ཁྲི་ཀའི་ལྷ་ཁང་ཐང་གི་གེ་སར་རྒྱལ་པོའི་འབུར་སྐུ།

ཟི་ལིང་། དབང་ཆེན་ཚེ་རིང་།

གེ་སར་རྒྱལ་པོའི་འབུར་སྐུ་དེ་ནི་ལ་ཟེ་བ་གྲོང་རྡལ་ལྷ་ཁང་ཐང་སྡེ་བའི་སྔགས་ཁང་གི་ཚོགས་ཁང་ཆེན་མོའི་གཡས་ཕྱོགས་ཀྱི་འདུ་ཁང་ནང་དུ་བཞེངས་འདུག སྐུའི་རྣམ་པ་ནི་གླིང་རྗེ་གེ་སར་རྒྱལ་པོ་འདོ་རྗེ་རྐྱང་རྒོད་གཡེར་བར་བཅིབས་ཤིང་། ཞལ་ངོ་དཀར་ཞིང་བཅོ་ལྔའི་དུང་ཟླ་འདྲ་བ། ལུས་ལ་ཟ་འོག་གི་གོས་སྣ་ཚོགས་ཀྱིས་བརྒྱན་པ། བྲང་དུ་མེ་ལོང་འཛམ་གླིང་རང་ཤར་བཏགས་པ། ཕྱག་གཡོན་པས་སྦ་ལྕག་བསམ་པའི་དོན་འགྲུབ་དང་གཡས་པས་སྲབ་མདའ་དང་རུ་དར་འཆང། མགོ་ལ་རྨོག་གྱོན་ཞིང་དེའི་སྟེང་རུ་དར་གྱིས་བརྒྱན་པ་ཞེས་གེ་སར་རྒྱལ་པོའི་སྣང་བརྙན་བསྟན་ཡོད།