ན་གཞོན་རི་མོ་བ་འབྲུག་མོ་རྒྱལ་ལགས།

ན་གཞོན་རི་མོ་བ་འབྲུག་མོ་རྒྱལ་ལགས་ནི་མདོ་སྨད་ཁྲི་ཀའི་ཡུལ་ནས་འཚར་ལོངས་བྱུང་ཞིང་། ཆུང་དུས་ནས་དྲིན་ཆེན་ཕ་མ་གཉིས་ཀྱི་བཀའ་དྲིན་ལ་བརྟེན་ནས་སློབ་གྲྭ་ཆེ་འབྲིང་ཆུང་གསུམ་བརྒྱུད་པའི་སྐལ་བ་ཐོབ། 2013ལོར་མཚོ་སྔོན་མི་རིགས་སློབ་གྲྭ་ཆེན་མོའི་སྒྱུ་རྩལ་སྡེ་ཁག་གི་ལྷ་རིས་སྒྱུ་རྩལ་འཛིན་གྲྭར་ཞུགས་ཏེ། དགེ་རྒན་ཤ་བོ་ཚེ་རིང་དང་པད་གོ་སོགས་ཀྱི་དྲུང་དུ་བོད་ཀྱི་ཐང་གའི་གཞུང་ལུགས་དང་ལག་ལེན་གྱི་ཐད་དུ་ཐོས་བསམ་ལྷུར་ལེན་བྱས་པ་དང་མཚུངས། ནུབ་ལུགས་དང་ཀྲུང་གོའི་སྲོལ་རྒྱུན་རི་མོའི་ཕྱོགས་ལའང་སྦྱངས་བ་མང་དུ་བྱས་ལ། 2015ལོའི་ཟླ6པར་མཚོ་སྔོན་མི་རིགས་སློབ་གྲྭ་ཆེན་མོ་ནས༼མི་ལོ་ལྔའི་སྒྱུ་རྩལ་གྱི་ལམ་བུ༽ཞེས་པའི་མི་སྒེར་གྱི་རི་མོའི་འགྲེམ་སྟོན་གྱི་མཛད་སྒོ་སྤེལ། ཁོ་མོའི་བརྩམས་ཆོས་ལ་རྒྱལ་ཁབ་རིམ་པའི་བྱ་དགའ་གཅིག་དང་ཞིང་ཆེན་རིམ་པའི་བྱ་དགའ་གཉིས། དེ་ལས་གཞན་པའི་བྱ་དགའ་ཡང་མང་དུ་ཐོབ་མྱོང་།  གོང་གི་བརྩམས་ཆོས་དག་ནི་ཁོ་མོའི་ལོ་ངོ་ལྔ་དྲུག་རིང་གི་སྒྱུ་རྩལ་གྱི་ལམ་བུ་ལ་ཕྱི་མིག་ཅིག་གི་ཚུལ་དུ་ཕུལ་བ་ལགས།   རང་ཉིད་ཀྱི་མི་ཚེ་ནི་སྒྱུ་རྩལ་ལ་བསྟུམ་ཞིང་། སྒྱུ་རྩལ་ནི་མི་ཚེ་འདིའི་མཛེས་སྡུག་དང་རིན་ཐང་ཁོ་ནར་རློམ་ཡོད།