གསུང་གི་ཕྲིན་ལས་ཀྱི་གནས་ནི་ཧོར་ཏྲེ་ཤོད་ལ་བཞུགས་པའམ། ལྕགས་མདུད་ཁ་བ་ལུང་རིང་གང་ཡིན་དཔྱད་དགོས། ཕྱི་མ་འདི་ལ་གྲུབ་ཆེན་གསལ་སྟོང་ཤོ་སྒོམ་གྱི་གནས་ཡིག་ཡོད་སྐད་དོ། །

༄༅། །རབ་བྱུང་བཅུ་བདུན་པའི་མེ་གླང་ལོའི་ཧོར་ཟླ་བཞི་པའི་ནང་དུ་གྲུབ་དབང་ལུང་རྟོགས་རྒྱལ་མཚན་མཆོག་མཚོ་ཕུ་རྡོ་ལོ་རིན་པོ་ཆེས་གདན་ཞུས་ལྟར་ལྷ་འབུམ་དགོན་དུ་བྱོན་ཞིང་། ཟངས་མདོག་དཔལ་རི་ལ་རབ་གནས་མཛད་དེ་འཇམ་དཔལ་སྐུ་ཡི་གནས་མཆོག་ཁ་བ་ལུང་རིའི་གནས་སྒོ་འབྱེད་པར་མཛད་སྐབས། ནམ་མཁའ་ནས་འཇའ་ཤར་ཞིང་མེ་ཏོག་གི་ཆར་བབས། གནས་ངོས་སུ་སྔར་མེད་ཀྱི་རང་བྱོན་མང་དུ་བྱུང་བ་སོགས་རྟགས་མཚན་ཆེས་ལེགས་པོ་བྱུང་བས་ཐམས་ཅད་ངོ་མཚར་བའི་གནས་ལ་བཀོད། གཏེར་ལུང་ལས༔ ཨེ་མ༔ ཆོས་དབྱིངས་རང་མདངས་བཀོད་པ་རྒྱལ་བའི་ཞིང༔ སྐུ་གསུམ་ལྷུན་གྲུབ་བདེ་ཆེན་ཡེ་ཤེས་རྩལ༔ ཕྱི་སྣོད་འཇིག་རྟེན་ཞིང་དང་ནང་བཅུད་ལྷ༔ དག་པ་རབ་འབྱམས་གནས་ཡུལ་ཚོགས་དུ་མ༔ ཡོངས་སུ་བཀོད་པ་འཛམ་གླིང་བྱང་གི་ཕྱོགས༔ གངས་ཅན་ཤར་ཕྱོགས་རྨ་རི་ལྷོ་ཡི་ཆ༔ ཨ་ཛི་ཉག་སྟོད་ཏྲེ་ཤོད་ཧོར་གྱི་སྨད༔ ཁ་བ་ལུང་རི་མདོ་སྨད་གནས་ཀྱི་གཙོ༔ དཔལ་ལྡན་འཁོར་ལོ་སྡོམ་པའི་ཕོ་བྲང་དངོས༔ རྒྱལ་བས་ལུང་བསྟན་བྱང་ཕྱོགས་རྟ་རྣ་རི༔ པདྨས་ལུང་བསྟན་དྲེལ་རྣ་འཛིན་གཉིས་པ༔ གནས་ཀྱི་བརྡ་རྟགས་རྫོགས་པའི་གངས་རི་ཟུང༔ ཞེས་དང་། སྔོན་གེ་སར་ནོར་རུ་དགྲ་འདུལ་གྱིས། སྟག་གཟིག་ནོར་རྫོང་ཕབ་ནས། ནོར་འགྱེད་བྱས་ཚེ་འབྲུ་གཡང་ཁྱུང་གི་སྒོ་ང་དེ། ཤོད་ཆེན་བཅོ་བརྒྱད་ལས་ཏྲེ་ཤོད་ཁ་བ་ལུང་རི་ལ་ཐོབ་པས། འདི་ཕྱོགས་འབྲུ་ཡི་བང་མཛོད་རྒྱས་ཤིང་བསོད་ནམས་བདེ་སྐྱིད་ལྡན་པའི་མི་རྒྱུད་དབྱར་མཚོ་ལྟར་རྒྱས་པ། སྐར་ཚོགས་ལྟར་བཀྲ་བ། ཉི་ཟླ་ལྟར་གསལ་བ། མདོ་ཁམས་སྒང་དྲུག་གི་གནས་བདག་ཀུན་གྱི་ནང་ནས་ས་ཕྱོགས་གང་ནས་བལྟས་ཀྱང་རྒྱལ་མཚན་གྱི་ཏོག་ལྟར་དཀར་ཟིང་ངེར་མངོན་པར་མཐོ་བ། དེ་ཡང་དུས་ཀྱི་འགྱུར་ཁུགས་ལྟར་རི་བོ་འདི་ཉིད་ཀྱང་། ཐོག་མ་དཀར་པོ་དུང་འདྲ། བར་དུ་ཁྲ་བོ་སྟག་འདྲ། ཐ་མ་ནག་པོ་ཕག་འདྲ་བར་འགྱུར་དུས་ཁམས་གསུམ་སྲོག་གི་བདག་པོར་འགྱུར་བའང་བཤད་དོ། །

གཉིས་པ་ནང་ལྟར་ན། རྒྱལ་བ་ཐུབ་པའི་དབང་པོས་ལུང་གིས་ཟིན་ཅིང་ཨོ་རྒྱན་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། དགེ་སློང་ནམ་མཁའི་སྙིང་པོ། རྣམ་སྣང་ལོ་ཙཱ་བ་བཻ་རོ་ཙ་ན། སོག་པོ་དཔལ་གྱི་ཡེ་ཤེས། སྣ་ནམ་རྡོ་རྗེ་བདུད་འཇོམས། ལྷ་ལུང་དཔལ་གྱི་རྡོ་རྗེ་སོགས་རྒྱ་བོད་ཀྱི་རིག་འཛིན་གྲུབ་བརྙེས་མང་དུ་བྱོན་ཅིང་བཞུགས་ཏེ་བྱིན་གྱིས་བརླབས་པའི་གནས། ཡི་དམ་བདེ་མཆོག་འཁོར་ལོའི་ཕོ་བྲང་། མ་གཤིན་ཌཱཀྐིའི་ཚོགས་ཀྱི་གནས་མཆོག་དཔལ་ལྡན་ཡེ་ཤེས་མགོན་པོའི་རྣམ་རོལ་དགེ་བསྙེན་མཆེད་གསུམ་བཞུགས་པའི་རྟེན་རྫོང་སྟེ། ཙཱ་རི་ཀོ་ཊ་ཡ་དང་འདུ་བ་མཉམ་ཞིང་། མདུན་གནས་པདྨ་ཤེལ་བྲག་སྟག་ཚང་ཕུག་བཀའ་བརྒྱད་ཀྱི་གནས་དངོས་དང་། ཕྱོགས་མཚམས་སུ་ཆེ་མཆོག །ཡང་དག་གཤིན་རྗེ། རྟ་མགྲིན། ཕུར་བ་སོགས་ཀྱི་གནས་སུ། སྐུ་དང་། སྲོག་ཡིག ཕྱག་མཚན། སྐུ་རྗེས་སོགས་མངོན་པར་བཀྲ་བ། གཞན་ཐུགས་རྗེ་ཆེན་པོའི་གནས་ལ་སྐུ་ཕྱག་སྟོང་སྤྱན་སྟོང་སྐུ་བརྙེན་དངོས་སུ་བཀྲ་བ། སྒྲོལ་མ། འཇམ་དཔལ། ཛམ་བྷ་ལྷ། སེང་གདོང་མ། གེ་སར། ཐང་ལྷ་རྣམས་ཀྱི་སྒྲུབ་གནས་སོ་སོའི་སྒྲུབ་ཕུག་དང་། དེ་དག་ཏུ། བཀའ་རྟགས། ཕྱག་རྗེས་གྲུབ་རྟགས་རང་བྱོན་ངོ་མཚར་ཅན་མཐོང་ཆོས་སུ་ཡོད་ཅིང་། དེ་ཡི་གནས་ཡིག་རྒྱས་པ་ཤོག་དྲིལ་བཅུ་དྲུག་ཙམ་བཞུགས་ཀྱང་དུས་འགྱུར་གྱི་དབང་གིས་གཏན་མེད་དུ་གྱུར་སོང་། དེང་འདིར་བཞུགས་པ་ཉུང་བསྡུས་ཏེ། རིག་འཛིན་འཇིགས་མེད་གླིང་པའི་སྐྱེ་སྤྲུལ། གཏེར་སྟོན་ཡེ་ཤེས་རྒྱལ་མཚན་གྱིས་ཕབ་མཛད་པ་ཆུ་ཟླ་གར་བསྒྱུར་ཞེས་བཞུགས་པ་འདིའོ། །གནས་འདིར་སྔོན་རྗེ་སྒམ་པོ་བའི་སློབ་མ་མཆོག་གྱུར། ཁམས་པ་མི་གསུམ་ལས། གསལ་སྟོང་ཤྭ་སྒོམ་བྱོན་ཏེ་ཡུན་རིང་པོར་སྒྲུབ་པ་མཛད་ནས་བཞུགས་པའི་གནས་ཁྱད་པར་བ་ཞིག་ཡིན་པར་གསུངས་སོ། །

མཆན། གནས་ཡིག་འདི་གྲུབ་དབང་ལུང་རྟོགས་རྒྱལ་མཚན་དཔལ་བཟང་པོའི་གསུང་འབུམ་གླེགས་བམ་བཞི་པ་ལས་ཞལ་བཤུས་པའོ། །

༄༅། །ན་མོ་གུ་རུ། ཡུལ་གནས་ཀྱི་གསལ་བཤད་རྒན་པོའི་བརྡ་སྤྲོད་མདོར་བསྡུས་ཙམ་བརྗོད་པ་ལ། སྤྱིར་སེམས་ཅན་རང་རང་གི་བག་ཆགས་སྣ་ཚོགས་པའི་ལས་ཀྱི་རྣམ་པར་བཀྲམ་པའི་ཞིང་བསམ་གྱིས་མི་ཁྱབ་པ་སྣང་བ་ལས། བྱེ་བྲག་ཏུ་བསྐལ་བཟང་སངས་རྒྱས་སྟོང་གི་གདུལ་ཞིང་མི་མཇེད་འཇིག་རྟེན་གྱི་ཁམས། གླིང་བཞིའི་ནང་ཚན་ལྷོ་འཛམ་བུ་གླིང་འདིར། ཡུལ་ཆེན་པོ་དྲུག་སྟེ། རྒྱ་གར་རྡོ་རྗེ་གདན། བོད་ཁ་བ་ཅན། ལི་ཡུལ་ལྕང་ར་སྨུག་པོ། རྒྱ་ནག་རི་བོ་རྩེ་ལྔ། བྱང་ཤམ་བྷ་ལ། རི་བོ་གངས་ལྡན་ཏེ་དྲུག་ལས། འདི་ནི་མདོ་སྡེ་པདྨ་དཀར་པོ་ལས་སྟོན་པ་ཐུབ་པའི་དབང་པོ་འོད་མའི་ཚལ་དུ་བཞུགས་པའི་ཚེ། མཛོད་སྤུ་ནས་འོད་ཟེར་བྱང་ཕྱོགས་སུ་སྤྲོས་ཏེ་ཞལ་འཛུམ་པ་མཛད་པས། བྱང་སེམས་སྒྲིབ་པ་རྣམ་སེལ་གྱིས་རྒྱུ་རྐྱེན་ཞུས་པས། བཀའ་བསྩལ་པ། རིགས་ཀྱི་བུ། དུས་གསུམ་གྱི་སངས་རྒྱས་གང་གིས་ཀྱང་འདུལ་བྱར་མ་གྱུར་པའི་གནས། འདྲེ་སྲིན་དུ་མས་གང་བའི་མཐའ་འཁོབ་ཁ་བ་ཅན་གྱི་རྒྱལ་ཁམས་དེར། མ་འོངས་པའི་དུས་སུ་དམ་པའི་ཆོས་ཉི་མ་ཤར་བ་ལྟ་བུ་ཞིག་དར་ཞིང་རྒྱས་པར་འདུག་སྟེ་སེམས་ཅན་དེ་རྣམས་ཀྱང་ཐར་པ་བྱང་ཆུབ་ཀྱི་ལམ་ལ་འགོད་པར་འགྱུར་རོ། །དེ་འདུལ་བའི་གཉེན་པོ་ནི་འཕགས་པ་སྤྱན་རས་གཟིགས་དབང་ཕྱུག་ཡིན་ནོ། །ཞེས་གསུངས་པ་དང་། འཇམ་དཔལ་རྩ་རྒྱུད་ལས། ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་དང་། དགེ་བ་ཅན་གྱི་ས་ཕྱོགས་ནས། །བྱང་ཕྱོགས་གངས་རིའི་རྒྱུད་བར་དུ། །ལོ་ནི་ཆིག་སྟོང་ལྔ་བརྒྱ་ན། །དམ་པའི་ཆོས་ནི་འབྱུང་བར་འགྱུར། །ཞེས་སོགས་ལུང་བསྟན་པ་ལྟར། དང་པོ་བོད་འདི་མཚོ་ཆེན་པོར་གྱུར་པའི་དབུས་སུ་གངས་རི་ཆེན་པོ་རྟ་ཡི་རྣ་ཅོག་འདྲ་བ་ཞིག་ཡོད་པ་དེ་བྱང་ཕྱོགས་རྟ་རྣ་ཅན་གྱི་རི་ཞེས་གྲགས་པ་དེ། ཁ་བ་ལུང་རའི་འདི་ཡིན་ཏེ། གནས་བསང་ལས། བཅོམ་ལྡན་ཤཱཀྱ་ཐུབ་པ་ཡིས། །མདོ་སྡེའི་ནང་དུ་ལུང་བསྟན་པ། །རྟ་རྣ་རི་ཞེས་བྱ་བར་གྲགས། །གྲུབ་པ་ཐོབ་པའི་གནས་སུ་བསྟན། །ཞེས་འབྱུང་ལ། མཚོ་དེ་རིམ་གྱིས་བྲི་ནས་སཱ་ལའི་ནགས་ཚལ་ཞིག་ཆགས་པར་གྱུར། དེར་འཕགས་པའི་ཐུགས་ལས་སྤྲུལ་པའི་སྤྲེའུ་ཞིག་ལ་དགེ་བསྙེན་གྱི་སྡོམ་པ་ཕོག་ནས། བོད་ཡུལ་འདྲེ་སྲིན་གྱི་ཡུལ་མི་རུ་བསྒྱུར་ཆེད། ཁམས་ཀྱི་རྨ་ལུང་བྲག་ཏུ་སྒོམ་སྒྲུབ་ལ་ཞུགས་ཚེ། སྒྲོལ་མའི་སྤྲུལ་པ་བྲག་སྲིན་མོ་ཞིག་གིས། ཁྱིམ་ཐབ་དགོས་པའི་བརྡ་ཡང་ཡང་བསྐུལ་བར། འཕགས་པར་ཞུས་པས། གནང་ཞིང་བྱས་པས། སྤྲེའུ་ཕྲུག་དྲུག་སྐྱེས་པ་བོད་མིའུ་གདུང་དྲུག་ཏུ་གྲགས་ལ། དེ་ནས་རིམ་བཞིན་མི་རྒྱུད་འཕེལ་ཏེ། གདོང་དམར་བྷོ་ཊའི་ཡུལ་ཁ་བ་ཅན་ཞེས་སྣོད་བཅུད་གཞན་དང་མ་འདྲེས་པ། འཕགས་པ་སྤྱན་རས་གཟིགས་ཀྱི་བདག་གིར་བཞེས་པའི་ཡུལ་ཁྱད་པར་ཅན་ལ། སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ལས། མདོ་སྨད་ས་ཡི་ཐིག་ལེ། ཆུ་བཞི། རོང་བཞི། ཤོད་ཆེན་བཅོ་བརྒྱད། སོགས་ཀྱི་མཚན་པ་ལས། ཆུ་བོ་རྫ་ཆུ་འབབ་པའི་གཡོན་ཟུར། བྱང་ཨ་རྟ་རོང་གི་ཉེ་ཆར། ཏྲེ་ཤོད་ཉག་རོང་། དང་པོ་སྦས་ཡུལ་དུ་གནས་ཤིང་། བརྡ་རྟགས་ཨཱཿཡིག་གིས་ཁུང་སུ་འཛིན་པས། སྦས་ཡུལ་ཉག་ཤོད་ཨཿའཛིན་རོང་ཞེས་པ་དེ་ལས། སྦས་ཡུལ་སྒོ་ཕྱེས་ཏེ་ཨཱཿཡིག་དེ་ཕྱེད་ཕྱེད་བསྒོ་ནས་གནས་སྒོ་ཕྱེས་པས། ཡུལ་དེ་ལ་དང་པོ་ཨ་གསལ་དང་། རྗེས་ཨ་བསད་ཅེས་གྲགས་པ། ད་ལྟ་སྐད་ཟུར་ཆགས་ནས། ཨ་བསེ་ཞེས་པའི་ས་ཆ་འདི་ཡིན་ལ། ལུང་པའི་ཕར་ཚུར་དུ་ཨ་ཡིག་ཕྱེད་ཕྱེད་དུ་གནས་པར་གདའ། སྤྱིར་གངས་ཅན་གྱི་ལྗོངས་འདིར། ལུང་ལྔ། གླིང་གཅིག ལྗོངས་གསུམ། གངས་ཆེན་ཉེར་གཅིག སྦས་གནས་ཉེར་ལྔ་སོགས། ས་ཆུ་ཤིང་གངས་རི་བྲག་མཚོ་གླིང་སོགས་རྒྱལ་བའི་ཞབས་ཀྱིས་བཅགས་ཤིང་བྱིན་གྱིས་བརླབས་པའི་གནས་དང་། གཞི་བདག་གྲངས་ཀྱིས་མི་ལོངས་ལ། བྱེ་བྲག་ཉག་ཨཱཿཛི་རོང་འདིར། ཉག་སྟོད་ཁ་བ་ལུང་རི་དེ་སེང་ལྕམ་མ་བུ་འདྲེས་འདྲ། ཉག་སྨད་སྐྱ་འབྱིན་སེང་ཉག་དེ་ནགས་ལ་སྟག་མོ་འགྱིང་འདྲ། བཞག་བྲ་ལྷ་རྩེ་གཉན་པོ་དེ་མཁའ་ལ་རི་དར་ཕྱར་འདྲ་སྟེ། གཞི་བདག་མཆེད་བློན་སྤུན་གསུམ་དང་། སྐུ་ཡི་གནས་ཞལ་དཀར་བྲག གསུང་གི་གནས་ཨ་གསལ་བྲག་དཀར། ཐུགས་ཀྱི་གནས་ཤང་ལང་བྲག་དཀར། ཡོན་ཏན་གནས་དགའ་བ་བྲག་དཀར། ཕྲིན་ལས་གནས་སྣ་ཆབ་བྲག་དཀར་སྟེ་སྐུ་ལྔའི་གནས་ཆེན་ལྔ་དང་། གཞན་ཡང་གནས་ཕྲན་མང་ངོ་། །དེ་ལས་ཁྱད་པར་དུ་གྱུར་པ་ནི། ཉག་སྟོད་ཁ་བ་ལུང་རི་འདི་ཡིན་ལ། དེ་ལ་ཕྱི་ནང་གསང་གསུམ་ལས། ཕྱི་ལྟར་ན་གངས་དཀར་དུང་གི་བཤོས་བཟང་ཆེ་ཆུང་གསུམ། རྩེ་མོ་མཁའ་ལ་བསྙེགས་ཤིང་འཇའ་ཚོན་བཀྲ་བ། སེང་གེ་དཀར་མོ་གཡུ་རལ་ཅན་གྱི་གནས། སྐེད་པ་སྤང་རི་བཀྲ་ཤིང་ནགས་ཚལ་རྒྱས་པ་ལ། རི་དྭགས་སྣ་ཚོགས་རྩེད་འཇོ་འཁྲབ་ཅིང་། གཅན་གཟན་སྣ་ཚོགས་ཀྱི་ངར་སྐད་སྒྲོག་པ། མཐར་ཆུ་བོ་གཡུ་ཡི་མཚོ་མོ་ལ། ཆུ་གནས་སྣ་ཚོགས་དང་གསེར་མིག་ཉ་མོས་ཉམས་འགྱུར་རྩེ་བ་སྟེ། རི་མཐོན་པོ་གནམ་གྱི་ཀ་བ། ས་དམའ་མོ་གཡུ་ཡི་མཎྜལ། གངས་དཀར་པོ་ཤེལ་གྱི་མཆོད་རྟེན། འོད་འཁྱིམ་བ་འཇའ་ཚོན་སྣ་ལྔ། བྱིན་ཆགས་པ་སྒྲུབ་གནས་བརྒྱ་རྩ། སྤང་སེར་པོ་གསེར་གྱི་མེ་ཏོག དབྱིབས་མཛེས་པ་པདྨ་སྟོང་ལྡན། དྲི་ཞིམ་པོ་སྨན་སྣའི་བདུག་སྤོས། བག་ཕེབས་པ་རི་དྭགས་རྩེད་བྲོ། ཉམས་དགའ་བ་བྱ་ཚོགས་སྐད་སྙན། ཆབ་ཆུ་བོ་ཡན་ལག་བརྒྱད་ལྡན། ནགས་ཕྱུག་མོའི་ཡལ་འདབ་རྒྱས་པ་སྟེ། གནས་ཀྱི་ཡོན་ཏན་ལྡན་པ། བཀྲ་ཤིས་པའི་ས་དཔྱད་ཀྱང་། གངས་རྩེ་གསུམ་མཁའ་ལ་བསྙེགས་པ། དར་དཀར་པོའི་རྒྱལ་མཚན་ཕྱར་འདྲ། ཆོས་བསྟན་པ་རྒྱས་པའི་རྟེན་འབྲེལ། དུང་དཀར་པོ་གཡས་སུ་འཁྱིལ་བ། དར་སྣ་ཚོགས་ཅོད་པན་བཏགས་འདྲ། དཔལ་སྙན་གྲགས་རྒྱས་པའི་རྟེན་འབྲེལ། མདུན་རི་བོ་གླང་ཆེན་འགྱིངས་འདྲ། སྤྲ་སྤྲེའུ་ཡངས་རྩལ་སྦྱོང་བ། ཉམས་རྟོགས་པ་རྒྱས་པའི་རྟེན་འབྲེལ། ཐང་ཆེན་པོ་དཔལ་གྱི་བེའུ། འབྲུ་སྣ་ཚོགས་སྨིན་པའི་ཞིང་ས། ཕྱུག་བང་མཛོད་རྒྱས་པའི་རྟེན་འབྲེལ། དེ་ལྟར་ཡ་མཚན་གྱི་ཁྱར་པར་དུ་མ་དང་ལྡན་པ་ལ། མཐའ་བསྐོར་དུ་རི་བོ་བརྒྱ་དང་རྩ་བརྒྱད། རི་ཕྲན་བརྒྱ་རྩ། ཆུ་བོ་བརྒྱ་རྩ། ཆུ་མིག་བརྒྱ་རྩ། མཚོ་ཆེན་བརྒྱ་དང་བརྒྱད། མཚོ་ཕྲན་སྟོང་དང་རྩ་གཉིས་ཀྱིས་བསྐོར་བའོ། །གནས་དེའི་བདག་པོ་ནི་ལུང་རི་མཆེད་གསུམ་སྟེ། སྔོན་བསྐལ་པ་དང་པོ་ལ། ཡབ་རྨ་རྒྱལ་སྦོམ་ར། ཡུམ་ཁྲི་ཤོར་རྒྱལ་མོ། ཞང་པོ་གཉན་ཆེན་ཐང་ལྷ་སྟེ། སྲས་རྩེ་བླ་བཅུ་གསུམ་ཡོད་པའི་ཆེ་བ་ལུང་རི་མཆེད་གསུམ་ཡིན།

དང་པོ་གཡུང་དྲུང་བོན་གྱི་ཐ་ཚིག་ལ་གནས་པས། ཆེ་བ་གཡུང་དྲུང་ལྷ་རྩེ། འབྲིང་བ་ཁ་བ་དུང་རྩེ། ཆུང་བ་སེང་གེ་སྟག་རྩེ། ཡུམ་ནི་ར་ཉ་བྲག་ནག སྲས་ལ་དམ་ངར་ལྷ་རྩེ་ཞེས་བཏགས་པས། གཡུང་དྲུང་བོན་གྱི་བསྟན་པ་སྐྱོང་བའི་རྟགས་ཕྱག་གཡས་ན་གཡུང་དྲུང་འཛིན་པའོ། །བར་དུ་རྩ་གསུམ་ཀུན་འདུས་པདྨ་འབྱུང་གནས་ཉིད་བོད་གངས་ཅན་གྱི་ལྗོངས་འདིར་གདུལ་བྱ་སྐྱོང་ཞིང་། ཆོས་མདོ་སྔགས་ཀྱི་བསྟན་པ་ཉིན་མོ་ལྟར་མཛད་ཕྱིར། དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་ས་འདུལ་ཞིང་། བྲག་དམར་དཔལ་གྱི་ཀེའུ་ཚང་དུ། མཆོད་བསྟོད་དྲེགས་པའི་དཀྱིལ་འཁོར་ཞལ་ཕྱེས་ནས། རྒྱ་བོད་ཀྱི་ལྷ་སྲིན་ཆེ་དགུ་ཐམས་ཅད་དམ་ལ་བཏགས་ཤིང་། ཆོས་སངས་རྒྱས་ཀྱི་བསྟན་པ་སྲུང་ཞིང་། རྗེས་འཇུག་བུ་ལྟར་སྐྱོང་བར་བཀའ་ཡི་གཉེར་གཏད་པའི་ཚེ། ལུང་རི་མཆེད་གསུམ་ལ། སྤྱི་བོར་རྡོ་རྗེ་བཞག ལྕེ་ལ་དམ་ཆུང་བླུད། སྲོག་གི་སྙིང་པོ་ཕུལ། དབང་རྟགས་རྡོ་རྗེ་ལག་ཏུ་བྱིན་ནས། གསང་ཚན། ཆེ་བ་གཡུང་དྲུང་རྡོ་རྗེ། འབྲིང་བ་མི་བསྐྱོད་རྡོ་རྗེ། ཆུང་བ་རོལ་པའི་རྡོ་རྗེ། ཡུམ་ལ་མེ་ལོང་བྲག་ནག སྲས་ནི་ལྷ་སྲས་ནམ་མཁའ་ཞེས་བཏགས་ལ། གཏེར་ཁ་སྟོང་དང་རྩ་གཉིས་དང་གསང་སྔགས་བཀའ་ཡི་གཉེར་སྐྱོང་གཏད། དེ་འོག་པདྨ་གསུང་གི་སྤྲུལ་པ། རབ་མིག་ཆོས་འབྱུང་ལ། དགེ་བསྙེན་གྱི་སྡོམ་པ་བླངས་ནས། གསང་སྔགས་ཀྱི་དབང་བསྐུར་ཏེ་ཆེ་བ་རྡོ་རྗེ་དཔལ་རྩེ། འབྲིང་བ་འོད་ཆེན་ཐང་ལྷ། ཆུང་བ་ལྷ་ཆེན་བཙན་རར། ཡུམ་ལ་ཨ་ནེ་མཚོ་སྨན། སྲས་ལ་ནམ་མཁའ་གཉེན་པོ་ཞེས་བཏགས་ཏེ། གསལ་བའི་འོད་ཟེར་ལུང་བསྟན་ནས། ནག་ཕྱོགས་འཇོམ་ཞིང་། དཀར་ཕྱོགས་སྐྱོང་བ་དང་། བསྟན་པའི་སྲུང་མར་བཞག གཏེར་ཁ་ལྔ་བརྒྱ་གཉེར་དུ་གཏད། དེ་ཡང་། ཞལ་གཟིགས་པ་ཧོར་གྱི་ཡུལ་ལ་གཟིགས། མགོན་བྱེད་པ་ཉག་གི་ཕྱོགས་ལ་མཛད། ཅེས་པ་ལྟར་ལ། འདིའི་འཁོར་དུ། ཆེ་བ་དགེ་བསྙེན་བརྒྱ་ཡིས་བསྐོར། འབྲིང་བ་བློན་པོ་བརྒྱ། ཆུང་བར་སྟག་ཆས་བརྒྱ། སྲས་ལ་ལྷ་སྲས་བརྒྱ། ཡུམ་ལ་ལྷ་མོ་ཀླུ་མོ་བརྒྱ་ཡིས་བསྐོར། ནང་བློན་བཞི་ནི་རུས་སྦལ་གནམ་ལྟས་ལྕགས་ཁྲབ་ཅན། ལྕགས་ཁྲབ་ཅན་ལ་བརྒྱ་ཡིས་བསྐོར། ཁ་བ་ལྷ་ཁང་དུང་ཁྲབ་ཅན། དུང་ཁྲབ་ཅན་ལ་བརྒྱ་ཡིས་བསྐོར། རྨེ་རྒྱལ་ལྷ་ཕྱུག་གསེར་ཁྲབ་ཅན། གསེར་ཁྲབ་ཅན་ལ་བརྒྱས་བསྐོར། ར་ནུ་རྣམ་གཉིས་དངུལ་ཁྲབ་ཅན། དངུལ་ཁྲབ་ཅན་ལ་བརྒྱས་བསྐོར། ཕྱི་ཡི་བློན་པོ་བཞི་ནི། བུ་མོ་སྤུན་གསུམ་སྨན་གྱི་གཙོ། །སྨན་མོ་གླུ་ལེན་སྟོང་གིས་བསྐོར། །སེ་ར་གཉེན་པོ་གཉེན་གྱི་གཙོ། གོ་མཚོན་ཐོག་པ་སྟོང་གིས་བསྐོར། །མོ་ནམ་མཆེད་བརྒྱད་ཀླུ་ཡི་གཙོ། །མི་དཀར་རྟ་དཀར་སྟོང་གིས་བསྐོར། །དང་མོ་གཉེན་པོ་བསྭེ་ཁྲབ་ཅན། །བཙན་རྒོད་འབར་བ་སྟོང་གིས་བསྐོར། །གཞན་ཡང་། ཁ་ཏི་གཡུ་མཚོ་མཚོ་སྨན་བརྒྱད། ལྷ་སྨན་ཀླུ་སྨན་འབུམ་འབུམ་དང་། སྒོ་སྲུང་འབུམ་སྒོ་སྟག་ཐུལ་སྟག་ཞྭ་ཅན། སྟག་སྒོ་གཡུ་རབ་གཟིག་ཤུབ་ཅན། དཀར་མོ་དམར་མོ་འབིག་མོ་ལ། ལྷ་མོ་ཀླུ་མོས་སྐུ་ཁྲུས་གསོལ། ཡང་འཁོར་བྱེ་བ་འབུམ་སྡེས་ཚོགས་ཀྱིས་བསྐོར་བར་གསུངས། དེ་ལྟ་བུའི་གནས་དང་གཞི་བདག ཀི་ཀིས་བོས་ན་མགོན་མཛད་པ། བསྭོ་བསྭོས་བསྐུལ་ན་གྲོགས་བྱེད་པ། དྲག་རྩལ་ཐོག་ལྟ་བུ། མྱུར་མགྱོགས་གློག་ལྟ་བུའི་རྫུ་འཕྲུལ་དང་ལྡན་པ། སྐྱེས་པ་ཕོ་ཡི་དགྲ་བླ། དགྲ་རྐུན་ཇག་གསུམ་གྱི་གཉའ་གནོན། དམ་ཉམ་སྲོག་གི་གཤེད་མ། ཟ་མ་མོ་ཡི་ཁ་འཛིན། ཟས་ནོར་གཡང་གི་མཚོ་མོ། བདེ་སྐྱིད་སྤེལ་བའི་བདག་པོ། སྔོན་གེ་སར་ནོར་བུ་དགྲ་འདུལ་གྱིས། སྟག་གཟིག་ནོར་རྫོང་ཕབ་ནས་ནོར་འབྱེད་བྱེད་དུས། འབྲུ་གཡང་ཁྱུང་གི་སྒོ་ང་དེ། ཤོད་ཆེན་བཅོ་བརྒྱད་ལས། བྲེ་ཤོད་ཁ་བ་ལུང་རི་ལ་ཐོབ་པས། འདི་ཕྱོགས་འབྲུ་ཡི་བང་མཛོད་རྒྱས་ཤིང་། བསོད་ནམས་བདེ་སྐྱིད་ལྡན་པ། མི་རྒྱུད་གཡར་མཚོ་ལྟར་རྒྱས་པ། སྐར་ཚོགས་ལྟར་བཀྲ་བ། ཉི་ཟླ་ལྟར་གསལ་བ། མདོ་ཁམས་སྒང་དྲུག་གི་གནས་བདག་ཀུན་གྱི་ནང་ནས། ས་ཕྱོགས་གང་ནས་བལྟས་ཀྱང་རྒྱལ་མཚན་གྱི་ཏོག་ལྟར་དཀར་ཟང་ངེ་བ། མངོན་པར་མཐོང་བ། དེ་ཡང་དུས་ཀྱི་འགྱུར་ཁུག་ལྟར། རི་བོ་འདི་ཉིད་ཀྱང་ཐོག་མ་དཀར་པོ་དུང་འདྲ། བར་དུ་ཁྲ་བོ་སྟག་འདྲ། ཐ་མ་ནག་པོ་ཕག་འདྲ་འགྱུར་དུས་ཁམས་གསུམ་སྲོག་གི་བདག་པོར་འགྱུར་བར་བཤད་དོ། །

གཉིས་པ་ནང་ལྟར་ན། རྒྱལ་བ་ཐུབ་པའི་དབང་པོས་ལུང་གིས་ཟིན་ཞིང་། ཨོ་རྒྱན་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། དགེ་སློང་ནམ་མཁའི་སྙིང་པོ། རྣམ་སྣང་ལོ་ཙཱ་བཻ་རོ་ཙ་ན། སོག་པོ་དཔལ་གྱི་ཡེ་ཤེས། སྣ་ནམ་རྡོ་རྗེ་བདུད་འཇོམས། ལྷ་ལུང་དཔལ་གྱི་རྡོ་རྗེ་སོགས་རྒྱ་བོད་ཀྱི་རིག་འཛིན་གྲུབ་བརྙེས་མང་དུ་བྱོན་ཞིང་བཞུགས་སྟེ་བྱིན་གྱིས་བརླབས་པའི་གནས། ཡི་དམ་བདེ་མཆོག་འཁོར་ལོའི་ཕོ་བྲང་། མ་གཤིན་ཌཀྐི་ཚོགས་ཀྱི་གནས་མཆོག དཔལ་ལྡན་ཡེ་ཤེས་མགོན་པོའི་རྣམ་རོལ། དགེ་བསྙེན་མཆེད་གསུམ་བཞུགས་པའི་རྟེན་རྫོང་ཏེ། ཙ་རི་ཀོ་ཊ་ཡ་དང་འདུ་བ་མཉམ་ཞིང་། མདུན་གནས་པདྨ་ཤེལ་བྲག་སྟག་ཚང་ཕུག་བཅས་ཀྱི་གནས་དངོས་དང་ཕྱོགས་མཚམས་སུ། ཆེ་མཆོག ཡང་དག གཤིན་རྗེ། རྟ་མགྲིན། ཕུར་པ་སོགས་ཀྱི་གནས་སུ། སྐུ་དང་། སྲོག་ཡིག ཕྱག་མཚན སྐུ་རྗེས་སོགས་མངོན་པར་བཀྲ་བ། གཞན་ཐུགས་རྗེ་ཆེན་པོ་གནས་ལ་སྐུ་ཕྱག་སྟོང་སྤྱན་སྟོང་སྐུ་བརྙན་དངོས་སུ་བཀྲ་བ། སྒྲོལ་མ། འཇམ་དཔལ། ཛཾ་བྷ་ལ། སེང་གདོང་མ། གེ་སར། ཐང་ལྷ་རྣམས་ཀྱི་སྒྲུབ་གནས་སོ་སོར་སྒྲུབ་ཕུག་དང་དེ་དག་ཏུ། བཀའ་རྟགས། ཕྱག་རྗེས། གྲུབ་རྟགས་རང་བྱོན་ངོ་མཚར་ཅན་མཐོང་ཆོས་སུ་ཡོད་ཅིང་། དེ་ཡི་གནས་ཡིག་རྒྱས་པ་ཤོག་དྲིལ་བཅུ་དྲུག་ཙམ་བཞུགས་ཀྱང་དུས་འགྱུར་གིས་གཏོར་ཏེ་གཏན་མེད་དུ་གྱུར་སོང་། དེང་འདིར་བཞུགས་པ་ཉུང་བསྡུས་དེ། རིག་འཛིན་འཇིགས་མེད་གླིང་པའི་སྐྱེ་སྤྲུལ། གཏེར་སྟོན་ཡེ་ཤེས་རྒྱལ་མཚན་གྱིས་ཕབ་མཛད་པ་ཆུ་ཟླ་གར་བསྒྱུར་ཞེས་བཞུགས་པ་འདིའོ། །གནས་འདིར་སྔོན་རྗེ་སྒམ་པོ་པའི་སློབ་མ་མཆོག་གྱུར། ཁམས་པ་མི་གསུམ་ལས། གསལ་སྟོང་ཤྭ་སྒོམ་བྱོན་ཏེ་ཡུན་རིང་བཞུགས་ཤིང་དེའི་སློབ་མ་སྣང་སེམས་ལ་རང་དབང་ཐོབ་པ་སྐར་ཚོགས་ཙམ་བྱོན་ཅིང་། རྩ་རླུང་ལ་གྲུབ་པ་ཐོབ་པས། དེ་དག་གིས་བཞུགས་གནས། བྱ་ཕྱག འགུར་ཐོག དགོན་ཉིན། སྤྱན་སྔ་རི་ཁྲོད། མཚོ་འབྲོག་སྟོད་སྨད། ཆུ་ཕྱར། རྫ་དམར། གཡང་སྙིང་མགོ འབྲུག་ཆིབས་འགོར་སོགས་བཅས་ལ། རྡོ་ཡི་སྒྲུབ་ཁང་གྲུ་བཞི་འདོམ་གང་བ་མང་དུ་བཞུགས་ལ་བཅུ་ཕྲག་འགའ་རེ་ད་ལྟའང་མ་ཞིག་པ་མཇལ་དུ་ཡོད་ཅིང་། འདི་དག་ཏུ་སྒྲུབ་བརྒྱུད་ཀྱི་བསྟན་པ་ཉི་ཟླ་ཤར་བ་བཞིན་བཞུགས་ཅིང་། ཟག་མེད་འཇའ་ལུས་སུ་འགྲུབ་པ་ཡང་མང་དུ་བྱོན། ཁྱུང་ལུང་རས་པ་དམ་ཚིག་རྡོ་རྗེ། རྡོ་གྲུབ་ཆེན་རིན་པོ་ཆེ་སོགས་བྱོན་ཅིང་ཙྭ་གདན་ཀྱང་པ་རེ་ཙམ་སྟེང་ཡུན་རིང་བཞུགས་ཅིང་། འགུར་བཞེས་པའི་གསུང་སྙེན་ལ། བྱ་བྱེའུ་རི་དྭགས་སོགས་ཀྱི་ཉན་ཏེ་མདུན་དུ་འདུག་པས་གནས་དེར་འགུར་ཐོག་ཞེས་མིང་ཐོག་པ། གཡུ་འབྲུག་ཆིབས་ནས་བྱོན་པས། འབྲུག་ཆིབས་མགོ་ཞེས་གྲགས་པ་སོགས་དེ་དག་གིས་རྣམ་ཐར་ན་གསལ། རྗེས་སུ་ཁྲོམ་དགེ་མཁའ་སྤྱོད་ཀློང་ཆེན་འོད་གསལ་སྙིང་པོ་བྱོན་ནས་འཇའ་ལུས་སྒྲུབ་ཕུག་ཏུ་བཞུགས་སྐབས། སྐྱེ་སྔོན་འཇའ་ལུས་གྲུབ་པ། རྗེས་དྲན་གིས་གཟིམ་མལ་འོག་ནས། ཏིང་ཤག་བླང་ད་ལྟ་ཁྲོམ་དགའི་བརྟན་སྒམ་དུ་བཞུགས་པ་དང་། གྲུབ་ཆེན་པདྨ་བདུད་འདུལ། ཁྲོ་ཟུར་དྷརྨ་བཛྲ། བདུད་འདུལ་འཇའ་ཚོན་གླིང་པ་སོགས་བྱོན་ནས་བཞུགས་ཤིང་གཏེར་ཁ་མང་དུ་བཞེས་པ་སོགས་ལོ་རྒྱུས་མང་ངོ་། །

གསུམ་པ་གསང་བ་ལྟར་ན། རང་སྣང་སྤྲུལ་སྐུའི་ཞིང་མཆོག་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་གི་བཀོད་པ་ལྷུན་གྱིས་གྲུབ་པ་ན། ཨོ་རྒྱན་པདྨ་ཐོད་ཕྲེང་རྩལ། འཁོར་རྗེ་འབངས་རིག་འཛིན་དཔའ་བོ་མཁའ་འགྲོའི་འཁོར་ཚོགས་བསམ་གྱིས་མི་ཁྱབ་པ་ལ། ཆོས་སྟོན་ནས་བཞུགས་པ་སོགས་སྐྱེས་མཆོག་དག་པའི་སྣང་ངོར་བསམ་གྱིས་མི་ཁྱབ་ཏེ་གང་ཟག་རང་སྐལ་དུ་སྣང་བ་ཉིད། ཇི་སྐད་དུ། ཡང་དག་ཤེས་པའི་རང་རིག་བློ་མེད་ན། །བདེ་ཆེན་ཞིང་ཡང་ངན་སོང་གནས་སུ་སྣང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་འགྲོའི་གནས་ཀྱང་དགའ་ལྡན་ལྷ་ཡི་གནས། །ཞེས་གསུངས་པ་ལྟར་དག་དང་མ་དག་རང་རང་གི་མཐོང་སྣང་འགོགས་དུ་མེད་ལ། དུས་རྒྱུན་པར་ཚེས་བཟང་དུས་བཟང་ལ། རྔ་དང་། མཁར་རྔ། གླིང་བུ། སིལ་སྙན། དུང་སྐད་སོགས་ཀྱི་སྒྲ་ཐོས་པ་ཡང་མང་དུ་ཡོད། དེ་ལྟ་བུའི་ཡ་མཚན་དང་ལྡན་པའི་གནས་འདི་ནི། བརྒྱུད་པ་གསུམ་གྱི་བྱིན་རླབས་འཛིན་པ། དཀོན་མཆོག་གསུམ་གྱི་བསྟན་པ་སྲུང་བ། བདེན་པ་གསུམ་གྱི་ཆོས་འཁོར་བསྐོར་བ། དགོས་འདོད་གསུམ་གྱི་ཆར་པ་འབེབས་པ། སྲིད་པ་གསུམ་ལ་བྱ་ར་མཛད་པའི་འཕྲིན་ལས་རྩལ་དང་ལྡན་པ་སྟེ། དེ་ལ་སྤྲེལ་ལོ་ནམ་ཤར་གྱི་ཚེ་ཟླ་བ་དང་པོ་ནས། དྲུག་པའི་བར་དང་གནས་འདུས་ཆེ་ཚེ་ཟླ་བ་དང་པོ་ནས་གསུམ་པའི་བར། འཛམ་གླིང་གི་གནས་ཡུལ་ཀུན་ནས་ཞིང་སྐྱེས་ཀྱི་དཔའ་བོ་མཁའ་འགྲོ་ཐམས་ཅད་འདུ་བའི་དུས་ཚིགས་ལ། ཕྱག་མཆོད་མར་མེ། ཇོ་དར། བསང་མཆོད་ཕུལ་བ་སོགས་དགེ་བ་གང་འགྲུབ་དང་། རྩེ་བསྐོར། བར་བསྐོར། མཐའ་བསྐོར་སོགས་སྡིག་སྤོང་དགེ་སྒྲུབ་བགྱི་བ་ལ། སྟོང་འགྱུར་གྱིས་འགྱུར་སྟོབས་ཆེ་ཞིང་། ལྷག་པར་བསྐོར་བ་གཅིག་ལ་མ་ཎི་དུང་བཅུ་གསུམ། སི་དྡྷི་དུང་བདུན་སོགས་ཀྱི་ཕན་ཡོན་ཡོད་པར་གསུང་ཞིང་། དེ་ཚུལ་ཡུལ་འདིར་ཡང་སྔར་སྲོལ་གོམ་གཤིས་ལ། ས་ཕྱོགས་རི་རྒྱུད་གནས་མཐའ་ཚུན། རི་རྒྱ་རྔོན་ཁྲིམས། རྐུ་རྒྱ་ཇག་ཁྲིམས། མི་ཚེ་མི་རབས་ལ་གནས་གཞི་ལ་གནོད་པའི་ཕག་དང་། བོང་བུ་མི་གསོ་བའི་སྲོལ་ཁྲིམས་བཅས་པ་ཡ་རབས་བཟང་པོའི་སྤྱོད་པས་རྟག་ཏུ་འཚོ་ཞིང་གནས་པ་ལ། རྗེས་འཇུག་ཕྱི་རབས་པས་ཀྱང་དེ་དེ་བཞིན་དུ་སྒྲུབ་པར་གལ་ཆེ་བར་གདམས་སོ། །དེ་སྐད་རིགས་རྒྱུད་རྒྱ་ལས་སྐྱེས་ཤིང་། མི་ཚེ་བོད་དུ་སྐྱེལ་བའི་མཚོ་རྡོ་མིང་རིག་འཛིན་རྒན་པོ་རང་ལོ་དོན་གཅིག་པར་ཆུ་ལུག་ཟླ་གསུམ་པའི་ཚེས་བཅུ་ལ་བྲིས་པ་འདིས་ཀྱང་རྣམ་མཁྱེན་སངས་རྒྱས་མྱུར་འགྲུབ་ཤོག དགེའོ། །

མཆན། ༡.ལྷ་འབུམ་དགོན་པས་འདོན་སྤྲོད་གནང་བའི་མཚོ་ཕུ་རྡོ་ལོ་པདྨ་འགྱུར་མེད་རྒྱ་མཚོའི་ཕྱག་བྲིས་དངོས་ལས་ཞལ་བཤུས་པའོ། །

༄༅། །ན་མོ་གུ་རུ་དྷེ་ཝ་ཌཱཀྐི་ནི། གནས་ཆེན་ཁ་བ་ལུང་རིའི་དཀར་ཆག་གསོལ་མཆོད་བཀོད་པ་ནི། ཀྱེ༔ འཛམ་གླིང་ཁ་བའི་བྱང་ཕྱོགས་ནས༔ གངས་དཀར་རྩེ་མཐོ་གཉན་པོའི་རི༔ གངས་དཀར་དུང་གི་བཤོས་བཟང་ལ༔གཞི་བདག་གཡུང་དྲུང་རྡོ་རྗེ་ཞེས༔  ཅོད་པན་ཤེལ་གྱི་ཟུར་ཕུད་ལ༔ གསལ་བའི་འོད་ཟེར་རྒྱུད་མ་ནི༔ ཉི་ཟླ་ཟུང་ཞི་རྟག་ཏུ་འཁོར༔ སྐར་ཕྲེང་ལྟ་བུར་བཀྲ་བའི་གནས༔ འཇའ་ཚོན་སྣ་ལྔའི་སྦྲ་གུར་བསྐོར༔ བོད་ཡུལ་མདོ་ཁམས་སྒང་དུ་གྲགས༔ སྔོན་ཚེ་བཅོམ་ལྡན་ཤཱཀ་ཐུབ་ཀྱི༔ མདོ་སྡེ་ནང་དུ་ལུང་བསྟན་པ༔ རྟ་རྣ་རི་ཞེས་བྱ་བར་གྲགས༔ གྲུབ་པ་ཐོབ་པའི་གནས་སུ་སྟོན༔ གནས་མཆོག་དེ་ཡི་མཚན་ཉིད་ནི༔ སྔོན་གྱི་བསྐལ་པ་དང་པོ་ལ༔ རི་བོ་འདི་ཉིད་དུང་ལས་གྲུབ༔ གླིང་བཞི་མི་འགྱུར་རྟག་བཞི་ལ༔ ཆུ་བཞི་འབབ་པ་རྒྱལ་བའི་གསུང༔ ཀླུ་བདུད་ནག་པོ་རྗེས་སུ་འབྲང༔ ཀུན་དགའ་གཞོན་ནུས་ཕོ་ཉ་མཛད༔ རྡོ་རྗེ་ཕག་མོའི་ཚོགས་ཁང་གནས༔ བདེ་མཆོག་འཁོར་ལོའི་ཕོ་བྲང་ཡིན༔ དཔའ་བོ་མཁའ་འགྲོའི་གྲོང་ཁྱེར་ཏེ༔ དུང་སེང་དཀར་མོ་རྩེ་ལ་བབས༔ ལྷ་ཆེན་བརྒྱད་ཀྱི་བཞུགས་གནས་ཡིན༔ ཀླུ་ཆེན་བརྒྱད་ཀྱི་ཕོ་བྲང་སྟེ༔ སྐལ་ལྡན་བྱང་ཆུབ་སྒྲུབ་པའི་གནས༔ སེང་ཁྱུང་ལྟ་བུར་སྒོམ་ཆེན་བཞུགས༔ ཕྱི་རབ་སྐལ་ལྡན་སྤྲིན་ལྟར་གཏིབ༔ སྨན་ནུས་པ་ཅན་རྣམས་འཁྲུངས་པའི་གནས༔ མེ་ཏོག་སྣ་ཚོགས་བཀྲ་བའི་གླིང༔ སྤུ་སྡུག་རི་དྭགས་སྣ་ཚོགས་འཁོར༔ སྐད་སྙན་བྱ་རིགས་འདུ་བའི་གནས༔ གནས་མཆོག་དེ་ཡི་ཟོ་དོར་ལ༔ རི་བོ་བརྒྱ་དང་བརྒྱད་ཀྱིས་བསྐོར༔ རི་ཕྲན་བརྒྱ་དང་བརྒྱད་ཀྱིས་བསྐོར༔ ཆུ་བོ་བརྒྱ་དང་བརྒྱད་ཀྱིས་བསྐོར༔ ཆུ་མིག་བརྒྱ་དང་བརྒྱད་ཀྱིས་བསྐོར༔ མཚོ་མོ་བརྒྱ་དང་བརྒྱད་ཀྱིས་བསྐོར༔ མཚོ་ཕྲན་སྟོང་དང་རྩ་གཉིས་བསྐོར༔ གྲུབ་ཆེན་བརྒྱད་ཅུ་བཞུགས་པའི་རྟགས༔ བཀའ་རྒྱུད་གསེར་ཕྲེང་ལུང་ཡང་བསྟན༔ མ་མགོན་ལྕམ་དྲལ་དུར་ཁྲོད་ཡིན༔ སྐལ་ལྡན་ལས་ཅན་ཐར་ལམ་གནས༔ སྲིད་པའི་མགུར་ལྷ་བཅུ་གསུམ་དང༔ དམ་ཅན་བརྟན་མ་བཅུ་གཉིས་དང༔ བོད་ཀྱི་རྩེ་ལྷ་བཅུ་གསུམ་སོགས༔ ཀུན་གྱི་གཙོ་ལ་བཞུགས་པ་ནི༔ རིན་ཆེན་ཤེལ་གྱི་ཟུར་ཕུད་ལ༔ དགྲ་བཅོམ་སྟོང་དང་ལྔ་བརྒྱ་བཞུགས༔ འཇའ་ཚོན་སྤེལ་མས་གདུག་ཁང་མཛེས༔ དེ་ན་བཞུགས་པའི་གནས་བདག་ནི༔ སྔོན་གྱི་བསྐལ་པ་དང་པོ་ལ༔ ཡབ་ནི་རྨ་རྒྱལ་སྤོམ་ར་བཞུགས༔ ཡུམ་ནི་ཁྲི་ཤོར་རྒྱལ་མོ་ལ༔ ཞང་པོ་གཉན་ཆེན་ཐང་ལྷ་སྟེ༔ སྲས་ནི་རྩེ་ལྷ་བཅུ་གསུམ་ནི༔ ཆེ་བ་ལུང་རི་མཆེད་གསུམ་ནི༔ གཡུང་དྲུང་བོན་གྱི་མཚན་གསོལ་བ༔ ཆེ་བ་གཡུང་དྲུང་ལྷ་རྩེ་དང༔ འབྲིང་བ་ཁ་བ་དུང་རྩེ་དང༔ ཆུང་བ་སེང་གེ་སྟག་རྩེ་དང༔ ཡུམ་ནི་ར་ཉ་བྲག་ནག་དང༔ སྲས་ནི་དམ་ངར་ལྷ་རྩེ་ཡིན། གཡུང་དྲུང་བོན་གྱི་བསྟན་པ་སྲུང༔ དེ་འོག་བསྐལ་པ་བར་མ་ལ༔ སློབ་དཔོན་པད་མ་འབྱུང་གནས་ཀྱིས༔ བཀའ་དང་དམ་ལ་བཏགས་པའི་ཚེ༔ ཁྱོད་ཀྱི་སྲོག་གི་སྙིང་པོ་ཕུལ༔ སྤྱི་བོར་དམ་ཚིག་རྡོ་རྗེ་བཞག༔ ལྕེ་ལ་དམ་ཚིག་བདུད་རྩི་བླུད༔ དབང་རྟག་རྡོ་རྗེ་ལག་ཏུ་བྱིན། ཁྱེད་ལ་གསང་བའི་མཚན་བཏག་པ༔ ཆེ་བ་གཡུང་དྲུང་རྡོ་རྗེ་དང༔ འབྲིང་བ་མི་བསྐྱོད་རྡོ་རྗེ་དང༔ ཆུང་བ་རོལ་པའི་རྡོ་རྗེ་བཏགས༔ ཡུམ་ནི་མེ་ལུང་བྲག་ནག་དང༔ སྲས་ལ་ནམ་མཁའི་མིང་དུ་བཏགས༔ གཏེར་ཁ་སྟོང་དང་རྩ་གཉིས་དང༔ གསང་སྔགས་བཀའི་གཉེར་དུ་གཏད༔ དེ་འོག་བསྐལ་པ་ཐ་མ་ལ༔ པདྨ་གསུང་གི་སྤྲུལ་པ་ནི༔ སྤྲུལ་སྐུ་རབ་མིག་ཆོས་འབྱུང་ལ༔ དགེ་བསྙན་སྡོམ་པ་བླངས་པའི་ཚེ༔ གསང་སྔགས་དཀྱིལ་འཁོར་དབང་ཡང་བསྐུར༔ ཁྱེད་ལ་གསང་བའི་མཚན་གསོལ་བ༔ ཆེ་བ་རྡོ་རྗེ་དཔལ་བརྩེགས་དང༔ འབྲིང་བ་འོད་ཆེན་ཐང་ལྷ་དང༔ ཆུང་བ་ལྷ་ཆེན་བཙན་དྲ་དང༔ ཡུམ་ལ་མཚོ་སྨན་ཞེས་ཀྱང་བྱ༔ སྲས་ནི་ནམ་མཁའི་གཉན་པོ་སྟེ༔ རྒྱལ་བའི་འོད་ཟེར་ལུང་ཡང་སྟོན༔ དེའི་བསྟན་པ་སྲུང་བར་བསྐོས།

གཏེར་ཁ་ལྔ་བརྒྱ་གཉེར་དུ་གཏད༔ གཟིགས་ནི་ཕར་རྒྱབ་ཡུལ་ལ་གཟིགས༔ མགོན་ནི་སེང་ཁྱུང་སྦྲ་ལ་མགོན༔ དེ་ལྟར་ཁས་བླངས་དམ་བཅས་པ༔ གསང་སྔགས་བཀའི་བསྟན་སྲུང་སྟེ༔ ཆེ་བ་དགེ་བསྙེན་བརྒྱའི་བསྐོར༔ འབྲིང་བ་བློན་པོ་བརྒྱའི་བསྐོར༔ ཆུང་བ་སྟག་ཆས་བརྒྱའི་བསྐོར༔ ཡུམ་ལ་ལྷ་མོ་ཀླུ་མོ་བརྒྱའི༔ སྲས་ལ་ལྷ་སྲས་བརྒྱའི་བསྐོར༔ ནང་གི་བློན་ཆེན་བཞི་ཡིས་བསྐོར༔ རུ་སྦལ་གནམ་ལྟས་ལྕགས་ཁྲབ་ཅན༔ ལྕགས་ཁྲབ་ཅན་ལ་བརྒྱའི་བསྐོར༔ ཁ་བ་ལྷ་ཁང་དུང་ཁྲབ་ཅན༔ དུང་ཁྲབ་ཅན་ལ་བརྒྱའི་བསྐོར༔ རྨ་རྒྱལ་ལྷ་ཕྱུག་གསེར་ཁྲབ་ཅན༔ གསེར་ཁྲབ་ཅན་ལ་བརྒྱའི་བསྐོར༔ ར་ནུ་རྣམས་གཉིས་དངུལ་ཁྲབ་ཅན༔ དངུལ་ཁྲབ་ཅན་ལ་བརྒྱའི་བསྐོར༔ ཕྱིའི་བློན་པོ་ཆེན་པོ་བཞི༔ བུ་མོ་སྤུན་གསུམ་སྨན་གྱི་གཙོ༔ སྨན་མོ་གླུ་ལེན་ཀྱུ་རུ་རུ༔ མི་དམར་རྟ་དམར་ཤ་ར་ར༔ སེ་ར་གཉེན་པོ་གཉེན་གྱི་གཙོ༔ མི་སེར་རྟ་སེར་སྟོང་གིས་བསྐོར༔ གོ་ཆ་སིལ་སྒྲ་སི་ལི་ལི༔ མཚོན་ཆ་འོད་མདངས་ལྷངས་སེ་ལྷང༔ མོ་རྣམས་མཆོད་བརྒྱད་ཀླུའི་གཙོ༔ མི་དཀར་རྟ་དཀར་སྟོང་གིས་བསྐོར༔ ཀླུའི་དམག་དཔུང་ཤ་ར་ར༔ དང་མོ་གཉེན་པོ་བསྭེ་ཁྲབ་ཅན༔ བཙན་རྒོད་འབར་བ་སྟོང་གིས་བསྐོར༔ བཙན་གྱི་བསྭོ་སྒྲ་ཏི་རི་རི༔ ཁྭ་ཏི་གཡུ་མཚོ་མཚོ་སྨན་བརྒྱད༔ ལྷ་སྨན་ཀླུ་སྨན་འབུམ་གྱིས་བསྐོར༔ འབུམ་སྒོ་སྟག་ཐུལ་སྟག་ཞྭ་ཅན༔ སྟག་སྒོ་གཡུ་རལ་གཟིག་ཤུབ་ཅན༔ དཀར་མོ་དམར་མོ་འབིག་མོ་ལ༔ ལྷ་མོ་ཀླུ་མོ་སྐུ་ཁྲུས་གསོལ༔ ཡང་སྤྲུལ་བྱེ་བ་འབུམ་སྡེས་བསྐོར༔ ཀུན་ཀྱང་རྫུ་འཕྲུལ་རྟ་ལ་ཆིབས༔ སྐུ་ལ་གོ་ཆ་སྣ་ཚོགས་གསོལ༔ དབུ་ལ་ཤེལ་གྱི་རྨོག་མོ་གསོལ༔ དར་འཕྲུ་རྒོད་འཕྲུ་ལྡེམ་སེ་ལྡེམ༔ སྟག་རལ་གཡས་ལ་གཟིག་ཤུབ་གཡོན༔ ཉག་ཕྲན་མདའ་འཕེན་ཤ་ར་ར༔ མཁར་ལུང་ཡངས་པ་ཐམས་ཅད་ཀུན༔ སློབ་དཔོན་པདྨའི་སྤྱན་སྔ་རུ༔ ཅི་ལྟར་ཁས་བླངས་དམ་བཅས་བཞིན༔ མཆོད་པའི་གནས་འདིར་སྤྱན་འདྲེན་ནས༔ དམ་ཚིག་དབང་གིས་གཤེགས་སུ་གསོལ༔ བསྟན་པ་སྲུང་ཕྱིར་གཤེགས་སུ་གསོལ༔ བར་ཆད་སེལ་ཕྱིར་གཤེགས་སུ་གསོལ༔ དགྲ་བགེགས་བསྒྲལ་ཕྱིར་གཤེགས་སུ་གསོལ༔ རྐྱེན་ངན་བཟློག་ཕྱིར་གཤེགས་སུ་གསོལ༔ སྡོང་གྲོགས་མཛད་ཕྱིར་གཤེགས་སུ་གསོལ༔ བསོད་ནམས་རྒྱས་ཕྱིར་གཤེགས་སུ་གསོལ༔ བཀོར་ནོར་འཕེལ་ཕྱིར་གཤེགས་སུ་གསོལ༔

ཆགས་ཉམས་བསྐང་ཕྱིར་གཤེགས་སུ་གསོལ༔ དགྲ་སྣ་བཟློག་ཕྱིར་གཤེགས་སུ་གསོལ༔ བྱ་ར་མཛད་ཕྱིར་གཤེགས་སུ་གསོལ༔ ལམ་ལྷ་མཛད་ཕྱིར་གཤེགས་སུ་གསོལ༔ དགྲ་དཔུང་ཐུལ་ཕྱིར་གཤེགས་སུ་གསོལ༔ བགེགས་དཔུང་འཇོམས་ཕྱིར་གཤེགས་སུ་གསོལ༔ འཁོར་འདས་གནས་འདིར་གཤེགས་སུ་གསོལ༔ འདིར་བྱོན་དགྱེས་པའི་གདན་ལ་བཞུགས༔ ཁྱེད་ལ་མཆོད་པ་འབུལ་བ་ནི༔ དཀར་གསུམ་དམར་གསུམ་གྱི་ལི་ལི༔ ཕྱེ་མར་ཞལ་ཟས་དཔུང་སེ་དཔུང༔ དྲི་ཞུམ་དུད་པ་ཕྱུ་རུ་རུ༔ དྲི་བཟང་སྤོས་ངད་ཐུ་ལུ་ལུ༔ སིལ་སྙན་རོལ་མོ་འུ་རུ་རུ༔ རྩི་ཤིང་དུད་པ་ཕྱུ་རུ་རུ༔ འཕེན་དང་བླ་བྲེ་ལྷབ་སེ་ལྷབ༔ གདུག་དང་བ་དན་ཡོང་སེ་ཡོང༔ རི་དྭགས་སྣ་ཚོགས་ཐ་ར་ར༔ གཅན་གཟན་འདུར་སྒྲ་ཁྲ་ལ་ལ༔ འདབ་ཆགས་གཤོག་སྒྲ་སི་རི་རི༔ གཡུང་དྭགས་ཐམས་ཅད་སྒ་ར་ར༔ ཕྱི་ནང་གསང་བའི་མཆོད་སྤྲིན་འདི༔ ཁ་བ་ལུང་རི་འཁོར་བཅས་མཆོད༔ དྲི་བཟང་སྣ་ཚོགས་དུད་པ་འདི༔ ཁ་བ་ལུང་རི་འཁོར་བཅས་བསང༔ དགྲ་བགེགས་ཤ་ནི་རི་ལྟར་སྤུང༔ ཁ་བ་ལུང་རི་འཁོར་བཅས་བསང༔ དགྲ་བགེགས་ཁྲག་ནི་མཚོ་ལྟར་སྐྱིལ༔ ཁ་བ་ལུང་རི་འཁོར་བཅས་བསང༔ དགེ་བགེགས་རུས་ནི་བྲག་ལྟར་བརྩེགས༔ ཁ་བ་ལུང་རི་འཁོར་བཅས་བསང༔ ལུང་རི་མཆེད་གསུམ་འཁོར་བཅས་ལ༔ ལྷ་རྫས་ཕྱིའི་མཆོད་པ་འབུལ༔ སྒྲུབ་རྫས་ནང་གི་མཆོད་པ་འབུལ༔ གཉིས་མེད་གསང་བའི་མཆོད་པ་འབུལ༔ དམ་རྫས་རྒྱན་གྱི་གཏོར་མ་འབུལ༔ གསེར་སྐྱེམས་བདུད་རྩིའི་ཆང་གིས་མཆོད༔ དགྱེས་པར་བཞེས་ལ་སྡོང་གྲོགས་མཛོད༔ དེ་ནས་བསྐུལ་པ་བསང་གཏད་ནི། ཧཱུཾཿདྲག་པོའི་ལས་ལ་བསྐུལ་པ་ནི༔ ལུང་རི་དགྲ་ལ་ཆས་ཙམ་ན༔ སྟོང་གསུམ་འཇིག་རྟེན་ཤིག་སེ་ཤིག༔ དམག་ཚོགས་སྤྲིན་ལྟར་ཐིབ་སེ་ཐིབ༔ མྱུར་མགྱོགས་གློག་ལྟར་ཁྱུག་སེ་ཁྱུག མཚོན་ཆ་ཐོག་ལྟར་ཤ་ར་ར༔ བསྟན་དགྲ་དམ་ཉམས་སྡིག་ཅན་འདི༔ སྟོང་གསུམ་འཇིག་རྟེན་གར་གནས་ཀྱང༔ རང་དབང་མེད་པར་ཁུག་ལ་ཤོག༔ དགྲ་བགེགས་ཤ་ཁྲག་ཞལ་དུ་གསོལ༔ བདག་ལ་སྡང་དགྲ་གནོད་བྱེད་ཀྱི༔ མི་ནོར་འཁོར་དང་བཅས་པ་རྣམས༔ བསང་མཆོད་འདི་དང་མཉམ་པར་བཞེས༔ གཏན་ནས་བརླག་པའི་ཕྲིན་ལས་མཛོད༔ བཅོལ་བའི་ཕྲིན་ལས་གྲུབ་པར་མཛོད༔ ཅེས་པ་འདི་ནི་སྤྲུལ་སྐུ་རབ་མིག་ཆོས་འབྱུང་གི་གསུང་ལས་ཇི་ལྟར་བྱུང་བ་བཞིན་དུ་ཚིག་གཅིག་ཀྱང་ནོར་བཅོས་མེད་པར་བྲིས་པ་དགེའོ། །

༄༅། །ཀྱེེ་སྔོན་གྱི་བསྐལ་པ་དང་པོ་ལ། །རི་རྒྱལ་ལྷུན་པོ་ལྷོ་ཕྱོགས་ནས། །འཛམ་བུ་གླིང་གི་བྱང་ཕྱོགས་ནས། །ཁ་བ་ཅན་ལྗོངས་བོད་ཀྱི་ཡུལ། །ཏི་སེ་གངས་དཀར་ཤར་ཕྱོགས་སུ། །རི་རྒྱལ་ཁ་བ་ལུང་རི་ནི། །སྔོན་ནོ་གཡུ་ཡི་མདོག་འདྲ་ལ། །དཀར་པོ་དུང་གི་ན་བཟའ་གསོལ། །རི་རྒྱལ་དེ་ཡི་འདབ་མ་ལ། །རྩི་ཤིང་སྣ་ཚོགས་སྐྱེས་པའི་ས། ལྗང་དཀར་ཐང་སྐྱེས་བྱེད་པའི་གནས། །མེ་ཏོག་སྣ་ཚོགས་འཁྲུངས་པའི་ལྗོངས། །འདབ་ཆགས་སྣ་ཚོགས་ལྡིང་ཞིང་འཁོར། །རི་དྭགས་སྣ་ཚོགས་འདུས་པའི་གནས། །གཅན་གཟན་སྣ་ཚོགས་ངར་སྐད་སྒྲོགས། །བདེ་བར་གཤེགས་པའི་གནས་མཆོག་འདིར། །དཔའ་བོ་མཁའ་འགྲོ་འདུས་པའི་གནས། །རྩ་བ་གཡུའི་མཚོ་མོ་འཁྱིལ། །རྩེ་མོ་སྤྲིན་དང་འཇའ་ཚོན་འཁྲིགས། །གཡུ་ཡི་ཆར་པ་སི་ལི་ལི། །དུང་གི་ཁ་བ་ཐིབ་སེ་ཐིབ། །ལྕགས་ཀྱི་སེར་བ་ཤ་ར་ར། །ཟངས་ཀྱི་ཁུ་འཕང་ཐ་ར་ར། །རི་དེར་གནས་པའི་གཞི་བདག་ནི། །དགེ་བསྙེན་གཡུང་དྲུང་རྡོ་རྗེ་མཚན། །སྐུ་གཟུགས་དཀར་ལ་འཛུམ་མདངས་ཅན། །སྐུ་ལ་དར་དཀར་ན་བཟའ་མནབ། མཛེས་པའི་རྒྱན་ཆ་སྣ་ཚོགས་གསོལ། །དཔའ་བོའི་གོ་ཆ་ཐམས་ཅད་གསོལ། །ཕྱག་གཡས་སྦ་ལྕག་ཀླད་ལ་གཡུག །གཡོན་པས་བ་དན་ཁྲ་བོ་བསྣམས། །ཆིབས་སུ་རྟ་དཀར་རྔོག་དམར་བཅིབས། །འཁོར་དུ་དམག་ཚོགས་འབུམ་གྱིས་བསྐོར། །སློབ་དཔོན་པདྨ་འབྱུང་གནས་ལ། །ཇི་ལྟར་ཁས་བླངས་ཐམས་ཅད་བཞིན། །འཁོར་བཅས་གནས་འདིར་གཤེགས་སུ་གསོལ། །ཇི་ལྟར་འབྱོར་བའི་མཆོད་པ་དང་། །བདུད་རྩི་གསེར་སྐྱེམས་མཆོད་པ་བཞེས། །དམ་རྫས་རྒྱན་གྱི་གཏོར་མ་འབུལ། །སྒྲུབ་པ་པོ་ལ་དངོས་གྲུབ་སྩོལ། །མཐུན་རྐྱེན་བསྒྲུབ་པའི་སྡོང་གྲོགས་མཛོད། །བསྐུལ་བ་ནི། ཧཱུཾ། དགྲ་བགེགས་སྟེང་དུ་བསྐུལ་བའི་ཚེ། །དཔའ་གཏུམ་རྔམ་པའི་ཆགས་ཚུགས་ཅན། །མཚོན་ཆ་སྣ་ཚོགས་ཕྱག་ན་བསྣམས། །སྐུ་ཡི་འོད་ཟེར་གྱི་ལི་ལི། །གོ་ཆ་སིལ་སྒྲ་ཏི་རི་རི། །མཚོན་ཆ་འོད་མདངས་ལྷང་སེ་ལྷང་། །ལྷ་སྲིན་སྡེ་བརྒྱད་ཤ་ར་ར། །འཁོར་གྱི་དམག་ཚོགས་དཔུང་སེ་དཔུང་། །རྒྱན་གྱི་གཏོར་མ་འདི་བཞེས་ལ། །དགྲ་བགེགས་ཐུལ་བའི་ཕྲིན་ལས་མཛོད། །སྡང་བའི་དགྲ་ལ་རྟག་ཕྱུང་ཞིང་། །གནོད་པའི་བགེགས་ལ་ལས་མཛོད་ཅིག །སྔོན་ཚེ་ཁས་བླངས་དམ་བཅའ་བཞིན། །སངས་རྒྱས་བསྟན་པ་སྲུང་མཛོད་ཅིག །རང་ལ་འགོ་བའི་ཡུལ་ལྷ་བསང་། །རང་ལ་ཕན་པའི་དགེ་ལྷ་བསང་། །རང་ལ་འགོ་བའི་ལྷ་མོ་བསང་། །རང་ལ་འགོ་བའི་དམ་ཅན་བསང་། །བཟང་བྱེད་ཡག་བྱེད་ཐམས་ཅད་བསང་། །བསང་མཆོད་དམ་པ་འདི་འབུལ་ལོ། །བདག་གི་ལས་བཅོལ་འགྲུབ་པར་མཛོད། །གཞི་བདག་ཁ་བ་ལུང་རིའི་བསང་མཆོད་བསྡུས་པ་རེ་ཞིག་རྫོགས་སོ། །

མཆན། ༡.གནས་ཡིག་འདི་ནི་སྤྲུལ་སྐུ་རབ་མིག་ཆོས་འབྱུང་ངམ་ལྷ་ལུང་དཔལ་རྡོར་གྱིས་མཛད་ཅིང་ལྷ་འབུམ་དགོན་གྱིས་འདོན་སྤྲོད་བྱས་པའི་དཔེ་རྙིང་བྲིས་མ་ལས་ཞལ་བཤུས་པའོ། །༢.གནས་འདི་ནི་དཀར་མཛེས་ཁུལ་ཉག་རོང་རྫོང་དར་ཀེ་ཞང་ལྷ་འབུམ་དགོན་པའི་རྒྱབ་ལོག་ཡིན། གནས་མདུན་གྱི་འགྲོ་ལམ་ནི་དཀར་མཛེས་རྫོང་ནས་ཉག་རོང་རྫོང་དུ་འགྲོ་བའི་ལམ་བར་ན་ཡོད་ཅིང་། དཀར་མཛེས་རྫོང་ནས་གནས་འདིའི་བར་དུ་སྤྱི་ལེ༤༠ཡོད།

༄༅། །ད་ནི་ཐུགས་ཀྱི་གནས་མཆོག་བསྟན་པ་ནི༔ བོད་ཀྱི་མདོ་ཁམས་རྨ་ཟླ་ཞེས་བྱ་རུ༔ ཐུགས་ཀྱི་གནས་གཙོ་དན་ཏིག་ཤེལ་གྱི་བྲག༔ དབུས་ཀྱི་བྲག་རི་རིན་ཆེན་ཙི་ཏྟའི་དབྱིབས༔ ཤར་གྱི་ལྗོན་ཤིང་ལུང་ལ་དེ་བཞིན་ལྷོར༔ རིན་ཆེན་ནུབ་ཏུ་སྒྲོམ་ལུང་བྱ་ཀ་ལུང༔ ཤར་ལྷོར་སྨན་ལུང་ལྷོ་ནུབ་ཆུ་ཕྱར་དང༔ ནུབ་བྱང་གསལ་ལུང་བྱང་ཤར་རོང་ལུང་སྟེ༔ བརྒྱད་པོ་འདི་ནི་པདྨ་ཁ་བྱེ་འདྲ༔ གཡས་གཡོན་སྐྱོར་ཆུ་གཉིས་དང་དབུས་ཕྱོགས་ཀྱི༔ རྨ་ལུང་ཆུ་བོ་རྩ་གསུམ་ཚུལ་དུ་གནས༔ བདེ་ཆེན་ཐུགས་ཀྱི་འཁོར་ལོ་ཆེན་པོར་རྫོགས༔ ཙིཏྟའི་དབྱིབས་ཀྱི་ཤར་ཕྱོགས་ངོས་ཡངས་པར༔ ཟ་འོག་གུར་ཁྱིམ་འདྲ་བའི་ཕུག་པ་རུ༔ ཨོ་རྒྱན་ང་ཡིས་ལོ་གསུམ་སྒྲུབ་པ་བྱས༔ རིན་ཆེན་གུར་ཁྱིམ་འདྲ་བ་བཀྲ་ཤིས་གནས༔ གནམ་ལ་འཁོར་ལོ་རྩིབས་བརྒྱད་བཀྲ་ཤིས་གནས༔ ས་ལ་པདྨ་འདབ་བརྒྱད་བཀྲ་ཤིས་གནས༔ ལུང་བརྒྱད་གུ་རུ་བཀྲ་ཤིས་རྟགས་བརྒྱད་བཀྲ༔ མཚོ་སྔོན་མཎྜལ་འདྲ་བ་བཀྲ་ཤིས་གནས༔ ལྗོན་ཤིང་བ་དན་འདྲ་བ་བཀྲ་ཤིས་གནས༔ འདི་ནི་ཨོ་རྒྱན་གནྡོ་ལ་དང་མཚུངས༔ གྲུབ་རྟགས་ཕྱག་ཞབས་མཚན་མ་བཀྲ་ཤིས་གནས༔ ཕུག་པའི་ནང་དུ་རྡོར་དབྱིངས་དཀྱིལ་འཁོར་བཞུགས༔ གཡས་ཕྱོགས་ནུབ་བྱང་གཡུ་འབྲུག་གྱེན་འགྲོ་རུ༔ འབྲུག་གི་ལག་གཡས་མཚོ་རྒྱལ་གསང་ཕུག་དང༔ དེ་ནས་རིམ་པར་ནམ་སྙིང་བཻ་རོ་དང༔ རྒྱལ་བ་མཆོག་དབྱངས་ཤུད་བུ་དཔལ་སེང་སོགས༔ ལས་ཅན་དག་པའི་འཁོར་བདུན་བཞུགས་པའི་ཕུག༔ གཡོན་ལོགས་བུམ་པ་འདྲ་ལ་ཚེ་ཆུ་དང༔ ཡི་གེ་འབྲུ་བདུན་ཨོཾ་ཨཱཿཧཱུྃ་གསུམ་གསལ༔ དེ་རུ་ཐུགས་ཀྱི་གཏེར་ཁ་ཉེར་ལྔ་སྦས༔

༄༅། །ཐུགས་ཀྱི་གནས་གཙོ་དན་ཏིག་ཤེལ་གྱི་བྲག་ནི་བྱང་ཕྱོགས་རྨ་ཁོག་སྟོད་བླ་ཆེན་དགོངས་པ་རབ་གསལ་སོགས་བཞུགས་པའི་གནས། ཡོངས་གྲགས་འདི་འགའ་ཞིག་གིས་རྒྱལ་བུ་དྲི་མེད་ཀུན་ལྡན་སྤྱུགས་པའི་གནས་བདུད་རི་བྱ་རོག་སྒྲ་གཅན་དེ་ཡིན་པར་ཡང་བཞེད།

༄༅། །ན་མོ་གུ་རུ་ཤཱཀྱ་མུ་ནེ་ཡེ། སློབ་པའི་དུས་སུ་བྱ་དཀའི་མཛད་པ་ཡིས། །མ་རུང་གདུལ་དཀའི་རེ་བ་ཡིད་བཞིན་བསྐངས། །ནམ་ཞིག་བྱང་ཆུབ་མཆོག་གི་རྒྱལ་ཐབས་ལ། །དབང་བསྒྱུར་ཤཱཀྱའི་བླ་མ་རྒྱལ་གྱུར་ཅིག །གང་ཡང་སྔོན་རབས་ཡུལ་གྲུའི་བཀོད་པ་དང་། །དམ་པའི་རྣམ་ཐར་མཁས་པའི་ཕྱག་རྗེས་སོགས། །ཕྱི་རབས་ཀུན་གྱི་སྙིང་ནོར་གཅིག་གྱུར་གང་། །ཡི་གེའི་ལམ་མིན་གཞན་གྱིས་ཇི་ལྟར་མཚོན། །དེ་ཕྱིར་འཕགས་ཡུལ་ཙི་ནའི་ཞིང་ཁམས་སུ། །ཆོས་སྲིད་གཙུག་ལག་ལམ་ལས་ཉེར་དྲངས་པའི། །སྔོན་བྱུང་གཏམ་གྱི་སྦྱོར་བ་ཇི་སྙེད་ཅིག །མཆིས་པ་དག་ཀྱང་ཡི་གེའི་ལམ་ལས་ཐོན། །ཁྱད་པར་གངས་ལྗོངས་འཛིན་མའི་ཐིག་ལེ་རུ། །མཁས་གྲུབ་ལོ་པཎ་རྒྱལ་བློན་རིམ་བྱོན་གྱིས། །ཅི་མཛད་འཕྲིན་ལས་ཕྲ་མོའི་ཆ་རེ་ཡང་། །ད་དུང་ཉམས་མེད་ངག་གི་སྤྱོད་ཡུལ་ཅན། །འདི་ཀོ་རིག་པའི་མཛོད་ལ་བློ་གྲོས་ཀྱི། །སྣང་བ་བདོ་བའི་དྲན་དབང་དེ་དང་དེའི། །ཕྱག་སོར་བསྐྱོད་པའི་བྱིན་གྱིས་བདག་ལྟ་ཡང་། །ལོ་རྒྱུས་སྨྲ་བའི་མགྲིན་པ་ཕྱུག་མིན་ནམ། །དེ་ལྟ་ན་ཡང་ས་འདིར་གནའ་དུས་ནས། །མཁས་པའི་རྗེས་ཞུགས་མཛད་པའི་རི་མོ་ཅན། །རྩོམ་འཆད་རྩོད་པའི་ཁུར་ཆེན་རྣམ་དཔྱོད་ཀྱི། །དཔུང་བས་འདེགས་བཟོད་བགྲང་ཡས་བྱོན་མོད་ཀྱང་། །ཕལ་ཆེར་ཏིང་འཛིན་འཁྱིལ་བའི་བྲག་སྐྱིབས་སུ། །རིམ་གཉིས་ཟབ་མོའི་ཀློང་དུ་སིམ་པ་ལས། །ལོ་རྒྱུས་ཞིབ་ཐོན་ངག་སྒོ་ཡངས་པའི་འཕྲུལ། །སྤེལ་བའི་གཏམ་ཡང་བཙལ་དུ་མེད་འདིས་སྐྱོ། །འོན་ཀྱང་བླ་བྲང་བསྟན་པའི་འབྱུང་གནས་ཆེར། །སྦྱངས་བརྩོན་སྔོ་ཁོས་བརྩམས་པའི་གནས་འདི་ཡི། །དཀར་ཆག་བསྐལ་བཟང་གཏམ་སྙན་འདི་ཙམ་ཞིག །ད་ལྟ་ས་འདིའི་རིན་ཆེན་གྲས་སུ་ཚུད། །གང་འདིར་སྔོན་མེད་བྱས་རྗེས་བསྐྲུན་པ་ཞིག །ཡིན་སྙམ་རྨི་ལམ་དུ་ཡང་མི་སེམས་མོད། །དོན་གཉེར་དབྱུ་གུས་བདག་བློ་དུནྡྷི་བྷིར། །བསྐུལ་བས་མ་སྲོན་མཉན་འོས་རྔ་གསང་ལྡིར། །དེ་ཡང་ཁུངས་བཙུན་ལུང་ལ་བློ་ཕུག་གཏད། །བརྒྱུད་པའི་ངག་སྒྲོས་ཐོས་ཚད་དཔྱད་གཞིར་དྲངས། །རབ་བཏགས་ཕུལ་བྱུང་འུད་ཀྱིས་མ་གོས་པའི། །རྨད་བྱུང་གཏམ་གྱི་སྦྱོར་བ་ཅི་ནུས་དགོད། །

དེ་ལ་འདིར་བོད་ཁ་བ་ཅན་གྱི་ཡུལ་གྲུ་ལ་ས་ཚིགས་ཀྱི་དབང་དུ་བྱས་ན་ཆོལ་ཁ་གསུམ་ལས་མདོ་སྨད་རྟའི་ཆོལ་ཁ། རྨ་ཀླུང་དལ་གྱིས་འབབ་པའི་ཆུ་རྒྱུན་གྱིས་ལྷོ་བྱང་གཉིས་སུ་བགོས་པའི་བྱང་རྒྱུད། ཙོང་ཁ་བདེ་ཁམས་དང་ཙོང་ལ་རིང་མོ་ཞེས་འབོད་པའི་ལྗོངས་དང་རྫ་རྒྱུན་གྱི་ཤར་མཐའི་ཆ། མཉམ་མེད་ཤཱཀྱའི་དབང་པོ་སྔོན་སློབ་པ་ལམ་གྱི་གནས་སྐབས་སུ་རྒྱལ་སྲས་ཀྱི་སྤྱོད་པ་བྱ་དཀའ་བ་ཐུགས་ཉམས་སུ་བསྟར་བའི་རྩོད་མེད་ཀྱི་སྒྲུབ་གནས། དམར་གཡོ་གཙང་གསུམ་དང་བླ་ཆེན་དགོངས་པ་རབ་གསལ་གྱིས་བསྟན་པའི་མེ་རོ་གང་ནས་གསོས་པའི་མདོ་ཁམས་སྨད་ཀྱི་སའི་ཐིག་ལེ། མཁས་ཤིང་གྲུབ་པའི་སྐྱེས་ཆེན་རིམ་བྱོན་དུ་མས་ཞབས་ཀྱིས་བཅགས་ཤིང་བྱིན་གྱིས་བརླབས་པའི་བྲག་རྫོང་། དཔལ་དན་ཏིག་ཡང་ཏིག་ཤེལ་གྱི་རི་བོ་ལེ་ལག་དང་བཅས་པའི་གནས་ཀྱི་དཀར་ཆག་ཅུང་ཟད་སྤྲོས་ཏེ་བརྗོད་པ་ལ་གསུམ། དན་ཏིག་གྲུབ་པའི་གནས་ཀྱི་རང་བཞིན་སྤྲོས་པའི་ཚུལ་དུ་བརྗོད་པ་དང་། སྒར་བ་ཁ་དྲུག་གི་སྒྲུབ་སྡེ་གཞན་ལེ་ལག་དང་བཅས་པའི་ལོ་རྒྱུས་ཤེས་ཚད་མདོ་ཙམ་དུ་བརྗོད་པ་དང་། སྒར་བ་ཁ་དྲུག་གི་འཛིན་བདག་ཚེ་ཏན་སྐུ་ཞབས་རྣམ་གཉིས་གོང་མ་ཚོའི་ལོ་རྒྱུས་ངེས་ཚོད་ཙམ་བརྗོད་པའོ། །

དང་བོ་ནི། འཛམ་བུའི་ལྗོན་ཤིང་གིས་ཉེ་བར་མཚན་པའི་གླིང་འདི་ལ། རྒྱ་ནག རྒྱ་གར། ཨུ་རྒྱན། པར་སིག ཨ་རབ། ཏུ་རུ་ཥ། མོང་གོལ་སོགས་ཡུལ་ཁམས་ཆེན་པོ་དང་། ཁྲའོ་ཞན། རི་པིན། ཧྥས་ལས་པིན། གསེར་གླིང་། མ་ལ་ཡ། ཧིན་དུ་ཏྲི་ན་སོགས་གླིང་ཕྲན་དང་ཕྱེད་གླིང་འདབས་འབྲེལ་གྱི་གླིང་ཆེན་པོ་འདི་ནི་ད་ལྟ་ཡ་ཀྲུའུ་ཞེས་གླིང་ཆེན་བདུན་གྱི་ནང་ནས་ཆེ་ཤོས་སུ་བརྩི་བར་བྱེད་ལ། གླིང་དེའི་ཤར་ལྷོ་བྱང་གི་ངོས་གསུམ་ནི་རྒྱ་མཚོ་ཆེན་པོ་ལ་ཐུག་པ་དང་། ནུབ་ངོས་ཡོ་རུབ་གླིང་གི་རི་རྒྱུན་དང་འབྲེལ་ཞིང་། ཧྥས་གླིང་གི་བཅོས་མའི་མཚོ་ཡུར་དང་སྣེ་སྦྲེལ་པའི་གླིང་གི་ཤར་ངོས་སུ་རང་རེའི་རྒྱལ་ཁམས་ཆེན་པོ་འདི་ཆགས་ལ། དེར་རྒྱ་མཚོ་འབབ་པའི་ཆུ་ཀླུང་ལ་བྱང་ཤར་མཚམས་སུ་ཧེ་ལུང་ཆུ་དང་། ལྷོ་ཕྱོགས་སུ་རྒྱལ་མོ་རྔུལ་ཆུ་དང་། རྫ་ཆུ་དང་། ཡར་ཀླུང་གཙང་བོ་སོགས་དང་། ཤར་དྲང་ཐད་དུ་འབབ་པ་ལ་གཡུ་འབྲུག་སྔོན་མོ་ས་ལ་འཁྱིལ་བ་ལྟ་བུའི་ཀླུང་ཆེན་འབྲི་ཆུ་དང་། རྨ་ཆུའི་ཐོན་ཁུངས་བ་ཡན་ཧ་རི་སྟེ་དེ་ལས་བབས་པའི་རྒྱུན་རྨ་གཡང་ཕྱུག་མོའི་གཞུང་དང་མཚོ་སྐྱ་རིང་སྔོ་རིང་གི་གཞུང་གཤགས་ནས་མཛོད་དགེ་སྟོད་ཀྱི་རྐ་ཆུ་དང་དམེ་ཆུ་འདྲེས་མཚམས་ནས་རིམ་གྱིས་ནུབ་བྱང་དུ་བསྐོར་ཏེ་ཁྲི་ཀའི་ཕྱོགས་སུ་འབབ་པའི་དབང་གིས་ས་དབྱིབས་ནོར་བུ་དགའ་འཁྱིལ་གྱི་ཚུལ་དུ་གཅིག་དང་། དེ་ནས་ཤར་དྲང་ཐད་དུ་རྒྱུགས་ཏེ་ལན་ཀྲུའུ་དང་ཐུང་ཀུན་ཕྱོགས་སུ་སླར་ཡང་ནོར་བུ་དགའ་འཁྱིལ་གྱི་ཚུལ་དུ་སྔར་ལས་ཀྱང་མངོན་ཆེ་བ་ཞིག་བསྐོར་བའི་མཐར། སྔོན་གྱི་རྒྱའི་སློབ་དཔོན་ཁུང་ཙིའི་འཁྲུངས་ཡུལ་ཤར་ཕྱོགས་ཧྲན་ཏུང་ཞིང་ཆེན་གཏུབ་ནས་རྒྱ་མཚོ་ཆེན་པོར་འབབ་བོ། །

དེ་ལྟར་ན་རྨ་ཆུའི་དབུ་ཞབས་ཀྱི་སྲིད་ལ་རྒྱའི་ལུགས་ཀྱི་རྒྱང་གྲགས་བདུན་སྟོང་དྲུག་བརྒྱ་དྲུག་ཅུ་ཡོད་ཅིང་དགའ་འཁྱིལ་དང་པོའི་མཐར་རྨ་ཆུའི་ཡུར་ཐག་གིས་ཕྱེ་བའི་རྨ་ལྷོ་རྒྱུད་དང་། རྨ་བྱང་རྒྱུད་ཅེས་ཡོངས་སུ་གྲགས་པ་ལས་འདིར་གང་བཤད་པར་བྱ་བའི་མདོ་སྨད་གྲུབ་པའི་གནས་ཆེན་མཐའ་དག་གི་ཕྱི་མོ་དན་ཏིག་ཤེལ་གྱི་ཡང་དགོན་ནི་དགའ་འཁྱིལ་དང་བོའི་མཇུག་དང་ཉེ་བའི་ཆ་བྱང་རྒྱུད་དུ་གཏོགས་སོ། །

དེ་ཡང་དན་ཏིག་གི་རི་རྒྱུད་ནི། ཙོང་ལ་རིང་མོའི་རི་རྒྱུད་ནི། ཙོང་ལ་རིང་མོའི་རི་རྒྱུད་ཤར་རྒྱུད་དུ་རྒྱུགས་པ་ལས་ལྷོར་གྱེས་པའི་རི་ལག་ལྟ་བུ་ཞིག་སྟེ། རྨ་ཆུའི་འགྲམ་ལས་རིམ་གྱིས་མཐོ་རུ་བརྩེགས་པའི་བྲག་རི་ནག་པོ་སྲ་ཞིང་མཁྲེགས་པའི་གཤིས་ཅན། ཕྱོགས་ཀུན་ནས་ཕྱིན་ཀྱང་བགྲོད་བདེ་བའི་ལམ་མེད་པས་སྲིབ་ཕྱོགས་ཀྱི་ལམ་ལ་སྡིག་སྦྱང་ལ་དང་། འདིར་ཁ་བ་བབས་དུས་ནང་རེ་བཞིན་མ་ཕྱགས་ན་འགྲོ་ལམ་འགོག་གོ །ཉིན་ཕྱོགས་ཀྱི་ལམ་ལ་ཀྲོང་ཀྲོང་གི་ལ་ཟེར་བས་ཀྱང་ཤེས་པར་ནུས་ལ། ཀྲོང་ཀྲོང་ཞེས་པ་རྣ་བའི་ཁ་རྒྱུན་གྱི་མིང་དུ་གྲགས་སོ། །དན་ཏིག་དངོས་ཀྱི་ལུང་བའི་དབུ་ཞབས་རྒྱའི་རྒྱང་གྲགས་བཅོ་ལྔ་ཙམ་ཡོད་པའི་ལུང་བའི་ཁ་ཤར་དུ་བསྟན་པའི་མདོར་སྔོན་ཆད་ཧྭ་ཤང་གི་དགོན་ཤུལ་ལམ་དན་ཏིག་གི་དགོན་རྙིང་ད་ལྟ་མཐིལ་བ་ཞེས་པའི་བརྡ་ཕལ་སྐད་དུ་ཐིས་པ་ཞེས་གྲགས་པའི་ས་མིག་དང་ལྷོ་ངོས་ཀྱི་ལུང་ལག་གཅིག་ཏུ་དཀྱིལ་འཁོར་ནང་ཞེས་པ་དང་། ཡང་ལུང་ལག་གཅིག་ཏུ་ཡང་ཏིག་དང་རྡོ་བཀའ་འགྱུར་དུ་གྲགས་པ་བཅས་ཡོད་དོ། །

དེ་ལྟ་བུའི་དན་ཏིག་གི་གནས་ཀྱི་རང་བཞིན་བརྗོད་པ་ལ། རྒྱལ་བུ་དོན་གྲུབ་ཕེབས་ནས་རྒྱལ་སྲས་ཀྱི་སྤྱོད་པ་བྱ་དཀའ་བ་ཐུགས་ཉམས་སུ་བཞེས་ཚུལ་དང་། དམར་གཡོ་གཙང་གསུམ་དང་བླ་ཆེན་པོས་བསྟན་པའི་མེ་རོ་གནས་འདི་ནས་ཇི་ལྟར་གསོས་ཚུལ་དང་། རྒྱལ་བ་བསོད་ནམས་རྒྱ་མཚོ་སོགས་མཁས་གྲུབ་རིམ་བྱོན་གྱིས་བྱིན་གྱིས་བརླབས་ཚུལ་དང་། གནས་མཇལ་བ་རྣམས་ལ་ཉེ་བར་མཁོ་བའི་གྲུབ་གནས་དང་རྟེན་གྱི་དཀར་ཆག་གསལ་བར་བརྗོད་པ་སྟེ་དོན་ཚན་བཞི་ལས། རེ་ཞིག་དང་བོ་དེ་བརྗོད་ནས་ཐོག་མར་བཅོམ་ལྡན་འདས་ཤཱཀྱ་ཐུབ་པ་རང་ཉིད་ཀྱི་བཀའ་ཚད་མ་ལས་བྱུང་བའི་རྒྱལ་བུ་དོན་གྲུབ་གྱི་མདོའི་བྱུང་བ་ལྟར་རྒྱལ་བུ་གཞོན་ནུ་དོན་གྲུབ་ཀྱིས་བྱ་དཀའ་བ་རྒྱལ་སྲས་ཀྱི་སྤྱོད་པ་ཐུགས་ཉམས་སུ་བཞེས་ནས་གནས་འདི་བྱིན་གྱིས་བརླབས་པ་ཡིན་ལ། དེའི་ཕྱིར་སྔོན་བྱུང་གི་ལོ་རྒྱུས་གནས་ཀྱི་རྟོགས་པ་བརྗོད་པའི་སྙིང་བོར་བསྒྲིལ་ཏེ་བསྡུས་ཙམ་ཞིག་འགོད་ན། སྔོན་བསྐལ་བ་གྲངས་མེད་པའི་སྔ་རོལ་ཏུ་བཅོམ་ལྡན་འདས་སློབ་པ་ལམ་གྱི་གནས་སྐབས་སུ། ཡུལ་ཡ་བ་ཞེས་པར་ཡབ་རྒྱལ་བོ་དགེ་བ་ཅན་གྱི་སྲས་སུ་འཁྲུངས་པར་རྒྱལ་བུ་དོན་གྲུབ་ཏུ་མཚན་གསོལ། རྒྱལ་བུ་དེ་གཞོན་ནུ་ནས་སྐྱེ་བོ་སློང་མོ་བ་ལ་གཏོང་ཕོད་ཆེ་བས་རྒྱལ་བོའི་དཀོར་མཛོད་ནས་གཏན་པ་མེད་པའི་ཚུལ་གྱིས་སྤྱིན་གཏོང་རྒྱ་ཆེར་མཛད་པར་བརྟེན་སྙན་པའི་གྲགས་པ་ཕྱོགས་ཀུན་ཏུ་ཁྱབ། ནམ་ཞིག་ན་ཡབ་རྒྱལ་བོའི་དགྲ་ཟླར་གྱུར་པའི་རྒྱལ་ཕྲན་ཞིག་གིས་བསམ་པ་དྲི་མ་ཅན་གྱིས། རྒྱལ་བོ་དགེ་བའི་བསོད་ནམས་ལས་གྲུབ་པའི་བལ་གྱི་གླང་བོ་བལ་གླང་དྲུག་ཅུའི་སྟོབས་དང་ལྡན་པ། ཕ་རོལ་གྱི་སྡེ་ལས་རྒྱལ་བར་བྱེད་པའི་གླང་བོ་སུ་ད་ཡ་ན་ཞེས་པ་ཞིག་ཡོད་པ་འཕྲོག་པར་འདོད་ནས། གཡོ་སྒྱུ་ལ་གོམས་པའི་བྲམ་ཟེ་མི་བརྒྱད་སློང་དུ་བཏང་། དེའི་ཚེ་རྒྱལ་བུའི་སྦྱན་སྔར་བྲམ་ཟེ་དེ་དག་ལམ་གྱིས་དུབ་ཅིང་ཉམ་ཐག་པའི་ཟོལ་གྱིས་འོངས་ནས། གླང་བོ་དེ་བསླངས་པར། རྒྱལ་བུའི་བསམ་པ་ལ་གལ་ཏེ་མ་ཕྱིན་ན་སྦྱིན་པའི་དམ་བཅའ་ཉམས་ཤིང་། བྱིན་ན་ནི་ཡབ་རྒྱལ་བོའི་གཅེས་ནོར། དགྲ་ལས་རྒྱལ་བྱེད་ཉག་གཅིག་ཡིན་པས་རྒྱལ་བོ་མི་དགྱེས་སུ་དོགས་ནས། གླང་བོ་སྟོབས་ཅན་གཞན་གང་དགོས་སྟེར་རྩིས་བྱས་པ་ན། སློང་མཁན་རྣམས་ནས། གལ་ཏེ་གླང་བོ་སུ་ད་ཡ་ན་མི་སྟེར་ན་གླང་བོ་གཞན་མི་དགོས། དེ་བས་ངེད་ཅག་རེ་ཆད་དང་བཅས་ཕྱིར་ལྡོག་གི ཁྱེད་ཀྱི་སྦྱིན་པའི་སྙིང་སྟོབས་ཀྱི་གྲགས་པ་ཡང་དེ་ཙམ་དུ་ཐལ། ཞེས་བརྙས་ཚིག་སྨྲས་ཤིང་མ་མགུ་བ་ལ། རྒྱལ་བུས་གཏོང་ཕོད་བསྐྱེད་དེ། གླང་པོ་རིན་པོ་ཆེ་རྒྱན་གྱིས་བརྒྱན་ནས་གནང་ཞིང་། ཁྱེད་ཅག་མགྱོགས་པོར་མ་སོང་ན་རྒྱལ་པོས་གསན་ཚེ་སླར་འཕྲོག་ཏུ་ཡང་དོགས་སོ། །ཞེས་བསྒོས་ནས་གླང་པོ་སུ་ད་ཡ་ན་སྦྱིན་པར་བཏང་ངོ་། །དེའི་ཚེ་རྒྱལ་བོ་འཁོར་དང་བཅས་པས་ཤེས་ཏེ་མི་དགའ་བཞིན་དུ་བློན་པོ་རྣམས་དང་བགྲོས་ནས་ད་ནི་ཇི་ལྟར་བྱ་ཞེས་པ་ན་ཐམས་ཅད་ཀྱིས་རྒྱལ་བུ་ལ་ཆད་ལས་གཏོང་བར་འཆམས་ཤིང་། ཕལ་ཆེར་གྱིས་རང་རེའི་རྒྱལ་སྲིད་སྲུང་བའི་གླང་པོ་དགྲ་ལག་ཏུ་བྱིན་པ་འདི་ལས་མི་འོས་པ་སུས་ཀྱང་བྱེད་ཐབས་མེད་པས་རྒྱལ་བུའི་རྐང་ལག་གཅོད་པའམ་མིག་འབྲུ་བའམ་གསད་པར་འོས་ཞེས་པ་དང་། བློན་པོ་མཁས་པ་ཁ་ཅིག་གིས་རྒྱལ་ཚབ་ཏུ་འོས་པའི་རིགས་སྲས་གཅིག་པུར་གྱུར་པ་དང་། ཡབ་རྒྱལ་བོ་ཉིད་སྲས་ལ་ཐུགས་ནང་ཤིན་ཏུ་གཤིན་པས་ཆད་ལས་དེ་དག་མི་འོས་པར་བསམས་ནས། རེ་ཞིག་རྒྱལ་བུ་གནས་སྤངས་ཏེ་འབྲོག་དགོན་པ་ཆེན་པོར་སྤྱུགས་ན། དམའ་ཕབ་པར་འགྱུར་ལ། གླང་བོ་བྱིན་པའི་ཉེས་པ་ཡང་ཤེས་པར་འགྱུར་རོ། །ཞེས་པའི་གྲོས་བཏོན་པ་རྒྱལ་པོས་ཀྱང་བཞེད་ནས་རྒྱལ་བུ་ལ་འདི་སྐད་ཅེས་བཀའ་ཕབ་བོ། །ཀྱེ་གཞོན་ནུ་དོན་གྲུབ། ཁྱོད་བདག་གིས་འབད་པ་དུ་མས་ཚོགས་བསགས་པ་དང་། ལྷ་ལ་གསོལ་བ་བཏབ་པ་ལས་བྱུང་བའི་བུ་ཐུ་བོ་སྙིང་དང་འདྲ་བས་ཅི་ནས་ཀྱང་འབྲལ་མི་ཕོད་ཀྱང་རྒྱལ་སྲིད་སྲུང་བའི་གླང་པོ་རིན་ཆེན་དགྲ་ཟླ་ལ་བྱིན་པའི་ཉེས་པས། འདི་ནས་བྱང་དུ་དཔག་ཚད་སྟོང་གི་ཕ་རོལ་རི་བོ་དན་ཏིག་ཏུ་ལོ་བཅུ་གཉིས་ཀྱི་བར་ལ་སྤངས་པ་ཡིན་ནོ་ཞེས་བཀའ་གནང་ངོ་། །དེའི་ཚེ་རྒྱལ་བུས་ཀྱང་ཡབ་ཀྱི་བཀའ་དང་དུ་བླངས་ཏེ། རང་གི་བཙུན་མོ་མ་ཏྲི་ལ་རྒྱུ་མཚན་དང་བཅས་ཁྱེད་རང་བུ་དང་བུ་མོ་ཕོ་བྲང་དུ་སྡོད་ཅིག ཁོ་བོ་ལོ་བཅུ་གཉིས་ཀྱི་བར་དུ་ནགས་སུ་འགྲོའོ། །ཞེས་སྨྲས་པ་དང་། བཙུན་མོས་ཁྱོད་དང་བྲལ་ཏེ་འདིར་སྡོད་པར་མི་མོས་པས་བདག་ཀྱང་འཁྲིད་དགོས་ཞེས་ཞུས་པར། ལན་དུ། ཁྱོད་བུད་མེད་སྙིང་སྟོབས་ཆུང་། ན་གཞོན་དུས་ནས་ཟས་གོས་གནས་མལ་བཟང་ཞིང་སྐྱིད་བདེ་ཡིན་པས་དཀའ་ཐུབ་བསྟེན་མི་ནུས། རི་བོ་དན་ཏིག་གི་གནས་ནི་འབྲོག་དགོན་པ་དང་། རོང་རྩུབ་པས་བགྲོད་པ་དང་སྡོད་དཀའ། བཟའ་བཏུང་ནི་ཆུ་དང་ཤིང་འབྲས་ཙམ་དང་། གོས་ནི་རྩྭ་དང་ཤིང་ཤུན་ཙམ་དང་། སྡོད་གནས་ནི་བྲག་སྐྱིབས་དང་རྩྭའི་སྤྱིལ་བུ་ཙམ་ལ་བརྟེན་དགོས་ཤིང་། གཅན་གཟན་གཏུམ་པོ་དང་། རི་དྭགས་དང་། བྲག་སྲིན་མི་མ་ཡིན་སོགས་རྒྱུ་ཞིང་སྐྱི་གཡའ་བའི་གནས་ཚུལ་རྣམས་བཤད་ཀྱང་མ་ཉན་པར་བཙུན་མོ་སྲས་མིང་སྲིང་དང་བཅས་པ་འགྲོ་བར་ཆས། རྒྱལ་བུས་རང་གི་མ་ལ་ཕྱི་ཕྱག་འཚལ་དུ་ཕྱིན་པས། ཤིན་ཏུ་གཅེས་པའི་ཤུགས་ཀྱི་མྱ་ངན་གྱིས་བརྒྱལ་བ་སངས་ནས། སླར་རིང་མིན་འཕྲད་པའི་སྨོན་ལམ་བཏབ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་ཤེས་ཏེ་མྱ་ངན་དྲག་པོས་ནོན་བཞིན་རྒྱལ་བུ་འཁོར་བཅས་ལམ་དུ་བསྐྱལ་ཏེ། འགའ་ཞིག་སེམས་འཕྲེང་བའི་གདུང་བ་དང་། འགའ་ཞིག་དཀའ་ཐུབ་རྟེན་དགོས་པར་སེམས་ཁྲལ་དང་། ཕལ་ཆེར་མཛའ་བའི་ཤུགས་ཀྱིས་འབྲལ་མི་ཕོད་པ་དང་། ཀུན་གྱིས་ཀྱང་ལམ་བགྲོད་བདེ་ཞིང་སླར་མགྱོགས་པོར་འཁོར་བའི་སྨོན་འདུན་བགྱིས་པའི་ངང་ནས་ལམ་དུ་ཞུགས། ལམ་དུ་སློང་མོ་བ་སོ་སོར་བདོག་པ་ཅི་འདོད་དུ་བཏང་ཞིང་། གཅིག་ལ་རྒྱལ་བོས་བྱིན་པའི་ཤིང་རྟ་འདྲེན་པའི་རྟ་ཕོ་ཡང་ཅི་བདེར་བྱིན། ཡང་སོང་བ་ན་ཤིང་རྟ་སློང་མཁན་ཞིག་ལ་དེ་ཡང་བྱིན་ཏེ་བྱིས་པ་གཉིས་པང་དུ་བཏེགས་པ་དང་ཕྲག་ཏུ་ཁུར་བ་སོགས་རྐང་གིས་བགྲོད། གོས་རྒྱན་ཁྱད་པར་དུ་འཕགས་པ་ཡང་སློང་བའི་སྐྱེ་བོ་ལ་རིམ་གྱིས་བྱིན་ཏེ་དཀའ་བ་བརྒྱ་ཕྲག་གི་སྒོ་ནས་དན་ཏིག་དང་ཉེ་བར་སླེབས། དེའི་ཚེ་རྨ་ཀླུང་གི་ཆུ་བོའི་འགྲམ་དུ་སླེབས་པ་ན། ལྷ་རྣམས་ཀྱི་མཐུས་ཆུའི་ནང་ནས་རྡོ་སྤུངས་པའི་རི་རྒྱུད་བརྟན་པོ་ཞིག་བྱུང་བ་ལ་བརྟེན་ནས་ཆུ་བོ་བརྒལ་བའི་མཐར་རྒྱལ་བུའི་བདེན་ཚིག་གིས་ཆུ་སྔ་མ་ཁོ་བཞིན་དུ་འབབ་པར་བྱས། དེ་ནས་རི་བོ་དན་ཏིག་ཏུ་ཕེབས་པ་ན། རི་དྭགས་དང་གཅན་གཟན་གཏུམ་པོ་དག་ཀྱང་བག་ཕབ་པས་བསུ་བའི་ཚུལ་གྱིས་མདུན་དུ་འོངས་ཤིང་དགའ་བའི་རྣམ་འགྱུར་སྣ་ཚོགས་སྟོན། དེར་གནས་པའི་ལྷ་ཀླུ་འབྱུང་བོ་རྣམས་ཀྱིས་ལམ་བདེ་བར་བགྲོད་པའི་མཐུན་རྐྱེན་བསྒྲུབས་ཤིང་། ལྷ་རྣམས་ཀྱིས་བར་སྣང་ལས་འཇའ་སྤྲིན་མེ་ཏོག་གི་ཆར་བས་མངོན་པར་བསུས། མིས་མི་ཐར་བའི་བྲག་གི་ངོས་ལ་དུང་ཆེན། རྒྱ་གླིང་། དུང་དཀར། མཁར་རྔ་དང་། དེ་རྡེག་བྱེད་ཀྱི་དབྱུ་གུའི་རྣམ་པ་བཅས་བུ་ག་རང་བརྡོལ་དུ་བྱུང་བ་རྣམས་ནས་རོལ་མོའི་སྒྲ་འབྱིན་ཞིང་། རྒྱལ་བུ་བསུས་པ་ཡིན་ཟེར་བ་ད་ལྟའང་བསྟན་དུ་ཡོད་དོ། །

དེར་བྲག་སྐྱིབས་ཤིག་ཏུ་སྒོམ་མཛད་པའི་དགེ་སྦྱོང་ཨ་ཆུ་ཏ་ཟེར་བ་ལོ་ལྔ་བརྒྱ་ལོན་པ་ཞིག་བཞུགས་པའི་དྲུང་དུ་རྒྱལ་བུ་ཕེབས་ནས་ཆོས་ཀྱི་བགྲོ་བ་མཛད་པས། དེ་མགུ་ནས་རྒྱལ་བུ་ལ་བསམ་གཏན་སྒོམ་པའི་བྲག་སྐྱིབ་བསྟབས་པ་ལ། དེང་སང་རཱ་ཛ་ཕུག་ཏུ་གྲགས་པ་འདི་ཡིན་ཏེ་དགེ་སློང་ཨ་ཆུ་ཏ་འདི་ཕྱིས་སུ་མོའུ་འགལ་གྱི་བུ་ཡིན་པར་མདོ་རང་ན་གསུངས་སོ། །དེར་རེ་ཞིག་རྒྱལ་བུ་ཡུམ་སྲས་བག་ཕབ་ཅིང་། བཙུན་མོས་ཉིན་རེ་བཞིན་ཤིང་ཏོག་འཚོལ་བ་དང་། མེ་ཏོག་སོགས་བཏུས་ནས་རྒྱལ་བུ་སྒོམ་མཛད་པ་ལ་མཐུན་རྐྱེན་བསྒྲུབས་ཤིང་། སྲས་མིང་སྲིང་གཉིས་ཀྱང་རི་དྭགས་རྣམས་དང་ལྷན་དུ་དགའ་བའི་རོལ་རྩེད་ཀྱིས་དུས་འདའ་བར་བྱས། དེའི་ཕྱིར་ཉིན་གཅིག་སྲས་ཁྱེའུ་རི་དྭགས་ལ་ཞོན་ནས་བརྒྱུགས་པས་ས་ལ་བརྡབས་པར་ལུས་རྨས་པའི་ཁྲག་སྤྲེའུ་ཞིག་གིས་ཤིང་ལོས་ཕྱིས་ཤིང་། ཆུ་འགྲམ་དུ་ཆུས་བཀྲུས་པའི་ཁྲག་ལྷུང་བའི་སར་ཙན་དན་གྱི་ལྗོན་པ་འཁྲུངས་པ་ཕྱིས་སུ་དེ་སྙིང་བོར་བཅུག་པའི་རྡོ་འབུམ་སྤུངས་པར་བྱས། དེ་ལྟར་སྒོམ་ཞིང་བཞུགས་པའི་ཚེ་ན་བྲམ་ཟེ་དབུལ་བོ་ཞིག་སླེབས་ནས་བྱིས་པ་མིང་སྲིང་གཉིས་གཡོག་ཏུ་བསླངས་པར་རྒྱལ་བུས་ཅི་དགར་བྱིན་པའི་ཚེ། བཙུན་མོ་ལ་ངན་ལྟས་བྱུང་སྟེ་རི་ནས་སླར་ལྡོག་པར་བརྩམས་པ་ན། སྦྱིན་པའི་བར་ཆད་དུ་འགྱུར་བ་འགོག་ཆེད་ལྷས་སེང་གེ་སྤྲུལ་ནས་བཙུན་མོའི་ལམ་བཀག་པའི་གནས་སེང་གེའི་འགག་མདོར་གྲགས་པ་དང་། བྲམ་ཟེས་བྱིས་པ་གཉིས་ཁྲིད་དེ་འགྲོར་མ་ཉན་པ་ན་སྡོང་བུ་ལ་བཅིངས་ཏེ་བསྡིགས་པའི་གནས་ཡིན་ཟེར་བ་དང་། ལ་ལས་བྲམ་ཟེས་བྱིས་པ་དེ་གཉིས་ཁྲིད་པ་རྔོན་པ་རྒྱུས་ཡོད་ཅིག་གིས་མཐོང་ནས་བྲམ་ཟེ་སྡོང་བུར་བཅིངས་པའི་ས་ཡིན་ཟེར་ཏེ། གང་ལྟར་ཡང་ས་དེ་ལ་ད་ལྟ་སྡོང་བཀྱིགས་ནའི་ཁུགས་སུ་གྲགས་པ་དང་། བཙུན་མོ་རྒྱལ་བུའི་སར་སླེབས་ནས་བྱིས་པ་གཉིས་མ་མཐོང་བའི་མྱ་ངན་གྱིས་གཟིར་བས། རང་གི་ནུ་མ་བཅད་དེ་ས་ལ་བོར་བ་ཡིན་ཟེར་བའི་རྡོ་འཇམ་སྣུམ་ནུ་མའི་དབྱིབས་ཅན་ད་ལྟ་དན་ཏིག་འདུ་ཁང་གི་རྟེན་ཁྲོད་དུ་ཡོད་པ་འདི་ཡིན་པར་གྲགས། རྒྱལ་བུ་བྱང་ཆུབ་སེམས་དཔས་དེ་ལྟར་སྲས་མིང་སྲིང་གཉིས་སྦྱིན་པར་བཏང་བའི་སྤྱོད་པ་ངོ་མཚར་བའི་སྟོབས་ཀྱིས་ས་རྣམ་པ་དྲུག་ཏུ་གཡོས་པས་བརྒྱ་བྱིན་ཡང་ངོ་མཚར་ནས་ཉམས་སད་ཕྱིར། བྲམ་ཟེའི་ཆ་བྱད་དུ་སྤྲུལ་ནས་རྒྱལ་བུ་ལ་བཙུན་མོ་བསླངས་པས་ཞུམ་པ་མེད་པར་ཤིས་པ་བརྗོད་པའི་ཚིག་དང་བཅས་སྦྱིན་པར་བཏང་བ་ན། བརྒྱ་བྱིན་ལྷག་པར་ཡ་མཚན་ནས་རང་ལུས་མངོན་སུམ་དུ་བསྟན་ཏེ་བཙུན་མོ་སླར་ཕུལ་ཅིང་བཟོད་པར་གསོལ། ཆེད་དུ་བརྗོད་པ་དང་བཅས་ཁྱེད་ཀྱིས་ཅི་ཞིག་འདོད་ནས་འདི་འདྲའི་དཀའ་བ་སྤྱད་པ་ཡིན་ཞུས་པར། ལན་དུ། བདག་གིས་ཉམ་ཐག་པའི་འགྲོ་བ་རྣམས་འཁོར་བ་ལས་བསྒྲལ་ཏེ་བྱང་ཆུབ་ཆེན་པོ་འཐོབ་པར་འདོད་པ་ཡིན། ཞེས་གསུངས་པ་ལ་ལེགས་སོ་དང་བཅས་བརྒྱ་བྱིན་དེ་ཉིད་དུ་མི་སྣང་བར་གྱུར། བརྒྱ་བྱིན་གྱི་མཐུས་བྱིས་པ་གཉིས་བྲམ་ཟེ་དབུལ་བོས་ལྟོ་གོས་ཆེད་དུ་འཚོང་བར་ཡུལ་གྲོང་སྣ་ཚོགས་སུ་འཁྱམས་ནས། མཐར་རྒྱལ་པོ་དགེ་བའི་ཡུལ་ག་ལ་བར་ཕྱིན། གྲོང་ཁྱེར་བ་རྣམས་ཀྱིས་ངོ་ཤེས་ནས་རྒྱལ་པོ་ལ་སྦྲན་པར། རྒྱལ་བོ་ཡང་སྲས་ཀྱི་སྦྱིན་པའི་སྙིང་སྟོབས་ལ་ཧ་ལས་ནས། བྱིས་པ་གཉིས་ཕོ་བྲང་དུ་བླངས་ཤིང་བྲམ་ཟེ་དབུལ་བོར་བྱ་དགའ་ཚད་མེད་པས་དགའ་བར་བྱས། དེ་ནས་ལོ་ཚད་བཅུ་གཉིས་ལས་ལོ་གཅིག་གིས་མ་ཚང་ཡང་རྒྱལ་བུ་ཡུམ་སྲས་བསུ་བའི་དོན་དུ་བཀོད་པ་དང་། བཀུར་སྟི་ཆེན་པོས་ཕོ་ཉ་བརྫངས། རྒྱལ་བུ་རི་བོ་དན་ཏིག་ནས་ཕེབས་ཁར་ཞབས་ཕྱག་གཉིས་རྗེས་དྲན་གྱི་རྟེན་སྐལ་དུ་བཞག་པ། ལྷ་རྣམས་ཀྱིས་ཆུད་མི་ཟ་བའི་ཕྱིར་རྡོ་བར་བྱིན་གྱིས་བརླབས་པའི་ངོ་མཚར་བ་གཅིག་འདུ་ཁང་གི་རྟེན་ཁྲོད་དུ་བཞུགས་ཤིང་། ཡ་གཅིག་རོང་བོ་མར་ནང་ཤིང་ལེ་ཁའི་དགོན་པར་ཡོད་པའི་ངག་རྒྱུན་འདུག དེར་མ་ཟད་རྒྱལ་བོའི་གསོལ་ཕོར་བཞག་པའི་རྗེས་བཏོད་པའི་རྡོ་བ་གཅིག་ཀྱང་རྟེན་ཁྲོད་དུ་སྣང་ངོ་། །དེ་ནས་རྒྱལ་བུ་ཡབ་ཡུམ་བདེ་བར་ཕོ་བྲང་དུ་འབྱོར་བ་ན་གཏོང་བའི་སྙན་གྲགས་ཀྱི་བ་དན་དཀར་པོ་སྲིད་རྩེའི་བར་དུ་བསྐྱོད་པས་སྔར་གྱི་དགྲ་ཟླར་གྱུར་པའི་རྒྱལ་ཕྲན་གྱིས་ཀྱང་གླང་པོ་སུ་ད་ཡ་ན་སླར་གུས་པས་ཕུལ། ཡབ་ཀྱིས་ཀྱང་རྒྱལ་སྲིད་སྲས་ལ་གཏད་ནས་ཡུལ་མི་རྣམས་དགའ་བདེས་འཚོ་ཞིང་རྒྱལ་སྲིད་ཆོས་བཞིན་དུ་བསྐྱངས་པ་ཞིག་སྟེ། རྒྱས་པར་ཤེས་འདོད་ན་རྒྱལ་བུ་དོན་གྲུབ་ཀྱི་མདོ་རང་ལ་བལྟས་ནས་རྒྱལ་སྲས་སྙིང་སྟོབས་ཆེན་པོའི་མཛད་པ་ལ་གུས་ཤིང་རྗེས་སུ་བསླབ་པ་ལ་སྨོན་པར་བྱའོ། །རྣམ་ཐར་འདི་དང་ཕྱོགས་ཙམ་ཆ་འདྲ་བའི་རྒྱལ་བོ་དྲི་མེད་ཀུན་ལྡན་ཟེར་བ་བདུད་རི་ནག་པོ་ཧྭ་ཤང་གི་ཡུལ་དུ་སྤྱུགས་པའི་ལོ་རྒྱུས་ཤིག་ཡོད་པར་བརྟེན། ལ་ལས་རྒྱལ་བུ་དེ་གཉིས་གཅིག་པར་འདོད་པས་རཱ་ཛ་ཕུག་ལ་དྲི་མེད་ཀུན་ལྡན་གྱི་ལྷ་ཁང་ཞེས་མིང་འདོགས་ཀྱང་བྱེད་མོད། རྣམ་ཐར་དེའི་ཁུངས་ཞིབ་རྩར་མ་ཆོད་ཅེས་སྔོ་ཁོའི་དཀར་ཆག་ཏུ་གསུངས་པ་ཐུགས་ཤིན་ཏུ་མད་ལ། སློབ་དཔོན་དཔའ་བོའི་སྐྱེས་རབས་སོ་བཞི་བར་བསྟན་པའི་རྒྱལ་བོ་ཐམས་ཅད་སྒྲོལ་ཡང་རྒྱལ་བུ་དོན་གྲུབ་དང་གཅིག་པར་རྒྱལ་དབང་ལྔ་བའི་གསན་ཡིག་གངྒཱར་གསུངས་སོ། །

གཞན་ཡང་གྲུབ་པའི་དབང་ཕྱུག་རྗེ་འཇིགས་མེད་བསམ་གཏན་རིན་པོ་ཆེ་དགུང་ལོ་མཐོ་བའི་སྐབས་ཀྱི་ཕྱག་བྲིས་དངོས་མ་ཚེ་ཏན་བླ་བྲང་གི་ཕྱག་དཔེ་ཁྲོད་དུ་མདའ་ཚད་མ་སྡེབ་གཅིག་བཞུགས་པ་ཞིག་ལས་འདི་ལྟར་འབྱུང་སྟེ། མཚན་ཡང་དག་པར་བརྗོད་པ་མན་ངག་གི་འགྲེལ་པ་རྒྱ་གར་གྱི་མཁན་པོ་གཞོན་ནུ་གྲགས་པས་མཛད་པ་ལས། ཚུལ་ཆེན་གཞན་གྱི་དྲིང་མི་འཇོག་པ་ནི་སྔོན་གྱི་རྒྱལ་བོ་བཞིན་བཟང་ཞེས་པ་རི་བོ་དན་ཏིག་ན་དགོངས་པ་མཛད་པ་ན་བདུད་བྱེ་བ་ཁྲག་ཁྲིག་བརྒྱ་སྟོང་གིས་གནོད་པ་དྲག་པོ་བྱས་པས་མ་ཚུགས་ནས། དེར་བདུད་དེ་ཚོས་བུད་མེད་ཉི་ཁྲིར་སྤྲུལ་ནས་འདོད་པའི་ཡོན་ཏན་ལྔས་ཅི་འགྱུར་བྱས་པས་ཀྱང་མ་ཚུགས་སོ། །ཞེས་པའི་ལུང་འདྲེན་མཛད་པ་འདི་བཞིན་སྡེ་དགེ་བསྟན་འགྱུར་བར་མ་ལྟར་ན་རྒྱུད་གུ་པོད་ཀྱི་བརྒྱ་ཉེར་བདུན་གྱི་ཉིན་ཕྲེང་དྲུག་པར་ཡོད་དེ། འདི་ཡང་རྒྱལ་བུ་དོན་གྲུབ་གྱི་མཚན་གྱི་རྣམ་གྲངས་ཤིག་གམ། གཞན་ཞིག་ཡིན་བརྟག་པར་འཚལ་ལོ། །དགེ་སློང་ཨ་ཆུ་ཏའི་སྐུ་གདུང་གར་བཞུགས་ལ་ལོ་རྒྱུས་འདི་སྐད་ཐོས་ཏེ། ཀ་རིང་ཚོ་ལྔ་ཕྱོགས་སུ་ཨ་མྱེས་ཤ་བོ་ཟེར་བའི་གཞི་བདག་དྲག་རྩལ་ཅན་ཞིག་གནས་པར། ཟ་ལར་གྱིས་བཞེངས་པའི་ལྷ་ཁང་ཤེ་ཡག་ཏུ་འབོད་པ་ཞིག་གི་ནང་དུ་གདུང་དུར་གྱི་རྣམ་པ་ཞིག་ཡོད་པ་དེ་ལ། ཚོ་ལྔ་དྲང་སྲོང་གི་སྐུ་གདུང་ངམ། ཨ་ཆུ་ཏའི་སྐུ་གདུང་དུ་གྲགས་པ་རྒྱ་བོད་ཟ་ལར་སོགས་ཀུན་གྱིས་དད་མོས་དང་མཆོད་བཀུར་གྱི་གནས་སུ་བྱེད་ཅིང་། ནད་པའམ་བྱིས་པ་བདེ་མིན་སོགས་ཞི་དྲག་གི་དོན་གང་ལ་གསོལ་བ་བཏབ་ཀྱང་དངོས་གྲུབ་མྱུར་བ་ཅན་དུ་རྩི་བ་དེ་ཉིད། ཨ་རིག་དགེ་བཤེས་ཆེན་མོ། ཡབ་རྗེ་གསེར་ཁང་བ། ཨ་རོལ་བློ་བཟང་ལུང་རིགས་རྒྱ་མཚོ། བདག་ཅག་གི་དཔལ་ལྡན་བླ་མ་དམ་པ་རྗེ་ཨ་བྷྱ་ཞབས་སོགས་ཚད་ལྡན་གྱི་སྐྱེས་བུ་རྣམས་ཤ་བོ་སྒང་དུ་དངོས་ཕེབས་ཀྱིས་ཨ་ཆུ་ཏ་ཡིན་ཤག་གིས་ཤེ་ཡག་སྐུ་གདུང་སོགས་ལ་ཡུལ་ཁྲུས་མཛད་པ་དང་། ཁྱད་པར་དུ་ཨ་རོལ་རིན་པོ་ཆེས་སྐུ་གདུང་དེ་གཞི་བདག་ཤ་བོས་མཆོད་ཡུལ་དུ་བཟུང་ཞིང་། ལྷ་དེ་མཐུ་བོ་ཆེ་ཞིག་ཡིན་པས་དེར་གུས་མཆོད་བྱེད་པ་ལ་རོགས་དན་བྱེད་པ་ཞིག་རེད་ཅེས་ཕེབས་སྒོ་སྩལ་བར་ཐོས་ཏེ། ཡུལ་དེ་གའི་བྱིས་པ་ཕལ་ཆེར་ལ་ཤ་བོ་ཚེ་རིང་ངམ། ཤ་བོ་སྐྱིད་སོགས་སུ་མིང་འདོགས་པའང་རྒྱུ་མཚན་དེ་ལ་བརྟེན་ཏོ། །

ཡང་ཏིག་གི་དྲང་ཐད་རྨ་ཆུའི་ཕ་ཁར་དུང་གི་དབྱིབས་སུ་ཡོད་པས་དུང་རིའམ་རི་ཕྲན་སྟོང་གིས་བསྐོར་བས་སྟོང་རི་ཟེར་བའི་རྫ་རི་མཐོན་པོ་ནགས་ཚལ་སྣ་ཚོགས་དང་། ཨ་ག་རུ་སོགས་དྲི་ཞིམ་པའི་མེ་ཏོག་དང་། རི་དྭགས་དང་། སྐད་སྙན་པའི་བྱ་རིགས་མི་འདྲ་བ་དུ་མ་ཡོད་པའི་རི་ལྗོངས་དེར། ལྷ་ལུང་དཔལ་གྱི་རྡོ་རྗེའི་སྒྲུབ་ཕུག་དང་། དེ་དང་ཉེ་བའི་རྒྱབ་ངོས་རི་ཤོད་དུ་རྒྱལ་བུ་དོན་གྲུབ་ཀྱི་སྤྱན་ཆབ་ཀྱི་རྒྱུན་ལས་བྱུང་ཟེར་བའི་ལོ་རྒྱུས་ཡོད་པའི་མཚོ་ཆེན་ནོར་བུའི་དབྱིབས་ཅན་ཡིད་དུ་འོང་བ། དབྱར་སྟོན་མཚོ་ཁར་ཤིང་ལོ་དང་རྩྭ་སྦུར་ལྷུང་ན་བྱ་བྱིའུ་རྣམས་ཀྱིས་བླངས་ཏེ་སེལ་བར་བྱེད་པ་དང་། མཚོ་ལ་དར་ཆགས་པའི་དུས་སུ་བཀྲ་ཤིས་རྟགས་བརྒྱད་དང་མཆོད་རྟེན་སོགས་བཀྲ་ཤིས་པའི་རི་མོའི་དབྱིབས་སུ་ཆགས་པ་སོགས་བྱང་ཆུབ་སེམས་དཔའི་སྒྱུ་མའི་རྣམ་འཕྲུལ་ད་ལྟ་ཡང་ཀུན་ལ་མཐུན་སྣང་དུ་གྲུབ་པ་ཞིག་ཡོད་དོ། །

དེ་ལ་འདིར་བསྐལ་པའི་སྲིད་ལ་བློ་གྲོས་ཀྱི་སོར་མོས་ཆ་ཚད་ལེན་འདོད་པ་འགའ་ཞིག་གིས་འདི་ལྟར་གླེང་བ་ཐོས་ཏེ། ཅི་རྒྱལ་བུ་དོན་གྲུབ་ཀྱི་བྱུང་བ་དེ་མདོ་རང་ན་གསལ་བ་ལྟར། བསྐལ་པ་དུ་མའི་སྔ་རོལ་ཞིག་ཏུ་བྱུང་བ་མིན་ནམ། ཡིན་ན་ནི་ཐ་ན་དེ་དུས་ཀྱི་སྒྲུབ་ཕུག་དང་། བྲག་སྐྱིབས་སུ་མེ་བཏང་བའི་དུད་པ་ཆགས་པ་ཚུན་ཆད་ད་དུང་མ་འཇིག་པར་གནས་སྲིད་དམ། ཞེས་སོགས་བློ་གྲོས་ཀྱི་བུ་ག་ཤིན་ཏུ་ཕྲ་མོའི་འཇུར་མིག་ལས་བྱུང་བའི་བརྟག་ཚིག་ཐོས་པའི་ནོར་གྱིས་དབུལ་བ་ཞིག་གིས་ཉན་ན་བདེན་བདེན་འདྲ་བ་འདི་ལ་བདག་གིས་ལན་འདི་ལྟར་གདབ་སྟེ། བརྟན་གཡོའི་སྣོད་བཅུད་ལ་དབང་ཐོབ་པ་ལྟར་ན། འཕགས་པ་བཟང་བོ་སྤྱོད་པའི་སྨོན་ལམ་ལས། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །ཞེས་པ་ལྟར་རྡུལ་ཕྲ་རབ་གཅིག་གི་གོ་སར་འཇིག་རྟེན་ཁམས་ཀྱི་རྡུལ་གྲངས་དང་མཉམ་པའི་འཇིག་རྟེན་གྱི་ཁམས་ཆུད་ཆོག་བ་དང་། འཇིག་རྟེན་གྱི་ཁམས་ཞེས་པའང་སྟོང་ཆེན་གྱི་འཇིག་རྟེན་དང་། ཞིང་ཁམས་རབ་འབྱམས་ཀྱི་འཇིག་རྟེན་སོགས་ལ་གོ་དགོས་ཀྱི། ཤའི་མིག་གིས་མཐོང་བའི་འཇིག་རྟེན་གོང་བུ་ཙམ་ལ་གོ་བར་མི་བྱའོ། །རྗེ་ཐམས་ཅད་མཁྱེན་པས། ལ་ལར་བལྟམ་ཞིང་ཞིང་གཞན་དུ་ཡང་བྱང་ཆུབ་ཚུལ་སྟོན་སྟོན་པ་ཁྱོད་ཀྱི་སྐུ་ཡི་ནི། །བཀོད་པ་མཆོག་འདི་འདི་དང་གཞན་དུ་མ་ལུས་འགྲོ་ཀུན་ཀུན་མཁྱེན་གྱུར་ཀྱང་བརྗོད་མི་ནུས། །ཞེས་གསུངས་པ་ལྟར་སངས་རྒྱས་ཀྱི་མཛད་ཆེན་རྣམས་དུས་གཅིག་ལ་སྣང་ཆོག་པ་དང་། གསུང་རབ་རྣམས་ལས་བསྐལ་བ་བསྟན་ཚུལ་གྱི་དབང་དུ་བྱས་ན་ཡང་། མཛོད་ལས། བསྐལ་བ་རྣམ་པ་མང་བཤད་པ། །ཞེས་པ་དང་། ཐུབ་པ་དགོངས་རྒྱན་ལས། བསྐལ་བ་འགའ་ཞིག་ནི་བརྒྱད་ཅུར་མ་ངེས་ཏེ། དགེ་རྩ་དང་སྨོན་ལམ་གྱི་དབང་གིས་རིང་བ་སྐར་མ་ལྟ་བུ་ལ་སོགས་པའོ། །ཞེས་དང་། བྱང་ས་ལས། བསྐལ་བ་ཆེན་པོ་དེ་ཡང་ཉིན་མཚན་དང་། ཟླ་བ་དང་། ཟླ་བ་ཕྱེད་དུ་བགྲང་བའི་ཚུལ་གྱིས་དཔག་ཏུ་མེད་པའི་ཕྱིར་གྲངས་མེད་པ་ཞེས་བྱའོ། །ཞེས་དང་། ཕལ་ཆེན་ལས། ཞིང་རྣམས་ལ་ལ་རྡུལ་མཉམ་པའི། །བསྐལ་བ་བྱེ་བར་བརྗོད་པ་ཡིན། །ཞེས་དང་། དུས་འཁོར་ལས། ཆུ་ཞིང་དཔག་ཚད་གཅིག་པའི་དོང་གི་སྐྲ་རྩེ་བགྲང་བའི་རིགས་པས་བསྐལ་ཆུང་དང་། བསྐལ་བ་བར་མ་དང་། མཆོག་གི་བསྐལ་བ་དང་། བསྐལ་བ་ཆེན་པོ་སོགས་བསྐལ་པ་བརྩི་ཚུལ་མི་འདྲ་བ་མང་དུ་གསུངས་པ་དང་། གནས་གཅིག་ཏུ་མཛད་པ་ཡང་ཡང་བསྟན་ཆོག་པ་ཡང་། མདོ་ལས། བྱ་རྒོད་ཕུང་བོའི་རི་འདི་ཉིད་དུ། །བསྐལ་བ་བྱེ་བ་ཁྲག་ཁྲིག་བརྒྱ་སྟོང་དུ་མར་སངས་རྒྱས་དཔག་ཏུ་མེད་པ་ལ་བསྙེན་བཀུར་བྱས་པ་དང་། སྡོང་བོ་གཅིག་གི་དྲུང་ནས་དབུ་ལན་སྟོང་དུ་སྦྱིན་པ་བཏང་བར་གསུངས་པ་དང་། གཞན་ཡང་ཤེར་མདོ་ལས་བསྟན་པའི་འཕགས་པ་ཆོས་འཕགས་དང་རྟག་ཏུ་ངུ་གང་དུ་བྱོན་པའི་གནས་ལ་ད་ལྟའི་ཟི་ཁྲོན་ཞིང་ཆེན་གྱི་ཁྲིན་འདུ་ཧྥུ་ལ་ངོས་འཛིན་པ་ལྟར། སྟག་མོ་ལུས་སྦྱིན་དང་དྲང་སྲོང་བཟོད་པ་སྨྲ་བ་སོགས་མཛངས་བླུན་གྱི་མདོ་སོགས་ནས་གསུངས་པའི་སྟོན་པའི་སྔོན་གྱི་སྐྱེས་རབས་སོ་སོའི་མཛད་ཆེན་གྱི་གནས་ཕལ་ཆེ་བ་ཞིག་ད་ལྟ་བལ་པོ་དང་། རྒྱ་གར་ཕྱོགས་སུ་བསྟན་དུ་ཡོད་པ་དེ་དག་ཐམས་ཅད་ཀྱིས་ངེས་པ་ལེགས་པར་དྲངས་ནས་དཔྱོད་པའི་སྒོ་ཡངས་པོར་དབྱེ་བར་རིགས་སོ། །ད་དུང་འདི་ལ་སྤྲོ་བྱ་ཡོད་ཀྱང་གཞུང་མང་བས་འཇིགས་སོ། །ཤིན་ཏུ་གཅེས་པའི་སྲས་དང་བཙུན་མོ་ཡང་། །སློང་ལ་ཟན་གོང་བཞིན་དུ་གཏོང་བའི་སྤོབས། །ལྷན་སྐྱེས་ཉིད་དུ་གོམས་པའི་སྤྱོད་བཟང་གིས། །ད་སྟེ་འདྲེན་མཆོག་ཤཱཀྱའི་ཏོག་ཏུ་གྱུར། །རང་ཅག་ཁབ་སྐུད་ཙམ་གྱི་ཟང་ཟིང་ལའང་། །ཤི་སྤར་འཐམས་ནས་གཏོང་བའི་བློ་ཞན་ཅིང་། །ལོ་མའི་སེར་ས་ཐུད་ཀྱི་སྔོ་ས་ནས། །མཆོད་ཁུལ་བགྱིས་པས་ད་དུང་འཁྱམས་འདིས་སྐྱོ། །ཀྱེ་མ་དབུགས་ཀྱི་འགྱུ་བའི་ཉག་ཐག་ལས། །བར་ཆོད་མེད་པའི་ཚེ་ལ་ལོང་ཡོད་ལྟར། །བྲིད་མིན་རྒྱལ་སྲས་གྲུབ་པའི་ཕུག་དེ་རུ། །ཉིན་མཚན་འདའ་བའི་དགེ་སྦྱོར་དཔལ་ལ་སྨོན། །ཞེས་བྱ་བ་ནི་ངེས་འབྱུང་སྤུ་ཟིན་གྱིས་ཡིད་ཅུང་ཟད་བསྐུལ་ནས་ངག་ལམ་དུ་ཐོན་པའི་བར་སྐབས་ཚིགས་བཅད་དོ། །

གཉིས་པ་དམར་གཡོ་གཙང་གསུམ་དང་བླ་ཆེན་པོས་བསྟན་པའི་མེ་རོ་གནས་འདི་ནས་ཇི་ལྟར་གསོས་པའི་ཚུལ་དེ་བརྗོད་ན། ཐོག་མར་དམར་གཡོ་གཙང་གསུམ་མམ་བོད་ཀྱི་མཁས་པ་རྣམ་གསུམ་དུ་གྲགས་པ་འདི་ཉིད་ནམ་ཕེབས་ཤེས་དགོས་པས། དེ་ལ་རྒྱལ་བའི་བསྟན་པ་རིན་པོ་ཆེ་འཇིག་རྟེན་དུ་དར་བ་དང་། ཡང་སྒོས་རང་རེའི་བོད་གངས་ཅན་དུ་བསྟན་པ་སྔ་དར་དང་ཕྱི་དར་གྱི་ལོ་ཚིགས་ནམ་བྱུང་བཅས་ཤེས་ན་བདེ་བླག་ཏུ་ཤེས་པར་འགྱུར་རོ། །དེའི་ཕྱིར་བདག་ཅག་གི་སྟོན་པ་ཤཱཀྱའི་དབང་བོ་དེ་ཉིད་འཁྲུངས་པ་དང་། ཁྱིམ་ནས་མངོན་པར་བྱུང་བ་དང་། མངོན་པར་བྱང་ཆུབ་པ་དང་། མྱ་ངན་ལས་འདས་པའི་དུས་ལ་སོགས་པ་དང་། མ་མཐའ་ཡང་སྟོན་པའི་འདས་ལོ་ཙམ་ཡིན་ཡང་ངེས་པ་གལ་ཆེ་ཞིང་། དེ་ལ་ཡང་སྔོན་བྱོན་རྒྱ་དཀར་ནག་གི་མཁས་པ་དང་། བོད་ཀྱི་མཁས་པ་རྣམས་ཀྱི་བཞེད་ཚུལ་མི་མཐུན་པ་མང་དུ་སྣང་ན་ཡང་། གྲགས་ཆེ་བ་ནི་འདི་ཙམ་ཞིག་ཡོད་དོ། །ཁ་ཆེ་པཎ་ཆེན་ཤཱཀྱ་ཤྲཱིའི་བཞེད་པ་ལྟར་ན། འགོས་ལོ་གཞོན་ནུ་དཔལ་བའི་དེབ་ཐེར་སྔོན་པོའི་སྨད་ཆ་ལས། དེ་ཡང་པཎ་ཆེན་ཉིད་ཀྱིས་བོད་དུ་མེ་མོ་ཡོས་ཀྱི་ལོ་ལ་སོལ་ནག་ཐང་བོ་ཆེར་བསྟན་རྩིས་མཛད་པར། སྨིན་དྲུག་ཟླ་བའི་དཀར་ཕྱོགས་ཀྱི། །ཚེས་བརྒྱད་ནམ་གུང་མཉམ་པ་ལ། །ཟླ་བ་རི་བོ་ལ་ནུབ་ཚེ། །ཐུབ་དབང་ཡོངས་སུ་མྱ་ངན་འདས། །དེ་རྗེས་ལོ་ནི་སྟོང་ཕྲག་གཅིག །བདུན་བརྒྱ་དང་ནི་ལྔ་བཅུ་དང་། །ཟླ་བ་གཉིས་དང་ཟླ་བ་ཕྱེད། །དེ་བཞིན་ཉི་མ་ལྔ་རབ་འདས། །ཞེས་གསུངས་ཏེ། དེ་ལྟ་བུའི་ལོ་དེ་རྣམས་ལ་དྲུག་ཅུས་བགོས་ན་ལྷག་མ་བཅུར་འགྱུར་བའི་ཕྱིར་བསྟན་པའི་ཐོག་མ་ནི་མེ་མོ་སྦྲུལ་ཡིན་པར་ཤེས་པར་བྱའོ། །

དེའི་ཚེ་དུས་འཁོར་བ་རྣམས་ཀྱི་འདས་ལོའི་ཐོག་མ་མེ་མོ་ཡོས་ནས་དྲུག་ཅུ་སྐོར་གསུམ་སྟེ་བརྒྱ་བརྒྱད་ཅུ་སོང་བ་ཡང་ཤེས་པར་བྱའོ། །ཐང་དུ་བརྩིས་པའི་མེ་ཡོས་དེ་ནས་དེང་སང་གི་མེ་ཕོ་སྤྲེའུ་འདི་ཡན་ལ་དྲུག་ཅུ་སྐོར་བཞི་དང་སུམ་ཅུ་སོང་བས་ན། ཐུབ་པ་མྱ་ངན་ལས་འདས་ནས་ལོ་སྟོང་ཕྲག་གཉིས་དང་ཉི་ཤུ་སོང་བ་ཡིན་ནོ། །ཞེས་གསུངས་སོ། །དེའི་དོན་ནི་འདི་ཡིན་ཏེ། སྟོན་པའི་འདས་ལོ་བརྩིས་པའི་མེ་ཡོས་ཀྱི་ལོ་དེ་ནི་དུས་འཁོར་བའི་འདས་ལོ་ཐོག་མ་རབ་བྱུང་དང་བོའི་མེ་ཡོས་ནས་ལོ་བརྒྱ་བརྒྱད་ཅུ་སོང་བ་སྟེ་དྲུག་ཅུ་སྐོར་གསུམ་སོང་རྗེས་ཀྱི་རབ་བྱུང་བཞི་བའི་ཐོག་མའི་ལོ་དེ་ཡིན་ལ། སྟོན་པའི་འདས་ལོ་ཆིག་སྟོང་བདུན་བརྒྱ་ལྔ་བཅུ་དེ་དྲུག་ཅུས་བགོས་པའི་ནོར་ལ་ཉེར་དགུ་དང་ལྷག་མ་བཅུ་འབྱུང་བས་དྲུག་ཅུ་སྐོར་ཉེར་དགུ་དང་། ལོ་རྐྱང་བཅུ་འདས་པ་སྟོན་ལ། ལོ་རྐྱང་བཅུ་བོ་དེ་ནི་དྲུག་ཅུ་སྐོར་མ་ལོངས་པའི་ང་གཅིག་པ་མེ་སྦྲུལ་ནས་དྲུག་ཅུ་བ་མེ་སྟག་གི་བར་གྱི་ལོ་བཅུ་བོ་དེ་ཡིན་པས། སྟོན་པ་འདས་པའི་ཕྱི་ལོའི་མེ་སྦྲུལ་དེ་ཉིད་བསྟན་རྩིས་ཀྱི་ཐོག་མ་ཡིན་པར་བསྟན། འགོས་ལོས་རབ་བྱུང་བརྒྱད་པའི་བགྲང་བྱ་སུམ་ཅུ་བ་མེ་སྤྲེལ་ལ་དེབ་སྔོན་རྩོམ་པའི་མགོ་ཚུགས་ནས་བགྲང་བྱ་སོ་གསུམ་པ་ལ་བརྩམས་གྲུབ་པས་ན། རབ་བྱུང་བརྒྱད་པའི་མེ་སྤྲེལ་ཡན་ལ་ལོ་ཉིས་སྟོང་ཉི་ཤུ་སོང་། དེར་ད་ལྟའི་རབ་བྱུང་བཅུ་དྲུག་པའི་བགྲང་བྱ་སུམ་ཅུ་བ་མེ་སྤྲེལ་ཏེ་སྤྱི་ལོ་ཆིག་སྟོང་དགུ་བརྒྱ་ང་དྲུག་ལོའི་བར་དུ་དྲུག་ཅུ་སྐོར་བརྒྱད་ཀྱི་ལོ་གྲངས་བཞི་བརྒྱ་བརྒྱད་ཅུ་བསྲེས་པས་ལོ་ཉིས་སྟོང་ལྔ་བརྒྱ་ཐམ་པ་འབྱུང་ངོ་། །དེ་ལྟར་ན་འཕགས་ཡུལ་གྱི་པཎ་ཆེན་ཨ་བྷ་ཡ་ཀ་ར་གུབྟ་དང་། བོད་ཀྱི་ཁྲོ་ཕུ་ལོ་ཙཱ་བ་བྱམས་པའི་དཔལ་སོགས་དང་། ད་ཚོད་སིང་ག་ལ་ནས་དར་བའི་གནས་བརྟན་སྡེ་བ་རྣམས་ཀྱིས་བཞེད་པའི་སྟོན་པའི་འདས་ལོ་ཡང་འདི་ཇི་ལྟ་བ་བཞིན་དུ་འདུག་པས། ད་ལྟ་འཇིག་རྟེན་ཁྱོན་དུ་ནང་པ་སངས་རྒྱས་པའི་རང་བསྟན་ལ་ཞུགས་པའི་ཕྱི་གླིང་བ་རྣམས་ནས་ཀྱང་སྟོན་པའི་འདས་ལོ་ལ་འདི་ཁོ་ན་བཞིན་རྩི་བར་བྱེད་མོད། ས་སྐྱ་པཎྚི་ཏས་དགག་པ་མཛད་སྣང་སྟེ་རྒྱས་པར་བདག་གིས་གཞན་དུ་འགོད་པར་འདོད་དོ། །

དགེ་འདུན་ཆོས་འཕེལ་གྱིས་བྱས་པའི་དེབ་ཐེར་དཀར་བོར། ཁ་ཆེ་པཎ་ཆེན་བོད་དུ་བྱོན་ལོ་ཆུ་ཕག་ལ་བྱས་པ་དང་། དེའི་ཕྱི་ལོའི་ཤིང་བྱི་དེ་གནས་བརྟན་པའི་ལུགས་ཀྱི་ཆིག་སྟོང་བདུན་བརྒྱ་ཞེ་བརྒྱད་བར་བྱས་པ་དང་། སོལ་ནག་ཐང་བོ་ཆེར་འདས་ལོ་རྩི་བའི་ལོ་དེ་ཤིང་བྱིའི་ལོ་དེ་གར་བྱས་པ་སོགས་རྩ་བ་ནས་ནོར་བོའི་རྐྱེན་གྱིས་པཎ་ཆེན་ལུགས་ལ་རྩིས་ཀྱི་དབང་གིས་ལོ་གཉིས་མ་མཐུན་པ་ཙམ་བྱུང་། ཞེས་པའི་དོན་མེད་ཀྱི་དགོངས་པ་ཞིག་ཀྱང་འཇོག་དགོས་བྱུང་། དེ་ལྟར་ན་ཁ་ཆེ་པཎ་ཆེན་བོད་དུ་བྱོན་ལོ་རབ་བྱུང་གསུམ་པའི་ཤིང་བྱི་ཡིན་གྱི་ཆུ་ཕག་མ་ཡིན། ཤིང་བྱི་ལོ་དེར་གནས་བརྟན་པའི་ལུགས་ཀྱི་འདས་ལོ་ཆིག་སྟོང་བདུན་བརྒྱ་ཞེ་བདུན་ཡིན་གྱི་ཞེ་བརྒྱད་མ་ཡིན། ཐང་བོ་ཆེར་རབ་བྱུང་བཞི་བའི་ཐོག་མ་མེ་ཡོས་ལོར་འདས་ལོ་བརྩིས་པ་ཡིན་གྱི་ཤིང་བྱི་ལོར་བརྩིས་པ་མིན་པས་དེ་དག་གིས་འཁྲུལ་གཞི་བྱས་སོ། །ས་པཎྚི་ཏས་མཛད་པའི་ས་ཆེན་གྲགས་པ་རྒྱལ་མཚན་གྱི་རྣམ་ཐར་ལས། ཁ་ཆེའི་པཎྚི་ཏ་ཆེན་པོ་སྡོམ་བརྩོན་བསོད་སྙོམས་པའི་ཞལ་སྔ་ནས་ཀྱིས་དཔལ་ས་སྐྱར་ལྕགས་ཕོ་རྟའི་ལོ་ལ་དབྱར་གནས་པའི་ཚེ་བརྩིས་པས། མྱ་ངན་ལས་འདས་ནས་ལོ་སྟོང་ཕྲག་གཅིག་དང་བདུན་བརྒྱ་ལྔ་བཅུ་ང་གསུམ་མོ། །ཞེས་གསུངས་པ་འདི་ལ་ལྟོས་དང་ཧ་ཅང་གསལ་ལོ། །དེས་ན་འདས་ལོ་འདི་ཕུག་པ་ཡབ་སྲས་ཀྱིས་བཞེད་པའི་སྟོན་པའི་འདས་ལོ་ལས་ལོ་གྲངས་སུམ་བརྒྱ་སོ་བདུན་གྱིས་ཉུང་བར་སྣང་ངོ་། །རྒྱ་ནག་ཙན་དན་ཇོ་བོའི་ལོ་རྒྱུས་ལྟར་ན། སྣར་ཐང་བསྟན་འགྱུར་སྔགས་ཕྱོགས་རུ་བོད་ཀྱི་མཇུག་ཏུ་བཞུགས་པའི་ལོ་རྒྱུས་ཤོག་བྱང་གི་སྙིང་བོ་བསྡུ་ན། རྒྱ་ནག་གི་རྒྱལ་རབས་ཅེའུ་ཞེས་བྱ་བའི་རྒྱལ་རིང་བཞི་བ་ཅེའུ་དབང་གི་ཁྲི་ལོ་ཉེར་བཞི་བ་ཤིང་སྟག་ཟླ་བ་བཞི་པའི་ཚེས་བརྒྱད་ལ་ཤཱཀྱ་ཐུབ་པ་སྐུ་བལྟམས། ཁྲི་ལོ་ཞེ་གཉིས་པ་རྒྱལ་བུ་དོན་གྲུབ་ལོ་བཅུ་དགུ་བར་ཁབ་ནས་བྱུང་། རྒྱལ་རིང་ལྔ་བ་མུ་དབང་ཁྲི་ལོ་གསུམ་པ་ཆུ་ལུག་ལོ་སྟོན་པ་དགུང་ལོ་སུམ་ཅུ་བཞེས་ཐོག་མངོན་པར་སངས་རྒྱས། དེ་ནས་ལོ་བརྒྱད་ལོན་པའི་དབྱར་ཟླ་གསུམ་ལྷ་ཡུལ་དུ་བཞུགས། དེའི་ཚེ་རྒྱལ་བོ་ཨུ་ཏྲ་ཡ་ནས་ཙན་དན་གྱི་ཇོ་སྐུ་དེ་བཞེངས། སྐུ་དེ་རྒྱ་གར་དུ་ལོ་ཆིག་སྟོང་ཉིས་བརྒྱ་གྱ་ལྔར་བཞུགས། དེ་ནས་ལི་ཡུལ་དང་མི་ཉག་གི་ཡུལ་དང་རྒྱ་ཡུལ་དུ་ཕེབས། སྐུ་དེ་བཞེངས་ནས་ལོ་རྒྱུས་འདི་བརྩམས་ལོའི་ཆུ་ཕག་ཡན་ལ་ལོ་ཉིས་སྟོང་ང་ལྔ་འདས། འདིའི་ལུགས་ཀྱིས་སྟོན་པ་འདས་ནས་ཆུ་ཕག་ལོ་དེ་ཡན་ཆད་ལ་ལོ་ཉིས་སྟོང་བཅུ་གསུམ་ལོན། ཞེས་འབྱུང་ལ། མཁས་ཤིང་གྲུབ་པའི་དབང་ཕྱུག་རྗེ་ལྕང་སྐྱ་རོལ་བའི་རྡོ་རྗེས་མཛད་པའི་ཙན་དན་ཇོ་བོའི་ལོ་རྒྱུས་སུ་ཡང་། སྟོན་པ་ཅེའུ་གུར་བྱི་དུས་ཤིང་སྟག་ལ་འཁྲུངས་ནས་ད་ལྟ་གནམ་སྐྱོང་ལོ་སོ་ལྔ་བ་ལྕགས་སྟག་གི་ལོ་འདི་ཉིས་སྟོང་བདུན་བརྒྱ་གོ་བདུན་པ་ཡིན་པར་སྣང་ངོ་། །ཞེས་གསུང་སྟེ། ཆེན་ལུང་ཁྲི་ལོ་སོ་ལྔ་བ་དེ་ནི་རབ་བྱུང་བཅུ་གསུམ་པའི་བགྲང་བྱ་ཉེར་བཞི་བ་ལྕགས་སྟག་གི་ལོ་ཡིན་ནོ། །དེའི་ཕྱིར་ལུགས་འདི་ལྟར་ན་སྟོན་པ་ཤིང་སྟག་ལ་འཁྲུངས་ནས་དགུང་ལོ་རེ་བདུན་བཞེས་པའི་སྟེང་ཕུག་པའི་འཁྲུངས་ལོ་དྲག་པོ་ལྕགས་སྦྲེལ་ལ་འབབ་བོ། །གུང་ལོ་ཆེན་རྒྱ་ནག་ཆོས་འབྱུང་གི་རྒྱལ་བསྟན་བྱུང་ཚུལ་སྐབས་སུ། འཁྲུངས་ལོའི་ཤིང་སྟག་དེ་ཅེའུ་དབང་གི་ཁྲི་ལོ་ཉེར་དྲུག་བྱས་ན་དག་ཟེར། ཨ་ཀྱཱ་བློ་བཟང་བསྟན་རྒྱན་གྱིས་ལུགས་འདི་ལས་ལོ་གྲངས་གཉིས་ཀྱིས་སྔ་བ་ཆུ་བྱི་ལ་སྟོན་པ་འཁྲུངས་པར་བཤད་དོ། །བོད་གངས་ཅན་གྱི་མཁས་པ་རྣམས་ཀྱི་བཞེད་པ་ལའང་མི་མཐུན་པ་མང་མོད་ཀྱང་། གྲགས་ཆེ་བ་ནི། བུ་སྟོན་གྱི་བཞེད་པ་དང་། ཕུག་པའི་བཞེད་པ་གཉིས་ལས། དང་པོ་ལྟར་ན། མེ་རྟ་ལོའི་ས་ག་ཤོལ་བཅས་སྔ་མའི་ས་གའི་ཉ་ལ་ལྷུམས་སུ་ཞུགས་ནས་ཟླ་བ་དགུ་དང་ཞག་ཉེར་གསུམ་འདས་པ། ལོ་དེའི་དགུན་ཟླ་ཐ་ཆུང་རྟ་ཟླ་སྟེ་ཧོར་ཟླ་དང་པོའི་ཚེས་བདུན་གྱི་སྔ་དྲོར་སྐུ་བལྟམས། ཉེར་དགུ་བ་ཤིང་ཁྱི་ལ་ཁབ་ནས་བྱུང་། སོ་དྲུག་པ་ལྕགས་སྦྲུལ་ལོའི་དཔྱིད་ཟླ་ཐ་ཆུང་ས་གའི་ཉའི་མཚན་གྱི་ཐུན་ཐ་མ་ལ་མངོན་པར་སངས་རྒྱས། དགུང་ལོ་གྱ་གཅིག་གི་ངོ་མཐོང་བའི་མེ་སྟག་ས་གའི་ཉའི་ནམ་ཕྱེད་ལ་མྱ་ངན་ལས་འདས་ཏེ། དེ་ལྟར་ན་ཕུག་ལུགས་ཀྱི་སྟོན་པ་དགུང་ལོ་ཞེ་བདུན་བཞེས་པའི་སྟེང་བུ་ལུགས་ཀྱི་འཁྲུངས་ལོ་མེ་རྟར་འབབ་བོ། །ཕུག་པ་ཡབ་སྲས་ཀྱི་བཞེད་པ་ལྟར་ན་ས་མོ་ལུག་གི་ལོའི་དབྱར་འབྲིང་ཆུ་སྟོད་ཉའི་སྐར་མ་རྒྱལ་གྱི་དུས་ལྷུམས་སུ་ཞུགས། དེ་ནས་ཟླ་བ་དགུ་དང་ཞག་ཉེར་གསུམ་རྫོགས་པ་ལྕགས་སྤྲེལ་ས་གའི་ཚེས་བདུན་གྱི་མཚན་མོ་སྐུ་བལྟམས། ཉེར་དགུ་བ་ས་བྱི་ལ་ཁབ་ནས་བྱུང་། སོ་ལྔ་པ་ཤིང་རྟ་ལོའི་ས་གའི་ཉ་སྟེ་ཚེས་བཅུ་དྲུག་ལ་སངས་རྒྱས། དགུང་ལོ་གྱ་གཅིག་ལྕགས་འབྲུག་ས་ག་ཟླ་བའི་ཉའི་མཚན་གྱི་ཐུན་བར་ཐའི་མཇུག་ནས་བརྩམས་ཏེ་ཐུན་ཐ་མའི་མགོ་རྩོམ་པའི་ཆ་ལ་མྱ་ངན་ལས་འདས། དེ་ལྟར་ན་སྟོན་པ་འདས་པའི་ལོ་དེ་ནས་ད་ལྟ་སྤྱི་ལོ་ཆིག་སྟོང་དགུ་བརྒྱ་ང་དྲུག་དང་། རབ་རྒྱལ་མེ་སྤྲེལ་ལོ་འདི་ཡན་ལ་ཉིས་སྟོང་བརྒྱད་བརྒྱ་སོ་དྲུག་འདས་པར་བཞེད་དེ་ཁོ་བོ་ནི་ལུགས་འདིའི་རྗེས་སུ་འབྲང་བ་ལ་དགའ་ཞིང་། ཚེ་སྨད་བརྩམས་པའི་བསྟན་རྩིས་ཀྱི་རེའུ་མིག་རྒྱས་པའང་ཕུག་ལུགས་གཞིར་བཞག་ནས་བྲིས་ཡོད་དོ། །སྒོ་མང་བླ་མ་ཀུན་མཁྱེན་འཇམ་དབྱངས་བཞད་པའི་རྡོ་རྗེའི་གསུང་དུ་སྐབས་འགར་བུ་ལུགས་དང་། སྐབས་འགར་ཕུག་ལུགས་ལྟར་གསུངས་པ་ལ། དེ་ཡང་འདུལ་བའི་མཐའ་དཔྱོད་དུ་ཕུག་ལུགས་ལྟར་ལྕགས་སྤྲེལ་ལ་འཁྲུངས་པར་བཤད། བསྟན་རྩིས་སུ་མེ་རྟའི་ས་ག་ཤོལ་བཅས་ཀྱི་སྔ་མའི་ཉ་ལ་ལྷུམས་སུ་ཞུགས་པ་སོགས་བུ་ལུགས་ཇི་མ་ཇི་བཞིན་དང་། ཕར་ཕྱིན་མཐའ་དཔྱོད་སྐབས་བརྒྱད་པར་མེ་རྟའི་ས་གའི་ཉ་ལ་ལྷུམས་སུ་ཞུགས། ཆུ་སྟོད་ཤོལ་བཅས་ཟླ་བ་བཅུ་རྫོགས་པའི་དགུན་ཟླ་ཐ་ཆུང་རྟ་ཟླའི་ཚེས་བདུན་ལ་བལྟམས་ཞེས་པ་དང་། མཆུའི་ཟླ་བའི་ཉ་དང་སྐར་མ་རྒྱལ་གྱི་སྔ་དྲོར་བལྟམས་ཞེས་པའི་བཤད་ལུགས་གཉིས་དང་། ཉེར་དགུ་པ་ཤིང་ཁྱི་ལ་ཁབ་ནས་བྱུང་། སོ་ལྔ་བ་ལྕགས་འབྲུག་ས་གའི་ཚེས་བཅོ་ལྔའི་སྲོད་ལ་བདུད་བཏུལ་ཅིང་། སོ་དྲུག་པ་ལྕགས་སྦྲུལ་གྱི་ས་གའི་ཉའི་སྲོད་ལ་བདུད་བཏུལ་ཞེས་པའི་བཤད་ལུགས་གཉིས་དང་། སོ་དྲུག་པ་ཁོ་ན་ལ་སངས་རྒྱས་པ་ཡིན། སངས་རྒྱས་ནས་ལོ་ཞེ་ལྔ་བ་ཤིང་གླང་འདས་ནས་མེ་སྟག་ས་གའི་ཉའི་ནམ་ཕྱེད་ལ་འདས་ཤིང་། མེ་རྟར་བལྟམས་ནས་ལོ་ཉིས་སྟོང་དྲུག་བརྒྱ་སོ་གསུམ་པ་ས་ཁྱིའི་ལོར་སྐབས་བརྒྱད་པའི་ཡིག་ཆ་དེ་བརྩམས། ཞེས་དང་། མཛོད་མཐའ་དཔྱོད་ཀྱི་གནས་དང་བོར། མེ་རྟ་ལ་འཁྲུངས། ཤིང་ཁྱི་ལ་ཁབ་ནས་བྱུང་། སོ་བདུན་པ་ཆུ་རྟའི་ས་གའི་ཉ་ལ་སངས་རྒྱས། ཞེས་དང་། གནས་བརྒྱད་པར། མེ་རྟའི་ས་ག་ཟླ་བར་འཁྲུངས། ཉེར་དགུ་བ་ཤིང་ཕག་ལ་ཁབ་ནས་བྱུང་། སོ་ལྔ་བ་ལྕགས་སྦྲུལ་ལ་སངས་རྒྱས། བརྒྱད་ཅུ་བ་མེ་སྟག་ལ་འདས། དེ་ནས་ལོ་ཉིས་སྟོང་ལྔ་བརྒྱ་ཞེ་གཅིག་འདས་ཤིང་ཞེ་གཉིས་པ་མེ་ཕག་ལ་ཡིག་ཆ་དེ་བརྩམས་པར་བཤད། འཇིགས་བྱེད་ཆོས་འབྱུང་དུ། ལྕགས་སྤྲེལ་ལ་བལྟམས། སོ་ལྔ་བ་ཤིང་རྟ་ལ་སངས་རྒྱས། ལོ་དེའི་དྲུག་པའི་ཞག་ཆད་བརྩིས་ན་ཚེས་དྲུག་དང་མ་བརྩིས་པའི་ཚེས་ལྔ་ལ་ཆོས་འཁོར་བསྐོར། སངས་རྒྱས་ཀྱི་བསྟན་པའི་དབུ་བརྙེས་ནས་ལོ་སྟོང་ཕྲག་གཅིག་དང་དགུ་བརྒྱ་དང་བདུན་འདས་པ་ན་མེ་མཁའ་རྒྱ་མཚོའི་རྗེས་ཀྱི་རབ་བྱུང་གི་ཐོག་མ་ཤར། ཞེས་དང་། མཇུག་ནས་མེ་རྟ་ལ་བལྟམས་ནས་ལོ་ཉིས་སྟོང་དྲུག་བརྒྱ་སོ་བཞི་བར་ཆོས་འབྱུང་འདི་བརྩམས། ཞེས་སོགས་གཞུང་ཕན་ཚུན་དང་གཞུང་གཅིག་ཏུའང་མི་འདྲ་བ་དུ་མ་གསུངས་ན་ཡང་རང་ལུགས་དངོས་ནི་བསྟན་རྩིས་ལྟར་ཡིན་ནོ། །

གཞན་ཡང་ས་སྐྱ་པཎྚི་ཏས་མཛད་པའི་ས་སྐྱ་གྲགས་པ་རྒྱལ་མཚན་གྱི་རྣམ་ཐར། འདུལ་བ་ལུང་རིགས་གཏེར་མཛོད། སྟག་ལོའི་དུས་འཁོར་སྤྱི་དོན་སོགས་ཀྱི་བཤད་ཚུལ་རྣམས་ཆེས་ཆེར་མི་འདྲ་ཞིང་ངེས་དགོས་པ་ཤ་སྟག་ཡིན་མོད། ཐམས་ཅད་འདིར་བཤད་པས་མི་ལང་ངོ་། །ད་ནི་བོད་གངས་ཅན་དུ་བསྟན་པ་ནམ་བྱུང་ཞེ་ན། དེ་ཡང་ཀུན་མཁྱེན་བླ་མའི་བསྟན་རྩིས་སུ། རིགས་ལྡན་འཇམ་དཔལ་གྲགས་པས་ཁྲི་མཛད་ནས་ལོ་ཞེ་གཅིག་གི་དུས་གཉའ་ཁྲི་བཙན་པོ་བོད་དུ་བྱོན། ཞེས་དང་། བྲག་དགོན་པའི་མདོ་སྨད་ཆོས་འབྱུང་ལས། སྟོན་པ་སངས་རྒྱས་པའི་ཕྱི་ལོ་ཆུ་རྟ་ནས་ལོ་དྲུག་བརྒྱ་དང་ཞེ་གསུམ་ན་གཉའ་ཁྲི་བྱོན། ཅེས་འབྱུང་བ་གཉིས་ཁུངས་གཙིགས་པའི་དབང་དུ་བཏང་ན། ཆོས་རྒྱལ་བདུན་གྱི་དང་པོ་ཟླ་བཟང་འདས་པའི་རྗེས་ཀྱི་ཤིང་ཕོ་སྤྲེལ་ལ་ལྷ་དབང་ཁྲིར་བཞུགས་པ་ནས་བཟུང་། ཆོས་རྒྱལ་ཕྱི་མ་རྣམས་དང་། རིགས་ལྡན་ཐོག་མ་འཇམ་དཔལ་གྲགས་པ་སོགས་བྱོན་པའི་ལོ་ལ་དུས་འཁོར་བ་ཐམས་ཅད་ཞལ་འཆམས་པས་ན། རིགས་ལྡན་འཇམ་དཔལ་གྲགས་པའི་ཁྲི་ལོ་ཞེ་གཅིག་པ་ནི་ཤིང་ཕོ་བྱི་བའི་ལོ་ཞིག་ཡིན་ནོ། །དེའི་ཕྱིར་ཕུག་ལུགས་ལྟར་ན། སྟོན་པ་འདས་པའི་ལྕགས་འབྲུག་ནས་ཆུ་ལུག་བར་ཟླ་བཟང་གི་ལོ་བཞི་དང་། དེ་ནས་ཆོས་རྒྱལ་ཕྱི་མ་དྲུག་ལ་ལོ་དྲུག་བརྒྱ་དང་། དེ་ནས་རིགས་ལྡན་འཇམ་དཔལ་གྲགས་པའི་ཞེ་གཅིག་སྟེ་དྲུག་བརྒྱ་ཞེ་ལྔ་བ་ཤིང་ཕོ་བྱི་བའི་ལོ་ནི་གཉའ་ཁྲི་བཙན་པོ་བོད་དུ་ཕེབས་པའི་ལོ་སྟེ། ཤིང་བྱིའི་ལོ་དེ་ནས་རིགས་ལྡན་གསུམ་པ་བཟང་པོའི་ཁྲི་ལོ་དོན་བརྒྱད་ལྕགས་བྱ་ཐོག་སྤྱི་ལོ་ཚུགས་པ་ཡིན་པས་དེའི་བར་ལ་ལོ་ཉིས་བརྒྱ་སོ་བདུན་དང་། ཡང་ཤིང་བྱིའི་ལོ་དེ་ནས་རིགས་ལྡན་བཅུ་བའི་ལོ་མགོ་མེ་མཁའ་རྒྱ་མཚོ་ཟུག་པའི་བར་ལ་ལོ་བརྒྱད་བརྒྱ་དྲུག་ཅུ་དང་། མེ་མཁའ་རྒྱ་མཚོ་མ་ཚུགས་གོང་གི་ལོ་བདུན་པ་མེ་གླང་སྟེ་སྤྱི་ལོ་དྲུག་བརྒྱ་བཅུ་བདུན་པ་ལ་སྲོང་བཙན་སྒམ་པོ་འཁྲུངས་པ་ལྟར་ན། གཉའ་ཁྲི་བོད་དུ་བྱོན་པའི་ལོ་ནས་སྲོང་བཙན་འཁྲུངས་པའི་བར་ལ་ལོ་བརྒྱད་བརྒྱ་དང་གསུམ་འདས་པ་ཡིན་ནོ། །བྲག་དགོན་པའི་ཆོས་འབྱུང་དུ། དུས་འཁོར་རྩ་རྒྱུད་གསུངས་ནས་ལོ་དྲུག་བརྒྱ་ཞེ་གསུམ་ན་གཉའ་ཁྲི་བཙན་པོ་བྱོན་པར་བཤད་པ་ནི། སྟོན་པས་དགུང་ལོ་སོ་བདུན་པ་ཆུ་རྟ་ལོར་དུས་འཁོར་གསུངས་པའི་ལུགས་སུ་བྱས་སོ། །སུམ་པ་ཡེ་ཤེས་དཔལ་འབྱོར་གྱི་ཆོས་འབྱུང་དང་། རྩིས་ཀྱི་བུ་གཞུང་གཉིས་ཀར། སྟོན་པ་མེ་ཡོས་ལ་འདས་པ་ནས་ལོ་བཞི་བརྒྱ་བཅུ་བདུན་འདས་པའི་ཤིང་བྱི་ལོར་གཉའ་ཁྲི་བཙན་པོ་འཁྲུངས་པར་བཤད་དེ། དེ་ལྟར་ན་འདིར་བཤད་པ་ལས་ལོ་བརྒྱ་དང་བརྒྱད་ཅུས་སྔ་བར་སྣང་ངོ་། །

འདིར་སྲོང་བཙན་སྒམ་པོ་ནམ་འཁྲུངས་པ་དང་། དགུང་ལོ་ག་ཚོད་བཞུགས་པ་དག་ལས་བརྩམས་ཏེ་གླང་དར་མས་བསྟན་པ་བསྣུབས་པའི་བར་གྱི་ལོ་ཚིགས་ལ་ཅུད་ཟད་དཔྱད་ན། ས་ཆེན་གྲགས་པ་རྒྱལ་མཚན་གྱིས་མཛད་པའི་བོད་ཀྱི་རྒྱལ་རབས་དང་། ས་སྐྱ་བསོད་ནམས་རྒྱལ་མཚན་གྱི་རྒྱལ་རབས་གསལ་བའི་མེ་ལོང་། བུ་སྟོན་ཆོས་འབྱུང་། ཚལ་བ་ཀུན་དགའ་རྡོ་རྗེའི་དེབ་དམར། བསོད་གྲགས་ཆོས་འབྱུང་། དཔའ་བོ་གཙུག་ལག་ཕྲེང་བའི་ཆོས་འབྱུང་། ངོར་བ་དཀོན་མཆོག་ལྷུན་གྲུབ་ཀྱི་ཆོས་འབྱུང་། ཀུན་མཁྱེན་འཇམ་དབྱངས་བཞད་པའི་བསྟན་རྩིས། སུམ་པ་པཎྚི་ཏའི་ཆོས་འབྱུང་། དབལ་མང་པཎྚི་ཏའི་རྒྱ་བོད་ཧོར་སོག་གི་ལོ་རྒྱུས། བྲག་དགོན་པའི་མདོ་སྨད་ཆོས་འབྱུང་རྣམས་སུ་སྲོང་བཙན་མེ་གླང་ལ་འཁྲུངས་པར་བྱས་ཤིང་། དེ་ལྟར་ན་མེ་གླང་དེ་ནས་ལོ་བདུན་འདས་པའི་བརྒྱད་པ་ཤིང་སྤྲེལ་ལ་དུས་འཁོར་བའི་མེ་མཁའ་རྒྱ་མཚོའི་མགོ་ཚུགས་པ་ཡིན། འགོས་ལོ་གཞོན་ནུ་དཔལ་བའི་དེབ་སྔོན་དང་། རྒྱལ་དབང་ལྔ་བའི་རྒྱལ་རབས། བཻ་དཀར། འཇིགས་མེད་གླིང་པ། ཅོ་ནེ་གྲགས་པ་བཤད་སྒྲུབ། འཇུ་མི་ཕམ་རྣམས་ཀྱིས་ས་གླང་ལ་འཁྲུངས་པར་བྱས་ཏེ། ས་གླང་དེ་ནི་མེ་མཁའ་རྒྱ་མཚོ་ཚུགས་རྗེས་ཀྱི་ལོ་དྲུག་པ་དེ་ཡིན་ནོ། །འགོས་ལོས་དེ་ལྟར་བཞེད་པའི་ཤེས་བྱེད་ནི་དེབ་སྔོན་གྱི་བསྟན་པ་ཕྱི་དར་གྱི་ལོ་ཚིགས་སྐབས་གོང་འོག་ཏུ། སྲོང་བཙན་ས་མོ་གླང་ལ་འཁྲུངས་ནས་ཡི་གེ་འདི་བགྱིས་པའི་མེ་སྤྲེལ་ཡན་ཆད་ལ་ལོ་བརྒྱད་བརྒྱ་ཞེ་བརྒྱད་འདས། ཞེས་དང་། སྲོང་བཙན་འཁྲུངས་ནས་ལོ་སུམ་བརྒྱ་ཉེར་དགུ་འདས་པའི་ས་ཕོ་རྟ་ལ་ལོ་ཆེན་རིན་བཟང་འཁྲུངས། ཞེས་དང་། དུས་མཚུངས་བསྒྲིགས་པའི་སྐབས་སུ། སྲོང་བཙན་སྒམ་པོ་འཁྲུངས་ནས་ལོ་བཞི་བརྒྱ་དང་བཅུ་གསུམ་འདས། བསྟན་པ་བསྣུབས་པའི་ལྕགས་བྱ་ནས་ལོ་བརྒྱ་དང་བཞི་བཅུ་རྩ་གཅིག་འདས་རྗེས་ཀྱི་ཆུ་ཕོ་རྟ་ལ་ཇོ་བོ་རྗེ་བོད་དུ་ཕེབས།  ཞེས་སོགས་ཀྱིས་གསལ་བར་འགྲུབ་བོ། །ལུང་དེས་དེ་ལྟར་འགྲུབ་ཚུལ་ནི་མེ་མཁའ་རྒྱ་མཚོ་སྟེ་ལོ་བཞི་བརྒྱ་དང་གསུམ་ལས་ལོ་ལྔ་ཕྲིས་པས་ལོ་སུམ་བརྒྱ་གོ་བརྒྱད། དེའི་སྟེང་དེབ་སྔོན་རབ་བྱུང་བརྒྱད་པའི་མེ་སྤྲེལ་ལ་རྩོམ་པས་དྲུག་ཅུ་སྐོར་བདུན་ལ་ལོ་བཞི་བརྒྱ་ཉི་ཤུ་དང་། རབ་བྱུང་བརྒྱད་པའི་མེ་སྤྲེལ་བཅས་པའི་ཡན་ལ་ལོ་སུམ་ཅུ་སྟེ་བསྡོམས་པས་ལོ་བརྒྱད་བརྒྱ་ཞེ་བརྒྱད་འབྱུང་བ་འདིས་ལེགས་པར་འགྲུབ་པ་ལྟར་དུ་ལུང་ཕྱི་མ་རྣམས་ཀྱང་ཤིན་ཏུ་གསལ་ལོ། །དེས་ན་དེབ་སྔོན་དུ་བོད་དང་རྒྱ་ཧོར་ལ་སོགས་པའི་རྒྱལ་རབས་ཀྱི་སྐབས་སུ། ཐང་ཀའུ་ཛུང་གིས་ས་ཕོ་སྟག་ལ་རྒྱལ་ཁམས་བླངས་པ་དེ། སྲོང་བཙན་སྒམ་པོའི་ལོ་ལྔ་བཅུ་བ་ཡིན། ཞེས་བཤད་འདུག་པས། དེ་ལྟར་ན་ཐང་གི་རྒྱལ་རབས་ཐོག་མར་བྱུང་བའི་ས་ཕོ་སྟག་ནི་མེ་མཁའ་རྒྱ་མཚོའི་གོང་གི་ལོ་དྲུག་པ་ཉིད་ཡིན་པ་ནི་རྒྱ་ནག་གི་ཡིག་ཚང་རྣམས་སུ་ཤིན་ཏུ་གསལ་བས་ཐེ་ཚོམ་གྱི་དྲི་ཙམ་ཡང་བྲོ་མི་དགོས་ཤིང་། དེ་དུས་སྲོང་བཙན་དགུང་ལོ་ལྔ་བཅུ་ཡིན་ན། སྲོང་བཙན་འཁྲུངས་ནས་ལོ་བརྒྱད་བརྒྱ་ཞེ་བརྒྱད་འདས་པ་སྟེ་རབ་བྱུང་བརྒྱད་པའི་མེ་སྤྲེལ་ལ་དེབ་སྔོན་རྩོམ་པའི་ལོ་ཚིགས་དང་ཇི་ལྟར་འགྲིག་སྟེ། དྲུག་ཅུ་སྐོར་གཅིག་གི་བར་ཁྱད་བྱུང་བ་མིན་ནམ་ཞེ་ན། བདེན་པ་ལྟར་སྣང་མོད་ཀྱང་སྲོང་བཙན་དེ་དུས་ལོ་ལྔ་བཅུ་ཡིན་ཞེས་སོགས་ཀྱི་ཚིག་ནི། མིའི་བདག་པོ་ཀུན་དགའ་རྡོ་རྗེས་ཡི་གེར་བཏབ་པ་བཞིན་བྲི་བར་བྱ་སྟེ་ཞེས་པའི་གཞན་གཞུང་འགོས་ཀྱིས་ལུང་དྲངས་པ་ལས་བྱུང་བ་ཡིན་གྱི། འགོས་ཀྱི་རང་ཚིག་ག་ན་ཡིན་ཏེ། དེབ་སྔོན་རང་ལ་མིག་གཉིས་ཆར་གྱིས་ཞིབ་ཏུ་གཟིགས་པར་འཚལ། སྤྱིར་ཀུན་དགའ་རྡོ་རྗེས་ཡི་གེར་བཏབ་པའི་རྒྱའི་ཡིག་ཚང་དེ་ལ་ཡིག་ནོར་མང་དུ་བྱུང་འདུག་སྟེ། ཀུན་དགའ་རྡོ་རྗེའི་དེབ་དམར་རང་ན་ཡང་། འདིའི་དབང་ཐང་ལ་ནོར་བ་འགའ་རེ་འདུག ཅེས་ནོར་བ་དེ་ངོས་ཟིན་ཡོད་པར་མ་ཟད། ལུང་དྲངས་པ་དེར། ལྕགས་ཁྱི་ལ་སྲོང་བཙན་འདས། ཞེས་པ་ལ་སྲོང་བཙན་གྱི་དགུང་ལོར་ལོ་ཞེ་བརྒྱད་ཀྱིས་ཉུང་བ་དང་། ས་མོ་ལུག་འདི་གླང་དར་མས་རྒྱལ་སྲིད་བྱས་ནས་ལོ་བཞི་ལོན་པའི་ས་མོ་ལུག་དེ་ཡིན། ཞེས་པའི་སྐབས་སུ་དྲུག་ཅུ་སྐོར་གཅིག་གི་ཆད་སྐྱོན་བྱུང་འདུག་སྟེ། དེ་དག་ཀྱང་འགོས་ཀྱི་རང་ཚིག་མིན་ནོ། །དེའི་ཕྱིར་དེབ་ཐེར་དཀར་པོར་མིང་བཏགས་པས། འགོས་ཀྱིས་ས་གླང་དེ་དྲུག་ཅུ་སྐོར་སྔ་མའི་ས་གླང་དུ་བྱས་ནས། སྲོང་བཙན་དགུང་ལོ་གྱ་གཉིས་བཞུགས་པར་གསུངས། ཞེས་དང་། སྲོང་བཙན་དོན་དགུ་ལ་ཕེབས་ཚེ་ཀོང་ཇོ་དང་བཤོས། ཞེས་དང་། སྲོང་བཙན་འདས་པའི་ལོ་ནི་འགོས་རང་ཉིད་ཀྱང་རྒྱའི་ལོ་རྒྱུས་ལ་བརྟེན་པར་གསལ། ཞེས་དང་། དེས་ན་འགོས་ཀྱིས་གདོན་མི་ཟ་བར་ལོ་དྲུག་ཅུ་སྐོར་སྔ་མའི་ས་གླང་དང་། ཕྱི་མའི་ས་གླང་ནོར་བར་ཟད་དེ། རྩ་བ་འདི་ནས་ནོར་བའི་དབང་གིས། དར་མས་ཆོས་བསྣུབས་པའི་ལྕགས་བྱ་ནས་ལོ་དུ་སོང་བ་བརྩིས་པ་ན་ཡང་། རེས་དྲུག་ཅུ་སྐོར་གཅིག་ལྷག རེས་དྲུག་ཅུ་སྐོར་གཅིག་ཆད་པ་གཉིས་དེབ་སྔོན་གྱི་མགོ་མཇུག་ཀུན་ཏུ་ཡོད་པ་ཞིབ་ཏུ་རྩིས་དང་ཤེས། ཞེས་ཞུན་མཐར་བཅད་ནས་བཤད་ཁུལ་བྱས་པ་རྣམས་ལ་སྙིང་བོ་ཅི་ཡང་མ་བྱུང་ངོ་། །

དེ་ལྟར་ན་དེབ་སྔོན་ལས་ཐད་དེར་མདའ་ཚད་ཤོག་དེབ་བཞི་ཙམ་ཀུན་དགའ་རྡོ་རྗེའི་ཡི་གེ་ལྟར་བཤུས་པ་ཡིན་པས་ན། མཇུག་ཏུ། ཞེས་པ་ཛམྦྷལ་རྡོ་ཤྲཱི་མགོན་གྱིས་སྨྲས་པ་ཀུན་དགའ་རྡོ་རྗེས་བྲིས་པའོ། །ཞེས་ཡོད་པ་འདི་ཞིབ་ཏུ་གཟིགས་པར་འཚལ། ཡང་དེབ་ཐེར་དཀར་པོ་དེར། སྤྱིར་སྲོང་བཙན་བརྒྱད་ཅུ་ལྷག་བཞུགས་ཟེར་མཁན་རྣམས་ཀྱིས། རྒྱལ་བོ་དགུང་ལོ་དོན་དགུའི་སྐབས་རྒྱ་བཟའ་བག་མར་བཞེས་སོ་བྱ་བ་འདི་འཛུམ་བག་ཅུང་ཟད་བཅས་ཁས་ལེན་དགོས་པ་བཟློག་ཏུ་མེད་ལ། ཁོང་རྣམས་བརྒྱད་ཅུ་བཞུགས་ཟེར་བ་དེ་ཡང་། དོན་ཕ་རྒྱུད་ཀྱི་ལུང་བསྟན་ཞིག་ལ་བརྟེན་པ་ཙམ་ཡིན་ལ། རྒྱུད་ཚིག་དེའི་དོན་ཡང་ཆེས་གཞན་ཞིག་ཡིན་མོད་ཀྱི་སྐབས་སུ་མ་བབ་པས་འདིར་མ་སྤྲོས་སོ། །ཞེས་བཤད་པ་ལ་གཏན་ནས་དོན་མ་མཆིས་ཏེ། སྲོང་བཙན་བརྒྱད་ཅུ་ལྷག་བཞུགས་པར་བཤད་མཁན་སུ་ཡིན་ཡང་། སྲོང་བཙན་འཁྲུངས་ལོ་མེ་མཁའ་རྒྱ་མཚོའི་སྔ་ཕྱིར་ལོ་ལྔའམ་བདུན་ལས་མ་འདས་ཤིང་། རྒྱ་བཟའ་ཀོང་ཇོའི་ཡབ་ཐང་ཐེ་ཙུང་དགུང་ལོ་ཉེར་དགུ་སྟེང་མེ་མཁའ་རྒྱ་མཚོའི་ལོ་གསུམ་པ་མེ་ཁྱི་ལ་རྒྱལ་སར་འཁོད་པར་མི་འཆམ་པ་གཅིག་ཀྱང་མེད་ལ། སྲོང་བཙན་དགུང་ལོ་ཉེར་ལྔ་བ་ལྕགས་གླང་ལོར་རྒྱ་བཟའ་བཙུན་མོར་བསུས་པར་དེབ་སྔོན་མཁན་པོ་དང་ངེད་ཅག་ཀུན་མཐུན་པར་འདོད་ན། དགུང་ལོ་དོན་དགུའི་སྐབས་རྒྱ་བཟའ་བག་མར་བཞེས་སོ་བྱ་བ་འདི་འཛུམ་བག་ཅུང་ཟད་བཅས་ཁས་ལེན་དགོས་པ་བཟློག་ཏུ་མེད་ཅེས་བཤད་པ་ནི་ཁྱོད་རང་གཅིག་པུ་ལས་གཞན་ཤེས་ལྡན་སུ་ཞིག་གིས་དེ་ལྟར་སྨྲ་བར་བགྱིད། སྤྱིར་ཚལ་བའི་དེབ་དམར་རང་གི་གཞུང་ན། སྲོང་བཙན་ལྕགས་ཁྱི་ལ་འདས་ཞེས་པའི་ཚིག་ནི། དེབ་དམར་རང་ན། གཏམ་རྒྱུད་འདི་ཐེ་ཙུང་གི་ཡིག་ཚང་བ་སུ་ཁྱེ་ཞེས་པས་བཏུས། ཤིང་བྱ་ལ་ཤིང་ཀུན་ཏུ་བསྒྱུར། འདིའི་དབང་ཐང་ལ་ནོར་བ་འགའ་རེ་འདུག ཅེས་བཤད་པ་འདི་དེབ་དཀར་མཁན་པོས་མ་མཐོང་བའམ་མཐོང་ཡང་མ་མཐོང་བའི་ཟོལ་གྱིས་ཡིན་གཅིག་མིན་གཉིས་སྲོང་བཙན་དགུང་ལོ་སོ་བཞི་ཐོག་ལྕགས་ཁྱི་ལ་འདས་པར་བཤད་དགོས་པའི་ཁག་དེ་ཅི་ལ་བབས། དེབ་དམར་རང་གི་གཞུང་ན་གོང་དེ་མ་ཐག་དྲངས་པའི་ལུང་དེའི་གཤམ་ན། སྲོང་བཙན་མེ་གླང་ལ་འཁྲུངས། ཆབ་སྲིད་ལོ་རེ་དགུར་བཟུང་། དགུང་ལོ་གྱ་གཉིས་པ་ས་ཁྱི་ལ་འདས། ཞེས་སོགས་ཀྱི་ལོ་རྒྱུས་ཕལ་ཆེར་བྱང་ཇི་སྟོན་ཤེར་འབུམ་གྱིས་རྒྱལ་རབས་མང་པོ་ལས་བསྡུས་པ་དཔག་ཐོག་པ་རིན་རྡོར་ལ་དྲིས་ཏེ་བྲིས་པ་ཡིན། ཞེས་དེབ་དམར་རྩོམ་མཁན་ཚལ་བའི་མི་དབང་ཀུན་དགའ་རྡོ་རྗེ་རང་གི་རང་ལུགས་འཁྲུལ་མེད་བཞག་པ་འདི། དེབ་དཀར་དུ་གླེང་ཙམ་ཡང་མི་བྱེད་པ་ནི་ཤིན་ཏུ་ཡ་མཚན་ནོ། །དེ་བཞིན་དུ་བོད་ཀྱི་རྒྱལ་རབས་སོ་སོའི་ལོ་ཚིགས་རྣམས་ལ་དཔྱད་པ་དང་དོགས་གཅོད་བྱེད་དགོས་པ་ཤིན་ཏུ་མང་མོད། འདིར་བཀོད་ན་སྐབས་དོན་སྒྲིབ་པར་འགྱུར་བས་གཞན་དུ་སྤྲོ་བར་འདོད་དོ། །དཀར་ཆག་འདི་བརྩམས་པའི་ལོ་ནས་ལོ་ཉེར་བཞི་ལོན་པ་དང་ལོ་བདུན་ཅུ་པའི་ས་ག་ཟླ་བར། དེབ་དཀར་མཁན་པོས་ཟླ་མེད་པའི་ཁུངས་རྣམ་དག་ཏུ་བརྩི་བ་ལི་ཡུལ་གྱི་ཤར་མཐའི་ཏུན་ཧོང་སངས་རྒྱས་སྟོང་གི་བྲག་ཕུག་ནས་ཐོན་པའི་བོད་རྒྱལ་རབས་ཀྱི་ལོ་ཚིགས་དང་ལོ་རྒྱུས་རགས་རིམ་བཀོད་དཔའི་ཡི་གེ་ཕྱི་རྒྱལ་དུ་འཕྱན་པ་དེའི་བུ་བཤུས་ཤིག་བདག་གི་ཡང་སུག་པར་འབྱོར་བ་ལ་བརྟེན་ལྟ་རྟོག་ཤིབ་མོ་བྱས་པ་ན། ཡི་གེ་དེ་རི་བོང་ཅལ་འདྲོག་གི་དཔེས་སྦིར་བ་ཙམ་ལས་ཡིད་བརྟན་ཕེར་བའི་ལོ་རྒྱུས་ཁུངས་ལྡན་ཞིག་ཏུ་མི་སེམས་སོ། །

དཀར་ཆག་འདིར་གོང་སྨོས་ལྟར་ལོ་ཚིགས་ཀྱི་དཔྱད་པ་དང་དོགས་གཅོད་མང་པོ་བྲིས་ན་སྐབས་དོན་སྒྲིབ་པར་འགྱུར་བས་མི་འཚམ་པ་འདྲ་ན་ཡང་། ད་ལྟ་བགྲང་བྱ་མཐོན་པོར་སླེབས་པས་བོད་རྒྱལ་རབས་ཀྱི་ལོ་ཚིགས་སོགས་ལ་དཔྱད་པའི་ཡི་གེ་ཟུར་བ་ཞིག་རྩོམ་ཐུབ་མིན་ཡང་ཚོད་མི་ཐིག་པས་འདིར་གནད་འགག་ཆེ་བ་འགའི་ཚིག་གིས་གཏེར་ཡིག་དེའི་མཚང་བརྟོལ་བ་འདི་ལྟར།

དང་བོ། དེབ་དཀར་མཁན་པོས་ཤོག་དྲིལ་ཀ་བའི་མིང་བཏགས་པ་དེར། འགར་སྟོང་བཙན་གྱིས་རྒྱ་བཟའ་ཀོང་ཇོ་བོད་དུ་སྤྱན་དྲངས་ནས་ལོ་དགུ་བ་ལ་སྲོང་བཙན་འདས་པར་བཤད་པ་དང་། ཡང་ཀོང་ཇོ་དང་ལོ་གསུམ་ལ་བཤོས་སོ། །ཞེས་པ་གཉིས་ནང་འགལ་ཏེ། ལོ་དགུའི་རིང་བོད་དུ་བཞུགས་ནས་ལོ་གསུམ་ཙམ་མ་གཏོགས་སྲོང་བཙན་དང་གཟིམ་མཇལ་མ་བྱུང་བ་ནི་ཆེས་ཡ་མཚན་ནོ། །དེབ་དཀར་མཁན་པོས་རྒྱ་བཟའ་བོད་དུ་འབྱོན་ལམ་བློན་པོ་འགར་གྱིས་འགོར་ཅི་ཐུབ་བྱས་ནས་ལོ་དྲུག་འགོར་ཞེས་རང་གི་ཞེ་འདོད་ཀྱི་ཕྱོགས་སུ་ནན་གྱིས་འཐེན་པ་ལ་སུ་ཞིག་ཡིད་ཆེས་པར་འགྱུར།

གཉིས་པ། མེ་མཁའ་རྒྱ་མཚོའི་ལོ་གྱ་གཅིག་པ། (སྤྱི་ལོ༧༠༤)ཤིང་ཕོ་འབྲུག་གི་ལོའི་དཔྱིད་ཀར་རྒྱལ་གཙུག་རུ་སྟེ་ཁྲི་ལྡེ་གཙུག་བཙན་མེས་ཨག་ཚོམ་འཁྲུངས་པ་དང་། ལོ་དེའི་དགུན་ཡབ་རྒྱལ་པོ་འདུས་སྲོང་མང་རྗེ་དགུང་དུ་གཤེགས་པར་བཤད། ཤིང་ཕོ་འབྲུག་དེ་ནས་བརྩིས་པའི་ལོ་བདུན་པ་ལྕགས་ཁྱི་ལོ(སྤྱི་ལོ༧༩༠)ལ་རྒྱ་བཟའ་ཕྱི་མ་གྱིམ་ཤིང་ཀོང་ཇོ་བོད་དུ་བསུས་པར་བཤད་དེ། ལོ་དེར་མེས་ཨག་ཚོམ་དགུང་ལོ་བདུན་ཡིན་པས་དེ་ལ་བཙུན་མོ་བསུ་བའི་ཆོ་ག་ཇི་ལྟར་བྱེད་བསམ་པའི་ཡུལ་ལས་འགོངས་སོ། །རྒྱལ་གཙུག་རུ་དགུང་ལོ་དགུ་ལོན་པའི་དུས་སུ་མཚན་ལ་ཁྲི་ལྡེ་གཙུག་བཙན་དུ་གསོལ་ཞེས་ཟེར་ཞིང་། འདི་ལ་ཕྱིས་སུ་མེས་ཨག་ཚོམ་དུ་འབོད་པར་ལོ་རྒྱུས་ཁུངས་མ་རྣམས་སུ་ཡོད་པ་དེ་ལྟར་རོ། །རླུང་ལྟར་གྲགས་པའི་ལོ་རྒྱུས་སུ་མེས་ཨག་ཚོམ་གྱི་སྲས་ལྗང་ཚ་ལྷ་དབོན་གྱི་བཙུན་མོར་རྒྱ་བཟའ་ཕྱི་མ་འདི་བསུ་གྲབས་བྱེད་དུས་ལྗང་ཚ་རྟས་བརྡབས་ནས་གྲོངས་ཏེ་མཐར་ཡབ་རྒྱལ་བོ་མེས་ཨག་ཚོམ་གྱི་བཙུན་མོར་བཞེས་པར་བཤད་པའི་ལོ་ཚིགས་དང་སྒྲིག་ཐབས་མེད་དོ། །

གསུམ་པ། མེ་མཁའ་རྒྱ་མཚོའི་ལོ་བརྒྱ་བཅུ་དྲུག་པ(སྤྱི་ལོ༧༣༡)ས་མོ་ཡོས་ཀྱི་དབྱར་སྲས་ལྷ་དཔོན་དང་། དགུན་རྒྱ་བཟའ་གྱིམ་ཤིང་ཀོང་ཇོ་གཉིས་འདས་པར་བཤད་པ་དང་། ས་མོ་ཡོས་དེ་ནས་བརྩིས་པའི་ལོ་བཞི་བ་ཆུ་ཕོ་རྟ(སྤྱི་ལོ༧༤༡)ཡི་ལོ་ལ་བྲག་དམར་དུ་ཡུམ་སྣ་ནམ་བཟའ་ལ་སྲས་ཁྲི་སྲོང་ལྡེ་བཙན་འཁྲུངས་ནས་དགུང་ལོ་བཅོ་ལྔའི་སྟེང་མཚན་ལ་ཁྲི་སྲོང་ལྡེ་བཙན་དུ་གསོལ་བར་བཤད་དོ། །ཡོངས་གྲགས་ཀྱི་བཤད་ཚུལ་དང་གཏན་མི་མཐུན་པ་འདི་ནི་བོད་ཀྱི་ལོ་རྒྱུས་སྨྲ་བ་སུས་ཀྱང་ཁས་ལེན་དུ་མི་བཏུབ་སྟེ། ལྗང་ཚ་ལྷ་དབོན་གྱི་མ་ཤང་གི་བུ་ཡིན་མདོག་ཁ་བོ་དང་། ཁྲི་སྲོང་ལྡེ་བཙན་མ་འཁྲུངས་པའི་གོང་གི་ལོ་བཞི་བ་ལ་ཁྲི་སྲོང་གི་མ་ཡུམ་དུ་རྩོད་པ་མེད་པའི་གྱིམ་ཤིང་ཀོང་ཇོ་འདས་པར་བཤད་པ་འདི་ལས་ལྷག་པའི་ཡི་མུག་པ་ཞིག་ཇི་ལྟར་འབྱུང་ངོ་། །སྤྱིར་སྔོན་རབས་ཀྱི་ཡི་གེ་དེར་ཁས་ལེན་དུ་མི་བཏུབ་བའི་ནོར་བ་མངོན་ཆེ་བ་འགའ་ཟུང་ཡོད་པ་ལས་ལོ་རྒྱུས་ལ་རྟོག་དཔྱོད་བྱེད་མཁན་ཚོར་ཧ་ཅང་མཁོ་ཆེ་བའི་ས་བོན་འགངས་ཅན་ཡོད་པ་སྨོས་མ་དགོས། དེ་ལྟར་གནད་ཆེ་བ་གསུམ་གྱི་སྒོ་ནས་སུན་ཕྱུང་བ་འདིས་ནི་གཏེར་ཡིག་དེ་ཡིད་བརྟན་ཐུབ་པའི་ཡི་གེ་ཞིག་མིན་པ་གསལ་བར་བསྟན་པས་ན། སྲོང་བཙན་སྒམ་པོ་དགུང་ལོ་སོ་བཞི་ལས་མ་བཞུགས་ཞེས་གྲེ་བ་འགགས་འགགས་ཀྱི་བར་དུ་བཤད་པ་དེར་ཐལ་སྤུངས་ཀྱི་རི་བོ་ལ་གནམ་ལྕགས་ཀྱི་ཐོག་སེར་བབས་པའི་དཔེ་ལས་གཞན་དུ་ཅི། མེ་མཁའ་རྒྱ་མཚོའི་ལོ་ང་དྲུག་པ(སྤྱི་ལོ༦༧༡)ས་མོ་ཡོས་ཀྱི་མཐའ་ནས་དེབ་དཀར་རྩོམ་འཕྲོར་ལུས་པས་རྒྱ་བཟའ་ཕྱི་མའི་ལོ་ཚིགས་སྐོར་དང་། བསྟན་བསྣུབས་དང་ཕྱི་དར་གྱི་ལོ་ཚིགས་སོགས་འབྲི་རྒྱུ་མ་བྱུང་བ་ནི་ཤིན་ཏུ་ཕངས་སོ། །སྤྲོས་པས་ཆོག་གོ །

དེས་ན་བོད་ཀྱི་རྒྱལ་རབས་ཀྱི་ལོ་ཚིགས་ལ་ས་ཆེན་གྲགས་པ་རྒྱལ་མཚན་གྱི་གསུང་དང་། དཔའ་བོ་གཙུག་ཕྲེང་གི་ཆོས་འབྱུང་། སུམ་པ་པཎྚི་ཏའི་ཆོས་འབྱུང་རྣམས་ཧ་ལམ་མཐུན་ཞིང་། དེ་དག་ལས་ཀྱང་རྒྱལ་དབང་ལྔ་བས་མི་བཞེད་པ་མ་གཏོགས་དཔའ་བོ་གཙུག་ཕྲེང་གིས་ལོ་ཚིགས་གང་བཤད་ལ་རང་ཚིག་སྔ་ཕྱི་མི་འགལ་བ་ལྟ་བུར་སྣང་བས་ཉུང་ཙམ་འགོད་ན། ཕུག་ལུགས་ལྟར་ན་སྟོན་པ་འདས་ནས་ལོ་ཆིག་སྟོང་བཞི་བརྒྱ་གོ་བརྒྱད་དང་། སྤྱི་ལོ་དྲུག་བརྒྱ་བཅུ་བདུན་པ་མེ་མོ་གླང་ལ་སྲོང་བཙན་འཁྲུངས། དེའི་ཕྱི་ལོ་ས་སྟག་ལ་ཐང་གི་རྒྱལ་ས་ཐོག་མར་ཚུགས། སྲོང་བཙན་ཉེར་ལྔ་བ་ལྕགས་གླང་ལ་རྒྱ་བཟའ་ཀོང་ཇོ་ཁབ་ཏུ་བཞེས། སྲོང་བཙན་ང་གསུམ་པ་ས་སྦྲུལ་ལ་མོང་བཟའ་ཁྲི་ལྕམ་དང་འདུས་པ་ལས་སྲས་གུང་རི་གུང་བཙན་འཁྲུངས། གུང་རི་གུང་བཙན་བཅོ་བརྒྱད་པ་མེ་ཁྱི་ལ་དེའི་སྲས་མང་སྲོང་མང་བཙན་འཁྲུངས། སྲོང་བཙན་གྱ་གཉིས་པ་ས་ཁྱི་ལ་འདས་ཏེ་དབོན་སྲས་མང་སྲོང་གིས་སྲིད་བཟུང་། མང་སྲོང་དགུང་ལོ་ཉེར་བདུན་པར་འདས་ནས་ཞག་བདུན་ན་འདུས་སྲོང་མང་རྗེ་འཁྲུངས། འདུས་སྲོང་མང་རྗེ་དགུང་ལོ་ཉེར་དགུ་བར་འདས་ནས་ལོ་དེར་སྲས་ཁྲི་ལྡེ་གཙུག་བརྟན་ཏེ་མེས་ཨག་ཚོམ་འཁྲུངས། མེས་ཨག་ཚོམ་དགུང་ལོ་ང་གཅིག་གི་དུས་སྲས་ཁྲི་སྲོང་ལྡེ་བཙན་འཁྲུངས། མེས་ཨག་ཚོམ་རེ་གསུམ་པར་འདས་ནས་སྲས་ཁྲི་སྲོང་ལྡེ་བཙན་གྱིས་རྒྱལ་སྲིད་བསྐྱངས། དགུང་ལོ་སོ་གསུམ་ནས་ལོ་རེ་བཞིན་སྲས་མུ་ནེ་བཙན་པོ། མུ་ཏིག་བཙན་པོ། ཁྲི་ལྡེ་སྲོང་བཙན་གསུམ་བསྐྲུན། ཁྲི་སྲོང་ལྡེ་བཙན་དགུང་ལོ་ང་ལྔ་བར་ཁྲི་ལས་བྱོལ་ནས་སྲས་མུ་ནེ་བཙན་པོ་སྲིད་ལ་བཞག དེ་ལོ་གཅིག་དང་ཟླ་བ་དགུ་ལ་བཀྲོངས་ནས་མེ་སྟག་ལོ་ལ་ཁྲི་ལྡེ་སྲོང་བཙན་ནམ་ལྡེང་ཁྲིའམ་སད་ན་ལེགས་མཇིང་ཡོན་ཞེས་མཚན་གྱི་རྣམ་གྲངས་མང་པོ་ཅན་དགུང་ལོ་ཉེར་གསུམ་བཞེས་པ་དེས་སྲིད་བསྐྱངས། དེས་དགུང་ལོ་བཞི་བཅུ་བཞེས་དུས་སྲས་གླང་དར་མ་དང་། ཞེ་གསུམ་བཞེས་དུས་མངའ་བདག་ཁྲི་རལ་བ་ཅན་བསྐྲུན། སད་ན་ལེགས་མཇིང་ང་བཞི་བར་འདས་ནས་སྲས་རལ་བ་ཅན་ཏེ་ཁྲི་གཙུག་ལྡེ་བཙན་རྒྱལ་སར་འཁོད། རལ་བ་ཅན་དགུང་ལོ་སོ་དྲུག་བཞེས་པའི་ལྕགས་བྱ་ལོར་སྡིག་བློན་གྱིས་བཀྲོངས་ནས་གཅེན་གླང་དར་མ་རྒྱལ་སར་བཀོད། དར་མས་ལོ་ལྔ་ལ་སྲིད་བསྐྱངས་ཤིང་བསྟན་པ་བསྣུབས་པར་བྱས། གཙུག་ཕྲེང་ལྟར་ན་ལོ་ལྔ་བ་ཟད་པ་མེ་སྟག་གི་ལོར་ལྷ་ལུང་དཔལ་རྡོར་གྱིས་དར་མ་བཀྲོངས་ཏེ། ལོ་དེ་ནི་མེ་མཁའ་རྒྱ་མཚོའི་ནང་ཚན་རབ་བྱུང་དང་པོ་མ་ཚུགས་གོང་གི་ལོ་བརྒྱ་ཉི་ཤུ་སྟེ་དྲུག་ཅུ་སྐོར་གཉིས་ཀྱི་སྔ་གོང་དེ་མ་ཐག་གི་མེ་སྟག་དེ་ཡིན་ནོ། །

སྐབས་འདིར་ཀུན་མཁྱེན་བསྟན་རྩིས་སུ། སྲོང་བཙན་མེ་གླང་ལ་འཁྲུངས་ནས་ལོ་བརྒྱད་པ་ཤིང་སྤྲེལ་ལ་མེ་མཁའ་རྒྱ་མཚོའི་མགོ་ཚུགས་ཞེས་དང་། སྲོང་བཙན་གྱ་གཉིས་པ་ས་ཁྱི་ལ་འདས་ནས་ལོ་བརྒྱད་ཅུ་སོང་བའི་ས་རྟ་ལ་ཁྲི་སྲོང་ལྡེ་བཙན་འཁྲུངས། དགུང་ལོ་རེ་དགུ་བ་མེ་སྟག་ལ་འདས། ཞེས་དང་། ཁྲི་སྲོང་གི་སྲས་མུ་ནེ་བཙན་པོ། དེའི་གཅུང་སད་ན་ལེགས་མཇིང་ཡོན། དེའི་སྲས་བར་མ་ཁྲི་རལ་བ་ཅན་རྒྱལ་དཀས་བྱེད་རྩིས་མགོ་རྩོམ་པའི་མེ་ཁྱི་ལ་འཁྲུངས་ཤིང་། དགུང་ལོ་བཅུ་གཉིས་པ་མེ་བྱ་ལ་རྒྱལ་སྲིད་བསྐྱངས། ཞེས་གསུངས་པ་རྣམས་གུང་བསྒྲིགས་ན། མེས་པོ་ཁྲི་སྲོང་ལྡེ་བཙན་དགུང་ལོ་ཉེར་དགུ་སྟེང་ཚ་བོ་ཁྲི་རལ་བ་ཅན་འཁྲུངས་དགོས། ཚ་བོ་དེས་དགུང་ལོ་བཅུ་གཉིས་སྟེང་རྒྱལ་སྲིད་བསྐྱངས་ན། དེ་དུས་མེས་པོ་ཁྲི་སྲོང་དགུང་ལོ་བཞི་བཅུ་ཡིན་ཞིང་། ཚ་བོ་རལ་བ་ཅན་གྱི་ཡབ་མེས་པོ་ཁྲི་སྲོང་གི་སྲས་སད་ན་ལེགས་མཇིང་འཁྲུངས་རེག་ལ་ད་དུང་ལོ་བདུན་འགོར་དགོས་པས། དེ་ལས་བཞད་གད་ཀྱི་གནས་ཅི་ཞིག་ཡོད་དེ། གང་ལྟར་ཡང་རལ་བ་ཅན་འཁྲུངས་ལོ་དྲུག་ཅུ་སྐོར་གཅིག་གིས་སྔ་བའི་སྐྱོན་བྱུང་ངོ་། །དབལ་མང་པཎྚི་ཏའི་རྒྱ་བོད་ཧོར་སོག་གི་ལོ་རྒྱུས་སུ་ཡང་པཎྚི་ཏས་ཐུགས་མཉམ་མ་བཞག་པའི་ཚུལ་གྱིས་དེ་ཇི་ལྟ་བ་བཞིན་བཀོད་འདུག་པ་དང་། འོག་ནས་འཆད་པ་ལྟར་བྲག་དགོན་པས་ཀྱང་འདི་ལ་བརྟེན་པས་ནོར་བ་བྱུང་འདུག་སྟེ། བསྟན་རྩིས་པ་རྣམས་ཀྱིས་ཐུགས་གཟབ་མཛད་འཚལ།

དེ་ཡང་བསྟན་པ་སྔ་དར་དང་ཕྱི་དར་འབྱུང་བའི་རྐྱེན་ནི་འདི་ལྟར་ཤེས་པར་བྱ་སྟེ། སྔར་བཤད་པའི་སད་ན་ལེགས་མཇིང་ཡོན་ལ་གཙང་མ། དར་མ། རལ་བ་ཅན། ལྷ་རྗེ། ལྷུན་གྲུབ་སྟེ་སྲས་ལྔ་བྱུང་། དེ་དག་ལས་ཐ་ཆུང་གཉིས་ཆུང་ངུ་ནས་གཤེགས་པས་བང་སོ་ཡང་མེད་ལ། ལྷ་སྲས་གཙང་མ་རབ་ཏུ་བྱུང་། དར་མ་སྡིག་ལ་དགའ་བས་རྗེ་བོར་མ་འོས་ཏེ། ཁྲི་གཙུག་ལྡེ་བཙན་རལ་བ་ཅན་དེ་ཉིད་དགུང་ལོ་བཅུ་གཉིས་བཞེས་ཐོག་མེ་མོ་བྱ་ལ་ཡབ་འདས་ཤུལ་ཁྲིར་བསྐོས། དེའི་ཁྲི་ལོ་ལྔ་དྲུག་གི་མཚམས་སུ་རྒྱ་ནག་གི་རྒྱལ་བོ་དང་འཁྲུག་ཆེན་བསླངས་པའི་མཐར། བོད་ཀྱི་མཆོད་གནས་ལོ་པཎ་རྣམས་དང་རྒྱའི་ཧྭ་ཤང་རྣམས་ཀྱིས་འདུམ་མཛད་དེ། རྒྱའི་གོང་གུ་རྨེ་རུ་སྟེ་འདི་ལ་ལས་ད་ལྟའི་མཚོ་སྔོན་ཁྲི་ཁ་ལ་ངོས་འཛིན་པ་དེར་མངའ་བདག་རལ་བ་ཅན་དངོས་སུ་ཕེབས་ཏེ་རྒྱ་བོད་ཀྱི་ས་མཚམས་ཕྱེ་ནས་གཙུག་ལག་ཁང་བརྩིགས། ཁྲི་རལ་གྱི་དབུ་སྐྲ་ནང་གཞུག་ཏུ་ཕུལ་བའི་རྒྱ་མཁར་གྱི་མཆོད་རྟེན་དེ་བཞེངས། རྒྱ་བོད་ཀྱི་ཕོ་བྲང་གི་མདུན་དང་། ས་མཚམས་རྨེ་རུ་གསུམ་དུ་རྡོ་རིང་བསླངས་ཏེ་གཙིགས་ཡིག་དང་བྲོས་ཚིག་བྲིས། གནམ་ལ་ཉི་ཟླ་ཟུང་གཅིག་དང་། ས་ལ་བཙན་པོ་དབོན་ཞང་ཞེས་བསྒྲགས་ནས་ཕ་བོང་ལ་ཉི་ཟླའི་གཟུགས་བྱས། ཕྱིན་ཆད་བོད་བོད་ཡུལ་ན་བདེ། རྒྱ་རྒྱ་ཡུལ་ན་བདེ། ས་མཚམས་རྨེ་རུ་མན་ལ་བོད་ཀྱིས་དམག་མི་འདྲེན། རྨེ་རུ་ཡན་ལ་རྒྱས་དམག་མི་འདྲེན། གལ་ཏེ་སུས་དྲངས་ན་རྡོ་རིང་གི་ཡི་གེ་ལན་གསུམ་དུ་བཀླགས་པས་སུས་དྲངས་པ་དེ་ཕུང་བར་གྱུར་ཅིག ཅེས་བཙན་པོ་དབོན་ཞང་གིས་བདེན་དཔང་བཙུགས་ཏེ་དམོད་བོར་བ་དང་མནའ་ཚིག་དོར། རྡོ་རིང་ནམ་བཙུགས་པའི་ལོ་ལ་རྒྱ་བོད་ཀྱི་ཡིག་ཚང་དུ་ལོ་དྲུག་ཅུའི་ཁྱད་པར་ཡོད་པས་བརྟག་པར་བྱ། ལ་ལས་གོང་གུ་རྨེ་རུ་ཞེས་པ་གཞན་ཞིག་ལ་ངོས་འཛིན་པའང་ཡོད་དོ། །

དེ་ནས་བཙན་པོ་དེས་ཡབ་མེས་རིང་ལ་རྒྱ་ནག་དང་། ལི་ཡུལ། རྒྱ་གར། ཟ་ཧོར། ཁ་ཆེ་སོགས་ཡུལ་སྣ་ཚོགས་ནས་དམ་པའི་ཆོས་བསྒྱུར་བས་བརྡ་མི་འདྲ་བ་མང་བས་མི་གོ་ཞིང་སློབ་དཀའ་བར་གཟིགས་ནས་ལོ་པཎ་མཁས་པ་མང་པོ་ལ་ཐེག་པ་ཆེ་ཆུང་ལས་བྱུང་བའི་ཆོས་རྣམས་རྒྱ་གར་གྱི་ཡུལ་དབུས་ལས་བྱུང་བའི་བརྡ་དང་མཐུན་པར་བསྒྱུར་བ་དང་། ཆད་ལྷག་སྤང་བའི་ཕྱིར་དཀར་ཆག་ཀྱང་བྲིས་ཤིག་ཅེས་བཀའ་སྩལ་ཏེ། ཁྲི་སྲོང་དུས་ཀྱི་དཀར་ཆག་ཕོ་བྲང་ལྡན་དཀར་མ་དང་། དེའི་ཁར་མཆིམས་ཕུ་མ་དང་། འཕང་ཐང་མ་སྟེ་གསུམ་སྔ་ཕྱིར་བཅོས། གཞི་ཐམས་ཅད་ཡོད་སྨྲ་ལས་གཞན་པའི་སྡེ་བ་བོད་དུ་མི་འཛུགས་ཤིང་སྡེ་བ་གཞན་པའི་སྡེ་སྣོད་དང་། སྔགས་མ་རྒྱུད་ཀྱི་སྐོར་མ་སྒྱུར་ཅེས་བཀའ་ཕབ་སྟེ་སྲང་དང་ཞོ་ཆ་ཚུན་ཆད་རྒྱ་གར་གྱི་ཡུལ་དབུས་དང་མཐུན་པར་བཅོས། རབ་ཏུ་བྱུང་བ་རེ་རེ་ལ་འབངས་མི་ཁྱིམ་བདུན་རེ་ཕུལ། དབུ་སྐྲ་བསིལ་བ་ལ་མི་མཉེས་པས་རལ་བ་ཅན་དུ་མཚན་ཐོགས། རྒྱལ་པོ་གྲལ་དབུ་ལ་བཞུགས་ཚེ་གཡས་གཡོན་ལ་དགེ་འདུན་གྱི་སྟན་བཤམས། དབུ་སྐྲ་ཚན་གཉིས་སུ་བྱས་པའི་སྣེ་ལ་དར་ཡུག་བཏགས་པ་དགེ་འདུན་གྱི་སྟན་ཁར་བཀྲམ་པ་ཚུན་ཆད་ཀྱིས་སྲི་ཞུ་མཛད། ཐུགས་དམ་གྱི་རྟེན་དུ་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་དགུ་ཐོག་བཞེངས་པ་ན། འོག་གི་ཐོག་སོ་གསུམ་རྡོ་ལས་བརྩིགས་ཏེ་དེར་རྗེ་བློན་རྣམས་བཞུགས། བར་ཐོག་གསུམ་སོ་ཕག་གིས་བརྩིགས་ཏེ་དེར་ལོ་པཎ་དགེ་འདུན་རྣམས་བཞུགས། སྟེང་ཐོག་གསུམ་ཤིང་གིས་བརྩིགས་ཏེ་ཐུགས་དམ་གྱི་རྟེན་རྣམས་བཞུགས་པ་ནི་ལྟ་བས་ཆོག་མི་ཤེས་པ་དང་འཛམ་གླིང་ན་གྲགས་པ་ཅན་དུ་གྱུར། ཡབ་མེས་ཀྱི་སྐུ་རིང་ལ་ཆབ་འབངས་སུ་མ་འདུས་པ་ཤར་སྐར་མ་སྨིན་དྲུག་འཆར་བའི་འོག་རྒྱ་ནག་སོ་ལོན་ཤན་གྱི་རི་རྒྱུད་དར་དཀར་གྱི་ཡོལ་བ་འདྲ་བ་ལ་གཏུགས། ནུབ་སྟག་གཟིག་གི་སྤ་སྟག་ཤ་དུང་གི་སྒོ་མོ་ལ་གཏུགས། བྱང་ཧོར་གྱི་བྱེ་མ་སྒང་རིང་ཉ་རྨང་མའི་རྒྱབ་འདྲ་བ་ལ་གཏུགས། ལྷོ་ཕྱོགས་བྲམ་ཟེའི་ཡུལ་ལས་བརྒལ་བར་གཏུགས་ཏེ་འཛམ་གླིང་སུམ་གཉིས་ལས་ཆེས་ལྷག་པར་མངའ་མཛད་དོ། །དེ་ལྟར་ལྷ་ཐོ་ཐོ་རི་ནས་རྒྱལ་བོ་འདི་བར་ལ་སྐྱིད་པའི་གདུང་རབས་ཕྱེད་དང་བཅུ་གསུམ་ཞེས་གྲགས་ལ། མེས་ཨག་ཚོམ་ནས་འདིའི་བར་ལ་ཤིན་ཏུ་སྐྱིད་པའི་གདུང་རབས་ལྔ་ཞེས་གྲགས་སོ། །

དེའི་ཚེ་ཆོས་ཁྲིམས་ཤིན་ཏུ་དམ་པས་བློན་པོ་དབས་སྟག་རྣ་སོགས་སྡིག་ལ་དགའ་བ་རྣམས་སྐྱོ་སྟེ་རང་ཅག་འདི་ཙམ་དུ་གུ་དོག་པ་ཅིས་ལན་ཟེར་བ་ལ། འགའ་ཞིག་གིས་རབ་བྱུང་ལ་སྡང་མིག་བལྟས། མཛུབ་མོ་ཀེར་ཏེ་འདི་རྣམས་ཀྱིས་ལན་ཟེར་བ་བཙན་པོས་གསན་ནས་དཀོན་མཆོག་ལ་དེ་ལྟར་བྱེད་པར་མི་རིགས་པས་དེ་དག་གི་མིག་ཕྱུངས་མཛུབ་མོ་ཆོད་ཅེས་ལུང་ཕབ། དེ་ནས་ནང་བློན་གདུག་པ་ཅན་འགས་ཆོས་ཁྲིམས་བཤིག་པར་བགྲོས་ནས་སྔོན་ལ་མོ་མ་དང་ཕྱྭ་མཁན་རྣམས་ལ་རྔན་པ་བྱིན་ཏེ་ལྷ་སྲས་གཙང་མ་འདིར་བཞུགས་ན་སྐུ་ཚེ་ལ་བར་ཆད་འོང་ཞིང་རྒྱལ་ཁྲིམས་འཇིག་ཟེར་དུ་བཅུག་ནས་མོན་ཡུལ་དུ་སྤྱུགས། བཙུན་མོ་ངང་ཚུལ་མ་དང་ཆོས་བློན་བྲན་ཀ་དཔལ་ཡོན་མཛའ་འོ་ཞེས་སྙན་ཕྲ་གསོལ་ནས་བཙུན་མོ་ལྕེབས། བྲན་ཀ་དཔལ་ཡོན་བྱང་དུ་བྲོས་ནས་ས་འོག་ཏུ་ལྕགས་ཀྱི་སྲོག་རྩ་བསྒྲུབས་ཤིང་ཅུང་མ་གྲུབ་པའི་འཚམས་སུ་དབས་སྟག་རྣ་ལ་སོགས་པས་ཤེས་ནས་བསད། དེ་ནས་མངའ་བདག་ཁྲི་རལ་དགུང་ལོ་སོ་དྲུག་བཞེས་ཐོག་ལྕགས་མོ་བྱ་ལ་རྒུན་ཆང་དྲངས་ནས་མྱོས་པར་བཞེས་ཏེ་ཁྲི་ཁར་གཟིམས་སྐབས། དབས་སྟག་སྣ་དང་། ཅོག་རོ་ལྷ་ལོད་དང་། ལེགས་སྡུག་བཙན་ཏེ་སྡིག་བློན་གསུམ་གྱིས་མགྲིན་པ་ལྟག་ལ་བསྐོར་ནས་བཀྲོངས་ཏེ་ཀྱེ་མ་ཀྱི་ཧུད། བོད་ཀྱི་བསོད་ནམས་ཟད་པའི་མཐའ་ལ་ལྟོས་ཤིག དེའི་ཚེ་བ་ལང་གི་ཤ་ཚུགས་ཅན་ཤེས་རྒྱ་ཆུང་ལ་རྒྱུད་གྱོང་བའི་གླང་དར་མ་ཨུ་དུམ་བཙན་རང་ལོ་སོ་དགུ་བ་ལྕགས་བྱ་ལ་རྒྱལ་སར་བཞག དབས་སྟག་རྣས་བློན་བྱས། དེའི་ཚེ་ཆོས་བྱེད་པ་བཀྲ་མི་ཤིས་སོ་ཞེས་སྙད་བཏགས་ནས། ཇོ་བོ་རྣམ་གཉིས་དང་། བྱམས་པ་ཆོས་འཁོར་ཆུ་ལ་སྐྱུར་ཟེར་བ་ལ་ཆོས་བློན་འགས་ཐབས་བྱས་ནས་སོ་སོའི་ཁྲི་འོག་ཏུ་སྦས། ལྷ་ཁང་གི་སྒོ་ལ་ཞལ་བརྒྱབ་སྟེ་བཙུན་པ་ཆང་འཐུང་བའི་རི་མོ་བྲིས། བསམ་ཡས་གཤིག་པར་བརྩམས་ཀྱང་ཐོག་བབས་པས་སྐྲག་ནས་འཕྲོར་ལུས། གཞན་ཡང་ལྷ་མང་བོ་བཤིག ལྷ་ས་དང་བསམ་ཡས་སུ་བཤས་ར་དང་། ཝ་ཚང་དང་སྤྱང་ཚང་བཅས། གསུང་རབ་གང་རྙེད་མེར་བསྲེགས། ལ་ལ་ཆུར་བསྐྱུར། ལ་ལ་སའི་འོག་ཏུ་སྦས། རྨ་རིན་ཆེན་མཆོག་དང་མྱང་ཏིང་འཛིན་བཟང་བོ་སོགས་དམ་པ་མང་དུ་བཀྲོངས། རབ་ཏུ་བྱུང་བ་ཕལ་ཆེར་ས་མཐར་བྲོས་ཤིང་མ་ཐར་བ་རྣམས་ཁྱིམ་པར་ཕབ། མ་ཉན་པ་རྣམས་བསད། ལ་ལ་རྒྱལ་བློན་རྣམས་ཀྱི་ཆིབས་ཀྱི་སྒུར་སྟེགས་བྱས། ལ་ལ་རྔོན་པ་ལ་བཏང་བ་སོགས་སྤྱོད་ངན་དེ་ལྟ་བུས་བསྟན་པ་བསྣུབས་པར་བྱས་སོ། །

དེའི་ཚེ་རྒྱ་བོད་མཚམས་སུ་བོད་ལ་དབང་བའི་རི་བརྩིགས་ཡོད་པ་འགྱེལ་བས་ཀླུ་ཆུ་ཞག་གསུམ་ལ་བགགས་ཏེ་གྱེན་དུ་ལོག་པ་དང་། སྐར་མདའ་འཁྲུགས་པ་སོགས་ལྟས་ངན་སྣ་ཚོགས་བྱུང་སྐབས། ལྷ་ལུང་དཔལ་གྱི་རྡོ་རྗེ་བྲག་ཡེར་བར་སྒོམ་མཛད་ནས་བཞུགས་པར་ཐུགས་དོགས་སྐྱེས་ཤིང་། བཙུན་པ་རྔོན་བྱེད་པ་མཐོང་བས་རྒྱལ་བོས་བསྟན་པ་བསྣུབས་པར་མཁྱེན། སྙིང་རྗེས་མ་བཟོད་པར་རྒྱལ་པོ་དགྲོང་ཕྱིར་བེར་དང་ཞྭ་ནང་དཀར་ལ་ཕྱི་ནག་པ་གོན། ཕུ་ཐུང་དུ་ལྕགས་མདའ་ལྕགས་གཞུ་བཅུག རྟ་དཀར་སོལ་བ་བྱུགས་པ་ལ་ཞོན་ནས་ལྷ་སར་འོངས་སོ། །དེར་རྒྱལ་བོས་རྡོ་རིང་གི་ཡི་གེ་གཟིགས་པའི་སྐབས་ཤིག་དང་འཕྲོད་ནས་དྲུང་དུ་ཕྱིན། ཕྱག་བྱེད་པ་ལྟར་བྱས་ནས། ཕུ་ཐུང་ནང་ནས་མདའ་གཞུ་བཏོན། ཕྱག་དང་པོ་ལ་མཐེབ་སྤྲད། གཉིས་པ་ལ་མདའ་བཀང་། གསུམ་པ་ལ་རྒྱལ་པོའི་དཔྲལ་བར་མདའ་བརྒྱབ་པ་སྨིན་མཚམས་སུ་ཕོག་སྟེ་མདེའུ་ལྟག་པར་བུད། རྒྱལ་པོས་ཡང་ན་ལོ་གསུམ་གྱིས་སྔ། ཡང་ན་ལོ་གསུམ་གྱིས་འཕྱིས་ཞེས་པ་ཙམ་ངག་ནས་ཤོར་ཏེ་ཕྱག་གཉིས་མདའ་ལ་འཇུས་ནས་གྲོངས་སོ། །དེར་ལྷ་ལུང་དཔལ་རྡོར་གྱིས་སྡིག་ཅན་རྒྱལ་བོ་གསོད་ན་དེ་ལྟར་གྱིས་ཞེས་གསུངས་ཤིང་བྲོས་ནས་གྲིབ་ཀྱི་མ་གདོང་གི་ཆུ་ལ་རྟ་བཤན་ཏེ་སོལ་བ་དག་པས་དཀར་བོར་སོང་། བེར་དང་ཞྭ་ཕྱི་ནང་བཟློག་སྟེ་གོན་ནས་རྫུ་འཕྲུལ་གྱི་བཀོད་པ་དུ་མ་དང་བཅས་ར་མདས་རྗེས་མ་ཆོད་པར་ཁམས་ལ་བྲོས། དེ་ནས་རིམ་གྱིས་ལོ་རྡོ་རྗེ་བྲག དན་ཏིག་ཡང་ཏིག སྟོང་རི་སོགས་སུ་ཕེབས་ནས་སྒྲུབ་པ་ལ་བཞུགས་སོ། །འདིར་དན་ཏིག་ཕྱོགས་ཀྱི་ངག་རྒྱུན་དུ་གྲགས་པ་ལྟར་ན། ལྷ་ལུང་དཔལ་རྡོར་གྱི་སྐུ་རྗེས་སུ་བོད་དམག་གིས་ཟིན་ལ་ཁད་དུ། ཨ་མ་ཅར་ཟེར་བ་ཁོང་ཐུགས་འཇིགས་ཚུལ་གྱི་གསུང་ཐོན་པའི་སར་ད་ལྟ་ཡང་མིང་དེ་ཐོགས་པ་དང་། དེ་ནས་བྲོས་ཏེ་ཕེབས་པར་འགྲོ་བས་ཐང་ཆད་ནས་ངལ་གསོ་མཛད་པའི་གནས་ལ་འགྲོ་ཐང་ཞེས་གྲགས་ཤིང་། དེར་གསོལ་ཇ་སྐོལ་ཆེད་རྡོ་སྒྱེད་ཕ་བོང་གསུམ་གྱི་ཁར་རྡོ་ཟངས་བཙུགས་པའི་རྫུ་འཕྲུལ་བསྟན་པ་ཡིན་ཟེར་བ་དེང་སང་འགྲོ་ཐང་སྡེ་བའི་ཀླད་ན་ཡོད་ལ། དེ་ནས་རྨ་ཆུའི་ཕར་འགྲམ་དུ་ཕེབས་པའི་ཚེ་དམག་ཕྱིར་ལོག་ནས་འཇིགས་པ་ལས་ཐར་བའི་གནས་ཡིན་པས། དེང་སང་རྒྱ་བོད་ཧོས་གསུམ་གའི་སྐད་དུ་ཡང་ཐར་ས་བོ་ཞེས་ཟེར་བ་དང་། དེ་ནས་སྟོང་རིའི་སྤྱན་ཆབ་ཀྱི་མཚོ་ཡོད་པའི་ཉེ་འདབས་བྲག་ཕུག་རྣམས་སུ་སྒྲུབ་པ་ཡུན་རིང་མཛད་པས་སྒྲུབ་ཕུག་ཀྱང་མཇལ་རྒྱུ་ཡོད་ལ། དེ་ནས་རྨ་ཀླུང་གི་གནས་དན་ཏིག་དང་ལོ་རྡོ་རྗེ་བྲག་སོགས་སུའང་སྒྲུབ་པ་མཛད་དེ་ཁམས་ཀླུང་ཐང་དུ་ཕེབས་པར་གྲགས། དེའི་ཕྱིར་སྟོང་རིའི་སྒྲུབ་ཕུག་དེར་ནད་པ་བྱིས་པ་སོགས་མཇལ་དུ་སོང་ན་བྱིན་བརླབས་ཀྱི་དགེ་མཚན་ཆེ་ཞིང་། བྱིས་པ་རྣམས་ལའང་ལྷ་ལུང་ཐར་དང་། ལྷ་ལུང་འབུམ་སོགས་ཀྱི་མིང་འདོགས་པའི་སྲོལ་གནའ་སྔ་མོ་ནས་དར་རོ་ཞེས་གྲག་གོ། དེ་ལྟར་དར་མས་བསྟན་པ་བསྣུབས་པའི་ཚེ། དཔལ་ཆེན་ཆུ་བོ་རིའི་སྒོམ་གྲྭར། དམར་ཤཱཀྱ་མུ་ནེ། གཡོ་དགེ་འབྱུང་། གཙང་རབ་གསལ་རྣམ་གསུམ་ཐོས་དོན་སྒོམ་གྱིན་བཞུགས་པ་ན། བཙུན་པ་གཅིག་གི་ལག་ཏུ་མདའ་གཞུ་ཐོགས། མགོ་ལ་བྱ་སྒྲོ་བཙུགས། ཁྱི་ཁྲིད་ཅིང་རི་དྭགས་བཤོར་བ་གཡོས་མཐོང་ནས། བན་རྒན་འཁྲུལ་ལམ་བཙུན་པ་སྨྱོ་ཟེར་ཞིང་གྲོགས་ལ་བསྟན་པས་ཁྱོད་མ་འཁྲུལ་བཙུན་པ་སྨྱོ་འདུག་ཟེར་ཏེ། རྔོན་པ་དེ་རྩར་བོས་ནས་རྒྱུ་མཚན་དྲིས་པས། ཁྱེད་ཅག་ལ་རྒྱལ་བོའི་ཆད་པ་མ་ཕོག་པ་ཉེན་རེ་ཆེ། གླང་དར་གྱིས་བསྟན་པ་བསྣུབས་པའི་ལོ་རྒྱུས་རྒྱས་པར་བཤད་པ་དང་ཤིན་ཏུ་སྐྲག་ནས་འདུལ་བའི་དཔེ་ཆ་དྲེལ་ཁལ་གཅིག་བཀལ་ནས་མངའ་རིས་སྟོད་དུ་བྲོས། ཧོར་ཡུལ་དུ་ཕྱིན་ནས་སྐད་རིགས་མི་གཅིག་པའི་སར་བསྟན་པ་དར་བར་བྱ་སྙམ་ཡང་མ་ནུས། མདོ་སྨད་བྱང་ངོས་ཀྱི་བེ་རུ་ཚྭ་མཚོ་ནས་ཚུར་བྱོན་ཏེ། ཨན་ཆུང་གནམ་རྫོང་། ལོ་རྡོ་རྗེ་བྲག དམར་གཙང་བྲག ཀ་མདོ་གདོང་དམར་སྣ། ཕུ་ལ་ཡང་རྫོང་སོགས་དབེན་གནས་གང་འགོལ་དང་། ཁྱད་པར་དན་ཏིག་ཤེལ་གྱི་ཡང་དགོན་དུ་ཡུན་རིང་བོར་བཞུགས་ཏེ། དམ་པ་དེ་གསུམ་གྱི་སྒྲུབ་ཁང་ནི་ད་ལྟ་སྒོམ་ཆེན་ཞེས་གྲགས་པ་འདི་ཡིན་ནོ། །

དེའི་རྗེས་ལ་ཀ་འོད་མཆོག་གྲགས་དང་རོང་སྟོན་སེངྒེ་རྒྱལ་མཚན་གཉིས་ཀྱིས་མངོན་པ་དང་མཛོད་ཀྱི་པུ་སྟི་མང་པོ་ཁྱེར་ནས་ཁམས་ལ་བྲོས་ཏེ། ཨན་ཆུང་གནམ་རྫོང་གི་བྲག་ཁུང་དུ་བཞུགས། ཞེས་རྒྱལ་རབས་གསལ་མེ་ལས་བཤད།

དེའི་ཚེ་རྒྱ་ཞུར་གྱི་སྡེ་གྲོང་འདི་རྨ་ཆུ་ཁར་འབྲོག་རུའི་ཚུལ་དུ་ཆགས་པ་ལས་དེའི་ཕྱུགས་རྫི་རྣམས་ཀྱིས་རིག་ནས། དགོང་ཁ་གྲོང་མི་འདུས་པ་རྣམས་ལ་སྨྲས་པས། སྔོན་སྦྱངས་བག་ཆགས་ཅན་མུ་གཟུ་གསལ་འབར་བྱ་བའི་ཁྱེའུ་ཞིག་བལྟ་རུ་ཕྱིན། དད་པ་འཁྲུངས་ནས་རབ་ཏུ་བྱུང་བར་ཞུས་པས་སློབ་དཔོན་ཡོན་ཏན་འོད་ཀྱིས་མཛད་པའི་འདུལ་བའི་ལས་ཆོག་ཀརྨ་ཤཱ་ཏམ་གྱི་དཔེ་གཏད་ནས་འདི་ལྟོས་ལ་དད་ན་རུང་གསུངས། བལྟས་པས་ཤིན་ཏུ་དད་ནས་མཆི་མ་བླགས་སོ། །དེར་གཙང་གིས་མཁན་པོ་དང་གཡོས་སློབ་དཔོན་བྱས་ཏེ་རབ་ཏུ་བྱུང་། མཁན་སློབ་ཀྱི་མཚན་ནས་དྲས་ཏེ་དགེ་བ་རབ་གསལ་དུ་བཏགས། ཕྱིས་སུ་ཐུགས་རབ་ཆེ་བས་དགོངས་པ་རབ་གསལ་དུ་གྲགས། དཔའ་བོ་གཙུག་ལག་ཕྲེང་བས་དམར་གྱིས་མཁན་པོ་བྱས་པར་བཤད་ནས་མཚན་ལའང་ཤཱཀྱ་དགེ་བ་རབ་གསལ་ཞེས་བཏགས་ཟེར། དེ་ནས་བསྙེན་རྫོགས་ཞུས་པས་དགེ་སློང་ལྔ་མ་ཚང་བས་མི་འོང་གསུངས། ལྷ་ལུང་དཔལ་རྡོར་མདུན་དུ་སོང་ནས་ཞུས་པས་ངས་རྒྱལ་བོ་བསད་པས་ཁ་སྐོང་བར་མི་འོས་མོད། ཁོང་བས་བཙལ་རོགས་བགྱིད་གསུངས་ནས་རྒྱའི་ཧྭ་ཤང་ཀེ་ཝང་དང་གྱི་ཕན་གཉིས་བཏང་སྟེ་ལྔ་ཚོགས་སྒོས་བསྙེན་པར་རྫོགས་ནས་འདུལ་བ་ལ་སློབ་གཉེར་རྒྱ་ཆེར་མཛད། དེའི་ཚེ་འདི་དཔོན་སློབ་ཀྱི་སྙན་པའི་གྲགས་པ་དབུས་གཙང་དུ་ཡང་རྒྱས་པར་བརྟེན། ཀླུ་མེས་ཚུལ་ཁྲིམས་ཤེས་རབ། འབྲིང་ཡེ་ཤེས་ཡོན་ཏན། རག་ཤི་ཚུལ་ཁྲིམས་འབྱུང་གནས། སྦ་ཚུལ་ཁྲིམས་བློ་གྲོས། སུམ་པ་ཡེ་ཤེས་བློ་གྲོས་ཏེ་དབུས་ཀྱི་ལྔ། ལོ་སྟོན་རྡོ་རྗེ་དབང་ཕྱུག ཚོང་བཙུན་ཤེས་རབ་སེང་གེ བོ་དོང་བ་ཨུ་དཀར་དེ་ཝ་སྟེ་གཙང་གི་གསུམ། མངའ་རིས་པ་འོད་བརྒྱད་སྤུན་གཉིས་བཅས་དབུས་གཙང་གི་མི་བཅུ་དན་ཏིག་ཏུ་ཕེབས་ནས་དེ་རྣམས་ཀྱིས་བསྙེན་རྫོགས་ཞུས་པས། དམར་གཡོ་གཙང་གསུམ་གྱིས་ངེད་ཅག་རྒས་པས་མཁན་བུ་སྐྱོང་མི་ཐུབ་ལ། དགོངས་པ་རབ་གསལ་འདི་བསྙེན་པར་རྫོགས་ནས་ལོ་ལྔ་ལས་མ་ལོན་ཀྱང་གང་ཟག་ཁྱད་པར་ཅན་ལ་དམིགས་བསལ་ཡོད་ཅེས་གསུངས་ནས་བླ་ཆེན་པོས་མཁན་པོ་མཛད་དེ་དབུས་གཙང་གི་མི་བཅུ་བོ་བསྙེན་པར་རྫོགས་ཤིང་འདུལ་བ་བསླབས། ཕྱིར་ལྡོག་ཁར་ཀླུ་མེས་ཀྱིས་ཞུས་ངོར། བླ་ཆེན་པོས་མནབ་བཞིན་པའི་བོན་ཞྭ་འོབས་ཞུ་ལ་ས་སེར་གྱིས་མདོག་བསྒྱུར་བ་གནང་ནས། འདི་གོན་ལ་ང་རྗེས་སུ་དྲན་པར་གྱིས་གསུངས་པ་ལྟར། ད་ལྟའི་བར་སྟོན་སྒོམ་སོ་སོས་མནབ་པའི་སྣེ་རིང་ཐུང་གི་སྒོམ་ཞྭ་སེར་བོ་འདི་བྱུང་བར་གྲགས། དེ་ནས་དབུས་གཙང་གི་མཁན་བུ་བཅུ་བོ་དབུས་གཙང་དུ་ཕྱིར་ཕེབས་པ་ནས་བཟུང་བསྟན་པ་ཕྱི་དར་གྱི་མགོ་ཚུགས་པ་སྟེ། དེའི་ཕྱིར་བསྟན་པའི་མེ་རོ་མདོ་ཁམས་སྨད་ནས་སོས་ཞེས་དོན་དང་ལྡན་པའི་བསྔགས་བརྗོད་མཛད་པ་ཡང་རྒྱུ་མཚན་འདི་ལ་བརྟེན་ཏོ། །བྲག་དགོན་པའི་མདོ་སྨད་ཆོས་འབྱུང་དུའང་། མཁས་པ་མི་གསུམ་དང་བླ་ཆེན་པོའི་བཀའ་དྲིན་ལས་བསྟན་པའི་མེ་རོ་གང་ནས་བསླངས་པའི་གཞིར་གྱུར་པའི་འཕགས་ཡུལ་དབུས་འགྱུར་འཆང་གཉིས་པར་བསྔགས་འོས་པ་འདི་བྱུང་།  ཞེས་དན་ཏིག་ལ་བསྔགས་པ་ལྟར་རོ། །

དེ་ནས་ཇོ་བོ་རྗེ་བྱོན་པའི་ལོ་དྲུག་ཅུ་ལྷག་གི་ཁོངས་སུ་ཀླུ་མེས་དཔོན་སློབ་ལ་བརྟེན་ནས་དབུས་གཙང་དང་ཁམས་སུ་གཙུག་ལག་ཁང་མང་བོ་བརྩིགས་ཤིང་དགེ་འདུན་གྱི་སྡེ་མང་དུ་འཕེལ་བ་ལ། ཀ་བ་བཞི། གདུང་མ་བརྒྱད། ལྕམ་སུམ་ཅུ་སོ་གཉིས། དྲ་ལམ་དཔག་ཏུ་མེད་པ་བྱུང་བར་གྲགས་ཏེ། རྔོག་བྱང་ཆུབ་འབྱུང་གནས། གྲུ་མེར་ཚུལ་ཁྲིམས་འབྱུང་གནས། གླན་ཡེ་ཤེས་ཤེས་རབ། ཞིང་སྣ་ནམ་རྡོ་རྗེ་དབང་ཕྱུག གཟུས་རྡོ་རྗེ་རྒྱལ་མཚན་སོགས་དངོས་དང་། སོག་ཚུལ་ཁྲིམས་བླ་མ། རྒྱ་འདུལ་འཛིན། རྨ་ཚོ་བྱང་ཆུབ་རྡོ་རྗེ། མཐའ་བཞི་བརྩོན་འགྲུས་འབར། བྱ་འདུལ་འཛིན་སོགས་བརྒྱུད་པའི་སློབ་མ་གྲགས་ཆེ་བ་མང་དུ་བྱོན་ཏེ་རྒྱས་པར་འདུལ་བའི་ཆོས་འབྱུང་རྣམས་སུ་ལྟའོ། །ཡང་དབོན་བི་ཅིས་བྲིས་པ་དེབ་སྔོན་དུ་བཀོད་པ་ལྟར་ན། བླ་ཆེན་པོ་བསྙེན་པར་རྫོགས་ནས་བྱང་ཕྱོགས་མི་ཉག་གྷའི་ཡུལ་དུ་བྱོན། གོ་རོང་སེང་གེ་གྲགས་ལས་འདུལ་བ་ལུང་སྡེ་བཞི་བཅས་རྫོགས་པར་གསན། དེ་ནས་ཀ་འོད་མཆོག་གྲགས་ལྷོ་བལ་དུ་ཆོས་མང་བོ་གསན་ནས་ཤར་ཕྱོགས་ལྷ་རྩེ་བྷིག་ཏིག་ཟེར་བའི་དགོན་གནས་སུ་བཞུགས་པ་མཇལ་དུ་ཕྱིན། འབུམ་ཊཱིཀ་དང་བྱང་ས་ལ་སོགས་པ་ལོ་བཅུ་གཉིས་སུ་གསན། གཞན་ཡང་སྐྱི་རྒྱལ་བའི་གཙུག་ཏོར་ལས་དབུ་མ་དང་ཚད་མ། ནམ་དགའ་ལྡན་བྱང་ཆུབ་ལས་ཡོ་ག་གསན་པར་བཤད་པས་མདོ་སྔགས་མང་དུ་ཐོས་པའི་མཁས་པའི་ཁྱུ་མཆོག་ཏུ་གྱུར། དགུང་ལོ་ཞེ་དགུ་བ་ལ་དན་ཏིག་ཏུ་ཕེབས་ནས་ལོ་སུམ་ཅུ་རྩ་ལྔ་བཞུགས། དེར་ཅི་ཡང་ཡིད་ལ་མི་བྱེད་པའི་ཧྭ་ཤང་མང་དུ་ཡོད་པ་དགག་ཆེད་དན་ཏིག་ཏུ་ལྷ་ཁང་དང་མཆོད་རྟེན་དཔག་ཏུ་མེད་པ་བཞེངས། ཚོན་རྩི་ཡང་ཡུལ་དེར་བྱུང་། བཟོ་ཡང་རང་ཉིད་ཀྱིས་མཛད་ནས་འདུས་བྱས་ཀྱི་དགེ་བའི་རྩ་བ་ལ་བརྩོན་པར་མཛད་ཅེས་གསུངས་ཏེ་དེ་ལྟར་ན་དན་ཏིག་གི་སྤྱི་བའི་ལྷ་ཁང་དང་ཐིས་པའི་ལམ་ཁ་ལྷ་སའི་ནང་དུ་ད་ལྟའི་མིའི་ལག་པ་ཙམ་ཡང་མི་སླེབས་པའི་སར་སྐུ་བརྙན་ཚོན་རིས་ཅན་སྔོན་གྱི་བཟོ་དབྱིབས་མང་དུ་ཡོད་པ་དེ་དག་ཕལ་ཆེར་བླ་ཆེན་གྱི་ཕྱག་བཟོ་ཡིན་ཡང་སྲིད་དམ་སྙམ་སྟེ། རྗེས་སུ་འཇུག་པ་ཚོས་ཤིན་ཏུ་གཅེས་པར་རིགས་སོ། །བླ་ཆེན་པོ་དགུང་ལོ་གྱ་བཞི་བར་གཤེགས་པའི་སྐུ་གདུང་ད་ལྟ་ཙོང་ཆུ་འགྲམ་གྱི་དམར་གཙང་བྲག་གམ་པེ་མ་ཟི་ཞེས་འབོད་པ་དེར་བཞུགས་ཤིང་མཁས་པ་མི་གསུམ་གྱི་སྐུ་གདུང་ནི་ཟི་ལིང་མཁར་གྱི་ཏ་ཧྥོ་ཟི་ཞེས་པའི་ལྷ་ཁང་གི་སྐུ་བརྙན་རྣམས་ཀྱི་སའི་རུམ་དུ་ཡོད་པར་གྲགས་སོ། །

དེ་ལ་བླ་ཆེན་པོ་ནམ་འཁྲུངས་དང་འདས་པའི་དུས་ཚིགས་ལ་བྲག་དགོན་པའི་ཆོས་འབྱུང་དུ་བླ་ཆེན་གཤེགས་པའི་ཤིང་ཕག་ནས་ལོ་ཉིས་བརྒྱ་དོན་བཞི་འདས་པ་རབ་བྱུང་ལྔ་བའི་ས་བྱ་ལ་ཆོས་རྗེ་དོན་གྲུབ་རིན་ཆེན་འཁྲུངས་ཤིང་། ཉིད་ཀྱི་ཞེ་གཅིག་པ་རབ་བྱུང་དྲུག་པའི་ས་གླང་ལ་བྱ་ཁྱུང་བཏབ། དེ་ནས་ལོ་བརྒྱད་པ་མེ་སྤྲེལ་ལ་རྟོགས་ལྡན་འཇམ་དཔལ་རྒྱ་མཚོ་འཁྲུངས། དེའི་ཕྱི་ལོ་མེ་བྱ་ལ་རྗེ་ཙོང་ཁ་པ་ཆེན་པོ་འཁྲུངས་པར་བཤད་པ་དང་། དེའི་གོང་དུ་སྲོང་བཙན་རྒྱལ་སར་བྱོན་པའི་ས་གླང་ནས་རལ་བ་ཅན་འདས་པའི་ལྕགས་བྱ་ཡན་ལ་ལོ་ཉིས་བརྒྱ་བཅུ་གཅིག་སོང་། གླང་དར་བཀྲོངས་ནས་ལྔ་བཅུ་འདས་པའི་ཆུ་བྱི་ལ་བླ་ཆེན་པོ་འཁྲུངས། བླ་ཆེན་གྱི་ཉེར་བདུན་པ་ས་སྟག་ལ་ཕྱི་དར་མགོ་ཚུགས། ས་སྟག་དེ་ནས་རེ་ལྔ་བ་ཆུ་རྟ་ལ་ཇོ་བོ་རྗེ་བོད་དུ་བྱོན། རབ་བྱུང་དང་པོའི་མེ་ཡོས་ནས་བརྒྱད་འདས་པ་གྱ་བཞི་ཤིང་ཕག་ལ་འདས། ཞེས་བཤད་པ་ཕལ་ཆེར་དོན་གནས་ཡིན་མཆི་ཡང་། མཁས་པ་མི་གསུམ་ཆུ་བོ་རིའི་སྒོམ་གྲྭ་ནས་ཕེབས་དུས་མ་མཐའ་ཡང་དགུང་ལོ་ཉི་ཤུ་ཡན་བཞེས་དགོས་ལ། དེ་ལྟ་ན་བྲག་དགོན་པ་རང་ཉིད་ཀྱིས་དོགས་པ་བསླངས་པ་ལྟར་བླ་ཆེན་བསྙེན་པར་རྫོགས་དུས་དམར་གཡོ་གཙང་གསུམ་དགུང་ལོ་དགུ་བཅུ་ལྷག་བཞེས་དགོས་པས་ཅུང་མི་བདེ་ལ། དེའི་ཕྱིར་བླ་ཆེན་ཆུ་བྱི་ལ་འཁྲུངས་པ་དང་། ཤིང་ཕག་ལ་འདས་པའི་ཁུངས་ཚད་ལྡན་ད་དུང་བཙལ་དགོས་ཤིང་། གང་ལྟར་སྲོང་བཙན་དགུང་ལོ་བཅུ་གསུམ་པའི་ས་མོ་གླང་ནས་རལ་བ་ཅན་འདས་པའི་བར་ལ་ལོ་ཉིས་བརྒྱ་དོན་གཉིས་སོང་བས་བྲག་དགོན་པ་ལ་དྲུག་ཅུ་སྐོར་གཅིག་དང་ལོ་རྐྱང་གཅིག་གི་ཆད་སྐྱོན་བྱུང་སྣང་ངོ་། །སྐབས་འདིར། དེབ་ཐེར་སྔོན་པོ་དང་། སུམ་པའི་ཆོས་འབྱུང་དང་རྩིས་གཞུང་། བྲག་དགོན་པའི་རྩིས་གཞུང་རྣམས་སུ་བླ་ཆེན་པོ་འཁྲུངས་འདས་ཀྱི་ལོ་ལ་དྲུག་ཅུ་སྐོར་གཅིག་གིས་སྔ་བའི་སྐྱོན་བྱུང་བ་ལ་བདག་རང་ལོ་ང་བཞིའི་ཐོག་བརྩམས་པའི་བླ་ཆེན་པོའི་རྣམ་ཐར་ཐུབ་བསྟན་ཁང་བཟང་མཛེས་པའི་ཏོག་ཏུ་དགག་གཞག་རྒྱ་ཆེར་བྱས་ཡོད་པ་དེར་བལྟ་བར་བྱའོ། །དེས་ན་བླ་ཆེན་པོའི་འཕྲིན་ལས་ལ་བརྟེན་ནས་ཀླུ་མེས་དཔོན་སློབ་དབུས་སུ་ཕེབས་ཏེ་བསྟན་པ་ཕྱི་དར་གྱི་དབུ་ཚུགས་པའི་ལོ་ནི་རབ་བྱུང་དང་བོ་མ་ཚུགས་པའི་གོང་རོལ་དྲུག་ཅུ་སྐོར་དེའི་བགྲང་བྱ་བཅུ་གཉིས་པ་ས་ཕོ་སྟག་གི་ལོ་ཡིན་པས། དེ་ནས་བཟུང་ད་ལྟའི་རབ་རྒྱལ་མེ་སྤྲེལ་བར་ལ་ལོ་དགུ་བརྒྱ་དོན་དགུ་འདས་པ་ཡིན་ཞིང་། དེ་ལ་དཔགས་ན་མཁས་པ་མི་གསུམ་དང་བླ་ཆེན་པོས་དན་ཏིག་ཏུ་ཆོས་ཀྱི་འཕྲིན་ལས་རྒྱ་ཆེར་བསྐྱངས་པ་ནས་བཟུང་ད་ལྟའི་བར་དུ་ལོ་ཅི་ཙམ་འདས་པའང་རགས་པར་ཤེས་ནུས་སོ། །དེ་ལྟ་ན་ཡང་དན་ཏིག་གི་གནས་འདིར་སངས་རྒྱས་ཀྱི་བསྟན་པ་དར་བ་ནི་བོད་ཡུལ་དབུས་གཙང་ལས་ཆེས་སྔ་བར་སེམས་ཏེ། གནས་འདི་རྒྱ་ནག་གི་ཡུལ་དང་འདབས་འབྲེལ་དུ་ཡོད་པས་ཐིས་པའི་སར་རྒྱ་ནག་གི་ཧྭ་ཤང་མཁས་པ་མདོ་སྡེ་དང་འདུལ་བ་འཛིན་པ་མང་དུ་བྱུང་བ་ནི་གཏན་ཚིགས་དུ་མས་གྲུབ་ལ། དེ་ལྟར་ན་རྒྱ་ནག་ཏུ་བསྟན་པ་ཐོག་མར་དར་བའི་དུས་ནི་རྒྱའི་ལུགས་ཀྱིས་སྟོན་པ་འདས་ནས་ལོ་ཆིག་སྟོང་བཅུ་གསུམ་པ་ཧན་གྱི་རྒྱལ་རབས་ཉེར་དྲུག་བྱུང་བའི་བཅུ་བཞི་བ་ཧན་མིང་དྷིའི་ཁྲི་ལོ་བརྒྱད་པར་བསྟན་པའི་དབུ་བརྙེས་ཤིང་། དེ་རྒྱ་གར་དུ་མགོན་པོ་ཀླུ་སྒྲུབ་ཀྱི་སྐུ་ཚེ་ཕྱེད་ལྷག་འདས་པ་ཙམ་དང་། བོད་ཀྱི་རྒྱལ་བོ་སྲོང་བཙན་ལས་རྒྱལ་རབས་ལྔའི་སྔོན་གྱི་ལྷ་ཐོ་ཐོ་རི་གཉན་བཙན་ལས་ཀྱང་སྔ་བའི་དུས་ཡིན་པས། ཧྭ་ཤང་མཁས་པ་དེ་དག་ལས་ཆོས་ཉན་ཞིང་སྡོམ་པ་བླངས་པའི་བོད་ཀྱང་ཡོད་དམ་སྙམ་སྟེ་བརྟག་གོ །རྒྱལ་བསྟན་རིན་ཆེན་གསེར་གྱི་འོད་སྣང་གིས། །གནའ་དུས་གངས་ཅན་ལྗོངས་དེ་དགེ་བར་བསྒྲུབས། །རེ་ཞིག་སྐྱེ་དགུའི་བསོད་ནམས་མཐུ་བྲི་བས། །ཡུད་ཙམ་ཞིག་ལ་མུན་པའི་གླིང་དུ་བྱས། །དེ་ཚེ་ལྷ་ལུང་དཔལ་གྱི་རྡོ་རྗེ་ཞེས། །བོད་ཁམས་ཡོངས་ཀྱི་གྲུབ་ཐོབ་རྗེ་བོ་དེའི། །ཉག་ཕྲན་རྩེ་ན་སྡིག་རྒྱལ་དར་མའི་སྲོག །མར་མེའི་ལྕེ་ལ་མཆོངས་པའི་ཕྱེ་ལེབ་བཞིན། །དམར་གཡོ་གཙང་གསུམ་དགོངས་པ་རབ་གསལ་གྱི། །ཐུགས་བསྐྱེད་དུས་བབ་སྐྱ་རེངས་དཀར་བོ་ཡིས། །སླར་ཡང་དབུས་གཙང་མཐའ་གྲུ་ཡངས་པའི་མཁར། །ཕྱི་དར་བསྟན་པའི་ཉིན་བྱེད་དགུང་ནས་དྲངས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

གསུམ་པ་རྒྱལ་བ་བསོད་ནམས་རྒྱ་མཚོ་སོགས་མཁས་གྲུབ་རིམ་བྱོན་གྱིས་བྱིན་གྱིས་བརླབས་པའི་ཚུལ་དེ་བརྗོད་ན། རྒྱལ་བ་རིན་པོ་ཆེ་སྐུ་ཕྲེང་གསུམ་པ་དེ་ཉིད་དབུས་གཙང་རུ་བཞིའི་དབུ་རུའི་སར། སད་མི་མི་བདུན་གྱི་ནང་ཚན་ཞིག་དང་། ལོ་ཙཱ་བ་བརྒྱ་རྩ་བརྒྱད་ཀྱི་གྲས་རྨ་ལོ་ཙཱ་བ་རིན་ཆེན་མཆོག་གི་གདུང་རྒྱུད་དུ་རབ་བྱུང་དགུ་བའི་ཆུ་མོ་ཡོས་ལ་འཁྲུངས་ཏེ། སྔོན་གནས་རྗེས་དྲན་སོགས་དམ་པའི་རྟགས་མཚན་ལྷན་སྐྱེས་སུ་མངའ། པཎ་ཆེན་བསོད་གྲགས། གླང་སྟོད་ཆོས་རྗེ། ཤར་རྩེ་དོན་ལེགས། འཕགས་སྡེ་ལོ་ཙཱ་བ། སྔགས་རམས་པ་དགེ་འདུན་བཀྲ་ཤིས་སོགས་ལས་མདོ་སྔགས་ཀྱི་ཆོས་བཀའ་རྒྱ་ཆེར་གསན། འཇའ་ལུས་བརྙེས་པའི་གྲུབ་ཆེན་དཔལ་ལྡན་རྡོ་རྗེ་ལས་བདེ་མཆོག་གི་དབང་དང་གྲུབ་ཆེན་རང་གིས་སློབ་དཔོན་པདྨ་ལས་དངོས་སུ་གསན་པའི་ཚེ་དབང་མནོས། དགུང་ལོ་ཉེར་གཉིས་ལ་དགའ་ལྡན་ཁྲི་ཟུར་ཆོས་རྗེ་དགེ་ལེགས་དཔལ་བཟང་བོས་མཁན་པོ་དང་། ཁྲི་ཆེན་དགེ་འདུན་བསྟན་པ་དར་རྒྱས་ཀྱིས་ལས་སློབ་མཛད་ནས་ཐུགས་རྫོགས་བཞེས། སྐབས་སྐབས་སུ་རབ་བྱུང་བསྙེན་རྫོགས་སྟོང་ཕྲག་ལོངས་པ་བསྒྲུབས་པ་དང་། སེར་འབྲས་རྣམས་སུ་གླེགས་བམ་རིན་པོ་ཆེ་སོགས་ཆོས་བཀའ་ཤིན་ཏུ་མང་བོ་གནང་། དེ་ཡང་འགྲོ་མགོན་ཆོས་རྒྱལ་འཕགས་པ་ལ། སེ་ཆེན་རྒྱལ་བོས་ཐོག་མར་བོད་ཁྲི་སྐོར་བཅུ་གསུམ། བར་བ་ལ་བོད་ཆོལ་ཁ་གསུམ། ཐ་མ་ལ་ཉེས་མེད་གསོད་པའི་རྒྱའི་མི་ཡུར་ཆེན་པོ་བཅད་པ་དང་། སངས་རྒྱས་ཀྱི་འཕེལ་གདུང་གིས་ཐོག་དྲངས་པའི་ཟང་ཟིང་གི་འབུལ་ཆེན་གསུམ་གྱི་ཐ་མ་ལ་གོས་ཡུག་ནག་པོ་བདུན། དེ་རྗེས་དཀར་བོ་གཅིག་ཕུལ་བས། ཞལ་ནས། ངེད་རང་གཉིས་སྐྱེ་བ་བདུན་གྱི་རིང་མི་འཕྲད། དེ་ནས་ཁྱོད་གསེར་གྱི་མིང་ཅན་དང་། ངེད་ཆུ་ལས་བྱས་པའི་མིང་ཅན་གྱི་ཚེ་མཇལ་ནས་འགྲོ་དོན་བྱེད་གསུངས་པ་ལྟར། དེ་ཡང་ཐུ་མེད་ཨལ་ཐན་རྒྱལ་བོ་ལ་ཨ་སེང་བླ་མས་རྗེ་འདིའི་སྐུ་གསུང་ཐུགས་ཀྱི་རྣམ་ཐར་ཞིབ་པར་གསུངས་པས་མི་ཕྱེད་པའི་དད་པ་སྐྱེས་ནས་རྒྱལ་བོ་དེས་བྱང་ཕྱོགས་ཧོར་གྱི་ཡུལ་དུ་སྤྱན་དྲངས་པ་ན། བཀའ་བགྲོས་མཛད་དུས་ལྷ་གཟིགས་མིའི་དབང་བོ་ངག་དབང་གྲགས་པས། མཐའ་འཁོབ་ཀྱི་རྒྱལ་བོ་དེའི་རེ་བ་བསྐངས་ན་འགབ་ཚུལ་སྙན་འབུལ་ཞུས་པ་ལྟར་ཕེབས་རྒྱུར་ཐག་བཅད། དགུང་ལོ་སོ་ལྔ་བ་མེ་གླང་གི་ལོར་ཨལ་ཐན་རྒྱལ་བོས་ཁོ་རང་མཚོ་ཁར་འབྱོར་རྩིས་ཀྱིས་གདན་འདྲེན་བསྐྱར་མ་སླེབས་དོན་ལྟར་ལོ་དེའི་ཧོར་ཟླ་གཅིག་པའི་ཉེར་དྲུག་ལ་འབྲས་སྤུངས་ནས་ཆིབས་ཁ་བསྒྱུར། ལམ་བར་ནས་དུང་དཀར་གཡས་འཁྱིལ་གྱི་གཏེར་བཞེས་པ་དང་། རྨ་ཆེན་སྦོམ་ར་མིའི་གཟུགས་ཀྱིས་བྱོན་ནས་བསུ་མ་མཛད། མཚོ་སྔོན་ཕྱོགས་སུ་ཕེབས་པ་ན་ཨལ་ཐན་རྒྱལ་བོ་རང་ཉིད་བསུ་མར་ཕེབས་པ་དང་དངོས་མཇལ་མཛད། རྒྱལ་བོ་ཉིད་ཀྱིས་མཐའ་འཁོབ་མུན་པའི་གླིང་དཀར་བོ་བྱེད་པའི་རྟེན་འབྲེལ་དུ་གོས་དཀར་བོ་གསོལ། འཁོར་ཁྲི་ཕྲག་བཅས་མཆོད་ཡོན་མཇལ་བའི་ཐོག་མར་དངུལ་སྲང་ལྔ་བཅུའི་མཎྜལ། གསེར་ཕོར་རིན་པོ་ཆེ་སོགས་དངོས་འབུལ་ཚད་མེད་པ་དང་། ཏཱ་ལའི་བླ་མ་བཛྲ་དྷ་ར་ཞེས་ཁྱབ་བདག་རྡོ་རྗེ་འཆང་གི་ལས་ཀ་དང་གསེར་ཐམ་ཕུལ། རྒྱལ་རིགས་གསུམ་གྱིས་གཙོས་རབ་བྱུང་དང་བསྙེན་རྫོགས་སྟོང་ཕྲག་བརྒལ་བ་བསྒྲུབས་པ་དང་ཆོས་ལུང་རྒྱ་ཆེར་གསུངས་ནས་སླར་ཁམས་ཕྱོགས་སུ་ཕེབས། ཆབ་མདོ་ལི་ཐང་དགོན་ཆེན་རྣམས་སུ་འཕྲིན་ལས་འཕེལ། དེ་སྐབས་ཨལ་ཐན་རྒྱལ་བོ་སྐུ་འདས་པའི་ཞལ་ཆེམས་བཞིན་སྤྱན་འདྲེན་བྱུང་བར་མཚོ་སྔོན་བརྒྱུད་ཏཱ་མིང་ཝན་ལི་ཁྲི་ལོ་བཅུ་གཅིག་ཐོག་དགུང་ལོ་ཞེ་གཅིག་པ་ཆུ་ལུག་ལ་ཞིང་སྐྱོང་ནང་སོས་གདན་དྲངས་པ་ལྟར་སྐུ་འབུམ་དུ་ཕེབས། ས་འདུལ་མཛད་ཅིང་ཆོས་སྡེ་བཏབ། བྱ་ཁྱུང་དུ་ཕེབས། རབ་བྱུང་བསྙེན་རྫོགས་དང་ཆོས་མང་དུ་གསུངས། དེ་ནས་ཕྱག་བཏེགས་ཏེ་མདོ་སྨད་གྲུབ་པའི་གནས་ཆེན་རི་བོ་དན་ཏིག་ཏུ་བྱོན། ཕྱག་ཕྱིར་པཎ་ཆེན་བསོད་ནམས་གྲགས་པའི་ཡང་སྤྲུལ་གཟིམ་ཁང་གོང་བསོད་ནམས་ཡེ་ཤེས་དབང་བོ་ཡང་ཕེབས། ད་ལྟའི་གྲུབ་ཆེན་ཟེར་བའི་གནས་ཁང་གི་སྒྲུབ་ཕུག་ཏུ་ཕེབས་ནས་འདི་ས་ཡིན་ནམ་རྡོ་ཡིན་ཞེས་བརྟག་ཕྱིར་དབུ་ཐོག་གི་བྲག་ལ་ཕྱག་མཛུབ་ཀྱི་རྗེས་མང་དུ་བཏོད། དེར་བསྙེན་མཚམས་ཡུན་རིང་མཛད་པས་དཔལ་འཁོར་ལོ་སྡོམ་པའི་ལྷ་ཚོགས་དང་བཅས་པའི་ཞལ་མངོན་སུམ་དུ་གཟིགས་པར། ཐུགས་ཅུང་ཟད་འཇིགས་པའི་ཚུལ་གྱིས་སྐུ་རྒྱབ་ཀྱི་བྲག་ལ་བརྟེན་པས་སྐུ་རྒྱབ་དང་། དབུ་དང་། དབུ་ཞྭ་བཅས་པའི་རྗེས་འདམ་ལ་ཟུག་པ་བཞིན་བཏོད་པ་ད་ལྟ་མཇལ་དུ་ཡོད་པ་འདི་ཡིན། བདེ་མཆོག་ལྷ་ལྔའི་ཆོས་ཚན་འགའ་ཞིག་ལྗགས་རྩོམ་གནང་། དཀར་ཆག་དང་རྣམ་ཐར་དུ་མི་གསལ་ཡང་། གྲུབ་ཆེན་གནས་ཁང་དེར་དཔལ་ལྡན་ལྷ་མོའི་དྲེལ་གྱི་རྨིག་རྗེས་ཡིན་ཟེར་བའི་རྡོ་བ་གཅིག་སྣང་སྟེ་བརྟགས་ན་དེ་ཡང་རྒྱལ་བ་བསོད་ནམས་རྒྱ་མཚོས་བསྙེན་མཚམས་མཛད་དུས་སུ་ཞལ་གཟིགས་བྱུང་བ་ལས་བབས་པར་མངོན། ཡང་ཏིག་ཏུ་ཕེབས། སྤྱིར་ཡང་ཏིག་འདི་རྗེ་སྐལ་ལྡན་རྒྱ་མཚོའི་ཆོས་འབྱུང་ལས། ཨུ་རྒྱན་རིན་པོ་ཆེས་སྤྲུལ་པ་དུ་མ་བཀྱེས་ཏེ། ཨ་མདོའི་གྲུབ་གནས་དུ་མའི་གནས་སྒོ་ཕྱེ་ཞིང་བྱིན་གྱིས་བརླབས་པའི་ནང་ཚན་གཅིག་ཡིན་པར་གསུངས་པ་ལྟར། དེར་སངས་རྒྱས་བྱང་སེམས་ཀྱི་སྐུ་དང་ཨུ་རྒྱན་རིན་པོ་ཆེའི་ཞལ་གཟིགས། བཀྲ་ཤིས་རྟགས་བརྒྱད་སོགས་རང་བྱོན་མང་དུ་བྱུང་། དེའི་བྲག་ངོས་ནས་ཚེ་གཏེར་དང་། འཆི་མེད་ཚེའི་བུམ་པའི་གཏེར། གཏེར་སྲུང་དང་བཅས་པའི་སྣང་བ་ཤར་ནས་གཏེར་དེ་དག་ལེན་རྩིས་མཛད་པ་ལ། འགའ་ཞིག་གིས་བྲག་དེ་གཡང་ཆེ་བས་མི་འགབ་ཚུལ་ཞུས་པ་དང་། སྐུ་ཚེ་རིང་བའི་འཕེན་པ་མེད་པའི་སྟབས་ཀྱིས་བཏང་སྙོམས་སུ་བཞག ཚེ་ཆུ་དེ་བཞེས་ཐུབ་པ་བྱུང་ན་སྐུ་ཚེ་མཐར་ཕྱིན་པ་ཞིག་འོང་ཚོད་དུ་འདུག་ཅེས་གསུངས་པར་མཛད། དན་ཏིག་ནས་ཕྱག་ཐེག་སྐབས་རོང་ཆེན་ལྷ་རྗེའི་རིགས་ལས་འཁྲུངས་པ། ཆོས་རྗེ་དོན་གྲུབ་རིན་ཆེན་གྱི་དངོས་སློབ་རྗེ་བསམ་གཏན་རིན་ཆེན་གྱི་སྐུའི་སྲིད་ཕྱི་མ་རྗེ་བསམ་གྲུབ་རིན་ཆེན་ནམ་རིན་ཆེན་བསམ་གྲུབ་ཅེས་ཞུ་བ། འཇམ་དབྱངས་དཀར་བོའི་ཞལ་གཟིགས་པ་དེ་ཉིད་རོང་བོ་ནས་ཆེད་གཉེར་གྱིས་མཇལ་དུ་ཕེབས་ནས། དངོས་འབུལ་རྒྱ་ཆེ་བ་ཕུལ་ཏེ་ཆོས་ཞུས། དེ་ནས་ཆིབས་བཏེག་སྟེ་ཕེབས་སྐབས་སྐྱེལ་ཐུང་ཞུས་པར། རྗེ་བསོད་ནམས་རྒྱ་མཚོས་ཞལ་ཕྱིར་བསྒྱུར་ནས་རྗེ་དེ་ཉིད་ལ་ཡང་ཡང་གཟིགས་པར། དྲུང་འཁོར་བ་འགའ་ཞིག་གིས་དེ་ཅི་ཡིན་ཞུས་པས་བླ་མ་དེའི་སྐུའི་ཕྲག་པ་གཡས་པ་ན་འཇམ་དབྱངས་དཀར་པོ་ཞིག་བཞུགས་འདུག་པ་དེ་ལ་བལྟས་པ་ཡིན། ཞེས་ཁྲོམ་དུ་བསྔགས་པ་མཛད་དེ། དེའི་སྐུ་སྐྱེ་ཕྱི་མ་ནི་ཡབ་རྗེ་སྐལ་ལྡན་རྒྱ་མཚོ་ཡིན་ནོ། །

ཀླུ་རྒྱལ་ལྷ་ཁང་དང་ཉེ་བའི་ཕར་འགྲམ་དུ་ཆོས་ཁྲི་ཆེན་པོ་གཅིག ཐིས་པའི་བཞུགས་སར་ཞབས་རྗེས་དང་བཞུགས་ཁྲི་གཅིག ཁང་བཟང་ཁར་བཞུགས་ཁྲི་དང་རྡོ་ལ་ཞབས་རྗེས་བཞག་པ་རྣམས་དེང་སང་མ་འཇིག་པར་ཡོད་ལ། གཞན་ཡང་རྒྱུ་དང་བཟོ་དབྱིབས་ཁྱད་པར་དུ་འཕགས་པའི་ཆིབས་ཡོབ་ཟུང་དང་། བཞེས་དཀར་གྱི་ཞབས་རྗེས་བབས་པའི་རྡོའི་གསོལ་ཅོག་གི་རྟེན་སྐལ་གཉིས་འདུ་ཁང་དུ་བཞུགས། སྡིག་སྦྱངས་ཚུར་འཁོར་གྱི་ལམ་ལྟག་ཏུ་ཞབས་རྗེས་གཅིག་དང་། འདི་ཁ་ཅིག་གིས་ཀིརྟི་ཐོགས་མེད་ཀྱི་ཞབས་རྗེས་ཡིན་ཡང་ཟེར། དེ་ནས་ཕེབས་ལམ་བརྒྱུད་དེ་བྱ་ནམ་ནང་ཟེར་བའི་ལུང་བར་བཞུགས་ཁྲི་དང་། རྡོ་བ་འདམ་ལྟར་བརྫིས་པའི་ཞབས་རྗེས། ཆིབས་པའི་རྨིག་རྗེས་བཅས་ཡོད་དེ། དེང་སང་ཕལ་བའི་ངག་རྒྱུན་དུ། བྱ་ནམ་གྱི་ཞབས་རྗེས་དང་རྨིག་རྗེས་འདི་གླིང་རྗེ་གེ་སར་གྱི་རྐང་རྗེས་དང་རྟ་རྗེས་སུ་བཤད་པ་ནི་སྒྲུང་ལ་དགའ་བའི་རྒན་པོ་ཚོའི་གཏམ་མོ། །ཞབས་རྗེས་འདི་དེང་སང་མཐུ་དགོན་བཙུགས་ཤིང་དུ་གདན་དྲངས་ཡོད་དོ། །དེ་ནས་ཚེ་ཏན་དགོན་པའི་གཡས་རིའི་ཐད་མགོ་ཆེ་ཐང་དུ་བཞུགས་ཁྲི། རྡོ་བའི་ཞབས་རྗེས། བཞུགས་གདིང་། བཞེས་ཕོར་ཡུ་རིང་། ཆིབས་སྒ་བཟོ་ཁྱད་ངོ་མཚར་ཅན་བཅས་བྱིན་རྟེན་དུ་གནང་བ་ལས། གདིང་བ་དང་ཡུ་རིང་མ་ཎི་ཐེམ་གྱི་ལྷ་ཐོའི་རྒྱབ་དང་། འབུམ་ཁང་རྒྱབ་ཀྱི་རྡོ་མཆོད་དུ་ཡོད་པར་གྲགས་ལ། ཆིབས་སྒ་ཚེ་ཏན་བླ་བྲང་ཀ་བཞི་མར་བཞུགས་ཤིང་། ཞབས་རྗེས་ཁྲི་ཁར་ཕྱིས་ཀྱི་བར་དུ་མཇལ་རྒྱུ་ཡོད་མོད། ད་ལྟ་མཁན་པོ་ཚང་ནས་བསྡུ་སྐྱོག་མཛད་ཅེས་གསུང་ངོ། །ཚུལ་འདི་ལ་བརྟགས་ན་སྐབས་དེར་སྤོའུ་ཆོས་རྗེའི་གོང་རོལ་ཡིན་པས་གནས་དེར་ཆོས་ཁྲི་རྩིག་པ་དང་རྟེན་སྐལ་ཞུ་མཁན་ནི་ཚེ་ཏན་སྒར་རྙིང་གི་སེར་མོ་རྣམས་ཡིན་པར་སེམས་སོ། །

ད་དུང་སེ་རའི་གྲམ་པར་ཞབས་རྗེས་དང་། ཆིབས་པའི་རྨིག་རྗེས། ཐང་བོར་ཆེར་བཞུགས་ཁྲི་བཅས་ཡོད་པའང་རྒྱལ་བ་བསོད་ནམས་རྒྱ་མཚོའི་ཡིན་པར་མངོན་ཏེ། ཞབས་རྗེས་ནི་དེང་སང་བོར་བརླག་ཏུ་སོང་སྐད། དེ་ནས་མཛོ་མོ་མཁར། བྱམས་པ་འབུམ་གླིང་། དཔའ་རི། མཚོ་ཁ། སོག་ཡུལ་རྣམས་སུ་བྱོན་ནས་ཆོས་ཀྱི་འཕྲིན་ལས་རྒྱ་ཆེར་འཕེལ། མཁར་སྔོན་པོར་ཕེབས་ནས་ཨལ་ཐན་རྒྱལ་བོའི་གདུང་སྦྱངས་པས་ནམ་མཁའ་འཇའ་འོད་ཀྱིས་གང་ཞིང་རིང་བསྲེལ་མཐའ་ཡས་པ་བྱུང་། སྐུ་མཚམས་གནང་བའི་སྐབས་ཤིག རྒྱལ་བ་ཙོང་ཁ་བས་བཏང་བའི་ཕོ་ཉ་ཡིན་ཟེར་བ་ཞིག་འོངས་ཏེ་ཡི་གེ་ཕྱག་ཏུ་ཕུལ་བ་གཟིགས་པས་རེ་ཞིག་དགའ་ལྡན་དུ་ཤོག ཟེར་བ་འདུག་གསུངས་ཏེ། དགུང་ལོ་ཞེ་དྲུག་པ་ས་བྱིའི་ལོར་རྒྱ་ནག་གོང་མ་ཏཱ་མིང་ཝན་ལིས་གསེར་གྱི་རྒྱལ་ཁབ་ཏུ་གདན་དྲངས་ཀྱང་སྐུ་སྙུང་ལྕི་བའི་ཚུལ་བསྟན་ནས་བསམ་བཞིན་དགའ་ལྡན་ཞིང་དུ་ཕེབས་སོ། །དེ་ལྟ་ན་རབ་བྱུང་བཅུ་བའི་བགྲང་བྱ་བཅུ་བདུན་པ་ཆུ་ལུག་ལོར་རྒྱལ་བ་བསོད་ནམས་རྒྱ་མཚོ་དན་ཏིག་ཏུ་ཕེབས་པ་ནས་བཟུང་རབ་རྒྱལ་མེ་སྤྲེལ་བར་ལ་ལོ་སུམ་བརྒྱ་དོན་བཞི་འདས་ཤིང་། དེར་ཉམས་བཞེས་དང་སྒྲུབ་པ་མཛད་ནས་བདེ་མཆོག་གི་ཞལ་གཟིགས་པ་སོགས་བྱིན་གྱིས་བརླབས་པའི་རྣམ་པར་ཐར་བ་འདི་ནི་བསྔགས་པའི་ཕུལ་དུ་སོན་པར་མ་ཟད། སྒར་བ་ཁ་དྲུག་གི་གཞུང་བརྒྱུད་ནས་ཤར་ཕྱོགས་སུ་ཕེབས་དུས་ཆོས་ཀྱི་བདུད་རྩི་ཅི་དགར་བཀྱེས་ཤིང་ཞབས་རྗེས་མང་བོ་བཞག་པ་སོགས་འཇིག་རྟེན་ན་རྙེད་པར་དཀའ་བའི་བྱིན་རླབས་ཀྱི་ཆུ་བོ་ཡང་བསྐྱིལ་བར་མཛད་དོ། །གཞན་ཡང་། མཁས་པ་དང་གྲུབ་པའི་དབང་ཕྱུག་མངོན་པ་དང་མི་མངོན་པའི་ཚུལ་ཅི་རིགས་ཀྱིས་གནས་དེར་ཕེབས་བཞུགས་མཛད་པ་ནི་བགྲང་བ་ལས་འདས་མོད། རེ་ཞིག་གྲགས་ཆེ་བ་ཙམ་ནི། སྤྲུལ་སྐུ་བསོད་ནམས་ཡེ་ཤེས་དབང་བོ། སྐུ་འབུམ་ཆོས་རྗེ་འོད་ཟེར་རྒྱ་མཚོ། ཀོའུ་བ་ཆོས་རྒྱ་མཚོ། རྒྱལ་སྲས་དོན་ཡོད་ཆོས་རྒྱ་མཚོ། སྐྱིད་ཤོད་སྡེ་བ་བསྟན་འཛིན་བློ་བཟང་རྒྱ་མཚོ། ལྕང་སྐྱ་གྲགས་པ་འོད་ཟེར། རོང་ཆེན་རིན་ཆེན་བསམ་གྲུབ། གྲུབ་ཆེན་ཆོས་པ་རིན་པོ་ཆེ། ཡབ་རྗེ་སྐལ་ལྡན་རྒྱ་མཚོ། བྱ་ཁྱུང་བདེ་ཁང་བློ་བཟང་རབ་བརྟན། ཆུ་བཟང་ངག་དབང་ཐུབ་བསྟན་དབང་ཕྱུག ཡབ་རྗེ་གསེར་ཁང་བ་ཆེན་པོ། སྐུ་མཆེད་བློ་བཟང་བསྟན་པ་རྒྱ་མཚོ། ཨ་རིག་དགེ་བཤེས་ཆེན་མོ། འཇམ་དབྱངས་བཞད་པ་སྐལ་བཟང་ཐུབ་བསྟན་དབང་ཕྱུག གྲུབ་པའི་དབང་ཕྱུག་རྗེ་འཇིགས་མེད་བསམ་གཏན། རྗེ་ཞྭ་དམར་པཎྚི་ཏ་དགེ་འདུན་བསྟན་འཛིན་རྒྱ་མཚོ། བཀའ་དྲིན་མཚུངས་མེད་བླ་མ་རིན་པོ་ཆེ་རྗེ་ཨབྷྱ་ཞབས། རོང་བོ་ཤར་ཐམས་ཅད་མཁྱེན་པ་སྐལ་ལྡན་བློ་བཟང་འཕྲིན་ལས་ལུང་རྟོགས་རྒྱ་མཚོ་སོགས་སྔ་ཕྱིར་བྱོན་ནས་ལ་ལས་ལོ་ཟླ་མང་པོར་བསྙེན་སྒྲུབ་མཛད་པ་དང་། ལ་ལས་དབང་ལུང་རྗེས་གསུམ་གྱི་ཆོས་བཀའ་མང་དུ་སྤེལ་བ་དང་། ལ་ལས་ཕྱག་མཆོད་ཞབས་སྐོར་གྱིས་གནས་འབྲེལ་མཛད་པ་སོགས་ཀྱིས་སྐབས་འགར་གནས་ཀྱིས་གང་ཟག་དང་། སྐབས་འགར་གང་ཟག་གིས་གནས་བྱིན་གྱིས་བརླབས་པའི་ཚུལ་མཐའ་དག་པར་སུ་ཞིག་གིས་བརྗོད་པར་ནུས།

དེ་དག་ལས་དམ་པ་རེ་གཉིས་ཀྱི་རྣམ་ཐར་ཅུང་ཟད་རེ་བརྗོད་པའི་སྒོ་ནས་ངོ་སྤྲོད་ཅིག་ཞུ་ན། སྤྲུལ་སྐུ་བསོད་ནམས་ཡེ་ཤེས་དབང་བོ་ནི། རྒྱལ་བ་བསོད་ནམས་རྒྱ་མཚོའི་ཡོངས་འཛིན་པཎ་ཆེན་བསོད་གྲགས་ཀྱི་སྐུའི་ཕྱི་མ་སྟེ་རབ་བྱུང་དགུ་བའི་མེ་འབྲུག་ལ་སྟོད་ལུང་ནས་འཁྲུངས། རྒྱལ་བ་བསོད་ནམས་རྒྱ་མཚོ་སོག་ཡུལ་དུ་ཕེབས་དུས་མཉམ་དུ་བྱོན་སྟབས། ལོ་ཐང་དགོན་པའི་ཐུབ་ཆེན་སོགས་ཀྱི་རྟེན་བཞེངས་ལྗགས་བཀོད་འདི་བས་མཛད། དམར་ཁམས་སུ་བཞུགས་དུས་མི་བསྲུན་པ་མང་བོས་ལྷ་ཁང་མ་ཐེབས་ན་ཁྱོད་མིན། ལྷ་ཁང་ཐེབས་ན་ཁོ་མིན་སོགས་བསམ་ངན་ཚིག་རྩུབ་སྣ་ཚོགས་བྱས་པར། རྗེ་དེས་ཆོས་སྐྱོང་དྲག་ཏུ་བསྐུལ་ནས་གཏོར་མ་རྡེབ་པའི་ནུབ་མོ་མེ་དཔུང་ཆེན་པོ་གཅིག་ཀུན་གྱིས་མངོན་སུམ་དུ་མཐོང་བར་དགྲ་བོའི་མགོ་ཐོག་ནས་གཉིས་སུ་སོང་སྟེ། གཅིག་དགྲའི་ཁྱིམ་དུ་བབས། གཅིག་མདུན་གྱི་རིར་བབས་པས་རི་ངུར་བ་སོགས་བྱུང་ཞིང་། ཟླ་བ་གསུམ་ལས་མ་འགྱངས་པར་དགྲ་བོའི་ཉེ་ཚན་དང་བཅས་པར་རྩྭ་སྐྱ་མེ་ལ་ཤོར་བ་ལྟ་བུའི་མཐུ་བསྟན་པ་སོགས་གྲུབ་པའི་གོ་འཕང་ལ་གནས་པ་ཞིག་གོ །སྐུ་འབུམ་ཕྱོགས་སུ་ཕེབས་སྐབས་ལོ་རྡོ་རྗེ་བྲག་ཏུ་མཇལ་བར་ཕེབས། ཞལ་ནས་ཚེ་སྔོན་མ་ཞིག་ལ་ཡང་གནས་འདིར་ཡོང་། དེ་རིང་སྣང་བ་སྐྱིད་པོ་བྱུང་། ཞེས་གསུངས་པར་གྲགས་ཏེ། དན་ཏིག་ཏུ་རྒྱལ་བ་བསོད་ནམས་རྒྱ་མཚོ་དང་མཉམ་དུ་ཕེབས་ནས་བསྙེན་སྒྲུབ་ཀྱང་ཡུན་རིང་མཛད་པར་མངོན་ནོ། །

སྐུ་འབུམ་ཆོས་རྗེ་འོད་ཟེར་རྒྱ་མཚོ་ནི། སྐུ་འབུམ་འདུལ་བ་ཆོས་རྗེ་སྔ་ཕྱི་གཉིས་བྱོན་པ་ལས། འདི་ནི་འདུལ་བ་ཆོས་རྗེ་ཕྱི་མ་ཡིན། སྐུ་འབུམ་མཁན་པོ་མཛད་ནས་ལོ་དགུ་སོང་ཐོག་རབ་བྱུང་བཅུ་བའི་ཆུ་བྱི་ལ་འཆད་ཉན་གསར་དུ་བཙུགས་ནས་ལོ་འཁོར་མང་བོར་བསྐྱངས་པའི་ཕྱག་རྗེས་རླབས་ཆེ་བ་ཞིག་སྟེ་རྒྱལ་བ་ཡོན་ཏན་རྒྱ་མཚོའི་སྐུ་རིང་ཡིན།

ཀོའུ་བ་ཆོས་རྒྱ་མཚོ་ནི། ཁྲི་གའི་ཀརྨ་ཐང་དུ་རབ་བྱུང་བཅུ་བའི་ལྕགས་ལུག་ལ་འཁྲུངས། རྒྱལ་བ་བསོད་ནམས་རྒྱ་མཚོ་ལས་རབ་ཏུ་བྱུང་། དབུས་སུ་ཕེབས་ནས་འབྲས་སྤུངས་སྒོ་མང་ཆོས་གྲྭར་སྦྱངས། པཎ་ཆེན་ཆོས་རྒྱན་ལ་བསྙེན་རྫོགས་ཞུས། སྒོམ་སྡེ་ནམ་མཁའ་རྒྱལ་མཚན། སྟག་ལུང་བྲག་པ་བློ་གྲོས་རྒྱ་མཚོ་སོགས་བསྟེན་ནས་གསན་སྦྱོང་རྒྱ་ཆེར་མཛད། དགུང་ལོ་སོ་བཞི་ཐོག་མདོ་སྨད་དུ་ཕེབས། ཞེ་བདུན་པར་སྐུ་འབུམ་ཁྲིར་བཞུགས། སྡེ་བ་ཆོས་རྗེས་དབང་རྡོར་ཕྲེང་གནང་བ་གསན། ཨན་ཆུང་གནམ་རྫོང་། བྲག་དཀར་རི་ཁྲོད་སོགས་སུ་སྒྲུབ་པ་ལ་གཞོལ། རེབ་གོང་དུ་བྱོན། གྲུབ་ཆེན་ཆོས་པ་ཡབ་སྲས་སོགས་ལ་ཆོས་བཀའ་མང་པོ་བསྩལ་བ་སོགས་བསྟན་པའི་གདུང་འཚོབ་ཟླ་མེད་པ་ཞིག་གོ །

རྒྱལ་སྲས་དོན་ཡོད་ཆོས་རྒྱ་མཚོ་ནི། རྒྱལ་སྲས་ཐོགས་མེད་ཀྱི་སྤྲུལ་རྒྱུན་དགོན་ལུང་འདེབས་མཁན་གྱི་རྒྱལ་སྲས་དེ་ཉིད་ཡིན་ལ། དྭགས་པོར་འཁྲུངས་ནས་རྒྱལ་བ་བསོད་ནམས་རྒྱ་མཚོས་ངོས་འཛིན་དང་རབ་བྱུང་མཛད། དྭགས་པོ་གྲྭ་ཚང་དུ་དཀའ་སྤྱད་ཚད་མེད་པས་སློབ་གཉེར་གནང་། པཎ་ཆེན་ཆོས་རྒྱན་དང་གྲུབ་ཆེན་ན་ཁ་བ་སོགས་བསྟེན། བྲ་སྟི་འབུལ་དཔོན་ཤེས་རབ་གྲགས་ཀྱིས་གདན་དྲངས་ནས་དཔའ་རིར་བྱོན། རབ་བྱུང་བཅུ་བའི་ཤིང་འབྲུག་ལ་དགོན་ལུང་བཏབ། སླར་དབུས་སུ་བྱོན་ནས་དབེན་གནས་དུ་མར་སྒྲུབ་པའི་རྒྱལ་མཚན་བཙུགས། མངོན་ཤེས་སོགས་ལ་མངའ་བརྙེས་པ་ཞིག་སྟེ། ད་ལྟ་དེའི་ཡང་སྲིད་ཕྱི་མ་རྣམས་ལ། རྒྱལ་སྲས་རིན་པོ་ཆེ་ཞེས་གྲགས་སོ། །

སྐྱིད་ཤོད་སྡེ་བ་བསྟན་འཛིན་བློ་བཟང་རྒྱ་མཚོ་ནི། རབ་བྱུང་བཅུ་བའི་ཆུ་སྦྲུལ་ལ་ལྷ་ལྡན་སྐྱིད་ཤོད་དུ་མི་དབང་སྡེ་བ་གཡུལ་རྒྱལ་ནོར་བུའི་སྲས་སུ་འཁྲུངས། མཆེད་བཞི་ལས་ཆེ་བ་སྡེ་བ་བསོད་རྒྱན། དེ་འོག་སྡེ་བ་ཡིད་བཞིན་ནོར་བུ། དེ་འོག་སྲས་པོ་རབ་བརྟན། བཞི་བ་རྗེ་ཉིད་དོ། །སྒོམ་སྡེ་ནམ་མཁའ་རྒྱལ་མཚན་གྱི་སྤྲུལ་པར་ངོས་འཛིན། ཁྲི་ཆེན་དགེ་འདུན་རྒྱལ་མཚན་དྲུང་ནས་རབ་བྱུང་མཛད། པཎ་ཆེན་ཆོས་རྒྱན་དང་རྒྱལ་བ་ཡོན་ཏན་རྒྱ་མཚོ་བསྟེན། རྩེ་ཐང་དུ་དཔལ་འབྱོར་བསོད་ནམས་ལྷུན་གྲུབ་ལས་རིག་གནས་དང་བཀའ་པོད་ལ་སྦྱངས། དགུང་ལོ་ཉེར་གསུམ་པར་པཎ་ཆེན་ལས་བསྙེན་རྫོགས་བཞེས། བྱ་རྒོད་གཤོང་དུ་དབུ་ཚད་གཙོར་བྱས་པའི་དམ་བཅའ་བཞག ངམ་རིང་དུ་ས་དགེའི་གྲྭ་ཚང་ཉེར་ལྔའི་དབུས་དཀའ་ཆེན་རྣམ་བཞིས་མཚོན་པའི་པོ་ཏི་བཅོ་བརྒྱད་ལ་གྲྭ་སྐོར་མཛད། བཀྲས་ལྷུན་ནས་པཎ་ཆེན་མདུན་མི་ཏྲ་རྡོར་ཕྲེང་། འགྲེལ་བ་བཞི་སྦྲགས་སོགས་ཆོས་རྒྱུན་དུ་མ་གསན། དགུང་ལོ་ཉེར་དྲུག་སྟེང་གཙང་དམག་གིས་སེར་འབྲས་བཅོམ་པ་དང་། སྐྱིད་ཤོད་པའི་རྫོང་གཞིས་བླངས་པ་སོགས་ལ་བརྟེན་མདོ་སྨད་དུ་ཕེབས་དགོས་བྱུང་། བྱ་ཁྱུང་། གསེར་ཁང་། རྔ་སྒར། ཤིང་ལེ་ཁ། གཉའ་གོང་། དན་ཏིག སྐུ་འབུམ། ཟི་ན། དཔའ་རི། དགོན་ལུང་། གྲོ་ཚང་། རོང་བོ། གནམ་རྫོང་། ལོ་རྡོ་རྗེ་བྲག ལྡེ་ཚ། འགག་ཚ། ཐང་རིང་། ཁ་ཏི་ཀ ཨུ་ཤི་ཕྲག མཛོ་མོ་མཁར། འབུམ་གླིང་སོགས་སུ་ཞབས་ཀྱིས་བཅགས། ཁ་ཏི་ཀའི་ནང་སོ་བསོད་ནམས་རྒྱ་མཚོའི་དགོངས་རྫོགས་ལ་སྤྱན་དྲངས་པར་དྲེའུ་བརྒྱ་ལ་སོགས་པའི་འབུལ་བ་རྒྱ་ཆེར་ཕུལ། ཀོའུ་བ་ཆོས་རྒྱ་མཚོ་དང་། འདན་མ་ཚུལ་ཁྲིམས་རྒྱ་མཚོ། གྲུབ་ཆེན་ཆོས་པ་ཡབ་སྲས། ཀོའུ་ཤྲཱི་བསྟན་འཛིན་ཆོས་རྒྱལ། ཧོང་ཐེ་ཅི། ཟི་ན་ནང་སོ་སོགས་ལ་དབང་རྡོར་ཕྲེང་སོགས་ཀྱིས་མཚོན་པའི་ཆོས་བཀའ་རྒྱ་ཆེར་བསྩལ། བྱ་ཁྱུང་དུ་དུས་འཁོར་དབང་དང་། རོང་བོའི་འཇམ་དབྱངས་ཀུན་གཟིགས་ལ་རབ་གནས་མཛད་པ་སོགས་ཕྱག་རྗེས་ཆེ། དགུང་ལོ་ཞེ་བདུན་སྟེང་དགོན་ལུང་ནས་མྱ་ངན་ལས་འདས། གདུང་ལ་དུང་དཀར་གཡས་འཁྱིལ་དང་། བདེ་མཆོག་ཞལ་ཕྱག་ཡོངས་རྫོགས་སོགས་བྱོན་ཏེ། མཚན་དོན་དང་མཐུན་པའི་བསྟན་འཛིན་གྱི་སྐྱེས་བུ་ཆེན་པོ་ཞིག་གོ །

ལྕང་སྐྱ་གྲགས་པ་འོད་ཟེར་ནི། སུམ་པ་དམ་ཆོས་རྒྱ་མཚོ་བསྟེན་ནས་ཐུགས་གཉེར་དང་། འབྲས་སྤུངས་སུ་བཀའ་པོད་ལ་སྦྱངས། ངང་ཚུལ་བཟང་བས་བཙུན་པའི་ཚད་དུ་རྩི། ངམ་རིང་དུ་རབ་འབྱམས་པའི་མཚན་བཏགས་མཛད། རབ་བྱུང་བཅུ་གཅིག་པའི་ལྕགས་རྟ་ལ་དགོན་ལུང་གི་ཁྲིར་བཞུགས། དན་ཏིག་ཏུ་ཕེབས་ནས་བདེ་མཆོག་གི་སྒྲུབ་པ་མཛད་པའི་ཚེ་གནས་དེ་བདེ་མཆོག་གི་ཕོ་བྲང་དུ་གཟིགས་ཤིང་ལྷག་པའི་ལྷ་མང་བོའི་ཞལ་གཟིགས། སྒྲུབ་ཁང་ད་ལྟ་སྒོམ་ཆེན་ཀླད་ཀྱི་བྲག་ཕུག་དེ་ལ་ངོས་འཛིན། འདིའི་སྤྲུལ་སྐུ་ནི་ལྕང་སྐྱ་ངག་དབང་བློ་བཟང་ཆོས་ལྡན་ཡིན་ནོ། །ཆོས་རྗེ་དོན་གྲུབ་རིན་ཆེན་གྱི་སྤྲུལ་བར་གྲགས་པ། བདེ་ཁང་བློ་བཟང་རབ་བརྟན་ཚང་དན་ཏིག་བླ་མ་རྣམ་གཉིས་ནས་གདན་ཞུས་བགྱིས་པ་ལྟར་རབ་འདོད་མེ་བྱི་ལོར་དན་ཏིག་ཏུ་བྱོན། བསུ་མ་སྔ་ཕྱི་མང་བོ་བཅས་ཤིན་ཏུ་བཟབས། གྲུབ་ཆེན་ལྷ་ཁང་ནས་བདེ་མཆོག་སྒྲུབ་མཆོད་མཛད། རྣམ་དག་ཆོས་སྐུ་བླ་མ་ཧེ་རུ་ཀ །ཞེས་པའི་ཇ་མཆོད་དེ་དུས་བརྩམས། སྤྱན་རས་གཟིགས་ཀྱི་དབང་སོགས་འདོད་ཆོས་ཅི་རིགས་སྩལ། འདིའི་རྣམ་ཐར་གྱི་སློབ་མའི་གྲས་སུ། བསྟན་པའི་མངའ་བདག་དགེ་བའི་བཤེས་གཉེན་ཆེན་པོ་དན་ཏིག་དང་ཚེ་ཏན་སོགས་ཀྱི་གདན་ས་དུ་མ་འཛིན་པའི་སྤོའུ་རྣམ་གཉིས། ཞེས་བསྔགས་བརྗོད་ཀྱང་ཆེ་སྟེ། མཁན་པོ་དཔལ་ལྡན་རྒྱ་མཚོ་དང་། ཞབས་དྲུང་འཇམ་དབྱངས་གྲགས་པའི་སྐུ་རིང་ཡིན་ནོ། །དེའི་ཕྱིར་ཕྲན་བུའི་དཔེ་ཁྲོད་དུ་བདེ་ཁང་གསུང་འབུམ་བྲིས་མ་ཆ་ཚང་ཞིག་ཡོད་པའང་དེ་དུས་བཞེངས་པ་འདྲ།

ཆུ་བཟང་ངག་དབང་ཐུབ་བསྟན་དབང་ཕྱུག་ནི། རབ་བྱུང་བཅུ་གཉིས་པའི་ཤིང་སྦྲུལ་ལོར་ལྕང་སྐྱ་རོལ་བའི་རྡོ་རྗེའི་སྐུ་མཆེད་དུ་འཁྲུངས། དགུང་ལོ་བཅོ་བརྒྱད་ཐོག་དབུས་སུ་ཕེབས། སྒོ་མང་ཆོས་གྲྭར་ཞུགས། རྒྱལ་མཆོག་བསྐལ་བཟང་རྒྱ་མཚོ། ཁྲི་ཆེན་ངག་དབང་མཆོག་ལྡན། རྗེ་བྱམས་པ་སོགས་བསྟེན་ནས་མདོ་སྔགས་ལ་ནང་བྱན་ཆུད། རྒྱལ་བ་རིན་པོ་ཆེར་བསྙེན་རྫོགས་ཞུས། ཁྲི་ཆེན་ལས་འཇིགས་བྱེད་བསྐྱེད་རིམ་གསན་སྐབས་ཤིག་ལ་འདི་བསྐྱེད་རིམ་མཐར་ཕྱིན་ནས་རྫོགས་རིམ་ལ་མྱོང་བ་ཐོན་ལ་ཁད་པ་ཞིག་རེད་ཅེས་ཁྲོམ་བསྒྲགས་སུ་གསུངས། དགུང་ལོ་ཉེར་བཞི་ཐོག་ཨ་མདོར་བྱོན། སྐུ་འབུམ་བྱ་ཁྱུང་གསེར་དགོན་དགོན་ལུང་སོགས་ཀྱི་ཁྲིར་བཞུགས། རྒྱ་ནག་པེ་ཅིན་དུ་ཕེབས། གོང་མ་ཆན་ལུང་གིས་ལྕང་སྐྱ་རོལ་བའི་རྡོ་རྗེ་ལོ་ཙཱ་མཛད་བཅུག་ནས་འདི་བ་ལ། ཁྱབ་པའི་དམིགས་པ་སོགས་ཞི་གནས་ལས་བརྩམས་ཏེ་བཀའ་དྲིན་མཛད། ལྕང་སྐྱ་རིན་པོ་ཆེ་ལ་རྡོ་རྗེ་ཕྲེང་བའི་དབང་དང་། མཚན་སྒྲོགས་བློ་བཟང་དར་རྒྱས་ལ་འགྲེལ་བ་བཞི་སྦྲགས་སོགས་ཞུས། ལྕང་སྐྱའི་རྣམ་ཐར་བརྩམས། དགུང་ལོ་རེ་གཅིག་སྟེང་ཆེད་ཞུས་ལྟར། དན་ཏིག གོང་སྐྱ། ཚེ་ཏན། གཅན་ཕུག་རྣམས་སུ་ཕེབས་ནས་དགོན་པ་དེ་བཞིའི་ཁྲི་བ་མཛད་ཅིང་ཆོས་སྲིད་ཀྱིས་བསྐྱངས། འོན་ཀྱང་གཅན་ཕུག་ཏུ་དངོས་སུ་ཕེབས་མིན་བརྟག་པར་བྱ་ཞིང་། དེ་དག་གི་ལོ་རྒྱུས་གང་ཤེས་འོག་ཏུ་འཆད་ལ། ཁྱད་པར་དུ་དན་ཏིག་ཐིས་པ་ཡང་ཏིག་རྣམས་སུ་གནས་མཇལ་མཛད་སྐབས་དག་པའི་གཟིགས་སྣང་དུ་མ་བྱུང་ཞིང་། བྲག་ལ་རང་བྱོན་གྱི་ལྷ་སྐུ་འདི་དང་འདི་རེད་ཅེས་ཞབས་ཕྱི་བ་ཚོར་བསྟན་ཀྱང་། དེ་དག་གིས་རྡོ་འབར་འབུར་ཙམ་ལས་ཅང་མ་མཐོང་བར་གྲགས། ཞལ་ནས། རི་བོ་དན་ཏིག་འདི་དམ་པ་མང་བོས་བྱིན་གྱིས་བརླབས་པའི་གནས། མཁའ་འགྲོ་ཆོས་སྐྱོང་རང་བཞིན་གྱིས་འདུ་བའི་གནས་ཤིག་ཏུ་འདུག ཅེས་གསུངས་པ་རྗེ་དེ་ཉིད་ཀྱི་རྣམ་ཐར་དུ་བཀོད་ཡོད། དེ་ལ་དཔགས་ན་དེང་སང་ཐིས་པ་དང་ཡང་ཏིག་གི་འགྲོ་ལམ་སོགས་སུ་གནས་བཅུ་རིགས་གསུམ་མགོན་པོ་སྒྲོལ་མ་ཉེར་གཅིག་རང་བྱོན་སོགས་སྟོན་རྒྱུ་ཡོད་པ་ནི་འདི་བས་ངོས་འཛིན་མཛད་པ་འདྲའོ། །

ཡབ་རྗེ་གསེར་ཁང་བ་ཆེན་པོ་དན་ཏིག་ཡང་ཏིག་རྣམས་སུ་ཡུན་རིང་རེ་ལ་སྐུ་མཚམས་མཛད་ཅིང་། རྒྱ་ཞུར་མ་ཎི་ཁང་དུ་བླ་ཆེན་པོའི་སྐུ་བརྙན་བྱོན་གཙང་ཞིག་བཞེངས་ནས་རབ་གནས་མཆོད་འབུལ་མཛད་པའི་རྒྱུན་ད་ལྟའང་ལོ་རེའི་བཞི་བའི་ནང་དུ་རང་གི་གྲྭ་རྒྱུན་དང་སྐྱེ་ཕོ་མོ་རྒན་བྱིས་ཐམས་ཅད་ནས་འབུལ་སྲོལ་བཟང་བོ་ཚུགས་པ་མ་ཆད་པར་ཡོད། སྐུ་མཆེད་རིན་པོ་ཆེ་བློ་བཟང་བསྟན་པ་རྒྱ་མཚོ་འཁོར་འདུལ་བ་འཛིན་པའི་བྱ་བཏང་དུ་མ་བཅས་སྔ་ཕྱིར་ཕེབས་ནས་ཐུགས་དམ་ཉམས་བཞེས། མཆོད་འབུལ་དང་བསྙེན་བཀུར། ཀླུའི་བུམ་གཏེར་སྒྲུབ་པ། མགོན་པོའི་གཏོར་སྒྲུབ་མཛད་པ། དགེ་འདུན་མང་ལ་བསླབ་པ་འབོགས་པ། ཞབས་དྲུང་ཚོན་པོ་མ་འཇིགས་མེད་ཐུབ་བསྟན་ནོར་བུས་གཙོས་མཛད་པའི་ཚོགས་པ་མང་པོ་ལ་འཇིགས་བྱེད་བཅུ་གསུམ་མའི་དབང་ལྷ་སྡེས་ཞུས་ངོར་ཐུགས་རྗེ་ཆེན་པོ་དང་གདུགས་དཀར་གྱི་དབང་། མཆོད་པའི་སྲོལ་བཙུགས་ཏེ་འཐེབ་གནང་བ་སོགས་མཛད་སྒོ་ཤིན་ཏུ་ཆེ། ཨ་རིག་དགེ་བཤེས་ཆེན་མོ་ཕེབས་ནས་སྒོམ་ཆེན་དང་ཉེ་བའི་བྱམས་ཁང་གི་མཚམས་ཁང་ནས་རྒྱུན་རིང་བཞུགས་ཤིང་གནས་འདི་ལྟ་བུས་གང་ཟག་བྱིན་གྱིས་རློབ་པར་གསུངས་ཞེས་གྲགས། ཁྱད་པར་དུ་དུས་ཕྱིས་རབ་བྱུང་བཅོ་ལྔ་བའི་སྨད་དང་། བཅུ་དྲུག་པའི་སྟོད་ཙམ་གྱི་དུས་བདག་ཅག་གི་དཔལ་ལྡན་བླ་མ་རིན་པོ་ཆེ་ཨ་བྷྱ་མཚན་ཅན་སྔ་ཕྱིར་ལན་འགའ་ཕེབས་ནས་རཱ་ཛ་ཕུག་ཏུ་བསྙེན་མཚམས་སྦྱིན་སྲེག་དང་བཅས་པ། ཐིས་པ་དང་དཀྱིལ་འཁོར་ནང་དུ་གནས་གཟིགས། འཇིགས་བྱེད་རྣམ་གཉིས། བདེ་མཆོག་ལཱུ་ལུགས། དྲིལ་བུ་ཕྱི་དཀྱིལ་དང་ལུས་དཀྱིལ། ཀུན་རིག ཐུགས་རྗེ་ཆེན་པོ་རྣམས་ཀྱི་དབང་སོགས་འདོད་ཆོས་ཅི་རིགས། དགུང་ལོ་བཞི་བཅུའི་སྟེང་ཁ་དྲུག་སྤྱི་ནས་གདན་ཞུས་ཀྱིས་ཐོག་མར་གནས་འདིར་ཕེབས། བླ་བྲང་གི་ལྷ་ཁང་དུ་གཞི་བྱེས་ཀྱི་ཚོགས་པ་མང་བོར་བཀའ་འགྱུར་གྱི་ལྗགས་ལུང་སྩོལ་བའི་དབུ་བཙུགས་ནས་ཟླ་བ་གཅིག་མ་ལོངས་ཙམ་གྱི་རིང་ལ་རྒྱུད་འབུམ་དང་། ཤེར་ཕྱོགས་མདོ་མང་གི་པོད་འགའ་བཅས་པའི་ལུང་སྩལ་ཅིང་། སྐབས་དེར་གནས་བསྟོད་ཚིགས་བཅད་མ་དེ་ཉིད་ལྗགས་རྩོམ་མཛད་པ་ཕྲན་བུས་ཡི་གེ་བའི་ཞབས་ཕྱི་ཞུས། གནས་འདིར་ནམ་ཕེབས་རེས་སུ། བྲག་གསེང་གི་རི་དྭགས་གནའ་བས་མཆོངས་རྒྱུགས་ཀྱིས་བསུ་བ་བྱེད་པ་སོགས་དཀར་ཕྱོགས་རྣམས་དགའ་བའི་རྟགས་སྟོན་པ་དང་། ཞལ་ནས་ཀྱང་འདིར་ནམ་སླེབས་ཚེ་སྣང་བ་འགྱུར་ཞིང་སེམས་བག་ཕེབས་པ་དང་ཉམས་སྤྲོ་བོ་འབྱུང་ཞེས་གསུངས་ཏེ་ཉན་ཤེས་པ་ཞིག་གིས་ཉན་ཚེ་ཉམས་རྟོགས་ལ་བོགས་སྟེར་བའི་གནས་ཀྱི་ཁྱད་ཆོས་སྟོན་པའི་གསུང་དུ་འཁུམས་ཤིང་། སྔོན་དུས་གཙང་བ་རབ་གསལ་གྱི་སྐུའི་སྐྱེ་བ་བཞེངས་དུས་ཡུན་རིང་བཞུགས་པའི་བག་ཆགས་ཀྱང་ཡིན་སྲིད་དེ། རྒྱས་པར་ཁོ་བོས་བརྩམས་པའི་རྣམ་ཐར་ཆེན་མོར་བལྟའོ། །གྲུབ་ཆེན་ཆོས་པ་ཡབ་སྲས་ཀྱང་འདིར་བྱོན་ནས་བསྙེན་སྒྲུབ་མཛད་པ་སོགས་རང་རང་གི་རྣམ་ཐར་ན་གསལ་བས་འདིར་བཀོད་ན་མང་དུ་དོགས་སོ། །ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་དང་། བླ་མ་རྡོ་རྗེ་འཆང་ཨ་བྷྱའི་མཚན་ཅན་རྣམ་གཉིས་འདི་ཕྱོགས་སུ་ཕེབས་ཚུལ་གྱི་སྐོར་ལ་ད་དུང་འོག་ནས་འཆད་པའི་སྐབས་ཡོད་དོ། །

གཞན་ཡང་རིག་འཛིན་དཔལ་ལྡན་བཀྲ་ཤིས་ཀྱིས་མཛད་པའི་གནས་བཤད་དོན་གྱི་བརྡ་ཆོས་ལས། མདོར་ན་དན་ཏིག་དང་། ཡང་ཏིག གཉའ་གོང་བྲག་དཀར། མཚོ་སྔོན་སོགས་མདོ་སྨད་འདིའི་གནས་རི་ཕལ་ཆེ་བ་ཐམས་ཅད་དུ། ཨོ་རྒྱན་རིན་པོ་ཆེ། ཕ་དམ་པ། བལ་བོ་བྷ་ཏནྟ། ཐོན་མི་སཾ་བྷོ་ཊ། རྒྱ་བཟའ་ཀོང་ཇོ། མངའ་བདག་ཁྲི་རལ་བ་ཅན། བོད་ཀྱི་མཁས་པ་མི་གསུམ། ལྷ་ལུང་དཔལ་གྱི་རྡོ་རྗེ། བླ་ཆེན་དགོངས་པ་རབ་གསལ། ས་པཎྚི་ཏ། འགྲོ་མགོན་འཕགས་པ། ཀརྨ་པཀྴི། ཀརྨ་རང་བྱུང་། ཀརྨ་རོལ་བའི་རྡོ་རྗེ། ཀརྨ་དེ་བཞིན་གཤེགས་པ། ཞྭ་དམར་ཆོས་ཀྱི་གྲགས་པ། གྲུབ་ཆེན་ཨོ་རྒྱན་པ། ཟི་ན་རྣལ་འབྱོར་བ། རྗེ་རིན་པོ་ཆེ། རྟོགས་ལྡན་འཇམ་དཔལ་རྒྱ་མཚོ། ཐམས་ཅད་མཁྱེན་པ་བསོད་ནམས་རྒྱ་མཚོ། སྤྲུལ་སྐུ་ཡེ་ཤེས་དབང་བོ། སྟོང་སྐོར་རིན་པོ་ཆེ། ཀིརྟི་ཐོགས་མེད། སྡེ་བ་ཞབས་དྲུང་། སྟག་ལུང་ཆོས་རྗེ་ལ་སོགས་པའི་མཁས་གྲུབ་ཀྱི་དམ་པ་དུ་མས་སྔ་ཕྱི་ཅི་རིགས་སུ་ཞབས་ཀྱིས་བཅགས་པ་དང་བྱིན་གྱིས་བརླབས་ཚུལ་གསུངས་པ་སོགས་རིས་མེད་སྐྱེས་ཆེན་དུ་མས་བསྔགས་བརྗོད་རྒྱ་ཆེར་མཛད་པ་མཐོང་སྟེ། དེ་དག་ལས་ཕལ་ཆེ་བ་ཞིག་དན་ཏིག་ཏུ་བྱོན་པའི་ལོ་རྒྱུས་ཚད་ལྡན་ཡང་ཡོད་དོ། །རྒྱལ་བའི་བཀའ་ལས་བསྟན་པའི་ངོ་མཚར་ཞིང་། །འཇིག་རྟེན་ཁྱོན་གྱི་ལྗོངས་སུ་རེ་རེ་སྟེ། །ཁྱད་པར་རྩོད་མེད་མིང་གིས་ངོས་བཟུང་བ། །དན་ཏིག་ལས་གཞན་ངེས་པར་སྲིད་པ་ཙམ། །བཟོ་བོས་མ་བཅོས་ལྷ་སྐུའི་སྣང་བ་གསལ། །གཟོང་གིས་མ་བརྐོས་རང་བྱུང་ཕུག་པ་ཟབ། །པིར་གྱིས་མ་བྲིས་ཞལ་ཕྱག་ཡན་ལག་རྫོགས། །ཆེད་དུ་མ་བསྔགས་པར་ཡང་གྲགས་པ་འབར། །རིན་ཆེན་ཤིང་རྟ་བརྒྱ་ཡིས་མི་ཁུགས་པའི། །མཁས་གྲུབ་གཉིས་འཛོམས་གནམ་གྱིས་ས་བཀབ་པ། །དཔེ་རུ་བགྱིད་འོས་ཞབས་ཟུང་པདྨའི་འདབ། །གང་དེར་བཞད་པའི་ཕ་མཐའ་སུ་ཡིས་གཞལ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

བཞི་བ་གནས་མཇལ་བ་རྣམས་ལ་ཉེ་བར་མཁོ་བ་གྲུབ་གནས་དང་རྟེན་གྱི་དཀར་ཆག་གསལ་བར་བརྗོད་པ་ནི། ད་ནི་གནས་མཇལ་བ་རྣམས་ཀྱིས་ལྟ་བདེ་ཞིང་ཡིད་ལ་འཇགས་ཕྱིར། འདུ་ཁང་། བླ་བྲང་གོང་འོག གནས་ཁང་སོ་སོར་བཞུགས་པའི་རྟེན་དང་། བྲག་རང་བྱོན། ཐིས་པ། ཡང་ཏིག་དང་བཅས་པའི་ངོ་སྤྲོད་གོ་སླ་བའི་སྒོ་ནས་ཅུང་ཟད་ཞུ་ན། ཐོག་མར་སྟོད་ནས་འོངས་པའི་གནས་མཇལ་བ་ཞིག་གི་འགྲོ་ལམ་དང་བསྟུན་ཏེ་འདི་ལྟར། ཁོ་ཡར་ནས་དན་ཏིག་བྲག་ཏུ་འགྲོ་བའི་ཁང་བཟང་ཁའི་ལ་རྐེད་དུ་རྒྱལ་བ་བསོད་ནམས་རྒྱ་མཚོའི་བཞུགས་ཁྲི་དང་ཞབས་རྗེས་གསལ་བར་བཏོད་པ་དང་། མ་ཎི་པད་ཁང་སྟེ་སྡིག་སྦྱངས་ཉིན་དུ་ཡང་རྒྱལ་བ་བསོད་ནམས་རྒྱ་མཚོའི་ཞབས་རྗེས། དེའི་མར་ངོས་ཀྱི་གཡས་ན་ཁྲི་མདུན་ཅོག་རང་བྱོན་དང་། དེའི་གཤམ་ན་རྒྱལ་ཆེན་བཞི་སྒོ་སྲུང་གི་ཚུལ་དུ་བྲག་འབུར་བོ་ཆེན་པོ་བཞི། དེའི་འགབ་ཏུ་ལྷ་མོའི་ཕོ་བྲང་ཡིན་ཟེར་བའི་བྲག་ཕུག་ཆོས་འབྱུང་གི་དབྱིབས་ཅན། བྲག་ཏུ་ཐོན་ལ་ཁད་ཀྱི་ལམ་ཁར་སྔོན་མཚོ་མ་དྲོས་པ་ནས་འོངས་པའི་ཀླུ་བདུད་མཚོ་འཁྱིལ་དུ་གནས་པ་ལ་ཕྱག་ན་རྡོ་རྗེས་རྡོ་ཟོར་འཕངས་ཏེ་བཏུལ་བ་ཡིན་ཟེར་བའི་རྡོ་གྲུ་གསུམ་གྱི་དབྱིབས་ཅན་དང་། དེའི་སྟེགས་ཡིན་ཟེར་བའི་རྡོ་གྲུ་གསུམ་གཞན་པ་ཞིག་དང་། མཚོ་འཁྱིལ་བསྐམས་པའི་ཤུལ་ད་ལྟ་རྒྱ་ཞུར་འགྲོ་ལམ་དུ་ཡོད་པ་དེར་ངོས་འཛིན་ཅིང་། མཚོ་འཁྱིལ་དེའི་ཡར་ངོས་ན་བྲག་ཕུག་ཅིག་ཡོད་པ་དེ་ལ། ལ་ལས་རྭ་ལོ་ཙཱ་བའི་སྒྲུབ་ཁང་དང་། ལ་ལས་ལྷ་ལུང་དཔལ་རྡོར་གྱི་སྒྲུབ་ཕུག་ཡིན་ཟེར་ཏེ་ཕྱི་མ་འདི་བདེན་པར་སྣང་། རྡོ་ཟོར་དེའི་ཡར་ཁའི་བྲག་ངོས་ཀྱི་བུ་ག་ཕྲ་མོ་ཞིག་ན་སྒྲོལ་ལྗང་རང་བྱོན། དེ་ནས་ཅུང་ཟད་མར་སོང་སྟེ་ལུང་བའི་ཕར་ཁའི་ངོ་ན་རྗེ་བསོད་ནམས་རྒྱ་མཚོའི་བཞུགས་ཁྲི། དེའི་ཚུར་ཁ་ན་སྤྱི་བ་ཡང་ཟེར། ཨ་མྱེས་ཀླུ་རྒྱལ་ཁང་ཡང་ཟེར་བ་དེར་སླེབ། ལྷ་ཁང་དབུས་མར་རྟེན་གཙོ་ཇོ་སྐུ། གཡས་སུ་རྒྱལ་བ་རྡོ་རྗེ་འཆང་། གཡོན་དུ་ཚེ་དཔག་མེད། ལོགས་བྲིས་ལ་ཉེ་བའི་སྲས་བརྒྱད། དེའི་གཡས་ཀྱི་ལྷ་ཁང་སྦུག་ཏུ། ཆེ་ཤོས་ལྷ་བཟོས་བཞེངས་པར་གྲགས་པའི་རྒྱལ་བ་བྱམས་པ་དགུང་ལོ་བདུན་པའི་ཚད་ཅན། ཐུབ་དབང་། གནས་བརྟན་བཅུ་དྲུག ཧྭ་ཤང་དགེ་བསྙེན། རྒྱལ་ཆེན་བཞི་བཅས་ཀྱི་སྨན་སྐུ་ཁྲུ་ཚད་ཅན་དང་། རྒྱབ་ཀྱི་སྒྲུབ་ཕུག་ཏུ། ཀླུ་རྒྱལ་ཀརྟི་ཀ་ལ་ཀླུ་ཆེན་བརྒྱད་ཀྱིས་བསྐོར་བ་ཀླུ་གཏེར་གྱི་བུམ་པ་མང་བོས་གང་བ་ལོ་རེའི་བཞི་བའི་བཅུ་གཅིག་ཉིན་མ་གཏོགས་རྒྱུན་དུ་ཞལ་མཇལ་མེད་པའི་གཙིགས་ཅན་དེ་ཉིད་བཞུགས་ཏེ། འདི་ལ་རྨ་ལྷོ་བྱང་གི་རྒྱ་བོད་ཀྱི་མཇལ་བ་མང་བོས་རིགས་རྒྱུད་སློང་བ་དང་སྲིའུ་གཏོད་པས་རྨ་ཕར་ཚུར་དེ་དག་གི་སྐྱེ་ཕོ་མོར་ཀླུའི་མིང་ཅན་ཤིན་ཏུ་མང་བ་ཡང་འདིའི་བྱིན་རླབས་ལས་བྱུང་ཞིང་། ཁྱད་པར་དུ་མ་དྲོས་པའི་མཆོད་ཆོག་སྒོས་མཆོད་པ་དང་། དམ་པ་ཚད་ལྡན་གྱིས་ཀླུ་གཏེར་འབུལ་བ་དང་། ཆར་ཆུ་བསླངས་ན་ཅི་འདོད་ཀྱི་དངོས་གྲུབ་སྦྱིན་པ་སོགས་དཀར་ཕྱོགས་ཀྱི་འཕྲིན་ལས་ཅན་དུ་གྲགས། དེ་དང་འབྲེལ་བའི་ལྷ་ཁང་ཆུང་ངུར། རྗེ་ཙོང་ཁ་བ། བླ་ཆེན་པོ། རྒྱལ་བུ་དོན་གྲུབ་ཀྱི་སྐུ་བརྙན་གསུམ་མི་ཚད་ཙམ་རེ་བཞུགས། བླ་ཆེན་གྱི་སྐུ་བརྙན་ཡིན་ཟེར་བ་དེ་ལ་སྐུ་འགག་སྒྲོན་ཡོད་སྟབས་ཡིན་རྒྱུ་ནི་རྒྱལ་བ་བསོད་ནམས་རྒྱ་མཚོ་ཡིན་པ་འདྲའོ། །

དེའི་ལོགས་སུ་ཀླུའི་དངོས་གྲུབ་མཚོན་པའི་ཆུ་རྒྱུན་གྱི་ཐིགས་ཕྲེང་རྒྱུན་ཆད་མེད་པར་འབབ་བཞིན་པའི་བྲག་སྐྱིབས་སྦུབས་རིང་བོ་གཅིག་ཡོད་དོ། །ཆུ་རྒྱུན་དེས་ལྷ་ཁང་དེ་དག་ཏུ་འབུལ་བའི་ཡོན་ཆབ་དང་། དཀོན་གཉེར་གྱི་བཏུང་ཆུ་ལ་ཕལ་ཆེར་འདང་ངེས་ཡིན། གཡོན་གྱི་ཕྱོགས་སུ་ཐུགས་རྗེ་ཆེན་པོ་བཅུ་གཅིག་ཞལ་གྱི་ལྷ་ཁང་། ལས་གཤིན། མགོན་པོ་བྱ་རོག་གདོང་དམ་ཅན་མགར་ནག་བཅས་པའི་སྐུ་བརྙན་བཞུགས་པའི་ལྷ་ཁང་། སྒོ་ཆེན་གྱི་འགྲམ་གཡས་གཡོན་དུ་རྒྱལ་ཆེན་བཞི་ཆེ་ཚད་བཟོ་ཤིན་ཏུ་ལེགས་པ་བཅས་བཞུགས། སྤྱིར་ཀླུ་རྒྱལ་ཀརྟི་ཀའི་ལོ་རྒྱུས་ལ་རྒན་པོ་རྣམས་ཀྱི་ངག་རྒྱུན་ལྟར་ན། སྔོན་མཚོ་མ་དྲོས་པར་གནས་པའི་ཀླུ་བདུད་སྤུན་གསུམ་གྱིས་སེམས་ཅན་ལ་འཚེ་བར། ཕྱག་ན་རྡོ་རྗེས་སྤུན་ཆེ་བ་གཉིས་མཚོ་དེ་གར་དམ་ལ་བཏགས། སྤུན་ཐ་ཆུང་རྫུ་འཕྲུལ་གྱིས་བྲོས་ནས་ས་འདིའི་མཚོ་འཁྱིལ་དུ་གནས་པ་ལ་ཕྱག་ན་རྡོ་རྗེས་ཕྱག་མཚན་རྡོ་རྗེ་འཕངས་པ་ན། ཡང་བྲོས་ནས་སྒོམ་ཆེན་གྱི་བྲག་སྲུབས་སུ་འཛུལ། འོན་ཀྱང་མཇུག་མ་མ་ཐར་བའི་སྐབས་སུ་ཕྱག་ན་རྡོ་རྗེས་བཟུང་ནས་ཕྱིན་ཆད་གཞན་ལ་མི་འཚེ་བའི་བྲོ་བོར་དུ་བཅུག་ཅིང་དཀར་ཕྱོགས་སུ་བསྒྱུར། དེ་ནས་སྤྲུལ་གཟུགས་དེ་རྡོ་ཞིག་ལ་ཐིམ་པ་ཕྱིས་སུ་སྤྱི་བ་ཁང་དུ་ཀླུ་རྒྱལ་ཀརྟི་ཀའི་སྐུ་བརྙན་བཞེངས་པའི་ནང་གཞུག་ཏུ་ཕུལ་ཡོད་ཅེས་པའི་བཤད་ཚུལ་ཞིག་ཀྱང་ཡོད་དོ། །

དེ་ནས་ཅུང་ཟད་ཕྱིན་ཚེ་གནམ་ས་ཆོས་འབྱུང་གི་དབྱིབས་སུ་ཡོད་པའི་གྲུ་ན་རྒྱལ་བུ་དོན་གྲུབ་ཀྱི་བཞུགས་གནས་སམ། དྲི་མེད་ཀུན་ལྡན་གྱི་ལྷ་ཁང་ངམ། བདེ་མཆོག་གི་ཕོ་བྲང་དུ་གྲགས་པ་ཡོད། འདི་ལ་ཁ་སྐད་དུ་རབ་འབྱམས་ཕུག་ཟེར་དོན་ཞིབ་མོས་བརྟགས་ན་རྒྱལ་བོའི་སྐད་དོད་རཱ་ཛ་ཡིན་ཞིང་། ཛ་ལ་འགྱ་ཞེས་ཀློག་པའི་སྐབས་ཡོད་སྟབས་ཕྱིས་སུ་བོད་སྐད་ཡིན་ཤག་གིས་ཧ་ཅང་དག་པའི་ཁུལ་གྱིས་བྲིས་པ་འདྲ་སྟེ། ཡིན་རྒྱུ་ནི་རཱ་ཛ་ཕུག་ཡིན་པར་སེམས་ཤིང་། རབ་འབྱམས་ཞིས་པ་ལ་སྐབས་འདིར་སྒྲ་བཤད་དུ་ཡང་མེད་དོ། །དེའི་ལྷ་ཁང་གི་རྟེན་གཙོ་བདེ་མཆོག་སྐུ་བརྙན་མི་འགྲེང་ལས་བརྒལ་བ་གསར་བཞེངས་ལ་གྲུབ་དབང་འཇིགས་མེད་བསམ་གཏན་གྱིས་སྤྱན་དབྱེ་རབ་གནས་མཛད་པ་དང་། རྒྱལ་བུ་དོན་གྲུབ་ཀྱི་མདོའི་བཀོད་པ་དང་། གྲུབ་ཆེན་བརྒྱད་ཅུའི་གྱན་ཐང་སོགས་རྟེན་བཞེངས་མི་ཉུང་ཙམ་དང་། ལོ་རེ་བཞིན་བརྒྱད་པའི་ནང་བདེ་མཆོག་སྒྲུབ་མཆོད་ཚད་ལྡན་ལྷ་ཁང་དེར་ཚོགས་སྲོལ་ཡོད། བྲག་ངོས་སུ་འཇིགས་བྱེད་རང་བྱོན་སོགས་ཀྱི་ངོས་འཛིན་འགའ་དང་། གཡོན་གྱི་བྲག་ཐེམ་མཐོན་པོར་སྔར་བཤད་པ་ལྟར་རྒྱལ་བུ་དོན་གྲུབ་ཕེབས་དུས་རང་གྲག་བྱུང་བའི་རྔ་དང་དུང་ཆེན་སོགས་ཀྱི་བྲག་ཕུག་མང་བོ་དང་། ཀླད་ཀྱི་བྲག་ཐེམ་གནའ་བ་རྒྱུ་ལམ་མཐོན་པོར་སྔོན་དུས་ཞབས་དྲུང་འཇིགས་མེད་ཐུབ་བསྟན་རྒྱ་མཚོས་ཆེད་གཉེར་གྱིས་བྲག་ལ་འགྲོ་མཁས་པ་གཉིས་བལྟ་བར་མངགས་པའི་བྲག་ཁུང་ཆེན་པོ་ཞིག་ཏུ་ལྷ་སྐུའི་རྣམ་ཅན་ཞིག་ཀེར་ལངས་སུ་ཡོད་ཟེར་ཏེ། ད་སྔ་དེ་གཉིས་མ་གཏོགས་སུ་ཡང་སླེབས་མྱོང་བའི་གཏམ་ཙམ་ཡང་མི་འདུག་གོ །ངག་རྒྱུན་ལ་འདིའི་གནས་སྒོ་ནི་གོང་བཤད་སྒྲོལ་ལྗང་རང་བྱོན་ཡོད་པའི་བྲག་ཐེམ་གྱི་ཕུག་པ་དེ་ཡིན་པར་གྲགས་སོ། །རབ་རྒྱལ་ཤིང་ལུག་ལོར། མཁན་སྤྲུལ་རིན་པོ་ཆེ་འཇིགས་མེད་རིགས་པའི་སྙིང་བོ་དཔལ་བཟང་བོས་དབུ་དྲངས་ཏེ་དན་ཏིག་སེར་སྐྱའི་གྲོས་དབང་ལྷན་རྒྱས་ནས། རཱ་ཛ་ཕུག་དེ་ཉིད་ཕྲན་བུ་ཞབས་དྲུང་གི་སྒར་གཞིས་ལ་དགྱེས་བཞིན་དུ་གནང་བར་བརྟེན་རིམ་གྱིས་རྟེན་བཞེངས། གཟིམ་ཁང་། བླ་བྲང་གི་གཞིས་ཀ་བཅས་ཅུང་ཟད་ཇེ་རྒྱས་སུ་བཞེངས་པའི་མགོ་རྩོམ་བཞིན་པ་ཡིན། དེའི་ཕྱིར་ཤིང་ལུག་ལོ་དེ་ཉིད་ལ་འདུག་ཁུང་ཐེབས་ཆགས་ཙམ་ཟིན་འཕྲད་མཆོག་སྤྲུལ་རིན་པོ་ཆེ་འཇིགས་མེད་ལུང་རྟོགས་རྒྱ་མཚོ་བྱ་ཁྱུང་ནས་རབ་བྱུང་བཞེས་པའི་མར་ལམ་དེར་ཕེབས་ནས་ཞབས་ཀྱིས་བཅགས་ཤིང་། དེའི་ཕྱི་ལོ་མེ་སྤྲེལ་བརྒྱད་པའི་ཡར་ཚེས་ལ་ཤར་སྐལ་ལྡན་ཐམས་ཅད་མཁྱེན་པ་སྟག་དགོན་དང་མཐུ་དགོན་བརྒྱུད་དེ་ཕེབས་ནས་ལྷ་ཁང་དེར་ལམ་རིམ་སྔགས་རིམ་དབུ་ནས་གསུང་ཆོས་ཀྱི་རྟེན་འབྲེལ་བསྒྲིགས་པ་དང་། རྗེ་བདེ་ཡངས་རིན་པོ་ཆེ་ནས་རྟ་གཅིག་དང་ཊཾ་སུམ་བརྒྱ་གནང་བས་པེ་ཅིན་ནས་གཉྫིར་བསྒྲུབས་པ་སོགས་ལེགས་ལམ་གང་འོས་བྱུང་། དེ་ནས་སྐོར་ལམ་བརྒྱུད་དེ་ཕྱིན་ན་བྲག་ངོས་སུ་ཆོས་དུང་རང་བྱོན་དང་། བྲག་བྱམས་པ་རང་བྱོན། ཁ་དོག་མི་གཅིག་པའི་སྒོའི་རྣམ་པ་ཅན་ཞལ་བ་བྱས་པ་ལྟ་བུའི་སྒྲུབ་ཕུག་འདག་སྦྱར། ལུང་བའི་མཐིལ་ན་རྒྱལ་བུ་དོན་གྲུབ་ཀྱི་སྲས་སྲས་མོའི་ཤངས་ཁྲག་ལས་སྐྱེས་པའི་ཙན་དན་རྡོ་འབུམ་བཅས་ཡོད་ལ། དེ་ནས་ཨ་ཆུ་ཏའི་སྒྲུབ་ཁང་དུ། དུས་གསུམ་སངས་རྒྱས། བྱམས་འཇམ་དབྱངས། 崐ཨ་ཆུ་ཏ། མི་ལ་རས་པ་རྣམས་ཀྱི་སྐུ་བརྙན་བཞུགས། སྒྲུབ་ཁང་ལ་ཐོག་སོ་དང་བཟོ་བཀོད་ཕུན་སུམ་ཚོགས་པས་སྲི་ཞུ་བྱས་ཡོད། དེ་ནས་སྐོར་ལམ་བརྒྱུད་དེ་ཕྱིན་ཚེ་གྲུབ་ཆེན་ཟེར་བའི་ལྷ་ཁང་ལ་ཐོན་ཏེ། དེ་ནི་རྒྱལ་བ་བསོད་ནམས་རྒྱ་མཚོའི་སྒྲུབ་ཕུག་ཡིན། སྟོན་པ་ཤཱཀ་ཐུབ། རྒྱལ་བ་རྡོ་རྗེ་འཆང་། ཚེ་དཔག་མེད། རྒྱལ་བ་བྱམས་པ། སྤྱན་རས་གཟིགས་ཕྱག་བཞི་བ། སྒྲོལ་མ་དཀར་སྔོན། རྒྱལ་བ་བསོད་ནམས་རྒྱ་མཚོ་རྣམས་ཀྱི་སྐུ་བརྙན། ཡི་དམ་འཇིགས་བྱེད། མགོན་ཆོས་ལྷ་མོ་རྣམ་སྲས་སོགས་ཀྱི་སྐུ་བརྙན་སྨན་འདམ་ལས་བཞེངས་པ་དང་། རྒྱལ་བ་བསོད་ནམས་རྒྱ་མཚོའི་སྐུ་འདྲའི་ཐད་ཀྱི་བྲག་ལ་སྔར་བཤད་པ་ལྟར་གྱི་སྐུ་རྗེས། གནམ་གྱི་བྲག་ངོས་ལ་ཕྱག་མཛུབ་ཀྱི་རྗེས་མང་བ། དཔལ་ལྡན་ལྷ་མོའི་དྲེའུའི་རྨིག་རྗེས་ཀྱི་རྡོ་བཅས་མཇལ་དུ་ཡོད། དེའི་ལུང་བའི་ཕར་ངོས་བྲག་ཐེམ་མཐོན་པོར་ཛཾ་དཀར་རང་བྱོན་འབུར་དུ་དོད་པ་རྒྱང་ནས་མཐོང་། དེ་ནས་མར་བབས་པའི་འདུ་ཁང་ཐད་ན་དབྱེན་བསྡུམ་མཆོད་རྟེན་ཆེ་ཚད་གཅིག་བཞུགས། འདུ་ཁང་ཆེན་མོ་གསང་སྔགས་དར་རྒྱས་གླིང་དུ་རྗེ་ཡབ་སྲས། ཚེ་དཔག་མེད། འོད་དཔག་མེད་སྟོང་སྐུ། གོས་སྐུ་ཆེན་མོ། རྒྱལ་བ་འཕྲིན་ལས་རྒྱ་མཚོས་རབ་གནས་དང་ཕྱག་ཐམ་གནང་བའི་རྗེ་གཟིགས་པ་ལྔ་ལྡན་གྲས་ཀྱི་ཐང་ག་གཅིག ཇ་སག་མཁན་པོས་རྒྱ་ནག་ནས་གདན་དྲངས་པའི་བཀའ་འགྱུར་མཚལ་པར་ཤིན་ཏུ་སྤུས་ལེགས་པ། རང་གྲྭ་རྒྱ་ཞུར་ཨ་ཁུ་འཇིགས་མེད་སོགས་སྦྱིན་བདག་འགས་གདན་དྲངས་པའི་བསྟན་འགྱུར་སྣར་ཐང་པར་མ། རང་གྲྭ་ཆོས་དར་དང་བསམ་གྲུབ་གཉིས་ནས་བཞེངས་པའི་རྗེ་ཡབ་སྲས་གསུམ་གྱི་གསུང་འབུམ་སྐུ་འབུམ་པར་མ་དཔེ་ཐུམ་གདོང་དར་སོགས་བཟང་གོས་ལས་གྲུབ་པ། རང་གྲྭ་ཨ་ཁུ་རྒྱ་མཚོས་གདན་དྲངས་པའི་བླ་མ་རྡོ་རྗེ་འཆང་ཆེན་པོའི་བཀའ་འབུམ་པོ་ཏི་བཅོ་ལྔ་བཟང་གོས་ཀྱི་ཐུམ་བཅས། འདོད་ལྷ་མང་བོས་གཏམས་པའི་མཐོངས་ཀོར་གྱི་མཆོད་རྫས་དྲ་བ་དྲ་ཕྱེད་ཅན་སོགས་སྔ་ཕྱིར་བཞེངས་པའི་སྐུ་གསུང་ཐུགས་རྟེན་མནོག་ཆེ་བ་བཞུགས། ལོ་རེར་བཞི་བའི་བཅུ་གཅིག་ལ་རྟེན་མཇལ་ལན་གཅིག་ཙམ་ལས་མི་གཏོང་བའི་རྟེན་སྒམ་བྱིན་ཅན་གྱི་ནང་དུ། སྔར་བཤད་པ་ལྟར་རྒྱལ་བུ་དོན་གྲུབ་ཀྱི་ཞབས་ཕྱགས་ཡ་གཅིག་དང་། བཙུན་མོ་མ་ཏྲིའི་ནུ་མ་རྡོ་བའི་རང་བཞིན་དུ་བྱིན་གྱིས་བརླབས་པ། རྒྱལ་བུ་དོན་གྲུབ་ཀྱི་གསོལ་ཕོར་བཞག་རྗེས་བབས་པའི་རྡོ་ཅོག རྒྱལ་བ་བསོད་ནམས་རྒྱ་མཚོའི་ཆིབས་ཡོབ་ཆ་དང་། དེའི་བཞེས་དཀར་བཞག་ཤུལ་གསལ་བར་བཏོད་པའི་རྡོ་བ་ཅུང་ཟད་ཆུང་བ། ཨ་རིག་དགེ་བཤེས་ཆེན་མོའི་དབུ་ཞྭ། ན་བཟའ། བཞུགས་གདན། གྲུབ་དབང་གོང་མ་རྗེ་འཇིགས་མེད་བསམ་གཏན་རིན་པོ་ཆེའི་སྐུ་ཤམ། རྗེ་ཞྭ་དམར་རིན་པོ་ཆེ་དགེ་འདུན་བསྟན་འཛིན་རྒྱ་མཚོའི་དབུ་ཞྭ། འཇམ་དབྱངས་བཞད་པ་སྐལ་བཟང་ཐུབ་བསྟན་དབང་ཕྱུག་གི་སྐུ་འགག རྒྱལ་དབང་ཐུབ་བསྟན་རྒྱ་མཚོའི་ཞབས་འབོབ་ཆ། པཎ་ཆེན་ཆོས་ཀྱི་ཉི་མའི་སྐུ་གཟན་དང་། འདྲ་བརྙན། པཎ་ཆེན་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་གྱི་ན་བཟའ། རྒྱལ་སྲས་བློ་བཟང་ཐུབ་བསྟན་འཇིགས་མེད་རྒྱལ་མཚན་གྱི་སྐུ་འགག དཔའ་རིའི་དགེ་བཤེས་བློ་བཟང་རབ་གསལ་གྱི་དབུ་ཞྭ། སྐུ་མཆེད་དགེ་འདུན་བསྟན་པ་རབ་རྒྱས་ཀྱི་དབུ་ཞྭ་དང་། བཞུགས་གདིང་། མཚུངས་མེད་བླ་མ་རིན་པོ་ཆེ་རྗེ་འཇིགས་མེད་ཞབས་ཀྱི་སྐུ་འགག ཚེ་ཏན་མཁན་པོ་བློ་བཟང་འཇིགས་མེད་རབ་བརྟན་དང་། ཞབས་དྲུང་འཇིགས་མེད་ཐུབ་བསྟན་རྒྱ་མཚོ་གཉིས་ཀྱི་ན་བཟའ་བཅས་ཡོད་ལ། ཕྱིས་སུ་མདོ་སྔགས་གཞུང་བརྒྱ་སྨྲ་བའི་བཤེས་གཉེན་ལྷ་རམས་པ་ངག་དབང་ཚུལ་ཁྲིམས་དཔལ་བཟང་བོས་རང་དགོན་འདི་ཉིད་ཐུགས་ཁུར་ཆེར་བཞེས་ཀྱིས་གངས་ལྗོངས་ཆོས་ཀྱི་ཞིང་ནས། གསེར་སྲང་སྟོང་གིས་ཀྱང་འགྲན་དུ་མེད་པའི་རྟེན་སྣ་བྱིན་ཅན་ས་སྟེང་ན་རྙེད་པར་དཀའ་བ་དུ་མ་ཞིག་གདན་དྲངས་པ་རྣམས་ཀྱི་ཐོ་ཆབས་གཅིག་ཏུ་འགོད་ན། ཐུབ་པའི་དབང་བོ་གཙོ་འཁོར་གསུམ་པ། གནས་བརྟན་བཅུ་དྲུག དགེ་བསྙེན་དྷརྨ། རྒྱ་ནག་ཧྭ་ཤང་། རྒྱལ་ཆེན་བཞི་དང་བཅས་པའི་ཞལ་ཐང་བྱོན་ལེགས་བཅུ་གསུམ་བཟང་གོས་ཀྱི་གོང་གཤམ་ལག་དང་བཅས་པར། རྒྱལ་དབང་བཅུ་གསུམ་པ་ཐུབ་བསྟན་རྒྱ་མཚོས་ཉིན་བདུན་ལ་རབ་གནས་དང་། ཐང་ག་རེ་རེར་ཕྱག་དཔར་ཕྱག་ཐམ་གནང་བའི་བྱིན་ཅན། ཐུབ་པ་ཐོག་ཐུབ་མ། སངས་རྒྱས་ཀྱི་ཞབས་རྗེས་དཔར་མ། རྒྱལ་བ་ཐུབ་བསྟན་རྒྱ་མཚོའི་འདྲ་བརྙན་ཕྱག་དཔར་ཅན་དང་། ན་བཟའ་བཞུགས་སྟན་རྒྱབ་ཡོལ་བཅས། རྗེ་སྐུ་ཚོང་དཔོན་དགེ་ལེགས་མ། རྗེ་གླིང་འཕུར་མ། རྗེ་ཞབས་སྙུང་མ། རྗེ་ཕྱག་ནས་བརྒྱ་རྩ་མ། ཀློང་རྡོལ་བླ་མའི་འདྲ་སྐུ་ཉིད་ཀྱི་ཕྱག་ཚ་ཅན། ཐུགས་རྗེ་ཆེན་པོ་བཅུ་གཅིག་ཞལ་ཀློད་རྡོལ་ཕྱག་ཚ་ཅན། རྒྱལ་བ་ཐུབ་བསྟན་རྒྱ་མཚོ་ཉིད་ཀྱི་ཚེ་རབས་རྗེས་འཛིན་ལྗགས་ལུང་གནང་རྟེན་གྱི་ཕྱག་དཔེ། སྒྲོལ་མ་དཀར་སྔོན་གྱི་སྐུ་བརྙན་བཅས་བྱིན་རླབས་ཀྱི་གཟི་འོད་འབར་བ་མང་དུ་བཞུགས། འདིར་སྐབས་དང་འབྲེལ་ཕྱིར་ལྷ་རམས་པ་ངག་དབང་ཚུལ་ཁྲིམས་རིན་པོ་ཆེའི་རྟོགས་པ་ཅུང་ཟད་བརྗོད་ན། འཁྲུངས་ཡུལ་ནི་དན་ཏིག་ལྷ་སྡེའི་ནང་ཚན་སྤྱང་ཚང་ནང་སྟེ། མ་ཡུམ་ནགས་སུ་སོང་བའི་ལམ། དེའུ་རིགས་པ་ཟེར་བའི་གནས་སུ་གནོད་ཟུག་ཅུང་ཟད་ཀྱང་མེད་པར་བཙས་སྐབས་འབྲུག་གྲགས་པ་སོགས་ལྟས་ངོ་མཚར་བ་བྱུང་། ཆུང་ངུ་ནས་རང་དགོན་གྱི་ཆོས་སྒོར་ཞུགས། ནར་སོན་ནས་སྐུ་འབུམ་དུ་སུ་ཕེབས། དཔའ་རིའི་དགེ་རྒན་བློ་བཟང་རབ་གསལ་སོགས་བསྟེན་ནས་བཀའ་པོད་ཀྱི་གཞུང་ལ་སྦྱངས། རྒྱལ་བ་ཐུབ་བསྟན་རྒྱ་མཚོ་སྐུ་འབུམ་དུ་ཕེབས་དུས་རྒྱལ་བས་སྤྱན་བསྐྱངས་དཔེ་མེད་མཛད་པར་བརྟེན་རྒྱལ་བ་དང་ལྷན་དུ་དབུས་སུ་ཕེབས། འབྲས་སྤུངས་སྒོ་མང་ཆོས་གྲྭར་ཞུགས་ཏེ། ལྷ་རམས་དམ་བཅའ་ཚེགས་མེད་པར་བཞེས། རྒྱལ་བས་གཟིགས་པ་ཆེ་སྟབས་སླར་མདོ་སྨད་དུ་ཕེབས་དུས་གོང་སྨོས་ལྟར་གྱི་བྱིན་རྟེན་དེ་རྣམས་དང་། འཁྲུངས་ཡུལ་སྤྱང་ཚང་སྡེ་བའི་མ་ཎི་ཁང་དུ་ཡང་རྒྱལ་བ་རིན་པོ་ཆེ་ནས་ཕྱག་རྗེས་སྤར་པའི་འཕགས་པ་སྤྱན་རས་གཟིགས་ཀྱི་ཞལ་ཐང་བྱིན་རླབས་ཅན་ཞིག་བཅས་གདན་དྲངས་ནས་རང་དགོན་དུ་ཕེབས་ཏེ་ཡུན་རིང་བཞུགས། སྒོམ་ཆེན་གྱི་བྱམས་ཁང་རྟེན་དང་བརྟེན་པར་ཞིག་གསོས་གནང་། དུས་འབྲེལ་གསོ་སྦྱོང་དང་སྤྱོད་འཇུག་སྨོན་ལམ་ཚོགས་འདོན་དུ་བཙུགས་པ་སོགས་ཕྱག་རྗེས་གང་ལེགས་བསྐྲུན་པས་དགོན་པ་འདི་ལ་ཤིན་ཏུ་བཀའ་དྲིན་ཆེ། སླར་སྐུ་འབུམ་དུ་བྱོན་ནས་རྒྱ་ཡག་སྤྲུལ་པའི་སྐུ་དང་ཏིག་རྒྱ་སྤྲུལ་བའི་སྐུ་སོགས་ཀྱི་ཡོངས་འཛིན་མཛད་ཅིང་། དགུང་ལོ་མཐོན་པོའི་བར་དུ་བསྟན་པའི་བྱ་བས་དུས་འདས་པ་ཞིག་སྟེ་ཞར་ལ་བྱུང་བའོ། །

དེ་ནས་མཁན་པོ་རིན་པོ་ཆེའི་བླ་བྲང་གི་ལྷ་ཁང་དུ། དབུས་སུ་ཆེ་ཤོས་ལྷ་བཟོས་བཞེངས་པར་གྲགས་པའི་འཇམ་དབྱངས་ཀུན་གཟིགས། གཡས་སུ་རྗེ་ཙོང་ཁ་བ། གཡོན་དུ་ཇོ་བོ་རྗེ། གཞན་ཐུགས་རྗེ་ཆེན་པོ་བཅུ་གཅིག་ཞལ། བསྟེན་པ་རྒྱལ་བོ་བེ་ཧར་བཅས་བཞུགས། ཐུགས་རྗེ་ཆེན་པོའི་ནང་རྟེན་དུ། བྱང་སེམས་ཆོས་འཕགས་ཀྱི་ཚེམས། མཁན་ཆེན་བོདྷི་སཏྭའི་དབུ་སྐྲ། སངས་རྒྱས་འོད་སྲུངས་ཀྱི་འཕེལ་གདུང་སོགས་བྱིན་ཅན་མང་པོ་བཞུགས་པར་གྲགས། ཆེ་ཤོས་ལྷ་བཟོ་ཞེས་པ་ནི་སྐུ་འབུམ་འཇམ་དབྱངས་ཀུན་གཟིགས་ཀྱི་སྐུ་བརྙན་བཞེངས་མཁན་བློ་བཟང་བཤེས་གཉེན་ཞེས་གྲགས་སྐད་དང་ལྡན་པ་དེ་ཉིད་ཡིན་ནོ། །

འདུ་ཁང་དང་བླ་བྲང་ཆགས་པའི་རྒྱབ་ཀྱི་བྲག་རི་ནི་གཤིན་རྗེ་ཆོས་རྒྱལ་གྱི་སྐུའི་རྣམ་ཅན་དུ་ཡོད་པར་གླེང་། དགོན་པའི་གླིང་དབུས་སུ་རྒྱ་ཞུར་ཨ་ཁུ་འཇིགས་མེད་གཙོ་བྱས་པའི་ཉེ་ཚན་རྣམས་ཀྱིས་ཆེད་དུ་བཞེངས་ནས་བླ་མ་རྡོ་རྗེ་འཆང་ལ་ཕུལ་བའི་གཟིམ་ཁང་དུ། དབྱར་རྩའི་ལོ་ཀོ་ཚད་ནས་གདན་དྲངས་པའི་རྒྱལ་བ་ཡང་དགོན་པའི་གསེར་ཡུམ་དང་། རྗེ་ཡབ་སྲས་གསུམ་གྱི་གསུང་འབུམ། གནས་བཅུའི་སྐུ་བརྙན་སོགས་རྟེན་གསུམ་ཤིན་ཏུ་མང་བོ་བཞུགས། དེ་ནས་སྒོམ་ཆེན་དུ་གྲགས་པ་བླ་ཆེན་པོ་བསྙེན་པར་རྫོགས་པའི་སྒྲུབ་ཕུག་ཏུ། བྱམས་སྐུ་ཁྲུ་ཚད་གསུམ་མ། སངས་རྒྱས་སྟོང་སྐུ། མཁས་པ་མི་གསུམ་དང་བླ་ཆེན་པོའི་སྐུ་བརྙན། རྗེ་ཙོང་ཁ་བའི་གྱན་ཐང་དང་། ལྟུང་བཤགས་ལོགས་རིས་བཅས་བཞུགས། དེའི་གཡས་སུ་མཁན་པོ་བློ་བཟང་འཇིགས་མེད་རབ་བརྟན་འཇིགས་བྱེད་བསྙེན་ཆེན་དུ་བཞུགས་སྐབས་གྲུབ་དབང་འཇིགས་མེད་བསམ་གཏན་རིན་པོ་ཆེ་ཕེབས་ནས་མཚམས་ཁོང་དུ་བླ་མཆོད། ལམ་གཙོ། ལྟ་ཁྲིད་སོགས་གནང་བའི་སྒོམ་ཁང་དེ་ཡོད། གཡོན་ཕྱོགས་གདོང་གི་བྱམས་ཁང་དུ། བྱམས་པ་ཆེ་ཚད། ཇོ་སྐུ། མི་འཁྲུགས་པ་རྣམས་ཀྱི་སྐུ་བརྙན། ཨ་རིག་དགེ་བཤེས་ཆེན་མོའི་སྒོམ་ཁང་། སྒོམ་ཆེན་ཀླད་ཀྱི་ཐེམ་ཐོག་ཏུ་ལྕང་སྐྱ་གྲགས་པ་འོད་ཟེར་གྱི་སྒོམ་ཁང་བཅས་མཇལ་དུ་ཡོད། བར་སྐབས་གྲྭ་གྲངས་བརྒྱད་ཅུ་ཙམ་བཞུགས་པར། གཞི་གསུམ་གྱི་ཕྱག་ལེན། བདེ་མཆོག་དང་ཀུན་རིག་གི་སྒྲུབ་མཆོད། སྨན་ཆོག་ཆེན་མོ། དུས་ཆེན་བཞིའི་སྨོན་ལམ་ཟླ་ཆོས། ལོ་གཉིས་ཀྱི་མཚམས་སུ་མ་ཎི་བུམ་སྒྲུབ། འགྲིག་ལམ་ཀུན་སྤྱོད་སོགས་དང་བ་འདྲེན་པའི་ཆོས་ཀྱི་ཀུན་སྤྱོད་ཡར་ལྡན་དུ་ཡོད། དེ་ནས་ཐིས་པར་འགྲོ་བའི་ལམ་ཁར། བཙུན་མོ་མ་ཏྲི་ཕེབས་ལམ་སེང་གེས་བཀག་པས་སེང་གེའི་འགག་མདོ་ཞེས་གྲགས་པ་དང་། བཙུན་མོའི་འོ་མའི་ཆུ་རྒྱུན་དུ་གྲགས་པ་ད་ལྟའང་བྲག་ངོས་ནས་ཆུ་རྒྱུན་ཕྲ་མོ་རྒྱུན་མ་ཆད་པར་འབབ་པ་དང་། ལོ་གསར་ལུང་བ་ཞེས་པའི་བྲག་ངོས་སུ། སྒྲོལ་མ་ཉེར་གཅིག་རང་བྱོན། བྲག་ཐེམ་དུ་སྔོན་གྱི་ལྷ་ཁང་རྙིང་བའི་ཤུལ་ད་ལྟ་ལྷ་ཁང་ཞིག་ཞིག་ཏུ་གྲགས་པ། འོམ་བུའི་ལུང་མདོའི་གཡོན་ངོས་སུ་བྱམས་པ་རང་བྱོན། རིགས་གསུམ་མགོན་པོ་མཐོར་བརྩེགས། གཡས་ངོས་ན་སྤྱན་རས་གཟིགས་བཅུ་གཅིག་ཞལ་རང་བྱོན་ཞལ་བཅུ་གཅིག་འབུར་དོད་དུ་ཡོད་པའི་ཆེས་ངོ་མཚར་བ། ལྷ་མོའི་ཕོ་བྲང་དུ་གྲགས་པར་གནས་ཆུ་རྒྱུན་ཆད་མེད་པར་འབབ་པ་བཅས་དང་། ལྷ་སའི་ནང་དུ་བྲག་ངོས་སུ་སྔར་བླ་ཆེན་པོའི་སྐབས་བཤད་པ་ལྟར། ཞལ་ཞལ་བྱས་པའི་ངོས་ལ་སངས་རྒྱས་བྱང་སེངས་དང་། རྒྱའི་ལྷ་སྐུ་ཕུ་དུང་ཅན་ཚོན་རྩིས་སྤྲས་པ་དུ་མ་དང་། བྲག་ངོས་སུ་ཟླ་ཚེས་དང་ཉི་མའི་དབྱིབས་བརྩེགས་མ་ཅན་མདོག་མི་འདྲ་བ་རང་བྱུང་དུ་བཏོད་པ། རི་དྭགས་དང་འཁོར་ལོ་རང་བྱོན། དེའི་ལུང་མདོར་གནས་བརྟན་བཅུ་དྲུག་རང་བྱོན་དང་། དེའི་ཐད་ཀར་མཎྜལ་ཚོམ་བུ་སྤུངས་པ་འདྲ་བའི་བྲག་རི་རང་བྱོན་བཅས་ཡོད། གཞན་ཡང་། དན་ཏིག་གི་ལུང་མདོར་ཨི་རེ་དགོན་ཆག་ཟེར་བའི་དགོན་ཤུལ་ཞིག་ཡོད་པའི་ངོས་དེར་རྭ་ལོ་ཙཱ་བའི་སྒྲུབ་ཕུག་ཏུ་གྲགས་པ་དང་། དེའི་མདུན་ན་རྡོ་ལོག་པོ་ཞིག་ལ་མཚམས་ཐོ་ཡིན་ཟེར་བ་དང་། རི་གདོང་གི་རྩེ་ན་རྭ་ལོའི་རྫོང་ཟེར་བ་བྲག་ཕུག་ཧ་ཅང་གཏིང་རིང་བ་མིས་མི་ཐར་བ་ཞིག་ཀྱང་ཡོད་པར་གྲགས་སོ། །སྤྱིར་རྭ་ལོ་ཆེན་པོ་ཐུན་མོང་སྣང་ཚོད་དུ་ཨ་མདོ་ཕྱོགས་སུ་ཕེབས་པའི་ལོ་རྒྱུས་མི་སྣང་ངོ་། །

ཐིས་པའི་གནས་སུ་རྔམས་ཤིན་ཏུ་མཐོ་བའི་བྲག་ཟུར་བསླངས་ཐོག་ཚད་ལས་མཐོ་བ་ཞིག་གི་ཁར་ལྡིང་ཐབས་སུ་གནས་པའི་མཆོད་རྟེན་ཐོག་ཚད་གཉིས་ལྷག་སྐོར་བར་འགྲོ་རུང་བ་མཆོད་རྟེན་གནམ་བབས་སུ་གྲགས་པ་དང་། དེའི་གཡོན་དུ་བྲག་ཤིན་ཏུ་མཐོ་བ་གཏོར་ཟོར་ལྟ་བུ་གསུམ་སྒྱེད་པུའི་ཚུལ་དུ་བསླངས་པ། རྩེ་མཉམ་པ་ལ་བཀལ་བའི་རྡོ་ཟངས་པའི་དབྱིབས་སུ་ཡོད་པ་ལ། རྡོ་ཚོགས་ཟངས་ཟེར་བའི་ཡ་མཚན་ཅན་དང་། ཡང་དེ་དག་གི་གཡས་སུ་མཆོད་རྟེན་ས་ལ་གནྡྷ་ཞེས་པ་སྔོན་དུས་ཀྱི་མཆོད་རྟེན་རྙིང་བ་ཆེ་ཚད་དང་། དཀར་ཆག་རྙིང་བར་རྒྱལ་བ་བསོད་ནམས་རྒྱ་མཚོའི་བཞུགས་ཁྲི་དང་ཞབས་རྗེས་ཞེས་བཤད་པ་ལ། བཞུགས་ཁྲི་ནི་དགོན་ཤུལ་གྱི་ས་དཀྱིལ་དུ་ཡོད་པ་དེ་ལ་ངོས་འཛིན་ཅིང་། ཞབས་རྗེས་ཀྱི་རྡོ་བ་ནི་དཀྱིལ་འཁོར་ནང་དུ་འགྲོ་བའི་ལ་ཤིན་ཏུ་གཟར་བོ་དེའི་རྐེད་ན་ཡོད་པ་དེ་ཡིན་པར་ངེས། བཞུགས་ཁྲི་དེ་དང་ཉེ་བར་སྔོན་དུས་ཀྱི་ཧྭ་ཤང་གི་དགོན་རྙིང་སྔ་ཕྱིའི་ས་མིག་ཡོད་པ་དེར་གནའ་དུས་ཀྱི་ལྷ་སྐུ་མཆོད་ཆ་སོ་ཕག་ཤིན་ཏུ་ཆེ་ཚད་སོགས་ས་འོག་ནས་ཐོན་པ་དེང་སང་ཡང་རྙེད་རྒྱུ་ཡོད་དོ། །དེ་ནས་ཨ་མ་ཅར་གྱི་འགྲོ་ལམ་དུ་བྲག་སྒོ་ཟེར་བའི་བྲག་ངོས་ཤིག་ཏུ་ལྷ་ལུང་དཔལ་རྡོར་གྱི་ཞབས་ཕྱགས་སུ་གྲགས་པའི་ལྷམ་གཉིས་ཀྱི་རྣམ་པའི་རྡོ་བ་རང་བྱོན་ཡོད། ཐིས་པ་ཉེ་འཁོར་དུ་སྔོན་ཆང་སྡེ་གྲོང་ཡང་ཆགས་པར་བཤད་དེ་ད་ལྟའང་རྫོང་ནང་ཚང་དང་། ཁྱ་རྒྱའི་ཐོད་ཚང་སོགས་ཐིས་པ་ནས་འོངས་པར་གྲགས། དེར་མ་ཟད་ལྷ་སའི་ལུང་མདོར་ལ་བཙས་ཤིག་ཡོད་པ་རྫོང་ནང་ཚང་གི་ཡིན་པས་ཡང་ཏིག་ཏུ་ནམ་མཇལ་བར་འགྲོ་བའི་ཚེ་ལ་བཙས་དེ་བསྟོད་པའི་སྲོལ་ག་ཕྱིས་ཀྱི་བར་དུ་ཡོད་པར་གྲགས་སོ། །བྲག་དགོན་པའི་ཆོས་འབྱུང་ལས། ཁྲི་གའི་རྒྱལ་བ་ཡང་དགོན་པའི་སྒྲུབ་གནས་སྔོན་མོ་རྫོང་བཤད་སྐབས། འདི་བ་ཡང་ཏིག་ཕྱོགས་ནས་འཁྲུངས། དེས་དན་ཏིག་ཐིས། ཡང་ཏ་ཐིས། ཁ་ཤ་ཐིས་ཏེ་ཐིས་གསུམ་གྱི་དགོན་པ་བཏབ། ཅེས་གསུངས་པ་ལྟར་རྒྱལ་བ་ཡང་དགོན་པ་དེ་ཉིད་ཡང་ཏིག་དང་ཁད་ཉེ་བའི་དབྱར་ས་ནས་འཁྲུངས་ཤིང་། གོང་སྐྱའི་དགོན་པ་བཏབ་པས་དགོན་པའི་མིང་ལ། ཡང་དགོན་ཐུབ་བསྟན་གླིང་དུ་བཏགས་པར་གནའ་ནས་གྲགས་ཆེ་བ་ལྟར་ངོས་ཀྱི་ལག་ཏུ་ཡོད་པའི་ཕག་མོ་གྲུ་བ་ཀུན་དགའ་ལེགས་པའི་འབྱུང་གནས་ཀྱི་བཀའ་ཤོག་དང་། ཆུ་བཟང་ངག་དབང་ཐུབ་བསྟན་དབང་ཕྱུག་གི་རྣམ་ཐར་དུའང་གོང་སྐྱའི་དགོན་ལ། ཡང་དགོན་ཞེས་འབྱུང་མོད། འོན་ཀྱང་དེས་དན་ཏིག་ཐིས་ཀྱི་དགོན་པ་ཇི་ལྟར་བཏབ་པའི་ལོ་རྒྱུས་ནི་དེང་སང་ཡོངས་སུ་མ་གྲགས་པས་དཔྱད་པར་བྱའོ། །

དེ་ནས་དཀྱིལ་འཁོར་ནང་དུ་ཤིན་ཏུ་དཀན་གཟར་ཆེ་བའི་བྲག་ངོས་སུ་རྡོ་རྗེ་འཇིགས་བྱེད་ཀྱི་དཀྱིལ་འཁོར་རང་བྱོན་དུ་ངོས་འཛིན་པའི་འབུར་བཏོད་གྲུ་བཞི་ཡ་མཚན་པ་དང་། དེའི་ཀླད་ན་རྒྱལ་བ་བསོད་ནམས་རྒྱ་མཚོའི་སྐབས་སུ་བཤད་པའི་གཏེར་སྒོ་ཕྱེ་བ་དེའི་གཏེར་སྒོ་ཡིན་ཞེས་རྡོ་སྲོག་ཆགས་འདྲ་བ་ཞིག་ཡོད་པ་དེ་ལ་ངོས་འཛིན་པའི་ངག་རྒྱུན་ཡོད། དེ་ནས་ཤིན་ཏུ་བགྲོད་དཀའ་བའི་ལམ་བརྒྱུད་དེ་ཕྱིན་ཚེ་ཡང་ཏིག་གི་རྫོང་ནང་དུ་སླེབས། དེར་སློབ་དཔོན་པདྨས་སྤྲུལ་བ་བཀྱེས་ནས་ཐོག་མར་གནས་སྒོ་ཕྱེ་ཞིང་ཨུ་རྒྱན་གྱི་སྒྲུབ་ཕུག་ཏུ་ཌཱ་མ་རུ་དང་རྐང་གླིང་རང་བྱོན། ཞབས་རྗེས། སློབ་དཔོན་རིན་པོ་ཆེས་སྲིན་མོ་གདུག་པ་ཅན་བཏུལ་བའི་གནས། མཐུ་སྒྲུབ་མཛད་པའི་རྡོ་ཟོར། ཕུར་གདབ་ཀྱི་རྟགས་རྡོ་ལ་རང་བྱུང་དུ་བབས་པ། ཚེ་བུམ་དུ་ངོས་འཛིན་པའི་བྲག་རི་བུམ་པའི་རྣམ་ཅན་བྲག་རིའི་རྩེར་ཁ་རྒྱན་མཚོན་བྱེད་ཡལ་ག་ལོ་འདབ་སྟུག་པོ་རྒྱས་པའི་ལྗོན་ཤིང་། བྲག་རིའི་གཤམ་དུ་ཚེ་བུམ་གྱི་བདུད་རྩི་འབབ་པའི་མཚོན་བྱེད་དྭངས་ཤིང་བསིལ་བའི་ཆུ་སྦྱིན་གྱི་མཐིལ་ན་སློབ་དཔོན་པདྨའམ་རྒྱལ་བ་བསོད་ནམས་རྒྱ་མཚོའི་ཞབས་རྗེས། ཚེ་བཅུད་བུམ་པའི་གཏེར་དང་ཆོས་གཏེར་སྦས་པའི་སར་ཀླུ་བདུད་བཙན་གསུམ་བཀའ་སྲུང་དུ་བསྒོས་པའི་དམ་རྟགས་བཅས་ཡ་མཚན་པ་ཤ་སྟག་དང་། དེ་ནས་བྲག་ལམ་བརྒྱུད་དེ་ལུང་བའི་ཕ་ཁར་ཕྱིན་ཚེ་རྡོ་བཀའ་འགྱུར་ཟེར་བའི་བྲག་ཐེམ་གླེགས་བམ་གྱི་ཚུལ་འདྲ་བ་མང་བོ་བརྩེགས་པའི་བྲག་རི་ཡ་མཚན་ཅན་དང་། དེའི་ལུང་བའི་ཐད་སོར་བདེ་མཆོག་ཡབ་ཡུམ་རང་བྱོན་ཆེ་ཚད་གཅིག་དང་། གཏེར་ནས་བཏོན་པའི་དུང་དཀར་གྱི་ཤུལ་བཅས་ཡོད། དེ་ནས་ཕྱིར་དན་ཏིག་འཁོར་ཕྱོགས་སུ། བཀྲ་ཤིས་རྟགས་བརྒྱད། སྒྲོལ་མ་ཉེར་གཅིག་གི་སྒྲུབ་ཕུག རྒྱལ་ཆེན་བཞི་བཅས་རང་བྱོན་དུ་ངོས་འཛིན་པ་རྣམས་དང་། བླ་ཆེན་པོའི་བཀའ་སྲུང་དུ་གྲགས་པའི་མགོན་པོ་བྱ་རོག་གདོང་གནས་པར་བཤད་པའི་བྲག་རི་མཐོན་པོར་གསོལ་མཆོད་ཀྱིས་མཉེས་པར་བྱས་ན་འཕྲིན་ལས་མྱུར་བའི་ཚད་དུ་བྱེད་པ་བཅས་མཇལ་དུ་ཡོད་དོ། །

ལྷ་སྡེ་ལ་ཁོ་ཡར་སྟོད་སྨད་གཟུངས་སྡེ་བཅུ་གཉིས་དང་། དཔྱིད་པ་ཁ་གསུམ་བཅས་ཡོད་པ་ལས་ཁོ་ཡར་སྔགས་ཁང་དུ་རྟེན་བཞེངས་རྒྱ་ཆེ་ཞིང་། བཀའ་བརྒྱད། རྟ་མགྲིན། ཐུགས་རྗེ་ཆེན་པོ་སོགས་ཀྱི་སྒྲུབ་འཕྲིན་བཅས་དང་། ཚེས་བཅུ་ཆགས་མེད་སོགས་ཀ་རིང་སྒོམ་སྤྲུལ་རྟ་མགྲིན་ཚང་སྐུ་ཕྲེང་སྔ་ཕྱིས་འཛིན་བདག་བྱེད་བཞིན་པ་ཡིན། ཚུལ་དེ་དག་ལ་རྣམ་འདྲེན་སྐལ་ལྡན་རྒྱ་མཚོའི་ཆོས་འབྱུང་ལས། ཨུ་རྒྱན་རིན་པོ་ཆེས་ཀྱང་སྤྲུལ་བ་དུ་མ་བཀྱེས་ཏེ་གཉའ་གོང་བྲག་དཀར་དང་། ཡང་ཏིག་དང་། མཚོ་སྙིང་མ་ཧཱ་དེ་བཱ་ལ་སོགས་པའི་སྒྲུབ་གནས་དུ་མའི་སྒོ་ཕྱེ་ཞིང་བྱིན་གྱིས་བརླབས། ཞེས་དང་། མཁས་པ་མི་གསུམ་དང་བླ་ཆེན་དགོངས་པ་རབ་གསལ་བཞུགས། ལྷའི་དབང་བོ་བརྒྱ་བྱིན་གྱིས་བླ་ཆེན་ལ་ཆོས་གསན་པར་ཕེབས། མཚན་མོ་གནས་ཐམས་ཅད་འོད་ཀྱིས་སྣང་བར་བྱས། ཡང་ཏིག་ཨུ་རྒྱན་གྱི་གྲུབ་གནས་སུ་རྗེ་བསོད་ནམས་རྒྱ་མཚོར་ཞལ་གཟིགས། གཏེར་སྲུང་གཏེར་དང་བཅས་པའི་སྣང་བ་ཤར། ཨུ་རྒྱན་བཞུགས་པའི་སྣང་བ་བྱུང་། ཞེས་གསུངས་པ་ལྟར་རོ། །

དན་ཏིག་ཅེས་འབྲི་བའི་ཡི་གེ་ལ་སྡེ་དགེ་བཀའ་འགྱུར་དཀར་ཆག་སོགས་སུ་ལེགས་སྦྱར་སྐད་ཡིན་ཤག་གིས་དནྟིག་བཅས་བརྩེགས་མ་ཅན་དང་། དཔེ་འགར་ཏན་ཏིག་ཅེས་གཉིས་ཀའང་སྡེ་བ་གསུམ་པའི་དང་བོ་བྲིས་པ་མཐོང་མོད། དཔེ་དག་པ་མང་བོར་དཀྱུས་སུ་བྲིས་པ་འདི་ཉིད་འབྱུང་ངོ་། །གང་ལྟར་བླུན་སྐད་དུ་ད་འདུག་དང་ཡང་འདུག་ཅེས་ངེས་ཚིག་ཐ་ཤལ་དང་བཅས་འཆད་པ་ནི་ཕྱིན་ཅི་ལོག་གི་བརྡ་ཆད་དུ་ཤེས་པར་བྱའོ། །དེ་ལྟར་ན་གྲུབ་པའི་གནས་ཆེན་འདི་ཉིད་ཀྱི་ལོ་རྒྱུས་གང་ཤེས་ཚིག་ཚོགས་ལ་མ་འཛེམ་པར་སྔོན་གྱི་ཆོས་འབྱུང་། དམ་པ་སོ་སོའི་རྣམ་ཐར། ངག་རྒྱུན་ཁུངས་མ་ལས་བྱུང་བ་རྣམས་དང་། རང་གི་མཐོང་ཐོས་ཅི་ཡོད་བཅས་ཕྱོགས་གཅིག་ཏུ་བསྡུས་པའི་ཚུལ་གྱིས་རེ་ཞིག་འདི་ཙམ་བཀོད་དོ། །

སྨྲས་པ། ཕྱི་རུ་ངམ་གནག་རྫ་བྲག་སྟུག་པོའི་རྫོང་། །ནང་དུ་བྱིན་རྟེན་བྱུར་བུར་སྤུངས་པའི་མཛོད། །གསང་བར་འཁོར་ལོ་སྡོམ་པའི་གཞལ་མེད་ཁང་། །ཆེད་བརྗོད་ཚིག་ཕྲེང་སྨྲ་བྱེད་བདུད་རྩི་ཉིད། །པདྨའི་ཚལ་ལ་བུང་བའི་འདུ་འགོད་བཞིན། །རྒྱ་མཚོའི་ཀློང་དུ་ཉལ་འགྲོའི་ཆུ་རྒྱུན་བཞིན། །དྲི་མེད་མཁའ་ལ་དབྱར་སྐྱེས་ཕྲེང་བ་བཞིན། །གནས་དེར་རིས་མེད་སྐྱེས་ཆེན་ངང་གིས་འདུ། །ལ་ལ་ཕྱག་མཆོད་དགེ་ལ་བརྩོན་པས་བྲེལ། །ལ་ལ་ཡོངས་རྫོགས་ལམ་བཟང་སྒོམ་པས་བྲེལ། །ལ་ལ་འཆད་སྤེལ་གཞན་དོན་ལས་ཀྱིས་བྲེལ། །ལ་ལ་རིམ་གཉིས་ཏིང་འཛིན་གར་གྱིས་བྲེལ། །རྒྱལ་སྲས་སྤྱོད་པ་ཕ་མཐར་ཕྱིན་པའི་གནས། །ལྷ་དབང་ས་ལ་བབས་པའི་ཡ་མཚན་བྲག །བསྟན་པའི་མེ་རོ་སྦར་བའི་དབུས་འགྱུར་འཆང་། །འདི་འདྲ་འཇིག་རྟེན་གཞན་ན་ཟླ་བོས་དབེན། །གང་གི་རང་བཞིན་གསལ་བྱེད་འབར་བའི་གློག། །ཐོགས་མེད་ཁ་ལ་འགྱུ་བའི་ལོ་རྒྱུས་མཁན། །ཁོ་བོའི་ལྕེ་རྩེ་གཞོན་ནུའི་རོལ་རྩེད་ཀྱང་། །བསྐལ་བའི་དཀྱུས་སུ་དོན་དང་ལྡན་པར་གྱུར། །ཅེས་བྱ་བ་ནི་སྙན་པའི་ངག་གི་རྒྱུད་མངས་རང་འཁྲོལ་ལས་བྱུང་བའི་ངལ་གསོའི་ཚིགས་སུ་བཅད་པའོ། །

གཉིས་པ་སྒར་བ་ཁ་དྲུག་གི་སྒྲུབ་སྡེ་གཞན་ལེ་ལག་དང་བཅས་པའི་ལོ་རྒྱུས་ཤེས་ཚད་མདོ་ཙམ་དུ་བརྗོད་པ་ལ། མཚུངས་ཟླ་མེད་པའི་མ་དགོན་ནི་ཚེ་ཏན་དགོན་དགའ་ལྡན་བཤད་སྒྲུབ་གླིང་ཡིན་ལ། དེའི་འོག་ཏུ་རིམ་བཞིན་དན་ཏིག ཡང་དགོན། གཅན་ཕུག མཐུ་བ། ཀ་ཐུང་རྣམས་ནི་བུ་དགོན་ཡིན་ནོ། །དེ་ལྟར་ན་ཡང་དན་ཏིག་བཤད་པའི་རྗེས་སུ་སའི་ཆགས་ཚུལ་ལྟར་གཡས་སྐོར་གྱིས་རིམ་པ་ལྟར་བཤད་ན་སྟབས་བདེ་བས། མཐུ་བ། ཀ་ཐུང་། ཚེ་ཏན། ཡང་དགོན། གཅན་ཕུག་གི་གོ་རིམ་ལྟར་བཤད་པར་བྱའོ། །

དགོན་དེ་དག་གི་ཆགས་དབྱིབས་ནི། ཕལ་ཆེ་བ་ཞིག་ཙོང་ལ་རིང་མོའི་རི་རྒྱུད་ཤར་དུ་བརྐྱངས་པའི་ལྷོ་ངོས་ཀྱི་རི་སུལ་དག་ཏུ་ཆགས་པ་ལས། མཐུ་བ་དགོན་ནི་བྲག་དཀར་སྤུན་གསུམ་གྱི་ལྷ་ཞོལ་དུ་ཆགས་ཤིང་། ཀ་ཐུང་ནི་ཆིས་ལི་ཟི་ཞེས་ཡོངས་སུ་གྲགས་པའི་སྨན་ཆུ་གང་ལས་བྱུང་བའི་མཚོ་སྨན་གྱི་རི་དང་། རྒྱལ་བ་བསོད་ནམས་རྒྱ་མཚོས་དམ་ལ་བཏགས་པའི་དྲག་རྩལ་མཐུ་བོ་ཆེ་གཡག་ལང་གི་རྫ་རི་མཐོན་པོའི་བར་གྱི་རི་ངོས་ཤིག་ན་ཡོད་དོ། །དེ་ལ་མཐུ་བ་ཀ་ཐུང་གཉིས་ནི་སྔོན་དུས་བྱ་ནམ་གྱི་གསེར་ཁ་ཞེས་པའི་གནས་སུ་ལྷན་གཅིག་ཏུ་ཡོད་དུས། སྐྱ་རེངས་དགོན་ཞེས་ཟེར་བ་ལས་སོ་སོར་གྱེས་པ་ཡིན་ལ། རྒྱལ་དབང་ལྔ་བ་པ་དགུང་ལོ་ཉེར་བདུན་དུས་ཏཱ་མིང་རྒྱལ་ས་སློག་མཁན་ཟི་ཁྲོན་ལི་ཙེའི་ཇག་འཁྲུག་དེའམ། རྒྱལ་མཆོག་བདུན་པ་དགུང་ལོ་བཅུ་དྲུག་པར་ཉན་ཀུང་ཡེས་མགོ་མནན་པའི་དུས་འཁྲུག་གང་རིགས་སུ། འགྲུལ་ལམ་ནས་རྐུན་ཇག་གི་འཚེ་བ་མང་རྐྱེན་དགོན་གནས་སྤོ་དགོས་བྱུང་བར་གླེང་། དེ་དུས་འདུ་ཁང་ལ་སོ་ཕག་སྒྲོན་མ་ཐུབ་པར་ཡོད་སྟབས་འདུ་ཁང་སྐྱ་རྡང་མའི་ནང་དུ། གསུང་རྟེན་ཡུམ་སྐྱ་འབར་མ་ཞེས་པ་དང་། བསྟེན་པ་ལྷ་མོ་དང་རྡོར་ལེགས་བཅས་ཡོད་པ་ལས། དགོན་གནས་སྤོར་སྐབས་དགེ་འདུན་པ་རྣམས་འདུ་ཁང་སྐྱ་རྡང་མར་ཚོགས་ནས། ཡུམ་སྐྱ་འབར་མ་མགོ་ལ་གཏུགས་ཤིང་བ་ཤ་ལག་གཡས་མ་ཁ་ལ་རེག་སྟེ་གྲོས་འཆམ་ཐུགས་མཐུན་གྱི་ངང་ནས་དགོན་གནས་སོ་སོར་སྤོས་པ་ཡིན་ཟེར་སྐད། བསྟེན་པ་རྡོར་ལེགས་སྐྱ་རེངས་ཁ་གསུམ་གྱི་སེར་མོས་ཁྱེར། ལྷ་མོའི་རྟེན་ཐང་ཀ་ཐུང་སེར་མོས་གདན་དྲངས། ཡུམ་སྐྱ་འབར་མ་ད་ལྟ་མཐུ་བ་ཚང་གི་མ་ཎི་ཁང་དུ་བཞུགས། ཚོགས་ཟངས་འདན་མ་ནས་རིམ་གྱིས་ཕྱིར་ཁྱེར་ནས་ད་ལྟ་སེར་དྲིས་དགོན་པའི་གཞུང་དུ་ཡོད་སྐད། དེ་ནས་ཁྱ་རྒྱའི་སེར་མོ་རྣམས་ཁྱ་རྒྱའི་གྲོང་གི་གཞུང་ཆུའི་ཕར་འགྲམ་དུ་ཆགས། འདན་མའི་སེར་མོ་འདན་མའི་སྡེ་བའི་གཡོན་གྱི་ཁུད་དེར་ཆགས། མཐུ་བ་ཚང་གི་སེར་མོ་རྣམས་ད་ལྟའི་མཐུ་དགོན་འདིའི་གཡས་ངོས་ཀྱི་ཉིན་དེར་ཆགས་པས་དེང་སང་དེ་དག་གི་ཤུལ་ལ་དགོན་ཆག་ཁུད་དང་དགོན་ཆག་ངོ་ཟེར་བ་ལྟ་བུའི་མིང་གིས་འབོད། ཀ་ཐུང་ཡང་ཐོག་མར་བྱ་ནམ་ལུང་བའི་འགོལ་ས་ཞིག་ཏུ་སྤོས། དེ་ནས་འགར་རུ་ཤི་སྣའི་གྲོང་དང་ཉེ་བའི་རི་ཞོལ་དུ་སྤོས། དེ་ནས་ད་ལྟའི་དགོན་ས་འདིར་སྤོས་པ་ཡིན་ཞེས་པའི་ངག་རྒྱུན་ཁུངས་མ་འདུག དེས་ན་དགེ་ལྡན་ལྔ་མཆོད་ཆེན་མོ་སྐྱ་རེངས་ཁ་བཞི་ནས་ལོ་རེར་གཏོང་རེས་བྱེད་པས་ཡར་གྱི་ཁ་གསུམ་པོས་གཏོང་སྐབས་ཀ་ཐུང་གི་སེར་མོ་རྣམས་ཡར་ལ་ཕེབས་དགོས་ཤིང་ཀ་ཐུང་གིས་གཏོང་སྐབས་མཐུ་དགོན་གྱི་སེར་མོ་རྣམས་མར་ལ་ཕེབས་ནས་དགེ་སྐོས་ཡར་དང་དབུ་མཛད་མར་གྱིས་བྱེད་པའི་སྲོལ་ད་དུང་ཡང་མ་ཉམས་པར་ཡོད་པ་ནི་རྒྱུ་མཚན་དེ་ལ་བརྟེན་ཏོ། །

སྐྱ་རེངས་དགོན་ཞེས་ཐོགས་དོན་ནི། ལ་ལས་ཆོས་ཐོག་ནམ་ཚོགས་དུས་སྐྱ་རེངས་ཤར་སྐབས་ཚོགས་པས་ན་དེ་སྐད་ཟེར། ལ་ལས་གྲོང་དུ་གཤིན་ཆོག་སོགས་ལ་གྲྭ་ཚང་ནམ་ཕེབས་དུས་སྐྱ་རེངས་ཤར་སྐབས་ཐོན་པས་ན་དེ་སྐད་ཟེར་ཞེས་བཤད་དེ་གང་ལྟར་ཡང་ད་ལྟའི་དུས་ནའང་གྲོང་གི་ལོ་ལོན་ཚོས་མནའ་སྐྱེལ་བའི་ཚེ་སྐྱ་རེངས་དགོན་པའི་རྡོར་ལེགས། ཞེས་པའི་ཁ་སྐད་ཡོད་པས་དགོན་པའི་མིང་ལ་སྐྱ་རེངས་ཞེས་ཟེར་བ་ནི་ཡང་དག་པའོ། །དགོན་པ་ནམ་སྤོས་ཀྱི་དུས་རགས་པ་ཙམ་ནི་འདི་ལྟར་ཤེས་ཏེ། རྒྱལ་བ་བསོད་ནམས་རྒྱ་མཚོ་ལམ་རྒྱུད་དེར་ཕེབས་ནས་བྱ་ནམ་ནང་དུ་བཞུགས་ཁྲི་དང་ཞབས་རྗེས་ཡོད་པ་ལ་དཔགས་ན། དེ་དུས་སྐྱ་རེངས་དགོན་པའི་བསྙེན་བཀུར་ཞུས་པའི་རྐྱེན་གྱིས་བྱིན་རྟེན་དེ་བྱུང་བ་ཡིན་པར་ཚད་མས་གྲུབ་གཤིས། དེའི་དུས་སུ་སྐྱ་རེངས་དགོན་གསེར་ཁར་ཡོད་ངེས་པ་དང་། རྒྱལ་མཆོག་བདུན་པའི་སྐུ་རིང་ལ་བྱོན་པའི་མཁན་པོ་དཔལ་ལྡན་རྒྱ་མཚོས་སྐྱ་རེངས་ཁ་བཞི་འཛིན་བདག་གསར་དུ་བྱས་སྐབས་ཕྱག་རྫས་མང་བོ་བཏང་ནས་པཱ་ཀྲུའུ་ཚང་གི་བླ་བྲང་ཐོབ་པ་དེ་ད་ལྟའི་མཐུ་བའི་བླ་བྲང་འདི་ལ་ངོས་འཛིན་པ་ལྟར་ན་ཕལ་ཆེར་རྒྱལ་དབང་ལྔ་བའི་སྐུ་ཚེ་སྟོད་ཙམ་ལ་ཡིན་པར་སེམས། པཱ་ཀྲུའུ་ཚང་ཤིན་ཏུ་དར་བའི་དུས་ནི་གོང་མ་ཁང་ཞིའི་དུས་ཡིན་པས། ཁང་ཞི་ཁྲི་ལ་གསར་དུ་བཞུགས་དུས་རྒྱལ་དབང་དགུང་ལོ་ཞེ་དྲུག་ཡིན་པ་དང་། པཱ་ཀྲུའུ་དགོན་ཤིན་ཏུ་དར་བའི་དུས་སུ་ཐང་རིང་གིས་འཛིན་བདག་བྱས་པ་ལས་མགོ་བཤངས་པ་དང་། སེར་དྲིས་དགོན་དང་། མཐུ་དགོན། ཆིས་ལི་ཟི་སོགས་ཀྱང་བུ་དགོན་དུ་བྱས་པ་ཡིན་ལས་ཆེ། དེ་ནས་མཐུ་བ་ཚང་གི་ད་ལྟའང་བླ་བྲང་ཚང་ཟེར་བའི་ཁྱིམ་དེ་ག་འཁྲུངས་པའི་ཨ་ལགས་བཱང་གྱ་ཟེར་བས་ཁ་གསུམ་གྱི་སེར་མོ་རྣམས་ཕྱོགས་གཅིག་ཏུ་བསྡུས་ནས་ད་ལྟའི་མཐུ་དགོན་བཀྲ་ཤིས་ཆོས་སྡེ་གླིང་འདི་ཆགས། ཡུལ་ངན་བྱུང་དུས་དྲ་མའི་ནང་དུ་སྨུག་པ་འཐིབས་པས་ཁྱ་རྒྱའི་སེར་མོ་རྣམས་མ་རངས་པའི་ཁ་སྐད་ད་དུང་ཡང་ཡོད། དུས་ཀྱི་སྔ་ཕྱི་གསལ་བོ་མི་ཤེས་ཀྱང་གོང་སྨོས་ཀྱི་སྐབས་དེ་ཙམ་དུ་པཱ་ཀྲུའུ་ཚང་ནས་འཛིན་བདག་བྱས་ཤིང་བླ་བྲང་བཞེངས་པ་ད་ལྟའི་ཤུལ་གྱི་བླ་བྲང་འགབ་མ་འདི་ལ་ངོས་འཛིན། འདུ་ཁང་ཀླད་ན་བླ་བྲང་མཆོད་ཁང་ཟེར་བའི་སྐུ་ཁང་ཀོག་པོ་དང་། མཆོད་རྟེན་རྙིང་བ་གཉིས་བཅས་དེང་སང་ཡོད་པ་དེ་ཉིད་ཨ་ལགས་བཱང་གྱའི་མཆོད་ཁང་དང་གདུང་རྟེན་ཡིན་ཞིང་། དེའི་སྐུ་སྐྱེ་ཕྱི་མ་སྔགས་རམས་པ་དགེ་འདུན་འོད་ཟེར་ནི་ཁྱ་རྒྱའི་ནང་གོང་མ་ཚང་ནས་འཁྲུངས་ཏེ། གཞོན་དུས་ནས་རབ་ཏུ་བྱུང་། བྱ་ཁྱུང་གི་ཆོས་སྒོར་ཞུགས། གཞུང་ལུགས་ལ་སྦྱངས། སྔགས་རམས་པའི་མཚན་བཏགས་བླངས། ཆུ་བཟང་ངག་དབང་ཐུབ་བསྟན་དབང་ཕྱུག་ཚང་གིས་སྦྱིན་བསྐྱངས་གནང་སྟེ། མཚོ་སྔོན་པེ་ལི་འཇིགས་མེད་ཡེ་ཤེས་ཀྱི་ཞབས་བརྟན་བླ་མར་མངགས། ཕྱག་རྫས་གང་བྱུང་བྱ་ཁྱུང་ལ་བསྔོས། དེའི་སྟབས་ཀྱིས་ཟི་ན་ཚུལ་ཁྲིམས་དར་རྒྱས་བྱ་ཁྱུང་ཁྲི་བཞུགས་ལོ་དང་བོ་རབ་བྱུང་བཅུ་གསུམ་པའི་མེ་སྦྲུལ་ལ་དེ་ཉིད་ཀྱིས་བཀའ་ཤོག་དང་། མེ་རྒན་ཆོས་རྗེའི་ཆོ་ལོ་གནང་སྟེ། བཀའ་ཤོག་དེ་མཐུ་དགོན་ནང་གོང་མའི་མཆོད་ཁང་དུ་ད་ལྟའང་མཇལ་དུ་ཡོད། སེར་དྲིས་མ་ཎི་བ་བློ་བཟང་བསྟན་པའི་ཉི་མས་བརྩམས་པའི་ཀ་ཐུང་འདུ་ཁང་དཀར་ཆག་ཏུ། ཁྱ་རྒྱའི་ཆོས་རྗེ་ཁུ་དབོན་རྣམ་གཉིས། ཞེས་ཀྱང་འབྱུང་ངོ་། །དེའི་སྐུ་སྐྱེ་ཕྱི་མ་ཁྱ་རྒྱའི་ཐོད་ཚད་ཨ་ཀ་ཞེས་པ་གྲྭ་ཐོག་དེར་དགོན་པའི་ཡ་རབས་འདོན་བཟང་སྐད་བཟང་གི་ཚད་དུ་རྩི་བ་ཉིད་ཡིན་པར་གླེང་མོད། བླ་སར་མ་བཀོད་པས་དེ་ནས་བཟུང་བླ་རབས་ཀྱི་རྒྱུན་ཆད་སྣང་། རབ་ཡོས་ཤིང་འབྲུག་ལོར་སྐུ་མཆེད་རིན་པོ་ཆེ་བློ་བཟང་བསྟན་པ་རྒྱ་མཚོ་དགོན་འདིར་ཕེབས། ཀུན་རིག་དབང་དང་། མཆོད་འབུལ་གྱི་རྒྱུན་བཙུགས་པར་འཐེབ་བཅས་གནང་། ཡབ་རྗེ་གསེར་ཁང་བའི་དབུ་ཞྭ་དང་འགུ་ཚེ། སྐུ་མཆེད་རིན་པོ་ཆེ་རང་གི་ཞབས་འབོབ་བཅས་རྟེན་སྐལ་དུ་སྩལ་འདུག འདུ་ཁང་ལ་རབ་གནས་མཛད། འདུ་ཁང་དེ་ཉིད་དགོན་དེ་ཆགས་ནས་ཐོག་མར་བཞེངས་པའི་འདུ་ཁང་ཡིན་ཞིང་། དེའི་སྔོན་དུ་ཚོགས་ཁང་ཙམ་ལས་མེད་ཟེར། རབ་གནས་མཛད་པའི་ཤིང་འབྲུག་ལོ་དེ་ནི་མཁན་པོ་བློ་བཟང་འཇིགས་མེད་རབ་བརྟན་འཁྲུངས་ནས་ལོ་གཉིས་དང་། ཞབས་དྲུང་ཚོན་པོ་མ་དགུང་ལོ་ཞེ་གཅིག་གི་ལོ་ཡིན། དེ་ནས་རབ་ཚེས་ལྕགས་ཡོས་ལོར་རྗེ་ཞྭ་དམར་དགེ་འདུན་བསྟན་འཛིན་རྒྱ་མཚོ་དཔལ་བཟང་པོ་ཕེབས་ནས། ཐེག་ཆེན་གསོ་སྦྱོང་དང་། དགའ་ལྡན་ལྷ་བརྒྱ་མའི་ཁྲིད་ཅིག་གནང་། སྐབས་དེར་གྲུབ་དབང་གོང་མ་འཇིགས་མེད་བསམ་གཏན་རིན་པོ་ཆེ་སྔ་ཕྱིར་ཡང་ཡང་ཕེབས་ནས་གཞི་བྱེས་ཀྱི་སློབ་མ་མང་བོར་དབང་ལུང་རྗེས་གསུམ་མང་དུ་གནང་། དགེ་ལྡན་པ་སྤྱིའི་ཞབས་བརྟན་དུ་ལྕགས་མཁར་ཟུར་དགུ་བ་བཙུགས། དགོན་པའི་རིམ་གྲོར་འཇིགས་བྱེད་ཀྱི་དྲག་པོའི་སྦྱིན་སྲེག་མཛད་དེ་དམ་སྲི་ཐལ་བར་བརླགས། འདན་མའི་མཚམས་ཁང་དུའང་ཆོས་ལུང་མང་ཙམ་གནང་། གཞི་བདག་ཁྲབ་ཆེན་ལ་ལ་བཙས་བསྟོད་པ་སོགས་དགོན་གྲོང་ལ་ཤིན་ཏུ་བཀའ་དྲིན་ཆེ་སྟེ། ཞིབ་པར་རྗེ་དེ་ཉིད་ཀྱི་རྣམ་ཐར་ཟུང་འཇུག་གྲུབ་པའི་བདེན་གཏམ་དུ་གསལ། རྗེ་དེ་ཉིད་ཀྱི་ཉེ་གནས་དམ་པ་རྗེ་དཀོན་མཆོག་ཕུན་ཚོགས་ནས་ཀྱང་དགོན་འདི་ཐུགས་ལ་ཤིན་ཏུ་བཏགས་པས་ཐམས་ཅད་ཀྱིས་བླ་མར་བཀུར་ཞིང་གུས་འདུད་ལྷུར་བླངས། དེའི་རྗེས་སུ་བླ་མ་རྡོ་རྗེ་འཆང་ཆེན་པོའི་སྐུ་རིང་ལ་དགེ་འདུན་པ་བགྲེས་གཞོན་ཚང་མས་སངས་རྒྱས་དངོས་དང་འདྲ་བའི་འདུ་ཤེས་ཀྱིས་བསྟེན་ཏེ་ལེགས་ཚོགས་ཀྱི་རྩ་བ་ཚུགས་ཚུལ་ཞིབ་པར་ཕྲན་བུས་བརྩམས་པའི་རྣམ་ཐར་ཆེན་མོར་བལྟ། དུས་ཕྱིས་གྲྭ་ཚོགས་རྒྱས་པས་འདུ་ཁང་ཆུང་ཞིང་རྙིང་སྐྱོན་གྱིས་ལོ་མང་རབས་ཤིག་ལ་བཞེངས་རྒྱུར་མ་ཁེལ་ཡང་ཕྱིས་སུ་རབ་རྒྱལ་ས་སྟག་ལོར་བླ་མའི་བྱིན་རླབས་དང་ལྗགས་བཀོད་ལྟར་འདུ་ཁང་གསར་བ་བདེ་བླག་ཏུ་བཞེངས་ཐུབ་པ་བྱུང་། ལོ་འགའི་མཚམས་སུ་གསེར་ཚོན་ཡང་ལེགས་པར་ཕུལ། འདུ་ཁང་གི་རྟེན་གཙོར་མཐུ་བ་དད་ལྡན་རྡོ་རྗེ་རྒྱལ་མཚན་གྱིས་རྒྱུ་རྐྱེན་གང་དགོས་བསྒྲུབས་ནས་འཇམ་དབྱངས་ཀུན་གཟིགས་ཆེ་ཚད་དེ་བཞེངས། གཟུངས་གཞུག་ཏུ་རྒྱལ་སྲས་རིན་པོ་ཆེ་ནས་ཤིང་བཟའ་ཚང་དང་། དེ་ནས་གྲུབ་དབང་གོང་མ། དེ་ནས་བླ་མ་རྡོ་རྗེ་འཆང་གི་བར་རྒྱུན་བསྣམས་མཛད་པའི་ཕྱག་དྲིལ་བྱིན་ཅན་གྱིས་གཙོས་རྟེན་རྩ་ཆེ་ཅི་མང་བཞུགས། སྐུའི་ཕྲ་རྒྱན་དུ་རྒྱུ་སྤུས་བཟང་བའི་མ་ནོ་ཁོ་ཁོར་གཅིག་དང་། ཕྱག་མཚན་རལ་གྲི་སོ་གཉིས་པ་རྣོ་དབལ་ཅན་ནི་བདག་གི་གཅུང་བོ་བློ་བཟང་སྤྱིན་པས་ཕུལ་བ་ཡིན། གཞན་ཡང་རྗེ་བླ་མ། སྤྱན་རས་གཟིགས། གྲུབ་དབང་གོང་མའི་སྐུ་བརྙན། མཁན་པོ་ཚང་གོང་མས་དབུས་ནས་ཞུས་པའི་རྗེ་གཟིགས་པ་ལྔ་ལྡན་གྲས་ཀྱི་ཐང་ག་གཅིག བཀའ་འགྱུར་སྣར་ཐང་དཔར་མ། བླ་མ་རྡོ་རྗེ་འཆང་གི་བཞུགས་ཁྲི། རྒྱ་ནག་ནས་དཔར་པའི་ཁོང་གི་འདྲ་བརྙན་བྱོན་ལེགས། རང་གི་བླ་མ་རྣམ་གཉིས་ཀྱི་བཞུགས་ཁྲི། ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་ནས་གནང་བའི་སྦུབ་ནག་དང་། དེ་ཉིད་ཀྱི་འདྲ་ཐང་། འདུ་ཁང་ཀླད་དུ་གྲུབ་དབང་གོང་མའི་ཞལ་བཀོད་ལྟར་བཞེངས་པའི་ཛཾ་ནག བསྟེན་པ་ཆོས་རྒྱལ། ལྷ་མོ། རྡོར་ལེགས་བཅས་བཞུགས། རབ་རྒྱལ་མེ་སྤྲེལ་ལོར། ཆོས་ར། རྔ་ཁང་། ཇ་ཁང་བཅས་ཤིན་ཏུ་ངོས་གཙང་བ་དང་། འདུ་ཁང་མཐོངས་ཀོར་གྱི་མཆོད་རྫས་སྤུས་ལེགས་བཅས་གསར་དུ་བསྐྲུན། པར་ཁང་ཆེན་མོར་དབུས་སུ་བླ་མ་རྡོ་རྗེ་འཆང་སྐུ་ཕྲེང་གཉིས་ཀྱིས་རྒྱུན་བསྣམས་ཀ་པཱ་ལི་བྱིན་ཅན་སོགས་རྟེན་སྣ་དང་གཟུངས་གཞུག་གིས་བྱུར་བུར་གཏམས་པའི་བླ་མ་རྡོ་རྗེ་འཆང་ཨབྷྱ་ཞབས་ཀྱི་འདྲ་སྐུ་སྐུ་ཚད་ལས་བརྒལ་བ། ལས་གཤིན་ཕྱག་བཞི་བའི་བསྙེན་ཐང་བླ་མ་རིན་པོ་ཆེའུ་ཕྱག་དཔར་དང་། འདོད་གསོལ་ཕྱག་བྲིས་ཅན། རབ་རྒྱལ་ཤིང་ཕག་ལོ་ནས་བཟུང་ལོ་ཉེར་གཅིག་རིང་ལ་རང་གྲྭ་ཉི་ཤུ་ལྷག་ཙམ་ནས་པར་དུ་བརྐོས་པའི་བླ་མ་རིན་པོ་ཆེའི་བཀའ་འབུམ་པོད་བཅོ་ལྔས་གཙོ་བྱས་པའི་མདོ་སྔགས་རིག་གནས་ཆོས་སྤྱོད་ཀྱི་གཞུང་མང་བོའི་འཕྲུལ་པར་ལོ་རེ་བཞིན་བརྐོས་པ་ལས་ད་ཆ་དབུས་གཙང་དུ་རྒྱལ་བ་ཡབ་སྲས་དང་། སེར་འབྲས་དགེ་གསུམ་གྱི་དགེ་བའི་བཤེས་གཉེན་ཐམས་ཅད་ཀྱིས་ཀྱང་བསྔགས་བརྗོད་ཚད་མེད་པའི་སྒོས་གསུང་འབུམ་གདན་ཅི་འདྲོངས་བྱེད་པ་དང་། རྔ་བ། ལྷ་མོ། རྭ་རྒྱ། རོང་བོ། བླ་བྲང་། བྱ་ཁྱུང་། སྐུ་འབུམ། ལྡེ་ཚ་སོགས་ཨ་མདོའི་དགོན་ཆེན་ཐམས་ཅད་དུ་ལོ་རེ་བཞིན་དཔེ་རྒྱུན་འཕེལ་ཞིང་། རྗེ་ཐམས་ཅད་མཁྱེན་པའི་གསུང་རབ་ཀྱི་དགོངས་པ་འགྲེལ་བའི་མིག་གཅིག་ཏུ་གྱུར་སྣང་ངོ་། །དེའི་ཕྱིར་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོས་མཛད་པའི་བཀའ་འབུམ་དེ་ཉིད་ཀྱི་པར་བྱང་སྨོན་ཚིག་ལས། གང་གི་མཁྱེན་རབ་མན་ཤེལ་ཐིག་ལེ་ལས། །རྣམ་དག་ཆོས་ཀྱི་ཟེགས་མ་འབུམ་འཛགས་པས། །བགྲང་ཡས་འགྲོ་ལ་བྱང་གྲོལ་ཞི་བའི་དཔལ། །རྣམ་པར་བྱིན་པའི་གྲགས་པ་སྲིད་ན་སྙན། །ཞེས་གང་གསུངས་པ་ནི་དོན་དང་ལྡན་པའི་ཆེད་བརྗོད་དོ། །དེའི་གཡོན་གྱི་བྱམས་ཁང་དུ། བླ་མའི་ཞལ་ཆེམས་ལྟར་བཞེངས་པའི་བྱམས་པ་ལུང་སྟོན་མ་བླ་མའི་སྐུ་ཚད་ཅན། ཇོ་བོ་རྗེ་དང་། རྗེ་ཙོང་ཁ་བ་མི་ཕལ་བའི་ཚད། བདེ་གཤེགས་མཆོད་རྟེན་བརྒྱད་ཁྲུ་ལོངས་གསེར་ཆབ་ཅན། གྲྭ་ཤག་གསུམ་ཐུན་མོང་ནས་གདན་དྲངས་པའི་རྗེ་ཡབ་སྲས་གསུམ་གྱི་གསུང་འབུམ་བླ་བྲང་པར་མ་ཆ་ཚང་། འདན་མའི་སྡེ་བས་བཞེངས་པའི་སྒྲོལ་མ་འཇིགས་པ་བརྒྱད་སྐྱོབ། རྒྱན་དྲུག་མཆོག་གཉིས། རྗེ་དང་འཁོར་དག་པ་རྣམ་བརྒྱད་ཀྱི་གོས་ཐང་བཅས་བཞུགས་ཤིང་། པར་ཁང་དང་བྱམས་ཁང་ཇི་ལྟར་བཞེངས་ཚུལ་ཁོང་གི་རྣམ་ཐར་དང་གསུང་འབུམ་དཀར་ཆག་ཏུ་ཟུར་ཙམ་རེ་བདག་གིས་བྲིས་ཟིན་པས་དེར་བལྟ་བར་བྱ་ལ། རབ་རྒྱལ་མེ་བྱ་ལོར་འདན་མའི་ཚེ་ལོ་འབུམ་སྒར་ཡུལ་ཤ་གསུམ་གྱིས་ཊཾ་དྲུག་བརྒྱ་ཙམ་དང་། དགེ་སློང་འཇིགས་བྱེད་སྐྱབས་དང་མ་ཎི་སྐྱབས་གཉིས་ཀྱིས་ཊཾ་ལྔ་བརྒྱ་ཙམ་ཕུལ་བར་བརྟེན་ཕྲན་བུས་པེ་ཅིན་ནས་བསྒྲུབས་པའི་ལྷ་ཁང་དེ་གཉིས་ལ་གསེར་ཏོག་ཆེ་ཚད་སྤུས་ལེགས་རེ་བཅས་ཡོད། ཡར་ཁའི་ཐང་གི་རི་ཞོལ་དུ་བླ་མ་རྡོ་རྗེ་འཆང་གི་འཇམ་དབྱངས་ཕྱག་ཚའི་འབུམ་ཁང་། བཙུགས་ཤིང་དུ་རྒྱལ་བ་བསོད་ནམས་རྒྱ་མཚོའི་ཞབས་རྗེས་བྱ་ནམ་ནས་གདན་དྲངས་པ། ལུང་མདོའི་བཙུགས་ཤིང་དུ་དམ་སྲིའི་ཁ་གནོན་དུ་བཞེངས་པའི་རྟ་མགྲིན་འབུམ་ཁང་བཅས་ཡོད།

བླ་བྲང་འགབ་མར་སྔོན་ཆད་བླ་མ་རྣམ་གཉིས་ཀྱི་གཟིམ་ཁང་ཐེབ་ཆགས་ཙམ་ཡོད་པ་དེ་ལས་ད་སྔ་གསར་བཞེངས་ཅི་ཡང་མི་སྣང་ལ། རྒྱབ་རིའི་ངོས་སུ་གྲུབ་དབང་གོང་མས་ཐུགས་བཀོད་གནང་དོན་ལྟར་ཞབས་དྲུང་འཇིགས་མེད་ཐུབ་བསྟན་རྒྱ་མཚོས་བཞེངས་བའི་མཚམས་ཁང་དེར། ཕྱིས་སུ་ངོས་ནས་ཅུང་ཟད་རྒྱ་བསྐྱེད་དེ་བཞེངས་པའི་མཆོད་ཁང་དུ་ལྷ་ས་ནས་གདན་དྲངས་པའི་བཀའ་འགྱུར་པར་གསར། ཀིརྟི་རིན་པོ་ཆེ་ནས་ཁོང་རྡོ་རྗེ་འཆང་ལ་གཟིགས་དཔེར་ཕུལ་བའི་བསྟན་འགྱུར་སྡེ་དགེའི་པར་མ་བྱིན་རླབས་ཀྱི་ཚན་ཁ་ཆེ་བ་ཁ་ཚང་། རྗེ་ཡབ་སྲས། པཎ་ཆེན། ལྕང་སྐྱ། ཀུན་མཁྱེན་བླ་མ་ཡབ་སྲས་སོགས་ཀྱི་གསུང་འབུམ་སོགས་ད་ལྟ་གླེགས་བམ་པོད་བརྒྱད་བརྒྱ་ཙམ་དང་། སྨན་ཐང་སྨན་བླ་དོན་གྲུབ་ཀྱི་ཕྱག་བྲིས་ལས་བཤུས་པའི་གནས་བཅུའི་འདྲ་ཐང་། གྲུབ་དབང་གོང་མ་འཇིགས་མེད་བསམ་གཏན་གྱི་དབུ་ལོ་གཟུངས་གཞུག་ཏུ་ཕུལ་བའི་དེ་ཉིད་ཀྱི་འདྲ་སྐུ་སོར་བཞི་བ། བླ་མ་རྡོ་རྗེ་འཆང་གིས་རབ་གནས་རྟ་ཐོག་མ་མཛད་པའི་འཇམ་དབྱངས་དམར་སེར་ཁྲུ་ཚད། བླ་མ་རྡོ་རྗེ་འཆང་གི་ཕྱག་དཔར་དང་འདོད་གསོལ་ཕྱག་བྲིས་གནང་བའི་འཇིགས་བྱེད་བསྙེན་ཐང་། ཆོས་རྒྱལ་ཡང་གསང་དང་ལྷ་མོའི་རྟེན་ཐང་། དེ་གསུམ་གའང་ལྕང་ལུང་ཁྲི་རྒན་འཇམ་དབྱངས་ཐུབ་བསྟན་རྒྱ་མཚོའི་གདུང་དཀྲིས་སྟེང་བཞེངས་པ་ཡིན། རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་བས་གནང་བའི་ཐུབ་པ་རྡོར་གདན་མ་དང་། རྗེ་དེ་ཉིད་ཀྱི་འདྲ་དཔར་ཕྱག་དམ་ཅན། པཎ་ཆེན་ཆོས་ཀྱི་ཉི་མས་གནང་བའི་འདྲ་དཔར་མཚན་ཡིག་ཅན་སོགས་སྐུའི་རྟེན་ཆེ་ཆུང་ཅི་རིགས་བཅས་བཞུགས། གཟིམ་ཁང་དེར་བླ་མ་རྡོ་རྗེ་འཆང་ཆེན་པོ་ཡབ་སྲས་ཕེབས་ནས་དབྱར་བཞུགས་གཉིས་དང་དགུན་བཞུགས་ཕྱེད་དང་གསུམ། རིབ་ཕེབས་ལན་ཁ་ཤས་མཛད་སྐབས་འཇིགས་བྱེད་སོགས་ཀྱི་དབང་། བརྒྱ་རྩ་གསུམ་སོགས་ཀྱི་རྗེས་གནང་། བཀའ་འགྱུར་ལས་འདུལ་བ་ཡོངས་རྫོགས་ཀྱི་ལུང་། སེམས་བསྐྱེད་མཆོད་པ། ལམ་རིམ་གྱི་ཁྲིད། འཇིགས་བྱེད་བསྙེན་ཁྲིད་སོགས་ཟབ་རྒྱས་ཀྱི་ཆོས་བཀའ་མནོག་ཆེ་བ་རྒྱ་ཆེར་སྩལ་བ་དང་། ཕྱིས་སུ་རབ་རྒྱལ་མེ་སྤྲེལ་ལོའི་བརྒྱད་པའི་ཡར་ཚེས་ལ་ཤར་ཐམས་ཅད་མཁྱེན་པ་གསུང་འབུམ་པར་ཁང་ལ་གཟིགས་མཇལ་དུ་ཞུས་ནས་ཕེབས་སྐབས་པར་ཁང་དུ་རབ་གནས་རྟ་ཐོག་མ། འདུ་ཁང་དུ་ཆོས་འབྲེལ། གཟིམ་ཁང་ནས་བཀའ་གདམས་གླེགས་བམ་ལས་དཀོན་མཆོག་འབངས་དང་དད་པ་བརྟན་པོའི་རྟོགས་བརྗོད་ཀྱི་ལྗགས་ལུང་སོགས་བྱིན་རླབས་ཀྱི་ཆར་ཆེན་ཕབ། དེ་ལྟར་དམ་པ་རིམ་བྱོན་གྱི་བཀའ་དྲིན་ལས་དགེ་འདུན་རྣམས་ཐུགས་མཐུན་ཁྲིམས་གཙང་ངོས། ལོ་རེ་བཞིན་ཚོགས་སུ་བཞི་བའི་མཆོད་པ། ལྔ་བའི་ནང་འཇིགས་བྱེད་བཅུ་གསུམ་མའི་སྒྲུབ་མཆོད་རས་བྲིས་ལ་བརྟེན་པ། བདུན་བའི་ཚེས་གཅིག་ལ་གྲུབ་དབང་གོང་མའི་དུས་མཆོད། དགུ་བའི་ནང་བླ་མ་རྡོ་རྗེ་འཆང་གི་དུས་མཆོད་དང་འབྲེལ་བར་རྭ་རྒྱའི་ཕྱག་ལེན་གྱི་རྣམ་སྣང་མདོ་བྱང་སྒྲུབ་མཆོད་གསར་ཚུགས་རྡུལ་ཚོན་ལ་བརྟེན་པ་དང་། ཆོས་རྒྱལ་ལྕགས་མཁར་ཟུར་དགུ་བ། དུས་ཆེན་བཞིའི་སྨོན་ལམ། གཞི་གསུམ་ཕྱག་ལེན་ཚད་ལྡན་བཅས་སྔར་ཡོད་མ་ཉམས་པའི་ཁུལ་དུ་མཆིས། སྔོན་ཆད་མ་ཎི་རིལ་སྒྲུབ་ཤིན་ཏུ་བྱིན་རླབས་ཆེ་བ་ཞིག་ཚུགས་ཀྱང་ཕྱིས་སུ་རྒྱུན་ཆད། གྲྭ་གྲངས་བརྒྱ་དང་ཉི་ཤུ་ཙམ་བཞུགས་པར་ཆོས་འདུལ་ཁྲིམས། འདོན་རྟ་དབྱངས། ཐིག་རྡུལ་ཚོན། རིག་གནས་ལག་རྩལ་གྱི་ཆ་ཡན་ལག་བཅས་ཡར་ལྡན་དུ་ཚང་བས་བསྔགས་པར་འོས་པའི་སྒྲུབ་སྡེ་ཞིག་ཏུ་ཡོངས་ལ་གྲགས་སོ། །མཐུ་བ་ཞེས་འབོད་པ་ན་སྔར་དེར་མཐུ་བྱད་གཏོང་མཁན་གྱི་སྔགས་པའི་རྣལ་འབྱོར་བ་ཞིག་གི་གཞི་ཆགས་པས་དེ་ལྟར་དུ་བཏགས་པའི་ངག་རྒྱུན་ཡོད་དོ། །

དེ་ནས་ཀ་ཐུང་རི་ཁྲོད་དགའ་ལྡན་རྩེ་ནི། སྔར་བཤད་པ་ལྟར་དགོན་གསར་ཆགས་ནས་འདུ་ཁང་གསར་བཞེངས་སོ་ཕག་གིས་བརྒྱན་པ་སྟབས་བདེ་ཞིག་བཞེངས་པའི་ནང་དུ་མཁན་པོ་བློ་བཟང་འཇིགས་མེད་རབ་བརྟན་གྱིས་དབུས་གཙང་ནས་གདན་དྲངས་པའི་ཇོ་སྐུ་སྨན་འདམ་ལས་གྲུབ་པ། རྒྱལ་བ་ཚངས་དབྱངས་རྒྱ་མཚོའི་གདུང་ཚའི་འདྲ་སྐུ། ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་གིས་གནང་བའི་རྟ་མགྲིན་ཡང་གསང་གི་དབུས་ཐང་སོགས་སྐུའི་རྟེན་འགའ་རེ་དང་། ཕྱིས་སུ་ཕྲན་བུ་རང་ལོ་བཅོ་ལྔ་ཙམ་ལོན་དུས་རང་གྲྭ་ཚོང་དཔོན་བློ་བཟང་གིས་གདན་དྲངས་པའི་སྣར་ཐང་བཀའ་འགྱུར་སོགས་རྟེན་མི་ཉུང་ཙམ་དང་། བསྟེན་པ་ལྷ་མོའི་ཞལ་ཐང་དང་། གནས་བདག་གཡག་ལང་གི་སྐུ་བརྙན། སྤྱི་བ་བླ་བྲང་གཅིག་འཐུས་ཀྱི་གཞུང་ཁང་གཅིག་དང་། གྲྭ་གྲངས་ཉི་ཤུ་ལྷག་བཞུགས། རབ་ཡིད་བགྲང་བྱ་སོ་བརྒྱད་པ་ཤིང་འབྲུག་ལོར་ཡབ་རྗེ་གསེར་ཁང་བའི་སྐུ་མཆེད་བློ་བཟང་བསྟན་པ་རྒྱ་མཚོ་དན་ཏིག་དང་། ལོ་ཀྱ་ཏུང་སོགས་སུ་ཕེབས་ལམ་དགོན་འདིར་བྱོན་ནས་འཇིགས་བྱེད་དང་། ཀུན་རིག ཐུགས་རྗེ་ཆེན་པོ་རྣམས་ཀྱི་དབང་དང་། མཆོད་འཐེབ་གནང་ནས་མཆོད་འབུལ་གྱི་རྒྱུན་བཙུགས་པ་ད་ལྟའང་མ་ཉམས་པར་གནས། ཤིང་འབྲུག་གི་ལོ་དེ་ནས་བརྩིས་པའི་ད་ལྟ་རབ་རྒྱལ་མེ་སྤྲེལ་ཡན་ལོ་བརྒྱ་དང་བཅུ་གསུམ་སོང་། རབ་ཚེས་བགྲང་བྱ་ང་དྲུག་ང་བདུན་ཙམ་ལ་ལྡེ་ཚའི་བྱ་བཏང་འདུལ་བ་འཛིན་པ་ཨ་ལགས་བཤད་སྒྲུབ་ཚང་ཆེད་དུ་གདན་དྲངས་ནས་གཞི་གསུམ་གྱི་ཕྱག་ལེན་དང་། ཀུན་རིག་སྒྲུབ་མཆོད་རས་བྲིས་ལ་བརྟེན་པ་ངོས་གཙང་བཅས་བཙུགས། ཁྱད་པར་དུ་ཁོར་ཡུག་དེར་མིང་ཙམ་ཡང་མ་གྲགས་པའི་སྡོམ་པ་གསུམ་གའི་ཕྱིར་བཅོས་ཀྱི་ཆོ་ག་ལེགས་པར་ཚུགས་སྣང་སྟེ། དེ་ནི་ཡུལ་དུས་དེ་ལ་བལྟས་ན་ཤིན་ཏུ་རྗེས་སུ་ཡི་རང་གི་གནས་སུ་འཁུམས་མོད།

དེང་སང་འདི་ཙམ་ཡང་ངོ་ཤེས་མཁན་དཀོན་ནོ། །

མ་ཎི་བུམ་སྒྲུབ་ཀྱི་ཟུར་ཡིག་ཅིག་ཏུ། མ་ཎི་རིལ་སྒྲུབ་མཐུ་དགོན་དང་ལོ་རེ་བཞིན་འཛུགས་རེས་དང་། ཆན་ལུང་གི་རིང་ནས་ཀྭོང་ཞུ་ཁྲི་ལོ་བཅུ་དྲུག་པ་རབ་ཚེས་ལྕགས་སྟག་བར་མ་ཎི་དུང་ཕྱུར་བཞི་བཅུ་ལྷག་སོང་བ་དང་། ལྕགས་སྟག་ལོ་དེའི་བཞི་བའི་ཚེས་གཅིག་ནས་བཟུང་ཟླ་བ་གཅིག་གི་བར་མ་ཎི་དུང་ཕྱུར་བསྒྲུབས་སྐབས། བུམ་ཁང་ལས་རོལ་ཆའི་སྒྲ་གྲགས་པའི་སྣང་བ་དང་། ཚོགས་གྲལ་དང་རུང་ཁང་ནས་རིལ་བུ་རྙེད་རྒྱུ་བྱུང་། ཞེས་སོགས་བྲིས་སྣང་སྟེ། དེའི་བཤད་བབ་ལ་བརྟག་ན་ཡང་ཀ་ཐུང་དགོན་འདི་ནམ་ཆགས་པའི་དུས་ཚིགས་རགས་ཙམ་ཤེས་རྒྱུ་ཡོད་དོ། །ཕྱིས་སུ་བླ་མ་རྡོ་རྗེ་འཆང་ལན་འགར་ཕེབས་ནས་དབང་ལུང་རྗེས་གསུམ་ཅི་རིགས། བསྙེན་རྫོགས་ཀྱི་བསླབ་རྒྱུན། བཀའ་འགྱུར་གྱི་གྲས་ལས་ཕལ་བོ་ཆེའི་མཇུག་གི་པོད་གཅིག་གི་ལྗགས་ལུང་བཅས་སྩལ། ལྷ་སྡེ་ལ་ཀ་ཐུང་ཡར་ནང་འགར་རུ་ཤི་སྣ་དང་། མར་ནང་གི་སྡེ་བ་གཉིས་ལས་རོང་འབྲོག་གཉིས་འཛོམས་ལྟ་བུས་འབྱོར་བ་མི་དམན་ཞིང་རྒྱུད་དྲང་བ་དང་རྣམ་དཀར་ལ་དད་པ་ཅན་ཤ་སྟག་ཡིན། འགར་རུ་ཤི་སྣའི་མ་ཎིའི་གཟུངས་གཞུག་ཏུ་ཡབ་རྗེ་གསེར་ཁང་བའི་སྐུ་འགག་ཅིག་ཡོད་ཟེར། གཡག་ལང་རི་ཞོལ་དུ་ནགས་ཚལ་སྟུག་པོའི་ཁྲོད་ཤུག་པ་སྣ་མང་ཟེར་བའི་ཤིང་སྡོང་གཅིག་གི་རྩེར་ཤིང་སྣ་དུ་མའི་ལྕུག་ཕྲན་སྐྱེས་པའི་ལྗོན་ཤིང་ཡ་མཚན་པ་ཞིག་ཡོད། སྐྱ་རེངས་ཁ་བཞིའི་ལྷ་སྡེ་གང་དུ་ཡང་མ་ཎི་ཁང་དང་སྔགས་ཁང་གཅིག་འཐུས་སུ། སེང་གདོང་། རྟ་མགྲིན། བླ་མཆོད། ནོར་རྒྱུན་མའི་གཏེར་སྒྲུབ་སོགས་ཅི་རིགས་ཀྱི་ཆོས་ཚོགས་དང་ཚེས་བཅུ་ཆགས་མེད་སོགས་གསང་སྔགས་རྙིང་མའི་སྒྲུབ་འཕྲིན་ཡང་ཉུང་ཤས་རེ་ཡོད་པ་དེར། ཕྲན་བུ་སྐྱེ་ཕྲེང་སྔ་ཕྱིས་འཛིན་བདག་བྱེད་མུས་སུ་ཡོད་དོ། །

དེ་ནས་ཤར་ཕྱོགས་སུ་ཐ་གྱ་བིས་གྱ་ཕྱོགས་ཀྱི་གཞུང་བརྒྱུད་ནས་ཕྱིན་པ་ན་ནོར་ར་ཟེར་བའི་དགོན་གྲོང་ཆུང་ངུ་ཞིག་ཡོད། དེ་ནི་སྔར་ཁ་ཏི་ཀའི་རྗེ་སྐུ་གསུང་འབྱོན་མ་གདན་འདྲེན་མཁན་ཚོང་དཔོན་ནོར་བུ་བཟང་བོའི་ཕྱུགས་འཚོ་ས་ཡིན་པས་ན་མིང་ལའང་དེ་ལྟར་ཐོགས། དེ་ནས་ཨ་བྷིས་ལྷ་ཞོལ་གྱི་རྩར་བབས་པ་ན། ནག་ཕྱོགས་ཟིལ་གྱིས་གནོན་པའི་རྒྱབ་རི་མཐོན་པོ་ནོར་བུ་སྤུངས་པ་འདྲ་བ། དཔལ་འབྱོར་གཡང་དུ་འགུགས་པའི་གཡས་གཡོན་གྱི་རི་བོ་སྒོ་གླེགས་ཕྱེ་བ་འདྲ་བ། ལེགས་ཚོགས་འདོད་དགུར་འཁྱིལ་བའི་ཕྱོགས་གཉིས་ཀྱི་འབབ་ཆུ་ནོར་བུ་དགའ་འཁྱིལ་འདྲ་བ། གཞན་སྡེ་མཐའ་ནས་འགོག་པའི་མདུན་རི་ཕྱུག་མོ་དང་སྟོང་རི་བསྣོལ་བསྡེབས་ཆེད་དུ་བརྩིགས་པའི་སྒོ་ཡོལ་འདྲ་བ། དབྱར་བསིལ་ལ། དགུན་དྲོ་བ། རླུང་མེད་ཅིང་ཉི་མ་རྟག་པ། དཀར་གསལ་ཆེ་ཞིང་མཐོངས་ཡངས་པ། ལྗོན་ཤིང་དང་ནགས་ཚལ། སྤང་ལྗོངས་དང་ཆུ་གཙང་། རྩིག་རྡོ་དང་གཡའ་ལེབ་སོགས་བསམ་གཏན་པ་ལ་འོས་པའི་མཐུན་རྐྱེན་ངང་གིས་འཛོམས་པ་སོགས་བཀྲ་ཕུན་སུམ་ཚོགས་པའི་གནས་དེར་ཚེ་ཏན་དགོན་དགའ་ལྡན་བཤད་སྒྲུབ་གླིང་ཆགས་ཡོད། དགོན་འདི་དང་བོ་གཡས་རིའི་ཐད་ཀྱི་མགོ་ཆེ་ཐང་དུ་ཡོད་པ་སྤོའུ་ཆོས་རྗེས་ད་ལྟའི་གནས་འདིར་སྤོས་པའམ། ཡང་ན་སྤོའུ་ཆོས་རྗེས་ལྷ་མོ་གསུང་འབྱོན་མའི་རྟེན་ཐང་གི་དྲེའུ་ས་འདིར་ཉལ་ནས་སློང་མ་ཐུབ་པར་བརྟེན་དགོན་པའི་ས་མིག་ཏུ་ངོས་བཟུང་ནས་དགོན་གསར་འདི་བཏབ་ཟེར་བའི་ལོ་རྒྱུས་ལྟར་ན། རིམ་གྱིས་དགོན་རྙིང་གི་སེར་མོ་རྣམས་ཀྱང་འདིར་འདུས་པར་ངེས། རྟེན་བཞེངས་ཀྱི་སྐོར་ལ། དགོན་པའི་ཀླད་ཀྱི་ཇོ་ཁང་དུ། དབུས་སུ་ཇོ་སྐུ་ཆེ་ཚད་གཡས་གཡོན་དུ་རྒྱལ་བ་སེང་གེའི་ང་རོ་དང་མི་འཁྲུགས་པ། དེའི་གཡས་ཀྱི་མགོན་ཁང་དུ་གསང་འདུས། འཇིགས་བྱེད། མགོན་ཆོས་ལྷ་མོ། ལྕམ་སྲིང་མགོན་དཀར། རྣམ་སྲས་རྡོར་ལེགས་སོགས་ཆེ་ཚད། འདུ་ཁང་ཆེན་མོར། ཙན་དན་ལས་གྲུབ་པའི་དུས་གསུམ་སངས་རྒྱས་འགངས་ཅན། རྗེ་ཞབས་སྙུང་མ་སྟོང་སྐུ། པཎ་ཆེན་འཁྲུངས་རབས་ཐང་ག གྲུབ་དབང་འཇིགས་མེད་བསམ་གཏན་རིན་པོ་ཆེས་རབ་གནས་མཛད་པའི་རྒྱལ་བ་བྱམས་པའི་གོས་སྐུ། གསང་འདུས་བློས་བསླང་། ཕྱག་ཏོ་ཡཱང་གྱ་བན་དེས་མཐུན་རྐྱེན་སྦྱར་ནས་བཞེངས་པའི་བཀའ་འགྱུར་བྲིས་མ་ཆ་ཚང་། ཡུམ་དངུལ་བྲིས། ལྕང་སྐྱ་རོལ་རྡོར་གྱི་གསེར་སྐུ་སོགས་ལི་སྐུ་རྙིང་བ་ཤིན་ཏུ་མང་བོ། རྒྱལ་བ་ལུང་རྟོགས་རྒྱ་མཚོས་རབ་གནས་མཛད་པའི་ལྷ་མོའི་རྟེན་ཐང་། རྒྱལ་བ་མཁས་གྲུབ་རྒྱ་མཚོའི་ཞབས་ཕྱགས་ཡ་གཅིག རང་གྲྭ་ཚ་རུ་གླས་འཇིགས་མེད་ནོར་བུས་གདན་དྲངས་པའི་རྗེ་ཡབ་སྲས་གསུམ་གྱི་གསུང་འབུམ་སྐུ་འབུམ་པར་མ་དང་། རྗེ་དགེ་ལེགས་མ། སྔོན་གྱི་རྒྱ་ནག་གོང་མ་ཟོན་ཏེ་རིང་གི་སྦུབ་ཆ་སྤུས་ལེགས་མང་བོ། འཆམ་ལྭ། སྐུ་རྟེན་གྱི་ཆས། བླ་མ་རྣམ་གཉིས་ཐུན་མོང་གི་བཞུགས་ཁྲི་ཆེན་མོ་དང་། སོ་སོའི་བཞུགས་ཁྲི་ཆུང་བ་རེ། འདུ་ཁང་གི་ཡང་ཐོག་ཏུ་གསེར་ཏོག རྒྱལ་མཚན། རི་དྭགས་ཕོ་མོ། སྤེན་རྒྱན། ཆོས་ར། རྔ་ཁང་སོགས་ཤིན་ཏུ་ངོས་གཙང་བ་གཞན་ལས་ཁྱད་པར་དུ་འཕགས། བླ་བྲང་གོང་མའི་ལྷ་ཁང་གི་ཀླད་དུ། མཁན་པོ་ཇ་སག་གིས་རྒྱ་ནག་ནས་གདན་དྲངས་པའི་རྗེ་སྐུ་མི་ཚད་ཅན། མཁན་པོ་རིམ་བྱོན་གྱི་སྐུ་གདུང་ལས། སྤོའུ་ཆོས་རྗེའི་སྐུ་གདུང་མཆོད་རྟེན་གློ་འབུར་གསེར་འགྱུར་ཅན་སྐུ་ཕྲེང་བདུན་པའི་རིང་ལ་གསར་དུ་བཞེངས་པ། དོན་གྲུབ་རྒྱ་མཚོའི་གདུང་རྟེན་དབྱེན་བསྡུམ་མཆོད་རྟེན་ཁྲུ་དོ། དཔལ་ལྡན་རྒྱ་མཚོའི་གདུང་རྟེན་བྱང་ཆུབ་མཆོད་རྟེན་ཁྲུ་དོ། བཙན་པོ་མའི་གདུང་རྟེན་བྱང་ཆུབ་མཆོད་རྟེན་ཁྲུ་ཕྱེད་དང་གསུམ། ཀ་ཐུང་དུ་འཁྲུངས་པ་དེ་ཉིད་ཀྱི་གདུང་རྟེན་གློ་འབུར་ཅན། ཇ་སག་གི་གདུང་རྟེན་གསེར་རིས་པ་ཏྲ་ཅན། བློ་བཟང་འཇིགས་མེད་རབ་བརྟན་ཚང་གི་གདུང་རྟེན་བྱང་ཆུབ་མཆོད་རྟེན་གསེར་འགྱུར་ཕྲ་རྒྱན་ཅན་ཏེ་བདུན་བཞུགས་ཤིང་། ཀ་ཅུ་ནས་འཁྲུངས་པའི་ཡང་སྲིད་བྱིས་པ་དེ་ཉིད་ཁྲི་ཁར་འགོད་རྒྱུ་མ་བྱུང་ཞིང་གདུང་རྟེན་ཡང་མེད་པས་ད་ལྟའི་མཁན་པོ་འཇིགས་མེད་རིགས་པའི་སྙིང་བོ་འདི་བ་སྐུ་ཕྲེང་བརྒྱད་པ་ཡིན་ནོ། །གཡས་སུ་པཎ་ཆེན་ཆོས་རྒྱན་གྱིས་གནང་བའི་བརྟེན་པ་ལྷ་མོ་གསུང་འབྱོན་མར་གྲགས་པ་དང་། གཡོན་དུ་རྒྱལ་བོ་བེ་ཧར། གྱན་ཐང་ལ་གནས་བཅུ། རྒྱན་དྲུག་མཆོག་གཉིས། རྗེ་གཟིགས་པ་ལྔ་ལྡན། ཚེ་ལྷ་རྣམ་གསུམ། སྨན་བླ་བདེ་གཤེགས་བརྒྱད། འོད་དཔག་མེད་ཀྱི་ཞིང་བཀོད། ལྟུང་བཤགས། གཡུ་ལོ་ཞིང་བཀོད། རྡོར་སེམས་སྟོང་ཐང་། རྒྱལ་ཆེན་བཞི་སྟེ་འདི་རྣམས་ཞབས་དྲུང་འཇིགས་མེད་ཐུབ་བསྟན་རྒྱ་མཚོས་བཞེངས་པར་ཁྲ་ཡིག་རྙིང་བ་ལས་བཤད་ཅིང་ཕལ་ཆེར་ལ་ཞབས་དྲུང་དེ་ཉིད་ཀྱིས་ཕྱག་བྲིས་མཛད་ནས་ཁ་བྱང་ཡང་བཏབ་འདུག ཡང་ཏིག་ནས་སློབ་དཔོན་པདྨས་གཏེར་ལས་བཏོན་པར་གྲགས་པའི་གཡང་ཟངས་ཁ་པད་འདབ་ཅན། རྒྱལ་བ་བསོད་ནམས་རྒྱ་མཚོའི་ཆིབས་སྒ། འདི་ཆན་ལུང་རྒྱལ་བོའི་ཆིབས་སྒ་ཡིན་ཟེར་མཁན་ཡོད་དེ་མ་དག་པར་སེམས། གཤམ་ན་སྤོའུ་ཆོས་རྗེ་ལ་ཕུལ་བའི་ཁ་ཏི་ཀའི་ནང་སོའི་བཞུགས་ཁྲི། ལྕང་སྐྱ་ཆོས་མཛད་ཟེར་བ་ལྕང་སྐྱའི་ཡང་སྤྲུལ་གྱི་མཚན་ཐོར་ཆུད་པ་ཞིག་བཀྲ་ཤིས་འཁྱིལ་ནས་འདས་པ་དེ་ཉིད་ཀྱི་གདུང་རྟེན་བཅས་བཞུགས། གདུང་རྟེན་འདིའི་ཕྱི་ཤུན་གྱི་མཆོད་རྟེན་ནི་སྤོའུ་ཆོས་རྗེའི་གདུང་རྟེན་བཞུགས་པའི་མཆོད་རྟེན་རྙིང་བ་དེ་ཡིན་ལ། དེའི་ཕྱིར་མཆོད་རྟེན་འདིའི་བཞེངས་བབ་ལ་བལྟས་ན། སྤོའུ་ཆོས་རྗེ་དུས་ཀྱི་འབྱོར་བ་དང་རིག་གནས་ཀྱི་ཡོན་ཚད་ཀྱང་གསལ་བོར་རྟོགས་ནུས་པས་ད་ལྟའི་དུས་སུ་རྗེས་དྲན་གྱི་རྟེན་བླ་ན་མ་མཆིས་པའོ། །

བླ་བྲང་གོང་མའི་གཟིམ་ཁང་དུ་སྡེ་དགེ་ནས་གདན་དྲངས་པའི་བཀའ་བསྟན་དང་། རྗེ་ཡབ་སྲས། ཀུན་མཁྱེན་སྐུ་ཕྲེང་གི་གསུང་འབུམ་སོགས་ཕྱག་དཔེ་གྱན་གང་དང་། ལི་སྐུ་ཆེ་ཆུང་མང་པོ་བཅས་དང་། སྐུ་ཕྲེང་བརྒྱད་པའི་རིང་ལ་གཟིམ་ཁང་སྟེང་འོག་སྐྱེད་ཚལ། ཕྱི་ར་ནང་སྐོར་བཅས་ཤིན་ཏུ་རྒྱ་ཆེ་བ་བཞེངས་ཡོད། བླ་བྲང་ཡར་ནང་ནི་སྔོན་དུས་མཁན་པོ་ཇ་སག་རིང་ལ་བཞེངས་ནས་ཞབས་དྲུང་ཚོན་པོ་མ་ལ་ཕུལ་བ་ཡིན་སྟབས་རྙིང་སྐྱོན་ཆེ་བ་དང་། ཞབས་དྲུང་སྐྱེ་ཕྲེང་ལྔ་བའི་རིང་ལ་མཆོད་ཁང་ཆུང་ངུ་ཐོག་སོ་ཅན་ཞིག་བཞེངས་ན་ཡང་སྟབས་བདེ་བོ་ཞིག་མ་བྱུང་བ་གང་ཅིས། ང་རང་ལོ་ཞེ་དྲུག་བདུན་གྱི་སྟེང་ཚོམས་ཆེན་གཟིམ་ཁང་དང་བཅས་པའི་སྐྱ་བཟོ་ལེགས་པར་གྲུབ་ནས་རིང་མིན་ཚོན་ལས་དང་རྟེན་བཞེངས་རེ་བྱེད་རྩིས་ཡོད་དེ་འགྲོ་སོང་སྒོར་མོ་ཁྲི་གཅིག་ཙམ་འགྲོ་ངེས་ཡིན། དེར་སྔོན་གྱི་རྟེན་རྙིང་འགའ་རེ་བཞུགས་པ་ལས་རྒྱལ་དབང་བཅུ་གཉིས་པ་ཆེན་པོས་རབ་གནས་མཛད་པའི་རྗེའི་སྐུ་ཐང་བྱིན་ཅན་དང་། སྐྱེ་ཕྲེང་ལྔ་བས་བཞེངས་པའི་རྡོར་སེམས་དང་། རྟ་མགྲིན་གྱི་སྨན་སྐུ་མི་ཚད། རིང་མིན་བཞེངས་རྩིས་བཏང་བའི་གྱན་དབུས་མར་རྗེ་ཡབ་སྲས་དང་། གྱན་གཡོན་མར་སྐྱབས་མགོན་ཤར་ཐམས་ཅད་མཁྱེན་པའི་གསུང་བཀོད་ལྟར་ཕྲན་བུ་ཞེ་དགུའི་གེགས་གྲོལ་གྱི་རྟེན་དུ་བདེ་མཆོག་དཀར་བོ་མི་ཚད་བཅས་དང་། སྟག་དཔོན་ཚང་ནས་བདག་གིས་གདན་དྲངས་པའི་སྟག་གྲུབ་ཆེན་པའི་རྐེད་ཕུར་དང་། ས་འདུལ་མཛད་པའི་གཙོས་རྭ་སོགས་རྟེན་སྣ་བཞུགས་པའི་གདུང་རྟེན་གསར་བཞེངས། སྨ་ར་ཚང་གི་གདུང་རྟེན་རྣམ་རྒྱལ་མཆོད་རྟེན་ཁྲུ་དོ་ཅན། བློ་བཟང་རབ་གསལ་གྱི་གདུང་རྟེན་བཀྲ་ཤིས་སྒོ་མང་ཁྲུ་དོ་ལྷག ཚོན་པོ་མའི་གདུང་རྟེན་མྱང་འདས་མཆོད་རྟེན་ཁྲུ་གསུམ་ཅན། འཇིགས་མེད་ཐུབ་བསྟན་རྒྱ་མཚོའི་གདུང་རྟེན་ཟངས་དམར་ལ་དངུལ་གྱི་ཚིགས་རྒྱན་སྤྲས་པའི་བྱང་ཆུབ་མཆོད་རྟེན་ཁྲུ་གསུམ་ཅན་ཏེ་གདུང་རྟེན་ལྔ་བཞུགས། གཟིམ་ཁང་དུ་རྒྱ་ནག་ཀུན་ར་བཟོ་དབྱིབས་ཤིན་ཏུ་ལེགས་པའི་ནང་དུ་རྒྱ་དཀར་ནག་གི་ལི་སྐུ་མང་ཙམ་དང་། ལྕང་སྐྱ་རོལ་བའི་རྡོ་རྗེའི་གསེར་སྐུ་བཞུགས་ཁང་དང་བཅས་པ། ལྷ་ཁང་གི་རྩེར་པེ་ཅིན་ནས་སྒོར་དྲུག་བརྒྱས་བསྒྲུབས་པའི་གསེར་ཏོག་ཆེ་ཚད་བྱོན་ལེགས་བཅས་ཡོད། དགོན་པའི་གྲྭ་ཤག་རྣམས་ཐེམ་ཐོག་ཏུ་མཐོ་དམན་རིམ་བརྩེགས་དང་། ས་རྩི་དཀར་དམར་གྱི་མཛེས་ཚོན་དང་། ཁང་འདབས་ཀྱི་གྱང་གཞི་ནག་པོར་ཕྲེང་བ་དཀར་པོ་ཆ་སྙོམས་པར་བསྒྲིགས་པས་རྒྱང་ནས་བལྟས་ན་ཤིན་ཏུ་བཀྲག་ཆེ་ཞིང་། སྟེང་ཁང་གཡས་གཡོན་དུ་དབྱར་དགུན་གྱི་མལ་ཁང་དང་། ཐུར་འཁོར་དུ་མེ་ཚང་། འོག་ཤོད་དུ་ནོར་ཕྱུགས་ཀྱི་ར་བ། སྒོ་སྟེང་དུ་ཉི་ར་བྱ་འདབས་ཅན་ཏེ། སྔོན་གྱི་བོད་མིའི་བཟོ་དབྱིབས་ཀྱི་ཁང་བཀོད་འདི་འདྲ་བ་ཞིག་ལོས་ཡིན་སྙམ་པ་འཆར་བ་ཤ་སྟག་ཡིན། ཕྱི་མཐར་འཁྲུག་སྐྱོན་སྲུང་བྱེད་ཡིན་ཡང་སྲིད། གང་ལྟར་ས་མཁར་མཐོན་པོའི་ལྕགས་རི་ངོས་གསུམ་དུ་མཁར་སྒོ་བཅས་བརྗིད་ཆགས་ཤིང་བཟོ་བཀོད་ཕུན་སུམ་ཚོགས་པ་དང་ལྡན། མཁན་པོ་སྐུ་ཕྲེང་གསུམ་པ་དཔལ་ལྡན་རྒྱ་མཚོའི་སྐུ་རིང་ལ་ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་དང་འབྲེལ་ཆེ་སྟབས། དཔལ་ལྡན་རྒྱ་མཚོ་སྐུ་ཚེ་སྨད་ལ་སོག་ཡུལ་ཨུར་དུ་སུར་ཕེབས་ནས་ཡུན་རིང་ལ་བཞུགས་སྐབས་ཁ་དྲུག་གི་ལས་སྣ་བསྐོ་བཞག་སོགས་ཆུ་བཟང་ཚང་ནས་བདག་གིར་མཛད། དེའི་སྟབས་ཀྱིས་མཁན་པོ་ཇ་སག་ཚང་དགུང་ལོ་བཞི་ལོན་པ་རབ་འདོད་ཤིང་མོ་སྦྲུལ་ལ་ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་ཚེ་ཏན་སོགས་སུ་ཕེབས། ཁ་དྲུག་གི་ཁྲི་བའི་འགན་བཞེས་ཤིང་འགྱེད་ཕོགས་བཏང་། ལོ་དེ་ནི་ཆན་ལུང་ཁྲི་ལོ་ལྔ་བཅུ་བ་ཡིན། དེའི་རྗེས་སུ་ཀྱ་ཆིན་ཁྲི་ལོ་གསུམ་པ་རབ་འདོད་ས་རྟ་ལོར། ཆུ་བཟང་བློ་བཟང་ཐུབ་བསྟན་རབ་རྒྱས་དགུང་ལོ་གཉིས་བཞེས་པའི་དུས་ཆུ་བཟང་བླ་བྲང་ནས་མི་སྣ་མངགས་ཏེ་ད་ལྟའི་ཚེ་ཏན་འདུ་ཁང་ཆེན་མོ་འདི་བཞེངས།

དེའི་རྗེས་སུ་ལོ་ཚིགས་མི་གསལ་ཡང་མཁན་པོ་ཇ་སག་རིང་ལ་ཆུ་བཟང་བློ་བཟང་ཐུབ་བསྟན་རབ་རྒྱས་འདུ་ཁང་རབ་གནས་ལ་ཞུས་ནས་ཕེབས་ངེས་པ་ཡིན། དེས་ན་ད་ལྟའི་འདུ་ཁང་དེ་བཞེངས་པའི་ལོ་ནས་རབ་རྒྱལ་མེ་སྤྲེལ་ཡན་ལ་ལོ་བརྒྱ་དང་དགུ་འདས། ཚེ་ཏན་གཞུང་གི་ལག་དེབ་ཀྱི་ཡི་གེ་ཞིག་ཏུ་རབ་བྱུང་བཅུ་གཅིག་པའི་ཤིང་སྦྲུལ་ལོ་སྟེ། ཁང་ཞི་ཁྲི་ལོ་བཞི་བར་སྤོའུ་ཆོས་རྗེས་ཇོ་ཁང་བཞེངས་ཟེར། འདི་བདེན་ན་འོག་ནས་འབྱུང་བ་ལྟར་སྤོའུ་ཆོས་རྗེས་ཏཱ་མིང་ཝན་ལི་ཁྲི་ལོ་གསུམ་པར་ཚེ་ཏན་དགོན་བཏབ་ཅེས་བཤད་པ་མ་དག་པར་ངེས་ཏེ། ཁྲི་ལོ་དེ་གཉིས་ཀྱི་བར་ལོ་དགུ་བཅུ་གོ་གཅིག་འགྲོ་བས་སོ། །ལག་དེབ་ཅེས་པ་བཅའ་ཡིག་གི་ཟུར་རྒྱན་ཡིན། ཡང་ལག་དེབ་གཅིག་ཏུ། རབ་ཡིད་ཤིང་བྱི་ཀྱ་ཆིན་ཁྲི་ལོ་བཅུ་དགུའི་སྟེང་ཇ་སག་གིས་ཞིག་གསོས་གནང་ཟེར། ལོ་དེར་གྲུབ་དབང་གོང་མ་འཇིགས་མེད་བསམ་གཏན་རིན་པོ་ཆེ་འཁྲུངས་ཤིང་། ཞབས་དྲུང་ཚོན་པོ་མ་དགུང་ལོ་བཅུ་གཅིག་ཡིན། དེ་ནས་ཞབས་དྲུང་ཚོན་པོ་མ་དགུང་ལོ་ང་བཞིའི་སྟེང་རང་གི་ཆིབས་པ་སོགས་ཡོད་ཚད་ཕུལ་ཏེ་ལོ་གསུམ་གྱི་རིང་ཇོ་ཁང་གཞི་ནས་ཞིག་གསོས་མཛད། དེ་ནས་མཁན་པོ་འདི་བས་དགུང་ལོ་ཉེར་གསུམ་སྟེང་ཞིག་གསོས་གང་དགོས་གནང་། ཚོན་པོ་མ་དགུང་ལོ་ཞེ་གཅིག་གི་དུས་སྐུ་མཆེད་བློ་བཟང་བསྟན་པ་རྒྱ་མཚོ་དགོན་འདིར་ཕེབས་ནས་བླ་གྲྭ་ཡོངས་ལ། ཀུན་རིག་དང་ཐུགས་རྗེ་ཆེན་པོའི་དབང་གནང་ཞིང་མཆོད་པའི་རྒྱུན་བཙུགས། ལོ་འདི་ནི་ཇ་སག་འདས་ནས་ལོ་གསུམ་སོང་བའི་ཤིང་འབྲུག་དེ་ཡིན་པས་མཁན་པོ་ཚང་གི་ཡང་སྲིད་གདན་སར་མ་བཀོད་པའི་སྐབས་ཡིན། རབ་ཚེས་ས་གླང་ལོར་གྲུབ་དབང་འཇིགས་མེད་བསམ་གཏན་དགོན་འདིར་ཕེབས་ནས་གསང་འདུས་འཕགས་ལུགས་དང་། འཇིགས་བྱེད་དཔའ་གཅིག་གི་དབང་། ལྷ་མོ། དམ་ཅན་སོགས་ཀྱི་རྗེས་གནང་སྩལ་ཏེ། འདི་དུས་མཁན་པོ་བློ་བཟང་འཇིགས་མེད་རབ་བརྟན་དགུང་ལོ་ཞེ་བདུན་དང་། ཞབས་དྲུང་འཇིགས་མེད་ཐུབ་བསྟན་རྒྱ་མཚོ་དགུང་ལོ་ཉེར་བདུན་ཡིན། རབ་ཚེས་ལྕགས་ཡོས་ལོར་རྗེ་ཞྭ་དམར་པཎྚི་ཏ་ཕེབས་ནས། ལམ་མཆོག་སྙིང་བོ། སྒྲོལ་བསྟོད། དར་མོ་སྨན་རམས་པའི་མན་ངག་བཀའ་རྒྱ་མ་བཅས་ཀྱི་ལུང་གནང་། བླ་མ་རྡོ་རྗེ་འཆང་སྔ་ཕྱིར་ཕེབས་ནས་དགུན་བཞུགས་གཉིས་གནང་སྟེ་དབང་ལུང་རྗེས་གནང་མང་ཙམ་དང་། ཁ་དྲུག་གིས་ཞུས་ངོར་འདུ་ཁང་ནང་ནས་ཚོགས་པ་སྟོང་ཕྲག་མང་བོར་དུས་འཁོར་དབང་ཆེན་སོགས་ཆོས་ཀྱི་བཀའ་དྲིན་རྒྱ་ཆེར་སྩལ་བ་རྣམ་ཐར་དུ་གསལ། དགེ་འདུན་པ་བརྒྱད་ཅུ་རྩ་གྲངས་བཞུགས་པར། དུས་ཆེན་བཞིའི་སྨོན་ལམ། བཞི་བར་མཆོད་པ་དང་། སྨྱུང་གནས། ལྔ་བའི་ནང་གསང་འདུས་སྒྲུབ་མཆོད། གཞི་གསུམ་ཕྱག་ལེན། ལོ་གཉིས་ཀྱི་མཚམས་རེར་མ་ཎི་བུམ་སྒྲུབ། ཆོས་སྐྱོང་ཁག་གི་གདང་དབྱངས་རྟ། རྒྱ་ལོ་ནང་འཆམ་དང་གོས་སྐུ། མེ་ཏོག་རྒྱན་འབུལ་སོགས་བླ་མ་གོང་མས་བཙུགས་པའི་ཕྱག་སྲོལ་མང་ཡང་དེང་སང་ཕལ་ཆེ་བ་ཞིག་འཇའ་ལུས་ཀྱི་སྐུ་བརྙེས་ལ། དེར་མ་ཟད་ཡབ་རྗེ་སྐལ་ལྡན་ཆོས་འབྱུང་དུ་གསལ་བ་ལྟར། སྔོན་ཆད་མཚན་ཉིད་ཀྱི་རྩོད་གྲྭ་ཡང་ཚུགས་པའི་རྟགས་ལ་དེང་སང་ཚོགས་གྲོལ་ཁར་བན་ཆུང་ཚོས་ཐལ་སྐད་གཏོང་བ་ཙམ་ཞིག་ལུས་སྣང་ངོ་། །བཅའ་ཡིག་ཞབས་དྲུང་ཚོན་པོ་མས་དགུང་ལོ་ང་གསུམ་སྟེང་འདུས་སྤྱིས་ཞུས་ངོར་བརྩམས་པ་ཞིག་ཡོད། ཚེ་ཏན་ཞེས་འབྲི་བའི་ཡི་གེ་ལ་ཁ་ལྕེའི་གདངས་ཀྱི་དབང་གིས་སེ་ཏན་དང་སེ་དན་དང་ཚེ་ཏན་ཞེས་བྲིས་སྣང་ཞིང་། ངེས་ཚིག་གསལ་བོ་ཤོད་རྒྱུ་མེད་པས་གང་དགའ་ཆད་དཀའ་ལ། རྒྱུས་མེད་པ་ཚོས་ཚེ་བརྟན་ཞེས་འབྲི་བ་ནི་མ་དག་པའོ། །ལྷ་སྡེ་ལ་ཚོ་བ་ཉི་ཤུ་རྩ་བརྒྱད་ཡོད་ཅིང་མི་རིགས་ལ་ཡང་རྒྱ་བོད་ཧོར་གསུམ་ག་ཡོད་ལ། སྐད་རིགས་བྱིངས་བོད་སྐད་ཡིན་ཡང་རྒྱ་ཡུལ་དང་ཐག་ཉེ་བས་རྒྱ་སྐད་འདྲེས་པ་ཤིན་ཏུ་མང་ཞིང་། སྐབས་འགར་བརྡ་རྙིང་བའམ་ཆོས་སྐད་དང་མཐུན་པ་ཡང་མང་དུ་སྣང་སྟེ། དཔེར་ན། ཁ་ཟས་ལ་འཚལ་མ་དང་། ཡོད་མེད་ལ་སྣང་མི་སྣང་ཞེས་བརྡ་རྙིང་དང་། ཁལ་དག་ལ། གོས་དྲ། ཆོས་གདོན་ཞེས་རྟགས་འཇུག་གི་དོན་ལྟར་བྱ་ཚིག་དག་པར་ལེན་པ་སོགས་དེ་འདྲ་མང་དུ་ཡོད་དོ། །

དེ་ནས་ཚེ་ཏན་ལུང་བའི་གཡས་ངོས་སུ་ཕྱིན་པ་ན། གཡག་ལང་གི་རི་རྒྱུད་གླང་ཆེན་གྱི་སྣ་ཞགས་ལྟར་བརྐྱངས་པའི་དཀྱིལ་ཙམ་དུ་གོང་སྐྱ་དགོན་གྲོང་ཆགས་ཤིང་། དེའི་སྣ་རྩེ་ལྟ་བུའི་ཕྱུག་མོའི་རི་རྒྱུད་ཟད་མཚམས་དང་། རྨ་ཆུ་ལ་ཉེ་བའི་རི་ངོས་དང་ཤོད་དུ་གཅན་ཕུག་སྒར་གྲོང་ཆགས་ཡོད་དོ། །དེ་ལ་གོང་སྐྱ་ཡང་དགོན་ཐུབ་བསྟན་གླིང་ནི་རྒྱལ་བ་ཡང་དགོན་པས་བཏབ་པ་སྟེ། དེ་ལ་ལོ་རྒྱུས་ཁུངས་ལྡན་ཞིག་མ་མཐོང་མོད། ཡུལ་དེ་གའི་རྒན་པོ་དག་གི་ངག་སྒྲོས་ལྟར་ན། བོད་ཀྱི་རྒྱལ་རྒྱུད་ལས་མཆེད་པའི་རིགས་ཤིག་ལ་སྲས་གླང་དཀར་བ། སྐྱི་ཤུལ་བ། ཡང་དགོན་པ་སྟེ་གསུམ་ལས་དང་བོས་གྲོ་ཚང་བཏབ། གཉིས་པས་ཁ་ཏི་ཀ་བཏབ། གསུམ་པས་གོང་སྒར་དང་ཁ་སྒང་དགོན་བཏབ་ཟེར་མོད། བཤད་ཚད་ཁུངས་དག་ཡིན་མིན་དཔྱད་དགོས་ཏེ། བྲག་དགོན་པའི་ཆོས་འབྱུང་དུ། གྲོ་ཚང་བྲག་འདེབས་པ་པོ་ནི་གྲུབ་ཆེན་མཚོ་རྙིང་བའམ་གླང་དཀར་བར་གྲགས་པ་ཧེ་བླ་མ་སངས་རྒྱས་བཀྲ་ཤིས་ཡིན་པར་བཤད་འདུག་ནའང་། ཁ་ཏི་ཀ་ནི་རྗེའི་དངོས་སློབ་བྱང་བླ་མ་ཆོས་ཀྱི་རྒྱལ་བོས་བཏབ་པར་བཤད་དོ། །

ཡང་ཆོས་འབྱུང་དེར། ཁྲི་གའི་ཕྱོགས་ཀྱི་དགོན་རོང་བྲག་སྐྱ་རྡོ་རྗེ་རྫོང་བཤད་སྐབས། དེའི་ལུང་བའི་ཕུར་རྒྱལ་བ་ཡང་དགོན་པའི་སྒྲུབ་གནས་སྔོན་མོ་རྫོང་ཡོད། འདི་བ་ཡང་ཏིག་ཕྱོགས་ནས་འཁྲུངས། དན་ཏིག་ཐིས། ཡང་ཏཱ་ཐིས། ཁ་ཤ་ཐིས་ཏེ་ཐིས་གསུམ་དུ་གྲགས་པའི་དགོན་པ་བཏབ། ཅེས་བཤད་པ་ལྟར་ན་རྒྱལ་བ་ཡང་དགོན་པ་དེ་ཉིད་ཕྱོགས་འདི་ཞིག་ཏུ་འཁྲུངས་ཤིང་། དེར་མ་ཟད་སྔར་དན་ཏིག་གི་སྐབས་སུ་བཤད་པ་ལྟར་ཐིས་པའི་དགོན་འདེབས་པ་པོ་ཡང་འདི་བ་ཡིན་པ་འདྲའོ། །ཡང་དགོན་པའི་ལོ་རྒྱུས་ཀྱི་ཡི་གེ་ཞིག་རྒྱ་རྒྱའི་དགོན་པའི་ཨ་ལགས་འབའ་ཡོག་ཚང་གི་ཕྱག་ཏུ་ཡོད་པར་གྲགས་ཤིང་། དེའི་བཀའ་ཤོག་གཅིག་སྐུ་འབུམ་ཆེ་ཤོས་ཚང་དུ་ཡོད་པའི་ཁ་སྐད་སྣང་ངོ་། །གང་ལྟར་ཡང་ཐོག་མར་ད་ལྟའི་དབྱར་སའི་སྡེ་བ་ཆགས་པའི་ཁུད་དེ་དགོན་གནས་བཞུགས་ལ། དེ་ནས་ད་ལྟའི་སྒར་རྙིང་བ་ཟེར་བ་མདུན་རིའི་ནགས་འདབས་དེར་སྤོར། དེའི་ཚེ་དགོན་པའི་མིང་ལ་ཡང་དགོན་ཀུན་ཏུ་བཟང་པོའི་ནགས་ཁྲོད་ཟེར། འོག་ཏུ་འཆད་པ་ལྟར་ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་དང་། སྐུ་མཆེད་བློ་བཟང་བསྟན་པ་རྒྱ་མཚོ་རྣམ་གཉིས་གང་དུ་ཕེབས་པའི་གནས་ནི་འདི་ཡིན་པར་ངེས། གོང་མ་ཏོ་ཀྭོང་ཁྲི་ལོ་ཉེར་བདུན་པའི་སྐབས་ཀྱི་ཧོས་འཁྲུག་དེ་བྱུང་བའི་རྐྱེན་གྱིས་དགོན་པ་གནས་མ་ཐུབ་པར་བརྟེན། རྗེ་ཐར་ཤུལ་རིན་པོ་ཆེར་བརྟག་པ་ཞུས་ནས་འདན་མའི་གྲོ་རྒན་དགོན་གནས་སུ་བབས་ནའང་རང་འདོད་དབང་བཙན་པར་བྱས་ཏེ་ད་ལྟའི་གྲོ་རྒན་གྲུ་ཟེར་བ་འདིར་དགོན་པ་སྤོས། དེ་ཡང་བཅའ་ཡིག་ཏུ་གསལ་བ་ལྟར། ཀྭོང་ཞུ་ཁྲི་ལོ་དང་བོ་ཤིང་ཕག་ལོར་གསར་སྤོས་བྱས་པ་ནས་བཟུང་རབ་རྒྱལ་མེ་སྤྲེལ་ཡན་ལ་ལོ་གྱ་གཉིས་འདས། དེ་དུས་མཁན་པོ་བློ་བཟང་འཇིགས་མེད་རབ་བརྟན་དགུང་ལོ་སོ་གསུམ་དང་། ཞབས་དྲུང་འཇིགས་མེད་ཐུབ་བསྟན་རྒྱ་མཚོ་དགུང་ལོ་བཅུ་གསུམ་ཡིན། དགོན་པ་སྤོར་སྐབས་ཞབས་དྲུང་དགེ་རྒན་ཚེ་ཏན་ནོར་བུ་དོན་གྲུབ་སྟེ་ཡོངས་གྲགས་ལ་ཨ་ཀ་ཏོ་ཐེ་ཟེར་བ་དེ་ཉིད་ཀྱིས་ཁ་མགོ་བྱས་ཟེར། མཁན་པོ་བློ་བཟང་འཇིགས་མེད་རབ་བརྟན་གྱིས་བརྩམས་པའི་མཐུ་དགོན་དང་ཡང་དགོན་གྱི་བཅའ་ཡིག་གི་ཡི་གེ་བའང་འདི་བ་ཡིན་པར་བཅའ་ཡིག་སོ་སོའི་གཤམ་དུ་གསལ། ཡང་དགོན་པའི་སྐུ་རིང་ལ་བཞེངས་པའི་གསེར་ཡུམ་དང་། གཅོད་བརྒྱ་གསེར་བྲིས་མ་པོད་ལྔ་དང་། ཨར་ནག་ལས་བཟོས་པའི་གླེགས་ཤིང་འགའ་རེ་དང་། དམག་དུང་ཆ་རྣམས་ལས་གསེར་ཡུམ་མ་གཏོགས་གཞན་རྣམས་ད་དུང་ཡང་འདུ་ཁང་ན་ཡོད་ལ། གསེར་ཡུམ་ད་ལྟ་དན་ཏིག་ཏུ་བཞུགས་ཏེ་སྔར་བཤད་ཟིན་ཏོ། །

གོང་སྐྱ་ཡར་མར་གྱི་གྲོང་སྡེ་ནི་ཡང་དགོན་པའི་ལྷ་སྡེ་ཡིན་སྟབས་ཟུར་ཆག་པས་ད་ལྟ་ལྷ་རྫས་སུ་འབོད་པར་གྲགས། ངག་སྒྲོས་སུ་མཆོད་རྟེན་དཀར་པོ་ཡན་དང་ཁ་ཤ་ཐིས་མན་ཆད་ལྷ་སྡེ་ཡིན་པར་ཡང་བཤད་དེ་ཧ་ཅང་ཐལ་དྲགས་པར་སེམས། ད་ལྟའི་འདུ་ཁང་དུ་ལམ་རིམ་བླ་བརྒྱུད་དབུས་ཐང་། རྗེ་ཚོང་དཔོན་དགེ་ལེགས་མ། སྣར་ཐང་བཀའ་འགྱུར། ཡུམ་དང་ཉི་ཁྲི་སོགས་ཚར་ཁ་ཤས། མཁན་པོ་གོང་མས་གདན་དྲངས་པའི་རྒྱལ་བ་འཕྲིན་ལས་རྒྱ་མཚོའི་ཕྱག་ཐམ་དང་སྤྱན་དབྱེ་མཛད་པའི་རྗེ་གཟིགས་པ་ལྔ་ལྡན་གྱི་གྲས་ལས་འཇིགས་རུང་སྟག་ཞོན་གྱི་དབུས་ཐང་། མ་ཎི་བུམ་ཁང་། ལི་སྐུ་འགའ་རེ་སོགས་སྔོན་གྱི་རྟེན་རྙིང་དང་ཕྱིས་སུ་བཀའ་མ་ལོག་ནན་གྱ་བསྟན་པས་ཕུལ་བའི་རྗེའི་གསུང་འབུམ། དབྱར་སའི་རིན་ཆེན་བཀྲ་ཤིས་དང་གཡང་འབུམ་དོན་གྲུབ་ཀྱིས་བླུས་པའི་རྒྱལ་ཚབ་མཁས་གྲུབ་གཉིས་ཀྱི་གསུང་འབུམ། དབྱར་སའི་ལོ་ཀོ་དང་མགོན་པོ་རིན་ཆེན། རྣམ་རྒྱལ་ཚེ་བརྟན་གསུམ་གྱིས་བཞེངས་པའི་བླ་མ་རྡོ་རྗེ་འཆང་ཨ་བྷྱ་ཞབས་ཀྱི་གསུང་འབུམ་ཆ་ཚང་བཅས་སོ་སོར་ན་བཟའ་གདོང་དར་སོགས་སྤུས་གཙང་བ་དང་། རྗེ་བླ་མ། རྡོ་རྗེ་འཆང་ཨབྷྱ་ཞབས། མཆོག་སྤྲུལ་རིན་པོ་ཆེ་འཇིགས་མེད་ལུང་རྟོགས་རྒྱ་མཚོ་སོགས་ཀྱི་སྐུ་བརྙན་གསར་བཞེངས་དུ་མ་དང་།རྗེ་ཆུ་བཟང་རིན་པོ་ཆེས་གནང་བའི་ཏཱ་མིང་ཟོན་ཏེའི་རིང་གི་སྦུབ་ཆ་སོགས་མཆོད་ཆ་དང་། སྔ་ཕྱིར་བསྒྲིགས་པའི་འཆམ་ལྭ་མང་ཙམ་དང་། རྡོ་རྗེ་མཁའ་འགྲོས་ཆ་རྐྱེན་སྦྱར་ཏེ་བཞེངས་པའི་མཆོད་རྫས་གསར་བཟོས་བཅས་དང་། གཡས་ཀྱི་ཇོ་ཁང་དུ་ཇོའུ་སྐུ། བྱམས་པ། འཇམ་དབྱངས། སྨན་བླ་བདེ་གཤེགས་བརྒྱད་སོགས་སྨན་སྐུ་ཆེ་ཆུང་ཅི་རིགས། གཡོན་དུ་རབ་རྒྱལ་མེ་སྤྲེལ་ལོར་གསར་བཞེངས་བགྱིས་པའི་ཆོས་སྐྱོང་ཁང་གི་གྱན་དབུས་མར་མཐུ་རྩལ་དྲེགས་ལྡན་དམ་ཅན་རྡོ་རྗེ་ལེགས་པའི་སྐུ་བརྙན་བྱིན་ཅན་དང་། གྱན་གཡས་མར་སློབ་དཔོན་པདྨའི་སྐུ་བརྙན། གཡོན་དུ་ཞབས་དྲུང་སྐྱེ་ཕྲེང་ལྔ་བས་བཞེངས་པའི་དམ་ཅན་སེང་ཞོན་གྱི་གྱན་ཐང་ངོས་ནས་ཕུལ་བ་དང་། གཏོར་སྒམ་སོགས་ངོས་གཙང་བ་བཅས་བཞུགས། འདི་ལ་ངག་སྒྲོས་སུ། རྒྱལ་བ་ཡང་དགོན་པས་དབུས་ནས་མགོན་པོ་ཕྱག་བཞི་པ་གདན་དྲངས་ཏེ་ལྡེ་ཚའི་ཐད་དུ་ཕེབས་ནས་ཆོས་སྐྱོང་གི་ཉམས་སད་ཕྱིར་འཕྲིན་བཅོལ་མཛད་པར་སྒྲ་ཆེན་དང་བཅས་བྲག་ལ་ཐིམ་པས་ད་ལྟ་མགོན་པོ་བྲག་ནག་ཏུ་བརྗོད་པ་འདི་ཡིན་ཟེར། སླར་དབུས་གཙང་དུ་ཆོས་སྐྱོང་ཞིག་གདན་འདྲེན་པར་ཕེབས་པ་ན། རྒྱལ་བ་ཡབ་སྲས་སུ་ཡིན་མ་ངེས་ཀྱང་། ཞལ་ནས། སྔར་གྱི་ཆོས་སྐྱོང་དེས་ཁྱོད་ཀྱི་དགོན་པར་གྲྭ་བ་སྟོང་ཕྲག་ཙམ་འདུ་བའི་རྟེན་འབྲེལ་ཡོད་མོད་དེ་མ་བྱུང་། ད་ནི་འཕྲིན་ལས་མྱུར་མགྱོགས་ཅན་ཞིག་སྟེར་གསུངས་ནས་ད་ལྟའི་ཆོས་སྐྱོང་སྐྱེས་བུ་ཆེན་པོ་རྡོར་ལེགས་ཤིང་སྐུ་ཁྲུ་ཚད་ལོངས་པ་འདིའི་གཟུངས་གཞུག་ཏུ་ཙཀླི་ཞིག་ཡོད་པ་དེ་གདན་དྲངས་པ་ཡིན་ཟེར། བླ་བྲང་གོང་འགབ་གཉིས་ཡོད་པ་ལས་བླ་བྲང་རྙིང་བར་སྔོན་གྱི་ཐེབ་ཆགས་ཙམ་ལས་ད་སྔ་རྟེན་བཞེངས་སོགས་ཅི་ཡང་མ་མཛད་འདུག་ལ། ཞབས་དྲུང་ལྔ་བས་བཞེངས་པའི་བླ་བྲང་གསར་བ་བདེ་ལྡན་ཕུན་ཚོགས་གླིང་གི་མཆོད་ཁང་དུ་རྗེ་བཙུན་སྒྲོལ་མ་སེང་ལྡེང་ནགས་སྒྲོལ་གྱི་སྨན་སྐུ་ཆེ་ཚད་གསེར་ཆབ་མ་གྲུབ་དབང་འཇིགས་མེད་བསམ་གཏན་གྱིས་རབ་གནས་སྤྱན་དབྱེ་མཛད་པའི་བྱིན་རླབས་ཆེ་བ་དེ་དང་། གནས་བཅུའི་འབུར་སྐུ། མཛད་བཅུ། བླ་མཆོད་ཚོགས་ཞིང་། སྒྲོལ་མ་འཇིགས་པ་བརྒྱད་སྐྱོབ་བཅས་ཀྱི་གྱན་ཐང་། རྒྱལ་དབང་བཅུ་བཞི་བ་ཆེན་པོས་གནང་བའི་རྗེ་དེ་ཉིད་ཀྱི་སྐུ་བརྙན་ཕྱག་ཐམ་ཅན། ཡུམ་སྐྱ་བྲིས་ཆ་ཚང་། གཉེར་བ་ལྷ་འབྲུག་གིས་བཞེངས་པའི་བླ་མ་རྡོ་རྗེ་འཆང་གི་གསུང་འབུམ། བླ་མ་རིན་པོ་ཆེས་བཀའ་འགྱུར་ལྗགས་ལུང་གནང་སྐབས་ཀྱི་བཞུགས་ཁྲི་ཆེན་མོ་སོགས་རྟེན་བཞེངས་མི་ཉུང་ཙམ་དང་། ཞབས་དྲུང་ལྔ་བས་རྒྱ་དཔོན་གྱི་ལས་ཁུར་བཟུང་དུས་ཀྱི་སྒྲིག་བཤམས་འགའ་རེ་བཅས་དང་། རྒྱ་ཕིབས་ཀྱི་རྩེར་གསེར་རྩིའི་ཀཉྫི་ར་པེ་ཅིན་ནས་གསར་བསྒྲུབས་བྱས་པ་དང་། གཟིམ་ཁང་ཕྱི་ར་ནང་སྐོར་བཅས་ཡུལ་དུས་ལ་དཔགས་པས་རྒྱ་ཆེ་བའི་ཚོད་དུ་གྱུར་སྣང་ངོ་། །གྲྭ་ཤག་གཅིག་ཏུ་དབུས་ནས་གདན་དྲངས་པའི་ཀློང་རྡོལ་བླ་མའི་ཕྱག་ཚ་སྤྱན་རས་གཟིགས་ཕྱག་སྟོང་སྤྱན་སྟོང་ཞིག་ཀྱང་ཡོད། གྲྭ་ཤག་སུམ་ཅུ་ཙམ་དང་གྲྭ་གྲངས་ལྔ་བཅུ་བརྒལ་བ་བཞུགས་པར། ས་གའི་ཉ་ལ་བྱ་ཁྱུང་ཕྱག་སྲོལ་ལྟར་བཙུགས་པའི་འཆམ་དང་། མགོན་པོ་རྡོ་རྗེའི་ཤ་འཆམ། སྨོན་ལམ་ཆོས་ཐོག་བཞི། ལྔ་བའི་མཆོད་པ། དབྱར་གནས། ལྔ་མཆོད། དགུ་བའི་དུས་མཆོད། དན་ཏིག་དང་རེས་མོས་ལྟ་བུས་ལོ་གཅིག་རེའི་རྗེས་ནས་མ་ཎི་བུམ་སྒྲུབ་ཚད་ལྡན་བཅས་ཡར་ལྡན་དང་། གསུམ་པའི་ནང་མི་འཁྲུགས་པའི་སྒྲུབ་མཆོད་ཅིག་སྔ་སོར་ཚུགས་ཀྱང་ད་སྐབས་རྒྱུན་ཆད་པར་སྣང་། རབ་བྱུང་བཅུ་གསུམ་པའི་ཤིང་སྦྲུལ་ལོར་ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་ཕེབས་པ་རྗེ་དེའི་རྣམ་ཐར་དུ་གསལ་ཏེ། དེ་ནི་མཁན་པོ་ཇ་སག་ཁྲི་ཁར་མ་བཀོད་པའི་སྐབས་དང་། ཞབས་དྲུང་སྐྱེ་ཕྲེང་གཉིས་པ་སྨར་ཚང་གི་སྐུ་ཚེ་སྨད་ཀྱི་དུས་ཏེ། ཤིང་སྦྲུལ་དེ་ནས་ད་ལྟའི་མེ་སྤྲེལ་བར་ལོ་བརྒྱ་དང་དོན་གཉིས་སོང་སྣང་། རབ་ཡིད་ཤིང་འབྲུག་ལོར་སྐུ་མཆེད་བློ་བཟང་བསྟན་པ་རྒྱ་མཚོ་ཕེབས་ནས་འདུ་ཁང་གསར་བ་ལ་རབ་གནས་མཛད་ཅིང་། མཆོད་འབུལ་གྱི་རྒྱུན་བཙུགས་པ་དང་། ཚོགས་ཡོངས་ལ་སེམས་བསྐྱེད་མཆོད་པ་དང་། ཀུན་རིག་དང་འཇིགས་བྱེད་ཀྱི་དབང་གནང་བར་རྗེ་དེ་ཉིད་ཀྱི་རྣམ་ཐར་དུ་གསུངས། ལོ་དེར་མཁན་པོ་བློ་བཟང་འཇིགས་མེད་རབ་བརྟན་འཁྲུངས་ནས་དགུང་ལོ་གཉིས་དང་། ཞབས་དྲུང་ཚོན་པོ་མ་དགུང་ལོ་ཞེ་གཅིག་གི་དུས་ཏེ་ད་ལྟ་ལོ་བརྒྱ་དང་བཅུ་གསུམ་སོང་། གྲུབ་དབང་གོང་མ་རྗེ་འཇིགས་མེད་བསམ་གཏན་རིན་པོ་ཆེ་ཕེབས་ནས་འཇིགས་བྱེད་བཅུ་གསུམ་དང་། བདེ་མཆོག་དྲིལ་བུ་ལུས་དཀྱིལ་གྱི་དབང་། ལུས་དྲིལ་གཉིས་ཀྱི་རིམ་གཉིས་ཀྱི་ཁྲིད་སོགས་དང་། སྒྲོལ་མའི་སྐུ་བརྙན་གསར་བཞེངས་ལ་རབ་གནས་མཛད། ཆོས་བཀའ་འདི་དག་བླ་བྲང་བདེ་ལྡན་ཕུན་ཚོགས་གླིང་ནས་གསུངས་པ་ཡིན་པར་ཞབས་དྲུང་ལྔ་བའི་གསན་ཡིག་ཏུ་གསལ། གཞན་འཇམ་དབྱངས་བཞད་པ་སྐལ་བཟང་ཐུབ་བསྟན་དབང་ཕྱུག་དང་། རྗེ་ཞྭ་དམར་པཎྚི་ཏ་སྐུ་ཕྲེང་སྔ་ཕྱི་རྣམས་ཀྱང་ཕེབས་ནས་ཆོས་བཀའ་ཅི་རིགས་སྩལ་ཅིང་། ཁྱད་པར་དུ་བླ་མ་རྡོ་རྗེ་འཆང་ཆེན་པོ་ཨབྷྱ་ཞབས་སྔ་ཕྱིར་ལན་འགར་ཕེབས་ནས་དབང་ལུང་མང་བོ་དང་། དགུང་ལོ་བཞི་བཅུའི་སྟེང་ཕེབས་ནས་སྒྲོལ་མའི་ལྷ་ཁང་དུ་བཀའ་འགྱུར་མདོ་མང་སོགས་ཀྱི་ལྗགས་ལུང་སྩལ་ཚུལ་རྣམས་ཞིབ་པར་རྗེ་ཉིད་ཀྱི་རྣམ་ཐར་དུ་གསལ། མཆོད་གཞིས་ལ་དབྱར་ས། གོང་སྐྱ་ཡར་ནང་མར་ནང་། འདན་མ། ཐ་ལེ་བཅས་ཚོ་བ་ལྔ་ཡོད་པར་ལྷ་རྫས་ལུང་བ་ཞེས་འབོད་དོ། །

གཅན་ཕུག་བཀྲ་ཤིས་ཆོས་གླིང་ངམ་གྲོ་ཅིན་ཟི་ནི། སའི་ཆགས་དབྱིབས་ཀྱི་དབང་དུ་བྱས་ན། རྒྱབ་ཏུ་བྲག་རི་མཐོན་པོར་ཐང་གསོམ་གྱི་ནགས་ཚལ་སྟུག་པོར་སྐྱེས་ཤིང་། མདུན་ངོས་ཕ་ཚད་དུ་སྟོང་རི་མཐོན་པོ་བརྗིད་ཅིང་ལྷུན་ཆགས་པའི་བར་དུ། རྨ་ཀླུང་དལ་གྱིས་འབབ་ལྡན་ལྷུང་ལྷུང་དུ་རྒྱུགས་པའི་ཆུ་བོ་མིག་གི་བདུད་རྩིར་སྨིན་པ་དང་། དགོན་པ་རི་ངོས་སུ་ཆགས་པས་གྲོང་ལས་ཤིན་ཏུ་དབེན་ཞིང་མཐོངས་ཡངས་པ་དང་། ཉེ་འཁོར་དུ་རྩྭ་ཤིང་དང་ཆུ་མིག་རང་ཆས་སུ་ཡོད་པས་མཐུན་རྐྱེན་ལག་མི་ཐོགས་པ་དང་། རྨ་འགྲམ་བདེ་ཐང་དུ་ཟན་ཁྲོན་ཞེས་ཁྲོན་གསུམ་གྱི་ཡ་གྱལ་ལྷ་སྡེ་ཚོ་བ་བརྒྱད་ཆགས་པར་ཤིང་ཐོག་གི་བཟའ་ཤིང་དང་། འབྲུ་དྲུག་གི་ཞིང་ས་སོགས་གཞན་ལ་འགྲམ་ཆུ་ལྡང་མི་དགོས་པའི་དཔལ་འབྱོར་ཁྱད་པར་དུ་འཕགས་སོ། །རིགས་རུས་ཀྱི་འབྱུང་ཁུངས་ནི། ཕལ་ཆེ་བ་ཞིག་སོག་ཡུལ་ནས་འོངས་ཤིང་འགའ་རེ་རྒྱ་ནག་ལས་མཆེད་པར་བཤད་དེ། གང་ལྟར་ད་ལྟ་ཐུའུ་ཙུ་ཞེས་འབོད་པ་སོག་སྐད་དང་ཆ་འདྲ་བའི་སྐད་རིགས་སྨྲ་བའི་ཧོར་གྱི་རིགས་ཡིན་ནོ། །སྔོན་དུས་དགོན་པ་ཧ་ཅང་དར་དུས་གྲྭ་གྲངས་སུམ་བརྒྱ་ཙམ་དུ་འཕེལ་ཞིང་། ད་ལྟའང་གཉུག་མར་གནས་པ་ལྔ་བཅུ་ལྷག་བཞུགས་པ་ལས་གཞན་སྐུ་འབུམ་སོགས་ཕྱི་ལོག་ཏུ་དགོན་འདིའི་གྲྭ་རིགས་ཤིན་ཏུ་མང་ངོ་། །འདུ་ཁང་དུ་རྗེ་ཡབ་སྲས། སྟོན་པའི་སྟོང་སྐུ། མཛད་བཅུའི་གྱན་ཐང་། རྟ་མགྲིན་ཡང་གསང་། བརྟེན་པ་དཔལ་ལྡན་ལྷ་མོ་བཅས་དང་། དུང་དཀར་གཡས་འཁྱིལ་སོགས་མཆོད་ཆ་དང་མཆོད་རྫས་ཤིན་ཏུ་སྤུས་གཙང་བ་དང་། རྒྱབ་རིའི་བྲག་གི་ལྷ་ཁང་མཐོན་པོར། དུས་གསུམ་སངས་རྒྱས། ཉེ་སྲས་བརྒྱད། ཁྲོལ་ཞལ་གཉིས། སྤྱན་རས་གཟིགས་བཅུ་གཅིག་ཞལ། གནས་བཅུ། མགོན་ཆོས་ལྔ་སོགས་བཞུགས་པའི་ལྷ་ཁང་སོ་སོ་དང་གནས་དབྱིབས་ངོ་མཚར་བ་བཅས་ཡོད། ཆོས་ཐོག་ལ། སྨོན་ལམ་ཆོས་ཐོག་བཞི། བཞི་བའི་མཆོད་པ། དབྱར་གནས། ལྔ་མཆོད། བོད་ལོའི་སྐུ་རིམ་བཅས་དང་། ཆོ་འཕྲུལ་སྨོན་ལམ་གྱི་མཇུག་ཏུ་འཆམ་བཅས་ཡོད། དགོན་པ་སུས་བཏབ་ཤེས་དཀའ་མོད། སྤོའུ་ཆོས་རྗེ་ཁུ་དབོན་སྐུ་ཕྲེང་གིས་ཞལ་བདག་མཛད་བཞིན་པ་དང་། དགོན་པ་འདིའི་བཅའ་ཡིག་རས་བྲིས་མ་ཤིན་ཏུ་རྙིང་བ་ཞིག་གི་མཇུག་ཏུ། སེ་ཏན་སྤོའུ་ཆོས་རྗེའི་གཅན་ཕུག་དགོན་པ་བཀྲ་ཤིས་ཆོས་གླིང་གི་བཅའ་ཡིག་འདི་ནི། དམ་པ་དེ་ཉིད་ཀྱི་ཉེ་འཁོར་བ་ནང་སོ་རྒྱལ་མཚན་དར་རྒྱས་ཀྱིས་བསྐུལ་ངོར། སློབ་མའི་ཐ་ཤལ་བ་བཙུན་གཟུགས་མ་ཎི་བས་ཆུ་ཁྱི་ལོར་བྲིས། ཞེས་འབྱུང་ཞིང་། ཆུ་ཁྱི་འདི་ནི་རབ་བྱུང་བཅུ་གསུམ་པའི་ཆུ་ཁྱི་ཡིན་པར་གསལ་ཏེ། དན་ཏིག་བཅའ་ཡིག་གི་མཇུག་ཏུ། སྤོའུ་ཆོས་རྗེ་རིན་པོ་ཆེའི་དན་ཏིག་ཤེལ་གྱི་ཡང་དགོན་གྱི་བཅའ་ཡིག་འདི་ནི། དམ་པ་དེ་ཉིད་ཀྱི་ཉེ་འཁོར་བ་ནང་སོ་དགེ་སློང་རྒྱལ་མཚན་གྱིས་བསྐུལ་བ་ལྟར་གྱ་ཆིན་རྒྱལ་པོ་གདན་ས་བཞི་བ། ས་མོ་ལུག་གི་ལོའི་དྲུག་བའི་བཅོ་ལྔ་ལ་སློབ་མའི་ཐ་ཤལ་བ་མིང་གི་སྐུ་སྐྱེ་མ་ཎི་བས་བྲིས། ཞེས་འབྱུང་སྟེ། བཅའ་ཡིག་དེ་གཉིས་ཀའི་བྲི་གཞི་དང་རྩོམ་ལུགས། སྐུལ་མཁན། ལོ་ཁྱད་གཉིས་ལས་མི་རྒྱུགས་པ་བཅས་ཤིན་ཏུ་ཆ་མཚུངས་པའི་རྒྱུ་མཚན་གྱིས་དེ་གཉིས་རྩོམ་པ་པོ་ནི་གང་ཟག་གཅིག་ཡིན་པ་ཐེ་ཚོམ་ཅུང་ཟད་ཀྱང་མེད་དོ། །དེར་མ་ཟད་ཀ་ཐུང་འདུ་ཁང་གི་དཀར་ཆག་བྲིས་ཅན་ཞིག་ཏུའང་། ཀྱ་ཆིན་ཁྲི་ལོ་ཉེར་གཉིས་པ་མེ་གླང་ལོར་མ་ཏི་བྷ་དྲ་ཤཱ་ས་ན་སཱུརྱ་སྟེ་བློ་བཟང་བསྟན་པའི་ཉི་མས་དགའ་ལྡན་དར་རྒྱས་གླིང་ནས་བྲིས། ཞེས་འབྱུང་ཞིང་། དགའ་ལྡན་དར་རྒྱས་གླིང་ནི་བིས་གྱ་དགོན་པ་ཡིན་ནོ། །ཀྱ་ཆིན་གདན་ས་བཞི་བ་ནས་ལོ་བཅུ་དགུ་འདས་པའི་མེ་གླང་ལོར་བརྩམས་པ་སྟེ་མ་ཎི་བློ་བཟང་བསྟན་པའི་ཉི་མ་འདི་ཡང་གོང་གི་དན་ཏིག་དང་གཅན་ཕུག་བཅའ་ཡིག་རྩོམ་མཁན་གྱི་མ་ཎི་བ་དེ་ཡིན་ངེས་པས་འདི་ནི་སེར་དྲིས་མ་ཎི་པཎྚི་ཏ་བློ་བཟང་བསྟན་པའི་ཉི་མ་ཚང་ཡིན་ནོ། །བཅའ་ཡིག་གཉིས་ཀྱི་སྦྱར་བྱང་དུ་སློབ་མའི་ཐ་ཤལ་བ་ཞེས་པའི་བབ་ལ་བརྟགས་ན་མཁན་པོ་དཔལ་ལྡན་རྒྱ་མཚོ་ལ་ཆོས་འབྲེལ་ཡོད་པའི་གསུང་དུ་འཁུམས་སོ། །གང་ལྟར་གཅན་ཕུག་དགོན་པའི་བཅའ་ཡིག་དེའི་བསྟན་ཚོད་ལྟར་ན་མཁན་པོ་དཔལ་ལྡན་རྒྱ་མཚོའི་རིང་ནས་འཛིན་བདག་བྱས་སམ་སྙམ། དགོན་པའི་ཀླད་དུ་བླ་བྲང་ཁང་ཧྲུལ་ཞིག་ཡོད་པ་ད་ལྟ་ཞིག་པར་གྱུར་རྐྱེན་རབ་རྒྱལ་མེ་སྤྲེལ་ལོར་དགོན་དེ་གའི་འདུས་སྤྱི་དང་ལྷ་སྡེའི་མོས་འདུན་ལྟར་སྐྱ་སེར་ཐུན་མོང་ནས་ཕྲན་བུ་ལ་དམིགས་ཏེ་མཚམས་ཁང་ལྟ་བུའི་སྒར་གཞིས་ཆུང་ངུ་ཞིག་གི་གཞི་འདིང་རྩིས་བྱས་སྣང་ངོ་། །དགོན་འདིར་སྐྱེས་ཆེན་དམ་པ་སུ་ཕེབས་ནི་ངག་རྒྱུན་དུ་གསལ་བར་མི་འབྱུང་མོད། ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་ཚང་ཁ་དྲུག་ཏུ་ཕེབས་དུས། དན་ཏིག ཡང་དགོན། ཚེ་ཏན་གསུམ་དུ་ཕེབས་པར་དེའི་རྣམ་ཐར་དུ་གསལ་ཞིང་། མཐུ་དགོན། ཀ་ཐུང་། གཅན་ཕུག་གསུམ་དུ་ཕེབས་མིན་མི་གསལ་མོད། འོན་ཀྱང་རྣམ་ཐར་དུ། ཡང་དགོན་སོགས་སུ་ཕེབས། ཞེས་སོགས་སྒྲ་ཞིག་འབྱུང་བས་གཅན་ཕུག་སྟོན་པ་ལས་འོས་མེད་སྙམ་མོ། །

གཙོས་གསེར་ཁྲི་བློ་བཟང་རྒྱལ་མཚན་སེང་གེའི་རང་རྣམ་དུ། ལྕང་སྐྱ་རྙིང་མ་ཡེ་ཤེས་བསྟན་པའི་རྒྱལ་མཚན་སྐུ་ཡུལ་དུ་ཕེབས་དུས་མཇལ་བར་ཕྱིན་པའི་ཐད་དུ་འདི་ལྟར། ཚུར་ལམ་བཀྲ་ཤིས་ཆོས་གླིང་གི་རྒན་པ་རྣམས་དང་ཟན་ཁྲོན་པ་ཁ་ཤས་ཀྱིས་གྲུ་གཟིངས་བརྟན་པོ་ཁ་ཤས་བཟོས། ཟན་ཁྲོན་པའི་མི་ཚང་ཕལ་ཆེར་ཞིག་གིས་བོས་བྱུང་བར་བློ་ངོ་དང་འཚམ་པའི་ཆོས་སྦྱིན་བྱས། ཁོང་པ་ཚོ་སྔར་སྨད་སོག་གི་ཡུལ་ནས་འོངས་པའི་མི་རྒྱུད་ལས་རིམ་གྱིས་མཆེད་ཅིང་། བླ་མ་དང་ལྷ་ཆོས་ལ་དད་མདོག་ཁ་ཞིག་འདུག་པས་ཁོ་བོ་ལ་མི་ཚང་སོ་སོ་ནས་དཀར་དམར་གྱི་བཟའ་བཅའ་སྣ་ཚོགས་དང་ཡོན་འབུལ་སྟེར་ཆ་ངོས་གཙང་སྤུས་ལེགས་བྱུང་། ཆུ་བཟང་མཆོག་སྤྲུལ་རིན་པོ་ཆེའི་དགོན་ལག་བཀྲ་ཤིས་ཆོས་གླིང་དུ་ཡོང་དགོས་ཚུལ་བྱུང་བ་ལྟར་ཆིབས་བསུ་སེར་སྦྲེང་རྔ་རོལ་དང་བཅས་མདུན་བསུས་ཏེ་དགོན་པའི་འདུ་ཁང་དུ་གསོལ་སྟོན་བགྱིས་ཐོག་བགྲེས་གཞོན་ཚང་མའི་ཐུགས་འདོད་དང་བསྟུན་ལམ་མཆོག་སྒོ་འབྱེད་ཀྱི་ལུང་བཤད་པ་མདོར་བསྡུས་དང་བཅས་ཕུལ་བར་ཡོན་འབུལ་ཡང་བཟབས། རྨ་ཆུར་གྲུ་ལས་བདེ་བར་ཐོན་ཏེ་སྟག་ལུང་དགོན་པར་ཕྱིན། ཞེས་གསུངས་པའི་བཀྲ་ཤིས་ཆོས་གླིང་ནི་གཅན་ཕུག་དགོན་པ་དང་། སྟག་ལུང་དགོན་ནི་ཀ་ཅུའི་ཧན་སྟག་ལུང་དགོན་ཡིན་ནོ། །

དེའི་ཕྱིར་གཙོས་ཁྲི་ཆེན་ཕེབས་པའི་ལོ་དེ་ནི་རབ་ཡིད་ཤིང་མོ་བྱ་ཡིན་པར་རང་རྣམ་ལས་རྟོགས་ནུས་ཤིང་། དེར་མ་ཟད་ཆུ་བཟང་རྙིང་མ་བློ་བཟང་ཐུབ་བསྟན་རབ་རྒྱས་ཀྱི་དགོན་ལག་ཡིན་པ་ཡང་ཞར་ལ་གོ་བར་ནུས་སོ། །ཕྱིན་ཆད་དཔེ་འདི་དག་མཇལ་བར་དཀའ་བས་འདིར་ཚེགས་ལ་མ་བལྟས་པར་ཆ་ཚང་བཀོད་ཡོད་དོ། །སྐུ་མཆེད་བློ་བཟང་བསྟན་པ་རྒྱ་མཚོའང་འདིར་ཕེབས་མིན་དེའི་རྣམ་ཐར་དུ་མི་འབྱུང་མོད། ཡང་དགོན་ནས་བརྒྱུད་དེ་ཟན་ཁྲོན་གྱི་ཝང་གྱ་ཟི། ཧུ་གྱ་ཟི། སཾ་བྷ་ར་སོགས་ཕྱག་ཏོ་ཐང་གི་དགོན་པ་ཕལ་ཆེར་དུ་ཕེབས་ནས་མཆོད་འབུལ་གྱི་རྒྱུན་བཙུགས་ཚུལ་གསལ་བ་དང་། གཅན་ཕུག་དགོན་འདིར་ཡང་བཞི་བའི་ནང་རྗེ་དེ་ཉིད་ཀྱི་ཕྱག་བཞེས་ལྟར་གྱི་མཆོད་འབུལ་ཚུགས་ཡོད་པ་བཅས་ལ། དཔག་ས་ན་ཡང་དགོན་གྱི་མར་ལམ་ཕེབས་ངེས་པ་ཡིན། ཕྱིས་སུ་བླ་མ་རྡོ་རྗེ་འཆང་ཆེན་པོ་ཨ་བྷྱ་ཞབས་དགུང་ལོ་བཞི་བཅུའི་སྟེང་ལོ་ཀྱ་ཏུང་དུ་ཕེབས་ལམ་དགོན་འདིར་བྱོན་ནས་ཞག་མལ་གནང་ཞིང་། འདུ་ཁང་ནས་འཇིགས་བྱེད་དང་ཀུན་རིག་གི་ཆོ་གའི་ལུང་སོགས་སྐྱ་སེར་གྱི་ཁྲོམ་མང་བོར་ཆོས་རྒྱུན་ཅི་རིགས་སྩོལ་བའི་བཀའ་དྲིན་བསྐྱངས་སོ། །

ལྷ་སྡེ་ཚོ་བརྒྱད་ཀྱི་ནང་ཚན་མཱ་གྱ་ནས་འཁྲུངས་པའི་ཟླ་དཀར་དགེ་བཤེས་ངག་དབང་བསྟན་འཛིན་ནི། རབ་ཡིད་ས་ཡོས་ལོར་འཁྲུངས། ཆུང་དུས་ནས་སྐུ་འབུམ་དུ་བསྐྱལ། ཆེ་ཤོས་ངག་དབང་བཤད་སྒྲུབ་བསྟན་པའི་ཉི་མ་ལས་རབ་བྱུང་དང་དགེ་ཚུལ་བསྒྲུབས། དགུང་ལོ་བཅོ་ལྔའི་སྟེང་ཚོགས་ཞུགས་གནང་སྟེ་ཐོས་བསམ་ལ་བརྩོན། དབུས་གཙང་དུ་ཕེབས་ཏེ་མཆོད་བཀུར་མཛད། བོད་ཀྱི་རྒྱལ་པོ་རེ་སྒྲེ་ཚང་གི་མདུན་ནས་བསྙེན་རྫོགས་བསྒྲུབས་འཕྲལ་རང་ཡུལ་དུ་བྱོན། ཆེ་ཤོས་རིན་པོ་ཆེ་དང་། གསེར་ཏོག་ཚང་རྣམ་གཉིས་ཀྱི་དྲུང་ནས་ཆོས་རྒྱུན་མང་པོ་གསན། དགུང་ལོ་རེ་དྲུག་པ་རབ་ཚེས་ཤིང་སྤྲེལ་ལོར་སྐུ་འབུམ་དུས་འཁོར་ཁྲི་ལ་བཞུགས། སྔ་ཕྱིར་ཐོར་ཝོད་ཤོག་ཏུ་ཕེབས་ཏེ་འགྲོ་དོན་བསྐྱངས། ཞལ་འདོན་དགེ་སྦྱོར་ལ་བརྩོན་བཞིན་དགུང་ལོ་དོན་བདུན་བཞེས་པའི་ཤིང་ལུག་ལོར་འདས་ཚུལ་སྐུ་འབུམ་གདན་རབས་སུ་གསལ། དེ་དུས་སྐུ་བདག་ཚོས་ཞུས་པ་ལྟར་ཚེ་ཏན་སྐུ་ཞབས་གོང་མ་གཉིས་ནས་སྤྲུལ་སྐུ་ཡོད་དགོས་པའི་ཕྱག་ཡིག་གནང་བཞིན་ཟི་ལིང་མཁར་གྱི་ཉེ་འདབས་ནས་འཁྲུངས་པའི་སྤྲུལ་སྐུ་ཞིག་གདན་སར་བཀོད། མཚན་ལ་བློ་བཟང་བསྟན་པའི་ཉི་མར་གསོལ་ཡང་དགུང་ལོ་ཆུང་དུས་ནས་འདས། སྐུ་ཕྲེང་གསུམ་པ་ཟླ་དཀར་བྱང་ཆུབ་བསྟན་པའི་རྒྱལ་མཚན་ནི། རབ་ཚེས་ས་ལུག་ལོར་ཀ་ཐུང་འགར་རུ་ཤི་སྣར་མཁན་པོ་སྐུ་ཕྲེང་ལྔ་བའི་འཁྲུངས་གཞིས་སུ་སྤོ་བོ་རྡོ་སྐྱབས་ཀྱི་ཚ་བོར་འཁྲུངས། དགུང་ལོ་དྲུག་བཞེས་ཐོག་སྐུ་འབུམ་དུ་གདན་སར་འགོད་སྐབས་ཕྲན་བུས་སྐུ་བདག་གི་འགན་བཟུང་ནས་སྐུ་འབུམ་བར་ཕེབས་སྐྱེལ་ཞུས། རྗེ་ཆེ་ཤོས་བྱང་ཆུབ་བསྟན་པའི་སྒྲོན་མེ་ལས་རབ་བྱུང་བཞེས། ཚོགས་ཆོས་གྲྭར་ཕེབས། དགེ་བའི་བཤེས་གཉེན་དུ་མའི་ཞབས་ལ་གཏུགས། དབུས་སུ་ཕེབས་ཏེ་སེར་བྱེས་གྲྭ་ཚང་དུ་ཞུགས་ནས་ཐོས་བསམ་ལ་རྩེ་གཅིག་ཏུ་འགྲུས། མཁས་པའི་གྲགས་སྙན་རྒྱས། པཎ་ཆེན་རིན་པོ་ཆེའི་བཀས་གསེར་ཏོག་ཚང་གི་ཡོངས་འཛིན་དུ་བཞུགས་ཏེ་ཨ་མདོར་བྱོན། བླ་བྲང་བཀྲ་ཤིས་འཁྱིལ་བར་ཕེབས་ནས་ཆོས་བཀའི་རྒྱུན་མནོག་ཆེ་བ་གསན། གཅན་ཕུག་ཏུའང་ལན་རེ་གཉིས་ཕེབས་ཏེ་གང་ཕན་ཆོས་ཀྱི་བདུད་རྩི་ཅི་དགར་བཀྱེས། ད་ལྟ་དགུང་ལོ་སོ་བརྒྱད་བཞེས་ཤིང་བསྟན་འགྲོའི་སྨན་ཡོན་དམ་པར་བཞུགས་པ་འདི་བཞིན་ལགས་སོ། །གཅན་ཕུག་ཅེས་བརྗོད་པའི་ངེས་ཚིག་ལ། ཁ་སྐད་དུ་གཅན་གཟན་རྒྱུ་བའི་ལུང་ཕུག་ཡིན་པས་ན་དེ་སྐད་ཅེས་བྱ་བ་དང་། སྔོན་འཕགས་པ་ཞིག་གིས་སྤྱན་སྦྱིན་པར་བཏང་བའི་གནས་ཡིན་པས་ན་སྤྱན་འབུལ་ཞེས་ཟེར་བར་གྲགས་པ་སོགས་ཁུངས་དང་ལྡན་མིན་ཅི་འཚལ་ཡང་། ངག་ལམ་ནས་གཅན་འབིག་གམ་གྲོ་མོ་ཁྲོན་ཞེས་ཡོངས་ལ་གྲགས་སོ། །ལྷ་སྡེ་ལ། གྲོ་གྱ། ཡུ་གྱ། ཏོ་གྱ། ནན་གྱ། ཉོ་གྱ། མཱ་གྱ། སྟོད་སྨད། ཀྲང་གྱ་སྟེ་ལྷ་སྡེ་ཚོ་བ་བརྒྱད་ཡོད་ཅིང་། ཡུལ་མི་སྤྱི་དང་། ཁྱད་པར་རྒན་མོ་རྣམས་ཆོས་ལ་ཤིན་ཏུ་དད་པས་འཕྲེང་བ་སྐེ་དང་མི་འབྲལ་བར་མ་ཎི་དམིགས་བརྩེ་མ་སྐྱབས་འགྲོ་རྣམས་དབྱངས་སུ་ལེན་པ་དང་། སྐུ་འབུམ་དུ་གྲྭ་རྒྱུན་འཇོག་པ་དང་། སྨོན་ལམ་ཆེ་ཁག་རྣམས་སུ་ལོ་རེ་བཞིན་ངལ་བ་ཁྱད་དུ་བསད་ནས་མཇལ་བར་འགྲོ་བ་སོགས་ཆོས་དད་ཤིན་ཏུ་ཆེ་ཞིང་། འཇིག་རྟེན་པའི་ལྷའི་ནང་ནས་བཀྭན་ལོ་ཡེ་སྟེ་སྤྲིན་རིང་རྒྱལ་པོ་དང་ཨར་ལང་ཡེ་གཉིས་ལ་མཆོད་བཀར་དཔེ་མེད་བྱེད་སྲོལ་ཡོད། སྐྱེས་པ་རྣམས་ཀྱི་ཆ་བྱད་ཕལ་ཆེར་རྒྱ་མི་དང་འདྲ་ཞིང་བུད་མེད་རྣམས་ཀྱི་ཆས་ནི་ད་ལྟའང་སྔོན་གྱི་ཆ་བྱད་མཆོད་པའི་ལྷ་མོ་དང་འདྲ་བ་དེ་ཉིད་མདོག་མ་འགྱུར་བར་ཡོད་དོ། །ངོ་མཚར་གྲུབ་པའི་གནས་དང་བྱིན་ཆེའི་རྟེན། །ངོ་མཚར་དཔག་ཡས་འདི་ཙམ་མཆིས་ན་ཡང་། །ངོ་མཚར་ལོ་རྒྱུས་འབྱུང་ཁུངས་གསལ་བྱས་པའི། །ངོ་མཚར་གཏམ་འདི་བདག་མིན་སུ་ཡིས་རྩོམ། །ཚད་ལྡན་དམ་པའི་གསུང་གི་ཁུངས་དང་ལྡན། །ཡིད་ཆེས་ངག་སྒྲོས་སྐྱོན་བྲལ་དུ་མས་སྤུད། །རང་གིས་མཐོང་ཐོས་སྤྱོད་ཡུལ་ལས་གྲུབ་གང་། །ཡི་གེར་བྲིས་འདི་ཀུན་ཡིད་རྟོན་པར་འོས། །རྣམ་གཡེང་མང་དུ་ལྷོད་པོར་བག་བརྐྱངས་པས། །རིན་ཐང་གཞལ་དཀའི་གཏམ་འདི་ག་ལས་རྙེད། །བདག་གིས་རིང་ནས་འབད་པས་མངོན་བྱས་པའི། །ལྟད་མོ་མཆོག་འདིར་ལན་གཅིག་གཟིགས་པར་ཞུ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

གསུམ་པ་སྒར་བ་ཁ་དྲུག་གི་འཛིན་བདག་ཚེ་ཏན་སྐུ་ཞབས་རྣམ་གཉིས་གོང་མ་ཚོའི་ལོ་རྒྱུས་ངེས་ཚོད་ཙམ་བརྗོད་པ་ནི། སྔར་བཤད་པ་ལྟར་དན་ཏིག་གིས་གཙོས་ཁ་དྲུག་རྣམས་སུ་ཕྱོགས་ཕེབས་བསྟན་འཛིན་གྱི་སྐྱེས་བུ་རིམ་བྱོན་རྣམས་ཀྱིས་ཆོས་ཀྱི་འཕྲིན་ལས་རྒྱ་ཆེར་སྤེལ་ནའང་། ཕྱོགས་དེར་སྐུའི་ཕྲེང་བ་ན་རིམ་གྱིས་ཆོས་སྲིད་ལེགས་ཚོགས་འཛིན་སྐྱོང་སྤེལ་གསུམ་གྱི་ཁུར་བཞེས་པ་ནི་ཚེ་ཏན་སྐུ་ཞབས་རྣམ་པ་གཉིས་ཡིན་ནོ། །དེའི་ཕྱིར་དམ་པ་དེ་གཉིས་ཀྱི་སྐུ་ཕྲེང་སོ་སོའི་མཛད་རིམ་ལོ་རྒྱུས་ཞིབ་འཁོད་ཀྱི་ཡི་གེ་ཞིག་རྙེད་དཀའ་མོད། རགས་རིམ་ཞིག་ནི་དན་ཏག་དཀར་ཆག་བསྐལ་བ་བཟང་པོའི་གཏམ་སྙན་དུ་ཡང་འབྱུང་ལ། དེ་ལས་ཅུང་ཟད་ཞིབ་པ་ནི་ཞབས་དྲུང་འཇིགས་མེད་ཐུབ་བསྟན་ནོར་བུའམ་ཡོངས་སུ་གྲགས་པའི་མཚན་ཞབས་དྲུང་ཚོན་པོ་མ་ཚང་གིས་མན་ཇུའི་རྒྱལ་བོ་ཏོ་ཀྭོང་ཁྲི་ལོ་ཉེར་དགུ་བ་སྟེ་རབ་བྱུང་བཅུ་བཞི་བའི་བགྲང་བྱ་ཞེ་གསུམ་པ་ས་བྱ་ལོར་བསྒྲིགས་པའི་ལོ་རྒྱུས་རིན་ཆེན་ཕྲེང་མཛེས་ཞེས་སྣ་ཐུང་དེབ་བཅུ་ཁ་མ་ལོངས་ཙམ་ཡོད་པ་དེ་གཞིར་བྱས། ངག་རྒྱུན་ཁུངས་མ་ཐོས་ཚད་ཀྱིས་ཟུར་བརྒྱན་ཏེ་འབྲི་བ་ལ། མཁན་པོ་ཚང་གི་སྐུ་ཐོག་དང་བོ་ནི། པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན་གྱི་དངོས་སློབ་སྤོའུའམ་སྤོ་བོ་ནས་འཁྲུངས་པའི་མཁས་ཤིང་གྲུབ་པའི་དབང་ཕྱུག་སྤོའུ་ཆོས་རྗེ་ཚུལ་ཁྲིམས་གྲགས་པ་ཡིན་ལ། པཎ་ཆེན་རིན་པོ་ཆེས། ཁྱོད་ཀྱི་གདུལ་བྱ་མདོ་སྨད་ཙོང་ཁའི་ཕྱོགས་སུ་ཡོད། ཅེས་ཕེབས་སྒོ་ཡང་ཡང་སྩོལ་བཞིན་པ་ལ། རེ་ཞིག་ན་ཚེ་ཏན་སྒ་ཚང་མའི་ཚོང་དཔོན་མགོ་སེར་ཞེས་པ་གཙང་དུ་སོང་ནས་པཎ་ཆེན་གཞུང་གི་སྐུ་དོན་ཡང་རྒྱ་ཆེ་བ་སྒྲུབ་ཚོད་རེད་དེ། གང་ལྟར་རང་ཡུལ་དུ་ལྡོག་ཁར་དངོས་རྫས་མང་བོའི་བདག་རྐྱེན་གནང་བ་ལ། ཚོང་དཔོན་གྱིས་དེ་བས་རང་ཡུལ་མཐའ་འཁོར་གྱི་སྐྱེ་འགྲོའི་བློ་སྣ་ཆོས་ལ་བསྒྱུར་བའི་མཚན་ཉིད་དང་ལྡན་པའི་བླ་མ་ཞིག་དགོས་ཞེས་ཨུ་ཚུགས་ཀྱིས་ཞུས་ངོར། སྔར་ཡང་ཡང་ལུང་བསྟན་པ་ལྟར་ས་འདིའི་སྐྱེ་འགྲོའི་ལས་སྐལ་དུས་སུ་སྨིན་ཏེ། སྤོའུ་ཆོས་རྗེ་གཏོང་གནང་མཛད་སྐབས། པཎ་ཆེན་རིན་པོ་ཆེ་ཉིད་ཀྱི་འདྲ་སྐུ་དང་དཔལ་ལྡན་ལྷ་མོ་གསུང་འབྱོན་མའི་རྟེན་ཐང་བཅས་སྩལ་ནས་རིམ་གྱིས་མདོ་སྨད་དུ་བྱོན། ཚེ་ཏན་གྱི་ཨ་བྷིས་ལྷ་ཆེན་གྱི་རི་ཞོལ། རྒྱལ་བ་བསོད་ནམས་རྒྱ་མཚོའི་བཞུགས་ཁྲི་དང་ཞབས་རྗེས་ཡོད་པའི་གནས་མགོ་ཆེ་ཐང་ཞེས་པར། ཚེ་ཏན་སྒར་རྙིང་རི་ཁྲོད་ལྟ་བུའི་གྲྭ་ཁང་འགའ་ཙམ་ལས་མེད་པ་དེར་རེ་ཞིག་བཞུགས། དེར་བཞུགས་སྐབས་ཉིན་གཅིག་ལྷ་མོའི་རྟེན་ཐང་གིས་གསུང་བྱོན་ཡང་ཟེར། རྟེན་ཐང་འགེལ་དྲེལ་ཉལ་ནས་སློང་མ་ཐུབ་ཀྱང་ཟེར། གང་ལྟར་ད་ལྟའི་ཚེ་ཏན་དགོན་གྱི་གནས་གཞི་འདིར་དགོན་གསར་ཕྱག་འདེབས་མཛད་དེ། དགོན་པའི་མཚན་ལ་དགའ་ལྡན་བཤད་སྒྲུབ་གླིང་དུ་བཏགས། དགོན་གསར་བཏབ་པའི་ལོ་འདི་ཏཱ་མིང་ཝན་ལི་ཁྲི་ལོ་གསུམ་པ་ཕག་གི་ལོ་ཡིན་ཞེས་རིན་ཆེན་ཕྲེང་མཛེས་སུ་བཤད་པ་ལྟར་མཁན་པོ་བློ་བཟང་འཇིགས་མེད་རབ་བརྟན་གྱི་ཕྱག་བྲིས་འགར་ཡང་རྗེས་ཟློས་མཛད་སྣང་མོད། དེ་ལྟར་ན་ཁྲི་ལོ་དེ་ནི་རབ་བྱུང་བཅུ་བའི་བགྲང་བྱ་དགུ་བ་ཤིང་མོ་ཕག་གི་ལོ་ཡིན་ལ། ལོ་དེར་ཚེ་ཏན་དགོན་བཏབ་པ་ཡིན་ན་དེ་དུས་པཎ་ཆེན་ཆོས་རྒྱན་དགུང་ལོ་དགུ་ཡིན་པས་སྤོའུ་ཆོས་རྗེ་མངགས་དུས་སྔ་ཆེས་པ་དང་། གོང་ནས་བཤད་པ་ལྟར་ཚེ་ཏན་ཇོའུ་ཁང་བཞེངས་པའི་བར་ལོ་གོ་གཅིག་འགྲོ་བས་སྤོའུ་ཆོས་རྗེ་དགུང་ལོ་བརྒྱ་ལྷག་ལ་བཞུགས་དགོས་པའི་ཐལ་བ་འབྱུང་། དེས་ན་ཏཱ་མིང་རྒྱལ་རབས་བཅོ་ལྔ་བ་ཐིན་ཆིའི་ཁྲི་ལོ་གསུམ་པ་ལ་བྱས་ན་ཆུ་ཕག་གི་ལོ་ཞིག་ཀྱང་ཡིན་པས་དུས་ཚོད་སྔ་ཕྱིའི་ཚོད་དང་འགྲིག་པར་འགྱུར་སྙམ། དེར་མ་ཟད་ཆུ་ཕག་ཕྱི་མ་འདི་ཐང་རིང་དགོན་བཏབ་ནས་ལོ་ལྔ་བ་དེ་ཡིན་པས་འོག་ནས་འབྱུང་བ་ལྟར་སྤོའུ་ཆོས་རྗེ་ཐང་རིང་དུ་གྲྭ་སྐོར་ལ་ཕེབས་བྱས་ན་ཡང་འཚམ་མོ། །

འདི་ལྟ་བུས་ལོ་ཚིགས་སྒྲིག་པ་ནི་བསྟན་རྩིས་ཀྱི་ཚུལ་ལ་བློ་གྲོས་ཀྱི་བུག་སྒོ་དོག་ན་དཀའ་བར་སྣང་ངོ་། །ཚོང་དཔོན་དེའི་གཞི་ཤུལ་ད་ལྟ་སྒ་ཚང་མའི་ལ་ཁ་ཚང་ཟེར་བ་འདི་ཡིན་པར་གྲགས། སྤྱིར་ཚེ་ཏན་ལྷ་སྡེའི་ཁྲོད་དུ། སྒ་ཚང་མ། སྒ་ནགས་གླས། སྒ་མར་ཁ་ཞེས་ཡོད་པ་རྣམས་ནི་སྔོན་གྱི་སྦྲ་འབྲུ་སྒ་ལྡོང་ཞེས་འབོད་པའི་རུས་ཆེན་བཞིའི་ཡ་གྱལ་གྱི་སྒའི་རིགས་སུ་གཏོགས་པ་ཤ་སྟག་ཡིན་པར་མངོན་ནོ། །གཞན་ཁ་ཏི་ཀ་དང་། ཐང་རིང་དང་། དགོན་ལུང་རྣམས་སུ་ཕེབས་ནས་ཆོས་ཀྱི་འཁོར་ལོ་བསྐོར་ཅིང་མཚན་ཉིད་ཀྱི་གྲྭ་སྐོར་མཛད། ཡིག་ཆའང་བརྩམས་པར་བཤད་དེ། དེ་ལྟར་ན་མཁས་པའི་རྒྱལ་ཐབས་འཛིན་པ་ཅན་ཞིག་ཏུའང་གྲུབ་བོ། །དགུང་ལོ་མཐར་འཁྱོལ་བར་བཞུགས་ནས་ཚེ་ཏན་དུ་སྐུ་འདས། སྐུ་གདུང་མཆོད་རྟེན་ཁྲུ་ཚད་གསུམ་མ་གསེར་རྩི་ཅན་དུ་བཞུགས་པར་ད་ལྟ་མཁན་པོ་ཚང་གི་ཀ་བཞི་མར་བྱིན་རྟེན་གཞན་ལས་ཁྱད་འཕགས་སུ་མཛད་པ་འདི་ཡིན་ནོ། །ཡབ་རྗེ་སྐལ་ལྡན་རྒྱ་མཚོའི་ཨ་མདོའི་ཆོས་འབྱུང་གི་ས་བོན་ལས། མཛོ་མོ་མཁར་དང་། བལ་ཇོའུ་དང་། ཚེ་ཏན་དུ་འཆད་ཉན་རེའི་རྒྱུན་བྱུང་ཡང་དེང་སང་འགྲིབ་སྣང་ངོ་། །ཞེས་དང་། སྔོ་ཁོའི་དན་ཏིག་དཀར་ཆག་ཏུ། སྤོའུ་ཆོས་རྗེ་དན་ཏིག་བྲག་སོགས་སུ་བཞུགས་ནས་བཤད་སྒྲུབ་ཀྱི་བསྟན་པ་བསྐྱངས་ཤིང་། མཛོ་མོ་མཁར་དུ་ཕེབས་ནས་ཆོས་རྒྱུན་སྤེལ། ཅེས་གསུངས་ལ། སུམ་པའི་ཆོས་འབྱུང་དུ། བྱང་དར་མའི་བཞུགས་གནས་ཕྱིས་སུ་སྤོའུ་ཚུལ་གྲགས་པས་བཟང་བའི་ཁ་ཏི་ཀའི་མཁར་ནང་གི་གསང་འདུས་དགོན། ཞེས་བཤད་པ་དག་ལ་དཔགས་ན་དགོན་ཁག་དེ་དག་ཏུ་ཡང་ཆོས་ཀྱི་འཕྲིན་ལས་རྒྱས་པར་འཁུམས། བྲག་དགོན་པའི་མདོ་སྨད་ཆོས་འབྱུང་དུ། ཨུ་ཤི་བྲག་རི་ཁྲོད་བཀྲ་ཤིས་དར་རྒྱས་གླིང་འདེབས་པ་པོ་པོའུ་ཚུལ་གྲགས་པ་ཡིན་པར་བཤད་པའི་མཐར་པོའུ་ཚུལ་གྲགས་པ་ནི་ཨང་དཀར་ཞབས་དྲུང་གི་གནས་བསྟོད་དུ། ཆེས་མཁས་གྲུབ་ཁྱད་འཕགས་ཟླ་མེད་པ། །རྗེ་སྨོན་ལམ་བསྟན་འཛིན་གྲགས་པ་ཞེས། །བྱང་ཧོར་ཡུལ་མུན་པའི་གླིང་ཆེན་དུ། །ཆོས་བསྟན་པའི་སྒྲོན་མེ་སྦོར་ནུས་པའི། །མགོན་ཚད་ལྡན་དམ་པ་དེ་རུ་འཁྲུངས། །ཞེས་བསྔགས་པ་ལྕང་སྐྱ་གོང་མའི་དངོས་སློབ་སྨོན་རམས་པ་བསྟན་འཛིན་གྲགས་པ་དང་གཅིག་གམ་སྙམ། ཞེས་བྲིས་པ་ནི་ཡིད་ཆེས་པའི་གཏམ་དུ་མི་སྣང་སྟེ། ལྕང་སྐྱ་གོང་མ་ནི་ཏཱ་མིང་གི་རྒྱལ་རབས་མཇུག་རྫོགས་པའི་སྔ་གོང་གི་ལོ་རབ་བྱུང་བཅུ་གཅིག་པའི་བགྲང་བྱ་བཅུ་དྲུག་པ་ཆུ་རྟ་ལ་འཁྲུངས་པས་ལོ་ཁྱད་ཆེན་པོ་བྱུང་ཞིང་། བསྟན་འཛིན་གྲགས་པ་དང་ཚུལ་ཁྲིམས་གྲགས་པ་ཞེས་མཚན་ཡང་མི་གཅིག་ལ། མགོན་ཚད་ལྡན་དམ་པ་དེ་རུ་འཁྲུངས། །ཞེས་པ་ལ་བལྟས་ན་ཡང་སྤོའུ་ཆོས་རྗེའི་འཁྲུངས་ཡུལ་ལ་བསྙེག་པར་ཤིན་ཏུ་དཀའ་འོ། །རིན་ཆེན་ཕྲེང་མཛེས་སུ་སྤོའུ་ཆོས་རྗེའི་ལོ་རྒྱུས་རྒྱས་པ་རྟེན་ཐང་ཁ་བྱང་དུ་གསལ། ཞེས་ཁ་འཕངས་ཤིག་འབྱུང་བ་ལྷ་མོའི་རྟེན་ཐང་ཡིན་འདྲ་ཡང་མཇལ་རྒྱུའི་སྐལ་བ་མ་བྱུང་ངོ་། །སྤོའུ་ཆོས་རྗེ་ཞེས་པའི་ཡི་གེ་ལ། ལ་ལས་པའོ་ཆོས་རྗེ་དང་འགར་པོའུ་ཆོས་རྗེ་སོགས་གང་འདོད་ཀྱིས་བྲིས་འདུག་ནའང་། བ་སོ་བ་རྟ་ཚག་རྗེ་དྲུང་བློ་བཟང་བསྟན་པའི་མགོན་པོའི་རྣམ་ཐར་དུ། བོད་རྒྱལ་གྲི་གུམ་བཙན་པོ་ལ་སྲས་གསུམ་གྱི་འབྲིང་བོ་བྱ་ཁྲི་ཡུལ་དེར་ཕེབས་ནས་འདིར་རེ་ཞིག་གནས་སྤོའོ་ཞེས་གསུངས་ནས་ཡུན་རིང་བཞུགས་པས་ཡུལ་མིང་ལ་སྤོའོ་ལུང་དྲུག་ཏུ་ཐོགས། ཞེས་གསུངས་པ་ལྟར་སྤོ་ལ་བདག་སྒྲ་སྦྱར་ནས་སྤོ་བོ་ཆོས་རྗེ་ཞེས་བྲིས་ན་ཁུངས་དང་ལྡན་ནོ། །

སྐུ་ཕྲེང་གཉིས་པ་སྤོའུ་སྤྲུལ་སྐུ་དོན་གྲུབ་རྒྱ་མཚོ་སྟེ། འདི་བ་དབུས་གཙང་གི་འཕྱོངས་རྒྱས་རི་བོ་བདེ་ཆེན་གྱི་སར་འཁྲུངས་ནས་འབྲས་སྤུངས་འགག་ཤིང་ཁམས་ཚན་དུ་བཞུགས། ཆོས་གྲྭར་ཞུགས་ཤིང་གསན་སྦྱོང་གང་ལེགས་མཛད་དེ་སྒོ་མང་མཁན་ཁྲིར་ཕེབས། འདི་ལ་མཁན་པོ་བློ་བཟང་འཇིགས་མེད་རབ་བརྟན་དབུས་གཙང་དུ་ཕེབས་ནས་གདན་དྲངས་པའི་རྗེ་གཟིགས་པ་ལྔ་ལྡན་གྱི་ཐང་ག་རྣམས་ཀྱི་རྒྱབ་ངོས་སུ་མཁན་ཐོག་སུམ་ཅུ་བ་དོན་གྲུབ་རྒྱ་མཚོ། ཞེས་བྲིས་ཤིང་། བེ་སེར་དུ་མཁན་ཐོག་སུམ་ཅུ་བ་ཨོ་རོང་དོན་གྲུབ་རྒྱ་མཚོ། ཞེས་པ་ལ་དཔགས་ན་འཁྲུངས་ཡུལ་དེ་ཅིར་འགྱུར་དཔྱད། སྐུ་ཚེ་གང་ཕལ་ཆེར་ལ་གྲྭ་ས་ནས་བཞུགས་ཤིང་སྐུ་ཚེ་སྨད་ཙམ་ལ་རང་དགོན་ཚེ་ཏན་དང་དན་ཏིག་ཏུ་ཕེབས་པར་གྲགས། མཚམས་འདིར་རིན་ཆེན་ཕྲེང་མཛེས་སུ། འདི་བས་ཆུ་བཟང་རིན་པོ་ཆེ་བླ་མར་བསྟེན་ཏེ་འབྲེལ་ཟབ་པ་དང་། དབུས་གཙང་དུ་བཞུགས་དུས་ཚེ་ཏན་གཅན་ཕུག་གོང་སྐྱ་སོགས་ནས་ཡང་ཡང་གདན་ཞུས་བགྱིས་པར་བརྟེན། དགོན་པ་དེ་དག་ཆུ་བཟང་ཚང་ལ་གཉེར་བཅོལ་མཛད་པ་དང་། ཆུ་བཟང་ཚང་ནས་ཀྱང་དགོན་ཁག་རྣམས་སྐྱོང་བའི་འགན་བཞེས་ཤིང་ཁྲི་ཚབ་འགའ་རེ་བཏང་བར་བཤད་པ་དང་། ཡང་དན་ཏིག་བྲག་ཏུ་ལྕང་སྐྱ་ངག་ཆོས་དང་ཕན་ཚུན་ཆོས་བཀའ་གསན་རེས་བྱས་པའི་ལོ་རྒྱུས་ཡོད། ཅེས་བྲིས་པ་ནི་ལོ་རྒྱུས་ཁུངས་དག་ཡིན་མིན་བརྟག་དགོས་ཏེ། ཚེ་ཏན་སོགས་དགོན་ཁག་གི་ཁྲི་བའི་འགན་བཞེས་པའི་ཆུ་བཟང་ནི། ལྕང་སྐྱ་རོལ་བའི་རྡོ་རྗེའི་སྐུ་མཆེད་རབ་ཉིའི་བགྲང་བྱ་སོ་དགུ་བར་འཁྲུངས་པའི་ཆུ་བཟང་དེ་ཡིན་ལ། དེ་དང་ཐོག་མར་འབྲེལ་ཆེ་བའི་མཁན་པོའི་སྐུ་རབས་ནི་སྐུ་ཕྲེང་གསུམ་པ་དཔལ་ལྡན་རྒྱ་མཚོ་བ་ཡིན་པའི་ཕྱིར་དང་། ལྕང་སྐྱ་ངག་དབང་ཆོས་ལྡན་པའི་སྐུ་སྔ་མ་ལྕང་སྐྱ་གྲགས་པ་འོད་ཟེར་དན་ཏིག་ཏུ་ཕེབས་པ་ལས་སྐུ་ཕྲེང་ཕྱི་མ་དན་ཏིག་ཏུ་ཕེབས་པའི་གཏམ་ཙམ་ཡང་མེད་པའི་ཕྱིར་རོ། །དེས་ན་མཁན་པོ་དོན་གྲུབ་རྒྱ་མཚོ་ཆུ་བཟང་དང་འབྲེལ་ཆེ་ཞེས་པ་སྐུ་ཕྲེང་ཕྱི་མའི་ངག་སྒྲོས་དང་ནོར་བ་འདྲའོ། །སྡེ་སྲིད་སངས་རྒྱས་རྒྱ་མཚོས་མཛད་པའི་རྒྱལ་བ་ཚངས་དབྱངས་རྒྱ་མཚོ་དགུང་ལོ་བཅུ་དགུ་བར་གྱི་རྣམ་ཐར་པོད་ལོངས་པ་ལས། སྒོ་མང་བླ་ཟུར་དོན་གྲུབ་རྒྱ་མཚོས་ཨོ་རོད་ནས་རྒྱ་སེར་གྱི་སྣམ་བུ་ཆུ་བ་ཉི་ཤུ་འདང་བ་དང་། དུས་རྟོགས་འཁོར་ལོ་སོགས་ཕུལ། ཞེས་འབྱུང་སྟེ་འདི་དུས་རྒྱལ་བ་ཚངས་དབྱངས་དགུང་ལོ་བཅུ་བདུན་དང་བཅོ་བརྒྱད་ཙམ་ཡིན་ངེས་ལ། དེ་ལྟར་ན་རབ་བྱུང་བཅུ་གཉིས་པའི་བགྲང་བྱ་བཅུ་གསུམ་པ་དང་བཅུ་བཞི་བའི་དུས་འདིར་པཎ་ཆེན་བློ་བཟང་ཡེ་ཤེས་དགུང་ལོ་སོ་གསུམ་མམ་སོ་བཞི་བཞེས་ཡོད་པ་དང་། ཨོ་རོད་དོན་གྲུབ་རྒྱ་མཚོའི་སྐུ་དུས་ཀྱང་རགས་རིམ་ཞིག་འདི་ལ་བརྟེན་ན་ཤིན་ཏུ་གསལ་ལོ། །

སྐུ་ཕྲེང་འདི་བ་སྒོ་མང་མཁན་ཁྲིར་བཞུགས་པས་ན་ཕྱི་མ་རྣམས་ལ་མཁན་པོ་ཞེས་གྲགས་སོ། །དེར་མ་ཟད་ཀུན་མཁྱེན་འཇིགས་མེད་དབང་པོས་མཛད་པའི་འཇམ་དབྱངས་བཞད་རྒན་གྱི་རྣམ་ཐར་ལས། ཀུན་མཁྱེན་བླ་མ་དགུང་ལོ་ང་བཞི་པའི་དུས་ཐོར་གོད་དོན་གྲུབ་རྒྱ་མཚོས་དྲི་བ་ཞུ་རྒྱུ། ས་བརྒྱད་པའི་ཟད་བར་གྱི་ཏིང་ངེ་འཛིན་གྱི་འཛིན་སྟངས་ཀྱི་ཡུལ་ཨེ་ཡོད་དྲིས་པར། རྗེ་འདིས་མེད་གསུངས། འོ་ན་ལོག་རྟོག་ཏུ་མི་འགྱུར་རམ་གསུངས་པ་ལ། དགོས་དབང་གིས་དེ་ལྟར་བཟུང་བ་ཡིན་གྱི། ཞེ་ཐག་པ་ནས་མི་འཛིན་པར་མ་ཟད། ཐེ་ཚོམ་གྱིས་ཀྱང་མི་འཛིན་པས་ལོག་རྟོག་ཏུ་མི་འགྱུར་གསུངས་པས། བླ་མཐོར་གོད་པའང་བློ་སྐྱེད་བྱུང་ཐུགས་དགྱེས་དགྱེས་མཛད། ཅེས་དང་། ཀུན་མཁྱེན་བླ་མས་བླ་མཐོར་གོད་པ་ལ་དྲི་བ་མཛད་རྒྱུ། མཆོག་གི་སྤྲུལ་བའི་སྐུའི་རྒྱུད་ལ་དགེ་སློང་གི་སྡོམ་པ་ཡོད་ན་ལོངས་སྐུ་ཡང་དགེ་སློང་དུ་ཁས་ལེན་མི་དགོས་སམ་ཞུས་པས། དེ་གཉིས་ཀ་རྒྱུད་གཅིག་ཡིན་པས་སྤྲུལ་སྐུས་དགེ་སློང་གི་སྡོམ་པ་ཐོབ་ན་ལོངས་སྐུས་ཀྱང་དེ་ངེས་པར་ཐོབ། དེ་ལྟར་ན་ལོངས་སྐུ་ཡང་དགེ་སློང་དུ་ཁས་ལེན་དགོས་ཤིང་། ལྷ་ལ་དགེ་སློང་མི་འདོད་པ་གྲུབ་མཐའ་འོག་མའི་ལུགས་ཡིན་གསུངས་པས་རྗེ་རང་གི་དགོངས་པ་དང་མཐུན་པར་བྱུང་། ཞེས་གསུངས་པའི་དོན་གྲུབ་རྒྱ་མཚོ་འདི་བ་གོང་སྨོས་ཨོ་རོད་དོན་གྲུབ་རྒྱ་མཚོ་དང་གང་ཟག་གཅིག་ཡིན་ན་ངེས་པར་མཁས་པ་ཟླ་མེད་ཅིག་ཡིན་ཞིང་། ལར་དམ་པ་གོང་མ་ཚོའི་གསུང་སྒྲོས་སུ། ལ་ལའི་ལྟ་རྒྱ་རྒྱན་ཡིན་ཏེ། །ལ་ལའི་ལྟ་རྒྱ་བྱུར་ཆགས་ཡིན། །ཞེས་པ་ངོས་སྟེང་དུ་བབས་མེད་ན། གོང་སྨོས་འདི་དག་གི་སྟེང་ནས་སྤོའུ་སྤྲུལ་སྐུ་དོན་གྲུབ་རྒྱ་མཚོའི་ལོ་རྒྱུས་ལ་བརྟག་པའི་གནས་ཤིན་ཏུ་ཆེའོ། །ཕྱིས་སུ་རང་ལོ་དོན་བཞིའི་སྟེང་མངོན་སུམ་དུ་མིག་ལམ་ལ་ཤར་བ་ནི། ཨོ་རོད་དོན་གྲུབ་རྒྱ་མཚོའི་སྤྲུལ་སྐུ་རྗེས་མ་རྣམས་ཤིན་ཅང་གི་སོག་ཡུལ་ན་ཡོད་དེ། ཡངས་གྲགས་ཀྱི་མཚན་ལ་སྒོ་མང་ཚང་ཟེར། དེ་ལྟར་ན་དོན་གྲུབ་རྒྱ་མཚོ་ལ་སྤྲུལ་སྐུ་གཉིས་བྱོན་པའི་གཅིག་ནི་རང་རེའི་སེ་ཏན་མཁན་པོ་འདི་བ་ཡིན་པར་བྱེད་དགོས་པས་ཚོན་པོ་མས་དེའི་ལོ་རྒྱུས་བྲིས་པ་གཏན་ནས་མ་དག་པར་སྣང་ངོ་། །

སྐུ་ཕྲེང་གསུམ་པ་དཔལ་ལྡན་རྒྱ་མཚོའམ་སྤྱན་གཟེངས་པ་ནི། རྨ་ཆུ་ཕར་བརྒལ་གྱི་སྟོང་རིའི་ལྷ་ཞོལ་ཀ་ཅུའི་སྡེར་གཏོགས་ཚོས་གྱ་ཧྭ་ཞེས་པའི་གྲོང་ཁྲོད་དུ། རྒྱ་མི་གཉོམ་ཆུང་བཟང་མི་གཉིས་ཀྱི་སྲས་སུ་འཁྲུངས་པ་དམ་པའི་མཚན་རྟགས་དང་ལྡན་པ་ཞིག་ཡིན་ནའང་སྟོང་རིའི་ནགས་འདབས་སུ་ཤིན་ཏུ་བཀྲེས་པའི་གཅན་གཟན་སྟག་གཅིག་ལ་སྐུ་ལུས་ཞེན་མེད་དུ་སྦྱིན་པར་བཏང་ཞེས་གྲགས་ལ། ཆེར་མ་འགྱངས་པར་སྔར་གྱི་ཁྱིམ་དེར། ཕ་མ་དེ་ཉིད་ལ་རྨིས་ལྟས་ཡ་མཚན་པ་དང་བཅས་བྱིས་ཆུང་ཞིག་བཙས་པ་ལ། ཆུང་དུས་ནས་ཁོ་བོའི་དགོན་པ་རྨ་ཆུ་བྱང་རྒྱུད་ན་ཡོད། དེར་འགྲོ་དགོས་ཞེས་པ་ལ་སོགས་པས་སྔོན་གནས་རྗེས་དྲན་གྱི་གསུང་ཡང་ཡང་བྱུང་བར་བརྟེན། སྤོའུ་ཆོས་རྗེའི་སྤྲུལ་སྐུར་ངོས་བཟུང་སྟེ་ཚེ་ཏན་དུ་སྤྱན་དྲངས། ཕྱིས་སུ་ཡབ་ཡུམ་འདས་པའི་གདུང་ཡང་དགོན་དེའི་ཉེ་འདབས་སུ་སྦས་པས་ཨ་མྱེས་གདུང་དང་། ཨ་མའི་གདུང་ཞེས་པའི་ས་མིང་ངོས་འཛིན་རྒྱུ་ཡོད། དེ་ནས་བླ་མ་སུ་བསྟེན་དང་། རབ་བྱུང་བསྙེན་རྫོགས་གར་བཞེས་རྣམས་མི་གསལ། གོང་མ་ཆེན་ལུང་ཁྲི་ལོ་བཅུ་གཉིས་པ་རབ་འདོད་མེ་ཡོས་ལོར་སྐྱ་རེངས་ཁ་བཞི་དབང་དུ་བསྡུས། ཚེ་ཏན་གྱིས་གཙོས་དགོན་མ་ལག་དྲུག་ཏུ་བྱས། ཕྱག་རྫས་མང་པོ་བཏང་ནས་པཱ་ཀྲུའུ་ཚང་གི་བླ་བྲང་བླངས་སྐད། ཆེན་ལུང་ཁྲི་ལོ་སོ་གཅིག་པ་མེ་ཕག་ལོར་དན་ཏིག་འདུ་ཁང་གསར་བཞེངས་བྱས་ཤིང་། དེ་དུས་ཟ་ལར་རྐུན་ཇག་གི་འཚེ་བས་དགོན་པ་གནས་དཀའ་བར་གྱུར་ཚེ། ཀ་ཅུའི་ཀྲིན་ཐེ་དང་ཡ་ཅིའི་ས་སྒོ་བརྒྱུད་ཙི་པན་བླངས་ཤིང་། ཙི་པན་གྱི་རྒྱ་ཡིག་གི་དོན་རྡོར། གོང་མས་མཁྱེན་པའི་དན་ཏིག་དགོན་པར་པོའུ་དགེ་བསྐོས་རྣམ་གཉིས་ཀྱིས་དཀར་ཐིགས་བསྡུས་ཏེ་འདུ་ཁང་བཞེང་། ཞེས་པ་ཙམ་ལས་ཆོ་ལོ་སོགས་བྱིན་པའི་གསལ་ཁ་མེད་ལ། དགེ་སྐོས་རྣམ་གཉིས་ཞེས་པའང་བླ་མ་རྣམ་གཉིས་ཡིན་པར་མངོན། གང་ལྟར་གོང་མའི་བཀས་དན་ཏིག་ཞབས་བརྟན་གྲྭ་ཚང་དུ་བསྒྱུར་བ་དང་། ཆོས་ཁྲིམས་ཕྱོགས་ལ་ཉམས་གསོ་དག་ཐེར་གྱི་མཛད་སྒོ་རླབས་ཆེ་བར་བརྟེན། བླ་ཆེན་དགོངས་པ་རབ་གསལ་གྱི་སྤྲུལ་བར་བསྔགས། རྒྱལ་མཆོག་བདུན་པའི་རྣམ་ཐར་ན་གསལ་བ་ལྟར་ཁྲི་ཆེན་ངག་དབང་མཆོག་ལྡན་པས་བྱ་ཁྱུང་གསེར་གདུང་རྒྱ་ཕིབས་བཞེངས་པའི་ལོ་དེར་མཁན་པོ་དཔལ་ལྡན་རྒྱ་མཚོས་དན་ཏིག་ཏུ་སྨོན་ལམ་འཛུགས་རྒྱུའི་དགེ་བསྐུལ་གྱི་བཀའ་ཤོག་ཞུས་པ་བཞིན་རྒྱལ་བས་བཀའ་ཤོག་དང་ཕྱག་ཡིག་གནང་བར་གསལ། སྐུ་ཚེ་སྨད་སོག་ཡུལ་ཨུར་དུ་སིའི་ཕྱོགས་སུ་ཕེབས་ཤུལ་ཆུ་བཟང་རིན་པོ་ཆེ་ངག་དབང་ཐུབ་བསྟན་དབང་ཕྱུག་ཚང་ནས་དགོན་མ་ལག་གི་ལས་སྣའི་བསྐོ་བཞག་དང་འཛིན་བདག་མཛད། སོག་ཡུལ་ནས་གླང་རི་ལུང་བསྟན་གྱི་ལྷ་ཁང་བཞེངས་ཤིང་། གྲྭ་བུ་སློབ་ཤིན་ཏུ་རྒྱས། འདི་སྐབས་གོང་མའི་བཀའ་ཐམ་དང་བཀའ་ཤོག་གནང་བ་ཐོབ་ཟེར་བ་ལྟར་ན་བ་སོའི་ཐམ་ག་དེ་སྐབས་དེར་བྱུང་བ་ཡིན་སྙམ། རྗེས་སུ་གནས་དེར་མཛད་པའི་ཐ་མ་བསྟན་ནས་ཡར་ཕེབས་རྒྱུ་མ་བྱུང་། ཆུ་བཟང་རིན་པོ་ཆེའི་ཞལ་བཀོད་ལྟར་སྟག་གྲུབ་སྤྲུལ་ཞབས་དྲུང་སྨར་ཚང་ཆེད་དུ་ཕེབས་ཏེ། སྐུ་གདུང་དང་ཕྱག་རྫས་ཡོད་ཚད་ཚེ་ཏན་དུ་གདན་དྲངས་ནས་གདུང་རྫོགས་རྒྱ་ཆེར་བཏང་། དེའི་རྐྱེན་གྱིས་ཆུ་བཟང་རིན་པོ་ཆེས་གཟིགས་སྐྱོང་ཚད་མེད་པའི་ཚུལ་གྱིས། ཞབས་དྲུང་སྨ་ར་ཚང་ཁ་དྲུག་གི་དགོན་པར་ཁོང་གི་ཁྲི་ཚབ་ཏུ་བསྐོ་བཞག་ཐོག་མར་མཛད།

སྐུ་ཕྲེང་བཞི་པ་སྤོའུ་སྐུ་སྐྱེ་བཙན་པོ་ཚང་ནི། ཆུ་བཟང་ནས་འཁྲུངས་པ་གདན་སར་བཀོད། དབུས་སུ་ཕེབས་ནས་ཆོས་གྲྭར་ཞུགས། རྒྱལ་བ་རིན་པོ་ཆེས་བཀའ་ཤོག་གནང་སྟེ་སླར་རང་དགོན་དུ་ཕེབས། དན་ཏིག་ཏུ་སྨོན་ལམ་དང་དབྱར་གནས། ཆོས་ཐོག་རྒྱུན་ཆགས་སུ་བཙུགས། སྐུ་ཚེ་མཐར་མ་ཕྱིན་པར་འདས།

སྐུ་ཕྲེང་ལྔ་བ་བློ་བཟང་རབ་བརྟན་ཀ་ཐུང་ཡར་ནང་འགར་རུ་ཤི་སྣ་ནས་འཁྲུངས་པ་སྟེ། ཕྱིས་སུ་སྐུ་འབུམ་ཟླ་དཀར་ཞབས་དྲུང་བྱང་ཆུབ་བསྟན་པའི་རྒྱལ་མཚན་ཡང་ཁྱིམ་དེར་འཁྲུངས་ཚུལ་གོང་ནས་བཤད་པ་ལྟར་ཡིན། དགོན་ཁག་རྣམས་སུ་ཁྲི་ལ་བཀོད། སྐུ་འབུམ་གྱི་ཆོས་གྲྭར་ཞུགས་ནས་ཡུན་མ་རིང་བར་སྐུ་གཤེགས། སྐུ་ཕྲེང་བཞི་བ་དང་ལྔ་བ་གཉིས་ལ་འདི་ཙམ་ལས་ལོ་རྒྱུས་ཀྱི་ས་བོན་མ་བྱུང་ལ། སྔར་བཤད་པ་ལྟར་སྐུ་ཕྲེང་གསུམ་པ་དཔལ་ལྡན་རྒྱ་མཚོས་རབ་འདོད་བགྲང་བྱ་ཉེར་གཅིག་པར་དན་ཏིག་འདུ་ཁང་བཞེངས་ཤིང་ཆེན་ལུང་ཙི་པན་བླངས་པའི་ལོ་ཚིགས་དེ་ཁུངས་དག་ཡིན་ཕྱིན། རབ་འདོད་བགྲང་བྱ་སོ་དྲུག་པ་ཆུ་སྟག་ལ་མཁན་པོ་ཇ་སག་འཁྲུངས་ངེས་པས་དེའི་བར་དུ་ལོ་བཅུ་བཞི་ལས་མ་བྱུང་། དན་ཏིག་འདུ་ཁང་བཞེངས་པའི་རྗེས་དེ་མ་ཁད། དཔལ་ལྡན་རྒྱ་མཚོ་སྐུ་གྲོངས་པའི་དབང་དུ་བྱས་ཀྱང་། ལོ་བཅུ་བཞིའི་རིང་ལ་སྔ་ཕྱིར་སྤྲུལ་སྐུ་གཉིས་གདན་སར་བཀོད་པ་ཙམ་དུ་མ་ཟད། སྔ་མ་དབུས་སུ་ཕེབས་ཁོམ་དང་། ཕྱི་མ་སྐུ་འབུམ་ཆོས་གྲྭར་ཞུགས་ཁོམ་ཡོད་མེད་ལ་དོགས་པ་ཆེ་བས་སླར་དཔྱད་དགོས། དེའི་ཕྱིར་སྤོའུ་སྐུ་སྐྱེ་བཙན་པོ་ཚང་ཞེས་པ་སྐུ་ཕྲེང་གཉིས་པ་དོན་གྲུབ་རྒྱ་མཚོའི་ཡོངས་གྲགས་ཀྱི་མཚན་དུ་ཡང་རིགས་པར་སེམས་ཏེ། སྔོ་ཁོའི་དཀར་ཆག་ཏུ་སྐུ་ཕྲེང་གཉིས་པ་སྤོའུ་སྤྲུལ་སྐུ་དང་། སྐུ་ཕྲེང་གསུམ་པ་སྤོའུ་བཙན་པོ་ཚང་། བཞི་བ་སྤྱན་གཟེངས་པ་ཞེས་བྲིས་འདུག་པ་དེ་ལ་ཡང་བརྟག་རྒྱུ་ཡོད་དོ། །གང་ལྟར་རིན་ཆེན་ཕྲེང་མཛེས་སུ་འདི་དག་གི་སྐབས་ཀྱི་ལོ་ཚིགས་བཀོད་པ་རྣམས་ལ་འགལ་འདུ་སྤུངས་པ་ལྟ་བུར་ཡོད་པས་སྐབས་སྐབས་སུ་བརྟག་པ་མི་བྱེད་ཀ་མེད་དུ་འདུག་གོ །

སྐུ་ཕྲེང་དྲུག་པ་ཇ་སག་ངག་དབང་འཇམ་དབྱངས་དོན་གྲུབ་ནི། རབ་བྱུང་བཅུ་གསུམ་པའི་ཆུ་སྟག་ལ་ཆུ་བཟང་རྭ་ལོ་ཐང་དུ་ཆུ་བཟང་ངག་དབང་ཐུབ་བསྟན་དབང་ཕྱུག་དང་། ལྕང་སྐྱ་རྙིང་མ་ཡེ་ཤེས་བསྟན་པའི་རྒྱལ་མཚན་གཉིས་ཀྱི་སྐུ་ཚར་འཁྲུངས། དགུང་ལོ་བདུན་པ་ལ་ཆུ་བཟང་རིན་པོ་ཆེ་ལས་རབ་བྱུང་བཞེས། དགོན་སོ་སོར་ཁྲི་ལ་བཀོད། དབུས་སུ་ཕེབས་ནས་འབྲས་སྤུངས་སྒོ་མང་ཆོས་གྲྭར་ཞུགས་ཏེ་གསན་སྦྱོང་གནང་ཞིང་སླར་ཕེབས་དུས་སྐྱབས་མགོན་འཁྲུངས་རབས་ཐང་ག་གདན་དྲངས། ཡིན་རྒྱུ་ནི་ཚེ་ཏན་འདུ་ཁང་ཀླད་ཀྱི་པཎ་ཆེན་འཁྲུངས་རབས་ཐང་ག་དེ་ཡིན་སྙམ། དགུང་ལོ་བཅོ་ལྔ་བཞེས་དུས་ཆུ་བཟང་རིན་པོ་ཆེ་མྱ་ངན་ལས་འདས། དེའི་ཡང་སྤྲུལ་ཆུ་བཟང་བློ་བཟང་ཐུབ་བསྟན་རབ་རྒྱས་ཀྱི་སྐུ་རིང་ལ། ཆུ་བཟང་ནས་མི་སྣ་མངགས་ཏེ་ཚེ་ཏན་འདུ་ཁང་གསར་བཞེངས་ཀྱི་བཀོད་ཁྱབ་གནང་། འདི་གོང་མ་གྱ་ཆིན་ཁྲི་ལོ་གསུམ་པ་ཟེར་ཏེ་ཅུང་སྔ་བའི་སྐྱོན་མཆིས་སྙམ། ཕྱིས་སུ་ཆུ་བཟང་མཆོག་སྤྲུལ་བློ་བཟང་ཐུབ་བསྟན་རབ་རྒྱས་གདན་དྲངས་ཏེ་ཚེ་ཏན་འདུ་ཁང་ལ་རབ་གནས་དང་། དན་ཏིག་སོགས་དགོན་ཁག་སོ་སོར་ཕེབས་ནས་ཆོས་འབྲེལ་དང་། རྟེན་སྐལ་གནང་ཞེས་བཤད། དེ་ལྟར་ན་ཚེ་ཏན་བླ་སྤྱི་རྣམས་སུ་ལྕང་སྐྱ་རོལ་བའི་རྡོ་རྗེའི་གསེར་སྐུ་བཞུགས་ཁང་འཕྲོད་མ་གསུམ་ཡོད་པ་རྣམས་ཀྱང་དེ་དུས་གནང་བར་ངེས། ལྕང་སྐྱ་ཡེ་ཤེས་བསྟན་པའི་རྒྱལ་མཚན་གྱི་ཞབས་གྲས་སུ་ཕེབས་ནས་ཇ་སག་མཛད། རྒྱ་ནག་ཏུ་ལན་འགའ་བྱོན། མན་ཆིན་གོང་མ་གྱ་ཆིན་དང་ཏོ་ཀྭོང་གི་ཞལ་མཇལ་བྱུང་སྐད། དེ་ལྟར་ན་རབ་ཡིད་བགྲང་བྱ་བཅུ་བཞི་བ་དང་བཅོ་ལྔ་བའི་མཚམས་ཡིན་རྒྱུ་རེད་དེ། གོང་མ་ཏོ་ཀྭོང་དེའི་བགྲང་བྱ་བཅོ་ལྔ་བ་ལྕགས་སྤྲུལ་ལ་ཁྲིར་བཞུགས་པས་སོ། །ཕྱིར་ཕེབས་དུས་ཚེ་ཏན་ཀ་བཞི་མའི་རྗེ་སྐུ་དེ་དང་། དན་ཏིག་ཏུ་བཀའ་འགྱུར་གདན་དྲངས་པ་སོགས་དགོན་ཁག་གཞན་ལའང་འཇོག་པ་རྒྱ་ཆེར་གནང་། ཆུ་བཟང་ཇོའུ་ཁང་གསར་བཞེངས་སྐབས་སྐུ་འདི་བ་ཇ་སག་ཡིན་ཚོད། འདིའི་སྐུ་རིང་ལ་ཚེ་ཏན་བླ་བྲང་ཡར་ནང་དང་། བླ་བྲང་གོང་མ་སྟེང་འོག་ཀ་བཞི་མ་སོགས་གསར་བསྐྲུན་མཛད་ཟེར་ཏེ། ཕལ་ཆེར་རབ་བྱུང་བཅུ་བཞི་བའི་ལོ་སྐོར་དང་བོ་དང་གཉིས་པ་གང་རིགས་སུ་ཡིན་འདྲ། སྐུ་ཚེ་སྨད་ལ་དུས་ངན་གྱི་བྱེད་པས་མི་ངན་འགས་བླ་མ་རྣམ་གཉིས་ཀྱི་བར་དབྱེན་དཀྲུགས་བྱས་པར་བརྟེན། ཇ་སག་ཚང་ཆུ་བཟང་དུ་ཕེབས་ནས་རེ་ཞིག་བཞུགས། ཆུ་བཟང་གི་དན་ཏིག་བླ་བྲང་ཟེར་བ་ཡང་འདིའི་སྐུ་རིང་ལ་བཞེངས་ཚོད། དགུང་ལོ་རེ་གཅིག་པ་ཆུ་སྟག་ལ་ཆུ་བཟང་ནས་སྐུ་གཤེགས། ཆུ་བཟང་བློ་བཟང་ཐུབ་བསྟན་རབ་རྒྱས་ཀྱིས་ཐུགས་ཁུར་བཞེས་ཏེ། རྒྱལ་བ་ཡབ་སྲས། ཇོ་ཤཱཀ་རྣམ་གཉིས། སེར་འབྲས་དགེ་གསུམ། མདོ་སྨད་ཀྱི་བླ་མ་དང་གྲྭ་ས་སོ་སོར་གདུང་མཆོད་ཕུལ། ཆུ་བཟང་ཚང་ནས་ཁ་དྲུག་ལ་ཅུང་ཟད་ཐུགས་མ་དགྱེས་པའི་རྐྱེན་གྱིས་སྐུ་གདུང་ཡང་མ་གནང་བའི་སྐབས་ཚོན་པོ་མ་ཚང་གིས་མགོ་དྲངས་ཏེ་ཚེ་ཏན་དགོན་གྲོང་གི་སྐྱ་སེར་མང་བོ་སོང་ནས་སྐུ་གདུང་འཕྲོག་སྟབས་ཀྱིས་གདན་དྲངས། ཆུ་བཟང་བླ་བྲང་ནས་ཚོན་པོ་མ་བཀག་སྟེ་བཀྱིགས་རྡུང་ཚུན་ཆད་ཀྱི་ཁྲིམས་ཕབ། མཐར་ཆུ་བཟང་དགོན་པའི་ཁྲི་བ་ལས་སྣེས་ངོ་ཆེན་ཞུས་པ་ལྟར་ཆད་པ་དགུ་ཚན་གསུམ་ཕུལ་རྗེས་ཁྲིམས་ལས་བཏང་། ཆུ་བཟང་ལ་མཐོལ་བཤགས་གཙང་སངས་པ་བྱས་ཏེ་བླ་སློབ་ཀུན་གྱི་འབྲེལ་བ་སྔར་ལས་ཇེ་ཟབ་ཏུ་བཏང་།

སྐུ་ཕྲེང་བདུན་པ་བློ་བཟང་འཇིགས་མེད་རབ་བརྟན་ནི། རབ་བྱུང་བཅུ་བཞི་བའི་བགྲང་བྱ་སོ་བདུན་པ་ཆུ་ཡོས་ལ་ཆུ་བཟང་རྭ་ལོ་ཐང་འདན་མ་ཚང་ནས་འཁྲུངས། ཆུ་བཟང་ལ་ཞུ་སྣ་བཅོལ་ཏེ་རྒྱལ་བ་རིན་པོ་ཆེ་མཁས་གྲུབ་རྒྱ་མཚོས་ཐུགས་ཐག་བཅད། ཆུ་བཟང་རིན་པོ་ཆེ་ལས་རབ་བྱུང་བསྒྲུབས། འཇིགས་བྱེད་ཀྱི་དབང་སོགས་གསན། དགུང་ལོ་བཅུ་དྲུག་གི་དུས་སུ་ཆུ་བཟང་བློ་བཟང་ཐུབ་བསྟན་རབ་རྒྱས་འདས། བླུ་ཡོན་ལ་ཚེ་ཏན་ནས་དོང་ཚེ་ཁྲོན་སུམ་བརྒྱ་ལྔ་བཅུ། ཀ་ཐུང་ནས་ཁྲོན་བརྒྱ་ལྔ་བཅུ། དགོན་ཁག་གཞན་བཞི་ནས་ཁྲོན་ཉིས་བརྒྱ་རེ་བཅས་ཕུལ་ཏེ་དགུང་ལོ་བདུན་པའི་ཧོར་ཟླ་བཅུ་བའི་ནང་ཚེ་ཏན་དུ་གདན་སར་བཀོད། ཞབས་དྲུང་ཚོན་པོ་མ་འཇིགས་མེད་ཐུབ་བསྟན་ནོར་བུ་བླ་མ་རབ་བསྟེན་ནས་བླ་མཆོད། ལྟུང་བཤགས། སྨོན་ལམ་རྣམ་ལྔ། སྨན་ཐུང་། འཇིགས་བྱེད་ཆོག མི་ལའི་རྣམ་ཐར་སོགས་ཀྱི་ལུང་དང་། འཇམ་དབྱངས། སྤྱན་རས་གཟིགས། སྒྲོལ་མ་དཀར་ལྗང་། ཆོས་རྒྱལ་རྣམ་གསུམ། ལྷ་མོ་བཅས་ཀྱི་རྗེས་གནང་རྣམ་གསན་ཞིང་། འཇིགས་མེད་སྤོབས་པ་མཆོག་གིས་སྐལ་ལྡན་ལ། །ཐུབ་བསྟན་ཡོངས་རྫོགས་སྟོན་མཁས་སྨྲ་བའི་མཆོག །བསླབ་གསུམ་ནོར་བུའི་འོད་ཀྱིས་འགྲོ་བ་ཡི། །རྒུད་མུན་མ་ལུས་སེལ་ལ་གསོལ་བ་འདེབས། །ཞེས་པའི་གསོལ་འདེབས་ཚིགས་བཅད་མ་ཞིག་ཀྱང་གསན་ཡིག་གི་དབུར་བཀོད་འདུག ཆུ་བཟང་གི་ཆོས་གྲྭར་ཕེབས་ནས་གསན་སྦྱོང་མཛད། གཞན་སྔོ་ཁོ་ངག་དབང་ལེགས་བཤད་ཉི་མའི་མདུན་ནས། ཆུ་བཟང་སྤྲུལ་སྐུ་བློ་བཟང་ཐུབ་བསྟན་བཤད་སྒྲུབ་ཉི་མ་དང་། བ་ཟ་སྤྲུལ་སྐུ་སོགས་དང་ལྷན་དུ་ལམ་རིམ་ཆེན་མོའི་བཤད་ལུང་། རིན་འབྱུང་བརྒྱ་རྩ། བདེ་མཆོག་དང་འཇིགས་བྱེད་ཀྱི་དབང་རྣམས་གསན། ཆུ་བཟང་སྤྲུལ་སྐུས་བླ་བྲང་སྒོ་མང་ཚང་བློ་བཟང་ཚུལ་ཁྲིམས་རྒྱ་མཚོ་ཆེད་གཉེར་གྱིས་ཆུ་བཟང་དགོན་པར་ཞུས་པའི་མདུན་ནས། མི་ཏྲ་རྡོར་ཕྲེང་། སྤྱན་རས་གཟིགས། ཐིག་ལེ་བཅུ་དྲུག དམ་ཚིག་གསུམ་བཀོད། མངོན་བྱང་། རྟ་མགྲིན། བདེ་མཆོག་ནག་པོ་བ། དྲིལ་བུ་ཕྱི་ནང་། བོང་ཞལ་ཅན། འཇིགས་བྱེད། གསང་འདུས། ཡེ་ཤེས་ཞབས་ལུགས། ཁྲོས་ནག་རྣམས་ཀྱི་དབང་། འཇམ་དབྱངས་དཀར་བོ། སྒྲོལ་དཀར། རྣམ་རྒྱལ་མ་རྣམས་ཀྱི་རྗེས་གནང་། འཇིགས་བྱེད་བསྙེན་ཁྲིད། འགྲེལ་བ་བཞི་སྦྲགས། སྦས་དོན་ཀུན་གསལ། ལམ་རིམ་ཆུང་ངུ་། ཉམས་མགུར་རྣམས་ཀྱི་བཤད་ལུང་སོགས་གསན། གཞན་ཡང་ཧོར་སྒོམ་སྤྲུལ་སྐུ་ངག་དབང་དཀོན་མཆོག་ཉི་མ། གྲུབ་དབང་གོང་མ་འཇིགས་མེད་བསམ་གཏན། ཞྭ་དམར་རིན་པོ་ཆེ་དགེ་འདུན་བསྟན་འཛིན་རྒྱ་མཚོ། སྐུ་མཆེད་དགེ་འདུན་བསྟན་པ་རབ་རྒྱས། འདན་མ་ཚང་སོགས་བླ་མ་བཅུ་ལྷག་བསྟེན། དགུང་ལོ་ཉེར་ལྔའི་སྟེང་དབུས་གཙང་དུ་ཕེབས། ཕྱིར་ཕེབས་དུས་སྔར་བཤད་པ་ལྟར་རྒྱལ་བ་འཕྲིན་ལས་རྒྱ་མཚོས་རྟེན་སྐལ་དུ་རྗེ་གཟིགས་པ་ལྔ་ལྡན་ལྔ་ཐང་ཕྱག་ཐམ་དང་རབ་གནས་ཅན། རྒྱལ་བ་མཁས་གྲུབ་རྒྱ་མཚོའི་ཞབས་ཕྱགས་བཅས་བསྩལ་བ་ལས་ཞབས་ཕྱགས་ཡ་གཅིག་འབྲས་འགག་ཤིང་ལ་གནང་། ཡ་གཅིག་ཚེ་ཏན་གཞུང་ལ་གནང་། གཙོ་ཐང་ཚེ་ཏན་དང་། གཞན་བཞི་དགོན་ཁག་བཞི་དང་། ཀ་ཐུང་ལ་ཇོའུ་སྐུ་བྱིན་ཅན་བཅས་བཞག དགུང་ལོ་སོ་བདུན་སྟེང་སྔོ་ཁོ་ཚང་ལ་དན་ཏིག་དཀར་ཆག་བསྡུས་པ་དེའི་རྩོམ་བསྐུལ་ཞུས། འདི་རྩོམ་བསྐུལ་ཞུ་བའི་རྐྱེན་ནི། དན་ཏིག་དཀར་ཆག་ཤིན་ཏུ་རྒྱས་པ་དཔེ་རྙིང་ཞིག་ཡོད་པ་མཇལ་བ་ཞིག་གིས་བརྐུས་ནས་ལག་ཏུ་མ་བྱུང་། དེའི་རྐྱེན་གྱིས་དཀར་ཆག་རྙིང་བ་དེའི་དོན་རྩ་རྒན་པ་ཚོའི་བློ་ན་ཡོད་པ་ས་བོན་དུ་བྱས་ནས་གསར་བ་འདི་བསྒྲིགས་པ་ཡིན། ཞེས་པའི་ངག་སྒྲོས་ཡོད། འདི་དུས་རྡོ་ཁོ་ཚང་དགུང་ལོ་དོན་གཉིས་ཡིན། མཁན་པོ་ཚང་དགུང་ལོ་ཞེ་གཉིས་སྟེང་དན་ཏིག་སྒོམ་ཆེན་ནས་འཇིགས་བྱེད་བསྙེན་ཆེན་དུ་བཞུགས། དགུང་ལོ་ལྔ་བཅུའི་ནང་ཙམ་ལ་སྟོད་སོག་ཡུ་གུར་ཕྱོགས་སུ་ཕེབས་ནས་གདུལ་བྱ་རྒྱས། ཡི་ལི་ཤི་ནེ་ཨང་གེའི་ཨུར་རྡ་ཨ་མ་བྷན་ཚེ་རིང་རྡོ་རྗེ་བསྟན་པའི་སྦྱིན་བདག་ཏུ་ཁུགས། ཕྱིར་ཕེབས་ནས་ཚེ་ཏན་ལ་བྱམས་པའི་གོས་སྐུ་སོགས་དགོན་ཁག་རྣམས་ལ་འཇོག་པ་བཟབས། ཨ་མ་བྷན་ཚེ་རིང་རྡོ་རྗེ་དེ་དང་། ཚེ་ཏན་དགོན་པའི་འདུས་སྤྱི་ནས་གྲུབ་དབང་གོང་མ་ལ་སྐུ་ཞབས་རྣམ་གཉིས་ཀྱི་སྐྱེ་ཕྲེང་གསོལ་འདེབས་ཀྱི་ལྗགས་རྩོམ་ཞུས། སྐྱེ་ཕྲེང་གསོལ་འདེབས་དེར། པོའུ་བཙན་པོ་ཚང་དང་། ཀ་ཐུང་ནས་འཁྲུངས་པ་གཉིས་ལ་མཚན་དངོས་མ་བྱུང་མོད། བྲག་དགོན་པའི་ཨ་མདོའི་ཆོས་འབྱུང་དུ། བོའུ་སྐུ་སྐྱེ་དཔལ་ལྡན་རྒྱ་མཚོ་དང་བློ་བཟང་རབ་བརྟན་སོགས་རིམ་པར་བྱོན་པ་ལས་ད་ལྟ་རྭ་ལོ་ཐང་ནས་འཁྲུངས་པ་བློ་བཟང་འཇིགས་མེད་རབ་བརྟན་ཆུ་བཟང་དུ་ཐུགས་གཉེར་གྱི་སྐབས་ཡིན། ཞེས་བཤད་པ་ལ་དཔགས་ན་བློ་བཟང་རབ་བརྟན་ཞེས་པ་ཀ་ཐུང་ནས་འཁྲུངས་པ་དེའི་མཚན་ཡིན་ནམ་སྙམ། སྤྱིར་མཁན་པོ་ཚང་འདི་བ་ཆོས་འབྲེལ་དངོས་གསན་གྱི་བླ་མ་རྣམས་ལ་བཀུར་གཟོ་ཆེ་ཞིང་། བསྟན་འགྲོ་ལ་གཅིག་ཏུ་སྨིན་པའི་ཐུགས་བསམ་དཀར་བས་སྨན་སྦྱིན་དང་། གསོ་བྱེད་ཀྱི་ལག་ལེན་ཡང་གྲགས་ཆེ། སྐུ་ཚེ་སྟོད་བར་ལ་ཞབས་དྲུང་འཇིགས་མེད་ཐུབ་བསྟན་རྒྱ་མཚོ་དང་རྣམ་གཉིས་ཐུགས་ཡིད་གཅིག་འདྲེས་སུ་ཡོད་པས། མཁན་པོ་ཚང་ཚོགས་ཕེབས་སྐབས་སུ་ཞབས་དྲུང་ནས་ཀྱོའུ་ཙི་ཚུན་ཆད་འདེགས་པ་དང་། དེ་བཞིན་དུ་མཁན་པོ་ཚང་ནས་སྤྲུལ་སྐུ་ཚང་འཇམ་པའི་དབྱངས་དངོས་ཡིན། ཞེས་རྒྱའི་དམག་དཔོན་གྱི་ཆས་སྤྲད་པ་ལའང་དག་སྣང་སྦྱངས་ཏེ་བསྔགས་བརྗོད་མཛད་ཚུལ་གཞན་ལས་ཁྱད་པར་དུ་འཕགས་པ་ཞིག་ཡིན་པར་རྗེ་རྫོང་དཀར་སྤྱན་སྔ་བ་ཆེན་པོ་དཀོན་མཆོག་ཕུན་ཚོགས་པའི་ཞལ་དངོས་ལས་ཕྲན་བུས་ཡང་ཡང་ཐོས་མྱོང་། སྐུ་ཚེ་སྨད་དུ་ཁ་དྲུག་གི་ལས་སྐལ་ཞན་པ་དང་། སོག་ཡུལ་གྱི་ནོམ་བདག་གི་འཁྲེན་ཆ་ལྟ་བུས་ཞབས་གྲས་པ་མི་ངན་ཁ་ཤས་ཀྱི་བྱེད་སྤྱོད་ལ་བརྟེན། ཁུ་དབོན་གྱི་བར་སེལ་ཆེན་པོ་ཞུགས་ནས་བདེ་སྐྱིད་ཀྱི་ཆུ་བོ་བྲི་བའི་ངང་དགུང་ལོ་དྲུག་ཅུ་རྩ་ལྔ་བ་ལ་སྐུ་འདས། ཏིག་གྱ་ཚང་སྦྱིན་སྲེག་བླ་མར་ཞུ་བ་སོགས་གདུང་རྫོགས་ཀྱི་འགན་ཐམས་ཅད་ཞབས་དྲུང་ཚང་ནས་བཞེས་པར་གླེང་།

སྐུ་ཕྲེང་བརྒྱད་པ་འཇིགས་མེད་རིགས་པའི་སྙིང་པོ་ནི། སྐུ་གོང་མ་འདས་པའི་རྗེས་ཀྱི་ལོ་གསུམ་པ་རབ་ཚེས་ལྕགས་ཁྱི་ལོར་ཆུ་བཟང་རྭ་ལོ་ཐང་ནས་ལ་མོ་སྐུ་ཞབས་སྒར་བའི་སྐུ་ཚར་འཁྲུངས། གསེར་ཁོག་རྒྱུད་པ་ཚང་གི་མདུན་ནས་རབ་བྱུང་བཞེས། དགུང་ལོ་བདུན་གྱི་སྟེང་གདན་སར་བཀོད། མཐུ་དགོན་ཨ་ཁུ་རབ་རྒྱས་ཀློག་གི་བཤེས་གཉེན་དུ་བསྟེན། དགུང་ལོ་བཅོ་ལྔ་ནས་ལོ་ལྔའི་རིང་བདེ་ཆེན་ཆོས་གྲྭར་ཕེབས་ཏེ་གསན་སྦྱོང་མཛད། བླ་མ་རྡོ་རྗེ་འཆང་ཡབ་སྲས་ཀྱི་ཞབས་པད་བསྟེན་ནས་ཆོས་བཀའ་མང་ཙམ་གསན། ཚེ་ཏན་ཇོའུ་ཁང་། དན་ཏིག་གི་སྒོམ་ཆེན། སྤྱི་བ། ཨ་ཆུ་ཏ་རྣམས་ཀྱི་གནས་ཁང་ཞིག་གསོས་ཀྱི་ཐུགས་བཀོད་གང་དགོས་སྩལ། ཚེ་ཏན་བླ་བྲང་དང་། དན་ཏིག་བླ་བྲང་ལ་ཞིག་གསོ་ངོས་གཙང་བ་དང་། སྡེ་དགེ་ནས་བཀའ་བསྟན། བཀྲ་ཤིས་འཁྱིལ་ནས་གསུང་འབུམ་དུ་མ་བཅས་སྐུ་གསུང་ཐུགས་རྟེན་བཞེངས་པ་སོགས་རྣམ་དཀར་ལ་བརྩོན་བཞིན། ད་ཆ་དགུང་ལོ་ཞེ་བདུན་བཞེས་ཤིང་སྐུ་ཚེ་བརྟན་པར་བཞུགས་པ་འདི་བཞིན་ལགས་སོ། །

དེ་ནས་ཞབས་དྲུང་གོང་མ་ཚོའི་ལོ་རྒྱུས་ཤེས་ཚོད་ཙམ་འབྲི་ན། ཐོག་མར་རྒྱ་གར་གྲུབ་ཆེན་ས་ར་ཧའི་རྣམ་སྤྲུལ་དུ་གྲགས་པ་སྟག་གྲུབ་ཆེན་པ་བློ་བཟང་བསྟན་པའི་སྙིང་བོ་ནི་དབུས་གཙང་གི་སྟག་ཚང་ལུང་བ་ནས་འཁྲུངས་གཞིས་དང་བཅས་པ་མདོ་སྨད་ཕྱོགས་སུ་ཕེབས། རིམ་གྱིས་ད་ལྟའི་བཱ་ཡན་སྟག་ཚང་གི་སར་ཆོས་ཀྱི་འཕྲིན་ལས་རྒྱ་ཆེར་རྒྱས། རྡོ་ར་ལ་ཁ་ཟེར་བ་ནས་གཞི་བྱེས་ཀྱི་ཚོགས་པ་མང་བོ་ལ་དབང་རྡོ་རྗེ་ཕྲེང་བ་གནང་། དེའི་ཤུལ་དུ་ད་ལྟའང་རྡོ་ཁྲི་མཇལ་དུ་ཡོད། གཟུངས་རི་ནང་ནས་དགོན་གསར་འདེབས་ཀྱི་གཞི་ཞིག་བཏིངས། རྒྱ་རྒྱའི་དགོན་པར་དུས་གསུམ་སངས་རྒྱས། ཉེ་སྲས་བརྒྱད། རྟ་མགྲིན། ཕྱག་རྡོར་རྣམས་ཀྱི་སྨན་སྐུ་ཆེ་ཚད་རེ་བཞུགས་པའི་ལྷ་ཁང་ཞིག་བཞེངས་པ་ལ། དེང་སང་ཡང་སྟག་བླ་མའི་ལྷ་ཁང་ཟེར། འཁྲུངས་གཞིའི་སྐུ་ཉེ་རྣམས་ལུང་བ་དེར་ས་འཛིན་དུ་བཞག་པ་ལ་པེ་ཧུའི་ཐོབ་བྱུང་བར་སྟག་དཔོན་ཚང་དུ་གྲགས། དེ་ནས་འགག་ཚར་ཕེབས་ཏེ་ཚོགས་པ་མང་བོར་མི་ཏྲ་བརྒྱ་རྩའི་དབང་ཆེན་སྩལ། དབང་གནང་བའི་གནས་དེར་བཙན་མདུང་བཙུགས་ནས་བཞག་པས་སའི་མིང་ལ་ཡང་ད་ལྟའི་བར་མདུང་རྒན་ཐང་ཟེར། ཚོན་པོ་མས་བརྩམས་པའི་རིན་ཆེན་ཕྲེང་མཛེས་སུ་གྲུབ་ཆེན་པ་དང་མཁན་པོ་དཔལ་ལྡན་རྒྱ་མཚོ་གཉིས་ཆོས་ཀྱི་འབྲེལ་ཤིན་ཏུ་ཟབ་པར་གསུངས་པ་ལ་དཔགས་ན་མི་ཏྲ་རྡོར་ཕྲེང་གི་དབང་གྲལ་དུ། མཁན་པོ་དཔལ་ལྡན་རྒྱ་མཚོ་ལྟ་བུའི་ཕྱོགས་དེའི་ཆེ་ཁག་རྣམས་ཀྱང་ཕེབས་པར་ངེས་ཏེ། རྒྱུ་མཚན་ཡང་དག་ད་དུང་འོག་ཏུ་འགོད་དོ། །དེ་ནས་སློབ་མ་སྦྱིན་བདག་ཚོས་བསྐུལ་བ་དོན་ཡོད་པར་བྱ་ཕྱིར་ད་ལྟའི་སྟག་དགོན་པ་དགའ་ལྡན་སྲིད་རྩེ་གླིང་ཞེས་པ་འདི་གསར་དུ་བཏབ། སྟོད་ཁག་གསུམ་རེ་རེ་ལ་དགོན་ཆུང་རེ་ཡོད་པ་རྣམས་དགོན་པ་གསར་བར་ཕྱོགས་གཅིག་ཏུ་བསྡུས། རྒྱ་གྱའི་དགོན་པའི་ལྷ་ཁང་དེ་དང་དབྱིབས་མཚུངས་པ་ཞིག་གི་ནང་དུ་དུས་གསུམ་སངས་རྒྱས་དང་། དེའི་མདུན་ཐད་དུ་འདུ་ཁང་བཅས་བཞེངས་པ་ད་ལྟའི་འདུ་ཁང་འདིའི་ཤུལ་ཡིན་སྐད། ད་ལྟའི་བླ་བྲང་གི་གཟིམ་ཁང་འདིའི་ཤུལ་དུ་མཚལ་སྣག་སྤེལ་མས་བྲིས་པའི་བཀའ་འགྱུར་ཁང་བཅས་བཞེངས། ཁྱད་པར་དུ་ཆོས་རྗེ་དོན་གྲུབ་རིན་ཆེན་གྱི་ཤངས་ཁྲག་གིས་བཞེངས་ཤིང་རྒྱལ་བ་རིན་པོ་ཆེས་རབ་གནས་མཛད་པར་གྲགས་པའི་ལྷ་མོའི་རྟེན་ཐང་ཤིན་ཏུ་གཉན་ཆ་ཆེ་བ་དེ་ཉིད་རྟེན་གཙོ་བྱས་པའི་ལྷ་མོ་ཁང་གྱན་གསུམ་མ་ལུང་མདོར་བསྟན་པ་ཞིག་བཞེངས་པ་ཕྱིས་སུ་ཕྲན་བུའི་རིང་ལའང་གནས། རྟེན་འདི་ཞུས་ནས་ཨ་མདོར་ཕེབས་ལམ་ཇག་པའི་ལག་ཏུ་ཤོར། དེ་ནས་བྲང་བཏབ་སྟེ་ཇ་སྐོལ་དུས་རྟེན་ཐང་འཕུར་ནས་བ་རྡོའི་སྟེང་དུ་བབས། ཨ་ཚ་ཞེས་གསུང་འབྱོན་པར་གྲགས་ཏེ། གང་ལྟར་རྟེན་ཐང་ལ་མེ་སྐྱོན་ཞིག་ཡོད་པ་ཕྲན་བུས་ཀྱང་དངོས་སུ་མཇལ་ལོ། །རྡོ་བའི་འོག་ནས་འབྱུང་བོ་ཞིག་གིས་ཉམ་ཐག་པའི་གླུ་ལེན་པ་གསན་ནས་རྡོ་ལ་མཛུབ་རྗེས་བཏོད་པ་ད་ལྟ་རྡོ་འབུམ་ཞིག་གི་འོག་ཏུ་ཡོད་ཟེར་ལ། བཞེས་དཀར་སྐྱེམས་དང་བཅས་པ་ཕྱག་གིས་བཅུམས་པའི་གྲུབ་རྟགས་བསྟན་པ་སོགས་ཀྱང་འགའ་རེ་ཡོད་པར་གྲགས། སྐབས་ཤིག་ཆིབས་རྟ་འགའ་ཡོད་པ་རྒྱ་རྒྱའི་ལུང་མདོའི་ཙག་ག་ཐང་ཟེར་བའི་གྲོང་གི་སྐལ་བཟང་འབུམ་གྱི་ཞིང་ནང་དུ་སོང་རྐྱེན། ཞིང་བདག་ཁྲོས་ནས་ཆིབས་པའི་རྔ་རྔོག་བྲེགས། དེ་ལ་བརྟེན་ནས་སྐལ་བཟང་འབུམ་གྱི་ཁྱིམ་དེ་སྡེ་གཏོགས་དང་བཅས་པ་ཕུང་ལ་སྦྱར་ཞེས་ད་ལྟའང་ཧ་ལས་པ་བྱེད་རྐྱེན་དེ་དག་ལ་བརྟེན་གྲུབ་ཆེན་པའི་མཚན་ཐོགས་པ་འདྲ། དགུང་ལོ་མཐོ་ཚད་ལོན་ནས་སྐུ་འདས་པའི་གདུང་སྟག་དགོན་འདུ་ཁང་རྙིང་བའི་ཀླད་དུ་བཞུགས། དུས་ཕྱིས་ཧོས་འཁྲུག་སྔ་ཕྱི་ལན་མང་བྱུང་སྐབས་ལྷ་མོ་ཁང་གཅིག་པུ་ལས་གཞན་ལྷ་ཁང་འདུ་ཁང་གྲྭ་ཁང་སོགས་ལ་མེ་སྐྱོན་ཚབས་ཆེན་བྱུང་བས་སྟག་བླ་མའི་སྐུ་གདུང་དང་རྟེན་རྣམས་ཀྱང་དེ་དུས་ནས་མཇལ་རྒྱུ་མ་བྱུང་། བཀའ་འགྱུར་གཏོར་ནས་ད་ལྟ་བསྐལ་བཟང་གི་གླེགས་བམ་གཅིག་པུ་ལས་ལུས་མེད། ལྷ་མོ་ཁང་དང་། དེའི་ཉེ་ལོགས་ཀྱི་ལ་བཙས་ནང་དུ་མེ་ཚང་ཇི་ལྟར་བཅས་ཀྱང་སྦར་མ་ཐུབ་པས་ཧོས་ཧོས་མི་སྲུན་པ་རྣམས་ཀྱང་འུ་ཐུག་པར་གྲགས། ལྷ་མོ་ཁང་གི་སྒོའི་མ་ཐེམ་ཅུང་ཟད་ཚིག་པའི་ཤུལ་ཕྱིས་སུའང་ཡོད། དེའི་སྟབས་ཀྱིས་ལྷ་མོའི་རྟེན་ཐང་དང་ལྷ་མོ་ཁང་ནི་རྙིང་ཧྲུལ་གྱི་ངང་སུས་ཀྱང་ལག་མ་ཚུགས་ཤིང་ཞིག་གསོས་བྱེད་རྒྱུར་ལུང་བསྟན་གཏན་མ་ཆུད་པར་རབ་རྒྱལ་ཆུ་སྦྲུལ་ཁར་དུ་སྔར་མུས་ལྟར་བཞུགས། དེ་ནས་ཕྲན་བུའི་རིང་ལ་ཞིག་གསོས་བྱས་ཚུལ་འོག་ཏུ་གསལ། དགོན་འདིར་རྒྱལ་བ་བསོད་ནམས་རྒྱ་མཚོ་ཕེབས་པའི་ངག་རྒྱུན་ཞིག་ཡོད་དེ། དགོན་གནས་འདིར་ཕེབས་པ་ཡིན་མིན་བརྟག་པའི་གནས་སུ་ཆེ་མོད། འོན་ཀྱང་ཚོ་བ་གསུམ་གྱི་དགོན་སོ་སོར་ཡོད་དུས་ཀྱི་དགོན་པ་ཞིག་ལ་ཕེབས་པ་ཡིན་སྲིད། གང་ལྟར་ཕྱོགས་དེར་ཕེབས་པའི་རྟགས་ལ། གཞུང་གི་དར་བོ་ཆེའི་རྩེ་ལ་རྒྱལ་མཚན་འདོགས་པ་དང་འདུ་ཁང་གི་རྩི་སེར་བོ་བྱེད་པ་དེ་རྒྱལ་བ་རིན་པོ་ཆེའི་ཆེ་རྟགས་ཡིན་ཟེར་ཞིང་། བློ་བཟང་རྒྱལ་བ་ཀུན་གྱི་ཐུགས་རྗེ་ནི། །ཞེས་སོགས་རྒྱལ་བ་རིན་པོ་ཆེ་ཉིད་ཀྱི་གསོལ་འདེབས་ཀྱང་ད་ལྟའི་བར་ཚོགས་འདོན་དུ་ཚུགས་སྣང་། དུས་ཕྱིས་ལྕང་སྐྱ་རོལ་བའི་རྡོ་རྗེའི་སྐུ་མཆེད་དུ་གྱུར་པ་ཆུ་བཟང་ངག་དབང་ཐུབ་བསྟན་དབང་ཕྱུག་ཁ་དྲུག་ཕྱོགས་སུ་ཕེབས་སྐབས་ཤིག་ལ་ཆེད་ཞུས་ལྟར་དགོན་འདིར་ཕེབས་ནས་ཀུན་རིག་དང་འཇིགས་བྱེད་བཅུ་གསུམ་མའི་དབང་སོགས་ཆོས་ལུང་ཅི་རིགས་གནང་། དགོན་པའི་གྲྭ་རྒན་རྣམས་ནས་འདིར་ཀུན་རིག་གི་དབང་ཞིག་གནང་བ་མ་གཏོགས་ལྷ་སྡེའི་ཁྲོད་དུ་སྔགས་པ་སུམ་བརྒྱས་ཞི་ཁྲོ་དམ་པ་རིགས་བརྒྱ་འདོན་པའི་དབང་ཤེད་ཆེ་བ་ལས་ཀུན་རིག་འདོན་པའི་དབང་གང་ན་ཡོད་ཅེས་ཡུས་ཞུས་པ་ན། ཆོས་བཀའ་གྲོལ་ཉིན་འདིར་ཚོགས་ཀྱི་སྐྱེ་ཕོ་མོ་རྣམས་ཕར་སོང་། གྲྭ་བ་རྣམས་བཞུགས་གསུངས་ནས། ཁོང་གིས་དབུ་དྲངས་ཏེ་གནད་དུ་ཐིངས་པའི་དྲུག་ཅུ་བ་དྲག་བསྔོས་ཤིག་མཛད་པར་བརྟེན་དེ་ནས་བཟུང་སྔགས་པ་རྣམས་རང་འཐོར་དུ་སོང་ནས། ཞི་ཁྲོ་འདོན་རྒྱུ་ལྟ་ཞོག་གནས་གཅིག་ཏུ་འཚོགས་དབང་ཡང་མ་བྱུང་། ཞེས་ཨ་མདོ་ཆོས་འབྱུང་དུ་བཀོད་པ་ལྟར་ཕྱིས་སུ་ཡང་སྟག་དགོན་པ་དང་སྟག་ཨ་ཡུ་ལྷ་མོ་ཞེས་བླ་མ་དང་ཆོས་སྐྱོང་གི་འཕྲིན་ལས་ཀྱིས་གཞན་དང་འགྲན་ཟླ་མེད་པར་དབུ་འཕང་མཐོ་བའི་ཚད་དུ་རྩི། འཇིགས་བྱེད་ཀྱི་དབང་གནང་བ་ཆོས་འབྱུང་དེར་མི་གསལ་ཡང་ཕྲན་བུས་བླ་བརྒྱུད་ཁ་སྐོང་རྩར་གཅོད་བྱེད་སྐབས། ཆུ་བཟང་རིན་པོ་ཆེ་ནས་བརྒྱུད་པའི་ཁ་སྐོང་ཡིན་ཙ་ན་དེ་དུས་འཇིགས་བྱེད་ཀྱི་དབང་ཅི་ནས་ཀྱང་གནང་བར་ངེས་པ་འདྲོངས། གཞན་སྐུ་མཆེད་བློ་བཟང་བསྟན་པ་རྒྱ་མཚོ་སྐུ་ཕྲེང་སྔ་ཕྱི། གྲུབ་དབང་འཇིགས་མེད་བསམ་གཏན། རྗེ་ཞྭ་དམར་རིན་པོ་ཆེ་སྐུ་ཕྲེང་སྔ་ཕྱི། ལྡེ་ཚའི་སྐུ་ཞབས་རྣམ་པ་གཞན་དང་གཞན་ཡང་ཕེབས་ནས་ཞབས་ཀྱིས་བཅགས་ཤིང་བྱིན་གྱིས་བརླབས་ལ། ཁྱད་པར་བླ་མ་རྡོ་རྗེ་འཆང་ཆེན་པོ་རྗེ་ཨ་བྷྱ་མཚན་ཅན་དགུང་ལོ་གཞོན་དུས་ནས་བཟུང་ལྡེ་ཚ་སོགས་སུ་ཕེབས་ལམ་ཡང་ཡང་ཆིབས་ཞལ་བསྒྱུར་ནས་དབང་ལུང་རྗེས་གསུམ། བདེ་ལམ་གྱི་ཁྲིད་སོགས་དང་ཕྱིས་སུ་རབ་རྒྱལ་ཆུ་སྤྲེལ་ལོར་དགུན་བཞུགས་གནང་ནས་འཁོར་འདུལ་བ་འཛིན་པ་དུ་མ་བཅས་བཤད་སྒྲུབ་ཉམས་བཞེས་ཀྱིས་དུས་འདས་པ་དང་། དེའི་དཔྱིད་ཀར་གཞི་བྱེས་ཀྱི་ཚོགས་པ་ཤིན་ཏུ་མང་བོར་དུས་འཁོར་དབང་ཆེན་གནང་བ་དང་། གྲྭ་རིགས་རྣམས་ཀྱི་རྐྱེན་སེལ་དང་འབྲེལ་མང་ཙམ་ལ་འཇིགས་བྱེད་བསྙེན་ཁྲིད་ཕོག་པ་དང་། ཁྲོ་བཅུའི་གཏོར་ཟློག་བཙུགས་པ་སོགས་ཕྱག་རྗེས་ཤིན་ཏུ་ཆེ་ཞིང་ཐམས་ཅད་ཀྱི་རེས་གཅིག་པུར་གྱུར་པ་སྟེ། ལོ་རྒྱུས་དེ་དག་ནི་སྟག་དགོན་རང་དང་འབྲེལ་ཞིང་། སྟག་དགོན་གྱི་འབྲེལ་དེ་ཉིད་གང་ཞིག་འདེབས་པ་པོ་དང་ཡང་འབྲེལ་བའི་ཕྱིར་ན་འདིར་ཅུང་ཟད་རེ་བྲིས་སོ། །ཕྱིས་སུ་ཕྲན་བུའི་སྐྱེ་ཕྲེང་སྔ་ཕྱིར་འབྲེལ་བའི་སྐོར་འོག་ནས་འཆད་པར་འགྱུར་རོ། །

སྐྱེ་ཕྲེང་གཉིས་པ་འཇམ་དབྱངས་གྲགས་པའམ་སྨ་ར་ཚང་ནི། སྔར་བཤད་པ་ལྟར་སྟག་བླ་མར་མཐུ་འགྲས་ཤོར་བའི་ཙག་ག་ཐང་གི་སྡེ་ཁྲོད་དུ་འཁྲུངས། དགྲའི་ཁྱིམ་དུ་བླ་མའི་ཡང་སྲིད་འཁྲུངས་དོགས་མེད་ཟེར་ནས་སྟག་དཔོན་ཚང་དང་སྟག་དགོན་པས་སྤྲུལ་སྐུ་བདག་མ་བརྒྱབ། དེའི་ཕྱིར་སྤྲུལ་སྐུ་དེ་རྒྱ་རྒྱའི་དགོན་པར་ཨ་ལགས་འབའ་ཡོག་ཚང་གི་སྒར་བར་ཅུང་ཟད་བཞུགས་སམ་སྙམ་སྟེ། དེར་སྟག་གྲུབ་ཆེན་སྤྲུལ་སྐུའི་གཟིམ་ཁང་ཟེར་བ་ཕྱིས་སུ་ཡང་ཡོད་པར་གྲགས། དེ་ནས་ཅུང་ཟད་ནར་སོན་པ་ན་སྔར་བཤད་པ་ལྟར་མཁན་པོ་དཔལ་ལྡན་རྒྱ་མཚོས་སྐུ་གོང་མའི་འབྲེལ་བསྒྲིགས་ཤིང་གཟིགས་སྐྱོང་གིས་དན་ཏིག་བྲག་ཏུ་གདན་དྲངས། བླ་སར་བཀོད། རབ་བྱུང་བསྒྲུབས་ནས་མཚན་ལ་བློ་བཟང་རྒྱལ་མཚན་དང་། བསྙེན་རྫོགས་སྐབས་སུ་འཇམ་དབྱངས་གྲགས་པར་མཚན་གསོལ། ཆུང་དུས་ནས་སྨར་བཞག་པས་ན་སྨ་ར་ཚང་དུ་གྲགས། དེའི་ཕྱིར་གྲུབ་དབང་གོང་མས་མཛད་པའི་སྐྱེ་ཕྲེང་གསོལ་འདེབས་སུ་འཇམ་འབྱངས་གྲགས་པ་དང་། བློ་བཟང་རྒྱལ་མཚན་ཞེས་སྐུ་ཕྲེང་སོ་སོར་བྱས་པ་ནི་ངག་སྒྲོས་མ་དག་པ་ཞིག་ལ་བརྟེན་པ་ཡིན་པར་སྣང་སྟེ། སྔོ་ཁོའི་དཀར་ཆག་དང་ཚོན་པོ་མའི་རིན་ཆེན་ཕྲེང་མཛེས་གཉིས་ཀར་ཤིན་ཏུ་གསལ་བར་མ་ཟད། སྐུ་གདུང་མཆོད་རྟེན་གྱིས་ཀྱང་དབང་དུ་ཕེར་རོ། །

དེ་ཡང་གོང་དུ་བཤད་པ་ལྟར་སྟག་གྲུབ་ཆེན་པའི་དབང་གྲལ་དུ་མཁན་པོ་དཔལ་ལྡན་རྒྱ་མཚོ་ཕེབས་ངེས་པའི་རྒྱུ་མཚན་ཡང་དག་དེ་གང་ཞེ་ན། དཔལ་ལྡན་རྒྱ་མཚོ་རང་གི་བཀའ་དྲིན་གསུམ་ལྡན་ལྟ་བུའི་བླ་མའི་སྤྲུལ་སྐུ་ཞིག་མིན་ན་གཞན་གྱིས་བདག་མ་བྱས་པའི་སྤྲུལ་སྐུ་ཞིག་བདག་བྱེད་དོན་མེད་པ་དང་། དན་ཏིག་དང་ཚེ་ཏན་གང་ཡིན་ཡང་འདྲ་སྟེ། དེ་དུས་སྟག་དགོན་དང་སྟག་དཔོན་ཚང་ལ་འབྲེལ་ཅི་ཡང་མེད་པ་དང་། སྐུ་བདག་མེད་པར་བར་མ་དོར་ལུས་པ་ལ་དེ་འདྲས་གཟིགས་སྐྱོང་མཛད་དགོས་དོན་ནི། དབང་བསྐུར་རྒྱུད་བཤད་མན་ངག་གནང་བའི་བཀའ་དྲིན་ལྟ་བུའི་ཆོས་ཀྱི་འབྲེལ་བ་ཡལ་བར་འདོར་མི་ཕོད་པ་ཞིག་ལ་ཅི་ནས་ཀྱང་བརྟེན་དགོས་པ་འདི་ཡིན་ནོ། །འདི་ནམ་འཁྲུངས་པ་དང་འདས་པའི་ལོ་ཚིགས་གསལ་ཁ་ཅན་གྱི་ཡི་གེ་མེད་སྟབས་ཁ་ཚོན་མི་ཆོད་མོད། བྱ་ཁྱུང་བདེ་ཁང་བ་དན་ཏིག་ཏུ་གདན་དྲངས་པའི་ལོ་ཚིགས་དང་ཆུ་བཟང་ངག་དབང་ཐུབ་བསྟན་དབང་ཕྱུག་དང་། དཔལ་ལྡན་རྒྱ་མཚོས་མཛད་པའི་རབས་དང་། ཞབས་དྲུང་ཚོན་པོ་མ་ནམ་འཁྲུངས་བཅས་ཀྱི་ལོ་ཚིགས་དང་སྦྱར་ན། རབ་བྱུང་བཅུ་གཉིས་པའི་སྨད་ཕྱེད་ཀྱི་སྟོད་ཙམ་དུ་འཁྲུངས་ནས། རབ་བྱུང་བཅུ་གསུམ་པའི་སྨད་ཕྱེད་ཀྱི་སྟོད་ཙམ་དུ་འདས་པར་མངོན་ཏེ། དེ་ལྟར་ན་དགུང་ལོ་དྲུག་ཅུ་ཙམ་ལ་བཞུགས་པ་ཤེས། གང་ལྟར་མཁན་པོ་དཔལ་ལྡན་རྒྱ་མཚོས་སྐུ་དྲུང་དུ་བླངས་པ་ནས་བཟུང་སྒར་བ་གཅིག་ཏུ་ཁུ་དབོན་གྱི་ཚུལ་དུ་བཞུགས་པས་ན་ཞབས་དྲུང་ཞེས་པའི་མཚན་སྟར་ཆགས་སུ་ཐོགས། གཞན་ཡང་གྲུབ་དབང་གོང་མས་སྐྱེ་ཕྲེང་གསོལ་འདེབས་དེ་རྩོམ་དུས་སྟག་བླ་མའི་མཚན་དང་ལོ་རྒྱུས་སོགས་རྩར་གཅོད་གནང་བར་བརྟེན། མཁན་པོ་བློ་བཟང་འཇིགས་མེད་རབ་བརྟན་ཚང་ནས་བཱ་ཡན་སྐྱིད་རྒྱལ་དཔལ་བྱམས་ལ་བཀའ་འདྲི་བྱས་པའི་ལན་གྱི་ཡི་གེ་ཚེ་ཏན་བླ་བྲང་དུ་ཡོད་པས། དེར་འདི་སྐད་ཟེར་ཏེ། ཚེ་ཏན་མཁན་པོ་ཚང་དང་ཞབས་དྲུང་གཉིས་འབྲེལ་ཆེ་བས། ཚེ་ཏན་དུ་ཞུས་ནས་མཁན་པོས་ཐུགས་རྩིས་ཆེར་མཛད་ཀུན་གྱིས་ཚེ་ཏན་བུ་ཟེར། དེའི་རྒྱུ་མཚན་ནི། མཁན་པོ་ཚང་ཕ་ལྟ་བུ་དང་། ཞབས་དྲུང་བུ་ལྟ་བུ་ཡིན་ཟེར་བའི་རྒྱུ་མཚན་བསྙད་འདུག སྟག་གྲུབ་ཆེན་གྱི་མཚན་ལ་བློ་བཟང་བསྟན་པའི་སྙིང་པོ་ཟེར་འདྲ། བདག་ཆུང་དུས་བཀའ་འགྱུར་གྱི་དུམ་བུ་ཞིག་གི་མཇུག་ནས་མཐོང་། ཞེས་བྲིས་འདུག་པ་འདི་ལ་བལྟས་ན་ཆོས་ཀྱི་ཕྱོགས་ནས་སྟག་གྲུབ་ཆེན་དང་དཔལ་ལྡན་རྒྱ་མཚོ་གཉིས་བླ་སློབ་ཀྱི་འབྲེལ་བ་དང་། སྨ་ར་ཚང་གི་རིང་ལ་བསླབ་པ་འབོགས་པའི་མཁན་པོ་མཁན་བུའི་འབྲེལ་བསྒྲིགས་པར་མ་ཟད། སྒར་ཁག་གཅིག་ཏུ་ཁུ་དབོན་གྱི་ཚུལ་དུ་བཞུགས་པ་ལ་འཇིག་རྟེན་ཡོངས་གྲགས་དང་མཐུན་པར་ཕ་དང་བུའི་ཐ་སྙད་ཀྱང་དེ་དུས་ཀྱི་སྐྱེ་བོ་ཀུན་གྱི་ངག་ཏུ་མ་བསླབས་པར་ཡང་ཁ་ལ་ལོབས་ཡོད་པ་གསལ་བར་ཤེས། སྟག་གྲུབ་ཆེན་པའི་མཚན་ལ་དཔལ་བྱམས་ཀྱི་ཡི་གེར་བློ་བཟང་བསྟན་པའི་སྙིང་བོ་ཞེས་འབྱུང་བ་ལྟར་དུ་སྐྱེ་ཕྲེང་གསོལ་འདེབས་སུ་ཡང་འབྱུང་ལ། བླ་མ་རྡོ་རྗེ་འཆང་གིས་ཕྱག་དཔེ་པར་མ་ཞིག་ཏུ་བློ་བཟང་ཐུབ་བསྟན་སྙིང་པོ་ཞེས་འབྱུང་བ་ཕྲན་ལ་བསྟན་པ་དྲན་ལམ་དུ་ཡོད་པ་ཙམ་ལས་དཔེ་ཆ་གང་ཡིན་ད་ལྟ་བརྗེད་འདུག དེའི་སྟབས་ཀྱིས་ཁོང་གིས་གནང་བའི་ཕྱག་བྲིས་འགར། བློ་བཟང་ཐུབ་བསྟན་སྙིང་པོ། ཞེས་གནང་ཡོད་དེ་དཔེ་ཆ་དེ་ད་དུང་འཚོལ་བར་རིགས། ཡང་རྒན་པོ་རྣམས་ཀྱི་ངག་རྒྱུན་དུ་ཙག་ག་ཐང་ནས་འཁྲུངས་པ་དེ་ཉིད་སྟག་དཔོན་ཚང་གིས་མ་བླུས་པར་བརྟེན་དབུས་གཙང་དུ་བྱོན། ཐོས་བསམ་མཛད། རྒྱལ་མེ་ཏོག་ཐང་གི་མཁན་པོར་བཞུགས། མཚན་ལ་བློ་བཟང་རྒྱལ་མཚན་དུ་གྲགས་པ་ལྟར་སྡེ་སྲིད་སངས་རྒྱས་རྒྱ་མཚོའི་བཻ་སེར་དུ་ཡང་། རྒྱལ་མེ་ཏོག་ཐང་གི་མཁན་རབས་སུ་མཚན་དེ་དང་མཐུན་པ་ཞིག་འབྱུང་། དེའི་ཕྱིར་བླ་མ་རིན་པོ་ཆེའི་གྲུབ་མཐའི་སྡོམ་སོགས་ཀྱི་ཡི་གེ་བ་ནི་ཕྲན་བུས་ཞབས་འགྱུར་བྱས་པ་སྟེ་དེར་རྒྱལ་མཁན་སྤྲུལ། ཅེས་གསུངས་པའི་ཁུངས་ནི་འདི་ལ་ཐུག་པ་ཡིན་ནོ། །དེ་ནས་མདོ་སྨད་དུ་ཕེབས། སྟག་དཔོན་ཚང་གི་ཡུལ་བའི་ཉེ་འདབས་སུ་གཟིམ་གུར་ཕུབ་ནས་ཉིན་བདུན་ལ་བཞུགས་ཀྱང་ཕན་ཚུན་ཐུག་ཕྲད་མ་བྱུང་། དེའི་རྐྱེན་གྱིས་ཁ་དྲུག་ཕྱོགས་ནས་གདན་དྲངས་ཏེ་ཕེབས་པ་ཡིན་ཟེར་ཏེ་ངག་རྒྱུན་གང་དག་བརྟག་པར་བྱ། དེ་ནས་དཔལ་ལྡན་རྒྱ་མཚོའི་སྐབས་སུ་བཤད་ཟིན་པ་ལྟར་སོག་ཡུལ་ནས་མཁན་པོ་ཚང་གི་སྐུ་གདུང་ཚེ་ཏན་དུ་ཞུས་ཤིང་གདུང་མཆོད་རྒྱ་ཆེར་བཏང་བ་སོགས་ཀྱི་ཕྱག་རྗེས་ཆེ་བར་བརྟེན་ཆུ་བཟང་རིན་པོ་ཆེའི་བཀའ་ལྟར་ཁྲི་ཚབ་མཛད་པས་སྒར་བ་ཁ་དྲུག་གི་ཁྲི་དྲུག་དང་གདུགས་དྲུག་གི་བདག་པོར་གྱུར། རབ་བྱུང་བཅུ་གསུམ་པའི་བགྲང་བྱ་སོ་ལྔ་བ་ལྕགས་གླང་ལོར་ཆུ་བཟང་ངག་དབང་ཐུབ་བསྟན་དབང་ཕྱུག་ཚང་ཁ་དྲུག་ཕྱོགས་སུ་ཕེབས་སྐབས་མཁན་པོ་ཇ་སག་དགུང་ལོ་བཞི་ཡིན་སྟབས་སྨར་ཚང་གིས་འགན་བཞེས་པའི་སྒང་དུ་སྣང་། དེ་ལྟར་ན་རགས་རྩིས་སུ་ཞབས་དྲུང་སྨ་ར་ཚང་ཁ་དྲུག་གི་ཁྲི་ལ་བཞུགས་པའི་ལོ་ནས་ད་ལྟ་རབ་རྒྱལ་མེ་སྤྲེལ་བར་དུ་མ་མཐའའང་ལོ་ཉིས་བརྒྱ་ལྷག་སོང་སྣང་ངོ་། །སྐབས་འདི་དག་ཏུ། སྐུ་ཞབས་རྣམ་གཉིས་ལ་དན་ཏིག་མཁན་པོ་དང་། དན་ཏིག་ཞབས་དྲུང་ཞེས་འབོད་པ་ཤས་ཆེ་ལ། དེའི་ཕྱིར་ཁོ་བོའི་དཔེ་ཐམ་སྟེང་དན་ཏིག་ཞབས་དྲུང་གི་དཔེ་ཆ་ཞེས་གླེགས་བམ་ཕལ་ཆེ་བའི་སྟེང་དཔེ་ཐམ་དེ་བརྒྱབ་ཡོད་པ་དང་། ཕྱིས་སུ་ཇ་སག་དང་ཚོན་པོ་མའི་སྐུ་རིང་ལ་ཚེ་ཏན་དགོན་དུ་རྒྱུན་བཞུགས་ཤས་ཆེ་བས་ན་རིམ་གྱིས་ཚེ་ཏན་མཁན་པོ་དང་། ཚེ་ཏན་ཞབས་དྲུང་ཞེས་འབོད་པའི་ཁ་རྒྱུན་དར་བར་གྱུར་ཏོ། །ཁྱད་པར་འདི་མ་ཕྱེད་པའི་དབང་གིས་བྲག་དགོན་པའི་མདོ་སྨད་ཆོས་འབྱུང་དུ་དན་ཏིག་ཞབས་དྲུང་དང་ཚེ་ཏན་ཞབས་དྲུང་ཞེས་བླ་སྤྲུལ་ཐ་དད་པ་གཉིས་ཡིན་པའི་ཚུལ་གྱིས་སོ་སོར་བགྲངས་པ་ནི་ཡུལ་དེའི་རྒྱུས་མ་ལོན་པའི་དབང་གིས་ནོར་བ་ཡིན་ནོ། །

སྐྱེ་ཕྲེང་གསུམ་པ་བློ་བཟང་རབ་གསལ་ནི། ཁོ་ཡན་ལུང་ཁོག་གི་སྡེ་ཁྲོད་ཅིག་ཏུ་འཁྲུངས་ཤིང་དན་ཏིག་གི་ཁྲི་ལ་བཀོད། དགུང་ལོ་བཅུ་ལྷག་བཞེས་པའི་སྐབས་སུ་སྐུ་གཤེགས་པས་མཛད་པའི་ལག་རྗེས་ཅི་ཡང་སྟོན་རྒྱུ་མ་བྱུང་། དེའི་ཕྱིར་ད་ཆ་འཁྲུངས་ཡུལ་གང་ཡིན་གྱི་ངག་རྒྱུན་ཡང་ཉམས་ནས་ལ་ལས་འབའ་ཡོག་དང་། ལ་ལས་ཤ་སྟེང་དང་། ལ་ལས་དོར་ཤི་ཡིན་ཟེར་བ་སོགས་ངེས་ཏིག་མི་སྣང་ངོ་། །ཕྱིས་སུ་མ་ཎི་སྒར་བའི་གཉེར་དཔོན་དགེ་འདུན་ཚུལ་ཁྲིམས་གཞོན་དུས་རྒན་མོ་ལོ་གྱ་སྟོད་ལོན་པ་ཞིག་གི་ངག་ལས་ཐོས་པ་ནི། འཁྲུངས་ཡུལ་རྒྱ་མཁར་ཡིན་པ་དང་། ཞབས་དྲུང་ཚོན་པོ་མ་དང་དེའི་སྐུ་ཐོག་སྔ་བ་ཆུང་དུས་གཞན་དོན་དུ་དགོངས་པ་རྫོགས་པ་གཉིས་ཀའི་འཁྲུངས་ཁྱིམ་གཅིག་ཡིན་པ་དང་། དེར་མ་ཟད་ཆུང་དུས་མ་བཞུགས་པ་དེ་ཉིད་ཀྱི་རྩེ་ས་རྒྱ་མཁར་སྡེ་འདབས་ཀྱི་ཕ་བོང་ནག་པོ་ཞིག་ཡོད་པ་དེའི་རྩ་ཡིན་ཚུལ་བཅས་རྒན་མོ་དེ་ལ་བཤད་རྒྱུ་ཡོད་ཟེར་ཏེ་བདེན་ནའང་ཐང་སྙམ་མོ། །རྒྱུ་མཚན་ནི་འཁྲུངས་ཁྱིམ་དེ་མ་ཎི་པཎྚི་ཏའི་གཞིས་ཀ་སྐྱོང་མཁན་ཞིག་ཡིན་པ་འདི་ལ་ཐུག་གོ །

སྐྱེ་ཕྲེང་བཞི་བ་འཇིགས་མེད་ཐུབ་བསྟན་ནོར་བུའམ་ཚོན་པོ་མ་ཚང་ནི། ཁོ་ཡན་རྒྱ་མཁར་དུ་རང་བྱུང་བཅུ་གསུམ་པའི་ཤིང་ཁྱི་ལོར་སེར་དྲིས་མ་ཎི་པཎྚི་ཏའི་སྐུ་ཉེར་འཁྲུངས། ཤིང་ཁྱིའི་ལོ་དེར་མཁན་པོ་ཇ་སག་དགུང་ལོ་ཉེར་གསུམ་ཡིན། དེས་ཐུགས་ཁུར་ཆེར་བཞེས་ཀྱིས་བླ་བྲང་རང་གི་ཕྱག་རྫས་དང་། ཁ་དྲུག་གི་དགོན་གཞུང་སོ་སོ་ནས་བླུ་ཡོན་ཕུལ་ཏེ་གདན་སར་བཀོད། དགུང་ལོ་བདུན་པར་ཇ་སག་མདུན་ནས་རབ་བྱུང་བསྒྲུབས། སེར་དྲིས་མ་ཎི་པཎྚི་ཏ་བློ་བཟང་བསྟན་པའི་ཉི་མ་དགེ་རྒན་དུ་བསྟེན། ཇ་སག་ཚང་རྒྱ་ནག་ཏུ་ཕེབས་ནས་ལོ་མང་རབས་བཞུགས། ཤུ་དུ་དགོན་ཁག་རྣམས་ཀྱི་ཁྲི་འགན་བཞེས་པར་བརྟེན་སེར་སྐྱ་ཚང་མར་རྩིས་མཐོང་ཤིན་ཏུ་ཆེ། སྔོ་ཁོའི་དཀར་ཆག་ཏུ་ཡང་། སྐུ་ཕྲེང་བཞི་བ་འཇིགས་མེད་ཐུབ་བསྟན་ནོར་བུ་ཞེས་མཁྱེན་རབ་དང་ལྷག་བསམ་ཆེ་བས་རང་གཞན་གྱི་སྡེ་ཁྲོད་དུ་བྱ་བ་ཆེ་ཕྲལ་ཀུན་གྱིས་གྲོས་འདྲི་ཞིང་། ཀུན་ལ་ཐུགས་སྙོམས་ཤིང་དྲང་བས་གསུང་དང་བླངས་ཆེ། ཞེས་གསུངས་པ་ནི་དོན་དང་ལྡན་པར་གྲགས་ཏེ། འགྲིག་ལམ་ཕྱོགས་སུ་ཕར་ཟད། ཐུགས་གཟུ་བོར་གནས་སྟབས་གྱོད་ངན་ཁ་མཆུ་སོགས་ཀྱང་འགྲིག་འདུམ་བྱས་པ་མང་བར་གླེང་། དཔེར་ན་ཁོ་ཡར་དང་རབ་ཁའི་ཚོ་བ་བཞིའི་ཟ་ལར་རྣམས་ནས་རྡོ་གཤོང་གི་རྩྭ་ས་བརྩད་ནས་ཚུར་ལ་མི་བཅོ་བརྒྱད་དང་། ཕར་ལ་མི་བཅུ་གསུམ་བསད་པའི་རྩོད་གླེང་སུས་ཀྱང་འདུམ་མ་ཐུབ་པའང་རྗེ་འདི་བས་བདེ་བླག་ཏུ་བསྡུམས། སྐབས་འགར་གཞུང་རྫས་བཀོལ་ཉེས་པས་བུ་ལོན་འཁོར་ཏེ་ན་བཟའ་ཚུན་ཆད་གཏའ་མར་འཇོག་དགོས་པའང་བྱུང་། སྡིག་སྤྱོད་ལ་འཛེམས་ནས་རེ་ཞིག་བར་ཤ་བཅད་དེ་ཟར་གཡིས་ཙམ་གྱིས་ཆོག་ཤེས་བསྟེན་པ་དང་། སྐུ་ཚོ་ཞིང་དར་བས་ཆིབས་ཀྱིས་མ་དྲོངས་པར་གཡག་ཀོ་སྟེང་ནས་འདྲུད་པའམ། ཀྱོའུ་ཙིའི་སྟེང་ནས་ཕེབས་བཞུད་བྱེད་དགོས་པ་དང་། དེ་དུས་ཀྱི་ཀྱོའུ་ཙི་ཕྲན་བུའི་རིང་ལའང་དན་ཏིག་བླ་བྲང་དུ་རོ་མ་ཙམ་ཞིག་སྟོན་རྒྱུ་ཡོད། ཀ་རིང་རྟ་མགྲིན་སྒོམ་སྤྲུལ་གྱི་སྐུ་ཐོག་དང་བོ་དང་འབྲེལ་ཆེ་བས་ཀྱལ་ཀའི་ཚུལ་གྱིས་སྐྱེ་བ་ཕྱི་མ་ལ་འུ་གཉིས་ཀྱི་ཤ་འདི་བརྗེ་དགོས་ཞེས་གླེང་མོལ་བྱས་པ་ལྟར་གཉིས་ཀའི་སྐུ་རྗེས་མ་ལ་རྟ་མགྲིན་ཚང་ཚོ་ཞིང་ཞབས་དྲུང་སྐུ་སྐེམ་པ་དེ་བྱུང་ཞེས་རྒན་པོ་ཚོས་གླེང་། སྐབས་ཤིག་ཁམས་ཅུང་ཟད་བདེ་མིན་བྱུང་བར། ཡབ་རྗེ་གསེར་ཁང་བ་ལ་ཞུས་པས་སྔོན་འབྲེལ་ཆེ་བའི་དགོན་པ་ཞིག་གི་བསྟེན་པ་ལྷ་མོ་ཡིན་པས་དེ་ལ་མཆོད་མེ་སྙན་ཤལ་རེ་ཕུལ་ན་དགའ། དེ་མིན་ཐབས་གཞན་ཅང་བྱེད་མི་དགོས། ཞེས་པའི་གསུང་བཀོད་ལྟར་སྟག་དགོན་པ་ལ་ལན་གཅིག་ཕེབས་མྱོང་ཟེར། དགུང་ལོ་སོ་དགུ་བ་ལ་མཁན་པོ་ཇ་སག་ཆུ་བཟང་ནས་སྐུ་གཤེགས་པར་འདི་བས་དབུ་དྲངས་ཏེ་སྐུ་གདུང་འཕྲོག་པ་དང་། ཆུ་བཟང་བླ་བྲང་ནས་བཙོན་སྡུག་མྱངས་པ་དང་། བཤགས་པ་བརྒྱབས་ནས་འབྲེལ་ཇེ་ཟབ་ཏུ་བཏང་བ་སོགས་སྔར་ཇ་སག་སྐབས་སུ་བཤད་ཟིན་པ་ལྟར་ལ། དགུང་ལོ་ཞེ་གཅིག་སྟེང་དན་ཏིག་དང་ཚེ་ཏན་སོགས་སུ་སྐུ་མཆེད་རིན་པོ་ཆེ་ལས་འཇིགས་བྱེད་དབང་སོགས་ཆོས་ལུང་མང་དུ་གསན། དགུང་ལོ་ཞེ་དྲུག་སྟེང་མཁན་པོ་ཚང་གི་ཡང་སྤྲུལ་གདན་སར་བཀོད་འཕྲལ་རྣམ་ཐར་རིན་ཆེན་ཕྲེང་མཛེས་དེ་བརྩམས། དགུང་ལོ་ང་གསུམ་སྟེང་ཚེ་ཏན་འདུས་སྤྱིས་རྩོམ་སྐུལ་ཞུས་ནས་ཚེ་ཏན་བཅའ་ཡིག་ཆེན་མོ་དང་དེབ་ཡིག་བཅས་གསར་རྩོམ་མཛད། དེའི་མཛད་བྱང་དུ་མིང་གཞན་དོན་ཡོད་རྡོ་རྗེ། ཞེས་འཁོད་འདུག ཀླད་དུ་རྒྱ་བོད་སོག་གསུམ་གྱི་ཡི་གེ་ཅན་གྱི་ཐམ་ག་ཞིག་བཏབ་སྣང་སྟེ་ཟི་ལིང་ཨམ་བྷན་གྱི་ཐམ་ག་ཡིན་སྐད། མཁན་པོ་བློ་བཟང་འཇིགས་མེད་རབ་བརྟན་གྱིས་བྲིས་པའི་མཐུ་དགོན་བཅའ་ཡིག་ཏུའང་རྗེ་འདི་བས་བཞག་པའི་བཅའ་ཡིག་ལ་གཞི་བྱས་ཏེ་བྲིས་པར་བཤད་སྣང་སྟེ། དེ་ལྟར་ན་མཐུ་དགོན་གྱི་ཐོག་མའི་བཅའ་ཡིག་ཀྱང་ཚོན་པོ་མས་བཞག་པར་མངོན། དགུང་ལོ་བཞིའི་སྟེང་ཚེ་ཏན་འདུ་ཁང་། བླ་བྲང་གི་ལྷ་ཁང་། གསང་འདུས་ཁང་། མགོན་ཁང་སོགས་ལ་རབ་གནས་རྒྱས་ཙམ་ཞིག་མཛད་པའི་མཇུག་ནས་ཆིབས་རྟ་དཀར་པོ་ཆེ་ལེགས་ཤིག་ཡོད་པ་ཕུལ་བས་གཞི་བྱས། སྣང་རའི་བན་དེ་སོགས་ཁ་དྲག་དབང་ཐང་ཆེ་བའི་ཁ་མགོ་བ་བཅས་ནས་ཁ་དྲུག་དང་ཁོ་ཡན་ལུང་ཁོག་ཏུ་དཀར་ཐིགས་པ་བསླངས་ནས་ཚེ་ཏན་ཇོའུ་ཁང་གཞི་ནས་ཞིག་གསོ་བྱས་པ་དགུང་ལོ་ང་དྲུག་གི་བདུན་པའི་ཚེས་མགོར་ལེགས་པར་གྲུབ་སྟེ་རབ་གནས་ཀྱང་མཛད། འགྲོ་སོང་ཀུན་བསྡོམས་དོང་ཁྲོན་བདུན་བརྒྱ་གོ་ལྔ་དང་། འབྲུ་བྲེ་ཆིག་སྟོང་བརྒྱ་དང་ང་དྲུག་སོང་ཞེས་ཇོའུ་ཁང་རྩིག་ངོས་ཀྱི་དཀར་ཆག་ཁོང་བས་བརྩམས་པ་ལས་འབྱུང་། གསུང་རྩོམ་གྱི་ཚུལ་ནི། བཅའ་ཡིག་གི་དབུར། རྨད་བྱུང་ཆུ་གཏེར་ཆེན་པོའི་དབུས་གནས་ཤིང་། །ངུར་སྨྲིག་རྒྱལ་མཚན་འཛིན་པའི་རྣམ་རོལ་ཅན། །འཆད་རྩོད་རྩོམ་ལ་ཐོགས་པ་མི་མངའ་བ། །དྲིན་ཅན་བླ་མའི་ཞབས་ལ་གུས་པས་འདུད། །ཅེས་དང་། ཇོའུ་ཁང་དཀར་ཆག་གི་དབུར། ལུགས་གཉིས་ཀུན་ལ་དབང་བསྒྱུར་བཀའ་དྲིན་ཅན། །བསྟན་པ་ཡོངས་ཀྱི་མངའ་བདག་ལྕང་སྐྱ་རྗེ། །འགྲོ་བ་ཀུན་གྱི་སྐྱབས་མགོན་ཆུ་བཟང་བ། །རྣམ་གཉིས་དབྱེར་མེད་ཞབས་ལ་གུས་ཕྱག་འཚལ། །ཞེས་དང་། ཤེས་བྱ་ཀུན་ལ་ལག་ཡོན་བྱིན་པའི་ཐོ། །ཞེས་སོགས་སྦྱངས་པ་ཞན་པའི་རྟགས་ཅུང་རེ་ཐོན་པ་མ་གཏོགས་ལེགས་པར་སྣང་ངོ་། །དེ་ནས་དགུང་ལོ་ང་བརྒྱད་དམ་ང་དགུ་གང་རིགས་ལ་གོང་སྐྱའི་སྒར་རྙིང་བ་ནས་མྱ་ངན་ལས་འདས་པར་གྲགས་སོ། །

སྐྱེ་ཕྲེང་ལྔ་བ་འཇིགས་མེད་ཐུབ་བསྟན་རྒྱ་མཚོ་ནི། བཱ་ཡན་འགག་ཚའི་ཆན་ཧུ་དཔོན་ཚང་གི་ཁྱིམ་དུ་གོང་མ་ཐུང་ཀྲི་ཁྲི་ལོ་གཉིས་པ་རབ་བྱུང་བཅུ་བཞི་བའི་བགྲང་བྱ་བདུན་པ་ཆུ་མོ་ཕག་ལ་འཁྲུངས། རྫོང་དཀར་སྤྱན་སྔ་བ་རྗེ་དཀོན་མཆོག་ཕུན་ཚོགས་དང་དགུང་མཉམ་ཡིན། ཡབ་ལ་པདྨ་བཀྲ་ཤིས་དང་ཡུམ་ལ་བློ་བཟང་ཆོས་སྒྲོན་ཟེར། མིང་སྲིང་བཅུ་གཉིས་སྐྱེས་པ་ལས་ཕལ་ཆེར་ཆུང་སྲིས་ཤི་ནས་མ་གསོན། དེའི་སྟབས་ཀྱིས་འདི་བ་བཙའ་དུས་ཕག་ཚང་གི་སྒོ་ནས་བཙར་བཅུག་པས་ཕྱིས་སུ་གྲིབ་སེལ་གྱི་དོན་དུ་སྐུ་ཞབས་ཨ་རོལ་བློ་བཟང་ལུང་རིགས་རྒྱ་མཚོས་ཁྲོ་བོ་སྨེ་བརྩེགས་ཀྱི་བྱབས་ཁྲུས་མང་པོ་ལྗགས་བཀོད་གནང་། བཙའ་དུས་མའི་རྨི་ལམ་དུ་ཁྱིམ་ནང་སྟག་ཅིག་མཆོངས་པ་རྨིས་སྐད། པང་ཐོགས་ཀྱི་དུས་སུ་ཆན་ཟན་ཧྲི་ཉན་ཞེས་ཀྭོང་ཞུ་ཁྲི་ལོ་ཉེར་གཅིག་པའི་ཧོས་འཁྲུག་སྔོན་གྱི་ལོ་སུམ་ཅུ་བའི་ཧོས་འཁྲུག་ཚབས་ཆེན་དེ་བྱུང་བར། སྟོད་ཁག་གསུམ་གྱི་སྐྱེ་ཕོ་མོ་རྣམས་ཕུ་ལ་ཡང་རྫོང་ངམ་གནའ་རྫོང་དུ་བྲོས་སྐབས་ཨ་ཆེ་གཉིས་ཡོད་པ་དེར་བསད། མས་བྱིས་པ་འདི་པང་དུ་བཟུང་ནས་གཡང་དུ་མཆོངས། མ་ལ་མདུང་རྨས་འགའ་ཕོག་པར་ཟ་ལར་ཞིག་ལ་བྱིས་པ་མི་སྟེར་ཀ་མེད་བྱུང་། སྟེར་དུས་མས་འདི་སྐད་དུ། ཁོ་མོའི་བུ་འདི་རིན་པོ་ཆེ་ཞིག་ཡིན། འདི་མ་གསོད་པར་ཁྱེར་ལ་ཕན་ཐོགས་ངེས་ཡིན་ནོ་ཞེས་གདམས། དེས་ཨ་མགོན་ཆུང་བར་ཁྱེར། འགག་ཚའི་ཆན་ཧུ་ཚང་གི་བྱིས་པ་འདི་ཉོ་མཁན་སུ་ཡོད་ཅེས་པར། གཅིག་གིས་བ་ལང་གཅིག་བྱིན་ཀྱང་མ་བཙོངས། ཁྱ་རྒྱར་ཕྱིན་ཏེ་གཅིག་གིས་རྟ་བཟང་བ་ཞིག་བྱིན་ནས་ཀྱང་མ་བཙོངས། དེ་ནས་རང་ཡུལ་ཏ་ཤི་བུ་ནག་གི་ཟ་ལར་གྱི་ཁྱིམ་དུ་ཁྱེར། བྱིས་པ་རྒྱུན་དུ་ངུ་ཞིང་སུ་ཡིན་གྱི་པང་ནས་མི་ཉལ་བར་ཅོག་ཙེ་ཁར་འདུག་པ་སོགས་འཛིན་མ་བདེ་བ་བྱུང་། དེའི་ཚེ་མཁན་པོ་བློ་བཟང་འཇིགས་མེད་རབ་བརྟན་ཚང་ནས་ཐུགས་ཁུར་དང་བཞེས་གྱིས་འཇམ་དབྱངས་བཞད་པ་སྐུ་ཕྲེང་བཞི་པའི་མདུན་ཐུགས་བརྟག་ཞུས་ནས་འདི་བ་ལ་བབས། ཟ་ལར་ལ་དོང་ཁྲོན་ཉིས་བརྒྱའི་བླུ་ཡོན་བྱིན་ནས་རིམ་གྱིས་གདན་སར་བཀོད། དེའི་སྟབས་ཀྱིས་ཕྱིས་སུ་ཕྲན་བུའི་རིང་ལའང་ཏ་ཤི་བུ་ནག་གི་སྡེ་བས་ཁོ་ཚོ་ཁྱོད་ཀྱི་སྐུ་བདག་ཡིན་ཟེར་བའི་ངག་རྒྱུན་མ་ཉམས་པར་ཡོད་པའི་རྐྱེན་གྱིས་བདག་ལོ་ཚོད་ཉི་ཤུ་རྩ་འགའི་སྐབས་ཏ་ཤི་བུ་ནག་གི་སྡེ་བས་བོས་པ་ལྟར་དེར་ཕྱིན་ནས་བཟའ་བཅའི་སྟོན་མོ་དང་ཕན་ཚུན་འཚམས་སྐྱེས་སྟེར་རེས་བྱས། རབ་བྱུང་མཁན་པོ་སུ་ཡིན་རྩར་མི་ཆོད་ཀྱང་རབ་བྱུང་གི་མཚན་ལ་བློ་བཟང་བསྟན་འཛིན་ནོར་བུ་དང་བསྙེན་རྫོགས་ཀྱི་མཚན་ལ་འཇིགས་མེད་ཐུབ་བསྟན་རྒྱ་མཚོ་སྟེ་ཚིགས་ཕྱི་མའི་མཁན་པོ་བླ་བྲང་སྒོ་མང་ཚང་ཡིན་ནམ་བརྟག ཚེ་ཏན་གྲྭ་རིགས་དགེ་སློང་ནོར་བུ་དོན་གྲུབ་སྟེ་ཨ་ཀ་ཏོ་ཐེ་ཟེར་བ་ཀློག་གི་སློབ་དཔོན་དུ་བསྟེན། དགུང་ལོ་བཅུ་གཉིས་ཐོག་ཆུ་བཟང་གི་ཆོས་གྲྭར་ཞུགས། ཡི་གེ་དང་རི་མོ་འབྲི་བ་སོགས་ལ་བྱང་ཆུབ། ཁྱད་པར་དུ་པིར་སྨྱུག་གིས་བོད་ཡིག་འབྲི་ཉམས་གཞན་ལས་ཁྱད་པར་དུ་འཕགས། སྐད་ངག་བདེ་ཞིང་འདོན་བཟང་བས་དབུ་མ་འཇུག་པ་ཚོགས་འདོན་ལ་ཁེལ་དུས་ཆེད་དུ་ཚོགས་ལ་ཕེབས་པར་ཞུ་བ་ཞིག་ཡིན་སྐད། ཚོགས་ལངས་ཀྱང་ལན་མང་བྱས། ཆུ་བཟང་མདུན་ནས་ལོ་གསར་བྱེད་དུས་རྫ་ཆུང་མང་བོར་དར་ཆགས་སུ་བཅུག་པའི་ངོས་ལ་ཚོན་རྩིས་རི་མོ་སྣ་ཚོགས་བྲིས་པ་སྒོ་འགྲམ་དུ་བསྟར་བས་བླ་གྲྭ་རྣམས་དགྱེས་སྐད། དགུང་ལོ་བཅོ་བརྒྱད་སྟེང་འཁྲུངས་ཡུལ་དུ་ཆན་ཧུ་བན་ཕྲུག་མ་འཚམས་ཤིང་། དེའི་བུ་དབང་ཆེན་ནར་མ་སོན་པའི་རྐྱེན་གྱིས་ཆན་ཧུའི་གོ་གནས་ཁུར། ཏོག་ཞྭ་གྱོན་ཞིང་ལས་ལྭ་མནབས། རེ་ཞིག་སྟོད་གྲུ་མགོ་དྲུག་དང་། སྨད་སྒར་བ་ཁ་དྲུག་གི་བླ་དཔོན་ཟུང་འབྲེལ་བྱས་ནས་རིམ་གྱིས་རྒྱ་དྲག་དང་འབྲེལ་བ་བསྒྲིགས། ཀྭོང་ཞུ་ཁྲི་ལོ་ཉེར་གཅིག་པའི་དུས་ཀྱི་ཧོས་འཁྲུག་ཚབས་ཆེན་ལངས་སྐབས། ཡ་རྫི་དང་བཱ་ཡན་ཁ་སྒང་ཕྱོགས་སུ། ལན་ཀྲུའུ་ཙུང་འདུའི་བཀས་དམག་མགོ་བསྐྱངས་པས་ཇུས་ཀ་ལེགས་པོ་བྱུང་། དེར་བརྟེན་གོང་མས་ཞིན་ཙི་ཡིན་མ་ཏོས་ཞེ་ཀྲིན་ཏུ་ཏུ་ཧུའུ་ཞིན་ཡིན་པཱ་ཐུར་ཞེས་པའི་ཆོ་ལོ་གནང་བའི་དན་རྟགས་ད་དུང་ཡང་གོང་སྐྱ་བླ་བྲང་སོགས་སུ་མང་དུ་ཡོད།

དེ་དུས་གྲུབ་དབང་འཇིགས་མེད་བསམ་གཏན་རིན་པོ་ཆེར་ཡིག་ལམ་ནས་བསླབ་པ་འབུལ་བའི་ཡི་གེ་མ་ཕྱི་ཚེ་ཏན་བླ་བྲང་ཡིག་སྒམ་ན་ཡོད་པ་བདག་གིས་མཐོང་མྱོང་། འགག་ཚའི་སྐྱེ་ཡུལ་དེ་བྲག་དཀར་གྱི་རྒན་རྒྱ་ཕྱོགས་ནས་མཆེད་པའི་ངག་སྒྲོས་ལྟར། རྒྱའི་སྐད་ཀྱི་གདངས་ལ་རྒན་མ་ཐོན་པར་ནན་ཞེས་བཅོས་པར་ཁོང་བའི་རྒྱའི་མིང་ལ་ནན་ཁྲན་ཀྲིན་དང་ནན་ཏཱ་ཞིན་ཞེས་སུ་གྲགས། དེའི་ཕྱིར་ལན་ཀྲུའུ་དང་ཀ་ཅུ་ཡན་ཆད་ནས་བཟུང་རྒྱ་བོད་ཧོས་གསུམ་མཆོག་དམན་ཁྲོད་ནས་ནན་ཏཱ་ཞིན་ཞེས་པའི་མིང་མི་ཤེས་མཁན་མེད་པ་ལྟ་བུར་གྱུར། ཧོས་འཁྲུག་གི་མགོ་མནན་པ་ལ་དེ་དུས་སྐྱེས་བུ་དམ་པ་དུ་མའི་ཐུགས་ཟིན་ཅིང་སྐྱབས་འཇུག་ཐོབ་པའི་ངག་སྒྲོས་མང་དུ་འདུག་ལ། ཁྱད་པར་དུ་སྐྱབས་རྗེ་བདེ་ཡངས་བློ་བཟང་བསྟན་འཛིན་ནོར་བུས་ཞབས་དྲུང་འདི་བ་གསང་བདག་གི་སྤྲུལ་བ་དངོས་ཡིན་པ་དང་། འཁྲུག་མགོ་མནན་པས་ད་ལྟ་ཚང་མ་བག་ཕབ་ཏུ་གནས་ཆོག་པ་འདི་བྱུང་ཞེས་གསུངས་ཤིང་ཧ་ཅང་ཐུགས་ཟིན་པའི་ངག་སྒྲོས་ཁུངས་མ་དང་ལྡན། རྐ་ཕུག་དང་དོ་རྒྱའི་བར་དང་། ཀ་རིང་དང་ཟམ་དཀར་བར་གྱི་མི་ཤ་མང་བོའི་རྩོད་གླེང་སོགས་འགྲིག་འདུམ་བྱས་པའང་མང་རབས་ཟེར། འདི་བ་སྟག་དགོན་དུ་ལན་མང་ཕེབས་ཏེ་དགོན་པར་སྲི་གནོན་བརྒྱབ་པ་སོགས་འཁྲུངས་ཡུལ་གྱི་དབང་གིས་སྐུ་ཕྲེང་སྔ་མ་རྣམས་ལས་འབྲེལ་བཟང་ཙམ་འགྲིག་པོ་བྱུང་། སྐབས་ཤིག་མཁན་པོ་ཚང་དང་བསྡོངས་ནས་ཐ་གྱ་དགོན་གྲོང་མངའ་འོག་ཏུ་བསྡུ་ཕྱིར་ཐང་རིང་རྒྱལ་བ་ཚང་དང་གཏུགས་བཤེར་བྱེད་པ་སོགས་མཐའ་མི་འཁྱོལ་བའི་འཇིག་རྟེན་གྱི་བྱ་བ་སྣེ་མང་ཡང་ལག་ཏུ་བསྟར། མཐར་ཐང་རིང་རྒྱུད་པས་ལྕགས་མཁར་སློག་པ་སོགས་བྱད་ཕུར་གྱི་ངོ་ལྟ་བུས་བླ་མ་རྣམ་གཉིས་ཀྱི་བར་དབྱེན་ཕྲ་ཅི་རིགས་བྱུང་བར་བརྟེན། ཁ་དྲུག་དགོན་གྲོང་སོ་སོར་ཕྱོགས་རིས་དང་རྩོད་གླེང་དབྱར་གྱི་ཤ་མོ་ལྟར་བརྡོལ་བ་དུས་ཕྱིས་ཀྱི་བར་དུ་ཞི་མ་ནུས་མོད། འོན་ཀྱང་བླ་མ་རྡོ་རྗེ་འཆང་གི་འཕྲིན་ལས་ཀྱིས་རིམ་གྱིས་ཞི་འཇམ་དུ་གྱུར་ཚུལ་ཡུལ་ཕྱོགས་དེ་གའི་ད་ལྟའི་མི་རབས་ཀུན་གྱི་ཡིད་ངོར་རི་མོར་བྲིས་པ་བཞིན་དུ་གསལ་བས་འདིར་ཞིབ་པར་མི་འབྲིའོ། །སྐུ་ཚེ་སྟོད་ལ་ཆུ་བཟང་རིན་པོ་ཆེ་བློ་བཟང་ཐུབ་བསྟན་བཤད་སྒྲུབ་ཉི་མ་དང་། བླ་བྲང་སྒོ་མང་སོགས་བསྟེན། ཕྱི་མའི་དྲུང་ནས་དགུང་ལོ་ཉི་ཤུའི་སྟེང་མི་ཏྲ་རྡོར་ཕྲེང་སོགས་སྔར་མཁན་པོ་ཚང་གི་སྐབས་སུ་གོང་སྨོས་ཕལ་ཆེར་གསན། ཕྱིས་སུ་ཞྭ་དམར་རིན་པོ་ཆེ། བདེ་ཡངས་རིན་པོ་ཆེ། གྲུབ་དབང་གོང་མ་རྣམས་སངས་རྒྱས་དངོས་དང་འདྲ་བར་གཙུག་ཏུ་བཀུར། དེ་དག་གིས་ཀྱང་གཟིགས་སྐྱོང་དང་ཐུགས་བརྩེ་ཤིན་ཏུ་ཆེ། གྲུབ་དབང་གོང་མ་ལས་དུས་འཁོར་དབང་དང་ལུས་སྦྱོང་གི་མྱོང་ཁྲིད། བདེ་ཡངས་རིན་པོ་ཆེ་ལས་མན་ངག་རྣམ་གསུམ་གྱི་ཁྲིད་སོགས་ཟབ་ཆོས་ཀྱང་གང་མང་མནོས། ཚེ་ཏན་དགོན་ན་བཞུགས་པའི་དགུང་གཅིག་ཞོན་དྲེལ་བཟང་བ་གཉིས་རྐུན་མས་ཁྱེར་ཏེ་ཉིན་འགར་གར་སོང་རྩར་མ་ཆོད་པ་ན་ཀ་བཞི་མའི་རང་གི་ལྷ་མོའི་རྟེན་ཐང་གསུང་འབྱོན་མར་གྲགས་པའི་མདུན་ཕེབས་ཏེ་ཐང་ག་ལ་གཟན་ལྕག་གིས་བྲབས་ནས་འདི་ཙམ་གྱི་འཕྲིན་ལས་ཀྱང་མི་སྒྲུབ་ན་ཚེ་རབས་ནས་ཚེ་རབས་སུ་སྲུང་མའི་ལྷར་བསྟེན་པ་ལ་དགོས་པ་ཅི་བྱུང་། ཞེས་ཁྲོས་པའི་ཉམས་ཀྱིས་འཕྲིན་བཅོལ་གནད་སྨིན་མཛད་པའི་ཕྱི་དྲོ་ཞིག་ལ། དྲེའུ་གཉིས་ཀ་ཤེད་ནས་རི་མགོ་བརྒྱུད་དེ་ཆུ་ལ་བཤན་པ་ལྟ་བུའི་རྔུལ་ཆུ་ཞམ་ཞམ་དང་བཅས་རྔམས་རྒྱུགས་ཀྱིས་བླ་བྲང་གིས་སྒོར་སླེབས་ནས་འཚེར་སྐད་འབྱིན་པ་ཀུན་གྱི་མིག་སྔར་མངོན་སུམ་དུ་བྱུང་ཞེས་བདག་ན་སོ་གཞོན་པའི་སྐབས་བླ་རྒན་ཚོས་རྣ་བ་སུན་སུན་དུ་བཤད་མྱོང་། སྟག་དཔོན་པོ་རྣམ་རྒྱལ་གྱིས་ཞུས་ནས་ལྷ་མོའི་གཏོར་ཆོག་ཉུང་བསྡུས་ཤིག་བརྩམས་ཡོད་དེ་ངེས་པར་བྱིན་བརླབས་ཀྱི་དྲོད་མ་ཡལ་བ་ཞིག་ཏུ་གདའ། དགུང་ལོ་སོ་དགུའི་སྟེང་འཇམ་དབྱངས་བཞད་པ་སྐལ་བཟང་ཐུབ་བསྟན་དབང་ཕྱུག་དན་ཏིག་དང་ཚེ་ཏན་སོགས་ཁ་དྲུག་ཕྱོགས་སུ་གདན་དྲངས་སྐབས་བསུ་སྐྱེལ་སྣེ་ལེན་གྱི་ཁུར་བཟུང་། ཆོས་འབྲེལ་བཞག ཀུན་མཁྱེན་བླ་མའི་འཁྲུངས་རབས་ཐང་ག་སོགས་རྟེན་སྐལ་ཅི་རིགས་དང་། ཨེར་ཏི་ནི་མཁན་པོའི་ཆོ་ལོ་དང་བཀའ་ཤོག་བཅས་སྩལ། ཕན་ཚུན་ཐུགས་འདྲིས་ཆེ་བར་གྱུར་རྐྱེན་འཇམ་དབྱངས་བཞད་པས་བླ་བྲང་བཀྲ་ཤིས་འཁྱིལ་བའི་ཕྱག་མཛོད་དུ་བསྐོ་རྒྱུའི་ཐུགས་བཞེད་ཡོད་སྒང་། ཏ་ཧོ་གྱའི་འབག་ཆེན་ཨ་ཧུན་ནས་སྟག་ལ་ཞོན་དཀའ་ཞོན་རྗེས་འབབ་པ་དཀའ་ཞེས་པའི་ཚིག་གིས་དོགས་པ་བསླངས་ཤིང་ཕྲག་དོག་བྱས་པར་བརྟེན་བཏང་སྙོམས་སུ་བཞག་སྐད། དགུང་ལོ་བཞི་བཅུ་ལོན་ནས་ལན་ཀྲུའུའི་དཔོན་ཁག་མང་ཙམ་གྱིས་གཙོས་སློབ་གྲྭ་བ་དུ་མར་བོད་ཡིག་བསླབ་ཕྱིར་ལན་ཀྲུའུར་ལོ་གཉིས་ཙམ་བཞུགས། མཐུ་དགོན་མཚམས་ཁང་དང་། གོང་སྐྱའི་བླ་བྲང་ཡར་ནང་སོགས་གཟིམ་ཁང་གསར་བཞེངས་བྱས། དམག་དཔོན་ཁུར་དུས་རེབ་གཅིག་ལ་ཟ་ལར་ལྔ་བཅུ་བསད་པ་སོགས་ཀྱི་སྡིག་བཤགས་སུ། གྲུབ་དབང་གོང་མའི་བཀའ་ལྟར་ཚེ་ཏན་དུ་རྡོར་སེམས་སྨན་སྐུ་མི་ཚད་ལས་བརྒལ་བ། རྡོར་སེམས་སྟོང་ཐང་། གོང་སྒར་བླ་བྲང་དུ་སྒྲོལ་མའི་སྨན་སྐུ་ཆེ་ཚད། གོང་སྒར་འདུ་ཁང་སྒོ་སྔུན་གྱི་སྒྲོལ་མའི་འབུམ་ཁང་བཅུ་ལོངས་སོགས་སྒྲིབ་སྦྱོང་གནད་དུ་ཐིངས་པ་བསྒྲུབས། དེ་ནས་རང་དགོན་རྣམས་སུ་སོས་དལ་གུ་ཡངས་ཀྱིས་བཞུགས་སྐབས། བླ་མ་རྡོ་རྗེ་འཆང་ཆེན་པོ་དགུང་ལོ་བཅུ་གཅིག་སྟེང་མཐུ་དགོན་དུ་ཕེབས་དུས་ཤིག་ལ་རྩེད་ཆས་ན་བཟའ་སོགས་ཀྱི་དངོས་འབུལ་བཅས། ཚེ་སྟོད་འཇིག་རྟེན་གྱི་བྱ་བ་གང་བསྒྲུབས་ལ་འགྱོད་བཤགས་དང་། ཕྱི་མར་རྗེས་འཛིན་གྱི་གདུང་ཡུས་མཆི་མ་མི་ཆོད་པ་དང་བཅས་སྨོན་ལམ་གང་དྲག་བཏབ་པ་ཕྱིས་སུ་བླ་མ་རིན་པོ་ཆེ་ནས་ཡང་ཡང་བཀའ་བསྩལ་པ་ཐོས་ཏེ། གང་ལྟར་སྐུ་ཚེ་གང་བོར་འཇིག་རྟེན་གྱི་བྱ་བས་ཕལ་ཆེར་གཡེངས། དགུང་ལོ་ཞེ་བདུན་པ་ས་བྱ་ལོར་ཟས་རྐྱེན་ཞིག་ལ་བརྟེན་ཧོར་ཟླ་གཉིས་པའི་བཅུ་གཅིག་ལ་མཐུ་དགོན་ནས་འདས། འདའ་ཁར་ལམ་གཙོ་རྣམ་གསུམ་ལ་མྱོང་བ་ཐོན་ཡོད་ཚུལ་གྱི་གསུང་འཕྲོས་དང་། ཧི་ཀ་དང་ཕཊ་དྲག་པོ་ཞིག་བཏབ་ནས་གཤེགས། ཉེ་གནས་དམ་པ་ཀརྨ་རབ་བརྟན་གྱིས་སྲོག་བཟུང་སྟེ་བདེ་ཡངས་རིན་པོ་ཆེར་ཞུ་སྣ་བཅོལ་ནས་རྒྱལ་བ་བཅུ་གསུམ་པ་ཆེན་པོ་སྐུ་འབུམ་དུ་བཞུགས་པར་ལྗགས་བསྔོ་ཞུ་རྟེན་ཕུལ་ཅིང་སྤྲུལ་སྐུ་མྱུར་འབྱོན་གྱི་རྩོམ་བསྐུལ་དང་། ཆུ་བཟང་རིན་པོ་ཆེར་ན་བཟའ་ཆ་ཚང་། ཆིབས་པ་བཅས་ཕུལ་ཏེ་མྱུར་འབྱོན་རྩོམ་བསྐུལ་ཞུས། སྐུ་གདུང་ཚེ་ཏན་དུ་གདན་དྲངས་ནས་གཅན་ཚ་ཞབས་དྲུང་སྦྱིན་སྲེག་བླ་མར་བོས། གདུང་རྫོགས་ཀྱི་རིམ་པ་རྣམས་ཡུལ་སྲོལ་ལྟར་རྒྱ་ཆེར་བཏང་།

སྐྱེ་ཕྲེང་དྲུག་པར་སྒྲོ་བཏགས་པ་འཇིགས་མེད་རིགས་པའི་བློ་གྲོས་སམ་ངག་དབང་དབྱངས་ལྡན་རིག་པའི་འདོད་འཇོ་ཞེས་འབོད་པ་ནི། རབ་ཚེས་ལྕགས་ཁྱི་ལོ་སྟེ་སྤྱི་ལོ་ཆིག་སྟོང་དགུ་བརྒྱ་བཅུ་བའི་ལོའི་ཧོར་ཟླ་བཞི་བའི་ཉེར་གཉིས་ཉིན་ཡ་རྫིའི་མཁར་ནས་ཕ་བློ་བཟང་བཀྲ་ཤིས་དང་། མ་ལྷ་མོ་ཐར་གཉིས་ཀྱི་བུར་སྐྱེས། རྗེ་ཞྭ་དམར་པཎྚིཏ་ལ་བྱིས་པའི་ཨང་གི་དྲུག་ཕུལ་བའི་མཐར་ཕྲན་ལ་ཐུགས་བརྟག་བཅད། ལོ་བདུན་པ་ལ་དགོན་སོ་སོའི་ཁྲིར་བཀོད། སེར་དྲིས་རྗེ་མ་ཎི་དགེ་འདུན་བསྟན་འཛིན་རྒྱལ་མཚན་ལས་རབ་ཏུ་བྱུང་། མིང་ལ་དགེ་འདུན་བཤད་སྒྲུབ་རྒྱ་མཚོར་བཏགས། མཐུ་དགོན་གནས་བརྟན་བློ་བཟང་ཟླ་བ་དང་། ཆོས་ཀྱི་བཤེས་གཉེན་ངག་དབང་ཆོས་འཛིན་རྣམ་གཉིས་ཀློག་གི་སློབ་དཔོན་དུ་བསྟེན། ལོ་བཅུ་བཞིའི་ཐོག་ལུགས་གཉིས་དཔྱོད་པའི་སྤྱན་ཡངས་ཨ་ཀ་ལོ་ཡེ་ཀརྨ་རབ་བརྟན་གྱིས་ཁྲིད་དེ། བླ་མ་རྡོ་རྗེ་འཆང་ཡབ་སྲས་ཀྱི་མདུན་དུ་སློབ་གཉེར་ལ་བསྐྱལ། འདི་ཕྱིའི་བློ་སྣ་གཏད་དེ་འཇུ་ས་འཆང་ས་གཅིག་པུར་བྱས། ད་ལྟ་ལོ་ཞེ་བདུན་ལོན་པའི་བར་དུ་འབྱུང་ལུས་སྒྱུ་མའི་མགྲོན་ཁང་དང་མ་བྲལ་བར་དགེ་ཚུལ་གྱི་འདུལ་བ་ཀ་རི་ཀཱ་ནས་བཟུང་དཔལ་དུས་ཀྱི་འཁོར་ལོའི་བར་གྱི་བསྟན་པ་ཡོངས་སུ་རྫོགས་པ་ལ་མཇལ་ལོ་ཞིག་བྱས། རྣམ་དཀར་གྱི་བྱ་བ་ཅུང་ཟད་རེ་བགྱིས་ཁུལ་རྣམས་གོང་དུ་སྐབས་སོ་སོར་རགས་རིམ་ཞིག་སྨོས་ཟིན་ལ། གཞན་འཁོར་བར་འཁོར་ཚུལ་གྱི་དག་འཁྱལ་ནི་སྣག་ཤོག་གྲོན་པའི་རྒྱུའོ། །འོན་ཀྱང་ཕྲན་བུའི་རིང་ལ་སྟག་དགོན་དང་འབྲེལ་ཇེ་ཟབ་ཏུ་ཇི་ལྟར་སོང་ཚུལ་ཅུང་ཟད་ཅིག་སྨོས་ན། སྟག་གྲུབ་ཆེན་པའི་ལོ་རྒྱུས་ཀྱི་ཟུར་རྒྱན་དུ་འགྲོ་བས་འདི་ལྟར། ལོ་བདུན་གྱི་དུས་སྟག་དགོན་དུ་ཐོག་མར་རྡོག་སྣ་ཞིག་བསྒྱུར། ཉི་ཤུ་ཉེ་ཙམ་དུ་འདུས་སྤྱིའི་ཐུགས་མོས་ལྟར་འདུ་ཁང་ནས་དགའ་ལྡན་ལྷ་བརྒྱ་མའི་ཁྲིད་ཅིག་ཕོག དེའི་རྗེས་སུ་ལྷ་མོ་ཁང་དུ་རབ་གནས་རྟ་ཐོག་མ་དང་། དགོན་པའི་འབུམ་ཁང་གཉིས་བསྒྲུབས། འདུ་ཁང་དུ་བླ་བྲང་ནས་རྗེ་ཡབ་སྲས་གསུམ་གྱི་གསུང་འབུམ་གདན་འདྲེན་པ་དང་། རྗེ་ཡབ་སྲས་ཀྱི་སྐུ་བརྙན་བཞེངས་པ་སོགས་ཀྱི་ཞབས་འདེགས་ཞུས། ཆུ་སྤྲེལ་ལོར་ཁོང་རྡོ་རྗེ་འཆང་སྟག་དགོན་དུ་དགུན་བཞུགས་ལ་ཞུས་སྐབས་དགོན་པའི་ནང་ཅུང་ཟད་མ་མཐུན་པར་ཡོད་པ་ལེགས་པར་བསྡུམས། ཁོང་ཕེབས་དུས་ཀ་མདོ་ཐང་ནས་ཆིབས་བསུའི་མགོ་དྲངས་ཤིང་། དུས་འཁོར་དབང་གི་མ་ཎི་བཤད་བཅས་ཁུར་དུ་བླངས། འདུ་ཁང་ཞིག་གསོའི་སྐབས་བཀོད་ཁྱབ་དང་། ཚེ་ལྷ་རྣམ་གསུམ་གྱི་གྱན་ཐང་ཞིག་བཞེངས། དགོན་པའི་གྲྭ་རིགས་མང་ཙམ་འཇིགས་བྱེད་བསྙེན་ཆེན་ལ་བཞུགས་པའི་མཇུག་ནས་ཞི་རྒྱས་ཀྱི་སྦྱིན་སྲེག་ངོས་ནས་བླུགས་པར་བརྟེན་ལོ་རེའི་འཇིགས་བྱེད་སྒྲུབ་མཆོད་ལ་སྦྱིན་སྲེག་ཚུགས། སྤྱོད་འཇུག་སྨོན་ལམ་སོགས་ཆོས་སྤྱོད་འགའ་ཚོགས་འདོན་དུ་བཙུགས། འདུ་ཁང་ཀླད་དུ་གདུགས་དཀར་རྒྱལ་མཚན་འཁོར་ལོ་གསར་བ་བཞེངས། ས་བྱི་ལོར་འདུ་ཁང་ནས་གཞི་བྱེས་ཀྱི་ཚོགས་པ་མང་ཙམ་ལ་རྗེའི་གསུང་འབུམ་གྱི་བཀླག་ལུང་ཕུལ། ལྕགས་སྟག་ལོར་རྔ་ཁོག་ཏུ་མཆོག་སྤྲུལ་རིན་པོ་ཆེ་ལ་ཁ་དར་འབུལ་བའི་མི་སྣའི་ཁྲོད་དུ་ཡང་སྟག་དགོན་གྲྭ་རིགས་མང་ཙམ་ཁྲིད། ཆུ་སྦྲུལ་ལོར་རྒྱལ་ཚབ་རྗེའི་གསུང་འབུམ་ལུང་བཏོན། ལོ་དེའི་དཔྱིད་ཀ་གྲྭ་ཚང་གི་ཐུགས་མོས་ལྟར་མི་རབས་མང་བོར་ཞིག་གསོས་ཙམ་ཡང་བྱེད་མ་ཕོད་པའི་ལྷ་མོ་ཁང་ཨར་ཆོག་བགྱིས་ཏེ་ཁ་མགོ་བ་བསྐོས་ཐོག་མཐུན་རྐྱེན་གར་དགོས་སྦྱར་ནས་ལྷ་མོ་ཁང་ཁ་ཤར་གྱན་བསྟན་གསུམ་མ་དེ་གསར་དུ་བཞེངས། ཤིང་རྟ་ལོར་ལྷ་ཁང་ལ་གསེར་ཚོན་ཕུལ། དེའི་ཕྱི་ལོར་གྱན་དབུས་མར་རྒྱལ་བ་རྡོ་རྗེ་འཆང་། གཡས་སུ་བླ་སྐུ་གསུམ་དང་སྐྱེས་བུ་གསུམ་གྱི་ཆོས་སྐྱོང་། གཡོན་དུ་ལྷ་མོ་གཙོ་འཁོར་བཅས་སྨན་འདམ་ལས་གྲུབ་པ་བྱོན་གཙང་བཞེངས་པར་གཟུངས་གཞུག་དྲིལ་སྒྲུབ་ཚད་ལྡན་བྱས། ལྷ་མོ་གཙོ་འཁོར་ལ་ཕྲན་ནས་ཆ་རྐྱེན་སྦྱར་བས་སྒོར་ཉིས་བརྒྱ་ཞེ་བདུན་སོང་ཞིང་། སྤྱིར་ལྷ་མོ་ཁང་རྟེན་དང་བརྟེན་པ་གསར་བཞེངས་ཡོངས་རྫོགས་ལ་སྒོར་ཉིས་སྟོང་བདུན་བརྒྱ་སུམ་ཅུ་ལེགས་པར་གནས་སོང་། བཞེངས་མཁན་སེང་གེ་གཤོང་ཡ་མགོའི་ཤེས་རབ་ནས་གསེར་ཚོན་འབུལ་སྐབས་ཆིབས་དྲེལ་གྱི་མིག་འབྲས་རང་བྱོན་དུ་བབས་པ་སོགས་ཤིང་བཟོ་དང་ལྷ་བཟོ་སུ་ལའང་ཡ་མཚན་པའི་རྟགས་དང་བཟོད་དཀའ་བའི་རྨི་ལམ་མང་རབས་བྱུང་བར་གླེང་། ཤིང་ལུག་ལོའི་དགུ་བའི་ཉ་ལ་རབ་གནས་རྟ་ཐོག་མའི་སློབ་དཔོན་བགྱིས་ཤིང་གཞུང་ནས་རབ་སྟོན་ཀྱང་རྒྱས་པ་བྱས། དེ་འཕྲལ་མཆོག་སྤྲུལ་རིན་པོ་ཆེ་དགུང་ལོ་བདུན་བཞེས་ཐོག་བྱ་ཁྱུང་ནས་གོང་ས་ཤར་རིན་པོ་ཆེའི་མདུན་ནས་རབ་བྱུང་བཞེས་ཤིང་དབང་བཀའ་མང་པོ་གསན་པའི་ཕྱིར་ལམ་དགོན་པར་གདན་འདྲེན་པའི་ཞུ་སྣ་བྱས་ནས་ཚོགས་མང་ལ་ཆོས་འབྲེལ་གྱི་རྟེན་འབྲེལ་སྒྲིག་པ་དང་། མེ་སྤྲེལ་ལོར་གོང་ས་ཤར་ཐམས་ཅད་མཁྱེན་པ་སྐལ་ལྡན་བློ་བཟང་འཕྲིན་ལས་ལུང་རྟོགས་རྒྱ་མཚོ་དཔལ་བཟང་པོ་གདན་དྲངས་ནས་སྐྱ་སེར་ཚོགས་པ་སྟོང་ཕྲག་གསུམ་ལྷག་ལ་ཐུགས་རྗེ་ཆེན་པོའི་དབང་གནང་ཞིང་སྟོང་འབུལ་འདེགས་པ་དང་མཎ་བཤད་ཞུ་བ་སོགས་སྐབས་ཀུན་ཏུ་ཞབས་འདེགས་ཅི་འགྱུར་བསྒྲུབས། ཁྱད་པར་དུ་སྟག་དཔོན་ཚང་དུས་ཀྱི་འཕོ་འགྱུར་དབང་གིས་ཉམས་རྒུད་བྱུང་སྐབས་རྡོ་རྗེ་དབང་ཕྱུག་ཕ་བུ་རྣམས་ནས་རབ་རྒྱལ་ཤིང་རྟ་ལོར་དཔོན་ཚང་གི་གྲྭ་ཤག་ཁོ་བོའི་སྒར་གཞི་ལ་བྱིན་པ་དང་བསྟུན། ཡུལ་བའི་མཆོད་ཁང་གི་རྟེན་རྣམས་ཞུས་ནས་ལ་ལ་གཞུང་དུ་ཕུལ། ལ་ལ་སྒར་བར་བཞུགས་སུ་བཅུག་སྟེ། སྒར་བའི་ཁྲ་མ་རྣམས་རྒན་པ་ལས་སྣེ་རིམ་ཁུར་གྱིས་སྤྲོད་ལེན་བྱེད་རྒྱུ་བྱས། ལྷ་སྡེ་ཁྲོད་དུའང་འབུམ་ཁང་བཞེངས་པ་དང་། གནམ་ལུག་མང་བོའི་སྲོག་གཅོད་ཀྱི་སྲོལ་ངན་བཅད་པ་དང་། རྟེན་བཞེངས་རེའི་བཀོད་ཁྱབ་ཀྱང་ཅི་རིགས་བྱས། མོས་པ་དང་བསྟུན་རབ་བྱུང་བསྙེན་རྫོགས་བསྙེན་ཁྲིད་སོགས་ཅི་འདོད་ལྟར་ཕོག་པ་དང་། དོན་གཉེར་ཅན་མང་དག་ཀ་རིང་དུ་ཡོང་བར་རིག་གནས་ཀྱི་དཔེ་ཁྲིད་དང་ཆོས་བཀའ་སོགས་ཀྱིས་རེ་བ་ལྟར་བསྐངས་པ་དང་། དགོན་པའི་མཆོད་རྫས་ཀྱི་བཟང་གོས་ཉོ་བ་དང་། ལྷ་མོ་ཁང་གི་གཉྫིར་བསྒྲུབས་པ་དང་། གྲྭ་ཤག་སོ་སོའི་རྟེན་བཞེངས་ལ་མཁོ་བའི་གསེར་ཚོན་ཉོ་སྒྲུབ་སོགས་རྣམ་དཀར་གྱི་ལས་བྱ་གང་བཅོལ་བསྒྲུབས་དང་སྒྲུབ་མུས་སུ་ཡོད་པ་འདི་བཞིན་ལགས་ཏེ། སྨར་ཚང་གི་རིང་ལ་རེ་ཞིག་འབྲེལ་ཆད་ནའང་ད་ལྟ་སྟག་གྲུབ་ཆེན་པའི་དུས་ཀྱི་འབྲེལ་བ་ལས་ཀྱང་ཟབ་པ་ཞིག་ཏུ་གྱུར་པ་འདི་ནི་བསྙེན་ཅིང་བསྒྲུབས་པའི་ཆོས་སྐྱོང་དེ་ཉིད་ཀྱི་འཕྲིན་ལས་ལས་བྱུང་བ་ཡིན་ནོ། །ཨེ་མ་ས་འདིའི་འགྲོ་བའི་གཙུག་གི་རྒྱན། །སྐུ་ཕྲེང་རིམ་བྱོན་ངོ་མཚར་མཛད་པའི་གཏམ། །མིག་གི་བདུད་རྩིར་བཀྲམ་པ་འདི་ལྟ་ཞིག །ཁོ་བོ་ལས་གཞན་སུ་ཡི་ངག་ནས་ཐོན། །ཁྱད་པར་རབ་བྱུང་ལོ་ཚིགས་སྔ་ཕྱི་ཡི། །དགག་གཞག་ལོ་རྒྱུས་གསལ་བྱེད་མེ་ལོང་གང་། །སྐྱེས་སྦྱངས་རིག་པའི་འཕྲུལ་ལས་མ་བཏོན་པར། །མཁས་པའི་སྤྱན་སྔར་ཇི་ལྟར་འཕྱར་དུ་རུང་། །ཕྱིས་འབྱུང་སྐལ་ལྡན་གྲྭ་སློབ་སྦྱིན་བདག་རྣམས། །ཕྱོགས་རིས་གདོན་གྱི་གྲིབ་མ་རྒྱང་བསྲིངས་ཏེ། །དམ་པའི་མཛད་པར་དག་སྣང་དད་པའི་མཚོ། །དབྱར་གྱི་དཔལ་བཞིན་འཕེལ་བའི་ཐབས་ལ་བརྩོན། །ཅེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །

དེ་ལྟར་ན་མདོ་སྨད་གྲུབ་པའི་གནས་ཆེན་རི་བོ་དན་ཏིག་ནི་གཅིག་ཏུ་བསྔགས་པར་འོས་པའི་གྲུབ་གནས་ཁྱད་པར་ཅན་ཡིན་པ་དང་། དེར་སྐྱེས་བུ་དམ་པ་སྔ་ཕྱིར་ཡང་ཡང་བྱོན་ནས་བསྟན་འགྲོར་སྨན་པའི་ལེགས་མཛད་རླབས་ཆེན་སྤེལ་བ་དང་། དེ་དང་འབྲེལ་བའི་ཁ་དྲུག་གི་དགོན་ཁག་གཞན་རྣམས་སུ་ཡང་དེ་དང་མཚུངས་པར་བསྟན་འཛིན་གྱི་སྐྱེས་བུ་རིན་བྱོན་རྣམས་ཀྱིས་བྱིན་གྱིས་བརླབས་པ་དང་། ཚེ་ཏན་སྐུ་ཞབས་རྣམ་གཉིས་ཀྱི་སྐྱེ་ཕྲེང་རིམ་བྱོན་ནམ་གནས་ཀྱི་བར་དུ། ཕྱོགས་དེའི་དགོན་ཁག་སོ་སོ། ལྷ་རྟེན་ཆོས་གསུམ། དགེ་འདུན་པའི་ཚོགས་པ། འགྲིག་ལམ་ཀུན་སྤྱོད། བསླབ་པ་སློབ་གཉེར། མཆོད་འབུལ་བསྙེན་བཀུར་སོགས་སྔར་ཡོད་མི་ཉམས་གོང་འཕེལ་དུ་འགྲོ་བཞིན་པ་སོགས་ཀྱི་ལོ་རྒྱུས་གཏམ་གྱི་ཕྲེང་བར་བསྒྲིགས་པ་འདི་ཉིད་ཕྱིས་འབྱུང་ཚུལ་འདི་ལ་མོས་པའི་རང་དང་སྐལ་མཉམ་རྣམས་ཀྱི་མིག་གི་དགའ་སྟོན་དུ་ལྕོགས་ཚོད་ཅིག་རེ་ཞིག་ཡོངས་སུ་གྲུབ་པར་བྱས་སོ། །

འདིར་སྨྲས་པ། ཡིད་ཆེས་ལུང་གི་ཆུ་བོས་བསྐྱེད་བསྲིངས་ཤིང་། །དམ་པའི་མཛད་སྤྱོད་ལོ་འདབ་སྟོང་གིས་བརྒྱན། །དོན་ལྡན་གཏམ་གྱི་འབྲས་བུ་གཡུར་ཟ་བའི། །ལྗོན་བཟང་འདི་ཀོ་བདག་གི་སྐལ་བར་གྱུར། །ཕར་ཕྱིན་དྲུག་གི་གྲངས་ལ་འགྲན་བསྡོ་བའི། །སྒར་ཁག་དྲུག་གི་ལོ་རྒྱུས་གནའ་བོའི་གཏམ། །སྐྱེ་ཕྲེང་དྲུག་པའི་མིང་འཛིན་ཁོ་བོ་ཡི། །ངག་རིག་རྐང་དྲུག་འཕུར་ལྡིང་དཔལ་ལས་ཐོན། །ཨེ་མ་མདོ་སྨད་ནོར་འཛིན་གྲྭ་གཅིག་ན། །བཤད་དང་སྒྲུབ་པའི་ཆོས་སྡེ་ཚོམ་བུའི་ཁྲོད། །དམ་པའི་བྱིན་རླབས་མཛོད་དུ་བསྐྱིལ་བའི་གནས། །འདི་དག་དུས་ཀྱི་མཐར་ཡང་བསྔགས་པའི་ཕུལ། །གང་དེར་སློབ་དཔོན་དབྱིག་གི་གཉེན་པོ་ཡིས། །མཛེས་བྱའི་ཕྱིར་ན་གཉིས་བྱུང་ཞེས་གསུངས་ལྟར། །མཁའ་ལ་ཉི་ཟླའི་དཔེ་རུ་མི་སྤོབས་ཀྱང་། །རིང་ནས་འབྲེལ་བའི་ཟམ་བག་སུ་ཡིས་གཞིག །དེ་སླད་རྗེས་འཇུག་སྐལ་བཟང་ཡོད་དོ་ཅོག །ཆེ་དང་ཆུང་བའི་ཐ་སྙད་ལ་བརྟེན་ནས། །ཕྱོགས་རིས་འབྱེད་པའི་ངན་སྤྱོད་ཡལ་བོར་ཏེ། །དག་སྣང་དགེ་སེམས་ཡར་ཟླའི་རྗེས་འགྲོར་མཛོད། །ཆོས་བཞིན་སྒྲུབ་པའི་དགེ་འདུན་འདུས་པའི་སྡེ། །ཐུགས་མཐུན་ཁྲིམས་གཙང་ཞི་དུལ་ལ་གནས་ཤིང་། །སྦྱིན་བདག་ཕོ་མོ་བགྲེས་གཞོན་དར་མའི་ཚོགས། །རིས་མེད་བདེ་སྐྱིད་དཔལ་ལ་རྟག་རོལ་ཤོག །ཕན་བདེའི་འབྱུང་གནས་རྒྱལ་བསྟན་ཉི་ལྟར་གསལ། །དེ་འཛིན་སྐྱེས་བུའི་སྐུ་ཁམས་གསེར་ལྟར་བཟང་། །ལུས་ཅན་ཕན་བདེ་རྒྱ་མཚོའི་དཔལ་ལྟར་རྒྱས། །བཀྲ་ཤིས་དགེ་མཚན་གྲུ་ཆར་ལྟར་འབབ་ཤོག །ཅེས་མདོ་སྨད་གྲུབ་པའི་གནས་ཆེན་དན་ཏིག་ཤེལ་གྱི་རི་བོ་ལེ་ལག་དང་བཅས་པའི་དཀར་ཆག་དོན་ལྡན་ངག་གི་རྒྱུད་མངས་ཞེས་བྱ་བ་འདི་ནི། དན་ཏིག་དགོན་པའི་དགེ་སྐོས་ལས་ཐོག་པ། རྣམ་དཔྱོད་མཆོག་ཏུ་ཡངས་པ་འཇིགས་མེད་དོན་གྲུབ་ནས་བཀྲ་ཤིས་པའི་ལྷ་རྫས་བཅས་འདི་འདྲ་ཞིག་དགོས་ཞེས་རྩོམ་སྐུལ་བགྱིས་ཤིང་། མྱུར་བར་པར་འགོད་ཀྱི་ཆ་རྐྱེན་སྒོར་མོ་བརྒྱ་ལྷག་སྔ་ཕྱིར་བྱིན་པ་ན། སུས་ཀྱང་ཁ་ནས་མཐོན་པའི་གཏམ་འདི་ལ་རང་ཡང་མཆོག་ཏུ་མོས་པའི་ལྷག་བསམ་གྱིས་ཉེ་བར་མཚམས་སྦྱར་ནས། དགོན་ཁག་སོ་སོར་དངོས་སླེབས་ཀྱིས་ལོ་རྒྱུས། ངག་སྒྲོས། བཅའ་ཡིག དེབ་ཡིག ཁྲ་ཡིག བཀའ་ཤོག ཐང་གའི་རྒྱབ་བྱང་ཚུན་ཆད་རྩར་བཅད་ནས་སྔ་ཕྱིར་ས་བོན་བསགས་ཤིང་། གཞན་ཡང་དམ་པ་གོང་མ་ཚོའི་རྣམ་ཐར་དག་ལས་ཀྱང་གང་རྙེད་ཕྱོགས་གཅིག་ཏུ་བསྒྲིགས་ཏེ། སྐྱེ་བོ་ཁྲི་ཕྲག་ཉི་ཤུ་རྩ་གཉིས་འདུ་བའི་ལྗོངས་ཆེན། ཆབ་སྲིད་རིག་གནས་དཔལ་འབྱོར་འཛུགས་སྐྲུན་རྒྱ་མཚོའི་རླབས་ལྟར་འགྱུར་བའི་གྲོང་ཁྱེར། མཚོ་སྔོན་ཞིང་ཆེན་གྱི་ཡུལ་དབུས་ཟི་ལིང་གི་གར་འདུག་ལྔ་རིག་ཆོས་ཀྱི་གུར་ཁང་དུ། ལོ་རྒྱུས་སྨྲ་བའི་མགྲིན་ཕུག་ཅུང་ཟད་ཡངས་པ། ཤཱཀྱའི་སྡེ་སྣོད་འཛིན་པར་ཁས་འཆེ་བ༧ཚེ་ཏན་ཞབས་དྲུང་འཇིགས་མེད་རིགས་པའི་བློ་གྲོས་སམ། མིང་གཞན་ངག་དབང་དབྱངས་ལྡན་རིག་པའི་འདོད་འཇོ་ཞེས་འབོད་པས་རང་ལོ་ཞེ་བདུན་པ་རབ་རྒྱལ་མེ་སྤྲེལ་ལོའི་ཧོར་ཟླ་བརྒྱད་པའི་ཡར་ཚེས་ནས་མགོ་བརྩམས། དགུ་བའི་ཚེས་བཅུ་གསུམ་གྱི་སྔ་དྲོའི་ཆར་རྫོགས་པར་བྲིས་ཤིང་མཇུག་གྲུབ་པར་བྱས་པ་སྟེ། དགེ་བས་མཉམ་མེད་བུ་རམ་ཤིང་བའི་རང་བསྟན་བསྐལ་བའི་སྲིད་དུ་དར་ཞིང་རྒྱས་པར་གྱུར་ཅིག དཀར་ཆག་འདི་བརྩམས་པའི་རྗེས་སུ་མཐུ་དགོན་དུ་པར་དུ་བཀོད་ནའང་དཔེ་རྒྱུན་འཕེལ་ལོང་མ་བྱུང་བའི་རྐྱེན་གྱིས་ལོ་མང་རབས་ཤིག་ལ་རང་གི་མིག་ལམ་དུ་སྣང་བར་མ་གྱུར་བ་དང་། ཕྱིས་སུ་སློབ་བུ་རྣམ་དཔྱོད་ཡངས་པ་རྫོང་ནང་ཚེ་རིང་རྡོ་རྗེས་བུ་བཤུས་བགྱིས་པའི་དཔེ་གཅིག་པུ་ཙམ་ལས་མིག་གི་སྤྱོད་ཡུལ་དུ་གྱུར་པ་གཞན་མ་མཆིས་པ་དང་། བུ་བཤུས་ཀྱི་དཔེ་དེར་དན་ཏིག་ཕྱོགས་ཀྱི་རྒན་པོའི་ངག་སྒྲོས་རྩ་འགངས་ཆེ་བ་འགའ་ཞིག་སྣོན་པའི་ས་བོན་གྱི་རམ་འདེགས་བྱས་ཡོད་པ་དང་། རང་ཡང་ལོ་ན་བགྲེས་པ་དང་མཉམ་དུ་བློ་གྲོས་ཀྱི་འཕེལ་ཁ་སྔར་ལས་རྒྱས་པར་གྱུར་པ་གང་ཅིས་རང་ལོ་རེ་བརྒྱད་པ་མེ་སྦྲུལ་ལོར་བུ་བཤུས་ཀྱི་དཔེ་དེ་ལ་ནོར་བ་བཅོས་པ་དང་། གསར་བ་སྣོན་པ་སོགས་ཞུས་དག་གང་དགོས་ཞིབ་ཐོན་ཁུལ་གྱིས་ཡང་དག་པར་གཏན་ལ་ཕབ་པའོ། །བསྟན་པ་ལ་ཉམས་འགྲིབ་ཆེན་པོ་བྱུང་དུས་སྔོ་ཁོས་བརྩམས་པའི་དཀར་ཆག་ཀྱང་ས་ཡལ་རྡུལ་འཁུར་དུ་སོང་ཙ་ན། ད་ཕན་དཀར་ཆག་འདི་ནི་ཡུལ་དུས་ལ་དཔགས་པས་ས་སྟེང་གི་རིན་པོ་ཆེའི་གྲས་སུ་ཆུད་པ་ལགས་ཏེ་དཔེ་རྒྱུན་ནམ་ཡང་མི་ཉམས་པའི་ཐབས་ལ་རྗེས་སུ་འཇུག་པ་རྣམས་ཀྱིས་ཅི་ནས་ཀྱང་བརྩོན་པ་བརྒྱ་ཕྲག་ཏུ་བསྟེན་པར་མཛོད་ཅིག །

ཨོཾ་སྭ་སྟི་སིངྔྷཾ། སྐུ་མཆོག་རབ་མཛེས་ནོར་བུའི་རྒྱན་ཆ་མ་ཡིན་མཚན་དང་དཔེ་བྱད་དེ། །གསུང་ངག་རབ་སྙན་དྲི་ཟའི་རྒྱུད་མངས་མ་ཡིན་ཡན་ལག་དྲུག་ཅུའི་དབྱངས། །ཐུགས་གསང་མན་ཤེལ་དྭངས་པའི་མེ་ལོང་མ་ཡིན་ཇི་ལྟ་ཇི་སྙེད་མཁྱེན། །བདེ་གཤེགས་གཞན་ལས་སྙིང་སྟོབས་ཆེ་བར་རབ་བསྔགས་ཤཱཀྱའི་དབང་བོ་མཆོད། །འདི་ན་སྔོན་མེད་གཏམ་བཟང་ཟློས་གར་ལས། །ཐོན་པའི་དཀར་ཆག་དོན་ལྡན་ངག་གི་རྒྱུད། །འཕྲིན་ལས་རབ་དཀར་ཉི་ཟླའི་མཆེད་གྱུར་པས། །གནས་དེའི་མཁའ་དབྱིངས་སྲིད་པའི་མཐར་ཡང་གསལ། །ལན་གཅིག་མ་ཡིན་སླར་ཡང་བརྐོས་པའི་འཕྲུལ། །དོན་གཉེར་ལྡན་པའི་སྐལ་བཟང་མིག་གི་དཔྱིད། །ལང་ཚོ་དར་བའི་རྐྱེན་དུ་ཤར་བ་ན། །ཡ་མཚན་རིག་སྔགས་བཟླས་པས་རོ་འཛིན་ངལ། །གཏམ་འདིའི་བྱེད་པོ་ན་ཚོད་མཐར་ཕྱིན་ཀྱང་། །བློ་མིག་མི་གསལ་མཐའ་རུ་མ་གཏུགས་པས། །དབྲི་སྣོན་ཚོན་རིས་གསར་བས་སྤུད་པ་གང་། །སྔར་ལས་མཛེས་པའི་ལང་ཚོ་ཅན་དུ་སྙེམས། །དེ་ཚེ་བཟང་པོའི་བག་ཆགས་ནོར་གྱིས་གཏམས། །གཏོང་ཕོད་འབྱོར་བའི་དཔལ་དང་ལྡན་རྣམས་ཀྱིས། །ཕྱི་ཐག་རིང་བོར་འདི་ཡི་འཕྲིན་ལས་རྒྱུན། །ཇི་ལྟར་འབྱུང་བའི་ཐབས་ལ་ཡང་ཡང་གཞིགས། །བགྲོས་པ་མ་ཡིན་བསམ་པའི་འཁྱེར་སོ་མཐུན། །བསྐུལ་བ་མ་ཡིན་འདུན་མ་གཅིག་ཏུ་བབས། །ཕྲོགས་པ་མ་ཡིན་ཕུལ་བའི་རྫས་དག་གིས། །དོན་མེད་མ་ཡིན་འཕྲུལ་ལྡན་པར་དུ་བཀོད། །དེ་ལྟའི་རབ་དཀར་དགེ་ཚོགས་བསགས་པའི་མཐུས། །འབྲེལ་ཐོགས་སྐྱེ་བའི་ཕྲེང་བར་རྟེན་བཟང་ཐོབ། །ཐེག་པ་མཆོག་གི་ས་མཁན་ཞབས་ཀྱི་རྡུལ། །གཙུག་ཏུ་མཆོད་པའི་སྐལ་ལྡན་ཉིད་གྱུར་ཅིག །ལྷོ་ཕྱོགས་མཚུན་ལྟས་མགྲོན་དུ་མ་བོས་པ། །དེ་སྲིད་བདག་དང་ལྟོས་བཅས་སྐྱེ་འགྲོ་ཀུན། །ཡིད་བཞིན་ནོར་འདྲའི་རྟེན་འདི་དགེ་ཕྱོགས་སུ། །རྣམ་ཀུན་བཀོལ་བའི་སྤྱོད་བཟང་ཉམས་མེད་ཤོག །མདོར་ན་གྲུབ་པའི་གནས་མཆོག་འདི་ཉིད་ཀྱི། །ལེ་ལག་ཆོས་སྡེ་ཆེ་ཆུང་གང་དུ་ཡང་། །བསྟན་འགྲོར་སྨན་པའི་ལེགས་མཛད་ཤ་སྟག་གིས། །མ་གྱུར་འགྲོ་རྣམས་གཏན་བདེར་འགོད་ནུས་ཤོག །ཅེས་གྲུབ་པའི་གནས་མཆོག་དན་ཏིག་གི་དཀར་ཆག་འདི་ཉིད་ཡང་བསྐྱར་པར་དུ་འགོད་སྐབས། ཀ་ཐུང་རི་ཁྲོད་པ་འཇིགས་མེད་རྒྱ་མཚོས་སྒོར་བརྒྱ། མཐུ་དགོན་པ་འཇིགས་མེད་ཏིང་འཛིན་གྱིས་སྒོར་བཞི་བརྒྱ་དང་ཉི་ཤུ། རྒྱ་ཞུར་ཚེ་ཐར་དོན་གྲུབ་ཀྱིས་སྒོར་བརྒྱ། རྫོང་ནང་ཚེ་རིང་རྡོ་རྗེས་སྒོར་བརྒྱ། འདན་མའི་པདྨ་དོན་གྲུབ་ཀྱིས་སྒོར་ལྔ་བཅུ། འདན་མའི་བསོད་ནམས་ཚེ་རིང་གིས་སྒོར་ལྔ་བརྒྱ་བཅས་ཕུལ་བའི་མཐུན་རྐྱེན་ཕུན་སུམ་ཚོགས་པ་ལ་བརྟེན་ནས་རབ་བྱུང་བཅུ་དྲུག་པའི་རྔ་ཆེན་ཞེས་པ་ཆུ་ཕོ་ཁྱི་ཡི་ལོར་སྤྱི་ལོ༡༩༨༡ལོར་པར་དུ་བརྐོས་པའི་སྨོན་ཚིག་འདི་ནི། ཞབས་དྲུང་སྤྲུལ་མིང་འཛིན་པ་རྒན་པོ་འཇིགས་མེད་རིགས་པའི་བློ་གྲོས་ཀྱིས་གང་དྲན་ཐོལ་བྱུང་དུ་སྨྲས་པ་དོན་ཡོད་པར་གྱུར་ཅིག །

སྭ་སྟི། མདོ་སྨད་དན་ཏིག་ཉེ་འཁོར་མཐུ་བ་དགོན། །བཀྲ་ཤིས་ཆོས་སྡེར་པར་དུ་བསྐྲུན་པའི་མཐུས། །བླ་མའི་ཞབས་བརྟན་རྒྱལ་ཁའི་ལུགས་བཟང་རྒྱས། །འབྲེལ་ཐོགས་ཀུན་ཀྱང་ཤམྦྷ་ལར་སྐྱེ་ཤོག །སརྦ་མངྒལཾ།

མཆན། ༡.གནས་ཡིག་འདི་ཚེ་ཏན་ཞབས་དྲུང་ངམ་རྗེ་འཇིགས་མེད་རིགས་པའི་བློ་གྲོས་ཀྱིས་མཛད་པའི་མདོ་སྨད་གྲུབ་པའི་གནས་ཆེན་དན་ཏིག་ཤེལ་གྱི་རི་བོ་ལེ་ལག་དང་བཅས་པའི་དཀར་ཆག་དོན་ལྡན་ངག་གི་རྒྱུད་མངས་ཞེས་པ་མཐུ་བ་དགོན་གྱི་སྣ་རིང་པར་མ་ལས་ཞལ་བཤུས་པའོ། །

༢.གནས་འདི་ནི་མདོ་སྨད་བ་ཡན་རྫོང་གི་ཤར་ནུབ་ཀྱི་སྤྱི་ལེ་སུམ་ཅུ་ལྷག་གི་མཚམས་སུ་གནས་ཏེ། ད་ལྟའི་བ་ཡན་རྫོང་གསེར་གཞུང་ཞང་གི་མངའ་ཁོངས་ལ་གཏོགས་ཤིང་། རྨ་ཆུ་བྱང་འགྲམ་གྱི་བྲག་རི་གཡང་གཟར་བརྗིད་ཆགས་ལྟ་ན་སྡུག་པའི་དབུས་སུ་བཞུགས།

༄༅། །ཐུགས་ཀྱི་སྐུ་ཡི་གནས་མཆོག་བསྟན་པ་ནི༔ བོད་ཀྱི་མདོ་སྨད་མི་ཉག་ཅེས་བྱ་རུ༔ ལྷ་རྩེ་ཞེས་བྱ་དུང་སེང་གནམ་མཆོངས་འདྲ༔ ཤར་ལྷོའི་ཤུ་ཡི་ལུང་པའི་སྐེད་པ་རུ༔ བྲག་རི་རིན་ཆེན་སྤུངས་པ་འདྲ་བ་རུ༔ པད་འབྱུང་ཟླ་གསུམ་སྒྲུབ་པའི་ཕུག་པ་ནི༔ ཟླུམ་འཁྱིལ་ཆོས་དུང་དཀར་པོའི་དབྱིབས་ཅན་ནང༔ ཨ་ཏི་ཞི་ཁྲོའི་ལྷ་ཚོགས་སྐུ་ཡང་གསལ༔ གཡས་ཀྱི་ལུང་པའི་བྲག་རི་ཐམས་ཅད་ལ༔ ཉེ་སྲས་བརྒྱད་དང་རྟ་ཕག་ཡབ་ཡུམ་བཞུགས༔ ནང་དུ་རིན་ཆེན་གཟི་ལས་གྲུབ་པ་ཡི༔ ཆོས་སྐུའི་མཆོད་རྟེན་མདའ་རྒྱངས་གང་ཙམ་སྦས༔ ལྷ་སྲས་ཐུགས་དམ་རྒྱལ་བཀའ་འགྱུར་ཚད་སྦས༔ རྒྱལ་གཏེར་འཕྲུལ་གཏེར་ནོར་གཏེར་དུ་མ་སྦས༔

༄༅། །ཐུགས་ཀྱི་སྐུའི་གནས་མི་ཉག་བཞག་ར་ལྷ་རྩེ་ཡོངས་གྲགས། གྲུབ་ཆེན་ཐང་སྟོང་རྒྱལ་པོ་དང་ཕྱིས་སུ་འབྲི་གུང་ཆོས་གྲགས་བྱོན་ཅིང་གནས་ཡིག་ཀྱང་ཡོད་འདུག

༄༅། །གཏོར་བསྔོ་རྒྱས་པ་དང་འབྲེལ་བའི་དགེ་བསྙེན་བཞག་བྲག་ལ་གཏོར་མ་འབུལ་ན། ཨོཾ་ཨཱཿཧཱུཾ་ཧ་ཧོ་ཧྲཱིཿཡིས་བྱིན་རླབས་དྲན་པར་བྱས་ལ། མདུན་གྱི་ནམ་མཁར་འཇའ་སྤྲིན་སྣ་ཚོགས་གུར་ཁང་གི་དབུས་སུ་དགེ་བསྙེན་ཆེན་པོ་བཞག་བྲག་སྐུ་མདོག་དཀར་པོ་ཆིབས་སུ་ལྷ་གཡག་དཀར་པོ་ལ་བཅིབས་པ། ཕྱག་གཡས་ན་ཡིད་བཞིན་གྱི་ནོར་བུ་དང་། གཡོན་པས་མདུང་དར་དཀར་པོ་འཛིན་པ། དབུ་ལ་དར་གྱི་ལ་ཐོད་དང་རིན་པོ་ཆེའི་སྲོག་ཞུ་བསྣམས་པ། སྐུ་ལ་ཟ་འོག་གི་བེར་དང་རིན་པོ་ཆེའི་རྒྱན་གྱིས་བརྒྱན་པ། ཞི་བ་དང་འཛུམ་པའི་ཉམས་དང་ལྡན་ཞིང་འོད་དང་འོད་ཟེར་སྣ་ཚོགས་འཕྲོ་བ། དེའི་མཐའ་བསྐོར་དུ་ཡུམ་ཆེན་ལྷ་མོ་བཞི། ཕྱི་འཁོར་ནང་འཁོར་སྤྲུལ་པ་ཡང་སྤྲུལ་བསམ་གྱིས་མི་ཁྱབ་པས་བསྐོར་བར་བསམ། དེ་ནས་རང་གི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་མདོ་ཁམས་ཤར་ཕྱོགས་མི་ཉག་རབ་སྒང་གི་བསིལ་ལྡན་གངས་ཀྱི་རི་བོ་ནས་དགེ་བསྙེན་ཆེན་པོ་བཞག་བྲག་འཁོར་དང་བཅས་པ་ཨོཾ་བཛྲ་ས་མཱ་ཛཿ ཞེས་སྐད་ཅིག་གིས་ཡེ་ཤེས་པ་རྣམས་མངོན་སུམ་དུ་མདུན་གྱི་ནམ་མཁར་སྤྱན་དྲངས། ཛཿཧཱུཾ་བཾ་ཧོཿ ཞེས་པས་དམ་ཚིག་པ་རང་དང་དབྱེར་མེད་དུ་བསྟིམ། དེ་ནས་གཏོར་མ་འབུལ་བ་ནི་པད་བསྐོར་སྔོན་དུ་འགྲོ་བའི་སྒོ་ནས། ཨོཾ་བྷུ་མི་པ་ཏེ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ཀྱི་ལན་གསུམ་མམ་བདུན་གྱིས་ཕུལ་བའི་མཐར། ཨོཾ་ཨརྒྷཾ། ཤབྟ་ཨཱཿཧཱུཾ་གི་ཕྱི་མཆོད་དང་། ཨོཾ་བྷུ་མི་པ་ཏེ་ས་པ་རི་ཝཱ་ར་ཨོཾ་ཨཱཿཧཱུཾ་གིས་ནང་མཆོད་འབུལ་ཞིང་། སྤྲོ་ན་འདོད་དོན་གསོལ་གདབ་བྱ། མེད་ཀྱང་རུང་། བསྟོད་པ་ནི། ཧཱུཾ་མཚོ་སྐྱེས་རྡོ་རྗེ་བཻ་རོ་ཙ་ན་དང་། །རྩ་རྒྱུད་དཔལ་ལྡན་བླ་མའི་སྤྱན་སྔ་རུ། །བསྟན་དང་དེ་འཛིན་སྐྱོང་བ་ཞལ་བཞེས་པའི། །ལྷ་ཆེན་བཞག་བྲག་འཁོར་དང་བཅས་ལ་བསྟོད། །འཕྲིན་ལས་བཅོལ་བ་ནི། རྒྱ་ཆེན་མཆོད་སྦྱིན་གཏོར་མ་འདི་བཞེས་ལ། །བདག་ཅག་དཔོན་སློབ་འཁོར་དང་བཅས་པ་རྣམས། །བསམ་དོན་ཐམས་ཅད་ཡིད་བཞིན་འགྲུབ་པ་དང་། །འཕྲིན་ལས་རྣམ་བཞིའི་དངོས་གྲུབ་རྒྱ་ཆེན་སྩོལ། །ཞེས་པ་འདི་ཡང་དོན་གཉེར་དགེ་བཤེས་བསོད་ནམས་ལྷུན་གྲུབ་པས་བསྐུལ་བའི་ངོར། ཤཱཀྱའི་དགེ་སློང་ཡོངས་འཛིན་པཎྜིཏ་དཔལ་ལྡན་ཆོས་ཀྱི་རྒྱལ་མཚན་གྱིས་སྦྱར་བའོ། །

ཧཱུྃ། གཉན་གྱི་གཙོ་བོ་བཞག་བྲག་ལྷ་རྩེ་ནི། །གངས་རི་དཔལ་གྱི་གཟི་མདངས་ཆེ། །རྩ་བ་ཀླུ་ཡི་གནས་སུ་ཟུག །བར་སྐབས་ལོག་འདྲེན་ཟིལ་གྱིས་གནོན། །རྩེ་མོ་ཚངས་པའི་ཞིང་ས་རྙོག །ཞལ་དཀར་གངས་རི་འཚེར་བ་ལ། །གནས་པའི་དགེ་བསྙེན་ཆེན་པོ་ནི། །སྤྱན་འདྲེན་མཆོད་པའི་གནས་འདིར་གཤེགས། །ཡུལ་ས་རྒྱལ་པོ་བཞག་བྲག་ཁྱེད། །སྔོན་ཚེ་སློབ་དཔོན་བཻ་རོ་སོགས། །རྩ་རྒྱུད་བླ་མའི་དམ་དགོངས་ལ། །འདོད་ཡོན་གཏོར་མ་བཞེས་ཕྱིར་གཤེགས། །རྣལ་འབྱོར་རྒྱུ་སྦྱོར་ཡོན་བདག་གིས། །དད་ཅིང་བརྩེ་བས་སྤྱན་འདྲེན་ནས། །བསང་མཆོད་སྣ་ཚོགས་བཞེས་སླད་དུ། །དམ་དགོངས་ཕྲིན་ལས་བསྒྲུབ་ཕྱིར་གཤེགས། །བྷྲུྃམ་ལས་སྐྱེས་པའི་སྣོད་ནང་དུ། །རྩི་ཤིང་དྲི་ཞིམ་སྣ་ཚོགས་དང་། །སྤོས་དང་དྲི་བཟང་སྨན་སྣ་དང་། །རིན་ཆེན་ལྔ་དང་དར་སྣ་ཚོགས། །ཕྱེ་མར་འོས་ཀུན་ཤུ་ཚིལ་སོགས། །འབྱུང་བ་མེ་ལ་དྲི་བཟང་ཐུལ། །གཡུ་ཤུག་དུད་པས་མཆོད་སྤྲིན་གྱིས། །གཉན་ཆེན་བཞག་བྲག་ལྷ་རྩེ་བསངས། །ཞི་རྒྱས་དབང་དྲག་ལྷ་ཚོགས་བསངས། །དགྲ་ལྷ་བཅུ་གསུམ་དམག་ཚོགས་བསངས། །ཀླུ་བཙན་མཆེད་བཞི་དམག་བསངས། །དགེ་བསྙེན་སུམ་བརྒྱ་དྲུག་ཅུ་བསངས། །སྲས་ཀྱིས་གྲོལ་ཕུག་བདུན་རྣམས་བསངས། །སྲིང་མོ་ལྕམ་མོ་བདུན་རྣམས་བསངས། །ཡུམ་ཆེན་ཀླུ་མོ་མཆེད་བཞི་བསངས། །བཞག་དམར་ལྷ་མོ་ཤ་གཞོན་བསངས། །ལྷ་དམག་འབུམ་སྡེའི་ཚོགས་རྣམས་བསངས། །ཀླུ་དམག་འབུམ་སྡེའི་ཚོགས་རྣམས་བསངས། །གཉན་དམག་འབུམ་སྡེའི་ཚོགས་རྣམས་བསངས། །བཙན་དམག་འབུམ་སྡེའི་ཚོགས་རྣམས་བསངས། །འཁོར་དང་བཅས་པ་ཐམས་ཅད་བསངས། །ཅི་བསམ་འབད་མེད་ལྷུན་གྲུབ་མཛོད། །བསམ་དོན་ཆོས་བཞིན་འགྲུབ་པར་མཛོད། །ཡིད་ལ་འདོད་པ་ཀུན་འགྲུབ་མཛོད། །ཀྱེེ་ཡུལ་ལྷའི་རྒྱལ་པོ་རྫུ་འཕྲུལ་ཅན། །བཞག་བྲག་ལྷ་རྩེ་མཐུ་བོ་ཆེ། །དུང་གིས་མི་ཕོ་དཀར་པོ་ནི། །ཤེལ་རི་དཀར་པོའི་ནང་ཤེད་ན། །རིན་པོ་ཆེ་ཡི་མཁར་ནང་དུ། །རིན་ཆེན་སྣ་ལྔའི་ཁྲི་ལ་བཞུགས། །ཟ་འོག་གུར་ཆེན་ནང་ནས་བཞུགས། །དབུ་ལ་གཡུ་ཡི་ཞྭ་མོ་གསོལ། །ཞབས་ལ་གསེར་གྱི་ཆག་འུ་མནབས། །ཕྱག་གཉིས་བདུད་རྩི་བུམ་པ་བསྣམས། །བདག་ཅག་ཚེ་སྲོག་བསྲུང་དུ་གསོལ། །བསྒྲུབ་པ་པོ་ལ་རྒྱབ་རྟེན་མཛོད། །བཞག་བྲག་ལྷ་རྩེ་འཁོར་བཅས་བསངས། །བསམ་པའི་དོན་རྣམས་འགྲུབ་པར་མཛོད། །ཅེས་སོ། །

༄༅། །བཤད་སྲོལ་དུ། སྤྱིར་བཞག་བྲ་ཟེར་དོན་ནི་ཨ་མྱེ་རྨ་ཆེན་ཡུལ་འདིར་ཕེབས་སྐབས་མི་ཉག་ཕྱོགས་ཀྱི་གཞི་བདག་ཚོས་ཁྱེད་ཀྱི་བུ་འདི། ཡུལ་འདིར་རྟེན་སྐལ་དུ་བཞག་ན་བཞག་བྲ་དང་མི་བྲ་ཞེས་ཞུ་བ་ཕུལ་སྐབས་རྨ་རྒྱལ་སྦོམ་རས་ངའི་བུ་འདི་བཞག་བྲ་ཞེས་མིང་བཏགས་སོ། །

གནས་རི་འདིའི་བདག་པོ་ནི་མི་དཀར་རྟ་དཀར་གཞོན་ནུའི་ཆ་བྱད་ཅན་ཞིག་ཡིན། གནས་རི་འདི་ཤམ་བྷ་ལ་གཉིས་པ་ཞེས་ཤིན་ཏུ་གནས་རྩ་ཆེན་ཞིག་ཡིན་པ་སྔོན་མའི་གནས་ཡིག་རྙིང་པའི་ནང་དུ་གསལ་ལོ། །

མིང་གི་རྣམ་གྲངས་ནི། ཤར་སྟོད་བཞག་བྲ། བཞག་བྲ་ལྷ་རྩེ། མི་ཉག་བཞག་བྲ་དཀར་པོ། ཤམ་བྷ་ལ་གཉིས་པ། བསྟན་སྲུང་བཞག་བྲ་ལྷ་རྩེ། ཤར་སྟོད་ཀྱི་དུང་རི་དཀར་པོ།

གནས་འདིའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་གནས་ནི། སྐུ་ཡི་གནས་རི་མི་ཉག་འབོ་གངས་དཀར། གསུང་གི་གནས་རི་བཞག་མོ་སྨན་བཙུན་གཞོན་ནུ། ཐུགས་ཀྱི་གནས་གནས་མཆོག་དཔལ་ལྷ་སྒང་། ཡོན་ཏན་གྱི་གནས་ཕག་མོ་རི། འཕྲིན་ལས་ཀྱི་གནས་གསེར་རྒྱ་སྒོ་བཅས་སོ། །

གནས་རིའི་རྩ་བའི་ཚ་ཆུ་རྣམས་ནི། བེ་རོ་ཚ་ཆུ། ཕོ་ལོག་ཚ་ཆུ། བརྒྱ་ཤོང་ཚ་ཆུ། མཁལ་མའི་ཚ་ཆུ། གཟེར་འཇོམས་ཚ་ཆུ། ཀུན་ཕན་ཚ་ཆུ་སོགས་ཚ་མིག་དྲུག་བདུན་ཙམ་ཡོད་པ་དེ་ནད་རིགས་ཀུན་ལ་ཕན་ནོ། །

རི་བོ་ནི། གནས་རི། རྫ་རི། བྲག་རི། གངས་རི། ནགས་རི། སྤང་རི། གཡའ་རི། གཏེར་རི་སོགས་ཡོད། ཆུའི་སྐོར་ལ། རང་བྱུས་གཏེར་ཆུ། ཆུ་མིག །སྨན་ཆུ། རྫ་ཆུ། གངས་ཆུ། ཚེ་ཆུ། འབབ་ཆུ། གླང་ཆུ་བཅས་སོ། །

གནས་ཆེན་འདིའི་ཁྱད་ཆོས་ནི། སྐར་བཟང་དུས་བཟང་ལ་ནམ་རྒྱུན་རང་བྱུང་གི་བསང་གཏོང་བ་ཀུན་གྱིས་རྒྱུན་དུ་མཐོང་རྒྱུ་ཡོད། ཡུལ་དེར་སྦས་ཡུལ་ཁེ་མཚར་ཞིག་ཡོད་པ་མི་འགས་མཐོང་མྱོང་། ས་བཅུ་ཐོབ་པའི་སེམས་དཔའ་ཆེན་པོ་ཞིག་ཡིན། གནས་རི་འདི་ལ་གཞི་བདག་ལྟ་བུ་བྱས་ནས་བསང་བཏང་ན་ཆོག་ཀྱང་བསང་གཙང་མ་གཏོང་དགོས།

གནས་འདི་ལ་འབྲེལ་བའི་ཕན་ཡོན་ནི། ཚེ་འདི་ལ་རྐྱེན་ངན་བར་ཆད་སེལ་བ་དང་ལས་ངན་གྱི་སྡིག་སྒྲིབ་དག་ནས་ཁ་རྗེ་རླུང་རྟ་དར་ཞིང་། ཕྱི་མ་ཐར་བའི་ལམ་སྣ་ཟིན་པའི་དགོས་པ་ཁྱད་པར་ཅན་འབྱུང་ངོ་། །

གནས་འདིའི་ཡུལ་ལྷ་འགའི་མིང་ནི། ནོར་ལྷ་གཏེར་བདག་ལབ་རྩེ། ཟུར་གསུམ། བཞག་མོ། མི་ཉག་གདུང་ར་དཀར་མོ། དར་མདོའི་བཞག་བྲའི་བསང་ཁྲི། ལྷ་སྒང་གི་སྒྲོལ་མ་རི་སོགས་ནི་གཞི་བདག་འདིའི་ཚབ་བྱེད་ཆོག་པའི་བསང་མཆོད་བྱེད་ས་ཁྱད་པར་ཅན་ཡིན་པར་གསུངས་སོ། །

མཆན། ༡.གོང་གི་གནས་ཡིག་བསྡུས་པ་ནི་འབའ་ལྷ་ཁང་དགོན་པའི་གསང་ཡིག་འདོན་སྤྲོད་གནང་བ་ལས་ཞལ་བཤུས་པ་ཡིན་ལ། གནས་ཡིག་འདི་གྲུབ་ཆེན་ཐང་སྟོང་རྒྱལ་པོ་དང་འབྲི་གུང་ཆོས་གྲགས་རྣམས་ཀྱིས་ཡོད་པར་གསུང་ཡང་། ཡིད་ཕངས་པ་ཞིག་ལ་དགོན་སྡེ་དང་ཡུལ་མི་རྣམས་ལ་འདྲི་རྩད་བྱས་ཀྱང་གནས་ཡིག་ལག་སོན་མ་བྱུང་། རྗེས་སུ་གནས་ཡིག་ཁ་གསབ་བྱེད་སྐབས་འཚོལ་བསྡུ་བྱེད་རྒྱུར་བཀའ་དྲིན་ཞུ། བཀྲ་ཤིས།

༢.གནས་འདི་ནི་དཀར་མཛེས་ཁུལ་ལྷ་སྒང་གྲོང་ཚོའི་ཕྱོགས་སུ་ཡོད།

༄༅། །ཐུགས་ཀྱི་གསུང་གི་གནས་མཆོག་བསྟན་པ་ནི༔ བོད་ཀྱི་མདོ་ཁམས་མཚམས་ཞེས་བྱ་བ་རུ༔ ཝར་ཏིའི་བྲག་རི་ལྗོན་ཤིང་སྐྱེས་པ་འདྲ༔ འབྲས་བུའི་ཚུལ་དུ་སྒྲུབ་ཕུག་བཅོ་བརྒྱད་ཡོད༔ ཀུན་ཏུ་པད་འབྱུང་བདག་གིས་ཞག་གསུམ་བསྒྲུབས༔ བཅུ་གསུམ་ནང་དུ་གྲུབ་ཆུ་བདུད་རྩི་ཡོད༔ ཀུན་ལ་སྟོན་པ་ཉེ་སྲས་བརྒྱད་ཀྱི་སྐུ༔ ཕྱི་རུ་མཆོད་ལྷ་བཅུ་དྲུག་སྒྲོལ་དཀར་ལྗང༔ ལྷ་ཚོགས་སུམ་ཅུ་སོ་བརྒྱད་སྐུ་ཡང་གསལ༔ མན་ངག་གཏེར་ཆེན་གཏེར་ཆུང་བཅུ་གསུམ་སྦས༔

༄༅། །ཐུགས་ཀྱི་གསུང་གི་གནས་ཝར་ཏིའི་བྲག་དཀྲིག་ཆ་མ་ངེས། མཚམས་ཞེས་པའི་ས་ཆ་ལ་དཔྱད་ན་བྲག་ཡབ་སྨད་མཚམས་ཀྱི་ཡི་གེ་དྲུག་མ་ཡོད་པའི་ཕྱོགས་དེར་བཞུགས་པ་ཡིན་ནམ།

མཆན། གནས་འདི་ནི་ཨོ་རྒྱན་རིན་པོ་ཆེའི་མདོ་བྱང་ཙམ་ལས་ཀོང་སྤྲུལ་ཡོན་ཏན་རྒྱ་མཚོས་ཀྱང་ཕྱོགས་མཚོན་ཙམ་དང་སླར་དཔྱད་ཀྱི་སྐུལ་མ་ལས་ཁ་ཚོན་བཅད་མི་འདུག་ལ། ཁོ་བོ་དག་ཀྱང་ས་ཁུལ་དེ་དག་ཏུ་ཐེངས་འགའ་ཤས་ཕྱིན་ཏེ་ས་གནས་དེ་གའི་དགོན་སྡེ་དང་མང་ཚོགས། སྲིད་གཞུང་སོགས་ལ་འབྲེལ་འདྲིས་ཀྱིས་འདྲི་རྩད་ཡང་ཡང་བྱས་ཀྱང་ཡིད་ཕངས་པ་ཞིག་ལ་གནས་ཡིག་ལག་སོན་བྱུང་རྒྱུ་ལྟ་ཞོག གནས་ངོས་ཟིན་མཁན་ཙམ་ཡང་དཀོན་པས་རང་སོར་དུ་བཞག་པ་ལས་འོས་མ་མཆིས་སོ། །

༄༅། །ཐུགས་ཀྱི་ཐུགས་གནས་བསྟན་པ་ནི༔ སོག་བོད་མཚམས་ཀྱི་རྨ་སྨད་རྡོ་རྗེའི་བྲག༔ ལྟེ་བའི་ཆ་ལ་ཨོ་རྒྱན་སྒྲུབ་པའི་གནས༔ པདྨ་ཁ་བྱེ་འདྲ་བའི་ནང་རྣམས་སུ༔ རྫོགས་ཆེན་སྟོན་པ་བཅུ་གཉིས་སྐུ་ཡང་གསལ༔ བྲག་གི་རྩ་བ་རྡོ་རྗེ་བརྒྱད་བསླངས་འདྲ༔ རེ་རེའི་ངོས་སུ་ཉེ་སྲས་བརྒྱད་རྣམས་དང༔ རྩ་བ་རེ་ལ་བྲག་ཕུག་ཟླུམ་འཁྱིལ་ལ༔ པད་འབྱུང་སྤྲུལ་པ་བརྒྱད་དེ་མཚན་བརྒྱད་གནས༔ དེ་རུ་ཟབ་པའི་གཏེར་ཁ་དགུ་ཙམ་སྦས༔

༄༅། །ཐུགས་ཀྱི་ཐུགས་གནས་རྨ་སྨད་རྡོ་རྗེའི་བྲག་ཡོངས་གྲགས་གྲུབ་ཆེན་ཐང་སྟོང་རྒྱལ་པོ་དང་ཕྱིས་སུ་འབྲི་གུང་ཆོས་གྲགས་བྱོན་ཞིང་གནས་ཡིག་ཀྱང་ཡོད་འདུག

༄༅། །འདིར་ཕྱི་དར་བསྟན་པའི་སྲོག་ཤིང་མཁས་པ་མི་གསུམ་དང་གྲུབ་བརྙེས་རྣལ་འབྱོར་བ་ཆེན་པོ་ལྷ་ལུང་དཔལ་གྱི་རྡོ་རྗེ་སོགས་སྔོན་བྱོན་མཁས་གྲུབ་ཀྱི་བསྟན་འཛིན་གསེར་རིའི་ཕྲེང་བ་བསྟར་བ་ཉི་ཟེར་གྱི་རྡུལ་ལ་འགྲན་པའི་གྲངས་ཀྱིས་ཞབས་ཀྱིས་བཅགས་ཤིང་། ཕན་བདེའི་རྩ་ལག་རྒྱལ་བའི་བསྟན་པ་རིན་པོ་ཆེ་སྟེ་བསླབ་པ་གསུམ་གྱི་ཉམས་ལེན་དང་སྡེ་སྣོད་གསུམ་གྱི་འཆད་ཉན་གྲ་རྒྱས་ཕུན་ཚོགས་སུ་སྒྲུབ་པའི་བྱིན་རླབས་སྟོང་དུ་འཁྱིལ་བའི་བསྟི་གནས། རྣལ་འབྱོར་དཔའ་བོ་ཕོ་མོའི་རྡོ་རྗེ་གླུ་ཡི་བྲོ་ར། དག་པ་རབ་འབྱམས་ཀྱི་སྣང་ངོར་དཔལ་བདེ་མཆོག་འཁོར་ལོ་སྡོམ་པའི་ཕོ་བྲང་། མི་ཤིག་ས་ཡི་ཕུང་བོ་རྡོ་རྗེའི་ཁམས་སུ་བརྟན་པའི་བྲག་རྫོང་། རྒྱལ་བ་སྲས་དང་བཅས་པ་མཐའ་དག་གི་སྙིང་གི་ཐིག་ལེ། སྤྱན་གྱི་འབྲས་བུ། ཆོས་ཀྱི་དེད་དཔོན། ཁམས་གསུམ་གྱི་བླ་མ། སྐྱེ་དགུ་མ་ལུས་པའི་རྣམ་འདྲེན། རྒྱལ་བའི་གདུང་འཚོབ། བསྟན་པ་མཐའ་དག་གི་བདག་པོ། མཉམ་མེད་ཙོང་ཁ་བ་ཆེན་པོའི་རྗེས་སྐྱོང་ཁོང་ཨ་ལགས་བླ་ཁོ་རྡོ་རྗེ་འཆང་། རྗེ་བཙུན་འཇིགས་མེད་འཕྲིན་ལས་རྒྱ་མཚོ་དཔལ་བཟང་པོ་ཡབ་སྲས་འཁོར་བཅས་གནས་འདིར་ཕེབས་ཏེ་བསླུ་མེད་ལུང་གིས་བསྔགས་པ་ཆེས་ཆེར་བརྗོད་དེ། རྣམ་དག་ཚུལ་ཁྲིམས་གླིང་ཞེས་བསྔགས་པའི་མཚན་གྱི་རི་མོ་དོན་ལྡན་དུ་མཛེས་པའི་གནས་ཕུན་སུམ་ཚོགས་པ་འདི་ཉིད་ཡུལ་གང་དུ་གནས་པ་ནི། རྨ་ཆུ་དལ་བ་རིང་མོ་ནོར་བུ་དགའ་འཁྱིལ་གྱི་ཚུལ་དུ་འབབ་པའི་འགྲམ་རྒྱུད། རྨ་མགུར་རྣམ་རྒྱལ་གླིང་གི་རྒྱབ་ངོས། སྲིན་པོ་རྫ་རིའི་འདབས་ཞོལ། ཆ་ཚང་སྐྱེས་ལྷའི་མདུན་ལྗོངས་སུ་ཆགས་ཤིང་། བྲག་འདིའི་ཆགས་དབྱིབས་ནི་གཙུག་ལག་ཁང་ཆེན་པོ་ཞིག་དང་འདྲ་བའི་སྣང་བ་སུ་ལ་ཡང་མ་བཅོས་ཤུགས་འབྱུང་གིས་སྟེར་བར་བྱེད་པས་ཀུན་གྱི་མཐོང་མ་ཐག་ནས་གྲོལ་བའི་ས་བོན་བསྐྲུན་པ་ཞིག་སྟེ། གནས་ཆེན་པོ་འདི་ལ་སྔོན་གྱི་ཆར། གོང་གསལ་ལྟར་བོད་ཀྱི་བཙན་པོ་ཁྲི་རལ་བ་ཅན་དང་། ཨུ་དུམ་བཙན་ཏེ་གླང་དར་མ་གཉིས་ཀྱིས་ཕུ་ནུའི་བར་གྱི་སྲིད་དབང་འཕྲོག་རྩོད་བརྒྱུད་དེ་མཐར་ཕུ་བོ་གླང་དར་གྱིས་རྒྱལ་སྲིད་བཟུང་ཞིང་། བསྟན་པའི་གཞི་མ་འདུལ་བའི་བསླབ་པ་དང་དེ་ཡི་རྟེན་གཞི་དགེ་འདུན་གྱི་སྡེ་སོགས་བཤིག་གཏོར་བྱས་ཏེ་བསྟན་པ་བསྣུབས་ཤིང་། རབ་བྱུང་དགེ་འདུན་པ་རྣམས་ཁྱིམ་དུ་ཕབ་པ་དང་། འཚོ་བ་སོགས་བླ་ནས་སྦྱོར་བ་བཀག་པས། དཔལ་ཆེན་ཆུ་བོ་རིའི་སྒོམ་གྲྭ་ནས། བོད་ཀྱི་མཁས་པ་མི་གསུམ་གྱིས་བསྟན་པའི་རྒྱུན་དང་འགྲོ་དོན་ལ་དགོངས་ཏེ། མངའ་རིས་སྟོད་དུ་སོང་། དེ་ནས་བཞུགས་མ་ཚུགས་པར་གར་ལོག་གི་ཡུལ་དུ་ཕེབས། ལོ་ཙཱ་བ་མེད་པས་འགྲོ་དོན་མ་བྱུང་། དེ་ནས་མདོ་སྨད་དུ་ཕེབས་པར་བཞེད་དེ་ཧོར་ཡུལ་སྐོར་ནས་ཨོ་རོད་བརྒྱུད་དེ་ཕེབས་པ་ཡིན་ལ། ཧོར་གྱི་དགེ་བསྙེན་ཞིག་དང་འགྲོགས་ཏེ། ཐོག་མར་ཨ་རིག་གི་ཡུལ་བེ་རུ་ཚ་མཚོ་ནས་ཚུར་བྱོན་ཏེ། ལོ་རྡོ་རྗེ་བྲག་ཏུ་རྣལ་འབྱོར་ལ་བརྩོན་པར་བཞུགས་ཙ་ན། ལྷ་ལུང་དཔལ་གྱི་རྡོ་རྗེ་བོད་བཙན་པོ་གླང་དར་མས་བསྟན་པ་བསྣུབས་པའི་མཛད་སྤྱོད་ལ་རྒྱུ་དུས་ཀྱི་ཀུན་སློང་སྙིང་རྗེ་ཆེན་པོས་བསླངས་ཏེ། རྒྱལ་པོས་རྡོ་རིང་གི་ཡི་གེ་གཟིགས་པ་ལ་ཕྱག་འཚལ་བའི་ཟོལ་གྱིས་མདས་བརྒྱབ་སྟེ་བོད་ཀྱི་རྗེ་བོ་བཀྲོངས་ཤིང་། བྲོས་བྱོལ་གྱིས་མདོ་ཁམས་སྨད་འདིར་ཕེབས་ཏེ་མཁས་པ་མི་གསུམ་ལོ་རྡོ་རྗེ་བྲག་ཏུ་བཞུགས་པ་རྩད་ཆོད་དེ་གནས་ཆེན་པོ་འདིར་ཕེབས་ནས་ཁོང་རྣམ་པ་བཞི་ལྷན་ཅིག་ཏུ་གདན་འཛོམས་པ་ལ་ཞལ་ཏ་ཕེབས་ཏེ་ལྷ་ལུང་དཔལ་གྱི་རྡོ་རྗེས་ཁོ་བོས་བོད་ཀྱི་བཙན་པོ་བཀུམས་པས་དམེ་གྲིབ་ཁྱེད་ཚོ་ལ་ཕོག་མི་འོས་གསུངས་ཏེ། མཁས་པ་མི་གསུམ་རྡོ་རྗེ་བྲག་གི་ཉེ་འགྲམ་སྒོམ་གཞིར་ཕེབས་བཅུག་ཅིང་། ཁོང་གིས་ཡུལ་འདིར་རྫོང་བཙན་པར་གཟིགས་ནས་ལྕགས་ཀྱི་མདའ་གཞུ་གནས་འདིར་གཏེར་ཏུ་སྦས་ཤིང་སྟེང་དུ་རྡོ་སྤུངས་མཛད། སྒོམ་སྒྲུབ་ཡུན་རིང་བྱས་ཟེར། དེ་ནས་ཁོང་རྣམ་པ་དག་རིམ་པར་ཨ་ཆུང་གནམ་རྫོང་དུ་ཕེབས་ཏེ་བཞུགས་སྐབས། འཕན་ཡུལ་གཞོང་བ་རུ་མུ་སུ་འབར་བྱ་བའི་བོན་པོ་ཞིག་གི་བུ་མུ་སུ་དགེ་འབར་ཞེས་པ་ལོ་བཅུ་གཅིག་གི་སྐབས་སྣང་གསལ་ལྷ་ཁང་གི་གྱང་ངོས་ལས་རབ་བྱུང་ཆོས་འཆད་ཉན་གྱི་གཟུགས་མཐོང་བས་ལས་འཕྲོའི་ས་བོན་སད་དེ། མཁས་པ་མི་གསུམ་བཙལ་ཏེ་མདོ་སྨད་དུ་ཨ་ཆུང་གནམ་རྫོང་ན་བཞུགས་པའི་དྲུང་དུ་བསྙེན་གནས་སྡོམ་རྒྱུན་བླངས་པར་ལོ་རྒྱུས་རྙིང་བའི་གྲས《ལྡེའུ་ཆོས་འབྱུང》དང《མྱང་ཆོས་འབྱུང》སོགས་སུ་གསལ་བས། དེས་ན་བླ་ཆེན་གྱི་སྡོམ་པ་ལེན་པའི་གནས་ཨ་ཆུང་གནམ་རྫོང་ཡིན་པས་ན། གཅན་ཚའི་ཡུལ་ལ་ཕྱི་དར་བསྟན་པའི་ཆུ་མགོ་ཞེས་བསྙད་ན་ཡང་ངོ་གནོང་མི་དགོས་པར་སྙམ། དེའི་རྗེས་སུ་འཇམ་དབྱངས་ས་སྐྱ་པཎྜི་ཏ་ཆེན་པོ་སྐུ་ཚེ་སྨད་ལ་ཡོན་རྒྱལ་རབས་ཀྱི་གོང་མ་གོ་དན་གྱིས་གདན་དྲངས་པ་ལྟར། མདོ་སྨད་ལོ་རྡོ་རྗེ་བྲག་ཏུ་ཕེབས་ཏེ་སངས་རྒྱས་གླིང་པའི་རིང་བསྲེལ་ཕོར་བ་གང་ནང་བཞུགས་ཀྱིས་འབུམ་མཆོད་རྟེན་བཞེངས་ཏེ། ཕྱིས་འབུམ་ཁང་འཇའ་འོད་མར་གྲགས་ཚུལ་གོང་དུ་བཤད་ཟིན་ལ། དེ་ནས་རྨ་མགུར་བརྒྱུད་དེ་ཕེབས་པ་ནི་ཚད་མར་གྱུར་པའི་ལོ་རྒྱུས་ཀྱི་ཁུངས་དང་ལྡན་ཞིང་འགྲོ་མགོན་ཆོས་རྒྱལ་འཕགས་པ་གནས་གཞིར་འདིར་ཕེབས་ཏེ། ས་པཎ་གྱིས་བཞེངས་པའི་རྡོ་རྗེ་བྲག་གི་འབུམ་ཁང་ལ་རབ་གནས་མཛད་སྐབས། རྨ་ཉིན་སྲིབ་ཕུ་སྟོད་སྨད་མཚོ་གཡས་གཡོན་གྱི་ཆེ་རྒུ་རྣམས་ཀྱིས་ཞུས་པ་ལྟར་སྒར་བའི་བླ་མ་ས་བལྟ་ཁོ་ཚོའི་བླ་མཆོད་དུ་ལུང་བསྟན། དེའི་ཕྱིར་སྙིགས་དུས་ཀྱི་སྐྱེ་བོ་རྣམས་ཀྱི་ཕྱག་འཚལ་མགོས་གཏུགས་བྱས་པ་ཙམ་གྱིས་ཀྱང་གང་འཚམ་གྱི་བྱིན་རླབས་ངང་གིས་འཇུག་པའི་སྒྲུབ་གནས་ཁྱད་པར་བ་ཡིན་པར་གཟིགས་ནས། སྔོན་བྱོན་དམ་པ་མང་བོ་ཆེད་གཉེར་གྱིས་ཕེབས་པ་ནི་གནས་ཀྱི་གནད་མཁྱེན་པ་དང་བསྟན་པའི་མིག་རྒྱན་དུ་ཆེ་བར་མངོན་ལ། དེང་སང་ཕལ་ཆེར་གྱིས་གཡས་བསྐྱུར་གཡོན་བསྐྱུར་གྱིས་བཞག་སྟེ་རླངས་འཁོར་སོགས་ཀྱི་བགྲོད་པ་མེད་ན་རྐང་བས་བསྐྱོད་པ་ལ་ངལ་བར་འཛེམ་ཞིང་། རྒྱ་སོག་གི་ཡུལ་ཙམ་ལ་འགྲམ་ཆུ་ལྡང་བ་ནི་མིག་ལ་མི་མཛེས་པ་ཁོ་ནའོ། །

རེབ་གོང་གྲུབ་གནས་བརྒྱད་ཀྱི་གྲུབ་ཐོབ་པ་འགའ་རེ་ཡང་གནས་འདིར་ཕེབས་པའི་བཤད་ཚུལ་ཡོད། གྲུབ་ཆེན་ལོ་ཁོག་ཐོག་འཛིན་གྱིས་རྡོ་རྗེ་བྲག་སྐེད་དུ་སྐས་བཙུགས་ཏེ་སྒོམ་སྒྲུབ་མཛད་པའི་རྗེས་ཤུལ་གྱི་རི་མོ་མངོན་པར་བཀྲ་བའི་སྒྲུབ་ཁང་ལ་ད་ལྟ་ལོ་ཁོག་སྒྲུབ་ཁང་ཞེས་སུ་གྲགས་པ་བྱུང་ཞིང་གནའ་ནས་ད་བར་གྱི་ལོ་ཁོག་གི་རིག་འཛིན་ཆེན་པོ་དག་གིས་ལོ་མཚམས་མང་བོར་སྒོམ་སྒྲུབ་མཛད་པ་བསམ་གྱིས་མི་ཁྱབ་པ་བྱུང་། སྤྲེལ་ནག་སྡེ་བར་འཁྲུངས་པའི་ལྕང་སྐྱ་གོང་མའི་དངོས་སློབ་སྤྲེལ་ནག་པ་སྒོམ་ཆེན་འཕྲིན་ལས་ཕུན་ཚོགས་ཀྱིས་བྲག་ལ་བསྐོས་ཏེ། སྒོམ་ཆེན་ལྷ་ཁང་གཙུག་ལག་ཁང་རྟེན་དང་བརྟེན་པ་བཅས་པ་བཞེངས་ཏེ། ལོ་མཚམས་ཉི་ཤུར་བཞུགས། ཆོས་རྗེ་སྤོད་གྲགས་པའི་སྤྲུལ་སྐུ་བསོད་ནམས་ཡེ་ཤེས་དབང་བོ་གནས་འདིར་ཕེབས་ཏེ། གཙུག་ལག་ཁང་རྟེན་དང་བརྟེན་པར་བཅས་པ་ལ་རབ་གནས་མཛད་དེ་ཁྲི་ཁ་འདི་ནས་སྐལ་ལྡན་རྣམས་སྨིན་གྲོལ་གྱི་ཆོས་ཆར་ཕབ་ཅིང་། སྐབས་འདིའི་གཙུག་ལག་ཁང་གི་ནང་རྟེན་དཀར་ཆག་རྡོ་རིང་ངོས་སུ་གསལ་བ་གོང་དུ་བཀོད་པ་ལྟར་ལགས་སོ། །སྡེ་བ་སྐྱིད་ཤོད་པ་བློ་བཟང་རྒྱ་མཚོ་མཆོག་གཙང་དམག་གིས་སེར་འབྲས་བཅོམ་པ་དང་། སྐྱིད་ཤོད་པའི་རྫོང་གཞིས་བླངས་པ་སོགས་ལ་བརྟེན་ནས་མདོ་སྨད་དུ་བྱོན་ཏེ་ལོ་རྡོ་རྗེ་བྲག་ཏུ་བཞུགས་ཤིང་ཆོས་རྒྱུན་སྤེལ་ཏེ་ཕན་བདེའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་དར་རྒྱས་སུ་མཛད། ལ་མོ་ཚོགས་གཉིས་རྒྱ་མཚོ་རྒྱལ་བ་བསོད་ནམས་རྒྱ་མཚོ་སོག་ཡུལ་དུ་ཕེབས་པའི་ཕྱག་ཕྱིར་མདོ་སྨད་དུ་ཕེབས་ཤིང་རྔ་སྒར་དང་ལོ་རྡོ་རྗེ་བྲག་ཏུ་རྒྱུན་བཞུགས་གནང་ཏེ་གནས་འདིར་ཁོང་གིས་ཐོག་མར་བདག་དབང་མཛད་ཅིང་། སྐུ་ཕྲེང་གཉིས་པ་ཁྲི་བློ་གྲོས་རྒྱ་མཚོས་རྨ་མགུར་བཏབ་ཅིང་ལོ་རྡོ་རྗེ་བྲག་ཏུ་རྒྱུན་བཞུགས་གནང་ཞིང་སྒོམ་སྒྲུབ་བསྐྱངས་པར་མངོན་ལ། ཆོས་འབྲེལ་བསྟན་རྒྱུན་ལ་དགོངས་ནས་མདོ་སྨད་སྒྲུབ་པའི་ཤིང་རྟ་བ་ཆེན་པོ་ཡབ་རྗེ་སྐལ་ལྡན་རྒྱ་མཚོ་ཡབ་སྲས་རྔ་སྒར་དང་ལོ་རྡོ་རྗེ་བྲག་ཏུ་བཞུགས་ཏེ་ཕན་ཚུན་ཆོས་འབྲེལ་གྱི་ཚོང་ཟོང་ཐང་མར་བརྡལ་བས། གནས་འདིར་ཡང་འཆད་ཉན་གྱི་རྒྱལ་མཚན་གྱེན་དུ་བསྒྲེངས་ཤིང་། དེའི་ཕྱིས་ཡབ་རྗེ་སྐལ་ལྡན་པའི་དངོས་སློབ་རོང་བོ་ནུ་གུ་གྲུབ་ཆེན་བློ་བཟང་དོན་གྲུབ་དང་རྔ་བ་ཆོས་རྗེ་གཉིས་གནས་འདིར་ཕེབས་ཏེ། ལྷ་ཁང་དུ་སྐུ་གསུང་ཐུགས་རྟེན་མང་དུ་བཞེངས། ཁྲི་ཆེན་རྒྱ་ནག་པའི་སྤྲུལ་སྐུ་གསུམ་པ་རྗེ་བཙུན་ངག་དབང་བློ་བཟང་བསྟན་པའི་ཉི་མ་མཆོག་ཡབ་སྲས་འཁོར་བཅས་གནས་འདིར་ཡང་ཡང་ཕེབས་ཏེ་ཆོས་ཀྱི་མཛད་སྒོ་ཡངས་པོར་ཕྱེས། སྐབས་ཤིག་ཀོའུ་བ་ནོ་མིན་ཧན་གྱི་རུ་སྡེ་ཧོར་མོ་ཁ་དང་ཚ་གན་ནོ་མིན་ཧན་རྔ་སྒར་སྐུ་སྐྱེས་དཀར་བོའི་མངའ་རིས་མ་འཆམ་པར་སྟོད་ནས་སོག་དམག་གི་དཔུང་ཆེན་པོ་གཅན་ཚའི་ཕྱོགས་སུ་ཡོང་སྟེ་གནས་མཆོག་རྡོ་རྗེ་བྲག་འདིར་ཡང་ཆག་འཇིག་ཅུང་ཙམ་བྱུང་བ་འདྲ་སྟེ་ཞིབ་ཏུ་མ་འཚལ་ལ། སོག་དམག་གིས་འདི་ཕྱོགས་ཀྱི་རི་རྩེ་མང་བོ་བཤིག་བརྡལ་བྱས་ཤིང་། བྲག་གི་རྒྱབ་རི་རྨ་བཙུན་རི་ཡི་རྩེ་མོ་ཡང་བཅད་དེ་འདུག་པར་གནའ་མི་ཆོས་ཕྱིར་ས་འཁུར་ནས་བཅོས་པའི་རྗེས་ཤུལ་ད་དུང་གསལ་བར་ཡོད་ཅིང་ཉེ་ཆར་འབར་རྩའི་སྡེ་འགྲམ་ནས་ཡུར་ནང་དུ་ཆུ་དྲངས་པའི་རྐ་ཞབས་བརྡོལ་ཏེ་གནའ་བོའི་སོག་དམག་གི་སྡོད་ཁང་དང་དམག་ཆས་ཀྱི་དངོས་པོ་མང་པོ་བྱུང་ངོ་། དེའི་རྗེས་ལ་མོ་བདེ་ཆེན་འདེབས་པ་པོ་སྐུ་ཕྲེང་གསུམ་པ་ངག་དབང་བློ་བཟང་བསྟན་པའི་རྒྱལ་མཚན་གྱི་རིང་ལ། ལོ་རྡོ་རྗེ་བྲག་གི་ལྷ་ཁང་གང་ཡོད་ཉམས་པ་ཞིག་གསོ་དང་མི་ཉམས་གོང་འཕེལ་དུ་གསར་བཞེངས་བྱས་ཏེ། ལ་མོ་བདེ་ཆེན་གྱིས་བདག་དབང་མཛད་ཅིང་རྨ་མགུར་རྣམ་རྒྱལ་གླིང་དུ་དུས་འཁོར་འཛུགས་པ་པོ་ལ་མོ་སྐུ་ཕྲེང་བཞི་བ་བློ་བཟང་ཐུབ་བསྟན་དགེ་ལེགས་རྒྱལ་མཚན་གནས་འདིར་ཕེབས་ཏེ་སྒྲུབ་པའི་རྒྱལ་མཚན་བསྒྲེངས་པར་མངོན།

སྐུ་ཕྲེང་ལྔ་པ་ཕན་བདེའི་དབང་ཕྱུག་མཁས་བཙུན་རྒྱ་མཚོ་མཁས་གྲུབ་གཉིས་འཛོམས་ཀྱི་རྣམ་ཐར་ལྷུར་བཞེས་པ་དེ་ཉིད་ཀྱང་སྒྲུབ་པའི་དགའ་ཚལ་འདིར་ཕེབས་བཞུགས་གནང་ཞིང་། སྐུ་ཕྲེང་དྲུག་པ་གྲུབ་པའི་དབང་ཕྱུག་ཆེན་པོ་ངག་དབང་མཆོག་གྲུབ་བསྟན་པའི་རྒྱལ་མཚན་མཆོག་ཀྱང་སྔ་ཕྱིར་གནས་ཆེན་པོ་འདི་གར་ཕེབས་ཏེ་བྱིན་རླབས་ཀྱི་མེ་ཏོག་གཏོར་བར་མངོན། སྐྱབས་རྗེ་ཤིང་བཟའ་རིན་པོ་ཆེ་ལ་མོ་བདེ་ཆེན་དུ་ཕེབས་པའི་ཞབས་ཕྱིར་ཡབ་རྗེ་གསེར་ཁང་བ་དགུང་གྲངས་ཉི་ཤུའི་ནང་ཞིག་ལ་ཕེབས། ཕྱིས་སུ་མར་ཁུའི་སྐུ་ཞབས་མཆོག་ལ་སྔོན་མོ་རྫོང་དུ་ཆོས་འབྲེལ་ཞུས་ཤིང་། དེ་ནས་རྡོ་རྗེ་བྲག་ཏུ་ཕེབས་ཏེ་སྐུ་མཚམས་ལ་ཡུན་རིང་བཞུགས། བྲག་ནས་ཐིགས་ཆུ་འབབ་པ་དང་རྩམ་རྐྱང་ཙམ་གྱི་བཞེས་པ་ལ་བརྟེན་ནས་བོད་ཀྱི་གྲུབ་རྒུའི་གཙུག་རྒྱན་རྗེ་བཙུན་མི་ལ་རིན་པོ་ཆེའི་རྣམ་ཐར་ཇི་ལྟ་བ་བཞིན་བསྐྱངས་ཏེ། ཁྱད་པར་དུ་དཔལ་བདེ་མཆོག་གི་ཞལ་འདོན་གསུངས་སྐབས་ཤིག་ལ་མདུན་གྱི་བྲག་དཔའ་བོ་དང་དཔའ་མོའི་རྣམ་པར་གཟིགས་ཏེ། ཞལ་ནས་རྡོ་རྗེ་བྲག་འདི་མཁའ་འགྲོའི་གནས་ཤིག་རེད་ཅེས་བཀའ་གསུང་ཕེབས། གནས་འདིའི་ཡུལ་མིར་ཐུགས་རྗེ་ཆེན་པོའི་དབང་གནང་སྟེ་སྡེ་བ་སོ་སོས་མ་ཎི་དུང་ཕྱུར་འདོན་རྒྱུའི་དམ་བཅའ་ཕུལ། སྐབས་འདི་ཞིག་ལ་སྐྱབས་རྗེ་ཐར་ཤུལ་རིན་པོ་ཆེ་ཡང་གནས་ཕུན་སུམ་ཚོགས་པ་འདི་རུ་དགུན་བཞུགས་རེ་གནང་སྟེ་སྒྲུབ་པའི་རྣལ་འབྱོར་འཕེལ་བར་ངེས། ཡབ་རྗེ་གསེར་ཁང་བ་སྣང་རའི་གསེར་ཁང་དུ་ཕེབས་ནས་སྤྱན་དབྱེ་ཆོ་ག་དང་ཉིན་མང་བོར་ཁྲུས་དབང་། རྡོ་རྗེ་འཇིགས་བྱེད་ཞི་བའི་སྦྱིན་བསྲེགས་སོགས་གྲུབ་ཏེ་ལོ་རྡོ་རྗེ་བྲག་ཏུ་ཡང་བསྐྱར་ཕེབས་ནས་སྒོམ་སྒྲུབ་མཛད་ཅིང་། རྗེ་གྲུབ་དབང་འཇིགས་མེད་བསམ་གཏན་རིན་པོ་ཆེ་སོགས་ངེས་དོན་བསྟན་འཛིན་གྱི་སྐྱེས་བུ་མང་བོ་ཕེབས་པར་མངོན་ཞིང་། ཡུལ་འདི་ཕྱོགས་ཀྱི་བླ་སྤྲུལ་དགེ་བཤེས་མང་བོ་ཆེད་གཉེར་ཕེབས་བཞུགས་ཅིས་ཀྱང་ཆེ་ངེས་སོ། །ཡབ་རྗེ་གསེར་ཁང་བ་དགུང་གྲངས་དྲུག་ཅུའི་ནང་ཞིག་ལ། ལོ་ཁོག་ཏུ་མི་ཤིང་ཞེས་པའི་ཇག་རྒོད་ཅིག་གིས་རྨ་ཕར་ཁའི་རྒྱའི་མི་དཔོན་ཞིག་ལ་མི་གསོད་རྟ་འདེད་ཀྱི་ཇག་བྱས་པས། ཟ་ལར། གཡས་སྔོན། གཡའ་ཆུ། ཕྱི་ཁོག་སོགས་ཀྱི་ཧོས་དམག་འབོར་ཆེན་རྨ་ཆུར་བརྒལ་ནས་ཤ་ཟངས་ཐང་བརྒྱུད་དེ་གླས་གསུམ་ལ་དམག་དྲངས་ཏེ། ཡོ་བོ་ཆེ། ལོ་ཁོག འབར་རྩ་བཅས་ཡོངས་སུ་རྫོགས་པའི་མི་ཁྱིམ་གྱི་ཁང་བ་དང་ཅ་ལག མ་ཎི་ཁང་། འབུམ་ཁང་། མཆོད་རྟེན། མཆོད་ཁང་། རྟེན་གསུམ་མེ་ལ་བསྲེགས་ཤིང་། མི་གསོད་རྒྱུ་འཕྲོག་གི་གཡུལ་འཁྲུག་བྱུང་བ་རིམ་གྱིས་མཆེད་དེ་དགོན་པ་གང་མང་བཤིག་རྒྱུས་སྦྱོར་བ་བསླངས་ཏེ་ལོ་རྡོ་རྗེ་བྲག་ཏུ་སྐབས་འདིར་ལྷ་ཁང་བཅུ་གཉིས་བཞུགས་པ་དང་། བླ་བྲང་དང་སྤོང་ཁང་སོ་སོར་མེ་མཆོད་ཕུལ་ཞིང་ལོ་ཁོག་གསེར་ཡུམ་ཡང་འདི་དུས་བསྟན་དགྲ་མགོ་དཀར་དམག་གིས་མེ་ལ་སྦྱངས་ཚུལ་གོང་དུ་བཤད་པ་ལྟར་རོ། །ཆག་འཇིག་འདི་སྤྱི་ལོ༡༨༤༦ཡས་མས་ཡིན་པར་ལོ་རྒྱུས་མང་པོ་གུང་བསྒྲིགས་ན་ཤེས་ཐུབ། དེར་བརྟེན་ཡབ་རྗེ་གསེར་ཁང་བས་གནས་ཕུན་སུམ་ཚོགས་པ་འདི་འདྲ་བ་ལ་ཆག་འཇིག་དང་སེམས་ཅན་མང་བོ་ཚེ་དང་ལོངས་སྤྱོད་ཀྱིས་ཕོངས་པར་གྱུར་པ་ནི། མདོ་ལས། བསྐལ་བ་བརྒྱ་ཕྲག་རྣམས་སུ་ཡང་། །ལས་རྣམས་ཆུང་བར་མི་འགྱུར་ཏེ། །ཚོགས་ཤིང་དུས་ལ་བབས་པ་ན། །ལུས་ཅན་རྣམས་ལ་འབྲས་བུ་སྨིན། །ཞེས་དང་། གཞན་ཡང་མདོ་ལས། འཇིགས་པ་ཆེན་པོ་བཞི་འདི་དག་འོང་སྟེ། དེ་དག་ལས་བཟློག་པའམ། རྫས་དང་། སྔགས་དང་། སྨན་གྱིས་བཟློག་པར་སླ་བ་མ་ཡིན་ནོ། །བཞི་གང་ཞེ་ན། རྒ་བ་དང་། ན་བ་དང་། འཆི་བ་དང་། རྒུད་པའོ། །རྒྱལ་པོ་ཆེན་པོ། རྒ་བ་ནི་དར་ལ་བབ་པ་འཇོམས་ཤིང་འོང་། འཆི་བ་ནི་སྲོག་འཇོམས་ཤིང་འོང་། རྒུད་པ་ནི་ཕུན་སུམ་ཚོགས་པ་ཐམས་ཅད་འཇོམས་ཤིང་འོང་ཞེས་གསུངས་པ་ལྟར། ལས་ཀྱི་རྣམ་པར་སྨིན་པ་ཁོ་ནར་ངེས་ཤིང་། དེ་ཡང་རང་ཅག་ནང་བ་སངས་རྒྱས་བར་ཁས་འཆེ་བ་རྣམས་ཀྱི་མེད་མི་རུང་བའི་སྒོ་དང་བོ་ནི་དཀོན་མཆོག་སྐྱབས་ཀྱི་དམ་པ་བསླུ་བ་མེད་པར་བཟུང་ནས། དེའི་ཡོན་ཏན་གྱི་ཚོགས་རྗེས་སུ་དྲན་པས་དད་པ་སྦྱང་བ་དང་། དེ་ཉིད་ཀྱི་རྗེས་སུ་ཡང་དག་པར་སློབ་པ་ཡིན་ཏེ། བསྟོད་པ་བརྒྱ་ལྔ་བཅུ་བ་ལས། གང་ཞིག་ལ་ནི་ཉེས་པ་ཀུན། །གཏན་ནས་ཡོང་ཡེ་མི་མངའ་ཞིང་། །གང་ལ་རྣམ་པ་ཐམས་ཅད་དུ། །ཡོན་ཏན་ཐམས་ཅད་གནས་གྱུར་པ། །གལ་ཏེ་སེམས་ཤིག་ཡོད་ན་ནི། །དེ་ཉིད་ལ་ནི་སྐྱབས་འགྲོ་ཞིང་། །དེ་བསྟོད་དེ་ནི་བཀུར་བ་དང་། །དེ་ཡི་བསྟན་ལ་གནས་པར་རིགས། །ཞེས་གསུངས་པ་ལྟར། སྐྱོན་ཐམས་ཅད་སྤངས། ཡོན་ཏན་ཐམས་ཅད་རྫོགས་པ་ནི་དཀོན་མཆོག་རིན་པོ་ཆེ་རྣམ་པ་གསུམ་ཡིན་ཞིང་། དེའི་ནང་ནས་ཀྱང་རབ་དང་མཆོག ཕུལ་དང་གཙོ་བོར་གྱུར་པ་ནི་དམ་པའི་ཆོས་ཁོ་ན་ཡིན་པས། ལམ་གྱི་ཆོས་ཉམས་སུ་ལེན་པ་དགེ་འདུན་དང་། མཐར་ཐུག་འབྲས་བུའི་ཆོས་ལ་མ་བརྟེན་པར་དེ་དག་འབྱུང་བའི་གོ་སྐབས་མེད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་དུས་གསུམ་གྱི་སངས་རྒྱས་འདུས་པའི་ཡུམ་དུ་འཆད་པའང་རྒྱུ་མཚན་དེ་ཉིད་ཀྱི་ཕྱིར་དགོངས་པ་དང་། འཇིག་རྟེན་ཐམས་ཅད་ཀྱི་ཕན་བདེའི་རྩ་ལག་རྒྱལ་བའི་བསྟན་པ་རིན་པོ་ཆེ་ལ་རག་ལས་ཤིང་། དེ་ཉིད་ཡུན་རིང་དུ་གནས་པ་དགེ་འདུན་གྱི་སྡེ་དང་ཆོས་ཚུལ་བཞིན་སྒྲུབ་པའི་གནས་ཁྱད་པར་ཅན་འདི་འདྲ་ཡུན་རིང་དུ་གནས་དགོས་པར་གཟིགས་ནས། ཡབ་རྗེ་ཆོས་ཀྱི་རྒྱལ་བོ་གསེར་ཁང་བ་རིན་པོ་ཆེ་སྐུ་དངོས་ཀྱིས་ཕེབས་ཏེ། བསྐྱར་བཞེངས་བྱ་རྒྱུར་བཀས་སྐུལ་ཞིང་སྒྲུབ་པའི་དགའ་ཚལ་འདིར་བཞུགས་ཏེ་ཕྱག་རྫས་གང་མང་ཕུལ། རྗེ་བཙུན་བྱམས་པའི་ལྷ་ཁང་གི་ལོགས་རིས་ཀྱི་ཉེ་སྲས་བརྒྱད་ཁོང་སྐུ་དངོས་ཀྱི་མཚལ་གྱིས་ཕྱག་བྲིས་བསྟར་ཞིང་ཚོན་རིས་འབུལ་དུ་མ་བཅུག་པར་བཞག གླས་གསུམ་རྒན་མང་གིས་ད་ནི་བྲག་ལ་ཆག་འཇིག་འདི་འདྲ་བྱུང་བས་རྟེན་གཙོ(ལྷ་ལུང་དཔལ་རྡོར་གྱི་མདའ་གཞུ་དང་ས་པཎ་གྱི་སངས་རྒྱས་གླང་བོའི་རིང་བསྲེལ་ཕོར་བ་གང)ཡོད་མེད་ལྟ་དགོས་ཞེས་ཡབ་རྗེ་གསེར་ཁང་བར་ཞུས་ནན་མ་བཟློག་པར་ས་སློག་པས་འབུམ་ཁང་མཆོད་རྟེན་ལ་འཇའ་འོད་ཀྱིས་གང་བར་གཡོགས་པ་ཤར་བས། ཕྱོགས་འདིའི་འགྲོ་བ་མང་བོ་དད་པའི་ཁོལ་བོར་བསྲན་པར་མ་ནུས་པས་ཅི་ཡང་བསྐྱོད་དེ། གཅེས་ནོར་མཁོ་རྒུའི་འབྱོར་བ་གནས་འདིར་སྤུངས་པ་བཞིན་གྱུར་ཏེ་འབུམ་ཁང་འཇའ་འོད་མ་གཙོ་བྱས་པའི་ལྷ་ཁང་བཅུ་བསྐྱར་བཞེངས་དང་མཆོད་པ་ཡང་བཙུགས་ལ། ནང་རྟེན་སོགས་གོང་དུ་བཀོད་པར་གྱུར་ཞིང་། དེ་བས་ན་ལོ་རྡོ་རྗེ་བྲག་འདི་ནི། ཡབ་རྗེ་གསེར་ཁང་བའི་སྐུ་ཚེ་སྟོད་སྨད་གཉིས་ཀར་བཞུགས་པའི་གདན་ས་ཁྱད་པར་བ་ཞིག་ཡིན་ཕྱིར། ཁོང་གི་རྗེས་འཇུག་གི་བླ་སློབ་སྐྱབས་རྗེ་ཨ་རོལ་རིན་པོ་ཆེ། ཐར་ཤུལ་རིན་པོ་ཆེ་སོགས་བསྟན་པའི་སྲོག་ཤིང་དུ་མ་གནས་འདིར་ཕེབས་པར་མངོན་ལ། ཁྱད་པར་དུ་བསྟན་པའི་སྒྲོན་མེ་སྐྱབས་རྗེ་ཞྭ་དམར་པཎྜི་ཏ་རྒྱལ་དབང་བཅུ་གསུམ་པ་ཆེན་པོའི་རིགས་ཀྱི་ཅོད་པཎ་ཁོང་ཉིད་གདན་ས་བདེ་ཆེན་དུ་ནམ་ཕེབས་ཆིབས་བར་དུ་ལོ་རྡོ་རྗེ་བྲག་ཏུ་ཕེབས་བཞུགས་གནང་ཞིང་། དགུང་ལོ་ཞེ་ལྔའི་སྟེང་གནས་ཕུན་སུམ་ཚོགས་པ་རྡོ་རྗེ་བྲག་འདིར་སྟོན་པ་ཕུན་སུམ་ཚོགས་པ་རྗེ་བཙུན་འཇམ་པའི་དབྱངས་དང་ཞལ་མི་གཉིས་པ་བཤེས་གཉེན་ཆེན་པོ་སངས་རྒྱས་ཆོས་གྲགས་ཀྱི་དྲུང་དུ་འཁོར་ཕུན་སུམ་ཚོགས་པ་རྒྱལ་སྲས་སྤྱན་སྔ་ཆེན་པོའི་རྣམ་འཕྲུལ་ཞབས་དྲུང་སྒར་བ་རིན་པོ་ཆེ་དང་། གཞུང་བརྒྱའི་མངའ་བདག་ཡོངས་འཛིན་ཤེས་རབ་རྒྱ་མཚོ་སོགས་དང་ལྷན་དུ། བླ་མའི་རྣལ་འབྱོར་ལམ་གྱི་སྲོག་ཏུ་བྱས་ཏེ་མཐུན་རྐྱེན་ཚོགས་བསགས་པ་དང་འགལ་རྐྱེན་སྒྲིབ་པ་སྦྱོར་བས་རྒྱབ་བརྒྱན་ཏེ། ཆོས་ཕུན་སུམ་ཚོགས་པ་རྗེ་ཐམས་ཅད་མཁྱེན་པའི་གསུང་གི་མཛད་ཆེན་བཞིའི་ནང་ཚན་གཞུང་ལུགས་ཆེན་མོ་རྩ་འཇུག་གི་ཊི་ཀ་ཆེ་ཆུང་སོགས་ལ་བརྒལ་ལན་དྲི་གཏུགས་ཀྱིས་དཔྱད་པ་སུམ་སྒྲིལ་གྱིས་སྟོང་བ་རྟེན་འབྱུང་དང་རྟེན་འབྱུང་སྟོང་བའི་ཚུལ་གྱི་དབུ་མའི་ཟབ་ལམ་དཔལ་ལྡན་ཐལ་འགྱུར་བའི་རང་ལུགས་དྲི་མ་མེད་པ། དཔལ་མགོན་འཕགས་པ་ཀླུ་སྒྲུབ་ཀྱི་བཞེད་མཐིལ་ལྟ་བའི་རང་ཞལ་ཐུགས་ཉམས་སུ་ཆུད་པར་མཛད་ཅིང་། ཕྱོགས་བཅུའི་རྒྱལ་བ་སྲས་བཅས་དགྱེས་པའི་སྒྲུབ་མཆོད་ཕུལ་བས། གནས་འདི་རྗེ་བླ་མ་ཙོང་ཁ་བ་ཆེན་པོའི་ཚུར་རོལ་སྣང་ངོར་སྟོང་ཉིད་ཀྱི་དཔྱད་པ་རྫོགས་པའི་ཚུལ་མཛད་པའི་གནས་ཆེན་པོ་འོལ་ཁ་དང་མཚུངས་པའི་གནས་སུ་བྱིན་གྱིས་བརླབས།

རབ་བྱུང་བཅོ་ལྔ་བའི་ས་བྱ་ལ་མོ་བདེ་ཆེན་གྱི་སངས་རྒྱས་སྟོང་སྐུ་རྟེན་དང་བརྟེན་པ་བཞེངས་གྲུབ་ཀྱི་ལོ༡༩༠༩བར་ཀུན་མཁྱེན་འཇམ་དབྱངས་བཞད་པ་རིན་པོ་ཆེ་སྐུ་ཕྲེང་བཞི་བ་རྗེ་བཙུན་སྐལ་བཟང་ཐུབ་བསྟན་དབང་ཕྱུག་ལོ་རྡོ་རྗེ་བྲག་ཏུ་ཕེབས་བཞུགས་བསྐྱངས་ཏེ་སྣང་རའི་གསེར་ཁང་དུ་ཡང་ཕེབས། མཁས་བཙུན་བཟང་གསུམ་གྱི་ཕུང་པོ་སྐྱབས་རྗེ་ལ་མོ་དགེ་འདུན་བསྟན་འཛིན་ནོར་བུ་ཡོངས་འཛིན་སྐུ་འཁོར་བཅས་ཡང་ཡང་གནས་འདིར་ཕེབས་ཏེ། དགུན་བཞུགས་མཚམས་བཅད་ཀྱི་ནང་དུ་དཔེ་ཁྲིད་འཆད་ཉན་གྱིས་བསྟན་པའི་རྒྱལ་མཚན་བསྐལ་བའི་མཐར་ཡང་མི་ཉམས་པའི་སྲོག་ཟུངས་ཕུལ། ཁྲི་ཆེན་རྒྱ་ནག་པའི་སྤྲུལ་རབས་བདུན་པ་རྗེ་བློ་བཟང་ཐུབ་བསྟན་རྒྱ་མཚོ་ཡབ་སྲས་གནས་འདིར་དགུན་བཞུགས་མང་དུ་གནང་ཏེ་སྒྲུབ་པའི་རྣལ་འབྱོར་ལ་བརྩོན་པར་མཛད་པས་ཐུགས་རྟོགས་རྨད་དུ་བྱུང་བ་འཁྲུངས་ཤིང་གནས་འདིར་གསེར་ཁྲི་བླ་བྲང་ཡང་ཡོད་པར་གྱུར།

སྐུ་ཕྲེང་བརྒྱད་པ་ཁྲི་སྤྲུལ་ལུང་རྟོགས་ཉི་མ་དང་སྐུ་ཕྲེང་དགུ་པ་བསྟན་འཛིན་དང་བླ་སྤྲུལ་གྱི་ཐ་སྙད་ཆེན་པོ་འཆང་བའི་ཁྲོད་ནའང་མཉམ་མེད་ཐུབ་པ་ཆེན་པོའི་ཚད་མའི་བསྟན་པ་རིན་པོ་ཆེ་སྲོག་གི་ཕྱིར་ཡང་ཚིག་ཙམ་གྱིས་ཀྱང་མི་གཏོང་བའི་ཐུགས་སྟོབས་མཉམ་ཟླ་མེད་པ། ཁྲི་སྤྲུལ་བློ་བཟང་བསྟན་པའི་རྒྱལ་མཚན་སྔ་ཕྱིར་ཡང་ཡང་ཕེབས་ཏེ་གནས་འདིར་བྱིན་གྱིས་བརླབས་ཤིང་། གླས་གསུམ་གྱི་སྡེ་གྲོང་སོ་སོར་ཕེབས་བསྐྱོད་བཀའ་དྲིན་ཡང་བསམ་གྱིས་མི་ཁྱབ་པར་མངོན། འགྲོ་མགོན་སྐྱབས་རྗེ་ཐར་ཤུལ་རྡོ་རྗེ་འཆང་སྐུ་ཕྲེང་དྲུག་པ་དགེ་འདུན་ཆོས་སྐྱོང་རྒྱ་མཚོ་དང་། སྐུ་ཕྲེང་བདུན་པ་དགེ་ལེགས་དབང་ཕྱུག་ཆོས་སྐྱོང་རྒྱ་མཚོ་བསྟི་གནས་འདིར་ཡང་ཡང་ཕེབས་ཏེ་སྒོམ་སྒྲུབ་བསྐྱངས་པ་དང་གླས་གསུམ་སྤྱིའི་བླ་མར་གྱུར་པས། ཁོང་དགུང་ལོ་དྲུག་ཅུ་བཞེས་པ་ས་བྱི་ལོ༡༩༤༨ལ་གླས་གསུམ་གཙོས་གྲོང་བརྒྱད་ཀྱིས་ཞུས་ངོར། དུས་འཁོར་དབང་མོ་ཆེ་གནང་བར་ལ་མོ་སྒར་བའི་སྤྲུལ་སྐུ་ཁྲི་ཆེན་རྒྱ་ནག་པའི་སྤྲུལ་སྐུ། ཀོའུ་བ་སྤྲུལ་སྐུ། ཁྲི་ཀའི་ཨ་ལགས་མཚན་གྲགས་ཚང་། གསང་སྒྲོག་སྤྲུལ་སྐུ། སྐུ་ཞབས་སྒོ་མང་ཚང་སོགས་བསྟན་པའི་རྩ་ལག་ལྡེའུ་ཚ་བཀྲ་ཤིས་ཆོས་སྡིངས། དགེ་འདུན་བསྟན་པའི་ཆུ་མགོ་བྱ་ཁྱུང་ཐེག་ཆེན་ཡོན་ཏན་དར་རྒྱས་གླིང་། ལུང་རིགས་སྒྲོག་པའི་ཆོས་སྡེ་མཁས་གྲུབ་བྱེ་བའི་རོལ་མཚོ་ལ་མོ་བདེ་ཆེན་ཆོས་གླིང་སོགས་དང་། གཞན་ཡང་ཀོའུ་བ་དགོན། གསང་སྒྲོག ངང་རོང་། རྨ་མགུར། རྔ་སྒར་སོགས་ཁྲི་ཀ་ཚུན་ཆད་ཀྱི་བཤད་སྒྲུབ་ཀྱི་སྡེ་མང་པོའི་བླ་སྤྲུལ་དགེ་བཤེས་ཆེ་ལ་རགས་པ་མང་དུ་ཕེབས་པར། ཚེ་དབང་དང་འཇིགས་བྱེད་ཀྱི་དབང་སོགས་ཀྱང་གནང་ལ། འདི་བ་རྫོགས་རིམ་གྱི་རྟོགས་པ་མཐོན་པོར་སླེབས་པ་ཞིག་ལགས་ཞེས་བདག་གི་བླ་མ་འཇམ་པའི་དབྱངས་དངོས་རྗེ་ཤར་གདོང་བློ་བཟང་བཤད་སྒྲུབ་རྒྱ་མཚོའི་ཞལ་ནས་དངོས་སུ་ཐོས། དགའ་ལྡན་དགེ་བཤེས་ཡང་ཆུང་ལྷ་རམས་པ་ངག་དབང་གྲགས་པ་དབུས་ནས་འདིར་ཕེབས་ཏེ་གནས་འདིར་བྱ་བཏང་སྒོམ་སྒྲུབ་ཀྱི་སྤྱོད་པ་རྒྱ་ཆེར་གནང་བས་བྲག་གི་བསྟན་སྲུང་ཆེན་མོ་བཙན་མགོན་བསྟེན་ཅིང་། གླས་གསུམ་གྱི་བླ་མ་ཡིན་པས་སྐུ་ཕྲེང་ཕྱི་མ་རྣམས་ཀྱང་དགའ་ཚལ་འདིར་ཕེབས་ཤིང་ཡང་ཆུང་བླ་བྲང་ཡང་ཡོད་པར་གྱུར། ཡོངས་རྫོགས་བསྟན་པའི་མངའ་བདག་བླ་བྲང་ཨ་ལགས་རིན་པོ་ཆེ་བླ་ཁོ་རྡོ་རྗེ་འཆང་། རྗེ་བཙུན་འཇིགས་མེད་འཕྲིན་ལས་རྒྱ་མཚོ་དཔལ་བཟང་བོ་གནས་འདིར་ཕེབས་ཏེ་བཀྲ་ཤིས་གསོ་སྦྱོང་མཛད་ཅིང་། མ་བོས་རང་འགྲིག་གིས་འཕགས་པའི་གནས་བརྟན་ཆེན་པོ་བཅུ་དྲུག་གི་གྲངས་ཚང་བས་ཁོང་ཐུགས་དགྱེས་ཏེ། གནས་འདི་ལ་རྣམ་དག་ཚུལ་ཁྲིམས་གླིང་ཞེས་དོན་ལྡན་མཚན་གྱི་མེ་ཏོག་རྒྱན་ཏུ་བཏགས་ཤིང་། གླས་གསུམ་གཙོས་གྲོང་བརྒྱད་ཀྱིས་ཞུས་ངོར། གདུགས་དཀར་མོ་ཅན་གྱི་དབང་གནང་བར་ཕྱོགས་འདུས་ཀྱི་བླ་སྤྲུལ་དགེ་བཤེས་དང་རབ་བྱུང་བ་སོགས་སྟོང་ཕྲག་དུ་མ་འདུས་པར་བྱུང་། ངང་རོང་བཀྲ་ཤིས་ཆོས་འཕེལ་གླིང་འདེབས་པ་པོ་དཔལ་ཆོས་མཁན་ཆེན་གྱི་སྐུ་ཕྲེང་ལྔ་བ་འཇམ་དབྱངས་མཁྱེན་རབ་རྒྱ་མཚོ་ཚང་རྡོ་རྗེའི་བྲག་འདིར་ཕེབས་ཏེ་དཔལ་རྡོ་རྗེ་འཇིགས་བྱེད་ཀྱི་བསྙེན་སྒྲུབ་མཛད་ཅིང་། བཅུ་ཆའི་སྦྱིན་བསྲེགས་ཀྱང་བླུགས་ལ། ཁོང་གནས་འདིར་བཞུགས་རིང་སྒོམ་ཆེན་ལྷ་ཁང་དུ་མཁན་ཆེན་ཞི་བ་འཚོ་དང་། བླ་ཆེན་དགོངས་པ་རབ་གསལ་རྣམ་གཉིས་ཀྱི་སྐུ་བརྙན་བཞེངས་ཤིང་གཟུངས་གཞུག་རབ་གནས་དང་བཅས་པ་ཆེན་ཧུས་ཞུས་ངོར། ཇི་སྐད་སྨྲས་པ་དེ་བཞིན་བྱས་པར་མངོན། རྒྱལ་སྲས་སེམས་དཔའ་ཆེན་པོ་སྐུ་ཞབས་སྒོ་མང་ཚང་དང་། རྨོག་དཔོན་སློབ་རྣམ་གཉིས་ཀྱང་སྔ་ཕྱིར་ཕེབས་ཏེ། གླས་གསུམ་སྤྱིའི་འགྲོ་དོན་ཐུགས་འཛིན་སྒོས་གསུང་ཆོས་མང་དུ་སྤེལ་ཞིང་། འདུ་ཁང་ནང་རྟེན་འགའ་རེ་ཁུར་ལེན་གྱིས་བཞེངས་བསྐྲུན་དང་མཆོད་པའི་རྒྱུན་ཡང་བཙུགས་པར་མངོན་པ། བཅུ་པའི་མ་ཎི་དང་ལོ་གཅིག་གི་སྨྱུང་གནས་ཆོས་ཐོག་གསུམ་སོགས་བཙུགས་ཏེ། བཅའ་ཡིག་ཀྱང་མཛད་ཟེར་ཏེ་ད་ལྟ་མཇལ་རྒྱུ་མི་འདུག དེ་ལྟར་སྔོན་བྱོན་ངེས་དོན་གྱི་བསྟན་འཛིན་སྐྱེས་བུ་དམ་པ་རྣམས་ཀྱིས་རྒྱལ་བའི་གསུང་རབ་ཐམས་ཅད་ཀྱི་གནད་བསྡུས་པ། ཤིང་རྟ་ཆེན་པོ་དག་གི་ལམ་སྲོལ། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་གཞུང་ལམ། བྱང་ཆུབ་ལམ་གྱི་རིམ་པ། ཐོག་མར་ལེགས་ཚོགས་ཐམས་ཅད་ཀྱི་རྩ་བ་མགོ་དགེ་བའི་བཤེས་གཉེན་བསྟེན་ཚུལ་ནས་བཟུང་མཐར་མི་སློབ་ཟུང་འཇུག་གི་བར་གྱི་ས་དང་ལམ་གྱི་རིམ་པའི་རྟོགས་པ་སྣ་རེ་ཡིན་ན་ཡང་རྒྱུད་ལ་ཅི་སྐྱེས་དང་། མ་མཐའ་སྨོན་ཡུལ་ཚུན་ཆད་དུ་བཟུང་སྟེ་འཕྲལ་ཕུགས་ཀྱི་འཇུ་ས་འཇང་ས་དམ་པའི་ཆོས་ཁོ་ནར་བྱེད་པ་དང་། དེའི་ཡན་ལག་ཏུ་ཐོས་བསམ་སྒོམ་པ་ཡ་མ་བྲལ་བར་ཚོགས་བསགས་སྒྲིབ་སྦྱོང་སྣ་སྒོ་མོ་ནས་ཉམས་བཞེས་མཛད་པ་ལས། དོན་ཆེན་པོ་ལ་སྙད་བཏགས་ཁག་འཇོག་གིས་ཞེ་ཕུགས་ཚེ་འདིའི་མིང་དང་དབང་འབྱོར་ལ་སྙིང་ཕུར་ཐེབས་པའི་ཕྱི་རྫིག་ནང་སྟོང་གི་དྲི་མ་རིང་དུ་བོར་བའི་མཁས་གྲུབ་རིམ་བྱོན་གྱི་གདན་ས་དམ་པ་ལོ་རྡོ་རྗེ་བྲག་འདི་ནི་མེ་མཁའ་རྒྱ་མཚོའི་འདས་ལོ༢༧༨ལྕགས་བྱ་ལོ༩༠༡ལ་གླང་དར་མ་ཁྲི་འཁོད་ནས་མེ་སྟག་ལོ༩༠༦་འདས་པར། རྒྱལ་ཀུན་གསང་བའི་བདག་པོའི་རྣམ་འཕྲུལ་ལྷ་ལུང་དཔལ་གྱི་རྡོ་རྗེས་བསྟན་དོན་དུ་བགྲོངས་ཏེ་གནས་གཞི་འདིར་བྲོས་བྱོལ་དུ་ཕེབས་པ་ནས་ད་ལྟའི་བར་དུ་ལོ་ངོ་ཆིག་སྟོང་ལྷག་གི་ལོ་རྒྱུས་ལྡན་ཞིང་། ས་སྐྱ་གོང་མ་རྣམ་ལྔའི་ནང་ཚན་དམར་བོ་རྣམ་གཉིས་དངོས་ཕེབས་ཀྱིས་འབུམ་ཁང་མཆོད་རྟེན་བཞེངས་པ་དང་། རབ་གནས་མཛད་པ། གཞན་ཡང་གསང་སྔགས་རྙིང་མའི་རིང་ལུགས་འཛིན་པའི་ལྕང་ལོ་ཅན་དང་འཇམ་མགོན་རྒྱལ་བའི་དབང་བོའི་རྗེས་སུ་འཇུག་པའི་ཞྭ་སེར་ཅོད་པན་འཆང་བ་སོགས་ཀྱི་མཁས་གྲུབ་གནམ་གྱིས་ས་བཀབ་པ་ལྟ་བུ་སྒྲུབ་པའི་དགའ་ཚལ་འདིར་རིམ་གྱིས་བྱོན་ཏེ་སྒོམ་སྒྲུབ་རྣལ་འབྱོར་གྱི་རྟོགས་པ་ཀློང་དུ་བརྡོལ་བའི་བྱིན་རླབས་ཀྱི་དྲི་མ་ཡལ་བ་འདི་ཉིད། རབ་རྒྱལ་བགྲང་བྱ་སོ་གཉིས་པ་སྤྱི་ལོ༡༩༥༨ལོར་གོད་ཆག་ཉམས་རྒུད་བསྟན་པ་དང་འགྲོ་བ་ཡོངས་ཀྱི་ཐོག་ཏུ་བསམ་བརྗོད་ལས་འདས་པར་བྱུང་བ་དང་མཚུངས་སྒྲུབ་པའི་དགའ་ཚལ་འདིའི་རྟེན་གསུམ་མཆོད་ཆ་སོགས་ཡོད་རྒུ་ཇི་སྙེད་དབང་གཞུའི་རི་མོ་ཡལ་བ་བཞིན་གྱུར་པ་ནི། ལས་འབྲས་ཀྱི་བླང་དོར་གོ་ལྡོག་ཏུ་སྤྱོད་ཐལ་དྲགས་པའི་དབང་གིས། ལས་འབྲས་ཀྱི་རྣམ་པར་སྨིན་པ་ནི། ས་ལ་མི་སྨིན། རྡོ་ལ་མི་སྨིན། ཆུ་ལ་མི་སྨིན། ཟིན་པའི་ཕུང་བོ་འབའ་ཞིག་ལ་སྨིན་ཞེས་གཉིས་མེད་གསུང་བའི་བཀའ་ལས་འབྱུང་བ་ལྟར་དང་། ལེ་ལན་ཐམས་ཅད་གཅིག་ལ་གདའ་ཞེས་པ་ལྟར། ལེ་ལན་གཞན་ལ་འགེལ་ས་མེད་པར་རང་གིས་ལས་ངན་བསགས་པའི་འབྲས་བུ་རང་གིས་མྱོང་བ་སྟེ། གཙོ་བོ་སྤྱི་མཐུན་གྱི་ལས་ཀྱི་དབང་དང་རང་རང་གི་འཕྲལ་གྱི་རྐྱེན་སྣ་ཚོགས་བསྒྲུབས་པ་ལས་བྱུང་བ་ཁོ་ནར་བསམ་མོད། རང་ཉིད་ཀྱིས་འབད་པ་དུ་མས་བསྒྲུབས་པའི་བསགས་ཤིང་བསྲུངས་པར་བྱས་པའི་ལོངས་སྤྱོད་ཀྱང་སུས་སྤྱོད་ཀྱི་གདེང་མི་རྙེད་པ། འགྲོ་བ་སེམས་ཅན་དག་གི་ཚེ་ནི་ཟག་བཅས་སུ་སྡུག་བསྔལ་ཞིང་། ལོངས་སྤྱོད་ཕུན་ཚོགས་མཐའ་དག་འདུས་བྱས་མི་རྟག་པའི་རྣམ་འགྱུར་རྒྱལ་གསུང་ཚད་མར་གྱུར་པས་གཏན་ལ་ཕབ་པ་མྱོང་ཐོག་ཏུ་བབ་པ་ན། གང་ལ་བལྟས་ཤིང་ཇི་ལྟར་བསམ་ན་ཡང་དཀོན་མཆོག་རིན་པོ་ཆེ་རྣམ་པ་གསུམ་ལས་སྐྱབས་རེ་ས་ཅི་ཡང་མེད་པ་དེ་ལྟའོ། །རྒྱལ་གསུང་རྒུད་པ་རྣམ་བཞིའི་ལམ་པོ་ཆེར། །སྣོད་བཅུད་སྡུག་བདེན་འཁོར་བའི་དངོས་པོ་ཀུན། །ཀུན་འབྱུང་ལས་ཉོན་སྒྱུ་མའི་ཁ་ལོ་བས། །དབང་མེད་འཇུག་པའི་ལས་འབྲས་སུ་ཡིས་བཤིག །ཅེས་ཀྱང་སྨྲའོ། །

མཆན། ༡.གནས་ཡིག་འདི་ནི་རོང་བོ་བློ་བཟང་སྙན་གྲགས་ཀྱིས་བརྩམས་པའི་མདོ་སྨད་གནས་ཆེན་རྨ་འགྲམ་རྡོ་རྗེ་བྲག་གི་ལོ་རྒྱུས་བཞུགས་སོ་ཞེས་པའི་དེབ་ཆུང་ལས་ཞལ་བཤུས་པའོ། །

༢.གནས་འདི་བཞུགས་པའི་ཡུལ་ནི་རྨ་ལྷོ་ཁུལ་གཅན་ཚ་རྫོང་མཁར་གྱི་བྱང་ཕྱོགས་རྨ་ཆུའི་འགྲམ་ཡིན།

༄༅། །ཐུགས་ཀྱི་ཡོན་ཏན་གནས་མཆོག་བསྟན་པ་ནི༔ བོད་ཀྱི་མདོ་ཁམས་ལྷོ་ཟླ་ཞེས་བྱ་རུ༔ འབུམ་ཞེས་བྱ་བ་བྲག་རི་སྣང་མཐའ་འདྲ༔ རི་ཡི་དབུས་སུ་རང་བྱུང་མཆོད་རྟེན་བཞུགས༔ པད་འབྱུང་ལོ་གསུམ་སྒྲུབ་གནས་དབང་ཕུག་དང༔ གྲུབ་རྟགས་མཚན་མ་སྐུ་གསུང་ཐུགས་རྟེན་བཞུགས༔ ཨོ་རྒྱན་སྒྲུབ་ཆུ་གཡུ་མཚོ་སྔོན་མོ་དང༔ མཚོ་ཡི་དབུས་སུ་རྡོ་ཡི་སྒྲོམ་ཆེན་ཡོད༔ གཡས་ཀྱི་བྲག་རི་ཨན་ཆུང་ནམ་མཁའ་རྫོང༔ རྒྱབ་ཀྱི་བྲག་རི་ཀླུ་བཙན་མི་ཟན་དང༔ གཡོན་རི་རྫོང་འཕྲང་མདུན་རི་ཧ་རི་ཞེས༔ ཀུན་ལ་ཨོ་རྒྱན་ང་ཡི་སྒྲུབ་ཕུག་རེ༔ དེ་རུ་མན་ངག་ཕྲན་གཏེར་ཉི་ཤུ་དང༔ ཤིན་ཏུ་གཅེས་པ་ཟབ་པའི་གཏེར་ཆེན་གསུམ༔ ཞེས་གསུངས་སོ། །

༄༅། །ཐུགས་ཀྱི་ཡོན་ཏན་གནས་ཞེས་བྱ་བ་ནི་ནང་ཆེན་སྨད་མཁའ་འགྲོ་འབུམ་རྫོང་། དྲུང་རྨ་སེ་བློ་གྲོས་རིན་ཆེན་གྱིས་གནས་སྒོ་ཐོག་མར་ཕྱེས། གནམ་ཆོས་དང་ཆགས་མེད་ཞབས་ཀྱིས་གནས་ཡིག་མཛད། གཏེར་ཆེན་ཉིད་ནས་འཁོར་བ་དོང་སྤྲུགས་པདྨ་གར་དབང་སོགས་གཏེར་ཁ་མང་པོ་དང་གནས་ཡིག་ཀྱང་བཞེས། དེའི་གཡས་རི་ཨན་ཆུང་ནམ་མཁའ་རྫོང་ནི་ད་ལྟ་སྤོ་རུ་ཟེར་བ་དེ་ཡིན་པར་གསུངས་སོ། །

༄༅། །བོད་ཡུལ་གནས་ཆེན་ཉེར་ལྔའི་ཐུགས་ཀྱི་ཡོན་ཏན་གྱི་གནས་མཆོག་འབུམ་རྫོང་གི་དཀར་ཆག་གསལ་བའི་སྒྲོན་མེ་ཞེས་བྱ་བ་བཞུགས་སོ༔ ཐུགས་ཀྱི་ཡོན་ཏན་རྩ་གསུམ་ཐམས་ཅད་ལ༔ གུས་པས་ཕྱག་འཚལ་དེ་དག་བཞུགས་པའི་གནས༔ འབུམ་རྫོང་གནས་ནི་མདོ་ཁམས་ཟླ་རྒྱུད་དུ༔ གཡང་གི་ཆུ་བོ་གཡོན་དུ་འབབ་པའི་གཡོན༔ མདོ་ཁམས་ཡུལ་དབུས་ཟལ་མོ་ཐོག་པའི་གནད༔ ཆུ་གསུམ་རྐང་གསུམ་འདུས་པ་ས་ཡི་གནད༔ ས་ཡི་དབྱིབས་རྣམས་རྒྱ་གར་ཡུལ་ལྟ་བུ༔ ལུང་ཕྲན་ཞིག་ལ་མདོ་ཁམས་མིང་དུ་གྲགས༔ དེ་ཡི་ཆུ་བོའི་སྐེད་དུ་གནས་དེ་ཆགས༔ བྲག་རི་རིན་ཆེན་འདྲ་བའི་གཡས་ལོགས་སུ༔ སྣང་བ་མཐའ་ཡས་སྐུ་ཡང་རང་བྱུང་བཞུགས༔ བྲག་རི་ཟང་ཐལ་རིན་ཆེན་གཞལ་ཡས་ཁང༔ ནང་དུ་བདེ་གཤེགས་ཞི་ཁྲོའི་ལྷ་ཚོགས་བཞུགས༔ གནས་ཀྱི་མདུན་ནང་གཡུ་མཚོ་སྔོན་མོ་ལ༔ མི་འགྱུར་རྡོ་ཡི་སྒྲོམ་ཆེན་དབུས་སུ་ཡོད༔ ལྷོ་ནུབ་སིནྡྷུའི་རྒྱ་མཚོ་ཆེན་པོ་དང༔ རང་བྱུང་བདུད་རྩིའི་མཚོ་ཡི་ཆ་ཤས་ཏེ༔ དབྱར་མི་རུལ་ལ་དགུན་མི་འཁྱགས་པའི་ཆུ༔ ཚད་པའི་ནད་བརྒྱ་འཇོམས་པའི་བདུད་རྩི་སྨན༔ དགུན་ཡང་མེ་ཏོག་འཁྲུངས་པའི་ངོ་མཚར་ཅན༔ བསྐོར་བ་གཅིག་གིས་དགེ་བ་འབུམ་དུ་འགྱུར༔ དེ་ཡི་གཡས་ནས་བརྩམས་ཏེ་བྲག་རི་རྣམས༔ ང་དང་གྲུབ་ཆེན་རྣམས་ཀྱི་གྲུབ་རྟགས་དང༔ སྐུ་གསུང་ཐུགས་ཀྱི་རང་བྱོན་མང་དུ་བཞུགས༔ སྤྱན་རས་གཟིགས་དང་འཇམ་དབྱངས་ཕྱག་རྡོར་དང༔ སྒྲོལ་མ་དཀར་སེར་དམར་སེར་མཐིང་ག་དང༔ སྟོན་པ་སངས་རྒྱས་སྣང་མཐའ་ཚེ་དཔག་མེད༔ མཁའ་འགྲོ་རིགས་ལྔ་མ་མགོན་ལྕམ་དྲལ་དང༔ ཁ་ས་རྤ་ཎི་འཁོར་བ་དོང་སྤྲུགས་སྐུ༔ བཅུ་གཅིག་ཞལ་དང་ཡིད་བཞིན་འཁོར་ལོ་དང༔ ཀུན་བཟང་རིགས་ལྔ་སེམས་དཔའ་སེམས་མ་དང༔ ཐུབ་པ་དྲུག་དང་སྒོ་བ་ཁྲོ་ཆེན་བཞི༔ རཏྣ་ཧེ་རུ་ཀ་དང་ཁྲོ་བོའི་ཚོགས༔ ཡིག་འབྲུ་ཨོཾ་ཨཱཿཧཱུྃ་དང་ཧྲཱིཿམང་པོ༔ འདི་ནི་ཐུགས་ཀྱི་ཡོན་ཏན་གནས་ཡིན་པས༔ ཐུགས་ཀྱི་རིགས་ཆེན་རིགས་ཆུང་མང་པོ་བཞུགས༔ ཡི་གེ་རྣམས་ཀྱང་ཧཱུྃ་དང་ཏྲཱྃ་ཡིག་འདྲ༔ མདུན་གྱི་རི་ལ་མཆོད་རྟེན་བརྒྱ་ཕྲག་དང༔ དབུས་ཀྱི་རི་ལ་ཆོས་སྐུའི་མཆོད་རྟེན་བཞུགས༔ ཨོ་རྒྱན་བདག་དང་གྲུབ་ཆེན་རྗེ་འབངས་ནི༔ གྲུབ་རྟགས་མཚན་མ་བྱུང་བའི་རྗེས་རྣམས་ནི༔ འབྱེད་པའི་སྐྱེས་བུ་མཁའ་འགྲོའི་ལུང་བསྟན་འབྱུང༔ སྔོན་གྱི་བག་ཆགས་སད་ནས་དྲན་པ་དང༔ དམ་གྲིབ་མཁའ་འགྲོའི་ཁྲུས་ཀྱིས་དག་པ་ན༔ ང་ཡི་རྗེས་ཞུགས་གྲུབ་རྟགས་ཐོན་པར་འགྱུར༔ དེ་ལ་དཔའ་བོ་མཁའ་འགྲོ་དངོས་བཞུགས་པའི༔ གཞན་ཡང་རང་བྱུང་རྟེན་མཆོག་བསམ་མི་ཁྱབ༔ བདེ་བ་ཅན་དང་དགའ་ལྡན་ལྷ་ཡི་ཡུལ༔ པོ་ཏ་ལ་དང་ཟངས་མདོག་དཔལ་གྱི་རི༔ གངས་རྒྱལ་ཏི་སེ་ཙཱ་རི་ཟམ་བུ་ལུང༔ ལ་ཕྱི་ཚ་བ་རོང་གི་ཁ་བ་དཀར༔ ལྷ་ས་བསམ་ཡས་གཡུ་རུ་ཁྲ་འབྲུག་སོགས༔ རྩ་གསུམ་ལྷ་ཚོགས་དངོས་སུ་བཞུགས་པ་ཡི༔ ཞིང་ཁམས་རྣམས་ཀྱི་བཀོད་པ་རང་བྱུང་བས༔ དེ་རྣམས་ཀུན་གྱི་བྱིན་རླབས་འདི་རུ་འདུས༔ ཁྱད་པར་མཁའ་ལ་སྤྱོད་པའི་མཁའ་འགྲོ་རྣམས༔ འབུམ་ཕྲག་འབུམ་ཕྲག་སྟག་གི་ལོ་ལ་འདུ༔ དེ་དུས་མཐུ་མྱུར་བཀའ་གཉན་བྱིན་རླབས་ཆེ༔ གནས་འདིར་ཕྱིན་ཚད་ངན་སོང་ལས་ཐར་ཞིང༔ མཆོད་པ་བྱས་ཚད་བསོད་ནམས་རྣམ་པར་འཕེལ༔ ཚེ་སྒྲུབ་ཚེ་འཕེལ་ནོར་སྒྲུབ་ལོངས་སྤྱོད་འཕེལ༔ ཚོགས་འཁོར་བྱས་ཚད་ཚོགས་གཉིས་ཡོངས་སུ་རྫོགས༔ སྒྲུབ་གནས་གཞན་དུ་ལོ་གཅིག་སྒྲུབ་པ་བས༔ གནས་མཆོག་འདི་རུ་ཉིན་གཅིག་སྒྲུབ་མཆོད་འཕགས༔ བསྐོར་བ་བཅུ་ཡི་དགེ་བ་འབུམ་བརྒྱར་འགྱུར༔ བསྐོར་བ་བརྒྱ་ཡིས་མཚམས་མེད་ལྔ་བྱང་ཞིང༔ གཞན་ཡང་གནས་འདི་འབྲེལ་གྲོལ་ཆེན་པོའོ༔ མ་འོངས་དུས་སུ་གནས་མཆོག་དེ་ཉིད་དུ༔ ནགས་ཚལ་རྒྱས་ཤིང་རོང་དུ་གྱུར་པ་ན༔ ཙཱ་རིའི་གནས་འགགས་སུ་ཡང་མི་ཕྱིན་ཚེ༔ ཙཱ་རིའི་གནས་མཆོག་དེ་རུ་འཕོས་པ་སྟེ༔ བྱིན་རླབས་ཐུགས་རྗེའི་མཐུ་དང་ལྡན་པ་ཡིན༔ སྐལ་བ་ལྡན་པ་རྣམས་ཀྱི་ཐུགས་ལ་ཕུར༔ སྐལ་མེད་ལོག་ལྟ་ཅན་གྱི་སྤྱོད་ཡུལ་མིན༔ མ་འོངས་དུས་སུ་གནས་སྒོ་འབྱེད་པའི་ཚེ༔ ཕྱི་ནང་གསང་བའི་ཚོགས་ཀྱི་འཁོར་ལོ་བསྐོར༔ བསང་དང་གསེར་སྐྱེམས་དམ་བདར་ལ་སོགས་བྱ༔ སྟག་ལོ་ཞྭ་དཀར་ཐོད་གྱོན་དར་དཀར་ཕྱར༔ སྤྱན་རས་གཟིགས་དང་པདྨ་བདག་ཉིད་ཀྱི༔ སྙིང་པོ་དབྱངས་སུ་ལེན་ཅིང་བསྟོད་པར་བྱ༔ སྐལ་ལྡན་ཟུར་བཟའ་མེ་ཏོག་སྒྲོན་ཁྱོད་ཀྱིས༔ ཤོག་བུ་མི་འཇིག་རྫས་དང་རྩི་ཡི་བྱུག༔ དཀར་ཆག་ཁྲོམ་གྱི་ཡི་གེ་དག་ཏུ་བྲིས༔ མ་འོངས་ཁྱོད་དང་ལྷ་སྲས་ཉིད་ཀྱིས་ནི༔ སྤྱོད་པའི་སྨོན་ལམ་ཐོབ་ལ་དབང་ཕུག་གི༔ སྦུག་ཏུ་རྡོ་ཆོལ་ཟླ་གམ་འོག་ཏུ་སྦོས༔ ཞེས་གསུངས་བཞིན་ཟུར་མཁར་བཟའ་བདག་གིས་མཆིམ་སྐྱ་བོའི་ཕོ་བྲང་དུ་ཡི་གེར་བྲིས་ཏེ་རྗེ་ཇོ་མོ་མཚོ་རྒྱལ་རིན་པོ་ཆེ་དང་ཨ་ཇོ་ལྷ་སྲས་ཁོ་མོ་དང་གསུམ་གྱིས་སྨོན་ལམ་དུ་མ་དང་བཅས་ཏེ་གཏེར་དུ་སྦས་པའོ༔ ས་མ་ཡ་རྒྱ་རྒྱ༔ ཞེས་ལྷ་སྲས་མུ་རུབ་བཙན་པོའི་རྣམ་འཕྲུལ་གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་མཆོག་གྱུར་བདེ་ཆེན་གླིང་པས། གནས་ཆེན་མཁའ་འགྲོ་འབུམ་རྫོང་གི་གུ་རུའི་སྒྲུབ་ཕུག་པདྨ་དབང་གི་དཀྱིལ་འཁོར་ནས་ཁྲོམ་གཏེར་དུ་སྤྱན་དྲངས་པའི་ཤོག་སེར་ལས། གནས་དེ་ཉིད་དུ་ལེགས་པར་ཕབ་པའི་ཡི་གེ་པ་ནི་སྔགས་བཙུན་པྲཛྙཱ་དྷྭ་ཛའོ། །

མཆན། གཏེར་ཆེན་མཆོག་འགྱུར་གླིང་པའི་བཀའ་འབུམ་ལ་པོད་ནས་ཞལ་བཤུས་པའོ། །

༄༅། །གནས་མཆོག་འབུམ་རྫོང་གི་གནས་ཡིག་དགོངས་པ་ཟུང་འབྲེལ་བཅས་བཞུགས་སོ། །གནས་འདིར་འབྲེལ་ཚད་སྐལ་བ་བཟང་པོར་འགྱུར། །བསླུ་བ་མེད་པ་རྒྱལ་བའི་བཀའ་ཡིན་ནོ། །

༄༅། །ཨོཾ་སྭ་སྟི། མཆོག་དམན་ཀུན་གྱི་དགོངས་བཞུགས་ལ། གནས་མཆོག་འབུམ་རྫོང་འདིར། ཕུན་སུམ་ཚོགས་པ་ལྔ་ཡི་གཞི་བཟུང་སྟེ། འཆི་མེད་སྨན་གྱི་སྒྲུབ་པ་བགྱིས་པའི་སྐབས་འདིར། རྟེན་དང་བརྟེན་པར་བཅས་པ་འདི་དག་འོག་མིན་པདྨ་དྲ་བའི་ཞིང་ཁམས་དང་ཆེས་མཚུངས་ཤིང་། གནས་ཀྱི་ཕན་ཡོན་བསམ་གྱིས་མི་ཁྱབ་པ་བརྗོད་ཀྱིས་མི་ལངས་ཞིང་། སྨན་སྒྲུབ་ཁོ་ནའི་ནུས་པས་ཀྱང་། སློབ་དཔོན་ཆེན་པོས། འདི་ཉིད་སྒྲུབ་པའི་གནས་འདི་ཡང༔ དུར་ཁྲོད་བསིལ་བ་ཚལ་དང་མཚུངས༔ དཔའ་བོ་མཁའ་འགྲོ་ཐམས་ཅད་འདུ༔ ས་ཕྱོགས་བྱིན་དང་ལྡན་པར་འགྱུར༔ ཆར་ཆུ་འབེབས་ཤིང་ལོ་ཕྱུགས་ལེགས༔ གང་བསྒྲུབ་པ་ཡི་གནས་འདི་རུ༔ སུ་བསྡད་མི་རྣམས་ཏིང་འཛིན་འཆར༔ ནམ་ཞིག་ཚེ་ཡི་དུས་བྱས་ཚེ༔ ཕོ་མོ་བཟང་ངན་མེད་པ་རུ༔ རིག་པ་འཛིན་པའི་ས་ལ་གནས༔ ཞེས་གསུངས་པ་ལྟར། དོན་དུ་དཔལ་ཧེ་རུ་ཀ་ཡི་གནས་སམ། འཐུང་སྤྱོད་ཙཱ་རི་ཏྲ་དང་མཚུངས་པས། ཀུན་ནས་ཉིན་མཚན་མེད་པར། དད་བརྩོན་ཆེན་པོའི་ཕྱག་དང་བསྐོར་བ་མཆོད་འབུལ་སོགས་བགྱིས་པས། གནས་སྐབས་དང་མཐར་ཐུག་ཀུན་ཏུ་ཡོངས་སུ་དགེ་ཞིང་ཤིས་པས་ཀུན་ནས་ངེས་པར་གྱིས། ཞེས་རི་བོ་ཆེ་ཡི་མཆོག་སྤྲུལ་རྣམ་གཉིས་ཀྱི་བཀའ་ལྟར་མཆོག་གྱུར་གླིང་པས་ཨེ་ཝཾ་ཆོས་སྒར་ནས་བྲིས།

༈ ན་མོ་གུ་རུ། དེང་སྟག་གི་ལོ་འདིར་མཁའ་འགྲོ་འབུམ་རྫོང་འདིར། གནས་ཉི་ཤུ་རྩ་བཞི། ཡུལ་སུམ་ཅུ་སོ་གཉིས་སུ་བཞུགས་པའི་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་བཞུགས་པས། མཚམས་སྒྲུབ་ཕྱག་བསྐོར་རྣམས་འགྱུར་ཤིན་ཏུ་ཆེ་སྟེ། དཀྱིལ་འཁོར་འབུམ་ཕྲག་བཞུགས་པ་ཡི། །གནས་སྲུང་མཁའ་འགྲོ་འབུམ་ཕྲག་འདུ། །དགེ་བ་གང་བྱས་འབུམ་དུ་འགྱུར། །སྟག་ལོ་སྟག་གི་ཟླ་བ་ལ། །གནས་མཆོག་འབུམ་གྱི་འདུ་བ་འདུས། །དགེ་བ་འབུམ་ཕྲག་འབུམ་དུ་འགྱུར། །འབུམ་འགྱུར་ཟླ་བའི་དེ་ཉིད་ལ། །དུང་ཕྱུར་འབུམ་ཕྲག་འབུམ་དུ་འགྱུར། །འདི་ལས་དགེ་བ་སྟོབས་ཆེ་བ། །གཞན་དུ་རྙེད་པར་མི་འགྱུར་རོ། །གལ་ཏེ་ཐེ་ཚོམ་ཡོད་གྱུར་ན། །སངས་རྒྱས་རིང་བསྲེལ་རེ་ཡོད་པའི། །ཅོང་ཞིའི་མཆོད་རྟེན་འབུམ་ཕྲག་བཞུགས། །ཡོད་མེད་སྒྲུབ་ཕུག་རྣམས་ནས་གསལ། །མཆོད་རྟེན་བསྐོར་བའི་ཕན་ཡོན་ནི། །རྒྱལ་པོ་གསལ་རྒྱལ་ཞུས་མདོར་ལྟོས། །སྔོན་ཚེ་གུ་རུ་པདྨ་ཡི། །སངས་རྒྱས་རིང་བསྲེལ་གཅིག་ལ་ནི། །གསོལ་བ་བཏབ་མཛད་འབུམ་ཕྲག་འཕེལ། །རི་བྲག་ལ་བཞུགས་བྱིན་རླབས་ཀྱིས། །མཆོད་རྟེན་རིང་བསྲེལ་ངོ་མཚར་རྣམས། །རིམ་པར་འབྱོན་པའི་གཏན་ཚིགས་ཡིན། །ང་ལ་བདེན་པར་འཛིན་རྣམས་ཀྱིས། །ལེགས་པར་སྤྲོ་བ་བསྐྱེད་བཞིན་པས། །གནས་མཆོག་བསྐོར་བ་བརྩོན་པར་གྱིས། །

༈ གནས་ནང་ནས་ཅོང་ཞི་ས་ལ་ལྷུང་བ་བྱིན་རྟེན་ཞུ་བ་མ་གཏོགས་རྡོས་བཀོག་པ་སོགས་མི་ཉན། མཆོད་རྟེན་རང་བྱོན་སོགས་བཤིགས་པའི་ཉེས་པ་འབྱུང་ཉེན་ཆེ། དེང་སང་གནས་རི་ལ་ཕན་ཡོན་ཡོད་མེད་ཀྱི་ཐེ་ཚོམ་ཡོད་པ་འགའ་སྲིད་མོད། དེ་ལྟར་བྱེད་མི་རིག་སྟེ་ས་རྡོ་རྣམས་ལ་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྔགས་དང་ཕྱག་རྒྱས་བྱིན་གྱིས་བརླབས་པར་མཛད་ནས་མཆོད་རྟེན་དང་སཱཙྪ་ཞེས་མཚན་དུ་གསོལ་བ་ཕྱག་དང་མཆོད་པའི་གནས་སུ་གྱུར་པ་དེ་བཞིན་གུ་རུ་པདྨ་འབྱུང་གནས་སོགས་སངས་རྒྱས་དང་བྱང་ཆུབ་སེམས་དཔའ་གྲུབ་པ་ཐོབ་པའི་ཚུལ་དུ་བྱོན་པ་རྣམས་ཀྱིས་ས་རྡོ་རི་བྲག་རྣམས་སྔགས་དང་ཕྱག་རྒྱ་ཏིང་ངེ་འཛིན་གྱིས་བྱིན་གྱིས་བརླབས་པ་དེའི་རྟགས་སུ་ཡིག་འབྲུ་སྐུ་གཟུགས་ཕྱག་མཚན་མངོན་སུམ་མཐོང་རྒྱུ་ཡོད་པ་དེ་བཞིན་ལ་ཡིད་ཆེས་བསྐྱེད་དགོས་ཏེ། དེ་ལྟར་ཐུན་མོང་ལུང་རིགས་ཀྱིས་གྲུབ་པ་ཡིན་གྱིས། དེ་ལས་ཀྱང་ཁྱད་པར་འཕགས་པའི་བསྒྲུབ་གཞི་དུ་མ་ཡོད་ཀྱང་རེ་ཞིག་དེ་ཙམ་གྱིས་ཆོག །བུམ་པ་དང་བང་རིམ་ཡོད་པ་ཞིག་ལ་མཆོད་རྟེན་དངོས་དང་། དེ་ལྟར་མེད་པ་ལ་མཆོད་རྟེན་མ་ཡིན་པ་མིན་ཏེ། འཇང་ཏཱ་ལར་སངས་རྒྱས་འོད་སྲུང་གི་མཆོད་རྟེན་ལ་དབྱིབས་ཐིག་ཤིང་བསླང་བ་ལྟ་བུར་ཡོད། བཟོ་དབྱིབས་བཀོད་པ་ངོ་མཚར་བ་མཐོང་རྒྱུ་ཡོད་པའི་རྒྱུ་མཚན་མེད་དེ། ཉན་ཐོས་རྣམས་ཀྱིས་ས་ཕུང་ཞིག་ཏུ་མཐོང་བ་དང་། སངས་རྒྱས་ཀྱིས་ཤེལ་གྱི་མཆོད་རྟེན་དཔག་ཚད་དུ་མར་ཡོད་པ་གཟིགས་པ་གསང་བ་རིང་བསྲེལ་གྱི་ལོ་རྒྱུས་སུ་གསལ་བ་བཞིན་ནོ། །སྐུ་གསུང་ཐུགས་རྟེན་གནས་རི་རྣམས་ལ་མེད་པ་མ་ཡིན་མ་མཐོང་བ་ཡིན། གནས་སོ་སོར་ལོ་དུས་མི་འདྲ་བར་གནས་སྒོ་བྱེ་བ་དང་། གནས་འདུས་འབྱུང་བ་འདི་ཡང་། སངས་རྒྱས་དང་བྱང་ཆུབ་སེམས་དཔའི་སྤྲུལ་པ་སྔོན་གྱི་སྐྱེས་ཆེན་རྣམས་ཀྱིས་སོ་སོའི་སྨོན་ལམ་གྱི་སྟོབས་ཡིན། བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་སྟོབས་མི་འདྲ་བའི་ཁྱད་ཆོས་ཕན་ཡོན་བསམ་གྱིས་མི་ཁྱབ་པ་གསུང་རབ་རྣམས་སུ་འབྱུང་བས་སོ། །གཞན་དུ་ལོ་གཅིག་བསྒྲུབ་པ་ལས། འདིར་ཞག་གཅིག་བསྒྲུབ་པ་འགྲུབ་སླ། གནས་ཉེར་བཞིར་རིག་སྔགས་ལོ་སྒྲུབ་དགོས་པ་རྣམས་ཐེངས་གཅིག་འགྲུབ་པར་ཡོད། གཞན་ཡང་ཚོགས་མཆོད་མར་མེ་ཡོན་ཆབ་ཕྱག་དང་བསྐོར་བ་རྣམས་ཡིད་ཆེས་པའི་སྒོ་ནས་བྱའོ། །རི་དྭགས་གསོད་པ་སོགས་སྡིག་པའི་ལས་བགྱིས་ན་ཉེས་པ་ལྷག་པར་ཆེ་བས་བག་ཡོད་པར་གྱིས། སྡོམ་པ་དང་དམ་ཚིག་ཆག་ཉམས་རྣམས་འདིར་བཤགས་སླ། དངོས་གྲུབ་གང་འདོད་ཐེ་ཚོམ་མེད་པར་གསོལ་བ་བཏབ་ན་འགྲུབ་བོ། །

ཞེས་པ་མཆོག་གྱུར་བདེ་ཆེན་གླིང་པ་རང་ལོ་སོ་བརྒྱད་པ་མེ་སྟག་འབུམ་འགྱུར་ཟླ་ཚེས་ལ་བསྐོར་བ་དང་ཚོགས་མཆོད་བགྱིས་པའི་སྐབས་སུ་ཡིད་ཆེས་ཐོབ་པའི་གཏན་ཚིགས་མཐོང་ནས་ཚ་གྲོ་ཁ་རྣམས་སུ་བྲིས་ཤིང་ཚེ་ཆུ་ཁར་ལེགས་པར་གྲུབ་པའི་དགེ་བས་མཐའ་ཡས་འགྲོ་བ་སངས་རྒྱས་ཐོབ་པའི་རྒྱུར་གྱུར་ཅིག

མཆན། གནས་ཡིག་འདི་གཏེར་ཆེན་མཆོག་འགྱུར་གླིང་པའི་བཀའ་འབུམ་ཇི་པོད་ནས་ཞལ་བཤུས་པའོ། །

༄༅། །ན་མོ་གུ་རུ་དེ་ཝ་ཌཱཀི་ནཱི་ཡེ། འབུམ་རྫོང་ཆོས་ཀྱི་ཕོ་བྲང་གི་གནས་ཀྱི་ལོ་རྒྱུས་ལ་ས་བཅད་གསུམ་ལས། དང་པོ་གནས་ཀྱི་འབྱུང་ཁུངས། བར་དུ་གནས་བྱིན་གྱིས་བརླབས་ཚུལ། ཐ་མ་གནས་སྒོ་ཕྱེ་ལུགས་དང་ཕན་ཡོན་བཤད་པའོ། །བསྐལ་པ་འདི་ཆགས་ནས་སྲིད་པའི་མེས་པོ་ལྷ་དབང་ཕྱུག་ཆེན་པོ་ཡབ་ཡུམ་གྱིས། དྲག་པོ་འཇིགས་བྱེད་ཉི་ཤུ་རྩ་བཞིར་སྤྲུལ་ནས། ཡུལ་ཉི་ཤུ་རྩ་བཞི་གནས་ཆེན་པོ་སུམ་ཅུ་རྩ་གཉིས་དང་། དེ་ལས་འཕྲོས་པའི་གནས་ཕྲན་ཐམས་ཅད་བདག་ཏུ་བཟུང་། དེ་ལ་འཁོར་ལྷ་མ་སྲིན་དཔག་ཏུ་མེད་པས་བསྐོར་ནས་སེམས་ཅན་ལ་གནོད་འཚེ་བྱེད་དོ། །དེའི་ཚེ་དབང་ཕྱུག་ཡབ་ཡུམ་གྱིས་བདག་ཏུ་བཟུང་བའི་ཕྱིར། འདིར་དབང་ཕྱུག་ཡབ་ཡུམ་གྱི་གསང་གནས་ཁ་སྤྲོད་བྱང་སེམས་བབས་པའི་ཤུལ་ཡང་ཡོད། དེ་ཡི་དུས་ན་འོག་མིན་སྡུག་པོ་བཀོད་པའི་ཞིང་ཁམས་ནས། སངས་རྒྱས་རྣམ་པར་སྣང་མཛད་ཀྱིས་བཅོམ་ལྡན་འདས་འཁོར་ལོ་བདེ་མཆོག་ཏུ་སྤྲུལ་ཡུམ་རྡོ་རྗེ་དབྱིངས་ཕྱུག་མ་ཕག་མོར་སྤྲུལ། བྱང་ཆུབ་སེམས་དཔའ་ཉི་ཤུ་རྩ་བཞི་དཔའ་བོ་ཉི་ཤུ་རྩ་བཞིར་སྤྲུལ། བྱང་ཆུབ་སེམས་མ་ཉི་ཤུ་རྩ་བཞི་དཔའ་མོ་ཉི་ཤུ་རྩ་བཞིར་སྤྲུལ་ནས། འཛམ་བུ་གླིང་འདིར་བྱོན་ཏེ། དབང་ཕྱུག་གི་སྤྲུལ་པ་ཇི་ཙམ་ཡོད་པའི་གྲངས་དང་མཉམ་པའི་བདེ་མཆོག་ཡབ་ཡུམ་དུ་སྤྲུལ་ནས། དབང་ཕྱུག་ཡབ་ཡུམ་ཞབས་འོག་ཏུ་མནན་ནས་དམ་ལ་བཏགས། དབང་ཕྱུག་ཡབ་ཡུམ་གྱིས་གནས་ཐམས་ཅད་བདེ་མཆོག་ཡབ་ཡུམ་ལ་ཕུལ་ནས་བདེ་མཆོག་ཡབ་ཡུམ་གྱིས་གནས་སུ་བྱིན་གྱིས་བརླབས་པས། གནས་འདིར་ཡང་བདེ་མཆོག་ཡབ་ཡུམ་གྱི་སྐུ་རང་བྱོན་ཡོད་དོ། །དེ་ནས་སངས་རྒྱས་འོད་སྲུང་གི་བསྟན་པ་ནུབ་ནས་སངས་རྒྱས་ཤཱཀྱ་ཐུབ་པའི་བསྟན་པ་མ་བྱུང་གི་བར་དུ་དེར་བདུད་ཕོ་མ་ཏྲཾ་རུ་ཏྲས་འཇིག་རྟེན་གྱི་ལྷ་འདྲེ་ཐམས་ཅད་དབང་དུ་བསྡུས་ཏེ། བདུད་དམག་བྱེ་བ་འཁོར་དང་བཅས་ནས་ལྷ་མི་ལ་སོགས་པའི་སྲོག་ཆགས་ཐམས་ཅད་ལ་གནོད་པ་བྱེད་དོ། །དེའི་ཚེ་དཔལ་རྟ་མགྲིན་ཡབ་ཡུམ་གྱིས་བདུད་རུ་ཏྲ་ཐར་པ་ནག་པོ་དམ་ལ་བཏགས། དེའི་ཚེ་དབང་ཕྱུག་ཉི་ཤུ་རྩ་བརྒྱད་ཀྱིས་གནས་ཉི་ཤུ་རྩ་བརྒྱད་ཕུལ། ལྷ་ཨ་འཁྲོ་རྒྱལ་པོའི་གནས་འདི་རྟ་མགྲིན་ཡབ་ཡུམ་ལ་ཕུལ། དེར་གནས་བདུད་སྲིན་མོ་སྐྲ་ཡི་རལ་པ་ཅན་ཞེས་བྱ་བ་འདིར་གནས་པ་ལ། སྲིན་མོ་དེ་བསྒྲལ་ནས་གནས་འདི་རྟ་མགྲིན་ཡབ་ཡུམ་གྱི་གནས་སུ་བྱིན་གྱིས་བརླབས་པས། ཕུག་པ་ཟླ་གམ་དམར་པོ་རྟ་མགྲིན་དབང་གི་གནས་དང་། རྟ་མགྲིན་ཡབ་ཡུམ་གྱི་བྱང་སེམས་དང་། སྲིན་མོ་བསྒྲལ་བའི་ཐོད་པ་རྣམས་ཡོད་དོ། །དེ་ནས་བཅོམ་ལྡན་འདས་ཤཱཀྱ་ཐུབ་པ་མྱ་ངན་ལས་འདའ་ཁར་བྱང་ཆུབ་སེམས་དཔའ་སྤྱན་རས་གཟིགས་བྱོན་ནས་ད་དུང་ཁ་བ་ཅན་ཞབས་ཀྱིས་མ་བཅགས་པས་མྱ་ངན་ལས་མི་འདའ་བར་བོད་ཀྱི་དོན་མཛད་པར་ཞུས་པས། བཅོམ་ལྡན་འདས་ཀྱིས་བཀའ་སྩལ་པ། ང་ནི་གདུལ་བྱ་རྫོགས་པས། མྱ་ངན་ལས་འདའོ། །བོད་ཁ་བ་ཅན་འདི་བྱང་ཆུབ་སེམས་དཔའ་ཁྱོད་ཀྱི་གདུལ་བྱ་ཡིན་པས་ཐུལ་ཅིག་གསུངས་ནས། བཅོམ་ལྡན་འདས་ཀྱི་ཞལ་ནས་འོད་ཟེར་ཁ་དོག་སྣ་ཚོགས་འཇའ་ཚོན་ལྟ་བུར་འཕྲོས་ཏེ་བོད་ཡུལ་དུ་སོང་ནས་འོད་དེ་གར་ཐིམ་པ་རྣམས་སུ་རང་བྱོན་དང་གནས་རྣམས་བྱུང་སྟེ། གནས་འདིར་ཡང་སངས་རྒྱས་ཀྱིས་འོད་ཟེར་ཕོག་པས་སངས་རྒྱས་རྡོ་རྗེ་སེམས་དཔའི་སྐུ་རང་བྱོན་དང་། མཁའ་འགྲོའི་འཇའ་ལམ། དབྱངས་གསལ་གྱི་ཡི་གེ་རྣམས་ཡོད་དོ། །དེ་ནས་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་ལྷོ་ཕྱོགས་རི་བོ་གྲུ་འཛིན་གྱི་རྩེ་ནས་བོད་ཁ་བ་ཅན་ལ་གཟིགས་ཏེ། སྐུ་ལས་འོད་ཟེར་སྣ་ཚོགས་འཕྲོས་ནས་བོད་ཁ་བ་ཅན་གྱི་གནས་རྣམས་བྱིན་གྱིས་བརླབས་ནས། དེ་དུས་འོད་ཟེར་གང་དུ་ཐིམ་པ་རྣམས་རང་བྱོན་བྱུང་བས། གནས་འདིར་ཡང་དགྱེས་རྡོར་གྱི་སྐུ། ཕག་མོའི་ཞལ་གཟུགས་དང་གསང་བ་ལ་སོགས་པ་རང་བྱོན་མང་པོ་དང་། ཐུགས་རྗེ་ཆེན་པོའི་གསུང་སྤྲུལ་དམ་པ་རྒྱ་གར་གྱི་སྐུ་དང་། སྒྲོལ་མའི་སྤྲུལ་པ་མ་ཅིག་ལབ་སྒྲོན་གྱི་སྐུ་རང་བྱོན་ཡོད་དོ། །

སྤྱིར་དབང་ཕྱུག་ཡབ་ཡུམ་གྱི་གནས་བདེ་མཆོག་ཡབ་ཡུམ་གྱི་གནས་སུ་བྱིན་གྱིས་བརླབས་པ་ཡང་། ས་འོག་སྤྱོད་སྐུའི་དབང་དུ་བྱས་ནས་སྤང་རིའི་ནང་དུ་འཛུལ་ས་ཡོད་པས། ས་འོག་སྤྱོད་སྐུའི་འཁོར་ལོའི་གནས་ཡིན་ཏེ། དཔའ་བོ་མཁའ་འགྲོའི་སྐུ་རང་བྱོན་མང་དུ་ཡོད་དོ། །ཁྱད་པར་ས་འོག་ནས་བྲག་རྒྱུད་འབྲེལ་ནི་ཡོད་པས། ས་འོག་སྤྱོད་པའི་དཔའ་བོ་ཌཱཀི་རྣམས་རྒྱུ་བའི་ལམ་ཡོད་པའི་ཕྱིར། བོད་ཀྱི་རི་བོ་རྩེ་ལྔ། བྱང་ནཱ་ལེནྡྲའི་རྒྱབ་རི་དང་། དབུས་རི་དྲང་སྲོང་སྲིན་པོ་རི་ནས་མཆིམས་ཕུ་ཀུན་བཟང་ནགས་ཁྲོད། ཟངས་རི་མཁར་དམར་ནས་རི་རྒྱུད་རྒྱ་ལ་རྩེ་བདུན། དེ་ནས་མདོ་ཁམས་ཟལ་མོ་སྒང་ནས། རྒྱ་ནག་རི་བོ་རྩེ་ལྔའི་བར་འབྲེལ་ནས་ཡོད་པ་གྲུབ་ཐོབ་ཐང་སྟོང་རྒྱལ་པོས་གསུངས་པ་ལྟར། འདི་ཡང་རྒྱ་ནག་རི་བོ་རྩེ་ལྔའི་གནས་ལག་འཇམ་དབྱངས་ཀྱི་གནས་ཀྱང་ཡིན་པས། འཇམ་དབྱངས་ཀྱི་རལ་གྲི་པུ་ཏིའི་རྗེས་དང་། མ་ཧཱ་གསེར་གྱི་རུས་སྦལ་ཡོད་དོ། །ས་སྤྱོད་གསུང་གི་འཁོར་ལོའི་གནས་ནི། ས་ཡི་སྟེང་དུ་ཡོད་པའི་གནས་ཏེ། དཔལ་ཙཱ་རི་ཏྲ་རང་བྱུང་གི་མཆོད་རྟེན་གྱི་ཕྱོགས་མཚམས་བརྒྱད་དུ་གནས་བརྒྱད་ཡོད་པར་བཤད་པའི་རྫ་རྒྱལ་གོ་བོ་ཁྱུང་ཕུག་ཙཱ་རིའི་ཤར་སྒོའི་གནས། འབུམ་རྫོང་ཆོས་ཀྱི་ཕོ་བྲང་ཙཱ་རིའི་བྱང་ཤར་གྱི་གནས་ལག་ཡིན་པས། སིནྡྷུ་ར་རིགས་ལྔ། མཆོད་པ་རྣམ་པ་ལྔ་སོགས་ས་སྟེང་དུ་ཡོད་དོ། །མཁའ་སྤྱོད་ཐུགས་ཀྱི་འཁོར་ལོའི་གནས་ནི། གནས་བཟང་པོ་འདི་དག་གི་ཐད་ཀྱི་ནམ་མཁའ་ལ། ཕལ་པས་མི་མཐོང་བའི་སངས་རྒྱས་བྱང་སེམས་དཔའ་བོ་མཁའ་འགྲོ་སྤྲིན་གྱི་ཕུང་པོ་ལྟ་བུར་དུས་རྟག་ཏུ་བཞུགས་པས་བསྐོར་བ་བྱས་པས་ཕན་ཡོན་ཆེའོ། །དེ་ཡན་ཆད་སྤྱིར་གནས་ཐམས་ཅད་དང་། ཁྱད་པར་གནས་འདི་ཡི་བྱུང་ཁུངས་ལགས་སོ། །

༈དེ་ནས་དོན་གཉིས་པ་གནས་བྱིན་གྱིས་བརླབས་ལུགས་ནི། ཨོ་རྒྱན་རིན་པོ་ཆེ་བོད་དུ་ཕེབས་ནས་ས་གཞི་རྟ་རྨིག་ཙམ་མ་ལུས་པ་ཞབས་ཀྱིས་བཅགས་ནས། ཁྱད་པར་བོད་ཁ་བ་ཅན་གྱི་རྒྱལ་ཁམས་སུ། ཕྱོགས་བཞི་སྦས་པའི་ཡུལ་ཆེན་པོ་བཞི། མཚམས་བཞིར་ལུང་ཕྲན་ཆེན་པོ་བཞི། གངས་ཆེན་པོ་ཉི་ཤུ་རྩ་གཅིག་དང་། སྒྲུབ་གནས་ཆེན་པོ་བརྒྱ་དང་རྩ་བརྒྱད་ལ་སོགས་པ་རྣམས་སུ། སྒྲུབ་པ་མཛད་ནས་གནས་བྱིན་གྱིས་བརླབས་པའི་དུས་སུ། གནས་འདིར་ཡང་ཨོ་རྒྱན་རིན་པོ་ཆེས་སྒྲུབ་གནས་སུ་བྱིན་གྱིས་བརླབས་ཤིང་། ཤེར་ཕྱིན་སྟོང་ཕྲག་བརྒྱ་པ་ཤོ་ལོ་ཀ་འབུམ་ཡོད་པ། མཁའ་འགྲོའི་བརྡ་ཡིག་ཏུ་བྲིས་ནས་གཏེར་དུ་སྦས་པས་འབུམ་རྫོང་དུ་གྲགས་སོ། །གནས་ཀྱི་བཀའ་སྲུང་རཱ་ཧུ་ལ་བསྐོས་པས་གཟའ་ཡི་སྐུ་རང་བྱོན་ཡོད། གཞན་ཡང་ཨོ་རྒྱན་རིན་པོ་ཆེ་ཡབ་ཡུམ་གྱི་ཕྱག་ཞབས་ཀྱི་རྗེས་དང་། རྗེ་འབངས་སངས་རྒྱས་ཡེ་ཤེས་ཀྱི་ཞབས་རྗེས་སོགས་ཡོད་དོ། །དེ་ནས་ཨོ་རྒྱན་རིན་པོ་ཆེའི་ཡེ་ཤེས་ཀྱི་མགོན་པོ་བྱ་རོག་གདོང་དང་། མ་མོ་ཨེ་ཀ་ཛ་ཊི་དང་། གཟའ་རཱ་ཧུ་ལ་གདོང་མོ་མཆེད་བཞི་དང་བཅས་པ་བཀའ་སྲུང་དུ་བསྐོས་ནས་བཞག་པས། སུ་ཡིན་གྱི་གནས་སྒོ་འབྱེད་པའི་དབང་མེད་དོ། །བསྟན་པ་ཕྱི་དར་གྱི་སྐབས་སུ་རྗེ་ཏཻ་ལོ་སངས་རྒྱས་ཀྱི་རྣམ་འཕྲུལ་དྲུང་རྨ་སེ་རིན་པོ་ཆེའི་གནས་འདི་བྱིན་རླབས་ཆེ་བར་དགོངས་ནས་ཡུན་རིང་པོར་སྒྲུབ་པ་མཛད་པས་མཆོག་དང་ཐུན་མོང་གི་དངོས་གྲུབ་ཐམས་ཅད་ཐོབ་སྟེ་དབེན་གནས་འབུམ་རྫོང་དུ་གྲགས་པ་ངོ་མཚར་དེ་ཡན་ནི་གནས་བྱིན་གྱིས་བརླབས་ཚུལ་ལོ། །

༈ གསུམ་པ་གནས་སྒོ་ཕྱེ་ལུགས་དང་ཕན་ཡོན་ནི། པདྨ་བཀའ་ཐང་འབྲིང་པོ་དང་། རྒྱལ་པོ་བཀའ་ཡི་ཐང་ཡིག་དང་། རཏྣ་གླིང་པ་དང་། བདུད་འདུལ་རྡོ་རྗེ་སོགས། སྔོན་གྱི་གཏེར་ཁ་དུ་མ་ནས་ལུང་བསྟན་པ་ལྟར། ལོ་ཆེན་ཤུད་བུ་དཔལ་སེང་གི་སྐྱེས་མཐའ་རིག་འཛིན་མི་འགྱུར་རྡོ་རྗེ་བདུད་འདུལ་རོལ་པ་རྩལ་དགུང་ལོ་བཅུ་བཞི་པར་ས་ཕྱོགས་དེར་ཕེབས་དུས་རྨང་ལམ་དུ་གནས་འདི་ཡི་ཁ་བྱང་གི་ཡི་གེ་མཚལ་གྱིས་བྲིས་པ་གཅིག་ཕྱག་ཏུ་བྱུང་བར་བརྟེན་ནས་གནས་སྒོ་ཕྱེས། གནས་ནང་དུ་ཨོ་རྒྱན་རིན་པོ་ཆེའི་ཕྱག་ཏུ་གསེར་གྱི་སྒྲོམ་བུའི་ཕྱོགས་བཞིར་འཇའ་གོར་ནང་དུ་ཞལ་གདམས་ལུང་བྱང་གི་ཡི་གེ་ཡོད་པ་རྣམས་ཞལ་གཟིགས། དེ་མ་ཐག་ཨོ་རྒྱན་རིན་པོ་ཆེ་རྩ་བ་གསུམ་གྱི་ལྷ་ཚོགས་དཔག་ཏུ་མེད་པ་གནས་འགྱུར་བར་གཟིགས་པ་ལ་བརྟེན་ནས། རང་བྱོན་རྣམས་འདི་ཡིན་ནོ་ཞེས། ཕྱི་ནང་གི་གནས་ཡིག་ཐམས་ཅད་ཐུགས་ལ་བཀྲ་ལམ་མེར་བྱུང་ནས་མི་རྣམས་ལ་ངོ་སྤྲད་པར་མཛད་དོ། །དེ་ཡང་གནས་འདི་གཉན་པས་དམ་ཚིག་ཅན་ལ་མཆོག་ཐུན་མོང་གི་དངོས་གྲུབ་ཐོབ། དད་པ་ཅན་གྱིས་མཇལ་ན་སྒྲིབ་པ་དག དད་པ་མེད་པ་དང་ལོག་ལྟ་ཅན་དམ་ཉམས་ཀྱིས་མཇལ་ན་དུག་ཏུ་འགྱུར་ཏེ་འབྱུང་དོགས་ཡོད་པས་གནས་ནང་དུ་འགྲོ་ཁ་དད་པ་བྱེད་པ་གལ་ཆེའོ། །དད་པ་ཡོད་ཀྱང་རང་བྱོན་རྣམས་བཀོག་ནས་མ་ཁྱེར། བཀའ་སྲུང་གཟའི་ར་མདའ་འོང་དོགས་ཡོད། དེ་ཡང་གནས་འདི་ལ་ཡོད་ལུགས་ཀྱི་གནས་ཡིག་རྒྱས་པ་ནི་འདི་ལྟ་སྟེ། གཡས་རི་གསེར་ཕྲེང་འཐེན་པ་འདྲ། །གཡོན་རི་རྒྱལ་མཚན་ཕྱར་བ་འདྲ། །མདུན་རི་ཕྱག་གི་སོར་ཀ་འདྲ། །རྒྱབ་རི་བསིལ་ཡབ་བཀྲམ་པ་འདྲ། །ཁ་དོག་ལྔ་ནི་རིགས་སྡེ་ལྔ། །འབྱུང་བ་ལྔ་ཡབ་ཡུམ་ལྔའོ། །གཡས་ཕྱོགས་སུ་ཕྱིའི་སྒོ་སྲུང་གད་པ་དུག་སྦྲུལ་གྱི་གཟུགས། བནྡྷ་དང་བདུད་རྩིར་ཁར་བཟུང་བ། རྡོ་སྦྲུལ་གྱི་གཙུག་གི་ནོར་བུ། གནས་གང་ནས་མཇལ་ཡང་དེར་གཏུགས་དགོས་ལ། དམ་ཚིག་ཅན་ལ་བདུད་རྩི་དང་། དམ་མེད་ལ་དུག་ཏུ་འགྱུར་རོ། །ལུང་པར་སྡིག་པ་རཱ་ཙས་གནས་མཇལ་བའི་གཟུགས་དགོན་པ་ཆེན་པོའི་ཆོས་རྗེ་འཚོགས་པ་སྟོང་གི་ཚོགས་དཔོན་དང་། བླ་མ་བརྒྱ་འདུས་སྟོང་འདུས་ཀྱི་ཚོགས་དཔོན་གནས་མཇལ་བའི་ཚུལ། འབུ་བསེ་ཁྲབ་པས་འགྲོ་བ་རིགས་དྲུག་གནས་ནང་དུ་ཁྲིད་པའི་ཚུལ། མ་ཧཱ་གསེར་གྱི་རུས་སྦལ་གྱིས་གནས་མཇལ་བའི་ཚུལ། སིནྡྷུ་ར་རིགས་ལྔ། མཆོད་པ་རྣམ་པ་ལྔ་ཡོད། ལྷ་འདྲེ་བརྒྱ་གཤར་བའི་སྒོ་མོ། སྟོང་འཚོགས་པའི་འདུ་ར། བྲག་གི་ནང་ནས་ནམ་མཁའ་མཐོང་བ། འཇའ་ཡི་ནང་ནས་སྤྲིན་མཐོང་བ་ཡོད། རྨ་སེ་བློ་གྲོས་རིན་ཆེན་གྱི་སྒྲུབ་ཕུག གཤིན་རྗེའི་ཕོ་དོང་། གཤིན་རྗེའི་མོ་དོང་། གཤིན་རྗེའི་དོང་ཆེན། སེམས་ཅན་དམྱལ་བའི་གནས། ཕྱག་འབུལ་སྒང་། མཁའ་འགྲོ་ཕྱག་རྒྱབ་མ། རི་ཡི་རྒྱལ་པོ་ལྷུན་པོ་རི་བོ་མཆོག་རབ། གླིང་བཞི། གླིང་ཕྲན་བརྒྱད་དང་བཅས་པའི་མཎྜལ་སྒང་། བསྟོད་པ་བྱེད་ས། མི་འཇིགས་པ་སེང་གེའི་ཁྲི་གཡུ་རལ་དང་བཅས་པ། དེ་སྟེང་མ་ཆགས་པདྨའི་གདན། ཁྲི་དྲུག་མགྱོགས་ཁྱུང་གིས་བརྒྱན་པ། གཡོན་བྲག་མཚོན་ཆ་གཟིང་འདྲ། གནས་སྲུང་གཏེར་མགོན་ཕྱག་བཞི་པའི་སྤྲུལ་པའི་བྱ་རོག་གི་གཟུགས། རྣམ་པར་ཐར་པའི་སྒོ་གསུམ་མཚོན་པའི་ལམ་གསུམ། ཕུག་པ་ཟླ་གམ་དམར་པོ། རྟ་མགྲིན་དབང་གི་གནས། དགྲ་བགེགས་ལོག་འདྲེན་ཚར་གཅོད་པའི་བརྡར་ཧོཾ་ཁུང་ནང་དུ་ཕུར་པ་བཏབ་པའི་ཚུལ་ཁྲོ་བོའི་ཞལ་གཟུགས། དབུ་མ་རོ་མ་རྐྱང་མ་གསུམ་གྱི་ངོ་བོ་ནང་དུ་ལམ་གསུམ། དགོས་འདོད་ལྷུན་གྱིས་གྲུབ་པའི་ཕྱིར། རིན་པོ་ཆེའི་སྦུག །གཡས་སུ་རིན་པོ་ཆེ་དགོས་འདོད་ཀུན་འབྱུང་ངོ་། །དེ་གཉིས་ལ་ཐོད་པ་གཏུགས་ནས་སྨོན་ལམ་གང་བཏབ་ཐམས་ཅད་འགྲུབ་བོ། །དེ་སྟེང་དག་པ་སངས་རྒྱས་ཀྱི་ཞིང་ཁམས་ཡོད་པའི་འོག་ཏུ་མ་དག་འཁོར་བའི་གྲོང་ཁྱེར་དུ་འགྲོ་དོན་མཛད་པ། དེ་ན་སྲིན་པོའི་གྲོང་ཁྱེར་ཡོད་པ་ལ་མགོ་གཏུགས་དང་སྨོན་ལམ་འདེབས་མི་རུང་། གཡོན་ཕྱོགས་སུ་མཁའ་འགྲོའི་ཐག་ར། དེ་སྟེང་སྲིན་པོ་དང་། དམྱལ་དོང་། སྒོ་ཐོད་ཨོ་རྒྱན་རིན་པོ་ཆེའི་ཕྱག་སྦུབ་ཁ་ཡ་ལུང་ཆད་ནས་ཤོར་བའི་མལ་དུ་ཤིང་སྐྱེས་པ། བར་དོའི་འཕྲང་ཆེན་དུ་མཁའ་འགྲོ་མ་རྣམས་འཚོགས་པའི་ཚོགས་དཔོན་རྟ་མགྲིན་ཡབ་ཡུམ་བྱང་སེམས་དཀར་དམར་ནམ་མཁའ་བྲག་གི་གཞལ་ཡས་སུ་བྲག་གིས་ཀ་བ་བརྒྱབ་པ། མཁའ་འགྲོ་མ་རྣམས་ཀྱི་འབྱོན་ལམ། ཕུག་པ་དེའི་སྟེང་འོག་ཕྱོགས་མཚམས་ཐམས་ཅད་རྟེན་འབྲེལ་སྙིང་པོ་དང་དབྱངས་གསལ་གྱི་ངོ་བོ་རྣམས་སོ། །ཤལ་མ་ལི་ཡི་སྡོང་པོ། རྡོ་རྗེ་ཕག་མོའི་ཤེལ་གུར་དཀར་མོ་ལ་ཤེལ་གྱི་ཀ་བ་བརྒྱབ་པ། རྡོ་རྗེ་འཆང་གི་སྐུ། སྤྱན་རས་གཟིགས་ཀྱི་སྐུ། ཡི་གེ་དྲུག་རང་བྱོན་ཡོད། སྒོ་བ་ཡབ་ཡུམ་བརྒྱད། མར་མེ་རང་འབར། ཤར་སྟག་སྲིན། ཟོར་བའི་གདོང་སོགས་གདོང་མོ་མཆེད་བཞི། རྡོ་རྗེ་རྣམ་པར་འཇོམས་པའི་སྐུ། རིན་པོ་ཆེའི་བེ་ཅོན། མེ་ཏོག་པདྨ་ཡུམ་ཆེན་པདྨ། སློབ་དཔོན་པདྨའི་གསང་རྗེས་གདམས་པ་དང་། མ་ཅིག་ལབ་སྒྲོན་གྱི་སྐུ། དགྱེས་པ་རྡོ་རྗེའི་སྐུ། རིན་པོ་ཆེའི་གཏེར་གྱི་བང་མཛོད་ཀྱི་སྒོ། ལྷ་འདྲེའི་དོང་དུ་མི་ཁྱེར་བའི་ཁ་གནོན་དུ་ཨོ་རྒྱན་རིན་པོ་ཆེའི་ཁྲི། ཅོག་ཙེ་ལྷ་འདྲེའི་ཆོས་ཞུ་ས། ལྷ་འདྲེས་ཕུལ་བའི་ཐུད། དཔལ་འཁོར་ལོ་བདེ་མཆོག་གི་སྐུ། སློབ་དཔོན་པདྨའི་སྐུ། སློབ་དཔོན་པདྨའི་ཞབས་རྗེས། ཕྱག་གི་རྡོ་རྗེ་རྒྱབ་མལ་དུ་བདུད་རྩི་བརྡོལ་བ། མཁའ་འགྲོ་ཡེ་ཤེས་མཚོ་རྒྱལ་གྱི་ཞབས་རྗེས། འཁོར་ལོ་རྩིབས་བརྒྱད། གུ་རུ་པདྨའི་ཕྱག་རྗེས། ཡེ་ཤེས་མཚོ་རྒྱལ་གྱི་ཕྱག་རྗེས། འགྲོ་བ་རིགས་དྲུག་གི་དོང་ཡོད་པར་ལྟ་མི་རུང་། ཨེ་ཀ་ཛ་ཊིའི་སྐུ། རྒྱལ་མཚན། ཁྲོ་ཆུའི་སྐུ། ཨོ་རྒྱན་རིན་པོ་ཆེའི་བྷནྡྷའི་རྗེས། ཁ་ཊྭཱཾ་རྩེ་དབུས་མའི་རྗེས། གུ་རུ་དྲག་པོའི་ཐོད་སྐམ་གྱི་རྗེས། སངས་རྒྱས་ཡེ་ཤེས་ཀྱི་ཞབས་རྗེས། དུང་གི་ཕུག་རོན་མགོན་དཀར་གྱི་གཟུགས། ལྷ་ཨ་འཁྲོ་རྒྱལ་པོའི་རྟ་རྗེས། འདྲ་དཔེ། ལྷ་དབུ་དཀར་ཅན་གྱི་དམག་ཚོགས་བྱེ་བ་དང་ཉི་ཁྲི། མི་དབུ་ནག་ཅན་གྱི་དམག་ཚོགས་བྱེ་བ་དང་ཉི་ཁྲི། ཀླུ་དབུ་སྔོན་ཅན་གྱི་དམག་ཚོགས་བྱེ་བ་དང་ཉི་ཁྲི། མཁའ་འགྲོ་མའི་གཤག་ར། མུན་ནག་གི་གླིང་། ལྷ་ཡི་ནུ་མ་བརྒྱད་བརྒྱད། ཀླུ་ཡི་ནུ་མ་བརྒྱད་བརྒྱད། མི་ཡི་ནུ་མ་བརྒྱད་བརྒྱད། མཁའ་འགྲོ་མའི་ཆའུ། སྨན་སྦྲུལ་དང་དུག་སྦྲུལ་གཉིས་ལྕེ་བརྐྱངས་སུ་སྔ་བྱས་པས། སྨན་སྦྲུལ་ལྕེ་བརྐྱངས་པས་སེམས་ཅན་ཐམས་ཅད་ལ་བདེ་སྐྱིད་འབྱུང་བ། དུག་སྦྲུལ་གྱི་ལྕེ་བསྐུམ་པ། མ་ཧེ་ཕོ་མོའི་ནུ་མ། མཁའ་འགྲོ་སྡེ་བཞིས་ཀ་བའི་བརྒྱན་ནས་མར་མེ་བཟུང་བ། ལྷ་ཆེན་དབང་ཕྱུག་ཆེན་པོ་དང་། ལྷ་མོ་ཨུ་མ་དེ་ཝ་གཉིས་ཀྱི་གསང་རྗེས། བྱང་སེམས་འབབ་པ། ཨ་འཁྲོ་རྒྱལ་པོའི་ཐེབ་རྗེས། གཏེར་གྱི་བང་མཛོད། ཕུག་པ་ལྷ་འདྲེའི་སྔགས་ཁང་རྔ་བརྡུང་བའི་སྐད་བོང་བ། འོ་མའི་ཆུ་མགོ ཨ་འཁྲོ་རྒྱལ་པོས་ཕྱག་རྗེས། ཨ་འཁྲོ་རྒྱལ་པོའི་ངལ་གསོའི་མལ། ཨེ་ཀ་ཛ་ཊིའི་གཏོར་ཟོར་བརྒྱབ་པ། བདུད་རྩི་ཆུའི་འབྱུང་ཁུངས། གླང་ཆེན་དྲོད་པར་བདུད་རྩིའི་ཆུ་འཁྱིལ་བ། པ་ཏྲ། སྤྱན་རས་གཟིགས་ཀྱི་ཕྱག་གི་མེ་ཏོག་རང་བྱོན། སྨན་ལྷའི་ཕྱག་གི་ཨ་རུ་ར་རང་བྱོན། མཁའ་འགྲོའི་སྐྲ་འཐེན་རུས་སྦལ་གྱི་རྒྱབ། མཁའ་འགྲོའི་སྐྲ་ཆུ། དུག་སྦྲུལ། སྲིན་པོའི་ཨོལ་ཀྲོང་། དུག་སྦྲུལ་ཆུན་པོ། མཁའ་འགྲོའི་སྐྲ་བསླས། མཁའ་འགྲོའི་འཇའ་ལམ། ཟངས་མདོག་དཔལ་རི། རྡོ་རྗེ་ཕག་མོའི་ཞལ་གཟུགས། སྲིན་པོའི་ལྗགས། སྲིན་མོ་བསྒྲལ་བའི་ཐོད་པ། ཨ་འཁྲོ་རྒྱལ་པོའི་སྐུ་གཟུགས། སྲིན་པོའི་བྷནྡྷ། མཁའ་འགྲོ་མས་འོ་མས་ཆག་ཆག་བཏབ་མལ། སྨན་སྦྲུལ་ལྕེ་བརྐྱང་བའི་རྩ་བ་ནས་བདུད་རྩི་འབབ་པ། ལྷ་བླ་མ་ཡི་དམ་མཁའ་འགྲོ་ཐམས་ཅད་ཀྱི་སྤྲུལ་པའི་བྱ་གཅན་རི་དྭགས་གཡུང་དྭགས་སྣ་ཚོགས་ཀྱི་རྩེ་ཀྱུ་བྱས་མལ། མཁའ་འགྲོའི་ཚོགས་ཁང་འདིར་ཨོ་རྒྱན་རིན་པོ་ཆེ་རྩ་བ་གསུམ་གྱི་ལྷ་ཚོགས་གནས་འགྱུར་བ། རྡོ་རྗེ་གསེར་སྒྲོམ་བསྣམས་པ་སྒམ་དེའི་ཕྱོགས་བཞིར་འཇའ་གུར་དང་དུང་མཚལ་གྱི་ཡི་གེ་ཡོད་པ་ཞལ་གཟིགས། འགྲོ་བ་རིགས་དྲུག་གི་ལམ་རང་རང་གི་མདོག་ཅན་པདྨ་སཾ་བྷའི་ཞབས་རྗེས། ཨོ་རྒྱན་རིན་པོ་ཆེའི་ཆའུ་ཆ་ཚང་། མཁའ་འགྲོའི་ལམ་འཁྱིལ་བ་ལ་རྡོའི་བཅོལ་བརྒྱབ་པ། མཁའ་འགྲའི་ཚོགས་ཁང་ལ་ཀ་བ་བརྒྱབ་པ། མཁའ་འགྲོའི་ཚོགས། ཡུར་བ་དང་བཅས་པ། མཁའ་འགྲོའི་གསོལ་བཀྱག་མཁའ་འགྲོའི་དཔོན་མོའི་གསོལ་བཀྱག་དང་གསོལ་སྐྱེམས། མཁའ་འགྲོ་མའི་གཏེར་མ་དང་བཅས་པ། མཆོད་རྟེན་བརྒྱ་དང་རྩ་བརྒྱད། མཁའ་འགྲོའི་ཀ་བ་ལ་སྐུ་འདྲ་མང་པོ། མཁའ་འགྲོའི་གཙོ་བོའི་དངུལ་སྐུ། མཁའ་འགྲོས་ཆུ་ལེན་པའི་ཆུ་བོ། མཁའ་འགྲོ་མའི་བྱང་སེམས་དཀར་པོའི་རིལ་བུ། རྡོ་རྗེ་སེམས་དཔའི་སྐུ། ཧོམ་ཁུང་། གསེར་ཉ། ལྷ་ཨ་འཁྲོ་རྒྱལ་པོའི་གསེར་གྱི་ཐག་པ་འདོམ་སྐོར་འདོམ་པ་བརྒྱད་ཅུས་གནས་ལྷ་ཡུལ་དུ་གདན་འདྲེན་ཤོམ་བྱས་པ། བར་དོའི་འཕྲང་ཆུང་ངུ་སྲིན་པོའི་མཆེ་བ། ཚོགས་ཟན་ལན་ས། མཁའ་འགྲོའི་འཇའ་འོད། བཀྲ་ཤིས་པའི་རྟགས་བརྒྱད། འཁའ་འགྲོ་མའི་འོ་མ་བླུགས་པའི་སྐྱེམས། གུ་རུ་སྐུ་ལྔ་མཚན་བརྒྱད་ཀྱི་ཕྱག་རྔ་བཏགས་པ། དུག་སྦྲུལ་མགོ ཞབས་རྗེས་དང་། པད་ཞྭའི་རྗེས། ཨ་འཁྲོ་རྒྱལ་པོའི་རྟ་རྗེས་ཆ་གཅིག རྡོ་རྗེ་ཕག་མོའི་གསང་བ། སྲིན་མོ་གནས་འདྲེ་མ་བསྒྲལ་བའི་ཐོད་པ། གསུང་རབ་པོ་ཏི་དམར་པོའི་རྩིག་པ། མཁའ་འགྲོ་མ་རྣམས་ཀྱི་བྲོ་ར་ལ། སྲིན་མོ་སྐྲ་ཡི་རལ་པ་ཅན་གྱིས་གཡང་ས་བཟོས་པ། མཁའ་འགྲོ་མ་གཙོ་མོའི་གསོལ་ཞལ་བཞག་པ། ཚོགས་ཀྱི་མཆོད་པ། དྲང་སྲོང་རཱ་ཧུ་ལའི་སྐུ་ཤིན་ཏུ་གསལ་བ། རྡོ་རྗེ་ཕག་མོའི་སྐས་བཙུགས་པ། སྲིན་མོ་སྐྲ་རོལ་མས་འཕྲོག་པ། ལྷ་ཁང་གི་སྒོ་བཀྲ། མཁའ་འགྲོ་མས་དར་དཀར་གྱི་ཡོལ་བ་བཀྱག་པ། མཁའ་འགྲོ་མར་ཁུའི་མཚོ་ལ་རིན་པོ་ཆེ་དང་རྡོ་ཡིས་བཅོལ་བརྒྱབ་པ། བར་དོའི་འཕྲང་འབྲིང་བ། བར་དོའི་འཕྲང་། བདུད་རྩི་མར་ཁུའི་ཆུ་འདི་ཁར་སོང་ཚད་ནད་གདོན་བར་ཆད་ཞི། མཁའ་འགྲོའི་དར་དཀར་བདུད་རྩི་ཞུ་བ། མཁའ་འགྲོ་མས་མེ་ཏོག་གི་མཆོད་པ་ཕུལ་བ་འཕགས་པ་འཇམ་དཔལ་གྱི་པདྨའི་སྟེང་དུ་པོ་ཏི་དང་རལ་གྲི་གསུམ་གྱི་རྗེས། ཕུག་སྲུང་སྦལ་གདོང་ཅན། ཕུག་སྲུང་སྤྲེལ་གདོང་ཅན། མཁའ་འགྲོ་མ་ཡེ་ཤེས་ཀྱི་གདོང་པ་ཅན་གྱི་ཤངས། རྒྱལ་ཆེན་རྣམ་ཐོས་སྲས་ཀྱི་སྐུ། ལྕགས་སྡིག་གི་གཟུགས། དེ་ཡི་སྟེང་དུ་འབུམ་བཞུགས་སོ། །ཨ་འཁྲོ་རྒྱལ་པོའི་མདའ་མཆོང་གི་ནོར། རིན་པོ་ཆེ་རྔ་མོང་ཉི་ཤུའི་རྒྱབ། གསེར་གྱི་ནོར་བུ་རིན་པོ་ཆེ་གླང་པོ་ཆེ་ལྔ་བརྒྱའི་རྒྱབ། དངུལ་གྱི་ནོར་བུ་རིན་ཆེན་རྟ་སྟོང་གི་རྒྱབ། གཡུ་ཡི་ནོར་བུ་རིན་ཆེན་རྔ་མོང་ལྔ་བརྒྱའི་རྒྱབ། གསེར་གྱི་ནོར་བུ་རིན་པོ་ཆེ་གླང་ཆེན་ཁྲི་ཡི་རྒྱབ། དངུལ་གྱི་ནོར་བུ་རིན་ཆེན་རྟ་ཁྲི་ཡི་རྒྱབ། མཆོང་གི་ནོར་བུ་རིན་ཆེན་མཛོ་ཁྲི་ཡི་རྒྱབ། དུང་གི་ཕ་བོང་དཀར་པོ་ལ་གཡུ་ཡི་དྲེག་པ་ཆགས་པའོ།  །

༈ དེ་ནས་གནས་ཀྱི་ཕན་ཡོན་ནི། ཁ་བྱང་གི་ཡི་གེ་ལས། ཕྱི་སྐོར་བདུན། བར་སྐོར་བཅུ། ནང་སྐོར་ཉི་ཤུ་དུང་ཕྱུར་ཡིན། ཞེས་པ་སྣང་གསུངས་པས། ཕན་ཡོན་ཡིག་དྲུག་དུང་རེ་དང་མཉམ། གཞན་ཡང་ཨོ་རྒྱན་རིན་པོ་ཆེའི་ལུང་བསྟན་བཀའ་རྒྱ་མ་ལས། དེས་ན་གནས་ཆེན་གནས་ཕྲན་ལ་སོགས་དང༔ ཡུལ་དང་ཡུལ་འདྲ་སྦས་པའི་ཡུལ་རྣམས་སུ༔ བསྒྲུབས་པ་བྱས་པའི་ཡོན་ཏན་བསམ་མི་ཁྱབ༔ ཕལ་པའི་གནས་སུ་ལོ་གཅིག་བསྒྲུབ་པ་བས༔ དེ་དག་རྣམས་སུ་ཞལ་གཅིག་འགྲུབ་ཐག་ཉེ༔ དེ་དོན་ཤེས་པར་མཛོད་ཅིག་རྗེས་འཇུག་རྣམས༔ ཞེས་གསུངས། གནས་ནང་དུ་འགྲོ་དུས་གསོལ་འདེབས་ཡིག་དྲུག་གམ་བཛྲ་གུ་རུ་གཅིག་བཟླས་ཀྱང་བྱེ་བ་མང་པོའི་འགྱུར་ཡོད་དོ། །ཁྱད་པར་བདུད་རྩི་མར་ཁུའི་ཆུ་ཁར་སོང་ཚད་གདོན་རིགས་ཐམས་ཅད་ཀྱི་གནོད་པ་ཞི་ཞིང་ཕྱི་མ་ངན་སོང་མེད་པར་གསུངས། གཞན་ཡང་གནས་འདི་ནི་ཨོ་རྒྱན་རིན་པོ་ཆེ་དང་། གནུབས་སངས་རྒྱས་ཡེ་ཤེས། དམ་པ་སངས་རྒྱས། དྲུང་རྨ་སེ་རྣམས་ཀྱི་སྒྲུབ་གནས་ཡིན་པས་གནས་འདི་མཇལ་བ་དང་བསྐོར་བ་བྱས་ན་བྱིན་རླབས་འཇུག་ཉམས་རྟོགས་སྐྱེ། ཙྭ་རིའི་གནས་ལག་ཡི་དམ་འཁོར་ལོ་བདེ་མཆོག་གི་གནས་ཡིན་པས་མཆོག་ཐུན་མོང་གི་དངོས་གྲུབ་ཐོབ། མཁའ་འགྲོ་རྡོ་རྗེ་ཕག་མོ་དང་ཡེ་ཤེས་མཚོ་རྒྱལ་ལབ་སྒྲོན་མ་རྣམས་ཀྱི་གནས་ཡིན་པས་བར་ཆད་ཐམས་ཅད་སེལ། རི་བོ་རྩེ་ལྔའི་གནས་ལག་འཇམ་དབྱངས་སྐུ་ཡི་གནས་ཡིན་པས་ལུས་ཀྱི་སྒྲིབ་པ་དག ཤེས་རབ་འཕེལ། རྟ་མགྲིན་གསུང་གི་གནས་ཡིན་པས་ངག་གི་སྒྲིབ་པ་ཐམས་ཅད་དག་ངག་ལ་ནུས་པ་སྐྱེ། དཔལ་ཀྱེ་རྡོ་རྗེ་དང་ཐུགས་མཆོག་རྡོ་རྗེ་སེམས་དཔའི་གནས་ཡིན་པས་ཡིད་ཀྱི་སྒྲིབ་པ་དག་ཉམས་རྟོགས་འཕེལ། མགོན་པོ་བྱ་རོག་ཅན་དང་སྔགས་སྲུང་ཨེ་ཀ་ཛ་ཏྲི། གཟའ་བདུད་དུག་གི་སྤུ་གྲི་ལྷ་སྲིན་སྡེ་བརྒྱད་དང་བཅས་པའི་འདུ་ར་ཡིན་པས་བར་ཆད་སེལ། ཚོགས་མཆོད་གཏོར་མ་མར་མེ་ཕུལ་ན་བསམ་པའི་དོན་དང་ཕྲིན་ལས་གང་བརྩམ་འགྲུབ། རྒྱལ་ཆེན་རྣམ་ཐོས་སྲས་ཀྱི་གནས་ཡིན་པས་ནོར་བུ་རིན་པོ་ཆེ་དགོས་འདོད་ཀུན་འབྱུང་སོགས་རིགས་མང་པོ་ཡོད་པས་གནས་འདི་ལ་མཆོད་བསྟོད་བསྐོར་བ་བྱས་ན་ཚེ་དང་བསོད་ནམས་དབང་ཐང་ཐམས་ཅད་འཕེལ་ཞིང་རྒྱས་སོ། །ཞེས་པ་འདི་ནི་སྤྲུལ་སྐུ་མི་འགྱུར་རྡོ་རྗེ་བདུད་འདུལ་རོལ་པ་རྩལ་གྱིས་གསུངས་པའི་གནས་ཡིག་ལ་གཞིར་བྱས། གསར་རྙིང་གི་རྒྱུད་སྡེའི་བཤད་པ་རྣམས་དང་། རྒྱལ་པོའི་བཀའ་ཆེམས། པདྨ་བཀའ་ཐང་། ལུང་བསྟན་བཀའ་རྒྱ་མ་སོགས་ནས་གནས་ཀྱི་བཤད་པ་རྒྱ་ཆེར་བྱུང་བའི་དོན་བསྡུས། ཡི་གེ་མང་དོགས་པས་ལུང་འདྲེན་རྣམས་སྤྲོས་པ་སྐྱུང་སྟེ་གོ་བདེ་བར་དགེ་སློང་རཱ་ག་ཨ་སྱས་བྲིས་པ་ལ་འགལ་བ་མཆིས་ན་གནས་གསུམ་མཁའ་འགྲོའི་ཚོགས་ལ་འཆགས་ཤིང་། དགེ་བས་འདི་ལ་འབྲེལ་བ་ཐོགས་ཚད་མཆོག་དང་ཐུན་མོང་གི་དངོས་གྲུབ་མྱུར་དུ་ཐོབ་པར་གྱུར་ཅིག །སརྦ་མངྒ་ལཾ། །

མཆན། ༡.གནས་ཡིག་འདི་ནི་མཁས་གྲུབ་ཀརྨ་ཆགས་མེད་ཀྱི་གསུང་འབུམ་གི་པོད་ལས་ཞལ་བཤུས་པའོ། །༢.གནས་ཀྱི་མདུན་ཕྱོགས་ནི་བོད་ལྗོངས་ཆབ་མདོ་ས་ཁུལ་ཆབ་མདོ་རྫོང་ཀརྨ་ཞང་། གཡས་ཕྱོགས་མཚོ་སྔོན་ཡུལ་ཤུལ་ཁུལ་ནང་ཆེན་རྫོང་སྤྲེལ་ཚྭ་ཞང་དང་གཡོན་ནང་ཆེན་རྫོང་ཉག་ལ་ཞང་གསུམ་གྱི་ས་མཚམས་ཡིན། གནས་བསྐོར་པའི་རྒྱུད་རིམ་དང་བར་ཐག་ནི་ནང་ཆེན་རྫོང་སྲིད་གཞུང་གནས་ས་ནས་གནས་མདུན་གྱི་ཉེ་འགྲམ་དུ་རླངས་འཁོར་འགྲོ་ཐུབ། ལམ་ཐག་སྤྱི་ལེ༦༠ལྷག་ཡོད། ཆབ་མདོ་ནས་གནས་མདུན་ལ་རླངས་འཁོར་བགྲོད་ལམ་ཡོད། ཕལ་ཆེར་སྤྱི་ལེ༡༠༠ལྷག་ཙམ་ཡོད། གནས་བསྐོར་གྱི་འཚོ་སྡོད་ཡོ་བྱད་ནི་རང་གིས་གྲ་སྒྲིག་བྱེད་དགོས། གནས་འདིའི་དགོངས་སྙིང་ནི་སྟག་ལོ་ཡིན་པས་དེར་བསྐོར་བ་བྱས་ན་བྱིན་བརླབས་ཤིན་ཏུ་ཆེ་བར་གསུངས། བསྐོར་ལམ་ཀྱག་ཀྱོག་དང་ལ་ཐུར་ཡིན་པས་རྐང་ཐང་ལ་འགྲོ་མཁན་འབྲིང་པོ་ཞིག་གིས་ཆུ་ཚོད་བཞི་ཡས་མས་ལ་འགྲོ་དགོས།

༄༅། །ཐུགས་ཀྱི་ཕྲིན་ལས་གནས་མཆོག་བསྟན་པ་ནི༔ བོད་ཀྱི་མདོ་ཁམས་རྔུ་ཞེས་བྱ་བ་རུ༔ སྤོ་ནེ་བྲག་དཀར་ཤེལ་གྱི་གུར་ཕུབ་འདྲ༔ ནང་དུ་རྒྱལ་བ་རིགས་ལྔ་སེམས་དཔའ་བཅུ༔ ཁྲོ་བོ་བཞི་དང་སྟོན་པའི་སྐུ་རང་བྱོན༔ པད་འབྱུང་བདག་གི་སྐུ་རྗེས་གསལ་བར་ཡོད༔ དེ་རུ་ཕྲན་གཏེར་ཟབ་གཏེར་གཉན་གཏེར་བརྒྱད༔ ཐུགས་ཀྱི་གནས་གཙོ་ཐུགས་གནས་གཅིག་ཏུ་བསྡུས༔ བདེ་ཆེན་ཐུགས་ཀྱི་གནས་ལྔ་བསྟན་པའོ༔ འབྱེད་པའི་སྐྱེས་བུ་པདྨའི་མིང་ཅན་འབྱུང༔

༄༅། །ཐུགས་ཀྱི་ཕྲིན་ལས་གནས་སྤོ་ནེ་བྲག་དཀར་ཡོད་པའི་ཕྱོགས་ལ་དཔྱད་ན་རྔུའི་སྒྲ་འབྱར་བ། ས་ངན་རྔུ་ཚ་རོང་ནས་འགྲོ་བ་དང་རྒྱལ་རོང་ནས་འབབས་པའི་རྒྱལ་མོ་རྔུལ་ཆུ་གཉིས་དང་ཉེ་བར་ཡོད་འདྲའང་དཔྱད་དགོས་ཤིང་། ས་ངན་ཕྱོགས་སུ་ཀློང་གསལ་གཏེར་གནས་སྤོ་ནེ་བྲག་དཀར་ཟེར་བ་ཞིག་ཀྱང་ཡོད་པར་འདུག་གོ །

མཆན། གནས་འདི་ནི་ཨོ་རྒྱན་རིན་པོ་ཆེའི་མདོ་བྱང་ཙམ་ལས་ཀོང་སྤྲུལ་ཡོན་ཏན་རྒྱ་མཚོས་ཀྱང་ཕྱོགས་མཚོན་ཙམ་དང་སླར་དཔྱད་ཀྱི་བསྐུལ་མ་ལས་ཁ་ཚོན་བཞེས་མི་འདུག་ལ། ཁོ་བོ་དག་གིས་ཀྱང་དང་ཐོག་རྒྱལ་རོང་ཕྱོགས་ཀྱི་རྒྱལ་མོ་རྔུལ་ཆུའི་སྨད་ཕྱོགས་ནས་འཚོལ་ཞིབ་བྱས་ཤིང་དེ་ནས་ས་ངན་ཕྱོགས་ཀྱི་གང་སར་ཐེངས་འགའ་ཤས་ཕྱིན་ཏེ་ས་གནས་རང་གི་དགོན་སྡེ་དང་མང་ཚོགས། སྲིད་གཞུང་སོགས་ལ་འབྲེལ་འདྲིས་ཀྱིས་འདྲི་རྩད་བྱས་ཀྱང་ས་རྒྱུས་སོགས་མེད་པས་གནས་ཡིག་ལག་སོན་དང་གནས་ངོས་ཟིན་སོགས་གང་ཡང་མ་བྱུང་།

༄༅། །ད་ནི་ཡོན་ཏན་གནས་ལྔ་བསྟན་པ་ནི༔ ཡོན་ཏན་གནས་ཀྱི་གཙོ་བོ་རྒྱས་པར་བཤད༔ བོད་ཀྱི་མདོ་ཁམས་འབྲི་ཟླ་ཞེས་བྱ་རུ༔ རུ་དམ་གངས་ཀྱི་ར་བ་སྦས་པའི་ཡུལ༔ དབུས་ཀྱི་རི་བོ་སེང་ཆེན་བརྒྱད་བསྣོལ་ནང༔ གསང་སྔགས་སྣོད་རུང་ཡུལ་གྲུ་བཅོ་བརྒྱད་སྦས༔ ཡུལ་གྱི་ཆགས་ཚུལ་པདྨ་ཁ་ཕྱེ་འདྲ༔ དབུས་ཀྱི་བྲག་རི་དཔག་ཚད་གཅིག་གི་སྟེང༔ རང་བྱུང་རྡོ་ཡི་མཆོད་རྟེན་ཁྱད་པར་ཅན༔ འོད་ཟེར་ནམ་མཁའི་དབྱིངས་སུ་འགྲོ་བ་དང༔ བྲག་དེའི་ནང་དུ་སྤྲུལ་པའི་ལྷ་ཁང་ནི༔ འོད་འབར་ཞེས་བྱ་མདའ་རྒྱང་གང་ཙམ་ཡོད༔ ནང་དུ་གསེར་གྱི་ཐུབ་པ་ཐོག་ཚད་གཅིག༔ ཡོན་བདག་དཔལ་མོ་ཧེ་ཡིས་བཞེངས་པ་ཡི༔ དངུལ་གྱི་ཉེ་སྲས་མི་ཚད་བརྒྱད་རྣམས་དང༔ དུང་དང་གཡུ་ཡི་སྒྲོལ་མ་དཀར་སྔོན་བཞུགས༔ རྒྱ་ནག་པྭ་ལ་ཏ་ཡི་རྒྱལ་པོ་ཡིས༔ པད་འབྱུང་བདག་ལ་ཕུལ་བའི་ནོར་སྣ་དང༔ ཁྱད་པར་བཟོ་ཁྱད་བྱུ་རུའི་ཚེ་དཔག་མེད༔ ཀ་མ་ལ་ཡི་རྒྱ་དཔེ་ཐམས་ཅད་བཞུགས༔ ཕྱོགས་མཚམས་རྣམས་ཀྱི་ལུང་ཆེན་བཅོ་བརྒྱད་དུ༔ གཏེར་ཆེན་གསུམ་དང་གཏེར་ཕྲན་བརྒྱད་རེ་སྦས༔ སྲུང་མ་ཡ་མ་བཅུ་གཉིས་མ་སངས་བརྒྱད༔ ལྷ་ཡི་དགེ་བསྙེན་རྡོ་རྗེ་དགའ་བར་གཏད༔ གཡས་ཀྱི་རི་ནི་རལ་གྲི་ཕྱར་བ་འདྲ༔ ཤར་གྱི་བྲག་ལ་ཐུབ་དབང་གནས་བརྟན་ཚོགས༔ ཟབ་པའི་གཏེར་གསུམ་དཀོར་སྲུང་སྲས་ལ་གཏད༔ གཡོན་གྱི་རི་ནི་སེང་ཆེན་འགྱིང་བ་འདྲ༔ ལྷོ་ཡི་བྲག་ལ་ཉེ་སྲས་བརྒྱད་རྣམས་དང༔ ཕྱོགས་བཅུའི་སངས་རྒྱས་རྣམས་ཀྱི་སྐུ་ཡང་གསལ༔ སྒོས་ཁྱད་གཏེར་དགུ་དཀོར་སྲུང་ཡུམ་ལ་གཏད༔ ལྕགས་རི་ཁྲ་བོའི་སྒོ་ཁང་ལྷོ་རུ་བསྟན༔ སྒོ་ཡི་ནང་དུ་བྲག་རི་རིན་ཆེན་འདྲ༔ དབུས་ཀྱི་ཆ་ལ་པད་འབྱུང་སྒྲུབ་ཕུག་ཡོད༔ དཔལ་ཆེན་དགུ་དང་རྡོ་རྗེ་སེམས་དཔའ་དང༔ དྲུག་པ་རྡོ་རྗེ་འཆང་དང་ཤཱཀྱ་ཐུབ༔ ཨོ་རྒྱན་བདག་གི་སྐུ་རྣམས་རང་བྱོན་གསལ༔ ཕྱོགས་བཞིའི་ཀླུང་ཆེན་བཞི་ཡི་མདོ་རྣམས་ལ༔ ཤར་གྱི་གཙང་དཀར་མཆོད་རྟེན་འོད་འབར་དང༔ ལྷོ་ཡི་འཁོར་ལོ་ཨཀྵ་ལྔ་བཅུ་ལ༔ ནུབ་ཀྱི་སེང་རྫོང་སྐུ་གདུང་ཆ་བརྒྱད་དང༔ བྱང་གི་ཕ་ཝཾ་ནག་པོ་ལོགས་རྣམས་སུ༔ མི་འགྱུར་བ་ཡི་རྟགས་བརྒྱད་མཚན་རྟགས་དགུ༔ མཚམས་ཀྱི་ཀླུང་ཆེན་རྣམས་ཀྱི་ཕུ་རྣམས་སུ༔ ཤར་ལྷོ་དཔལ་གྱི་གཏོར་མ་འདྲ་བའི་རི༔ མངོན་རྫོགས་རྒྱལ་པོ་མཁས་པ་སུམ་ཅུ་ཡིས༔ རྫུ་འཕྲུལ་བྱིན་གྱིས་བརླབས་པའི་སྐུ་རང་བྱོན༔ ནོར་ལྷ་ཕོ་བརྒྱད་མོ་བརྒྱད་གཙོ་བོ་གཉིས༔ གཏེར་བདག་བཅོ་བརྒྱད་རྣམས་ཀྱིས་ནོར་ཆར་འབེབས༔ ལྷོ་ནུབ་རྡོ་རྗེ་འདྲ་བའི་བྲག་རི་ལ༔ པད་འབྱུང་བདག་གིས་རྫུ་འཕྲུལ་སྣ་ཚོགས་པའི༔ བཀོད་པ་བསམ་མི་ཁྱབ་པའི་མཚན་རྟགས་དང༔ རང་བྱུང་གྲུབ་ཆུ་འཆི་མེད་ཚེ་ཆུ་དང༔ དངོས་གྲུབ་ཆུ་བོ་ཁྲུས་ཀྱི་ཆུ་བོ་ཡོད༔ ནུབ་བྱང་རིན་ཆེན་བྲག་རི་སྒོམ་འདྲ་ལ༔ མ་སངས་དམ་ལ་བཏགས་པའི་མཚན་རྟགས་དང༔ རྣམ་འཇོམས་རྣམ་པར་རྒྱལ་མ་གདུགས་དཀར་མོ༔ གྲྭ་ལྔའི་ལྷ་མོ་ཀྲི་ཡའི་ལྷ་ཚོགས་བཞུགས༔ བྱང་ཤར་བྲག་རི་གཏེར་གྱི་བུམ་པ་འདྲ༔ རང་བྱུང་ཐུགས་རྗེའི་ལྷ་ཚོགས་བཞི་བཅུ་གཉིས༔ ཁྱད་པར་ཅན་གྱི་ཕྱག་སྟོང་སྤྱན་སྟོང་དང༔ རྟ་མགྲིན་དབུ་དགུ་ག་ནི་བཅོ་བརྒྱད་ཅན༔ རྡོ་རྗེ་ཕག་མོ་ཞལ་གསུམ་ལ་སོགས་པའི༔ མཁའ་འགྲོ་དགོངས་འདུས་དཀྱིལ་འཁོར་ལྷ་ཚོགས་ཡོད༔ ཕྱོགས་མཚམས་རྣམས་ཀྱི་བར་གྱི་ཀླུང་ཆེན་ལ༔ དང་པོར་དཔའ་བོ་བྲག་ལ་རྟ་མགྲིན་དང༔ གཉིས་པར་རུ་ཡི་བྲག་ལ་འཇམ་དཔལ་ནག༔ གསུམ་པར་སྐུ་ཡི་བྲག་ལ་ཕྱག་རྡོར་དང༔ བཞི་པར་ཉེ་བའི་བྲག་ལ་སྨེ་བ་བརྩེགས༔ ལྷོ་ཕྱོགས་བྲག་ལ་རིག་འཛིན་འདུས་པ་སོགས༔ དཀྱིལ་འཁོར་རབ་འབྱམས་རྒྱ་མཚོའི་སྐུ་རྣམས་གསལ༔ ཁྱད་པར་ལྷོ་ཕྱོགས་དབུས་ཀྱི་བྲག་རི་ལ༔ བརྟན་མའི་གསང་ཕུག་གཡས་ལོགས་མཚོ་རྒྱལ་དང༔ སྟེང་ལ་བཻ་རོ་རྒྱབ་ཏུ་གཉགས་ཆེན་སོགས༔ ལས་ཅན་དག་པའི་འཁོར་བདུན་རྣམས་ཀྱིས་ཀྱང༔ བསྒྲུབས་པའི་གནས་དང་གྲུབ་རྟགས་མཚན་མ་བཅས༔ མི་འགྱུར་འཛེར་གྱིས་རབ་ཏུ་གཏམ་པའོ༔ ཡོན་ཏན་གཏེར་ལྔ་ཕྲན་གཏེར་ཉི་ཤུ་སྦས༔ ཡོན་ཏན་སྐུ་ཡི་ཡོན་ཏན་དག་ལ་འདུས༔ བརྡ་ཐོམ༔

༄༅། །ཡོན་ཏན་གནས་ཀྱི་གཙོ་བོ་རུ་དམ་གངས་ཀྱི་ར་བ་ནི་ཁྲོ་རི་རྡོ་རྗེ་ཟིལ་ཁྲོམ་སྟེ། འདིའི་གནས་ཡིག་གཏེར་ཆེན་ཉིད་ཀྱིས་རྫོགས་ཆེན་གངས་ཁྲོད་ནས་བཞེས། གཞན་ཡང་ཟབ་གཏེར་འགའ་ཞིག་དང་བདུད་འདུལ་བས་ཀྱང་གཏེར་ཞལ་ཕྱེས། ལྕགས་རི་ཁྲ་བོའི་སྒོ་ཁང་ལྷོར་བསྟན་ནི་ཟིལ་ཁྲོམ་གནས་ཀྱི་ཞལ་ངོ་ཁྲོ་མཚོའི་ཕྱོགས་སུ་བསྟན་པ་ཤར་དུ་བརྩིས་ཏེ། ལྷོ་ཕྱོགས་དེང་སང་སྒོ་སྲུང་ཏུ་གྲགས་པ་དེར་བྲག་རི་ལ་སྒྲུབ་ཕུག་དང་ཁྱད་འཕགས་ཟབ་གཏེར་བཞུགས་ཤིང་གནས་དང་ས་གནད་ཀྱི་སྙིང་པོའང་འདི་ཉིད་ཡིན། ཤར་གྱི་གཙང་དཀར་འཛུམ་གཙང་དཀར། ལྷོའི་འཁོར་ལོ་ནི་འཁོར་ལོ་མདོ། ནུབ་ཀྱི་སེང་རྫོང་དཔྱད། བྱང་གི་ཕ་ཝཾ་ནི་རུ་དམ་ཕ་ཝཾ་ཞབས་ཆེ་ཆུང་། ཤར་ལྷོ་དཔལ་གཏོར་འདྲ་བ་རྡོ་མུ་ནམ། ལྷོ་ནུབ་རྡོ་རྗེ་འདྲ་བའི་བྲག་ནི། ལྷ་ལུང་ཞུད་དང་ཉེ་བ་ན་ལྷ་ལུང་དཔལ་རྡོར་སྒྲུབ་གནས་ནུབ་བྱང་བྲག་རི་སྒྲོམ་འདྲ་དང་། བྱང་ཤར་གཏེར་བུམ་འདྲ་བའང་སླར་བརྟགས། ཕྱོགས་མཚམས་ཀྱི་དང་པོ་དཔའ་བོ་བྲག་ནི་དཔའ་འོག་གི་དཔའ་བོ་དབང་ཆེན་བྲག །ཡོངས་གྲགས་དཔའ་ར་ཟེར་བ་མདོ་བྱང་འདི་ཉིད་ཀྱི་གཏེར་གནས། གཞན་རྣམས་དཔྱད་དགོས། ཁྱད་པར་ལྷོ་ཕྱོགས་དབུས་ཀྱི་བྲག་རི་ནི་གོང་སྨོས་སྒོ་ཁང་ལ་ཡོད་པ་དེའོ།།

༄༅། །ན་མོ་གུ་རུ༔ཆུ་ཕོ་སྤྲེལ་ལོ་སྤྲེལ་ཟླ་ར་བའི་ཚེས་བཅུ་ལ་ཨོ་རྒྱན་གྱི་གུ་རུ་པདྨ་འབྱུང་གནས་དག་པའི་འཁོར་དུ་མ་དང་བཅས་པ༔ རུ་དམ་གངས་ཀྱི་ར་བའི་དབུས་ཀྱི་ནེའི་སེང་དུ་དར་གྱི་གུར་ཕུབས༔ རིན་པོ་ཆེའི་ཁྲི་ལ་བཞུགས༔ ཟ་འོག་གི་ན་བཟའ་སྣ་ཚོགས་གསོལ༔ ཞལ་ཟས་དུ་མའི་མཆོད་པ་ཡེ་ཤེས་ཀྱིས་བདུད་རྩིར་བྱིན་གྱིས་བརླབ༔ ཡེ་ཤེས་ཀྱི་མཁའ་འགྲོ་མའི་ཚོགས་མཚན་ལྡན་མང་པོས་ཚོགས་ཀྱི་འཁོར་ལོར་རོལ་བའི་ངོ་མཚར་བདེ་གཤེགས་ཀུན་འདུས་ཀྱི་ཚོམ་བུའི་སྒྲུབ་པ་མཛད་པའི་ཚེ༔ འཁོར་རྣམས་ཀྱིས་མགྲིན་གཅིག་ཏུ༔ ཀྱེ་དུས་གསུམ་རྒྱལ་བ་ཀུན་འདུས་རྗེ༔ ཡེ་ཤེས་སྤྱན་གྱིས་གཟིགས་པ་དགོངས་སུ་གསོལ༔ ཉིད་ཀྱིས་ཞབས་བཅགས་སྒྲུབ་པའི་གནས་སུ་གཟིགས༔ དཔལ་དང་ལྡན་པའི་ཕུན་སུམ་ཚོགས་པའི་གནས༔ འདི་ཡི་བྱུང་ཚུལ་ལོ་རྒྱུས་ཡོན་ཏན་དང༔ མ་འོངས་དུས་སུ་ཇི་ལྟར་འབྱུང་བ་རྣམས༔ ད་ལྟ་བཞུགས་དང་མ་འོངས་འབྱུང་འགྱུར་གྱི༔ སྒྲུབ་པ་པོ་ལ་ངེས་ཤེས་སྤྲོ་བསྐྱེད་ཕྱིར༔ སྤྱན་ལྔ་ལྡན་པ་ཉིད་ཀྱིས་གསུང་དུ་གསོལ༔ ཞུས་པས་གུ་རུ་ཉིད་ཀྱིས་བཀའ་བསྩལ་པ༔ ཀྱེ་ཉོན་གཅིག་སྐལ་ལྡན་འཁོར༔ རིག་པ་འཛིན་པ་ཕོ་མོ་རྣམས༔ ཕུན་སུམ་ཚོགས་པའི་སྒྲུབ་པ་ནི༔ ཕུན་སུམ་ཚོགས་པའི་གནས་སུ་བསྒྲུབ༔ ཕུན་སུམ་ཚོགས་པའི་འབྲས་བུ་རྣམས༔ ཕུན་སུམ་ཚོགས་པ་ལྔ་ལས་འབྱུང༔ དེ་ལས་གནས་ཀྱི་ཕུན་ཚོགས་ནི༔ ཐོག་མ་ཉིད་དུ་རྒྱལ་བས་གསུངས༔ བསྒྲུབ་པའི་གནས་དེ་མ་ལེགས་ན༔ སྒྲུབ་པ་ཐམས་ཅད་དོན་མེད་འགྱུར་༔ བསྒྲུབ་པའི་གནས་ཀྱི་མཆོག་རྣམས་ལ༔ བསྒྲུབས་ན་དངོས་གྲུབ་འབད་མེད་འགྲུབ༔ ས་ཕྱོགས་ཕལ་ལ་སྒྲུབ་པ་བས༔ ཕུན་ཚོགས་གནས་སུ་འབུམ་གྱིས་ལྷག༔ ཕུན་སུམ་ཚོགས་པའི་གནས་དེ་ནི༔ ཨུ་དུམ་ཝཱ་རའི་མེ་ཏོག་བཞིན༔ བརྒྱ་ལམ་ལ་ནི་རེ་རེ་ཙམ༔ འདི་ནི་གནས་མཆོག་ཕུན་སུམ་ཚོགས༔ དང་པོ་ལོ་རྒྱུས་བྱུང་ཚུལ་བཤད༔ ཆོས་སྐུའི་གནས་མཆོག་ཆོས་ཀྱི་དབྱིངས༔ རྒྱ་ཆད་ཕྱོགས་ལྷུང་ཀུན་དང་བྲལ༔ ལོངས་སྤྱོད་རབ་རྫོགས་སྟུག་པོ་བཀོད༔ ཡེ་ཤེས་གཟུགས་ཀྱི་ལྷ་རྣམས་ཀྱི༔ ཆ་ལུགས་ཕྱག་མཚན་ཆ་ཤས་ལས༔ སྤྲུལ་པའི་ཞིང་ཁམས་འབུམ་འབུམ་གནས༔ སྟོང་གསུམ་རབ་འབྱམས་འཇིག་རྟེན་རྣམས༔ མཁའ་ལ་རླུང་རྟེན་དེ་ལ་ཆུ༔ དབང་ཆེན་གསེར་གྱི་ས་གཞིའི་སྟེང༔ ལྷུན་པོ་རི་རབ་རོལ་བའི་མཚོ༔ འགྲོ་བ་དྲུག་པོ་ཆགས་པའི་གནས༔ རྟ་གདོང་མེ་དང་བཅས་པ་ནི༔ སོ་སོའི་སྐྱེ་བོས་མ་དག་མཐོང༔ འཕགས་པའི་ཡེ་ཤེས་རོལ་བ་དང༔ དོན་ལ་ཡུམ་ལྔའི་རང་བཞིན་ཡིན༔ ཤཱཀྱའི་སྐྱེས་མཆོག་ཐུབ་པའི་ཞིང༔ འཛམ་གླིང་འདི་རུ་ཡུལ་ཆེན་དྲུག༔ དཔལ་ལྡན་ས་ཡི་ཐིག་ལེ་ཆེ༔ ཚོགས་ཀྱི་འདུ་བ་ཉེར་བཞིའི་གླིང༔ དུར་ཁྲོད་ཆེན་པོ་བརྒྱད་དང་བཅས༔ ཁྱད་པར་རི་མཐོ་ས་གཙང་བ༔ གངས་ཅན་བོད་ཀྱི་ཡུལ་འདི་རུ༔ སྟོན་པས་ཞབས་ཀྱིས་མ་བཅག་ཀྱང༔ སྤྱན་རས་གཟིགས་ཀྱིས་བྱིན་གྱིས་བརླབས༔ གངས་རི་ཉི་ཤུ་རྩ་གཅིག་ལ༔ འཕགས་པ་འཁོར་བཅས་དངོས་སུ་བཞུགས༔ གནས་མཆོག་ཀུན་གྱི་རྩ་བ་ཡིན༔ ཨོ་རྒྱན་སློབ་དཔོན་པདྨ་ངས༔ སྒྲུབ་པ་ཟབ་མོ་མང་དུ་བགྱིས༔ སངས་རྒྱས་བྱང་ཆུབ་སེམས་དཔའ་དང༔ བླ་མ་ཡི་དམ་མ་ལུས་པ༔ མཐའ་ཡས་སྤྱན་དྲངས་བཞུགས་སུ་གསོལ༔ མཁའ་འགྲོ་རྣམས་ལ་གཉེར་གཏད་ཅིང༔ དམ་ཅན་ཆོས་སྐྱོང་སྲུང་མར་བསྐོས༔ ཟབ་མོའི་གཏེར་ཁ་མང་དུ་སྦས༔ ཞལ་བྱང་གནས་ཡིག་དཀར་ཆག་བཏབ༔ འགྱེད་པའི་སྐྱེས་བུ་ལས་ཅན་བཅས༔ མཐའ་རྒྱས་མ་ཚང་མེད་པ་བྱས༔ ཀུན་ཏུ་བཟང་པོས་བྱིན་བརླབས་པའི༔ ཆོས་དབྱིངས་ནམ་མཁའི་གནས་སུ་ཆགས༔ ལོངས་སྤྱོད་རྫོགས་སྐུས་བྱིན་བརླབས་པའི༔ འབྱུང་བའི་བཅུད་རྣམས་འདུས་པ་ལས༔ ནམ་མཁའི་བཅུད་འདུས་རྩལ་གདང་ནི༔ དྲག་ཏུ་མཐིང་ཀ་ཁྱབ་པ་ཆེ༔ རྒྱ་ཆེ་དྭངས་ལ་ཟབ་པ་འོད༔ ས་ཡི་བཅུད་འདུས་གངས་ཅན་རི༔ ཆུ་ཡི་བཅུད་འདུས་གཏན་འཁྱིལ་མཚོ༔ མེ་ཡི་བཅུད་འདུས་དྲོད་ཆེན་འབར༔ དབྱར་བསིལ་གངས་ཁྲོད་ཡིན་ན་ཡང༔ དགུན་དུས་ས་མིག་ཁེངས་པ་མེད༔ རླུང་བཅུད་ནགས་ལྗོན་འབྲས་ལྡན་ཞིང༔ སྨན་གྱི་རིགས་རྣམས་ཐམས་ཅད་རྒྱས༔ དེ་ལྟར་གནས་ཀྱི་བྱུང་ཚུལ་ལོ༔ ས་མ་ཡ༔ གཉིས་པ་གནས་ཀྱི་ཡོན་ཏན་ནི༔ གངས་རི་འགྱུར་མེད་ཆོས་ཀྱི་སྐུ༔ གཡུ་མཚོ་གཏན་འཁྱིལ་ལོངས་སྤྱོད་རྫོགས༔ བྲག་རི་གཡའ་སྤང་ནགས་ཁྲོད་སོགས༔ཇི་ལྟར་འདོད་པ་སྤྲུལ་བའི་སྐུ༔ གཙོ་བོ་སྐུ་ཡི་གནས་ཡིན་ཕྱིར༔ ཀུན་ཏུ་བཟང་པོ་ཡབ་དང་ཡུམ༔ དེ་བཞིན་རྣམ་སྣང་རྡོ་རྗེ་སེམས༔ རིགས་ལྔའི་རང་བཞིན་སྐུ་ཡི་གནས༔ ཤེལ་གྱི་གུར་ཕུག་འདྲ་བ་ལྔ༔ ཡབ་ཡུམ་སྐུ་ཡང་གསལ་བར་ཤར༔ བྱང་ཆུབ་སེམས་དཔའ་རིགས་གསུམ་མགོན༔ སྐུ་མཆོག་གསལ་བའི་གངས་རི་གསུམ༔ རྩེ་རྒྱས་དཔལ་བཤོས་བསླང་བ་འདྲ༔ ལུང་ཆེན་ཉི་ཤུ་ལུང་ཕྲན་བརྒྱད༔ དམ་པ་རིགས་བརྒྱའི་དཀྱིལ་འཁོར་རྫོགས༔ གབ་ཅིང་སྦས་པའི་ལུང་པ་བཅུ༔ ཀླ་ཀློ་གདུག་པ་འཐིབ་པའི་ཚེ༔ སྙིང་ནས་ཆོས་བྱེད་དགའ་བའི་གནས༔ དབུས་ཕྱོགས་རུ་ཡི་ལུང་པ་རུ༔ རིག་འཛིན་བླ་མ་སྤྲིན་ལྟར་གཏིབ༔ དབང་ཆེན་རྟ་ཡི་ལུང་པ་རུ༔ རུ་ཏྲ་བསྒྲལ་བའི་བཀོད་པ་ཚང༔ གསང་སྔགས་བསྟན་པ་འབྱུང་བའི་གནས༔ བྱང་ཕྱོགས་མཁའ་འགྲོའི་ལུང་པ་རུ༔ རྡོ་རྗེ་ཕག་མོ་རིགས་ལྔ་བཞུགས༔ དཔའ་བོ་མཁའ་འགྲོ་འདུ་བའི་གླིང༔ ཤར་ཕྱོགས་རྔམ་ཁྲོའི་ལུང་པ་རུ༔ སྒོ་སྲུང་ཁྲོ་བོ་ལས་ལ་རྔམ༔ ཡི་དམ་དཔལ་ཆེན་ཁྲོ་རྒྱལ་རྣམས༔ གར་དགུའི་རོལ་བས་དབུས་ནས་འགྱིངས༔ གུ་རུ་པདྨ་འབྱུང་གནས་བདག༔ བདེ་ཆེན་ཚོགས་ལ་རོལ་བ་ཡི༔ རྫུ་འཕྲུལ་གར་གྱིས་ཞབས་བརྡབས་པས༔ མཐོང་བས་སྣང་བ་འགྱུར་བའི་མཚོ༔ བསྒྲུབས་པས་ཡེ་ཤེས་བསྐྱེད་པར་བྱེད༔ མཁའ་འགྲོ་འདུ་བའི་མཚོ་གླིང་གི༔ ཀླུ་ཡི་ཕོ་བྲང་ཆེན་པོའི་རྩེར༔ མི་འགྱུར་རྟགས་སུ་ཕ་བོང་བཞག༔ རིན་ཆེན་དབྱིབས་ཀྱི་ལུང་བ་རུ༔ རིན་ཆེན་ཤེལ་གྱི་ཕ་བོང་ཡོད༔ རྫོགས་ཆེན་བསྟན་པའི་རྩ་བར་གནས༔ བྱང་ཆུབ་ཤིང་གི་ལྗོན་པའི་ཚལ༔ དགོས་འདོད་འབྲས་བུ་སྣ་ཚོགས་འབྱུང༔ ཁྲོ་བོ་རོལ་བའི་ལུང་པ་རུ༔ བདུད་རྩི་ཁྲུས་ཆབ་འོ་མའི་མཚོ༔ བཏུང་ཞིང་ཁྲུས་བྱས་ཉོན་སྒྲིབ་སེལ༔ ཁྲོ་མོ་རོལ་བའི་ལུང་པ་རུ༔ རཀྟ་ཁྲག་གི་ཞལ་ཆུ་འབབས༔ ཆུ་བོས་ཧཱུྃ་དང་ཕཊ་སྒྲ་སྒྲོགས༔ ཕྱི་ནང་བར་ཆད་བགེགས་ཆེན་འཇོམས༔ ལྷོ་ཕྱོགས་གསང་བའི་ལུང་པ་རུ༔ དར་གྱི་ཡོལ་བ་བྲེས་འདྲའི་གངས༔ ཚེ་ཡི་བུམ་པ་འདྲ་བའི་བྲག༔ འཆི་མེད་ནགས་ཚལ་ལྷ་ཡི་ལྗོངས༔ གཡུ་མཚོ་གཏན་འཁྱིལ་ཚེ་ཡི་བཅུད༔ ལྗོན་པའི་ཤིང་མཆོག་ཚེ་ཡི་མདའ༔ ས་ཡི་ཐིག་ལེ་དཔལ་གྱི་རི༔ ནུབ་ཕྱོགས་མགོན་པོ་ཤཱ་ནཱའི་ལུང༔ ཞིང་སྐྱོང་སེང་གེའི་གདོང་ཅན་གནས༔ གཞན་ཡང་ཕྱོགས་བཞིའི་གངས་ཁྲོད་དུ༔ ཨོ་རྒྱན་ང་ཡི་སྒྲུབ་ཕུག་བཞི༔ ཨོ་རྒྱན་ང་ཡི་ཕྱག་རྗེས་རེ༔ མཁའ་འགྲོ་གནས་པའི་མཚོ་ཆུང་རེ༔ ཡི་དམ་ལྷ་ཡི་དཀྱིལ་འཁོར་རེ༔ ཡ་མཚན་ཅན་གྱི་གཏེར་ཆེན་རེ༔ འདོན་མི་རུང་བའི་བླ་གཏེར་བཞི༔ སུས་ཀྱང་འདོན་རུང་གཏེར་ཕྲན་བརྒྱད༔ འགྱུར་མེད་གངས་རི་ལྷུན་ཆགས་པ༔ སྒོམ་ན་ལྟ་བའི་གདེང་ཆེན་རྙེད༔ ཆུ་བོ་ལྷང་ལྷང་རྔ་སྒྲ་སྒྲོགས༔ སྒྲུབ་ན་སྔགས་ཀྱི་དངོས་གྲུབ་མྱུར༔ ལུང་ཁོག་ཡངས་ལ་རྩི་ཤིང་ཕྱུག༔ འཆད་ན་ཤེས་རབ་རྩལ་ཁ་རྒྱས༔ མཚོ་དང་ཆུ་ཀླུང་དྭངས་ཤིང་བསིལ༔ བརྟེན་ན་བློ་གྲོས་རབ་ཏུ་འཕེལ༔ ཆུ་བོ་ཡངས་ཤིང་རྒྱས་པ་ནི༔ སྨིན་བྱེད་དབང་གི་ཆུ་བོ་རྒྱས༔ དབྱིངས་ཕྱུག་གནས་པའི་མཚོ་ཆེན་ལ༔ བདེ་གཤེགས་ཞི་བའི་དཀྱིལ་འཁོར་བཞུགས༔ རིན་ཆེན་བྲག་ཞབས་བྱ་སྐྱིབ་ཁེངས༔ སྒོམ་ན་ཐོད་རྒལ་ཉམས་རྟོགས་འཆར༔ ཁྲོ་བོ་རོལ་བའི་ཕོ་བྲང་དུ༔ སྲ་འཁྲེག་རྡོ་ཡི་ལྡིང་ཁང་དུ༔ སྒྲུབ་ན་བསྐྱེད་རིམ་ལྷག་པར་གསལ༔ ལྗོན་ཚལ་ཤིང་དྲུང་ཀེའི་ཚང་དུ༔ བསྒྲུབས་ན་རྣལ་འབྱོར་མོས་གུས་འབར༔ མཁའ་འགྲོ་འདུ་བའི་ཆོས་འབྱུང་དུ༔ མ་མོ་མཁའ་འགྲོ་ཚོགས་སུ་འདུ༔ ནགས་ཁྲོད་སྦས་པའི་གསང་ཕུག་ཏུ༔ ཚོགས་ཀྱི་འདུ་བ་བདེ་ཆེན་ཁོལ༔ རུ་ཏྲ་དམ་སྲིའི་སྙིང་ཁྲག་རྣམས༔ དམར་ནག་རཀྟའི་རྒྱ་མཚོ་འཁྱིལ༔ དམ་ཅན་རྒྱ་མཚོ་ལས་ལ་འདུ༔ རྡོ་ཐུན་རྡོ་ཡི་སྒྲུབ་ཁང་དུ༔ བསྒྲུབས་ན་ཞིང་བཅུའི་སྲོག་གཅོད་འགྲུབ༔ དམ་སྲི་ཐགས་ཅད་དམ་ལ་བཏགས༔ ཚོགས་བསགས་ཡང་ཡང་བསྒྲུབས་པས་ན༔ དམ་སྲི་རྒྱུ་བའི་ལམ་ཆད་ནས༔ བོད་ཁམས་ཐམས་ཅད་རྒྱལ་བར་འགྱུར༔ འགྱུར་མེད་གངས་ཀྱི་ར་བས་བསྐོར༔ ནམ་མཁའི་ལྡིང་ཁང་མཐོ་ལ་དྭངས༔ གཏན་འཁྱིལ་རྒྱ་མཚོ་གཏིང་རིང་ཟབ༔ ཉམས་དང་རྟོགས་པ་འཆར་བའི་གནས༔ མཆོག་གི་དངོས་གྲུབ་མྱུར་དུ་འགྲུབ༔ རྫ་བྲག་རྔམ་ལ་ན་བུན་འཐིབས༔ ཆུ་ཀླུང་དྲག་འབབ་འུར་སྒྲ་ཆེ༔ འབྲུག་སྒྲ་དྲག་པོ་གློག་འོད་འཁྱུགས༔ རྩལ་རྔམ་ཆེ་ཞིང་འཇིགས་རུང་བས༔ དམ་ཉམས་སྡིག་ཅན་སྐྲག་ཅིང་བྲོས༔ མཁའ་འགྲོ་གནས་ཀྱི་སྲུང་མ་ཡིས༔ ལོག་པར་སྤྱོད་ལ་ཆད་པ་འབེབས༔ དམ་ལྡན་རྟུལ་ཞུགས་ལྡན་པ་རྣམས༔ དང་པོ་སེམས་ལ་ཡ་ང་སྐྱེ༔ བར་དུ་བསྙེལ་མེད་གདེངས་བསྐྱེད་ནས༔ ཐ་མ་ལུས་བདེ་རིག་པ་དྭངས༔ སྐྱོ་ཤས་ངེས་འབྱུང་ཐུགས་ལ་སྐྱེ༔ ཉམས་དང་རྟོགས་པའི་རྩལ་ཁ་རྒྱས༔ སློང་ཚད་རྟེན་འབྲེལ་འདིར་འགྲིག་པས༔ རྟུལ་ཞུགས་ལྡན་པས་གནས་འདིར་འགྲིམ༔ ས་ཡི་བཅུད་འདུས་གཏན་ཆགས་གངས༔ ཆུ་ཡི་བཅུད་འདུས་གཏན་འཁྱིལ་མཚོ༔ མེ་རླུང་བཅུད་འདུས་རྩི་བཅུད་ལྡན༔ འཆི་མེད་བཅུད་ལེན་འགྲུབ་པའི་གནས༔ རི་བོ་ལྷུན་ཆགས་ནོར་བུ་ལྡན༔ ས་ཡི་བཅུད་ལྡན་སྟོབས་ཆེ་བས༔ ནོར་དང་ལོངས་སྤྱོད་འདི་རུ་འགྲུབ༔ ཕྱི་ལྟར་ཕུན་ཚོགས་བཀོད་པ་ཚོགས༔ ནང་ལྟར་རྒྱལ་བའི་དཀྱིལ་འཁོར་རྫོགས༔ གསང་བ་ཡེ་ཤེས་ལྔ་ཡི་ཞིང༔ ཡང་གསང་ཧེ་རུ་ཀ་ཡི་གྲོགས༔ བླ་མའི་མཆོད་སྡོང་འདི་ཡིན་པས༔ ལུས་ཀྱིས་ཕྱག་དང་བསྐོར་བ་དང༔ ངག་གིས་བསྟོད་ཅིང་བཟླས་པ་བྱེད༔ ཡིད་ཀྱིས་དད་ཅིང་མོས་པས་བརྟེན༔ དངོས་འབྱོར་ཡིད་ཀྱི་སྤྲུལ་པས་མཆོད༔ བྱ་བ་ཕྲིན་ལས་རྒྱ་ཆེར་སྤེལ༔ དེ་ལྟར་བཀུར་བསྟི་བགྱིས་གང་ལ༔ གནས་སྐབས་ནད་དང་གནོད་པ་ཞི༔ ཚེ་དང་བསོད་ནམས་ལོངས་སྤྱོད་འཕེལ༔ ཡིད་ལ་གང་འདོད་དབང་དུ་གྱུར༔ མཐར་ཐུག་སྒྲིབ་པ་ཀུན་བྱང་ནས༔ ཡེ་ཤེས་བླ་ན་མེད་པ་འཕེལ༔ གཞན་ཡང་འདི་ལ་བཤད་བྱས་ན༔ ཤར་དུ་སྐུ་མཆོག་རོལ་བའི་གནས༔ དེ་བཞིན་ཡེ་ཤེས་ཐུགས་ཀྱི་གནས༔ ཤར་ལྷོ་མ་མོ་རོལ་བའི་གནས༔ ལྷོ་རུ་བདུད་རྩི་རོལ་བའི་གནས༔ ལྷོ་ནུབ་རིག་འཛིན་རོལ་བའི་གནས༔ བྱང་ཤར་དྲག་སྔགས་སྒྲུབ་པའི་གནས༔ རིམ་པ་བཞིན་དུ་འཁོར་ལོ་དང༔ རྡོ་རྗེ་ཐོད་པའི་མཁར་བརྩིགས་པ༔ བུམ་ཐོད་ཁ་ཊཾ་མ་རུ༔ མཁའ་ཐབས་རྒྱ་གྲམ་ཕུར་བའི་དབྱིབས༔ རིན་ཆེན་མཚོན་ཆ་གཟེང་བ་འདྲ༔ གྲུབ་པའི་སློབ་དཔོན་ཆེན་པོ་དགུ༔ བཀའ་བབས་རིག་པ་འཛིན་པ་རྣམས༔ རྫུ་འཕྲུལ་གྱིས་བྱོན་སྒྲུབ་པའི་གནས༔ བསྒྲུབས་ན་རང་རང་དངོས་གྲུབ་འགྲུབ༔ ཡོན་ཏན་བརྗོད་པའི་རིམ་པའོ༔ ས་མ་ཡཱ༔ གསུམ་པ་མ་འོངས་པ་ཡི་དུས༔ ང་ཡི་རྫུ་འཕྲུལ་དུ་མ་ཡིས༔ གནས་འདིའི་བསྔགས་པ་བརྗོད་པར་བྱེད༔ གཡུང་དྲུང་བོན་གྱི་སྒྲུབ་གནས་བྱེད༔ ཤར་གྱི་ཐུགས་གཏེར་ལ་སྤྱོད་པའི༔ ལས་ཅན་སྐྱེས་བུ་འགྲོ་བ་འདུལ༔ རྡོ་རྗེ་ཅན་གྱི་མིང་ཅན་གྱིས༔ སིདྡྷི་མཚོ་ནས་དྲག་སྔགས་འབྱེད༔ མཁའ་འགྲོ་སྒྲུབ་པའི་སྙིང་པོ་ཡི༔ ཞལ་བྱང་འདི་ཉིད་ལོན་ནས་ཀྱང༔ བར་དུ་ཐུགས་གཏེར་སྣ་ཚོགས་འབྱེད༔ འབྲིང་དུ་སྒྲུབ་པའི་གནས་སུ་བྱེད༔ དེ་ནས་ལྷོ་ནས་ལས་ཅན་ཞིག༔ གློག་འགྱུ་བཞིན་དུ་ཞལ་བྱང་ལེན༔ སངས་རྒྱས་བསྟན་པ་ཡུན་དུ་བསྲིང༔ ཆོས་མཛད་ནམ་མཁའི་མིང་ཅན་སོགས༔ ལས་ཅན་སྐྱེས་བུ་དུ་མ་ཡིས༔ བོད་ཁམས་བདེ་ཐབས་བརྩོན་པར་བྱེད༔ གཞན་ཡང་གནས་འདིའི་ཕྱོགས་བཞི་རུ༔ བསྟན་པ་འཛིན་པའི་སྐྱེས་བུ་བཞི༔ སྤྲུལ་དང་ཡང་སྤྲུལ་དུ་མ་འབྱུང༔ ཆོས་ཀྱི་རྒྱལ་པོ་ཆེན་པོ་བཞི༔ གནས་འདིའི་ཕྱོགས་བཞིར་རྒྱུན་པར་འབྱུང༔ བསྟན་ལ་གུས་ཤིང་འགྲོ་ལ་བྱམས༔ ཟབ་མོའི་གཏེར་ལ་དབང་བ་བཞི༔ རྡོ་རྗེ་རིན་ཆེན་པདྨ་དང༔ ཕྲིན་ལས་རྩལ་དུ་གྲགས་པ་འབྱུང༔ གཞན་ཡང་གནས་ཀྱི་མཐའ་སྐོར་དུ༔ རིག་འཛིན་ཕོ་མོ་མང་པོ་འདུས༔ ཁྱད་པར་ཨ་ཏི་རྫོགས་ཆེན་གྱི༔ སྣང་བཞིའི་ཡེ་ཤེས་མཐར་ཕྱིན་པའི༔ ཉམས་རྟོགས་ལྡན་པ་དུ་མ་འབྱུང༔ རིག་པ་ཚད་ལ་ཕེབས་པ་ནི༔ བཅུ་ཕྲག་རྣམ་པ་ཀུན་ཏུ་འབྱུང༔ ཆོས་ཉིད་ཟད་སར་འཁྱོལ་བ་ཡི༔ གྲུབ་ཐོབ་རྒྱུན་མི་ཆད་པ་འབྱུང༔ གཞན་ཡང་གནས་ཀྱི་མཐའ་འཁོར་དུ༔ མཁས་དང་གྲུབ་པ་དཔག་མེད་འབྱུང༔ དད་ལྡན་ཕོ་མོ་མཚན་དང་ལྡན༔ གཏོང་ཕོད་ལྡན་པ་དཔག་མེད་འབྱུང༔ མཉམ་མེད་ཐུབ་པའི་བསྟན་པ་ལ༔ བཀུན་བསྟི་ཕུ་དུད་ཆེ་བ་ཡི༔ རྒྱལ་པོ་བཙུན་མོ་དུ་མ་འབྱུང༔ མདོ་སྔགས་བསྟན་པ་འབྱུང་བའི་གནས་༔ སྒྲུབ་པའི་གླིང་དང་བཤད་པའི་གླིང༔ གཙུག་ལག་ཁང་ནི་དུ་མ་འབྱུང༔ བོད་ཆེན་ལྗོངས་སུ་ཆེས་ལྷག་པའི༔ གནས་མཆོག་འདི་ནི་ཁྱད་པར་འཕགས༔ དུས་ཀྱི་ཐ་མ་གྱུར་པ་ན༔ ལས་ཅན་འབྲུག་གི་མིང་ཅན་འབྱུང༔ བསྟན་དང་འགྲོ་ལ་ཕན་བདེ་སྤེལ༔ ཟབ་མོའི་ཐུགས་གཏེར་ལྷོ་ནས་འབྱེད༔ སྔགས་འཆང་སྙིང་པོའི་མིང་ཅན་གྱིས༔ པདྨའི་ཐུགས་གཏེར་ལྷོ་ནས་འབྱེད༔ ཨ་ཏི་སྙིང་པོའི་བསྟན་པ་སྤེལ༔ བྱང་ནས་གསང་སྔགས་ལྷག་པའི་མིང༔ དགོངས་གཏེར་འདྲ་མིན་ཆེ་ཕྲ་འབྱིན༔ ཕྱི་རོལ་མཐའ་དམག་ཐམས་ཅད་བཟློག༔ རྒྱལ་པོ་དྲག་ཤུགས་ལྡན་པ་ཡིས༔ ཀླ་ཀློའི་དཔུང་ཚོགས་སྐབས་གཅིག་འཇོམས༔ མདོ་དང་སྔགས་ཀྱི་བསྟན་པ་སྤེལ༔ རབ་བྱུང་གསལ་བའི་མིང་ཅན་གྱིས༔ ལོག་པར་སྤྱོད་པ་ཚར་བཅད་ནས༔ ཡང་དག་བསྟན་པ་འཛུག་ཅིང་སྤེལ༔ འབྱུང་འགྱུར་བསྟན་པའི་རིམ་པའོ༔ ས་མ་ཡ༔ དེ་ལས་འཕྲོས་པའི་གཏམ་ཚོགས་ཅུང་གླེང་ན༔ གངས་ཅན་ལྗོངས་སུ་གནས་ཀྱི་མཆོག་གྱུར་པ༔ གངས་རི་ཉི་ཤུ་རྩ་གཅིག་དཔལ་གྱི་གནས༔ སྟོད་ཀྱི་མངའ་རིས་སྐོར་གསུམ་གངས་རི་བདུན༔ བར་གྱི་དབུས་གཙང་རུ་བཞི་གངས་རི་བདུན༔ སྨད་ཀྱི་མདོ་ཁམས་སྒང་དྲུག་གངས་རི་བདུན༔ རེ་རེ་ལའང་ཁྱད་པར་གསུམ་གྱིས་དབྱེ༔ གངས་རི་ཉེར་གཅིག་གངས་སྦས་ཉེར་གཅིག་དང༔ གངས་ལྗོངས་ཉེར་གཅིག་དྲུག་ཅུ་རྩ་གསུམ་ལ༔ གངས་རྒྱལ་ཏི་སེ་དང་ནི་དྲུག་བཅུ་བཞི༔ ཡུལ་ཅན་ཡེ་ཤེས་འཁོར་ལོ་དང་ལྡན་པ༔ རྒྱུ་ཡི་ས་བཅུ་འབྲས་བུའི་ས་བཅུ་དང༔ བླ་ན་མེད་པའི་ས་དང་ཉི་ཤུ་གཅིག༔ ནང་རྒྱུད་ཨ་ནུ་ཡོ་གའི་ལུང་ལས་གསུངས༔ ཕྱི་ཡི་ལུས་དང་ནང་གི་རྡོ་རྗེའི་ལུས༔ གཞན་དུ་མ་ཡིན་ཡང་གསང་ཡེ་ཤེས་ཉིད༔ ཕྱག་རྒྱའི་སྐུ་ལ་དཔལ་ཆེན་ཞལ་ཉེར་གཅིག༔ གསང་བའི་སྤྱན་བཅས་དྲུག་ཅུ་རྩ་བཞི་ལས༔ སྤྲུལ་བ་ཁྲག་འཐུང་དྲུག་ཅུ་རྩ་བཞི་ཡི༔ དམ་ཚིག་རྒྱ་མཚོའི་དཀྱིལ་འཁོར་དྲུག་ཅུ་བཞི༔ དེ་བཞིན་རླུང་དང་དཀར་དམར་ཐིག་ལེ་ལ༔ ཁྲག་འཐུང་དྲུག་ཅུ་རྩ་བཞི་ཡབ་དང་ཡུམ༔ འཁོར་དང་བརྟེན་གྱི་གཞལ་ཡས་ཁང་དང་བཅས༔ ཡེ་ཤེས་འབར་བ་དྲག་པོ་དྲུག་ཅུ་བཞི༔ དམ་ཚིག་རྒྱ་མཚོ་དཀྱིལ་འཁོར་ལྷུན་གྱིས་གྲུབ༔ དེ་ལྟར་ནང་དང་གསང་བའི་གནས་ལུགས་ལ༔ གསེར་དང་གསེར་གྱི་འོད་བཞིན་ཕྱི་རུ་ཤར༔ དེ་ལྟར་ཞིབ་ཀྱིས་འགྲེལ་ཞིང་བཤད་ཤེས་ན༔ ཨཱ་ནུ་ལུང་འདི་རྣལ་འབྱོར་པ་རུ་བརྗོད༔ ཕྱི་ནང་ལུས་ཀྱི་གནས་ལུགས་ཤེས་པ་ཡི༔ མ་བསྐྱེད་རྒྱལ་བའི་དཀྱིལ་འཁོར་ལྷུན་གྱིས་གྲུབ༔ རླུང་གི་འཇུག་ལྡང་སྒྲ་སྐད་རང་བྱུང་སྔགས༔ དུག་ལྔའི་རྟོགས་པ་བདེ་ཆེན་དབྱིངས་སུ་གྲོལ༔ འདོད་ཡོན་ལྔ་པོ་ཡེ་ཤེས་རྒྱན་དུ་རོལ༔ ཚེ་རབས་བདེ་སྡུག་བདེ་བ་ཆེན་པོར་ཤར༔ དེ་ལྟར་ཀུན་བཟང་སྤྱོད་པའི་རྣལ་འབྱོར་པ༔ རྟུལ་ཞུགས་ལམ་སློང་བྱེད་པའི་གནས་ཆེན་འགྲིམས༔ སྣང་གྲགས་རྟོགས་པ་ལྷ་སྔགས་ཡེ་ཤེས་སྐུ༔ ཤར་བ་ཨ་ནུ་ལུང་གི་རྣལ་འབྱོར་ལ༔ དམ་ཚིག་ཉམས་པ་བྱ་བའི་མིང་ཡང་མེད༔ གལ་མདོ་ངེས་པའི་དམ་ཚིག་སྒོ་གསུམ་དག༔ སྣོད་བཅུད་སྣང་གྲགས་དག་པ་ལྷར་ཤར་བས༔ གནོད་པ་མི་བྱེད་གཞན་ལ་ཕན་པ་འབྱུང༔ རྒྱུ་ཡི་ཚུལ་ཁྲིམས་གསུམ་པོ་རྣམ་པར་དག༔ རྡོ་རྗེ་སློབ་དཔོན་མཆེད་ལྕམ་ལྷ་རུ་མཐོང༔ རྒྱལ་བ་སྲས་བཅས་སྐུ་ཡི་དམ་ཚིག་འགྲུབ༔ ཕྱག་བརྒྱའི་ལྷ་གསལ་སྔགས་ལ་རྒྱུན་ཆད་མེད༔ འདོད་ཡོན་བདེ་ཆེན་ཆགས་པའི་གསང་མཆོག་འགྲུབ༔ ལྟ་བ་དབྱིངས་དང་ཡེ་ཤེས་དབྱེར་མེད་པས༔ རྩོལ་མེད་འགྲོ་དོན་ཐུགས་ཀྱི་དམ་ཚིག་ལྡན༔ དེ་ལྟར་སྡོམ་པ་དམ་ཚིག་ལྷུན་གྲུབ་པས༔ ལམ་གྱི་ཡོན་ཏན་ཐུན་རེ་འབུམ་འབུམ་འཕེལ༔ རྩོལ་མེད་ངང་གིས་མངོན་པར་སངས་རྒྱས་པ༔ ལུང་ཆེན་ཨ་ནུ་ཡོ་གའི་དགོངས་པ་ལ༔ གནས་ཡུལ་ཡོན་ཏན་མན་ངག་ཆེད་དུ་བརྗོད༔ འདི་ཡང་དཔལ་ཆེན་རྡོ་རྗེ་ཆེ་མཆོག་གིས༔ བཀའ་ཡིས་ཇི་ལྟར་བསྔགས་བཞིན་བདག་གིས་བརྗོད༔ སྐལ་ལྡན་སྒྲུབ་པ་པོ་ཡི་སྙིང་ལ་ཆོངས༔ གྲུབ་པ་ཐོབ་པའི་རྣལ་འབྱོར་ཕོ་མོ་རྣམས༔ ཞལ་བྱང་ཡི་གེ་ཕབས་ལ་གཏེར་དུ་སྦས༔ སྒྲུབ་པས་ལུང་རྟོགས་བསྟན་པ་གནས་ཤིང་འཕེལ༔ གསང་སྔགས་བསྟན་པའི་འགྲོ་དོན་མཐར་རྒྱས་ཤོག༔ ས་མ་ཡ༔ རྒྱ་རྒྱ་རྒྱ༔ ཨོ་རྒྱན་མཆོག་གྱུར་བདེ་ཆེན་ཞིག་པོ་གླིང་པས་རབ་བྱུང་བཅོ་ལྔ་པའི་ཐོག་མ་མེ་ཡོས་ལོའི་དབྱར་ཟླ་ར་བའི་དུས་ཆེན་ཉིན་རྫོགས་ཆེན་རིན་པོ་ཆེ་མཁན་སློབ་ཀྱིས་བཀས་བསྐུལ་ཞིང་། ཕྱི་ནང་གསང་བའི་རྟེན་འབྲེལ་དུ་མ་འགྲིགས་པས་གླིང་སྤྲུལ་རིན་པོ་ཆེ་དང་རིགས་ཀྱི་མྱུ་གུ་གཉིས་སྐལ་ལྡན་དུ་མ་བཅས། རུ་དམ་གངས་ཁྲོད་ཀྱི་བྲག་ནས་རྡོ་སྒྲོམ་རྣམ་པ་གསུམ་སྤྱན་དྲངས་པའི་ནང་ནས་གནས་ཡིག་ཞལ་བྱང་དང་བདུད་རྩི་ཆོས་སྨན་བཅས་བྱོན་པ་གངས་ཁྲོད་བདེ་བ་ཆེན་པོའི་ཕུག་པ་ནས་སངས་རྒྱས་ཚེ་རིང་གིས་ཚོགས་ཀྱི་མཆོད་པ་རྒྱ་འབུལ་དང་། རྒྱལ་རོང་ནམ་སྤྲུལ་རིན་པོ་ཆེས་གསེར་གྱི་མཎྜལ་དང་བཅས་སྐུལ་མ་མཛད་པར་བརྟེན་ཁྲོ་ཕྱོགས་གཡུ་མཚོའི་གནས་སྒོ་འབྱེད་སྐབས་ཤོག་སེར་ལས་བསྒྱུར་བའི་ཡེ་གེ་པ་ལྷོ་ཕྱོགས་ཚངས་པའི་ལྔ་རིག་སྨྲ་བའི་བཙུན་པ་རིན་ཆེན་རྣམ་རྒྱལ་གྱིས་མཛད་པའོ། །མངྒ་ལཾ།

མཆན།གནས་ཡིག་འདི་མཆོག་གྱུར་བདེ་ཆེན་ཞིག་པོ་གླིང་པའི་བཀའ་འབུམ་ལས་ཞལ་བཤུས་པའོ། །

༄༅། །མཁའ་སྤྱོད་ས་ལ་འཕོས་པ་བདེ་ཆེན་ཞིང་། །ཕ་ཡུལ་པདྨ་བཀོད་ཀྱི་གནས་བཟང་དེའི། །ཆ་ལག་རུ་དམ་སྐྱིད་ཁྲམ་ལུང་པ་ནི། །རི་དབྱིབས་པདྨ་ཁ་ཕྱེས་ལྟ་བུ་ལ། །རྒྱབ་མདུན་དར་དཀར་ཡོལ་བ་དཀྲིས་པ་འདྲ། །ཤར་ཕྱོགས་ཐང་ལ་རྟ་མཆོག་འདྲ་བའི་བྲག །གུ་རུ་ཐོད་ཕྲེང་སྡེ་ལྔའི་རང་བྱོན་ཡོད། །གནས་དེའི་བྱང་ཤར་ཚེས་བརྒྱད་འདྲ་བའི་བྲག །གནོད་སྦྱིན་འབར་བ་སྤུན་བདུན་ཕོ་བྲང་ཡོད། །མདུན་དུ་རྩི་ཤིང་དམར་པོ་ཡལ་འདབ་ལྡན། །དབྱར་དུས་ཁྲག་གི་རྒྱ་མཚོ་ཅུང་ཟད་འཁྱིལ། །ཀླུ་བཙན་མངོན་དུ་རྒྱུ་བའི་ར་གཞོབ་འཐུལ། །ལྷོ་ངོས་གངས་རི་ལྷུན་ཆགས་ངོས་དཀྱིལ་གྱི་། །བྲག་ལ་རྗེ་བཙུན་སྒྲོལ་མ་དངོས་སུ་བཞུགས། །མེ་ལྷའི་མཚམས་སུ་འཇམ་དཔལ་གཤིན་རྗེ་ཡི། །ཕོ་བྲང་ངོས་ལ་དེའི་འདབས་འབབ་ཆུའི་རྒྱུན། །གངས་ཆུ་ཤུགས་དྲག་ལྡན་པ་བདུད་རྩིའི་ཆུ། །གཤིན་རྗེའི་དྲག་སྔགས་དུ་ཏྲི་ཕུ་ཏྲི་དང་། །ཡ་མ་རཱ་ཛ་ཡ་མ་རཀྴ་སྒྲོགས། །དྲང་སྲོང་མཉམ་བཞག་ལྟ་བུའི་སྒྲུབ་སྡེ་ཆགས། །འདབས་སུ་སྨན་བཙུན་མཁའ་འགྲོའི་ཕོ་བྲང་ཡོད། །ནུབ་བྱ་རི་བོང་རྣ་བ་སྦྲེལ་འདྲའི་བྲག །སྤྱན་རས་གཟིགས་དང་སྒྲོལ་མ་དཀར་མོའི་སྐུ། །རང་བྱོན་གཟུངས་སྔགས་མ་ཎི་ཡིག་དྲུག་དང་། །ཨཱརྱ་ཏ་རེ་བྲག་གི་སྡེབ་གཉིས་ཡོད། །བྱང་ཕྱོགས་རླུང་ལྷ་གནས་པ་ཕ་བོང་བདུན། །རྣམ་སྲས་ཛཾ་ལྷའི་ཕོ་བྲང་དངོས་ཡིན་ཡང་། །དམ་ཅན་རྡོར་ལེགས་ཆོས་རྒྱལ་སྐུ་ལྔ་སོགས། །རང་བྱོན་བྲག་གི་ངོ་ལ་གསལ་དོད་ཡོད། །འདབས་སུ་འབབ་ཆུའི་སྒྲ་ལ་བེ་ཤྲཱི་སྒྲོགས། །ཡུལ་དབུས་ཨོ་རྒྱན་བསམ་གཏན་ཆོས་ཀྱི་གླིང་། །སྟེང་ན་རྩ་གསུམ་མཁའ་འགྲོ་སྤྲིན་ལྟར་གཏིབ། །བར་ན་མཆོག་ཐུན་དངོས་གྲུབ་ཆར་ལྟར་འབེབ། །གཤམ་ན་བསྟན་སྲུང་ཐམས་ཅད་གློག་ལྟར་འཁྱུག །མདོ་སྔགས་བཤད་སྒྲུབ་ཆོས་སྒྲའི་གླུ་དབྱངས་ལེན། །དེ་འདྲའི་གནས་ཀྱི་བཀོད་པ་ངོ་མཚར་བ། །བསམ་མི་ཁྱབ་ཀྱང་མདོར་བསྡུས་ཙམ་ཞིག་བཀོད། །འདི་ལ་ཕྱག་བསྐོར་བྱས་པའི་ཕན་ཡོན་ནི། །དད་མོས་ཅན་གྱིས་སྟོང་ཕྲག་གཅིག་བསྐོར་བ། །དུང་ཕྱུར་གཅིག་ཏུ་འགྱུར་ཞིང་ལས་སྒྲིབ་དག །དངུལ་དཀར་མེ་ལོང་བག་རྡུལ་ཕྱིས་པ་འདྲ། །ཕྱི་མ་སྐུ་གསུམ་ཞིང་ཁམས་མངོན་སུམ་མཐོང། །གླིང་བསྐོར་ཕན་ཡོན་དེ་འདྲར་ཤེས་པར་གྱིས། །དུས་བཟང་རྣམས་སུ་མཐའ་བསྐོར་སུམ་བརྒྱ་ལ། །གོང་གི་འགྱུར་ཡོད་དེ་འདྲ་སྙིང་ལ་ཞོག །གཙུག་ལག་ཁང་དངོས་འདི་ལ་སྟོང་བསྐོར་གཉིས། །དུང་ཕྱུར་འགྱུར་ཡོད་ཉ་སྟོང་བརྒྱད་གསུམ་དང། །ཆོ་འཕྲུལ་དུས་ཆེན་ཤར་ཚེ་བརྒྱ་བསྐོར་གསུམ། །དཱེ་བཱི་ཀོ་ཊ་བསྐོར་དང་ཁྱད་པར་མེད། །སྤྱིར་ན་ལྔ་བདོའི་སྡིག་སྒྲིབ་རྐྱེན་གོས་སམ། །ངེས་བསལ་ཕྱིར་དུ་དམ་སྡོམ་གཙང་མ་ཡིས། །སྨེ་བརྩེགས་རྣམ་འཇོམས་རི་ཁྲུས་ལྷ་བསང་སོགས། །འབད་ན་འཕྲལ་ཕུག་ཡ་མཚན་རིམ་བཞིན་གསལ། །དད་མོས་ཅན་གྱི་དགེ་ལེགས་རེ་སྐོང་ཕྱིར། །ཨོ་རྒྱན་ཆེ་མཆོག་དཔལ་གྱི་རྡོ་རྗེས་བྲིས། །འབྲེལ་ཚད་སྒྲིབ་སྦྱངས་སྐུ་གསུམ་མངོན་གྱུར་ཤོག །མངྒ་ལཾ། །

མཆན། ༡.གོང་གི་གནས་ཡིག་འདི་ནི་པདྨ་སྐལ་བཟང་རིན་པོ་ཆེས་འདོན་སྤྲོད་གནང་བའི་སྔ་འགྱུར་རྫོགས་ཆེན་ཆོས་འབྱུང་ཆེན་མོ་ལས་ཞལ་བཤུས་པའོ། །༢.གནས་འདི་ནི་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་རྫོགས་ཆེན་ཞང་རྫོགས་ཆེན་དགོན་པའི་རྒྱབ་རི་དང་མདུན་རི་སྟེ་ཡིས་ལྷུང་བླ་མཚོའི་ཕྱོགས་ཡིན། རྫོགས་ཆེན་དགོན་དང་ཡིས་ལྷུང་བླ་མཚོའི་ཉེ་འཁོར་ལ་རླངས་འཁོར་བགྲོད་ཐུབ།

༄༅། །ཡོན་ཏན་སྐུ་ཡི་གནས་མཆོག་བསྟན་པ་ནི༔ བོད་ཀྱི་མདོ་ཁམས་འབྲི་ཞེས་བྱ་བ་རུ༔ དངུལ་ཞེས་ལུང་པར་ལྡང་ཞེས་བྱ་བའི་རི༔ བྲག་རི་གཡུ་འབྲུག་གནམ་དུ་འགྲོ་བ་འདྲ༔ རི་ཡི་དབུས་སུ་པད་འབྱུང་སྒྲུབ་པའི་གནས༔ ཕུག་པ་ཟ་འོག་གུར་ཁྱིམ་འདྲ་བའི་ནང༔ བི་མ་མི་ཏྲ་ལོ་གཅིག་བཞུགས་པའི་གནས༔ པད་འབྱུང་དག་པའི་འཁོར་བདུན་དང་བཅས་པའི༔ དབང་གི་དཀྱིལ་འཁོར་ཕོ་བྲང་དགུ་ཀློང་ཡོད༔ ཕུག་པའི་མདོ་རུ་ཐུགས་རྗེ་ཆེན་པོ་དང༔ གཡས་ལོགས་རྟ་མགྲིན་གཡོན་ལོགས་ཕག་མོ་དང༔ ཕུག་པའི་སྟེང་དུ་ཚེ་དཔག་མེད་མགོན་དང༔ གཞན་ཡང་ཡིག་འབྲུ་སྣ་ཚོགས་གསལ་བ་སྟེ༔ ཟབ་པའི་གཏེར་ལྔ་སྐུ་ཡི་གཏེར་གསུམ་སྦས༔ སྲུང་མ་ལྷ་ཆེན་བློ་གྲོས་ཉིད་ལ་གཏད༔ རི་ཞོལ་འདི་རུ་ང་སྤྲུལ་བརྩོན་འགྲུས་མིང༔ གྲུབ་ཐོབ་ཅིག་བྱོན་དེ་ནས་མགོ་བརྩམས་པར༔ རྒྱལ་པོ་བྱིས་པའི་མིང་ཅན་བློ་གྲོས་ཅན༔ རྒྱལ་བའི་བསྟན་ལ་བྱ་བ་བྱེད་པ་འབྱུང༔ དེ་ནི་རྒྱལ་རབས་སིལ་མ་ལྔ་ཙམ་ལ༔ མུ་ཏིག་སྤྲུལ་པ་དཔལ་གྱི་མིང་ཅན་འབྱུང༔ དེ་དུས་དཀར་ཆག་འདི་ཡང་ས་སྟེང་འབྱུང༔

༄༅། །ཡོན་ཏན་གྱི་སྐུའི་གནས་རྔུལ་མདའ་ཕོ་བྲང་སྡེ་དགེ་ལྷུན་གྲུབ་སྟེང་གི་མདུན་ངོས་འབྲི་གཉན་གདོང་། བདུད་འདུལ་རྡོ་རྗེས་གནས་སྒོ་ཕྱེས་ཤིང་གཏེར་ཆེན་དེ་ཉིད་དང་། གནམ་ཆོས་མི་འགྱུར་རྡོ་རྗེ་སྡེ་དགེ་གྲུབ་ཐོབ་རྣམས་ཀྱི་གནས་ཡིག་ཡོད། འདིར་ང་སྤྲུལ་བརྩོན་འགྲུས་མིང་ནི་གྲུབ་ཆེན་ཐང་སྟོང་རྒྱལ་པོའམ་བརྩོན་འགྲུས་བཟང་པོ་ཕེབས་ཤིང་སྡེ་དགེའི་རྒྱལ་ས་ཐོག་མར་འདེབས་པའི་ས་འདུལ་བྱིན་རླབས་སོགས་མཛད། རྒྱལ་པོ་བྱིས་པའི་མིང་ཅན་ནི་ཆོས་རྒྱལ་བསྟན་པ་ཚེ་རིང་། མུ་ཏིག་སྤྲུལ་པ་ནི་ད་ལྟའི་ལྷ་སྲས་དཔལ་ལྡན་འཆི་མེད་རྟག་པའི་རྡོ་རྗེའོ། །

༄༅། །གུ་རུ་དྷེཝ་ཌཱཀྐི་ནི་སིདྡྷི་ཧཱུྃཿདེ་ཡང་བོད་ཡུལ་དུ་གནས་ཆེན་བརྒྱ་དང་རྩ་བརྒྱད། གནས་ཕྲན་སྟོང་དང་རྩ་གཉིས། དེ་དག་རེ་རེ་ལ་ཡང་གནས་འདྲ་དང་གནས་ལག་གྲངས་མེད་པ་ཞིག་ཡོད་པར་བཤད་དེ། གཤིན་རྗེ་གཤེད་གསལ་ཤིང་གི་རྒྱུད་ལས། ཉི་ཤུ་རྩ་བཞི་གནས་ཀྱི་མཆོག །ཉི་མ་བྱང་ཤར་མཚམས་ཤེད་ནས། །འདི་ནས་རི་བོ་བཅུ་གསུམ་འདས་པ་ན། །གངས་རིས་བསྐོར་བའི་ར་བ་ན། །རྡོ་རྗེ་ཕག་མོའི་དཀྱིལ་འཁོར་གནས། །ཞེས་དང་། །དུར་ཁྲོད་མངོན་འབྱུང་གི་རྒྱུད་ལས། ཀུན་དགའ་གཞོན་ནུའི་གྲོང་ཁྱེར་ནས། །བདེར་གཤེགས་ཞི་ཁྲོའི་ཕོ་བྲང་ནས། །ཞེས་དང་། །བླ་མ་དགོངས་པ་འདུས་པའི་ཆོས་ཚན་ལུང་བསྟན་བཀའ་རྒྱ་མ་ལས། གཞན་ཡང་དར་རི་དང་། རྫའི་ཟོམ་དང་། ལུང་པའི་སུལ་དང་། ལུང་ཕུག་ལ་སོགས་པ་འབྲོག་ལུང་གབ་གནས་བསམ་གྱིས་མི་ཁྱབ་པ་བྱིན་གྱིས་བརླབས་ནས་ཡོད་དོ། །ཞེས་གསུངས་པ་ལྟར། འབྲི་གཉན་གདོང་གི་གནས་ལག་ཅུང་ཟད་གཅིག་གི་གནས་ཡིག་ཐོར་བུ་རེ་བྲི་དབང་དུ་སོང་ན། བདག་སྤྲུལ་སྐུ་མི་འགྱུར་རྡོ་རྗེ་ཞེས་གོང་གི་གཏེར་རྙིང་དུ་མ་ནས་ལུང་བསྟན་ཞིང་ཡོངས་སུ་གྲགས་པ་དེས་ཆུ་ཡོས་སྤྲེལ་ཟླའི་ཚེས་བདུན་གྱི་དུས་སུ། སྔོན་གྱི་དམ་ཚིག་དང་རྟེན་འབྲེལ་འཛོམས་པའི་རིམ་པར་ངོ་སྤྲོད་པ་ནི། རི་དབང་རྒྱལ་པོ་སྤུན་དགུའི་ཡ་གྱལ་གཞན་དང་མི་འདྲ་ཀུན་ལས་གཞན་པའི་གནས་འདི་ལ། རི་སྣ་བརྒྱ་དང་རྩ་བརྒྱད། ལུང་པ་བརྒྱ་དང་རྩ་བརྒྱད། གོང་དུ་རི་སྣ་གསུམ་ཡོད་པ་ནི་རིགས་གསུམ་མགོན་པོའི་མཚོན་བྱེད་ཡིན། མི་འགྱུར་བའི་རྟགས་ལ། མདུན་དུ་བྱང་ཆུབ་མཆོད་རྟེན་རང་བྱོན་ཡོད། ལང་གྲོ་དཀོན་མཆོག་འབྱུང་གནས་ཞབས་རྗེས་ཡོད། རི་དྭགས་བསེའི་གཟུགས་རང་བྱོན། སྣ་ནམ་རྡོ་རྗེ་བདུད་འཇོམས་ཀྱི་ཞབས་རྗེས། དྲན་པ་ནམ་མཁའི་ཞབས་རྗེས། དུང་གི་རུས་སྦལ་རང་བྱོན། གསེར་གྱི་མཆོད་རྟེན་རང་བྱོན། ཡི་གེ་ཨ་རང་བྱོན། ཚེ་དཔག་མེད་སྐུ་རང་བྱོན། རྟ་ཕག་ཡབ་ཡུམ་སྐུ་རང་བྱོན། གླང་ཆེན་རང་བྱོན། ཨ་རང་བྱོན། དུང་ཁྱི་དཀར་པོ་རང་བྱོན། འཆོང་གི་དུང་རང་བྱོན། བར་དོའི་གཡང་ས། རྡོ་བ་ལན་ཧ་རུ། བདེ་མཆོག་སྐུ་གཟུགས་རང་བྱོན། བུམ་པ་རང་བྱོན། རྡོ་རྗེ་ཕག་མོའི་སྐུ་གསལ་བ། དུང་གི་མཆོད་རྟེན་མ་ཧཱ་ས་རང་བྱོན། ཨོ་རྒྱན་རིན་པོ་ཆེའི་སྐུ་རང་བྱོན། བྲམ་ཟེ་མཆོག་སྲེད་ཀྱི་སྐུ་རང་བྱོན། དུང་གི་པདྨ་རང་བྱོན། སྐུ་གསུང་ཐུགས་མཚོན་པའི་བརྡར་རྡོ་འབུར་གསུམ། འཆོང་གི་རིང་བསྲེལ། ཁྲོ་བོ་ཆེན་པོའི་ཞལ། རྡོ་གནས་པ་ཐམས་ཅད་ཡར་ཕྱུར་བ་དང་། ཕྱིར་ཟབ་པའི་ཚུལ་ཅན་ལ། ཡབ་ཡུམ་ཐབས་ཤེས་མཚོན་པའི་རྡོ་རིང་གཉིས་ཀ་བའི་ཚུལ་དུ་ཡོད། རྡོ་རྗེ་འཆང་སྐུ་རང་བྱོན། རྣམ་པར་རྒྱལ་བའི་ཁང་བཟང་མཚོན་པ་ཡིན་ཞིང་། ཤ་ཟ་མཁའ་འགྲོ་ལོ་གྱོན་མའི་སྐུ་རང་བྱོན། བདུད་བཏུལ་བའི་མཆིན་པའི་ཚུལ། མར་མེ་མཛད་ཀྱི་སྐུ་རང་བྱོན། རིན་ཆེན་བྲག་རིའི་ངོས་ལ་དུང་གི་ཕྲ་བཏབ་པ། གཞན་དང་མི་འདྲ་བའི་རྡོ་འབུར་ལྔ་ནི། རྒྱལ་བ་རིགས་ལྔ་ཡིན། ཡིད་བཞིན་ནོར་བུ་རང་བྱོན། ཐུགས་རྗེ་ཆེན་པོ་བཅུ་གཅིག་ཞལ་བཞེངས་སྐུ་རང་བྱོན། རྡོ་ཡི་རིང་བསྲེལ་ནག་པོ་ལྔ། ཁྱུང་གཤོག་པ་བཀྲབ་པའི་ཚུལ། ཨོ་རྒྱན་པདྨས་བདུད་དེད་པས་ཕ་བོང་ལ་ཐིམ་པས་རྡོ་བརྒྱབ་པ། དུང་གི་གདུགས་ཆེན་རང་བྱོན། གུར་དྲག་ཕུར་ཤམ་ཅན་རང་བྱོན། དུང་གི་སྤུ་རི་རང་བྱོན། བྲག་ཕུག་མ་ར་ཏི་ཀའི་བཀོད་པ། རྒྱ་ནག་རི་བོ་རྩེ་ལྔའི་བཀོད་པ། ཤེལ་དང་དུང་གི་ཀ་བ། ཨོ་རྒྱན་པདྨས་ཆོས་གསུངས་ཚུལ་དང་མཁའ་འགྲོས་ཉན་ཚུལ། ཐབས་ཤེས་ཟུང་འཇུག་མཚོན་བྱ། བར་དོའི་འཕྲང་དང་ཤལ་མ་རིའི་སྡོང་བོ་དེ་ལ་སྨོན་ལམ་བཟང་པོ་ཐོབ། ལྕགས་ཀྱི་རྡོ་རྗེ་རང་བྱོན། གསེར་བུམ་དངུལ་བུམ་རང་བྱོན། རིན་ཆེན་སྣ་ལྔའི་ཕྲ་ཚོམ། ཡེ་ཤེས་མཚོ་རྒྱལ་རྫུ་འཕྲུལ་གྱིས་ཞབས་རྗེས། རུས་སྦལ་རང་བྱོན་རིང་བསྲེལ་གྱིས་མཚན་པ། ཡི་གེ་ཧཱུྃ་རང་བྱོན། དུང་གིས་ཕྱེ་མཆོད་རྟེན་ཡིད་བཞིན་ནོར་བུ་རང་བྱོན་སྣ་ལྔ། ཐུགས་ཀྱི་མཚོན་བྱེད་ལྕགས་ཀྱི་མཆོད་རྟེན། སྐུ་ཡི་མཚོན་བྱེད་དུང་གི་མཆོད་རྟེན། གསུང་གི་མཚོན་བྱེད་ཟངས་ཀྱི་མཆོད་རྟེན། རང་བྱུང་རྡོ་རྗེའི་རིང་བསྲེལ། ཨོ་རྒྱན་པདྨས་ཕྱག་གིས་གཅིར་བའི་རྗེས། ཚེ་འཕྲང་བར་དོའི་ལམ་དེ་རྣམས་བཞུགས། བསྐོར་ལམ་དུ། ཨོ་རྒྱན་རིན་པོ་ཆེའི་ཞབས་རྗེས་དང་། ལྷ་ལྕམ་མནྡ་ར་བའི་ཞབས་རྗེས་གསལ་བར་ཡོད། ཨོ་རྒྱན་རིན་པོ་ཆེས་ཉི་མ་འདེས་ནས་བཞུགས་མལ་ལ། སྣ་ནམ་ཡེ་ཤེས་ཀྱི་ཞབས་རྗེས་ཉིས་བརྩེགས། དུང་བྲག་དཀར་པོ་ཤེལ་གྱི་མཆོད་རྟེན། གནས་དག་པ་ཤྲཱི་བཀོད་པ། དེ་གཉིས་མཚམས་སུ་མཁའ་འགྲོ་དང་ཞི་བ་འཚོའི་ཞབས་རྗེས་ཨས་མཚན་པ་ཡོད། ཨོ་རྒྱན་རིན་པོ་ཆེའི་ཕྱག་མཁར་བཙུགས་རྗེས་རིང་བསྲེལ་གྱིས་མཚན་པ། ཕྱག་ན་རྡོ་རྗེའི་སྐུ་རང་བྱོན། ཨོ་རྒྱན་པདྨས་ཞབས་རྗེས། ཕ་ཝཾ་གབ་གནས་ཞེས་བྱ་བ་འདི་ལ་རང་བྱོན་མང་དུ་ཡོད་ཀྱང་། དྲང་སྲོང་ཀུན་ཏུ་རྒྱུས་སྨོན་ལམ་གྱི་སྟོབས་ཀྱིས་གནས་སྒོ་ཡང་མི་ཕྱེ་ལ་བསྐོར་བའི་ནང་དུ་བཙུད་མི་བཏུབ་པ། གཏེར་སྲུང་བྱ་རོག་ཡབ་ཡུམ་མཆུ་ཁྲག་གིས་བྱུག་ནས་བྱ་ར་མཛད་པའི་ཚུལ་ཡོད། རང་བྱུང་དག་པའི་མཆོད་རྟེན་ཡོད། བདུད་འདུལ་ལྕགས་ཀྱི་དགྲ་སྟ་ཡོད། ཕ་ཝཾ་ཆུའི་བུམ་པ་ཡོད། བདུད་སྡིག་ཆེན་བདུད་འཇོམས་ཆོས་ཀྱི་བརྩིགས་པས་མནན་ནས་ཡོད། དེ་ལས་ཚུ་རོལ་དུ་མཆོད་རྟེན་རྩ་གཅིག་རྩེ་ལྔ་བལྟས་ན་རྒྱང་ནས་གསལ་བ་ཡོད། གཉག་ཆེན་ཛྙཱ་ནའི་ཞབས་རྗེས་གསལ་བར་ཡོད། ངོ་མཚར་ལྟས་ཀྱི་བྱེ་བྲག་ལས། དཀར་པོ་དུང་གི་དགའ་འཁྱིལ་ཡོད། ཨོ་རྒྱན་རིན་པོ་ཆེ་འཕུར་ནས་བྱོན་པའི་སྐུ་རྗེས་ཡོད་དོ། །གནས་འདི་ཡང་འཇིག་རྟེན་མགོན་པོ་མཆོད་པའི་རྟེན་དམ་པ་ཡིན་པས་བསྐོར་བའི་ཕན་ཡོན་བསམ་གྱིས་མི་ཁྱབ་སྟེ། རྒྱུད་ལས། འགྲོ་བ་ཀུན་ལ་ཕན་པའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །འཇིག་རྟེན་མགོན་གྱི་མཆོད་རྟེན་ལ། །སུ་ཞིག་མཆོད་པ་བྱེད་པ་ནི། །སྐྱེ་བ་དག་ནི་ཐམས་ཅད་དུ། །བྱང་ཆུབ་སྤྱད་སྤྱོད་པའི་ཚེ། །ཡིད་དང་ལྡན་པའི་བློ་གྲོས་ལྡན།  །ཞེས་སོགས་མདོ་རྒྱུད་དུ་མར་གསུངས་པ་ལྟར། གནས་འདིའི་བསྐོར་ལམ་མ་ནོར་བར་བསྐོར་བ་བཅུ། བརྒྱ་ཕྱག་བཅུ། ཡིག་དྲུག་གང་ཐོན་རྣམས་བཟླས་ན་དུང་དང་ཕན་ཡོན་མཉམ་མོ། །ཞེས་པའི་གནས་ཡིག་འདི་ཡང་འཕྲལ་དུ་བདག་མིང་མི་འགྱུར་རྡོ་རྗེ་ཞེས་པ་ས་མཐའི་ཟོབ་རྒན་གྱིས་བྲིས་ཤིང་གོ་འཇོའི་ཕྱོགས་ཀྱི་བླ་མ་མགོན་ཞེས་པའི་རྩ་སློབ་ཏུ་གྱུར་པ་ཞིག་གིས་ཡི་གེར་བྲིས་པ་དགེ་ལེགས་སུ་གྱུར་ཅིག །

མཆན། གནས་ཡིག་འདི་ནི་སྨུག་སང་ན་ཤིང་པར་དུ་བཞུགས་པའི་གནམ་ཆོས་མི་འགྱུར་རྡོ་རྗེའི་བཀའ་འབུམ་ཁྲོད་ཀྱི་ཝཾ་པོད་ལས་ཞལ་བཤུས་པའོ། །

༄༅། །ཨོ་རྒྱན་པདྨ་འབྱུང་གནས་ལ་ཕྱག་འཚལ་ལོ། ཨོ་རྒྱན་པདྨ་འབྱུང་གནས་ཀྱི་གཏེར་ལུང་བཅུ་གསུམ་བསྡུས་པ་བྱ་བཏང་ཐར་པ་རྒྱལ་མཚན་གྱི་ཕྱག་ནས་ས་སེར་དགོན་པའི་བླ་མ་བསོད་ནམས་རྒྱལ་མཚན་གྱི་ཕྱག་ཏུ་བྱུང་། དེ་ནས་གྲུབ་པའི་ཕྱག་ན་བྱུང་བའི་གནས་ཡིག ཡུལ་ཕྱོགས་དབེན་གནས་སོགས་ཀྱི་བཀོད་པ་ནི། །དབེན་གནས་མཎྜལ་བཀོད་པ་འདྲ། །སྡེ་དཔོན་མཚོ་ལ་དར་ཆགས་འདྲ། །རྒྱ་ཞིང་ཤོག་སྐྱ་གཏོར་བ་འདྲ། །གཙང་བོ་ཡོན་ཆབ་བཤམས་པ་འདྲ། །བྲག་དཀར་སྐ་རགས་བཅིངས་པ་འདྲ་། །གཡས་རི་སྟག་མོ་ངར་བ་འདྲ། །གཡོན་རི་གཟིག་མོ་འགྱིང་བ་འདྲ། །རྒྱབ་རི་རིན་ཆེན་སྤུངས་པ་འདྲ། །མདུན་རི་མདུང་མོ་གཤིབ་པ་འདྲ། །དེའུ་ལྷ་བཤོས་བཤམས་པ་འདྲ། །ཆུ་མིག་མར་རྒྱན་བཏགས་པ་འདྲ། །ཤུག་པ་བྱ་རྒོད་སྤུངས་པ་འདྲ། །གནས་མི་འགྱུར་བའི་རྟགས་བཞི་དང་རྟགས་འདྲ་བ་བཞི་སྟེ་བརྒྱད་ཡོད། སྒོ་སྲུང་ཁྲོ་བོ་བཞི་དང་ཁྲོ་མོ་བཞི་སྟེ་བརྒྱད་ཡོད། རྒོད་འབྲང་གནས་ཀྱི་སྒོ་སྲུང་ཕྱི་རི་ཡིན།

༈ རྟེན་རང་བྱོན་ཇི་ལྟར་བཞུགས་པ་ནི། གནས་ཕུག་ནང་དུ་ཁ་ཡར་གྱུར་པའི་གཡས་ཕྱོགས་སུ་བཀའ་བརྒྱད་ཁ་ཊྭཱཾ་བཞུགས། ཁ་མར་གྱུར་པའི་གཡོན་ཕྱོགས་སུ་སྐྱེ་གནས་བར་དོ་དང་། འཆི་ཁའི་བར་དོ། སྲིད་པ་བར་དོ། བསམ་གཏན་བར་དོ། སྒྱུ་མ་བར་དོ། དམྱལ་བའི་བར་དོ་བཅས་ཡོད། དེ་ནས་ཀུན་རིག་གི་ལྷ་སུམ་ཅུ་སོ་བདུན་མགྲོན་ཐབས་ཀྱི་ལྷ་དང་བཅས་པ་དང་། སྤྱན་རས་གཟིགས། དཔལ་མགོན་བདུན་ཅུ་རྩ་ལྔ། རྟ་མགྲིན་ལྕགས་རལ་ཅན་གཙོ་འཁོར་བཞི། སླར་སྤྱན་རས་གཟིགས་བཅུ་གཅིག་ཞལ། མཁའ་འགྲོ་སྡེ་ལྔ། རྒྱལ་ཆེན་སྡེ་བཞི། རྟ་མགྲིན་དྲེགས་པ་ཀུན་སྒྲོལ་མ་བྱམས་པ་མཆེད་བརྒྱད་ཀྱིས་བསྐོར་བ། རྗེ་བཙུན་རྡོ་རྗེ་རྣལ་འབྱོར་མ་བཅས་བཞུགས། ཨོ་རྒྱན་རྒྱ་གར་འཕུར་ལམ་དང་། ཨོ་རྒྱན་པད་ཞྭ། ཕྱག་དྲིལ། དུང་དཀར། གསོལ་དཀར་དཀར་འཛིན་བཅས་ཡོད། རི་དྭགས་ཀྲིཥྞ་སཱ་ར་དང་། སྒྲོལ་མ་དཀར་སྔོན་གཉིས། འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས། གཡོན་དུ་ར་འཇིགས་རས་པ་ལ་རས་པ་དུང་ཕྱུར་གྱིས་བསྐོར་བ་བཅས་བཞུགས། གཡོན་ཕྱོགས་སུ་མུན་ཁང་རིམ་པ་དགུ་བརྒྱ་དང་། སྒོ་སྲུང་ལས་མཁན་ཨ་བ་གླང་མགོ་དང་། རྒྱ་གར་གྱི་གསེར་སྒོ་ཁྲ་མོ། ཤལ་མ་རི་ཡི་སྡོང་པོ་བཅས་ཡོད། སྤྱན་རས་གཟིགས་ཞལ་གཅིག་ཕྱག་བཞི་པ་དང་། གཤིན་རྗེ་ཆོས་རྒྱལ་ལ་ལས་མཁན་རྣམས་ཀྱིས་བསྐོར་ནས་ཡོད། ལས་ཀྱི་རྒྱ་མ། རྒྱ་རྡོ། ཤོག་དྲིལ་དང་བཅས་པ་ཡོད། དུང་ཁྱི་དཀར་ལུ་གཉིས་དང་། མ་གཅིག་ཁྲོས་མ་ནག་མོ། ཨོ་རྒྱན་གྱིས་དམ་ལ་བཏགས་པའི་རུས་སྦལ་རྒྱ་བོ་ཁ་ཐུར་དུ་གྱུར་པ་ཡོད། གླང་པོ་ཆེའི་སྣ་ལྗགས་ལ་མ་གཅིག་གྲུབ་པའི་རྒྱ་མོས་བཟུང་ནས་བཞུགས་ཡོད། མ་གཅིག་སྒྲུབ་ཁང་ཡོད། དེ་ནས་ཀླུ་མི་མགོན་དཀར་པོ་དང་། གཉའ་ལ་བདེ་མཆོག་དཀར་པོ། ཚོགས་བདག་དཀར་པོ་བཅས་ཡོད། རྡོ་གོར་གོར་གཞོང་དཀྱིལ་འདྲ་བའི་ནང་རིན་ཆེན་བདུད་རྩིའི་ཚེ་ཆུ་ཡོད། ཡང་མཁའ་འགྲོ་མ་སྟག་གདོང་དང་། ལུག་གདོང་། སེང་གདོང་མ། མཁའ་འགྲོ་ལའུ་ཟེར་བ་བཅས་བཞུགས། ནོར་བུ་རིན་ཆེན་ཆ་བདུན་ཡོད། དེ་ནས་ཆོས་སྐུ་ཀུན་ཏུ་བཟང་པོ་དང་། ཡི་དམ་འཁོར་ལོ་བདེ་མཆོག །ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས་བཅས་ལ་རྒྱུད་སྡེའི་ལྷ་ཚོགས་ཀྱིས་བསྐོར་ནས་བཞུགས་པའོ། །

༈ ཕྱི་གནས་ལ་སྦྲ་ཕུབ་བརྒྱ་དང་བརྒྱད་ཅུ། སྨྱུག་ཕྱུང་བརྒྱ་དང་བརྒྱད་ཅུ། འཁོར་རུ་བ་བརྒྱ་དང་བརྒྱད་ཅུ། འོ་མཚོ་བརྒྱ་དང་བརྒྱད་ཅུ། ཆུ་མིག་བརྒྱ་དང་བརྒྱད་ཅུ། ཤུག་ཕུང་བརྒྱ་དང་བརྒྱད་ཅུ། སུར་ཕུང་བརྒྱ་དང་བརྒྱད་ཅུ། གསེར་གྱི་རི་བདུན། རོལ་པའི་མཚོ་བདུན། དུང་གི་རི་དགུ། དངུལ་གྱི་རི་དགུ། གཡུ་ཡི་རི་དགུ་བཅས་ཡོད། གནས་ཀྱི་ཀླད་དུ་ཤུག་ཕུང་དམ་རལ་འདྲ་བ་གསུམ་ཡོད། གནས་ཀྱི་རྩེ་ལ་དེའུ་དགུ་ཡོད།

༄༅། །རྒྱ་གར་རྡོ་རྗེ་གདན། རྒྱ་ནག་རི་བོ་རྩེ་ལྔ། བལ་ཡུལ་འཕགས་པ་ཤིང་ཀུན། ཙཱ་རི་རྩ་ཀོང་། བྱང་ཤམ་བྷ་ལ། གངས་རི་ཏི་སེ། སྦས་ཡུལ་པདྨ་བཀོད། རྒྱལ་མོ་དམུ་རྡོ། ལྷ་ལྡན་ཇོ་བོ། མ་ཕམ་གཡུ་མཚོ། བྱང་གི་གནམ་མཚོ། ཡར་འབྲོག་གཡུ་མཚོ། ཕ་ཝང་ཞབས་ཆེན། ཀ༔ཐོག་རྡོ་རྗེ་གདན། པར་ཁང་ཆོས་མཛོད། མཐོང་གྲོལ་གཙུག་ལག་ཁང་། ཤར་སྒམ་པོ་རི་སོགས་བསྐོར་ནས་སྒྲིབ་སྦྱོང་བྱས་པ་དང་ཕན་ཡོན་མཉམ་པས་བསམ་ལས་འདས། འཇམ་དཔལ་སྐུ་ཡི་ལྷ་ཚོགས། པདྨ་གསུང་གི་ལྷ་ཚོགས། ཡང་དག་ཐུགས་ཀྱི་ལྷ་ཚོགས། རྒྱལ་བ་བྱམས་པ་མགོན་པོ། གྲུབ་ཐོབ་དྲན་པ་ཡེ་ཤེས་སོགས་མཇལ་བ་དང་ཕན་ཡོན་མཉམ། གནས་འདི་མཇལ་ཕྱག་སུས་བྱས་ན་ངན་སོང་གསུམ་ལས་ཐར། ནད་རིགས་བཞི་བརྒྱ་རྩ་བཞི། ཡེ་འབྲོག་སུམ་བརྒྱ་དྲུག་ཅུ། བགེགས་རིགས་སྟོང་ཕྲག་བརྒྱད་ཅུ། གློ་བུར་ཉི་ཁྲི་ཆིག་སྟོང་། གཞན་ཡང་གཟུགས་ཅན་གཟུགས་མེད་ཀྱི་སྟེང་གདོན། འོག་གདོན། བར་གདོན་མོ་འདྲེ། རྒྱལ་འགོང་། ས་བདག  ཀླུ། དམུ། བཙན་སོགས་ཀྱི་གནོད་པ་མི་འབྱུང་། སྲིད་སྐམ་པ་ལ་བུ་སྐྱེ། མི་ཕོ་དཔལ་བསྐྱེད། རྟ་ཕོ་བང་མྱུར། བསམ་པའི་དོན་རྣམས་འགྲུབ་པ་ཡིན།

མཆན། ༡.འབྲི་རྒྱལ་གཉན་གདོང་གི་དཀར་ཆག་དང་གནས་ཀྱི་ཕན་ཡོན་འདི་གཉིས་ནི་དགོན་ཆེན་མཁན་སྐལ་ལྡན་ལགས་ཀྱིས་འདོན་སྤྲོད་གནང་བའི་འབྲི་བརྒྱུད་ཡེ་ན་དཔལ་བཀྲ་ཤིས་ལྷ་རྩེ་དགོན་གྱི་ལོ་རྒྱུས་ཞེས་པའི་དེབ་ལས་ཞལ་བཤུས་པའོ། །

༢.གནས་འདི་བཞུགས་པའི་ཡུལ་ནི་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་དངུལ་མདའ་ཕོ་བྲང་སྡེ་དགེ་ལྷུན་གྲུབ་སྟེང་གི་མདུན་ངོས་ཡིན།

༄༅། །ཡོན་ཏན་གསུང་གི་གནས་མཆོག་བསྟན་པ་ནི༔ བོད་ཀྱི་མདོ་ཁམས་འབྲི་ཞེས་བྱ་བ་རུ༔  ཤོད་ཆེན་ཡ་གྱལ་སྨད་ཤོད་འཛོམས་ཞེས་པར༔ བོད་ཀྱི་གནས་ཆེན་ཀུན་ལས་ཁྱད་འཕགས་པ༔ ཡེ་ཤེས་སྐུ་བརྙེས་དགའ་རབ་རྡོ་རྗེ་དང༔ ཟུང་འཇུག་སྐུ་བརྙེས་ཤྲི་སིང་ཧ་དང༔ དབང་གི་ཆུ་བོ་བཞི་ཡི་སློབ་དཔོན་བཞིས༔ རྫུ་འཕྲུལ་ཞབས་ཀྱིས་བཅག་པའི་གནས་ཡིན་ལ༔ གངས་རྒྱལ་ཙཱ་རི་ཟབ་ལུང་གྲགས་ཆེ་ཡང༔ བདེ་ཆེན་པདྨ་ཤེལ་ཕུག་འདི་ཉིད་ལ༔ ཆར་མི་ཉེ་ཞིང་ཀུན་ལས་འདི་འཕགས་པས༔ བོད་ཡུལ་ས་འོག་ཀུན་གྱི་གཏེར་གཅིག་མ༔ མཁས་གྲུབ་ཀུན་གྱི་ཐུགས་བཅུད་རྫོགས་པ་ཆེ༔ སྡེ་གསུམ་དམ་པའི་ཆོས་འདི་བཞུགས་པའི་གནས༔ རིན་ཆེན་གསེར་གྱི་ཟ་མ་ཏོག་གི་སྒྲོམ༔ འཁོར་བ་མཐའ་མ་སྟོང་པའི་བར་དུ་བཞུགས༔ དེ་ལས་ལྷག་པའི་ཡོན་ཏན་ཅི་ཞིག་བརྗོད༔

༄༅། །ཡོན་ཏན་གསུང་གི་གནས་ནི་སྨད་ཤོད་དམ་ཡོངས་གྲགས་རྨེ་ཤོད་འཛོམ་ནང་གི་ཕུར་བཞུགས་པའི་པདྨ་ཤེལ་ཕུག འདི་ནས་ཡབ་སྲས་ལྷན་རྒྱས་པས་རྫོགས་ཆེན་སྡེ་གསུམ་དང་འདིའི་གནས་ཡིག་སོགས་སྤྱན་དྲངས་ཤིང་གནས་ཞལ་ཕྱེས།

དམ་ཆོས་རྫོགས་པ་ཆེན་པོ་སྡེ་གསུམ་ལས། དབང་གི་གནས་མཆོག་པདྨ་ཤེལ་ཕུག་གི་དཀར་ཆག་བཞུགས།

༄༅། །ན་མོ་གུ་རུ༔ སྡེ་དྲུག་གནས་ཡིག་སྐོར་གསུམ་ལས༔ ཨོ་རྒྱན་ཆེན་པོས་འདི་སྐད་གསུངས༔ ཨ་ཧོ༔ མཁའ་སྤྱོད་དག་པའི་ཞིང་ཁམས་རྣམས༔ ས་ལ་འཕོས་པ་རྒྱ་གར་ཡུལ༔ ཡན་ལག་ཙམ་ཞིག་བོད་དུ་སྣང༔ དེ་བས་བོད་རྣམས་གྲུབ་ཐོབ་ཉུང༔ དེ་ཕྱིར་པདྨ་བདག་ཉིད་ཀྱིས༔ བོད་ཀྱི་ས་གནད་གང་བཟང་དུ༔ སྒྲུབ་པ་བྱས་ཤིང་བྱིན་གྱིས་བརླབས༔ མཁའ་སྤྱོད་ཞིང་དང་རྒྱ་གར་གྱི༔ གནས་དང་དུར་ཁྲོད་ལ་བཞུགས་པའི༔ རིག་འཛིན་མཁའ་འགྲོའི་ཚོགས་ཐམས་ཅད༔ སྤྱན་དྲངས་གནས་མཆོག་སོ་སོར་བསྟིམས༔ མཁའ་སྤྱོད་གནས་དང་དབྱེར་མེད་བྱུང༔ དཀར་ཆག་བཏབ་སྟེ་གཏེར་དུ་སྦས༔ སྤྱི་དོན་བཤད་པ་དང་པོའི་སྐོར༔ ས་མ་ཡ་རྒྱ་རྒྱ༔ རྒྱ་གར་སོ་ས་གླིང་གི་གནས༔ བོད་ཀྱི་ཡུལ་དུ་སྤྱན་དྲངས་ནས༔ བསྟིམས་པའི་ས་ནི་མཆིམས་ཕུ་ཡིན༔ དེ་ཉིད་གཅིག་ལས་གཉིས་མཆེད་ཚུལ༔ ཁམས་ཀྱི་སྨད་ཤོད་ཛཾ་དུ་འཕོས༔ ལུང་པ་པདྨ་ཁ་ཕྱེ་འདྲ༔ དབུས་ཀྱི་ལུང་པའི་མདོ་དག་ལ༔ བྲག་དཀར་ཤེལ་གྱི་གུར་ཕུབ་འདྲ༔སྒྲུབ་ཕུག་པདྨ་ཤེལ་ཕུག་འདིར༔ ཨོ་རྒྱན་པདྨ་བདག་ཉིད་ཀྱིས༔ བདེ་གཤེགས་འདུས་པའི་སྒྲུབ་ཆེན་བྱས༔ ཕུག་པའི་ནང་རྣམས་ཐམས་ཅད་དུ༔ དཀྱིལ་འཁོར་དགུ་ཀློང་རང་བྱོན་བྱུང༔ བདེ་བར་གཤེགས་པ་ཐིམ་པས་ན༔ མཐོང་ཚད་ངན་སོང་སྐྱེ་སྒོ་ཆོད༔ གཡས་ཀྱི་ལུང་པའི་རི་གདོང་རྣམས༔ ཕ་བོང་བྱ་ཁྱུ་བབས་པ་འདྲ༔ རྒྱ་གར་དུར་ཁྲོད་ཆེན་པོ་ནས༔ བྱོན་པའི་རྡོ་དང་ས་ཤིང་ཡིན༔ དབུས་སུ་ང་ཡི་སྒྲུབ་ཆུ་དང༔ སྐུ་གསུང་ཐུགས་ཀྱི་རང་བྱོན་བཞུགས༔ གཡོན་གྱི་བྲག་དཀར་རྒྱལ་མཚན་འདྲ༔ ཨོ་རྒྱན་ང་ཡི་ཞབས་རྗེས་དང༔ འགྲོ་ཕན་འདོད་པའི་ཟབ་གཏེར་གསུམ༔ འབྲེལ་ཚད་དོན་ལྡན་རྟེན་གཏེར་གསུམ༔ ས་བཅུད་གསོ་བའི་བཅུད་གཏེར་གསུམ༔ འདོན་མི་རུང་བའི་གཏེར་དྲུག་སྟེ༔ ཟབ་པའི་གཏེར་ཆེན་དགུ་ཡང་སྦས༔ གཟིམ་ཕུག་ནང་གི་ཐོ་ཕྱི་ལ༔ ཤིན་ཏུ་གཅེས་པའི་གཏེར་ལྔ་སྦས༔ ནུབ་བྱང་མཚམས་ཀྱི་བྲག་དཀར་ན༔ བདག་གིས་རིགས་གསུམ་མགོན་པོ་བསྒྲུབས༔ ཞལ་མཐོང་སྒྲོམ་འདྲའི་བྲག་ལ་ཐིམ༔ སྐུ་གསུང་ཐུགས་ཀྱི་རྟགས་དང་ལྡན༔ གཡས་ཕྱོགས་བྲག་དཀར་དཔལ་གཏོར་འདྲ༔ ཧེ་རུ་ཀ་དཔལ་རང་བྱོན་བཞུགས༔ གཡས་ལོགས་རི་ཡི་བྲག་དཀར་ལ༔ སྐུ་གསུམ་སྙིང་པོ་རང་བྱོན་བཞུགས༔ བོད་ལ་ཕན་པའི་ནོར་གཏེར་སྦས༔ བཏོན་ན་ས་བཅུད་ཉམས་པར་འགྱུར༔ གསོལ་བ་བཏབ་ན་དངོས་གྲུབ་འབྱུང༔ བསྐོར་ན་ལོངས་སྤྱོད་ཚེ་གཡང་འཕེལ༔ ཆགས་ཚུལ་དཀར་ཆག་གཉིས་པའི་སྐོར༔ ས་མ་ཡ་རྒྱ་རྒྱ༔ གསུམ་པ་ཕན་ཡོན་བཤད་པ་ནི༔ དབུས་ཀྱི་པདྨ་ཤེལ་ཕུག་ཉིད༔ བསྐོར་ན་ལས་ཀྱི་སྒྲིབ་པ་བྱང༔ ཚོགས་འཁོར་སྐོར་ན་དངོས་གྲུབ་འབྱུང༔ ཞག་བདུན་སྒྲུབ་ན་ཉམས་རྟོགས་འཕེལ་༔ བཀུར་བསྟི་ཕུ་དུད་སུས་བྱས་པ་༔ བསོད་ནམས་ཚོགས་ཆེན་རབ་རྫོགས་ཏེ༔ མཐར་ཐུག་ལེགས་པའི་ལམ་ལ་སྦྱོར༔ ནད་གདོན་ཞི་འདོད་གནས་འདི་བསྐོར༔ ཚེ་བསོད་རྒྱས་འདོད་གནས་འདི་བསྐོར༔ ཉམས་རྟོགས་འཕེལ་འདོད་གནས་འདི་སྒྲུབས༔ གཞན་དུ་ལོ་གཅིག་བསྒྲུབས་པ་བས༔ གནས་འདིར་ཞག་གཅིག་ཚོགས་འཁོར་འཕགས༔ ཅི་ཕྱིར་ཞེ་ན་དཔའ་བོ་དང༔མཁའ་འགྲོའི་ཚོགས་རྣམས་འདུས་པ་ཡི༔ ཚོགས་ཀྱི་དཀྱིལ་འཁོར་ཡིན་པའི་ཕྱིར༔ གྲོང་ཁྱེར་མི་གཅིག་འབོད་པ་བས༔ གྲོང་ཁྱེར་དངོས་སུ་ཕྱིན་ནས་ཀྱང༔ ལོངས་སྤྱོད་འགྱེད་ན་ལྷག་པའི་ཕྱིར༔ དེ་བས་དོན་འདི་གོ་བར་གྱིས༔ ས་མ་ཡ་རྒྱ་རྒྱ༔ དབང་གི་གནས་མཆོག་དཀར་ཆག་འདི༔ ཨོ་རྒྱན་རྗེ་ཡིས་གསུངས་པ་བཞིན༔ མཚོ་རྒྱལ་ཁོ་མོས་ཡི་གེར་བྲིས༔ ལས་ཅན་བུ་དང་འཕྲད་པར་ཤོག༔ ས་མ་ཡ་རྒྱ་རྒྱ༔ ལྷ་སྲས་མུ་རུབ་བཙད་པོའི་རྣམ་པར་འཕྲུལ་བ་སྤྲུལ་པའི་གཏེར་ཆེན་མཆོག་གྱུར་གླིང་པས་གནས་མཆོག་ནམ་མཁའ་མཛོད་ནས་སྤྱན་དྲངས་པའི་ཁ་བྱང་དང་། འཕྲལ་དུ་སློབ་དཔོན་རིན་པོ་ཆེ་ཡབ་ཡུམ་གྱིས་དངོས་སུ་གསུངས་པའི་ཡང་བྱང་དང་སྙིང་བྱང་ལ་བརྟེན་ནས། མེ་འབྲུག་རྒྱལ་ཟླའི་དཀར་ཕྱོགས་ཀྱི་རྒྱལ་བ་དང་པོའི་ཉི་ཤར་ལ་བོད་ཆེན་པོའི་སའི་ཐིག་ལེ་སྡེ་དགེ་ཆོས་རྒྱལ་ཆེན་པོའི་ཕོ་བྲང་གི་ཤར་གྱི་ཕྱོགས་ཀྱི་ཡུལ་ལྗོངས། སྨད་ཤོད་ཛཾ་ནང་ཕུ་ཨོ་རྒྱན་རིན་པོ་ཆེའི་སྒྲུབ་གནས་པདྨ་ཤེལ་ཕུག་གི་གནས་མཐོང་ནས། བདག་ཅག་འདུས་པ་ཉེར་ལྔ་ཙམ་གྱིས་མཐོང་བར་དངོས་སུ་སྤྱན་དྲངས་ཤིང་། དེ་འཕྲལ་སྐལ་ལྡན་གྱི་འདུས་པ་ཉིས་བརྒྱ་བརྒལ་བར་བྱིན་བརླབས་བསྩལ་ཏེ་ཐམས་ཅད་ཀྱི་ཡིད་ཆེས་རྩོད་བྲལ་དུ་གྱུར་པའི་མཆོང་ཤོག་སྨུག་པོའི་ངོས་ལས་ཕབ། རིམ་བཞིན་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོས་དག་པར་བྲིས་པའི་དགེ་བས་བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན་ཅིང་། ཟབ་གཏེར་གྱི་བསྟན་པ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག སརྦ་མངྒ་ལཾ།

མཆན། གནས་ཡིག་འདི་ནི་གཏེར་སྟོན་མཆོག་གྱུར་གླིང་པའི་བཀའ་འབུམ་ཟ་པོད་ལས་ཞལ་བཤུས་པའོ། །

༄༅། །ཨེ་མ། སྔོན་ཚེ་གདོད་མའི་སར་བཞུགས་ཤྲཱི་སིང་ཧ། །འཆི་མེད་རྒྱལ་པོ་པདྨ་ཡབ་དང་ཡུམ། །རྣམ་སྣང་མཛད་སོགས་ཡེ་ཤེས་སྐུ་ཅན་རྣམས། །མངོན་སུམ་ཕེབས་ནས་རྡོ་རྗེའི་འོག་མིན་གྱི། །ཕོ་བྲང་ཉིད་དང་དབྱེར་མེད་བྱིན་གྱིས་བརླབས། །བར་དུ་བན་དེ་ཡེ་ཤེས་ཞབས་དང་ནི། །གྲུབ་ཐོབ་ཤར་པ་ལ་སོགས་བན་བོན་གྱི། །རིག་འཛིན་དུ་མས་སྒྲུབ་པའི་གནས་སུ་མཛད། །ཕྱིས་དུས་སྤྲུལ་པའི་གཏེར་ཆེན་རྣམ་པ་གཉིས། །ཆོས་རྒྱལ་ཡབ་སྲས་ལས་སྨོན་འཕྲོ་སད་ནས། །ཞལ་འཛོམས་གནས་དང་གཏེར་གྱི་སྒོ་འཕར་ཕྱེས། །

༈ སྡེ་གསུམ་གཙོར་བྱས་ཆོས་དང་དམ་རྫས་ནི། །གྲོལ་བ་བཞི་ལྡན་གདུལ་བྱའི་དཔྱིད་དུ་དྲངས། །སྔོན་མེད་ངོ་མཚར་རྨད་དུ་བྱུང་བ་ཡི། །གཏམ་སྙན་ས་གསུམ་རྣ་བའི་བཅུད་དུ་ལེན། །དེང་སང་བདག་ཀྱང་གུ་རུ་རིན་པོ་ཆེའི། །ལུང་གི་རྗེས་སྐྱོང་མོས་གུས་རིག་པའི་རྩལ། །ཏིང་འཛིན་རོལ་མོ་ཅི་ཡང་སྒྱུར་བཞིན་དུ། །ཁྱབ་བདག་བླ་མའི་སྐུ་ཚེ་བརྟན་པ་དང་། །རྣལ་འབྱོར་དོན་འགྲུབ་རྒྱལ་ཁམས་བདེ་བའི་སླད། །རྩ་གསུམ་དགོངས་པ་འདུས་པའི་དཀྱིལ་འཁོར་དུ། །ཕྱི་ནང་གསང་བའི་ཚོགས་འཁོར་ཚུལ་བཞིན་སྤྱད། །སྨོན་ལམ་འབྲས་བུ་སྨིན་པའི་ས་བོན་བཏབ། །དེ་ལྟའི་གནས་མཆོག་པདྨ་ཤེལ་ཕུག་ཅེས། །ཡོན་ཏན་གསུང་གི་གནས་ཆེན་རྨད་དུ་བྱུང་། །ཀུན་ལས་ཁྱད་པར་འཕགས་པ་ལུང་གིས་བསྔགས། །དབུས་ལྟེ་ཙིཏྟ་ཤེལ་གྱི་གུར་ཕུབ་འདྲ། །སྙིང་པོ་པདྨ་འོད་ཀྱི་གཞལ་མེད་ཁང་། །ཐབས་མཆོག་བདེ་ཆེན་གུ་རུ་དངོས་སུ་བཞུགས། །གཡོན་ཏུ་ཤེས་རབ་ཕར་ཕྱིན་མཚོ་རྒྱལ་མས། །ཏིང་འཛིན་སྒོམ་པའི་གནས་སུ་བྱིན་བརླབས་པ། །མཁའ་འགྲོའི་འདུ་བ་དྲི་བཟང་ངད་པས་མཚོན། །རྒྱབ་རི་ཀུན་བཟང་རྡོ་རྗེ་སེམས་དཔའ་ཡིས། །བྱིན་བརླབས་བརྒྱུད་གསུམ་རིག་འཛིན་བླ་མའི་ཞིང་། །གཡས་ཕྱོགས་རིག་གསུམ་སེམས་དཔའ་ཐབས་ཀྱི་གནས། །གཡོན་ཕྱོགས་མྱུར་མཛད་དཔའ་མོ་ཤེས་རབ་འཕྲུལ། །མདུན་ཕྱོགས་འཕགས་པ་ཛམ་ལྷ་རིགས་ལྔ་ཡི། །ཕོ་བྲང་སྙིང་པོ་ཕྱག་རྒྱའི་མཚན་མ་གསལ། །བླ་དྭགས་མིང་ཡང་ཛཾ་ནང་ཞེས་པར་གྲགས། །ཕྱོགས་མཚམས་ཆོས་ནོར་གཏེར་མཛོད་དུ་མས་གཏམས། །ངོ་མཚར་བཀའ་རྟགས་རང་བྱོན་ཅི་ཡང་བཀྲ། །ཡེ་ཤེས་ཅན་ངོར་མཁའ་སྤྱོད་རྡོ་རྗེའི་གྲོང་། །དག་པའི་སྣང་བར་ཞིང་ཁམས་མངོན་སུམ་བཞིན། །རྩ་བ་གསུམ་གྱི་བྱིན་རླབས་སྤྲིན་ལྟར་འཐིབས། །རིག་འཛིན་དཔའ་བོ་མཁའ་འགྲོ་དངོས་སུ་འདུ། །བཀའ་སྲུང་གིང་བཙན་དཀར་དམར་ལས་ལ་མྱུར། །ཡུལ་བདག་དཀར་པོའི་ཕྱོགས་སྐྱོང་དམ་ལ་གནས། །ནག་ཕྱོགས་ལྷ་སྲིན་གདུག་པའི་རྒྱུ་སྲང་མེད། །ཚུལ་མཐོང་སྐྱེ་བོ་ཀུན་གྱི་སྣང་ངོར་ཡང་། །ས་ཡི་ཁད་མཐོ་གཙང་ཞིང་ཡིད་དུ་འོང་། །དབྱིབས་ལེགས་བྲག་རི་དཀར་དམར་ཕྲེང་བར་བསྟར། །སྤང་ལྗོང་མེ་ཏོག་ཚོམ་བུ་ཀུན་ནས་མཛེས། །ལྷ་བྱ་རྩེད་འཇོའི་མགྲིན་གླུ་རྣ་བར་སྙན། །སྤོས་ཀྱི་ཤིང་དང་སྨན་གྱི་མྱུ་གུ་འཁྲུངས། །ལྗོན་ཤིང་འདབ་རྒྱས་ནགས་ཚལ་ཁྱུད་མོས་བསྐོར། །སྐྱེ་བོའི་རྒྱུ་འགྲུལ་ཉུང་བས་འདུ་འཛི་དབེན། །ཉམས་དགའ་བག་ཕེབ་བསམ་གཏན་སྒོམ་པའི་གནས། །ཐོས་པས་ཡིད་སྤྲོ་མཐོང་བས་དད་མོས་བསྐྱེད། །བསྡད་ན་འབྲལ་མི་ཕོད་པའི་ཏིང་འཛིན་ཤར། །སྐྱོ་ཤས་མོས་གུས་སྙིང་རྗེའི་བོགས་རྩལ་ཐོན། །ཕྱག་བསྐོར་མཆོད་སོགས་ཕན་ཡོན་ཚད་ལས་འདས། །ཆེ་ཆུང་བཟང་ངན་འབྲེལ་ཚད་དོན་དང་ལྡན། །ཁྱད་པར་དམ་ལྡན་དགོངས་ཉམས་རྩལ་རྫོགས་པའི། །རྣལ་འབྱོར་ཚོགས་ཀྱི་འདུ་བར་སྤྱོད་པ་ལ། །གནས་མཆོག་ཀུན་ལས་དངོས་གྲུབ་ཁྱད་པར་འཕགས། །ཤོད་ཆེན་བཞི་ཡི་ཡ་གྱལ་སྨན་ཤོད་ཀྱི། །གནས་ཀྱི་གཙོ་བོ་ཡུལ་གྱི་བཅུད་ཡིན་པས། །དད་ལྡན་རྣམས་ཀྱིས་བསོད་ནམས་གསོག་པར་རིགས། །མཆོག་འདོད་རྣམས་ཀྱིས་པདྨའི་ཁང་དུ་བསྒྲུབས། །ཁྱད་པར་གསུང་གི་རིགས་མཆོག་འགྲུབ་ཐག་ཉེ། །ཐུན་མོང་དོན་གཉེར་ཛཾ་ལྷའི་གནས་སུ་བསྒྲུབས། །གཡང་སྒྲུབ་བྱས་ན་ཡུལ་ཕྱོགས་རྒུད་པ་གསོ། །གནས་མཆོག་འདི་དང་འདི་འདྲའི་ཉེ་འཁོར་དུ། །སྐྱེས་ཀྱང་དད་མེད་བསོད་ནམས་མི་གསོག་པ། །མི་ལུས་དུད་འགྲོའི་སེམས་ལྡན་སྐལ་དམན་ཏེ། །དབུལ་པོའི་ཐབས་འོག་གསེར་བཞིན་དགོས་པའི་དོན། །འགྲུབ་མིན་དད་དང་ཡིད་ཆེས་སྐྱེ་བ་སོགས། །རིགས་བཟང་སྨོན་ལམ་འདེབས་ལ་བརྩོན་པར་འཚལ། །ཁོང་པར་སྙིང་ཡོད་རྣམས་ཀྱིས་ཚེགས་ཆུང་ངུས། །འདི་གཏན་དོན་ཆེན་སྒྲུབ་བྱེད་སྤྱི་ཡི་ནོར། །གུ་རུ་པདྨས་བཀའ་དྲིན་སྩལ་འདི་ལ། །ཡིད་ཆེས་མོས་པས་ཕྱག་བསྐོར་ཚོགས་གསོག་དང་། །སྒོམ་སྒྲུབ་འབྲེལ་བས་མི་ཡི་ལུས་ཐོབ་ཅིང་། །གནས་མཆོག་མཇའ་བའི་སྙིང་པོ་ལེན་ཡང་མཛོད། །ཨ་ཧོ། །འཁོར་འདས་ཆོས་རྣམས་རིག་པའི་མདངས་རྩལ་ཤར། །རྟོགས་ན་ཞིང་ཁམས་མ་རྟོགས་ཐ་མལ་དངོས། །རྣལ་འབྱོར་པ་ནི་བླང་དོར་གཟའ་གཏད་མེད། །གར་བལྟས་འོད་གསལ་ཉི་མ་ཁོར་ཡུག་ཤར། །ཆོས་དབྱིངས་མཁའ་ཁྱབ་འདི་ནི་བསྒྲུབ་མི་དགོས། །ཡངས་པ་ཆེན་པོ་འཛིན་རྟོགས་ཀུན་ལས་འདས། །སེམས་ཀྱི་སྤྲིན་ཚོགས་འདུ་འགོད་ཅི་བྱེད་ཀྱང་། །རང་རིག་ཟངས་ཐལ་མཁའ་ལ་སྒྲིབ་པ་མེད། །བདེ་ཆེན་ཆོས་སྐུ་འགྱུར་མེད་ཁྱབ་གདལ་ཆེ། །གནས་དང་གང་ཟག་གཉིས་པོ་གཅིག་ཏུ་འདྲེས། །བལྟ་བྱ་མ་མཆིས་ལྟ་མཁན་གཞི་རྩ་སྟོང་། །བསྒོམ་པ་མ་མཆིས་སྒོམ་མཁན་དབྱིངས་སུ་ནུབ། །སྤྱོད་མེད་སྤྱོད་པ་ཚུལ་འཆོས་རྩིས་གདབ་ཞིག །རིག་སྟོང་ཆོས་སྐུ་འདུ་འབྲལ་མེད་པ་ལས། །འབྲས་བུ་གཞན་ནས་ཚོལ་བའི་རེ་དོགས་བྲལ། །པདྨ་གར་དབང་སྐལ་པ་བཟང་བཟང་འདྲ། །བློ་གྲོས་མཐའ་ཡས་བན་རྒན་སྨྱོ་སྨྱོ་འདྲ། །བསྟན་གཉིས་གླིང་པ་སྐྱིད་སྡུག་མེད་མེད་འདྲ། །རེ་མེད་དོགས་མེད་བཀྲ་ཤིས་དཔལ་འབར་ཤོག །ཁོ་བོ་གུ་ཎའི་མིང་ཅན་གྱིས་ཆོས་རྗེ་མ་ཧཱ་གུ་རུའི་བཀའ་བཞིན་སྒྲུབ་གནས་ཀྱི་རྒྱལ་པོ་པདྨ་ཤེལ་ཕུག་ཏུ་གནས་འབྲེལ་བྱས་པའི་ཚེ་ཆེད་དུ་བརྗོད་པ་དགེ་ལེགས་འཕེལ།

མཆན། གནས་བསྟོད་འདི་ནི་ཀོང་སྤྲུལ་ཡོན་ཏན་རྒྱ་མཚོའི་བཀའ་འབུམ་ཇ་པོད་ལས་ཞལ་བཤུས་པའོ། །

༄༅། །ཐོག་མར་དགོན་ལུང་མདའ་ལ། ༡ ༄། །འདི་ནས་བྱ་བྲང་མགོ་ཡི་བར་སྐོར་དང་། ཁྱད་པར་ཤུག་པར་ཤར་གདོང་འདི་ཐར་པའི་དར་ལམ་ཡིན་པས་གདོང་རྒྱུད་མ་འཁྱོག་པར་བསྐོར་ན་ཐར་པའི་ལམ་སྣ་ཟིན་ནོ། ། དགོན་ལུང་ནང་བྲག་དཀར་བར་མ་ལ།

༢ ༄། །ངོས་འདིར་ཕྱག་རྡོར་ནཱ་ག་རཀྴ་རང་བྱོན་བཞུགས། ཡང་བྲག་དེ་ཉིད་ལ།           ༣ ༄། །འདི་དབེན་རྩར་དབང་ཆེན་གྲུབ་བརྙེས་ངན་ལམ་རྒྱལ་བ་མཆོག་དབྱངས་གཟིམས་ཕུག་ཡིན། མ་ཎི་རང་བྱོན་ལ། ༤ ༄། །འདི་ལ་ཡིག་དྲུག་གཙོས་སྐུ་གསུམ་སྙིང་པོ་རང་བྱོན་ཡོད་པས་བསྐོར་ལམ་ནང་ཚུད་དགོས། ༥ ༄། །འདི་ན་ནོར་བུ་རང་བྱོན་ཡོད། ཕྱག་འབུར་ལ་ལ། ༦ ༄། །འདི་རྣམས་རྒྱ་གར་ནས་བྱོན་པའི་ས་རྡོ་ཤིང་གསུམ་ཡིན་ཨཱཿཧཱུྃ་རང་བྱོན་ཡོད། །དཀར་དམར་བྲག་སྒོ་ལ། ༧ ༄། །འདི་གནས་ཀྱི་བྱ་ར་བ་གནས་པའི་བྲག་ཡིན། གཏེར་ཆེན་བླ་མས་དགའ་རབ་རྡོ་རྗེའི་གདུང་རྟེན་གཏེར་ནས་བཞེས་ས་ཡིན། གནས་བསྐོར་དུས་ཐར་ན་ཕུག་པ་ཟང་ཐལ་འདི་ནས་འགྲོ། མ་ཐར་ན་གོང་གི་བྲག་ཕུག་བར་མ་ནས་འགྲོ་དགོས། རིགས་གསུམ་སྒྲུབ་ཕུག་ལ། ༨ ༄། །འདིར་ཨོ་རྒྱན་རིན་པོ་ཆེས་རིགས་གསུམ་མགོན་པོ་ཞལ་གཟིགས་པའི་སྒྲུབ་ཕུག་འདི་ཡི་ནང་རིགས་གསུམ་མགོན་པོ་ཐིམ་པའི་སྐུ་རང་བྱོན་ཡོད། བཀའ་བརྒྱད་དཀྱིལའཁོར་ལ། ༩ ༄། །འདི་ལ་བཀའ་བརྒྱད་དཀྱིལ་འཁོར་ལས་ཐིམ་པའི་རྒྱ་གར་ལུགས་ཀྱི་མཆོད་རྟེན། འདུས་པ་མདོའི་ཁྲག་འཐུང་མངོན་རྫོགས་རྒྱལ་པོའི་དཀྱིལ་འཁོར། བཀའ་བརྒྱད་དཀྱིལ་འཁོར་ལས་ཐིག་རྣམས་རང་བྱོན་ཡོད། ༡༠ ༄། །འདིར་ཕག་མོའི་དཀྱིལ་འཁོར་ཆོས་འབྱུང་རང་བྱོན་དང་། གོང་དུ་སྒྱུ་འཕྲུལ་ཞི་ཁྲོའི་དཀྱིལ་འཁོར་རང་བྱོན་ཡོད། ༡༡ ༄། །འདི་ཨོ་རྒྱན་རྡོ་རྗེ་གྲོ་ལོད་སྐུ་རྗེས་ཡིན། ༡༢ ༄། །འདི་ན་གཏེར་ཡིག་མཐོང་གྲོལ་ཡོད། ཤྲཱི་སིངྷ་ལ། ༡༣ ༄། །འདི་རིག་འཛིན་ཤྲཱི་སིངྷ་དང་ཨོ་རྒྱན་རིན་པོ་ཆེ། ལོ་ཆེན་བཻ་རོ་རྣམས་ཞལ་འཛོམས་པའི་ཕུག་པ་བྱིན་རླབས་ཅན་ཡིན། ༡༤ ༄། །འདི་ལོ་ཆེན་བཻ་རོའི་དབུ་དང་ཕྱག་ཞབས་རྗེས་ཡིན། པདྨ་ཤེལ་ཕུག་སྒོ་བྱང་སུམ་ཕབ་རྡོ་བརྐོས་མ་ལ། ༡༥ ༄། །གངས་རིའི་ཁྲོད་ཙམ་ན་མངོན་པར་མཐོ་བའི་སྒྲུབ་གནས་ཀྱི་རྒྱལ་པོ་བདེ་ཆེན་པདྨ་ཤེལ་ཕུག་རྒྱལ་བར་གྱུར་ཅིག། པདྨ་ཤེལ་ཕུག་གཡོན་ལོགས་ཕུག་པར། ༡༦ ༄། །འདི་གནས་ཀྱི་སྙིང་པོ་རྡོ་རྗེ་གསུམ་གྱི་ཡིག་འབྲུ་གསུམ་རང་བྱོན། པདྨ་ཤེལ་ཕུག་རྒྱབ་ལ། ༡༧ ༄། །འདི་གནས་ཡིག་རྩ་བར་གསུངས་པའི་ཨོ་རྒྱན་རིན་པོ་ཆེའི་རྫུ་འཕྲུལ་ཞབས་རྗེས་ཡིན། ༡༨ ༄། །འདི་ལ་རྗེ་འབངས་རྣམས་ཀྱི་ཕྱག་རྗེས་དང་། དམ་ཅན་གྱི་ར་རྗེས། སྤྲུལ་པའི་མཁའ་འགྲོ་མ་རྣམས་ཀྱི་ཕྱག་ཞབས་རྗེས་ཡོད། ༡༩༄། །འདི་ཨོ་རྒྱན་རིན་པོ་ཆེའི་ཆིབས་ཁྱུང་གདོང་ནག་པོའི་རྗེས་ཡིན། ༢༠ ༄། །འདི་རྣམས་མཁའ་འགྲོའི་ཚོགས་གཏོར་ཡིན། ༢༡ ༄། །འདི་ལ་བདུད་རྩི་སྨན་གྱི་གཏེར་བཞུགས་པའི་རྟགས་བྃ་ཡིག་རང་བྱོན་ཡོད། ༢༢ ༄། །མཐིལ་འདི་མཁའ་འགྲོའི་བྲོ་ར་ཡིན་པས་ཚོགས་འཁོར་བྱས་ན་དཔའ་བོ་མཁའ་འགྲོ་རང་བཞིན་གྱིས་འདུ། བྱ་ཕུག་མདོ་ཉིན་མོ་བྲག་དེའུ་དཀར་པོ་ལ། ༢༣ ༄། །འདི་ལོ་ཆེན་བཻ་རོས་ཀློང་སྡེའི་ཆོས་འཁོར་བསྐོར་བའི་གནས་མདུན་གྱི་སྤང་འདི་ཚུལ་ཤིང་ས་ལ་བཙུགས་པ་ལས་སྐྱེས། འདི་ཡི་ཐོད་དུ་ཁྲག་འཐུང་མངོན་རྫོགས་རྒྱལ་པོ་རང་བྱོན་ཡོད། ༢༤ ༄། །འདི་སྒྲིབ་སྦྱོང་ལ་ཡིན་པས་གཏམ་མི་སྨྲ་ངལ་མི་གསོ་བར་དྲང་པོར་འགྲོ་དགོས། ། ༢༥ ༄། །ཛཾ་ནང་བཻ་རོའི་སྒྲུབ་གནས་ཀྱི་དཀར་ཆག་བཞུགས། སྭ་སྟི། རྡོ་རྗེའི་བླ་མ་པདྨ་ཡིས། །རྡོ་རྗེའི་གར་གྱི་བྱིན་བརླབས་པ། །རྡོ་རྗེའི་མཚན་པའི་རི་བོའི་ཁོངས། །རྡོ་རྗེ་ཐེག་པའི་འབྱུང་གནས་ཀྱི། །གནས་ཆེན་གནས་ཕྲན་གྲངས་མེད་པ། །ཇི་སྙེད་གྲགས་པ་ཀུན་གྱི་གཙོ། །ཛཾ་གྱི་ལུང་པར་སྒྲུབ་གནས་ཀྱི། །གཙུག་ནོར་པདྨ་ཤེལ་ཕུག་ཡིན། །དེ་ཡི་མདུན་དུ་མཎྜལ་ཚུལ། །མངའ་བདག་ཆོས་རྒྱལ་ཡབ་སྲས་ཀྱི། །ཨོ་རྒྱན་ཡབ་ཡུམ་གཙོ་འཁོར་ལ། །ཀུན་བཟང་མཆོད་སྤྲིན་སྤྲོ་བའི་གཞི། །དགོངས་པའི་རྩལ་ཆེན་ཡོངས་རྫོགས་པ། །ཡེ་ཤེས་སྤྱན་ལྡན་བཻ་རོ་རྗེའི། །སྒྲུབ་པ་མཛད་པའི་ཕུག་ཆེན་པོར། །རྩ་གསུམ་ལྷ་ཚོགས་མངོན་སུམ་བཞུགས། །བླ་གཏེར་ཆོས་ནོར་བགྲང་ཡས་པ། །བསྟན་པའི་བཙས་སུ་སྦས་པ་ཉིད། །ཕྱི་མའི་དུས་སུ་རིག་པ་འཛིན། །འགྲོ་འདུལ་སྤྲུལ་པའི་སྒྱུ་མས་གཏོན། །ཕ་ཝང་ངོས་ལ་བརྡ་རིས་དང་། །ཨོ་རྒྱན་རྗེ་འབངས་ཕྱག་ཞབས་རྗེས། །སངས་རྒྱས་བྱང་སེམས་སྣང་བརྙན་སོགས། །ཕྱག་རྒྱའི་གཟུགས་སུ་བཀྲ་བ་དང་། །བཻ་རོའི་ཕྱག་འཁར་བཙུགས་པ་ལས། །འཁྲུངས་པའི་ལྗོན་ཤིང་བཟང་པོ་སོགས། །ཁྱད་པར་འཕགས་པའི་བཀོད་པ་ནི། །མངོན་སུམ་མིག་གི་བདུད་རྩིར་གྲུབ། །རྩེ་གཅིག་དད་མོས་དྲག་པོ་ཡིས། །ཕྱག་བསྐོར་མཎྜལ་ཚོགས་སྐོང་དང་། །ལས་བཞི་མེ་མཆོད་སྒྲུབ་པ་སོགས། །བྱས་པས་འཕྲལ་རྐྱེན་ནད་གདོན་ཞི། །བསོད་ནམས་ལྷུན་པོ་ལྟར་མཐོ་ཞིང་། །ཡེ་ཤེས་ཉི་ཟླའི་དཀྱིལ་འཁོར་གསལ། །འོད་གསལ་ཁོར་ཡུག་ཀུན་ཏུ་ཁྱབ། །ཕན་བདེའི་པད་ཚལ་རྒྱས་པར་འགྱུར། །ཅེས་པའང་ཛཾ་ནང་གནས་འཛིན་བླ་མ་ནས་ལན་གྲངས་བསྐུལ་བ་དང་། ཉེ་ཆར་མཁྱེན་བརྩེ་སྤྲུལ་པའི་སྐུ་འཇམ་དབྱངས་ཆོས་ཀྱི་དབང་པོས་གསུང་གིས་ནན་ཏན་བསྐུལ་བས་མཚམས་སྦྱར་ཏེ། རིག་འཛིན་གྱི་བཙུན་པ་པདྨ་ཡེ་ཤེས་རྡོ་རྗེས་བདེ་ཆེན་མཚོ་རྒྱལ་གྱི་སྒྲུབ་ཕུག་དབུ་རྩེར་སྨྲས་རིམ་བཞིན། ཡི་གེ་པ་བསྐུལ་བ་པོས་མཛད་པ་འདིས་ཀྱང་བསྟན་འགྲོའི་དོན་མཐའ་ཡས་པའི་རྒྱུར་གྱུར་ཅིག སྐོར་བ་གཅིག་ལ་ཡིག་དྲུག་འབུམ་ཐེར་འགྱུར་ངེས་དང་། སྐོར་ཚད་ཁྲི་གཅིག་ཆིག་སྟོང་ཆིག་བརྒྱ་བཅུ་ཡིས་རྫོགས་པ་ཡིན་ནོ། །འ་ཨ་ཧ་ཤ་ས་མ། སརྦ་མངྒ་ལཾ། དགེའོ། །

གོང་གསལ་འདི་རྣམས་མཁྱེན་ཀོང་མཆོག་གསུམ་ནས་གནས་བྱང་རྡོར་བརྐོས་པ་ཡིན་ལ་གནས་ཤིས་ཆོས་ཀྱི་བློ་གྲོས་གསུང་ཡིན། རབ་བྱུང་བཅུ་བདུན་པའི་ཤིང་སྤྲེལ་གནས་འདུས་སྐབས་དགེ་སློང་ཀརྨ་ཆེད་མངགས་ཀྱིས་ངོ་བཤུས་བྱས་པར་ཡིག་འབྲུ་མི་གསལ་བ་རྣམས་མཁན་རིན་པོ་ཆེ་ཐུབ་བསྟན་རབ་གསལ་ནས་ཞུ་དག་མཛད་པ་ཁུངས་ཐུབ་ཡིན་ལ་ཡིག་ཆུང་འདི་རྣམས་ངེས་བཟུང་ཕྱིར་དང་ཨང་ཀི་འདི་རྣམས་འདྲ་པར་དང་བསྒྲིགས་ཕྱིར་གསར་དུ་བསྣན་པ་ཡིན་ནོ། །

༄༅། །གནས་ཆེན་པདྨ་ཤེལ་ཕུག་གི་གསོལ་འདེབས་བཞུགས་སོ། །

མཚོ་སྐྱེས་གུ་རུའི་བྱིན་རླབས་འབྲེལ་ཚད་ཀུན། །དོན་གཉིས་འབད་མེད་སྩོལ་བའི་ནོར་བུ་མཆོག །གནས་མཆོག་པདྨ་ཤེལ་ཕུག་ལ་གསོལ་བ་འདེབས། །མཆོག་དང་ཐུན་མོང་དངོས་གྲུབ་མྱུར་དུ་སྩོལ། །ཅེས་སྒྲུབ་གནས་ཀྱི་གསོལ་འདེབས་ཀུན་གཟིགས་འཇམ་དབྱངས་བླ་མ་རིན་པོ་ཆེའི་བཀའ་ལྟར་ཀརྨ་པ་ཐེག་མཆོག་རྡོ་རྗེས་སྤྲེལ་ལོ་སྤྲེལ་ཟླའི་ཡར་ཚེས་བཅོ་ལྔ་ལ་ཙཱ་འདྲ་རིན་ཆེན་གནས་ནས་འཕྲལ་དུ་བྲིས་ཏེ་ཕུལ་བའོ། །

༄༅། །ཨོྃ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ། ངོ་བོ་བློ་འདས་སྤྲོས་པ་བྲལ་བའི་དབྱིངས། །རང་རིག་བླ་མ་མཚོ་སྐྱེས་རྡོ་རྗེ་འཆང་། །དགོངས་ཀློང་འདུ་འབྲལ་མེད་ལ་གསོལ་བ་འདེབས། །ཡེ་ཤེས་དགོངས་པའི་རྩལ་ཆེན་རྫོགས་པར་ཤོག །རྩ་གསུམ་ཀུན་འདུས་ཨོ་རྒྱན་རིན་པོ་ལ། །ཡིད་ཆེས་མོས་གུས་གདུང་བས་གསོལ་བ་འདེབས། །སྐྱེ་བ་ཀུན་ཏུ་འབྲལ་མེད་རྗེས་བཟུང་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པའང་འཇམ་དབྱངས་ཆོས་ཀྱི་བློ་གྲོས་པས་ཤིང་བྱི་ཟླ་བ་བཅུ་གཅིག་པའི་ཚེས་བཅུ་བདུན་ལ་གསོལ་བ་བཏབ་པ་སིདྡྷི་རསྟུ།

མཆན། ༡.གོང་གི་གནས་ཡིག་འདི་རྣམས་ནི་རྫོང་སར་དགོན་པའི་མཁན་ངང་བརྟེན་གྱིས་འདོན་སྤྲོད་གནང་བའི་གནས་ཡིག་ཕྱོགས་བསྒྲིགས་ལས་ཞལ་བཤུས་པའོ། །༢.གནས་འདི་ནི་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་རྫོང་སར་དགོན་པའི་རྒྱབ་ཕྱོགས་ཛཾ་མདའ་གྲོང་གི་ལུང་པའི་ཕུ་ན་ཡོད། རྫོང་སར་དགོན་ནས་གནས་མདུན་ལ་རླངས་འཁོར་གྱིས་སྤྱི་ལེ༧ཙམ་དང་རྐང་ཐང་གིས་སྤྱི་ལེ༣ལ་འགྲོ་དགོས།

༄༅། །ཡོན་ཏན་ཐུགས་ཀྱི་གནས་མཆོག་བསྟན་པ་ནི༔ བོད་ཀྱི་མདོ་ཁམས་འབྲི་ཞེས་བྱ་བ་རུ༔ དཔལ་གྱི་རི་ནི་གླང་ཆེན་འགྱིང་བ་འདྲ༔ དེ་བཱི་ཀོ་ཊི་ཙཱ་འདྲ་རིན་ཆེན་བྲག༔ ཧེ་རུ་ཀ་དཔལ་དགུ་ཡི་ཚུལ་དུ་གནས༔ པདྨའི་སྒྲུབ་ཕུག་མེ་ཏོག་ཁ་བྱེ་འདྲ༔ བྲག་གི་ལོགས་སུ་ཞི་ཁྲོ་རང་བྱོན་དང༔ ཐུགས་ཀྱི་རིག་འཛིན་ནམ་མཁའི་སྙིང་པོ་ཡི༔ སྒྲུབ་པའི་གནས་མཆོག་ཟླ་གམ་དབྱིབས་ཅན་ཡོད༔ མཆོག་སྒྲུབ་འདོད་པས་འདི་རུ་རྩེ་གཅིག་སྒྲུབས༔ ཁྱད་པར་བདག་གི་གཙུག་རྒྱན་བི་མ་ལས༔ བྱིན་གྱིས་བརླབས་པའི་གནས་མཆོག་གུད་དུ་སྦས༔ སྔགས་སྲུང་གནས་པའི་ཤིང་ནི་བྷ་ཊ་ཡི༔ ཉེ་བའི་ཕུག་པར་ཨོ་རྒྱན་བདག་ཉིད་གནས༔ དེ་ཚེ་ཐུགས་ཀྱི་རིག་འཛིན་ཧཱུྃ་ཀ་ར༔ བྱོན་ཏེ་ཞག་གསུམ་བཀའ་ཡི་བསྡུ་བ་མཛད༔ སློབ་དཔོན་ཉིད་ཀྱི་སྐུ་བརྙན་རང་བྱོན་དང༔ ཡེ་ཤེས་སྐུ་ཡི་ཞབས་ཀྱི་མཚན་མ་གསལ༔ ཁྱད་པར་ཅན་གྱི་ངོ་མཚར་དེ་འདྲ་བདོག༔

ཡོན་ཏན་ཐུགས་ཀྱི་གནས་ཙཱ་འདྲ་རིན་ཆེན་བྲག་ནི། དཔལ་སྤུངས་དགོན་གྱི་རྒྱབ་རི་ཡོངས་གྲགས་དབུ་ཆེ་བྲག་དཀར་དང་འདབས་འབྲེལ་བ་སྟེ། གནས་རི་སྤྱི་དེ་ཝི་ཀོ་ཊི། ཤར་གྱི་བྲག་རི་ཙཱ་འདྲ་དངོས་ཡིན་ནོ། །བི་མ་ལའི་གནས་མཆོག་གུད་དུ་སྦས་པ་ནི། ཡང་ཁྲོད་ཀུན་བཟང་བདེ་ཆེན་འོད་གསལ་གླིང་གི་ཀླད་དེར་ཡོད། འདི་ནས་གསང་ཐིག་སྐོར་གསུམ་དང་གནས་ཡིག་བཞེས་ནས་གནས་ཞལ་ཕྱེས།

༄༅། །ཧེ་རུ་ཀ་ལ་ཕྱག་འཚལ་ལོ༔ ཆོས་དབྱིངས་རྣམ་པར་དག་པའི་ཞིང༔ བདེ་ཆེན་ཡེ་ཤེས་ལོངས་སྤྱོད་རྫོགས༔ ལྷུན་གྱིས་གྲུབ་པའི་བཀོད་པ་ནི༔ ནམ་མཁའི་མཐའ་དང་མཉམ་པ་ལས༔ སྣ་ཚོགས་སྣང་བའི་ཆོ་འཕྲུལ་ལས༔ དག་དང་མ་དག་འཕྲུལ་སྲིད་ཀྱང༔ འཇིག་རྟེན་རབ་འབྱམས་ཐམས་ཅད་ནི༔ སྤྲུལ་པའི་ཞིང་ཁམས་ལྷུན་གྱིས་གྲུབ༔ མི་མཇེད་འཇིག་རྟེན་ཞིང་ཁམས་འདིར༔ སྤྲུལ་པའི་སངས་རྒྱས་དུ་མ་བྱོན༔ ཁྱད་པར་འཛམ་གླིང་གླིང་དག་ཏུ༔ རྫོགས་པའི་སངས་རྒྱས་ཐུབ་པ་ཡིས༔ མཛད་པ་བཅུ་གཉིས་ཞིང་འདིར་བསྟན༔ སྐུ་གསུང་ཐུགས་ཀྱི་བྱིན་རླབས་ལས༔ མཐའ་དབུས་རི་བྲག་མཚོ་ལ་སོགས༔ བེམ་པོའི་གཟུགས་བརྙན་ཐམས་ཅད་ལ༔ སྐུ་གསུང་ཐུགས་སུ་བྱིན་གྱིས་བརླབས༔ དེ་ཉིད་བརྫུས་སྐྱེས་ཚུལ་སྤྲུལ་པ༔ པདྨ་འབྱུང་གནས་བདག་ཉིད་ཀྱིས༔ སྣང་སྲིད་ཀུན་ལ་དབང་བསྒྱུར་ཏེ༔ གསང་སྔགས་ཆོས་ཀྱི་སྒྲོན་མེ་སྦར༔ བེམ་པོ་ས་རྡོ་རྣམས་ལ་ཡང༔ སྐུ་གསུང་ཐུགས་ཀྱི་ཕྱག་རྒྱས་བཏབ༔ གྲོལ་བ་བཞི་ལྡན་འགྲོ་དོན་སྤེལ༔ ཉེར་བཞིའི་གནས་དང་དུར་ཁྲོད་བརྒྱད༔ མཐའ་དབུས་ཀུན་གྱི་གནས་རྣམས་དང༔ ཁྱད་པར་བོད་ཡུལ་འདི་ཉིད་ཀྱི༔ དབུས་གཙང་སྒྲུབ་གནས་བརྒྱ་རྩ་བརྒྱད༔ ཁམས་ཀྱི་གནས་ཆེན་ཉེར་ལྔ་ལ༔ སྒྲུབ་པ་བྱས་ཤིང་བྱིན་གྱིས་བརླབས༔ འབྲེལ་ཚད་དོན་དང་ལྡན་པར་བྱས༔ ཐུགས་ཀྱི་གནས་མཆོག་གྲུབ་རྟགས་མྱུར༔ ཙཱ་འདྲ་རིན་ཆེན་བྲག་འདི་ནི༔ བདེ་ཆེན་འཁོར་ལོའི་རྩ་འདབ་ཚུལ༔ བཛྲ་ཙིཏྟ་ཀོ་ཊཱི་ཞེས༔ དབུས་ཀྱི་བྲག་ནི་ཧེ་རུ་ཀ༔ གཽ་རཱི་ལྷ་མོ་བརྒྱད་ཀྱིས་བསྐོར༔ དབུས་སུ་བྷ་ཊ་ཞེས་བྱའི་ཤིང༔ ཤར་དུ་ལྗོན་པ་ལྷོར་གསལ་ཤིང༔ ནུབ་ཏུ་ལྕགས་ཀྱུ་བྱང་འབྲས་ལྡན༔ མི་འགྱུར་ཤིང་གི་གཟེར་མ་གདབ༔ སྐུ་གསུང་ཐུགས་རྟགས་བརྒྱ་རྩ་བརྒྱད༔ ཆུ་བཞིས་སྔགས་ཀྱི་རང་སྒྲ་སྒྲོགས༔ ཀ་ལ་དུང་མཚོ་ཁྲུས་ཀྱི་ཆབ༔ སྐུ་གསུམ་ཐོད་སྒྱེད་ཚོགས་ཀྱི་གཞོང༔ འདོད་ཡོན་རྣམ་ལྔའི་མཆོད་སྤྲིན་འཕྲོ༔ རྡོ་རྗེ་སེམས་དཔའ་བདེ་བ་ཆེ༔ ཚེ་དཔག་མེད་པ་འཆི་མེད་གནས༔ ཧཱུྃ་ཀ་ར་དང་བི་མ་ལ༔ གྲུབ་པའི་སློབ་དཔོན་ཐམས་ཅད་ཀྱིས༔ ཡེ་ཤེས་སྐུ་ཡི་བྱིན་གྱིས་བརླབས༔ བྱ་སྐྱིབས་ཀེའུ་ཚང་ཉམས་དགའ་བར༔ རིག་འཛིན་གསུམ་གྱི་སྒྲུབ་པའི་གནས༔ ཁྲུས་ཆབ་ཚེ་ཆུ་སིནྡྷུ་ར༔ སྨན་ཆུ་ལ་སོགས་ངོ་མཚར་ཅན༔ གྲུབ་པའི་གནས་མཆོག་འདི་དག་ཏུ༔ གྲུབ་པའི་སྐྱེས་བུ་དུ་མ་འདུ༔ གཙུག་ལག་ཁང་དང་མཆོད་རྟེན་འབྱུང༔ དཀར་ཆག་ས་སྟེང་བྱུང་བ་ན༔ ཧེ་རུ་ཀ་ཡི་སྐུ་གསུང་ཐུགས༔ འོག་མིན་གནས་ནས་འདི་རུ་འཕོ༔ ཁྱད་པར་ལུག་ལོ་སྤྲེལ་ཟླ་བར༔ རིག་འཛིན་ཡི་དམ་མཁའ་འགྲོའི་ཚོགས༔ ཕྱོགས་བཅུའི་གནས་ནས་འདི་རུ་འབྱོན༔ ཐུན་མོང་ཁྱད་པར་ཐམས་ཅད་དུ༔ དད་ཅིང་མོས་པ་བརྟན་པོ་ཡིས༔ གནས་འདིར་ཕྱིན་པ་ཙམ་གྱིས་ཀྱང༔ ངན་སོང་དུཿཁ་ལས་སྐྱོབ་ཅིང༔ ཕྱི་ནང་གསང་བའི་ཚོགས་འཁོར་གྱིས༔ བསོད་ནམས་ཡེ་ཤེས་ཚོགས་ཆེན་རྫོགས༔ ཕྱག་དང་བསྐོར་བ་སུས་བྱེད་པ༔ ལས་ངན་སྡིག་སྒྲིབ་ཐམས་ཅད་འདག༔ གཞན་དུ་ལོ་གཅིག་སྒྲུབ་པ་བས༔ འདི་རུ་ཐུན་གཅིག་བསྒོམ་པ་ཟབ༔ རྩེ་གཅིག་སྒྲུབ་པ་སུས་བྱེད་པ༔ མཆོག་ཐུན་དངོས་གྲུབ་དེ་ཡིས་འཐོབ༔ གནས་འདིར་མཆོད་པ་སུས་བྱེད་པ༔ ཚེ་དང་བསོད་ནམས་ཐམས་ཅད་རྒྱས༔ དུས་གསུམ་བདེ་གཤེགས་ཐམས་ཅད་ཀྱིས༔ བསྔགས་པ་བརྗོད་པའི་གནས་འདི་ནི༔ འོད་གསལ་ཐུགས་ཀྱི་གནས་ཡིན་ཕྱིར༔ ས་རྡོ་རི་བྲག་ཐམས་ཅད་ཀུན༔ འཇའ་ཟེར་ཐིག་ལེའི་རྣམ་པར་གནས༔ དཔའ་བོ་མཁའ་འགྲོ་ངང་གིས་འདུ༔ བཀའ་སྲུང་ཕོ་ཉ་ལས་ལ་མྱུར༔ ལེགས་ཉེས་སྟངས་འཛིན་གནས་འདིས་བྱེད༔ དམ་མེད་ཚུལ་ཉེས་སྤྱོད་པ་རྣམས༔ གནས་འདིར་བགྲོད་པའི་གནས་མ་ཡིན༔ སྐལ་བ་ལྡན་དང་དམ་ཚིག་ལྡན༔ ཚུལ་བཞིན་སྤྱོད་པའི་རྣལ་འབྱོར་ལ༔ སྐལ་བར་འཚམས་པའི་དངོས་གྲུབ་ནི༔ འཐོབ་འགྱུར་ཐེ་ཚོམ་མེད་པའོ༔ དེ་བཞིན་གཤེགས་པ་ཐམས་ཅད་ཀྱི༔ འགྲོ་དོན་ཐབས་ཀྱི་རིང་བསྲེལ་མཆོག༔ རྨད་བྱུང་སྐུ་གདུང་འདུས་པ་ཡི༔ དམ་རྫས་རིན་པོ་ཆེ་ཡི་ཏོག༔ ཟབ་པའི་གདམས་པ་དང་བཅས་པ༔ དཀར་ཆག་རིན་ཆེན་གཏེར་དུ་སྦས༔ ལས་འཕྲོ་ཅན་དང་འཕྲད་པར་ཤོག༔ ས་མ་ཡ་རྒྱ་རྒྱ༔ ཞེས་སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པས། གནས་མཆོག་ཙཱ་འདྲ་རིན་ཆེན་བྲག་གི་དབུས་དཔལ་ཆེན་པོ་རང་བྱུང་གི་བྲག་གཡས། གུ་རུའི་གསང་ཕུག་གི་སྙིང་པོ་ནས་ལུག་ལོ་སྤྲེལ་ཟླའི་ཚེས་བཅུར་དམ་རྫས་རིན་པོ་ཆེའི་ཏོག་དང་ལྷན་ཅིག་སྤྱན་དྲངས་པའི་ཤོག་སེར་དཀྱུས་མཐོ་ཕྱེད་དང་དོ། ཞེང་སོར་བཞིའི་ངོས་འཕྲུལ་གྱི་ཡི་གེ་ལས་ཡང་ཁྲོད་ཀུན་བཟང་བདེ་ཆེན་གླིང་དུ་གཏན་ལ་ཕབ་པའི་ཡིག་བྲིས་པདྨ་གར་དབང་བློ་གྲོས་མཐའ་ཡས་པའི་སྡེས་བགྱིས་པ་དགེ་ལེགས་འཕེལ།

མཆན། གནས་ཡིག་འདི་ནི་མཆོག་གྱུར་གླིང་པའི་བཀའ་འབུམ་ཨ་པོད་ལས་ཞལ་བཤུས་པའོ༎

༄༅། །གནས་འདུས་སྒོ་བྱང་དང་པོ། དཔལ་དུས་གསུམ་ཀུན་མཁྱེན་ཨོ་རྒྱན་ཆོས་ཀྱི་རྒྱལ་པོ་ཡབ་ཡུམ་གྱི་ཞབས་ཀྱི་པདྨོ་དྲི་མ་མེད་པ་ལ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །དེའང་སངས་རྒྱས་གཉིས་པ་པདྨ་ཀ་རའི་གསང་གསུམ་ཡོན་ཏན་ཕྲིན་ལས་དང་བཅས་པ་ལ་བྱིན་གྱིས་བརླབས་པའི་རྡོ་རྗེའི་གནས་བསམ་གྱིས་མི་ཁྱབ་པ་ཞིག་མཆིས་པ་ལས། ཡོངས་སུ་གྲགས་ཤིང་ཁྱད་པར་དུ་འཕགས་པ་དབུས་གཙང་སྒྲུབ་གནས་ཉེར་གཅིག་ཁམས་ཀྱི་གནས་ཆེན་ཉེར་ལྔ་ཞེས་གདོད་ནས་གྲགས་ཤིང་གྲུབ་པའི་ནང་ཚན་མདོ་ཁམས་སུ་བཞུགས་པའི་གནས་ཆེན་ཉེར་ལྔ་ལས་ཡོན་ཏན་ཐུགས་ཀྱི་གནས་མཆོག་འདི་ཉིད། ཐོག་མར་རབ་བྱུང་བཅུ་བཞི་པའི་མེ་འབྲུག་ལོར་དཔལ་སྤུངས་ཐུབ་བསྟན་ཆོས་འཁོར་གླིང་གི་ལྷ་གསར་མཆོད་སྡོང་བྱིན་རླབས་དཔལ་འབར་བཞུགས་པའི་དྲི་གཙང་ཁང་དུ་བླ་མ་དགོངས་པ་འདུས་པའི་དབང་སྒྲུབ་ཆེན་མོ་ཚུགས་པའི་སྐབས་སུ། དག་པའི་སྣང་བར་གནས་འདི་ཡུལ་ཆེན་ཉེར་བཞིའི་བྱེ་བྲག་དེ་བཱི་ཀོ་ཊི་གསུམ་པ་ཡིན་ཚུལ་ཡེ་ཤེས་མཁའ་འགྲོའི་གསང་བའི་ལུང་ལས་ཐོས། དེ་རྗེས་མེ་སྦྲུལ་གནམ་ལོ་གསར་དུ་ཚེས་པར་ཉེ་བ་ན་གཏེར་ཆེན་མཆོག་གྱུར་བདེ་ཆེན་གླིང་པས་དཔའ་བོ་དབང་ཆེན་བྲག་ནས་གནས་ཆེན་ཉེར་ལྔའི་མདོ་བྱང་ཁྲོམ་གཏེར་དུ་བཞེས། གནས་ཆེན་གྱི་སྙིང་པོ་ཙཱ་འདྲ་རིན་ཆེན་བྲག་གི་སྐོར་རྣམས་ཟླ་བ་དང་པོའི་དཀར་ཕྱོགས་ཀྱི་རྒྱལ་བ་གསུམ་པར་ངོ་སྤྲོད་མཛད། སླར་ས་ལུག་ལོར་བཀའ་བརྒྱུད་རྒྱལ་བ་ཡབ་སྲས་ཞལ་རྒྱས་པའི་སྐབས་སུ་གཏེར་ཆེན་རིན་པོ་ཆེས་ཟླ་བ་ལྔ་པའི་ཚེས་བཅུར་ཙཱ་འདྲ་རིན་ཆེན་བྲག་ནས་ཁྱད་པར་འཕགས་པའི་ཆོས་དང་དམ་རྫས་ཀྱི་ཟབ་གཏེར་སྤྱན་དྲངས་པ་དང་ལྷན་ཅིག་གནས་ཞལ་འབྱེད་ཅིང་མཚན་ཉིད་ཞིབ་པར་གཏན་འབེབས་མཛད་པས་ཆེ་བའི་ཡོན་ཏན་ཡོངས་སུ་གྲགས་ཏེ་ཕྲིན་ལས་ཀྱི་སྒོ་ཚུགས་པ་ལྟར། སྒོམ་སྒྲུབ་ཚོགས་མཆོད་ཕྱག་བསྐོར་སོགས་ཚོགས་གསོག་བགྱིས་ན་དུས་ནམ་ཡིན་དུ་ཁྱད་པར་མེད་པར་དགེ་རྩ་གང་སྒྲུབ་དེ་ཉིད་འབུམ་ཕྲག་རེའི་འགྱུར་ཡོད་པ་བསླུ་མེད་རྡོ་རྗེའི་ལུང་གི་ངེས་པ་ཡིན་ཅིང་། ད་ལམ་དམིགས་བསལ་ལྕགས་ལུག་ཟླ་བ་དྲུག་པའི་ཚེས་གཅིག་ནས་གནམ་གང་བར་དུ་དཔལ་གྱི་གནས་མཆོག་ཙཱ་རི་ཏྲའི་ཡེ་ཤེས་འཁོར་ལོ་རྟེན་དང་བརྟེན་པར་བཅས་པ་དངོས་སུ་བྱོན་པ་ཡིན་པས། མཐའ་སྐོར་གཅིག་ལ་ཡིག་དྲུག་གམ་བཛྲ་གུ་རུ་དུང་ཕྱུར་བདུན། མཐའ་སྐོར་གསུམ་ལ་ཙཱ་རི་རོང་ཆེན་བསྐོར་བའི་ཕན་ཡོན་ཡོད་ངེས་པ་ཡིན་ཅིང་། དེ་བཞིན་ཧེ་རུ་ཀའི་བར་སྐོར་གཅིག་ལ་སྙིང་པོ་དུང་ཕྱུར་གསུམ། རྩེ་སྐོར་བདུན་ལ་དུང་ཕྱུར་གསུམ་གྱི་ཕན་ཡོན་ཡོད་པས་ཐམས་ཅད་ཀྱིས་སྒོ་གསུམ་མི་དགེ་བ་དང་མ་འདྲེས་པར་དད་གུས་མོས་པ་རྩེ་གཅིག་པའི་ངང་བསང་དང་ཚོགས་གཏོར་མཆོད་འབུལ། ཕྱག་སྐོར་སོགས་དགེ་བའི་འབྲེལ་འཇོག་ཅི་ནུས་ལ་འབད་ན་མི་ལུས་དོན་ལྡན་དུ་འགྱུར་བ་དང་། ཚོགས་མཆོད་ལྟ་བུ་ལན་རེ་ཕུལ་བས་ཀྱང་འབུམ་འགྱུར་གྱི་ཕན་ཡོན་ངེས་པར་ཐོབ་པ་དང་། ཁྱད་པར་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་རྗེ་བཙུན་འཕགས་མ་སྒྲོལ་མའི་ཡེ་ཤེས་ཀྱི་སྐུ་དངོས་དང་རྣམ་དབྱེར་མེད་པ་སྒྲོལ་སྐུ་གསུང་འབྱོན་མ་བཞུགས་ཡོད་པས། འཕགས་མ་སྒྲོལ་མ་ལ་དད་གུས་ཆེན་པོས་ཕྱག་འཚལ་ཉེར་གཅིག་དང་། སྒྲོལ་མའི་སྙིང་པོ་བཟླ་བཞིན་དུ་ཕྱག་སྐོར་བྱས་ན་གནས་སྐབས་ཀྱི་འགལ་རྐྱེན་ཉེ་བར་འཚེ་བ་མཐའ་དག་ཞི་ཞིང་ཚེ་བསོད་ཡེ་ཤེས་འཕེལ། མཐའ་དམག་གདུག་པའི་ཉེ་བར་འཚེ་བ་ཞི་ཞིང་མཐར་ཐུགས་འཕགས་མས་རྗེས་སུ་འཛིན་པའི་རྟེན་འབྲེལ་ཡོད་པ་དང་། གནས་ཀྱི་དབུ་རྩེར་མཁའ་འགྲོ་མ་ལས་ཀྱི་དབང་མོ་དང་། སློབ་དཔོན་ཀླུ་སྒྲུབ་ཀྱི་ཐུགས་དམ་གུ་རུ་རིན་པོ་ཆེ་ལ་བསྩལ་བའི་འཕགས་པ་འཇིག་རྟེན་དབང་ཕྱུག་ཐུགས་རྗེ་ཆེན་པོའི་སྣང་བརྙན་ཡེ་ཤེས་ཀྱི་སྐུ་དང་ཚུལ་མཚུངས་པ་བསྟན་པའི་གསོས་སུ་ཟབ་གཏེར་དུ་བཞུགས་པས། སྙིང་པོ་ཡི་གེ་དྲུག་མ་བཟླ་བཞིན་ཕྱག་མཆོད་བསྐོར་བ་ལ་འབད་ན་མཚམས་མེད་པ་ལྔའི་སྡིག་པ་བྱང་ཞིང་འབྲེལ་ཚད་བདེ་བ་ཅན་དུ་སྐྱེ་བ་དང་། ཚེ་བསོད་དཔལ་འབྱོར་ཡེ་ཤེས་ཐམས་ཅད་རྒྱས་པར་རྡོ་རྗེའི་ལུང་ལས་གསལ་བས་དད་མོས་རྩེ་གཅིག་པས་ཕྱག་སྐོར་མཆོད་འབུལ་དང་། བཟང་པོ་སྤྱོད་པའི་སྨོན་ལམ་སོགས་སྒོ་གསུམ་འཇུག་པ་གཅིག་པས་འབད་བརྩོན་བགྱིས་ན་འདི་ཕྱི་ཀུན་དུ་དགེ་ཞིང་དོན་ཐམས་ཅད་འགྲུབ་པར་ངེས་པས་ཀུན་གྱིས་ཐུགས་ལ་བཞག་པར་ཞུ། ཞེས་དགེ་བསྐུལ་གྱི་ཡི་གེ་རབ་བྱུང་བཅོ་ལྔ་པའི་ནང་གསེས་སྐྱེ་དགུའི་བདག་ཅེས་ལྕགས་ལུག་ས་ག་ཟླ་བའི་དཀར་ཕྱོགས་ཀྱི་རྒྱལ་བ་གསུམ་པར་རྫོང་སར་བཀྲ་ཤིས་ལྷ་རྩེའི་རང་གནས་བསམ་གཏན་གྱི་ཁང་བུ་ནས་འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་། འཆི་མེད་བསྟན་གཉིས་གཡུང་དྲུང་གླིང་པ་ཟུང་གིས་སྤེལ་བ་དགེ་ལེགས་ཀྱི་སྣང་བས་ཕྱོགས་དུས་ཀུན་ཏུ་ཁྱབ་ཅིང་རྟག་པར་གྱུར་ཅིག སརྦ་དཱ་ཀ་ལྱ་ཎཾ་མངྒ་ལཾ་བྷ་བནྟུ། གནས་འདུས་སྒོ་བྱང་གཉིས་པ། སཱ་སྟི་སི། གངས་ཅན་གྱི་ལྗོངས་འདིར་རྒྱལ་བ་ཀུན་ལས་བཀའ་དྲིན་ཕུལ་དུ་བྱུང་བ་འཕགས་མཆོག་སྤྱན་རས་གཟིགས་ཀྱིས་ཐོག་མར་མའི་འགྲོ་བ་དང་ལོངས་སྤྱོད་ཀྱི་ཟས་བཅུད་སྤེལ་ཅིང་ས་རྡོ་རི་བྲག་རྣམས་ཀྱང་བྱིན་གྱིས་བརླབས། དེ་ཉིད་སྤྲུལ་པའི་རྒྱལ་པོའི་ཚུལ་བཟུང་བ་རྣམས་ཀྱིས་དཀོན་མཆོག་གསུམ་གྱི་རྟེན་བཀོད་ནས་མཐའ་འཁོབ་ཀྱི་ཡུལ་འདི་འཕགས་པའི་ཡུལ་ལྗོངས་དང་མཉམ་པར་མཛད། སྤྱན་རས་གཟིགས་ཉིད་རྡོ་རྗེ་སློབ་དཔོན་གྱི་རྣམ་པར་བཟུང་བ་སངས་རྒྱས་གཉིས་པ་པདྨ་ཀ་ར་བོད་ཡུལ་དུ་སྐུ་དངོས་ཀྱིས་ཕེབས་པས་བོད་ཁམས་མཐའ་དབུས་ཀུན་གྱིས་གཞི་རྟ་རྨིག་ཙམ་ཡང་མ་ལུས་པ་ཞབས་ཀྱིས་བཅགས། ལྷ་སྲིན་གདུག་པ་ཅན་ཐམས་ཅད་དམ་ལ་བཏགས། གངས་བྲག་རི་མཚོ་མ་ལུས་པ་སྒྲུབ་པའི་གནས་སུ་མཛད་ཅིང་ཕལ་ཆེར་གདོད་ནས་གྲུབ་པའི་གནས་ཆེན་རྣམས་དང་དབྱེ་བ་མེད་པར་བྱིན་གྱིས་བརླབས་པ་ཐམས་ཅད་ཀྱང་འབྲེལ་ཚད་དོན་ལྡན་གྱི་ཕྲིན་ལས་ཅན་དུ་བཞུགས་པ་ལས། སྐབས་སུ་བབས་པ། མདོ་ཁམས་ལྗོངས་སུ་གནས་ཆེན་གནས་ཕྲིན་བསམ་གྱིས་མི་ཁྱབ་པ་བཞུགས་པ་ཐམས་ཅད་ཀྱི་གཙོ་བོ་གནས་ཆེན་ཉེར་ལྔ་ཞེས་ཡོངས་སུ་གྲགས་པ་ལས། ཡོན་ཏན་གྱི་གནས་ལྔ་པོ་སྡེ་བཞི་དགེ་བཅུས་མཚན་པའི་རྒྱལ་ཁམས་འདིར་བཞུགས་པའི་ནང་གསེས་ཡོན་ཏན་ཐུགས་ཀྱི་གནས་དཔལ་གྱི་ཙཱ་རི་ཏྲ་དང་རྣམ་དབྱེར་མེད་པ་དེ་བཱི་ཀོ་ཊི་ཙཱ་འདྲ་རིན་ཆེན་བྲག་ཅེས་པ་འདི་ཉིད། སྔོན་གྱི་དུས་ནས་གནས་ཆེན་ཡིན་པར་གྲགས་ཀྱང་སྦས་པའི་ཚུལ་དུ་བཞུགས་པ་ལ། དེང་སང་འགྲོ་དོན་དུས་ལ་བབས་ཤིང་གནས་དུས་ཀྱི་རྟེན་འབྲེལ་ཕུན་སུམ་ཚོགས་པའི་རྒྱུ་ལས་རྩོད་བྲལ་གྱི་གཏེར་ཆེན་ཨོ་རྒྱན་མཆོག་གྱུར་གླིང་པས་སྤྱིའི་མདོ་བྱང་དང་། བྱེ་བྲག་འདི་ཉིད་དཀར་ཆགས་གཏེར་ནས་བཞེས་ཤིང་གནས་ཞལ་འབྱེད་པར་མཛད། དཔལ་རྒྱལ་དབང་ཀརྨ་པ་ཡབ་སྲས་སོགས་སྐྱེས་བུ་དམ་པ་རྣམས་ཀྱིས་མགྲིན་གཅིག་ཏུ་བསྔགས་པ་འདི་ཉིད་དག་པའི་སྣང་ངོར་ཡེ་ཤེས་ཀྱི་ཕོ་བྲང་རྩ་གསུམ་རྒྱལ་བ་རྒྱ་མཚོ་རྟག་ཏུ་བཞུགས་པ་ཡིན་པས་ནམ་དུའང་བྱིན་རླབས་དང་ལྡན་ཞིང་ཕྱག་བསྐོར་སོགས་ཀྱི་ཕན་ཡོན་གཏེར་གཞུང་ལས་འབྱུང་བ་ལྟར་ཡོད་པ་གཞིར་བཅས་ཀྱང་། ཁྱད་པར་དུས་ནི་གཏེར་གཞུང་ལས། ཁྱད་པར་ལུག་ལོ་སྤྲེལ་ཟླ་བར༔ རིག་འཛིན་ཡི་དམ་མཁའ་འགྲོའི་ཚོགས༔ ཕྱོགས་བཅུའི་གནས་ནས་འདི་རུ་བྱོན༔ ཅེས་གསུངས་པ་ལྟར་ལུག་ལོ་ནམ་ཤར་དང་དེའི་ཡང་སྤྲེལ་ཟླ་བའི་ནང་དུ་འདུ་བ་ཁྱད་པར་ཅན་ངེས་པར་ཡོད་པས། གནམ་ལོ་འདིའི་ཟླ་བ་ལྔ་པ། དྲུག་པ། བདུན་པ་སྟེ་སྤྲེལ་ཟླ་ལུག་གསུམ་དང་། ཁྱད་པར་ཟླ་བ་དྲུག་པ་ལ་དཔལ་གྱི་ཙཱ་རི་ཏྲ་རྟེན་དང་བརྟེན་པར་བཅས་པ་མངོན་སུམ་དུ་འདིར་འཕོས་ནས་བཞུགས་པ་ཡིན་པས་རྩེ་སྐོར་བདུན། བར་སྐོར་གསུམ། མཐའ་སྐོར་གཅིག་ལ་དུང་ཕྱུར་བདུན་གྱི་འགྱུར་ཡོད་ཅིང་། སྤྱིར་གཏེར་གཞུང་ལས། ཐུན་མོང་ཁྱད་པར་ཐམས་ཅད་དུ༔ དད་ཅིང་མོས་པ་བརྟན་པོ་ཡིས༔ གང་འདིར་ཕྱིན་པ་ཙམ་གྱིས་ཀྱང༔ ངན་སོང་དུཿཁ་ལས་སྐྱོབ་ཅིང༔ ཕྱི་ནང་གསང་བའི་ཚོགས་འཁོར་གྱིས༔ བསོད་ནམས་ཡེ་ཤེས་ཚོགས་ཆེན་རྫོགས༔ ཕྱག་དང་སྐོར་བ་སུས་བྱེད་པ༔ ལས་ངན་སྡིག་སྒྲིབ་ཐམས་ཅད་འདག༔ གཞན་དུ་ལོ་གཅིག་སྒྲུབ་པ་ལས༔ འདི་རུ་ཐུན་གཅིག་བསྒོམས་པས་ཟབ༔ གནས་འདིར་མཆོད་པ་སུས་བྱེད་པ༔ ཚེ་དང་བསོད་ནམས་ཐམས་ཅད་རྒྱས༔ ཞེས་དང་། ཡང་བྱང་ལས། ཕྱག་འཚལ་ལན་གཅིག་བགྱིས་པ་དང༔ ལན་གཅིག་བསྐོར་བས་ལུས་སྒྲིབ་དག༔ ཆེ་བའི་ཡོན་ཏན་སུས་བརྗོད་པ༔ ངག་གི་སྒྲིབ་པ་ཐམས་ཅད་བྱང༔ དད་དང་ངེས་ཤེས་ཆེར་ལྡན་ན༔ མཆོག་དངོས་གྲུབ་པ་སྨོས་ཅི་དགོས༔ ཞེས་སོགས་ཨོ་རྒྱན་གུ་རུ་རིན་པོ་ཆེའི་རྡོ་རྗེའི་གསུང་གིས་ཡང་ཡང་བསྔགས་པ་ལ་དད་ཅིང་ཐེ་ཚོམ་མེད་པའི་ངེས་ཤེས་དང་ལྡན་པས་གནས་ནང་དུ་བྱ་དང་རི་དྭགས་གསོད་པ། རྩི་ཤིང་གཅོད་ཅིང་བྲག་བཤིགས་རྦབ་བསྒྲིལ། རྐུ་འཕྲོག་འཐབ་རྩོད་འཁོན་འཁྲུགས་སོགས་མི་དགེ་བའི་ལས་སྤངས་ནས། ཚོགས་འཁོར། ཆོས་འཁོར། མཆོད་འབུལ། ཚེ་ཐར། ཀླུང་རྟ། དར་ལྕོག ཁ་ཏོན། བཟླས་བརྗོད། ཕྱག་བསྐོར་སོགས་དགེ་བའི་ལས་ཅི་འགྲུབ་བྱས་ན་རེ་རེ་ལའང་འགྱུར་ཁྱད་ཕན་ཡོན་གོང་སྨོས་ལྟར་ཡོད་ངེས་པ་ཡིན་པས་མཆོག་དམན་ཀུན་གྱིས་ཐུགས་ལ་གཅགས་ཏེ་འདི་ཕྱིའི་གཏན་འདུན་དུས་ཐུང་ངུས་འགྲུབ་པ་ལ་བཏང་སྙོམས་སུ་མ་ལུས་པའི་སྤང་བླང་མཛད་པ་ཞུ། ཞེས་དགེ་བསྐུལ་གྱི་ཡི་གེ་ཉི་མ་ཞེས་པ་ཆུ་མོ་ལུག་ལོ་ས་ག་ཟླ་བའི་དཀར་ཕྱོགས་ཀྱི་ཚེས་བཟང་པོར་པདྨ་འོད་གསལ་མདོ་སྔགས་གླིང་པ་དང་། འཆི་མེད་བསྟན་གཉིས་གཡུ་དྲུག་གླིང་པ་ཟུང་གིས་སྤེལ་བ་སརྦ་དཱ་ཀ་ལྱ་ཎཾ་བྷ་བནྟུ། གནས་འདུས་སྒོ་བྱང་གསུམ་པ། གངས་ཅན་འགྲོ་བའི་སྐྱབས་གཅིག་པུ། །སངས་རྒྱས་གཉིས་པ་པདྨ་འབྱུང་། །དབྱིངས་ཡུམ་བདེ་ཆེན་རྒྱལ་མོ་ལ། །ཕྱག་འཚལ་གསོལ་འདེབས་བྱིན་གྱིས་རློབས། །འཛམ་བུའི་གླིང་འདིར་དཔལ་ཧེ་རུ་ཀའི་བྱིན་གྱིས་བརླབས་ཤིང་གདོད་མ་ནས་གྲུབ་པའི་གནས་ཆེན་ཉི་ཤུ་རྩ་བཞི། ཡུལ་མཆོག་སུམ་ཅུ་སོ་གཉིས་རྣམས་སུ་བཞུགས་པའི་ནང་ཚན་བོད་ཡུལ་འདིར་བཅོམ་ལྡན་འཁོར་ལོ་བདེ་མཆོག་གི་དཀྱིལ་འཁོར་དངོས་སུ་བཞུགས་པའི་གནས་ཆེན་གཅིག་ཁོ་ན་ཡོད་པ་ནི་དཔལ་གྱི་ཙཱ་རི་ཏྲ་ཡིན་ལ། དེའི་བཀོད་པ་གཉིས་པ་དེ་བཱི་ཀོ་ཊཱ་ཙཱ་འདྲ་རིན་ཆེན་བྲག་འདི་ཡིན་པའི་ཚུལ་མངའ་བདག་མར་པ་ལོ་ཙཱས། འདི་དང་ཉེ་བ་ན་དཔལ་གྱི་ཙཱ་རི་ཏྲ་ཡོད། དེའི་ཤར་ཕྱོགས་ན་དེ་བཱི་ཀོ་ཊི་ཞེས་བྱ་བ་ཡོད། མ་འོངས་པ་ན་ངའི་བུ་བརྒྱུད་ཀྱིས་འཛིན་པར་འགྱུར་ཅེས་ལུང་བསྟན་པ་བཞིན་སྐྱོབ་པ་འཇིག་རྟེན་གསུམ་གྱི་མགོན་པོའི་ཐུགས་སྲས་དཔལ་ལྡན་བྱང་ཆུབ་གླིང་པས་ཆོས་འཁོར་བཏབ་ཅིང་དར་རྒྱས་ཆེན་པོ་བྱུང་། ཕྱིས་སུ་ཐམས་ཅད་མཁྱེན་པ་སི་ཏུ་ཆོས་ཀྱི་འབྱུང་གནས་ཀྱིས་གདན་ས་མཛད་ཅིང་དཔལ་སྤུངས་དགོན་ཞེས་ཡོངས་དུ་གྲགས་པ་ཆགས་པའི་གནས་ཆེན་འདི་ཉིད་མདོ་ཁམས་གནས་ཆེན་ཉེར་ལྔའི་ནང་ནས་ཡོན་ཏན་ཐུགས་ཀྱི་གནས་ཆེན་འབྲེལ་ཚད་དོན་དང་ལྡན་པ་ཡིན་ཀྱང་སྔར་སྦས་པའི་ཚུལ་དུ་བཞུགས་པ་ལ་དེང་སང་འགྲོ་དོན་དུས་ལ་བབས་ནས་ཐོག་མར་ཀུན་མཁྱེན་བླ་མ་པདྨ་འོད་གསལ་མདོ་སྔགས་གླིང་པ་ལ་ཡེ་ཤེས་མཁའ་འགྲོས་ལུང་བསྟན། དེ་རྗེས་སྤྲུལ་པའི་གཏེར་ཆེན་མཆོག་གྱུར་གླིང་པ་ལ་ཁོ་བོས་སྔ་རྗེས་བསྐུལ་མ་ཞུས་པ་ལྟར་གནས་ཆེན་ཉེར་ལྔའི་མདོ་བྱང་དང་གནས་འདིའི་དཀར་ཆག་དམིགས་བསལ་གཏེར་ནས་སྤྱན་དྲངས། རྗེ་རིན་པོ་ཆེ་འཇམ་དབྱངས་མཁྱེན་བརྩེའི་དབང་པོས་ཡང་བྱང་གཏེར་དུ་བཞེས་པ་རྣམས་ཀྱི་དོན་བཞིན་གནས་ཞལ་ཕྱེས་པ་འདི་ཉིད་ལ་དུས་རྒྱུན་ཕྱག་བསྐོར་སོགས་དགེ་སྒྲུབ་ཅི་བྱས་ཀྱང་འབུམ་ཕྲག་རེའི་འགྱུར་ཁྱད་ཡོད་ཅིང་ཡེ་ཤེས་ཀྱི་དཀྱིལ་འཁོར་རྟག་ཏུ་བཞུགས་པ་ཡིན་ཡང་། ཁྱད་པར་གྱི་དུས་ནི་དཀར་ཆག་གཏེར་གཞུང་ལས། ཁྱད་པར་ལུག་ལོ་སྤྲེལ་ཟླ་བར༔ རིག་འཛིན་ཡི་དམ་མཁའ་འགྲོའི་ཚོགས༔ ཕྱོགས་བཅུའི་གནས་ནས་འདི་རུ་བྱོན༔ ཞེས་གསུངས་པ་ལྟར་ངེས་པས། ཤིང་ལུག་གནམ་ལོ་འདིའི་ཟླ་བ་ལྔ་པ། དྲུག་པ། བདུན་པ་སྟེ་སྤྲེལ་ཟླ་ལུགས་གསུམ་འབྱུང་བའི་སྐབས་སུ་རྩ་གསུམ་རབ་འབྱམས་བཞུགས་པའི་གནས་ཆེན་སྤྱི་དང་། བྱེ་བྲག་དཔལ་གྱི་ཙཱ་རི་ཏྲའི་དཀྱིལ་འཁོར་པ་མངོན་སུམ་དུ་བྱོན་ནས་དཔའ་བོ་དཔའ་མོའི་འདུ་བ་ལ་སྤྱོད་པ་ཡིན་པས་མཐའ་སྐོར་གཅིག་ལ་ཡིག་དྲུག་དང་བཛྲ་གུ་རུ་བཟླ་བ་སོགས་དགེ་རྩ་གང་སྒྲུབ་དུང་ཕྱུར་བདུན། བར་སྐོར་གཅིག་ལ་དུང་ཕྱུར་གསུམ་རྩེ་སྐོར་བདུན་ལ་དུང་ཕྱུར་གསུམ་གྱི་འགྱུར་བ་དང་། མཐའ་སྐོར་གསུམ་ལ་ཙཱ་རི་རོང་ཆེན་བསྐོར་བ་དང་ཁྱད་མེད་ངེས་པ་ཅན་ཡིན། གཞན་ཡང་གཏེར་གཞུང་ལས། མ་འོངས་གནས་མཆོག་འདི་དག་ཏུ༔ གྲུབ་པའི་སྐྱེས་བུ་དུ་མ་འདུ༔ གཙུག་ལག་ཁང་དང་མཆོད་རྟེན་འབྱུང༔ ཞེས་ལུང་བསྟན་པའི་དཔལ་སྤུངས་ཐུབ་བསྟན་ཆོས་འཁོར་གླིང་དུ་ནང་རྟེན་འགྲན་ཟླ་དང་བྲལ་བ་མང་དུ་བཞུགས་པ་དང་། དཀར་ཆག་ས་སྟེང་བྱུང་བ་ན༔ ཧེ་རུ་ཀ་ཡི་སྐུ་གསུང་ཐུགས༔ འོག་མིན་གནས་ནས་འདི་རུ་འཕོ༔ ཞེས་ལུང་བསྟན་པའི་དོན་བཞིན་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་དཔལ་ཧེ་རུ་ཀའི་སྐུ་གསུང་ཐུགས་ཀྱི་རྟེན་གཞན་གང་ལས་ཀྱང་ཁྱད་པར་འཕགས་པ། རྗེ་བཙུན་སྒྲོལ་མ་དངོས་དང་ཁྱད་པར་མེད་པ་སྒྲོལ་སྐུ་གསུང་འབྱོན་མ་སོགས་བཞུགས་པ་དང་། གནས་ཀྱི་གཡས་ཕྱོགས་སུ་བཀྲ་ཤིས་དཔལ་གྱི་བེའུ། གཡོན་ཕྱོགས་སུ་གུ་རུ་རིན་པོ་ཆེའི་སྐུ་རྗེས་གཙོ་བོར་གྱུར་པའི་འབྲེལ་ཚད་དོན་ལྡན་གྱི་རྟེན་དང་བཀའ་རྟགས་རང་བྱོན་མཐའ་ཡས་པ་བཞུགས་པ་འདི་རྣམས་ལ་དགེ་བའི་འབྲེལ་བ་བཞག་པའི་ཕན་ཡོན་ཀྱང་གཏེར་གཞུང་ལས། ཐུན་མོང་ཁྱད་པར་ཐམས་ཅད་དུ༔ དད་ཅིང་མོས་པ་བརྟན་པོ་ཡིས༔ གནས་འདིར་ཕྱིན་པ་ཙམ་གྱིས་ཀྱང༔ ངན་སོང་དུཿཁ་ལས་སྐྱོབ་ཅིང༔ ཕྱི་ནང་གསང་བའི་ཚོགས་འཁོར་གྱིས༔ བསོད་ནམས་ཡེ་ཤེས་ཚོགས་ཆེན་རྫོགས༔ ཕྱག་དང་བསྐོར་བ་སུས་བྱེད་པ༔ ལས་ངན་སྡིག་སྒྲིབ་ཐམས་ཅད་འདག༔ གཞན་དུ་ལོ་གཅིག་སྒྲུབ་པ་བས༔ འདི་རུ་ཐུན་གཅིག་བསྒོམས་པས་ཟབ༔ རྩེ་གཅིག་སྒྲུབ་པ་སུས་བྱེད་པ༔ མཆོག་ཐུན་དངོས་གྲུབ་དེ་ཡིས་ཐོབ༔ གནས་འདིར་མཆོད་པ་སུས་བྱེད་པ༔ ཚེ་དང་བསོད་ནམས་ཐམས་ཅད་རྒྱས༔ ཞེས་དང་། ཡང་བྱང་ལས། དཔལ་དེའུ་ལ་དམིགས་བསལ་དུ༔ མཐོང་བས་མཚམས་མེད་སྒྲིབ་དག་ན༔ འབྲེལ་བ་ཐོབ་པ་སྨོས་ཅི་དགོས༔ ལན་གཅིག་ཚོགས་གཏོར་བགྱིས་པས་ཀྱང༔ སྒྲིབ་དག་གེགས་ཞི་བསོད་ནམས་འཕེལ༔ གནས་མཐིལ་མཁའ་འགྲོའི་དོ་ར་ན༔ ཌཱ་ཀི་ཀུན་ཏུ་དགྱེས་པ་ཡི༔ ཕྱི་ནང་གསང་བའི་ལོངས་སྤྱོད་པས༔ རྩ་རླུང་ཐིག་ལེའི་འཕོ་བ་གྲོལ༔ ཞེས་སོགས་དང་། སྐུ་རྗེས་ལ། དེ་མཐོང་རེག་དང་དྲན་པས་ཀྱང༔ དད་དང་དམ་ཚིག་མཆོག་ལྡན་པས༔ སྐྱེ་བ་བདུན་ནས་མི་ལྡོག་པར༔ རྡོ་རྗེ་ཡེ་ཤེས་འགྲུབ་འགྱུར་ན༔ དད་པས་བསྙེན་པ་སྨོས་ཅི་འཚལ༔ ཞེས་གསུངས་ཤིང་། གཞན་ཡང་ཕྱག་བསྐོར་མཆོད་འབུལ་མཎྜལ་ཚོགས་འཁོར་ཀླུང་རྟ་སོགས་ཕུལ་བའི་ཕན་ཡོན་མདོ་བྱང་ཆེན་མོ་ལས་རྒྱས་པར་གསུངས་པ་ལྟར་ལགས་པ་དང་། གནས་འདིའི་རྩ་ཤིང་གཅོད་ཅིང་བྲག་སྒྱེལ་བ། རི་འདིར་གནས་པའི་སྲོག་ཆགས་གསོད་པ་དང་། མནའ་སྐྱེལ་ཞིང་ཀུ་ཅོ་སྒྲོག་པ་སོགས་མི་དགེ་བའི་ལས་བྱས་ན་ཚེ་འདིར་བཀའ་ཆད་ཆེན་པོ་འབྱུང་། སྡིག་པ་བྱས་པའང་དགེ་བ་ལྟར་འགྱུར་སྟོབས་ཆེ་བས་དམྱལ་བར་འགྲོ་བ་ལ་ཐེ་ཚོམ་མེད་པས་མི་ལུས་ཐོབ་ཅིང་བློ་དང་ལྡན་པ་རྣམས་ཀྱིས། ཨོ་རྒྱན་སངས་རྒྱས་གཉིས་པའི་བསླུ་མེད་རྡོ་རྗེའི་གསུང་ལ་ཡིད་ཆེས་དང་དད་མོས་ཀྱིས་ཀུན་ནས་བསླངས་ཏེ་བཏང་སྙོམས་མེད་པའི་བརྩོན་འགྲུས་དྲག་པོས་གནས་རྟེན་རྣམས་ལ་བཟང་འབྲེལ་བཞག་ན་འདི་ཕྱིའི་དགེ་ལེགས་ཀྱི་དཔལ་ཡོན་ཡར་ཟླ་བཞིན་དུ་རྒྱས་པར་འགྱུར་རོ།།

མཆན། ཐུགས་ཀྱི་གནས་མཆོག་ཆེན་པོ་དེ་བཱི་ཀོཊཱི་ཙཱ་འདྲའི་གནས་འདུས་སྒོ་བྱང་ཞེས་པ་འདི་འཇམ་མགོན་ཀོང་སྤྲུལ་ཡོན་ཏན་རྒྱ་མཚོའི་བཀའ་འབུམ་ཇ་པོད་ལས་བཤུས་ཤིང་། པར་ཤིང་དེང་སང་དཔལ་སྤུངས་དགོན་པའི་པར་ཁང་དུ་བཞུགས་སོ། །

༄༅། །རྩ་གསུམ་ཡོངས་འདུས་ལྷ་ལ་འདུད༔ ཇི་སྙེད་བརྗོད་པ་ཐམས་ཅད་ཀྱི༔ སྙིང་པོ་མི་ཤིགས་ནཱ་དའི་རྒྱུད༔ བཀྲ་ཤིས་རྟག་པ་དམ་པའི་ཆོས༔ ཡེ་ཤེས་གསལ་བའི་ཚུལ་འཆང་བ༔ ཡུལ་དང་དུས་དང་རྣམ་པ་ཀུན༔ རིས་སུ་མེད་པར་འཆར་བ་ལས༔ ཤིན་ཏུ་རྣམ་དག་འདུས་མ་བྱས༔ ཤྲཱི་ཧེ་རུ་ཀ་དཔལ་ཆེ༔ ཀུན་ནས་ཀུན་ཏུ་མི་ཕྱེད་པའི༔ དང་པོ་ས་དང་གཉིས་པ་ཆུ༔ གསུམ་པ་མེ་དང་བཞི་པ་རླུང༔ ལྔ་པ་ནམ་མཁའི་བྷ་ག་ནི༔ རིས་མེད་ཡོངས་སུ་ཁྱབ་པ་ན༔ དེ་བཞིན་གཤེགས་པ་ཐམས་ཅད་ཀྱི༔ རྡོ་རྗེ་གསང་མཆོག་ཝཾ་ཡིག་གིས༔ རེག་དང་བཅུག་དང་བསྲུབས་པ་ལས༔ ཡེ་ཤེས་རྣམ་པ་རྨད་བྱུང་བ༔ དགའ་བ་དང་ནི་མཆོག་དགའ་དང༔ ཁྱད་པར་དགའ་དང་ལྷན་ཅིག་སྐྱེས༔ རྡོ་རྗེ་སེམས་དཔའ་ཐིག་ལེ་ཆེ༔ བཙུན་མོའི་མཁའ་རུ་འཁྱིལ་བ་ལས༔ འགྲོ་དོན་སྲས་ཀྱི་རྣམ་པར་སྤྲུལ༔ ལ་ལར་བརྟན་པ་བེམ་པོའི་དབྱིབས༔ རེས་འགའ་གཡོ་བ་སྲོག་གི་ཚུལ༔ གཅིག་པུ་མ་ཡིན་དུ་མ་མིན༔ མཐའ་དང་དབུས་མེད་དེ་བཞིན་གཤེགས༔ རྡོ་རྗེ་དང་ནི་རིན་པོ་ཆེ༔ པདྨ་ལས་དང་རྣམ་པར་སྣང༔ རིགས་དང་རིགས་ཅན་བསམ་མི་ཁྱབ༔ ཀུན་ཀྱང་དང་པོའི་མགོན་པོ་ཡི༔ སྙིང་རྗེའི་རྒྱུ་ལས་སེམས་དཔའི་ཚུལ༔ གཟུང་དུ་མེད་ཅིང་བརྗོད་དུ་མེད༔ བསམ་དུ་མེད་ཅིང་འདུས་མ་བྱས༔ ནམ་མཁའ་དང་མཉམ་ཁྱབ་ཅིང་རྟག༔ འཕེལ་དང་འགྲིབ་པ་མེད་པའོ༔ ས་མ་ཡ༔ དེ་ལས་རང་བྱུང་ཡེ་ཤེས་ནི༔ སྟོང་པ་ཉིད་དང་མཚན་མ་མེད༔ སྨོན་པ་མེད་དང་འོད་གསལ་བ༔ རྣམ་པར་ཐར་པའི་སྒོ་བཞི་ནི༔ ཀུན་འདུས་ཀུན་ལས་ཁྱད་འཕགས་པ༔ ཡོངས་གྲུབ་ཐུགས་ཀྱི་ཐིག་ལེ་ནི༔ བེམ་པོའི་གཟུགས་སུ་སྣང་བ་ལས༔ ལྷ་མོ་དཔའ་བོ་ཐམས་ཅད་ཀུན༔ དགྱེས་པར་རོལ་པའི་མཁར་ཆེན་པོ༔ དཔལ་ཆེན་རྡོ་རྗེ་ཁྲག་འཐུང་ཆེ༔ ཐ་མལ་མིག་གི་སྤྱོད་ཡུལ་ནི༔ ཁྱད་པར་འཇུག་པའི་སྲོག་གི་གཞི༔ རྡོ་རྗེའི་བྲག་དང་ལྗོན་པའི་ཤིང༔ རི་བོའི་སུལ་དང་འབབ་པའི་ཆུ༔ རང་བྱུང་རྣམ་པ་ཐམས་ཅད་པ༔ གདོད་མའི་མགོན་པོ་ཀུན་ཏུ་བཟང༔ པདྨ་འབྱུང་གནས་བདག་ཉིད་ཀྱིས༔ གཞན་དང་གཞན་དུ་མདོ་བྱང་དང༔ ཅུང་ཟད་རྒྱས་པར་གཏན་ཕབ་པ༔ དེ་ཉིད་ལྟར་དུ་རིག་པར་བྱ༔ ས་མ་ཡ༔ དེ་ལས་ཐུན་མོང་མ་ཡིན་པ༔ བཀྲ་ཤིས་དཔལ་གྱི་དེའུ་ནི༔ དབང་ཕྱོགས་ས་འཛིན་ཁྱད་པར་ཅན༔ རང་བྱུང་ལྷུན་སྟུག་རི་བོའི་རྩེ༔ ཀུན་གྱིས་མངོན་ཀྱང་སྦས་པ་ལྟར༔ དེ་ཡི་ཙིཏྟའི་རྩེ་མོ་ན༔ བཀྲ་ཤིས་ཟླ་གམ་ཤར་དུ་བལྟ༔ ཨོ་རྒྱན་ཆེན་པོ་བདག་ཉིད་ཀྱི༔ རྡོ་རྗེའི་སྐུ་དང་མི་འགྱུར་གསུང༔ འཁྲུལ་མེད་ཐུགས་ཀྱི་མཚན་མ་ཅན༔ རང་རྩལ་ཡེ་ཤེས་མཁའ་ལ་འཕྲོ༔ མཐོང་བས་མཚམས་མེད་སྒྲིབ་དག་ན༔ འབྲེལ་བ་ཐོབ་པ་སྨོས་ཅི་དགོས༔ ལན་གཅིག་ཚོགས་གཏོར་བགྱིས་པས་ཀྱང༔ སྒྲིབ་དག་གེགས་ཞི་བསོད་ནམས་འཕེལ༔ གནས་མཐིལ་མཁའ་འགྲོའི་དོ་ར་ན༔ ཌཱ་ཀི་ཀུན་ཏུ་དགྱེས་པ་ཡི༔ ཕྱི་ནང་གསང་བའི་ལོངས་སྤྱོད་པས༔ རྩ་རླུང་ཐིག་ལེའི་འཕོ་བ་གྲོལ༔ བདུད་རྩིའི་རྒྱུན་དང་སྨན་གྱི་ཆུ༔ ཐབས་དང་ཤེས་རབ་ཀུན་ཏུ་རུ༔ ནད་སེལ་གདོན་ཞི་ཡེ་ཤེས་འཕེལ༔ སྤྱི་དང་བྱེ་བྲག་འོད་གསལ་བའི༔ སྙིང་པོའི་སྒྲུབ་པའི་སྲོག་བཟུང་ན༔ ངེས་དོན་བསྟན་ལ་དགེ་བར་འགྱུར༔ ཁྱད་པར་འབྱོར་བ་མཆོག་ཏུ་འཕེལ༔ ས་མ་ཡ༔ དབུས་ཀྱི་རི་བོ་མ་ལ་ཡ༔ འབྲས་དཀར་སྤུངས་པ་ལྟ་བུའི་དབྱིབས༔ སངས་རྒྱས་རྣམས་ནི་ཐམས་ཅད་ཀྱི༔ སྙིང་རྗེ་ཆེན་པོའི་ཡེ་ཤེས་སྐུ༔ འཇིག་རྟེན་དབང་ཕྱུག་འོད་གསལ་བ༔ འཕགས་མ་སྒྲོལ་མ་ཡུམ་དང་བཅས༔ གང་འདུལ་རྣམ་པ་ཐམས་ཅད་པ༔ ཅིར་ཡང་འཆར་ཞིང་འབྱུང་བའི་ཚུལ༔ སྙན་པ་སྒྲོག་པའི་ཆོས་དུང་དཀར༔ འགྱུར་མེད་ཚེ་ཡི་བུམ་པ་བཟང༔ མི་ཤིགས་དཔལ་བེའུ་འོད་འབར་བ༔ ཆོས་ཀྱི་འཁོར་ལོའི་རྩིབས་སྟོང་བཀྲ༔ མཚམས་སུ་བཀྲ་ཤིས་གཞན་གྱི་གཟུགས༔ ངོ་མཚར་མཚན་མ་བཅས་ཏེ་བཞུགས༔ དེ་ལྟ་བུ་ཡི་གནས་མཆོག་ཏུ༔ འཕགས་པའི་སྐུ་བརྙན་མཐོང་གྲོལ་དང༔ བཀའ་རྟགས་ཡི་གེ་རང་བྱུང་ཟུང༔ གཙོ་བོར་གྱུར་པའི་ཟབ་མོའི་གཏེར༔ ལྷ་ཆེན་རྡོ་རྗེ་འབར་བ་ཡི༔ སྲས་ཀྱི་ཐུ་བོ་ནོར་བུ་བཟང༔ གཡུང་དྲུང་ཐིག་ལེ་རྩལ་ལ་གཏད༔ མ་འོངས་པདྨས་བྱིན་བརླབས་པའི༔ སྔགས་སྤྱོད་ལྷ་དང་རྗེའི་རིགས༔ ཟུང་གིས་མངོན་དུ་འབྱིན་པ་འོང༔ འོན་ཏེ་གཉུག་མར་བཞག་གྱུར་ཀྱང༔ བསྟན་པའི་བཙས་མཆོག་བླ་ན་མེད༔ ས་མ་ཡ༔ ཤར་ནས་སྲིབ་ཀྱི་རི་སུལ་ནི༔ བཅུ་གསུམ་གྲངས་ལྡན་གདགས་ཀྱི་ཕྱོགས༔ ཆུ་མིག་དབང་གི་ཙཎྜི་ཀ༔ དགྱེས་པར་རོལ་པའི་མགོ་བོ་རུ༔ དུས་གསུམ་ཀུན་མཁྱེན་བདག་ཉིད་ཀྱི༔ རྡོ་རྗེ་སྐུ་ཡི་མཚན་མ་ནི༔ རང་བྱུང་བྲག་རིའི་བ་གམ་ན༔ སྐལ་ལྡན་སྤྱོད་ཡུལ་མངོན་སུམ་བཞུགས༔ དེ་མཐོང་རེག་དང་དྲན་པས་ཀྱང༔ དད་དང་དམ་ཚིག་མཆོག་ལྡན་པས༔ སྐྱེ་བ་བདུན་ནས་མི་ལྡོག་པར༔ རྡོ་རྗེ་ཡེ་ཤེས་འགྲུབ་འགྱུར་ན༔ དད་པས་བསྙེན་པ་སྨོས་ཅི་འཚལ༔ ས་མ་ཡ༔ དེ་ནས་གཞན་ཡང་བཤད་བྱ་བ༔ དཔལ་ལྡན་ཁྲག་འཐུང་དགྱེས་པ་ཆེ༔ འཁོར་ལོ་དྲ་བར་སྡོམ་པ་ཡི༔ ཀུན་བཟང་པདྨ་སམྦྷ་བའི༔ འོག་མིན་གནས་ནི་ཉམས་དགའ་བར༔ གསང་བ་མཆོག་གི་དགྱེས་པ་ཆེར༔ སྙོམས་པར་ཞུགས་པའི་ཆོ་འཕྲུལ་ལས༔ འཛམ་གླིང་བྱེ་བ་ཕྲག་བརྒྱ་རུ༔ གནས་དང་ཉེ་བའི་གནས་མཆོག་དང༔ རྡོ་རྗེའི་ཡུལ་དང་ཉེ་བའི་ཡུལ༔ བདེ་ཆེན་ཞིང་དང་ཉེ་བའི་ཞིང༔ མཁའ་འགྲོ་འདུ་དང་ཉེ་འདུ་བ༔ རྔམས་བརྗིད་ཚནྡོ་ཉེ་ཚནྡོ༔ རབ་སོང་ཉེ་བའི་རབ་སོང་སྟེ༔ རྡོ་རྗེའི་སྐུ་དང་གསུང་དང་ཐུགས༔ ཉི་ཤུ་རྩ་བཞི་སོ་གཉིས་སོགས༔ ཕྱི་ལྟར་རི་བྲག་བེམ་པོའི་གཟུགས༔ ནང་ལྟར་རྡོ་རྗེའི་རྩ་ཐིག་རླུང༔ གཞན་དུ་ས་བཅུ་ལམ་མཆོག་ལྔ༔ བློ་དང་དབང་པོའི་ཁྱད་པར་བཞིན༔ མིག་འཕྲུལ་ལྟ་བུར་འཆར་བ་ལས༔ གཙོ་བོ་དང་ནི་དེ་འཁོར་དང༔ རྣམ་པར་སྤྲུལ་པའི་ཡན་ལག་གཞན༔ རེ་རེ་ལ་ཡང་འདི་ལྟ་སྟེ༔ རྟེན་ནི་མི་འགྱུར་རི་བོའི་སྤོ༔ རྡོ་རྗེའི་བྲག་སྐྱིབས་འཁྱིལ་བའི་ཆུ༔ ཡིན་བཞིན་རྗེས་མཐུན་ལྗོན་བཟང་དང༔ ལྕུག་ཕྲན་དང་ནི་ཚང་ཚིང་ནགས༔ དེ་དག་རྣམས་ལ་རྟེན་བཅས་པའི༔ མི་སྣང་དཔའ་བོ་རྣལ་འབྱོར་མ༔ འཇའ་སྐུ་ཤིགས་སེར་བཞུགས་པ་དག༔ སྙོམས་འཇུག་བདེ་བའི་གཟི་འབར་ཞིང༔ ཨ་ཧཾ་ནཱ་ད་སྔགས་ཀྱི་སྒྲ༔ རང་བྱུང་ཡེ་ཤེས་རྩོལ་མེད་པ༔ བཅུ་དྲུག་ཕྱེད་ཕྱེད་ཐིག་ལེའི་སྲོག༔ རྣམ་པ་ཐམས་ཅད་མཆོག་ལྡན་པའི༔ སྣང་བ་ཉིད་ཀྱང་དེ་ལྟ་བུ༔ ལས་དང་སྐལ་བ་ཉིད་ལྡན་པ༔ ལྟར་སྣང་ཇི་ལྟར་སྤྱོད་ཀྱང་རུང༔ དོན་དུ་ཧེ་རུ་ཀ་ཆེན་པོ༔ སྟངས་དཔྱལ་འཁོར་དང་བཅས་པ་ཡི༔ གདུང་འཛིན་རྒྱུན་མི་འཆད་པ་འབྱུང༔ ས་མ་ཡ༔ ཁྱད་པར་སྤྱི་དང་བྱེ་བྲག་གི༔ རྡོ་རྗེའི་གནས་མཆོག་དེ་རྣམས་སུ༔ འདུ་འཛིའི་གཡེང་བ་རིང་སྤངས་པས༔ རྩེ་གཅིག་ཏིང་འཛིན་སྒོམ་གྱུར་ན༔ ཧེ་རུ་ཀ་དང་སྤྱོད་ཡུལ་མཉམ༔ འདི་དང་འཆི་ཁ་བར་མ་དོ༔ སྐྱེ་བ་བདུན་དང་བཅུ་དྲུག་ཚུན༔ དབང་པོ་སྐལ་བའི་ཁྱད་པར་བཞིན༔ འཇའ་ལུས་རྡོ་རྗེའི་གོ་འཕང་ཐོབ༔ བཤད་ན་ལུང་གི་བསྟན་པ་ནི༔ རྒྱ་མཚོའི་རླབས་བཞིན་གྲངས་མེད་འཕེལ༔ ཚོམ་བུ་ཚོགས་སུ་བསྒྲུབས་པ་ན༔ སྙིང་པོའི་བཙས་སུ་ངེས་པར་འགྱུར༔ ཕྱག་འཚལ་ལན་ཅིག་བགྱིས་པ་དང༔ ལན་ཅིག་བསྐོར་བས་ལུས་སྒྲིབ་དག༔ ཆེ་བའི་ཡོན་ཏན་བརྗོད་པའི་གླུས༔ ངག་གི་སྒྲིབ་པ་ཐམས་ཅད་བྱང༔ དད་དང་ངེས་ཤེས་ཆེ་ལྡན་ན༔ མཆོག་དངོས་གྲུབ་པ་སྨོས་ཅི་དགོས༔ དེ་ཕྱིར་ཕྱི་རབས་ལས་ལྡན་དང༔ སྣོད་དང་སྐལ་པར་ལྡན་པའི་ཆེད༔ རྡོ་རྗེའི་ཡེ་གེའི་གཟུགས་སུ་བྲིས༔ མི་འགྱུར་བྲག་གི་སྙིང་པོར་གཏམས༔ སྐལ་ལྡན་སྐྱེས་བུ་གློག་ལྟར་འཁྱུག༔ འཕགས་པའི་གར་མཁན་འཇའ་ལྟར་ཤར༔ རྩོལ་བ་མེད་པའི་རྫུ་འཕྲུལ་གྱི༔ སྣང་བརྙན་མངོན་དུ་སྟོན་པའི་ཚེ༔ ལྷ་ཀླུ་དགྱེས་པས་མེ་ཏོག་ཆར༔ སིལ་མར་འཐོར་དང་ཆབས་ཅིག་པར༔ རང་བྱུང་ཡི་གེ་འདིར་སྣང་བས༔ བསྟན་པ་དང་ནི་འགྲོ་བ་དང༔ སྣོད་བཅུད་ཀུན་ལ་བདེ་ལེགས་འགྱུར༔ ས་མ་ཡ༔ རྒྱ་རྒྱ་རྒྱ༔ ཞེས་ཡོན་ཏན་ཐུགས་ཀྱི་གནས་མཆོག་དེ་ཝཱི་ཀོ་ཊི་ཙཱ་འདྲ་རིན་ཆེན་བྲག་གི་ཡང་བྱང་གནས་ཡིག་གསུམ་པ་འདིའང་གྲུབ་ཐོབ་གཏེར་སྟོན་ཐམས་ཅད་ཀྱི་འཁོར་ལོས་བསྒྱུར་བ་འཇིགས་བྲལ་གྱི་རྡོ་རྗེ་སློབ་དཔོན་ཆེན་པོ་པདྨ་འོད་གསལ་མདོ་སྔགས་གླིང་པས། ཁོ་བོ་ཅག་སོགས་སྐལ་ལྡན་འདུས་པ་རྣམས་ཀྱི་དབུས་སུ་རབ་ཚེས་ཐོག་མའི་སྨིན་ཟླའི་དཀར་ཕྱོགས་ཀྱི་རྒྱལ་བ་གསུམ་པར་འཇའ་འོད་ཀྱི་གུར་ཁྱིམ་མེ་ཏོག་གི་ཆར་དང་བཅས་ཏེ། ཨ་ཏ་རོང་གསང་མཆོག་ཞི་ཁྲོ་ཤེལ་ཕུག་ནས་སྤྱན་དྲངས་པའི་རིན་པོ་ཆེའི་ཤོག་སེར་ལས། ཙཱ་འདྲ་རིན་ཆེན་བྲག་གི་སྒྲུབ་གནས་ཀུན་བཟང་བདེ་ཆེན་འོད་གསལ་གླིང་དུ་གཏན་ལ་ཕབ་སྟེ། བདག་འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་བསྐལ་པ་བཟང་པོའི་བགོ་སྐལ་དུ་བསྩལ་པ་དགེ་ལེགས་འཕེལ།

མཆན། གནས་ཡིག་འདི་ནི་མཆོག་འགྱུར་གླིང་པའི་བཀའ་འབུམ་ཨ་པོད་ལས་ཞལ་བཤུས་པའོ། །

༄༅། །ན་མོ་གུ་རུ་པདྨ་ཀ་རཱ་ཡ།བདེ་ཆེན་སྦྲང་རྩིས་སྒེག་པའི་ཐུགས་ཀྱི་པདྨོ་ནི། །བུམ་སྐུའི་རང་བཞིན་བརྟན་པའི་སྣང་ཆར་འཕོས་པ་ལས། །གསང་བའི་ཙིཏྟར་འཁྲུལ་སྣང་དྲ་བ་སྡོམ་མཛད་པ། །བསམ་གྱིས་མི་ཁྱབ་གསང་བའི་གནས་ལ་བདག་དད་དོ། །སྲིད་མཐའ་ཐུགས་རྗེས་བཟུང་བའི་པད་དཀར་འཆང་། །འགྲོ་འདུལ་འཕྲུལ་དགུའི་གར་མཛད་ཐོད་ཕྲེང་རྩལ། །ཀརྨ་ཀ་དང་ཏཱ་ཡི་སི་ཏུ་ཞེས། །མཚུངས་བྲལ་བླ་མའི་སྐུ་རུ་ཤར་ལ་འདུད། །མ་བྱུང་མི་འབྱུང་འབྱུང་བར་མི་འགྱུར་བའི། །པདྨའི་གཅེས་མཛོད་རང་དབང་སྤྱོད་པ་ལ། །མཆོག་གྱུར་བདེ་ཆེན་གླིང་ཞེས་གྲུབ་པའི་གཙོ། །བཀའ་དྲིན་སྣང་བས་འཇིག་རྟེན་ཁྱབ་དེ་རྒྱལ། །གནས་དང་ཡུལ་གྱི་དཔའ་བོ་རྣལ་འབྱོར་མ། །ཀུན་བདག་དབྱིངས་ཀྱི་དབང་ཕྱུག་ཝཱ་ར་ཧཱི། །དམ་ཅན་གཏེར་བདག་གནས་སྲུང་ཚོགས་རྣམས་ཀྱིས། །དགྱེས་པས་དགོངས་ཏེ་གནང་བའི་སྐབས་སྩོལ་ཅིག །གཞན་མཆོག་ཧེ་རུ་ཀ་དཔལ་གྲོང་ཁྱེར་ཏེ། །ནང་དུ་རྩ་ཐིག་རླུང་གི་རང་མདངས་ལས། །ཕྱི་རོལ་ཉེ་བའི་གནས་སུ་ཤར་བ་ཡི། །ངོ་མཚར་རྟོགས་པ་ཆ་ཙམ་བརྗོད་པར་སྤྲོ། །འདིར་གྲུབ་པའི་གནས་མཆོག་ཆེན་པོ་ཙཱ་འདྲ་རིན་ཆེན་བྲག་གི་རྟོགས་པར་བརྗོད་པ་ལ་དོན་ཚན་བཀྲ་ཤིས་པའི་རྟགས་ཀྱི་གྲངས་དང་ལྡན་པ་སྟེ། གནས་ཀྱི་འབྱུང་ཁུངས་སྤྱིར་སྨོས་པ། རྣམ་པར་དབྱེ་བ་ཐ་དད་དུ་བསྟན་པ། གནས་སུ་གྲུབ་པའི་འཐད་པ་བརྗོད་པ། བྱེ་བྲག་གནས་ཆེན་དམིགས་སུ་བཤད་པ། སླར་ཡང་བྱིན་གྱིས་རླབས་ཚུལ་དང་། གནས་ཀྱི་སྒོ་ཇི་ལྟར་ཕྱེས་པ། གནས་ཀྱི་བཞུགས་ཚུལ་དཀར་ཆག གནས་ལ་བསྐོར་བ་བྱེད་ཚུལ། དེ་བྱུང་ཕན་ཡོན་གྱི་རྣམ་གྲངས་སྨོས་པའོ། །

དང་པོ། གནས་ཀྱི་འབྱུང་ཁུངས་ལ་གཉིས། སྐུ་གསུམ་ཞིང་སྣང་སྤྱིར་སྨོས་པ། གནས་ཀྱི་འབྱུང་ཁུངས་དངོས་འཆད་པའོ། །

དང་པོ་ནི། སྤྱིར་དབྱིངས་དག་པ་ཆོས་སྐུའི་ཞིང་ནི་བརྟན་གཡོ་འཁོར་འདས་ཀུན་ལ་ཁྱབ་པའི་གནས་ལུགས་དེ་བཞིན་ཉིད་ཀྱི་དབྱིངས། རྒྱ་དང་ཚད་ཡོངས་སུ་མ་ཆད་པ་ཆོས་ཅན་སྣ་ཚོགས་སུ་སྣང་ཡང་ཆོས་ཉིད་འགྱུར་བ་མེད་པར་གདོད་ནས་ཡོངས་གྲུབ་ཐིག་ལེ་ཆེན་པོར་འོད་དུ་གསལ་བ་དང་། ནང་རང་སྣང་ལོངས་སྐུའི་ཞིང་རྡུལ་གཅིག་གི་སྟེང་དུ་རྡུལ་ཕྲན་སྙེད་ཀྱི་ཞིང་དང་སྐུ་རབ་འབྱམས་རྒྱ་མཚོར་སྣང་ཞིང་། གཞི་གཅིག་ལའང་ལྷ་སྔགས་དཀྱིལ་འཁོར་གྱི་འཁོར་ལོ་རྣམ་པ་ཐམས་ཅད་པར་འཆར་བ་དག་པ་རབ་འབྱམས་ལོངས་སྤྱོད་ཡོངས་སུ་རྫོགས་པར་ལྷུན་གྱིས་གྲུབ་པ་དང་། ཕྱི་ཡུལ་སྣང་སྤྲུལ་སྐུའི་ཞིང་ཁམས་སྐལ་བ་མཆོག་ལ་དག་པའི་ཞིང་སྐལ་པ་འབྲིང་ལ་དག་པའི་གནས། སྐལ་བ་ཐ་མ་ལ་ས་རྡོ་རི་བྲག་བེམ་པོ་མ་དག་པའི་ཚུལ་ཅན་ཀུན་གྱི་སྤྱོད་ཡུལ་དུ་གྱུར་པས་ཀྱང་འགྲོ་ལ་ཕན་འདོགས་བྱེད་སངས་རྒྱས་ཀྱི་མཛད་པའི་རོལ་མོར་གཤིས་སམ་བབ་ཀྱིས་གྲུབ་པ་དག་ཆོས་ཉིད་བདེན་པའི་བྱིན་རླབས་དང་། དེ་བཞིན་གཤེགས་པའི་ཐུགས་རྗེ་ལས་རང་བྱུང་བ། ངོ་མཚར་རྨད་དུ་བྱུང་བ་ཉིད་དོ། ། གཉིས་པ་ལ་གཉིས། གདོད་ནས་གྲུབ་པ་དང་རྗེས་སུ་བྱུང་བའོ། །དང་པོ་ནི། སྔ་འགྱུར་དགོངས་པ་འདུས་པའི་མདོ་ཆེན་པོ་སོགས་ཀྱི་ལུང་དོན་ལྟར་ན། འདས་པའི་དུས་བླ་མ་དང་ལྟ་སྤྱོད་ལ་ལོག་པར་བཟུང་བའི་རུ་དྲ་ཐར་པ་ནག་པོའི་ཆུང་མ་སྡེ་དང་བཅས་པས་འཇིག་རྟེན་ཐམས་ཅད་བདག་ཏུ་བཟུང་ཞིང་ལོག་པར་སྤྱོད་པས་འགྲོ་བ་རྣམས་ཕུང་བར་གྱུར་པ་ན། སངས་རྒྱས་ཐམས་ཅད་ཀྱི་ཐུགས་རྗེ་གཅིག་ཏུ་བསྡུས་པའི་ཁྲག་འཐུང་ཧེ་རུ་ཀས་དྲག་ཤུལ་འབར་བ་ཆེན་པོའི་གར་གྱི་རོལ་པས་རུ་དྲ་ཕོ་བསྒྲལ་བའི་ལུས་ཀྱི་དུམ་བུ་འཛམ་བུ་གླིང་དུ་གཏོར་བས་གདོད་ནས་རང་བཞིན་གྲུབ་པ་དག་གི་སྣང་ཆ་འཕོས་པ་དུར་ཁྲོད་ཆེན་པོ་བརྒྱད། གནས་དང་ཡུལ་ལ་སོགས་པ་གསང་སྔགས་ཀྱི་ཕོ་བྲང་དུ་ཆགས། མོ་རྣམས་སྦྱོར་བའི་ཡུམ་དུ་མཛད་ཅིང་གནས་དང་དུར་ཁྲོད་རྣམས་ཀྱི་སྲུང་མ་ཆེན་མོར་བསྐོས། རུ་དྲའི་རྣམ་ཤེས་དཔལ་མ་ཧཱ་ཀཱ་ལར་གྱུར་པས་གནས་ཡུལ་དུར་ཁྲོད་དེ་དག་རྣམས་སུ་དངོས་དང་སྤྲུལ་པའི་ཚུལ་གྱིས་ཁྱབ་པར་བཞུགས་ཤིང་སངས་རྒྱས་ཀྱི་བསྟན་པ་སྲུང་། ཁུ་ཁྲག་སོགས་ལས་དཔག་བསམ་སྦྲུལ་གྱི་སྙིང་པོ་ར་ས་ཡ་ན་རྩ་བ་བརྒྱད་ཀྱི་རང་བཞིན་དུ་འཁྲུངས་ཤིང་། ཟག་པ་ཁ་འཐོར་བ་ལས་ཡན་ལག་སྟོང་གི་རྩི་སྨན་བདུད་རྩིའི་རང་བཞིན་དམ་ཚིག་གི་རྫས་ཆེན་པོར་ལྷུན་གྱིས་གྲུབ་པར་བྱིན་གྱིས་བརླབས་པའོ། །ཕྱི་འགྱུར་གསང་མཐའི་རྩེ་མོ་མཁའ་འགྲོ་དྲ་བ་སྡོམ་པའི་ལུང་དོན་ལྟར་ན། སྒྲོན་མེའི་བསྐལ་པ་འདི་ཐོག་མར་ཆགས་པའི་རྗེས་སུ་དྲག་པོ་འཇིགས་བྱེད་དུས་མཚན་དང་བཅས་པས་སྲིད་པ་གསུམ་ལ་དབང་བྱེད་ཅིང་ལོག་པའི་ལམ་ལ་ཞུགས། འཁོར་གྱི་དྲེགས་པ་ལྷ་དང་དྲི་ཟས་ནམ་མཁའ། གནོད་སྦྱིན་དང་སྲིན་པོས་ས་སྟེང་། ཀླུ་དང་ལྷ་མིན་གྱིས་ས་འོག མ་མོ་ཕྲ་མེན་ལ་སོགས་པ་རྣམས་ཀྱིས་གནས་ཡུལ་དུར་ཁྲོད་ཀུན་བདག་གིར་བཟུང་སྟེ་འཇིག་རྟེན་གྱི་ཁམས་མ་རུངས་པར་གྱུར་པ་དེའི་ཚེ། གདུག་པ་ཅན་རྣམས་འདུལ་བའི་ཕྱིར་བཅོམ་ལྡན་འདས་རྡོ་རྗེ་འཆང་ཆེན་པོ་ཉིད་ཧེ་རུ་ཀ་ཡི་སྐུར་བཞེངས་ནས་རི་རབ་ཀྱི་རྩེ་མོར་དཀྱིལ་འཁོར་ཆེན་པོ་རྣམ་པར་སྤྲུལ་ཏེ། འཇིགས་བྱེད་དྲག་པོ་སྡེ་དཔུང་དང་བཅས་པ་རྣམས་བདག་པོའི་ཚུལ་གྱིས་དབང་དུ་བྱེད་པ་དང་། ལོངས་སྤྱོད་པ་དང་། ཐིམ་པའི་ཚུལ་གྱིས་བཏུལ་ཅིང་བདེ་མཆོག་རྩ་བའི་རྒྱུད་ལ་སོགས་པ་རྒྱུད་སྡེ་རབ་འབྱམས་ལས་གསུངས། དྲེགས་པ་དེ་དག་གིས་བཟུང་བའི་མཁའ་སྤྱོད། ས་སྤྱོད། ས་འོག་སྤྱོད་པའི་གནས་ཡུལ་དུར་ཁྲོད་མཐའ་དག་འཁོར་ལོ་གསུམ་གྱི་བདག་ཉིད་དུ་བྱིན་གྱིས་བརླབས་པར་མཛད་པ་ལས་དཔའ་བོ་དང་རྣལ་འབྱོར་མ་རྣམས་ཀྱིས་སྤྱོད་ཡུལ་དང་རང་བཞིན་དུ་གྱུར་པའི་གནས་དང་གནས་ཕྲན་བསམ་གྱིས་མི་ཁྱབ་པར་བྱུང་བར་གྱུར་ཏོ། །གདོད་ནས་གྲུབ་པ་དེ་དག་ནི་གནས་ཀྱིས་གང་ཟག་བྱིན་གྱིས་རློབས་ནུས་པས་མཐོང་ཐོས་དྲན་རེག་འབྲེལ་ཚད་དོན་དང་ལྡན་པ་ཤ་སྟག་ཏེ་ཉི་ཤུ་རྩ་བཞིའི་གནས་ལ་སོགས་པ་བཞིན་ནོ། །

གཉིས་པ། རྗེས་སུ་བྱུང་བ་ནི། གདོད་ནས་མཆོག་གི་གནས་སུ་གྲུབ་པ་མིན་ཀྱང་འཕགས་པ་དང་། རྣལ་འབྱོར་པ་གྲུབ་པ་ཐོབ་པས་སྒྲུབ་པའི་གནས་སུ་མཛད་ཅིང་བྱིན་གྱིས་བརླབས་པས། ཕྱི་རབས་ཀྱི་སྒྲུབ་པ་པོ་ལ་བར་ཆད་མེད་ཅིང་དངོས་གྲུབ་མྱུར་དུ་ཐོབ་པར་ནུས་པ་སོགས་ཡོན་ཏན་མང་དུ་ལྡན་པ་ནི་གང་ཟག་གིས་གནས་བྱིན་གྱིས་བརླབས་པ་སྟེ་འཕགས་བོད་ཀྱི་སྒྲུབ་གནས་ཕལ་མོ་ཆེ་རྣམས་སོ། །

གཉིས་པ། རྣམ་པར་དབྱེ་བ་ཐ་དད་དུ་བསྟན་པ་ལ་གཉིས། སྤྱིར་གཙོ་ཕལ་དབྱེ་བ་དང་། དེའི་རྒྱུ་མཚན་ཕྱི་ནང་གི་ངག་སྦྱོར་ལས་བྱུང་བའི་ཚུལ་ལོ། །

དང་པོ་ནི། ཛཱ་ལནྡྷ་ར་ལ་སོགས་པའི་གནས་ཆེན་ཉི་ཤུ་རྩ་བཞི། དེ་ལ་འཐུང་གཅོད་བརྒྱད་པོ་བསྣན་པའི་ཡུལ་ཆེན་སུམ་ཅུ་རྩ་གཉིས་སུ་གྲགས་པ་ནི་ཕྱི་དང་ནང་གི་དག་པ་སྦྱོར་བའི་དབང་གིས་གནས་ཐམས་ཅད་ཀྱི་གཙོ་བོའམ་འབྱུང་ཁུངས་སམ་དབྱེ་གཞིར་གྱུར་པ་ཡིན་ལ། དེ་དག་ལས་གྱེས་པའི་གནས་ཀྱི་བྱེ་བྲག་ནི་བསམ་གྱིས་མི་ཁྱབ་པར་ཛམ་བུའི་གླིང་ཁྱབ་པར་བཞུགས་པ་སྟེ། བི་མ་ལས་མཛད་པའི་ཙཱ་རིའི་ལམ་ཡིག་ལས། སྤྱིར་འཛམ་བུ་གླིང་ན་མཁའ་འགྲོ་མ་ཐམས་ཅད་ངེས་པར་འདུ་བའི་གནས། དུར་ཁྲོད་ཆེན་པོ་བརྒྱ་དང་བཅུ་གསུམ་བཞུགས་པ་ལས། རྒྱ་གར་གྱི་ཡུལ་ན་སྤྱོད་པ་བྱེད་པའི་གནས་དྲུག་ཉམས་སྐྱོང་བའི་གནས་བཅུ་བཞི། དམ་ཚིག་སྐོང་བའི་གནས་བརྒྱད་འདོད་ཅིང་འདུན་པ་དྲག་པོ་སྐྱེ་བའི་གནས་བཞི་སྟེ་སུམ་ཅུ་རྩ་གཉིས་བཞུགས། དེ་དག་གི་ནང་ནས་རང་བཞིན་གྱི་མཁའ་འགྲོ་མ་གནས་པའི་དུར་ཁྲོད་ཆེན་པོ་བརྒྱད་བཞུགས་པའི་གནས་ནི་མཆོག་ཏུ་གྱུར་པ་ཡིན་ལ། ཨོ་རྒྱན་གྱི་ཡུལ་ན་མཁའ་འགྲོ་མ་ངེས་པར་འདུ་བའི་གནས་བརྒྱད། ཁ་ཆེའི་ཡུལ་ན་བཅུ། ལི་དང་ཧོར་གྱི་ཡུལ་ན་ལྔ། ཚ་བ་དམར་ཐག་དང་ཞང་ཞུང་ན་ལྔ། མི་ཉག་དང་ཟ་ཧོར་གྱི་ཡུལ་ན་བཅུ། ཐོན་མི་དང་གར་ལོག་གི་ཡུལ་ན་བཅུ། རྒྱ་ནག་ཡུལ་ན་སུམ་ཅུ། བོད་ན་ཕྱེད་དང་གཉིས་བཞུགས་པའི་ཕྱེད་ནི་གཞོ་སྟོད་ཏེ་སྒྲོ་བྲག་དཀར་མཁའ་འགྲོ་མ་རེས་འགར་འདུ་བ་དང་། གཅིག་ནི་ལྷོ་ཕྱོགས་དཔལ་གྱི་ཙཱ་རི་ཏྲ་རང་བྱུང་གི་མཆོད་རྟེན་ཆེན་པོ་ཉིད་ཡིན་པར་གསུངས་སོ། །དེ་དག་ནི་གདོད་མ་ནས་རང་བཞིན་གྱིས་གྲུབ་པའི་མཁའ་སྤྱོད་ཀྱི་ཕོ་བྲང་ནང་སྤྲུལ་པའི་ལྷ་ཚོགས་མངོན་སུམ་དུ་བཞུགས་པའི་གནས་ཆེན་གཙོ་བོའི་དབང་དུ་མཛད་པ་སྟེ། དེ་ལས་གྱེས་པའི་ཡན་ལག་ནི་བོད་ཀྱི་ཡུལ་ཁོ་ནར་ཡང་། ཨོ་རྒྱན་ཆེན་པོའི་ཟབ་གཏེར་རྣམས་ལས། མཆོག་གི་སྒྲུབ་གནས་ལྔ། སྐུ་གསུང་ཐུགས་ཀྱི་གནས་མཆོག་ལྔ། ངོ་མཚར་བའི་གནས་ཆེན་ཉི་ཤུ་རྩ་ལྔ། ལུང་ལྔ་ལྗོངས་གསུམ་གླིང་གཅིག་སྒྲུབ་གནས་ཆེན་པོ་བརྒྱད། གངས་རི་བཞི། སྦས་ཡུལ་ཉི་ཤུ་རྩ་གཅིག་གངས་ཆེན་ཉེར་གཅིག་གནས་ཆེན་བརྒྱད་དང་རྩ་བརྒྱད། གནས་ཕྲན་སྟོང་དང་རྩ་གཉིས་རྣམས་ཡོད་པར་གསུངས་སོ། །གཏེར་གསར་མདོ་བྱང་ལས། རྒྱ་གར་ཡུལ་དུ་གནས་ཆེན་ཉི་ཤུ། མངའ་རིས་སྐོར་གསུམ་དུ་གནས་ཀྱི་གཙོ་བོ་གངས་བྲག་ཉི་ཤུ། དབུས་གཙང་རུ་བཞིར་སྒྲུབ་གནས་དྲུག་ཅུ་རྩ་ལྔ། མདོ་ཁམས་སྒང་དྲུག་ཏུ་གཙོ་བོ་ལྔ་དང་བཅས་པའི་གནས་ཆེན་ཉི་ཤུ་རྩ་ལྔ། ཁྱད་པར་ཅན་གྱི་གནས་བཞི། ཕྲིན་ལས་འགྲོ་འདུལ་སྤྲུལ་པའི་གནས་བརྒྱད་དེ་མཆོག་ཏུ་གྱུར་པའི་གནས་ཆེན་བཞི་བཅུ་རྩ་གཉིས་བཞུགས་པར་གསུངས་སོ། ། གཉིས་པ་ནི་དེ་དག་ཀྱང་གཙོ་བོ་དང་ཡན་ལག་གི་དབྱེ་བ་ཡོད་པ་རྒྱུ་མཚན་གང་གིས་ཡིན་སྙམ་ན། དེ་ཁོ་ན་ཉིད་སྦྱང་གཞིའི་ངེས་པར་དང་མཐུན་པའི་སྦྱང་འབྲས་གཞན་མཆོག་དོན་དམ་སྙིང་པོའི་དཀྱིལ་འཁོར་གྱི་ལྷར་གནས་པ་དག་སྦྱང་བྱ་ནང་རྡོ་རྗེའི་ལུས་དྲི་བཅས་རྩ་རླུང་ཐིག་ལེ་རྟེན་དང་བརྟེན་པའི་ཚུལ་དུ་གྲུབ་པའི་གདངས། ཕྱི་འཇིག་རྟེན་གྱི་ཁམས་སུ་གནས་ཡུལ་མཁའ་འགྲོའི་རྣམ་པར་ཤར་བ་སྟེ། ཟླ་ཉི་སྒྲ་གཅན་གྱི་རླུང་འབབ་པའི་སྐུ་དང་གསུང་དང་ཐུགས་ཀྱི་རང་བཞིན་རྩའི་སྡོང་པོ་བརྒྱད་གསུམ་ཉེར་བཞི་རོ་རྐྱང་དབུ་མའི་རིགས་སུ་གྱེས་པའི་སྤྱི་བོར་མི་ཕྱེད་མ་སོགས་རྩའི་གཙོ་མོ་ཉི་ཤུ་རྩ་བཞི་ནི་ཕྱི་རོལ་ཏུ་ཛཱ་ལནྡྷ་ར་ལ་སོགས་པའི་གནས་ཆེན་ཉི་ཤུ་རྩ་བཞི།

དེ་དག་ལ་བརྟེན་པ་སྤྱི་བོའི་དཔྱིད་དང་ཐིག་ལེ་ལ་སོགས་པ་ནི་ཐོད་པའི་དུམ་བུ་དང་རབ་གཏུམ་མ་ལ་སོགས་པའི་དཔའ་བོ་དཔའ་མོ་ཉེར་བཞི། དེ་རེ་རེ་ལ་ཐིམ་པ་དང་ལོངས་སྤྱོད་པ་དང་བདག་པོའི་དབྱིབས་ཡན་ལག་གི་རྩ་འདབ་བདུན་ཅུ་རྩ་གཉིས་སུ་འགྱུར་བས་ཕྱི་རོལ་དུའང་གནས་ཆེན་ཉེར་བཞི་ལ་དངོས་དང་ཡན་ལག་དང་སྦས་པའི་ཚུལ་གྱིས་མིང་འདྲ་གསུམ་གསུམ། དེའི་སྟེང་ཡན་ལག་རླུང་ལྔའི་རྟེན་དང་རྩའི་གཙོ་མོ་གསུམ་བསྣན་པས་ཕྱི་རོལ་ཏུ་ཡུལ་ཆེན་སུམ་ཅུ་རྩ་གཉིས་སུ་སྣང་བ་ཡིན་ཞིང་། དེ་བས་ཀྱང་གྱེས་པས་མཐའ་ཡས་པར་འགྱུར་ཏེ། གཞན་དག་པ་མཁའ་སྤྱོད་ཀྱི་ཞིང་ཁམས་ན་དཔའ་བོ་དང་དཔའ་མོ་ཉེར་བཞི། དེ་རེ་རེ་ལ་འཁོར་གྱི་དཔའ་བོ་ཌཱ་ཀི་སྟོང་ཕྲག་བདུན་ཅུ་རྩ་གཉིས། ནང་རྡོ་རྗེའི་ལུགས་ལ་རྩའི་གཙོ་མོ་ཉེར་བཞི་དེ་རེ་རེ་ལས་རྩ་ཕྲན་སྟོང་ཕྲག་བདུན་ཅུ་རྩ་གཉིས་ཕྱི་རོལ་ཏུ་གནས་ཆེན་པོ་ཉི་ཤུ་རྩ་བཞི། དེ་རེ་རེ་ལ་གནས་ཕྲན་སྟོང་ཕྲག་བདུན་ཅུ་རྩ་གཉིས་དེ་ཐམས་ཅད་ཀྱང་དོན་དམ་བདེ་སྟོང་དབྱེར་མེད་གཉུག་མ་ལྷན་སྐྱེས་ཡབ་ཡུམ་གྱི་ངོ་བོར་རོ་མཉམ་དུ་བསྡམས་པས་གནས་ཐམས་ཅད་ཀྱང་ཐབས་ཤེས་དབྱེར་མེད་ཀྱི་མཚོན་བྱེད་ཅན་དུ་བཞུགས་པའོ། །གསུམ་པ་གནས་སུ་གྲུབ་པའི་འཐད་པ་བརྗོད་པ་ནི། སྤྱི་ཙམ་གྱི་དབང་དུ་བྱས་ན། དོན་དམ་པར་ཞིང་དང་སྐུའི་རོལ་པས་མ་ཁྱབ་པར་གང་ཡང་མེད་པས་རྣལ་འབྱོར་ཅན་དང་སྣང་བ་དག་པའི་བློ་ངོར་བེམ་པོ་ལས་ཀྱང་སངས་རྒྱས་ཀྱི་ཆོ་འཕྲུལ་མཐའ་ཡས་པ་མཐོང་བ་དང་། གང་ཞིག་སངས་རྒྱས་ཡིད་བྱེད་པ། །དེ་ཡི་མདུན་ན་ཐུབ་པ་བཞུགས། །ཞེས་འབྱུང་བ་ལྟར་དད་མོས་ཅན་ལ་སྣང་གྲགས་ཐམས་ཅད་སྐུ་གསུང་ཐུགས་ཀྱི་རོལ་པར་འཆར་བས་དོན་མཛད་པའི་ཕྱིར། འདི་ནི་གནས་ཡིན་ནོ། །འདི་ནི་གནས་མ་ཡིན་ནོ་སྙམ་པ་ནི་རང་བློ་མ་དག་པའི་ལོག་རྟོག་ཡིན་ལ། བྱེ་བྲག་འབྱེད་པ་ནའང་། གདོད་ནས་གྲུབ་པའི་གནས་དེ་དག་ནི་ཉེ་རྒྱུའི་སྤྱོད་པ་སྐྱོང་བའི་གནས་ཀྱི་མཆོག་ཏུ་རྒྱུད་སྡེ་རིན་པོ་ཆེ་རྣམས་ལས་གསུངས་པས་རྩོད་པ་མེད་ལ། གནས་ཕྲན་ལ་སོགས་པ་རྣམས་ཀྱང་ཕྱི་ནང་གི་དག་པ་སྦྱོར་བའི་རིགས་པས་འཐད་པ་དང་། ལུང་གིས་གྲུབ་སྟེ། དང་པོའི་སངས་རྒྱས་ལས། གནས་ལ་སོགས་ཆེ་འབྲིང་ཆུང་ངུའི་དབང་དུ་བྱས་པའི་ཆེན་པོ་ནི་གླིང་བཞི་སོགས་ལས་རླུང་གི་དཀྱིལ་འཁོར་གྱི་མཐར་ཐུག་པའི་བར་དང་། འབྲིང་པོ་ནི་འཛམ་གླིང་ཆུང་ངུའི་ཡུལ་སོ་སོར་ཡོད་པ་རྣམས་སུ་བཤད་པ་དང་། ཆུང་ངུ་ནི་དྲི་མེད་འོད་ལས། འདིར་ཐུན་མོང་གི་བྱིས་པ་རྣམས་ཡུལ་དུ་འཁྱམས་པའི་དོན་དུ་ཛཱ་ལནྡྷ་ར་ལ་སོགས་པ་རྣམས་གནས་ལ་སོགས་པར་གསུངས་སོ། ། དེ་ཉིད་ནི་ཐམས་ཅད་དུ་ཁྱབ་བྱེད་དུ་མི་འགྱུར་ཏེ་རྣལ་འབྱོར་མ་རྣམས་ཀྱི་རིགས་སུམ་ཅུ་རྩ་དྲུག་ནི་གྲོང་ཁྱེར་གཅིག་ཏུའང་གནས་སོ། །གང་གིས་ན་འདི་མཆོག་གི་དང་པོའི་སངས་རྒྱས་ཐམས་ཅད་ལ་ཁྱབ་པར་བྱེད་པ་ཉིད་ཡིན་པའི་ཕྱིར་ན་བོད་ལ་སོགས་པ་དང་རྒྱ་ནག་ལ་སོགས་པའི་ཡུལ་རྣམས་ནའང་གནས་ལ་སོགས་པ་རྣམས་ཡོད་དོ། །ཞེས་འབྱུང་བ་དང་། འདུལ་ལུང་ལས། དགེ་སློང་དག་བྱང་ཕྱོགས་གངས་རིའི་ཁྲོད་ན་ས་རྡོ་བེམ་པོས་ཀྱང་སེམས་ཅན་གྱི་དོན་བྱེད་པ་ཡོད་དོ། ། ཞེས་དང་། རཏ་གླིང་དང་འཇའ་ཚོན་གཏེར་བྱོན་ཚིག་མཐུན་པར། བསམ་ཡས་མཆིམས་ཕུ་ནས་བཟུང་སྟེ་བོད་ཡུལ་མ་ལུས་པར་ཞབས་ཀྱིས་བཅགས་ཤིང་བྱིན་གྱིས་བརླབས། གངས་དཀར་ཏི་སེ་མན་ཆད་ནས། ཁམས་གཙང་ཁ། གན། འཇང་། ཧཱུ། མི་ཉག་ཧོར། ལི་ཡུལ། གྲུ་གུ ཀོང་རྒྱལ། མཆིམས། ཉང་ཁ། ལོང་བྲག མོན་སྟག་སྒོ། བུམ་ཐང་། སྤ་གྲོ་ལ་སོགས་པ་ཐམས་ཅད་སྒྲུབ་གནས་སུ་བྱིན་གྱིས་བརླབས་ཤིང་། འགྲོ་བ་རྣམས་སྨིན་གྲོལ་ལ་བཀོད་དོ། །མཆོག་གི་སྒྲུབ་གནས་ལྔ་ལ་སོགས་པའི་གནས་དེ་རྣམས་སུ་མ་འོངས་པའི་དུས་སུ་མཐོང་ཐོས་དྲན་རེག་ཀུན་གྲུབ་པ་ཐོབ་ཅིང་དངོས་གྲུབ་བརྙེས་པའོ། །ཞེས་དང་། རྒྱལ་པོ་བཀའ་ཆེམས་ལས་བོད་ཡུལ་གནས་ཀྱི་བྱེ་བྲག་གསལ་བར་གསུངས་ཤིང་། འཛམ་གླིང་གི་རྒྱན་གཅིག་ཀུན་མཁྱེན་རང་བྱུང་རྡོ་རྗེའི་ཙཱ་རིའི་ལམ་ཡིག་ལས། སྨད་རོང་བཙན་ཁ་བ་དཀར་པོ་ལ་ཐུག་ཅིང་། སྟོད་བལ་པོའི་ཡུལ་གྲུབ་པའི་གནས་ཆེན་པོ་ལ་ཐུག་གི་བར་དང་། ལྷོ་ཕྱོགས་ཀཱ་མ་རཱུ་པའི་མཐར་ཐུག་གི་གནས་ཚུན་ཆད་ལ། གནས་དང་ཉེ་བའི་གནས་ལ་སོགས་པའི་གནས་ཕྲན་སྟོང་ཕྲག་ཡོད་ཅེས་ཙཱ་རི་ཁོ་ནའི་གནས་ཀྱི་གྲངས་སུ་གསུངས་པས། གཞན་ལའང་རིགས་མཚོན་པ་ན། གནས་མཆོག་འདི་ཀུན་ཀྱང་ཤིན་ཏུ་ཚད་མར་གྲུབ་པ་ཡིན་ལ། ཁྱད་པར་སྐྱོབ་པ་འཇིག་རྟེན་གསུམ་གྱི་མགོན་པོས་ཆོས་ཀྱི་འཁོར་ལོ་བསྐོར་བའི་ཚེ་འདི་གའི་གནས་བདག་དགེ་བསྙེན་ཆེན་པོ་ཉིད་སྤྱན་སྔར་སྔོན་ཏུ་ཕྱིན་ནས། ངའི་ས་ཆར་སྒྲུབ་གནས་ཁྱད་པར་ཅན་ཞིག་ཡོད་པས་བླ་མ་རིན་པོ་ཆེ་དེར་ཕེབས་པར་ཞུ་ཞེས་སྤྱན་དྲངས་པས་ཉིད་ཀྱི་སྐུ་ཚབ་ཏུ་དཔལ་ལྡན་བྱང་ཆུབ་གླིང་པ་འདིར་ཕྱག་ཕེབས་ཏེ་བསྟན་པ་སྤེལ་བས་མཚོན།〖JY〗གནས་མཆོག་འདིའང་གདོད་ནས་གྲགས་ཤིང་གྲུབ་པ་ཡིན་

ནོ། །

གསུམ་པ། བྱེ་བྲག་གནས་ཆེན་འདི་ཉིད་དམིགས་སུ་བཤད་པ་ལ་ལྔ། ངོ་བོ། སྒྲ་དོན། ངོ་མཚར་བའི་ལུང་། ཡིད་ཆེས་པའི་རྟགས། དེའི་མཚན་ཉིད་དོ། །

དང་པོ་གནས་འདིའི་ངོ་བོ་གང་ཡིན་སྙམ་ན། སྐུ་གསུམ་གྱི་ཞིང་ལས་སྤྲུལ་སྐུའི་ཞིང་གི་ཆ་ཤས། གནས་ཉེར་བཞི་ལས་མིག་གི་རྩ་བའི་བདག་ཉིད་ཉེ་བའི་གནས། དེ་བཱི་ཀོ་ཊཱིའི་བྱེ་བྲག་བཛྲ་ཀོ་ཊཱི། ཡུལ་སོ་གཉིས་ལས་རྩ་ཨ་བ་དྷཱུ་ཏིའི་རང་བཞིན་ཙཱ་རི་ཏྲའི་ཡན་ལག་ཙཱ་འདྲ་རིན་ཆེན་བྲག་སྲིད་པ་གསུམ་དག་པའི་འཁོར་ལོ་གསུམ་ལས་མཁའ་སྤྱོད་ཐུགས་ཀྱི་འཁོར་ལོར་གཏོགས་པ་གནས་ཆེན་དང་གནས་ཕྲན་གཉིས་ལས། གློ་བུར་དྲི་མ་བྲལ་བའི་འབྲས་ཆོས་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་བརྒྱན་གྱི་འཁོར་ལོ་ལྔ་ཕྲག་ལྔ་ཡི་རང་བཞིན་མདོ་ཁམས་ཀྱི་གནས་ཆེན་ཉེར་ལྔའི་ནང་ཚན་ཡོན་ཏན་ཐུགས་ཀྱི་གནས་མཆོག གནས་དང་ཡུལ་ཆེན་པོ་རྣམས་ཀྱི་བྱེ་བྲག་ཡིན་པས་ངོ་བོ་གདོད་ནས་གྲུབ་ཅིང་། རྒྱལ་བ་ཐམས་ཅད་ཀྱི་སྤྱི་གཟུགས་རྡོ་རྗེ་ཐོད་ཕྲེང་རྩལ་སོགས་ཀྱིས་བྱིན་གྱིས་བརླབས་པའི་གངས་ཅན་གྱི་གནས་ཆེན་ཡིན་པས་རྣམ་པ་རྗེས་སུ་བྱུང་བ། ཐར་པ་ཆེན་པོའི་ཕོ་བྲང་། སངས་རྒྱས་ཐམས་ཅད་ཀྱི་གཞལ་མེད་ཁང་ཆེན་པོའོ། །

གཉིས་པ་མཚན་གྱི་སྒྲ་དོན་གང་ཡིན་སྙམ་ན། ནང་དུ་མཆིན་པའི་ཁམས་འབབ་པའི་རྩ་སྒོམ་པ་མོ་ལ་དཀར་ཆ་རེས་འགའ་གནས་པས་ཕྱི་རོལ་དུའང་མཁའ་འགྲོ་མ་རེས་འགའ་གནས་པས་ཉེ་བའི་གནས་སམ། རྩ་ཨ་བ་དྷཱུ་ཏིར་དཀར་དམར་འདྲེས་པ་ལས་བྱུང་བའི་ལྷན་སྐྱེས་ཀྱི་བདེ་བ་འཐུང་ཞིང་སྒྲིབ་པ་མ་ལུས་པ་གཅོད་པས་ཕྱི་རོལ་དུའང་དེ་ལྟ་བུའི་བྱེད་ལས་ཡོད་པ་ལས་འཐུང་གཅོད་ཅེས་བྱ་ཞིང་། དེ་བཱི་ཀོ་ཊཱི་ནི་ལྷ་མོའི་མཁར་ཏེ་བྲག་རི་རྣམས་སུ་སྙིང་འདྲ་བའི་མཁར་དང་སྐྱེ་གནས་ཀྱི་གཟུགས་ཐལ་སྦྱར་འདྲ་བ་མང་བས། མ་དག་པའི་ཚེ་སྲིད་པ་མོ་རྒྱུད་ཀྱི་ལྷ་འདྲེས་ཆོ་འཕྲུལ་སྟོན་ཅིང་ཟག་བཅས་ཀྱི་ཆགས་པ་སྤེལ་བ་དང་། ལམ་དུས་སུ་ཕྱག་རྒྱ་བཞིའི་རྣམ་པར་བསླངས་ནས་བདེ་སྟོང་གི་ཡེ་ཤེས་སྐྱེད་པར་བྱེད་ལ། འབྲས་དུས་སུ་རྣམ་ཀུན་མཆོག་ལྡན་གྱི་སྟོང་པ་ཉིད་ཆོས་ཐམས་ཅད་ཀྱི་བརྟེན་གཞིར་གྱུར་པ་ཉིད་འཐོབ་པར་བྱེད་པ་མཚོན་པའོ། །གནས་ཡིག་གཏེར་བྱོན་རྩ་བ་ལས། བཛྲ་ཙིཏྟ་ཀོ་ཊཱི་ཞེས་གསུངས་པ་ནི་དེ་བཱི་ཀོ་ཊཱིའི་བྱེ་བྲག་རྡོ་རྗེ་ཐུགས་ཀྱི་མཁར་ཏེ་ཐུགས་རྡོ་རྗེའི་རང་བཞིན་བཅོམ་ལྡན་འདས་རྡོ་རྗེ་སེམས་དཔའ་ཞི་བ་དང་ཁྲོ་བོ། དཔལ་འཁོར་ལོ་སྡོམ་པ་སོགས་རྡོ་རྗེའི་རིགས་ཀྱི་ཧེ་རུ་ཀ་ཕྱག་བརྙན་དང་བཅས་པ་ཁྱད་པར་དུ་བརྟེན་པའི་ཕོ་བྲང་དུ་གྱུར་པའོ། །ཙཱ་འདྲ་རིན་ཆེན་བྲག་ཅེས་པ་ནི། ཙཱ་རི་ཏྲ་ཐམས་ཅད་འདུས་པ་ལ་འཇུག་པས་ནང་དུ་རྩ་དབུ་མ་དང་ཕྱི་རོལ་ཏུ་ལྷོ་གནས་མཆོག་དཔལ་གྱི་ཙཱ་རི་ཏྲའི་ཡན་ལག་ཡིན་པས་དེ་དང་ཆ་འདྲ་བའི་བཀོད་པ་ཡོད་པ་དང་། རིན་པོ་ཆེ་ནི་ཡོན་ཏན་གྱི་རིགས་ཡིན་པས་འདིར་ཡོན་ཏན་གྱི་རིགས་ལས་བྱུང་བའི་གནས་སུ་མཚོན་པའི་ཕྱིར་བྲག་རིའི་ཕྱི་དབྱིབས་ཕལ་ཆེར་རིན་པོ་ཆེ་འབར་བའི་དབྱིབས་སུ་ཡོད་པའོ།།

དེ་བཱི་ཀོ་ཏྲི་དང་ཙཱ་འདྲ་གཉིས་ཀ་ཡིན་པ་ནི་མི་འགལ་ཏེ། རྩ་དབུ་མ་རྩ་ཉེར་བཞི་པོའི་ཁྱབ་བྱེད་དུ་འགྱུར་བའི་ཕྱིར་ཙཱ་རི་ཏྲའང་གནས་ཐམས་ཅད་ཀྱི་ཁྱབ་བྱེད་དུ་འགྱུར་བ་དང་། དེ་གཉིས་མིག་དང་སྙིང་གི་དབུས་ཀྱི་རྩ་ཡི་དག་པ་ཡིན་པས་སྙིང་དང་མིག་དག་ཀྱང་འབྲེལ་བ་ཅན་དུ་ཡོད་པའི་ཕྱིར། ལྷོ་བྲག་མཁར་ཆུར་བཞུགས་པའི་དེ་བཱི་ཀོ་ཊཱིའང་ཙཱ་རི་ཏྲའི་ཡན་ལག་ཡིན་པ་ཡེ་ཤེས་གཟིགས་པ་དག་གི་སྔར་ནས་བཤད་པ་ལྟར་རོ། །འཇམ་མགོན་བླ་མ་མཁྱེན་བརྩེའི་དབང་པོས་གནས་འདི་ཡེ་ཤེས་སྤྱན་དབུས་མའི་རང་བཞིན་ཡིན་གསུངས་པའང་ཡེ་ཤེས་ཀྱི་གཟིགས་པ་འཁྲུངས་པ་ལས་ཏེ་སྤྱན་དབུས་མ་དབུ་མའི་ཡར་སྣའི་སྟོང་པའི་ཡེ་ཤེས་ཀྱི་དག་པ་ཡིན་ཅིང་དེ་ཉིད་སྙིང་གའི་དབུས་ནས་ཡེ་ཤེས་འཆར་བའི་སྒོར་གྱུར་བའི་ཕྱིར། དེ་བཱི་ཀོ་ཊཱི་ཙཱ་འདྲ་རིན་ཆེན་བྲག༔ ཅེས་པའི་ལུང་དོན་དང་ཤིན་ཏུ་འབྱོར་བ་ཡིན་ནོ། །གསུམ་པ་ཡིན་པར་ངེས་པའི་ལུང་ཡང་། མངའ་བདག་མར་པ་ལོ་ཙཱས་རྗེ་བཙུན་མི་ལ་རས་པ་གཙང་ལ་ཡར་འབྱོན་གྱི་སྐབས་སུ་ཚོགས་འཁོར་བཟང་པོ་མཛད་ཅིང་ཞལ་གདམས་ཕྱི་ཕྲིན་གྱི་བསླབ་བྱ་རྒྱས་པར་གནང་བའི་སྐབས་སུ། ཤར་ཕྱོགས་ན་གནས་ཆེན་དེ་བཱི་ཀོ་ཏྲི་དང་ཙཱ་རི་འབྲེལ་ནས་ཡོད་དེ། དེ་ད་ལྟ་ཞལ་འབྱེད་མ་རན། མ་འོངས་པ་ན་ཁྱོད་ཀྱི་བུ་བརྒྱུད་ཀྱིས་འཛིན་པ་ཞིག་འོང་བ་ཡིན། ཅེས་གསུངས་པ་ནི་ཕྱོགས་དང་། མཚན་དང་། གནས་ལུགས། སྒྲུབ་བརྒྱུད་རྣམས་ཀྱི་སྒོ་ནས་གནས་འདི་ཉིད་ལུང་བསྟན་པ་ཤིན་ཏུ་གསལ་བ་ཡིན་ནོ། །བཞི་པ་དེ་ལ་ཡིད་ཆེས་པའི་རྟགས་ཀྱང་འདི་ལྟར་དུ་ཡོད་དེ། སྔོན་གྱི་དུས་སུ་དྲག་པོ་དང་དུས་མཚན་གྱིས་བདག་ཏུ་བཟུང་བ་ཧེ་རུ་ཀས་བཏུལ་ཏེ་མཆོག་གི་གནས་སུ་བྱིན་གྱིས་བརླབས་པའི་ཐབས་ཤེས་ཀྱི་རྟགས་གང་ལ་ཡོད་པ་ནི་ཁྱད་པར་ཅན་གྱི་གནས་ཆེན་ཡིན་པའི་རྟགས་སུ་ཡོངས་ལ་གྲགས་པ་ལྟར། འདི་ཡང་རང་བྱུང་གི་ལིངྒ་དང་སྐྱེ་གནས་ཀྱི་མཚན་མ་དག་དང་། སྟོད་ན་ཅུ་གང་དང་སྨད་ན་སིནྡྷུ་རའི་རྒྱུད་ཁྱད་པར་ཅན་མཆིས་པ་དང་། ཕྱོགས་བཞིར་མི་འགྱུར་བ་ཤིང་གི་གཟེར་དང་། རྒྱུད་ལས། ཡུལ་དེར་གནས་པའི་ལྷ་མོ་ནི། །བྲག་གི་ཁྱིམ་ལ་བརྟེན་ཏེ་གནས། །ཞེས་གསུངས་པ་བོད་སྐྱོང་ལྷན་ཅིག་སྐྱེས་མ་བརྟེན་པའི་རང་བྱུང་རྡོའི་མཁར་སྙིང་གི་གཟུགས་འདྲ་བ་གསང་བའི་ཕུག་པ་དང་བཅས་པ་ཡོད་པ་ནི་དེ་བཱི་ཀོ་ཊཱིའི་གནས་སུ་གྲུབ་པའི་མཚན་མ་དང་། ཙཱ་རི་ཏྲ་དང་མཁར་ཆུ་རོང་བཙན་རྣམས་སུ་སྐྱེས་པ་དང་མདོག་དབྱིབས་ཤིན་ཏུ་མཚུངས་པའི་ཤིང་བྷ་ཊའི་སྡོང་པོ་གནས་ཀྱི་དབུས་སུ་སྐྱེས་པ་ནི་ཙཱ་རི་ཏྲ་ཡིན་པའི་རྟགས་སུ་གསལ་བ་དང་། སྐུ་གསུང་ཐུགས་ཀྱི་བཀའ་རྟགས་ཕྱག་ཞབས་ཀྱི་རྗེས་ལ་སོགས་པ་དབང་པོའི་སྤྱོད་ཡུལ་དུ་སྣང་བ་ནི་མངོན་སུམ་དུ་གྲུབ་པའི་ཚད་མའོ། །

བཞི་པ། གནས་ཀྱི་མཚན་ཉིད་འཆད་པ་ལ་གསུམ། ཐུན་མོང་སོ་སྐྱེ་རྣམས་ཀྱི་མཐུན་སྣང་དུ་ཇི་ལྟར་གྲུབ་པ་དང་། ཐུན་མིན་རྣལ་འབྱོར་པ་རྣམས་ཀྱི་བློ་ངོར་ཇི་ལྟར་ཡོད་པ་དང་། ཤིན་ཏུ་ཐུན་མིན་འཕགས་པ་ཆེན་པོ་རྣམས་ཀྱི་གཟིགས་ངོར་ཇི་ལྟར་ཤར་བའོ། །

དང་པོ་ནི། མཆོག་དམན་ཀུན་གྱི་མཐུན་སྣང་དུ་གྲུབ་པར་འཕགས་ཡུལ་དང་རྒྱ་ནག་གི་གཞུང་ལས་ཇི་སྐད་བཤད་པའི་སའི་དཔྱད་ལེགས་རྙེད་པར་དཀའ་བ་ཐམས་ཅད་མ་ཚང་བ་མེད་པ་ས་གཞི་ཐམས་ཅད་འཇམ་ཞིང་ངམ་གྲོག་དང་གཡང་ས་མེད་ཅིང་རྡོ་དང་ཚེར་མ་ཉུང་བ། མི་མ་ཡིན་གདུག་པ་ཅན་དང་གཅན་གཟན་གཏུམ་པོའི་འཚེ་བ་དབེན་ཅིང་ཁྱད་པར་སྦྲུལ་སོགས་མི་སྲུན་པའི་སྲོག་ཆགས་ཉེ་བའི་ཕྱོགས་སུའང་མི་གནས་པ་མཐོ་དམན་ཁད་མཉམ་པ་ཧ་ཅང་ཚ་བ་དང་གྲང་བའི་གནོད་པ་མེད་པ། དབྱར་དགུན་རྟག་ཏུ་ཁམས་དྭངས་ཤིང་རིག་པ་སྤྲོ་བ། ཤིན་ཏུ་མཛེས་པའི་བྲག་རི་དཀར་དམར་སྔོན་པོའི་ཕྲེང་བ་དང་། བཟང་ཤིང་སྣ་ཚོགས་པའི་ནགས་ཚལ་དང་ནེའུ་གསིང་སྤང་ལྗོངས་ཡིད་དུ་འོང་བས་བརྒྱན་པ། རོ་ནུས་ཁྱད་པར་འཕགས་པའི་སྨན་གྱི་རིགས་དུ་མ་འཁྲུངས་པ། ཕུ་མ་ཤོར་ཞིང་མདའ་མ་རལ་བ། དྭངས་ཤིང་བསིལ་བའི་འབབ་ཆུ་སྒྲ་སྙན་པ་དག་གཡས་གཡོན་ནས་རྒྱུ་ཞིང་མདུན་དུ་འདུས་པ། རི་རྒྱུད་གངས་དང་འབྲེལ་ཞིང་ཆུ་རྒྱུད་གཙང་པོ་ལ་ཟུག་པ། སྐད་རིགས་མི་གཅིག་པའི་སྐྱེ་བོ་དུ་མ་འདུས་ཤིང་སྡེ་བཞིའི་དཔལ་ཡོན་ཕུན་སུམ་ཚོགས་པ། ཇི་སྐད་དུ། ཁང་ས་ཞིང་ས་ས་ཡི་དགེ །ཁང་ཤིང་བུད་ཤིང་ཤིང་གི་དགེ །ཁང་རྡོ་ཐབ་རྡོ་རྡོ་ཡི་དགེ། འཐུང་ཆུ་ཡུར་ཆུ་ཆུ་ཡི་དགེ །གམ་འབྲོག་རྒྱང་འབྲོག་རྩྭ་ཡི་དགེ། ཞེས་བཤད་པའི་ཡུལ་གྱི་དགེ་བཅུ་མཐའ་དག་ཀྱང་ཐད་ཀར་འབྱོར་བ་སོགས་ཕྱི་ལྟར་བསྔགས་པར་འོས་པའི་ཡོན་ཏན་དུ་མའི་དཔལ་གྱིས་ཀུན་ནས་སྤུངས་པའོ། །

གཉིས་པ་ནི། ནང་རྣལ་འབྱོར་ལ་དགའ་བ་རྣམས་ཀྱི་སྤྱོད་ཡུལ་དུ། གཞན་གྱིས་བདག་ཏུ་མ་བཟུང་བའི་ནགས་ཚལ་དང་། བྲག་རིའི་བྱ་སྐྱིབས་བསམ་གཏན་སྒོམ་པའི་གནས་སུ་འོས་པས་ཕྱོགས་ཀུན་ཏུ་གཏམས་པས་མདོ་འདུལ་ནས་བཤད་པའི་ཡོན་ཏན་དང་ལྡན་པ། གྲོང་ལས་རྒྱང་གྲགས་ལྷག་པར་འཕགས་ལ་དབེན་ཅིང་ཉམས་སུ་དགའ་བས་མངོན་པ་ནས་བཤད་པའི་དོན་དང་མཐུན་པ། ཤར་གཞོལ་ལ་ལྷོ་སྤུངས་པ། ནུབ་བསྐྱོར་ལ་བྱང་འདན་པ། ཆུ་བོ་དབང་གི་ཕྱོགས་ནས་འབབ་ཅིང་མདུན་ན་མེ་ཏོག་གི་གླིང་ཆགས་པ། དཔའ་བོ་དང་མཁའ་འགྲོ་འདུ་ཞིང་གྲུབ་ཐོབ་གོང་མས་ཞབས་ཀྱིས་བཅགས་པ་སྟེ་གསར་རྙིང་སྔགས་གཞུང་རྣམས་ནས་གསུངས་པའི་སྒྲུབ་གནས་ཀྱི་མཚན་ཉིད་ཐམས་ཅད་ཚང་བ། ཞི་གནས་སྐྱེ་བའི་གནས་ནགས་ཚལ་མཐུག་པོ། ལྷག་མཐོང་སྐྱེ་བའི་གནས་ས་ཁད་མཐོ་ཞིང་རིག་པ་དྭངས་པ། རྟོགས་པ་འཆར་བའི་གནས་རིག་འཛིན་གོང་མའི་སྒྲུབ་གནས། རྒྱབ་རི་སྒོམ་ཆེན་དང་སྤང་མཐིལ་སྐྱིལ་ཀྲུང་བཅས་འདྲ། བདེ་སྟོང་གཏུམ་མོ་སྒོམ་པའི་གནས་གཅོང་རོང་རི་སུལ། བོགས་འདོན་སྤྱོད་པ་བསྐྱང་བའི་གནས་འཇིགས་པའི་དུར་ཁྲོད་སོགས་མདོར་ན་ཕྱི་ནང་གི་རྟེན་འབྲེལ་མཐའ་དག་བསྒྲིག་པར་ནུས་པ། ནང་ལྟར་ཡོན་ཏན་རིན་པོ་ཆེའི་བྲག་གི་མཛོད་དུ་ལྷུན་གྱིས་གྲུབ་པའོ། །

གསུམ་པ་ནི། འཕགས་ཆེན་གྲུབ་ཐོབ་རྣམས་ཀྱི་གཟིགས་ངོར། གནས་མཆོག་འདིའི་ས་རྡོ་རི་བྲག ཐ་ན་ཤིང་བུ་རྡེའུ་ཚུན་ཆད་རྟེན་གཞལ་ཡས་ཁང་ལ་བརྟེན་པ་རྩ་བརྒྱུད་བླ་མ། ཡི་དམ་ལྷ་ཚོགས། དཔའ་བོ་མཁའ་འགྲོ། ཆོས་སྐྱོང་སྲུང་མའི་ཚོགས་རྣམས་དངོས་སུ་བཞུགས་པའི་རྟགས་སུ་སྐུ་གསུང་ཐུགས་ཀྱི་རྟེན་རང་བྱོན་མཐའ་ཡས་པས་ཕྱོགས་ཀུན་ཏུ་གཏམས་པ། ཆུ་བོའི་རྒྱུན་རྣམས་ཀྱིས་ཀྱང་སྔགས་ཀྱི་རང་སྒྲ་རྟག་ཏུ་སྒྲོག་པ། བྲག་རིའི་བྱ་སྐྱིབས་རྣམས་སུ་གྲུབ་པའི་རིག་འཛིན་དུ་མ་བསམ་གཏན་ལ་བཞུགས་པ། དུར་ཁྲོད་རྣམས་སུ་རྫུ་འཕྲུལ་དང་ལྡན་པའི་ཞིང་སྐྱོང་མང་པོ་རོལ་པ། དུས་དང་དུས་སུ་གྲུབ་པ་དང་དཔའ་བོ་རྣལ་འབྱོར་མ་མཐའ་ཡས་པས་ཚོགས་ཀྱི་འདུ་བ་ལ་ལོངས་སྤྱོད་ཅིང་སྐལ་བ་ལྡན་པ་ལ་དངོས་གྲུབ་སྟེར་བ། ཁྱད་པར་སྐྱབས་གཅིག་མ་ཧཱ་གུ་རུ་པདྨ་ཀ་ར་དང་། རྡོ་རྗེའི་སྐུ་བརྙེས་བི་མ་ལ་ཏྲ་སྟེ་འཆི་མེད་གྲུབ་པའི་རྒྱལ་པོ་རྣམ་པ་གཉིས་དུས་བཟང་པོ་ལ་ཡེ་ཤེས་རྡོ་རྗེའི་གར་གྱིས་ཕེབས་ཤིང་སྒྲུབ་པོ་རྗེས་སུ་འཛིན། དད་པ་ཅན་གྱི་རྒྱུད་བྱིན་གྱིས་བརླབས། ཚོགས་འཁོར་སོགས་མཆོད་པའི་དམ་རྫས་བཞེས་ཏེ་བསོད་ནམས་ཀྱི་ཚོགས་རྫོགས་པར་མཛད་པས་གསང་བ་ལྟར་ན་བཛྲ་ཀོ་ཊཱི་ཙཱ་རི་ཏྲ་དང་མཚུངས་པ་ཡིན་ནོ། །

ལྔ་པ། བྱིན་གྱིས་བརླབས་ཤིང་གནས་སྒོ་ཕྱེས་པའི་ཚུལ་ལ་གཉིས།

དང་པོ་ཇི་ལྟར་བྱིན་གྱིས་བརླབས་པའི་ཚུལ་ནི། ཐོག་མར་བཅོམ་ལྡན་འདས་ཧེ་རུ་ཀ་རྡོ་རྗེ་བཙུན་མོའི་ཚོགས་དང་བཅས་པས་རང་བྱུང་གི་དུར་ཁྲོད་ཆེན་པོའི་རྣམ་པར་ལྷུན་གྱིས་གྲུབ་པར་མཛད། བར་དུ་བདག་ཅག་གི་སྟོན་པ་ཐུབ་པའི་དབང་པོས་མཚན་མཐའ་ཡས་པའི་འོད་ཟེར་ཆེན་པོས་ཁྱབ་པར་མཛད། སྤྱན་རས་གཟིགས་དང་སྤྲུལ་པའི་ཆོས་རྒྱལ་སྲོང་བཙན་སྒམ་པོའི་ཡེ་ཤེས་ཀྱི་སྐུས་རྟེན་ལ་བརྟེན་པ་བཞུགས་པའི་ཚུལ་གྱིས་འཁོར་བ་མ་སྟོང་གི་བར་དུ་འགྲོ་དོན་ལྷུན་གྲུབ་ཏུ་འབྱུང་བར་རབ་ཏུ་གནས། གྲུབ་པའི་སློབ་དཔོན་ཧཱུྃ་ཀ་ར་དང་བི་མ་ལ་མི་ཏྲ། ཁྱད་པར་རིག་འཛིན་གྲུབ་ཐོབ་ཐམས་ཅད་ཀྱི་འཁོར་ལོས་བསྒྱུར་བ་ཨོ་རྒྱན་ཆེན་པོ་པདྨ་ཐོད་ཕྲེང་རྩལ་ཡབ་ཡུམ། ལས་ཅན་གྱི་རྗེ་འབངས་བདུན་ལ་སོགས་པས་ཞབས་ཀྱིས་གཅགས་ཤིང་སྒྲུབ་པའི་གནས་སུ་མཛད། མ་རུངས་པའི་འབྱུང་པོ་ཐམས་ཅད་དམ་ལ་བཞག ངེས་དོན་ཟབ་མོའི་རྒྱུད་ལུང་གསུངས་ཤིང་གསང་སྔགས་ཆོས་ཀྱི་བགྲོ་བ་མཛད། ཡང་དག་ངེས་པའི་བཀའ་བསྡུ་མཛད་ཅིང་ས་རྡོ་རི་བྲག་བྱིན་གྱིས་བརླབས། ཟབ་གཏེར་ཆེ་ཕྲ་དུ་མ་སྦས་ཤིང་མཁའ་འགྲོའི་ཆོས་སྐྱོང་གཉེར་དུ་བཞག་མ་འོངས་ཕྱི་མའི་དུས་སུ་འགྲོ་དོན་མཐའ་ཡས་པ་འབྱུང་བའི་དགོངས་པས་མཚམས་སྦྱར། འོན་ཀྱང་དུས་ལ་མ་བབས་པས་སྦས་པའི་ཚུལ་གྱིས་ཕྱོགས་འདིར་ཤིན་ཏུ་གཉན་ཆ་འཚུབ་འགྱུར་ཆེ་བས་སྐྱེ་བོའི་རྒྱུ་འགྲུལ་ཙམ་ཡང་མི་ནུས་ཤིང་འདྲེ་ལུང་དུ་གྲགས་པ་ཞིག་ཡོད་པ་ལ། ཕྱིས་དུས་སྙིགས་མའི་སྐབས་སུ་དཔལ་མགོན་འཕགས་པ་ཀླུ་སྒྲུབ་ཀྱི་རྣམ་པར་རོལ་བ་སྐྱོབ་པ་འཇིག་རྟེན་གསུམ་གྱི་མགོན་པོའི་ཐུགས་སྲས་དཔལ་ལྡན་བྱང་ཆུབ་གླིང་པ་ཉིད་ཕྱག་ཕེབས་ཏེ། རེས་མཚོར་གནས་པའི་ནག་ཕྱོགས་ཀྱི་ཀླུ་མ་རུང་བ་དེ་ཕྱག་མཁར་གྱིས་བསྣུན་ནས་བསྒྲལ་ཏེ་མཚོ་ཕལ་ཆེར་སྐམ་པར་མཛད། རིའི་རྩེ་མོར་བཙན་རྨ་གཅོད་གྭ་པའི་བྲག་རི་ཡོད་པ་རྫུ་འཕྲུལ་གྱི་ཞགས་པས་རྐེ་ནས་བཟུང་སྟེ་མཐུར་དུ་ཁྲིད་པ་ན། བླ་གཡུ་ཕུལ་ཏེ་སྐྱབས་སུ་ཞུགས་པས་དགེ་བསྙེན་གྱི་གཏན་ཁྲིམས་ཕོག་ཅིང་དམ་ལ་བཞག་མིང་རྡོ་རྗེ་རྫོང་དམར་དུ་བཏགས། ས་ཕྱོགས་ཐམས་ཅད་བྱིན་གྱིས་བརླབས་ཤིང་རྫུ་འཕྲུལ་ཞབས་རྗེས་སྟོད་སྨད་བར་གསུམ་བཞག་པ་ད་ལྟའང་མཇལ་རྒྱུ་ཡོད་པ་འདི་ཡིན། གདན་སའི་མཐིལ་དཔལ་སྤུངས་སྒང་དུ་མཛད་ཅིང་། དེ་ལས་གྱེས་པའི་བྲག་ནག་དགོན་བཅས་ཀློག་པ་གཙོ་ཆེ་བའི་གྲྭ་སྡེ་དང་། དབུ་ཆེའི་རི་མགུལ་དུ་སྤོང་བ་པའི་སྡེ་བཙུགས་ཤིང་དེ་རྣམས་སུ་དགེ་འདུན་ཁྲི་ཚོ་དུ་མའང་འདུས། གདན་ས་དེ་དག་དང་ཉེ་བར་ཆོས་ཀྱི་ཁྲི་བརྩིགས་ནས་རྒྱུ་འབྲས་ཀྱི་ཆོས་དུ་མ་གསུངས། སྐྱེ་བོ་མང་པོ་སྨིན་གྲོལ་ལ་བཀོད་པས་དེང་སང་ཡང་ཆོས་ཁྲི་ཐང་དུ་གྲགས་པ་དེ་བྱུང་། གཞན་ཡང་ཐེག་པ་ཆེན་པོའི་ཆོས་ཀྱི་འཁོར་ལོ་རྒྱ་ཆེར་བསྐོར་ནས་སྒྲུབ་བརྒྱུད་ཀྱི་བསྟན་པ་རིན་པོ་ཆེ་ནམ་ལངས་པ་ལ་ཉི་མ་ཤར་བ་ལྟ་བུའི་ཕྱག་རིས་མཛད་པ་ཡིན་ཏེ། རྗེ་དེ་ཉིད་ཀྱི་ཞལ་ནས། སྤྱིར་མདོ་ཁམས་སྒང་། རི་མཐོ་ལ་ས་གཙང་བ། དེ་བཞིན་གཤེགས་པའི་བསྟན་པ་དར་ཞིང་རྒྱས་པ། ས་གཞི་ཕུན་སུམ་ཚོགས་པ། བསོད་ནམས་བསགས་པ་ཅན་རྣམས་ཀྱི་འབྱུང་ཁུངས། ཁྱད་པར་འབྲི་ཀླུང་དམ་པ་ཆོས་ཕྱུག་གི་ཤར་ཕྱོགས། ཏྲེ་ཀ་བྲག་དཀོན་མཆོག་འབྱུང་གནས་ཀྱི་ནུབ་ཕྱོགས། ལྡན་གླང་ཐང་ཆོས་ཀྱི་སྒྲོལ་མའི་ཤར་ཕྱོགས། བྱང་ཕུ་ཚུལ་རྒ་ལོའི་གནས་ཀྱི་ལྷོ་ཕྱོགས། འོར་རྡུལ་བྱམས་སྐྱོང་གི་བཀའ་བསྒོའི་བྱང་ཕྱོགས། བླ་མ་རིན་པོ་ཆེས་རྗེས་སུ་གནང་བའི་དགོན་པ། རྗེ་བཙུན་མ་པརྞ་ཤ་བ་རིས་བྱིན་གྱིས་བརླབས་པའི་མིང་ཡིག་དང་པོ་མཐུན་སྣང་དུ་ཤར་བ་དཔལ་སྤྲུལ་དགོན། དོན་གྱི་ཉོན་མོངས་པ་ཐམས་ཅད་འཇོམས་པའི་ཚོགས་སུ་གྱུར་པའི་ཕྱིར་དཔལ་སྤྲུལ་སྒང་། མོས་གུས་རིན་པོ་ཆེ་མེ་ཏོག་གི་ཆར་འབེབས་པའི་ཡུལ། སྤོས་དྲི་ཞིམ་པ་སྣ་ཚོགས་ཀྱི་ངད་ལྡང་བ། རོལ་མོ་སྣ་ཚོགས་པའི་སྒྲ་འབྱུང་བ། བཅོམ་ལྡན་འདས་དཔལ་ཧེ་རུ་ཀ་མཚན་དང་དཔེ་བྱད་ཀྱིས་བརྒྱན་པའི་བླ་མ་དམ་པ། དཔལ་ཆེན་པོ་དཔའ་བོ་དང་མཁའ་འགྲོའི་ཚོགས་ཀྱིས་ཡོངས་སུ་བསྐོར་བས་བྱིན་གྱིས་བརླབས་པ། སྔོན་གྱི་ཆོས་རྒྱལ་རིགས་གསུམ་མགོན་པོའི་ཐུགས་ཀྱིས་དགོངས་པ། སློབ་དཔོན་ཆེན་པོ་པདྨ་འབྱུང་གནས་ཀྱི་དགེ་བསྙེན། རང་རྟགས་སྲོག་གི་སྙིང་པོ་ཕུལ་བ། སློབ་དཔོན་ཆེན་པོ་པདྨས་དབང་བསྐུར། ལག་ཏུ་རྡོ་རྗེ་བྱིན། གསང་བའི་མཚན་བཏགས། བསྟན་པ་སྲུང་བའི་གཉེར་གཏད་པའི་དགེ་བསྙེན་ཆེན་པོ་ང་འདྲ་དང་། སྤོ་བོ་རྡོ་རྗེ་ཕུར་བ་དང་། གཉན་ལྡང་རྡོ་རྗེ་བློ་གྲོས་དང་། ཁྲོ་ཟིལ་ཁྲོམ་རྡོ་རྗེ་གཞོན་ནུ་ལ་སོགས་པའི་གངས་རིའི་ཕྲེང་བས་བསྐོར་བ། འབྲི་གུང་བྱང་ཆུབ་གླིང་ལས་བྱུང་བས་བདག་གི་མིང་ཡང་དཔལ་བྱང་ཆུབ་གླིང་པར་བརྗོད་པ་དེའི་ཕྱིར་བདག་གི་དགོན་པའི་མིང་ཡང་དཔལ་བྱང་ཆུབ་གླིང་དངོས་གྲུབ་བརྟན་པར་གཟིགས་པ། རྡོ་རྗེ་སེམས་དཔའི་གནས་ཚལ་བཀྲ་ཤིས་པའི་མཛོད་ཅེས་བྱ་བ་ཡིན་ནོ། །ཞེས་གནས་ཀྱི་མཚན་ཉིད་གསལ་བར་གསུངས་པ་སྟེ། ཧེ་རུ་ཀ་དང་སྤྲུལ་པའི་ཆོས་རྒྱལ་སོགས་ཀྱིས་བྱིན་གྱིས་བརླབས་པའི་ཚུལ་དངོས་སུ་བསྟན་པའི་ཤུགས་ལས་གདོད་ནས་གྲུབ་པའི་གནས་ཆེན་པོར་མཚོན་ནུས་པ་དང་། པརྞ་ཤ་བ་རིས་བྱིན་གྱིས་བརླབས་པའི་རྟགས་ཀྱང་། མཚན་ཡིག་གི་ཐོག་མ་དབུ་ཅན་གྱི་པ་ཡི་གཟུགས་མདུན་རིའི་སྤང་ལེབས་ངོས་སུ་གསལ་བ་ཡོད་དོ། །

དེ་ནས་དུས་རིང་ཞིག་འདས་པ་ན་དཔལ་ལྡན་ས་སྐྱ་པའི་བསྟན་འཛིན་ཆེན་པོ་མངའ་རིས་རབ་འབྱམས་པ་ཚུལ་ཁྲིམས་འོད་ཟེར་གྱིས་གདན་ས་བཟུང་། གསང་སྔགས་ལམ་འབྲས་བུ་དང་བཅས་པའི་ཆོས་ཀྱི་འཁོར་ལོ་ཟབ་རྒྱས་སུ་བསྐོར། འཆད་རྩོད་རྩོམ་གསུམ་གྱིས་སངས་རྒྱས་ཀྱི་བསྟན་པ་རྒྱ་ཆེར་རྒྱས་པར་མཛད་དེ་དུས་ཕྱིས་མཁན་པོ་དཔལ་ལྡན་ལྷུན་གྲུབ་ཀྱི་བར་དུ་དར་རྒྱས་སུ་བཞུགས། དེ་ནས་རྐྱེན་འགའ་ཞིག་གིས་གདན་ས་རྣམས་སྟོངས་སུ་གྱུར་པ་ན། ཨོ་རྒྱན་ཆེན་པོའི་གཏེར་ལུང་འཁྲུལ་མེད་དུ་མ་ནས་ཟིན་ཅིང་། རྒྱལ་ཚབ་བྱམས་པ་མགོན་པོའི་རྣམ་པར་སྤྲུལ་པ། མངའ་བདག་མར་པ་ལོ་ཙཱ་བ་ཆེན་པོ་བསམ་བཞིན་མིའི་སྲིད་པ་བཟུང་བ། རྩོད་དུས་ཀྱི་ཐམས་ཅད་མཁྱེན་པ་ཆེན་པོ་ཏཱའི་སི་ཏུ་ཆོས་ཀྱི་འབྱུང་གནས་ཀྱིས་ཞབས་ཀྱིས་གཅགས་ཤིང་། ཡོན་ཏན་རིན་པོ་ཆེ་མ་ཚང་བ་མེད་པའི་དཔལ་གྱིས་ཀུན་ནས་སྤུངས་པའི་གདན་ས་ཆེན་པོ་ཉིད་བཏབ། འཆད་ཉན་སྒོམ་སྒྲུབ་ཀྱི་མཛད་པ་རྒྱ་ཆེན་པོས་སྒྲུབ་བརྒྱུད་བསྟན་པའི་མེ་རོ་གཞི་བཞེངས་སུ་བསླངས། གནས་འདིའི་སྟོད་སྨད་ཀྱི་བྲག་ཕུག་དབེན་གནས་རྣམས་སུའང་ཐུགས་དམ་ཅི་རིགས་པར་མཛད་ཅིང་། རྩ་གསུམ་རབ་འབྱམས་སྤྱི་དང་ཁྱད་པར་མ་མགོན་ལྕམ་དྲལ། དཔལ་ལྡན་ཞིང་སྐྱོང་དབང་པོ་སོགས་ཀྱིས་ཞལ་བསྟན་ཅིང་ཞིང་སྐྱོང་གནས་པའི་བྲག་རི་དག་ཀྱང་ངོས་འཛིན་གནང་བ་ད་ལྟ་ཡོངས་ལ་གྲགས་པ་ལྟར་དང་། ཁྱད་པར་རྒྱུད་བླ་མ་གསུངས་པའི་སྐབས་ཤིག་འཕགས་པ་ཐོགས་མེད་ལྷའི་རྒྱལ་པོའི་ཆ་བྱད་ཅན། སྐུ་ཚད་ཤིན་ཏུ་ཆེ་བ་ཞིག་ད་ལྟ་ཙཱ་འདྲ་རིན་ཆེན་བྲག་གི་གནས་མཐིལ་དུ་ངོས་འཛིན་མཛད་པའི་ཕྱོགས་འདི་ནས་གཟིགས་པ་སོགས་རྒྱུ་མཚན་མང་པོས་གསུང་སྒྲོས་སུ། ཧེ་རུ་ཀ་གནས་དཔལ་སྤུངས་སུ། །ཨོ་རྒྱན་མཁན་པོའི་འབངས་དེས་བྲིས། །ཞེས་འབྱུང་བའང་མི་བསླུ་བའི་ཚད་མ་ཆེན་པོ་ཡིན་ནོ། །རྗེ་དེ་ཉིད་ཀྱི་ཞལ་སློབ་གྲུབ་པའི་ཁྱུ་མཆོག་བམ་སྟེང་སྤྲུལ་པའི་སྐུ་ཚོགས་གཉིས་ལེགས་གྲུབ་ཀྱིས་ཀྱང་གནས་འདི་དག་གི་ཕན་ཚུན་དུ་སྤྲོས་མེད་ཀྱི་རྣལ་འབྱོར་ལ་གཞོལ་བ་ན། རང་ཉིད་ཀྱི་སྐྱེ་བ་སྔ་མ་གྲུབ་ཐོབ་ཁྱི་ཐུལ་ཅན་དུ་གྱུར་པས་གནས་འདི་དང་ཉེ་བར་སྒྲུབ་པ་ཡུན་རིང་མཛད་པའི་ཚུལ་གསལ་བར་དྲན་ཏེ་སྒྲུབ་ཕུག་དང་གྲུབ་པའི་རྟགས་སོགས་ཀྱང་གསལ་བར་མཛད་པར་གྲགས་སོ། །དེ་བཞིན་དུ་རིག་འཛིན་རོལ་པའི་རྡོ་རྗེའི་སྒྱུ་འཕྲུལ་ཀརྨ་བདུད་འདུལ་རྒྱལ་པོ་དང་། མངའ་བདག་ཚངས་པ་ལྷའི་མེ་ཏོག་གི་རྣམ་རོལ་རིག་འཛིན་རྡོ་རྗེ་དྲག་པོ་དག་གིས་ཀྱང་དབུ་ཆེ་བྲག་དཀར་འདི་ཉིད་ཐུགས་རྗེ་ཆེན་པོ་རྒྱལ་བ་རྒྱ་མཚོའི་གནས་ཡིན་པར་ཞལ་གྱིས་བཞེས་པར་གྲགས་པ་དང་། དུས་ཕྱིས་གཉགས་ཛྙཱ་ནའི་ཡེ་ཤེས་ཀྱི་རོལ་པ་མཁན་ཆེན་བྱང་ཆུབ་སེམས་དཔའ་ཆེན་པོ་ཀརྨ་ངེས་དོན་བསྟན་པ་རབ་རྒྱས་ཀྱི་གཟིགས་སྣང་ལའང་ཚུལ་དེ་དང་མཐུན་པར་བྱུང་ཞིང་། རྗེ་ཉིད་གནས་འདིའི་དབུ་རྩེར་ཕེབས་ནས་ཡུལ་ཕྱོགས་ཀྱི་ས་བཅུད་ཉམས་པ་གསོ་བའི་གཏེར་ཆེན་ཆེད་དུ་སྦ་བར་མཛད་པའི་སྐབས། ཉི་མ་རྩེ་ཤར་ལ་ངོ་མཚར་བའི་མཇའ་མཚོན་ནམ་མཁའི་དཀྱིལ་ནས་གཏེར་གནས་དེ་ཉིད་དུ་ཟུག་པ་ཀུན་གྱིས་མཐོང་བ་ཡིན་ནོ། །སྙིགས་དུས་ཀྱི་རྡོ་རྗེ་འཆང་འགྲོ་བའི་མགོན་པོ་པདྨའི་རྒྱལ་ཚབ་པདྨ་ཉིན་བྱེད་དབང་པོས་སྒྲུབ་པའི་སྡེ་བཙུགས། འཁོར་འདས་མཉམ་ཉིད་ཀྱི་དགོངས་པས་སྣོད་བཅུད་དཀྱིལ་འཁོར་གསུམ་དུ་བྱིན་གྱིས་བརླབས་པའི་མཚན་མ་གཡས་ཕྱོགས་ཀྱི་རི་མགུལ་དུ་ཞབས་ཀྱི་རྗེས་སྦས་པའི་ཚུལ་གྱིས་བཞུགས་ཤིང་། གངས་ཅན་མགོན་པོ་རྒྱལ་དབང་ཀརྨ་པ་ཞྭ་དམར་ནག་དཔལ་ལྡན་དཔའ་བོའི་དབང་ཕྱུག་སོགས་ཡོངས་གྲགས་འཕགས་ཆེན་དུ་མས་ཞབས་ཀྱིས་གཅགས་ཤིང་གསང་སྔགས་ཀྱི་སྒྲུབ་ཆེན་མཛད། ལྷ་སྲིན་དམ་ལ་བཞག ཆོས་ཀྱི་འཁོར་ལོ་བསྐོར་ཏེ་ནན་ཏན་བྱིན་གྱིས་བརླབས་པས་ཀྱང་ནོར་བུའི་རྒྱལ་པོ་བྱི་དོར་བྱས་པ་ལྟར་གནས་མཆོག་འདི་ལྷག་པར་འབྲེལ་ཚད་དོན་ལྡན་དུ་གྱུར་པ་སྟེ། བན་སྒར་ཀུན་མཁྱེན་གྱིས། ཕུན་ཚོགས་བཀྲ་ཤིས་རྟགས་ཀྱི་མཚན་མ་ཅན། །ཞབས་སེན་རྩེ་མོས་རེག་པའི་རྡུལ་ཕྲན་ཡང་། །འགྲོ་བའི་མཆོད་རྟེན་མཆོག་ཏུ་གྱུར་པ་ཡི། །མཚུངས་མེད་ཆོས་རྗེའི་ཞབས་ལ་གསོལ་བ་འདེབས། །ཞེས་རྗེ་བདུན་པ་ལ་བསྔགས་པ་བརྗོད་པས་མཚོན་ནོ། །

གཉིས་པ་གནས་སྒོ་དངོས་ཇི་ལྟར་ཕྱེས་པའི་ཚུལ་ནི། གཏེར་ཆེན་རཏྣ་གླིང་པའི་བསྟན་པ་སྤྱི་ལུང་རྒྱལ་ཚབ་ཀྱི་ཆོས་བདག་རྣམས་གསལ་བར་བསྟན་པའི་སྐབས་སུ། ནོར་བུའི་མིང་ཅན་ཁམས་ཀྱི་ལྷོ་ཕྱོགས་འབྱུང༔ ཞེས་དང་དྲི་མེད་ཀུན་དགའ་སོགས་གཏེར་རྙིང་འགའ་ཞིག་ནས་ཀྱང་ལུང་གིས་ཟིན་པའི་རྩོད་བྲལ་དུས་བབས་ཀྱི་སྤྲུལ་པའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པ་ཉིད་སྐུ་ན་གཞོན་པའི་སྐབས་སུ་འདིར་ཡུན་རིང་བཞུགས་པ་ན་ཧེ་རུ་ཀའི་གནས་མཆོག་ཡིན་པའི་ངེས་པ་གསལ་བར་གཟིགས་པ་དང་། ཁྲི་སྲོང་ཡང་སྲིད་ཀུན་མཁྱེན་འཇམ་དབྱངས་མཁྱེན་བརྩེའི་དབང་པོས་གདན་ས་ཆེན་པོར་བླ་མ་དགོངས་འདུས་ཀྱིས་དབང་སྒྲུབ་ཆེན་པོའི་སྐབས་སུ་གནས་འདི་དེ་བཱི་ཀོ་ཊཱི་གསུམ་པ་ཡིན་ཅེས་ཡེ་ཤེས་ཌཱ་ཀིའི་གསུང་ལས་གསན་པ་དང་། ཁོ་བོས་ཀྱང་ཉིང་འཁྲུལ་སྔ་རྗེས་སུ་གནས་ཆེན་ཞིག་ཡིན་ནམ་སྙམ་དུ་རྣམ་པར་རྟོག་པའི་རྒྱུ་ལས། མེ་འབྲུག་གི་ལོ་མཇུག་ཏུ་གཏེར་ཆེན་རིན་པོ་ཆེ་འདིར་ཕེབས་པའི་སྐབས། ལང་གྲོ་ལོ་ཙཱ་བ་ཆེན་པོའི་རྣམ་འཕྲུལ་དུ་གདོད་ནས་གྲུབ་པ་དབོན་སྤྲུལ་རིན་པོ་ཆེ་དང་ཁོ་བོས་ཀྱང་བཀྲ་ཤིས་པའི་མཎྜལ་དང་བཅས་བསྟན་འགྲོའི་དོན་དུ་ཆེད་བསྐུལ་ཞུས་པའི་རྟེན་འབྱུང་ལས། དཔའ་བོ་དབང་ཆེན་བྲག་ནས་གནས་ཆེན་ཉེར་ལྔའི་མདོ་བྱང་བཞེས། མེ་སྦྲུལ་གནམ་ལོ་གསར་དུ་ཚེས་པའི་ཆོ་འཕྲུལ་ཟླ་བའི་དཀར་ཕྱོགས་ཀྱི་རྒྱལ་བ་དང་གནས་ཀྱི་མཐིལ་དུ་ཚོགས་འཁོར་དང་། གནས་རྩེར་བསང་བརྔན་གསེར་སྐྱེམས་ཀྱིས་ཐོག་དྲངས་ལྷ་སྲིན་དམ་ལ་འདོགས་པའི་ཆོ་ག་རྒྱས་པར་མཛད་པའི་མཐར། གནས་ཀྱི་སྙིང་པོའི་ཞགས་ཚུལ་ངོ་སྤྲོད་ལ་ཕེབས་པ་ན་གནས་བདག་སྔགས་ཀྱི་སྲུང་མ་མངོན་སུམ་དུ་གཟིགས་ཏེ་གཞན་ངོར་རེ་ཞིག་ཐུགས་དྲན་མེད་པ་ལྟ་བུར་གྱུར་པ་དང་། ཕྱི་ཉིན་ཡང་ཚོགས་གཏོར་མཛད་པས་གནམ་ས་སྦྲེལ་བའི་རླུང་ནག་སོགས་གཉན་ཆ་ཤིན་ཏུ་ཆེ་བའི་རྩུབ་འགྱུར་བྱུང་ཞིང་གཟིགས་སྣང་རྒྱས་པ་གཏན་ལ་མ་ཕབ་པར་རེ་ཞིག་འཇོག་པར་མཛད་པ་ནི། གྲུབ་ཐོབ་གཉིས་འགར་ཆོས་གསུམ་གྱིས་ཙཱ་རིའི་གནས་སྒོ་འབྱེད་དུ་བྱོན་པའི་ལོ་རྒྱུས་དང་མཚུངས་པར་གནས་ཤིན་ཏུ་གཉན་པས་བྱ་སླའི་ཚུལ་གྱིས་མི་འབྱུང་བར་སྟོན་པ་ཡིན་ནོ། །དེ་ནས་དོན་འགྲུབ་ས་མོ་ལུག་གི་གནམ་ལོ་ཤར་བའི་ཚེ་སླར་ཡང་གཏེར་ཆེན་ཉིད་འདིར་ཕེབས་ཤིང་། རྒྱལ་བ་ཡབ་སྲས་ཞལ་རྒྱས་པའི་སྐབས་སུ་རྩ་གསུམ་མཁའ་འགྲོའི་ལུང་ལས། ཐུགས་ཀྱི་གནས་མཆོག་ཙཱ་འདྲ་འདི༔ སྙིང་རྩ་འདབ་བརྒྱད་ཚུལ་དུ་ཡོད༔ ཤར་སྒོ་དཔལ་ཆེན་ཧེ་རུ་ཀའི༔ ལྷ་ཁང་བཞེངས་ཤིང་གནས་སྲུང་ལ༔ རྟེན་བཅའ་རྟེན་གཟུགས་བྱས་ནས་སུ༔ གནས་སྒོ་འབྱེད་པ་ཤིན་ཏུ་གཅེས༔ ཞེས་སོགས་གནས་ཞལ་གསལ་བར་འབྱེད་པའི་དུས་ལ་བབས་པ་དང་། འབྱེད་པའི་ཐབས་ཀྱི་སྤང་བླང་ལུང་བསྟན་བྱུང་བ་བཞིན། སྒྲུབ་བརྒྱུད་བསྟན་པའི་སྲོག་ཤིང་དབོན་སྤྲུལ་རིན་པོ་ཆེས་དགོངས་ཁྱབ་ཆེན་པོས་མགོ་ལུང་གནང་སྟེ་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་དུ་དཔལ་ཆེན་ཧེ་རུ་ཀའི་ལྷ་ཁང་བཞེངས་པ་ལ་ཞུགས། དཔལ་ཡེ་ཤེས་ཀྱི་མགོན་པོ་རྡོ་རྗེ་ཕྱག་དྲུག་པ་དང་། སྔགས་སྲུང་ཨེ་ཀ་ཛཱ་ཊཱིའི་ཕྱི་ནང་གསང་བའི་རྟེན་ཁྱད་པར་ཅན་བཙུགས། སྔགས་བདག་མཁའ་ནག་སོགས་ཀླུ་རྒྱལ་སྤྱི་དང་བྱེ་བྲག་པའི་རྟེན་བཅའ་བ་སོགས་འཕྲལ་དུ་བསྒྲུབས་ནས། རྙིང་མ་ཡོངས་གྲགས་ལུགས་ཀྱི་ཧོར་ཟླ་ལྔ་པའི་སྤྲེལ་ཟླ་བའི་ཚེས་བརྒྱད་ལ་གནས་བདག་ཆེན་པོ་རྡོ་རྗེ་དཔལ་འབར་གྱི་མགུལ་དུ་ཕེབས་ནས་རྩ་གསུམ་རྒྱ་མཚོར་ཚོགས་མཆོད། གཞི་བདག་རྟེན་ལ་བསྐོར་བ། བསང་བརྔན་གསེར་སྐྱེམས་ཀྱི་ཆོ་ག་རྒྱས་པར་མཛད་ཅིང་དཔོན་སློབ་ཉུང་ངུས་ཧེ་རུ་ཀའི་ལམ་ནས་ཕེབས་ཏེ་ཕྱི་ནང་གི་བསྐོར་ལམ་ཕྱོགས་མཚོན་པར་མཛད་ཅིང་། སླར་དཔལ་གྱི་ཙཱ་རི་ཏྲའི་འབྱེད་ཚུལ་དང་མཚུངས་པར་རྟེན་འབྲེལ་གྱི་བྱེ་བྲག་འགའ་ཞིག་བཅས་ལམ་ཤུལ་ལེགས་པ་གཏོད་དགོས་པར་བཀས་གནང་། ཕེབས་ལམ་དུ་བཞུགས་པའི་རང་བྱོན་ཕལ་ཆེར་ངོ་སྤྲོད་མཛད། ཁྱད་པར་འབུར་མོ་བྲག་ནས་བྱུང་བའི་ཁ་བྱང་གི་དོན་བཞིན། སྤྲེལ་ཟླའི་ཚེས་བཅུར་དཔལ་ཆེན་པོ་རང་བྱུང་གི་གཡས་ཕྱོགས་གུ་རུའི་གསང་ཕུག་གི་སྦུག་ནས་དུར་ཁྲོད་ཆེན་པོ་བརྒྱད་དང་ཡུལ་ཆེན་དྲུག་ཅུ་རྩ་བཞིའི་ས་སྣ་ལས་གྲུབ་པའི་པར་བུའི་ནང་དུ་དེ་བཞིན་གཤེགས་པ་ཐམས་ཅད་ཀྱི་རིང་བསྲེལ་འདུས་པའི་དམ་རྫས་རིན་པོ་ཆེའི་ཏོག་བདུན་ཕྲག་གཉིས། ཟབ་མོའི་གདམས་སྐོར་ཚན་བཞི། གནས་ཀྱི་དཀར་ཆག་བཅས་བཞུགས་པ་སྤྱན་དྲངས་ཤིང་རི་ཁྲོད་འདི་རང་དུ་མངའ་དབུལ་ཞིང་གཏེར་ཞལ་ཕྱེས་ཏེ་ཤོག་སེར་འབེབས་པར་མཛད་པ་དེའི་སྐབས་སུའང་། ནམ་མཁར་འཇའ་སྤྲིན་ཤར་བ་དང་། གཏེར་གནས་སུ་བྱ་རོག་ཟུང་གིས་འཁྲེན་ཅིང་བདག་ཏུ་འཛིན་པའི་རྣམ་འགྱུར་བྱེད་པ་སོགས་དེར་ཡོད་རྣམས་ཀྱིས་མཐོང་ངོ་། །

དྲུག་པ། གནས་ཀྱི་བཞུགས་བྱང་དཀར་ཆག་དངོས་ལ་གཉིས། ལུང་གི་ཁུངས་སྨོས་པ། དེ་ཉིད་བཞུགས་ཚུལ་དངོས་དང་སྦྱོར་བའོ། །

དང་པོ་ནི། གནས་ཆེན་ཉེར་ལྔའི་མདོ་བྱང་ལས། ཡོན་ཏན་ཐུགས་ཀྱི་གནས་མཆོག་བསྟན་པ་ནི༔ བོད་ཀྱི་མདོ་ཁམས་འབྲི་ཞེས་བྱ་བ་རུ༔ དཔལ་གྱི་རི་ནི་གླང་ཆེན་འགྱིང་བ་འདྲ༔ དེ་བཱི་ཀོ་ཊཱི་ཙཱ་འདྲ་རིན་ཆེན་བྲག༔ ཧེ་རུ་ཀ་དཔལ་དགུ་ཡི་ཚུལ་དུ་གནས༔ པདྨའི་སྒྲུབ་ཕུག་མེ་ཏོག་ཁ་བྱེ་འདྲ༔ བྲག་གི་ལོགས་སུ་ཞི་ཁྲོ་རང་བྱོན་དང༔ ཐུགས་ཀྱི་རིག་འཛིན་ནམ་མཁའི་སྙིང་པོ་ཡི༔ སྒྲུབ་པའི་གནས་མཆོག་ཟླ་གམ་དབྱིབས་ཅན་ཡོད༔ མཆོག་སྒྲུབ་འདོད་པས་འདི་རུ་རྩེ་གཅིག་སྒྲུབས༔ ཁྱད་པར་བདག་གི་གཙུག་རྒྱན་བི་མ་ལས༔ བྱིན་གྱིས་བརླབས་པའི་གནས་མཆོག་གུད་དུ་སྦས༔ སྔགས་སྲུང་གནས་པའི་ཤིང་ནི་བྷ་ཊ་ཡི༔ ཉེ་བའི་ཕུག་པར་ཨོ་རྒྱན་བདག་ཉིད་གནས༔ དེ་ཚེ་ཐུགས་ཀྱི་རིག་འཛིན་ཧཱུྃ་ཀ་ར༔ བྱོན་ཏེ་ཞག་གསུམ་བཀའ་ཡི་བསྡུ་བ་མཛད༔ སློབ་དཔོན་གཉིས་ཀྱི་སྐུ་བརྙན་རང་བྱོན་དང༔ ཡེ་ཤེས་སྐུ་ཡི་ཞབས་ཀྱི་མཚན་མ་གསལ༔ ཁྱད་པར་ཅན་གྱི་ངོ་མཚར་དེ་འདྲ་བདོག༔ ཅེས་དང་། སེང་བྲག་ཡང་བྱང་དཔའ་བོ་བྲག་ནས་བྱུང་བ་ལས། ཡང་བྱང་སྦས་པའི་བྲག་འདིའི་ཆུ་འབབ་པའི་མདར༔ རི་གླང་ཆེན་འགྱིང་བ་འདྲ་བའི་ཟེ་བ་ན་ཐུགས་རྗེ་ཆེན་པོའི་ཕོ་བྲང་བྲག་དཀར་ཁྲོ་ལེ་བ་ཡོད༔ དེར་གནས་སྲུང་རྡོ་རྗེ་དཔལ་འབར་མཆོད་ཅིག༔ རི་དེའི་གདོང་པ་ཤར་ཕྱོགས་སུ་རྒྱུག་པ་བྲག་རི་ཐལ་མོ་སྦྱར་བ་འདྲ་བའི་དབེན་རྩ་རུ༔ ཤིང་བྷ་ཊ་ལོ་མ་དར་སྐུད་འདྲ་བ་ཡོད༔ དེ་ནས་འདོམ་དགུ་གཞལ་བའི་སར་ཧཱུྃ་ཀ་རས་རྫུ་འཕྲུལ་གྱིས་བྱོན་པའི་སྒྲུབ་ཕུག་ཡོད༔ དེ་ནས་མདའ་རུ་མདའ་རྒྱངས་གང་ཙམ་ན་དཔལ་ཆེན་པོ་འགྱིང་བ་འདྲ་བའི་བྲག་ལོགས་རྣམས་སུ་འགྲོ་འདུལ་ཐུགས་ཀྱི་གཏེར་ལྔ་སྦས་པའི་ལག་སོར་འདྲ་བའི་མཐིལ་དུ་གཏད་རྒྱ་ཡོད༔ ཅེས་འབྱུང་ཞིང་། ཁྱད་པར་འདི་ཉིད་ཀྱི་དཀར་ཆག་གཏེར་བྱོན་ལས་ཞིབ་པར་འབྱུང་བ་འོག་ཏུ་སྨོས་པ་ལྟར། གཟིགས་སྣང་དང་བློ་ཡིས་སྒྲོ་བཏགས་པ་གུང་བསྒྲིགས་པ་ཙམ་མ་ཡིན་པར་རྡོ་རྗེའི་གསུངས་ལས་གསལ་ཞིང་ཞིབ་པར་འབྱུང་བ་ཡིན་ནོ། །གཉིས་པ་ནི། དེའང་འཕགས་པ་རྣམས་ཀྱི་གཟིགས་པའི་དབང་དུ་བྱས་པ་ནི་གོང་དུ་ཇི་སྐད་སྨོས་པ་ལྟར་རང་ཅག་སོ་སྐྱེའི་སྤྱོད་ཡུལ་མ་ཡིན་ལ། སོ་སྐྱེ་ཐ་མལ་པ་དག་གི་མཐོང་ཚུལ་ཡང་མཁྲིས་ནད་ཅན་གྱིས་དུང་དཀར་སེར་པོར་མཐོང་བ་ལྟར་དངོས་སྣང་ཉིད་ལའང་ལོག་འཁྲུལ་འབའ་ཞིག་ཏུ་རྟོགས་པས་འཆད་པར་བྱ་བ་མ་ཡིན་ལ། འདིར་རྣལ་འབྱོར་ཅན་ལ་ཇི་ལྟར་སྣང་ཞིང་འཕགས་པའི་གཟིགས་པས་གཏན་ལ་ཕབ་པ་དེ་ཉིད་ཀྱི་རྗེས་སུ་འབྲང་བས་བརྟག་པར་བྱ་བ་ཡིན་པས། དེའི་དབང་དུ་བྱས་ཏེ་འཆད་ན། སྤྱིར་ཆོས་སྐྱོང་བའི་རྒྱལ་པོ་སྡེ་དགེའི་མངའ་རིས་འདིར་ཡོན་ཏན་གྱི་གནས་ལྔ་དང་འཕྲིན་ལས་ཀྱི་གནས་ཕལ་མོ་ཆེ་བཞུགས་པའི་སྟོད་ཀྱི་ཆར་ཟིལ་ཁྲོམ། མུ་ནམ། ང་འདྲ། གཙང་དཀར་སོགས་སྲིད་པའི་གངས་རི་རྟག་ཆགས་དཀར་ཞིང་བསིལ་བ་རྣམས་ནི་ཐབས་བདེ་བ་ཆེན་པོ་ཝཾ་ཡིག་གི་ཚུལ་དཔལ་ཆེན་ཧེ་རུ་ཀ་གཙོ་བོར་གྱུར་པའི་གནས། སྨད་ཀྱི་ཨ་ཏ་རོང་། སྤོ་རོང་། རྨེ་རོང་། གཏེར་རོང་སོགས་རོང་ཆེན་ཤིན་ཏུ་མཐུག་ལ་དྲོད་ཆེ་བ། ངམ་གནག་ཅིང་རྩུབ་པ་རྣམས་ནི་ཤེས་རབ་སྟོང་པ་ཉིད་ཨེ་ཡིག་གི་ཚུལ་ཀྲོ་དྷཱི་ཤྭ་རི་མ་རྣམས་གཙོ་བོར་གྱུར་པའི་གནས། བར་དུ་ཁྲོ་གཞུང་། ཟིལ་བརྒྱུད། ཨ་ལོ། དཔལ་སྤུངས། རྨེ་ཤོད། རོང་མེ། གཏེར་ལྷུང་། འཛིང་ཁྲོ་རྣམས་ནི་རྩ་གསུམ་འཁོར་ལོ་ལྔ་ལྡན་གྱི་ཚུལ་དཔའ་བོ་དང་མཁའ་འགྲོ་རྒྱ་མཚོ་འདུ་བའི་གནས་སུ་གྱུར་པའི་ནང་ཚན། ཐུགས་ཀྱི་འཁོར་ལོ་ཙཱ་འདྲའི་གནས་མཆོག་འདི་ཉིད་དམིགས་བསལ་ཆགས་ཚུལ་གྱི་དབྱིབས་ནི་དཀར་ཆག་རྩ་བ་ལས། ཙཱ་འདྲ་རིན་ཆེན་བྲག་འདི་ནི༔ བདེ་ཆེན་འཁོར་ལོའི་རྩ་འདབ་ཚུལ༔ ཞེས་གསུངས་ཏེ། རྡོ་རྗེ་ཐུགས་ཀྱི་ཕོ་བྲང་དུ་མཚོན་པའི་ཕྱིར་ཙིཏྟ་སྙིང་གི་དབྱིབས་སུ་ཆགས་ཤིང་། ཐུན་ཆེན་པོ་བརྒྱད་དག་ཅིང་འོད་གསལ་ཆོས་སྐུའི་དགོངས་པ་འཆར་བར་བྱེད་པ་ཆོས་ཀྱི་འཁོར་ལོའི་རྩ་འདབ་བརྒྱད་དུ་མཚོན་པའི་སྒང་རྒྱུད་རྣམས་ལས། ཤར་ཕྱོགས་རྡོ་རྗེ་ཆེན་པོའི་རྩ་འདབ་ནི་ཡང་ཁྲོད་ཆགས་པའི་རི་རྒྱུད་འདི་ཡིན་པ་སོགས་གོང་སྨོས་ལུང་གི་གྲུབ་པས། དེ་ལྟ་ན་ཤར་ཕྱོགས་ཡེ་ཤེས་ཀྱི་རྩ་འདབས་སུའང་བཞེད་པར་སྣང་བས་འདིར་སྒོམ་ན་མཆོག་གི་རྟོགས་པ་སྐྱེ་ཞིང་མཁའ་སྤྱོད་ཆེ་འབྲིང་ཆུང་ངུ་། གྲོལ་ལུགས་རྣམ་པ་བཞི་ལ་སོགས་པས་གདོད་མའི་གྲུབ་མཐའ་སྙོགས་ནུས་པ་དང་། དཔལ་ཆེན་ཐུགས་ཀྱི་ལྷ་ཚོགས་བཞེངས་དགོས་པའང་དེའི་རྟེན་འབྱུང་ལས་བྱུང་བ་ཡིན། དེའི་ཤུགས་ལས་ལྷོ་ཕྱོགས་རིན་ཆེན་ཅོད་པན་གྱི་རྩ་འདབ་ནི་གདན་ས་ཆེན་པོ་དཔལ་སྤུངས་ཐུབ་བསྟན་ཆོས་འཁོར་གླིང་ཆགས་པའི་རི་རྒྱུད་པ་སྤང་སྒང་ཟེར་བ་འདི་ཡིན་པས་སྙན་གྲགས་རྒྱ་ཆེར་འབྱུང་བ་དང་གདན་ས་འདིར་བཞུགས་པ་རྣམས་ལ་ཡོན་ཏན་གྱི་ཚོགས་རྒྱུད་ཚོད་དང་མཐུན་པར་འཕེལ་ཞིང་རྒྱས་པ་ཡིན། ནུབ་ཕྱོགས་པདྨ་ཆེན་པོའི་རྩ་འདབ་ནི་ར་ཆེན་སྒང་རྒྱུད་འདི་ཡིན་ཅིང་དེར་བཀྲ་ཤིས་དཔལ་གྱི་དེའུ་དང་ཚེ་དཔག་མེད་རང་བྱོན་ཀྱང་གསལ་བས། དེར་ཆོས་དང་མཐུན་པར་གནས་བཅའ་ན་ཚེ་རིང་ཞིང་སྒྲུབ་པ་བྱས་ན་ཚེ་དབང་མཆོག་གི་དངོས་གྲུབ་འབྱུང་། བྱང་ཕྱོགས་སྟོབས་པོ་ཆེའི་རྩ་འདབ་དཔའ་འོག་ཕྱོགས་སུ་ཟུག་པའི་གདོང་རྒྱུད་འདི་ཡིན་པས་རི་རྒྱུད་འདིར་བློ་ནུས་སྟོབས་རྩལ་ཅན་གྱི་སྐྱེ་བོ་འབྱུང་བ་དང་། སྒྲུབ་པ་བྱས་ན་དྲག་པོའི་ཕྲིན་ལས་འགྲུབ། མཚམས་བཞིའི་རྩ་འདབ་རྣམས་ཀྱང་དེ་དག་གི་བར་བར་ནས་གྱེས་པའི་ཚུལ་གྱིས་ཤིན་ཏུ་གསལ་བར་ཡོད་དེ་རང་རང་གི་བྱེད་ལས་དང་མཚུངས་པའི་དངོས་གྲུབ་འགྲུབ་པའི་གནས་ཡིན་ནོ། །བྱེ་བྲག་གནས་ཀྱི་བཀོད་པ་ནི་ཐོག་མར་གནས་ཀྱི་དབུས་ནས་འཆད་པར་མཛད་པ་སྟེ། དཀར་ཆག་ལས། བཛྲ་ཙིཏྟ་ཀོ་ཊཱི་ཞེས༔ དབུས་ཀྱི་བྲག་ནི་ཧེ་རུ་ཀ༔ གོ་རཱི་ལྷ་མོ་བརྒྱད་ཀྱིས་བསྐོར༔ ཞེས་གསུངས་པའི་ལེགས་སྦྱར་དེ་ཉིད་བོད་སྐད་དུ་རྡོ་རྗེ་ཐུགས་ཀྱི་ཕོ་བྲང་ཞེས་པ་ནི་ཤར་ཕྱོགས་རྡོ་རྗེའི་འདབ་མ་ཡིན་པའི་ཕྱིར་ཡང་ཁྲོད་ཀྱི་ས་ཆ་འདིའི་སྒེར་མིང་ཡིན་ལ། འདིའི་གཡས་གཡོན་གྱི་བྲག་རི་དཔལ་ཆེན་པོའི་ཕྱག་དྲུག རྩེ་མོའི་བྲག་ནི་དབུ་གསུམ། རི་ཁྲོད་འདིར་ཐུགས་ཀ་འདི་འོག་གི་གདོང་རྒྱུད་གཉིས་གཉིས་སུ་གྱེས་པ་ནི་ཞབས་བཞི་བགྲད་པའི་ཚུལ་ལོ། །གོ་རཱི་ལ་སོགས་མདུན་གྱི་བཀོད་པ་ནི་འོག་ཏུ་འཆད་དོ། །དེས་ན་དཔལ་གྱི་ཙཱ་རི་ཅིག་ཆར་དུ་ས་འོག་ས་སྟེང་མཁའ་སྤྱོད་ཀྱི་ཕག་མོ་གསུམ་འཛོམས་པས་འཇིག་རྟེན་བདེ་བར་ལུང་གིས་བསྔགས་པ་བཞིན། འདིར་ཡང་སྟེང་དུ་མཁའ་སྤྱོད་དང་འོག་ཏུ་ས་འོག་སྤྱོད་ཀྱི་དཔལ་ཆེན་པོའི་ཕོ་བྲང་བཞུགས་པ་དག་པའི་གཟིགས་ངོར་གསལ་ཞིང་། བར་དུ་ས་སྤྱོད་ཀྱི་དཔལ་ཆེན་པོའི་ཕོ་བྲང་རྟེན་དང་བརྟེན་པར་བཅས་པ་བྱུང་བ་ལས་འཇིག་རྟེན་ན་བདེ་སྐྱིད་ཕུན་སུམ་ཚོགས་པ་འབྱུང་བའི་རྒྱུད་གྲུབ་པ་ཡིན་ནོ། །གཞན་ཡང་དཔལ་གྱི་ཙཱ་རི་ཏྲ་དང་ཚུལ་མཚུངས་པར། རི་ཁྲོད་གཡས་ཀྱི་རི་རྒྱུད་འདི་ཐབས་རྡོ་རྗེ་རི། གཡོན་ཤེས་རབ་དྲིལ་བུ་རི། དབུས་ཟུང་འཇུག་དབུ་མ་རི། རྩེ་མོ་དག་པ་མཁའ་སྤྱོད་ཀྱི་རི་ཞེས་བྱ་ལ། དེ་དག་གི་ཐོག་མ་གཡས་ཕྱོགས་ཐབས་རྡོ་རྗེ་རིའི་བྲག་ལག་སོར་བཀྲམ་པ་ལྟ་བུའི་མདུན་ངོས་སུ། གུ་རུ་པདྨའི་སྒྲུབ་ཕུག་མེ་ཏོག་ཁ་བྱེ་བ་འདྲ་བའི་ཕུག་ཏུ་གུ་རུའི་ཞབས་རྗེས་ཁྲུ་གང་ལྷག་པ། ཕྱག་མཁར་གྱི་རྗེས། གཏེར་སྒོ་ལ་ཕྱག་རྟགས་ཀྱི་རྒྱས་གདབ་པ། སྒོ་གདོང་དུ་བརྡ་ཡིག་གི་འབྲུ་གསུམ་དང་། གཡོན་ལོགས་སུ་རིགས་གསུམ་མགོན་པོ། མདུན་འོག་སྒྲོལ་མ་དཀར་མོ། བྲག་ལོགས་རྣམས་སུ་ཞི་ཁྲོ་དམ་པ་རིགས་བརྒྱ་རང་བྱོན་གྱིས་ཚུལ་དུ་བཞུགས། དེའི་གཡས་ཕྱོགས་ནས་ཡར་འཛེགས་པའི་ནགས་རོང་དོགས་པོར་གུ་རུའི་ཞབས་རྗེས་ཁྲུ་གང་ལྷག་པ། དེའི་ཡར་ཐད་དུ་ལྷ་སྲིན་དམ་ལ་བཞག་ཅིང་ཆོས་འཁོར་བསྐོར་བའི་བཞུགས་ཁྲི་རང་བྱུང་གི་ཟུར་དུ། ཨོ་རྒྱན། མཚོ་རྒྱལ། བེ་རོ་རྣམས་རང་བྱོན། གུ་རུའི་ཕྱག་མཁར་ལས་སྐྱེས་པའི་ཤུག་སྡོང་རྒན་པོ། དེ་ནས་བཟུང་སྒང་རྒྱུད་གྱེན་དེད་དུ་ཕྱིན་པའི་ལམ་དུ་ཧ་ཡིག་དཀར་པོ་གཉིས། ཨ་ཡིག་དཀར་པོ་གཅིག་མཚོ་རྒྱལ་བཞུགས་པའི་གནས་སུ་བདུད་རྩི་ཕྱག་མཆོད་མཛད་པའི་ཕྱག་རྗེས་དང་ཞབས་རྗེས། ཐོད་བརྒལ་གཟིགས་པའི་བྲག་ལྟེམ་སོགས་ཡོད། བདུད་རྩིས་བརླན་པའི་ཕྱག་གིས་རེག་པ་ལས་རྡོ་འབུར་ཞིག་གི་ངོས་སུ་ཕག་མོ་ལྷ་ལྔ་དམར་སྨུག་ཏུ་བྱོན་པ་ནི་ཕྱིས་སུ་གནས་མཇལ་དག་གིས་བཀོག་པ་ད་ལྟ་དཔལ་ཆེན་པོའི་ལྷ་ཁང་གི་བདེ་མཆོག་ནང་གཞུག་ཏུ་བཞུགས། པདྨའི་སྒྲུབ་ཕུག་ནས་གཡས་བསྐོར་དུ་ཕྱིན་པའི་ལམ་ཁ་བྲག་ཟེ་བ་ལྟ་བུའི་ངོས་སུ་ཛཾ་བྷ་ལ་དམར་པོ། བེ་རོའི་སྒྲུབ་ཕུག་འོག་མ་ཤར་དུ་ལྟ་བའི་ཀླད་ཀྱི་གཡོན་ཕྱོགས་སུ་སྒྲུབ་ཕུག་གོང་མ་འདི་དག་ཏུ་བེ་རོའི་ཕྱག་ཞབས་ཀྱི་རྗེས་སོགས་བཞུགས། དེའི་གཡོན་ཕྱོགས་སུ་གུ་རུའི་གསང་ཕུག་མདོ་གཉིས་མའི་གཡས་སུ་ཏྃ་ཡིག་འབུར་མ། ཨོ་རྒྱན་རིན་པོ་ཆེས་ཕྱག་མཚན་རྡོ་རྗེ་དང་ཀ་པཱ་ལ་བཞག་པའི་རྗེས། གཡོན་གྱི་ཕུག་ནས་གནས་ཡིག་སོགས་ཟབ་གཏེར་སྤྱན་དྲངས་པའི་ཤུལ། འོག་གཡས་ཅུང་དམའ་བར་མཁའ་ཆེན་དཔལ་གྱི་དབང་ཕྱུག་གི་སྒྲུབ་ཕུག་དེའི་མདུན་འོག་ཏུ་གྲུབ་ཆེན་ནམ་མཁའི་སྙིང་པོའི་སྒྲུབ་ཕུག་ཟླ་གམ་དབྱིབས་ཅན་གྱི་ཕུག་ཏུ་ཡང་དག་ལྷ་དགུ་དང་། གཡོན་ངོས་དམའ་བར་ཐུགས་རྟགས་རྡོ་རྗེ་རང་བྱོན། དེ་འོག་བྲག་ངོས་སུ་མཚལ་གྱི་གཏེར་རྟགས་མང་པོ། དེ་འོག་བྲག་གདོང་གི་ཕུག་ན་ནམ་མཁའི་སྙིང་པོའི་ཚེ་ཆུ་རྒྱུན་འབབ་ས། འདི་ནི་ཙཱ་རིའི་ཐབས་རྡོ་རྗེ་རི་ལ་རིན་པོ་ཆེའི་རྡོ་ཆུ་ཞེས་པ་ཤིན་ཏུ་དྭངས་ཤིང་བདུད་རྩིའི་ཡོན་ཏན་ཅན། གདམས་ངག་དང་ལྡན་པས་ནུབ་གཅིག་འཐུང་བ་ཙམ་གྱིས་རྡོ་རྗེའི་ལུས་དང་གཡུང་དྲུང་གི་ཚེ་ཐོབ་པར་གསུངས་པས་དེའི་དོད་ཡིན་པས། འདིར་ཚེའི་བདུད་རྩི་བསྒྲུབ་པའམ། སྒྲུབ་པའི་ཆུ་རྒྱུན་ལ་བསྲེས་ན་ཕན་ཡོན་གོང་དང་ཆ་མཚུངས་འབྱུང་བ་ཡིན་ནོ། །ནམ་སྙིང་སྒྲུབ་ཕུག་གི་མདུན་ངོས་དམ་ཅན་གནས་པའི་བྲག་ལེབ་ངོས་མགར་བ་དམར་ནག་སྐུ་གཟུགས། དེ་མདུན་བྲག་ངོས་སྒྲོལ་ལྗང་དང་འབྲུ་གསུམ་སོགས་དེ་མདུན་གྱི་ཆུ་མིག་ནི་དམ་ཅན་མགར་ཆུར་གྲགས་པ། དེ་དག་གི་གཡས་གཡོན་རྣམས་སུ་རའི་རྗེས་མང་བ། ཆུ་མིག་མགོ་ཐད་ཤུགས་གསེབ་བྲག་སྐྱིབས་ནི་མཚོ་རྒྱལ་གྱི་བཞུགས་གནས་ཏེ་ཕྱོགས་འདིར་ནི་ཐབས་བསྐྱེད་རིམ་གཙོར་སྒྲུབ་པའི་གནས་སོ། །

གཉིས་པ་གཡོན་ཕྱོགས་ཤེས་རབ་དྲིལ་བུའི་རིའི་ཆུ་མིག་གོང་མའི་ཕུག་པའི་གཡོན་དུ་བྷྱོ་ཡིག་དཀར་པོ། དེ་ནས་ཕར་ཕྱིན་པའི་བྲག་ལོགས་སུ་རུ་ལུ་འབྲུ་བརྒྱད་ཆུ་མིག་འོག་མའི་ལམ་ལྟག་ཏུ་འབྲུ་གསུམ། ལམ་འོག་ཏུ་ཡི་གེ་འབྲུ་དྲུག་དེ་ནས་ཕར་ཕྱིན་པའི་སྟོད་དུ་གནས་སྒོར་གྲགས་པའི་ཕུག་ཆེན་ལ་གཏེར་ཆེན་ཉིད་ཀྱིས་བླ་མ་ཆོས་སྐུའི་སྒྲུབ་པ་མཛད་ཅིང་དག་པའི་གཟིགས་སྣང་མཐའ་ཡས་པ་ལ་ལོངས་སྤྱོད། དེའི་ཕར་ཐད་ཙམ་པཎ་ཆེན་སྨྲྀ་ཏི་ཛྙཱ་ནའི་སྒྲུབ་ཕུག་སྨད་དུ་བདུད་འདུལ་གྲོ་ལོད་ཕུག་པར་རྡོ་རྗེ་གྲོ་ལོད་ཕྱག་མཚན་རྡོ་རྗེ་དང་ཕུར་བ་འཛིན་ཅིང་སྟག་ལ་ཆིབས་པ། དེ་ནས་ཕར་ཕྱིན་པའི་བྲག་ངོས་སུ་དུང་དཀར་འབུར་མ། བྲག་གི་གདོང་ཉག་ཐོག་པྃ་ཡིག་དམར་པོ། འཇའ་མཚོན་གྱི་ཧཱུྃ་ཡིག་བཤུར་མའི་ཁུངས་སུ་ཧཱུྃ་ཆེན་ཀ་རའི་ཞབས་རྗེས་ཀྱིས་མཚན་པ། དེ་ཉིད་ཀྱི་བཞུགས་ཁྲི་རང་བྱུང་། འདི་ནི་ཙཱ་རིར་བྱང་ཆུབ་སེམས་དཔའ་ཆོས་འཕགས་ཀྱི་བཞུགས་ཁྲི་དང་ཚུལ་མཚུངས་པ་ཡིན། དེའི་ཕར་ནང་ཕུག་ཆུང་སྒོར་མཁའ་སྤྱོད་དཀར་མོ། དེ་ནས་ཕར་ཕྱིན་པ་ན་བྲག་རི་ཕག་མོའི་དབྱིབས་ཀྱི་བྷ་ག་ནས་རཀྟའི་ཚུལ་དུ་སིནྡྷུ་ར་འབབ། དེའི་ཕར་ནང་ཕུག་ཆུང་སྒོར་མཁའ་སྤྱོད་དཀར་མོ། དེའི་ཕར་ནང་གི་རོང་ནས་སིནྡྷུ་རའི་ཆུ་བོ་འབབ་པ་ནི་དམར་ནག་རཀྟའི་མཚོ་དང་ཚུལ་མཚུངས་པར་དམར་མོ་གསུང་གི་མཁའ་འགྲོ་དང་། ཨེ་ཀ་ཛཱ་ཊིའི་གནས་ཡིན་པས་ཤིན་ཏུ་གཉན་པས་སྤྱོད་ལམ་གཟབ། འདི་རྣམས་ནི་ཙཱ་རི་དང་མཚུངས་པར་ཆུའི་བཅུད། སའི་ཞག བདུད་རྩིའི་སྨན། རྟེན་འབྲེལ་རྫས་ཀྱི་ནུས་པ་ཀུན་ལྡན་ཡིན་ཞིང་། འདི་དག་ཏུ་མཁའ་འགྲོ་མ་ཚོགས་པའི་གླུ་སྒྲ་རོལ་མོ་སོགས་སྐབས་སུ་འབྱུང་། འདིའི་སྟོད་ཆར་དཔལ་ཆེན་རྒ་ལོ་ཙཱ་དངོས་སུ་བྱོན་པའི་སྒྲུབ་ཕུག་དང་ཞབས་རྗེས། དེའི་གཡོན་སྟོད་ཀྱི་ཕུག་པ་ཞིག་གི་གཡོན་ངོས་སུ་གཡུང་དྲུང་གཡས་བསྐོར་རང་བྱོན། གཞན་ཡང་སྒྲུབ་ཕུག་རང་བྱོན་ཤིན་ཏུ་མང་བ་བཞུགས་ལ་ཕྱོགས་འདིར་ནི་རྫོགས་རིམ་རྩ་རླུང་ཐིག་ལེའི་རྣལ་འབྱོར་གཙོར་སྒྲུབ་པའི་གནས་སོ། །

གསུམ་པ་ཟུང་འཇུག་དབུ་མ་རིའི་དབུས་ཀྱི་སྙིང་པོར་དཔལ་ཆེན་པོའི་ལྷ་ཁང་ཆགས་པའི་སྟོད་དུ་བྷ་ཊའི་ཤིང་དང་ཉེ་བར་བྲག་སྐྱིབས་ལྷོར་ལྟ་བར་ཧཱུྃ་ཡིག་རང་བྱོན་མང་དུ་བཞུགས་པ་ནི་སློབ་དཔོན་རྣམ་གཉིས་ཞག་གསུམ་བཀའ་བསྡུ་མཛད་པའི་གནས། དེའི་མར་ནང་བྲག་ཕུག་ཏུ་སློབ་དཔོན་རྣམ་གཉིས་ཀྱི་ཞབས་རྗེས་གཉིས་དང་ཧཱུྃ་ཡིག་དཀར་པོ། དེའི་གཡོན་ཕྱོགས་ཀྱི་བྲག་སྐྱིབས་སྦས་པ་ལྟ་བུ་ནི་གུད་དུ་སྦས་པའི་བི་མི་ལའི་གནས་མཆོག་སྟེ། ཕུག་ཏུ་ཏྃ་དང་ཧ་ཡིག་སྒོ་ཀླད་ཉི་ཟླ་རང་བྱོན། དུས་བཟང་བྱུང་ངོ་ཅོག་ལ་རྡོ་རྗེའི་སྐུ་ཅན་བི་མ་ལ་མི་ཏྲ་ཡེ་ཤེས་ཀྱི་རོལ་པས་ཕེབས་ནས་བཞུགས་ཤིང་བྱིན་གྱིས་བརླབས་པའི་གནས། དེ་དང་ཉེ་བའི་འགྲམ་དུ་བི་མ་མི་ཏྲ་དང་མཁའ་འགྲོ་བདེ་ཆེན་རྒྱ་མཚོའི་ཞབས་རྗེས་ཆེ་ཆུང་གཉིས། དེ་འོག་བྲག་རིའི་སྙིང་གཟུགས་ལྟ་བུའི་ངོས་སུ་གྲུབ་པའི་སློབ་དཔོན་ཆེན་པོ་ཧཱུྃ་ཀ་རའི་སྐུ་བརྙན་ཐོག་ཚད་ཙམ་པ་རང་བྱོན། འདིའི་གཡོན་ཕྱོགས་ཀྱི་ཕུག་པ་བྱང་ཆུབ་གླིང་པས་ཚེ་སྒྲུབ་མཛད་པའི་གནས། སྙིང་པོའི་འོག་གི་བྲག་རི་སྙིང་གཟུགས་ཆེ་ཆུང་ཟུང་སྦྲེལ་བརྟེན་པའི་ལྗོན་ཤིང་དང་བཅས་པ་ནི་ཕྱི་ལྟར་བདུད་མགོན་སེང་གེའི་གདོང་པ་ཅན་ཡབ་ཡུམ། ནང་ལྟར་ཞིང་སྐྱོང་འཇིགས་བྱེད་ཆེན་པོ། གསང་བར་དཔའ་བོ་རྡོ་རྗེའི་འོད་ལྡན་དང་དཔའ་མོ་ལང་ཀའི་དབང་ཕྱུག་མ་བཞུགས་པའི་གནས་ཏེ། དེའི་བྲག་གི་ངོས་སུ་ཨོ་རྒྱན་ཟ་ཧོར་མ་སྐུ་ཚད་ཆེ་བའི་འོག་ནས་བཛྲ་གུ་རུ་འབྲུ་བཅུ་གཉིས་ཚང་བ། དེ་མདུན་རྡོ་རྗེ་དང་འབྲུ་གསུམ། དེ་འོག་བྲག་ལེབ་ངོས་གཡུང་དྲུང་གཡས་བསྐོར་གཉིས་གསུམ་དང་ཧ་རི་ནི་སའི་ཡིག་འབྲུ་གསལ་བར་བཞུགས། འདིའི་རྟེན་འབྲེལ་ལས་སྒྲུབ་གནས་འདིར་རྩེ་གཅིག་ཏུ་སྒྲུབ་ན་སྡོད་ཚུགས་པ་དང་ཚེ་མཐར་ཕྱིན་པར་འགྱུར། གཡས་ཕྱོགས་ཀྱི་ཆུ་བོ་ནི་ཁྲུས་ཀྱི་ཆབ་སྟེ་བཀྲུ་བ་དང་འཐུང་བ་སོགས་བྱས་པས་ནད་གདོན་སྡིག་སྒྲིབ་ཞི་བའི་རྟེན་འབྲེལ་ཡོད། བུམ་པ་སྒྲུབ་པའི་ཁྲུས་ཆབ་ཀྱི་རྒྱུན་ལ་བསྲེས་ན་ནུས་པ་ཆེ། འདིའི་གཡོན་ངོས་གདོང་རྒྱུད་ཕྱིའི་སྐོར་ལམ་གྱི་གོང་ཙམ་དུ་བྲག་རིའི་ཚོགས་གཏོར་འདྲ་བ་ལ་ལྗོན་ཤིང་གདུགས་ཕུབ་པ་ལྟ་བུའི་ངོས་སུ་མཁའ་འགྲོ་མ་བརྒྱ་རྩ་བརྒྱད་ཀྱི་ཞབས་རྗེས་ཡོད་པ་ནི་གནས་ཀྱི་མདུན་མི་འགྱུར་བའི་གཟེར། ཞིང་སྐྱོང་ལྷན་ཅིག་སྐྱེས་མ་བསྟི་བའི་གནས་ཏེ། ལྷན་ཅིག་སྐྱེས་མའི་ཕོ་བྲང་གཞན་ཡང་ཡོད། དབུས་རི་འདི་ནི་བསྐྱེད་རྫོགས་ཟུང་འཇུག་གི་ཏིང་ངེ་འཛིན་ཕྱག་ཆེན་དང་རྫོགས་ཆེན་སོགས་བསྒོམ་པའི་གནས་སུ་བསྔགས་སོ། །

བཞི་པ་དག་པ་མཁའ་སྤྱོད་རི་ནི་ཐུགས་རྗེ་ཆེན་པོའི་ཕོ་བྲང་དུ་ལུང་གིས་ཟིན་པ་གནས་བདག་དགེ་བསྙེན་ཆེན་པོ་རྡོ་རྗེ་དཔལ་འབར་གྱི་བྲག་རི་ཉིད་ཡིན་ཅིང་འདིར་བཞུགས་པའི་རང་བྱོན་གྱི་ཚོགས་ནི་གཉན་ཆ་ཆེ་ཞིང་དུས་ལ་མ་བབས་པས་ངོ་སྤྲོད་མ་མཛད་པས་སྨྲ་རྒྱུ་མེད་ལ། འདིའི་རྒྱབ་ཕྱོགས་ཀྱི་བྲག་དཀར་རྟ་སོ་གཤིབས་པ་ལྟ་བུ་ནི་རིགས་གསུམ་མགོན་པོའི་གནས་ཡིན་པས་བྲག་ངོས་སུ་རིགས་གསུམ་མགོན་པོ་རང་བྱོན་བཞུགས་པ་ལུང་པའི་ནང་ནས་གྱེན་ཏུ་མཇལ་བས་མཐོང་བར་གསུངས། རི་འདིར་སྔོན་དཔལ་ལྡན་བྱང་ཆུབ་གླིང་པའི་སྐབས་སུ་མཁའ་ལ་སྤྱོད་པའི་རྣལ་འབྱོར་གྱི་དབང་ཕྱུག་དུ་མ་བྱོན་པར་མངོན་ནོ། །གཏེར་གཞུང་ལས། ཧཱུྃ་ཀ་ར་དང་བི་མ་ལ༔ གྲུབ་པའི་སློབ་དཔོན་ཐམས་ཅད་ཀྱིས༔ ཡེ་ཤེས་སྐུ་ཡི་བྱིན་གྱིས་བརླབས༔ བྱ་སྐྱིབས་ཀེའུ་ཚང་ཉམས་དགའ་བར༔ རིག་འཛིན་གསུམ་གྱིས་སྒྲུབ་པའི་གནས༔ ཁྲུས་ཆབ་ཚེ་ཆུ་སིནྡྷུ་ར༔ སྨན་ཆུ་ལ་སོགས་ངོ་མཚར་ཅན༔ གྲུབ་པའི་གནས་མཆོག་ཉམས་དགའ་བ༔ ཞེས་སྔགས་པ་ནི་ཐབས་ཤེས་ཟུང་འཇུག་གི་རི་གསུམ་ལ་ཚང་ཞིང་། སྨན་གྱི་ཆུ་ནི་རི་མོ་མདའ་དང་ཉེ་བར་ཕོ་ནད་སེལ་བར་གྲགས་པའི་ཆུ་འདི་ཉིད་ཡིན་ནོ། །གདན་ས་ཆེན་པོའི་འོག་གི་བྲག་རི་འདི་རྣམས་བར་ཆད་སྲུང་བའི་ཁྲོ་བོ་བཅུ་རང་བྱུང་གི་ཚུལ་དུ་བཞུགས་ཤིང་། ཆོས་ཁྲི་བྲག་སྣ་ནས་གཡས་བསྐོར་གྱིས་ཆུ་རྒྱུད་གྱེན་དེད་དུ་ཕྱིན་པའི་ར་ཆེན་གཡོན་ལོགས་ཀྱི་སྤང་ཐང་སྟེ་ཕ་ཝང་གཉིས་བསྒྲིགས་ལྟ་བུའི་གཡས་སུ་ཚེ་དཔག་མེད། གཡོན་ཏུ་སྒྲོལ་མ་དམར་མོ། ར་ཆེན་ཆུ་རྒྱུད་སྐོར་དུ་སྤྱིར་རང་བྱོན་ཤིན་ཏུ་མང་། ཁྱད་པར་ཨོ་རུབ་ལྟེམས་སུ་གྲགས་པའི་བྲག་གདོང་ཀ་བ་ལྟ་བུའི་ངོས་སུ་སྣང་བ་མཐའ་ཡས་དམར་པོ་དང་། ཐུགས་རྗེ་ཆེན་པོ་བཅུ་གཅིག་ཞལ་སྐུ་ཚད་ཤིན་ཏུ་ཆེ་བ་བཞུགས། སྡོང་བོ་སྒང་གི་གནས་དིལ་དུ་གྲགས་པ་དེ་དཔལ་ལྡན་ཞིང་སྐྱོང་དབང་པོ་རེས་འགར་རྒྱུ་བའི་ཕོ་བྲང་། དེ་འོག་བྲག་ཡར་ལྟ་བའི་ངོས་སུ་རྡོ་རྗེ་ཕག་མོ་རང་བྱོན་བཞུགས། སླས་རིང་མའི་ཆུ་རྒྱུད་གྱེན་དེད་དུ་ཕྱིན་པའི་ཐོག་མར་ལམ་སྣེ་མཚེར་དུ་གྲགས་པ་འདི་ནི་མཁའ་འགྲོའི་བྲོ་ར་ཡིན་པས་འདིར་ཐབ་ཀ་བཅའ་བ། རྟ་དྲེལ་འདོགས་པ་སོགས་གཏན་ནས་མི་རུང་། འདིའི་ལྟག་གི་གནས་དིལ་འདི་དཔལ་གྱི་ཙཱ་རི་ཏྲ་རང་བྱུང་གི་བཀོད་པ་ཡིན། འདིའི་མདུན་ངོས་སུ་པདྨ་སམ་བྷ་བ་བཞེངས་སྟབས་ཤིན་ཏུ་གསལ་བ། སྒྲོལ་དཀར་ཡིད་བཞིན་འཁོར་ལོ། གནུབས་ཆེན་སངས་རྒྱས་ཡེ་ཤེས་ཀྱི་ཕྱག་རྗེས། གཉག་ཆེན་ཛྙཱ་ནའི་ཞབས་རྗེས། སོག་པོ་ལྷ་དཔལ་གྱི་དབུ་རྗེས། ཨ་དཀར་པོ། རྡོ་རྗེ། གླང་ཆེན། གསེར་ཉ། དུང་དཀར། ཙཱ་རིའི་ལྷ་གཡག་རྗེས་ལ་ཧ་རི་ནི་སས་མཚན་པ། དེ་དག་གི་སྟེང་ངོས་སུ་མཚོ་རྒྱལ་ཞབས་རྗེས་འཇའ་ཚོན་མ། ཧཱུྃ་ཡིག དམ་ཅན་རྫ་འཕྲལ་ར་རྗེས་སོགས་དང་། དེ་ནས་ཆུ་རྒྱུད་གྱེན་དེད་དུ་ཕྱིན་པའི་ཐོག་མར་བྱང་ཆུབ་ཆེན་པོའི་མཆོད་རྟེན་ཐོག་ཚད་ཙམ་པའི་གཡས་སུ་གུ་རུའི་ཞབས་རྗེས། དེ་ནས་ཧཱུྃ་ཡིག མཁའ་འགྲོའི་ཚོགས་གཞོང་དང་ཆུ་བོའི་གཡས་གཡོན་ཏུ་ཐོད་སྒྱེད་ཀྱི་རྣམ་པ་ཕ་ཝང་ཆེན་པོ་གསུམ། དེ་ལྟག་དུང་ཆོས་རང་བྱུང་ལས་ཆུའི་ཟེགས་མ་འཐོར་བ་ནི་བྱིན་གྱིས་བརླབས་པའི་ཁྲུས་ཆབ་ཡིན་པས་འདི་འཐུང་ཞིང་མགོ་ལུས་བཀྲུ་བ་སོགས་བྱས་ན་ནད་གདོན་སྡིག་སྒྲིབ་ཞི། དེ་ནས་ཡར་ཕྱིན་པ་ན་རྣམ་པར་རྒྱལ་མའམ་དཀར་མོ་སྐུའི་དྷཱ་ཀི་བཞུགས་པའི་གནས། ཀ་ལ་དུང་མཚོའི་གཡས་སུ་ཨོ་རྒྱན་རིན་པོ་ཆེའི་ཞབས་རྗེས། གཡོན་དུ་མཁའ་འགྲོ་མ་འགྲོ་བ་བཟང་མོའི་ཞབས་རྗེས། དེ་ཕྱོགས་ཆུ་འགྲམ་དུ་ཐུགས་རྗེ་ཆེན་པོ་འཁོར་བ་དོང་སྤྲུལ་ཀྱི་སྐུ། དེ་ལྟག་མཁའ་འགྲོའི་ཞབས་རྗེས་དང་། བཅོམ་ལྡན་འདས་རྡོ་རྗེ་སེམས་དཔའི་སྣང་བརྙན་དཀར་པོ་འབུར་མ་བཅས་རིམ་པར་བཞུགས། བྲག་ནག་མར་གྲགས་པའི་བྲག་རི་འདི་རྣམས་ལ་རྩ་བ་གསུམ་གྱི་སྐུ་བརྙན་དང་། གསུང་ཡིག་འབྲུ། ཐུགས་ཕྱག་མཚན་དང་མཆོད་རྟེན་ཏེ་ངོ་མཚར་བའི་བཀའ་རྟགས་བརྒྱ་དང་རྩ་བརྒྱད་བཞུགས་པར་གསུངས་ཤིང་འདིའི་སྐོར་གྱི་བྲག་རྣམས་རྗེ་བཙུན་སྒྲོལ་མའི་གནས་ཡིན་པས་སྒྲོལ་མ་བྲག་ཟེར་བ་ཡིན། འདིར་གུ་རུ་རིན་པོ་ཆེའི་དབང་ཕུག་བཀའ་བརྒྱད་ཀྱི་སྒྲུབ་ཆེན་མཛད་པའི་ཕུག་པའི་སྟེང་འོག་རྣམས་དཔལ་དགུ་རང་བྱོན། ཤུག་ཕུང་ཞིག་གིས་སྦས་པ་ལྟ་བུའི་ཕུག་པ་ནི་གནུབས་ཆེན་སངས་རྒྱས་ཡེ་ཤེས་ཀྱི་སྒྲུབ་ཕུག་བྲག་སུམ་བསྒྲིགས་ལྟ་བུར་ཡོད་པའི་སྣེར་ཕུག་པ་ནི་ལྷ་ལྕམ་མནྡཱ་ར་བ་སྐབས་སུ་རྫུ་འཕྲུལ་གྱིས་ཕེབས་པའི་བཞུགས་གནས། བྲག་འཇའ་ཚོན་གྱི་རི་མོ་དར་ཟབ་སྣ་ཚོགས་བཤམས་པ་འདྲ་བའི་འོག་ཏུ་ཡོད་པའི་ཕུག་པ་ནི་དཔལ་ལྡན་དུས་གསུམ་མཁྱེན་པ་ཀཾ་པོ་གངས་ར་ནས་དབུས་སུ་ཕེབས་སྐབས་ཞག་གསུམ་བཞུགས་ཤིང་། དགོངས་པས་བྱིན་གྱིས་བརླབས་པ་ཡིན་པས་བྲག་ལོགས་རྣམས་སུ་མར་མི་དྭགས་གསུམ་དང་ཀརྨ་པ་རང་བྱོན་བཞུགས། བྲག་དམར་ཁ་ཤར་ལ་བསྟན་པའི་ཕུག་པ་ནི་བྱང་ཆུབ་གླིང་པའི་བཞུགས་གནས་ཏེ་རྫུ་འཕྲུལ་གྱི་ཞབས་རྗེས་ཀྱང་ཡོད། བྲག་ཚེ་བུམ་འདྲ་བའི་གསེང་དུ་ཐང་སྟོང་རྒྱལ་པོའི་སྒྲུབ་ཕུག་གཞན་ཡང་ཕྱག་ཞབས་ཀྱི་རྗེས་སོགས་མང་དུ་བཞུགས། སླས་རིང་མའི་འོག་གི་ལུང་པའི་ནང་ནས་གྱེན་དུ་ཕྱིན་པའི་ལམ་ཁར་ཕ་ཝང་ངོས་སྒྲོལ་མ་དམར་མོ་རང་བྱོན། རྡོ་རྗེ་མཚེར་ཆེན་གྱི་ཐད་དུ་རྫོགས་ཆེན་སེམས་སྡེའི་གྲུབ་ཐོབ་ཞིག་སྐབས་རེར་བྱོན་ནས་མཉམ་པར་བཞག་པའི་ཕུག་པ། ས་དམར་ལའི་རི་དབང་གི་མདོག་ཅན་ཟླ་གམ་དབང་གི་ཕོ་བྲང་། དེའི་ངོས་སུ་ཚེ་བུམ་དང་ལྕགས་ཀྱུའི་གཟུགས་རང་བྱོན་གསལ། ར་ཆེན་ཁའི་གཡས་ཕྱོགས་ཀྱི་བྲག་ངོས་སུ་ཚེ་དཔག་མེད་དཀར་པོ། དམར་པོ། ཡབ་ཡུམ་འཁྲིལ་སྦྱོར་དུ་བཞུགས་པ་གསུམ་དང་ལུང་པའི་ཕུའི་ན་ཐང་ཧཱུྃ་ཡིག་གི་རང་གཟུགས། དེ་ནས་ལ་བརྒལ་བའི་ལམ་གྱི་གཡོན་དབུ་ཆེའི་གཡས་ཟུར་ཕ་ཝཾ་ངོས་མཁའ་འགྲོའི་ཞབས་རྗེས། སྤྱིར་གནས་འདི་ལ་མཁའ་འགྲོའི་ཞབས་རྗེས་བརྒྱ་རྩ་བརྒྱད་ཡོད་པར་གསུང་ཤིང་ཙཱ་འདྲ་རིན་ཆེན་བྲག་གི་སྒང་རྒྱུད་དཔལ་ཆེན་དབུའི་ཀླད་དུའང་ཕ་ཝཾ་ཞིག་ལ་ཞབས་རྗེས་ཤིན་ཏུ་གསལ་བ་ཆེ་ཆུང་གཉིས། ལྷ་མོའི་རྫུ་འཕྲུལ་གྱི་དྲེལ་རྗེས་གཅིག་བཞུགས་པས་མཚོན་ཏེ་འདི་རིགས་མང་ངོ་། །ལ་རྒྱབ་སྨར་ཡུ་ནང་ནས་བྱང་ངོས་སུ་ལྟ་བའི་བྲག་དཀར་ནི་གནོད་སྦྱིན་རྨུགས་འཛིན་དབང་པོའི་གནས་ཡིན། འདིའི་བྲག་ངོས་སུ་མཆོད་རྟེན་རང་གྲུབ། མདུན་ངོས་བྲག་ལེབ་ཟུར་པ་ཤར་ལྟ་བ་ཞིག་གི་ངོས་སུ་རི་རབ་མཚོ་གླིང་དང་བཅས་པའི་བཀོད་པ། དེ་འོག་བྲག་ངོས་སུ་རིན་ཆེན་ཟུར་བརྒྱད་མེ་འབར་གྱི་དབྱིབས་སུ་གྲུབ་པ་ལ་བརྡ་ཡིག་ཧྲཱིཿདང་བོད་ཡིག་ཊྃ་གྱིས་མཚན་པ། དེའི་གཡས་སྟོད་ཀྱི་ཕ་ཝང་ངོས་སུ་གཏེར་རྟགས་དགའ་བ་འཁྱིལ་བ་དང་རྡོ་རྗེ་མེ་འབར་ཕྱག་བྲིས་མའི་སྟེང་དུ་གུ་རུའི་ཞབས་ཀྱི་རྗེས་བཞུགས། ཛུ་རུ་ལུང་པའི་བར་བག་དིལ་དཀར་ཆུང་ངོས་ཧཱུྃ་མཐིང་ག་སོགས་ཡིག་འབྲུ་སྣ་ཚོགས་གསལ་བ་སྟེ་འདི་རྣམས་ནི། དཀར་ཆག་ལས་སྐུ་གསུང་ཐུགས་རྟགས་བརྒྱ་རྩ་བརྒྱད༔ ཆུ་བཞིའི་སྔགས་ཀྱི་རང་སྒྲ་སྒྲོག༔ ཀ་ལ་དུང་མཚོ་ཁྲུས་ཀྱི་ཆབ༔ སྐུ་གསུམ་ཐོད་སྒྱེད་ཚོགས་ཀྱི་གཞོང༔ འདོད་ཡོན་རྣམ་ལྔའི་མཆོད་སྤྲིན་འཕྲོ༔ རྡོ་རྗེ་སེམས་དཔའ་བདེ་བ་ཆེ༔ ཚེ་དཔག་མེད་པ་འཆི་མེད་གནས༔ ཞེས་གསུངས་པའི་དོན་ཡིན་ལ། སྔགས་སྒྲ་སྒྲོག་པའི་ཆུ་བཞི་ནི། དཔའ་འོག་ཆུས་རྡོ་རྗེ་སེམས་དཔའི་སྔགས། རི་ཁྲོད་ཆུས་རི་ལུའི་སྔགས། ཆུ་མིག་མགོ་མང་དང་ར་ཆེན་ཆུས་ཡི་གེ་དྲུག་པའི་སྔགས། མཚེར་མིང་མའི་ཆུས་ཚེ་ལྷ་རྣམ་གསུམ་གྱི་སྔགས་ཀྱི་རང་སྒྲ་སྒྲོག་པ་ཡིན་ནོ། །དེ་ནས་ཧེ་རུ་ཀའི་མདུན་ངོས་སུ་ཇི་ལྟར་བཞུགས་པའི་ཚུལ་ནི། ཐོག་མར་གཡོན་ཕྱོགས་རྒ་ལོའི་སྒྲུབ་ཕུག་དང་འབྲེལ་བའི་བྲག་ནི་དཔལ་མ་ཧཱ་ཀ་ལ་ཕྱག་བཞི་པ། བཀའ་སྡོད་བརྒྱད་དང་བཅས་པའི་ཕོ་བྲང་། མགོན་པོའི་བླ་ཤིང་འཇིགས་སུ་རུང་བ། མི་ནག་ཁྱི་ནག་བྱ་ནག་འབུམ་འབུམ་གནས་པའི་བྲག་རི་ལྗོན་ཤིང་འཐིབས་པ་ནི་མགོན་པོ་རོང་། དེ་ནས་རིམ་བཞིན་སྔོན་མོ་བྱ་འདྲེད་བྱིས་འདྲེད་བྲག་རི་བྱ་རོག་གདོང་རང་བྱོན། ལ་དགུ་ལུང་དགུའི་ཕར་ནང་ཡེ་ཤེས་ཀྱི་མགོན་པོ་ཕྱག་དྲུག་པ་རང་བྱོན། འཁྲུལ་སྣང་རྩད་གཅོད་འཕྲང་གི་ཕ་རོལ་ཏུ་ཡིག་དྲུག་སོགས་རང་བྱོན་དང་། དོམ་ཚང་རོང་གི་ཕུག་པར་གསང་བའི་མགོན་པོ་གནས་པས་དེ་ཉིད་སྒྲུབ་ན་འགྲུབ་ཐག་ཉེ། འདི་དང་སྟག་ཚང་རོང་གཉིས་ལ་ཨོ་རྒྱན་བཞུགས་པའི་སྒྲུབ་ཕུག་རེ་རེ། ལེགས་ཉེས་སྟངས་འཛིན་འཕྲང་གི་ཕ་རོལ་ཏུ་མཁའ་འགྲོ་མ་བདེ་བའི་དབང་ཕྱུག་གི་སྐུ་རང་བྱོན། སྤྱིར་མདུན་འདིར་རོང་བཞི་ཡོད་པའི་སྒང་བརྒྱད་ལ་གོ་རཱི་སོགས་གནས་ཀྱི་མ་མོ་བརྒྱད། སིཾ་ཧ་མ་སོགས་ཡུལ་གྱི་ཕྲ་མན་བརྒྱད། རྟ་གདོང་སྒོ་མ་བཞི་དང་བཅས་པ་སྤེལ་ནས་བཞུགས་པའི་ཕོ་བྲང་བྲག་རི་ཟང་ཡག་རྣམས་ཀྱི་ངོས་སུ་འཕགས་ཡུལ་གྱི་རིག་འཛིན་བརྒྱད་བོད་ཀྱི་བཀའ་བབས་དགུ་རྣམས་ཀྱི་སྐུ་བརྙན་ཕྱག་ཞབས་ཀྱི་རྗེས། སྒྲུབ་པའི་ཕུག་པ་དང་གྲུབ་ཆུ། མ་མོ་རྣམས་སྐུ་དང་ཕྱག་མཚན། གཾ་ལ་སོགས་པའི་མིང་ཡིག་དང་པོ་རང་བྱོན། བསྟེན་པའི་ཤིང་སོགས་བཞུགས་པར་གསུངས་སོ། །མཐའ་སྐོར་དུར་ཁྲོད་རྣམས་ནི་དཀྱིལ་འཁོར་ཆེན་པོའི་དུར་ཁྲོད་རྣམས་ཀྱི་རང་གཟུགས་སུ་ལྷུན་གྱིས་གྲུབ་ལ། ཆུ་མིག་མགོ་མང་གི་གཡས་ཕྱོགས་སྤང་གཤུར་དུ་ཁ་ཊཱ་གའི་རྣམ་པ་གསལ་ཞིང་། བྲག་ལེབ་ནུབ་ཏུ་བལྟ་བའི་ངོས་སུ་ལྷན་སྐྱེས་ཡེ་ཤེས་ཀྱི་མཁའ་འགྲོ་བཀྲ་ཤིས་ཆེའི་དབང་ཕྱུག་མ་སེང་གེ་ལ་ཆིབས་པའི་གཟུགས་གསལ་པོ་ཡོད་པ་ནི་དེ་ཉིད་ཀྱི་བརྟེན་པའི་གནས་ཏེ། འདིར་སྨོས་པ་རྣམས་ནི་སྤྲུལ་གཏེར་ཆེན་དངོས་ཀྱི་ཞལ་སྔ་ནས་དངོས་སུ་ཞབས་བཀོད་པ་དང་། ལྐོག་གྱུར་ཡེ་ཤེས་གཟིགས་པ་ལས་འཁྲུངས་པ་རྣམས་ཆད་ལྷག་མེད་པར་བཀོད་པ་ཡིན་ལ། སྤྱིར་གནས་མཆོག་འདིའི་བཞུགས་ཚུལ་དང་གང་ཟག་སོ་སོའི་དག་སྣང་དུ་འཆར་ཚུལ་ནི་བསམ་གྱིས་མི་ཁྱབ་པས་སླད་ནས་ཇེ་གསལ་ཇེ་མང་དུ་འགྱུར་བ་ཡིན་ནོ། །གཞན་ཡང་དཀར་ཆག་ལས། དུས་གསུམ་བདེ་གཤེགས་ཐམས་ཅད་ཀྱིས༔ བསྔགས་པ་བརྗོད་པའི་གནས་འདི་ནི༔ འོད་གསལ་ཐུགས་ཀྱི་གནས་ཡིན་ཕྱིར༔ ས་རྡོ་རི་བྲག་ཐམས་ཅད་ཀུན༔ འཇའ་ཟེར་ཐིག་ལེའི་རྣམ་པར་གནས༔ ཞེས་གསུངས་པ་ལྟར་གནས་འདིའི་ས་རྡོ་རི་བྲག་ཐམས་ཅད་ཀྱང་ཁ་དོག་དང་དབྱིབས་ཀྱི་རྣམ་པ་མ་ངེས་པ་འཇའ་འོད་ཟེར་དང་ཐིག་ལེའི་རྣམ་པ་ཤ་སྟག་ཏུ་ཡོད་ཅིང་། དཔའ་བོ་མཁའ་འགྲོ་ངང་གིས་འདུ༔ བཀའ་སྲུང་ཕོ་ཉ་ལས་ལ་མྱུར༔ ལེགས་ཉེས་སྟངས་འཛིན་གནས་འདིས་བྱེད༔ ཅེས་འབྱུང་བའི་དོན་རྣམས་ཀྱང་ཚད་མས་གྲུབ་པ་ཡིན་ནོ། །དཀར་ཆག་ལས། དབུས་སུ་བྷ་ཊ་ཞེས་བྱའི་ཤིང༔ ཤར་དུ་ལྗོན་པ་ལྷོར་གསལ་ཤིང༔ ནུབ་ཏུ་ལྕགས་ཀྱུ་བྱང་འབྲས་ལྡན༔ མི་འགྱུར་ཤིང་གི་མཛེར་མ་གདབ༔ ཅེས་དེ་བཱི་ཀོ་ཊཱིའི་གནས་མཆོག་ལ་མི་འགྱུར་བའི་གཟེར་ལྔ་རུ་གསུངས་པའི་དབུས་ཀྱི་བྷ་ཊ་ནི། ཟུང་འཇུག་དབུ་མ་རིའི་སྙིང་པོར་སྐྱེས་པའི་ཤིང་སྡོང་ལོ་མ་དར་སྐུད་འདྲ་བ་སྔགས་སྲུང་གནས་པའི་རྟེན་དང་། ཤར་གྱི་ལྗོན་པ་བཟང་པོ་ནི་མགོན་པོ་དང་ཞིང་སྐྱོང་རོང་གི་བར་ན་དམར་ནག་གི་མདངས་དང་ལྡན་པའི་ཤིང་སྡོང་གཞན་དང་མི་མཚུངས་པ་མགོན་པོའི་བླ་རྟེན་དང་། ལྷོ་ཡི་གསལ་ཤིང་ནི་དགོན་པའི་འོག་ལོགས་ཀྱི་ཤིང་སྡོང་རྩེ་མོ་དགུ་པ་གཤིན་རྗེའི་རྟེན་དང་། ནུབ་ཕྱོགས་ཨུཏྤལ་ལའི་ལྕགས་ཀྱུ་ལྟ་བུ་ནི་སྒྲོལ་མ་བྲག་ཁྲོད་ཀྱི་ཤིང་སྡོང་སྒྲོལ་མས་བྱིན་གྱིས་བརླབས་པ་སྟེ་དེ་གསུམ་ནི་སཱ་ལའི་སྡོང་པོ་ཡིན་ལ། བྱང་གི་འབྲས་བུ་ལྡན་པའི་ཤིང་གི་ཛུ་རུ་ལུང་པའི་ཕྱོགས་སུ་ཤུག་པའི་སྡོང་པོ་གཞན་དང་མི་མཚུངས་པ་ཞིག་ཡོད་པ་གནོད་སྦྱིན་གྱི་བླ་རྟེན་ཡིན་ནོ། །གཞན་ཡང་མཁའ་འགྲོ་རྒྱ་མཚོའི་ཕྱི་སྐོར་གྱི་བྲག་རྣམས་ལ་རྡོ་རྗེ་དང་ཕུར་བུ་རལ་གྲི་འཁོར་ལོ་སོགས་མཚོན་ཆའི་ར་བ་གསལ་བར་སྣང་ཞིང་། མགོན་པོ་རོང་། བྱ་རོག་རོང་ངམ་ཞིང་སྐྱོང་རོང་། སྟག་ཚང་རོང་། དོམ་ཚང་སྟེ་རོང་བཞི། དགེ་སྡིག་ཤན་འབྱེད་འཕྲང་། འཁྲུལ་སྣང་རྩད་གཅོད་འཕྲང་། ལེགས་ཉེས་སྟངས་འཛིན་འཕྲང་། འཁོར་འདས་ལ་ཆེན་འཕྲང་སྟེ་འཕྲང་བཞི། བཀོད་ལེགས་མཎྜལ་ཐང་། མཁའ་འགྲོའི་བྲོ་ར་ཐང་། བདེ་སྐྱིད་ཕུན་ཚོགས་ཐང་། ཡེ་ཤེས་ཡངས་པའི་ཐང་སྟེ་ཐང་བཞི། སྒྲོལ་མ་ལ། ཞིང་སྐྱོང་ལ། སྒྲིབ་སྦྱོང་ལ། ཆོས་འཕེལ་ལ་སྟེ་ལ་བཞི། ཐར་ལམ་སྒང་། ཕྱག་འཚལ་སྒང་། ལྷ་མཇལ་སྒང་། མཐར་ཕྱིན་སྒང་སྟེ་སྒང་བཞི། བར་ཆད་བདུད་ཀྱི་དབེན་པའི་རི། ཆགས་སྡང་འདུ་འཛིན་དབེན་པའི་རི། ཉོན་མོངས་ཆོས་བརྒྱད་དབེན་པའི་རི། སྡུག་བསྔལ་དབེན་ཅིང་བདེ་བ་འཕེལ་བ་གསང་བའི་རི་སྟེ་དབེན་རི་བཞི། ཡེ་ཤེས་གསལ་བའི་གོང་བུ། ཆོས་ཉིད་རང་བྱུང་གོང་བུ། ལྟ་བ་ཀློང་ཡངས་གོང་བུ། ཐིག་ལེ་ཉག་གཅིག་གོང་བུ། འགྱུར་མེད་གཡུང་དྲུང་གོང་བུ་སྟེ་གོང་བུ་སྟེ་གོང་བུ་ལྔ་རྣམས་ཡོད་པ་ལས། ལ་གསུམ་གཡས་ཕྱོགས་སུ་ཡོད་ཅིང་། རོང་བཞི་འཕྲང་བཞི་གཡོན་ཕྱོགས་སུ་ཡོད། གཞན་རྣམས་བསྐོར་ནས་ཡོད་པ་སྟེ་མདོར་ན་རྒྱ་ཆེ་ཆུང་ཙམ་ལས་མཚན་དང་རྣམ་པ་ཐམས་ཅད་དཔལ་གྱི་ཙཱ་རི་ཏྲ་དང་ཚུལ་མཚུངས་པར་ཁོ་ནར་བཞུགས་པ་ཡིན་པས་ཐེ་ཚོམ་མེད་པའི་ཡིད་དང་བ་ཆེན་པོས་གུས་པ་ལྷུར་ལེན་པར་རིགས་སོ། །དེ་དག་གི་རྟེན་དུ་གྱུར་པ་གནས་རིའི་དཀར་ཆག་ཞིབ་པར་བཤད་གྲུབ་ནས། དེ་ལ་བརྟེན་པའི་གདན་ས་ཆེན་པོ་འདི་ཉིད་ཀྱང་། ཇི་སྐད་དུ། མ་འོངས་གནས་མཆོག་འདི་དག་ཏུ༔ གྲུབ་པའི་སྐྱེས་བུ་དུ་མ་འདུ༔ གཙུག་ལག་ཁང་དང་མཆོད་རྟེན་འབྱུང༔ ཞེས་དཔལ་སྤུངས་ཐུབ་བསྟན་ཆོས་འཁོར་གླིང་རྟེན་དང་བརྟེན་པ། དེར་འཛིན་སྐྱེས་བུའི་ཚོགས་དང་བཅས་པ་རྣམས་དང་། དཀར་ཆག་ས་སྟེང་བྱུང་བ་ན༔ ཧེ་རུ་ཀ་ཡི་སྐུ་གསུང་ཐུགས༔ འོག་མིན་གནས་ནས་འདི་རུ་འཕོ༔ ཞེས་ཡང་ཁྲོད་ཀུན་བཟང་བདེ་ཆེན་འོད་གསལ་གླིང་རྟེན་དང་བརྟེན་པར་བཅས་པའང་རྡོ་རྗེའི་གསུང་གིས་གསལ་བར་བསྟན་པ་ཡིན་པས་དང་བ་དང་ཡིད་ཆེས་པའི་དད་པས་ཚོགས་སྤེལ་བ་ལ་བརྩོན་པར་བྱའོ། །

དེ་ལྟར་རང་བྱོན་ལ་སོགས་པ་འདི་རྣམས་ཡང་དག་པ་ཡིན་པའི་ལུང་ཡང་། བླ་མ་དགོངས་འདུས་ལུང་བསྟན་བཀའ་རྒྱ་མ་ལས། ལ་ལར་སངས་རྒྱས་རྣམས་ཀྱི་སྤྲུལ་པ་ནི༔ ས་རྡོ་རི་བྲག་ལམ་འཕྲང་ལ་སོགས་སུ༔ སྐུ་གསུང་ཐུགས་ཀྱི་སྤྲུལ་པ་རང་བྱུང་འབྱོན༔ དེ་མཐོང་ཐོས་དང་གང་འབྲེལ་ངན་སོང་མེད༔ ཕྱོགས་ནི་མ་ངེས་ཕྱོགས་མཚམས་དབུས་ལ་སོགས༔ ཉེ་རིང་མེད་ཕྱིར་ཀུན་ཏུ་འབྱོན་པར་འགྱུར༔ དེ་བཞིན་དུས་ལ་ངེས་མེད་ནམ་ཡང་འབྱོན༔ ཡུན་ལ་ཚད་བཟུང་མེད་དེ་འཁོར་མཐའི་བར༔ ཞེས་དང་། ཡིག་དྲུག་ལ་སོགས་རང་བྱོན་བསམ་མི་ཁྱབ༔ དེ་སོགས་རྣམ་པ་དུ་མར་སྤྲུལ་ནས་ཀྱང༔ འགྲོ་བའི་དོན་མཛད་བསྟན་པ་རྒྱས་པར་འགྱུར༔ ཞེས་གསུངས་པས་གནས་མཆོག་འདི་ལྟ་བུར་མ་ཟད། མཐོ་དམན་ངེས་པ་མེད་པའི་ཕྱོགས་རྣམས་སུ་རང་བྱོན་ཅི་རིགས་པར་བཞུགས་པ་རྣམས་ཀྱང་རྒྱལ་བ་སྲས་དང་བཅས་པའི་ཡེ་ཤེས་ཀྱི་རང་འོད་ལས་བྱུང་བ་ཡིན་པས་དད་མོས་དག་སྣང་རྩེ་གཅིག་བྱས་ན་དེ་དག་དངོས་སུ་མཇལ་བ་དང་ཁྱད་པར་མ་མཆིས་སོ། །

བདུན་པ། བསྐོར་བ་ཇི་ལྟར་བྱ་བའི་ཚུལ་ལ་གསུམ། བསྐོར་བའི་ལམ། དུས་ཚོད། བསྐོར་བ་བྱེད་ཚུལ་ལོ། །

དང་པོ་བསྐོར་ལམ་ཕྱི་ནང་གསང་བ་རྩེ་བསྐོར་སྟེང་བསྐོར། བཅས་བཞི་ལས། ཐོག་མར་མཁའ་འགྲོ་རྒྱ་མཚོའི་ཕྱི་བསྐོར་ནི། གནས་མཆོག་འདི་ཉིད་ཕྱི་ལྟར་ན་བདེ་མཆོག་མཁའ་འགྲོ་རྒྱ་མཚོའི་དཀྱིལ་འཁོར་གྱི་བཀོད་པའི་ཚུལ་དུ་བཞུགས་པའི་རྡོ་རྗེའི་རྭ་བའི་ནང་མཐའ་ནས་བསྐོར་བ་སྟེ། ཐོག་མར་སེམས་བསྐྱེད་དང་ལྡན་པས་དུང་དཀར་ཆུ་མདང་ནས་བཀོད་ལེགས་མཎྜལ་ཐང་དུ་བབ་པ་སྟེ། རྡོ་རྗེ་སེམས་དཔའི་ཡིག་བརྒྱ་བཟླས་བཞིན་པས་དཔའ་འོག་ཆུ་བོས་ཁྲུས་བྱ་ཞིང་ནང་གསང་བའི་མཎྜལ་ཕུལ། ཆོས་ཁྲི་བྲག་སྣར་ལྷོ་ཡི་སྒོ་སྲུང་ལ་བསང་དང་གསེར་སྐྱེམས་ཀྱིས་མཆོད། ཡིག་དྲུག་བཟླས་བཞིན་ར་ཆེན་ནས་འབབ་པའི་ཆུ་བོས་ཁྲུས་བྱ། ཆུ་རྒྱུད་གྱེན་དེད་དུ་ཕྱིན། མཁའ་འགྲོའི་བྲོ་ར་ཐང་དུ་གླུ་གར་དང་འབྲེལ་བའི་ཚོགས་ཀྱི་འཁོར་ལོ་བྱ། ཨ་མནའ་འདྲེ་ཕུག་ཡར་བཅད་དེ་ཙཱ་རི་རང་བྱུང་གི་ལྟག་ནས་ཆུ་བོའི་རྒྱུན་གྱེན་ལ་དེད། སྒྲོལ་མ་ལ་ནང་མཁའ་འགྲོའི་ཚོགས་གཞོང་དུ་ཕལ་བས་བཟའ་བཏུང་ཟས་སྣའི་རིགས་མཆོད་ཅིང་། རྣལ་འབྱོར་པས་ལུས་སྦྱིན་གྱིས་མཚོན་ཕྱི་ནང་གསང་བའི་ཚོགས་འཁོར་བྱ། རང་བྱུང་ཁྲུས་ཆབ་ལས་ཚེ་ལྷ་རྣམ་གསུམ་གཟུངས་བཟླ་ཞིང་བཀྲུ་བ་དང་འཐུང་བ་སོགས་བྱ། དེའང་ཆུའི་ནང་དུ་ལུས་ཀྱི་དྲི་མ་འགྲོ་མི་རུང་བས་ཟུར་དུ་ལེན་པ་ལེགས། ཀ་ལ་དུང་མཚོར་གཙང་ཞིང་དག་པའི་མཚོ་འབུལ་ཅི་འབྱོར་ཕུལ། སྒྲོལ་མ་ལ་ཐོག་ཚེ་བསོད་རྒྱས་པའི་རྟེན་འབྲེལ་མཎྜལ་དང་སྨོན་ལམ་སོགས་བྱ། བདེ་སྐྱིད་ཕུན་ཚོགས་ཐང་དུ་བདེ་སྐྱིད་འབྱུང་བའི་རྟེན་འབྲེལ་དཀར་སྤྲོའི་ཁ་ཟས། དགའ་སྐྱིད་ཀྱི་གླུ་གར་སོགས་བྱ་ཞིང་རྒྱལ་ཁམས་བདེ་སྐྱིད་འབྱུང་བའི་སྨོན་ལམ་གདབ། ཐར་ལམ་སྒང་དུ་སེམས་ཅན་ཐམས་ཅད་ཐར་པའི་ལམ་ཕྱིན་ཅི་མ་ལོག་པ་ལ་འཇུག་པའི་སྨོན་ལམ་གདབ། སྒྲིབ་སྦྱོང་ལ་ཐོག་ཏུ་ནུབ་སྒོ་སྲུང་བ་ལ་བསང་དང་གསེར་སྐྱེམས་འབུལ། རླུང་སེམས་དབང་དུ་འདུས་པའི་རྟེན་འབྲེལ་བསྒྲིགས། ཕྱག་འཚལ་སྒང་དུ་གནས་མཆོག་རྟེན་དང་བརྟེན་པར་བཅས་པའི་དཀྱིལ་འཁོར་གསལ་གདབ་ཅིང་ཕྱག་ཅི་ནུས་སུ་འཚལ། ཆོས་འཕེལ་ལ་ཐོག་ཏུ་སེམས་ཅན་ཐམས་ཅད་ཀྱི་སེམས་རྒྱུད་ཆོས་ལ་འབྱོར་བའི་སྨོན་ལམ་གདབ། གནས་སྲུང་ཆེན་པོ་རྡོ་རྗེ་དཔལ་འབར་མ་བསང་དང་གསེར་སྐྱེམས་སོགས་ཀྱིས་མཆོད། ལྷ་རྒྱལ་བཏང་། རྨུག་འཛིན་དབང་པོའི་གནས་རིས་མདུན་ནམ་འབྲས་ལྡན་གྱི་ལྗོན་ཤིང་ཡོད་པའི་ཕྱོགས་ནས་བྱང་སྒོ་སྲུང་བ་ལ་བསང་དང་གསེར་སྐྱེམས་ཀྱིས་བརྔན། ཕྱྭ་གཡང་འགུགས་པའི་འདོད་དོན་བཅོལ། རི་གདོང་རལ་གྲི་འདྲ་བ་ནས་དགྲ་བགེགས་ཚར་གཅོད་ཀྱི་རྟེན་འབྲེལ་བསྒྲིགས། དེ་ནས་རིམ་པར་གཡས་བསྐོར་གྱིས་ཕྱིན་ཏེ་དཔལ་ཆེན་པོ་རང་བྱུང་གི་གཡོན་འདབ་བྲག་དམར་ལྷུན་ཆགས་ནས་གངས་རི་རྩེ་མཐོང་བའི་བར་དུ་བརྒལ། ལྷ་མཇལ་སྒང་ནས་རང་བྱུང་དཔལ་ཆེན་པོའི་བཀོད་པ་མཇལ་ཞིང་མཎྜལ་ཚོགས་གཏོར་ཡན་ལག་བརྒྱད་པའི་རྒྱུན་བཤགས་སོགས་བྱ་ཞིང་ཐུན་མོང་མ་ཡིན་པའི་སྨོན་ལམ་གདབ། འདི་དག་ནས་མགོ་བརྩམས་མཐར་ཕྱིན་སྒང་དུ་མ་སླེབ་བར་ཀུ་ཅོ་བཤུག་པ་སོགས་སྐད་ཆེར་མི་འདོན། གཅིན་རྟུག་སྣབས་ལུད་དོར་བ་སོགས་མི་བྱ་བར་དད་མོས་རྩེ་གཅིག་པས་རིག་པ་བསྒྲིམས་ནས་འགྲོ་དགོས། སྔོན་མོ་བྱ་འདྲེད་བྱིས་འདྲེད་བརྒྱུད་པས་སྐབས་སྐབས་སུ་ཀང་ཀ་དང་བྱ་རོག་གི་སྐད་ཐོས། ཞིང་སྐྱོང་ལ་བརྒལ། བྱ་རོག་གདོང་རང་བྱོན་གྱི་མདུན་དུ་གཏོར་ཚོགས་འབུལ་ཞིང་ཕྲིན་ལས་བཅོལ། མཁའ་འགྲོའི་ཚོགས་གཏོར་ཡོད་པའི་མདུན་ཐད་ནས་ཡན་ལག་བརྒྱད་པ་ཕྱི་ནང་གསང་བའི་མཎྜལ་དང་ཚོགས་གཏོར་འབུལ། མཆོག་གི་དངོས་གྲུབ་ཐོབ་པའི་གསོལ་བ་གདབ། ཤར་གྱི་ལྗོན་པ་ཡོད་པར་སྒོ་སྲུང་ལ་བསང་དང་གསེར་སྐྱེམས་ཀྱིས་བརྔན། ལ་དགུ་ལུང་དགུ་བརྒལ། ཕྱག་དྲུག་པ་རང་བྱོན་ལ་མཆོད་པ་འབུལ་ཞིང་འདོད་དོན་ཞུ། བྱ་རོག་རོང་ངམ་ཞིང་སྐྱོང་རོང་དུ་བབ། རུ་ལུའི་སྔགས་བཟླ་ཞིང་བདུད་རྩིའི་ཆུ་བོས་ཁྲུས་བྱ། དགེ་སྡིག་ཤན་འབྱེད་ཀྱི་འཕྲང་ནས་བརྒྱུད་སྟག་ཚང་རོང་དུ་ཕྱིན། འདི་ནས་མཁའ་འགྲོ་མ་སྟག་གཟིག་གི་གཟུགས་སུ་སྤྲུལ་ནས་མི་སྡིག་ཅན་ཟ་བར་བྱེད། གནས་བསྐོར་བ་གཞན་ལའང་ངར་སྐད་སྒྲོགས་པ་དང་འཇིགས་གཟུགས་བསྟན་པའི་སྔངས་སྐྲག་གིས་ལས་ཀྱི་སྒྲིབ་པ་སྦྱོང་། འདིའི་གཡས་ཕྱོགས་ཕུག་པ་ཞིག་ལ་རྡོ་བཅོལ་བས་བཟང་ངན་གྱིས་པྲ་བརྟག འཁྲུལ་སྣང་རྩད་གཅོད་ཀྱི་འཕྲང་ལས་སྒྲོལ་ཏེ་སྤྱན་རས་གཟིགས་དངོས་སུ་མཇལ་བར་འདུ་ཤེས་པས་ཡིག་དྲུག་རང་བྱོན་མཇལ། དོམ་ཚང་རོང་དུ་སླེབས། འདིའི་གསང་མགོན་ཕུག་པར་ཕལ་གྱིས་བགྲོད་དུ་མི་རུང་ཞིང་ཕྱག་དྲུག་ཡེ་ཤེས་ཀྱི་མགོན་པོའི་རྣལ་འབྱོར་པ་ཡིན་ན་གཟབ་ནས་སོང་སྟེ་མཆོད་བསྟོད་བགྱིས་པས་འདོད་དོན་འགྲུབ། རོང་འདི་རྣམས་ཙཱ་རིའི་གནས་ལག་དངོས་ཡིན། ལེགས་ཉེས་སྟངས་འཛིན་ཀྱི་འཕྲང་ལས་བརྒལ་ཏེ་མཁའ་འགྲོ་མ་བདེ་བའི་དབང་ཕྱུག་གི་སྐུ་མཇལ། མཁའ་སྤྱོད་ཀྱི་སྨོན་ལམ་གདབ། འཁོར་འདས་ཤན་འབྱེད་ཀྱི་འཕྲང་ལས་བརྒལ་ནས་འཁོར་འདས་ལ་བཟླའི་ལྟེམས་ཡེ་ཤེས་ཡངས་པའི་ཐང་དུ་ཅུང་ཟད་ངལ་གསོ། རྣལ་འབྱོར་པ་རྣམས་ཀྱིས་ཉམས་སྐྱོང་ཞིང་རྡོ་རྗེའི་ཉམས་མགུར་བླངས། ཚོགས་ཀྱི་འཁོར་ལོ་བྱ། མཎྜལ་རྒྱས་པར་འབུལ། སྐྱེ་བོ་ཕོ་མོས་ཀྱང་ཡི་གེ་བདུན་པ་དང་བཛྲ་གུ་རུའི་དབྱངས་གླུར་ལེན། མཐར་ཕྱིན་སྒང་དུ་སླེབ་པ་ན་བཀྲ་ཤིས་བརྗོད་ཅིང་བསྔོ་བ་སྨོན་ལམ་གྱི་རྒྱས་གདབ་པར་བྱའོ། །

གཉིས་པ་ཧེ་རུ་ཀའི་ནང་སྐོར་ནི། གདན་ས་ཆེན་པོ་ནས་ཕྱིན་ཏེ་སྒྲོལ་མ་ལ་བརྒལ། རྡོ་རྗེ་མཚེར་ཆེན་མའི་འོག་གི་ལུང་པ་བརྒྱུད་ར་ཆེན་ཁ་ནས་སྨར་ཡུ་ནང་དུ་བབ་སྟེ་ལྷ་མཇལ་སྒང་དུ་འགྲོ། དེ་ནས་ཐད་ཀའི་གསང་ལམ་བརྒྱུད། རི་ཁྲོད་ཞིང་སྐྱོང་བྲག་འོག་ནས་དུང་དཀར་སྒང་དུ་བསྐོར་མདུད་ཕོག་པའོ། །

གསུམ་པ་ཡེ་ཤེས་འབར་བའི་གསང་བསྐོར་ནི་གྲུབ་པ་ཐོབ་པ་དང་སུམ་ལྡན་རྡོ་རྗེ་འཛིན་པ། དགེ་སློང་ཁྲིམས་གཙང་། སྔགས་པ་དམ་གཙང་། རིགས་བཟང་མཁའ་འགྲོའི་མཚན་རྟགས་ཚང་བའི་བུད་མེད་མ་གཏོགས་ཕལ་པས་བགྲོད་པའི་གནས་མ་ཡིན་ནོ། །

བཞི་པ་རིག་འཛིན་བླ་མའི་རྩེ་སྐོར་ནི། ཆུ་མིག་མགོ་མང་ནས་ཧེ་རུ་ཀའི་དབུ་རྩེའི་བར་དུ་ཕྱིན་ཏེ་ངོས་ལེབ་ནས་མཐུར་དུ་བབ། ཞིང་སྐྱོང་བྲག་འོག་ནས་དུང་སྒང་དུ་ཕྱིན་པའོ། །

ལྔ་པ་ཀུན་ཏུ་བཟང་པོའི་སྟེང་སྐོར་ནི། དཀྱིལ་འཁོར་གྱི་སྟེང་ཕྱོགས་བགྲོད་པའི་ཚུལ་ཏེ་ཉམས་བསྐྱང་བའི་གནས་ལས་ཕལ་པའི་སྤྱོད་ཡུལ་མ་ཡིན་ནོ། །གཞན་ཡང་ཅི་བདེའི་ཞོལ་ནས་བསྐོར་ན་ཆོས་ཁྲི་བྲག་སྣ་ནས་ས་དམར་ལ་བརྒྱུད། ཛི་ན་ནས་ངོས་ཆེན་ཏུ་བབ་སྟེ་དཔའ་ཆུ་རིམ་འདེད་ཀྱིས་ཆོས་ཁྲི་མཎྜལ་ཐང་དུ་ཕྱིན་པ་དང་། ནང་གི་ཧེ་རུ་ཀ་གསུམ་ཚང་བའི་དཀྱིལ་འཁོར་རྫོགས་པའི་མཐའ་སྐོར་བྱེད་ན། ཤ་བཞི་ལ་བརྒལ་ཚེ་ཚ་ནས་རྩེ་ཟུལ་མདོར་ཕྱིན། ཨ་ལོ་ཁ་སྟེང་ལ་བརྒལ། ཀ་རོང་ཁ་ནས་ལྷ་མདོའི་འཇོ་ངད་ལ་བརྒྱུད། དཔའ་བོ་དབང་ཆེན་བྲག་ནང་དུ་བཙུད། གཡུ་འབྲུག་ལ་སྨད་ནས་གསང་ལམ་བསྙེགས་ཏེ་རྡོ་ཕུར་བབ། ཆུ་ཐུར་དེད་ཀྱིས་ཕྱིན། སི་ངུ་ལ་བརྒལ། རོང་མེ་ནས་གཞུང་ལམ་བརྒྱུད་དེ་འདི་གར་འགྲོ་དགོས་པར་གསུངས་སོ། །

གཉིས་པ་དུས་ཚོད་ལ་གཉིས། ཐུན་མོང་དང་ཁྱད་པར་རོ། །

དང་པོ་ནི། གནས་མཆོག་འདི་དག་འཁོར་བ་མ་སྟོངས་ཀྱི་བར་དུ་འབྲེལ་ཚད་དོན་ལྡན་གྱི་འགྲོ་དོན་འབྱུང་བ་བྱིན་གྱིས་བརླབས་པ་ཡིན་པས། རང་རང་གི་འཁོས་ལྕོགས་དང་བསྟུན་པའི་ཕྱག་བསྐོར་མཆོད་འབུལ་སོགས་དུས་ནམ་བྱས། ཆེ་ཆུང་ཇི་ཙམ་ནུས་ཀྱང་དེ་དང་མཐུན་པའི་ཕན་ཡོན་འབྱུང་བ་ཡིན་པས་ངེས་བཟུང་མེད་དོ། །

གཉིས་པ་ཁྱད་པར་གྱི་དུས་ནི། རྩ་བ་ལས། ཁྱད་པར་ལུག་ལོ་སྤྲེལ་ཟླ་བར༔ རིག་འཛིན་ཡི་དམ་མཁའ་འགྲོའི་ཚོགས༔ ཕྱོགས་བཅུའི་གནས་ནས་འདི་རུ་འབྱོན༔ ཞེས་གསུངས་པས་ལུག་ལོ་ནམ་ཤར་དུ་ཕྱོགས་བཅུའི་རྩ་བ་གསུམ་པོའི་དཀྱིལ་འཁོར་གནས་མཆོག་འདིར་འདུ་བ་ཡིན་ཅིང་། དེ་ལས་ཀྱང་ཁྱད་པར་སྤྲེལ་གྱི་ཟླ་བར་ངེས་པ་ཅན་གྱི་དུས་ཚིགས་སུ་གསུངས་པས། ལུག་ལོ་སྤྲེལ་གྱི་ཟླ་བ་དང་། ལོ་བསྟར་དུའང་སྤྲེལ་ཟླ་ནམ་བྱུང་ལ་བསྐོར་ན་བྱིན་རླབས་ལྷག་པར་ཆེ་བ་ཡིན། སྤྲེལ་ཟླ་ཟླ་བ་ལྔ་པ་དང་། དྲུག་པ་དང་། བདུན་པ་ལ་བཞེད་པའི་ལུགས་སྲོལ་གསུམ་སྣང་བ་གསུམ་ཀའང་ཆོས་སྤྱན་ལྡན་པ་དག་གི་དགོངས་པ་ཡིན་པས་འཁྲུལ་བ་མེད་ཅིང་། སངས་རྒྱས་རྣམས་གདུལ་བྱའི་ཡུལ་ལ་འཇུག་པའི་ཐུགས་རྗེ་མངའ་བས་སེམས་ཅན་གྱི་དད་པའི་ཉེར་ལེན་དང་མཐུན་པར་བྱིན་རླབས་འཇུག་པའི་ཕྱིར་ཟླ་བ་འདི་གསུམ་ཁྱད་པར་མེད་པར་བཟུང་ངོ་། ། གསུམ་པ་བསྐོར་བ་བྱེད་ཚུལ་ཁྱད་པར་བ་ནི་གོང་དུ་སྨོས་པས་ཁྱབ་ལ། སྤྱིར་ནི་རྒྱལ་བ་གཉིས་པ་རང་བྱུང་རྡོ་རྗེ་དང་། རྟོགས་ལྡན་མཁའ་སྤྱོད་དབང་པོ་སོགས་ཀྱི་གསུང་རབ་ལས་འབྱུང་བ་ལྟར། འདུལ་བ་དང་མཐུན་པར་སྒོ་གསུམ་སྡོམ་པ་དང་ལྡན་པ། ཕར་ཕྱིན་དང་མཐུན་པར་བྱང་ཆུབ་སེམས་བསྐྱེད་དང་ལྡན་པ། གསང་སྔགས་དང་མཐུན་པར་དམ་ཚིག་གཙང་ལ་ཁྱེར་སོ་གསུམ་དང་ལྡན་པ། ལུས་སྒྲིབ་དག་པར་བྱེད་པ་རྟ་ཁྱེར་ཞྭ་གྱོན་སོགས་སྤོང་བ། ངག་སྒྲིབ་དག་པར་བྱེད་པ་ཁ་ཏོན་བསྟོད་དབྱངས་དང་བཅས་པ། ཡིད་སྒྲིབ་དག་པར་བྱེད་པ་མོས་གུས་དག་སྣང་དང་ལྡན་པ། མདོར་ན་ཆོས་མིན་གྱི་སྤྱོད་པ་སྤང་སྟེ་བག་ཡོད་དྲན་ཤེས་ཡིད་ཆེས་དང་ལྡན་པས་བསྐོར། རྩེད་མོ་ཀུ་རེ་བཞད་གད་ལུང་མ་བསྟན་གྱི་གཏམ་སྨྲ་བ་སོགས་སྤང་། བཟང་བཏུང་འཕྱོར་ཆས་སོགས་འཇིག་རྟེན་བྱ་བ་རྒྱང་དུ་བསྲིངས། ཁྱད་པར་མི་དགེ་བའི་ལས་ལམ་བཅུ་དང་། ཆང་བཟི་འཐབ་རྩོད། ཀུ་ཅོ་ཆེར་སྒྲོག་པ་སོགས་ལ་ཤིན་ཏུ་འཛེམ། གནས་ནང་འདིར་གཏོགས་པའི་རི་དྭགས་གསོད་པར་བྱུང་ན་ཆེ་ཆུང་གང་གསོད་ཀྱང་རུང་བཀའ་ཆད་འཕྲལ་དུ་འབྱུང་བའི་བཀའ་བསྒོ་ལོ་བསྟར་ནན་ཏན་བྱས་ཤིང་མདོ་སྒྲུབ་ཀྱང་ཡོད་པས་བཀའ་ཆད་ངེས་པར་འབྱུང་བའི་ཕྱིར་རང་སྲོག་དང་རང་ནོར་ལ་བསམ་མནོ་བཏང་བའི་དྲན་པ་བསྟེན་དགོས། ལ་མཐུར་འཕྲང་རོང་གིས་ངལ་དུབ་བྱུང་ན་དོན་མེད་འཇིག་རྟེན་བྱ་བ་དཀའ་བ་དང་བླང་དང་མི་མཚུངས་པར་སྒྲིབ་པ་བྱང་བའི་དགའ་བ་བསྒོམ། དཔའ་བོ་མཁའ་འགྲོའི་རྣམ་འཕྲུལ་ཇི་ལྟར་སྟོན་པའི་ཚོད་མི་ཟིན་པས་མི་དུད་འགྲོ་བྱ་བྱིའུ་རི་དྭགས་གཅན་གཟན་བཟང་ངན་གང་མཐོང་ཡང་དད་པ་དང་དག་སྣང་བསྐྱེད། ལམ་འཕྲང་ཆར་རླུང་ནགས་རོང་གཅན་གཟན་ཐོག་སེར་སོགས་ཀྱི་འཇིགས་པ་བྱུང་ན་སེམས་མི་ཞུམ་པར་རྩ་བ་གསུམ་ལ་གསོལ་འདེབས་དང་གནས་བདག་ལ་གཏོར་མ་གསེར་སྐྱེམས་འབུལ་ཞིང་བཀའ་བསྒོ་བྱ། བར་དོའི་འཇིགས་སྐྲག་དང་མཚུངས་པར་བལྟས་ལ་བར་དོ་འཕྲང་སྒྲོལ་གྱི་གསོལ་འདེབས་བྱ། རྟེན་དང་རང་བྱོན་རྣམས་ལ་རྡེག་པ་དང་བཅག་པ་དང་གཞན་དུ་སྤོ་བ་སོགས་བྱས་ན་དུས་མིན་འཆི་བ་སོགས་བར་ཆད་འབྱུང་བས་གཡས་ཆུང་གཏན་ནས་མི་བྱ་བར་རྩ་གསུམ་དངོས་སུ་འདུ་ཤེས་བསྐྱེད། སྒྲུབ་པའི་ཕུག་པ་རྣམས་སུ་ཚུལ་མ་ཡིན་པའི་སྤྱོད་པ་བྱས་ན་བཀའ་ཆད་འབྱུང་བས་ཚོགས་འཁོར་དང་བསམ་གཏན་བསྒོམ་པ་སོགས་ཀྱི་བཟང་འབྲེལ་བཞག་པར་བྱ་སྟེ། རྩ་བ་ལས་དམ་མེད་ཚུལ་ཉེས་སྤྱོད་པ་རྣམས༔ གནས་འདིར་སྡོད་པའི་གནས་མ་ཡིན༔ སྐལ་བ་ལྡན་དང་དམ་ཚིག་ལྡན༔ ཚུལ་བཞིན་སྤྱོད་པའི་རྣལ་འབྱོར་ལ༔སྐལ་པར་མཚམས་པའི་དངོས་གྲུབ་ནི༔ འཐོབ་འགྱུར་ཐེ་ཚོམ་མེད་པའོ༔ ཞེས་གསུངས་སོ། །མདོར་ན། མོས་གུས་གསོལ་འདེབས་དང་བཅས་ཏེ་བསྐོར་ན་རིག་འཛིན་བླ་མའི་བྱིན་རླབས་འཇུག་ཏིང་འཛིན་བཟླས་བརྗོད་དང་བཅས་ཏེ་བསྐོར་ན་ཡི་དམ་ལྷའི་དངོས་གྲུབ་སྟེར། དགའ་སྟོན་ཚོགས་འཁོར་དང་བཅས་ཏེ་བསྐོར་ན་མ་སྲིང་མཁའ་འགྲོས་སྡོང་གྲོགས་བྱེད། དམ་རྫས་གཏོར་མ་དང་བཅས་ཏེ་བསྐོར་ན་ཆོས་སྐྱོང་སྲུང་མས་ཕྲིན་ལས་སྒྲུབ། བསང་བརྔན་གསེར་སྐྱེམས་དང་བཅས་ཏེ་བསྐོར་ན་གནས་བདག་ཡུལ་ལྷས་མཐུན་རྐྱེན་སྒྲུབ། དཀའ་སྤྱད་གདུང་ཤུགས་དང་བཅས་ཏེ་བསྐོར་ན་ལས་ངན་སྡིག་སྒྲིབ་དག མཎྜལ་སྨོན་ལམ་དང་བཅས་ཏེ་བསྐོར་ན་གང་འདོད་འབྲས་བུ་འགྲུབ། གསང་ཆེན་རིག་སྤྱོད་དང་བཅས་ཏེ་བསྐོར་ན་འཕོ་མེད་བདེ་ཆེན་འགྲུབ། མི་རྟོག་ཏིང་འཛིན་དང་བཅས་ཏེ་བསྐོར་ན་མཆོག་གི་དངོས་གྲུབ་འཐོབ་པར་འགྱུར་བ་ཡིན་པས་རྡོ་རྗེའི་དཀྱིལ་འཁོར་བླ་ན་མེད་པ་འདི་དག་ལན་བརྒྱར་བསྐོར་ཡང་ཆོག་ཤེས་མེད་པ། ལོ་བརྒྱར་བསྡད་ཀྱང་སྐྱོ་ངལ་མེད་པ། ཡིད་ཆེས་ངེས་ཤེས་རྒྱུན་ཏུ་བྱ་བ། ཀུན་ཏུ་དགའ་བས་རྟག་ཏུ་བསྟེན་ཏེ་མི་ལུས་དོན་དང་ལྡན་པར་བྱའོ། །

བརྒྱད་པ། ངོ་མཚར་དེ་ལྡན་གྱི་གནས་ལ་བསོད་ནམས་བགྱིས་པའི་ཕན་ཡོན་བརྗོད་པ་ལ་གསུམ། སྤྱི་དང་བྱེ་བྲག སྐོར་ཚད་སྨོས་པའོ། །

དང་པོ་ནི། སྤྱིར་རྡོ་རྗེའི་གནས་ཆེན་འདི་རྣམས་སུས་ཀྱང་མ་བྱས་རང་བྱུང་ལྷུན་གྱིས་གྲུབ་པའི་རྟེན་མཆོག དག་པའི་སྣང་ངོར་ཐར་པ་ཆེན་པོའི་ཕོ་བྲང་། མ་དག་པའི་བློ་ལ་ས་རྡོ་རི་བྲག་བེམ་པོའི་གཟུགས་སུ་སྣང་བ་ཡིན་པས། བཟོ་བོ་མཁས་པས་འཇིམ་པ་སོགས་ལས་བཅོས་པའི་སྐུ་གསུང་ཐུགས་རྟེན་ལ་ཕྱག་མཆོད་བསྐོར་བ་བགྱིས་པའི་བསོད་ནམས་ཀྱང་ཚད་མེད་པ་མདོ་རྒྱུད་རྣམས་ལས་གསུངས་པས། དེ་ལས་ཀྱང་གནས་མཆོག་འདི་རྣམས་ལ་ཕྱག་མཆོད་བསྐོར་བ་སོགས་བགྱིས་པའི་ཕན་ཡོན་བྱེ་བ་བརྒྱ་འགྱུར་དུ་ཆེ་བ་ལུང་དང་རིགས་པས་གྲུབ་ལ། རྣལ་འབྱོར་པ་རྣམས་ཀྱིས་ནི་རྡོ་རྗེའི་བརྟུལ་ཞུགས་ཀྱི་རྟེན་འབྲེལ་དུ་མ་བསྒྲིགས་ནུས་པ་ཡིན། ལུང་བསྟན་བཀའ་རྒྱ་མ་ལས། དེ་བཞིན་གནས་དང་གནས་ཕྲན་ལ་སོགས་དང༔ ཡུལ་དང་ཡུལ་འདྲ་སྦས་པའི་ཡུལ་རྣམས་སུ༔ སྒྲུབ་པ་བྱས་པའི་ཡོན་ཏན་བསམ་མི་ཁྱབ༔ ཕལ་པའི་གནས་སུ་ལོ་གཅིག་བསྒྲུབ་པ་པས༔ དེ་དག་རྣམས་སུ་ཞག་གཅིག་འགྲུབ་ཐག་ཉེ༔ ཞེས་སོགས་གཏེར་ཁ་རྣམས་ལས་མགྲིན་གཅིག་དབྱངས་གཅིག་ཏུ་གནས་ཆེན་རྣམས་ཀྱི་ཡོན་ཏན་ཚད་མེད་པར་བསྔགས་པར་མཛད་ཅིང་། མདོ་ཁམས་གནས་ཆེན་རྣམས་ཀྱི་མདོ་བྱང་དཀར་ཆག་གི་ཕན་ཡོན་སྤྱི་བསྡོམས་ལས་ཀྱང་། ཕྱག་བསྐོར་བྱས་ཚད་ངན་སོང་སྐྱེ་སྒོ་གཅོད༔ བཀུར་སྟི་བྱས་ན་མཐོ་རིས་གནས་སུ་སྐྱེ༔ ཚོགས་འཁོར་ལན་གཅིག་བསོད་ནམས་ཚོགས་ཆེན་རྫོགས༔ ཚོགས་འཁོར་ལན་གཉིས་ལས་ཀྱི་རྣམ་སྨིན་བྱང༔ ཚོགས་འཁོར་ལན་གསུམ་ཨོ་རྒྱན་པདྨ་བདག༔ དངོས་ཉམས་རྨི་ལམ་བརྡ་ཡི་ཚུལ་དུ་མཇལ༔ ཚོགས་འཁོར་བརྒྱ་རྩས་མཁའ་སྤྱོད་གནས་སུ་སྐྱེ༔ མཆོག་ཐོབ་འདོད་ན་རྩེ་གཅིག་སྒྲུབ་ལས་འགྲུབ༔ འབྲེལ་ཚད་དོན་ལྡན་གནས་མཆོག་ཨེ་མ་ཧོ༔ ཞེས་གསུངས་སོ། །

གཉིས་པ་བྱེ་བྲག་ཏུ་གནས་ཆེན་འདི་ཉིད་ལ་བསོད་ནམས་བསགས་པའི་ཕན་ཡོན་ནི། དཀར་ཆག་ལས། ཐུན་མོང་དུས་ཚོད་ཁྱད་པར་ཐམས་ཅད་དུ༔ དད་ཅིང་མོས་པ་བརྟན་པོ་ཡིས༔ གནས་འདིར་ཕྱིན་པ་ཙམ་གྱིས་ཀྱང༔ ངན་སོང་དུཿཁ་ལས་སྐྱོབ་ཅིང༔ ཕྱི་ནང་གསང་བའི་ཚོགས་འཁོར་གྱིས༔ བསོད་ནམས་ཡེ་ཤེས་ཚོགས་ཆེན་རྫོགས༔ ཕྱག་དང་བསྐོར་བ་སུས་བྱེད་པ༔ ལས་ངན་སྡིག་སྒྲིབ་ཐམས་ཅད་འདག༔ གཞན་དུ་ལོ་གཅིག་སྒྲུབ་པ་བས༔ འདི་རུ་ཐུན་གཅིག་བསྒོམ་པས་ཟབ༔ རྩེ་གཅིག་སྒྲུབ་པ་སུས་བྱེད་པ༔ མཆོག་ཐུན་དངོས་གྲུབ་དེ་ཡིས་འཐོབ༔ གནས་འདིར་མཆོད་པ་སུས་བྱེད་པ༔ ཚེ་དང་བསོད་ནམས་ཐམས་ཅད་རྒྱས༔ ཞེས་གསལ་ལ་འདུས་པར་བདེན་པའི་ཚིག་ཏུ་ལེགས་པར་གསུངས་པ་ལྟར། ཕྱག་བསྐོར། མཆོད་བསྟོད། མཎྜལ་ཚོགས་འཁོར། སྤྲོས་བཅས་སྤྲོས་མེད་ཀྱི་སྒྲུབ་པ་བགྱིད་པར་ལྟ་ཅི་སྨོས། དད་ཅིང་མོས་པས་གནས་འདིར་ཕྱིན་པ་ཙམ་གྱིས་ཀྱང་ངན་འགྲོ་ལ་རྒྱབ་ཀྱིས་ཕྱོགས་པར་འགྱུར་ཞིང་། འདི་ཉིད་ཙཱ་རི་ཏྲའི་གནས་དང་མཚུངས་པའི་རྒྱུ་མཚན་གྱིས། དེའི་ཕན་ཡོན་ཁྱད་པར་བ་རྣམས་ཀྱང་འཐོབ་པར་འགྱུར་ཏེ། དེའང་རྒྱལ་བའི་དབང་པོ་རང་བྱུང་ཞབས་ཀྱིས། གནས་ཉེར་བཞིའི་གཙོ་བོ་ཙཱ་རི་ཏྲ། །བཅོམ་ལྡན་བདེ་མཆོག་གི་ཕོ་བྲང་ཡིན། །དད་མོས་པས་བསྐོར་བ་བྱེད་པ་རྣམས། །ཕྱི་མ་བདེ་ཆེན་ཞིང་ཁམས་སུ། །འོད་དཔག་མེད་ཀྱི་སྤྱན་སྔར་སྐྱེ། །ཞེས་དང་། རྗེ་བདུན་པ་ཆོས་གྲགས་རྒྱ་མཚོས། འདི་ནི་དཀྱིལ་འཁོར་ཆེན་པོ་ཉིད། །སྐལ་ལྡན་རྣམས་ཀྱིས་དངོས་སུ་མཐོང་། །སྐལ་བ་འབྲིང་དང་ཐ་མ་ལ། །ལྷ་སྐུ་ཕྱག་མཚན་ཡིག་འབྲུ་དང་། །མཆོད་རྟེན་དུར་ཁྲོད་ལ་སོགས་པ། །གསལ་དང་མི་གསལ་ཚུལ་དུ་མཐོང་། །གནས་འདི་བསྐོར་བ་བསམ་ནས་ནི། །གོམ་པ་གཅིག་ཙམ་བོར་བས་ཀྱང་། །སྒྲིབ་དག་བར་ཆད་སེལ་བ་དང་། །དངོས་གྲུབ་འབྱུང་བར་ངེས་པ་ན། །དད་པ་དམ་ཚིག་དང་ལྡན་པས། །ལོག་ལྟ་སྤངས་ནས་ཚུལ་བཞིན་དུ། །གནས་ཀུན་བསྐོར་བ་བྱས་པ་ན། །ནད་གདོན་སྡིག་སྒྲིབ་བར་ཆད་སོགས། །མི་མཐུན་ཕྱོགས་ཀུན་ཞི་བ་དང་། །བསམ་དོན་འགྲུབ་ཅིང་ཚེ་དང་ནོར། །བསོད་ནམས་བདེ་ལེགས་རྒྱས་པར་འགྱུར། །སྣོད་བཅུད་དབང་དུ་འདུ་བ་དང་། །དགྲ་བགེགས་ཐམས་ཅད་ཚར་ཆོད་ཅིང་། །ཐུན་མོང་དངོས་གྲུབ་ཕལ་ཆེར་འགྲུབ། །རིམ་གྱིས་མཆོག་གི་དངོས་གྲུབ་ཐོབ། །ཅེས་རྡོ་རྗེའི་ཚིག་ཏུ་མི་བསླུ་བར་ཞལ་གྱིས་བཞེས་པའི་ཕན་ཡོན་དེ་དག་རང་རང་གི་དད་མོས་ཀྱི་ཉེར་ལེན་སྐལ་པའི་ཁྱད་པར་དང་མཚུངས་ལྡན་དུ་འཐོབ་པར་འགྱུར་བ་ཡིན་ལ། ཁྱད་པར་གནས་མཆོག་འདིའི་ཐང་བཞིར་ཚོགས་གཉིས་བསགས་པས་རྒྱུད་བཞི་དག །འཕྲང་བཞི་བརྒལ་བས་སྒྲིབ་བཞི་བྱང་། རོང་བཞིར་བགྲོད་པས་གནས་སྐབས་བཞིའི་བག་ཆགས་སེལ། ཆུ་བོ་བཞིས་ཁྲུས་བྱ་ཞིང་འཐུངས་པས་དབང་བཞིའི་ནུས་པ་འཇོག ལ་བཞིར་དཀའ་བ་འཛེགས་པས་ལམ་བཞིར་བགྲོད། སྒང་བཞིར་ཕྱིན་པས་ཉམས་བཞི་འཆར། དབེན་རི་བཞིར་ཏིང་འཛིན་བསྐྱངས་པས་རྟོགས་པ་བཞི་ཐོབ། གོང་བུ་ལྔ་མཐོང་བས་ཡེ་ཤེས་ལྔ་འཆར་ཞིང་མཐར་ཐུག་སྐུ་ལྔ་འཐོབ་པ་སྟེ། དེ་ལྟ་བུའི་རྟེན་འབྲེལ་བསྒྲིག་ཅིང་བག་ཆགས་རྒྱུད་ལ་འཇོག་པ་ཡིན་པས་སོ་སོར་ངེས་ཤེས་ཀྱང་བསྐྱེད་དགོས་སོ། །དེ་ལྟར་ན་བསྐོར་བ་རྒྱས་པ་ཚད་ལྡན་གཅིག་གིས་ཁམས་དྲུག་ལྡན་གྱི་རྟེན་ཅན་ཞིག་སྨིན་གྲོལ་གཉིས་མཐར་ཕྱིན་ནས་ཚེ་ལུས་གཅིག་ལ་འཚང་རྒྱ་བའི་རྟེན་འབྲེལ་ལྷུན་གྲུབ་ཏུ་བསྒྲིག་ནུས་པ་ཡིན་ནོ། །གསུམ་པ་བསྐོར་ཚད་ཀྱི་ཕན་ཡོན་ཀྱང་། ལམ་ཞུགས་ཀྱི་གང་ཟག་རབ་འབྲིང་ཐ་མ། ཁྱིམ་པ་ཕོ་མོ་གང་ཡིན་ཡང་རང་རང་ལུགས་མཐུན་གྱི་བསམ་སྦྱོར་ཚད་ལྡན་གོང་སྨོས་ལྟ་བུའི་ངོས་ནས་མཁའ་འགྲོ་རྒྱ་མཚོའི་ཕྱི་སྐོར་གཅིག་ལ་རང་རང་གི་འདོན་བཟླས་གང་བྱེད་པ་དུང་ཕྱུར་གཅིག་ཏུ་འགྱུར་ཞིང་གང་ཟག་རབ་ལ་ནི་ཚད་བཟུང་མེད། དེ་བཞིན་དུ་ཧེ་རུ་ཀའི་ནང་སྐོར་བདུན། རིག་འཛིན་བླ་མའི་རྩེ་སྐོར་བརྒྱ། ཅི་བདེའི་ཞོལ་བསྐོར་ཉེར་གཅིག་ལ་དུང་ཕྱུར་རེ་བཟླས་པའི་ཕན་ཡོན་ཡོད། གཞན་ཡང་མཎྜལ་མར་མེ་ཚོགས་འཁོར་སོགས་ཀྱང་གཞན་དུ་སུམ་བརྒྱ་བྱས་པ་དང་གནས་འདིར་བརྒྱ་རྩ་གྲུབ་པའི་ཕན་ཡོན་མཉམ་ཞིང་། སྒྲུབ་པ་བགྱིས་པ་སོགས་ཀྱི་འགྱུར་ཁྱད་ཚད་མེད་པའང་གོང་སྨོས་ལུང་གིས་གསལ་བོར་མཚོན་པ་ལྟར། མི་ལུས་སྙིང་པོར་ལེན་པར་འདོད་པའི་བློ་གྲོས་བཟང་པོ་ཅན་རྣམས་ཀྱིས་གནས་མཆོག་འདིར་ཚོགས་གཉིས་སྤེལ་བ་ལ་ཕྱི་བཤོལ་དུ་མ་སོང་བ་བརྩོན་འགྲུས་བརྟན་པོའི་གོ་ཆ་བགོ་བར་བྱའོ། །སངས་རྒྱས་ཡེ་ཤེས་ཡུལ་ནི་བསམ་མི་ཁྱབ། །ཁམས་དང་མོས་པའི་མཐུར་ཡང་ཚད་བཟུང་མེད། །བདེ་ཆེན་ཆང་གིས་མྱོས་པའི་གར་མཁན་རྣམས། །རྡོ་རྗེའི་བཀོད་པ་མཐའ་ཡས་གླུ་ལེན་ནོ། །རང་ལ་སྦས་པ་གཞན་ལ་སྟོན་པའི་མིག །འཕགས་མིན་སྐྱེ་ལ་མི་གསལ་རབ་རིབ་ཕྱིར། །ངལ་བ་འདི་འདྲས་བདག་ལ་ཅི་བྱ་ཡང་། །གྲུབ་པའི་དྲིན་གྱིས་གཞན་ལ་ཕན་པར་བརྩམས། །སུ་ཞིག་རྡུལ་དང་བྲལ་བའི་མིག་ཐོབ་པ། །དེ་ཡི་གམ་ན་རྒྱལ་བའི་ཞིང་བཀོད་དེ། །སྤྱོད་པ་རྒྱ་མཚོ་སྤྱད་པའི་བློ་ཆེན་ནི། །མྱུར་དུ་ཐམས་ཅད་གཟིགས་པའི་ས་ལ་འགྲོ། །ལྐོག་གྱུར་གཟིགས་པའི་རྡོ་རྗེའི་སྤྱན་ལྡན་རྣམས། །ཕྲ་བའི་ཡུལ་ལ་ཡེ་ཤེས་འཇུག་པས་ན། །ཇི་ལྟར་གསུངས་ཀྱང་བདེན་པའི་ཚིག་ཡིན་ཕྱིར། །ཟ་འོག་རས་མ་ཆོས་ཀྱི་གོས་སུ་བསྡེབས། །འདི་འབྲེལ་སྐྱེ་དགུས་རྡོ་རྗེའི་ལམ་བགྲོད་དེ། །སྒྲིབ་པའི་དྲི་མ་སྙིང་པོར་གཙང་བྱས་ནས། །བདག་དང་གཞན་དོན་ཕུན་སུམ་ཚོགས་པའི་སྒོར། །གཏན་མེད་ཞི་བའི་སྦྱིན་པ་སྩོལ་གྱུར་ཅིག །ཅེས་པ་འདིའང་རབ་ཡིད་ཆུ་སྟག་ལོར་ཁྱབ་བདག་རྡོ་རྗེ་འཆང་པདྨ་དབང་ཆེན་གྱི་ཞལ་སྔ་ནས་བཀྲ་ཤིས་པའི་ལྷ་རྫས་དང་བཅས་ཏེ་རྟེན་དང་བརྟེན་པར་བཅས་པའི་གནས་ཡིག་དཀར་ཆག་རྒྱས་པར་འབྲི་བའི་བཀས་གནང་བ་ཡང་ཡང་བསྩལ་རུང་ལག་ཏུ་མ་ལོན་པ་དང་། སླད་ནས་དོན་གྲུབ་ས་ལུག་ལོར་ཁམས་གསུམ་མགོན་པོ་རྒྱལ་བ་ཡབ་སྲས་ཞལ་རྒྱས་ཤིང་། གཏེར་ཆེན་ཆོས་ཀྱི་རྒྱལ་པོའི་བཀའ་དྲིན་ལས་གནས་ཀྱི་ངང་ཚུལ་གསལ་བོར་གཏན་ལ་ཕབ་པ་མ་ཟད། བཀས་རྗེས་སུ་གནང་བ་ཐོབ་པ་ལྟར་རི་ངོགས་འདིར་ཡི་དམ་བརྟན་པ་པདྨ་གར་གྱི་དབང་ཕྱུག་བློ་གྲོས་མཐའ་ཡས་པའི་སྡེས་བྲིས་པ་དགེ་ལེགས་འཕེལ།

མཆན། ༡.གནས་ཡིག་འདི་ཉིད་ཐུགས་ཀྱི་གནས་མཆོག་ཆེན་པོ་དེ་བཱི་ཀོཊཱི་ཙཱ་འདྲའི་གནས་འདུས་སྒོ་བྱང་ཞེས་པ་འཇམ་མགོན་ཀོང་སྤྲུལ་ཡོན་ཏན་རྒྱ་མཚོའི་བཀའ་འབུམ་ཇ་པོད་ལས་ཞལ་བཤུས་པ་ཡིན་ལ། པར་ཤིང་ད་ལྟ་དཔལ་སྤུངས་དགོན་པའི་པར་ཁང་དུ་བཞུགས་སོ། །༢.གནས་འདི་ཟི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་དཔལ་སྤུངས་དགོན་གྱི་རྒྱབ་རི་ཡིན་ནོ། །