Skip to main content Skip to search
བོད་རིག་པའི་ཆ་ལག་ཏུ་ཉེ་བར་མཁོ་བ་རྒྱུན་ཤེས་དཔྱད་མཛོད་ཆེན་མོ་ཞེས་བྱ་བ་བཞུགས་སོ།། སྟོད་ཆ།
ཀླད་ཀྱི་གཏམ།

ས་སྒང་འདིར་སྐྱེས་ཤིང་སླར་ཤ་རུས་འཐོར་བའི་རྐང་གཉིས་སུ་ཞིག་ཡིན་རུང་། སོ་སོའི་དགའ་ཁ་འཁྱེར་ཕྱོགས་ཀྱི་ཐད་ལ་ཆ་མ་ཆོ་རིགས་ཡོདཔ་ནི་སྨོས་མེད་ཡིན། དེའི་ནང་། ང་ཚོ་བོད་ཀྱི་ཤེས་ཡོན་པར་མཚོན་ན། དེང་གི་སྤྱི་ཚོགས་ཁྲོད། ཡ་གའི་མཁས་པ་དེ་རྫིག་རབས་དང་། མ་གའི་བསམ་བློ་བ་དེ་ཐུ་རབས། བར་གྱི་རྩོམ་པ་པོ་དེ་ཨང་དང་བོ་ཡིན་རབས་སོགས། སྐད་ཆ་ཤོམ་པོ་རེའི་འདྲི་ཚིག་རྟག་པར་གོ་ཐོས་སུ་གྱུར་ཡང་། ངེས་དོན་དུ་བཤད་ན། རང་རང་ལ་ཐུན་མིན་གྱི་ཁྱད་ཆོས་རེ་མངའ་བ་དེས། སོ་སོར་ལག་རྗེས་འཇོག་པ་ལས། ཤེས་བྱ་ཐམས་ཅད་རུབ་ཀྱིས་འདུས་ནས་མི་གཅིག་གི་སེམས་ཁོང་དུ་སྤུངས་པ་ཉིན་དཀར་གྱི་སྐར་མ་ལས་ཀྱང་དཀོན། འོན་ཀྱང་། སྔ་མའི་ལས་དབང་དང་ད་ལྟའི་ཤེས་འཇོན་གྱིས། ཁ་ལོར་བསྒྱུར་ཏེ། དེ་ལ་དེ་འཇོན་གྱིས་ལས་ཀ་ཕྲན་ཚེགས་རེ་སྒྲུབ་ཐུབ་པ་ཀུན་ལ་ཆོས་ཉིད་ལྟ་བུར་ཆགས་ཡོད། དེ་བས། མིའུ་བདག་ནི། ལོ་ན་ཆུང་དུས་ནས་ཤེས་རིག་གི་རྨུ་ཐག་ལ་འཇུས་ཏེ། རྒྱ་ཇ་ནག་ཕོར་གྱི་ཤེལ་དམ་གཏན་གྲོགས་སུ་བསུས་ནས། ཤོག་ཧྲུལ་འགའ་རེ་ཕར་སློག་ཚུར་སློག་གི་ཀློང་ནས་མི་ཚེ་ཟད་དགོས་པ་ཐོད་པའི་ཁ་ཡིག་ལ་བརྐོས་ཟིན་པས། ང་དང་ང་འདྲ་བ་མང་བོ་ཞིག ཁ་རྗེ་དབང་ཐང་ཞན་ཡང་། རི་བོང་གནམ་རྡིབས་ཀྱི་སེམས་ཁུར་བཞིན། སྤྱི་ཚོགས་ཀྱི་གྲུ་ཟུར་ཐམས་ཅད་ལ་བསམ་གཞིགས་གཏོང་རྒྱུར་གོམས་པས། དེ་དག་གབ་པ་མངོན་བྱུང་གི་གཟིགས་མོའི་ཆེད། སྨྱུག་རྩེ་དང་ཕབ་གཞོང་གི་འཐབ་ར་ནས། ལང་ཚོ་དེ་ཤེས་མེད་ཚོར་མེད་དུ་རྒས་ཀྱིན་ཡོད་ནའང་ནོངས་འགྱོད་དང་བློ་ཕམ་སྐྱེས་མི་སྲིད། ཁ་ཅིག མི་རྒྱུ་ཡོད་ལ་སྨྱོ། ཟོག་རྩྭ་ཡོད་ལ་སྨྱོ། ཟེར་བའི་དཔེ་ལྟར། མཁས་མིང་གི་གོ་སར་འགྱིང་སྟབས་ཀྱིས་ལས་གཞིའི་རྣམ་གྲངས་ལ་རྩོད་ལེན་དང་ལག་སྙོབ་བྱས་ཏེ། གྲུང་མི་གཙོ། མང་གཙོ་བའི་དུས་རབས་ཤིག་གིས་རྦབ་རྡོས་དེད་དེ། ཤོག་གྲངས་མང་ཉུང་དང་། དངུལ་ལོའི་སྲབ་མཐུག་གི་ཁེ་ལས་གཉེར་བར་དག རྐང་མཐིལ་ནས་སྤྱི་གཙུག་བར་དུ་རིག་གཞུང་ལ་འགན་འཁུར་བའི་ཟུངས་ཁྲག་དེ་མེད་རྐྱེན། ལྟོས་འཇོག་གིས་བསམ་བློ་རེ་བཏང་ན། གྲྭ་རྐྱང་ང་དང་ང་འདྲ་བའི་རིགས་མཐུན་གྱི་སྤུན་ཟླ་མང་བོ་ཞིག་གིས། རྩམ་ཁུག་གི་མཐོ་དམའ་རྩོད་པའི་དུས་རབས་ཀྱི་ཁུགས་སོ་འདིར། རྩམ་ཁུག་རླུང་ལ་སྤུར་ཏེ། ཤེས་ན་བཟང་བོའི་ཁ་དང་། མ་ཤེས་ངན་པའི་ཚིག་ཏུ་འགྱུར་རུང་། དབུགས་ཀྱི་རྒྱུ་བ་ཚུན་ཆད་ཀྱང་རིག་གཞུང་ཞིག་ལ་བསྟིམ་པ་ནི། ལྔ་བདོའི་དུས་མཐའ་འདིར་རླུང་འཚུབ་ནང་གི་མར་མེར་བགྲང་ཆོག་ཆོག་ལགས། ཅིའི་ཕྱིར་ན། ངའི་ཁ་ཚིག་རྩུབ་ཀྱང་བསམ་པ་དཀར། བྱ་ཕོ་རོག་ནག་ཀྱང་མཆིན་པ་དཀར། ཞེས་པའི་རང་བཞིན་ལས་མ་འདས་སོ། །ཡང་ཁ་ཅིག་དེ་ལས་ལྡོག་སྟེ། སྔོན་བྱོན་དམ་པ་རེ་འགའི་རྗེས་སུ་འབྲངས་རློམ་གྱིས། གྲུབ་མཐའ་དང་གྲུབ་མཐའི་བར། མི་སྡེ་དང་ཕྱོགས་ཁ་བར་རྩོད་ཡིག་གི་ཁ་ངན་དུག་ཆུ་གཏོར་ནས། བླུན་རྨོངས་མང་དག་ཅིག་ལོག་ལམ་དུ་འཁྲིད་པའི་སྣེ་མོ་བར་གྱུར་ཏེ། ནམ་ཞིག གྲིབ་ནག་འདྲེ་མཐོང་གིས། རང་སྡེ་རྒྱལ་བའི་དགྲ་ལྷའི་དཔུང་བསྟོད་དགུང་དུ་འཕྱར་བ་ནི། ཆོས་ལམ་རིམ་ཁྲིད་ཀྱིན་ཞེ་སྡང་ཇེ་ཆེ་དང་། སྨན་ཅོང་ཞི་འཐུང་གིན་ནད་པ་ཇེ་ཐུ་རུ་དོན་གྱིས་སོང་བས། མཇུག་འབྲས་ཀྱང་། ཕྱིའི་ཆར་བ་ལས། ནང་ཐིགས་ཆུ་སྡུག་པའི་ཚོད་དུ་ལྷུང་སྟེ། ཡོད་པ་མེད་པར་བཟོས། དར་བ་ཕྱུར་བར་བཏང་བ་མང་དུ་གདའོ། །

དེ་བས། བདག་གིས་བསམ་བློ་བཞི་གསུམ་བཅུ་གཉིས་བཏང་བའི་ཡང་སྙིང་ནི། ད་ཐེངས་ལྒིགས་བམ་གྱི་གདགས་སྲིབ་དང་ངག་རྒྱུན་གྱི་ལ་དགུ་ལུང་དགུ་བརྒྱུད་དེ། རང་ཅག་གི་གྲུབ་མཐའ་རིས་མེད་ཀྱི་གསུང་རྒྱུན་དྲི་མ་མེད་པ་གཞིར་བཞག མདོས་གླུད་གཏོ་གསུམ་གྱི་ཆོ་ག་མང་བོས་ཁོག་ཕུབ། ཡིག་རིགས་གཞན་གྱི་ལེགས་ཆའི་ཟུར་བརྒྱན། ཐ་ན་འཇིག་རྟེན་རྒན་པའི་ངག་རྒྱུན་མང་བོ་བཏུས་ཏེ། སྐྱིད་ལ་སྡུག་པའི་མི་ཚེའི་ཁྲོད 《རྒྱུན་ཤེས་དཔྱད་མཛོད་ཆེན་མོ》འདི་བརྩམས་གྲུབ་གནང་བ་ནི། བྱེ་དོང་བྲུས་ཏེ་གསེར་རྡོག་རྙེད་པའི་ཚོད་དུ་རློམ་ཡོད། རྒྱུ་མཚན་ནི། རང་ཅག་གི་རྒྱུན་ལྡན་འཚོ་བའི་ཁྲོད། ཆུ་ལ་ཆུ་བཞག་གི་ཚུལ་དུ་སིམ་པའི་རྒྱུན་འཁྱེར་གྱི་ཤེས་བྱ་འདི་རྣམས། བོད་མི་ཡོངས་ཀྱི་རུས་རྐང་ལ་སིམ་པར་མ་ཟད། སྤྱི་ཚོགས་ཀྱི་གྲུ་ཟུར་རེ་རེ་ན་གསེར་རྡོག་ལྟར་བྲིན་སྒོ་ཆེ་ནའང་། གནམ་ཀ་མེད་འོག་གི རྒོད་པོ་མཐུར་མེད་ཀྱི་མཁས་དབང་དག་གིས། རྒྱ་ཆེན་གཏིང་ཟབ་ཀྱི་རིག་གཞུང་ལ། ཉིན་མཚན་ཁོར་མོ་ཡུག་ཏུ་སྤྱན་འབྲས་ཤོར་ཏེ། བར་མ་དོར་ལུས་ཤིང་། ཡང་མཁས་རློམ་འགའ་ཞིག དབྱེ་ཞིབ་དང་བརྟག་དཔྱད་ཡེ་མི་གནང་བར། རྨོངས་དད་དང་ལྒིན་རྟགས་ཀྱི་སྡོམ་ཚིག་བཀོད་པ་ནི། ཤེས་རིག་ལ་རྒྱུས་མངའ་ཆུང་ཞིང་། རང་རིགས་ལ་ཞེན་ཁོག་ཆུང་བའི་རང་མཚང་ཕྱིར་མངོན་པའི་དན་རྟགས་ཤིག་ཏུ་མཐོང་། དེ་བས། རེབ་གོང་ཤེས་རིག་གླིང་ནས། ༢༠༠༦ ལོའི་ཟླ ༦ ཚེས ༡༥ ནས་དབུ་ཚུགས་ཏེ། ༢༠༡༤ ལོའི་ཟླ ༦ ཚེས ༤ བར། 《རྒྱུན་ཤེས་དཔྱད་མཛོད་ཆེན་མོ》འདི་རྩོམ་པའི་སྔ་ཕྱི་བར་གསུམ་དུ། རང་གི་སྒེར་གཉེར་རེབ་གོང་དཔེ་མཛོད་ཁང་འདི་ཉིད། ཆར་བ་ཆུ་གྲོགས་དང་། ཉི་མ་མེ་གྲོགས་སུ་གྱུར་བ་ལས་གཞན། ལོ་ངོ་བརྒྱད་ཀྱི་རིང་། ཐ་ན་རང་ཤག་ཏུ་དགེ་ཕྲུག་ཙམ་ཡང་གཡོག་ཏུ་མ་བཀོལ་བར། ཇ་མ་ཆུ་ལེན་སོགས་ཀྱང་རང་སྟེང་དུ་བླངས་ཏེ《རྒྱུན་ཤེས་དཔྱད་མཛོད་ཆེན་མོ》འདི་ནར་སོན་པ་ནི། ཕྱིར་འདང་རེ་བརྒྱབ་ན་དྲང་ལམ་དུ་གོམ་པ་སྤོས་ཚར་ཞིང་། རང་གི་དགེ་རྩ་ལ་དགའ་བ་དང་རློམ་སེམས་ཕྲན་བུ་དང་བཅས་ཏེ། ཡ་ཆུང་སེམས་ཀྱི་དཀྱིལ་ནས་དྲོད་ཐིགས་ཤིག་ཀྱང་བཅོས་མིན་དུ་འཕྱུར་ཡོང་།

སྤྱིར་ན། 《རྒྱུན་ཤེས་དཔྱད་མཛོད་ཆེན་མོ》འདིའི་ཐོག་མཐའ་བར་གསུམ་དུ་འདྲ་པར་རམ་རི་མོ་བཀོད་དེ་གསལ་བཤད་བྱེད་རྒྱུ་ནི། ཀློག་མཁན་རྣམ་པར་ཆེས་ཡག་ཤོས་ཏེ། དེང་སང་བོད་རང་གི་མར་དྲི་དང་རྩམ་དྲི་འཐུལ་བའི་རྒྱུན་ཤེས་རིག་གནས་འདི་དག་ཉག་ཕྲ་ཞིང་། འགའ་ཞིག་ཕྱི་ཐོགས་པའི་མིང་ཙམ་ཡང་རྣ་ལམ་དུ་མ་སོན་པ་མང་དུ་འབྱུང་བས་སོ། །ཡིན་ནའང་། ད་ཐེངས་རྒྱུ་རྐྱེན་གང་མང་ཞིག་གིས་ལག་ལེན་དུ་མ་ཐེབས་པ་ཡིད་རབ་ཏུ་ཕངས་ཀྱང་། སླད་མར་རེ་འདོད་དོན་འཁྱོལ་དུ་ཡོང་བའི་སྨོན་པ་ཤིན་ཏུ་ཟབ།

ལྷག་པར་དུ། ཤེས་ཡོན་གྱི་རིན་གོང་ཡི་དྭགས་ཀྱི་སུག་པ་ལས་ཕྲ་ཞིང་། དཔལ་འབྱོར་གྱི་གོང་ཚད་བྲེ་ཏའི་ལྟོ་བ་ལས་ཆེ་བའི་དུས་ཀྱི་མར་གཤམ་འདིར། བསྟན་འཛིན་བསྟན་བཤིག་ལས་ཐུ་བའི་བླ་གྲྭ་འཇོན་པོ་ཁག་གཅིག འདོད་ཡོན་ལ་བྱ་རྒོད་གཟན་ལ་འབབ་པ་བཞིན། དུས་རབས་ཀྱི་རྗེས་ཆོད་ཁུལ་གྱིས། ཚོང་ལས་ཀྱི་ཁ་དར་ཞིང་། གྲོང་ཆོག་གི་ཉ་འདུར་བའི་ཁེ་ལས་ཁྲོད། ནང་ན་ཉམས་རྟོགས་སྤུ་རྩེ་ཙམ་མེད་ཀྱང་། ད་དུངབྱང་སེམསདང་ཡང་སྤྲུལ། རྟོགས་ལྡནདངསྐུ་ལོའིསྐྱག་རྫུན་གྱི་བརྡ་ཁྱབ་དང་བརྙན་པར་གྱི་རླུང་རྟ་དྲ་རྒྱའི་རྨུ་ཐག་གི་སྣེ་མོ་བཀལ་ཏེ། དྲ་ཐོག་ཏུ་ཁྱི་ལུད་བཞིན་སྤུངས་ཤིང་སྙིགས་རྫོབ་བཞིན་བརྒྱུད་སྒྲོགས་གནང་བ་ལ། ཁ་ལག་སྙིང་གསུམ་གྲོན་པའི་དུས་རབས་འདིར། ཉམ་ཆུང་བདག་གིས་ལག་འབབ་སྐར་གང་ལ་མ་རེ་བར། དུང་སེམས་ཞིག་གི་ཐུ་འོག་ནས། སྐུད་སྣེ་ཁབ་ཁྲིད་དང་། ཆར་སྣེ་རླུང་ཁྲིད་ཀྱི་དཔེ་ལྟར། ལོ་ངོ་བརྒྱད་ཀྱི་དུས་ཚོད《རྒྱུན་ཤེས་དཔྱད་མཛོད་ཆེན་མོར》གྲོན་པ་འདི། ངན་པས་རང་བསྟོད་དང་། ཁ་ཏས་སྒྲོ་བསྟོད་དུ་འགྲོ་མི་འགྲོ བོད་ཀྱི་ཕྱི་རབས་པ་དག་གིས་གོང་ཚོད་རྒྱག་པ་ལས། ངས་འདི་ནས་ཁ་ཚོན་གཅོད་དགོས་དོན་མེད།

ཕྲན་བུའི་མི་གཤིས་ནི། བྱ་ལས་གང་ལ་འཇུག་ཀྱང་། སྟག་གི་རྔ་མར་མི་འཇུ་ཞིང་། བཟུང་གི་ནངས་མོ་མི་གཏོང་བའི་བག་ཆགས་དེ་མཐུག་རྐྱེན། 《རྒྱུན་ཤེས་དཔྱད་མཛོད་ཆེན་མོ》འདིའི་མགོ་མཇུག་བར་གསུམ་དུ། སྐྱ་ཆད་སྔོ་སྡུག་གི་འཚོ་བ་ལ་གདོང་གཏད་དེ། རྒྱུ་ཆ་འཚོལ་སྡུད་དང་། གཞན་ལ་འདྲི་བརྩད། ཞིབ་འཇུག་ཡང་ཡང་བྱས་པ་སྟེ། དཔེར་ན། ནང་བསྟན་གྱི་རྒྱུ་ཆ་ལས་གཞན། བོན་གྱི་བསྟན་འགྱུར་ཕལ་ཆེར་ལ་བལྟ་ཀློག་གནང་བ་དང་། ཁུངས་ལུང་དང་རྒྱབ་རྟེན་གྱི་དཔྱད་གཞིའི་རྒྱུ་ཆ་མང་བོ་འཚོལ་སྡུད་དང་། བདེན་པ་བདར་ཅི་ཐུབ་ཀྱིས་འདོར་ལེན་གནང་བར་མ་ཟད། ཕོ་རབ་གཅིག་གི་བློ་རྩེ་ལས། ཕོ་འབྲིང་གསུམ་གྱི་གྲོས་བསྡུར་དགའ་བའི་དགོངས་དོན་བཞིན། སྐབས་སྐབས་སུ་ཆེད་མཁས་པ་མང་བོ་ཤེས་རིག་གླིང་དུ་གདན་དྲངས་ནས། དབྱེ་ཞིབ་དང་གྲོས་ཐག་ཆོད་པར་བྱས་ཏེ། དཔྱད་བརྡར་མང་དུ་བྱས་པ་དང་། ལྷག་པར་དུ། དྲིན་ཆེན་གྱི་ཕ་དམ་པ་མཁར་བྱམས་ལགས་ཀྱིས། བཀའ་འགྱུར་དག་ཚར་གཅིག་ལ་གསེར་ལྗགས་གྲུབ་པའི་ཞོགས་པ་དེར། ང་ལ་སྙིང་ཉེ་བའི་ཚུལ་གྱིས། བུ་རྒོད་པོ། མ་ལ་བུ་དགོས། བུ་ལ་སྙིང་དགོས། སྙིང་ལ་རུས་པ་དགོས་ཟེར་བས། ང་འཇིག་རྟེན་རྒད་པོ་ཞིག་གིས་བཀའ་འགྱུར་དག་ཚར་གཅིག་བཏོན་ཚར་ན། ཁྱོད་ཀྱིས《རྒྱུན་ཤེས་དཔྱད་མཛོད་ཆེན་མོ》འདི་ངེས་པར་དུ་བརྩམས་གྲུབ་གནང་དགོས་ཞེས་སྐུལ་ལྕག་གནང་བ། མར་མེ་སྣུམ་སྣོན་གྱི་ཚུལ་དུ་གྱུར་བ་དང་། རྟེན་འབྱུང་འདི་ལ་བརྟེན་ནས་ཁོང་སྐུ་གྲོངས་པའི་ཕྱི་ལོ ༢༠༡༤ ཟླ ༤ ཚེས ༨ གྱི་དུས་སྐར་ལ་ཐོན་ཚེ། གཞིས་ཀ་ནས་དུས་མཆོད་ཉིན་བཅོ་ལྔར་བསྒྲུབས་རྗེས། ཞུས་དག་དབུ་རྩོམ་པ་ལ་ཁེལ་བའང་། དོན་གྱིས་དགོངས་རྫོགས་སུ་གྱུར་བར་སྙམ་མོ། །

འོན་ཀྱང་། 《རྒྱུན་ཤེས་དཔྱད་མཛོད་ཆེན་མོ》འདིའི་མགོ་མཇུག་བར་གསུམ་དུ། ཀློག་མཁན་གྱི་ཆ་ནས་ཀྱང་། ལྟ་ཕྱོགས་གཅིག་ལ་། མཐོང་ཕྱོགས་གཉིས་སུ་སོང་བ་དང་། རྩོམ་མཁན་གྱི་ཆ་ནས་ཀྱང་། ཆུ་དྲོད་འཇམ་གྱིས་ཤ་མ་ཚོས་པ་དང་། གཏམ་ཉག་ཉོག་གིས་དོན་མ་གོ་བ་ཡོད་པའི་ཁར། མི་སྐྱོན་མེད་འཛམ་བུ་གླིང་ན་མེད། ཤིང་སྐྱོན་མེད་རྒྱ་རྫོང་ནགས་ན་མེད་པའི་དཔེ་བཞིན། ཚིག་དོན་གཉིས་ཆར་ནས་མ་དག་པ་མང་དུ་འབྱུང་བ་གདོན་མི་ཟ་བས། དཔྱོད་ལྡན་དག་གིས། མི་སྐྱོན་འདོན་དགོས་པ་དང་། ཤིང་སྐྱོན་གཞོག་དགོས་པ་ཁ་ཞེ་གཉིས་མེད་ཀྱི་གཏམ་མོ། །

ཡང་གཅིག་བཤད་ན། 《རྒྱུན་ཤེས་དཔྱད་མཛོད་ཆེན་མོ》འདི་ནི། རང་ཅག་རིག་གཞུང་ཁྲོད། ཨེ་ཡོད་ནང་གི་དེ་ཡོད་དང་། སྒོ་ངའི་ནང་གི་སེར་ཐིག་ལྟ་བུ་ཞིག་མིན་རུང་། བུ་ཨེ་བཟང་བརྒྱ་སྡེའི་ཁ་དང་། འབབ་ཅི་ཡོད་ཁུག་མའི་ནང་དུ་བཅུག་ཡོད་པས། བསྐལ་བའི་ཡུར་བ་ལས། སྲིད་པའི་ཆུ་དྲངས་པའི་རྫ་ཆུ་བསིལ་མ་དེར་རློམ་གཤིས། ཤེས་ལྡན་པ་དག་གི་སྐོམ་སེལ་ཀྱི་བདུད་རྩི་དང་། སྐུ་ཚེའི་ལྟ་གྲུབ་ཀྱི་གསོས་སྨན་དུ་འགྱུར་རྒྱུའི་རེ་སྨོན་དང་སྐྱབས་འཇུག་སྙིང་ཐག་པ་ནས་ཞུ་བ་དང་ཆབས་ཅིག 《རྒྱུན་ཤེས་དཔྱད་མཛོད་ཆེན་མོ》འདིའི་ཐོག་མཐའ་བར་གསུམ་དུ་འགན་སྒྲུབ་དང་། བདག་ལ་ལྷག་བསམ་ཟོལ་མེད་ཀྱིས་ཐུགས་ཁུར་གནང་བའི་གཅུང་བོ་ཤེས་རབ་དང། གཞན་ཡང་། རྒྱུ་ཆ་འཚོལ་སྡུད་སོགས་རམ་འདེགས་གང་མང་གནང་བའི་བློས་ཐུབ་ཀྱི་གྲོགས་པོ་བདུད་འདུལ་རྡོ་རྗེ་རྣམ་གཉིས་ལ་སྙིང་ཁོང་རུས་པའི་གཏིང་ནས་བཀའ་དྲིན་ཆེ་ཞུའོ། །

རྩོམ་པ་པོས ༢༠༡༤ ཟླ ༦ ཚེས ༤ ལ།

ལེའུ་དང་བོ། སྔགས་ཆས་ཀྱི་སྐོར།
དང་བོ། འབུད་པའི་རོལ་མོ།
དུང་དཀར།

སྤྱིར་དུང་ལ་རིགས་བཞི་ཕྱེས་ཡོད་དེ། དུང་དཀར་གཡས་འཁྱིལ། གཟི་དུང་། དུང་དཀར། དུང་དམར་རོ། །དེ་རྣམས་ལས་སྔ་མ་སྔ་མ་མཆོག་ལ། ཕྱི་མ་ཕྱི་མ་ཞན་པའོ། །དུང་འདི་འོག་ཕྱོགས་ཀླུ་ཡི་ཕོ་བྲང་ནས་བྱུང་བར་བཤད་དེ། དུང་གི་སྲིད་པ་བཤད་པ་ལ། ཕ་ནི་གཡུ་འབྲུག་སྔོན་པོ་ལ། །མ་ནི་གསེར་ཉ་གཡུ་གཤོག་ཡིན། །བུ་ནི་དུང་བོ་ཨ་གྲགས་ཡིན། །མཚོ་སྨན་རྒྱལ་མོའི་མིང་བོ་ཡིན། །གདེངས་ཅན་ཀླུ་ཡི་མཆེད་ཟླ་ཡིན། །ཆུ་སྲིན་གདུག་པའི་གཤེད་མ་ཡིན། །ཞེས་གསུངས་ལ། དུང་དཀར་འདི་ཕ་གཡུ་འབྲུག་སྔོན་མོ་དང་། མ་གསེར་ཉ་ལས་འཁྲུངས་པར་བཤད་པ་ནི། ལས་ཚུལ་དང་རྟེན་འབྲེལ་གྱི་རང་བཞིན་སྨྲ་བསམ་བརྗོད་ལས་འདས་པ་སྟེ། དཔེར་ན། ཐང་དཀར་ལ་དུང་ཤྭ་དང་། སྲེ་མོང་མཚེར་མོ་ལ་གཡུ། གླག་མེར་མོ་ལ་སྒྲོག་དང་། ཨབ་ཤ་མཚེར་མོ་ལ་སྦུག་དང་། རྒོ་བ་ཁྱིའུ། ངུར་བ་མཚེར་མོ་ལ་ངུར་ཕྲུག་སྐྱེ་བ་སོགས་འཇིག་རྟེན་གྱི་སྣང་ཚུལ་ཡ་མཚན་མང་དུ་ཡོད་པ་བཞིན་ནོ། །

དུང་དཀར་གྱི་སྒྲ་གྲག་པས་ཕ་རོལ་བོ་ཟིལ་གྱིས་མནོན་པ་སྟེ། བྱང་ཆུབ་སེམས་དཔའ་དམ་པ་ཏོག་དཀར་དགའ་ལྡན་ནས་འཛམ་གླིང་དུ་འཕོ་བར་གཟིགས་ཙ་ན། ལྷའི་བུ་འགའ་ཞིག་གིས། མུ་སྟེགས་པའི་སྟོན་པ་དྲུག་གསུམ་བཅོ་བརྒྱད་ཀྱིས། ཡུལ་མ་རུངས་པར་བྱས་པས། དེ་བཞིན་གཤེགས་པ་འབྱོན་པའི་དུས་མིན་ཞེས། གཤོལ་བཏབ་སྐབས། ལྷའི་བུ་རྣམས་ཀྱིས་རོལ་མོ་ཐམས་ཅད་དུས་གཅིག་ལ་དཀྲོལ་ཡང་། བྱང་ཆུབ་སེམས་དཔའ་ཉིད་ཀྱིས་དུང་དཀར་བུས་པའི་སྒྲ་ཡིས་ཐམས་ཅད་ཟིལ་གྱིས་མནན་པ་དང་། སངས་རྒྱས་ཀྱིས་ཆོས་གསུངས་པའི་ཚེ། བརྒྱ་བྱིན་གྱིས་དུང་དཀར་ཕུལ་བར་གསུངས་པས། ལྷ་ཡུལ་ནའང་དར་སྲོལ་ཆེ་ལ། མི་ཡུལ་ལ་མཚོན་ནའང་། རྡོ་རྗེ་གདན། ན་ལེནྡྲ། བི་ཀྲ་མ་ཤཱི་ལ་སོགས་ཆོས་འཁོར་ཆེན་པོ་རྣམས་སུ་ཆོས་དུང་མཛད་པ་དང་། རང་ཅག་བོད་ལ་ཡང། དཔལ་ལྡན་ས་སྐྱ་བའི་ཆོས་དུང་དཀར་བོ་རྒྱང་གྲགས་ཞེས་ཧ་ཅང་སྔ། ཆོས་དུང་འདི་སངས་རྒྱས་ཀྱིས་ཆོས་འཁོར་བསྐོར་བའི་དུས། བརྒྱ་བྱིན་བྲམ་ཟེ་སྐར་རྒྱལ་དུ་སྤྲུལ་ནས། བཅོམ་ལྡན་འདས་ལ་ཕུལ་བའི་ཆོས་དུང་འཁྲུལ་མེད་ཡིན། དེ་ཡང་སྔོན་རྒྱ་གར་གྱི་རྒྱལ་བོ་དྷི་རྨ་པ་ལའི་སྐུ་རིང་ལ། མུ་སྟེགས་པས་ན་ལེནྡྲ་བཅོམ་པས། རྒྱ་ནག་རྒྱལ་བོ་དེ་བ་ར་ཛཱས་གྲོགས་བྱས་པས། སྐྱེས་ལན་དུ་སངས་རྒྱས་ཀྱི་ཆོས་དུང་འདི་ཕུལ། རྒྱ་ནག་ནས་ས་སྐྱར་ཇི་ལྟར་འབྱོར་ཞེ་ན། རྒྱལ་བོ་གོ་དན་གྱིས་ས་པཎ་ལ་ཕུལ་ཞིང་། དེས་འགྲོ་མགོན་འཕགས་པ་ལ་གནང་བར་བཤད་དོ། །དུང་དཀར་དེ་ལ་རྣམ་བཅུ་དབང་ལྡན་དང་། མཁའ་སྤྱོད་མ་དང་སྤྱན་རས་གཟིགས། བདེ་མཆོག་རྩ་སྔགས། མཁའ་འགྲོའི་བརྡ་ཡིག་སོགས་རང་བྱོན་མང་། འདིའི་གསུང་ཐོས་པས་བསྐལ་བ་མང་བོའི་སྡིག་སྒྲིབ་དག་ཅིང་། ངན་སོང་གི་སྐྱེ་སྒོ་ཆོད་ལ། ཐར་བར་འགོད་པར་མ་ཟད། ས་བཅུད་འཕེལ་བ་དང་། སད་སེར་གནོད་པ་སེལ། འབུད་མཁན་མེད་ཀྱང་རང་སྐད་འདོན་པ་དང་། ཕྱག་མཆོད་བྱས་ཏེ་སྨོན་ལམ་བཏབ་ན་འགྲུབ་པར་གསུངས་སོ། །

ཡང་འབྲས་སྤུངས་ཆོས་དུང་གི་བྱུང་བ་ཡང་། ལང་ཀར་གཤེགས་པའི་མདོ﹙རྒྱ་ནག་འགྱུར﹚ལས། བཅོམ་ལྡན་འདས་ལ་ཀླུའི་རྒྱལ་བོ་མ་དྲོས་པས་དུང་དཀར་བོ་ཞིག་ཕུལ་བ། མོའུ་གལ་གྱི་བུ་ལ་གནང་ནས། འདི་ཁྱོད་ཀྱིས་འགོག་པ་རིར་སྦོས་ཤིག མ་འོངས་པ་ན་དགེ་སློང་པདྨའི་ངད་ལྡན་འདིས་གཏེར་ནས་འདོན་པས། དེའི་ཆོས་དུང་དུ་འགྱུར་གྱི། གཏེར་བདག་སྤྲེའུ་གཟུགས་ཀྱིས་གནས་བྱེད་དོ། །ཞེས་པ་ལྟར། དགའ་ལྡན་ཆོས་འབྱུང་བཻཌཱུ་རྱ་སེར་བོ་ལས། སྟོན་པ་འཁོར་བཅས་ཁ་ཆེར་ཕེབས་དུས། ད་ལྟའི་སློབ་མ་དགེ་སློང་པདྨའི་ངད་ལྡན་འདི་བོད་གདོང་དམར་གྱི་ཡུལ་དུ། བློ་བཟང་གྲགས་པ་ཞེས་བྱ་བའི་དགེ་སློང་དུ་གྱུར། ཞེས་པ་ལྟར། རྗེ་ཙོང་ཁ་པ་བློ་བཟང་གྲགས་པའི་དཔལ་གྱིས། དགའ་ལྡན་འགོག་པ་རི་ནས་གཏེར་ནས་བཏོན། རྗེས་སོར་རྗེ་ཙོང་ཁ་པས་འཇམ་དབྱངས་ཆོས་རྗེ་ལ། ཁྱེད་ཀྱིས་ཆོས་སྡེ་ཞིག་འཐོབ་དང་། མ་དགོན་ལས་བུ་དགོན་དར་རྒྱས་ཆེན་པོ་འབྱུང་ཞེས་ལུང་བསྟན་ཏེ། གཏེར་ནས་བཞེས་པའི་དུང་དཀར་འདི་རྟེན་སྐལ་དུ་བསྩལ། དེ་བཞིན་དགོན་སྡེ་ཁག་ན། དགེ་འདུན་འདུས་པ་རྒྱ་མཚོ། ཚོགས་ལ་ཚོགས་དུས་ཉིས་དུང་འབུད་པ་དང་། ཆོས་ལུགས་ཀྱི་བྱེད་སྒོ་ཕལ་ཆེར་ལའང་འབུད་སྲོལ་ཡོད། ཁྱད་པར་དུ་དུང་དཀར་གཡས་འཁྱིལ་འདི། བྱང་ཆུབ་སེམས་དཔའ་ཞིག་དུང་གི་སྐྱེས་པ་ལྔ་བཞེས་པ་སྟེ། ཀློང་རྡོལ་བླ་མའི་རིན་པོ་ཆེ་བརྟག་ཐབས་ལས། དུང་ནི་སྲོག་ཆགས་དུང་རྣམས་རྗེས་བཟུང་ཕྱིར། །སྐྱེ་བ་ལྔ་བར་བྱང་སེམས་དུང་ལ་སྐྱེས། །ཞེས་དང་། དུང་སྐད་ཐོས་པའི་ཕན་ཡོན་ཡང་། དེ་ཉིད་ལས། གཡས་འཁྱིལ་གསུང་སྐད་ཐོས་པས་ནད་རིགས་སེལ། །ཁྱིམ་དུ་བཅང་ན་འཐབ་རྩོད་མེད་ཅིང་མཐུན། །ཞེས་དང་། ཁྱད་པར་དུ་དུང་སྒྲ་འདི་གོ་བ་ཐམས་ཅད་ངན་སོང་དུ་མི་ལྟུང་ཞིང་། ཐར་བའི་ལམ་སྣ་ཟིན་པར་སྨོན་ལམ་བཏབ་ཡོད་པས། སེར་སྦྲེང་དང་གཙུག་ལག་ཁང་གི་མདུན་ལས། ཉིས་དུང་བྱས་ནས་འབུད་སྲོལ་ཡོད།

ཡང་བོན་གྱི་ལུགས་ལ། དུང་དཀར་འདི་སྟོན་པ་གཤེན་རབ་མི་བོ་ཆེའི་དུས་སུ་རོལ་མོའི་རྣམ་གྲངས་སུ་བྱས་ནས་འབུད་སྲོལ་ཡང་ཡོད་པར་བཤད་དེ། བོན་གཞུང་ལས། དེ་ནས་འཁོར་དུ་གཏོགས་པ་རྣམས་ཀྱིས། སྟོན་པ་ལ་བླ་ན་མེད་པའི་མཆོད་པ་སྤྲིན་གྱི་རྒྱན་ཞེས་བྱ་བ་བཤམས་ནས་ཕུལ་ཏེ། དེ་ཡང་ལ་ལ་ཞིག་ནི་དར་ཕྱར་རོ། །ལ་ལ་ཞིག་ནི་དུང་འབུད་དོ། །ཞེས་དང་། གཡུ་རྔ་དིང་བ་དང་། དུང་བོ་ཨང་གྲགས་དང་། ཞེས་འབྱུང་བ་དང་། མདོ་གཟེར་མིག་ལས་ཀྱང་། རི་མོ། གཉེར་རིས། གཟུང་ཚུལ། སྙན་ཤལ་བཅས་ལ་དཔེ་མཚོན་གྱི་འགྲེལ་བཤད་རྒྱག་སྲོལ་ཡོད་དེ། སྔ་འགྱུར་རྡོ་རྗེ་ཐེག་པའི་རིག་འཛིན་རྒྱ་མཚོས། ལོངས་སྤྱོད་ཆས་གོས་རྒྱན་དང་རོལ་མོའི་རྣམ་བཤད་སྔགས་འཆང་རྒྱན་གྱི་མེ་ཏོག་ལས། ཁ་དོག་དྲི་མེད་དཀར་བ་ནི། །དཀར་ཕྱོགས་དབུ་འཕང་བསྟོད་པའི་བརྡ། །གཡོན་སྐོར་རི་མོའི་མུ་ཁྱུད་ཅན། །ས་ལམ་རིམ་གྱིས་བགྲོད་པའི་བརྡ། །གལ་ཏེ་རི་མོ་གཡས་འཁྱིལ་ན། །བསམ་དགུའི་རེ་སྐོང་རིན་ཆེན་བརྡ། །སྦུབས་སྟོང་ཆོས་སྐུ་འགྱུར་མེད་ལ། །དུང་སྒྲ་འགག་མེད་ལོངས་སྤྱོད་རྫོགས། །ནང་གི་རྐན་གཉེར་རི་མོ་ནི། །སྣ་ཚོགས་སྤྲུལ་བའི་དོན་བྱེད་བརྡ། །རྐན་དབུགས་རྩོལ་བའི་སྒྲ་སྐད་ནི། །ཆོས་རྣམས་རྟེན་ཅིང་འབྲེལ་འབྱུང་བརྡ། །ལྔ་ལྡན་དར་གྱི་སྙན་ཤལ་ནི། །ལམ་ལྔ་མཐའ་རུ་ཕྱིན་པའི་བརྡ། །ཐལ་མོ་པདྨ་རྒྱས་འཛིན་པ། །ཐབས་ཤེས་ཟུང་དུ་འཇུག་པའི་བརྡ། །སྒྲ་སྐད་ཐམས་ཅད་མནོན་པ་ནི། །ནག་པོའི་ཕྱོགས་ལས་རྒྱལ་བའི་བརྡ། །ཡང་། དུང་སྐད་བསྒྲགས་པའི་དགོས་པ་ཡང་། དེ་ཉིད་ལས། དུང་སྐད་ལན་གཅིག་སྟེང་དུ་བསྒྲགས། །ལྷ་ཁམས་མ་ལུས་དབང་དུ་བསྡུས། །ཚངས་པ་བརྒྱ་བྱིན་ལས་ལ་བཀོལ། །དུང་སྐད་གཉིས་པ་བར་དུ་བསྒྲགས། །མི་དང་མི་མིན་དབང་དུ་བསྡུ། །དུང་སྐད་གསུམ་པའི་ང་རོ་ཡིས། །དཀོན་མཆོག་གསུམ་དང་རྩ་བ་གསུམ། །གོང་མ་སྲི་ཞུའི་ཡུལ་ཀུན་མཆོད། །བཞི་བ་ཚངས་པ་བརྒྱ་བྱིན་སོགས། །མགོན་པོ་ཡོན་ཏན་མགྲོན་ཀུན་མཉེས། །ལྔ་བས་ཁམས་གསུམ་འགྲོ་བ་དྲུག། སྙིང་རྗེས་མགྲོན་ཀུན་བདེ་དང་ལྡན། །དྲུག་པས་བགེགས་རྒྱལ་བི་ན་ཡ་ག་སོགས། །བགེགས་རིགས་ལན་ཆགས་དང་བོ་ཚིམ། །དུང་སྐད་བདུན་པའི་སྒྲ་དབྱངས་ཀྱིས། །ཉན་རང་བྱང་སེམས་གནས་ནས་སྤོར། །ཐེག་ཆེན་བླ་མེད་འབྲས་བུར་སྦྱོར། །ཞེས་གསུངས་སོ། །

དུང་ཆེན།

དུང་ཆེན་ནི་བོད་ཀྱི་རོལ་མོའི་བྱེ་བྲག་ཞིག་སྟེ། ལོ་ངོ་སྟོང་ཕྲག་མང་བོའི་ལོ་རྒྱུས་ལྡན་ཞིང་། དགོན་སྡེའི་རོལ་མོའི་ཁྲོད་བྱིན་ཆགས་རྔམ་ཟིལ་ཆེ་ཤོས་ཡིན། དཔྱད་གཞིའི་ཡིག་ཆ་ལྟར་ན་དུང་ཆེན་འདི། ཆོས་རྒྱལ་ཁྲི་སྲོང་ལྡེ་བཙན་གྱི་དུས་སུ་ཡང་ཡོད་པ་སྟེ། ཁྲི་སྲོང་གིས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེངས་གྲུབ་བྱུང་ནས། མཁན་ཆེན་ཞི་བ་འཚོ་དང་། སློབ་དཔོན་པདྨ་འབྱུང་གནས་ཟུང་སྤྱན་འདྲེན་སྐབས། ཟངས་ལས་བྱུང་བའི་དུང་ཡོད་པར་གསུངས་ཏེ། རྒྱལ་བོ་བཀའ་ཐང་ལས། ཟངས་དུང་ཆ་ལང་མཁར་རྔ་གླིང་བུ་དང་། །རྫ་རྔ་པི་ཝང་ཕེག་རྡེབ་རོལ་མོའི་ཚོགས། །ཞེས་གསུངས་པ་ལྟར། ཁྲི་སྲོང་གི་སྐབས་ནས་བོད་ལ་ཟངས་དུང་ཡོད་པར་གསུངས་ལ། བསྟན་པ་ཕྱི་དར་གྱི་སྐབས། ཟངས་དུང་ལ་དཔེ་བྱས་ནས་རག་དུང་བྱུང་བ་ཡིན་ཏེ། ཆོས་འབྱུང་མཁས་པའི་དགའ་སྟོན་ལས། རག་དུང་ཡང་སྔར་མེད་པ་ལ། ཇོ་བོ་སྤྱན་འདྲེན་པའི་ཕྱིར་བཅོས་པ་ཡིན་ཏེ། ལོ་པཎ་སྤྱན་འདྲེན་གྱི་དུང་དུ་གྲགས། དུང་ཆེན་འདི་བུས་ན་བྱང་གི་རྟ་ཁྱུ་འདྲོགས། ཕྱུགས་ཐམས་ཅད་ཐག་པ་བཅད་ནས་བྲོས། ཞེས་བཀའ་གདམས་ལྒིགས་བམ་ལས་གསུངས་པ་དེ་ག་རང་དུ་འདུག་པ་ད་ལྟ་མཐོང་གསལ་ལོ། །

དུང་ཆེན་གྱི་དབྱིབས་ནི། རྩེ་མོ་ནས་སྨད་དུ་ཇེ་སྦོམ་དུ་གྱུར་ལ། ཚིགས་བཞི་ཡོད་ཅིང་། ཕྱེད་སྨད་ཀྱི་དུང་སྦུབས་སུ་དྲངས་ཆོག་ལ། རྩེ་མོ་ཐུར་མ་ཙམ་དུ་ཕྲ་ལ། ཁ་ཀ་ཏོ་ར་ཙམ་དུ་གཡེལ་བ། ཆེ་ཚད་མིས་ཐེག་ཚད་ཙམ་དང་། ཆུང་ཚད་འཁྱེར་བདེའི་འདོམ་ཕྱེད་ཙམ་མོ། །དུང་སྐད་ཡང་འབུད་པ་པོའི་དབུགས་ཀྱི་དམ་ལྷོད་ཀྱིས། ཏིར། འདོར། བསུ་མ། བརྒྱངས། རྦད་བཅད། ཏིར་ཆེན། བརྒྱངས་ཕྲུག་སོགས་སུ་ཡོད་ལ། དེ་ཡང་གཞི་རྩ་གསུམ་དུ་འདུ་སྟེ། རྔ་སྟེང་དུ་སྲན་མ་གཏོར་བ་ལྟ་བུའི་འདོར། བྱ་རྒོད་ཀྱིས་ནམ་འཕང་གཅོད་པ་ལྟ་བུའི་བརྒྱངས། གླང་ཆེན་ངུར་བ་ལྟ་བུའི་ཏིར་རོ། །དེ་ལྟར་སྤྱིའི་འབུད་སྟངས་དེ་འདྲ་ཞིག་ཡིན་མཆི་ཡང་། དགོན་སྡེ་སོ་སོའི་ཕྱག་ལེན་མི་འདྲ་བའི་དབང་གིས་སྣ་མང་ཡོད་མཆི། ཞིབ་ཏུ་དགོན་སྡེ་སོ་སོའི་དུང་ཚིག་དབྱངས་རིས་སུ་གསལ་བ་ལྟར་རོ། །

དུང་ཆེན་འབུད་དུས་ནི། བཀྲ་ཤིས་ཀྱི་ལྷ་བསང་གཏོང་བ་དང་། སེར་སྦྲེང། གར་འཆམ། བསྐང་གསོ། གཟིམ་བརྡ། བསྒྲལ་ལས་སོགས་ཀྱི་ཆོ་གར་འབུད་སྲོལ་ཡོད་ཅིང་། དུང་སྐད་ཐོས་པ་ཙམ་གྱིས་བསྟན་དགྲ་དང་། ལོག་ལམ་དུ་འཕྱན་པ་རྣམས་དོན་སྣོད་ཁར་འབྱིན་པ་ལྟ་བུའི་སྐྲག་སྣང་དང་། དད་ལྡན་སྐྱེ་བོ་དང་བ་འདྲེན་པའི་དགེ་མཚན་ཡོད་པར་མ་ཟད། མི་རིགས་གཞན་དུ་འང་དར་ཁྱབ་ཆེ་ལ། ཁྱད་པར་དུ་བསྐང་གསོའི་སྐབས་སུ། བྱམས་པ་གླིང་བ་དང་། སྤྱན་འདྲེན་དུང་ཚིགས་ཆུ་ཚོད་གཅིག་དང་གཉིས་ཙམ་ལ་འབུད་སྲོལ་ཡོད། དུང་ཆེན་འདི་ཞི་དྲག་གཉིས་ལས། དྲག་ལས་ཀྱི་སྐབས་སུ་གཏོང་བའོ། །ཁ་ཅིག བལ་བོའི་སྡེ་རྙིང་རྣམས་སུ་བག་མ་བསུ་སྐྱེལ་དུ་འབུད་པར་བཤད་པའང་ཡོད་དོ། །

རྒྱ་གླིང་།

བོད་ཀྱི་ཆོས་སྤྱོད་རྒྱ་གླིང་འདི། ལ་དྭགས་རྒྱལ་རབས་ལས། བཙན་པོ་འདུས་སྲོང་མང་བོ་རྗེའི་སྐུ་དུས་སུ། ཇ་དང་རྒྱ་གླིང་བྱུང་བར་འཁོད་ཡོད། དབྱིབས་ནི་ཁ་ཆེ་ཞིང་གཡེལ་ལ། མདའ་ཁྲི། རྐེད། ཕུ་སྟེགས། པི་ཟངས། འདམ་བུ་བཅས་ཆ་ཤས་དྲུག་ལས་གྲུབ་པའོ། །མདུན་དུ་འཐེབ་མིག་བདུན་དང་། ལྟག་པར་མཐེབ་མིག་གཅིག་གོ། རྒྱ་གླིང་འདི་དགོན་སྡེའི་རོལ་མོའི་ཁྲོད་དྲག་ཤོས་ཡིན་ཞིང་། བེད་སྤྱོད་ཀྱི་བྱེད་སྒོ་ཡང་། སེར་སྦྲེང། གར་འཆམ། བླ་མ་ཕེབས་བསུ། སྙན་གསན་འབེབས་པ་སོགས་ནང་བསྟན་གྱི་གྲུབ་མཐའ་རིས་མེད་ཀྱིས་འབུད་སྲོལ་ཡོད། རྒྱ་གླིང་གཏོང་བ་ཡང་། གྲུབ་མཐའ་སོ་སོ་དང་། དགོན་སྡེ་སོ་སོ་ལ་ཕྱག་བཞེས་སྣ་ཚོགས་ཡོད་ཀྱང་། དགེ་ལུགས་པའི་ཆོས་སྡེ་ཞིག་ལ་ཆ་བཞག་ནས་བཤད་ན། ལྷ་མོ་རྒྱས་བསྡུས། རྩ་འཆམ་སིལ་ཆ། ཧོར་གླུ། རྣམ་སྲས། མཛུབ་མོ་བཞི་བ། མགོན་པོ། ཆོས་རྒྱལ། སྒྲ་དབྱངས་མཚོ་འཁོར། ཀ་ལ་པིང་ཀ ཚེ་སྨོན་གླིང་། བཀྲ་ཤིས་ལྷ་མོ། བསྟན་སྐྱོང་མ། ཚལ་བ། མེ་ཏོག་ཆར་འབེབས། གྲུ་འཛིན་ཕོ་བྲང་། བཙུན་མོའི་དབྱངས། བདེ་ཆེན་གླིང་བུ་འམ་ཤན་པའི་ངར་གླུ། སྤྱན་འདྲེན་ལྔ་བཀག ཆོས་འཁོར་རྫ་རི་སོགས་སོ་གཉིས་ཡོད་པ་དང་། རྙིང་མར་མཚོན་ན། རྒྱལ་སྲས་བསྟན་པའི་ཉི་མ་ལ་ཌཱ་ཀིས་བསྩལ་བའི་ལྷ་མོ་ཆེ་ཆུང་། ཁྲ་ཆེན་ཁྲ་ཆུང་། རྒྱ་འབུད། བོད་འབུད། བླ་མ་རྒྱང་འབོད་སོགས་དང་། བསམ་ཡས་དགོན་པར་མཚོན་ན། རྒྱལ་བོ་སྤྱན་འདྲེན། གཡུ་སྒྲོན་སྤྱན་འདྲེན། བཀྲ་ཤིས་མཚོ་མོ། ཨོ་རྒྱན་མཚོ་མོ། ཕེབས་གླུ། ཁམས་གླུ། མེ་ཏོག་ཆར་འབེབས། གར་བ། སྨོན་ལམ་གྱི་གླུ་སོགས་དང་། འབྲུག་པ་བཀའ་བརྒྱུད་པའི་གདན་ས་སྡིངས་བོ་ཆེ་མཚོན་ན། ས་ཟླ་སྤྱན་འདྲེན། གྲུ་འཛིན་ཕོ་བྲང་། འབྲུག་གླུ་ཀུན་བཟང་ཆོས་སྒྲོལ། བྱང་གླུ། བསྟན་འཕེལ་དྲུག་བཀག སྟོད་གྲོང་། སྦྲང་ཚང་འཁོར། ཀརྨ་པ། བསམ་ཡས་ལྕོག་གསོལ། ངང་འཁྱིལ་མ། མགོན་སྐྱབས་མེ་ཏོག་མཆོད་པ། སུར་ཎ། བདུན་བདུན། ཚོང་འདུས་གྲྭ་ཚང་། བཀྲ་ཤིས་ཐུགས་སྨོན། མཐོང་སྨོན་གྲྭ་ཚང་། གཉན་སྦྱོར། མེ་ཏོག་ཆུ་ལེན་སོགས་བརྒྱད་ཅུ་ཡོད་དོ། །

རྐང་གླིང་།

༡ རྐང་གླིང་གི་ཁུངས། རྐང་གླིང་འདི་ལའང་རྒྱུད་ཀྱི་ཁུངས་ཚད་ལྡན་ཡོད་དེ། རྡོ་རྗེ་གཞོན་ནུ་ཐུགས་རྗེ་ཁྲོས་པའི་རྩ་རྒྱུད་ལས། བརླ་ཡི་རྐང་ལ་འབུད་པའི་དུང་། །ལྕང་ལོ་མཚན་དང་ལྡན་པ་ལ། །མ་མོ་མཁའ་འགྲོའི་རྟེན་དུ་བཅང་། །ཞེས་དང་། བདུད་རྩི་བམ་བརྒྱད་ལས། རྐང་བུ་འབུད་ཅིང་ཀུ་ཤའི་གླུ་བླངས། །ཞེས་དང་། རོ་ལངས་གསང་བའི་དཀའ་འགྲེལ་ལས། རྐང་ཆེན་ལ་སོགས་གླིང་བུ་འབུད་པར་བྱ། །ཞེས་སོ། །བོན་གྱི་དབང་དུ་བཏང་ནའང་སྔ་མོ་ནས་ཡོད་དེ། བོན་གྱི་ཡིག་ཆ་འགར། ཞང་ཞུང་དབལ་གྱི་བྲག་ཕུག་རོང་ཆེན་དུ། །དབལ་བོན་ཆེན་པོ་སྟག་ལ་མེ་འབར་གྱིས། །སྲིན་པོ་ཕོ་མོ་བསྒྲལ་བའི་བརླ་རྐང་ལ། །བསྟན་པའི་དགྲ་དཔུང་བཤིག་པའི་རྐང་གླིང་བཟོ། །ཞེས་བཤད་དོ། །

༢ རྐང་གླིང་དར་ཚུལ་དང་རྒྱུ་མཚན། རྐང་གླིང་ནི། དཔའ་བོ་དམག་ཐོག་ཏུ་ཤི་བ་འམ། སྐྱེས་པའམ་བུད་མེད་གཙང་མ་རང་བཞིན་གྱིས་ཤི་བའི་རུས་རྐང་ལས་བཟོས་པའི་གླིང་བུ་སྟེ། རྐང་གླིང་གི་ཆེད་དུ་མི་གསད་ནས་རྐང་གླིང་བཟོ་བ་ནི། ནང་བསྟན་ལས་ཕྱིན་ཅི་ལོག་ཏུ་སོང་བའོ། །བཅུ་དྲུག་མཆོག་རྐང་ནི་ཁྱད་དུ་འཕགས་པར་བཤད་དེ། དེ་ཡང་བུ་མོ་ལོ་བཅུ་དྲུག་ལོན་པའི་ཚེ། བུ་འདོད་ཅིང་བཙས་མ་ཐག་ཏུ་འཆི་བའི་བམ་རྐང་ཞེས་པ་དེ་ཡིན་ཞིང་། རྒྱུ་མཚན་ནི་འཆི་དུས། བུ་དེ་ཉིད་ཡིད་ལ་བྱེད་ཅིང་སྙིང་རྗེ་ཚད་མེད་སྐྱེས་ནས་འཆི་བས། དེའི་བརླ་རྐང་ལས་བྱས་པའི་སྐད་ཐོས་པ་ཙམ་གྱིས། ལྷ་སྲིན་འདྲེ་གསུམ་གང་ཡིན་ཡང་སྙིང་རྗེའི་སེམས་སྐྱེས་པར་གྲགས། ཕྱིས་སུ་འང་ཁ་ཅིག བླ་མ་བྱང་སེམས་ཅན་དང་། གྲུབ་ཐོབ་དང་། མཁའ་འགྲོ་མ། བུད་མེད་སྙིང་རྗེ་ཅན་གྱི་རྐང་གླིང་བཟང་བར་ཡང་བཤད་དོ། །རྐང་གླིང་འདི་རྒྱ་གར་ན་ཡོད་མཆི་སྟེ། ལོ་ཙཱ་བ་རིན་བཟང་གི་རྣམ་ཐར་ལས། ཁོང་རྒྱ་གར་ལ་ཕྱིན་སྐབས། རྣལ་འབྱོར་བ་གཅེར་བུ་ཞིག་གིས་མི་རྐང་གི་གླིང་བུ་འབུད་པ་མཇལ་ཚུལ་དང་། རྣལ་འབྱོར་བས་བླ་མའི་དབུ་ལ་མི་རྐང་གི་གླིང་བུ་དེ་ལན་གསུམ་དུ་བསྐོར་ཚུལ། རྐང་གླིང་གི་སྒྲ་ཐོས་པ་ཙམ་གྱིས་སྟག་ཡང་ལམ་གཟིར་ཚུལ་སོགས་བྲིས་ཡོད། རང་རེའི་ཡུལ་དུ་ཕལ་ཆེར་དུས་རབས་བཅུ་གཅིག་པའམ་བཅུ་གཉིས་པའི་ནང་ཕ་དམ་པ་སངས་རྒྱས་དང་། མ་ཅིག་ལབ་སྒྲོན་སོགས་ལས་ཞི་བྱེད་གཅོད་ཀྱི་ལུགས་དར་བ་སྟེ། གཅོད་དེ་ལ་ཕྱི་ནང་དོན་གསུམ་དུ་དབྱེ་ཡོད་ལ། གཉན་ས་རི་ཁྲོད་འགྲིམས་པ་ཕྱི་ཡི་གཅོད། ཕུང་བོ་གཟན་དུ་བསྒྱུར་བ་ནང་གི་གཅོད། ཉག་གཅིག་རྩད་ནས་གཅོད་པ་དོན་གྱི་གཅོད། ཅེས་གསུངས་པ་ལྟར། རྣལ་འབྱོར་བའི་གཅོད་སྐྱོང་སྐབས། གཅོད་རྐང་དར་བ་ནས་རིམ་བཞིན་ཆོས་ལུགས་ཀྱི་ཆོ་ག་མང་བོར་བེད་སྤྱོད་བཏང་བ་ཡིན། དཔེར་ན། རྐང་གསོ། གཏོར་རྒྱག སྦྱིན་སྲེག གར་འཆམ། སེར་སྲུང་སོགས་སུ་འབུད་སྲོལ་ཡོད་ལ། སེར་སྲུང་སྔགས་པས་སེར་བའི་གནོད་འཚེ་འགོག་སྐབས། རྐང་གླིང་བུས་ཏེ་སྲུང་མ་ཐུབ་ན། དེ་ལ་འཕྱ་སྨོད་བྱེད་པ། དམངས་གཞས་ཚུན་ནའང་ཡོད་དེ། སེར་བ་བྱ་གསར་སྒོ་ངས། །འབྲས་བུའི་ཡ་ཟམ་བཅག་སོང་། །ཐུན་རྭ་རྒྱ་གར་རྐང་གླིང་། །གདང་བུའི་རྒྱན་ཆ་ཡིན་འགྲོ། །གསུངས་ལ། ཁྱད་པར་དུ། རྐང་གླིང་མཆོག་ཏུ་གྱུར་བ་ནི། ཨ་ཙཱ་རའི་རྐང་ལ་རྐང་གླིང་བྱས་པ་འདི་དང་། བཅུ་དྲུག་མཆོག་རྐང་གཉིས་ཡིན་པར་སྨྲ། དེ་ཡང་གོང་གསལ་དམངས་གཞས་ལས། ཐུན་རྭ་རྒྱ་གར་རྐང་གླིང་། །ཞེས་པ་ལས་ཀྱང་རྟོགས་ལ། རྒྱ་གར་རྐང་གླིང་ཞེས་པ་ཨ་ཙཱ་རའི་རྐང་གླིང་ལ་ཟེར། ཨ་ཙཱ་ར་གྲོངས་པའི་རྐང་གླིང་ཕྲ་ལ་རིང་ཞིང་། གསུང་སྐད་ལེགས་རབ་བཤད་པས། རྟོགས་ལྡན་པ་ཚོས་ཕྱག་ཏུ་ཐོགས་པ་མང་། མྱང་སྨད་དགའ་སྡོང་དགོན་དུ་ཨ་ཙཱ་རའི་རྐང་གླིང་ཆ་གཅིག་ཡོད་པར་བཤད་པ་དང་། ས་སྐྱ་དགོན་དུའང་མོན་པའི་ཨ་ཙཱ་ར་ཞེས་ལྷ་མ་ཡིན་ལྟ་བུ་ཞིག་ཡོད་པ་དེའི་རྐང་གླིང་མགོན་ཁང་དུ་ཉར་ཚགས་བྱས་ཡོད་ཟེར། གཞན་སྐྱེས་པ་དར་མ་གྲི་ཤིར་ཐེབས་པའི་བརླ་རྐང་གཡོན་པ་ལ། གསང་གླིང་ཞེས་བྱ་སྟེ། མཁའ་འགྲོ་འབོད་པའི་རྟེན་དང་། བུད་མེད་དར་མ་གྲི་ཤིར་ཐེབས་པའི་རྐང་གླིང་ནི། དཔའ་བོ་འབོད་པའི་རྟེན་དུ་གྲགས་སོ། །

༣ རྐང་གླིང་གི་མདོག་དང་དབྱིབས། རྐང་གླིང་དཀར་བོ་རབ། སྨུག་པོ་འབྲིང་། ཁྲ་བོ་ཐ་མ། ཐལ་སྐྱ་ལ་སོགས་པ་ཕལ་བ་སྐྱོན་དུ་འགྱུར་བས་འཆང་མི་རུང་ངོ་། །དབྱིབས་སུ་མི་རུང་བ་ནི། དུམ་བུར་འཁྱོག་པ་དང་། གས་པ། སིལ་མང་བ། སངས་པ། ཤད་ཤད་བོ་དང་། སྦོམ་པ། སྐད་འདོར་འདོར་རོ། །ཟུར་མང་བ། ལེབ་ལེབ་བོ་སོགས་མིག་ལམ་དུ་མི་སྡུག་པ་འཆང་དུ་མི་གཏུབ་ལ། དབྱིབས་སུ་རུང་བ་ནི། གདོང་གྲིང་གྲིང་བོ་ནང་ངོས་སུ་གུག་པ་དང་། ཁ་བོ་ཆེ་དངུལ་དང་རག་ཏུང་ལས་བྱས་པ། རྐང་གཞུ་རྭ་ལྟར་གུག་པ། མི་སྣ་ལྟ་བུའི་ཁ་བོ་ཆེ་ཆུ་སྲིན་དང་ཉ་མོའི་ཁ་བཞིན་གཡེལ་བའོ། །

༤ རྐང་གླིང་འབུད་སྟངས་ནི། རྐང་གླིང་འབུད་དུས། ལྕགས་དང་ཟངས། ཤིང་དང་རྭ་ཅོ་ལ་གླན་ཏེ་འབུད་དུ་མི་རུང་བ་ལ། ལྷག་པར་དུ་གཡག་ནག་གི་རྭ་ནི་མནན་པ་བྱེད་པའི་སྣོད་ཡིན་ཅིང་། རྫས་ངན་མ་རུངས་པ་ཡིན་པས། དེ་ལ་རྐང་གླིང་སྤྲད་ནས་བུས་ན། ཐོས་པ་པོ་ཡིད་མི་བདེ་ཞིང་། གནོད་པའི་སེམས་སྐྱེས་ལ། གང་དུ་སྒྲོགས་པའི་སར་བཀྲ་མི་ཤིས་པ་སྣ་ཚོགས་འབྱུང་བར་བཤད་དོ། །ཕུང་བོ་གཟན་བསྒྱུར་གྱི་སྐབས་སུ། རྐང་གླིང་བུས་ཏེ་ལྷ་འདྲེ་བསྡུ་བའི་བརྡ་སྒྲོན་པ་ལ། སྐྱབས་འགྲོ་སེམས་བསྐྱེད་ཀྱིས་རྩིས་ཟིན་པའི་སྒོ་ནས། ཐོག་མར། ཕཊཿདྲག་པོ་གསུམ་བརྗོད་ཅིང་། དུང་སྐད་གསུམ་གཏོང་བ་སྟེ། དུང་སྐད་དང་བོའི་སྐབས་སུ་དམིགས་པ་དང་བཅས། ཀྱེ། ཐམས་ཅད་ཉོན་ཅིག ཅེས་པའི་སྒྲ་ཕྲ་ལ་གྲིམ་ཅིང་སྙན་པ་དེ། ཁམས་གསུམ་སེམས་ཅན་ཐམས་ཅད་ཀྱིས་སང་ངེ་ཐོས་པས། ཐམས་ཅད་སོ་སོའི་ལས་སྤྱོད་པ་ལ། མི་ཁོམ་པ་ཅི་ཡོད་ཀྱང་ལས་འཕྲོ་བཅད་དེ། ཐམས་ཅད་གྲོང་ངེར་ཉན་ནས། འདིར་འོང་བའི་སྤྲོ་བློ་བུན་གྱིས་སྐྱེས་པར་བསམ། དུང་གཉིས་པའི་སྐབས། ཀྱེ། ཐམས་ཅད་འདིར་འདུས་ཤིག ཅེས་པའི་སྒྲར་ཐོས་པར་བསམ་ལ། དེ་དག་ཐམས་ཅད་ཟིང་སྟེ་རང་རང་ཕྱོགས་ནས་བྱུང་བར་བསམ། དུང་གསུམ་པའི་སྐབས། ཐམས་ཅད་འུར་གྱིས་འདུས་ནས། ཀུན་གྱིས་རང་ལ་དད་པ་དང་། ཕཊཿགདབ་པ་ཡང་དམིགས་པ་དུང་དང་མཚུངས་པའོ། །གཞན་ཡང་། གཅོད་ཀྱི་སྐབས་སོགས་ལ་རྐང་དུང་གི་མཚན་ཉིད་ཞིབ་ཕྲ་སྒོས་མ་ཅིག་ལབ་སྒྲོན་གྱི་གཅོད་གཞུང་ཆེན་མོ་ལས་འབྱུང་བ་བཞིན། གནས་སྐབས་དང་རྒྱུན་གྱི་ཐུན་ཚོད་འཛིན་པ་སོགས་འདིའི་རིགས་ལའང་འབུད་ལུགས་ཀྱི་སྐད་འགྱུར་ཚད་དང་ལྡན་དགོས་ཕྱིར། དེང་སང་བཀའ་བརྒྱུད་པ་དག་གི་དགུ་འབུད་ཟེར་བ་འདི་ལ་ནི་བདེ་མཆོག་གི་རྩ་སྔགས་ཡི་གེ་བདུན་པ་ཉིད་ཀྱི་བརྡ་སྐད་ཡིན་པར་གསུངས་པ་ནི། ཡི་གེ་བདུན་པ་ལ་ཨོཾ་གཅིག་ལས་མེད་ཀྱང་སྐབས་འདིར་ཕག་མོའི་ཨོཾ་གསུམ་མ་དང་བསྟུན་པའི་བརྡ་སྐད་བྱ་བ་ཡིན་པས། ཐོག་མར་ཨོཾ་་་ཨོཾ་་་་་ཨོཾ་་་་་ཞེས་འབྱུང་བ་གསུམ་འབུད་ལ། དེ་ནས་ཧྲཱྀཿཞེས་བྱ་བ་རིང་བ་གཅིག དེ་ནས་ཧ་ཞེས་བྱ་བ་རིང་བ་གཅིག དེ་ནས་ཧ་འ་འ་འ་འ་འ་ཞེས་བྱ་བ་རྒྱང་རིང་ལ་ལྡེམ་འགྱུར་ཡོད་པ་གཅིག དེ་ནས་ཧཱུཾ་ཧཱུཾ་ཞེས་ཐུང་བ་གཉིས། དེ་རྗེས་ཕཊཿཞེས་ཅུང་རིང་བ་བྱས་པ་སྟེ། དགུ་འབུད་ཅེས་པའི་ཐ་སྙད་བཏགས་པ་ནི། དེང་སང་ཀརྨ་བཀའ་བརྒྱུད་དང་འབྲུག་པ་བཀའ་བརྒྱུད་དག་གི་འབུད་སྲོལ་ལོ། །ཡང་གསང་སྔགས་རྙིང་མའི་ལུགས་ལྟར་ན། སྔོན་ཚེ་མདོ་ཁམས་ཀ་ཐོགས་ཀྱི་གྲུབ་ཐོབ་དམ་གཙང་བྱམས་གསུམ་སོགས་ཀྱི་ཞལ་བཀོད་ལ་རྐང་གླིང་བདུན་འབུད་འདི། བླ་མ་གསོལ་བ་འདེབས་པའི་བརྡ་སྐད་ཡིན་ཚུལ་ནི། དང་ཐོག་མཆོད་མཆོད་ཅེས་པ་འདི་གཉིས་ཀྱི་སྔ་མ་རིང་ཙམ་དང་ཕྱི་མ་ཐུང་བར་བྱ་ལ། དེ་ནས་བླ་མ་བླ་མ་ཞེས། བླ་མའི་རྒྱང་འབོད་ཀྱི་ཚིག་འདི་གཉིས་ཀ་རིང་བོར་བྱ་ཞིང་། དེ་ནས་བླ་མ་མཁྱེན་མཁྱེན་ཞེས་པའི་ཚིག་འདི་གཉིས་རྒྱང་རིང་ཞིང་། ལྡེམ་འགྱུར་དང་བཅས་བྱ་ལ། དེའི་རྗེས་ཕཊཿཕཊཿཞེས་པའི་ཚིག་འདི་གཉིས་སྔ་མ་ཅུང་ཟད་རིང་བ་ཙམ་དང་། ཕྱི་མ་ཐུང་བ་རྦད་ཀྱིས་བཅད་དེ་བཞག་པ་ཡིན་ལ། དེ་ལྟར་རང་རྩ་བའི་བླ་མ་འབོད་པའི་རྒྱང་འབོད་གསུམ་པོ་དེ་ལའང་། མགོ་མ་ཤེད་ཆེ་བ་ལ། མཇུག་ཏུ་རིམ་པར་ཆུང་བར་ནར་གྱིས་བཞག་པ་འདི་ནི་བླ་མ་དྲན་པའི་མོས་གུས་གདུང་ཤུགས་རང་རྒྱུད་ལ་སྐྱེ་བའི་ཕྱིར་ཡིན་པ་དང་། བརྡ་སྐད་འདི་འབོད་ལུགས་ལ་མཁས་པ་ཞིག་བྱུང་ཚེ་སྣང་བ་འགྱུར་ཏེ། སྐྱོ་ལྷང་ལྷང་གིས་རྐང་གླིང་གཏོང་ནུས་ཞིག་ཡོང་བར་གསུངས་ལ། དེ་ལྟའི་རྐང་དུང་འབུད་ལུགས་ལའང་བརྡ་སྐད་ཚད་ལྡན་ཐུན་མོང་མ་ཡིན་པ་རེ་ཡོད་དོ། །དགེ་ལུགས་པའི་དགོན་པ་འགའ་ཞིག བསྐང་གསོའི་སྐབས་ཛག་རིང་ཛག་ཐུང་དང་། གུར་མགོན་ལྕམ་སྲིང་གི་བསྐང་གསོར་རྟ་སྐད། བསྒྲལ་ཆོག་དང་གཏོར་རྒྱག་སྐབས་བསྣོལ་རྐང་སོགས་དང་། ས་སྐྱ་དགོན་ལ་མཚོནའང་བསུ་རིང་བསུ་ཐུང་། རཀྟ་དམར་ཆེམསམ། རྐང་གླིང་སྙན་པའི་རོལ་མོ། སྤྱང་ཀིའི་ངུར་སྐད་སོགས་ཡོད་དོ། །

ཡང་། སྨིན་གྲོལ་གླིང་ལ་མཚོན་ན། ཟླ་རེའི་ཚེས་གསུམ་དང་། བརྒྱད། བཅོ་ལྔ་བཅས་ལ་ལྷ་བསང་གཏོང་སྐབས་སྙན་གསན་ལ། ལྷ་རྒྱལ། ཐུགས་རྗེ་ཆེན་པོ། རྡོ་རྗེ་སྒྲ་དབྱངས། དཔལ་མགོན་ལྕམ་དྲལ། རྒྱལ་བའི་བསྟན་སྲུང་། དམ་ཆེན་མགོ་ཐོག བཀྲ་ཤིས་འཁྱིལ་བ་བཅས་དང་། ས་སྐྱ་བར་མཚོན་ནའང་། སྙན་གསན་ཆེན་མོ། དམ་ཅན་མ། གསོལ་ཇ་རྒྱས་བསྡུས། དམ་ཅན་མ་ལྔ་ཚིག སྙན་གསན་ཆེན་མོ་ལྔ་ཚིག ལྷ་རྒྱལ་རྒྱས་བསྡུས། སྤྱན་འདྲེན། མཆོད་རོལ། དྷི་ཎ་མེ་ཀེ སྐུ་གསུང་ཐུགས། ཚིག་རོལ། ནས་འདྲ་མ་སོགས་སོ། །

རྐང་གླིང་འདི་སྟོང་ཉིད་ཀྱི་མཚོན་དོན་དང་། སྐབས་འགར་སྤྱན་འདྲེན་དང་། བཟློག་པ། ཐུགས་དམ་བསྐང་བ། འཕྲིན་བཅོལ་སོགས་ལ་འབུད་ཅིང་། གཞན་ཕུང་བོ་ལ་ཆགས་ཞེན་བཟློག་པ་དང་། མི་རྟག་པར་དྲན་སྐུལ་གྱི་ཆེད་དུ་འང་ཡིན་ནོ། །

༥ རྐང་གླིང་གི་མཚོན་དོན། ཁ་དོག་དཀར་ལ་སྣུམ་པས་གཟུང་འཛིན་གྱི་མཚན་མ་རང་ཞིར་སོང་བ། སོར་བཅུ་གཉིས་ཀྱིས་རྟེན་འབྲེལ་བཅུ་གཉིས། བུ་ག་དང་བོ་ཅ་ཡི་དབྱིབས་ཅན་གྱིས་ཆོས་ཉིད་མི་འགྱུར་བ། ངར་གདོང་རྣོ་བས་འཁོར་རྩ་གཅོད་པར་མྱུར་བ། རྐང་མཚམས་ལེབ་ཙམ་གཞོང་བས་མ་མོའི་བྲོ་ར། སྦུབས་སྟོང་གཉིས་ཡོད་པས་ཐབས་ཤེས་ཟུང་འཇུག་མཚོན་ནོ། །

རྭ་དུང།

རྭ་དུང་འདི་ལའང་རྒྱུད་ཀྱི་ཁུངས་ཡོད་དེ། རྒྱུད་མངོན་བརྗོད་བླ་མ་ལས། དུང་དང་རྭ་དུང་པ་ཊ་ཧ། །ཞེས་དང་། མཁའ་འགྲོ་རྒྱ་མཚོ་ལས། ཟངས་དུང་མ་དང་རྭ་དུང་མ། །ཞེས་སོ། །རྭ་དུང་ནི་རྐང་གླིང་ལ་དཔེ་བྱས་ཏེ་དར་བར་བཤད་ལ། རྭ་དུང་གི་རྒྱུ་ཆ་རྭ་ཅོ་ཡིན་ལ། དེ་ཡང་མ་ཧེ་དང་གླང་རྭ་ཡང་རུང་ལ། ཁྱད་དུ་འཕགས་པ་ནི། རི་དྭགས་ཁྲི་གཉན་གྱི་རྭ་ཡིན་པར་བཤད། རྒྱུ་མཚན་ནི་རི་དྭགས་འདི། སྔོན་བྱང་ཆུབ་སེམས་དཔའ་ཞིག སྟོང་ཉིད་ཀྱི་རྩིས་མ་ཟིན་པར་སྙིང་རྗེ་ཁ་རྐྱང་དུ་གོལ་བས། ཕྱི་མ་ཁྲི་སྙན་དུ་སྐྱེས་པར་བཤད་ལ། རི་དྭགས་དེའི་རྭ་ཡིན་ན་སེམས་ཅན་ལ་ཕན་ཐོགས་པའི་རྟེན་འབྲེལ་གྱི་གནད་ཆེ་བར་བཤད། རྭ་དུང་འདི་དགེ་བཤེས་པོ་ཏོ་བ་སོགས་ཀྱིས་བསྣམས་པར་གྲགས་ལ། འདིའི་སྒྲ་ཐོས་པས། རྔོན་པའི་ཁྱི་ཡིས་རི་དྭགས་མི་གསོད་པ་དང་། ཉ་བས་ཉ་མི་གསོད་པ་སོགས་ཀྱི་ཡོན་ཏན་ཡོད་པར་བཤད་དོ། །ཡང་། རྭ་དུང་འདི་རྙིང་མའི་དགོན་སྡེ་མང་བོར་བསྙེན་སྒྲུབ་ཀྱི་ཐུན་གཅོད་དང་གྲོལ་དུས་ཀྱི་ཚད་འཛིན་བྱེད་དུའང་བཀོལ་སྲོལ་ཡོད། འབུད་ཚུལ་མི་འདྲ་བ་གྲུབ་མཐའི་མཁན་པོ་དག་གི་ཞལ་ཤེས་ལས་རྟོགས་པར་བྱའོ། །

གླིང་བུ།

༡ གླིང་བུའི་ཁུངས་ནི། རྒྱུད་ལས་མཆོད་པ་དང་། དཀྱིལ་འཁོར་སྒྲུབ་པ། རིག་མ་མཆོད་པ། ཚོགས་འཁོར་སོགས་དང་། ད་ལྟ་བླ་མ་བསུ་ཕེབས་དང་། སེར་སྦྲེང། ཐ་ན་གླུའི་རམ་འདེགས་དང་། འཇིག་རྟེན་གྱི་དགའ་སྤྲོ་སོགས་མཚོན་པའི་དབྱངས་སྣ་ཚོགས་ལའང་བཀོལ་བའོ། །གླིང་བུ་འདི་ཡང་རྒྱུད་ལས་བསྟན་པའི་ཁུངས་ཡོད་དེ། ཁྲག་འཐུང་མངོན་འབྱུང་ལས། གླུ་དང་གླིང་བུ་གར་ལ་སོགས། །ཞེས་དང་། དཔུང་བཟང་ལས། གླིང་བུ་པི་ཝང་རྫ་རྔ་ཆེན་པོའི་སྒྲ། །ཞེས་སོགས་ནང་བསྟན་གྱི་གཞུང་ལས་མང་དུ་འབྱུང་ངོ་། །

བོན་ལུགས་ལ་མདོ་དྲི་མེད་གཟི་བརྗིད་སོགས་སུ། ལ་ལ་ནི་གླིང་བུ་འབུད་དོ། ཞེས་གསལ་བར་གསུངས་པ་དང་། ཡང་ཆོས་འབྱུང་མཁས་དགའ་ལས། བཞི་བ་ཐོག་རྗེ་ཐོག་བཙན་སྐུ་རིང་ལ། །ལྷ་ཡི་རོལ་མོ་གླིང་བུ་ཅག་པར་བྱུང་། །ཞེས་སོ། །

 ༢ གླིང་བུའི་རྒྱུ་ནི། གསེར་དང་དངུལ། སྟོང་། ལྗོན་དམར། ར་གན་ལས་གཞན། སྨྱུག་གླིང་། ཤིང་གླིང་། ལྕགས་གླིང་། རྫ་གླིང་། རྒོད་གླིང་སོགས་སོ། །

༣ གླིང་བུའི་དབྱིབས་ནི། སྨྱུག་མ་འམ་ཙན་དན་ལས་བྱས་པ་དེ་ལ་བུ་ག་མང་དུ་དོད་པ་དུང་ཆེན་དང་འདྲ་ཞིང་། དེ་ལས་ཆུང་བ་ཞིག་ཡོད་པ་དེ་ལ་རྒྱ་གླིང་དང་། གཞན་སྙུག་སྦུག་ལ་བུ་ག་མང་དུ་ཡོད་པ། ཁ་དང་མཛུབ་གུའི་དམ་ལྷོད་བར་ན་འབུད་པའི་འཕྲེད་གླིང་དང་། གཞན་རྫ་དང་། རྭ་ཅོ། རྒོད་ཀྱི་དང་རི། རྐང་རུས་སོགས་ཀྱིས་བཟོས་པའང་ཡོད་དོ། །

 ༤ འབུད་ཚུལ་ནི། ཆོས་ལུགས་ཀྱི་དབང་དུ་བཏང་ན། སྨིན་གླིང་ལུགས་ལ་ལྷ་མོ་ཆེ་ཆུང་དང་། ཁྲ་ཆེ་ཁྲ་ཆུང་། རྒྱ་འབུད། བལ་འབུད། བླ་མ་རྒྱང་འབོད་སོགས་ཡོད་པ་ལས་གཞན་གྲུབ་མཐའ་སོ་སོར་མི་འདྲ་བ་ཡོད་ལ། ད་ལྟ་འཕྲེད་གླིང་ནི་འཇིག་རྟེན་ལུགས་སུ་དར་སོ་ཆེ་སྟེ། དེ་ནི་བཟོ་བདེ། འཁྱེར་བདེ། གཏོང་བདེའི་རོལ་མོ་ཁྱད་པར་ཅན་ཞིག་གོ། སྤྱིར་ན། གླིང་བུ་ལྟ་བུ་སྒྲ་སྙན་གྱིས་སྒྲ་དམའ་སར་འཁོར་བ་ཆུ་ནང་དུ་ཉ་འཁྱུག་པ་ལྟ་བུ་དང་། སྒྲ་བར་མའི་རོལ་མོ་རི་ལྡེབས་ལ་རི་དྭགས་རྒྱུག་པ་ལྟ་བུ། སྒྲ་མཐོ་བའི་རོལ་མོ་གངས་སེང་གནམ་དུ་མཆོངས་པ་ལྟ་བུ། སྒྲ་མཐོ་དམའ་བར་གསུམ་རམ་འདེགས་བྱེད་པ་ནམ་མཁར་བྱ་འཕུར་བ་ལྟ་བུ་ཡིན་པར་བཤད་དོ། །

བཤུག་པ།

བཤུག་པ་འདི། སྔགས་ཚིག་བཤུག་པ་བརྡ་ཡིས་མཚོན་ནས་ཀྱང་། །མ་ལུས་འཁོར་དང་བཅས་ཏེ་གཤེགས་སུ་གསོལ། །ཞེས་སྒྲུབ་པའི་སྤྱན་འདྲེན་དང་། བྱིན་འབེབས་དགུག་གཞུག་སོགས་ལ་འབུད་སྲོལ་ཡོད་ལ། དེ་ལའང་རྒྱུད་ཀྱི་ཁུངས་ཚད་ལྡན་ཡོད་དེ། ཕུར་བ་གསང་རྒྱུད་ལས། རང་བཞིན་ཡེ་ཤེས་ཁྲོ་ཚོགས་རྣམས། །རྡོ་རྗེ་བཤུག་པའི་སྤྱན་དྲངས་ནས། །ཤེས་རབ་མ་ལ་བསྟིམ་མཆོད་སྒྲུབ། །ཅེས་དང་། རོ་ལངས་གསང་བའི་དཀའ་འགྲེལ་ལས། བཤུག་གླུ་ལེན་པའི་ལས་རྣམས་དང་། །འཁོར་རྣམས་སྐུལ་བའི་ཐབས་མཆོག་ཡིན། །ཞེས་སོ། །བཤུག་པའི་མིང་གི་རྣམ་གྲངས་ལ་སི་འམ་ཤུ་ཞེས་སྒྲའི་འབྱིན་ཚུལ་གྱིས་འབོད་པའང་ཡོད། དེ་ཡང་རྒོད་རྐང་དང་། རྭ་རྩེ། སྙུག་ཚིགས། རྫ་སོགས་ཀྱིས་བཟོས་སོ། །དེ་ཡང་ཀྲེ་ཅང་ཞིང་ཆེན་ཀྱི་ཧཱ་མུའུ་ཏུའི་གནའ་ཤུལ་དུ་འདབ་ཆགས་ཀྱི་རྐང་རུས་ལས་བཟོས་པའི་བཤུག་པ་དང་། རྨ་ཆུའི་སྟོད་རྒྱུད་ཀྱི་ཁཱ་ཡའི་གནའ་ཤུལ་ལས་བུད་པའི་བཤུག་པའི་རིགས་ལ་བརྟགས་ན། ལོ་ངོ་བདུན་སྟོང་ཡས་མས་ཀྱི་ལོ་རྒྱུས་ཡོད་པར་བཤད་དོ། །

འབུད་ཚུལ་ནི། བཤུག་པ་དགོས་པའི་གཞུང་ཚིག་དང་བསྟུན་ཏེ། མཐེབ་མཛུབ་ཁ་ལ་སྦྱར་ནས་འབུད་པ་དང་། ཡང་སྲི་མནོན་གྱི་སྐབས་སུ་འགུགས་ཐབས་སུ་སྲོད་ལ་ཤུ་དྲག་པོ་བུས་ཏེ། བརྗོད་ཚིག་ལ། སི་ལས་སྣ་འདྲེན་ཆེ་བ་མད་དོ། །དེ་དགོང་ཙམ་ལས་སྐྱིད་པ་མེད་དོ། །ཞེས་བརྗོད་དེ་ལག་གཡས་སུ་གཡབ་དར་ནག་པོ་ཐོགས་ནས་གནོད་འདྲེ་དགུག་གཞུག་བྱེད་སྲོལ་ཡོད་དོ། །དགེ་ལུགས་པའི་ལྕགས་མཁར་རྫོགས་སྐབས་སུ་འབུད་སྲོལ་ཡོད་པ་ལྟར། གྲུབ་མཐའ་རང་རང་གི་ཞལ་ཤེས་ལས་རྟོགས་པར་བྱའོ། །ཡང་སྔོན་དུས་སུ་རྔོན་རྒྱག་སྐབས་འདབ་ཆགས་རྣམས་འགུགས་ཐབས་སུའང་ཤུ་འབུད་སྲོལ་ཡོད་དོ། །

གཉིས་པ། རྡུང་བའི་རོལ་མོ།
རྔ།

༡ རྔའི་དབྱེ་བ། དཔལ་ནག་པོ་ཆེན་པོའི་རྒྱུད་ལས། འདུས་མ་བྱས་རང་བྱུང་དབྱིངས་ཀྱི་རྔ་དང་། འདུས་བྱས་རྟགས་ཀྱི་རྔ་གཉིས་གསུངས་པ་ལས། དང་བོ་ནི། གནམ་མཐའི་རི་རྩེ་ཟླུམ་པོར་བཀུགས་པ་ལ། །སྤྲིན་དང་ན་བུན་བགོ་བའི་རྒྱན་གྱིས་གཡོགས། །གཡུ་འབྲུག་རོལ་བའི་སྒྲ་སྐད་དྲག་པོ་ནི། །གྲགས་སྟོང་དབྱིངས་སུ་ཤར་བའི་རྔ་བོ་ཆེ། །གསུངས་པ་ལྟར་དང་། གཉིས་པ་ནི་མཚན་མ་རྫས་ཀྱི་རྔ་སྟེ། དེ་ལ་རྔ་བོ་ཆེ། རྔ་ཆུང་། རྔ་རིང་། རྔ་པ་ཏྲ་ཧ། པ་ཏྲ་ཧ་ཆེན་པོ། བཀྲ་ཤིས་རྔ། རྔ་ཕྲན། ཐོད་རྔ། ཅང་ཏེའུ་སོགས་དབྱིབས་དང་རྒྱུ་མི་འདྲ་བ་དུ་མ་ཡོད་པ་དང་། རྔ་འདི་དག་ནི་མཆོད་པ་དང་སྤྱན་འདྲེན། སྐུལ་བ། བགེགས་བསྐྲོད། དགྲ་བཟློག མནན་པ་སོགས་ལ་རྡུང་བ་ཡིན་ནོ། །

༢ རྔའི་རྒྱུ། ཙན་དན། སེང་ལྡེང་། ཤུག་པ། ཨ་གར། སྦ་སྙུག ཚེར་ནག རུས་པ་སོགས་དང་། རྔ་གཡོག་བྱེད་ནི། མི། སེང་གེ རི་དྭགས་ཀྲི་ཀྲིཤྣཱ་ར། ར་རྒོད། ར་རྒྱ་མོ། འབྲོང་། བ་ལང་སོགས་ཀྱི་ཀོ་བ་གང་རུང་ངོ་། །རྔ་ལྕགས་ཀྱང་སྦ་སྙུག ལྕགས། རྭ་ཅོ། མི་ལག མིའི་རྩིབས་རུས། དོམ་དང་དྲེད་མོའི་ལག་པ། ཤིང་ཚེར་མ་ཅན་སོགས་སྲ་ཤིང་གི་རིགས་ལ་བྱ་རུང་ངོ་། །

༣ རྔའི་ཚད་དབྱིབས། ཟླུམ་པོ་ཁྱབ་ཆེ་ལ། ཚད་ངེས་གཏན་མེད་པའོ། །

༤ རྔ་བརྡུང་ཚུལ། སློབ་དཔོན་ཙནྡྲ་གོ་མིས། རྔ་གཡོག་རྔ་ལ་རེག་མ་ཐག །ཕྲལ་ནས་ཐ་དད་ཉིད་དུ་བྱ། །སྐད་ཅིག་ཙམ་ལ་མི་སྦྱོར་བ། །སོ་སོར་འབྱེད་པ་མཁས་པའི་ལུགས། །ཞེས་པ་ལྟར་རྡུང་པ་ལས། རྒྱ་མཚོ་ཆེན་པོའི་ཀློང་མི་དཀྲུགས། །རི་རབ་གླིང་བཞིའི་མཐའ་མི་བསྐོར། །རི་ཐང་མཚམས་ཀྱི་བྲག་མི་བཤག། རི་དྭགས་རྒྱལ་བོའི་གཉའ་མི་བསྣུན། །ཞེས་པ་ལྟར། མཐའ་དང་དཀྱིལ་གཉིས་སུ་མ་ཡིན་པར། སུམ་གཉིས་ཡར་ཕུད་པའི་སར་བསྣུན་ཚེ་སྐད་ལེགས་པར་ཐོན་ལ། གདངས་ཀྱི་ཆ་ནས་སྒྲའི་དབྱེ་བ་བདུན་ཡང་གསུངས་ཏེ། ཕོ་སྒྲ་དིང་ཟིལ་ལྡན་པར་བརྡུང་། །མོ་སྒྲ་སྙན་ཅིང་མཛེས་པར་བརྡུང་། །ཕྱེད་མ་དྭངས་ཁྲོལ་ཆགས་པར་བརྡུང་། །ཞི་ལ་སྦྲང་ཆར་སིལ་བུ་ལྟར། །རྒྱས་ལ་རྫི་ཆར་གཡོས་པ་ལྟར། །དབང་ལ་དྲག་ཆར་འབབ་པ་ལྟར། །དྲག་ལ་ཐོག་སེར་འབྱིན་ལྟར་རོ། །ཞེས་དང་། ཙནྡྲ་ཤྲཱིས། ཐོག་མར་རྔ་སྒྲ་དལ་བུས་བསྐུལ། །དེ་རྗེས་བྱེ་བྲག་བྱེ་བྲག་ཏུ། །སྐུལ་བའི་གནས་ཀྱང་འདི་ལྟ་སྟེ། །རྔ་ཡུ་ཐད་ནས་ཡར་འཇལ་བའི། །མཁྱིད་གང་ས་རུ་དབྱུག་གུ་གནས། །དེ་ཡང་ལག་པའི་སོར་ཚིགས་ལ། །འཕྲུལ་ཙམ་རྔ་གཡོགས་རང་ལྗིད་ཀྱིས། །གདོང་གསུམ་བསྟན་ལ་སློད་གསུམ་བརྡུང་། །རྔ་གཡོག་རྔ་ལ་རེག་མ་ཐག། ཕྲལ་ནས་ཐ་དད་ཉིད་དུ་བྱ། །སྐད་ཅིག་ཙམ་ཡང་མི་སྦྱོར་ལ། །སོ་སོར་བཤད་པ་མཁས་པའི་ལུགས། །ཞེས་དང་། དེ་ཡང་། ཞི་རྒྱས་སོགས་ལ་རྡུང་ཚུལ་མི་འདྲ་བར་ཡང་བཤད་དེ། ཞ་ལུ་ཙནྡྲ་ཤྲཱི་རིའི་རྔ་སྦུག་རྣམ་བཞག་ལས། ཞི་བའི་རྔ་བརྡུང་བྱེད་པ་ན། །དེ་ཡི་ཉམས་དང་ལྡན་པར་བྱ། །རྔ་ཐབས་དག་ལ་སློད་པར་བྱ། །རྒྱས་པའི་རྔ་བརྡུང་བྱེད་པ་ན། །སྒེག་ཅིང་དཔའ་བའི་ཉམས་ཀྱིས་བྱེད། །རྔ་ཐབས་གསལ་ལ་འཁྲོལ་བར་བརྡུང་། །དབང་གི་རྔ་བརྡུང་བྱེད་པ་ན། །ཆགས་ཤིང་མཛེས་པའི་ཉམས་ཀྱིས་བཤད། །རྔ་ཐབས་དྲག་ལ་བརྗེད་པར་བརྡུང་། །དྲག་པོའི་རྔ་བརྡུང་བྱེད་པ་ལ། །རྩུབ་ཅིང་ཁྲོས་པའི་ཉམས་ཀྱིས་བཤད། །རྔ་བས་དྲག་ལ་མྱུར་བར་བརྡུང་། །དྲག་བརྡུང་རྒྱུན་ཆ་བྱེད་པ་ན། །ཐོག་སེར་ལྟར་ཡང་དབབ་པར་བྱ། །ཞེས་དང་། རྙིང་རྒྱུད་སྒྱུ་འཕྲུལ་བླ་མ་ལས། ཨེ་ཡི་ཚོགས་ཆེན་འབྱམས་པ་རུ། །སྟི་རིའི་རྔ་ཆེན་སྒྲ་བསྒྲགས་པས། །ཧཱུཾ་ཧ་ཧེ་ཕཊ་སྒྲ་འབྱིན་ཅིང་། །ཞེས་ཀྱང་གསུངས་སོ། །

༡༢ རྔ་སྒྲའི་ཕན་ནུས། རྒྱུད་སྒྱུ་འཕྲུལ་བླ་མ་ལས། སྟི་ར་རྔ་ཆེན་འདི་བརྡུང་བས། །གནོད་སྦྱིན་སྲིན་པོ་ཀུན་བསྒྲལ་ཏེ། །མུ་སྟེགས་ཀུན་ཀྱི་སྙིང་ཡང་འབྱིན། །སྟི་ར་རྔ་ཆེན་འདི་བསྒྲགས་པས། །སྟོང་གསུམ་ཁྲོ་བོའི་ཚོགས་ཀྱིས་བཀང་། །ཀུན་ཀྱང་རྔ་བརྡུང་དི་རི་རི། །རྔ་སྒྲ་ཆེན་པོའི་སྟོང་གསུམ་བཤིག། རྔ་སྒྲ་ཆེན་པོས་བདུད་དཔུང་བསྒྲལ། །རྔ་སྒྲ་ཆེན་པོས་སྲིད་གསུམ་སྦྱངས། །རྔ་སྒྲ་ཆེན་པོས་དགྲ་བགེགས་འདུལ། །རྔ་སྒྲ་ཆེན་པོས་ངན་སོང་སྦྱངས། །རྔ་སྒྲ་འབྲུག་གི་སྒྲ་བསྒྲགས་པས། །ན་རག་དམྱལ་ཁམས་སྟོང་བར་བྱེད། །རྔ་སྒྲ་ཏུག་ཆེམ་རི་རབ་བསྙིལ། །སྟི་ར་རྔ་ཆེན་སྒྲ་བྱུང་བས། །ཕྱིན་ཅི་ལོག་རྣམས་སྙིང་ཡང་འབྱིན། །རྔ་ཆེན་འབྲུག་གི་སྒྲ་སྒྲོགས་ཅིང་། །རྔ་ཐབས་གློག་སྟོང་འགྱུ་བ་བཞིན། །དེ་བཞིན་གཤེགས་པའི་ཐུགས་དམ་བསྐང་། །མ་མོ་མཁའ་འགྲོ་དམ་ཚིག་བསྐང་། །རྣལ་འབྱོར་རྣམ་ལྔའི་དམ་ཚིག་བསྐུལ། །སྟི་ར་རྔ་ཆེན་འདི་བརྡུང་བས། །ཉན་ཐོས་མདོ་སྡེ་གནས་ནས་སྤར། །རང་རྒྱལ་ལྟ་བ་དབྱིངས་སུ་སྒྲོལ། །སྟི་ར་རྔ་ཆེན་འདི་བསྒྲགས་པས། །ལྷ་དང་མི་ཡི་ཐེག་པ་ཡང་། །བླ་མེད་ཐེག་པའི་དབྱིངས་སུ་བཙུད། །སྟི་ར་རྔ་ཆེན་འདི་བསྒྲགས་པས། །སྟོང་གསུམ་སྟི་རའི་རྔ་སྒྲའི་བཀང་། །ཀུན་ཀྱང་རྔ་བརྡུང་དི་རི་རི། །རྔ་ཐབས་གློག་སྟོང་ལྕེ་འབྱིན་ཅིང་། །རྔ་སྐད་འབྲུག་སྟོང་སྒྲ་སྒྲོགས་པས། །བྱིན་རླབས་ལྕགས་ཀྱི་སེར་ཆེན་འབེབས། །སྟོང་གསུམ་འཁྲུགས་ཞིང་སྲིད་གསུམ་འཐོར། །ཞེས་དང་། རྔ་སྒྲ་རིན་ཆེན་ཁང་བ་བརྩེགས། །བསམ་རྫོགས་ཆེ་ལ་དབང་ཡང་འཐོབ། །རྔ་སྒྲས་གཡོ་བ་མེད་པར་བཤད། །ཆོས་ལ་འཛུད་པའི་སྒྲ་ཡང་འབྱིན། །རྔ་སྒྲའི་ཅི་འདོད་དགོངས་པ་རྫོགས། །ཞེས་དང་། གཞན་ཡང་། ཕན་ཡོན་བརྗོད་ལས་འདས་པ་གསེར་འོད་རྔ་སྒྲ་ལས་ཀྱང་གསུངས་སོ། །དེ་ལས་གཞན། རྫ་རྔ་དང་འཁར་རྔ་སོགས་ཀྱང་ཡོད་ལ། སྙིང་རྗེ་པད་དཀར་ལས། དམ་ཆོས་བསྟན་པའི་དུས་སྟོན་ཕྱིར། །རྔ་འམ་གནྡི་བརྡུང་བའི་སྒྲ། །ཞེས་པ་ལྟར། དམ་ཆོས་སྟོན་པའི་དུས་སྟོན་དང་། གཞན་ཡང་གྲྭ་ཚོགས་བསྡུ་བའི་བརྡ་དང་། མཆོད་ཆོག་སྒྲུབ་མཆོད་ཀུན་ལ་བཀོལ་བ་དང་། ཡང་། དགེ་འདུན་བསྡུ་བའི་འཁར་རྔ་བརྡུང་སྐབས། བཟང་སྤྱོད་ལས་འབྱུང་བ་ལྟར། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །ཞེས་དང་། བྱམས་སྨོན་ལས། ཆོས་རྔ་ཆེན་པོའི་སྒྲ་ཡིས་ནི། །སེམས་ཅན་སྡུག་བསྔལ་མཐར་བགྱིད་ཤོག། བསྐལ་བ་བྱེ་བ་བསམ་ཡས་སུ། །ཆོས་སྟོན་མཛད་ཅིང་བཞུགས་གྱུར་ཅིག །ཅེས་དང་། ཀུན་མཁྱེན་ཀློང་ཆེན་པས། ཆོས་རྔ་སྒྲོག་པའི་སྒྲ་ཐོས་སེམས་ཅན་ཡང་། །ངན་སོང་རྣམ་གྲོལ་ཉན་རྣམས་སྨོས་ཅི་དགོས། །ཞེས་གསུངས་པའི་ཕྱག་ལེན་ཡང་ཡོད་དོ། །

ཆ་ལང་ངམ་སྦུབ།

 ༡ སྦུབ་ཀྱི་ཁུངས་དང་རྣམ་གྲངས། ཁྲག་འཐུང་མངོན་འབྱུང་ལས། ཆ་ལང་སྒྲ་ནི་ཆེན་པོ་དང་། །ཞེས་དང་། སམྦུ་ཊ་ལས། ཆ་ལང་ལྟ་བུའི་སྒྲ་གྲག་པ་དང་། ཞེས་སོགས་རྒྱུད་མང་བོར་ཆ་ལང་ཞེས་འབྱུང་ལ། ད་ལྟ་སྦུབ་བམ་སྦུག་ཆལ་བྱ་བ་དེ་ཡིན་ལ། དེ་ནི་སྒྲ་གདངས་ཀྱི་ཁྱད་པར་གྱིས་བཏགས་པའི་མིང་ངོ་། །འདི་ལ་འབྲི་ཚུལ་མང་སྟེ། སྦུག་ཆོལ་ལམ་སྦུག་ཆོལ། སྦུབ་ཆོལ་ལམ་སྦུབ་ཆོལ། སྦུག་གམ་སྦུབ། ཆ་ལང་ངོ་། །

རྒྱུ་ནི་འཁར་དང་ལི་སོགས་ཀྱིས་བྱས་པ། ཆེ་ཆུང་མ་ངེས་པ། དབུས་སུ་འབུར་དུ་དོད་པའི་ནང་སྦུབ་ཅན། འདབ་མ་ཟླུམ་པོར་བྱས་པའོ། །ཕྱིས་སུ་བོད་དུ་དར་བའི་བཟོ་བཀོད་དང་མདོག སྒྲའི་འབྱིན་ཚུལ་སོགས་ཀྱི་དབྱེ་བ་བཞི་ཡོད་དེ། ཧོར་སྦུབ། རྒྱ་སྦུབ། བལ་སྦུབ། བོད་སྦུབ་བོ། །དེ་ཡང་འཇིགས་མེད་གླིང་བས། དེ་ཉིད་ལའང་ཧོར་རྒྱ་བལ་བོད་བཞི། །ཧོར་རིགས་གསུམ་ལས་མཆོག་ཏུ་གྱུར་བ་ནི། །ཛ་ལན་དྷ་ར་ཐོད་ཁྱིམ་ཆེ་ལ་ཕྱུར། །འཁོར་རྒྱ་ཆུང་ལ་ཐོ་རྗེས་ཤིན་ཏུ་གསལ། །གཡའ་མདངས་སེར་ནག་སྐད་སྙན་རྒྱང་གྲགས་ཆེ། །ངོ་བོ་ཆུང་ལ་རྒྱུ་ཚོགས་སྟུག་པ་དང་། །ཁ་སྒོར་ཟ་ར་ཚགས་སུ་མངོན་པ་ཡིན། །ཤིན་ཀུན་མ་ནི་ཐོད་པ་ཟླུམ་པ་ལ། །ལོ་ཐོད་བར་སྙེག་འཁོར་རྒྱ་སྔོན་བས་ཆེ། །རྒྱུ་ཚོགས་ཆེ་ལ་ངར་བས་གཞན་དག་གནོན། །སྤྱི་བོ་མཁར་བ་ཐོད་པ་ཆུང་བ་ལ། །ལོ་མ་རན་ཞིང་སྔོན་པོའི་ཁ་དོག་སྔོ། །མཚན་ཉིད་གཞན་རྣམས་མཚུངས་ཤིང་རྒྱ་གསར་ཀྲིག། བལ་བོ་ཧོར་དུ་བརྫུས་དང་མ་འཛོལ་ན། །ཧོར་གྱི་མཇུག་དང་རྒྱ་ཡི་ཐོག་མ་རུ། །བྱུང་བའི་རོལ་མོ་ཁྱད་གཞིས་འཕགས་པ་སྟེ། །སྐྱེ་མཆེད་དོད་ལ་ཐོད་ལོ་མཆུ་ཞེང་གབ། །ཐོད་མཚམས་ཟད་མཚམས་རྩ་རིས་བྱེ་ཁ་མངོན། །གཡའ་མདངས་སེར་ཞག་ཅན་དང་སྔོ་ནག་སོགས། །སྣུམ་བག་གཞན་བས་ལྟ་ན་སྡུག་པ་ལ། །སྐད་སྙན་འཁྲོལ་ཞིང་རྒྱང་གྲགས་ཆེ་བ་ཡོད། །ཅེས་ཧོར་སྦུབ་ལ་ཛ་ལན་དྷ་ར་དང་། ཤིན་ཀུན་མ། སྤྱི་བོ་མཁར་བ་བཅས་གསུམ་དང་། རྒྱ་སྦུབ་ལ་ཡང་དེ་ཉིད་ལས། རྒྱ་སིལ་ལེགས་དང་དྲིལ་བུ་ཁྱད་འཕགས་དུས། །སྦུབ་ཆོལ་ཉུང་བས་ཕལ་རྣམས་ཕྱི་ནས་བྱུང་། །ཤིན་ཏུ་གསར་བ་ཁ་དོག་སྐྱ་འམ་གནག། རྒྱུ་ཚོགས་ལྡན་ཞིང་སྐད་སིང་སྙན་ཆ་ལྡན། །ཞེས་དང། བལ་སྦུབ་ཡང་དེ་ཉིད་ལས། བལ་ཆོལ་སྦལ་མགོ་མ་དང་སྤྲེལ་ཐོད་མང་། །ཐོད་པ་ཅུང་ཆུང་དེ་ཡང་གཅིག་ཤོས་སུ། །ཅིག་ཤོས་ཤོང་ཞེས་ཟེར་ཡང་ཆེ་ཆུང་དུ། །མངོན་པ་གང་ལ་ཡོད་པས་མ་ངེས་ལ། །སྲུབས་རིས་གསལ་ཞིང་ལི་མདངས་སེར་སྐྱར་སྣང་། །ཞེས་སྦལ་མགོ་མ་དང་སྤྲེལ་མགོ་མ་དང་། བོད་སྦུབ་ལ་ཡང་དེ་ཉིད་ལས། བོད་ནི་གྲ་སྦུག་ཉིད་དང་དེ་བཞིན་དུ། །ལྷོ་མོན་དག་ནས་གསར་བྱུང་བལ་རྒྱུད་བཟོ། །རྒྱ་གསར་དག་དང་འཁྲུལ་བ་བསྐྱེད་པ་དང་། །སྔོན་རབས་འཇང་སྦུག་སོགས་ནི་རྟོགས་པར་སླ། །གང་བྱུང་རྒྱུ་ལ་རྒོད་གཡུང་བྱེ་བྲག་གིས། །ཡབ་སྦུབ་མས་སྦུབ་ཁྱད་པར་ཆེ་བ་ཡིན། །ཞེས་བོད་སྦུབ་ལ་གྲ་སྦུབ་དང་མོན་སྦུབ། འཇང་སྦུབ་སོགས་བཤད་དོ། །

༢ སྦུབ་རྡུང་ཚུལ། རྡུང་ཚེ་ལུང་ཐག་སྲིན་ལག་ལ་བསྐོན་ནས། ཡབ་སྦུབ་མཐེབ་སོར་བཀྱེད་པས་བཟུང་ཞིང་། ཡུམ་སྦུབ་གཡོན་ལག་གི་མཐིལ་དུ་རླུང་དང་སྒྲ་མི་འགོག་པའི་ཆེད་དུ་བཞག་ཅིང་། ཕན་ཚུན་ཅུང་ཟད་བསྣོལ་ཏེ་རྡུང་ཚུལ་ནི། ཞ་ལུའི་མཁས་པ་ཙནྡྲ་ཤྲཱི་རིས། རང་ལྗིད་ཁོ་ནས་དྲག་ཙམ་བསྐུལ། །དཔྲལ་བའི་ཐད་བཀྱག་རིམ་བཞིན་ཕབ། །ཁ་གང་ཙམ་ནས་ཚིགས་ཁྲོལ་ལྷོད། །མས་ཀྱང་ཅུད་ཟད་ཙམ་འཁྲོལ་བྱ། །ཆེ་ཆུང་ལ་སོགས་སྐབས་བསྟུན་བྱ། །ཞེས་དང་། བར་སྣང་མི་གཡུག་གདོང་མི་དགག། བྲང་དང་པུས་མོ་ལ་མི་བརྡབ། །འཕྱག་དུས་ལྷོད་ལ་དལ་བུས་བསྐྱོད། །བདེ་བླང་སྒྲ་ཆེར་འཐབ་ཅིང་གསིལ། །འཁྲོལ་ནས་མགྲིན་པའི་ཐད་ཙམ་སྟེ། །ཆེ་འབྲིང་ཆུང་སྐད་སྐབས་དང་སྦྱར། །སྒྲ་གདངས་ཁྱད་པར་ཡང་དེ་ཉིད་ཀྱིས། བཞི་འཕར་འུར་དིང་སྙན་རྩུབ་དང་། །ཕྲ་སྦོམ་དྭངས་འཁྲོལ་ལ་སོགས་པའི། །སྒྲ་ཐབས་རྣམ་དབྱེ་རྟོགས་པར་བྱ། །ཞེས་གསུངས་པ་དང་། གཞན་ཡང་། ས་དགེ་ཀར་རྙིང་ཀུན་གྱིས་རང་རང་གི་ཐུན་མིན་གྱི་རྡུང་ཚུལ་ཡོད་པས། ཞིབ་ཏུ་མཐོང་བ་བརྒྱུད་པའི་ཕྱག་ལེན་ལས་རྟོགས་པར་བྱའོ། །

༣ སྦུབ་ཀྱི་མཚོན་དོན། སྟེང་འོག་གཉིས་ཀྱིས་ཐབས་ཤེས་ཟུང་འཇུག ལྟོ་བ་ལྡིར་བས་གནས་སྐབས་དང་མཐར་ཐུག་གི་བྱང་ཆུབ། ཁོར་ཡུག་གི་ཞེང་ཁ་གྱེན་དུ་ཕྱོགས་པས་སྔགས་ཀྱི་སྤྱོད་པ། འཆང་བཟུང་གིས་བདེན་གཉིས་ཟུང་འཇུག སྒྲ་དལ་མྱུར་འཇམ་ལྷོད་དང་། དྲག་པས་གྲགས་སྟོང་འགག་པ་མེད་པ་མཚོན་པའོ། །

༤ སྦུབ་ཀྱི་དགོས་པ། རྔ་སྦུབ་སོགས་ཆོ་གའི་ཚིག་རིས་དང་མཐུན་པར་འཇུག་པས། རྣལ་འབྱོར་བའི་ལྟ་དགོངས་ལ་འབོགས་ཐོན། གདོན་བགེགས་ལོག་འདྲེན་གྱི་དགྲ་བགེགས་སྐྲོད་པ། སྣང་སྲིད་མ་མོ་རྣམས་སྙིང་ཉེ་བ། རྩ་གསུམ་ལྷ་ཚོགས་མ་ལུས་ཐུགས་དགྱེས་ཤིང་བསྐྱེད་རྫོགས་ཀྱི་ཡོན་ཏན་གོང་དུ་སྤེལ་བའི་རྐྱེན་དུ་འགྲོའོ། །

ཏིང་ཤག

༡ ཏིང་ཤག་གི་ཁུངས། ཏིང་ཤག་ལ། ཏིང་ཏིང་ཅག་དང་། ཏིང་ཏིང་ཤག་ཅེས་འབྲི་བའང་ཡོད་ལ། དེ་ནི་དགེ་འདུན་པ་སོགས་ཀྱིས་སྦྱིན་སོགས་ཕར་ཕྱིན་གྱི་ཆོས་ལ་ཉམས་ལེན་མཛད་ཆེད་ཟས་སྦྱིན་གཏོང་སྐབས་འཁོར་གསུམ་མི་དམིགས་པའི་ཏིང་ངེ་འཛིན་ལ་མཉམ་བཞག་གི་སྒོ་ནས་གཏོང་བའི་ཐབས་ཁྱད་པར་བ་ཞིག་ཡིན་ལ། ཏིང་ཤག་ཅེས་པ་དེ་ཡང་། ཏིང་ངེ་འཛིན་ཞེས་སུམ་བརྡུང་གི་སྒྲས་བླངས་པའི་སྒྲ་ཡིན་པས་དེ་སྐད་ཐོགས་པར་བཤད། བོད་དུ་ཏིང་ཤག་འདི་འབྲོག་མི་ལོ་ཙཱ་བ་ནས་དར་བར་བཤད། འགའ་ཞིག་གིས་ཏིང་ཤག་འདི་གཡེར་ཁ་ལ་དཔེ་བྱས་ཏེ་བཟོས་པར་བཤད་མོད། དེ་ལྟར་ག་ལ་ཡིན་ཏེ། ནག་པོ་ཆེན་པོའི་རྒྱུད་ལས། གླིང་བུ་དང་། ཏིང་ཏིང་ཤག་དང་། ཞེས་དང་། གསང་རྒྱན་བཀོད་པའི་རྒྱན་ལས། ཏིང་ཏིང་ཤག་དང་དུང་སྒྲ་དང་། །ཞེས་རྒྱུད་སྡེ་མང་བོ་ལས་གསུངས་པས་སོ། །ཏིང་ཤག་གི་རྒྱུ་ནི། འཁར་བ་དང་། ལི་སོགས་ལས་བྱས་པ། བོད་དུ་ཆོས་རྒྱལ་སྲོང་བཙན་གྱི་དུས་སུ་ཟ་ཧོར་ནས་དར་བར་བཤད་དོ། །

༢ ཏིང་ཤག་གི་དབྱེ་བ། ཏིང་ཤག་ལ་རྭ་ཏིང་ཞེས་ཏིང་ཤག་ཡ་གཅིག་ལ་རྡུང་བྱེད་ཀྱི་རྭ་ཅོ་ཆུང་ངུ་ཞིག་ཡོད་པ་དེ་ནི་གསུར་གཏོང་སྐབས་སྤྱོད་པ་དང་། སྦུབ་ཆུང་ཀྱི་དབྱིབས་ལྟར་ཆ་གཅིག་ཡོད་པ་དེ་ལ། བསྟན་པ་སྔ་དར་གྱི་དུས་སུ་ཁ་ཆེ་མ་དང་། འཇའ་ལན་ར་མ་ཞེས་དབྱེ་བ་གཉིས་བྱུང་བ་སྟེ། ཇི་སྐད་དུ། ཏིང་ཤག་མགོ་འཕང་དམའ་ཞིང་གྲག་འདི་ནི། །སྦུབ་སྙམ་བྱེད་ཅིང་སྐད་སངས་ཁྲོལ་ཆེ་བ། །མགོ་དང་འདབ་མའི་མཚམས་སུ་པུས་མོ་གསལ། །ཁ་ཆེ་མ་ཞེས་གྲགས་པ་འདི་ཉིད་ཡིན། །ཏིང་ཤག་ཁྱོན་ཆུན་མགོན་པོ་ནས་བཟུང་སྟེ། །རིམ་གྱིས་ཕབ་པ་ཁ་གཡེལ་ཤས་མཐུག་པས། །རྡོ་སྐད་འཕར་རིམ་སྙན་ཆ་ཆེ་བ་ལ། །འཇའ་ལན་ར་མ་ཞེས་བྱ་ཡོངས་སུ་གྲགས། །ཞེས་གསུངས་ལ། བསྟན་པ་ཕྱི་དར་ནས་ཧོར་ཏིང་དང་རྒྱ་ཏིང་། བལ་ཏིང་དང་བོད་ཏིང་སྟེ། སོ་སོར་དབྱིབས་དང་། ཁ་དོག་སྒྲ་གདངས་ཀྱི་སྙན་ཆ་སོགས་ཁྱད་ཆོས་ལྡན་པའི་ཏིང་ཤག་སྣ་ཚོགས་དར་བ་སྟེ། ཀུན་མཁྱེན་འཇིགས་མེད་གླིང་བས། ཏིང་ཏིང་ཤག་ལ་ཧོར་དང་རྒྱ་བལ་བོད། །ཧོར་ལ་རིགས་གསུམ་ཛ་ལན་དྷ་ར་མཆོག། ཤིང་ཀུན་འབྲིང་ལ་ཕལ་བ་ཐ་མ་སྟེ། །ཛ་ལན་དྷ་ར་གླིང་ཕྲན་ལས་འོངས་པའི། །ཤང་ཤང་ལས་བྱུང་ཐོད་པ་སྦུབ་ལ་ཟླུམ། །ལོ་མ་ཆུང་ཤོས་མཐེའུ་ཆུང་གི་རྒྱ། །ཁ་སྐོར་མཐུག་ཅིང་གཞན་ལས་ཆུང་བ་ལ། །སྐད་སྙན་རྒྱང་གྲགས་མཆོག་ཏུ་གྱུར་བ་ཡིན། །ཤིང་ཀུན་ཐོད་པ་དཔངས་མཐོ་རྩེ་མོ་ཕྱུར། །མཐའ་སྐོར་ཁ་སྦུབ་མཐུག་ལ་བར་སྐབས་སྲབ། །རྒྱང་གྲགས་ཆེ་ལ་དབུགས་ཐག་རིང་བ་ཡིན། །ཕལ་བ་བརྡར་གད་ཅུང་དོད་ཐོད་པ་དམའ། །ལི་ལ་ཁྲོ་ཉམས་ཡོད་པས་གྲུམས་པའང་སྲིད། །ཅེས་ཧོར་ཏིང་ལ་རབ་འབྲིང་ཐ་གསུམ་དུ་བཤད་པ་དང་། རྒྱ་ཏིང་ཡང་དེ་ཉིད་ཀྱིས། རྒྱ་ཏིང་ཐོད་པ་ཟླུམ་ལ་ཁ་ཕྱིར་ཐེག །ལོ་ཐོད་མཚམས་སུ་དཀྲི་ཁ་འཁོར་མོ་ལ། །ནག་གམ་སེར་མདངས་གཡའ་སྟུག་སྐད་གཤིས་འབོལ། །ཞེས་དང་། བལ་ཏིང་ནི། བལ་བོ་ཧོར་ཕལ་ལས་ཆེ་ཐོད་པ་ཕྱུར། །སེར་སྐྱ་སྲབ་ཞིང་སྙན་ཆ་ཆུང་བ་ཡིན། །ཞེས་དང་། བོད་ཏིང་ནི། དེ་ཉིད་ལས། སྙེ་ཤང﹙སྟོད་བལ་ཡུལ་དུ་ཡོད་པའི་ས་ཆ་ཞིག﹚ལ་སོགས་བོད་རྙིང་ཁ་དོག་ནག །སྐད་གཟེངས་མཐོ་ལ་སྙན་ཆ་ཆེ་བའོ། །ཟལ་མོ་སྒང་བ་ཐོད་པ་ཆུང་ལ་འདལ། །ལོ་མ་ཆེས་ཆེ་མཚམས་སུ་དཀྲི་ཁ་ཅན། །རྒྱུ་ཚོགས་ཆེ་ལ་སྐད་འབོལ་རྒྱང་གྲགས་ཆེ། །ཞེས་སོ། །

༣ ཏིང་ཤག་རྡུང་ལུགས། ཏིང་ཤག་ནི་སྦུབ་ལྟར་ཆ་གཅིག་ཡོད་ཀྱང་རྡུང་ལུགས་ནི་ཁ་བཀན་དུ་བསྟན་ཏེ་གཡས་གཡོན་ཟུར་རྡུང་བྱེད་པ་ལས། སྦུབ་ལྟར་ཁ་སྦྱོར་ནས་རྡུང་བ་མིན། ཁྱད་པར་དུ་སྔ་དྲོ་མགྲོན་གོང་མ་རྣམས་ལ་སྙན་སེང་ཞུ་ཆེད། ལི་ཏིང་ཆ་གཅིག་རྡུང་བ་དང་། དགུང་དྲོ་མགྲོན་འོག་མ་རྣམས་ལ་བརྡ་གཏོང་བྱེད་དུ་རྭ་ཏིང་བེད་སྤྱོད་པའི་ཕྱག་སྲོལ་ཡང་ཡོད་དོ། །

༤ ཏིང་ཤག་གི་མཚོན་དོན། ཁ་འཁྱེར་ཆུང་ཞིང་བརྗིད་ཆེ་བས་སྦྱིན་སོགས་དགེ་རྩ་ཆུང་ངུས་འབྲས་བུ་རྒྱ་ཆེན་འཐོབ་པ། ཕྱི་ནང་མཐུག་པོར་གནས་པས་ཆོས་ནོར་གྱི་སྦྱིན་པས་འགྲོ་བ་རྣམས་ཚིམ་ཞིང་དགེ་ཚོགས་ཟད་པ་མེད་པ། ལྟོ་བ་ཅུང་ཟད་ལྡིར་བས་ཐེག་ཆེན་གྱི་ནུས་པ་སད་པ། བུ་ག་གཅིག་པས་ཞི་སྒོ་གཉིས་སུ་མེད་པའི་དབུ་མའི་ལམ་མཚོན་པ་སོགས་སོ། །

༥ ཏིང་ཤག་རྡུང་བའི་དགོས་པ། ད་ལྟ་ཏིང་ཤག་འདི། བསུར་བསྔོ་དང་ཆུ་གཏོར། མཆོད་པ་དང་། བརྒྱ་རྩ་སོགས་འདོན་དུས་བཀོལ་ལ། དེ་ཡང་། རྟོགས་ལྡན་རྣལ་འབྱོར་བ་རྣམས་ཀྱིས་ཆུ་སྦྱིན་དང་གསུར་མཆོད་སོགས་ཀྱི་སྐབས། དཀོན་མཆོག་སྲི་ཞུའི་མགྲོན། མགོན་པོ་ཡོན་ཏན་གྱི་མགྲོན། བགེགས་རིགས་ལན་ཆགས་ཀྱི་མགྲོན། རིགས་དྲུག་སྙིང་རྗེའི་མགྲོན་དུ་གྱུར་བ་རྣམས་ལ་སྙན་གསན་བཏང་སྟེ། མཆོད་རྫས་ཟག་མེད་ལོངས་སྤྱོད་ཀྱི་མཛོད་དུ་དམིགས་ཏེ་བསྔོ་ཞིང་། ཏིང་ཤག་གི་སྒྲ་སྔགས་ཚིག་དང་བསྟུན་ནས། མཆོད་མགྲོན་མཉེས་ཤིང་ཚོགས་རྫོགས་པ། ལན་ཆགས་དང་ཤ་འཁོན་སྦྱངས། ཏིང་ཤག་གི་སྒྲ་དྭངས་ཞིང་སྙན་ལ་ཕྲ་ཞིང་ཡུན་རིང་བ་དེ་ཐོས་པ་རྣམས་ཀྱི་རྒྱུད་ལ་ངེས་འབྱུང་གི་བློ་སྐྱེས་པ་སོགས་ཕན་ཡོན་ཡོད་དོ། །

གསུམ་པ། དཀྲོལ་བའི་རོལ་མོ།
རྡོ་དྲིལ།

རྡོ་དྲིལ་ལ། མཚོན་བྱ་དོན་གྱི་རྡོ་དྲིལ་དང་། མཚོན་བྱེད་དཔེས་རྡོ་དྲིལ་གཉིས་དང། ཐབས་བདེ་བ་ཆེན་པོ་ནི་མཚོན་བྱ་དོན་གྱི་རྡོ་རྗེ་ཡིན། སྟོང་ཉིད་རྟོགས་པའི་ཤེས་རབ་ནི་མཚོན་བྱ་དོན་གྱི་དྲིལ་བུ་ཡིན། ང་ཚོས་ལག་ལེན་བྱེད་པའི་རྡོ་དྲིལ་ནི་མཚོན་བྱེད་རྟགས་ཀྱི་རྡོ་དྲིལ་ཡིན་ལ། རྣལ་འབྱོར་རོལ་བའི་དགའ་སྟོན་ལས། དབང་བླངས་པའི་ཚེ་རང་གི་མེ་ཏོག་གང་ལ་ཕོག་པའི་རིགས་ཀྱི་དབང་དུ་བྱས་པའི་རྡོ་རྗེ་དང་། རྡོ་རྗེ་དེས་ཡུ་བ་བྱས་པའི་དྲིལ་བུའི་དབང་བླང་ཞིང་། དེ་ལྟ་བུའི་རྡོར་དྲིལ་བཟུང་བར་བྱ་སྟེ། གསུངས་པ་ལྟར། དེའི་ཁུངས་ནི། རུ་ཏྲའི་སྨེ་སྔགས་སོགས་ལས། སྔོན་རི་རབ་གྱི་ཁོང་གསེང་ལས། བདེན་སྟོབས་བརྙེས་པའི་དྲང་སྲོང་ཞོ་འཐུང་གི་རུས་པ་ལ། བརྒྱ་བྱིན་གྱི་ཕྱག་མཚན་རྡོ་རྗེ་འཆོས་པས། རྡོ་རྗེའི་མཚོན་ཆ་དེས་བརྡེག་ཚད་ཕོག་པ་དང་། ཕོག་ཚད་འཆི་བ། ཤི་ཚད་འདྲེན་པ་སྟེ། དམ་བཅའ་བཞི་ལྡན་དུ་བཤད་དོ། །དེ་ཡང་རྡོ་རྗེ་བཤད་པ་དང་། དྲིལ་བུ་བཤད་པ་གཉིས་ལས། རྡོ་རྗེ་བཤད་པ་ལ།

༡ རྡོ་རྗེའི་རྒྱུ་ལ། གསེར། དངུལ། ཟངས། རག ལི། ལྕགས། རྡོ། ཤིང་སོགས་རུང་བར་རྡོ་རྗེ་མཁའ་འགྲོ་སོགས་ལས་གསུངས་སོ། །

༢ རྡོ་རྗེའི་དབྱིབས་ནི། ལྟེ་ཟུར་བརྒྱད་པ་ཟླུམ་པོ། མཐའ་གཉིས་ཕྲེང་བ། དེའི་སྟེང་པདྨ། དེའི་སྟེང་ཟླ་བའི་དཀྱིལ་འཁོར། དེའི་སྟེང་མཐར་ཕྲེང་བསྐོར། དེའི་སྟེང་རྭ་དབུས་ཕྱིར་གྱེས་ལ་རྩེ་ནང་དུ་གུག་པ། རྩེ་མོ་ལས་རྩ་བ་ཕྲ་བ། དབུས་སྦོམ་ལ་རི་མོ་གསུམ་ལྡན་དབུས་མཐོ་ལ་མཐའ་དམའ་བ། རྭ་ཟུར་བཞི་འོག་ངོས་ཅུང་ཟད་ཟླུམ་པ། ཕྱོགས་རྭ་ཆུ་སྲིན་གྱི་ཁ་ནས་ཐོན་པ། གློ་གཉིས་སུ་ཕྲེང་བ་ཡོད་པ། ཕལ་ཆེར་རྩེ་དབུས་རྭ་ལ་ཟུག་པར་རྒྱུད་རྡོ་རྗེ་མཁའ་འགྲོ་དང་། སམ་བྷ་ཏྲ་ནས་གསུངས་ལ། མཚོན་བྱེད་རྟགས་ཀྱི་རྡོ་རྗེ་འདི་ལ། རྩེ་གཅིག་པ་དང་རྩེ་གསུམ་པ། ལྔ་བ་དང་དགུ་བ། སྣ་ཚོགས་རྡོ་རྗེ་སོགས་རྩེ་མོ་སྟོང་གི་བར་དུ་ཡོད་པར་མཁའ་འགྲོ་རྒྱ་མཚོ་ལས་གསུངས།

༣ རྡོ་རྗེའི་མཚོན་དོན་ནི། ལྟེ་བས་རྡོ་རྗེ་སེམས་དཔའ་དང་། སྟེང་གི་རྭ་ལྔས་རྒྱལ་བ་རིགས་ལྔ། པད་འདབ་བརྒྱད་ཀྱིས་འཕགས་ལམ་ཡན་ལག་བརྒྱད་ཀྱི་རང་བཞིན་ནམ་ཉེ་བའི་སྲས་ཆེན་བརྒྱད་མཚོན་པར་སམྦུ་ཊ་ལས་གསུངས། འོག་གི་རྭ་ལྔས་མཁའ་འགྲོ་སྡེ་ལྔ། པད་འདབ་བརྒྱད་ཀྱིས་སྒོམ་བཞི་དང་སྐུལ་བྱེད་མ་སོགས་བཞི་མཚོན་པར་བྱེད་དོ། །གཞན་ཡང་། རྡོ་རྗེ་ཐབས་ཡིན་པས་ཉིན་མོའི་ཆོས་དང་། དྲིལ་བུ་ཤེས་རབ་ཡིན་པས་མཚན་མོའི་ཆོས་སུ་འཇོག་ལ། ཉིན་མོ་གསལ་བྱེད་ཀྱི་ཆོས་དང་། མཚན་མོ་དབྱངས་ཀྱི་ཆོས་ཡིན་ཞིང་། དབྱངས་སྲོག་ཏུ་ཞུགས་པ་མེད་པའི་གསལ་བྱེད་ཀྱི་དོན་བརྗོད་པ་མེད་པའི་ཕྱིར། རྡོ་རྗེ་ལ་བརྗོད་པའི་སྒོར་གྱུར་བའི་ཞལ་མི་བྱེད་ལ། དབྱངས་ནི་བརྗོད་པའི་ཆོས་ཀྱི་རྒྱུའི་གཙོ་བོ་ཡིན་པའི་ཕྱིར། དྲིལ་བུ་ལ་བརྗོད་པའི་སྒོར་གྱུར་བའི་ཤེས་རབ་མའི་ཞལ་གྱི་རྣམ་པ་བྱ་བར་གསུངས་སོ། །

གཉིས་པ་དྲིལ་བུ་བཤད་པ་ལ། ༡ དྲིལ་བུའི་དབྱིབས་ནི། སྟེང་གི་རྡོ་རྗེ་གོང་ལྟར་དང་། རྡོ་རྗེའི་འོག་ཏུ་ཤེས་རབ་མའི་ཞལ་དབུ་སྐྲ་དང་། རིན་ཆེན་དབུ་རྒྱན་ཅན་ཟླ་དཀྱིལ་ལས་ཕྱིར་མི་འཕགས་པ། ཞལ་འོག་བུམ་པ་དང་བུམ་གདན། དེའི་འོག་ཕྲེང་བ་སུམ་བརྩེགས་དང་དབྱུག་པ། དེའི་འོག་ཤེས་རབ་མའི་དྲང་ཐད་ཤར་དུ་བྱས་ནས། པདྨ་འདབ་བརྒྱད་ལ། ཤར་ཏུ་སྒྲོལ་མའི་ས་བོན་ཏཱཾ། བྱང་དུ་གོས་དཀར་མོའི་ས་བོན་བམ། ནུབ་ཏུ་མ་མ་ཀིའི་མཾ། ལྷོ་སྤྱན་མའི་ལཾ། ལྷོ་ནུབ་ཏུ་སྐུལ་བྱེད་མ་སྟེ་ཙུན་དའི་ཙུཾ། འདི་ལ་སྦྲང་རྩི་མ་དང་། མངར་བ་མ། དབྱངས་སྙན་མ་ཞེས་ཀྱང་གསུངས། ནུབ་བྱང་དུ་ཁྲོ་གཉེར་ཅན་མའི་བྷཾ། འདི་ལ་གཟི་བརྗིད་ཅན་མ། ཡིད་འོང་མ། མཛེས་མ་ཞེས་ཀྱང་གསུངས། བྱང་ཤར་དུ་ཕྲེང་བ་མའི་མཾ། འདི་ལ་རིན་ཆེན་འཁྱིལ་བ་མོ་ཞེས་ཀྱང་གསུངས། ཤར་ལྷོ་ནོར་རྒྱུན་མ་བཾ། འདི་ལ་གསེར་ཅན་མ། མདོག་བཟང་མ་ཞེས་ཀྱང་གསུངས། ལོགས་སུ་པདྨ་རེའི་ཐད་དྲ་བ་དྲ་ཕྱེད་སོགས་ཀྱིས་བརྒྱན་པའོ། །དེའི་འོག་དྲིལ་ཁོག་གཡེལ་ལ་མཐའ་ཟུམ་པ། དྲིལ་ལྕེ་ཟུར་བརྒྱད་པ། དྲིལ་བུའི་ཚད་དང་འཚམ་པའོ། །བྷ་བ་བྷ་དྲས་ས་བོན་དང་ལྷ་མོའི་སྐུ་འགོད་པ་གདམ་ང་ཅན་དུ་གསུངས། དེ་ལྟ་བུའི་པདྨའི་འོག་ཏུ་མུ་ཏིག་གི་འཕྲེང་བ་ལྟ་བུའི་སྐ་རགས་གཉིས་ཀྱི་དབུས་སུ་རྡོ་རྗེ་ཕྲེང་བ་བྱ་བར། རྡོ་རྗེ་མཁའ་འགྲོ་དང་མན་སྙེར་གསུངས་ཤིང་། རྗེ་བསྟན་རྒྱན་གྱིས་དྲ་ཕྱེད་ཀྱང་རེ་རེ་བརྒྱད་ཅེས་གསུངས། དྲ་ཕྱེད་བརྒྱད་ཀྱི་ནང་དུ་ཤར་ལ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲི ཤར་ལྷོ་སྤྱན། ལྷོ་ནུབ་ཏུ་རྡོ་རྗེ། ནུབ་བྱང་དུ་པདྨ། བྱང་ཤར་དུ་ཨུཏྤལ་བྱ་ཞིང་། དྲ་ཕྱེད་ལ་སོགས་པའི་གནས་གཞན་དུ་ཀུ་མུ་ད་དང་། ཨུཏྤལ། པདྨ། རིན་པོ་ཆེ་དང་། པ་ཏྲ། མྱུ་གུ་ལ་སོགས་པ་འཕྱང་བ་བྱ་བར་མན་སྙེར་གསུངས་སོ། །

དྲིལ་བུ་ལ་རྒྱལ་བ་རིགས་ལྔ་གའི་ས་བོན་དང་ཕྱག་མཚན། རི་མོ་འབུར་དོད་དུ་ཡོད་པའི་དམ་ཚིག་གི་དྲིལ་བུ་དང་། རིགས་ལྔ་སོ་སོའི་དྲིལ་བུ་བཅས་མི་འདྲ་བ་ཡོད།

༢ དྲིལ་བུའི་དབྱུག་གུ་ནི། རྒྱུ་ལྕགས་བཟང་བོ་ལས་བྱས་པ་ཟུར་བརྒྱད་པར་རྡོ་རྗེ་མཁའ་འགྲོ་དང་། མན་སྙེར་བཤད་ལ། དེ་ཡང་ཟུར་བརྒྱད་པའི་རྣམ་པར་རྩེ་མོ་ནི་ཟུར་བརྒྱད་ཀྱི་དབུས་ནས་ཅུང་ཟད་མཐོ་བར་བྱས་པའི་ཟླུམ་པོ་བྱ་བར་གསུངས་སོ། །

༣ དྲིལ་བུའི་མཚོན་དོན་ནི། དྲིལ་བུ་ཆ་གསུམ་དུ་ཡོད་པས་ཁམས་གསུམ། ནང་ཁོག་སྟོང་དུ་ཡོད་པས་ཆོས་ཐམས་ཅད་རང་བཞིན་གྱིས་སྟོང་བ་མཚོན། ཡང་དྲིལ་བུའི་དབྱུག་གུས་འབྲས་དུས་ཀྱི་ལྷན་སྐྱེས་བདེ་བ་ཆེན་པོའི་ཡེ་ཤེས་དང་། བུམ་པའི་བདེ་སྟོང་དབྱེར་མེད་དང་། ཞལ་གྱིས་བདེ་སྟོང་དབྱེར་མེད་ཀྱི་ཡེ་ཤེས་ཤེར་ཕྱིན་མའི་རྣམ་པར་ཤར་བ་དང་། པདྨའི་ཡི་གེ་བརྒྱད་ཀྱིས་ཡུམ་བཞི་དང་། ནོར་རྒྱལ་མ་བཞི་མཚོན་ནོ། །གཞན་ཡང་། རྡོ་དྲིལ་ཕན་ཚུན་འཁྱུད་པས། ཁ་སྦྱོར་ཡན་ལག་བདུན་ལྡན་གྱི་ལོངས་སྐུ་དང་། དྲིལ་བུའི་སྒྲས་ཆོས་འཁོར་རྒྱུན་མི་ཆད་དུ་བསྐོར་བ་མཚོན་ནོ། །མན་སྙེ་ལས། རྡོ་རྗེའི་ཐུགས་དང་དྲིལ་བུའི་སྐུ། དེའི་སྒྲས་གསུང་ངོ་། །ཞེས་པ་ལྟར། སྐུ་གསུང་ཐུགས་ཀྱང་མཚོན་ནོ། །

༤ དྲིལ་བུའི་དབྱེ་བ་ནི། དྲིལ་བུ་འདི་བོད་ཡུལ་དུ་བོན་ལུགས་ཀྱིས་གནའ་སྔ་མོ་ནས་ཆོས་སྲིད་ཀྱི་སྤྱོད་སྒོ་ཁག་ལ་བེད་སྤྱོད་བྱེད་ལ། ཁྱད་པར་དུ་སྲོང་བཙན་གྱི་སྐུ་དུས་སུ་ནང་བསྟན་དར་བས་རྒྱ་གར་གྱི་སྔགས་ཆོས་ལ་ཁུངས་བཅོལ་ཏེ་ཁྲོ་ལྕགས་ལས་གྲུབ་པའི་དྲིལ་ཆེན་དང་། གཙུག་ལག་ཁང་གི་བར་སྒོར་དྲིལ་གདང་དུ་འདོགས་སྲོལ་བྱུང་ཡོད། ཕྱིས་སུ་བསྟན་པ་ཕྱི་དར་གྱི་དུས་སུ་དྲིལ་བུའི་བཟོ་བཀོད་ལ་འཕེལ་རྒྱས་ཆེན་པོ་བྱུང་བ་སྟེ། འགྲོ་མགོན་འཕགས་པའི་སྐུ་དུས་སུ་ཁོང་གི་བཀས་བསྐུལ་ཏེ་དྲིལ་བུ་རྩེ་ལྔ་དང་རྩེ་དགུ། ཚངས་རྡོར་སོགས་རྒྱུ་ཆ་དང་བཟོ་དབྱིབས། རྣམ་པ་མི་འདྲ་བྱུང་ཚུལ། རྒྱ་བོད་ནོར་རྫས་ཀྱི་རིས་བརྟགས་ཤིང་དཔྱད་པའི་དཔྱད་དོན་ཡིད་ཀྱི་འདོད་འཇོ་ཞེས་པ་ལས་གསུངས་ཡོད་ལ། ཁྱད་པར་དུ་གསུང་རྟེན་རྡོ་དྲིལ་སྐོར་རབ་འབྲིང་ཐ་གསུམ་དུ་བྱུང་ཚུལ་འཇིགས་མེད་གླིང་བས། གསུང་རྟེན་དྲིལ་བུ་ཧོར་དང་རྒྱ་དཀར་ནག། བོད་ཆེན་རིགས་བཞི་ལས་ནི་རྒྱུའི་སྒོ་ནས། །ཧོར་དྲིལ་གཉིས་ལས་ཤིན་ཀུན་མཆོག་ཏུ་གྲགས། །རྒྱུ་ནི་ལི་དཀར་དངུལ་མདངས་བཀྲག་ཞག་ཆེ། །དྲིལ་བུའི་སྟོད་ཞུམ་བ་ལང་ཁ་ཁེབས་ལ། །ལུགས་གཙང་བརྡར་གད་མ་བྱས་ལི་རྒྱུ་འཇམ། །ནང་ནི་ཞོ་ཁ་ཞེས་པ་འོ་སྤྲིས་འདྲ། །དྲྭ་ཕྱེད་འབུར་ལ་བར་སྟོང་འཇམ་སང་མང་། །དཔུང་བའི་པད་འདབ་རིགས་ཀྱི་ཕྱག་མཚན་སྤྲས། །དྲིལ་བུའི་དཔུང་ཟུར་པད་མཐའ་གཅིག་ཏུ་འདྲེས། །སྐད་སྙན་སྦོམ་ལ་རྒྱང་གྲགས་ལྷག་པར་ཆེ། །དབུ་རྡོར་ཅོང་ལི་མང་ན་དངུལ་དཀར་དང་། །ཛཻཀྵཱཾ་དག་ཀྱང་ཉུང་བར་སྲིད་པ་ཡིན། །རྩེ་ལྔ་བ་མང་ཆུ་སྲིན་ནང་ལ་བལྟ། །འཁོར་ལོའི་རྒྱན་ལྡན་རྩེ་དགུ་ཉུང་བ་ཡིན། །རྒྱུ་དང་གསུང་ལ་དོ་ཟླ་མེད་ན་ཡང་། །བཟོ་སྒྲོས་བྱིལ་བས་ཉམས་མེད་ཕལ་གྱིས་དོར། །དངོས་བསྟན་ཉུང་ལ་འདྲ་ཅོག་མང་བ་ཡིན། །ཕལ་བ་ལུགས་ཁ་དམ་ལ་གཙང་ཤ་ཆུང་། །ནང་ལ་བྲད་བརྡར་སོང་བས་ཞོ་ཁ་མེད། །རབ་འབྲིང་ཐ་མའི་ཁྱད་པར་ཆེ་བ་སྣང་། །ཞེས་ཧོར་དྲིལ་ལ་ཤིན་ཀུན་མ་དང་ཕལ་བ་གཉིས་སུ་བྱུང་བར་བསྟན་པ་དང་། དེ་བཞིན་རྒྱ་གར་དྲིལ་བུ་ལའང་། རྒྱ་གར་དྲིལ་བུ་ཆེ་ཚད་ཁྲུ་ལ་ཉེ། །ཆུང་བ་དག་ཀྱང་གཞན་ལས་ཆེ་བ་དང་། །པད་སྤུངས་དབྱིབས་ཅན་བྲད་བརྡར་གཙང་ཤ་མེད། །ཉུང་ཟད་སྣང་བ་ལི་དཀར་ཁོ་ནར་མཐོང་། །དྲིལ་བུའི་རྣམ་བཞག་རྒྱུད་སྡེ་ལས་གསུངས་པའི། །ཐ་སྙད་དང་མཚུངས་མཚུངས་པར་མ་ངེས་པ། །འཕགས་ཡུལ་དམ་ཚིག་སྲུང་ལ་སྒམ་པའི་ཕྱིར། །ཁྱབ་གདལ་མ་དར་བཟོ་ལ་འདྲིས་པ་ཆུང་། །ཞེས་དང་། རྒྱ་ནག་ནས་ཐོན་པའི་དྲིལ་བུ་ལའང་། རྒྱ་ནག་ཁྱད་དྲིལ་ཕལ་བ་ཏཱ་མིང་གསུམ། །ཁྱད་དྲིལ་སྐྱེ་མཆེད་བྲད་བརྡར་འགྲན་ཟླ་མེད། །དཀྱུས་ལས་ཅུང་ཆེ་བ་ལང་ཁ་སྦུབ་མཐུག། རི་མོ་དོད་ཀྱང་ཧྲོབ་ཉམས་གཏན་ནས་མེད། །རྩེ་ལྔ་བ་རྣམས་ཆུ་སྲིན་ནང་ལ་བལྟ། །འཁོར་ལོའི་རྒྱན་དང་རྩེ་དགུ་ཡིན་ནོ་ཅོག། རྩི་བར་དྲྭ་ཕྱེད་ཁོང་ནས་ཕྱག་མཚན་ཅན། །མུ་ཏིག་སྐེ་རགས་ཞིབ་ལ་སྐད་སྙན་འཁྲོལ། །མགོ་རྡོར་གསེར་དང་གསེར་དམར་ལས་གྲུབ་སྲིད། །རྒྱ་རག་ཚ་གསེར་མཐུག་པ་ཀུན་ལ་ཡོད། །ཕལ་བ་སྐྱེ་མཆེད་ཅུང་ཟད་གཙང་ཤ་ཆུང་། །དབྱིབས་ཀྱང་ཙོང་ལ་སྐད་ངར་གཉིས་སུ་འཚེར། །དྲྭ་ཕྱེད་སོགས་དང་པད་འདབ་ལྷོངས་ལ་འཇམ། །ས་བོན་ལཉྫར་ཡོད་པ་ཏཱ་མིང་མང་། །ཐེག་ཆེན་གན་དྲིལ་ལྷག་པར་ཆེ་བ་དང་། །ཁྱད་དྲིལ་མིང་དུ་གྲགས་པ་མེད་ན་ཡང་། །བཟང་ངན་ཁྱད་པར་ཆེ་བ་ཡོད་པའོ། །དགའ་ལྡན་གན་དྲིལ་དེ་བས་ཅུང་ཟད་ཞེར། །དྲིལ་བུའི་སྟོད་ཞུམ་མགོ་རྡོར་རྩེ་དགུ་མང་། །ཞེས་རྒྱ་ནག་ནས་ཐོན་པའི་དྲིལ་བུ་ལ་འང་ཁྱད་དྲིལ་དང་། ཕལ་བ། ཏཱ་མིང་བཅས་དབྱེ་བ་གསུམ་དུ་བྱུང་བར་བསྟན་པ་དང་། །བོད་དྲིལ་ལ་ཡང་། བོད་དྲིལ་རྙིང་མ་མདོ་ཁམས་རྩི་ཡུལ་དུ། །ཆེ་ཆུང་གཉིས་བཟོས་བྱི་བྱད་རྒྱ་འདྲ་བ། །ཉམས་མེད་རྣམས་ཀྱིས་རྒྱ་རུ་ངོས་འཛིན་ཡང་། །རི་མོ་མི་གཙང་དཔུང་མགོ་ཧོར་འདྲ་བ། །བ་ལང་ཁ་ནི་རྒྱ་ཧོར་གཉིས་ཀ་དང་། །འགལ་ཞིང་ནང་ལ་སུལ་གྱི་རྣམ་པ་མང་། །བོད་དྲིལ་གསར་མ་ཟལ་མོ་སྒང་དུ་དར། །རི་མོ་ཧྲོབ་ལ་སྐད་ངར་རིང་དུ་བསྲིངས། །ཁྱད་དྲིལ་རྣམས་ནི་སྐྱེ་མཆེད་གཙང་ཤ་ཆེ། །དེ་ལས་གཞན་པ་འཇང་འབའ་ལོ་གྲོ་སོགས། །དྲིལ་བུའི་གཟུགས་བརྙན་བརྟགས་པར་སླ་བས་སོ། །ཞེས་བོད་དྲིལ་ལའང་གསར་རྙིང་གི་དབྱེ་བ་ཡོད་ཚུལ་དང་ཁྱད་ཆོས་སོགས་བསྟན་ཡོད་དོ། །

༥ རྡོ་དྲིལ་གྱི་དགོས་པ་ནི། ཡི་དམ་གྱི་ལྷ་སྒྲུབ་སྐབས་དཀྱིལ་འཁོར་གྱི་སྒྲུབ་རྟེན་དང་། སྒྲུབ་བྱེད་ཀྱི་རྫས་དང་། དམ་ཚིག་གི་སྐབས་སུ་དབང་གི་དམ་ཚིག་དང་། ལས་རབ་འབྱམས་སྒྲུབ་པ་དང་། གསང་སྔགས་ཀྱི་གླུ་གར་སོགས་རྡོ་རྗེ་ཐེག་པའི་སྤྲོས་བཅས་ཀྱི་ཉམས་སོགས་ལ་དགོས་པར་གསུངས་སོ། །

༦ འཆང་ཚུལ་ནི། རང་ཉིད་ཀྱིས་གང་བསྒྲུབ་བྱའི་ལྷ་བསྒོམ་ཏེ་ལག་གཡས་ཉི་མ་དང་། ལག་གཡོན་ཟླ་བའི་དཀྱིལ་འཁོར་དུ་བསམ་ནས། ལག་པས་པད་བསྐོར་གྱི་ཕྱག་རྒྱ་དང་བཅས་ཏེ། གཡས་རྡོ་རྗེ་དང་། གཡོན་དྲིལ་བུ་འཛིན་པར་སམྦུ་ཊ་སོགས་ལས་བཤད་དོ། །

༧ རྡོ་དྲིལ་གཉིས་གསོར་བཀྲོལ་ཇི་ལྟར་བྱ་བ་ནི། དེ་ཡང་ཐབས་ཀྱི་མཚོན་བྱེད་རྡོ་རྗེ་ཕྱག་ཏུ་ཐོགས་ནས། ཐུགས་ཀྱི་དམ་ཚིག་དྲན་པའི་སྒོ་ནས། ཧཱུཾཿ མི་འགྱུར་ཐུགས་ཀྱི་རྡོ་རྗེ་ནི། །ཐུགས་ཀར་རྟག་ཏུ་བརྟེན་བྱ་བའི། །ཐུགས་ཉིད་ཡེ་ཤེས་རྡོ་རྗེ་ཡིན། །གསོར་བས་གདོན་བགེགས་ཐམས་ཅད་འཇོམས། །ཞེས་སོགས་ཀྱིས་གསོར་ཞིང་། གསོར་ལུགས་ལའང་རྐེད་གསོར་དང་རྩེ་གསོར་སོགས་མཆིས་པ་ལས། འདི་རྩེ་གསོར་རོ། །དྲིལ་བུ་ཡང་མཐེབ་སྲིན་གཉིས་ཀྱི་བར་དུ་ཐོགས་ལ། ཨཿ ཤེས་རབ་དབྱིངས་ཀྱི་སྒྲ་སྒྲོག་པ། །མཚན་མའི་དངོས་བོ་སྒྲ་མཐར་སྟོང་། །སྲིད་གསུམ་རང་བཞིན་ཉིད་ཀྱིས་དག། དངོས་བོ་ཐམས་ཅད་སྟོང་ཉིད་ངང་། །ཞེས་པས་དཀྲོལ་ཞིང་། དཀྲོལ་ལུགས་ཡང་སྣ་ཚོགས་ཡོད་པ་ཞལ་ཤེས་ལས་དང་། དེ་ཡང་ཐེངས་གཅིག་འཁྲོལ་ནས་དཀུར་བརྟེན་པས་གསུང་གི་དམ་ཚིག་དང་། ཐུགས་ཀར་བསྣོལ་བས་སྐུའི་དམ་ཚིག་དྲན་པར་བྱ་སྟེ། ཟུང་འཇུག་གི་ལམ་ཡང་དག་པར་འཇུག་པའི་བརྡ་མཚོན་ནོ། །

༨ ཕན་ཡོན་ལ། རྡོ་རྗེ་འཆང་བའི་ཕན་ཡོན་ནི། རྣལ་འབྱོར་བའི་རྟོགས་པའི་ཡེ་ཤེས་འཕེལ་བར་བཤད་པ་དང་། འགྲོ་བ་རྣམས་སྡུག་བསྔལ་ལས་སྒྲོལ་བ་དང་རྨོངས་ལས་ལྡོག་པ། བགེགས་སོགས་གནོད་པ་ཐམས་ཅད་འཇོམས་པ་དང་། དྲིལ་བུ་འཆང་བའི་ཕན་ཡོན་ཡང་། ཚེ་རིང་ནད་མེད་དང་། སྟོབས་དང་རྫུ་འཕྲུལ་སྟེར་བ། ནོར་འབྲུ་འཕེལ་ཞིང་སྡུག་བསྔལ་འཇོམས་པར་རྡོ་རྗེ་མཁའ་འགྲོ་སོགས་ལས་གསུངས་སོ། །དེ་ལྟར་འདིར་མགོ་འབུས་ཙམ་བརྗོད་པ་སྟེ། རྡོར་དྲིལ་གྱི་རྒྱུ་དང་དབྱིབས། ཚད་དང་དབྱེ་བ། མཚོན་དོན་དང་དགོས་པ། འཆང་ཚུལ་དང་རབ་གནས། ཕན་ཡོན་སོགས་ཞིབ་ཏུ་ཤེས་འདོད་པ་དག་གིས་གཤིན་རྗེ་གསང་རྒྱུད་དང་། རྡོ་རྗེ་མཁའ་འགྲོ། བྱ་རྒྱུད་ལེགས་གྲུབ། སམྦུ་ཊ ། དཔུང་བཟང་དང་དངོས་གྲུབ་འབྱུང་རྒྱུད། རྡོ་རྗེ་ཕུར་བ་གསང་རྒྱུད། དངོས་གྲུབ་འབྱུང་རྒྱུད། རྙིང་རྒྱུད་རྟ་མཆོག་རོལ་བ། གསང་འདུས་སྒྱུ་འཕྲུལ་དྲ་བ། གདན་བཞི། མན་སྙེ། རྙིང་རྒྱུད་ཧེ་རུ་ཀ རྙིང་རྒྱུད་ཡེ་ཤེས་རྔམ་གློག དགོངས་པ་ལུང་བསྟན། དཔལ་མཆོག་དང་བོའི་རྒྱུད། རྡོར་དྲིལ་བཤད་པ་རྒྱུད་ལུང་དཔང་བཞག རྣལ་འབྱོར་རོལ་བའི་དགའ་སྟོན། སྔགས་འཆང་རྒྱན་གྱི་མེ་ཏོག་སོགས་ལ་བལྟ་བར་བྱོས་ལ། ཧ་ཅང་རྒྱས་པར་ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས་སྔགས་ཀྱི་ཆ་ལག་འགའ་ཞིག་ཟུར་དུ་བཀོད་པ་ཟབ་དོན་གསལ་བྱེད་ཅེས་པར་བཞུགས་པས་དེར་བལྟ་བར་བྱའོ། །

ཅང་ཏེའུ།

ཅང་ཏེའུ་ནི། བླ་མེད་ཀྱི་རྒྱུད་སྡེ་རྣམས་མ་གཏོགས། རྒྱུད་སྡེ་འོག་མ་རྣམས་ལས་དཀྲོལ་བར་མ་བཤད་ལ། མིང་གཞན་དུ་ཌཱ་མ་རུ། གསང་བའི་རྔེའུ་ཆུང་ཀྱང་ཟེར།

༡ ཅང་ཏེའུ་གྱི་རྒྱུ། རྒྱུ་ནི་ཙན་དན་དང་སེང་ལྡེང་། མིའི་ཐོད་པ་དང་བ་སོ་སོགས་སྟེ། སམྦུ་ཊའི་རྒྱུད་ལས། དེ་ནས་ཅང་ཏེའི་མཚན་ཉིད་བཤད། །བཛྲ་ཤིར་ཤ་རྩ་བ་དང་། །ཙན་དན་དམར་བོ་ལས་བྱུང་དང་། །གཞན་རྣམས་གང་རྣམས་དེ་རྣམས་ནི། །ཡིད་ལ་འདོད་པ་རྣམས་ལ་བྱ། །ཞེས་པ་ལྟར། བཛྲ་ཞེས་པ་རྡོ་རྗེ་ཅན་གྱི་ཤིང་དང་། ཤིར་ཥ་ནི་ཙན་དན་བ་ལང་མགོའི་རྩ་བར་མཁས་གྲུབ་རྗེས་གསུངས་པ་དང་། ཡང་རྒྱུད་དེ་ཉིད་ལས། གཞན་པ་ཡི་ཡང་རྔེའུ་ཆུང་ནི། །ཐོད་པ་ལས་ནི་བསྐོར་བ་ཉིད། །ཅེས་དང་། རྒྱུ་འཕྲུལ་དྲ་བ་ལས། མི་ཐོད་ལས་བྱས་ཅང་ཏེའུ་ལ། །ཞེས་སོ། །

༢ དབྱིབས་དང་བཟོ་ཚུལ། དབྱིབས་སྣ་ཚོགས་འབྱུང་། ཀ་པ་ལའི་ཌཱ་མ་རུ་ནི། སམྦུ་ཊ་ལས། ཐོད་པ་ལས་ནི་བསྐོར་བ་ཉིད། །སྤྲེའུ་པགས་པས་གཡོགས་པའོ། །དེ་བཞིན་ཁ་སྦྱོར་གཉིས་ལ་ནི། །པདྨ་དག་ནི་འབྲི་བར་བྱ། །བུད་མེད་ཁྲག་གིས་མཛེས་པ་དང་། །དུར་ཁྲོད་སྐྱེས་པའི་སྐྲ་ལས་ནི། །བཀལ་བའི་རུས་པ་གཉིས་ནི་བཅིང་། །ཁྱིམ་གྱི་མེ་ཏོག་གཉིས﹙ཕོ་ལོ་བཅུ་དྲུག་གི་ཁུ་བ་དང་མོ་ལོ་བཅུ་གཉིས་ཀྱི་ཟླ་མཚན་འབབ་པ་ཡིན་པས། དེ་ཡང་གྲོང་ཆོས་ཀྱིས་མ་གོས་པ་ལ་བྱའོ། །﹚ཀྱིས་ནི། །པདྨ་ཟེའུ་འབྲུ་གཉིས་པ་ལ། །དཀྱིལ་འཁོར་ཉིད་ནི་བྲི་བར་བྱ། །ཞེས་པ་ལྟར། སྐྱེས་པ་ལོ་བཅུ་དྲུག་དང་། བུད་མེད་ལོ་བཅུ་གཉིས་ཀྱི་ཐོད་པ་ལྟག་སྤྲོད་བྱས་ཏེ། སྤྲེའུ་པགས་པས་གཡོགས། པགས་པའི་ནང་དུ་ཤེས་རབ་མའི་ཟླ་མཚན་དང་བོ་བྱུང་བའི་པདྨ་འདབ་བརྒྱད། དེའི་ལྟེ་བར་རང་རང་གི་ཡི་དམ་གྱི་སྐུ ཕྱག་མཚན། ཡི་དམ་གྱི་རྩ་སྔགས། སྙིང་བོ། ཉེ་སྙིང་སོགས་འགོད་ལ། པགས་པའི་ངོས་གཅིག་ལ་ཡི་དམ་གྱི་ལྷ་དེའི་ཡུམ་གྱི་སྐུ་དང་། ཕྱག་མཚན་སྔགས་སོགས་འབྲི། རྒྱུ་ཐོད་པ་ཡིན་ན། ཕོ་ཐོད་ལ་ཡབ་ཀྱི་ལྷ་སྐུ་དང་། མོ་ཐོད་ལ་ཡུམ་གྱི་སྐུ་བྲིས་ཏེ། སྟེང་འོག་མི་ནོར་བར་བྱས། དེའི་སྟེང་དུ་སྐྲའི་སྐུད་པའི་རེའུ་མིག་ཆོས་འབྱུང་ལྟ་བུའི་སྟེང་འོག་ཏུ་བཅུ་དྲུག་རེ་བྱས་ཏེ། དེ་དག་གིས་རང་གི་འདོད་ལྷ་ཡབ་ཡུམ་རྟེན་བརྟེན་པའི་དཀྱིལ་འཁོར་དང་། དགའ་བ་བཅུ་དྲུག་སོགས་མཚོན། ཅང་ཏེའུ་ཟུར་ལ་བསླངས་ཏེ་འཇོག་ནའང་། སྟེང་གཡས་དང་འོག་གཡོན་དུ་འོང་བ་བྱ། སྟེང་འོག་མི་ནོར་བའི་ཆེད་དུ་སྟེང་གི་ཁ་གཡོགས་ཀྱི་ཕྱིའི་དབུས་སུ་ཧཱུཾ་བྲི་བ་ཁ་ཅིག་ཕྱག་ལེན་ལ་ཡོད་དོ། །སྔ་མ་ཁ་ཅིག་སྟེང་གི་པདྨ་ལ་ཡི་དམ་གྱི་ས་བོན་ནམ་ཕྱག་མཚན། འོག་གི་པདྨའི་ལྟེ་བར་ནག་པོ་ཆེན་པོ་ལ་སོགས་པའི་ཕྱག་མཚན། འདབ་མ་བརྒྱད་ལ་ཤར་ནས་གཡས་བསྐོར་དུ་རྡོ་རྗེ། ཐོད་པ། དགྲ་སྟ། མཆེ་བ། འཁོར་ལོ། རྒྱལ་མཚན། རལ་གྲི། དུང་རྣམས་བྲི་བ་མན་ངག་ཏུ་བཤད་དོ། །སྐ་རགས་ལ། སམྦུ་ཊ་ལས། དུར་ཁྲོད་སྐྱེས་པའི་སྐྲ་ལས་ནི། །ཞེས་དང་། བརྟག་གཉིས་ལས། རྐུན་མའི་སྐྲ་ལས་སྐ་རགས་བྱ་བར་གསུངས་སོ། །

༣ རྡུང་བྱེད་ནི། ཆུ་སྐྱར་དང་མཐིང་རིལ་གྱི་རྐང་རུས་གཡོགས་ཀྱིས་དྲིལ་ནས་སྐྲའི་སྐུད་པས་བཏེགས་ཏེ། རིན་པོ་ཆེའི་ཕྲ་ཚོམ་གྱིས་སྐ་རགས་སྤུད། ཕྱག་བཟུང་དར་སྐུད་སོགས་བྱ་སྟེ། སམྦུ་ཊ་ལས། མི་ཡི་སྐྲ་ཡིས་བཏགས་ནས་ནི། །མཐིལ་རིལ་གྱི་ནི་རྐང་རུས་ཀྱིས། །ཕེ་ཧཱུཾ་མིང་ནས་བརྗོད་ཅིང་བརྡུང་། །ཞེས་དང་། ཁ་སྦྱོར་ལས། ཆུ་སྐྱར་རྐང་བའི་རུས་པས་གདབ། །ཅེས་པ་མན་སྙེར། ཆུ་སྐྱར་རྐང་བའི་གནས་སུ་གདབ། །ཅེས་པ་དང་མཐུན་ནོ། །ཡང་སྔ་མ་ཁ་ཅིག བུད་མེད་ཀྱི་སྐྲ་དང་མེ་ལོང་དང་ཁ་དོག་སྣ་ལྔའི་དར་ལ་སོགས་པར་འདོགས་པ་དང་། བུད་མེད་ཀྱི་སེན་མོས་རྡུང་བྱེད་བྱེད་པ། གཞན་ཡང་བུད་མེད་ཀྱི་བརླའི་དཔྱི་གཉིས་དང་ཚིགས་རུས་འབྲེལ་བ་བྲེགས་ནས་འཇམ་པོར་བྱས་ཏེ། བྷ་གའི་པགས་པས་གཡོགས་ཤིང་། སྐྱེས་པའི་རྡོ་རྗེས་རྡུང་བྱེད་བྱས་པ་མཁའ་འགྲོ་མ་འབོད་པའི་གསང་བའི་རྔེའུ་ཆུང་སོགས་གསུངས་པ་ནི་སྔགས་གསར་མའི་གཞུང་ཁུངས་ཐུབ་ལས་མི་འབྱུང་བར་ཁལ་ཁ་དམ་རྡོར་གྱིས་གསུངས་སོ། །

༤ ཚད་ནི། སམྦུ་ཊ་ལས། དེ་ཡི་ཚད་ནི་བཀའ་བསྩལ་བ། །བཅུ་གཉིས་པ་དང་བཅུ་བ་ཉིད། །ཁ་ལ་དེ་ཡི་ཕྱེད་ཉིད་དོ། །གསུངས་སོ། །བྱིན་རླབས་དང་རབ་གནས་ལེགས་པར་སོང་བའི་ཌཱ་མ་རུ་དེ། འོ་བརྒྱལ་ས་དང་ས་སྒྲེ་བོ་འཇོག་པ་སོགས་མ་གུས་པ་སྤངས་ཤིང་། འཇོག་ཚེ་ཕོ་ཐོད་གཡས་དང་མོ་ཐོད་གཡོན་དུ་བསྟན་ཏེ་བསླངས་ནས་འཇོག་དགོས།

༥ མཚོན་དོན་ནི། ཀྱེ་རྡོར་ལས། ཁ་ཊཱཾ་ཀ་གཟུགས་ཤེས་རབ་སྟེ། །ཐབས་ཀྱི་གཟུགས་ཀྱི་ཅང་ཏེའུ་ཉིད། །ཅེས་དང་། རྣལ་འབྱོར་མ་ཀུན་སྤྱོད་ཀྱི་རྒྱུད་ལས། ཁ་ཊཱཾ་ཀ་ནི་ལྷ་ཡི་སྐུ། །ཤེས་རབ་ཌཱ་མ་རུ་རུ་བརྟག། ཞེས་དང་། རྒྱུད་མངོན་བརྗོད་བླ་མ་ལས། ཅང་ཏེའུ་གཞི་ཐབས་བདེ་བ་ཆེན་པོ་དང་། སྒྲ་ཤེས་རབ་སྟོང་བ་ཉིད་མཚོན་བྱེད་དུ་གསུངས་སོ། །གཞན་ཡང་། ཅང་ཏེའུ་གྱི་ཁོག་པ་དང་པགས་གཡོགས་དང་རྡུང་བྱེད་དང་ལག་པའི་རྩོལ་བ་སོགས་གཅིག་ལ་གཅིག་བརྟེན་ནས་སྒྲ་འབྱུང་བ་ནི། ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་དང་། སྒྲ་ནི་གྲགས་སྟོང་སྐྱེ་འགགས་མེད་པ་ཆོས་ཉིད་ཀྱི་སྒྲ་མཚོན་བྱེད་དུ་འང་གསུངས་སོ། །གཞན་ཡང་། ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། ཅང་ཏེའུའི་དག་པ་དྲན་པའི་སྒོ་ནས་དཀྲོལ་བར་བྱ་སྟེ། དེ་ཡང་ཐོད་པའི་སྐད་དོད་ཀམ་པཱ་ལའི་ཀམ་བདེ་བ་དང་། པཱ་ལ་སྐྱོང་བ་ལ་འཇུག་པས་བདེ་བ་སྐྱོང་བའི་གནས་ཕྱག་རྒྱའི་པདྨ་མཚོན་ལ། ནང་དུ་བཀོད་པའི་འདོད་པའི་ལྷའི་མཚན་མས་ནི། གནས་དེར་མངོན་དུ་བྱས་པའི་ལྷན་ཅིག་སྐྱེས་པའི་བདེ་བ་མཚོན་ཞིང་། བདེ་ཆེན་ལ་དགའ་བ་བཅུ་དྲུག་ཡོད་པ་ནི་དྲ་བའི་རེའུ་མིག་གིས་མཚོན་ལ། ཌཱ་མ་རུའི་སྒྲས་ནི་ཟབ་མོ་སྟོང་བ་ཉིད་སྒྲོགས་པར་སེམས་པར་བཤད་པས། ཐོད་པ་སོགས་ཀྱིས་མཚོན་པའི་བདེ་བ་ཆེན་པོ་དང་སྒྲས་བརྗོད་པའི་དོན་སྟོང་བ་ཉིད་དང་དབྱེར་མི་བྱེད་པར་སྦྱར་བའི་ཐབས་ཤེས་གཉིས་སུ་མེད་པ་མཚོན་པར་བྱེད་དོ། །

༦ བཀྲོལ་ཚུལ་ཡང་། ལག་གཡས་ཀྱི་མཐེ་བོང་དང་གུང་མཛུབ་ཀྱིས་སྐེ་དཀྲིས་ནས་འཆང་སྟེ། ཐང་ལྷོད་མེད་པར་བརྡུང་། བགེགས་བསྐྲད་ལ་མཐེ་བོང་ཕྱིར་བསྟན་དང་། བྱིན་རླབས་དང་དབང་བསྐུར་ལ་མཛུབ་མོ་ནང་བསྟན་གྱིས་བརྡུང་དགོས་པར་སྔགས་འཆང་རྒྱན་གྱི་མེ་ཏོག་ཏུ་གསུངས་སོ། །

༧ བརྡུང་བྱའི་དགོས་ནི། དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། དེ་ཉིད་དེ་ཁོ་ན་ཉིད་དྲན་པའི་སྒོ་ནས་དཀྲོལ་བས། བདེ་སྟོང་གཉིས་སུ་མེད་པའི་ཡེ་ཤེས་ཉིད་སྒྲའི་རྣམ་རོལ་ཏུ་ཤར་བས་བླ་མ་དང་དཀྱིལ་འཁོར་གྱི་ལྷ་ལ་སོགས་པ་མཉེས་པར་བྱེད་པའི་མཆོད་པའི་དོན་དང་། དེ་ལས་བྱིན་གྱིས་རློབ་ཅིང་དངོས་གྲུབ་སྩོལ་བར་འགྱུར་བ་དང་། དཔའ་བོ་དང་རྣལ་འབྱོར་མ་ཐམས་ཅད། སྒྲ་དེས་ཐུགས་རྒྱུད་བསྐུལ་ནས་མྱུར་དུ་འདུ་ཞིང་། བྱིན་གྱིས་རློབ་པ་དང་། དབང་དུ་འགྱུར་བ་དང་། མཁའ་འགྲོ་ཆོས་སྐྱོང་རྣམས་སྒྲ་དེས་ཐུགས་རྒྱུད་བསྐུལ་ནས་འཕྲིན་ལས་ལ་སྦྱོར་བར་བྱེད་པ་ཡིན་ལ། རང་ལྷའི་ང་རྒྱལ་དང་རྣལ་འབྱོར་བརྟན་པ་དམ་ཚིག་དང་། སྡོམ་པ་ལ་གནས་པའི་སྔགས་པ་ཡིན་ན་གོང་དུ་བཤད་པའི་མཚན་ཉིད་དང་ལྡན་པའི་ཅང་ཏེའུ་ལ་བརྟེན་ནས་ཞིང་སྐྱོང་གི་མཁའ་འགྲོ་མ་དགུག་པའི་ལས་སྦྱོར་ཁྱད་པར་བ་ཞིག་ཀྱང་གསུངས་སོ། །

༨ ཕན་ཡོན་ནི། སངས་རྒྱས་མཉམ་སྦྱོར་ལས། ཅང་ཏེའུ་ཚུལ་སྟོན་རྣལ་འབྱོར་བ། །ཇི་ལྟར་བབས་པའི་གར་བྱེད་པས། །རིམས་དང་གདོན་དང་དུག་ཞེན་པའི། །སྡུག་བསྔལ་ཐམས་ཅད་མྱུར་དུ་སེལ། །ཞེས་དང་། མངོན་བརྗོད་བླ་མ་ལས། དཔའ་བོ་རྣལ་འབྱོར་མ་རྣམས་ཀྱི། །ཡིད་ནི་དགའ་བར་གྱུར་ནས་སུ། །དགའ་བ་ཡི་ནི་བསམ་པ་ཡིས། །ཅང་ཏེའུ་སྒྲ་ཡིས་བསྐུལ་ན་ནི། །མཉམ་ཉིད་དགའ་ལས་བཞེངས་པར་གྱུར། །ཞེས་དང་། རྙིང་རྒྱུད་ཀརྨ་མཱ་ལེ་ལས། ཅང་ཏེའུ་ཚུལ་སྟོན་རྣལ་འབྱོར་བ། །ཇི་ལྟར་བསམ་པའི་གར་བྱེད་པ། །འགྲོ་བ་གསུམ་དག་དབང་དུ་བྱེད། །དངོས་གྲུབ་མ་ལུས་མྱུར་དུ་འགྲུབ། །རིམས་གདོན་དུག་སེལ་སྡུག་བསྔལ་སེལ། །གནས་གསུམ་དག་ནི་སྐད་ཅིག་འབེབས། །ཞེས་སོ། །

གཞན་ཡང་། སངས་རྒྱས་བྱང་སེམས་ལ་མཆོད་པར་འགྱུར་བ་དང་། བསོད་ནམས་ཀྱི་ཚོགས་གསོག་པ། ཆོས་སྲུང་གི་ཐུགས་རྒྱུད་བསྐུལ་བ། བགེགས་བསྐྲད་དང་། རིག་པ་བརྟུལ་ཞུགས་ཀྱི་ཉམས་བསྐྱེད་པ། ཐབས་ཤེས་ཀྱི་མདོ་དྲན་པ། མཁའ་འགྲོ་མ་དབང་དུ་འདུ་བར་ཡང་འགྱུར་ཏེ། སྒྱུ་འཕྲུལ་དྲ་བ་ལས། ལམ་གྱི་བཞི་མདོར་དཀྱིལ་འཁོར་ནི། །རྐང་བ་གཡོན་པས་མཐེ་བོས་བྲིས། །གྲྭར་ནི་བུ་མོ་ཟས་བྱིན་ལ། །འགུགས་པར་བརྩོན་པའི་ལྕགས་ཀྱུ་བྱ། །གཙོ་བོ་ཁྲག་འཐུང་ཆ་ལུགས་ཀྱི། །གཟུགས་ཅན་གྱི་ནི་རྟིང་བས་བརྡུང་། །འདིས་ནི་ཁམས་གསུམ་རྣམ་གནས་པའི། །བུ་མོ་ཟས་བྱིན་འགུགས་པར་འགྱུར། །ཞེས་སོ། །

སིལ་སྙན།

༡ སིལ་སྙན་གྱི་སྒྲ་བཤད་དང་ཁུངས། གསང་བ་རྒྱན་གྱི་བཀོད་པ་ལས། ཇི་ལྟའི་སིལ་སྙན་རྡུང་སྤྱོད་ནི། །བརྡུང་བའི་བདག་ཉིད་ཅན་གྱིས་དཀྲོལ། །དེ་ལས་བྱུང་བའི་སིལ་སྙན་ལན། །གསིལ་བའི་སིལ་སྙན་ཉིད་དུ་བརྗོད། །ཅེས་གསུངས་པའོ། །སངས་རྒྱས་མཉམ་སྦྱོར་ལས། གླུ་དང་སིལ་སྙན་ལ་སོགས་པ། །ཞེས་དང་། ཟླ་གསང་ཐིག་ལེ་ལས། སིལ་སྙན་ཕྲེང་བ་རོ་ཆེན་དང་། །ཞེས་སོགས་རྒྱུད་མང་བོ་ལས། སིལ་སྙན་ཞེས་འབྱུང་ལ། མིང་གཞན་དུ་ཙིན་དང་རྔ་གཤང་ཞེས་ཀྱང་ཟེར། སིལ་སྙན་དང་ཆ་ལང་ནི། ཞི་དྲག་གི་ཁྱད་པར་དུ་གསུངས་ལ།

༢ སིལ་སྙན་གྱི་རྒྱུ་དང་དབྱིབས། རྒྱུ་ནི་ལི་དང་འཁར་བ་ལས་བྱས་ལ། དབྱིབས་ནི་འདབ་ཁ་གཤོག་པ་བརྐྱངས་འདྲ་ལ། ཁ་ཅུང་ཟད་གཡེལ་བ། ནང་དུ་སྦུབ་སྟོང་ཆུང་ཙམ། ཕྱི་ནས་ལག་པས་བཟུང་དུ་རུང་བ། སྐད་ཤིན་ཏུ་སྙན་པའོ། །

༣ སིལ་སྙན་གྱི་དབྱེ་བ། སིལ་སྙན་གྱི་རོལ་ཆ་འདི་ལ་ཕྱིས་སུ་དབྱེ་བ་མི་འདྲ་བ་བཞི་བྱུང་ཡོད་དེ། ཧོར་སིལ། རྒྱ་སིལ། བལ་སིལ། བོད་སིལ་ལོ། །དེ་དག་སོ་སོའི་ཁྱད་ཆོས་མི་འདྲ་བ་ནི། འཇིགས་མེད་གླིང་བའི་གཏམ་ཚོགས་ལས། སིལ་སྙན་ལའང་ཧོར་རྒྱ་བལ་བོད་བཞི། །ཧོར་ལ་རིགས་གསུམ་ཛ་ལན་དྷ་ར་དང་། །ཤིན་ཀུན་མ་དང་སྤྱི་བོ་མཁར་བ་ལས། །ཛ་ལན་དྷ་ར་ཐོད་ཆེ་འཁོར་རྒྱ་ཆུང་། །རྒྱུ་ཚོགས་ཆེ་ལ་སྐད་སྙན་རྒྱང་གྲགས་ཆེ། །སྤྲེལ་ཐོད་སྦལ་ཐོད་ཇི་ལྟའང་གཞན་པས་ཆུང་། །ཤང་ཤང་ཏེའུ་རེག་པའི་དུག་ཅན་ཕྱིར། །ཡི་གེ་བརྡ་ལས་རིན་ཐང་གཞལ་ཞེས་ཟེར། །དཀོན་པའི་ཕྱིར་ན་ནོར་སྣར་གྲགས་པ་ཡིན། །ཤིང་ཀུན་འཁོར་རྒྱར་དཔག་པའི་ཐོད་པ་ཆུང་། །ཐོད་དབྱིབས་གོང་འདྲ་སྐད་འབོལ་སེར་མདངས་ཆེ། །སྤྱི་བོ་མཁར་ལ་ཐོད་དབྱིབས་གསུམ་དུ་ཡོད། །ར་ཐོད་ཙོང་ལ་སྦལ་ཐོད་ཐོད་ཟུར་ཆག། སྤྲེལ་ཐོད་ཟླུམ་ལ་རྩ་བ་ཉག་པ་སྟེ། །འཁོར་རྒྱ་ཆེ་ཆུང་རན་ལ་འཁྲོལ་ཆ་ཆུང་། །གསེར་ངམས་ཟིལ་བ་ཆགས་པ་ཚེ་འབྲུམ་ཅན། །ནང་ལ་ཐོ་རིས་གསལ་ཞིང་སྲུབས་རིས་མེད། །ཐོད་པའི་རྩ་ནས་ལོ་མཐུར་སེ་གས་བསུ། །ཨོལ་མ་སོང་མཚམས་ཤང་ཁ་གྱེན་ལངས་ཀྱི། །ཁ་སྦྱར་བར་མཐའ་མ་རེག་ཙམ་དུ་ཡོད། །རྒྱ་ནག་ཆེ་ཆུང་འཚམ་ལ་ཆུ་ཞེང་གབ། །ཤང་ཁ་བཙན་ཚུགས་ཡོད་པས་འཁྲོལ་བ་དཀའ། །མཐའ་ལ་ཆ་ག་ནང་ལ་ཐོ་རྗེས་གསལ། །སེར་ནག་སྐད་སིལ་ཧོར་ལས་སྙན་ཆ་ཆུང་། །སྦལ་ཐོད་མ་ཎི་ལཉྫར་ཡོང་བ་ཡིན། །བལ་སིལ་སྲབ་དང་བོད་སིལ་རྒྱུ་ཚོགས་ཅན། །རྒྱ་ཧོར་གཉིས་དང་འགལ་བས་རྟོགས་པར་སླ། །དེ་ལས་བོད་སིལ་སྙན་ཆ་ཆེ་བ་ཡིན། །ཞེས་གསུངས་པ་ལྟར་རོ། །

༤ ཆེ་ཆུང་གི་ཚད། གཤང་རབས་ལས། གཤང་ངམ་ཁྲི་ལོ་སིལ་སྙན་ནི། །ཆེ་བ་གསེར་ཉིའི་ནུ་འབུར་ལས། །བྱུང་བའི་གླང་རེ་གཤང་ཆེན་དང་། །འབྲིང་བ་སངས་བོའི་ནུ་འབུར་ལས། །བྱུང་བའི་ཁྲི་ལོ་གནམ་གྲགས་དང་། །ཆུ་ལྕམ་རྒྱལ་མོའི་ནུ་འབུར་ལས། །བྱུང་བའི་ཁོལ་མོ་སིལ་སྙན་གྲགས། །ཞེས་སོ། །

༥ དཀྲོལ་ཚུལ། རོལ་མོའི་བསྟན་བཅོས་གཅིག་ཤེས་ཀུན་གྲོལ་ལས། སིལ་སྙན་འཁྲོལ་བ་ལྟ་བུ་ཞིག། ཡིན་ན་སིལ་སྙན་ཆེ་ཆུང་ལ། །ལྟོས་པའི་དཀྲོལ་ལུགས་འབྱུང་འགྱུར་ཏེ། །ཆེ་ལ་མཐོ་དང་ཆུང་ལ་དམའ། །ཡང་དོག་ཀྱང་ནི་གོ་རིམ་བཞིན། །དེས་ན་ཆེ་ཆུང་གང་ཡིན་ཡང་། །སིལ་སྙན་ཡིན་ན་ཐད་ཀར་དཀྲོལ། །སྦུག་ཆལ་ཡིན་ན་སྟེང་འོག་བྱ། །ཞེས་སྤྱིའི་དཀྲོལ་ཚུལ་དང་། བྱེ་བྲག་ཏུ་ལྷ་སའི་རྒྱུད་སྨད་གྲྭ་ཚང་ལ་ཆ་བཞག་ན་འཇིགས་བྱེད་ཀྱི་བདག་བསྐྱེད་སྐབས། སིལ་སྙན་ནམ་མཁའ་བྱ་འཛིང་དང་། རྒྱུད་སྟོད་ཀྱིས་བྱང་ཆུབ་ཕྱག་རྒྱ་མ། མཚུར་ཕུའི་དབྱར་འཆམ་གྱི་སྐབས་སུ་ཟླ་བ་ཡར་ཚེས་དང་། གཞན་ཡང་པདྨ་འདབ་བསྐོར་དང་། མེ་ཏོག་སིལ་མ་སོགས་དཀྲོལ་ཚུལ་ཡོད་དོ། །

༦ མཚོན་དོན། འཆང་བཟུང་གཉིས་ཀྱིས་ཐབས་ཤེས་གཉིས། དབྱིབས་གོར་མོ་དང་སྒྲ་སྙན་པས་མཆོད་ཡུལ་དག་དགྱེས་ཤིང་སོ་སྐྱེས་རྣམས་མ་རིག་པའི་གཉིད་ལས་སློང་བ། ཁ་ཞེང་ཆེ་བས་དབྱངས་ཀྱི་ཡན་ལག་ཕུན་སུམ་ཚོགས་པ། ཁ་ཁྱེར་ཅུང་ཟད་ནང་དུ་ཟུམ་པས་རྒྱལ་བ་རྣམས་ཐུགས་རྒྱུད་བསྐུལ་ཞིང་གདུལ་བྱ་རྗེས་སུ་འཛིན་པའི་བརྡ་མཚོན་ནོ། །

༧ སིལ་སྙན་གྱི་དགོས་པ་དང་ཕན་ཡོན། མཆོད་རྫས་འདི་རོལ་མོའི་བྱེ་བྲག་ཏུ་མདོ་སྔགས་གཉིས་ཀར་བསྟན་ཅིང་། མཆོད་པ་དང་། སྒྲུབ་མཆོད། ཚོགས་མཆོད། རབ་གནས་སོགས་སུ་དཀྲོལ་ཅིང་། སྤྱིར་ན་སྒྲ་སྙན་གྱི་རིགས་ཀུན་གང་ལ་གང་མཁོར་ལོངས་སྤྱད་ཀྱང་རུང་ལ། ནང་བསྟན་ལས་བསྟན་པའི་སྒྲ་སྙན་ཕལ་མོ་ཆེ་བླ་མ་ལྷ་ཚོགས་ལ་མཆོད་དེ་དགེ་སྒྲུབ་ཀྱི་ཆ་རྐྱེན་ཞིག་སྟེ། ཇི་སྐད་དུ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཡིད་འོང་སྒྲ་སྙན་ཅི་མཆིས་པ། །མོས་བློས་དཀྱིལ་འཁོར་ལྷ་ལ་བདག་འབུལ་ན། །བཞེས་ནས་བླ་མེད་གྲུབ་མཆོག་སྩལ་དུ་གསོལ། །ཞེས་པ་ལྟར། ལས་རྣམ་པར་འབྱེད་པའི་མདོ་ལས། དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་ཞིང་ལྟ་ན་སྡུག་པར་འགྱུར་བ། སྐད་སྙན་པར་འགྱུར་བ་དང་། ཡིད་དུ་འོང་བའི་སྨྲ་བ་དང་ལྡན་པར་འགྱུར་བ་དང་། གྲགས་པ་དང་ལྡན་པར་འགྱུར་བ་དང་། གཟུང་བའི་ཚིག་ཏུ་འགྱུར་བ་དང་། རྟག་ཏུ་དགའ་བར་འགྱུར་བ་དང་། ཐམས་ཅད་དགའ་བར་འགྱུར་བ་དང་། ཐམས་ཅད་དགའ་བའི་སྒྲ་རྒྱ་ཆེན་པོ་ཐོབ་པར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་སྟེ། བཅུ་བོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་ཡིན་ནོ། །ཞེས་དང་། སྒྱུ་མ་བདེ་མཆོག་ལས། སིལ་སྙན་ཕྱག་རྒྱ་བཤད་པ་རྣམས། །ལས་རྣམས་ཐམས་ཅད་རབ་བསྒྲུབ་པའི། །ཆ་ལུགས་བཞིན་དུ་གར་བྱེད་པས། །མ་རུངས་པ་ཡང་རབ་ཏུ་འགྲུབ། །ལས་རྣམས་ཀུན་ལ་མཆོག་ཏུ་ནི། །བརྡུང་ན་དཔལ་ནི་བཞི་འགྱུར་འགྲུབ། །ཅེས་གསུངས་སོ། །

པི་ཝང་།

པི་ཝང་ནི་ད་ལྟ་གླུ་བ་གླུ་མ་དག་གི་ཕྱག་མཚན་ལྟ་བུར་སྣང་མོད་ཀྱང་། འདི་ལ་རྒྱུད་སྡེ་དག་གི་ཁུངས་ཡོད་དེ། མངོན་བརྗོད་བླ་མ་ལས། པི་ཝང་གླིང་བུ་རྫ་རྔ་ཆེ། །ཞེས་དང་། བདེ་མཆོག་སྡོམ་འབྱུང་ལས། པི་ཝང་རྒྱུད་མངས་རྫ་རྔ་ཆེ། །ཞེས་དང་། ཁྱད་པར་དུ་སྟོན་པ་བཅོམ་ལྡན་འདས་ཀྱིས་དྲི་ཟའི་རྒྱལ་བོ་རབ་དགའ་པི་ཝང་གི་སྒྲ་སྙན་གྱིས་བཀུགས་ཏེ་བཏུལ་བ་དང་། རྒྱུད་སྡེ་རྣམས་སུ་རྡོ་རྗེ་པི་ཝང་མ་ཞེས་མཆོད་པའི་ལྷ་མོ་དང་། རྒྱལ་ཆེན་ཡུལ་འཁོར་སྲུང་དང་། དབྱངས་ཅན་མའི་ཕྱག་མཚན་ཡིན་པས་རྟོགས་ནུས་སོ། །པི་ཝང་འདི་མཆོད་པ་དང་ཚོགས་འཁོར། དཀྱིལ་འཁོར་སྒྲུབ་པ། རིག་མ་མཆོད་པ། རབ་གནས་སོགས་ལ་སྦྲེང་བའི་རོལ་མོའི་བྱེ་བྲག་གོ། མིང་གི་རྣམ་གྲངས་ལ། འཕང་འགྲོ། ཏམ་བུ་ར། རྒྱུད་མངས་སོ། །པི་ཝང་དེ་ལ་ཡང་། རྒྱུད་གཅིག་པ་ནས་མང་བོའི་བར་དུ་ཡོད་ལ། སོར་མོའི་འདེགས་འཇོག་ལ་བརྟེན་ནས་རྒྱུད་རེ་རེ་ལ་སྒྲ་གདངས་མི་འདྲ་བའི་སྒྱུ་རྩལ་འདོན་རྒྱུ་ཡོད་དོ། །

པི་ཝང་སྦྲེངས་པའི་ཕན་ཡོན་ནི། སངས་རྒྱས་མཉམ་སྦྱོར་ལས། པི་ཝང་ལེན་པའི་ཚུལ་སྟོན་ཅིང་། །ཇི་ལྟར་བབས་པའི་གར་བྱེད་པས། །ལས་རྣམས་གྲུབ་པ་རབ་འབྱམས་དང་། །དངོས་གྲུབ་མ་ལུས་མྱུར་དུ་འགྲུབ། །ཅེས་དང་། ཀརྨ་མཱ་ལེ་ལས། པི་ཝང་ལེན་པའི་ཚུལ་སྟོན་ཅིང་། །ཇི་ལྟར་བསམ་པའི་གར་བྱེད་དང་། །འགྲོ་བ་གསུམ་དག་དབང་དུ་བྱེད། །ཅེས་དང་། རྒྱ་བཟའ་ཀོང་ཇོ་བོད་དུ་ཕེབས་དུས་ཀྱང་། རྒྱན་གོས་འཕྱོར་བའི་བུ་མོ་ཉེར་ལྔས་པི་ཝང་དཀྲོལ་ནས་སྔུན་བསུས་ཚུལ་དེབ་ཐེར་རྣམས་སུ་བཀོད་ཡོད་པ་དང་། དེང་གི་དུས་འདིར། འབྲོང་རུའི་སྒྲ་སྙན་དང་། རྟ་ནག་སྒྲོགས་འགྲོས་སོགས་འཇིག་རྟེན་ཕྱོགས་སུ་དར་སོ་ཆེ་ལ། རྒྱུ་ཆ་ཡང་། དམངས་ཁྲོད་ཀྱི་བཤད་རྒྱུན་ལ། པི་ཝང་ཁྱོད་དང་ང་གཉིས། །མི་དགོས་རྒྱུ་ཞིག་མེད་ཀི །གཡག་རྒན་གྲོད་པུ་དགོས་ཀི །འབྲོང་རྒན་རྭ་ཅོ་དགོས་ཀི །རྟ་རྒན་རྔ་མ་དགོས་ཀི །སྡོང་རྒན་ཐང་ཆུ་དགོས་ཀི །ང་ལ་རྩམ་པ་དགོས་ཀི །འབྲུ་མར་ཕྱུར་བ་དགོས་ཀི །ཞེས་པས་ཤེས་སོ། །གཞན་སྒྲ་སྙན་གྱི་སྐོར་ལ་གན་ཆག རེ་མ། ཡང་ཆིན་སོགས་དགྲ་ལྷ་ཟླ་བཟང་གི་ཆེད་རྩོམ་ཤོག་ངོས༡༤༧ ནས༡༦༥བར་གསལ་བས། ཤེས་འདོད་པ་རྣམས་ཀྱིས་དེར་བལྟ་བར་བྱའོ། །འབུད་རྡུང་དཀྲོལ་གསུམ་གྱི་རོལ་མོ་འདི་དག་ནི་ཆོས་འཇིག་རྟེན་གཉིས་ཆར་ནས་མཆོག་ཏུ་གྱུར་ཞིག་སྟེ། འཕགས་པ་རིན་པོ་ཆེས། དད་ལྡན་རྣམས་ཀྱིས་མཆོད་པ་དང་། །བཀྲེན་པ་རྣམས་ནི་འཚོ་བ་དང་། །ཆགས་ཅན་རྣམས་ནི་ཡིད་གཡོ་བ། །དེ་ཀུན་རོལ་མོ་མཁན་ལས་བྱུང་། །བློ་ངན་གཟུགས་ཀྱིས་འཕོང་ཡང་རུང་། །རིགས་ངན་ནོར་དང་བྲལ་ཡང་བླ། །རོལ་མོའི་ཆ་ལ་མཁས་གྱུར་ན། །ཚོགས་ཀྱི་ནང་ནས་རྒྱན་ལྟར་མཛེས། །ཞེས་སོགས་རོལ་མོ་ལ་བསྔགས་པ་མང་དུ་མཛད་དོ། །

གཡེར་ཁ།

རྒྱུད་ལས་གཡེར་ཁའི་དྲིལ་བུ་བྱེ་བྲག་ཏུ་གསུངས་ལ། དེ་ཡང་དབྱིབས་མི་འདྲ་བ་གཉིས་འབྱུང་། གཅིག་ནི་རྩེ་མེད་པའི་དྲིལ་བུ་ཁ་འདབ་ཕྱིར་གཡེར་བ། དཀྱིལ་འཁོར་གྱི་དྲ་ཆས་དང་། འདུ་ཁང་གི་བྱ་འདབ། མཆོད་རྟེན་གྱི་གདེངས་ཁ་སོགས་སུ་བཀོལ་བ་དེ་ཡིན། སྒྲ་བཤད་ལ་ཁ་འདབ་ཕྱིར་གཡེར་བས་གཡེར་ཁ་དང་། ཅིག་ཤོས་ནི། འཆམ་གོས་སོགས་སུ་བརྒྱན་པའི་གཡེར་རྡོག་དང་ཧ་ཅང་འདྲ་ཆེ་བ་དེ་ཡིན་ལ། མིང་ཡང་འདྲ་བ་རྒྱུ་མཚན་དུ་བྱས་ནས་བཏགས་པའོ། །

འདི་ལ་རྒྱུད་ཀྱི་ཁུངས་ཚད་ལྡན་ཡོད་དེ། མངོན་བརྗོད་བླ་མ་ལས། གཡེར་ཁ་སྒྲ་སྒྲོགས་སྐ་རགས་ཅན། །ཞེས་དང་། མཁའ་འགྲོ་རྒྱ་མཚོ་ལས། གཡེར་ཁའི་ཕྲེང་དང་ལྕགས་ཐག་དང་། །ཞེས་དང་། རྡོ་རྗེ་རྩེ་མོ་ལས། གཡེར་ཁའི་དྲ་བ་ཀུན་ཏུ་ཁེབས། །དྲིལ་བུའི་མཆོག་ནི་ཀུན་ཏུ་འཕྱང་། །ཞེས་སོགས་རྒྱུད་མང་བོ་ལས་གསུངས་སོ། །གཡེར་ཁ་འདི། དཀྱིལ་འཁོར་དང་གོས་སོགས་ཀྱི་རྒྱན་དུ་བཀོད་པ་དང་། ད་ལྟ་སྟོད་གཞས་ནང་མ་དང་། མཆོད་སྤྲིན་རོལ་གར། བྲོ་བ། གཞས་མ། ཀོང་བྲོ་སོགས་ཀྱི་ནང་གལ་ཆེའི་གནས་བབ་བཟུང་ཡོད་ལས་གཞན། རྟའི་མགྲིན་པ་དང་། བྱིས་པའི་ལྭ་བ། རྒྱ་གར་སོགས་སུ་རྐང་ལག་གི་གདུབ་བུར་ཡང་བཏགས་ཡོད་དོ། །

བཞི་བ། ཕྱག་མཚན་གྱི་སྐོར།
ཁ་ཊཱཾ་ཀ

༡ ཁ་ཊཱཾ་ཀའི་ཁུངས་ནི། མཁའ་འགྲོ་རྒྱ་མཚོ་ལས། ཐོད་པ་དང་ནི་ཁ་ཊཱཾ་འཛིན། །ཞེས་དང་། གདན་བཞི་ལས། ཁ་ཊཱཾ་ཀ་དང་རྣལ་འབྱོར་སྣོད། །རྒྱན་རྣམས་ཀུན་གྱིས་རྣམ་པར་བཀླུབས། །ཞེས་སོགས་རྒྱུད་སྡེ་མང་བོར་གསུངས་སོ། །སྒྲ་བཤད་ལ་སྔགས་འཆང་རྒྱན་མེ་ལས། ཁ་ཞེས་པ་ནམ་མཁའ་དང་། ཊཱཾ་ཞེས་པ་ཀེང་རུས་སམ་དབྱུག་པ་སྟེ། ནམ་མཁའི་ཀེང་རུས་སམ་ནམ་མཁའི་དབྱུག་པ་ཞེས་གསུངས་སོ། །

༢ ཁ་ཊཱཾ་ཀའི་ཡུ་བ་ནི། ཙན་དན་དང་ཆུ་ཤིང་ནག་པོ་སོགས་ཀྱིས་བྱས་ཤིང་། ཡར་སྣེ་རྡོ་རྗེ་རྩེ་གཅིག་པའི་དབྱིབས། དབྱུག་པའི་སྟེང་བུམ་པ་དམར་སེར་གང་རུང་། དེའི་སྟེང་སྣ་ཚོགས་རྡོ་རྗེ། དེའི་སྟེང་མི་མགོ་རློན་པ་དམར་བོ། རྙིད་པ་ནག་པོ། སྐམ་པོ་དཀར་བོ་སྟེ་སུམ་བརྩེགས། དེའི་སྟེང་རྡོ་རྗེ་རྩེ་ལྔ་སྔོན་པོ་ཡོངས་རྫོགས་གྱེན་དུ་བགྲེང་བ། འདི་ལ་རྡོ་རྗེ་ཕྱེད་པ་དང་། ཁ་དོག་ནག་པོ་བཞེད་པའང་ཡོད། བུམ་འོག་ཏུ་སྐྲའི་ཚངས་སྐུད། དྲིལ་ཆུང་དར་འཕན་སོགས་བུམ་པ་ལས་འཕྱང་བ། རྣོ་དབལ་དང་ལྡན་པའི་རྩེ་མོ་གསུམ་དང་ལྡན་པའོ། །ཡུ་བའི་རིང་ཚད་ལ། རང་གི་ལུས་ཚད་དང་། ཐུང་ཚད་ལ་ཁྲི་གང་སོགས་རུང་བར་བཤད་པ་དང་། དེ་ཡང་ཅུང་ཟད་མི་འདྲ་བ་གཞན་ཡང་ཡོད་དོ། །ཡང་མཁས་གྲུབ་རྗེས། ཁ་ཊཱཾ་ཀའི་ཚད་བཤད་པ་རྒྱུད་ན་མེད་པའི་རྟོག་བཟོའོ། །ཞེས་ཀྱང་གསུངས།

༣ མཚོན་དོན་ནི། དང་བོ་དབྱིབས་ཀྱི་མཚོན་དོན་ནི། རྩེ་མོའི་རྡོ་རྗེ་རྩེ་ལྔ་ནི་ལམ་དུས་སུ་མ་དག་པའི་ཕུང་ལྔ་སྦྱངས་ནས་འབྲས་བུ་སྐུ་དང་ཡེ་ཤེས་རིགས་སོགས་ལྔ་གྲུབ་པ་དང་། འོག་རྭ་ཐོད་སྐམ་གྱི་སྟེང་དུ་ཟུག་པ་ལྔ་ནི་སྦྱང་བྱ་ཁམས་གསུམ་གྱི་ཕུང་ལྔ་དང་། སྟེང་རྭ་ལྔ་སྦྱང་འབྲས་ཡེ་ཤེས་ལྔ་དང་། མར་སྣེའི་རྩེ་ལྔས་བྱང་ཆུབ་སེམས་དང་། ཡུ་བས་ཆོས་ཐམས་ཅད་བདག་མེད་པ། སྣ་ཚོགས་རྡོ་རྗེས་སྐུ་གསུམ་དང་། དེ་ལ་དྲིལ་བུ་དང་བ་དན་དར་དཔྱངས་སྣ་ཚོགས་ཀྱིས་བརྒྱན་པས། སེམས་ཅན་དོན་བྱེད་ཀྱི་འཕྲིན་ལས། བུམ་པ་བདུད་རྩིས་བཀང་བས་ལོངས་སྐུ ཐོད་གསུམ་བརྩེགས་པས་ཆོས་སྐུ་དང་རྣམ་ཐར་སྒོ་གསུམ་མཚོན་ནོ། །

ཡང་། བདེ་མཆོག་གི་བསྐྱེད་རིམ་ཚད་ལྡན་དག་ལས། ཁ་ཊཱཾ་ཀའི་ཡུ་བ་དཀར་བོར་ཡོད་པས་ནི་བྱང་ཆུབ་ཀྱི་སེམས་རྒྱས་པ། དེའི་སྟེང་གི་བུམ་པས་རྒྱུད་བདེ་བ་ཆེན་པོའི་བཅུད་ཀྱིས་བཀང་བ། སྣ་ཚོགས་རྡོ་རྗེས་འཕྲིན་ལས་བཞི་འགྲུབ་པ། མི་མགོ་རློན་པ་ནག་པོས་སྤྲུལ་བའི་སྐུ་དང་། རྙིད་པ་དམར་བོས་ལོངས་སྤྱོད་རྫོགས་པའི་སྐུ་དང་། སྐམ་པོ་དཀར་བོས་ཆོས་སྐུ་དང་། སྟེང་གི་རྡོ་རྗེ་སྔོན་པོ་རྩེ་ལྔ་བས་ཆོས་དབྱིངས་ཡེ་ཤེས་གཙོ་བོར་གྱུར་བའི་ཡེ་ཤེས་ལྔ་མཚོན་པར་ཡང་གསུངས་སོ། །

གཉིས་པ་ཚད་ཀྱི་མཚོན་དོན་ལ། སྣེ་རྡོར་ལ་སོར་ལྔ་ཡོད་པས་ཡེ་ཤེས་ལྔར་འདྲེན་པ་དང་། བསྐྱེད་རིམ་གྱི་སྦྱང་བྱ་རྐང་བའི་སོར་མོ་ལྔ་དང་། ཡུ་བ་སོར་བཞིས། ནང་གི་དབང་བོ་ཉི་ཤུ་རྩ་གཉིས་དང་། ཆོས་ཅན་དང་ཆོས་ཉིད་གཉིས་བསྣན་པས་ཉེར་བཞི་དང་། ཁྲུ་གསུམ་བྱས་ཚེ་རྣམ་ཐར་སྒོ་གསུམ་དང་། དྲིལ་བུ་དང་བ་དན་གྱིས་ལག་པ་གཉིས་མཚོན་པ་དང་། སྣ་ཚོགས་རྡོ་རྗེ་སོར་གཉིས་པས་སྤྲུལ་སྐུའི་འཇིག་རྟེན་དང་། འཇིག་རྟེན་ལས་འདས་པའི་དོན་མཛད་པ་དང་། བུམ་པ་སོར་བཞིས་ལོངས་སྐུས་དགའ་བཞི་ལོངས་སུ་སྤྱོད་པ་དང་། སོར་དྲུག་པོ་ཐུན་མོང་དུ་མགྲིན་པའི་གནས་དང་། མགོ་བོ་དང་བོའི་སོར་གསུམ་པོ་མགོ་བོ་དང་རྣམ་ཐར་སྒོ་གསུམ་གྱི་རྣམ་པར་ཐར་བའི་སྒོ་སྟོང་བ་ཉིད་དང་། དེ་མན་གྱི་ཚད། སྤྱིར་འདོད་ཁམས་མཚོན་བྱེད་དང་། སོར་བཅུ་གཉིས་པོ་རྟེན་འབྲེལ་ཡན་ལག་བཅུ་གཉིས་དང་། མགོ་བར་བའི་ཚད་དེ་གཟུགས་ཁམས་དང་། རྒྱུ་མཚན་མ་མེད་པ་དང་། མགོ་བོ་སྟེང་མའི་ཚད་དེ་གཟུགས་མེད་ཀྱི་ཁམས་དང་། འབྲས་བུ་སྨོན་པ་མེད་པ་དང་། རྩེ་གསུམ་པོ་དུག་གསུམ་རྩད་ནས་གཅོད་བྱེད་ཀྱི་གཉེན་པོ་ཡེ་ཤེས་དང་། འབྲས་བུ་སྐུ་གསུམ་དང་གཞི་ལམ་འབྲས་གསུམ་མཚོན་པར་བྱེད་དོ། །ཡང་སྤྱིར་བཏང་། བརྟག་གཉིས་ལས། ཁ་ཊཱཾ་ཀ་སྒོམ་ཤེས་རབ་ཉིད། །ཞེས་དང་། རྣལ་འབྱོར་མ་ཀུན་སྤྱོད་ལས། ཁ་ཊཱཾ་ཀ་ནི་ལྷ་ཡི་སྐུ། །ཞེས་དང་། ཁ་ཅིག ཁ་ཊཱཾ་ཀ་བདེ་བ་ཆེན་པོའི་ལྷ་སྐུ་དང་། མགོ་གསུམ་གྱིས་སྐུ་གསུང་ཐུགས་མཚོན་པར་བཤད་ལ། གཞན་སློབ་དཔོན་པདྨའི་ཁ་ཊཱཾ་ཀར་རྭ་ལ་ཨ་ལོང་དགུས་མཚོན་ལ། དེས་ཐེག་རིམ་དགུས་འཇུག་སྒོ་མཚོན། དེ་ལས་གཞན་བརྡ་སྣ་ཚོགས་མཚོན་པའི་དྲིལ་བུ་དང་། ཉི་ཟླས་བརྒྱན་པ་སོགས་ཀྱང་འབྱུང་ངོ་། །

ཡང་སློབ་དཔོན་པདྨ་འབྱུང་གནས་ཀྱི་ཁ་ཊཱཾ་ཀའི་མཚོན་དོན་དུ་འདི་ལྟར་འབྱུང་སྟེ། མཆན་ཁུང་གཡོན་ན་ཡུམ་ལྷ་ལྕམ་མཁའ་འགྲོའི་དབང་ཕྱུག་སྦས་པའི་ཚུལ་གྱི་ཁ་ཊཱཾ་ཀ་འཛིན་པ། ཁ་ཊཱཾ་ཀ་དེ་ཡང་ངོ་བོ་རང་བཞིན་ཐུགས་རྗེ་གསུམ་མཚོན་པའི་ཡར་རྩེ་གསུམ། ཆོས་ལོངས་སྤྲུལ་གསུམ་གྱི་སྐུ་མཚོན་པའི་ཐོད་པ་སྐམ་རློན་རྙིང་གསུམ། ཐེག་པ་རིམ་པ་དགུ་མཚོན་པའི་རྭ་དང་ལྕགས་ལུང་དགུ། ཡེ་ཤེས་ལྔ་མཚོན་ཕྱིར་དར་ཚོན་སྣ་ལྔ། དུར་ཁྲོད་ཆེན་པོ་བརྒྱད་དུ་བརྟུལ་ཞུགས་ཀྱི་སྤྱོད་པ་མཛད་དེ་མ་མོ་དང་མཁའ་འགྲོ་དབང་དུ་བསྡུས་པའི་བརྡར་ཤི་སྐྲ་དང་གསོན་སྐྲ་ལ་སོགས་པས་བརྒྱན་པར་བཤད་དོ། །

༤ དགོས་ཆེད་ནི། ཁ་ཊཱཾ་ཀ་འདི་ཤེས་རབ་ཡུམ་གྱི་ཚུལ་དུ་བསྟེན་པས་ཐབས་ཤེས་ཀྱི་དོན་དང་། ལྷན་སྐྱེས་བདེ་བ་ཆེན་པོའི་དོན་མི་བརྗེད་པར་དྲན་པ་དང་། སྐུ་ལ་གཟི་བརྗིད་བསྐྱེད་པ། དམ་ཚིག་ཚང་བ། མཁའ་འགྲོ་དབང་དུ་འདུ་བ་སོགས་ཀྱི་ཕན་ཡོན་ཡོད་དོ། །སྔགས་འཆང་རྒྱན་མེ་ལས། ཁ་ཊཱཾ་ཀ་འདིས་འཁོར་བ་དང་མྱ་ངན་ལས་འདས་པའི་ཆོས་སམ། ལུས་ཀྱི་རྐང་མཐིལ་ནས་སྤྱི་བོའི་བར་རམ། ལམ་དང་འབྲས་བུའི་ཆོས་ཐམས་ཅད་མཚོན་པས་ན་དེ་ཡང་ཇི་བཞིན་ཤེས་ཤིང་འཛིན་པར་བྱེད་པ་ནི་དགོས་པའོ། །ཞེས་སོ། །

དགང་གཟར་བླུགས།

༡ དགང་བླུགས་ཀྱི་རྒྱུ། རྡོ་རྗེ་མཁའ་འགྲོའི་རྒྱུད་ལས། གསེར་རམ་དངུལ་ལམ་ཟངས་མ་འམ། །མཆོད་སྦྱིན་གྱི་ནི་ཤིང་ཡང་རུང་། །ཞེས་པ་ལྟར། གསེར་དངུལ་ཟངས་ལྕགས་དང་། ར་གན། རུས་པ། སྲ་ཤིང་། སྦྱིན་སྲེག་གི་ཤིང་སོགས་སོ། །

༢ དགང་གཟར་གྱི་དབྱིབས་ཚད། རྡོ་རྗེ་མཁའ་འགྲོ་ལས། དགང་གཟར་རྒྱུ་དང་བླུགས་པ་སོགས། །ཚད་དང་དབྱིབས་ལ་སོགས་པ་བཤད། །སྟེང་དུ་སོར་བཞི་དང་ལྡན་པ། །དཀྱུས་ནི་གྲུ་བཞི་བྱ་བ་སྟེ། །ཟབས་སུ་སོར་གཉིས་བརྐོ་བར་བྱ། །དཀྱིལ་དུ་ཡེ་ཤེས་རྡོ་རྗེས་བརྒྱན། །དེ་ཡི་སྟེང་དུ་ཆུ་སོར་བཞི། །པདྨའི་འདབ་མ་ལྟ་བུར་བྱ། །དེ་དབུས་བཅུད་ནི་འཛག་པ་ཡི། །བུ་ག་མཐེའུ་ཆུང་ཚད་དུ་བྱ། །དེ་ནས་འོག་ཏུ་དབྱུག་པ་སྟེ། །རྡོ་རྗེ་རིན་ཆེན་སོར་དྲུག་བརྒྱན། །ཞེས་དང་།

༣ བླུགས་གཟར་གྱི་དབྱིབས་ཚད། རྡོ་རྗེ་མཁའ་འགྲོ་ལས། རྒྱ་རུ་སོར་གཉིས་ཟབས་སོར་གཅིག། ཁ་ནི་པདྨའི་འདབ་མ་འདྲ། །དབུས་སུ་རྡོ་རྗེ་མཛེས་པ་སྟེ། །ལྷག་མ་སྔོན་བཞིན་མཚོན་པར་བྱ། །ཞེས་སོགས་དགང་གཟར་བླུགས་ཀྱི་ཚད་དབྱིབས་མཁའ་འགྲོ་རྒྱ་མཚོ་དང་། གཤེད་དམར། རྡོ་རྗེ་འབར་བ། དགྲ་ནག་གི་རྒྱུད་སོགས་ལས་ཀྱང་གསུངས་ལ། གཞུང་ཁ་ཅིག་ཏུ་ཕྱི་ནང་གསང་གསུམ་གྱི་ཚད་དབྱིབས་མི་འདྲ་བར་ཡང་བཤད་དོ། །

༤ དགང་གཟར་བླུགས་འཆང་ཚུལ། རྡོ་རྗེ་མཁའ་འགྲོ་ལས། ཞི་བ་བྱང་ཆུབ་མཆོག་གིས་བཟུང་། །ནོར་བུའི་ཁུ་ཚུར་རྒྱས་པ་ལ། །དབང་དང་འགུགས་པ་དག་ལ་ནི། །དེ་བཞིན་པདྨའི་ཁུ་ཚུར་བཟུང་། །དྲག་པོའི་ལས་ལ་འབད་པ་ཡིས། །དེ་བཞིན་ཁྲོ་བོའི་ཁུ་ཚུར་བྱ། །དགང་གཟར་བླུགས་གཟར་ཆོ་གའོ། །དགང་བླུགས་ཞེས་སུ་བྱ་བ་ནི། །གང་བའི་སྦྱིན་སྲེག་ལ་སོགས་པའོ། །དེ་ཡི་ཆོ་ག་གཞན་བཤད་བྱ། །ཞི་བ་དང་ནི་རྒྱས་དང་དབང་། །དགེ་བ་ཡི་ནི་ལས་རྣམས་ལ། །གདོང་གི་འཛུམ་དང་བཅས་པར་བྱ། །དྲག་པོའི་ལས་ལ་ཁྲོ་གདོང་གིས། །ཡམ་ཤིང་ལ་སོགས་སྲེག་པར་བྱ། །ཞེས་དང་། བདེ་མཆོག་སྡོམ་འབྱུང་ལས། ལག་གཉིས་པུས་མོའི་ནང་བཞག་སྟེ། །དགང་གཟར་དང་ནི་བླུགས་གཟར་བཟུང་། །ཞེས་གསུངས་སོ། །

༥ དགང་བླུགས་བསང་སྦྱངས་བྱ་ཚུལ། རང་གི་སྙིང་ག་ནས་འོད་ཟེར་འཕྲོས་ཡེ་ཤེས་ལྷའི་ཐུགས་རྒྱུད་སྐུལ། ཐབས་དང་ཤེས་རབ་ཀྱི་རང་བཞིན་ཡེ་ཤེས་སེམས་དཔའ་འོད་ཟེར་གྱི་ཚུལ་དུ་བཀུག དགང་བླུགས་ལ་ཐིམ་པས་དངོས་གྲུབ་ཐམས་ཅད་འབྱུང་བའི་དམ་ཚིག་ཡོ་བྱད་དུ་གྱུར་བར་བསམ་མོ། །

༦ དགང་བླུགས་གཉིས་ཀྱི་མཚོན་དོན། དགང་གཟར་གྱིས་ཤེས་རབ་སྟོང་ཉིད་ཀྱི་ཆ་དང་། བླུགས་གཟར་གྱིས་ཐབས་བདེ་བ་ཆེན་པོ་སྟེ། རྡོ་རྗེ་མཁའ་འགྲོའི་རྒྱུད་ལས། དགང་གཟར་ཆོས་ནི་སྟེར་བའི་མ། །བླུགས་གཟར་རོ་ལྡན་ཐབས་ཡིན་ནོ། །སེམས་ཅན་ཀུན་ལ་ཕན་བྱེད་པ། །ཞེས་སོ། །

བགྲང་ཕྲེང་།

བོད་མི་ཕྲེང་བཟུང་གི་ལུང་བ་ཞེས། བགྲང་ཕྲེང་འདི་རང་ཅག་གི་མཐོ་བ་བླ་དཔོན་དང་། དམའ་བ་སྤྲང་ནག་ཚུན་ལ་མ་ཁྱབ་པ་མེད་པས། ད་ལྟ་བོད་ཀྱི་དམངས་སྲོལ་ལྟ་བུར་གྱུར་བའམ། ཡང་ན་གྲངས་ཀ་བགྲང་བྱེད་ཁོ་ན་ཙམ་དུ་བཟུང་སྟེ། སྐྱེ་བོ་ཕལ་མོ་ཆེས་སྣང་ཆུང་དུ་འཛིན་མོད་ཀྱང། འདི་ལ་རྒྱུད་ཀྱི་ཁུངས་དང་དཔྱད་པ་ཧ་ལས་པ་ཡོད་པས། འདིར་དེའི་སྐོར་ཅུང་ཟད་བརྗོད་པར་བྱའོ། །

༡ ཕྲེང་བའི་ངོ་བོ་དང་ངེས་ཚིག སྔགས་འཆང་རྒྱན་གྱི་མེ་ཏོག་ལས། རྩར་ལས་རྒྱུས་དང་གྲངས་ཅན་དང་། །རྒྱན་དུ་བྱས་དང་ཁྲིགས་ལ་འབེབས། །ཚོད་འཛིན་བསྙེན་པའི་སླད་དུ་སྟེ། །དེ་སོགས་ཕྲེང་བའི་ངོ་བོར་བཤད། །ཅེས་དང་། ངེས་ཚིག་ནི། དད་ལྡན་གྱི་སློབ་མ་བླ་མ་ལ་སེམས་འཕྲེང་ནས་གསོལ་བ་ཕུར་ཚུགས་སུ་བཏབ་པས་བརྩེ་བ་ཆེན་པོས་བྱིན་གྱིས་བརླབས་པ། ཡི་དམ་ལ་སེམས་འཕྲེང་ནས་བསྙེན་སྒྲུབ་ལ་ནན་ཏན་བྱས་པས་མཆོག་ཐུན་གྱི་དངོས་གྲུབ་གནང་བ། མཁའ་འགྲོའི་ཚོགས་ལ་སེམས་འཕྲེང་ནས་འཕྲིན་ལས་དྲག་ཏུ་བསྐུལ་བས་ཅི་འདོད་ཀྱི་འཕྲིན་ལས་བསྒྲུབ་པ། དེ་བཞིན་ལྕམ་དྲལ་དང་རྡོ་རྗེ་སྤུན་གྲོགས་ལ་སོགས་གཅིག་སེམས་གཅིག་ལ་འཕྲེང་ནས་དམ་ཚིག་ལས་མི་འདའ་ཞིང་། དཀྱིལ་འཁོར་གཅིག་ཏུ་འགྲུབ་པ་སོགས་སྔགས་འཆང་རྒྱན་མེ་ལས་རྒྱ་ཆེར་བཤད་དོ། །

༢ ཕྲེང་བའི་རྒྱུ། ཕྲེང་བའི་རྒྱུ་ལ་རབ་འབྲིང་ཐ་གསུམ་དུ་བཤད་དེ། པདྨའི་ཕྲེང་བཤད་ལས། རྒྱུ་ནི་རབ་ལ་རིན་པོ་ཆེ། །འབྲིང་ནི་ཤིང་གི་འབྲས་བུ་སྟེ། །ཐ་མ་ཤིང་དང་ས་རྡོ་དང་། །སྨན་གྱི་ལྡེ་གུའི་ཕྲེང་བའོ། །ཞེས་སོ། །ཕྲེང་བའི་རྒྱུ་སྤྱི་ལ། ཤེལ། ཉ་ཕྱིས། མུ་ཏིག མུ་མིན། བྱི་རུ། ལུང་ཏང་། དུང་། གསེར། དངུལ། ཟངས། ཞ་ཉེ། འཁར་བ། པདྨའི་སྙིང་བོ། བ་སོ། ཙན་དན། རུཀྵ། མིའི་ཐོད་རུས། རྔ་མོང་དང་བོང་བུ་མ་ཧེའི་རུས་པ། འབྲས་བུ་དང་རིན་པོ་ཆེའི་རིགས་གང་འཛོམས་བྱ་རུང་བ་དུས་འཁོར་བསྡུས་རྒྱུད་དང་། རྡོ་རྗེ་མཁའ་འགྲོ། བདེ་མཆོག་སྡོམ་འབྱུང་། རྡོ་རྗེ་གདན་བཞི། སམྦུ་ཊ། གཤིན་རྗེ་གཤེད་དམར། དངོས་གྲུབ་འབྱུང་རྒྱུད། ཁྲག་འཐུང་མངོན་འབྱུང་གི་རྒྱུད། བྱ་རྒྱུད་དཔུང་བཟང་སོགས་ལས་གསུངས་སོ། །སྤྱིར་བསོད་ནམས་འཕེལ་བའི་ཕྱིར་རིན་པོ་ཆེའི་ཕྲེང་བ་བཟུང་ན་འོས་ཀྱང་། རློམ་སེམས་སྐྱེས་པ་དང་། ཡང་གཞན་གྱིས་རིན་ཐང་བཅད་ན་དམ་སེལ་ཞུགས་པ་སོགས་སུ་འགྱུར་ན་དམ་དུ་སྦ་བ་དང་། ཡང་ཤིན་ཏུ་དམན་པའི་ཕྲེང་བ་ཡིན་ན་རང་ཉིད་ཀྱིས་འདྲེན་མི་སྤྲོ་ཞིང་། གཞན་ཀྱིས་ཀྱང་བརྙས་པར་འགྱུར་ན་སྦ་བར་བྱའོ། །

བྱེ་བྲག་ཞི་རྒྱས་དབང་དྲག་གི་ཕྲེང་བའི་རྒྱུ་ལ། ཞི་བའི་ཕྲེང་རྒྱུ་ནི། པདྨའི་ཕྲེང་བཤད་ལས། དུང་ནི་ཞི་བའི་ཕྲེང་བ་སྟེ། །ཞི་བའི་ལས་ཀྱི་སྔགས་པའོ། །ཞེས་པ་ལྟར། དུང་། ཤེལ། ཉ་ཕྱིས། མུ་ཏིག བཻཌཱུ་རྱ་དཀར་བོ། བྱང་ཆུབ་ཤིང་གི་ཐོག་གུ། རིན་པོ་ཆེའི་རིགས་དཀར་བོའོ། །

རྒྱས་པའི་ཕྲེང་རྒྱུ་ནི། པདྨའི་ཕྲེང་བཤད་ལས། གསེར་གྱི་ཕྲེང་བ་རྒྱས་པའི་ལས། །ཞེས་དང་། འོ་སེ་ལ་སོགས་འབྲས་བུ་ཅན། །རྒྱས་པའི་ལས་འགྲུབ་ཕྲེང་བའོ། །ཞེས་པ་ལྟར། གསེར། དངུལ། ཟངས་མ། མུ་ཏིག པདྨའི་སྙིང་བོ། ལུང་ཏང་། ཨ་རུ་ར་སོགས་ཕན་ནུས་ཅན་གྱི་ཤིང་འབྲས་དང་། མདོག་སེར་བོ་ཟད་ཁ་སྲ་བའི་རིགས་དགོས་པར་བཤད་དོ། །

དབང་གི་ཕྲེང་རྒྱུ་ལ། པདྨའི་ཕྲེང་བཤད་ལས། བྱི་རུའི་ཕྲེང་བས་དབང་ལས་འགྲུབ། །ཅེས་དང་། མཛོ་མོ་ཤིང་དང་འོམ་བུའི་ཕྲེང་། །དབང་གི་ལས་འགྲུབ་ཕྲེང་བར་བསྔགས། །ཞེས་པ་ལྟར། བྱི་རུ། པད་རག ཙན་དན། ཟངས། སེང་ལྡེང་། མཛོ་མོའི་ཤིང་མདོག་དམར་བོའི་རིགས་དང་། དྲི་ཞིམ་ཤིང་ལ་བྱ་དགོས་པར་བཤད་དོ། །

དྲག་པོའི་ཕྲེང་རྒྱུ་ནི། པདྨའི་ཕྲེང་བཤད་ལས། ལྕགས་དང་གཡུ་ཕྲེང་དྲག་པོའི་ལས། །ཞེས་དང་། ནཱ་ག་ཁྱུང་མཆུ་རཀྵ་ནི། །དྲག་པོའི་ལས་ཀྱི་ཕྲེང་བར་བསྔགས། །ཞེས་པ་ལྟར། དྲག་སྔགས་བཟླ་བྱེད་ལ། ལྕགས། གཡུ། རུ་དྲ་ཀྵ། ལུང་ཏང། མི་རུས། ཐོད་རུས། དྲེད་དང་བོང་བུ་རྔ་མོང་གི་སོ་དང་། ཡང་ན། རྔ་མོང་དང་བོང་བུ། མ་ཧེའི་རུས་པ། ཚེར་ནག་གི་ཤིང་དང་ཐོག་གུ་སོགས་ནག་རྩུབ་ཀྱི་རིགས་བསྔགས་པའོ། །

གཞན་ཡང་། ས་རིལ་ཞི་བའི་ཕྲེང་བ་དང་། །རྡོ་ཡི་ཕྲེང་བ་རྒྱས་པར་ཤེས། །སྨན་གྱི་ཕྲེང་བ་དབང་ལ་ཤེས། །ཐོད་པ་ལ་སོགས་རུས་ཆེན་རྣམས། །དྲག་པོའི་ལས་ལ་ཤེས་པར་བྱ། །ཞེས་པདྨའི་ཕྲེང་བཤད་ལས་རྒྱུའི་ཁྱད་པར་གྱིས་དབྱེ་བ་དང་། ཡང་། ཞི་ལ་ཁ་དོག་དཀར་བོ་དང་། །ཁ་དོག་སེར་བོ་རྒྱས་པ་ལ། །དམར་བོ་དབང་ལ་རྟག་ཏུ་བསྒོམ། །ནག་པོ་ཤིན་ཏུ་གསད་ལ་འདོད། །ཅེས་གཤིན་རྗེ་གཤེད་དམར་ལས་ཁ་དོག་གིས་དབྱེ་བ་དང་། དགོངས་འདུས་པདྨའི་ཕྲེང་བཤད་ལས་ཀྱང་། ཁ་དོག་དག་ཀྱང་འདི་ལྟ་སྟེ། །དཀར་བོར་ཞི་བའི་ལས་ལ་བསྔགས། །ཁ་དོག་སེར་བོ་རྒྱས་པའི་ཕྲེང་། །དབང་ལ་ཁ་དོག་དམར་བའི་ཕྲེང་། །ནག་པོ་དྲག་པོའི་ཕྲེང་བར་བསྔགས། །ལས་རྣམས་ཀུན་ལ་ཁྲ་བོར་བཤད། །ཅེས་སོ། །ཡང་། རྒྱལ་བའི་རིགས་ལ་བོ་དེ་ཙེ། །སྔགས་ཀྱི་ནོར་བུར་རབ་ཏུ་བསྒྲགས། །པདྨའི་རིགས་ལ་པདྨའི་སྙིང་། །རྡོ་རྗེའི་རིགས་ལ་རུ་དྲ་ཀྵ། །རིགས་གསུམ་དག་ནི་ཐམས་ཅད་ལ། །ནོར་བུ་དེ་དག་རབ་ཏུ་བསྒྲགས། །བཟླས་བརྗོད་བྱེད་པའི་ལས་ཀུན་ལ། །དེ་དག་དགེ་ཞིང་མཆོག་ཏུ་བཤད། །ཅེས་ལེགས་གྲུབ་ལས་རིགས་ཀྱི་དབྱེ་བ་དང་། རྒྱུད་རྡོ་རྗེ་རྩེ་མོ་ལས་ཀྱང་། སངས་རྒྱས་རྣལ་འབྱོར་བོ་དེ་ཙེ། །རྡོ་རྗེ་ཅན་ལ་རུ་དྲཱ་ཀྵ། །ཕྱི་རོལ་ནོར་རིགས་དབང་བོ་དེ། །མུ་ཏིག་ནོར་བུའི་རྣལ་འབྱོར་ཅན། །པདྨའི་སྙིང་བོའི་ཕྲེང་བ་ནི། །པདྨའི་རིགས་རྣམས་ཀུན་ལ་བསྔགས། །ཞེས་སོ། །དེ་ལྟར་ལས་བཞི་སྒྲུབ་པའི་ཕྲེང་རྒྱུ་གཙོ་ཆེར་དགོངས་པ་མ་གཏོགས། གཏན་མི་རུང་བ་མ་ཡིན་ཏེ། སམྦུ་ཊ་ལས། ཞི་རྒྱས་དབང་དང་མངོན་སྤྱོད་ལ། །པུ་ཏྲ་ཛཱི་ཝ་ལས་ཀུན་བྱེད། །ཅེས་དང་། གདན་བཞི་ལས། ཞི་དང་རྒྱས་དང་དབང་དྲག་ལ། །པུ་ཏྲ་ཛཱི་ནི་ལས་ཀུན་བྱ། །ཞེས་དང་། པདྨའི་ཕྲེང་བཤད་ལས། གཟི་མཆོང་སྣ་ཚོགས་ལས་ལ་ཤིས། །ཞེས་སོགས་རྒྱུད་མང་བོ་ལས་གསུངས་སོ། །ཡང་། ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། ཞི་བ་ལ་གསེར་དངུལ་ཟངས་དང་མུ་མིན། རྒྱས་པ་ལ་པདྨའི་ས་བོན། དབང་ལ་དྲི་བཟང་བོའི་རིལ་བུ། བྱི་རུ། ཙན་དན་དམར་བོ། དམར་བོ་བཙོས་པ། དྲག་པོ་ལ་རུ་རཀྵ། ལུང་ཐང་། སྐྱེས་པའི་རུས་པ། ལས་བཞི་ཀ་ལ་བོ་དེ་ཙེ་བསྔགས་ཤིང་། དྲག་པོ་ལས་སོ་སོའི་ཁྱད་པར་ཡང་། སྡོམ་འབྱུང་ལས། རུ་རཀྵ་དང་ལུང་ཐང་འབྲས། །དེ་བཞིན་མི་རུས་ཉིད་ཀྱང་སྟེ། །རྔ་མོང་བོང་བུ་མ་ཧེ་ཡི། །རུས་པ་མངོན་སྤྱོད་ལྐུགས་དང་རེངས། །བསད་དང་བསྐྲད་དང་དབྱེ་བ་དང་། །དགྲ་བོ་ཚར་བཅད་རྣམས་ལ་སྦྱར། །ཞེས་དང་། དུས་འཁོར་དབང་ལེའི་རྩ་འགྲེལ་ལས། ཞི་བ་ལ་ཤེལ། རྒྱས་པ་ལ་མུ་ཏིག་གི་འབྲས་བུ། བསད་པ་ལ་མིའི་སོ། བསྐྲད་པ་ལ་བོང་བུའི་སོ་རུས། དབང་ལ་བོ་དེ་ཙེ། འགུག་པ་ལ་པདྨ་འམ་ཙན་དན་དམར་བོའི་ས་བོན། རྨོངས་པ་ལ་ལུང་ཐང་། རེངས་པ་ལ་དབང་བོའི་མིག་ཅེས་རུ་རཀྵར་གསུངས་སོ། །

༣ ཕྲེང་བའི་རྒྱུན་ཐག ལང་ཚོ་དང་ལྡན་པའི་བུ་མོ་གཞོན་ནུ་མ། བློ་ལྡན་ངག་འཇམ་གྱིས་གསེར་སྐུད་དང་བལ་སྐུད་སོགས་བརྒྱུ་དགོས་པ་རྡོ་རྗེ་མཁའ་འགྲོ་སོགས་ལས་གསུངས་ལ། རས་བལ་གྱི་སྐུད་པ་ཡང་ཁ་སྦྱོར་དགུ་སྒྲིལ་ལས་བྱ་ལ། དེའང་ཁ་སྦྱོར་ལས་ཕྱོགས་མཚམས་བརྒྱད་དང་དབུས་ཀྱི་སྐུད་པ་ལྷ་དགུར་བྱིན་རླབས་བྱ་བར་གསུངས་པས། དགུ་སྒྲིལ་བྱ་ཚུལ་ཁྱད་པར་བ་ལས། སོ་སོའི་དབང་དུ་བྱས་ན་དེ་ཡང་ཞི་ཕྲེང་ལ་བལ་སྐུད་དཀར་བོ། རྒྱས་ཕྲེང་ལ་རས་སྐུད་སེར་བོ། དབང་ཕྲེང་ལ་དར་སྐུད་དམར་བོ། དྲག་ཕྲེང་ལ་གྲི་ཤིར་ཐེབས་པའི་རྒྱུས་པ་དང་། རྒྱུ་མ། པགས་རིགས་ཀྱི་རྒྱུན་བུ་དགུ་སྒྲིལ། ལས་སྣ་ཚོགས་ཀྱི་ཕྲེང་བ་ལ་ཚོན་སྣ་ལྔ་སྒྲིལ་གྱི་སྲད་པུ་དགོས་པར་པདྨའི་ཕྲེང་བཤད་ལས་གསུངས་པ་དང། གཞན་ཡང་། མནན་བསྐྲད་ལས་སྔགས་བཟླ་བྱེད་ཀྱི་ཕྲེང་ཐག བོང་བུ་དང་རྔ་མོང་གི་སྤུ་ལ་ཁྭ་ཏའི་སྒྲོ་བསྲེས་པའི་སྲད་པུ་དང་། ཕན་ཚུན་སྡང་བའི་ལས་ལ་རྟ་དང་མ་ཧེའི་སྤུ་དང་། གསོད་མནོག་དབྱེ་བའི་ལས་སོགས་དྲག་པོ་མངོན་སྤྱོད་ཀྱི་ལས་ལ། དུར་ཁྲོད་ཀྱི་སྐྲ་དང་ཁྱི་སྤུ་བསྲེས་ཏེ་ཕྲེང་ཐག་བྱ་དགོས་པར་བདེ་མཆོག་སྡོམ་འབྱུང་ལས་གསུངས་པ་དང་། ཁྲག་འཐུང་མངོན་འབྱུང་ལས་དེ་དང་ཅུང་མི་མཐུན་པར་བཤད་དོ། །ཕྲེང་ཐག་གི་ཕྲ་སྦོམ་དང་ཡངས་དོག་ནི། སློབ་དཔོན་པདྨའི་དགོངས་འདུས་ཕྲེང་བཤད་ལས། དེ་དག་ཀུན་ཀྱང་ཕྲེང་བ་ཡི། །མིག་དང་བསྟུན་ལ་རན་པར་བྱ། །ཡངས་པ་མ་ཡིན་དོག་པ་མིན། །རིང་བ་མ་ཡིན་ཐུང་བ་མིན། །ཧ་ཅང་དོག་པ་ལས་མི་འགྲུབ། །ཡངས་ན་གསེབ་འཚང་བར་ཆད་འཇུག། རིང་ན་ལྷ་འགྱང་སྒྲུབ་པ་གཡེལ། །ཧ་ཅང་ཐུང་ན་ཚེ་ལ་གཟན། །མདུད་པ་ཅན་དང་མདུད་པ་ཆགས། །ཕྲ་སྦོམ་མ་སྙོམས་གོད་ཁ་འབྱུང་། །དེ་སོགས་རྣམ་དབྱེ་ཤེས་པར་བྱ། །ཞེས་སོ། །

 ༤ ཕྲེང་བའི་གྲངས་ཚད། སམྦུ་ཊ་ལས། སྔགས་ཀྱི་སྒྲུབ་པ་ལྔ་བཅུ་སྟེ། །དབང་ལ་དེ་ཡི་ཕྱེད་ཉིད་དོ། །བརྒྱ་ཕྲག་གཅིག་ནི་ཞི་བ་ལ། །དེ་བཞིན་རྒྱས་ལ་ལྷག་པར་བརྒྱད། །མངོན་སྤྱོད་ལ་ནི་དྲུག་ཅུ་ཉིད། །ཁྱད་པར་དུ་ནི་ལས་ལ་སྦྱར། །ཇི་ལྟར་ལས་ཀྱི་བྱེ་བྲག་གིས། །ཕྲེང་བ་ལ་སོགས་བྱ་བའོ། །ཞེས་རྡོ་རྗེ་མཁའ་འགྲོ་དང་། གདན་བཞི་སོགས་མཐུན་པར་སྣང་ལ། གཤེད་དམར་ལས། མངོན་སྤྱོད་དྲུག་ཅུ་རྩ་བཞིའོ། །ཞེས་དྲག་པོ་ལ་རེ་བཞི་དགོས་པར་བཤད་དོ། །

༥ ཆེ་ཆུང་གི་ཚད། ཆེ་ཆུང་གི་ཚད་ལ། ཞི་བ་ལ་རང་གི་འགྲམ་སོ་ཙམ། རྒྱས་པར་མཐེབ་ཆུང་གི་རྩེ་མོ་ཙམ། དབང་ལ་ནོར་བུའི་ཏོག་ཙམ། དྲག་པོར་རྐང་བའི་མཐེབ་ཆེན་གྱི་ཚད་ཙམ་དགོས་པར་པདྨའི་ཕྲེང་བཤད་ལས་གསུངས་ལ། འདི་ནི་བཟོས་ཕྲེང་གི་དབང་དུ་བཏང་བ་ཡིན་གྱི། ནོར་བུ་དང་ཤིང་འབྲས་ལ་ཚད་དེ་དག་འོང་བའི་ངེས་པ་མེད་དོ། །

༦ ཕྲེང་བའི་མདོ་འཛིན། མདོ་འཛིན་ནི། པདྨའི་ཕྲེང་བཤད་ལས། ཕྲེང་བའི་མདོ་འཛིན་འདི་ལྟ་སྟེ། །ཞི་བ་དཀར་ཞིང་ཟླུམ་ལ་འགྲིལ། །རྒྱས་ལ་སེར་བོ་རྒྱ་མདུད་ཅན། །ཡང་ན་ལྕམ་གཞོག་མཆོད་རྟེན་རིས། །དབང་ལ་ཁ་དོག་དམར་བོ་དང་། །དབྱིབས་ནི་ལེབ་ལ་ཟླ་གམ་དང་། །ནར་མོ་ཉིད་ཀྱང་ཤེས་པར་བྱ། །དྲག་པོ་ཁ་དོག་ནག་པོའི་ཆ། །དབྱིབས་ནི་ཟུར་གསུམ་སེན་ཐག་རིས། །ཟུར་ཅན་བུ་ག་ཚག་ཚག་རིས། །མདོར་ན་རྩུབ་ལ་རྣོ་བའོ། །སྣ་ཚོགས་ལས་ཀྱི་ཕྲེང་བ་ལ། །མདོ་འཛིན་སྐུ་གསུང་ཐུགས་ཀྱི་རྒྱ། །དཀར་དམར་སྔོན་པོའི་རིགས་ཀྱིས་སྤྲས། །དེ་སོགས་མཚན་མཐུན་རིགས་པས་དཔྱད། །ཅེས་སོ། །

༧ སྤང་བྱའི་ཕྲེང་བ། པདྨའི་ཕྲེང་བཤད་ལས། རྭ་ཕྲེང་མི་བཅིང་བགྲང་མི་བྱ། །མཚམས་མེད་ལས་བགྱིས་འགྲོ་བ་ཡི། །བགྲང་དང་བཅིང་བའི་ཕྲེང་བ་དང་། །དེ་བཞིན་དམ་ཚིག་ཉམས་པ་དང་། །བཤན་པ་ལ་སོགས་རིགས་ངན་དང་། །དམེ་བོ་ཁྲིམས་ཉམས་དམ་སེལ་ཞུགས། །ཡུགས་ས་སྡིག་ཅན་རྐུན་མ་ཡིས། །བགྲང་བའི་ཕྲེང་བ་མི་བསྟེན་སྤང་། །གཞན་གྱིས་དོར་ཞིང་སྟོར་བ་ཡི། །རྙེད་པའི་ཕྲེང་བ་མི་བསྟེན་སྤང་། །ལྷ་ལ་ཕུལ་དང་རྒྱན་བྱས་ལ། །དབང་མེད་འཕྲོག་པའི་ཕྲེང་བ་སྤང་། །ཐག་པ་ཆད་དང་གྲངས་མ་ཚང་། །དུད་འགྲོས་འགོངས་དང་བྱ་བྱིས་ཟས། །མེས་ཚིག་ལ་སོགས་ཉམས་པ་སྤང་། །སྔགས་ལ་དམ་སེལ་ཞུགས་པས་སྤང་། །ལུང་མ་བསྟན་གྱི་ཕྲེང་བ་དང་། །རྣལ་འབྱོར་ཡིད་དང་མི་མཐུན་པའི། །ཕྲེང་བ་གང་ཡིན་མི་འཆང་སྤང་། །ཞེས་སོ། །

༨ ཕྱི་ནང་གསང་བ་དང་དེ་ཁོ་ན་ཉིད་ཀྱི་ཕྲེང་བའི་དབྱེ་བ། ཡང་། ཕྲེང་བ་ལ། ཕྱི་ནང་གསང་བ་དང་། དེ་ཁོ་ན་ཉིད་ཀྱི་དབྱེ་བ་བཞི་ཡང་ཡོད་དེ། པདྨའི་ཕྲེང་བཤད་ལས། ཕྱི་ཕྲེང་རྫས་ལ་བརྟེན་རྣམས་སོ། །ནང་གི་ཕྲེང་བ་མཆུ་སྦྱོར་རོ། །གསང་བ་རླུང་གི་རྒྱུ་རྔུབས་ཏེ། །དེ་ཉིད་སྟོང་བའི་ཕྲེང་བ་ཡིས། །ཕྱི་ནང་གཞན་སོགས་གང་དང་གང་། །གནས་ལུགས་ཀ་དག་དབྱིངས་སུ་བསྐྱལ། །ཀུན་བཟང་དགོངས་པའི་ངང་ལ་བཞག །ཅེས་སོ། །

༩ ཕྲེང་བའི་རབ་གནས་ནི། མདོར་བསྡུས་ན། ཕྲེང་བ་གསུང་རྡོ་རྗེ་སྒོམ་ནས། ཡེ་ཤེས་སེམས་དཔའ་དང་གཅིག་བྱས་ཏེ། གཟུགས་དེ་ཡོངས་སུ་གྱུར་བ་ལས། ཕྲེང་བའི་རྣམ་པར་བསམས་ལ། བུམ་པའི་ཆུས་གཏོར་ཏེ་མཆོད་ནས་གསུང་རྡོ་རྗེའི་སྙིང་བོ་བརྒྱ་རྩ་བརྒྱད་བཟླས་སོ། །རྒྱས་པར་གཞན་དུ་ཤེས་པར་བྱའོ། །

༡༠ ཕྲེང་བ་འཆང་ཚུལ། ཕྲེང་བ་རང་གི་ལུས་དྲོད་དང་མ་བྲལ་བའི་སྟེང་ནས་གཞན་ལག་ཏུ་མི་འཇོག་ཅིང་། ཁྱད་པར་དུ་དམ་ཉམས་ཀྱི་ལག་ཏུ་མི་འགྲིམ། ཕྲེང་བ་སྟོང་འདྲེན་མ་ཡིན་པར། བཟླས་པ་བྱེད་དུས་བགྲང་བ། མོ་རྩིས་ལ་མི་བཀོལ་བ། རབ་གནས་དང་ལྡན་པའི་ཕྲེང་བ་དེ། ས་སྒྲེ་བོར་མི་འཇོག ཁྱི་སོགས་བརྡེག་བྱེད་མི་བྱ། ཕྲེང་ཐག་ཞག་དང་མ་ལོན་པར་བརྗེ་བ། རླན་དང་གྲིབ་ལ་འཛེམ་པ། ཁྱད་པར་དུ་གསང་ཕྲེང་ཡིན་ན་ལས་སྦྱོར་གྱི་དུས་མ་གཏོགས་སྦ་བར་བྱ་བ་སོགས་པདྨའི་ཕྲེང་བཤད་ལས་གསུངས་སོ། །ཡང་ཕྱི་ཡི་ཕྲེང་བ་ནི་གྲངས་སོགས་བཤར་བའི་ལས་ལ་བཀོལ། ནང་གི་ཕྲེང་བ་ནི་དུས་རྒྱུན་ཁ་ཡན་དུ་གང་བསྙེན་པའི་ལས་ལ་བཀོལ། གསང་བའི་ཕྲེང་བ་ནི་སྒྲུབ་པ་དང་ལས་སྦྱོར་དུས་སུ་མ་གཏོགས་གོས་དང་ལུས་ཀྱི་བར་དུ་བཟུང་སྟེ་མི་མཐོང་བར་བྱེད་དགོས་སོ། །

༡༡ ཕྲེང་བ་འདྲེན་ཚུལ། འདྲེན་ཚུལ་ལ། ཁ་སྦྱོར་གྱི་འགྲེལ་པར། ལག་པ་རྡོ་རྗེ་པདྨར་བསྒོམས་པ། སྟོང་བ་ཉིད་དང་སྙིང་རྗེ་དབྱེར་མེད་པར་བསྒོམས་ནས། ལག་པ་གཡས་པས་བགྲང་བ་དང་། ལྷའི་སྐུ་རང་བཞིན་མེད་པར་ཤེས་པའི་དེ་ཉིད་དང་ལྡན་པས་སྔགས་བཟླ་བར་གསུངས་ཤིང་། དེ་ལ་རྡོ་རྗེ་མཁའ་འགྲོ་ལས། ཞི་བ་ལ་ནི་མཛུབ་མོ་བཞག ། རྒྱས་ལ་གུང་མོ་འགལ་བར་བྱ། །དབང་དུ་བྱ་བ་སྲིན་ལག་གསུངས། །མཐའ་མ་ལ་ནི་མངོན་སྤྱོད་བྱ། །མཐེ་བོང་ལྕགས་ཀྱུར་བྱས་ནས་ནི། །ལྷ་རྣམས་ཐམས་ཅད་འགུགས་པར་བསམ། །ཤིན་ཏུ་མཉམ་བཞག་སྔགས་བཟླས་ན། །འགྲུབ་འགྱུར་འདི་ལ་ཐེ་ཚོམ་མེད། །ཅེས་སོགས་སྡོམ་འབྱུང་དང་། སམྦུ་ཊ། གདན་བཞི་སོགས་སུ་འང་གསུངས་སོ། །

ཡང་། ཕྲེང་བ་འདྲེན་སྐབས་གནས་མི་འདྲ་བར་འདྲེན་ཚུལ་ཡང་བཤད་དེ། པདྨའི་ཕྲེང་བཤད་ལས། ཞི་བ་ལ་ནི་སྙིང་ཁར་བགྲང་། །རྒྱས་པ་ལྟེ་བའི་ཐད་དུ་སྟེ། །དབང་ལ་ཕྲེང་བ་གསང་གནས་ཐད། །འགུག་པའི་འདུན་པས་བགྲང་བར་བྱ། །དྲག་པོ་སྐྱིལ་ཀྲུང་བསྣོལ་མཚམས་སུ། །པུས་མོའི་སྟེང་དུ་བགྲང་བར་བྱ། །སྣ་ཚོགས་ལས་ལ་གང་བདེར་བྱ། །ཞེས་དང་། ཡང་། ཡོ་གའི་ལུགས་ལ། རྡོ་རྗེའི་རིགས་ལ་གུང་མོ། རིན་ཆེན་རིགས་ལ་སྲིན་ལག པདྨའི་རིགས་ལ་མཐེའུ་ཆུང་། ལས་ཀྱི་རིགས་ལ་སོར་མོ་ཀུན་གྱིས་བགྲང་དགོས་པར་ཡང་གསུངས་སོ། །

༡༢ ཕྲེང་བའི་དག་པའམ་མཚོན་དོན། མཚོན་དོན་ལ། སམྦུ་ཊ་ལས། ཕྲེང་བ་ཀུན་ནི་དགྲ་བཅོམ་པ། །མཆོད་རྟེན་སྟེང་དུ་རབ་ཏུ་བརྟག། མཆོད་རྟེན་ཆོས་ཀྱི་དབང་བོའི་ཕྱིར། །སྟེང་དུ་ཡང་ནི་ཆོས་ཀྱི་དབྱིངས། །ལག་མཐིལ་ཉི་མ་བསམ་བྱས་ནས། །དབྱངས་ཡིག་དང་བོ་ལ་སོགས་པ། །ལག་པའི་དབུས་སུ་རྣལ་འབྱོར་བས། །བསྒོམ་ཞིང་བདུད་རྩི་ཡི་གེ་ནང་། །འོད་ཟེར་འཕྲོ་བ་དུ་མ་དང་། །ཁ་དོག་དཀར་བོ་བསམ་ནས་ནི། །སོར་མོ་རྡོ་རྗེ་རྩེ་མོ་སྟེ། །གཡོན་པ་པདྨ་འདབ་མར་བསྒོམ། །པདྨ་རྡོ་རྗེ་སྙོམས་འཇུག་པའི། །ཁ་སྦྱར་དབུས་སུ་ཕྲེང་བཞག་ལ། །ཀུན་གྱིས་དེ་ཉིད་བསྒོམ་བྱ་ཞིང་། །ཞེས་སོགས་གདན་བཞི་དང་། རྡོ་རྗེ་མཁའ་འགྲོ་སོགས་ལས་ཀྱང་གསུངས་སོ། །

གཞན་ཡང་། ཁ་སྦྱོར་གྱི་དོན་མན་སྙེར་བཀྲལ་བ་ལྟར། སྲད་པུའི་དག་པ་ནི། སྐུད་པ་དབུས་མ་རྡོ་རྗེ་སེམས་དཔའ་དང་། ཕྱོགས་མཚམས་ཀྱི་སྐུད་པ་བརྒྱད་ཕྱག་ན་པད་མ་ལ་སོགས་པ་བརྒྱད་རྣམ་པར་དག་པ་དང་། ཕྲེང་རྡོག་རྣམས་ཀྱི་དག་པ་ནི། རྒྱལ་བའི་གཟུགས་སྐུ་མཐའ་ཡས་པ་རྣམ་པར་དག་པ་དང་། མདོ་འཛིན་གཉིས་བརྩེགས་པ་ནི་མན་སྙེར་སྟོབས་དང་མི་འཇིགས་པ་སོགས་ཀྱི་ངོ་བོར་གསུངས་པའི་དོན། རཏྣ་རཀྴི་ཏས་འོག་མ་རི་ལུ་ནི་ཆོས་སྐུ་ཟག་མེད་ཡེ་ཤེས་ཀྱི་རང་བཞིན་དུ་རྣམ་པར་དག་པ་དང་། དེའི་སྟེང་མ་མཆོད་རྟེན་ལྟར་སྟེང་དུ་བསྒྲེང་བ་ནི། དག་པ་གཉིས་ལྡན་གྱི་ཆོས་ཉིད་ངོ་བོ་ཉིད་སྐུའི་ངོ་བོར་རྣམ་པར་དག་ཅིང་མཚོན་པར་བྱེད་པའི་དོན་དུ་གསུངས་སོ། །

༡༣ ཕྲེང་བའི་དགོས་ཆེད། རབ་གནས་དང་བྱིན་གྱིས་བརླབས་པའི་ཕྲེང་བ་དེ་ཉིད། ལྷའི་ཕྱག་མཚན་མི་བརྗེད་པ་དང་། ཡེ་ཤེས་ལ་སེམས་འཕྲེང་བ། ཤེས་རབ་ཡུམ་གྱི་རྟེན་དུ་རུང་བ། སྔགས་ཀྱི་དམ་ཚིག་གི་རྫས་སུ་འགྱུར་བ། ཞི་སོགས་ལས་འགྲུབ་པ་སོགས་དགོས་པ་སྤྱི་དང་། བྱེ་བྲག་སྔགས་ཀྱི་ཚད་འཛིན་བྱེད་དོ། །

༡༤ ཕྲེང་བའི་ཕན་ཡོན། ཕྲེང་བ་མཚན་ཉིད་ལྡན་པ་འཆང་ན། འཁོར་བསྒྱུར་དང་མཆོག་ཐུན་གྱི་དངོས་གྲུབ་འཐོབ་པ། གཟུགས་མཛེས་ཤིང་ཚེ་རིང་བ། ལོངས་སྤྱོད་འབྱུང་བ། ནད་གདོན་ཞི་བ། མཁའ་འགྲོ་འདུ་བ། སངས་རྒྱས་བྱང་སེམས་ཀྱི་བྱིན་གྱིས་བརླབས་པ་སོགས་ཕན་ཡོན་མང་དུ་འབྱུང་བ་སམྦུ་ཊ་དང་། སྡོམ་འབྱུང་། ཁྲག་འཐུང་མངོན་འབྱུང་། གཤེད་དམར། ཡོ་ག་རྡོ་རྗེ་རྩེ་མོ། གདན་བཞི། སྔགས་འཆང་རྒྱན་མེ་སོགས་ལས་གསུངས་པས། ཞིབ་ཏུ་ཤེས་འདོད་པ་དག་གིས་དེ་དག་ལ་གཟིགས་པར་བྱའོ། །

ཕུར་བ།

༡ ཕུར་བའི་ངོ་བོ་དང་སྒྲ་བཤད། ཕུར་བ་རྡོ་རྗེ་འཕྲོས་པ་ལས། ཁྱབ་གདལ་ཆོས་ཉིད་མི་འགྱུར་བ། །སྣང་སྲིད་འཁོར་འདས་ཀུན་ལ་ཁྱབ། །དབྱིངས་དང་ཡེ་ཤེས་དབྱེར་མེད་པའི། །རྒྱས་འདེབས་བཛྲ་ཀི་ལ་ཡ། །ཞེས་ངོ་བོ་དང་། ལོ་པཎ་བཀའི་ཐང་ཡིག་ལས། ཕྱི་ནང་གི་ཆོས་ཐམས་ཅད་ཕུར་བའི་ངང་དུ་གནས་ལ། ཞེས་པ་དང་ཡང་མཐུན་ནོ། །ཡཀྵ་ཟ་བྱེད་འབར་བའི་རྒྱུད་ལས། ཕུར་ནི་རིག་པ་ཡེ་ཤེས་ཏེ། །བ་ནི་སྣ་ཚོགས་དངོས་བོའོ། །སྣ་ཚོགས་སེམས་ཀྱི་ཆོ་འཕྲུལ་དུ། །རྟོགས་ན་ཕུར་བ་ཞེས་སུ་གྲགས། །ཞེས་ངེས་ཚིག་བསྟན་ནོ། །

༢ ཕུར་བའི་རྒྱུ། ཕུར་བའི་རྒྱུ་སྤྱི་ལ་རྒྱུད་མང་བོར། གསེར་དང་། དངུལ། ཤེལ་དང་བྱུ་རུ། ཟངས་དང་ར་གན། ཙན་དན་དཀར་དམར་དང་སེང་ལྡེང་། འོ་མ་ཅན་གྱི་ཤིང་། འོ་སེ་དང་རྒྱ་ཤུག གླ་བ་དང་མཛོ་མོ་དམར་མོ། ཤུག་པ་དང་ཚེར་ནག སྐྱེར་བ་དང་མི་རུས། མིའི་རྗེ་ངར་གྱི་རུས་པ། སྤྲེའུའི་རུས་པ་སོགས་དང་། ལྕགས་ལྔ་སྟེ། ཐོག་ལྕགས་དང་ས་ལྕགས། ཁྲོ་ལྕགས་དང་མི་རྟ་བསད་པའི་གྲི་ལྕགས། ལྕགས་ཕལ་སོགས་རུང་བར་རྒྱུད་སྡེ་དག་ལས་གསུངས་ལ།

བྱེ་བྲག་གི་རྒྱུ་ནི། སྲོག་ཆགས་ཀྱི་རྐང་རུས་མི་འདྲ་བའི། ཞི་རྒྱས་དབང་དྲག་གི་ལས་བཞི་སྒྲུབ་པར་ཡང་བཤད་དེ། ཕུར་བ་གསང་རྒྱུད་ལས། རྨིག་ཟླུམ་རྐང་ལ་ཞི་བ་བྱ། །འདབ་ཆགས་རྐང་ལ་རྒྱས་པ་བྱ། །རྐང་ལེབ་རྐང་ལ་དབང་ཡང་བྱ། །སྡེར་ཆགས་རྐང་ལ་དྲག་པོ་བྱ། །ཞེས་དང་། ཡང་ཕུར་བ་མྱང་འདས་ཀྱི་རྒྱུད་ལས། ལྕགས་སམ་ནག་པའི་ཤིང་རྣམས་ནི། །དྲག་པོའི་ལས་ཀྱི་ཕུར་བའི་རྒྱུ། །གསེར་རམ་སེར་བའི་ཤིང་རྣམས་ནི། །ཡོན་ཏན་རྒྱས་པའི་ཕུར་བའི་རྒྱུ། །ཟངས་སམ་དམར་བའི་ཤིང་རྣམས་ནི། །གསུང་མཆོག་དབང་གི་ཕུར་བུའི་རྒྱུ། །དངུལ་ལམ་དཀར་བའི་ཤིང་རྣམས་ནི། །ཞི་བ་ཆོས་ཉིད་ཕུར་བུའི་རྒྱུ། །ཞེས་དང་། གཞན་ཡང་ཤིང་གི་སྦ་མཆོག་རྐང་། །གདུག་པ་ཅན་དང་བཀྲ་མི་ཤིས། །ཁྱོ་དགུ་ཤི་བའི་ཡུགས་མའི་འཕང། །དེ་ལ་དྲག་པོའི་ཕུར་བུ་བྱའོ། །སྐྱེར་བ་གཡེར་བ་སྲིན་ཤིང་དང་། །སྐྲིག་ཤིང་ལ་སོགས་ཤིང་བུ་ལ། །དེ་ལ་རྒྱས་པའི་ཕུར་བུ་བྱ། །འཁར་བ་ལྗོན་དམར་སེང་ལྡིང་དང་། །མཛོ་མོའི་གླ་དཀར་ཚེར་མ་ཅན། །དེ་ལ་དབང་གི་ཕུར་བ་བྱ། །ཙན་དན་དཀར་བོ་ཤུག་པ་འཇག། གླ་བ་སྟར་བུའི་ཤིང་རྣམས་ལ། །དེ་ལ་ཞི་བའི་ཕུར་བ་བྱའོ། །ཞེས་དང་། ཡང་རྒྱུའི་བྱེད་ལས་དང་སྦྱར་ཏེ་གསུངས་ཚུལ་ནི། རྙིང་རྒྱུད་ཕུར་བ་རྡོ་རྗེ་ཁྲོས་པ་རྩ་རྒྱུད་ལས། སེང་ལྡེང་ཕུར་བ་སོར་བརྒྱད་ནི། །མཐུ་འཕྲོག་བྱིན་རླབས་ཡོད་པ་ཡིན། །དེ་བཞིན་བྱ་རྒོད་གཤོག་ཕུར་ཡང་། །འགུགས་པར་བྱ་བའི་ནུས་པ་ཡོད། །སེར་བོ་གསེར་རམ་ཡང་ན་ནི། །སྐྱེར་བ་དག་ལ་བྱས་པ་ནི། །ཟིལ་གྱིས་མནོན་པའི་ཕུར་བ་ཡིན། །སྐྱེས་པ་དར་མ་རིགས་ཅན་གྱི། །སྦོམ་པོ་མ་ཡིན་ཐུར་མ་ཕྲ་མོ་ཙམ། །ཟངས་སམ་མཛོ་མོའི་ཤིང་དག་གིས། །དམར་བོ་དག་ལ་བྱས་པ་ནི། །དབང་དུ་འདུས་པའི་ཕུར་བུར་བསྟན། །ཙན་དན་དག་གམ་རྒྱ་ཤུག་ནི། །གཟི་བྱིན་འཕྲོག་པར་ཡང་དག་བསྟན། །ལྕགས་སམ་ཤིང་ནི་ནག་པོ་ནི། །དྲག་པོར་འགྱུར་བ་མཐའ་དག་ལ། །རྡུལ་དུ་བརླག་པར་རབ་ཏུ་བསྟན། །ཞེས་དང་། གཞན་ཕུར་བ་བཅུ་གཉིས་ཀྱི་རྒྱུད་ལས། རྒྱུ་མི་འདྲ་བ་དང་། ཁ་དོག་མི་འདྲ་བའི་ཡོན་ཏན་དང་བྱེད་ལས་མི་འདྲ་བར་ཡང་བཤད་དོ། །

༣ ཕུར་བུའི་དབྱིབས། ཕུར་བ་སྤྱིའི་དབྱིབས་ནི། ཕུར་བ་ཁྲོས་པའི་རྩ་རྒྱུད་ལས། ལྕགས་སྣ་ལྔ་འམ་བདུན་ཡང་རུང། །མགོ་བོ་རྒྱ་མདུད་རྩེ་ཟུར་གསུམ། །སྐེད་པ་རྒྱ་མདུད་གཞལ་ཡང་ཁང་། །ལྕམ་གཞོག་ལ་ནི་སོར་བཅུ་གཉིས། །ཞེས་དང་། གཞན་ཟ་བྱེད་འབར་བ་དང་ཕུར་བ་མྱང་འདས་ཀྱི་རྒྱུད་སོགས་ལས། དེ་དང་མི་འདྲ་བར་ཡང་གསུངས་སོ། །

བྱེ་བྲག་དབང་བཞིའི་ཕུར་བའི་དབྱིབས་ནི། ཞི་ལ་ཁ་དོག་དཀར་བོ། མགོ་བོ་རྒྱ་མདུད། རྩེར་ཟླུམ་པོ། ལོགས་སུ་ཞི་བའི་ལྷ་རྣམས་བཀོད་པའི་ཕུར་བ་དང་། རྒྱས་པ་ལ། ཁ་དོག་སེར་བོ། མགོ་དང་རྒྱ་མདུད་རྩེ་གྲུ་བཞི་ཅན་དང་། དབང་ལ། ཁ་དོག་དམར་བོ། མགོ་དང་རྒྱ་མདུད་རྩེ་མོ་ཟླ་གམ་ཅན་དང་། དྲག་པོ་ནི། ཁ་དོག་ནག་པོ། མགོ་དང་རྒྱ་མདུད་རྩེ་གསུམ་ཟུར་གསུམ་ཅན་ནོ། །ཤིང་གི་ཕུར་བ་ཡིན་ན་རྩ་རྩེ་མ་ནོར་བར་བྱ་དགོས་ཏེ། ཀརྨ་ལས་ཀྱི་རྒྱུད་ལས། ཤིང་གི་རྩ་བ་རྒྱ་མདུད་བྱ། །མྱུ་གུའི་ངོས་སུ་སོ་སོའི་དབལ། །རི་རམ་ལྕམ་གཞོག་བརྒྱད་ལྡན་བརྗིད། །ཅེས་སོ། །

༤ ཕུར་བུའི་ཚད། སྤྱིར་ཕུར་བུ་ལ་རིང་ཐུང་གི་ཚད་ནི། ཕུར་བུ་ལ་ཆ་ཚད་ལྡན་ན་བྱིན་རླབས་ཆགས་ཤིང་། ལས་འགྲུབ་པ་མྱུར་ཏེ། ཐུགས་རྗེ་ཁྲོས་རྒྱུད་ལས། ཆ་ཚད་ལྡན་པའི་རྟགས་མྱུར་རོ། །ཞེས་པ་ལྟར། ཕུར་བུ་མྱང་འདས་ཀྱི་རྒྱུད་ལས། སོར་ཡང་བཅོ་བརྒྱད་བཅུ་གཉིས་དང་། །བརྒྱད་དང་ལྔ་དང་བཞི་དང་གཅིག། ནས་གང་ཚད་དང་གང་རུང་བར། །མཁས་པས་དཀྱིལ་འཁོར་རིམ་པར་འགོད། །བྱེ་བྲག་ཕུར་བུ་རང་རང་གི་ཚད་ཀྱང་། ཧེ་རུ་ཀ་སྙིང་རྗེ་རོལ་བ་ལས། སོར་བརྒྱད་དམ་བཅུ་གཉིས་པར་བྱས་པ་མགོ་མཇུག་མ་ནོར་བར་ཤིང་རྩ་བ་ཕྱོགས་སུ་མགོ་བྱས་ལ། སོར་བརྒྱད་ལ། སོར་གཅིག་ལ་རྒྱ་མདུད། སྐེད་པར་སོར་གཅིག་ལ་རྒྱ་མདུད། སྟོད་ཟུར་བརྒྱད། སྨད་ཟུར་གསུམ་དུ་བྱས་ལ་རི་རབ་ལྟར་བརྗིད་པ་ནི་གཟུགས་སོ། །ཞེས་དང་། གཞན་ཡང་། སོར་བཅུ་གཉིས་དང་། བཅུ་དྲུག་གི་ཚད་ཀྱང་ཕུར་བ་ཐུགས་རྗེ་ཁྲོས་པ་རྩ་རྒྱུད་སོགས་སུ་གསུངས་ཡོད་པས། རིགས་པས་དཔག་སྟེ་ཚད་བགོ་དགོས་སོ། །ཚད་ངེས་ཅན་གྱི་རྒྱུ་མཚན་ཡང་། ཡཀྵ་ཟ་བྱེད་འབར་བ་ལས། སྐྱེས་པ་རྣམ་བཞིའི་སྒོ་བཀག་པ། །ཚད་ནི་སོར་བཞི་བསྟན་པ་ཡིན། །རྣམ་ཤེས་བརྒྱད་ཀྱི་སྒོ་བཀག་པས། །ཆུང་ཚད་སོར་ནི་བརྒྱད་པ་བསྟན། །རྟེན་འབྲེལ་བཅུ་གཉིས་རྒྱུན་བཅད་ཕྱིར། །འབྲིང་ཚད་སོར་ནི་བཅུ་གཉིས་བསྟན། །ཁམས་ཆེན་བཅོ་བརྒྱད་རྩད་བཅད་ཕྱིར། །སོར་ནི་བཅོ་བརྒྱད་རིང་ཚད་བསྟན། །ཞེས་སོ། །

༥ ཕུར་བུའི་དབྱེ་བ། ཕུར་བུའི་དབྱེ་བ་ལ། ཐུགས་རྗེ་ཁྲོས་པ་རྩ་རྒྱུད་ལས། ཆོས་ཉིད་དོན་གྱི་ཕུར་བུ། རིག་པ་ཡེ་ཤེས་ཀྱི་ཕུར་བུ། འདུས་བྱས་རྫས་ཀྱི་ཕུར་བུ། རྟེན་པ་ལུས་ཀྱི་ཕུར་བུ་སྟེ་བཞིར་གསུངས་ལ། ཡཀྵ་ཟ་བྱེད་འབར་བ་ལས། དེ་དང་ཅུང་མི་མཐུན་པར། རིག་པ་ཡེ་ཤེས། ཚད་མེད་སྙིང་རྗེ། བྱང་ཆུབ་སེམས་དང་། འདུས་བྱས་རྫས་ཀྱི་ཕུར་བུ་སྟེ་བཞིའོ། །གོང་གསལ་འདུས་བྱས་རྫས་ཀྱི་ཕུར་བུ་ལ། ནང་གསེས་བསྙེན་ཕུར་དང་། སྒྲུབ་ཕུར་དང་། གདབ་ཕུར་དང་། མངགས་ཕུར་བཞིར་དབྱེའོ། །

༦ ཕུར་བུ་བྱིན་གྱིས་བརླབས་ཚུལ། ཕུར་བུ་བྱིན་གྱིས་བརླབས་ཚུལ་ནི། ཀརྨ་ལས་ཀྱི་རྒྱུད་དང་། ཕུར་བ་བཅུ་གཉིས་ཀྱི་མདོ། ཧེ་རུ་ཀ་སྙིང་རྗེ་རོལ་བ་སོགས་སུ་གསལ་ལ། བྱིན་གྱིས་བརླབས་རྗེས། རབ་གནས་ལེགས་པར་བྱས་ཏེ། ཚོན་སྐུད་སྣ་ལྔ་འམ་བ་སུ་ཏའི་གཟུངས་ཐག་བཏགས་ཏེ་རྣལ་མར་གྲུབ་ནས་བསྙེན་པ་བྱེ་བ་གཅིག་ལ་སོགས་གྲུབ་པ་ན། ཕུར་བུ་ལྡིང་བ་དང་། གར་འཆམ་པ། མེ་སྟག་དང་འོད་འབར་བ་སོགས་གྲུབ་པའི་ལྟས་ཐོན་པ་ཡིན་ནོ། །

༧ ཕུར་བུའི་མཚོན་དོན། དེ་དག་གི་མཚོན་དོན་ཡང་ཕུར་བ་ཐུགས་རྗེ་ཁྲོས་པ་རྩ་རྒྱུད་ལས། དབུ་ཡི་རྒྱ་མདུད་སོར་གཅིག་དེ། །ཟུར་གསུམ་བརྒྱད་དང་གྲུ་བཞི་ལྔ། །ཧཱུཾ་མཛད་ཁྲག་འཐུང་ལྔ་རྫོགས་ཏེ། །སོར་གཉིས་ལྟེ་བ་ཡན་ཆད་ལ། །ལྕམ་གཞོག་བརྒྱད་དུ་ཡང་དག་ཤེས། །ཁྲོ་བརྒྱད་མགོ་བརྙན་བཅུ་དྲུག་རྫོགས། །སོར་གཅིག་གཙོས་སོ་མཚན་མ་སྟེ། །ཆུ་སྲིན་ཁ་རུ་ཡང་དག་རྫོགས། །དྲག་པོ་ཁྲོས་པའི་དཀྱིལ་འཁོར་ཡིན། །སོར་གསུམ་དབལ་དང་ལྡན་པ་སྟེ། །ཡུམ་ཆེན་ལྔ་ཡི་དཀྱིལ་འཁོར་ཡིན། །ཞེས་དང་། ཕུར་བུའི་རྒྱུད་ལས། ཁྲོ་རྒྱལ་འཇིགས་བྱེད་བཛྲ་ཀཱི་ལ་ཡ། །སྡུག་བསྔལ་འཇོམས་མཛད་སྤྱི་བོའི་རྒྱ་མདུད་ནི། །སྲིད་གསུམ་མ་ལུས་དབྱིངས་སུ་འདྲེན་པའི་བརྡ། །མ་སྐྱེས་ལྷུན་གྱིས་གྲུབ་པའི་གཟི་བྱིན་བསྐྱེད། །རྐེད་པ་རྒྱ་མདུད་ཟུར་དྲུག་ཡེ་ཤེས་དྲུག །ཆུ་སྲིན་ཁ་ནས་སྦྲུལ་གྱི་ཆུན་པས་བརྒྱན། །མ་བཅོས་ལྷུན་གྱིས་གྲུབ་པའི་གཞལ་ཡས་ཁང་། །འབྱུང་བ་ཡུམ་གྱི་ལྷུམས་སུ་གཟི་བྱིན་བསྐྱེད། །ཟུར་བཞི་ལོགས་བཞི་ཁྲོ་མོ་བརྒྱད་ཀྱི་ངང་། །རྣམ་ཤེས་ཚོགས་བརྒྱད་དུར་ཁྲོད་བརྒྱད་དུ་རོལ། །སྡུག་བསྔལ་བརྒྱད་པོ་གནས་སུ་བསྒྲལ་ནས་ཀྱང་། །བཅུ་དྲུག་རོལ་བ་ཆེན་པོར་གཟི་བྱིན་བསྐྱེད། །རྩེ་མོ་ཟུར་གསུམ་སྐུ་གསུང་ཐུགས་ཀྱི་ངང་། །དུག་གསུམ་འཁོར་བའི་བཙོན་ར་རྒྱ་བཀྲལ་ནས། །ལུས་ངག་ཡིད་གསུམ་བག་ཆགས་གཏན་སྦྱངས་ཏེ། །ས་གསུམ་ཟིལ་གྱིས་མནོན་པའི་གཟི་བྱིན་བསྐྱེད། །ཅེས་སོ། །

༨ དམིགས་པར་བྱ་བའི་ཡུལ་བཞི། ཆོས་ཀྱི་དབྱིངས། ཡུམ་གྱི་མཁའ། འགྲོ་བ་རིགས་དྲུག གང་ལ་དམིགས་པ་དང་བཞིའོ། །

༩ ཕུར་བུ་གདབ་ཚུལ། སྔགས་འཆང་རྒྱན་མེར། རིག་པ་ཡེ་ཤེས་ཀྱི་ཕུར་བ་ཆོས་ཀྱི་དབྱིངས་ལ་གདབ། བྱང་སེམས་ཡེ་ཤེས་ཀྱི་ཕུར་བ་ཡུམ་གྱི་མཁའ་ལ་གདབ། ཐུགས་རྗེ་སྤྲུལ་བའི་ཕུར་བ་རིགས་དྲུག་སེམས་ཅན་ལ་གདབ། འདུས་བྱས་རྫས་ཀྱི་ཕུར་བ་དམིགས་པའི་ཡུལ་ལ་གདབ་པ་དང་། ཡང་འཕྲིན་ལས་རྣམ་བཞིའི་དབང་དུ་བཏང་ནའང་། གདབ་པར་བྱ་བ་བཞི་སྟེ། ཞི་བའི་ཕུར་བ་ཡུལ་འཇིགས་པ་བརྒྱད་ལ་གདབ། རྒྱས་པའི་ཕུར་བ་འབྱོར་བ་དྲུག་ལ་གདབ། དབང་གི་ཕུར་བ་ཉོན་མོངས་པ་བཞི་ལ་གདབ། དྲག་པོའི་ཕུར་བ་དགྲ་བགེགས་གཉིས་ལ་གདབ། ཅེས་གསུངས་པ་ལྟར། རང་ཉིད་ལྷའི་ང་རྒྱལ་བརྟན་པོ་ལ་གནས་བཞིན་དུ། ཕུར་བ་ལས་བྱེད་ཀྱི་ཀཱི་ལ་ཡ་དངོས་སུ་གསལ་ཏེ། བསྒྲུབ་བྱ་དེའི་སྙིང་མགྲིན་སྤྱི་བོ་དང་། ལྟེ་བ་གསང་གནས་སོགས་སུ་གདབ་སྟེ། རྡུལ་དུ་བརླག་ལ། དོན་དུ་ཟག་བཅས་ཉེར་ལེན་གྱི་ཕུང་ལྔ་ཟག་མེད་ཡེ་ཤེས་ཀྱི་ཕུང་ལྔར་རྒྱས་བཏབ་པ་ནི་ཕུར་བུ་གདབ་ཚུལ་ཡིན་ཏེ། འཕྲིན་ལས་འབྱུང་བ་སྒྲོལ་མ་འདུས་པའི་རྒྱུད་ལས། གདུག་པ་ཐམས་ཅད་བཀུགས་ནས་ཀྱང་། །ནམ་མཁའི་དབྱིངས་སུ་བསྐྱེད་ནས་ནི། །རྡོ་རྗེ་ཕུར་བུའི་ཚོགས་སྤྲོས་ནས། །གནས་ལྔ་དག་ཏུ་ཕུར་བུ་གདབ། །ཅེས་དང་། ཡང་སྒྱུ་འཕྲུལ་དྲྭ་བ་ལས། རྡོ་རྗེ་ཡི་ནི་ཕུར་བུ་ཡིས། །གཟུགས་བརྙན་གྱི་ནི་གནས་ལྔ་བོ། །དཔྲལ་བ་མགྲིན་པ་སྙིང་ག་དང་། །དེ་བཞིན་དཔུང་བ་གཉིས་སུ་གདབ། །རྡོ་རྗེ་ཐོ་བས་བརྡུང་བར་བྱ། །ཞེས་སོགས་རྒྱུད་སྡེ་མང་བོ་ལས་གསུངས་ལ། གཞན་ཡང་། ཕུར་བུ་ནི་སྒྲུབ་རྟེན་དང། མཚམས་གཅོད་བཟློག་པ། ཐིག་འདེབས་སོགས་ལ་བཀོལ་ཡུལ་མང་ངོ་། །

༡༠ འདེབས་པར་བྱ་བའི་གྲོགས་བཞི། ཤེས་རབ། ཏིང་འཛིན། སྙིང་རྗེ། ཚད་མེད་དང་བཞིའོ། །

༡༡ ཐེབས་པའི་རྟགས་བཞི། ཆོས་དབྱིངས་སུ་ཐེབས་པས་ཡེ་ཤེས་འཆར། ཡུམ་གྱི་མཁའ་ལ་ཐེབས་པས་གཉིས་མེད་སྦྱོར། འགྲོ་བ་རིགས་དྲུག་ལ་ཐེབས་པས་ཐུགས་རྗེས་ཟིན། གང་ལ་དམིགས་པ་ལ་ཐེབས་པས་བསྟན་པ་ཚུགས་པ་དང་བཞིའོ། །ཡང་ལོ་པཎ་བཀའི་ཐང་ཡིག་ལས། ཕུར་བ་ལ་ཐེབས་པ་གསུམ་ཡོད། འདོད་ཁམས་གཟུགས་ཁམས་གཟུགས་མེད་ཁམས་ལ་ཐེབས་པ་དང་གསུམ་མོ། །ཏིང་འཛིན་རྣམ་པ་གསུམ་བསྒོམས་པས་ནི་གཟུགས་ཁམས་ལ་ཐེབས། དཀྱིལ་འཁོར་གསུམ་བསྒོམས་པས་ནི་འདོད་ཁམས་ལ་ཐེབས། དཀྱིལ་འཁོར་རྣམ་པ་གསུམ་སྟོང་ཉིད་དུ་བསྒོམས་པས་ནི་གཟུགས་མེད་ཁམས་ལ་ཐེབས་པའོ། །ཤ་ལ་ཐེབས་པ་དང་། རུས་པ་ལ་ཐེབས་པ་དང་། ཁྲག་ལ་ཐེབས་དང་། དབུགས་ལ་ཐེབས་པ་དང་བཞི་ལས། དེ་བཞིན་ཉིད་ཀྱི་ཏིང་ངེ་འཛིན་བསྒོམས་པས་ནི་དབུགས་ལ་ཐེབས་པའོ། །ཡེ་ཤེས་སེམས་དཔའ་བསྒོམས་པས་ནི་རུས་པ་ལ་ཐེབས་པའོ། །ཁྲོ་བོ་བཅུ་བསྒོམས་པས་ནི་ཁྲག་ལ་ཐེབས་པའོ། །དམ་ཚིག་སེམས་དཔའ་བསྒོམས་པས་ནི་ཤ་ལ་ཐེབས་པའོ། །གསུངས་སོ། །

༡༢ ཕུར་བ་མ་ཐེབས་པའི་ཉེས་སྐྱོན། རིག་པ་ཡེ་ཤེས་ཀྱི་ཕུར་བ་ཆོས་ཀྱི་དབྱིངས་ལ་མ་ཐེབས་ན་འཁོར་བ་ལས་མི་སྒྲོལ་བ་དང་། བྱང་ཆུབ་སེམས་ཀྱི་ཕུར་བ་ཡུམ་གྱི་མཁའ་ལ་མ་ཐེབས་ན་དམ་ཚིག་སེམས་དཔའི་དཀྱིལ་འཁོར་རྒྱུན་ཆད་པ་དང་། ཐུགས་རྗེ་སྤྲུལ་བའི་ཕུར་བ་རིགས་དྲུག་ལ་མ་ཐེབས་ན་གཞན་དོན་འཕྲིན་ལས་རྒྱུན་ཆད་པ་དང་། འདུས་བྱས་རྫས་ཀྱི་ཕུར་བ་ཞིང་བཅུ་ལ་མ་ཐེབས་ན་ལས་ངན་རྒྱུན་ཆད་མེད་པ་དང་བཞིའོ། །ལོ་པཎ་བཀའི་ཐང་ཡིག་ལས། སྔ་མ་གཉིས་འདྲ་ལ། ཐུགས་རྗེ་སྤྲུལ་བའི་ཕུར་བ་རིགས་དྲུག་ལ་མ་ཐེབས་ན་འཁོར་བར་གཏན་དུ་འཁྱམས། འདུས་བྱས་རྫས་ཀྱི་ཕུར་བ་གང་ལ་དམིགས་པ་ལ་མ་ཐེབས་ན་བསྟན་པའི་སྙིང་བོ་མི་ཚུགས་ཞེས་ཕྱི་མ་གཉིས་མི་འདྲ་བར་གསུངས་སོ། །

༡༣ ཕུར་བུའི་ནུས་པ། གང་དམིགས་པ་ལ་ཕུར་བུ་གདབ་ན། དགྲ་རྒྱུད་རྩ་ནས་བརླག་པ་དང་། སྐྱེ་རྒྱུན་ངན་པ་གཅོད་པ། ཞིང་བཅུ་ཚང་བའི་དགྲ་བགེགས་འཇོམས་པ། རྣལ་འབྱོར་བའི་རྟོགས་པ་འཕེལ་ཞིང་། སྙན་གྲགས་དང་བསྟན་པ་རྒྱས་པ། མདོར་ན། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གནས་ལུགས་ཁྱབ་གདལ་ཀ་དག་ཆེན་པོས་རང་བཞིན་དུ་རྟོགས་པ་ནི་ཕུར་བུ་ཐེབས་ཚུལ་མཐར་ཐུག་ཡིན་ནོ། །

བྱེ་བྲག་ཏུ་གསང་རྒྱུད་ལས། ཙན་དན་དཀར་བོའི་ཕུར་བུ་ཡིས། །ནད་རྣམས་མ་ལུས་ཞི་བར་བྱེད། །སྐྱེར་བའི་ཕུར་བ་ཟུར་བཞི་ཡིས། །ཚེ་དང་ལོངས་སྤྱོད་རྒྱས་པར་བཤད། །སེང་ལྡེང་ཕུར་བ་ཟླ་གམ་གྱིས། །ཐམས་ཅད་དབང་དུ་སྡུད་པར་བྱེད། །ཅེས་དང་། གསེར་གྱིས་བྱང་ཆུབ་སེམས་རྒྱས་བྱེད། །ཙན་དན་དམར་བོའི་ཕུར་བ་ཡིས། །ཕོ་མོ་དབང་དུ་འདུ་བར་བྱེད། །ཟངས་ཀྱིས་རྒྱལ་བོ་དབང་དུ་སྡུད། །ཤིང་གིས་གདོན་རྣམས་དབང་དུ་སྡུད། །ཅེས་དང་། གཞན་ཡང་། ཞི་བའི་ཕུར་བུས་ནད་གདོན་འཇིགས་བརྒྱད་ལས་སྐྱོབ། རྒྱས་པའི་ཕུར་བུས་ཚེ་བསོད་འབྱོར་དྲུག་སྤེལ། དབང་གི་ཕུར་བུས་སྲིད་གསུམ་དབང་དུ་སྡུད། དྲག་པོའི་ཕུར་བུས་དགྲ་བགེགས་གདུག་པ་ཅན་ཚར་གཅོད་དོ། །

༡༤ ཕུར་བུའི་འབྲས་བུ། འབྲས་བུ་ཡང་རིག་པ་ཡེ་ཤེས་ཀྱི་ཕུར་བས་ཆོས་སྐུ། བྱང་ཆུབ་སེམས་ཀྱི་ཕུར་བས་ལོངས་སྐུ། ཐུགས་རྗེའི་ཕུར་བས་སྤྲུལ་སྐུ། རྫས་ཀྱི་ཕུར་བས་རྡོ་རྗེའི་སྐུ་མངོན་དུ་བྱེད་ནུས་སོ། །

༡༥ ཕུར་བའི་དགོས་ཆེད། ཡེ་ཤེས་ཀྱི་ཕུར་བས་བྱང་ཆུབ་མངོན་དུ་བྱེད་པ་དང་། བྱང་སེམས་ཀྱི་ཕུར་བས་རྒྱུད་བྱིན་གྱིས་བརླབས་པ། སྤྲུལ་བའི་ཕུར་བུས་རིགས་དྲུག་འདྲེན་པ། རྫས་ཀྱི་ཕུར་བས་ཞིང་བཅུ་ཚང་བའི་དགྲ་བགེགས་སྒྲོལ་བའི་དགོས་པ་ཡོད་དོ། །

གྲི་གུག

༡ གྲི་གུག་གི་རྒྱུ་དང་ཚད། རྒྱུད་ལས། གྲི་ལྕགས་ལས་བྱས་གྲི་གུག་ནི། །རྣོ་ཞིང་སོར་བཅུའི་ཚད་དང་ལྡན། །ཡུ་བ་རྡོ་རྗེ་ཕྱེད་པོ་ཡི། །ལྟེ་བ་ཧཱུཾ་གིས་མཚན་པར་བྱ། །ཞེས་པ་ལྟར། ཟངས་དང་ལྕགས། མི་གསོད་ཀྱི་ལྕགས་གྲི་གང་རུང་རོ་སོལ་གྱི་མེས་བསྲེགས་པ་སྟེ། དངོས་གྲུབ་ཀུན་འབྱུང་ལས། ཟངས་དང་ལྕགས་ཀྱི་གྲི་གུག་གིས། །བླ་དང་ཚེ་སྲོག་དོན་སྙིང་ལ། །མྱུར་དུ་འཁོར་བས་གཅོད་པར་བྱེད། །ཅེས་དང་། གཞན་ཡང་། མཁའ་འགྲོ་སྡེ་ལྔ་སོགས་ལ་ནི་རིན་ཆེན་སྣ་ལྔ་སོགས་ཀྱི་རྒྱུ་ལས། གྲི་གུག་ཀྱང་རྡོ་རྗེ་གྲི་གུག རིན་ཆེན་གྲི་གུག པདྨ་གྲི་གུག རྒྱ་གྲམ་སོགས་ཀྱང་ཡོད་པར་བཤད་དོ། །

༢ གྲི་གུག་གི་དབྱིབས། དུར་ཁྲོད་ནག་པོའི་རྒྱུད་ལས། གྲི་གུག་མཚན་ཉིད་ཇི་ལྟར་ལགས། །བཅོམ་ལྡན་འདས་ཀྱིས་བཀའ་བསྩལ་བ། །སོ་བཅུ་རྡོ་རྗེ་ཡུ་བ་ཅན། །ཡུ་བའི་རྩ་བར་ཧཱུཾ་གནས་པར། །སོ་ནི་ཟླ་ཕྱེད་ལྟ་བུར་བྱ། །ཞེས་དང་། ཡང་མཁའ་འགྲོའི་སྡེ་ལྔའི་གྲི་གུག་ལ་རྡོ་རྗེ་རིན་ཆེན་པདྨ་རྒྱ་གྲམ་སོགས་ཀྱིས་བརྒྱན་པར་ཡང་བཤད་དོ། །

༣ གྲི་གུག་གི་དགོས་པ། ལྷའི་ཕྱག་མཚན་དང་། ལས་སྒྲུབ་ཀྱི་རྟེན། དམ་ཚིག་གི་རྫས་སུའོ། །

༤ གྲི་གུག་གི་མཚོན་དོན། ཀྱེ་རྡོར་ལས། ང་རྒྱལ་ལ་སོགས་སྐྱོན་དྲུག་རྣམས། །གཅོད་ཕྱིར་གྲི་གུག་རྣམ་པར་གནས། །ཞེས་གསུངས་སོ། །

རལ་གྲི།

རལ་གྲི་འདི་ལྷའི་ཕྱག་མཚན་དང་། ཆོས་སྲུང་གི་བླ་རྡོ་བཅའ་ཐབས་སུ་དགོས་པར་བཤད་ལ། རྒྱུ་ནི་རྣོ་ཁབ་ལེན། ལྕགས། ཡང་ན། ཤིང་ལས་བྱས་པའི་ཚད་སོར་བཞི་དང་། བརྒྱད། བཅུ་གཉིས། ཁྲུ་གང་བ་དྲང་ཞིང་རྣོ་བ། གས་ཆག་མེད་པ་དགོས་པར། གཤེད་དམར་དང་། གཤེད་ནག རྡོར་སེམས་སྒྱུ་འཕྲུལ་མེ་ལོང་སོགས་སུ་བཤད་དོ། །

རལ་གྲི་གྲུབ་པའི་རྟགས་ལ། གཤིན་རྗེ་གཤེད་ནག་ལས། གྲུབ་ན་རལ་གྲི་རབ་ཏུ་འབར། །འོད་ཟེར་ལྔ་ཡི་གློག་ཆེན་འཁྲུག །གྲུབ་པ་དེ་ནི་བཟུང་གྱུར་བས། མི་རྣམས་ཁམས་གསུམ་ལས་རྒྱལ་འགྱུར། །ཞེས་སོ། །ཡང་ཐུན་མོང་བའི་དངོས་གྲུབ་བརྒྱད་ཀྱི་ནང་གསེས་རལ་གྲིའི་དངོས་གྲུབ་ནི། ཕྱི་ནང་གཉིས་ཀས་བསྒྲུབ་རུང་བ་ཞིག་སྟེ། རོ་ལངས་བསྒྲུབས་ནས། གྲུབ་ན་ཐོག་མར་རོ་ལ་ཁ་རླངས་བྱུང་། དེ་ནས་འགུལ། དེ་ནས་རོ་ལངས་གར་བྱེད་ཅིང་། ལྕེ་ཡུག་ཡུག་པ་ལན་གསུམ་རྐྱོང་བས། དེ་དང་བོར་ཆོད་ན་རབ། བར་དུ་ཆོད་ན་འབྲིང་། ཐ་མར་ཆོད་ན་ཐ་མ་ཡིན་པས། དེའི་ལྕེ་རལ་གྲིར་གྱུར་ཏེ། རི་རབ་གྱི་རྩེ་མོ་སོགས་སུ་སྐད་ཅིག་ལ་བགྲོད་ཐུབ་པའི་ཁྱད་ཆོས་ལྡན་པ་ཞིག་དང་། རོ་གསེར་དུ་འགྱུར་ལ། མ་ཆོད་ན་སེམས་ཅན་མང་བོ་རོ་ལངས་ཀྱི་ཁ་ཟས་སུ་འགྲོ་བ་ཡིན། ཞིབ་ཏུ་སྦ་བཞེད་ལས། བསམ་ཡས་བཞེངས་པ་ཨོ་ཏན་ཏ་པུ་རིར་དཔེ་བླངས་པ་ལས་འཕྲོས་ཏེ། སྔོན་རྣལ་འབྱོར་བ་ཞིག་གིས་རོ་ལངས་སྒྲུབ་ཏེ་རལ་གྲིའི་དངོས་གྲུབ་བརྙེས་པའི་ཚུལ་འཁོད་པས་དེར་གཟིགས་པར་བྱའོ། །

བེང་།

བེང་འདི་གཙོ་བོ་དཔལ་ལྡན་མགོན་པོའི་ཕྱག་མཚན་སྟེ། མགོན་ནག་དངོས་གྲུབ་འབྱུང་རྒྱུད་ལས། གསང་བ་བེང་འཛིན་མགོན་པོ་ཡིས། །ལྷ་མ་ཡིན་གྱི་གྲོང་ཁྱེར་ནི། །སུམ་བརྩེགས་ལ་སོགས་ཁང་བཟང་རྣམས། །ཁྲོ་བོ་ཙན་དན་བེང་བསྣམས་ཀྱིས། །ཞེས་དང་། མེ་ལྕེ་ཕྲེང་རྒྱུད་ལས། ཙན་དན་བེང་གི་བར་ཤེད་ནས། །སྤྲུལ་བའི་ཕོ་ཉ་འབུམ་བཀྱེ་བས། །ཞེས་སོ། །

༡ བེང་གི་རྒྱུ་ནི། རྙིང་རྒྱུད་མེ་ལྕེ་ཕྲེང་རྒྱུད་ལས། དེ་ནས་བེང་གི་བཅས་དག་ནི། །ཙན་དན་སེང་ལྡེང་ཤེར་ཤིང་དང་། །སྐྱེར་ལྡེང་མཛོ་མོ་གླ་བ་དང་། །རྒྱ་ཤུག་དག་ལ། ཞེས་གསུངས་པ་དང་།

༢ དབྱིབས་ནི། རྒྱུད་དེ་ཉིད་ལས། རྒྱ་ཤུག་དག་ལ་འདོམ་གང་ངམ། །མདའ་ཚད་གང་དུ་བྱས་པ་ལ། །ལོགས་བརྒྱད་རྒྱ་མདུད་གཉིས་ལྡན་པ། །མགོ་བོར་ནོར་བུ་མེ་འབར་བ། །རྡོ་རྗེ་རྩེ་མོ་ཕུར་བུའི་དབལ། །ཁ་དོག་སྨུག་པོ་ཡང་ན་གནག །ཕྱོགས་བརྒྱད་ལྷ་སྲིན་སྡེ་བརྒྱད་ཀྱི། །སྲོག་སྙིང་དྲག་སྔགས་བཅས་པ་གཞུག །ཅེས་དང་། ཡང་ཁ་ཅིག སྟོད་ལ་ཁྱུང་སོགས་འདབ་ཆགས་དང་། སྐེད་པར་འབྲུག སྨད་ལ་སྟག་གཟིག་གི་རི་མོ་འབྲི་བར་ཡང་བཤད་དོ། །

སྦ་འཁར།

སྦ་འཁར་འདི། རྣལ་འབྱོར་བ་སྤྱི་དང་། བྱེ་བྲག་བྱ་བྲལ་བ་དག་གི་ཕྱག་རྟེན་ཡིན་ལ། འདི་རྒྱ་བོད་གཉིས་ཀྱི་མཁས་གྲུབ་དག་ལ་དར་སོ་ཆེ་བ་ཡིན། ཕྱག་འཁར་དེ་ཨ་ཀ་རུ་སོགས་ལས་བྱས་པའང་ཡོད་དེ། སློབ་དཔོན་པད་འབྱུང་རྒྱ་གར་ནས་ཕེབས་དུས་སུ་ཕྱག་མཁར་ཞིག་བསྣམས་ཡོད་པར་བཤད་པ་དང་། ད་དུང་པད་འབྱུང་གིས་ཆུ་ཤིང་ནག་པོའི་ཕྱག་འཁར་དེ་གྲུ་མོ་གཡོན་དུ་འཆང་བ་ནི་ཆོས་རྣམས་ཐེག་པ་གཅིག་ཏུ་རྫོགས་པའི་བརྡར་གོ་བར་བཤད་པ་དང་། རས་ཆུང་བ་རྒྱ་གར་ལས་ཕྱིར་ལོག་དུས། ཏི་ཕུ་བ་ཡང་རྗེ་བཙུན་ལ་དད་ནས་སྐྱེས་སུ་ཨ་ཀ་རའི་ཕྱག་འཁར་ཞིག་བསྐུར་བར་བཤད་པ་དང་། རྒྱལ་བ་ལོ་རས་པ་དང་འབྲུག་པ་རྒྱལ་དབང་རྗེ་སོགས་གནས་བསྐོར་ལ་ཕེབས་སྐབས། སྦ་སྙུག་བསྣམས་པའི་ལོ་རྒྱུས་ཡོད་པ་དང་། ཆོས་རྗེ་དོན་འགྲུབ་རིན་ཆེན་གྱིས་ཀྱང་ཕྱག་མཁར་བསྣམས་ཏེ་གནས་བསྐོར་ལ་ཕེབས་པས། ད་ལྟ་འང་ཨ་མདོ་རྡོ་འབུམ་སྔོ་རིས་ཀྱི་རྟེན་གཙོ་ཁོང་གི་ཕྱག་མཁར་ཡིན་པ་དང་། ཡང་། དགེ་སློང་སོགས་ཀྱིས་དུག་སྦྲུལ་དང་དུག་སྦྲང་སོགས་ཀྱི་གནོད་པ་བཟློག་ཕྱིར་ཕྱག་འཁར་འཆང་བའང་ཡོད་དེ། དེ་ནི་ཡར་རྩེ་ཏོག་དང་ལྡན་པ་དང། མར་སྣེར་ལྕགས་སོགས་ཀྱི་སྦུ་གུ་བསྐོན་ནས་སིལ་སིལ་གྱི་སྒྲ་འབྱིན་པ་ཞིག་ཡིན་ཏེ། མདོ་རྩ་ལས། དུག་སྦྲུལ་ལ་སོགས་པའི་གཉེན་པོའི་ཕྱིར་འཁར་བ་སྒྲ་དང་བཅས་པ་བཅང་ངོ་། །ཡུ་བའི་རྩ་བ་ནས་གས་ན་སྦུ་གུ་བསྐོན་ནོ། །ཡ་ཏོག་ནི་དཀྲི་བས་སོ། །ཞེས་དང་། འདིར་བྱ་བྲལ་སྤྱི་དང་། མི་ལའི་འཆང་བའི་སྦ་འཁར་གྱི་དབྱིབས་དང་མདོག མཚོན་དོན་སོགས། མི་ལ་རས་པ་ལ་ངན་རྫོང་རས་པས། འོ་ན། རྣལ་འབྱོར་བ་ཁྱེད་རང་གི་ཕྱག་ཏུ་བསྣམས་པའི་སྦ་ལྕག་དེའི་བརྡ་ཅི་ལགས། བྱིས་པའི་རྩེ་མོ་འམ་སྨྱོན་པའི་ལག་ཆ་ལྟ་བུ་འདི་ལ་དོན་ཞིག་ཡོད་ངེས་པས། འདི་ཡི་དོན་འགྲེལ་བར་ཞུ་ཞུས་པས་ལན་དུ། མི་ལའི་རྣམ་མགུར་ལས། འོ་ན། ཡོན་བདག་འདྲི་རྟོགས་མཁན། །ཁྱོད་སྦྱིན་ཤུགས་ཅན་དེ་ཚུར་ཉོན་དང་། །མི་ང་ངོ་ཁྱོད་ཀྱིས་ཤེས་མ་ཤེས། །ང་ངོ་ཁྱོད་ཀྱིས་མ་ཤེས་ན། །ཁོ་བོ་མི་ལ་རས་པ་ཡིན། །ང་དཀའ་བ་སྤྱད་པའི་གང་ཟག་ཡིན། །སྙིང་རུས་བྱས་པའི་སྒོམ་ཆེན་ཡིན། །ཕྱོགས་མེད་སྦྱངས་པའི་རྣལ་འབྱོར་ཡིན། །ངའི་ལག་ན་བཟུང་བའི་སྦ་འཁར་འདི། །དང་བོ་རྒྱ་བྲག་ལོགས་ལ་སྐྱེས། །བར་དུ་རྒྱ་ཟོར་གུག་པས་བརྔས། །ཐ་མ་ཤ་འབྲེང་མཉེན་ལ་དྲགས། །འོང་ནི་ལྷོ་ཁ་མོན་ནས་འོང་། །བཀལ་ནི་ཐེག་ཆེན་མཛོ་ལ་བཀལ། །འགྲིམས་ནི་ཚོང་འདུས་རྣམས་སུ་འགྲིམས། །ཕུལ་ནི་དད་པ་ཅན་གྱིས་ཕུལ། །ད་ལྟ་ང་ཡི་བེར་མ་ལྕག། འདི་དོན་ཁྱོད་ཀྱིས་གོ་མ་གོ། །འདི་དོན་ཁྱོད་ཀྱིས་མ་གོ་ན། །འདི་དོན་བཤད་ཀྱིས་ལེགས་པར་ཉོན། །སྦ་མ་ཐོག་རྩ་བ་བཅད་པ་དེ། །འཁོར་བའི་གཞི་རྩ་བཅད་པའི་རྟགས། །སྦ་ཡ་ཐོག་རྩེ་མོ་བཅད་པ་དེ། །ཐེ་ཚོམ་གོལ་ས་བཅད་པའི་རྟགས། །ཁྲུ་དོ་ཚད་ལ་བོར་བ་དེ། །ཆོས་པའི་ཚད་དོར་བོར་བའི་རྟགས། །སྦ་རྒྱུ་ནས་བཟང་ཞིང་མཉེན་པ་དེ། །གཞི་སེམས་ཉིད་ཡེ་ནས་བཟང་བའི་རྟགས། །སྦ་རྩི་འཇམ་ཁ་དོག་ལེགས་པ་དེ། །སེམས་གཉུག་མའི་དོན་ལ་སྦྱངས་པའི་རྟགས། །སྦ་དྲང་ལ་ལྡེམ་པར་འདུག་པ་དེ། །དོན་མ་ནོར་ཉམས་སུ་ལེན་པའི་རྟགས། །སྦ་ལ་ལུང་སུལ་འདུག་པ་དེ། །བྱང་ཆུབ་རྒྱུན་ལམ་འབྱོངས་པའི་རྟགས། །སྦ་དུམ་བུ་བཞི་རུ་འདུག་པ་དེ། །ཚད་མེད་བཞི་དང་ལྡན་པའི་རྟགས། །སྦ་ལ་ཚིགས་གསུམ་འདུག་པ་དེ། །གཞི་ལ་སྐུ་གསུམ་ཚང་བའི་རྟགས། །སྦ་ཁ་དོག་བསྒྱུར་དུ་མེད་པ་དེ། །གཞི་ཆོས་ཉིད་འགྱུར་བ་མེད་པའི་རྟགས། །སྦ་ཟླུམ་ལ་འགྲིལ་བར་འདུག་པ་དེ། །ཆོས་ཉིད་སྤྲོས་དང་བྲལ་བའི་རྟགས། །སྦ་ཡེ་ནས་དཀར་ཞིང་འཚེར་པ་དེར། །ཆོས་སྐུ་དྲི་མ་མེད་པའི་རྟགས། །སྦ་ལ་སྦུ་གུ་འདུག་པ་དེ། །ཆོས་རྣམས་ཐམས་ཅད་སྟོང་བའི་རྟགས། །སྦ་ལ་སྨེ་བ་འདུག་པ་དེ་། །ཆོས་ཐིག་ལེ་ཉག་ཅིག་གོ་བའི་རྟགས། །ནག་པོ་ཚག་ཚིག་འདུག་པ་དེ། །བོད་ཀྱི་རྣལ་འབྱོར་རས་པ་ལ། །རྣམ་རྟོག་ཕྲ་མོ་ཡོང་བའི་རྟགས། །སྦ་ཆོ་རིས་ཡེ་ནས་བཙུན་པ་དེ། །ཆོས་ཚུལ་བཞིན་ཉམས་སུ་བླངས་པའི་རྟགས། །སྦ་མཛེས་ཤིང་ཡིད་དུ་འོང་བ་དེ། །འགྲོ་བ་དལ་ཅིང་འཛིན་པའི་རྟགས། །སྦ་ཞབས་ལྕགས་ཀྱིས་བསྐོར་བ་དེ། །རྣལ་འབྱོར་རི་ཁྲོད་འགྲིམས་པའི་རྟགས། །འཆང་བཟུང་ཟངས་ཀྱི་དྲིལ་བ་དེ། །ཌཱ་ཀི་དབང་དུ་འདུས་པའི་རྟགས། །སྦ་ལ་ལྕགས་གཟེར་བཏབ་པ་དེ། །རྣལ་འབྱོར་སྙིང་རུས་ཆེ་བའི་རྟགས། །ར་གན་ཨ་ལོང་བཏགས་པ་དེ། །ནང་གི་ཡོན་ཏན་རྒྱས་པའི་རྟགས། །དེ་ལ་ཤ་འབྲེང་བཏགས་པ་དེ། །རྣལ་འབྱོར་ཤེས་པ་མཉེན་པའི་རྟགས། །ལྕག་འབྲས་གཉིས་སུ་སྒྲིལ་བ་དེ། །ཟུང་འཇུག་ལམ་དུ་འཁྱེར་བའི་རྟགས། །ལྕག་འབྲས་མ་བུ་འཛོམས་པ་དེ། །སྐུ་གསུམ་མ་དང་མཇལ་བའི་རྟགས། །རུས་པའི་བློང་མོར་བཏགས་པ་དེ། །རྣལ་འབྱོར་རྒྱལ་ཁམས་བསྐོར་བའི་རྟགས། །མེ་ལྕགས་ཁུག་མ་བཏགས་པ་དེ། །ཅི་སྣང་གྲོགས་སུ་འཁྱེར་བའི་རྟགས། །དུང་ལོང་དཀར་བོ་བཏགས་པ་དེ། །ཆོས་ཀྱི་འཁོར་ལོ་བསྐོར་བའི་རྟགས། །གཅན་གཟན་རས་མ་བཏགས་པ་དེ། །ཉམ་ང་བག་ཚ་མེད་པའི་རྟགས། །དེ་ལ་མེ་ལོང་བཏགས་པ་དེ། །རྟོགས་ཚད་ནང་ནས་ཤར་བའི་རྟགས། །སྤུ་གྲི་རྣོན་པོ་བཏགས་པ་དེ། །ཉོན་མོངས་ཟུག་རྔུ་གཅོད་པའི་རྟགས། །ཤེལ་སྒོང་རྡོག་གཅིག་བཏགས་པ་དེ། །བག་ཆགས་དྲི་མ་སྤངས་པའི་རྟགས། །བ་སོའི་ཕྲེང་བ་བཏགས་པ་དེ། །བླ་མ་ཡིད་ལ་འཕྲེང་བའི་རྟགས། །དྲིལ་བུ་གཡེར་ཁ་བཏགས་པ་དེ། །སྙན་པ་ཕྱོགས་བཅུར་སྒྲོགས་པའི་རྟགས། །སྣམ་རས་དཀར་དམར་བཏགས་པ་དེ། །བུ་སློབ་མང་བོ་འཁོར་བའི་རྟགས། །རྣལ་འབྱོར་ལག་ན་མཛེས་པ་དེ། །མི་ནག་ཐབས་ཀྱིས་འདུལ་བའི་རྟགས། །དེ་དོན་གང་ལགས་འདྲི་བ་དེ། །མོས་གུས་བག་ཆགས་ཡོད་པའི་རྟགས། །མི་ཁྱོད་ང་དང་འཕྲད་པ་དེ། །སྔོན་ཆད་སྨོན་ལམ་བཏབ་པའི་རྟགས། །དེ་སྦ་ལྕག་དཀར་བོ་རྟགས་ཀྱི་གླུ། །བརྡ་གོ་བར་གདའ་འམ་ལྷ་མི་ཀུན། །དོན་ཆོས་སུ་བདོག་གོ་དད་གུས་ཀྱིས། །ཁྱེད་ཡུན་དུ་སྐྱིད་ཀྱིས་དམ་ཆོས་མཛོད། །ཅེས་སྦ་ལྕག་དཀར་བོ་ལ་ཆོས་དང་མཐུན་པའི་མཚོན་དོན་སྦྱར་ཏེ་མགུར་གསུངས་པ་འདིས་རྟོགས་ནུས་སོ། །

གཙོད་རྭ།

གཙོད་རྭ་ནི། བྱ་བྲལ་གྱི་རྣལ་འབྱོར་བས་འཆང་སྲོལ་ཡོད་ལ། རྒྱ་གར་དུའང་གྲུབ་ཐོབ་མང་བོའི་བསྣམས་ཡོད་པར་བཤད། འདི་ལ་མིང་གཞན་དུ་ར་རྒྱུག་ཀྱང་ཟེར། དགོས་པ་ནི། དཀྱིལ་འཁོར་དང་། སྒྲུབ་ཁང་། བུམ་པ་འཇོག་པ། ས་འདུལ་རྒྱག་པ་སོགས་ལ་རྭ་འདིས་ཐོག་མར་ས་སློག་ན། གནོད་བྱེད་ཞི་ལ། དཔེར་ན། བཻ་དཀར་ལས་བཤད་པའི་ཕྱིའི་ས་དགྲ་སོ་བདུན། ནང་གི་ས་དགྲ་བཅུ་གཅིག ཕྱི་ནང་འབྲེལ་བའི་ས་དགྲ་བཅུ་བདུན་སོགས་ཟློག་ཅིང་། སླད་ཆད་བཀྲ་ཤིས་པར་བཤད། མི་ལ་རས་པས་ཀྱང་། ར་རྒྱུག་འདི་ཕྱག་ཏུ་བསྣམས་ཡོད་དེ། ཁོང་གི་མགུར་གླུ་ལས། ར་རྒྱུག་མདའ་གང་སོར་བཅུ་བ། །དང་བོ་གང་དང་གང་ནས་ཡོང། །བྱང་ཕྱོགས་ནོར་ལྷའི་ཕྱོགས་ནས་འོང་། །ནོར་ལྷའི་ཕྱོགས་ནས་འོང་བ་དེ། །ང་ཆོག་ཤེས་ནོར་དང་ལྡན་པའི་བརྡ། །སེམས་ཅན་གཙོད་ཀྱི་མགོ་ལ་སྐྱེས། །ཞེས་སོགས་མཚོན་དོན་མང་དུ་གསུངས་ཡོད་དོ། །

ལྔ་བ། ཡོ་བྱད་ཕྲན་ཚེགས་ཀྱི་སྐོར།
ཀཱ་པ་ལ།

༡ ཐོད་པ་ངན་པར་བརྟག་ཚུལ། རྒྱུད་ཡེ་ཤེས་རྔམ་གློག་ལས། ཡང་ན་བུམ་པའི་སྐྱིན་པ་རུ། །ཟླ་བ་ཉི་མ་དྲི་ཆུ་དང་། །བརྡུང་བ་རབ་ཏུ་སྣུམ་པོ་དང་། །དབང་བོ་ཀུན་ནས་འབྱུང་བ་རྣམས། །ཤ་སྲང་གཅིག་གིས་རབ་བསྲེས་པའི། །གང་བའི་བྷན་དྷ་དེ་བཞིན་བཞག། ཅེས་པ་ནི་ཐོད་པ་སྟེ། ཀཱ་པ་ལ་ཞེས་པ་ལེགས་སྦྱར་སྐད་དང་། བོད་སྐད་དུ་བདེ་བ་སྐྱོང་བ་ཟེར། དེ་ཡང་ཧེ་རུ་ཀ་གལ་བོ་ལས། བླང་བར་བྱ་བའི་སྣོད་ནི་གང་། །སྤང་བར་བྱ་བ་ཇི་བཞིན་དུ། །མཚན་ཉིད་རྣམ་པ་དུ་ཞིག་མཆིས། །སྤྱད་པར་བྱ་བ་དུ་ཞིག་མཆིས། །ཞེས་པ་ལྟར། ཀཱ་པ་ལར་བརྟག་པར་བྱ་བ་མང་ཞིག་མཆིས་ལ།

ཐོད་པ་ངན་པ་ནི་འདི་ལྟ་སྟེ། ཡ་ཡོ་གྱ་གྱོག་མང་བ། འཇོང་ནར་དང་། ཕྱོགས་གཅིག་གཞོམ་པ། སྟོད་སྨད་ཆེ་ཆུང་ཡོད་ལ་རྟོལ་ལ་ཁད་པ། སྲུབས་ཀ་རྩེག་ཅིང་དུམ་བུ་མང་བ། བྱ་དང་ཁྱི། སྲིན་བུའི་རྗེས་མང་བ། ཧོམ་ཁུང་བྲུས་པ་དང་བྱི་བ་དང་འབུ་སྲིན་གྱིས་ཟོས་པ་འདྲ་བ། སྦྲུལ་དང་སྦལ་ལྕོང་། སྡོམ་སྡིག ཝ་དང་ཅེ་སྤྱང་སོགས་མི་ཤིས་པའི་སྲོག་ཆགས་ཀྱི་གཟུགས་རིས། ལྗོན་ཤིང་ཧ་ཅང་བསྐམས་པ། མཐོང་བ་ཙམ་གྱིས་ཡིད་མི་དགའ་བ་སོགས་ནི་ཐོད་པ་ངན་པ་ཡིན་ལ། དེ་ལ་དམ་སྲི་མནན་པའི་རྫས་ཟེར། ཐོད་པ་འདི་དག་འཆང་ན། ནད་དང་གོད་ཁ་སྨྲས་དང་འཐབ་རྩོད་འོང་ལ། ལྷག་པར་ནོར་ལ་གནོད་པའི་འཆང་མི་རུང་ངོ་། གཞན་ཡང་། ལྕགས་ཀྱུ་དང་ཞགས་པ་ལྕགས་སྒྲོག་དབྱུག་ཐོ་རལ་གྲི་དགྲ་སྟ་སྟེ་སྐྱོན་ཅན་གྱི་རི་མོ་དྲུག་དང་། རྩེ་གསུམ་དང་ཁྲོ་བོའི་དབྱིབས་འདྲ་བ། ཡ་མ་རཱ་ཛའི་ཡི་གེ་དོད་པ་སོགས་ཐོད་ངན་གྱི་རིགས་སུས་འཆང་ན་འཆི་བདག་གི་དྲུང་དུ་ཉེ་བར་གནས་ལ། ཡང་། གཤིན་རྗེ་གཤེད་ཀྱི་འཕྲུལ་འཁོར་བཞག་པའམ། འཆི་བདག་ཞལ་དབྱེ་སོགས་ཀྱི་དྲག་རྫས་ལ་མཁོའོ། །

ཡང་། བུད་མེད་ཀྱི་ཐོད་པ་ནི། སྲབ་ཞིང་ཚངས་བུག་མེད་པ། སྲུབས་ལྷོད་ལ་རྣ་བའི་ངོས་གཉིས་སྲབ་པ། སྔོ་དཀར་དམར་གསུམ་གྱིས་མདོག་འདྲེས་པ། ལྗོན་ཤིང་དང་དཔག་བསམ་ཤིང་གཉིས་རུས་པའི་ནང་དུ་ཐིམ་པ་དང་། སྐྱེས་བུའི་དྲི་ཆུས་བཀང་ལ་རེག་པ་སོགས་ནི་བུད་མེད་ཀྱི་ཐོད་པ﹙སྐབས་འདིར་བསྟན་བུད་མེད་ཀྱི་ཐོད་པ་ཞེས་པ་ཐོད་པ་རིགས་ཕྱེ་བའི་ཚེ་ཕོ་མོ་གང་ཡིན་ཡང་ཐོད་པ་བོངས་ཆེ་ཆུང་སྲབ་ལ་མདོག་ངན་པ་དེ་ལ་བྱའོ། །﹚ཡིན་པས། ཡོན་ཏན་མང་བོ་ལྡན་ཡང་། ཤིས་པའི་སྣོད་དུ་མི་འགྱུར་ཞིང་། མཁའ་འགྲོ་དགའ་བར་བྱེད་པ་མ་ཡིན་པས། སྔགས་པས་འཆང་བར་མི་བྱའོ། །འཇུ་མི་ཕམ་གྱི་ཐོད་བརྟག་ནོར་བུ་ལག་སྟེར་ལས་ཐོད་པའི་མཚན་མ་ངན་པ་བཅུ་དྲུག་ཀྱང་གསུངས﹙མི་ཕམ་གསུང་འབུམ་ལྕགས་པར་པོད་བཅུ་དགུ་བའི་ཤོག་གྲངས༣༠༠﹚ལ་དེར་བལྟ་བར་བྱའོ། །

བུ་གའི་དབང་དུ་བཏང་ན། བུ་ག་མེད་དང་མང་བ་ནི། །མཁས་པས་ཤིན་ཏུ་སྤང་བར་བྱ། །ཞེས་པ་ལྟར། ཚངས་བུག་མེད་པ་ལ་ཐོད་ལྐུགས་ཟེར་ཏེ་བདུད་རིགས་ཀྱི་ཐོད་པ་ཡིན་པས། བཟང་བརྒྱ་ངན་གཅིག་གིས་འཇོམས་པ་ཟེར་ལ། འཆང་མི་རུང་། དབང་སྡུད་ཀྱི་སྐབས་སུ་མཁོ་བ་ཡོད། ཚངས་བུག་ཞོ་འཛག་ནུས་པ་ཧ་རེ་ཡོད་ན། སུས་འཆང་རུང་མཁའ་སྤྱོད་འགྲུབ། མདུན་དུ་ཚངས་བུག་གཉིས་དང་རྒྱབ་ཏུ་གསུམ་བྱུང་ནའང་དངོས་གྲུབ་འགྲུབ།

རུས་པའི་སྲབ་མཐུག་ནི། རུས་པའི་རྒྱུ་སྲ་མཁྲེགས་དང་ལྗིད་ལྡན་བཟང་། སྤྱིར་སྲབ་མཐུག་ཁོད་སྙོམས་ལས། མདུན་ངོས་རང་ས་མཐུག་ཅིང་ལྟག་པ་དགྲ་ས་སྲབ་ན་ཧ་ཅང་ལེགས། དེ་ལས་ལྡོག་ན་ངན། བར་གྱི་ལྷ་བ་ཆུང་ཞིང་རུས་པ་ཆེ་ན་བཟང་། ལྡོག་ན་ངན། ལྷ་བའི་ཟམ་པ་བརྒྱུད་མར་འཁོར་ན་མཆོག་ཏུ་ལེགས་སོ། །

རྣལ་ཐོད་ནི། ཕ་དང་བུ་མོ་འམ་མིང་སྲིང་འགྲོགས་ཏེ་སྐྱེས་པའི་རྣལ་ཕྲུག་གི་ཐོད་པ་ཡིན་ལ། རྟགས་ནི། ལྟག་མགོ་ནས་དཔྲལ་བའི་བར་སྲུབ་མ་ཆད་པར་ཡོད་པ་ཡིན། དེ་ནི་གྲིབ་རྫས་ཡིན་པས། དངོས་གྲུབ་སྒྲུབ་པའི་གེགས་ཏེ། ཤིས་པའི་སྣོད་དུ་མི་འགྱུར་བས་སྤང་བྱའོ། །འོན་ཀྱང་མ་མོའི་དམ་རྫས་ཁྱད་པར་ཅན་ནོ། །

 ༢ ཐོད་པ་བཟང་བོར་བརྟག་ཚུལ། དཀར་ན་དུང་འཚེར་བ་འདྲ་བ། སེར་ན་གསེར་དང་འདྲ་བ། ཟླུམ་ཞིང་སྣུམ་ལ་མཆོད་ཀོང་འདྲ་བ། ཡ་ཡོ་མེད་པ་ནོར་བུ་འདྲ་བ། སྲབ་མཐུག་སྙོམས་ལ་ལྟོ་བ་ཆུང་བ། མཚོག་མ་རིང་ལ་རྣོ་བ་མཁའ་ལྡིང་གི་མཆུ་དང་སྟག་སེན་འདྲ་བ། མཁྲེགས་ཤིང་ལྕི་ལ་རྡོ་བ་འདྲ་བ། འཇམ་ཞིང་འོད་འཚེར་བ། ཚངས་བུག་གཉིས་ལྷག་མིན་ལ་གསལ་བ། འདོད་འཇོའི་བ་དང་གང་གཱའི་ཀླུང་གསལ་ཞིང་རིང་ལ་ཟབ་པ། ལྗོན་ཤིང་གཞོན་ལ་ལོ་འདབ་རྒྱས་པ། མེ་ཏོག་དང་འབྲས་བུ་གང་བུ་ཆགས་པ། ཨཱཿསོགས་ཡིག་འབྲུ་དང་། རལ་གྲི་སོགས་མཚོན་ཆ། བཀྲ་ཤིས་རྟགས་བརྒྱད་སོགས་ཀྱི་རི་མོ་ཡོད་ན། མཆོག་ཏུ་བཟང་བའི་ཐོད་པ་ཡིན། པད་དཀར་ཆུན་པོ་ལས། རྡོ་ལྟར་མཁྲེགས་ཤིང་གསེར་ལྟར་བརྗིད་པ། མཐོང་བ་ཙམ་གྱིས་ཡིད་སྤྲོ་བའི་ཁྱད་ཆོས་གསུམ་དང་ལྡན་ན། མཐོང་མ་ཐག་བླང་ཆོག་པར་གསུངས་པ་དང། མཁས་གྲུབ་རྗེས། དཔྲལ་བའི་དབུས་སུ་ཉི་མའི་གཟུགས་བརྙན་ཡོད་ན། བདེ་སྐྱིད་ཀྱི་ཉི་མ་འཆར་བར་བཤད་ལ། གཞན་ཡང་སྲུབ་ཀ་གཏན་ནས་མེད་པའམ། སྲུབ་སོར་གང་ཙམ་ལས་མེད་པ་ནི་ཐོད་ཕོར་མཆོག་སྟེ། རྣལ་འབྱོར་བ་ཡིས་རྟག་ཏུ་འཆང་ཞིང་། བཞེད་དོན་འགྲུབ་པར་ཐེ་ཚོམ་མེད་དོ། །དེ་ལས་གཞན། ཐོད་པ་འཇམ་ན་མི་ཁ་བྱམས། ལྗིད་ན་བསོད་ནམས་འཕེལ། དབྱིབས་ལེགས་ན་ནོར་འདུ། གཏིང་ཟབ་ན་ཟས་འདུ། མཐུག་ཅིང་ཁོད་སྙོམས་ན་ལོངས་སྤྱོད་བརྟན། དྭངས་ཤིང་མཁྲེགས་ན་ཆོས་འཕེལ། ནང་གི་རི་མོ་རྒྱས་ན་ཆོས་སྲིད་འཕེལ། ཚངས་བུག་དྲང་ན་མི་བརྒྱུད་དང་ཤེས་རབ་འཕེལ། འབུར་ཕྱི་དང་ཀོང་ནང་ན་ཡོད་པ། རྒྱང་བཀྱེད་ན་རྩུབ་ལ་ངར་ཆེ་བ། བཏུད་ཏེ་བལྟས་ན་སྲ་འཇམ་འོད་ཆེ་བ་དེ་བཟང་། མཚན་ལྡན་ཐོད་པ་རྣམས་ནི་རང་གི་བསོད་ནམས་འཕེལ་འགྲིབ་དང་བསྟུན་ཏེ། མདོག་དང་རི་མོ་འགྱུར་ལྡོག་ཡོད་པར་བཤད་ལ། གཞན་ཐོད་པ་མཆོག་རྣམས་ས་སྤར་ཏེ་འགྲོ་བ། ཏོག་ཏོག་གི་སྒྲ་གྲག་པ། མཚན་མོ་མེ་འོད་འཕྲོ་བ་སོགས་འབྱུང་བར་ཡང་གསུངས་སོ། །སྤྱིར་ན་སྔགས་རྫས་གྲུབ་རྟགས་སུ། ར་ག་ཨ་སེའི་འགྲུབ་རྟགས་ཚོད་འཛིན་ལས། རྔ་དང་རྔ་ལྕག་ཕྲེང་བ་ལུས་གོས་ལ། །མེ་འབར་སིར་སྒྲ་དང་བཅས་ཚ་ཚ་འཕྲོ། །ནང་མཆོད་ཁོལ་ཞིང་འཕྱུར་དང་རླངས་པ་འབྱུང་། །དམ་རྫས་རིལ་བུ་ཁོལ་དང་འཕེལ་བ་དང་། །སྒྲུབ་ཁང་ཉེ་ལོགས་འཇའ་ཚོན་ཡང་ཡང་ཟུག །སྒྲུབ་ཁང་ནང་དུ་འཇའ་འམ་འཇའ་གུར་ཕུབ། །རོལ་མོའི་སྒྲ་དང་སྔགས་སྒྲ་ཡང་ཡང་ཐོས། །སྔར་དུ་ཡོད་པའི་སྲོ་ཤིག་ཐམས་ཅད་མེད། །ལྕེ་རུ་ཟ་མ་མྱོང་བའི་རོ་མཆོག་མྱོང་། །རྒས་པར་སེའུ་སྐྱེ་དང་སོ་ལ་ནི། །རིང་བསྲེལ་འཕེལ་སོགས་དངོས་སུ་འབྱུང་བ་དང་། །གཏོར་མ་ཞུ་དང་བདུད་རྩི་འབབ་པ་དང་། །གཏོར་མ་བདུད་རྩི་ཞུ་བ་འགྲུབ་པའི་རྟགས། །གསུངས་སོ། །

 ༣ གསོན་པའི་ཚེ་ཐོད་པ་བརྟག་ཚུལ། རིགས་མཐོ་ཞིང་ཆོས་ལྡན་གྱི་ཐོད་པ་བཟང་། རིགས་ངན་ལ་སྡིག་ཅན། བུད་མེད་ཀྱི་ཐོད་པ་ངན། སྐྲ་འཇམ་ཞིང་སྙི་ལ། དཔྲལ་བའི་གདོང་ཆེ་ཞིང་སྨེ་བ་ཡོད་པ། སྨིན་མ་མཐུག་ཅིང་ཡ་རྐན་དཀྱིལ་ན་སོ་ལྷག་ཡོད་པ། ལྕེ་རྩེ་སྣ་ལ་རེག་ཅིང་སྐད་ཕྲ་བ། འགྲོ་ཚེ་རྐང་ལག་གཡོན་སྔོན་དོར་བ་སོགས་བཟང་བར་བཤད་དོ། །

གཞན་ཡང་། ཕོ་མོ་གང་ཡིན་ཡང་གསོན་དུས་སུ་མདོག་སྔོ་ནག་དང་། མིག་ཕུག་ཟབ་པ། སོ་སྐྱ་བ། སྐྲ་སེན་ཆེ་ལ་རྩུབ་པ། སྣ་ཆེ་ཞིང་རྩེ་རྣོ་བ། མཆོག་མ་འབུར་བ། སྨིན་མ་འབྲེལ་ཞིང་རིང་བ། མིག་དཀར་ལ་མཁུར་བ་མཐོ་བ། སོ་ཟོར་བ། མཆེ་བ་རིང་བ། མཆུ་གཡོར་བ་སོགས་ཀྱང་བཟང་བར་བཤད་དོ། །

༤ རོ་ཐོད་ལ་བརྟག་ཚུལ། རྒྱ་མོ་ཐུགས་ཀྱི་གཟར་བུའི་རྒྱུད་ལས། ས་གཞི་ལེགས་པར་མཉམ་ཡུལ་ནི། །ཐམས་ཅད་བྱེ་མའི་གཤོང་དག་ཏུ། །སྔགས་པས་བསྒྲུབ་པ་བྱའོ་དེར། །རོ་དེ་འགྱེལ་བ་ལ་ནི་བརྟག །གསུངས་པ་ལྟར། དང་ཐོག་རོ་སྤྱི་བོར་བསྟན་པ་དུམ་བུ་གཅིག་པ་ཡོང་། དེ་བཞིན་དུ་མདུན་བསྟན་པ་དུམ་བུ་གསུམ་པ། གཡས་གཡོན་བསྟན་པ་དུམ་བུ་གཉིས་པའམ་བཞི་བ། ལྟག་པ་བསྟན་པ་ལ་ཐོད་ངན་དུམ་བུ་དྲུག་པ་སོགས་མང་དུ་འབྱུང་བས་སྤང་བྱའོ། །

༥ ཐོད་པ་རྙེད་དུས་ཀྱི་འབྲས་བཤད། དཔྱིད་གསུམ་དང་ཟླ་སྟོད། སྔ་དྲོར་ཐོད་པ་རྙེད་ན། ནད་དང་སྡུག་བསྔལ་ཁ་སྨྲས་ཞི། དབྱར་གསུམ་དང་ཟླ་སྟོད་ཉིན་ཕྱེད་རྙེད་ན་ཟས་ནོར་ལོངས་སྤྱོད་འཕེལ། སྟོན་གསུམ་དང་ཟླ་སྨད་ཕྱི་དྲོར་རྙེད་ན། མི་ནོར་ཟས་གསུམ་དབང་དུ་སྡུད། དགུན་གསུམ་མམ་སྲོད་དང་ནམ་སྟོད་རྙེད་ན་མཐུ་ནུས་དབང་ཐང་རྒྱས་སོ། །

༦ རྙེད་ཡུལ་ལ་བརྟེན་པའི་འབྲས་བཤད། ནགས་ཁྲོད་ནས་རྙེད་ན། རིགས་རྒྱུད་འཕེལ། གྲོང་ཡུལ་ནས་རྙེད་ན་གྲོགས་མང་འབྱུང་། རི་རྩེ་ནས་རྙེད་ན་དབང་ཕྱུག་ལྡན། དུར་ཁྲོད་ནས་རྙེད་ན་ནུས་པ་འཐོབ། བྱ་དང་གཅན་གཟན་གྱི་ཁ་ནས་ལྷུང་ན་རྟག་ཏུ་ཟས་ནོར་ལོངས་སྤྱོད་འཕེལ། ཆུ་ཀླུང་ནས་རྙེད་ན་ཡོན་ཏན་འཕེལ་ལོ། །

༧ ཁ་དོག་དང་དབྱིབས་ཀྱི་འབྲས་བཤད། ཐོད་པ་དཀར་བོ་དང་ཟླུམ་པོས་ནད་དང་སྡུག་བསྔལ་ཞི། སེར་བོ་དང་གྲུ་བཞིས་འཁོར་དང་ལོངས་སྤྱོད་རྒྱས། དམར་བོ་དང་ཟླ་གམ་གྱིས་མི་ནོར་དབང་དུ་སྡུད། ལྗང་དང་ནག་པོ་ཟུར་གསུམ་གྱིས་མངོན་སྤྱོད་འགྲུབ་བོ། །སྡོམ་འབྱུང་ལས། སེར་དང་དེ་བཞིན་སེར་སྐྱ་སྟེ། །ཐལ་བའི་མདོག་དང་མདོག་ངན་དང་། །སྣ་ཚོགས་མདོག་ཏུ་རབ་ཏུ་གྲགས། །ལྷག་པ་དམན་དང་ཐ་མ་སྟེ། །ཞེས་སོ། །

གཞན་ཡང་། ཀུན་འདུས་རིག་པ་ལས། དཀར་བོར་རི་ལྕང་ལོ་ཅན་དང་། །འདི་དག་རྟག་ཏུ་སུས་འཆང་བ། །འདོད་དོན་ཐམས་ཅད་འགྲུབ་པ་སྟེ། །རྒོལ་བ་ཐམས་ཅད་འཇོམས་པར་ནུས། །ཡིད་བཞིན་ནོར་བུ་ཇི་འདྲ་བར། །དེ་ཡི་ཡོན་ཏན་འདི་ལས་བྱུང་། །ཞེས་དང་། ཧེ་རུ་ཀ་སྙིང་རྗེ་རོལ་བ་ལས། དུང་དང་ཀུན་ཟླ་འདྲ་བའི་མདོག། སྣུམ་ལ་མཉམ་དུ་སྡུག་པ་ནི། །སྔགས་རྣམས་ཐམས་ཅད་འགྲུབ་སྟེར་ཡིན། །དབང་ཕྱུག་ཆེན་པོ་ཤེས་པར་བྱ། །ཞེས་དང་། སྦྲང་རྩི་སེར་སྐྱའི་མདོག་འདྲ་བའི། །ཞི་བའི་ཐིག་ལེའི་རྣམ་པར་བརྒྱན། །ཁྱབ་འཇུག་པ་ཡི་སྣོད་ཡིན་ཏེ། །ཟུག་རྔུ་དགྲ་རྣམས་འཇོམས་པར་བྱེད། །ཅེས་དང་། ཡང་ཁལ་ཁ་དམ་རྡོར་གྱིས། བྲམ་ཟེ་ཁ་དོག་དམར། རྒྱལ་རིགས་དཀར་ཞེས་སོགས་ཀྱི་ཐ་སྙད་ཡོད་པ་དང་མཐུན་པར་མཛད་དེ། ཐོད་པ་དཀར་བོ་བྲམ་ཟེའི་རིགས་ཀྱི་ཐོད་པ། དཀར་བོ་དམར་མདངས་ཅན་རྒྱལ་རིགས། སེར་བོ་དང་དམར་སེར་གཉིས་རྗེ་རིགས། ལྗང་ཁུ་དམངས་རིགས། ཐལ་མདོག་སོགས་ནི་གདོལ་བའི་རིགས་ཀྱི་ཐོད་པར་གསུངས་ཤིང་། བྲམ་ཟེ་དང་རྒྱལ་རིགས་རབ། རྗེ་རིགས་འབྲིང་། ལྷག་གཉིས་ཐ་མ་ཡིན་པས་སྤང་བྱའོ། །ལས་སོ་སོ་ལ་བསྔགས་པའི་ཁ་དོག་ཀྱང་། ཁ་དོག་དཀར་བོས་སྔགས་ཀྱི་དངོས་གྲུབ་འགྲུབ། སེར་བོ་དབྱིབས་ཟླུམ་པོས་ནོར་སོགས་རྒྱས་པའི་ལས་འགྲུབ། དམར་བོ་འམ་ཐིག་ལེ་དམར་བོས་མཚན་པ་ནི། དབང་དང་འགུག་པའི་ལས་འགྲུབ། དེ་དག་ཀྱང་མདོག་སྣུམ་ཞིང་ཡིད་དུ་འོང་བ་མཁྲེགས་ཤིང་ལྗིད་པ་ལེགས། བ་ལང་ཁའི་རྣམ་པ་དང་འདྲ་ལ་ཤིན་ཏུ་ཕྲ་ཞིང་ཐིག་ལེ་དཀར་བོས་མཚན་པ་ནི་བསད་ཚད་དབྱེ་བ་སོགས་ལ་བསྔགས་པ་དང་། གཏོར་སྣོད་ལ་ཡང་ལས་དང་མཐུན་པའི་ཐོད་པ་མཆོག་ཏུ་བསྔགས་པར་གསུངས་སོ། །དེ་ཡང་མཁྲིས་ནད་ཅན་གྱི་མདོག་སེར་བོ་དང་གསེར་མདོག དུག་སོགས་ཀྱིས་སྔོན་པོ་དང་གཡུ་མདོག མཛེ་ཐོད་སྨུག་པོ་དང་མཆོང་མདོག་ངན། དེ་དག་མ་ནོར་བར་གཅེས་སོ། །སྐྱ་གོག དམར་གོག སེར་གོག་སོགས་སྣུམ་མདངས་མེད་པ་དང་། སྔོ་སྐྱ། ས་འོག་ཏུ་སོང་བ། མི་སྡུག་པའི་ར་རི་ཡོད་པ། རྩུབ་ལ་མདངས་མེད་པ། གསོབ་ཞིང་ཡང་བ་སོགས་སྤང་བྱའོ། །

དབྱིབས་ཀྱི་དབང་དུ་བཏང་ན། ཧེ་རུ་ཀ་སྙིང་རོལ་ལས། དུང་སྔོ་བ་དག་སྡུག་བསྔལ་ཏེ། །བྱ་རོག་རྗེས་ནི་འཐབ་རྩོད་འགྱུར། །ཉིས་རིམ་གྱིས་ནི་གསོད་པར་འགྱུར། །གླང་བོའི་རྒྱབ་ནི་ནད་དུ་འགྱུར། །ཞེས་དང་། སྡོམ་འབྱུང་ལས། ཁྭ་ཡི་རྐང་འདྲས་རྩོད་པར་འགྱུར། །གཤོང་བུ་གཉིས་པས་རྒུད་པར་འགྱུར། །ཞེས་སོ། །དེ་ལས་གཞན་ཟླུམ་པོ་ཞི་བ། གྲུ་བཞི་རྒྱས་པ། ཟླ་གམ་དབང་། ཟུར་གསུམ་དྲག་པོ། ཟུར་བརྒྱད་པ་མཆོག་གི་ལས་ཀྱི་ཐོད་པ་སྟེ། རིམ་བཞིན་སངས་རྒྱས་སྤྱན་ལ་སོགས་པའི་ཕྱག་མཚན་ནོ། །དབྱིབས་ངན་པ་ནི། ཡོན་པོ་དང་གྲོག་སྐེད་ཁྱུང་མཆུ་དང་ཟ་ལུང་མེད་པ། ཆ་མི་མཉམ་པ་དང་། ཡང་། ཟ་ར་ཚག་འདྲ་ན་བསོད་ནམས་ཀྱི་རྐང་ཚུགས། རང་སའི་ཕྱོགས་སུ་ཁ་གྱེད་ན་བསོད་ནམས་རྒྱ་ཆེ། རིགས་རྒྱུད་ལ་བྱང་ཆུབ་སེམས་དཔའ་སྐྱེ། ནང་དུ་རུབ་ན་བསོད་ནམས་བུལ། གཞན་དོན་མི་འགྲུབ། ཐམས་ཅད་གྱེད་ན་བསོད་ནམས་འབྲིང་། ཁ་ཁྱེར་ཕྱིར་གྱེད་ཅིང་མཐུག་པ། དགྲ་ས་སྲབ་ཅིང་ནང་དུ་རུབ་པ་བཟང་། རྣ་ལྟག་ཏུ་རུས་ལྷན་བྱུང་ན་གཞན་གྱིས་མགོ་འདོགས། དེ་ཡང་རང་སར་རང་འདོགས། དགྲ་སར་དགྲ་འདོགས། མཚམས་སུ་ཡོད་ན་གཉིས་ཀ་ལ་འདོགས། རང་སའི་ཁ་ཁྱེར་ལ་བུག་པ་མང་ན་འཁོར་གྱི་ནང་ནས་དགྲ་ལྡང་ཞིང་བོར་སྟོར་འོང་། བུ་ཚ་བུད་མེད་འཁོར་འདབ་ཀྱི་སར་བྱུང་ནའང་དེ་དག་ངན། དགྲ་སར་དགྲ་ལ་འོང་། ཁ་ཁྱེར་གྱི་སྟེང་རི་མོ་གཞུ་བརྡུང་བ་འདྲ་ན་རླུང་འདུ་བའོ། །གཞན་ཡང་། བདེ་མཆོག་སྡོམ་འབྱུང་སོགས་ལས་ཀྱང་། མདོག་དབྱིབས་དང་ཁྱད་ནུས་སོགས་མང་དུ་གསུངས་ཡོད་ཀྱང་འདིར་མ་སྤྲོས་སོ། །

༨ ཐོད་པར་གྱི་མགོ་གང་བསྟན་གྱི་འབྲས་བཤད། ཤར་སོགས་ཕྱོགས་བཞི་ལ་བལྟས་ན་རིམ་བཞིན་ལས་བཞིའི་དངོས་གྲུབ་འགྲུབ། མཚམས་བཞིར་བལྟས་ན་དྲག་པོ་འགྲུབ། གན་རྐྱལ་གྱིས་དབང་ཐང་ལྡན། ཁ་བུབ་ཀྱིས་ནད་མེད་ལོངས་སྤྱོད་འབྱུང་། ལུས་མེད་མགོ་བོ་གཅིག་པུ་རྙེད་ན། དགྲ་མེད་ཆོས་ཀྱིས་བདེ་བར་འཚོའོ། །

༩ དུམ་བུའི་གྲངས་ཀྱི་འབྲས་བཤད། ཐོད་པ་གླིང་གཅིག་ཅན་ས་ལ་དབང་། གཉིས་ཅན་འདོད་ཁམས་ལ་དབང་། གསུམ་ཅན་ནོར་ལ་དབང་། བཞི་ཅན་ཆོས་ལ་དབང་། ལྔ་ཅན་རིགས་རྒྱུད་འཕེལ་ལ། ཡོན་ཏན་མེད་ཀྱང་སློབ་དཔོན་བྱེད། དུམ་བུ་དྲུག་ལས་མང་བ་སོགས་རང་གཞན་འཕུང་བྱེད་དུ་གསུངས་པ་དང་། ཧེ་རུ་ཀ་སྙིང་རྗེ་རོལ་བ་ལས། དུམ་བུ་གཅིག་པ་ས་ལ་དབང་། །གཉིས་པ་དེ་ནི་རྒྱལ་ཕྲན་གྱུར། །གསུམ་པ་དེ་ཡང་ནོར་ལ་དབང་། །བཞི་བ་དེ་ཡང་སྔགས་འགྲུབ་འགྱུར། །ལྔ་བ་དེ་ཡང་ཆོས་ཀྱང་འགྲུབ། །དྲུག་པ་དེ་ནི་སློང་བ་ཡིན། །བདུན་པ་དེ་ནི་བརྟུལ་ཞུགས་སོ། །བརྒྱད་པ་ཡོངས་སུ་སྤང་བར་བྱ། །ཞེས་དང་། བདེ་མཆོག་སྡོམ་འབྱུང་ལས། དུམ་བུ་གཅིག་པ་གནས་ལ་དབང་། །དུམ་བུ་གཉིས་པ་དཀྱིལ་འཁོར་དབང་། །དུམ་གསུམ་སྒྲུབ་པོའི་དངོས་གྲུབ་འགྱུར། །དུམ་བུ་བཞི་བས་སྔགས་དངོས་འགྲུབ། །ལྔ་བ་ཡིས་ནི་ཞི་དང་རྒྱས། །དུམ་དྲུག་སློང་མོ་རྙེད་པར་ཤེས། །དུམ་བུ་བདུན་པས་དབང་དུ་བྱེད། །དངོས་གྲུབ་འགྲུབ་པ་འབྲས་མེད་ཕྱིར། །དེ་བཞིན་དུམ་བུ་བརྒྱད་པ་སྤང་། །ཞེས་ཀྱང་གསུངས་སོ། །

ཡང་། ཁལ་ཁ་དམ་རྡོར་གྱིས། དུམ་བུ་གཅིག་པས་ཡུལ་ཉེར་བཞིར་འགྲོ་བ་ལ་དབང་བ་དང་། ཡང་། འགྲེལ་བར་གནས་ལ་སོགས་པར་འགྲོ་བ་ལ་མི་སྐྱོ་བར་བཤད་པ་དང་། སྨོན་འགྲོ་མར་བ་ལ་སོགས་པའི་ལོ་ཙཱ་བ་ཁ་ཅིག དངོས་གྲུབ་སྒྲུབ་པའི་གནས་སུ་གྱུར་བ་དང་། དུམ་བུ་གཉིས་པས་འགྲེལ་བར་མང་བོ་མཆོད་པར་འགྱུར་བ་དང་། ལོ་ཙཱ་བ་དེ་དག་དཀྱིལ་འཁོར་གྱི་བདག་པོ་ལ་དབང་བར་བཤད། གསུམ་པས་གང་འདོད་གྱི་དངོས་གྲུབ་ཕུན་སུམ་ཚོགས་པར་བྱེད། བཞི་བས་སྔགས་ཀྱི་དངོས་གྲུབ་འགྲུབ། ལྔ་བས་ཞི་རྒྱས་ཀྱི་ལས་འགྲུབ། དྲུག་པས་སློང་མོ་རྙེད་པར་འགྱུར། བདུན་པས་དབང་གི་ལས་འགྲུབ། བརྒྱད་པས་ཞི་སོགས་ཀྱི་ལས་གཞན་མི་འགྲུབ་ཅིང་། དྲག་པོའི་ལས་ལ་བླང་བར་བྱ་ལ། དེ་ལས་མང་བ་རྣམས་ནི་ངན་པར་གསུངས་ཤིང་། དུམ་གྲངས་སུ་མ་ཟད་དབྱིབས་དང་ཁ་དོག་གི་མཚན་མ་ངན་པ་ཐམས་ཅད་དྲག་པོའི་ལས་ལ་ཅི་རིགས་པར་སྦྱར་བར་གསུངས་སོ། །

ཡང་། འཇུ་མི་ཕམ་གྱི་ཐོད་བརྟག་ནོར་བུ་ལག་སྟེར་ལས། དུམ་གཅིག་ཆོས་ཐོད། གཉིས་པ་ནོར། གསུམ་པ་མི། བཞི་བ་འབྲུ། ལྔ་བ་ཕྱུགས་འཕེལ་བའི་ཐོད་པར་བཤད། དེ་ཡང་དུམ་བུ་གཅིག་པ་ལ། སྲུབ་གཏན་ནས་མེད་པ་བྱ་མོའི་སྒོ་ང་ལྟ་བུ་དེ་ནི་ཐོད་པ་ཇ་རིལ་ཞེས་ཤིན་ཏུ་བཟང་། སྲུབ་མངོན་ཀྱང་དུམ་བུ་རྣམས་གཅིག་ཏུ་འབྲེལ་བ་ལས་སོ་སོར་མ་ཆད་པ་དེ་ཡང་བཟང་། དུམ་བུ་གཉིས་པ་ལ་བཟང་ངན་གཉིས་ཏེ། གླིང་ལ་ཆེ་ཆུང་བྱུང་ནས་མདུན་ངོས་ཆེ་བ་བྱུང་ན་བཟང་། མཉམ་པར་གཞུང་དུ་སྲུབ་བྱུང་ན་གོང་ལས་གཞན་པ་སྟེ་ངན་ནོ། །དུམ་གསུམ་ལ་རིགས་གསུམ་སྟེ། ལྟག་པ་དང་མཆོག་མ་གཡས་གཡོན་དག་ཏུ་སྲུབ་བྱུང་ན་བཟང་། གླིང་དཀྱིལ་དང་མཚོག་མ་ལྟག་པ་དང་གསུམ་དུ་སྲུབ་བྱུང་ཡང་བཟང་། རྣ་ལྷན་གཉིས་དང་དཀྱིལ་དུ་བྱུང་བའང་བཟང་ངོ་། །གླིང་བཞི་བ་ལ་རིགས་བཞི་སྟེ། །མཐའ་བཞི་བཞི་ཆོད་སྤྲ་ཆོད་བཟང་། །གླིང་ལྔ་བ་ལ་རིགས་ལྔ་སྟེ། །ལྔ་ཚོམ་ལྔ་འདུས་ལྔ་གཤིབ་བཟང་། །སུམ་གཉིས་དང་ནི་ཕྱོགས་ཆོད་ངན། །དུམ་གྲངས་ཕྱེ་ཚུལ་ནི། ལྟག་པ་དང་རྣ་ལྷན་གཉིས་པོའི་དུམ་བུ་མི་བརྩི་བར་ལྷག་མའི་རུས་པ་ལ་ཐོད་པའི་སྲུབ་ཀྱིས་བཅད་ནས་རུས་པ་ཕན་ཚུན་འབྲེལ་མེད་དུམ་གྲངས་དུ་རུ་མངོན་པར་བརྩི་དགོས་ཏེ། ཡུངས་འབྲུ་ཙམ་སོ་སོར་ཆད་པའམ། འཇག་མ་ཙམ་གྱིས་འབྲེལ་ཀྱང་གཅིག་ཏུ་བརྩིའོ། །

༡༠ ཐོད་པའི་རི་མོ་ལ་བརྟག་པ། ཧེ་རུ་ཀ་སྙིང་རྗེ་རོལ་བ་ལས། རི་མོ་རྡོ་རྗེ་འཁོར་ལོ་དང་། །མཆོད་རྟེན་དང་ནི་རིན་པོ་ཆེ། །པདྨ་དང་ནི་ལྗོན་ཤིང་དང་། །དབུས་སུ་བུ་ག་གཉིས་ཡོད་པ། །མདུན་ན་གཤོང་བུ་གསུམ་དང་གཉིས། །གང་དག་རྡོ་རྗེ་མཚན་ཡོད་པ། །དཔལ་དང་ལྡན་པའི་སྣོད་གནས་སོ། །ཞེས་དང་། བདེ་མཆོག་སྡོམ་འབྱུང་ལས། དེ་བཞིན་གླང་བོའི་རྒྱབ་ཀྱི་ནང་། །དབུས་ཀྱི་གནས་སུ་གཞོང་བུ་བཞི། །འདོད་འཇོའི་བར་ནི་བལྟ་བར་བྱ། །མདུན་ཕྱོགས་སུ་ནི་གཤོང་བུ་གཉིས། །ཡིད་བཞིན་ནོར་བུ་ཞེས་བྱར་བཤད། །ཅེས་དང་། གསང་བ་སྒྲུབ་ཐབས་མཚན་ཉིད་ནི། །ཡན་ལག་ཆེས་ཕྲ་མང་བའི་བདག། དཔག་བསམ་ཤིང་ནི་ཡོད་གྱུར་ན། །འདོད་པའི་འབྲས་བུ་འཐོབ་འགྱུར་ཏེ། །སྔགས་པ་དེ་ལ་ཐེ་ཚོམ་མེད། །ཅེས་སོ། །དཔག་བསམ་ཤིང་མིན་ཀྱང་ཡལ་ག་ལོ་མ་རྒྱས་པ་དབྱར་ཤིང་ཞེས་བཟང་། དེ་ལས་ལྡོག་ན་དགུན་ཤིང་ཟེར་ཏེ་ཞན། ཡལ་ག་ལོ་མ་སོགས་ཀྱི་རྩེ་མོ་རང་སར་སྤུངས་པའི་རི་མོ་ཡོད་ན་དཔལ་འབྱོར་འཕེལ་ལོ། །གཞན་ཡང་། ཟ་ལུང་དང་སོག་སྣ་བརྟག་པ་སོགས་ཀྱང་ཡོད་དོ། །

༡༡ གནས་མལ་དགུ་ལ་བརྟག་པ། རང་ས། ལྷ་ས། རྡོ་རྗེ་སློབ་དཔོན་གྱི་ས། སློབ་མའི་ས། ཡོན་བདག་གི་ས། གཟུངས་མའི་ས། ཚེ་འདས་ཀྱི་ས། དུར་ས། དགྲ་ས་སྟེ་དགུ་ལ་གནས་མལ་དགུ་ཟེར་ཞིང་། ཐོད་པའི་ཕྱི་ནང་རུས་འབུར་བྱུང་བ་ལ་རུས་ཁྲ་ཟེར་ལ། རང་སར་བྱུང་ན་ཤིན་ཏུ་བཟང་། ཐོད་ནང་གི་དབུས་སུ་མཛུབ་རྗེས་ལྟ་བུ་བཞི་བྱུང་ན་འདོད་འཇོ་བ་ཡི་ནུ་རྗེས་ཟེར་ཏེ་ཤིན་ཏུ་བཟང་། མདུན་ངོས་སུ་གཤོང་བུ་གཉིས་བྱུང་ན་ཡིད་བཞིན་ནོར་བུ་ཡིན་ཏེ་བཟང་། ཐོད་དབུས་སུ་གཤོང་ནར་གཅིག་གམ་གཉིས་མདུན་ཕྱོགས་སུ་དོད་ན་རྣལ་འབྱོར་བའི་ཟ་ལམ་ཡིན་ཏེ་བཟང་། འདི་རྣམས་འཆང་བས་ཟས་ནོར་ལོངས་སྤྱོད་འཕེལ། མདུན་དང་དཔྲལ་བའི་ནང་གི་རུས་འབུར་དེ་ལ་ཁྱུང་མཆུ་ཟེར། དེ་འབུར་ལ་སྣ་རིང་བོར་དོད་ན་རྣལ་འབྱོར་སྲོག་གི་ཀ་བ་ཡིན་ཏེ་བཟང་། ཡང་། མཛུབ་མོ་བཀལ་གཏུབ་ཙམ་བྱུང་ན་ངན་པ་དགུ་ཐུབ་ཟེར་ལ། སྐྱོན་བརྒྱ་ཡོན་ཏན་གཅིག་གིས་ཆོམ་ཞེས་ཤིན་ཏུ་བཟང་། ཁྱུང་མཆུ་མཐུག་ན་བསོད་ནམས་ཆེ། རྣོ་ན་ཤེས་རབ་རྣོ། རྒྱུན་རིང་ན་བསོད་ནམས་རྒྱུན་རིང་། རང་སར་ཐིག་ལེ་ཟླུམ་པོས་བསྐོར་ན་སྐྱིད་ཀྱི་ཉི་མ་ཟེར་ཏེ་བཟང་། ཉི་མ་འཁྱིམ་པ་ལྟ་བུ་བྱུང་ན་ཞག་གི་ཆུ་མིག་ཡིན་ཏེ་བཟང་། གཞན་བཀྲ་ཤིས་ཀྱི་རྫས་དང་། ནས་འབྲུ་དང་། ཁབ་མགོ་ལྟ་བུ་གཤུང་འབུར་གང་རུང་བྱུང་ན་ལེགས། རྡོ་རྗེ་སློབ་དཔོན་གྱི་སར་རིགས་ལྔའི་ཕྱག་མཚན་དང་། སློབ་མའི་སར་མཆོད་པ་རྣམ་ལྔ། ཚེ་འདས་སར་རིགས་དྲུག་གི་ས་བོན། ཡོན་བདག་གི་སར་གླིང་བཞིའི་རི་མོ། གཟུངས་མའི་སར་བཀྲ་ཤིས་རྟགས་བརྒྱད། དུར་སར་རི་མོ་དཀར་བོ་ཁབ་མགོ་ཙམ་འབུར་དོད་དེ་ཚེ་ལམ་བྱུང་ན་བཟང་། དགྲ་སར་ཁུང་སོགས་ངན་པ་བྱུང་ཡང་བཟང་། རང་སར་འཇམ་པ་དང་དགྲ་སར་རྩུབ་ན་ལེགས་སོ། །

 ༡༢ བུ་ག་བརྟག་ཚུལ། བདེ་མཆོག་སྡོམ་འབྱུང་ལས། བུ་ག་གཅིག་པ་བྲམ་ཟེ་འགྱུར། །བུ་ག་གཉིས་པ་རྒྱལ་རིགས་འགྱུར། །བུ་ག་གསུམ་པ་རྗེའུ་རིགས་ཤེས། །བུ་ག་བཞི་བ་དམངས་རིགས་རྣམས། །ཞེས་དང་། བདུད་རྩི་བམ་པོ་བརྒྱད་པ་ལས། ཡང་ན་བྷཎྡ་དཔལ་ལྡན་རྫོགས། །ཟླུམ་ཞིང་འཁྱིལ་བ་པདྨ་འདྲ། །དབུས་ན་བུ་ག་གཅིག་ཡོད་པ། །ཞེས་པ་ལྟར། བུག་གཅིག་ཅན་ནི་རྒྱུད་དུ་མར་ཤིན་ཏུ་ལེགས་པར་གསུངས་སོ། །

དེ་ཡང་བུག་པ་གཅིག་པ་ནི་ཚངས་བུག་ཡིན་ལ། དེ་ལས་མང་བའི་བུ་ག་ནི་རྩའི་སྣེ་མོས་ཐོད་པ་ཕུག་ནས་ཕྱིར་འཐོན་པ་འམ་ཐོན་ལ་ཁད་པའི་བུག་པ་ཡོད་པ་དང་། བུད་མེད་ཀྱི་ཐོད་པ་ལ་ཚངས་བུག་མེད་ཅིང་། ནལ་བུའི་ཐོད་པ་ནི་ཐོད་སྲུབས་སོག་སྣའི་ཐད་ནས་དཔྲལ་བའི་གཞུང་ན་ཡོད་པའོ། །བུ་སྟོན་གྱིས་སམ་ཊིཀ་ལས། རིགས་ངན་རྣ་ལྟག་ཏུ། མ་ནིང་ལ་ལྟག་པར་བུ་ག་ཡོད་ཅིང་། དཔྲལ་བ་དང་རྣ་རྩར་མུ་ཏིག་གི་ཕྲེང་བ་འདྲ་བ་ནི་སྔགས་པའི་ཐོད་པར་གསུངས། བུད་མེད་ཀྱི་ཐོད་པ་སོགས་རང་གི་དངོས་གྲུབ་སྒྲུབ་པ་ལ་སྤང་བྱར་གསུངས་ཀྱི། ལས་སྦྱོར་ལ་ངེས་པར་དགོས་པ་རྒྱུད་སྡེ་རྣམས་ལས་གསུངས་སོ། །

༡༣ སོ་ལ་བརྟག་ཚུལ། སོ་ལྗང་ཁུ་དང་། སེར་བོ་དང་། སྔོ་བ་དང་། ལོགས་སུ་སྐྱེས་པ་དང་། སོ་མེད་པའམ་ཉམས་པ་རྣམས་ངན་ལ། དེ་ཡང་མགོ་བོ་ཚང་བ་ལ་རྟོག་པའི་དབང་དུ་བྱས་པའོ། །

༡༤ ལ་ཉེ་ལ་བརྟག་པ་ནི། བདེ་མཆོག་སྡོམ་འབྱུང་ལས། ས་གཞི་མཉམ་པའི་ཡུལ་རྣམས་སམ། །ཐང་ངམ་བྱེ་མའི་གཤོང་དག་ཏུ། །སྔགས་པས་དེ་ནི་བསྒྲུབས་བྱས་ལ། །དེ་ཡི་ལྷུང་བ་བརྟག་པར་བྱ། །ལྷོ་བལྟས་བྲམ་ཟེ་འཇིགས་པར་འགྱུར། །བདེན་བྲལ་ལྷུང་བའི་བ་ལང་དང་། །རིགས་མེད་པ་དང་རིགས་ངན་འཇིགས། །རླུང་བལྟས་སྔགས་ནི་འཇིགས་པ་སྟེ། །བྱང་དུ་བལྟས་ན་ཕྱུག་པོར་འགྱུར། །དབང་ལྡན་སྔགས་ཀྱི་དངོས་གྲུབ་སྟེ། །བརྟུལ་ཞུགས་རྒྱུན་ནི་ཉམས་པ་མེད། །མེར་བལྟས་ཉེ་བར་འཕྲོག་པ་སྟེ། །དེ་བཞིན་འོག་བལྟས་ཆོམ་རྐུན་མའོ། །སྟེང་བལྟས་གནས་པས་བུད་མེད་འཇོམས། །ལོགས་སུ་ལྷུང་བའི་གཏུམ་མོ་སྟེ། །སྣོད་ཀྱི་མཚན་ཉིད་རྣམ་ཤེས་བྱ། །ཞེས་དང་། ཧེ་རུ་ཀ་སྙིང་རྗེ་རོལ་བ་ལས། ཤིན་ཏུ་མཉམ་པའི་ས་ཕྱོགས་སམ། །སྙི་བ་འམ་ཡང་ན་དུལ་བའི་སར། །སྔགས་ཀྱིས་བཏབ་སྟེ་གནམ་དུ་བསྐྱུར། །ལྷུང་བའི་མཚན་ཉིད་འདི་རིག་བྱ། །ལྷོ་ཕྱོགས་ཁ་བལྟས་བྲམ་ཟེ་མེད། །སྲིན་པོའི་ཕྱོགས་བལྟས་གླང་བོ་སྙོལ། །ནུབ་ཀྱི་ཕྱོགས་བལྟས་རིགས་ངན་ཏེ། །རླུང་གི་ཕྱོགས་བལྟས་གསང་མི་ཐུབ། །བྱང་གི་ཕྱོགས་བལྟས་ཕྱུག་པོར་འགྱུར། །དབང་ལྡན་ཕྱོགས་བལྟས་སྔགས་འགྲུབ་སྟེར། །ཤར་དུ་བལྟས་ན་བདག་ཉིད་གསོད། །མེ་ཡི་ཕྱོགས་བལྟས་ཤེའུ་ཤིང་མེད། །འོག་ཏུ་བལྟས་ན་རྐུན་པོ་སྤྱོད། །སྟེང་དུ་བལྟས་ན་བུད་མེད་གསོད། །གློར་བལྟས་དེ་ནི་རིགས་ངན་ཏེ། །སྣོད་ཀྱི་མཚན་ཉིད་འདི་རྣམས་སོ། །ཞེས་སོ། །

༡༥ ཐོད་པ་ཆེ་ཆུང་གི་ཚད། མཐོ་གང་ལས་ཆེ་བའི་ཐོད་པ་བྱུང་ན་ཚད་ལས་འདས་ཏེ་དཀོན། མཐོ་གང་རབ། མཛུབ་གང་འབྲིང་། མཁྱིད་གང་ཐ་མ་ཡིན། དེ་གསུམ་གང་ཡིན་རུང་མཚན་ཉིད་ལྡན་ན་དངོས་གྲུབ་འབྱུང་། མཚན་ལྡན་ཐོད་པར་ཆུར་སོར་བཅུ་བཞི། ཞེང་སོར་བདུན་ཡིན་ནོ། །

༡༦ ཐོད་པའི་མཚོན་དོན། རྗེ་བཙུན་མི་ལ་རས་པས། ང་རྣལ་འབྱོར་ལག་ན་ཡོད་པ་ཡི། །ཟས་སྣོད་མཚན་ལྡན་ཐོད་པ་འདི། །རིགས་དྲུག་སྐྱེས་བུའི་ཡ་ཐོད་ཡིན། །ལྟ་བ་ཡས་འབུབ་མཚོན་པའི་ཕྱིར། །གླང་ཆེན་དར་གྱི་ཐོག་ནས་ཕུབས། །སྤྱོད་པ་མས་ཡར་འཛེག་པའི་ཕྱིར། །མ་ཐོད་ཁྱོགས་ཀྱིས་གྱེན་ལ་བཏེགས། །སྒོམ་པ་ཉམས་སུ་ལེན་པའི་ཕྱིར། །བར་ན་ཀླད་དཀར་གཡོ་མེད་འཁྱིལ། །དེ་ལྟར་ལྟ་སྤྱོད་སྒོམ་གསུམ་གྱིས། །འཁོར་བའི་གཞི་རྩ་གཅོད་པའི་ཕྱིར། །སྐྲ་མཚམས་ཚད་ལྡན་མཚམས་ནས་བཅད། །སྒྲིབ་གཉིས་བག་ཆགས་སྦྱངས་པའི་ཕྱིར། །ཤ་ལྤགས་རུས་པའི་མཚམས་ནས་བཤུས། །ཉེས་ལྟུང་དྲི་མས་མ་གོས་ཕྱིར། །རུས་པ་དཀར་བོ་དུང་གི་མདོག། གསང་སྔགས་ཟབ་དོན་བདུད་རྩིའི་རྒྱུན། །འཛེད་ཕྱིར་ཁ་ནི་གྱེན་དུ་བསྟན། །དམ་ཚིག་སྡོམ་གསུམ་ཤོར་དོགས་ནས། །རྣལ་འབྱོར་ལག་པས་དམ་དུ་བཟུང་། །ད་དུང་ཉོན་དང་དྲི་རྟོགས་མཁན། །ཐོད་པ་དུམ་བུ་གཅིག་ཡིན་ན། །ཆོས་སྐུ་རོ་གཅིག་མཚོན་པའི་བརྡ། །གལ་ཏེ་དུམ་བུ་གསུམ་ཡིན་ན། །སྐུ་གསུམ་དབྱེར་མེད་མཚོན་པའི་བརྡ། །ཚངས་པའི་བུ་ག་ཡོད་པ་འདི། །ཆོས་སྐུའི་ངང་དུ་འགྲོ་བའི་བརྡ། །ལྗོན་ཤིང་རྒྱས་པའི་རི་མོ་འདི། །སྟུག་པོ་བཀོད་པའི་ཞིང་ཁམས་སུ། །ལོངས་སྤྱོད་སྐུ་རུ་བཞེངས་པའི་བརྡ། །རྒྱ་སྲུབ་རི་མོ་འདྲ་བ་འདི། །སྣ་ཚོགས་སྤྲུལ་སྐུར་འགྱུར་བའི་བརྡ། །རང་སར་ཟུར་བུ་བྱུང་བ་འདི། །ཉོན་མོངས་དགྲ་ལས་རྒྱལ་བའི་བརྡ། །དགྲ་སར་ཟུར་བུ་མེད་པ་དེ། །བདག་འཛིན་དགྲ་བོ་ཐུལ་བའི་བརྡ། །མར་ལ་མཐེབ་མོས་མནན་འདྲ་བའི། །མཐིལ་ན་འདོད་འཇོའི་ནུ་མ་བཞི། །དགོས་འདོད་ཆོས་ཀུན་འབྱུང་བའི་བརྡ། །རྩ་རོ་སྲིན་ཁུང་མེད་པ་འདི། །བར་ཆད་བདུད་ལས་རྒྱལ་བའི་བརྡ། །ཕྱི་ཡི་རྣ་ལྟག་གཉིས་ཀྱི་སྟེང་། །གླང་ཆེན་སྒང་རྒྱབ་འདུག་པ་དེ། །ཐེག་ཆེན་ཁུར་དུ་འཁུར་བའི་བརྡ། །ལྷ་བ་ཅུང་ཟད་འདུག་པ་དེ། །རྣམ་རྟོག་ཕྲ་མོ་འཕྲོ་བའི་བརྡ། །དབྱིབས་ནི་པད་འདབ་འདྲ་བ་འདི། །འཁོར་བ་ཆགས་པ་མེད་པའི་བརྡ། །ཁ་དོག་སྣུམ་ཞིང་འཚེར་བ་འདི། །ཏིང་འཛིན་དྲོད་རྟགས་ལྡན་པའི་བརྡ། །རྣལ་འབྱོར་ལག་ན་བཟུང་བ་འདི། །ཕྱི་རུ་བསོད་སྙོམས་ཟས་ལ་སྤྱོད། །ནང་དུ་བསམ་གཏན་ཟས་ལ་སྤྱོད། །རྣམ་པ་ཀུན་ཏུ་ཟག་མེད་ཀྱི། །བདུད་རྩིས་རྟག་ཏུ་འཚོ་བའི་རྟགས། །དེ་རྣམས་ཕྱི་ཡི་བརྡ་མཚོན་ཙམ། །ཞེས་སོ། །

 ༡༧ ནང་མཆོད་ཀྱི་རཀྟའི་ཡན་ལག་སོ་ལྔ། ༡ མཚལ། ༢ ལི་ཁྲི། ༣ བཙག ༤ སྡོང་རོས། ༥ རྡོ་དྲེག་སྟེ་སའི་རཀྟ་ལྔ། ༦ ཙན་དན་དམར་བོ། ༧ སེང་ལྡེང་། ༨ མཛོ་མོ་ཤིང་། ༩ གོ་ཤིར་ཥ། ༡༠ བཤེར་ཤིང་དམར་བོ་སྟེ་ཤིང་གི་རཀྟ་ལྔ། གོ་ཤི་ཥ་དང་བཤེར་ཤིང་མ་རྙེད་ན། སྟར་བུ་དང་ཀནྟ་རི་དམར་བོ་རུང་བར་བཤད། ༡༡ པདྨ་རཱ་ག ༡༢ བྱུ་རུ། ༡༣ མཚུར་དམར། ༡༤ མེ་ཤེལ། ༡༥ རྡོ་རྒྱུས་དམར་བོ་འམ་སྦལ་རྒྱབ་གང་རུང་སྟེ་རྡོའི་རཀྟ་ལྔ། ༡༦ ཧ་ལོ། ༡༧ ཁུག་ཆུང་། ༡༨ གླང་སྣ། ༡༩ སེ་རྒོད། ༢༠ ལུག་རུ་དམར་བོ་སྟེ་མེ་ཏོག་གི་རཀྟ་ལྔ། ༢༡ ར་མོ་ཤག ༢༢ ཉེ་ཤིང་། ༢༣ སྙ་ལོ། ༢༤ གྲོ་མ། ༢༥ སྙུག་མ་དམར་བོ་སྟེ་རྩྭའི་རཀྟ་ལྔ། ཕྱི་མ་དེ་མདོ་ཁམས་ཀློང་ཐང་སོགས་སུ་སྐྱེས་པའི་ཁྲག་སྙུག་ཟེར་བ་དེའོ། །༢༦ རྒུན་འབྲུམ། ༢༧ རམ་བུ། ༢༨ ཁ་སུར། ༢༩ བ་མཁལ་སྨུག་པོ། ༣༠ སྐྱུ་རུ་ར་སྟེ་འབྲུའི་རཀྟ་ལྔ། ༣༡ རྒྱ་སྐྱེགས། ༣༢ སིན་དྷུ་ར། ༣༣ འབྲི་མོག ༣༤ བུ་རམ། ༣༥ བྲག་ཞུན་སྟེ་རྩིའི་རཀྟ་ལྔ་རྣམས་བསྡོམས་པས་རཀྟ་སོ་ལྔ་བོ་འདི་ནི་རྩ་བ་ཡིན། དེའི་ཡན་ལག་ཏུ་རྫས་སོགས་གང་དམར་གྱི་རིགས་སུ་གྱུར་བ་ཐམས་ཅད་དང་། རིན་པོ་ཆེ་ཟངས་སོགས་རྡོའི་རིགས་དམར་བོ་མང་བོ། ཨུཏླལ་དམར་བོ་དང་ཤང་དྲིལ་དམར་བོ་སོགས་མེ་ཏོག་དམར་བོ་མང་བོ། གཙང་དམར་དང་ས་འདྲེས་དམར་བོའི་རིགས། སྣ་མའི་འབྲས་བུ་དང་འོལ་མོ་སེ་སོགས་འབྲས་བུ་དམར་བོའི་རིགས། འབྲས་དམར་དང་ཁྲེ་དམར་སོགས་འབྲུའི་རིགས། གཞན་ཡང་། སྲོག་ཆགས་ལས་བྱུང་བའི་རཀྟའི་རིགས་མཐའ་དག་གོ།

༡༨ ནང་གི་དཔྱད་པ། མདུན་རང་ས། གཡས་མི་ས། གཡོན་ནོར་ས། རྒྱབ་ཕྱི་ས་སྟེ། ནང་ངོས་འཇམ་པ་འམ། མར་ལ་མཐེབ་བཅགས་བྱས་པ་ལྟ་བུ་བཟང་། ཤིང་ལོ་རབ་ཏུ་རྒྱས་ཤིང་ཡན་ལག་རགས་པ་ཡལ་ག་རང་སར་འཁྱིལ་ཞིང་། འབྲས་ལྟ་བུ་ཕྲུམ་ཕྲུམ་མེ་ཏོག་ལྟ་བུ་ཤར་ན་བཟང་། ཐོད་སྤྲི་མ་རལ་བ་སོགས་བཟང་ངོ་། །

༡༩ ཐོད་པའི་དཔྱད་འབྲས། མདོར་ན་ཐོད་པ་འཇམ་ན་མི་ཁ་བྱམས། བརྗིད་ཆེ་ན་བསོད་ནམས་འཕེལ། དབྱིབས་ལེགས་ན་ནོར་འདུ། གཏིང་ཟབས་ན་ཟས་འདུ། མཐུག་ཅིང་ཁོད་སྙོམས་ན་ལོངས་སྤྱོད་བརྟན། སྲབ་ལ་དྭངས་ཞིང་མཁྲེགས་ན་ཆོས་འཕེལ། ནང་གི་རི་མོ་དྭངས་ཤིང་རྒྱས་ན་འབངས་སྲིད་འཕེལ། ཚངས་བུག་གསང་ན་མི་རྒྱུད་སྐད་ཐོན་པ་འོང་། བལྟས་པ་ཙམ་གྱིས་ཡིད་འོང་དགའ་བ་སོགས་འབྱུང་ན་ཐོད་པ་དེ་ལ་ཡོན་ཏན་མེད་པ་མི་སྲིད་པས་བཅིང་བར་བྱའོ། །

༢༠ ཀཱ་པ་ལའི་དགོས་པ་དང་རྒྱུ་ཆ། ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས། བླ་མ་ལྷ་དང་དཔའ་བོ་དང་རྣལ་འབྱོར་མ་རྣམས་ལ་ཚོགས་ཀྱི་འཁོར་ལོ་དང་། དཔའ་བོའི་སྟོན་མོ། དཀྱིལ་འཁོར་སྒྲུབ་མཆོད་སོགས་དུས་ཁྱད་པར་ཅན་དང་། དུས་ནར་མའི་ཚེ་ཡང་བདག་དང་ལྷ་ལ་སོགས་པ་བདུད་རྩིའི་མཆོད་པས་ཚིམ་པར་བྱེད་པའི་བཏུང་བའི་སྣོད་དང་། ལྷ་དང་མཁའ་འགྲོ་ཆོས་སྐྱོང་འབྱུང་བོ་ལ་སོགས་པ་གཏོར་མས་མཆོད་པའི་སྣོད་རྣལ་འབྱོར་བའི་ལྷུང་བཟེད་ཅེས་གསུངས་པ་ནི་ཐོད་པ་ཡིན་ལ། དེ་ལ་བྱང་སེམས་དཀར་དམར་གྱི་བདུད་རྩི་གང་དུ་འདུ་འཕྲོད་བྱས་པས་བདེ་སྐྱོང་བའི་གནས་ནི་ཕྱག་རྒྱའི་པདྨ་ཡིན་པས་པདྨའི་སྣོད་ཅེས་ཀྱང་བྱ་ལ། ཐོད་པ་མེད་ན་སྡོམ་འབྱུང་བཅོ་ལྔ་བ་ལྟར། མཁར་བ་ཟངས་ལྕགས་གསེར་དངུལ་རྭ་དང་ཤིང་དང་འཇིམ་པ་སོགས་ལས་ཀྱང་ཐོད་པའི་དབྱིབས་ཀྱི་རྣམ་པར་བྱས་ཀྱང་རུང་ལ། ན་རི་ཀེ་ལ་དང་ཉ་ཕྱིས་དང་རུས་སྦལ་གྱི་ཁོག་པས་ཀྱང་རུང་ཞིང་། དེ་རྣམས་ནི་རང་བཞིན་གྱིས་ཐོད་པའི་དབྱིབས་མཐུན་དུ་ཡོད་པས་དེ་ག་རང་གིས་ཆོག་པར་གསུངས་སོ། །

༢༡ ཀ་པཱ་ལ་བཅང་ཚུལ། རྒྱུད་དང་རྒྱ་གཞུང་ཁུངས་མ་རྣམས་ལས་བདུད་རྩི་དང་གཏོར་མ་བྱིན་གྱིས་བརླབས་པའི་སྐབས་སོགས་སུ་རང་རང་གི་ཐོད་པའི་བསྐྱེད་ཆོག་གསུངས་པ་རྣམས་དང་། མ་རྒྱུད་ཀྱི་སྤྱོད་པའི་བརྟུལ་ཞུགས་སྦྱིན་པའི་ཚེ་ཡབ་ཡུམ་གྱི་སྔགས་ལན་གསུམ་གསུམ་བཟླས་ནས་སྦྱིན་པ་དང་། དེའི་ཚེ་ཐོད་པ་བདུད་རྩི་བཀང་བས་བདེ་སྟོང་དབྱེར་མེད་དུ་སྦྱོར་བ་མཚོན་པར་གསུངས་པ་ལྟར་དྲན་པར་བྱས་ཏེ་འཆང་བ་ཙམ་ཞིག་གསུངས་ཀྱི། དེ་ལས་གཞན་པའི་བཅང་ཚུལ་རྒྱས་པར་མ་གསུངས་པས། བཟང་བོ་ལ་དངོས་གྲུབ་འབྱུང་བའི་བཅང་ཐབས། འབྲིང་བོ་འཕྲིན་ལས་སྒྲུབ་པའི་བཅང་ཐབས། ངན་པ་ལ་ཉེས་པ་མི་འབྱུང་བའི་བཅང་ཐབས་སོགས་མང་དུ་སྨྲ་རྒྱུ་ཡོད་དོ། །

༢༢ ཀ་པཱ་ལར་མཆོད་ཚུལ། ཐོད་ནག་གི་རྒྱུད་ལས། ཀ་པཱ་ལ་ནི་མཆོད་ཤེས་ན། །ལོངས་སྤྱོད་ཕུན་སུམ་ཚོགས་པར་འགྱུར། །ཀ་པཱ་ལ་ནི་མ་མཆོད་ན། །ས་འོག་གནས་པའི་གཏེར་དང་འདྲ། །ཞེས་དང་། གཞན་ཡང་། ཐོད་པ་དར་ཚོན་སྣ་ལྔས་དྲིལ། །མཛོད་ཁང་སོགས་ལ་སྦ་བར་བྱ། །དེ་ལྟར་རྒྱུན་ཏུ་མཆོད་པ་ལ། །བརྩོན་པར་བྱས་ན་རྣལ་འབྱོར་བས། །དམ་ཆོས་སྒྲུབ་པའི་བར་ཆད་ཞི། །མཐུན་རྐྱེན་ལེགས་པར་ཚང་བ་དང་། །མཁའ་འགྲོ་མཉེས་ན་མཆོག་ཐུན་གྱི། །དངོས་གྲུབ་མྱུར་དུ་སྩོལ་བར་འགྱུར། །ཞེས་གསུངས་ལ།

མཆོད་པའི་དུས་ནི། ཟླ་བ་གང་ཡིན་གྱི་ཚེས་བརྒྱད་ལ་རབ། དེ་མིན་གཟའ་སྐར་འཕྲོད་སྦྱོར་ཕུན་ཚོགས་ཀྱི་ཉིན། དབེན་གནས་སོགས་བྱིན་ཅན་དང་། གཙང་ཞིང་བཀྲ་ཤིས་པའི་རི་སོགས་ནས། བུ་མོ་གཙང་མས་བླངས་པའི་སས། མནྡལ་པདྨ་བྲིས་ཏེ། སྟེགས་བུ་མཐོ་དམན་ཇི་ལྟར་འཚམས་པའི་སྟེང་། སྣ་ཚོགས་པདྨ་ནི་རྡུལ་ཚོན་སོགས་ཀྱིས་བྲིས། ཐོད་པའི་ནང་དུ་ཤར་དུ་ཨཱཿ ལྷོར་ཧཱུཾ་དང་། ནུབ་ཏུ་སྭཱ བྱང་དུ་ཧཱ། དབུས་སུ་ཨོཾ། ཕྱི་རོལ་གྱི་ཁ་ནས་གཡོན་བསྐོར་དུ་ཨོཾ་དཱེ་ན་རཏྣ་སི་དྡྷི་ས་མ་ཡ་ཨ་ཡུ་ཿཕ་ལ་ཧཱུཾ། ཞེས་པ་འབྲི་བར་བཤད་པའང་ཡོད། ནང་དུ་ཅི་འདོད་སྤེལ་ཚིག་བྲིས། རིན་ཆེན་སྣ་ཚོགས་འབྱོར་ཚད་དང་། དྲི་སྣ་དང་། སྨན་སྣ། འབྲུ་སྣ། ས་སྣ། རྡོ་སྣ། ཤིང་ཐོག གོས་དང་རྟ་ཕྱུགས་སོགས་གཡང་ཅན་གྱི་སྤུ། གཞན་བཀྲ་ཤིས་རྟགས་བརྒྱད་དང་རྒྱལ་སྲིད་སྣ་བདུན། འདོད་ཡོན་ལྔ་སོགས་བྲིས་མ་དང་བླུགས་མ་ཇི་སྙེད་ཀྱིས་བཀང་ལ། མནྡལ་དབུས། མཉྫིའི་སྟེང་དུ་ལེགས་པར་བཞག ཤར་དུ་འོ་ཞོ་དང་། ལྷོར་མར་ཁུ། ནུབ་ཏུ་མངར་གསུམ། བྱང་དུ་ཆང་ཕུད། མཚམས་བཞིར་འབྲུ་སྣ་མེ་ཏོག་བཀྲམས། མཐའ་འཁོར་དུ་ཉེར་སྤྱོད་ཞལ་ཟས་སོགས་མཆོད་པའི་ཡོ་བྱད་ཅི་འབྱོར་དང་། འབྱོར་ན། རྒྱལ་མཚན་བ་དན་བླ་རེ་ཡོད་ན་རབ། དེ་ནས་ཐོད་པའི་དབུས་སུ་གཟུངས་རྡོར་བཞག རང་ཉིད་ཁ་ཤར་བལྟས་ཏེ། སྐྱབས་སེམས་དང་། ཚད་མེད་བཞི། ཡི་དམ་བདག་བསྐྱེད་ཅི་རིགས་བསྒོམ་ནས། མདུན་གྱི་དཀྱིལ་འཁོར་ཐོད་པ་དང་བཅས་སྒྲུབ་ཚུལ་ཆོ་ག་ལྟར་ཉམས་བཞེས་མཛད་ན། ཚེ་དང་ནོར་སྟོབས་དང་དབང་ཕྱུག་སོགས་འགྲུབ་པར་གསུངས་སོ། །གཞན་ཡང་། མི་ཐོད་འདི་བཟའ་བཏུང་གི་སྣོད་དུ་སྤྱོད་པ་ནི། འདི་ཉིད་ཕྱག་ཏུ་འཆང་རེས་ཀྱིས་མི་རྟག་པར་སྐུལ་ཆེད་དང་། ཕུང་བོ་བདག་མེད་སྒོམ་པ་སོགས་ཀྱི་གནད་ཆེ་བར་གསུངས་སོ། །ཀ་པཱ་ལའི་སྐོར་རྒྱས་པར་ཤེས་འདོད་པ་དག་གིས། སངས་གླིང་བླ་མ་དགོངས་འདུས་དང་། མཁས་གྲུབ་ཐམས་ཅད་མཁྱེན་པའི་རྣལ་འབྱོར་རོལ་བའི་དགའ་སྟོན། པད་དཀར་ཆུན་པོ། ཆོས་རྗེ་མི་ཕམ་པའི་གསུང་འདོད་དགུ་འབྱུང་གནས་སོགས་ལས་ཤེས་པར་བྱའོ། །

གཡབ་དར།

གཡབ་དར་གྱི་ཁུངས་ནི། ཀུན་འདུས་རིག་པ་ལས། ཁ་དོག་ལྔ་ཡི་དར་གཡབ་ཀྱིས། །གཡབ་ཞིང་རིག་འཛིན་མང་བོ་འབོད། །རོལ་མོ་ཆ་བྱད་མང་བོ་དག། རྡོ་རྗེ་གར་དང་སྙན་པའི་གླུ། །སྲིད་པའི་མ་མོ་ཀུན་བསྟེན་ཅིང་། །བྱིན་རླབས་ཆེན་པོ་དབབ་པར་བྱ། །ཞེས་པ་ལྟར། ཆོས་སྐྱོང་དང་མ་མོ་སོགས་སྤྱན་འདྲེན་དང་། བྱིན་འབེབས་ལ་མཁོ་བའི་སྔགས་ཆས་ཤིག་ཡིན། །དེ་ཡང་རྡོ་རྗེ་རྩེ་ལྔ་བར་ཁ་དོག་ལྔ་ལྡན་གྱི་དར་བཏགས་པ་དང་། ཆོས་སྐྱོང་དང་མ་མོ་འབོད་བྱེད་ལ། རས་གཞི་ནག་པོ་ལ་གསེར་མཚལ་གང་རུང་གིས། མ་མགོན་སོགས་ཀྱི་འབོད་སྔགས་བྲིས་པ་རྡོ་རྗེ་རྩེ་དགུར་བཏགས་པ་དང་། ཡང་། མི་ལག་གཡས་པའི་སོར་ལྔ་ལ་དར་ཚོན་སྣ་ལྔ་བཏགས་པ་དང། རྡོ་རྗེ་ལ་མི་ལྤགས་ཀྱི་གཡང་གཞི་བཏགས་པ། དྲེད་མོའི་ལག་པ་ལ་གཡང་གཞི་བཏགས་པ་སོགས་སོ། །ཡང་ཆོས་འགའ་ཟུང་ལ་བཟློག་དར་ཞེས་པ་དར་ནག་ཟུར་གསུམ་མཐའ་ཤན་ཅན་དང་། དར་ལྕེ་དམར་བོའི་ངོས་ལ་མཚལ་གྱིས་བྷྱོ་བཟློག་གི་ཡི་གེ་བྲིས་པ་ཞིག་ཀྱང་སྣང་། གཞན་ཡང་། ལྷ་མོ་རེ་མ་ཏི་སྤྱན་འདྲེན་གྱི་གཡབ་དར་ལ། ན་ཆུང་མ་ཆུ་གྲིར་ཤི་བའི་སྲིན་ལག་གཡས་པ་དར་མཐིང་ནག་ལ་བཏགས་ཏེ། དཔའ་བོ་གཡུལ་དུ་དབུགས་ཆད་ཁ་མའི་སྙིང་ཁྲག་གིས་འབོད་སྔགས་བྲིས་པ་དང་། ཁོལ་མོ་རེ་མ་ཏི་འབོད་པ་ལ། དྲེད་མོའི་རལ་བ་དགོས་པར་ཡང་བཤད་དོ། །

ཧོམ་ཁུང་།

ཧོམ་ཁུང་ཟུར་གསུམ་ནི། རྒྱུ་ལྕགས་དང་ས། རྫ་དང་རྡོ་ཤིང་ལས་བཟོས་པ་དང་། ཚད་དང་དབྱིབས་ནི། ཕུར་བ་གསང་རྒྱུད་ལས། གྲུབ་ཁུང་ལས་ཀྱི་དཀྱིལ་འཁོར་ནི། །དཀྱིལ་འཁོར་ཁྲུ་གང་ཙམ་དུ་བྱ། །གྲུ་གསུམ་སུ་བརྩེགས་ཁ་ཁྱེར་ལ། །ཟ་བྱེད་ཞལ་དང་མདའ་གཞུ་བཅས། །མཚོན་ཆ་ལྔ་དང་རྩང་གིས་བསྐོར། །མཐིང་ནག་དར་གྱིས་ཞལ་བཀབ་པའི། །ཞེས་པ་སྟེ། མཚོན་ཆ་ལྔ་ནི། རྡོ་རྗེ། འཁོར་ལོ། རལ་གྲི དབྱུག་ཏོ། རྒྱ་གྲམ་མོ། །ཡང་། རྙིང་རྒྱུད་མགོན་པོ་མཚོན་ཆ་འཁོར་ལོའི་རྒྱུད་ལས། དབུས་ནས་ཁྲུ་གང་གྲུ་གསུམ་ལ། །ཆང་རིས་གསུམ་ལྡན་ཐུར་དུ་བྲུ། །ཐ་མ་ཐོད་པའི་ཕྲེང་བས་བརྒྱན། །དུག་ཤིང་རྩང་དམར་ཉི་ཤུ་བརྒྱད། །རྡོ་རྗེ་འཁོར་ལོ་རལ་གྲི་དང་། །དབྱུག་ཐོ་རྒྱ་གྲམ་རྣམ་པ་ལྔས། །འོག་མ་དག་ལ་བསྐོར་བར་བྱ། །ཞེས་དང་། འགའ་ཞིག་ཧོམ་ཁུང་རིམ་པ་དང་བོའི་ཁ་འཁྱེར་ལ་བྱ་རིགས་དང་། བར་བ་ལ་གཅན་གཟན་ཁྱུང་འབྲུག འོག་མར་མི་རོ་རྟ་རོ། ནང་དམར་ལ་ཕྱི་ནག་པ་མེ་རིས་རི་མོ་དག་བྱེད་དོ། །

བུམ་པ།

༡ བུམ་པའི་རྒྱུ། སྤྱིར་བུམ་པ་ལ་གསུམ་སྟེ། དོན་དམ་ཆོས་ཉིད་ཀྱི་བུམ་པ། འདུས་བྱས་རྟགས་ཀྱི་བུམ་པ། མཚོན་བྱེད་རྫས་ཀྱི་བུམ་པའོ། །དོན་དམ་ཆོས་ཀྱི་བུམ་པ་ནི། ཆོས་ཀྱི་དབྱིངས་དང་རང་རིག་པའི་ཡེ་ཤེས་དབྱེར་མེད་པ་དང་། འདུས་བྱས་རྟགས་ཀྱི་བུམ་པ་ནི་ཕྱིའི་སྣོད་ཀྱི་འཇིག་རྟེན་དང་། ནང་བཅུད་ཀྱི་སྐྱེ་འགྲོའི་གཟུགས་ཕུང་སོགས་ཡིན། འདིར་བཤད་བྱ་ནི་མཚོན་བྱེད་རྫས་ཀྱི་བུམ་པའོ། །དེ་ལ་ཡང་རྒྱུ་སོགས་མང་བོ་ཞིག་ཡོད་པ་ལས། རྒྱུ་ནི། དུར་ཁྲོད་ཁུ་བྱུག་རོལ་བའི་རྒྱུད་ལས། དང་བོ་གསེར་གྱི་བུམ་པར་བཤད། །གཉིས་པ་ཤེལ་དང་དངུལ་གྱི་སྟེ། །གསུམ་པ་བཻཌཱུ་རྱ་ཡིའོ། །བཞི་བ་ཟངས་ཀྱི་བུམ་པར་བཤད། །ལྔ་བ་ལྕགས་ཀྱི་བུམ་པར་བཤད། །དྲུག་པ་ལ་ནི་སྣ་ཚོགས་པའི། །བུམ་པ་གང་བ་བཞག་པར་བྱ། །ཞེས་དང་། ཡེ་ཤེས་རྔམ་གློག་ལས། བུམ་པ་རྣམ་པ་སྣ་ཚོགས་ཀྱི། །གསེར་དང་དངུལ་ལས་བྱས་པའོ། །ཞེས་པ་ལྟར། གསེར་དངུལ་ཟངས་ལྕགས། ར་གན། ལི། ཤེལ། བཻཌཱུ་རྱ། བྱུ་རུ། ཨིནྡྲ་ནི་ལ། པདྨ་རཱ་ག མཆོང་། རྡོ། རྫ། ཤིང་། ཐོད་པ། ས། རིན་པོ་ཆེ་སོགས་གང་ཡང་རུང་བ་དུས་འཁོར་བསྡུས་རྒྱུད། ཟླ་གསང་ཐིག་ལེ། གཙུག་དགུ་སོགས་ལས་བཤད་དོ། །བྱེ་བྲག་ཏུ། དུས་འཁོར་གྱི་དབང་ལེར། ཞི་བ་ལ་ཤེལ། རྒྱས་པར་དངུལ། བསད་པ་ལ་མི་ཐོད། བསྐྲད་དབྱེ་ལ་ལྕགས། དབང་ལ་གསེར། འགུགས་པ་ལ་ཟངས། རངས་པ་ལ་ས། རྨོངས་པ་ལ་ཤིང་གི་བུམ་པའོ། །

༢ བུམ་པའི་དབྱིབས། གཤིན་རྗེ་དགྲ་ནག་གི་རྒྱུད་ལས། ནག་པོ་ར་རི་མེད་པ་ཡི། །བུམ་པ་ལྟོ་ཆེ་བྲེ་ཚད་པ། །མཆུ་འཕྱང་མགྲིན་རིང་གདན་ལྡན་པར། །སྙིང་བོ་ལྡན་པའི་སྨན་སོགས་གཞུག། ཅེས་རྟ་མཆོག་རོལ་བ་སོགས་ལས་འབྱུང་ལ། མདོར་ན་བུམ་པ་ལ། མགྲིན་རིང་ཞིང་ཕྲ་བ། ལྟོ་ལྡིར་བ། མཆུ་འཕྱང་བ། ཞབས་ཞུམ་པ﹙ཁ་ཅིག་འདི་ལ་ཞབས་སྟེགས་མེད་པ་བརྩི་བའང་ཡོད།﹚དང་། ཁ་འཁྱེར་གཡེར་བ་སྟེ། ཁྱད་པར་དྲུག་ཚང་བ་ཡིན་ནོ། །རྡོ་རྗེ་མཁའ་འགྲོ་ལས། བུམ་པ་དག་ནི་བྱ་བ་སྟེ། །རྩ་བ་ནག་པོ་ལ་སོགས་སྤང་། །ཞེས་པའི་རྩ་བ་ནི་ཞབས་སྟེགས་མེད་པ་དང་། ནག་པོ་ནི་དྲི་མའི་ར་རི་སྤང་དགོས་པ་ལ་བཤད་དོ། །

༣ བུམ་པའི་ཁ་དོག མི་གསལ་བ་དང་། ར་རིའི་དྲི་མ་མེད་པ། ཞི་བ་ལ་དཀར་བོ། རྒྱས་པར་སེར་བོ། དབང་ལ་དམར་བོ། མངོན་སྤྱོད་ལ་སྔོན་པོ་བྱ་དགོས་པར། ཁུངས་རིམ་བཞིན་དུས་འཁོར་བསྡུས་རྒྱུད། གཤེད་དམར། དཔུང་བཟང་། བཤད་རྒྱུད་དྲག་པོ་གསུམ་འདུལ་སོགས་སུ་གསུངས་སོ། །

༤ བུམ་པའི་ཚད། སྤྱིར་བཏང་ལ་ལྟོ་བའི་རྒྱར་མཐོ་ལྔ། མགྲིན་པའི་སྲིད་དུ་སོར་བརྒྱད། མགྲིན་པའི་རྡོ་རྗེ་ཁུ་ཚུར་ཤོང་བ། ཁ་འཁྱེར་སོར་བཞི། མཆུ་འཕྱང་ལ་སོར་གཉིས། མཆུ་ཕྱེད་ལ་སོར་བརྒྱད་དུ་གསུངས་ལ། དུས་འཁོར་ལས་ཞི་རྒྱས་གཉིས་ཀྱི་བུམ་ཚད་བྱེ་བྲག་ཏུ་བརྗོད་དེ། བསྡུས་རྒྱུད་ལས། ཟླུམ་པོ་བརྒྱད་གཉིས་སོར་དུ་བརྗོད་དེ་གཉིས་ཀྱིས་བསྒྱུར་བའི་བཅུ་ཡིས་དཔངས་དང་སོར་གཉིས་དག་གི་མཆུ། །དྲུག་ནི་མགྲིན་པ་སོར་བརྒྱད་ཁ་སྟེ་རི་བོང་འཛིན་པ་ལྟར་དཀར་ཞི་རྒྱས་དག་ལའོ་གཞན་ལ་མིན། །ཞེས་དང་། ཀུན་རིག་ཊིཀ་ཆེན་ལས། བུམ་པའི་ཚད་ནི་རྣམ་རྒྱལ་ལ་ལྟོ་བའི་ཐད་ཀའི་རྒྱར་སོར་ཉི་ཤུ། མཐའ་བསྐོར་དུ་མཐོ་ལྔ། མགྲིན་པའི་དཔངས་སོར་བརྒྱད། མཆུའི་འཕྱང་ལ་སོར་གཉིས་པའི་ཚད་ལྡན་མེད་ན་སྦྱིན་བདག་ལ་མི་ཤིས་པས་ཚད་དང་ལྡན་པ་བྱ། གཞན་རྣམས་མ་ངེས་པར་བཤད་དེ། ཀུན་ཀྱང་ནག་པོ་མེད་པ། རྩ་བ་དོར་ཞིང་མ་འབྱར་བ། བུག་པ་དང་། གས་པ་མེད་པ། མཆུ་འཕྱང་ཞིང་། མགྲིན་པ་རིང་བ། གསུས་པ་ཆེ་བ། ཞེས་འདི་སོར་བཞག་འབྱུང་། ཞེས་གསུངས་སོ། །ཞི་བ་ལ་ཤེལ། རྒྱས་པ་ལ་དངུལ། བསད་པ་ལ་མི་ཐོད། བསྐྲད་དབྱེ་ལ་ལྕགས། དབང་ལ་གསེར། འགུགས་པ་ལ་ཟངས། རེངས་པ་ལ་ས། རྨོངས་པ་ལ་ཤིང་གི་བུམ་པ་དང་། དེ་དག་གི་ཚད་ནི་ཞི་རྒྱས་གཉིས་ལྟེ་བའི་རྒྱར་སློབ་དཔོན་གྱི་མཐེབ་སོར་བཅུ་དྲུག ལྟེ་བའི་འོག་ནས་ཁའི་བར་དུ་སོར་ཉི་ཤུ། ཁའི་མཚམས་ནས་འཆང་བའི་མཆུ་ལ་སོར་གཉིས། མགྲིན་པའི་དཔངས་སུ་སོར་དྲུག མཆུའི་མཐའ་ནས་མཆུའི་མཐའི་བར་གྱི་ཁ་ལ་སོར་བརྒྱད་ཡོད་པའི་ཆ་གཉིས་མགུལ་བའི་སྦུབས་སྟོང་དང་། ཆ་གཅིག་གི་ཚད་དུ་གསུངས་ལ། གཞན་ཡང་རྡོ་རྗེ་ཕྲེང་བ་ལས། དབྱེ་བ་དང་བསྐྲད་པ་དག་གི་ལྟོ་བ་ནི་ཟླུམ་པོར་སོར་བཅུ་གཉིས་སོ། །དཔངས་སུ་སོར་ཉི་ཤུ་རྩ་བཞིའོ། །སྐེ་བ་ཡོན་པོ་སྟེ་སོར་བརྒྱད་པའོ། །ཁ་ནི་སོར་དྲུག་གོ། མཆུ་གཉིས་ནི་སོར་རེ་རེའོ། །དབང་དང་འགུག་པ་དག་གི་བུམ་པ་ནི་བཟོ་བོས་ཇི་ལྟར་བྱས་པའོ། །རེངས་པ་ལ་ནི་ཐུང་ཞིང་ཟླུམ་པ་དང་། དཔངས་སུ་སོར་བཅུ་དྲུག་གོ། མགྲིན་པ་ནི་སོར་བཞིའོ། །ཁ་ནི་སོར་དྲུག་གོ། མཆུ་ནི་སྦོམ་ཞིང་སོར་གཉིས་པའོ། །ལས་ཐམས་ཅད་པ་ལ་ཞི་བ་ལ་སོགས་པའི་ལས་ལ་བརྗོད་པའི་བུམ་པ་རྣམས་གཟུང་བར་བྱའོ། །འདི་ནི་དུས་ཀྱི་འཁོར་ལོ་ལས་གསུངས་པའི་ཚད་དོ། །བུམ་པའི་ཚད་མི་འདྲ་བ་མང་བོ་ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་དང་། རྗེ་ཤེས་རབ་རྒྱ་མཚོའི་ཐིག་བཤད་ལག་ལེན་དུ་མའི་སྐོར་གྱི་བརྗེད་བྱང་སོགས་ལས་ཤེས་པར་བྱའོ། །

༥ བུམ་པའི་དབྱེ་བ། རྟེན་གྱི་བུམ་པ་དང་། རྣམ་རྒྱལ་བུམ་པ་དང་། ལས་བུམ་མོ། །ཕྱི་མ་གཉིས་ཀྱི་ཁུངས་ནི། རྡོ་རྗེ་གདེང་བའི་རྒྱུད་ལས། རྣམ་པར་རྒྱལ་བའི་བུམ་པར་ནི། །སྨན་ལ་སོགས་པའི་ལེགས་བཀང་ནས། །རས་ཀྱིས་དཀྲིས་ལ་བཞག་པར་བྱ། །ཞེས་བུམ་རྫས་ཀྱིས་བཀང་ནས་རས་ཀྱིས་དཀྲིས་ཏེ་ཡི་དམ་ལྷའི་དཀྱིལ་འཁོར་སྒོམ་ནས་སློབ་མ་ལ་དབང་བསྐུར་བྱེད་ཡིན་པས། དཀྱིལ་འཁོར་གྱི་དབུས་སུ་འཇོག་དགོས་པ་དང་། ཡང་སྒྱུ་འཕྲུལ་དྲ་བ་ལས། སྒོ་ཡི་ཕྱོགས་ཀྱི་བུམ་པ་ནི། །ལས་ཀུན་བྱེད་པའི་བཟླས་བརྗོད་དོ། །སེམས་ཅན་ཀུན་གྱིས་བསང་གཏོར་བྱ། །ཞེས་ལས་བུམ་ཁྲོ་བོ་སོགས་བསྐྱེད་ནས་གཏོར་མ་དང་། མཆོད་རྫས་སོགས་ལ་བསང་སྦྱངས་ཀྱི་ལས་སྒྲུབ་བྱེད་ཡིན་པས། ལས་བུམ་དཀྱིལ་འཁོར་གྱི་སྒོར་འཇོག་དགོས། གྲངས་ནི་རབ་ལྷ་གྲངས། འབྲིང་དགུ་འམ་ལྔ། ཐ་མ་གཙོ་ལས་གཉིས་སུ་བསྡུས་ཡང་རུང་ངོ་། །ཡང་ལོ་པཎ་བཀའི་ཐང་ཡིག་ལས། དབྱེ་བ་དབང་བསྐུར་རྩ་རྒྱུད་ལས། རྟེན་བྱེད་བུམ་པ་མཚོན་བྱེད་བུམ་པ་དང་། །རང་བཞིན་བུམ་པ་རྣམ་རྒྱལ་བུམ་པ་དང་། །ལས་ཀྱི་བུམ་པ་དང་ནི་ལྔ་རུ་བཤད། །ཅེས་གསུངས་སོ། །

༦ བུམ་པའི་མཚོན་དོན། ཀུན་འདུས་རིག་པ་ལས། བཀྲ་ཤིས་ཆེན་པོའི་བུམ་པ་ནི། །བདེ་གཤེགས་བཞུགས་པའི་ཕོ་བྲང་སྟེ། །དཀྱིལ་འཁོར་རྫོགས་པར་གྱུར་བ་ཡི། །དབང་ཆེན་དེ་ལ་སྦྱིན་པར་བྱ། །ཞེས་པ་ལྟར། ཕྱི་ཚད་གཞལ་ཡས་ཁང་སྟེ་ཕོ་བྲང་དང་། ནང་བཅུད་ཀྱི་བདུད་རྩི་ལྷ་དང་ལྷ་མོའི་རང་བཞིན་དུ་བལྟ་བ་དང་། བྱེ་བྲག་གིས་དབྱེ་ན། ལྟོ་ལྡིར་བས་ཆོས་དབྱིངས་རྒྱ་ཆེ་བ། མཆུ་འཕྱང་བས་གཞན་དོན་མཛད་པ། མགྲིན་པ་ཕྲ་བས། བྱང་ཆུབ་ཀྱི་སེམས་དཔོག་དཀའ་བ། དེ་རིང་བས་ཆོས་ཀྱི་དོན་རྟོགས་དཀའ་བ། ཁ་གཡེར་བས་སྙིང་རྗེས་ཀུན་ལ་ཁྱབ་པ། རྩ་བ་མེད་པས་ཉོན་མོངས་མེད་པ། ཡང་ལྟོ་བ་ཟླུམ་པས་ཆོས་སྐུ། མགྲིན་པས་ལོངས་སྐུ། ཁ་འཁྱེར་གྱིས་སྤྲུལ་སྐུ། མགྲིན་སྦུབས་ནས་བཅུད་འགྲོ་འོང་བྱེད་པས། སངས་རྒྱས་ཀྱིས་འགྲོ་དོན་རྒྱུན་མི་ཆད་པ་མཚོན་ལ། དེ་ལས་གཞན། ཁ་རྒྱན་དཔག་བསམ་ཤིང་གིས་རེ་འདོད་ཡིད་བཞིན་དུ་སྐོང་བ། ཀུ་ཤས་སྡིག་སྒྲིབ་དང་མཚན་རྟོག་འདག་པ། རྨ་སྒྲོས་བླ་མེད་དུ་དུག་ལྔ་མི་སྤང་ལམ་དུ་འཁྱེར་བ། མགུལ་ཆིངས་ཀྱིས་སྐུ་ལྔ་མཚོན་པར་བཤད་དོ། །

ཡང་བུམ་པས་གཞལ་ཡས་ཁང་། ཁ་རྒྱན་དང་མགུལ་ཆིངས་ཀྱིས་རྟ་བབས། གཟུངས་ཐག་གིས་བརྩེ་བ་སྙིང་རྗེ་ཆེན་པོ། སྨན་ལྔས་བྱང་ཆུབ་ཀྱི་སེམས། འབྲུ་ལྔས་ལྷ་ཚོགས་ཀྱི་ཡོན་ཏན་མཚོན་པར་སློབ་དཔོན་ཀུ་ཀུ་རཱ་ཛས་གསུངས་པ་དང་།

ཡང་ཁ་ཅིག བུམ་པ་དང་མགུལ་ཆིངས། གཟུངས་ཐག རྡོ་རྗེ་ཁ་རྒྱན། དུང་ཆོས་བཅས་པ་སྤྲུལ་སྐུ་དང་། བུམ་རྫས་དང་དྲི་ཆུས་བུམ་ཆ་གསུམ་དགོས་པའི་ཆ་གཉིས་གང་བ་ལོངས་སྐུ་དང་། སུམ་ཆའི་ཆ་གཅིག་སྟོང་བར་བཞག་པས་ཆོས་སྐུ། དུང་ཆོས་ཀྱི་སྟེང་གི་རྡོ་རྗེ་ལ་ལྷའི་གཟུགས་བརྙན་སྣང་བ་ངོ་བོ་ཉིད་སྐུ་མཚོན་པར་གསུངས་ལ།

སྔགས་འཆང་རྒྱན་མེ་ལས། མདོར་བསྡུ་ན་སྐུ་གསུམ་མཚོན་བྱེད་བུམ་པ་དེ་ལ་སྐུ་ལྔ་མཚོན་བྱེད་མགུལ་ཆིངས། གསུང་ལྔ་མཚོན་བྱེད་གཟུངས་ཐག ཐུགས་ལྔ་མཚོན་བྱེད་རྡོ་རྗེ། ཡོན་ཏན་ལྔ་མཚོན་བྱེད་དཔག་བསམ་གྱི་ཤིང་། འཕྲིན་ལས་ལྔ་མཚོན་བྱེད་རྨ་བྱའི་མདངས་ཀྱིས་བརྒྱན་པ་སྟེ། འབྲས་བུ་ཆོས་ཉེར་ལྔའང་ཤུགས་ལ་ཚང་བའོ་གསུངས་སོ། །

ཡང་། ཐུན་མིན་བླ་མེད་ཀྱི་རྫས་ཀྱི་མཚོན་དོན་ནི། སངས་རྒྱས་ཐོད་པ་ལས། དྲི་ཆུ་ཡེ་ཤེས་རྡོ་རྗེ་སྟེ། །དྲི་ཆེན་རྡོ་རྗེ་བཟང་བོ་ཉིད། །ཁྲག་ནི་མར་མེ་རྡོ་རྗེ་ཡིན། །ཁུ་བ་རྡོ་རྗེ་ཐབས་བྱུང་ཉིད། །ཤ་ནི་ཆོས་ཀྱི་རྡོ་རྗེ་ཡིན། །དེ་ལྔ་རྣལ་འབྱོར་མ་ཡི་མཆོག །ཅེས་དང་། རྡོ་རྗེ་ཕྲེང་བ་ལས། ཁྲག་ནི་རིན་ཆེན་དབང་ཕྱུག་དང་། །བྱང་ཆུབ་སེམས་ནི་འོད་དཔག་མེད། །དེ་བཞིན་དོན་ཡོད་གྲུབ་པ་ཤ །མི་བསྐྱོད་དེ་བཞིན་རྡོ་རྗེ་ཆུ། །དྲི་ཆེན་རྣམ་སྣང་མཛད་དུ་བཤད། །དེ་དག་བདུད་རྩི་ལྔ་ནི་མཆོག། ཞེས་གསུངས་སོ། །

ཡང་། ཚེ་བུམ་ལྟ་བུར་མཚོན་ན། ཁ་རྒྱན་སྒོ་ཁྱིམ་དང་བཅས་པས་འཆི་མེད་ཚེའི་ལྷ་ཚོགས་སྐུ་མི་འགྱུར་བ་རྡོ་རྗེ་ལྟ་བུ་མཚན་དཔེ་གསལ་རྫོགས་ཀྱི་ངོ་བོར་ཡེ་ནས་དག་པ་དང་། མགྲིན་པ་རྒྱན་འཆང་དང་བཅས་པས་གསུང་འགག་མེད་ཀྱིས་ཆོས་འཁོར་བསྐོར་བ། ལྟོ་བས་ཐུགས་གཡོ་མེད་ཀྱིས་སྟོབས་བཅུ་དང་མི་འཇིགས་པ་བཞི། མ་འདྲེས་པའི་ཆོས་བཅོ་བརྒྱད་སོགས་ཡེ་ནས་རྫོགས་པ། ཞབས་པད་ཀྱིས་འཁོར་མཐའ་ལས་འདས་ཤིང་པདྨ་ཅན་ནམ་བདེ་བ་ཅན་གྱི་ཞིང་ཁམས་མཚོན་པ་ཡིན་ལ།

དེ་ལྟར་བུམ་ཆུ་ལ་ལོངས་སྤྱད་པས། གནས་སྐབས་སེང་གེ གླང་ཆེན། མེ་དཔུང་འབར་བ། དུག་སྦྲུལ། ཆོམ་རྐུན། ལྕགས་སྒྲོག རྒྱ་མཚོའི་རྦ་རླབས། ཤ་ཟ་ཁྲོས་པ་སོགས་འཇིགས་ཆེན་བརྒྱད་དམ། སྔ་འགྱུར་གྱི་གཞུང་འགའ་ཞིག་ལས། ནད། མུ་གེ མེ། ཆུ་ཆེན། དམག མཚོན་ཆ། རྒྱལ་བོའི་ཆད་པ། དུས་མིན་གྱི་འཆི་བ་སྟེ་འཇིགས་ཆེན་བརྒྱད་ལས་སྒྲོལ་བ་དང་། མཐར་ཐུག་འགྲོ་དོན་རྒྱུན་མི་ཆད་པར་འབྱུང་བའི་ཕན་ཡོན་ཡོད་པར་བཤད་དོ། །

༧ བུམ་པའི་རྒྱན། བུམ་པའི་དགོས་པ་ནི། དཀྱིལ་འཁོར་གྱི་ནང་གི་རྒྱན་དང་སྐུའི་སྒྲུབ་རྟེན་དང་། བྱིན་རླབས་ཀྱི་སྣོད་སོགས་ཀྱི་དགོས་པའོ། །རྒྱན་ནི། རྟ་མཆོག་རོལ་བ་ལས། མགུལ་ཆིངས་གཟུངས་ཐག་ཁ་རྒྱན་སོགས། །ཞེས་པ་ལྟར། མགུལ་ཆིངས་ནི། བསྒྲུབ་བྱའི་ལྷ་རང་རང་གི་མདོག་ལྟར་བུམ་པ་ཕྱི་དོར་དང་། ས་རྡོ་ཤིང་སོགས་ཀྱི་བུམ་པ་ཡིན་ན་དྲི་ཞིམ་བྱུགས་ནས། ཛྙ་ཙ་ལི་ཀ་དང་། དཱུ་གུ་ལ་དང་། ཀ་ཤི་དར་སོགས་ཀྱི་ཁ་དོག་སྣ་ལྔའི་དར་རས་འཇམ་གཙང་གསོལ་བའམ། ཡང་ན། ལྷ་རང་རང་གི་མདོག་མཐུན་གྱིས་བརྒྱན་པ་དང་། རང་མདོག་གི་ཚོན་གྱིས་རིགས་ལྔའི་ཕྱག་མཚན་དང་། ས་བོན། ལྷ་སོ་སོའི་ས་བོན་གྱི་ཡི་གེ་པདྨ་སོགས་ཀྱི་རི་མོ་འབྲི་དགོས་པར། རྟ་མཆོག་རོལ་བ། ཀརྨ་ལས་ཀྱི་རྒྱུད། ཕུར་བ་གསང་རྒྱུད་སོགས་ལས་འབྱུང་ངོ་། །

༨ གཟུངས་ཐག འདོམ་གསུམ་ལས་མི་ཐུང་བ་སྲད་པུ་དཀར་བོ་ལ་དར་སྐུད་སྔོ་སེར་དཀར་དམར་ལྗང་ལྔ་བསྒྲིལ་བའི་སྣེ་ལ་རྡོ་རྗེ་རྩེ་ལྔ་སོར་བཞི་བཏགས་པར་མེ་ཏོག་གི་ཕྲེང་བས་བརྒྱན་པར་རྒྱུད་མང་བོ་ལས་གསུངས་སོ། །གཞན་བུམ་སྟེང་དུ་དུང་ཆུང་ངུའི་ཆུས་བཀང་བའི་དུང་ཆོས་དང་གཟུངས་ཐག་རྡོ་རྗེ་བཅས་འཇོག རྡོ་རྗེ་དེ་ཡང་རྣམ་སྣང་ལ་རྡོ་རྗེ་མགོར་འཁོར་ལོ་དང་། གཞན་རིགས་བཞི་སོ་སོར་རྡོ་རྗེ་དང་། རིན་ཆེན། པདྨ། རྒྱ་གྲམ་བཅས་མཚན་པའོ། །དེ་ཡང་། གཟུངས་ཐག་སློབ་དཔོན་གྱིས་ཐུགས་ཀར་འཛིན་པ་ནི། མདུན་བསྐྱེད་ཀྱི་ལྷ་དང་གཞི་རྒྱུད་གཅིག་པ་དང་། སྔགས་ཕྲེང་ལས་འོད་ཟེར་སྤྲོ་བསྡུ་བྱ་བའི་ལམ་གྱི་རྒྱུ་དང་། སྣེ་གཅིག་པོ་རྡོ་རྗེ་ལ་བཏགས་ནས་བུམ་ཁར་བཞག་པའང་འབྲས་བུ་སྐུ་གསུམ་དབྱེར་མེད་རྡོ་རྗེ་སྐུ་གསུམ་འགྲུབ་པའི་དགོས་པ་ཡོད་དོ། །

༩ བུམ་པའི་ཁ་རྒྱན། དཔག་བསམ་ཤིང་སོགས་འབྲས་བུ་ཅན་གྱི་ཤིང་། འོ་མ་ཅན་གྱི་ཤིང་། ལྡུམ་བུའི་ལོ་མ་དང་། ཀུ་ཤ མེ་ཏོག རྨ་བྱའི་སྒྲོ། ཨ་སྨྲའི་ལྕུག་མ། ཤིང་ལོ་གསར་བ་སོགས་གཟུགས་དགོས་པ་རྒྱུད་མང་བོའི་དགོངས་པའོ། །གཞན་བཀྲ་ཤིས་པའི་སིལ་ཏོག་བླུགས་ནས། ཀུ་ཤའི་གདན་དང་། མནྜལ་གྱི་སྟེང་ལ་འཇོག་དགོས། གསང་བ་སྤྱི་རྒྱུད་ལས། ཤིང་བཀྲ་ཤིས་ཁར་བླུགས་ནས། ཞེས་དང་། རྡོ་རྗེ་མཁའ་འགྲོ་ལས། ཀུ་ཤའི་ཆུན་པོ་འོག་ཏུ་གདིང་། །ཞེས་དང་། ཕྱག་རྡོར་གཏུམ་པོ་གསང་རྒྱུད་ཕྱི་མ་ལས། མནྜལ་གཙང་མའི་སྟེང་དུ་བཞག། ཅེས་སོ། །དེ་ཡང་ཁ་རྒྱན་དཔག་བསམ་ཤིང་ལས་བྱས་པ་ནི། རེ་འདོད་ཡིད་བཞིན་དུ་འགྲུབ་པའི་ཆེད་དུའོ། །རྒྱུད་སྡེ་འོག་མ་རྣམས་ལས་རྩྭ་ཀུ་ཤས་བརྒྱན་པ་ནི། ཀུ་ཤ་དག་བྱེད་ཀྱི་རྫས་ལགས་པས་སྡིག་སྒྲིབ་འདག་པའི་བརྡའོ། །ཐིག་ལེ་ལྔ་ཅན་གྱི་རྨ་སྒྲོས་བརྒྱན་པས། རྨ་བྱས་དུག་ཟོས་ཀྱང་བཀྲག་མདངས་འཚེར་བ་ལྟར། དུག་ལྔ་ལམ་འཁྱེར་བྱེད་པའི་བརྡའོ། །

༡༠ བུམ་རྫས་ལ། རྒྱུད་སྡེ་འོག་མ་གསུམ་ལ་གྲགས་པའི་བུམ་རྫས་ལ། མི་གཡོ་བའི་རྟོག་པ་ལས། རིན་ཆེན་སྣ་ལྔ་འབྲུ་སྣ་ལྔ། །སྨན་ཆེན་པོ་ནི་ཡང་དག་ལྡན། །དྲི་ཆུ་ཡིས་ནི་རབ་ཏུ་བཀང་། །ཞེས་རྡོ་རྗེ་རྙིང་རྒྱན་དང་། བྱ་རྒྱུད་ཆོ་ག་གསང་རྒྱུད་སོགས་ལས། དྲི་དང་འབྲུ། སྨན་དང་རིན་ཆེན་ཞེས་ལྔ་ལྔ་སྟེ་ཉི་ཤུ་གསུངས་མེད། ཕུར་བ་གསང་རྒྱུད་ལས ལྔ་ཚན་ཉི་ཤུ་རྩ་ལྔ་ཉིད། །སྔགས་དང་ཏིང་འཛིན་གསལ་རྫོགས་ནས། །ཞེས་དང་། སྨན་བླའི་སྟོང་མཆོད་ལས། ལྔ་ཕྲག་ལྔ་ལྡན་སྙིང་བོ་དམ་པ་འབུལ། །ཞེས་པ་ལྟར། གསེར། དངུལ། བྱི་རུ། མུ་ཏིག ཟངས་སྟེ་རིན་པོ་ཆེ་ལྔ། དབང་ལག ཀན་ཊ་ཀཱ་རི། སླེ་ཏྲེས། ཅུ་གང་། ཤུ་དག་དཀར་བོ་སྟེ་སྨན་ལྔ། ག་བུར། གླ་རྩི། ཛཱ་ཏི། ཀུར་གུམ། ཙན་དན་ཏེ་དྲི་ལྔ། ནས། གྲོ། ཏིལ། སྲན་མ། འབྲས་ཏེ་འབྲུ་ལྔ། ལན་ཚྭ། ཏིལ་མར། མར། བུ་རམ། སྦྲང་རྩི་སྟེ་སྙིང་བོ་ལྔ་བཅས་ཉེར་ལྔའོ། །

དེ་ཡང་། བུམ་རྫས་ཉེར་ལྔ་བོ་འདི་དག་ཀྱང་། ལྷ་མོ་བསྟན་མས་རིན་ཆེན་ལྔ། ལྷ་ཆེན་བུ་མོས་སྨན་ལྔ། དྲི་ཟའི་བུ་མོས་དྲི་ལྔ། འཇིག་རྟེན་བུ་མོས་འབྲུ་ལྔ། གནོད་སྦྱིན་བུ་མོས་སྙིང་བོ་ལྔ་སྟེ་ཉེར་ལྔ་ཕུལ་བར་བཤད་ལ། དེ་ལྟར་བུམ་རྫས་ཉེར་ལྔ་བོ་དེས་མ་དག་པའི་སྲིད་པ་ཉེར་ལྔ་སྦྱོངས། སྒྲིབ་པ་ཉེར་ལྔ་འདག ཚད་མེད་ཉེར་ལྔ་རྒྱུད་ལ་སྐྱེས། དག་ཞིང་ཉེར་ལྔ་མཐོང་བར་གསུངས་སོ། །

བུམ་རྫས་ཉེར་ལྔ་བོ་འདི་དག་ལ་རྒྱུད་སོ་སོར་ངོས་འཛིན་ཚུལ་མི་འདྲ་བ་སྣང་མོད། མཐའ་དག་འདིར་མ་བཀོད་དོ། །ཡང་བླ་མེད་ཀྱི་བུམ་རྫས་ལ། རྒྱུད་ལས་ཅུང་ཟད་མི་འདྲ་བ་སྣང་ཡང་། བུམ་རྫས་ཉེར་ལྔའི་སྟེང་ལ། དྲི་ཆེན་དང་དྲི་ཆུ། རཀྟ། བྱང་སེམས་ཤ་འམ་མང་ས་སྟེ་བདུད་རྩི་ལྔ་དང་། བ་ལང་། རྟ། ཁྱི། གླང་བོ་ཆེའི་ཤ་དང་ཤ་ཆེན་ཏེ་ཤ་ལྔ་བསྣན་པའི་སོ་ལྔ་བོ་དེ་ལ་བླ་མེད་བུམ་རྫས་སོ། །རྒྱུད་སྡེ་གོང་འོག་ཐུན་མོང་དུ་ཆུ་གཙང་དང་དྲི་བཟང་གཉིས་བསྣན་པས། བླ་མེད་ལ་སོ་བདུན་དང་། འོག་མ་རྣམས་ལ་ཉེར་བདུན་དུ་འགྱུར་རོ། །བུམ་ཆུ་ལའང་། འཁྱིལ་ཆུ་དང་རྫིང་ཆུ་སོགས་ཆུ་ཤི་བདུན་སྤངས་ཏེ། རབ་ཡན་ལག་བརྒྱད་ལྡན་གྱི་ཆུ། འབྲིང་འབབ་ཆུ། ཐ་མ་འོ་མ་དགོས་པར་རྒྱུད་ལས་གསུངས་སོ། །བུམ་ཆུའི་ཚད་ནི་རྗེ་ཡབ་སྲས་ཀྱི་གསུང་ལས་མི་འབྱུང་ཡང་། འགྲོ་མགོན་འཕགས་པས་བུམ་པ་ཆ་གསུམ་དུ་ཕྱེ་བའི་ཆ་གཉིས་ཆུས་དགང་བ་དང་། ཆ་གཅིག་སྟོང་བར་འཇོག་ཅིང་། ཆ་གཉིས་བཀང་བས་གཟུགས་སྐུ་གཉིས་དང་། སྟོང་བའི་ཆ་གཅིག་གིས་ཆོས་སྐུ་མཚོན་པ་ཡིན་པར་གསུངས་སོ། །

༡༡ བུམ་རྫས་ཀྱི་ཕན་ནུས། ཕྱག་རྡོར་གསང་བ་མངོན་བསྟན་ལས། བྱཱ་གྷྲི(སླེ་ཏྲེས)སེང་གྷྲི(ཀན་ཏ་ཀཱ་རི)དབྱུག་པ་དང་། །ཨུཏྤལ་གཞན་གྱིས་མི་ཐུབ་པ། །ཧ་ས(རྒྱ་མཚོའི་ཝུ་བ)དེ་བས་ནད་རྣམས་སྦྱོངས། །དངུལ་དང་མུ་ཏིག་མུ་མིན་དང་། །བྱུ་རུ་གསེར་གྱིས་ཡེ་ཤེས་འཕེལ། །ནས་གྲོ་ཏིལ་དང་སྲན་མ་དང་། །མུ་ད་ག་ཡིས་ལམ་ལྔ་དག། ག་བུར་ཀུར་གུམ་ཛཱ་ཏི་དང་། །ཙན་དན་ཨ་ཀ་རུ་ཡི་ནི། །གཞན་དོན་འཕྲིན་ལས་ལྔ་འགྲུབ་བོ། །ཆུ་དང་སྙིང་བོ་ལྔ་ཡིས་ནི། །རྣལ་འབྱོར་ཕུན་སུམ་ཚོགས་གྱུར་བས། །ཞེས་དང་། གཞན་ཡང་། སློབ་དཔོན་སངས་རྒྱས་གསང་བའི་དཔུང་བཟང་འགྲེལ་བ་ལས་ཀྱང་མང་དུ་གསུངས་སོ། །

༡༢ བུམ་པ་སྒྲུབ་ཚུལ། དཀྱིལ་འཁོར་གྱི་ཁར། རབ་བསྒྲུབ་བྱའི་ལྷ་གྲངས་ཀྱི་བུམ་པ་དང་། འབྲིང་བུམ་པ་བཞི་འམ་ལྔ། བརྒྱད་དང་བཅུ་སོགས་ཅི་འབྱོར། མ་མཐའ་ཡང་རྣམ་རྒྱལ་བུམ་པ་དང་། ལས་བུམ། གཙོ་བོའི་ལྷར་མཐུན་གྱི་བུམ་པ་ངེས་པར་དགོས་པ་རྒྱུད་དག་ལས་གསུངས་སོ། །སྒྲུབ་ཚུལ་དངོས་ནི། སློབ་དཔོན་དཱ་རི་ཀ་བས། བསངས་སྦྱངས་བགེགས་བསྐྲད་སྔོན་འགྲོ་བས། །བུམ་པ་དྲི་ཡི་ཆུས་བཀང་སྟེ། །ཞེས་དང་། རྟ་མཆོག་རོལ་བ་ལས། དམ་ཚིག་ལྷ་རྣམས་གསལ་བྱས་ནས། །ཡེ་ཤེས་སྐུ་དང་གཉིས་མེད་པར། །མཆོད་བསྟོད་སྔགས་ཀྱི་བཟླས་པ་བྱ། །སྔགས་བཅས་ཆུ་དང་གཉིས་མེད་གནས། །དཀྱིལ་འཁོར་གྲུབ་པའི་དུས་དག་ཏུ། །རང་རང་གནས་ཀྱི་ཕྱོགས་སུ་དགྲམ། །ཞེས་པ་ལྟར་རོ། །

མགུ་ཙེ།

མགུ་ཙེ་ནི། ཟངས་ལ་དངུལ་གྱི་ཕྲ་ཤན་བཏབ་པ་སོགས་ཡིན། ཚད་ནི་ཆེ་ཚད་ཁྱོར་བཅུ་དང་། ཆུང་ཚད་སོར་བདུན་ཤོང་བ། ཆུང་ཚད་ཁྱོར་བདུན་ཤོང་ལ། གཏོར་གཞུང་ཁྱོར་ཉི་ཤུ་ཤོང་བའི་མཉྫུའི་ཁར་འཐེབ་ཙེ་བཀོད་དེ། ཆོ་ག་ལ་བརྟེན་ནས་ཛམ་ལྷར་ཆུ་གཏོར་དང་། ལན་ཆགས་ཤ་འཁོན་སྦྱངས་པའི་དགེ་སྒྲུབ་ལ་ལོངས་སྤྱོད་པའི་ཡོ་བྱད་ཅིག་ཡིན།

མཚོན་དོན་ནི། ལྟོ་བ་ཟླུམ་ཞིང་རྒྱ་ཆེ་བས། སེམས་ཅན་གྱི་ཁམས་ཟད་མི་ཤེས་པ་དང་འདོད་རྒུ་ཡིད་བཞིན་དུ་སྐོང་བ་དང་། མཆུ་མཚམས་ནས་དྲས་ཁ་ཅུང་ཟད་བསྐུམས་པས། འགྲོ་བ་རྣམས་ཞི་སྒོ་གཉིས་སུ་མེད་པའི་དོན་ལ་སྦྱོར་བ། མཆུའི་མགྲིན་པ་ཡར་བགྲེང་བས་ཐར་ལམ་དུ་འདྲེན་པ། སྦུ་གུས་གཉིས་སུ་མེད་པའི་བྱང་ཆུབ་ཀྱི་སེམས། ཁ་གཅོད་ལེབ་མོས་གཟུང་འཛིན་གྱི་འཕྲུལ་སྣང་ཁེགས་པ། གཞོང་པ་ཡངས་ཞིང་ནས་འབྲུ་ཞིབ་པ་ལྟ་བུས་ཕྲ་བཀོད་པས། ལུས་ཅན་རྣམས་མགྲོན་དུ་གཉེར་ཞིང་ལོངས་སྤྱོད་འཛད་མེད་དུ་སྟེར་བ། ཞབས་རྭ་མེད་པས་སྙིང་རྗེས་གཞན་དབང་དུ་གྱུར་བ། མཉྫུའི་འོག་ཏུ་ཚིགས་རྭ་བརྒྱད་དང་ལྡན་པས། ཚད་མེད་བཞིས་འགྲོ་དོན་མཛད་ཅིང་མཐར་ཐུག་སྐུ་བཞིའི་གོ་འཕང་ལ་འགོད་པར་གསུངས་སོ། །

པོག་ཕོར།

པོག་ཕོར་གྱི་སྣོད་ནི། གསེར་དངུལ་ཟངས་ལྕགས་དང་། དུང་དང་ཙན་དན་རྫ་ཕོར་སོགས་ལས་བྱས་ལ། ལྟོ་ལྡིར་ལ་རྐང་བ་གསུམ་ཅན། པ་ཏྲས་བརྒྱན་ཅིང་། ལུང་ཐག་གསུམ་ལྡན་ཞིག་གོ །བདུག་སྤོས་ཀྱི་རྫས་ནི། ལེགས་གྲུབ་ལས། ག་བུར་དུ་ཏུས་ཨ་ཀ་རུ། །གསུམ་ནི་དྲི་ཞིམ་མཆོག་ཅེས་བྱ། །དྲི་ཞིམ་ལྔ་ནི་དེ་རྣམས་ལ། །ཙན་དན་དང་ནི་བུ་རམ་མོ། །ར་ས་དང་ནི་ཞོས་བསྣན་ན། །དྲི་ཞིམ་རྣམ་པ་བདུན་ཞེས་བྱ། །བདུག་སྤོས་དམ་པ་དེ་གསུམ་ནི། །ལས་རྣམས་ཀུན་ལ་གཙོ་བོར་གསུངས། །ཞེས་དང་། གཞན་ཡང་མདོ་རྒྱུད་དག་ནས་གསུངས་པ་ལྟར། སྤོས་སྦྱོར་དག་མཁས་གྲུབ་དམ་པའི་ཚད་ལྡན་ཕྱག་ལེན་ལྟར་བྱའོ། །

ཡང་ལེགས་གྲུབ་ལས། རིལ་བུ་གོང་བུ་ཕྱི་མ་དང་། །རེང་བུ་དང་ནི་རྣམ་པ་བཞི། །སྡིག་སྤོས་རིགས་སུ་ཤེས་བྱས་ནས། །ལས་རྣམས་སོ་སོར་སྦྱར་བར་བྱ། །ཞེས་པ་ལྟར་ལས་སོ་སོར་སྦྱོར་ཚུལ་ཡང་། དེ་ཉིད་ལས། ཞི་བ་ལ་ནི་རིལ་བུ་མཆོག། རྒྱས་པ་ལ་ནི་གོང་བུ་མཆོག། དྲག་ཤུལ་སྤྱོད་ལ་ཕྱི་མ་ཤིས། །ཐམས་ཅད་ལ་ནི་རེང་བུ་ཤིས། །ཞེས་དང་། གཞན་ཡང་། གནོད་སྦྱིན་དང་ཕོ་ཉ་མོ་སོགས་བདུག་ཡུལ་གྱི་ཁྱད་པར་ལ་བརྟེན་ཏེ་སྤོས་སྦྱོར་མཐའ་ཡས་པ་ཞིག་ཡོད་དོ། །ད་ལྟ་སེར་སྦྲེང་སོགས་སུ་འང་པོག་ཕོར་གྱི་ནང་དུ་བདུག་སྤོས་བཏུད་ནས་ཕེབས་པའི་ཕྱག་སྲོལ་ཡོད་པ་དང་། ཡང་བགེགས་བསྐྲད་སོགས་ལ་གུ་གུལ་བདུག་པ་འང་རྒྱུད་ཀྱི་དགོངས་པའོ། །བདུག་སྤོས་ཀྱི་སྦྱར་རྫས་སུ་མི་རུང་བའང་། ལེགས་གྲུབ་ལས། བློ་ལྡན་རྣམས་ཀྱི་ངན་པ་དང་། །སེན་མོ་རྒྱ་སྐྱེགས་ཐམས་ཅད་དང་། །དགུ་བ་དང་ནི་ཆང་སོགས་ཀྱིས། །བདུག་སྤོས་སྦྱར་བར་མི་བྱའོ། །ཞེས་སོ། །

སོ་ཤིང་།

སོ་ཤིང་གི་རྒྱུ་ནི། ཨུ་དམ་ཝ་ར། ཤུག་པ། འོ་མ་ཅན་དང་། མེ་ཏོག་དང་། འབྲས་བུ་ཅན་གྱི་ཤིང་དྲང་ཞིང་འཛེར་བུ་མེད་པ། རྨ་མེད་པ་དག་གོ། སྔགས་རིམ་ལས། སོ་ཤིང་ནི། ཨ་ཤྭད་ཐ་ལ་སོགས་འདིར་མི་རྙེད་པས་ཀླུ་བྱང་གིས་གསུངས་ལྟར། འོ་མ་ཅན་གྱི་ཤིང་ཧ་ཅང་སྦོམ་པ་དང་ཕྲ་བ་མིན་པ་དྲང་ཞིང་སྲོག་ཆགས་མེད་པ། མ་གས་པ་རྨ་མེད་པ། མགོ་མཇུག་མཉམ་པ། དྲི་བཟང་གི་ཆུས་བཀྲུས་པ་བདུག་པས་བདུགས་པ་སོར་བཅུ་གཉིས་པ་རྩེ་མོར་མེ་ཏོག་བཅིངས་པ་བྱའོ། །གསུངས་སོ། །

ཚད་ནི་སོར་བརྒྱད་དམ། བཅུ་གཉིས། དྲི་བཟང་བྱུགས་ཤིང་། རྩེ་མོ་དར་དང་མེ་ཏོག་གི་ཕྲེང་བ་འདོགས་པར། རྟ་མཆོག་རོལ་བ་དང་། རྡོར་ཕྲེང་མངོན་བྱང་། སྒྲོལ་མ་རལ་བ་གྱེན་བརྫེས་ཀྱི་རྒྱུད་སོགས་ལས་གསུངས་སོ། །

སོ་ཤིང་དོར་བའི་གནས་ནི། སྔགས་རིམ་ལས། ཁྲུ་བཞི་བ་གྲུ་བཞི་བའི་དཀྱིལ་འཁོར་བའི་ལྕི་བ་ལ་སོགས་པས་བྱུགས་པར་ཕྲེང་བ་ལས་གསུངས་ཤིང་། བའི་ཀོ་བ་ཙམ་དུ་ཞེས་གསུངས་པ་ནི་སྲབ་མཐུག་གི་ཚད་དུ་བི་རྱ་བའི་བཤད་དོ། །

དེ་ཡང་འདོར་ཚུལ་ནི། མགོ་ཞབས་རིང་ཐུང་སྙོམས་པ། ལྷ་གང་ཡིན་གྱི་སྙིང་བོའི་སྔགས་ཀྱིས་བཏབ་ནས། སློབ་མར་བཀྲམས་ཏེ་དཀྱིལ་འཁོར་དུ་འདོར་བའམ། སྔགས་རིམ་ལས། སོ་ཤིང་ལ་སློབ་དཔོན་གྱིས་བཟླ་བའི་སྔགས་ཕྲེང་བར་མ་བྱུང་ཡང་དོན་ཡོད་ཞབས་ཀྱིས་བགེགས་མཐར་བྱེད་ཀྱི་སྔགས་བཟླ་བར་གསུངས་པ་ལྟར་རམ། མི་ཐུབ་པས། ཨོཾ་ཨཱཿཛི་ཧ་སཾ་བ་རྟི་ནི་ཧཱུཾ་ཕཊ། ཅེས་ལན་བདུན་བཟླས་ཏེ། དེ་ནས་སློབ་དཔོན་བྱང་དུ་ཕྱོགས་ཏེ་སློབ་མ་ལ་སྦྱིན་ནས་སློབ་མ་ཤར་རམ་བྱང་དུ་ཕྱོགས་པས། ཨོཾ་བཛྲ་ཧཱ་ས་རྔྷི། ཞེས་བརྗོད་ནས་རྩེ་མོ་ནས་འཆོས་ཏེ་མིག་སྟེང་དུ་བལྟ་ཞིང་བལྟོས་པ་མེད་པར་མདུན་དུ་འདོར་རོ། །སྤྱི་རྒྱུད་ལས་སློབ་མ་ཁ་བྱང་དུ་ཕྱོགས་པ་ལ་སྦྱིན་ཞིང་སློབ་མས་ཤར་དུ་བལྟས་ཏེ་འདོར་བར་བཤད་དོ། །

དོར་བའི་ལྟས་ལ་ཤར་བྱང་ནུབ་ལྷོ་སྟེང་འོག་ཏུ་ཕྱོགས་པར་ལྟུང་ན་རིམ་པ་བཞིན་དུ་ཞི་རྒྱས་དབང་དྲག་རིག་འཛིན་ས་འོག་གི་དངོས་གྲུབ་འགྲུབ་ཅིང་། ཕྱི་རོལ་དུ་ལྷུང་ན་དངོས་གྲུབ་མེད་དོ། །

བྲིས་སྐུ།

གསང་སྔགས་ཀྱི་དངོས་གྲུབ་ལ་འཇུག་ཅིང་མྱུར་ཕྱིར། སྔགས་པ་ལས་དང་བོ་བས་བསྐྱེད་རིམ་གྱི་རྟོགས་པ་འཆར་བའི་རྟེན་དུ། གང་སྒྲུབ་པའི་ཡི་དམ་དེའི་སྐུ་བརྙན་བྲིས་འཆང་དགོས་པ་ཡིན།

ཇི་ལྟར་འབྲི་བའི་ཚུལ་ནི། ཡི་དམ་ཀྱི་ཆོ་ག་སྔོན་དུ་བཏང་སྟེ། དུར་ཁྲོད་དམ་དབེན་གནས་སུ་གད་བདར་བྱས་ཏེ། བླ་བྲེ་སྔོན་པོས་གུར་འོག་ནས་རུས་པའི་བརྒྱངས་ཤིང་ལ། རས་སོགས་ཀྱི་ཐང་ག དྲི་ཞིམ་བྱུགས་པའི་ཐོད་སྣོད་དུ། ཚོན་རྩི་ལྔ་འམ་རོ་བསྲེགས་ཀྱི་སོལ་བས་བཟོས་པའི་སྣག་ཚས། རོ་སྐྲ་པིར་དུ་བྱས་ནས་འབྲི་དགོས་པར། ཀྱེ་རྡོར་དང། སམྦུ་ཊ། གཤེད་དམར་སོགས་ལས་གསུངས་སོ། །

བཞེངས་ཚུལ་ནི། བྲིས་སྐུའི་རྣམ་པ་ཡང་བདེ་མཆོག་སྡོམ་འབྱུང་ལས། ཞི་ལ་ཞི་བའི་ཚུལ་གྱིས་སྐུ། །དྲག་ལ་དྲག་ཅིང་འཇིགས་བྱེད་པ། །དཔའ་ལ་དཔའ་ཞིང་ང་རྒྱལ་སྐུ། །སྒེག་པ་ལ་ནི་བཞད་པའི་ཞལ། །མཚན་ཉིད་འདི་ལྟར་མཚོན་ནུས་ནི། །སྔགས་པ་རྣམས་ཀྱིས་བྲིས་སྐུ་བྲི། །སྔགས་པ་ལས་ནི་དང་བོ་བས། །གཟུགས་བརྙན་ལ་སོགས་བྱ་བ་སྟེ། །བྲིས་སྐུ་སྒྲུབ་ན་མྱུར་བར་ནི། །དངོས་གྲུབ་རྒྱ་ཆེན་འཐོབ་པར་འགྱུར། །ཞེས་སོ། །

ལྒིགས་བམ།

འདིར་བསྟན་ལྒིགས་བམ་ནི་ཁྲོམ་བསྒྲགས་མི་རུང་བའི་གསང་བ་སྔགས་ཀྱི་ལྒིགས་བམ་སྟེ། དེ་འབྲི་བའི་ཚུལ་ནི། དུར་ཁྲོད་དམ་དབེན་གནས་སུ་གྲོ་ཤུན་དང་། ཏ་ལའི་ལོ་མ་གང་རུང་། སྲིད་དུ་སོར་བཅུ་གཉིས་དང་། །ཞེང་དུ་སོར་བཞིར་རྒྱུད་ཁུངས་མ་ལས་གསུངས་ལ། དགེ་ཆོས་ཀྱི་གསེར་ཐང་ལས་ཀྱང་། རྒྱ་དཔེ་ཕལ་ཆེར་ཏ་ལའི་ལོ་མར་བྲིས་པས། ཏ་ལའི་ལོ་མ་དེ་ཞེང་སོར་གསུམ་བཞི་ལས་ལྷག་པ་མི་ཡོང་བས། སྣེ་གང་རིང་བྱེད་ནུས་པ་ཙམ་ལས། ཞེང་ཆེན་པོ་གང་ལ་འོང་། ཞེས་པ་དང་མཐུན་ལ། དེ་ཡང་འབྲི་བྱེད་ནི། རོ་སོལ་ལ་སྣག་ཚ་བསྲེས་ཏེ། མི་རུས་དང་ལྕགས་སྨྱུག་གིས་འབྲི་དགོས་པར། ཀྱེ་རྡོར། རྡོ་རྗེ་མེ་ལྕེ་སོགས་ལས་གསུངས་སོ། །འབྲི་དུས་ཀྱང་ཕུར་བ་བཅུ་གཉིས་ཀྱི་རྒྱུད་ལས། བརྒྱད་དམ་བཅོ་བརྒྱད་ཉི་ཤུ་བརྒྱད། །ཉིན་མཚན་གུང་ལ་བྲིས་བྱས་ཏེ། །ཞེས་སོ། །ལྒིགས་ཤིང་དང་ལྒིགས་ཐག་ཡང་། རྡོ་རྗེ་མེ་ལྕེ་རྒྱུད་ལས། ལྒིགས་ཤིང་རུས་པ་འམ་གླང་ཆེན་གྱི། །བ་སོ་དག་ལ་ངེས་པར་བྱ། །ཐག་པ་བྲམ་ཟེ་མོ་ཡི་ནི། །སྐྲ་ཡིས་ཡོངས་སུ་བསྡམས་པར་བྱ། །ཡང་ན་ཡིད་ཆེས་པགས་པ་ལ། །མཉེན་པར་བྱ་བས་ཡོངས་སུ་བསྡམས། །ཞེས་སོ། །ཡང་ལྒིགས་བམ་འཆང་ཚུལ་ནི། དཔེ་ཀློག་གི་ཚེ་མ་གཏོགས། སྤྱི་བོའི་ཐོར་ཅོག་གི་གསེབ་དང་། ཡང་མཆན་ཁུང་དུ་སྦ་དགོས་པར་གསུངས་སོ། །སྤྱིར་ན། དགེ་འདུན་སྤྲུལ་བའི་ལྒིགས་བམ་ནི། སྣོད་མིན་གྱིས་མིག་ལ་ཤོག་སྟོང་ཡིན་པར་གསུངས་པ་སོགས་ཀྱི་ནུས་པ་ཡོད་ན་མ་གཏོགས། སྔགས་ཆས་འདི་དག་ཁྲོམ་གཟིགས་བྱེད་པ་གཏན་མི་རུང་ལ། དེང་སང་། རང་ཉིད་བླ་མ་ཆེ་ཁག་ཏུ་ཞལ་འཆེས་པ་འགའ་ཞིག་གིས་སྔགས་ཆས་དང་ཁྱད་པར་དུ། གསང་སྔགས་ཟབ་མོ་ཆོས་ཀྱི་ཁེ་ཚོང་ལ་བཀོལ་བ་ནི། རང་ཉིད་རང་གིས་དམྱལ་བའི་གཏིང་རྡོ་འཕེན་པ་ཡིན་ཏེ། གུང་ཐང་གིས། གསང་སྔགས་དེ་ཡང་འཕྲལ་གྱི་རྐྱེན་སེལ་ལམ། །ཚེ་དང་ནོར་སྒྲུབ་དབང་ཐང་མངོན་སྤྱོད་སོགས། །ཚེ་འདིའི་ལག་ཆ་ཁོ་ན་བྱེད་པ་ནི། །ས་མཆོག་ཙན་དན་སོལ་བར་བྱས་འདྲ་བས། །ཆོས་ཀྱིས་ངན་སོང་སྒྲུབ་པར་མ་བྱེད་ཨང་། །གསུངས་པ་དང་། ཞིབ་ཏུ་སྔགས་གཞུང་དག་ལས་ཤེས་པར་བྱོས་ལ། འདིར་མགོ་འབུས་ཙམ་བརྗོད་ན། དུར་ཁྲོད་ནག་པོའི་རྒྱུད་ལས། གྲི་གུག་དང་ནི་ཐོད་པ་དང་། །ཕུར་བུ་དང་ནི་ཐང་ག་དང་། །སུ་ལ་བསྟན་པར་མི་བྱ་སྟེ། །ཞེས་དང་། རྡོ་རྗེ་ཕྲེང་རྒྱུད་ལས། སྣོད་དང་ཅང་ཏེའུ་གྲི་གུག་དང་། །ལྒིགས་བམ་དང་ནི་བགྲང་ཕྲེང་དང་། །དམ་ཚིག་མེད་པ་གཞན་དག་ལ། །གང་དུ་འང་བསྟན་པར་མི་བྱའོ། །ཞེས་དང། རྣལ་འབྱོར་དམ་པ་རྡོ་རྗེ་ཅན། །བགྲང་ཕྲེང་དང་ནི་དབུ་རྒྱན་དང་། །རུས་པའི་རང་བཞིན་ཕྱག་རྒྱ་དང་། །ལྒིགས་བམ་བསམ་གཏན་རས་རིས་དང་། །ཐོད་པ་ལ་སོགས་རྣལ་འབྱོར་མ། །ཐམས་ཅད་དུ་ནི་དངོས་གྲུབ་ཕྱིར། །བླ་མ་ལ་ཡང་སྦ་བར་བྱ། །སྔགས་ནི་ཚིག་ཏུ་བརྗོད་མི་བྱ། །མཆུ་འགུལ་བར་ཡང་མི་མངོན་ཞིང་། །ཅུང་ཟད་མགྲིན་པར་བརྗོད་བྱ་ཡིས། །སྔགས་ཀྱི་རྒྱལ་བོ་དེ་ལྟར་བཟླས། །གསང་ལས་དངོས་གྲུབ་མཚུངས་པ་མེད། །དེ་ཕྱིར་དེ་ནི་སྡོམ་པར་བྱ། །སྣོད་མིན་ནོར་ནི་ཆེན་པོ་དང་། །ལྡན་ཡང་རྒྱུད་ལས་སྐྱོན་དུ་གསུངས། །བླ་མས་བླ་མེད་དངོས་གྲུབ་ཕྱིར། །འབད་པ་ཡིས་ནི་སྤང་བར་བྱ། །བཟའ་བཏུང་གོས་ལ་སོགས་པ་དང་། །ནོར་ནི་ཆེན་པོ་ལ་ཆགས་ཤིང་། །སྣོད་མིན་སློབ་མར་མན་ངག་མཆོག །སྨད་དུ་བྱུང་བ་གང་སྨྲ་བ། །རྣལ་འབྱོར་ཤེས་པ་ཚེ་འདི་ལ། །དེ་ནི་དམྱལ་བ་ངུ་འབོད་སྐྱེས། །ཞེས་དང་། མདོར་ན། དབང་འཐོབ་ཅིང་དམ་ཚིག་ལ་གནས་པའི་སྔགས་པས། སྤྱི་གསང་བཞི། བར་གསང་བཞི། གསང་བར་འོས་པ། གསང་བར་གཉེར་གཏད་པ་སྟེ། ལམ་ཉམས་ལེན་གྱི་ཚེ་གསང་བ་བཅུ་ཡི་སྒོ་ནས་གསང་བར་བཤད་དེ། གསལ་བཀྲ་ལས། ལྟ་ཟབ་སྤྱོད་པ་བརླིང་བོ་དང་། །ལྷའི་མིང་གཟུངས་དང་གྲུབ་རྟགས་གསང་། །སྤྱི་གསང་བཞི་དང་། བསྒྲུབས་པའི་གནས་དུས་ཡོ་བྱད་གྲོགས། །བར་དུ་གསང་ལ་བསྒྲུབ་པར་པར་བྱ། །བར་གསང་བཞི་དང་། བླ་མ་དང་རྡོ་རྗེ་སྤུན་གྲོགས་ཀྱི་སྐྱོན་ཕྲ་མོ་ཙམ་ཡང་གསང་བར་འོས་པ་དང་། བླ་མའི་དམ་ཆུ་ངག་ཏུ་བླུད། རྡོ་རྗེ་མགོར་བཞག་ནས་གསང་བ་འདི་གཞན་ལ་མ་སྨྲ་ཞེས་བཀའ་བསྒོས་གཉེར་གཏད་གནང་བ་དང་། དབང་ཆོག་རྣམས་ལས་ཀྱང་། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེ་བདུད་རྩིའི་ཆུ་འཐུངས་ཤིག། ཞེས་རྡོ་རྗེ་མནའ་ཆུ་བླུད་ནས་དམ་བཞག་མཛད་པ་དང་། དམ་ཚིག་ལས་འདས་ན། ཉེས་དམིགས་ཀྱང་། ཁྱོད་ཀྱི་དམ་ཚིག་རྡོ་རྗེ་འདི། །གལ་ཏེ་ཁྱོད་ཀྱིས་འགའ་ཞིག་ལ། །འདི་སྨྲས་ན་ནི་མགོ་བོ་འགེམས། །ཞེས་དང་། ཨོཾ། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་སོ། །

དེ་བས་སྔགས་ཆས་དེ་དག་ལ་མ་གུས་པ་སྤང་བར་བྱ་དགོས་ཏེ། རྡོ་རྗེ་རྩེ་མོ་ལས། རྟགས་དང་ཕྱག་རྒྱ་རྣམས་ལ་ཡང་། །ནམ་ཡང་བརྙས་པར་མི་བྱའོ། །འཁོར་ལོ་རྡོ་རྗེ་པདྨ་སོགས། །མཚན་མའི་ཕྱག་རྒྱ་གང་ཡིན་པ། །འགོམ་པ་ཉིད་དུ་མི་བྱ་ཞིང་། །བཟའ་བར་ཡང་ནི་མི་བྱའོ། །རྐང་བ་དག་གིས་བརྫི་མི་བྱ། །དེ་ཡི་སྟེང་དུ་འདུག་མི་བྱ། །སླར་ཡང་བཞག་པར་མི་བྱའོ། །ལྷ་ཡི་ཕྱག་མཚན་བཟང་བོ་དང་། །ལྷ་ཡི་བཞོན་པའི་མཚན་མ་རྣམས། །འགོམ་ཞིང་བརྙས་པར་མི་བྱ་སྟེ། །ཞེས་གསུངས་སོ། །

འདིར་སྔགས་ཆས་ལས་འཕྲོས་ཏེ་པོ་ཏིའི་སྐོར་ཅུང་ཟད་བརྗོད་ན། ད་ལྟ་རང་ཅག་གིས་གནའ་དཔེ་ཕྲ་ལ་རིང་བ་འདི་དག་ཀྱང་རྒྱ་གར་གྱི་ཏ་ལའི་ལོ་མའི་བྲིས་རྒྱུན་དར་བ་མང་དུ་བརྡ་སྤྲོད་མི་དགོས་ལ། འོན་ཀྱང་། སྔོན་གྱི་སྲོལ་ལ་བག་ཆགས་མཐུག་པའི་དམ་པ་རེ་གཉིས་ཀྱིས་སྣ་རིང་ལ་ཆོས་ཆེན་ཞེས་བརྩི་མཐོང་ཆེ་ཞིང་། ལྕགས་པར་ལ་མགོ་བཙེམ་ཞེས་བཏང་སྙོམས་སུ་འཇོག་པ་ནི། ཆོས་ཀྱི་གནད་གོ་བ་ཞིག་ཡིན་ཕྱིན། བརྗོད་བྱའི་ནང་དོན་ལ་བལྟ་བ་མ་གཏོགས། དཔེ་དབྱིབས་གྲུ་བཞི་མ་ཟད། ཟུར་གསུམ་ཞིག་ཡིན་ནའང་སྤྱི་ཚོགས་འཕེལ་འགྱུར་གྱི་དབང་གིས་སྟབས་བདེ་ཁྱད་ཀྱིས་བྱུང་བ་མ་གཏོགས། བལྟ་ཚུལ་གཅིག་ཏུ་བཟུང་ན་ལེགས་སོ། །

རྒྱ་གར་དུ་མ་ཟད། བོད་དུའང་ཏ་ལའི་ལོ་མའི་ལྒིགས་བམ་མང་དུ་དར་ཡོད་པ་སྟེ། རྒྱལ་བོ་བཀའི་ཐང་ཡིག་ལས། མ་འོངས་རྒྱལ་བརྒྱུད་ནོར་སྐལ་ཇི་ལྟར་སྦས་ཚུལ་གསུངས་དུས། དཀོར་མཛོད་དབུས་མའི་ཀེའུ་ཚང་ནང་། །ཏཱ་ལའི་ལོ་མའི་བཀའ་པོ་ཏི། །ལྒིགས་བམ་བདུན་ཅུ་རྩ་དྲུག་ནི། །རྒྱ་བོད་ལོ་པཎ་རྒྱ་དཔེ་བཞུགས། །ཞེས་གསུངས་ལ། བག་ཆགས་དང་རྙིང་ཞེན་གྱིས་དབང་གིས། ཏ་ལའི་ལོ་མའི་ཚད་དབྱིབས་ཀྱི་དཔེ་ཆ་རང་ཅག་ལ་དར་སྲོལ་བྱུང་བ། དགེ་ཆོས་ཀྱིས། རྒྱ་གར་ལྷོ་ཕྱོགས་ཀྱི་ཏ་ལའི་འདབ་མར་ལྕགས་ཁབ་ཀྱི་རྩེ་མོས་ཡི་གེ་བྲི་བར་འདུག་སྟེ་ཀློག་བདེ་བ་མི་སྣང་མོད། ཡི་གེ་ནམ་ཡང་ཆུད་མི་ཟ། སིང་ག་ལར་ཡང་སྡེ་སྣོད་ཀྱི་ལྒིགས་བམ་རྣམས་ལྕགས་ཁབ་ཀྱིས་འབྲི་ཡིན་འདུག གཞན་ཡུལ་དབུས་དང་བལ་ཡུལ་ནས་བྱུང་བ་རྣམས་ནི་སྣག་ཚའི་ཡི་གེ་ཤ་སྟག་ཏུ་སྣང་། སྤྱིར་དཔེ་ལྡེབས་མ་རིང་བོ་བྲི་བའི་སྲོལ་འདི་དང་བོ་ཏ་ལའི་ལོ་མར་བྲིས་པ་ལ་བརྟེན་ཏེ། རྒྱ་གར་དང་བོད་ཡུལ་སོགས་སུ་དར་བར་འདུག་ཅིང་། རྒྱ་གར་བ་རྣམས་ཤོག་བུའི་མིང་ལ་ད་དུང་ཡང་ལོ་མ་ཟེར། ཞེས་དང་། མི་ལ་རས་པས། ཕྱུགས་རྫི་ལ་མར་བ་དྲིས་སྐབས་ཀྱང་། སྲས་དར་མ་མདོ་སྡེས། འོ་ངེད་ཀྱི་ཕ་ཇོ་ལ་ཟེར་བ་ཡིན་པ་འདྲ། དེ་ཡིན་ན་རྒྱ་གར་ནས་པོ་ཏི་ཕྲ་ལ་རིང་བ་མང་བོ་འཁྱོས་མ་ལ་བཀལ་ནས་འོང་བ་ཞིག ཅེས་དང་། སྟེང་དུ་ཡི་གེ་ནུས་པའི་ཏ་ལའི་ལོ་མ་དེ། ཏ་ལ་ཁྱད་པར་བ་ཤིན་ཏུ་མཐོ་ལ་སྦོམ་པ་ཞིག་སྣང་། ཏ་ལ་དཀྱུས་མའི་ལོ་མ་ནི་སོར་གང་དོ་ལས་མེད་པས། ཡི་གེ་འབྲི་ས་མེད། དེ་ཡང་ལོ་མའི་ཕྱོགས་གཡས་གཡོན་གཉིས་ནས། ལྡེབས་མ་རེ་རེ་འོང་། དང་བོ་ལོ་མ་དེ་ཆུས་ནང་དུ་བཙོས། དེ་ནས་མཇུག་ཏུ་རྡོ་བཏགས་ཏེ། ཤིང་ཞིག་ལ་བཀལ་ནས་ཀོ་བ་བཞིན་དུ་མཉེད། ལག་པར་འཐུལ་བ་ན་དཔེ་རང་གི་ཚད་དུ་བཅད། ལྡེབས་རེ་རེ་བཞིན། སུམ་ཆའི་མཚམས་ནས་ཁུང་བུ་གཉིས་ཤིག་ཕུག དེ་བཞིན་ལྒིགས་ཤིང་ལ་ཡང་ཕུག་ནས་ནང་དུ་སྐུད་པ་རིང་བོ་ཞིག་དྲངས་ཏེ་མདུན་དུ་མདུད་པ་བོར་ནས། སྐེད་པ་ལ་བཅིངས་ཏེ་འགྲོ། བཀའ་པོད་སྐེ་རགས་སུ་བཅངས་བྱ་བ་དེ་འདྲ་ནས་བྱུང་བ་མིན་ནམ་སྙམ། ཀློག་རན་ཚེ་ཐག་པ་རན་པར་ལྷོད་ནས་ལྡེབས་རྣམས་དལ་བུའི་བསྒྱུར་ཏེ་འདོན། དེའི་ཕྱིར་ལྡེབས་འཁྲུག་དོགས་མེད་པས་རྒྱ་དཔེ་ཕལ་ཆེར་ལ་ཁ་ཡིག་གམ་ལྡེབས་གྲངས་མ་བཀོད་པ་དེ་ཡིན། ལྡེབས་རེ་བཞིན་ཨི་ཁུང་ཕུག་པ་སྟེ། རང་རེའི་བོད་ཀྱི་དཔེ་རྙིང་རྣམས་ལ་ཡང་འདུག་ཅིང་། དུས་ཕྱིས་བར་དུ་མཚལ་གྱི་སྐོར་ཐིག་ཆེན་པོ་གཉིས་ཨི་ཁུང་གི་ཐད་དུ་བྲིས་ནས་སྣང་། དེ་ནས་སྐོར་ཐིག་དེ་སྟོང་བར་སྣང་བའི་ནང་དུ་སྐུ་བརྙན་རེ་བྲི་བའི་སྲོལ་ད་ལྟའི་བར་རེབ་གོང་གི་དོར་རྡོ་རྣམས་ཀྱི་བརྒྱད་སྟོང་པར་མ་སོགས་ལ་འདུག་པ་དེ་ཡིན། དེ་ལས་ཀྱང་ས་སྐྱ་གོང་མ་རྣམས་ཀྱི་ཕྱག་དཔེ་ཕལ་ཆེར་ཤོག་བུ་ལ་བྲིས་པ་ཡང་ཕྲ་ལ་རིང་བ་ཏ་ལའི་ལོ་མའི་དབྱིབས་སུ་བྱས་ནས་སྣང་ཞིང་། དེ་བཞིན་ཞ་ལུ་ལོ་ཆེན། བུ་སྟོན། ངོར་ཆེན་སོགས་ཀྱི་ཕྱག་དཔེ་རྣམས་ཀྱང་འདྲ་བར་གནས་པས། ལྒིགས་བམ་ཁ་མ་ཕྱེས་བར་དུ་ཏ་ལའི་ལྒིགས་བམ་དང་ནོར་འགྲོ་བ་འདུག དཔེ་ཕྲ་ལ་རིང་བ་དེ་འདྲ་བྱེད་པའི་སྲོལ་ད་དུང་ཡང་ཁམས་ན་ཡོད་ཟེར། ཏ་ལའི་ལོ་མ་དེ་རྩ་རྒྱུས་གསལ་བས། ཐིག་ཀྱང་འདེབས་མི་དགོས། དབུ་ཤོག་གི་དང་བོ་ལ་ཨོཾ་ཞིག་བྲིས་པ་མ་གཏོགས། གཞན་ལྡེབས་རེ་རེའི་མགོ་ལ་དང་ཀྱོག་སོགས་བྲིས་པའང་མི་སྣང་བས། ཁ་འཐོར་ཚེ་ལྡེབས་ཀྱི་ཉིན་སྲིབ་གང་ཡིན་ཀྱང་མི་ཤེས། ཤོག་བུ་ལ་བྲིས་པའི་རྒྱ་དཔེ་རྣམས་ནི་ཤོག་བུའི་ཉིན་ལ་གུར་ཀུམ་གྱི་ཁ་བསྒྱུར་ཏེ། སེར་བོ་དང་། སྲིབ་ཕྱོགས་རང་མདོག་བཞག་པ་ཤ་སྟག་ཏུ་སྣང་། གཏེར་ཡིག་རྣམས་ཀྱང་ཤོག་སེར་སྟེང་ན་ཡོད་པ་དེ་འདྲའི་སྲོལ་ཡིན་མཆིས། སྡེ་སྣོད་གསུམ་ངོས་འཛིན་གྱི་འགྱུར་ཕྱག་དགོས་པ་འདི་ཆོས་རྒྱལ་གྱི་བཀའ་བཅད་ཡིན་ཟེར་མོད། རྒྱ་དཔེ་ཐམས་ཅད་ཀྱི་མགོ་ལ་ཡང་སངས་རྒྱས་དང་བྱང་སེམས་དཔའ་ཐམས་ཅད་ལ་ཕྱག་འཚལ་ལོ་དང་། འཇམ་དཔལ་གཞོན་ནུར་གྱུར་བ་ལ་ཕྱག་འཚལ་ལོ་སོགས་རྒྱ་ཡིག་རང་ལ་བྲིས་སྣང་ཞིང་། གཤེད་དམར་སོགས་ཀྱི་རྒྱུད་དང་། གཞན་ཡང་། བོད་དུ་བསྒྱུར་ཟིན་པ་ཇི་སྙེད་ཅིག་གི་ཕྱི་མའི་རྒྱ་དཔེ་ངོར་སོགས་ན་བཞུགས་པ་ལ་ཡང་། རྡོ་རྗེ་མཁའ་འགྲོ་ལ་ཕྱག་འཚལ་ལོ། །སོགས་བོད་སྐད་ལ་གང་ཡོད་རྒྱ་དཔེ་ལ་ཡང་སྣང་། འོ་ན། རྒྱ་དཔེ་དེ་དག་ལོ་ཙཱ་བ་རང་གི་ཕྱག་བྲིས་ཡིན་ནམ་སྙམ་ན། དེ་ཡང་མིན་ཏེ། བལ་ཡུལ་དང་རྒྱ་གར་ན་ནང་བའི་དཔེ་ཉུང་ཟད་ཙམ་བཞུགས་པ་དེ་ཀུན་གྱི་དབུ་ལ་ཡང་ཕྱག་འཚལ་ལོ་དེ་ཁོ་ན་ལྟར་སྣང་། ད་དུང་ཨུ་ཚུགས་དགོས་ནས་རྒྱ་གར་དང་མཚུངས་པར་ཆོས་རྒྱལ་གྱི་བཀས་བཅད་དོ་སྨྲས་པ་ཙམ་འབད། ཅེས་སོ། །

ཕྱིས་སུ་བོད་ཀྱི་གསུང་རབ་ཀྱི་དཔེ་ཆ་རྣམས་ཕྱོགས་བསྒྲིགས་བྱེད་སྐབས་ཚེག་བར་སོ་གཉིས་དང་སོ་དྲུག་གང་རུང་ལ་ཤོ་ལོ་ཀ་རེ་དང་། ཤོ་ལོ་ཀ་སུམ་བརྒྱ་ལ་བམ་གྲངས་སམ་བམ་པོ་རེ་བྱས་ཏེ། ལྒིགས་ཤིང་གི་བར་དུ་བསྡམས་ནས་འཇོག་པ་ལ་ལྒིགས་བམ་གཅིག་ཏུ་བརྩིས་པ་དང་། རྗེས་སུ་ལྒིགས་བམ་ཆེ་བར་ཤོག་གྲངས་ལྔ་བརྒྱ་ཡས་མས་དང་། འབྲིང་སུམ་བརྒྱ་ནས་བཞི་བརྒྱ་ཙམ། ཆུང་བར་ཉིས་བརྒྱ་ལྷག་ཡོད། ལྒིགས་བམ་རྣམས་ལ་ཁྱད་ཆོས་བདུན་ལྡན་པ་སྟེ། ཡིག་འབྲུའི་མཐའ་སྣེ་མི་འཆོལ་བའི་ཆེད་དུ་མཐའ་ཐིག ཤོག་ངོས་སོ་སོའི་རྒྱབ་མདུན་མི་ནོར་བའི་ཆེད་དུ་ཡིག་མགོ ཤོག་ངོས་སྔ་ཕྱིའི་གོ་རིམ་མི་འཛོལ་བའི་ཆེད་དུ་ཤོག་གྲངས། ལེ་ཚན་ཕན་ཚུན་མི་འཁྲུགས་པའི་ཆེད་དུ་མཚན་བྱང་། ལྒིགས་བམ་ཧྲིལ་བོར་སྲུང་སྐྱོབ་བྱ་བའི་ཆེད་དུ་ལྒིགས་ཤིང་། ལྒིགས་བམ་ཕན་ཚུན་མི་འདྲེས་པའི་ཆེད་དུ་ལྒིགས་བམ། དད་གུས་དང་མཆོད་པའི་ཆེད་དུ་ན་བཟའ་དཔེ་སྒྲིལ། དེ་དག་ཀྱང་བོད་རང་གི་སྒྱུ་རྩལ་གྱི་བཟོ་ཁྱད་ལས་བྱུང་བ་དང། ཡང་། གཞུང་ཆེན་གྱི་ཚིག་དོན་བམ་པོ་སོགས་ཀྱི་གོ་རིམ་མི་འཁྲུགས་པར་བྱེད་པའི་རྟགས་སུ། རྒྱ་རིམ་པ་བདུན་གྱིས་བཏབ་པ་ཞེས་འབྱུང་སྟེ། དེ་ནི། ཚིག་གི་རྒྱ། ཤད་ཀྱི་རྒྱ། ལེའུ་རྒྱ། བམ་པོའི་རྒྱ། བམ་གྲངས་ཀྱི་རྒྱ། སྣེ་ཐིག་གི་རྒྱ། གདོང་ཡིག་གི་རྒྱ་འམ་སྤྱན་འཁྱེར་གྱི་རྒྱ་སྟེ་བདུན་ནོ། །

སྲུང་མདུད།

༡ སྲུང་མདུད་ཀྱི་ཁུངས། ཕྱག་མདུད་དམ་སྲུང་མདུད་ནི་རྡོ་རྗེ་ཐེག་པ་ལ་འཇུག་པའི་ཚེ་སྟ་གོན་གྱི་སྐབས་སུ་དབང་གནང་ཡུལ་སློབ་མའི་ལུས་ཚད་ཀྱི་སུམ་སྒྲིལ་བྱས་ཏེ། མདུད་མཚམས་ལ་དབང་ལྷ་དང་སྔགས་བརྒྱ་རྩ་བཟླས་ནས་ཕུ་བཏབ་སྟེ་དཔུང་བ་གཡོན་པར་བཅིངས་པ་དེ་སྲུང་མདུད་ཀྱི་ཁུངས་ཡིན་ཏེ། རྟ་མཆོག་རོལ་བ་ལས། གཙང་བའི་རས་ལ་ལེགས་བཀལ་བའི། །སྲུང་སྐུད་མདུད་པ་གསུམ་ལྡན་པ། །ཡི་གེ་གསུམ་གྱི་སྔགས་བཟླས་ནས། །དེ་ཡི་དཔུང་བ་གཡོན་པར་བཅིངས། །ཞེས་དང་། རྡོ་རྗེ་ཕྲེང་པ་ལས། སྐུད་པ་ལན་གསུམ་དཀྲིས་པ་ནི། །རྡོ་རྗེ་གསུམ་ནི་མདུད་པར་ལྡན། །དཔུང་བ་གཡོན་པར་བཅིངས་པ་ནི། །ཞེས་སོ། །ཡང་གསེར་འོད་དམ་པའི་མདོ་ལས། བཅོམ་ལྡན་འདས་གཟུངས་སྔགས་འདི་སྒྲུབ་པའི་ཚེ་ཚོན་སྐུད་སྣ་ལྔ་ལ་སྔགས་ལན་རེ་གདབ་ཅིང་མདུད་པ་རེ་རེ་བཅིང་ངོ་། །དེ་འདྲ་བར་ལན་ཉི་ཤུ་རྩ་གཅིག་སྔགས་ཏེ་དཔུང་བ་གཡོན་པ་ལ་བཏགས་ན་འཇིགས་པ་ཐམས་ཅད་བསལ་ཏེ་ལུས་བསྲུང་བར་འགྱུར་རོ། །ཞེས་པ་འདི་ཡང་སྲུང་མདུད་ཀྱི་ཁུངས་སུ་འགྲོ་སྙམ་མོ། །

སྤྱིར་སྲུང་མདུད་ལ་ཡང་། ལས་སྒྲུབ་གྱི་དབང་གིས་རྣམ་གྲངས་མང་བོ་ཡོད་དེ། ཞི་རྒྱས་དབང་དྲག་གི་ལས་སོ་སོར་སྲད་པུ་ཁ་དོག་སྔོ་སེར་དཀར་དམར་དང་། ནག་པོ་ཁྲ་བོ་སོགས་དང་། མདུད་པ་ཡང་གཅིག་ལྡན་གསུམ་ལྡན་བར་མདུད་ཚུལ་མི་འདྲ་བ་མང་ངོ་། །

 དེ་ཡང་སྲུང་མདུད་འདི་ལ་མྱ་ངན་ལས་འདས་པའི་ས་ལ་མ་བཞག་གི་བར་དུ། བར་དུ་གཅོད་པའི་ཕྱི་ནང་གསང་གསུམ་གྱི་བདུད་ཀྱིས་མི་ཚུགས་པར་སྲུང་བས་ཡིན། རྒྱུད་འགྲེལ་ལས་ཀྱང་། དཔུང་སྐུད་སློབ་མའི་ལུས་ཚད་སུམ་སྒྲིལ་གྱི་མདུད་མཚམས་སུ་བླ་མས་བུམ་ཆུས་རྡོ་རྗེ་རྒྱ་གྲམ་དུ་རེག་ཅིང་། དེར་སྣ་ཚོགས་རྡོ་རྗེ་གདན་ལ་རྒྱལ་བ་བྱམས་པ་མགོན་པོ་བཞུགས་སྟངས་ཅན་གྱི་སྐུ་ལས་འོད་ཟེར་འཕྲོས་ཏེ། སངས་རྒྱས་བྱམས་པ་མ་འབྱོན་བར་དུ་བདུད་ཀྱི་གཡོ་བ་མེད་པར། གསུངས་པ་ལས་ཀྱང་ཤེས་པར་ནུས་སོ། །དེ་ལྟར་དབང་གི་སྐབས་ཀྱི་དཔུང་སྐུད་འདི་ཁུངས་སུ་བཅོས་ནས། མི་རྣམས་ཆག་ཆེ་ཉམ་ང་དང་བར་དུ་གཅོད་པ་བཟློག་ཆེད་ཕྱག་ཡུལ་དུ་གྱུར་བའི་བླ་མ་དང་རྣལ་འབྱོར་བས། ལྷ་གང་རུང་ལ་དད་གུས་རྩེ་གཅིག་གིས་གསོལ་བ་བཏབ་སྟེ། གཟུངས་སྔགས་བཟླས་ནས་མདུད་མཚམས་སུ་ཕུ་བཏབ་སྟེ་ལུས་ལ་འཆང་བའམ་མགྲིན་པར་བཏགས་ན་གནོད་པས་མི་ཚུགས་པར་གདམས་པ་ཡིན་ཏེ། ཆོས་རྒྱལ་ཁྲི་སྲོང་ལྡེ་བཙན་ལ་སྐུ་ཁམས་མ་བདེ་བ་དང་། བོད་ཡུལ་དུ་བཙའ་སད་སེར་གསུམ་དང་། ནད་ཡམས་མུ་གེ་སོགས་བྱུང་བས། ཨོ་རྒྱན་རིན་པོ་ཆེས་རྒྱལ་བོ་ལ་ཕྱག་མདུད་དང་ཡི་གེ་བཅས་བསྐུར་བར། མནོལ་བསང་ལྷ་ཆབ་སྔོན་མོ་ལས་བཤད་དོ། །ཕྱིས་སུ་སྲུང་མདུད་ལ་དགུ་མདུད་དང་དྲུག་མདུད་སོགས་མང་དུ་དར་ཁྱབ་བྱུང་། ཁ་དོག་ནི་གྲྭ་བཙུན་ལ་སེར་བོ་དང་མི་སྐྱ་ཕོ་མོ་ལ་དམར་སྔོ་ལྗང་སོགས་གནང་བའི་ཕྱག་ལེན་བྱུང་ངོ་། །

༢ སྲུང་མདུད་ཇི་ལྟར་དར་ཚུལ། རྒྱས་པར་བྱས་ན། སྒྲུབ་པ་པོའི་གང་ཟག་རྣལ་འབྱོར་བ་ཆེ་གེ་མོས་རང་གིས་བསྲུང་བྱའམ་བསྒྲུབ་བྱའི་སློབ་མ་ལ་སྐབས་བབ་དོན་བྱ་གང་གི་ཆེད་སྲུང་མདུད་གྱི་སྒོ་ནས་བསྲུང་བ་བྱེད་པར། ཐོག་མར་སྲུང་མདུད་ཀྱི་རྒྱུ་ཆ་དར་སྐུད་དང་བལ་སྐུད་སོགས་གང་ཡིན་གཙང་སྦྲ་ལེགས་པོ་བྱས། དེ་ནས་རྩ་བརྒྱུད་ཀྱི་བླ་མ་རྣམས་མདུན་གྱི་ནམ་མཁར་སྤྱན་དྲངས། རང་ཉིད་ཡི་དམ་དུ་གསལ་བའི་ཕྱག་གཡོན་པདྨ་འདབ་མ་ལྔ་བའི་སྟེང་དུ་ཨཱ་གཅིག་ལ་དབྱངས་ཡིག་བཅུ་དྲུག་གཡོན་བསྐོར། ལག་གཡས་སོར་མོ་རྡོ་རྗེ་རྩེ་ལྔ་བའི་ལྟེ་བའི་མཐར་གསལ་བྱེད་སོ་བཞི་བསམ། སྲུང་མདུད་མདུན་དུ་བཞག་ནས་གང་བསྟེན་པའི་ཡི་དམ་གྱི་སྔགས་ཀྱིས་བགེགས་བསྐྲད། སྟོང་སྦྱངས་དང་བཅས་སྲུང་མདུད་རྣམས་ཨོཾ་ཨཱཿཧཱུཾ་གི་རང་བཞིན་དུ་གྱུར་པ་ལག་པ་པད་སྐོར་གྱིས་བླངས་ནས་སྙིམ་པར་བཟུང་ལ། ལག་གཉིས་རྡོ་རྗེ་པདྨ་སྙོམས་ཞུགས་ཀྱི་ཚུལ་ལས་འོད་ཟེར་རྣམས་བྱང་སེམས་ཀྱི་ཚུལ་གྱིས་སྲུང་མདུད་ལ་ཐིམ་པར་བསམ་ཞིང་། སྲུང་མདུད་ཡི་དམ་གྱི་ལྷའི་ངོ་བོ་འོད་ཟེར་སྣ་ལྔའི་རང་བཞིན་ཅན་གྱི་མི་ཤིགས་པའི་རྡོ་རྗེ་སྲུང་བའི་མདུད་པར་བསྐྱེད་ལ་རྩ་སྔགས་དང﹙ཉུང་མཐར་བརྒྱ་རྩ་བརྒྱད﹚བཅས་སྔགས་ཀྱི་འབྲུ་དོན་རྣམས་བསམ་སྟེ་མདུད་པ་མདུད། མདུད་པར་དགུ་མདུད་དང་། བཞི་མདུད། ལྔ་མདུད། སུམ་མདུད་ཆིག་མདུད་སོགས་ཅི་རིགས་ལས། དགུ་མདུད་ལྟ་བུ་ནི་ཡི་དམ་རྒྱལ་བ་ཞི་ཁྲོ་རྣམས་ཀྱི་ཕྱི་ནང་གསང་བའི་སྐུ་གསུང་ཐུགས་ཀྱི་ཡོན་ཏན་འོད་ཀྱི་རྣམ་པར་བསྡུས་ནས་བྱིན་གྱིས་བརླབས་པ་དང་། དེ་བཞིན་གཞན་རྣམས་ཀྱང་རྒྱལ་བ་རིགས་ལྔ་དང་རིགས་གསུམ་མགོན་པོ། སྐབས་འབྲེལ་ཡི་དམ་སོགས་ཅི་རིགས་ཀྱི་སྒོ་ནས་བྱིན་གྱིས་བརླབས་ཏེ་བསྒྲུབ་བྱ་སློབ་མའི་ནད་གདོན་འགལ་རྐྱེན་བར་གཅོད་ཐམས་ཅད་ཞི་ཞིང་ཕྱི་ནང་གསང་བའི་བར་གཅོད་ཐམས་ཅད་བཟློག་ཅིང་དེ་ལས་བསྲུང་བར་བསམ། མཐར་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས། ཨཱ་ལི་ཀཱ་ལི་དཔག་ཏུ་མེད་པ་བྱུང་ནས་སྲུང་མདུད་ལ་ཐིམ་པས་འོད་དུ་ཞུ་ནས་མདུད་པའི་ངོ་བོར་གྱུར་པར་བསམ་ལ། ཡེ་དྷ་རྨའི་ཤིས་བརྗོད་དང་བཅས་མཇུག་བསྡུ་བྱ། བསྡུས་པ་བྱས་ན། གཟུངས་སྔགས་བཟླས་ནས་དར་སྐུད་ཀྱི་མདུད་པར་ཞལ་ཕུ་དམིགས་སྒོམ་དང་བཅས་བྱིན་རླབས་བྱེད་ཀྱང་རུང་བར་གསུངས།

༣ སྲུང་མདུད་ཀྱི་ཁྱད་པར་དང་དབྱེ་བ། སྲུང་མདུད་ལ་ནང་གསེས་བསྒྲུབ་བྱ་རྣམས་འགལ་རྐྱེན་དང་བར་ཆད་ལས་སྲུང་བ། མཚོན་ཆ་དང་གཟའ་གདོན་ལས་སྲུང་བ། ཇག་རྐུན་དང་ཁྱི་སྤྱང་ལས་སྲུང་བ། གཅན་གཟན་དང་སྦྲུལ་བདུག་ལས་སྲུང་བ། ཐོག་སེར་དང་ས་ཆུ་མེ་རླུང་གི་འཇིགས་པ་ལས་སྲུང་བ། ཉམས་གྲིབ་དང་སྲི་ངན་ལས་སྲུང་བ། མི་ཕྱུགས་ཀྱི་འགོས་ནད་དང་འགོང་པོ་ལས་སྲུང་བ། དམག་འཁྲུག་དང་གཡུལ་ས་ལས་སྲུང་བ། ཐ་ན་ཐིག་ལེ་དང་མངལ། བུད་མེད་སྲུང་བའི་མདུད་པ་སོགས་ཅི་རིགས་ཡོད་ལ། དེ་རེ་རེ་ཡང་ཐུན་མིན་གྱི་སྒྲུབ་ཐབས་དང་དམིགས་སྒོམ་ཆོ་ག་མི་འདྲ་བ་རེ་རེ་ཡོད།

དཔེར་ན། ལས་སྣ་ཚོགས་ཀྱི་བེའུ་བམ་ལས། གུ་རུ་པདྨ་ལ་ཕྱག་འཚལ་ལོ། །ཚོན་སྐུད་སྣ་ལྔའི་སྐུད་པ་ལ་མདུད་པ་གསུམ་བྱས། སྔགས་བདུན་སྟོང་ངམ་ཁྲི་གསུམ་བཟླས་ལ་བཏབ་སྟེ་བཏགས། ཨོཾ་པདྨ་བིནྟུ་མུ་ནེ་ཛ་ལི་སྭཱ་ཧཱ། སྔགས་མདུད་དེ་ཕྱུགས་སོགས་གང་ལ་བཏགས་ཀྱང་བུ་མི་འཆོར། སྲིའུ་ལ་བཏགས་ན་ཤི་ཁ་ཆོད། སྐྱེས་པར་བཏགས་ན་ཕྱོགས་ངན་ཐུབ། བུད་མེད་ལ་བཏགས་ན་བུ་མི་འཆོར། ར་ལུག་ལ་བཏགས་ན་གཅན་གཟན་ཐུབ། སུ་ལ་བཏགས་ཀྱང་ནད་རིམ་ཐུབ། སྒོ་གོང་དུ་བཏགས་ན་དེ་ཡི་འོག་ཏུ་འཛུལ་ཚད་དལ་ཡམས་དང་རིམས་ཡམས་ལས་ཐར། ལུས་ལ་བཅངས་ན་མཚོན་གྱིས་མི་ཚུགས། སྲུང་སྐུད་དཀར་བོ་ལ་སྔགས་ནས་རྐེད་པར་བཏགས་ན་ཐིག་ལེ་འཛག་པ་ཟབ། ནག་པོར་སྔགས་ཏེ་བུད་མེད་ཀྱི་རྐེད་པར་བཏགས་ན་ལྟེ་བ་བསྒྱུར་བའི་མཆོག སྒྲུབ་པར་འཇུག་དུས་ཚོན་སྣ་ལྔའི་སྐུད་པར་ཐུབ་ཆོད་ཆེན་པོའི་སྔགས་འདིས་བསྣུན་ཏེ་ཁབ་མིག་ལ་དྲངས་ནས་སྒོ་གོང་དུ་འཛེར་ན་བར་ཆད་ཐམས་ཅད་ཐུབ་པར་འགྱུར་རོ། །ཚོན་སྐུད་སྣ་ལྔའི་གདམས་པ་ཟབ་བོ། །

སྡིག་མདུད་ཀྱིས་སྲུང་བ་ཐེའུ་རྟ་སྡུད་མ་ནི། སྔགས་དང་ཏིང་འཛིན་བཟླས་པ་ཅན་གྱིས་སྲུང་སྐུད་འདི་བཏགས་པས་ཐུབ། འདི་གང་ལ་བཏགས་པའི་འཆང་བ་བོ་དེ་ཉིད་གཟའ་བདུད་ཀྱི་རྒྱལ་བོས་ཕྱག་ན་རྡོ་རྗེར་མཐོང་། དེ་བཞིན་དུ་ས་བདག་ཀླུ་གཉན་ཁྱུང་རིགས་ལྔ། རྒྱལ་བོ་བེ་ཧར་གྱིས་རྟ་མགྲིན། ཐེའུ་རང་ཡུལ་འདྲེ་གདུག་པ་ཅན་གྱིས་གནམ་ལྕགས་ཕུར་བ་མེ་འབར། བདུད་དང་གཤིན་རྗེས་ཞགས་པ་མེ་དཔུང་འཕྲོ་བ། སྣང་སྲིད་ལྷ་འདྲེ་རྣམས་ཀྱིས་ཐོག་དང་མཚོན་ཆའི་འཁོར་ལོ། དེ་བཞིན་ལ་ལས་དུག་གི་སྡོང་བོ། ལ་ལས་ཁྲོ་ཆུའི་ཕ་ཝཾ། ལ་ལས་ས་སྲིན་ཕོ་མོ། ལ་ལས་ཀླུ་བདུད་མགོ་དགུ། ལ་ལས་ནམ་མཁའ་སྟོང་བ་སོགས་གདུག་པ་ཅན་དེ་དག་གིས་མི་ཚུགས་པའི་མཐོང་སྣང་སྣ་ཚོགས་སུ་འཆར། འདི་ལ་བདུད་འདུལ་རྡོ་རྗེའི་ཞགས་པ། ནམ་མཁའི་ཐོག་རྒོད་མཚོན་ཆ་ལས་ཀྱི་འཁོར་ལོ་སོགས་སུ་གྲགས། གང་གིས་ཐོགས་པ་དེ་བདུད་རིགས་བར་ཆད་གང་གིས་མི་ཚུགས་ཤིང་ཚེ་ཡི་དམུ་ཐག་དང་། འདྲེ་འཇོམས་བྱད་གྲོལ་གྱི་སྲུང་བ་ཟས་ནོར་འགུགས་ཅིང་དབང་བྱེད་ཀུན་གྱིས་བཀུར་བའི་དོན་ཡོད་ཞགས་པ། ཕྱོགས་ངན་ནད་ཡམས་ཞོ་ལད་ཆང་ལད་སྨྱོན་པ་འདྲེ་ཅན་སོགས་ཀུན་ཐུབ་རྡོ་རྗེའི་ཐོ་བ། སྲིའུ་ཡ་མ་ནག་པོ་དང་། སྐེག་ཅན་སོགས་བསྐྱབ་པའི་ཚེ་འཛིན་རྡོ་རྗེའི་ཞགས་པ་ཡོན་ཏན་བརྒྱ་ལྡན་འདི་ཡི་བྱ་ཐབས་ལ། དང་བོར་བྱང་ཆུབ་མཆོག་ཏུ་སེམས་བསྐྱེད་དེ། རང་ཡི་དམ་བསྒོམ། སྲུང་སྐུད་ནག་པོ་དེ་ལྕགས་སྡིག་མགོ་ལུས་གཉེར་མས་གང་བ་འོད་ཟེར་མེ་མཚོན་གྱི་ཚ་ཚ་འཕྲོ་བར་བསམ་ལ། སྔགས་བརྒྱ་བཟླས་ལ་མདུད་པ་དགུ་བརྒྱབ་མདུད་པ་རེ་སྡིག་པའི་མགོ་རེ་རེ་གྱུར་བར་བསམ། མདུད་པ་དགུ་བརྒྱབ་ཚར་བ་དང་། སྔགས་བརྒྱ་སྟོང་གང་འགྲུབ་བཟླས་ལ། སྲུང་སྐུད་དེ་སྡིག་པ་ནག་པོ་མགོ་དགུ་ཁ་དགུ་མིག་དགུ་ཡོད་པ། མིག་ཉི་ཟླ་ལྟ་བུ། སྡེར་མོ་ལྕགས་ཀྱུ་ལྟ་བུ། མཆེ་བ་དང་ཟེ་བ་སོག་ལེ་ལྟ་བུ། དེ་མཐོང་བ་ཙམ་གྱིས་གནོད་བྱེད་རྣམས་བརྒྱལ་བར་བྱེད་པ། དེ་ལས་འོད་ཟེར་འཕྲོས་པས་གནོད་བྱེད་ཐམས་ཅད་བཀུགས་ནས་སྡིག་པ་ལ་རེག་པ་ཙམ་གྱིས་ལྕགས་བསྲེག་ལ་རྩར་སྦུར་ཕོག་པ་ལྟར་བསྲེགས་པར་བསམ། སྔགས་ནི། ཨོཾ་ཏྲི་ཙེ་ཤང་ཀུ་རུ་འཆང་བ་བོ་ལ་སྲུངས་ཤིག ཨོཾ་གྷི་པ་ར་ཙ་འཆང་བ་བོ་ལ་སྲུངས་ཤིག ཅེས་བཟླས། མདུད་པར་སྔགས་བཏབ། དེ་ནས་གང་ལ་བཏགས་པའི་མི་ཕྱུགས་དེ་ཉིད་སྡིག་པའི་ཁོག་པའི་ནང་དུ་ཚུད་ཅིང་། ཐུགས་རྗེ་ཆེན་པོའི་རྣམ་ཐར་སྡིག་པའི་སྙིང་གི་དཀྱིལ་དུ་བཞུགས་པར་བསམ། ལྕགས་སྡིག་དེ་མཐོང་བ་ཙམ་གྱིས་གནོད་བྱེད་གདོན་བགེགས་རྣམས་རྔུབས་ཤིང་བསྲེགས་པར་བསམ། རང་ཡི་དམ་བསྒོམ་པའི་ཐུགས་ཀའི་འོད་ཟེར་གྱིས་དབྱིངས་ནས་ཁྲོ་བོ་དང་བྱ་ཁྱུང་ཚོན་གང་བ་ཁ་བ་བུ་ཡུག་འཚུབ་པ་ལྟ་བུ་བྱོན་ནས་སྲུང་སྐུད་ལ་ཐིམ་པར་བསམ་ལ། ཨོཾ་ཧེ་རི་གདུག་པ་ཅན། ལྕགས་ཀྱི་མཆེ་བ་ཅན། གནོད་བྱེད་གདུག་པ་ཅན་གྱི་སྙིང་ནས་དྲོངས་ཤིག་སྭཱ་ཧཱ། ཞེས་སྨྲ་བཅད་བྱས་ལ་ཁྲི་ཕྲག་གཅིག་གིས་སྲུང་སྐུད་སྔགས་པར་བྱའོ། །འདི་སྲིའུ་ཡ་མ་ནག་པོ་གསོ་བ་དང་། སྨྱོ་འབོག་དང་གོད་ཁ་ཆེ་བ་གཅོད། ཞོ་ཆང་ལད་པ་དང་། འབྲི་མཛོ་བཞོ་མ་ཐུབ་པ་སོགས་ཐུབ། སེམས་ཅན་ལ་སྤྱང་ཀིས་འཚེ་བ་དང་། མི་ལ་གདོན་གྱིས་གནོད་པ་སོགས་ལ་སྲུང་སྐུད་འདི་བཏགས་པས་ཐེ་ཚོམ་མེད་དེ་བདེན་རྫུན་ལག་ཏུ་ལོངས་དང་གསལ། ཟབ་མོ་གཏེར་གྱི་མན་ངག་གོ།

གཞན་ཡང་། སྲུང་སྐུད་སོགས་ལ་ཡི་དམ་གྱི་སྔགས་བསྲུང་ཤམ་ཅན་ཟབ་མོ་ཅི་རིགས་བཟླས་ཏེ་དམིགས་པ་ཁ་བསྒྱུར་ལ་བཏགས་པས་གནོད་བྱེད་ཐམས་ཅད་སྲུང་བར་འགྱུར་རོ། །

དབང་ཕྱུག་ཆེན་པོའི་སྲུང་མདུད་ནི། སྤྱན་རས་གཟིགས་ཀྱི་སྤྲུལ་བ། ལྷ་འདྲེ་འབྱུང་བོ་ཀུན་གྱི་གཙོ་བོ། དབང་ཕྱུག་ཆེན་པོའི་སྒོ་ནས་གཞན་སྲུང་ན། རང་ཉིད་མུ་སྟེགས་རྣམས་ཀྱི་ལྷའི་གཙོ་བོ་དབང་ཕྱུག་མཐིང་མདོག་དབུ་ལ་རིན་པོ་ཆེ་ཡོད་པ་གཡས་ཏྲི་ཤུལ་རྩེ་གསུམ། གཡོན་སྡིགས་མཛུབ་ཅན་ནམ། ཡང་ན། སྐུ་མདོག་ནག་པོ་གཅེར་བུ་རྒྱན་མེད་ལིང་ག་གྱེན་དུ་སྒྲེང་བ། ཕྱག་གཉིས་རྭ་ཡི་མདའ་གཞུ་འགེངས་པར་བསྒོམ་ལ། སྲུང་སྐུད་ནག་པོ་གཅིག་ལ་མདུད་དགུ་བརྒྱབ། མདུད་པ་རེ་རེ་བཞིན་ལྕགས་སྡིག་མགོ་དགུ་ཁ་གདངས་པ་མེ་ཡི་ཚ་ཚ་འཕྲོ་བ་དྲི་མ་མི་ཞིམ་པས་དཔག་ཚད་ཁྱབ་པ་གནོད་བྱེད་ཀུན་ཟ་བར་བྱེད་པར་བསམ་ལ། ཨོཾ་མ་ཧཱ་དྷི་ཝ་ཧཱུཾ་ཕཊ། ཨོཾ་ཧ་ས་དྷི་ཝ་ཧཱུཾ་ཕཊ། ཨོཾ་དེ་བ་དྷི་ཝ་ཧཱུཾ་ཕཊ། ཞེས་བརྒྱ་སོགས་བཟླས་པ་སྲུང་སྐུད་ལ་བཏབ་སྟེ་གང་ལ་བཏགས་པས། ནོར་འོ་མ་མི་སྟེར་བ། སྐམ་འགོང་། ཞོ་ལད། ཆང་ལད། རྒྱུན་དུ་འོ་མ་རུལ་བ། ནད་པའི་འགྲུལ་སྣ། བྱིས་པ་མཚན་ངུས་བྱེད་པ། ཡམས་ནད་འདྲེ་འདར། སྲོག་རླུང་། ཆང་སྨྱོན་བྱེད་པ། གཟའ་ནད། རྟ་ནད། ནོར་ནད། རྟ་ནོར་གདོན་བཏབ་བརྡུང་བ་ལ་སོགས་དེ་དག་རྣམས་ལ་ཤིན་ཏུ་ཕན་ནོ། །

ཕ་དམ་པའི་མན་ངག ཨོཾ་སུ་དུ་ར་རྦད་སྭཱ་ཧཱ། སྲུང་སྐུད་དཀར་བོ་ཆ་གཅིག་ནག་པོ་ཆ་གཉིས་ཕྱི་བསྒྲིལ་སུམ་ཁུག་བྱས་པའི་ཁྲོ་བོ་ལ་མདུད་པ་གསུམ་བྱས་ལ་སྔགས་འདི་བརྒྱ་རྩ་བཏབ། ཆང་ཉེས་ན་སྦང་མ་དང་བླུག་སྣོད་ལ་བཏགས། རྫ་མ་ཉེས་ན་རྫ་མའི་ལུང་ལ་བཏགས། ཞོ་ཉེས་ན་ཞོ་སྣོད། མི་རྣམས་འཁྲུ་ན་སྐེད་པ། སྐྱུག་ན་སྐེ། ཐིག་ལེ་འཛག་ན་སྐེད་པ། མཚོན་སྲུང་ན་སྐེ། སེམས་ཅན་འཕྱིས་སྲུང་བྱེད་ན་མཇུག་མར་བཏགས། དམ་པའི་མན་ངག་ནག་པོ་དགུ་བསྒྲིལ་འདི་ཅི་ལ་ཡང་འགྲོའོ། །

ཡང་དབང་ཕྱུག་ཆེན་པོའི་སྲུང་སྐུད་ནི། ལུག་ནག་སོགས་བལ་ལ་སྲུང་མདུད་ཉེར་གཅིག་བྱ། དེ་རེ་རེ་བཞིན་ལྷེན་སྔོན་པོ་གཡས་ཌཱ་མ་རུ་དང། གཡོན་ཁ་ཊཱཾ་བཟུང་བ་རེ་སྟེ་ཉེར་གཅིག་ཏུ་བསྒོམ། མདུད་པ་རེ་ལ་སྔགས་བརྒྱ་འདེབས། ཨོཾ་ཨ་ཧི་ནག་པོ་ནན། དུར་ཏི་ནག་པོ་སོད། ཅེས་བཟླས་འདི་ནི་ཕྱུགས་བཞོ་མ་བཏུབ་ན་རྭ་ལ་བཏགས། འོ་མ་མི་སྟེར་ན་རྣ་བ་གཡོན། འཁྲབ་ན་མཇུག་མ། ཞོ་ཉེས་ཞོ་ཟོ། ཆང་ཉེས་ཆང་སྣོད། ཐིག་ལེ་འཛག་ན་སྐེད་པ། བྱིས་པ་མཚན་ངུས་བྱེད་ན་སྐེ་ལ་བཏགས། འཁྲུ་ན་རྐང་བ་ལ་བཏགས། གྲང་བ་ལ་མར་བསྔགས་ནས་སྐེད་པར་བྱུག་པ་སོགས་ཀྱིས་ཉེས་པ་རྣམས་སྲུང་ངོ་གཏེར་མའོ། །

ཨང་རག

ཨང་རག་འདི་རྩ་རླུང་འཕྲུལ་འཁོར་དང་གཏུམ་མོ་སོགས་སྒོམ་དུས་ཀྱི་དོར་ཐུང་ཞིག་ཡིན། རྫོགས་ཆེན་ལུགས་ལ་སྔགས་གོས་བརྒྱད་ཀྱི་ནང་ཚན་རྡོ་རྗེ་གསང་གོས་ཟེར། དེ་ཡང་། པདྨ་བཀའ་ཐང་ལས། ཨ་ཏི་ཡོ་ག་བྱ་བ་ཁས་ལེན་པའི། །བྱིས་དཀར་རས་སྔོན་ཨང་རག་གྱོན་པ་ཞིག། ཞེས་དང་། རས་ཀྱི་ཨང་རག་སྔོན་པོ་སྨད་ལ་དཀྲིས། །ཞེས་པར་མདོག་སྔོན་པོར་བཤད་ལ། སྔགས་འཆང་རྒྱན་མེར་རྐང་བ་གཉིས་རྐེད་པ་གསུམ་འགྲོ་བས་ཁ་གསུམ་པ་དང་། དྲ་ཕྱི་ནང་བསྒྲགས་པའི་དོར་མ་ལྟ་བུ། རིང་ཐུང་ཁྲུ་གང་དང་། གཞི་མ་དམར་བོ་ལ་རྐང་བ་གཉིས་ལ་མུ་འདྲིལ་ལྗང་ཁུ་བྱས་པ། འདི་གསང་གོས་ཡིན་པས་གཞན་གྱི་མི་མཐོང་བར་བྱ་དགོས་པར་གསུངས་སོ། །དེ་ལྟར་རིང་ཚད་ཁྲུ་གང་བ། རས་སྣ་ཚོགས་འཇའ་སྒྲིག་དང་། དུང་ཕྲེང་ངམ་ཐོད་ཕྲེང་གི་རི་མོ་ཡོད་པ། ཁ་འདབས་སུ་དར་སྔོན་སོགས་ཀྱི་གདུགས་ཕུར་གྱིས་བརྒྱན་པ་ཞིག་གོ །

སྒོམ་ཐག

སྒོམ་ཐག་འདི་མདོ་སྔགས་གཉིས་ཀ་ལས་འབྱུང་སྟེ། མདོ་ལས་དགེ་སློང་རྣམས་མཚན་མོ་མལ་ནང་དུ་ལུས་ཚུགས་མི་ཞིག་པའི་ཆེད་དུ། པུས་འཁྱུད་དགོས་པར་གསུངས་པ་དེ་ཡིན། སྔགས་ལས་རྣལ་འབྱོར་བས་རྩ་རླུང་ཐིག་ལེའི་སོགས་ཀྱི་ཉམས་ལེན་སྐབས་ཤིན་ཏུ་གལ་ཆེ་ལ། སྒོམ་ཐག་འདི་གྲུབ་མཐའ་རིས་མེད་ཀྱིས་སྤྱོད་སྲོལ་ཡོད་པ་དང་། ཁྱད་པར་དུ་རྗེ་མི་ལའི་ཡན་ཆད་ཀྱི་གྲུབ་འཐོབ་པ་རྣམས་ཀྱིས་སྒོམ་ཐག་ཁུག་པའི་མགོ་བོར་འཁོར་ཚད་དང་། ཆོས་དྲུག་སྡུད་པའི་ཟིན་བྲིས་རྣམས་ལས་ཀྱང་དེ་ལྟར་དང་། མི་ལའི་མདུན་དུ་དྭགས་པོས་ཐབས་ལམ་བསྒོམས་པའི་སྐབས་སུ། དམྱལ་བ་ཐིག་ནག་གི་བཀོད་པ་མཐོང་ཞིང་སྐུ་ཁམས་མ་བདེ་བ་བྱུང་སྐབས། རྗེ་བཙུན་གྱིས་ཁྱེད་ཀྱི་སྒོམ་ཐག་ཐུང་བའི་རྐྱེན་གྱིས་རྩ་འཐམ་པར་འདུག་པས། སྒོམ་ཐག་རིང་དུ་ཐོངས་གསུངས་པ་ལྟར། ཆང་བ་གང་རིང་དུ་བཏང་བ་ནས་ད་ལྟ་དེ་ལྟར་བྱེད་པ་མང་སྟེ། གཅིག་རྐྱང་ལ་སོར་བདུན། ཞེང་ལེབ་ལ་སོར་གསུམ་མམ་བཞིའོ། །རྙིང་ལུགས་ལ་སྒོམ་ཐག་བཅིང་བ་ལ་བརྟེན་ཏེ་འཇའ་ལུས་གྲུབ་པའི་རྟེན་འབྲེལ་གྱི་བྱིན་རླབས་ལ་དམིགས་ནས། སྒོམ་ཐག་དང་སྒོམ་ཤིང་གི་ངོས་ལ་རྡོ་རྗེ་ཟམ་པའི་རྩ་ཚིག་བྲིས་པས་དབང་བསྐུར་བའི་ཕྱག་བཞེས་མཛད་དོ། །

སྤྱིར་སྒོམ་ཐག་ནི། སྒོམ་ཆེན་དག་ལུས་ཚུགས་དྲང་བོར་བསྲིངས་ཆེད། ཕྲག་སྟེང་ནས་པུས་འཁྱུད་ཀྱི་སྡོམ་ཐག་སྟེ། དེ་ཡང་སྒོམ་ཆེན་མཉམ་བཞག་གི་ཚེ། རས་ལེབ་མོ་ཞེང་ཚད་སོར་བཞི་ཙམ་པ་ལ། རྩ་དབུ་སྐྱོ་རོ་གསུམ་མཚོན་ཕྱིར། གཞུང་སྐུད་གསུམ་གཤིབས་པ། གཏུམ་མོའི་མེ་མཚོན་ཕྱིར་ཁ་དོག་དམར་བོ། དགའ་བ་བཅུ་དྲུག་མཚོན་ཕྱིར་དྲ་མིག་བཅུ་དྲུག་ཡོད་པའོ། །

རྒྱབ་ཤིང།

རྒྱབ་ཤིང་ནི། སྒོམ་དུས་སུ་རྒྱབ་རྟེན་ས་ཞིག་སྟེ། ཚད་འོག་མཁར་དང་འདྲ་ལ། ཕྲེད་ཤིང་མཐོ་གང་བ་རེ་གླ་རྒྱུན་སོགས་ཐི་གུ་འཇམ་པོས་སྦྲེལ་བ་ཞིག་གོ། སྒོམ་མཁར་དང་འདི་གཉིས་བཻ་རོ་ཙཱ་ན་ནས་སྤང་མི་ཕམ་མགོན་པོ་བར་སྒོམ་ཐག་དང་སྒོམ་རྟེན་ལུས་ལ་བཙུགས་ནས་རྫོགས་པ་ཆེན་པོའི་མན་ངག་གནང་བས་འཇའ་ལུས་བརྙེས་པའི་ལོ་རྒྱུས་ཡོད་ལ། ད་ལྟ་ཡང་གྲུབ་མཐའ་ཁ་ཅིག་གིས་ཕྱག་ལེན་དུ་འདེབས་པའི་གསང་ཆས་ཡིན་པར་བཤད་དོ། །

སྒོམ་རྟེན་གྱི་མདུན་ཤིང་ངམ་འོག་མཁར།

འོག་མཁར་ནི་སྒོམ་ཆེན་པ་དག་ལུས་གནད་མི་འཆུག་པ་དང་། ཐིག་ལེ་ལུག་བརྒྱུད་བལྟ་ཕྱིར། མདུན་དུ་བསླངས་ནས་སྣེ་མོ་མ་ནེའི་ཀོས་ཀོ་བརྟེན་པ་ཞིག་སྟེ། རྒྱུ་ཚེར་མ་མེད་པའི་ཤིང་རིགས་ཤུག་པ་སོགས་ཀྱིས་བཟོས་པའི་དབྱུག་པ། རིང་ཚད་ཁྲུ་ཕྱེད་དོ་ཡོད་པ་ཞིག་གོ། རྒྱ་གར་གྱི་གྲུབ་ཆེན་དག་དང་། རྫོགས་ཆེན་པ་དང་བཀའ་གདམས་པར་དར་སོ་ཆེའོ། །

འབོལ་གདན།

འབོལ་གདན་ནི། ཀུ་ཤ་སྔོན་པོའི་འབོལ་གདན། འཕང་དུ་སོར་བཞི་དང་། སྲིད་ཞེང་མཐོ་གང་སོར་བཅུ་དྲུག་ཡོད་པ་ལེགས་གྲུབ་ལས་གསུངས་ལ། མ་འབྱོར་ན་འཇག་མ་དང་སྤ་ཡང་རུང་སྟེ། མི་ལས། འོག་ན་སྤ་ཡི་འབོལ་ཆུང་བདེ། ཞེས་པ་ལྟར། ཡང་ལས་ཀྱི་ཁྱད་པར་གྱིས་ཤིང་གི་སྟན་དང་། ཁྲིའུ། ལས་ཀུན་ལ་ལོ་མའི་སྟན་ཡང་རུང་བར་ལེགས་གྲུབ་ལས་གསུངས་པ་དང་། ཡང་བླ་མེད་ཀྱི་རྒྱུད་ལས་ནི། ཞིང་ལྤགས་དང་གླང་ཆེན་ཀོ་རློན། སྟག་གཟིག་སེང་གེའི་པགས་པ། སྡེར་བཞི་མ་ཉམས་པ་དང་། དུར་ཁྲོད་ཀྱི་རས་དག་ཀྱང་བཤད་དོ། །

ཡང་། བརྟག་གཉིས་ལས་ཚོགས་ཀྱི་འཁོར་ལོའི་དུས་སུ་རྣལ་འབྱོར་ཕོ་མོ་རྣམས་གདན་ཇི་ལྟ་བུ་ལ་གནས་པ་འཆད་པའི་ཚེ། རོ་གདན་དང་། སྟག་ལྤགས་དང་། དུར་ཁྲོད་རས་ཀྱི་གདན་གསུམ་གསུངས་པ་ལས། རོ་གདན་ནི་རོ་དངོས་མ་ཉམས་པ་སྨན་ལ་སོགས་པས་བྱུགས་པས་པགས་པ་མ་དུལ་བར་བྱས་ནས་ལེགས་པར་བསྐམས་ཏེ། དེ་ཉིད་སླར་ཡང་བྱེ་མ་རློན་པ་སོགས་ལ་ཅུང་ཟད་སྦངས་ནས། དབྱུག་པའམ་ཐོ་བ་འཇམ་པོས་རུས་མགོ་རྣམས་ཀྱི་ཐད་ནས་རིམ་པ་བཞིན་བརྡུངས་པས། ནང་གི་རུས་པ་སོགས་ཕྱེ་མར་གྱུར་བ་འོག་གི་ལམ་ནས་འཐོན་པར་འགྱུར་ལ། ཐམས་ཅད་འཐོན་ཟིན་ནས་ལེགས་པར་འཇམ་པོར་གྱུར་གྱི་བར་དུ་བྱི་དོར་བྱས་པ་དེ་ཉིད་གདན་དུ་བྱའོ། །ཞེས་འཆད་དོ། །དེ་བཞིན་དུ་སྟག་ལྤགས་ཡན་ལག་མ་ཉམས་པ་མཉེན་པོར་བྱས་པ་དང་། རོ་རས་ལ་ནི་མི་རོ་བྲིས་པའོ་ཞེས་བླ་མ་དག་འཆད་དོ། །

ཡང་ཞི་ཁྲོའི་ཁྱད་པར་གྱི་གདན་དུ་བཞུགས་ཚུལ་ལ། རང་བྱུང་གི་ཡེ་ཤེས་རྟོགས་པའི་ཡོན་ཏན་གྱིས། ཞི་བའི་ལྷ་ཚོགས་ཀྱི་གདན་ལ། དབང་བསྐུར་རྒྱལ་བོའི་རྒྱུད་ལས། ཐུགས་ནི་མི་འཇིགས་བཞི་ཡིས་བདུད་བཞི་བཅོམ། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །སྐུ་ནི་སྟོབས་བཅུའི་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་བཞིས་ཆགས་མེད་སྒྲོལ། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིན་རྒྱལ་བོའི་གསུང། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་འཕྲིན་ལས་རྣམ་བཞིས་ཐོགས་མེད་སྒྲོལ། །དེ་གྲུབ་རྟགས་སུ་ཤང་ཤང་ཁྲི་ལ་བཞུགས། །ཞེས་སོ། །ཆེ་བའི་ཡོན་ཏན་དེ་རྣམས་ཀྱི་ཉེས་ཚོགས་བཅོམ་པའི་གདན་ནི། ཐབས་དང་ཤེས་རབ་དབྱེར་མེད་པ་ཉི་མ་དང་ཟླ་བའི་གདན། དོན་དམ་དཀོར་བདུན་ལྷུན་གྱིས་གྲུབ་པའི་རྟགས་སུ་རིན་པོ་ཆེའི་ཁྲི་རྐང་མཛོད་མིག་བདུན་ལྡན་དུ་ཤར་བ་རྣམས་ཡིན་ལ། གདན་དེ་དག་བརྩེགས་ལུགས་ནི། སྐྱེས་བུ་ལྔ་ལ་ལྔ་བརྩེགས། སེམས་དཔའ་ལ་ནི་སུམ་བརྩེགས། ཀུན་བཟང་ཡབ་ཡུམ་ལ་བཞི་བརྩེགས་སོ། །གཞན་ཡང་རྣམ་གྲངས་ལ། སྟོབས་གླང་ཆེན། སྙིང་རྗེ་རི་དྭགས། ཆོས་མ་འདྲེས་པ་ཆུ་སྲིན་སོགས་ཀྱང་བཤད་དོ། །

ཁྲོ་བོའི་ཚོགས་ཀྱི་གདན་ནི། ཉི་ཟླ་པད་གསུམ་ནི་ཞི་ཁྲོ་གཉིས་ལ་ཐུན་མོང་དུ་རུང་བ་སྤྱིར་བཏང་ཡིན་ལ། ཁྲོ་གདན་གྱི་ཁྱད་པར་ནི། སྔ་འགྱུར་རྙིང་མའི་ལུགས་ཀྱི་ཆེ་མཆོག་ཧེ་རུ་ཀ་ལྟ་བུར་མཚོན་ན། འོག་གཞི་རྡོ་རྗེ་བྲག་གདན་ལ། འགྲོ་བ་རིགས་དྲུག་རང་གཟུགས་ཀྱིས་བཏེགས་པའི་གདན། སྣ་ཚོགས་པདྨ་གེ་སེར་དང་བཅས་པ། རྩ་ཉོན་དྲུག་དང་ཉེ་ཉོན་ཉི་ཤུ་བསྲེགས་པའི་འོད་ཟེར་སྟོང་དུ་འབར་བའི་ཉི་མ། འཁོར་བའི་གདུང་བ་སེལ་བའི་ཟླ་བའི་དཀྱིལ་འཁོར། དེའི་སྟེང་དུ་ད་དུང་དབང་བོ་བརྒྱ་བྱིན་དང་། ཚངས་པ། ཁྱབ་འཇུག དབང་ཕྱུག གདོང་དྲུག སྦྲིང་གི་རི་ཏི། ཚོགས་ཀྱི་བདག་པོ་བཅས་ལྷ་ཆེན་བརྒྱད། མཐའ་ཡས། འཇོག་པོ། དུང་སྐྱོང་། སྟོབས་རྒྱུ། པདྨ། དབང་ཆེན། ནོར་རྒྱས། རིགས་ལྡན་བཅས་ཀླུ་ཆེན་པོ་བརྒྱད་དེ། ལྷ་ཀླུ་སྤེལ་མར་ཁ་སྦུབ་དུ་བསྣོལ་བའི་གདན་གྱི་སྟེང་ལ། མི་འཇིགས་པ་སེང་གེ དཔའ་བ་སྟག གཏུམ་པ་གཟིག བརྗིད་པ་དོམ། སྟོབས་གླང་ཆེན། འཛིན་པ་མ་ཧེ། གདུག་པ་ཆུ་སྲིན། ཞེ་སྡང་སྦྲུལ་ཏེ་བྱོལ་སོང་གཙོ་བོ་བརྒྱད་ཀྱི་གདན་གྱི་ཁར། གསེར་གྱི་འཁོར་ལོ་རྩིབས་མ་བཅུ་གཉིས་དང་ལྡན་པ་དེའི་ལྟེ་བ་ལྷ་ཆེན་པོ་མ་ཧཱ་དེ་བ་དང་། ཨུ་མ་དེ་བ་ཁ་སྦུབ་དང་ཕྱི་ཆིངས་སུ་བསྣོལ་བའི་གདན་རྣམས་ཡིན་ནོ། །

དྲུག་པ། རྒྱན་གོས་ཀྱི་སྐོར།
ལོངས་སྐུའི་ཆ་བྱད་དང་དེའི་མཚོན་དོན།

འདིར་ལོངས་སྐུ་མཛེས་པར་བྱེད་པའི་རིན་པོ་ཆེའི་རྒྱན་བརྒྱད་དང་གོས་ལྔ་སྟེ་གོས་རྒྱན་བཅུ་གསུམ་བཤད་པ་ལ། དང་བོ། རྒྱན་བརྒྱད་ནི། སྙན་རྒྱན། མགུལ་རྒྱན། དཔུང་རྒྱན། དོ་ཤལ་ལམ་སེ་མོ་དོ། ཕྱག་གདུབ། སོར་གདུབ། ཞབས་གདུབ། དབུ་རྒྱན་བཅས་རིན་པོ་ཆེའི་རྒྱན་བརྒྱད་དང། གོས་ལྔ་ནི། དར་གྱི་ཅོད་པན། སྟོད་གཡོགས། དར་དཔྱངས། སྐ་རགས། སྨད་དཀྲིས་བཅས་ལྔའོ། །དེ་དག་གི་མཚོན་དོན་ནི། སྨོན་ལམ་ཕ་རོལ་ཕྱིན་པས་ན། །དབུ་རྒྱན་རིན་ཆེན་པྲོག་ཞུ་ལ། །རྩེ་ཕྲན་དག་གིས་རྣམ་པར་སྤྲས། །ཐབས་ཀྱི་ཕ་རོལ་ཕྱིན་པས་ན། །ལེ་བརྒན་དར་གྱི་ཅོད་པན་ཅན། །འཕྱངས་དང་བསྐྱོད་པས་རྣམ་པར་མཛེས། །བཟོད་པས་ཕ་རོལ་ཕྱིན་པས་ན། །སྙན་ཤལ་རིན་ཆེན་པ་ཏྲ་ལ། །ཁོང་གསེང་སྔོན་པོའི་ཕྲ་དང་བཅས། །བསམ་གཏན་ཕ་རོལ་ཕྱིན་པས་ན། །ཐུགས་ཀའི་ཟེའུ་རྒྱན་མཛེས་པ་ལ། །དཔལ་གྱི་བེའུ་རྣམ་པར་བརྒྱན། །བརྩོན་འགྲུས་ཕ་རོལ་ཕྱིན་པས་ན། །སྐུ་སྨད་དར་གྱི་ཤམ་ཐབས་དང་། །ཞབས་གདུབ་རིན་ཆེན་པ་ཏྲ་ཅན། །ཚུལ་ཁྲིམས་ཕ་རོལ་ཕྱིན་པས་ན། །སྐེད་རྒྱན་རིན་ཆེན་པ་ཏྲ་ལ། །དྲ་བ་དྲ་ཕྱེད་ཟ་ར་ཚགས། །སྦྱིན་པའི་ཕ་རོལ་ཕྱིན་པས་ན། །རིན་ཆེན་པ་ཏྲའི་སོར་གདུབ་དང་། །ཕྱག་གདུབ་རིམ་པ་ལྔ་དང་ལྡན། །ཤེས་རབ་ཕ་རོལ་ཕྱིན་པས་ན། །སེ་མོ་དོ་དང་དོ་ཤལ་ལ། །རིན་ཆེན་པ་ཏྲའི་སྤྲས་པ་ཅན། །སྟོབས་ཀྱི་ཕ་རོལ་ཕྱིན་པས་ན། །དབུ་རྒྱན་རིན་ཆེན་པ་ཏྲ་ལ། །དྲ་བ་དྲ་ཕྱེད་ཟ་ར་ཚགས། །ཡེ་ཤེས་ཕ་རོལ་ཕྱིན་པས་ན། །དར་གྱི་སྟོད་གཡོགས་དར་དཔྱངས་དང་། །སྐ་རགས་ལྷབ་ལྷུབ་མཛེས་པ་བཅས། །བཅུ་གསུམ་རྒྱན་དང་ལྡན་པ་ནི། །ངེས་པ་ཅན་གྱི་གཞུང་ལས་གསུངས། །ཞེས་སོ། །

དབུ་སྐྲ་ལྕང་ལོ།

སྔགས་འཆང་རྣམས་ཀྱི་དབུ་སྐྲ་ལྕང་ལོ་འཇོག་པའི་ཁུངས་ནི། འཇམ་དཔལ་མཚན་བརྗོད་ལས། གཙུག་ཕུད་ཕུད་བུ་ལྕང་ལོ་ཅན། །རལ་བ་མུ་ཉྫ་ཅོད་པན་ཐོགས། །གདོང་ལྔ་གཙུག་ཕུད་ལྔ་དང་ལྡན། །ཟུར་ཕུད་ལྔ་བ་མེ་ཏོག་ཐོད། །ཅེས་དང་། ཀུན་འདུས་རིག་པ་དང་། དཔལ་ཡེ་ཤེས་ཐིག་ལེ། རྡོ་རྗེ་མེ་ལྕེ་རྒྱུད་སོགས་ལས་ཀྱང་གསུངས་སོ། །དེ་ཡང་ཆོས་རྒྱལ་ཨིནྡྲ་བྷུ་དྷི་དང་ཁ་ཆེ་ཟླ་བ་བཟང་བོ་སོགས་ཁྱིམ་སྔགས་རིག་པ་འཛིན་པ་མང་དུ་བྱུང་ཕྱིར། དེ་དག་གི་ངོ་སྐལ་དང་དགོས་པ་དུ་མ་ཞིག་གི་ཕྱིར། གསར་རྙིང་གི་རྒྱུད་སྡེ་དུ་མ་ནས་དཔའ་བོའི་ལྕང་ལོ་མི་བྲེག་པར་རྒྱན་དུ་བསྔགས་པ་ཡིན།

སྐྲ་བཅིངས་ཚུལ་ལའང་། ཐོར་ཅོག ཕྱེད་བཅིངས། ཟུར་ཕུད་གྱེན་བརྫེས་དང་གསུམ་ཡོད། ཐོར་ཅོག་ནི་དབུ་སྐྲ་ཀུན་སྤྱི་བོར་བཅིངས་ནས། སྐྲ་སྣེ་ཕྱིར་མི་མངོན་པར་རྡོག་པོ་ཏོག་ལྟར་བཅིངས་པའོ། །ཕྱེད་བཅིངས་ནི། སྐྲ་ཕྱེད་སྤྱི་བོ་དང་། ཕྱེད་ཀ་ཐུར་དུ་ཉིལ་བའོ། །ཟུར་ཕུད་གྱེན་བརྫེས་ནི། སྐྲ་ཐུར་དུ་ཉིལ་བ་ལ་སྤྱི་བོར་སྐྲའི་ཟུར་ཕུད་ལྔ་འམ་གསུམ་བཅིངས་པའོ། །གཞན་སྐྲ་བཅིངས་རུས་པའི་འཁོར་ལོ་དེ་བསྐོན་ན་མཆོག་གྱུར་ཞིག་ཏུ་བཤད་དེ། དཔལ་སྤྲུལ་གྱིས། ལྟོ་སྟོང་རུས་པའི་འཁོར་ལོ་ཟླུམ་པོ་དེ་ཡོད་ན། །དཔའ་བོའི་ལྕང་ལོ་མི་འབྲེག་གཙུག་ཕུད་དེ་བསམ་ཡང་། །རྒྱན་མེད་རལ་རྫོང་སྟུག་པོའི་འཕྱང་སྡེབས་དེས་སུན་ནས། །སོར་གསུམ་གཙུག་སྐྲའི་མཆོད་པ་མཁན་སློབ་ལ་ཕུལ་བཏང་། །ཞེས་སོ། །

དེར་མ་ཟད་སྐྲ་ཐོད་དུ་བཅིངས་པ་ལ་གསེར་དངུལ་སོགས་ཀྱི་ཟླ་ཕྱེད་དང་། སྣ་ཚོགས་རྡོ་རྗེ་སོགས་ཀྱིས་ཀྱང་བརྒྱན་པར་བཤད་དེ། མངོན་བརྗོད་བླ་མ་ལས། ཐོད་པའི་ཕྲེང་བས་དབུ་ལ་བརྒྱན། །རལ་བའི་ཅོད་པན་རྒྱན་དུ་ཐོགས། །ཟླ་བ་ཕྱེད་པས་སྤྱི་གཙུག་ལ། །སྣ་ཚོགས་རྡོ་རྗེས་དབུ་ལ་མནན། །ཞེས་སོ། །

དེ་ལས་གཞན། རྒྱུད་ཀྱི་ལྒིགས་བམ་ཡང་རལ་བའི་དཀྱིལ་དུ་བཅིངས་དགོས་པ་སྟེ། ཕྱག་རྡོར་གསང་བ་མངོན་བསྟན་ལས། ལྒིགས་བམ་སོར་ནི་བཅུ་དྲུག་ལ། །རིམ་བདུན་རྒྱ་ཡིས་བཏབ་ནས་ཀྱང་། །རྟག་ཏུ་སྤྱི་བོའི་གཙུག་ཏུ་བཟུང་། །འདི་དང་བྲལ་བར་མ་གྱུར་ན། །བསྙེན་པ་དེ་ཡིས་བསྒྲུབ་པ་དེ། །སྒྲུབ་པ་ཆེན་པོའང་དེ་ཡིན་ཏེ། །སྔགས་ཀྱང་དེ་ཡིན་ལྷ་ཡང་དེ། །བླ་མ་དེ་ཡིན་སློབ་དཔོན་ཡང་། །སངས་རྒྱས་ཆོས་དང་དགེ་འདུན་ཡང་། །དེ་ཡིན་བསྐྱེད་དང་རྫོགས་པ་དེ། །མ་ལུས་དབང་ཡང་དེ་ཡིན་ཏེ། །འཇིག་རྟེན་བྱ་བ་ཀུན་སྤངས་ནས། །འདི་ལ་མཆོད་པར་གྱུར་བ་ནི། །ཚོགས་གཞན་ཅི་ཡོད་རྨོངས་པའི་རྒྱུ། །ཅི་ཕྱིར་འདི་ལ་འབད་མི་བྱེད། །ཅེས་ཕན་ཡོན་དང་བཅས་ཏེ་གསལ་བར་གསུངས་སོ། །

མཚོན་དོན་ནི། སྐྲ་སྤྱི་བོར་བཅིངས་པས་རིགས་བདག་འབྲལ་བ་མེད་པ་དང་། ལྕང་ལོ་གཡས་སུ་འཁྱིལ་བས་དཔའ་མོ་མཚོན་པའོ། །ཡང་སྔགས་ལུགས་ལ་ལྕང་ལོ་འཇོག་དགོས་པའི་ཁྱབ་པ་མེད་དེ། གཏུམ་པོ་དཔའ་གཅིག་གི་རྒྱུད་ལས། སངས་རྒྱས་ལྔ་ནི་རབ་སྦྱོར་བས། །མགོ་བོ་དབུ་རྒྱན་ཕྱག་རྒྱ་བྱ། །ཟུར་ཕུད་ལྔ་ཡིས་བརྒྱན་བྱས་ནས། །སྐྲ་དང་ཁ་སྤུ་བྲེག་པར་བྱ། །ཞེས་སོ། །

ཉེ་ཆར། སྔགས་རལ་གྱི་བཤད་པ་ཤོག་འཁྱར་ཞིག་ལག་སོན་བྱུང་བ། སྐབས་འདིར་འབྲེལ་ཆེ་བས། ཚེགས་ལ་མ་བལྟས་པར་ཆ་ཚང་བཀོད་ན། རལ་བ་ཞེས་འཁྲུལ་སྣང་གི་རྒྱ་ཆོས་ཉིད་ཀྱི་རོལ་བ་རལ་བའི་དོན་ནི། ཕྱོགས་བཅུ་དུས་བཞིའི་རྒྱལ་བ་རབ་འབྱམས་ཐུགས་ཀྱི་ཟེའུ་འབྲུ་ཨོ་ཏྲིའི་ཨོ་རྒྱན་ལ། ཉོན་མོངས་མེ་ཡིས་གདུང་བའི་གྱི་ན་བས། །གསོལ་བ་འདེབས་སོ་བྱིན་རླབས་ཆར་ཆེན་ཕོབས། །སྔོན་བསགས་དཀར་བོའི་འབྲས་བུ་ལེགས་སྨིན་པས། །མཆེད་ཀྱི་མཆོག་གྱུར་པདྨ་རྡོ་རྗེ་ཉོན། །ཨེ་མ། སྐལ་ལྡན་གྲུབ་པའི་དབང་ཕྱུག་གོང་མ་འགས། །དབུ་ལོ་མ་བྲེགས་བརྡ་རྟགས་རྟེན་འབྲེལ་ནི། །རང་བྱུང་རྡོ་རྗེ་འཇིགས་མེད་གླིང་བ་ཡིས། །རལ་བ་ཡི་ཐོར་ཚུགས་ལན་བུ་ཅན། །གསང་སྔགས་ཀྱི་བསྟན་པ་དར་བ་དང་། །སྣང་བ་ཀུན་ཟིལ་གནོན་རྟེན་འབྲེལ་ཡིན། །ལེགས་འདོད་དང་ཚུལ་འཆོས་བྱས་སྙམ་མེད། །ཅེས་གསུངས་པའི་དོན་དེ་སེམས་ལ་རྨད། །གཞན་གདོད་མའི་ས་ལ་ལེགས་བྱོན་པའི། །དོན་འབྲས་གྲུབ་བརྡའ་འགས་ལུང་བཤད་ན། །སྐྲ་ལན་བུ་ལྔ་བཅུ་རྩ་བརྒྱད་ནི། །དཔལ་ཁྲག་འཐུང་ལྔ་བཅུ་རྩ་བརྒྱད་མཚོན། །སྤུ་ཉག་མ་བྱེ་བ་གྲངས་མང་ནི། །མ་ཌཱ་ཀྐི་བྱེ་བ་གྲངས་མང་མཚོན། །དུས་རྟག་ཏུ་སྤྱི་བོར་བཅིངས་པ་ནི། །ཕ་བླ་མ་མི་བརྗེད་དྲན་གསོར་བཞག། དུས་དབྱར་དགུན་ཚ་གྲང་གིས་དུབ་ཚེ། །བསིལ་དྲོད་ཀྱི་བདེ་བ་སྟེར་ཕྱིར་བཞག། རང་མ་ཉེས་བཞིན་དུ་གླགས་ལྟ་བས། །དགྲ་བགེགས་རྩད་ནས་བརླག་ཕྱིར་བཞག། ཁོང་བཀའ་གདམས་རྣམ་ཐར་སྐྱོང་བའི་ཕྱིར། །མི་གྲལ་ལ་མི་ཚུད་གྱིར་དུ་བཞག། དུས་མ་འོངས་གཙུག་ཏོར་ལྟར་མི་མངོན། །དེ་འཐོབ་པའི་དགོས་པ་ཡོད་ཕྱིར་བཞག། དབུར་སྐྱེས་པའི་ལྕང་ལོའི་ཐོར་ཅོག་འདི། །ཆོས་སྐུ་ཐིག་ལེ་ཉག་གཅིག་བརྡ། །མ་བྲེགས་མགོ་ལ་དཀྲིས་པ་འདི། །འཁོར་འདས་སྤང་བླང་དག་པའི་བརྡ། །དེ་འདྲའི་དོན་ཅན་རལ་བ་འདི། །ལྷ་རྩ་གསུམ་སྲུང་མའི་བླ་རྡོ་ཡིན། །རྫོགས་ཆེན་མཁྱེན་བརྩེ་འོད་ཟེར་གྱིས། །མཐོན་མཐིང་རལ་བའི་ལྒིགས་བམ་མན་ཆད་ནས། །བདོག་པའི་ཉེར་སྤྱོད་ཕྲ་མོ་ཡན་ཆོད་དུ། །མདོར་ན་རྣལ་འབྱོར་ཡིད་ལ་མཛའ་བའི་རྫས། །རྩ་གསུམ་དམ་ཅན་ཌཱ་ཀྐིའི་བླ་རྡོར་འབུལ། །ཞེས་གསུངས་པ་དེ་ན་རལ་བའི་དོན་རེ་ཆེ། །ངུར་སྨྲིག་བཙུན་ཚུགས་ལེན་ཀྱང་འདི་རང་དགའ། །རྡོ་རྗེ་ལུང་གིས་འདི་ལྟར་བསྔགས་ནས་ཡོད། །ཞྭ་མོས་ཅི་བྱེད་རལ་བའི་ཟུར་ཕུད་ཐོགས། །ཟ་ར་ཟི་རེ་བཙུན་པ་ཙམ་བཞག་ནས། །ངེད་ཅག་གྲུབ་དབང་ས་ར་ཧ་བ་ལྟར། །ཡ་ང་མེད་པའི་བརྟུལ་ཞུགས་སྤྱོད་པ་སྐྱོངས། །ཞེས་གསུངས་དོན་ལ་ཐུགས་དགོངས་ལེགས་པར་གཏོད། །གཞན་ཡང་དམ་པ་དུ་མའི་ལུང་མང་ཡང་། །རེ་ཞིག་དེ་ཙམ་ཞིག་གིས་ཆོག་ཤེས་མཛོད། །ཅེས་གསུངས་སོ། །

གཙུག་ཏོར།

གསང་སྔགས་ཀྱི་སྐབས་འདིར། སྲིད་པ་སྒྱུ་མའི་ཆོས་ཀུན་དག་པ་ཡེ་ཤེས་ཀྱི་རྣམ་རོལ་གཞི་དབྱིངས་ཆེན་པོར་ལྷུན་གྱིས་གྲུབ་པའི་བརྡ་རྟགས་སུ། ཕྱི་སྣོད་གཞལ་ཡས་ཁང་། ནང་བཅུད་ལྷ་དང་ལྷ་མོར་ལྟ་བ། བྱ་བྱེད་ཐམས་ཅད་རྡོ་རྗེ་གསང་བའི་ལམ་འཁྱེར་འབའ་ཞིག་དང་། རྫས་དང་ཡོ་བྱད་ཐམས་ཅད་ཀྱང་ངེས་པར་དགོས་པའི་བརྡ་རྟགས་ཀྱི་སྒོ་ནས་རྟེན་འབྲེལ་གྱི་གནད་ཟབ་མོ་འགའ་ཞིག་རྟོགས་པའི་ཐབས་སུ་གྱུར་བ་ཡིན་ལ། དེ་བས་ས་ཆོག་དང་། རང་ཉིད་ལྷའི་དཀྱིལ་འཁོར་ལ་འཇུག་སྐབས་དང་། ཚོགས་ཀྱི་འཁོར་ལོ་ཆེན་པོ་བྱེད་པའི་དུས་དང་། སྤྲོས་བཅས་དང་སྤྲོས་མེད་ཀྱི་སྤྱོད་པ་བྱེད་པ་རྣམས་ཀྱི་ཚེ་དང་། གླུ་གར་སོགས་ཀྱི་མཆོད་པ་དང་། སྦྱིན་སྲེག་སོགས་ཀྱི་ཚེ་ལྷའི་ཆ་བྱད་ཀྱིས་འཇུག་དགོས་པས། སྔགས་གོས་གསོལ་ཚེ་ཡང་། སྔགས་པའི་དགེ་སློང་དང་དགེ་ཚུལ་ལ་སོགས་པ་འདུལ་བའི་བརྟུལ་ཞུགས་ལ་གནས་པ་ཡིན་ན། ཆོས་གོས་ཁ་དོག་དཀར་བོ་དང་ནག་པོ་སོགས་དང་། སྐྲའི་ཐོར་ཅོག་དང་། རུས་པ་དང་རིན་པོ་ཆེའི་རྒྱན་ལ་སོགས་པ་ལུས་ལ་བགོ་བ་དང་བརྒྱན་པའི་སྔོན་དུ་དུས་དྲན་བྱས་ནས། རྒྱགས་པ་དང་། འཕྱར་གཡེང་གི་བསམ་པ་དང་། རྒོད་བག་སོགས་ཀྱིས་མིན་པར་ཀུན་སློང་དག་པ་དང་། ལྷའི་ང་རྒྱལ་འཆང་བར་བཤད་ལ།

ལོངས་སྤྱོད་རྫོགས་པའི་ལྷ་ཐུན་མོང་གི་དབང་དུ་བཏང་ན། ཆགས་བཅས་ཀྱི་ཆ་ལུགས་སུ་གཙུག་ཏོར་དང་བཅས་པའི་དབུ་སྐྲ་བཅིངས་པ་སྟེ། སྟོད་བཅིངས་ཤིང་སྨད་དཔྱངས་པ་སོགས་ཡོད་པ་དང་། དགོས་པ་ཡང་སྔགས་ཀྱི་དམ་ཚིག་བཟུང་བ་དང་རིམ་གཉིས་ཀྱི་རྣལ་འབྱོར་ལ་གནས་པའི་གང་ཟག་གིས། རང་ཉིད་ལྷའི་གཙུག་ཏོར་དང་ལྡན་པར་དྲན་གསོ་བའམ། ལྷའི་རྣལ་འབྱོར་དང་མི་འབྲལ་བའི་དམ་ཚིག་དྲན་པའི་རྟེན་དུ་འཆང་བའོ། །

དབུ་རྒྱན།

ལྷ་སོ་སོའི་འཕྲིན་ལས་ཀྱི་དབང་གིས། རིགས་ལྔའི་དབུ་རྒྱན། རིན་ཆེན་དབུ་རྒྱན། དར་དང་མེ་ཏོག་གི་དབུ་རྒྱན་སོགས་མང་མོད། བླ་མེད་ཀྱི་ལྷ་ཕལ་ཆེར་རིན་ཆེན་དང་ཐོད་སྐམ་ཀྱི་དབུ་རྒྱན་ཏེ། དེ་ཡང་ཐོད་སྐམ་ལྔས་བདེ་སྟོང་ཡེ་ཤེས་ལྔ་དང་། དེ་བཞིན་ལག་གི་ལྷར་ཤར་བ་རྒྱལ་བ་རིགས་ལྔ་མཚོན་ལ། དགོས་པ་ཡང་གསང་སྔགས་རིག་པ་འཛིན་པ་རྣམས་ཀྱིས། རང་གི་དབུར་རིགས་ཀྱི་བདག་པོ་རྣམས་དང་མི་འབྲལ་བའི་དམ་ཚིག་གི་རྟེན་དུ་བྱེད་པ་ཡིན་ནོ། །

བྲོག་ཞུ།

བྲོག་ཞུ་ནི་རལ་བའི་ཐོར་ཅོག་ལ་བརྟེན་པ་རིན་པོ་ཆེའི་ཁྱུད་མོ་སུམ་རིམ་ལ་རིན་པོ་ཆེའི་རྩེ་ཕྲན་རྣམས་ཀྱིས་མཛེས་པར་བྱས་ཤིང་། སྤྱི་བོར་རིན་པོ་ཆེ་ལ་གནས་པའི་རྡོ་རྗེ་ཕྱེད་པས་མཚན་པ་སྟེ། རལ་བའི་ཐོར་ཅོག་དངོས་མེད་ན་སྐྲ་ལས་བྱས་པའོ། །རྗེ་བསྟན་རྒྱན་གྱིས། བྲོག་ཞུ་དེ་གཙུག་ཏོར་གྱི་སྟེང་ནས་ཞྭ་ལྟར་གྱོན་པར་བྱེད་པ་ཞིག་ཡིན་པར་གསུངས་སོ། །

ཁྱིམ་སྔགས་ཀྱི་གོས་དཀར།

ཁྱིམ་སྔགས་ཀྱིས་གོས་དཀར་གྱོན་པ་ནི་སྔགས་ཆས་ཞིག་ཡིན་པར་མ་ཟད། དེའི་རྒྱུ་སྐུད་པ་འཁལ་དང་རས་ཡུག་འཐག་པ་སོགས་ཀྱང་དམ་ཚིག་ཏུ་བརྩིས་ཡོད་དེ། དགྱེས་རྡོར་གྱི་བརྟག་པ་ཕྱི་མ་ལེའུ་དྲུག་པའི་ནང་། གང་གང་སྐུད་པ་འཁལ་བ་དང་། །གང་གང་རས་ཡུག་ཐགས་པ་དང་། །དེ་ཡང་དམ་ཚིག་ཅན་ངེས་པས། །དམ་ཚིག་བྱིན་རླབས་རྣལ་འབྱོར་བས། །ཞེས་གསུངས་ལ།

ཁྱིམ་སྔགས་རྣམས་ཀྱིས་གོས་དཀར་བགོ་བའི་ཁུངས་ནི། དཔུང་བཟང་ལས། གོས་དཀར་དག་གམ་ཤིང་ལོ་འམ་གསོ་མ་འམ། ཟར་མ་འམ་ཤིང་ཤུན་རྣམས་ཀྱི་གོས་བགོའོ། །ཞེས་པ་ལྟར། གསང་བ་སྤྱི་རྒྱུད་དང་། རྡོ་རྗེ་མེ་ལྕེ་རྒྱུད་སོགས་ལས་ཀྱང་གསུངས་ལ། གོས་མ་བཅོས་དཀར་བོ། སྐྲ་མ་བཅོས་ལྕང་ལོ། སེམས་མ་བཅོས་གཉུག་མ་སྟེ། མ་བཅོས་གསུམ་ལྡན་གྱི་སྔགས་པ་ཞེས། གོས་དཀར་གཙང་ལ་ནག་ནོག་གི་དྲི་མ་མེད་པ་ཞིག་བགོ་བ་ཡིན་ནོ། །ཁྱད་པར་དུ་སྨད་གོས་དེ་ཉལ་བའམ་ཁྲུས་ཀྱི་ཚེ་མ་གཏོགས་མི་འབྲལ་བ་སྟེ། ལེགས་གྲུབ་ལས། ཉལ་དང་ཁྲུས་བྱེད་མ་གཏོགས་པར། །སྔགས་པས་མཐང་གོས་མི་སྤང་ཞིང་། །དཀར་ལ་ཤིན་ཏུ་འཇམ་པ་དེ། །ཉིན་རེ་བཞིན་དུ་བཀྲུ་བར་བྱ། །ཞེས་སོ། །

གཞན་ཡང་། ལས་བཞིའི་སྦྱིན་སྲེག་སོགས་ཞི་རྒྱས་དབང་དྲག་ལ། གོས་རྒྱན་དང་ཡོ་བྱད་ཡང་དཀར་སེར་དམར་ནག་བསྔགས་པ་ཡིན་ཏེ། མི་གཡོ་བའི་རྟོག་པའི་རྒྱུད་ལས། གོས་དཀར་རྒྱན་ཡང་དཀར་བོ་སྟེ། །ཡོ་བྱད་ཀུན་ཀྱང་དཀར་བྱས་ནས། །བསམ་པ་བཟང་བོས་ཤར་བལྟས་པ། །འདིས་ནི་ཞི་བའི་ལས་རྣམས་འགྲུབ། །ཅེས་སོ། །

སྟོད་སྨད་ཀྱི་གོས་སོགས།

སྟོད་སྨད་ཀྱི་གོས་ལའང་ལྷ་རང་རང་གི་རྣམ་འགྱུར་གྱིས་མཚོན་པས། གང་འཚམ་ཞིག་ཡོད་མོད་ཀྱང་། འདིར་ལྷ་དང་ཆ་ལུགས་མཐུན་པར་བྱ་བའི་ཕྱིར་ལྷ་རྫས་ལས་གྲུབ་པའི་སྟོད་གོས་དང་སྨད་གཡོགས་རིན་པོ་ཆེའི་རྒྱན་ཅན། དམ་ཚིག་དྲན་པ་གསོ་བའི་རྟེན་དུ། དེ་ཡང་ཞི་བའི་ལྷ་རྣམས་ལ་ལྷ་རྫས་གོས་ཀྱི་ན་བཟའ་དང་། དར་དཔྱངས་སྟོད་ཁེབས་སོགས་ཏེ། སྔགས་འཆང་རྒྱན་མེ་ལས། དུག་ལྔ་མ་སྤངས་པའི་བརྡར། དར་དཀར་བོ་གསེར་གྱི་ངང་རིས་ཅན་གྱི་སྟོད་གཡོགས་དང་། ཚི་གུས་སྨད་དཀྲིས་དང་། ཅོད་པན་ཟི་ལྡིར་གར་གྱི་ཕུ་དུང་ཅན་ཏེ། དར་གྱི་ཆས་གོས་ལྔ་དང་། བཏགས་པའི་རྒྱན་ལའང་ལོངས་སྤྲུལ་གཉིས་ལས། དང་བོ་ནི། འདོད་ཡོན་མ་སྤངས་གནས་སུ་དག་པའི་བརྡར། རིན་ཆེན་དབུ་རྒྱན། སྙན་ཆ། མགུལ་རྒྱན། སེ་མོ་དོ། ཕྱག་གདུབ། ཞབས་གདུབ། སྐ་རགས། དོ་ཤལ་སྟེ་རིན་ཆེན་རྒྱན་བརྒྱད་དོ། །ཐུབ་པའི་རྒྱན་དྲུག་ནི། ཕར་ཕྱིན་དྲུག་མཐར་ཕྱིན་པའི་བརྡར། ནམ་མཁའི་ཁྱུང་གི་རྒྱན། བུ་ཆུང་ལྷ་ཡི་རྒྱན། རི་དྭགས་སྙིང་རྗེའི་རྒྱན། ཆུ་སྲིན་པ་ཊའི་རྒྱན། སེང་གེ་བརྗིད་ཀྱི་རྒྱན། གླང་ཆེན་སྟོབས་ཀྱི་རྒྱན་དྲུག་གོ །མཚོན་དོན་ཡང་། གླང་ཆེན་གྱིས་སྟོབས། སེང་གེས་མི་འཇིགས་པ། རི་དྭགས་གིས་སྙིང་རྗེ། ཤང་ཤང་གིས་དགེ་སྡིག ངང་བས་བྱམས་པ། ཆུ་སྲིན་གྱིས་ཐུགས། ཀླུ་འབྲུག་གིས་ཡེ་ཤེས། བྱ་ཁྱུང་གིས་ལྟ་བའོ། །

ཁྲོ་བོའི་རིགས་ལ་དུག་གསུམ་དབྱིངས་སུ་བཅོམ་པའི་བརྡར། མི་ལྤགས་ཀྱི་སྟོད་གཡོགས་དང་། གླང་ཆེན་ཀོ་བའི་སྐེ་དཀྲིས། སྟག་ལྤགས་ཀྱི་ཤམ་ཐབས་བགོ་བ་སྟེ། དེ་ཡང་ཞིང་ལྤགས་ནི། སྐྱེས་པ་དར་མ་གཡུལ་དུ་བསད་པའི་པགས་རློན་ཁྲག་ཤམ་ཅན། ཡན་ལག་མགོ་དང་བཅས་པའོ། །གླང་གོས་ནི། མིས་བདག་ཏུ་མ་བཟུང་བའི་ནགས་ཀྱི་གླང་རྒོད་ཕན་ཚུན་སྟོབས་བཀྱེ་ཏེ་ཤི་བའི་མགོ་སུག་དང་བཅས་པའོ། །སྟག་པགས་ནི། མོ་སྟག་དར་མ་བཀྲག་མདངས་ཅན་སྐྱོན་མ་ཞུགས་པ་སྡེར་བཞི་མགོ་དང་བཅས་པ་ཁྲག་གི་ར་རིས་སྦགས་པའོ། །དག་པ་ཡང་། ང་རྒྱལ་དབྱིངས་སུ་དག་པའི་ཞིང་ལྤགས། གཏི་མུག་དག་པས་གླང་ཀོ འདོད་ཆགས་དག་པས་སྟག་ཤམ་མོ། །གཞན་ཡང་། དཔའ་བོ་དང་ལྷ་མོའི་རྒྱུད་ལ་གཟིག་ཤམ་དང་། སྒྱུ་འཕྲུལ་དྲ་བ་ལས། སྨད་གཡོགས་སེང་གེའི་པགས་པས་གཡོགས། །ཞེས་སེང་ལྤགས་སོགས་གྱོན་ཞིང་། ཁྲོ་རྒྱན་ལའང་། མ་རུངས་གདུག་ཅན་འདུལ་ཕྱིར་སྦྲུལ་ཆུན་དང་། དེ་དག་འཁོར་བ་ལས་སྒྲོལ་ཕྱིར་མགོ་ཕྲེང་ངོ་། །དེ་ཡང་སྦྲུལ་ཆུན་ནི། ཀླུ་རིགས་དཀར་སེར་སྔོ་ལྗང་གི་སྦྲུལ་བཞི་ཀ ཡན་ལག་གི་ཉྭ་བཞིར་བཅིངས་པའོ། །ཐོད་ཕྲེང་ནི། སྦྲུལ་ནག་ཟུང་ལ་མགོ་རློན་ལྔ་བཅུ་བརྒྱུས་ཏེ་ཕྲེང་བ་མགུལ་ནས་བྲང་གི་བར་དཔྱངས་པའོ། །དག་པ་ལ། སྦྲུལ་ཆུན་གྱིས་ཀླུ་རིགས། མགོ་རློན་གྱིས་ཚངས་པ་འདུལ་བའམ། ཡང་ན། སྦྲུལ་ཆུན་གྱིས་ཞེ་སྡང་། ཐོད་ཕྲེང་གིས་ཕྲག་དོག་དབྱིངས་སུ་ཞི་བའོ། །

བྱུགས་རྫས་ལའང་། ཐལ་ཆེན་གྱི་ཚོམ་བུ། ཁྲག་གི་ཐིག་ལེ། ཞག་གི་ཟོ་རིས་བཅས་བྱུག་པའི་རྫས་གསུམ་སྟེ། ཐལ་ཆེན་ནི། དཔའ་བོ་གྲི་ཤིར་ཐེབས་པའི་རོ་བསྲེགས་པའི་ཐལ་བ་བྱུགས་པའི་སྟེང་། རུས་པའི་ཕྱེ་མ་དཀར་བོ་སོར་གསུམ་བཅུག་ནས་དཔྲལ་བར་འབྲུ་ཡི་ཚོམ་བུ་ལྟར་བཀོད་པ་དང་། ཁྲག་གི་ཐིག་ལེ་ནི། དཔའ་བོ་གཡུལ་དུ་རྨས་ཏེ་དབུགས་མ་ཆད་གོང་དུ་སྙིང་ཁྲག་དྲོན་མོ་མཁུར་ཚོས་གཉིས་སུ་ཐིག་ལེ་སུམ་ཚུགས་སུ་ནོར་བུའི་དབྱིབས་སུ་བྲིས་པ་དང་། ཞག་གི་ཟོ་རིས་ནི། རུ་ཏྲའི་ལེའུ་ལས། དེ་ནས་ཁ་ལ་ཞག་གི་ཟོ་རིས་ཆགས། །གསུངས་པ་ལྟར། ཞག་དེས་སོར་མོ་གསུམ་གྱི་རིས་སམ། ཟོར་བ་རིས་འཁྱོག་གསུམ་དུ་བྲིས་པའོ། །དག་པ་ལའང་། ཐལ་ཆེན་གྱིས་བརྒྱ་བྱིན། རཀྟས་དབང་ཕྱུག ཞག་གིས་ཁྱབ་འཇུག་སྟེ་ལྷ་ཆེན་གསུམ་འདུལ་བའམ། དུག་གསུམ་འཇོམས་པར་སྦྱར་བའང་ཡོད་དོ། །

དེ་གསུམ་ཡང་དུག་གསུམ་བཅོམ་པའི་བརྡ་རྟགས་སུ་གསུངས་ཤིང་། བརྡ་དོན་ཡང་སྔོན་རུ་ཊ་ཐར་བ་ནག་པོ་བཏུལ་བའི་ཆས་རྣམས་ཏེ། དེ་ཡང་ཡེ་ཤེས་ཀྱི་ཆས་སུ་བྱིན་གྱིས་བརླབས་པ་ཡིན་ནོ། །ཡང་རིག་པ་རང་བྱུང་གི་ཡེ་ཤེས་ལ་ཡོན་ཏན་རང་ཆས་སུ་ཡོད་པའི་བརྡ་རྟགས་སུ་དཔལ་གྱི་ཆས་བཅུ་ནི། རྔམ་གློག་ལས། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་ཤེས་རབ་ཉི་ཟླ་ཟུང་འབྲེལ་ཆས། །བདུག་པ་བསྲེགས་པ་ཡེ་ཤེས་མེ་ཡི་ཆས། །སྐྱེ་ཤི་རྩར་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེའི་གཤོག་པའི་ཆས། །མངའ་ཐང་ཡོངས་རྫོགས་རྡོ་རྗེ་སློག་པའི་ཆས། །སངས་རྒྱས་སར་འགྲོ་དབང་གི་བསེ་ཁྲབ་ཆས། །གནོད་གདུག་བཟློག་བྱེད་རྒྱ་བྱེའུ་ལྕགས་ཀྱི་ཆས། །ཞེས་དང་། ཡང་། རྣམ་གྲངས་ལ། རྡོ་རྗེ་ཁྱུང་གཤོག་ཐབས་དང་ཤེས་རབ་ཆས། །མཐིང་ག་ཅོད་པན་དཔའ་རྟགས་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པ་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་བཟློག་བྱེད་རྒྱ་བྱེའུ་ལྕགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་རིས་ཆས། །དབུ་སྐྲ་གྱེན་བརྫེས་འཁོར་བ་རྒྱུ་བཟློག་ཆས། །ཞེས་དང་། བཀའ་བརྒྱད་སོགས་ལས། རྒྱ་བྱེའུ་ལྕགས་ཀྱི་ཆས། བསེ་ཁྲབ་དབང་གི་ཆས། གཅན་གཟན་གཟིག་གི་ཆས། སྤྲུལ་བ་རྡོ་རྗེ་ཆས། གདུག་པ་སྦྲུལ་གྱི་ཆས། དཔའ་བོ་སྟག་གི་ཆས། གཟི་མདངས་ཞིང་ལྤགས་ཀྱི་ཆས། དམར་གསར་ཁྲག་གི་ཆས། རྩལ་ཆེན་སེང་གེའི་ཆས། གདུག་པ་དོམ་གྱི་ཆས་སོགས་ཀྱང་བཤད་དོ། །ཀླུ་རིགས་ལྔ་འདུལ་བའི་བརྡར། རྒྱལ་རིགས་ལ་དཀར་བོ། བྲམ་ཟེའི་རིགས་དམར་བོ། རྗེ་རིགས་སེར་བོ། དམངས་རིགས་ལྗང་གུ གདོལ་རིགས་ནག་པོ་སྟེ། སྦྲུལ་རིགས་ལྔའི་རྒྱན་ནོ། །ཡང་རྡོ་རྗེ་སློབ་དཔོན་གྱི་ཆས་སུ་ཞུགས་པར་བྱ་བ་ནི། རིན་ཆེན་དབུ་རྒྱན། ཐོར་ཚུགས། ཅོད་པན། སྙན་ཆ། མགུར་ཆུ། དཔུང་རྒྱན། ཕྱག་གདུབ། ཞབས་གདུབ། དོ་ཤལ་རུས་པའི་རྒྱན་དྲུག་དང་། དར་ཟབ་ཀྱི་སྟོད་གཡོགས། སྨད་གཡོགས། དྲི་བཟང་གི་བྱུགས་པ། རིན་ཆེན་ཕྲེང་བ་རྣམས་འདོད་ཡོན་མ་སྤངས་པའི་རྒྱན་དུ་རོལ་ཕྱིར་གསོལ་ལ། གཉིས་པ་གང་གི་ཆས་ནི། སྟག་ཤམ། རུས་རྒྱན། སྙིང་ཕྲེང་། གྲི་རྣམས་སྟེ་རིགས་དྲུག་ཡེ་ཤེས་དྲུག་ཏུ་སྦྱོར་བའི་བརྡའོ། །གཞན་ཡང་། དབང་བསྐུར་རྒྱལ་བོའི་རྒྱུད་ལས། བུམ་དབང་ཆོས་བཅུ་མ་འཛོམས་ན། །ཡེ་ཤེས་སེམས་དཔའ་འཕེལ་མི་འགྱུར། །ཞེས་པ་ལྟར། ཆོས་བཅུ་ནི། ༡ གྲུབ་པར་བྱེད་པ་ཚོགས་ཀྱི་ཆས། ༢ བཀོལ་ཉན་དུས་བཏབ་འཁོར་གྱི་ཆས། ༣ བར་ཆད་སྲུང་བ་མོས་པའི་ཆས། ༤ ལ་ཉེས་བརྟགས་པ་སྟ་གོན་ཆས། ༥ དམིགས་རྟེན་བཅའ་བ་དཀྱིལ་འཁོར་ཆས། ༦ ཞུ་གསོལ་ལྡན་པ་ལས་ཀྱི་ཆས། ༧ ཡོན་ཏན་ལྡན་པ་ཡུམ་གྱི་ཆས། ༨ ཕྱག་རྒྱ་བསྒྱུར་བ་གར་གྱི་ཆས། ༩ སྟངས་སྟབས་འགྱིང་བག་གིང་གི་ཆས། ༡༠ བྱེ་བྲག་འབྱེད་པ་རོལ་མོའི་ཆས། ཞེས་ཀྱང་གསུངས་སོ། །ཁྱད་པར་དུ་གོས་རྒྱན་སོགས་ཀྱི་ཆས་འདི་དག་ཡེ་ཤེས་ཀྱི་ཆས་སུ་བྱིན་གྱིས་བརླབས་པ་ཡིན་ཏེ། རུ་ཏྲའི་ཆས་ནི་མང་ལ་ཡང་བ་ཡང་། །དེ་དག་ཡེ་ཤེས་ཆས་སུ་བྱིན་གྱིས་བརླབས། །ཞེས་སོ། །

དེ་ལྟར་ཞི་མ་ཁྲོའི་རིགས་དང་། ཆགས་ཤིང་ཁྲོ་བའི་རིགས་དང་། ཁྲོས་ཤིང་ཆགས་པའི་རིགས་སོགས་ཀྱང་། ལྷ་རང་རང་གི་རྒྱུད་ནས་བདེ་སྟོང་གི་ལམ་ཇི་ལྟར་མངོན་པར་གསལ་མི་གསལ་སོགས་ཀྱི་གནད་ཀ་ལྡན་ལ། དེ་ཕྱིར་ན་བཟའ་བཞེས་ཚུལ་སོགས་ལའང་དེ་མཚུངས་སུ་མཛད་པ་ཤེས་དགོས་སོ། །

བེར།

བེར་གྱི་ཁུངས་ནི། སྒྲུབ་པ་རྩ་རྒྱུད་ལས། ན་བཟའ་དར་ནག་བེར་ཆེན་གསོལ། །ཞེས་གདན་གཞི་དང་དངོས་གྲུབ་འབྱུང་རྒྱུད་སོགས་ལས་ཀྱང་གསུངས་ལ། བེར་གྱི་ཁ་དོག་སྔོན་པོ་དང་། ལྗང་ཁུ། ནག་པོ། དམར་བོ་སོགས་རྒྱུད་ལས་གསུངས་མོད། གཙོ་བོ་ཁ་དོག་ནག་པོའི་སྟེང་ལ་སྐུད་པ་དམར་བོའི་མེ་རིའི་རི་མོ་ཅན། སྐེད་པ་ནས་སྡུད་ཆིངས་ཡོད་པ། བེར་འདབ་ཤིན་ཏུ་ཡངས་པ་དེའོ། །ད་ལྟ་ཐུལ་བ་འམ་ཟླ་གམ། བླ་མ་ཚོས་གསོལ་བའི་སྐུ་བེར་འདི་ལ་འདྲ་དཔེ་བླངས་པ་ཡིན།

ཡང་། སྔགས་ཆས་ཀྱི་བེར་འདི་ལ་མི་ལྤགས་ཀྱིས་གཡོགས་པའམ། སུམ་རིམ་དུ་བྱེད་པའང་ཡོད་དེ། གདན་བཞི་ལས། སྙིང་བོའི་ཚེམ་བེར་དམར་བོ་ནི། །མི་ཡི་པགས་པས་གཡོགས་པར་བྱ། །ཞེས་དང་། དངོས་གྲུབ་འབྱུང་རྒྱུད་ལས། སྐུ་ལ་དར་བེར་སུམ་རིམ་ལ། །སྣ་ཚོགས་ཅོད་པན་དར་གྱིས་སྤྲས། །ཞེས་སོ། །

ལྷ་མོའི་ཕྱག་རྒྱ་ལྔ།

སམྦུ་ཊ་ལས། འཁོར་ལོ་རྣ་ཆ་མགུལ་རྒྱན་དང་། །ལག་པར་གདུ་བུ་སྐ་རགས་ཉིད། །སངས་རྒྱས་ལྔ་ནི་རྣམ་དག་པས། །འདི་ལྔ་ཕྱག་རྒྱ་དག་པར་གསུངས། །ཞེས་པ་ལྟར། དག་པ་ཡང་། འཁོར་ལོས་མི་བསྐྱོད་པ། རྣ་ཆས་འོད་དཔག་མེད། མགུལ་ཕྲེང་གིས་རིན་ཆེན་འབྱུང་ལྡན། ལག་གདུབ་ཀྱིས་རྣམ་སྣང་། སྐ་རགས་ཀྱིས་དོན་འགྲུབ་མཚོན་པར་ཀྱེ་རྡོར་ལས་ཀྱང་བཤད་དོ། །

ཡང་། རྣལ་འབྱོར་མ་ཀུན་སྤྱོད་ལས་རྒྱན་དགུ་དང་། སངས་རྒྱས་ཐོད་པ་ལས་བརྒྱད། ཀྱེ་རྡོར་ལས་བདུན། མངོན་བརྗོད་བླ་མ་ལས་དྲུག་ཀྱང་བཤད་དོ། །ཡི་དམ་ལྷའི་རྒྱན་ཆ་འདི་དག སྤྱིར་གསང་སྔགས་འབྲས་བུ་ལམ་འཁྱེར་གྱི་ལམ་ཡིན་པ་དང་། སྔགས་ལམ་དུ་འདོད་ཡོན་མི་སྤངས་པར་ལམ་འཁྱེར་གྱིས་ཉམས་སུ་བླངས་དགོས་པ་དང་། གདུལ་བྱ་ཆགས་ཅན་གྱི་གང་ཟག་ལ་བསྟན་པའི་ལམ་ཡིན་ཕྱིར། དེ་སྒོམ་པའི་རྣལ་འབྱོར་བས་ཀྱང་། རྒྱན་ཆ་དག་འཇིག་རྟེན་ན་རིན་པོ་ཆེ་སོགས་རིན་ཐང་ཆེ་བ་དང་། མཛེས་པར་གྲགས་པ་ལྟར། ཁྲོ་ཆས་སོགས་ལྷའི་ཆ་ལུགས་དང་མཐུན་པར་རྒྱན་གོས་ཀྱིས་བརྒྱན་དགོས་པ་ཡིན། ཁྱད་པར་དུ་དབང་བསྐུར། རབ་གནས། སྒྲུབ་པ། སྦྱིན་སྲེག ཚོགས་འཁོར། གསང་སྤྱོད། ཚོགས་སྤྱོད་སོགས་ཀྱི་སྐབས་སུ་བརྒྱན་དགོས་པ་ཡིན་ནོ། །གསང་སྔགས་ཀྱི་ཚེ། ལུས་རྒྱན་སྤྲས་པ་འདི་ཡང་སྔགས་པ་དགེ་ཚུལ་སློང་ཡིན་ན་དུས་དྲན་བསྟེན་ཏེ་གསོལ་བ་དང་། ཁྱིམ་པ་ཡིན་ནའང་མཛེས་ཆོས་དང་། རྒྱགས་འཕྱར། རྒོད་གཡེང་སོགས་ཀྱི་བསམ་པས་ལྷའི་རྣལ་འབྱོར་དང་བྲལ་བར་བྱེད་ན་ནི། རབ་བྱུང་གི་བསླབ་པས་མ་བསྡམས་པ་ཁྱིམ་པའི་སྔགས་པ་ཡིན་ཡང་། ངན་སོང་གི་སྒོ་དབྱེ་བས་མི་རུང་བས་ན་རབ་ཏུ་བྱུང་བ་ལྟ་ཅི་སྨོས། དེ་ལྟ་མིན་པར་བསམ་པ་ཁྱད་པར་ཅན་གྱིས་ལྷའི་རྣལ་འབྱོར་ལ་གནས་པས་ཆས་སུ་ཞུགས་པ་ལ་བསོད་ནམས་ཁྱད་པར་ཅན་འཐོབ་ཀྱི། གཞན་དུ་ན་མཆོད་པ་འབུལ་བའི་སྐད་ཀྱི་གདངས་དང་། སྦྱིན་སྲེག་གི་ཚེ། འབྲུ་མེ་ལ་སྲེག་པ་དང་། མཆོད་པའི་སླད་དུ་རོལ་མོ་བྱ་བ་སོགས་ལའང་དུས་དྲན་མི་འཆགས་ཤིང་བྱར་མི་རུང་བར་འགྱུར་བས། མདོ་སྔགས་འགལ་བར་འཛིན་པའི་ཕྱོགས་སུ་བརླན་པར་འགྱུར་བ་དང་། རབ་བྱུང་གཟུགས་ཀྱིས་ལྷའི་ཆས་སུ་ཞུགས་ནས་གསང་རྫས་དུ་མ་ཐོགས་ནས་ལུས་ཀྱིས་ཕྱག་རྒྱ་དང་། ངག་གི་སྔགས་ལ་སོགས་གསང་བ་སྒྲོགས་ཤིང་། དབང་མ་འཐོབ་པའི་སྐྱེ་བོ་མང་བོའི་དབུས་སུ་རྒོད་བག་གི་བསམ་པས་ཀུན་ཏུ་རྩེ་བ་དག་ནི། མདོ་སྔགས་ཀྱི་བསྟན་པ་གཉིས་ཀ་དུས་གཅིག་ཏུ་ཉམས་པར་བྱས་ཏེ་དམྱལ་བ་མི་བཟད་པའི་སྒོ་ཕྱེས་པ་ཡིན་ལ། དེ་བས་མཐའ་གཉིས་སུ་མ་ལྷུང་བའི་སྒོ་ནས་བསྟན་པ་ཐམས་ཅད་འགལ་མེད་དུ་འཁྱེར་ཤེས་པར་བྱའོ། །

རིན་པོ་ཆེའི་རྒྱན་དྲུག

རིན་པོ་ཆེ་རྒྱན་དྲུག་འདི་ལ་འདྲེན་ཚུལ་མི་འདྲ་བ་མང་ཡང་། བདེ་དགྱེས་དུས་འཁོར་སོགས་དུ་མ་དང་། ཀུན་སྤྱོད་དང་ལུ་ཨི་བའི་བདེ་མཆོག་གི་མངོན་པར་རྟོགས་པ་གཉིས་ལས། མགུལ་རྒྱན། གདུ་བུ། རྣ་ཆ། སྤྱི་གཙུག་གི་ནོར་བུ། མཆོད་ཕྱིར་ཐོགས། ཐལ་ཆེན་ཏེ་དྲུག་གོ།

མགུལ་རྒྱན་ནི། དབུས་ཀྱི་གཞུང་དང་མཐའ་རྟེན་གཉིས་ཀྱི་བར་རུས་པའི་ཕྲེང་བ་བརྒྱད་ཀྱིས་བསྣོལ་མར་བསྡམས་ཤིང་། དེ་ལས་དོ་ཤལ་གྱི་ཚུལ་དུ་འཆང་བ་རུས་པའི་ཤར་བུ་དུ་མས་མཛེས་པར་བྱས་པ་བརྒྱད་བྱའོ། །

གདུ་བུ་ནི། མཐའ་གཉིས་དབུས་དང་གསུམ་དུ་རུས་པའི་གཞུང་བར་སྐབས་དང་མཐའ་རྟེན་བྱས་པའི་དབུས་ཀྱི་གཞུང་གི་གཡས་གཡོན་གཉིས་ཀ་དང་། མཐའ་རྟེན་གཉིས་ཀྱི་ནང་ཟུར་ལ་བུག་པ་ལྔ་ལྔ་བྱས་པ་ལས་སྐུད་པ་དྲངས་ཏེ། དེ་ལ་བརྒྱུས་པའི་རུས་པའི་ཕྲེང་བ་ལྔས་བསྣོལ་མར་བསྡམས་པའི་སྨད་ངོས་ལ་ཤར་བུ་དང་གཡེར་ཆུང་ངུ་དུ་མས་མཛེས་བྱས་པའོ། །

རྣ་རྒྱན་ནི། དབུས་སུ་རྡོ་རྗེ་རྩེ་གསུམ་པས་མཚན་པའི་རུས་པའི་འཁོར་ལོ་རེ་རེ་ལའང་དྲ་བ་གསུམ་དང་དྲ་ཕྱེད་གཉིས་གཉིས་ཏེ་ལྔ་ལྔས་བརྒྱན་པའོ། །རྒྱལ་དབང་གིས་དྲ་ཕྱེད་ལྔ་ཞེས་གསུངས་སོ། །

སྤྱི་གཙུག་གི་ནོར་བུ་ནི། ནོར་བུ་རིན་པོ་ཆེ་ཆ་བརྒྱད་པའམ་དགུ་བ་རྩེ་མོར་རྡོ་རྗེ་རྩེ་ལྔ་བ་རྫོགས་པ་སོར་ལྔའམ་ཅི་ལྟར་མཛེས་པས་མཚན་པའི་རྩ་བ་མི་རུས་ཀྱི་འཁོར་ལོ་རྩིབས་བརྒྱད་པའི་ལྟེ་བར་བཅུག་ནས། མི་འགུལ་བར་བྱས་པའི་རྩིབས་ཀྱི་མཚམས་རྣམས་ནས་ཕུག་པའི་བུག་པ་བརྒྱད་ནས་བརྒྱུས་པའི་རུས་པའི་ཕྲེང་བ་འཁོར་ལོའི་རྩིབས་ལྟ་བུར་གྱུར་བ་བརྒྱད་བྱ་ཞིང་། ཕྲག་གོང་གཡོན་གྱི་ཕྲེང་ཐག་ཀྱང་དེ་བཞིན་དུ་སྟེང་གི་གཡོན་ཟུར་ནས་འོག་གི་གཡས་ཟུར་དུ་ཐལ་བྱུང་དུ་ཐོན་པའི་ཚུལ་གྱིས་བསྣོལ་མར་སྦྲེལ་བའོ། །

མཆོད་ཕྱིར་ཐོགས་ནི། འདོད་འཇོ་དང་ཀུན་སྤྱོད་ལས་མཆོད་ཕྱིར་ཐོགས་ལ་ཚངས་སྐུད་ཅེས་ཀྱང་ཟེར་ལ། རུས་པའི་མཆོད་ཕྱིར་ཐོགས་མེད་ན་རྐུན་མའི་སྐྲ་འམ་མིའི་རྒྱུས་པ་ལས་བྱས་པའི་སྐུད་པ་ཉག་མ་གཅིག་ལ་སུམ་སྒྲིལ་བྱས་པ། རིང་བོ་གཅིག་གིས་ཕྲག་པ་ནས་མཆན་འོག་ལ་སྐོར་གསུམ་དུ་འཁོར་བའི་སྐོར་གསུམ་གའང་རྡོ་རྗེའི་མདུད་པས་བར་བར་དུ་བསྡམས་པའི་རྡོ་རྗེའི་མདུད་པ་གསུམ་དང་ལྡན་པ་དེ་ལྟ་བུ་སྔར་ལྟར་རྒྱ་གྲམ་དུ་འཆིང་བའམ། པང་ནས་ཕྲག་པ་གཡོན་པ་ནས་མཆན་ཁུང་གཡས་ལ་བྱས་ཏེ། ག་ཤལ་ལྟར་བཅིངས་པའོ། །

ཐལ་ཆེན་ནི། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པར་བདེ་དགྱེས་དུས་འཁོར་སོགས་དུ་མ་ལས་གསུངས་ཤིང་། ཆས་འཇུག་གི་ཚེ་དེ་ལྟར་མ་གྲུབ་ན། དཔྲལ་བ་ལུས་ཀྱི་གནས་ཡིན་པས་ལུས་ཐམས་ཅད་ལ་དགོད་པའི་ལྷ་དཔྲལ་བར་འགོད་པའི་རིགས་པས་ལུས་ཐམས་ཅད་ལ་བྱུགས་པར་མོས་ཏེ། དཔྲལ་མཚམས་སུ་ཐལ་ཆེན་གྱི་ཐིག་ལེའམ། སོར་རིས་གསུམ་བྱའོ། །ཡང་ཁ་ཅིག་ལུས་ལ་ཐལ་ཆེན་བྱུགས་ཤིང་མཉེས་པའི་སྟེང་དུ་རུས་ཆེན་བསྲེགས་ནས་དཀར་བོར་གྱུར་བ་ཞིབ་ཏུ་བཏགས་པ་ལ་སོར་མོ་ལྔའི་རྩེ་མོ་ཉུག་ནས། སོར་མོ་ལྔ་བསྡོམས་ཏེ། དཔྲལ་བ་དང་མཁུར་ཚོས་སོགས་གནས་རྣམས་སུ་རེག་པ་ན། གཞིའི་ཐལ་ཆེན་ལས་དཀར་བའི་མཚན་མ་ལྔ་ཚོམ་རེ་འབྱུང་སྟེ། དེ་དག་ལ་ཐལ་ཆེན་གྱི་ཚོམ་བུ་ཞེས་བྱའོ། །ཡང་ཕྱིན་དྲུག་མཚོན་ཕྱིར་མགུལ་རྒྱན་སོགས་དྲུག་བཤད་དོ། །

རྒྱན་དྲུག་གི་རྣམ་པ་ཅུང་ཟད་མི་འདྲ་བ་ཁལ་ཁ་དམ་རྡོར་གྱི་དམ་ཚིག་གི་རྫས་དང་ཡོ་བྱད་ཀྱི་རྣམ་བཞག་དངོས་གྲུབ་གཏེར་མཛོད་ལས་ཀུན་མཁྱེན་འཇམ་བཞད་དང་ཐང་སག་པའི་བཤད་ཚུལ་དྲངས་ནས་གསུངས་ཡོད་པས་དེར་བལྟ་བར་བྱའོ། །

 

 

ལེའུ་གཉིས་པ། ཞྭ་མོའི་སྐོར།
དང་བོ། ཞྭ་མོའི་དགོས་པ།

ཞྭ་མོ་འདི་ཡང་མིའི་རིགས་ཀྱི་གྱོན་ཆས་འཕེལ་རྒྱས་བྱུང་བའི་བརྒྱུད་རིམ་ཁྲོད། དར་སྲོལ་བྱུང་བའི་ཤེས་རིག་ཅིག་ཡིན་ལ། དེ་ཡང་གནའ་བོའི་ལ་ཐོད་དཀྲིས་པ་ནས། ད་ལྟའི་སྤུས་ཀ་ལེགས་པའི་ཞྭ་མོའི་བར་ཀྱི་ལོ་རྒྱུས་ལས་རྟོགས་ཐུབ། འདིར་བོད་ཀྱི་ཞྭ་མོའི་དབང་དུ་བཏང་ན། རབ་བྱུང་སེར་མོའི་ཞྭ་དང་། ཁྱིམ་པ་སྐྱ་བོའི་ཞྭ་གཉིས་སུ་དགར་ཆོག སྤྱིར་ན་བོད་ཞྭ་མང་ཆེ་བ་རྩེ་མོ་གཟེངས་སེ་ཡོད་པ་ཡང་། དགེ་ཆོས་ཀྱིས་བོད་ཀྱི་ཕ་མེས་རྣམས་གངས་རི་ལ་བརྩི་བས། ཞྭ་མོ་དང་གཏོར་མ། ལྷ་རྟེན་སོགས་ཀྱི་རྩེ་མོ་རྣོ་རྩེ་རེ་ཡོད་པ་ཞིག་ལ་དགའ་བ་ཡིན། གསུངས་པ་ལྟར་རོ། །སྒོས་སུ་ཆོས་དང་འབྲེལ་བའི་དབུ་ཞྭ་ནི། ཇི་སྐད་དུ། ཞྭ་ནི་བླ་མའི་རྟེན་འབྲེལ་ཏེ། །དད་པའི་ཕྱག་འཚལ་རབ་ཏུ་བླང་། །ཞེས་པ་ལྟར། ཞྭ་འདི་སྤྱི་བོའི་རིགས་བདག་བླ་མ་མཚོན་བྱེད་ཡིན་པས། དགོས་ཆེད་ཀྱང་། རང་གཞན་གནས་སྐབས་གསུམ་གྱི་དོན། །རང་ཉིད་བཙུན་པར་བྱ་བ་དང་། །གཞན་ཡིད་དྭངས་པ་འདྲེན་ཕྱིར་དང་། །གནས་སྐབས་རྐྱེན་ལས་སྐྱོབ་པ་སོགས། །དགོས་ཆེད་དུ་མ་ལྡན་པའོ། །ཞེས་དང་། ཁ་དོག་ལའང་། ཞྭ་ཡི་ཁ་བསྒྱུར་རིམ་པ་རྣམས། །ཞི་རྒྱས་དབང་དང་མངོན་སྤྱོད་དེ། །འཕྲིན་ལས་ཡོངས་ལ་སྤྱོད་པ་ལྔ། །དཀར་སེར་དམར་མཐིང་སྣ་ཚོགས་ཞྭ། །ཞེས་དང་། གཞན་ཡང་། སྔོན་བྱོན་དམ་པ་མང་བོས་ཚད་དབྱིབས་བཟོ་ཚུལ་སོགས་ལ་དཔྱད་འཇུག་ཡང་དག་པས་བརྡར་ཤ་བཅད་ནས་བྱུང་བ་ཡིན་པས། ཧ་ཅང་མིང་དོན་ལྡན་པས། འདིར་ཞྭ་མོ་སྣ་ཚོགས་ཀྱི་བཟོ་དབྱིབས་དང་འགྲེལ་བརྗོད་བྱེད་པ་ལ།

གཉིས་པ། གསང་སྔགས་ཀྱི་དབུ་ཞྭའི་སྐོར།
༡ སྲིད་པ་སྤྱི་བླུགས་ཀྱི་ཞྭ།

སྲིད་པ་སྤྱི་བླུགས་ཀྱི་ཁུངས་ནི། ཕྱག་རྡོར་གཏུམ་པོ་གསང་རྒྱུད་ལས། གཡང་གཞི་སྲིད་པ་སྤྱི་བླུགས་བགོ། །ཞེས་པ་དེ་ཡིན་ལ། དེ་ནི་ཀོ་བ་སོགས་ཀྱིས་བྱས་པའི་ཞྭ་རྩི་ནག་པོ་ཅན་འདབ་མ་ལ་མཁྱིད་གང་དང་། ཞྭ་ཕུག་ལ་མཐོ་གང་ཙམ་ཡོད་པ། འདབ་མའི་ཁོར་ཡུག་ལ་རུས་པ་སོགས་ཀྱིས་བཟོས་པའི་ཐོད་སྐམ་སོར་བཞི་བས་བརྒྱན་པ། སྟེང་དུ་སྐུད་པ་དཀར་དམར་མཐིང་གསུམ་གྱིས་ཆོས་འབྱུང་བསྣོལ་བའི་རི་མོ་སླས་པ། ཞྭ་སེར་རྡོ་རྗེ་ཕྱེད་པའི་ཏོག་གམ་ནོར་བུ་མེ་འབར་གྱིས་བརྒྱན་པ་ཞིག་ཡིན། ཐུའུ་བཀྭན་ཆོས་ཉིས། ཞྭ་ནག་འདི་རྙིང་མའི་སྲིད་པ་སྤྱི་བླུགས་ཀྱི་ཞྭར་གསུངས་ཀྱང་། དེ་ནི་རྒྱུད་གསར་མར་ཕྱག་རྡོར་གཏུམ་པོ་གསང་རྒྱུད་ལས་གསུངས་པས་སོ། །གཞན་ཡང་བྱང་ཆུབ་སེམས་ཞྭ། འདུལ་བ་ནས་གསུངས་པའི་ཆུ་ལ་ཆབ་རོམ་ཆགས་པའི་ཡུལ་དུ་གནང་བའི་ཞྭ་སྒྲོག་གུ་ཅན་སོགས་ཡོད་དོ། །

༢ གཙུག་ཞྭ།

གཙུག་ཞྭ་ཞེས་པ། ཞྭ་དབྱིབས་མི་འདྲ་བ་གསུམ་ཡོད་ལ། ཁྲོམ་ཚོགས་ཆེན་པོའི་སྐབས་དང་། བྱིན་འབེབས་དབང་བསྐུར་དང་འཆད་ཉན་ཀྱི་སྐབས། རྒྱུན་པར་གོན་པ་སོགས་གོན་སྲོལ་མི་འདྲ་བར་ཡོད་པར་བཤད། དེ་གསུམ་ཀའི་ནང་དུ། བྲིས་སྐུ་ཙཀྲ གདུང་རང་བསྲེལ་སོགས་བྱིན་རྟེན་དང་རབ་གནས་གནང་ལུགས་ཡོད་ལ། བཟོ་དབྱིབས་ཀྱང་མི་འདྲ་བ་མང་དུ་ཡོད་པར་བཤད།

༣ ཕོ་རོག་མཐུ་ཞྭ།

ཞྭ་ནག་རྩེ་མོ་བྱ་རོག་གི་མགོ་དང་། ཐོད་དུ་ཁྲོ་ཞལ་ཡོད་པ་ཞིག

གསུམ་པ། སྔ་འགྱུར་རྙིང་མའི་དབུ་ཞྭའི་སྐོར།
༡ ཨོ་རྒྱན་པད་ཞུ།

ཨོ་རྒྱན་པད་ཞུ་ནི། ཏ་ཟིག་སོགས་ནས་དར་བ་སྟེ། གསེར་ཐང་ལས། ཨོ་རྒྱན་པད་ཞུ་འདི་ལ་ཉི་ཟླའི་རྟགས་དང་རྒོད་ཕྲུ་བཙུགས་པ་ནི། རྒྱ་གར་ཏ་ཟིག་སོགས་ཀྱི་རྒྱལ་བོ་རྣམས་ཀྱི་སྔོན་གྱི་ཆས་ལ་ཡོད་ཅིང་། དེ་ཡང་དར་ཐོད་ཀྱི་སྟེང་དུ་བྱས་ལ་ཞྭ་མོ་རང་དབྱིབས་འདི་ལྟ་བུ་གྱོན་པ་ཡང་སྔོན་གྱི་སང་ག་ལའི་རྒྱལ་བོ་འགའ་ལ་ཡོད་འདུག་པ་དཔེ་རིས་སུ་བཀོད་པ་དེ་ཡིན་ཅིང་། འདིའི་རྣ་ལེབ་གཡས་གཡོན་གཉིས་ཀྱི་དབྱིབས་མཚམས་འདིར་ཤྭ་བའི་རྣ་བ་དང་འདྲ་བས་ཤྭ་བའི་སྙན་ཞུ་སྟེ། ཞུ་ནི་ཞྭའི་དོན་ཡིན་ལ། ཕྱིས་གཉེན་ཞུ་ཞེས་པར་བྲིས། ཞེས་གསུངས་པ་ལས་རྟོགས་ནུས་སོ། །

༢ པདྨ་མཐོང་གྲོལ།

སློབ་དཔོན་པད་འབྱུང་གི་དབུ་ཞྭ་པདྨ་མཐོང་གྲོལ་ནི། ཟ་ཧོར་རྒྱལ་བོས་སྡིག་སྦྱངས་དང་བཟོད་གསོལ་འབུལ་ཆེད་ཕུལ་བའི་ཞྭ་ཞིག་ཡིན་པར་བཤད་ལ། དབུ་ཞྭ་འདི་ལ་མཚོན་དོན་ཡང་བསམ་གྱིས་མི་ཁྱབ་པ་ཡོད། དེ་ཡང་བསྐྱེད་རྫོགས་ཟུང་དུ་འཇུག་པ་མཚོན་བྱེད། ཕྱི་ནང་རིམ་པ་གཉིས། ཡར་གྱི་རྩེ་གསུམ་གྱིས་སྐུ་གསུམ། ཁ་དོག་ལྔས་སྐུ་ལྔས་འགྲོ་དོན་མཛད་པ། ཉི་ཟླ་ཟུང་གིས་ཐབས་ཤེས་གཉིས། མུ་ཁྱུད་མཐིང་གས་དམ་ཚིག་ལ་མུ་མེད་པ། རྡོ་རྗེའི་ཏོག་གིས་ཏིང་འཛིན་གཡོ་བ་མེད་པ། རྒོད་ཀྱི་རྩེ་སྒྲོ་བརྒྱན་པས་ལྟ་བ་ཡང་རྩེ་རྟོགས་ཤིང་། སྒྲུབ་པ་མཐར་ཕྱིན་པ་སོགས་གསང་སྔགས་རྡོ་རྗེ་ཐེག་པའི་ཐབས་མཚོན་བྱེད་དུ་མས་ཕྱུག་པའོ། །གཞན་ཡང་རྙིང་མར། པཎ་ཞྭ་སྣང་སྲིད་ཟིལ་མནོན། འདབ་ལྡན་རིགས་ལྔ། པདྨ་ཁ་འབུས། ཌཱ་ཀི་སྤྲིན་ཕུང་། སྟོང་ཉིད་ལྡེམ་ཞྭ། སྨིན་ལུགས་པད་ཞུ། པད་མ་སམ་ཞུ་སོགས་ཁ་དོག་དང་ཚད་དབྱིབས་སྣ་ཚོགས་བཟོ་ལུགས་ཡོད།

བཞི་བ། ཀརྨ་བའི་དབུ་ཞྭའི་སྐོར།
༡ ཀརྨ་བའི་ཞྭ་ནག་མཐོང་བ་རང་གྲོལ།

ལང་གཤེགས་ལས། རབ་བྱུང་ཆོས་ལ་ཞྭ་ནག་ཅན། །སྟེང་གི་བསྟན་པ་མ་ནུབ་པར། །འགྲོ་བའི་དོན་ལ་རྒྱུན་ཆད་མེད། །ཅེས་དང་། ཨོ་རྒྱན་པད་འབྱུང་གིས། སངས་རྒྱས་ཀུན་གྱིས་བསྔགས་པའི་སྲས་གཅིག་པུ། །རྒྱལ་བའི་དབང་བོ་ཞྭ་ནག་ཅོད་པན་འཛིན། །བོད་ཡུལ་གདུལ་བྱར་དགོངས་ཏེ་ངེས་པར་འབྱོན། །ཞེས་པའི་ལུང་བསྟན་དང་མཐུན་པར། ཀརྨ་དུས་གསུམ་མཁྱེན་པ་རབ་ཏུ་བྱུང་ནས་གཙུག་ཕུད་དོར་ཚེ་དཔལ་འཁོར་ལོ་སྡོམ་པ་དང་མཁའ་འགྲོ་མ་བྱེ་བ་ཕྲག་སུམ་ཅུ་རྩ་གཉིས་ཀྱིས་དབུ་སྐྲ་ཉག་མ་རེ་ལས་བྱས་པའི་ཨིནྡྲ་བྷུ་དྷིའི་ཞྭ་ནག་གི་ཅོད་པན་དབུ་ལ་གསོལ་ཏེ་དབང་བསྐུར། དེ་ནས་བཟུང་སྟེ་དབང་རྟགས་རིགས་ཀྱི་ཅོད་པན་དེ་དབུ་ལ་རང་གྲུབ་ཏུ་ཡོད་ནའང་། སོ་སྐྱེས་ཕལ་བའི་མིག་གི་སྤྱོད་ཡུལ་དུ་མ་གྱུར་བས། དེ་མཚོན་བྱེད་དུ་དབུ་ཞྭ་ནག་པོ་ཞིག་མནབས་ཞེས་ཟླ་ཤེལ་ཕྲེང་བ་དང་། མཁས་པའི་དགའ་སྟོན་སོགས་ཆོས་འབྱུང་མང་བོར་གསུངས་སོ། །སྤྱིར་ཀརྨ་སྐུ་ཕྲེང་རིམ་བྱོན་གྱི་དབུར་ཞྭ་ནག་མཐོང་གྲོལ་འདི་ཉིད་བཞུགས་ཀྱང་། སྐལ་ལྡན་ལས་འཕྲོ་ཅན་མ་གཏོགས་མི་མཐོང་བར་གསུངས་ལ། ད་ལྟ་དངོས་སུ་འཇལ་རྒྱུ་ཡོད་པ་འདི་ཉིད་ཀརྨ་སྐུ་ཕྲེང་ལྔ་བ་རྒྱ་ནག་ལ་ཕེབས་སྐབས། རྒྱལ་བོས་རྒྱུན་དུ་ཁོང་གི་དབུ་ལ་ཞྭ་ནག་པོ་ཞིག་བཞེས་པ་མཇལ་བས། དེ་ལ་དཔེ་བྱས་ཏེ་ཀུན་གྱིས་མཇལ་དུ་ཡོད་པས་མཐོང་གྲོལ་འདི་བཟོས་པ་ཡིན། འདི་ལ་ཡང་གང་ཟག་གི་ལས་སྐལ་སོ་སོའི་དབང་གིས་མཐོང་སྣང་མི་འདྲ་བ་འབྱུང་བ་སྟེ། ལ་ལས་དབུ་ཞྭ་ཉིས་བརྩེགས་དང་། ཁ་ཅིག་འོད་ཀྱི་གོང་བུ། འགའ་རེས་འཇའ་འོད་སྣང་བ་སོགས་སོ། །

དབུ་ཞྭ་འདིའི་མཚོན་དོན་ཡང་། མདོག་མཐིང་ནག་ཏུ་སྣང་བ་ནི། ཆོས་ཉིད་ལ་འགྱུར་བ་མེད་པའི་བརྡ་དང་། སྐུ་གསུམ་ལྷུན་གྱིས་གྲུབ་པའི་བརྡ་རུ་རྩེ་མོ་གསུམ་དུ་སྣང་བ། ཚད་མེད་བཞིས་འགྲོ་བ་རྗེས་སུ་འཛིན་པའི་བརྡ་རུ་ངོ་སྒོ་གྲུ་བཞི་བ་དང་། སྣ་ཚོགས་རྡོ་རྗེ་རྒྱ་གྲམ་གྱིས་མཚན་པ་ནི་འཕྲིན་ལས་བཞིས་གདུལ་བྱའི་དོན་བྱེད་ཚུལ་སྟོན་པ། སྤྲིན་རིས་ཀྱིས་བརྒྱན་པ་ནི། ཐུགས་རྗེ་འཕྲིན་ལས་ཕྱོགས་ལྷུང་མེད་པར་ཀུན་ལ་ཁྱབ་པའི་བརྡ་དང་། ཐབས་ཤེས་ཟུང་དུ་འཇུག་པའི་རང་རྟགས་སུ་ཁྱུང་གཤོག་གིས་མཛེས་པ། ཆོས་སྐུའི་རྒྱལ་སར་དབང་བརྙེས་ཤིང་གཅིག་ཤེས་ཀུན་གྲོལ་གྱིས་མཁྱེན་པའི་རྩལ་རྫོགས་ཏེ་འོད་གསལ་ཁོར་ཡུག་གིས་ཏིང་འཛིན་ལ་དབང་འབྱོར་བའི་རྟགས་སུ་ཉི་ཟླ་ནོར་བུའི་ཏོག་གིས་སྤྲས་པ་སོགས་ཡེ་ཤེས་ཀྱི་རོལ་པ་འགོག་ཏུ་མེད་པ་ཁོ་ནའོ། །ཞྭ་ནག་མཐོང་གྲོལ་འདི་ཉིད་ལ་མཇལ་བས་སྒོ་གསུམ་གྱི་སྡིག་སྒྲིབ་བྱང་བ་དང་། གནས་སྐབས་ཚེ་རིང་ནད་མེད་དང་སྟོབས་འབྱོར་རྒྱས་པ། མཐར་ཐུག་འོད་དཔག་མེད་ཀྱི་ཞིང་དུ་སྐྱེས་པ་སོགས་ཕན་ཡོན་འབྱུང་བར་ཡང་བཤད་དོ། །

ཡང་འཇུ་མི་ཕམ་གྱི་མཐོང་གྲོལ་དབུ་ཞྭའི་འབེལ་གཏམ་མདོར་བསྡུས་ལས། འཇིག་རྟེན་དབང་ཕྱུག་ཀརྨ་ན་རིམ་གྱིས་སྐྱེ་རྒུ་རྣམས་ལ་རྣམ་གྲོལ་གྱི་ས་བོན་བསྐྲུན་པའི་ཕྲིན་ལས་ཀྱི་གཙོ་བོ་མཐོང་གྲོལ་ཞྭ་ནག་ལ་བརྟེན་ནས་མཛད་པ་སྟེ། དེའང་སྤྱན་རས་གཟིགས་ཀྱི་རྣམ་འཕྲུལ་དྲང་སྲོང་དཀོན་པ་སྐྱེས་ཞེས་པ་རྡོ་རྗེ་ལྟ་བུའི་ཏིང་ངེ་འཛིན་བརྙེས་པའི་ཚེ་རྒྱལ་བ་སྲས་དང་བཅས་པའི་དབང་རྟགས། རྡོ་རྗེ་ཅོད་པན་ཡེ་ཤེས་ཀྱི་མཁའ་འགྲོ་མ་བྱེ་བའི་དབུ་སྐྲ་ལས་གྲུབ་པ་སྤྱི་བོར་བཅིངས་པ་དེ་ནས་བརྩམས་བྱང་སེམས་བློ་གྲོས་རིན་ཆེན། གྲུབ་ཆེན་ས་ར་ཧ་བ། དཔལ་ལྡན་དུས་གསུམ་མཁྱེན་པ་སོགས་སྐུའི་སྐྱེ་བ་རིམ་བྱོན་ཐམས་ཅད་ཀྱི་དབུ་ལ་འབྲལ་མེད་དུ་བཞུགས་ཀྱང་། ལས་སྐལ་ལྡན་པ་རེ་རེ་ཙམ་ལས་མཇལ་བར་དཀའ་བས། འཇམ་དབྱངས་སྤྲུལ་བ་ཏཱ་མིང་ཡུང་ལོ་རྒྱལ་བོས་རྒྱལ་དབང་ཀརྨ་པ་ལྔ་བ་དེ་བཞིན་གཤེགས་པ་ལ་གསོལ་བ་བཏབ་སྟེ། ཉིད་ཀྱིས་མཇལ་ཚུལ་དང་མཐུན་པར་མཐོང་གྲོལ་ཞྭ་ནག་འཛམ་གླིང་གཡས་བཞག་ཏུ་གྲགས་པ་ཕུལ་བས། ཡེ་ཤེས་རང་སྣང་གི་ཅོད་པན་དང་དབྱེར་མེད་དུ་བྱིན་གྱིས་བརླབས་ཤིང་མཆོག་དམན་ཀུན་གྱི་སྤྱོད་ཡུལ་དུ་སྣང་བར་མཛད། ཅེས་ཀྱང་གསུངས་སོ། །

ཡང་བཤད་ཚུལ་གཞན་ཞིག་ལ། ཀརྨ་ཞྭ་ནག་ནི། ཀརྨ་སྐུ་ཕྲེང་གཉིས་པ་ཀརྨ་ཀྵུ་རྒྱ་ནག་ཡོན་གོང་མའི་དབུ་བླར་བྱོན་སྐབས། གོང་མས་ལས་ཞྭར་ཕུལ་བས། ཕྱིས་སྐུ་ཕྲེང་རིམ་བྱོན་གྱིས་དབུ་ཞྭ་དེ་མནབས་པར་ཡང་གྲགས་ལ། ཡང་། བྱམས་ཆེན་ཆོས་རྗེའི་ཞྭ་ནག་ནི། ཏཱ་མིང་རྒྱལ་བོས་ཁོང་ལ་ཞྭ་ནག་ཅིག་གནང་། ཞེས་དང་།

དེ་ཡང་དགེ་ཆོས་ཀྱིས། ཀརྨ་བའི་ཞྭ་ནག་ནི་ལོ་རྒྱུས་ཤིན་ཏུ་རྒྱས་མོད། ཐད་དུ་བལྟས་ཚེ་སྔོན་བྲིས་པའི་རྒྱ་ནག་གི་བཙུན་པ་རྣམས་ཀྱི་སྐུ་བརྙན་ལ་ཞྭ་དེ་ཀ་རང་འདུག་པས། རྒྱ་ནག་ལས་བྱུང་བར་སེམས་ཞེས་གསུངས་བར་གཞིགས་ན་གང་ལྟར་རྒྱ་ནག་གོང་མས་གནང་བ་བདེན་སྙམ་མོ། །

དེ་ལས་གཞན། ཐུའུ་བཀྭན་གྲུབ་མཐའ་ལས། ཀརྨ་བ་ཚོས། ཞྭ་ནག་པོ་འདི་དུས་གསུམ་མཁྱེན་པ་ལ་མཁའ་འགྲོ་མ་བྱེ་བ་འབུམ་གྱི་དབུ་སྐྲ་ལས་བྱས་ནས་ཕུལ་བ་ཡིན་ཟེར་བ་སོགས་ཆེ་བརྗོད་མང་བོ་སྒྲོགས་པ་ནི་སྒྲོ་བཏགས་ཀྱི་གཏམ་དུ་དོགས་སོ། །ཞེས་ཡང་གསུངས་སོ། །

༢ ཞྭ་དམར།

རབ་བྱུང་དྲུག་པའི་སྐབས་སུ་ཀརྨ་རང་བྱུང་རྡོ་རྗེའི་དངོས་སློབ་རྟོགས་ལྡན་གྲགས་པ་སེང་གེ་ལ། ཧོར་རྒྱལ་བོས་ཞྭ་དམར་བོ་ཞིག་ཕུལ་བས་དེའི་བླ་མ་སློབ་བརྒྱུད་ལ་ཞྭ་དམར་གྲགས། གཞན་ཀརྨ་བར། གསལ་སྟོང་སྒོམ་ཞྭ། སི་ཏུའི་ཞྭ་ཁྲ། དྭགས་པོ་རབ་འབྱམས་པའི་ཞྭ་ལྗང་། ལྡང་ལྷ་པཎ་ཆེན་གྱི་ཞྭ་སེར། ཀརྨ་སྒར་བ་ནས་དར་བའི་སྒར་སྦུགས་སོགས་མང་ངོ་། །

༣ འབྲི་གུང་སྒོམ་ཞྭ།

འབྲི་གུང་སྒོམ་ཞྭ་ནི་འགྲོ་མགོན་ཕག་མོ་གྲུ་བས་ཆོས་རྗེ་སྟག་ལུང་བ་དང་། རྗེ་བཙུན་གླིང་རས་པ། ཆོས་རྗེ་འབྲི་གུང་བ་གསུམ་ལ་སྣམ་ཕྲུག་དམར་བོ་འདོམ་རེ་གནང་ནས་ཁྱེད་གསུམ་གྱིས་སྒོམ་ཞྭ་རེ་བཟོས་ནས་འཁྱེར་ཤོག་གསུངས་པས། ཆོས་རྗེ་འབྲི་གུང་བས་དེ་དོན་དམ་དུ་ཐུགས་སུ་ཆུད་ནས་ཕྲུག་འདོམ་གང་བསྣན་ཏེ། སྒོམ་ཞྭ་སྨུག་ཡོད་མར་གྲགས་པ་བཟོས་པས། ཁོང་གི་རྒྱལ་ཚབ་ཏུ་དབང་བསྐུར་བར་མ་ཟད། ཕག་གྲུའི་གདན་རབས་རིམ་བྱོན་གྱིས་ཀྱང་སྒོམ་ཞྭ་འདི་མནབས་ལ། དབུ་ཞྭ་འདི་ནི་དཔལ་སྦྱིན་གྱིས་ཞུས་པའི་མདོ་སོགས་ལས། ཕྱོགས་ཀྱི་ཆར་བྱང་ཆུབ་སེམས་དཔའ་རིན་ཆེན་དཔལ་ཞེས་བྱ་བས་འགྲོ་བ་འདུལ་བར་ཞྭ་འདི་ལྟ་བུ་གྱོན་པར་འགྱུར་རོ། །གསུངས་ལ། འབྲི་གུང་བ་རང་གི་ཞལ་ལས་ཀྱང་། ངའི་ཞྭ་འདི་རྒྱལ་བའི་བཀའ་རབ་འབྱམས་ལ་བརྟེན་ནས་རྟེན་འབྲེལ་ཏུ་བསྒྲིགས་ཏེ་བརྩམས་པ་ཡིན་གྱི། ངོ་དགའ་དང་པད་ལད་ཚུལ་འཆོས་ཀྱིས་མ་ཡིན་ནོ། །ཞེས་གསུངས་ལ། ཟབ་ཆོས་རིན་པོ་ཆེ་ལས། སྤྱིར་བསྟན་པ་ལ་ཕན་པའི་ཞྭ་གསུམ། གནོད་པའི་ཞྭ་གསུམ། ཕན་གནོད་མེད་པའི་ཞྭ་སོགས་ཡོད་པ་ལས། ཕན་པའི་ཞྭ་གསུམ་ནི་ཇོ་བོ་རྗེའི་རྣ་རིང་དང་། པཎ་ཆེན་ཤཱཀྱ་ཤྲཱིའི་གདུགས་རྩིབས་མ་དང་། ངའི་སྒོམ་ཞྭའོ། །ཞེས་ཀྱང་གསུངས་སོ། །དབུ་ཞྭ་འདིའི་ཁྱད་ཆོས་ཀྱང་། ཟབ་ཆོས་དེ་ཉིད་ལས། དཔག་མེད་བསོད་ནམས་སྟོབས་ལས་བྱུང་བའི་ཞྭ། །འགྲོ་བ་སྨིན་བྱེད་ཡོན་ཏན་རིན་ཆེན་ཞྭ། །དུས་གསུམ་ཀུན་མཁྱེན་རྒྱལ་བའི་བསྔགས་པའི་ཞྭ། །མང་བོའི་དབུས་ན་ཁྱད་འཕགས་གཙུག་ཏོར་ཞྭ། །ང་ཡི་ཞྭ་འདི་ཅིས་ཀྱང་ནུབ་མི་འགྱུར། །ཞེས་སོ། །

ཕན་ཡོན་ཡང་། འབྲི་གུང་བས། ངའི་ཞྭ་འདི་རྟེན་ཁུག་གི་ལྷ་ཁང་ཡིན། རྒྱབ་བརྟེན་དང་སྐྱེལ་མ་ཡིན། བཀའ་རྟགས་ཀྱི་ཕྱག་རྒྱ་ཡིན། ཞེས་དང་། ཞྭ་སྒོམ་ཞྭ་མགོ་ལ་བཞག་ཙམ་གྱིས། །འཕྲལ་ཅིས་ཀྱང་སངས་རྒྱས་འཐོབ་པར་ངེས། །ཞེས་སོགས་རྒྱ་ཆེར་གསུངས་པ་དང་། ཡང་། དབུ་ཞྭ་འདི་ཉིད་ལ་བརྙས་པ་སོགས་བྱས་ན་ཉེས་དམིགས་ཡང་ཚད་མེད་འབྱུང་སྟེ། འབྲི་གུང་བའི་ཞལ་ལས། འདི་གསར་བ་བཟོས་ན་ལྷ་ཁང་དང་མཆོད་རྟེན་བཞེངས་པའི་ཕན་ཡོན་འབྱུང་ཞིང་། བཤིག་ན་ཉེས་པ་ལྷ་ཁང་བཤིག་པ་དང་མཉམ་མོ། །ཞེས་དང། ངའི་ཞྭ་འདི་སྡིག་ཅན་གྱི་མགོ་ལ་མི་བཞག མི་ནག་གི་ལག་ཏུ་མི་བཞག་ཅེས་སོགས་ནན་ཏན་གྱིས་གདམས་པའི་ཕྱིར་རོ། །

ལྔ་བ། དགེ་ལྡན་པའི་དབུ་ཞྭ།
༡ ཞྭ་སེར་སྣེ་རིང་།

ཞྭ་སེར་སྣེ་རིང་འདི་ནི་དགེ་ལུགས་པའི་འདུལ་འཛིན་རྣམས་ཀྱིས་མནབས་པ་ཡིན་ལ། དེའི་ཁུངས་ནི། བུ་སྟོན་ཆོས་འབྱུང་དུ། བླ་ཆེན་གྱིས། ཀླུ་མེས་འགྲོ་ཁར་བོན་པོའི་ཞྭ་འོབ་ཞུ་ཁོག་ནས་ས་སེར་བཏབ་པ་ཞིག་གནང་། འདི་གྱོན་ལ་ང་རྗེས་སུ་དྲན་པར་གྱིས་གསུངས་པ་དེ་ཡིན་ལ། ཁོང་ཉིད་སླར་ཕེབས་དུས་དབུས་གཙང་ཚ་བ་ཆེ་བས་རྣ་གཉིས་རྒྱབ་ལྟེབ་གསོལ་བས། ཞྭ་སྣེ་རིང་དུ་གྲགས་པ་འདི་བྱུང་བས། དེ་རྗེས་ཐུགས་ལ་བབས་ཏེ་ཁོང་གི་སློབ་བརྒྱུད་དང་བཅས་པར་ཡང་ཞྭ་སེར་ངེས་ཅན་དུ་མཛད་པས། དགེ་ལྡན་པ་ལ་ཞྭ་སེར་དུ་གྲགས་པ་སྟེ། འབྲུག་རྒྱལ་དབང་ཆོས་རྗེས། འདི་དག་གི་སྔ་ཕྱི་ནས་ཀླུ་མེས་ཆེན་པོ་སོགས་སྔོན་གྱི་འདུལ་བ་འཛིན་པ་རྣམས་ཀྱི་རྣམ་ཐར་དང་མཐུན་པར་དབུ་ཞྭ་གསེར་གྱི་མདོག་ཅན་མནབས་ཞེས་འབྱུང་བ་ལྟར་རོ། །ཡང་སུམ་པའི་ཆོས་འབྱུང་སོགས་ལས། བདེ་བ་ཅན་ནས་རྡོ་རྗེ་རྣལ་འབྱོར་མས་ལུང་བསྟན་པ་ལྟར། དབུ་ཞྭ་པད་ཞྭ་གསེར་གྱི་མདོག་ཅན་དུ་བསྒྱུར་བར་མཛད་ཅེས་ཡང་གསུངས་སོ། །དབུ་ཞྭ་འདི་ཉིད་རྗེ་བདག་ཉིད་ཆེན་པོའི་རྗེས་འབྲངས་པ་རྣམས་ཀྱིས་གསོལ་བ་ཡིན་ལ། དེ་ཡང་ཁོང་གི་ཆོས་རྒྱུན་དྲི་མ་མེད་པ་དར་ཁྱབ་མཛད་པའི་ཆེད་དུ་ཡིན་ཏེ། ཐ་ན་བདེ་བ་རིན་སྤུངས་པ་དབང་ཕྱུག་ཆེ་བའི་དུས་སུ་གྲུབ་མཐའི་ཐན་འཁྱེར་གྱིས་སེ་འབྲས་ཀྱི་དགེ་འདུན་པ་རྣམས། ལྷ་སའི་སྨོན་ལམ་ཆེན་མོར་ཞུགས་མི་ཆོག་པ་དང་། ཞྭ་སེར་ཡང་གྱོན་མི་ཆོག་པའི་ཁྲིམས་བཅས་ཀྱང་དགེ་ལུགས་པའི་དགེ་འདུན་པ་རྣམས་ཀྱིས་དབུ་ཞྭ་ཕྱི་སེར་བོ་དང་། ནང་དམར་བོ་བྱས་ཏེ། ཕྱིར་ཕེབས་དུས་ཞྭའི་ཕྱི་ནང་ལྡོག་ནས་གསོལ་དགོས་བྱུང་ཡང་། ད་ལྟའི་བར་དུ་ཞྭ་སེར་གསོལ་བའི་ཕྱག་ལེན་མ་དོར་བ་འདི་ཡིན་ནོ། །

༢ སྒོམ་ཞྭ།

པཎ་ཆེན་སྐུ་ཕྲེང་བཞི་བ་བློ་བཟང་ཆོས་རྒྱན་གྱིས་བཞེས་པའི་སྒོམ་ཞུ་དབུས་སུ་སེར་བོ་དང་། མཐའ་བསྐོར་དམར་བོ་འདི་ཉིད། རྙིང་མའི་བླ་མ་ཞིག་གིས་ཕུལ་བར། ཁོང་གིས་ཞྭ་འདིས་ཁ་དོག་ལ་བརྟགས་ན། གྲུབ་མཐའ་གཞན་གྱིས་མཐའ་བསྐོར་བའི་དབུས་ན་རྗེ་བདག་ཉིད་ཆེན་པོའི་བསྟན་པ་འདི་བསྟན་པའི་སྙིང་བོ་ལྟ་བུར་གཞོམ་གཞིག་བྲལ་བས། རྟེན་འབྲེལ་བཟང་། ཞེས་གསོལ་བར་གྲགས། ཡང་སྔོན་གྱི་ཚེ་ཡང་། ཞྭ་མདོག་སེར་བོ་འདི། བྷོ་དྷི་ས་ཏྭ་སོགས་སྔ་འགྱུར་ལོ་པཎ་རྣམས་དང་། ཇོ་བོ་རྗེ་སོགས་བཀའ་གདམས་རྣམས་ཀྱང་ཞྭ་སེར་མནབས་པའི་ལོ་རྒྱུས་ཡོད་པ་དང་། སློབ་དཔོན་པད་འབྱུང་གིས་ཀྱང་། དབུ་ཞྭ་གསེར་གྱི་བྱེ་མ་བྱུགས། །བསྟན་པ་གསེར་དང་འདྲ་བའི་རྟགས། །ཞེས་དབྱིབས་མི་འདྲ་བ་མ་གཏོགས་སེར་བོ་གསོལ་བ་སྔོན་གྱི་ཡིག་ཚང་དག་ལས་མཐོང་ངོ་། །

༣ རྩེ་ཞྭ།

རྩེ་ཞྭ་འདི། ལ་ལས་རྩེ་ཐང་འཇམ་དབྱངས་ཆོས་རྗེ་ནས་དར་བར་བཤད་པ་དང་། ཁ་ཅིག གྲྭ་བ་མངོན་ཤེས་ཅན་ནས་དར་བས། གྲྭ་ཞྭར་འབོད་པར་བཤད་པ་དང་། ཡང་ཁ་ཅིག་ས་པཎ་ལ་ཧོར་རྒྱལ་བོས་ཕུལ་ནས་དར་བར་ཡང་བཤད་དོ། །

༤ བསྐལ་བཟང་བསིལ་ཞྭ།

བསྐལ་བཟང་བསིལ་ཞྭ་འདི་ལ་བསྐལ་བཟང་བསིལ་སྒྲིབ་ཡང་ཟེར། རྒྱལ་བ་བསྐལ་བཟང་རྒྱ་མཚོས་གསོལ་བའི་ཞྭ་ཞིག་ཡིན་ལ། དེ་ཡང་རྒྱལ་མཆོག་བདུན་པ་རི་ཁྲོད་དང་ནོར་གླིང་དུ་བཞུགས་སྐབས། ཁོང་གིས་གསར་གཏོད་གནང་བའི་མཆུ་རིང་ཉི་སྒྲིབ་ཞྭ་མོ་འདི་གསོལ་བ་ལགས་ཀྱང་། ཁ་ཅིག་དེ་ལ་དུག་གསུམ་ཚང་ལུགས་བརྗོད་པ་ནི། གྲུབ་མཐའི་ཕྱོགས་ཞེན་གྱི་རོ་ལངས་སྙིང་ལ་གསོལ་ཞིང་། ཞྭ་དབྱིབས་ཙམ་ཡང་ཡིད་ལ་ཚེར་མ་བཞིན་རྩུབ་པའི་རྟགས་ཡང་དག་གོ། འདི་ལ་དུང་དཀར་ཚིག་མཛོད་ལས་ཀྱང་། སྤྱིར་བཏང་ལྷ་སའི་བུ་མོ་རྣམས་ཀྱི་ཞྭ་མོ་མི་གྱོན་ཡང་། ཅུང་ལོ་ན་ཆེ་བ་རྣམས་གླིང་བསྐོར་སོགས་ཉི་འོག་ཏུ་འགྲོ་སྐབས། བསྐལ་བཟང་བསིལ་ཡབ་ཅེས་ཏཱ་ལའི་བླ་མ་སྐུ་ཕྲེང་བདུན་པའི་སྐབས་བྱུང་བ། སྨྱུག་མའི་རྩིབས་རུས་ཅན། རྒྱུ་ཐེར་མ་དང་གོས་ཆེན་སོགས་གང་རུང་ལས་བཅོས་པ། དཔྲལ་བའི་མདུན་ཕྱོགས་སུ་ཉི་སྒྲིབ་ཏུ་བརྐྱངས་པ་ཞིག ཨོག་སྒྲོག་གིས་བཅིངས། ཞེས་གསུངས་པ་དེའོ། །

༥ རིགས་ལྔ་ཅོད་པན།

འདི་ནི་ལོངས་སྤྱོད་རྫོགས་སྐུའི་རིགས་ལྔ་པྲོག་ཞུ་འམ་དབུ་རྒྱན་ཏེ། མི་བསྐྱོད་པ། རིན་འབྱུང་། འོད་དཔག་མེད། དོན་གྲུབ། རྣམ་སྣང་སྟེ་རིགས་ལྔ་མཚོན་པའི་དབུ་རྒྱན་ལ་ཟེར།

༦ ཞྭ་མོན་རྔོག་ཟེ།

ཞྭ་མོན་རྔོག་ཟེ་ནི། ད་ལྟ་དགེ་ལུགས་པའི་སེར་འབྲས་དགའ་གསུམ་སོགས་དགོན་སྡེ་མང་བོར་གྱོན་པ་དེ་ལགས་ལ། དེའི་མཚོན་དོན་ནི། ཞྭ་གདོང་ཐལ་སྦྱར་ཟུང་འཇུག་ལོངས་སྤྱོད་རྫོགས། །ཞྭ་མདོག་སེར་བས་སྤྲུལ་སྐུ་ཐུབ་པ་མཚོན། །ཞྭ་ཡི་སྤུ་ཉག་ཆོས་ཕུང་བརྒྱད་ཁྲི་མཚོན། །ཞྭ་ཡི་གོང་སྦྱོར་ཚོགས་གཉིས་ཟུང་དུ་འཇུག །ཞྭ་འདབ་ཟུང་འབྲེལ་བདེན་གཉིས་ཟུང་འཇུག་མཚོན། །ཞྭ་དར་དམར་བོས་མཁའ་འགྲོ་འདུ་བ་མཚོན། །ཞྭ་འདབ་ཚེམས་དཀར་ཆོས་སྐྱོང་བསྐོར་བ་མཚོན། །ཞེས་པ་ལྟར། ཞྭ་དབྱིབས་ཀྱི་ཆ་ཤས་རེ་ཡང་མཚོན་དོན་རྨད་དུ་བྱུང་བ་ཡོད་དོ། །

༧ དགའ་ལྡན་དུང་ཤུབས།

ཞྭ་མོའི་བྱིངས་པཎ་ཞྭ་དང་འདྲ་ལ། རྣ་བ་ལུག་རུ་ལྟར་འཁྱིལ་བ་ཞིག

༨ པཎ་ཞྭ།

པཎ་ཞྭའི་ཁུངས་ནི། གདན་བཞི་ལས། སྤྱི་བོ་ངུར་སྨྲིག་མཚན་མ་དང་། །ཞེས་པ་འདི་ཡིན་པར་བཞེད་ལ། འདི་ནི་པཎྚྀ་ཏའི་དབུ་ཞྭ་ཡིན་པར་གྲགས་ཤིང་། རྗེ་བཙུན་སྒྲོལ་མའི་བྱིན་རླབས་ཞུགས་པའི་བུད་མེད་ཅིག་གིས་རྨི་ལམ་དུ་མགོ་ལ་ཚེར་མ་ལྟ་བུའི་ཅོད་པན་དམར་བོ་གྱོན་ནས་ཕྱི་རོལ་བ་དང་བརྩད་ན། རྒྱལ་བའི་ལུང་བསྟན་བྱུང་སྟེ་དར་བའི་ལོ་རྒྱུས་ཀྱང་མཆིས་པར་མ་ཟད། གཏམ་རྒྱུད་གསེར་ཐང་ལས་ཀྱང་། བྷང་ག་ལའི་ཤར་ཅི་ཊ་གྷོ་དུ་སྔ་དར་གྱི་བསྟན་པ་ནུབ་ནས་མི་ཐོག་གཅིག་ཀྱང་མ་སོང་བས། རྒད་པོ་འགའ་རེས་ངེད་རྣམས་བྱིས་པའི་དུས་དགེ་སློང་རྣམས་ཞྭ་དམར་ཕུར་བུའི་གཟུགས་འདྲ་བ་གྱོན་པ་མཐོང་མྱོང་ཟེར། གཏམ་དེ་ཇོ་བོ་དང་ཀུན་མཁྱེན་གྱིས་ཀྱང་ཡུལ་དེ་ཀ་རང་དུ་ཚེར་མ་ལྟ་བུའི་ཞྭ་དར་བར་གསུངས་པ་དང་ཤིན་ཏུ་འབྱོར་བར་གསུངས་པས་ཀྱང་། རྒྱ་གར་ནས་དར་བའི་ཁུངས་གསལ་ལོ། །

ས་སྐྱ་གོང་མ་རྣམས་ཀྱང་སྔོན་པཎ་ཞྭ་དམར་བོ་འདི་གསོལ་མོད། སློབ་དཔོན་བསོད་ནམས་རྩེ་མོས། ས་ཆེན་ཀུན་དགའ་སྙིང་བོ་ལ་མྱ་ངན་ཞུ་ཆེད་ཞྭ་རྩེ་བཅད་པས། ཕྱིས་སུ་ས་པཎ་གྱིས་ཀྱང་པཎ་ཞྭ་རྩེ་མེད་འདི་མནབས་པའི་ལོ་རྒྱུས་ཡོད་ལ། ས་ཆེན་ཀུན་དགའ་བཟང་བོའི་དུས་སུ་སླར་ཡང་བསྟན་པ་ཆེས་ཆེར་དར་བའི་རྟེན་འབྲེལ་ལ་དགོངས་ནས། ཞྭ་ལུང་ཡ་ཐོད་ལ་བསྣོལ་བའི་སྲོལ་དར། པཎ་ཞྭའི་མཚོན་དོན་ལ། ཞྭ་རྩེ་མཐོ་ལ་རྣོ་བས་ལྟ་བའི་ཡང་རྩེ་དབུ་མ་ཐལ་འགྱུར་བ་དང་། ཞྭ་ལག་གཉིས་ཀྱིས་བདེན་གཉིས་མཚོན་པར་བཤད་དོ། །

༩ ཞྭ་མོ་སྒྲོ་བཙེམས་མ་དང་སྒྲོ་ལྷུག་མ།

ཞྭ་མོ་འདི་གཉིས་བོད་རང་དུ་དར་ཁྱབ་བྱུང་བའི་ཞྭ་ཞིག་ཡིན་ལ། སོག་ཡུལ་གྱི་གྲྭ་བ་འགས་གྱོན་པ་ཡང་བོད་ལས་འཕྲོས་པ་ཡིན། སྒྲོ་བཙེམས་དང་སྒྲོ་ལྷུག་གཉིས་ཀྱི་ཁྱད་པར་ཡང་། ཞྭའི་སྒྲོ་བཙེམས་ཡོད་མེད་ཙམ་ལས། བཟོ་དབྱིབས་གཅིག་མཚུངས་ཡིན། ཞྭ་འདི་གཉིས་ས་དགེ་ཀར་རྙིང་ཀུན་གྱིས་གསོལ་བ་ཡིན། ཁ་དོག་ཡང་གྲུབ་མཐའི་དབང་གིས་དམར་བོ་དང་སེར་བོ་ཅི་རིགས་ཡོད་དོ། །

དྲུག་པ། གཡུང་དྲུང་བོན་གྱི་ཞྭ་མོའི་སྐོར།
༡ པད་ཞུ།

བོན་གྱི་པད་ཞུ་ནི། འདུལ་བ་རྒྱུད་དྲུག་སོགས་ལས་གསུངས་པ་ལྟར། བལ་སྣམ་ལས་གྲུབ་ཅིང་སུལ་བུ་ཉེར་ལྔ་དང་ལྡན་ཐོག སྤྱི་གཙུག་ཏུ་བུ་ག་ཡོད་པ། ཕྱི་མཐའ་པད་འདབ་བཞི་འམ་བརྒྱད་ཀྱིས་བསྐོར་བའི་མདོག་མཐིང་སྔོན་ཅན་གྱི་ཞྭ་ཞིག་སྟེ། བོན་གཞུང་ལས། སོ་ཐར་གྱི་ཁྲིམས་ཆེན་མ་རྫོགས་པར་གསོལ་མི་རུང་པར་བཤད་དོ། །

༢ ཞྭ་ཁྱུང་ལྡིང་མ།

ཞྭ་འདིའི་བཟོ་དབྱིབས་བྱ་ཁྱུང་ལྡིང་བའི་རྣམ་པ་ཅན་ཞིག་ཡིན་པས་ཆ་ནས་བཏགས་ལ། ཞྭ་མོའི་མ་གཟུགས་གཏོར་དབྱིབས་ཅན་དང་། ཏོག་ལ་རྒྱལ་མཚན་ལྟ་བུར་བཀོད་ཅིང་། མདུན་དུ་ཁྱུང་གི་གཤོག་པ་བརྐྱངས་འདྲ་གཉིས་ཡོད་ལ། ད་ལྟའི་བོན་ལུགས་ཀྱི་ཁྲོད་ཞྭ་འདི་གྱོན་ནས་ཆོ་ག་སྤེལ་མཁན་ཧ་ཅང་ཉུང་བར་བཤད་དོ། །

༣ དཀར་མོ་རྩེ་རྒྱན།

ཞྭ་མོ་འདིའི་ཚོས་གཞི་གཙོ་བོ་དཀར་བོ་ཡིན་པས་ཆ་ནས། ཕྱིས་སུ་གཡུང་དྲུང་བོན་ལ་ཞྭ་དཀར་བོན་གྱི་བསྟན་པ་ཞེས་འབོད་སྲོལ་ཡོད་ལ། ཞྭ་འདིའི་ཏོག་དང་མ་གཟུགས་ཞྭ་ཁྱུང་ལྡིང་མ་དང་འདྲ་ཞིང་། ཁྱུང་གཤོག་གི་དབྱིབས་གཟུགས་མི་ལྡན་ཞིང་། ཞྭ་མཐའ་ལ་སྐུད་པ་འཆང་ཞིང་། ཞྭ་སྟེང་དུ་གཡུང་དྲུང་དང་ཡེ་ཤེས་ཀྱི་སྤྱན་འདྲ་བ་ཞིག་བཀོད་སྲོལ་འདུག་གོ། བོན་གྱི་ཞྭ་དཀར་གྱི་ཁུངས་དང་། དཔྱད་པ། མནབ་ཚུལ། ཕན་ཡོན་སོགས་ནི་བླ་ཆེན་དྲན་པ་ནམ་མཁས་རྒྱས་པར་གསུངས་ཡོད་པས་དེར་བལྟ་བར་བྱའོ། །

༤ སྟག་ཞུ།

ཞྭ་མོ་འདི་ནི་སྟག་ལྤགས་ལས་བཟོས་པའི་གཞི་གསོལ་ཚོགས་ཀྱི་དབྱིབས་འདྲ་བ་དེ་ཉིད། གཡས་གཡོན་མེ་ཏོག་པདྨའི་འདབ་མ་འདྲ་བའི་ལྕེ་གཉིས་ཀྱིས་བསྐོར་ནས་ཡོད་པ་ཞིག་གོ།

༥ གཤེན་ཞུ།

ཞྭ་འདི་ནི་སྤྱིར་པད་ཞྭ་དང་འདྲ་བ་ཞིག་ཡིན་ནའང་། འདི་ལ་འདབ་མ་གསུམ་ལས་མི་ལྡན་པའི་ཁར། པད་ཞུ་ལས་དབྱིབས་ཅུང་ཟད་ཙོག་པའམ་ནར་བ་ཞིག་ཡིན། བོན་ལུགས་པད་ཞུ་ནི། འདུལ་ཁྲིམས་ཉིས་བརྒྱ་ལྔ་བཅུ་ཅན་མ་གཏོགས་སྤྱོད་མི་ཆོག་པར་གྲགས་ལ། དེ་ལ་འདབ་མ་བཞི་ལྡན་དང་། དྲུག་ལྡན། བརྒྱད་ལྡན་སོགས་ཡོད་དོ། །

བདུན་པ། ཁྱིམ་པ་སྐྱ་བོའི་ཞྭ།
༡ དར་དམར་གྱི་ལ་ཐོད།

དར་དམར་གྱི་ལ་ཐོད་འདི། རྒྱལ་བོ་སྲོང་བཙན་སོགས་ཀྱིས་བཞེས་པ་ལ། དེབ་དཀར་ལས་ཏ་ཟིག་གི་ཆས་སུ་བཤད་ཀྱང་། འདི་ཕལ་ཆེར་ཁ་དོག་གི་ཁྱད་པར་མ་གཏོགས་པ་སྣང་ཞེན་བལ་ཐོད་ཅན་གྱི་ལུགས་དང་མཐུན་པར་སེམས། སྦ་བཞེད་ལས་མཁན་པོས་རྒྱལ་བོ་ཁྲི་སྲོང་ལ་བརྟག་པ་མཛད་སྐབས། རྒྱལ་བོ་ཁྱོད་ཀྱིས་དབུ་ལ་ཐོད་བཅིངས་པ་དང་སྦྱར་ན་སྟོད་དུ་མངའ་རིས་ཞྭ་ཙམ་ཞིག་ཆགས་ཞེས་པ་ལས། རྒྱལ་བོའི་དབུ་ལ་ལ་ཐོད་བཞེས་ཡོད་པ་ཤེས། ཕྱིས་སུ་ལ་དྭགས་སུ་ཡང་ལ་ཐོད་ལ་གཞི་བྱས་ཏེ་དར་བའི་ཞྭ་ཞིག་ལ། དེབ་དཀར་ལས། མངའ་རིས་ལ་དྭགས་ཆོས་རྒྱུད་ཀྱི་གདུང་རྒྱུད་དུ་གྲགས་པ་ད་ལྟའི་བར་ཡོད་པ་རྣམས་ནས། ལོ་སར་གྱི་ཚེ། སྔོན་གྱི་ཆས་ཡིན་ཟེར་ནས་ཞྭ་དམར་བཙན་ཞྭའི་དབྱིབས་ཅན་རྩེ་མོ་མཐོ་ཞིང་ཕྲ་བའི་ཡས་ཟུར་དུ་ཚེ་དཔག་མེད་ཀྱི་སྐུ་བརྙན་ཞིག་དར་དམར་གྱིས་བཅིངས་པའི་ལྷག་མ་མདུན་ནས་བསྣོལ་བསྒྲིགས་ཏེ་གྱོན་པ་སོགས་ཡིན་འདུག ཅེས་སོ། །

༢ ཐང་ཞུ།

ཐང་ཞུ་འདི་ཡང་བོད་སྲོལ་དངོས་མ་ཞིག་ཏུ་ངོས་འཛིན་ཏེ། དེབ་དཀར་ལས། ཐང་ཞུ་འདི་ཡང་བོད་རང་གི་སྲོལ་ལས། ཡུལ་གཞན་གང་ལའང་མི་འདུག་ཅིང། རྒྱ་གར་ཤར་ངོས་ཀྱི་བྷར་མ་བ་རྣམས་ནི། བོད་རིགས་ལས་མཆེད་པར་ཁོང་ཅག་གི་རྒྱལ་རབས་སུའང་གསལ་བ་བཞིན་ཡིན། དེ་དག་གི་སྔ་མའི་རྒྱལ་བོ་རྣམས་ཀྱང་ཐང་ཞུ་གྱོན་པ་ཡིན་འདུག་པས། འོ་ན་རང་རེའི་བཙན་པོས་ཀྱང་སྐབས་འགར་ཐང་ཞུ་ཡང་གསོལ་བ་ཡིན་ནམ་སྙམ། ཞེས་པ་ལྟར། ད་ལྟ་ཡང་བླ་སྤྲུལ་ཁག་དང་། དམ་ཅན་རྡོ་ལེགས། ཤུགས་ལྡན་སོགས་ཀྱི་བཞེས་པ་དེའོ། །

༣ རྨ་སྒྲོ་དང་བྱུ་རུའི་ཏོག་ཞྭ།

ཆིང་རྒྱལ་རབས་ཀྱི་སྐབས་སུ་དཔོན་རིགས་རྣམས་ཀྱིས་གྱོན་པའི་ཞྭ་མོ་སྔོན་པོ་མཐའ་ལ་པགས་པ་ནག་པོའམ། སྤུ་མ་ནག་པོའི་ཐོད་སྒོར་ཡོད་པ། ཞྭ་མོའི་སྟེང་སྟོང་རྒྱུད་དམར་བོའི་འཛར་དང་། ཏོག་གི་གདན་གྱི་མཚམས་ནས་རྨ་བྱའི་སྒྲོ་ཕོད་རྒྱབ་ཏུ་འཕྱང་བ་ཞིག དཔོན་རིགས་མཐོ་བ་རྣམས་ལ་བྱུ་རུའི་ཏོག་དང་སྒྲོ་ཕོད་གཉིས་རེ་ཡོད་པས། བོད་ཀྱི་ཁ་དཔེར་ཡང་། གོ་ས་མཐོ་བའི་དཔོན་རིགས་ལ། བྱུ་རུ་དམར་བོའི་ཏོག་ཅན། རྨ་བྱ་དེ་ཕོའི་སྒྲོ་ཅན། ཞེས་ཟེར་རོ། །

༤ ཨོ་རྒྱན་སྒོམ་ཞྭ་ཕྲ་ཆུང་།

ཞྭ་འདི་ནི་ཚངས་པའི་ངོ་ལུག་གིས་ཇོ་རུ་ལ་ཕུལ་བའི་ཞྭ་ཞིག་སྟེ། ཞྭ་བཤད་ནི་གླིང་སྒྲུང་རྟ་རྒྱུགས་རྒྱལ་འཇོག་ལས། སྟོང་ཉིད་སྒོམ་ཞྭ་ཁྲ་ཆུང་འདི། །སྐྱ་ལོའི་སྟོན་པའི་ཕུག་ནོར་ཡིན། །ཆེ་རྒྱུད་གླིང་གི་རྟེན་སྐལ་ཡིན། །ཨོ་རྒྱན་པདྨའི་དབང་ཞུ་རེད། །དེ་རིང་ལྷ་སྲས་ཁྱེད་ལ་འབུལ། །ཞྭ་ལ་འཁོར་འདས་གཉིས་ཀར་མཚོན། །འཁོར་བ་ཁམས་གསུམ་རིགས་དྲུག་ཚང་། །རྩེ་མོ་བྱ་སྒྲོ་བཞི་ཡིས་བརྒྱན། །གཟུགས་མེད་སྐྱེ་མཆེད་མུ་བཞི་མཚོན། །དེ་ལ་དར་སྣ་བཅུ་བདུན་བཏགས། །གཟུགས་མེད་གནས་རིས་བཅུ་བདུན་མཚོན། །ཞྭ་ལ་པད་འདབ་དྲུག་གིས་བརྒྱན། །འདོད་ལྷ་རིགས་དྲུག་མཚོན་པའི་བརྡ། །ངོས་བཞི་གླིང་ཆེན་བཞི་ལ་མཚོན། །ངོས་རེ་ལ་ཡང་ཟུར་གཉིས་རེ། །ཟུར་བརྒྱད་གླིང་ཕྲན་བརྒྱད་ལ་མཚོན། །ཞྭ་ལུང་མཐའ་ལ་ཚར་ལོ་གསུམ། །ངན་སོང་གསུམ་གྱི་གནས་རིས་མཚོན། །ཞྭ་ལ་གདོང་དྲུག་ཡོད་པ་འདི། །རིགས་དྲུག་འགྲོ་བ་དྲུག་ལ་མཚོན། །ཞྭ་ཁོག་སྟོང་ཞིང་ཡངས་པ་འདི། །འཁོར་བ་སྙིང་བོ་མེད་པར་མཚོན། །ཞྭ་མདོག་དཀར་ལ་འཚེར་བ་དེ། །ཀུན་གཞི་འགྱུར་བ་མེད་པར་མཚོན། །ཞྭ་མཐའ་རས་ཀྱིས་བཏུམས་པ་འདི། །གློ་བུར་སྒྲིབ་གཉིས་སེལ་བའི་བརྡ། །ལུགས་འབྱུང་འཁོར་བ་ཞྭ་ལ་རྫོགས། །ལུགས་ལྡོག་ཞི་བའི་ལམ་དང་མཐུན། །ཞྭ་ཁོག་སྟོང་བ་ཟང་ཐལ་འདི། །གཞི་ཡི་ངོ་བོ་སྟོང་བའི་བརྡ། །ཞྭ་རྒྱུ་རང་བྱུང་དཀར་བ་འདི། །རང་བཞིན་གསལ་བར་མཚོན་པའི་བརྡ། །རྣམ་པ་ཞྭ་རུ་སྣང་བ་ལ། །ཚེ་འདི་དབུ་འཕང་མཐོ་བའི་བརྡ། །གང་ལ་སྦྱར་དུ་རུང་བ་ནི། །ཐུགས་རྗེ་ཀུན་ལ་ཁྱབ་པའི་བརྡ། །ལྟེབས་ན་ངོས་གཉིས་ཡོད་པ་འདི། །ཆོས་ཀུན་བདེན་གཉིས་བསྡུ་བའི་བརྡ། །ཕུད་ན་ལོགས་བཞི་འོང་བ་ནི། །བདེན་བཞིའི་དངོས་བོ་མཚོན་པའི་བརྡ། །ཞྭ་ལ་གདོང་དྲུག་ཡོད་པ་དེ། །ཕ་རོལ་ཕྱིན་དྲུག་རྫོགས་པའི་བརྡ། །ངོས་བཞི་དཀར་གཙང་འཇམ་པ་དེ། །ཚད་མེད་བཞི་དང་ལྡན་པའི་བརྡ། །ཟུར་བརྒྱད་འཕགས་ལམ་ཡན་ལག་བརྒྱད། །བྱང་ཆུབ་སྤྱོད་ལ་གོམས་པའི་བརྡ། །པད་འདབ་དྲུག་གིས་བརྒྱན་པ་ནི། །རིགས་དྲུག་བག་ཆགས་དག་པའི་བརྡ། །རྣ་འདབ་གཡས་གཡོན་མཐོ་བ་དེ། །ཐབས་ཤེས་ཟུང་དུ་འཇུག་པའི་བརྡ། །ཞྭ་ལ་རྩེ་གསུམ་ལྡན་པ་ནི། །འབྲས་བུ་སྐུ་གསུམ་འཐོབ་པའི་བརྡ། །སྣ་ཚོགས་དར་སྣས་བརྒྱན་པ་ནི། །ཡེ་ཤེས་ཕྱོགས་མེད་རྒྱས་པའི་བརྡ། །ཁྱུང་ཆེན་སྒྲོ་ཡིས་བརྒྱན་པ་ནི། །ཆོས་དབྱིངས་མཁའ་ལ་རྟག་རོལ་བརྡ། །ཐང་དཀར་སྒྲོ་ཡིས་བརྒྱན་པ་ནི། །མཁྱེན་པས་མ་རིག་སེལ་བའི་བརྡ། །ནེ་ཙོའི་སྒྲོ་ཡིས་བརྒྱན་པ་ནི། །བརྩེ་བས་གཞན་ལ་གདམས་པའི་བརྡ། །གླག་མོའི་སྒྲོ་ཡིས་བརྒྱན་པ་ནི། །ནུས་པས་བདུད་དཔུང་འཇོམས་པའི་བརྡ། །ཚར་གསུམ་ཐུར་དུ་འཕྱང་བ་ནི། །དུག་གསུམ་སྒྲིབ་པ་སྤང་བའི་བརྡ། །འཁོར་དང་མྱ་ངན་འདས་པའི་ཆོས། །ཞྭ་དང་མི་མཐུན་གཅིག་ཀྱང་མེད། །ཞྭ་འདི་བཞེས་དང་རྟེན་འབྲེལ་ཆེ། །ཞེས་དང་།

གཞན་ཡང་། གེ་སར་རྒྱལ་བོ་འཛོམ་པ་སྤུན་གསུམ་དུ་སྤྲུལ་ནས་ཧོར་ཡུལ་དུ་ཕེབས་སྐབས། འབྲུག་མོས་སྣེ་ལེན་གཟབ་རྒྱས་བྱས་ཏེ། ཁྱེད་ཅག་གི་ཞྭ་དེ་མཚར་རོ་ཞིག་འདུག་པས་ཞྭ་བཤད་དྲིས་པའི་ལན་དུ། འཛོམ་སྔོན་གཡུ་ཡི་ལ་ཐོད་ཅན་དེས། ཞྭ་ལ་དཔེ་སྦྱར་ནས། ཐོག་མར་གླིང་བཞི་གླིང་ཕྲན། དེ་ནས་ས་རི་ཆུ་ཀླུང་དང་ཡུལ་གྱི་ཆགས་དབྱིབས། ཁྱད་པར་དུ་ཆོས་ལུགས་ཀྱི་ཆོ་ག་དང་མཐུན་པའི་ཞྭ་བཤད་ཤོ་ལོ་ཀ་བརྒྱ་དང་ང་ལྔ་ཡོད་པ﹙ཧོར་གླིང་གཡུལ་འགྱེད་སྨད་ཆའི་ཤོག་ངོས༣༠༥ནས༣༢༠ བར﹚ནི་དེར་བལྟ་བར་བྱའོ། །

༥ ཕྱིང་ཞྭ།

ཁ་དཔེར། བླ་མའི་གསེར་ཞྭ་དང་། རྫི་བོའི་ཕྱིང་ཞྭ། ཟེར་བ་ལྟར། ཕྱིང་ཞྭ་འདི་འབྲོག་ཕྱོགས་སུ་དར་ཁྱབ་ཆེ་ལ། དེང་ཡང་རོང་བས་ཀྱང་ཀླུ་རོལ་སོགས་ཀྱི་ཚེ་གྱོན་པ་དེ་ཡིན། སྤྱིར་ཕྱིང་ཞྭ་དེ་བལ་རྒྱུ་བྱས་ཏེ་ཕྱིང་བས་བཟོས་པའི་ཞྭ་འདབ་ཀོར་ཞིང་། ཞྭ་རྩེ་མཐོ་ལ། རྩེ་མོ་ངོས་མཉམ་དུ་བཅད་པ་དེ་ཡིན་ལ། དེང་སང་ཀླུ་རོལ་སོགས་ཀྱི་སྐབས་སུ་གྱོན་པ་སྔོན་གྱི་བཟོ་དབྱིབས་དེ་ལ། མཛེས་ཆོས་དོད་པོ་བྱས་ཏེ། ཞྭ་རྩེ་ལས་ཅ་ལ་དམར་བོ་མཐའ་བསྐོར་དུ་ཤམ་ཡོད། དགེ་ཆོས་ཀྱིས། ཡུལ་གྱི་ལྷ་དང་སྔོན་གྱི་མི་གཉིས་དཔེ་སྦྱར་ནས་གསུངས་ཡོད་པ་བཞིན། རྨ་རྒྱལ་སྦོམ་རའི་ཀྱང་ཕྱིང་ཞྭ་མནབས་ཡོད་པ་དེ་ཡིན་ལ། གེ་སར་སྒོམ་ཞྭ་ཟེར་བ་དེ་ཡང་འཕྱིང་བའི་ཞྭ་མོ་བཟོ་སྲོལ་འདིའི་སྟེང་ནས་བྱུང་བར་བཤད་དོ། །

༦ རྨོག་ཞྭ།

རྨོག་ཞྭ་ནི། གཡུལ་འཁྲུག་གི་སྐབས་སུ། མགོ་བོ་སྲུང་སྐྱོབ་ཀྱི་ཆེད་དུ་གྱོན་པའི་ལྕགས་ཞྭ་ཞིག་ཡིན་ལ། དེ་ལ་དར་ཕྲུ་ཡོད་མེད་ཅི་རིགས་ཡོད། ཆོས་རྒྱལ་ཚོའི་སྐུ་རིང་ལ་རྨོག་གྱོན་ཏེ་གཡུལ་འཐབ་གནང་བ། དེ་ལ་གཟུངས་སྔགས་དང་ཕྱག་རྒྱ་སྣ་ཚོགས་ཀྱིས་མཚོན་སྲུང་ཡང་བྲིས་ཡོད་པ་མང་བ་ལོ་རྒྱུས་དེབ་ཐེར་དུ་གསལ་ལ། དེང་སང་ཡང་ནོར་བུ་གླིང་ཁར་སྲོང་བཙན་གྱི་རྨོག་ཡིན་ཞེས་ཉར་ཚགས་བྱས་པ་ཞིག་ཀྱང་ཡོད་པར་མ་ཟད། གླིང་གི་དཔའ་རྟུལ་ཚོའི་རྨོག་ཡིན་ཞེས་དགོན་སྡེ་ཁག་ན་མཇལ་རྒྱུ་མང་དུ་ཡོད་།

༧ ཞྭ་མོ་ལྕགས་མདའ།

དེ་ནི་གོས་ཆེན་གྱིས་བཟོས་པའི་ཞྭ་ལེབ་མོ། ཞྭ་ཁོག་སྟེང་ཚར་སྐུད་དམར་བོ་ཡོད་པ། དེའི་སྟེང་བུམ་པ་ཆུང་ངུའི་དབྱིབས་ཅན་མཆིས་པ་ཞིག་ཡིན། སྔ་སོར་དེ་ནི་གཞུང་སའི་དཔོན་གནས་རིམ་པ་བཞི་བ་ཡན་གྱི་གྱོན་པའི་དབྱར་ཞྭ་ཞིག་ཡིན་པར་བཤད།

༨ ཚར་ཞྭ།

ཚར་ཞྭ་ནི་ལུ་གུའི་པགས་པས་བཟོས་པའི་ཞྭ་ཞིག་སྟེ། ཞྭ་འདབ་ལ་ཚར་རུ་བརྒྱབ་ཏེ་ཞྭ་འདབས་གཡེར་ཞིང་། སྟེང་དུ་གོས་ཆེན་སོགས་ཀྱིས་བཟོས་པ་ཞིག་ཡིན། ཡང་འདི་ལ་བཟོ་དབྱིབས་མི་འདྲ་བ་གཞན་དག་ཀྱང་སྣང་ངོ་། །

༩ ཝ་ཞྭ།

ཝ་ཞྭ་ནི་ཝ་ལྤགས་སྐྱ་བཤུས་བརྒྱབ་ནས། མ་དྲས་པར་གོན་པ་དང་། ཡང་ན། ཝ་ལྤགས་དྲས་ཏེ་ཞྭ་འདབས་ཡར་བརྫིས་ཏེ་གྱོན། བཟོ་དབྱིབས་ཀྱི་ཐད་ཕོ་མོའི་ཞྭ་གཉིས་ཀར། ཡུལ་ལུང་སོ་སོ་མི་འདྲ་བ་འགའ་ཤས་དང་། གོན་སྟངས་ཡང་མི་འདྲ་བ་འགར་འདུག ཡང་ལ་ལས་ཝ་ཞྭ་འདི་བཙན་པོའི་སྐབས་སུ། ཁྲིམས་ཡིག་ཏུ། སྡར་མ་ལ་ཝ་ཞྭས་མ་སྨད་ན། །དཔའ་བོ་དང་སྡར་མའི་ཤན་མི་འབྱེད། །ཅེས་པ་ལྟར། སྡར་མ་ལ་དམའ་འབེབས་བྱེད་དུ་བསྐྱོན་པ་ཞིག་ཡིན་སྣང་ཡང་། གང་ལྟར་ཕྱིས་སུ་ཝ་མོའི་གྲྭ་ཁ་འདི་མཛེས་པའི་ཆ་ནས། འཕྱོར་ཞྭ་ཞིག་ཏུ་ངོས་འཛིན་པར་བཤད་དོ། །

༡༠ ཞྭ་ཐོད་རིང་བོ།

ཨ་མདོའི་མཚོ་སྔོན་པོའི་འབྲོག་པ་ཚོས་གྱོན་པའི་ཞྭ་མོ་རྩེ་རིང་བོ་ཕྱུ་བའི་ཕུ་ཐུང་གི་རྩེ་བསྡུས་ནས་བསྡམས་ཏེ་མགོར་གྱོན་པ་ལྟ་བུ་ཞིག་འདུག་པ་དེའོ། །

༡༡ ཞྭ་མོ་འབོག་ཐོ།

སྔོན་གྱི་ཚེ་བོད་ས་གནས་སྲིད་གཞུང་སྐབས་གཞུང་གི་དྲུང་འཁོར་སྐྱ་བོ་ཚོས་རྒྱ་ལུ་ཆས་སྤྲས་དུས་མགོར་གྱོན་པའི་ཞྭ་མོ་ཨར་ཀོང་ཟེར་བ་རས་དཀར་བོ་ལས་བཟོས་པ་དེའོ། །

༡༢ རྒྱ་གར་ལེབ་མོ།

ཞྭ་འདི་རང་ཅག་གིས་རྒྱ་གར་ནས་དར་བ་ཞིག་ལ་ངོས་འཛིན་ཀྱང་། དོན་དུ་རྒྱ་གར་འདི་དབྱིན་ཇིས་ཡུན་རིང་དབང་བསྒྱུར་བྱས་སྟབས། ཞྭ་མོ་དེ་རྒྱ་གར་ལ་དབྱིན་ཇི་ནས་དར་བར་སེམས། དེ་བས་དབྱིན་ཇི་དང་རྒྱ་གར་བ་སོགས་ཀྱིས་གྱོན་མཁན་མང་བས། དེ་ལྟར་མིང་ཐོགས། དབྱིབས་ནི་ཞྭ་མགོ་ཟླུམ་ཞིང་ཞྭ་འདབ་རང་རེའི་ཕྱིང་ཞྭ་དང་འདྲ་བ་འདི་ཉིད་དོ། །

༡༣ ཚེ་རིང་སྐྱིན་ཁེབས།

དབུ་ཞྭ་ཚེ་རིང་སྐྱིན་ཁེབས་ལ་ཞྭ་གདན་ཡང་ཟེར་ལ། ལྕེ་བཞི་ཅན་གྱི་དགུན་ཞྭ་ཞིག་ཡིན། རྒྱུའི་གཙོ་བོ་ཕྱིང་བ་ལས་གྲུབ་ལ། སྐྱིན་ཁེབས་ཞེས་པ་གོས་ཆེན་གྱི་རིགས་ཤིག་དང་། གསེར་སྐུད་ལྷས་མ་བཅས་ལས་གྲུབ་ཡོད། དམངས་གཞས་ལས། དབུ་ཞྭ་ཚེ་རིང་སྐྱིན་ཁེབས། །ཞྭ་ལ་ཡར་སྟོད་གསེར་རེད། །ཞྭ་ལ་མར་སྟོད་དངུལ་རེད། །ཅེས་ལེན་སྲོལ་ཡོད། ཚེ་རིང་སྐྱིན་ཁེབས་ཞེས་ཐོགས་དོན་ཡང་། ཚེ་སྲོག་ཡུན་རིང་དུ་གནས་པའི་རྟེན་འབྲེལ་གྱིས་ཚེ་རིང་དང་། རྒྱུ་ཆ་གོས་ཆེན་སྐྱིན་ཁེབས་ཡིན་པས། རྒྱུ་མིང་འབྲས་ལ་ཐོགས་པ་ཡིན།

༡༥ ཚངས་གླིང་ཞྭ་མོ།

ཞྭ་འདིའི་རྒྱུ་ཆ་གཙོ་བོ་ནི་སྣམ་བུ་ལས་བྱས་པ་མང་ལ། དབྱིབས་ནི། རྭ་ཅོ་ལྟ་བུའི་ཟུར་གཉིས་དང་ལྡན་ལ། ཞྭ་མཐའ་ལ་འཇའ་སྒྲིལ་བཏང་སྟེ། མུ་ཏིག་གི་ཕྲ་རྒྱན་རྒྱག་སྲོལ་ཡོད། གྱོན་སྟངས་ལ། བུད་མེད་གཉེན་སྒྲིག་བྱས་པ་དག ཞྭ་མོའི་རྭ་གཉིས་ཟུར་ལ་བསྟན་ནས་གྱོན་པ་དང་། སྨྱན་སྒྲིག་མ་བྱས་པ་དག་ཟུར་གཉིས་རྒྱབ་ཏུ་བསྟན་ནས་གྱོན་སྲོལ་ཡོད། ཞྭ་འདི་གཙོ་ཆེ་ཤོས་ཀོང་ཡུལ་དུ་གྱོན་པ་མང་སྐད།

༡༦ ཡང་ཞྭ། དུང་དཀར་ཚིག་མཛོད་ལས།

དགུན་དུས་སུ་བུ་མོ་ཚོས་ཡང་ཞྭ་ཞེས་ཐེར་མ་སོགས་ཀྱིས་བཟོས་པའི་ཞྭ་མོ་རྒྱབ་མདུན་གཉིས་ཀ་རྣ་ཅོག་ཆེ་བ་རེ་དང་། གཡས་གཡོན་གཉིས་ལ་ཆུང་བ་རེ་པགས་པའམ་སྤུ་མ་གྲ་རིང་གིས་བརྒྱན་པ་ཞིག་གྱོན་པར་བྱེད། ཅེས་དང་། དུས་སྟོན་དང་སྤྲོ་སྐྱིད་སྐབས་སུ་སྤ་ཕྲུག་མི་གྱོན་པར། ཞྭ་མོ་ཡང་ཞྭ་གྱོན། ཞེས་སོ། །

གཞན་ཡང་ནག་ཆུ་ཁུལ་ལ་མཚོན་ན། ལྷས་དངོས་ཀྱི་ཞྭ་མོ། ཐོད་ཁེབས། ཞྭ་མོ་མགོ་ཁྲ། ཞྭ་མོ་དབུས་རིས་ཚེ། རས་ཞྭ་ཁྲ་རིལ། སྐྱེས་པའི་རས་ཞྭ་སོགས་ཀྱང་ཞིབ་པར་ཤེས་འདོད་ན་ནག་ཚང་ཤེལ་ཚྭ་རྫོང་གི་ལོ་རྒྱུས﹙ཤོག་གྲངས༢༣༧- ༢༤༠﹚ཞེས་པར་གསལ་ལོ། །

 

ལེའུ་གསུམ་པ། དགེ་སློང་གི་ཡོ་བྱད་དང་གཞི་གསུམ་སྐོར།
དང་བོ། ན་བཟའི་སྐོར་བཤད་པ།
༡ ཆོས་གོས་རྣམ་གསུམ་གྱི་བྱུང་བ་དང་ཁྲུ་ཚད།

སྟོན་པ་ཐུགས་རྗེ་ཅན་ཞལ་བཞུགས་དུས། རྒྱལ་བོ་གཟུགས་ཅན་སྙིང་བོས་འཚོ་བ་བ་གོས་ངུར་སྨྲིག་གྱོན་པ་ཞིག་མཐོང་བས། གླང་ཆེན་ལས་བབས་ཏེ་ཞབས་ལ་མགོ་བོས་གཏུགས་པས། འཁོར་གྱིས་དེ་ནི་སྟོན་པའི་ཉན་ཐོས་མ་ལགས་སྨྲས་པས། རྐྱེན་དེ་ལ་བྱས་ཏེ་རྒྱལ་བོས། སྟོན་པ་བཅོམ་ལྡན་འདས་ལ། རབ་བྱུང་གི་ཆོས་གོས་གཞན་དང་མི་འཁྲུལ་བའི་རྟགས་དགོས་ཚུལ་ཞུས་པས། སྟོན་པས་ལུས་འཕགས་ཀྱི་ཞིང་ལྟ་བུའི་དྲས་དྲུབ་བྱེད་དགོས་པར་བཀའ་བསྩལ་བ་ཡིན། དེ་ཡང་ཆོས་གོས་རྣམ་གསུམ་གྱི་སྒྲ་བཤད་ནི། ཆོས་དོན་དམ་པའི་དགེ་སྦྱོང་དང་། མྱ་ངན་ལས་འདས་པ་དང་མཐུན་པའི་གོས་ཡིན་པས་ཆོས་གོས་དང་། རྣམ་ཕྲན་དང་ལྒིགས་བུ་དུ་མ་སོ་སོར་རམ་ཀུན་ཏུ་སྦྱར་བས་ན་རྣམ་སྦྱར་དང་། བླ་སྟེ་སྐུ་སྟོད་དུ་གྱོན་པས་གོས་ཡིན་པས་བླ་གོས། མཐང་སྟེ་སྐུ་སྨད་དུ་གྱོན་པས་གོས་ཡིན་པས་མཐང་གོས་ཟེར་རོ། །

ཆོས་གོས་དེ་རྣམས་འཇལ་བྱེད་ཀྱི་ཁྲུ་ནི། ལུས་ཁྲུ། ལག་ཁྲུ། རྡུལ་ཁྲུ། ཞེས་གསུམ་དུ་འདུལ་གཞུང་ལས་གསུངས་ཤིང་། ལུས་ཁྲུ་ནི། རང་གི་ལུས་ཀྱི་སྲིད་དུ་ཆ་བདུན་དུ་བགོས་པའི་ཆ་གཉིས་དང་། ལག་ཁྲུ་ནི། ཊིཀྐ་ལས། ཁྲུ་ནི་གྲུ་མོ་ནས་གུང་མོའི་བར་རོ། །ཞེས་དང་། མཛོད་རྩར་སོར་མོ་ཉི་ཤུ་བཞི་ལ་ཁྲུ། ཞེས་སོ། །རྡུལ་ཁྲུ་ནི། རྣམ་འབྱེད་འགྲེལ་བ་ན་འདུལ་བ་ལས་དྲུག་འགྱུར་དུ་བསྒྲེ་བ་ནི། མར་འབྲི་བའི་དུས་ཀྱི་མི་ཉམ་ཆུང་བའི་སོར་རྣམ་པར་བཞག་པའི་ཕྱིར་རོ། །ཆོས་མངོན་པ་ལས་བདུན་འགྱུར་དུ་བསྒྲེ་བ་ནི། བསྐལ་བ་དང་བོའི་མི་ཉམ་ཆེ་བའི་སོར་རྣམ་པར་བཞག་པའི་ཕྱིར་རོ་ཞེས་གསུངས་པ་ལྟར། འདུལ་བ་མདོ་རྩར། རྡུལ་ཕྲ་རབ་དང་། རྡུལ་ཕྲ་མོ་དང་། ཆུ་དང་། ལྕགས་དང་། རི་བོང་དང་། ལུག་དང་། གླང་དང་། ཉི་ཟེར་གྱི་རྡུལ་དང་། སྲོ་མ་དང་། ཤིག་དང་། ནས་དང་སོར་རྣམས་སྔ་མ་སྔ་མ་དྲུག་འགྱུར་དང་། སོར་མོ་ཉི་ཤུ་རྩ་བཞི་ལ་ཁྲུ་གང་སོགས་གསུངས་སོ། །མཛོད་རྩ་ལས། སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང་། །ཉི་ཟེར་རྡུལ་དང་སྲོ་མ་དང་། །དེ་ལས་བྱུང་དང་དེ་བཞིན་དུ། །སོར་ཚིགས་ཞེས་བྱ་གོང་བདུན་འགྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ་། །དེ་དག་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་སོ། །

གཞལ་ཚུལ་ཡང་། ཀུན་མཁྱེན་མཚོ་སྣ་བའི་གདུལ་ཊིཀ་ཉི་མའི་འོད་ཟེར་ལས། རྡུལ་ཁྲུ་ལུས་ཁྲུ་ལག་ཁྲུ་སྟེ། །ཁྲུ་གསུམ་རྣམ་དབྱེ་ཤེས་པར་བྱ། །རྡུལ་ཁྲུས་གཞལ་བར་བྱ་བ་ནི། །ཁང་བའི་ཚད་དང་ཁྲི་རྐང་ཚད། །གདིང་བ་གཡན་འགབ་རས་ཆེན་ནོ། །དེ་དག་ལས་གཞན་ཆོས་གོས་རྣམས། །ལུས་ཁྲུ་འམ་ལག་ཁྲུས་གཞལ་བ་སྟེ། །ལུས་རིང་ཧ་ཅང་ལག་ཐུང་དང་། །དེ་ལས་ལྡོག་པའི་ཆོས་གོས་རྣམས། །རང་གི་ལུས་ཁྲུ་ཁོ་ནས་གཞལ། །ལུས་ཚད་ལག་ཚད་འཚམ་པ་ཡིས། །ལག་ཁྲུས་ཀྱང་ནི་གཞལ་དུ་རུང་། །ཞེས་སོ། །

གོས་གང་ལས་སྒྲུབ་པའི་བསམ་སྤྱོད་མི་རུང་བའི་རྒྱུ་ཚུལ་འཆོས་དང་། ཁ་བསགས། གཞོགས་སློང་། ཐོབ་ཀྱིས་འཇལ་བ། རྙེད་པས་རྙེད་པ་འཚོ་བ་སྟེ་ལོག་འཚོ་ལྔའི་བསམ་སྤྱོད་ཀྱིས་གོས་སྒྲུབ་པ་སྤངས་ཏེ། ཀུན་སྤྱོད་དང་སྤྱོད་ལམ་དག་པས་གོས་འཚོལ་སྒྲུབ་བྱེད་དགོས་པར་མ་ཟད། དཔག་བསམ་གྱི་ཤིང་ལས་བྱུང་བ་དང་། རས་བལ་དང་རྔ་མོང་གི་བལ་སོགས་རིན་པོ་ཆེ་ལས་གྲུབ་པ་དང་། དབྱིབས་མི་རུང་བ་ཁ་ཚར་དང་ཕུན་ཚར་ཅན་དང་། མུ་སྟེགས་ཀྱི་རྒྱལ་མཚན་ལྟ་བུ་དང་། ཁ་དོག་མི་རུང་བ་ཁྲ་བོ་དང་། དཀར་བོ། ནག་པོ། མཚལ། རྒྱ་སྐྱེགས། བཙོད། གུར་གུམ། མཐིང་ཤིང་། ལི་ཁྲི། སྨར་ཤིང་། ལེ་བརྒན་སོགས་ཀྱི་ཚོན་ཀྱིས་ཁ་བསྒྱུར་བའི་གོས་ཀྱི་རྒྱུ་མི་རུང་བ་སྤངས་ཏེ། བལ་དང་། རྩྭ་ཤ་ན། ཉི་འོག་པའི་གོས་དང་། རས་གོས་དང་། རྩྭ་ཟར་མ། རྩྭ་གོ་ཏམ་པ་བཅས་ལས་གྲུབ་པའི་གོས་རྣམས་དང་། སྔོན་པོ་དང་། སེར་བོ། དམར་བོ་སྟེ་སངས་རྒྱས་ཀྱིས་གནང་བའི་གོས་ཀྱི་རྒྱུ་སྒྲུབ་དགོས་སོ། །

༢ སྣམ་སྦྱར།

སྣམ་ཕྲན་དགུ་ནས་ཉེར་ལྔ་བར། ལྒིགས་བུ་ཕྱེད་དང་གསུམ་པ་ནས་ཕྱེད་དང་ལྔ་བར་ཆུང་འབྲིང་ཆེ་བ་སྐོར་དགུ་སྟེ། ཆེ་ཚད་སྲིད་དུ་ཁྲུ་ལྔ། ཞེང་དུ་ཁྲུ་གསུམ། ཆུང་ཚད་སྲིད་ཞེང་གཉིས་ཀ་ནས་ཁྲུ་ཕྱེད་ཕྱེད་ཕྲི་བ། དེ་གཉིས་ཀྱི་བར་ནི་འབྲིང་ཚད་དེ་ཆོས་གོས་རྣམ་གསུམ་གྱི་ཚད་ནི་གཅིག་མཚུངས་ཡིན་ནོ། །འདི་ལ་སྣམ་ཕྲན་ཉེར་ལྔ་དང་། ལྒིགས་བུ་ཕྱེད་དང་ལྔ་རེ་ཡོད་པས་ནི་འཕགས་ལམ་ཡན་ལག་བརྒྱད་དང་། ཡན་ལག་བདུན། དབང་སྟོབས་བཅུ། ལྕགས་རི་དྲན་ཉེ་སོགས་གསུམ་སྟེ། བྱང་ཆོས་སོ་བདུན་དྲན་གསོའི་རྟེན་ནོ། །གཞི་ཐམས་ཅད་ཡོད་པར་སྨྲ་བའི་སྣམ་སྦྱར་གྱི་གྲྭ་རྟགས་ནི་འཁོར་ལོ། ནོར་བུ། ཨུཏྤལ། པདྨ། ཤིང་ལོ་སོགས་དང་། ཕལ་ཆེན་པ་ནི་གྲྭ་རྟགས་དུང་སོགས་དང་། གནས་བརྟན་པ་ནི་གྲྭ་རྟགས་དཔལ་བེའུ་སོགས་དང་། མང་བཀུར་བ་ཡང་གྲྭ་རྟགས་དཔལ་བེའུ་སོགས་སོ། །

༣ བླ་གོས།

བླ་གོས་དང་རྣམ་སྦྱར་ནི། སྐུ་སྟོད་དུ་བཞེས་ནས་ཁྱིམ་པ་དང་མུ་སྟེགས་སོགས་ལས་ཁྱད་པར་དུ་འཕགས་པ་དང་། དགེ་སྦྱོང་གི་དྲན་པ་གསོ་བས་གོས་རྒྱུ་དང་ཁ་དོག་དབྱིབས་སོགས་ཚད་དང་ལྡན་པ་འདིས། གནས་སྐབས་འབུ་དང་ཚ་གྲང་ལས་སྐྱོབ་པའི་གོས་འདི་འཆང་ནས། སྔོན་གྱི་དེ་བཞིན་གཤེགས་པ་རྣམས་ཀྱི་དོན་དམ་པའི་དགེ་བ་ཐར་བ་མྱང་འདས་ཀྱི་སར་གཤེགས་པ་ལྟར། བདག་ཀྱང་ཚུལ་ཁྲིམས་ཀྱི་བསླབ་པའི་མི་མཐུན་ཕྱོགས་ལས་སྡོམ་པ་ཆུ་ལོན་ལྟ་བུ་སོ་ཐར་སྤོང་བདུན་འཁོར་བཅས་ཀྱི་ཚུལ་ཁྲིམས་རྣམ་པར་དག་པ་སྲུང་ནས་ཐར་བ་མྱ་ངན་ལས་འདས་པ་འཇུག་པར་བྱའོ་སྙམ་དུའོ། །ཚད་ནི། སྣམ་ཕྲན་བདུན་པ། ལྒིགས་བུ་ཕྱེད་དང་གསུམ་པ། ཚད་སྣམ་སྦྱར་ལྟར་རོ། །འདི་ལ་ལྒིགས་བུ་ཕྱེད་དང་གསུམ་རེ་ཡོད་པས། བྱང་ཆུབ་ཡན་ལག་བདུན་དང་། དེའི་ངོ་བོར་གྱུར་བའི་མཉམ་བཞག་སོགས་ཀྱི་དྲན་གསོའི་རྟེན་ནོ། །

༤ མཐང་གོས།

མཐང་གོས་ཀྱིས་སྨད་གཅེར་བུ་སྐྱོབ་ཆེད་དང་། སྦྲང་བུ་དང་ཤ་སྦྲང་རླུང་དང་ཉི་མ་སོགས་ཀྱི་གནོད་པ་སྐྱོབ་པར་མ་ཟད། ཁྱིམ་པ་དང་མུ་སྟེགས་ཅན་རྣམས་ལས་རྟགས་ཁྱད་པར་དུ་འཕགས་པར་བྱེད་པ་སོགས་སོ། །ཚད་ནི་སྣམ་སྦྱར་ལྟར་དང་། ལུས་བོངས་ཆེ་བས་སྲིད་དུ་མ་ཆོག་ན། ཇི་ཙམ་མ་ཆོག་པ་དེ་ཙམ་གྱི་ལུས་དང་འཚམ་པའི་རལ་ཁ་དཔུང་ཆད་གླན་པ་དེ། རྩ་བར། མི་ཡོགས་ན་རལ་ག་དཔུང་ཆད་བྱའོ། །ཞེས་སོ། །འདི་ལ་ལྒིགས་བུ་ཕྱེད་དང་གཉིས་རེ་ཡོད་པས་དབང་སྟོབས་ལྔ་དྲན་པ་གསོ་བའི་རྟེན་དུ་མཚོན་པ་ཡིན་ནོ། །

༥ ཤམ་ཐབས།

ཉིན་མོ་སྐུ་ལུས་ལ་གྱོན་རྒྱུའི་གོས་ཏེ། ཚད་མཐང་གོས་དང་མཉམ་ཞིང་། མཐང་གོས་ལ་རྔུལ་གྱི་དྲི་མས་མི་བགོ་བའི་ཆེད་དུའོ། །

༦ ཤམ་ཐབས་ཀྱི་གཟན།

མཚན་མོ་སྨད་དུ་གྱོན་པའི་གོས་ཏེ། ཚད་མཐང་གོས་དང་མཉམ་ཞིང་། ཤམ་ཐབས་ཀྱི་ཐེབས་སོ། །

༧ རྔུལ་གཟན།

ཉིན་མོ་སྐུ་སྟོད་དུ་གྱོན་པའི་གོས་ཏེ། ཚད་བླ་གོས་དང་མཉམ་ཞིང་། བླ་གོས་རྔུལ་གྱི་དྲི་མས་མི་བགོ་བའི་སླད་དུའོ། །

༨ རྔུལ་གཟན་གྱི་གཟན།

མཚན་མོ་སྐུ་སྟོད་དུ་གྱོན་པའི་གོས་ཏེ། ཚད་བླ་གོས་ལྟར་ལ། རྔུལ་གཟན་གྱི་ཐེབས་སོ། །

༩ གཡན་པ་དགབ་པ།

འདི་ནི་དགེ་སློང་གཡན་པའི་ནད་ཅན་ལ་གནང་བ་སྟེ། སྲིད་དུ་ཁྲུ་དྲུག ཞེང་དུ་ཁྲུ་གསུམ་མོ། །

༡༠ རྣག་གཟན།

འདི་ནི་དགེ་སློང་རྣག་ཅན་ལ་གནང་བ་སྟེ། ཚད་ཆོས་གོས་དང་མཉམ།

༡༡ གདོང་ཕྱིས། གདོང་ཕྱིས་ནི།

སྲིད་ཞེང་གཉིས་ཀར་ཁྲུ་གང་རེ།

༡༢ སྐྲ་བཟེད།

འདི་ནི་སྐྲ་གཞར་བའི་ཚེ་གྱོན་པའི་གོས་ཡིན་ལ། སྲིད་དུ་ཁྲུ་གསུམ། ཞེང་དུ་ཁྲུ་ཕྱེད་དང་གཉིས་སོ། །

༡༣ གདིང་བ།

གནས་མལ་སྐྱོབ་པའི་ཆེད་དུ་གནང་བ་སྟེ། དགེ་འདུན་གྱིས་རྩའི་གདན་མ་གཏོགས་གནས་མལ་དང་། ཁྱིམ་པའི་སྟན་དཀར་བོ་དང་། གང་ཟག་གི་ཁྲ་བོ་སོགས་ཕལ་ཆེར་མ་ཉམས་པ་ལ་ལོངས་སྤྱད་པའི་དུས་སུ་འདིས་བསྐྱབས་ནས་ལོངས་སུ་སྤྱོད་དགོས་པ་ཡིན། གདིང་བ་གསར་བ་ལས་ཁ་དོག་མི་སྡུག་པར་བྱ་བའི་ཕྱིར། འདིང་བ་རྙིང་བ་ལས་བདེ་བར་གཤེགས་པའི་མཐོ་གང་ངམ། ཚད་དང་ལྡན་པའི་ཁྲུ་ཕྱེད་དང་དོས་ཕྱོགས་ཀུན་ནས་འཁོར་བ་གླན་པ། ཚད་སྲིད་དུ་ཁྲུ་གསུམ། ཞེང་དུ་ཁྲུ་དོ་སོར་དྲུག མ་ཆོག་ན་སྲིད་དུ་ཕྱེད་དང་དོས་བསྐྱེད་པའོ། །འདི་ལ་ལྕགས་རི་དྲན་ཉེ་བཞི་དང་། ལྒིགས་བུ་ཕྱེད་དང་གཉིས་ནི་ཡང་དག་སྤོང་བ་བཞི་དང་། རྫུ་འཕྲུལ་གྱི་རྐང་བ་བཞིའི་དྲན་གསོའི་རྟེན་དུའོ། །

༡༤ དབྱར་གྱི་གོས་རས་ཆེན།

འདི་ནི་ཆར་སྐྱོབ་པའི་ཆེད་དུ་གནང་བའི་གོས་ཡིན་ལ། སྲིད་དུ་ཁྲུ་དགུ། ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །འདི་དག་ནི་དགེ་སློང་གི་འཚོ་བའི་ཡོ་བྱད་བཅུ་གསུམ་ཡིན་ནོ། །

༡༥ སྟོད་འགག

༡ སྟོད་འགག་གི་ཁུངས། སྟོད་འགག་ནི། དགེ་འདུན་པ་ཚོའི་སྐུ་སྟོད་དུ་གསོལ་རྒྱུའི་ན་བཟའ་དེ་ཡིན་ལ། འདི་ནི་ཆོས་འདུལ་བ་ལས་མ་བྱུང་ཡང། མཐོ་སྒང་འདིར་གྲང་ངར་ཆེ་སྟབས། བསྟན་པ་ཕྱི་དར་གྱི་དུས་སུ། དགེ་འདུན་ཚོ་གྲང་སྐྱོབ་ཏུ་ཕན་སླད། རྔུལ་གཟན་གྱི་ཚབ་ཏུ་གྱུར་བའི་སྟོད་འགག་འདི་དར་ཁྱབ་བྱུང་བ་ཡིན། ༢ སྟོད་འགག་གི་འཚེམ་སྟངས་དང་དབྱིབས་སོགས་གཅིག་མཚུངས་ཡིན་ནའང་། རྒྱུ་ཆ་ལ་མི་འདྲ་བའི་ཁྱད་པར་ཅུང་ཟད་ཡོད། དཔེར་ན། གོས་རྒྱ་སེར་གྱི་འགག དམར་སེར། ཐེར་མའི་འགག སྣམ་བུའི་འགག་སོགས་ཡོད། འདི་ལ་གྲུབ་མཐའ་ཁག་ལ་ཁྱད་པར་མེད་ནའང་། སེར་འབྲས་དགེ་གསུམ་གྱི་བླ་མ་ལས་སྣེ་དང་། བོད་གཞུང་གི་སེར་མོ་བའི་རྩེ་དྲུང་རྣམ་པ་སོགས་ཀྱིས་གོས་ཆེན་རྒྱ་སེར་དང་། རྒྱུད་སྟོད་པས་སྟོད་འགག་གི་ཕྲག་ལྷན་དུ་ཐེར་མ་སེར་བོ། རྒྱུད་སྨད་པས་སྟོད་འགག་གི་དབུས་སུ་ཚོས་གཞི་དམར་བོ་རྒྱག་སྲོལ་ཡོད། གྲྭ་བ་དཀྱུས་མའི་རིགས་ཀྱིས་ཐེར་མའམ་སྣམ་བུ་དམར་བོ་ཙམ་གྱི་སྟོད་འགག་གྱོན་སྲོལ་ཡོད་པ་ནི། ཆོས་འདུལ་བ་ལས་མ་བྱུང་བའི་བོད་རང་གི་ཡུལ་ཆས་སོ། །༣ སྟོད་འགག་གི་མཚོན་དོན། སྟོད་འགག་གི་དབྱིབས་གླང་ཆེན་གོ་ལྤགས་བཤུས་པ་འདྲ་བས། གླང་ཆེན་སྲོག་ཆགས་ཀྱི་ཁྲོད་ན་སྟོབས་ཆེ་བ་བཞིན། སྟོད་འགག་མནབས་པའི་གང་ཟག་དེ་དགེ་སྒྲུབ་ལ་གཞན་ལས་ས་ཆོད་ཆེ་ཞིང་སྟོབས་ཆེ་བ། ཧ་གོར་གཉིས་གླང་བོའི་རྣ་བ་དང་འདྲ་ཞིང་། མཐའ་རུ་སྐུད་པ་སྔོན་པོ་བཏགས་པས། མཁས་པ་མི་གསུམ་གྱི་བསྟན་རྩ་སོ་ཐར་གྱི་སྡོམ་རྒྱུན་བླ་ཆེན་དགོངས་པ་རབ་གསལ་ལ་ཕུལ་སྐབས། དགེ་འདུན་ཁ་སྐོང་གི་གྲས་སུ་རྒྱ་ནག་གི་དགེ་སློང་ཡོད་པས། ཁོང་རྣམ་པས་དྲིན་བསམ་ཆེད་དང་། དཔུང་མགོར་སྐུད་སྔོན་གྱི་གུག་ཡོད་པས། དགེ་ཚུལ་སློང་ཕྱི་རོལ་ཏུ་ཕེབས་སྐབས་ལག་པ་མི་གཡུགས་པའི་ཆེད་དུ་མཐེ་བོང་འཇུག་སའི་དོད་ཡིན་པ་སོགས་མང་དུ་བཤད་རྒྱུ་ཡོད་དོ། །

༡༦ སྟོད་གོར་ནང་ཚངས་ཅན།

མདོ་རྩ་ལས། སྟོད་ཀོར་ནང་ཚངས་ཅན་ཞེས་སྐུ་སྟོད་དུ་གྱོན་རྒྱུའི་དངུལ་གཟན་བར་ཚངས་ཅན། དགེ་སློང་གིས་འཆང་རུང་བར་བཤད་པ་དེ་ནི། ཕལ་ཆེར་ད་ལྟའི་སྟོད་འགག་གི་མ་གཟུགས་འདྲའོ། །

༡༧ སྐ་རགས།

མདོ་རྩ་ལས། ཤམ་ཐབས་བགོས་པའི་སྟེང་དུ་སྐ་རགས་བཅིང་ངོ་། །ཤུར་བུ་འམ་ལྕག་པོད་དམ་རྒྱ་ལྕང་ངམ། ཤུར་བུ་ཕྲེའུས་སོ། །༡ ཤུར་བུ་ནི། སྐུད་པ་མང་བོ་འཐག་པ་སྲབ་ཞིང་ཞེང་ཆེ་བ་ཞིག་གོ། ༢ ལྕག་པོད་ནི། སྐུད་པ་དུ་མས་བརྒྱད་སླས་ཀྱི་ཟུར་བཞི་བའི་རྣམ་པར་སླས་པ་ཞིག ༣ རྒྱ་ལྕང་ནི། སྐུད་པ་མང་བོ་སླས་པའི་ཟླུམ་སྦུག་ཁོང་སྟོང་གི་སྐ་རགས་ཤིག ༤ ཤུར་བུ་ཕྲེའུ་ནི། སྐུད་པ་མང་བོས་འཐག་པའི་བར་བར་ནས་སྦུ་གུ་ལྟར་ལྷས་པའི་དུམ་བུ་ལྔ་འམ་དྲུག་ཡོད་ལ། བར་བར་དྲ་བ་ལྟར་འབྲེལ་བ་ཞིག་གོ །

༡༨ གཏུར་བུ།

ཆོས་གོས་ཉར་ཚགས་བྱེད་པའི་སྣོད་ཅིག་སྟེ། སྲིད་དུ་ཁྲུ་གསུམ་དང་། ཞེང་དུ་ཁྲུ་ཕྱེད་གསུམ་མམ། ཕྱེད་དོ་ཞེང་དུ་ཉིས་ལྟེབ་བྱས་ཏེ་བཟོས་པ། ཁ་དཀྱིལ་དུ་ཡོད་པ་ལ་ཐ་གུས་ཁ་ལུང་སྦྱར་ནས། ཐ་གུ་གཞན་ཞིག་གིས་ཕན་ཚུན་སྒྲོག་ཆོག་པ་ཞིག་སྟེ། དེ་ཡང་ཞེང་དུ་ཁྲུ་ཕྱེད་དོ་འམ་ཕྱེད་གསུམ་ཞེས་གསུངས་ཚུལ་མི་འདྲ་བ་ནི། སྔ་མ་ཆོས་གོས་བརྒྱད་ལྟེབ་ཀྱིས་གཞུག་པ་དང་། ཕྱི་མ་བཞི་ལྟེབ་ཀྱིས་གཞུག་པའི་ཁྱད་པར་རོ། །

དེ་ཐམས་ཅད་ཁ་ཚར་ཅན་དང་། དཔག་བསམ་གྱི་རྒྱུ་ལས་བྱུང་བ་དང་། ར་བལ་དང་རྔ་བལ་ལས་བྱས་པ་དང་། རུང་བའི་ཚོན་གྱིས་ཁ་མ་བསྒྱུར་བ་དང་། ཁྲ་བོ་སོགས་དང་། ཚོན་ཆེན་གྱིས་ཁ་བསྒྱུར་བ་དང་། མུ་སྟེགས་ཀྱི་ཆ་ལུགས་སུ་གཏོགས་པའི་སྐྲའི་གཡང་གཞི་སོགས་མི་རུང་ཞིང་། ལུག་བལ་དང་། རྩྭ་ཤན་ལས་བྱས་པ། ཉི་འོག་པའི་གོས་དང་། རས་གོས་དང་། རྩྭ་ཟར་མ་དང་། རྩྭ་གོ་ཏམ་པ་དང་། རྩྭ་དུ་གུ་ལས་བྱས་པ་དང་བདུན་རུང་ངོ་། །ཁ་དོག་ཀྱང་རུང་བའི་ཚོན་གྱིས་ཁ་བསྒྱུར་བ་དགོས་ཏེ། སྔོན་པོ་བཙག་དང་ངུར་སྨྲིག་རྩི། །འདི་དག་རུང་བའི་ཚོན་གསུམ་སྟེ། །ཚོན་གཞན་དག་གིས་ཆོས་གོས་ནི། །ཁ་བསྒྱུར་བྱེད་པ་བཀག་པ་ཡིན། །ཞེས་སོ། །

གཞན་ཡང་ཡོ་བྱད་ཕྲན་ཚེགས་ཀྱི་སྐོར་ལ། ཞྭ། ལྷུང་བཟེད་ཀྱི་ཤུབས། ཁ་གཡོགས། རམ་ཕྱིས་སམ་ཕོར་ཕྱིས་སོགས་མང་ངོ་། །

༡༩ འདུལ་བ་ལས་བསྟན་པའི་དགེ་སློང་གི་མཆིལ་ལྷམ་འགའ།

༡ དགེ་སློང་གྲོ་བཞིན་སྐྱེས་ལ་བརྟེན་ནས་གནང་བའི་མཆིལ་ལྷམ་རིམ་པ་གཅིག་པ། ༢ དགེ་སློང་བསོད་སྙོམས་པ་ཞིག་ལ་ཁྱིམ་བདག་གིས་ཕུལ་བ་ལ་བརྟེན་ནས་གནང་བའི་མཆིལ་ལྷམ་རིམ་པ་མང་བོ་ཅན་གྱི་དཔེ་སྟེ། ཁྱིམ་པས་ཐ་ན་གོམ་པ་བདུན་དུ་བགོས་ན་རིམ་པ་མང་ཡང་རུང་ངོ་། །༣ མཆིལ་ལྷམ་གྱིས་རྐང་བ་ལ་རྨ་བྱུང་ནས་གནང་བ་རྐང་བའི་ལོང་བུའི་མཐར་ཐུག་པ་ཁྱབ་པ་པགས་པའི་ལྷམ་ཀོ་བ་ཅན། ༤ དགེ་སློང་རི་ལ་འཛེག་ནས་མཐེ་བོང་ལ་རྨ་བྱུང་སྟེ་གནང་བ། རྐང་བའི་སོར་མོའི་ངོས་ལ་གྱོན་པའི་ལྷམ་སྣ་སྦུབས་ཅན། ༥ དགེ་སློང་རི་ལས་འབབ་པ་ན་རྟིང་བ་ལ་རྨ་བྱུང་སྟེ་གནང་བ། རྐང་བའི་རྟིང་བའི་ངོས་ལ་གོན་པའི་ལྷམ་རྟིང་སྦུབས་ཅན། ༦ ཀླུའི་ཁ་ཆུས་རྩྭ་དུག་ཅན་དུ་གྱུར་ནས་དེའི་གནོད་པ་བསལ་བའི་ཕྱིར་གནང་བ་རྐང་བ་ཕལ་ཆེར་གཡོགས་པ་ལ། བོལ་གྱི་སྣར་ཕྱུངས་པའི་སྦུབས་མཐོངས་ཅན། ༧ རྩྭའི་མྱུ་གུ་ཆེར་སྐྱེས་པས་དགེ་སློང་གི་རྐང་བར་རྨ་བྱུང་ནས་གནང་བ། རྗེ་ངར་གྱི་ཕྱེད་ཁྱབ་པའི་ལྷམ་ཡུ་ཆས་ཅན། ༨ ཀུན་དགའ་བོ་ལ་བརྟེན་ནས། གང་ན་སྣོད་དུ་ཆུ་འཁྱགས་པའི་ཡུལ་དུ་གནང་བ་རྐང་བའི་མཐིལ་ནས་པུས་མོའི་མཐར་ཐུག་པར་ཁྱབ་པའི་མཆིལ་ལྷམ་སྒྲོ་གུ་ཅན།

༢༠ དགེ་སློང་ལ་མི་རུང་བའི་ལྷམ།

༡ ཨ་ཤྭ་ཐ་དང་ཀ་ར་བིའི་འདབ་མ་ལྟ་བུ་དག་མི་བཅང་ངོ་། །༢ ལུག་རུ་ལྟ་བུ་དག་མི་བཅང་ངོ་། །༣ གསེར་དངུལ་གྱི་སྤྲས་པ་སོགས་རྒྱུ་དབྱིབས་རི་མོའི་སྒོ་ནས་མི་རུང་ངོ་། །༤ ཐྲིག་ཐྲིག་ཟེར་བ་དང་། ཏུག་ཏུག་ཟེར་བ་དག་སྒྲའི་སྒོ་ནས་མི་རུང་བ་སྟེ། སྤྱིར་རུང་བར་སྣང་བའི་ལྷམ་དེ་རྣམས་ཀྱང་སྒེག་རྫས་སུ་འགྱུར་བའི་སྐྱོན་དེ་དག་དང་བཅས་ན་མི་རུང་ངོ་། །

༢༡ གཡུང་དྲུང་བོན་གྱི་ཆས་གོས་སྐོར་རགས་ཙམ་བཤད་པ།

སྤྱིར་བོན་གྱི་ཆོས་གོས་ལ། འདུལ་ཆས་དང་། སྔགས་ཆས་ཁག་གཉིས་སུ་དབྱེ་སྟེ། དང་བོ་སྟོན་པ་གཤེན་རབ་རྒྱལ་བུ་རྒྱལ་སར་མ་བཏོན་གྱི་བར་དུ་རྫོགས་སྐུའི་ཆ་ལུགས་དང་། རྒྱལ་སར་བཞུགས་ནས་རབ་ཏུ་མ་བྱུང་བར་དུ་རྒྱལ་བོའི་ཆ་ལུགས། རབ་ཏུ་བྱུང་ནས་འདུལ་ཆས་ན་བཟའ་པད་ལོ་རིགས་དྲུག་གསོལ་བ་ཏེ། པད་ཞུ། སྨད་གོས། གཟན། སྟོད་འགག ཤམ་ཐབས། པད་ལྷམ་བཅས་དྲུག་གསོལ་བས། བོན་གྱི་འདུལ་འཛིན་རྣམ་པས་པད་ལོ་རིགས་དྲུག་གཙིགས་འཛིན་བྱེད་པར་གསུངས་སོ། །སྤྱིར་འདུལ་ཆས་ཀྱི་ཁ་དོག་ལ་སྔོ་དམར་སེར་གསུམ་དུ་བཤད་ཀྱང་། བོན་ལུགས་ལ་སྔོན་པོ་གཙིགས་ཆེན་འཛིན་པ་ནི། བོན་གཞུང་འདུལ་བ་གླིང་བསྒྲགས་དང་། སྲིད་པ་རྒྱུད་ཀྱི་ཁ་བྱང་སོགས་ལས། གོས་སྔོན་དེ་འདུལ་འཛིན་གོང་མའི་བཀའ་རྟགས་དང་། གཡུང་དྲུང་བོན་གྱི་བརྡ་རྟགས་ལྟ་བུར་བཤད་པ་དང་། དུས་གསུམ་དུ་གཡུང་དྲུང་བོན་མི་འགྱུར་བའི་རྟགས་སུའང་བཤད་དོ། །

གཉིས་པ། སྔགས་ཆས་ལའང་སྔགས་ཕྱི་ནང་གི་ཆས་གོས་འདྲ་མིན་ཅི་རིགས་ཡོད་ལ། སྔགས་ཞྭ་ལ་གཙོ་བོ་དཀར་བོ་རྩེ་རྒྱན་དང་། ཁྱུང་ལྡིང་སོགས་ཡོད་དོ། །

གཉིས་པ། ཡོ་བྱད་ཀྱི་སྐོར།
༡ གཎྜི།

༡ གཎྜི་ཐོག་མར་བྱུང་བའི་ཁུངས་ནི། སྟོན་པ་ལ་རྒྱལ་བོ་གསལ་རྒྱལ་གྱིས་རྩོད་དུས་སུ་ཉོན་མོངས་པ་དང་ལས་ངན་སྣ་ཚོགས། འཐབ་རྩོད་རྣམས་ཞི་བ་ལ། ཕན་པ་འབྱུང་བའི་ཐབས་ཞིག་བསྟན་ཏུ་གསོལ་ཞེས་ཞུས་པས། སངས་རྒྱས་སྒྲ་སྒྲོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་ནས། ངན་སོང་གསུམ་གྱི་སྡུག་བསྔལ་ཆད་པར་བྱས་ཤིང་། ཡུམ་ཆེན་མོ་གཎྜི་གཟུགས་ཀྱི་རྣམ་པའི་སེམས་ཅན་ཐམས་ཅད་ཀྱི་ཉོན་མོངས་དང་འཐབ་རྩོད་ཞི་བ་དང་། ཚེ་བསོད་ཡོན་ཏན་འཕེལ་བ། སྒྲ་ཐོས་པའི་སྤྲོ་བ་བསྐྱེད་པ། ཡུམ་ཤེས་རབ་གྱི་ཕ་རོལ་ཏུ་ཕྱིན་པ་གཎྜིའི་གཟུགས་ཀྱིས་བཞུགས་སོ། །ཞེས་གཎྜིའི་མདོའི་ལྒིང་གཞི་ལས་གསུངས་པ་ལྟར་རོ། །

གཎྜི་ནི་ཆོས་སྡེ་རྣམས་སུ། དགེ་འདུན་ལ་ཚོགས་བརྡ་གཏོང་བྱེད་དེ། རིང་ཐུང་འདོམ་གང་ལྷག་ཙམ། དབྱིབས་ཟུར་བརྒྱད་པ། རྡུང་བྱེད་མགོ་མཇུག་སྦོམ་ཞིང་། དཀྱིལ་ཕྲ་བ། ཤིང་རིགས་སྣ་བཅུ་དྲུག་ལས་བཟོས་པ་ཞིག་གོ།

༢ ཎྜིའི་རྒྱུ་ནི།

རྒྱུ་གནྜིའི་མདོ་ལས་གསུངས་པ་ལྟར། ༡ ཙན་དན་དཀར་བོ། ༢ བིལ་བ(འབྲས་སུ་ཚིག་རུས་ཅན་གྱི་ཤིང་ཏོག་ཀ་པེད)། ༣ པཱ་ལ་ཤ(ཀེང་ཤུ་ཀ་སྟེ་རྒྱ་སྐྱེགས་ཤིང་།) ༤ ཨ་ཤད་ཐ། ༥ ཙན་དན་དམར་བོ། ༦ སྟར་ཁ། ༧ ཏཱ་ལ(རྩེ་མོ་བཅད་ན་སླར་མི་སྐྱེ་བའི་ཤིང་ཞིག)། ༨ ཀེང་ཤུ་ཀ ༩ ཤཱ་བ། ༡༠ ཏཱ་མ་ལ། ༡༡ ཨ་མྲ། ༡༢ སྟར་བུ། ༡༣ སྐྱུ་རུ་ར། ༡༤ རིན་ཏི་ས་ར། ༡༥ ཨ་ཤྭ་ཀ ༡༦ འོ་མ་སེ་ཤིང་ངོ་། །བོད་རང་ལ་མཚོན་ན་སྟར་བུ་དང་སྟར་ཁ་ནི་རྙེད་སླ་ཞིང་། རྒྱ་ཤུག་དང་སྟག་པ་ལས་ཀྱང་བྱ་རུང་བར་ཀུན་མཁྱེན་མཚོ་སྣ་བས་གསུངས་སོ། །ཡོངས་གྲགས་སུ་སེང་ལྡེང་དུ་འབོད་པ་དེས་བཟོས་ན་ལེགས་པར་གསུངས། རྟེན་འབྲེལ་གྱི་ཡན་ལག་བཞི་ཡང་དག་པར་མཚོན་པའི་གཎྜི་རྣམ་པ་བཞི་སྟེ། དྲོད་རྣམ་པར་དག་པའི་གཎྜི། རྩེ་མོ་མངོན་རྟོགས་རྣམ་པར་དག་པའི་གཎྜི། བཟོད་པའི་རྣམ་པར་དག་པའི་གཎྜི། ཆོས་མཆོག་གི་རྣམ་པར་དག་པའི་གཎྜིའོ། །

༣ ཚད་དབྱིབས་ནི། གཎྜིའི་མདོ་ལས། ཚད་ནི་མཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་ནི་སོར་ནི་དྲུག་པ་སྟེ། །དཔངས་སུ་ཡང་ནི་གཉིས་བྱའོ། །སོར་མོ་ཚིགས་ཀྱི་ཚད་དག་ནི། །ཟུར་བཞིའི་ཚད་ནི་གཉིས་པ་ཡིན། །ལེགས་མཉམ་ཉིད་དང་ཤིན་ཏུ་གསལ། །རྩེ་གཉིས་སྦལ་བའི་མགོ་བཞིན་ནོ། །ཞེས་དང་། ཀློང་རྡོལ་བླ་མས། གཎྜི་ཆེ་བ་སོར་བརྒྱ་དང་བརྒྱད། གཎྜི་ཆུང་བ་སོར་བརྒྱད་ཅུ་རྩ་བཞི། དེ་གཉིས་ཀྱི་བར་ནི་འབྲིང་ཚདཡིན། ཁ་ཞེང་སོར་དྲུག སྲབ་མཐུག་སོར་གཉིས། སྤོང་བ་པའི་གཎྜི་ཆུང་བ་སོར་ཉེར་བཞི། སྲབ་མཐུག་ཁ་ཞེང་དག་ཆེ་བ་དང་འདྲའོ། །ཞེས་སོ། །

༤ རྡུང་བྱེད་ནི། དེ་ཉིད་ལས། དེ་ནས་རྡུང་བར་བྱེད་པ་ཡང་། །ཤིང་དེ་ལ་ནི་གཅད་དེ་བྱ། །སོར་བཅུ་གཉིས་ཀྱི་ཚད་དག་དང་། །ཟླུམ་ཞིང་རྩེ་གཉིས་ནེའུ་ལེའི་མགོ ། ཞེས་དང་། གཞན་ངོས་ལ་བཀྲ་ཤིས་ཀྱི་ཚིགས་བཅད་དང་། སེར་སྔགས་འབྲི་བ། རབ་གནས་སོགས་བྱའོ། །

༥ རྡུང་ཚུལ་ནི། རྡུང་མཁན་དགེ་བསྙེན་ཡན་ཆད། གསོ་སྦྱོང་ལ་གནས་ཏེ། གཙུག་ལག་ཁང་གི་སྟེགས་བུར་དར་གོས་བཤམས་པའི་སྟེང་དུ། གཎྜི་བཞག་ལ་ཕྱག་གསུམ་འཚལ། ཤེར་ཕྱིན་གྱི་ཆོས་སྒྲ་སྒྲོགས་པར་མོས་ནས། གཎྜི་ཕྲག་པར་བླངས་ནས་བརྡུང་དགོས་ཏེ། མདོ་རྩ་ལས། བསྡུ་བའི་ཕྱིར་གཎྜི་བརྡུང་ངོ་། །དེའི་གནས་ནི་ཁང་སྟེང་ངོ་། །དགེ་འདུན་བསྡུ་བའི་ཕྱིར་རྒྱུད་གསུམ་དང་དེ་སྙེད་ཀྱི་ཏོག་དག་གོ། ལས﹙གསོ་དགག་སོགས་སུ་འདུལ་བའི་ལས་བརྒྱ་རྩ་བརྒྱད་གང་རུང﹚བྱ་བའི་དོན་དུ་ནི་རྒྱུད་གཅིག་དང་ཏོག་གསུམ་མོ། །ཁ་ཅིག་ལས་ནི་རྒྱུད་གསུམ་དང་ཏོག་གཉིས་ཤེའོ། །ཤི་བ་ལ་ཕྲག་པ་དབྱུང་བའི་དོན་དུ་ནི་བྱི་བོའོ། །ཁ་ཅིག་ལས་ནི་རྒྱུད་གཅིག་དང་ཏོག་གཅིག་གོ་ཞེའོ། །ཞེས་པ་སྟེ། རྒྱུད་ཅེས་པ་གཅིག་ནས་བཅོ་བརྒྱད་བར་སྒྲ་ཇེ་ཆེར་བརྡུང་བ་དང་། ཏོག་ཅེས་པ་མཇུག་ཏུ་ཤེད་ཀྱིས་ལན་གཅིག་སོགས། དེས་འགྲེས་ནས་ཤེས་པར་བྱའོ། །གཞན་ཡང་། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔ་འམ་གཎྜི་རྡུང་བའི་སྒྲ། །ཐོས་པས་བྱང་ཆུབ་འཐོབ་འགྱུར་ན། །ཉན་ཕྱིར་ལྷགས་པ་སྨོས་ཅི་དགོས། །ཞེས་པ་ལྟར་ཆོས་ཉན་པའི་བརྡ་སྟོན་ཕྱིར་ཡང་བརྡུང་ལ། དེ་ལས་གཞན་སེར་གནོད་སོགས་བཟློག་ཆེད་ཅི་ཙམ་གྱིས་བཟློག་པ་དེ་ཙམ་དང་། ཡང་། སྒོམ་གྲོལ་བ་དང་ཟས་བཟའ་ཆེད་ཀྱང་བརྡུང་བར་བྱེད་དོ། །

༦ གཎྜིའི་མཚོན་དོན་ནི། བཟོ་གནས་སྐྲ་རྩེའི་ཆུ་ཐིགས་ལས་འདི་ལྟར་འབྱུང་སྟེ། གཎྜི་ལ་རྟེན་འབྲེལ་གྱི་ཡན་ལག་བཞི་ཡང་དག་པར་མཚོན་པའི་གཎྜི་རྣམ་པ་བཞི་སྟེ། དང་བོ། ཆུང་བའམ་དྲོད་རྣམ་པར་དག་པའི་གཎྜི་ནི། ཆོས་ཀྱི་ཕུང་བོ་བརྒྱད་ཅུ་རྩ་བཞི་མཚོན་པའི་སྲིད་དུ་ཆ་བརྒྱད་ཅུ་རྩ་བཞི་བ་གསུམ་དང་། ཁོར་ཡུག་ཟླུམ་པོར་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ཀྱི་རྣམ་པར་དག་པའི་ཆ་བཅུ་གཉིས་སོ། །གཉིས་པ། རྩེ་མོར་མངོན་པར་རྟོགས་པའི་རྣམ་པར་དག་པའི་གཎྜི་ནི། སྲིད་དུ་མངོན་པར་ཤེས་པ་ལྔ་དང་། དཔེ་བྱད་བཟང་བོ་བརྒྱད་ཅུ་མཚོན་པའི་ཆ་བརྒྱད་ཅུ་རྩ་ལྔ་དང་། མཐའ་བསྐོར་ཟླུམ་པོར་ས་བཅུ་གསུམ་གྱི་རྣམ་པར་དག་པའི་ཆ་བཅུ་གསུམ་དང་། རྣམ་པར་ཐར་བ་བརྒྱད་ཀྱིས་རྣམ་པར་དག་པ་བརྒྱད་ཀྱིས་རྣམ་པར་བརྒྱན་པའོ། །གསུམ་པ། བཟོད་པའི་རྣམ་པར་དག་པའི་གཎྜི་ནི། སྲིད་དུ། སྟོབས་བཅུ་དང་། དགེ་བ་བཅུ་དང་། དབང་བཅུ་དང་། ཕ་རོལ་ཏུ་ཕྱིན་པ་བཅུ་དང་། ཤེས་པ་བཅུ་དང་། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རྣམ་པར་དག་པའི་ཆ་བརྒྱད་ཅུ་རྩ་བདུན་དང་། མཐའ་བསྐོར་དུ། སྒྲིབ་པ་མེད་པའི་རྣམ་པ་ལ་སོགས་པའི་དབྱངས་བཅོ་ལྔའི་རྣམ་པར་དག་པའི་ཆ་བཅོ་ལྔ། གསུང་རབ་ཡན་ལག་བཅུ་གཉིས་ཀྱི་དག་པས་བརྒྱད་ཅུ་རྩ་གཉིས་སོ། །བཞི་བ། ཆོས་མཆོག་གི་རྣམ་པར་དག་པའི་གཎྜི་ནི། སྲིད་དུ། ཉོན་མོངས་དགུ་བཅུ་རྩ་བརྒྱད་རྣམ་པར་དག་པས་ཆ་དགུ་བཅུ་རྩ་བརྒྱད་དང་། ཁོར་ཡུག་ཏུ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམ་པར་དག་པས་ཆ་བཅོ་བརྒྱད། བདེན་པ་བཅུ་དྲུག་གི་རྣམ་པར་དག་པས་བརྒྱད་ཅུ་རྩ་དྲུག་གོ། ཞེས་གསུངས་སོ། །

༧ བརྡུངས་པའི་ཕན་ཡོན་ནི། བརྡུངས་པའི་སྒྲས་ཤེར་ཕྱིན་གྱི་སྒྲ་བརྗོད་པར་འགྱུར་རོ། །བཀྲ་ཤིས་ཀྱི་ཚིག་འབྱུང་ངོ་། །འཁོར་རྣམ་བཞིའི་ནད་ཞི་བར་བྱེད་དོ། །བྱང་ཆུབ་མངོན་དུ་བྱེད་དོ། །མཆོག་གསུམ་གྱི་བཀའ་དྲིན་ཡང་ཤིན་ཏུ་སྐྱེ་བར་འགྱུར་རོ། །དཀྱིལ་འཁོར་ལ་གུས་པར་འགྱུར་རོ། །རྒྱལ་བོ་ཆོས་དང་ལྡན་པར་འགྱུར་རོ་སོགས་ཡོན་ཏན་ཚད་མེད་པའོ། །

༢ མཁར་གསིལ།

དགེ་སློང་བསོད་སྙོམས་ལ་ཕེབས་སྐབས་ཀྱི་ཕྱག་མཚན་ཏེ། མིང་གཞན་ལ་གསིལ་བྱེད། གསེག་ཤིང་། གོ་བྱེད། ཁྱི་སྐྲོད། སིལ་བྱེད་ཡང་ཟེར། དབྱེ་ན། རྭ་གཅིག་པ། རྭ་གཉིས་པ། རྭ་བཞི་བ། རྭ་དྲུག་པ་རྣམས་སོ། །འདི་དགེ་སློང་གི་འཚོ་བའི་ཡོ་བྱད་བཅུ་གསུམ་གྱི་གྲས་ཡིན་ཞིང། འདིའི་རིང་ཚད་དགེ་སློང་རང་རང་གི་ལུས་ཚད་དང་མཉམ་པར་བཤད་དོ། །

དབྱིབས་ནི། ཞུས་ལན་ནོར་བུའི་ཕྲེང་བ་ལས། མདུད་པ་གཅིག་དང་དུམ་བུ་གསུམ། །བར་ཤིང་གསོམ་དང་སྨད་ཞོག་བདུན། །སྟོད་ཞོག་བརྒྱད་དང་རྭ་ཆེན་བཞི། །མཆོད་རྟེན་གཅིག་དང་འཁོར་ལོ་རྒྱུ། །སྦུབས་གཉིས་སྟོང་དང་ཟུང་དུ་འབྲེལ། །ཨ་ལོང་བཅུ་གཉིས་ཡོད་པ་ནི། །བདག་གི་ཐེ་ཚོམ་བཅད་པའི་ཕྱིར། །གང་ལྟར་ལགས། ཞེས་པ་ལྟར་རོ། །

མཁར་གསིལ་འཆང་ཚུལ། མཁར་གསིལ་ཇི་ལྟ་བར་འཆང་ཚུལ་གྱི་སྤྱོད་ལམ་སོགས་ཀྱང་ཇོ་བོ་རྗེའི་གསུང་ལས། འདི་ལ་འཆང་ལུགས་འདི་ལྟར་བགྱི། །མདུང་ཐོགས་བཞིན་དུ་མི་བསླངས་ཤིང་། །དུང་ཐོགས་བཞིན་དུ་མི་སྒྱེར་རོ། །མ་ནི་བུ་གཅེས་འཛིན་པ་བཞིན། །སེམས་ཀྱི་བླངས་པ་ཐུགས་ཀར་བཅིངས། །ཀུ་ཀུ་རཱ་ཙ་ལ་སོགས་པ། །གང་ན་འཇིགས་པ་ཡོད་པའི་སར། །གང་ལྟར་བྱས་ཀྱང་ཉེས་པ་མེད། །བསླབ་གསུམ་ཐབས་དང་ཤེས་རབ་ནི། །ནམ་ཡང་འབྲལ་བར་མི་བྱའོ། །མཆོད་རྟེན་ཡིན་པས་གུས་པར་བྱ། །བརྡ་ཆོས་ཡིན་པས་ཉམས་སུ་བླང་། །འདི་འཆང་ཡོན་ཏན་བསྟན་པ་འཛིན། །མི་ཁོམ་བརྒྱད་སྤངས་སྐམ་པར་གནས། །ཞེས་སོ། །

མཁར་གསིལ་གྱི་དགོས་པ་ནི། དགེ་སློང་བསོད་སྙོམས་ཀྱི་ཚེ་ཁྱི་སོགས་སྐྲོག་བྱེད་དང་། ཡོན་བདག་གི་སྒོ་དྲུང་དུ་བརྡ་གཏོང་བྱེད་ཡིན།

རྡུང་ཚུལ་ནི། དྲིས་ལན་ནོར་ཕྲེང་ལས། མ་ཐེམ་ལ་ནི་ལན་གསུམ་དུ། །དུས་གསུམ་ལན་གསུམ་རྡུང་བར་བྱ། །ཞེས་དང་། ཁྱིམ་བདག་རྣམས་ལ་སི་ལི་ལི། །སྒྲ་དང་ལྡན་པ་བསྒྲག་པར་བྱ། །ཞེས་པ་ལྟར་རོ། །མཁར་གསིལ་འདི་འདུལ་བ་མ་ཟད་སྔགས་ལས་ཀྱང་འཆང་བར་བྱེད་དེ། རྒྱུ་མ་བདེ་མཆོག་ལས། དེ་བཞིན་དུ་ནི་མཁར་གསིལ་དང་། །དམ་པའི་ཆོས་ཀྱི་ལྒིགས་བམ་དག། མཚན་མའི་ཕྱག་རྒྱ་ཚོགས་ཡིན་ནོ། །ཞེས་སོ། །

མཁར་གསིལ་གྱི་མཚོན་དོན་ནི། མདུད་པ་གཅིག་ཡོད་པས་ངན་སོང་གི་སྒོ་གཅོད་པ། དུམ་བུ་གསུམ་གྱིས་བསླབ་པ་གསུམ། བར་གསོམ་ཤིང་བྱས་པས། སེམས་རྒྱུད་དྲང་ཞིང་འཇམ་དགོས་པའི་རྟགས། རྟིང་བའི་རྒྱ་མདུད་ཀྱིས་ངན་སོང་གི་སྒོ་འགེགས་པ། སྨད་ལ་བདུན་ཟུར་ཡོད་པས། བྱང་ཆུབ་ཡན་ལག་བདུན། སྟོད་ལ་བརྒྱད་ཟུར་ཡོད་པས། འཕགས་ལམ་ཡན་ལག་བརྒྱད། རྭ་བཞིས་བདེན་པ་བཞི། རྭ་རེར་ཨ་ལོང་གསུམ་གསུམ་སྟེ་བཅུ་གཉིས་ཡོད་པས། གསུང་རབ་ཡན་ལག་བཅུ་གཉིས། མཆོད་རྟེན་གཉིས་ཀྱིས་སྐུ་གཉིས། འཁོར་ལོ་གསུམ་གྱིས་སྡེ་སྣོད་གསུམ། སྟོད་སྦུབས་སྟོང་བས་ཆོས་ཀྱི་བདག་མེད། སྨད་སྦུབས་སྟོང་བས་གང་ཟག་གི་བདག་མེད། སྟོད་སྨད་ཟུང་དུ་སྦྲེལ་བས་ཐབས་ཤེས་གཉིས། བར་གྱི་ལྕགས་ཀྱུས་གདུལ་བྱ་ཐར་བར་འདྲེན་པའི་འཕྲིན་ལས་མཚོན་ནོ། །ཞིབ་པར་རྒྱལ་དབང་བཅུ་གསུམ་པའི་བསྟན་པའི་ནང་མཛོད་དང་། འདུལ་བ་ལུང་སྡེ་བཞི་སོགས་ན། དཔེ་རིས་དང་བཅས་པ་བཞུགས་པས་དེར་གསལ་ལོ། །

བོན་གྱི་མཁར་གསིལ་ནི། ཡུ་བ་རིང་ཞིང་འཁར་རྒྱུག་གི་རྣམ་པ་ཅན་ཞིག་ཡོད་པ་དེ། གྲྭ་བ་རྣམས་འདུལ་ཁྲིམས་ཞུ་སྐབས། འདུལ་ཁྲིམས་གནང་མཁན་གྱི་བླ་མའི་ཕྱག་ཏུ་བསྣམས་པར་བཤད་ལ། འོན་ཀྱང་ད་ལྟ་རང་ཅག་གི་ཞལ་ངོ་རྣམས་ཀྱིས་ཁྲིམས་དབྱུག་﹙ཨ་མདོའི་སྐད་དུ་བཀྱིག་པ་ཟེར།﹚འཛིན་པའི་ཕྱག་ལེན་དེ་ཡང་འདི་ལས་མཆེད་པར་སེམས།

༣ ལྷུང་བཟེད།

ལྷུང་བཟེད་ནི་ཤཱཀྱའི་རབ་བྱུང་རྣམས་གྱིས་བསོད་སྙོམས་སློང་བའི་སྣོད་ཅིག་ཡིན་ལ། དེ་ཡང་སྦྱིན་བདག་རྣམས་ཀྱིས་ཟས་འདིའི་ནང་ལྷུང་བ་བཟེད་པས་ན་ལྷུང་བཟེད་དམ་སློང་ཕོར་ཡང་ཟེར། མཚོན་དོན་ནི། འདི་ཟས་ཀྱིས་འགེངས་པ་བཞིན་དུ་རང་གི་ཤེས་རྒྱུད་ཡོན་ཏན་གྱིས་བཀང་བ། ནང་དུ་ཟས་ལ་ལོངས་སྤྱོད་པ་བཞིན་དུ་ཆོས་ལ་ལོངས་སྤྱོད་པ། མཐའ་གཉིས་སྤོང་བའི་བསོད་སྙོམས་སྤྱོད་པའི་སྣོད་དུ་སྟོན་པས་གནང་བ་ཡིན་པས། དུས་རྒྱུན་དུ་ལྷུང་བཟེད་འདི་སྤྱོད་དོ། །

འདི་ལ་རུང་བ་ལྔ་དང་ཆུང་འབྲིང་ཆེ་གསུམ་གྱི་ཚད་དང་ལྡན་པ་ཞིག་དགོས། རུང་བ་ལྔ་ནི། རྒྱུའི་རུང་བ་ས་རྡོ་ལྕགས་གསུམ་ལས་བྱས་པ། ཁ་དོག་གི་རུང་བ་བྱ་རོག་གི་མིག་ལྟར་ནག་པ། དབྱིབས་ཀྱི་རུང་བ་སྒོ་ང་ཕྱེད་བཅད་ལྟར་ཟླུམ་པ། ངོ་བོའི་རུང་བ་ལྷན་པ་ལྔ་ཡན་ཆད་མ་ཕོག་ཅིང་ལོངས་སྤྱད་རུང་བའོ། །

ལྷུང་བཟེད་ཀྱི་ཚད་ནི། ཆེ་ཚད་རྒྱ་གར་མ་ག་དྷའི་བྲེ་གང་གི་ཚད་ཀྱི་འབྲས་རླངས་བཙོས་བྱས་པ་འཕེལ་བའི་ཕུལ་བཅུ་གསུམ། དེའི་སྟེང་སྔོ་ཚོད་ཕུལ་བཞི། སྟོང་བ་ཕུལ་གང་བཅས་ཕུལ་བཅོ་བརྒྱད་ཤོང་བ་ཞིག་དང་། ཆུང་ཚད་ནི་འབྲས་བྲེ་གང་བཙོས་ནས་འཕེལ་བའི་ཕུལ་དྲུག དེའི་སྟེང་དུ་སྔོ་ཚོད་ཕུལ་དོ། སྟོང་བ་ཕུལ་གང་སྟེ་ཕུལ་དགུ་ཤོང་བ་ཞིག་ཡོད་ཅིང་། དེ་གཉིས་ཀྱི་བར་ནི་འབྲིང་ཚད་ཡིན་ལ། དགེ་སློང་ཕའི་ལྷུང་བཟེད་ཆུང་ཚད་དེ། དགེ་སློང་མའི་ལྷུང་བཟེད་ཆེ་ཚད་དོ། །ཞིབ་ཏུ་ཞང་ཞུང་ཆོས་དབང་གྲགས་པའི་ལྷུང་བཟེད་ཀྱི་ཚད་བརྗོད་པ་སོགས་སུ་གཟིགས་པར་ཞུ། གཞན་ཡང་། གྲུབ་ཆེན་ཐང་སྟོང་རྒྱལ་བོས། དབུས་སུ་མུ་གེ་འགོག་ཆེད། ལྷ་སའི་ཇོ་མདུན་དུ་གསེར་སྲང་བརྒྱ་དང་ཉེར་བདུན་གྱིས་ལྷུང་བཟེད་ཆེན་པོ་ཞིག་བཞེངས་ཚུལ་ཁོང་གི་རྣམ་ཐར་ལས་གསལ་བ་དང་། ཡང་བལ་བཟའ་ཁྲི་བཙུན་སྲོང་བཙན་གྱི་བཙུན་མོར་མངའ་གསོལ་སྐབས། བཙུན་མོའི་ནོར་སྐལ་དུ་བཻཌཱུ་རྱའི་ལྷུང་བཟེད་ཞིག་གནང་བ་གཙུག་ལག་ཁང་གི་སྒོ་འགྲམ་དུ་ཡོད་པའི་གནོད་སྦྱིན་ཁང་བར་གཏེར་དུ་སྦས་པར་ཡིག་ཚང་མང་བོར་གསལ་བ་དང་།

ཡང་ལྷུང་བཟེད་ཀྱི་དབྱེ་བ་ལ་ཚད་ཀྱི་སྒོ་ནས་གསུམ། རྟེན་གྱི་སྒོ་ནས་ཕ་མའི་གསུམ་གསུམ་སྟེ་དྲུག རྒྱུའི་སྒོ་ནས་དྲུག་པོ་རེ་རེ་ལ་ས་དང་ལྕགས་ལས་བྱས་པ་གཉིས་གཉིས་ཏེ་བཅུ་གཉིས་ཡོད་དོ། །

ལྷུང་བཟེད་འདི་གསང་སྔགས་རིག་པ་འཛིན་པའི་དགེ་སློང་གི་རྟེན་ཅན་གྱིས་ཀྱང་འཆང་བར་བཤད་དེ། དཔུང་བཟང་ལས། ཀུ་བའམ་ལྕགས་སམ་འཇིམ་པ་ལས་བྱས་པའི། །དབྱིབས་ནི་ལེགས་ཤིང་མི་རྩུབ་འཇམ་པ་དང་། །མ་ཆག་ཟླུམ་ཞིང་མ་གས་རྨ་མེད་པ། །ཡིད་དུ་འོང་བའི་ལྷུང་བཟེད་བཅང་བར་བྱ། །ཞེས་གསུངས་སོ། །

འདུལ་བ་ལས། ལྷུང་བཟེད་དུ་སྤྱད་པའི་སྡེ་ཚན་ལ། གཞན་གྱི་ལྷུང་བཟེད་ལ་དཔྱས་གདགས་པའི་ཕྱིར་བལྟ་བ། ལག་ཟས་ཀྱི་སྦགས་བཞིན་ཆུ་སྣོད་བཟུང་བ། གཞན་ལ་ཟས་དང་སྦགས་པའི་ཆུས་གཏོར་བ། ཁྱིམ་དུ་མ་དྲིས་པར་ཟས་དང་སྦགས་པའི་ཆུ་དབོ་བ། ལྷུང་བཟེད་དུ་ཟས་ཟོས་པའི་སྙིགས་མ་དོར་བ། འོག་གཞི་མེད་པ་དང་། ངམ་གྲོག་གི་ཁ་དང་། གཡང་ས་དང་། དཀན་གཟར་བོར་ལྷུང་བཟེད་བཞག་པ། འགྲེང་བཞིན་ལྷུང་བཟེད་བཀྲུ་བ། གད་ཁ་དང་། གཡང་ས་དང་། དཀན་གཟར་བོར་ལྷུང་བཟེད་བཀྲུ་བ། འབབ་ཆུའི་རྒྱུན་ལས་བཟློག་སྟེ་ལྷུང་བཟེད་ཀྱིས་ཆུས་བཅུ་བ་སྟེ་བཅུ་བཞི་གསུངས་སོ། །

ལྷུང་བཟེད་བཅངས་པའི་ཕན་ཡོན་ནི། སྟོན་པའི་བཅས་པ་དང་མི་འགལ་བ། སྣོད་དམན་པ་ལས་ཁྱད་དུ་འཕགས་པ། དགེ་སློང་གི་དྲན་པ་གསོ་བ། མཐར་མངོན་མཐོ་དང་ངེས་ལེགས་འཐོབ་པའོ། །

༤ རྔ་ཡབ།

རྔ་ཡབ་ནི་མདོ་སྔགས་གཉིས་ཀ་ལས་འབྱུང་ལ། བདེན་བཞི་སྔགས་ཀྱི་ཆ་ལས། གྲོག་མ་ལ་སོགས་བསལ་བའི་ཕྱིར། །རྔ་མའི་ཆུན་པོ་བསྔགས་པ་ཡིན། །ཞེས་དང་། ཟླ་གསང་ཐིག་ལེ་ལས། རིག་མ་སྟོང་གིས་མངོན་པར་མཆོད་བྱེད་ཅིང་། །རིག་འཛིན་མོ་སྙན་བུད་མེད་རྣམས་ཀྱིས་ནི། །གཡག་རྔ་དཀར་བོའི་ཚོགས་ཀྱིས་གཡོབ་བྱེད་པའི། །འཇིག་རྟེན་དབང་བོ་བདེ་མཆོག་འབྲེལ་བ་འཐོབ། །ཅེས་དང་། གཤེད་དམར་ལས། སྣ་ཚོགས་རིན་ཆེན་རང་བཞིན་བརྒྱན། །རྔ་ཡབ་དཀར་བོས་བརྒྱན་པ་ཡི། །ལག་པ་དག་ནི་རྡོ་དྲིལ་ཡང་། །ཞེས་པ་སྟེ། རྔ་ཡབ་འདི་དཀྱིལ་འཁོར་དང་ཕོ་བྲང་གི་རྒྱན་མཆོག་ཏུ་མཛེས་པར་མ་ཟད། རྡོ་རྗེ་སློབ་དཔོན་ལ་ཁྲི་འབུལ་དང་། དབང་བསྐུར་སོགས་ལའང་དགོས་ལ། རྣལ་འབྱོར་བའི་གྲོག་མ་སོགས་བསལ་ཆེད་དུ་འང་འཆང་བའོ། །ཡང་། གནས་བཅུའི་ཕྱག་མཆོད་ལས། གནས་བརྟན་ཡན་ལག་འབྱུང་། ནགས་ན་གནས། རྡོ་རྗེ་མོའི་བུ། དགེ་བསྙེན་དྷ་རྨ་ཏ་ལ་སོགས་ཀྱི་ཕྱག་ཏུ་འང་རྔ་ཡབ་འཆང་བར་བཤད་དོ། །

༥ ཆུ་ཚགས།

ཆུ་ཚགས་ནི། རབ་བྱུང་བས་ཆུ་ལ་ལོངས་སྤྱོད་ཚེ། སྲོག་ཆགས་ཕྲ་མོ་དང་། ཆུ་སྙིགས་འཚག་བྱེད་ཀྱི་ཡོ་བྱད་ཅིག་ཡིན། དེ་ཡང་སངས་རྒྱས་ཀྱི་བསྟན་པ་སྙིང་རྗེ་རབ་ཏུ་ཕྱེས་པ་ཡིན་པས། སོ་སོར་ཐར་བའི་སྡོམ་པ་གཞན་གནོད་གཞི་དང་བཅས་པ་ལས་ལྡོག་པ་ཡིན་པས། ཆུ་འདི་འབྲལ་མེད་དུ་བསྟེན་དགོས་པར་དགོངས་ནས་སེམས་ཅན་ལ་གནོད་འགོག་ཆེད། སྟོན་པས་ཆུ་ཚགས་འདི་གནང་བ་ཡིན། དེ་ལ་མི་འདྲ་བ་ལྔ་ཡོད་དེ། མེ་ཏོག་ཕྲེང་རྒྱུད་ལས། རིལ་ཚགས་ཞེས་བྱའི་རྣམ་པ་དང་། །དེ་བཞིན་གྲོལ་བར་བྱེད་པའི་རས། །གྲུ་གསུམ་པ་དང་ཞབས་ཚགས་ཏེ། །བུམ་ཚགས་གཅེའུ་ཅན་དང་ལྔ། །ཞེས་པ་ལྟར། མདོ་རྩ་ལས། བུམ་ཚགས་གཅེའུ་ཅན་ནི། ཚེགས་ཆུང་ངོ་། །དེ་བཅིངས་པར་བྱའོ། །ས་དང་ཟངས་མ་ལས་བྱས་པའོ། །དེ་ནི་བུམ་པའི་དབྱིབས་ཅན་ནང་པདྨའི་བུ་གུ་ལྟ་བུ་དང་ལྡན་པའི་སྦུབས་ཅན་ཡིན་ནོ། །ཞེས་སོ། །ཆུ་ཚགས་གྲུ་གསུམ་ནི། མདོ་རྩ་ལས། ཆུ་ཚགས་ཉེ་བར་བཞག་པར་བྱའོ། །ཆུ་ཚགས་གྲུ་གསུམ་མམ། ཞེས་པ་ཙམ་ལས་མི་གསལ་མོད། ཤིང་བུ་གསུམ། གྲུ་གསུམ་དུ་བཟོས་པའི་ནང་ངོས་སུ་རས་སྲབ་མོ་སྦྱར་བ་ཞིག་གོ །

དཔྱང་ཚགས་ནི། མདོ་རྩ་ལས། དཔྱང་ཚགས་བཅིངས་པར་བྱའོ་ཙམ་འབྱུང་ལ། དོན་དུ་ལྕགས་སྒོར་སོགས་ཀྱི་ནང་ངོས་སུ་རས་སྲབ་མོའི་ཁུག་མ་སྦྱར་བ་ཐུར་དུ་འཕྱང་བ་ལ། ཁ་ཟུར་དུ་ཡུ་བ་ཡོད་པ་ཞིག་གོ། རིལ་བ་ཞབས་ཚགས་ཅན་ནི། འོད་ལྡན་ལས། རིལ་བ་ཞབས་ཚགས་ཅན་ནི། རིལ་བའི་ཞབས་སུ་ཚགས་བྱས་པ་ཞིག་གོ །བསལ་ཚགས་ནི། ཆུ་སྣོད་ཀྱི་ཁར་འགེབ་བྱེད་རས་དུམ་བུ་གྲུ་བཞི་བ་ཞིག་སྟེ། སློབ་ཕན་ལས། གྲོལ་བར་བྱེད་པའི་རས་ཞེས་བྱ་བ་ནི། རས་ཀྱི་དུམ་བུ་ཟུར་བཞི་བ་དེའི་ལྷག་པའི་ཚིག་གོ་གསུངས་སོ། །ཆུ་ཚགས་འདི་དགེ་ཚུལ་སློང་ལ་མེད་མི་རུང་གི་ཡོ་བྱད་ཞིག་དང་། སྔགས་ལས་ཀྱང་ཆུ་ཚགས་འཆང་དགོས་པར་གསུངས་ཏེ། གདན་བཞི་ལས། ལྷུང་བཟེད་མཆན་ཁུང་ཆུ་ཚགས་བཅས། །གསུངས་སོ། །

༦ རིལ་བ་སྤྱི་བླུགས།

མདོ་རྩ་ལས། རིལ་བ་སྤྱི་བླུགས་བཞག་པར་བྱའོ། །ཞེས་པ་དེ་ཡིན་ལ། དེ་ནི་དགེ་ཚུལ་སློང་གི་ཁ་བཤལ་ལ། ཆུ་འཇོག་པའི་སྣོད་ཆུང་བུམ་པ་དང་འདྲ་བ། སྐེད་དང་མཆུ་ལ་འགག་ཡོད་ལ། མགོ་མཇུག་ལྡོག་ན་ཆུ་འོང་བའི་བུ་ག་ཡོད། དེང་སང་གི་ཆབ་རིལ་ཡང་དེ་འདྲའི་དོད་ཙམ་ཡིན། གྲྭ་ས་སོགས་ན་གུང་ཚིགས་སོགས་བཞེས་པའི་རྗེས་སོར་ཆབ་འགྲེམས་ཀྱི་ཕྱག་ཆ་དེའོ། །

༧ བསིལ་ཡབ།

བསིལ་ཡབ་འདི། རྒྱ་གར་གྱི་ཡུལ་ཆོས་ལྟར། ཚ་བ་ཧ་ཅང་ཆེ་དུས་སུ་དགེ་ཚུལ་སློང་ལ་བསིལ་སློང་བྱེད་ཀྱི་ཡོ་བྱད་དེ། མདོ་རྩ་ལས། ཚ་བར་ནི་བསིལ་ཡབ་སྦྱར་རོ། །བསིལ་ཡབ་བཅིང་བར་བྱའོ། །བསིལ་ཡབ་མཁན་གྱིས་བྱས་པའམ། ཏ་ལའི་ཆང་བུའོ། །ཞེས་དང་། མེ་ཏོག་ཕྲེང་རྒྱུད་ལས། འོད་མ་ཏ་ལའི་ལོ་མ་ཡི། །བསིལ་ཡབ་ཀྱང་ནི་རྣམ་པ་གཉིས། །ཞེས་གསུངས་སོ། །ཁ་དོག་ཁྲ་བོའི་བསིལ་ཡབ་དགེ་ཚུལ་སློང་གིས་འཆང་མི་རུང་བར་མདོ་རྩ་ལས་བཤད་དོ། །

༨ ཚུལ་ཤིང་།

ཚུལ་ཤིང་གི་ཁུངས་ནི། མདོ་རྩ་ལས། དྲི་དག་གིས་བསྐུས་པའི་ཚུལ་ཤིང་གཟེབ་ཀྱི་སྐྲོག་མར་རས་དཀར་བོ་བཏིང་བས་དཀྲིས་པ་དག་རྒན་རིམ་སུ་བཞག་ནས། ཞེས་དང་། ཆོས་ཀྱི་ཚུལ་ཤིང་དག་ནི་ཡ་ཡོ་མེད་པ་དང་། ཁྱར་འཁྱོར་མེད་པ་དང་། ཅས་ཅུས་མེད་པ་དང་། ཁ་དོག་བཟང་བ་དང་། དྲི་ཞིམ་པ་དང་། རེག་པ་འཇམ་པ་ཉིད་དག་ཡིན། ཞེས་གསུངས་ལ། རྒྱུ་ཙན་དན་དང་ཨ་ཀར་སོགས་དྲི་བཟང་ཅན་གྱི་ཤིང་ཐུར་ཕྲ་མོ་ཁྲུ་གང་བ་ཙམ་པ་དེའོ། །

དགོས་པ་ནི། དགེ་འདུན་པའི་གྲངས་འཇལ་བྱེད་དུ་འགྲེམས་པ་ཞིག་སྟེ། དབྱར་ཁས་ལེན་དང་། རྙེད་པ་བགོ་བ་སོགས་དར་སྐུད་ཀྱིས་དཀྲིས་ཏེ། གཟེབ་ཀྱི་སྐྲོག་མར་རས་དཀར་བཏིང་ཏེ་བཀྲམས་པ་དེའོ། །

༩ སྐྱེས་བུ།

སྐྱེས་བུ་ནི་རབ་བྱུང་ངམ་བསྙེན་རྫོགས་ཀྱི་ཚེ་སྡོམ་པ་འཐོབ་པའི་དུས་སྟོན་པའམ། སྔ་ཕྱིའི་དུས་ཚོད་འབྱེད་པའི་ཤིང་བུ་སོར་བཞི་བ་ཞིག་སྟེ། མདོ་རྩ་ལས། དེ་མ་ཐག་ཏུ་གྲིབ་ཚོད་རིག་པར་བྱའོ། །དེ་ནི་ཐུར་མ་སོར་བཞི་བ་བཟང་ངོ་། །དེ་ནི་སྐྱེས་བུ་ཉིད་ཅེས་ཐ་སྙད་དུ་བྱའོ། །ཞེས་པ་ལྟར། དེ་ནི་ཤིང་སོར་བཞི་གྲུ་བཞིར་གཞོག་སྟེ་སོར་རེ་རེའི་མཚམས་ནས་བང་རིམ་དོད་པ་ཞིག་ཡིན་ཞིང་། ཤིང་བུ་དེའི་གྲིབ་མ་ཇི་ཙམ་ཡོད་པའི་ཚད་ལ། ཤིང་བུ་རང་གིས་གཞལ་ཏེ། སོར་བཞི་བ་རང་གི་ཚད་ལ་སྐྱེས་བུ་གཅིག་དང་། དེའི་སྟེང་དུ་གྲིབ་མ་ལ་སོར་གཅིག་གཉིས་སོགས་ལྷག་ཡོད་ན། སྐྱེས་བུ་གཅིག་དང་རྐང་བ་གཅིག་གཉིས་སོགས་གཞལ་ཏེ། སྔ་ཕྱིའི་དུས་ཚོད་ངོས་འཛིན་བྱེད་ཀྱི་ཤིང་ཐུར་ཞིག་གོ །

གསུམ་པ། གཞི་གསུམ་ཕྱག་ལེན།
༡ གསོ་སྦྱོང་།

སྤྱིར་འདུལ་བའི་སྡེ་སྣོད་ཀྱི་བརྗོད་བྱ་མཐའ་དག་གཞི་བཅུ་བདུན་དུ་འདུ་ལ། དེ་དག་ལས་སྐབས་སུ་བབ་པ་གསོ་སྦྱོང་། དབྱར་གནས། དགག་དབྱེ་སྟེ་གསུམ་ལ་གཞི་གསུམ་ཞེས་བརྗོད། དེ་ཡང་གསོ་སྦྱོང་གི་སྒྲ་བཤད་ནི། དགེ་བ་མཐའ་དག་གསོ་ཞིང་། སྡིག་པ་མཐའ་དག་སྦྱོང་བ་དང་། ཁྱད་པར་དུ་བསླབ་པ་གསུམ་གསོ་ཞིང་། དེའི་མི་མཐུན་ཕྱོགས་རྣམས་སྦྱོང་བས་སོ། །དེ་ཡང་ལྒིང་གཞི་ནི། སྟོན་པ་འོད་མའི་ཚལ་ཀ་ལན་ཀ་ཏར་བཞུགས་དུས། རྒྱལ་བོའི་ཁབ་ཀྱི་དགེ་བསྙེན་མང་བོ། སངས་རྒྱས་ལ་ལྟ་བ་དང་བསྙེན་བཀུར་བྱ་ཕྱིར་ལྷགས་ཚེ། སྟོན་པ་དང་དགེ་སློང་དག་ཡང་དག་པར་འཇོག་པར་མཛད་པས། རེ་ཞིག་མུ་སྟེགས་ཀྱི་ཀུན་དགའ་ར་བར་ལྷགས་ཚེ། དེ་དག་གིས། འདུག་པ་དང་། བྱ་བ་དང་། གསོ་སྦྱོང་ནི་ངེད་ཅག་འབའ་ཞིག་ལ་ཡོད་ཀྱི། ཤཱཀྱའི་དགེ་སྦྱོང་དག་ལ་མེད་དོ་ཞེས་བརྗོད་པ་ཇི་ལྟ་བ་བཞིན། དགེ་བསྙེན་དག་སྟོན་པ་ལ་གསོལ་བས། སྟོན་པས་ཀྱང་གནང་སྟེ། གསོ་སྦྱོང་གང་ཞེ་ན། དགེ་སློང་དག་ངས་སོ་སོར་ཐར་བའི་མདོ་འདོན་པ་གང་ཡིན་པ་སྟེ། དེ་ཁྱོད་ཀྱིས་དེང་ཕྱིན་ཆད་ཟླ་བ་ཕྱེད་ཕྱེད་ཅིང་འདོན་པར་བྱའོ། །ཞེས་གསོ་སྦྱོང་གི་བཅས་པ་མཛད་དོ། །དེ་ཡང་དང་བོ་ཕྱག་འཚལ་བའི་རྒྱུད། བར་དུ་མདོ་འདོན་པའི་རྒྱུད། ཐ་མར་བསྔོ་བའི་རྒྱུད་གསུམ་གོ་རིམ་ཡོད་ལ། གསོ་སྦྱོང་ལ་དབྱེ་ན། བཅུ་བཞི་བའི་གསོ་སྦྱོང་། བཅོ་ལྔ་བའི་གསོ་སྦྱོང་། གནོད་པ་ཞི་བའི་གསོ་སྦྱོང་། མཐུན་པའི་གསོ་སྦྱོང་། བཀྲ་ཤིས་པའི་གསོ་སྦྱོང་། ཞི་གནས་ཀྱི་གསོ་སྦྱོང་སྟེ་དྲུག་དང་། ཡང་ན། དུས་འབྲེལ་གསོ་སྦྱོང་། བཀྲ་ཤིས་གསོ་སྦྱོང་། གནོད་བཟློག་གསོ་སྦྱོང་། དབྱེན་བཟླུམས་གསོ་སྦྱོང་སྟེ་བཞིའོ། །

༢ དབྱར་གནས།

༡ དབྱར་གནས་ཀྱི་སྒྲ་བཤད་ནི། དབྱར་གྱི་དུས་སུ་འགྲོ་འདུག་མང་བོ་བྱེད་པ་སྤངས་ཏེ། གཞི་གཅིག་ཏུ་གནས་པའི་ཆོ་གའི་སྒོ་ནས་ཁས་བླངས་པར་བྱས་པའོ། །དབྱར་གནས་ཀྱི་ལྒིང་གཞི་ནི། སྟོན་པ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ། དགེ་སློང་དག་མི་སྦེད་ཅིང་མ་བསྲུངས་པར་དབྱར་གྱི་ནང་ལོགས་སུ་ལྗོངས་རྒྱུ་བ་ན། མུ་སྟེགས་དག འདི་དག་ནི་ལྗོངས་རྒྱུ་ཞིང་དོང་བས། སྲོག་ཆགས་ཕྲ་མོ་དང་། ཤིན་ཏུ་ཕྲ་མོ་མང་བོའི་ཚོགས་བརྫིས་ཏེ་སྲོག་དང་བྲལ་བར་བྱེད་དོ། །རེ་ཞིག་བྱེའུ་ཁུག་རྟ་ཡང་དབྱར་ཟླ་བཞི་ལ་རང་གི་ཚང་མལ་དུ་ཞུམ་ཞུམ་པོར་ཀུམ་ནས་འདུག་ན། དགེ་སྦྱོང་མགོ་རེགས་འདི་དག་དབྱར་ཁས་ལེན་ཙམ་ཡང་མི་ཤེས་ན། འདི་དག་ལ་བསོད་སྙོམས་དང་བཀུར་སྟི་བྱེད་པ་ག་ལ་ཡོད། ཅེས་འཕྱས་གདགས་པ་ན། དགེ་སློང་དག སྟོན་པར་གསོལ་བས། དབྱར་གནས་པར་བཅས་པ་མཛད་དོ། །འོ་ན། དབྱར་ཁས་ལེན་གྱི་གནས་ཇི་འདྲ་ཞིག་དགོས་ཞེ་ན། ཟས་གོས་སོགས་མཐུན་རྐྱེན་འཛོམས་པ། ཆོམ་རྐུན་སོགས་ཀྱིས་འཇིགས་པ་དང་། འཐབ་ཀྲོལ་ཅན་མ་ཡིན་པ། ཁང་སྟེང་གཡོགས་ཤིང་། སོ་ཐར་གྱི་མདོ་ངག་ནས་ཐོན་པ། གནས་ཀྱི་བླ་མར་རུང་བའི་དགེ་སློང་གནས་པ། སྐྱེ་བོ་མང་བོའི་རྒྱུན་ལམ་མིན་པ། མཚམས་ནང་གཞན་མིན་པ་སོགས་སོ། །

༢ དབྱར་གནས་ཀྱི་སྔོན་དུ་གནས་ཁང་དང་གླིང་བར་བྱི་དོར་བྱ་བ། སྟོན་པའི་སྐུ་བརྙན་གྱི་སྤྱན་སྔར་མཆོད་པ་བཤམས་པ། ཚུལ་ཤིང་། གདིང་བ། སྒོ་ལྕགས་ལྡེ་མིག་ཁ་སྤྲད་པ་སོགས་ཚགས་སུ་ཆུད་པར་བྱས། དགོན་འདབས་སུ་ནག་འགྲུལ་འགོག་ཆེད་ནག་ཐོ་བསླངས། ཚུལ་ཤིང་འགྲེམས་པ་ནི་དབྱར་ཁས་ལེན་གྱི་གྲངས་ཀ་ཤེས་ཆེད་ཡིན། དེ་ཡང་དབྱར་བདག་གིས་ཚུལ་ཤིང་བཀྲམས་པ་དང་། སྒོ་ལྕགས་གདིང་བ་བསྟབས་པ་སོགས་ཆོ་ག་གཞུང་བཞིན་འདོན་ནོ། །ཚེས་བཅུ་དྲུག་ཉིན་སྐྱ་རེངས་འཆར་ཁའི་དུས་སུ་གཎྜི་དང་འཁར་རྔ་སོགས་ཀྱིས་ཚོགས་བརྡ་བཏང་སྟེ། ཆོས་གོས་རྣམ་གསུམ་གསོལ་ནས་གནས་བཅུ་སོགས་གསུངས་ཏེ། དབྱར་གནས་ལ་བཞུགས་ཚུལ་ཆོ་ག་ལྟར་བྱའོ། །གཞན་འདུལ་གཞུང་དག་ལས་དབྱར་ཟླ་བ་གསུམ་ཞེས་གསུངས་པ་དེ་ཡང་། རྗེ་འཇིགས་མེད་རིགས་པའི་བློ་གྲོས་ཀྱི་གཞི་གསུམ་ཕྱག་ལེན་ལས། ཆོ་ག་ནང་ཟླ་བ་གསུམ་གནས་པར་ཁས་ལེན་པ་ལྟར། ཡིད་ཀྱིས་ཀྱང་བསམ་པ་ཐག་པ་ནས་ཟླ་བ་གསུམ་གནས་པར་བསམ་དགོས། རང་རེའི་བོད་དུ་ཚ་བའི་དུས་ཐུང་བའི་རྐྱེན་ཡིན་ནམ་ཟླ་བ་ཕྱེད་དང་གཉིས་ཀྱིས་མཚམས་གློ་བུར་དགག་དབྱེ་བྱེད་པ་འདིའི་ཁུངས་གར་ཡོད་རྩར་གཅོད་དགོས་གསུངས། ཐོག་མཐའི་བདུན་མཚམས་གཉིས་ལས་གཞན་གྱི་སྐབས་ཆོས་ལྡན་གྱི་བྱ་བ་ཡིན་ན་ཞག་དྲུག་ཚུན་ཚད་ཀྱི་བྱིན་རླབས་ཞུས་ཆོག་གོ། དབྱར་གྱི་ནང་སེར་བ་སོགས་བྱུང་ན། དབྱར་བདག་གིས་གཎྜི་ཚོད་མེད་དུ་བརྡུང་། དབྱར་བདག་པར་བྱིན་རླབས་ཞུས་ནས་རྒྱང་གྲགས་ཕན་ཆད་དུ་འགྲོ་མི་ཆོག་ལ། དབྱར་ཆོས་ཀྱི་འདོན་རིམ་དང་མཆོད་འབུལ་སོགས་རང་རང་གི་མཐོང་བརྒྱུད་ཕྱག་ལེན་ལྟར་བྱའོ། །

༣ དེ་ལྟར་དབྱར་གནས་པའི་དགོས་པ་གང་ཡིན་ཞེ་ན། དགོས་པ་དགུ་གསུངས་ཏེ། ༡ དབྱར་ཁས་མ་བླངས་པའི་ཉེས་པ་ཁེགས་པ། ༢ སྲོག་ཆགས་ལ་གནོད་པ་སྤངས་པ། ༣ གཞན་གྱིས་འཕྱ་བ་སྤངས་པ། ༤ ལུས་སྲོག་ལ་གནོད་པ་སྤངས་པ། ༥ དོན་དང་བྱ་བ་ཉུང་བ། ༦ དགག་དབྱེ་འབྱུང་བ། ༧ སྲ་བརྐྱང་དང་འདིང་བ་འབྱུང་བ། ༨ གནས་རལ་བ་དང་གྲུམ་པ་འཆོས་པ། ༩ ཐོས་བསམ་འཕེལ་བའོ། །

༤ བཅོམ་ལྡན་འདས་ཀྱིས་དབྱར་བཞུགས་གནང་བའི་གནས་ཀྱི་རིམ་པ་ནི། བྱེ་བྲག་ཏུ་བཤད་པ་བུ་སྟོན་ཆོས་འབྱུང་དུ་དྲངས་པ་ལས། ཆོས་འཁོར་གནས་དང་ཡངས་པ་ཅན། །ས་དཀར་ཅན་དང་ལྷ་ཡི་གནས། །བྱིས་པ་གསོད་དང་ཀོའུ་ཤམ་བྷ། །འབྲོག་དང་མཆོད་རྟེན་རི་དང་ནི། །འོད་མའི་གྲོང་དང་སྒྲར་བཅས་དང་། །སེར་སྐྱའི་གནས་ཀྱི་གྲོང་ཁྱེར་དུ། །དེ་རྣམས་སུ་ནི་ཐུབ་པ་ཡིས། །སྐྱེས་མཆོག་ལོ་རེ་ལོ་རེར་བཞུགས། །ཉི་ཤུ་རྩ་གསུམ་གཉན་ཡོད་དུ། །སྨན་གྱི་ནགས་སུ་ལོ་བཞི་སྟེ། །འབར་བའི་ཕུག་གི་གནས་སུ་གཉིས། །རྒྱལ་བོའི་ཁབ་ཀྱི་གྲོང་དུ་ལྔ། །དཀའ་བ་སྤྱད་པ་ལོ་དྲུག་སྟེ། །ཉི་ཤུ་རྩ་དགུ་ཁབ་གནས་སུ། །རྒྱལ་བ་དེ་ལྟར་བརྒྱད་ཅུ་ལ། །ཐུབ་མཆོག་དམ་པ་མྱ་ངན་འདས། །ཞེས་གསུངས་ལ། ཞིབ་པར་བསྐལ་བཟང་ཆོས་ཀྱི་རྒྱ་མཚོས་མཛད་པའི་སྟོན་པའི་རྣམ་ཐར་ཏུ་གསལ་ལོ། །

༣ དགག་དབྱེ།

༡ དགག་དབྱེའི་སྒྲ་བཤད་ནི། དབྱར་གྱི་ནང་དུ་ལྟུང་བ་ལྒིང་དྲན་དང་། ནན་ཏུར་བྱེད་པ། དབྱར་གྱི་རྙེད་པ་བགོ་བ། མཚམས་ཀྱི་ཕྱི་རོལ་ཏུ་སྡོད་པ་རྣམས་དགག་པ་ལས་འདིར་དེ་དག་བྱ་རུང་བར་བྱེད་པའོ། །དགག་དབྱེའི་ལྒིང་གཞི་ནི། སྟོན་པ་གཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་ཀྱི་ཀུན་རར་དབྱར་ཞལ་གྱིས་བཞེས་ཚེ། ཚེ་དང་ལྡན་པ་དག་ལྟ་སྤྱོད་འཚོ་བ་དང་། ཚུལ་ཁྲིམས་ཉམས་པའམ། ཆུ་རའི་བུམ་པའམ། ཁྲུས་བུམ་ལ་ཆུ་ལེན་པ་རྩོད་ཅན་དུ་གྱུར་ཚེ། གཅིག་ལ་གཅིག་མི་སྨྲ་བར་ཁ་རོག་གེར་འགྲོ་བ་སོགས། སྟོན་པ་ལ་ཞུས་པས། བཅོམ་ལྡན་འདས་ཀྱིས་སྐྱེས་བུ་གཏི་མུག་ཅན་དག་འདི་ལྟ་སྟེ། མི་སྨྲ་བ་ནི་མུ་སྟེགས་ཀྱི་རྒྱལ་མཚན་ནོ། །དེ་ལྟ་བས་ན། དགེ་སློང་གིས་མི་སྨྲ་བར་དམ་བཅའ་བར་མི་བྱའོ། །དགེ་སློང་གིས་མི་སྨྲ་བར་དམ་བཅས་ན་འགལ་ཚབས་ཅན་དུ་འགྱུར་རོ། །འོན་ཀྱང་། དབྱར་གནས་པར་དམ་བཅས་པའི་དགེ་སློང་གིས་དགེ་འདུན་ལ་མཐོང་བ་དང་ཐོས་པ་དང་དོགས་པའི་གནས་གསུམ་ཀྱིས་དགག་དབྱེ་བྱའོ། །ཞེས་དབྱར་གནས་ཀྱི་མཇུག་ཏུ་དགག་དབྱེ་བྱ་དགོས་པའི་བཅས་པ་མཛད་དོ། །

༢ དགག་དབྱེའི་དུས་ནི། བདུན་པའི་ཉེར་དགུ་འམ་གནམ་གང་ལ་བྱ་དགོས་ལ། སྔ་ཉིན་གླིང་ཡོངས་ལ་གད་བདར་དང་། རྩྭ་དུར་བ་སོགས་ལ་ཆངས་པ་རེ་འདང་ངེས་ཚགས་སུ་ཆུད་པར་བྱ། དབྱར་ཁས་ལེན་སྔ་ན་བསོད་ནམས་ཆེ་ཞིང་། དགག་དབྱེ་འཕྱི་ན་བསོད་ནམས་ཆེ་བར་གསུངས་ལ། དབྱར་གནས་གུང་ཚིགས་གྲོལ་རྗེས་སུ། གཎྜི་མཆོད་ནས། རྫས་ཀྱི་དགག་དབྱེའི་ཆེད་དབྱར་རྫས་བཟུང་ལ། དགེ་ཚུལ་སློང་ཆབས་ཅིག་གནས་བཅུ་དང་འདུལ་བ་རྒྱ་མཚོའི་སྙིང་བོ་གསུངས་ཏེ། ཐམས་ཅད་བཞེངས་ནས་ཕྱོགས་བཞིར་གཡས་བསྐོར་དུ་ཕྱག་བཞི་གསུམ་བཅུ་གཉིས་འཚལ་བ་འདི་ལ་ཕྱག་ཟིང་བོ་ཟེར་ལ། དེ་ནི་དབྱར་གནས་སྐབས་དགེ་འདུན་ཐུགས་འགལ་འདྲ་བྱུང་ཡོད་ན་དེ་བཤགས་ཆེད་ཡིན། དེ་ནས་དུར་བ་བཀྲམས་ཚུལ་དང་། འདོན་ཆ་ཕྱག་ལེན་ནི་ཆོ་ག་ལྟར་གྲུབ་རྗེས། བརྒྱད་པའི་ཚེས་གཅིག་ལ་ལྗོངས་རྒྱུར་ངེས་ཅན་དུ་འབྱོན་དགོས་པས། རང་རེའི་ཡུལ་ཕྱོགས་འདིར་ལྗོངས་རྒྱུའི་དོད་དུ་དབྱར་སྟོན་གྱི་བསྙེན་བཀུར་བྱེད་པའི་སྲོལ་དར་ཡོད་ལ། དེ་ཡང་གཎྜིའི་བརྡ་བཏང་སྟེ། ཆོས་གོས་རྣམ་གསུམ་གསོལ། གདིང་བ་ཕྲག་ལ་གཟར། གནས་བརྟན་གྱིས་མཁར་གསིལ་དང་ལྷུང་བཟེད་ཐོགས་ནས་དབུ་དྲངས་ཏེ། བསླབ་པའི་གོ་རིམ་ལྟར། ཚུལ་མཐུན་གྱིས་ཕེབས་ལ། ངལ་གསོའི་སྐབས་སུ་གནས་བརྟན་གྱིས་དབུ་སྐུལ་ཏེ། སངས་རྒྱས་གཙོ་ལ་སོགས་འདོན་རིམ་ལྟར་གསུངས་ནས་ཕེབས་པའི་ཕྱག་ལེན་ཡོད།

༣ དགག་དབྱེ་བྱས་པའི་དགོས་པ་ནི། ཞེ་སྡང་ལ་སོགས་པའི་ཉོན་མོངས་མངོན་གྱུར་བ་རྣམས་དགག་ཅིང། དགེ་བའི་བསམ་པ་མངོན་གྱུར་ཤུགས་དྲག་བསྐྱེད་པ་དང་། ལྟུང་བ་སྡེ་ལྔ་མཐའ་དག་ལེགས་པར་བརྟགས་ཏེ། བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམས། བྱིན་གྱིས་བརླབ་པ་ནི། རང་གི་མ་ཤེས་པའི་ལྟུང་བ་ཅི་བྱུང་བ་ཐམས་ཅད་དགེ་འདུན་རྣམས་ལ་ལྒིང་དྲན་བྱེད་པར་ཞུས་ཏེ། ལྟུང་བ་མཐོང་ཐོས་དོགས་གསུམ་ཅི་བྱུང་བ་ཐམས་ཅད་འཕྲལ་དུ་བཤགས་ཤིང་དག་པར་བྱས་པས་ན། ཚུལ་ཁྲིམས་རྣམ་པར་དག་པར་འགྱུར་བ་དང་། དགག་དབྱེ་བྱ་དགོས་པར་ཐུབ་པས་བཅས་པ་དེ་བསྲུང་ཞིང་། དེ་ལས་འདས་པའི་ཉེས་པ་མི་འབྱུང་བ་དང་། སྦྱིན་བདག་དད་པ་ཅན་གྱི་བསོད་ནམས་སྤེལ་བ་སོགས་དགོས་པ་ཁྱད་པར་ཅན་མང་བོ་ཡོད་པར་ཡོངས་འཛིན་ཡེ་ཤེས་རྒྱལ་མཚན་གྱིས་གསུངས་སོ། །ཞིབ་ཏུ་འདུལ་འཛིན་གྲགས་པ་རྒྱལ་མཚན་དང་། ཡོངས་འཛིན་ཡེ་ཤེས་རྒྱལ་མཚན། གུང་ཐང་བློ་གྲོས་རྒྱ་མཚོ། རྗེ་འཇིགས་མེད་རིགས་པའི་བློ་གྲོས་སོགས་ཀྱི་གཞི་གསུམ་གྱི་ཆོ་ག་ལ་བལྟ་དགོས་སོ། །

 

ལེའུ་བཞི་བ། ཆོས་སྲོལ་རིག་གནས།
གཉྫི་ར།

གཉྫིར་ཞེས་པ་ལེགས་སྦྱར་སྐད་དེ། བོད་སྐད་དུ་མཛོད་ལྡན་ཟེར་ཞིང་། གཙུག་ལག་ཁང་གི་ཡང་སྟེང་དུ་འཛུགས་སྲོལ་ཡོད་པ་དེ་ཡིན། དབྱིབས་ནི། དེ་ལ་རྒྱ་གར་ལུགས་ཀྱི་དྲིལ་གཟུགས་ཀྱི་གཉྫི་ར་དང་། རྒྱ་ནག་ལུགས་ཀྱི་བུམ་གཟུགས་ཀྱི་གཉྫི་ར་གཉིས་ཡོད། དྲིལ་གཟུགས་གཉྫི་ར་ནི་རྒྱས་པའི་ལུགས་ཏེ། འདི་ལ་རྒྱལ་བ་རིགས་ལྔའི་མཚོན་དོན་ཡོད། པདྨའི་གདན་གྱི་སྟེང་དུ་སངས་རྒྱས་རྣམ་སྣང་མཚོན་པའི་འཁོར་ལོ་ཉལ་སྟབས་སུ་ཡོད་པ། དེའི་སྟེང་དོན་ཡོན་གྲུབ་པ་མཚོན་པའི་དྲིལ་བུ། དེའི་སྟེང་འོད་དཔག་མེད་མཚོན་བྱེད་པདྨ་འདབ་བརྒྱད། དེའི་སྟེང་མི་བསྐྱོད་པ་མཚོན་པའི་བུམ་པ། དེའི་སྟེང་རིན་ཆེན་འབྱུང་ལྡན་མཚོན་བྱེད་ནོར་བུའི་ཏོག་བཅས་ཡོད་པའོ། །བུམ་གཟུགས་གཉྫི་ར་ནི་བསྡུས་པའི་ལུགས་ཏེ། པད་གདན་གྱི་སྟེང་དུ་རྣམ་སྣང་མཚོན་པའི་བུམ་པ། དེའི་སྟེང་འོད་དཔག་མེད་མཚོན་པའི་པདྨ་འདབ་བརྒྱད། དེའི་སྟེང་མི་བསྐྱོད་པ་མཚོན་པའི་ནོར་བུའི་ཏོག་བཅས། སྐུ་གསུང་ཐུགས་ཀྱི་སངས་རྒྱས་རིགས་གསུམ་ཚང་བར་བྱས་པ་དེའོ། །ས་སྐྱ་དགོན་པར་བཞུགས་པའི་གཉྫི་ར་ཟླ་བའི་འོད་ཟེར་ཞེས་པར་ནང་གཞུག་ཏུ་འབྲུག་གི་སྒོ་ང་གསོལ་པར་གྲགས་པས། དབྱར་འབྲུག་སྒྲ་གྲག་དུས་མེ་རླབས་དངོས་སུ་འབར་ཞིང་ཐོག་ལེན་གྱི་ནུས་པའང་ཡོད་པར་གྲགས་སོ། །

ཆོས་འཁོར་དང་རི་དྭགས་ཕོ་མོ།

ཆོས་འཁོར་དང་རི་དྭགས་ཕོ་མོ་གཙུག་ལག་ཁང་གི་སྒོ་སྟེང་དུ་འཇོག་པ་ནི། ཚངས་པ་ཆེན་པོས་འཁོར་ལོ་རྩིབས་སྟོང་ཞིག་ཕུལ་ཏེ། སྟོན་པ་སངས་རྒྱས་ལ་གསོལ་བ་འདེབས་པའི་ཚེ་ན། རི་དྭགས་རུ་རུ་ཕོ་མོ་གཉིས་ཀྱིས་འཁོར་ལོ་ལ་མིག་མི་ཟུམ་པར་ལྟ་བ་བྱུང་བའི་རྒྱུས། དེ་དག་མཚོན་བྱ་མཚོན་བྱེད་དུ་སྦྱར་ནས། འཁོར་ལོ་ནི་འཕགས་ལམ་ཡན་ལག་བརྒྱད་དང་སྦྱོར་ཏེ། བཙུན་པ་དབྱངས་སྒྲོགས་ཀྱིས། འཕགས་ལམ་ཡན་ལག་བརྒྱད་ཁོ་ན་ཆོས་འཁོར་ཡིན་ཏེ། འཁོར་ལོ་རིན་པོ་ཆེ་དང་ཆོས་མཚུངས་པ་དེ་ཁོ་ན་ལ་ཡོད་པའི་ཕྱིར་ཏེ། ཡང་དག་པའི་ལྟ་བ། རྟོག་པ། རྩོལ་བ་གསུམ་ནི། གཅོད་པར་བྱེད་པའི་རྩིབས་དང་ཆོས་མཚུངས་པ་སྟེ། དེ་གསུམ་ཤེས་རབ་གྱི་བསླབ་པ་ཡིན་པས། རང་གི་མི་མཐུན་ཕྱོགས་འཇོམས་པར་བྱེད་པའི་ཕྱིར། ངག ལས་ཀྱི་མཐའ། འཚོ་བ་གསུམ་ནི་རྟེན་པར་བྱེད་པའི་ལྟེ་བ་དང་ཆོས་མཚུངས་ཏེ། དེ་གསུམ་ཚུལ་ཁྲིམས་ཀྱི་བསླབ་པ་ཡིན་པས། བསླབ་པ་གཞན་གཉིས་ཀྱི་རྟེན་བྱེད་པའི་ཕྱིར། དྲན་པ་དང་ཏིང་ངེ་འཛིན་གཉིས་སྡུད་པར་བྱེད་པའི་མུ་ཁྱུད་དང་། ཆོས་མཚུངས་ཏེ། དེ་གཉིས་ཏིང་ངེ་འཛིན་གྱི་བསླབ་པའི་ནང་དུ་འདུ་བས། སེམས་དམིགས་པ་ལ་སྡུད་བྱེད་ཡིན་པའི་ཕྱིར། ཞེས་དང་། མཛོད་ལས། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཀྱིས། །ཞེས་གསུངས། འཕགས་ལམ་ཡན་ལག་བརྒྱད་པོ་དེ། གང་ཟག་གི་རྒྱུད་ལ་འཕོ་བའི་གང་ཟག་ཕོ་མོ་གཉིས་སུ་ངེས་པ་དང་། དོན་དང་སྦྱར་ན། འཁོར་ལོ་ནི་དམ་ཆོས། རི་དྭགས་གདུལ་བྱ་རིགས་ཅན་གསུམ། འཁོར་ལོ་ནི་ཐུབ་བསྟན་དང་། རི་དྭགས་གཉིས་ནི་གཞིའི་བདེན་པ་གཉིས། ལམ་གྱི་ཐབས་ཤེས་གཉིས་དང་། ལྟ་སྤྱོད་དང་། འབྲས་བུ་ཆོས་གཟུགས་ཀྱི་སྐུ་གཉིས་ལ་སྦྱོར་དགོས་པ་ནི། སྔགས་ཀྱི་གཞལ་ཡས་ཁང་གི་དག་པ་དང་། མདོ་ཕྱོགས་གསུང་རབ་དག་ལས་ཟུར་ཙམ་འབྱུང་བའོ། །

ཡང་། མཚོན་དོན་གཞན་ཞིག་ནི། ཆོས་འཁོར་གྱི་གྲུབ་ཆ་ནི་ལྟེ་བ་དང་རྩིབས། མུ་ཁྱུད་དང་གསུམ་སྟེ། མཚོན་བྱ་ནི། བཅོམ་ལྡན་འདས་ཀྱིས། གདུལ་བྱ་རིགས་ཅན་གསུམ་ལ་རང་རང་གི་སྐལ་བ་དང་འཚམ་པའི་ཆོས་འཁོར་རིམ་པ་གསུམ་དུ་བསྐོར། སྤྱིར་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་ཡོད་ཀྱང་། བསྡུ་ན། འདུལ་བ་དང་མདོ་སྡེ། མངོན་པ་བཅས་སྡེ་སྣོད་གསུམ་དུ་འདུས་ཤིང་། སྒྲིབ་གཉིས་དྲུངས་ནས་འབྱིན་པའི་གཉེན་པོ་འདི་གསུམ་ཁོ་ན་ཡིན་པས། དེ་ལྟར་མཚོན་ནོ། །རི་དྭགས་ཕོ་མོ་གཉིས་ཀྱིས་ཆོས་འཁོར་གྱི་རྩེ་མོ་ལ་མིག་མི་སུམ་པར་བལྟ་བ་ནི། སྐྱེ་བོ་མཆོག་སུ་ཡིན་ཡང་། མཐར་ཐུག་སྐུ་གསུམ་ལ་དམིགས་ཤིང་། བགྲོད་ལམ་གསུམ་ལས་གཞན་དུ་མ་མཆིས་པའི་དེ་ལྟར་རོ། །

ཁྲི་དྲུག་འགྱོགས།

ཁྲི་དྲུག་འགྱོགས་ནི་སྲོག་ཆགས་དྲུག་གིས་ཁྲི་འདོགས་པར་བྱེད་པ་སྟེ། དེ་ཡང་། ༡ སེང་གེས་སྟོབས་བཅུ། ༢ གླང་ཆེན་གྱིས་སོ་སོར་ཡང་དག་པའི་རིག་པ་བཞི། ༣ རྟ་མཆོག་གིས་དབང་བཅུ། ༤ རྨ་བྱས་སྨོན་གནས་ཤེས་པ། ༥ ཤང་ཤང་ཏེའུས་བྱང་ཆུབ་ཀྱི་ཕྱོགས། ༦ གྱད་མིས་མི་འཇིགས་པ་བཞི་མཚོན་པའོ། །

གོང་སྨོས་རྒྱན་དྲུག་གི་ཐིག་ཁོག་ཆ་མཉམ་པར་དགོས་པའི་སྐུའི་སྤྱི་གཙུག་གི་སྟེང་དུ། ཁྱུང་རྭ་ནོར་བུས་བརྒྱན་ཅིང་སྦྲུལ་ཟ་བས། ཤེས་རབ་ཀྱི་ཕར་ཕྱིན། ཀླུ་ཕྲུག་སྦྲུལ་མཇུག་གིས་སྦྱིན་པའི་ཕར་ཕྱིན། ཆུ་སྲིན་མཇུག་མ་པ་ཏྲ་ཅན་གྱིས་བསམ་གཏན་གྱི་ཕར་ཕྱིན། མཛེས་པའི་བུ་ཆུང་ཤིང་ལོ་གྱོན་པ་གཉིས་ཀྱིས་བརྩོན་འགྲུས། ཤ་ར་བྷས་ཚུལ་ཁྲིམས། གླང་ཆེན་རྒྱན་སྤྲས་ཀྱིས་བཟོད་པའི་ཕར་ཕྱིན་མཚོན་ནོ། །དེ་ཡང་གཙོ་བོ་བརྒྱད་ཀྱི་ཁྲི། སྟག སེང་གེ གཟིག་སོགས་ཕྱོགས་བཞི་དང་། གླང་ཆེན། མ་ཧེ། ཆུ་སྲིན། སྦྲུལ་ནག་པོ་སོགས་དབུས་ཞེས་འབྱུང་བ་ལྟར་དུའང་ཡོད་དོ། །

ཐིག་ནག

ཐིག་ནག་ཅེས་པ་ནི། འདུ་ཁང་དང་མགོན་ཁང་སོགས་ཀྱི་གྲྭ་ཟུར་དང་སྟེང་ལ་བཙུགས་སྲོལ་ཡོད་པ་སྟེ། དེ་ནི་འབྲི་གཡག་གི་རྩིད་པ་ནག་པོ་ལས་བཟོས་པའི་ཐུག་རལ། ལྕགས། མེ་རི་གསུམ་གྱིས་གྲུབ་པ་ཡིན། འདི་འཛུགས་སྲོལ་གྱི་ཁུངས་ནི། ས་སྐྱ་པཎྚི་ཏས་སྟོད་ཁུལ་དུ་མུ་སྟེགས་པ་འཕྲོག་བྱེད་དགའ་བོ་རིགས་ལམ་རྣམ་དག་གིས་ཚར་བཅད་ནས། ཁོའི་སྐྲ་དང་རལ་བ་གཞན་ལ་རྔམ་བརྗིད་སྟོན་པའི་ཆེད། ཁང་བའི་ཡང་སྟེང་དུ་དཔའ་དར་ལྟ་བུར་བཀལ་བ་དེ་ཡིན། དེ་ཡང་གཟུངས་དང་སྲོག་ཤིང་སྒྲུབ་བཞག་བཅས་སྒྲུབ་ལུགས་ཚང་བར་བྱེད་དགོས་ལ། ཐིག་མང་ཆེ་བ་ཚོན་མདོག་ནག་པོ་ཡིན། ཕྱིས་སུ་ཐིག་འགེལ་སྲོལ་དེ། ཕལ་མོ་ཆེ་ཆོས་སྲུང་སོགས་གནས་སའི་མགོན་ཁང་དུ་ཆགས་པས། དེ་ལ་བརྟེན་པའི་ཆོས་སྲུང་དེས་ནང་བསྟན་གྱི་དབུ་འཕང་མཐོ་བར་འདེགས་ཤིང་། མུ་སྟེགས་པ་ཚར་གཅོད་པའི་རྔམ་བརྗིད་ཀྱི་མཚོན་དོན་ལྟ་བུར་གྱུར་ཡོད། གཞན་ཡང་དགོན་སྡེ་འགར། དར་ཤིང་རིང་བོ་གཡག་ཀོ་བློན་པས་དཀྲིས་ཏེ་རྩིད་པ་འཇོལ་ལེ་ཡོད་པ་དེ་ཡང་། མུ་སྟེགས་འཕྲོག་བྱེད་ཀྱི་རལ་བ་དར་ཤིང་ལ་བསྐྱོན་པའི་མཚོན་བྱེད་ཡིན་ཟེར། ཡང་ཁ་ཅིག ཐིག་ནག་གི་ཁུངས་ནི་ཇང་གིར་རྒྱལ་བོའི་བ་དན་མདུང་རིང་ཡིན་པར་ཡང་བཤད་དོ། །

ཐིག་ནག་གི་ཕན་ནུས་ནི། ལྷ་ཁང་དེར་གོད་ཆག་མི་ཡོང་བ་དང་། ཡུལ་ཕྱོགས་དེར་འཇིགས་པ་མི་ཡོང་བའི་ནུས་མཐུ་ཡོད་པར་གྲགས་སོ། །

 

 

ལེའུ་ལྔ་བ། རིག་གཞུང་ཁག་གཅིག་ངོ་སྤྲོད།
དང་བོ། ཡོངས་ཁྱབ་ཀྱི་རིག་གནས་ཁག་གཅིག
བཀའ་འགྱུར།

བཀའ་འགྱུར་ནི། བསྟན་པའི་བདག་པོ་སྟོན་པ་བཅོམ་ལྡན་འདས་ཀྱིས་གསུངས་པའི་མདོ་སྔགས་ཀྱི་ཆོས་དཔེ་རྣམས་བོད་དུ་བསྒྱུར་བ་ལ་བཀའ་འགྱུར་ཟེར། སྔོན་རྒྱ་གར་དུ་སངས་རྒྱས་སྐུ་དངོས་སུ་བཞུགས་སྐབས། ཁོང་གི་གསུང་རབ་འགའ་ཞིག་ཡི་གེར་ཕབ་སྟེ། རྒྱལ་བློན་དང་ཁྱིམ་བདག་སོགས་ཀྱིས་མཚན་མོ་སྒྲོན་འོད་དུ་བལྟ་ཀློག་བྱེད་ཀྱི་ཡོད་ཀྱང་། བཀའ་བསྡུས་ཀྱི་ལྒིགས་བམ་མེད། སྟོན་པ་མྱ་ངན་ལས་འདས་པའི་ཕྱི་ལོར་བཀའ་བསྡུ་དང་བོ་མཛད་ཅིང་། དེའི་རྗེས་ཀྱི་ལོ་ངོ་བརྒྱ་དང་བཅུ་སོང་རྗེས་བཀའ་བསྡུ་གཉིས་པ་དང་། ལོ་བཞི་བརྒྱ་སོང་མཚམས་བཀའ་བསྡུ་གསུམ་པ་དང་བཞི་བ་གནང་སྟེ། ཕྱོགས་བསྡུས་ཀྱི་གསུང་རབ་རྣམས་ལྒིགས་བམ་དུ་བཀོད། ཕྱིས་སུ་དེ་དག་གི་ནང་ནས་མང་ཙམ་ཞིག་མུ་སྟེགས་པའི་གཏོར་བཤིག་ལན་གསུམ་དུ་བཏང་སྟེ་བསྟན་པའི་གོད་ཆག་ཆེན་པོར་གྱུར། རང་ཅག་བོད་དུ་ཆོས་རྒྱལ་ཁྲི་སྲོང་ལྡེ་བཙུན་གྱི་དུས་སུ། ལོ་པཎ་རྣམས་ཀྱིས་རྒྱ་གར་ན་བཞུགས་པའི་གསུང་རབ་ཕལ་མོ་ཆེ་སྤྱན་དྲངས་ཤིང་བོད་སྐད་དུ་བསྒྱུར་བར་མ་ཟད། དཀར་ཆག་ཡང་རིམ་པ་བཞིན། འཕང་ཐང་མ་དང་། ལྡན་དཀར་མ། མཆིམས་ཕུ་མ་སོགས་མཛད། སྤྱི་ལོ ༡༣༡༢ ལོ་ནས་བཅོམ་ལྡན་རིག་རལ་དང་། དབུས་པ་བློ་གསལ་བྱང་ཆུབ་ཡེ་ཤེས་སོགས་ཀྱིས་བཀའ་བསྟན་འགྱུར་གྱི་མ་དཔེ། དབུས་གཙང་དང་མངའ་རིས་སོགས་ལས་བསྡུ་སྒྲིག་གནང་སྟེ། ཞུས་དག་དང་། སྡེ་ཚན་དབྱེ་བ། གོ་རིམ་སྒྲིག་པ་སོགས་སྐུ་ངལ་ལ་མ་འཛེམ་པར། དཀར་ཆག་ཡང་རྒྱས་བསྡུས་གསུམ་མཛད་ནས། སྣར་ཐང་དགོན་པར་བཞུགས་སུ་གསོལ་བ་ནི། བོད་དུ་བཀའ་བསྟན་བྲིས་བཞེངས་མཛད་པའི་ཐོག་མའོ། །དེ་ནས་རིམ་བཞིན་ཚལ་བ་བཀའ་འགྱུར། ཞ་ལུ་བཀའ་འགྱུར། འཕྱོངས་རྒྱས་བཀའ་འགྱུར་ལྗགས་ཞུས་མ། ཡུང་ལོའི་བཀའ་འགྱུར། བཀའ་འགྱུར་རྒྱལ་རྩེ་ཐེམ་སྤང་མ། ཏཱ་མིང་བཀའ་འགྱུར། དེ་བཞིན། ལི་ཐང་། སྣར་ཐང་། སྡེ་དགེ པེ་ཅིན། ཅོ་ནེ། ར་རྒྱ། ལྷ་ཞོལ་བཀའ་འགྱུར། སོག་པོ་ཁུ་རེ་བཀའ་འགྱུར་སོགས་མང་ལ། བཀའ་འགྱུར་རྡོ་བརྐོས་ཀྱི་དབང་དུ་བཏང་ནའང་ཟི་ཁྲོན་གྱི་སེར་ཤུལ། མཚོ་སྔོན་གྱི་དགའ་བདེ་དང་རྩེ་ཁོག མགོ་ལོག་སོགས་སུ་རྡོ་བརྐོས་བཀའ་བསྟན་མང་བོ་ཡོད་དོ། །དུམ་གྲངས་ཀྱི་དབང་དུ་བཏང་ན། འདུལ་བ་པོད༡༣ ཤེར་ཕྱིན་པོད ༢༣ ཕལ་བོ་ཆེ་པོད ༤ དཀོན་བརྩེགས་པོད ༦ མདོ་མང་པོད ༣༢ རྒྱུད་འབུམ་པོད ༢༠ དུས་འཁོར་འགྲེལ་ཆེན་པོད ༢ བཅས་ཁྱོན་བསྡོམས་པོད་བརྒྱ་དང་། ཆོས་ཚན་བརྒྱད་བརྒྱ་དྲུག་ཅུ་རེ་བརྒྱད་ཡོད་དོ། །

བསྟན་འགྱུར།

སྟོན་པའི་གསུང་རབ་ཀྱི་དགོངས་འགྲེལ་ལ་བསྟན་བཅོས་ཟེར་ཞིང་། དེ་དག་གི་ནང་དུ་རྒྱ་དཀར་ནག་གི་མཁས་པས་བརྩམས་པ་བོད་དུ་འགྱུར་བ་ལ་བསྟན་འགྱུར་དང་། འོན་ཀྱང་། བསྟན་འགྱུར་མཇུག་ཏུ་བསྟན་པ་སྔ་དར་དུས་སུ་བྱོན་པའི་བོད་ཀྱི་མཁས་པ་ཁག་གཅིག་གིས་བསྟན་བཅོས་ལས་མི་འཇོག་པ་ནི། བསྟན་འགྱུར་ཁྲོད་དུ་བོད་མིས་བརྩམས་པའི་བསྟན་བཅོས་རྫུན་མའི་སླད་སྐྱོན་མི་འདྲེས་པའི་ཆེད་དུ་བཀས་བཅད་མཛད་པ་ཡིན།

བོད་ཀྱི་བསྟན་འགྱུར་ཆ་ཚང་ཐོག་མར་བསྡུ་སྒྲིག་སྣར་ཐང་བཀའ་འགྱུར་དང་ཆབས་ཅིག་ཕྱོགས་བསྡུས་བྱས་པ་ཡིན་ལ། ཁྱད་པར་དུ་སྤྱི་ལོ ༡༣༣༤ ལོར་ཞ་ལུ་སྐུ་ཞང་ཀུན་དགའ་དོན་འགྲུབ་ཀྱིས་མཐུན་རྐྱེན་སྦྱར་ཏེ། བུ་སྟོན་རིན་ཆེན་གྲུབ་ཞུས་ཆེན་པར་སྤྱན་དྲངས་ནས། བསྟན་འགྱུར་ཆ་ཚང་ཞིག་བཞེངས་པ་ཞ་ལུ་གསེར་ཁང་དུ་བཞུགས་སུ་གསོལ་ཏེ། ཁོང་གིས་བསྟན་འགྱུར་དཀར་ཆག་ཡིད་བཞིན་དབང་གི་རྒྱལ་བོའི་ཕྲེང་བ་མཛད་པ་དང་། དེའི་རྗེས་རིམ་བཞིན། རྒྱལ་དབང་ལྔ་བའི་དགོངས་རྫོགས་སུ་བསྟན་འགྱུར་གསེར་བྲིས་ཆ་ཚང་གནང་བར། དཀར་ཆག་རྒྱལ་དབང་ལྔ་བའི་འབྲུག་ལོར་བརྩམས་པར་གསུངས་འདུག་ཀྱང་། དུས་ཚོད་མི་མཐུན་པའི་སྡེ་སྲིད་ཀྱིས་གསང་རྒྱ་བརྟན་ཕྱིར་མཛད་པར་ངེས་སོ། །ཤིང་པར་གྱི་དབང་དུ་བཏང་ན། བོད་ཡིག་བསྟན་འགྱུར་ཤིང་པར་དུ་འཁོད་མྱོང་བའི་དཔེ་གཞི་བཞི་ཁོ་ན་ཡོད་པ་ལས།

༡ སྡེ་དགེ་བསྟན་འགྱུར་ནི། ༡༧༣༧ ལོར་སྡེ་དགེ་རྒྱལ་བོ་བསྟན་པ་ཚེ་རིང་གིས་སྦྱིན་བདག་བགྱིས་ཏེ། པར་བསྐྲུན་གྱི་དབུ་བརྩམས་ནས་ལྒིགས་བམ་བདུན་ཙམ་རྫོགས་མཚམས། ཆོས་རྒྱལ་དགོངས་པ་རྫོགས་ཀྱང་། དེའི་སྲས་སྡོམ་བརྩོན་རྒྱལ་བོའི་ཚུལ་འཛིན་བླ་མ་ཀུན་དགའ་འཕྲིན་ལས་རྒྱ་མཚོས་མཛད་འཕྲོ་བསྐྱངས་ཏེ་སྤྱི་ལོ ༡༧༤༤ ལོ་སྟེ། ལོ་བདུན་གྱི་རིང་ལ་བཙུན་པ་ཚུལ་ཁྲིམས་རིན་ཆེན་གྱིས་ཞུས་དག་དང་བཅས་པ་ལེགས་པ་བྱུང་། བསྟན་འགྱུར་འདིའི་ཕྱི་མོ་ནི། འགྲོ་མགོན་ཆོས་འཕགས་ཀྱི་སློབ་མ་སྒ་ཨ་གཉན་དམ་པས་ཞ་ལུའི་དཔེ་ལྟར་བཞེངས་པའི་བསྟན་འགྱུར་ཞིག་དང་། སི་ཏུས་བཞེངས་པའི་བྲིས་མ། ཀརྨ་ན་རིམ་གྱི་ཐུགས་དམ་རྟེན་ཆོས་རྒྱལ་བསྟན་པ་ཚེ་རིང་ལ་གནང་བའི་བསྟན་འགྱུར། ཆོས་རྒྱལ་རང་ཉིད་ཀྱི་མཐིང་ཤོག་དངུལ་བྲིས་ཀྱི་བསྟན་འགྱུར་བཅས་དཔེ་བསྡུར་བྱས་པ་ཡིན་ལ། དེ་རྣམས་ལས་སི་ཏུ་གཙོར་བཟུང་བྱས་ཡོད། བསྟན་འགྱུར་འདི་ལ་པོད་གྲངས ༢༡༢དང་། ཡིག་ལྡེབས ༦༤༥༡༢ ཡོད། ད་ལྟ་ཤིང་པར་ཡོངས་རྫོགས་སྐྱོན་སླད་མ་བྱུང་བར་སྡེ་དགེ་པར་ཁང་ཆོས་མཛོད་ཆེན་མོར་བཞུགས་ཡོད།

༢ པེ་ཅིན་བསྟན་འགྱུར་ནི། སྤྱི་ལོ ༡༧༢༤ ལོ་རྒྱ་ནག་གོང་མ་གཡུང་ཊི་ཁྲི་ལོ་གཉིས་པར་པར་བསྐྲུན་གྱི་དབུ་ཚུགས་ཤིང་། ལྷ་སྐྱོང་ཁྲི་ལོ་གསུམ་པ་སྤྱི་ལོ ༡༧༣༨ ལ་མཇུག་གྲུབ་སྟེ། པེ་ཅིན་དུ་བཞུགས་སུ་གསོལ། འདིའི་པར་གཞི་ནི། རྒྱལ་དབང་ལྔ་བའི་དགོངས་རྫོགས་སུ་གསང་རྒྱ་བསྡམས་ཏེ་བསྟན་འགྱུར་གསེར་བྲིས་གནང་བ་དེ་ཡིན་ཞིང་། དེར་མ་བཞུགས་པ་བུ་སྟོན་ནས་དེ་དུས་བར་གྱི་གསར་འགྱུར་དང་། མདོ་སྔགས་རིག་གནས་ཀྱི་དཔེ་རྙིང་ཁུངས་བཙུན་པ་སྔར་མ་ཆུད་པ་རྣམས་དང་བཅས་པའི་ཁྱོན་ཆོས་ཚན ༧༨༠ ཙམ་གསར་དུ་བསྣན་ཡོད། པར་ཤིང་འདི་ཁང་ཞིས་ཁྲི་ལོ་ཉེར་དྲུག་པར་སྤྱི་ལོ ༡༩༠༠ རྒྱལ་བརྒྱད་འབྲེལ་དམག་གིས་ཀྲུང་གོར་བཙན་འཛུལ་བྱེད་སྐབས་མེད་བརླག་ཏུ་བཏང་ཡང་། རྒྱལ་དབང་བཅུ་གསུམ་པས་ཚར་གཅིག་འཇར་པན་ཏུང་ཅིན་དུ་གདན་དྲངས་ནས། ཏ་གོས་སློབ་གྲྭ་ཆེན་མོའི་དཔེ་མཛོད་ཁང་དུ་བཞུགས་སུ་གསོལ། པར་མ་འདི་ལ་བསྐྱར་པར་བརྒྱབ་སྟེ། ད་ལྟ་པེ་ཅིན་དཔེ་མཛོད་ཁང་། མི་རིགས་རིག་གནས་ཕོ་བྲང་གི་དཔེ་མཛོད་ཁང་། ཀྲུང་གོའི་ནང་བསྟན་མཐུན་ཚོགས། ཀྲུང་དབྱང་མི་རིགས་སློབ་གྲྭའི་དཔེ་མཛོད་ཁང་སོགས་སུའང་བཞུགས་ལ། འདི་དཀར་ཆག་དང་བཅས་དེབ་གྲངས་བརྒྱ་དང་ང་གཅིག་ཡོད་ལ། དེའི་དབུའི་དེབ་ཞེ་ལྔ་བཀའ་འགྱུར་དང་། ལྷག་མ་བསྟན་འགྱུར་ཡིན་པར་བཤད་དོ། །

༣ སྣར་ཐང་བསྟན་འགྱུར་ནི། སྤྱི་ལོ ༡༧༤༡ ལོར་དབུ་ཚུགས་ཏེ་མི་དབང་ཕོ་ལྷ་བ་བསོད་ནམས་སྟོབས་རྒྱས་ཀྱིས་སྦྱིན་བདག་མཛད་དེ། ལོ་བདུན་རིང་ལ་མཇུག་གྲུབ་པ་ཡིན་ལ། འདི་པར་གཞི་སྡེ་སྲིད་སངས་རྒྱམ་གྱིས་བཞེངས་པའི་བསྟན་འགྱུར་ཡིན། དཀར་ཆག་ཕུར་ལྕོག་ངག་དབང་བྱམས་པས་མཛད་ལ། བསྟན་འགྱུར་འདི་ལ་པོད་གྲངས ༢༢༥ དང་། ཡིག་ལྡེབས༧༦༨༨༣ ཡོད། སྔ་གཞུག་གི་རྒྱུ་སོང་བསྡོམས་པས་དངུལ་ཐུར་སྲང་བདུན་ཁྲི་ཉིས་སྟོང་ཆིག་བརྒྱ་རེ་གཉིས་དང་ཞོ་ལྔ་རི་བ་ལ། ཡུལ་ཐང་ལྟར་བརྩིས་པའི་འབྲུ་ཁལ་ས་ཡ་གཅིག་དང་བཞི་འབུམ་ལྔ་ཁྲི་བདུན་སྟོང་ཉིས་བརྒྱ་ལྔ་བཅུ་བཏང་བར་བཤད་དོ། །པར་གཞི་འདི་རིག་གསར་སྐབས་བརླག་ནས་ད་ལྟ་མཇལ་རྒྱུ་མེད་དོ། །

༤ ཅོ་ནེ་བསྟན་འགྱུར་ནི། ཅོ་ནེ་དཔོན་འཇམ་དབྱངས་ནོར་བུའི་བཙུན་མོ་རིན་ཆེན་དཔལ་འཛོམས་དང་། དེའི་སྲས་བསྟན་སྲུང་ཚེ་རིང་གཉིས་ཀྱིས་སྦྱིན་བདག་བགྱིས་ཏེ་མི་ངོ་བཞི་བརྒྱ་ལྷག་རྩ་འཛུགས་བྱས་ནས། སྤྱི་ལོ ༡༧༥༣ ལོར་དབུ་ཚུགས་ཏེ། ༡༧༧༢ ལོ་སྟེ་བགྲང་བྱ་ཉི་ཤུ་ལ་ལེགས་གྲུབ་གནང་ཞིང་། ཕྱི་མོ་སྡེ་དགེ་བསྟན་འགྱུར་ཡིན། དཀར་ཆག་ཀུན་མཁྱེན་འཇིགས་མེད་དབང་བོས་མཛད་ལ། ཁྱོན་བསྡོམས་ལྒིགས་བམ ༢༠༨ དང་། ཡིག་ལྡེབ ༦༥༤༢༥ ཙམ་བཞུགས། སྔ་གཞུག་གི་རྒྱུ་སོང་ལ་དངུལ་སྲང་ཆིག་ཁྲི་སུམ་སྟོང་དགུ་བརྒྱ་སུམ་ཅུ་སོ་བདུན་དང་ཞོ་བདུན་སྐར་བདུན་སོང་བར་བཤད་ཅིང་། པར་གཞི་འདི་༡༩༢༨ ལོར་ཀ་ཆུའི་མཱ་ཀྲུང་དབྱིན་གྱིས་མེར་སྲེག་པར་བཤད།

གོང་གསལ་ཤིང་པར་འདི་བཞི་ཕྱི་མོ་གནང་སྟེ་ཟུར་བལྟའི་པར་མ་རྣམས་བསྡུར་ཏེ། ཀྲུང་གོ་བོད་ཀྱི་ཤེས་རིག་ཞིབ་འཇུག་ལྟེ་གནས་ཀྱི་བཀའ་བསྟན་དཔེ་སྡུར་ཁང་གིས། དཔེ་བསྡུར་བྱེད་སྟངས་དང་། མཚོན་རྟགས་རྒྱག་སྟངས། ཡི་གེ་སྒྲིག་སྟངས། མཛེས་ཆ་འགོད་སྟངས་སོགས་སྒྲིག་གཞི་ལྡན་ཞིང་འཐུས་ཚང་བའི་སྒོ་ནས་ལྕགས་པར་དུ་བསྐྲུན་པ། ད་ལྟ་བདག་ཅག་གི་སྤྱན་ལམ་དུ་ཉི་མ་བཞིན་ཤར་བ་འདི་ཉིད་དོ། །

བསྟན་འགྱུར་ལ་ཡོངས་གྲགས་པོད་གྲངས་ནི། བསྟོད་ཚོགས་པོད ༡ རྒྱུད་སྡེ་པོད ༧༨ ཤེར་ཕྱིན་པོད ༡༦ དབུ་མ་པོད ༡༧ མདོ་སྡེ་པོད ༡༠ སེམས་ཙམ་པོད ༡༦ མངོན་པ་པོད ༡༡ འདུལ་བ་པོད ༡༨ སྐྱེས་རབས་པོད ༢ དཔག་བསམ་འཁྲི་ཤིང་པོད ༢ སྤྲིངས་ཡིག་པོད ༢ ཚད་མ་པོད ༢༡ སྒྲ་རིག་པོད ༤ གསོ་རིག་པོད ༥ བཟོ་རིག་པོད ༡ སྣ་ཚོགས་པོད ༩ ཡོད་ལ། བསྟན་འགྱུར་ལ་ཁྱོན་བསྡོམས་པོད་ཉིས་བརྒྱ་བཅུ་གསུམ་དང་། ཆོས་ཚན་ལ་བུ་སྟོན་ཆོས་འབྱུང་ལྟར་ན། ཉིས་སྟོང་སུམ་བརྒྱ་སོ་བདུན་ཡོད་དོ། །

གཞུང་བཀའ་པོད་ལྔ།

གཞུང་ལུགས་བཀའ་པོད་ལྔ་འམ་པོ་ཏི་ལྔ་ནི། ཕར་ཕྱིན། དབུ་མ། རྣམ་འགྲེལ། འདུལ་བ། མཛོད་བཅས་ལ་ཟེར། དེ་ཡང་བཀའ་པོད་ལྔ་ནི། སྡེ་སྣོད་གསུམ་གྱི་སྡོམ་ཆེན་པོ་སྟེ། ཚད་མ་དང་། དབུ་མ། མཛོད་གསུམ་ནི་མངོན་པའི་སྡེ་སྣོད་ཀྱི་སྡོམ། ཕར་ཕྱིན་ནི་མདོ་སྡེའི་སྡེ་སྣོད་ཀྱི་སྡོམ། འདུལ་བ་ནི་ཐེག་པ་ཆེ་ཆུང་གཉིས་ཀའི་འདུལ་བའི་སྡེ་སྣོད་ཀྱི་སྡོམ་མོ། །བསྟན་པ་ཕྱི་དར་གྱི་མགོ་ཚུགས་པ་ནས་བོད་ཀྱི་གྲྭ་ས་ཆེ་ཁག་ཀུན་དུ་གཞུང་ཆེན་བཀའ་པོད་ལྔར་སློབ་གཉེར་གཙོ་བོར་གནང་གི་ཡོད་པའང་། སྔོན་བྱོན་མཁས་པའི་གསུང་རྒྱུན་དུ། བསྟན་པའི་ལྕགས་རི་ཚད་མ། བསྟན་པའི་མཛེས་རྒྱན་མཛོད། བསྟན་པའི་གཞུང་ཤིང་ཕར་ཕྱིན། བསྟན་པའི་སྙིང་བོ་དབུ་མ། བསྟན་པའི་ནང་མཛོད་འདུལ་བ་ཟེར་བའང་དེ་ཡིན་ནོ། །པོད་ལྔའི་བཞེད་དགོངས་ལྟར་ཡིག་ཆ་གྲགས་ཆེ་བ་ནི། སྒོ་མང་གསར་རྙིང་། བློ་གླིང་། རྗེ་བཙུན་ཡིག་ཆ་བཅས་སོ། །འདིར་པོ་ཏི་ལྔ་རེ་རེ་བཞིན་ངོ་སྤྲོད་མདོར་བསྡུས་བགྱིད་ན།

ཕར་ཕྱིན། ཕར་ཕྱིན་གྱི་གཞུང་ནི་རྗེ་བཙུན་བྱམས་པ་མགོན་པོས་མཛད་པའི་བྱམས་ཆོས་སྡེ་ལྔ་སྟེ། མངོན་རྟོགས་རྒྱན། མདོ་སྡེ་རྒྱན། རྒྱུད་བླ་མ། དབུས་མཐའ་རྣམ་འབྱེད། ཆོས་ཉིད་རྣམ་འབྱེད་དང་། འཕགས་པ་ཐོགས་མེད་ཀྱིས་བརྩམས་པའི་ས་སྡེ་ལྔ། སའི་དངོས་གཞི། གཏན་ལ་དབབ་པ་བསྡུ་བ། གཞི་བསྡུ་བ། རྣམ་གྲངས་བསྡུ་བ། རྣམ་པར་བཤད་པའི་སྒོ་བསྡུ་བ་སོགས་ཡིན། ཕར་ཕྱིན་གྱི་གཞུང་གི་བརྗོད་སྙིང་ནི། ཡུམ་རྒྱས་འབྲིང་བསྡུས་གསུམ་གྱི་བརྗོད་དོན་དུ་སྦས་པའི་དགོངས་པ་རྣམས་དངོས་བོ་བརྒྱད་དང་དོན་བདུན་ཅུར་བསྡུས་ནས་བརྗོད་པ་ཡིན་ལ། དེ་དག་ལ་བོད་ཀྱི་མཁས་པས་མཛད་པའི་འགྲེལ་བ་འགྲེལ་བཤད་ཡང་མང་ངོ་། །

དབུ་མ། རྟག་ཆད་ཀྱི་མཐའ་གཉིས་བཀག་ནས་དེ་གཉིས་དང་བྲལ་བའི་དབུས་ཟབ་མོ་རྟེན་འབྱུང་གི་དོན་ཁས་ལེན་པས་དབུས་མ་ཞེས་ཟེར་ལ། དེ་བརྗོད་བདེའི་དབང་གིས་དབུ་མ་བ་གྲགས་སོ། །དབུ་མའི་ལུགས་འདི་སློབ་དཔོན་ཀླུ་སྒྲུབ་ཀྱིས་འཛམ་བུའི་གླིང་གི་ཆོས་སྐལ་དུ་ཀླུ་ཡུལ་ནས་ཤེར་ཕྱིན་འབུམ་པ་སོགས་སྤྱན་དྲངས་ཏེ། ཀླུ་སྒྲུབ་རང་གིས་རྩ་བ་ཤེས་རབ། རྩོད་བཟློག སྟོང་ཉིད་བདུན་ཅུ་བ། རིགས་པ་དྲུག་ཅུ་བ། ཞིབ་མོ་རྣམ་འཐག རིན་ཆེན་ཕྲེང་བ་སྟེ། དབུ་མ་རིགས་ཚོགས་དྲུག་གསར་དུ་བརྩམས་ནས། དབུ་མའི་སྲོལ་ཕྱེས་ཤིང་། དབུ་མའི་ལམ་གྱི་དགག་བྱ་ཉོན་མོངས་པའི་སྒྲིབ་པ་ཆགས་སྒྲིབ། ཤེས་བྱའི་སྒྲིབ་པ་ཐོགས་སྒྲིབ། སྙོམས་འཇུག་གི་སྒྲིབ་པ་དམན་སྒྲིབ་བཅས་ཡིན་ལ། རྗེས་འབྲང་ལ་ཚད་མར་གྱུར་བའི་སློབ་དཔོན་ཨརྱ་དེ་བ། སངས་རྒྱས་བསྐྱངས། ཞི་བ་ལྷ་སོགས་བྱུང་བའོ། །

ཚད་མ་རྣམ་འགྲེལ། རྒྱ་གར་གྱི་སློབ་དཔོན་དཔལ་ལྡན་ཆོས་གྲགས་ཀྱིས་མཛད་པའི་ཚད་མ་སྡེ་བདུན། ཚད་མ་རྣམ་འགྲེལ། རྣམ་ངེས། རིགས་ཐིགས། གཏན་ཚིགས་རིག་པ། འབྲེལ་བ་བརྟག་པ། རྒྱུད་གཞན་སྒྲུབ་པ། རྩོད་པའི་རིགས་པ་བཅས་མཆིས་པ་ལས། ཚད་མ་རྣམ་འགྲེལ་ཡིན་ལ། བརྗོད་སྙིང་ནི། རིགས་པ་བརྒྱ་ཕྲག་གི་སྒོ་ནས་སྟོན་པ་ཐུབ་པའི་དབང་བོ་ཚད་མའི་སྐྱེས་བུ་དང་། དེས་བསྟན་པའི་ཆོས་ཚད་མའི་གསུང་རབ་ཡིན་པ་རྩལ་དུ་བཏོན་ནས་སྒྲུབ་ཡོད།

འདུལ་བ། སྟོན་པ་ཐུགས་རྗེ་ཅན་གྱི་གསུངས་པའི་འདུལ་བ་ལུང་སྡེ་བཞི་སྟེ། ལུང་གཞི། ལུང་རྣམ་འབྱེད། ལུང་ཞུ་བ། ལུང་ཕྲན་ཚེགས་སོ། །དེ་ཡང་བཀའ་འགྱུར་ནང་དུ་དེ་བཞི་ལ་སྤྱི་ནས་པོད་གྲངས་བཅུ་གསུམ་ཡོད། འདུལ་བའི་སྡེ་སྣོད་ནི་སེམས་རྒྱུད་འདུལ་བའི་ཆེད་དུ་ལུས་ངག་གི་ཉེས་སྤྱོད་འགོག་པར་བྱེད་པ་སྟེ། ལྷག་པ་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོ་བྱས་ནས་སྟོན་པ་ཡིན། སློབ་དཔོན་དབྱིག་གཉེན་གྱི་སློབ་མ་འདུལ་བ་རང་ལས་མཁས་པ་ཡོན་ཏན་འོད་ཀྱིས། འདུལ་བ་ལུང་སྡེ་བཞིའི་བརྗོད་སྙིང་བསྡུས་ཏེ་འདུལ་བ་མདོ་རྩ་མཛད། འདི་ལ་ལེའུ་ཉི་ཤུ་དང་བམ་པོ་དགུ་ཡོད། བོད་རྒྱལ་མུ་ཏིག་བཙན་པོའི་དུས་སུ་བོད་འགྱུར་གནང་ཞིང། དུས་རབས་བཅུ་གསུམ་པའི་དུས་དཀྱིལ་དུ་དགེ་བཤེས་མཚོ་སྣ་བས་འདུལ་བ་མདོ་རྩའི་མཆན་འགྲེལ་ཉི་མའི་འོད་ཟེར་སོགས་མཛད་དེ་དར་ཁྱབ་བྱུང་།

མཛོད། ཆོས་མངོན་པ་མཛོད་ནི། སློབ་དཔོན་དབྱིག་གཉེན་གྱིས་ཐེག་དམན་གྱི་མངོན་པའི་གཞུང་གི་རྩ་བ་གནས་བརྒྱད་ཀྱི་རང་བཞིན་ཅན་ཞིག་ཡིན། དེ་ཡང་དགྲ་བཅོམ་པ་རྣམས་ཀྱི་མཛད་པའི་བྱེ་བྲག་བཤད་མཚོ་ཆེན་མོ་འདི་རིམ་པར་བརྒྱུད་དེ་དབྱིག་གཉེན་གྱིས་གསན་ནས། མངོན་པ་སྡེ་བདུན་དང་བྱེ་བྲག་བཤད་མཚོ་ཆེན་མོ་སོགས་ཀྱི་བརྗོད་སྙིང་བསྡུས་ནས་ཐེག་པ་དམན་པའི་ལུགས་སུ་ཆོས་མངོན་པ་མཛོད་ཀྱི་ཚིག་ལེའུར་བྱས་པ། ཁམས་དང་། དབང་བོ། འཇིག་རྟེན། ལས་དང་ཕྲ་རྒྱས། ལམ་དང་གང་ཟག ཡེ་ཤེས། སྙོམས་འཇུག་སྟེ་བརྒྱད་ཀྱི་བདག་ཉིད་ཅན་གྱི་བསྟན་བཅོས་འདི་མཛད་ཅིང་། ཁོང་གི་རང་འགྲེལ་དང་བཅས་པ་ཡོད་དོ། །

སྔགས་ཕྱོགས་རྒྱུད་སྡེ་བཞི།

ནང་བསྟན་ལས་གསུངས་པའི་གསང་སྔགས་ཟབ་མོའི་ཆོས་འདི་ལ། ནང་དོན་མཆོག་དམན་གྱི་རིམ་པ་དང་བསྟུན་ནས་རིགས་མི་འདྲ་བ་བཞིར་ཕྱེས་ཡོད་དེ། ༡ བྱ་རྒྱུད། ༢ སྤྱོད་རྒྱུད། ༣ རྣལ་འབྱོར་རྒྱུད། ༤ རྣལ་འབྱོར་བླ་མེད་བཅས་ལ། རྒྱུད་སྡེ་ཆེན་པོ་བཞི་ཟེར། རྒྱུད་སྡེའི་བཞིའི་གོ་དོན་ལ་གྲུབ་མཐའ་ཁག་གིས་བཞེད་ལུགས་མི་འདྲ་བ་ཡོད་ཀྱང་། འདིར་ཀོང་སྤྲུལ་ཡོན་ཏན་རྒྱ་མཚོའི་དགོངས་པ་ལྟར་བཀོད་ན། ༡ བྱ་རྒྱུད་ནི། ཕྱིའི་ཀུན་སྤྱོད་ཁྲུས་དང་གཙང་སྦྲ་སོགས་གཙོ་བོར་སྟོན་པའི་སྒོ་ནས་སྔགས་ཀྱི་ལམ་བསྒོམ་པའི་ཆ་ནས་བཞག་པ་དང་། ༢ སྤྱོད་རྒྱུད་ནི། ཕྱི་ལུས་ངག་གི་བྱ་བ་དང་ནང་སེམས་ཀྱི་ཏིང་ངེ་འཛིན་ཆ་མཉམ་པར་སྤྱོད་པའི་སྒོ་ནས་གསང་སྔགས་ཀྱི་ལམ་བསྒོམ་ཚུལ་གཙོ་བོར་བསྟན་པས་རྒྱུད་རྣམས་ཡིན། ༣ རྣལ་འབྱོར་རྒྱུད་ནི། ནང་ཐབས་ཤེས་གཉིས་ཀྱི་རྣལ་འབྱོར་དང་བདེན་པ་གཉིས་དབྱེར་མེད་དུ་སྦྱོར་བའི་ཏིང་ངེ་འཛིན་བསྒོམ་ཚུལ་གཙོ་བོར་སྟོན་པའི་རྒྱུད་རྣམས་ཡིན། ༤ རྣལ་འབྱོར་བླ་མེད་རྒྱུད་ནི། གཞི་ལམ་འབྲས་གསུམ་གྱི་སྐབས་སུ་ཐབས་ཤེས་གཉིས་མེད་དུ་སྦྱོར་ཚུལ་གཙོ་བོར་སྟོན་ཅིང་། དེ་ལས་ལྷག་པའི་རྒྱུད་སྡེ་གཞན་མེད་པ་ཞིག་ལ་ཟེར། རྒྱས་པར་རྗེ་ཙོང་ཁ་པའི་སྔགས་རིམ་ཆེན་མོ་དང་། ཀོང་སྤྲུལ་རིན་པོ་ཆེའི་ཤེས་བྱ་ཀུན་ཁྱབ་རྩ་འགྲེལ་སོགས་ལ་གཟིགས་པར་བྱའོ། །

གསུང་འབུམ།

གསུང་འབུམ་ནི། ས་དགེ་ཀར་རྙིང་སོགས་ཀྱི་མཁས་པ་དག་གིས་སྐུ་ཚེ་གང་བོར་བརྩམས་གནང་མཛད་པའི་གསུང་རྩོམ་ཕྱོགས་སྒྲིག་ལ་ཟེར་ལ། བརྗོད་བྱ་ལ་མདོ་སྔགས་རིག་གནས་སྤྱི་དང་། བསྟོད་ཚོགས། འདོན་ཆོག་སྣ་ཚོགས་ཡོད། དུམ་གྲངས་མང་བ་ལ། དཔེར་ན། བོ་དོང་ཕྱོགས་ལས་རྣམ་རྒྱལ་ལ་པོད་བརྒྱ་རྩ་དང་། ཉུང་བ་ལ་པོ་ཏི་གཅིག་ལས་མེད་པའང་ཡོད། དགེ་ལུགས་པར་མཚོན་ན། དགེ་ལུགས་པའི་གསུང་འབུམ་དཀར་ཆག་ལས། མཁས་དབང་ཉིས་བརྒྱ་ཉེར་གཉིས་ཀྱི་མཚན་བྱང་དང་། སོ་སོའི་ཕྱག་དཔེའི་དཀར་ཆག་ཀྱང་ཞིབ་རྒྱས་སུ་བཀོད་ཡོད།

གཉིས་པ། གྲུབ་མཐའ་ཆེ་ཁག་འགའ་ངོ་སྤྲོད།
བོན་གྱི་གྲུབ་མཐའ།

 ༡ སྤྱིར་གྲུབ་མཐའ་ཞེས་པ་ནི། ལུང་རིགས་གང་རུང་ལ་བརྟེན་ནས་རྣམ་རྟོག་གི་སྒྲོ་བཏགས་པའི་ཆ་གཞན་བཀག་སྟེ། རང་གི་བློ་ངོར་ཡང་དག་པར་འཐད་པའི་དོན་དེ་ཉིད་གྲུབ་པའམ་དམ་བཅས་ཏེ་འཛིན་པའི་ཚུལ། དེ་ལས་གཞན་དུ་མེད་དོ་སྙམ་ནས་ཐག་བཅད་པའི་ཆ་དེར་གྲུབ་མཐའ་ཞེས་བྱ་ལ། ཐག་བཅད་པ་དེ་གཞན་ལ་སྨྲ་བས་ན་གྲུབ་མཐའ་སྨྲ་བ་ཟེར། འདིར་བོད་ཀྱི་གྲུབ་མཐའ་ཁག་གཅིག་ངོ་སྤྲོད་རགས་རིམ་བཤད་པ་ལ།

༢ བོན་གྱི་གྲུབ་མཐའི་སྲོལ་འབྱེད་སྟོན་པ་གཤེན་རབ་མི་བོ་ཆེ་ནི། སྟག་གཟིག་འོལ་མོ་ལུང་རིང་ནས། ཡབ་རྒྱལ་བོ་ཐོད་དཀར་དང་ཡུམ་ཡོ་ཕྱི་རྒྱལ་བཞད་གཉིས་ཀྱི་སྲས་སུ﹙ལོ་རྒྱུས་ཁ་ཅིག་ཏུ་སྤྱི་ལོ་སྔོན་གྱི་དྲུག་བརྒྱ་ཡས་མས་སུ་འཁྲུངས་པར་བཞེད།﹚འཁྲུངས་ཤིང་། སྐྱེད་བསྲིངས་ནས་གཙུག་ལག་ལ་མཁས་པར་གྱུར་ཏེ་འགྲོ་དོན་མང་དུ་མཛད། ཧོས་ཟ་རྒྱལ་མོད་སོགས་ཁབ་ཏུ་བཞེས་ཤིང་། གཏོ་བུ་འབུམ་སངས་སོགས་སྲས་མང་དུ་འཁྲུངས། ཕྱིས་མཆོད་རྟེན་རྣམ་དག་དཀར་བོའི་དྲུང་ནས་རབ་ཏུ་བྱུང་ཞིང་། བྱ་སྤྲེལ་མི་གསུམ་གྱི་འཚོ་བ་ཆ་ཤས་ཙམ་ལ་བརྟེན་ནས་དཀའ་ཐུབ་ལོ་དགུར་སྤྱད་དེ་བདུད་བཞི་བཅོམ་ནས་སངས་རྒྱས་པའི་ཚུལ་བསྟན། སྡིག་ཅན་མི་དགུ་སོགས་འགྲོ་བ་བགྲང་ལས་འདས་པ་ཐར་ལམ་ལ་བཀོད་ཅིང་། ཆོ་འཕྲུལ་མང་དུ་བསྟན་ནས་ལོག་སྒྲུབ་བྱས་པ་རེ་རེ་ནས་ཚར་བཅད། འདུལ་བ་ཕོ་གླིང་དང་མོ་གླིང་གཉིས་སུ་ཕྱེས་ནས་དགོན་སྡེ་མཛད། བོན་སྡེ་བརྒྱད་ཁྲི་བཞི་སྟོང་མཐའ་དག་དོན་ཐིག་ལེ་ཉག་གཅིག་ཏུ་བསྡུས་ཏེ། བོན་གྱི་འཁོར་ལོ་རྒྱ་ཆེར་བསྐོར། སྡུད་འཁོར་བཅུ་གསུམ་ལ་བཀའ་ཐམས་ཅད་མདོ་སྡེ་དང་འབུམ་སྡེ། རྒྱུད་སྡེ་དང་མཛོད་སྡེ་བཞི་རུ་བསྡུས་ཏེ་གཉེར་གཏད་མཛད། མཐར་མྱ་ངན་ལས་འདས་ཏེ་ཡེ་ཤེས་ཀྱི་མེ་རང་འབར་གྱིས་ཞུགས་ལ་སྦྱངས་དུས། ཐུགས་ལྗགས་སྤྱན་གསུམ་ལ་ལྷ་སྐུའི་སྣང་བརྙན་མང་དུ་བབས། ཚེམས་ལ་དུང་དཀར་གཡས་འཁྱིལ་བྱུང་བ་ད་ལྟ་འང་མཇལ་རྒྱུ་ཡོད།

༣ ལྟ་སྒོམ་སྤྱོད་གསུམ་ནི། བོན་གྱི་བསྟན་པ་འདི་བོད་ཀྱི་གདོད་མའི་ཆོས་ལུགས་ཡིན་ལ། དེ་ལ་གཡུང་དྲུང་བོན་ཞེས་གྲགས་པའང་། གཡུང་དྲུང་གི་རྟགས་འདི་བོན་བསྟན་གྱི་མཚོན་བྱེད་དེ། རྟག་བརྟན་མི་འགྱུར་བའི་དོན་ཡིན། སྤྱིར་བོན་གྱི་བསྟན་པ་ལ་ཕྱི་ནང་གསང་གསུམ་གྱི་དབྱེ་བ་ཡོད་དེ། གཤེན་རབ་མི་བོ་ཆེའི་ཡར་སྔོན་དུ་བོན་སྐུའི་སྟོན་པ་ཀུན་ཏུ་བཟང་བོས་གྲོལ་ལམ་རྫོགས་ཆེན་གྱི་བསྟན་པ་སྤེལ་བ་ལ་གསང་རྒྱུད་དང་། ལོངས་སྐུའི་སྟོན་པ་གཤེན་ལྷ་འོད་དཀར་གྱིས་གསང་སྔགས་ཀྱི་བསྟན་པ་སྤེལ་བ་ལ་རྒྱུད། ཕྱིས་སུ་སྤྲུལ་སྐུའི་སྟོན་པ་གཤེན་རབ་མི་བོ་ཆེས་སྤེལ་བ་ལ་མདོ་ཕྱོགས་ཀྱིས་གཙོས་པའི་བསྟན་པ་ལ་ཕྱི་རྒྱུད་ཟེར། གཤེན་རབ་ཀྱི་མདོ་ལས། ལྟ་བ་ནི་ཡས་ཕུབ་ཅིག སྤྱོད་པ་ནི་མས་འཛེགས་ཤིག གཞི་སྙིང་རྗེ་ཆེན་པོ་ལ་ལོངས་ཤིག ཐབས་ཕ་རོལ་ཕྱིན་དྲུག་ལ་སྤྱོད་ཅིག ཅེས་གསུངས་པ་ལྟར། ལྟ་བ་ནི། གདུལ་བྱའི་བློ་ཁ་དང་བསྟུན་ཏེ། མདོ་ལུགས་ལ་གྲུབ་མཐའ་གོང་འོག་གཉིས་དང་། སྔགས་ལུགས་ལ་རྒྱུད་སྡེ་གོང་འོག་གི་རིམ་པ་བྱུང་བས། འོག་མ་ལའང་ནང་གསེས་གཉིས་ཏེ། གཤེན་རབ་རྣམ་རྩོད་དང་། རང་རྟོགས་གཤེན་རབ་གཉིས། གོང་མ་ལའང་གཉིས་ཏེ། ཐུགས་རྗེ་སེམས་དཔའ་སེམས་ཙམ་པ་དང་། གཡུང་དྲུང་སེམས་དཔའ་སྤྲོས་མེད་དོ། །སྤྲོས་མེད་པ་ནི་དབུ་མ་བ་སྟེ་ཆེས་མཐོ་བའི་ལྟ་བ་ཡིན་པར་བཞེད། དེ་གཏན་འབེབས་ཀྱི་གཞུང་ལའང་འབུམ་ཤེར་ཕྱིན་དང་། ཁམས་ཆེན་སྟོང་ཕྲག་བརྒྱ་བ་སོགས་འབུམ་སྡེ་ཇི་སྙེད་ཅིག་གསུངས་ཡོད། སྒོམ་པ་ནི། གཞི་སྙིང་རྗེ་ཆེན་པོས་ཀུན་ནས་བསླངས་ཏེ་ཚོགས་བསགས་པ་དང་འབྲེལ། བདག་མེད་རྟོགས་པའི་ངེས་ཤེས་དེའི་རྒྱུན་བསྐྱངས་ནས་བསྒོམས་པས་མངོན་པར་འཚང་རྒྱ་བ་དེ་ཡིན། སྤྱོད་པ་ནི། དེ་དག་མཐར་ཕྱིན་པའི་ཆེད་དུ། གཞི་སེམས་བསྐྱེད་ཀྱིས་བཟུང་། ཐབས་ཕར་ཕྱིན་བཅུ་ལ་སློབ་དགོས་ཤིང་། དེ་ཡང་སྡོམ་པ་འོག་མ་ལ་བརྟེན་ཏེ་གོང་མ་གོང་མར་སློབ་པ་དེ་ལ་རྒྱལ་སྲས་བྱང་ཆུབ་སེམས་དཔའི་སྤྱོད་པ་རླབས་ཆེན་ཞེས་བརྗོད་ལ། སྤྱོད་པ་མས་འཛེགས་ཞེས་པས་དོན་ཡང་དེ་ཡིན་ནོ། །སྔགས་ལྟར་ན་ལྟ་སྒོམ་སྤྱོད་གསུམ་ནི། གང་ཟག་དབང་བོ་རབ་འབྲིང་གི་ཁྱད་པར་གྱིས་རྒྱུད་སྡེ་བཞི་ཡོད་པ་རེ་རེ་ལ་ལྟ་སྒོམ་སྤྱོད་པ་དམ་ཚིག་གི་འབྲས་བུ་སོགས་ཀྱིས་ཁྱད་པར་ཡོད་དོ། །

རྙིང་མ་བ།

༡ རྙིང་མའི་ཆོས་རྒྱུན་བརྒྱུད་ཚུལ། རྙིང་མའི་ཆོས་ལུགས་ནི། བོད་དུ་ནང་བའི་གསང་སྔགས་ཀྱི་ཆོས་བྱུང་བའི་ཐོག་མ་ཡིན་ལ། མདོ་ཕྱོགས་ལ་རྙིང་མ་ཞེས་པའི་ཐ་སྙད་འདི་མ་བྱུང་ལ། གསང་སྔགས་ཀྱི་སྒོ་ནས་བཞག་པ་ཡིན། དེ་ཡང་བཤད་སྲོལ་མི་འདྲ་བ་ཡོད་ཀྱང་གཙིགས་ཆེ་བ་ནི། པཎྚི་ཏ་སྨྲི་ཏི་བྱོན་པ་ཡན་ཆད་དུ་བསྒྱུར་བའི་གསང་སྔགས་ཀྱི་གཞུང་རྣམས་ལ་རྙིང་མ་དང་། མངའ་རིས་ལོ་ཙཱ་བ་རིན་ཆེན་བཟང་བོ་བྱོན་པ་མན་ཆད་དུ་བསྒྱུར་བའི་རྒྱུད་རྣམས་ལ་སྔགས་གསར་མ་ཟེར། བརྒྱུད་པའི་རིམ་པ་ལ། རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་གསུམ་དང་། ཡང་། བཀའ་བབས་ལུང་བསྟན་གྱི་བརྒྱུད་པ། ལས་འཕྲོ་གཏེར་གྱི་བརྒྱུད་པ། སྨོན་ལམ་གཏད་རྒྱའི་བརྒྱུད་པ་སྟེ་དྲུག་ཏུ་འང་བཤད་ཀྱང་། འདིར་བརྗོད་པར་བྱ་བ་ནི། རིང་བརྒྱུད་བཀའ་མ། ཉེར་བརྒྱུད་གཏེར་མ། ཟབ་མོ་དག་སྣང་གི་བརྒྱུད་པ་སྟེ་གསུམ་གྱི་སྒོ་ནས་འཆད་ན།

རིང་བརྒྱུད་བཀའ་མ་བྱུང་ཚུལ་ནི། པཎ་ཆེན་བི་མ་ལ་མི་ཏྲས་རྨ་རིན་ཆེན་མཆོག་དང་། གཉགས་ཛཉ་ན་ཀུ་མ་ར་གཉིས་ལ་སྒྱུ་འཕྲུལ་གསང་བ་སྙིང་བོའི་སྐོར་བཤད་ཅིང་བསྒྱུར་བས། སློབ་མ་དེ་གཉིས་ལས་ཡང་སློབ་མང་བོ་བརྒྱུད་དེ་སྤེལ་བ་དང་། ཡང་སློབ་དཔོན་དྷ་ན་རཀྵ་རས་བལ་བོ་དྷ་རྨ་བྷོ་དྷི་ལ་རྩ་རྒྱུད་དང་། བཤད་རྒྱུད་སོགས་བཤད། བྲུ་ཤའི་ཡུལ་དུ་ཁྲོམ་རུམ་ཆེ་བཙན་སྐྱེས་ལ་བཤད་ཅིང་བསྒྱུར། དེ་ནས་རིམ་པར་འཕེལ་བ་ཡིན།

 ཉེ་བརྒྱུད་གཏེར་མ་ནི། བསོད་ནམས་ཐམས་ཅད་སྡུད་པ་ཏིང་ངེ་འཛིན་གྱི་མདོ་ལས། དྲི་མ་མེད་པའི་གཟི་བརྗིད། ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་གཏེར། རི་དང་རི་སུལ་དང་ཤིང་གི་ནང་ན་བཅུག་པ་དག་ཡོད་དེ། གཟུངས་དང་ཆོས་ཀྱི་སྒོ་མཐའ་ཡས་པ་ལྒིགས་བམ་དུ་བྱས་པ་དག་ཀྱང་ལག་ཏུ་འོང་བར་འགྱུར་རོ། །ཞེས་པ་ལྟར། སློབ་དཔོན་པདྨ་འབྱུང་གནས་ལ་སོགས་པ་ཚད་མའི་སྐྱེས་བུ་འགའ་ཟུང་གིས་འབྱུང་འགྱུར་གྱི་གདུལ་བྱར་མཆོག་ཐུན་གྱི་དངོས་གྲུབ་འགྲུབ་པའི་མན་ངག་མང་བོ་རི་བྲག་སོགས་ལ་གཏེར་དུ་སྦས། གཏེར་དེ་ནམ་འདོན་དང་། འདོན་པ་པོའི་མིང་རུས་དང་འཁྲུངས་གཞིས། ལུས་ཀྱི་རྟགས་མཚན་སོགས་ཆ་ཚང་གཏེར་གྱི་ཁ་བྱང་བཏབ། ཕྱིས་སུ་གནས་དུས་གང་ཟག་འཛོམས་པ་ན་གཏེར་དེ་བཏོན་ནས་དར་སྤེལ་བཏང་བ་ལ་གཏེར་ཆོས་སུ་གྲགས། ﹙གྲུབ་མཐའ་གཞན་ལའང་གཏེར་ཆོས་རེ་གཉིས་སྲིད་ཀྱང་མང་ཆེ་ཤས་རྙིང་མའི་ཆོས་ལ་ཡོད།﹚གཏེར་སྟོན་པའང་དངོས་རྫུས་ཅི་རིགས་ཡོད་ཀྱང་། སློབ་དཔོན་པདྨས་ལུང་གིས་ཟིན་མ་ཟིན་བསྡོམས་གཏེར་སྟོན་ཚད་ལྡན། རྒྱལ་དབང་ལྔ་བའི་བྱང་བདག་རིག་འཛིན་ངག་གི་དབང་བོའི་རྣམ་ཐར་ལས། གཏེར་སྟོན་བརྒྱ་དང་བཅུ་བདུན་གྱི་མཚན་ཙམ་གསལ། གཏེར་སྟོན་བརྒྱ་རྩའི་གཏེར་ཆོས་རགས་བསྡུས་རིན་ཆེན་གཏེར་མཛོད་སོགས་སུ་གསལ།

ཟབ་མོ་དག་སྣང་གི་བརྒྱུད་པ་ནི། བླ་མ་འགའ་ཞིག་ལ་ཡི་དམ་གྱི་ལྷ་ཞལ་གཟིགས་ནས་དངོས་སུ་གསུངས་པའི་མན་ངག་གི་སྐོར་ལ་ཟེར།

 ༢ རྙིང་མའི་ལྟ་སྒོམ་སྤྱོད་གསུམ་སོགས། ལྟ་བ་ཀློང་ཆེན་རབ་འབྱམས་ཡིན་གསུངས་པ་སྟེ། དེ་ཡང་དབྱིངས་སྤྲོས་བྲལ་ཀྱི་ཆོས་བདེ་གཤེགས་སྙིང་བོ་ཀློང་ཆེན་པོ་ན། འཁོར་འདས་ཀྱི་སྣང་བ་ཇི་སྙེད་པ་ཐམས་ཅད་ཆོས་ཉིད་མཉམ་པ་ཉིད་དུ་རྫོགས་པའི་དོན་ཤེས་པའོ། །

སྒོམ་པ་མཁྱེན་བརྩེ་འོད་ཟེར་ཡིན་གསུངས་ཏེ། དེ་ལྟ་བུའི་ལྟ་བ་སྤྲོས་བྲལ་གྱི་རང་བཞིན་མཁྱེན་ཆ་ཤེས་རབ་ལྷག་མཐོང་གིས་གཏན་ལ་འབེབས་ཞིང་། སྟོང་ཉིད་དེ་ཡང་སྙིང་རྗེ་བརྩེ་བ་ཆེན་པོའི་ཞི་གནས་ཀྱི་ཐབས་དང་མ་བྲལ་བར་རྩེ་གཅིག་ཏུ་མཉམ་པར་འཇོག་པ་སྟེ། སྟོང་ཉིད་སྙིང་རྗེ་དང་འབྲེལ་བ་ནི་སྒོམ་པའོ། །སྤྱོད་པ་རྒྱལ་བའི་མྱུ་གུ་ཡིན་གསུངས་པ་སྟེ། དེ་ལྟ་བུའི་ལྟ་སྒོམ་དང་ལྡན་པའི་ངང་ནས་རྒྱལ་བའི་མྱུ་གུ་བྱང་ཆུབ་སེམས་དཔའ་རྣམས་ཀྱི་ཚུལ་དང་མཐུན་པའི་ཕར་ཕྱིན་དྲུག་ཉམས་སུ་ལེན་པས་སོ། །

གཞན་ཡང་། རྙིང་ཆོས་ཀྱི་སྙིང་བོར་གྱུར་བ་ནི། མན་ངག་རྫོགས་པ་ཆེན་པོ་ཞེས་གྲགས་པ་སྟེ། དེའི་སྒྲ་བཤད་ཀྱང་། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རིག་པ་སྟོང་བ་འདིའི་ནང་དུ་རྫོགས་པས་ན་རྫོགས་པ་དང་། དེ་ལས་ལྷག་པའི་འཁོར་བ་ལས་གྲོལ་བའི་ཐབས་གཞན་མཆོག་ཏུ་གྱུར་བ་མེད་པས་ན་ཆེན་པོ་བྱ་ལ། དེ་ལ་ནང་གསེས་ཀྱིས་སེམས་སྡེ། ཀློང་སྡེ། མན་ངག་གི་སྡེ་གསུམ་ལས། སེམས་སྡེ་ནི་ཅིར་སྣང་སེམས་ཡིན་ལ། སེམས་ཉིད་རང་བྱུང་གི་ཡེ་ཤེས་སུ་ཤར་བས་རང་བྱུང་གི་ཡེ་ཤེས་ལས་གཞན་དུ་གྱུར་བ་མེད་པ་དང་། ཀློང་སྡེ་ནི་ཆོས་ཉིད་ཀུན་ཏུ་བཟང་བོའི་ཀློང་ནས་འགྲོ་ས་གཞན་མེད་ཆོས་ཉིད་ཀྱི་ཀློང་ལས་གཞན་བྱུང་འགོག་པ་ཡིན། མན་ངག་གི་སྡེ་ནི། སྤང་བླང་བྲལ་བ་ཟུང་འཇུག་གཉིས་སུ་མེད་པའི་ཡེ་ཤེས་ཀྱིས་འཁོར་འདས་ཀྱི་ཆོས་ཐམས་ཅད་ཆོས་ཉིད་སྟོང་འཛིན་དང་བྲལ་བའི་ངང་དུ་སྐྱེལ་བའི་གནད་ཀྱིས་འཁོར་འདས་གང་དུའང་མ་ཕྱེ་བའི་རིག་པ་ཉིད་ཆོས་ཉིད་ཀྱི་ཡུལ་མངོན་སུམ་དུ་ཤར་ནས། རང་རིག་ལུ་གུ་རྒྱུད་ཀྱི་སྐུར་སྨིན་ཅིང་གྲོལ་བར་བྱེད་པའོ། །

བཀའ་གདམས་པ།

༡ བཀའ་གདམས་པའི་ཆོས་རྒྱུན་བརྒྱུད་ཚུལ། དེ་ཡང་བཀའ་གདམས་པ་ཞེས་པའི་དོན་གང་ཡིན་ཞེ་ན། སངས་རྒྱས་ཀྱི་བཀའ་སྡེ་སྣོད་གསུམ་དོན་ཐམས་ཅད་མ་ལུས་པར་ཨ་ཏི་ཤའི་གདམས་པ་སྐྱེས་བུ་གསུམ་གྱི་ལམ་རིམ་དུ་བསྡུས་ནས་ཉམས་སུ་ལེན་པས་ན་བཀའ་གདམས་པ་ཟེར། གྲུབ་མཐའ་འདི་ཇོ་བོ་རྗེ་ཨ་ཏི་ཤ་ནས་དབུ་བརྙེས་ཤིང་། འབྲོམ་སྟོན་གྱིས་སྲོལ་ཕྱེས། སྐུ་མཆེད་གསུམ་གྱིས་དར་ཞིང་རྒྱས་པར་མཛད། གླང་ཤར་གཉིས་དང་བྱ་ཡུལ་བ་སོགས་ཀྱིས་དེ་ལས་ཀྱང་རྒྱས་པར་མཛད་པ་ཡིན། དེ་ཡང་། ཡོངས་གྲགས་སུ་བཀའ་གདམས་བརྒྱུད་པ་གསུམ་སྟེ། དགེ་བཤེས་པོ་ཏོ་བ་ནས་ཤ་ར་བ་ལ་བརྒྱུད་པ་ནས་ལོ་ཙཱ་བ་ཆེན་པོ་སྐྱབས་མཆོག་དཔལ་བཟང་བོ་བར་དུ་བརྒྱུད་པའི་བཀའ་གདམས་གཞུང་བ་བ་དང་། དགེ་བཤེས་སྤྱན་སྔ་བ་ནས་དགེ་བཤེས་བྱ་ཡུལ་བ་ལ་བརྒྱུད་པ་ནས་ལྷོ་བྲག་མཁན་ཆེན་ནམ་མཁའ་རྒྱལ་མཚན་བར་བརྒྱུད་པའི་བཀའ་གདམས་མན་ངག་པ། དགེ་བཤེས་དགོན་པ་བ་ནས་དགེ་བཤེས་སྣེ་ཟུར་བ་ལ་བརྒྱུད་པ་ནས་ལྷོ་བྲག་མཁན་ཆེན་ནམ་མཁའ་རྒྱལ་མཚན་བར་བརྒྱུད་པ་ལ་བཀའ་གདམས་ལམ་རིམ་པ་སྟེ། བརྒྱུད་པ་དེ་གསུམ་ཀ་ཆུ་བོ་སུམ་འདྲེས་ཀྱི་ཚུལ་དུ་རྗེ་བླ་མ་ཙོང་ཁ་པར་མངའ་བ་ཡིན་ནོ། །

༢ བཀའ་གདམས་པའི་བསྟན་པའི་སྤྱི་བབ། འབྲོམ་སྟོན་གྱིས། ངོ་མཚར་བཀའ་ནི་སྡེ་སྣོད་གསུམ་ཡིན་ཏེ། །གདམས་པ་སྐྱེས་བུ་གསུམ་གྱིས་མཛེས་པ་ཡིས། །བཀའ་གདམས་རིན་ཆེན་གསེར་གྱི་ཕྲེང་བ་ལ། །འགྲོ་བ་གང་གིས་བགྲང་ཀྱང་དོན་ཡོད་འགྱུར། །ཞེས་གསུངས་པ་ལྟར། དེ་ལ་རྒྱབ་རྟེན་གྱི་གཞུང་དང་། ལག་ལེན་གྱི་མན་ངག་གཉིས་ཡོད་ཅིང་། གཞུང་དེ་ལའང་ནང་གསེས་ཀྱིས་གསུམ་དུ་དབྱེ་སྟེ། ལྟ་བ་དང་། སྤྱོད་པ། ལྟ་སྤྱོད་གཉིས་ཀ་གཙོ་བོ་སྟོན་པའོ། །ལྟ་བ་གཙོ་བོར་སྟོན་པའི་གཞུང་ནི། ཇོ་བོ་རྗེས་མཛད་པའི་བདེན་གཉིས་ལ་འཇུག་པ་དང་། དབུ་མའི་མན་ངག་སོགས་ཡོད། སྤྱོད་པ་གཙོར་སྟོན་ནི། ཇོ་བོས་མཛད་པའི་སྤྱོད་བསྡུས་སྒྲོན་མེ། སེམས་བསྐྱེད་སྡོམ་པའི་ཆོ་ག་སོགས་ཡོད། ལྟ་སྤྱོད་ཟུང་འབྲེལ་དུ་སྟོན་པ་ནི། བྱང་ཆུབ་ལམ་སྒྲོན་ཡིན། གཞན་ཡང་། ཀླུ་སྒྲུབ་ཀྱིས་མཛད་པའི་རྩ་ཤེས། སྟོང་ཉིད་བདུན་ཅུ་བ། རིན་ཆེན་ཕྲེང་བ་རྣམས་ལྟ་བ་གཙོར་སྟོན་གྱི་གཞུང་དང་། བཀའ་གདམས་གཞུང་དྲུག་ཏུ་གྲགས་པ་ལས། ས་རྒྱན་གཉིས། སྐྱེས་ཚོམས་གཉིས་ཏེ་བཞི་ནི། སྤྱོད་པ་གཙོར་སྟོན་གྱི་གཞུང་དང་། བསླབ་སྤྱོད་གཉིས་ལྟ་སྤྱོད་ཟུང་འབྲེལ་དུ་སྟོན་པའི་གཞུང་ཡིན།

མན་ངག་ལ་འང་། ལྟ་བ། སྤྱོད་པ། ལྟ་སྤྱོད་ཟུང་འབྲེལ་སྟོན་པ་སྟེ་གསུམ་ཡོད། ལྟ་བ་གཙོར་སྟོན་ནི། ཇོ་བོ་རྗེའི་མན་ངག་སྤྱན་སྔ་བ་ནས་བརྒྱུད་པའི་བདེན་བཞིའི་ཁྲིད་དང་། ཕུ་ཆུང་བ་ནས་བརྒྱུད་པའི་རྟེན་འབྲེལ་གྱི་ཁྲིད། ཨ་མེས་བྱང་ཆུབ་རིན་ཆེན་ནས་བརྒྱུད་པའི་བདེན་གཉིས་ཀྱི་ཁྲིད་རྣམས་ཡིན་ཞིང་། བདེན་བཞི་དང་རྟེན་འབྲེལ་གྱི་ཁྲིད་ཀྱིས་ཐེག་པ་ཐུན་མོང་བའི་གང་ཟག་གི་བདག་མེད་དང་། བདེན་གཉིས་ཀྱི་ཁྲིད་ལ་བརྟེན་ནས་ཤིན་ཏུ་ཕྲ་བའི་ཆོས་ཀྱི་བདག་མེད་ལ་ཁྲིད་པ་ཡིན།

 སྤྱོད་པ་གཙོར་སྟོན་ནི། ཐེག་ཆེན་བློ་སྦྱོང་གི་གདམས་པ་རྣམས་ཡིན་ཞིང་། དེའི་ཁུངས་ནི་ཐེག་ཆེན་གྱི་མདོ་སྡེ་སྤྱི་དང་། ལྷག་པར་དུ་ཕལ་ཆེན། དབུ་མ་རིན་ཕྲེང། བསླབ་སྤྱོད་སོགས་ཡིན་ཞིང་། དེ་དག་ལག་ལེན་གྱི་སྙིང་བོ་དྲིལ་བ་ནི། བློ་སྦྱོང་མཚོན་ཆའི་འཁོར་ལོ་དང་། རྨ་བྱ་དུག་འཇོམས། དོན་བདུན་མ། ཚིགས་བརྒྱད་མ། ཐུན་བརྒྱད་མ། བེའུ་བུམ་ཁྲ་བོ། ཁ་རག་སྐོར་གསུམ་སོགས་ཡིན།

ལྟ་སྤྱོད་ཟུང་འབྲེལ་དུ་སྟོན་པ། བྱང་ཆུབ་ལམ་སྒྲོན། བསྟན་རིམ་སོགས་རྒྱས་བསྡུས་སྣ་ཚོགས་ཡོད།

ཡང་། ཡོངས་གྲགས་སུ་བཀའ་གདམས་གདམས་ངག་པ་ནི། མན་ངག་པ་དང་མི་འགལ་ལ། དེ་ཡང་ཇོ་བོ་རྗེ་ཨ་ཏི་ཤ་དང་འབྲོམ་སྟོན་རྣམ་གཉིས་ནས་དགེ་བཤེས་སྤྱན་སྔ་ཚུལ་ཁྲིམས་འབར་ལ་བརྒྱུད་པ་སྟེ། གཞུང་བཤད་རྒྱ་ཆེར་མ་སྤྲོས་པར། ཨ་ཏི་ཤའི་མཛད་པའི་རྟེན་འབྲེལ་དང་། བདེན་གཉིས་ཀྱི་ཁྲིད་ལ་བརྟེན་ནས་སློབ་མ་སྐྱོང་བར་མཛད་པས། མཚན་དེ་ལྟར་ཐོགས་པ་ཡིན།

འོ་ན། བཀའ་གདམས་པར་སྔགས་ཀྱི་ཉམས་ལེན་མེད་པར་མི་སེམས་ཏེ། ཐུབ་པ་དམ་ཚིག་གསུམ་བཀོད་དང། མི་གཡོ་བའི་སྐོར་དང་། སྨྱུང་བར་གནས་པ་སོགས་དེ་རྒྱས་ཆེ་ཞིང། དངོས་ཚོད་ལའང་འབྲོམ་སྟོན་ལ་རྒྱུད་སྡེ་བཞིའི་མན་ངག་ཆ་ཚང་དང་། ཁྱད་པར་ཕ་རྒྱུད་གསང་བ་འདུས་པ། མ་རྒྱུད་འཁོར་ལོ་བདེ་མཆོག་སོགས་གསང་ཚུལ་གྱིས་གནང་ཡོད་པས། འབྲོམ་སྟོན་བསྟན་པ་ཡོངས་ཀྱི་མངའ་བདག་ཏུ་གྱུར་བ་དང་། ལམ་སྒྲོན་ལའང་མདོ་སྔགས་ཡོངས་སུ་རྫོགས་པ་སྟེ། ལམ་རིམ་ལས། མདོ་སྔགས་གཉིས་ཀའི་གནད་བསྡུས་ནས་སྟོན་པས་བརྗོད་བྱ་ཡོངས་སུ་རྫོགས་པ་ཞེས་ཁྱད་ཆོས་སུ་གསུངས་སོ། །

བཀའ་བརྒྱུད་པ།

༡ བཀའ་བརྒྱུད་པའི་ཆོས་རྒྱུན་བརྒྱུད་ཚུལ། དེ་ཡང་བཀའ་བརྒྱུད་པ་ཞེས་པ་ནི། སངས་རྒྱས་ཀྱི་བཀའ་སྡེ་སྣོད་གསུམ་དང་རྒྱུད་སྡེ་བཞིའི་དགོངས་པ་བཤད་སྒྲུབ་ཟུང་གིས་འཛིན་པས་ན། བཀའ་བརྒྱུད་པ་ཞེས་པ་ཐུན་མོང་ལྟར་དང་། ཡང་ན། རྒྱལ་བ་རྡོ་རྗེ་འཆང་གི་བཀའ་བབས་ཀྱི་ཆུ་བོ་ཆེན་པོ་བཞིའི་མཛོད་དུ་གྱུར་བའི་ཏེ་ལོ་བའི་ཆོས་རྒྱུན་འཛིན་པས་ན། བཀའ་བརྒྱུད་པ་ཞེས་ཐུན་མོང་མ་ཡིན་པ་ལྟར་རོ། །གྲུབ་མཐའ་འདི་གྲུབ་ཆེན་ཏེ་ལོ་བར། རྒྱལ་བ་རྡོ་རྗེ་འཆང་ནས་བརྒྱུད་པའི་བཀའ་བབས་ཀྱི་གདམས་པ་བཞི་མངའ་བ་སྟེ། རྒྱལ་བ་རྡོ་རྗེ་འཆང་ནས་ནཱ་རོ་ཆོས་དྲུག་གི་སྒྱུ་ལུས་དང་འཕོ་བའི་བཀའ་བབས། རྒྱལ་བ་རྡོ་རྗེ་འཆང་ནས་ནཱ་རོ་ཆོས་དྲུག་གི་རྨི་ལམ་གྱི་བཀའ་བབས། རྒྱལ་བ་རྡོ་རྗེ་འཆང་ནས་ནཱ་རོ་ཆོས་དྲུག་གི་འོད་གསལ་གྱི་བཀའ་བབས། རྒྱལ་བ་རྡོ་རྗེ་འཆང་ནས་ནཱ་རོ་ཆོས་དྲུག་གི་གཏུམ་མོའི་བཀའ་བབས་ཡིན། བཀའ་བབས་བཞིའི་གདམས་པ་འདི་པཎ་ཆེན་ནཱ་རོ་བ་དང་། མངའ་བདག་མེ་ཏྲི་བ། དཔལ་ཞི་བ་བཟང་བོ། གྲུབ་ཆེན་ཡེ་ཤེས་སྙིང་བོ་བཅས་བླ་མ་གཙོ་བོ་བཞི་དང་། གཞན་ཡང་། པཎྚྀཏ་དང་། གྲུབ་ཐོབ་མཁའ་འགྲོ་མ་སོགས་བླ་མ་བརྒྱ་དང་བདུན་ཅུ་ལྷག་ཙམ་བསྟེན་ནས་བུམ་པ་གང་བྱོའི་ཚུལ་དུ་འཐོབ་པ་ལྷོ་བྲག་མར་བ་ལོ་ཙཱ་བ་ཡིན། མར་བ་ལོ་ཙཱ་བ་བོད་དུ་བྱོན་ནས་བཀའ་བབས་བཞིའི་གདམས་པ་རྣམས་འཆད་སྤེལ་མང་དུ་མཛད་པ་ལས། མན་ངག་དང་། བཤད་རྒྱུད་འཛིན་པའི་སློབ་མ་ཀ་ཆེན་བཞི་སྟེ། མི་ལ་རས་པ། མེས་སྟོན་ཆེན་པོ། རྔོག་ཆོས་སྐུ་རྡོ་རྗེ། མཚུར་སྟོན་དབང་གི་རྡོ་རྗེ་བཅས་བཞི་བྱུང་ཞིང་། ཁྱད་པར་དུ་རྗེ་བཙུན་མི་ལ་རས་པ་དང་དེའི་སློབ་མ་མཉམ་མེད་དྭགས་པོ་ལྷ་རྗེ་ནས་བཀའ་ཕྱག་ཆུ་བོ་གཉིས་འདྲེས་སྒྲུབ་བརྒྱུད་ཀྱི་བསྟན་པ་ཉི་མ་ཤར་བ་ལྟར། འཕེལ་རྒྱས་ཆེན་པོ་བྱུང་བར་བརྟེན། བཀའ་བརྒྱུད་ཆེ་བཞི་ཆུང་བརྒྱད། ཟུར་གཉིས་སོགས་རིམ་བཞིན་བྱུང་བ་སྟེ། བཀའ་བརྒྱུད་ཆེ་བཞི་ནི། ༡ རྗེ་སྒམ་པོ་བའི་དངོས་སློབ་འབའ་རོམ་དར་མ་དབང་ཕྱུག་ལས་བརྒྱུད་པའི་འབའ་རོམ་བཀའ་བརྒྱུད། ༢ དྭགས་པོའི་དངོས་སློབ་ཁམས་པ་མི་གསུམ་ལས་ཕག་གྲུ་རྡོ་རྗེ་རྒྱལ་བོ་བརྒྱུད་པའི་ཕག་གྲུ་བཀའ་བརྒྱུད། ༣ དྭགས་པོའི་ཐུགས་སྲས་ཁམས་པ་དབུ་སེའམ་ཀརྨ་དུས་གསུམ་མཁྱེན་པ་ལས་བརྒྱུད་པའི་ཀམ་ཚང་བཀའ་བརྒྱུད། ༤ དྭགས་པོ་ལྷ་རྗེ་དབོན་པོ་སྒོམ་པ་ཚུལ་ཁྲིམས་སྙིང་བོའི་སློབ་མ་ཞང་ཚལ་བ་འགྲོ་བའི་མགོན་པོ་ལས་བརྒྱུད་པའི་ཚལ་བ་བཀའ་བརྒྱུད་དོ། །

བཀའ་བརྒྱུད་ཆུང་བརྒྱད་ནི། ༡ ཕག་གྲུ་བའི་བུ་ཆེན་རྟེན་འབྲེལ་མཐར་ཕྱིན་སྐྱོབ་པ་འཇིག་རྟེན་མགོན་པོ་ལས་བརྒྱུད་པའི་འབྲི་གུང་བཀའ་བརྒྱུད། ༢ ཕག་གྲུ་བའི་བུ་ཆེན་མོས་གུས་མཐར་ཕྱིན་སྟག་ལུང་ཐང་བ་བཀྲ་ཤིས་དཔལ་ལས་བརྒྱུད་པའི་སྟག་ལུང་བཀའ་བརྒྱུད། ༣ ཕག་གྲུའི་དངོས་སློབ་རྒྱལ་ཚ་རིན་ཆེན་མགོན་དང་དབོན་ཀུན་ལྡན་རས་པ་སྐུ་མཆེད་ལས་བརྒྱུད་པའི་ཁྲོ་ཕུ་བཀའ་བརྒྱུད། ༤ ཕག་གྲུ་བའི་དངོས་སློབ་གླིང་རས་པ་པདྨ་རྡོ་རྗེ་ནས་ཆོས་རྗེ་གཙང་བ་རྒྱ་རས་པ་ལས་བརྒྱུད་པའི་འབྲུག་པ་བཀའ་བརྒྱུད། ༥ ཕག་གྲུའི་ཐུགས་སྲས་སྨར་བ་ཤེས་རབ་ཡེ་ཤེས་ལས་བརྒྱུད་པའི་སྨར་བ་བཀའ་བརྒྱུད། ༦ ཕག་གྲུའི་ཐུགས་སྲས་ཡེལ་བ་ཡེ་ཤེས་བརྩེགས་པ་ལས་བརྒྱུད་པའི་ཡེལ་བ་བཀའ་བརྒྱུད། ༧ ཕག་གྲུའི་བུ་ཆེན་ཟྭ་ར་སྐལ་ལྡན་ཡེ་ཤེས་སེང་གེ་ལས་བརྒྱུད་པའི་གཡའ་བཟང་བཀའ་བརྒྱུད། ༨ ཕག་གྲུའི་སློབ་མ་རོ་གཅིག་རྟོགས་པའི་བུ་ཆེན་གྱེར་སྒོམ་ཚུལ་ཁྲིམས་སེང་གེ་ལས་བརྒྱུད་པའི་ཤུག་གསེབ་བཀའ་བརྒྱུད་དེ་བརྒྱད་དོ། །

ཟུར་གཉིས་བཀའ་བརྒྱུད་ནི། ༡ ཀརྨ་ལྔ་བ་དེ་བཞིན་གཤེགས་པའི་དངོས་སློབ་རྨ་སེ་བློ་གྲོས་རིན་ཆེན་ལས་བརྒྱུད་པའི་ཟུར་མང་བཀའ་བརྒྱུད། ༢ ཞྭ་དམར་དྲུག་པ་གར་དབང་ཆོས་ཀྱི་དབང་ཕྱུག་གི་དངོས་སློབ་མཁས་གྲུབ་ཀརྨ་ཆགས་མེད་ལས་བརྒྱུད་པའི་གནས་མདོ་བཀའ་བརྒྱུད་དོ། །

༢ བཀའ་བརྒྱུད་པའི་ལྟ་སྒོམ་འབྲས་བུའི་རྣམ་བཞག གདམས་ངག་ཕྱག་རྒྱ་ཆེན་པོ་ལ། མདོ་ལུགས་དང་། སྔགས་ལུགས། སྙིང་བོའི་ལུགས་གསུམ་ལས།

དང་བོ་ནི། མར་བའི་གསུང་མགུར་ལས། ཤར་ཆུ་བོ་གང་གཱའི་འགྲམ་དུ་ཕྱིན། །རྗེ་མེ་ཏྲི་ཆེན་པོའི་བཀའ་དྲིན་གྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་བ་ཉིད་ལ་སྤར་ཟིན་བྱས། །དོན་སྤྲོས་བྲལ་གཉུག་མའི་ངོ་བོ་མཐོང་། །སྐུ་གསུམ་མ་དང་མངོན་དུ་མཇལ། །མི་ཁོ་བོས་སྤྲོས་པ་དེ་ནས་བཅད། །ཅེས་པ་ལྟར། མདོ་ལུགས་ཀྱི་ཕྱག་རྒྱ་ཆེན་པོ་ནི། གཞི་དངོས་བོའི་གཤིས་ལུགས་འཁོར་འདས་གང་དུ་མ་གྲུབ་ཅིང་སྤྲོས་པ་མཐའ་དག་དང་བྲལ་བས། སྨྲ་བསམ་བརྗོད་ཡུལ་ལས་འདས་པ་འཁྲུལ་གྲོལ་རང་མཚན་གང་དུ་མ་གྲུབ་པས། ནམ་མཁའ་ལྟ་བུའི་སྲིད་ཞི་ཀུན་ཁྱབ་ཀྱི་གནས་ལུགས་ཟབ་གསལ་གཉིས་མེད་དོན་དམ་བདེན་པའི་སྦྱང་གཞི་རྣམ་དག་སེམས་ཀྱི་ངོ་བོ་སྐྱེ་འགག་གནས་གསུམ་དང་བྲལ་བའི་སྐུ་གསུམ་དབྱེར་མེད་གདོད་ནས་ལྷུན་གྱིས་གྲུབ་པའི་གནས་ལུགས་ཀྱི་རང་ངོ་ཤེས་པས། མཚན་མ་བྲལ་བའི་གཞིའི་གནས་ལུགས་བདེ་གཤེགས་སྙིང་བོ་ངོས་ཟིན་པ་དང་། སྒོམ་པ་ནི། ཐོག་མར་སྒོམ་པ་མ་སྐྱེས་པ་སྐྱེས་པར་བྱ་བ་ལ། ལམ་རིམ་བློ་ལྡོག་རྣམ་བཞི་དང་སྐྱབས་གསུམ་བསགས་སྦྱངས་བླ་མའི་རྣལ་འབྱོར་ལ་རྟགས་ཐོན་པར་སྦྱངས་ནས། བློ་ཆོས་ལམ་དུ་འགྲོ་བ་དང་། བར་དུ། སྐྱེས་པ་ལམ་དུ་བྱེད་པ་ངོ་སྤྲོད་རྣམ་གསུམ་ནི། ལྷན་སྐྱེས་བསམ་གྱིས་མི་ཁྱབ་པའི་རྒྱུད་ལས། སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །སྣང་སེམས་དབྱེར་མེད་ལྷན་ཅིག་སྐྱེས་ལ་སྦྱོར། །ཞེས་ལྷན་སྐྱེས་གསུམ་གྱི་ངོ་སྤྲོད་པ་ལ། རིམ་པ་བཞིན། ལམ་གྱི་འཁྲུལ་བ་བསལ། རྟོག་ཚོགས་ཆོས་སྐུར་བསྲེ། འཁྲུལ་བ་ཡེ་ཤེས་སུ་འཆར་བར་བྱེད་པའོ། །

འབྲས་བུ་སངས་རྒྱས་མངོན་དུ་འགྱུར་ཚུལ་ནི། གཞིའི་གནས་ལུགས་ལྟ་བའི་དོན་ལ་སྒྲོ་འདོགས་ཆོད་ཅིང་། སེམས་མ་བཅོས་གནས་ལུགས་ཀྱི་སྟེང་རང་བབ་ཏུ་འཇོག་པའི་སྒོམ་པའི་དོན་ཉམས་སུ་མྱོང་། སྟོང་ཉིད་སྙིང་རྗེ་ཟུང་འཇུག་འགག་མེད་ཤུགས་འབྱུང་གི་སྤྱོད་པས་བོགས་བཏོན་ཏེ། རྟོགས་པ་མཐར་ཕྱིན་པའི་འབྲས་བུ་སྟེ། སངས་རྒྱས་སེམས་ལས་རྙེད། སྐུ་གསུམ་རང་ཞལ་མཇལ་བའོ། །

གཉིས་པ་སྔགས་ལུགས་ནི། མདོར་ན། ནཱ་རོ་ཆོས་དྲུག་ཅེས་གཏུམ་མོ་ལམ་གྱི་གཞུང་དང་། སྒྱུ་ལུས་གྱི་བོགས་འདོན། རྨི་ལམ་ལམ་གྱི་ཚོད་འཛིན། འོད་གསལ་ལམ་གྱི་སྙིང་བོ། བར་དོ་ལམ་གྱི་བློ་ཆོད། འཕོ་བ་ལམ་གྱི་སྐྱེལ་མ་སོགས་གདམས་ངག་སྒོམ་པའོ། །

གསུམ་པ་སྙིང་བོའི་ལུགས་ནི། རྟོགས་ལྡན་གྱི་བླ་མས་དབང་རྣོན་གྱི་སྐལ་ལྡན་སློབ་བུ་རྣམས་ལ་ཡེ་ཤེས་ཀྱི་དབང་གིས་བྱིན་རླབས་འབེབས་པ་ཙམ་གྱིས་སྤྲོས་བཅས་ཀྱི་ས་དང། སྦྱངས་པའི་རྩོལ་བ་ལ་མ་ལྟོས་པར། ཐ་མལ་གྱི་ཤེས་པ་སྙིང་དབུས་སུ་སད་ནས་རྟོགས་གྲོལ་དུས་མཉམ་དུ་འགྱུར་བའོ། །

ཞི་བྱེད་པའི་གྲུབ་མཐའ།

༡ དེ་ཡང་ཞི་བྱེད་པ་ནི། ཤེར་ཕྱིན་གྱི་ཉམས་ལེན་ལ་བརྟེན་ཏེ་སྡུག་བསྔལ་ཞི་བར་བྱེད་པའི་ཆ་ནས་བཏགས་པ་ཡིན་ལ། ཆོས་བརྒྱུད་འདིའི་མ་ཁུངས་ནི་ཕ་དམ་པ་སངས་རྒྱས་ཡིན། བི་ཀྲ་མ་ཤི་ལར་མཁན་པོ་དགེ་བའི་ལྷ་ལས་རབ་ཏུ་བྱུང་། བླ་མ་མང་བོ་བསྟེན་ནས་མཁས་གྲུབ་ཀྱི་གོ་འཕང་བརྙེས། བོད་དུ་ཐེངས་ལྔར་ཕེབས་ཤིང་། སློབ་མ་དཔག་ཏུ་མེད་པ་ཞི་བྱེད་ཀྱི་གདམས་པས་སྨིན་པར་མཛད་པ་ལས། གྲགས་ཆེ་བ་ནི། ཞི་བྱེད་སྔ་ཕྱི་བར་གསུམ་སྟེ། སྔ་མ་ཁ་ཆེ་ཉྫ་ན་གུ་ཧ་ལ། དེ་ཨོང་པོ་ལོ་ཙཱ་བས་བསྒྱུར་བ། ཞི་བྱེད་སྒྲོན་མ་སྐོར་གསུམ་དང་། གཤིན་རྗེ་གཤེད་ལ་སོགས་པའི་སྒྲུབ་ཐབས་དང་། བརྒྱུད་པ་བར་མ་ནི། རྨ་ཆོས་ཀྱི་ཤེས་རབ། སོ་ཆུང་དགེ་འདུན་འབར། སྐམ་ཡེ་ཤེས་རྒྱལ་མཚན་དང་གསུམ་ལ་གདམས་ངག་གནང་ནས་འཕེལ་བ་ལ་ཟེར། བརྒྱུད་པ་ཕྱི་མ་ནི། ཕ་དམ་པ་སངས་རྒྱས་དིང་རི་གླང་སྐོར་དུ་བྱོན། དམ་པ་ཕྱར་ཆེན། ཕྱར་ཆུང་། བཛྲ་ཀྲོ་དྷ། ཀུན་དགའ་བཞི་ལས། ཀུན་དགའ་གཙོ་བོ་སྟེ། སྐུ་ཚེ་ལྔར་དམ་པ་སངས་རྒྱས་ཀྱིས་རྗེས་སུ་བཟུང་། སྐུ་ཚེ་འདིར་དེའི་གདམས་ངག་གི་མཛོད་དུ་གྱུར་བས། སློབ་མ་པ་ཚབ་སྒོམ་པ་དང་། དེ་ནས་རྒྱལ་བ་ཏེ་ནེ། རོག་ཤེས་རབ་སེང་གེ་དང་ཞིག་པོ་ཉི་མ་སེང་གེ་སོགས་བརྒྱུད་དེ་ཞི་བྱེད་དར་རྒྱས་སུ་མཛད་དོ། །ཞི་བྱེད་ཀྱི་ཆོས་ཀྱི་སྙིང་བོར་གྱུར་བ་ནི་ཤེར་མདོ་ལ་གཏུགས་ལ། ཤེར་ཕྱིན་གྱི་བརྒྱུད་པའི་བཀའ་བབས་དྲུག་གི་སྙིང་བོའི་བཅུད་བསྡུས་ནས་ཉམས་སུ་ལེན་པ་ལགས་ལ། ཁྱད་པར་དུ་ཀླུ་སྒྲུབ་ལ་ཚད་མར་མཛད་པ་སྟེ། དིང་རི་བརྒྱད་ཅུ་བར་ཡང་། སྟོང་བའི་ངང་དུ་རིག་པ་མདུང་བསྐོར་བྱ། །ལྟ་བར་ཐོགས་རྡུགས་མེད་དོ་དིང་རི་བ། །ཞེས་ལྟ་བ་མཐའ་བྲལ་དུ་གསུངས་པའི་ཕྱིར་ན་དབུ་མའི་ལྟ་བ་ལས་མ་འདས་སོ། །

 ༢ ཞི་བྱེད་པའི་ཡ་གྱལ་གཅོད་ལུགས། དེ་ཡང་གཅོད་ཅེས་པ་ནི། བྱམས་སྙིང་རྗེ་བྱང་ཆུབ་ཀྱི་སེམས་ཀྱི་སྒོ་ནས་རང་དོན་ཡིད་བྱེད་གཅོད། སྟོང་ཉིད་ཀྱི་ལྟ་བས་འཁོར་རྩ་གཅོད། ཐུན་མོང་གི་བདུད་བཞི་གཅོད་པས་ན། གཅོད་ཅེས་བྱེད་ལས་ཀྱི་ཆ་ནས་བཏགས་པ་དང་། ཡང་ན། རྒྱལ་སྲས་ཀྱི་ཉམས་ལེན་ཐབས་ཤེས་ཀྱི་ལམ་ལ་སྤྱོད་པས་ན་སྤྱོད་ཅེས་ཀྱང་གྲགས་སོ། །

གཅོད་ཀྱི་གདམས་པ་འདི་བརྒྱུད་ཚུལ་ནི། ཕ་དམ་པ་བོད་དུ་ཕེབས་ཐེངས་གསུམ་པར། གཙང་དུ་སྐྱོ་སྟོན་བསོད་ནམས་བླ་མ་དང་། ཡར་ཀླུང་སྨ་ར་སེར་བོ་གཉིས་ལ་གཅོད་ཀྱི་གདམས་པ་གནང་། སྨ་ར་སེར་བོས་རང་གི་ཉེ་གནས་སྨྱོན་པ་སེ་རོང་། དེས་རྩེ་སྟོན་དང་སུམ་སྟོན་གཉིས་ལ། རྩེ་སྟོན་གྱིས་གཉན་སྟོན། སུམ་སྟོན་གྱིས་སྐལ་ལྡན་སྲས་མོ། དེས་གཙང་སྟོན། དེས་གཉན་སྟོན་སོགས་ལ་གནང་བའི་རྒྱུན་ལ་ཕོ་གཅོད་དང་། སྐྱོ་སྟོན་བསོད་ནམས་བླ་མས་ལབ་སྒྲོན་ལ་གནང་བའི་རྒྱུན་ལ་མོ་གཅོད་དུ་གྲགས་སོ། །སྤྱིར་ན། གཅོད་ཀྱི་གདམས་པ་འདི་ལ་རྒྱ་གཅོད་ཆུ་བོ་བཞི་དང་། ཕོ་གཅོད་མོ་གཅོད་ཅེས་ཐ་སྙད་སྦྱོར་ཚུལ་མང་ཡང་། མ་ཅིག་གི་བརྒྱུད་པ་དྲུག་ལྡན་བྱ་བ་འདི་སྟོང་དཀྲུགས་འོ་མའི་མར་ལོ་བཞིན་དྲིལ་ཞིང་། ཁྱད་པར་དུ་འཇམ་དཔལ་གྱི་རྒྱུད་སོགས་ལས། ང་ཡི་བསྟན་པའི་སྙིགས་མ་ལ། །བྱང་ཕྱོགས་ལབ་ཀྱི་གྲོང་ཁྱེར་དུ། །རྒྱལ་བའི་ཡུམ་གྱི་སྤྲུལ་བ་ནི། །སྒྲོན་མའི་མཚན་ཅན་འབྱུང་བར་འགྱུར། །སྐྱེ་མེད་སྙིང་བོའི་དོན་སྟོན་ཅིང་། །གྲོང་དང་གྲོང་ཁྱེར་རི་སུལ་དང་། །དུར་ཁྲོད་བས་མཐའ་ཁྱད་པར་ཉུལ། །དེ་ཡི་ཆོས་ནི་རྒྱས་པར་འགྱུར། །ཞེས་ལུང་གིས་ཟིན་པའི་མ་ཅིག་ལབ་སྒྲོན་འདི་ལ་བུ་སློབ་མང་དུ་ཡོད་ཀྱང་། གཙོ་ཆེ་བའི་དབང་དུ་བཏང་ན། ཐུགས་ཀྱི་སྲས་བོ་བཞི་དང་། སྲས་མོ་བཞི། རང་མཉམ་གྱི་སྲས་བརྒྱད་དེ་བཅུ་དྲུག་སོགས་བྱུང་ནས་ཆོས་རྒྱུན་འདི་རྒྱ་ཆེར་དར་བ་ཡིན་ནོ། །

གཅོད་ཀྱི་གདམས་པའི་ངོ་བོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་སྔགས་དང་མཐུན་པར་སྤྱོད་པ་སྟེ། གདམས་པའི་ཁུངས་ཡུམ་རྒྱས་འབྲིང་བསྡུས་གསུམ་དང་། ལྷག་པར་དུ་སྡུད་པ་ལས། རྒྱུ་རྣམས་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་བར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་བསྟན་ཏོ། །སྔགས་དང་ཇི་ལྟར་རྗེས་སུ་མཐུན་ན། བརྟག་གཉིས་ལས། ཤིང་གཅིག་དང་ནི་དུར་ཁྲོད་དང་། །མ་མོའི་ཁྱིམ་དང་མཚན་མོ་དང་། །ཡང་ན་དབེན་པའི་བས་མཐའ་རུ། །བསྒོམ་པ་བཟང་བར་བརྗོད་པར་བྱ། །ཞེས་པས་ཉམས་སུ་བླངས་པའི་གནས་དང་། ལུས་ཀྱིས་སྦྱིན་པ་སྦྱིན་བྱས་ནས། །ཕྱི་ནས་སྤྱོད་པ་ཡང་དག་སྤྱད། །ཅེས་པས་ཇི་ལྟར་ཉམས་སུ་ལེན་པའི་ཚུལ་དང་། ངེས་པར་སྔོན་དུ་ལྷ་མིན་དང་། །བརྒྱ་བྱིན་ལྟ་བུར་འོངས་ན་ཡང་། །དེ་ལ་འཇིགས་པར་མི་བྱ་སྟེ། །སེང་གེའི་གཟུགས་ཀྱིས་རྣམ་པར་རྒྱུ། །ཞེས་པས་ཉམས་སུ་བླངས་པ་ལ་བརྟེན་ནས་སློང་དང་ཆོད་ཚད་འབྱུང་ཚུལ་བཅས་བསྟན་ཏོ། །

ས་སྐྱ་བ།

ས་སྐྱ་བའི་ཆོས་རྒྱུན་བརྒྱུད་ཚུལ། ས་སྐྱ་བ་ནི་བོད་རབ་བྱུང་དང་བོའི་ཆུ་གླང་༡༠༧༣ ལོར་འཁོན་དཀོན་མཆོག་རྒྱལ་བོས། དབོན་པོ་རི་གླང་ཆེན་ཉལ་བ་འདྲ་བའི་མཁལ་ཁུང་གཡས་པའི་ཐད་ནས་ས་དཀར་ཞིང་སྣུམ་ལ། ཆུ་གཡས་སུ་འབབ་པ་སོགས་ཀྱི་བཀྲ་ཤིས་དགེ་མཚན་དུ་མ་ལྡན་པར་གཟིགས་ནས། ས་དེར་དགོན་པ་བཏབ་པས་སའི་ཁ་དོག་གི་ཁྱད་པར་གྱིས་དཔལ་ལྡན་ས་སྐྱ་བ་ཞེས་པའི་གྲུབ་མཐའ་འདི་བྱུང་བ་ཡིན། འཁོན་དཀོན་མཆོག་རྒྱལ་བོ་འདི་བ་སྔ་སོར་རྙིང་མ་བ་ཞིག་ཡིན་ཀྱང་། ཁྲོམ་དཀྱིལ་དུ་སྔགས་པ་མང་བོས་དབང་མོ་ཉེར་བརྒྱད་ཀྱི་འབག་གྱོན་ནས་འཆམ་བྱེད་པ་མཐོང་བ་བླ་མ་གཅེན་ལ་ཞུས་པས། གཅེན་གྱི་ཞལ་ལས། ད་གསང་སྔགས་འཆོལ་བའི་དུས་བྱུང་བ་ཡིན། ཕྱིན་ཆད་སྔགས་རྙིང་མ་ལ་གྲུབ་ཐོབ་ཚད་ལྡན་མི་འོང་གསུངས་ཏེ། འབྲོག་མི་ལོ་ཙཱ་བ་ཤཱཀྱ་ཡེ་ཤེས་ཀྱི་དྲུང་དུ་མངགས་ནས་གསང་སྔགས་ཕྱི་འགྱུར་ལ་སྦྱངས་པ་བྱེད་དུ་བཅུག གཞན་ཡང་། འགོས་ཁུག་པ་ལྷས་བཙས་སོགས་བླ་མ་མང་བོའི་ཞབས་ལ་གཏུགས་ནས་ལྷ་ཆོས་མང་བོ་གསན། ལོ་ངོ་སུམ་ཅུ་ཐམ་པར་གདན་ས་བསྐྱངས་ཏེ་འཆད་ཉན་བྱས། མཐར་དགུང་གྲངས་རེ་དགུ་བར་གཤེགས། ཕྱིས་སུ་ས་སྐྱ་གོང་མ་རྣམ་ལྔ་སྟེ། ས་ཆེན་ཀུན་དགའ་སྙིང་བོ། ས་སྐྱ་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན། ས་པཎ་ཀུན་དགའ་རྒྱལ་མཚན། འགྲོ་མགོན་ཆོས་རྒྱལ་འཕགས་པ་སོགས་ཀྱིས་ཆོས་རྒྱུན་སྤེལ་ཞིང་། ཁྱད་པར་དུ་སྤྱི་ལོ ༡༢༥༣ ལོར་འགྲོ་མགོན་ཆོས་རྒྱལ་འཕགས་པ་ཧུ་པི་ལི་སི་ཆེན་ཧན་གྱིས་དབུ་བླར་བཀུར་ཏེ། དབང་ཡོན་དུ་བོད་ཁྲི་སྐོར་བཅུ་གསུམ་གནང་བ་ནས་བཟུང་དར་རྒྱས་ཆེན་པོ་བྱུང་བ་ཡིན་ནོ། །བརྒྱུད་འཛིན་མཆོད་གཞིས་ཀྱི་དབང་དུ་བཏང་ནའང་། ངོར་ཨེ་ཝཾ་གླིང་། གོང་དཀར་རྡོ་རྗེ་གདན། རྟ་ནག་ཐུབ་བསྟན་རྣམ་རྒྱལ། ཞ་ལུ་དགོན། དྷི་དགོན་སོགས་ཡོད་དོ། །

ས་སྐྱ་བའི་ལྟ་སྒོམ་སྤྱོད་གསུམ་གྱི་རྣམ་བཞག གཞི་དུས་ཀྱི་རང་བཞིན་འོད་གསལ་སྤྲོས་པ་དང་བྲལ་བ་ནི། འཁོར་བ་མྱ་ངན་ལས་འདས་པ་གཉིས་ཀའི་རྒྱུ་ཡིན་ལ། དེ་ངོས་མ་ཟིན་པ་གཟུང་འཛིན་གཉིས་སུ་ཤར་བའི་ཉོན་མོངས་པ་མངོན་གྱུར་བག་ལ་ཉལ་དང་བཅས་པ་འདི་འཁོར་བའི་རྩ་བ་ལྷན་སྐྱེས་ཀྱི་མ་རིག་པ་ཡིན་པས། འདིའི་རྩ་བ་བཅད་དེ་དབྱིངས་སུ་བསྟིམ་པའི་ཐབས་ཁྱད་པར་ཅན་གྱིས་ཟིན་པ་ནི་འཁོར་འདས་དབྱེར་མེད་ཀྱི་ལྟ་བའོ། །

སྒོམ་པ་ནི། ལྟ་བ་རྒྱུད་ལ་སྐྱེས་པའི་ཐབས་ནི་བསྒོམས་ནས་གོམས་དགོས་པ་ཡིན་པས། དེ་ཡང་། ཞི་ལྷག་གི་ཏིང་ངེ་འཛིན་དང་རིམ་གཉིས་ཀྱི་རྣལ་འབྱོར་སོགས་ལ་བརྟེན་ནས་སྒོམ་པའོ། །

སྤྱོད་པ་ནི། བསྒོམས་པས་ལྟ་བ་ལ་བརྟན་པ་ཐོབ་པར་གྱུར་བ་ན། ལྟ་ཐོག་དེར་འཁྲུལ་སྣང་ཐམས་ཅད་ལྷན་སྐྱེས་བདེ་བ་ཆེན་པོའི་ཡེ་ཤེས་ཀྱི་རོལ་བར་ངོ་ཤེས་པའི་ཕྱིར། ཀུན་འདར་གསང་སྤྱོད་དང་མངོན་སྤྱོད་སོགས་ལ་རིམ་གྱིས་ཞུགས་ནས་ལྟ་བ་ལ་བོགས་འབྱིན་པ་ནི་སྤྱོད་པའོ། །

ཇོ་ནང་བ།

ཇོ་ནང་བའི་ཆོས་རྒྱུན་གྱི་ཁུངས་སོགས། ཇོ་ནང་བའི་གྲུབ་མཐའ་ནི། ཡུ་མོ་མི་བསྐྱོད་རྡོ་རྗེ་ནས་ལམ་སྲོལ་ཆེས་ཆེར་ཕྱེས་པ་ཡིན་ལ། དེ་ཡང་སྨྲ་བའི་ཁྱུ་མཆོག་ལེགས་ལྡན་ཞབས་ཀྱི་དབུ་མ་རིན་ཆེན་སྒྲོན་མེ་ལས། རགས་པ་ཕྱི་ཡི་དབུ་མ་ཐལ་རང་གཉིས། །ཕྲ་བ་ནང་གི་དབུ་མ་གཞན་སྟོང་སྟེ། །ཞེས་གཞན་སྟོང་གི་ལྟ་བ་འདི་སློབ་དཔོན་ཀླུ་ཐོགས་དང་། དུས་འཁོར་རྩ་རྒྱུད་སོགས་ལས་བསྟན་པར་ཁོ་བོ་ཅག་འདོད་ཅིང་། ཇོ་ནང་བ་ཞེས་པའི་མིང་འདི་ཀུན་སྤངས་ཐུགས་རྗེ་བརྩོན་འགྲུས་ཀྱིས་ཇོ་མོ་ནང་དུ་དགོན་པ་བཏབ། དོལ་བོ་བ་དེར་བཞུགས་ནས་གྲུབ་མཐའ་འདི་རྒྱ་ཆེར་སྤེལ་བ་ནས་བཟུང་། བརྒྱུད་འཛིན་རྣམས་ལ་ཇོ་ནང་བར་གྲགས་སོ། །གྲུབ་མཐའ་འདིའི་བླ་མའི་གཙོ་བོ་དོལ་བོ་བ་ཤེས་རབ་རྒྱལ་མཚན﹙༡༢༩༢ -༡༣༦༡﹚དང་། ཇོ་ནང་ཏཱ་ར་ནཱ་ཐ། ཕྱོགས་རྒྱལ་བ། ལོ་ཙཱ་བ་བློ་གྲོས་དཔལ། ས་བཟང་མ་ཏི་པཎ་ཆེན། ཉ་དབོན་ཀུན་དགའ་དཔལ﹙རྗེ་ཐམས་ཅད་མཁྱེན་པས་ཀྱང་ཕྱོགས་ལས་རྒྱལ་བ་ལས་དུས་འཁོར་དང་། ཉ་དབོན་ལས་ཕར་ཕྱིན་སོགས་གནས།﹚སོགས་ཡིན། ཡི་དམ་གྱི་གཙོ་བོ་དུས་འཁོར་དང་། དཔལ་འཁོར་ལོ་བདེ་མཆོག མཁའ་འགྲོའི་གཙོ་བོ་མཁའ་སྤྱོད་མ་དང་། ཆོས་སྐྱོང་གི་གཙོ་བོ་དཔལ་ལྡན་གུར་གྱི་མགོན་པོ་དང་བདུད་མགོན་ཏྲཀྵད་ནག་པོ་ཡིན།

ཇོ་ནང་གི་གཞན་སྟོང་འདོད་ཚུལ། ཡུ་མོ་མི་བསྐྱོད་རྡོ་རྗེས་དུས་ཀྱི་འཁོར་ལོའི་སྦྱོར་དྲུག་བསྒོམས་པ་དང་། རྒྱུད་འགའ་ཞིག་ལ་བརྟེན་ནས། གཞན་སྟོང་དོན་དམ་པའི་བདེན་པ་རྟག་བརྟན་ཐེར་ཟུག་བརྟན་གཡོ་ཐམས་ཅད་ལ་ཁྱབ་པ། བདེ་གཤེགས་སྙིང་བོ་དང་དོན་གཅིག་པ་གཞིའི་གནས་ཚུལ་ལ་ཡོད་པ་དེ་ཉིད། རྣལ་འབྱོར་དྲུག་གི་རིམ་པས་ཉམས་སུ་བླངས་པས་འབྲས་བུ་ཆོས་ཉིད་མངོན་དུ་འགྱུར་བར་འདོད་པ་དང་། དོལ་བོ་བས་ལྟ་བ་དེ་སྟོན་པའི་བསྟན་བཅོས་ངེས་དོན་རྒྱ་མཚོ་བརྩམས་ཏེ། ལུང་རིགས་ཀྱི་སྒྲུབ་བྱེད་མང་དུ་བཀོད་ནས་གཞན་སྟོང་དོན་དམ་པའི་ལྟ་བ་ཞེས་པའི་གྲུབ་མཐའི་རྐང་བཙུགས། དེའི་རྗེས་འབྲང་ཕྱོགས་ལས་རྣམ་རྒྱལ་གྱིས་འཁྲུལ་འཇོམས་ཆེ་ཆུང་གཉིས་དང་། ཉ་དབོན་གྱིས་གྲུབ་མཐའ་འོད་གསལ་རྒྱན་སོགས་བརྩམས་ཏེ་ཇོ་ནང་བའི་གྲུབ་མཐའ་འདི་དར་སྤེལ་བཏང་བ་ཡིན་ནོ། །

དགེ་ལུགས་པ།

དགེ་ལུགས་པའི་ཆོས་རྒྱུན་བྱུང་ཚུལ། དགེ་ལུགས་པ་ནི། འཇམ་མགོན་བླ་མ་ཙོང་ཁ་པས﹙༡༣༥༧ -༡༤༩༡﹚སྤྱི་ལོ༡༤༠༩ བོད་རབ་བྱུང་བདུན་པའི་ས་གླང་ལོར་དགའ་ལྡན་དགོན་པ་བཏབ་སྟེ། སྐུ་ཚེ་སྨད་དེར་བཞུགས་པས། རྗེའི་རང་ལུགས་པ་ཚོས་གདན་སའི་མཚན་གྱི་ཆ་ལས་རི་བོ་དགའ་ལྡན་པ་ཞེས་འབོད་པ་བྱུང་། ད་ལྟ་དགའ་ལྡན་པ་ཞེས་པ་བརྗོད་བདེའི་དབང་གིས་དགེ་ལྡན་པ་ཞེས་རྒྱུན་ཆགས་སུ་གྱུར་རོ། །ཡང་བླ་ཆེན་དགོངས་པ་རབ་གསལ་དང་ཀླུ་མེས་སོགས་སྔོན་གྱི་འདུལ་འཛིན་པ་རྣམས་ཀྱིས་ཞྭ་སེར་མནབས་པར་བརྟེན། རྗེ་བླ་མས་ཀྱང་འདུལ་བསྟན་ཉམས་པ་གསོ་བའི་རྟེན་འབྲེལ་དུ་དགོངས་ནས་ཞྭ་སེར་འདི་མནབས་པས། གྲུབ་མཐའ་འདི་ལ་ཞྭ་སེར་བའང་ཟེར། རྗེ་ཉིད་བཞུགས་ཐོག་དེར་རྒྱལ་ཚབ་རྗེ་དང་མཁས་གྲུབ་རྗེ་གཙོར་བྱས། འཁོར་དག་པ་རྣམ་བརྒྱད་སོགས་དངོས་སློབ་གྲགས་ཆེ་བའང་བརྒྱ་དང་ཞེ་བདུན་བྱུང་བ་དང་། དགོན་སྡེའི་དབང་དུ་བཏང་ནའང་སེར་འབྲས་དགེ་གསུམ་སོགས་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཇི་སྙེད་ཅིག་བྱུང་བ་དང་། ཁྱད་པར་དུ་རྗེ་བློ་སྒོ་གསུམ་སོགས་གྱི་ཡིག་ཆ་བརྩམས་ཏེ་ཞྭ་སེར་གྱི་བསྟན་པ་རིན་པོ་ཆེ་ཉི་མ་ལྟར་ཤར་བ་འདི་ཉིད་བྱུང་ངོ་། །

ལྟ་སྒོམ་སྤྱོད་གསུམ་གྱི་རྣམ་བཞག དགེ་ལུགས་པའི་ལྟ་བ་ནི། གཟུགས་ནས་རྣམ་མཁྱེན་བར་ཆོས་ཐམས་ཅད་ཀྱི་སྟེང་དུ་དགག་བྱ་རང་བཞིན་གྱིས་གྲུབ་པ་རྡུལ་ཙམ་ཡང་མེད་པར། རང་གི་གདགས་གཞི་ལ་བརྟེན་ནས་རྟོག་པས་བཏགས་པ་ཙམ་དེ་རྟེན་འབྱུང་གི་དོན་ཡིན་ལ། སྟོང་བས་ཡོད་མཐའ་སེལ་ཞིང་སྣང་བས་མེད་མཐའ་སེལ་ཚུལ་ནི། ཆོས་གང་དང་གང་དེ་ལྟ་བུའི་རྟེན་འབྱུང་དུ་བློ་ལ་ནམ་ཤར་བའི་ཚེ། ཆོས་དེ་དང་དེ་རང་བཞིན་གྱིས་སྟོང་བར་ངེས་ཤེས་འདྲེན་པ་ནི་སྣང་བས་ཡོད་མཐའ་སེལ་ཚུལ་དང་། གཅིག་ཏུ་བྲལ་ལྟ་བུས་རིགས་པས་དཔྱད་དེ། ཆོས་གང་དང་གང་རང་བཞིན་མེད་པའི་ཚུལ་བློ་ལ་ནམ་ཤར་བའི་ཚེ། ཆོས་དེ་དང་དེ་རྟོག་པས་བཏགས་ཙམ་གྱི་རྟེན་འབྱུང་ཡིན་པར་འབད་མེད་དུ་འཆར་བ་ནི། སྟོང་བས་མེད་མཐའ་སེལ་ཚུལ་ལོ། །

སྒོམ་པ་ནི། དཔྱད་སྒོམ་དགོས་པ་རྣམས་ལ་དཔྱད་སྒོམ། འཇོམ་སྒོམ་དགོས་པ་རྣམས་ལ་འཇོག་སྒོམ། དཔྱད་འཇོག་སྤེལ་མ་དགོས་ལ་སྤེལ་མ་དང་། ཏིང་འཛིན་ཡང་དག་སྒྲུབ་ཚུལ་གྱི་མན་ངག་མདོའི་དོན། བྱམས་ཆོས་དང་། ས་སྡེ། དབུ་མ་སྒོམ་རིམ་སོགས་ལས་བཀྲལ་བ་བཞིན། ཞི་ལྷག་སོ་སོའི་ཚོགས་བརྟེན་ཚུལ། དམིགས་རྟེན་གྱི་ཁྱད་པར། སེམས་གནས་པའི་ཐབས་དགུ་དང་སྤོང་བའི་འདུ་བྱེད་བརྒྱད་དང་ལྡན་པར་བྱས་ཏེ་སྒོམ་པའོ། །

སྤྱོད་པ་ནི། རྗེ་བདག་ཉིད་ཆེན་པོས་བསྟན་པའི་གཞི་མ་ལྷག་པ་ཚུལ་ཁྲིམས་ཀྱི་བསླབ་པ་ལགས་པར་དགོངས་ནས། བྱིན་ལེན་རུང་ཆུ་སོགས་འདུལ་བའི་བཅས་ཁྲིམས་ཕྲ་མོ་རྣམས་ཀྱང་མ་ཚང་བ་མེད་པའི་སྒོ་ནས། འདུལ་བའི་ཀུན་སྤྱོད་ལ་གནས་བཞིན་པའི་ངང་ནས་རིམ་གཉིས་ཀྱི་རྣལ་འབྱོར་ཉམས་སུ་ལེན་པ་སོགས་ཀུན་སྤྱོད་དག་པ་དང་། དེའི་སྟེང་དུ་བྱང་སེམས་དང་སྔགས་ཀྱི་འདུལ་བ་ནས་གསུངས་པའི་བཅས་མཚམས་རྣམས་ཀྱང་མིག་འབྲས་བཞིན་སྲུང་བས་སྤྱོད་པ་རྣམ་པར་དག་པའོ། །མདོར་ན། གུང་ཐང་བསྟན་པའི་སྒྲོན་མེས། ལྟ་བ་རྣམ་དག་རྟག་ཆད་མཐའ་ལས་གྲོལ། །སྒོམ་པ་རྣམ་དག་བྱིང་རྨུགས་མུན་པ་སངས། །སྤྱོད་པ་རྣམ་དག་རྒྱལ་བའི་བཀའ་བཞིན་བསྒྲུབས། །བློ་བཟང་རྒྱལ་བའི་བསྟན་པ། ཞེས་གསུངས་སོ། །

གཞན་དུ་ནང་བསྟན་གྱི་གྲུབ་མཐའ་བཅུ་གཉིས་ཞེས་ཀྱང་བརྩི་སྲོལ་ཡོད་དེ། དེ་དག་ནི། རྙིང་མ་བ། ས་སྐྱ་བ། དགེ་ལུགས་པ། ཇོ་ནང་བ། ཤངས་པ། འབྲི་གུང་བ། ཀརྨ་བ། བུ་ལུགས། བཀའ་གདམས་པ། རྫོགས་ཆེན་པ། ཕྱག་ཆེན་པ། ཞི་བྱེད་པ་བཅས་སོ། །

གསུམ་པ། རིག་གནས་ཆེ་བ་ལྔ།

བོད་གངས་ཅན་གྱི་ལྗོངས་འདིར་སྔོན་བྱོན་ལོ་པཎ་དག་གི་སྐུ་དྲིན་ལས། རིག་གནས་བགྲང་ལས་འདས་པ་ཞིག་དར་སྤེལ་གནང་ཡོད། དེ་དག་བསྡུས་ན་རིག་གནས་ཆེ་བ་ལྔ་སྟེ། སྒྲ་རིག་པ། ཚད་མ་རིག་པ། བཟོ་རིག་པ། གསོ་བ་རིག་པ། ནང་དོན་རིག་པ་དང་། རིག་གནས་ཆུང་བ་ལྔ་ནི། སྙན་ངག མངོན་བརྗོད། སྡེབ་སྦྱོར། ཟློས་གར། སྐར་རྩིས﹙ཕྱིས་སུ་དཔལ་ཁང་ལོ་ཙཱ་བ་དང་རྒྱལ་དབང་ལྔ་བ་སོགས་ཀྱིས་སྒྲ་རིག་མི་བརྩི་བར་སྐར་རྩིས་བསྣན﹚ཏེ། ཁྱོན་བསྡོམས་རིག་གནས་བཅུ་ནི་བོད་ཀྱི་རིག་གནས་ཐམས་ཅད་ཀྱི་སྡོམ་མོ། །

སྒྲ་རིག་པ།

སྒྲ་རིག་པའི་སྒྲ་ནི་གཙོ་བོར་བརྗོད་བྱའི་དོན་སྟོན་པའི་བརྡ་སྤྲོད་པའི་གཞུང་ལུགས་དང་། ཐ་ན་ཆུ་ཐིགས་ལྷུང་བའམ་སྡོང་ལོ་རླུང་གིས་བསྐྱོན་པའི་སྒྲ་ལ་བརྟག་ནས་བརྗོད་དོན་གོ་བ་སོགས་ནི་འབྱུང་བོ་ཐམས་ཅད་པའི་སྐད་ཤེས་པ་ཞེས། སྒྲ་རིག་པ་ལ་མཁས་པའི་མཐར་ཕྱིན་པའི་ཚད་དུ་འཇོག དེ་བས་སྒྲ་ཤེས་ན་དོན་ལ་མི་རྨོངས་ཟེར་ལ། རྒྱ་གར་གྱི་དབང་དུ་བཏང་ན། ཀཱ་ཙན་དབྱངས་གསུམ་སོགས་སྒྲ་གྲགས་ཅན་མང་ལ། དེ་དག་ལ་འགྲེལ་བཤད་ཀྱང་རྒྱ་བོད་ཀྱི་མཁས་པས་མཛད་པ་ཧ་ཅང་མང་། བོད་ཀྱི་དབང་དུ་བཏང་ན། ཆོས་རྒྱལ་སྲོང་བཙན་སྒམ་པོའི་སྐུ་རིང་ལ། ཐོན་མིས་མཛད་པའི་ཡི་གེ་ལ་མཁོ་བའི་བསྟན་བཅོས་ཆེན་པོ་བརྒྱད་སོགས་མཛད་ནའང། ད་ལྟ་དཔེ་རྒྱུན་གནས་པ་ནི་སུམ་ཅུ་བ་དང་རྟགས་འཇུག་གཉིས་ཡིན། བོད་འདིར་སྒྲ་གཞུང་གི་བརྗོད་བྱ་གཙོ་བོ་ཚོགས་གསུམ་སྟེ། མིང་གི་ཚོགས། ཚིག་གི་ཚོགས། དེ་གཉིས་འགྲུབ་བྱེད་ཀྱི་ཡི་གེ་བཅས་ཡིན་ཞིང་། སུམ་རྟགས་དག་གསུམ་གྱིས་ཚོགས་གསུམ་རྒྱས་པར་བཤད་པ་ཡིན་པས་བོད་ཀྱི་སྒྲ་གཞུང་དུ་ངོས་འཛིན་ལ། སུམ་རྟགས་གཉིས་སྒྲ་རིག་གི་ཕྱི་མོ་བྱས་ཏེ་དགོངས་འགྲེལ་གྲགས་ཆེ་བ་ལ། ཞ་ལུ་ལོ་ཆེན། ལོ་ཆེན་ནམ་བཟང་། པྲ་ཏི་དགེ་བཤེས། སི་ཏུ་པཎ་ཆེན་སོགས་ཀྱི་འགྲེལ་བ་དང་། དག་ཡིག་གི་སྐོར་ལ། རྔོག་ལོ། ཞ་ལུ་ལོ་ཆེན། དཔལ་ཁང་བ་སོགས་ཀྱིས་མཛད་པ་མང་ངོ་། །

ཚད་མ་རིག་པ།

སྤྱིར་བཏང་ཚད་མ་རིག་པ་ཞེས་པ། སྒྲ་ཡངས་པའི་དབང་དུ་བྱས་ན་རྟོག་པའི་རིག་པ་ཙམ་ལ་གོ་ཡང་། འདིར་བསྟན་ཚད་མ་ནི། རྒྱུ་མཚན་དང་གཏན་ཚིགས་ཡང་དག་གིས་བརྡར་ཤ་བཅད་དེ་འཁྲུལ་བ་མེད་པ་ཞིག་ལ་ཟེར། སྟོན་པ་སངས་རྒྱས་ཀྱི་མདོ་སྡེ་མང་བོས་ཚད་མ་གསུམ་གྱི་རྣམ་བཞག་སྐོར་བསྟན་ཡོད་ལ། དུས་རབས་བདུན་པའི་མགོ་ཙམ་དུ་སློབ་དཔོན་ཕྱོགས་གླང་གིས་ཐོག་མར་དམིགས་པ་བརྟག་པ་དང་། སེལ་བར་བརྟག་པ་སོགས་བསྟན་བཅོས་ཐོར་བུ་བརྒྱ་རྩ་མཛད། ཕྱིས་སུ་ཚད་མའི་བསྟན་བཅོས་དེ་དག་གི་བརྗོད་དོན་ཕྱོགས་བསྡུས་གནང་སྟེ་ཁོང་གིས་ལེའུ་དྲུག་གི་བདག་ཉིད་ཅན་གྱི་ཚད་མ་ཀུན་བཏུས་མཛད། ཕྱོགས་གླང་སྐུ་གཤེགས་རྗེས། སློབ་དཔོན་ཆོས་ཀྱི་གྲགས་པས་སློབ་དཔོན་དབང་ཕྱུག་སྡེའི་དྲུང་ནས་ཚད་མ་ཀུན་བཏུས་ཚར་གསུམ་གསན་ནས་སློབ་དཔོན་གྱིས་གནང་བ་ཐོབ་པ་ལྟར། ཚད་མ་སྡེ་བདུན་བརྩམས་ཤིང་ཚད་མ་སྡེ་བདུན་ལ་གཙོ་བོ་ལུས་ལྟ་བུའི་བསྟན་བཅོས་གསུམ་སྟེ། རྒྱས་པར་སྟོན་པ་ཚད་མ་རྣམ་འགྲེལ། འབྲིང་དུ་སྟོན་པ་ཚད་མ་རྣམ་ངེས། བསྡུས་ནས་སྟོན་པ་ཚད་མ་རིགས་ཐིགས་བཅས་དང་། འཕྲོས་པ་ཡན་ལག་ལྟ་བུའི་བསྟན་བཅོས་བཞི། རང་དོན་ལེའུ་ལས་འཕྲོས་པ་གཏན་ཚིགས་རིགས་པ་དང་། ལྟག་ཆོད་ཀྱི་འབྲེལ་བ་གཏན་ལ་འབེབས་པ་འབྲེལ་བ་བརྟག་པ། གཞན་དོན་ལེའུ་ལས་འཕྲོས་པ་རྒྱུད་གཞན་གྲུབ་པ་དང་རྩོད་པའི་རིགས་པ་གཉིས་ཏེ་བཞི་ཡོད། ཕྱིས་སུ་ལོ་པཎ་རྣམས་ཀྱིས་རྒྱ་གཞུང་གི་ཚད་མའི་བསྟན་བཅོས་དེ་དག་བོད་འགྱུར་དང་འགྲེལ་བཤད་མང་དུ་མཛད་ཅིང་། ས་པཎ་གྱིས་རིགས་གཏེར་དང་། མཁས་གྲུབ་དགེ་ལེགས་དཔལ་བཟང་གིས་སྡེ་བདུན་ཡིད་ཀྱི་མུན་སེལ་སོགས་མཛད། ཁྱད་པར་དུ་ཆ་བ་ཆོས་ཀྱི་སེང་གེས་བསྡུས་གྲྭའི་རིགས་ལམ་གསར་གཏོད་གནང་བ་ནས་བཟུང་། བོད་འདིར་ཚད་མ་རིག་པའི་འཆད་ཉན་རྒྱ་ཆེར་དར་བ་ཡིན་ནོ། །

བཟོ་རིག་པ།

འདིར་བཤད་པའི་བཟོ་རིག་པ་ནི། དེང་སང་གི་ཚན་རྩལ་ཀྱི་བཟོ་ལས་མ་དར་གོང་གི་བོད་ཀྱི་བཟོ་རིག་པ་ལ་བྱ་སྟེ། དེ་ལ་ལུས་བཟོ། ངག་བཟོ། ཡིད་བཟོ་གསུམ་ཡོད་ལ། དེ་རེ་རེ་ལའང་གཙོ་ཕལ་གཉིས་ཡོད་པ་ལས།

༡ ལུས་བཟོ་མཆོག་ནི། སྐུ་རྟེན། གསུང་རྟེན། ཐུགས་རྟེན་བཅས་གསུམ་དང་། དང་བོ་སྐུ་རྟེན་ལའང་། བྲིས་འབུར་གཉིས་ཀྱི་ནང་ནས་བྲིས་ཀྱི་རིགས་རྒྱལ་བོ་གཉའ་ཁྲིའི་སྔོན་ནས་ཡོད་པ། ཆབ་མདོ་ཁ་རུབ་སོགས་ལས་བུད་པའི་རིག་རྫས་ཀྱིས་ར་སྤྲོད་བྱེད་ཐུབ་པ་དང་། འབུར་གྱི་རིགས་ནི་ཐོག་མར་འཇིམ་གཟུགས་དང་། ཤིང་བརྐོས། རྡོ་བརྐོས་ཀྱི་རིགས་ལས་རིམ་བརྒྱུད་བྱུང་བའོ། །

གཉིས་པ་གསུང་རྟེན་ནི། བྲིས་མ་དང་དཔར་མའི་རིགས་གཉིས་ཡོད། གསུང་རྟེན་ཡི་གེར་འབྲི་བའི་སྐོར་ལ། རྣམ་གྲངས་མང་ཡང་། གཟབ་ཆེན་གཟབ་ཆུང་། འབྲུ་ཆེ་ཆུང་། བཤུར་མ་དང་དཀྱུས་ཡིག་བཅས་དྲུག་ཏུ་འདུའོ། །བརྐོ་བཟོའི་པར་ཤིང་འདི་བོད་ལ། རབ་བྱུང་བདུན་པའི་ས་བྱི་སྤྱི་ལོ ༡༤༠༨ ལོར་རྗེ་རིན་པོ་ཆེའི་སྐུ་ཚབ་ཏུ་བྱམས་ཆེན་ཆོས་རྗེ་ཏ་མིང་ཡུང་ལོ་རྒྱལ་བོའི་དབུ་བླར་ཕེབས་སྐབས། གོང་མས་ནན་ཅིང་དུ་བོད་ཡིག་གི་བཀའ་འགྱུར་པར་དུ་བརྐོས་པ་དེ་ནི། བོད་ཡིག་གི་པར་གཞི་ཐོག་མ་ཡིན། དེ་ནས་ས་དགེ་ཀར་རྙིང་ཇོ་ནང་བོན་དང་བཅས་པའི་སྔོན་བྱོན་མཁས་དབང་རྣམས་ཀྱིས་མཛད་པའི་གསུང་འབུམ་གྱི་སྐོར་དང་། ཐོར་བུ་སྣ་ཚོགས་རི་བོའི་གཏོས་དང་མཉམ་པ། སྡེ་དགེ་པར་ཁང་། ཞོལ་པར་ཁང་། སྐུ་འབུམ་པར་ཁང་། བླ་བྲང་པར་ཁང་། རོང་བོའི་པར་ཁང་། གཞན་དགོན་སྡེ་དང་གྲོང་ཚོ་རེ་ན་པར་ཤིང་ཐོར་རེ་བ་མང་དུ་ཡོད་པ་འདི་དག་གོ །

གསུམ་པ་ཐུགས་རྟེན་ནི། གཙོ་བོ་མཆོད་རྟེན་རྣམས་ཡིན། བཟོ་དབྱིབས་ནི་ནང་ཆོས་དར་བའི་རྒྱལ་ཁབ་ཁག་ཏུ་སྣ་ཚོགས་འདུག་མོད། བོད་ཀྱི་དབང་དུ་བཏང་ན། བདེ་གཤེགས་མཆོད་རྟེན་བརྒྱད་ཟེར་བ་དེ་ཡིན། གཞན་ཡང་། གསང་སྔགས་རྒྱུད་སྡེ་བཞིའི་དཀྱིལ་འཁོར་བྲིས་ཐིག་དང་། བློས་བསླངས། ས་གར་མཆོད་གར། སྒྲུབ་པ་བཀའ་བརྒྱད་ཀྱི་ཕུར་བའི་རྩ་འཆམ། འགྲུབ་འཆམ་སོགས་ཡོད།

ལུས་བཟོ་ཕལ་བ་ནི། གྲུ་གཟིངས་ཆེ་ཆུང་དང་། ཁང་ཁྱིམ། བཟའ་བཏུང་གཡོས་སྦྱོར། གོས་རྒྱན་བཟོ་བ། སྒྱོགས། འཕྲུལ་འཁོར། མདའ་མདུང་མཚོན་གསུམ་བཟོ་བ་སོགས་ཏེ། མདོ་སྡེ་རྣམས་ལས་བཤད་པའི་བཟོ་སྦྱངས་བཅོ་བརྒྱད་དང་། སྒྱུ་རྩལ་དྲུག་ཅུ་རེ་བཞི། བཟོ་ལ་གཏོགས་པ་སུམ་ཅུ་སོགས་ཡིན།

༢ ངག་བཟོ་མཆོག་ནི། རྒྱུད་སྡེ་བཞིར་བསྟན་པའི་ཡི་དམ་ཆོས་སྲུང་གི་མཆོད་དབྱངས། སྒྲ་དག་གསལ་གསུམ་ཚང་ཞིང་དོན་བཟང་ལ་བརྗོད་བྱ་ཟབ་པའི་ཆོས་གཏམ་གསུངས་ཏེ། ཉན་པ་པོ་སྤྲོ་བ་བསྐྱེད་པ་སོགས་ཡིན།

ངག་བཟོ་ཕལ་བ་ནི། ཕོ་རྩལ་སྣ་དགུ་ལས། ལོ་རྒྱུས་ཀྱིས་དགེ་ཐོན་པ། གཏམ་གྱིས་བཞད་གད་ཐོན་པ། གཤགས་ཀྱིས་ཕ་རོལ་གནོན་པ་སྟེ་ངག་གི་རྩལ་གསུམ་དང་གླུ་ལེན་པ་སོགས་ཡིན།

༣ ཡིད་བཟོ་མཆོག་ནི། ཐོས་བསམ་སྒོམ་གསུམ་དང་། ལུང་རྟོགས་ཀྱིས་བསྡུས་པའི་མདོ་སྔགས་རིག་གནས་དང་བཅས་པར་མཁས་ཤིང་། གཞན་ལ་ལེགས་པར་འདོམས་ཤེས་པ་ལ་ཟེར།

ཡིད་བཟོ་ཕལ་བ་ནི། ཕྱི་རོལ་གྱི་བྱ་དངོས་སྣ་ཚོགས་ལ་རིག་པས་དུ་ཡོད་འཇུག་ནུས་པ་ལ་ཟེར།

གསོ་བ་རིག་པ།

 བོད་མི་རིགས་ཀྱིས་གདོད་མ་ནས་ནད་རིགས་ལ་འཐབ་རྩོད་བྱེད་པའི་བརྒྱུད་རིམ་ཁྲོད་ཉམས་མྱོང་ཕྱོགས་བསྡོམས་བྱས་ནས། རང་བྱུང་སྐྱེ་དངོས་དང་། རྩི་ཤིང་། གཏེར་རྫས། སྲོག་ཆགས་སོགས་ལ་བརྟེན་ནས་ནད་གསོ་བའི་ཆོས་ཉིད་བྱུང་བར་མ་ཟད། དུག་ཀྱང་སྨན་དུ་བསྒྱུར་བའི་རིག་པ་རྟོགས་ནས། ཆང་ལ་བརྟེན་ནས་རྨ་བཅོས་པ། བྱུགས་སྲེག་གཏར་གསུམ་དང་། ཟས་ཀྱི་ཚོད་རིག་པ། རྨ་གསར་ལ་མར་བཞུས་ནས་བཏང་བས་རྩ་ཁ་སྡོམ་པ་སོགས་ནད་བཅོས་ཀྱི་ནུས་པ་ཚད་ཇེ་མཐོར་སོན། རྒྱལ་བོ་གཉའ་ཁྲི་བཙན་པོའི་དུས་སུ་བོན་ཤེས་པ་ཅན་མི་བཅུ་གཉིས་ཀྱི་ནང་གསེས་ཕན་ཤེས་སྨན་དཔྱད་བྱ་བ་བྱུང་བ་དང་། གཞན་ཡང་། ཏུང་ཧོང་གཏེར་ཡིག་ལས་ཐོན་པའི་གནའ་རབས་སྨན་དཔྱད་མདོར་བསྡུས་ཤིག་གི་ནང་། དཔྱད་གཞི་འདི་ནི་ཞང་ཞུང་གི་དཔྱད་ཕུག་པ་དང་སྦྱར་ཏེ་བགྱིད་པ་ལགས་སོ་ཞེས་སོགས་ལ་གཞིགས་ན། བོད་ཡུལ་དུ་ཐོག་མར་དར་བ་ནི་བོན་གྱི་གསོ་རིག་གོ །ཚུལ་འདི་ལ་དགོངས་ནས། གཡུ་ཐོག་ཡོན་ཏན་མགོན་པོའི་རྣམ་ཐར་ལས། དང་བོ་སྣོད་ཀྱི་འཇིག་རྟེན་ཆགས། །བཅུད་ཀྱི་སེམས་ཅན་བདེ་ཕྱིར་དུ། །དང་བོ་གསོ་བ་རིག་པ་བྱོན། །དེ་ནས་གསོ་བྱེད་འབུམ་པ་བྱོན། །དེ་ནས་དཔལ་ལྡན་རྒྱུད་བཞི་བྱོན། །དེ་ནས་ཡན་ལག་བརྒྱད་པ་འབྱུང་། །དེ་ནས་མཁས་པ་སོ་སོའི་ལུགས། །ཞེས་སོ། །

ལྷ་ཐོ་ཐོ་རིའི་སྐུ་དུས་སུ་རྒྱ་གར་གྱི་སྨན་པ་བི་བྱི་དང་བི་མ་ལྷ་བོད་དུ་ཕེབས་དུས། རྒྱལ་བོས་གསོ་རིག་དར་སྤེལ་གྱི་ཆེད་དུ། བི་བྱི་ལ་ལྷ་ལྕམ་ཡིད་ཀྱི་རོལ་ཆ་ཕུལ་བས། སྲས་སུ་སྨན་པ་དུང་གི་ཐོར་ཅོག་ཅན་འཁྲུངས་ཏེ། ཡབ་ཀྱིས་སྲས་ལ་སྨན་དཔྱད་ལག་ལེན་དང་བཅས་པ་གནང་ནས། ཕྱིས་སུ་སྨན་པ་དུང་གི་ཐོར་ཅོག་ཅན་རྒྱལ་བོའི་བླ་སྨན་ལ་བཞུགས་ཏེ་གསོ་རིག་དར་སྤེལ་བཏང་། སྲོང་བཙན་གྱི་དུས་སུ་རྒྱ་ནག་གི་སྨན་གཞུང་སྐོར་གཅིག་བོད་དུ་བསྒྱུར་བ་དེ་ལ་སྨན་དཔྱད་ཆེན་མོ་ཞེས་ཟེར་ལ། གཞན་ཡང་རྒྱ་ཡི་སྨན་པ་ཧན་ཝེན་ཧེ་དང་། རྒྱ་གར་གྱི་སྨན་པ་བྷ་ར་དྷྭ་ཛ། སྟག་གཟིག་གི་སྨན་པ་ག་ལེ་ནོས་བཅས་བོད་དུ་སྤྱན་དྲངས་ནས་ཁོང་ཚོས་སྤྱི་མཐུན་གྱིས་བརྩམས་པའི་སྨན་གཞུང་དེ་ལ་མི་འཇིགས་པའི་མཚོན་ཆ་ཟེར། ཁྲི་ལྡེ་གཙུག་བརྟན་གྱི་དུས་སུ་རྒྱ་ནག་གི་སྨན་དཔྱད་སོ་མ་ར་ཛ་བོད་དུ་བསྒྱུར་བ་དང་།

ཁྱད་པར་དུ་ཁྲི་སྲོང་ལྡེ་བཙུན་གྱི་དུས་སུ་བོད་ཀྱི་གསོ་རིག་གི་ཤིང་རྟའི་སྲོལ་འབྱེད་གཡུ་ཐོག་རྙིང་མ་ཡོན་ཏན་མགོན་པོ་བྱོན་ཏེ། རྒྱལ་ཁབ་ཕྱི་ནང་མང་བོའི་གསོ་རིག་གི་ཉིང་བཅུད་བསྡུས་ཤིང་། དམངས་ཁྲོད་ཉམས་མྱོང་གིས་ཟུར་བརྒྱན་ཏེ་དཔལ་ལྡན་རྒྱུད་བཞི་སོགས་བསྟན་བཅོས་མང་བོ་མཛད་པར་མ་ཟད། དགོན་པ་ལྟ་ན་སྡུག་ཕྱག་འདེབས་མཛད་ཅིང་། སྨན་སློབ་ཀྱི་སྒྲིག་སྲོལ་ཆ་ཚང་བཙུགས་ཏེ། སློབ་མའི་ཡོན་ཚད་ལྟར་འབུམ་རམས་པ་དང་། དཀའ་བཅུ་བ། བསྡུས་ར་བ་བཅས་རིམ་པ་བཞིར་ཕྱེས་ནས་མིང་བཏགས་གནང། དུས་རབས་བཅུ་གཅིག་པའི་དུས་མགོར་ལོ་ཙཱ་བ་རིན་ཆེན་བཟང་བོས་སྨན་དཔྱད་ཡན་ལག་བརྒྱད་པ་དང་འགྲེལ་བ་བོད་སྐད་དུ་བསྒྱུར་ཏེ་དར་སྤེལ་བཏང་བས། སྟོད་ལུགས་ཀྱི་སྨན་པ་མཁས་པ་མི་དགུ་སོགས་བྱུང་བས་སྟོད་ལུགས་སུ་གྲགས། དུས་རབས་བཅུ་གཉིས་པའི་ནང་གཡུ་ཐོག་གསར་མ་ཡོན་ཏན་མགོན་པོས་རྒྱུད་བཞིའི་འགྲེལ་བ་བརྩམས་ཏེ་སྔར་ལས་ཕུན་སུམ་ཇེ་ཚོགས་སུ་བཏང་བ་དང་། དེ་རྗེས་གསོ་རིག་གི་ལག་ལེན་ཁྲོད་བྱང་ཟུར﹙བྱང་བ་བདག་པོ་རྣམ་རྒྱལ་གྲགས་བཟང༡༣༩༤ - ༡༤༧༥དང་། ཟུར་མཁར་མཉམ་ཉིད་རྡོ་རྗེ ༡༤༣༩ - ༡༤༧༥﹚གཉིས་སུ་གྱེས་ཏེ། གསོ་རིག་འཕེལ་རྒྱས་བྱུང་བ་དང་། དེ་ལས་གཞན། སྡེ་སྲིད་སངས་རྒྱས་རྒྱ་མཚོས་བཻ་སྔོན་དང་རྒྱུད་བཞིའི་འགྲེལ་བ་དང་། མན་ངག་ལྷན་ཐབས། ཟིན་ཏིག་སོགས་ཉམས་མྱོང་ཚད་མ་དང་སྦྱར་ནས་བརྩམས་གནང་མཛད་དེ། གསོ་རིག་གི་འཕྲིན་ལས་རྒྱ་ཆེར་སྤེལ་བ་དང་། ༡༨༤༠ ལོར་སྡེ་དགེ་དེའུ་དམར་དགེ་བཤེས་བསྟན་འཛིན་ཕུན་ཚོགས་ཀྱིས་ཤེལ་གོང་ཕྲེང་སོགས་བརྩམས་ཏེ། ཁོང་གིས་དོན་དངོས་ལ་བརྟག་དཔྱད་དང་། ལག་ལེན་ཀྱི་ཁྲོད་ནས་སྨན་རྫས་སྣ་ཁ་ཉིས་སྟོང་ཉིས་བརྒྱ་ཙམ་འཚོལ་སྡུད་དང་། སྨན་རིགས་སོ་སོའི་ངོ་བོ་དང་ནུས་པ་སོགས་གསལ་རྗེན་དུ་བཀོད་དེ་དར་སྤེལ་བཏང་བ་སོགས་ཀྱིས་སྐུ་དྲིན་གྱིས། ད་ལྟ་བོད་ཀྱི་གསོ་བ་རིག་པ་ཞེས་རྒྱལ་ཁབ་ཕྱི་ནང་ཀུན་ཏུ་ས་ཁྱབ་རྡོ་ཁྱབ་ཏུ་སོང་བ་འདི། འཛམ་གླིང་གི་སྤྱི་ནོར་དང་། རང་ཅག་གི་ཁྱད་ནོར་དུ་གྱུར་བ་ལགས་སོ། །

ནང་དོན་རིག་པ།

ནང་དོན་རིག་པ་ནི་གཙོ་བོ་སེམས་འདུལ་བའི་ཐབས་ལམ་གྱི་རིམ་པ་སྟོན་པ་སྟེ། འདི་ལ་གྲྭ་ས་ཆེན་པོ་རྣམས་སུ་ནང་དོན་རིག་པ་སྡོམ་དུ་བསྡུས་ནས་བཀའ་པོད་ལྔ་ལ་འཆད་ཉན་བྱེད་པ་ཡིན། དེ་ཡང་སྟོན་པ་བཅོམ་ལྡན་འདས་ཀྱི་བཀའ་ཐམས་ཅད་སྡེ་སྣོད་གསུམ་དུ་འདུ་ལ། བཀའ་པོད་ལྔ་ནི་སྡེ་སྣོད་གསུམ་གྱི་དོན་བསྡུ་ཡིན། འདུ་ཚུལ་ནི། མདོ་རྩ་འདུལ་བའི་སྡོམ། དབུ་ཚད་མཛོད་གསུམ་མངོན་པའི་སྡོམ། ཕར་ཕྱིན་མདོ་སྡེའི་སྡོམ་ཡིན། སྡེ་སྣོད་གསུམ་ནི། བསླབ་གསུམ་དང་ལྟ་སྒོམ་སྤྱོད་གསུམ་ལ་སྦྱར་ན། འདུལ་བའི་སྡེ་སྣོད་ཀྱིས་ཚུལ་ཁྲིམས་ཀྱི་བསླབ་པ་གཙོ་བོ་དང་སྤྱོད་པ་སྟོན་པའི་གཞུང་ཡིན། མདོ་སྡེ་སྡེ་སྣོད་ཀྱིས་ཏིང་འཛིན་གྱི་བསླབ་པ་གཙོ་བོ་དང་སྒོམ་པ་སྟོན་པའི་གཞུང་ཡིན། མངོན་པའི་སྡེ་སྣོད་ཀྱིས་ཤེས་རབ་ཀྱི་བསླབ་པ་གཙོ་བོ་དང་ལྟ་བ་སྟོན་པའི་གཞུང་ཡིན། དེ་ཡང་དཔེར་ན། ཤེས་རབ་ཀྱི་བསླབ་པ་ནི། ཉོན་མོངས་པའི་དུག་ཤིང་གཅོད་བྱེད་ཀྱི་སྟ་རེ་དང་འདྲ། ཏིང་ངེ་འཛིན་གྱི་བསླབ་པ་ནི་ཤིང་མཁན་གྱི་དཔུང་བ་བརྟན་པོ་དང་འདྲ། ཚུལ་ཁྲིམས་ཀྱི་བསླབ་པ་ནི་ཤིང་མཁན་གྱི་ལུས་སྟོབས་མ་ཉམས་པར་གནས་པ་དང་འདྲའོ། །

ཡང་བཀའ་ཐམས་ཅད་ཐེག་པ་ཆེ་ཆུང་གི་སྡེ་སྣོད་གཉིས་སུ་འདུ་བའི་དབང་དུ་བཏང་ན། ཐེག་ཆེན་གྱི་ལྟ་བ་དབུ་ཚད་གཉིས་དང་སྤྱོད་པ་ཕར་ཕྱིན་གྱིས་འཆད་པ་དང་། ཐེག་དམན་གྱི་ལྟ་སྤྱོད་གཉིས་མཛོད་ཀྱིས་འཆད་ལ། འདུལ་བས་ནི་ཐེག་པ་ཆེ་ཆུང་ཐུན་མོང་གི་ཚུལ་ཁྲིམས་ཀྱི་རྣམ་བཞག་འཆད་དོ། །

དེ་ཡང་སྡེ་སྣོད་གསུམ་གྱི་ངེས་ཚིག་ལ། སྐྱེ་མཆེད་བཅུ་གཉིས་ཀྱི་དོན་དང་ཚིག་ཐམས་ཅད་བསྡུས་པའི་སྣོད་ལྟ་བུའི་ཕྱིར་ན་སྡེ་སྣོད་ཅེས་བྱའོ། །

ལྷག་པ་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་སྟོན་པའི་རིས་སུ་གནས་པའི་གསུང་རབ་འདུལ་བའི་སྡེ་སྣོད་ཀྱི་མཚན་ཉིད། ནང་གསེས་ཀྱིས་ཕྱེ་ན། ཉན་ཐོས་ཀྱི་འདུལ་བ། བྱང་ཆུབ་སེམས་དཔའི་འདུལ་བ། གསང་སྔགས་ཀྱི་འདུལ་བ་བཅས་གསུམ་ཡོད། འདི་ནི་ཆོས་སྒོར་ཞུགས་པ་རྣམས་ཀྱི་ལུས་ངག་གི་ཚུལ་འཆལ་མཐའ་དག་སྤོང་བའི་བསླབ་ཁྲིམས་སྟོན་པ་ཞིག་ཡིན། བཀའ་འགྱུར་གྱི་ནང་འདུལ་བ་ལུང་སྡེ་བཞི་ལ་པོད་བཅུ་གསུམ་ཡོད། འདིར་བསྟན་འགྱུར་ཁོངས་སུ་ཡོད་པ་རྣམས་བཀའ་བསྡུ་བའི་ཁོངས་སུ་མ་གཏོགས་པས་རྩིས་མེད།

ལྷག་པ་སེམས་ཀྱི་བསླབ་པ་བརྗོད་བྱའི་གཙོ་བོར་སྟོན་པའི་རིས་སུ་གནས་པའི་གསུང་རབ་མདོ་སྡེའི་སྡེ་སྣོད་ཀྱི་མཚན་ཉིད། འདི་ནི་གདུལ་བྱའི་རྒྱུད་ཀྱི་རྣམ་གཡེང་གི་སྒྲིབ་པ་སྤོང་ཆེད་དུ་གསུངས་པ་གསང་སྔགས་ཀྱི་ཆོས་རྣམས་ཀྱང་སྡེ་སྣོད་གསུམ་དུ་ཕྱེ་བའི་སྐབས་སུ་མདོ་སྡེའི་སྡེ་སྣོད་ཀྱི་ཁོངས་སུ་བསྡུ། བཀའ་འགྱུར་ནང་མདོ་མང་པོད་སུམ་ཅུ་ཡོད།

ལྷག་པ་ཤེས་རབ་ཀྱི་བསླབ་པ་གཙོ་བོར་སྟོན་པའི་རིས་སུ་གནས་པའི་གསུང་རབ་མངོན་པའི་སྡེ་སྣོད་ཀྱི་མཚན་ཉིད། འདིས་ནི་གདུལ་བྱའི་རྒྱུད་ཀྱི་བདག་འཛིན་གཉིས་ཀྱི་གཉེན་པོ་ལམ་བདག་མེད་གཉིས་ཀྱིས་རྟོགས་པའི་ཤེས་རབ་གཙོ་བོར་སྟོན་པ་ཡིན། བཀའ་འགྱུར་ནང་ཡུམ་རྒྱས་འབྲིང་བསྡུས་གསུམ་ལྟ་བུ་དང་། བསྟན་འགྱུར་ནང་གི་དབུ་མ་དང་། མངོན་པ་འོག་མ་སོགས་ཡིན།

རྒྱ་གར་འཕགས་ཡུལ་དུ་ཐུབ་བསྟན་གྱེན་དུ་གདེགས་པའི་ཀ་བ་ལྟ་བུ་རྒྱན་དྲུག་མཆོག་གཉིས་སོགས་བྱོན་ལ། ཚད་མར་གྱུར་བའི་བསྟན་འཛིན་དེ་དག་གི་གཞུང་ལུགས་སྡོམ་དུ་བསྡུས་ནས། བོད་འདིར་ཡང་ས་དགེ་ཀར་རྙིང་ཀུན་གྱིས་བཀའ་པོད་ལྔར་འཆད་ཉན་བྱས་ཏེ། བསྟན་འཛིན་གྱི་སྐྱེས་བུ་གནམ་གྱིས་ས་གབ་པ་ལྟ་བུ་མང་དུ་བྱོན་པ་དང་། ཁྱད་པར་དུ་རྒྱལ་བ་གཉིས་པ་བློ་བཟང་གྲགས་པའི་དཔལ་སོགས་བྱོན་པ་ནས་བཟུང་། དབུས་གཙང་གི་གདན་ས་ཆེན་པོ་དྲུག་སོགས་བྱུང་ནས་ནང་དོན་རིག་པ་ཉི་ཤར་སྤར་མོས་མི་ཁེབས་འདི་དར་རྒྱས་སུ་བྱུང་ངོ་། །

བཞི་བ། རིག་གནས་ཆུང་བ་ལྔ།
སྙན་ངག

སྙན་ངག་ནི་རང་ཅག་གི་འཚོ་བ་དངོས་ཀྱི་སྣང་ཚུལ་དང་ནང་སེམས་ཀྱི་འཆར་སྒོ་སྣ་ཚོགས་ཚིག་གི་སྒྱུ་རྩལ་གྱི་རྣམ་པ་བཀོལ་ཏེ་བརྗོད་པ་ལ་ཟེར། སྙན་ངག་གི་སྒྱུ་རྩལ་འདི་རྒྱལ་ཁབ་དང་མི་རིགས་ཁག་ཚང་མར་ཡོད་ལ། རང་ཅག་གི་སྙན་གཞུང་འདི་རྒྱ་གར་མེ་ལོང་མར་ཁུངས་གཏུགས་ཡོད་ཕྱིར། ལུས་དང་། རྒྱན﹙བོད་མཁས་དང་འབྲུག་སྤྲུལ་སོགས་ཀྱིས་སྙན་ངག་གི་གཞུང་དངོས་ལ་ལུས་རྒྱན་གཉིས་སུ་འདུ་བར་བཞེད་ཀྱང་། རྒྱལ་དབང་ལྔ་བས་ལུས་རྒྱན་སྲོག་གསུམ་དུ་བཞེད་དོ། །﹚དང་། སྐྱོན་སེལ་བ་གསུམ་དུ་འདུས་པ་ཡིན། ལུས་ནི་སྙན་ངག་གི་ཚིག་རྒྱན་གང་ལ་སྦྱོར་བའི་གཞི་སྟེ། ཚིགས་བཅད། ལྷུག་པ། ཚིགས་བཅད་ལྷུག་སྤེལ་མ་གསུམ་ཡོད། ཚིགས་བཅད་ལའང་རིགས་གྲོལ་མཛོད་འདུས་བཞི་ཡོད། རྒྱན་ནི་བརྗོད་བྱའི་དོན་གང་རུང་ཞིག་མཚོན་པའི་ཚིག་སྦྱོར་དེ་ཉིད་མཛེས་པར་བྱེད་པ་སྟེ། དེ་ལ་ཐུན་མོང་བའི་རྒྱན་བཅུ་དང་། ཐུན་མོང་མ་ཡིན་པ་དོན་རྒྱན་སོ་ལྔ། སྒྲ་རྒྱན་རིགས་མང་བ། གབ་ཚིག་གི་རྒྱན་བཅུ་དྲུག་ཡོད། སྐྱོན་སེལ་བ་ནི། སེའུ་བཅུ་བའི་ངག་ལྟར་འབྲེལ་མེད་དོན་གཞན་གྱི་སྐྱོན་སོགས། གསེར་གྱི་ཀ་བ་ལ་འཇག་མའི་ལྷན་པ་ལྟར་སྙན་ངག་ལ་མི་མཛའ་བའི་སྐྱོན་དོར་བ་ལ་ཟེར།

ཕྱིས་སུ་འགྲོ་མགོན་ཆོས་རྒྱལ་འཕགས་པའི་སྐུ་རིང་ལ་ཤོང་སྟོན་རྡོ་རྗེ་རྒྱལ་མཚན་གྱིས་མེ་ལོང་མ་དང་། དཔག་བསམ་འཁྲི་ཤིང་སོགས་བོད་འགྱུར་བྱས་པ་ནས་བཟུང་། རྒྱལ་དབང་ལྔ་བ་དང་བོད་མཁས་སོགས་ཀྱིས་མེ་ལོང་མར་གཞི་བྱས་ཏེ་སྙན་ངག་གི་བསྟན་བཅོས་མང་དུ་མཛད་ཡོད་དོ། །

སྡེབ་ལེགས་ངག་གི་སྒྱུ་རྩལ་འདི་མེད་ན། མཁས་པའི་མདུན་སར་བྲིན་སྒོ་ཆུང་སྟེ། ཟུར་མཁར་བློ་གྲོས་རྒྱལ་བོས། རྒྱལ་བོ་ལང་ཚོས་དྲེགས་གྱུར་ཀྱང་། །རྒྱན་མེད་པས་ན་སྐྱེས་བོས་ལྒིང་། །དེ་བཞིན་སྙན་ངག་མི་ལྡན་པའི། །བསྟན་བཅོས་མཁས་ལ་རྩིས་སུ་མེད། །ཅེས་སོ། །བོད་མཁས་པས། ནང་དོན་རིག་པའི་གསུང་རབ་རྣམས་ཀྱང་སྙན་ངག་གི་གཟུགས་ཁོ་ནར་གནས་ཤིང་། རིག་གནས་གཞན་ཀུན་ལའང་འདི་ཉིད་འཇུག་པས་ཤེས་བྱ་ཀུན་ལ་ལྟ་བའི་མིག་འབྲས་ལྟ་བུ་ཡིན་པར་གསུངས་པ་ལས་གཞན། བཤད་རྒྱུན་དུ། སྙན་ངག་མཁན་ལ་ཅི་ཡང་རྒྱན་དང་། སྙན་ངག་ཤེས་ན་ཚིག་རྒྱན་ལ་མཁས་ཟེར་བར་མ་ཟད། མེ་ལོང་མ་ལས། སྙན་ངག་ཆུང་ངུ་ལའང་ངལ་བྱས་མི། །མཁས་པའི་འདུན་ས་དག་ཏུ་འདུག་ལ་དབང་། །གསུངས་སོ། །

འོན་ཀྱང་སྙན་ངག་མེ་ལོང་བོད་དུ་མ་བསྒྱུར་གོང་དུ་བོད་དུ་སྙན་ངག་གི་ཚིག་སྦྱོར་མང་བོ་བྱུང་ཡོད་པ་ནི། དཔེར་ན། བོན་གྱི་ཆོ་གའི་ཚིག་སྦྱོར། སྲོང་བཙན་སྒམ་པོའི་སྔ་རྗེས་ཀྱི་མགུར་གླུ་ཁག་དང་། ཐོན་མིས་སྲོང་བཙན་ལ་ཕུལ་བའི་ཡིག་ཕུད། སྒྲུང། ལྡེའུ། གཏམ་དཔེ། གླུ་གཞས། ཤགས། ལས་གླུ། དག་ས། བཤད་པ། ལྷ་སྐད་སོགས་ཀྱི་ཚིག་སྦྱོར་ལ་བརྟགས་ན། བོད་རང་གི་མར་དྲི་དང་རྩམ་དྲི་མ་ཡལ་བའི་སྙན་ངག་གི་ཚིག་སྦྱོར་ཞིག་རུས་རྐང་ལས་འཕྱུར་ཡོང་བ་གསལ་བཤད་བྱས་ཡོད་དོ། །

མངོན་བརྗོད།

མངོན་བརྗོད་ནི་ཤེས་བྱའི་ཆོས་རེ་རེ་ལ་མིང་གི་རྣམ་གྲངས་མང་བོའི་སྒོ་ནས་བརྗོད་པ་ཞིག་ལ་ཟེར་བས། མངོན་བརྗོད་ཤེས་ན་མིང་ལ་མཁས་ཟེར་ལ། དེ་ཡང་འདྲ་བ་དང་། འབྲེལ་བ། རྒྱུ་འབྲས། རྟེན་བརྟེན་པ། ལྡོག་པ། བྱེད་ནུས། སྔོན་བྱུང་། གཏམ་རྒྱུད་སོགས་དང་སྦྱར་ཏེ་ཆོས་གཅིག་ལ་མིང་དུ་མར་བཏགས་པ་ཞིག་ཡིན་ལ། སྤྱིར་བོད་ཀྱི་རིག་གནས་ལ་རྒྱ་གར་གྱི་ཤན་ཞུགས་ཆུ་ལ་ཆུ་བཞག་བཞིན་སིམ་ཡོད་པས། འཚོ་གནས་དང་། ས་གཤིས། སེམས་ཁམས་སོགས་ཀྱིས་དབང་གིས་མི་འབྱོར་བའང་ཡོད། དཔེར་ན། དངུལ་གྱི་མིང་དུ་མདོག་ངན་ཟེར་བ་ལྟ་བུ་ཡིན། ཡང་སྐབས་ལན་རེར་སྒྲ་གཅིག་དོན་མང་བོ་སྟོན་པ་ཡོད་དེ། གཉིས་སྐྱེས་ཞེས་པ། སོ་དང་། ཟླ་བ། བྲམ་ཟེ། རབ་བྱུང་བ། འདབ་ཆགས་སོགས་ཀྱི་མིང་དུ་འཇུག་པ་བཞིན་ནོ། །མངོན་བརྗོད་ཀྱི་གཞུང་རྒྱ་གར་ལས་བསྒྱུར་བ་སློབ་དཔོན་འཆི་མེད་སེང་གེས་མཛད་པའི་མངོན་བརྗོད་འཆི་མེད་མཛོད་དང་། དེའི་འགྲེལ་བ་འདོད་འཇོའི་བ་མོ་དང་། བོད་ཀྱི་དབང་དུ་བཏང་ན། ཞ་ལུ་ལོ་ཙཱ་བས་མངོན་བརྗོད་ལེགས་བཤད་གསེར་གྱི་ལྡེ་མིག སྡེ་བ་རིན་སྤུངས་བས་མངོན་བརྗོད་མཁས་པའི་རྣ་རྒྱན། དངུལ་ཆུ་ཆོས་བཟང་གིས་མངོན་བརྗོད་རྒྱ་མཚོའི་ཆུ་ཐིགས་སོགས་མང་དུ་མཛད་ཡོད་དོ། །

སྡེབ་སྦྱོར།

 སྡེབ་སྦྱོར་ནི་གནའ་བོའི་རྒྱ་གར་གྱི་སྐད་ལྕི་ཡང་གི་སྒྲ་སྡེབ་པའི་རྩོམ་ཚུལ་ཞིག་སྟེ། དེ་ནི་ཡི་གེ་སྤྱི་ཡང་སྦྱར་བའི་ཚིགས་སུ་བཅད་པའི་རིགས་ཤིག་སྟེ། དེ་ལའང་ལུང་ལས་འབྱུང་བའི་ཚིགས་སུ་བཅད་པ་དང་། བསྟན་བཅོས་ལས་འབྱུང་བའི་ཚིགས་སུ་བཅད་པ་གཉིས་ཡོད། དང་བོའི་དབང་དུ་བཏང་ན་མངོན་པ་ཀུན་བཏུས་ལས་ཚིགས་བཅད་ལ་རྐང་བ་གཉིས་པ་ནས་དྲུག་པའི་བར་དུ་ཡོད་པར་བཤད་ལ། གཉིས་པའི་དབང་དུ་བཏང་ན་ཚིགས་བཅད་ཀྱི་སྡེབ་སྦྱོར་ལ་རྐང་བ་བཞི་རེ་ཆ་མཉམ་དུ་བསྒྲིགས་པ་ཞིག་སྟེ། དེ་ལ་ཡི་གེ་བགྲང་བ་པྲི་ཏ་དང་ཛཱ་ཏི་གཉིས་ཡོད། པྲི་ཏ་ནི་ཡི་གེ་བགྲང་བ་ཡིན་ཞིང་། དེ་ལའང་ཚིགས་བཅད་གང་གི་རྐང་བ་དང་བོ་ཇི་ལྟ་བ་དེ་ལྟར་རྐང་བ་གཞན་རྣམས་ཀྱང་འདྲ་བ་མཉམ་པའི་པྲི་ཏ་དང་། གང་གི་རྐང་བ་ཟུང་མིན་དང་བོ་དང་གསུམ་པ་འདྲ། ཟུང་གཉིས་པ་དང་བཞི་བ་འདྲ་བ་ཕྱེད་མཉམ་པའི་པྲི་ཏ་དང་། བཞི་བོ་རེ་རེ་ཞིང་མི་འདྲ་བ་ནི་མི་མཉམ་པའི་པྲི་ཏའོ། །ཛཱ་ཏི་ནི་ཡི་གེའི་ཕྱི་མོ་བགྲང་བ་སྟེ། དེ་ལ་འཕགས་མ་དང་། རོ་ལངས་ཅན། ཕྱི་མོ་མཉམ་པ་དང་གསུམ་མོ། །སྡེབ་སྦྱོར་འདི་སྙན་ངག་ལ་འཇུག་ཚེ་ངེས་པར་ཏུ་མཁོ་བ་ཞིག་སྟེ། ཇི་སྐད་དུ། རིག་པ་སྙན་ངག་རྒྱ་མཚོ་ནི། །ཟབ་མོ་བརྒལ་འདོད་རྣམས་ཀྱི་རྒྱུ། །གསུངས་སོ། །སྡེབ་སྦྱོར་གྱི་རིག་པ་འདི་ཐོག་མར་དྲང་སྲོང་གྲོག་མཁར་གྱིས་མཛད་པར་གྲགས་ལ། ཐུབ་པ་དམར་སེར་ཅན་གྱིས་སྡེབ་སྦྱོར་རྩ་བའི་མདོ། སློབ་དཔོན་རིན་ཆེན་འབྱུང་གནས་ཞི་བས་མཛད་པའི་སྡེབ་སྦྱོར་རིན་ཆེན་འབྱུང་གནས་སོགས་དང་། བོད་དུ་ཡང་། ཞ་ལུ་ལོ་ཙཱ་བའི་སྡེབ་སྦྱོར་གྱི་རྩ་བ་བསྡུས་པ། གཞན་ཡང་ལོ་ཙཱ་བ་བྱང་ཆུབ་རྩེ་མོ། སྟག་ལུང་ལོ་ཙཱ་བ། ལོ་ཆེན་དྷ་རྨ་ཤྲྀ་རི། སྨོན་འགྲོ་ཡབ་སྲས་སོགས་ཀྱིས་སྡེབ་སྦྱོར་གྱི་བསྟན་བཅོས་མང་དུ་ཡོད་དོ། །བོད་ཀྱི་དབང་དུ་བཏང་ན་སྡེབ་སྦྱོར་ནི། ཚིགས་བཅད་ལ་ཚེག་བར་དྲུག་པ་ནས་སོ་ལྔའི་བར་མཆིས་ལ། ཚིག་གི་མང་ཉུང་གི་རྣམ་བཞག་ལྟར། རྣམ་དབྱེ་དང་ཚིག་ཕྲད་སོགས་ཚིག་གི་ལྷུ་རྐང་བསྒྲིགས་ཏེ་སྡེབ་སྦྱོར་བྱེད་པ་ཞིག་ཡིན་པས། སྡེབ་སྦྱོར་ཤེས་ན་ཚིགས་བཅད་ལ་མཁས་ཟེར་བ་ཡིན་ནོ། །

ཟློས་གར།

ཟློས་གར་ནི། སྔོན་བྱུང་གི་གཏམ་རྒྱུད་དང་ལོ་རྒྱུས་སོགས་ཀྱི་མི་སྣ་དང་ལྷ་འདྲེ་སོགས་མཚོན་པའི་རྣམ་པ་ཞིག་སྟེ། སོ་སོའི་སྐད་ཀྱི་སྒོ་ནས་གླུ་ལེན་པ་དང་ལུས་སེམས་གཉིས་ཆར་ནས་ཡང་ཡང་ཟློས་ཤིང་གར་བྱེད་པ་ལ་ཟེར་བས། ཟློས་གར་ཤེས་ན་སྐད་རིགས་ལ་མི་རྨོངས་ཟེར་ལ། དེ་ཡང་འཁྲབ་མཁན་དེའི་ལུས་ཀྱི་རྣམ་འགྱུར་དང་ངག་གི་སྨྲ་བརྗོད་ལ་བརྟེན་ནས། འཁྲབ་བྱའི་མི་སྣ་སོ་སོའི་བསམ་བློའི་ཉམས་འགྱུར་དངོས་སུ་མཚོན་པའི་གར་གྱི་ཆ་བྱད་དགུ﹙གཞན་གར་གྱི་ཆ་བྱད་བརྒྱད། གར་གྱི་ཉམས་བརྒྱད། གར་གྱི་ཉམས་བཅུ་སོགས་བཤད་ཚུལ་ཡོད་པ་རེ་རེ་དུང་དཀར་ཚིག་མཛོད་ལས་གསལ།﹚ལྡན་ཞིང་། ཟློས་གར་གྱི་སྐྱོན་ལྔ་སྤངས་ཏེ་ལྟད་མོ་བའི་ཡིད་སེམས་དབང་མེད་འགུགས་པ་ཞིག་ཡིན། གར་འཁྲབ་པ་དང་བསྟུན་ཏེ། འབུད་རྡུང་དཀྲོལ་གསུམ་དང་རྒྱུད་ཀྱི་རོལ་མོ་བཞིས་རམ་འདེགས་བྱེད་དགོས་པ་ཡིན་ལ། ཁྱད་པར་དུ་ཟློས་གར་ལ་དགོས་པའི་ཡན་ལག་ལྔ་ངེས་པར་ཚང་དགོས་སོ། །བོད་ཀྱི་ཟློས་གར་གྱི་ས་བོན་ནི་སྲོང་བཙན་དང་ཁྲི་སྲོང་གི་དུས་ནས་གཙུག་ལག་ཁང་གི་གྱང་ལྡེབས་སུ་བྲིས་པ་ཡོད་ལ། ཁྱད་པར་གྲུབ་ཆེན་ཐང་སྟོང་རྒྱལ་བོས་ཨ་ལྕེ་ལྷ་མོའི་ཟློས་གར་སོགས་དབུ་བརྙེས་པ་ནས་བཟུང་། བོད་ཡུལ་དུ་དར་ཁྱབ་ཆེན་པོ་བྱུང་བ་གོང་གསལ་བོད་ཀྱི་ཟློས་གར་ཞེས་པའི་ཐད་དུ་གསལ་ལོ། །

སྐར་རྩིས།

སྐར་རྩིས་རིག་པ་ནི་རང་བྱུང་གི་ཉི་ཟླ་རྒྱུ་སྐར་གྱི་འཁོར་འགྲོས་ངེས་ཅན་ལ་བརྟེན་ནས་གོ་ལའི་ཐོག་དུས་མི་འདྲ་བ་དང། གནམ་གཤིས་འགྱུར་ལྡོག་གི་ཆོས་ཉིད་རྟོགས་པའི་རིག་པ་ཞིག་ཡིན། དཔྱད་གཞིའི་ཡིག་ཆ་ལྟར་ན། སྐར་རྩིས་ནི་བོད་རང་ལའང་ཆེས་སྔ་མོ་ནས་རང་རྐྱ་ཕེར་བ་ཡོད་དེ། རྒྱལ་བོ་གཉའ་ཁྲིའི་དུས་སུ་ཤེས་པ་ཅན་མི་བཅུ་གཉིས་ཀྱི་ཁྲོད་སྐོར་ཤེས་རྩིས་མཁན་ཟེར་བ་བྱུང་བ་དང་། དེ་རྗེས་བོད་རྗེ་བྱ་ཁྲི་བཙན་པོའི་སྐུ་དུས་སུ་ཡར་ཀླུང་དུ་རྒན་མོ་བལ་མའི་ཟླ་རྩིས་ཞེས་པ་ཡུལ་ཐབས་ཀྱིས་ཟླ་དཀྱིལ་གྱི་འཕེལ་འགྲིབ་ལ་བརྟག་པ་དང་། ཉི་མའི་ལྷོ་བྱང་གི་འགྲོས་ལས་དུས་གཏན་འབེབས་དང་། ཡང་ཞང་ཞུང་རྒན་པོའི་ངག་རྩིས། གཞན་བྱ་དང་ཤིང་ལ་བརྟག་པའི་ལྷོ་མོན་རྩིས། རླུང་ལ་བརྟག་པའི་བྱང་རྩིས། གངས་དང་འཁྱག་ལ་བརྟག་པའི་སྟེང་རྩིས། རི་ཕྱུགས་མཚོ་ལ་བརྟག་པའི་གམ་འབྲོག་རྩིས། ཉི་ཟླའི་བགྲོད་ལམ་ལ་བརྟག་པའི་བོན་ཞང་རྩིས་སོགས་གནམ་རིག་སྐར་རྩིས་ཕུན་སུམ་ཚོགས་པ་དར་སྤེལ་བྱས་ཏེ། བོད་གངས་ཅན་འདིར་སྐར་རྩིས་ཤེས་ན་གྲངས་ལ་མི་རྨོངས་པར་བྱས་པ་དང་།

དེ་ལས་གཞན་དུས་འཁོར་གྱི་རྒྱུད་ལས། ཕྱི་རི་གླིང་གཟའ་སྐར་གྱི་རྣམ་བཞག ནང་རྩ་རླུང་ཐིག་ལེའི་འདུ་འཕྲོད། གཞན་དཀྱིལ་འཁོར་འཁོར་ལོའི་དག་པ་བཅས་གཅིག་ཏུ་བསྒྲིགས་པའི་ཁྱད་ཆོས་གསུངས་པ་ལས། ཕྱི་རི་གླིང་གཟའ་སྐར་གྱི་རྣམ་བཞག་ནི། རི་གླིང་རོལ་མཚོ་སོགས་ཆགས་ཚུལ། བྱེད་པ་ལྔ་དང་། གཟའ་ལྔ་སོ་སོའི་མྱུར་བུལ་དང་། དྲང་འཁྱོག་བཅས་ཀྱི་འགྲོས་བཞི། སོ་སོའི་ཁྱིམ་དང་། ལོངས་སྤྱོད། གཞན་ཡང་སྒྲ་གཅན་དང་དུས་མེས་ཉི་ཟླ་འཛིན་ཚུལ། དུ་བ་མཇུག་རིང་གི་འཆར་ནུབ། དབྱར་དགུན་གྱི་ཉི་ལྡོག དུས་སྦྱོར། ཞག་གསུམ་གྱི་རྣམ་དབྱེ་སོགས་དུས་འཁོར་ལས་གསུངས་པ་རྣམས་སོ། །འདི་ལ་བྱེད་རྩིས་དང་གྲུབ་རྩིས་གཉིས་ཡོད། ལོ་ཙཱ་བ་རྭ་འབྲོ་ཤོང་གསུམ་གྱི་རིང་ལ་བོད་དུ་ཐོག་མར་བསྒྱུར་ཅིང་། ཕྱིས་སུ་རྒྱ་མཚོ་རྣམ་གསུམ་ནས་དར་རྒྱས་ཆེན་པོ་བྱུང་ལ། སྡེ་སྲིད་སངས་རྒྱས་རྒྱ་མཚོ་སོགས་ཀྱིས་རྩིས་གཞུང་མང་དུ་མཛད་ཡོད་པས་ཞིབ་ཏུ་དེ་དག་ལ་གཟིགས་པར་བྱའོ། །སྐར་རྩིས་ནི་ནང་དོན་རིག་པའི་ཁོངས་སུ་འདུ་བར་གསུངས་སོ། །

དེ་ལས་གཞན། སྲོང་བཙན་དང་ཁྲི་སྲོང་ལྡེ་བཙན་གྱི་དུས་སུ་རྒྱ་ནག་ནས་རྩིས་གཞུང་ཁ་ཤས་བོད་དུ་བསྒྱུར་བ་དང་། གཡུ་ཐོག་ཡོན་ཏན་མགོན་པོས་རྩིས་གཞུང་མང་དུ་བརྩམས་པ་དང་། དེ་རྗེས་དུས་རབས་བཅུ་གསུམ་པའི་སྟོད་དུ་སྔ་ཕྱིར་ས་སྐྱའི་ལི་ཐོ། མཚུར་ཕུའི་ལི་ཐོ། སྨིན་གླིང་ལི་ཐོ། དཔལ་སྤུངས་ལི་ཐོ་སོགས་བརྩམས་ཏེ་རྩིས་རིག་འདི་དར་སྤེལ་བཏང་ནས། གནམ་གཤིས་ཀྱི་འགྱུར་ལྡོག་དང་། གཟའ་སྐར་འཕྲོད་སྦྱོར་སོགས་ལ་མི་རྨོངས་པར་བྱས་པ་སྟེ། དེ་ནི་སྨེ་བ་དགུ་དང་། སྤར་ཁ་བརྒྱད། ལོ་སྐོར་བཅུ་གཉིས། ཀེག་རྩིས། ཚེ་རབས་ལུས་རྩིས། བག་རྩིས། གཤིན་རྩིས། གླང་རྩིས་སོགས་ཏེ། ཕལ་མོ་ཆེར་འབྱུང་བ་བཞི་དང་སྦྱར་ནས་མ་བུ་དགྲ་གྲོགས་ལ་བརྟེན་ཏེ་བརྩི་དགོས་པ་ཞིག་ཡིན་ནོ། །

 

ལེའུ་དྲུག་པ། སྔོན་འགྲོ་ཁྲིད་ཆེན་བཅུ།
སྔོན་འགྲོ་སྤྱིར་བཤད་པ།

ས་དགེ་ཀར་རྙིང་ཀུན་གྱི་ཆོས་པ་ཚོས་སྔོན་འགྲོ་གཏོང་བ་ཞེས་པ་ནི། དོན་སྙིང་གནད་དུ་འབབ་ས་གང་ཡིན་ཞེ་ན། ལུང་རྟོགས་ཀྱི་ལྷ་ཆོས་རྣལ་མ་ཞིག་རང་རྒྱུད་ལ་འབྱོར་བ་ལ། སྔོན་དུ་མཐུན་རྐྱེན་ཚོགས་བསགས་པ་དང་། འགལ་རྐྱེན་སྒྲིབ་པ་སྦྱངས་ཏེ། རྟོགས་པ་ཡ་ཚད་པ་ཞིག་སེམས་རྒྱུད་དུ་སྐྱེས་རུང་རུང་བྱ་བ་ཡིན། དཔེར་ན། ཞིང་ས་ལྟ་བུར་མཚོན་ན་ལོ་ཏོག་སྐྱེ་བ་ལ། མཐུན་རྐྱེན་ཆུ་ལུད་དྲོད་གཤེར་དང་། འགལ་རྐྱེན་ལྡུམ་ཡུག་རྡོ་གསེག་སོགས་བསལ་ཏེ། ས་བོན་ཅི་བཏབ་སྐྱེ་རུང་བའི་ཞིང་ས་གཤིན་པོར་བཟོས་པ་དང་གཅིག་མཚུངས་ཡིན། ཡང་དཔེ་གཞན་ཞིག་གི་སྟེང་ནས་བཤད་ན། མཁར་རྫོང་བརྟན་པོ་ཞིག་བཟོ་བ་ལ། རྨང་བརྟན་པོ་འདིང་བ་དང་འདྲ། རྨང་གཞི་བརྟན་པོ་ཞིག་མེད་ན་འཁྱག་ཐོག་ཏུ་མཁར་བརྩིགས་པ་ལྟར། དཔྱིད་ཀར་དྲོད་བབས་ཚེ་ཆུ་ནང་དུ་ནུབ་སྟེ་འགྲོ་བ་བཞིན། རྟོགས་པ་ཞིག་སྐྱེས་ལོ་བྱས་ཀྱང་རྐྱེན་དང་འཕྲད་ཚེ་གར་སོང་ཆ་མེད་དུ་འགྲོ་བ་ཡིན། དེ་བས་སྔོན་བྱོན་དམ་པ་རྣམས་ཀྱིས་ཆོས་ཀྱི་གནད་འདི་མཁྱེན་ནས། ཉིན་ལས་ཉིན་ཐུང་བ་དང་མཚན་ལས་མཚན་ཐུང་བའི་སྔོན་འགྲོ་ལ་འབད་པའི་རྣམ་ཐར་འདི་བྱུང་བ་ཡིན། དེས་ན་སྔོན་འགྲོ་གཏོང་ཚུལ་ལ་གྲུབ་མཐའ་ཁག་གིས་གྲངས་དང་གཏོང་ཚུལ་གྱི་ཕྱག་ལེན་མང་ནའང་། འདིར་དགེ་ལུགས་པའི་སྔོན་འགྲོ་ཁྲིད་ཆེན་བཞི་ཞེས་གྲགས་པ་ནི། གུང་ཐང་བསྟན་པའི་སྒྲོན་མེས། བླ་མ་གོང་མ་རྣམས་གདམས་པ་ཟབ་མོ་ཕལ་ཆེར་ཉམས་སུ་ལེན་པའི་སྔོན་འགྲོ་ལ། ༡ བསྟན་པ་སྤྱིའི་འཇུག་སྒོ་སྐྱབས་འགྲོ་དང་། ཐེག་ཆེན་ལམ་གྱི་འཇུག་སྒོ་སེམས་བསྐྱེད་ཕྱོགས་གཅིག་ཏུ་བསྡོམས་པ་སྐྱབས་འགྲོ་སེམས་བསྐྱེད་ཀྱི་ཁྲིད། ༢ སྡིག་པ་སྦྱོང་བ་རྡོར་སེམས་སྒོམ་བཟླས་ཀྱི་ཁྲིད། ༣ ཚོགས་གསོག་པ་མཎྜལ་གྱི་ཁྲིད། ༤ བྱིན་རླབས་འཇུག་པ་བླ་མའི་རྣལ་འབྱོར་གྱི་ཁྲིད་བཞི་ལ་སྔོན་འགྲོ་ཁྲིད་ཆེན་བཞི་འམ། སྔོན་འགྲོ་འབྲེལ་བ་ཅན་བཞིར་གྲགས་ཞེས་གསུངས་པའི་སྟེང་། ༥ དམ་ཚིག་རྡོ་རྗེ་བཟླས་པ། ༦ ཟ་བྱེད་མཁའ་འགྲོའི་སྦྱིན་སྲེག ༧ མཆོད་པ་ཕུལ་བ། ༨ བསྐོར་བ་བྱེད་པ། ༩ ཕྱག་འཚལ་བ། ༡༠ སཙྪ་འདེབས་པ་སོགས་བསྣན་ན་སྔོན་འགྲོ་ཁྲིད་ཆེན་བཅུ་ཞེས་གྲངས་བཅད་ཡོད་དོ། །རང་རང་གི་འཇོན་ནུས་དང་བསྟུན་ཏེ་སྔོན་འགྲོ་ཁྲིད་ཆེན་བཞི་འམ་བཅུ་བསྒྲུབས་ན། དལ་འབྱོར་དོན་ལྡན་དུ་འགྱུར་ལ། ཁྱད་པར་དུ་འཇིགས་བྱེད་བསྙེན་ཆེན་སོགས་བཞུགས་པའི་སྔོན་འགྲོ་སོགས་ལ། ཁྲིད་ཆེན་བཅུ་བོ་ངེས་པར་དུ་བསྒྲུབ་དགོས་སོ། །

སྐྱབས་སེམས་དཀྱུས་གཅིག་ཏུ་བཤད་པ།
བསྟན་པའི་འཇུག་སྒོ་སྐྱབས་འགྲོ།

༡ སྐྱབས་འགྲོའི་རྒྱུ། ༡ དེ་ཡང་བསྟན་པའི་འཇུག་སྒོ་སྐྱབས་འགྲོ་ཡིན་ལ། ཐོག་མར་སྐྱབས་འགྲོའི་རྒྱུ་ནི་འཇིགས་དད་གཉིས་ཡིན་པས། འཇིགས་པ་མ་ཡོང་ན་སྒྲོལ་མ་མི་དྲན་ཟེར་བ་ལྟར། རང་ཉིད་བྱེས་སུ་འགྲོ་བའི་ལམ་འགག་ཅིག་ལ་བགྲོད་པའི་ཚེ། ལམ་བར་ཞིག་ན་མི་ཤ་ཡོད་པའི་ལག་དམར་ཞིག་གིས་སྒུག་འདུག་པ་གོ་ན། ཤེས་པ་འཚུབ་ལང་ངེ་། ཡིད་སེམས་འཇིགས་ཡེར་རེ་སོང་ནས། སྐྱེལ་མ་དཔའ་བོ་ཞིག་ལ་བློ་སྙིང་ལིངས་ཀྱིས་གཏད་དེ། ངའི་ལེགས་ཉེས་སྐྱིད་སྡུག་ཁྱེད་མཁྱེན་ཟེར་ནས་བགྲོད་པ་བཞིན། རང་ཉིད་ཤི་ན་གསོན་ན། སྐྱིད་ན་སྡུག་ན། ལེགས་ན་ཉེས་ན། མཐོ་ན་དམའ་ན། འཁོར་བ་དང་ངན་སོང་གི་འཇིགས་པ་ཐམས་ཅད་ལས་སྒྲོལ་བ་ལ་བླ་མ་དཀོན་མཆོག་ཁྱེད་མཁྱེན་སྙམ་ནས་བློ་སྙིང་ཆུས་བཤལ་འདྲ་ཞིག་བྱས་ཏེ། བྱིས་པ་བསམ་མ་ཤེས་པ་ཞིག་གིས་རང་གི་མ་ལ་བློ་རྩེ་གཏོད་པ་ལས་བརྒྱ་འགྱུར་གྱིས་བློ་སྙིང་བྲང་གསུམ་གཏོད་པ་ཞིག་དགོས་སོ། །

དད་པ་ཡང་། མདོར་ན་སྙིང་ཁོང་རུས་པའི་གཏིང་ནས་གནས་སྐབས་དང་མཐར་ཐུག་གི་སྐྱིད་སྡུག་ལེགས་ཉེས་ཐམས་ཅད། སྐྱིད་ན་སྡུག་ན། ཤི་ན་གསོན་ན་བསླུ་མེད་དཀོན་མཆོག་ཁྱེད་རྣམ་པ་མཁྱེན་སྙམ་སྟེ་བློ་སྙིང་བྲང་གསུམ་གཏོད་ཐུབ་པ་ལ་ཟེར།

༢ སྐྱབས་ཡུལ་ངོས་བཟུང་བ། འོ་ན། སྐྱབས་ཡུལ་གང་ཡིན་ཞེ་ན། སྐྱབས་འགྲོ་བདུན་ཅུ་བ་ལས། སངས་རྒྱས་ཆོས་དང་དགེ་འདུན་ནི། །ཐར་བ་འདོད་པ་རྣམས་ཀྱི་སྐྱབས། །ཞེས་པ་ལྟར། རང་ཅག་གིས་སྐྱབས་ཡུལ་དཀོན་མཆོག་རིན་པོ་ཆེ་རྣམ་གསུམ་ལ་བློ་གཏོད་པ་ལས། ཚངས་པ་དང་བརྒྱ་བྱིན། ཡུལ་ལྷ་གཞི་བདག་སོགས་སྐྱབས་སུ་བསྟེན་ན། འདམ་ནང་དུ་ལྷུང་བའི་མིས་འདམ་ནང་གི་མི་ལ་སྐྱོབ་པར་རེ་བ་བཅའ་བ་དང་མཚུངས།

འོ་ན་དཀོན་མཆོག་གསུམ་གྱིས་ང་ཚོ་ཇི་ལྟར་སྐྱོབ་པ་ཡིན་ཞེ་ན། སྟོན་པ་སངས་རྒྱས་ཀྱིས་ཆོས་སྒྲུབ་པའི་ཐབས་ལམ་སྟོན་པ་དང་། རང་ཅག་གིས་ཐབས་ལམ་དེ་ཉམས་སུ་བླངས་པས་སྐྱོབ་པ་ཡིན། དེ་ཉམས་སུ་ལེན་པ་ལ་དགེ་འདུན་གྱིས་གྲོགས་བྱེད་པ་ཡིན་པས། སངས་རྒྱས་སྐྱབས་སྟོན་པ་པོ། ཆོས་སྐྱབས་དངོས། དགེ་འདུན་སྐྱབས་སྒྲུབ་པའི་ཟླ་གྲོགས་ཟེར་རོ། །ཡང་དཔེར་ན། སངས་རྒྱས་སྨན་པ་དང་། ཆོས་སྨན། དགེ་འདུན་ནད་གཡོག་ལྟ་བུ་སྟེ། ནད་པས་དེ་གསུམ་ལ་རེ་བ་བཅོལ་ལུགས་མི་འདྲ་བ་གསུམ་འབྱུང་བ་ལྟར་རོ། །

༣ སྐྱབས་འགྲོ་སྒོམ་པའི་དམིགས་རིམ། སྐྱབས་འགྲོ་ཇི་ལྟར་ལག་ཏུ་བསྟར་ཚུལ་ནི། གནས་ཁང་བྱི་དོར་གཙང་སང་ངེ་བ་ཞིག་བྱས་ཏེ། ཆག་ཆག་ལེགས་པར་བཏབ། བདུག་སྤོས་བསུང་ཆིལ་ལེ་ཞིག་སྒྲོན་ཏེ། སྟེགས་བཟང་བོ་ལ་སྐུའི་རྟེན་སྐྱབས་འགྲོའི་ཚོགས་ཞིང་ཞིག་ཡོད་ན་རབ། མེད་ཀྱང་སངས་རྒྱས་བྱང་སེམས་ཀྱི་སྐུ་བརྙན་བྲིས་འབུར་ཅི་རིགས་དང་། གསུང་གི་རྟེན་ལ་ལམ་སྔགས། ཐུགས་ཀྱི་རྟེན་ལ་བྱང་ཆུབ་མཆོད་རྟེན་སོགས་གང་འཛོམས་བཞུགས་སུ་གསོལ། ཅི་འབྱོར་བའི་མཆོད་པ་གཡོ་མེད་ཅིང་བཀོད་པ་མཛེས་པར་བཤམས། བདེ་བའི་སྟན་ལ་སྤྱོད་ལམ་ཚུལ་མཐུན་གྱིས་འཁོད་དེ། རང་རྒྱུད་ལ་བརྟག་ནས། ག་རེ་བདག་ངན་སོང་ལས་འཁྱམས་འཁྱམས་ནས། ད་རེབ་ཙམ་ལ་རྙེད་དཀའ་ཞིང་དོན་ཆེ་བའི་མི་ལུས་རིན་པོ་ཆེ་ཞིག་འཐོབ་ཀྱང་། དོན་ལྡན་གྱི་སྙིང་བོ་ཅི་བླངས། ནམ་ཞིག་འཆི་བ་མི་རྟག་པ་བསམ་དབང་དྲན་དབང་མེད་པར་གནམ་ལྕགས་ཀྱི་ཐོག་བཞིན་ལྟར་རང་སྟེང་དུ་བབས་ན། དགེ་བ་བསགས་པ་མང་ངམ། སྡིག་པ་བསགས་པ་མང་། ཞེས་རང་གིས་རང་ལ་ཕྲ་མ་རྒྱོབ། རང་ལྟ་བུ་ལ་བསམ་ན་དགེ་བ་ནི་ཡུངས་དཀར་ལས་ཀྱང་ཉམ་ཆུང་། མི་དགེ་བ་ནི་རི་རབ་ལས་ཀྱང་དཔངས་མཐོ། དེས་ན་དབུགས་རྟ་རྔ་འདྲ་བོ་འདི་ཆད་དེ་ངན་སོང་ལས་སྐྱེས་ཚེ། དམྱལ་བར་ཚ་གྲང་། ཡི་དྭགས་བཀྲེས་སྐོམ། དུད་འགྲོར་བླུན་ཞིང་བཀོལ་སྤྱོད་སོགས་སྡུག་བསྔལ་བཟོད་གླགས་མེད་པ་མྱོང་དགོས་པར་མ་ཟད། ད་དུང་ལས་ངན་མ་ཟད་བར་དུ་ཐར་བའི་རེ་བ་མེད་པས། ཧོན་འཐོར་བ་ལྟ་བུ་འཇིགས་སྐྲག་ཅི་སྐྱེས་བྱ། དེས་ན་དེ་ལས་སྐྱབས་དང་སྐྱོབ་པ་དཔུང་གཉེན་མཐར་ཐུག་པ་ནི། དཀོན་མཆོག་རིན་པོ་ཆེ་རྣམ་པ་གསུམ་ཁོ་ན་ཡིན་པས། ད་ལྟ་ཉིད་ནས་བློ་སྙིང་བྲང་གསུམ་དཀོན་མཆོག་ལ་གཏད་དེ་སྐྱབས་འགྲོ་རྣལ་མ་ཞིག་བྱ་སྙམ་ནས།

རང་གི་གཡས་སུ་ཕ། གཡོན་དུ་མ། མདུན་དུ་དགྲ་དང་བགེགས། རྒྱབ་ཏུ་གཉེན། མཐའ་འཁོར་དུ་རིགས་དྲུག་གི་འགྲོ་བ་རྣམས་ཀྱིས་བསྐོར་བ། དེ་དག་ཐམས་ཅད་ཀྱང་ཚེ་རབས་སྔོན་མ་རྣམས་སུ་རང་གི་མར་གྱུར་ཚེ། ད་ལྟའི་མ་བཞིན་དྲིན་མོ་ཆེ་ཤ་སྟག་ཡིན་ཚུལ་བསམ་ནས་སྙིང་རྗེ་དུངས་དུངས་པ་ཞིག་སྐྱེས་ཏེ། འདི་དག་ཐམས་ཅད་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་འཐོབ་འདོད་ཀྱི་དགེ་སེམས་ཁྱད་པར་ཅན་གྱིས་ཀུན་ནས་བསླངས་ཏེ། སྐྱབས་འགྲོའི་ཚོགས་ཞིང་གསལ་གདབ་པ་ནི།

རང་གི་སྨིན་མཚམས་ཀྱི་དྲང་ཐད་དུ་སེང་ཆེན་བརྒྱད་ཀྱིས་བཏེགས་པའི་ཁྲི་སྟེང་དུ་པད་ཟླ་ཉི་མའི་དཀྱིལ་འཁོར་གྱི་གདན་ལ་ངོ་བོ་རང་གི་རྩ་བའི་བླ་མ་ཡིན་པ་ལ། རྣམ་པ་རྒྱལ་བ་ཤཱཀྱ་ཐུབ་པ་ཡིན་པར་གསལ་བཏབ། དེའི་ཐུགས་ཀར་རྒྱལ་བ་རྡོ་རྗེ་འཆང་། དེའི་ཐུགས་ཀར་ཧཱུཾ་ཡིག་སྔོན་པོ་འོད་ཟེར་འཕྲོ་བ། སྟོན་པའི་རྒྱབ་ངོས་ཀྱི་སྟེང་དུ་སེང་ཁྲི་པད་ཟླ་ཉི་མའི་གདན་ལ་རྒྱལ་བ་རྡོ་རྗེ་འཆང་ལ་ཉམས་ལེན་བྱིན་རླབས་བརྒྱུད་པའི་བླ་མ་རྣམས་ཀྱིས་བསྐོར་བ། གཡས་སུ་རྗེ་བཙུན་བྱམས་པ་མགོན་པོ་ལ་རྒྱ་ཆེན་སྤྱོད་བརྒྱུད་ཀྱི་བླ་མ་རྣམས་ཀྱིས་བསྐོར་བ། གཡོན་དུ་རྗེ་བཙུན་འཇམ་དབྱངས་ལ་ཟབ་མོ་ལྟ་བརྒྱུད་ཀྱི་བླ་མ་རྣམས་ཀྱིས་བསྐོར་བ། མདུན་དུ་ཆོས་འབྲེལ་ཅན་གྱི་བླ་མ་རྣམས་ཀྱིས་བསྐོར་བ། དེ་དག་གི་མཐའ་འཁོར་དུ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་དཔའ་མོ་ཉན་རང་ཆོས་སྐྱོང་སོགས་ཀྱིས་བསྐོར་བ། དེ་སོ་སོའི་མདུན་ན་སྟེགས་མཐོན་པོ་ལ་རང་རང་གིས་གསུངས་པའི་འོད་ཀྱི་རང་བཞིན་ཅན་གྱི་པོ་ཏིའི་རང་སྒྲ་ལྷང་ལྷང་སྒྲོགས་པ། དེ་དག་གི་ཕྱི་ལོགས་སུ་ཁོར་ཡུག་མཛེས་ཤིང་སྡུག་པ་མཁོ་རྒུ་མ་ཚང་བ་མེད་པ། ཐམས་ཅད་ཀྱང་རང་ལ་དགྱེས་པའི་ཉམས་ཅན་དུ་བསམ་མོ། །

དེ་ནས་རང་དབུ་མཛད་ཀྱི་ཚུལ་དུ་སེམས་ཅན་ཐམས་ཅད་ཀྱི་མགྲིན་གཅིག་དབྱངས་གཅིག་གིས་སྐྱབས་འགྲོ་བཞི་སྐོར་འདོན་པར་བྱ་སྟེ། ཡབ་རྗེ་བླ་མའི་སྐྱབས་ཁྲིད་ལས། བདག་གི་དྲིན་ཅན་ཕ་མའི་ཐོག་དྲངས་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་ད་ནས་བཟུང་སྟེ་བྱང་ཆུབ་སྙིང་བོ་ལ་མཆིས་ཀྱི་བར་དུ་བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཞེས་བརྒྱ་སྟོང་ཁྲི་འབུམ་བརྗོད། དམིགས་པ་ནི། སྐྱབས་ཡུལ་རྣམས་ལས་བདུད་རྩི་འོད་ཟེར་དང་བཅས་པ་བྱུང་ནས། རང་དང་སེམས་ཅན་ལ་ཐིམ། ཚེ་དང་བསོད་ནམས་ལུང་རྟོགས་ཀྱི་ཡོན་ཏན་སོགས་འཕེལ་ཞིང་རྒྱས། བླ་མ་མཆོག་གསུམ་གྱི་བྱིན་རླབས་ཞུགས། བདག་དང་མ་སེམས་ཅན་ཐམས་ཅད་འཁོར་བ་དང་ངན་སོང་གསུམ་གྱི་སྡུག་བསྔལ་ཐམས་ཅད་ལས་བསྐྱབས་བྱུང་སྙམ་པའི་མོས་པར་བྱའོ། །གསུངས་པ་ལྟར་རོ། །

ཐུན་བསྡུ་བའི་ཚེ། བླ་མ་ཐུབ་དབང་གི་ཐུགས་ཀ་ནས་འོད་ཟེར་འཕྲོས་པ་ཚོགས་ཞིང་རྣམས་ལ་ཕོག་པས། ཐམས་ཅད་འོད་དུ་ཞུ་ནས་ཐུབ་དབང་ལ་ཐིམ། ཐུབ་དབང་རང་གི་སྨིན་མཚམས་སུ་ཐིམ་པས་རང་རྒྱུད་བྱིན་གྱིས་བརླབས་པའི་མོས་པ་བྱའོ། །མཇུག་ཏུ་དགེ་བ་རྣམས་འདུན་པ་དྲག་པོས་བསྔོ་བར་བྱའོ། །

༤ བསླབ་པར་བྱ་བའི་རིམ་པ། བདག་ཉིད་དེ་རིང་ནས་དཀོན་མཆོག་གསུམ་གྱི་སྐྱབས་འོག་ཏུ་འཛུལ་ཟེར་བ་ཙམ་གྱིས་མི་ཆོག་པར། སྐྱབས་འགྲོའི་བསླབ་བྱ་བསྲུང་དགོས། མ་བསྲུང་ན། ཁ་སྟོང་ནང་གི་ཚིག་སྟོང་དང་། ཕྱག་སྟོང་ནང་གི་ཕྱག་རྒྱ་ལས་མ་འདས་པས། ཕན་ཡོན་ཕར་ཞོག ནང་བ་སངས་རྒྱས་པའི་གྲས་སུའང་མི་ཆུད་པས། སྐྱབས་འགྲོའི་བསླབ་བྱ་བརྗོད་པ་ལ། འདིར་ནང་ཚན་དགར་རྒྱུ་མང་ཡང་། ལས་དང་བོ་བར་རྟོགས་སླ་བའི་ཆེད་དུ་སྐྱབས་འགྲོའི་བསླབ་བྱ་ཉི་ཤུ་དཀྱུས་གཅིག་ཏུ་བཀོད་ན།

༡ དགེ་བའི་བཤེས་གཉེན་ལ་བརྟེན་པ། ༢ དམ་པའི་ཆོས་ལ་ཉན་པ། ༣ ཚུལ་བཞིན་ཡིད་ལ་བྱེད་པ། ༤ ཆོས་མཐུན་སྒྲུབ་པ་སྟེ་དགེ་འདུན་ལ་ཆོས་སྒྲུབ་པའི་ཟླ་གྲོགས་སུ་འཛིན་པ། ༥ མིག་རྣ་སོགས་དབང་བོ་ལྔ་བོ་ཉོན་མོངས་ལ་མི་ཕྱོགས་པར་ཞི་ཞིང་དུལ་བ། ༦ རང་གི་རྒྱུད་ཚོད་དང་བསྟུན་ཏེ་བསླབ་སྡོམ་ལེན་པ། ༧ སེམས་ཅན་གྲོག་སྦུར་ཚུན་ཆད་མི་བསོད་པར་སེམས་ཅན་ལ་སྙིང་བརྩེ་བ། ༨ རང་མཁོས་དང་བསྟུན་ནས་དཀོན་མཆོག་མཆོད་པ་ལ་བརྩོན་པ། ༩ སངས་རྒྱས་ལ་སྐྱབས་སུ་སོང་ནས་འཇིག་རྟེན་ཀྱི་ལྷ་འདྲེ་སོགས་ལ་སྐྱབས་མི་བཅོལ་བ། ༡༠ ཆོས་ལ་སྐྱབས་སུ་སོང་ནས་སེམས་ཅན་གཞན་ལ་གནོད་འཚེ་མི་བྱེདཔ། ༡༡ དགེ་འདུན་ལ་སྐྱབས་སུ་སོང་ནས་ཆོས་ལུགས་དང་ལྟ་བ་མི་མཐུན་པ་ལ་བློ་གཏད་མི་བྱ་བ། ༡༢ སངས་རྒྱས་ལ་སྐྱབས་སུ་སོང་ནས་སངས་རྒྱས་ཀྱི་སྐུ་གཟུགས་རྒྱུ་ཆ་ངན་པ་ས་འདམ་ལས་བྱས་པ་དང་། བཟོ་དབྱིབས་ངན་པ། ཞིག་རལ་ཏུ་གྱུར་བའི་སྐུ་གཟུགས་ཚུན་ཆད་ལ་སངས་རྒྱས་ཀྱི་འདུ་ཤེས་འཛིན་པ། ༡༣ ཆོས་ལ་སྐྱབས་སུ་སོང་བས་ཆོས་ཀྱི་ནང་དོན་ལྡན་པའི་ཡིག་འབྲུ་གཅིག་ཚུན་ཆད་ལའང་ཆོས་དཀོན་མཆོག་གི་འདུ་ཤེས་འཇོག་པ། ༡༤ དགེ་འདུན་ལ་སྐྱབས་སུ་སོང་བས་དགེ་འདུན་གྱི་རྟགས་ཙམ་འཛིན་པ་ཚུན་ཆད་ལ་མ་གུས་པ་སྤང་བ། ༡༥ མཆོག་གསུམ་གྱི་ཁྱད་པར་དང་ཡོན་ཏན་དྲན་ནས་ཡང་དང་ཡང་དུ་སྐྱབས་སུ་འགྲོ་བ། ༡༦ མཆོག་གསུམ་གྱི་བཀའ་དྲིན་དྲན་པས་རྟག་ཏུ་བཟའ་བཅའི་ཕུད་དབུལ་ཏེ་མཆོད་པ་ལ་བརྩོན་པ། ༡༧ ཐུགས་བརྩེ་བའི་སྒོ་ནས་འགྲོ་བ་གཞན་ཡང་སྐྱབས་འགྲོ་ལ་འགོད་པ། ༡༨ བྱ་ལས་གང་དང་དགོས་པ་ཅི་ཡོད་ཀྱང་དཀོན་མཆོག་ལ་མཆོད་ནས་གསོལ་བ་འདེབས་ཤིང་འཇིག་རྟེན་གྱི་ཐབས་གཞན་སྤོང་བ། ༡༩ སྔར་བཤད་པའི་སྐྱབས་འགྲོའི་ཕན་ཡོན་རྣམས་བསམས་ཏེ་ཉིན་མཚན་དུས་དྲུག་ཏུ་སྐྱབས་སུ་འགྲོ་བ། ༢༠ བཞད་གད་ཀྱི་ཕྱིར་རམ་སྲོག་གི་ཕྱིར་ཡང་དཀོན་མཆོག་གསུམ་མི་གཏང་བའོ། །རང་ཉིད་ནང་བར་ཚུད་མི་ཚུད་ནི། མཐར་གཏུགས་ན་བསླབ་བྱ་ཉི་ཤུ་བོ་འདི་རང་རྒྱུད་ན་ཡོད་མེད་ལ་ཐུག་འདུག་སྟེ། དེ་མིན། གླ་བྲག་ནང་དུ་བཞག་ནས། གླ་རྩི་རྒྱ་ནང་དུ་གཏམས་པ་དང་འདྲའོ། །

༥ སྐྱབས་སུ་སོང་བའི་ཕན་ཡོན། སྐྱབས་འགྲོའི་ཕན་ཡོན་ལ། ལམ་རིམ་ཆེན་མོར། བསྡུ་བ་ལས་བྱུང་བ་བརྒྱད་དང་། མན་ངག་ལས་འབྱུང་བ་བརྒྱད་གསུངས་ཀྱང་། འདིར་མན་ངག་ལས་འབྱུང་བ་བརྒྱད་བཤད་ན།

༡ ནང་བ་སངས་རྒྱས་པར་ཆུད་པ་ནི། སྙིང་ཁོང་རུས་པའི་གཏིང་ནས་མཆོག་གསུམ་ལ་བློ་སྙིང་གཏོད་པ་ཞིག་མ་བྱུང་ན། ཡབ་རྗེ་བླ་མས། ཁེ་རྒྱལ་ཁ་ཙམ་གྱི་དོན་ཆེད་དུ། །ཕ་བླ་མ་དཀོན་མཆོག་ཀུན་འདོར་ཡང་། །མིག་ཟིམ་ཟིམ་སྐྱབས་འགྲོ་གསོལ་འདེབས་པ། །བློས་དཔྱད་ཚེ་གད་མོ་འཆོར་བའི་རྒྱུ། །གསུངས་པ་ལྟར། རྒྱུད་ན་སྐྱབས་འགྲོ་མེད་ན། བཀའ་རབ་འབྱམས་པར་ཐོས་བསམ་གྱིས་སྒྲོ་འདོགས་བཅད་ཀྱང་རུང་། བསྐྱེད་རྫོགས་སྒོམ་ཁུལ་བྱས་ཏེ་ས་ལ་འཛུལ་ཞིང་གནམ་དུ་འཕུར་ཀྱང་རུང། ནང་བ་སངས་རྒྱས་ཀྱི་གྲས་སུ་མི་ཚུད་པས། བཀའ་གདམས་གོང་མས། གནས་བརྟན་ཞལ་མར་གཟིགས་ཅིག་འདུག་པ་ལ། ད་དུང་ནང་བ་སངས་རྒྱས་ཀྱི་གྲས་སུ་ཚུད་མེད་པའང་མང་། གསུངས་པས། དམ་ཆོས་རྣལ་མ་ཞིག་བསྒྲུབ་རྒྱུ་ཡིན་ཕྱིན། ཐོག་མར་བསྟན་པའི་འཇུག་སྒོ་སྐྱབས་འགྲོ་གནད་དུ་ཁེལ་བ་ཞིག་རང་རྒྱུད་ལས་སྐྱེས་པ་གལ་ཆེའོ། །

༢ སྡོམ་པ་ཐམས་ཅད་ཀྱི་རྟེན་དུ་གྱུར་བ་ནི། སྐྱབས་འགྲོ་བདུན་ཅུ་བ་ལས། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་པ་ལྟར། སོ་ཐར་དང་བྱང་སེམས། གསང་བ་སྔགས་ཀྱི་སྡོམ་པ་གང་ཡིན་ཀྱང་སྐྱབས་འགྲོའི་རྟེན་གཞི་མེད་ན། རྒྱ་མཚོ་ལ་ཁ་བ་བབས་པ་བཞིན་རྟེན་མེད་དུ་གྱུར་ནས། ཐ་ན་ཉིན་གཅིག་ལ་གསོ་སྦྱོང་ཞིག་ལེན་པའམ། ཁ་ཏོན་ཅིག་འདོན་པ། ཆོ་ག་ཞིག་གྱེར་བ་ཚུན་ཆད་ལའང་སྐྱབས་འགྲོའི་རྨང་གཞི་དགོས་སོ། །

༣ སྔར་བསགས་པའི་ལས་སྒྲིབ་བསྲབས་ཤིང་འཛད་པ་ནི། རྒྱལ་བོ་མ་སྐྱེས་དགྲས་ལྷས་བྱིན་གྱི་ཁ་ལ་ཉན་ཏེ་རང་གི་ཕ་གཟུགས་ཅན་སྙིང་བོ་བསད་པ་དང་། སྟོན་པ་དང་དགེ་འདུན་ལ་མི་འོས་པའི་ལས་ངན་ཚབས་པོ་མང་དུ་བྱས་པས། ཚེ་སྨད་ལ་འབྲུམ་བུ་མེ་དབལ་ནག་པོའི་ནད་བྱུང་ནས། ཁོ་འུ་ཐུག་ཐབས་ཟད་དེ་འཕགས་པ་འཆར་ཀ་སྤྱན་དྲངས་པས། འཆར་ཀས་རྒྱལ་བོ་ཆེན་པོ་རང་གིས་ནུས་ན་སངས་རྒྱས་ལ་ཕྱག་གསུམ་འཚལ་ཏེ་སྐྱབས་སུ་སོང་ཞིག ཅེས་གདམས་པས། མ་སྐྱེས་དགྲས་ཁོ་བྲན་གཡོག་རྣམས་ལ་སློང་བཅུག་པས། ལག་པ་སོགས་གང་ལས་འཐེན་པ་དེ་ནས་ཤ་ཐམས་ཅད་བུལ་འགྲོ་བའི་སྡུག་བསྔལ་བྱུང་ཡང་། བསྲན་ཚུགས་ཏེ་ཕྱག་གསུམ་འཚལ་ནས་སངས་རྒྱས་ཁོ་ནར་སྐྱབས་སུ་སོང་བས། སྔོན་བསགས་ཀྱི་ལས་ངན་ཐམས་ཅད་ཟད་ནས་དགྲ་བཅོམ་འཐོབ་པ་ཡིན། རྒྱལ་བོ་འདི་སྐུ་ཚེ་གཅིག་ལ་མིང་གསུམ་ཐོགས་པ་ཡིན་ཏེ། དང་བོ་རྒྱལ་བོ་མ་སྐྱེས་དགྲ། བར་དུ་སྡིག་ཅན་མ་སྐྱེས་དགྲ། ཐ་མར་དགྲ་བཅོམ་མ་སྐྱེས་དགྲ་ཟེར་རོ། །

ཡང་བདུད་ལྷས་བྱིན་གྱིས་མི་ཚེ་གང་བོ་སངས་རྒྱས་ལ་འགྲན་ཟླ་དང་། མཚམས་མེད་ཀྱི་ལས་སོགས་ལོག་ལྟ་དང་མི་དགེ་བ་བགྲང་ལས་འདས་པ་བསགས་ཏེ། ས་གས་ནས་དམྱལ་བའི་མེ་འཕྱུར་ཏེ་གསོན་སྲེག་མཛད་སྐབས། སངས་རྒྱས་ཀྱི་གསུང་ལ་ཡིད་ཆེས་ནས། ད་ནི་རུས་པའི་གཏིང་ནས་སངས་རྒྱས་ལ་སྐྱབས་སུ་མཆིའོ། །ཞེས་བརྗོད་པས་མ་འོངས་པ་ན་སངས་རྒྱས་རུས་པ་ཅན་བྱ་བར་འགྱུར་བར་ལུང་བསྟན་པ་དང་།

ཡང་ཞབས་དཀར་བས། སྔོན་དབུས་ཕྱོགས་ཀྱི་བླ་མ་ཞིག་རྒྱལ་གདོན་གྱིས་ན་བའི་རྐྱེན་བྱས། ཐུགས་དམ་གྱི་གཙོ་བོ་དམིགས་བརྩེ་མ་ལ་བྱས་པས་རྒྱལ་ནད་དྲག མཚན་མོ་རྨི་ལམ་ཞིག་ཏུ། རྗེ་རིན་པོ་ཆེར་མཇལ། ཁྱོད་ལོ་འདི་ལྟ་བུ་ཞིག་ལ་དགའ་ལྡན་དུ་འོང་དགོས་གསུངས་པ་རྨིས་པ་སློབ་མ་འགའ་རེར་བཤད། ཕྱིས་ལོ་དེའི་ནང་ལ་སྐུ་གཤེགས། གདུང་བཞུ་བའི་དུས། སྟེང་ཕྱོགས་ནས་སྤྲིན་དཀར་བོ་ཞིག་གདུང་སྟེང་དུ་འཐེན། གདུང་བཞུས་པས་རྒལ་ཚིགས་ཀྱི་རུས་པ་སོགས་ཀྱི་སྟེང་དུ། དམིགས་བརྩེ་མའི་ཡི་གེ་རང་བྱོན་དུ་བྱུང་སྐད་གསུངས་པ་ལྟ་བུའོ། །

༤ བསོད་ནམས་རྒྱ་ཆེན་པོ་འཐོབ་པ་ནི། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་གསུངས་པ་ལྟར། སྔོན་རྫ་མཁན་ཁྱེའུ་སྣང་བྱེད་བྱ་བ་བསོད་ནམས་དམན་པའི་དབང་གིས། རྫ་གང་བཟོས་པ་མྱུར་དུ་ཆག་པའམ། ཉོ་མཁན་མ་རྙེད་པས། ཐབས་རྡུགས་ཏེ་སངས་རྒྱས་ལ་ཞུས་པས། རེ་ཞིག་ཁྱེད་ཀྱིས་རྫ་བཟོ་རྒྱུ་བསྐྱུར་ལ། རྒྱལ་བྱེད་ཚལ་དུ་ཕྱགས་དར་དང་། མཆོག་གསུམ་ལ་སྐྱབས་འགྲོ་གྱིས་ཤིག་ཅེས་གདམས་པས། རྗེས་སུ་ཁོ་རང་ཕྱུག་པོར་ཆགས་ཏེ། སྟོན་པ་ཐུགས་རྗེ་ཅན་གྱི་བཀའ་དྲིན་དྲན་ནས། སངས་རྒྱས་ལ་གདུགས་ཚོད་མ་ཆག་པར་དྲངས་ཤིང་། དུས་གསུམ་གསུམ་དུ་དགེ་འདུན་ལ་ན་བཟའ་ཕུལ་བའི་སྦྱིན་བདག་ཆེན་པོ་ཞིག་ཏུ་གྱུར་བ་དང་། ཡང་དགེ་བཤེས་སྤྱན་སྔ་བ་མི་སྐྱའི་དུས་གསེར་ཁར་ལན་གཉིས་ཕྱིན་ཀྱང་རེས་གཅིག་ཡེ་མི་རྙེད། ཐང་གཅིག་བཞི་ཙམ་རྙེད། ཕྱིས་གློ་སྙིང་བྲང་གསུམ་དཀོན་མཆོག་ལ་གཏད་ཅིང་ལམ་རིམ་བསྒོམས་པས་མཐོང་ཆོས་སུ་བསོད་ནམས་མངོན་དུ་གྱུར་ཏེ། གསེར་ཡང་སྲང་བདུན་སྟོང་སྦྱིན་པ་བཏང་བ་ལྟ་བུའོ། །ཚུལ་འདི་ལ་དགོངས་ནས་པོ་ཏོ་བའི་ཞལ་ལས། ཡུང་བའི་དགེ་བཤེས་ཤཱཀྱ་ཡོན་ཏན་གྱིས་དཀོན་མཆོག་གསུམ་ལ་བློ་བཀལ་ནས་ཆོས་ཉམས་སུ་བཞེས་པས། ད་ལྟ་ཡུང་བ་ཙམ་ན་ཁོང་ལ་བདེ་སྐྱིད་ཆེ། གསུངས་པ་ལྟར་རོ། །

༥ ངན་འགྲོར་མི་ལྟུང་བ་ནི། སྔོན་ལྷ་ཞིག་འཆི་ལྟས་ཀྱིས་ཐེབས་ཏེ་ཞག་བདུན་ནས་ཕག་ཏུ་སྐྱེས་པར་མཐོང་བས་སྨེ་སྔགས་བཏོན་པ་ན། བརྒྱ་བྱིན་གྱིས་བྱིན་གྱིས་བརླབས་ཏེ་སངས་རྒྱས་ལ་སྐྱབས་སུ་འགྲོར་བཅུག་པས། དགའ་ལྡན་གྱི་ལྷའི་རིས་སུ་སྐྱེས་པ་དང་། ཡང་རྒྱ་གར་དུ་གནས་བརྟན་ཞིག་ལ་ཕམ་པ་བྱུང་བས། ཁོ་འགྱོད་དེ་སྐྱབས་འགྲོ་ཁོ་ན་བྱེད་བཞིན་པའི་འཕྲོར་ཚེ་འཕོས། ཤི་མ་ཐག་དམྱལ་བར་སྐྱེས་ཏེ་གཤིན་རྗེ་ལས་མཁན་རྣམས་ཀྱིས་སོད་སོད་རྒྱོབ་རྒྱོབ་ཀྱིས་འཇིགས་སྣང་བསྐུལ་བས། ཁོ་ཤིན་ཏུ་སྐྲག་ཏེ་མཆོག་གསུམ་ལ་སྐྱབས་སུ་འགྲོ་བའི་ཚེ། ལས་མཁན་དག་གིས་མཚོན་རུབ་བྱས་ནས་བསད་པས། དམྱལ་བའི་སྡུག་བསྔལ་ཡུད་ཙམ་པ་དེ་ལས་མ་མྱང་བར་སུམ་ཅུ་རྩ་གསུམ་གྱི་ལྷར་སྐྱེས་པ་ལྟ་བུའོ། །

 ༦ མི་དང་མི་མིན་གྱི་བར་ཆད་ཀྱིས་མི་ཚུགས་པ་ནི། རྒྱ་གར་དུ་མི་ཞིག་ལ་རྒྱལ་བོའི་ཁྲིམས་ཆད་ཕོག་པས་དུར་ཁྲོད་དུ་བོར། དེར་བསྐྱལ་ཚད་ཀྱི་ཤ་ཟས་སུ་ཟ་བ་ལ། ཁོས་དགེ་འདུན་གྱི་ཚུལ་བུ་ཞིག་སྤྱི་བོར་བཞག་ནས་སྐྱབས་འགྲོ་བྱས་པས། གནོད་པས་མ་ཚུགས་པ་དང་། ཡང་སྔོན་མི་ཞིག་དྲེད་ཀྱིས་བཟུང་ནས་ཤི་ལ་ཁད་དུ་གཏུགས། ཕྱིས་བླ་མ་ཞིག་གིས་ཁོ་ལ་སྐྱབས་འགྲོའི་མན་ངག་བསྟན་པས། ཡང་བསྐྱར་དྲེད་དང་ཐུག་སྐབས། ཁོས་སྐྱབས་འགྲོ་བྱས་པས། དྲེད་ཀྱིས་སྣས་སྣོམ་ཙམ་བྱ་བ་ལ་མིའི་དྲི་ཙམ་མ་ཚོར་བར་སོང་བ་དང་། ཡང་དགེ་སློང་ཞིག་གི་གྲྭ་ཤག་ཏུ་རྐུན་མ་འཛུལ་བ་བཟུང་སྟེ། དཀོན་མཆོག་གསུམ་གྱི་མཚན་ནས་སྒྲོགས་ཏེ་དབྱུག་པས་ལན་གསུམ་བཞུས་པས། དེ་བྲོས་ཏེ་མི་མ་ཡིན་རྒྱུ་བའི་ཟམ་འོག་ཅིག་ནས་དེ་བསྐྱར་གྱིན། དེ་གསུམ་ལས་མེད་པ་ལེགས། དེ་ལས་མང་ན་ཁོ་བོ་གསོད་འདུག་ཅེས་ཆིག་ལབ་བརྒྱབ་པས། དེའི་ནུབ་མོར་ཟམ་སྟེང་དུ་མི་མ་ཡིན་འགྲོ་མ་ཐུབ་པར་བཤད་དོ། །

༧ ཅི་བསམ་པ་ཐམས་ཅད་འགྲུབ་པ་ནི། བོད་དུ་ནང་ཆོས་མ་དར་བའི་སྔོན་དུ། རང་སངས་རྒྱས་གསུམ་བྱོན་ནས་སྐྱབས་འགྲོ་ཁོ་ན་མཛད་དེ། མཐའ་འཁོབ་འདིར་རྒྱལ་བསྟན་དར་བའི་རྟེན་འབྲེལ་བསྒྲིགས། དེ་དུས་སོ་སོའི་རྫུ་འཕྲུལ་སྟོན་པར་དགོངས་ནས། མཛུབ་མོ་རི་འབིག་གིས། རི་བོ་མཛུབ་མོས་ཕིག་པས། ཀུན་ཡ་མཚར་ནས་རྒྱུ་མཚན་དྲིས་པས། སངས་རྒྱས་ལ་སྐྱབས་སུ་སོང་བའི་ནུས་མཐུ་ཡིན་གསུངས། རྦབ་སོ་འཛིན་གྱིས། རྦབ་ཆེན་པོ་འགྲིལ་བ་སོས་བཟུང་བས། ཅི་ཡིན་ཞུས་པས། ཆོས་ལ་སྐྱབས་སུ་སོང་བའི་ནུས་མཐུ་ཡིན་གསུངས། དཔུང་བ་རི་འགུལ་གྱིས། དཔུང་ཤེད་ཀྱིས་རི་ཆེན་པོ་སྒུལ་བས། ཅི་ཡིན་ཞུས་པས། དགེ་འདུན་ལ་སྐྱབས་སུ་སོང་བའི་ནུས་མཐུ་ཡིན་གསུངས་པ་ལྟར་དང་། ཡང་བཞི་བརྒྱ་བ་ལས། བསམ་པ་བཟང་བོས་མཆིལ་ལྷམ་ཞིག། ཐུབ་པའི་དབུ་ལ་བཞག་པ་དང་། །གཞན་གྱིས་དེ་ཉིད་བསལ་བྱས་པ། །གཉིས་ཀས་རྒྱལ་སྲིད་འཐོབ་པར་འགྱུར། །ཞེས་པ་ལྟར། སྔོན་ལམ་ཁ་ཞིག་ན་སཙྪ་ཞིག་ཡོད་པ་མི་ཞིག་གིས་མཐོང་བས། འདི་ནི་ཆར་བའི་མྱུར་དུ་འཇིག་ཉེན་ཆེ་བསམ་ནས། ལོགས་སུ་ལྷམ་ཀྲད་ཞིག་ཡོད་པ་སྟེང་དུ་བཀབ་པ་དང་། གཞན་ཞིག་གིས། ཨ་ཙ་མ། སཙྪའི་སྟེང་དུ་མི་གཙང་བའི་ལྷམ་ཀྲད་བཀབ་པ་མ་ལེགས་སོ་ཟེར་ནས། དེ་མ་ཐག་དོར་བས། ལྷམ་འགེབས་པ་པོ་དང་འདོར་བ་བོ་གཉིས་ཀའི་བསམ་པ་བཟང་བས། གནས་སྐབས་རྒྱལ་སྲིད་སོགས་མངོན་མཐོ་འཐོབ་ཅིང་། མཐར་ཐུག་ཐར་བའི་ས་བོན་ཐེབས་པ་ཡིན་ནོ། །

༨ མྱུར་དུ་འཚང་རྒྱ་བའི་ཕན་ཡོན་ནི། དམ་ཆོས་པད་དཀར་ལས། བདེར་གཤེགས་སྐུ་གཟུགས་རྩིག་ངོར་བྲིས་པ་ལ། །འཁྲུགས་བཞིན་པ་ཡི་སེམས་ཀྱིས་བལྟས་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །གཡེང་བའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིགས་གཅིག་ལན་འགའ་བརྗོད་པར་བྱས་ནའང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །གསུངས་པ་ལྟར་རོ། །

ཐེག་ཆེན་གྱི་འཇུག་སྒོ་སེམས་བསྐྱེད།

༡ བྱང་ཆུབ་ཀྱི་སེམས་བསྐྱེད་དགོས་པ། ཇོ་བོ་ཆེན་པོ་རྡོ་རྗེ་གདན་ལ་བསྐོར་བ་མཛད་ནས། ཇི་ལྟར་བྱས་ན་མྱུར་དུ་རྫོགས་པའི་བྱང་ཆུབ་འཐོབ་སྙམ་དུ་དགོངས་པ་ན། སྐུ་གཟུགས་ཆུང་བ་རྣམས་བཞེངས་ནས་ཆེ་བ་རྣམས་ལ། མྱུར་དུ་འཚང་རྒྱ་བར་འདོད་པས་གང་ལ་བསླབ་པར་བྱ་ཞེས་དྲིས་པ་ན། བྱང་ཆུབ་ཀྱི་སེམས་ལ་བསླབ་པར་བྱའོ། །ཞེས་གསུངས་པ་ལྟར། བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་མཛོད་ལས་གཅེས་ནོར་དཀར་བོ་ཆིག་ཐུབ་ལྟ་བུ་ཡིན། བྱང་ཆུབ་སེམས་ཀྱིས་རྩིས་མ་ཟིན་ན། རྩ་རླུང་སྒོམ་པ་དང་སྦུད་པ་རླུང་གིས་འགེངས་པ་ལ་ཁྱད་མེད། བསྐྱེད་རྫོགས་ཀྱི་བཟོ་འདྲ་བོ་བསྒོམས་ཀྱང་། དེ་མུ་སྟེགས་པ་ལའང་ཡོད། དེ་བས་དགེ་བཤེས་སྟོན་པ་ལ་རྣལ་འབྱོར་བ་ཆེན་པོས། ཁོ་བོ་ལ་རླུང་མཉམ་འཇུག་ལ་སོགས་པའི་ཏིང་ངེ་འཛིན་འདི་དང་འདི་ཡོད་བྱས་པས། ཁྱོད་ལ་རྣ་རྩར་རྔ་བོ་ཆེ་བརྡུངས་ཀྱང་མི་ཤིགས་པའི་སྒོམ་ཡོད་ཀྱང་། བྱམས་པ་དང་སྙིང་རྗེ་བྱང་ཆུབ་ཀྱི་སེམས་མེད་ན། ཉིན་མཚན་དུ་བཤགས་པ་བྱ་དགོས་པའི་སར་སྐྱེས་པ་ཡིན་ནོ་གསུངས། ཚུལ་འདི་ལ་དགོངས་ནས། སྤྱོད་འཇུག་ལས། བསྐལ་བ་དུ་མར་རབ་དགོངས་མཛད་པ་ཡི། །ཐུབ་དབང་རྣམས་ཀྱིས་འདི་ཉིད་ཕན་པར་གཟིགས། །གསུངས་སོ། །

༢ སེམས་དེ་སྦྱངས་པའི་རིམ་པ། བྱང་ཆུབ་ཀྱི་སེམས་སྦྱངས་ལུགས་ལ་གཉིས་ཏེ། ཇོ་བོ་རྗེ་ནས་བརྒྱུད་པའི་རྒྱུ་འབྲས་མན་ངག་བདུན་མ་དང་། ཞི་བ་ལྷའི་གཞུང་ལས་འབྱུང་བའི་བདག་གཞན་མཉམ་བརྗེས་སོ། །ལས་དང་བོ་བར་རྒྱུ་འབྲས་མན་ངག་བདུན་གྱི་སྒོ་ནས་བློ་སྦྱངས་ན་སྐྱེས་ཚབས་ཆེ་བས་འདི་ལྟར། ཐོག་མར་དགྲ་གཉེན་བར་མའི་སེམས་ཅན་ཐམས་ཅད་ལ་བཏང་སྙོམས་སྒོམ། དེ་ནས་མར་ཤེས། དྲིན་དྲན། དྲིན་གཟོ། ཡིད་འོང་གི་བྱམས་པ། སྙིང་རྗེ་ཆེན་པོ། ལྷག་བསམ་རྣམ་དག་བཅས་བསྒོམས་དགོས་ལ། དང་བོ་བཏང་སྙོམས་ནས་ཡིད་འོང་གི་བྱམས་པའི་བར་ལྔ་བོ་ནི་རྒྱུ་དང་། རྒྱུ་དེ་ལ་བརྟེན་ནས་འབྲས་བུ་སྙིང་རྗེ་ཆེན་པོ་དང་ལྷག་བསམ་རྣམ་དག་གཉིས་འབྱུང་ཞིང་། དེ་ལ་བརྟེན་ནས་བྱང་ཆུབ་ཀྱི་སེམས་འབྱུང་བའི་རྒྱུ་མཚན་གྱིས་རྒྱུ་འབྲས་མན་ངག་བདུན་གྱི་སྒོ་ནས་བྱང་ཆུབ་མཆོག་ཏུ་སེམས་བསྐྱེད་ཚུལ་ཞེས་བརྗོད་དོ། །

༣ སེམས་བསྐྱེད་ཀྱི་དབྱེ་བ། བློ་སྟོབས་ཀྱི་སྒོ་ནས་དབྱེ་ན་གསུམ་ཡོད། དེ་ཡང་རྒྱལ་བོ་རྣམས་ཕས་རྒོལ་ཟིལ་མནོན་དང་རང་སྡེ་དཔུང་བསྟོད་ཀྱིས། ཐོག་མར་རང་ཉིད་རྒྱལ་བོར་བཞུགས་ཏེ་མངའ་རིས་སྐྱོང་བ་བཞིན་དུ། ཐོག་མར་རང་ཉིད་སངས་རྒྱས་ཀྱི་གོ་འཕང་བརྙེས་ཏེ། ཕྱིས་སུ་སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པ་ནི་རྒྱལ་བོ་ལྟ་བུའི་སེམས་བསྐྱེད་དེ་བློ་སྟོབས་ཞན་པ་ཡིན། དཔེར་ན། སངས་རྒྱས་ཤཱཀྱ་ཐུབ་པ་ལྟ་བུ་ཡིན།

མཉན་པ་རྣམས་རང་ཉིད་གྲུ་བོ་ཆེར་ཁ་ལོར་བསྒྱུར་ཏེ་མགྲོན་པོ་རྣམས་དང་མཉམ་དུ་ཆུའི་ཕ་རོལ་ཏུ་སྒྲོལ་བ་ལྟར། རང་གཞན་ཐམས་ཅད་ལྷན་ཅིག་ཏུ་སངས་རྒྱས་ཀྱི་གོ་འཕང་ལ་འགོད་པ་ནི། མཉན་པ་འམ་གྲུ་བ་ལྟ་བུའི་སེམས་བསྐྱེད་པ་དེ། བློ་སྟོབས་འབྲིང་ཡིན་ལ། དཔེར་ན། རྗེ་བཙུན་བྱམས་པ་ལྟ་བུའི་སེམས་བསྐྱེད་ཡིན།

ཕྱུགས་རྫི་རྣམས་རྩྭ་ཆུ་གང་བཟང་དུ་ནོར་ལུག་རྣམས་སྔོན་དུ་དེད་ནས་རང་ཉིད་ཕྱི་བཞིན་དུ་འབྲངས་པ་ལྟར། སྔོན་དུ་སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་དེ་ཕྱི་ནས་རང་ཉིད་འཚང་རྒྱ་བར་འདོད་པ་ནི་ཕྱུགས་རྫི་ལྟ་བུའི་སེམས་བསྐྱེད་དེ་བློ་སྟོབས་ཆེན་པོ་ཡིན་ལ། དཔེར་ན། རྗེ་བཙུན་འཇམ་དབྱངས་ཀྱི་སེམས་བསྐྱེད་ལྟ་བུ་ཡིན་ནོ། །

༤ སྨོན་འཇུག་གི་བསླབ་བྱ་གཟུང་ཚུལ། སྨོན་པའི་བསླབ་བྱ་ནི། བདག་གཞན་མཉམ་པ། བརྗེ་བ། བདག་པས་གཞན་གཅེས་སྒོམ་པ་དང་གསུམ་དང་། འཇུག་པའི་བསླབ་བྱ་ནི། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་བོ། །

༥ བྱང་ཆུབ་སེམས་ཀྱི་ཕན་ཡོན། འཁོར་བའི་བཙོན་ར་ལྟ་བུར་ལྷུང་བའི་ཉམ་ཐག་གི་འགྲོ་བ་སུ་ཞིག་ཡིན་རུང་བྱང་ཆུབ་ཀྱི་སེམས་འདི་སྐྱེས་མ་ཐག་རྒྱལ་བའི་སྲས་བོ་ཞེས་བཀུར་འོས་པའི་ཞིང་དམ་པ་སྟེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་པ་ལྟར། ཤར་རི་སྡེ་བའི་ལུང་ལས་ཀྱང་། སྤྱིར་མི་ལུས་འདི་མི་གཙང་བའི་རྫས་སོ་དྲུག་སོགས་ཀྱི་རྐྱལ་བ་ཞིག་ཡིན་ཡང་བྱང་ཆུབ་ཀྱི་སེམས་དེ་ཡོད་ན་རིན་ཐང་གཞལ་དུ་མེད་པའི་རྒྱལ་བའི་སྐུར་བསྒྱུར་ནུས་པ་དང་། དགེ་བ་གཞན་ཀུན་ཆུ་ཤིང་བཞིན་དུ་འབྲས་བུ་བསྐྱེད་ནས་ཟད་ཅིང་། བྱང་ཆུབ་སེམས་ཀྱི་ལྗོན་པའི་འབྲས་བུ་ལ་ཟད་པ་མེད་པར་འཕེལ་བར་འགྱུར་རོ། །བྱང་ཆུབ་ཀྱི་སེམས་རྒྱུད་ལྡན་གྱི་གང་ཟག་དེ་མིའམ་དུད་འགྲོ་གང་ཡིན་རུང་དགེ་བ་གཞན་མ་བྱས་བར། གཉིད་ལོག་པའམ་བག་མེད་ར་རོའི་ངང་ནས་བཞུགས་ཀྱང་། ནམ་མཁའ་དང་མཉམ་པའི་དགེ་རྩ་རྟག་ཏུ་འབྱུང་བར་མ་ཟད། འཁོར་ལོ་སྒྱུར་རྒྱལ་སྲུང་བའི་སྲུང་མ་ཉིས་འགྱུར་གྱིས་སྲུང་བའོ། །ཞེས་གསུངས་སོ། །

བྱང་ཆུབ་ཀྱི་སེམས་འདི་སྡིག་པ་འཇོམས་པའི་ཡང་མཆོག་ཏུ་བསྔགས་ཏེ། སྡོང་བོ་བཀོད་པའི་མདོ་ལས། ཉེས་བྱས་ཐམས་ཅད་སྲེག་པའི་བསྐལ་བའི་མེ་ལྟ་བུའོ། །གསུངས་པ་ལྟར། སྤྱོད་འཇུག་ལས། སྡིག་པ་ཤིན་ཏུ་མི་བཟད་བྱས་ནའང་། །དཔའ་ལ་བརྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་འགྱུར་བ། །དེ་ལ་བག་ཅན་རྣམས་ཀྱིས་ཅིས་མི་བརྟེན། །དེ་ནི་དུས་མཐའི་མེ་བཞིན་སྡིག་ཆེན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་སོ། །

གཞན་ཡང་། བྱང་ཆུབ་ཀྱི་སེམས་མངའ་བའི་རྒྱལ་སྲས་རྣམས་ལ་བཟང་འབྲེལ་ལྟ་ཅི། ངན་འབྲེལ་བྱས་པས་ཀྱང་སེམས་དཔའ་དེས་སྨོན་ལམ་གྱི་སྟོབས་ཀྱིས་བདེ་བ་འདྲེན་པར་བྱེད་དེ། སྟོན་པ་སློབ་པ་ལམ་གྱི་གནས་སྐབས་སུ་རྒྱལ་བོ་བྱམས་པའི་སྟོབས་སུ་གྱུར་བའི་ཚེ་གནོད་སྦྱིན་ལྔ་ལ་ཤ་ཁྲག་དྲོན་མོ་སྦྱིན་ཏེ། བདག་སངས་རྒྱས་པའི་ཚེ་ན་ཆོས་ཀྱི་བདུད་རྩིའི་ཐོག་མ་ཁྱེད་ཅག་རྣམས་ལ་སྦྱིན་པར་ཤོག་ཅེས་སྨོན་ལམ་བཏབ་པས། གནོད་སྦྱིན་ལྔ་བོ་འཁོར་ལྔ་སྡེར་གྱུར་བ་དང་། ཡང་ཐུབ་པ་འདི་ཉིད་རྒྱལ་བོ་པདྨའི་སྐྱེ་བ་བཞེས་དུས་ཁོང་གི་མངའ་རིས་ལ་ནད་ཡམས་ཆེན་པོ་ཞིག་བྱུང་བས་མི་མང་བོ་ཤི་བས། སྨན་པས་ཉ་རོ་ཧི་ཏའི་ཤས་ཕན་གྱི། གཞན་གང་གིས་ཀྱང་མི་ཕན་པར་ཞུས་པས། རྒྱལ་བོས་དུས་བཟང་ཞིག་ལ་དེར་སྐྱེས་པའི་གསོལ་བ་དྲག་ཏུ་བཏབ་ནས། ཁང་བཟང་ཁྲུ་སྟོང་ཡོད་པའི་ཁར་མཆོངས་སོ། །དེ་མ་ཐག་ཉ་རོ་ཧི་ཏར་སྐྱེས་ནས། མིའི་སྐད་དུ་ངའི་ཤ་ལས་ཟོ་ཤིག གཞོགས་གཅིག་ལས་ཟད་ཙ་ན་གཅིག་སོབ་སྟེ་ཀུན་ལ་ཕན་ནོ། །ང་ཁྱེད་ཅག་གི་རྒྱལ་བོ་པདྨ་ཡིན་ཏེ། ཁྱེད་རྣམས་ནད་ལས་སྐྱོབ་ཆེད་སྐུ་ཚེ་འདུ་བྱེད་བཏང་བ་ཡིན། ཁ་ལ་ཉན་ན་དྲིན་དུ་སྡིག་སྤོང་དགེ་སྒྲུབ་བྱོས་ཤིག་གསུངས་པས། དེ་དག་གིས་ཀྱང་བཀའ་བཞིན་བསྒྲུབས་པས། དེ་ནས་བཟུང་དེར་ཐམས་ཅད་དུ་ངན་སོང་དུ་མ་ལྟུང་བ་ལྟ་བུ་དང་།

ཡང་། བྱང་ཆུབ་ཀྱི་སེམས་རྒྱུད་ལྡན་གྱི་གང་ཟག་གིས་སྨོན་ལམ་དང་བདེན་ཚིག་ཅི་བཏབ་འགྲུབ་སྟེ། དྲང་སྲོང་བཟོད་པ་སྨྲ་བའི་སྤྱན་སྔར་རྒྱལ་བོ་རྩོད་བྱུང་གི་བཙུན་མོས་ཆོས་ཉན་པར་ཕྲག་དོག་དང་སྡང་སེམས་སྐྱེས་ནས། རྒྱལ་བོ་དེས་དྲང་སྲོང་གི་ཡན་ལག་དང་ཉིང་ལག་བཅད་དེ། ཁྱོད་སུ་ཡིན་ཅེས་དྲིས་ཀྱང་། ད་དུང་བདག་དྲང་སྲོང་བཟོད་པ་སྨྲ་བའོ་ཞེས་རང་ཚུགས་མ་ཤོར་ལ། རྒྱལ་བོ་དེས་འོ་ན་ཁྱོད་བཟོད་པ་ཅན་དུ་ཅིའི་ཕྱིར་ཡིད་ཆེས་པར་འགྱུར་སྨྲས་པས། བདག་བཟོད་པ་ཅན་དུ་བདེན་ན་ཁྲག་འོ་མར་འགྱུར་ཞིང་། ཡན་ལག་བཅད་པ་ཡང་སྔར་ལྟར་སོས་པར་གྱུར་ཅིག་ཅེས་བདེན་ཚིག་བརྗོད་མ་ཐག་སྔར་བཞིན་གྱུར་བ་ལྟ་བུའོ། །

དེ་ལས་གཞན། བྱང་ཆུབ་ཀྱི་སེམས་མངའ་བའི་སེམས་དཔའ་དེའི་དྲུང་དུ་བྱ་དང་གཅན་གཟན་རི་དྭགས་ཚུན་ཆད་འཁོར་ཞིང་གཅིག་གིས་གཅིག་ལ་གནོད་འཚེ་མི་བྱེད་དེ། དཔེར་ན། རྒྱལ་སྲས་ཐོགས་མེད་ཀྱི་དྲུང་དུ་སྤྱང་ཀི་ཞིག་ཡོད་པས་གཞན་ལ་མི་གནོད་པ་དང་། གྲྭ་ནང་གི་འབུ་སྦྲང་ཚུན་ཆད་གཅིག་གིས་གཅིག་ལ་མི་འཚེ་བར་གསུངས་པ་དང་། བླ་མ་ཡོངས་འཛིན་ཡེ་ཤེས་རྒྱལ་མཚན་འཇིག་རྟེན་ན་བཞུགས་དུས་སུ། ཁོང་ལ་བྱང་ཆུབ་ཀྱི་སེམས་མངའ་བས། ས་དེར་སྤྱང་ཀིས་ལུག་མི་གསོད་པ་དང་། ལུག་ཡང་སྤྱང་ཀིར་སྐྲག་སྣང་མེད་པ་ལྟ་བུ་བྱུང་། མཚམས་ཞིག་ས་དེར་སྤྱང་ཀིས་ལུག་གསོད་པ་བྱུང་བས། ཐམས་ཅད་ཀྱིས་ཁོང་མྱ་ངན་ལས་འདས་པར་ཤེས་པ་ལྟ་བུ་དང་། སྔོན་རྒྱ་གར་ན་བླ་མ་བྱམས་པའི་རྣལ་འབྱོར་བ་བྱང་ཆུབ་ཀྱི་སེམས་བསྒོམས་ནས་ནགས་གསེང་ན་བཞུགས་དུས། གཅན་གཟན་ཚུན་ཆད་ཀྱི་གཞན་ལ་མི་འཚེ་བར་བསྐོར་བ་བྱེད་པ་དང་། ནམ་མཁའི་བྱ་ཚུན་ཆད་འཕུར་མཚམས་བཞག་ནས་ཆོས་ལ་ཉན་པ་སོགས་བྱུང་བ་དང་། སྐྱེས་རབས་ལས་ཀྱང་། དེ་ཡི་རང་བཞིན་སྙིང་རྗེ་བདག་ཉིད་ཀྱིས། །རྣམ་པར་བརླན་པ་བཞིན་དུ་བརླན་གྱུར་ན། །ཕན་ཚུན་གནོད་པ་མེད་པའི་ཡིད་གྱུར་ཏེ། །དཀའ་ཐུབ་ཅན་བཞིན་གཅན་གཟན་ཁྲོ་བོའང་སྤྱོད། །ཅེས་པ་ལྟར། དེད་དཔོན་སེང་གེ་སོགས་སེམས་བསྲུངས་པས་སྲིན་མོ་ཐུལ་བ་དང་། གྲུབ་པ་འཐོབ་པའི་སྐྱེས་བུ་རྣམས་སྟག་དང་སེང་གེ་སོགས་བཞོན་པ་དང་དུག་སྦྲུལ་སོགས་ཕྱག་ཏུ་ཐོགས་པ་ལྟ་བུའོ། །

གཞན་ཡང་། རྗེ་མི་ལ་རས་པ་དེ་ཉིད་བལ་བོད་གཉིས་ཀྱི་སོ་མཚམས་དབེན་གནས་གཉི་ཤང་འགུར་རྟ་བྱ་བར་བཞུགས་དུས། ནམ་ཞིག་གི་ཚེ་གནས་དེའི་ཕུར་ཁྱི་སྐད་ལྷང་ལྷང་བ་དང་། དེ་རྗེས་ཐུག་སྒྲ་ཆེན་པོ་ཞིག་བྱུང་བས། ད་ལམ་བར་ཆད་ཅིག་མིན་ལས་ཆེ་བསམས་ནས། ལུང་མདོའི་ཕ་བོང་ཞིག་གི་ཁར་དམིགས་པ་མེད་པའི་སྙིང་རྗེ་ཆེན་པོའི་ངང་ལ་བཞུགས་ཚེ། ཁྱི་ར་བ་མགོན་པོ་རྡོ་རྗེས་ཤྭ་བ་བདའ་བྱུང་བ་ལ། རྗེ་བཙུན་གྱིས་མགུར་བཞེངས་ནས་ཤྭ་བའི་འཇིགས་སྐྲག་ཞི་ནས་མཆི་མ་ཕྲུལ་ཞིང་ན་བཟའ་ལ་ལྡག་སྟེ་རྗེ་བཙུན་གྱི་གཡོན་ཕྱོགས་སུ་བག་ཕེབས་ནས་ཉལ་བསྡད་པ་དང་། དེའི་རྗེས་ཁྱི་མོ་གློག་སྤྱང་དམར་མོ་བྱ་བ་ལྕེ་དར་ཡུག་ཙམ་རྐྱོང་བ། སྡེ་བཞི་ཐམས་ཅད་བྲག་གིས་གཤགས་པ། འདི་ཕྱི་སྣང་བའི་དངོས་བོ་ཐམས་ཅད་དགྲར་མཐོང་བ། གནོད་སེམས་དང་ཞེ་སྡང་གི་ཁྱི་སྐད་འདོན་པ་དེ་ཡང་ཆོས་གསུངས་ནས། ཞེ་སྡང་ཞི་ནས་སྐད་སྣ་ནས་འདོན་ཞིང་། རྗེ་བཙུན་ལ་མཇུག་མ་བསྒྲིལ་ཏེ་ན་བཟའ་ལྡག་ནས་གུས་གུས་བྱེད་ཅིང་། རྗེ་བཙུན་གྱི་གཡས་ཕྱོགས་སུ་མིག་མཆི་མ་ཉིལ་ལེ་ལག་པ་གཉིས་ཀྱི་བར་དུ་མཚུལ་བ་བཅུག་ནས། ཤྭ་བ་དང་དང་མ་བུའི་ཚུལ་དུ་ཉལ་བ་དང་། དེའི་རྗེས་མི་ངམ་གནག་མིག་རྩ་འཁྲུག་པ། སྐྲ་ཐམས་ཅད་སྤྱི་བོར་བཅིངས་པ། ཐུ་བ་གཡས་གཟེད་གཡོན་གཟེད་བྱས་པ། དགོ་སློག་ཞགས་པ་ལ་བརྒྱུས་ནས་ག་ཤ་ལ་དྲངས་པ། ལག་ན་མདའ་གཞུ་ཐོགས་ཤིང་དབུགས་ཁར་འཚངས་པ། རྔུལ་ནག་ཁྲག་ཏུ་ཤམ་མེ་བ་ཞིག་སླེབས་པའི་ཁྱི་ར་བ་མགོན་པོ་རྡོ་རྗེ་དེ་ཡང་ཆོས་གསུངས་ནས། ལྷ་ཆོས་རྣལ་མ་བསྒྲུབས་པས་ཉམས་རྟོགས་མཐར་ཕྱིན་པའི་ཐུགས་སྲས་ཁྱི་ར་རས་པ་ཞེས་པར་གྱུར་བ་དང་། ཁྱི་དང་ཤྭ་བ་ཡང་དེ་ནས་བཟུང་སྟེ་ངན་སོང་གི་སྡུག་བསྔལ་ལས་གྲོལ་བ་དང་།

ཨ་ཏི་ཤ་ཕྱག་སྙུང་བ་ལ་འབྲོམ་གྱི་པང་དུ་བཞག་ནས་འདི་ལ་ཁྱོད་ཀྱིས་བྱིན་རླབས་གྱིས་དང་། ཁྱོད་ལ་བསམ་པ་བཟང་བོ་ཡོད་པ་ཡིན་གསུངས་པ་དང་། དེ་བས། ཇོ་བོ་བླ་མ་མང་ཡང་བླ་མ་གསེར་གླིང་བ་སེམས་ཙམ་རྣམ་བདེན་གྱི་ལྟ་བ་དང་། ཁོང་དབུ་མའི་ལྟ་བ་འཛིན་པ་ཡིན་ཀྱང་། བྱང་ཆུབ་ཀྱི་སེམས་གསེར་གླིང་བར་བརྟེན་ནས་འཁྲུངས་པས། སྐུ་དྲིན་ཆེ་ཤོས་དང་འགྲན་གྱི་དོ་མེད་ཀྱི་རྩ་བའི་བླ་མ་ཉག་གཅིག་ཏུ་འཛིན་པ་ཡིན་ནོ། །

བསམ་པ་བཟང་ངན་གྱི་དབང་གིས་ལས་དཀར་ནག་དང་སྟོབས་ཆེ་ཆུང་འགྱུར་བ་ཡིན་ཏེ། རྗེ་ཐམས་ཅད་མཁྱེན་པས། བསམ་པ་བཟང་ན་ས་དང་ལམ་ཡང་བཟང་། །བསམ་པ་ངན་ན་ས་དང་ལམ་ཡང་ངན། །ཐམས་ཅད་བསམ་པ་དག་ལ་རག་ལས་པས། །ཞེས་པ་ལྟར། དམ་ཆོས་ཐེག་པ་ཆེན་པོའི་མདོ་ལས། སེམས་གཅིག་སྨེ་ན་ནི་ཆོས་སོ་ཅོག་སྨེའོ། །སྨེ་བའི་དྲི་མ་ནི་སྡིག་པ་ཡིན་ནོ། །ཞེསདང་། རིན་པོ་ཆེའི་ཕུང་བོའི་མདོ་ལས་ཀྱང་། སྟོང་གསུམ་གྱི་སེམས་ཅན་ཐམས་ཅད་སོ་སོ་ནས་སངས་རྒྱས་ཀྱི་མཆོད་རྟེན་རི་རབ་ཙམ་བྱེད་ལ། དེ་དག་ལའང་བསྐལ་བ་བྱེ་བ་སྙེད་དུ་བསྟི་སྟང་དུ་བྱ་བ་ཐམས་ཅད་ཀྱིས་བསྟི་སྟང་བྱེད་པ་ལས། བྱང་སེམས་ཀྱིས་ཐམས་ཅད་མཁྱེན་པའི་སེམས་དང་མ་བྲལ་བས་མེ་ཏོག་གཅིག་ཙམ་དོར་བ་བསོད་ནམས་མང་བར་གསུངས་སོ། །གཞན་ཡང་། སྔོན་རྒན་མོ་མ་བུ་གཉིས་ལག་སྦྲེལ་བྱས་ནས་ཆུས་འཁྱེར་བ་ལ། མས་བསམ་པར་བུ་མོ་འདི་ཆུས་མ་འཁྱེར་བ་ཞིག་བྱུང་ན་ང་རང་འཁྱེར་ཡང་ཅི་སྐྱོན་སྙམ་པ་དང་། བུ་མོས་ཨ་མ་ཆུས་འཁྱེར་བ་ལས་རང་འཁྱེར་ན་སྙམ་པས། གཉིས་ཀ་ཤི་ནས་ཚངས་པའི་འཇིག་རྟེན་དུ་སྐྱེས་པ་ཡིན། མདོར་ན། དཔས་བྱིན་གྱིས་ཞུས་པ་ལས། རིན་ཆེན་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་སོ། །

དེ་ལྟ་བས་ན། མན་ངག་ཐམས་ཅད་ཀྱི་སྙིང་བོ། དངོས་གྲུབ་ཀུན་གྱི་གཏེར། ཐེག་དམན་ལས་འབྱེད་པའི་ཆོས་གཅིག་པུ། རྒྱལ་སྲས་བྱང་ཆུབ་སེམས་དཔའི་ཁྱད་ནོར། མྱུར་དུ་འཚང་རྒྱ་བའི་གདམས་པ་ཟབ་མོ། རྒྱལ་སྲས་ཀྱི་སྤྱོད་པ་རླབས་པོ་ཆེ་ལ་སྐུལ་བའི་རྟེན་དམ་པ་ནི་བྱང་ཆུབ་ཀྱི་སེམས་སུ་ཤེས་པར་བྱོས་ནས། རུས་ཤིང་དང་བཅས་ཏེ་སྐོམ་པས་ཆུ་འདོད་པ་ལྟར་བཙལ་ཞིང་སྒོམ་པར་བྱའོ། །

རྡོར་སེམས་སྒོམ་བཟླས།

༡ རྡོར་སེམས་སྒོམ་བཟླས་གལ་ཆེ་ཚུལ། རང་ཅག་སྐྱེ་བ་ཐོག་མ་མེད་པ་ནས་ད་ལྟའི་བར་དུ་སྡིག་ལྟུང་ཆར་བ་བབས་པ་བཞིན་བྱུང་བས། ད་ལྟ་ཤེས་རྒྱུད་ནག་ཐོམ་མེར་གྱུར་ཏེ། ས་ལམ་གྱི་མངོན་རྟོགས་འཁྲུངས་པ་ལྟ་ཅི། བསམ་བློ་ཡག་པོ་ཞིག་ཀྱང་མི་འབྱུང་བ་སྡིག་སྒྲིབ་ཀྱིས་ལན་པ་ཡིན། རྗེ་བཙུན་བློ་བཟང་ཆོས་ཀྱི་རྒྱལ་མཚན་གྱིས། སེམས་ཀྱི་ཆོས་ཉིད་མཐོང་བ་ཡང་། །ཚོགས་བསགས་སྒྲིབ་སྦྱོང་ལ་ལྟོས་པས། །ཡིག་བརྒྱ་འབུམ་ཙམ་ལྟུང་བཤགས་ནི། །བརྒྱ་ཕྲག་གང་མང་སྔོན་བཏང་ནས། །གསུངས་ལ། དཔེར་ན་སེམས་ནི་མེ་ལོང་ལྟ་བུ་དང་། མངོན་རྟོགས་ཀྱི་རིམ་པ་ནི་གཟུགས་བརྙན་འཆར་བ་ལྟ་བུ་ལགས་པས། མེ་ལོང་ལ་ས་རྡུལ་དང་འབག་བཙོག་གིས་བསྒོས་ན་མངོན་རྟོགས་ཀྱི་གཟུགས་བརྙན་མི་འཆར་བས། སྡིག་སྦྱངས་བྱེད་པ་གལ་ཆེ། སྤྱིར་སྡིག་སྒྲིབ་སྦྱོང་བའི་ཐབས་མང་དུ་ཡོད་ཀྱང་། རྗེ་སྒྲུབ་ཁང་བས། ཁྱེད་ཚོ་ལམ་གྱི་རྟོགས་པ་ཞིག་རྒྱུད་ལ་སྐྱེས་འདོད་པ་ཡིན་ན་ཡིག་བརྒྱ་འབུམ་ཐེར་རེའི་བསྙེན་པ་གྱིས། གསུངས་པ་ལྟར། སྡིག་ལྟུང་སྦྱངས་ཚུལ་གཞན་ལས་ཀྱང་མཆོག་ཏུ་གྱུར་བ་ནི། རྡོར་སེམས་སྒོམ་བཟླས་ལ་བརྟེན་ནས་སྡིག་ལྟུང་སྦྱངས་པ་འདི་བསྔགས་པ་ཡིན། རང་ཅག་སྐྱེ་བ་ཐོག་མེད་ནས་བག་མེད་དང་ལེ་ལོའི་ངང་ལུས་ངག་ཡིད་གསུམ་གྱི་སྡིག་ལྟུང་ཆར་བ་འབབ་པ་ལྟར་བསགས་ཡོད་པ་ཕར་ཞོག ཉེས་པ་ཕྲ་མོ་རེས་ཀྱང་། དུག་སྦྲུལ་གྱིས་སོ་བཏབ་པ་བཞིན་དུག་འཕེལ་བར་འགྱུར་བར་མ་ཟད། དགེ་རྩ་ཐམས་ཅད་ཆད་ནས་འགྱོད་བཞིན་དུ་ངན་འགྲོ་སྐྱེ་དགོས་པ་ཡིན་པས། ཡབ་རྗེ་སྐལ་ལྡན་རྒྱ་མཚོས། ཉིན་བཞིན་དུ་ལུས་ངག་ཡིད་གསུམ་པོ། །སྡིག་མི་དགེའི་སྐྱོན་གྱིས་ཆེར་སྦགས་པས། །རྒྱུད་ལས་སུ་རུང་བའི་འགལ་རྐྱེན་བྱེད། །གསུངས་ལ། དེ་བས་ན་བཤགས་སྡོམ་བྱེད་པ་གནད་དུ་ཆེ་ལ། འཆི་ཁ་ཚུན་ཆད་དུ་བཤགས་སྡོམ་མ་བྱས་ན། ངན་འགྲོར་སྡུག་བསྔལ་བཟོད་གླགས་མེད་པ་མྱོང་ངེས་པས། དེ་མི་འདོད་ན་སྡིག་ལྟུང་བཤགས་སྡོམ་བྱེད་པ་ལས་ཐབས་གཞན་མེད་པས། དགེ་སྦྱོར་གཞན་རྣམས་བཞག་སྟེ་བཤགས་སྡོམ་ལ་འབད་དགོས། དེ་ཡང་ད་ལྟ་ངན་འགྲོའི་རྒྱུ་སྡིག་ལྟུང་བཤགས་སྦྱངས་བྱེད་པ་དང་། སྡིག་ལྟུང་གི་འབྲས་བུ་ངན་འགྲོའི་སྡུག་བསྔལ་བཟོད་དཀའ་བ་མྱོང་བ་གཉིས་ཀྱི་གདམ་ཀ་རང་ལ་ཡོད་པས། གནད་ཀ་མ་འཕྱུགས་པར་བྱ་དགོས། ཁྱད་པར་དུ་རང་ཅག་བོད་མི་རྣམས། སྙིང་རུས་ཆུང་ལ་དཔའ་རྔམ་ཆེ་བས། དབང་རེ་མ་ཉན་པ་མེད་པའི་ཚོད་དུ་འདུག གསང་སྔགས་ཀྱི་སྒོ་ཞུགས་ནས་དམ་ཚིག་མ་བསྲུང་ན་དམྱལ་བ་དང་། བསྲུངས་ན་སངས་རྒྱས་ཀྱི་གོ་འཕང་འཐོབ་པ་ལས་འགྲོ་ས་གཞན་མེད་ཚོད་ཡིན། ཆོས་ལ་མ་ཉན་པ་གཅིག་ཀྱང་མེད་ལ། སྲུང་བ་སྣ་གཅིག་ཀྱང་མེད་པས། ད་ལྟ་དམ་ཉམས་ས་སྟེང་བཀང་བའི་ཚོད་དུ་འདུག ཚོགས་གྲལ་དུ་དམ་ཉམས་གཅིག་ཕྱིན་ན་ཉམས་གྲིབ་ཀྱིས་དམ་ལྡན་ཁྲི་འབུམ་གྱི་སྒྲུབ་པ་ལ་འབྲས་བུ་མི་འབྱིན་པ། དཔེར་ན། འོ་མ་གཙང་མ་ཟངས་མོ་ཆེ་གང་ལ་འོ་རུལ་ཐིགས་པ་གཅིག་ལྷུང་སྟེ་རུལ་བར་བྱེད་པ་དང་འདྲ། དམ་ཉམས་དེའི་ཉེས་པ་ཡང་། རྒྱུད་ལས། རྡོ་རྗེ་སྲིན་པོས་སྙིང་ཁྲག་འཐུང་བ་དང་། །ཚེ་ཐུང་ནད་མང་ནོར་ཡལ་དགྲས་འཇིགས་དང་། །མནར་མེད་དམྱལ་བ་ཤིན་ཏུ་སྐྱི་གཡའ་བ། །སྡུག་བསྔལ་མི་བཟད་ཡུན་རིང་གནས་པར་འགྱུར། །ཞེས་གསུངས་པ་ལྟར་ཡིན་པས། དང་བོ་ནས་ཆོས་གཞན་གང་ལས་ཀྱང་ཐོག་མར་སྡིག་ལྟུང་སྦྱངས་པ་གལ་ཆེ།

༢ མི་མཐུན་ཕྱོགས་སྤང་སྟེ་མཐུན་ཕྱོགས་སྒྲུབ་དགོས་པ། དེ་ཡང་དམིགས་རྣམ་གྱི་གསལ་འདེབས་ཅི་ཡང་མེད་པར། ངག་བཀྱལ་གྱི་གཏེར་ཁ་བརྡོལ། ཕུ་མདའ་བར་གསུམ་གྱི་བླ་བཙག་ཕྱི་བརྡུང་གི་འཆལ་གཏམ་གྱི་སྒོ་མོ་ཕྱེས་ཏེ། བགྲང་ཕྲེང་རྒྱུ་ནག་འདེད་འདེད་བྱས་པས་གར་ཡང་མི་ཕྱིན་ཏེ། སྤྱོད་འཇུག་ལས། བཟླས་བརྗོད་དང་ནི་དཀའ་ཐུབ་ཀུན། །ཡུན་རིང་དུས་སུ་སྤྱད་བྱས་ཀྱང་། །སེམས་གཞན་གཡེང་བས་བྱས་པ་ནི། །དེ་ཉིད་རིག་པས་དོན་མེད་གསུངས། །ཞེས་བཟླས་བརྗོད་བྱེད་ཚེ་ཡང་། སེམས་རྣལ་དུ་མི་གནས་པར་གཡེང་ནས་བཏོན་ན་དགོས་པ་ཆུང་བར་གསུངས་པ་དང་། དེར་མ་ཟད། ཀློག་ཚུལ་དག་པའང་གལ་ཆེ་སྟེ། བྱིས་འཇུག་ལས། གང་གིས་བཀླག་ཐབས་མི་ཤེས་པ། །རིག་སྔགས་ལོག་པར་བཟླས་གྱུར་ན། །དད་མེད་རྣམས་ལ་དོན་མེད་འགྱུར། །དད་པ་ཡོད་ཀྱང་དངོས་གྲུབ་རིང་། །ཞེས་སོ། །

འོ་ན་ཇི་ལྟར་བྱ་ཟེར་ན། དཔུང་བཟང་གིས་ཞུས་པ་ལས། བཟླས་བརྗོད་བྱེད་ཚེ་མི་མྱུར་མི་དལ་ཞིང་། །སྒྲ་ཆེར་མི་བྱ་ཧ་ཅང་ཆུང་བ་མིན། །སྨྲ་ཞིང་མ་ཡིན་གཞན་དུ་གཡེང་བཞིན་མིན། །གུག་བསྐྱེད་ཀླད་ཀོར་ཚེག་རྣམས་ཉམས་པ་མིན། །ཅེས་པ་ལྟར་དམིགས་པ་གཞན་དུ་མ་གཡེང་བར་མི་མྱུར་མི་དལ། མི་ཆེ་མི་ཆུང་བར་བཟླས་ཏེ་སྨྲ་བ་གཞན་བཅད་ནས་དག་འདོན་བྱས་ན། དུས་གཅིག་ལ་ཡིག་བརྒྱ་ལན་བརྒྱ་རྩ་བརྒྱད་བཟླས་ནའང་སྡིག་སྒྲིབ་དང་དམ་ཚིག་ཉམས་ཆག་དག་པ་བླ་མ་རྡོ་རྗེ་སེམས་དཔའི་ཞལ་གྱིས་བཞེས་པ་ཡིན་ནོ། །

ཨོཾ་བཛྲ་ས་ཏྭ་ས་མ་ཡ་སོགས་ཀྱི་སྔགས་དོན་རགས་བསྡུས་ནི། རྡོ་རྗེ་སེམས་དཔའ་ཞེས་མཚན་ནས་བོས་ཏེ། སྔོན་ཚེ་ཐུགས་བསྐྱེད་པའི་དུས། སེམས་ཅན་སངས་རྒྱས་ཀྱི་གོ་འཕང་ལ་འགོད་པར་དམ་བཅས་པ་དེ་དྲན་པར་མཛོད་ལ། དམ་ཚིག་རྗེས་སུ་སྐྱོང་བའི་ཆེད་དུ། རྡོ་རྗེ་སེམས་དཔའ་ཉིད་ཉེ་བར་གནས་པའོ། །བདག་ལ་བསྟན་པར་མཛད་དུ་གསོལ། བདག་ལ་ལེགས་པར་དགྱེས་པར་མཛོད། བདག་ལ་ཤིན་ཏུ་རྒྱས་པར་མཛོད། བདག་ལ་རྗེས་སུ་ཆགས་པར་མཛོད། བདག་གི་དགེ་བའི་རྩ་བ་རྣམས་བརྟན་པར་མཛོད། བདག་ཉོན་མོངས་པའི་དབང་དུ་སོང་བ་ལ་མི་དགྱེས་པ་མེད་པར་རྗེས་སུ་ཟུངས། བདག་གི་ལུང་རྟོགས་ཀྱི་ཡོན་ཏན་རྒྱས་པར་མཛོད། བྱང་ཆུབ་མ་འཐོབ་བར་དུ་བརྩེ་བའི་མ་འདོར་ཞིག དངོས་གྲུབ་ཐམས་ཅད་བདག་ལ་སྩོལ། བདག་གི་ལས་ཐམས་ཅད་ལའང་སེམས་ལ་ཕན་པའི་དཔལ་དུ་མཛོད། དངོས་གྲུབ་ཀྱི་དཔལ་གང་ཞེ་ན། ཡེ་ཤེས་ལྔ་དང་། དེ་ཀུན་གཅིག་ཏུ་འདུས་པ་རྡོ་རྗེ་བདེ་སྟོང་དབྱེར་མེད་ཀྱི་ས་བོན་ནོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཅན་གྱི་རང་བཞིན་གྱི་སེམས་དཔའ་ཆེན་པོས་བདག་ལ་དམ་ཚིག་བཞིན་དུ་མ་བཏང་བར་གྲོལ་བར་མཛོད་ཅེས་པའོ། །ཨཱཿགསུང་རྡོ་རྗེ་དང་སྟོང་ཉིད་རྟོགས་པའི་ཡེ་ཤེས། ཧཱུཾ་བདེ་ཆེན་གྱི་ཡེ་ཤེས། ཕཊ་ཀྱིས་དེ་གཉིས་དབྱེར་མེད་མཚོན་པར་གསུངས་སོ། །

རྡོར་སེམས་སྒོམ་བཟླས་སྐབས་ཅི་ནས་ཀྱང་ཚང་དགོས་པ་ནི། སྟོབས་བཞི་སྟེ། རྟེན་གྱི་སྟོབས་ནི། རྡོ་རྗེ་སེམས་དཔའ་ལ་སྐྱབས་སུ་བཟུང་ནས་སྨོན་འཇུག་གི་བྱང་སེམས་དང་ལྡན་པ་དང་། རྣམ་པར་སུན་འབྱིན་པའི་སྟོབས་ནི། སྔར་བྱས་ཀྱི་སྡིག་པ་མི་དགེ་བ་ཁོག་ཏུ་དུག་སོང་བ་ལྟར་འགྱོད་པ་དང་འཇིགས་སྐྲག་སྐྱེས་པ་དང་། ཉེས་པ་ལས་སླར་ལྡོག་པའི་སྟོབས་ནི། སྔར་བྱས་ཀྱི་སྡིག་ལས་དྲན་ཏེ་ཕྱིན་ཆད་སྲོག་ལ་བབ་ཀྱང་མི་བྱེད་པའི་དམ་བཅའ་བརྟན་པ། གཉེན་པོ་ཀུན་ཏུ་སྤྱོད་པའི་སྟོབས་ནི། སྡིག་པ་འདག་པའི་ཆེད་དུ་དགེ་བ་བྱས་ཚད་ཐམས་ཅད་ལ་ཟེར་རོ། །

སྤྱིར་སྡིག་པ་ལ་ཡོན་ཏན་ཞིག་ག་ན་མཆིས་ཀྱང་། བཤགས་པས་འདག་པ་འདི་སྡིག་པའི་ཡོན་ཏན་དུ་བརྩི། རྡོར་སེམས་སྒོམ་བཟླས་གནད་དུ་སོང་ན་སྡིག་པ་ཚབས་པོ་ཆེ་རི་རབ་ཙམ་ཞིག་བསགས་ཀྱང་། དུང་དཀར་གྱི་སྟེང་གི་རྡུལ་ཕྱིས་པ་ལྟར་དག་འགྲོ་བ་ཡིན། དཔེར་ན། རྗེ་མི་ལས་སྐུ་ཚེ་དེར་མི་རྟ་སོ་ལྔ་བསད་ཀྱང་སྡིག་སྒྲིབ་དག་ཏེ་ཟུང་འཇུག་གི་གོ་འཕང་འཐོབ་པ་ལྟ་བུ་ཡིན་ནོ། །

༣ དམིགས་རྣམ་གསལ་འདེབས་ཚུལ། དེ་ཡང་ལག་ཏུ་ལེན་ཚུལ་མདོར་བསྡུས་ཤིག་བརྗོད་ན། རང་གི་སྤྱི་བོར་མདའ་གང་ཙམ་གྱི་སྟེང་དུ་རྡོ་རྗེ་སེམས་དཔའ་དཀར་བོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་དཀར་མོ་ཞལ་གཅིག་ཕྱག་གཉིས་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་ན་བཟའ་དང་རིན་པོ་ཆེས་བརྒྱན་པ། ཡབ་རྡོ་རྗེ་དཀྱིལ་ཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་ཡིག་དཀར་བོ། མཐར་ཡི་གེ་བརྒྱ་བའི་སྔགས་ཕྲེང་དཀར་བོ་མགོ་ཕྱིར་བསྟན་ནས་བསྐོར་བ། དེ་ལས་འོད་ཟེར་འཕྲོས་ཏེ་རང་འདྲའི་ཡེ་ཤེས་པ་སྤྱན་དྲངས། གཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་ལྷས་དབང་བསྐུར་བ་ལྟར་བརྗོད་དེ། ཡབ་ཡུམ་གྱི་སྤྱི་བོ་ནས་བྱང་སེམས་ཀྱི་བདུད་རྩིའི་དབང་བསྐུར་བས། སྐུ་གང་། དྲི་མ་དག བདུད་རྩིའི་ཆུའི་ལྷག་མ་སྤྱི་བོར་ལུད་པ་ལས་མི་བསྐྱོད་པའི་དབུ་བརྒྱན་པར་གྱུར་བར་བསམ། རང་གི་སྙིང་ཀའི་ཟླ་བའི་སྟེང་དུ་རང་ཐ་མལ་བའི་རྣམ་པ་ཅན། དེའི་མདུན་དུ་ཕ་མ། གཡས་སུ་སྤུན་ཟླ། གཡོན་དུ་གྲོགས་མཆེད། རྒྱབ་ཏུ་གཉེན། མཐའ་བསྐོར་དུ་སེམས་ཅན་ཐམས་ཅད་འཁོད་པར་མོས་ཏེ། བཅོམ་ལྡན་འདས་རྡོ་རྗེ་སེམས་དཔའ་བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་དང་། དམ་ཚིག་ཉམས་ཆག་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། ཐུགས་ཀའི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཉེས་པའི་མཆོད་པ་འབུལ། དེ་རྣམས་ཀྱི་མཁྱེན་བརྩེ་ནུས་གསུམ་གྱི་ཡོན་ཏན་ཐམས་ཅད་འོད་ཀྱི་རྣམ་པར་བསྡུས་ནས་ཐུགས་ཀའི་ཧཱུཾ་ལ་ཐིམ་པའི་གཟི་བརྗིད་དང་མཐུ་སྟོབས་ནུས་པ་ཕུན་སུམ་ཚོགས་པར་བསམ་པ་འདི་དམིགས་པ་མདོར་བསྟན་དང་།

དེ་ནས་རྡོ་རྗེ་སེམས་དཔའི་སྤྱན་སྔར། རང་གི་ཚེ་རབས་ཐོག་མེད་ནས་ད་ལྟའི་བར་དུ་ལུས་ངག་ཡིད་གསུམ་གྱི་སྡིག་པ་མི་དགེ་བ་བཅུ། མཚམས་མེད་ལྔ། སོ་སོ་ཐར་བའི་སྡོམ་པ་དང་འགལ་བ། བྱང་ཆུབ་སེམས་དཔའི་བསླབ་པ་དང་འགལ་བ། གསང་སྔགས་ཀྱི་དམ་ཚིག་དང་འགལ་བ། རྫུན་དང་ཕྲ་མ་བརྒྱབ་པ། ཁྲེལ་དང་ངོ་ཚ་བོར་བ་ལ་སོགས་པའི་མི་དགེ་བ་བསགས་ཚད་སེམས་ཐོག་ལ་དྲན་པར་བྱས་ཏེ། ཤ་ཟིང་སྤུ་ཟིང་གི་དངངས་སྐྲག་དང་བཅས་མཐོལ་ཞིང་བཤགས་སོ། །མི་འཆབ་བོ། མི་སྦེད་དོ། །སླད་ཆད་ཀྱང་གཅོད་ཀྱང་སྡོམ་པར་འགྱུར་ལགས་སོ། །ཞེས་ཡིག་བརྒྱ་བཟླས་པས། ཡིག་འབྲུ་རྣམས་ལས་བདུད་རྩིའི་རྒྱུན་བབས་ཏེ་ཡབ་ཡུམ་གྱི་སྦྱོར་མཚམས་ནས་ཐོན། རང་གི་སྤྱི་གཙུག་ནས་ཞུགས་པས། ཐོག་མེད་ནས་བསགས་པའི་སྡིག་སྒྲིབ་བག་ཆགས་དང་བཅས་པ་དུད་ཁུ་དང་སོལ་ཁུ། དེས་བསྐྱེད་པའི་ནད་རིམས་ཐམས་ཅད་རྣག་ཁྲག གདོན་བགེགས་ཐམས་ཅད་སྡོམ་སྡིག་སྦལ་ལྕོང་ལ་སོགས་ཀྱི་རྣམ་པར་བདུད་རྩིའི་རྒྱུན་གྱིས་དེད་དེ། རྐང་མཐིལ་འོག་སྒོ་བ་སྤུའི་བུ་ག་རྣམས་ནས་ནག་ཉིལ་ཉིལ་གྱིས་ཕྱིར་ཐོན། རང་གི་འོག་ཏུ་ས་གས་པའི་མར་ཞབས་ན། ལས་ཀྱི་གཤིན་རྗེ་ལ་ལན་ཆགས་བུ་ལོན་ཤ་འཁོན་གཉེར་བ་མང་བོས་བསྐོར་ཏེ། ཁ་ལག་སྤར་གསུམ་བཟེད་ནས་ཡོད་པའི་ནང་དུ་སོང་ཏེ་དེ་དག་ངོམས་ཤིང་ཚིམ། ལན་ཆགས་དག བུ་ལོན་འཇལ། ཤ་འཁོན་བྱང་། སྡིག་སྒྲིབ་ཟད་དེ་གནོད་འཚེ་བསམ་སྦྱོར་ངན་པ་ཞི་ནས་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་གྱུར་ཏེ། དེ་རྣམས་ཀྱི་ཁ་ལག་སྤར་གསུམ་ཟུམ། ས་གས་པ་ཡང་སུབ། རང་ལུས་ཤེལ་བུམ་དུ་མར་མེ་སྦར་བ་ལྟར་ཕྱི་གསལ་ནང་གསལ་འོད་ཀྱི་རང་བཞིན་དུ་གྱུར་བའི་མོས་པ་བྱེད་པ་གོང་ནས་མར་དེད་པས་ཡས་དེད་དང་། ཡང་སྔར་ལྟར་བདུད་རྩི་རྐང་མཐིལ་ནས་སྤྱི་གཙུག་བར་དུ་སྣོད་ཆུས་བཀང་སྟེ་ཕྱིར་འཕོ་བ་ལྟར་མིག་གཉིས་དང་། ཁ་སྣའི་བུ་ག་དང་བ་སྤུ་སོགས་ཀྱི་སྒོ་ནས་ནག་ནར་ནར་ཐོན་ཏེ་ལྷག་མེད་དུ་དག་པར་བསམ་པ། མས་ནས་ཡར་དེད་པས་མས་དེད་ཟེར་བ་དང་། ཡང་སྡིག་སྒྲིབ་དམ་ཚིག་ཉམས་ཆག་ཐམས་ཅད་ཐལ་བའི་ཕུང་བོ་ལྟར་སྙིང་ཀར་ནག་སྤུངས་སེ་ཡོད་པ་ལ། སྔར་ལྟར་བདུད་རྩིའི་རྒྱུན་བབས་པས། ལུས་ཀྱི་སྟེང་འོག་བར་གསུམ་དང་བ་སྤུའི་བུ་ག་ཐམས་ཅད་ནས་ཐོན་ཏེ། སྡིག་སྒྲིབ་བག་ཆགས་དང་བཅས་པ་འབབ་ཆུའི་གད་པ་ཆད་པ་ལྟར་ཐོན་ནས། ལུས་ཤེལ་གོང་གཡའ་དག་པ་ལྟར་བསམ་པ་ལ་ཕུང་དེད་ཀྱི་དམིགས་པ་ཞེས་བྱའོ། །དེ་བཞིན་མཐའ་བསྐོར་གྱི་སེམས་ཅན་རྣམས་ཀྱི་སྤྱི་བོར་ཡང་འོད་ཟེར་གྱི་སྣེ་ལ་རྡོར་སེམས་ཡབ་ཡུམ་ཟུང་རེ་སྤྲོས་པའི་སྦྱོར་མཚམས་ནས་བདུད་རྩིའི་རྒྱུན་བབས་པས་སྡིག་སྒྲིབ་སྦྱངས་ཚུལ་སྔར་ལྟར་རོ། །དེ་ནས། བདག་ནི་མི་ཤེས་རྨོངས་པ་ཡིས། །ཞེས་པ་ནས། འགྲོ་བའི་གཙོ་ལ་བདག་སྐྱབས་མཆི། །ཞེས་པའི་བར་དལ་བུས་བཏོན་ཏེ་གསོལ་བ་རྩེ་གཅིག་ཏུ་བཏབ་པས། བླ་མ་དང་དབྱེར་མེད་པའི་རྡོར་སེམས་ཡབ་ཡུམ་ཐུགས་ཤིན་ཏུ་དགྱེས་ཏེ། རིགས་ཀྱི་བུ་ཁྱོད་ཀྱི་སྡིག་སྒྲིབ་དང་དམ་ཚིག་ཉམས་ཆག་ཐམས་ཅད་བྱང་ཞིང་དག་གོ །ཞེས་གསུངས་ནས་འོད་དུ་ཞུ་སྟེ་རང་ལ་ཐིམ་པས། རང་གི་སྒོ་གསུམ་དང་རྡོ་རྗེའི་སེམས་དཔའི་སྐུ་གསུང་ཐུགས་དབྱེར་མི་ཕྱེད་པར་གྱུར་པར་བསམ་དགོས་སོ། །མཐར་བསྔོ་སྨོན་གྱིས་རྒྱས་འདེབས་པར་བྱའོ། །

༤ རྡོར་སེམས་སྒོམ་བཟླས་ཀྱི་ཕན་ཡོན། ཇོ་བོ་ཆེན་པོས། སྔགས་ལ་ལྟུང་བ་འབྱུང་བའི་སྒོ་བསམ་གྱིས་མི་ཁྱབ་སྟེ། བུམ་པ་ལྟ་བུ་ཞིག་ལའང་དངོས་བོར་ཐ་མལ་བར་བལྟས་ན་ལྟུང་བར་འགྱུར་བ་ས་ཕྱོགས་རྡུལ་ཆེ་བ་ཞིག་ཏུ་མཎྚལ་ཞིག་ཕྱིས་ཏེ་བཞག་ན། དེ་མ་ཐག་རྡུལ་ཆགས་ནས་འོང་བ་དང་འདྲ་གསུངས། འོ་ན་དེ་ལ་བརྟེན་ནས་སངས་རྒྱས་མྱུར་དུ་འགྲུབ་དཀའ་འམ་ཞུས་པས། ལྟུང་བ་སྦྱངས་པའི་ཐབས་བྱ་བརྒྱ་འུར་རྡོ་གཅིག་གིས་འདེད་པ་ལྟ་བུའི་གདམས་པ་ཟབ་མོ་རྡོ་རྗེ་སེམས་དཔའི་སྒོམ་བཟླས་བྱ་བ་སྔགས་ལ་ཡོད། གསུངས་པ་ལྟར་དང་། དཔེར་ན། རིན་པོ་ཆེའི་ཉེར་སྤྱད་ཆག་ཀྱང་མགར་བ་མཁས་པ་ལ་བརྟེན་ནས་བཅོས་སུ་ཡོད་པ་ལྟ་བུ་ཡིན། དེ་བས་ཉིན་རེ་བཞིན་རྡོ་རྗེ་སེམས་དཔའ་བསྒོམས་ཏེ་ཡི་གེ་བརྒྱ་བ་ཉེར་གཅིག་བཟླས་ན། ལྟུང་བ་བྱིན་གྱིས་བརླབས་པ་ཞེས་བྱ་སྟེ། ལྟུང་བའི་འཕེལ་ཁ་ཆོད་པ་དང་། འབུམ་ཕྲག་གཅིག་བཟླས་ན་མཚམས་མེད་ཀྱི་ལས་ཀྱང་འདག་པར་གསུངས་པས་ན། རྡོར་སེམས་སྒོམ་བཟླས་ལ་བརྩོན་དགོས། གཞན་ཡང་། གསང་སྔགས་ཀྱི་ལྷ་སོགས་སྒྲུབ་པ་ལའང་འདི་ལས་ལྷག་པ་མེད་དེ། ཀུན་མཁྱེན་འཇམ་དབྱངས་བཞད་པས། དངོས་གྲུབ་བརྟན་པ་དང་ལྷའི་དངོས་གྲུབ་ཉེ་བ་དང་། ལྷ་རང་ལ་ཉེ་བར་འདོད་པས་ཡི་གེ་བརྒྱ་བ་མན་ངག་ལྟར་འབད་པར་བྱ་བ་གནད་དུ་ཆེའོ་གསུངས་པ་དང་།

 སྔོན་བློ་གསལ་གླིང་གི་དགེ་བཤེས་དོམ་འབྲུག་ཅེས་གྲགས་སྐད་ཅན་གཉིས་ཡོད་པའི་ནང་ཚན། འབྲུག་སྟག་ངག་དབང་དཔལ་བཟང་གིས་སྔགས་ཀྱི་རྩ་ལྟུང་བྱུང་ན་མནར་མེད་དུ་འཕེན་པས། དེའི་ཚེ་ཚད་རྫོགས་པའི་བར་དུ་ཕར་ཕྱིན་ཐེག་པའི་དབང་རྣོན་འཚང་རྒྱ་གསུངས་པ་ལ། ཀུན་མཁྱེན་འཇམ་དབྱངས་བཞད་པས། དེ་གཡག་ཞར་གྱིས་རྩྭ་ཟོས་པ་དང་འདྲ། རྡོར་སེམས་ཡུམ་བཅས་ཀྱི་སྒོས་ཡིག་བརྒྱ་འབུམ་གྱིས་རྩ་ལྟུང་འདག་པ་ལྟ་བུའི་ཐབས་མཁས་ཀྱི་ཆེ་བ་མ་ཤེས་པས་ལན། གསུངས་པ་ལྟ་བུ་དང་། ཚུལ་འདི་ལ་དགོངས་ནས། མཁས་པའི་སྡིག་པ་ལྕི་ཡང་ཡང་། །བླུན་པོའི་སྡིག་པ་ཡང་ཡང་ལྕི། །ཞེས་པའང་བཤགས་པ་བྱ་ཚུལ་ལ་མཁས་མི་མཁས་ལས་བྱུང་བ་ཡིན། བཤགས་སྡོམ་ལ་བརྟེན་ནས་སྡིག་པ་དག་ཟིན་པ་ཡང་། བཤེས་སྤྲིངས་ལས། གང་ཞིག་སྔོན་ཆད་བག་མེད་གྱུར་བ་ལ། །ཕྱིས་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་གསུངས་པ་ལྟར། སྟོན་པའི་གཅུང་དགའ་བོ་བྱ་བ་འདོད་ཆགས་ཆེ་བས་རང་གི་ཆུང་མ་དང་སྐད་ཅིག་ཙམ་ཡང་འབྲལ་མི་ཕོད་པ་དང་། སོར་མོའི་ཕྲེང་བ་བྱ་བ་སློབ་དཔོན་ངན་པས་བསླུས་ནས། ཞག་བདུན་གྱི་ནང་མི་དགུ་བརྒྱ་གོ་དགུ་བསད་པ་དང་། མཐོང་ལྡན་ཏེ་རྒྱལ་བོ་མ་སྐྱེས་དགྲས་རང་གི་ཕ་གཟུགས་ཅན་སྙིང་བོ་བཙོན་ཏུ་བཅུག་སྟེ་ལྟོ་བཀག་ནས་གྲོངས་པ་དང་། ཁྱེའུ་བདེ་བྱེད་ནམ་རྒྱུན་གཞན་གྱི་བུད་མེད་ལ་ལོག་གཡེམ་བྱེད་དུ་འགྲོ་བ་ཨ་མས་ཤེས་ཏེ་བཀག་པས། ཨ་མ་ལ་གྲིས་བསྣུན་ཏེ་བསད་པ་སོགས་སྡིག་པ་ཚབས་པོ་ཆེ་དེ་འདྲ་བསགས་ནའང་། ཕྱིས་སུ་སངས་རྒྱས་དང་མཇལ་ནས་སྡིག་སྦྱངས་བྱས་པས། སྔ་མ་གཉིས་དམྱལ་བར་མ་སྐྱེས་པ་དང་། ཕྱི་མ་གཉིས་ཡུད་ཙམ་སྐྱེས་ཀྱང་མྱུར་དུ་ཐར་བ་བཞིན་ནོ། །

གཞན་ཡང་། བཤགས་བྱ་ལ་ལྟུང་བ་དང་སྡིག་པ་གཉིས་ལས། ལྟུང་བས་ལས་ལ་བསྒྲིབས། སྡིག་པས་རྣམ་སྨིན་མྱོང་བས། ལྟུང་བ་ཕྱིར་བཅོས་དང་། སྡིག་པ་སྟོབས་བཞིས་སྦྱངས་དགོས། ལྟུང་བ་ཕྱིར་བཅོས་ཚུལ་ཡང་། བྱང་ཆུབ་ལམ་རིམ་གྱི་སྐབས་འདིར་སྟོབས་བཞི་ཚང་བའི་སྒོ་ནས་ཉན་རང་རྣམས་ལ་གཙོ་བོར་དམིགས་ནས་སོ་ཐར་གྱི་བཤགས་པ་དང་། སངས་རྒྱས་བྱང་སེམས་ལ་གཙོ་བོར་དམིགས་ནས་བྱང་སེམས་ཀྱི་བཤགས་པ་དང་། ཆོས་སྲུང་སོགས་ལ་དམིགས་ནས་སྔགས་ཀྱི་བཤགས་པ་བྱོས་ལ། མཐོང་སྡོམ་དྲིས་ལན་དངོས་སུ་རང་གིས་བརྗོད་ཅིང་། ཡིད་ཀྱིས་མདོ་ཕྱོགས་ཀྱི་དྲི་བ་ཐུབ་དབང་དང་། སྔགས་ཕྱོགས་ཀྱི་དྲི་བ་རྡོ་རྗེ་འཆང་དང་བླ་མ་དབྱེར་མེད་པས་མཛད་པར་བསམས་ལ། མཐོང་ལགས། ཞེས་སོགས་ཀྱི་ལན་བྱའོ། །

གཞན་ཡང་རྡོ་རྗེ་སེམས་དཔའི་སྒོ་ནས་ནད་སྦྱོང་བ་དང་། ཤེས་རབ་སྤེལ་བ། ཚེ་སྒྲུབ་སོགས་སྙན་བརྒྱུད་ཀྱི་མན་ངག་ཇི་སྙེད་ཅིག་ཀྱང་ཡོད་དོ། །

༥ ཕུང་བོ་གསུམ་པའི་སྡིག་བཤགས་བྱེ་བྲག་ཏུ་བཤད་པ། རྗེ་བདག་ཉིད་ཆེན་པོས་ཕུང་བོ་གསུམ་པའི་མདོ་ཕྱག་དང་སྦྲགས་ཏེ་བཤགས་སྡོམ་མཛད་པའི་རྣམ་ཐར་དྲི་མ་མེད་པ་མཆིས་པ་བཞིན། རང་ཅག་གིས་ཀྱང་དེ་ལྟར་མཛད་ན་རྟེན་འབྲེལ་གྱི་གནད་ཆེ་བ་ཡིན། ཕུང་བོ་གསུམ་པའི་མདོ་ལ་སྟོབས་བཞིས་བཤགས་སྡོམ་གྱི་གནད་དྲིལ་བ་ཡིན། རྣམ་པར་སུན་འབྱིན་པའི་སྟོབས་ཀྱིས་སྡིག་པའི་འཕེལ་འཕྲོ་གཅོད། གཉེན་པོ་ཀུན་ཏུ་སྤྱོད་པའི་སྟོབས་ཀྱིས་སྡིག་པ་ཉམས་དམའ་བར་བྱེད། ཉེས་པ་ལས་སླར་ལྡོག་པའི་སྟོབས་ཀྱིས་སྡིག་པ་རྩ་བ་ནས་འདོན་པར་བྱེད། རྟེན་གྱི་སྟོབས་ཀྱིས་སྡིག་འབྲས་སྡུག་བསྔལ་ལས་སྐྱོབ་པར་བྱེད་དོ། །འོ་ན། ཕུང་བོ་གསུམ་པའི་མདོའི་ནང་སྟོབས་བཞི་ཅི་ལྟར་ཚང་ཞེ་ན། བླ་མ་ལ་སྐྱབས་སུ་མཆིའོ་ནས་དགེ་འདུན་ལ་སྐྱབས་སུ་མཆི་ཞེས་པའི་བར་རྟེན་གྱི་སྟོབས། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ་ནས་རིན་པོ་ཆེ་དང་རི་དབང་གི་རྒྱལ་བོ་ལ་ཕྱག་འཚལ་ལོ་ཞེས་པའི་བར་གཉེན་པོ་ཀུན་ཏུ་སྤྱོད་པའི་སྟོབས། དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ནས་མི་འཆབ་བོ། །མི་སྦེད་དོ། །ཞེས་པའི་བར་རྣམ་པར་སུན་འབྱིན་པའི་སྟོབས། སླད་ཆད་ཀྱང་སྡོམ་པར་མི་འགྱུར་བ་ལགས་སོ། །ཞེས་པའི་བར་ཉེས་པ་ལས་སླར་ལྡོག་པའི་སྟོབས་ཚང་ངོ་། །

ཕན་ཡོན་ནི། བྱང་ཆུབ་སེམས་དཔའི་ལྟུང་བ་བཤགས་པའི་ཕན་ཡོན་ལས། སངས་རྒྱས་གཅིག་གི་མཚན་བརྗོད་ན་ཡོན་ཏན་དཔག་ཏུ་མེད་པར་འགྱུར་རོ། །སངས་རྒྱས་སོ་ལྔའི་མཚན་ནས་ལན་གཅིག་བརྗོད་ན། སེམས་ཅན་གང་ཞིག་གི་རྣ་ལམ་དུ་གྲག་པ་དེ་ངན་སོང་དུ་མི་སྐྱེ་ཞིང་དེའི་ཡོན་ཏན་ནི་རྒྱལ་བ་རྣམས་ཀྱིས་བགྲང་བར་མི་ནུས་སོ། །ཞེས་དང་། འདུལ་བ་ལུང་ལས་ཀྱང་། བཀའ་ཡི་ཚེ་དང་ལྡན་པ་རྣམས་ཉོན་ཅིག མ་འོངས་པའི་དུས་ལྔ་བརྒྱའི་ཐ་མ་ལ། སེམས་ཅན་ཉོན་མོངས་པའི་སྒྲིབ་པ་ཅན་རྣམས་ལ་ཕན་བཏགས་པའི་ཕྱིར། འཕགས་པ་ཕུང་བོ་གསུམ་པའི་མདོ་འདིས་དཀོར་གྱི་ཕུང་བོ་རི་རབ་ཙམ་ཡང་བྱང་སྟེ་སེམས་ཅན་འཆི་ཁ་རྣ་ལམ་དུ་བསྒྲགས་པར་འགྱུར་ན། ངན་སོང་དུ་མའི་སྐྱེ་སྒོ་གཅོད་པར་འགྱུར་རོ། །གསུངས་པ་ལྟར། དཔེར་ན། བྱ་བརྒྱ་འུར་རྡོ་གཅིག་གིས་འདེད་པ་ལྟ་བུའོ། །ཚུལ་འདི་ལ་དགོངས་ནས་ཡབ་རྗེ་སྐལ་ལྡན་རྒྱ་མཚོས། སྟོབས་རྣམ་བཞིས་སྡིག་ལྟུང་སྦྱོང་བྱེད་པའི། །མི་དེ་ལ་མཐོ་རིས་ཅི་བདེར་ཡོད། །ཅེས་དང་། ལས་དགེ་སྡིག་མི་བསླུ་ཕྱི་བཞིན་འབྲང་། །སྡིག་ཉེས་ལྟུང་སྟོབས་བཞིས་སྦྱངས་ན་ལེགས། །གསུངས་སོ། །

དེ་ལྟར་ཉམས་ལེན་གནད་དུ་སོང་ན་སྡིག་ལྟུང་དག་པ་ལ་རྨི་ལྟས་ཇི་ལྟར་བྱུང་ཅེ་ན། རྨི་ལམ་དུ་ཟས་ངན་སྐྱུགས་པ་དང་། ཞོ་དང་འོ་མ་ལ་སོགས་འཐུང་བ་དང་། ཉི་མ་དང་ཟླ་བ་མཐོང་བ་དང་། ནམ་མཁའ་ལ་འགྲོ་བ་དང་། མེ་འབར་བ་དང་། མ་ཧེ་དང་མི་ནག་པོ་ཐུབ་པ་དང་། དགེ་སློང་དང་དགེ་སློང་མའི་དགེ་འདུན་མཐོང་བ་དང་། འོ་མ་འབྱུང་བའི་ཤིང་དང་། གླང་བོ་ཆེ་དང་། ཁྱུ་མཆོག་དང་། རི་དང་། སེང་གེའི་ཁྲི་དང་། ཁང་བ་བཟང་བོའི་སྟེང་དུ་འཛེགས་པ་དང་། ཆོས་ཉན་པ་སོགས་རྨིས་ན་སྡིག་པ་དག་པའི་རྟགས་སུ་བསྐུལ་བྱེད་ཀྱི་གཟུངས་ལས་གསུངས་པ་དང་། ར་ག་ཨ་སེའི་གྲུབ་རྟགས་ཚོད་འཛིན་ལས། ཁྲུས་བྱེད་གོས་དཀར་གྱོན་དང་གངས་རིར་འཛེགས། །ནམ་ལངས་ཤེལ་རྙིང་མཆོད་རྟེན་བསྐོར་བ་བྱེད། །དེ་དག་སྒྲིབ་པ་དག་པའི་རྟགས་སུ་གསུངས། །ཞེས་ཀྱང་གསུངས་སོ། །

མཎྜལ།

༡ མཎྜལ་གྱི་ཁུངས་དང་དགོས་པ། མཎྜལ་ཞེས་པ་སྙིང་བོ་ལེན་པའི་དོན་དུ་འཇུག་པས་ན། དེ་ཡང་བསོད་ནམས་དང་ཉམས་རྟོགས་ཀྱི་སྙིང་བོ་རང་ཅག་གིས་ལེན་དགོས་པ་ཡིན། མཎྜལ་འབུལ་ཚུལ་ནི། དཀོན་མཆོག་སྤྲིན་སོགས་ལས་མེ་ཏོག་དང་འབྲས་བུ། དཔག་བསམ་གྱི་ཤིང་སོགས་བདག་གིར་འཛིན་པ་མེད་པར་ཉིན་ལན་གསུམ་མཚན་ལན་གསུམ་དུ་སངས་རྒྱས་བྱང་ཆུབ་སེམས་དཔའ་རྣམས་ལ་འབུལ་བ་དེ་ཡིན། དེ་ཡང་ཆོས་པ་རྣམས་ཀྱིས་དཀོན་མཆོག་མཆོད་པ་དང་། ཚོགས་བསགས་སྒྲིབ་སྦྱོང་། ཆོས་འཆད་ཉན་གྱི་སྐབས་སུ་བེད་སྤྱོད་གཏོང་བ་ཡིན་ལ། འདུས་པའི་རྩ་རྒྱུད་ལས། ཞིང་འདིར་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་ནས། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེར་ཤེས་རབ་ཅན་གྱིས་དབུལ། །ཞེས་གསུངས་པ་ལྟར། རང་ཅག་གིས་ཀྱང་སྔོན་བྱོན་དམ་པའི་རྣམ་ཐར། རྗེས་འཇུག་གདུལ་བྱའི་ཉམས་ལེན་དུ་འཁྱེར་ནས། དཀར་བོ་དགེ་ཕྱོགས་ལ། ཡོད་གི་ཁ་གསོག་འདོད་བྱེད་པ་ལས། མེད་གི་ཕོར་བ་གཡུགས་འདོད་མི་སྐྱེས་པ་གལ་ཆེའོ། །འདིར་སྐབས་སུ་བབ་པ་ནི། ཚོགས་བསགས་པ་མཎྜལ་གྱི་ཁྲིད་ཡིན།

༢ མཎྜལ་གྱི་དབྱེ་བ། ཕྱི། ནང་། གསང་བ། དེ་ཁོ་ན་ཉིད་བཅས་ཀྱི་མཎྜལ་ཡོད་ལ།

༡ ཕྱིའི་མཎྜལ་ལ། མཎྜལ་གྱི་ས་གཞི་རབ་ཡིན་ན། གསེར་དངུལ་སོགས་རིན་པོ་ཆེའི་རིགས་དང་། འབྲིང་ལི་ཟངས་དང་། ཐ་མ་ཤིང་རྡོ་སོགས་ཀྱང་ཆོག རྗེ་བདག་ཉིད་ཆེན་པོས་ཀྱང་རྡོའི་མཎྜལ་ལ་བརྟེན་ནས་ཕྱག་ངར་བརྡོལ་བ་སོགས་རྣམ་ཐར་ན་གསལ་བ་དང་། ད་ལྟ་ཡང་འོལ་ཁ་ཆོས་གླིང་ན་མཎྜལ་འབུལ་བྱེད་ཀྱི་རྡོ་ལ་མཇལ་རྒྱུ་ཡོད། མཎྜལ་གྱི་དབྱིབས་ཟླུམ་པོ། ཁ་དོག་མ་ངེས་པ། ཆེ་ཚད་ལ་ཚད་མེད་ཅིང་། ཆུང་མཐའ་ལ་ཕོར་བ་ལས་མ་ཆུང་བ། བང་རིམ་ལ་གསུམ་དང་བཞི་གང་རུང་ཆོག་ལ། ཚོམ་བུ་ཡང་རབ་རིན་པོ་ཆེའི་རིགས། འབྲིང་དུང་དང་མགྲོན་བུ་སོགས། ཐ་མ་འབྲུའི་རིགས་དང་། མ་འབྱོར་ན་བྱེ་མ་དང་ས་རྡོ་སོགས་ཀྱང་རུང་ལ། འབྱོར་བ་ཡོད་བཞིན་དུ་རྒྱུ་གང་ངན་ལ་མཆོད་པ་བྱ་བ་ནི། རང་གི་བསོད་ནམས་ཉམས་པའི་རྒྱུ་ཡིན་པས། དམུས་ལོང་གིས་མིག་ལྡན་ལ་མགོ་བསྐོར་གཏོང་བ་དང་འདྲ་བར་པོ་ཏོ་བས་གསུངས་སོ། །མཎྜལ་འབུལ་བ་ནི། དཔེར་ན། རྒྱལ་བོ་ཆེན་པོ་ཞིག་ལ་བྱ་བ་གལ་ཆེན་ཞིག་ཞུ་ན། འབུལ་བ་གཏོས་ཆེ་བ་ཞིག་སྔོན་དུ་ཕུལ་ནས་ཞུ་དགོས་པ་ལྟར། རང་རེ་ཀུན་ཚོགས་ཞིང་ལ་དོན་གལ་ཆེན་ཞིག་ཞུ་ན། དེའི་དོན་དུ་མཎྜལ་འབུལ་བ་ཡིན།

མཎྜལ་འབུལ་ཚུལ་ནི། མཆོད་འབུལ་གྱི་སྐབས། ཤར་ཚོགས་ཞིང་ལ་འཁོར་བ་དང་། གསོལ་འདེབས་ཀྱི་སྐབས་ཤར་རང་ལ་འཁོར་བའི་ཁྱད་པར་ཤེས་དགོས། མཎྜལ་གྱི་ས་གཞི་ལག་གཡོན་གྱིས་ཚོམ་བུ་ཕྲན་ཙམ་དང་བཅས་འཛིན་ཅིང་། ཕྱག་གཡས་ཀྱི་ལག་ངར་ལ་མངོན་ཤེས་འཆར་བའི་རྩ་ཡོད་པས། དེས་ཕྱིས་ན་མངོན་ཤེས་འཐོབ་པ་དང་། ཕྱིར་ལན་གསུམ་ཕྱིས་ཏེ་ཐོག་མེད་ནས་རང་གཞན་གྱིས་བསགས་པའི་སྡིག་སྒྲིབ་དག་པའི་མོས་པ་བྱེད། ནང་དུ་ལན་གསུམ་ཕྱིས་ཏེ་ཚོགས་ཞིང་གི་སྐུ་གསུང་ཐུགས་ཀྱི་ཡོན་ཏན་འཐོབ་པར་བསམ་དགོས།

མཎྜལ་གྱི་ཚོམ་བུ་འགོད་ཚུལ་ལ་རྣམ་གྲངས་མང་ཡང་། འགྲོ་མགོན་ཆོས་རྒྱལ་འཕགས་པས་སྲོལ་ཕྱེས་པའི་ཚོམ་བུ་སོ་བདུན་མ་ནི་ཁྱབ་ཆེ་བས། སོ་བདུན་མ་ལྟར་ན། དབང་ཆེན་གསེར་གྱི་ས་གཞི་ནས་ཕྱོགས་ལས་རྣམ་པར་རྒྱལ་བའི་རྒྱལ་མཚན་བར་ཚོམ་བུ་བཀོད་དེ་མཐར་ཏོག་གཟུགས་དགོས། སྣོད་བཅུད་འཇིག་རྟེན་ཁམས་འདི་རང་གི་ལག་པས་བཀྱགས་ཏེ། ཞིང་དམ་པ་རྣམས་ལ་དབུལ་བར་བགྱིའོ། །རིམ་གྱིས་དམིགས་པ་ཇེ་རྒྱས་སུ་བཏང་ནས། དེ་འདྲ་བ་གཅིག་ཙམ་མ་ཡིན་པར་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་གསལ་བཏབ་ནས་དབུལ་དགོས་སོ། །

འོ་ན། མཎྜལ་གྱི་ས་གཞི་ཆུང་ངུའི་སྟེང་དུ་སྣོད་བཅུད་དེ་དག་ཤོང་ངམ་ཞེ་ན། གཡག་རྭའི་ནང་དུ་མི་ལའི་སྐུ་ཆུང་ངུར་མ་སོང་བར་བཞུགས་པ་དང་། ཇོ་བོས་སྐུ་ལུས་ཡོངས་རྫོགས་ས་ཙྪའི་རྐོས་ཕོར་ཆུང་ངུ་ཞིག་གི་ནང་དུ་བཅུག་པ་སོགས་རྫུ་འཕྲུལ་སྣ་ཚོགས་ཞིག་བསྟན་པའི་མཐར། དེ་རིང་འོ་ཅག་གིས་གང་བྱས་པ་འདི་ཀུན། རིགས་པ་སྨྲ་བའི་རྟོག་གེ་བ་རྣམས་ཀྱིས་འགལ་བར་བརྩི། འོ་ན་བརྩི་ནའང་བརྩིར་ཆུག ཆོས་ཀྱི་གནས་ལུགས་འདི་འདྲ་ཞིག་མིན་རེ་ཞེས་རྒྱ་བོད་གཉིས་ཀ་འགྲིམས་ནས་མནའ་བསྐྱལ་ཡང་ཆོག་གསུངས་པ་ལྟར་ལགས་སོ། །

དེ་ནས་གསོལ་བ་འདེབས་པ་ལ། དོན་ཆེན་པོ་གསུམ་དང་། ལམ་མཆོག་སྒོ་འབྱེད། བྱིན་རླབས་སྤུངས་ཞུས། ཕུར་ཚུགས་སུ་གསོལ་བ་འདེབས་པ་སོགས་གང་རུང་གིས་འདོད་དོན་ལ་གསོལ་བ་གདབ་བོ། །

གྲངས་ཇི་ལྟར་གསོག་ཚུལ་ནི། ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམས། །རི་རབ་གླིང་བཞི་ཉི་ཟླས་བརྒྱན་པ་འདི། །སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་ཞིང་ལ་སྤྱོད་པར་ཤོག། ཨི་དམ་གུ་རུ་རཏ་ན་མཎྜ་ལ་ཁམ་ནི་ཪྻཱ་ད་ཡ་མི། ཞེས་འབུམ་ཕྲག་བཟླ། མཇུག་བསྔོ་སྨོན་གྱིས་རྒྱས་གདབ་པར་བྱའོ། །

༢ ནང་གི་མཎྜལ་འབུལ་སྟངས་ནི། རང་གི་ལུས་ཀྱི་ཡན་ལག་རྣམས་མཎྜལ་དུ་བསྒྱུར་ནས་འབུལ་བ་ཡིན། ལུས་ཀྱི་པགས་པ་གསེར་གྱི་ས་གཞི་དང་། ཁྲག་གིས་ཆག་ཆག་དང་། ཡན་ལག་གླིང་བཞི་དང་། ཉིང་ལག་གླིང་ཕྲན་བརྒྱད། ཁོག་པ་རི་རབ། མགོ་བོ་རྣམ་པར་རྒྱལ་བའི་ཁང་བཟང་། མིག་གཉིས་ཉི་ཟླ། སྙིང་ནོར་བུ། དབང་བོ་ནང་ཁྲོལ་རྣམས་ལྷ་མིའི་དཔལ་འབྱོར་དུ་བསྒྱུར་ནས་འབུལ་བ་ཡིན། རྗེ་བཙུན་བློ་བཟང་ཆོས་རྒྱན་གྱི་གཅོད་གཞུང་དུ། དག་པ་རབ་མཛེས་སོགས་ལྟར་དང་། ཕྱག་ལེན་འདི་བྱ་བྲལ་གྱི་རྣལ་འབྱོར་བ་ལ་ཧ་ཅང་མཁོ་བ་ཡིན།

༣ གསང་བའི་མཎྜལ་ནི། རྒྱལ་མཆོག་བདུན་པས། ཐབས་མཆོག་བདེ་ཆེན་རོལ་རྩེད་ཀྱིས། །ཞེས་སོགས་ཀྱིས་བདེ་སྟོང་གི་ཡེ་ཤེས་ཧཱུཾ་ཡིག་ཏུ་སྤྲོས་པ་ཡོངས་སུ་གྱུར་བ་ལས་རི་གླིང་སོགས་སུ་ཤར་བ་དག་པའི་སྣོད་བཅུད་དུ་དམིགས་ཏེ་ཚོམ་བུ་སོ་སོར་བཀོད་ནས་དབུལ་བའོ། །

༤ དེ་ཁོ་ན་ཉིད་ཀྱི་མཎྜལ་ནི། རྒྱལ་མཆོག་བདུན་པས། བདེ་ཆེན་ཀུན་ཏུ་བཟང་བོའི་རྣམ་རོལ་གྱིས། །ཞེས་སོགས་སྐུ་དག་པ་སྒྱུ་མའི་སྐུ་དང་། ཐུགས་དག་པ་དོན་གྱི་འོད་གསལ་ཟུང་དུ་འཇུག་པ་སོགས་ཧཱུཾ་ཡིག་གི་རྣམ་པར་སྤྲོས་པ་རི་གླིང་སོགས་སུ་ཤར་བ་དག་པའི་སྣོད་བཅུད་དུ་དམིགས་ཏེ་ཚོམ་བུ་སོ་སོར་བཀོད་ནས་དབུལ་ལོ། །

༣ མཎྜལ་ཕུལ་བའི་ཕན་ཡོན། ཟ་མ་ཏོག་ལྟ་བུའི་གཏམ་ལས། བདེ་བར་གཤེགས་པ་མཆོག་རྣམས་ཀྱི། །ཕོ་བྲང་མཆོག་ནི་བརྒྱན་བྱེད་པ། །གསེར་གྱི་མདོག་ལྟར་ལྡན་འགྱུར་ཞིང་། །ནད་རྣམས་ཀུན་ནས་གྲོལ་བར་འགྱུར། །ལྷ་དང་མི་ལས་ཁྱད་འཕགས་ཤིང་། །ཉི་མའི་འཁོར་ལོ་ལྟ་བུར་མཛེས། །ནོར་དང་གསེར་ནི་མང་བ་དང་། །རྒྱལ་བོའི་རིགས་ཀྱིས་རྒྱལ་བར་འགྱུར། །འཇིག་རྟེན་གསུམ་གྱིས་མཆོད་པ་ཡི། །སངས་རྒྱས་ལ་ནི་གང་ཞིག་འདིར། །མཎྜལ་མེ་ཏོག་བཅས་བྱེད་པ། །འགྲོ་བའི་བདག་པོ་ཚེ་རིང་ཞིང་། །སྣ་ཚོགས་ནད་ཀྱི་འཇིགས་ལས་གྲོལ། །གང་ཡིན་དེ་ཡིས་སྐད་ཅིག་ཐོབ། །བདེ་གཤེགས་མཎྜལ་བྱེད་དེ་དག། ཕ་རོལ་ཕྱིན་དྲུག་ཐོབ་འགྱུར་ཏེ། །ཆུ་དང་ས་བསྲེས་བཏང་སྦྱིན་པ། །གྲོག་མོ་སོགས་སེལ་ཚུལ་ཁྲིམས་ཏེ། །བསྲེས་ནས་ཉེད་པ་བཟོད་པ་ཡིན། །འབད་པ་བྱེད་པ་བརྩོན་འགྲུས་ཡིན། །སྐད་ཅིག་དེ་ལ་རྩེ་གཅིག་ཏུ། །སེམས་འཛིན་བྱེད་པ་བསམ་གཏན་ཡིན། །ལེགས་པར་གཟོབ་པ་ཤེས་རབ་བོ། །སྣ་ཚོགས་བསོད་ནམས་ཀྱིས་བརྒྱན་པ། །ས་གཞི་བྲིས་པ་འབུལ་བྱེད་པ། །ལྷ་ཡི་བདེ་བ་ཐམས་ཅད་དང་། །ལོངས་སྤྱོད་མཆོག་དང་ལྡན་འགྱུར་ཞིང་། །མིར་སྐྱེས་གསེར་ལས་ལྷག་པ་ཡི། །ཁ་དོག་དང་ལྡན་མཛེས་པ་དང་། །པདྨའི་མདོག་ལྟར་ཡན་ལག་ཚང་། །མིག་ནི་དཀྱུས་རིང་མཛེས་པར་འགྱུར། །ཞེས་སོ། །གཞན་ཡང་མཎྜལ་གྱི་མདོ་ལས། ཐུབ་པས་མཎྜལ་བྱས་པ་ཡིས། །ཕ་རོལ་ཕྱིན་པ་འདི་དྲུག་ཐོབ། །ཞེས་གསུངས་པ་ལྟར་མཎྜལ་ཕུལ་བ་འདི་ལ་ཕར་ཕྱིན་དྲུག་ཚང་སྟེ། དེ་ཉིད་ལས། ཆུ་བཅས་ལྕི་བ་སྦྱིན་པ་སྟེ། །ལེགས་པར་ཉུག་པར་བྱེད་པ་ཚུལ་ཁྲིམས་སོ། །སྲིན་དང་གྲོག་སྦུར་བསལ་བ་བཟོད་པ་ཡིན། །བྱ་བ་ལ་ནི་ཉེར་ཞུགས་བརྩོན་འགྲུས་ཏེ། །དེ་ལ་སྐད་ཅིག་སེམས་ནི་གཅིག་བྱེད་པ། །བསམ་གཏན་ཤེས་རབ་རི་མོ་གསལ་བའོ། །ཞེས་པ་ལྟར་བ་བྱུང་ལྔ་སྟེ་གཅི་ཞོ་འོ་མ་མར་བཅས་ལྔས་བྱུགས་པ་སྦྱིན་པ་དང་། མཎྜལ་ཁོད་སྙོམས་སུ་ཉུག་པ་ཚུལ་ཁྲིམས། མཎྜལ་ལ་གནས་པའི་སྲིན་བུ་གྲོག་སྦུར་སོགས་བསལ་བ་བཟོད་པ། མཎྜལ་གྱི་བྱ་བ་ལ་ཉེ་བར་ཞུགས་པ་བརྩོན་འགྲུས། མཎྜལ་གྱི་དམིགས་པ་རྩེ་གཅིག་གཏོད་པ་བསམ་གཏན། མཎྜལ་ཚོམ་བུ་བཀྲ་བར་བཀོད་པ་ཤེས་རབ་བོ། །དེ་ལྟར་མཎྜལ་ཕུལ་བ་ལ་བརྟེན་ནས། དགེ་སློང་མ་དཔལ་མོས་ཐུགས་རྗེ་ཆེན་པོ་ཞལ་གཟིགས་པ་དང་། རྣལ་འབྱོར་དབང་ཕྱུག་དཔལ་ལྡན་དགོན་པ་བས། དུས་རྒྱུན་མཎྜལ་འབུལ་གིན་ཡོད་ཀྱང་། ཚེ་ཞིག་ཏིང་འཛིན་ལ་ཞག་བདུན་མཉམ་པར་བཞག་པ་འབྲོམ་གྱིས་མཁྱེན་ནས། ཁྱེད་ལས་ལྷག་པ་ཇོ་བོ་ཙམ་ཡིན་ཏེ། མཎྜལ་དུས་དྲུག་རེ་མ་ཆག་པར་འབུལ་བ་ཡིན་ཞེས་བཀའ་བཀྱོན་གནང་བ་ཡིན། དེ་ནས་མཎྜལ་ལ་འབུངས་པས་སངས་རྒྱས་ཀྱི་ཞིང་རྡུལ་ཕྲ་རབ་ཀྱི་གྲངས་དང་མཉམ་པ་ཁྲ་ལམ་མེར་གཟིགས་པ་ཡིན། གཞན་ཡང་། ཇོ་བོས་མུ་སྟེགས་པ་དང་རྩོད་པ་མཛད་པའི་ཚེ་མུ་སྟེགས་པས་སྒྲའི་དཀའ་གནས་ཤིན་ཏུ་ཕྲ་བ་ཞིག་དྲིས་པས། ཇོ་བོས་མ་དགོངས་པ་ན། ཆབ་གསང་ལ་འབྱོན་ཁུལ་མཛད་ནས་ནང་དུ་བྱོན། ཇོ་བོས་རང་གི་ཐུགས་དམ་གྱི་རྟེན་དུ་གྱུར་བ་ཇོ་མོ་སྒྲོལ་མར་མཎྜལ་ཕུལ་ནས་གསོལ་བ་དྲག་ཏུ་བཏབ་པས། སྒྲའི་དཀའ་གནད་དེ་ཐུགས་ལ་ཝལ་གྱིས་ཤར་ནས་མུ་སྟེགས་པ་ལ་ལན་མཛད་པ་ན། ཇོ་བོ་རྒྱལ་ཏེ་སངས་རྒྱས་ཀྱི་བསྟན་པ་རྒྱས་པར་གྱུར་བ་ལྟ་བུ་ཡིན་ནོ། །དེ་བཞིན་རྗེ་བདག་ཉིད་ཆེན་པོས་ཀྱང་འོལ་ཁར་ཕེབས་ཏེ་མཎྜལ་རྒྱུན་མ་ཆད་པར་ཕུལ་བས། སངས་རྒྱས་སོ་ལྔའི་ཞལ་གཟིགས་པ་ཡིན་ནོ། །

བླ་མའི་རྣལ་འབྱོར།

༡ བླ་མ་ཉིད་བྱིན་རླབས་ཀྱི་འཇུག་སྒོར་བསྟན་པ། རང་རྒྱུད་ལ་བྱིན་རླབས་འཇུག་པ་ལ། བླ་མའི་རྣལ་འབྱོར་ལ་བསྟེན་དགོས། དམིགས་བརྩེ་མ་དང་འབྲེལ་བའི་བླ་མའི་རྣལ་འབྱོར་ལ་གཉིས་ཡོད་ལ། སྲད་རྒྱུད་ལུགས་ཀྱི་བླ་མའི་རྣལ་འབྱོར་དགའ་ལྡན་ལྷ་བརྒྱ་མ་དང་། དབེན་ས་ལུགས་ཀྱི་བླ་མའི་རྣལ་འབྱོར་བླ་མཆོད་ཡིན། ཐེག་པ་ཆེ་ཆུང་གི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མ་ལ་རག་པ་ཡིན། བླ་མ་ནི་མཆོག་གསུམ་གྱི་སྤྱི་གཟུགས་ཡིན་པས། རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་མ་ཡིན། །ཞེས་གསུངས་པ་ལྟར་སྐྱབས་གསུམ་ཀུན་འདུས་ཀྱི་ངོ་བོར་མོས་ནས་བླ་མའི་རྣལ་འབྱོར་བསྒོམས་ན། བསྐྱེད་རྫོགས་སྒོམ་པ་དང་བཟླས་བརྗོད་བྱས་པ་སོགས་ལས་ཁྱད་པར་དུ་འཕགས་པ་ཡིན་ཏེ། སམྦུ་ཊའི་རྒྱུད་ལས། བསྐྱེད་རིམ་བསྒོམ་པ་མང་ལགས་ཏེ། །བླ་མ་བསྒོམ་པའི་གོང་ན་མེད། །བཟླས་བརྗོད་བྱེད་པ་མང་ལགས་ཏེ། །གསོལ་བ་འདེབས་པའི་གོང་ན་མེད། །རྒྱུན་ཏུ་གསོལ་བ་བཏབ་པ་ན། །འབྲལ་མེད་ཉམས་མྱོང་འོང་བར་ངེས། །ཞེས་སོ། །

ལྷག་པར་དུ་ཉི་མའི་འོད་ཟེར་མེ་ཤེལ་ལ་དྲངས་ཏེ་བུད་ཤིང་སྟེང་དུ་བབས་ན་མེ་འབར་བ་ལྟར། བླ་མ་དང་སངས་རྒྱས་དབྱེར་མེད་དུ་སྒོམ་ན། བྱིན་རླབས་ཀྱི་ཚན་ཁ་གཞན་ལས་ཆེ་བ་ཡིན། ས་སྐྱ་པཎ་ཆེན་གྱིས། ཉི་མའི་འོད་ཟེར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་བྱིན་རླབས་ཀྱང་། །བླ་མ་མེད་པར་འཇུག་མི་ནུས། །ཞེས་དང་། རྒྱུད་ལས། དྲིན་དང་ལྡན་པའི་བླ་མ་དེ། །ལག་པའི་མཐིལ་ལམ་སྙིང་གི་དཀྱིལ། །ལུས་ཀྱི་ཆ་ཤས་གར་བསྒོམས་ཀྱང་། །སངས་རྒྱས་སྟོང་གི་བྱིན་རླབས་ཀྱང་། །གང་ཟག་དེ་ཡིས་སྡུད་པར་བྱེད། །ཅེས་པ་ལྟར་བླ་མའི་རྣལ་འབྱོར་བསྒོམས་པས་སངས་རྒྱས་སྟོང་གིས་བྱིན་རླབས་འཇུག་ནུས་པར་མདོ་རྒྱུད་དུ་མར་གསུངས་ཡོད་པས། སྔོན་བྱོན་དམ་པ་རྣམས་ཀྱིས་ཉམས་ལེན་གྱི་མཐིལ་དུ་འཛིན་པ་ཡིན་ཏེ། རྨོག་ལྕོག་པས། ཀྱེ་རྡོ་རྗེ་རང་དམར་ན་དམར། ཐུགས་རྗེ་ཆེན་པོ་རང་དཀར་ན་དཀར། རྗེ་བཙུན་སྒྲོལ་མ་རང་སྔོ་ན་སྔོ། ང་ནི་གང་དུ་བསྡད་ཀྱང་བླ་མའི་སྣང་བ་དང་འབྲལ་མ་མྱོང་། ཚེ་གཅིག་གིས་སངས་རྒྱས་སམ་དེ་ཡོང་ཡོང་འདྲ་གསུངས་པ་དང་། དེ་བས་ན། བླ་མ་མཚན་ཉིད་དང་ལྡན་པ་ཞིག་དང་། སློབ་མ་བསོད་ནམས་ཀྱི་བསགས་རྒྱབ་ཅན་གཉིས་འཛོམས་ནས། བླ་མའི་རྣལ་འབྱོར་གནད་དུ་སོང་ན། སངས་རྒྱས་ལག་པས་བཟོས་པ་འདྲ་བ་ཞིག་བྱེད་རྒྱུ་ཡོད་པར་བཀའ་གདམས་པ་གཙང་བ་ནམ་མཁའ་རིན་ཆེན་གྱིས་གསུངས་ལ། ཕ་དམ་པས་ཀྱང་། བླ་མས་བསྐྱལ་ན་གང་འདོད་གནས་སུ་སླེབས། །རྐང་གླར་མོས་གུས་ཕུལ་ཅིག་དིང་རི་བ། །ཞེས་གསུངས་སོ། །

དེ་བས་འདིར་ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ་རྣམ་པ་ཁམས་གསུམ་ཆོས་ཀྱི་རྒྱལ་བོ་ཙོང་ཁ་པར་དམིགས་ནས། དམིགས་བརྩེ་མ་བཟླས་བརྗོད་བྱེད་པ་ཡིན། དམིགས་བརྩེ་མ་ནི། རྗེ་གསུང་ཐོར་བུ་ལས། དྲི་མེད་མཁྱེན་པའི་དབང་བོ་འཇམ་པའི་དབྱངས། །ཚད་མེད་བརྩེ་བའི་གཏེར་ཆེན་སྤྱན་རས་གཟིགས། །གངས་ཅན་མཁས་པའི་གཙུག་རྒྱན་རེད་མདའ་བ། །གཞོན་ནུ་བློ་གྲོས་ཞབས་ཀྱི་པད་མོར་འདུད། །ཐར་འདོད་བུང་བ་བདག་ཀྱང་བསྐྱང་དུ་གསོལ། །ཞེས་རྗེ་བདག་ཉིད་ཆེན་པོས་རེད་མདའ་བའི་ཞབས་ལ་ཕུལ་ཀྱང་། རེད་མདའ་བས། གསོལ་འདེབས་འདི་བདག་ལ་མི་འོས། ཁྱེད་རང་ལ་འོས་ཞེས་ད་ལྟའི་ཚིག་འདི་ལྟར་ཁ་བསྒྱུར་ནས་རྗེའི་ཞབས་ལ་ཕུལ་ཏེ་རྗེར་གསོལ་འདེབས་གནང་བ་དང་། ངེས་དོན་རྗེ་བཙུན་འཇམ་དབྱངས་ཀྱི་གསུང་གི་ཆ་ཤས་སུ་ཤར་བ་སྟེ། བཀའ་གདམས་ལྒིགས་བམ་ལས། བདག་གི་སྤྲུལ་བ་དམ་པ་ཞིག །རེ་འགའ་དགེ་སློང་ཉིད་དུ་སྤྲུལ། །ཞེས་པས་རྗེ་ཐམས་ཅད་མཁྱེན་པ་བསྟན་པ་དང་། རེས་འགའ་གསོལ་འདེབས་དབྱངས་ཀྱི་གཟུགས། །ཞེས་པས་དམིགས་བརྩེ་མ་བསྟན་ཅེས་དམ་པའི་གསུང་རྒྱུན་ཡང་ཡོད་དོ། །

༢ དམིགས་བརྩེ་མའི་དམིགས་རིམ། བླ་མའི་རྣལ་འབྱོར་ལག་ཏུ་བསྟར་ཚུལ་ནི། རྗེ་བླ་མའི་སྐུ་བརྙན་བྲིས་འབུར་གཙོ་བོར་བྱས་ཏེ་རྟེན་གསུམ་ལེགས་པར་བཀྲམ། མདུན་དུ་མཆོད་པ་གཡོ་མེད་ཅིང་བཀོད་པ་མཛེས་པར་བཤམས། སྟན་བདེ་བ་ལ་སྤྱོད་ལམ་ཚུལ་མཐུན་གྱིས་འཁོད་དེ། སྐྱབས་སེམས་དང་ཚད་མེད་བཞི་སྔོན་དུ་བཏང་ནས། ཆོས་ཐམས་ཅད་རང་བཞིན་མེད་རྟོགས་ཀྱི་བློ་ཤུགས་དྲག་པོ་བསྐྱེད་དེ། སྭ་བྷ་ཝ་ངག་ཏུ་བརྗོད་ཅིང་སྔགས་དོན་ལ་མཉམ་པར་བཞག འཁོར་འདས་ཀྱི་ཆོས་ཐམས་ཅད་སྟོང་བ་ཉིད་དུ་གྱུར། སྟོང་བའི་ངང་ལས་རང་གི་སྤྱི་བོ་རིན་པོ་ཆེའི་ཁྲི་ལ་པད་ཉི་ཟླ་བའི་གདན་བརྩེགས་ཀྱི་སྟེང་དུ། ངོ་བོ་རང་གི་རྩ་བའི་བླ་མ་ཡིན་པ་ལ་རྣམ་པ་ཁམས་གསུམ་ཆོས་ཀྱི་རྒྱལ་བོ་ཙོང་ཁ་པ་དགེ་སློང་གི་ཆ་བྱད་ཅན། དེའི་སྤྱི་བོར་རྗེ་བཙུན་འཇམ་པའི་དབྱངས་དམར་སེར་ལྒིགས་བམ་དང་རལ་གྲི་འཛིན་པ། མགྲིན་པར་སྤྱན་རས་གཟིགས་ཕྱག་བཞི་བ། ཕྱག་དང་བོ་གཉིས་ཐལ་མོ་སྦྱོར་ཞིང་། གཡས་འོག་མས་ཤེལ་ཕྲེང་དང་། གཡོན་འོག་མས་པད་དཀར་འཛིན་པ། ཐུགས་ཀར་ཕྱག་ན་རྡོ་རྗེ། གཡས་རྡོ་རྗེ་དང་། གཡོན་ཐུགས་ཀར་སྡིགས་མཛུབ་མཛད་པ། ཞབས་གཡས་བསྐུམས་གཡོན་བརྐྱང་གིས་བཞུགས་པ། འཇམ་དབྱངས་ཀྱི་ཐུགས་ཀར་ཨོཾ་དཀར་བོ། སྤྱན་རས་གཟིགས་ཀྱི་ཐུགས་ཀར་ཨཱཿདམར་བོ། ཕྱག་རྡོར་གྱི་ཐུགས་ཀར་ཧཱུཾ་སྔོན་པོ། དེ་གསུམ་ལས་འོད་ཟེར་འཕྲོས་པས། རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་སོགས་སྐྱབས་གནས་ཐམས་ཅད་སྤྱན་དྲངས་ཏེ། རྡོ་མཚན་ལ་ཁ་བ་བབས་པ་བཞིན་ཐིམ་པས་སྐྱབས་གནས་ཀུན་འདུས་ཀྱི་བདག་ཉིད་དུ་གྱུར། དེ་ནས་ཇི་སྙེད་སུ་དག་ཞེས་སོགས་ཡན་ལག་བདུན་པ་འབུལ་དང་མཎྜལ་ཕུལ། དེ་ནས་རྗེ་བླ་མ་དེ་ཉིད་སངས་རྒྱས་ཀུན་འདུས། ཆོས་ཀུན་འདུས། དགེ་འདུན་ཀུན་འདུས། བླ་མ་ཀུན་འདུས། ཡི་དམ་ཀུན་འདུས། ཆོས་སྐྱོང་ཀུན་འདུས་ཀྱི་ངེས་ཤེས་ཤུགས་དྲགས་པོས་དྲངས་ཏེ། དུས་འདི་ནས་བཟུང་སྟེ་བྱང་ཆུབ་མ་འཐོབ་བར་དུ། སྐྱིད་ན་སྡུག་ན། ཤི་ན་གསོན་ན། ལེགས་ན་ཉེས་ན། རེ་ས་ཁྱེད་ལས་མེད་དོ་སྙམ་ནས་བློ་སྙིང་བྲང་གསུམ་ལིངས་ཀྱིས་བཀལ་ནས། མོས་གུས་དྲག་པོས་སེམས་རྩེ་གཅིག་གིས། དམིགས་བརྩེ་མ་ཅི་འགྲུབ་བཟླ། དེ་ལྟར་རྗེ་བཙུན་ཙོང་ཁ་པ་ཆེན་པོ་ལ་གསོལ་བ་དྲག་ཏུ་བཏབ་པས། སྐུ་ལས་འོད་ཟེར་དཀར་དམར་མཐིང་ཀ་གསུམ་བབས་ནས། སྒྲིབ་གཉིས་བག་ཆགས་དང་བཅས་པ་སྦྱངས་ཏེ་ས་ལམ་གྱི་རྟོགས་པ་ཁྱད་པར་རྒྱུད་ལ་འཁྲུངས། སྐྱེ་བ་ནས་ཚེ་རབས་ཐམས་ཅད་དུ་རྗེ་བླ་མས་དགྱེས་བཞིན་དུ་རྗེས་སུ་བཟུང་ནས། གསུང་གི་བདུད་རྩི་ངོམ་པ་མེད་པར་འཐུང་ནས་རྒྱལ་སྲས་ཀྱི་སྤྱོད་པ་ལ་ལེགས་པར་བསླབ་སྟེ། སྐུ་བཞིའི་བདག་ཉིད་འཐོབ་པར་བྱིན་གྱིས་བརླབས་སོང་སྙམ་པའི་མོས་པ་བྱ། ཐུན་བསྡུ་བའི་ཚེ། སྤྱི་བོའི་བླ་མ་དེ་ཉིད་འཐེབ་སོར་གྱི་ཚད་ཙམ་དུ་གྱུར་ནས་སྤྱི་བོའི་རྩ་དབུ་མར་བརྒྱུད་དེ་རང་གི་སྙིང་ཀ་པདྨ་འདབ་བརྒྱད་དུ་བྱོན་ནས་བྱང་ཆུབ་མ་འཐོབ་བར་འབྲལ་བ་མེད་པར་བཞུགས་པར་བསམ་མོ། །མཇུག་ཏུ། ཚེ་རབས་ཀུན་ཏུ་རྒྱལ་བ་ཙོང་ཁ་པས། །སོགས་དང་། འཇམ་དཔལ་དཔའ་བོས་ཇི་ལྟར་མཁྱེན་པ་དང་། །ཞེས་སོགས་བསྔོ་སྨོན་གྱིས་རྒྱས་འདེབས་པར་བྱའོ། །

༣ དམིགས་བརྩེ་མ་སྐོར་བདུན་གྱིས་གསོལ་བ་འདེབས་ཚུལ། དམ་ཚིག་གསུམ་བཀོད་ཀྱི་རྒྱུད་ལས། མཚན་དང་དཔེ་བྱད་འབར་བའི་ལྷ། །བསྐལ་བ་འབུམ་དུ་བསྒོམ་པ་ལས། །བླ་མ་དྲན་པའི་འབུམ་ཆར་མིན། །བསྙེན་སྒྲུབ་བཟླས་བརྗོད་ས་ཡ་བས། །བླ་མའི་གསོལ་ཚིག་ལན་གཅིག་མཆོག །ཅེས་གསུངས་པ་ལྟར་དམིགས་བརྩེ་མའི་གསོལ་འདེབས་འདི་ལ་སྐོར་བདུན་ཡོད་པ་ལས།

དམིགས་བརྩེ་མ་སུམ་སྐོར་ནི། རྗེ་བདག་ཉིད་ཆེན་པོ་བརྩེ་བ་འཕགས་མཆོག་སྤྱན་རས་གཟིགས་དང་། མཁྱེན་པ་རྗེ་བཙུན་འཇམ་པའི་དབྱངས་དང་མཉམ་པར་མ་ཟད། རྗེ་བླ་མ་དང་དེ་གཉིས་ཀྱི་སྤང་རྟོགས་ཀྱི་ཡོན་ཏན་སོགས་ཆ་ཐམས་ཅད་ནས་འདྲ་བ་དང་། ཡང་ན། རྗེ་བླ་མའི་སྤྱི་བོར་འཇམ་དབྱངས། མགྲིན་པར་སྤྱན་རས་གཟིགས་ཕྱག་བཞི་བ་སྒོམ་ནས། ཁོང་རྣམ་པ་གསུམ་དབྱེར་མེད་དུ་དམིགས་ནས་གསོལ་བ་འདེབས་པ་སྟེ། དམིགས་མེད××། །དྲི་མེད××། །གངས་ཅན××། །བློ་བཟང××གསོལ་བ་འདེབས། །ཞེས་ཚིག་རྐང་བཞི་བོ་འདི་དང་།

བཞི་སྐོར་ནི། རྒྱལ་བ་ཀུན་གྱི་མཁྱེན་བརྩེ་ནུས་གསུམ་ལྷ་སྐུ་བཞིན་ལག་གི་ངོ་བོར་ཤར་བ་རིགས་གསུམ་མགོན་པོ་དང་། དེ་གསུམ་བླ་མ་དགེ་བའི་བཤེས་གཉེན་གྱི་རྣམ་པར་ཤར་བ་རྗེ་བདག་ཉིད་ཆེན་པོ་ལགས་པར་མོས་ནས། རྗེ་བླ་མའི་སྤྱི་བོར་འཇམ་དབྱངས། མགྲིན་པར་སྤྱན་རས་གཟིགས། ཐུགས་ཀར་ཕྱག་ན་རྡོ་རྗེ་སྒོམ་ནས། དེ་བཞི་དབྱེར་མེད་དུ་གསོལ་བ་འདེབས་པ་སྟེ། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་ལྔ་དང་། ཡང་རྗེ་བླ་མའི་གནས་གསུམ་དུ་རིགས་གསུམ་བཀོད་ནས་གསོལ་བ་འདེབས་ཞིང་དངོས་གྲུབ་ཞུ་བ་དང་།

ལྔ་སྐོར་ནི། རྗེ་བླ་མའི་གནས་གསུམ་དུ་རིགས་གསུམ་མགོན་པོ། ལྟེ་བར་རྒྱལ་བ་ཤཱཀྱ་ཐུབ་པ་སྒོམ་ནས། དེ་རྣམས་དབྱེར་མེད་དུ་གསོལ་བ་འདེབས་པ་སྟེ། བསྟན་པའི་བདག་པོ་སྟོན་པ་བཅོམ་ལྡན་འདས། །དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་དྲུག་དང་།

དྲུག་སྐོར་ནི། རྗེའི་གནས་གསུམ་དུ་རིགས་གསུམ་མགོན་པོ། ཕྱག་རྡོར་གྱི་ཐུགས་ཀར་རྒྱལ་བ་རྡོ་རྗེ་འཆང་། ལྟེ་བར་ཐུབ་དབང་བཀོད་ནས། དེ་རྣམས་ངོ་བོ་དབྱེར་མེད་དུ་བྱས་ནས་གསོལ་བ་འདེབས་པ་སྟེ། རིགས་ཀུན་ངོ་བོ་ཁྱབ་བདག་རྡོ་རྗེ་འཆང་། །བསྟན་པའི་བདག་པོ××། །དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་བདུན་པོ་འདི་སྲད་རྒྱུད་ལུགས་ཀྱི་དམིགས་བརྩེ་མ་དྲུག་སྐོར་དང་། དབེན་ས་བ་ལྟར་ན། དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། དམིགས་མེད××། །དྲི་མེད××། །བདུད་དཔུང××། །གངས་ཅན་མཁས་པའི་གཙུག་རྒྱན་བློ་བཟང་གྲགས། །སྐྱབས་གསུམ་ཀུན་འདུས་བླ་མ་སངས་རྒྱས་ལ། །སྒོ་གསུམ་གུས་པའི་སྒོ་ནས་གསོལ་བ་འདེབས། །རང་གཞན་སྨིན་ཅིང་གྲོལ་བར་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཞེས་ཚིག་རྐང་དགུ་འདོན་ཞིང་ལྷ་འགོད་ཚུལ་ལ་ཁྱད་པར་མེད་ལ། ཡང་རྗེའི་ཐུགས་ཀར་འཇིགས་བྱེད་བཀོད་ནས། འཇམ་དཔལ་ཁྲོས་པའི་ཟློས་གར་གཤིན་རྗེ་གཤེད། །ཅེས་ཀྱང་སྦྱར་ཆོག་གོ།

བདུན་སྐོར་ནི། རྗེ་བླ་མའི་གནས་གསུམ་དུ་རིགས་གསུམ་མགོན་པོ། ཕྱག་རྡོར་གྱི་ཐུགས་ཀར་རྒྱལ་བ་རྡོ་རྗེ་འཆང་། ལྟེ་བར་ཐུབ་དབང་། གསང་གནས་སུ་རྗེ་བཙུན་སྒྲོལ་མ་བཀོད་ནས། དེ་རྣམས་ངོ་བོ་དབྱེར་མེད་དུ་གསོལ་བ་འདེབས་པ་སྟེ། འཕྲིན་ལས་ཀུན་འགྲུབ་རྗེ་བཙུན་སྒྲོལ་མ་ཡིན། །དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་བདུན་དང་།

དམིགས་བརྩེ་མ་བརྒྱད་སྐོར་ནི། རྗེ་བླ་མའི་གནས་གསུམ་དུ་རིགས་གསུམ་མགོན་པོ། སྤྱི་བོའི་འཇིགས་བྱེད་ཀྱི་ཐུགས་ཀར་འཇམ་དབྱངས། ཕྱག་རྡོར་གྱི་ཐུགས་ཀར་རྡོ་རྗེ་འཆང་། ལྟེ་བར་ཐུབ་དབང། གསང་གནས་སུ་སྒྲོལ་མ་བཀོད་ནས། དེ་རྣམས་ངོ་བོ་དབྱེར་མེད་དུ་གསོལ་བ་འདེབས་པ་སྟེ། འཇམ་དཔལ་ཁྲོས་པའི་ཟློས་གར་གཤིན་རྗེ་གཤེད། །འཕྲིན་ལས་ཀུན་འགྲུབ་རྗེ་བཙུན་སྒྲོལ་མ་ཡིན། །དངོས་གྲུབ་ཀུན་འབྱུང་ཐུབ་དབང་རྡོ་རྗེ་འཆང་། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་བརྒྱད་དང།

དམིགས་བརྩེ་མ་དགུ་སྐོར་ནི། རྗེ་བླ་མའི་སྤྱི་བོར་འཕགས་པ་སྤྱན་རས་གཟིགས་ཕྱི་ནང་གསང་གསུམ་སྒོམ་པ་སྟེ། རྗེ་བླ་མའི་སྤྱི་བོར་སྤྱན་རས་གཟིགས་ཕྱག་བཞི་བ། དེའི་ཐུགས་ཀར་སྤྱན་རས་གཟིགས་རྡོ་རྗེ་ཆོས། དེའི་ཐུགས་ཀར་སྤྱན་རས་གཟིགས་རྒྱལ་བ་རྒྱ་མཚོ་སྒོམ་པ་དང་། ཡང་རྗེ་བླ་མའི་མགྲིན་པར་རྗེ་བཙུན་འཇམ་པའི་དབྱངས་ཕྱི་ནང་གསང་གསུམ་སྒོམ་པ་སྟེ། ཕྱི་སྒྲུབ་འཇམ་དབྱངས་དཔའ་བོ་གཅིག་གྲུབ། ནང་སྒྲུབ་དབྱངས་ཅན་མ་དམར་མོར་འཁྱུད་པ། གསང་སྒྲུབ་འཇམ་དབྱངས་ཡབ་ཡུམ་འཁྱུད་པ་སྒོམ་པའོ། །

ཡང་རྗེ་བླ་མའི་ཐུགས་ཀར་གསང་བདག་ཕྱག་ན་རྡོ་རྗེ་ཕྱི་ནང་གསང་གསུམ་སྒོམ་པ་སྟེ། ཕྱི་སྒྲུབ་གསང་བདག་གོས་སྔོན་ཅན། ནང་སྒྲུབ་གསང་བདག་འབྱུང་འདུལ། གསང་སྒྲུབ་གསང་བདག་འཁོར་ཆེན་ཏེ། རྗེ་བླ་མ་དང་རིགས་གསུམ་མགོན་པོ་ཕྱི་ནང་གསང་གསུམ་དགུ་བོ་ངོ་བོ་དབྱེར་དུ་གསོལ་བ་འདེབས་པ་ལ་དམིགས་བརྩེ་མ་དགུ་སྐོར་ཟེར་ལ།

ཡང་དམིགས་བརྩེ་མ་དགུ་སྐོར་ལ། རྗེ་བླ་མའི་སྤྱི་བོར་སྤྱན་རས་གཟིགས་ཕྱག་བཞི་བ། དེའི་ཐུགས་ཀར་པདྨ་དང་ཧྲཱྀ་ཡིག མགྲིན་པར་འཇམ་དབྱངས། དེའི་ཐུགས་ཀར་རལ་གྲི་དང་དྷཱིས་མཚན་པ། ཐུགས་ཀར་ཕྱག་ན་རྡོ་རྗེ་གོས་སྔོན་ཅན། དེའི་ཐུགས་ཀར་རྡོ་རྗེ་དང་ཧཱུཾ་གིས་མཚན་པ་སྟེ་གསུམ་ཀའང་སེམས་དཔའ་སུམ་བརྩེགས་སུ་བསྒོམས་ནས་རྗེ་བླ་མའི་སྐུ་གསུང་ཐུགས་དང་རྣམ་གསུམ་ངོ་བོར་དབྱེར་མེད་དུ་གསོལ་བ་འདེབས་པའོ། །འདོན་པ་དམིགས་བརྩེ་མ་བཞི་སྐོར་ལས་ཡན་གར་བ་མེད་དེ། དམིགས་མེད་བརྩེ་བའི××། །དྲི་མེད××། །བདུད་དཔུང××། །གངས་ཅན××། །བློ་བཟང××། །ཞེས་ཚིག་རྐང་ལྔའོ། །

སྤྱིར་ན། དམིགས་བརྩེ་མ་ལ་སྐོར་བདུན་ཡོད་ཀྱང་། རྒྱུན་འདོན་དུ་བཞི་སྐོར་འདི་བཏོན་ན་བྱིན་རླབས་ཀྱི་ཚན་ཁ་གཞན་ལས་ཆེ་བར་བཤད་ལ། དམིགས་བརྩེ་མ་བཞི་སྐོར་སྐབས་རྗེ་བླ་མར་གསོལ་བ་འདེབས་ཚེ།

ཕྱི་མཚུངས་པ་གསལ་བྱེད་ཀྱི་སྒོ་ནས་གསོལ་བ་འདེབས་པ་ནི། རྒྱལ་བ་སྲས་བཅས་ཐམས་ཅད་ཀྱི་མཁྱེན་བརྩེ་ནུས་གསུམ་ལྷ་སྐུ་བཞིན་ལག་གི་ངོ་བོར་ཤར་བ་རིགས་གསུམ་མགོན་པོ་ཡིན་ལ། རིགས་གསུམ་མགོན་པའི་མཁྱེན་བརྩེ་ནུས་གསུམ་དེ་མཚུངས་སུ་རྗེ་བླ་མ་ལ་ཡོད་པར་མོས་ཏེ་གསོལ་བ་འདེབས་པ། རྗེ་བླ་མ་ཕྱི་སྒྲུབ་དང་། གསོལ་འདེབས་ནི། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །མཁས་པ་ཡོན་ཏན་ཀུན་ལྡན་པ། །བདག་ཀྱང་ཁྱེད་རང་ལྟ་བུར་བྱིན་གྱིས་རློབས། །ཞེས་དང་།

ནང་ཡོན་ཏན་དེ་ལྡན་གྱི་སྒོ་ནས་གསོལ་བ་འདེབས་པ་ནི། སྤྱན་རས་གཟིགས་ལ་སྙིང་རྗེ་ཆེན་པོས་མཚོན་པའི་ཡོན་ཏན་ཇི་སྙེད་ཅིག་དང་། འཇམ་པའི་དབྱངས་ལ་ཤེས་རབ་ཀྱིས་མཚོན་པས་ཡོན་ཏན་ཇི་སྙེད་དང་། ཕྱག་ན་རྡོ་རྗེ་ལ་མཐུ་སྟོབས་ཀྱིས་མཚོན་པའི་ཡོན་ཏན་ཇི་སྙེད་ཅིག་ཡོད་པ་དེ་མཚུངས་སུ། རྗེའི་ཐུགས་རྒྱུད་ན་མངའ་བར་མོས་ཏེ་གསོལ་བ་འདེབས་པ་རྗེ་བླ་མ་ནང་སྒྲུབ་དང་། གསོལ་འདེབས་ནི། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །གྲུབ་པ་རྟོགས་པའི་ཡོན་ཏན་ཀུན་ལྡན་པ། །བདག་ཀྱང་ཁྱེད་རང་ལྟ་བུར་བྱིན་གྱིས་རློབས། །ཞེས་དང་།

གསང་བ་ལྷག་པའི་ལྷ་དང་དབྱེར་མེད་ཀྱི་སྒོ་ནས་གསོལ་བ་འདེབས་པ་ནི། རྒྱལ་བ་སྲས་བཅས་ཀྱི་མཁྱེན་བརྩེ་ནུས་གསུམ་ལྷའི་རྣམ་པར་ཤར་བ་རིགས་གསུམ་མགོན་པོ་དང་། དེ་གསུམ་གཅིག་ཏུ་བསྡུས་ནས་མིའི་ཟློས་གར་དུ་རོལ་བ་རྗེ་བླ་མ་ཉིད་དུ་ཤེས་པའི་སྒོ་ནས་གསོལ་བ་འདེབས་པ་རྗེ་བླ་མ་གསང་སྒྲུབ་དང་། གསོལ་འདེབས་ནི། དམིགས་མེད××། །དྲི་མེད××། །བདུད་དཔུང××། །གངས་ཅན××། །བློ་བཟང××། །རིགས་གསུམ་ངོ་བོ་གསང་གསུམ་རྡོ་རྗེ་སྐུ། །བདག་ཀྱང་ཁྱེད་རང་ལྟ་བུར་བྱིན་གྱིས་རློབས། །ཞེས་སོ། །

ཡང་དམིགས་བརྩེ་མའི་སྒོ་ནས་དངོས་གྲུབ་ཞུ་བ་ལ། མ་དག་པ་འཁྲུ་བ། མི་ཤེས་པ་གསལ་བ། ལས་ཚོགས་གཞན་སྒྲུབ་ཚུལ་ཡོད་ལ།

མ་དག་པ་འཁྲུ་བ་ནི། རྗེ་ཡབ་སྲས་གསུམ་གྱི་ཐུགས་ཀ་ནས་འོད་ཀྱི་སྦུ་གུ་ལྟ་བུ་གསུམ་བྱུང་ནས་རྩ་བ་གཅིག་ཏུ་གྲིལ་ཏེ་རང་གི་སྤྱི་བོ་ནས་ཞུགས། ནད་གདོན་སྡིག་སྒྲིབ་དང་མ་དག་པའི་དྲི་མ་ཐམས་ཅད་ནག་འདུར་འདུར་དེད་ནས་བཀྲུས། ལུས་དྭངས་གསལ་ཤེལ་གོང་གི་རང་བཞིན་དུ་གྱུར་བར་བསམ་པ་དང་།

མི་ཤེས་པ་གསལ་བ་ནི། སྐུ་ཡི་ཆེ་དང་གསུང་གི་གསལ། །ས་བོན་མྱུར་བ་ཕྱག་མཚན་ཟབ། །ལྒིགས་བམ་རལ་གྲི་ལྒིགས་རལ་གྱིས། །འཆད་དང་རྩོད་དང་རྩོམ་པའོ། །ཞེས་པ་ལྟར། རྗེ་བླ་མ་ལ་བརྟེན་ནས་ཤེས་རབ་སྒྲུབ་ཚུལ་བདུན་ལས།

གསོལ་བ་འདེབས་པ་སྔོན་དུ་སོང་སྟེ་རྗེ་ཡབ་སྲས་གསུམ་གྱི་ཐུགས་ཀ་ནས་བདུད་རྩི་དམར་སེར་རྒྱ་མཚོ་ལ་ཁ་བ་བབས་པ་བཞིན་སིམ་ནས་ལུས་ཀྱི་ནང་ཐམས་ཅད་གང་། བདུད་རྩིའི་རྡུལ་ཕྲ་རབ་རེ་རེ་འཇམ་དཔལ་དབྱངས་ཀྱི་སྐུའི་རྣམ་པར་སྒོམ་སྟེ་སྐུའི་སྒོ་ནས་ཤེས་རབ་ཆེ་བ་སྒྲུབ་པ་དང་། དེ་བཞིན་དུ་བདུད་རྩིའི་རྡུལ་ཕྲ་རབ་རེ་རེ་དམིགས་བརྩེ་མ་དང་ཨ་ར་པ་ཙའི་ཡིག་འབྲུར་བསྒོམས་སྟེ་གསུང་གི་སྒོ་ནས་ཤེས་རབ་གསལ་བ་སྒྲུབ་པ་དང་། ཡང་རྡུལ་ཕྲ་རབ་རེ་རེ་དྷཱི་ཡིག་གི་རྣམ་པར་བསྒོམས་པས་ས་བོན་གྱི་སྒོ་ནས་ཤེས་རབ་མྱུར་བ་སྒྲུབ་པ་དང་། ཡང་རྡུལ་ཕྲ་རབ་རེ་རེ་ཕྱག་མཚན་གྱི་རྣམ་པར་བསྒོམས་པས་ཟབ་པའི་ཤེས་རབ་སྒྲུབ་པ་དང་། ཡང་རྡུལ་ཕྲ་རབ་རེ་རེ་ལྒིགས་བམ་དང་རལ་གྲི་དང་ལྒིགས་རལ་གསུམ་དུ་བསྒོམས་པས་འཆད་རྩོད་རྩོམ་གསུམ་སྒྲུབ་པའོ། །

ལས་ཚོགས་གཞན་སྒྲུབ་ཚུལ་ནི། རྗེ་ཡབ་སྲས་གསུམ་གྱི་ཐུགས་ཀ་ནས་བདུད་རྩི་དཀར་བོ་བབས་པས་སྡིག་ལྟུང་ཉེས་ཚོགས་ནད་གདོན་སོགས་དག་པར་མོས་པ་ཞི་བའི་དངོས་གྲུབ་སྒྲུབ་ཚུལ་དང་། དེ་བཞིན་འཆི་བ་མེད་པའི་ཚེའི་བདུད་རྩིའི་ངོ་བོར་བབས་པས་ཚེ་བསོད་སོགས་འཕེལ་བར་མོས་པ་རྒྱས་པའི་དངོས་གྲུབ་སྒྲུབ་ཚུལ་དང་། ཡང་བདུད་རྩི་དམར་བོའི་རྒྱུན་བབས་པས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་དབང་དུ་གྱུར་བར་མོས་པས་དབང་གི་དངོས་གྲུབ་སྒྲུབ་ཚུལ་དང་། ཡང་བདུད་རྩིའི་རྒྱུན་རྡུལ་ཕྲ་རབ་ཀྱི་རྣམ་པར་བབས་པས་གདོན་བགེགས་བར་ཆད་གང་གིས་ཀྱང་མི་ཚུགས་པར་བསྲུང་བ་ཆེན་པོ་གྱུར་བར་མོས་པས་དྲག་པོའི་དངོས་གྲུབ་སྒྲུབ་ཚུལ་ལོ། །

༤ དམིགས་བརྩེ་མ་དང་འབྲེལ་བའི་བླ་མའི་རྣལ་འབྱོར་གྱི་ཕན་ཡོན། སྔོན་སྲད་ཀྱི་གཡག་ཤུལ་ལུང་བའི་མདའ་ན་ཁྱིམ་ཚང་ཕྱུག་པོ་ཞིག་ཡོད་པ་ལ། རྒྱལ་བོ་པེ་ཧར་གྱིས་གནོད་པ་བཏང་སྟེ་མི་མང་བོ་གུམ། ཚེ་ཞིག་ཁྱིམ་དེའི་གཅེས་ཕྲུག་ལ་རྒྱལ་གདོན་ཞུགས་ཤིང་། སྨན་དཔྱད་དང་མདོས་གླུད་སོགས་ཀྱིས་རིམ་གྲོ་ཇི་ལྟར་བསྒྲུབས་ཀྱང་མ་ཕན་པར་འཆི་ལ་ཐུག་ཙ་ན། ཕྱུགས་རྫི་ཞིག་གིས་ཁྱིམ་བདག་ལ། གཡག་ཤུལ་ལུང་བའི་ཕུ་འདིར་གྲུབ་ཆེན་པ་ཞིག་འདུག་ལ། མཚམས་ལན་རེར་ཁྲོ་བོ་འཇིགས་རུང་ཞིག་གི་སྐུར་བཞེངས་པ་དང་། ལན་རེར་གཡག་ཆེན་པོ་ཞིག་གི་རྣམ་པ་དང་། མཚམས་རེར་དགེ་སློང་གི་རྣམ་པར་བཞུགས་པ་ཞིག་ཡོད་པས། ཁོང་ཞུས་ན་ཐབས་རེ་ཨེ་ཡོད་ཅེས་གྲོས་བཏབ་པ་བཞིན། འདུལ་ནག་པ་དཔལ་ལྡན་བཟང་བོ་ཞུས་ཀྱང་། དང་བོ་ཁོང་གིས་བདག་བཙུན་རྒན་ཕལ་བ་ཞིག་ཡིན་པས། རྒྱལ་གདོན་དེ་འདུལ་ག་ན་ཐུབ་ཅེས་ཞལ་གྱིས་མ་བཞེས། ནན་གྱིས་ཞུས་པས་སྲད་རྒྱུད་འདེབས་པའི་དུས་ལ་བབ་པའི་སྔ་ལྟས་སུ་གཟིགས་ཏེ། འོ་ན་ཕན་མི་ཕན་བརྟག་པ་བྱ་དགོས་པས། ཐོག་མར་བྱིས་པའི་ཁོག་ཏུ་རྒྱལ་གདོན་ཞུགས་ཚེ། གདིང་བ་འདིས་སྐར་ཁུང་གཡོགས། ལྷམ་གཉིས་སྒོའི་གཡས་གཡོན་དུ་ཞོག ཕྲེང་བ་རེ་རེ་ཁྱིམ་དེའི་བུ་ག་གང་ཡོད་དུ་ཞོག་དང་། རྒྱལ་གདོན་དེའི་སྐད་ངན་འདོན་པའི་ཚེ་ང་རང་སླེབས་གྱིས། དེར་མ་འཇིགས་ན་ངེད་ཀྱིས་ཕན་མི་ཐོགས་གསུངས་ནས་བཏང་། ཁྱིམ་བདག་གིས་བླ་མས་ཐུགས་བཀོད་ལྟར་བསྒྲུབས་པས། གདོན་དེ་དངངས་སྐྲག་སྐྱེས་ཏེ་འདིར་ཅི་ལ་ཡོང་། སྐར་ཁུང་དུ་བྲོས་པས་ཁྲོ་བོ་གཤིན་རྗེ་གཤེད་འཇིགས་སུ་རུང་བ་ཞིག་གིས་བཀག་འདུག སྒོར་བྲོས་པས་གཤིན་རྗེ་རལ་གྲི་ཐོགས་པ་གཉིས་ཀྱིས་སྲུང་འདུག བུ་ག་ཐམས་ཅད་བཙུན་པའི་དམག་གིས་བསྐོར་འདུག ད་གང་དུ་འགྲོ་ཞེས་སྨེ་སྔགས་བཏོན་པ་ན། འདུལ་ནག་པ་མྱུར་མོར་ཕེབས་ནས་དམ་ལ་བཏགས་ཏེ། ད་ནས་བཟུང་རྒྱལ་གདོན་ཁྱོད་ཀྱིས་སྐྱེ་འགྲོ་ཀུན་ལ་གནོད་པ་མི་བྱེད་པར་དམ་བཅའ་གྱིས། དེ་མིན་བརླག་པར་བྱའོ་གསུངས་པས། གདོན་ན་རེ། ངེད་ཅག་གི་ཁ་ཟས་ནི་ཤ་ཁྲག་གིས་འཚོ་བ་ལ། ཟས་སྐོམ་མི་རྙེད་པས། བླ་མས་སྙིང་རྗེ་རེ་གཟིགས་ཞུས་པས། འོ་ན་དམིགས་བརྩེ་མ་འདོན་མཁན་ལ་མི་གནོད་པར་དམ་བཅའ་གྱིས། དེ་མིན་བརླག་གོ་གསུངས་པས། སྟོད་ཛ་ཏིའི་མེ་ཏོག་སྐྱེ་ས་ནས། ཤར་རྒྱ་མཚོའི་མཐའི་བར་དུ་དམིགས་བརྩེ་མས་མ་ཁྱབ་པ་མེད་པས། ངེད་གང་དུ་འགྲོ། དེ་ཡང་ཐུགས་རྗེ་གཟིགས་པར་ཞུ་ཞུས་པས། འོ་ན། དགའ་ལྡན་ལྷ་བརྒྱ་མའི་སྒོ་ནས་དམིགས་བརྩེ་མ་བགྲང་མཁན་གར་ཡོད་ལ་གནོད་པ་མི་བྱེད་པའི་དམ་བཅའ་གྱིས། དེ་མིན་བརླག་པར་བྱའོ་ཞེས་བཀའ་བསྒོས་པས། རྒྱལ་བོ་བེ་ཧར་གྱིས་ཁས་བླངས་ཤིང་བྲོ་བོར་བ་ལྟ་བུ་དང་།

ཡང་འདུལ་ནག་པས་རླུང་བུམ་པ་ཅན་བཟུང་ནས་མཁའ་ལ་གཤེགས་ཏེ་མདུང་རྩེར་དཀྱིལ་ཀྲུང་གིས་འཁོད་པས་མདུང་རྩེ་རས་པར་གྲགས་ལ། ཁོང་གིས་སྐྱེ་འགྲོ་ཀུན་ལ་དམིགས་བརྩེ་མ་འདོན་པར་སྐུལ་ཏེ། མ་བཏོན་པའི་ཁ་ལ་གཟའ་ནད་བཏང་ཡོང་གསུངས་ཀྱང་། སྡེ་བ་རིན་སྤུངས་པས་མ་བཏོན་པར་ཁ་ཡོ་སོང་བས། བཅོས་ཐབས་གང་གིས་ཀྱང་མ་ཕན་པས། འདུལ་ནག་པ་སྤྱན་དྲངས་ཏེ། ཁོང་གིས་དམིགས་བརྩེ་མ་འདོན་བཅུག་པས་མྱུར་མོར་སོར་ཆུད་པ་དང་།

ཡང་སློབ་དཔོན་བྱམས་པས་ཀྱང་རྒྱུན་འདོན་ལ་དམིགས་བརྩེ་མ་གནང་ཞིང་། སྐུ་འདའ་ཁར་ཡང་ཁྲི་ནམ་བཟང་ལ་ང་ལ་འདས་མཆོད་ཀྱི་ཆོ་ག་གཞན་མི་དགོས། ཞེ་དགུ་ལ་དམིགས་བརྩེ་མ་བགྲོང་ཞེས་ཐུགས་བཀོད་གནང་བ་དང་།

དམིགས་བརྩེ་མའི་སྒོ་ནས་བླ་མའི་རྣལ་འབྱོར་ལས་གཞན། ཆར་འབེབས། སད་སྲུང་། སྲུང་འཁོར། ཚེ་སྒྲུབ། རིལ་སྒྲུབ། མཚོན་སྲུང་། གྲིབ་སེལ། སྲོག་རླུང་བཅོས་ཐབས། ཟ་ཡིག ཇག་འཆིང་། ཞིང་གི་རྩ་འདོན། ཁ་ཟས་ཡོང་ཐབས། ཤྭ་འོད་ཆུ་བསྒྱུར་གྱི་ཆོ་ག བར་ཆད་སེལ་ཐབས། ས་བཅུད་སྒྲུབ་ཐབས། བསྙེན་པ་གཏོང་ཐབས། སྦྱིན་སྲེག རྒྱལ་མཚན་འཛུགས་ཆོག དབང་སྡུད། དགེ་འདུན་འདུ་བའི་འཁོར་ལོ་སྒྲུབ་ཚུལ། སྡིག་སྦྱངས། སེར་འགོག རིམས་ནད་བསྲུང་བ། བགེགས་བསྐྲད། བཀྲུ་བྱབས། རི་ཁྲུས་བྱ་ཚུལ་སོགས། ལས་ཚོགས་བརྒྱ་རྩ་བརྒྱད་ཡོད་པ་དང་། བཅུ་གཅིག་ཙམ་གྱི་རྒྱུན་དེང་སང་ཡང་ཡོད།

གཞན་སངས་རྒྱས་ཐམས་ཅད་ཀྱི་ཡོན་ཏན་བསྡུས་ན་སངས་རྒྱས་རང་རྒྱུད་ཀྱི་མཁྱེན་བརྩེ་ནུས་གསུམ་དུ་འདུ་ལ། དེ་གསུམ་ལྷ་སྐུ་བཞིན་ལག་གི་རྣམ་པར་ཤར་བ་རྗེ་བཙུན་འཇམ་པའི་དབྱངས། འཕགས་པ་སྤྱན་རས་གཟིགས། གསང་བདག་ཕྱག་ན་རྡོ་རྗེ་གསུམ་ལགས་ལ། དེ་གསུམ་གཅིག་བསྡུས་ཀྱི་ངོ་བོ་འཇམ་མགོན་རྒྱལ་བ་བློ་བཟང་གྲགས་པ་ཡིན་པས། རྗེ་བླ་མ་ལ་གསོལ་བ་བཏབ་པ་དང་མཆོད་པ་ཕུལ་ན། ཕྱོགས་བཅུའི་རྒྱལ་བ་སྲས་དང་བཅས་པར་གསོལ་བ་བཏབ་པ་དང་མཆོད་པ་ཕུལ་བར་འགྱུར་ཞིང་། དམིགས་བརྩེ་མ་ནི་དེ་དག་གི་གསོལ་འདེབས་དབྱངས་སུ་ཤར་བ་ཡིན་པས། རྒྱལ་བ་སྲས་བཅས་ཀྱི་སྙིང་བོ་དང་ཉེ་སྙིང་བགྲང་བའི་ཕན་ཡོན་ཡང་འབྱུང་ངོ་། །མདོར་ན། རྗེ་བླ་མར་གསོལ་བ་བཏབ་ཅིང་དམིགས་བརྩེ་མ་བགྲང་ན། འདི་ཕྱིའི་ལེགས་ཚོགས་ཀྱི་རྩ་བ་ཚུགས་ཤིང་། ཐོས་བསམ་སྒོམ་གསུམ་རྣལ་དུ་འགྲོ་ལ། གདོན་བགེགས་བར་ཆད་ཀྱིས་མི་ཚུགས་པར་མ་ཟད། ཟབ་གསལ་མྱུར་གསུམ་གྱི་ཤེས་རབ་སོགས་འགྲུབ་སླ་ཞིང་། ཚེ་རབས་ཀུན་ཏུ་རྗེ་བླ་མའི་བསྟན་པ་དང་འཇལ་ཏེ། དགའ་ལྡན་དུ་སྐྱེས་པ་སོགས་ཕན་ཡོན་མཐའ་ཡས་པ་འབྱུང་ངོ་། །

དམ་ཚིག་རྡོ་རྗེ་བཟླས་པ།

༡ དམ་ཚིག་རྡོ་རྗེ་བཟླས་པ་གལ་ཆེ་ཚུལ། སྔགས་བླ་མེད་ཀྱི་ལམ་ཉམས་སུ་ལེན་པ་ལ། དམ་སྡོམ་སྲུང་བ་གལ་ཆེ། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་བླ། །འཆི་བའི་དུས་ལ་བབ་ཀྱང་བླ། །དམ་ཚིག་རྟག་ཏུ་བསྲུང་བར་བྱ། །ཞེས་པ་ལྟར། དམ་ཚིག་སྲུང་ཞིང་ལམ་སྒོམ་པ་གནད་དུ་སོང་ན། རྣམ་གྲོལ་ཟླ་བས། མ་བསྒོམས་གྱུར་ཀྱང་ལྟུང་མེད་ན། །སྐྱེ་བ་བཅུ་དྲུག་དག་ན་འགྲུབ། །ཅེས་ཟུང་འཇུག་གི་གོ་འཕང་མྱུར་བ་མྱུར་བར་འཐོབ་ལ། དམ་ཚིག་མ་བསྲུང་ན་དམྱལ་བ་མ་གཏོགས་ཐོ་མེད་དེ། རྡོ་རྗེ་རྩེ་མོ་ལས། གཞན་དུ་དམ་ཚིག་ལས་ཉམས་ན། །ཉམས་པ་བདུད་ཀྱིས་གཟུང་བར་འགྱུར། །འདི་དང་ཕ་རོལ་ཏུ་ནི་ཕུང་། །བསྟིར་མེད་སྤྱིའུ་ཚུགས་དམྱལ་བར་འགྲོ། །ཞེས་པ་ལས་མ་འདས་ལ། ཁྱད་པར་དུ། དེང་སང་སྔོན་འགྲོ་དང་མདོ་ལ་མ་བརྟེན་པར། གསང་སྔགས་ཟབ་མོའི་མྱུར་ལམ་ཞེས་ཐམས་ཅད་ཀྱི་རྣ་བ་ཀྲོག་ཀྲོག་བྱེད་ཀྱང་། སུ་ཐོད་ཐོད་ལ་མི་ཉེ་བ་ཡིན། སྐྱེ་བ་སྔོན་མ་ནས་སྦྱངས་སྦྱངས་པའི་སྐལ་ལྡན་གྱི་སྐྱེ་བོ་དབང་བོ་ཡང་རབ་ཅིག་ལ་ཉེ་བ་མ་གཏོགས། ཐུན་མོང་ལམ་སྦྱངས་དང་སྔོན་སྦྱངས་ཀྱི་བག་ཆགས་མེད་པར། ཁྱི་དང་གློ་བ་འཕྲད་པ་བཞིན་གསང་སྔགས་ལ་དམར་འཇུ་བྱས་ན། སྔགས་ལ་སྤྱད་སྲུང་གི་དམ་ཚིག་བགྲང་ལས་འདས་པ་ཡོད་པས། དེའི་ཟུར་གཅིག་ཉམས་ནའང་དམྱལ་བ་འགྲོ་བ་ལས་འོས་མེད། དེ་བས། སྔགས་ལ་ཞུགས་པའི་སྐྱེས་བུ་ངན་སོང་དང་། །སངས་རྒྱས་གཉིས་ལས་འགྲོ་ས་གསུམ་པ་མེད། །གསུངས་ལ། ཁྱད་པར་དུ་གསང་སྔགས་ཀྱི་དམ་ཚིག་ནི་ཕྲ་ཞིང་ཞིབ་ལ། གྲངས་མང་ཞིང་སྲུང་དཀའ་བ་ཡིན་ཏེ། དཔེ་ཆོས་ལས། སྔགས་ཀྱི་རྡུལ་ཚོན་དཀྱིལ་འཁོར་བྲི་བའི་དུས་སུ་ཡང་། དང་བོ་ཐིག་བག་ཙམ་ཞིག་འགྲུས་ཀྱང་། ཉན་ཐོས་ཀྱི་ཕས་ཕམ་གྱིས་དོ་མ་ཡིན་གསུངས་ན། དམ་ཚིག་གཞན་ལྟ་ཅི་སྨོས། སྔགས་ཀྱི་སྤྱད་སྲུང་གི་དམ་ཚིག་ས་མ་ཡ་འབུམ་སྡེ་ཡོད་པས། དེ་རྣམས་འོ་སྐོལ་གྱིས་ཉམས་འོག་ཏུ་ཚུད་པར་དཀའ། གསུངས་ལ། ཨ་ཏི་ཤ་ལྟ་བུ་ཡང་སྔགས་ལ་ཞུགས་དུས་ཉེས་པ་ཅར་རྒྱག་ཉར་རྒྱག་བྱུང་གསུངས་ན། རང་ཅག་ཐ་མལ་བ་དྲན་ཤེས་ནི་མཐུ་ཆུང་། གཉེན་པོ་བརྟེན་པ་ནི་དེ་བས་ཀྱང་དཀའ། ཐ་ན་རྩ་ལྟུང་གི་གྲངས་འདྲེན་ཙམ་་ཡང་བློ་ངོ་ན་མེད་པས། ཡ་གིའི་བླ་མའི་དབང་མོ་ཆེ་འདི་དང་འདི་གསུངས་ཟེར་ནས་དེར་རྒྱུགས། མ་གིའི་མཁན་པོའི་ཆོས་ཟབ་མོ་འདི་དང་འདི་གསུངས་ཟེར་ནས་དེར་རྒྱུགས་ཏེ། ཁྱི་རྒན་བཞིན་དུ་གཏུགས་གཏད་མེད་པར་ལྡོམ་ནས། ཆོས་ལ་མ་ཉན་བྱ་བ་གཅིག་ཀྱང་མེད་ཚོད་ཡིན། འོན་ཀྱང་། གསང་སྔགས་ལ་ཞུགས་ན་དམ་ཚིག་དང་སྡོམ་པ་ཁས་ལེན་དགོས་པ་ནི་ཡིད་ཀྱི་དགུ་ལའང་མ་དྲན་པར། རྡོ་རྗེ་མནའ་ཆུ་སྐོམ་པས་ཆུ་འདོད་པ་བཞིན་དུ་འཐུང་། དམ་ཚིག་དང་སྡོམ་པ་ལམ་ཁའི་རྡོ་བཞིན་དུ་བསྐྱུར་ཏེ་འགྲོ་བ་ནི་སྡིག་ལྟུང་ཆར་བ་ལྟར་ཕབ་ནས་རང་ཉིད་དམྱལ་བར་བརྫངས་པའི་སྔ་ལྟས་ཏེ། འདི་ནི་ཁྱེད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེའི་བདུད་རྩིའི་ཆུ་འཐུང་ཤིག། ཅེས་སོགས་དུས་འཁོར་བདག་འཇུག་སོགས་ལས་གསུངས་པ་དང་། རེ་ཞིག་དམ་ཚིག་ཉམས་པ་ན། །དངོས་གྲུབ་འཐོབ་པ་ལྟ་ཞོག་གི། མི་ཡི་སྐྱེ་བའང་རྙེད་པར་དཀའ། །ཞེས་དང་། གཞན་ཡང་། དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་པ་ལྟར། དམ་ཚིག་ལས་འདས་ན། ཉེས་དམིགས་འདི་དག་གིས་མཚོན་པའི་ཉེས་ལྟུང་མང་དུ་འབྱུང་། གལ་ཏེ་རང་ངོས་ནས་དམ་ཚིག་ཉམས་པའི་དྲི་མས་མ་གོས་ཀྱང་། རྡོ་རྗེ་སྤུན་གྲོགས་སུ་གྱུར་བའི་དམ་ཉམས་ཤིག་ཚོགས་གྲལ་དུ་ཐོན་ན། དེའི་ཉམས་གྲིབ་ཀྱིས་དམ་ལྡན་ཁྲི་འབུམ་མང་བའི་སྒྲུབ་པ་ལ་འབྲས་བུ་མི་འབྱུང་བར་མ་ཟད། དཔེར་ན་སྦལ་བ་ཁྲག་ཅན་གཅིག་གིས་སྦལ་བ་ཐམས་ཅད་རྨ་ཅན་དུ་བསྒྱུར་ཏེ་རུལ་ཏུ་བཅུག་པ་དང་མཚུངས། དེ་ལས་གཞན་དམ་ཉམས་དེ་དང་གཏམ་བསྲེ་བ། སྤྱོད་ལམ་འདྲེས་པ། ཐ་ན་ལུང་བ་གཅིག་གི་མགོ་སྔ་ནས་ཆུ་འཐུང་ནའང་ཟླས་ཉམས་དང་ཞོར་ཉམས་བྱུང་བ་ཡིན། དཔེར་ན། བེའུ་སྦྲེལ་གཡང་དུ་ལྷུང་བ་བཞིན་བླ་མ་དང་མཆེད་གྲོགས་ཚུན་ཆད་རྡོ་རྗེ་དམྱལ་བར་ལྷུང་བ་ཡིན་ཏེ། དེར་ལྷུང་ན་ཚེ་ཚད་ནི། འཇམ་དཔལ་རྩ་རྒྱུད་ལས། ཕྱིའི་རྒྱ་མཚོ་ཆེན་པོ་ལ་སྐྲ་ཉག་མ་གཅིག་གི་རྩེ་མོས་ཆུ་གཏོར་བས་མ་ཟད་ཀྱི་བར་དུ་སྡུག་བསྔལ་ཆེན་པོ་མྱོང་བར་གསུངས་སོ། །འོ་ན། དམ་ཚིག་ཉམས་པ་བྱུང་ན་ཇི་ལྟར་བྱ་ཟེར་ན། སྤྱིར་དང་བོ་སྡིག་ལྟུང་གིས་མ་གོས་པ་ཞིག་དང་། གལ་ཏེ་གོས་ན་བཤགས་སྡོམ་བྱ་བ་འདི་གནད་དུ་ཆེ། དེ་ཡང་གསང་སྔགས་ཀྱི་དམ་ཚིག་ཉམས་པ་འདི་བཤགས་པས་འདག་སླ་བ་ཡིན་ཏེ། ཉན་ཐོས་ལུགས་ཀྱི་རྩ་ལྟུང་སྐོར་ཅིག་རྫ་ཆག་པ་ལྟར་སླར་གསོ་ཐབས་མེད་པ་དང་། བྱང་སེམས་ཀྱི་བསླབ་སྡོམ་ཉེར་སྤྱད་ཆག་པ་དང་འདྲ་བས་མགར་བ་མཁས་པས་སླར་བཅོས་སུ་ཡོད་པ་ལྟར། གཞན་རྐྱེན་དགེ་བའི་བཤེས་གཉེན་ལ་བརྟེན་ནས་གསོར་རུང་བ་དང་། གསང་སྔགས་ཀྱི་དམ་ཚིག་ཉམས་པ་ནི་རིན་པོ་ཆེའི་ཉེར་སྤྱད་ཅུང་ཟད་ཞོམ་པ་དང་མཚུངས་པས། རང་ཉིད་ཀྱིས་ཀྱང་ལྷ་སྔགས་ཏིང་འཛིན་ལ་བརྟེན་ནས་བཤགས་ཀྱང་ལྷག་མེད་དུ་དག་པར་གསུངས་པས་ན། མྱུར་བ་མྱུར་དུ་དམ་ཚིག་ཉམས་པ་གསོ་བ་གལ་བོ་ཆེར་འཛིན་པ་དང་། དེ་ཡང་བཞི་བརྒྱ་ལྔ་བཅུ་བ་ལས། དམ་ཚིག་ཉམས་ལས་བསླང་བ་ནི། །དོན་ཡོད་རྡོ་རྗེ་འཁོར་ལོ་བཟང་། །ཞེས་པ་ལྟར། དམ་ཚིག་ཉམས་ཆག་སྦྱོང་བ་ལ་དོན་ཡོད་རྡོ་རྗེ་ཞབས་ལ་བརྟེན་ན། དེ་བཞིན་གཤེགས་པ་དོན་ཡོན་གྲུབ་པ་ལ་དམ་ཚིག་རྡོ་རྗེ་ལྷ་དང་། དམ་ཚིག་འགུགས་པའི་ལྷ་དང་། དམ་ཚིག་གྲུབ་པ་གདོན་མི་ཟ་བས་ལྷ་གཞན་ལས་ཁྱད་དུ་འཕགས་པ་ཡིན་པས། འདི་ཉིད་ཡི་དམ་དུ་བཟུང་ནས། དམ་ཚིག་རྡོ་རྗེ་བཟླས་པའི་རྣལ་འབྱོར་ཉམས་སུ་ལེན་པ་གལ་ཆེའོ། །ཨོཾ་ཨཱཿཔྲཛྙདྷྲྀཀ་ཧ་ཧཱུཾ། ཞེས་པའི་སྔགས་དོན་ནི། ཉམ་ཆུང་བའི་བུ་ཆུང་གིས་མ་ལ་བློ་རྩེ་གཏད་དེ་ལིང་ལིང་གིས་འབོད་པ་བཞིན། པྲཛྙ་དྷྲྀཀ་ཞེས་ཤེས་རབ་འཆང་བ་ཞེས་བོས་ཏེ། ས་བོན་ཧ་ཡིག་གིས་སྔོན་གྱི་ཐུགས་བསྐྱེད་དྲན་པར་མཛོད་ཅིག་ཅེས་བསྐུལ་ནས། སེམས་ཅན་ཐམས་ཅད་ཀྱིས་ཐོག་མེད་ནས་བསགས་པའི་སྡིག་སྒྲིབ་ཉམས་ཆག་དང་། དེས་བསྐྱེད་པའི་སྲིད་ཞིའི་རྒུད་པ་ཕྲ་རགས་ལས་སྒྲོལ་ལ། ཨོཾ་ཨཱཿཧཱུཾ་གསུམ་གྱིས་མཚོན་པའི་སྐུ་གསུང་ཐུགས་རྡོ་རྗེ་གསུམ་གྱི་དངོས་གྲུབ་ད་ལྟ་ཉིད་དུ་སྩོལ་ཅིག་ཅེས་པའོ། །

༢ དམིགས་རྣམ་གསལ་འདེབས་ཚུལ། དམིགས་པ་སྐྱོང་ཚུལ་ནི། བླ་བྲང་ཨ་ཁུ་ཤེས་རབ་རྒྱ་མཚོ་དང་ཁྲི་རྒན་འཇམ་པའི་དབྱངས་སོགས་ཀྱིས། ཡབ་རྗེ་བླ་མ་སྐལ་ལྡན་རྒྱ་མཚོའི་མཛད་པ་འདི་གོ་བདེ་བར་བསྔགས་པས་ན། དེའི་རྨང་གཞིའི་སྟེང་ནས་འཆད་པ་ལ། སྐྱབས་སེམས་སྔོན་དུ་བཏང་སྟེ། རང་གི་ཐུགས་ཀར་པདྨ་འདབ་བརྒྱད་ཅིག་གསལ་བཏབ། དེའི་ལྟེ་བར་རང་གི་སེམས་ཉིད་ཧ་ལྗང་ཁུ་དེ་ཡོངས་སུ་གྱུར་བ་ལས། རལ་གྲི་ཕྲ་མོའི་ལྟེ་བ་ལ་ཧས་མཚན་པ་ཞིག་སྒོམ། དེ་ལས་འོད་འཕྲོས་རྒྱལ་བ་སྲས་བཅས་ལ་མཆོད་པ་ཕུལ། སེམས་ཅན་ཐམས་ཅད་དམ་ཚིག་ཉམས་ཆག་དང་སྡིག་སྒྲིབ་མ་ལུས་པ་སྦྱངས་ཏེ། དམ་ཚིག་རྡོ་རྗེའི་གོ་འཕང་ལ་བཀོད། འོད་ཟེར་སླར་བཀུགས་ཏེ་ཕྱག་མཚན་ས་བོན་དང་བཅས་པ་ལ་ཐིམ། དེ་ཡོངས་སུ་གྱུར་བ་ལས་དོན་ཡོད་རྡོ་རྗེ་ལྗང་ཁུ་ཞལ་གསུམ་ཕྱག་དྲུག་པ། རྩ་ཞལ་ལྗང་། གཡས་ཞལ་སྔོ་ལ་གཡོན་ཞལ་དཀར་བ། ཕྱག་དང་བོ་གཉིས་ཀྱིས་ཡུམ་ལ་འཁྱུད་ཅིང་། གཡས་གཉིས་རྡོ་རྗེ་དང་རལ་གྲི གཡོན་གཉིས་དྲིལ་བུ་དང་པདྨ་འཛིན་པ། ཡབ་ཡུམ་གཉིས་ཀའང་དར་རིན་པོ་ཆེས་བརྒྱན་པ། གཉིས་ཀའི་སྤྱི་བོ་ཨོཾ། མགྲིན་པར་ཨཱཿ ཐུགས་ཀར་ཧཱུཾ་གིས་མཚན་པ། དེ་ལས་འོད་ཟེར་འཕྲོས། རང་བཞིན་གྱི་གནས་ནས་དམ་ཚིག་རྡོ་རྗེ་ཡེ་ཤེས་པ་དཔག་ཏུ་མེད་པ་སྤྱན་དྲངས་ཏེ། དམ་ཚིག་རྡོ་རྗེ་ཡབ་ཡུམ་ལ་ཐིམ་ནས་གཉིས་སུ་མེད་པར་གྱུར། དབང་ལྷས་དབང་བསྐུར། ཡབ་ལ་མི་བསྐྱོད་པ་དང་ཡུམ་ལ་དོན་ཡོད་གྲུབ་པའི་དབུ་བརྒྱན་པར་གྱུར། དེ་ནས་རང་གི་སྙིང་ཀར་ཟླ་གདན་གྱི་སྟེང་དུ་སྣ་ཚོགས་རྡོ་རྗེའི་ལྟེ་བར་ཧ་ལྗང་ཁུ། དེའི་མཐའ་འཁོར་གྱི་སྔགས་ཕྲེང་འོད་ཟེར་དང་བཅས་པ་ལས། བདུད་རྩིའི་རྒྱུན་བྱུང་སྟེ་ལུས་གང་། བདེ་བ་མྱོང་། རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་ནག་ཉིལ་ཉིལ་དང་། ནད་རིགས་སོགས་རྣག་ཁྲག་ཆུ་སེར་ལྗན་ལྗིན་གྱི་རྣམ་པ་དང་། གདོན་བགེགས་རྣམས་སྡོམ་སྡིག་སྦལ་ལྕོང་སོགས་སྲོག་ཆགས་མི་སྡུག་པའི་རྣམ་པར་དབང་བོའི་སྒོ་དང་བ་སྤུའི་བུ་ག་སོགས་ནས་ཐོན་ཏེ། དབང་ཆེན་གསེར་གྱི་ས་གཞིའི་འོག་ཏུ་ལས་ཀྱི་གཤིན་རྗེ་ཁ་ནང་དུ་སོང་སྟེ་ངོམས་ཤིང་ཚིམས། གནོད་འཚེ་དང་བསམ་སྦྱོར་ངན་རྩུབ་ཐམས་ཅད་ཞི་ཞིང་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པར་བྱས། བདུད་རྩིའི་ལྷག་མ་གསེར་གྱི་རྒྱ་གྲམ་དུ་གྱུར་ཏེ་ས་གས་པའི་ཁ་བཅད། རང་གཞན་གྱི་སྡིག་སྒྲིབ་བག་ཆགས་དང་བཅས་པ་མུན་ཁུང་ལ་སྒྲོན་མེ་སྦར་བ་བཞིན་སངས་ཏེ་དག་པར་བསམ། དེ་ནས་རང་གིས་སྔར་བྱས་ཀྱི་དམ་ཚིག་ཉམས་ཆག་ཐམས་ཅད་འགྱོད་གདུང་དྲག་པོས། ཨོཾ་ཨཱཿཔྲཛྙདྷྲྀཀ་ཧ་ཧཱུཾ། ཞེས་མང་དུ་བཟླ་བར་བྱའོ། །དེ་ནས་བདག་ནི་མི་ཤེས་ཞེས་སོགས་ཀྱིས་གསོལ་བ་རྩེ་གཅིག་ཏུ་བཏབ་པས། དོན་ཡོད་རྡོ་རྗེའི་ཞལ་ནས་རིགས་ཀྱི་བུ་ཁྱོད་ཀྱིས་སྡིག་སྒྲིབ་དང་དམ་ཚིག་ཉམས་ཆག་བྱང་ཞིང་དག་གོ །ཞེས་གསུངས་ནས། དོན་ཡོད་རྡོ་རྗེ་ཡབ་ཡུམ་རང་ལ་ཐིམ་ནས་རང་དང་དོན་ཡོད་རྡོ་རྗེ་དབྱེར་མེད་དུ་གྱུར་བར་བསམ་མོ། །འདི་ལའང་རྡོ་སེམས་སྒོམ་བཟླས་བཞིན། ཡས་དེད་དང་། ཕུང་དེད་སོགས་ཀྱི་དམིགས་པའང་སྦྱར་ཆོག་གོ ། 

གཞན་དོན་དུ་དམིགས་པའི་སྐབས་ཡིན་ན། ཁྲི་རྒན་འཇམ་པའི་དབྱངས་ཀྱིས། རང་གི་སྙིང་ཀར་དོན་ཡོད་རྡོ་རྗེ་ཡབ་ཡུམ་བཞུགས་པའི་འོག་ཙམ་དུ་ཟླ་བའི་སྟེང་དུ། དབུས་སུ་རང་ཉིད་ཐ་མལ་བའི་རྣམ་པ་ཅན་དང་། དེའི་མདུན་དུ་ཕ་མ། གཡས་སུ་སྤུན་ཟླ། གཡོན་དུ་ཉེ་དུ་དང་གྲོགས་མཆེད། རྒྱབ་ཏུ་གདོན་བགེགས། མཐའ་བསྐོར་དུ་མཁའ་ཁྱབ་ཀྱི་སེམས་ཅན་གསལ་བཏབ་སྟེ་བདུད་རྩི་འབེབས་སྦྱངས་ཀྱི་དམིགས་པ་བྱེད་ཅིང་། སྔགས་བཟླ་བའི་ཚེ་ཐམས་ཅད་ཀྱིས་འུར་ཆེམ་ཆེམ་གདུང་ཤུགས་དྲག་པོས་སྒོ་ནས་བསམ་དགོས་པར་གསུངས་སོ། །

༣ དམ་ཚིག་རྡོ་རྗེ་བཟླས་པའི་ཕན་ཡོན། རྩ་ལྟུང་རྣམ་བཤད་ལས། དོན་ཡོད་གྲུབ་པ་ནི་དམ་ཚིག་རྡོ་རྗེ་ཞེས་ཀྱང་གསུངས་ལ། དེ་ནི་ལྷག་པར་དམ་ཚིག་ཉམས་པ་རྣམ་པར་དག་པར་བྱེད་པའི་ལྷར་གསུངས་པས། ཞེས་པ་ལྟར། ལྷ་མཆོག་འདི་ཉིད་ཀྱིས་སྔོན་སློབ་པ་ལམ་གྱི་གནས་སྐབས་ན། བདག་སངས་རྒྱས་པའི་ཚེ་སྡིག་སྒྲིབ་སྦྱོང་བ་ལ་ཐོགས་པ་མེད་པའི་མཐུ་ཅན་དུ་གྱུར་ཅིག་ཅེས་ཐུགས་བསྐྱེད་དེ་སྨོན་ལམ་གྱི་སྟོབས་གྲུབ་པ་ལགས་པས། རང་ཅག་གིས་བློ་སྙིང་བྲང་གསུམ་གཏད་དེ། ཁ་ཞེ་གཉིས་མེད་ཀྱིས་དམ་ཚིག་ཉམས་ཆག་བྱུང་བ་ལ། ཁོང་དུ་དུག་སོང་བ་ལྟར། སྔར་བྱས་ལ་འགྱོད་སེམས་དང་ཕྱིན་ཆད་མི་བྱེད་པའི་སྡོམ་སེམས་བསྟེན་ཏེ། བཤགས་སྦྱངས་བྱས་ན། དེ་ལས་ལྷག་པའི་ཉམས་ལེན་ཞིག་མེད་ཚོད་དུ་གདའ་བས། སྤྱིར་ན་དམ་སྡོམ་ལ་སེལ་མ་ཞུགས་པ་ཞིག་དང་། གལ་ཏེ་དམ་ཚིག་ཉམས་པ་བྱུང་ན། ལེགས་གྲུབ་ཀྱི་རྒྱུད་ལས། ཉིན་པར་བག་མེད་བྱས་པ་དག །མཚན་མོ་སོ་སོར་བཤགས་པར་བྱ། །ནུབ་མོ་བྱས་པ་ནངས་པར་བཤགས། །ལེགས་པར་བྱས་ལ་མངོན་དགར་བྱ། །ཞེས་པ་ལྟར། ལག་ལེན་དུ་བསྟར་ཏེ་མདོ་ཕྱོགས་ཀྱི་རྨང་བརྟན་པོ་གདིང་སྟེ། གསང་སྔགས་ཟབ་མོའི་མྱུར་ལམ་ལ་ཞུགས་ན། སངས་རྒྱས་ཀྱི་གོ་འཕང་རིན་པོ་ཆེ་ལག་པས་བཟོས་པ་ལྟ་བུ་ཞིག་ཡོང་བ་གདོན་མི་ཟའོ། །

ཟ་བྱེད་མཁའ་འགྲོའི་སྦྱིན་སྲེག

 ༡ ཟ་བྱེད་མཁའ་འགྲོའི་སྦྱིན་སྲེག་གི་སྔོན་འགྲོ། སྲེག་སྣོད་ཀྱི་ནང་དུ་མེ་ཚགས་སུ་ཆུད་པར་བྱས་ནས། སྣོད་གཙང་དུ་ཐུན་གཅིག་ལ་སྲེག་རྫས་ཅི་ཙམ་འཛད་ཚོད་ཀྱི་ཏིལ་རྫས་བླངས། ཆུ་གཉིས་ཉེར་སྤྱོད་བཤམས། ཀུན་སློང་དག་པ་སྔོན་དུ་བཏང་ནས། སྨིན་མཚམས་ཀྱི་ཐད་དུ་སེང་གེས་བཏེགས་པའི་ཁྲི་འཕང་དུ། རྩ་བའི་བླ་མ་རྡོ་རྗེ་མཁའ་འགྲོ སྐུ་མདོག་མཐིང་ནག་ཞལ་གཅིག་ཕྱག་གཉིས་པ། རྡོ་རྗེ་དང་དྲིལ་བུ་འཛིན་པ། ཧཱུཾ་མཛད་ཀྱི་ཕྱག་རྒྱ་མཛད་ཅིང་ཞལ་གདངས་པ། མཆེ་བ་རྣོན་པོ་བཞི་གཙིགས་པ། ཐོད་སྐམ་ལྔས་དབུ་བརྒྱན་དང་། སྟག་ལྤགས་ཀྱི་ཤམ་ཐབས་ཅན། རློན་པ་ལྔ་བཅུའི་དོ་ཤལ་ཅན། ཁྲོ་བོའི་ཉམས་ཐམས་ཅད་རྫོགས་པ། སྐྱབས་གནས་དཀོན་མཆོག་གསུམ་གྱིས་བསྐོར་བའི་རྣམ་པ་ཅན་གསལ་གདབ་ལ། རང་གི་མཐའ་འཁོར་དུ་སེམས་ཅན་ཐམས་ཅད་བཞུགས་པར་མོས། སེམས་ཅན་དེ་རྣམས་འཁོར་བ་དང་ངན་སོང་གི་སྡུག་བསྔལ་དང་། སྡིག་ལྟུང་སྤྱི་བྱེ་བྲག་ལ་འཇིགས་ཤིང་སྐྲག་པའི་བློ་སྣ་ཤུགས་དྲག་པོ་དང་བཅས། སྡིག་ལྟུང་སྦྱོང་བ་ལ་སྐྱབས་ཡུལ་དེ་རྣམས་ལ་ནུས་པ་ཡོད་པར་ཡིད་ཆེས་ཀྱི་དད་པ་སྒོམ་སྟེ། སྐྱབས་འགྲོ་སེམས་བསྐྱེད་དང་བདུད་རྩི་འབེབས་སྦྱངས་བྱ། དེ་ནས་མ་རྒན་སེམས་ཅན་སངས་རྒྱས་ཀྱི་གོ་འཕང་དུ་འགོད་ལ། རྡོ་རྗེའི་མཁའ་འགྲོའི་སྦྱིན་སྲེག་ལ་འཇུག་པར་བགྱིའོ་སྙམ་པས། སྐྱབས་ཡུལ་རྣམས་འོད་སྔོན་པོའི་རྣམ་པར་རང་གི་སྨིན་མཚམས་སུ་ཐིམ་པས་རྒྱུད་བྱིན་གྱིས་བརླབས་པར་བསམ་མོ། །

༢ སྦྱིན་སྲེག་གི་དངོས་གཞི། ༡ གང་ལ་སྲེག་པའི་མེ་ལྷ་བསྐྱེད་པ་ལ། ༡ མེའི་བགེགས་བསང་བ་ནི། སྔགས་ལ། ཨོཾ་བཛྲ་ཨ་མྲི་ཏ་ཀུཎྚལི་ཧ་ན་ཧ་ན་ཧཱུཾ་ཕཊ་ཞེས་པ་སྟེ། དོན་ནི་རྡོ་རྗེའི་བདུད་རྩི་འཁྱིལ་བ་སྣུན་སྣུན་ཞེས་བརྗོད་པས། རང་གི་ཐུགས་ཀ་ནས་ཁྲོ་བོ་བདུད་རྩི་འཁྱིལ་བ་དཔག་མེད་འཕྲོས་ཏེ། མེ་ལ་གནས་པའི་བགེགས་རྣམས་རྒྱ་མཚོའི་ཕར་འགྲམ་དུ་བསྐྲད་པར་བསམ། ༢ མེས་སྟོང་བར་སྦྱངས་པ་ནི། སྭ་བྷ་ཝས་སྦྱངས་ལ། མེ་སྣོད་དང་བཅས་པ་འོད་དུ་ཞུ་ནས་སྣང་ངོར་མ་དག་པའི་སྣང་བ་དང་། ངེས་ངོར་བདེན་འཛིན་གྱི་ཞེན་པ་གཉིས་ཀྱིས་སྟོང་བ་དྲན་པར་བྱའོ། །༣ མེ་ལྷ་བསྐྱེད་པ་ལ། བསྙེན་པའི་ཡན་ལག་གནས་གསུམ་བྱིན་གྱིས་རླབས་པ་དང་། སྒྲུབ་པའི་ཡན་ལག་ཡེ་ཤེས་པ་གཞུག་པ། སྒྲུབ་ཆེན་གྱི་ཡན་ལག་དབང་བསྐུར་ཞིང་རྒྱས་གདབ་ལ། དེ་ནས་མཆོད་བསྟོད་བྱ་དགོས་སོ། །

༢ གང་བསྲེག་པའི་ཏིལ་ལ་སྡིག་སྒྲིབ་བསྟིམ་པ་ནི། རང་གི་ལུས་སྤྱི་གཙུག་ནས་རྐང་མཐིལ་བར་དྭངས་ཤིང་གསལ་བའི་སྙིང་གར་སྡིག་པའི་ས་བོན་བཾ་ནག་པོ། ལྟེ་བའི་དབུས་སུ་མེའི་ས་བོན་རཾ་དམར་པོ་ལས་མེའི་དཀྱིལ་འཁོར་ཟུར་གསུམ་པ་ཟུར་གཅིག་མདུན་དུ་བསྟན་པ། རང་ལངས་སྟབས་སུ་གནས་པའི་རྐང་མཐིལ་གཉིས་ཀྱི་འོག་ཏུ་རླུང་གི་ས་བོན་ཡཾ་ཡིག་སྔོན་པོ་ལས་ཟླ་གམ་བཅད་ཁ་མདུན་དུ་བསྟན་པ་རྣམས་གསལ་བཏབ། དེ་ནས་སྙིང་གའི་བཾ་འོད་ཟེར་དམར་ནག་ལྕགས་ཀྱུ་ལྟ་བུ་ལུས་ཀྱི་སྟོད་སྨད་ཀུན་ལ་ཁྱབ་པར་འཕྲོས། བ་སྤུའི་བུ་ག་ནས་ཐོན་ཏེ་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ། འོད་ཟེར་ནག་པོའི་རྣམ་པར་བཀུག་སྟེ་སྙིང་གའི་བཾ་ཡིག་ལ་ཐིམ། དེ་ནས་རྐང་འོག་གི་རླུང་དཀྱིལ་གཡོས་ཏེ་ལུས་ཀྱི་ནང་དུ་ཞུགས་ནས། ལྟེ་བའི་མེ་ཆེས་ཆེར་སྦར་ཏེ་མེའི་འོད་ཟེར་ཀྱིས་བཾ་ཡིག་ནག་པོ་དེད་ནས། སྣ་བུག་གཡས་པ་ནས་ཐོན་པས་སྡིག་པ་རྭ་ཅན་གྱི་རྣམ་པར་སྣོད་ནང་གི་ཏིལ་ལ་ཐིམ་ཞིང་། ཏིལ་ཁྲོ་བོའི་ཞལ་དུ་གསོལ་བར་བསམ་དགོས་སོ། །

༣ ཇི་ལྟར་སྲེག་པའི་ཚུལ་ནི། སྔགས་རེ་བཟླས་པ་དང་ཏིལ་རྫས་རེ་ཁྲོ་བོའི་ཞལ་དུ་ཕུལ་བས་ཐུགས་རྒྱུད་ལ་ཟག་མེད་ཀྱི་བདེ་བ་ཁྱད་པར་ཅན་འཁྲུངས་པར་བསམ་ལ། སྦྱིན་སྲེག་འབུལ་བ་བོ་དང་། འབུལ་ཡུལ། སྲེག་རྫས་རྣམས་སྣང་བཞིན་སྟོང་ལ། སྟོང་བཞིན་སྣང་བའི་སྣང་སྟོང་གཉིས་ཚོགས་སྒྱུ་མའི་རང་བཞིན་དུ་ཤར་བས། རང་གཞན་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་ལྷག་མེད་དུ་དག་པར་བསམ་མོ། །འབུལ་སྔགས་ནི། ཨོཾ་བཛྲ་ཌཱ་ཀ་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་བྷསྨི་ཀུ་རུ་སྭཱ་ཧཱ་ཞེས་པ་སྟེ། དོན་ནི། ཨོཾ་ནི་སྐུ་གསུང་ཐུགས་རྡོ་རྗེ་གསུམ་གྱི་ས་བོན། བཛྲ་ཌཱ་ཀ་རྡོ་རྗེ་མཁའ་འགྲོ། ཁ་ཁ་ཟོ་ཟོ། ཁཱ་ཧི་ཁཱ་ཧི་ཟོ་ཤིག་ཟོ་ཤིག སརྦ་པཱ་པཾ་སྡིག་པ་ཐམས་ཅད། ད་ཧ་ན་བསྲེགས། བྷ་སྨི་ཀུ་རུ་ཐལ་བར་མཛོད། སྭཱ་ཧཱ་གཞི་ཚུགས་ཞེས་པའོ། །སྤེལ་ཚིག་ནི། བདག་གིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་དང་དམ་ཚིག་ཉམས་ཆགས་ཐམས་ཅད་ཤིནྟཾ་ཀུ་རུ་སྭཱ་ཧཱ་ཞེས་པའོ། །ཤིནྟཾ་ཀུ་རུ་ནེ་ནི་ཞི་བར་མཛོད་ཅིག་ཅེས་པའི་དོན་ནོ། །ཚེ་འདས་དང་ཤི་འདྲེའི་གནོད་པ་སོགས་ཡིན་ན། བསྒྲུབ་བྱ་དེའི་མིང་སྨོས་པའི་སྤེལ་ཚིག་སྦྱོར་དགོས་པར་སྦྱོང་རྒྱུད་ལས་གསུངས་སོ། །

༣ མཇུག་གི་རིམ་པ། གོང་གི་དམིགས་རིམ་དང་མཆོད་བསྟོད། རྡོ་རྗེ་མཁའ་འགྲོའི་སྤྱི་བོའི་རིགས་བདག་མི་བསྐྱོད་པའི་ཐུགས་ཀར་ཟླ་གདན་གྱི་སྟེང་དུ་ས་བོན་གྱི་མཐར་ཡི་གེ་བརྒྱ་བས་བསྐོར་བ་ལས་བདུད་རྩི་འོ་མའི་རྒྱུན་ལྟར་སྐྱ་ཆིལ་ཆིལ་དུ་བབས། ལྷའི་ཚངས་བུག་ནས་ཞུགས། སྐུ་ལུས་ཐམས་ཅད་ཁྱབ་པས་སྲེག་རྫས་མ་དག་པ་དང་། དམིགས་པ་མ་བརྟན་པ། ཆོ་ག་ཆད་ལྷག་སོགས་ལྷག་མེད་དུ་དག་པར་བསམ་སྟེ། གཟོད་གསོལ་ཞུས། དེ་ནས་ཡེ་ཤེས་པ་རང་བཞིན་གྱི་གནས་སུ་གཤེགས་ཤིང་། དམ་ཚིག་པ་མེ་འབར་བའི་རྣམ་པར་བསམ་དགོས་སོ། །

མེ་མ་ཤི་བར་དུ་ཐལ་བ་ལ་རེག་པའམ་འགོམ་ཡུག་མི་ཤོར་བ་བྱ་དགོས་ཤིང་། གལ་ཏེ་གཞིལ་དགོས་བྱུང་ན། འོ་མ་དང་ཆུ་དཀར་གྱིས་གཞིལ་བར་བྱས། བཅིལ་རྗེས་ཐལ་བ་ཆུ་གཙང་དུ་ཕྱགས་པའམ། རི་རྩེ་སོགས་གཙང་སར་སྐྱེལ་ཏེ། སྨོན་ལམ་དང་ཤིས་བརྗོད་ཀྱི་མཐའ་བརྒྱན་པར་བྱའོ། །ཟ་བྱེད་མཁའ་འགྲོའི་སྦྱིན་སྲེག་འདི་ནི་སྡིག་སྒྲིབ་སྦྱོང་བ། ཉམས་ཆགས་སྐོང་བ། བར་ཆད་བཟློག་པ་སོགས་ཀྱི་ཕན་ཡོན་ཡོད་དེ། དངུལ་ཆུ་དྷ་རྨ་བྷ་དྲས་ཀྱང་། འདི་ནི་སྡིག་སྒྲིབ་མུན་སེལ་ཉི་མའི་འོད། །ཉམས་ཆགས་དྲི་མ་ཀུན་འཁྲུད་གང་གཱའི་རྒྱུན། །བར་གཅོད་ནད་གདོན་སྤྲིན་འཇོམས་འཐོར་རླུང་སྟེ། །ཀྭ་ཡེ་དེ་ཕྱིར་འདིར་འབད་སྐལ་བ་བཟང་། །ཞེས་གསུངས་སོ། །

མཆོད་པ།

༡ མཆོད་པའི་ཁུངས། རང་རེའི་གངས་ཅན་གྱི་ལྗོངས་འདིར་ཆུ་མཆོད་འབུལ་སྲོལ་ནི། བོད་ཀྱི་མཁས་པ་རྣམས་ཀྱིས་ཇོ་བོ་རྗེ་བོད་ལ་ཕེབས་ནས། རང་ཅག་གི་དྭངས་བསིལ་ཡན་ལག་བརྒྱད་ལྡན་གྱི་རྫ་ཆུ་བསིལ་མ་འདིས་ཐུགས་འཕྲོག་ནས། གསར་གཏོད་བྱས་པར་གསུངས་ཀྱང་། གཏམ་རྒྱུད་གསེར་ཐང་ལས། བྷར་མའི་ཡུལ་ཆོས་བཤད་སྐབས། གཙུག་ལག་ཁང་རྣམས་སུ་ཉིན་བཞིན་ཏིང་བརྒྱ་ཕྲག་རེ་གཉིས་ཀྱི་ནང་དུ་ཆུའི་མཆོད་པ་བོད་བཞིན་དུ་འབུལ་བའི་སྲོལ་མཆིས། འདི་ནི་སིང་ག་ལ་སོགས་ཉེ་བའི་ཡུལ་གང་ནའང་མེད་པས། སྔོན་ཐེག་ཆེན་པའི་དུས་སུ་དར་བ་ཞིག་ཡིན། རང་རེ་རྣམས་ཀྱིས་ཡོན་ཆབ་ཀྱི་སྲོལ་ཇོ་བོ་བྱོན་ནས་བོད་ཀྱི་ཆུ་གཟིགས་ཏེ། གསར་དུ་མཛད་པ་འདྲ་བ་ཞིག་བཤད་མོད། དོན་ལ་རྒྱ་གར་ལ་སྔ་མོ་ནས་དར་བར་མངོན། བྷར་མ་དང་བོད་གཉིས་ལོ་སྟོང་ཕྲག་དུ་མའི་བར་ལ་ཕན་ཚུན་རྒྱུ་འགྲུལ་སོགས་ཀྱི་འབྲེལ་ཅི་ཡང་མེད་པས། སྲོལ་དེ་ཡང་། རྒྱ་གར་བྷང་ག་ལ་ནས་མཆེད་པར་སེམས། ཞེས་གསུངས་པ་ལས་ཤེས་སོ། །དེ་ལྟར་རིམ་གྱིས། མཆོད་པ་ཆེན་པོ་བཞི་སོགས་དར་ཁྱབ་བྱུང་བ་སྟེ། མུ་ནེ་བཙན་པོའི་སྐབས་ལྷ་སར་འདུལ་བའི་མཆོད་པ། ཁྲ་འབྲུག་ལ་མངོན་པའི་མཆོད་པ། བསམ་ཡས་ལ་མདོ་སྡེའི་མཆོད་པ། བྱང་ཆུབ་མཆོད་པ་ཆེན་པོའོ། །

ཡོན་ཆབ་འབུལ་ཚེ། ཏིང་ཕོར་གྱི་ཚད་ལ་ངེས་བཟུང་མེད་པར་མང་ན་ལེགས་ལ། ཕལ་མོ་ཆེའི་ཏིང་བདུན་རེ་བྱེད་པ་ནི། འདོན་ཆོག་མང་བོར་གསལ་བ་ལྟར། མཆོད་ཡོན། ཞབས་བསིལ། མེ་ཏོག བདུག་སྤོས། སྣང་གསལ། དྲི་ཆབ། ཞལ་ཟས་བཅས་རྣམ་གྲངས་བདུན་འབུལ་སྲོལ་ཡོད་པ་དང་བསྟུན་པ་ཡིན་ནོ། །

༢ མཆོད་པ་འབུལ་ལུགས་ནི། ཏིང་ཕོར་དར་གཙང་མས་འོད་འཕྱར་བ། ཕྱག་མཛུབ་ཀྱི་རྗེས་མ་ཕབ་པར་ཕྱིས། བར་ཐག་རིང་ན་བླ་མ་དང་འབྲལ། ཐོ་གཏུགས་ན་དབང་བོ་རྟུལ། སྒྲ་འབྱིན་ན་སྨྱོ་བ་སོགས་འབྱུང་། ཡ་ཡོ་བྱུང་བས། དགེ་སྦྱོར་འཕྲིགས་སུ་མི་འོང་བ་སོགས་འབྱུང་བས་དེ་ལ་གཟབ་དགོས་ཤིང་། མཆོད་འབུལ་གྱི་སྐབས་འཇིག་རྟེན་པ་དང་སྒོ་བསྟུན་པའི་དབང་གིས་འཕགས་ཡུལ་དུ་རྒྱལ་བོ་དང་། ཡུལ་དམ་པ་མགྲོན་དུ་བོས་ཚེ། ཆུ་གཙང་གིས་ཞབས་བཀྲུ་བ་དང་། དྲི་ཞིམ་གྱི་ཆུ་ཞལ་དུ་འབུལ་བ་དང་། སྐུ་ལ་འཐོར་བ་དང་། མེ་ཏོག་སོགས་ཀྱི་རྒྱན་འདོགས་པ་དང་། སྤོས་མེས་གདུག་པ་དང་བཅས་ཏེ། བཟའ་བ་དང་། བཏུང་བའི་དངོས་བོ་འདྲེན་པ་བཞིན་དུ། མཆོད་པ་ནམ་ཕུལ་གྱི་སྐབས་ཐམས་ཅད་དུ་ཡང་དེ་ལྟར་བྱའོ། །

 དེ་མིན། ཏིང་ཕོར་བཤམས་ཏེ་ཡུན་རིང་འགྱངས་ཆེ་ན། དྲི་ཟ་རྣམས་གཟུགས་ལ་ཆགས་པས། ཏིང་ཕོར་འོད་འཆར་བའི་ནང་དྲི་ཟའི་གྲོང་ཁྱེར་ཆགས་པར་བཤད་པས། ཆུ་རྒྱུན་སྦྲེངས་ཚེ་དྲི་ཟའི་གྲོང་ཁྱེར་འཇིག་པའི་ཉེས་པ་ཡོད་པ་དང་། ཡང་ཡོན་ཆབ་འབུལ་ཚེ། བྲི། གང་། རེག རིང་། གཡོ། ཆུ་འཁྱར་ཞེས་སྐྱོན་དྲུག་དང་བྲལ་ཏེ་ཡོན་ཆབ་ཕུལ་ན་ཡོན་ཏན་དྲུག་འཐོབ་པར་འགྱུར་ལ། སྐྱོན་དྲུག་གིས་གོས་ན་ཉེས་སྐྱོན་དྲུག་འབྱུང་སྟེ། ༡ ཡོན་ཆབ་བྲི་ཆེས་པས། རང་རྒྱུད་ཡོན་ཏན་གྱིས་མི་གང་བ་དང་། ༢ གང་ཆེས་པས། རང་རྒྱུད་ལས་སྒྲིབ་ཀྱིས་ཁ་གང་བ་དང་། ༣ མཆོད་ཏིང་གཅིག་ལ་གཅིག་རེག་པས། སྡིག་གྲོགས་དང་འཕྲད་པར་འགྱུར་བ་དང་། ༤ ཏིང་ཕོར་རིང་ཆེས་པས། བཤེས་གཉེན་དང་མཐུན་གྲོགས་རིང་དུ་བཀྱེད་པ་དང་། ༥ གྲལ་བསྒྲིགས་པ་གཡོ་བས། ཚེ་རབས་ཀུན་ཏུ་ལུས་དང་སེམས་མི་དྲང་བ་དང་། ༦ ཏིང་ཕོར་ལས་ཆུ་འཕོས་ཏེ་ཕྱི་ལོགས་སུ་འཁྱར་བས། ཚེ་རབས་སུ་མིག་མི་གསལ་ཞིང་མིག་ཆུ་ཤོར་བའི་སྐྱོན་འབྱུང་བར་བཤད་པས། དེ་དག་གཟབ་པར་འཚལ་ལོ། །

ཡོན་ཆབ་ལྡུགས་དུས་ཐོག་མཐའ་གཉིས་ཕྲ་ལ་དཀྱིལ་སྦོམ་པོར་སྦྲེངས་ཏེ། ངག་ཏུ། ཨོཾ་ཨཱཿཧཱུཾ། ཞེས་འབྲུ་གསུམ་གྱིས་བྱིན་གྱིས་བརླབས་ཏེ་འབུལ། དེ་ཡང་ཡིག་འབྲུ་གསུམ་པོ་དེས་རྒྱལ་བ་སྲས་བཅས་ཀྱི་བྱིན་རླབས་འབྲུ་གསུམ་ལ་ཞུགས་ཏེ་མཆོད་པར་ཐིམ་ཞིང་། ཧཱུཾ་གྱིས་མི་གཙང་བ་ཐམས་ཅད་དག ཨཱསཿདག་གཙང་བདུད་རྩིའི་རང་བཞིན་ཅན་དུ་གྱུར། ཨོཾ་གྱིས་འབྱམས་ཀླས་པ་སྤེལ་བར་སེམས་དགོས་སོ། །

༣ ཡོན་ཆབ་གྱི་ཚད་ནི། ཆབ་ཕྱིར་འཕོས་ན་ཚུལ་ཁྲིམས་འཆལ་ཞིང་འཁོར་མི་འདུ། དམའ་ཆེས་ན་ལོངས་སྤྱོད་ཀྱིས་དབུལ་བས། ཏིང་ཕོར་གྱི་བར་ཐག་དང་ཁ་ཕུད་ལ་འབྲུའི་ཚོད་ཙམ་བཞག་སྟེ། མི་ཆེན་ལ་གསོལ་ཇ་འདྲེན་པའི་ཚོད་ཀྱིས་འབུལ་དགོས་ལ། མཆོད་པ་རྒྱ་ཆེར་འགྲོ་ཕྱིར་མཆོད་གཟུངས་བཏོན་ཏེ་ཕུལ་ན་ཆོད་ཆེའོ། །

༤ མཆོད་པའི་ཕན་ཡོན་ནི། ཡོན་ཆབ་ནི། ཕྱིའི་དངོས་བོ་ལ་མ་ཐོགས་ནང་དད་པ་ལ་ཐོགས་གསུངས་པ་ལྟར། དེ་བས་མཆོད་པའི་རྫས་ལ་སུ་ཡང་ལག་ཐོགས་པ་མེད། ཇོ་བོས་ཀྱང་། བོད་ཀྱི་ཆུ་འདི་ཐམས་ཅད་ཡན་ལག་བརྒྱད་ལྡན་ཡིན་པས། བོད་ན་མཆོད་པ་ཡོན་ཆབ་གཅིག་པུས་ཆོག་འདུག གསུངས་པ་ལྟར། ཆུ་བསིལ་བ་ཕུལ་བས་དཀོར་གྱི་ཉེས་དམིགས་འདག་ཅིང་ཚུལ་ཁྲིམས་དག་པ་དང་། ཆུ་ཞིམ་པས་ཟས་མཆོག་རྙེད་པ་དང་། ཆུ་ཡང་བས་ལུས་སེམས་ལས་སུ་རུང་བ་དང་། ཆུ་འཇམ་པས་ཤེས་རྒྱུད་འཇམ་པ་དང་། ཆུ་དྭངས་པས་རིག་པ་དྭངས་ཤིང་བྱམས་དང་སྙིང་རྗེ་སྐྱེས། ཆུ་དྲི་མི་ང་བས་སྒྲིབ་པ་སྦྱོང་བ་དང་། ཆུ་ལྟོ་བ་ལ་མི་གནོད་པས་ནད་མི་འབྱུང་བ། ཆུ་མགྲིན་པ་ལ་མི་གནོད་པས་ངག་སྙན་པ་བཅས་ཕན་ཡོན་བརྒྱད་འབྱུང་ངོ་། །

ཟ་མ་ཏོག་ལྟ་བུའི་གཏམ་ལས། གཡོ་ཞིང་ཨུད་དཔལ་གྱིས་བསྒོས་པ། །དྲི་མེད་པདྨ་རཱ་ག་བཞིན། །ཡིད་འོང་གསེར་གྱི་སྣོད་དུ་བླུགས། །དྲི་ཞིམ་ཙན་དན་གྱིས་བསྐོས་མངར། །ཡིད་དུ་འོང་དང་བདའ་ཞིང་འཐུང་། །ཅུང་ཟད་མིག་ནི་ཟངས་མདོག་འདྲ། །གླུ་ལེན་སྒྲ་དང་ངེས་ལྡན་པའི། །མི་མཆོག་དེ་དག་སྐོམ་རྣམས་ནི། །སྦྱིན་པ་སྦྱིན་པའི་འབྲས་བུ་ཡིན། །ཨིནྡྲ་ནི་ལ་བཻཌཱུརྱ། །རིན་ཆེན་མཆོག་རྣམས་ཀྱིས་སྤྲས་པའི། །གསེར་གྱི་སྣོད་ནི་གང་ཡིན་པར། །ལྷ་གང་ལྷ་ཡི་བུ་མོ་ནི། །བྲང་གི་དཀྱིལ་ན་ནུ་མ་ནི། །བུམ་པ་ལྟ་བུའི་འབུར་ལྡན་པའི། །རབ་མཛེས་གཅུགས་དང་ལྷན་ཅིག་ཏུ། །སྦྲང་རྩི་ལྟར་མངར་བཏུང་འཐུང་བ། །ཡོན་ཏན་ལྡན་པའི་ཚོགས་ལ་ནི། །བཏུང་བ་ཡིད་འོང་བྱིན་པ་ཡི། །འབྲས་བུ་ཡིན་པར་མཁས་རྣམས་གསུངས། །གང་ཞིག་ཁ་དོག་དྲི་ཞིམ་སོགས། །ཚོགས་ལྡན་སྐོམ་པའི་གདུང་བ་སེལ། །བད་ཀན་རླུང་དྲག་རབ་ཞི་བྱེད། །ཁ་ར་པི་པི་ལིང་བསྲེས་ཚོར། །ཙན་དན་ལྟ་བུར་ཚ་བ་སེལ། །ཟླ་བའི་འོད་ཟེར་དང་ལྡན་པའི། །སྣོད་དུ་བླུགས་ནས་དེ་དག་གིས། །གུས་པར་དགེ་འདུན་ལ་ཕུལ་བས། །ཕ་རོལ་གྱི་ནི་སྐྱེ་གནས་སུ། །ལྷ་ཡི་བཏུང་བ་འཐོབ་པར་འགྱུར། །མངར་ཞིང་མངར་མཆོག་གུས་པ་ཡི། །བཏུང་བ་སྣ་ཚོགས་མཆོག་ལ་ཕུལ། །ལྷ་དང་མི་ཡི་གནས་རྣམས་སུ། །ལྷ་ཡི་བུ་མོ་མཆོག་རྣམས་དང་། །ཡུན་རིང་བཏུང་བ་ལྷན་ཅིག་འཐུང་། །གང་ཞིག་ས་གནས་མི་རྣམས་ཀྱིས། །དང་བའི་དད་པའི་ཡིད་ཀྱིས་ནི། །དགེ་འདུན་ལ་ནི་བཏུང་བ་མཆོག། དུས་ལས་བབ་པར་དྲངས་པ་ཡིས། །འཁོར་བའི་རི་ཁྲོད་གནས་པ་ན། །རྟག་ཏུ་བཏུང་བའང་ཞིམ་བཟང་འཐོབ། །ཅེས་སོ། །

ཡོན་ཆབ་འདི་མཆོད་རྫས་མ་འཛོམས་ཀྱང་། དབུལ་ཕོངས་རྣམས་ཀྱིས་ཀྱང་འབུལ་ཐུབ་པ་ཡིན་པས། ཕུལ་ན་ཕན་ཡོན་བསམ་གྱིས་མི་ཁྱབ། ཏིང་ཕོར་ཙམ་མ་འབྱོར་ཡང་། མཆོད་པ་འདི་སྔོན་བྱོན་སྐྱེས་བུ་དམ་པའི་ཕྱག་ལེན་དུ་བསྟར་བའི་རྣམ་ཐར་ཡོད་དེ། རྗེ་སྒྲུབ་ཁང་དགེ་ལེགས་རྒྱ་མཚོ་སེ་ར་རྩེ་རི་ཁྲོད་ན་བཞུགས་སྐབས། ཡོ་བྱད་ཧ་ཅང་བཀྲེན་པས། ཡོན་ཆབ་འབུལ་སྐབས་ཁོང་གི་བཞེས་ཕོར་ཡག་པོར་བཀྲུས་ནས་ཡོན་ཆབ་ཕུལ་བ་དང་། གསོལ་རས་བཞེས་སྐབས་དཀོན་མཆོག་རིན་པོ་ཆེར་གཡར་བོར་མཛད་པ་ལྟར་རོ། །དེ་ལས་གཞན། བདག་པོས་མ་བཟུང་བ་ཀུན་ཀྱང་མཆོད་པ་འབུལ་ཆོག་སྟེ། སྤྱོད་འཇུག་ལས། ནམ་མཁའ་རབ་འབྱམས་ཁམས་ཀྱི་མཐས་གཏུགས་པར། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་དབང་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། །གསུངས་སོ། །

ཡང་། མཆོད་པ་ལ། ཕྱིའི་མཆོད་པ། ནང་གི་མཆོད་པ། གསང་བའི་མཆོད་པ། དེ་ཁོ་ན་ཉིད་ཀྱི་མཆོད་པ། སྨན་གཏོར་རཀྟའི་མཆོད་པ་ལྔར་ཡང་ཕྱེས་ཏེ། ༡ ཕྱིའི་མཆོད་པ་ལ། མཆོད་ཡོན་ཞལ། ཞབས་བསིལ་ཕྱག་ཞབས། མེ་ཏོག་དབུ། བདུག་སྤོས་ཤངས། མར་མེ་སྤྱན། དྲི་ཆབ་སྐུ། ཞལ་ཟས་ལྗགས། རོལ་མོ་སྙན་ལ་ཕུལ་བ་སོགས་སྔར་བཤད་ཟིན་པ་དང་། ༢ ནང་གི་མཆོད་པ་ནི། སྔགས་ལུགས་ལ། བམ་གཙང་མ་ལ་རང་བྱུང་དུ་གནས་པའི་ཁྲག་གི་མཆོད་ཡོན་དང་ཞབས་བསིལ། མིག་ལྕེ་རྣ་བ་སྣ་སྙིང་སོགས་འབུལ་བ་ནི། བླ་མེད་ཀྱི་ཁྱད་ཆོས་སུ་གྲུབ་པས། གསང་འདུས་ལས། གཙང་མ་ལྷ་ཡི་རིས་ལ་དྲི་ཆེན་དང་། །དྲི་ཆུ་ཁ་ཆུ་ཁྲག་གི་མཆོད་ཕུལ་བས། །རོ་མྱགས་འདམ་དུ་སྐྱེ་བ་སྙིང་རེ་རྗེ། །ཞེས་དང་། མགོན་པོའི་ཆོ་ག་ལས། གསར་སྙིང་ཁྲག་དང་ག་བུར་སྦྱར་བ་ལ། །བདུད་རྩི་ལྔ་ཡིས་སྦགས་ཤིང་བྱིན་རླབས་པ། །ཞག་ཆེན་སྤྲིས་མ་ཆགས་པའི་དྲི་ཆབ་འདིས། །མྱུར་མཛད་ཡེ་ཤེས་མགོན་པོའི་ཐུགས་དམ་བསྐང་། །ཞེས་སོགས་དང་། ༣ གསང་བའི་མཆོད་པ་ནི། རྒྱུའི་དུས་ན་འདོད་ཆགས་ཞེ་སྡང་གཏི་མུག་ང་རྒྱལ་སོགས་དུག་ལྔ་དང་། དུག་གསུམ་ཐམས་ཅད་ཡེ་ཤེས་ལྔ་དང་། རྡོ་རྗེ་གསུམ་གྱི་རྣམ་རོལ་ཏུ་རང་ཤར་རང་གྲོལ་དུ་སྤྱོད་པ་གསང་བའི་མཆོད་པའོ། །༤ དེ་ཁོ་ན་ཉིད་ཀྱི་མཆོད་པ་ནི། འདི་ནི་དེ་ཁོ་ན་ཉིད་བདེ་སྟོང་གཉིས་སུ་མེད་པའི་མཆོད་པ་སྟེ། ལྷ་ཚོགས་རྣམས་རང་རང་གི་ཡུམ་དང་སྦྱར་བའི་སྲུབ་སྦྱོར་གྱི་རྐྱེན་ལས་དྷུ་ཏིའི་མར་སྣེ་ཁ་ཕྱེ་ནས་དྭངས་མའི་རཀྟ་ཡེ་ཤེས་ཀྱི་མེར་འགྱུར་ཏེ། གཏུམ་མོའི་ཤུགས་ཀྱིས་སྦར་བས་སྤྱི་བོ་བདེ་ཆེན་འཁོར་ལོའི་དབུས་སུ་བྱང་ཆུབ་ཀྱི་སེམས་རིན་པོ་ཆེ་ཞུ་བས་དགའ་བ། དེ་ལས་ལོངས་སྤྱོད་ཀྱི་འཁོར་ལོར་བབས་པས་ཁྱད་པར་གྱི་དགའ་བ། དེ་ལས་བདེ་སྐྱོང་གི་འཁོར་ལོར་བབས་ཏེ་རྗེས་ཆགས་ལྷག་པར་རྒྱས་པས་ལྷན་སྐྱེས་ཀྱི་དགའ་བ། དེའི་ཚེ་བདེ་སྟོང་གཉིས་སུ་མེད་པའི་ཡེ་ཤེས་འོད་གསལ་གྱི་ངོ་བོར་བཞུགས་པས་ཆགས་སྡང་གི་གཉིས་རྟོག་ཐམས་ཅད་དབྱིངས་རིག་དབྱེར་མེད་ཀྱི་ངོ་བོ་ལ་བཟླ་བ་ནི་དེ་ཁོ་ན་ཉིད་ཀྱི་མཆོད་པའོ། །༤ སྨན་གཏོར་རཀྟའི་མཆོད་པ་ནི། སྨན་གྱི་མཆོད་པ། རཀྟའི་མཆོད་པ། གཏོར་མའི་མཆོད་པ་དང་གསུམ་ལས། དང་བོ་སྨན་གྱི་མཆོད་པ་ལ། ཕྱི་ཀུན་རྫོབ་ཀྱི་སྨན། ནང་དོན་དམ་གྱི་སྨན། གསང་བ་འཁོར་འདས་གཉིས་མེད་ཀྱི་སྨན་གསུམ་དང་། རཀྟའི་མཆོད་པ་ལའང་། དངོས་སུ་བཤམས་པའི་རཀྟ་སྔར་བྱིན་གྱིས་རླབས་པ་དང་། འདོད་ཆགས་ཀྱི་རྟོག་པ་ཐམས་ཅད་བདེ་སྟོང་གི་ངང་དུ་འབུར་འཇོམས་སུ་སྒྲོལ་བ་དང་། སྣང་བ་ཡབ་ཀྱི་རྡོ་རྗེ་སྟོང་བ་ཡུམ་གྱི་མཁའ་གསང་དུ་རོལ་བ་ལས་བྱུང་བའི་ཟུང་འཇུག་ཁྲག་ཆེན་གྱི་དྭངས་བཅུད་ཁྱབ་གདལ་དུ་འབར་བ་གསུམ་མོ། །གཏོར་མའི་མཆོད་པ་ལའང་། ཕྱི་ནང་གསང་གསུམ་དེ་ཁོ་ན་ཉིད་བཞི་ལས། ཕྱིའི་གཏོར་མ་ནི། དངོས་བཤམས་ཀྱི་གཏོར་མ་རྫས་དང་བཅས་པ་འདོད་ཡོན་གྱི་ལོངས་སྤྱོད་བསམ་གྱིས་མི་ཁྱབ་པར་སྦར་བ་དང་། ནང་གི་གཏོར་མ་ནི། རང་ལུས་ཕུང་ཁམས་སྐྱེ་མཆེད་ཀྱི་དྭངས་བཅུད་ཐམས་ཅད་འཛད་མེད་ཀྱི་བདུད་རྩིའི་རང་བཞིན་དུ་སྦར་བ་དང་། གསང་བའི་གཏོར་མ་ནི། སངས་རྒྱས་རྣམས་ཀྱི་ཐུགས་དབྱིངས་ཀྱི་རང་བཞིན་ཁྱབ་གདལ་ཆེན་པོ་ལ་མའི་བརྡ་ཆད་བཞག་པ་དང་། མ་དེ་ལས་གཉིས་སྣང་གི་ཞེན་པ་ཕྲ་མོའི་རྐྱེན་གྱིས་སེམས་ཅན་གྱི་རིག་པ་དུམ་བུར་ཆད་པ་ལྟ་བུའི་སྣང་ཚུལ་ཤར་བ་ལས། དབྱིངས་རིག་ཐ་དད་དུ་གྱུར་བས་འཁོར་འདས་སུ་ཕྱེ་བའི་གཉིས་འཛིན་གྱི་བྱུར་འདྲེ་ཐམས་ཅད་འཁོར་གསུམ་མི་དམིགས་པའི་ཀློང་དུ་བསྒྲལ་ནས། ཐ་མལ་སྣང་ཞེན་གྱི་གཏོར་མ་ཟག་མེད་བདུད་རྩིར་སྦར་ཏེ་ཕུལ་བའོ། །དེ་ཁོ་ན་ཉིད་ཀྱི་གཏོར་མ་ནི། མཆོད་རྫས་ཐམས་ཅད་ཀྱང་འཁོར་གསུམ་ཀ་དག་ཐིག་ལེ་ཉག་གཅིག་གི་ངོ་བོར་རྩལ་རྫོགས་པས་མཆོད་བྱ་མཆོད་བྱེད་མཆོད་ཡུལ་ཐམས་ཅད་སྤྲོས་བྲལ་ཆེན་པོའི་རྣམ་རོལ་ཏུ་བལྟས་ནས་མཆོད་པའོ། །འདི་དག་ནི་གསང་སྔགས་བླ་མེད་ལུགས་ཀྱི་སྒོས་ཆོས་སུ་གྲུབ་པས་ཆེར་མི་སྤྲོ་ལ། འདི་སྐབས་སུ་བབ་པ་ནི་མདོ་ལུགས་ཀྱི་མཆོད་པ་ཕུལ་སྲོལ་ཡིན་པས་སོ། །

བསྐོར་བ།

༡ བསྐོར་བའི་ཁུངས་ནི། སྙིང་རྗེ་པདྨ་དཀར་བོའི་སྨོན་ལམ་ལྔ་བརྒྱ་བ་ལས། འཇིག་རྟེན་མགོན་གྱི་མཆོད་རྟེན་ལ། །སུ་ཞིག་བསྐོར་བ་བྱེད་པ་ནི། །ཚེ་རབས་དག་ནི་ཐམས་ཅད་དུ། །བྱང་ཆུབ་སྤྱད་པ་སྤྱོད་པའི་ཚེ། །དྲན་དང་ལྡན་ཞིང་བློ་གྲོས་ལྡན། །བསོད་ནམས་ལྡན་ཞིང་འཇིགས་མེད་འགྱུར། །ཞེས་དང་། ལུང་གཞི་ལས། མཁས་པ་གང་ཞིག་རབ་ཏུ་སེམས་དད་པས། །སངས་རྒྱས་མཆོད་རྟེན་ལ་ནི་གོམ་འདོར་བ། །འཛམ་བུ་ཆུ་བོའི་གསེར་གྱི་ཞེང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་སོགས་མཆོད་རྟེན་བསྐོར་བའི་ཚིགས་སུ་བཅད་པའི་མདོ་དང་། གསལ་རྒྱལ་གྱི་ཚིགས་བཅད་སོགས་ལས་ཀྱང་གསུངས་སོ། །

༢ བསྐོར་བ་བྱ་ཚུལ་ནི། སྤྱིར་བསྐོར་བ་གཡས་ཕྱོགས་སུ་འགྲོ་བའི་དོན་ཡང་། སངས་རྒྱས་ཀྱི་མཚན་དཔེ་བཤད་སྐབས་ལམ་གྱི་བསྐོར་ཕྱོགས་དང་མཐུན་པར་གཤེགས་པ། ཞེས་འབྱུང་པ་ལྟར། གཡས་ཕྱོགས་ནི་ལམ་ཡང་དག་པ་ཡིན་པས་སོ། །འཇིག་རྟེན་གྲགས་ཚོད་ལའང་། གཡས་ཕྱོགས་ནི་ལམ་ཡང་དག་པ་དང་། གཡོན་ཕྱོགས་ནི་ལོག་ལམ་ཏུ་ངོས་འཛིན་པས། ལོག་ལམ་དུ་ཕྱིན་པ་ལ་གཡོན་ལྷུང་གི་ལྟ་བ་ཟེར་བ་དང་། ལག་པ་ལྟ་བུར་མཚོན་ནའང་། རྒྱ་གར་གྱི་ཡུལ་ཆོས་སུ་གཡས་ལག་གཙང་མ་དང་། གཡོན་ལག་མི་གཙང་བར་བརྩི་སྲོལ་ཡོད་ལ། ཐ་ན་ལམ་ཞིག་སྟོན་ཚེ་ཡང་། ལག་པ་གཡས་པས་བསྟན་ན་གུས་ཉམས་མཚོན་བྱེད་དུ་འགྲོ་སྟེ། སྤྱོད་འཇུག་ལས། གུས་དང་བཅས་པར་གཡས་པ་ཡིས། །ལག་པ་དག་ནི་ཀུན་གྱིས་ཀྱང་། །ལམ་ཡང་དེ་ལྟར་བསྟན་པར་བྱ། །གསུངས་པས་ཀྱང་། གཡས་ཕྱོགས་ནི་ལམ་ཡང་དག་ཡིན་པར་རིགས་པས་གྲུབ་པར་སྙམ་མོ། །

གཞན་ཡང་། མཁའ་འགྲོ་ཡེ་ཤེས་མཚོ་རྒྱལ་གྱི་རྣམ་ཐར་ལས། བསྐོར་བ་སོགས་ལ་གཡས་སུ་བསྐོར་བ་ཕྱག་རྒྱ་ཆེན་པོ། གཡོན་དུ་བསྐོར་བ་རྫོགས་པ་ཆེན་པོ། ཞེས་ཀྱང་གསུངས་སོ། །ལམ་རིམ་ཆེན་མོ་སོགས་ལས། ཕྱག་དང་སྔགས་བཟླ་ཚེ་ལུས་དང་ལྕེ་གྲངས་མེད་ཀྱིས་བཟླས་ན་འགྱུར་ཁྱད་ཆེ་བར་གསུངས་པ་ལྟར། བསྐོར་བའི་ཚེ་ཡང་། རང་གཞན་ཐམས་ཅད་ཀྱིས་བསྐོར་བ་བྱེད་པར་མོས་ཏེ་། ཁ་བཏོན་ཡང་ཡིག་བརྒྱ་དང་ལྟུང་བཤགས་སོགས་རང་གང་མོས་ཀྱིས་འགྱུར་ཆེ་བར་གསུངས་ན་དགོས་པ་ཆེའོ། །རྒྱལ་བའི་བཀའ་འབུམ་གྱི་སྒྲུབ་ཐབས་ལས། རྟེན་ལས་འོད་བྱུང་ནས་རང་ལ་ཕོག་པས། སྒྲིབ་པ་ཐམས་ཅད་བྱང་བར་བསམ་ལ་བསྐོར་བ་བྱའོ། །ཞེས་ཀྱང་གསུངས་སོ། །

གཡུང་དྲུང་བོན་གྱིས་ཀྱང་། ཚད་ལྡན་གྱི་གཞུང་མང་བོར། གཡས་བསྐོར་ཕྱག་རྒྱ་ཆེན་པོ་དང་། གཡོན་བསྐོར་རྫོགས་པ་ཆེན་པོ་ཞེས་ཟེར་ཡང་། མདོ་དྲི་མེད་ལས། གཡུང་དྲུང་ཞབས་ནི་གཡས་བསྐོར་རོ། །ཞེས་དང་། བྱ་ངང་བའི་འགྲོས་ལྟར་འགྱིང་ཡང་མི་འགྱིང་། བྲེལ་ཡང་མི་བྲེལ་བར། དལ་འགྲོས་དང་ལྡན་པར་བྱས་ལ་གཡས་བསྐོར་དུ་གཤེགས། ཞེས་གསུངས་ཀྱང་། དེང་སང་བོན་པོ་མང་བོ་དེ་ལས་ལྡོག་ཏེ་འགྲོ་བ་དང་། མི་ལ་དང་ན་རོ་བན་ཆུང་གཉིས་ཀྱང་ཏི་སེའི་གངས་བསྐོར་ལ་གཡས་གཡོན་བརྩད་པའི་རྣམ་ཐར་ཡང་ཡོད་དོ། །

༣ བསྐོར་བའི་གྲངས་ཚད་ནི། སྤྱིར་བསྐོར་བའི་གྲངས་ཚད་ལ་འདི་ཙམ་ཞེས་གྲངས་བཟུང་མེད་པར། ཇི་ཙམ་སོང་ན་དེ་ཙམ་བཟང་ལ། འདིར་སྔོན་འགྲོ་ཁྲིད་བཞི་འམ་ཁྲིད་བཅུ་ཞེས་པའི་སྐབས་དང་བསྟུན་ནས་འབུམ་དུ་གྲགས་པ་ལྟར་གཞལ་ན། གུང་ཐང་བསྟན་པའི་སྒྲོན་མེས། རྟེན་གཙོ་གང་ལ་གཞལ་བ་དེར་གྲངས་འབུམ་ཕྲག་གཅིག་འགྲོ་བའི་ཚོད་ལ་བསྐོར་ཚད་དུ་གྲགས་པ་ལྟར་ན། རྟེན་གཙོ་འོད་དཔག་མེད་ཀྱི་པད་གདན་ལ་གཞལ་ཏེ། དེ་ཉེར་ལྔའི་འགྱུར་གྱིས་སེང་ཁྲིའི་འགབ་འཁོར་བས། མཆོད་རྟེན་རང་ལ་བསྐོར་བ་བཞི་སྟོང་བྱས་ཚེ། གཙོ་བོ་ལ་འབུམ་ཕྲག་གཅིག་གི་ཚོད་འཁྲོལ་དང་བཅས་ཏེ་འགྲོའོ། །ཞེས་དང་། ཅོ་ནེ་གྲགས་པ་བཤད་སྒྲུབ་ཀྱིས། དེ་ཡང་དགོན་སྡེ་གང་ཡིན་ཡང་རང་རང་གི་རྟེན་གྱི་གཙོ་བོ་གང་ལ་བྱེད་པ་དེའི་བཞུགས་ཁྲི་འམ། པད་གདན་ནམ། སྐྱིལ་ཀྲུང་ལྟ་བུའི་མཐར་མཐོ་ཚད་ཀྱིས་གཞལ་བར་བྱས་ནས། མཐོ་ཚད་དང་འདོམ་ཚད་གང་ལོངས་ཀྱང་། མཐར་དཀྲིས་གཅིག་འཁོར་བའི་ཚད་དེ། བསྐོར་ལམ་དུ་ཅི་ཙམ་ཞིག་འཁོར་ནས་འབུམ་ལོངས་པ་ན། བསྐོར་ཚད་རེ་རྫོགས་པར་འཇོག དེ་ནི་རྟེན་གྱི་གཙོ་བོ་གང་ཡིན་དེ་ལ་བསྐོར་བ་འབུམ་སོང་བའི་དབང་དུ་བཏང་ཡང་། དེར་མ་ཟད་རྟེན་གྱི་གཙོ་བོ་དེ་དང་ཚད་མཉམ་པ་རྣམས་སོ་སོ་ལའང་འབུམ་རེ་འགྲོ་ཞིང་། གཙོ་བོ་ལས་ཆུང་བ་རྣམས་ལ་ནི་གྲངས་དེ་ལས་མང་བར་འགྲོའོ། །གསུངས་པ་ལྟར་རོ། །དེ་ཡང་རྟེན་གཙོ་ཆེ་ན་བསྐོར་གྲངས་མང་ལ་ཆུང་ན་བསྐོར་གྲངས་ཉུང་བ་ཡིན་ནོ། །བསྐོར་བ་བྱེད་ཚེ་བསྐོར་བའི་འགྱུར་སྔགས་ནི། ན་མོ་བྷ་ག་ཝ་ཏེ། རཱཏྣ་ཀེ་ཏུ་རཱ་ཛཱ་ཡ། ཏ་ཐ་ག་ཏཱ་ཡ། ཨཪྷ་ཏེ་སམྱ་ཀྶཾ་བུད་དྷཱ་ཡ། ཏ་ཏྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣེ་རཏྣེ་བི་ཛ་ཡ་སྭཱ་ཧཱ། ཞེས་དང་། ཡང་ན། ན་མཿཔྲ་དཀྵྲ་སུ་པྲ་དཀྵྲ་སརྦ་པཱ་བཾ་བི་ཤོ་དྷ་ནི་སྭཱ་ཧཱ། ཞེས་པ་འདི་འདོན་བཞིན་བགྲོད་ན་ཕན་ཡོན་ཆེ་ལ། རྟེན་གྱི་གྲིབ་མ་ལ་འགོམས་དགོས་བྱུང་ན། ཨོཾ་བཛྲ་བེ་ག་ཨ་ཀྲ་མ་ཧཱུཾ། ཞེས་པ་འདི་བཏོན་ཏེ་གྲིབ་མའི་འོག་ཏུ་འཛུལ་བར་མོས་ན་ཉེས་པ་མེད་དོ། །

༤ བསྐོར་བའི་ཕན་ཡོན་ནི། འཕགས་པ་སྤྱན་རས་གཟིགས་ཀྱི་མདོ་ལས། མཆོད་རྟེན་བསྐོར་བ་བྱས་ན་ནི། །སྐྱེ་བ་ཐམས་ཅད་ཀུན་ཏུ་ཡང་། །དབང་ཆེར་གྲགས་པའི་ཁྱིམ་བདག་དང་། །དཔལ་དང་གཟི་བརྗིད་ལྡན་པར་འགྱུར། །བྲམ་ཟེ་སཱ་ལ་ཆེ་འདྲ་དང་། །ཚུལ་ཁྲིམས་ལྡན་ཞིང་མང་ཐོས་དང་། །རྒྱལ་རིགས་སཱ་ལ་ཆེ་འདྲ་དང་། །ཕྱུག་ཅིང་ནོར་ཆེར་ལྡན་པར་འགྱུར། །ཞེས་སོགས་རྒྱ་ཆེར་གསུངས་ལ། གསལ་རྒྱལ་གྱི་ཚིགས་བཅད་ལས། སུ་ཞིག་དད་པས་ཐུབ་པའི་མཆོད་རྟེན་ནམ། །སྐུ་གཟུགས་དག་ལ་བསྐོར་བ་བྱེད་པ་དེ། །ཕྱི་མའི་ཚེ་ལ་དགྲ་ཆེན་རྣམས་ཀྱིས་བཏུད། །བཟང་བོའི་སྣོད་འགྱུར་ཡོན་ཏན་རྣམས་དང་ལྡན། །མི་རྣམས་སུ་དག་དགའ་བཞིན་གུས་པ་ཡིས། །བླ་མེད་མཆོད་རྟེན་རྣམས་དང་སྐུ་གཟུགས་ལ། །ལུས་ཀྱི་ལས་རྣམས་བྱེད་པ་དེ་དག་ནི། །སྲིད་པ་ཀུན་ཏུ་མཛོད་རྣམས་ཤིན་ཏུ་རྒྱས། །ཞེས་དང་། འདུལ་བ་ལུང་ལས། གང་ཞིག་དད་ཅིང་མོས་པའི་སེམས་ཀྱིས་སུ། །སངས་རྒྱས་མཆོད་རྟེན་ལ་ནི་གོམ་འདོར་ན། །འཛམ་བུ་ཆུ་བོའི་གསེར་གྱི་གྲངས་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་དང་། མཆོད་རྟེན་བསྐོར་བའི་ཚིགས་སུ་བཅད་པའི་མདོ་ལས། དལ་འབྱོར་འཐོབ་ཅིང་། དྲན་དང་། བློ་གྲོས་དང་ཁ་དོག་ལྡན་ཞིང་མཛངས་པར་འགྱུར་བ། ཚེ་དང་ལོངས་སྤྱོད། སྙན་གྲགས་དང་དབང་ཐང་། སྟོབས་དང་བརྩོན་འགྲུས། རྫུ་འཕྲུལ་འཐོབ་པ། མའི་ལྟོར་བདེ་ཞིང་བུ་ཕྲུག་བདེ་བར་བཙའ་བ་སོགས་ཕན་ཡོན་མང་དུ་གསུངས་པ་དང་།

སྔོན་བྱུང་དང་སྦྱར་ནའང་། ཁྱིམ་བདག་དཔལ་སྐྱེས་སྔོན་གྱི་ཚེ་ཕག་གི་སྐྱེས་པ་བླངས་པའི་དུས། ཁྱིས་བདས་ཏེ་ལྟས་དབང་གིས་་མཆོད་རྟེན་ལ་བསྐོར་བ་བྱས་པས། རྒྱུད་ལ་དགེ་བའི་ས་བོན་ཐེབས་པ་བཅོམ་ལྡན་འདས་ཀྱིས་གཟིགས་ཏེ། རབ་ཏུ་བྱུང་བར་གནང་བ་དང་། གཞན་ཡང་། ལུང་གཞི་སོགས་མདོ་ཚད་མ་དང་། རྒྱལ་བོའི་བཀའ་འབུམ་སོགས་སྒྲུབ་ཐབས་ཚད་མ་ལས་ཀྱང་མང་དུ་གསུངས་པ་ལས་གཞན། ཅོ་ནེ་གྲགས་པ་བཤད་སྒྲུབ་ཀྱི་ཕྱག་མཆོད་བསྐོར་བའི་ཕན་ཡོན་ལས་ཀྱང་གསུངས་སོ། །

ཕྱག་འཚལ་བ།

༡ ཕྱག་འཚལ་སྟངས། སྤྱིར་ཕྱག་ནི། ལུས་ཀྱི་རྣམ་འགྱུར་ལ་སོགས་པའི་ཆ་ནས་བཞག་པའི་ཕུང་བོ་ལྔ་བ་ཅན་ཞིག་ལ་ཕྱག་ཟེར། ལུས་ངག་ཡིད་གསུམ་གྱི་ཕྱག་ཡོད་ཀྱང་། འདིར་སྐབས་སུ་བབ་པ་ལུས་ཀྱི་ཕྱག་ལ། སྡོང་བཀོད་ལས། ལུས་ཐམས་ཅད་ས་ལ་ཕབ་པའི་བརྐྱངས་ཕྱག་དང་། སྡོང་བོ་འགྱེལ་བ་ལྟ་བུའི་ལུས་ཐམས་ཅད་ས་ལ་ཕབ་པའི་ཕྱག་འདིས། སྡིག་པ་ལ་འགྱོད་པ་དྲག་པོ་ཡོད་པའི་རྣམ་འགྱུར་དང་། ང་རྒྱལ་གྱི་རི་བོ་ས་ལ་བསྙིལ་བ་ལྟ་བུ་མཚོན་པར་ཡང་བཤད་དོ། །

མདོ་རྩར། ཡན་ལག་ལྔ་ཕྱག་སྟེ། མགོ་དང་། ལག་མཐིལ་གཉིས། པུས་མོའི་སླ་ང་གཉིས་བཅས། ལུས་ཀྱི་མ་ལྔ་ས་ལ་གཏུགས་ཏེ་ཕྱག་འཚལ་བས་ཉོན་མོངས་དུག་ལྔའི་སྒྲིབ་པ་འདག་པ་དང་། སྐུ་གསུང་ཐུགས་ཡོན་ཏན་འཕྲིན་ལས་ལྔའི་བྱིན་རླབས་ཞུགས་པའི་དགོས་པ་ཡོད་པར་བཤད་པ་ལས་གཞན། ལུས་ཀྱི་མ་ལྔ་ས་ལ་གཏུགས་པའི་བསྐུམ་ཕྱག་གི་དགོས་པ། ཕུང་བོ་གསུམ་པའི་མདོ་ལས། བྱང་ཆུབ་སེམས་དཔའ་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་མཉམ་པ་ཉིད་ལ་འཇུག་ཅིང་ཡན་ལག་ལྔ་ས་ལ་གཏུགས་པར་བྱ་སྟེ། པུས་མོ་གཡས་པ་ས་ལ་འཛུགས་པའི་ཚེ། སེམས་ཅན་ཐམས་ཅད་གཡས་ཕྱོགས་ཀྱི་ལམ་ལ་འཇུག་པར་གྱུར་ཅིག་ཅེས་བརྗོད་དོ། །གཡོན་པ་འཛུགས་པའི་ཚེ། སེམས་ཅན་སུ་དག་གཡོན་ཕྱོགས་ཀྱི་ལམ་ལ་གནས་པ་དེ་ཐམས་ཅད་འཕགས་པའི་ལམ་ལ་གནས་ཤིང་ཡང་དག་པའི་ལམ་ལ་གནས་པར་གྱུར་ཅིག ཅེས་སོ། །ལག་པ་གཡས་པ་ས་ལ་འཛུགས་པའི་ཚེ། ཇི་ལྟར་སངས་རྒྱས་བྱང་ཆུབ་ཀྱི་སྙིང་བོ་མཆོག་དམ་པར་བཞུགས་པ་དགེ་བའི་ཆོས་ཐམས་ཅད་དང་ལྡན་པས་དབུ་དང་སྐུ་སྐྱིལ་མོ་ཀྲུང་ལ་བཞུགས་ཏེ། ཕྱག་གཡས་པ་ས་ལ་བསྣུན་ནས་བདུད་དཔུང་དང་བཅས་པ་བཏུལ་ཞིང་། བྱང་ཆུབ་བརྙེས་པ་ལྟར་སེམས་ཅན་འདི་དག་གིས་ཀྱང་བདུད་ཕྱིར་རྒོལ་བ་ཆོམས་པར་གྱུར་ཅིག བྱང་ཆུབ་སྙིང་བོ་ལ་འདུག་ཅིང་ས་ལ་བསྣུན་ཏེ་སངས་རྒྱས་ཀྱི་ཡེ་ཤེས་ཐོབ་པར་གྱུར་ཅིག ལག་གཡོན་ས་ལ་འཛུགས་པའི་ཚེ། སེམས་ཅན་སུ་དག་བྱིས་པའི་ཆོས་ལ་གནས་ཏེ་གཡོན་ཕྱོགས་སུ་འཛིན་པ། གདུལ་དཀའ་བ་དེ་ཐམས་ཅད་བསྡུ་བའི་དངོས་བོ་བཞིས་ཤིན་ཏུ་སྡུད་པར་གྱུར་ཅིག གདོང་བ་དང་དཔྲལ་བ་ས་ལ་གཏུགས་པའི་ཚེ། སེམས་ཅན་ཐམས་ཅད་ང་རྒྱལ་མ་མཆིས་པས་བླ་མ་རྣམས་ལ་རིམ་འགྲོ་བགྱིད་ཅིང་སྤྱི་གཙུག་ལྟར་མི་མཐོང་བ་དང་། དགེ་བའི་ཆོས་ཐམས་ཅད་ཀྱིས་འཕགས་པར་གྱུར་ཅིག དེ་ལྟར་བདག་གིས་ཡན་ལག་ལྔས་ཕྱག་འཚལ་བ་འདིས། སེམས་ཅན་ཐམས་ཅད་ཀྱི་སྒྲིབ་པ་ལྔ་སེལ་བར་གྱུར་ཅིག དབང་བོ་ལྔ་ཡོངས་སུ་རྫོགས་པར་གྱུར་ཅིག མིག་ལྔ་ཡོངས་སུ་དག་པར་གྱུར་ཅིག ཅེས་པས་ཤེས་སོ། །

གཞན་ཡང་། སྒྱིད་པ་འཁྱུད་པའི་ཕྱག་དང་། དམ་ཆོས་པད་དཀར་ལས། ཐལ་མོ་ཡ་གཅིག་གི་ཕྱག་དང་། ལུས་དུད་པ་ཙམ་ཀྱི་ཕྱག་ཀྱང་གསུངས་ལ། གང་ལྟར་ཡིད་དང་བའི་སྒོ་ནས་གུས་པའི་ཉམས་འགྱུར་ཐམས་ཅད་ལ་ཕྱག་ཟེར། དེ་ཡང་། ཞིང་རྡུལ་མཉམ་པའི་སྒོ་གསུམ་རབ་བཏུད་ནས། །བླ་མ་རྒྱལ་བ་སྲས་བཅས་ལ་ཕྱག་འཚལ། །གསུངས་པ་ལྟར་ཕྱག་འཚལ་བ་སྟེ། ཐར་བ་ཆེན་པོའི་མདོ་ལས་ཀྱང་། པདྨ་ཁ་འབུས་ཕྱེ་འདྲ་བ། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་ཀྱིས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་སོ། །

ཐལ་མོ་སྦྱོར་སྟངས་ཡང་། མུ་སྟེགས་པའི་ཐལ་མོ་བཅར་ལེབ་དང་། ནང་བའི་ཐལ་མོ་ཁོང་སྟོང་མཐེ་བོང་ནང་དུ་བཅུག་ནས། ནོར་བུའི་དབྱིབས་ལྟ་བུ་སྟེ། བདག་གིས་སྟོང་བའི་མཚོན་བྱེད་ཡིན། མཐེ་བོང་གཉིས་ཅུང་ཟད་ནང་དུ་འོང་བར་བྱས་ཏེ། ནོར་བུ་འཛིན་པའི་ཕྱག་རྒྱས་ལག་གཉིས་ཀྱིས་ནོར་བུ་ཐོགས་པར་མོས། ནོར་བུ་དེ་ལས་ཀུན་ཏུ་བཟང་བོའི་མཆོད་སྤྲིན་ནམ་མཁའི་ཁམས་སྤྲོས་ཏེ། མཆོད་པ་འབུལ་བར་བསམ་པའང་ཡོད། ཡང་ན། ཐལ་མོ་སྦྱོར་བའི་གཟུགས་ཀྱིས་གཟུགས་སྐུ། ཡ་གཉིས་ཀྱིས་ཐབས་ཤེས་ཟུང་འབྲེལ་བྱས་པས། ལམ་མ་སྐྱེས་པ་སྐྱེས་པ། སྐྱེས་པ་གནས་པ། གནས་པ་གོང་འཕེལ་ལ་འགྲོ་བའི་རྟེན་འབྲེལ་སྒྲིག་པ་དང་། ཐལ་མོ་སྤྱི་བོར་སྦྱར་བས་སྙིང་གའི་རྩ་མདུད་གྲོལ། ཁྱད་པར་དུ་སངས་རྒྱས་ཀྱི་གཙུག་ཏོར་འགྲུབ། སྨིན་མཚམས་སུ་སྦྱར་བས་མཛོད་སྤུ། མགྲིན་པར་སྦྱར་པས་མགྲིན་པའི་རྩ་མདུད་གྲོལ། ཁྱད་པར་དུ་གསུང་དབྱངས་ཡན་ལག་དྲུག་ཅུ་འགྲུབ། སྙིང་གར་སྦྱར་པས། སྙིང་གའི་རྩ་མདུད་གྲོལ། ཁྱད་པར་དུ་ཐུགས་རྣམ་པ་ཐམས་ཅད་མཁྱེན་པ་འགྲུབ་པའི་ནུས་པ་འཇོག་ཅིང་། འདིས་བསགས་སྦྱངས་གཉིས་ཀ་འབྱུང་བས་ལུས་ངག་ཡིད་གསུམ་གྱི་སྡིག་སྒྲིབ་འདག ལུས་ས་ལ་ཕབ་པ་དང་ལྡང་བའི་སྐབས། སོར་མོ་རྣམས་གཤིབ་སྟེ་ས་ལ་བཀྲམས་པས། ཕྱག་ཞབས་ཀྱི་སོར་མོ་དྲ་བས་འབྲེལ་བ་འགྲུབ་ལ། ལག་པ་དང་དཔྲལ་བ་སར་གཏུགས་ཏེ་མར་ལྡང་སྐབས། འཁོར་བ་ལས་མྱུར་དུ་ལྡང་བའི་རྟེན་འབྲེལ་ཡོད།

ཡང་ཕྱག་ལ་དབྱེ་ན་བརྒྱད་དུ་ཕྱེ་ཚུལ་ཡང་ཡོད་དེ། རྟོགས་པ་ཆོས་ཉིད་ཀྱི་ཕྱག དགུ་ཕྲུགས། གཟིགས་ཕྱག བྱེ་གཤོག བཞེངས་ཕྱག རྒྱལ་ཕྱག དཔྲལ་སྡེབས། སྒུམ་མཐུན་ནོ། །༡ རྟོགས་པ་ཆོས་ཉིད་ཀྱི་ཕྱག་ནི། ཕྱག་འཚལ་བའི་ཡུལ། འཚལ་བ་བོ། ཚུལ་བའི་ཚུལ་ཐམས་ཅད་རང་སེམས་སྐད་ཅིག་མའི་བྱེད་ལས་ཀྱིས་སྒྲོ་བཏགས་པ་ལས། དོན་ལ་ཕྱག་འཚལ་ཡུལ་དང་འཚལ་བྱ་གཉིས་སུ་མ་གྲུབ་པའི་ཡེ་ཤེས་ལ་ངེས་པ་རྙེད་པ་སྟེ། རིམ་པ་ལྔ་བ་ལས། ཇི་ལྟར་ཆུ་ལ་ཆུ་བཞག་ལྟར། །ཇི་ལྟར་མར་ལ་མར་བཞིན་དུ། །རང་གིས་རང་གི་ཡེ་ཤེས་ནི། །ལེགས་མཐོང་གང་ཡིན་འདིར་ཕྱག་ཡིན། །གསུངས་པ་ལྟར་རོ། །༢ དགུ་ཕྲུགས་ནི། དབང་བསྐུར་བ། རྒྱུད་བཤད་པ། མན་ངག་གནང་བའི་བཀའ་དྲིན་སུམ་ལྡན་གྱི་བླ་མ་ལ་ཕྱག་དགུ་ཕྲུགས་འཚལ་བའོ། །༣ གཟིགས་ཕྱག་ནི། བཀུར་འོས་རྣམས་མཐོང་ནས་གཟིགས་ཕྱག་གནང་སྟེ་ཞེ་ས་འབུལ་བ་འོ། །༤ བྱེ་གཤོག་ནི། བཙད་པོ་རབ་བྱུང་སྔགས་པ་གསུམ་འཛོམས་ན་བྱའོ། །༥ བཞེངས་ཕྱག་ནི། ཕྱག་ཡུལ་རྣམས་མཐོང་ན་ཡར་བཞེངས་ཤིང་ཐལ་མོ་སྦྱོར་བའོ། །༦ རྒྱལ་ཕྱག་ནི། རྒྱལ་བོའི་ཕྱག་ལ་གསུམ། འདུན་ཚུགས། སུམ་ཁུགས། རྒྱལ་ཕྱག་ཉི་ཤུ་རྩ་གཅིག་པའོ། །༧ དཔྲལ་སྡེབས་ནི། ཉན་ཐོས་རབ་བྱུང་གི་ཕྱག་གོ། ༨ མོས་ཕྱག་ནི། དཀོན་མཆོག་གི་རྟེན་མཐོང་བའི་ཕྱག་སྟེ། ལན་གསུམ་འཚལ་བའོ། །

༢ ཕྱག་འཚལ་བའི་དམིགས་པ། སྐྱབས་ཡུལ་དམ་པ་ལ་སྙིང་ཁོང་རུས་པའི་གཏིང་ནས་གུས་ཏེ། བདག་གི་སྒོ་གསུམ་གྱི་དབང་ཆ་ཡོངས་རྫོགས་ཁྱེད་རང་གི་ཕྱག་ཏུ་བཞག་ན། འཕྲལ་ཕུགས་ཀྱི་སྐྱིད་སྡུག་ལེགས་ཉེས་ཐམས་ཅད་ཁྱེད་མཁྱེན་སྙམ་པའམ། ཡང་ན། ཕྱག་ཅེས་པ་བྱང་བ་དང་། འཚལ་ཞེས་པ་ཡོན་ཏན་འདོད་པའི་དོན་དུ་གོ་བ་བླངས་ན། སྒོ་གསུམ་གྱི་སྡིག་སྒྲིབ་བྱང་ཞིང་དག་པ་དང་། བསླབ་གསུམ་གྱི་ཡོན་ཏན་སྐྱེས་ཤིང་འཕེལ་བར་བྱིན་གྱིས་བརླབ་ཏུ་གསོལ་ཞེས་བསམ་ཞིང་སྨོན་པ་དང་། ཡང་ལམ་རིམ་ཆེན་མོར། འཇིག་རྟེན་གྱི་ཁམས་ཕྱོགས་རེ་བ་དང་དུས་རེ་རེའི་སངས་རྒྱས་མ་ཡིན་གྱི། ཕྱོགས་བཅུ་ཁ་ན་བཞུགས་པ་དང་སྔར་བྱོན་ཟིན་པ་དང་མ་འོངས་པ་ན་འབྱོན་པར་འགྱུར་བ་དང་། ད་ལྟར་བྱུང་བའི་རྒྱལ་བ་ཐམས་ཅད་ལ་དམིགས་ནས་གཞན་གྱི་གཡམ་ལ་རྒྱུགས་ལྟ་བུ་མིན་པར་བསམ་པ་ཐག་པ་ནས་སྒོ་གསུམ་གུས་པའི་ཕྱག་འཚལ་བའོ། །དེ་ཡང་སངས་རྒྱས་གཅིག་ལ་ཕྱག་འཚལ་ནའང་བསོད་ནམས་དཔག་ཏུ་མེད་པ་ལ་སངས་རྒྱས་དེ་ཙམ་ལ་དམིགས་ནས་ཕྱག་འཚལ་ན་ལྟ་ཅི་སྨོས་ཞེས་སློབ་དཔོན་ཡེ་ཤེས་སྡེས་བཤད་པར་གསུངས་སོ། །ཡང་སྒོ་གསུམ་སོ་སོའི་ཕྱག་འཚལ་སྐབས་དམིགས་རྣམ་ནི། སློབ་དཔོན་ཡེ་ཤེས་སྡེས་འདི་ལྟར་གསུངས་ཏེ། ལུས་ཀྱི་ཕྱག་ནི། རྒྱལ་བ་ཕྱོགས་དང་དུས་ཀྱིས་བསྡུས་པ་ཐམས་ཅད་ཡིད་ཀྱི་ཡུལ་དུ་མངོན་སུམ་པ་ལྟར་དམིགས་ལ་རང་གི་ལུས་ཞིང་རྣམས་ཀྱི་རྡུལ་ཕྲ་རབ་དང་གྲངས་མཉམ་པར་སྤྲུལ་ལ་ཕྱག་བྱའོ། །དེ་ཡང་ཡུལ་རྣམས་ཀྱིས་བཟང་བོ་སྤྱོད་པ་ལ་རབ་ཏུ་དད་པའི་སྟོབས་བསྐྱེད་དེ་དེས་ཀུན་ནས་བསླངས་ཏེའོ། །ལུས་གཅིག་གིས་ཕྱག་བྱས་པའང་བསོད་ནམས་ཆེ་ན་ལུས་དེ་ཙམ་གྱིས་ཕྱག་བྱས་པ་ནི་བསོད་ནམས་ཤིན་ཏུ་ཆེའོ། །ཡིད་ཀྱི་ཕྱག་ནི། རྡུལ་ཕྲ་རབ་རེ་རེའི་སྟེང་ནའང་རྡུལ་ཐམས་ཅད་ཀྱི་གྲངས་དང་མཉམ་པའི་སངས་རྒྱས་འཁོར་བྱང་སེམས་ཀྱིས་བསྐོར་བའི་དབུས་ན་བཞུགས་པ་ལ་དེ་དག་གི་ཡོན་ཏན་རྗེས་སུ་དྲན་པའི་མོས་པ་བསྐྱེད་པའོ། །ངག་གི་ཕྱག་ནི། ཡུལ་རྣམས་ཀྱི་ཡོན་ཏན་བསྔགས་པ་ཟད་མི་ཤེས་པ་རྣམས་ལུས་རེ་རེ་ལ་མགོ་བོ་དཔག་ཏུ་མེད་པ་དང་། མགོ་བོ་རེ་རེ་ལ་ལྕེ་དཔག་ཏུ་མེད་པར་གསུངས་པ་ལྟར་བྱས་ནས་སྙན་པའི་དབྱངས་ཀྱིས་བརྗོད་པའོ། །

༣ ཕྱག་གི་མཚོན་དོན། འདིར་ས་པཎ་གྱིས་ཕྱག་གི་མཚོན་དོན་དང་སྦྱར་ཏེ་ཕན་ཡོན་ཞིག་གསུངས་པ། གོ་བདེ་ཞིང་ཕན་སླེབས་ཆེ་བས་ཚེགས་སུ་མ་ལྟོས་པར། འདིར་ཆ་ཚང་དྲངས་ན། ན་མོ་གུ་རུ་བྷྱཿ ན་མོ་བུད་དྷ་ཡ། ན་མོ་དྷ་ཪྨ་ཡ། ན་མཿསང་གྷ་ཡ། བདག་གིས་མཆོག་གསུམ་དམ་པར་ཕྱག་འཚལ་ནས། །བདག་ཅག་འགྲོ་ཀུན་སྡིག་སྒྲིབ་འདག་པར་ཤོག། ལག་གཉིས་མཉམ་པར་ཐལ་མོ་སྦྱར་བ་ཡིས། །ཐབས་དང་ཤེས་རབ་ཟུང་འཇུག་འཐོབ་པར་ཤོག། ཐལ་མོ་སྤྱི་བོའི་གཙུག་ཏུ་སྦྱར་བ་ཡིས། །ཞིང་མཆོག་བདེ་བ་ཅན་དུ་སྐྱེ་བར་ཤོག། ཐལ་མོ་སྨིན་མཚམས་དཔྲལ་བར་སྦྱར་བ་ཡིས། །ལུས་ཀྱི་སྡིག་སྒྲིབ་ཐམས་ཅད་འདག་པར་ཤོག། ཐལ་མོ་མགྲིན་པའི་ཐད་དུ་སྦྱར་བ་ཡིས། །ངག་གི་སྡིག་སྒྲིབ་ཐམས་ཅད་འདག་པར་ཤོག། ཐལ་མོ་སྙིང་གི་ཐད་དུ་སྦྱར་བ་ཡིས། །ཡིད་ཀྱི་སྡིག་སྒྲིབ་ཐམས་ཅད་འདག་པར་ཤོག ། ཐལ་མོ་སྦྱར་བ་སོ་སོར་ཕྱེས་པ་ཡིས། །གཟུགས་སྐུ་གཉིས་ཀྱིས་འགྲོ་དོན་བྱེད་པར་ཤོག །རྐང་གཉིས་པུས་མོ་ས་ལ་བཙུགས་པ་ཡིས། །འཁོར་བ་ངན་སོང་གནས་ལས་ཐར་བར་ཤོག །ལག་གཉིས་སོར་བཅུ་ས་ལ་བཙུགས་པ་ཡིས། །ས་བཅུ་ལམ་ལྔ་རིམ་གྱིས་བགྲོད་པར་ཤོག །མགོ་བོའི་དཔྲལ་བ་ས་ལ་བཙུགས་པ་ཡིས། །བཅུ་གཅིག་ཀུན་ཏུ་འོད་ཀྱི་ས་འཐོབ་ཤོག །ཡན་ལག་བཞི་བོ་བརྐྱངས་བསྐུམས་བྱས་པ་ཡིས། །འཕྲིན་ལས་རྣམ་བཞི་ལྷུན་གྱིས་འགྲུབ་པར་ཤོག ། རྩ་རྒྱུས་ཐམས་ཅད་བརྐྱངས་བསྐུམས་བྱས་པ་ཡིས། །རྩ་མདུད་ཐམས་ཅད་མ་ལུས་དགྲོལ་བར་ཤོག །སྒལ་ཚིགས་དབུ་མ་དགྱེ་སྒུར་བྱས་པ་ཡིས། །རླུང་རྣམས་མ་ལུས་དབུ་མར་ཚུད་པར་ཤོག །ས་ལ་ཐུག་ནས་ཡར་ལ་ལྡང་བ་ཡིས། །འཁོར་བར་མི་གནས་ཐར་ལམ་བགྲོད་པར་ཤོག། བདག་གིས་བརྐྱངས་ཕྱག་ཕུལ་བའི་དགེ་བའི་མཐུས། །གནས་སྐབས་ཚེ་རིང་ནད་མེད་ཕུན་སུམ་ཚོགས། །འཆི་ཚེ་བདེ་བ་ཅན་དུ་སྐྱེས་ནས་ཀྱང་། །རྫོགས་པའི་སངས་རྒྱས་གོ་འཕང་འཐོབ་པར་ཤོག། དགེ་འདིས་དུས་གསུམ་ཕྱོགས་བཅུའི་སངས་རྒྱས་དང་། །བློ་ཆེན་རྒྱལ་སྲས་སེམས་དཔའ་ཐམས་ཅད་ཀྱིས། །མཛད་པ་སྨོན་ལམ་རླབས་ཆེན་ཇི་སྙེད་པ། །མཐའ་དག་བདག་ཉིད་གཅིག་པུས་འགྲུབ་གྱུར་ཅིག །ཅེས་སོ། །

༤ ཕྱག་འཚལ་ལུགས་ནོར་བའི་ཉེས་པ། ཉེས་དམིགས་ཇི་ལྟར་ཡོད་ཚུལ་ནི། ལུས་ས་ལ་ཕབ་པ་དང་ལྡང་བའི་སྐབས། མཛུབ་མོ་བསྐུམས་ན། དུད་འགྲོ་རྨིག་རྡུམ་དང་། ལུས་ས་ལ་ཕབ་ནས་ཧ་ཅང་འགྱངས་ཆེ་བས། ལྟོ་འཕྱེ་དང་སྦྲུལ་གྱི་རིགས་སུ་སྐྱེས་པ་དང་། ཕྱག་སྔ་ཕྱིའི་བར་ལུས་སྒུར་ཙམ་སྒུར་ཙམ་བྱས་པས། དུད་འགྲོ་ལྟ་བུ་སྒུར་བོ་དང་། དཔྲལ་བ་ས་ལ་མ་གཏུགས་པས། དམྱལ་བ་མགོ་འཕྱང་དང་། ཡང་ན་དམྱལ་བ་སྤྱིའུ་ཚུགས་སུ་སྐྱེས། ལག་པ་གཡུགས་པ་དང་། རྒྱབ་མདུན་བསྣོལ་བ་སོགས་ཀྱིས། དམྱལ་བར་སྐྱེས་པ་དང་། ཐར་ན་ཡང་ཉེས་པ་མེད་པར་གྱོད་ལ་སྦྱོར་བ་སོགས་འགྱུར་བས། ཕྱག་འཚལ་ལུགས་ལ་གཟབ་དགོས་པ་ཡིན་ནོ། །

༥ ཕྱག་འཚལ་བའི་ཕན་ཡོན། འཕགས་པ་ཐམས་ཅད་ཡོད་པར་སྨྲ་བའི་གཞུང་ལས། དགེ་སློང་དག དགེ་སློང་གིས་འདི་ལྟར། སྐྲ་དང་སེན་མོའི་མཆོད་རྟེན་ལ་ཡན་ལག་ཐམས་ཅད་ཀྱིས་ཕྱག་འཚལ་ཏེ། སེམས་དང་བར་བྱེད་པ་ལ་ལྟོས། བཙུན་པ་དེ་ལྟར་ལགས་སོ། །དགེ་སློང་དག་འདིས་ས་ཇི་ཙམ་མནོན་པའི་འོག་དཔག་ཚད་བརྒྱད་ཁྲི་བཞི་སྟོང་ན་གསེར་གྱི་འཁོར་ལོ་རྣམས་ལ་ཐུག་པའི་བར་ན། བྱེ་མ་ཇི་སྙེད་ཡོད་པ་དེ་སྙེད་དུ་དགེ་སློང་འདིས་འཁོར་ལོས་བསྒྱུར་བའི་རྒྱལ་སྲིད་སྟོང་འགྱུར་དུ་ལོངས་སྤྱོད་པར་འགྱུར་རོ། །ཞེས་དང་། མདོ་ལས་ཀྱང་། བཅོམ་ལྡན་འདས་ཀྱི་དབུའི་གཙུག་ཏོར་མི་མངོན་པ་ནི། བླ་མར་བྱ་བའི་སྐྱེ་བོ་ལ་གུས་པར་བཏུད་དེ་ཕྱག་འཚལ་བ་ལས་བྱུང་ངོ་། །ཞེས་དང་། དཀོན་མཆོག་ཏ་ལ་ལ་ལས། རྒྱལ་བ་རྣམས་དང་རྒྱལ་བའི་མཆོད་རྟེན་ལ། །ལུས་གཏུགས་ནས་ནི་ལུས་ནི་སྦྱང་བ་འཐོབ། །སེམས་ཅན་སྦྱོང་བའི་འོད་ཟེར་རབ་གཏོང་ཞིང་། །མྱོས་པ་ཐམས་ཅད་སེམས་དང་ལྡན་པར་འགྱུར། །ཞེས་དང་། དམ་ཆོས་པད་དཀར་ལས་ཀྱང་། མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །གང་གི་རིང་བསྲེལ་གནས་པ་དེ་དག་ལ། །གཡེང་བའི་སེམས་ཀྱིས་ཕྱག་འཚལ་སངས་རྒྱས་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཞེས་སོགས་སྤྱན་རས་གཟིགས་ཀྱི་མདོ། སྨན་མདོ་བརྒྱད་བརྒྱ་བ་སོགས་ལས་ཀྱང་མང་དུ་གསུངས་སོ། །

སཙྪ་འདེབས་སྲོལ།

༡ སཙྪ་འདེབས་སྲོལ་གྱི་ཁུངས། རང་ཅག་བོད་འདིར་ཆོས་ལུགས་ཀྱི་སྒྲུབ་སྟངས་འདྲ་མིན་དར་བ་ལས། སཙྪ་འདེབས་སྟངས་འདི་ཡང་། དེའི་གྲས་ཀྱི་ཆོས་སྲོལ་ཅིག་ཡིན། སཙྪའི་སྐད་དོད་ལ་བོད་སྐད་དུ་འདྲ་གཟུགས་ཟེར། དེའི་ཁུངས་ནི་ཤེས་པ་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་གྱི་གཟུངས་ལས། འབྱུང་བ་ཆེན་པོ་གང་ལ་མཆོད་རྟེན་བཏབ་ཀྱང་། བསྐལ་བ་དཔག་ཏུ་མེད་པ་ཐམས་ཅད་ཀྱི་སྒྲིབ་པའི་དྲི་མ་དག་ནས། ཁྱིམ་བདག་གི་རིགས་སཱ་ལ་ཆེན་པོ་ལྟ་བུར་སྐྱེས་ཏེ། ཕྱིར་མི་ལྡོག་པའི་ས་འཐོབ་པར་འགྱུར་རོ། །ཞེས་དང་། ལས་ཐམས་ཅད་པའི་རྒྱུད་དང་སྒྱུ་འཕྲུལ་དྲྭ་བའི་དགོངས་པ་བཞིན་རོང་ཟོམ་ཆོས་བཟང་གིས་གསུངས་བར་གཞི་བྱས་ཏེ་འཇུ་མི་ཕམ་པས་ཀྱང་གསུངས་ཡོད་པ་དང་། དཔུང་བཟང་གིས་ཞུས་པའི་རྒྱུད་ལས། བདེ་གཤེགས་མཆོད་རྟེན་རྟེན་འབྲེལ་སྙིང་བོ་ཅན། །སྡིག་པ་དག་ཕྱིར་རྟག་ཏུ་གདབ་པར་བྱ། །ཞེས་དང་། གུང་ཐང་བསྟན་པའི་སྒྲོན་མེས། བསོད་ནམས་འབྲས་བུ་གཟུགས་སུ་ཤར་བ་བདེ་བར་གཤེགས་པའི་མཆོད་རྟེན་བརྒྱད། །བསོད་ནམས་ཞིང་སར་གཅིག་ཏུ་སྡུད་པའི་རྨད་བྱུང་ཐབས་མཁས་བླ་ན་མེད། །ཅེས་དང་། བསྒྲུབ་པར་སླ་ཞིང་ཤིན་ཏུ་དོན་ཆེ་བ། །སྔོན་རབས་དམ་པ་མང་བོའི་ཐུགས་དམ་མཐིལ། །སཙྪའི་གདམས་པ། ཞེས་པ་ལྟར། སཙྪ་ནི་ཚ་རྐོང་ལས་བྱུང་བའི་མཆོད་རྟེན་ཆུང་ངུའི་རིགས་ཏེ། འདི་ཐུགས་རྟེན་གྱི་ཁུངས་སུ་གཏོགས་མོད་ཀྱང་། མི་འཁྲུགས་པ་དང་། སྨན་བླ་སོགས་དང་། ལྟུང་བཤགས་ཀྱི་ལྷ་སོ་ལྔ། མདོ་སྡེ་བསྐལ་བཟང་ལས་བྱུང་བའི་སངས་རྒྱས་སྟོང་སོགས་ཀྱི་སྣང་བརྙན་གྱི་སཙྪ་ནི་སྐུ་རྟེན་དང་། ད་ལྟ་གཟུངས་སྔགས་སོགས་ཀྱི་ཚ་རྐོང་མ་བྱུང་ཡང་། དེ་ཡང་བྱུང་ན་ཤིན་ཏུ་ལེགས་པར་སྙམ་ལ། ཕྱིས་སུ་དེ་དག་བྱུང་ན་གསུང་གི་རྟེན་གྱི་ཁུངས་སུ་གཏོགས་སོ། །

ཡང་ར་ག་ཨ་སེའི་སཙྪའི་ཕན་ཡོན་རིན་ཆེན་ཕུང་བོ་ལས་སཙྪ་ནི་ཆོས་ལོངས་སྤྲུལ་གསུམ་གྱི་སྐུ་ལས་ཆོས་སྐུའི་རྟེན་དང་། ཆོས་སྐུའི་རྟེན་དེ་ཡང་ལྷུང་བཟེད་ཁ་སྦུབ་པ་དང་། ཁང་བུ་ལྟར་དང་། རྒྱལ་མཚན་ལྟར་བརྩེགས་པ་གསུམ་ལས། སཙྪ་ནི་རྒྱལ་མཚན་ལྟར་གྲགས་པ་དེ་ཡིན་པར་བཤད་ཡོད་ལ། དེ་ལའང་བདེ་གཤེགས་མཆོད་རྟེན་བརྒྱད་ཚང་བར་གསུངས་ཏེ། པདྨའི་འདབ་མ་ཅན་ནི་པདྨ་ཅན་ཏེ་སྐུ་བལྟམས་པའི་མཆོད་རྟེན། བང་རིམ་བཞི་པ་ནི་རྡོ་རྗེ་གདན་དུ་བྱང་ཆུབ་པའི་མཆོད་རྟེན། བཀྲ་ཤིས་སྒོ་མང་གི་མཆོད་རྟེན་ནི་ཆོས་ཀྱི་འཁོར་ལོ་བསྐོར་བའི་མཆོད་རྟེན། ཕྱོགས་བཞིར་འབུར་ཡོད་པ་ནི་ཆོ་འཕྲུལ་ཆེན་པོ་བསྟན་ནས་མུ་སྟེགས་ཕམ་བྱེད་མཆོད་རྟེན། སྐས་ཡོད་པ་ནི་ལྷ་བབས་མཆོད་རྟེན། བང་རིམ་བཞིའི་ཟུར་བཅད་པ་ནི་དགེ་འདུན་དབྱེན་ཟླུམ་མཆོད་རྟེན། བང་རིམ་གསུམ་པོ་ཟླུམ་པ་ནི་སྐུ་ཚེ་བྱིན་གྱིས་བརླབས་པའི་མཆོད་རྟེན། མགུལ་ཆུ་མན་ཆད་བཞུགས་པ་ནི་མྱ་ངན་ལས་འདས་པའི་མཆོད་རྟེན་ཞེས་གསུངས་ནི་ཞིབ་ཆ་བཏོད་པ་ཙམ་ལས། སཙྪའི་སྐད་དོད་དུ་འདྲ་གཟུགས་སུ་གསུངས་པས་ན་མཆོད་རྟེན་དང་སྐུ་གཟུགས་གང་ཡིན་ཀྱི་འདྲ་ལ་གོ་དགོས་པར་སྙམ་མོ། །

གཡུང་དྲུང་བོན་གྱི་ལུགས་ལའང་གཟན་དཔར་ཆེ་ཆུང་སྣ་ཚོགས་ཡོད་ཅིང་། དེ་དག་གི་སྟེང་དུ་མཆོད་ལྷ་བརྒྱད་དང་། འདོད་ཡོན་ལྔ། སེང་གླང་རྟ་འབྲུག་ཁྱུང་། བཀྲ་ཤིས་རྟགས་བརྒྱད་དང་རྫས་བརྒྱད། གོ་ཁྲབ་མཚོན་གསུམ་སོགས་ཀྱི་རི་མོ་རྣམས་ཤིང་སྟེང་དུ་འབུར་བརྐོས་བྱས་པ་དེ་རྣམས་ཆོ་ག་དང་བསྟུན་ཏེ་དཔར་བརྒྱབ་ནས་བེད་སྤྱོད་གཏོང་སྲོལ་ཡོད་དོ། །གཟན་དཔར་དེ་དག་ནི་འདྲ་གཟུགས་ཞེས་མིང་བཏགས་ཆོག་ཀྱང་། མཆོད་རྟེན་གྱི་སཙྪའི་མིང་མི་ཐོགས་སོ། །

༢ སཙྪ་རྐོས་ཕོར་བོད་ལ་དར་བའི་དུས་རིམ། སཙྪ་བོད་དུ་དར་བའི་དུས་རིམ་ནི། བོད་ཀྱི་རྒྱལ་རབས་ཉེར་བདུན་པ་ལྷ་ཐོ་ཐོ་རི་སྙན་ཤལ་གྱི་དུས་སུ། པཎྜི་ཏ་བློ་སེམས་འཚོ་དང་། ལོ་ཙཱ་བ་ལི་ཐེ་སེ་ཟུང་གིས་མདོ་སྡེ་ཟ་མ་ཏོག་སོགས་རྒྱལ་བོར་ཕུལ་ཏེ། དམ་པ་ཆོས་ཀྱི་དབུ་བརྙེས་སྐབས། རིན་པོ་ཆེའི་བརྐོས་ཕོར་དྲུག་ཡོད་པར་གསུངས་པས་ན། དེ་དུས་ནས་དབུ་ཚུགས་པ་ཡིན་ཞེས་བཤད་ན་འགལ་བ་མེད་པར་སེམས། བསྟན་པ་ཕྱི་དར་གྱི་དུས་སུ། སྨྲི་ཏིའི་སྐྱེད་ཡུམ་གཙང་རྟ་ནག་གི་དུད་ཁྱིམ་ཞིག་གི་ཐབ་རྩར་འབུ་སྲིན་ཞིག་གི་སྐྱེས་པ་བླངས་ཡོད་པ་ཤེས་པས། ཁོང་གིས་ཚ་རྐོང་བསྣམས་ཏེ། ཁྱིམ་ཚང་དེའི་ཐབ་ས་བླངས་ནས་སཙྪ་བཏབ་པའི་ལོ་རྒྱུས་ཡོད་པ་དང་། གཞན་ཡང་། ཇོ་བོ་རྗེ་དང་མི་ལ། འཇམ་མགོན་རྒྱལ་བ་བློ་བཟང་གྲགས་པའི་དཔལ་སོགས་ཀྱིས་སཙྪ་བཏབ་པ་སོ་སོའི་རྣམ་ཐར་ན་གསལ་བ་ལྟར། དམ་པ་དེ་ཚོའི་ཕྱག་ལེན་རིམ་བརྒྱུད་ཀྱིས་སཙྪ་བཏབ་སྟེ་ད་ལྟ་ཡང་རང་ཅག་གིས་ལག་ལེན་དུ་འདེབས་པ་འདིའོ། །

༣ སཙྪའི་མཚོན་དོན་དང་རྒྱུ། སཙྪའི་མཚོན་དོན་ནི། ཐུགས་རྗེ་ཆེན་པོ་གསང་བ་འདུས་པའི་རྒྱུད་ལས། དེ་ནས་ཚོགས་ཆེན་བསག་པའི་ཕྱིར། །སཙྪའི་རིམ་པ་བཤད་པར་བྱ། །ས་བཟང་རིན་ཆེན་བརྡར་བ་ལ། །ཡིག་འབྲུ་བཟླ་ཞིང་འབི་འབི་བྱ། །རང་ཉིད་ཡི་དམ་ལྷར་གསལ་བས། །སྐུ་པར་སྟོང་བ་ཆོས་སྐུ་ལ། །འབི་འབི་ལོངས་སྤྱོད་རྫོགས་པའི་སྐུ། །སཙྪ་སྤྲུལ་སྐུ་འགྲོ་བའི་དོན། །ཐུགས་རྗེ་ཆེན་པོར་ལམ་ལམ་བྱོན། །ཞེས་སོ། །

སཙྪའི་རྒྱུ་ལ་ས་ཆུ་གཉིས་ཏེ། ཇོ་བོ་རྗེས་མཛད་པའི་ཚ་དགུ་མ་ལས། ས་ཆུ་སྲོག་ཆགས་མེད་པ་ལ། །ཞེས་དང་། འདུལ་བའི་མདོར། སྐྱེས་པ་ཕྲ་མོའི་གནས་དང་ལྡན་པ་སྤོངས་དགོས་པར་གསུངས་པས། འབུ་སྲིན་ཕྲ་མོ་ཡོད་མེད་ལ་བརྟགས་ཏེ་སྲོག་ཆགས་མེད་པའི་གཞི་ལས་བླངས་པའམ། ཡང་ན་སྲོག་ཆགས་ཕྲ་མོ་རྣམས་ས་ཚགས་དང་ཆུ་ཚགས་ཀྱིས་བསལ་དགོས་པ་དང་། ས་ཆུ་དེ་མཆོད་རྟེན་གྱི་རྒྱུ་ཆ་ཡིན་སྟབས་ལམ་འོག་དང་། གད་སྙིགས་འདོར་ཡུལ་སོགས་ནས་བླངས་པ་མ་ཡིན་པར་ས་ཆུ་གཙང་ས་ནས་ལེན་དགོས། སའི་རྒྱུ་རབ་ནི་ས་དམར་གྱི་རིགས་འབྱར་བག་ཅན་ཡིན་མོད། མ་འབྱོར་ན་སྤྱིར་བཏང་གི་ས་ཡིན་ཡང་ཆོག དེ་ཡང་རྩྭ་སྔོན་མི་སྐྱེས་པའི་སའམ། ཡང་སའི་ཁ་ཤུན་བཀོག་ནས། བྱེ་མ་སོགས་མི་འདྲེས་པའི་ས་གཙང་ལེན་དགོས།

༤ སཙྪ་ལག་ལེན་ལ་འདེབས་སྟངས། སཙྪ་འདེབས་པའི་རིམ་པ་ལ། ཐོག་མར་ས་སྦྱིན་པོ་ཡོད་ཅིང་གདོན་དྲག་པོ་མེད་པའི་སར། ས་ཆོག་རྒྱས་པར་བྱས་ནས་བསླངས་ན་རབ། འབྲིང་ཡིན་ན་ས་བདག་ལ་གཏོར་མ་བཏང་ནས་སློང་། མ་མཐའ་འང་ཁྱིམ་ནས་གནས་དེའི་ས་བདག་ལ་གཏོར་མ་བཏང་ནས་སློང་ངོ་། །དེ་མ་བྱུང་ན་སའི་ལྷ་མོ་བརྟན་མ་དང་ལྟོ་འཕྱེ། ཡང་ན། ས་བདག་བྱེ་བྲག་པ་རེ་ཡོད་པས། མ་བྱིན་ལེན་གྱི་ཉེས་པ་འབྱུང་བར་གསུངས་སོ། །ས་རྐོ་བའི་དུས་ནི། ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། དེ་ནས་སྐག་ལེ་ཐོགས་ཏེ་ས་རྐོ་བ། །དཔྱིད་ཟླ་གསུམ་ལ་བྱང་དུ་ཁ་གྱུ﹙འཇོར་གྱི་ཁ་འཁོར་ཕྱོགས﹚རྐོ། །དབྱར་ཟླ་གསུམ་ལ་ཤར་དུ་ཁ་གྱུ་རྐོ། །སྟོན་ཟླ་གསུམ་ལ་ལྷོ་རུ་ཁ་གྱུ་རྐོ། །དགུན་ཟླ་གསུམ་ལ་ནུབ་ཏུ་ཁ་གྱུ་རྐོ། །དེ་ལྟར་ལྟོ་འཕྱེ་མ་བརྩིས་ཉེས་སྐྱོན་འབྱུང་། །ཚེས་པ་བཅུ་གཉིས་ནམ་ཡང་ས་མི་རྐོ། །གྲུ་རེ་བརྐོས་ན་མི་རེ་འཆི་བར་བཤད། །དེ་ནི་ས་བདག་ཐེ་སེ་སྤྲེལ་ཁོག་ཟེར། །ཞེས་གསུངས་ལ། དེ་ལྟར་ཁ་གྱུ་ཕྱོགས་མ་ནོར་བར་བརྐོས་ན། ལྟོ་འཕྱེའི་ལྟོ་ཚིལ་ལོན་པར་མ་ཟད། ས་དེ་རིན་ཆེན་སྣ་ལྔའི་གཏེར་ཁ་སྟེ་ས་གཡང་དངོས་གྲུབ་འཐོབ་པར་བཤད་དོ། །ས་སློང་གི་ཚིག་ཀྱང་། ས་བདག་ལྟོ་འཕྱེ་ཆེན་པོ་དང་། །ས་ཡི་ལྷ་མོ་བརྟན་མ་དང་། །སྲས་པོ་ས་འཛིན་ལག་པ་ཆེ། །ཡུལ་རིས་འདི་ལ་གནས་པ་དང་། །ཁྱད་པར་ས་སྦྱིན་ལེན་པ་དང་། །གནས་པའི་ས་བདག་ཐམས་ཅད་ཀུན། །བདུད་རྩི་གཏོར་མ་འདི་བཞེས་ལ། །བདེ་གཤེགས་མཆོད་རྟེན་བཞེངས་པའི་ཕྱིར། །ས་འདི་བདག་ལ་གནང་བར་མཛོད། །ཅེས་དང་། སཙྪའི་ཆོ་ག་བསོད་ནམས་རི་བོ་ལས། བདག་གིས་མཆོད་རྟེན་མང་བཞེངས་པའི། །དགེ་བའི་ཆ་ཤས་ཁྱེད་ལ་བྱིན། །དེ་ཕྱིར་དགེ་ཞིང་བྱང་སེམས་ཀྱིས། །ས་འདི་བཀྲ་ཤིས་མཛད་དུ་གསོལ། །བརྗོད་པས་བརྟན་མ་ལ་སོགས་དགྱེས། །ས་འདི་གནང་བས་འགྲོ་དོན་སྤྱོད། །གསུངས་ནས་བརྟན་མ་ས་ལ་ཐིམ། །ས་བདག་གཞན་རྣམས་བྱེར་བར་གྱུར། །ཞེས་པ་བརྗོད་དེ་ས་དེ་ས་བདག་གིས་བྱིན་གྱིས་བརླབས་པའི་དངོས་གྲུབ་ཆེན་པོར་སྒོམ་ལ་ཁྱིམ་དུ་འཁྱེར་ཏེ་རིན་ཆེན་བརྡར་ཞིང་སྤོས་ཆུས་བྲན་པར་བྱ། དེ་ནས་འབྲུ་གཙང་མ་ལ་རྟེན་འབྲེལ་སྙིང་བོ་དང་གཟུངས་སྔགས་བཟླས་པའི་གཟུངས་གཞུག་སོགས་སྟ་གོན་བྱ། གཙང་སྦྲ་དང་ལྡན་པའི་ངང་ནས་མི་འཁྲུགས་པའི་གཟུངས་དང་། ངན་སོང་སྦྱོང་རྒྱུད་ཀྱི་གཟུངས་བསྔོ་སྨོན་རྣམ་དག་སོགས་སྔོན་དུ་བཏང་ནས། སཙྪ་འདེབས་པའི་སྔགས་འདི་རྣམས་སོ་སོར་བརྗོད་དགོས་ཏེ། འཇིམ་པ་བླངས་པའི་སྔགས། ཨོཾ་ན་མཿས་མནྟ་བུདྡྷ་ནན་ཨོཾ་བཛྲ་ཨཱ་ཡུ་ཥེ་སྭཱ་ཧཱ། བཟླས་ཏེ། འཇིམ་གཙང་བླངས་ནས། ཚེ་འདས་ཡིན་ན་སྐྲ་དང་། རུས་པ་ཕྱེ་མར་བཏང་སྟེ་འཇིམ་པར་བསྲེས་དགོས་སོ། །དེ་ཡང་སཙྪའི་ཆོ་ག་བསོད་ནམས་རི་བོ་ལས། སྡིག་ཅན་མིན་ཞིང་ཉེ་དུ་མིན་པས་ནི། །རུས་པ་ཞིབ་པར་བརྡུང་ལ་ཆུ་ལ་སྦྱང་། །སེ་གཅིག་མེད་ཅིང་ཆུ་མདོག་འགྱུར་ཙམ་བྱ། །དེ་ཡི་ས་ཡིས་སྦྲུ་བར་བྱ་བ་སྟེ། །གསོན་པོའི་སོ་དང་སྐྲ་སེན་དེ་དང་མཚུངས། །གསུངས་སོ། །འབི་འབི་བྱ་བའི་སྔགས། ཨོཾ་བཛྲོ་དྡྷ་ཝྭཱ་ཡེ་སྭཱ་ཧཱ། སྣུམ་བྱུགས་པའི་སྔགས། ཨོཾ་ཨ་ར་ཛེ་བི་ར་ཛེ་སྭཱ་ཧཱ། སྐུ་སྤར་དུ་འཇུག་པའི་སྔགས། ཨོཾ་ངྷ་ཪྨཱ་དྷཱ་ཏུ་གརྦྷེསྭཱ་ཧཱ། གཟུངས་གཞུག་པའི་སྔགས། ཨོཾ་བཛྲ་དྷཱ་ཏུ་གརྦྷེ་སྭཱ་ཧཱ། བརྐོས་པོར་ལས་མ་བཏོན་གོང་དུ་འབྲུའི་གཟུངས་གཞུག་ན་སྟབས་བདེའོ། །ར་ག་ཨ་སེས་སྡིག་སྒྲིབ་དག་པར་ཨོ་ཨཿཧཱུཾ་དང་། ཡིག་བརྒྱ། རྟེན་འབྲེལ་སྙིང་བོའི་སྔགས་ནང་གཞུག་བྱེད་པར་ཡང་གསུངས་སོ། །འཇིམ་པ་བཅད་པའི་སྔགས། ཨོཾ་བྷ་ཡུ་ཏེ་སྭཱ་ཧཱ། བརྡུང་བའི་སྔགས། ཨོཾ་བཛྲ་མུངྒ་ར་ཨཱ་ཀོ་ཊྚ་ཡ་ཨཱ་ཀོ་ཊྚ་ཡ་ཧཱུཾ། བརྐོས་ཕོར་ལས་བཏོན་ཏེ་ཉི་མ་བསྐམ་པའམ། རབ་ཡིན་ན་སོར་བཏང་ན་ལེགས་པར་གསུངས་སོ། །རྟེན་འབྲེལ་སྙིང་བོའི་གཟུངས་སྔགས་ནི། ཡེ་དྷ་རྨ་སོགས་དང་། ས་དཀར་གསོལ་བའི་སྔགས་ནི། ཨོཾ་བཛྲ་ཨ་ར་ཛེ་བི་ར་ཛེ་སྭཱ་ཧཱ། མཐར་རབ་གནས་རྒྱས་བསྡུས་གང་རུང་བྱས་ཏེ། བསྔོ་སྨོན་སོགས་ཀྱིས་རྒྱས་འདེབས་པར་བྱའོ། །

ཡང་ན། སཙྪ་གདབ་སྐབས། ཚེ་འདས་ཀྱི་དོན་དུ་ཡིན་ན་རྩ་རིག་དང་ཀམ་ཀ་ནིའམ་མ་ཎི་བཟླ་ལ། སྒྲིབ་པ་དག་པར་འདོད་ན་ཡིག་བརྒྱ་དང་། ཚེ་རིང་བ་ལ་ཚེ་གཟུངས། ནད་ཞི་བ་ལ་སྨན་བླའི་སྔགས། སྲི་བཟློག་ལ་སོ་འབྲང་མ། ལོངས་སྤྱོད་རྒྱས་པར་ཛམ་ལྷའི་སྔགས་སོགས་བཟླའོ། །ཡང་དགེ་སློང་མ་དཔལ་མོའི་ལུགས་ཀྱི་ཐུགས་རྗེ་ཆེན་པོ་དམར་ཁྲིད་ལས། ས་བརྐོ་བ། ས་བྱིན་གྱིས་བརླབས་པ། འབི་འབིའི་སྔགས། འདེབས་པའི་སྔགས། ཕྱུང་བའི་སྔགས། བཞུགས་གསོལ་སྔགས། ཡེ་ཤེས་པ་བསྟིམ་སྔགས། རབ་གནས་སྔགས་སོགས་མ་ཎི་བཏོན་པའི་ཆོག་པར་གསུངས་པ་ནི། ཐུགས་རྗེ་ཆེན་པོ་ཡང་སྙིང་བསྡུས་པ་དང་། ཐུགས་རྗེ་ཆེན་པོ་གསང་འདུས་རྒྱུད་གཞུང་ལས། ཨོཾ་མ་ཎི་པདྨེ་ཧཱུཾ་ཧྲཱྀཿབཟླ་ཞིང་བཏབ་པས་ཆོག སྔགས་གཞན་མི་དགོས་པར་གསུངས་པའི་དགོངས་པའོ། །

མདོག་གི་ཁྱད་པར་ཡང་། སཙྪ་ཆོ་ག་བསོད་ནམས་རི་བོ་ལས། ཡིག་དྲུག་ནང་གཞུག་ཅན་རྣམས་སེར་བོ་བྱ། །མགོན་པོ་སྔགས་ཅན་ཉི་ཤུ་སྔོན་པོ་བྱ། །འབྲུ་གསུམ་ནང་གཞུག་ཅན་རྣམས་སེར་བོ་བྱ། །གཞན་པ་ཀུན་ལ་དཀར་རྩི་གསོལ་ན་ལེགས། །གསུངས་སོ། །

དེ་ལྟར་སཙྪ་གྲུབ་ཟིན་པ་དེ་ཇི་ལྟར་བྱ་ཞེ་ན། ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། ས་གཙང་སཙྪ་བཞི་མདོ་ཡི། །བསྐོར་བ་འཕེལ་བར་ཚ་ཁང་བྱ། །རུས་ཚ་བྲག་ཕུག་དབེན་པར་བཞུགས། །ཞེས་དང་། ལས་ཀྱི་སྒྲིབ་པ་རྣམས་སྦྱོང་བའི་གཟུངས་ལས། མཆོད་རྟེན་འབུམ་ལས་བྱས་ལ། གདུགས་དང་། རྒྱལ་མཚན་དང་། བ་དན་ལ་སོགས་པས་ལེགས་པར་མཆོད་ནས་རྒྱ་མཚོ་ཆེན་པོའམ། ཡང་ན། ཆུ་ཀླུང་དུ་བཤགས་ན། དེས་སེམས་ཅན་དམྱལ་བ་སོགས་ལས་ཐར་བར་འགྱུར་རོ། །ཞེས་དང་། བུ་སྟོན་རིན་པོ་ཆེས་ཀྱང་། གཤིན་པོ་རྗེས་འཛིན་གྱི་ཆེད་དུ་ཡང་སཙྪ་བྱས་རྗེས་ཆུ་ཀླུང་དུ་གཏོང་བའམ། ཡང་ན། ལམ་གྱི་བཞི་མདོར་མཆོད་རྟེན་བྱ་བ་གཉིས་སུ་གསུངས་པ་དང་།

ཡང་བསམ་དགོས་པ་ཞིག་ལ། པོ་ཏོ་བའི་གསུང་སྒྲོས་སུ། སཙྪ་ཆུ་ནང་དུ་བསྐྱུར་བའམ། ཡང་ན་ཆུ་འགྲམ་དུ་འཇོག་པ་ནི་མཆོད་རྟེན་འཇིག་པ་ཡིན་པས། ཉེ་བའི་མཚམས་མེད་དུ་འགྱུར་ཞེས་གསུངས་ཀྱང་། དེའི་དགོངས་པ་ནི། རང་གི་གནས་སོགས་སུ་འཇོག་མི་བདེ་བར་བསམ་ནས་ཆུ་ནང་དུ་བསྐྱུར་བ་སོགས་ལ་དགོངས་པ་ཡིན། ཞེས་གུང་ཐང་བསྟན་སྒྲོན་གྱིས་ཞིབ་ཆ་གཏོད་ཡོད་དོ། །

འོན་ཀྱང་། སྒྲིབ་པ་རྣམ་སྦྱོང་གི་གཟུངས་ལས། དེའི་མིང་བྲིས་པ་གཟུངས་སྔགས་བཟླས་བརྗོད་བྱེད་ཅིང་མཆོད་རྟེན་འབུམ་བྱས་པར་གདུགས་དང་། རྒྱལ་མཚན་དང་། བ་དན་ལ་སོགས་པས་ལེགས་པར་མཆོད་ནས་རྒྱ་མཚོ་ཆེན་པོའམ། ཡང་ན། ཆུ་ཀླུང་དུ་བཏང་ན། དེས་ནི་སེམས་ཅན་དམྱལ་བ་ལ་སོགས་པ་ལས་ཐར་བར་འགྱུར་རོ། །ཞེས་གསུངས་པ་ནི། ཚེ་འདས་ཀྱི་མིང་བྱང་བཅུག་པའམ་རུས་སྐྲ་སོགས་འདྲེས་ཏེ་མི་འཁྲུགས་པའི་རུས་ཆོག་བྱས་པ་ནི་ཆུར་གཤེགས་པར་བཤད་པ་ལས། སཙྪ་གཞན་རྣམས་ཆུར་དོར་མི་རུང་ཞེས་ཆོས་ཀྱི་དབང་ཕྱུག་དང་། དཀོན་མཆོག་འབངས། སྟག་ཚང་ལོ་ཙཱ་བ་སོགས་ཀྱིས་གསུངས་ལ། ར་ག་ཨ་སེས། སཙྪའི་ནང་མིང་བཅུག་པའམ། རུས་པ་སྐྲ་སོགས་འདྲེས་པ་ནི། བསྐོར་བ་མི་ཕོག་སར་བཞག་དགོས་ཀྱི། གལ་ཏེ་དེ་ལ་བསོད་ནམས་དང་ཡོན་ཏན་ཆེ་བས་བསྐོར་ན། ཚེ་འདས་ལ་གནོད་པ་འོད་སྲུང་རྫོགས་བྱེད་ཀྱི་གཏམ་རྒྱུད་དུ་སྦྱོར་ཀྱང། དེ་ནི་སེམས་དཔའ་སོགས་མ་ཡིན་པའི་ཕལ་བའི་རུས་སྐྲ་དང་། རུས་ཆོག་བྱེད་པ་པོ་ཐ་མལ་བ་ལ་དགོངས་པར་སྙམ་མོ། །སཙྪ་ཆུ་ཀླུང་དུ་གཤེགས་སྐབས། པཎ་ཆེན་དཔལ་ལྡན་ཡེ་ཤེས་ཀྱི་གསུང་བཞིན་རྒྱལ་སྲས་ཀྱིས་མཛད་པའི་ཆུ་གཤེགས་ཀྱི་ཆོ་ག་ཡོད་དོ། །

དེ་ལས་གཞན་གནས་ཀྱི་ཁྱད་པར་ནི། སཙྪའི་ཆོ་ག་བསོད་ནམས་རི་བོ་ལས། གཤིན་པོའི་རུས་ཆོག་གསོན་པོའི་སྐྲ་ཚ་ནི། །བསྐོར་བ་མི་ཁྱག་བསོད་ནམས་ཉམས་འགྱུར་ཕྱིར། །གནས་བདག་གདུག་པ་ཅན་ནི་མི་གནས་ཤིང་། །ས་དཔལ་བཟང་ཞིང་ས་དགྲ་མེད་པའི་ས། །འོག་ཏུ་བརླན་མེད་ཆར་བ་ཁེབས་པ་ཡི། །བྲག་ཕུག་ས་ཕུག་སོགས་སུ་སྦས་བྱས་ཏེ། །གནས་བདག་དེ་ལ་དཀར་གཏོར་ཕུལ་བར་བྱ། །དགོན་པ་གྲོང་བ་རི་ཁྲོད་གང་རུང་གི །ཤར་དུ་ཚ་ཁང་བྱས་ན་བཀྲ་མི་ཤིས། །ཤར་ལྷོ་མཚམས་སུ་བྱས་ན་ཟ་ཁ་འགགས། །ལྷོ་རུ་བྱས་ན་ནོར་དང་ལོངས་སྤྱོད་ཉམས། །ལྷོ་ནུབ་མཚམས་བྱས་བྱི་ཕག་ལོ་ལ་ངན། །ནུབ་ཏུ་བྱས་ན་ནད་ཉུང་རིམ་གྲོ་མཆོག །ནུབ་བྱང་མཚམས་སུ་བྱས་ན་སད་སེར་ཉུང་། །བྱང་དུ་བྱས་ན་དགྲ་དང་ཁ་མཆུ་ཉུང་། །བྱང་ཤར་མཚམས་བྱས་ཆུ་ཁམས་པ་ལ་ངན། །ལྟག་ཏུ་བྱས་ན་གཉའ་གནོན་མར་འགྲོ་ཆེ། །འོག་ཏུ་བྱས་ན་མལ་ས་ནོན་པ་ཡིན། །ཁྱིམ་གྱི་ནང་དུ་བླུགས་ཀྱང་ཕྱོགས་དེར་བརྩི། །ཁྱིམ་ནང་གང་དུ་ཚ་ཁང་བྱས་པ་ཡིས། །ས་རྒོད་གཉན་པོ་ཡིན་ཀྱང་ངེས་པར་ནོན། །སྐྲ་རྒན་གཡང་ཅན་རུས་ཚ་ཁྱིམ་བཞག་ན། །མི་གཡང་མི་ཉམས་བཀྲ་ཤིས་དགེ་བ་ཡིན། །འཆི་ལུགས་ངན་དང་གཞོན་ཤི་རུས་ཚ་ནི། །ཁྱིམ་དུ་མི་ཉལ་རི་ལ་བསྐྱལ་བ་ལེགས། །གསོན་པོའི་སྐྲ་སོའི་སཙྪ་ཁྱིམ་དུ་རུང་། །དེ་མིན་སཙྪ་གཙང་མ་ཚ་ཁང་གི། །གང་དུ་བྱ་སར་ས་འདེབས་རྒྱས་པར་བྱ། །དེ་མ་བྱས་ན་ལྷ་འདྲེའི་ཕོག་ཐུག་འོང་། །ཞེས་སོ། །

༥ སཙྪའི་དབྱེ་བ། ཐུགས་རྗེ་ཆེན་པོ་ཡང་སྙིང་འདུས་པའི་རྒྱུད་ལས། དེ་ནས་སཙྪ་རྣལ་འབྱོར་བཤད། །ས་ཆུ་མེ་རླུང་འབྱུང་བཞི་ལ། །ཡང་སྙིང་བཟླ་ཞིང་བརྐོས་ཕོར་གདབ། །ཅེས་དང་། དེའི་འགྲེལ་བ་སློབ་དཔོན་པདྨས་མཛད་པ་ལས། འབྱུང་བ་མེ་ཆུ་རླུང་གསུམ་ལ་བརྐོས་ཕོར་བསྟན་ཞིང་ཡང་སྙིང་བརྗོད་ཅིང་བཏབ་པས་འཕགས་པའི་སྐུ་ཝལ་ཝལ་བསམ་སྟེ། འཇིག་རྟེན་སྐྱོང་ཞིང་འགྲོ་དོན་མཛད་པར་བསམ་མོ། །ཞེས་དང་། ཤེས་པ་ཐམས་ཅད་མཐར་ཕྱིན་པར་གྲུབ་པའི་མཆོད་རྟེན་གྱི་གཟུངས་ལས་འབྱུང་བ་ཆེན་པོ་བཞི་ལ་མཆོད་རྟེན་གདབ་པར་གསུངས་པ་བཞིན། སར་གདབ་ཚུལ་ནི་སྔར་བཤད་ཟིན་པ་དང་། ཆུར་གདབ་སྐབས་ཆུ་རྒྱུན་དྭངས་གཙང་ལ་བརྐོས་ཕོར་ཡང་དང་ཡང་དུ་ཆུར་གདབ་པ་དང་། མེར་གདབ་ལ་དྲི་བཟང་གི་ཤིང་གི་མེ་ལྕེའི་སྟེང་དུ་གདབ་དགོས་པ་དང་། རླུང་ལ་ཡང་ཤར་ནས་ནུབ་ཏུ་རྒྱུ་བའི་རྫི་ཕྱོགས་སུ་གདབ་དགོས་པ་ཡིན། གཞན་ཡང་འབྱོར་ན་གསེར་དངུལ་དུ་གདབ་པའང་མཐོང་རྒྱུ་ཡོད།

ཡང་འཇུ་མི་ཕམ་གྱི་འཇམ་དཔལ་གྱི་སཙྪའི་ལས་ཚོགས་ལས་ས་ཆུ་མེ་རླུང་ནམ་མཁའ་ཆོས་ཉིད་ལ་གདབ་པ་དྲུག་གི་སྒོ་ནས་གདབ་པར་གསུངས་ཏེ། དེ་ཡང་། ཆོས་ཉིད་ལ་གདབ་པ་ནི། ཆོས་ཐམས་ཅད་སེམས་ཀྱི་སྣང་བ་ཙམ་ཡིན་ལ། སེམས་ནི་ངོ་བོ་ཉིད་ཀྱིས་སྟོང་བས་ཆོས་ཀྱི་དབྱིངས་ཡིན་ནོ། །ཆོས་དབྱིངས་དེའི་ངང་ལས་སྣང་བའི་ཆོས་ཐམས་ཅད་ཡེ་ཤེས་ཀྱི་རྣམ་པར་འཕྲུལ་བའི་ཆོས་ཀྱི་སྐུའི་མཆོད་རྟེན་དུ་མ་གྱུར་བ་གཅིག་ཀྱང་མེད་པར་བསམ་པས་གདབ་བོ། །ནམ་མཁའ་ལ་གདབ་པ་ནི། ནམ་མཁའ་ཐམས་ཅད་དུ་མཆོད་རྟེན་བཏབ་པར་བསྒོམས་ནས་རྐོས་ཕོར་ལག་ཏུ་ཐོགས་ཏེ། ལག་པའི་འདུ་བྱེད་ཀྱིས་བཏབ་པའི་ཚུལ་བྱའོ། །རླུང་འབྱུང་བ་ན་དེ་ལ་བཏབ་སྟེ་དེ་བཞིན་བསྒོམ། མེ་འབར་བ་ལ་བཏབ་པ་དང་། ཆུ་འགྲམ་དུ་ཆུ་ལ་བཏབ་སྟེ་ཆུ་ཡི་རྒྱུན་ཐམས་ཅད་མཆོད་རྟེན་ནམ་ཆུའི་རྡུལ་ཕྲན་རེ་རེ་མཆོད་རྟེན་དུ་གྱུར་བར་བསམ་པ་ནི་ཀུན་དང་འདྲའོ། །ཚུལ་འདི་ལ་དགོངས་ནས། ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། དེ་བཞིན་མེ་ཆུ་རླུང་ལ་ཡང་། །སྔགས་བཟླས་བརྐོས་ཕོར་གཡུག་པ་དང་། །དམིགས་པ་བསྒོམ་ན་ས་དང་འདྲ། །གསུངས་སོ། །

ས་ལ་ནི་རིན་པོ་ཆེའམ་གཞན་དངོས་བོ་གང་རུང་ལས་སྐུ་འམ་མཆོད་རྟེན་བྱ་བའམ། ཡང་ན་འཇིམ་པ་བཟང་བོ་ལ་བཏབ་པར་བྱ་སྟེ། དངོས་བོ་གང་ལའང་བཏབ་པས་ཆོག་གོ ། ཞེས་དང་། སྤྲོས་མེད་སྙིང་བོའི་ཚུལ་དུ་འདེབས་ན་ནམ་མཁའ་སོགས་ལ་བརྐོས་ཕོར་བཏབ་སྟེ་ཨོ་ཨཱ་ཿཧཱུཾ་འབའ་ཞིག་བརྗོད་པས་སངས་རྒྱས་ཐམས་ཅད་ཀྱི་ཡེ་ཤེས་ཆོས་སྐུའི་གཟུགས་བརྙན་གསང་གསུམ་མི་ཟད་པའི་བྱིན་རླབས་དང་ལྡན་པ་རེ་རེ་ལམ་ལམ་བྱུང་སྟེ། འཁོར་བ་སྲིད་དུ་གནས་པ་དང་། དེའི་ཚུལ་ནམ་མཁའ་སོགས་འབྱུང་བ་དེས་གར་ཁྱབ་དེ་ལྟར་གྱུར་བར་བསམས་པར་གསུངས་སོ། །སཙྪ་གདབ་པའི་དམིགས་ཡུལ་གྱི་དབང་དུ་བཏང་ན་ཇོ་བོ་རྗེས་རྣམ་པ་དགུ་གསུངས་ཏེ། དགེ་བའི་བཤེས་གཉེན་གྱི་ཐུགས་དགོངས་རྫོགས་པའི་དོན་དུ་གདབ་པ། ཕ་མའི་དོན་དུ་གདབ་པ། བསླབ་བྱ་དང་འགལ་བ་བཤགས་པའི་དོན་དུ་གདབ་པ། སྡིག་པ་ལྕི་བ་བྱང་བའི་དོན་དུ་གདབ་པ། ལོག་པའི་བཤེས་གཉེན་དང་སྡིག་གྲོགས་ཀྱི་དབང་དུ་མི་འགྲོ་བའི་དོན་དུ་གདབ་པ། འགྲོ་བ་མཐའ་དག་གི་དོན་དུ་གདབ་པ། འཆི་ཁ་མའི་སེམས་ཅན་ཐམས་ཅད་ཀྱི་དོན་དུ་གདབ་པ། བར་དོའི་སེམས་ཅན་ཐམས་ཅད་ཀྱི་དོན་དུ་གདབ་པ། སེམས་ཅན་ཐམས་ཅད་ཀྱི་དོན་དུ་གདབ་པ་བཅས་སོ། །

ཡང་། དོན་དམ་ནང་དང་གསང་བའི་སཙྪ་ནི། སཙྪའི་ཕན་ཡོན་རིན་ཆེན་ཕུང་བོ་ལས། དོན་དམ་ནང་དང་གསང་བའི་སཙྪ་ནི། །ཡང་སྙིང་འདུས་པའི་རྒྱུད་ལས་འདི་སྐད་གསུངས། །རང་ལུས་གཞལ་ཡས་མཆོད་རྟེན་ཁང་། །རྟོག་ཚོགས་ལྷར་གསལ་སཙྪ་དེ། །ཆོས་དབྱིངས་སྟོང་བའི་བརྐོས་ཕོར་དུ། །རིག་པ་ཡེ་ཤེས་མཆོད་རྟེན་གཞུག། མཆོད་རྟེན་མཆོག་ཏུ་བདག་འགྱུར་ངེས། །ཐབས་ཤེས་རྒྱུ་རྐྱེན་བརྐོས་ཕོར་དུ། །རང་ལུས་མཆོད་རྟེན་རང་སེམས་ནི། །ཐུགས་རྗེ་ཆེན་པོའི་ལྷ་ཚོགས་ཡིན། །ཆོས་དབྱིངས་སྟོང་བའི་བརྐོས་ཕོར་དུ། །སྣང་སྟོང་དབྱེར་མེད་མཆོད་རྟེན་ཏེ། །དེ་ལྟར་རྟོགས་པ་མཐར་ཕྱིན་ན། །རང་ཉིད་མཆོད་རྟེན་མཆོག་ཏུ་འགྱུར། །ནང་དང་གསང་བའི་སཙྪ་ཡིན། །ཞེས་གསུངས་སོ། །

༦ སཙྪ་བཏབ་པའི་ཕན་ཡོན། ཐུགས་རྗེ་ཆེན་པོ་གསང་འདུས་རྒྱུད་ལས། དེ་ནས་ཚོགས་ཆེན་གསག་པའི་ཕྱིར། །སཙྪའི་རིམ་པ་བཤད་པར་བྱ། །ས་བཟང་རིན་ཆེན་བརྡར་བ་ལ། །ཞེས་པ་ནས། ཡོན་ཏན་མཐའ་ཡས་བསམ་པ་འགྲུབ། །ཅེས་དང་། ཁྱད་པར་ཚེ་འདས་ཀྱི་ཆེད་དུ་སཙྪ་བཏབ་ན་ངན་སོང་ལས་སྦྱོང་བའི་གདམས་པ་ཟབ་མོ་སྟེ། འཇམ་དཔལ་ཆོ་ག་འདུས་པའི་རྒྱུད་ལས། གང་ཟག་ཚེ་ཡི་དུས་བྱས་པའི། །ངན་སོང་སྦྱོང་བའི་ཐབས་ཆེན་པོ། །རུས་པ་གོས་སམ་མིང་ལ་ནི། །ཡེ་ཤེས་སྐུ་ཡི་སྔགས་ཀྱིས་གདབ། །རྫས་རྣམས་ཀུན་དང་བསྲེས་ཏེ་འབྱུང་། །འཇིམ་པའི་ཕུང་བོ་རིན་ཆེན་ལྔ། །སྔགས་པ་རྣལ་འབྱོར་ལྡན་པ་ཡིས། །སཙྪ་ཕུང་བོ་དཔག་མེད་བྱ། །ནམ་མཁའི་ལྷ་རྣམས་སྤྱན་དྲངས་ལ། །གཉིས་སུ་མེད་པར་མཆོད་པས་མཆོད། །རབ་ཏུ་གནས་པ་ཚུལ་བཞིན་བྱ། །ཞེས་དང་། ངན་སོང་སྦྱོང་རྒྱུད་ལས། ཡང་ན་མེད་པར་གྱུར་ནའང་། །བཟླ་ཞིང་སྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ཀྱང་། །མཆོད་རྟེན་ཕྲེང་བ་བྱ་བ་དང་། །ཡང་ན་གཟུགས་སུ་བྱས་ཀྱང་རུང་། །སྦྱིན་སྲེག་མངོན་པར་དབང་བསྐུར་ན། །གདོན་མི་ཟ་བར་བདེ་འགྲོར་སྐྱེ། །ཞེས་དང་། དེ་ཡི་མིང་གི་སྨོས་ནས་ནི། །གུར་གུམ་བཟང་བོས་སྔགས་བྲིས་ལ། །རིམ་གྱིས་འབུམ་གྱི་ཚད་ཙམ་དུ། །མཆོད་རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེས་ནི་ངེས་པར་དམྱལ་གནས་ལ། །འདི་བྱས་པས་ནི་གྲོལ་བར་འགྱུར། །ཡི་དྭགས་བྱོལ་སོང་སྡུག་བསྔལ་ལས། །གྲོལ་ཏེ་ལྷ་ཡི་གནས་སུ་སྐྱེ། །ཞེས་དང་། འཆི་བླུའི་མན་ངག་ལས། བྱེ་མའི་མཆོད་རྟེན་བྱེད་པ་དང་། །དེ་བཞིན་སཙྪ་འདེབས་པ་དང་། །མཆོད་རྟེན་ལ་སོགས་ཕྱག་བྱས་པས། །ཚེ་ནི་ངེས་པར་འཕེལ་བར་འགྱུར། །ཞེས་དང་། སཙྪ་གདབ་པའི་ཆོ་ག་ལས། མཆོད་རྟེན་ལ་རྡུལ་ཕྲ་རབ་ཇི་སྙེད་ཅིག་ཡོད་པ་དེ་སྙེད་ཀྱིས་བྱེ་བ་བྱས་པར་འགྱུར་རོ། །རྡུལ་ཕྲ་རབ་ཀྱི་གྲངས་ཇི་སྙེད་ཀྱི་ལྷ་དང་མི་རྣམས་ཀྱི་སྐྱེ་བ་ཕུན་སུམ་ཚོགས་པ་ཐོབ་པར་འགྱུར་རོ། །གང་དང་གང་དུ་སྐྱེས་པ་ན་སྐྱེ་བ་དྲན་པར་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བ་ཡིན་ནོ། །ཞེས་གསུངས་སོ། །

ཡང་། སྒྲིབ་པ་སྦྱངས་པ་ལའང་སཙྪ་འདེབས་པ་ཕན་ཡོན་ཆེ་སྟེ། སྔོན་ཇོ་བོ་རྗེས་མངའ་བདག་མེ་ཏྲི་བ་གནས་དབྱུང་བཏང་བའི་རྣམ་སྨིན་གྱིས། རི་རབ་ལ་བསྐོར་བ་གསུམ་ཕོག་པའི་སེམས་ཅན་ཆེན་པོ་ཞིག་གི་སྐྱེ་བ་བླངས་ཏེ། བྱ་སྣ་ཚོགས་ཀྱིས་ཟ་བའི་སྡུག་བསྔལ་མྱོང་བར་འགྱུར་རོ་ཞེས། རྗེ་བཙུན་སྒྲོལ་མས་ལུང་དུ་བསྟན་པས། ཇོ་བོས་དེའི་སྒྲིབ་པ་སྦྱོང་བར་ཞུས་པས། ཁ་བ་ཅན་དུ་སོང་ལ་སངས་རྒྱས་ཀྱི་བསྟན་པ་དར་བར་གྱིས། ཉིན་རེ་བཞིན་སཙྪ་བདུན་བདུན་ཕྱག་བཏབ་ཚུལ་བཀའ་གདམས་པའི་གཞུང་ལས་གསུངས་པ་དང་། དེ་དང་མཐུན་པར་ར་ག་ཨ་སེའི་སཙྪ་སྤྱི་འགྲོས་ཕྱག་ལེན་ལས། པད་ཉི་ཟླ་སྟེང་སཙྪ་རྣམས། །རིན་ཆེན་མཆོད་རྟེན་དཔག་མེད་ནང་། །རྩ་གསུམ་རྒྱལ་བ་སྲས་བཅས་བཞུགས། །འོད་འཕྲོས་བདག་གཞན་སྒྲིབ་པ་སྦྱངས། །འགྲོ་དོན་དཔག་མེད་མཛད་པར་གྱུར། །ཞེས་པ་དང་མཐུན་ལ། ཡང་མི་ལས་མ་ཡུམ་གྱི་རུས་པས་སཙྪ་བཏབ་པ་དང་། དེ་བཞིན་རྗེ་བདག་ཉིད་ཆེན་པོ་སོགས་ཀྱིས་སཙྪ་འདེབས་པ་འདི་ཐུགས་དམ་ཀྱི་དཀྱིལ་དུ་བཟུང་ཚུལ་གུང་ཐང་བསྟན་སྒྲོན་གྱིས་གསུངས་པ་དང་། མདོར་ན། བདེ་བར་གཤེགས་པའི་རྟེན་གསུམ་གང་བཞེངས་ཀྱི་ཕན་ཡོན་ཅི་ཡོད། སཙྪ་ཆུང་ངུ་ཞིག་ལ་འང་ཡོད་པས་ཚེགས་ཆུང་ལ་དོན་ཆེ་བའི་ཕན་ཡོན་བསམ་གྱིས་མི་ཁྱབ་པ་ཡོད་དོ། །

ཡང་། སྐྱེས་ཆེན་ཁག་གིས་དད་ལྡན་ཀྱི་རེ་བ་སྐོང་སླད་སཙྪའི་ངོས་ཕྱག་ཐེལ་བཏབ་པའི་ཕྱག་ཚ་ནི་མཚོན་སྲུང་གདོན་ལ་སོགས་སྲུང་བའི་བྱེད་ནུས་ཡོད་པར་བཤད་དོ། །

གཞན་ཡང་། ར་ག་ཨ་སེའི་སཙྪའི་ཕན་ཡོན་རིན་པོ་ཆེའི་ཕུང་བོ་ལས་མང་དུ་གསུངས་ལ། དེ་ལས་མདོར་དྲིལ་ཏེ་བཤད་ན། ཚེ་འདིར་མངོན་ཤེས་ལྔ་འཐོབ་ཅིང་སྐྱེ་བ་ཀུན་ཏུ་རྒྱལ་བོར་སྐྱེས་པ། སྐྱེ་བ་དྲན་ཞིང་ཐོས་པ་མང་བ། རིམ་གྲོའི་རྒྱབ་རྟེན་དུ་འགྱུར་ཞིང་དངོས་གྲུབ་འཐོབ་པ་མྱུར་བ། འཕྲིན་ལས་འགྲུབ་ཅིང་སྡིག་ལྟུང་སྦྱང་བ། བར་ཆད་ཞི་ཞིང་སེམས་ཆོས་ལ་འཁོར་བ། བར་དོའི་འཇིགས་སྐྲག་ཞི་ཞིང་ངན་སོང་གི་སྐྱེ་སྒོ་འགོག་པ་སོགས་མང་དུ་གསུངས་སོ། །

སཙྪའི་རིག་གནས་ཀྱི་སྐོར་རྒྱས་པར་ཤེས་འདོད་པ་དག་གིས། དགེ་ལུགས་པའི་ཆོ་གར་མཚོན་ནའང་། རྒྱལ་དབང་ལྔ་བའི་སཙྪ་འདེབས་པའི་གསལ་བྱེད་ལེགས་ཚོགས་ལྷུན་གྲུབ། ཐུའུ་བཀྭན་ཆོས་ཀྱི་ཉི་མའི་འབྱུང་བ་ཆུ་ལ་སཙྪ་གདབ་པའི་ཚུལ། འཇོག་རི་ངག་དབང་བསྟན་འཛིན་འཕྲིན་ལས་ཀྱི་ཚེ་འདིར་སཙྪ་སོགས་ཆབ་འདྲེན་གྱི་ཆོ་ག ཁྲི་རྒན་འཇམ་དབྱངས་ཐུབ་བསྟན་རྒྱ་མཚོའི་གྲུབ་དབང་གཉན་ཚེམ་བུ་བའི་ལུགས་ཀྱི་ཐུགས་རྗེ་ཆེན་པོའི་རྣལ་འབྱོར་དང་འབྲེལ་བར་སཙྪ་འདེབས་ཚུལ་ལེགས་ཚོགས་ལྷུན་གྲུབ་སོགས་ལ་གཟིགས་པར་ཞུ།

དེ་ལྟར་རྣམ་གྲོལ་རྒྱལ་བའི་ཁྲི་འཕང་དུ་བགྲོད་པའི་ཐེས་སྐས་དུ་གྱུར་བ་ནི། སྔོན་འགྲོ་ཁྲིད་ཆེན་བཅུ་སྟེ། རང་ལེགས་སུ་རེ་བ་དག་གིས་ཐེག་པ་ལ་མཐོ་བསྙེགས་མི་བྱེད་པར། གདམས་པའི་སྙིང་ནོར་དུ་གྱུར་བའི་སྔོན་འགྲོ་ཁྲིད་ཆེན་བཅུ་ཉམས་སུ་བསྟར་ན། སངས་རྒྱས་ཀྱི་གོ་འཕང་ཟན་དྲོན་མོ་ལག་པས་བཟོས་པ་ལྟ་བུ་ཡོང་ལ། དེ་མིན། མི་ཚེ་ཐོས་བསམ་ལ་གཞོལ་བའི་རྟོག་གེ་མགོ་མཁྲེགས་ལ་སྐྱབས་སུ་རེ་ནས། སྔོན་འགྲོའི་བསགས་རྒྱབ་ཀྱི་གདམས་པ་མ་བསྟེན་ན། དཔེར་ན། སྐོམ་གྱིས་གདུང་བ་ཆོས་ཀྱི་ཆུ་ཀླུང་དུ་འཁྱེར་ཏེ་སྐོམ་པ་སེལ་མི་ནུས་པ་ལྟར། འཁོར་བ་ལས་སོར་གང་འཕགས་མི་ཐུབ་པར་མ་ཟད། ད་དུང་ལམ་དམན་ནས་དམན་པར་འགྲོ་བ་མང་བས། གདམས་པའི་མཆོག་གྱུར་སྔོན་འགྲོ་ཁྲིད་ཆེན་བཅུ། རང་གཞན་ཀུན་གྱིས་ཉམས་སུ་ལེགས་པར་བསྟར་ན། ཀུན་མཁྱེན་རྒྱལ་བ་དགྱེས་པའི་ལམ་པོ་ཆེར་བགྲོད་པའི་རྐང་སྟེགས་ཉིད་དུ་འགྱུར་བ་ནི་གདོན་མི་ཟའོ། །

 

ལེའུ་བདུན་པ། ཆོས་སྤྱོད་ཀྱི་སྐོར།
མར་མེ།

༡ མར་མེ་འབུལ་བའི་ཁུངས་ནི། འཕགས་པ་གྲོང་ཁྱེར་འཚོ་བའི་མདོ་ལས། རྒྱལ་བོ་གསལ་རྒྱལ་གྱིས་དེ་བཞིན་གཤེགས་པ་མཆོད་ཕྱིར་སྟོན་ཐ་ཆུང་ཉ་བའི་ཚེས་བཅོ་ལྔ་ལ། འབྲུ་མར་ཟངས་བོ་ཆེ་སྟོང་བཀང་སྟེ་དངར་ནས་མར་མེ་སྦར་བའི་འོད་ཀྱིས་ཁོ་ར་ཁོར་ཡུག་ཏུ་དཔག་ཚད་བཞིར་སྣང་བས་ཁྱབ་པར་བྱས་སོ། །ཞེས་དང་། སྤྱན་རས་གཟིགས་ཀྱི་མདོ་ལས། སངས་རྒྱས་མཆོད་རྟེན་མར་མེ་གཅིག་ཕུལ་ན། །འདི་ནས་བཟུང་སྟེ་སྲིད་པའི་རྩེ་མོའི་བར། །སངས་རྒྱས་ཞིང་ནི་འཛམ་གླིང་གསེར་གྱིས་བཀང་། །དེ་འདྲའི་དཔལ་དེ་ཟད་པར་བྱ་མི་ནུས། །བཅོམ་ལྡན་མཆོད་རྟེན་མར་མེ་ཕུལ་བྱས་ན། །དེ་ཡི་ལུས་ནི་མདོག་ངན་ཡོང་མི་འགྱུར། །ཞེས་དང་། དཀོན་མཆོག་ཏ་ལ་ལ་ལས། མིག་རྣམས་སྦྱོང་བའི་འོད་ཟེར་རབ་གཏོང་ཞིང་། །དེ་ཚེ་ལོང་བས་སྣ་ཚོགས་གཟུགས་རྣམས་མཐོང་། །རྒྱལ་བ་དག་དང་རྒྱལ་བའི་མཆོད་རྟེན་ལ། །མར་མེ་ཕུལ་བས་མིག་སྦྱོང་འོད་ཟེར་འཐོབ། །ཅེས་དང་། འབྲུ་མར་མར་མེ་མར་གྱི་མར་མེ་དང་། །རྩྭ་ཤིང་འདམ་བུ་འོད་མའི་སྒྲོན་མ་དང་། །སྤོས་དང་བཅུད་ལེན་རིན་ཆེན་སྒྲོན་མ་དང་། །རྒྱལ་བ་རྣམས་ལ་ཕུལ་བའི་འོད་ཟེར་འཐོབ། །སྒྲོན་ཞེས་བྱ་བའི་འོད་ཟེར་རབ་གཏོང་ཞིང་། །སེམས་ཅན་གང་དག་འོད་དེས་བསྐུལ་བྱས་པ། །དེ་དག་སྲེད་སྤངས་སྲིད་པའི་རྒྱ་མཚོ་ལས། །སེམས་ཅན་བསྒྲལ་བའི་དོན་དུ་གོ་ཆ་གྱོན། །ཞེས་དང་། གཞན་ཡང་ལས་རྣམ་འབྱེད་ཀྱི་མདོ་སོགས་ལས་མང་དུ་གསུངས་པ་དེའོ། །

༢ མར་མེའི་སྣོད་ནི། ལེགས་གྲུབ་ལས། གསེར་རམ་དངུལ་ལམ་ཟངས་མ་འམ། །ལྕགས་སམ་ཡང་ན་ཁམ་པ་ལས། །མར་མེ་བླུགས་པའི་སྣོད་བྱས་ན། །གསང་སྔགས་ཡོངས་སུ་མཉེས་པར་འགྱུར། །ཞེས་དང་། རྣམ་སྣང་མངོན་བྱང་ལས། མར་མེ་སྣོད་ཀྱི་གསེར་གྱི་བཟང་། །ཡང་ན་ཁམ་པའི་སེར་བོ་འང་རུང་། །བྱེ་བྲག་ཏུ། ཞི་བར་དངུལ་སོགས་དཀར་བོ། རྒྱས་པར་གསེར་སོགས་སེར་བོ། དབང་ལ་ཟངས་མ་སོགས་དམར་བོ། དྲག་པོར་ལྕགས་སོགས་ནག་པོའི་སྣོད་དགོས་པར་ཡང་གསུངས་སོ། །

༣ མར་མེ་ལག་ལེན་བྱེད་སྟངས་ནི། མར་མེ་ནི་གཟུགས་ཀྱི་མཆོད་པ་བླ་ན་མེད་པ་ཡིན་ལ། ཚོགས་བསགས་ཀྱི་དགེ་བ་སྟོབས་ཆེན་ཞིག་ཀྱང་ཡིན། ལག་ལེན་ནི། སྡོང་བུ་ལ་གསེར་དངུལ་ལས་བྱེད་པའམ། ཤེས་རབ་རྣོན་པོ་ཡོང་ཆེད་རྒྱ་ཁབ་ཀྱི་སྟེང་ལ་རས་བལ་གྱིས་དཀྲི་བ་འང་ཡོད། གཞན་དྲི་བཟང་ཅན་གྱི་རྩི་ཤིང་དང་ཤུག་པ་སོགས་སྦོམ་ཕྲ་རན་པར་བྱས་ཏེ། རྩ་བ་བརྟན་ལ་དྲང་ཞིང་རྩེ་མོ་རྣོ་བ་ལ། སྡོང་བུ་དཀྲི་བྱེད་དུ། མངོན་བྱང་ལས། ཤིང་བལ་དང་ནི་རས་གསར་དང་། །དུ་གུ་ལ་དང་གསོ་རས་དང་། །དེ་ལ་སོགས་པའི་སྙིང་བོ་བྱ། །ཞེས་དང་། དེ་ཡང་ལས་ཀྱི་བྱེ་བྲག་གིས། ཞི་བར་དཀར་བོ། རྒྱས་པར་སེར་བོ། དབང་ལ་དམར་བོ། དྲག་པོར་སྔོན་པོ་འམ་ནག་པོ་དཀྲི་བར་བཤད་ལ། དེ་ལྟར་རས་བལ་སོགས་ཀྱིས་ལན་གསུམ་དཀྲིས། རིང་ཐུང་རྐོང་བུའི་ཚད་ལ་དཔག་པར་བྱ། དེ་ནས་རྐོང་བུ་བྱི་བདར་ལེགས་པར་བགྱིས་ཏེ་སྡོང་བུ་བཙུགས་ནས། མར་གཙང་མ་བཙགས་ཐག་ཆོད་པར་བྱས་ཏེ། ཚགས་ཀྱི་ནང་ལྡུགས་བཞིན་ངག་ཏུ། ཨོཾ་ཨཱཿཧཱུཾ ཞེས་འདོན་བཞིན་བླུགས་ན་བགེགས་མི་ཞུགས་པར་གསུངས།

ཡང་། རྣམ་གྲོལ་ལག་བཅངས་ལས། མར་མེ་འོད་ཕུལ་བ་ཡིན་གྱི། མར་ཁུ་ཕུལ་བ་མིན་པས་ཅུང་ཟད་ཁ་ཚ་ཙམ་ཡོད་ཀྱང་ཆོག་པར་ཡང་གསུངས། བྱེ་བྲག་ཏུ། ལས་བཞི་འགྲུབ་པ་ལ་མར་ཁུའི་ཁྱད་པར་ཡང་བསྟན་དུ་ཡོད་དེ། ལེགས་གྲུབ་ལས། ཞི་བ་ལ་སོགས་བྱེ་བྲག་གིས། །དེ་ཡི་མར་ནི་དྲི་ཞིམ་པ། །འབྲུ་མར་བསུང་ཅན་ཡིད་འོང་བའམ། །ཡང་ན་དྲི་ཞིམ་མར་གྱིས་བྱ། །དྲི་ཞིམ་ཤིང་ལས་བྱུང་བའི་མར། །ཞི་བའི་ལས་ལ་ཤིས་པར་བྱ། །ཏིལ་མར་གྱིས་ནི་རྒྱས་པ་ལ། །དྲག་པོ་ལ་ནི་ཡུངས་མར་ཤིས། །རིགས་སྔགས་ཀུན་ལ་ཟར་མའི་མར། །འབྲས་བུ་ལས་བྱུང་གསང་སྔགས་ལ། །ཞེས་དང་། སྨན་རྣམས་ལས་ནི་བྱུང་བའི་མར། །དེ་ཀུན་རྒྱས་པའི་ལས་ལ་གསུངས། །དྲི་ཞིམ་ཐམས་ཅད་ཞི་བ་ལ། །དྲག་སྤྱོད་ལ་ནི་དྲི་ངད་རྣམས། །ཞེས་དང་། གཞན་ཡང་ལེགས་གྲུབ་ལས། ལས་རྣམས་དག་ནི་ཐམས་ཅད་ལ། །དམར་སེར་བ་མར་མཆོག་ཏུ་གསུངས། །ཞེས་དང་། ཁ་བའི་ཤིང་ལས་བྱུང་བའི་མར། །ཕལ་བ་རྣམས་ལ་ཡོངས་སུ་བསྒྲགས། །ཤ་ཟ་རྣམས་ལ་ཉ་ཡི་མར། །གནོད་སྦྱིན་རྣམས་ལ་ཚིལ་བུར་བཤད། །ཤིན་ཏུ་དམན་པ་གཞན་རྣམས་ལ། །བྷ་ལ་ཏ་ཀ་ལ་སོགས་མར། །དུར་ཁྲོད་པ་ནི་ཐམས་ཅད་དང་། །རོ་ལངས་ལ་སོགས་དངོས་གྲུབ་ལ། །ཁྱད་པར་དུ་ནི་ཚིལ་ཆེན་གྱི། །སྣུམ་ནི་རྗེས་སུ་མཐུན་པ་ཡིན། །ཞེས་གསུངས་པ་ལྟར། མགོན་པོའི་ཆོ་ག་ལས། གདུག་པའི་དགྲ་བགེགས་རྣམས་ཀྱི་ཞུན་ཆེན་པོ། །སྐྲ་ཡི་རས་ཀྱི་སྡོང་བུར་བཅས་པ་ལ། །ཡི་དྭགས་མེ་ཡིས་སྦར་བའི་སྒྲོན་མེ་འདིས། །མྱུར་མཛད་ཡེ་ཤེས་མགོན་པོའི་ཐུགས་དམ་བསྐང་། །ཞེས་སོགས་གསུངས་པ་ནི། སྔགས་བླ་མེད་ཀྱི་རྟོགས་པ་ཡ་ཚད་པ་ཞིག་ལ་གསུངས་ཀྱི། རང་ག་བས་མ་ཡིན་ནོ། །

༤ མར་མེ་སྦར་ཚུལ་དང་འདོན་ཆོག མེ་མ་ཤི་ཙམ་པའི་འོད་ཀྱིས་རྒྱུན་རིང་བོར་བྱེད་པས། ཚེ་རིང་བའི་རྟེན་འབྲེལ་ཡོད་པ་དང་། སྡོང་བུ་ཧ་ཅང་སྦོམ་པའི་མྱུར་དུ་སྦར་བར་མི་བྱེད་པར་འོད་གསལ་བའི་སྟེང་ནས། དལ་འབར་བྱས་ན་ལེགས་པར་བསྟན་རིམ་ལས་གསུངས་སོ། །

མར་མེ་སྒྲོན་ཚེ་ངག་ཏུ། མར་ཁུ་རྒྱ་མཚོ་ཡོངས་སུ་འཁྱིལ་བའི་རྐོང་། །ཕུན་ཚོགས་འོད་སྟོང་འབར་བའི་སྒྲོན་མེ་འདིས། །མུན་པའི་བསྐལ་བ་ཡོངས་སུ་སངས་བྱས་ནས། །འགྲོ་རྣམས་སངས་རྒྱས་མངོན་སུམ་མཐོང་བར་ཤོག། ཅེས་དང་། ཡང་ན། ཇོ་བོ་རྗེ་དབུས་གཙང་གི་གཙུག་ལག་ཁང་ཁག་གི་མཆོད་མཇལ་སྐབས། དཔོན་སློབ་བཅོ་བརྒྱད་ཀྱིས་མགྲིན་གཅིག་ཏུ་གསུངས་པའི་མར་མེའི་འདོན་ཆོག་ནི། འདི་ལྟར། ཨོཾ་ཨཱཿཧཱུཾ ། མར་མེའི་སྣོད་ནི་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཀྱི་ཁོར་ཡུག་དང་མཉམ་པར་གྱུར་ཅིག མར་མེའི་སྡོང་བུ་ནི་རི་ཡི་རྒྱལ་བོ་རི་རབ་ཙམ་དུ་གྱུར་ཅིག མར་ཁུ་ནི་མཐའི་རྒྱ་མཚོ་ཙམ་དུ་གྱུར་ཅིག གྲངས་ནི་སངས་རྒྱས་རེ་རེའི་མདུན་དུ་དུང་ཕྱུར་རེ་རེ་གསལ་བར་གྱུར་ཅིག འོད་ཀྱིས་སྲིད་པ་རྩེ་མོའི་མན་ཆད་དང་མནར་མེད་པའི་དམྱལ་ཁམས་ཡན་ཆད་ཀྱི་སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ་ནས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཞིང་མངོན་སུམ་དུ་མཐོང་ཞིང་གསལ་བར་གྱུར་ཅིག ཨོཾ་བཛྲ་དྷ་རྨ་ཨཱ་ལོ་ཀེ་ཨཱཿཧཱུཾ། ཨེ་མ་ཧོ། ངོ་མཚར་རྨད་བྱུང་སྣང་གསལ་སྒྲོན་མེ་འདི། །བསྐལ་བཟང་སངས་རྒྱས་སྟོང་རྩ་ལ་སོགས་པའི། །རབ་འབྱམས་ཕྱོགས་བཅུའི་ཞིང་ཁམས་མ་ལུས་པའི། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །དཀྱིལ་འཁོར་ལྷ་ཚོགས་རྣམས་ལ་འབུལ་བར་བགྱི། །ཕ་མའི་གཙོ་བྱས་སེམས་ཅན་ཐམས་ཅད་ཀྱི། །ཚེ་རབས་འདི་དང་སྐྱེ་གནས་ཐམས་ཅད་དུ། །རྫོགས་སངས་རྒྱས་པའི་ཞིང་ཁམས་མངོན་མཐོང་ནས། །འོད་དཔག་མེད་མགོན་ཉིད་དང་དབྱེར་མེད་ཤོག །དཀོན་མཆོག་གསུམ་དང་རྩ་གསུམ་ལྷ་ཚོགས་ཀྱིས། །བདེན་པའི་མཐུ་ཡིས་སྨོན་ལམ་ཅི་བཏབ་པ། །མྱུར་ཏུ་འགྲུབ་པར་བྱིན་གྱིས་བརླབ་ཏུ་གསོལ། །ཏ་དྱཐཱ། པཙྙ་ནྡྲྀ་ཡ་ཨཱ་བ་བོ་དྷཱ་ན་ཡེ་སྭཱ་ཧཱ། ཞེས་སོ། །

གཞན་ཡང་། མཆོད་མེ་སྦར་སྐབས་མཆོད་པའི་འགྱུར་སྔགས་དང་། མར་མེ་འདི་ཡིས་བསོད་ནམས་ཀྱིས། །མ་རིག་མུན་པ་སེལ་བར་ཤོག །ཡེ་ཤེས་སྤྱན་དང་ལྡན་པར་ཤོག ། ཤེས་རབ་རྩ་ཁ་དབྱེ་བར་ཤོག །སོགས་སྐབས་བབ་མར་མེ་དང་འབྲེལ་བའི་སྨོན་ལམ་སྣ་ཚོགས་བཏོན་ན་ཕན་ཡོན་ཆེའོ། །གཞན་ཡང་། ཅོ་ནེ་གྲགས་པ་བཤད་སྒྲུབ་ཀྱི་མར་མེ་འབུལ་ཚུལ་སྨོན་ལམ་དང་བཅས་པ་ཞེས་པར་ཡང་གསལ་ལོ། །

༥ མར་མེའི་མཚོན་དོན་ནི། སྡོང་ཤིང་གི་རྩེ་མོ་རྣོ་བའི་ཤེས་རབ་རྣོ་བ། སྡོང་བུའི་རྩ་བ་བརྟན་པས་བསམ་གཏན་གྱི་རྩ་བ་བརྟན་པ། སྡོང་བལ་རིམ་པ་གསུམ་དུ་དཀྲིས་བས་ཚུལ་ཁྲིམས་དང་། བཟོད་པ། བརྩོན་འགྲུས་གསུམ། མར་ཁུ་མེར་གྱིས་བཀང་བས་སྦྱིན་པ་སྟེ་ཕར་ཕྱིན་དྲུག་མཚོན། ཡང་འཇུ་མི་ཕམ་གྱིས། སྣོད་ཀོང་བུ། བཅུད་མར་ཁུ། རྒྱུད་རྣམ་ཤེས་མར་མེ། སྟོང་བ་སྣོད། གསལ་བ་མར་ཁུ། ཟུང་འཇུག་མར་མེ། ལུས་རྩ་ཡི་རྐོང་བུ། དྭངས་མ་ལྔ་མར་ཁུ། མི་ཤིགས་ཏིལ་ཀ་མར་མེ་སོགས་གཞི་ལམ་འབྲས་བུའི་མཚོན་དོན་ཁྱད་པར་ཅན་ཡོད་པར་གསུངས་སོ། །

༥ ཕན་ཡོན་ནི། མདོ་སྡེ﹝ཚ﹞དུམ་པ་ལས། འཕགས་པ་མར་མེ་འབུལ་བ་ཞེས་བྱ་བའི་ཐེག་པ་ཆེན་པོའི་མདོ་ལས། སྦྱོར་བ་ཕུན་སུམ་ཚོགས་པས་ཐ་ན་མར་མེ་སྙིང་བོ་ཆུང་ངུ་འམ་ངན་པ་ཞིག་འབྲུ་མར་གྱིས་བསྐུས་སམ། མར་གྱིས་བསྐུས་ཏེ་འབུལ་ལམ། ངེས་པར་འབུལ་ལམ། འཇོག་པར་བྱེད་པ་དང་། དགེ་བ་དོན་དུ་གཉེར་བས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ཕྱི་མའི་མཐའི་སྐྱེ་བའི་འཁོར་བ་སྤངས་པ། དེ་ལྟར་བྱུང་ན། ཚུལ་ཁྲིམས་དང་། ཏིང་འཛིན་དང་། ཤེས་རབ་དང་། རྣམ་པར་གྲོལ་བ་སོགས་རྒྱ་ཆེར་གསུངས་སོ། །གཞན་ཡང་སེམས་ཀྱི་ངེས་པར་སེམས་པ་གསུམ། འཆི་བའི་དུས་ཀྱི་སྣང་བ་གསུམ་མམ་བཞི། ཟང་ཟིང་མེད་པའི་དགའ་བ་བཞི། འདུན་པ་བཞི། ཡོངས་སུ་དག་པ་བཞི། ཆོས་ཀྱི་མཆོག་བརྒྱད། སོ་སོ་ཡང་དག་བཞི་སོགས་འཐོབ་པར་གསུངས་སོ། །མར་མེ་ཕུལ་བས་མངོན་ཤེས་འགྲུབ་པ་དང་། ཆོས་ཀྱི་མིག་རྣམ་པར་དག་པ་འཐོབ་པ། ཁྱད་པར་དུ་མ་རྒྱུད་ཀྱི་གཏུམ་མོའི་རྣལ་འབྱོར་ལ་བརྟེན་ནས། བདེ་ཆེན་འོད་གསལ་གྱི་ཡེ་ཤེས་འདྲེན་པ། གཟུགས་མཛེས་པར་འོང་བ། ལུས་ལ་འོད་སྣང་རྒྱས་པ། ཞེས་དང་། རིན་ཆེན་ཕྲེང་བར། མཆོད་རྟེན་མར་མེ་ཕྲེང་བ་དང་། །མུན་ཁུང་དག་ཏུ་སྒྲོན་མེ་དང་། །མར་མེ་འབྲུ་མར་བྱིན་པ་ཡིས། །ལྷ་ཡི་མིག་ནི་འཐོབ་པར་འགྱུར། །ཞེས་དང་། གཞན་ཡང་། ལས་རྣམ་འབྱེད་ཀྱི་མདོ་ལས། དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བའི་ཕན་ཡོན་བཅུ་གསུངས་སོ། །

མདོ་ལས། མར་མེ་ཅུང་ཟད་ཞིག་ཕུལ་བ་དེའི་བསོད་ནམས་སངས་རྒྱས་བཅོམ་ལྡན་འདས་ཁོ་ན་མ་གཏོགས། འཇིག་རྟེན་ན་སུས་ཀྱང་བསྟན་མི་ནུས་པར་གསུངས་པ་བཞིན། འདིར་མར་མེ་ཕན་ཡོན་ལ་མཁོ་བའི་སྔོན་གྱི་བྱུང་བ་ཞིག་བཀོད་ན། སངས་རྒྱས་མཉན་ཡོད་དུ་བཞུགས་པའི་ཚེ། དགེ་སློང་གི་དགེ་འདུན་རྣམས་ལ་མཆོད་པ་རྣམ་པ་སྣ་ཚོགས་ཀྱིས་རབ་ཏུ་མཆོད་དོ། །དེའི་ཚེ་ཡུལ་དེ་ན། དབུལ་མོ་བསྙེན་དགའ་མོ་བྱ་བའི་བུད་མེད་ཅི་ཡང་མི་བདོག་པ་ཞིག་མཆིས་པ་ལས། རྒྱལ་བོ་དང་བློན་པོ་སོགས་ཀྱིས། བཅོམ་ལྡན་འདས་དང་དགེ་སློང་གི་དགེ་འདུན་རྣམས་ལ། མཆོད་པ་རྣམ་པ་སྣ་ཚོགས་ཀྱིས་མཆོད་པར་མཐོང་ནས་འདི་སྙམ་དུ། ཀྱེ་མ་ངས་མི་དགེ་བའི་ལས་ཅི་ཞིག་བྱས་པས་འདི་ལྟར་དབུལ་ཞིང་རིགས་ངན་དུ་སྐྱེས་པར་གྱུར། ད་བསོད་ནམས་ཀྱི་ཞིང་ཕུན་སུམ་ཚོགས་པ་དང་འཕྲད་ཀྱང་། བདག་ལ་ནི་བསོད་ནམས་གསོག་པའི་དངོས་བོ་ཅི་ཡང་མེད་དོ་སྙམ་ནས། ཤིན་ཏུ་ཡི་མུག་ཅིང་། ཉི་མ་གཅིག་གི་རིང་སློང་མོ་བྱས་ཀྱང་དོང་ཙེ་གཅིག་ལས་མ་རྙེད་དོ། །དེ་ནས་བསྙེན་དགའ་མོ་མར་འཚོང་ཁང་ཞིག་གི་ཁྱིམ་དུ་སོང་སྟེ། དོང་ཙེ་གཅིག་པུས་མར་ཉོས་པས། མར་འཚོང་བའི་ཁྱིམ་བདག་གིས་སྨྲས་པ། དོང་ཙེ་གཅིག་གིས་མར་ཉོ་བ་ནི་ཧ་ཅང་ཉུངས་ཆེས་པས། ཁྱོད་ལ་འདི་ལྟ་བུའི་མར་ཉུང་ངུ་ཞིག་གིས་ཅི་ཞིག་བྱ། བསྙེན་དགའ་མོས་སྨྲས་པ། རྒྱལ་བོ་དང་བློན་པོ། ཁྱིམ་བདག་དད་པ་ཅན་རྣམས་ཀྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་མཆོད་པ་རྣམ་པ་སྣ་ཚོགས་ཀྱིས་མཆོད་ཅིང་ཚོགས་རྒྱ་ཆེན་པོ་གསོག་པར་བྱེད་དོ། །ཁོ་མོ་ནི་འདི་ལྟར་དབུལ་ཞིང་ཕོངས་ཆེ་བས། བསོད་ནམས་བྱ་བའི་དངོས་བོ་གཞན་ཅི་ཡང་མེད་པས། ཉི་མ་གཅིག་ལ་སློང་མོ་བྱས་པ་ལས་ཐོབ་པའི་དོང་ཙེ་གཅིག་པོ་འདིས། སངས་རྒྱས་དང་དགེ་འདུན་ལ་མཆོད་པའི་ཕྱིར་མར་ཉོ་བ་ཡིན་ནོ། །ཞེས་སྨྲས་པ་དང་། ཁྱིམ་བདག་གིས་ཀྱང་སྙིང་རྗེ་ནས་མར་ལྷག་པར་བྱིན་ནོ། །དེ་ནས་བསྙེན་དགའ་མོས་མར་དེ་ཐོབ་པར་རབ་ཏུ་དགའ་ནས་གཙུག་ལག་ཁང་དུ་སོང་སྟེ། བཅོམ་ལྡན་འདས་ཀྱི་སྤྱན་སྔར་མར་མེ་ཆུང་ངུ་ཞིག་བཙུགས་ནས། བདག་ད་ལྟ་དབུལ་ཞིང་ཕོངས་པས། མར་མེ་ཆུང་ངུ་འདིས་སངས་རྒྱས་ལ་མཆོད་དོ། །བསོད་ནམས་འདིས་མ་འོངས་པའི་དུས་ན་བདག་ཤེས་རབ་གྱི་མར་མེ་དང་ལྡན་ནས། སེམས་ཅན་ཐམས་ཅད་ཀྱི་མུན་པའི་དྲི་མ་བསལ་བར་ཤོག་ཅིག ཅེས་སྨོན་ལམ་བཏབ་ནས་རང་གི་གནས་སུ་སོང་ངོ་། །དེའི་ཚེ་འཕགས་པ་མོའུ་འགལ་གྱི་བུ་ཆེན་པོ་དུས་འཛིན་པའི་རེས་ལ་བབ་པས། ནངས་སྔ་མོར་གཟིམ་ལས་ལྡང་བ་ན། མར་མེ་གཞན་རྣམས་ནི་ཤི་ཟིན་ཀྱང་། བསྙེན་དགའ་མོའི་མར་མེ་གཅིག་པུ་ནི་ལྷག་པར་གསལ་ཞིང་། མར་དང་སྙིང་བོ་ཡང་མ་ཉམས་པར་གསར་དུ་བཙུགས་མ་ཐག་པ་ཞིག་དང་འདྲ་བས། ད་ནི་ནམ་ལངས་ཟིན་པའི་ཉིན་པར་མར་མེ་བཙུགས་ཀྱང་ཕན་པ་མེད་དོ་སྙམ་ནས་གསད་པར་གཟས་བས་མ་སོད་དོ། །དེ་ནས་ལག་པས་གསད་པར་གཟས་ནའང་མ་སོད་དོ། །དེ་ནས་གོས་ཀྱིས་གསད་པར་གཟས་ནའང་མ་སོད་པ་བཅོམ་ལྡན་འདས་ཀྱིས་གཟིགས་ནས། བཀའ་བསྩལ་བ། ཁྱོད་ཀྱིས་མར་མེ་འདི་གསོད་པར་གཟས་ཀྱང་མར་མེ་འདི་ནི་ཁྱོད་ཀྱིས་མི་སོད་དོ། །ཁྱོད་ཉན་ཐོས་རྣམས་ཀྱིས་བསྒུལ་ཞིང་བསྐྱོད་པར་ནུས་པའང་མ་ཡིན་ནོ། །གལ་ཏེ་ཁྱོད་ཀྱིས་རྒྱ་མཚོ་ཆེན་པོ་བཞིའི་ཆུ་ཕབ་བམ་རྫི་རླུང་གཡུག་པས་ཀྱང་སོད་པར་མི་འགྱུར་རོ། །མར་མེ་འདི་ལྷག་པའི་བསམ་པ་རྒྱ་ཆེན་པོ་བསྐྱེད་ནས་ཕུལ་བ་ཡིན་པས། མར་མེ་འདི་ལ་བསོད་ནམས་དཔག་ཏུ་མེད་པ་འབྱུང་བར་འགྱུར་རོ། །ཞེས་བཅོམ་ལྡན་འདས་ཀྱིས་མར་མེ་ཆུང་ངུ་དེའི་བསྔགས་པ་བརྗོད་པ་བསྙེན་དགའ་མོས་ཐོས་ནས། བཅོམ་ལྡན་འདས་ཀྱི་དྲུང་དུ་འོང་སྟེ། ཞབས་ལ་སྤྱི་བོས་ཕྱག་འཚལ་བ་དང་། བཅོམ་ལྡན་འདས་ཀྱིས་ཁྱོད་མ་འོངས་པའི་དུས་བསྐལ་བ་གྲངས་མེད་པ་གཉིས་འདས་ནས་མངོན་པར་རྫོགས་པའི་སངས་རྒྱས་ཏེ། མཚན་ཡང་མར་མེ་འོད་ཅེས་བྱ་བར་འགྱུར་རོ། །ཞེས་ལུང་བསྟན་ཏོ། །དེ་ལྟར་དབུལ་མོ་བསྙེན་དགའ་མོས་མར་མེ་གཅིག་ཕུལ་བའི་སངས་རྒྱས་སུ་ལུང་བསྟན་ཏོ་ཞེས་ཀུན་ལ་གྲགས་པས། ཡུལ་མི་ཀུན་གྱིས་མཆོད་མེ་ཕུལ་ཏེ་རྒྱལ་བུ་རྒྱལ་བྱེད་ཀྱི་ཚལ་ཡོངས་སུ་གང་བར་གྱུར་ཏེ། མཚན་མོ་ཡང་ཉིན་མོ་ལྟར་གྱུར་ནས་ཞག་བདུན་ལ་ཕུལ་ཏོ། །དེ་ནས་ཀུན་དགའ་བོས་བཅོམ་ལྡན་འདས་ཀྱིས་སྔོན་ལས་ཅི་ཞིག་བགྱིས་ནས་འདི་ལྟ་བུའི་མར་མེ་ཕུལ་བ་དང་ལྡན་པར་གྱུར་ཞེས་གསོལ་བ་དང། བཅོམ་ལྡན་འདས་ཀྱིས་བཀའ་བསྩལ་བ། སྔོན་དེ་བཞིན་གཤེགས་པ་རིན་ཆེན་གཙུག་ཕུད་ཅན་ཞེས་བྱ་བ་འཇིག་རྟེན་དུ་འཚོ་ཞིང་བཞེས་པའི་ཚེ། དགེ་སློང་འཕགས་པའི་གཉེན་ཞེས་བྱ་བ་ཞིག་གིས་ཟླ་བ་གསུམ་ལ་མར་མེ་ཕུལ་བའི་ཡོན་བདག་ཏུ་ཁས་བླངས་ནས། ཚོང་དཔོན་དང་། ཁྱིམ་བདག་དང་། མི་མང་བོ་ལས་མར་དང་། འབྲུ་མར་དང་། མར་མེའི་སྙིང་བོ་བསླངས་སོ། །དེའི་ཚེ་རྒྱལ་བོའི་བུ་མོ་ཐུབ་པ་ཞེས་བྱ་བས། དགེ་སློང་དེ་ཉི་མ་རེ་རེ་བཞིན་གྲོང་དུ་རྒྱུ་ཞིང་དཀའ་ལས་མང་བོ་བྱེད་པ་མཐོང་ནས། བཙུན་པ་ཁྱེད་ཀྱིས་ཅི་ཞིག་སྒྲུབ་ན། རྟག་པར་འདི་ལྟ་བུའི་བྲེལ་བ་ཆེ་བར་འགྱུར་ཞེས་དྲིས་པས། འཕགས་པའི་གཉེན་གྱིས་ཇི་ལྟར་གྱུར་བའི་གཏམ་རྒྱས་པར་བཤད་དོ། །བུ་མོས་སྨྲས་པ། དེང་ཕྱིན་ཆད་ཁྱོད་ཀྱིས་དེ་ལྟར་འབད་པས་འཚོལ་མི་དགོས་ཀྱི། ཅི་འདོད་པའི་ཡོ་བྱད་ཁོ་མོས་སྦྱོར་རོ་ཞེས་ཞུས་སོ། །དེ་ནས་ཟླ་བ་དྲུག་ཚང་བར་གྱུར་བའི་ཚེ་བཅོམ་ལྡན་འདས་ཀྱིས་དགེ་སློང་འཕགས་པའི་གཉེན་བསྐལ་བ་གྲངས་མེད་པ་གཅིག་འདས་ནས་མར་མེ་མཛད་ཅེས་བྱ་བར་སངས་རྒྱས་པར་ལུང་བསྟན་པས། རྒྱལ་བོའི་བུ་མོའི་བསམ་པར། དགེ་སློང་འདི་ནི་མ་འོངས་པར་སངས་རྒྱས་མར་མེ་མཛད་དུ་ལུང་དུ་བསྟན་ན། ཡོ་བྱད་ཁོ་མོས་སྦྱར་ཡང་ང་ནི་ལུང་མ་བསྟན་ཏོ་སྙམ་མོ། །བཅོམ་ལྡན་འདས་ཀྱིས་བུ་མོ་དེའི་བསམ་པ་མཁྱེན་ནས། བུ་མོ་ཁྱོད་མ་འོངས་པའི་དུས་བསྐལ་བ་གྲངས་མེད་པ་དགུ་བཅུ་རྩ་གཅིག་འདས་པ་ན། མངོན་པར་རྫོགས་པར་འཚང་རྒྱ་སྟེ། མཚན་ཡང་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་སོགས་ཕན་ཡོན་བསམ་གྱིས་མི་ཁྱབ་བོ། །

༦ ལག་ལེན་མ་དག་པའི་ཉེས་པ་ནི། སྣོད་གཙང་མར་མ་ཕྱིས་པས་ཕྱི་མར་གཟུགས་མི་སྡུག་པར་སྐྱེས། སེར་སྣ་ཤོར་བས་ཡི་དྭགས་སུ་སྐྱེས། མར་ཁུ་རུལ་སྙིགས་དང་ས་རྡུལ་གྱིས་སྦགས་པས་དུད་འགྲོར་སྐྱེས་པ་སོགས་སོ། །

གཞན་ཡང་། མར་མེ་ལ་འོད་ཁང་ལྕགས་དྲས་གཡོགས་པ་སོགས་ཐབས་ཤེས་མ་བསྟེན་པར། ཕྱེ་ལེབ་སོགས་སེམས་ཅན་མང་བོ་འཚེད་པ་ནི་ཕན་ཡོན་ལས་ཉེས་དམིགས་ཆེ་བས། དཀོན་མཆོག་མཉེས་པ་ལས་ལྡོག་པ་སྟེ། མཁས་དབང་ངག་དབང་བློ་བཟང་མཁས་གྲུབ་ཀྱི་མཆོད་གཏོར་བཤམས་ཚུལ་བསོད་ནམས་སྒོ་འབྱེད་ལས། དེང་སང་ཕལ་མོ་ཆེས་དབྱར་དུས་སུ་རྟེན་གྱི་དྲུང་དུ་མར་མེ་ཆེ་ཆུང་རྣམས་འོད་ཁང་མེད་པར་བཞག་པ་དེའི་ནང་དུ་ཕྱེ་ལེབ་སོགས་སྲོག་ཆགས་ཕྲ་མོ་བརྒྱ་སྟོང་དུ་མ་པད་མོའི་མཚོ་ལ་ངང་བའི་ཁྱུ་བཞིན་འཁོར་ཞིང་འོང་ནས་ལྷུང་ཞིང་འཚེད་པ་ནི། ཇི་ལྟར་དམྱལ་བའི་ཟངས་ཞུན་བསྐོལ་བར་དེའི་སེམས་ཅན་ཆར་བཞིན་དུ་བབས་ཤིང་འཇུག་པའི་ངང་ཚུལ་ལྟར་གྱུར་བས་ན། རྟེན་གྱི་དྲུང་དུ་སེམས་ཅན་མང་བོ་གསོད་པའི་སྟ་གོན་ཤེས་བཞིན་དུ་བཤམས་ནས། ཤི་རོ་དུ་མས་མཆོད་མེ་རྨེ་བར་བྱེད་པ་སོགས་ལ་ཅི་ཡང་མི་སེམས་པར། ད་དུང་སྲོག་ཆགས་དེ་རྣམས་ལ་ཚིག་པ་ཟོས་ནས་སེམས་ཅན་ལས་ཀྱིས་ཤི་བ་ཐབས་ཅི་ཡོད་སྙམ་དུ་སེམས་ཤིང་སྨྲ་བར་བྱེད་པ་དག་གིས། ཕྱུགས་བསད་མཆོད་སྦྱིན་གྱི་གཟུགས་བརྙན་ལྟ་བུའི་མཆོད་མེ་སྦར་བ་ལས་ཕན་ཡོན་ཆེན་པོ་མི་འཐོབ་ཀྱི། སེམས་ཅན་གྱི་སྲོག་ཡལ་བར་དོར་བའི་བསམ་པ་དང་། སངས་རྒྱས་ཀྱི་བཅས་པ་འོད་ཁང་མེད་པར་མར་མེ་བཞག་མི་རུང་བར་གསུངས་པའི་བཀའ་ལ་བསམ་བཞིན་ཁྱད་དུ་བསད་པའི་མི་དགེ་བ་ཆེན་པོ་གསོག་པར་འགྱུར་རོ། །མདོར་ན། ཕྱི་ནང་གི་གཙང་སྦྲ་གང་ཐོན་གྱི་ངོས་ནས་མཆོད་གཏོར་རྣམས་ཚུལ་བཞིན་དུ་བཤམས་འཕྲལ། ཆབ་ཀྱིས་བྲན་ལ་བསངས་ཀྱིས་བདུག གྲིབ་སྲུང་གི་རྫས་ཀུ་ཤ་དང་རྨ་བྱའི་སྒྲོ་སོགས་ཉེ་འཁོར་དུ་བཞག བགེགས་མི་འཇུག་པའི་ཆེད་དུ་མདོ་སྔགས་གང་རིགས་ཀྱིས་བྱིན་རླབས་བྱ། ཞེས་གསུངས་སོ། །

༧ གློག་མཆོད་དང་འོད་སྣང་འབུལ་ཚུལ། ལམ་རིམ་ཆེན་མོ་ལས། མར་མེ་ནི་སྤོས་མར་ལ་སོགས་པའི་དྲི་ཞིམ་ཞིང་འོད་གསལ་བ་དང་། རིན་ཆེ་བའི་ནོར་བུའི་འོད་གསལ་བའོ། །ཞེས་ཡང་སྙིང་སྨྲས་ན་འོད་འབུལ་བ་ལགས་པས། ཉི་ཟླ་སྐར་གསུམ་དང་། ནོར་བུ་འོད་ཅན། གློག་སྒྲོན་སྣ་ཚོགས་སྟེ། མདོར་ན། འོད་ཅན་གྱི་རྫས་ཇི་སྙེད་མཆིས་པ་ཀུན། སྣང་གསལ་གྱི་མཆོད་པར་འགྲོ་བས། དཀོན་མཆོག་གི་ཞིང་དུ་ཕུལ་ན། ཕན་ཡོན་ཆེན་པོ་འབྱུང་ངོ་། །གློག་འོད་འབུལ་དུས། གུང་ཐང་བསྟན་པའི་དབང་ཕྱུག་གིས། ཉི་ཟླའི་འོད་ལྟར་གསལ་ལ་མུན་སེལ་ཞིང་། །ཚིག་པའི་དྲི་དང་དུ་བས་བསྣོགས་པ་མེད། །གཙང་ཞིང་ཡིད་འོང་གློག་གི་སྒྲོན་མེ་འདི། །རྒྱལ་བ་སྲས་དང་བཅས་ལ་གུས་པས་འབུལ། །སྟོང་གསལ་ཆོས་དབྱིངས་མཁའ་ལས་བྱུང་བ་ཡི། །དྭངས་གསལ་མ་འདྲེས་ཡེ་ཤེས་འོད་འབར་བ། །ཏིང་འཛིན་འཕྲུལ་གྱིས་བཀུགས་པའི་གློག་འོད་འདིས། །མ་རིག་འཁོར་བའི་རྩ་བ་གཞོམ་གྱུར་ཅིག། ཅེས་སྨོན་ཚིག་འདོན་པ་འམ། ཡང་ན། ཕྱོགས་བཅུའི་སངས་རྒྱས་ལ་མཆོད་པའི་མོས་པ་དང་བཅས། ཨོཾ་བཛྲ་དྷ་རྨ་ཨཱ་ལོ་ཀེ་ཨཱཿཧཱུཾ། བཏོན་ན་ལེགས་སོ། །

མར་མེ་བརྟག་ཐབས། མར་མེ་བརྟག་ཐབས་ལ་རྒྱུད་དང་མན་ངག་གི་བརྟག་པ་རེ་ཟུང་། པ་རི་ལོ་ཙཱས་བསྒྱུར་བའི་མར་མེའི་བརྟག་པ་ཉུང་ངུའང་མཆིས་ལ། དར་མོ་སྨན་རམས་པའི་གདམས་ངག་བཀའ་རྒྱ་མ་ལས་འབྱུང་བ་འདིར་ཆ་ཚང་བཀོད་ན། ཨོཾ་ཨ་ཐཿ འགྲོ་བ་རྨོངས་པའི་མུན་སེལ་བའིཿ མར་མེ་མཛད་དཔལ་ཞབས་ལ་འདུདཿ མར་མེའི་བརྟགས་ཐབས་བསྟན་པ་ལཿ དང་པོ་གདམས་པ་ཆིག་རྒྱུད་རྒྱཿ མར་ཀོང་སྡོང་རས་གསུམ་པོ་ལཿ སྔགས་འདི་བརྒྱ་རྩ་བརྒྱད་བཏབ་སྟེཿ ཨོཾ་བྷ་ན་རི་མེ་ཐཱ་ཧཱཿ གཙང་སྦྲ་ལྡན་པ་ཕུལ་ན་ནིཿ རང་གི་འདོད་ཡོན་གང་ཡིན་གྱིཿ བཟང་ངན་རྟགས་རྣམས་སྟོན་དུ་གསོལཿ ཞེས་བརྗོདཿབཟང་བའི་རྟགས་དྲུག་ལཿ ཕྲ་ཞིང་དཀར་ལ་ལྡེམ་པ་ནིཿ མི་ནུབ་རྒྱལ་མཚན་ཐོབ་པའི་རྟགསཿ དཀར་གསལ་རྩེ་མོ་གསུམ་པ་ནིཿ མི་འགྱུར་གཡུང་དྲུང་ཐོབ་པའི་རྟགསཿ གསལ་ཞིང་ཟླུམ་པ་པདྨ་འདྲཿ ཆོས་སྐུ་མི་འགྱུར་ཐོབ་པའི་རྟགསཿ གསལ་ཞིང་རྒྱལ་མཚན་དབྱིབས་འདྲ་ནཿ དཔལ་དང་བཀྲ་ཤིས་ཐོབ་པའི་རྟགསཿ དཀར་ཞིང་ལྡེམ་པ་གསལ་བ་ནིཿ ཆོས་དབྱིངས་མི་གཡོ་ཐོབ་པའི་རྟགསཿ མར་མེ་དམར་ཞིང་པདྨ་འདྲཿ ཚེ་དང་བསོད་ནམས་འཕེལ་བའི་རྟགསཿ དེ་རྣམས་བྱུང་ན་བཟང་པོ་ཡིནཿ

ངན་པའི་རྟགས་ནི་འདི་ལྟར་རོཿ དུ་བ་ཆེ་ཞིང་མི་གསལ་ནཿ ལས་སྒྲིབ་ཆེན་པོ་ཡོད་པའི་རྟགསཿ བཤགས་པ་བྱ་ཞིང་དགེ་ལ་འབདཿ ཚག་སྒྲ་ཆེ་ཞིང་མེ་སྟག་འཕྲོཿ ཕུགས་སུ་གདོན་བགེགས་ཞུགས་པའི་རྟགསཿ བསྙེན་སྒྲུབ་བྱེད་ཅིང་བཟློག་པ་བྱཿ མེ་ལྕེ་དུམ་བུར་ཆད་པ་ནིཿ རྐྱེན་ངན་བར་ཆད་འོང་བའི་རྟགསཿ ཚེ་སྒྲུབ་ཚེ་དབང་སྤངས་དག་གཏོངཿ མེ་ལྕེ་ལྷབ་ལྷུབ་འབར་བ་ནིཿ དགྲ་རྐུན་མྱུར་དུ་འོང་བའི་རྟགསཿ བཟློག་པ་སྟོབས་པོ་ཆེ་ལ་འབདཿ འོད་མེད་སྡོང་རོ་ཆེ་བ་ནིཿ ནད་པ་འཆིའམ་རིམས་ནད་འབྱུང་ཿ འཆི་ངོས་སྲོག་བླུ་ཉེའུ་འདོན་བྱཿ མར་མེ་སྤུང་སྤུང་བསྐྱིལ་བ་ནིཿ གོད་ཁ་གཏོར་བརླག་ཡོང་བའི་རྟགསཿ མགོ་ཚིག་སྟོར་བའི་ངོ་ཡིན་པསཿ རིམ་གྲོར་བཟློག་པ་གང་མང་བྱཿ དེ་ལྟར་མར་མེ་བརྟགས་ཚུལ་ནིཿ མདོར་བསྡུས་ཙམ་བྲིས་དགེ་བ་འདིསཿ མི་ཤེས་མུན་འཐིབ་འགྲོ་བའི་བློཿ ཤེས་རབ་འོད་ཀྱིས་གསལ་བར་ཤོགཿ མཐའ་མ་དམ་ལྡན་སློབ་བུས་རྒྱཿ དར་མོ་སྨན་རམས་པའི་གདམས་ངག་བཀའ་རྒྱ་མ་ལགས་སོཿ བཀྲ་ཤིསཿ ཞེས་འབྱུང་ངོ་། །

གཞན་ཡང་མར་མེ་བརྟག་པ་བྱ་ཚུལ་གཏེར་སྟོན་སངས་རྒྱས་གླིང་བའི་གཏེར་བྱོན་མར་མེ་པྲ་བརྟག་དང་། འཇུ་མི་ཕམ་གྱི་བརྟག་པ་སྣ་ཚོགས་ཀྱི་སྐོར་ནོར་བུའི་མེ་ལོང་ལས་རི་མོ་དང་བཅས﹙ལྕགས་པར་དེབ་གྲངས་བཅུ་དགུ་ཤོག་ངོས༢༩༢ནས༣༠༠ བར﹚པ་གསལ་བར་བཀོད་ཡོད་པས། ཤེས་འདོད་པ་དག་གིས་དེ་དག་ཏུ་གཟིགས་པ་ལས། འདིར་ཡི་གེ་མང་དུ་འཇིགས་ནས་མ་བཀོད་ལ། འདིར་བསྡུས་ཙམ་ཁོལ་དུ་ཕྱུང་ནས་བཀོད་ན། འོད་གསལ་ན་ནད་མེད། མི་གསལ་ན་ནད་ངོ་དང་གྲིབ་ངོ་ཡིན། རླུང་དང་རྐྱེན་མེད་སར་མར་མེ་ཤི་ན་ངེས་པར་ཤི་ཆད་འོང་། ཆུ་སོང་བ་ལྟར་ཚག་སྒྲ་དང་བཅས་འབར་དཀའ་ན་བར་ཆད་ཆེ། ཕྱོགས་སུ་རླུང་དྲག་པོས་བཏབ་པ་ལྟར་མེ་ལྕེ་ཆད་ཅིང་བསྐྱོད་ན། འཚུབ་ཆེ་བས་རིམ་གྲོར་འབད། འུར་ཟིང་གི་ངོ་ཡང་ཆེ། རྩེ་མོ་བཅད་པ་ལྟ་བུ་མི་གསལ་ཞིང་ཐུང་ན་ཕོ་ལྷ་མནོལ། ངོ་སོ་དམའ། དབྱིབས་རྩེ་རྣོ་ཞིང་རིང་ལ་མཛེས་པ་དང་། རྒྱལ་མཚན་དང་བཀྲ་ཤིས་པའི་རྫས་འདྲ་ན་ཤིན་ཏུ་བཟང་། དཀར་བོ་སོགས་ཀྱི་མདངས་ལྡན་གསལ་ན་ཞི་སོགས་ལས་འགྲུབ། འབར་ཡུན་རིང་ན་སྲིས་སྨེ་ཞིང་བཟང་། དཀྱིལ་སྔོ་ནག་ལ་སྡོང་བུ་རྩེ་མོ་དམར་བར་ནག་ཐིང་ངེ་འདུག་ན་བློ་འགྱོད་ཆེ། མེ་སྟག་དམར་ཚིག་གེ་བ་མི་གསལ་ན་ན་ངོ་དང་གྱོད་ངོ་ཡིན། རྩེ་མོ་ཐུར་དུ་གུག་ཉམས་ལྟར་མི་གསལ་ན་མནན་པ་སོགས་གཉའ་ནོན་ཡོད། སྟབ་སྟབ་ཟེར་ཞིང་འོད་ཤིན་ཏུ་བཟང་ལ་ཡིད་དུ་འོང་བར་འབར་ན་བཀྲ་ཤིས་འཕེལ། དེ་ལ་མེ་ཏོག་ཆགས་ཤིང་འོད་གསལ་ན་དགེ་མཚན་གྱི་ངོ་ཡིན། ཞེས་གསུངས་སོ། །

མ་ཎི་འཁོར་ལོ།

༡ མ་ཎི་འཁོར་ལོའི་ཁུངས། དམ་ཆོས་པད་དཀར་ལས། གསང་སྔགས་རིག་སྔགས་གཟུངས་སྔགས་ཀུན། །བཟླས་བརྗོད་གཙོ་བོར་མ་བྱས་ཀྱང་། །འཁོར་ལོ་བསྐོར་བའི་ལས་སྦྱོར་དག། ཕུན་སུམ་ཚོགས་པས་འགྲུབ་པར་འགྱུར། །གསང་སྔགས་ཡིག་འབྲུར་བྲིས་པ་ནི། །བཏོན་པ་ལས་ཀྱང་བསྐོར་བ་མཆོག། གང་གང་བྲིས་པ་དེ་དག་ནི། །ཚེགས་མེད་ཉིད་དུ་འགྲུབ་པར་འགྱུར། །ཞེས་དང་། པད་ཕྲེང་གི་རྒྱུད་ལས། འཁོར་ལོ་འདི་ཡིས་དགོས་ཆེད་ནི། །གང་ཞིག་བརྩོན་འགྲུས་མི་ལྡན་པའི། །ཅི་བདེར་གནས་པའི་གང་ཟག་ལ། །འཁོར་ལོའི་མན་ངག་ཤིན་ཏུ་གཅེས། །གཞན་ཡང་། སངས་རྒྱས་པད་མོ་མཆོག་གིས་སྒྲིབ་པ་རྣམ་སེལ་ལ། ཕ་རོལ་ཕྱིན་པ་བཅུ་དང་ནི། །སྡེ་སྣོད་གསུམ་དང་རྒྱུད་སྡེ་བཞི། །བསྐལ་བའི་བར་དུ་འཆད་ཉན་ལས། །ཆོས་འཁོར་ལན་གཅིག་བསྐོར་བ་མཆོག །ཞེས་དང་། གཞན་རྒྱལ་བ་དགོངས་འདུས་སོགས་སུའང་གསུངས་པ་རྣམས་མ་ཎི་འཁོར་ལོའི་ཁུངས་ཡིན་ནོ། །

གཞན་ཡང་། གུང་ཐང་བསྟན་པའི་སྒྲོན་མེས། འདིའི་ཁུངས་ནི་རྒྱུད་སྡེ་བཞི་ཀ་ནས་ལྷ་རང་རང་གི་སྔགས་བགྲང་བ་དང་། སྔགས་འཁོར་ལོ་ལ་བྲིས་ཏེ་ཕྱིའི་འབྱུང་བ་དང་། རང་གི་ལག་པས་བསྐོར་བ་ལ་བརྟེན་ནས་ཞི་རྒྱས་དབང་དྲག་གི་ལས་མཐའ་ཡས་པ་འགྲུབ་པར་གསུངས་པ་ལ་བརྟེན་ནས། རྒྱ་བོད་ཀྱི་མཁས་གྲུབ་མཐའ་དག་གིས་རང་གི་ཕྱག་དང་མདུན་དུ་བཞག་པ་སོགས་ཀྱིས་བསྐོར་བ་དང་། དགོན་གྲོང་ཐམས་ཅད་དུ་མ་ཎི་བཞུགས་ཡུལ་གྱི་གཙུག་ལག་ཁང་བཞེངས་པ། མཁས་བླུན་སྐྱེ་བོ་མཐའ་དག་ལ་ཕན་པའི་ཐབས་བསམ་གྱིས་མི་ཁྱབ་པ་ཡིན་པར་གསུངས་སོ། །

༢ མ་ཎི་བོད་ཀྱི་ཆོས་སྐལ་དུ་གྱུར་ཚུལ། འཕགས་མཆོག་སྤྱན་རས་གཟིགས་དབང་གིས་སངས་རྒྱས་འོད་མཛད་ཡེ་ཤེས་ཏོག་གི་སྤྱན་སྔར་ཐུགས་བསྐྱེད། སངས་རྒྱས་འོད་དཔག་མེད་ཀྱི་སྤྱན་སྔར་དམ་བཅས་ཤིང་སྨོན་ལམ་ཆེན་པོ་གྲངས་མེད་བཏབ་པ་དང་། ཁྱད་པར་དུ་སྟོན་པ་འདིའི་སྤྱན་སྔར་འདས་པའི་སངས་རྒྱས་རྣམས་ཀྱིས་ཀྱང་མ་ཐུལ། མ་འོངས་པའི་སངས་རྒྱས་རྣམས་ཀྱིས་ཀྱང་གདུལ་བར་མི་འགྱུར་བའི་མཐའ་འཁོབ་བོད་ཁ་བ་ཅན་གྱི་སེམས་ཅན་རྣམས་འདུལ་བའི་དམ་བཅས་པར་བརྟེན། འཕགས་པ་ཐུགས་རྗེ་ཆེན་པོ་བོད་ཀྱི་ལྷ་སྐལ་དང་། མ་ཎི་ཡི་གེ་དྲུག་མ་བོད་ཀྱི་ཆོས་སྐལ་དུ་གྲགས་པའི་གནད་ཀྱང་འདི་ལ་ཐུག་ཡོད། འཕགས་མཆོག་འདིའི་སྨོན་ལམ་གྱི་དབང་གིས། རང་ཅག་ལ་ལྷ་གཞན་ལས་བྱིན་རླབས་མྱུར་བ་དང་། གཟུངས་སྔགས་གཞན་ལས་ཡི་གེ་དྲུག་མ་འདི་ཉིད་འགྲུབ་སླ་བ་ཡིན། ཚུལ་འདི་ལ་དགོངས་ནས་ཡབ་རྗེ་བླ་མས། གསུང་ཡི་གེ་དྲུག་མ་ནུས་མཐུ་ཆེ། །ངག་དལ་བ་མེད་པར་འདྲེན་པ་གཅེས། །གསུངས་ལ། གུང་ཐང་བསྟན་པའི་སྒྲོན་མེས་ཀྱང་། གཟུངས་ཡིག་དྲུག་ཚར་གཅིག་བཏོན་ན་ཡང་། །དེ་འཇིག་རྟེན་ཕྱི་མའི་ལམ་རྒྱགས་ཡིན། །ཆོས་གཅིག་ལ་བྱིན་རླབས་ཆེ་བ་དེ། །སྔགས་གཟུངས་མཆོག་ཡི་གེ་དྲུག་མ་ཡིན། །ཁོང་བྱིས་པ་ཚུན་ཆད་ཤེས་པ་དེ། །ངེད་བོད་ཀྱི་ཆོས་སྐལ་ཡིན་པའི་རྟགས། །ཞེས་དང་། འབྲི་གུང་གྲུབ་ཐོབ་གངས་རི་རྡོར་འཛིན་ཀུན་དགའ་གྲགས་པ་མ་ཕམ་གྱི་མཚོ་འགྲམ་དུ་ཕེབས་ནས་མཚོ་བདག་དམ་ལ་བཏགས་ནས། མཚོའི་ནང་ནས་རྡེའུ་ཕྱག་གང་བླངས་པའི་ནང་དུ་རྡོ་ནག་པོའི་ལྡེབས་ལ་རྡོ་དཀར་གྱི་ཡིག་དྲུག་རང་བྱོན་བཟོ་བོ་མཁས་པས་བསྐྲུན་པ་ལྟ་བུ་ཕྱག་ཏུ་བྱུང་བ་དེ་ཀླུ་རྒྱལ་མ་དྲོས་པས་ཕུལ་བར་གྲགས་པ། ད་ལྟ་ལ་དྭགས་སྒང་སྔོན་གྱི་ནང་རྟེན་དུ་བཞུགས་པ་སོགས་ཆོས་སྐལ་དུ་སྨིན་པ་མང་དུ་ཡོད། ཨོཾ་མ་ཎི་པདྨེ་ཧཱུཾ་ཞེས་པ་འདི་དོན་བསྒྱུར་བྱས་ན། ཀྱེ་ནོར་བུ་པདྨ་སྐུ་གསུང་ཐུགས་ཀྱི་དངོས་གྲུབ་སྩོལ་ཞེས་པ་སྟེ། འཕགས་པ་སྤྱན་རས་གཟིགས་ལ་ཉེ་ཚིག་གིས་བོས་ཏེ་དངོས་གྲུབ་ཞུ་བའོ། །

༣ གཟུངས་སྔགས་འདི་བརྒྱུད་ཚུལ། རིག་སྔགས་ཀྱི་རྒྱལ་པོ་འདི་སངས་རྒྱས་སྣང་བ་མཐའ་ཡས་ཀྱིས་འཕགས་པ་ཐུགས་རྗེ་ཆེན་པོ་ལ་གནང་ཞིང་། དེས་སངས་རྒྱས་པདྨའི་མཆོག་དང་། དེ་ལས་སྟོན་པ་ཐུགས་རྗེ་ཅན་ལ་བརྒྱུད་ཅིང་། སྟོན་པ་ཁོང་ཉིད་ཀྱིས་རྡོ་རྗེ་གདན་དང་། བྱ་རྒོད་ཕུང་པོའི་རི། པོ་ཏ་ལ་རྣམས་སུ་འཁོར་འདུས་པ་མང་བོར་སྤྱན་རས་གཟིགས་ཀྱི་མདོ་རྒྱུད་མན་ངག་དང་བཅས་པ་གསུངས་ཤིང་། རང་རེའི་ལྗོངས་འདིར་ཡང་ཆོས་ཀྱི་རྒྱལ་པོ་སྲོང་བཙན་སྒམ་པོས་དམ་པའི་ཆོས་ཀྱི་སྲོལ་གཏོད་དེ་མདོ་སྡེ་དཀོན་མཆོག་སྤྲིན་དང་། ཐུགས་རྗེ་ཆེན་པོའི་མདོ་རྒྱུད་ཉེར་གཅིག གཉན་པོ་གསང་བ་སོགས་བསྒྱུར་ནས་གཟུངས་འདིའི་འཕྲིན་ལས་རྒྱ་ཆེར་དར་རོ། །

དེ་ལྟར། བོད་མི་རྩམ་གཟན་ནམ་ཕྲེང་བཟུང་གི་ལུང་བ་འདིར། རྒྱལ་བློན་ལོ་པཎ་ཕལ་ཆེར་འཕགས་མཆོག་སྤྱན་རས་གཟིགས་ཀྱི་རྣམ་སྤྲུལ་གྱིས་ཆོས་སྲིད་བསྐྱངས་ཤིང་། ཐ་ན་ངག་གི་རྒྱན་དང་སྐད་ཆའི་ཁུགས། སྐྱིད་པའི་གླུ་དང་སྡུག་པའི་སྨྲེང་གཏམ་ཚུན་ཆད་དུ་མ་ཎི་ཡིག་དྲུག་གི་མ་ཁྱབ་པ་མེད་པས། ཁ་དཔེར་ཡང་། ཐུགས་རྗེ་ཆེན་པོ་མ་གཏོགས་ལྷ་མེད། ཡི་གེ་དྲུག་མ་མ་གཏོགས་ཆོས་མེད། ལྷ་སྐལ་ཐུགས་རྗེ་ཆེན་པོ་ཡིན། ཆོས་སྐལ་ཡི་གེ་དྲུག་མ་ཡིན། འདུག་ས་ཁ་བ་ཅན་པ་ཡིན། འགྲོ་ས་བདེ་བ་ཅན་པ་ཡིན། ཞེས་སྣོད་བཅུད་ཀྱི་རྒྱན་དུ་གྱུར་བ་ཡིན།

གཞན་ཡང་། སློབ་དཔོན་ཀླུ་སྒྲུབ་སྙིང་བོ་ལ། །འཕགས་པ་སྤྱན་རས་གཟིགས་དབང་གིས། །འདི་ལྟར་ལུང་བསྟན་མཛད་པ་ནི། །ཀླུ་ཡི་ཡུལ་གྱི་ཕོ་བྲང་ན། །ཀླུ་རྒྱལ་བྱང་ཆུབ་སེམས་དཔའ་ལ། །ཆོས་ཀྱི་འཁོར་ལོ་མཐོང་ཐོས་དང་། །དྲན་ཅིང་རེག་པ་ཙམ་གྱིས་ཀྱང་། །ངན་སོང་གསུམ་གྱི་སྡུག་བསྔལ་ལས། །མྱུར་ཏུ་སྒྲོལ་བར་བྱེད་པ་ཡི། །ཟབ་མོའི་ཆོས་འཁོར་གཅིག་འདུག་པ། །ཁྱོད་ཀྱིས་ལོངས་དང་སེམས་ཅན་གྱི། །དོན་གྱི་རྒྱ་ཆེན་འབྱུང་བར་འགྱུར། །ཞེས་གསུངས་ནས་ལུང་བསྟན་མཛད་པ་ལྟར། །སློབ་དཔོན་ཀླུ་སྒྲུབ་ཀླུ་ཡུལ་དུ་བྱོན་ནས། ཀླུའི་རྒྱལ་བོ་བྱང་ཆུབ་སེམས་དཔའ་ལ་འདི་སྐད་ཅེས་ཞུས་སོ། །ཀླུའི་རྒྱལ་བོ་བྱང་ཆུབ་སེམས་དཔའ་གསན་དུ་གསོལ། འཕགས་པ་སྤྱན་རས་གཟིགས་དབང་གིས། །བདག་ལ་ལུང་བསྟན་མཛད་བྱུང་བ། །ཀླུ་ཡི་ཡུལ་དུ་ཁྱོད་སོང་ལ། །ཀླུ་རྒྱལ་བྱང་ཆུབ་སེམས་དཔའ་ལ། །ཆོས་འཁོར་མཐོང་ཐོས་དྲན་རེག་པས། །ངན་སོང་སྡུག་བསྔལ་ཀུན་གྲོལ་བའི། །ཟབ་མོའི་ཆོས་འཁོར་གཅིག་འདུག་པ། །བདག་ལ་ཞུས་ཤོག་གསུངས་ནས་འོང་། །ཆོས་འཁོར་ཐུགས་རྗེས་གནང་དུ་གསོལ། །ཞེས་ཞུས་པས། ཀླུའི་རྒྱལ་བོ་བྱང་ཆུབ་སེམས་དཔའི་ཞལ་ནས། ངའི་ཆོས་ཀྱི་འཁོར་ལོ་ཟབ་མོ་མཐོང་ཐོས་དྲན་པ་དང་རེག་པ་ཙམ་གྱིས། འགྲོ་བ་རིགས་དྲུག་གི་སེམས་ཅན་ཐམས་ཅད་ངན་སོང་གི་སྡུག་བསྔལ་ཆེན་པོ་ལས་མྱུར་དུ་གྲོལ་བར་བྱེད་པའི་འཁོར་ལོ་འདི་སྔོན་འདས་པའི་སངས་རྒྱས་མར་མེ་མཛད་ཀྱིས་ངེད་ཀླུ་རྣམས་ལ་གནང་ནས་ཀླུ་རྣམས་བདེ་བ་དང་ལྡན་ཞིང་སངས་རྒྱས་ཀྱི་ས་ལམ་བགྲོད་པ་ཡང་མང་བོ་བྱུང་བ་ཡིན་ནོ། །ཆོས་འཁོར་ཟབ་མོ་འདིར་འཕགས་པ་སྤྱན་རས་གཟིགས་ཀྱིས་སངས་རྒྱས་རྣམས་ལ་ཞུས་པའི་གཟུངས་སྔགས་ཀྱི་སྙིང་བོ་ཨོཾ་མ་ཎི་པདྨེ་ཧཱུཾ་ཞེས་པ་འདི་སངས་རྒྱས་ཐམས་ཅད་གཅིག་ཏུ་བསྡུས་པའི་གཟུངས་སྔགས་ཀྱི་འཁོར་ལོ་ཡིན་པས་ཁྱོད་ལ་སྟེར་རོ། །ཁྱོད་ཀྱིས་ཀྱང་འཁོར་ལོ་ཟབ་མོ་འདི་ས་ཆུ་མེ་རླུང་ལའང་ཚུགས་ལ། སངས་རྒྱས་ཀྱི་བསྟན་པ་དང་སེམས་ཅན་གྱི་དོན་གྱིས་ཤིག་གསུངས་ནས། ཕྱག་ལེན་དང་བཅས་པ་གནང་ངོ་། །དེ་ནས་འཕགས་པ་ཀླུ་སྒྲུབ་ཀྱིས་རྒྱ་གར་ཡུལ་དུ་གདན་དྲངས་ནས་མཁའ་འགྲོ་མ་སེང་གེ་གདོང་ཅན་ལ་གནང་། དེས་ཏེ་ལོ་བ། དེས་ན་རོ་བ། དེས་མར་བ་ལ་གནང་ནས་བོད་དུ་གདན་དྲངས་སོ། །དེས་མི་ལ་ལ་གནང་། དེས་དྭགས་པོ་ལྷ་རྗེ་ལ། དེས་ཁམས་པ་ཨུ་སེ་ལ་གནང་ནས་རིམ་པར་བརྒྱུད་པ་སོགས་གྲུབ་ཐོབ་ཀརྨ་དཔའ་ཤིའི་གསུང་འབུམ་གྱི་ནང་ན་འཁོར་ལོ་འདིའི་ཕན་ཡོན་དང་བཅས་པ་མང་དུ་བཞུགས་སོ། །

༤ མ་ཎི་འཁོར་ལོའི་མཚོན་དོན། ཆུ་ཀླུང་ཆེན་པོ་བསྐོར་བའི་མདོ་ལས། རྩ་བ་བྱང་ཆུབ་ཤིང་ལས་བྱས། །བྱང་ཆུབ་སེམས་ནི་ངང་གིས་བསྐྱེད། །སྲོག་ཤིང་སྲ་བའི་ལྕགས་ལས་བྱས། །རྣལ་འབྱོར་ཚེ་སྲོག་སྲ་ཤིང་བརྟན། །མ་ནི་ཧཱུཾ་གི་རྩ་བར་གཏད། །ཨོཾ་ནི་ཕྱི་ལ་དར་སྣས་དྲིལ། །བསོད་ནམས་ལོངས་སྤྱོད་དཔལ་འབྱོར་རྒྱས། །རྩེ་ལ་ཏོག་གཅིག་བསྐོར་བ་དེ། །ཆོས་སྐུ་སྣང་བ་མཐའ་ཡས་མཚོན། །ཆོས་སྐུའི་གོ་འཕང་འཐོབ་པའི་རྟགས། །བར་དུ་འཁོར་ལོ་བསྐོར་བ་ནི། །ལོངས་སྐུ་ཐུགས་རྗེ་ཆེན་པོ་མཚོན། །བདེན་གཉིས་ཟུང་དུ་ཆུད་པའི་རྟགས། །དེ་ལ་ཤམ་བུ་བསྐོར་བ་ནི། །སྤྲུལ་སྐུ་འགྲོ་དོན་བྱེད་པའི་རྟགས། །སྐོར་རྡོ་ལྟ་བུ་དུང་བཏགས་པ། །གདུལ་བྱ་འཕྲིན་ལས་རྒྱས་པའི་རྟགས། །དབུ་ལ་གདུགས་ཆེན་བསྐོར་བ་དེ། །ས་ལམ་མ་ལུས་ཡོངས་རྫོགས་ནས། །སྤངས་རྟོགས་སྟོང་ཉིད་མཐར་ཕྱིན་ཤོག །གསུངས་སོ། །

གཞན་ཡང་། ཡི་གེ་མ་ཎི་དྲུག་མ་འདི་སངས་རྒྱས་ཐམས་ཅད་ཀྱི་སྙིང་བོ་ཡིན་ཏེ། མ་ཎི་དང་པདྨ་གཉིས་ཀྱིས་ཐབས་ཤེས་སོ་སོར་བསྟན་ཅིང་། དེ་གཉིས་ཨོཾ་སོགས་ལ་སྦྱར་པས། ཐབས་ཤེས་དབྱེར་མེད་ཀྱི་སྐུ་གསུང་ཐུགས་ཡོན་ཏན་སྟོན། ཧྲཱྀ་ནི་སྤྱིར་སངས་རྒྱས་ཐམས་ཅད་ཀྱི་སྙིང་བོ་དང་། ཁྱད་པར་དུ་འཕགས་པ་སྤྱན་རས་གཟིགས་ཀྱིས་ས་བོན་ཡིན་ནོ། །

ཡང་། ཁ་ཅིག་གིས་མཚོན་དོན་ལ། ཨོཾ་ཡིག་གིས་སྦྱིན་པའི་ཕར་ཕྱིན་རྫོགས་པར་མཚོན་པ་སྟེ། གནས་སྐབས་ཀྱི་ཟས་གོས་དང་། གནས་མལ་གྱི་བདེ་བ་ཙམ་མ་ཡིན་པར་འཁོར་བ་སྤྱི་དང་བྱེ་བྲག་གི་སྡུག་བསྔལ་ཕྲ་རགས་ལས་ཐར་བའི་གཏན་གྱི་བདེ་བ་ལྷུན་གྱིས་གྲུབ་པར་སྟོན་ལ། དེ་ཡང་ཨ་ཨུ་ཨོ་གསུམ་གཅིག་ཏུ་འདུས་པའི་ཆ་ནས་སྐྱེ་འཆི་བར་དོ་བཅོམ་པའི་སྐུ་གསུམ་སོ་སོ་དངོས་ཟིན་པའང་མཚོན་པ་ཡིན། དེ་བཞིན་མ་ཡིག་གིས་བཟོད་པའི་ཕར་ཕྱིན་མཚོན་ཏེ། འཕགས་པ་སྤྱན་རས་གཟིགས་ཀྱིས་སངས་རྒྱས་འོད་དཔག་མེད་པའི་དྲུང་དུ་ཐུགས་བསྐྱེད་སྨོན་ལམ་གྱི་གཡར་དམ་མཛད་པའི་བྱུང་བ་བཞིན། གདུལ་དཀའ་སེམས་ཅན་རྣམས་བླ་ན་མེད་པའི་བྱང་ཆུབ་མ་ཐོབ་ཀྱི་བར་དུ་སྐད་ཅིག་ཙམ་ལའང་བསྲན་དཀའ་བའི་མེ་ཡི་ནང་དུ་བསྐལ་བ་རྒྱ་མཚོར་གནས་དགོས་ཀྱང་། གཞན་དོན་མི་འདོར་བའི་བཟོད་པ་བསྐྱེད་པའི་སྒོ་ནས་སྐྱེ་རྒུ་ཀུན་གྱི་མ་ལྟར་བརྩེ་བས་བསྐྱངས་པར་སྟོན་པའོ། །ཎི་ཡིས་འགྲོ་དྲུག་འདྲེན་པར་བྱེད། གསུངས་པ་བཞིན་སྙིགས་དུས་ཀྱི་འགྲོ་བ་རྣམས་ང་རྒྱལ། ཁོང་ཁྲོ། ཕྲག་དོག་བཅས་ཀྱིས་དུས་འདའ་ཞིང་། དགེ་བར་གཞོལ་བའི་སེམས་བག་ལ་ཉལ། བྱིང་རྒོད་ཀྱི་འཐོར་རླུང་གིས་གཡེང་བའི་ཤིང་བལ་བཞིན་འཕྱན་པ་རྣམས་ཐར་ལམ་དུ་འདྲེན་པར་བྱེད་པ་སྟོན་པ་དང་། གཞི་ཀུན་རྫོབ་ཙམ་དུ་རྒྱུ་འབྲས་རྟེན་འབྱུང་སོགས་བྱ་བྱེད་རྣམ་བཞག་ཡོངས་རྫོགས་ཀྱི་རང་གཤིས་གསལ་རྗེན་དུ་མཚོན་པའོ། །པད་ཅེས་པས་མི་འདོད་པའི་སྡུག་བསྔལ་ཕྲ་རགས་ཀྱི་རྩ་བ་དྲུང་ནས་འབྱིན་པར་སྟོན་པ་ཡིན་ལ། དེ་ལྟར་འབྱིན་པ་ལའང་དེ་ཁོ་ན་ཉིད་ཀྱི་ཏིང་ངེ་འཛིན་ནམ་བསམ་གཏན་གྱི་ཏིང་ངེ་འཛིན་ལ་རག་ལས་པས། བསམ་གཏན་གྱི་ཕར་ཕྱིན་མཚོན་པ་ཡིན་ནོ། །མེ་ཡིས་བུད་ཤིང་ཐམས་ཅད་སྲེག་པར་བྱེད་པ་བཞིན་རྣམ་དཀར་གྱི་དགེ་བའི་ལས་ལམ་དུ་འཇུག་པའི་བརྩོན་འགྲུས་ཀྱི་མེ་ཡིས་སྒྲིབ་གཉིས་བག་ཆགས་དང་བཅས་པའི་དྲི་མའི་བུད་ཤིང་མ་ལུས་པ་བསྲེགས་ཞིང་། གནས་སྐབས་དང་མཐར་ཐུག་གི་ཕན་བདེ་མ་ལུས་འབད་མེད་དུ་སྟེར་བས་ན། བརྩོན་འགྲུས་ཀྱི་ཕར་ཕྱིན་མཚོན་པ་ཡིན། ཧཱུཾ་ཡིག་གིས་དོན་དམ་པར་རང་བཞིན་གྱིས་གྲུབ་པར་འཛིན་པའི་བདེན་འཛིན་གྱི་དམིགས་པའི་གཏད་སོ་བྲལ་བའི་སྟོང་བ་ཉིད་དང་། རྒྱུ་འབྲས་རྟེན་འབྲེལ་སོགས་བྱ་བྱེད་ཀྱི་ཆོས་ཀུན། ཀུན་རྫོབ་ཙམ་དུ་འཐད་པའི་རྟེན་འབྱུང་གཉིས་འགལ་མེད་གྲོགས་སུ་འཁྱེར་བའི་ཤེས་རབ་ཀྱི་ཡུལ་དང་བཅས་པ་སྟོན་པར་མ་ཟད། གོང་གི་མ་ཎི་པདྨེ་ཞེས་སྤྱན་རས་གཟིགས་ཀྱི་མཚན་སྨོས་ཏེ་ཧཱུཾ་ཞེས་པས་ནི་བརྩེ་བ་སྙིང་རྗེ་ཆེན་པོའི་བདག་ཉིད་ཅན། ཁྱོད་ཀྱིས་བདག་སོགས་བྱང་ཆུབ་མ་ཐོབ་བར་དུ་རྗེས་སུ་ཟུངས་ཤིག ཐར་བ་བླ་ན་མེད་པའི་ལམ་བཟང་མྱུར་དུ་འཐོབ་པར་མཛོད་ཅིག་ཅེས་གསོལ་བ་འདེབས་པའི་ཚུལ་མཚོན་པ་བཅས་སོ། །

༥ མ་ཎི་འཁོར་ལོའི་རྣམ་གྲངས། སྤྱིར་འཁོར་ལོ་ལ། བསྒོམ་པའི་འཁོར་ལོ། བསྲུང་བཟློག་གསད་གསུམ་གྱི་འཁོར་ལོ། འཁོར་བའི་འཁོར་ལོ། གཅོད་པའི་འཁོར་ལོ། འཕྲོ་བའི་འཁོར་ལོ། བཀྲ་ཤིས་ཚེ་རིང་གི་འཁོར་ལོ། ལས་ཐམས་ཅད་ལྷུན་འགྲུབ་གྱི་འཁོར་ལོ། བསྐོར་པའི་འཁོར་ལོ་དང་བཅུ་གཅིག་ཡོད་པར་བཤད། དེའི་ནང་གསེས་སྐབས་སུ་བབ་པ་བསྐོར་པའི་འཁོར་ལོ་ལ། ཆུ་འཁོར། རླུང་འཁོར། མེ་འཁོར། ས་འཁོར། ལག་འཁོར་དང་ལྔའོ། །གཞན་ཡང་། རྣལ་འབྱོར་བས་དགྲ་བགེགས་ཚར་བཅད་པའི་ཆེད་དུ་རླུང་འཁོར། སེལ་ཕུང་། ཉེ་འབྱེད། འགོ་མཆོག་སོགས་དྲག་པོའི་ལས་ཀྱི་འཁོར་ལོའི་རིགས་བྲིས་སྒྲུབ་བགྱིས་པ་སོགས་ཐུའུ་བཀྭན་རིན་པོ་ཆེའི་རྟ་མགྲིན་ལས་ཚོགས་ན་གསལ་ལོ། །

༦ བྲི་བའི་རྫས་ནི། རབ་གསེར་དང་དངུལ་མཚལ་གསུམ། འབྲིང་གཡུ་དང་དུང་། ཐ་མ་སྣག་ཚའོ། །དེ་ཡང་སྣག་ཚའི་ཤིང་པར་དང་ལྕགས་པར་འདི་རྒྱུགས་ཆེ་ལ། དེ་ཡང་རིན་ཆེན་སྣ་ལྔ་དང་སྨན་དྲི་བཟང་སོགས་སྣག་ཚ་བསྲེས་ཏེ་བཞེངས་ལ། མཚན་ལྡན་བླ་མས་རབ་གནས་དང་བཀྲ་ཤིས་སྨོན་ལམ་གྱིས་མཚམས་སྦྱར་ཏེ། རིན་ཆེན་དང་གོས་དར་གང་འཛོམས་ཀྱིས་མཛེས་པར་སྤུད་པར་བྱའོ། །མ་ཎི་རྡོ་བརྐོས་ལྟ་བུར་མཚོན་ན། ཡིག་དྲུག་གི་མདོག་གི་ཁྱད་པར་གྱིས་ཁྱད་ནུས་མི་འདྲ་བ་ཐོན་པར་ཡང་བཤད་དེ། ཨོཾ་དཀར་བོས་ལྷའི་སྐྱེས་སྒོ་གཅོད། མ་ལྗང་ཁུས་ལྷ་མིན་གྱི་སྐྱེ་སྒོ་གཅོད། ཎི་སེར་བས་མིའི་སྐྱེ་སྒོ་གཅོད། པད་མཐིང་གས་དུད་འགྲོའི་སྐྱེ་སྒོ་གཅོད། མེ་དམར་བས་ཡི་དྭགས་ཀྱི་སྐྱེ་སྒོ་གཅོད། ཧཱུཾ་མཐིང་ནག་གིས་དམྱལ་བའི་སྐྱེ་སྒོ་གཅོད་པར་ཡང་གསུངས་སོ། །

༧ མ་ཎི་འཁོར་ལོ་ལག་ལས་བྱེད་ཚུལ། ཆོས་ཀྱི་འཁོར་ལོ་རྒྱུན་མི་ཆད་པའི་རྒྱུད་ལས། ཆོས་ཀྱི་འཁོར་ལོ་ཆེན་པོ་འདི། །ས་ཆུ་མེ་རླུང་འཁོར་ལོ་དང་། །འདུ་བྱེད་ལག་པའི་འཁོར་ལོ་སོགས། །མཐོང་བ་བརྒྱུད་པའི་ཕྱག་ལེན་ལྟར། །ས་བལྟ་གནམ་བལྟ་མ་ནོར་བར། །སྐྱོན་མེད་ཤིན་ཏུ་དག་པར་བྱ། །ཞེས་པ་ལྟར། འཁོར་ལོའི་དབུ་ཏུབ་དང་གནམ་ལ་བསྟན་པ་དང་། ཞབས་ཏུབ་ས་ལ་བསྟན་པར་བྱའོ། །འཁོར་ལོ་དེ་གཉིས་ཁ་སྦྱར་ལ། མང་དུ་བརྩེགས་པ་སོགས་ཆེ་ཆུང་གི་ཚད་དང་བསྟུན་པར་བྱ། གཟུངས་སྔགས་དཀྲི་ཚུལ་ནི། ཆོས་ཀྱི་འཁོར་ལོ་རྒྱུན་མི་ཆད་པའི་རྒྱུད་ལས། ཨོཾ་ནི་སྲོག་ཤིང་སྨྱུག་མར་འཇུས། །ཧཱུཾ་ནི་མཇུག་ནས་ཡོད་པར་བྱ། །ཞེས་པ་ལྟར་ཡི་གེ་ནང་ལ་བསྟན་ཏེ་མཇུག་ནས་སྒྲིལ་བར་བྱ་ཞིང་། དམ་ལྷོད་ཡང་རན་པར་བྱ་དགོས་ཏེ། དམ་དྲགས་ན་གཟུངས་སྔགས་བྲག་གི་བར་དུ་བཙིར་བ་ལྟ་བའི་ཉེས་པ་དང་། ལྷོད་དྲགས་ན་རྒྱུ་མ་ལུགས་པ་ལྟ་བུའི་ཉེས་པ་ཡོད་པས། དམ་ལྷོད་རན་པར་བྱའོ། །

༨ མ་ཎི་བསྐོར་དུས་ཀྱི་དམིགས་རིམ། དམིགས་རྣམ་སྐྱོང་ལུགས་ནི། གཟུངས་གཞུག་ལས་འོད་ཟེར་དཔག་མེད་འཕྲོས་ཏེ། མཆོད་པའི་སྤྲིན་གྱིས་ཞིང་ཁམས་ལས་ཐམས་ཅད་འགེངས། རྒྱལ་བ་སྲས་བཅས་ཀྱི་བྱིན་རླབས་ནུས་མཐུ་ཐམས་ཅད་བསྡུས་ནས་མ་ཎི་འཁོར་ལོ་ལ་ཐིམ། དེ་ལས་འོད་འཕྲོས་ཏེ་སེམས་ཅན་ཐམས་ཅད་ལ་ཕོག་པས། སྡིག་སྒྲིབ་བྱང་ཞིང་མཆོག་ཐུན་གྱི་དངོས་གྲུབ་ཐོབ། སླར་འོད་དང་དཀྱིལ་འཁོར་ལྷ་ཚོགས་ནམ་མཁའ་ཀུན་ཏུ་ཁྱབ་ནས། མ་གྱུར་སེམས་ཅན་ཐམས་ཅད་ཀྱི་དགེ་རྩ་དང་ལྷན་ཅིག་ཏུ་འཕྲོས་ཏེ། རིགས་དྲུག་གི་སྡུག་བསྔལ་དག་ཅིང་། སྣོད་བཅུད་རྣམ་པའི་རང་གཞན་གཟུངས་སྔགས་ཀྱི་རང་སྒྲ་སྒྲོགས་པ་དང་། སེམས་བདེ་སྟོང་དབྱེར་མེད་ཀྱི་ངང་ལ་འབྱམས་པར་བསམ་དགོས་སོ། །

གཞན་ཡང་། རྒྱལ་མཁན་ཆེན་གྲགས་པ་རྒྱལ་མཚན་གྱིས། རང་ཉིད་ཐུགས་རྗེ་ཆེན་པོ་གསལ་བ་ལས་རིགས་དྲུག་གི་འགྲོ་བའི་གྲངས་དང་མཉམ་པའི་ཐུགས་རྗེ་ཆེན་པོ་སྤྲོས་ཏེ། དེ་དག་གི་སྒྲིབ་པ་སྦྱངས། སྤྱན་རས་གཟིགས་ཀྱི་གོ་འཕང་ལ་བཀོད་པ་དང་། རང་རང་གི་ཐུགས་ཀ་ནས་ཀུན་ཏུ་བཟང་བའི་མཆོད་པའི་སྤྲིན་གྱི་ཕུང་བོ་སྤྲོས་ཏེ། ཕྱི་ནང་གསང་བའི་མཆོད་པས་མཆོད། རྒྱལ་བ་སྲས་བཅས་ཐམས་ཅད་སྤྱན་རས་གཟིགས་ཀྱི་རྣམ་པར་སྤྱན་དྲངས་པ་ནམ་མཁའི་ཁྱོན་ཐམས་ཅད་ཏིལ་གྱི་གང་བུ་ལྟར། བར་མཚམས་མེད་པར་གང་བ་ལ་དམིགས་ཏེ་མ་ཎི་བགྲང་བའི་ཚེ། རང་གིས་དུས་གསུམ་དུ་བསགས་པའི་དགེ་ཚོགས་མཐའ་དག་དང་། རྒྱལ་བ་སྲས་བཅས་ཀྱི་ཡོན་ཏན་ཐམས་ཅད་གཅིག་ཏུ་འདྲེས་ཏེ། དེ་ལས་བདུད་རྩིའི་རྒྱུན་དང་། འོད་སྣ་ལྔ་ལ་སོགས་པ་བྱུང་སྟེ་ཚ་དམྱལ་བརྒྱད་དང་། གྲང་དམྱལ་བརྒྱད་ཀྱི་སྡུག་བསྔལ་དང་། བྱིངས་དང་ཁ་འཐོར་ན་གནས་པའི་དུད་འགྲོའི་སྡུག་བསྔལ། སེར་སྐྱ་མིའི་ཡུལ་སོགས་ན་གནས་པའི་ཡི་དྭགས་བཀྲེས་སྐོམ་གྱི་སྡུག་བསྔལ། ལྷ་མ་ཡིན་གྱི་ཕྲག་དོག ལྷའི་འཆི་འཕོ་འོག་ལྟུང་། མིའི་སྐྱེ་རྒ་ན་འཆི་སོགས་སྡུག་བསྔལ་མཐའ་དག་བསལ་ཏེ། སྐད་ཅིག་མ་གཅིག་ལ་རྫོགས་སྨིན་སྦྱངས་གསུམ་མཐར་ཕྱིན་ནས། ས་བཅུ་བ་དང་རྒྱུན་མཐའ་ལྟ་བུའི་དབང་རྣོན་དུ་གྱུར་བ་དེ་ཉིད། རང་གི་བླ་མ་ལ་ཕུལ་ནས་གདུལ་བྱར་གྱུར་བར་མོས་ཏེ། འཁོར་ལོ་བསྐོར་བར་གསུངས་སོ། །

གཞན་ཡང་། ཆོས་ཀྱི་འཁོར་ལོ་ཆེན་པོ་ལས། །འོད་འཕྲོས་སེམས་ཅན་ཐམས་ཅད་ཀྱི། །ཉོན་མོངས་མ་ལུས་དུཿཁ་དང་། །རིགས་དྲུག་བག་ཆགས་ས་བོན་རྣམས། །རབ་འདུས་ཡིག་དྲུག་འཁོར་ལོར་ཐིམ། །ཉོན་མོངས་ལས་དང་ས་བོན་དང་། །རིགས་དྲུག་བག་ཆགས་ས་བོན་རྣམས། །བསྲེག་དང་བཅོམ་དང་དག་པར་བསམ། །མན་ངག་དེ་དང་ལྡན་གྱུར་ན། །འཁོར་བའི་རྒྱུ་རྐྱེན་འབྲས་བུ་དང་། །ཉོན་མོངས་ལས་དང་སྡིག་སྒྲིབ་ཀུན། །མ་ལུས་པ་ནི་གྲོལ་བར་འགྱུར། །འཁོར་བའི་རྩ་གཅོད་འཁོར་ལོ་ཡིན། །ཤིན་ཏུ་གསང་ལ་ཉམས་ལེན་གཅེས། །ལས་སྦྱོར་འཁོར་ལོ་རིན་ཆེན་གྱི། །སྔགས་ལས་འོད་ཟེར་འཕྲོས་གྱུར་བས། །འགྲོ་བ་རྣམས་ལ་ཕོག་པ་ཡིས། །བྱམས་དང་སྙིང་རྗེ་དགའ་བ་དང་། །བཏང་སྙོམས་དང་ནི་ཚད་མེད་བཞི། །རྒྱུད་ལ་ལྷུན་གྱིས་འགྲུབ་པར་འགྱུར། །སྦྱིན་པ་ཚུལ་ཁྲིམས་བཟོད་པ་དང་། བརྩོན་འགྲུས་བསམ་གཏན་ཤེས་རབ་སྟེ། །ཕ་རོལ་ཕྱིན་དྲུག་རྫོགས་པར་འགྱུར། །ཞེས་གསུངས་སོ། །

༩ མ་ཎི་སྐོར་བྱེད་ཀྱི་རྒྱུ་འབྱོར་མ་དག་པའི་ཉེས་པ། མ་ཎི་འཁོར་ལོའི་རྒྱུ་འབྱོར་ལོག་འཚོས་གོས་པ་སོགས་མ་དག་ཡིན་ན། ཕན་ཡོན་མེད་པར་མ་ཟད། ཉེས་དམིགས་ཧ་ཅང་ཆེ། ཁྱད་པར་དུ་སེམས་ཅན་མང་བོའི་སྲོག་བཅད་དེ། མ་ཎི་བསྐོར་བ་ཆོས་སུ་རློམ་པ་ནི། ཁྲག་མཚོ་དང་རྣག་མཚོའི་དཀྱིལ་ནས་ཡི་གེ་བྲིས་པ་སྟེ། གསུང་རབ་ཁྱད་དུ་གསད་པ་མ་ཡིན་ཡང་། གོ་བ་ལོག་པར་སོང་བས། སྡིག་འབྲས་ཆེས་ལྕི་བའི་ཕྱིར་རོ། །

༡༠ བསྐོར་ཚུལ་ལོག་པའི་ཉེས་དམིགས། ཇི་སྐད་དུ། ཏབ་ཏབ་ཏུ་ནི་བསྐོར་བ་ན། །དམན་པའི་ལུས་སུ་སྐྱེ་བར་འགྱུར། །འཁོར་ལོ་འཕྲེད་ལ་བསྐོར་བ་ན། །དུད་འགྲོ་སྒུར་བོའི་ལུས་སུ་སྐྱེ། །མགོ་མཇུག་ལོག་ནས་བསྐོར་བ་ན། །སེམས་ཅན་ཞ་བོའི་ལུས་སུ་སྐྱེ། །འཁོར་ལོ་གསལ་བར་མ་བཞེངས་ན། །དམུས་ལོང་ཅན་གྱིས་ལུས་སུ་སྐྱེ། །འཁོར་ལོ་སྒྲ་སྐད་ལོག་བལྟས་ན། །རྣ་བ་འོན་པའི་ལུས་སུ་སྐྱེ། །འཁོར་ལོ་སྐུར་བ་བཏབ་པ་ན། །ལྒིན་ཞིང་ལྐུགས་པའི་ལུས་སུ་སྐྱེ། །ཞེས་དང་། གཞན་ཡང་མགོ་མཇུག་ལྡོག་པ། སར་འཕངས་པ་སོགས་གསང་སྔགས་བཟླས་པའི་འཕྲུལ་འཁོར་བཤིགས་པ་ལྟར་རྣམ་སྨིན་ལྕི་བ་དང་། འགབ་ཡུག་ཤོར་བ་དང་། བརྙས་བཅོས་བྱས་ན། སྨྱོ་བ་དང་། བརྒྱལ་བ་དང་། དགྲ་རྐུན་ཇག་གསུམ་དང་། གོད་ཁ་རྒྱུན་མི་ཆད་པར་འོང་ཞིང་། དབུལ་ཕོངས་དང་ཤི་ཆད་། བཀྲ་མི་ཤིས་པ་མང་བོ་བྱུང་སྟེ། དམྱལ་བར་འགྲོ་བ་མདོ་རྒྱུད་རྣམས་སུ་གསུངས་པ་དང་། འཁོར་ལོ་བསྐོར་དུས་སུ་ཙེར་ཙེར་ཟེར་ན་སྲོག་ལ་གནོད། ཏྲག་ཏྲག་ཟེར་ན་འཁོར་ལ་གནོད་པས། སྐད་མེད་ཆུ་བོའི་རྒྱུན་བཞིན་བསྐོར་བ་གལ་ཆེའོ། །

༡༡ བསྐོར་ཚུལ་ལེགས་པའི་ཕན་ཡོན། གདུགས་ལྟར་བསྐོར་ན་གཟུགས་བཟང་ཞིང་། །སྐྱེ་མཆེད་ལེགས་ཤིང་ཚང་བར་སྐྱེ། །དེས་ན་སྐལ་ལྡན་སྐྱེས་བུ་ཡིས། །ཆོས་ཀྱི་འཁོར་ལོ་ཆེན་པོ་འདི། །ཐད་ཀར་དྲང་ཞིང་བསྐོར་བ་ན། །དབང་བོ་ཡ་རབས་སངས་རྒྱས་འཐོབ། །འགྲོ་བ་སེམས་ཅན་དོན་བྱེད་འགྱུར། །དབང་བོ་འབྲིང་རྣམས་མི་ལུས་འཐོབ། །སྡིག་སྤོང་དགེ་ལ་བརྩོན་པར་འགྱུར། །ཞེས་དང་། སངས་རྒྱས་སྣང་བ་མཐའ་ཡས་ཀྱིས། །སྙིགས་མའི་སེམས་ཅན་དོན་ཕྱིར་དུ། །ཡི་གེ་དྲུག་པའི་ཕན་ཡོན་བཤད། །ཡིག་དྲུག་འདྲེན་དང་ཆོས་འཁོར་བསྐོར། །དུས་གཅིག་ཉམས་སུ་ལེན་བྱེད་པ། །སངས་རྒྱས་སྟོང་དང་སྐལ་བ་མཉམ། །ཞེས་དང་། ཤཱཀྱའི་རྒྱལ་བོས། སྒྲིབ་པ་རྣམ་སེལ་ལེགས་པརཉོན། །སྙིང་བོ་དོན་གྱི་རྣལ་འབྱོར་མཆོག། སྒྲུབ་པ་ལོ་གཅིག་བྱས་པ་པས། །དབྱུག་རྡོ་ལན་གཅིག་བསྐོར་བ་མཆོག། སྙིང་བོ་དོན་བསྒོམ་འབྲིང་གིས་ཀྱང་། །སྒྲུབ་པ་ལོ་བདུན་བྱས་པ་ལས། །ཆོས་འཁོར་ལན་གཅིག་བསྐོར་བ་མཆོག། སྙིང་བོ་དོན་བསྒོམ་ཐ་མས་ཀྱང་། །སྒྲུབ་པ་ལོ་དགུ་བྱས་པ་བས། །ཆོས་འཁོར་ལན་གཅིག་བསྐོར་བ་མཆོག། ཐོས་བསམ་སྒོམ་གསུམ་བསྐལ་བ་བས། །ཆོས་འཁོར་ལན་གཅིག་བསྐོར་བ་མཆོག །ཅེས་གསུངས་པ་དང་། །འཇམ་དཔལ་གྱིས། རྒྱལ་ཆེན་བཞི་དང་ཕྱོགས་སྐྱོང་བཅུས། །ཕྱོགས་དང་ཕྱོགས་མཚམས་ཐམས་ཅད་ཀྱི། །བར་ཆད་ཐམས་ཅད་སྲུང་བར་བྱེད། །མཚམས་མེད་ལྔ་དང་མི་དགེ་བཅུ། །ངན་སོང་ལས་རྣམས་འདི་ཡིས་སྦྱོངས། །སངས་རྒྱས་ཞིང་ནས་ཞིང་དུ་འགྲོ། །བདེ་བ་ཅན་གྱི་ཞིང་ཁམས་སུ། །པདྨའི་སྙིང་བོ་ཟེའུ་འབྲུ་ལ། །བརྫུས་ཏེ་སྐྱེ་བ་ལེན་པར་འགྱུར། །ཕྱོགས་བཅུའི་སངས་རྒྱས་ཐམས་ཅད་ཀྱི། །འཕྲིན་ལས་ཕྱོགས་བཅུར་རྒྱས་པར་འགྱུར། །ཞེས་གསུངས་པ་དང་། མགོན་པོ་བྱམས་པའི་ཞལ་ལས། ཆོས་ཀྱི་འཁོར་ལོ་ཟབ་མོ་ལ། །ན་བཟའ་ལེགས་པར་ཕུལ་བ་ན། །སྐྱེ་བ་ལྔ་བརྒྱར་གོས་བཟང་འགྱུར། །འགྲོ་བ་ཡོངས་ཀྱི་མགོན་དུ་འགྱུར། །གྲིབ་མ་ཕོག་པའི་སེམས་ཅན་རྣམས། །ངན་སོང་གནས་ལས་ཐར་བར་འགྱུར། །གནས་སྐབས་བསྐོར་བའི་ཕན་ཡོན་ནི། །འགོ་ནད་རིམས་ནད་ཐམས་ཅད་ཐུབ། །གྲིབ་དང་མི་གཙང་ཐམས་ཅད་འཇོམས། །བདུད་དང་བགེགས་ཀྱི་དཔུང་རྣམས་འཇོམས། །ཞེས་དང་། ཕྱག་ན་རྡོ་རྗེས། ཆོས་ཀྱི་འཁོར་ལོ་ཆེན་པོ་འདིས། །སྟེང་གདོན་གཟའ་དང་འོག་གདོན་ཀླུ། །བར་གྱི་བཙན་དང་འབྱུང་བོའི་ཚོགས། །གནོད་བྱེད་ཐམས་ཅད་འདི་ཡིས་ཐུབ། །དེ་ལྟར་ཐུབ་པ་ཅིའི་ཕྱིར་ན། །རྒྱལ་བ་རིགས་ལྔ་སྟེང་ཕྱོགས་ཀྱི། །སངས་རྒྱས་མཐུ་སྟོབས་རྒྱལ་བོ་སོགས། །སྙིང་བོ་རེ་རེ་བསྡུས་པ་ཡི། །གཟུངས་སྔགས་འཁོར་ལོ་ཡིན་ཕྱིར་རོ། །ཞེས་དང་། འཕགས་པ་སྤྱན་རས་གཟིགས་ཀྱིས། གཟུངས་སྔགས་འཁོར་ལོ་ཆེན་པོ་འདི། །འཁོར་ལོ་གཞན་ལས་ཁྱད་པར་འཕགས། །སྐལ་བ་ལྡན་པའི་འགྲོ་བ་རྣམས། །ཆོས་འཁོར་འདི་ལ་བློ་གཏད་ནས། །བསྐོར་ཞིང་གསོལ་བ་བཏབ་པ་ནི། །འདི་ཕྱིའི་སྐྱབས་མགོན་མཆོག་ཡིན་ནོ། །ཞེས་གསུངས་པ་དང་། སློབ་དཔོན་པདྨས་མཛད་པའི་རླུང་འཁོར་ལས། ཙཀྲ་འདི་ཡི་དགོངས་པ་ནི། །མན་ངག་བརྩོན་འགྲུས་མི་ལྡན་པར། །ཅི་བདེར་གནས་པའི་གང་ཟག་གིས། །སི་དྷི་འཐོབ་པར་བྱ་བ་དང་། །བརྩོན་འགྲུས་ལྡན་པའི་གང་ཟག་གི །བཟླས་བརྗོད་དག་ནི་གྲོགས་སུ་འགྱུར། །སྡིག་པ་དཔག་ཏུ་མེད་པ་ཡང་། །འབད་པ་མེད་པར་བྱང་བར་འགྱུར། །ཡི་དམ་འདོད་ལྷ་མང་བོ་ཡང་། །ཅིག་ཅར་ཉིད་དུ་འགྲུབ་པར་འགྱུར། །གང་གི་མིང་སྤེལ་བྲིས་པ་ན། །རང་ལ་འདུན་པ་མེད་པ་ཡང་། །སྐྱོན་དག་ཡོན་ཏན་རྫོགས་པར་འགྱུར། །མི་ཁོམ་བརྒྱད་ཀྱི་འགྲོ་བ་རྣམས། །ཙཀྲའི་གྲིབ་མ་ཕོག་པས་གྲོལ། །ཙཀྲ་ཕོག་པའི་འབྱུང་བ་བཞི། །ཕོག་པ་ཙམ་གྱིས་ངན་སོང་ལས། །གྲོལ་བར་འགྱུར་ཞེས་རྒྱལ་བའི་གསུངས། །མདོར་ན་ཉེས་སྐྱོན་མང་བོ་ཡང་། །འབད་པ་མེད་པར་བྱང་བར་འགྱུར། །ཙཀྲ་ལན་གཅིག་རེག་པ་ན། །རེག་པ་ཙམ་གྱིས་གྲོལ་བ་དང་། །བདེ་ལེགས་ཡོན་ཏན་མང་བོ་ཡང་། །འབད་པ་མེད་པར་འཐོབ་པར་འགྱུར། །ཞེས་དང། སློབ་དཔོན་ཀླུ་སྒྲུབ་ཀྱི་རླུང་འཁོར་ལས། འཁོར་ལོའི་རླུང་རྒྱུན་ཕོག་པའམ། །གྲིབ་མ་ཕོག་པའི་སེམས་ཅན་རྣམས། །དེ་དང་དེ་དག་གྲོལ་བར་འགྱུར། །ཞེས་དང་། ཨོཾ་མ་ཎི་པདྨེ་ཧཱུཾ་ཞེས་པའི་འཁོར་ལོ་ཆེན་པོ་འདི། སྟེང་དུ་རླུང་ལ་བཙུགས་པ་ན། །རླུང་ཟེར་ཕོག་པའི་སེམས་ཅན་དང་། །རླུང་ཕྱོགས་གནས་པའི་འགྲོ་བ་རྣམས། །ངན་སོང་སྡུག་བསྔལ་ལས་གྲོལ་ལོ། །འོག་ཏུ་མེ་ལ་བཙུགས་པ་ན། །དུ་དྲི་ཚོར་ཚད་སེམས་ཅན་དང་། །མེ་འོད་ཕོག་པའི་སེམས་ཅན་རྣམས། །ངན་སོང་སྡུག་བསྔལ་ལས་གྲོལ་ལོ། །ས་ལ་འཁོར་ལོ་བཙུགས་པ་ན། །ས་དེར་གནས་པའི་སེམས་ཅན་རྣམས། །ས་རྡུལ་ཕོག་པའི་འགྲོ་བ་རྣམས། །ངན་སོང་སྡུག་བསྔལ་ལས་གྲོལ་ལོ། །ཆུ་ལ་འཁོར་ལོ་བཙུགས་པ་ན། །ཆུ་ནང་གནས་པའི་སེམས་ཅན་རྣམས། །ཆུ་དེ་འཐུང་བའི་འགྲོ་བ་རྣམས། །ངན་སོང་སྡུག་བསྔལ་ལས་གྲོལ་ལོ། །ཨོཾ་མ་ཎི་པདྨེ་ཧཱུཾ་ཞེས་པའི་འཁོར་ལོ་འདི་ལ་གང་ལ་གང་མཁོའི་ཡོ་བྱད་སྣ་ཚོགས་དང་། མར་མེ་ཞལ་ཟས་ལ་སོགས་པའི་མཆོད་པ་ཕུལ་ན། སྟོང་འཁོར་ལོའི་སྒྱུར་བའི་རྒྱལ་བོར་འགྱུར་ཞིང་། གང་ལ་གང་འདོད་ཅི་ལ་ཅི་འདོད་པའི་ལོངས་སྤྱོད་སྣ་ཚོགས་ལ་ལོངས་སྤྱོད་ཅིང་། མཐར་འཕགས་པ་སྤྱན་རས་གཟིགས་ཀྱི་གོ་འཕང་འཐོབ་པར་འགྱུར་རོ། །སྐལ་བ་དང་ལྡན་པའི་སྐྱེས་བུ་རྣམས་ཀྱིས། ཨོཾ་མ་ཎི་པདྨེ་ཧཱུཾ་ཞེས་པའི་འཁོར་ལོ་འདི་གཞན་ལའང་སྟོན་ཅིག ཤོད་ཅིག སྒྲོགས་ཤིག འཁོར་ལོ་འདིས་བསྟན་པ་སྤེལ་ཞིག སངས་རྒྱས་ཀྱི་བསྟན་པ་སྤེལ་སྐྱོང་བྱས་པ་དང་འདྲ་བར་འགྱུར་རོ། །

མ་ཎི་འཁོར་ལོ་འདི་མེ་ལ་བསྐོར་ན། དུད་པའི་གར་ཁྱབ་ལ་ཐར་བའི་ས་བོན་ཐེབས་པར་འགྱུར་རོ། །ཆུ་དང་རླུང་ལ་བསྐོར་ན། ཆུ་དང་རླུང་གིས་གར་ཁྱབ་པའི་སེམས་ཅན་ཐམས་ཅད་བྱང་ཆུབ་འཐོབ་པར་གསུངས་ལ། ལག་པས་བསྐོར་ན། མི་དང་འཁོར་ལོ་དེ་གཉིས་མཐོང་ཐོས་དྲན་རེག་གིས། སེམས་ཅན་ཐམས་ཅད་རྣམ་དཀར་གྱི་ཆོས་ལ་འགོད་པར་གསུངས། ཟམ་པའི་སྟེང་དུ་བསྐོར་ན་མཐོང་བའི་སེམས་ཅན་ངན་སོང་ལས་ཐར། ཁྱིམ་དུ་བཙུགས་ན་ཁྱིམ་དེ་གཞལ་ཡས་ཁང་དུ་འགྱུར། ཐ་ན་མ་ཎི་འཁོར་ལོ་ལག་ཏུ་འཁྱེར་བའི་མི་དང་འཕྲད་ནའང་ཕ་མ་བསད་པའི་སྡིག་པ་ཡང་དག་སྟེ་ངན་སོང་ལས་ཐར་བར་བཤད་དོ། །

གཞན་ཡང་། ཁ་རྗེ་དབང་ཐང་། དབང་སྡུད་ནོར་སྒྲུབ། སྟོབས་དང་ཚེ་སྒྲུབ། སྲུང་འཁོར་དང་ལོངས་སྤྱོད། དཔལ་དང་གཟི་བརྗིད། ཤེས་རབ་དང་སྙིང་རྗེ་བསྐྱེད་པར་མ་ཟད། ནད་གདོན་བར་ཆད། བྱད་གཏད་མནན་གསུམ་དང་། དུག་དང་འབྱུང་གཞི། དུཿཁ་དང་མུ་གེ གོད་ཁ་དང་ནད་ཡམས། མི་དང་མི་མིན་གྱི་འཇིགས་པ་སོགས་བཟློག་པ་དང་། རྒྱལ་བའི་ཆད་པ་ལས་ཐར་བར་འགྱུར་རོ། །འཁོར་ལོ་བསྐོར་བས། ལུས་རྟེན་གཙང་མ་འཐོབ་ནས། དགེ་བའི་བཤེས་གཉེན་དང་ཞལ་མཇལ་ཏེ། ཆོས་སྤྱོད་ཀྱི་སྐལ་བ་ལྡན་ཞིང་། ཆོས་ཀྱི་མངའ་བདག་ཏུ་གྱུར་ཏེ། མི་བརྗེད་པའི་གཟུངས་འཐོབ་ནས། འཆད་རྩོད་རྩོམ་གསུམ་ལ་ཐོགས་པ་མེད་པར་འགྱུར་རོ། །འཁོར་ལོ་འདིས་ཕྱི་མ་དང་བར་དོ་ནས། མཆོད་པའི་རྫས་མང་བོས་ཕྱོགས་བཞིའི་སངས་རྒྱས་ལ་མཆོད་པར་མཛད་ཅིང་། ཆོས་ཉན་པའི་སྐལ་བ་དང་ལྡན་ལ། སེམས་ཅན་དཔག་ཏུ་མེད་པའི་དོན་བྱེད་དོ། །འཁོར་ལོ་འདིས་ངན་སོང་གི་སྐྱེ་རྒྱུན་གཅོད་ཅིང། མི་དགེ་བཅུ། མཚམས་མེད་ལྔ། སོ་བྱང་སྔགས་གསུམ་གྱི་དམ་སྡོམ་ཉམས་ཆག་དང་། ལུས་ངག་ཡིད་གསུམ་གྱི་སྡིག་པ་ཐམས་ཅད་འགྱོད་པ་དྲག་པོས་བཤགས་ན་འབྱང་བར་འགྱུར་བ། མཁའ་འགྲོ་མ་ཨ་ར་ལི་ལ་ཐུབ་པ་ཆེན་པོས་གསུངས་སོ། །སློབ་དཔོན་པད་འབྱུང་གི་མ་འོངས་ལུང་བསྟན་ལས་ཀྱང་། ལྷོ་ནུབ་ཏུ་འབྱོན་ཁར། ངས་སྲིན་པོ་ཐམས་ཅད་ཐུལ་བའི་རྟགས་ལ། ས་ཡི་མཐར་ཡི་གེ་དྲུག་མའི་འཁོར་ལོ་དར་ནས་ཡོང་སྟེ། དེ་དུས་འཁོར་ལོ་བསྐོར་བ་དང་། མཐོང་ཐོས་དྲན་རེག དེའི་རླུང་ཕོག་ཚད་ཐམས་ཅད། བཀྲ་ཤིས་དོན་འགྲུབ། སྒྲིབ་པ་དག མཐར་བྱང་ཆུབ་འཐོབ་པ་སོགས་ཕན་ཡོན་དཔག་ཏུ་མེད་པར་མ་ཟད། རྒྱ་གར་ནས་བོད་དུ་འགྱུར་ཚད་ཀྱི་ཆོས་ལུས་ངག་གི་དགེ་སྦྱོར་བྱ་ཐབས་ལ། ཡི་གེ་དྲུག་པའི་འཁོར་ལོ་འདི་བས་ཕན་པ་དང་ཡོན་ཏན་ཆེ་བ་མེད་པར་གསུངས་སོ། །དེ་ལྟར་མདོ་རྒྱུད་གཉིས་ལས་མང་དུ་གསུངས་ལ། ཡང་། འདིར་རྒྱུད་ལས་གསུངས་ཚུལ་འགའ་བཀོད་ན། ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྒྱུད་ལས། གང་ཞིག་བྱང་སེམས་ལྡན་པ་ཡིས། །སྐྱེས་བུ་བློ་གྲོས་སྟོབས་ལྡན་གྱིས། །ཡིག་དྲུག་ལྒིགས་བམ་ཆེན་པོ་བཞེངས། །བསྐྱེད་རིམ་རབ་གནས་མངའ་གསོལ་ནས། །ཆུ་འམ་རླུང་ངམ་ལག་པས་བསྐོར། །ངེས་པར་འཁོར་བ་ཕྱིར་བསྙིལ་ཞིང་། །ཕྲིན་ལས་རྣམ་བཞི་ལྷུན་གྱིས་གྲུབ། །དེ་ཡི་ཡོན་ཏན་བརྗོད་མི་ལང་། །ཞེས་དང་། ཐུགས་རྗེ་འགྲོ་དོན་བྱེད་འདོད་ན། །རིན་ཆེན་སྣ་ལྔའི་ལྒིགས་བམ་འབྲི། །རྒྱུན་འབབ་ཆུ་ལ་བསྐོར་ན་ནི། །དེ་ཡི་ལས་སྒྲིབ་མྱུར་དུ་འདག། མཐོ་རིས་ཐར་བའི་ཐེམ་སྐས་འཛུགས། །ཞེས་དང་། ཐུགས་རྗེ་ཆེན་པོའི་མུན་སེལ་སྒྲོན་མེའི་རྒྱུད་ལས། བྱང་སེམས་སྐྱེས་བུ་གང་དག་གིས། །ཡིག་བདུན་འཁོར་ལོ་མང་བཞེངས་ནས། །འབྱུང་བ་བཞི་ལ་བསྐོར་བ་ན། །ཕྲིན་ལས་གང་འདོད་མྱུར་དུ་འགྲུབ། །ཁྱད་པར་རྒྱུན་ཆད་མེད་པ་ཡི། །ལུས་ལ་བསྐོར་ན་ཡང་དག་འགྲུབ། །ཅེས་དང་། རྩ་བའི་རྒྱུད་ལས། གཞི་ལ་འགྲོ་བ་རིགས་དྲུག་གི་སྐྱེ་སྒོ་གཅོད་པ་དང་། ལམ་ལ་ཕར་ཕྱིན་དྲུག་གི་ཚོགས་རྫོགས་པ། འབྲས་བུ་ལ་རིགས་དྲུག་པ་རྒྱལ་བ་རྡོ་རྗེ་འཆང་གི་གོ་འཕང་འགྲུབ་པའི་ཕན་ཡོན་ཡོད། གུང་ཐང་བསྟན་པའི་སྒྲོན་མེས། དེ་དག་རང་རང་གི་ཀློག་པ་ལ་ཕན་ཡོན་ཇི་སྙེད་ཅིག་གསུངས་པ་ཐམས་ཅད་འབྱུང་སྟེ། སྔགས་རེ་གཉིས་ཤིང་བྱང་ལ་བྲིས་ཏེ་ཐེངས་འགའ་བསྐོར་བས། ནད་རིམས་སད་སེར་སོགས་ཞི་བ་མངོན་སུམ་དུ་གྲུབ་པ་ན། བསམ་པ་རྣམ་པར་དག་པས་གཟུངས་ཁྱད་པར་ཅན་དུ་མ་བསྐོར་བ་ལ་ཕན་ཡོན་བསམ་གྱིས་མི་ཁྱབ་སྟེ། དེ་འདྲ་ལ་རེག་པའི་རླུང་གིས་ཕོག་པ་ཙམ་གྱིས་ཀྱང་སྡིག་སྒྲིབ་ཚན་པོ་ཆེ་བྱང་ཞིང་། ཐར་བའི་ས་བོན་བསྐྲུན་པར་གསུངས་ཤིང་། མ་ཎི་བཏོན་པ་དང་བསྐོར་བའི་ཕན་ཡོན་མཉམ་པར་བཤད་དེ།

 བཏོན་པའི་ཕན་ཡོན་ནི། ཟ་མ་ཏོག་བཀོད་པའི་མདོ་ལས། ཡི་གེ་དྲུག་པ་འདི་ལག་གིས་བྲག་དང་རྩིག་པ་ལ་བྲིས་ནས་ལག་པས་རེག་པ་དང་ཞེས་སོགས་ནས་མཐོང་བ་ཙམ་གྱིས་སྲིད་པ་ཐ་མའི་བྱང་ཆུབ་སེམས་དཔར་འགྱུར་རོ། །སྐྱེ་རྒ་ན་འཆི་དང་། མི་སྡུག་པ་དང་འཕྲད་པ་དང་། སྡུག་པ་དང་བྲལ་བའི་སྡུག་བསྔལ་མེད་པར་འགྱུར་རོ། །ཞེས་གསུངས་སོ། །མདོར་ན། ལྷ་ཐུགས་རྗེ་ཆེན་པོར་སྙིང་ཁུང་རུས་པའི་གཏིང་ནས་གསོལ་བ་བཏབ་ནས། འདི་ཁོ་ནར་སྒོ་གསུམ་ཆིག་དྲིལ་དུ་བརྩོན་ན། བྱས་པ་དོན་ལྡན། ངལ་བ་འབྲས་བཅས། བསམ་པ་གཅིག་ཆོག འབྲེལ་ཚད་དོན་ལྡན་དུ་གྱུར་བ་དང་། མ་ཎི་ཁོ་ན་ཡི་དམ་དུ་བྱེད་པ་འདི་ལ། ཆོས་སྒོ་ཐམས་ཅད་ཀྱི་གནད་འདུ། བྱིན་རླབས་མྱུར། ཉམས་རྟོགས་ཤུགས་ལ་སྐྱེས། བསྒྲུབ་ཐག་ཉེ། རབ་ཚེ་འདི། འབྲིང་འཆི་ཁ། ཐ་མའང་ལུས་སེམས་བྲལ་མ་ཐག་འཕགས་པ་ཐུགས་རྗེ་ཆེན་པོས་བདེ་བ་ཅན་དུ་ཁྲིད་དེ་སངས་རྒྱས་ཀྱི་གོ་འཕང་འཐོབ་པར་གདོན་མི་ཟའོ། །

མ་ཎིའི་ཕན་ཡོན་ཞིབ་ཏུ་ཛ་ཡ་བློ་བཟང་འཕྲིན་ལས་ཀྱི་མ་ཎིའི་ཕན་ཡོན་སྟོན་པའི་བྱིན་རླབས་མྱུར་འཇུག་དང་། གཙང་རྒན་བློ་བཟང་ངག་དབང་འཕྲིན་ལས་རྒྱ་མཚོའི་མ་ཎིའི་ཕན་ཡོན་ཀུན་དགའི་དཔལ་སྟེར་སོགས་སུ་གཟིགས་པར་བྱའོ། །

སྦྱིན་སྲེག

༡ སྦྱིན་སྲེག་གི་ངོ་བོ། སྦྱིན་སྲེག་གི་སྒྲ་བཤད་ལ། དུང་དཀར་ཚིག་མཛོད་ལས། སྦྱིན་ནི་དགའ་བའི་ལྷ་ལ་སྦྱིན་པ་གཏོང་བ་དང་། སྲེག་ནི་རང་ལ་གནོད་བྱེད་མཁན་གདོན་འདྲེ་མཐའ་དག་སྲེག་པའི་དོན་དུ་གསུངས། ཕྱི་བའི་ལུགས་ལ་ཕྱུགས་ཀྱི་སྦྱིན་སྲེག་དང་། རྟ་གཙང་གི་སྦྱིན་སྲེག་སོགས་ཡོད་པར་བཤད་ཀྱང་། རང་ཅག་ནང་བའི་ལུགས་ལ་སྲོག་ཆགས་མེར་བསྲེགས་པའི་ལུགས་ངན་འདི་མེད་ལ། འབྲུ་དང་སྨན་སོགས་སྦྱིན་སྲེག་བྱེད་ལ། དེ་ནི་ཐབ་ཀྱི་ནང་དུ་མེ་ལྷ་དང་། རང་གི་ཡི་དམ་དངོས་སུ་བཞུགས་པར་མོས་ནས། དེའི་ནང་མར་ཁུ་དང་འབྲུ་རིགས་སོགས་སྲེག་ཏེ་ལྷས་བཞེས་པར་མོས་པའི་སྔགས་ཆོག་ཞིག་ཏུ་འདོད་དོ། །སྦྱིན་སྲེག་གི་ཆོ་ག་ནི། གྲུབ་མཐའ་སོ་སོའི་མཁས་དབང་རྣམས་ཀྱིས་མཛད་པའི་རང་རང་གི་ལྷ་ལ་བསྟེན་པའི་ཆོ་ག་སྣ་ཚོགས་ཡོད་དོ། །

༢ སྦྱིན་སྲེག་གི་སྔོན་འགྲོ། སྦྱིན་སྲེག་གི་སྔོན་འགྲོའི་ཆོ་ག་ལ། ས་གཞི་བྱིན་གྱིས་བརླབས་པ་སྤྱི་དང་། བྱེ་བྲག་ཏུ་ཞི་བར་མེ་ཐབ་དཀར་བོ་ཟླུམ་པོ་དང་། ཡམ་ཤིང་བདུད་རྩི་ཅན་གྱི་ཤིང་གི་གཞོག་པ། རྒྱས་པར་མེ་ཐབ་སེར་བོ་གྲུ་བཞི། ཡམ་ཤིང་འབྲས་བུ་ཅན་གྱི་ཤིང་གི་གཞོག་པ། དབང་ལ་མེ་ཐབ་དམར་བོ་ཟླ་གམ་དང་། ཡམ་ཤིང་ཙན་དན་སོགས་ཀྱིས་གཞོག་པ། དྲག་པོར་མེ་ཐབ་ནག་པོ་གྲུ་གསུམ་དང་། ཡམ་ཤིང་ཚེར་མ་ཅན་གྱི་ཤིང་གིས་གཞོག་པ། ཞི་རྒྱས་དབང་དྲག་གི་སྦྱིན་སྲེག་གང་ཡིན་ཡང་། རང་རང་དང་མཐུན་པའི་སྲེག་རྫས་རྣམས་གཙང་མར་བཤམས་པ་དང་། སློབ་དཔོན་གྱིས་ལས་བཞི་གང་བྱེད་ཀྱི་རིགས་མཐུན་ཆོས་གོས་གསོལ་བའོ། །

༣ སྦྱིན་སྲེག་གི་རྫས་ཀྱི་རྣམ་གྲངས། ཡོངས་གྲགས་རྫས་ཆེན་བཅུ་གཉིས་ནི། ༡ ཡམ་ཤིང་། ༢ མར་ཁུ། ༣ ཏིལ། ༤ རམ་པ། ༥ འབྲས། ༦ ཞོ་ཟན། ﹙ཞོ་དང་མར་ཁུ་མངར་གསུམ་བསྲེས་པ﹚༧ ཀུ་ཤ ༨ ཡུངས་དཀར། ༩ སོ་བ། ༡༠ ནས། ༡༡ སྲན་མ། ༡༢ གྲོ་བཅས་སོ། །

༤ སྦྱིན་སྲེག་གི་དངོས་གཞི། དངོས་གཞི་ནི། རྡོར་དྲིལ་ཕྱག་ཏུ་བཟུང་ཞིང་། དགང་གཟར་བླུགས་དང་། རྫས་བྱིན་གྱིས་བརླབས་པ། མེ་སྦར་ཞིང་ཀུ་ཤ་བཀྲམ་པ། ལས་བཞི་གང་ཡིན་གྱི་ཕྱག་རྒྱ་དང་བཅས་པའི་འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ཀྱི་གཟུངས་སྔགས་བཟླ་བཞིན་སྲེག་རྫས་འབུལ་ཞིང་། ལས་བཞི་ལྷུན་གྱིས་གྲུབ་པ་སོགས་ཀྱི་དམིགས་པ་བཟུང་བ་དང་། འཕྲིན་བཅོལ། མཆོད་བསྟོད། བཟོད་གསོལ། གཤེགས་བསྡུ་བྱ་བ་སོགས་ཡིན་ཞིང་། རྒྱས་པར་ནི་རང་རང་གི་ཆོ་ག་རྣམས་སུ་གསལ་བས། ཞིབ་ཏུ་དེར་གཟིགས་པར་བྱའོ། །

༥ སྦྱིན་སྲེག་གི་རྗེས་ཀྱི་བྱ་བ། རྗེས་ཀྱི་བྱ་བ་ནི། སྦྱིན་སྲེག་གི་དགེ་བསྔོ་དང་། ཤིས་བརྗོད། ལས་ཀྱི་རྗེས་བསྡུ་བྱེད་པ་རྣམས་ཡིན་ཞིང་། ལས་ཀྱི་རྗེས་བསྡུ་ནི། ཞི་བའི་སྦྱིན་སྲེག་ཡིན་ན་མེ་རང་ཞི་འཇོག་པའམ། ཡང་ན་འོ་ཆབ་ཀྱིས་གཞིལ་ཞིང་། ཐབ་སོལ་ཆུ་བོའི་ནང་དུ་འདོར་བ་དང། རྒྱས་པ་ཡིན་ན་གོང་ལྟར་མེ་རང་ཞིར་འཇོག་པའམ། ཡང་ན་དྲི་བཟང་གིས་ཆུས་གཞིལ་ཞིང་ཐལ་སོལ་བང་མཛོད་དམ་རི་ལ་སྦ་བ་དང་། དབང་གི་སྦྱིན་སྲེག་ཡིན་ན་མེ་རང་ཞིར་འཇོག་པ་གོང་ལྟར་རམ། ཡང་། ཆང་གིས་གཞིལ་ཞིང་ཐབ་སོལ་རི་བོའི་རྩེ་རུ་འཕྱར་བ་དང་། དྲག་པོ་ཡིན་ན་མེ་རང་ཞིར་མི་འཇོག་པར་དམོད་མོ་དང་བཅས་ཏེ་གསོད་པའམ། ཡང་ན་དུག་ཆུས་གཞིལ་ཞིང་ཐལ་བ་རྒྱ་གྲམ་དོད་པའི་ལམ་དང་། མཆོད་རྟེན་གྱི་འོག་ཏུ་མནོན་པ་སོགས་ཡིན་ནོ། །

༦ སྦྱིན་སྲེག་གི་ཕན་ཡོན། ཕན་ཡོན་ནི། ཞི་བའི་སྦྱིན་སྲེག་གིས། དེ་ཡིས་སྐལ་བ་ངན་པ་དང་། །སྒྲིབ་པའི་བར་ཆད་ཐམས་ཅད་ཞི། །དམ་ཚིག་ཉམས་ཆག་ཉེས་ལྟུང་དང་། །ལས་ཀྱི་སྒྲིབ་པ་ཐམས་ཅད་ཟད། །སྨྱོ་འབོག་གདོན་ཆེན་ནད་ཡམས་གཅོད། །ནད་དང་འགལ་རྐྱེན་མ་ལུས་ཞི། །ཞེས་དང་། རྒྱས་པའི་སྦྱིན་སྲེག་གིས། སྨོན་པའི་ལེགས་ཚོགས་ཐམས་ཅད་ཀུན། །བསམ་པ་ཡིད་བཞིན་འགྲུབ་པར་འགྱུར། །ཞེས་དང་། དབང་གི་སྦྱིན་སྲེག་གིས། འཕྲིན་ལས་སྒྲུབ་འདོད་འདི་ལ་བརྩོན། །གང་བསམ་ཐོགས་མེད་ལྷུན་གྱིས་གྲུབ། །ཅེས་དང་། དྲག་པོའི་སྦྱིན་སྲེག་གིས། གཟུང་འཛིན་འཁྲུལ་བའི་དགྲ་གདོན་བགེགས། །ཐམས་ཅད་མ་ལུས་རབ་ཏུ་འཇོམས། །ཞེས་སོགས་དང་། གཞན་ཡང་རྡོ་རྗེ་རྣམ་འཇོམས་ལ་བརྟེན་ནས་མི་གཙང་བའི་གྲིབ་རིགས་སེལ་བ་དང་། ངན་སོང་སྦྱོང་རྒྱུད་ལ་བརྟེན་ནས་ངན་སོང་གི་སྡུག་བསྔལ་ཞི་བ་སོགས་ཕན་ཡོན་མཐའ་ཡས་པ་ཡོད་དོ། །

རབ་གནས།

༡ རབ་གནས་བྱ་དགོས་པའི་རྒྱུ་མཚན། སྤྱིར་རྟེན་གསུམ་གྲུབ་ཙམ་ནས་རབ་གནས་མ་བྱས་ཀྱང་། ཕྱག་མཆོད་ཀྱི་ཡུལ་དུ་འོས་པ་ནི། མགོན་པོ་ཀླུ་སྒྲུབ་ཀྱིས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཇི་འདྲ་འང་རུང་མཁས་པས་མཆོད། །ཅེས་གསུངས་ལ། འོ་ན། རབ་གནས་བྱ་དགོས་པ་གང་ཡིན་ཞེ་ན། རྒྱུད་སྡེ་ལས། སྦྱིན་བདག་གི་བསོད་ནམས་མཐའ་ཡས་པ་སྤེལ་བ། རྟེན་དེ་ཡུལ་གང་དུ་གནས་པ་དེར་བཀྲ་ཤིས་པ་སོགས་ཀྱི་ཆེད་དུ་རབ་གནས་གསུངས་པ་ལྟར། དགོས་པ་དེ་དག་གི་ཆེད་དུ་རབ་གནས་དགོས་ཏེ། རབ་གནས་ཀྱི་རྒྱུད་ལས། སྐྱེ་བོ་རབ་ཏུ་དང་བ་ཡིས། །བརྗོད་པའི་དགེ་བ་སྤེལ་བའི་ཕྱིར། །རབ་གནས་བསྟན་བཅོས་ལས་གསུངས་པ། །ཐ་སྙད་ཙམ་དུ་བྱས་པ་ཡིན། །ཞེས་པ་ལྟར། ཆོས་དབྱིངས་དོན་དམ་པར་བྱང་སེམས་རྣམས་ནི་གཡོ་མེད་ཀུན་ཏུ་ཁྱབ་པས་གཤེགས་བཞུགས་རབ་གནས་བགྱིར་མེད་ཀྱང་། ཀུན་རྫོབ་ཐ་སྙད་ཙམ་དུ་རབ་གནས་མ་བྱས་པར་ཡུན་རིང་ལུས་ན། བཀྲ་མི་ཤིས་པ་དང་མཆོད་པའི་འོས་སུ་མི་འགྱུར་བ་སོགས་ཏེ། རབ་གནས་ཀྱི་རྒྱུད་ལས། གང་དུ་སྐུ་གཟུགས་རྫོགས་པ་ལ། །བྱིན་མ་རླབས་པར་རིང་གནས་ན། །དེ་ལ་བཀྲ་མི་ཤིས་འབྱུང་ཞིང་། །ཇི་སྲིད་མཆོད་པ་དེར་མི་འོས། །དཔེར་ན་སྐྱེས་བུ་ལ་ལ་ཞིག། རིག་པའི་མཚན་ཉིད་སྤངས་པ་ན། །འཇིག་རྟེན་ཀུན་གྱིས་མཆོད་མི་བྱེད། །དེ་དེ་བཞིན་དུ་གཟུགས་བརྙན་དེ། །རབ་གནས་མ་བྱས་གཟུགས་བརྙན་ལ། །གང་གིས་མཆོད་ཅིང་ཕྱག་བྱེད་པ། །དམ་ཚིག་བྲལ་ཞིང་སྔགས་དམན་པས། །སྦྱིན་སྲེག་ཐལ་བ་འབྲས་མེད་མཚུངས། །ཞེས་སོ། །དེ་བས། རབ་གནས་ཀྱི་གོ་དོན་ཡང་། ཀུན་མཁྱེན་འཇམ་བཞད་ཀྱིས། དོན་དམ་པར་རབ་ཏུ་གནས་བྱ་གནས་བྱེད་སོགས་ཆོས་ཐམས་ཅད་བདེན་པར་མ་གྲུབ་པ་ནམ་མཁའ་ལྟ་བུ་ཞིག་ཡིན་ཀྱང་། ཐ་སྙད་དུ་རྫས་སྔགས་ཏིང་འཛིན་སོགས་རྟེན་ཅིང་འབྲེལ་བར་འབྱུང་བ་རྣམས་ཚོགས་པ་དང་། རྒྱལ་བ་རང་ཉིད་ཀྱི་གསུང་ལྟར་ཐུགས་དམ་བསྐུལ་བ་ལ་བརྟེན་ནས། ཡེ་ཤེས་པའི་ཚོགས་གདུལ་བྱའི་མོས་ངོ་དང་བསྟུན་པར་དམ་ཚིག་པ་ལ་རབ་ཏུ་གནས་པ་ལ་གསུངས་སོ། །ངེས་ཚིག་ནི། དངོས་བོ་ཕལ་བ་ཡེ་ཤེས་སེམས་དཔའི་དངོས་བོར་གྲུབ་སྟེ་གནས་པར་བྱེད་པ་ལ་ཟེར་རོ། །

དེ་བས། རབ་གནས་ནི་གསར་བཞེངས་ཀྱི་སྐུ་གསུང་ཐུགས་རྟེན་སོགས་ལ་ངོ་བོ་དངོས་མའི་བྱིན་རླབས་རབ་ཏུ་གནས་པར་བྱས་པ་ལ་བྱ་ཞིང་། འདི་ཡང་ཆོས་ལུགས་ཀྱི་བྱེད་སྒོ་ཆེ་གྲས་སུ་གཏོགས། དེ་ཡང་སྐུ་གསུང་ཐུགས་རྟེན་གསར་དུ་བཞེངས་གྲུབ་བྱུང་རྗེས། བགེགས་བསྐྲད་དང་རབ་གནས་མ་བྱས་ན། གནོད་བྱེད་འདྲེ་གདོན་སོགས་ཀྱིས་རྟེན་དེ་ལ་གནས་བཅས་ཏེ། བདག་ཏུ་བཟུང་ནས་གནོད་འཚེ་གཏོང་བས། དེ་ལ་བགེགས་བསྐྲད་དང་ཡེ་ཤེས་པ་བསྟིམས་དགོས་པ་ཡིན་པས། རབ་གནས་ཆེན་མོ་སོགས་རྒྱས་འབྲིང་བསྡུས་གསུམ་བྱེད་ཚུལ་ཡོད་པ་གྲུབ་མཐའ་ཁག་གི་བླ་མ་གོང་མ་རྣམས་ཀྱིས་ཆོ་ག་མང་དུ་མཛད་པ་ཡོད། །

༢ རབ་གནས་བྱེད་པའི་སློབ་དཔོན། རབ་གནས་བྱེད་པའི་སློབ་དཔོན་གྱི་མཚན་ཉིད་ལ་ཐེག་པ་རང་རང་གི་སྐབས་སུ་འབྱུང་ལ། ཐེག་པ་འོག་མ་འདུལ་བའི་སྐབས་སུ་མཁན་སོགས་གསུམ་འོས་པའི་མཚན་ཉིད་བསྡུས་ན་བརྟན་མཁས་ཀྱི་ཡོན་ཏན་གཉིས་དང་ཕྱེ་བ་ལྔ་ཕྲུགས་ཉེར་གཅིག་སོགས་དང་ལྡན་པ་དགོས། ཐེག་ཆེན་ལ་མདོ་ལུགས་ཀྱི་སྐབས་སུ་མཚན་ཉིད་ལྔ་ལྡན་སོགས་བཤད་ལ། སྔགས་ཀྱི་ཐེག་པར་ཆོ་ག་ཉི་ཤུ་སོགས་མང་བོ་ཞིག་བཤད་པ་ལས། འདིར་ནི་དུལ་སོགས་ཀྱི་མཚན་ཉིད་དང་ལྡན་ཞིང་། དེ་ཉིད་བཅུ་ཤེས་པ་ཞིག་དགོས་ཏེ། རྟེན་བརྟེན་པའི་དཀྱིལ་འཁོར་བྱེད་པ། ཏིང་འཛིན་གྱིས་ཉེས་ཚོགས་མནོན་ཅིང་ལེགས་ཚོགས་བསྐྱེད་པ། ཕྱག་རྒྱ་དང་གར་གྱི་སྟངས་སྟབས་ལ་མཁས་པ། གདན་ཁྲི་བཤམས་པ། བཟླས་བརྗོད་བྱེད་པ། སྦྱིན་སྲེག མཆོད་པ་འབུལ་བ། ལས་ཀྱི་སྦྱོར་བ་ཉེ་བར་བསྡུ་བ་རྣམས་ཀྱི་ཚུལ་ཤེས་ཤིང་། སྔགས་ཀྱི་དམ་སྡོམ་དག་པ། མཐོང་བ་བརྒྱུད་པའི་ཕྱག་བཞེས་ཀྱི་སྒོ་ནས་རབ་གནས་ཆོ་ག་ལ་མཁས་པ་ཞིག་དགོས་ཀྱི། སུ་ཐོད་ཐོད་ཀྱིས་མི་རུང་ངོ་། །དེ་ཉིད་བཅུ་ཤེས་པའི་སློབ་དཔོན་ལའང་། དམན་འབྲིང་མཆོག་གསུམ་ཡོད་པ་ནི། འགྲེལ་ཆེན་དྲི་མེད་འོད་ལས། དེ་ཉིད་བཅུ་ནི་ཡོངས་ཤེས་པ། །གསུམ་ལས་དགེ་སློང་མཆོག་ཡིན་འབྲིང་། །དགེ་ཚུལ་ཞེས་བྱ་དེ་དག་ལས། །ཁྱིམ་ན་གནས་པ་ཐ་མའོ། །ཡང་གནས་གཅིག་ཏུ་དེ་གསུམ་ཡོད་ཚེ་རབ་བྱུང་གཉིས་གང་རུང་གིས་བྱེད་དགོས་ཀྱི། ཁྱིམ་པས་བྱེད་མི་རུང་པ་ནི། དུས་འཁོར་རྩ་རྒྱུད་ལས། ལྷ་ཁང་ལ་སོགས་རབ་གནས་པོ། །རྟགས་ཅན་གྱིས་ནི་རྟག་ཏུ་བྱ། །གནས་གཅིག་དག་ཏུ་གསུམ་ཡོད་ན། །ཁྱིམ་པ་གོས་དཀར་ལྡན་པས་མིན། །

༣ རབ་གནས་ཀྱི་ཡུལ་དང་གནས། རབ་ཏུ་གནས་པའི་ཡུལ་ནི། སྐུ་གདུང་ཐུགས་རྟེན་གྱི་རིགས་བརྡུང་བ་དང་། བྲིས་པ། བླུགས་འབུར་ཅི་རིགས། གཙུག་ལག་ཁང་དང་རྡོ་དྲིལ་སོགས་གསར་བཞེངས་དང་། ཨར་ལྕོག་བྱས་ཏེ་བསྐྱར་བཞེངས་ཅི་རིགས་སོ། །ཀུན་མཁྱེན་འཇམ་བཞད་ཀྱིས། རབ་ཏུ་གནས་བྱའི་རྟེན་ནི། མཆོག་སྐུ་གསུང་ཐུགས་ཀྱི་རྟེན་དང་། དགེ་འདུན་གྱི་ཀུན་དགའ་ར་བ་རྡོ་རྗེ་དྲིལ་བུ་བགྲང་ཕྲེང་རྒྱན་དྲུག་སོགས་སོ། །ཕལ་བ་ནི་ཁང་བ་ཁང་བཟང་སྐྱེད་ཚལ་ཁྲོན་པ་ཆུ་མིག་སོགས་ཡིན་གསུངས་སོ། །

གནས་ནི། དུས་འཁོར་རྩ་རྒྱུད་ལས། གང་ན་ས་སྐྱོང་ཆོས་ལྡན་ཞིང་། །གང་ཞིག་ཁོ་ནར་སྐྱེ་དགུ་རྣམས། །བདེར་གནས་ས་འཛིན་རྩོད་མེད་པའི། །གནས་དེར་རྣལ་འབྱོར་བརྩམ་པར་བྱ། །ཞེས་དང་། སྤྱི་རྒྱུད་ལས། མཆོད་ན་ཆེན་པོ་ཉམས་དགའ་དང་། །དབེན་པ་ཡི་ནི་གནས་དག་ཏུ། །རི་ཡི་རྩེ་མོ་རྒྱ་ཆེན་དུ། །དངོས་གྲུབ་དཀྱིལ་འཁོར་བྲི་བར་བྱ། །ཞེས་དང་། གཞན་ཡང་། གནས་ནི་ཉམས་དགའ་འདུ་འཛི་མེད། །ཉེས་པ་ཐམས་ཅད་རྣམ་སྤང་ལ། །ཞེས་པ་ལྟར། ཉེས་པ་ཐམས་ཅད་ཅེས་པ་བཤན་པ་དང་སྨད་འཚོང་མ་དང་། སྦལ་སྦྲུལ་སྡོམ་སྡིག་སོགས་གནས་པའི་གཞི་དང་། གད་སྙིགས་དང་འདམ་རྫོབ་སོགས་ཀྱི་གནས་སྤང་དགོས་སོ། །

༤ རབ་གནས་བྱེད་པའི་དུས་ནི། རབ་གནས་ཀྱི་རྒྱུད་ལས། དཔྱིད་ཟླ་ར་བའམ་དཔྱིད་ཟླ་འབྲིང་། །དགུན་དང་དཔྱིད་ཀྱི་ཐ་ཆུང་ངམ། །དབྱར་ར་དེ་བཞིན་དབྱར་འབྲིང་བོ། །ཉི་མ་བྱང་དུ་གནས་པ་ཡི། །དཀར་བོའི་ཕྱོགས་ཀྱི་གཉིས་པ་འམ། །དེ་བཞིན་དེ་ལྟར་གསུམ་པ་དང་། །གང་ཚེ་གཟའ་ཚེས་དང་བསྟུན་ནས། །ནག་པོའི་ཕྱོགས་ལའང་བརྩམས་པར་བྱ། །ཞེས་སོགས་དང་། དུས་ཚེས་དེ་དག་ཏུ་རབ་གནས་བགྱིས་པའི་འབྲས་རྟགས་ཀྱང་། བདེ་མཆོག་དཀྱིལ་ཆོག་ལས། དབྱར་དུས་རབ་གནས་གྲུབ་པའོ། །སྟོན་ནི་བདེ་བ་སྟེར་བར་འགྱུར། །དགུན་སྟོད་ཡེ་ཤེས་འཕེལ་བ་སྟེ། །དགུན་སྨད་དབང་ཕྱུག་ཐམས་ཅད་འབྱུང་། །དཔྱིད་ཀ་དཔལ་ནི་རབ་ཏུ་སྦྱིན། །སོས་ཀ་རྒྱལ་དང་ཞི་བ་སྟེར། །རབ་གནས་དུས་ནི་ཐམས་ཅད་དུ། །སངས་རྒྱས་བཞུགས་སུ་འཇུག་པར་བཞེད། །ཅེས་དང་། ཐམས་ཅད་དུ་ནི་ཆུ་སྟོད་དང་། །སྣར་མ་གྲོ་བཞིན་དེ་བཞིན་དབོ། །ལག་པ་སྣུབས་དང་སྣྲོན་དང་ནི། །རྒྱལ་དང་ཆུ་སྨད་དེ་བཞིན་ནོ། །ཁྲུམས་སྨད་དག་ཀྱང་དེ་བཞིན་དུ། །རྒྱུ་སྐར་འདི་དག་ཐམས་ཅད་དུ། །རབ་ཏུ་གནས་པ་མཆོག་ཏུ་བཤད། །ཞེས་སོགས་ཟླ་བ་དྲུག་དང་། གཟའ་བཞི། སྐར་མ་བཅུ་བཞི་སོགས་ལ་རབ་གནས་བྱ་བར་གསུངས་ཏེ། ཞིབ་ཏུ་རྗེའི་རབ་གནས་རྒྱས་པའི་ཟིན་བྲིས་སོགས་ལས་ཤེས་པར་བྱ་ཞིང་། ཁྱད་པར་དུ་དགུན་ཟླ་འབྲིང་བོ་དང་། དཔྱིད་ཟླ་འབྲིང་བོ་ནི་འཁོར་ལོའི་སྒྱུར་རྒྱལ་དང་། སངས་རྒྱས་ཀྱིས་དབང་བསྐུར་བའི་དུས་ཆེན་ཡིན་པས། མཆོག་ཏུ་བཀྲ་ཤིས་པར་གསུངས། དེ་ལས་གཞན། ཚེས་གྲངས་ངན་དང་དུས་མིན་དང་། །གནས་མིན་ཆོ་ག་མི་ལྡན་པར། །མཁས་པས་དཀྱིལ་འཁོར་མི་འབྲིའོ། །བྲིས་ན་གདོན་མི་ཟ་བར་ཤི། ཞེས་གསུངས་ལ།

འོན་ཀྱང་། སློབ་དཔོན་ཏིང་འཛིན་མཆོག་དང་ལྡན་ཞིང་། མི་མཐུན་ཕྱོགས་ཟིལ་གྱིས་མནོན་པར་ནུས་ན་ནི་དུས་ཚོད་དགག་བྱ་ཅི་ཡང་མེད་པར་མ་ཟད། གྲུབ་ཆེན་འགའ་ཟུང་གིས་རབ་གནས་ཀྱི་ཆོ་ག་སོགས་ཅི་ཡང་མི་བརྟེན་པར། འཇིག་རྟེན་པར་ཞེན་ལོག་བྱུང་བ་ལྟ་བུའི་རབ་གནས་བགྱིད་པའང་རེ་གཉིས་སྲིད་དེ། དཔེར་ན། འབྲུག་པ་ཀུན་ལེགས་ཀྱི་རྣམ་ཐར་ལས། དེ་ནས་ངས་ར་ལུང་དུ་ཕྱིན་པའི་ཚེ་ལམ་བར་བ་རྣམས་ཞོལ་ནས་བརྒྱུད་ཡོང་། རྒད་གསུམ་དར་ཞེས་པ་ལོ་བརྒྱད་ཅུ་ལོན་པ་ཞིག་གིས་བཀའ་བརྒྱུད་གསེར་ཐང་གི་ཞལ་ཐང་རི་མོ་ཅན་ཤིན་ཏུ་ལེགས་པ་ལ། གསེར་བྲིས་མེད་པ་ཞིག་རྒྱབ་ཏུ་འཁུར་ཏེ་འགྲོ་བ་དང་འཕྲད་བྱུང་། རྒད་པུ་གར་འགྲོ་ཞེས་བྱས་པས་ང་ར་ལུང་དུ་ངག་དབང་ཆོས་རྒྱལ་གྱི་དྲུང་དུ་སྐུ་ཐང་རབ་གནས་ཤིག་ཞུ་བ་ལ་འགྲོ་རྒྱུ་ཡིན་ཟེར་བས། རྒད་པུ་ཁྱེད་ཀྱི་སྐུ་ཐང་དེ་ང་ལ་སྟོན་དང་བྱས་པས། ཁྱོད་ལ་མི་སྟོན་ངག་དབང་ཆོས་རྒྱལ་ལ་སྟོན་རྒྱུ་ཡིན་ཟེར། ཅིས་ཀྱང་ང་ལ་སྟོན་དང་བྱས། རྒྱ་བཤིག་ནས་བལྟས་པས་རྒད་པུས་དགའ་མོ་ཨེ་འདུག་ཟེར། ངས་ཀྱང་དགའ་མོ་རང་འདུག་སྟེ། འདི་ཞིག་དགོས་རྒྱུ་ཡིན་གསུངས་ནས་ཕྱག་མཇེ་ལ་འཇུས་ནས་ཕར་གཡུག་ཚུར་གཡུག་མཛད་ཅིང་སྐུ་ཐང་གི་སྟེང་དུ་ཆུ་ཐེ་རེ་རེ་བཏང་བས། རྒད་པུ་ནི་དབུགས་ཁ་ཤོང་ཚད་བཏོན་ཏེ། ཨ་ཧོ་ཧོ། ཨ་ཕུའུ། ཨའུ། སྨྱོན་པ་ཁོ་དེ་འདྲ་མ་བྱེད་ཟེར། རྒད་པུ་ངུ་ཞིང་འདུག ངས་ཀྱང་རྒད་པུ་མ་ངུ་ཟེར་ནས་ཞལ་ཐང་རློན་པ་དེ་བསྒྲིལ་ནས་རྒད་པུ་རང་ལ་བསྐུར། ད་རབ་གནས་ཞུ་རུ་ཕྱིན་པས་ཆོག་ཟེར་རྒད་པུ་བརྫངས་པས། རྒད་པུ་ར་ལུང་དུ་སླེབས་ངག་དབང་ཆོས་རྒྱལ་མཇལ་ཚེ། ང་ཡི་བསོད་ནམས་བསག་པའི་རྟེན་བཀའ་བརྒྱུད་གསེར་འཕྲེང་ཞིག་བཞེངས་པ་འདི་རུ་ཕྱག་ནས་ཞུ་རུ་ཡོང་བའི་ལམ་དུ་སྨྱོན་པ་ཞིག་དང་འཕྲད་བྱུང་། ངའི་སྐུ་ཐང་གི་སྟེང་དུ་ཆུ་བྱས་ནས་མེད་པ་ལགས། འདི་ལ་གཙང་བྱས་ནས་ཆོག་མི་ཆོག་ད་དུང་ཨེ་ཡོད་གཟིགས་དང་ཞུས་པས། རྒྱ་བཤིག་ནས་གཟིགས་པའི་ཆབ་གང་སླེབས་ཐམས་ཅད་གསེར་གྱི་དྲ་བ་དྲ་ཕྱེད་མུ་ཁྱུད་ཀྱི་འོད་ཟེར་ཕྲ་ཕུང་ངེ་བར་སོང་འདུག་པས། བླ་མས་ཀྱང་རབ་གནས་བྱེད་མི་དགོས་པར་འགྲུབ་འདུག་གསུངས། རྒད་པུ་བླ་ན་མེད་པའི་དད་པ་ཐོབ་སྟེ། ལེགས་སོ་བཀའ་དྲིན་ཆེ་ལགས། རྒད་པུ་ཁྱོད་ལམ་དུ་སྨྱོན་པ་གཅིག་དང་འཕྲད་པ་དེ་གྲུབ་ཐོབ་འབྲུག་སྨྱོན་ཆེན་པོ་ལགས་པས་རབ་གནས་མི་དགོས་གསུངས། རྒད་པུས་ངའི་ཐང་སྐུ་འདི་ཡང་ཀུན་ལེགས་དངོས་དང་ཁྱད་པར་མེད་པའི་བྱིན་རླབས་སྩོལ་ཅིག་ཟེར། སྐུ་ཐང་དེ་དེང་སང་ཡང་ཐིང་ཡུལ་རྡོར་རྟ་མགོའི་མཆོད་ཁང་ན་བཞུགས་ཡོད་དོ་གསུངས་པ་ལྟ་བུ་ལགས་ལ། དེ་ནི་ཆོ་ག་ལ་མ་བལྟོས་པའི་དོན་དམ་སྤྲོས་བྲལ་གྱི་རབ་གནས་ཞེས་བྱ་སྟེ། དེ་ཡང་ཆོས་ཉིད་ཟབ་མོའི་དོན་ལ་དབང་འབྱོར་བའི་སྐྱེས་བུ་ཆེན་པོ་རྣམས་ཀྱིས་ནི་དགོངས་པ་གཏད་པ་ཙམ་གྱིས་རི་བྲག་སོགས་རང་བྱུང་དང་བཅོས་པའི་རྟེན་གང་ཡིན་ཀྱང་ཡེ་ཤེས་ཆེན་པོའི་འཁོར་ལོར་བྱིན་གྱིས་རློབས་ནུས་པ་ཡིན་ནོ། །

༥ ཆོ་ག་དམན་པའམ་རབ་གནས་མ་བྱས་པའི་ཉེས་པ་ནི། རབ་གནས་ཀྱི་རྒྱུད་ལས། གང་དུ་སྐུ་གཟུགས་རྫོགས་པ་དང་། བྱིན་མ་བརླབས་པར་རིང་གནས་ན། །དེ་ལ་བཀྲ་མི་ཤིས་འབྱུང་ཞིང་། །ཇི་སྲིད་མཆོད་པ་དེ་མི་འོས། །དཔེར་ན་སྐྱེས་བུ་ལ་ལ་ཞིག །རིག་པའི་མཚན་ཉིད་སྤངས་པ་ལ། །འཇིག་རྟེན་ཀུན་གྱིས་མཆོད་མི་བྱེད། །དེ་དེ་བཞིན་དུ་གཟུགས་བརྙན་དེ། །རབ་གནས་མ་བྱས་གཟུགས་བརྙན་ལ། །གང་གིས་མཆོད་ཅིང་ཕྱག་བྱེད་པ། །དམ་ཚིག་བྲལ་ཞིང་སྔགས་དམན་པས། །སྦྱིན་སྲེག་ཐལ་བ་འབྲས་མེད་མཚུངས། །ཞེས་དང་། ཆོ་ག་དམན་པས་མི་བྱ་སྟེ། །རབ་གནས་རྟག་པར་བཀྲ་མི་ཤིས། །འཇིག་རྟེན་འདིར་ཡང་སྡུག་བསྔལ་ལ། །འཇིག་རྟེན་ཕ་རོལ་འཇིགས་པ་ཆེ། །དེ་བས་འབད་པ་ཐམས་ཅད་ཀྱིས། །དངོས་གྲུབ་འདོད་པས་ནན་ཏན་བྱ། །ཞེས་སོ། །

༦ རབ་གནས་ཀྱི་ཕན་ཡོན། རབ་གནས་ཀྱི་རྒྱུད་ལས། ཆོ་ག་འདི་ཉིད་ནུས་པ་ཡིས། །རྟོག་པ་ལས་གསུངས་ཚུལ་ལེགས་པ། །དེ་བྱས་བསོད་ནམས་ཆེ་བ་ནི། །མཐོང་དང་མ་མཐོང་འབྲས་བུ་སྐྱེ། །སྐུ་གཟུགས་ཀྱི་ནི་མཚན་ཉིད་ཀྱིས། །དེ་ལ་བྱིན་རླབས་འཇུག་པར་འགྱུར། །ཞེས་དང་། དེ་བཞིན་དུ་ཡང་སྔགས་གནས་པས། །མཆོད་ལྡན་མཆོད་པ་བྱེད་པ་དང་། །དེ་ཡི་ལས་ཀྱི་རྣམ་སྨིན་གྱིས། །སྐྱེ་བ་རུ་ནི་མཆོད་པར་འགྱུར། །ཞེས་དང་། བདེ་མཆོག་སྡོམ་འབྱུང་ལས། ཇི་ལྟར་རབ་ཏུ་གནས་བྱའི་ལྷ། །རབ་ཏུ་གནས་པར་བྱ་བར་ནུས། །སློབ་མ་དད་པའི་གསོལ་བཏབ་པའི། །བསོད་ནམས་ཕྱིར་ནི་བྱ་བ་ཡིན། །ཞེས་དང་། ཇོ་བོ་རྗེས། རབ་གནས་ཚད་ལྡན་སུས་བྱས་པ། །བསམ་པ་ཐམས་ཅད་ཡོངས་རྫོགས་ཤིང་། །འཁོར་ལོས་སྒྱུར་རྒྱལ་དབང་ཕྱུག་ནི། །འཐོབ་འགྱུར་འདི་ལ་ཐེ་ཚོམ་མེད། །ཅེས་སོ། །

རྒྱས་པར་ཀུན་མཁྱེན་འཇམ་དབྱངས་བཞད་པའི་རབ་གནས་ཀྱི་ཆོ་ག་ཀླག་པའི་དོན་གྲུབ་དགེ་ལེགས་ཀྱི་གཏེར་ཆེན་བཀྲ་ཤིས་རབ་རྒྱས་ཞེས་པར། རབ་གནས་བྱེད་དགོས་མི་དགོས་ཀྱི་ཁྱད་པར། ཆོ་ག་དག་མ་དག་གི་སྐྱོན་ཡོན། སློབ་དཔོན་གྱི་མཚན་ཉིད། གནས་དང་དུས། རྟེན་གྱི་ཁྱད་པར། དོན་དང་སྒྲ་བཤད། ལྷ་གང་གི་སྒོ་ནས་བྱེད་པ། ཆོ་གའི་ཁྱད་པར་བཅས་བཅུའི་སྒོ་ནས་གསུངས་ཡོད་པས་དེ་དག་ཏུ་གཟིགས་པར་བྱའོ། །

རྟེན་ལ་ནང་གཞུག་འབུལ་ཚུལ།

རྟེན་ལ་ནང་གཞུག་དགོས་པའི་ཁུངས་ནི། མདོ་ལས་རིང་བསྲེལ་ཡུངས་འབྲུ་ཙམ་བཞུགས་པའི་མཆོད་རྟེན་ལ། ཞེས་དང་། ཡང་། རིང་བསྲེལ་ཡུངས་འབྲུ་ཙམ་མཆོད་རྟེན་སྐྱུ་རི་རའི་འབྲུ་ཙམ་གྱི་ནང་དུ་བཅུག་སྟེ་སྲོག་ཤིང་ཤིང་ཁབ་ཙམ་གཟུག་ཅིང་གདུགས་རྒྱ་ཤུག་ལོ་མ་ཙམ་གྱིས་འགེབས་ཞེས་སོགས་ཀྱིས་འགྲུབ་ཞིང་། དེ་ཡང་སོ་སྐྱེས་ཀུན་རྫོབ་ཀྱི་སྣང་ངོར་། རྟེན་ལ་ནང་གཞུག་དགོས་ཏེ། ཀོང་སྤྲུལ་ཡོན་ཏན་རྒྱ་མཚོས། བསྟན་འགྲོའི་ཕུན་ཚོགས་རྒྱལ་བའི་རྟེན་ལས་བྱུང་། །དེ་ཡི་ནང་གཞུག་མི་ལ་སྲོག་བཞིན་གཅེས། །གསུངས་ལ། དེ་ལེགས་པར་མ་བསྒྲུབ་ན་མི་ལ་རྣམ་ཤེས་མ་ཞུགས་པ་ནང་བཞིན། གཟུགས་བེམ་དེ་ལ་གདོན་བགེགས་ཅི་རིགས་ཞུགས་ཏེ། བསྟན་འགྲོར་གནོད་ཅིང་། རྒྱུ་ནོར་ཆུད་གཟན་པ་ལས་མེད། རྐྱེན་དབང་གིས་ནང་གཞུག་སོགས་མ་གྲུབ་པ་ཡིན་ན། གནས་སྐབས་ཞལ་ཕྱེས་ནས་མི་འཇོག་པར། ལྷ་བཟོའི་ལག་ཆ་རྟེན་དང་ལྷན་དུ་འཇོག་པ་འམ། བྱིན་ཅན་གྱི་དམ་རྫས་སམ་ས་ཙྪ། ལྷ་རང་རང་གི་སྙིང་བོ་སོགས་འཇོག་དགོས། ནང་གཞུག་དང་རབ་གནས་ལེགས་པར་གྲུབ་ན། བསོད་ནམས་བསགས་པའི་ཞིང་སར་གྱུར་བར་མདོ་རྒྱུད་དུ་མར་གསུངས་སོ། །

 གཟུངས་གཞུག་འབུལ་ཡུལ་ནི། སྐུ་གསུང་ཐུགས་གསུམ་ལས། གཙོ་བོ་སྐུ་གཟུགས་གཉིས་ཡིན་ལ། གསུང་རྟེན་རང་ཉིད་ཆོས་ཀྱི་རང་བསྲེལ་ལགས་པས། ནང་གཞུག་མི་དགོས་པར་གསུངས་པ་དང་། ཁ་ཅིག་ལྒིགས་བམ་གྱི་མཇུག་ཏུ་རྟེན་འབྲེལ་སྙིང་བོ་འབྲི་སྲོལ་ཡོད་ཡང་ཟེར།

 འབུལ་བྱ་གཟུངས་གཞུག་གམ་རིང་བསྲེལ་ནི། བྱང་ཆུབ་སྙིང་བོ་རྒྱན་གྱི་གཟུངས་ཀྱི་ཆོ་ག་ཞིབ་མོ་ལས་གསུངས་པ་བཞིན། ནང་གཞུག་རིང་བསྲེལ་ལ་ལྔ་ལས། ༡ ས་ཙྪ་དང་མཆོད་རྟེན་སོགས་ནི་ཆོས་སྐུའི་རིང་བསྲེལ་དང་། ༢ གཟུངས་ཆེན་སྡེ་ལྔ་དང་ལྒིགས་བམ་སོགས་ཆོས་ཀྱི་རིང་བསྲེལ། ༣ སངས་རྒྱས་བྱང་སེམས་ཀྱི་གདུང་རུས་སོགས་སྐུ་གདུང་རིང་བསྲེལ། ༤ སངས་རྒྱས་བྱང་སེམས་ཀྱི་དབུ་སྐྲ་དང་སེན་མོ། ན་བཟའ་སོགས་སྐུ་བལ་གྱི་རིང་བསྲེལ། ༥ སངས་རྒྱས་དང་དམ་པའི་སྐྱེས་བུ་སོགས་ཀྱི་འཕེལ་གདུང་སྟེ་ཡུངས་འབྲུའི་རིང་བསྲེལ་ལོ། །གཟུངས་སྔགས་ཀྱི་རིགས་ནི། སྟོན་པ་ཐུགས་རྗེ་ཅན་ཁོང་རང་ཉིད་ཀྱིས་ཆེད་དུ་བསྔགས་པ་གཙུག་ཏོར་རྣམ་རྒྱལ། གཙུག་ཏོར་དྲི་མེད། གསང་བ་རང་བསྲེལ། བྱང་ཆུབ་རྒྱན་འབུམ། རྟེན་འབྲེལ་སྙིང་བོ་སྟེ་རྩ་བའི་གཟུངས་ཆེན་སྡེ་ལྔ་ཡོངས་རྫོགས་དང་། ལྷ་རང་རང་གི་སྙིང་བོ་དང་ཉེ་སྙིང་གཙོ་བོ་བྱ། ཆུང་ན་དེ་དག་གི་སྙིང་བོ་དང་མཆོད་རྟེན་ལ་ནི་དེ་དག་དང་འོད་ཟེར་དྲི་མེད་གྱི་སྙིང་བོ་ཙམ་ལས་གཞན་མ་འཛོམས་ཀྱང་ཆོག

 བསྒྲིལ་ལུགས་ནི། བུ་སྟོན་སོགས་ཀྱིས་མཇུག་ནས་བསྒྲིལ་བ་དང་། ངོར་ཆེན་སོགས་ཀྱིས་དབུ་ནས་དྲིལ་བའི་ལུགས་གཉིས་ཡོད་ཀྱང་། གང་ལྟར་དམ་པོར་སྒྲིལ་དགོས།

 མཆོད་རྟེན་དང་ས་ཙྪ་བྱིན་ཅན་བཞག་ན། གདོན་བགེགས་མི་འཇུག་ཅིང་། རབ་གནས་མ་གྲུབ་ཀྱང་བྱིན་བརླབས་ཆགས་པར་གསུངས་སོ། །

 ཡང་བསྟན་འཛིན་གྱི་སྐྱེས་བུར་རློམ་པའི་དམ་ཚིག་ཉམས་ཆག་བྱུང་བའི་བླ་གཟུགས་ཀྱི་ཡོ་བྱད་དང་། གསུང་རྟེན་འདྲ་མིན། འཇིག་རྟེན་པའི་ལྷ་སྐུའི་རིགས་ལ་ཤིན་ཏུ་འཛེམ་དགོས། ལམ་ཞུགས་སོ་སྐྱེས་བསླབ་པ་གསུམ་ལྡན་གྱི་རུས་པ་ནང་གཞུག་ཏུ་རུང་ཡང་། དེ་དང་རྒྱུད་ཚོད་མཐོ་བས་ཕྱག་བྱས་ན་ཕྱག་ཡུལ་ལ་གནོད་པར་འགྱུར་ན། ཐ་མལ་བའི་རུས་བུ་གཏན་དུ་ནང་དུ་གཞུག་མི་རུང་བ། འོད་སྲུངས་རྫོགས་བྱེད་ཀྱི་གཏམ་རྒྱུད་ལས་ཤེས་སོ། །

འོན་ཀྱང་། སྦྱོང་རྒྱུད་ལས། དེ་ནས་རྣལ་འབྱོར་ཅན་གྱི་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བརྟག་ནས་ཀྱང་། །མཆོད་རྟེན་དབུས་སུ་བཞག་པར་བྱ། །ཞེས་གསུངས་པ་ཡང་། དཀོན་མཆོག་གསུམ་གྱི་བདེན་པ་དང་། བླ་མ་ཐུགས་རྗེ་ཅན་གྱི་བྱིན་རླབས་དང་། རིག་སྔགས་ཏིང་འཛིན་གྱི་མཐུ་སྟོབས་དང་། ཆོས་ཀྱི་དབྱིངས་རྣམ་པར་དག་པའི་བསམ་གྱིས་མི་ཁྱབ་པའི་ནུས་མཐུ་ལ་བརྟེན་ཏེ། རྟོགས་ལྡན་ཞིག་དང་དེ་འབྲེལ་སྔོན་ལས་ཀྱི་བསགས་རྒྱབ་ཅན་ཞིག་དང་འཕྲད་ན་དེ་འདྲ་སྲིད་པ་མ་གཏོགས། དེ་འདྲ་ཅི་ཡང་མེད་པར་རུས་ཆོག་བྱས་ལོ་ཙམ་གྱིས་ནང་རྟེན་ཏུ་རློམ་པ་ནི། གཤིན་པོ་ལ་གནོད་སྐྱེལ་བ་ལས་གཞན་གང་ཡང་མེད་དོ། །

 ནང་གཞུག་འབུལ་བ་བོ་ནི། རབ་དགེ་སློང་རྡོ་རྗེ་འཛིན་པ། འབྲིང་དགེ་ཚུལ། ཐ་མ་དགེ་བསྙེན་ནམ་ཁྱིམ་པ་སོགས་ཀྱིས་གསོ་སྦྱོང་བླངས་ཏེ། ཤ་ཆང་སྒོག་ཙོང་སོགས་སྤངས་ནས། སྤྱོད་ལམ་ཡང་དག་དང་ཕྱག་ལེན་ཞིབ་ཚགས་ཀྱིས་དབུལ་བ་གལ་ཆེའོ། །

རྟེན་གྱི་སྲོག་ཤིང་གི་རྒྱུ། ཙན་དན་དང་ཨ་གར་ཤུག་པ་སོགས་དགོས་ལ། དེ་ཡང་གནས་གཙང་དང་ས་མིང་ཡག་ས་ནས། གནས་བདག་གི་མི་དང་། མི་མ་ཡིན་པའི་གཞི་བདག་ལ་མཆོད་གཏོར་ཕུལ་ཏེ་སློང་ཞིང་། ཡར་ངོ་གཟའ་སྐར་འཕྲོད་སྦྱོར་བཟང་བའི་ཉིན་ཞིག ཤར་ཕྱོགས་མི་ནོར་བའི་མཚན་མ་བཏབ་སྟེ། དབྱིབས་གྲུ་བཞི་རྩ་རྩེའི་རྣམ་པ་ཅན། རིང་ཐུང་དང་ཆེ་ཆུང་རྟེན་གྱི་བབ་དང་བསྟུན་ནས། ཤར་ངོས་ཀྱི་རྩེར་རྣམ་རྒྱལ་མཆོད་རྟེན། མི་ཤོང་ན་བྷྲུཾ་ཡིག་བྲིས་ཀྱང་ཆོག ཞབས་མཐིལ་གྱི་ལྟེ་བ་དང་ཕྱོགས་བཞིར་པད་འདབ་རྭ་དང་བཅས་པས་སྲོག་ཤིང་གི་ཞབས་བཏུམས་ལ། སྐུ་གཟུགས་ཀྱི་སྲོག་ཤིང་ཡིན་ན་ཤར་ངོས་སུ། སྤྱི་བོ་ཨོཾ། མགྲིན་པར་ཨཱ། ཐུགས་ཀར་ཧཱུཾ། ལྟེ་བར་ཏྲཾ། གསང་གནས་སུ་ཧྲཱྀ་ཡིག་འབྲི། སྤྱི་བོའིཨོཾ་གྱི་མཐའ་བསྐོར་དུ་རིག་པ་ཆེན་པོའི་གཟུངས། ཨོཾ་སརྦ་བིངྱཱ་སྭཱ་ཧཱ། ཞེས་དང་། མགྲིན་པའི་ཨཱའི་མཐའ་བསྐོར་དུ། ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷྲ་ཎ། ཏ་ཐ་ད་ངྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཞེས་དབྱངས་གསལ་དང་། ཐུགས་ཀར་ཧཱུཾ་གྱི་མཐའ་བསྐོར་དུ། ཨོཾ་བཛྲ་ཨ་ཡུ་ཥེ་སྭཱ་ཧཱ། ཞེས་དང་། ལྷ་རང་རང་གི་སྙིང་བོ། ལྟེ་བར་ཏྲཾ་གི་འོག་ནས་ཤར་ངོས་སུ་གཙུག་ཏོར་རྣམ་རྒྱལ་གྱི་གཟུངས། ཨོཾ་བྷྲཱུཾ་སྭཱ་ཧཱ། ཨོཾ་ཨ་མྲྀ་ཏ་ཨ་ཡུ་རྡ་དེ་སྭཱ་ཧཱ། ཞེས་དང་། ཏྲཾ་གི་འོག་ནས་ལྷོར་གཙུག་ཏོར་དྲི་མེད་ཀྱི་གཟུངས། ཨོཾ་ན་མ་སྟྲཻ་ཡ་དྷི་ཀ་ནྡཾ། སརྦ་ཏ་ཐ་ག་ཏ་ཧྲི་ད་ཡ་གརྦྷེ་ཛྭ་ལ་ཛྭ་ལ། དྷ་རྨྨ་དྷྱ་ཏུ་གརྦྷེ་སཾ་བྷ་ར་མ་མ། ཨ་ཡུཿསཾ་ཤོ་དྷ་ཡ་སཾ་ཤོ་དྷ་ཡ། མ་མ་སརྦ་པ་བཾ། སརྦ་ཏ་ཐ་ག་ཏ་ས་མནྟོ་ཤྟི་ཥ་བི་མ་ལེ་ཤུད་དྷི་ཧཱུཾ་ཧཱུཾ་ཧཱུཾ། ཨཾ་བཾ་སཾ་ཛ་སྭཱ་ཧཱ། ཞེས་དང་། ཏྲཾ་གི་འོག་ནས་ནུབ་ཏུ་གསང་བ་རིང་བསྲེལ་གྱི་གཟུངས། ཨོཾ་སརྦ་ཏ་ཐ་ག་ཏ་ཨུཥྞི་ཥ་དྷ་དུ་མུ་དྲཱ་ན་སྭཱ་ཧཱ། སརྦ་ཏ་ཐ་ག་ཏ་སྭཱ་དྷཱ་ཏུ་བི་བྷུ་ཥི་ཏ་ཨ་དྷི་ཥྛི་ཏེ་ཧུ་རུ་ཧུ་རུ་ཧཱུཾ་ཧཱུཾ་སྭཱ་ཧཱ། ཏྲཾ་གི་འོག་ནས་བྱང་དུ་བྱང་ཆུབ་རྒྱན་འབུམ་གྱི་གཟུངས། ཨོཾ་སརྦ་ཏ་ཐ་ག་ཏ་བྱཱ་བ་ལོ་ཀི་ཏེ། ཛ་ཡ་ཛ་ཡ་སྭཱ་ཧཱ། ཧྲི་ད་ཡཾ། ཨོཾ་ཧུ་རུ་ཧུ་རུ། ཛ་ཡ་མུ་ཥེ་སྭཱ་ཧཱ། ཨུ་བ་ཧྲི་ད་ཡཾ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཞེས་སོགས་ཀྱི་གཟུངས་འབྲི། གསང་གནས་སུ་ཧྲཱྀ་ཡིག་གི་ཐད་དུ། ཨོཾ་སུ་པྲ་ཏི་ཥྛ་བཛྲ་ཡེ་སྭཱ་ཧཱ། དེ་ནས། ཡེ་དྷ་ཪྨཱ་ཧེ་ཏུ་པྲ་བྷ་པཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བད་ཏ་ཏེ་ཥཙྙ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿཡེ་སྭཱ་ཧཱ། ཞེས་དང་། བཞི་ཀའི་གཤམ་དུ་ཤིས་བརྗོད་འདོད་གསོལ་སྨོན་ལམ་ཅི་རིགས་ཀྱིས་བརྒྱན་ཏེ། ལྷ་སོ་སོའི་མདོག་མཚུངས་ཀྱི་ན་བཟའ་འམ། ལས་བཞི་ལྷུན་གྲུབ་ཀྱི་མདོག་དར་གོས་ཀྱིས་དྲིལ་བར་བྱའོ། །

 དེ་ནས་སྲོག་ཤིང་གཟུགས་ཏེ་རྟེན་གསུམ་རིམ་པ་མ་འཆོལ་བར་ཕུལ་ཏེ། བར་སྟོང་དུ་ཤུག་པ་དང་བ་ལུ་སོགས་དྲི་ལྡན་གྱི་སྨན་ཕྱེ། རིན་ཆེན་རིགས། འབྲས་བུ་གསུམ། བཟང་དྲུག རྩ་བ་ལྔ། འབྲུ་ནག་མིན་པའི་འབྲུ་སྣ། དཀར་གསུམ་མངར་གསུམ་སོགས་ལྟིར་གྱིས་གང་ནས། མཐུན་རྐྱེན་ལེགས་ཚོགས་གོང་འཕེལ་དུ་གནོད་སྦྱིན་ཕོ་མོ། གནོད་སྦྱིན་བང་མཛོད། དབུལ་བའི་བསྐལ་བ་སེལ་ཕྱིར་རིན་པོ་ཆེའི་རིགས། ནད་ཀྱི་བསྐལ་བ་སེལ་ཕྱིར་སྨན་སྣ། མཚོན་གྱི་བསྐལ་བ་སེལ་ཕྱིར་མཚོན་ཆའི་རིགས་ཕུལ་ཏེ་མཐར་རྒྱ་གྲམ་གྱིས་གཅད་པར་བྱའོ། །

 བྲིས་ཐང་ཡིན་ན། རྒྱབ་ཏུ་གནས་གསུམ་དུ་ཡིག་འབྲུ་གསུམ་མམ་གནས་ལྔ་སྐྱེ་མཆེད་བྱིན་རླབས། ལྷ་སོ་སོའི་མཚན་སྔགས་དང་གཟུངས། སརྦ་བིངྱཱ། བཛྲ་ཨ་ཡུ། རྟེན་སྙིང་། གསོ་སྦྱོང་དང་བཀྲ་ཤིས་སོགས་འབྲི་ལ། ཧ་ཅང་ཆུང་ན་འབྲུ་གསུམ་གྱིས་ཀྱང་ཆོག་གོ །

ཕྭ་གཡང་།

༡ ཕྭ་གཡང་གི་གོ་དོན། སྤྱིར་གཡང་ཟེར་བ་ནི། ཚེ་དང་བསོད་ནམས། དཔལ་དང་འབྱོར་བ། སྙན་གྲགས་དང་རིགས་རྒྱུད། ཆོས་སྲིད་ཀྱི་ལེགས་པའི་ཆ་ཐམས་ཅད་ཚང་བ་ལ་གཡང་དང་། དེ་མ་ཚང་བ་མེད་པར་འགུགས་ཐབས་ཀྱི་ཆོ་ག་ལ་བརྟེན་ནས་ཚུར་སྡུད་པ་ལ་ཕྭ་གཡང་འགུགས་ཟེར།

ཡང་ཐུའུ་བཀྭན་ཆོས་ཉིས། གཡང་དང་བཅུད་དོན་གཅིག་པས། སྲིད་ཞིའི་བཅུད་འགུགས་པ་ལ་གཡང་འགུགས་པ་ཞེས་བཏགས་པ་སྟེ། གཡང་ཞེས་པའི་ཐ་སྙད་རྒྱུད་རྡོ་རྗེ་རྩེ་མོ་ལས་ཀྱང་། མཆོག་དང་ནོར་སྟེར་དཔལ་དང་གཡང་། །ཞེས་འབྱུང་བས་གཡང་འབོད་བྱེད་པ་བོད་ཀྱི་རྟོག་བཟོ་ཙམ་མ་ཡིན་ནོ། །གསུངས་སོ། །

 ཡང་བོན་ཀྱི་ཡིག་རྙིང་ཁག་གཅིག་ལས། ཕྭ་ནི་འཇིག་རྟེན་སྐྲུན་མཁན་གྱི་ཡབ་མེས་ཤིག་ཏུ་འདོད་ཕྱིར། ཕྭ་གཡང་འགུགས་པ་ཞེས་པའང་འགྲོ་བ་མིའི་མེས་པོ་ཕྭ་ཞེས་པ་གདན་དྲངས་ནས་བཅུད་དང་ལེགས་ཚོགས་འགུགས་པར་འགྲེལ་ནའང་མི་ཆོག་པ་མེད་སྙམ་མོ། །

༢ ཕྭ་གཡང་གི་ཁུངས། བདག་ཅག་གི་སྟོན་པ་བཅོམ་ལྡན་འདས་ཀྱིས། ལྷ་ཀླུ་མི་གསུམ་སོགས་གདུལ་བྱ་གྲངས་ཀྱིས་མི་ཟིན་པར། བྱ་རྒོད་ཕུང་བོའི་རི་ནས་གསེར་འོད་གཡང་སྐྱབས་གསུངས་པ་ནི། ད་ལྟ་ཡང་དངོས་སུ་མཇལ་རྒྱུ་ཡོད་པ་དེའོ། །གསེར་འོད་གཡང་སྐྱབས་འདི་ལ་ཡང་། ཐུའུ་བཀྭན་ཆོས་ཉིས། གསེར་འོད་གཡང་སྐྱབས་སོགས་རྒྱ་གར་ནས་མ་ཡིན་པར་ཡུལ་གཞན་ནས་རྙེད་པ་ཡིན་འདུག་པའི་བརྡ་ཆད་སྣ་ཚོགས་སྣང་ལ། སངས་རྒྱས་ཀྱི་ཞལ་ནས་གསུངས་པའི་མདོ་ཡིན་མིན་ཐེ་ཚོམ་ཟ་ཡང་། བྱིན་གྱིས་བརླབས་པའམ་རྗེས་སུ་གནང་བའི་བཀའ་གང་རུང་ཡིན་དུ་རུང་ངམ་སྙམ་མོ་གསུངས་སོ། །

བཤད་ཚུལ་གཞན་ལ། ཕྭ་གཡང་ཞེས་པ་འདི་བོན་གྱི་ཆོས་སྐད་ཅིག་ཡིན་ལ། ད་ལྟའི་གཡང་འབོད་ཀྱི་ཆོ་ག་འདི། བོད་རྒྱལ་ཐོག་མ་གཉའ་ཁྲིའི་སྔོན་ནས། བོན་ཤེས་པ་ཅན་བཅུ་གཉིས་ཀྱི་ནང་ཚན་གཡང་ཤེས་ཕྭ་བོན་གྱིས་གཡང་སྒྲུབ་བྱེད་པའི་སྲོལ་ཡོད་པ་སྟེ། ལུག་དམར་གྱི་ལག་ཤ་དང་། ཚིགས་གསུམ་ཅན་གྱི་མདའ་ལ་དར་ཚོན་སྣ་ལྔ་དང་། གཟི། སྤོས་ཤེལ། བྱུ་རུ། གཡུ། མེ་ལོང་བཅས་ཀྱིས་བརྒྱན་པའི་མདའ་དར་རྩེ་ལྔ་སྒྲོ་དང་ལྡན་པ་ལག་ཏུ་ཐོགས་ཏེ་ཚེ་བསོད་འགུགས་པའི་ཆོ་ག་བྱེད་སྲོལ་ཡོད་ལ། ལ་ལས་ད་དུང་ཕྱེ་མར་ཆང་ཕུད་སོགས་འཁྱེར་བའི་མི་གཅིག་གིས་ཁང་ཐོག་ནས་ཕྭ་གཡང་འགུགས་ཞེས་ཕྱག་རྒྱ་དང་བཅས་སྐད་རྒྱག་སྲོལ་ཡང་ཡོད་དོ། །

པདྨ་བཀའ་ཐང་ལས། འཇིག་རྟེན་འཕྲལ་རྐྱེན་བཟློག་པ་ཙམ་གྱི་བོནཿ ཤ་བ་ཤིང་མགོ་རྭ་རྒྱས་བྱེད་པ་དངཿ གཡག་ལུག་ཟན་ལ་གཟུགས་བརྙན་བྱེད་དུ་བཅུགཿ ལྷ་གཡང་སྐོར་གསུམ་མིན་པ་ཐམས་ཅད་བསྣུབསཿ དེ་ལྟར་རྒྱལ་བོ་ཁྲི་སྲོང་ལྡེ་བཙུན་གྱིས་བོན་ཆོས་བསྣུབས་པའི་སྐབས་སུ། གཡང་ཆོག་སོགས་སྤྱི་ཚོགས་ལ་ཕན་ཐོགས་པའི་བོན་ཆོས་འགའ་མ་བསྣུབས་པར་བཞག་ལ། ཕྱིས་སུ་སངས་རྒྱས་ཆོས་ལུགས་པས་བོན་ཆོག་གི་རྣམ་པ་རང་སོར་བཞག་ནས། ནང་དོན་གྱི་ཆ་ནས་ནང་བསྟན་དང་མཐུན་པར་བཅོས་པར་གྲགས་ལ། གང་ལྟར་ཆོས་ལུགས་གཉིས་ཀ་ན་ཁུངས་གཏུགས་ས་ཡོད་དོ། །ཚུལ་འདི་ལ་དགོངས་ནས། ཐུའུ་བཀྭན་ཆོས་ཀྱི་ཉི་མས། ཆོས་དང་བོན་ཞེས་འགལ་བའི་མཚང་བྱེད་དང་། །ཆོས་ལ་བོན་འདྲེས་བོན་ལ་ཆོས་འདྲེས་པས། །ཆོས་མིག་རྡུལ་བྲལ་མི་ལྡན་བདག་ལྟ་བུས། །ཆོས་བོན་རྣམ་དབྱེ་འབྱེད་ལ་སྒྱིད་ལུག་འགྱུར། །གསུངས་པའང་འདི་ལྟ་བུ་ལ་དགོངས་པ་ཡིན་ནོ། །

༣ གཡང་སྒྲུབ་ལ་མཁོ་བའི་རྫས། གསེར་འོད་གཡང་སྐྱབས་ལས། ཤིན་ཏུ་དབེན་ཞིང་ཉམས་དགའ་བར། །གཞི་མ་དཀར་གཙང་སྟེང་དུ་ནི། །དཀོན་མཆོག་མཆོད་པ་རྒྱ་ཆེར་བཤམས། །མདའ་དར་ཕྱེ་མར་གསེར་སྐྱེམས་མཆོད། །རིན་ཆེན་བུམ་པ་མར་ཁུས་བཀང་། །སྦ་སྨྱུག་རིན་ཆེན་གསེར་གཡུ་དང་། །གཡང་གི་ར་བ་རིན་ཆེན་མར་གྱིས་བཀང་། །མར་ལུག་དུང་ཤ་ཆང་ཕུད་སོགས། །ཕྱག་རྒྱ་སྔགས་ཀྱིས་བྱིན་བརླབས་ཏེ། །ཞེས་པ་ལྟར། བཟང་དྲུག་སོགས་སྨན་སྣ་དང་འབྲུ་སོགས་བྱུར་བུར་སྤུངས་ལ། ནོར་ལྷའི་གཟུངས་སྔགས་དང་། སྤེལ་ཚིག་དག་བྲིས་ཏེ། ཤོག་དྲིལ་བྱས་པ་རིན་ཆེན་གྱི་སྦུ་གུར་བཅུག་ནས། གཡང་རྫས་ཀྱི་ནང་ལ་བཞག་སྟེ་སྒྲུབ་རྟེན་བྱ། མདུན་དུ་མཆོད་པ་ཅི་འབྱོར་བཤམས། འགུགས་བྱེད་རྟེན་འབྲེལ་མཚོན་བྱེད་ཡང་། གསེར་འོད་གཡང་སྐྱབས་ལས། བྱང་ཕྱོགས་དཔལ་གྱི་ལྷུན་པོ་ལ། །དཔལ་གྱི་སྦ་སྨྱུག་ལྡེམ་པ་སྐྱེས། །ཚིགས་བདུན་ཚིགས་དགུ་བཅུ་གསུམ་པ། །འཁོར་ལོ་བསྒྱུར་བའི་གཡང་རྟེན་ལགས། །དེ་ལྟར་ལོངས་སྤྱོད་རྒྱས་པ་ཡང་། །བཀྲ་ཤིས་སྦ་སྨྱུག་རྒྱས་པ་དེ། །འཁོར་ལོ་བསྒྱུར་བའི་གཡང་ཕུར་བྱས། །རྒྱལ་བོ་ལོངས་སྤྱོད་རྒྱས་པ་ལྟར། །དེ་རིང་སྨྱུག་རྒོད་ཚིགས་གསུམ་པ། །ཡོན་བདག་འདི་ཡི་ཕྭ་གཡང་ལགས། །ཞེས་པ་ལྟར། ཚིགས་གསུམ་ཅན་གྱི་མདའ་ལ་དར་ཚོན་སྣ་ལྔ་དང་། གཟི། སྤོས་ཤེལ། བྱུ་རུ། གཡུ། མེ་ལོང་བཅས་བཏགས་པའི་མདའ་དར་བཅས་དགོས་ལ།

ཁྱད་པར་དུ། གཡང་མདའ་འདི་ཕྭ་གཡང་གི་ཡོ་བྱད་གཙོ་བོ་བརྩི་བ་ནི་ཅི་ཡིན་ཞེ་ན། གདོད་མའི་སྤྱི་ཚོགས་ནང་ཁང་བའི་ཚད་འཇལ་ལ་ཕྱོགས་བཞི་ནས་མདའ་འཕངས﹙བསམ་ཡས་གཙུག་ལག་ཁང་གི་རྒྱ་ཁྱོན་ཀྱང་མདའ་འཕངས་ཏེ་གཞལ་བ་ལོ་རྒྱུས་དག་ན་གསལ།﹚ཏེ་ས་ཁྱོན་འཇལ་བ་དང་། གཉེན་རྟགས་དང་གཡང་རྟེན་དུ་མཁོ་བ་དང་། རྔོན་ལས་དང་གཡུལ་འགྱེད་སྐབས་ཀྱི་མཚོན་ཆ་གཙོ་བོ་དང་། མངའ་ཐང་དབང་སྡུད་སོགས་མདའ་རྩལ་ལ་བརྟེན་དགོས་སྟབས། མདའ་མོ་ལ་མངའ་ཐང་དང་རྒྱུ་འབྱོར། །དབང་སྡུད་སོགས་བདག་གིར་བཞེས་པའི་ཁྱད་ནུས་ལྡན་ཕྱིར། གདོད་མིའི་མི་རྣམས་ཀྱིས་རེ་སྨོན་དང་སེམས་འདུན་དམིགས་ཡུལ་བཅོལ་ཡུལ་གྱི་གཡང་རྟེན་གྱི་གཙོ་བོར་བཞག་པ་རེད། དེ་བས་མི་སྲོག་མདའ་དང་མདའ་སྲོག་ལྷ་ལ་བཅོལ་བའི་ལྟ་བ་ཞིག་ཐོན་ཡོད་པ་སྟེ། ཀརྨ་ཆགས་མེད་ཀྱིས། མི་སྲོག་འདི་ནི་མདའ་ལ་བརྟེན། །མདའ་སྲོག་འདི་ནི་ལྷ་ལ་བཅོལ། །ལྷ་སྲུང་གཉན་པོས་བསྲུང་དུ་གསོལ། །ཕྭ་གཡང་ནོར་གཡང་སྲུང་དུ་གསོལ། །ཞེས་སོ། །

མདའ་སྨྱུག་དེ་སྐྱེ་ཡུལ་དང་རྣམ་པ། བྱིན་གྱིས་བརླབས་ཚུལ་ནི། པདྨ་གཡང་འབུམ་ལས། རི་རབ་རི་ཡི་ལྷོ་ཕྱོགས་ན། །དབང་བོའི་ཡུལ་གྱི་ཕ་རོལ་ན། །བཀྲ་ཤིས་ནགས་ཚལ་ཆེན་པོ་ན། །སྦ་རྒོད་སྙུག་རྒོད་ལྡེམས་སེ་ལྡེམས། །ཕྱི་ཤུན་སྔོན་པོའི་མདངས་དང་འདྲ། །འདམ་ནས་དར་བས་རབ་ཏུ་འཇམ། །རྩེ་མོ་ནམ་མཁའི་དབྱིངས་སུ་བསླེབས། །ལོ་མ་འབྲས་བུ་ཐིབས་སེ་ཐིབས། །རྒྱལ་བོ་ཆེན་པོ་སྡེ་བཞི་དང་། །ལྕགས་ཀྱི་ཟོར་བས་བྲེགས་པ་ཡིན། །སློབ་དཔོན་པདྨ་འབྱུང་གནས་ཀྱིས། །སྔགས་དང་ཕྱག་རྒྱས་བྱིན་གྱིས་བརླབས། །བཤུད་ཤད་མཚན་ལྡན་མདའ་དར་བྱས། །བྱ་རྒོད་གཤོག་པའི་སྒྲོ་ཡིས་བསྐྱོན། །དར་ཚོན་སྣ་ལྔའི་ན་བཟའ་གསོལ། །ཡ་མཚན་རྨད་དུ་བྱུང་བའི་མདའ། །དར་ཚོན་སྣ་ལྔ་ཤ་ར་ར། །ཕ་ནི་གནམ་ལ་མ་ནི་ས། །བུ་ནི་སྦ་སྙུག་ལྡེམས་སེ་ལྡེམས། །ཚིགས་གསུམ་སྐུ་གསུང་ཐུགས་སུ་བྱིན་གྱིས་བརླབས། །ཁོང་གསེང་བྱང་ཆུབ་སེམས་དཔས་བྱིན་གྱིས་བརླབས། །མེ་ཏོག་གཡུ་ལོ་རབ་ཏུ་འབར། །དེ་འདྲའི་ཡོན་ཏན་ལྡན་པའི་མདའ། །མཛེས་པའི་ཡོན་ཏན་ལྔ་ཡིས་བརྒྱན། །གཡང་ལྷ་འཁོར་དང་བཅས་ལ་འབུལ། །སྐུ་ཡི་རྟེན་དུ་མདའ་དར་འབུལ། །གསུང་གི་རྟེན་དུ་མདའ་དར་འབུལ། །ཐུགས་ཀྱི་རྟེན་དུ་མདའ་དར་འབུལ། །གཡང་ལྷ་རྣམས་ལ་མདའ་དར་འབུལ། །ཞེས་སོ། །

ཡང་། ཆོས་རྒྱལ་ཁྲི་སྲོང་ལྡེ་བཙན་གྱིས་བོད་རྣམས་ཀྱི་དབུལ་བ་སེལ་ཕྱིར། བུམ་པ་སྦྲང་ཆང་གིས་བཀང་སྟེ། སློབ་དཔོན་པད་འབྱུང་ལ་ཞུས་པའི་ཆོ་ག་པདྨ་གཡང་འབུམ་ལས། ཞལ་ཟས་བཟང་བོ་དང་། དཔག་བསམ་ལྗོན་ཤིང་དང་། མེ་ཏོག་པདྨ་དང་། བཀྲ་ཤིས་དཔལ་ཐོགས་བྲིས། སྟེང་དུ་གཡང་གི་དཔལ་བཤོས་བཤམས། མདའ་བྱ་རྒོད་ལ་རིན་ཆེན་སྣ་ལྔ་དང་རྔ་མ་དཀར་ནག་དང་། གཡང་གི་སྙིང་བོ་བྲིས་པ་བཏགས། ཚེ་རིང་བའི་རྟེན་བཤམས། སྟག་རས་གཟིག་རས་དང་། ཁྲབ་བྱང་དང་དེ་རྣམས་བཏགས་ལ་རྟེན་དུ་བཙུགས། ཤུག་པ་ལ་གཡང་གི་ཕུར་བ་སོར་བརྒྱད་གཅིག་ལ་དཔལ་བཤོས། དེ་ཡང་རིན་ཆེན་དར་དང་བ་དན་དང་རྔ་མ་དཀར་ནག་དང་། དུང་དང་། པི་ཝང་དང་། དྲིལ་བུ་དང་། སྒྲ་སྙན་པ་ཐམས་ཅད་བཞག འབྲུ་སྣ་ཚོགས་དང་ཕྱེ་དང་ཞོ་དང་ཕྱེ་མར་དང་། བུ་རམ་དང་མར་དང་ཐུད་དང་། གཡག་ལུག་གི་ཤ་དང་མར་ཁུ་དང་སྦྲང་དང་ཆང་དང་འོ་མ་དང་། འབྱོར་ཚད་སྣ་ཚོགས་བཤམས། གཏོར་མ་ཆ་གསུམ་དང་བཅས། མཆོད་པ་རྣམ་ལྔ་འབུལ། གོས་ཀྱི་དངོས་གྲུབ་འཐོབ་ཕྱིར། རས་ཕྲུག་དར་གསུམ་བཞག རི་རྩེ་ཤར་དུ་ཚངས་པའི་ནེའུ་ལེ་རྐྱལ་བ་གཅིག་ནང་དུ་རིན་ཆེན་སྣ་ཚོགས། འབྲུ་སྣ་ཚོགས། རྒྱན་སྣ་ཚོགས་ཀྱི་སྙིང་བོ་དང་། ནོར་ལྷ་མཆེད་ཀྱི་སྙིང་བོ་དང་། རྨང་དང་ཞིང་བཟང་བོ་དང་ཕྱུག་པོའི་ནོར་རྫས་སྣ་ཚོགས་ཀྱི་སྤུ་དང་། ཤོག་གུ་ལ་ནོར་ལྷའི་སྙིང་བོ་བྲིས་ལ་བཞག དེ་གཡང་ཕུར་ལ་བཏགས། དེ་ནས་བགེགས་གཏོར་བཤམས་ལ་བཙོད་ཚུར་རམ་གསུམ་ཚ་སྒོག་རྣམས་བསགས་དགོས་པར་གསུངས་ཡོད་དོ། །

༤ མདའ་དར་སོགས་ཀྱི་མཚོན་དོན། སྨྱུག་རྒོད་ལ་ཚིགས་གསུམ་ཡོད་པས་ཐེག་པ་གསུམ། དར་སྣ་ལྔས་མཁའ་འགྲོ་དང་ཡེ་ཤེས་ལྔ་དང་འཕྲིན་ལས་ལྔ། རྒོད་སྒྲོས་གནས་ལུགས་ཀྱི་ཡང་རྩེ་རྟོགས་ཤིང་ཕས་རྒོལ་གྱིས་གླགས་མི་རྙེད་པ། མེ་ལོང་གིས་སྣོད་བཅུད་ཐམས་ཅད་གསལ་ལེར་འཆར་བ། གཡུ་ནི་མི་ཡི་བླ་རྡོར་གྲགས་པས། བླ་ཚེ་འཁྱམས་པ་སྐད་ཅིག་ལ་འགུགས་ནུས་པ། རྩ་བ་མདུང་ཚུགས་སུ་གནས་པས་ཚེ་སྲོག་འགྱུར་བ་མེད་པ། སྦ་སྨྱུག་དྲང་བས་དགེ་བཅུའི་ལམ་དང་ལས་འབྲས་ལ་བློ་ཁ་དྲང་བ་སོགས་མཚོན་པར་བཤད་དོ། །གཞན་ཡང་། ཆོ་ག་དག་ལས། མདའ་ལ་ཡོན་ཏན་བསམ་མི་ཁྱབ། །མདའ་མོ་དར་གྱིས་བརྒྱན་པ་འདི། །མོ་སྲིད་ཕོ་རུ་འཕེལ་བ་ཡིན། །མདའ་ལྟོང་གནམ་ལ་བསྟན་པ་འདི། །ཁ་རྗེ་དགུང་དང་མཉམ་པ་ཡིན། །སྨྱུག་མ་ཚིགས་གསུམ་ཡོད་པ་འདི། །ལུས་ངག་ཡིད་དང་གསུམ་པོའི་དོན། །མདེའུ་ལྕགས་ལས་བྱས་པ་འདིས། །མི་ཁ་འགོང་བོ་ཐུབ་པ་ཡིན། །ཁབ་དང་སྐུད་པས་བརྒྱན་པ་འདི། །ཕར་བཏང་ཚུར་མི་ལྡོག་པའི་དོན། །ཞེས་གསུངས་སོ། །

གཞན་ཡང་། མདའ་སྒྲོའི་འགབ་ཀྱི་ཕྱོགས་བཞི་ལ་གཡང་གི་ར་བ་སྒོ་བཞི་འབྲི་བ་ཡང་རྒྱུ་མཚན་འདི་ལྟར་སྟེ། གླིང་སྒྲུང་འཁྲུངས་སྐོར་ལས། དེ་ནས་རྒྱ་བཟས(རྒྱ་བཟའ་ལྷ་དཀར་སྒྲོལ་མ)རྒོད་མ་གཅིག་དང་། མ་མོ་གཅིག འབྲི་མོ་གཅིག ར་མ་གཅིག་བཅས་བཞི་བྱིན་ཏེ་བུ་མོས(འགོག་བཟའ་ལྷ་དཀར)གཞི་ཟིན་པའི་རྟེན་འབྲེལ་དུ་གཡང་གི་ར་བ་སྒོ་བཞི་ཟེར་བའི་གཏམ་རྒྱུད་བྱུང་། ཞེས་པར་གཞིགས་ན་དེ་བཞི་ནི་སྒོ་ཟོག་གི་གཅེས་ནོར་དུ་བརྩི་བས། ཕྱིས་སུ་གཡང་མདའ་བརྒྱན་པའི་རི་མོ་དང་། ཕྱུགས་གཡང་འགུགས་པའི་མཚོན་དོན་དུ་བཞག་གོ། དེར་མ་ཟད་རྒྱལ་ལོའི་སྟ་གོན་དུ་སྣུམ་འཁུར་བཙོས་རྗེས་སུ་གཡང་གི་ར་བ་སྒོ་བཞི་བཙོས་ཏེ་ཚེས་གཅིག་ལ་མཆོད་སྟེགས་སུ་བཤམས་སྲོལ་ཡང་ཡོད།

༥ གཡང་འགུགས་ཇི་ལྟར་བྱ་ཚུལ། གཡང་འགུགས་བྱེད་པ་པོ་རབ་འབྲིང་ཐ་གསུམ་ཡོད་པ་ལས། རབ་ཆོས་ཐམས་ཅད་མཉམ་ཉིད་དུ་རྟོགས་པའི་རྣལ་འབྱོར་བ་ཞིག་དང་། འབྲིང་བསྐྱེད་རྫོགས་ཀྱི་རྟོགས་ལྡན་པ། ཐ་མ་ཡང་ཆོ་ག་ལ་བརྟེན་ཏེ་རྒྱལ་བ་སྲས་བཅས་ཀྱི་བྱིན་རླབས་དང་། སྲིད་གསུམ་གྱི་བདེ་སྐྱིད་དཔལ་འབྱོར་ཇི་སྙེད་ཅིག་མཆིས་པ་ཐམས་ཅད་ཡིད་བཞིན་དུ་འགྲུབ་པའི་དམིགས་པ་དང་བཅས། ཕྱག་ཏུ་གཡང་དར་ཐོགས། ཞལ་ལས་བཀྲ་ཤིས་གཡང་འགུགས་ཀྱི་སྤེལ་ཚིག་གསུངས་བཞིན་མདའ་དར་གྱིས་གཡབ་མོ་བྱེད་པ་ཡིན། ས་སྐྱ་བ་དང་། དགེ་ལུགས་པ་སོགས་ཀྱི་ངོས་ནས་བརྗོད་ན། རྣམ་སྲས་མགོན་དཀར། སྒྲོལ་མ་སོགས་ཀྱི་གཡང་འགུགས་རྒྱས་པར་ཡོད། གཞན་གྲུབ་མཐའ་སོ་སོའི་གཡང་འགུགས་ཀྱི་ཆོ་ག གཏོང་སྟངས་དང་གོ་རིམ། གཡང་རྫས། ཕྱག་ལེན་མི་འདྲ་བ་ཡོད་པ་ལས་གཞན། དམངས་ཁྲོད་ཀྱི་ལུགས་སྲོལ་མི་འདྲ་བ་མང་བོ་ཡོད་དོ། །དེ་ལས་གཞན་བརྡ་རགས་པའི་དབང་དུ་བཏང་ན། བྱ་བ་ལམ་འགྲོ་ཡོང་བའི་ཚིག་ཅིག་བརྗོད་པ་ལའང་ཁ་གཡང་བོས་ཟེར། ཁྱད་པར་ཡུལ་ལུང་འགའ་ཤས་ནས་བུ་མོ་གནས་ལ་འགྲོ་སྐབས། ཨ་མའི་ཕྲ་ལ་རིང་བའི་སྐད་དབྱངས་དང་བཅས། བཟང་ཡོད་ན་གནས་ལ་འཁྱེར། འཕྲོ་ཡོད་ན་ཡུལ་ལ་ཞོག ཅེས་དང་། མི་གཡང་མི་ལ་མ་འཁྱེར་ཨ་མར་ཞོག སྐྱིད་ཉི་མ་གཉིས་ཀ་ཁྱོད་ཀྱིས་འཁྱེར། ཞེས་སོགས་གཡང་འབོད་གཏོང་བ་ནི། གཉེན་ཚན་གཉིས་ཀར་མི་འགལ་བའི་གཡང་བགོ་ལུགས་ཀྱི་རྟེན་འབྲེལ་ཞིག་རེད་བསམ་མོ། །དེ་བཞིན་ཡུལ་ལུང་འགར་སྒོར་མོ་ཕར་སྟེར་དུས། དངུལ་སྒོར་ཁྱེད་ལ་བྱིན་ཆོག་ཀྱང་། དངུལ་གཡང་ང་ལ་བསྐྱུར་དགོས་ཞེས་རང་ལུས་སུ་བྱིལ་བྱིལ་འགར་བྱས་ནས་སྟེར་བ་ཡང་། བོད་མི་རྣམས་གཡང་གི་ཚོར་འདུ་ཤུགས་དྲག་ཡོད་པ་ལས་བྱུང་བ་ཡིན་ནོ། །

༦ གཡང་འགུགས་ཀྱི་འཛེམ་བྱ། གསེར་འོད་གཡང་སྐྱབས་ལས། ཕྱི་མི་སྐྱ་བོ་ནང་ལ་མ་གཏོང་ཞིག། ནང་མི་སྨུག་པོ་ཕྱི་རུ་མ་འབུད་ཅིག། ལྷ་ལུག་ཐང་ལ་མ་འབུད་ཅིག །སྲིད་ཀྱི་གླང་ཆེན་ནང་ལ་མ་གཏོང་ཞིག། ཅེས་གསུངས་པ་ལས་གཞན། གཡང་ཁ་བསྡམས་རྗེས་ཅ་ལག་ཕན་ཚུན་ལ་མི་གཏོང་བ་སོགས་བྱེད་དོ། །

རིལ་སྒྲུབ།

༡ རིལ་སྒྲུབ་ཀྱི་ཆོ་ག་དང་སྒྲུབ་ཚུལ། དགེ་ལུགས་པའི་མ་ཎི་རིལ་སྒྲུབ་གཅིག་པུར་མཚོན་ནའང་། རྒྱལ་དབང་ལྔ་བ་བློ་བཟང་རྒྱ་མཚོ། ལྕང་སྐྱ་ངག་དབང་བློ་བཟང་ཆོས་ལྡན། བཀའ་འགྱུར་བ་བློ་བཟང་ཚུལ་ཁྲིམས། ཀི་རྟི་བློ་བཟང་འཕྲིན་ལས་སོགས་ཀྱི་རིལ་སྒྲུབ་དང་། དམིགས་བརྩེ་མའི་རིལ་སྒྲུབ་ཡང་། ཅོ་ནེ་གྲགས་པ་བཤད་སྒྲུབ། ཞོགས་དོན་ཡོད་མཁས་གྲུབ། ཀུན་མཁྱེན་འཇིགས་མེད་དབང་བོ་སོགས་ཀྱི་རིལ་སྒྲུབ་དང་། དཀོན་མཆོག་རྒྱལ་མཚན་གྱི་མ་ཎི་རིལ་སྒྲུབ་དང་། རྗེ་དོན་ཡོད་མཁས་གྲུབ་ཀྱིས་གསང་བ་ཡེ་ཤེས་མཁའ་འགྲོའི་རིལ་སྒྲུབ་སོགས་བཞུགས་པ་ལྟར། གྲུབ་མཐའ་སོ་སོའི་མཁས་པས་མཛད་པའང་མང་ངོ་། །

རིལ་སྒྲུབ་ནི་བསྒྲུབ་བྱ་དང་མཐུན་པའི་རྫས་རྣམས་ཞིབ་མོར་བྱས་ཏེ་རིལ་བུར་ཕབ་ནས། ཆོ་ག་ཆད་ལྷག་མེད་པའི་སྒོ་ནས་རིལ་བུ་བྱིན་ཅན་བཟོས་པ་ལ་བྱ་ཞིང་། དབྱེ་བ་ཡང་། སྒྲུབ་ཐབས་ཀྱི་སྒོ་ནས་ཚད་བཟུང་མི་ནུས་ཀྱང་། ངོ་བོའི་སྒོ་ནས་ཞི་རྒྱས་དབང་དྲག་གི་རིལ་སྒྲུབ་བཞི་ལས་མ་འདས་ལ། མདོག་གི་དབང་དུ་བཏང་ན། ཤེས་རབ་འཕེལ་བར་སེར་བོ། ཞི་བར་དཀར་བོ། རྒྱས་པར་སེར་བོ། དབང་སྡུད་ལ་དམར་བོ། དབྱིབས་ཀྱི་དབང་དུ་བཏང་ན། ཞི་བར་ཟླུམ་ལེབ། དབང་ལ་ཟླ་གམ། རྒྱས་པར་གྲུ་བཞི་བྱ། སྒྲུབ་དུས་ནི། རྒྱུ་སྐར་རྒྱལ་དང་ཁྲུམས་སྟོད་ཁྲུམས་སྨད་ནམ་གྲུ་དང་། གཟའ་ཕུར་ལྷག་ཟླ་བ་པ་སངས་རྣམས་སུ་བསྒྲུབ་པར་བྱའོ། །

༢ རིལ་བའི་རྒྱུ། རིལ་བུའི་རྒྱུ་ལ། ཀུན་མཁྱེན་འཇིགས་མེད་དབང་པོས་མཛད་པའི་དགེ་འདུན་རིལ་སྒྲུབ་བྱ་ཚུལ་ལས། སངས་རྒྱས་ཀྱི་འཕེལ་གདུང་། མཁས་ཤིང་གྲུབ་པ་བརྙེས་པའི་དམ་པ་གོང་མ་རྣམས་ཀྱི་གདུང་རུས། བླ་མ་དང་དགེ་འདུན་གྱི་སྡེ་ཁྱད་པར་ཅན་གྱི་བསྒྲུབས་པའི་མ་ཎི་རིལ་བུ། བླ་མ་གོང་མ་རྣམས་ཀྱི་ན་བཟའ་དང་དབུ་སྐྲ་ལྟ་བུ་ནུས་ལྡན་བསྲེགས་པའི་བྱེ་མ་རྣམས་ཞིབ་མོར་བརྡུང་བ་ཞེས་སོགས་དང་། རྗེ་བཙུན་དམ་ཆོས་རྒྱ་མཚོས་མཛད་པའི་འཕགས་མ་མཚོ་ལྡན་མའི་རིལ་སྒྲུབ་བྱ་ཚུལ་ལས། ཨ་རུ་གསེར་མདོག བ་རུ། སྒྲོན་ཤིང་། གོ་སྙོད་ཀྱི་འབྲས་བུ། དུག་མོ་ཉུང་། ལུག་རུ་དཀར་སེར་དམར་གསུམ། སྤང་རྒྱན་དཀར་བོ། ཤིང་མངར་བཅས་ཆ་སྙོམས་པ་ཞིབ་ཏུ་བཏགས་ནས་ཞེས་གསུངས་པ་སོགས་སྒྲུབ་ཐབས་སོ་སོ་ལས་རིལ་བའི་རྒྱུ་མི་འདྲ་བ་མང་དུ་གསུངས་ཤིང། བསྒྲུབ་བྱ་རྩ་བ་གསུམ་མམ། ཡང་ན། ཞི་རྒྱས་དབང་དྲག་གི་ལས་གང་ཞིག་ལ། སྒྲུབ་ཐབས་གང་གིས་རིལ་སྒྲུབ་བྱས་ཀྱང་། གཞན་གྱི་ཁ་ཟས་མི་སྤྱོད་པ། འཆལ་གཏམ་མི་སྨྲ་བ། རིལ་བའི་རྒྱུར་འགོམ་ཡུག་དང་། བཙོག་གྲིབ་ཤོར་བ། དམ་ཉམས་ཀྱི་ལག་ནས་ཐོན་པ་མ་ཡིན་པར་ངོས་གཙང་དགོས་སོ། །

༣ རིལ་སྒྲུབ་བྱ་ཚུལ། རིལ་བུ་བཟོས་རྗེས་མཚལ་དང་གུར་ཀུམ་སོགས་ཀྱིས་ཁ་བསྒྱུར་ཅིང་། བུམ་པ་སོགས་སུ་བླུགས་ལ། སྒྲུབ་པ་པོས་ཤ་ཆང་སྒོག་ཙོང་སོགས་སྤངས་ཏེ། རང་ཉིད་ལྷ་དང་བླ་མ་གང་རུང་ལ་གསལ་བཏབ་ནས། ཐུགས་ཀ་ནས་འོད་ཟེར་འཕྲོས་པས། སངས་རྒྱས་བྱང་སེམས་རྣམས་ཀྱི་བྱིན་རླབས་དང་ནུས་མཐུ་ཐམས་ཅད་གཅིག་བསྡུས་ཀྱིས་རིལ་བུར་ཐིམ་པ་སོགས་ཆོ་ག་ལྟར་སྒྲུབ་པར་བྱོས་ལ། མངོན་སུམ་དང་རྨི་ལམ་གང་རུང་ལ། འགྲུབ་པའི་རྟགས་མ་བྱུང་གི་བར་དུ་བསྒྲུབ་དགོས། མ་མཐའ་ཡང་གྲངས་དང་བསྙེན་ཚད་ཙམ་ངེས་པར་དུ་འགྲོ་དགོས་སོ། །

༤ རིལ་སྒྲུབ་ཀྱི་ཕན་ཡོན། འཕགས་མ་མཚོ་ལྡན་མའི་རིལ་སྒྲུབ་ལས། ཞག་བདུན་ཟོས་པས་དིག་པ་དང་། །ལྐུགས་པ་ལྒིན་པ་དག་ཀྱང་འཚོ། །བཅུ་གཅིག་སྐད་བཟང་མགྲིན་པ་བདེ། །ཉི་ཤུས་མི་བརྗེད་གཟུངས་འཐོབ་འགྱུར། །ཟླ་བ་གཅིག་ཏུ་ཟོས་གྱུར་ན། །བློ་ནི་མེ་དང་འདྲ་བར་འགྱུར། །རབ་ཏུ་བསྟེན་ན་ཚེ་རིང་ཞིང་། །རྒས་པའི་སྐྱོན་གྱིས་གོས་པ་མེད། །ཅེས་དང་། གཞན་ཡང་། མི་འཁྲུགས་པའི་རིལ་སྒྲུབ་ཚད་ལྡན་བྱས་པ་ཟོས་ན་ངན་སོང་གི་སྒོ་ཁེགས་པ་དང་། འཇམ་དབྱངས་ཀྱི་རིལ་སྒྲུབ་ཟོས་ན་ཤེས་རབ་འཕེལ་བ། ཚེ་དཔག་མེད་ཀྱིས་ཚེ་རིང་བ། སྨན་བླས་ནད་འཇོམས་པ། དམིགས་བརྩེ་མས་རྒྱུད་ལ་བྱིན་རླབས་འབྱུང་བ་སོགས་ཕན་ཡོན་བསམ་གྱིས་མི་ཁྱབ། འཇུ་མི་ཕམ་གྱིས་ཀྱང་རིལ་བུ་མགུལ་དུ་འདོགས་པའམ། ནངས་མ་རེ་ལ་རིལ་བུ་ཟོས་ན། བརྒྱ་ཡིས་མི་བརྗེད་གཟུངས་ཐོབ་པ་དང་། རྫས་ཀྱི་བཅུད་ལེན་སོགས་ཀྱི་དགོས་པ་དང་། དབང་སྡུད་མངོན་ཤེས་སོགས་འགྲུབ་པར་གསུངས་སོ། །དབྱངས་ཅན་མའི་རིལ་སྒྲུབ་ཀྱི་ཕན་ཡོན་ནི། དམ་པའི་རྒྱ་གཞུང་ལས། རིལ་བུ་རྒྱ་ཆེན་བཞིར་མཐོང་ནས། །ཤེས་རབ་འཇམ་དཔལ་རྡོ་རྗེ་དང་། །སངས་རྒྱས་ཀུན་དང་མཉམ་པར་འགྱུར། །རིལ་བུ་དབྱངས་ཅན་མར་མཐོང་ནས། །སངས་རྒྱས་ཞིང་དུ་འགྲོ་བར་འགྱུར། །རིལ་བུ་ཉི་ཟླར་མཐོང་གྱུར་ནས། །སྔོན་གྱི་སྐྱེ་བ་དྲན་པར་འགྱུར། །རིལ་བུ་འོད་དུ་མཐོང་གྱུར་ནས། །སྒྲ་བཞི་དག་ལ་མཁས་པར་འགྱུར། །འོད་དང་དུ་བ་རྔ་སྒྲ་དང་། །དུང་འབུད་ཉི་ཟླ་ཤར་བ་དང་། །མེ་ཏོག་འཛུགས་དང་ཞིང་རྨོ་དང་། །སྣག་ཚ་འཐུང་དང་ཉམས་དགའ་དང་། །ཡི་གེ་འབྲི་ཀློག་མཐོང་བ་དང་། །མངོན་པར་ཤེས་པ་འཆར་བ་རྣམས། །ཤེས་རབ་འཕེལ་བའི་རྟགས་སུ་འདོད། །ཅེས་སོ། །

འཕོ་བ་འདེབས་སྟངས།

༡ འཕོ་བའི་ཁུངས། སྤྱིར་ན་འཕོ་བ་ཟེར་བ་ནི། ནཱ་རོ་བས། རླུང་གི་གཞུ་ལ་སེམས་ཀྱི་མདའ། །ཧིག་གི་སྒྲ་ཡིས་རབ་བསྐུལ་ནས། །རྣམ་པར་ཤེས་པའི་ཆོས་ཉིད་འདས། །མིང་ཡང་འཕོ་བའི་གདམས་ངག་ཟེར། །གསུངས་པ་ལྟར་ལགས་ལ། འཕོ་བ་ཞེས་པའི་གདམས་ངག་ཁྱད་པར་ཅན་འདི་ཉིད། སྔགས་བླ་མེད་ཀྱི་ཕ་རྒྱུད་མ་རྒྱུད་གཉིས་ལས་གསུངས་ཀྱང་། གཙོ་བོ་མ་རྒྱུད་གདན་བཞི་དང་། སམྦུ་ཊ། བདེ་མཆོག་སྡོམ་འབྱུང་སོགས་ལས་གསུངས་ཏེ། གདན་གཞི་ལས། ཐམས་ཅད་ལུས་ལ་གནས་པ་ཡི། །ཡེ་ཤེས་ཀྱིས་ནི་ཡེ་ཤེས་མཆོག། སྟེང་དུ་ཚངས་པའི་སྒོ་འདི་ནི། །མདོ་ལས་འཕོ་བའི་མིང་དུ་བཤད། །ཅེས་སོགས་དང་། པཎ་ཆེན་བློ་བཟང་ཆོས་རྒྱན་གྱིས། ཚུལ་འདི་སྡིག་ཅན་བཙན་ཐབས་འཚང་རྒྱའི་ཐབས། །མ་བསྒོམ་འཚང་རྒྱ་འཕོ་བའི་མན་ངག་ཅེས། །བླ་མེད་རྒྱུད་སྡེའི་སྙིང་བོ་བསྡུས་པ་ཡིན། །ཞེས་དང་། བླ་མཆོད་ལས། ལམ་སྣ་མ་ཟིན་འཆི་བའི་དུས་བྱེད་ན། །བཙན་ཐབས་འཚང་རྒྱ་བླ་མའི་འཕོ་བ་ནི། །སྟོབས་ལྔ་ཡང་དག་སྦྱར་བའི་གདམས་ངག་གིས། །དག་པའི་ཞིང་དུ་བགྲོད་པར་བྱིན་གྱིས་རློབས། །ཞེས་པ་འདི་དག་གོ ། 

དགེ་ལུགས་པར་མཚོན་ན་སྲད་རྒྱུད་ལུགས་ཀྱི་དགའ་ལྡན་འཕོ་ཁྲིད་ཐུན་མོང་མ་ཡིན་པའི་དམིགས་བརྩེ་མ་འབུམ་གྱི་བཀའ་རྒྱ་ཅན་འདི་འཇམ་དབྱངས་བཞད་པའི་རྡོ་རྗེ་ཡན་ཆད་ལ་ཡི་གེ་མེད་པའི་སྙན་བརྒྱུད་དུ་བཞུགས་པ་ལས། དེའི་དྲུང་དུ་ཐུགས་སྲས་འཇམ་དབྱངས་བདེ་བའི་རྡོ་རྗེས་གསན་ཏེ། ཟིན་བྲིས་བཏབ་པ་ནས་ཡིག་ཐོག་ནས་དར་ཁྱབ་བྱུང་ལ། འདིའི་ཁྲིད་འཐོབ་པ་ལ་དམིགས་བརྩེ་མ་སུམ་འབུམ་མམ། མ་མཐའ་འབུམ་གཅིག་ངེས་པར་དུ་གསུངས་དགོས་སོ། །གཞན་ཡང་། གསར་མའི་ལུགས་སུ་འཕོ་བ་མཁའ་སྤྱོད་མ་དང་འཕོ་བ་སྐར་ཁུང་སོགས་དང་། རྙིང་ལུགས་སུ་པདྨ་འོད་འབར་གྱི་འཕོ་བ་དང་། ཉི་ཟླ་སངས་རྒྱས་ཀྱི་འཕོ་བ་འཇག་བཙུགས་མ། ཀརྨ་གླིང་བའི་ཞི་ཁྲོའི་འཕོ་བ་དྲན་པ་རང་གྲོལ་སོགས་ཡོད་དོ། །

༢ འཕོ་བའི་དབྱེ་བ། སྤྱིར་འཕོ་བ་ལ་དབྱེ་ན་བཅུ་གཅིག་ཡོད་དེ། སྦྱངས་ཏེ་འཕོ་བ་ཏིང་ངེ་འཛིན། སྲོག་དང་རྩོལ་བའི་འཕོ་བ། རྣམ་ཤེས་བླ་མར་འཕོ་བ། བཙན་ཐབས་དག་ཏུ་འཕོ་བ། སྤྲོས་མེད་ཆོས་སྐུའི་འཕོ་བ། སྤྲོས་བཅས་གཟུགས་སྐུའི་འཕོ་བ། ལོངས་སྤྱོད་རྫོགས་སྐུའི་འཕོ་བ། སྤྲུལ་བ་སྐུ་ཡི་འཕོ་བ། ཡིད་འོང་མཁའ་འགྲོའི་འཕོ་བ་དང་། གཞན་ཡང་། འཕོ་བ་ལ་དྲུག་ཏུ་ཡང་བཤད་དེ། ༡ རབ་ཆོས་སྐུའི་འཕོ་བ་ནི། ཚེ་འདིར་གནས་ལུགས་མ་བཅོས་པའི་ལྟ་བ་མ་ནོར་བ་རྒྱུད་ལ་སྐྱེས་ཤིང་གོམས་འདྲིས་ཡོད་པ་རྣམས། འཆི་ཁའི་ཚེ་ཀ་དག་མཁྲེགས་ཆོད་ཀྱི་གསང་ལམ་ནས་དབྱིངས་རིག་གི་གནད་ལ་བརྟེན་ཏེ་ཆོས་སྐུའི་ཀློང་དུ་འཕོ་བ་དེ་ཡིན། འཕོ་བ་ཐེབས་པའི་ཕྱི་རྟགས་སུ་ནམ་མཁའ་གཡའ་དག་པ་དང་། ནང་རྟགས་སུ་ཕུང་བོ་ཡུན་རིང་བཀྲག་མི་ཡལ་བ་དང་། གསང་རྟགས་སུ་ཨ་དཀར་བོ་དང་ཧཱུཾ་མཐིང་ག་སོགས་འབྱོན་ནོ། །

༢ འབྲིང་ལོངས་སྐུའི་འཕོ་བ་ནི། བསྐྱེད་རྫོགས་ཀྱི་རྣལ་འབྱོར་ལ་གོམས་འདྲིས་བྱས་ཤིང་སྒྱུ་མ་ལྟ་བུའི་ལྷ་སྐུ་ལ་རྩལ་འབྱོངས་པ་དག་འཆི་ཁའི་ཚེ། བར་དོའི་འཁྲུལ་སྣང་འཆར་བ་དང་མཉམ་དུ་ཟུང་འཇུག་ཡེ་ཤེས་ཀྱི་སྐུར་འཕོ་བ་དེ་ཡིན། ལོངས་སྐུའི་འཕོ་བ་ཐེབས་ན། ཕྱི་རྟགས་སུ་ནམ་མཁའ་འཇའ་དང་འོད་ཀྱིས་གང་བ་དང་། ནང་རྟགས་སུ་སྤྱི་བོའི་ཚངས་བུག་ཏུ་ཁྲག་དང་ཆུ་སེར་ཐོན་པ་དང་། ཟིལ་བ་ཁྲོམ་པ། སྐྲངས་པ་སོགས་འབྱུང་། གསང་རྟགས་སུ་གདུང་རིགས་རྣམ་པ་ལྔའམ་གང་རུང་དང་ལྷ་སྐུ་འམ་ཕྱག་མཚན་སོགས་འབྱོན་ནོ། །

༣ ཐ་མ་སྤྲུལ་སྐུའི་འཕོ་བ་ནི། གསང་སྔགས་སྨིན་བྱེད་ཀྱི་དབང་ཐོབ་ཅིང་། དམ་ཚིག་ལ་སྐྱོན་མ་ཞུགས་པར་བར་དོའི་གདམས་ངག་དང་ལྡན་ཞིང་། སྐྱེ་བ་སྤྲུལ་བའི་ལམ་འཁྱེར་ལ་བརྟེན་ནས་ཞིང་དག་པའི་གནས་སུ་འཕོ་བ་ཡིན། ཕྱི་རྟགས་སུ་འཇའ་སྤྲིན་དང་མེ་ཏོག་གི་ཆར་འབབ་པ་དང་། ནང་རྟགས་སུ་སྣ་བུག་གཡོན་དུ་ཁྲག་གམ་ཆུ་སེར། ཡང་ན་བྱང་སེམས་ཐོན་པའོ། །གསང་རྟགས་སུ་རིང་བསྲེལ་ལམ་དབུ་ཐོད་བུམ་ཧྲིལ་དང་། ཕྱག་མཚན་སོགས་འབྱོན་ནོ། །༤ ཐ་མལ་འདུ་ཤེས་གསུམ་ལྡན་གྱི་འཕོ་བ་ནི། རྩ་དབུ་མ་ལ་ལམ་གྱི་འདུ་ཤེས། སེམས་རྣམ་ཤེས་ལ་མགྲོན་པོའི་འདུ་ཤེས། གནས་བདེ་ཆེན་དག་ཞིང་ལ་འགྲོ་སའི་འདུ་ཤེས་བཞག་སྟེ་འཕོ་བ་དང་། ༥ སྐད་ཅིག་མའི་འཕོ་བ་ནི། མེ་ཆེན་པོའི་ནང་དུ་ཧྲིལ་གྱིས་ཐིམ་པ་དང་། ཆུ་ཆེན་པོའི་ནང་དུ་བུབ་ཀྱིས་འཁྱེར་བ། གཡང་གཟར་དུ་འཚུབ་བེ་ལྷུང་བ། མགོ་ལ་ཐོག་བརྒྱབ་པའམ། སྙིང་ལ་མདའ་གྲིས་བསྣུན་པ། གཟའ་གདོང་ཐུག་བརྒྱབ་པ་ལྟ་བུ་བྱུང་དུས། རིག་པ་སྤྱི་བོའི་བླ་མ་འོད་དཔག་མེད་ལ་གཏད་པའོ། །༦ གཤིན་པོ་རྗེས་འཛིན་གྱི་འཕོ་བ་ནི། རྟོགས་པ་ཚད་ལྡན་གྱི་དམ་པ་སྣང་སེམས་ལས་སུ་རུང་བ། བར་དོའི་རྒྱུད་མཁྱེན་པའི་རྣལ་འབྱོར་བས། གཞན་འཆི་ཁ་མའམ། བར་དོ་ན་ཡོད་པར་འཕོ་བ་འདེབས་པ་དེ་ཡིན། སྐབས་འདིར་འཆད་བྱའི་འཕོ་བ་ནི་འདི་ཉིད་དོ། །

༣ འཕོ་སྦྱོང་བྱེད་སྟངས། ཐོག་མར་ཚད་ལྡན་བླ་མ་དམ་པའི་དྲུང་ནས། འཕོ་བ་ལུང་རྐྱང་ཙམ་མ་ཡིན་པར། བླ་སློབ་ཟུང་གིས་དམིགས་རིམ་དང་ལྡན་པའི་སྒོ་ནས། ལུང་ཁྲིད་སོགས་ཁུངས་བཙན་མནོས་རྗེས། དབེན་གནས་སུ་འཕོ་སྦྱང་བྱས་ཏེ། འཕོ་རྟགས་ཐོན་རེག་བར་དུ་སྦྱངས་དགོས་ལ། ཐོན་རྗེས་བླ་མས་གཞན་ལ་འཕོ་བ་འདེབས་པའི་གསུང་གི་གནང་བ་འཐོབ་པ་ན། རང་ཉིད་དམ་སྡོམ་ལ་གནས་པའི་སྒོ་ནས་འཕོ་བ་འདེབས་པ་ཡིན་ནོ། །རྣམ་ཤེས་འཕོ་བའི་སྒོ་ཡང་། རྡོ་རྗེ་གདན་བཞི་རྒྱུད་ཆེན་པོ་ལས། ལམ་བཟང་བོ་ནི་མཛེས་པའི་གནས། །ལམ་ངན་སྲིད་པའི་སྐྱོན་གྱིས་གོས། །ཐིག་ལེ་ལྟེ་བ་སྤྱི་གཙུག་དང་། །མིག་དང་སྣ་དང་རྣ་བ་དང་། །ཆུ་དང་ཆུ་མིག་སྒོ་ཡིན་ཏེ། །སྒོ་དགུ་ཡི་ནི་མཚན་ཉིད་ཡིན། །ལྟེ་བ་འདོད་ཅན་མཐོ་རིས་ཏེ། །ཐིག་ལེ་གཟུགས་ཀྱི་ལུས་ཅན་ནོ། །སྟེང་ནས་སྟེང་གི་གནས་ཡིན་ཏེ། །མི་གདུགས་ལ་སོགས་དེ་རུ་འགྲོ། །རྣ་ནས་གནོད་སྦྱིན་གནས་སུ་འགྲོ། །རྣ་བ་དག་ནི་གྲུལ་བུམ་ལྷ། །གལ་ཏེ་མིག་ལས་ཡེ་ཤེས་འགྲོ། །མི་རྣམས་ཀྱིས་ནི་བདག་པོར་འགྱུར། །སྲིད་པའི་སྒོ་ནི་ཡི་དྭགས་ཏེ། །དེ་ནི་ལྕི་བས་དུད་འགྲོའོ། །ཆུ་མིག་རྣམ་ཤེས་མྱུར་བ་རུ། །དམྱལ་བ་བརྒྱད་དུ་ཤེས་པར་བྱ། །སྒོ་རྣམས་ཀྱི་ནི་བྱེ་བྲག་གི །འཁོར་བའི་བྱེ་བྲག་འབྱུང་བ་ཡིན། །དེ་བས་སྒོ་ནི་བྱེ་བྲག་ལས། །སྒྲུབ་པ་པོས་ནི་ལམ་བཟང་བསྟེན། །ཅེས་དང་། ནཱ་རོ་པཎ་ཆེན་གྱིས། སྒོ་བརྒྱད་འཁོར་བའི་སྐར་ཁུང་ཅན། །སྒོ་གཅིག་ཕྱག་རྒྱ་ཆེན་པོའི་ལམ། །སྒོ་བརྒྱད་བཅད་ནས་སྒོ་གཅིག་དབྱེ། །ཞེས་དང་། ཡང་བཤང་སྒོར་ཐོན་ན་དམྱལ་བར་མཆི་སྟེ། མཁའ་འགྲོ་མ་ཀུ་རུ་ཀུ་ལེའི་རྒྱུད་ལས། རྣམ་ཤེས་རླུང་ལ་ཞོན་ནས་ནི། །འོག་གི་གནས་སུ་འཕོས་གྱུར་ན། །ཆོས་ལ་གོམས་པའི་གང་ཟག་ཀྱང་། །ངན་སོང་རྒྱུད་དུ་སྐྱེ་འགྱུར་ཏེ། །མགྲོན་པོ་ལམ་དུ་ཞུགས་པའི་མི། །གྲོགས་ཀྱིས་བསྒྱུར་བ་ཇི་བཞིན་ནོ། །གསུངས་པ་དང་། ཁ་ནས་ཐོན་ན་ཡི་དྭགས། ཆུ་ལམ་ནས་ཐོན་ན་དུད་འགྲོ། མིག་ནས་ཐོན་ན་མི། རྣ་བར་ཐོན་ན་ལྷ་མིན། ལྟེ་བར་ཐོན་ན་འདོད་ལྷ། སྣ་ནས་ཐོན་ན་གནོད་སྦྱིན། མིག་དབུས་སྨིན་མཚམས་ནས་ཐོན་ན་གཟུགས་ཁམས་སུ་སྐྱེ་བར་གསུངས་པས་སྒོ་གཞན་བརྒྱད་བཅད་དེ། སྤྱི་གཙུག་གསེར་གྱི་སྒོ་ནས་ཐོན་དགོས་པར་ཁྲི་བློ་བཟང་རྒྱལ་མཚན་སེང་གེས་གསུངས་ལ། སྤྱི་གཙུག་ཚངས་བུག་ནི་དག་པ་མཁའ་སྤྱོད་དུ་འགྲོ་བའི་ལམ་ཡིན་པས་དེ་ལས་རྣམ་ཤེས་ཐོན་ན་ཐར་བ་འཐོབ་པར་འགྱུར་བས། དེར་འདུན་པ་གཏད་པ་གལ་ཆེའོ། །

༤ འཕོ་བ་འདེབས་སྐབས་ཀྱི་སྦྱོར་བ། རང་ཉིད་འཕོ་འདེབས་ཀྱི་གནས་སུ་མ་སླེབས་གོང་ནས། ཡི་དམ་རྡོ་རྗེ་འཇིགས་བྱེད་ལྟ་བུ་ཡིན་ན། དེའི་ང་རྒྱལ་ལ་གནས་པའི་ཐུགས་ཀའི་ས་བོན་ཧཱུཾ་ཡིག་ལས་ཁྲོ་བོའི་ཚོགས་དཔག་མེད་སྤྲོས་ཏེ། རོ་རྩར་སླེབས་ཚེ་གཤིན་འདྲེ་ལ་སོགས་པ་ལ་ཕན་སེམས་ཀྱི་སྒོ་ནས་གསུར་དང་གཏོར་མ་བཏང་། འདིའི་རྣམ་ཤེས་དང་ཉེ་འབྲེལ་ལ་མ་གནོད་པར་སོང་ཞིག་ཅེས་བརྗོད་ལ། གལ་ཏེ་གནོད་འདྲེ་རྣམས་མི་འགྲོ་བར་གླགས་འཚོལ་བར་སེམས་ན། སྙིང་ཀ་ནས་ཁྲོ་ཚོགས་དཔག་ཏུ་མེད་པ་འཕྲོས་ཏེ། གཤིན་རྗེ་དེ་དག་རྒྱ་མཚོའི་ཕར་འགྲམ་དུ་བསྐྲད་ཅིང་བརླག་པར་བསམས་ལ། སྔགས་དང་གུ་གུལ་བདུག ཡུངས་དཀར་ལ་ཡི་དམ་གྱི་སྙིང་བོ་སོགས་བཟླས་ནས་བྲབས་པར་བྱའོ། །

༥ འཕོ་བ་འདེབས་ཚུལ་དངོས། འཕོ་བ་འདེབས་ཀྱི་ཚེ། དང་བོ་རྫས་ཀྱི་འཕོ་བ་སྟེ། དེ་བཞིན་གཤེགས་པའི་འཕེལ་གདུང་ངམ། སྐྱེས་ཆེན་དམ་པའི་གདུང་རུས། ཡང་ན། སྒྲུབ་མཆོད་སྐབས་ཀྱི་རྡུལ་ཚོན། མགྲོན་བུ་མེར་བསྲེག་པའི་ཐལ་བ། ཁབ་ལེན་རྡོ་རྣམས་ཕྱེ་མར་འཐག་པ། སྦྲང་རྒོད་དང་མར་སྦྱར་བའི་ལྡེ་གུ སྤྱི་གཙུག་ཏུ་སྲབ་མཐུག་ཀོ་བ་ཙམ་བྱུགས། དེ་ཡང་ཕྱི་དབུགས་ཆད་མ་ཐག་ནས་ལུས་ཀྱི་དྲོད་ཕལ་ཆེར་བསྡུས་ཤིང་། སྙིང་ཀའི་ཐད་དུ་དྲོད་ཅུང་ཟད་ཡོད་པའི་སྐབས་དེར་འཕོ་བ་འདེབས་དགོས། ཚེ་འདས་དེ་ཉིད་ཤི་ནས་ཞག་ཁ་ཡར་སོང་བ་ལྟ་བུ་ཡིན་ན་རྣམ་ཤེས་འགུག་གཞུག་བྱ་དགོས། རོ་མེད་ན་གོས་སམ་མིང་བྱང་སོགས་ཐ་མལ་བའི་ཆ་བྱད་ཅན་ཙོག་པུར་ཐལ་མོ་སྦྱར་ནས་འདུག་པར་བསམ་ལ། སྐྱབས་འགྲོ་སེམས་བསྐྱེད་དང་། ཚད་མེད་བཞི་སྒོམ་སྟེ། མགོན་པོ་འོད་དཔག་མེད་འཁོར་དང་བཅས་པ་སྤྱན་དྲངས། ཚེ་འདས་ཀྱི་རྣམ་ཤེས་ཁ་དོག་དམར་ཞིང་གསལ་ལ་ཨ་ཐུང་གི་གཟུགས་ཅན་དུ་བཀུག་སྟེ། སྤྱི་གཙུག་ནས་སྙིང་ཀར་ཐིམ་པར། བདེན་ཚིག་བརྗོད་དེ་བགེགས་བསྐྲད་བྱས། དེ་ནས། བར་དོ་ངོ་སྤྲོད་དང་བཅས་ཕྱག་ཐལ་མོ་སྦྱར་ནས་འོད་དཔག་མེད་ལ་གསོལ་བ་རྩེ་གཅིག་ཏུ་བཏབ་སྟེ། བླ་མ་སྟོན་པ་འོད་དཔག་མེད་ཀྱི་མཚན་བརྗོད་པ་ཉེར་གཅིག་བྱ། དེ་ནས་ཚེ་འདིའི་ལུས་ལོངས་སྤྱོད་གཉེན་ཉེ་གང་ལའང་མ་ཆགས་པར་འོད་དཔག་མེད་ལ་གསོལ་བ་རྩེ་གཅིག་ཏུ་འདེབས་དགོས་པའི་གསལ་འདེབས་དང་། ལུས་རྙིང་བ་ཙོག་པུར་ཡོད་པའི་དབུས་སུ་རྩ་དབུ་མ་སྦོམ་ཕྲ་མདའ་སྨྱུག་ཙམ་ཡོད་པའི་མར་སྣེའི་ལྟེ་བ་དང་། ཡར་སྣེ་ཚངས་བུག་ཏུ་ཟུག་པའི་མར་སྣེ་ཁ་ཟུམ་ཞིང་། ཡར་སྣེ་སྐར་ཁུང་ཁ་ཕྱེ་བ་ལྟ་བུར་གྱུར་བའི་མར་སྣེའི་ནང་དུ། རྣམ་ཤེས་ཀྱི་ངོ་བོ་ཐིག་ལེ་དཀར་ལ་དམར་བའི་མདངས་ཅན་རྒྱ་སྲན་ཙམ་ཡང་ཞིང་གཡོ་བ་འཕུར་ལ་ཁད་ཀྱི་རྣམ་པར་གསལ་བཏབ་སྟེ། དེ་ལ་དམིགས་པ་བཟུང་ནས། རང་གི་སྙིང་ཀ་ནས་རླུང་ཅུང་ཟད་སྤྲོས་ཏེ། ཚེ་འདས་ཀྱི་སྙིང་གི་ཐིག་ལེ་འོག་ཏུ་གནས་པ་ཆེར་འཕེལ་ཏེ། ཐིག་ལེ་བསྐྱོད་པར་ནུས་པ་དང་ལྡན་པར་བསམ་ལ། ཚེ་འདས་ཀྱིས་ཀྱང་གསོལ་བ་གདབ་པར་མོས་ཏེ། རང་ཉིད་ཀྱིས་སྐད་སྙན་མོས་མགོན་པོ་འོད་དཔག་མེད་ལ་གདུང་ཤུགས་དྲག་པོས་གསོལ་བ་ལན་གསུམ་བཏབ་པས། འོད་དཔག་མེད་ཀྱི་ཐུགས་ཀ་ནས་འོད་ཀྱི་སྦུ་གུ་ཕུ་ཐུང་བརྐྱངས་པ་ལྟ་བུ་ཞིག་བྱུང་སྟེ་ཚངས་བུག་ལ་ཟུག དེའི་ནང་ནས་འོད་ཟེར་ལྕགས་ཀྱུ་ལྟ་བུ་བྱུང་བ་དབུ་མའི་ནང་བརྒྱུད། ཚེ་འདས་ཀྱི་རྣམ་ཤེས་ཐིག་ལེར་གསལ་བཏབ། རང་གི་སྙིང་ག་ནས་སྤྲོས་པའི་ཐིག་ལེ་འོག་ཏུ་གནས་པ་ཆེར་འཕེལ་བ་དེས་བསྐྱོད་པར་བསམ་ལ། སྐད་གསང་མཐོན་པོས[ཧིག] གསུམ་དང[ཕཊ]གཅིག་བརྒྱབ། [ཧིག]དང་བོའི་སྐབས་སུ་ཚེ་འདས་ཀྱི་རྣམ་ཤེས་དེ་སྙིང་ག་ནས་མགྲིན་པར་དྲངས། གཉིས་པས་མགྲིན་པ་ནས་ཚངས་བུག གསུམ་པས་ཚངས་བུག་ནས་སྤྱི་བོ་བླ་མ་འོད་དཔག་མེད་ཀྱི་ཐུགས་ཀའི་ཧྲཱྀ་ཡིག་ལ་ཐིམ། མཐར[ཕཊ]དྲག་པོ་ཞིག་བརྗོད་ཚེ་དཔའ་ཆེན་གྱི་མདའ་འཕངས་པ་བཞིན་བདེ་བ་ཅན་གྱི་སྤྲུལ་གཞི་ལ་ཐིམ། དེའི་ཐུགས་ཀ་ནས་སླར་ཡང་རང་སེམས་ཚུར་འོང། གཤིན་པོའི་རྣམ་ཤེས་ཐིག་ལེའི་རྣམ་ཅན་སྐར་མདའ་མཆེད་པ་བཞིན་འདབ་སྟོང་པདྨའི་སྦུབས་སུ་ཐེག་ཆེན་གྱི་རིགས་ཅན་དབང་རྣོན་དུ་སྐྱེས། སངས་རྒྱས་ཀྱི་ཞལ་མཐོང་ཞིང་། ཆོས་མཐའ་ཡས་པའི་ཡོན་ཏན་བརྙེས་པས། རྒྱལ་བ་འཁོར་བཅས་མཉེས་ཏེ་བླ་ན་མེད་པའི་བྱང་ཆུབ་འཐོབ་པར་ལུང་བསྟན། སངས་རྒྱས་ཀྱི་ཞིང་གྲངས་མེད་དུ་བགྲོད་ནས། ཐེག་ཆེན་གྱི་ཆོས་ཉན་ཞིང་། མ་དག་པའི་འགྲོ་བ་སྒྲོལ་ནུས་པའི་མོས་པ་བྱས་ལ། རྗེས་སུ་བཟང་སྤྱོད་སོགས་སྨོན་ལམ་གྱིས་མཐའ་བརྒྱན་པར་བྱའོ། །ཞིབ་པར་ངག་དབང་འཇམ་དབྱངས་བློ་གྲོས་ཀྱི་འཕོ་ཁྲིད་དགའ་ལྡན་ཞིང་དུ་བགྲོད་པའི་མྱུར་ལམ་སོགས་ལས་ཤེས་པར་བྱའོ། །

ཡང་རྡོ་རྗེའི་གདན་བཞིའི་རྒྱུད་ལས། རིམས་ལ་སོགས་པ་མ་ཕོག་པར། །གོང་དུ་འཕོ་བའི་སྦྱོར་བ་མཆོག། སྔོན་དུ་བུམ་པ་བརྩམས་པ་ཡིན། །སྒོ་རྣམས་ཐམས་ཅད་བཅིང་བར་བྱ། །རྒྱལ་བ་ལྔ་ཡི་མཆོད་རྟེན་གྱི། །སྒོ་ནི་དགག་པར་བསྒོམ་བྱ་སྟེ། །དེ་ལ་འོག་གི་སྒོ་རུ་ནི། །ཆུ་ཡི་ས་བོན་དཀར་བོ་བསམ། །ཆུ་དང་ཆུ་མིག་སྒོ་ལ་ནི། །མེ་ཡི་ས་བོན་འབར་བ་སྟེ། །དེ་ལ་ཤིན་ཏུ་མཉམ་བཞག་པས། །དབུགས་ནི་བུམ་པ་ཅན་དུ་བསྒོམ། །ཞེས་རླུང་སྦྱོར་དང་བཅས་པ་སྒོམ་པར་གསུངས་ནའང། །རྙིང་ལུགས་ལྟར་ཞི་ཁྲོ་འཕོ་བ་རང་གྲོལ་གྱི་སྒོམ་ལུགས་ནི། མཁས་གྲུབ་ཀརྨ་ཆགས་མེད་ཀྱིས། བདེ་བའི་གནས་ལ་སེམས་དཔའི་སྐྱིལ་ཀྲུང་གིས་འདུག་ལ་འཁོར་བའི་སྒོ་དགག་པ་ནི། ལུས་དྲང་བོར་བསྲངས། ལག་པ་གཉིས་ས་ནོན་གྱི་ཕྱག་རྒྱས་པུས་མོ་གཉིས་བཀབ། དཔུང་བ་གཉིས་བརྒྱངས། དེ་ནས་རང་གི་སྙིང་གར་ཡི་གེ་ཧཱུཾ་མཐིང་ནག་འོད་དུ་འབར་བ་གཅིག ཧཱུཾ་གཅིག་ཆད་པས་བཤང་ལམ་དུ་སོང་། དམྱལ་བའི་སྒོ་ཁྲིག་གེར་བཀག དེ་ནས་ཧཱུཾ་གཅིག་ཆད། སྲིད་པའི་སྒོར་སོང་། ཡི་དྭགས་ཀྱི་སྒོ་བཀག དེ་བཞིན་དུ་ཧཱུཾ་གཅིག་གིས་ཆུ་ལམ་དུད་འགྲོའི་སྒོ་བཀག དེ་ནས་སྣ་བུག་གཉིས། དེ་ནས་རྣ་བའི་བུ་ག་གཉིས་ཧཱུཾ་འོད་དང་ལྡན་པ་རེ་རེས་བཀག་པར་བསམ། སྤྱི་བོ་ཚངས་པའི་བུ་ག་ནས་རྔྷི་མགོ་ཐུར་དུ་བསྟན་པས་བཀག་པར་བསམ། ལུས་ཀྱི་དབུས་རྩ་དབུ་མ་ལུག་རྒྱུད་ཀྱི་རྒྱུ་མ་ཕུས་བཏབ་པ་ལྟར། མར་སྣེ་ལྟེ་འོག་ཏུ་ཟུག་པ། ཡར་སྣེ་ཚངས་བུག་ཏུ་ཟུག་པ། དཀར་ལ་འཚེར་བའི་མདངས་དང་ལྡན་པ། ལུས་ཀྱི་དབུས་སུ་དྲང་བོར་ཁྲང་ངེ་ཡོད་པའི་མར་སྣེ་ལྟེ་འོག་རྩ་གསུམ་འདུས་མདོར་རིག་པའི་ངོ་བོ་ཐིག་ལེ་དཀར་ལ་འཚེར་བ་གསལ་ལ་དྭངས་པ། དབུགས་ཀྱི་སྐྱིབ་སྐྱིབ་འཕར་ལྷབ་ལྷབ་ཡར་ལ་ཁད་པ་ཡོད་པར་བསམ། སྤྱི་བོའི་སྟེང་གི་ནམ་མཁར་བླ་མ་དེ་འོད་དཔག་མེད་ཀྱི་ཆ་ལུགས་འཛུམ་དམུལ་ལེར་བཞུགས་པར་བསམ། ལུས་ཤེད་སྟེང་དུ་སྤུག་ལ་སྒྲིམ། བཤང་ལམ་དུ་དྲག་ཏུ་བསྡམས། མིག་གྱེན་དུ་ལྡོག ལྕེ་ཡ་རྐན་ལ་སྦྱར། ལག་པའི་མཐེ་བོང་གཉིས་ཀྱིས་སྲིན་རྩ་མནན་པའི་ཁུ་ཚུར་དྲག་ཏུ་བཅང་ཞིང་ལྟེ་འོག་ནས་ཡར་དྲག་ཏུ་འཐེན་ཅིང་། ངག་ཏུ﹝ཧིག﹞﹝ཧིག﹞ཅེས་ཁོང་ཤེད་དང་ལྡན་པས་དྲངས། འོག་རླུང་གི་ཤུགས་ཀྱིས་ཐིག་ལེ་དེ་རང་དབང་མེད་པར་དབུ་མའི་ནང་ནས་ཡར་ངང་ཧྲིལ་ལེ་དྲངས་པ། ﹝ཧི﹞བདུན་གྱིས་ལྟེ་བར་དྲངས། དེ་ནས་བདུན་གྱིས་སྙིང་གར། དེ་ནས་བདུན་གྱིས་མགྲིན་པར། དེ་ནས་བདུན་གྱིས་སྨིན་མཚམས་སུ། དེ་ནས﹝ཧིག﹞ཅེས་ཚངས་བུག་གི་རྔྷི་དེ་ལ་གཏུགས། ཐུག་པ་དང་ཀ་ཞེས་ཡང་ཐིག་ལེ་དེ་མར་བབས་པ་སྟེ། ལྟེ་འོག་ཏུ་ངང་ཀྱི་ལེར་གནས་པར་བསམ། དེའི་བར་ལ་ཅུང་ཟད་ངལ་གསོ། ཡང་སྔོན་ལྟར་སྦྱངས། ཐིག་ལེ་རིམ་པར་སྤར་བར་གསུངས་ལ།

 ཡང་འཇག་བཙུགས་པའི་འཕོ་བ་སྦྱང་ལུགས་ནི། སེམས་ཅན་ཐམས་ཅད་ཀྱི་དོན་དུ་བདག་གིས་འཕོ་བ་སྦྱང་བར་བྱའོ་སྙམ་དུ་སེམས་བསྐྱེད་ནས། རང་ཉིད་ཡི་དམ་རྡོ་རྗེ་རྣལ་མའི་སྐུ་ཕྲུ་མ་ཕུས་བཏབ་པ་ལྟ་བུ་ཁོག་པ་སྟོང་སང་ངེ་བར་བསམ་པའི་སྤྱི་བོར་བླ་མའི་ངོ་བོ་སངས་རྒྱས་འོད་དཔག་མེད་སྐུ་མདོག་དམར་བོ་ཞལ་གཅིག་ཕྱག་གཉིས་མཉམ་བཞག་གི་ཕྱག་རྒྱར་མཛད་པ་ཞབས་རྡོ་རྗེ་སྐྱིལ་ཀྲུང་གིས་བཞུགས་པར་བསམ། རང་གི་ལུས་ཀྱི་དབུས་ནས་ཡར་རྩ་དབུ་མ་ཕྱི་དཀར་ལ་ནང་དམར་བ། སྤྱི་གཙུག་ནས་ལྟེ་འོག་སོར་བཞིའི་བར་སླེབས་པ་ཕྲ་སྦོམ་སྦ་ལྕག་འབྲིང་བོ་ཙམ་བསམ་པའི་ཚངས་བུག་ཏུ་རྔྷི་ཡིག་དཀར་བོ་མགོ་ཐུར་དུ་བསྟན་པ། དེ་ནས་རང་གི་དབུ་མའི་ནང་གི་སྙིང་ཐད་དུ་པདྨ་དམར་བོ་འདབ་མ་བརྒྱད་པའི་ལྟེ་བར་རམ་ལས་ཉི་མའི་དཀྱིལ་འཁོར་གྱི་སྟེང་དུ་རང་གི་རྣམ་པར་ཤེས་པའི་ངོ་བོ་ཐིག་ལེ་དཀར་ལ་འཚེར་བ། སྣུམ་ཞིང་འགྲིལ་བ། སྲན་མའི་རྡོག་པོ་ཙམ། འཕར་འདར་ལིང་ལིང་བ་ཞིག་བསམས་ལ། ལུས་ཐ་མལ་བའི་སྐྱིལ་ཀྲུང་སོར་མོ་རྣམས་བསྐུམས། ཉྭ་བཞི་བསྒྲིམས། ལག་པ་རྡོ་རྗེ་ཁུ་ཚུར་བསྡམས། བྲང་གི་སྒྲོག་རུས་གཡས་གཡོན་ནོན་ཙམ་བྱ། མགྲིན་པ་འགུགས། ལྕེ་ཡ་རྐན་ལ་སྦྱར། མིག་གྱེན་ལ་ལྡོག གསུས་པ་སྟོད་དུ་ཡར་སྤུངས་ནས། ངག་ཏུ﹝ཧིག﹞ཞེས་པས་ཐིག་ལེ་སེན་རྡེལ་འཕངས་པ་ལྟར་སྤྱི་བོའི་རྔྷི་ལ་ཕོག་པར་བསམ། ཀ་ཞེས་པས་སྐར་མདའ་ལྷུང་བ་ལྟར་ཧྲིལ་གྱིས་ལྷུང་བར་བསམ། དེ་ལྟ་བུ་ཡར་འཕོ་མར་ཕབ། རྟགས་མ་ཐོན་གྱི་བར་དུ་འབད་དགོས་པར་གསུངས་སོ། །རྟགས་ནི་འཇག་བཙུགས་མའི་གཞུང་ལས། རྟགས་ནི་སྤྱི་བོ་ཟ་བ་དང་། ཚ་ཚག་དང་། སྦྲིད་པ། སྐྲངས་པ། བེམ་པ། གཡའ་བ། སྤྱི་གཙུག་ཏུ་ཆུ་སེར་དང་ཁྲག་ཐོན་པ། འབུར་བ་དང་། འབུག་པོ་ཡིན། ལུས་ཀྱང་ཟོ་མདོག་བདེ། དྲོད་སྐྱེས། ཟས་འཇུ་བ་སོགས་འབྱུང་ངོ་། །

༦ འཕོ་བ་ཐེབས་པའི་ཕན་ཡོན། གདན་གཞི་ལས། ཉེས་པ་ཀུན་གྱིས་གོས་པ་ནི། །འཕོ་བའི་སྦྱོར་བ་སྦྱར་བས་གྲོལ། །ཉིན་རེར་བྲམ་ཟེ་གསོད་པ་དང་། །མཚམས་མེད་ལྔ་བོ་བྱེད་པ་དང་། །རྐུ་འཕྲོག་འདོད་ལོག་སྤྱད་པ་ཡང་། །ལམ་འདི་ཡིས་ནི་དག་གྱུར་ཏེ། །སྡིག་པས་གོས་པར་མི་འགྱུར་ཞིང་། །སྲིད་པའི་སྐྱེན་ལས་རིང་དུ་འགྲོ། །ཇི་ལྟར་འདམ་སྐྱེས་པདྨ་ནི། །འདམ་གྱིས་གོས་པར་མ་གྱུར་ལྟར། །ཞེས་དང་། སྒྲོལ་མ་རིག་བྱེད་མའི་རྒྱུད་ལས། རྣམ་ཤེས་རླུང་ལ་ཞོན་པ་ནི། །སྟེང་གི་ལམ་ནས་འཕོས་ན་ནི། །སྡིག་ལ་གོམས་པའི་གང་ཟག་ཀྱང་། །མཐོ་རིས་དག་ཏུ་སྐྱེ་བར་འགྱུར། །མགྲོན་པོ་ལམ་དུ་ཞུགས་པ་ལ། །གྲོགས་ཀྱིས་བསྒྱུར་བ་ཇི་བཞིན་ནོ། །ཞེས་དང་།

ཡང་། སྔོན་ཁྲི་སྲོང་ལྡེ་བཙན་གྱི་བློན་པོ་ཉི་མ་བྱ་བས་མེ་མཆེད་ཤོར་ཚེ་བླ་མཆོད་དང་ཕ་མ་གཉིས་མི་ཟོག་སུམ་བརྒྱ་ཙམ་ཚིག་སྟེ་དམྱལ་བར་སྐྱེས། བློན་པོ་སེམས་ཁོང་དུ་ཆུད་ནས་ཟས་ཀྱང་མ་ཟོས་པར་མུན་ཁུང་དུ་ཞུགས་ནས་འཆི་ལ་ཉེ་སྐབས། རྒྱལ་བོས། སློབ་དཔོན་པདྨ་འབྱུང་གནས་ལ་ཞུས་པས། སློབ་དཔོན་གྱིས་ཟབ་བེར་གྱིས་དབུ་བཏུམ་ནས་སྐད་ཅིག་གིས་བདེ་བ་ཅན་དུ་བྱོན་ནས། ཚོགས་འཁོར་བསྐོར་ནས་སངས་རྒྱས་བྱང་སེམས་ཐམས་ཅད་སྤྱན་དྲངས་ནས། ཨོ་རྒྱན་གྱི་ཐུགས་ཀར་བསྟིམས་ནས་བཀའ་བསྒོ་མཛད། འཕོ་བའི་གདམས་པ་བླངས་ཏེ་ཚུར་བྱོན་ནས་བློན་པོ་མུན་ཁུང་ལས་བཏོན་ཏེ། བློན་པོ་ཉི་མ་ལ་ཆིག་བརྒྱུད་དུ་བསྩལ། བློན་པོ་ཉི་མས་བསྒོམས་པས་ཞག་གསུམ་ནས་སྡུག་བསྔལ་སངས། ཞག་ལྔ་ནས་ཚེ་འདས་རྣམས་སངས་རྒྱས་འཐོབ་པ་ཀུན་གྱིས་མཐོང་། བློན་པོ་འཇའ་གུར་གྱི་ཀློང་དུ་འཕོ་བ་སྦྱངས་པ་དང་ལྷ་དང་ལྷ་མོ་ཡང་ཞལ་གཟིགས་བྱུང་ངོ་། །

༧ འཕོ་བ་མ་ཐེབས་པའི་ཉེས་སྐྱོན། འཆི་ཁ་མར་རྩ་བའི་བླ་མ་དྲན་པ་སོགས་རང་ལ་ནུས་པ་ཡོད་ན་གཞན་གྱི་འཕོ་བ་འདེབས་མི་དགོས་པར། དག་ཞིང་སོགས་སུ་བགྲོད་པའི་མཆོག་སྟེ། དཔུང་བཟང་གིས་ཞུས་པའི་རྒྱུད་ལས། སྐྱེས་བུ་གང་ཞིག་འཆི་བའི་ཚེ། །བླ་མ་སྐད་ཅིག་དྲན་གྱུར་ན། །འཕོ་བ་རྣམས་ཀྱི་མཆོག་ཏུ་འགྱུར། །སྐྱེས་བུ་དེ་ནི་མངོན་སངས་རྒྱས། །ཞེས་གསུངས་ལ། འཕོ་བ་བཏབ་ཀྱང་འདེབས་མཁན་དེའི་བསམ་སྦྱོར་མ་དག་ན། རང་གཞན་ཕུང་ལ་སྦྱོར་བ་སྟེ། རྡོ་རྗེ་མཁའ་འགྲོ་ལས། དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ལྷ་རྣམས་བསད་པ་ཙམ་གྱིས་ནི། །དམྱལ་བར་ངེས་པར་སྲེག་པར་འགྱུར། །དེ་བས་འཆི་བའི་མཚན་མ་རྣམས། །མཁས་པས་འབད་དེ་ཤེས་པར་བྱ། །ཞེས་གསུངས་ལ། འཕོ་ཁྲིད་མི་ཕམ་བླ་མའི་ཞལ་ལུང་ལས། ལས་སྦྱོར་གྱི་ཞལ་ཤེས་ཀྱང་འཆི་ལྟས་བྱུང་ན་བཟློག་ཐབས་མ་བྱས་པར་བཙན་ཐབས་ཀྱིས་འཕོས་ན་ལུས་ལ་དམ་པ་རིགས་བརྒྱ་གནས་པས་ལྷ་བསད་པའི་ཉེས་པ་འབྱུང་བར་གསུང་རྒྱུན་ལས་བྱུང་། ཚེ་འདིའི་ཆགས་ཞེན་ཆེ་ན་འཕོ་རྟགས་ཐོན་ཡང་དག་ཞིང་དུ་འཕོ་དཀའ་བ། བྱ་ནམ་མཁར་འཕུར་ཀྱང་གཤོག་པ་ལ་རྡོ་བཏགས་པ་ལྟ་བུ་ཡིན་གསུངས་པ་དང་ཡང་མཐུན་ནོ། །

རྗེ་བཙུན་མི་ལས། མི་ཤི་བའི་རོ་ཡི་སྔས་མགོ་ལ། །ནོར་ལེན་འདོད་ཀྱི་བན་བོན་ཅ་ཅོ་འདོན། །ཞེས་པ་ལྟར། འཕོ་བའི་སྐབས་ལོངས་སྤྱོད་འཐོབ་འདོད་ཀྱི་བརྣབ་སེམས་དང་། ཡིད་དུང་དུང་དང་། མིག་ཟུམ་ཟུམ། སྨིན་མ་ཟེང་ཟེང་གིས་གཤིན་བསླུས་མཛའ་མགུ་འབའ་ཞིག་ལྷུར་ལེན་པ་ནི། རང་ཉིད་ད་ལྟ་ཉིད་ནས་རྡོ་རྗེ་དམྱལ་བར་མིང་རྟགས་འགོད་པར་གསུངས་ལ། གཞན་ཡང་། གཤིན་དོན་དུ་ངན་སོང་སྦྱོང་བའི་ཆོ་ག་དང་། གཟུངས་སྔགས་བཟླ་བ། འཕོ་བ་སོགས་བྱས་པ་དེ་མ་དག་པ་དང་། བྱིང་རྒོད་ཀྱི་དབང་དང་། དམ་ཚིག་མི་གཙང་བ་སོགས་ཀྱི་དབང་དུ་བཏང་ན། བར་དོ་བ་དེས་མངོན་ཤེས་ཕྲ་མོས་མཐོང་ནས། ཀྱེ་མ་འདི་རྣམས་ཀྱིས་བདག་བསླུས་སོ་སྙམ་ནས་ཡི་མུག་སོགས་ཀྱིས་རྐྱེན་བྱས་ཏེ། ངན་སོང་དུ་འགྲོ་བའི་རྐྱེན་དུ་འང་འགྱུར་བར་གསུངས་སོ། །

སྨྱུང་གནས།

༡ སྨྱུང་གནས་ཀྱི་བརྒྱུད་རིམ། སྔོན་འཇིག་རྟེན་གྱི་ཁམས་རིན་པོ་ཆེའི་བརྒྱན་པ་ཞེས་བྱ་བ་ཞིག་ན། སངས་རྒྱས་ལེགས་མཐོང་ཞེས་བྱ་བའི་ཆོས་འཁོར་བསྐོར་ཞིང་། ཐམས་ཅད་གསོ་སྦྱོང་ཡན་ལག་བརྒྱད་པའི་ཁྲིམས་ལ་གནས་བཅུག་ནས། གནས་སྐབས་དང་མཐར་ཐུག་གི་བདེ་བར་བཀོད་ཚེ། འཁོར་སྒྱུར་གསོ་སྦྱོང་འཕགས་ཞེས་བྱ་བས་ཀྱང་དེ་བཞིན་གཤེགས་པ་དེ་ལས། གསོ་སྦྱོང་ཡང་དག་པར་བླངས་ཏེ། ནམ་མཁར་འཕགས་ནས། སྐྱེ་བོ་མང་བོ་སྨྱུང་གནས་ཡན་ལག་བརྒྱད་པ་ལ་བཀོད་ནས། མི་དང་ལྷ་གནས་སུ་སྐྱེས་སོ། །

ཡང་། སྔོན་བསྐལ་བ་དཔག་ཏུ་མེད་པའི་སྔ་རོལ་ཏུ་སངས་རྒྱས་གཟི་བརྗིད་སྟོབས་ཞེས་པ་འཇིག་རྟེན་དུ་བྱོན་ནས་སེམས་ཅན་མང་བོ་སྨྱུང་གནས་ལ་བཀོད་དེ། ལ་ལ་དག་བྱང་ཆུབ་སེམས་དཔའ་དང་། ཐ་མ་རྣམས་ཀྱང་ལྷ་མིའི་གོ་འཕང་འཐོབ་བོ། །

དེ་ནས་སངས་རྒྱས་འོད་སྲུངས་མྱ་ངན་ལས་འདས་ནས་དམ་ཆོས་འཇིག་ལ་ཉེ་བ་ན། བྲམ་ཟེ་གཉིས་ཀྱིས་གསོ་སྦྱོང་ཡན་ལག་བརྒྱད་པ་བླངས་པས། གཅིག་གིས་ཚུལ་ཁྲིམས་རྣམ་དག་བསྲུངས་པས་རྒྱལ་བོར་སྐྱེས་པ་དང་། ཅིག་ཤོས་ཀྱིས་ཕྱི་དྲོའི་ཁ་ཟས་ཟོས་པས་ཀླུར་སྐྱེས་པས། ཀླུར་སྐྱེས་པ་དེས་རྒྱལ་བོའི་ར་བ་སྲུང་མཁན་བརྒྱུད་དེ། ཉིན་ཞག་གཅིག་གི་ཁྲིམས་ཀྱི་ཆོ་ག་བདག་ལ་བསྩལ་ཏུ་གསོལ། མ་གནང་ན་རྒྱལ་བོའི་ཡུལ་ཡང་རྒྱ་མཚོར་བསྒྱུར་རོ་ཞེས་འཕྲིན་སྤྲིངས་པས། རྒྱལ་བོ་ཤིན་ཏུ་མི་དགའ་ནས། བློན་པོ་མཆོག་གཅིག་མཆིས་པ་དེ་ལ་ཁྱོད་ཀྱིས་དཔེ་ཆ་དེ་མ་རྙེད་ན་གསོད་དོ། །ཞེས་བཀའ་ཕབ། བློན་པོ་ཨུ་ཐུག་ཏེ་ཕ་རྒན་ལ་སྨྲས་པས། ཕ་རྒན་གྱིས། རང་ཅག་གི་ཁྱིམ་ན་ཀ་བ་ཞིག་ལ་རྟག་ཏུ་འོད་འབྱུང་སྟེ། དེའི་ནང་ན་ཅི་ཡོད་ལྟོས་ཤིག་ཅེས་བསྒོས་པ་ལྟར། ཀ་བ་གཤགས་ཏེ་བལྟས་པས། རྟེན་འབྲེལ་བཅུ་གཉིས་ཀྱི་མདོ་དང་ཉིན་ཞག་གཅིག་པའི་ཁྲིམས་བརྒྱད་ཀྱི་དཔེ་བྱུང་བ་རྒྱལ་བོར་ཕུལ་བས། ཀླུ་དང་མིའི་ཡུལ་དུ་གསོ་སྦྱོང་ཡན་ལག་བརྒྱད་པ་དར་བར་མཛད་པ། མཛངས་བླུན་མདོ་ལས་ཀུན་ཏུ་རྒྱུས་ཚུལ་ཁྲིམས་བསྲུངས་པའི་ལེའུར་གསུངས་པ﹙བཤད་ཚུལ་འདི་དང་ཅུང་ཟད་མི་མཐུན་པ་བྲག་དཀར་སྤྲུལ་སྐུ་དང་བློ་བཟང་ལུང་རིགས་རྒྱ་མཚོའི་སྨྱུང་གནས་ཀྱི་ཆོ་གའི་ཟུར་བརྒྱན་ལས་གསུངས་པའི་ཁུངས་འཚོལ།﹚དང་།

 འོ་ན། ད་ལྟའི་སྨྱུང་གནས་ཀྱི་རྣལ་འབྱོར་ལ་བརྩོན་པ་འདི་གང་ལས་བརྒྱུད་ཅེ་ན། རྣམ་འདྲེན་བཞི་བ་སྟོན་པ་ཤཱཀྱ་ཐུབ་པས། ཐུགས་རྗེ་ཆེན་པོའི་རྒྱུད་རྣམས་འཕགས་པ་སྤྱན་རས་གཟིགས་དང་། འཇམ་དཔལ་དབྱངས། ཕྱག་ན་རྡོ་རྗེ་སོགས་ལ་གནང་། དེ་ལས་མགོན་པོ་ཀླུ་སྒྲུབ་ཡབ་སྲས་དང་། སློབ་དཔོན་ཛེ་ཏ་རི་དང་། རྡོ་རྗེ་གདན་པ་ཡབ་སྲས་བརྒྱུད་ཚུལ་དང་། ཡང་དགེ་སློང་མ་དཔལ་མོས་ཀྱང་གྲུབ་ཆེན་ཕག་ཚད་པ་སོགས་མཁས་གྲུབ་མང་དུ་བསྟེན་པ་སོགས་བརྒྱུད་རིམ་མང་དུ་སྣང་ཡང་། དེང་སང་ཡོངས་གྲགས་ལ་ཐུགས་རྗེ་ཆེན་པོ་ནས་དགེ་སློང་མ་དཔལ་མོར་བརྒྱུད་པ་འདི་གཙིགས་ཆེ། དེ་ཡང་དགེ་སློང་མ་དཔལ་མོས་ཐུགས་རྗེ་ཆེན་པོ་ཞལ་གཟིགས་ཤིང་། དབང་དང་གདམས་པ་ཐམས་ཅད་བུམ་པ་གང་བྱོའི་ཚུལ་དུ་གནང་བ་འདི། བྱིན་རླབས་ཉེ་བརྒྱུད་ཀྱི་དབང་དུ་བྱས་པ་ཡིན། དགེ་སློང་མ་དཔལ་མོ་ནས་རང་གི་དྲིན་ཆེན་རྩ་བའི་བླ་མའི་བར། རྡོ་ལག་རྒྱུན་དང་ཆུ་བུམ་རྒྱུན་གྱི་དཔེ་བཞིན་བརྒྱུད་པ་ནི། དགེ་སློང་མ་དཔལ་མོ་ནས་རིམ་བཞིན་པཎྚྀ་ཏ་ཟླ་བ་གཞོན་ནུ། མཁས་པ་ཡེ་ཤེས་བཟང་བོ། བལ་བོ་བེ་ཉ་བ། བྱང་སེམས་ཟླ་བ་རྒྱལ་མཚན། ཉི་ཕུག་པ་ཆོས་ཀྱི་གྲགས་པ། སྤྲུ་བ་རྡོ་རྗེ་རྒྱལ་བོ། ཞང་སྟོན་དགྲ་འཇིགས། རྩེ་འདུལ་ཐུགས་རྗེ་བྱང་ཆུབ། མཁན་ཆེན་བདེ་བ་ཅན་པ། ཆུ་བཟང་བྱང་ཆུབ་འབར། རིན་པོ་ཆེ་ཤེས་རབ་འབུམ། རྒྱལ་སྲས་ཐོགས་མེད་བཟང་བོ། ཀུན་མཁྱེན་ཤེས་རབ་དཔལ། ཞལ་སྔ་ནས་ཚུལ་ཁྲིམས་རྒྱལ་མཚན། རྗེ་ཡོན་ཏན་རིན་ཆེན། རྗེ་སངས་རྒྱས་རྒྱ་མཚོ། སྐྱབས་མཆོག་དཔལ་བཟང་། རྒྱལ་བ་བློ་བཟང་དོན་འགྲུབ། མཁས་གྲུབ་སངས་རྒྱས་ཡེ་ཤེས། པཎ་ཆེན་བློ་བཟང་ཆོས་ཀྱི་རྒྱལ་མཚན། དྲུང་བ་རྟ་ཕུག་པ་དམ་ཆོས་རྒྱལ་མཚན། སྒྲུབ་ཁང་དགེ་ལེགས་རྒྱ་མཚོ། ཕུར་ལྕོག་ངག་དབང་བྱམས་པ། ཡོངས་འཛིན་ཡེ་ཤེས་རྒྱལ་མཚན། གྲུབ་དབང་བསྐལ་བཟང་བསྟན་འཛིན་སོགས་བརྒྱུད་པ་ཡིན་ལ། སྨྱུང་གནས་བླ་མ་བརྒྱུད་པའི་རྣམ་ཐར་ཅུང་ཟད་རེ་བྲག་དཀར་སྤྲུལ་སྐུའི་སྨྱུང་གནས་བླ་མ་བརྒྱུད་པའི་རྣམ་ཐར་དང་ཕན་ཡོན་ན་གསལ་བས། དེར་གཟིགས་པར་བྱ་ལ།

འདིར་དགེ་སློང་མ་དཔལ་མོའི་རྣམ་ཐར་མདོར་བསྡུས་ཤིག་བཀོད་ན། རྒྱལ་སྲས་ཐོགས་མེད་བཟང་བོ་དཔལ་གྱིས། ཨིནྡྲ་བྷུ་ཏིས་ལུང་བསྟན་འཕགས་པ་བསྒྲུབས། །ཤིང་འཕེལ་གནས་སུ་མཆོག་གི་དངོས་གྲུབ་འཐོབ། །ཁ་སར་བ་ཎིར་ཆོ་འཕྲུལ་ཆེན་པོ་བསྟན། །དཔལ་ལྡན་དཔལ་མོའི་ཞབས་ལ་གསོལ་བ་འདེབས། །ཞེས་དང་། རྒྱལ་མཆོག་སྐལ་བཟང་རྒྱ་མཚོས། རྣམ་གྲོལ་མཆོག་གི་སར་གཤེགས་དཔལ་མོའི་ཞབས། །ཞེས་བསྔགས་པའི་དགེ་སློང་མ་དཔལ་མོ་ནི། རྒྱལ་བོ་ཨིནྡྲ་བྷུ་ཏིའི་སྲས་མོར་འཁྲུངས། སྐྱེད་བསྲིངས་ནས་རྒྱ་གར་ཉི་འོག་གི་རྒྱལ་བོ་སྡིག་སྤྱོད་ལ་དགའ་བ་ཞིག་ལ་ཆུང་མར་བརྫངས་ཀྱང་། དེར་མ་སླེབས་ཙམ་དུ་འཁོར་བ་ལ་ཞེན་ལོག་འཁྲུངས་ཏེ། སྨྱོ་རྫུ་གནང་ནས། དགེ་སློང་མའི་སྡོམ་པ་བླངས་ཤིང་། གྲུབ་ཆེན་ཕག་ཚད་པ་སོགས་མཁས་གྲུབ་མང་དུ་བསྟེན་ནས་རིག་པའི་གནས་ལྔ་དང་། ཁྱད་པར་དུ་གསང་སྔགས་ཀྱི་ཉམས་ལེན་ལ་བརྩོན་པ་མཛད། ནམ་ཞིག་གི་ཚེ། དགེ་སྦྱོར་གནད་དུ་སྨིན་ཏེ་སྒྲུབ་པ་ལ་སྐུལ་བའི་ཆེད་དུ། སྐུ་ལུས་ལ་མཛེ་ནད་བཞེས་ཏེ་སྣག་ཁྲག་བྱུང་ནས་ཟུག་གཟེར་གཟོད་དཀའ་བ་བྱུང་སྟེ། ཕྱག་གཡས་པའི་མཁྲིག་མ་ནས་ཆད་པས། བཟའ་བཏུང་ཡང་སྤྱོད་དཀའ་བ་བྱུང་སྟེ། དུད་འགྲོ་ལྟར་ཁ་སྦུབ་ཏུ་ཟ་དགོས་པ་བྱུང་བས། འཁོར་རྣམས་ཀྱིས་རྩའི་སྤྱིལ་བུ་ཞིག་ཏུ་བསྐྱལ། དེར་ཐུགས་ཧ་ཅང་སྐྱོ་བས་བཤུམ་གྱིན་བཞུགས་པའི་ཚེ། མཚན་ལམ་དུ་ཡབ་རྒྱལ་བོ་ཨིནྡྲ་བྷུ་ཏི་བྱོན་ནས། ཁྱོད་ལི་ཁ་ར་ཤིང་འཕེལ་དུ་བྱོན་ལ་ཐུགས་རྗེ་ཆེན་པོ་སྒྲུབས་ཤིག་ཅེས་ལུང་བསྟན་པ་བཞིན། དེར་ཕེབས་ཏེ་བཅུ་གཅིག་ཞལ་གྱི་དྲུང་དུ་བཞུགས་ནས། མཆོག་གི་དངོས་གྲུབ་མ་འཐོབ་བར་དུ་གཞན་དུ་མི་འགྲོ་བའི་དབུ་མནའ་བཞེས་ཏེ། ཐུགས་དམ་ལ་དམར་བས། ནད་ཐམས་ཅད་སྦྲུལ་ཤུན་ལྟར་ཕུད་ཅིང་། ཕྱག་གཡས་པ་ཡང་སོར་ཆུད་པས། སྐུ་ལུས་སྔར་བས་ཀྱང་ཡིད་འོང་དུ་གྱུར་ཏེ། ས་ལམ་གྱི་རྟོགས་པ་ཁྱད་པར་ཅན་ཐུགས་རྒྱུད་ལ་འཁྲུངས་ཤིང་། ལྷ་ཀླུ་བཙན་གསུམ་བྲན་ཏུ་འཁོལ་བར་མ་ཟད། རྗེ་བཙུན་སྒྲོལ་མ་དང་། དོན་ཞགས་ལྷ་ལྔ་སོགས་ཞལ་གཟིགས་ཤིང་། ཁྱད་པར་དུ་ས་ག་ཟླ་བའི་ཚེས་བཅོ་ལྔའི་ཉིན་ཐུགས་རྗེ་ཆེན་པོ་དངོས་སུ་ཞལ་གཟིགས་ཏེ། དབང་དང་གདམས་པ་བུམ་པ་གང་བྱོའི་ཚུལ་དུ་གསན། དེ་ནས་སེམས་ཅན་གྱི་དོན་དུ་སྨྱུང་གནས་ཟླ་གསུམ་དུ་སྲུང་མཐར། ཡུལ་དབུས་སུ་བྱོན་པས་ཐམས་ཅད་ཀྱི་སྐུ་ལུས་ཉ་ཟླ་ལྟར་དྭངས་པ་མཐོང་བས། དགེ་སློང་མ་འདིས་བསླབ་སྡོམ་ལ་ཅུང་ཟད་གཡེལ་ལམ་ཞེས་ཟེར་བས། གཞན་མ་དད་པ་ལྡོག་པའི་ཕྱིར། ཁ་སར་བ་ཎིའི་དུས་མཆོད་ཀྱི་ཁྲོམ་གསེབ་ཏུ་བྱོན་ཏེ་རང་གི་དབུ་བཅད་ནས། མཁར་གསིལ་གྱི་རྩེ་མོར་བཏགས་ཏེ། གར་བྱེད་པ་སོགས་ཆོ་འཕྲུལ་མང་དུ་བསྟན་ནས། ཁོ་ལ་ཕམ་པ་བྱུང་ན་མགོ་བོ་འབྱར་དུ་མི་བཏུབ། མ་བྱུང་ན་སླར་འབྱར་བའི་བདེན་སྟོབས་བརྗོད་པས། སླར་འབྱར་ཏེ་ཐམས་ཅད་ཀྱི་ལོག་ལྟ་ཞི་ཞིང་དད་པའི་ས་ལ་བཀོད་དེ། དབང་དང་བྱིན་རླབས་གནང་བས་གྲུབ་པ་འཐོབ་པའི་བུ་སློབ་མང་དུ་བྱུང་ངོ་། །

༢ བསྙེན་གནས་དང་ཐེག་ཆེན་གསོ་སྦྱོང་གི་མི་འདྲ་བའི་ཁྱད་པར། བསྙེན་གནས་དང་ཐེག་ཆེན་གསོ་སྦྱོང་གཉིས་སྤང་བྱ་བརྒྱད་སྤོང་བ་ཙམ་དུ་མཚུངས་ཀྱང་། མི་འདྲ་ས་གཞན་མང་སྟེ། ༡ གང་ནས་གསུངས་པའི་ཁུངས་མི་འདྲ་བ་ནི། བསྙེན་གནས་ཀྱི་ཆོ་ག་བྲམ་ཟེ་གནས་འཇོག་གི་མདོ་དང་། ཐེག་ཆེན་གསོ་སྦྱོང་ནི་དོན་ཞགས་ཞིབ་མོའི་རྒྱུད་ལས་གསུངས་པ་ཡིན། ༢ སྡོམ་པ་ལེན་པའི་རྟེན་མི་འདྲ་བ་ནི། བསྙེན་གནས་ནི་རབ་བྱུང་གིས་ལེན་དུ་མི་རུང་ལ། གསོ་སྦྱོང་ནི་དགེ་སློང་རྡོ་རྗེ་འཛིན་པས་ཀྱང་བླངས་ཆོག་པ་ཡིན། ༣ ལེན་པའི་ཀུན་སློང་མི་འདྲ་བ་ནི། བསྙེན་གནས་ནི་རང་དོན་ཁོ་ནར་མྱང་འདས་འཐོབ་འདོད་ཀྱི་བསམ་པ་ཙམ་ལ་བརྟེན་ནས་སྐྱེས་ལ། ཐེག་ཆེན་གསོ་སྦྱོང་ནི་གཞན་དོན་དུ་སངས་རྒྱས་འཐོབ་འདོད་དགོས་པ་ཡིན་ནོ། །༤ ཆོ་ག་མི་འདྲ་བ་ནི། བསྙེན་གནས་ནི་དགོངས་གསོལ་སྐྱབས་འགྲོ་སྔོན་དུ་བཏང་སྟེ་ལེན་དགོས་ལ། གསོ་སྦྱོང་ནི་ཕྱོགས་བཅུའི་སངས་རྒྱས་དང་བྱང་སེམས་ལ་དགོངས་གསོལ་སྔོན་དུ་བཏང་ནས། སྔོན་བྱོན་གྱི་རྒྱལ་བ་རྣམས་དང་ཚུལ་མཚུངས་པར་ཁས་ལེན་ལན་གསུམ་དུ་བྱས་ཏེ་ལེན་དགོས། ༥ འཐོབ་བྱའི་འབྲས་བུ་མི་འདྲ་བ་ནི། བསྙེན་གནས་ལ་སེམས་བསྐྱེད་པ་ལྟར་ཐེག་པ་ཆེ་ཆུང་གི་མྱང་འདས་གཉིས་ཀ་འབྱུང་ལ། གསོ་སྦྱོང་ལ་ནི་མ་ཉམས་ན་རྫོགས་པའི་བྱང་ཆུབ་ཀྱི་འབྲས་བུ་འབྱུང་བའི་ཕྱིར་རོ། །དེ་ལྟར་མི་འདྲ་བའི་ཁྱད་པར་མང་དུ་ཡོད་ཀྱང་། སྔོན་བྱོན་དམ་པ་རྣམས་ཀྱི་ལྔར་བསྡུས་ཏེ་གསུངས་པ་ལྟར། འདིར་ཡང་དེ་ལྟར་བཀོད་དོ། །

༣ ཐེག་ཆེན་གསོ་སྦྱོང་གི་སྡོམ་པ་ལེན་པའི་ཚུལ། སྡོམ་པ་མ་བླངས་པའི་སྔོན་འགྲོ་ལ་ཐ་མ་ཁ་དང་ཆང་། སྒོག་ཙོང་། ཟྭ་ཚོད་སོགས་ཉིན་འགའི་སྔོན་ལ་འཛེམ་དགོས་སྟེ། རནྟའི་ལུང་བསྟན་ལས། རྟེན་གྱི་སྐུ་ལ་དུ་བ་ཕོག་པ་ཡིས། །ལྷན་ཅིག་སྐྱེས་པའི་ལྷ་ནི་བྲོས་པ་དང་། །འཐུང་བའི་མོད་ལ་བྱང་ཆུབ་སེམས་རྩ་སྐེམ། །སྲོག་རྩར་གདོན་ཞུགས་ཚེ་ཐུང་དབུགས་ཀྱང་འཚང་། །བཞི་བརྒྱ་རྩ་བཞིའི་ནད་རྣམས་སྣ་འདྲེན་བྱེད། །ཅེས་དང་། འཐུང་བའི་མི་རྣམས་ཡི་དམ་ལྷ་བསྒྲུབ་ཀྱང་། །ལྷ་ཞལ་མི་སྟོན་ཚུར་ལ་གདོན་ཞལ་མཐོང་། །བསྐལ་བར་བསྒྲུབས་ཀྱང་མི་འགྲུབ་བར་ཆད་འབྱུང་། །ཞེས་དང་། ཆང་ལའང་འདུལ་བ་ལུང་ལས། ཆང་འཐུང་དམྱལ་བ་ངུ་འབོད་སྐྱེ། །སྦྱིན་མཁན་དེ་ཡི་འཁོར་དུ་སྐྱེ། །ཞེས་དང་། ཙོང་སྒོག་སོགས། འདུལ་བ་མདོ་རྩར། སྒོག་སྐྱ་ཞག་བདུན། ཀུན་དོང་ནི་ཞག་གསུམ། ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ། །ཞེས་སོ། །

སྡོམ་པ་ལེན་པའི་རྟེན་ལ། ཡོད་ན་རྟེན་དང་གང་ཟག མེད་ན་རྟེན་གསུམ་ལས་ཀྱང་ལེན་རུང་ལ། རབ་དགེ་སློང་ཁྲིམས་ལྡན་དང་། མིན་ན། ཁྱིམ་པ་གསོ་སྦྱོང་ལ་གནས་པ་ལས་ཀྱང་ངོ་། །སྡོམ་པ་ལེན་པ་དེ་ཡང་། སྐྱབས་གསུམ་སྔོན་དུ་བཏང་སྟེ། སྡོམ་པ་ཞུ་བའི་དོན་དུ་མཎྜལ་དབུལ། དེ་ནས་བྱང་ཆུབ་སེམས་ཀྱི་ཀུན་སློང་གསལ་བཏབ་ནས། ཕྱོགས་བཅུ་ན་བཞུགས་པའི་ཞེས་སོགས་དགོངས་གསོལ་སྔོན་དུ་བཏང་སྟེ། དངོས་གཞི་ལ། ཇི་ལྟར་སྔོན་གྱི་དེ་བཞིན་གཤེགས་པ་ཞེས་པ་ནས། གསོ་སྦྱོང་ཡང་དག་པར་བླང་བར་བགྱིའོ། །ཞེས་པའི་བར་བླ་མ་ལ་ཐུགས་རྗེ་ཆེན་པོའི་འདུ་ཤེས་བཞག་ནས། རྗེས་ཟློས་ལན་གསུམ་རྫོགས་པ་དང་ལྷན་དུ་སྡོམ་པ་མནོས་པའི་ཐོབ་བློ་བྱས་ཏེ། དགའ་བ་སྒོམ་པ་གལ་ཆེ། ཐབས་ལགས་ཀྱང་བྱ། དེ་ནས་ཚུལ་ཁྲིམས་སྔར་ཉམས་པ་སོས་ཤིང་། སླར་རྣམ་དག་འབྱུང་ཕྱིར་ཚུལ་ཁྲིམས་རྣམ་དག་གི་གཟུངས་ཉེར་གཅིག་བཟླ་ལ། ཁྲིམས་ཀྱི་ཚུལ་ཁྲིམས་སྐྱོན་མེད་ཅིང་། །སོགས་བཏོན་ཏེ་ཚུལ་ཁྲིམས་རྣམ་དག་གིས་མཐར་བརྒྱན་པར་བྱའོ། །

རྟེན་གྱི་དྲུང་དུ་ལེན་ཚེ། རྟེན་ལ་ཐུགས་རྗེ་ཆེན་པོ་དངོས་ཀྱི་འདུ་ཤེས་བཞག དགོངས་གསོལ་དང་། ཐབས་ལགས་འདོར་བ་མ་གཏོགས། གཞན་རྣམས་སྔར་ཇི་ལྟ་བ་བཞིན་ནོ། །

༤ ཐེག་ཆེན་གསོ་སྦྱོང་གི་བསྲུང་བྱ་ཡན་ལག་བརྒྱད། བཤེས་སྤྲིངས་ལས། འཚེ་དང་ཆོམ་རྐུན་འཁྲིག་པ་རྫུན་དང་ནི། །ཆང་དང་དུས་མིན་ཟས་ལ་ཆགས་པ་དང་། །མལ་སྟན་མཐོ་ལ་དགའ་དང་གླུ་དག་དང་། །གར་དང་ཕྲེང་བའི་ཁྱད་པར་རྣམ་སྤོང་ཞིང་། །ཞེས་དང་། ཐེག་ཆེན་གསོ་སྦྱོང་གི་ཆོ་ག་ལས། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ནི་བླང་མི་བྱ། །འཁྲིག་པའི་ཆོས་ཀྱང་མི་སྤྱད་ཀྱང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་བོ་ཉེར་བསྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཞེས་སོ། །

དེ་ཡང་སྡོམ་པ་འཐོབ་པ་ཙམ་གྱི་མི་ཆོག་པར་ཚུལ་བཞིན་སྲུང་བ་འདི་ཤིན་ཏུ་ནས་ཀྱང་གལ་ཆེ་སྟེ། བྱམས་པའི་ལུང་བསྟན་པའི་མདོ་ལས། ཤཱཀྱ་སེང་གེ་བསྟན་པ་ལ། །བསླབ་གཞི་ཡང་དག་བླངས་ནས་སུ། །ཇི་ལྟར་སྲུང་བཞིན་བསྒྲུབས་པ་ནི། །ང་ཡི་བསྟན་ལ་ལྷགས་པ་ཡིན། །ཞེས་སོ། །སྐབས་འདིར་བསླབ་གཞི་གང་ཞེ་ན། རྩ་བ་བཞི་དང་ཡན་ལག་བཞི་སྤོང་བ་སྟེ། མངོན་པ་མཛོད་ལས། ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་གསུམ་རིམ་གོ་རིམ་བཞིན། །ཞེས་པ་ལྟར། དང་བོ་བཞི་ཚུལ་ཁྲིམས་ཀྱི་ཡན་ལག་དང་། ཆང་སྤོང་བ་བག་ཡོད་ཀྱི་ཡན་ལག ལྷག་མ་གསུམ་བརྟུལ་ཞུགས་ཀྱི་ཡན་ལག་ཏུ་འདུའོ། །ཇོ་བོ་རྗེས་དེའི་སྟེང་གུང་ཚིགས་དཀར་གསུམ་ཁོ་ནར་སྤྱོད་པ་དང་། བག་ཡོད་ཀྱི་སླད་དུ་ཆབ་ལེན་པ་གཉིས་བསྣན་པའོ། །སྲུང་དུས་ཀྱང་། ལུས་དཀའ་ཐུབ། ངག་སྨྲ་བཅད། ཡིད་རྣམ་རྟོག་གིས་མ་བསླད་པར། གཙང་སྦྲ་དང་ལྡན་པའི་སྒོ་ནས་དགེ་སྦྱོར་ལ་བརྩོན་པར་བྱ་ལ། ཐ་ན་གཉིད་དང་གླལ་བ། འོག་རླུང་སོགས་ཀྱང་བསྡམས་ཞིང་། གལ་ཏེ་ཤོར་ན་གཟུངས་ཆུས་བཀྲུ་བར་བྱའོ། །ནངས་སྔ་མོའི་ཐོ་ཐུག་ཀྱང་ལུས་ལ་གནས་པའི་སྲིན་འབུ་རྣམས་གསོ་ཆེད་ཡིན་པས། འབག་ཐང་ཙམ་གྱིས་འཐུས་པར་བྱའོ། །

༥ སྨྱུང་གནས་སྲུང་བའི་དུས། སྨྱུང་གནས་སྲུང་བའི་དུས་ནི། ལྷའི་དབང་བོས་ཞུས་པའི་མདོ་ལས། ཚེས་བརྒྱད་དག་དང་བཅོ་ལྔ་དང་། །ཆོ་འཕྲུལ་ཆེན་པོའི་ཟླ་བ་ལ། །བསྙེན་གནས་ཡན་ལག་བརྒྱད་སྲུང་བས། །དེ་ནི་སངས་རྒྱས་ཉིད་དུ་འགྱུར། །ཞེས་དང་། བྱམས་པའི་ལུང་བསྟན་པའི་མདོ་ལས། ཟླ་ཕྱེད་ཀྱི་ནི་བཅུ་བཞི་དང་། །བཅོ་ལྔ་དེ་བཞིན་ཚེས་བརྒྱད་དང་། །ཆོ་འཕྲུལ་གྱི་ནི་ཟླ་ཕྱེད་ལ། །ཡན་ལག་བརྒྱད་ལ་ལེགས་གནས་པའི། །བསྙེན་གནས་གསོ་སྦྱོང་བྱས་པས་ནི། །ང་ཡི་བསྟན་ལ་ལྷགས་སོ་གསུངས། །ཞེས་དང་། ཞབས་དཀར་ཚོགས་དྲུག་རང་གྲོལ་གྱིས། ཚེས་གྲངས་བརྒྱད་ལ་བསྙེན་གནས་ཀྱི། །སྡོམ་པ་ཚུལ་བཞིན་བསྲུངས་གྱུར་ན། །གཅོད་གཏུབ་དམྱལ་བ་ལས་ཐར་ནས། །བསྐལ་བ་སུམ་ཅུའི་སྒྲིབ་པ་བྱང་། །བཅོ་ལྔའི་ཉིན་པར་བསྙེན་གནས་ཀྱི། །སྡོམ་པ་ཚུལ་བཞིན་བསྲུང་གྱུར་ན། །གྲང་བའི་དམྱལ་བ་ལས་ཐར་ནས། །བསྐལ་བ་སུམ་ཅུའི་སྡིག་པ་བྱང་། །གནམ་སྟོང་ཉིན་པར་བསྙེན་གནས་ཀྱི། །སྡོམ་པ་ཚུལ་བཞིན་སྲུང་གྱུར་ན། །ཚ་བའི་དམྱལ་བ་ལས་ཐར་ནས། །བསྐལ་བ་བརྒྱ་ཡི་སྡིག་པ་བྱང་། །དེ་ཕྱིར་ཁྱིམ་པ་དད་ལྡན་ཚོ། །བསྙེན་གནས་སྡོམ་པ་ཅི་ཐུབ་སྲུང་། །ཞེས་སོ། །འདི་དག་ནི་དུས་འགྱུར་གྱི་དགེ་རྩར་དམིགས་ནས་གསུངས་པ་ཡིན་ལ། གཞན་དུ་ཆོས་སེམས་འཁྲུངས་ཤིང་མཐུན་རྐྱེན་འཛོམས་ན་དེ་ཉིད་དུ་རུང་སྟེ། ཚེ་ལ་ངེས་པ་མེད་པའི་ཕྱིར་རོ། །རྒྱལ་བུ་སྙིང་རྗེ་ཆེར་སེམས་ཀྱིས་ཇི་སྲིད་འཚོའི་བར་དུ་སྡོམ་པ་བླངས་པ་དཀོན་བརྩེགས་ལས་གསུངས་པ་ལྟར་རོ། །

༦ ཚུལ་ཁྲིམས་རལ་བའི་ཉེས་དམིགས་བཤད་པ། འདུལ་བ་ལུང་ལས། འདི་ན་ལ་ལས་རྒྱལ་བོའི་ཚིག་ཆེན་ལས། །ལན་འགར་འདས་ཀྱང་ཆད་པ་འཐོབ་མི་འགྱུར། །ཐུབ་པའི་བཀའ་ལུང་ཚུལ་མིན་འདའ་བྱེད་ན། །དུད་འགྲོ་འགྲོ་འགྱུར་ཨེ་ལའི་འདབ་ཀླུ་བཞིན། །ཞེས་པ་ལྟར། ཀླུ་ཨེ་ལའི་འདབ་ཅེས་པ་སངས་རྒྱས་འོད་སྲུང་གི་བསྟན་པ་ལ། བཅས་པ་ཁྱད་དུ་བསད་དེ། ཤིང་ཨེ་ལའི་འདབ་མ་ཞིག་ཞེ་སྡང་གིས་བཅད་པས། དེའི་རྣམ་སྨིན་གྱིས། ད་ལྟ་ཡང་ཀླུ་ཨེ་ལའི་འདབ་ཞེས་བྱ་བ་མགོ་བོ་བདུན་ཡོད་པ། མགོ་བོ་རེ་རེ་ལ་ཨེ་ལའི་སྡོང་བོ་སྐྱེས་པ། སྲིན་འབུའི་རིགས་བརྒྱ་ཕྲག་དུ་མས་གང་བ། སྦྲང་བུའི་ཚོགས་དུ་མ་ལྡིང་ཞིང་སྣག་ཁྲག་འཛག་ཅིང་དྲི་ང་བ་ཞིག་ཏུ་སྐྱེས་པ་དང་།

ཡང་། སྨྱུང་གནས་ཀྱི་སྐབས། ཡན་ལག་རེ་རེ་མ་བསྲུངས་པའི་ཉེས་དམིགས་ནི། ༡ སྲོག་བཅད་ན། བསད་པས་ཚེ་ཐུང་ཞེས་པ་ལས་གཞན། དམྱལ་བ་ལས་སྐྱེས་ཏེ་སྡུག་བསྔལ་བཟོད་གླགས་མེད་པར་མྱངས་དགོས་པར་མ་ཟད། སྲོག་རེ་རེ་བཅད་པས། སྲོག་ལན་དགུ་བརྒྱ་གོ་དགུ་ནས་སུམ་བརྒྱའི་བར་མཆོག་དམན་ལ་ལྟོས་ནས་འཇལ་དགོས་པ་དང་། ༢ མ་བྱིན་པར་བླངས་པས། དམྱལ་བ་ངུ་འབོད་དུ་སྐྱེས་ལ། མིར་སྐྱེས་ཀྱང་ལོངས་སྤྱོད་དབུལ་ཞིང་གཞན་གྱིས་སྡང་བ། ༣ འཁྲིག་ཆོས་བརྟེན་པས། ངུ་འབོད་ཆེན་པོར་སྐྱེས་ལ། སྐྱེ་བ་ལྔ་བརྒྱར་མཛེ་མོ་དང་དབང་བོ་མི་ཚང་བ་སོགས་སུ་སྐྱེ། ༤ རྫུན་གྱིས་ནི། ཐིག་ནག་ཏུ་སྐྱེས་ལ། མིར་སྐྱེས་ཀྱང་ངག་ལྐུགས་པ་དང་། ཕྲག་དོག་ཆེ་བ། ཆོས་སྐད་མི་གོ་བར་སྐྱེ། ༥ ཆང་འཐུང་བས། ཟངས་ཞུན་ཁོལ་མ་འཐུང་བའི་ཚ་དམྱལ་དུ་སྐྱེས་ལ། མིར་སྐྱེས་ནའང་། གཏི་མུག་དང་བརྗེད་ངས་ཆེ་བ། ཁྲེལ་དང་ངོ་ཚ་མེད་པ། གནོད་སྦྱིན་དང་ཁྱི་དང་སྨྱོན་པ་རྣམས་ཀྱི་སྐྱེ་བ་ལྔ་བརྒྱ་རེ་ལེན་པ་དང་། ༦ ཁྲི་སྟན་ཆེ་མཐོ་ལ་བསྡད་པས། མལ་སྟན་མི་འབྱོར་ཞིང་། གཞན་གྱིས་གུས་བཀུར་མི་འཐོབ་པ་དང་། ཁྲི་སྟན་ཆེ་མཐོ་བསྡད་དེ་ཚུལ་ཁྲིམས་ཉམས་པས་ལན་ཆགས་ཤ་འཁོན་གཉེར་བའི་ལོ་རྒྱུས་ཤིག་ལ། སྔོན་རྒྱ་ནག་གི་ཡུལ་དུ་ཧྭ་ཤང་གི་སློབ་དཔོན་ཊི་ཥ་ན་བྱ་བ་འདུལ་ཁྲིམས་མིག་འབྲས་བཞིན་བསྲུང་བ་ཞིག་གིས། རྒྱལ་བོས་གནང་བའི་ཨ་ཀ་རུ་ནག་པོའི་ཁྲི་རིན་པོ་ཆེས་སྤྲས་པ་ཞིག་ལ་རྒྱལ་བོའི་བཀའ་ནན་ཆེ་བས་དབང་མེད་དུ་ལན་འགའི་བར་ལོངས་སྤྱད། མི་རིང་བར་པུས་མོའི་ལྷ་ང་ལ་ཕོལ་མིག་ཕོར་ཚད་ཙམ་མིག་གཉིས། སྨིན་མ་ཁ་སྣ་ཐམས་ཅད་ཚང་བ། ཁར་ཟས་བཅུག་ན་ཟ་བ། ན་ཚ་ཟུག་ཟེར་བཟོད་གླགས་མེད་པ་ཞིག་བྱུང་ནས་ཤིན་ཏུ་གདུངས་པ་ན། སྤྱན་རས་གཟིགས་ཀྱི་རྣམ་འཕྲུལ་ཧྭ་ཤང་ཞིག་དང་མཇལ་བས་དེས་ཆུ་མིག་ཞིག་གི་འགྲམ་དུ་ཁྲིད་ནས། ཕོལ་མིག་ཆུས་འཁྲུ་ཞིང་རྔ་ཡབ་ཀྱིས་བྱབས་བཞིན། དགེ་བཤེས་ཁྱོད་སྔོན་ཧཱན་གུར་གྱི་རྒྱལ་བོ་གིང་དྷིའི་ནང་བློན་ཡུའང་ཨང་དང་། ཕོལ་མིག་ཁྱོད་བློན་པོ་བཞོའུ་ཚོར་གྱུར་བ་ཨེ་དྲན། ཡུའང་ཨང་གིས་རྒྱལ་བོ་ལ་ཕྲ་མ་བཅུག་ནས་བཞོའུ་ཚོར་བསད་པ་ཨེ་དྲན། དེ་ནས་ཡུའང་ཨང་འགྱོད་པ་སྐྱེས་ནས་རབ་ཏུ་བྱུང་། ཡང་སྲིད་ཕྱི་མ་ནས་ད་ལྟའི་བར་མཐར་ཆགས་སུ་ཚུལ་ཁྲིམས་སྲོག་ལྟར་བསྲུངས་པས། བཞོའུ་ཚོ་ཁྱོད་ཀྱིས་ཤ་འཁོན་གཉེར་ནས་ཁོའི་སྐྱེ་བ་བཅུའི་བར་དུ་འབྲངས་ཀྱང་། ཚུལ་ཁྲིམས་བསྲུང་བའི་སྟོབས་ཀྱིས་གླགས་མ་རྙེད་པ་ཨེ་དྲན། ཞེས་གསུངས་པ་རྣམས་ལ་ཕོལ་མིག་གིས་ཀྱང་། ཨང་ཞེས་ལན་རེ་བཏབ། ཡུའང་ཨང་གི་སྐྱེ་བ་འདིར་དེ་ཉིན་ཁྲི་རིན་ཐང་ཅན་ལ་ལོངས་སྦྱད་པས་བཅས་འགལ་བྱུང་སྟེ། ཁྱོད་ཀྱིས་གླགས་རྙེད་ནས་གནོད་པ་བྱེད་ཐུབ་འདུག་ཀྱང་། ཁྱོད་ལའང་སླར་ལས་འདིའི་རྣམ་སྨིན་འབྱུང་བར་ངེས་པས། ད་རེས་ངེད་ཀྱིས་ཁྱེད་གཉིས་འདུམ་པར་བྱ་ཡི་ཐོངས་ཤིག་ཅེས་གསུངས་པས། ཕོལ་མིག་དེ་འབག་དོར་བ་བཞིན་དུ་ལྷུང་ཞེས་རྒྱ་ནག་ཆོས་འབྱུང་ལས་གསུངས་སོ། །༧ དུས་མིན་གྱི་ཟས་ཟོས་པས། སྔོན་སངས་རྒྱས་འོད་སྲུང་གི་བསྟན་པ་ལ། བྲམ་ཟེ་གཉིས་ཀྱིས་ཐེག་ཆེན་གསོ་སྦྱོང་གི་སྡོམ་པ་བླངས། གཅིག་གིས་ཕྱི་དྲོའི་ཁ་ཟས་ཟོས་པས། ཀླུར་སྐྱེས་པ་མཛངས་བླུན་མདོ་ན་གསུངས་པ་དང་།

ཡང་བྲམ་ཟེ་སྤྲང་བོ་ཞིག་གིས་གསོ་སྦྱོང་བླངས་ཏེ་སོང་བས། རི་བྲག་ཅིག་ཏུ་སླེབས་པ་ན་མུན་རུབ་པས། གནས་ཚང་གཡར་ཏེ་ཁ་ཟས་མ་ཟོས་པས། གནས་བདག་གིས་ཁྱེད་ཀྱིས་མི་ཟ་ན། ངེད་ཀྱི་ཁྱིམ་དུ་མ་འདུག་ཅིག་ཅེས་སྤྲད་པས། ཁོ་སྐྲག་ཏེ་ཁ་ཟས་ཟོས་པས། ཚེ་འཕོས་ནས་རྒྱལ་ཆེན་རིགས་བཞི་ལས་ལྷའི་བུ་གསོ་སྦྱོང་རལ་ཞེས་མིང་ངན་ཐོགས་ཏེ། ལོངས་སྤྱོད་དང་གཟི་བརྗིད་ལྷ་གཞན་ལས་དམན་པ་ཞིག་ཏུ་སྐྱེས་པ་དང་། ཡང་རྒན་མོ་སྡིག་རྒན་མ་མི་བཅུ་བསད་པ་ཞིག་སྨྱུང་གནས་ཐེངས་གསུམ་བསྲུངས་པས། ཐེངས་གཅིག་ཁ་ཟས་ཅུང་ཙམ་ཟོས། ཐེངས་གཅིག་ཆུ་འཐུང་། ཐེངས་གཅིག་ལེགས་པར་བསྲུངས་ནས་ཚེ་འཕོས་པས། རྒྱལ་སྲས་ཤིག་ཏུ་འཁྲུངས་ཀྱང་། ཟས་ཟོས་པས་མདོག་ངན་པ་དང་། ཆུ་འཐུང་བས་སེམས་རྣལ་ཏུ་མི་གནས་པའི་སྨྱོན་པ་ཞིག་ཏུ་སྐྱེས་པ་ལྟ་བུའོ། །འོན་ཀྱང་ཞབས་དཀར་བས། ན་ན་བསྙེན་གནས་སྡོམ་པ་སྲུང་། །མ་ཐུབ་བཞག་ན་འཆོར་བ་མིན། །ན་བ་སོས་ནས་མ་བསྲུང་ན། །སྡོམ་པ་འཆོར་བའི་སྲུང་བར་གྱིས། །བརྗེད་ནས་རྩམ་པ་སོགས་ཟོས་ཀྱང་། །བཤགས་ཏེ་བསྲུངས་ན་ཉེས་པ་མེད། །ཚོགས་ཀྱི་འཁོར་ལོ་བསྐོར་བའི་ཚེ། །ཟོས་ན་སྡོམ་པ་འཆོར་བ་མིན། །ཟོས་རྗེས་སྔར་ལྟར་མ་བསྲུང་ན། །སྡོམ་པ་འཆོར་བས་སྲུང་བར་མཛོད། །ཅེས་ཀྱང་གསུངས་སོ། །༨ ཆགས་སེམས་ཀྱིས་དྲི་བྱུགས་པས། ཚེ་འཕོས་ནས་དྲི་ངན་བྲོ་བ་དང་། མཚན་བཟང་མི་ལྡན་པ། གླུ་གར་གྱི་རྩེད་འཇོར་རོལ་བས། ཚེ་རབས་ཀུན་ཏུ་ཤེས་རྒྱུད་རྒོད་པ་དང་། ངག་ལ་ཆོས་ཀྱི་སྒྲ་མི་འཁྱོངས་པའོ། །

 ༧ གསོ་སྦྱོང་ཡན་ལག་བརྒྱད་པའི་ཕན་ཡོན་བཤད་པ། དང་བོ། ཡན་ལག་བརྒྱད་པ་སྤྱིའི་ཕན་ཡོན། ༡ དུས་ཀྱི་སྒོ་ནས་ཕན་ཡོན་ཆེ་བ་ནི། ཏིང་འཛིན་རྒྱལ་བོའི་མདོ་ལས། བསྐལ་བ་བྱེ་བ་གང་གཱའི་བྱེ་སྙེད་ཀྱི། །དང་བའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེ་ཕྲེང་བ་ཡིས། །སངས་རྒྱས་བྱེ་བ་ཁྲི་ཕྲག་རིམ་གྲོ་བྱས། །གང་གི་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་གྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་བྱེ་བྲག་འཕགས། །ཞེས་བསྐལ་བ་གྲངས་མེད་དུ། དང་བའི་སེམས་ཀྱིས་མཆོད་པའི་རྣམ་གྲངས་ཇི་སྙེད་ཅིག་གིས། སངས་རྒྱས་འབྱམས་ཀླས་པར་རིམ་གྲོ་བྱས་པ་ལས། བསྟན་པའི་དུས་མཐའ་འདིར་བསླབ་པ་སྣ་གཅིག་སྲུང་ན་ཕན་ཡོན་ཆེ་བར་བསྟན་པའི་ཤུགས་ལས། གསོ་སྦྱོང་གི་སྡོམ་པ་ལན་གཅིག་སྲུང་ན་ཕན་ཡོན་ཆེ་བ་གཏོགས་ཐུབ། བྱམས་པ་རང་གི་གསུངས་ལས་ཀྱང་། ཤཱཀྱ་ཐུབ་པའི་བསྟན་པ་ལ། །དད་པས་གང་གིས་ཆོས་ཉན་ཅིང་། །བསྙེན་གནས་ཡན་ལག་བརྒྱད་བསྲུངས་པ། །དེ་ཡི་འཁོར་དུ་སྐྱེ་བར་འགྱུར། །ཞེས་དང་། དབྱིག་གཉེན་གྱིས། གང་གི་དད་པའི་སེམས་ཀྱིས་ནི། །ལོ་བརྒྱར་སྦྱིན་པ་བྱིན་པ་བས། །གང་གི་ཉིན་གཅིག་ཚུལ་ཁྲིམས་ནི། །བསྲུངས་པའི་བསོད་ནམས་ཁྱད་པར་འཕགས། །ཞེས་སོ། །༢ ཡུལ་གྱི་སྒོ་ནས་ཕན་ཡོན་ཆེ་བ་ནི། དག་ཞིང་རྣམས་སུ་དགེ་བ་རྣམ་དག་བསྐལ་བར་བསྒྲུབས་པ་ལས། མ་དག་པའི་ཞིང་ཁམས་འདིར་དགེ་བ་སྣ་གཅིག་སེ་གོལ་གཏོགས་པའི་ཡུན་ཙམ་དུ་བསྒྲུབས་ན། བསོད་ནམས་ཁྱད་དུ་འཕགས་པར་གསུངས་སོ། །ཚུལ་འདི་ལ་དགོངས་ནས། ཡབ་རྗེ་བླ་མས་ཀྱང་། ལྷ་སྤྱན་རས་གཟིགས་ལས་མྱུར་བ་མེད། །ཆོས་ཡི་གེ་དྲུག་མས་ཟབ་པ་མེད། །སྡིག་སྦྱོང་ཐབས་བསྙུང་གནས་ལས་ལྷག་མེད། །འགག་ཉག་ག་མ་ནོར་རི་ཁྲོད་པ། །གསུངས་སོ། །༣ མི་མིན་གྱི་བར་ཆད་ཀྱིས་མི་ཚུགས་པ་ནི། ཚུལ་ཁྲིམས་ཡང་དག་པར་ལྡན་པའི་མདོ་ལས། ཇི་ལྟར་སྦྲུལ་གདུག་ཀླུ་ཆེན་ནག་པོ་ཡང་། །ཚུལ་ཁྲིམས་ལྡན་ལ་གནོད་མེད་གཞན་ཅི་སྨོས། །ཞེས་པ་ལྟར། སྔོན་རྒན་མོ་ཞིག་ཡན་ལག་བརྒྱད་པའི་གསོ་སྦྱོང་བླངས་ཏེ། ནམ་ཕྱེད་ཙམ་ན། རྒྱལ་བོ་གསལ་རྒྱལ་གྱིས། མི་ནག་ཆེན་ཞིག་ལ་ལྟོ་བསྐྱལ་བར་བང་ཆེན་དུ་མངགས་པས། ལམ་བར་དུ་མི་མ་ཡིན་ཁག་གསུམ་དང་འཕྲད་ཀྱང་། དེ་དག་གིས་གནོད་པའི་གླགས་མ་རྙེད་པའི་ལོ་རྒྱུས་འདུལ་བ་ལུང་ལས་གསུངས་པ་དང་། ༤ རྟེན་གྱི་སྒོ་ནས་ཕན་ཡོན་ཆེ་བ་ནི། དཔུང་བཟང་གིས་ཞུས་པའི་རྒྱུད་ལས། ཇི་ལྟར་ལོ་ཏོག་ཐམས་ཅད་ས་ལ་ནི། །བརྟེན་ནས་སྐྱོན་མེད་པར་ནི་སྐྱེས་པ་ལྟར། །དེ་བཞིན་ཚུལ་ཁྲིམས་བརྟེན་ནས་ཆོས་དཀར་མཆོག། སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཞེས་པ་ལྟར། ཚུལ་ཁྲིམས་ནི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་ཀྱི་གཞི་རྟེན་ཡིན་པར་མ་ཟད། ཆོས་སྒྲུབ་པ་ལ་ས་ཆོད་གཞན་ལས་ཆེ་སྟེ། ཞབས་དཀར་བས། བསྙེན་གནས་མ་བསྲུངས་གནས་སྐབས་སུ། །མར་ཁུ་རྒྱ་མཚོ་ཙམ་ཞིག་ལ། །སྡོང་བུ་རི་རབ་ཙམ་པ་ཞིག །བཙུགས་ནས་མར་མེ་ཕུལ་བ་བས། །སྡོམ་པ་བསྲུངས་པའི་ཉི་མ་དེར། །མར་ཁུ་ཐིགས་པ་ཙམ་ཞིག་ལ། །སྡོང་བུ་ཁབ་རྩེ་ཙམ་པ་ཞིག །བཙུགས་ནས་མར་མེ་ཕུལ་བ་དེ། །ཕན་ཡོན་ཤིན་ཏུ་ཆེ་བ་ཡིན། །བསྙེན་གནས་བསྲུང་བའི་ཉི་མ་དེར། །ཚོགས་བསགས་རྒྱ་ཆེན་བྱས་གྱུར་ན། །ཕྱི་མ་འདོད་ཁམས་ལྷ་རུ་སྐྱེ། །ཚོགས་བསགས་འབྲིང་ཙམ་བྱས་གྱུར་ན། །རབ་ཏུ་བྱུང་བའི་མི་རུ་སྐྱེ། །ཚོགས་བསགས་ཅུང་ཟད་བྱས་ན་ཡང་། །ཕྱི་མ་མི་ལུས་གཙང་མ་འཐོབ། །དེ་ཕྱིར་སྡོམ་པ་སྲུང་བའི་ཉིན། །ཚོགས་བསགས་གྱིས་ཤིག་དད་ཅན་ཚོ། །ཞེས་སོ། །ཡིག་དྲུག་གི་ཕན་ཡོན་བརྗོད་པ་པད་དཀར་ཆུན་པོ་ལས་ཀྱང་། སྨྱུང་གནས་བྱས་པའི་ནངས་པར་སྔ་དྲོ་དེ་དག་ལ་བཤོས་དྲངས་ན། ས་བརྒྱད་པ་ལ་གནས་པའི་བྱང་ཆུབ་སེམས་དཔའ་དྲངས་པ་དང་བསོད་ནམས་མཉམ་པ་དང་། གསོ་སྦྱོང་བླངས་པ་ཙམ་ལ་དྲངས་ན་དགྲ་བཅོམ་པ་ལ་དྲངས་པ་དང་བསོད་ནམས་མཉམ་པར་གསུངས་སོ། །༥ སྨྱུང་བར་གནས་པའི་གཏམ་རྒྱུད་དང་སྦྱར་ཏེ་ཕན་ཡོན་འགའ་བཤད་ན། མི་གཅིག་གིས་ཕ་མ་ཤི་སྟེ་ཆོས་བྱེད་རྒྱུ་མེད་པས་སྡུག་བསྔལ་ཤིན་ཏུ་ཆེ་སྐབས། བླ་མ་རིན་པོ་ཆེ་ཐོགས་མེད་ཀྱིས་དགོངས་ནས། ཁྱེད་ཀྱིས་ཕ་མའི་དྲིན་ལན་བསབ་ན་སྨྱུང་གནས་གྱིས། གསུངས་པ་བཞིན། གདན་གཅིག་སོ་ལྔ་བྱས་པས། ཕ་མ་གཉིས་ཐར་བ་འཐོབ་ལ། ཁོ་ཡང་དགྲ་བཅོམ་འཐོབ་པར་གསུངས་སོ། །

ཡང་། གནོད་སྦྱིན་ཤ་ཟ་ལྔས་རྒྱལ་བོ་བྱམས་པའི་སྟོབས་ལ་ཤ་ཁྲག་དྲོན་མོ་བསླངས་པས། རྒྱལ་བོས་སྐུ་ཤ་བཅད་དེ་བྱིན་པས། དེ་དག་གིས་ཁ་ཟས་ཀྱི་ཆེད་དུ་སྐུ་ཉིད་ལ་གནོད་པ་བྱས་པ་གཟོད་པར་འཚལ་ཞུས་པས། རྒྱལ་བོས་དེ་དག་གསོ་སྦྱོང་ཡན་ལག་བརྒྱད་པར་བཀོད་པས། དེའི་ཕན་ཡོན་གྱིས། བཅོམ་ལྡན་འདས་ཀྱི་སྤྱད་པ་སྤྱོད་པའི་ཚེ་འཁོར་ཤ་སྟག་ཏུ་སྐྱེས་ཤིང་། མཐར་སངས་རྒྱས་པའི་ཚེ་ཡང་འཁོར་གྱི་ཐོག་མ་ལྔ་སྡེར་འཁྲུངས་ཏེ་དགྲ་བཅོམ་འཐོབ་པ་ཡིན།

ཡང་། གྲུབ་ཆེན་ཉི་མ་སྦས་པའི་ཞལ་ལས། བུད་མེད་ཅིག་བུ་གཅིག་དང་། དུད་འགྲོ་ཡང་མང་བོ་ལག་ཉེས་ལ་སོང་བ་ཞིག ཕྱིས་སུ་བླ་མ་བཟང་བོ་ཞིག་དང་འཕྲད་པས། སྔར་བྱས་ལ་འགྱོད་པ་དྲག་པོ་འཁྲུངས་ཏེ་སྨྱུང་གནས་བརྒྱ་དང་བརྒྱད་བསྲུངས་པས། ཚེ་འཕོས་ནས་ལྷོ་ཕྱོགས་དཔལ་གྱི་རི་ལ་འགྲོ་དོན་བྱེད་ནུས་པའི་བླ་མ་བསོད་ནམས་འབྱུང་གནས་ཞེས་པར་འཁྲུངས།

ཡང་། མ་ཇོ་ཆོས་སྐྱིད་བྱ་བས་སྨྱུང་གནས་མང་དུ་བསྲུངས་པས། མོ་ཤི་བའི་དུས་སུ་རུས་པ་དུར་ཁྲོད་དུ་བསྐྱལ་བ་བྱ་རོག་གིས་རུས་པའི་དུམ་བུ་འཁྱེར་བ་རིང་བསྲེལ་དུ་སོང་བ་དང་།

དེ་མིན། སྨྱུང་གནས་གཅིག་སྲུང་ཡང་བསྐལ་བ་བཞི་ཁྲིའི་འཁོར་བ་ཕྱིར་བསྙིལ་བར་འགྱུར། བརྒྱ་རྩ་བརྒྱད་བསྲུང་ན། མི་དེ་རི་མགོར་སོང་ན་དེ་ཕྱོགས་ཀྱི་རླུང་ཕོག་ཚད་ཀྱི་སེམས་ཅན་ལ་ངན་འགྲོ་མེད་གསུངས། ཆུ་ལ་བརྒལ་ན། ཆུ་དེ་འཐུང་ཚད་ཀྱི་སེམས་ཅན་ལ་ངན་འགྲོ་མེད། མཐོང་ཐོས་དྲན་རེག་ལུས་ཀྱི་གྲིབ་མ་ཕོག་ཚད་ཡན་ཆད་ལ་ངན་འགྲོ་མེད་ཅེས་རྒྱུད་ནས་གསུངས་སོ། །དེ་ལས་གཞན་སྨྱུང་གནས་སྲུང་བའི་ཕན་ཡོན་གཏམ་རྒྱུད་མང་བོ་སྨྱུང་གནས་ཀྱི་ཆོ་ག་ཐར་བའི་ཐེམ་སྐས་ལས་གསལ་བས་དེར་གཟིགས་པར་བྱའོ། །

གཉིས་པ། གསོ་སྦྱོང་ཡན་ལག་བརྒྱད་པོ་སོ་སོའི་ཕན་ཡོན། ༡ སྲོག་གཅོད་སྤངས་པས་ཚེ་རིང་ནད་མེད་དང་། གཟི་བརྗིད་ཆེ་བ། ༢ མ་བྱིན་ལེན་སྤངས་པས། ཚེ་རབས་ཀུན་ཏུ་ལོངས་སྤྱོད་ཆེ་ཞིང་། རང་གི་ལོངས་སྤྱོད་ལ་གཞན་གྱིས་གནོད་པ་མེད་པར་རང་དབང་དུ་འདུ་བ། ༣ འཁྲིག་སྤྱོད་སྤངས་པས། གཟུགས་མཛེས་ཤིང་ཤ་མཚག་ལེགས་ལ། དབང་བོ་ཡོངས་སུ་ཚང་བ། ༤ རྫུན་སྤངས་པས། གཞན་གྱི་བསླུ་བྲིད་ཀྱིས་མི་ཐུབ་ཅིང་། ངག་ལ་བརྩི་མཐོང་ཆེ་བ། ༥ ཆང་སྤངས་པས། ཚེ་རབས་ཀུན་ཏུ་དྲན་ཤེས་བརྟན་ཞིང་ཤེས་རབ་ཕུན་སུམ་ཚོགས་པ། ༦ ཁྲི་སྟན་ཆེ་མཐོ་སྤངས་པས། གཞན་གྱིས་བསྟོད་བཀུར་འཐོབ་ཅིང་། མལ་སྟན་བཟང་ཞིང་བཞོན་པ་མང་བར་འགྱུར་རོ། །༧ དུས་མིན་གྱི་ཟས་སྤངས་པས། བཟའ་བ་དང་ལོ་ལེགས་ཀྱིས་ཕྱུག་པ། ༨ དྲི་དང་ཕྲེང་བ་སྤངས་པས། ཚེ་རབས་ཀུན་ཏུ་ལུས་དྲི་ཞིམ་པོ་དང་། མདོག་དབྱིབས་མཛེས་ལ་མཚན་བཟང་དུ་མ་དང་ལྡན་པ། གླུ་གར་སོགས་སྤངས་པས། ཚེ་རབས་ཀུན་ཏུ་ལུས་དང་ཤེས་རྒྱུད་དུལ་བ་དང་། ངག་ལས་ཆོས་ཀྱི་སྒྲ་དབྱངས་མི་ཆད་པར་སྒྲོགས་པ་བཅས་སོ། །

མདོར་ན། གུང་ཐང་བསྟན་པའི་སྒྲོན་མེས། མི་སྡིག་ཅན་བཙན་ཐབས་འཚང་རྒྱའི་ཆོས། །དཀོར་བག་ཆགས་ངན་པ་སྦྱོང་བ་ལ། །ཆེས་ཟབ་པའི་མཐར་ཐུག་སྨྱུང་གནས་ཡིན། །འདིའི་ཕན་ཡོན་ནམ་མཁའི་མཐའ་དང་མཉམ། །དུས་དེང་སང་ངན་པ་མགོ་མཐོ་ཡང་། །ལམ་བར་དོའི་འཕྲང་རིང་བརྒལ་བའི་ཉིན། །དགྲ་གཤིན་རྗེ་དམག་གིས་བསྐོར་བའི་ཚེ། །ཆོས་ཚུལ་བཞིན་བྱས་པའི་མི་དེ་སྐྱིད། །འཕྲང་ཡ་ངའི་འཇིགས་པ་སེལ་འདོད་ཅིང་། །མར་ངན་སོང་སྐྱེ་སྒོ་གཅོད་འདོད་ན། །ལྷ་ཐུགས་རྗེ་ཆེན་པའི་ཞབས་ལ་འཇུས། །ཞེས་གསུངས་སོ། །

སྨྱུང་གནས་ཀྱི་ཕན་ཡོན་རྒྱས་པར་བཀའ་འགྱུར་བ་བློ་བཟང་ཚུལ་ཁྲིམས་ཀྱི་དགེ་སློང་མ་དཔལ་མོའི་ལུགས་སྨྱུང་གནས་ཀྱི་ཕན་ཡོན་དང་། བཀྲ་ཐང་བློ་བཟང་ཆོས་ཀྱི་ཉི་མའི་སྨྱུང་གནས་ཕན་ཡོན་དགེ་སྐུལ་སྙན་པའི་གླུ་དབྱངས་སོགས་སུ་གཟིགས་པར་འཚལ་ལོ། །

གླིང་མེ།

གླིང་མེ་ནི། དགོན་པའི་གླིང་བར་དང་སྒེའུ་ཁུང་། གཙུག་ལག་ཁང་གི་ཡང་སྟེང་སོགས་སུ་སྒྲོན་ཏེ། མར་མེ་འོད་སྣང་གླིང་བར་ཁོར་ཡུག་ཀུན་ཏུ་ཁྱབ་པའི་ཆ་ནས་གླིང་མེ་དང་། ཡང་རྣམ་འདྲེན་ལྔ་བ་རྗེ་བཙུན་བྱམས་པ་མྱུར་མོ་འབྱོན་འགྱུར་གྱི་རྟེན་འབྲེལ་ལ། བྱམས་པའི་སྐུ་གཟུགས་གླིང་བར་དུ་གདན་འདྲེན་པ་ལ་བྱམས་པ་གླིང་བསྐོར། ཞེས་པའང་གླིང་མེ་ཞེས་པའི་ཐ་སྙད་འདྲ་ཁུངས་གཅིག་གི་སྒོ་ནས་མིང་བཏགས་པའོ། །གླིང་མེ་ནི་དགའ་ལྡན་ལྔ་མཆོད་ཀྱི་མཆོད་པའི་ཆ་ཤས་ཤིག་སྟེ། དེ་ཡང་ཤར་ཙོང་ཁ་པ་བློ་བཟང་གྲགས་པའི་དཔལ་ས་ཕག﹙སྤྱི་ལོ༡༤༡༩﹚ལོར་དགའ་ལྡན་དུ་ཕེབས་ནས། སྐུ་བེར་དང་དབུ་ཞྭ་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ། རྒྱལ་ཚབ་ཏུ་བསྐོ་བཞག་མཛད་ནས་བཅུ་བའི་ཚེས་ཉེར་ལྔ་ལ། གཟིམ་ཁང་འོད་དཔག་སྦུག་ཏུ་སྐུ་གཤེགས། དེའི་ཕྱི་ལོར་དགའ་ལྡན་དུ་རྡོ་རྗེ་སློབ་དཔོན་བརྒྱ་ཕྲག་དུ་མས། གསང་སྡེ་འཇིགས་གསུམ། ཀྱེ་རྡོར། དུས་འཁོར། ཚེ་དཔག་མེད། ཀུན་རིག་སོགས་ཀྱི་དཀྱིལ་འཁོར་ལ་བརྟེན་པའི་དགོངས་རྫོགས་སྒྲུབ་མཆོད་རྒྱ་ཆེར་མཛད་པ་དང་། ཡང་། སྣེའུ་གདོང་དཔོན་ནམ་མཁའ་བཟང་ཁུ་དབོན་གྱིས་ཡོན་སྦྱར་ཏེ། ཆོས་རྗེ་ཤཱཀྱ་ཡེ་ཤེས་ར་ཁ་བྲག་ཏུ་སྤྱན་དྲངས་ཏེ། དགེ་འདུན་མང་བོར་མཆོད་འབུལ་དང་། དགོངས་རྫོགས་བཏང་བ་ནས་བཟུང་། དེང་སང་ཡང་། དགའ་ལྡན་ལྔ་མཆོད་ཆེན་མོ་ཞེས། གྲུབ་མཐའ་རིས་མེད་དང་། རྒྱ་བོད་ཧོར་སོག་གི་དད་ལྡན་སེར་སྐྱ་ཕོ་མོ་ཇི་སྙེད་པས་ཉིན་དེར་རྣམ་དཀར་ལས་ལ་བརྩོན་ཞིང་། དེ་ཉིན་གོང་ས་མཆོག་དང་ཡོངས་འཛིན་རྣམ་གཉིས་སོགས་གཞུང་ཞབས་སེར་སྐྱ་མང་བོ། རྩེ་ཕོ་བྲང་གི་རྟེན་གཙོ་འཕགས་པ་ལོ་ཀེ་ཤྭ་ར་སོགས་མཆོད་འབུལ་གཟབ་རྒྱས་གནང་སྲོལ་ཡོད་པ་དང་། དགུང་མོར་སེར་འབྲས་དགའ་གསུམ་དང་། རྩེ་པོ་ཏ་ལའི་ཡས་མས་ལྷ་ཞོལ་དགོན་ཁག མདོར་ན་གྲུབ་མཐའ་རིས་མེད་ཀྱི་དགོན་གྲོང་སེར་སྐྱ་ཚང་མས་གླིང་མེའི་མཆོད་པ་རྒྱ་ཆེར་འབུལ་ཞིང་། དགོན་སྡེ་དག་ལས། གཙུག་ལག་ཁང་གི་ཡང་སྟེང་དུ་མར་མེ་བཞག་སྟེ། མཆོད་པའི་རོལ་མོ་དང་། གདུང་དབྱངས་དང་བཅས་དམིགས་བརྩེ་མ་གདངས་སྙན་མོ་འཐེན་པ་དང་། གྲྭ་ཤག་དང་དུད་ཁྱིམ་རྣམས་ཀྱིས་སྒེའུ་ཁུང་ལས་མར་མེ་ཕྲེང་བ་རྒྱ་ཆེར་མཆོད་པ་དང་། ཨ་མདོ་སོགས་སུ་ཁང་བའི་སྟེང་འོག་ཀུན་ཏུ། གཞོང་བ་ཆེན་པོའི་ནང་དུ་མར་མེའི་བསྟར་ཕྲེང་བསྒྲིགས་ཏེ། དམིགས་བརྩེ་མ་གདངས་དབྱངས་སྙན་མོས་གསུང་བཞིན། ཁང་བའི་སྟེང་འོག་ཀུན་ཏུ་འཁྱེར་སྲོལ་ཡོད། ཚུལ་འདི་ལ་དགོངས་ནས། མཁས་གྲུབ་རྗེས། མདོར་ན་མྱ་ངན་ལས་འདས་པའི་མཛད་པ་བསྟན་པའི་རྗེས་སུ་ཡང་། ཉིད་ཀྱིས་ངོ་མཚར་བའི་མཛད་པ་དག་གིས་གདུལ་བྱ་དཔག་ཏུ་མེད་པ་སྨིན་གྲོལ་གྱི་ལམ་ལ་འཇོག་པར་མཛད་དོ། །ཞེས་དང་། འབྲུག་རྒྱལ་དབང་ཆོས་རྗེས། དེང་སང་གི་བར་དུ་འང་དགའ་ལྡན་ལྔ་མཆོད་ཆེན་མོ་ཞེས་ཧོར་ཟླ་བཅུ་བའི་ཚེས་ཉེར་ལྔ་ལ་རྒྱ་བོད་ཧོར་སོག་སྐྱ་སེར་གྲུབ་མཐའ་རིས་སུ་མ་ཆད་པ་ཐམས་ཅད་ཀྱིས་གླིང་མེ་སྦར་བ་སོགས་རྣམ་དཀར་ལས་ལ་བརྩོན་པ་རྒྱུན་མི་ཆད་པ་འདི་དག་ཀྱང་རྗེ་ཐམས་ཅད་མཁྱེན་པ་ཉིད་ཀྱི་འཕྲིན་ལས་ཁོ་ན་སྟེ་གསུངས་པ་ནི། དེ་ཁོ་ན་ཉིད་ལགས་ལ། མཁས་དབངདགེ་ཆོས་ཀྱིས་ཀྱང་། ལྔ་མཆོད་ཀྱི་གླིང་མེ་འདི་ལ་ཐུགས་གཞིགས་ལེགས་པར་བཏང་སྟེ། ཤར་ཙོང་ཁ་པ་བློ་བཟང་གྲགས་པའི་དཔལ་ཞི་བར་གཞོལ་ནས། ལོ་དྲུག་བརྒྱ་ལྷག་ཕྱིན་ཡང་བོད་མི་དམངས་ཀྱི་སེམས་ཁོང་ན་དད་གདུང་དང་དྲན་གསོ། གླིང་མེར་འཕོས་ཏེ་ནམ་མཁའི་སྐར་ཚོགས་ས་ལ་བབས་འདྲའི་འོད་ཆེམ་ཆེམ་འབར་བ་འདི་མཐོང་ན། ང་ཚོ་ཨ་མདོ་ནས་ཇི་འདྲའི་བླ་རྒན་རླབས་ཆེན་ཞིག་འཁྲུངས་པ་རེད་ཨང་། ཞེས་མཚམས་ཆོད་དཀའ་བའི་མིག་ཆུ་བཏོན་པའང་གཟུར་གནས་མཁས་པས་ཤེས་ནས་དད་གདུང་འཁྲུངས་པའི་རྟགས་ཡང་དག་གོ།

གཞན་ད་ལྟ་ཨ་མདོ་ཕྱོགས་ཀྱི་དགོན་སྡེ་ཁག་ན། དགོན་བདག་དང་སྐྱེས་ཆེན་དམ་པ་ཞི་བར་གཞོལ་བའི་དུས་སྐར་ལ། གོང་ལྟར་གླིང་མེ་སྒྲོན་པའི་ཕྱག་སྲོལ་ཡོད་ཅིང་། ཞལ་ངོ་དང་ཆབ་རིལ་སོགས་གྲྭ་ཤག་ཡོངས་སུ་གླིང་མེ་བཞག་ཡོད་མེད་ལ་གཟིགས་བསྐོར་དུ་ཕེབས་པའི་སྒྲིག་སྲོལ་ཡང་ཡོད་དོ། །ཡང་ལྷ་སའི་ཕྱོགས་སུ་རྗེ་བདག་ཉིད་ཆེན་པོ་དྲན་གསོའི་ཕྱིར་དུ་མྱང་ཐུག་ཅེས་པའི་བག་ཐུག་ཀྱང་འཐུང་སྲོལ་ཡོད་པར་གྲགས་སོ། །མདོར་ན་གླིང་མེ་འདི། བོད་མི་དམངས་ཡོངས་ཁྱབ་ཀྱིས་རྗེ་ཙོང་ཁ་པའི་མཛད་འཕྲིན་ལ་རྗེས་དྲན་དང་། དགོངས་རྫོགས་ལ་མར་མེ་མཆོད་པ་འབུལ་བ་ཡིན་ནོ། །

ཆོས་བསྐོར།

ལོ་རེའི་དབྱར་ཟླ་ལྔ་བ་འམ་དྲུག་པའི་ནང་། སོ་ནམ་པ་རྣམས་ཀྱིས་ཆོས་བསྐོར﹙ཕྲག་རྒྱབ་ཏུ་ཆོས་ཀྱི་ལྒིགས་བམ་འཁུར་ཏེ་ཞིང་ཁར་བསྐོར་བ་རྒྱག་པ﹚རྒྱག་པ་འདི་ལ། དབུས་གཙང་སོགས་སུ་འོང་བསྐོར་ཟེར། འོང་བསྐོར་ཞེས་པ་དེའི་གོ་དོན་ཡང་། འོང་ནི་འོང་ཁ་སྟེ། སྟོན་ཐོག་དང་ལྡན་པའི་ཞིང་ས་ངོས་འཛིན་ལ། བསྐོར་ནི་ཞིང་ཁ་ལ་བསྐོར་བ་བརྒྱབ་པའི་དོན་དུ་བཤད། ཡང་། ཡུལ་འགར། ཞིང་བསྐོར་དང་། ཆོས་ཁུར་རྒྱག་པ། སེར་བཟློག་ལྷ་འཁྱེར་ཡང་ཟེར།

ཆོས་བསྐོར་རྒྱག་སྲོལ་འདིའི་ཁུངས་ནི། བོད་རྒྱལ་དགུ་བ་པུ་དེ་གུང་རྒྱལ་གྱི་དུས་སུ། མཛངས་བློན་རུ་ལས་སྐྱེས་ཀྱིས་ཞིང་ལས་ཐོན་སྐྱེད་ལ་བརྩི་མཐོང་ཆེར་གནང་སྟེ། ཞིང་ལས་གོང་འཕེལ་གནང་སྐབས། བོན་པོ་རྣམས་ཀྱིས་ཕྱག་དཔེ་བསྣམས་ནས་ཞིང་ཁ་བསྐོར་བ་བརྒྱབ་སྟེ། སྟོན་ཐོག་བཟང་བོ་སྨིན་པའི་གསོལ་འདེབས་དང་། ཕྭ་གཡང་གི་ཆོ་ག་སྤེལ་སྲོལ་ཡོད་པ་དེ་ཡིན། རིམ་གྱིས་ངལ་རྩོལ་མི་དམངས་རྣམས་ཀྱིས་ངལ་འབྲས་དོན་སྨིན་དུ། ལོ་ལེགས་ཡོང་བར་སྐྱབས་བཅོལ་དུས་ཆེན་ཞིག་ཏུ་གྱུར་བ་ཞིག་ཡིན་པར་སེམས་ཏེ། ལྷ་སར་ལོ་རེའི་ཟླ་བདུན་པའི་ཚེས་གང་བཟང་རེ་བདམས་ནས། བོད་ས་གནས་སྲིད་གཞུང་གི་སྐབས། ལྷ་སའི་མི་དཔོན་གཉིས་དང་། ལྷ་ས་གཉེར་ཚང་བ། དཀོར་གཉེར་དཔོན་སོགས་ཀྱིས་དབུ་ཁྲིད་ནས། ཇོ་བོ་རིན་པོ་ཆེའི་ན་བཟའ་གདན་ཞུས་ཀྱིས་ཞིང་བསྐོར་ཉིན་མོར། སོ་ནམ་པ་རྣམས་གོས་རྒྱན་ལེགས་པར་སྤྲོས་ཏེ། སེར་སྲུང་ལག་སྟོད་པས། རྟ་ཧྲག་གི་སྣེ་ཁྲིད་གནང་ནས་སྲིད་པ་ཧོར་འཁྱེར། ཕ་མ་གཉིས་འཛོམས་ཀྱི་ཕོ་མོ་གཉིས་རྟར་ཞོན་ཏེ། ལག་ཏུ་མདའ་དར་འཁྱེར་ནས། བཀའ་བསྟན་གྱི་པོ་ཏི་རྒྱབ་ཏུ་བསྣམས་ནས། བསྟར་ཕྲེང་བསྒྲིགས་ཏེ་ཞིང་བསྐོར་ཉིན་གུང་བར་གྲུབ་པར་བྱས་རྗེས། ཞིང་འགྲམ་གྱི་སྤང་ཐང་དུ་རས་གུར་ཕིབ་ནས། ས་མ་རུབ་བར་དུ་བཟའ་བཏུང་རྩེད་འཇོར་རོལ་ཞིང་ལྷ་བསང་བཏང་སྟེ། ཀི་སྭོ་ལྷ་རྒྱལ་དང་བཅས་མཇུག་གྲུབ་པ་ཡིན། ཕྱི་ཉིན་ལྷ་སའི་མི་དཔོན་སོགས་ནོར་གླིང་དུ་ཕེབས་ནས་ལོ་ཕུད་འབུལ་སྲོལ་ཆགས་ཡོད།

ཨ་མདོའི་ཕྱོགས་སུ་ཕོ་མོ་གཞོན་གྲས་རྣམས་ཀྱིས་པོ་ཏི་སྣ་ཚོགས་ཕྲག་རྒྱབ་ཏུ་འཁུར་ཏེ། ས་ཚིགས་བཀས་བཅད་ཀྱིས་ངལ་གསོ་གནང་སྐབས། ལྷ་བསང་ཕུད་པ་དང་། ངག་ལས་མ་ཎི་དང་མགུར་གང་རུང་དབྱངས་སུ་གྱེར་ནས་བཞུད་དོ། །

དགོས་པ་ཡང་། ལོ་གཅིག་གི་སྟོན་ཐོག་ལ་སད་དང་སེར་བ། བཙའ་དང་ཐན་པ། ཤྭ་འོད་དང་འབུ་སྲིན་སོགས་ཀྱིས་གནོད་འཚེ་མེད་པར། སྟོན་འབྲས་ལེགས་པར་འགྲུབ་པའི་རེ་བ་ཟབ་མོ་བཅངས་ཡོད་དོ། །

གཏོར་མ།

༡ གཏོར་མའི་ཁུངས་ནི། སྔོན་འཕགས་ཡུལ་སེར་སྐྱའི་ནགས་ཚལ་དུ། སྟོན་པའི་སྐུ་གཅུང་དགའ་བོས་ཆོས་བྱེད་ཅིང་མཆིས་པར། ནམ་གྱི་སྨད་ཆ་ལ་ཡི་དྭགས་ཁ་ལ་མེ་འབར་འཇིགས་ཤིང་སྐྱི་གཡའ་བ་ཞིག་བྱུང་ནས། ཁྱོད་ད་སྟེ་ཞག་བདུན་ནས་འཆི་བ་ཡོང་། ངའི་ཟས་སྐལ་ཡིན་ཟེར་བས། དགའ་བོ་བྲེད་ནས་སངས་རྒྱས་ལ་ཞུས་པས། སྟོན་པས་གཟུངས་སྔགས་གཟི་བརྗིད་ཚད་མེད་པའི་གཏོར་མ་འདི་གཏོང་དགོས་པར་གདམས་པས། དུས་ཚེ་དགའ་བོས་གཏོར་མ་བཏང་བས་འཆི་བ་ལས་གྲོལ་བར་གསུངས། དེ་ནས་གཅུང་དགའ་བོ་ནས་རིམ་བཞིན་དགེ་སློང་མ་དཔལ་མོ། གྲགས་འཛིན་མ། ཉེ་གནས་མ་དགྲ་བཅོམ་པ། ཨཱ་ནན་ད་བཛྲ། རྡོ་རྗེ་གདན་པ། གསེར་གླིང་བ། མཉམ་མེད་ཇོ་བོ་རྗེ་སོགས་བརྒྱུད་དེ། ད་ལྟའི་བར་ཕྱག་ལེན་ཟམ་མ་ཆད་པར་བྱུང་བ་འདིའོ། །

ཡང་། བདུད་རྩི་འབྱུང་བའི་གཟུངས་ཞེས་བྱ་བ་ཆབ་གཏོར་གྱི་རྒྱུད་ནི། སྟོན་པ་རྒྱལ་བའི་ཁབ་ན་བཞུགས་ཚེ། ཁྱིམ་བདག་བཟང་སྐྱོང་གིས་སྤོས་ཆུ་ལ་སྨན་དང་མེ་ཏོག་སྣ་ཚོགས་བཏབ་པ་ཞིག་འཁྱེར་ནས་བཅོམ་ལྡན་འདས་ལ། སངས་རྒྱས་བྱང་སེམས་རིགས་དྲུག་ལ་ཕུལ་བའི་ཕན་ཡོན་ཆེན་པོ་འབྱུང་བར་བྱིན་གྱིས་བརླབ་ཏུ་གསོལ་ཞེས་ཞུས་པས། བདུད་རྩི་འབྱུང་བའི་ཏིང་ངེ་འཛིན་ལ་སྙོམས་པར་ཞུགས་ནས་སྔགས་དྲུག་ཏིང་ངེ་འཛིན་དྲུག་གསུངས་ཏེ། གཏོར་མའི་ལས་བྱས་ནས་སྦྱངས་པ་རྣམ་པ་དྲུག་སོགས་གནང་བའོ། །

ཡང་། སྟོན་པ་རྒྱལ་བྱེད་ཚལ་དུ་བཞུགས་པ་ལ། མ་ག་དྷར་ཁྱིམ་བདག་ཕྱུག་པོ་དགེ་ཞེས་པས། སངས་རྒྱས་འཁོར་བཅས་ལ་ཆོས་སྟོན་དྲངས་པས། ཕྱི་ལོ་ཁྱིམ་བདག་དབུལ་བོར་གྱུར་ཏེ་སྟོན་པར་ཞུས་པས། སངས་རྒྱས་ཀྱིས་སྤྱན་རས་གཟིགས་ལ་ཞུ་དགོས་པའི་བཀའ་བསྩལ་བ་བཞིན། སྤྱན་རས་གཟིགས་ཀྱིས་ཁྱིམ་བདག་ཁྱོད་ཀྱིས་སྔར་མཆོད་པའི་ཡི་དྭགས་འབྱུང་བོ་སྐལ་བ་བཅད་པས། ད་ནས་མཆོད་ཅིག་ཅེས་འབྱུང་གཏོར་གསུངས་ཞིང་སླར་མཆོད་པས། ཁྱིམ་བདག་སྔར་ལྟར་འབྱོར་བ་དང་ལྡན་པར་གྱུར་བ་དང་།

ཡང་། ཆོས་འབྱུང་མཁས་དགའ་ལས། པདྨ་སམ་བྷ་བའི་ཞལ་ནས་སང་གི་གྲོ་ལམ་ན་ཉི་ཚེ་བའི་དམྱལ་ཁམས་ཤིག་ཡོད་པས་སྙིང་རྗེ་བྱ་དགོས་གསུངས་ནས་གཟིངས་ལས་བབས་ཏེ་འུ་ཡུག་ཏུ་གཏོང་མ་དང་དགོངས་པ་མཛད་ཅེས་གསུངས་ལ། དེ་བས་བདག་འཛིན་གྱི་འཆིང་བ་བཅད་དེ་ཐམས་ཅད་མཁྱེན་པའི་གོ་འཕང་འཐོབ་པ་ལ། ཐབས་ཤེས་ཟུང་འབྲེལ་བྱ་དགོས་ཤིང་། དེ་ཡང་ཐབས་ཀྱི་ཆ་བསོད་ནམས་བསགས་པ་ལ། སྟོན་པའི་གསུང་རབ་ཀྱི་ཁུངས་དང་འབྲེལ། གྲུབ་པའི་མན་ངག་གིས་ཟུར་བརྒྱན་ཏེ། ཆོག་བསྒྲིགས་ཤིག་ལ་མ་བརྟེན་ན་མི་བཏུབ་པས། སྔོན་གྱི་དམ་པ་བྱང་སེམས་རྒྱལ་མཚན། རྗེ་བཙུན་གྲགས་པ་རྒྱལ་མཚན། རྒྱལ་སྲས་ཐོགས་མེད་བཟང་བོ་རྣམས་ཀྱིས། ཡི་དྭགས་མོ་ཁ་འབར་མ་དབུགས་དབྱུང་བའི་གཏོར་མའི་ཆོ་ག་སོགས་ཀྱི་ཁུངས་དང་འབྲེལ་དར་སྤེལ་གནང་བ་ཡིན་ནོ། །

༢ གཏོར་མའི་ངོ་བོ་སོགས། ཕྱི་སྣོད་ཀྱི་འཇིག་རྟེན་རྣམ་པར་དག་པའི་རང་བཞིན་ཆོས་ཀྱི་དབྱིངས་དང་། ནང་བཅུད་ཀྱི་སེམས་ཅན་རྣམ་པར་དག་པའི་རང་བཞིན་རིག་པ་ཡེ་ཤེས་ཀྱིས་མཚོན་ཏེ། ཡུལ་སྟོང་བ་ཉིད་ཡུལ་ཅན་ཡེ་ཤེས་གཉིས་དབྱེར་མེད་པ་གཏོར་མའི་ངོ་བོར་བཤད། ངེས་ཚིག་ལ། འཛིན་རྟོག་མཚན་མ་གཏོར་བས་གཏོར་དང་། རིག་པ་ཡེ་ཤེས་བསྐྱེད་པའི་མ་ཞེས་བྱའོ། །ཞང་བོད་ཏི་སེའི་འོད་ཅེས་པར། དེ་དག་གིས་དམར་མཆོད་བྱེད་སྲོལ་ཡོད་པ་ལ། གཤེན་རབ་མི་བོ་ཆེ་མ་དགྱེས་ནས། བདུད་བོན་དང་གདོད་བོན་རྣམས་ཆམ་ལ་ཕབ། དེ་དག་གི་སྤྱོད་ཚུལ་དུ་སེམས་ཅན་གྱི་རིགས་གང་ཞིག་བསད་ནས་ཤ་རུས་ཀྱིས་མཆོད་པ་བྱེད་སྲོལ་ཡོད་པ་དེདག་གི་ཚབ་ཏུ་འབྲུ་དཀར་གྱི་གཏོར་མས་འཐུས་པར་བྱས་པ་དང་། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་ཀྱང་འབྱུང་ངོ་། །

༣ གཏོར་མ་ལ་དབྱེ་ན། ཕྱི་ནང་གསང་གསུམ་གྱི་གཏོར་མ། བསམ་གཏན་དང་། མཚོན་པའི་གཏོར་མ་སོགས་ལས། འདིར་བཤད་པ་ནི་དང་བོ་ཡིན། གཏོར་མ་འདི་སྐྱ་སེར་སུས་ཀྱང་བཏང་ཆོག་ལ། བསོད་ནམས་ཆེ་ཆུང་ཡོད། རབ་ཀྱིས་མགྲོན་སོ་སོའི་སྤྱན་ལམ་དུ་ཇི་འདོད་བཞིན་སྤྲུལ་ནུས་ལ། དེ་ལྟར་མི་ནུས་ཀྱང་། ཆོ་ག་དང་བསྟུན་ཏེ་བྱིན་གྱིས་བརླབས་ནས་བཏང་ན་ཕན་ཡོན་འབྱུང་བ་གདོན་མི་ཟ།

སྔགས་འཆང་རྒྱན་མེ་ལས། གཏོར་མའི་གཟུགས་རྣམ་པ་གཉིས་སུ་གསུངས་ཀྱང་། འདིར་ངེས་པ་ཅན་ཏེ་རྣམ་པ་དྲུག་ལས། བྱིན་རླབས་བླ་མའི་གཏོར་མ། དངོས་གྲུབ་ཡི་དམ་གཏོར་མ། འཕྲིན་ལས་མགྲོན་པོའི་གཏོར་མ། དམ་ཅན་ཆོས་སྐྱོང་གཏོར་མ། དྲེགས་པ་སྡེ་བརྒྱད་གཏོར་མ། ཐམས་ཅད་འདུས་པའི་གཏོར་མ་སྟེ། དེ་དག་གི་བཟོ་དབྱིབས་དང་། ཞི་རྒྱས་དབང་དྲག་གི་དབྱེ་བ། གྲངས། གཙོ་གཏོར་དང་གཏོར་ཕྲན་སོགས་དེ་ཉིད་དུ་ཞིབ་བརྗོད་གནང་ཡོད་ལ།

མ་ཎི་བཀའ་འབུམ་ལས་གཏོར་མ་ལ་དབྱེ་བ་དྲུག་ཕྱེས་ཡོད་ལ། ༡ ཕྱིའི་གཏོར་མ་ནི། གཏོར་སྣོད་རིན་པོ་ཆེ་རྒྱ་ཆེན་པོར་བསམ། གཏོར་མ་བདུད་རྩིའི་རྒྱ་མཚོར་དཀར་མེར་གྱིས་ཁེངས་པར་བསམ། བླ་མ་ཡི་དམ་མཁའ་འགྲོ་མདུན་གྱི་ནམ་མཁར་བཞུགས་པར་བསམ་ལ། ཨོཾ་མ་ཎི་པདྨེ་ཧཱུཾ། ཞེས་འབུལ་ལོ། །༢ ནང་གི་གཏོར་མ་ནི། ཆུ་ཐམས་ཅད་རཀྟ། ས་ཐམས་ཅད་ཤ་ཆེན། བྲག་དང་རྡོ་ཐམས་ཅད་རུས་པར་བསམ་ལ་འབུལ་ལོ། །༣ གསང་བའི་གཏོར་མ་ནི། རང་ལུས་ཀྱི་ཤ་ཁྲག་རུས་པ་ཐམས་ཅད་གཏོར་མར་བསམ་ནས། བླ་མ་ཡི་དམ་མཁའ་འགྲོ་དང་། རིགས་དྲུག་སེམས་ཅན་དང་། ལན་ཆགས་ཀྱི་བགེགས་རྣམས་ལ་ཆགས་པ་དང་ཞེན་པ་མེད་པར་དབུལ་ལོ། །༤ དོན་གྱི་གཏོར་མ་ནི། བློས་བླངས་པའི་ཆོས་ཐམས་ཅད་ཆགས་པ་དང་ཞེན་པ་མེད་པར་འཁྲི་བ་ཆོད་ན་གཏོར་མ་ཐེབས་པ་ཡིན་ནོ། །༥ རྟགས་ཀྱི་གཏོར་མ་ནི། རིག་པ་རང་ངོ་ཤེས་ནས་རང་ཤར་གྲོལ་ཙ་ན་གཏོར་མ་ཐེབས་པ་ཡིན་ནོ། །༦ མཚོན་པའི་གཏོར་མ་ནི། ཅི་ཟ་ཅི་འཐུང་གིས་བླ་མ་དཀོན་མཆོག་མཆོད་དོ། །ཞེས་གསུངས་སོ། །

༤ གཏོར་མགྲོན་ལ་དབྱེ་ན། མཆོད་པར་བྱ་བ་དང་། སྦྱིན་པར་བྱ་བ་གཉིས་སུ་འདུ་བས། མཆོད་བྱའི་ཡུལ་བཞི་སྟེ། མཆོག་ཐུན་གྱི་དངོས་གྲུབ་སྩོལ་ཕྱིར་བླ་མ་མཆོག་གསུམ་དང་། བར་ཆད་སེལ་ཕྱིར་མཁའ་འགྲོ་ཆོས་སྐྱོང་དང་། སྨོན་ལམ་བཟང་བོ་གདབ་ཕྱིར་དགེ་སྦྱོང་བྲམ་ཟེ། འབྱོར་བ་རྒྱས་ཕྱིར་ནོར་ལྷ་ལྷན་སྐྱེས་རྣམས་ལ་འབུལ་བ་ཡིན་ནོ། །སྦྱིན་པར་བྱ་བའི་ཡུལ་ལ་འཇིག་རྟེན་པའི་ལྷ་ཀླུ་གདོན་བགེགས་སོགས་སོ། །གཞན་ཡང་། དཀོན་མཆོག་མཆོད་པའི་མགྲོན། དཔལ་མགོན་ཡོན་ཏན་གྱི་མགྲོན། རིགས་དྲུག་སྙིང་རྗེའི་མགྲོན། གདོན་བགེགས་ལན་ཆགས་ཀྱི་མགྲོན་བཞིའོ། །དེ་ཡང་དཀོན་མཆོག་ལ་རྒྱལ་བོར་དཔྱ་ཁྲལ་འབུལ་བའི་ཚུལ་གྱིས་ཕུལ་ན་ཚོགས་རྒྱ་ཆེན་རྫོགས་ཤིང་། ཐུགས་རྗེ་གཡེལ་བ་མེད་པར་སྐྱོབ། ཡོན་ཏན་གྱི་མགྲོན་རྣམས་ལ་གྲོགས་ལ་མགྲོན་བྱེད་པའི་ཚུལ་གྱིས་ཕུལ་བས། ཕན་པ་སྒྲུབ་ཅིང་བར་ཆད་ལས་སྲུང་བར་འགྱུར། སྙིང་རྗེའི་མགྲོན་རྣམས་ལ་སྟོན་མོའི་ཚུལ་དུ་ཕུལ་བས། གཞན་དོན་འགྲུབ་ཅིང་ཐེག་ཆེན་པར་འགྱུར། ལན་ཆགས་ཀྱི་མགྲོན་རྣམས་ལ་བུ་ལོན་གྱི་ཚུལ་དུ་ཕུལ་བས། ཤ་འཁོན་བྱང་ཞིང་ཕྱིས་མི་འཚེ་བར་འགྱུར། འཇུར་འགགས་ཅན་གྱི་ཡི་དྭགས་ནི་ཁ་ཟས་ལ་སྤྱོད་དབང་མེད་པའི་ལས་ངན་ཡིན་ཕྱིར། ཟུར་དུ་མ་བསྔོས་ན་མི་འཐོབ་པས། ཐོག་མཐའ་གཉིས་སུ་བསྔོ་བར་མཛད་པའང་། དང་བོ་སླེབས་པ་དང་། རྗེས་སུ་གློ་བུར་དུ་ལྷགས་པའི་རིགས་ཅན་གཉིས་སུ་དགོངས་པའོ། །སྤྱིར་སྦྱིན་ཡུལ་མཐར་ཐུག་དབུལ་ཕོངས་ཡིན་ཞིང་། དབུལ་ཕོངས་ཀྱི་མཐར་ཐུག་ཡི་དྭགས་ཡིན་ལ། ཡི་དྭགས་ཀྱི་མཐར་ཐུག་འཇུར་འགགས་ཡིན་པས་སྔ་མ་ལས་ཕྱི་མ་རིམ་བཞིན་བསོད་ནམས་རྒྱ་ཆེ་བར་སྟོན་པས་ཞལ་གྱིས་བཞེས་སོ། །

ཛམ་ལྷར་དམིགས་སུ་དཀར་ནས་ཆུ་འབུལ་བ་ནི། རྒྱུད་ལས། ཛམ་བྷ་ལ་ལ་ཆུ་སྦྱིན་བྱ། །ཞེས་གསུངས་ལ། དེ་ཡང་ཆོས་མཐུན་གྱི་འཚོ་བའི་མི་ཕོངས་ཤིང་བསྒྲུབ་བྱའི་ཆོས་བཅུ་བདུན་གྱི་ནང་ཚན་དང་མི་འགལ་བའི་ཕྱིར་རོ། །འབུལ་ཚེ་ཡང་སྣོད་དེ་དག་ཆུ་གཙང་མ་སོགས་སྲོག་ཆགས་མེད་པས་ཁེངས་པར་འགེངས་ཤིང་། ཡ་ཡོ་མེད་པ་དང་གཏོར་མའི་རྫས་ཀྱང་ཤིན་ཏུ་གཙང་བ་དང་། ཉམས་པས་མ་འབགས་པ་དགོས་ཏེ། མགྲོན་དེ་དག་ཕལ་ཆེར་གཙང་སྦྲ་ལ་དགའ་བ་དང་། ཕལ་ཆེར་དམིགས་པས་ཚིམ་པ་དང་། ལ་ལ་བཤམས་པས་ཚིམ་པ་དང་། འགའ་ཞིག་བསྔོས་པས་ཚིམ་པ་དང་། ཁ་ཅིག་རེག་པས་ཚིམ་པ་དང་། གཞན་དག་རྫས་ཀྱིས་ཚིམ་པ་སོགས་ཡོད་པས་ཕྱིར་རོ། །

༥ གཏོར་མགྲོན་འབྱོན་མི་འབྱོན་གྱི་ཁྱད་པར། མཆོད་སྦྱིན་གཏོར་མའི་རྣམ་བཤད་དགེ་བའི་ཉི་མ་ལས། ༡ སངས་རྒྱས་བྱང་སེམས་ཉན་རང་ཆོས་སྐྱོང་ཐམས་ཅད་ནི། མོས་གུས་དང་གདུང་ཤུགས་ཀྱིས་སྤྱན་དྲངས་ན། དེའི་ཕྱོགས་སུ་སྐད་ཅིག་གིས་འབྱོན་པ་ཡིན་ཏེ། ཐུགས་རྗེ་རྫུ་འཕྲུལ་གྱི་མཐུ་མངའ་བའི་ཕྱིར། སྤྱན་དྲངས་ན་འབྱོན་པའི་མགྲོན་ཞེས་བྱའོ། །༢ གནོད་སྦྱིན་ལག་རིང་རི་རབ་འགྱེལ་དོགས་ཀྱིས་དེ་ལ་འཁྱུད་པ་དང་། ལག་ན་གཞོང་ཐོགས་ཁང་བ་ཆུས་འཁྱེར་དོགས་ཀྱིས་དེ་ཆགས་པ་དང་། རྟག་མྱོས་འདོད་ཡོན་གྱིས་མྱོས་པས་འོང་བའི་སྐབས་མེད་པ་དང་། གནོད་སྦྱིན་རྩེ་སྐན་རི་རབ་རྩེ་ནས་གླིང་བཞིར་དགྲ་བྱུང་མིན་བལྟ་བས་འོང་སྐབས་མེད་པ་སྟེ། དེ་བཞི་ནི་སྤྱན་དྲངས་ཀྱང་མི་འབྱོན་པའི་མགྲོན་ཞེས་བྱའོ། །༣ ཡི་དྭགས་མཁའ་ལ་རྒྱུ་བ་དང་། བྱིངས་ན་གནས་པ་གཉིས། དྲི་ཟ་མཁའ་ལ་རྒྱུ་བ་དང་། ཀླུང་ན་གནས་པ་གཉིས་ཏེ་བཞི་ནི། མཆོད་སྦྱིན་གང་བྱེད་ཀྱི་ཕྱོགས་སུ་ངང་གིས་འདུ་བ་ཡིན་པས། དེ་ལ་སྤྱན་མ་དྲངས་ནའང་འབྱོན་པའི་མགྲོན་ཞེས་བྱའོ། །༤ ས་བདག་སྟོབས་པོ་ཆེ་མགྲོན་དུ་བོས་ན་ཁོ་རི་རབ་ཀྱི་འོག་ཏུ་གནས་པས་འོག་གཞི་རླུང་དཀྲུགས་ནས་འཇིག་རྟེན་ཁམས་སུ་ས་ཡོམ་འོང་ཉེན་ཡོད་པ་དང་། ཡི་དྭགས་གཏེར་སྲུང་བོས་ན། གཏེར་བུམ་གཞན་གྱིས་འཁྱེར་ནས་འཇིག་རྟེན་ཁམས་སུ་མུ་གེ་འབྱུང་ཉེན་ཡོད་པ་དང་། ས་བདག་ཤྲྀ་པ་ཏྲ་བོས་ན། ལག་ཏུ་ནད་རྐྱལ་ཡོད་པས་མི་ནད་ཕྱུགས་ནད་འབྱུང་ཉེན་ཡོད་པ་དང་། ཀླུ་ཧོང་ཕན་བོས་ན། ཁོ་ལ་མཐོང་དུག་ཡོད་པས་ཀླུ་ནད་སྣ་ཚོགས་འབྱུང་ཉེན་ཡོད་པ་སྟེ། དེ་བཞི་ལ་སྤྱན་དྲང་དུ་མི་རུང་བའི་མགྲོན་ཞེས་བྱའོ། །

༦ གཏོར་འབུལ་གྱི་ཚེ་སྔགས་ནུས་ནི། ཨོཾ་ཨཱཿཧཱུཾ་གིས་བྱིན་གྱིས་བརླབས་པ་ནི། རྒྱུད་ལས། ཨོཾ་གྱིས་འབྱུང་བོ་དབང་དུ་སྡུད། །ཨཱཿཡིས་རྫས་སོགས་དག་པར་བྱེད། །ཧཱུཾ་གིས་འབྲེལ་དང་ཁྱབ་པར་སྦྱིན། །གསུངས་ལ། ན་མཿ་སརྦ་ཏ་ཐཱ་ག་ཏ་ཨཱ་ཝ་ལོ་ཀི་ནི་ཨོཾ་སམ་བྷ་ར་སམ་བྷ་ར་ནི་ཧཱུཾ། ཞེས་པ་དོན་འགྱུར་གྱི་དབང་དུ་བཏང་ན། དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །སྐུ་གསུང་ཐུགས་ཀྱི་བདུད་རྩིས་འཇིག་རྟེན་ཁམས་ཀྱི་སེམས་ཅན་ཐམས་ཅད་སྐྱེ་བ་མེད་པའི་བདེ་བའི་མཆོག་ཏུ་མཛོད་ཅིག བདེ་བའི་མཆོག་ཏུ་མཛོད་ཅིག ཅེས་པ་ལགས་ལ། གཟུངས་སྔགས་ཟབ་མོ་འདིའི་སྟོབས་ཁོ་ནས་ཕྱོགས་བཅུའི་སངས་རྒྱས་ཀྱི་ཞིང་ཁམས་མ་ལུས་པའི་དཀོན་མཆོག་བཞུགས་སོ་འཚལ་ལ་མཆོད་པའི་བྱེ་བྲག་བསམ་གྱིས་མི་ཁྱབ་པས་མཆོད་པར་འགྱུར་རོ། །བྲམ་ཟེ་དང་དྲང་སྲོང་དང་། ཡི་དྭགས་གང་གཱའི་ཀླུང་གི་བྱེ་མའི་གྲངས་དང་མཉམ་པ་རྣམས་ལ་སོ་སོར་ནས་ལྷའི་ཞལ་ཟས་མཆོག་ཏུ་གྱུར་བ། ཡུལ་མ་ག་དྷའི་བྲེ་བོ་ཆེས་འཇལ་བའི་བྲེ་བདུན་རེ་འཐོབ་པར་གསུངས་སོ། །

སྦྱིན་ཡུལ་གྱི་སྐབས། དེ་བཞིན་གཤེགས་པ་བཞིའི་མཚན་བརྗོད་པའི་རྒྱུ་མཚན་ཡང་། མདོ་ལས། རིན་ཆེན་མང་གི་མཚན་བརྗོད་པའི་བྱིན་རླབས་ཀྱིས་ཡི་དྭགས་ཐམས་ཅད་ཀྱི་སྐྱེ་བ་མང་བོ་སེར་སྣ་བྱས་པའི་མི་དགེ་བའི་ལས་བཅོམ་ཞིང་བསོད་ནམས་ཡོངས་སུ་རྫོགས་པར་འགྱུར་རོ། །གཟུགས་དམ་པའི་མཚན་ནས་བརྗོད་པས་ཡི་དྭགས་མང་བོའི་བྱད་གཟུགས་མི་སྡུག་པ་བཅོམ་ཞིང་གཟུགས་དང་མཚན་ཕུན་སུམ་ཚོགས་པར་འགྱུར་རོ། །སྐུ་འབྱམས་ཀླས་ཀྱི་མཚན་ནས་བརྗོད་པས་ཡི་དྭགས་མང་བོའི་སྐོམ་པ་སྤངས་ཤིང་ཚིམ་པར་གྱུར་ཏེ། སྦྱིན་པའི་གནས་སུ་ཡིད་བཞིན་དུ་ཟ་བ་དང་ཆོག་ཀྱང་འདྲོངས་པར་འགྱུར་རོ། །འཇིགས་པ་དང་བྲལ་བའི་མཚན་བརྗོད་པས་ཡི་དྭགས་མང་བོའི་འཇིགས་པ་ཐམས་ཅད་དང་བྲལ་ཏེ། ཡི་དྭགས་ཀྱི་ཁམས་ཞི་བར་འགྱུར་རོ། །ཞེས་གསུངས་སོ། །

༧ གཏོར་སྣོད་ནི། སྤྱིར་ན། ཕྱིའི་གཏོར་སྣོད་རིན་ཆེན་སྣ་ལྔ། ནང་གི་གཏོར་སྣོད་མཚན་ལྡན་ཀཱ་པ་ལ། གསང་བའི་གཏོར་སྣོད་རུས་སྦལ་གྱི་ཁོག་པ། དོན་གྱི་གཏོར་སྣོད་ནམ་མཁའ་ཡངས་པ། རྟགས་ཀྱི་གཏོར་སྣོད་ཕྱི་སྣོད་ཀྱི་འཇིག་རྟེན། མཚན་མའི་གཏོར་སྣོད་གང་འབྱོར་སྣོད་ལ་བྱའོ། །བྱེ་བྲག་ཏུ། གཏོར་འབུལ་གྱི་སྐབས་སུ། སྣོད་གཙང་མ། ཆུ་གཙང་མ། རྫས་གཙང་མ་གསུམ་གལ་ཆེ་ལ། སྣོད་ནི། ཆུང་བ་དང་། མ་དག་པ་དང་། ཁ་ཆག་ཞབས་བརྡོལ་དང་། བསེ་དང་། རྭ་དང་། ཐོད་པ་དང་། ལི་དང་། འཁར་བ་དང་། ལྕགས་ཀྱི་སྣོད་བརྒྱད་དང་། རུས་པ། དུག་གཟེར་ཅན་ནི་མི་རུང་བས་སྤང་བྱ་སྟེ། རུས་པ་དང་པགས་པ་ལས་བྱས་པ་ནི་ཡི་དྭགས་སྐྲག་ཅིང་། གཙང་སྦྲ་ཅན་མི་འཁོར། ལྕགས་ནི་མཚོན་ཆའི་རྒྱུ་ཡིན་པས་གོ་མཚོན་སོགས་སུ་མཐོང་ནས་སྐྲག་པར་འགྱུར། ཁ་ཆག་ཞབས་བརྡོལ་ནི་མི་ཤིས་པའི་སྣོད་ཡིན་པས་བྱིན་རླབས་མི་ཆགས་ཞེས་པཎ་ཆེན་གྱི་གསུང་གྲུབ་ཆེན་སྙིང་སྟོབས་རྒྱ་མཚོ་ལས་ཐོས་པའི་གསུང་དང་། འཇིམ་ལོའི་གསུང་ལས། ཀ་པཱ་ལ་ལ་ཡི་དྭགས་ཕྲ་མོ་འཇིགས་པ་དང་། ཏིང་ནི་ལྷ་མ་ཡིན་གྱིས་ཐོད་པར་མཐོང་བའོ། །ལྕགས་ནི་དྲག་པོའི་རྫས་མཚོན་ཆའི་རྒྱུ་ཡིན་པས་ཡི་དྭགས་ཐམས་ཅད་འཇིགས་པའོ། །རུང་བའི་སྣོད་ནི། གསེར་གཞོང་། དངུལ་གཞོང་། ཟངས་གཞོང་། རག་གཞོང་། ཤིང་གཞོང་། རྫ་གཞོང་དྲུག་གོ། ཆེ་ཆུང་ཡང་ཆུང་བ་ཕུལ་གང་ཤོང་བ་ནས། ཆེ་བ་ཚད་མེད་པའི་བར་ལ་ཏི་ཚ། ལ་ཆ། གཤའ་རྩི་མེད་པ་དང་། དབྱིབས་ལ་རྒྱ་ཆེ་བ་ལ། ཁ་གཡེལ་བ་ཞིག་དགོས་པར་བཤད།

ཆུ་ནི། མི་གཙང་བས་གོས་པ་དང་། དམར་སྐྱུར་གྱིས་སྦགས་པ་སྤངས་ནས་གཙང་ཞིང་དག་པར་བྱའོ། །

༨ གཏོར་མའི་རྫས་ནི། གས་ཆག་དང་ནག་ནོག་གི་དྲི་མས་མ་གོས་པའི་སྣོད་དྭངས་ཤིང་འོད་འཚེར་བ་སོགས་ཀྱི་ནང་དུ། གཙོ་བོ་རྣམ་པ་དགུ། དཀར་གསུམ་མངར་གསུམ། ཤ་ཆེན་རྣམ་གསུམ་ལས། ཕྱིའི་དཀར་གསུམ་ནི། མར་ཁུ་འོ་མ་ཞོ། མངར་གསུམ་ཀ་ར་བུ་རམ་སྦྲང་རྩི། གཞན་ཡང་། འབྲུའི་དངོས་བོ་ཕྱེ་ཟན། རིན་པོ་ཆེའི་མེ་ཏོག་སྣ་ཚོགས་གཙང་མ་རྣམས་སོ། །རྫས་དེ་རྣམས་ཀྱང་རང་ཅག་ལྷ་བཤོས་ཀྱི་སྐབས། དཀར་གསུམ་མངར་གསུམ་དང་དྲི་བཟང་སོགས་སྤྲུས་ཏེ་སྦྱོར་བ་ནི། ཇི་འདྲ་ཞིག་ཏུ་འགྱུར་སྙམ་སྟེ། གཏམ་རྒྱུད་གསེར་ཐང་ལས། རྒྱ་གར་བ་རྣམས་ཟས་ཟ་ཚུལ་གསུངས་སྐབས། ལི་སྡེར་ཆེན་པོ་ཞིག་གི་ནང་དུ་ངོས་གཅིག་ལ་འབྲས་ཆན་དང་། ངོས་གཅིག་ལ་ཚོད་མ་ཚོམ་བུ་དུ་མ་བཀོད། གཞན་ན་སྣོད་ཆུང་མང་བོར་ཞོ་དང་འོ་མ་སོགས་སྣ་མང་བོ་བླུགས་ཏེ། གཅིག་ཟོས་པའི་མཇུག་ཏུ་སྣ་གཞན་འཁྱེར་ཏེ་འོང་ཞིང་། མགྲོན་བཟང་བོ་ཚོ་ལ་ཆུ་ཚོད་ལྷག་ཙམ་ཟས་མཇུག་མི་རྫོགས། ཞལ་ཟས་རོ་བརྒྱ་འབུལ་ཚུལ་སོགས་ཀྱང་འདི་ལྟར་བསམ་དགོས་ཀྱི། རང་རེའི་དཀར་གསུམ་མངར་གསུམ་ལྷ་བཤོས་ལ་བསྲེས་པ་བཞིན། ཐམས་ཅད་འདྲེས་ན་རོ་ངན་པའི་མཐར་ཐུག་ཅིག་འོང་སྙམ་པ་སོགས་གོ་བ་ནོར་བ་ཡིན། ཞེས་གསུངས་པ་དེ་ག་རང་ལགས་པས། གཏོར་རྫས་རྣམས་མ་འདྲེས་པའམ། སོ་སོར་མཐུན་པར་སྦྱར་ཏེ། རང་གི་ནུས་ཚོད་དང་བསྟུན་ནས། བློས་དམིགས་པ་བཟའ་བ་རི་རབ་ཙམ། བཏུང་བ་རྒྱ་མཚོ་ཙམ་དུ་སྤྲུལ་ཏེ་འབུལ་ལ། མ་འབྱོར་ན་འབྲུ་རྡོག་གཅིག་གམ། ཟས་ཁམ་གང་། ཆུ་ཕུལ་གང་ཙམ་ཡང་གཏོང་བ་སྟེ། སྔགས་འཆང་རྒྱན་མེ་ལས། བསོད་ནམས་ཚོགས་ཆེན་སྤེལ་བའི་ཕྱིར། །ཅི་འབྱོར་གཏོར་མ་ཆེ་བར་བསྐྱེད། །མ་འབྱོར་གང་བཤམས་དམིགས་པས་བསྐྱེད། །ཅེས་དང་། རྒྱལ་བའི་སྡེ་སོགས་ཀྱིས་ཀྱང་། རབ་འབྱོར་ན་སྨན་ལྔ་དང་། དྲི་ལྔ་དང་། རིན་པོ་ཆེ་ལྔ་དང་། འབྲུ་ལྔ་དང་། སྙིང་བོ་ལྔ་དང་། སྤོས་དང་། མེ་ཏོག་དང་། དཀར་གསུམ་མངར་གསུམ་དང་འབྲས་སོགས་ཀྱི་ཆན་པ་དང་། འཁུར་བ་སོགས་དང་། མ་འབྱོར་ན་ཆུ་ལ་ཟན་ནམ་ཕྱེ་གང་རུང་ལྟ་བུ་ཅི་ཙམ་འབྱོར་བ་བཤམས་པས་ཆོག་པར་གསུངས་པའི་ཕྱིར།

༩ གང་གིས་གཏོང་བའི་གང་ཟག་ནི། རབ་དགེ་ཚུལ་སློང་དང་དགེ་བསྙེན། མ་མཐའ་ཆོག་ཤེས་པ་ཅིག་གིས་གཏང་ཡང་རུང་བར་བཤད་དོ། །དེ་ཡང་དབང་བོ་རབ་ཀྱིས་བདེན་མེད་ཀྱི་ལྟ་བ་དང་འབྲེལ་བའི་ཐབས་ཤེས་ཟུང་འཇུག་གི་བསམ་པས་གཏོང་བ་དང་། འབྲིང་གིས་སྔགས་དང་བསམ་པའི་ཁྱད་པར་ཟུང་འབྲེལ་གྱིས་གཏོང་བ་དང་། ཐ་མས་སྔགས་ཀྱི་སྟོབས་ཁོ་ནར་ཡིད་ཆེས་ཀྱིས་གཏོང་ངོ་། །དེ་ཡང་མཐར་གཏུགས་ན་བསམ་པ་རྒྱ་ཆེ་ཆུང་ལ་རག་ལས་ཏེ། བྱང་ཆུབ་སེམས་དཔའི་སྡེ་སྣོད་ལས། སྦྱིན་པ་པོ་རྫས་ཀྱི་དངོས་བོ་རྒྱ་ཆུང་ཡང་། བསམ་པ་རྒྱ་ཆེ་བ་ནི་མཆོག་ཡིན། དངོས་བོ་རྒྱ་ཆེ་ཡང་། བསམ་པ་རྒྱ་ཆུང་བ་ནི་དེ་ལྟར་མ་ཡིན་ནོ། །མཁས་པས་སྦྱིན་པ་ཆུང་ཡང་མང་བོར་བྱེད་པ། ཡེ་ཤེས་ཀྱི་སྟོབས་ཀྱིས་ལྷག་པར་བྱེད་པ། ཤེས་རབ་ཀྱི་སྟོབས་ཀྱིས་རྒྱས་པར་བྱེད་པ། སྨོན་ལམ་གྱི་སྟོབས་ཀྱིས་དཔག་ཏུ་མེད་པར་བྱེད་དོ། །ཞེས་སོ། །

༡༠ གང་དུ་གཏོང་བའི་གནས་ནི། སྐྱེ་བོའི་རྒྱུ་འགྲུལ་དང་ཅ་ཅོ་ཆེ་བ། སྡིག་སྤྱོད་དང་མི་གཙང་བའི་གནས་སྤངས་ནས། བདེ་ཞིང་མཐོང་གསལ་ཆེ་བ། གཙང་ཞིང་ཡིད་དུ་འོང་བའི་གནས་སུ་ལས་དང་བོ་བས་གཏང་བར་བྱའོ། །

དུས་གང་གི་ཚེ་གཏང་བ་ནི། སྤྱིའི་དུས་ནི། སྔ་དྲོ་དང་། ཕྱི་དྲོ་དང་། ཉིན་གུང་དང་། མཚན་མོའི་སྐབས་གང་ཡང་རུང་ཞིང་། ཁྱད་པར་གྱི་དུས་ནི། ས་རུབ་ཁ་ཟས་མ་ཟོས་གོང་དུ་མ་བཏང་ན་ཟས་དྲི་ཚོར་བ་ཙམ་གྱིས་སྐྲག་པ་སྐྱེ་བས་དེའི་དུས་སུ་བཏང་བའམ། ཕྲག་དོག་གིས་སེམས་རྒྱུད་འཁྲུགས་ནས་གླགས་ལྟ་བར་བྱེད་པས། དེའི་ཉེས་པ་སྐྱོབ་ཕྱིར་སྔ་མོ་ཉིད་ནས་བཏང་བའོ། །གཏོར་མ་གཞན་ཡང་འཛམ་གླིང་དུ་ཉི་ཤར་གྱི་ཚེ་བཀྲ་ཤིས་པའི་དུས་ཡིན་པས་བསོད་ནམས་ཆེ་ཞིང་། སྲོད་དང་མཚན་མོ་འབྱུང་བོ་དང་ཡི་དྭགས་མཐུ་བོ་ཆེ་རྣམས་ཀྱི་གཞན་ལ་འཚེ་བའི་དུས་ཡིན་པས་བགེགས་ཞི་བར་འགྱུར་རོ། །

༡༡ གཏོར་མའི་དམ་ཚིག་ལ། གཏོར་མ་གཏོང་མཁན་གྱི་ཤ་ཆང་སྒོག་ཙོང་སོགས་སྤངས་ཏེ། གཏང་བྱའི་སྣོད་ཆུ་རྫས་གསུམ་དྭངས་གཙང་གི་ངོས་ནས། བཀོད་པ་མཛེས་པར་བཤམས་ཏེ། ཆོ་ག་ཆད་ལྷག་མེད་པའི་སྒོ་ནས་དམིགས་རྣམས་རྒྱ་ཆེན་པོ་བསྐྱེད་དེ་གཏོང་དགོས་སོ། །གཏོར་མ་གྲུབ་པའི་རྟགས་སུ། དགུན་གྱི་གྲང་སྒང་ལ་གཏོར་མ་མི་འཁྱག་པ། གཏོར་མ་ཞུ་བ་དང་བདུད་རྩི་འབབ་པ་སོགས་གཏོར་མ་གྲུབ་རྟགས་སུ་བཤད་ཀྱང་། སྐབས་འགར་དེ་ལྟ་བུ་བར་ཆད་དུ་གྱུར་བའང་བཤད་དོ། །

༡༢ གཏོར་མའི་བཟོ་དབྱིབས་ནི། བཀའ་བསྟན་རྣམས་སུ། གཏོར་མ་ཆ་གསུམ་དང་ཆ་བཞི་སོགས་ཙམ་ལས་མི་སྣང་ལ། གཏོར་མ་བརྒྱ་རྩ་སོགས་བཟོ་ཚུགས་མི་འདྲ་བ་མང་བོ། རང་རེའི་གངས་ཅན་པའི་ཕྱག་སྲོལ་དུ་སྣང་། རྒྱ་གར་རྒྱལ་བོ་ཨག་བྷར་ལ་ཡང་། བོད་ནས་ཡོང་བའི་རྒྱ་གར་བ་ཞིག་གིས་གཡག་ཅེས་བྱ་བའི་སྲོག་ཆགས་ཤིག་དང་། བོད་སྟོན་རྣམས་ཀྱིས་ཟན་དང་མར་ལས་བྱས་པའི་གཏོར་མ་བྱ་བ་ངོ་མཚར་བའི་ལྟད་མོ་གཉིས་མཐོང་བ་ཞུས་ཚུལ་གྱིས་ཀྱང་། རང་རེའི་ཕྱག་སྲོལ་ཡིན་པ་རྟོགས། ཡང་གསེར་ཐང་ལས། གཏོར་མ་ནི་འབྲས་དང་འཁུར་བ་སོགས་མིའི་ཟ་ལུགས་དེ་ལྟར་བྱས་ཏེ་ཕུལ་བ་ལས། རང་རེ་བཞིན་རྩེ་མོ་རིང་བོ་སོགས་དབྱིབས་སྣ་ཚོགས་པར་བྱེད་པ་མེད། དེ་འདྲ་བྱེད་པ་སྔོན་གྱི་ཆོ་ག་སོགས་ནའང་མེད་ཟེར་བས། བོད་རང་གི་སྲོལ་ཡིན་པར་སེམས། བླ་མ་སོག་བཟློག་པས། རྒྱ་བྲིས་ཀྱི་ཐང་ག་ལ་གཏོར་མ་འདུག་བྱ་བ། མཆོད་རྫས་གཞན་ཞིག་ལ་ནོར་བའམ། ཐང་ག་དེ་བལ་བོ་ཞིག་གིས་བོད་དུ་བྲིས་པ་ཡིན་མཆི། བོད་ཀྱི་ཕ་མེས་རྣམས་གངས་རི་ལ་བརྩི་བས་ཞྭ་མོ་དང་། གཏོར་མ་ལྷ་རྟེན་སོགས་ཀྱི་རྩེ་མོ་རྣོ་རྩེ་རེ་ཡོད་པ་ཞིག་ལ་དགའ་བ་ཡིན། ཡང་དག་པར་དུ་ན་གཡུང་དྲུང་བོན་གྱི་ཕྱག་ལེན་དུ་སེམས་གསུངས་པ་ལྟ་བུ་དང་། ཆང་གི་དཀར་གསུམ་ནི། རྩི་ཞག་རུས་པ། མངར་གསུམ་ནི་དྲི་ཆེན། ཚིལ་ཆེན། གསུར་ཆེན་ནོ། །གཞན་དྲི་ཆུ། ཨ་མྲི་ཏ། མང་ས། ཤ་ཆེན། ཞལ་ཟས་སྣ་ཚོགས་སོ། །གསང་བའི་དཀར་གསུམ་ནི། རྐང་ཀླད་བྱང་སེམས་དང་། མངར་གསུམ་བུད་མེད་རྩི་ཆེན། མཚལ་ཆེན་དྭངས་མའོ། །གང་ལྟར་བོད་ཀྱི་གཏོར་མ་བཟོ་སྟངས་ལ། གཏོར་མ་གཏོང་ཡུལ་དང་། གྲུབ་མཐའ་སོ་སོའི་བླ་མའི་ཕྱག་བཞེས་བཞིན། སྣ་སྒོ་མོ་མཆིས་ཀྱང་། ཁ་དོག་གི་ཆ་ལ། དཀར་གཏོར་དང་དམར་གཏོར་གཉིས་ཡོད། མར་ཁུ་བྱུགས་པའི་དཀར་གཏོར་དེ་ཞི་བའི་ལྷ་རྣམས་ལ་འབུལ་བའི་གཏོར་མ་དང་། དམར་གཏོར་དེ་དྲག་པོའི་ལྷ་རྣམས་ལ་འབུལ་བའི་གཏོར་མ་ཡིན།

༡༣ གཏོར་མའི་བྱེད་ནུས། སྐབས་འགར་དམར་ཟོར་ནི། བོན་པོའི་རྟ་ཟོར་འཕེན་པ་བཟློག། ཅེས་པའི་ཚིག་དེ་ལ་བལྟས་ན། དང་བོ་བོན་པོའི་དྲག་སྦྱོར་བྱེད་ཚུལ་ཞིག་ཡིན་པར་མངོན་ཞེས་དུང་དཀར་རིན་པོ་ཆེས་གསུངས་ལ། བཀའ་བརྒྱུད་རྣམ་བཤད་དང་སྤྱི་དོན་འོད་གསལ་སྙིང་བོ་ཡང་དག་གྲུབ་པའི་ཚིག་འགྲེལ་ལས་ཀྱང་འཕྲིན་ལས་ཀྱི་གཟེར་ཆེན་ལྔ་བགྲང་བའི་ཚེ་འཁོར་ལོ་ལ་བརྟེན་ཏེ་སྲུང་བའི་གཟེར། གཏོར་མ་ལ་བརྟེན་ཏེ་བཟློག་པའི་གཟེར། ཞེས་གཏོར་མའི་ནུས་པ་ནི་དགྲ་བགེགས་བཟློག་པའི་བྱེད་ལས་ཅན་དུ་གསུངས་ཡོད། དེ་ཡང་གཏོར་ཟོར་ལ་ཕྱི་ལྟར་ན་གཏོར་མའི་ཕུང་བོ་དང་། ནང་ལྟར་ན་ལྷ་ཚོགས་ཀྱི་རང་གཟུགས། གསང་བ་ལྟར་ན་དྲག་པོའི་མཚོན་ཆར་གསུངས་པས། གྲུབ་པའི་རྣལ་འབྱོར་བས་གཏོར་ཟོར་འཕེན་པའི་དམིགས་རིམ་ཁྲོད། དྲག་གཏོར་དེ་ཐོག་མར་ཡི་དམ་གྱི་ལྷར་སྒོམ་པ་དང་། བར་དུ་ལྷ་དེའི་ཞལ་ཟས་སུ་སྒོམ་པ། མཐའ་མར་དྲག་པོའི་མཚོན་ཆར་བསྐྱེད་ནས་ཞིང་བཅུ་ཚང་བའི་དགྲ་བགེགས་ཕྱོགས་སུ་བརྫངས་པ་ཡིན་ནོ། །

དུང་དཀར་གྲུབ་མཐའ་ལས། གཏོར་ཟོར་འཕེན་པ་ཟེར་བ་ནི། གཏོར་མ་ཟུར་གསུམ་ཆེན་པོ་དེ་འདྲ་བཞེངས་ཐོག ཚེ་ཟོར་ཞེས་གཏོར་མའི་སྟེང་དུ་གང་སར་པད་ཁའི་གང་བུ་འཛུགས་པ་དང་། ཡུམ་ཟོར་ཞེས་ཤིང་ཀྱེར་པ་རིང་ཐུང་ལི་རྨི་གསུམ་ཙམ་ལ་གཞོགས་བརྒྱབ་ནས་རྩེ་རྣོ་བོ་བཟོས་ཏེ་འཛུགས་སྲོལ་ཡོད། གཏོར་མ་གཡུགས་སྟངས་ལ། གཏོར་མ་དེ་ལྷ་ཡིན་བསམ་པ་བྱས་ཏེ་གཡུགས་སྲོལ་ཞིག་དང་། ལྷ་ལ་ཕུལ་བའི་དམིགས་པ་བྱས་ཏེ་གཡུགས་སྲོལ་ཞིག་གཉིས་ཡོད། གཏོར་མ་དེ་ལྷ་ཡིན་བསམ་པའི་དམིགས་པའི་གཡུགས་སྟངས་དེ་ཧ་ཅང་ཉེན་ཁ་ཆེན་པོར་བརྩི་གི་ཡོད། ཅེས་དང་། མཁས་གྲུབ་ར་ག་ཨ་སེས། བསྟན་ལ་ཐུག་པའི་དགྲ་བོ་བྱུང་སྲིད་ན། །ཟོར་དུ་འཕངས་ན་ཧུར་ཐུམ་འགྲོ་བར་བཤད། །རང་ཉིད་ཡི་དམ་ང་རྒྱལ་བརྟན་པོ་ཡི། །ལྷ་ཉིད་གདན་དང་བཅས་ཏེ་འཕངས་བསྒོམས་པས། །ཕ་རོལ་རྡུལ་དུ་བརླག་པར་གདོན་མི་ཟ། །ནུས་པ་ཆུང་ན་རང་ལ་ལྡོག་དོགས་ཆེ། །བསྐུལ་བ་བཏོན་ནས་ལྷ་དེ་ནམ་མཁར་བཏེགས། །སེར་སྤྲིན་བཞིན་དུ་འུར་ཆེམ་བཅས་ཏེ་སོང་། །གཏོར་མ་མེ་དཔུང་མཚོན་ཆར་དམིགས་ཏེ་འཕངས། །དེ་ཡིས་རང་ལ་ལྡོག་དོགས་ཡོད་པ་མིན། །གསུངས་སོ། །གཏོར་མ་བཏང་ནས་སླར་འཁོར་ཚེ། གཏོར་སྣོད་ཁ་ཕྱིར་བསྟན་ན་དངོས་གྲུབ་ཡོལ་ཞིང་། ཁ་ནང་དུ་བསྟན་ནས་འཁྱེར་ཡོང་ན་དངོས་གྲུབ་འདུ་བར་གསུངས་སོ། །

ཡང་། ར་ག་ཨ་སེའི་གཏོར་མའི་ཡིག་སྣ་ལྷ་ཡི་ནོར་བུ་ལས། གཏོར་མ་བཅའ་ཐབས་ཤིག་ལ། གཏོར་ཆེན་བཟོ་ན་སྟོད་སྨད་རྣམ་པ་ལྔར་སོ་སོར་ཤོག་དྲིལ་འཇུག་པར་བཤད་དེ། སྟོད་དུ་བླ་མའི་མཚན་སྔགས། དེའི་འོག་ཡི་དམ་གང་ཡིན་གྱི་སྙིང་བོ། དེའི་འོག་བསྙེན་སྔགས་དང་འབོད་སྔགས་བཅུག སྐེད་པར་སྒྲུབ་སྔགས་དང་རྦད་སྔགས། རྩ་བར་གསང་སྔགས་འཇུག་པར་བཤད་པ་དང་། གཏོར་མ་ཆུང་ན་ཟངས་སྦུག་གམ་སྨྱུག་ཚིགས་ཀྱི་ནང་དུ་སྔགས་ལྔ་བོ་བྲིས་ཏེ་གཏོར་མའི་སྲོག་ཤིང་དུ་བྱས་ཀྱང་འཐུས་པར་བཤད་དོ། །ཡང་འཇིག་རྟེན་པའི་ལྷ་ལ་བླ་མའི་མཚན་མི་འཇུག་པར་གོང་ནོན་གཉེན་པོའི་ལྷ་ཡིས་སྔགས་ཀྱི་ཆོག་ལ། གཏོར་མའི་དབུས་སུ་རིན་ཆེན་སྣ་ཚོགས་བཅུག་ན་ལོངས་སྤྱོད་འཕེལ་བ། སྨན་སྣ་བཅུག་ན་ནད་སེལ་བའི་རྟེན་འབྲེལ་དང་། གསེར་དང་གསེར་ཤོག་མང་དུ་བཅུག་པ་ལ་གསེར་གཏོར་ཞེས་ཁམས་ཆེན་དུ་བརྩི་བ་དང་། ཡང་ཕྱག་ལེན་ཞིག་ལ་གོས་ཆེན་གཏོར་དབྱིབས་སུ་བཟོས་ནས། ནང་དུ་འབྲུ་སྨན་དང་རིན་ཆེན་ཤོག་དྲིལ་བཀང་། དངུལ་གྱི་མར་རྒྱན་འདོགས་པ་སོགས་གཏོར་བཟོ་མང་དུ་བཤད་ལ།

ཡང་། དགྲ་བགེགས་བསྒྲལ་ལུགས་ལ། ལྕགས་མཁར་སྲེག་པ་ཞེས་དྲག་ལས་བྱེད་སྲོལ་ཞིག་ཡོད། དེ་ནི་སླ་ང་ཆེན་པོའི་ནང་སྣུམ་ཁོལ་ཐག་ཆོད་པའི་སྐབས་སུ། དགྲ་བགེགས་སྒྲོལ་བ་བོ་དེས་གནོད་བྱེད་དེའི་གཟུགས་བརྙན་བྲིས་ཐོག སྙིང་ཁར་དགྲ་བགེགས་དེའི་མིང་བྱང་བྲིས་ཏེ། རྫས་ངན་མང་བསྲེས་བྱུགས་པའི་ཤོག་ལྷེ་ཞིག་དབྱུག་པའི་རྩེར་བསྐོན་ནས་འཁྱེར་ཐོག ཨ་རག་སྤུས་ལེགས་ཀ་ལི་གང་འཁྱེར་ནས་འཆམ་རྒྱག་བཞིན། མེ་ལ་བསྐོར་བ་གསུམ་བརྒྱབ་ནས་ཨ་རག་དེ་སྣུམ་ཐོག་ཏུ་བླུགས་ནས། མེ་ལྕེ་དྲག་ཏུ་འབར་བ་དང་ཆབས་ཅིག་དགྲ་གཟུགས་ཀྱི་ཤོག་ལྷེ་དེ་མེའི་ནང་དུ་སྲེག་སྲོལ་ཡོད་པ་དེའོ། །

༡༤ གཏོར་མའི་མཚོན་དོན། གཏོར་མ་གཏོང་བ་འདི་ལ། ཕྱིན་དྲུག་དང་བསྡུ་བཞི། སྡོམ་གསུམ་ཚང་བར་མཁས་པ་སྔ་མ་དག་གིས་གསུངས་ཏེ། གཏོར་རྫས་བཏང་བས་སྦྱིན་པ། གཙང་ཞིང་གནོད་འཚེ་སྤངས་པས་ཚུལ་ཁྲིམས། མི་འཚེ་ཞིང་དཀའ་བ་དང་དུ་བླངས་པས་བཟོད་པ། གཏོང་ཕོད་ཆེ་ཞིང་ལེ་ལོ་བྲལ་བས་བརྩོན་འགྲུས། གཏོང་བའི་དུས་སུ་སེམས་གཞན་དུ་མི་གཡེངས་བས་བསམ་གཏན། འཁོར་གསུམ་ཡོངས་སུ་དག་པར་རྟོགས་པས་ཤེས་རབ་ཚང་ངོ་། །བསྡུ་བཞི་ཚང་བ་ནི། མགྲོན་སོ་སོར་བསྔོས་པའི་སྦྱིན་པ། མགྲོན་སོ་སོར་བསྔགས་པ་བརྗོད་པས་སྙན་སྨྲ། འདོད་དོན་ཞུ་བས་དོན་སྤྱོད་པ། འཁོར་གསུམ་དག་པར་བསྔོས་པས་དོན་མཐུན་པ་ཚང་བའོ། །སྡོམ་གསུམ་ཚང་བ་ནི། གཏོར་མ་གཏོང་དུས་གཙང་ཞིང་མི་འཚེ་བ་སོགས་མི་དགེ་སྤངས་པས་སོ་ཐར་གྱི་སྡོམ་པ། གཞན་དོན་དུ་གཏོང་བའི་བྱང་སེམས་ཀྱི་སྡོམ་པ། ལྷ་སྒོམ་ཞིང་གཟུངས་སྔགས་བཟླས་ཏེ་གཏོང་བས་གསང་སྔགས་ཀྱི་སྡོམ་པ་ཚང་ངོ་། །ཡང་གཏོར་མ་ལ་གཞི་ལམ་འབྲས་གསུམ་གྱི་གནས་སྐབས་དང་སྦྱར་ན། སྦྱངས་གཞི་ལུས་ངག་ཡིད་གསུམ་དང་ཁུ་ཁྲག་རླུང་གསུམ་གྱི་སྦྱར་བྱ་ཤིན་ཏུ་ཕྲ་བའི་བག་ཆགས་གསུམ་དང་། དུག་གསུམ། སྒོ་གསུམ་གྱི་སྐྱོན་རྣམས་སྦྱངས་ཏེ་སྦྱོང་བྱེད་རྡོ་རྗེ་གསུམ་མཐར་ཕྱིན་པ་དང་། སྦྱང་འབྲས་སྐུ་གསུང་ཐུགས་རྡོ་རྗེ་འགྲུབ་པའི་རྒྱུ་སྨིན་བྱེད་དུ་འགྱུར་བའི་ཆེད་དུ་སྨན་རག་གཏོར་མ་འབུལ་བ་ཡིན་ནོ། །

ཡང་སྙིང་ཐིག་གཏོར་མའི་རེག་ཟིག་ལས། དང་བོ་བླ་མ་མཆོད་པ་དང་ཡང་གསང་བླ་སྒྲུབ་འདྲ་བར་ཟླུམ་གཏོར་དམར་བོ་པདྨ་འདབ་བཞི་བ། ནང་སྒྲུབ་རིག་འཛིན་འདུས་པ་ལ། བང་རིམ་དམར་བོ་གསུམ་གྱི་འོག་མ་ལ་འཁོར་ཚོགས་སྤྱི་འདུས་སུ་འཐེབ་ཀྱུ་ཅི་མང་། བར་མ་ལ་རྗེ་འབངས་ཉེར་ལྔ་མཚོན་བྱེད་མར་གྱི་ནོར་བུ་ཉེར་ལྔ། སྟེང་མ་ལ་རིག་འཛིན་བརྒྱད་མཚོན་བྱེད་རིན་ཆེན་ཟུར་བརྒྱད་པ་སེར་བོ། དེའི་སྟེང་བདེ་སྟོང་གཉིས་ཀྱི་མཚོན་བྱེད་ཉི་ཟླ་གཉིས་ཀྱི་སྟེང་འཁོར་བའི་སྐྱོན་གྱིས་མ་གོས་པའི་རྟགས་པདྨ་འདབ་བཞིའི་མཛེས་ཚོན་ཅན་གྱི་དབུས་སུ་ཟླུམ་གཏོར་བརྗིད་ལྡན། ཞེས་གསུངས་སོ། །

༡༥ གཏོར་མ་བཏང་བའི་ཕན་ཡོན་ནི། གཏོར་མ་ལས་རྣམས་ཀྱི་སྔོན་དུ་འགྲོ་བ། འཕྲིན་ལས་མ་ཚང་བ་ཁ་སྐོང་བ། ཚེ་བསྲིངས་ཤིང་བར་ཆད་སེལ་བ། མདངས་དང་ལྡན་པར་འགྱུར་བ། ལོངས་སྤྱོད་འཕེལ་བ། གཟི་བརྗིད་དང་མཐུ་སྟོབས་ཆེ་བ། གནས་སྐབས་བདེ་འགྲོ་དང་། མཐར་ཐུག་སངས་རྒྱས་འཐོབ་པའི་ཕན་ཡོན་སོགས་བརྗོད་ལས་འདས་སོ། །གཏོར་མའི་ཡིག་སྣ་ལྷའི་ནོར་བུ་ལས། གཏོར་མ་མེད་ན་བར་ཆད་སེལ་བ་མེད། །གཏོར་མར་བརྩོན་ན་བར་ཆད་མི་ཚུགས་ཤིང་། །མཆོག་ཐུན་དངོས་གྲུབ་སྒྲུབ་པའི་མཆོག་ཏུ་གསུངས། །

ཡང་ཀྲི་ཡ་དཔུང་བཟང་གི་རྒྱུད་ལས། ནད་ཀྱི་བསྐལ་བ་བསལ་བའི་ཕྱིར། །སྨན་སྣ་ལྔ་ནི་བུམ་པར་བླུགས། །ཚུལ་ཁྲིམས་རྣམ་པར་དག་བྱའི་ཕྱིར། །དྲི་སྣ་ལྔ་ཡང་བུམ་པར་བླུགས། །དགོས་འདོད་རེ་བ་བསྐང་བ་དང་། །མཚོན་གྱི་བསྐལ་བ་བསལ་བའི་ཕྱིར། །རིན་ཆེན་ལྔ་ཡང་བུམ་པར་བླུགས། །ཀུན་གྱི་སྙིང་བོར་གྱུར་བ་དང་། །དགོས་འདོད་རེ་བ་བསྒྲུབ་བྱའི་ཕྱིར། །སྙིང་བོ་ལྔ་ཡང་བུམ་པར་བླུགས། །ཞེས་སོ། །

ཡང་མཁས་པ་མང་བོ་ཞིག ཇོ་བོའི་ཞལ་ལས། བོད་ཕྱུག་པོ་མི་འོང་། གཏོར་ཟན་སླ་མོ་བྱེད། གཏོར་མ་མཐེབ་ཀྱུ་བྱེད་པར་འདུག་གསུངས་ལ། ཀུན་མཁྱེན་འཇམ་དབྱངས་བཞད་པས། གཏོར་མའི་རྣམ་བཤད་མང་བོར་དེ་ལྟར་མི་སྣང་བས་ཇོ་བོས་དེ་ལྟར་བཤད་པ་མི་བདེན་པར་ཡང་གསུངས་སོ། །

བྷ་ལིང་ཨཱ་ཙརྱའི་ཆོས་སྐྱོང་ཐམས་ཅད་ཀྱི་གཏོར་ཆོག་ལས། བསོད་ནམས་ཀྱི་ཚོགས་གསོག་པ་དང་། གཏོར་མས་བར་ཆད་ཐམས་ཅད་ཞི་བ་དང་། གཏོར་མས་འཕྲིན་ལས་རྣམ་བཞི་འགྲུབ་པ་དང་། གཏོར་མ་ནི་ལྷ་སྒོམ་པ་དང་། རབ་གནས་དང་། སྦྱིན་སྲེག་དང་། ལས་ཚོགས་ཀུན་ལ་སྔོན་དུ་འགྲོ་བ་དང་། གཏོར་མས་སངས་རྒྱས་ཐམས་ཅད་ཀྱིས་དགོངས་ཤིང་། ལྷ་རྣམས་ཀྱིས་སྲུང་ཞིང་སྐྱོབ་པ་དང་། སྦྱིན་པའི་ཕར་ཕྱིན་ཡོངས་སུ་རྫོགས་པར་འགྱུར་བ་དང་། གཏོར་མས་ཚེ་རིང་ཞིང་བསོད་ནམས་ཚད་མེད་པ་བསྐྱེད་ཅིང་འཕེལ་བ་དང་། སྦྱིན་པའི་ཕར་ཕྱིན་མྱུར་དུ་རྫོགས་པར་བྱེད་ཅིང་། གཏོར་མས་བསོད་ནམས་དང་ཚེའི་ཚད་ཀྱང་འཕེལ་ཞིང་སྐྱེ་བར་བྱེད་པ་དང་། གཏོར་མས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་སྙེད་མཆོད་པའི་བསོད་ནམས་འཐོབ་པས། ཚེ་རིང་བ་དང་། བསོད་ནམས་དང་། མདངས་དང་། སྟོབས་སྐྱེ་ཞིང་འཕེལ་བ་དང་། དགེ་བའི་རྩ་བ་ཡོངས་སུ་རྫོགས་པ་དང་། མི་དང་མི་མ་ཡིན་པ་དང་། གནོད་སྦྱིན་དང་། སྲིན་པོ་དང་། ཡི་དྭགས་མ་རུངས་པ་ཐམས་ཅད་ཀྱིས་འཚེ་ཞིང་གནོད་པ་བྱེད་མི་ནུས་པ་དང་། དེ་དག་སོགས་གཞན་ལ་གཟི་བརྗིད་ཚད་མེད་པ་དང་ལྡན་པར་འགྱུར་བ་སོགས་མཐའ་ཡས་པའི་ཕྱིར་གསུངས་སོ། །དཔེར་ན། གཏོར་མ་བཏང་བས་ཚེ་རིང་བ་དང་བསོད་ནམས་འཐོབ་པ་གྲུབ་ཆེན་ལྕེ་སྒོམ་ལྟ་བུ་སྟེ། ལྕེ་སྒོམ་པ་ལོ་བརྒྱད་ཅུ་རྩ་གྲངས་བཞུགས་པ་གཏོར་མའི་བྱིན་རླབས་ཡིན་གསུངས་པ་དང་། ཡང་ལྕེ་སྒོམ་པའི་ཞལ་ལས། ང་ལ་དང་བོ་རྒྱགས་སུ་ཞོག་གཅིག་ལས་མེད་དེ། ད་ལྟ་ལོངས་སྤྱོད་ཆེ་བ་གཏོར་མའི་དོན་ཡིན་པར་འདུག་གསུངས་པ་དང་། ཆོས་པ་ལྟོ་གོས་ཀྱིས་ཕོངས་པ་མཐོང་ཙ་ན། གཏོར་མ་མ་ཐོངས་པ་ཡིན་གསུངས་ལ། སྐབས་ཤིག་བླ་མའི་རྒྱགས་ཆད་ནས་ཕྱེ་ཕད་སྤྲུགས་པས་རྩམ་པ་བྲེ་བཞི་བྱུང་བ་གཏོར་མ་བཏང་བས། ཉིན་ཕྱེད་ནས་ཡོན་བདག་འགས་ནས་མང་བོ་དང་ཆོས་སྟོན་བཟང་བོ་ཁྱེར་ནས་བྱུང་བས། བླ་མས་ཉེ་གནས་ལ་ཞིང་གི་སྟོན་ཐོག་ལས་མི་མགྱོགས་སམ་གསུངས་པ་ལྟར་རོ། །

མདོར་ན། མཆོད་གཏོར་གྱི་སྐབས་སུ་གཅེས་པར་འཛིན་པ་དང་། ལྡན་དགོས་པ། འབྲས་བུ་ཇི་ལྟར་འཐོབ་པ་ནི། མཆོད་སྦྱིན་གཏོར་མའི་རྣམ་བཤད་དགེ་བའི་ཉི་མ་ལས། སྦྱོར་བའི་སྐབས་སུ་སེམས་བསྐྱེད་དམ་པ་གཅེས། །དངོས་གཞི་འཁོར་གསུམ་བདེན་མེད་ཤེས་པ་གཅེས། །རྗེས་སུ་འདུན་པ་བྱང་ཆེན་རྒྱུར་བསྒྱུར་གཅེས། །གཅེས་པ་རྣམ་གསུམ་ལམ་གྱི་སྲོག་ཤིང་ཡིན། །དང་བོ་གཏང་བྱའི་རྫས་ལ་གཙང་སྦྲ་དགོས། །བར་དུ་ཆོ་གའི་ལས་ལ་འཁྲུལ་མེད་དགོས། །ཐ་མར་རང་གཞན་ཡིད་ཆེས་ལྡན་པ་དགོས། །དགོས་པ་རྣམ་གསུམ་བརྗོད་བྱའི་སྙིང་བོ་ཡིན། །དཀོན་མཆོག་མཆོད་པས་བསོད་ནམས་ཚོགས་ཆེན་རྫོགས། །རིགས་དྲུག་སྦྱིན་པས་ལམ་གྱི་ཡན་ལག་རྫོགས། །ཐབས་ཤེས་འབྲེལ་བས་ཚོགས་གཉིས་ཟུང་འཇུག་རྫོགས། །རྫོགས་པ་རྣམ་གསུམ་འདི་ཡི་འབྲས་བུ་ཡིན། །ཞེས་སོ། །

གཏོར་མའི་སྐོར་རྒྱས་པར་དགེ་ལུགས་པར་མཚོན་ནའང་། དེ་མོ་ངག་དབང་དགེ་ལེགས་རྒྱལ་མཚན་གྱི་གཏོར་མའི་དེ་ཉིད་གསལ་བར་སྟོན་པ་ནོར་བུའི་མེ་ལོང་དང་། ཞབས་དྲུང་ཆོས་རྗེ་ངག་དབང་ཚེ་རིང་གི་གཏོར་མའི་རྣམ་བཞག་གདོན་གྲོལ་ཉེར་མཁོ། རོང་ཐ་བློ་བཟང་དམ་ཆོས་རྒྱ་མཚོའི་གཏོར་མའི་རིམ་པ་སྣ་ཚོགས་དང་། གཞན་ཡང་། མཆོད་སྦྱིན་གཏོར་མའི་རྣམ་བཤད་དགེ་བའི་ཉི་མ་ལས། གཏོར་མའི་སྔོན་འགྲོ། དངོས་གཞི། རྗེས་ཀྱི་རིམ་པ་བཅས་གསུངས་ཡོད་པ་དང་། གཡུ་ཐོག་རྙིང་ཐིག་གི་གཏོར་མའི་དཔེ་རིས་དང་བཅས་པ་སྡེ་དགེ་པར་ཁང་དུ་ཡོད་པ་དང་། རྫོགས་ཆེན་གྱི་གཏོར་མའི་དཔེ་རིས་ཀྱང་གྲོང་ཆོག་པ་རྣམས་ཀྱི་ལག་ན་མང་དུ་གདའ་བས། ཞིབ་ཏུ་དེ་དག་ལ་གཟིགས་པར་ཞུ།

ཞལ་ཟས་རྒྱ་མཚོ།

ཞལ་ཟས་ཀྱི་གཏོར་མ་ཇི་ལྟར་བྱུང་བ་དང་། དར་ཚུལ་གྱི་བརྒྱུད་རིམ་སོགས། གཏོར་མའི་རྣམ་བཤད་སྐབས་སུ་བཤད་ཟིན་ལ། འདིར་སྐབས་སུ་བབ་པ་མཆོད་པའི་བྱེ་བྲག་ཞལ་ཟས་རྒྱ་མཚོ་བཟོ་སྲོལ་ཇི་ལྟར་བྱུང་ཚུལ་བརྗོད་ན། རྗེ་བདག་ཉིད་ཆེན་པོ་དགུང་ལོ་ང་གསུམ་གྱི་ཚེ། ཆོ་འཕྲུལ་སྨོན་ལམ་ཆེན་མོའི་དུས་མཆོད་བཙུགས་སྐབས། ཇོ་བོ་རྣམ་གཉིས་གཙོས་སངས་རྒྱས་བྱང་སེམས་རྣམས་ལ་རྒྱན་དང་ན་བཟའ་ཕུལ། མཆོད་ཚོགས་རྒྱ་མཚོའི་སྤྲིན་ལྟར་ཕུལ་དུས། ཞལ་ཟས་རྒྱ་མཚོ་འདི་གསར་དུ་བཞེངས་པ་སྟེ། རྗེའི་རྣམ་ཐར་དད་པའི་འཇུག་ངོགས་ལས། ཞལ་ཟས་མདའ་ཚད་ཙམ་ལྷག་ཙམ་ལ་མར་གྱི་རྒྱལ་སྲིད་རིན་པོ་ཆེ་སྣ་བདུན་ལ་སོགས་པའི་རྒྱན་ཡིད་འཕྲོག་པས་བརྒྱན་པ་བརྒྱ་རྩ་བརྒྱད་རེ་ཉིན་རེར་ཞིང་གསར་བ་ཕུལ་ཞིང་། ཀོང་བུ་ཆེན་པོའི་གཡས་གཡོན་དུ་ས་སྟེགས་ལ། རྩམ་པ་ཁལ་བཞི་བརྒྱ་རེ་ལས་བྱས་པའི་ལྷ་བཤོས་རྒྱན་བཟང་བོ་དཔག་ཏུ་མེད་པས་སྤྲས་པ། འཕྱར་དར་བཙུགས་པ་དང་། བཅས་པ་མངོན་པར་བཤམས་པའི་ཞལ་ཟས་རྙིང་བ་རྣམས་ནི་བདག་གིར་བྱེད་པ་མེད་པར་སྐྱེ་བོ་ཕོངས་པ་སྤྲང་བོའི་ཚོགས་ལ་ལྟོས་པ་མེད་པར་བྱིན་པས། ཕོངས་པ་དག་ཀྱང་བཀྲེན་པའི་འདུ་ཤེས་ཀྱི་འཆང་བ་ལས་གྲོལ་ནས་བཟའ་བཏུང་གིས་ཚིམ་པ་ལྷག་པར་འཐོབ་པས། སླར་བཟའ་བ་ཡིད་ལ་མི་བྱེད་པ་ལྟ་བུར་གྱུར་ཏོ། །ཞེས་པ་ལྟར། སྐབས་དེར་རྨང་གཞི་རྩམ་གཏོར་ཆེན་པོའི་སྟེང་དུ། མར་ཚོན་ལས་བཞེངས་པའི་རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། རྫས་བརྒྱད་སོགས་བཟོ་བཀོད་ཕུན་སུམ་ཚོགས་པ་བཤམས་པ་ལས། ཕྱིས་སུ་སྤྱི་ལོ ༡༥༨༣ ལོར་རྒྱལ་དབང་སྐུ་ཕྲེང་གསུམ་པ་སྐུ་འབུམ་དུ་གདན་དྲངས་སྐབས། སྐུ་འབུམ་དགོན་པའི་མཁན་པོ་བརྩོན་འགྲུས་བཟང་བོས་ལྷ་ལྡན་སྨོན་ལམ་ཆེན་མོ་ཇི་བཞིན་སྨོན་ལམ་སྐབས་སུ་མར་རྒྱན་གྱི་མེ་ཏོག་མཆོད་པ་སྣ་ཚོགས་བཤམས་པ། ད་ལྟའི་མིང་དུ་གྲགས་པའི་སྐུ་འབུམ་དགོན་པའི་མེ་ཏོག་མཆོད་པ་འདི་དར་བས། སྔོན་ཆད་ཀྱི་བཟོ་ཚུལ་ལ་འགྱུར་བ་ཆེན་པོ་ཐེབས་ཡོད། དེ་ནི་རྨང་གཞི་རྩམ་གཏོར་བཏང་སྟེ། མར་ཚོན་གྱི་ཕྱག་རྩལ་འབུར་དུ་ཐོན་པར་བྱས་ནས། མར་བཟོས་རྒྱན་མཆོད་དང་འབྲེལ། ལོ་རེ་བཞིན་རྒྱལ་ལོ་ཚེས་བཅོ་ལྔ་ཉིན་མཆོད་ཚོགས་དང་བཅས་པའི་དུས་མཆོད་ཅིག་ཡིན། དེ་ལ་རྟེན་གཙོ་འཇམ་དབྱངས་ཀུན་གཟིགས། སྟོན་པ་ཤཱཀྱ་ཐུབ་པའི་འཁྲུངས་རབས་ཁག་གཅིག ཆོས་རྒྱལ་སྲོང་བཙན་གྱིས་རྒྱ་བཟའ་ཀོང་ཇོ་བོད་དུ་གདན་དྲངས་ཚུལ་གྱི་བརྒྱུད་རིམ་མདོར་བསྡུས། དེ་མིན་མེ་ཏོག་དང་ཁང་བཟང་། སྲོག་ཆགས་མང་བོའི་མར་བཟོས་སྣང་བརྙན་སོགས་བཞེངས་ཏེ། སྐུ་འབུམ་མར་བཟོས་རྒྱན་མཆོད་ཅེས་ཡོངས་སུ་གྲགས་པ་དང་།

གཞན་ཡང་། མདོ་དབུས་ཁམས་གསུམ་གྱི་དགོན་སྡེ་མང་བོས་ལོ་རེར་བཞིན། ཞལ་ཟས་རྒྱ་མཚོའི་མཆོད་གཏོར་ལ་སྲོག་ཆགས་དང་། མེ་ཏོག་སྣ་ཚོགས་ཀྱི་མར་རྒྱན་སྣ་མང་བཟོས་ཏེ། གཙུག་ལག་ཁང་དུ་འབུལ་སྲོལ་དར་བ་ལས་གཞན། སེམས་བསྐྱེད་མཆོད་པ་སོགས་ཀྱི་མཆོད་སྤྲིན་རྒྱ་མཚོ་སྤྲོ་སྐབས། ཞལ་ཟས་རྒྱ་མཚོ་ཇི་སྙེད་ཅིག་བཞེངས་པའི་སྲོལ་རྒྱ་ཆེར་དར་ཡོད་དོ། །

ལྷ་བསང་།

༡ ལྷ་བསང་གི་ཁུངས། ལྷ་བསང་གཏོང་བའི་ཁུངས་དང་བྱུང་རིམ་ནི་མ་གྷ་དྷ་བཟང་མོའི་རྟོགས་བརྗོད་ལས། སངས་རྒྱས་བཅོམ་ལྡན་འདས་བུ་རམ་ཤིང་འཕེལ་དུ་མ་གྷ་དྷ་བཟང་མོས་སྤྱན་འདྲེན་པ་ལ་སྤོས་དང་མེ་ཏོག་ཁྱེར་ནས་ཁང་བཟང་གི་རྩེར་འཛེག་སྟེ། མ་ལུས་སེམས་ཅན་ཀུན་གྱི་མགོན་གྱུར་ཅིང། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་བའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་གསོལ་བ་བཏབ་སྟེ། སྙིམ་པས་མེ་ཏོག་དཀར་དམར་སྔོ་སེར་གཏོར་བས་བདུག་སྤོས་ཀྱི་དུད་སྤྲིན་དང་། དྲི་བཟང་འཐུལ་ཞིང་ནམ་མཁའ་ལ་དལ་བུས་སོང་བ། སངས་རྒྱས་ཀྱི་ཞབས་པད་ལ་མེ་ཏོག་རྣམས་དང་སྤོས་དང་བཅས་པ་བབས་ཤིང་། ཞུ་བའི་ཚིག་དབྱངས་དང་བཅས་པ་གསན་པ་དེ་དང་། གསེར་འོད་དམ་པ་ལས། བཙུན་པ་བཅོམ་ལྡན་འདས་གསེར་འོད་དམ་པ་མདོ་སྡེ་དབང་བོའི་རྒྱལ་བོ་དེ་ལ་མཆོད་པའི་སླད་དུ་བདུག་པ་སྣ་ཚོགས་ཀྱི་འཁྲི་ཤིང་དག་འབྱུང་བར་འགྱུར་ཏེ། དེ་དག་སྐད་ཅིག་ཐང་ཅིག་ཡུད་ཙམ་དེ་ལ། རྒྱལ་བོ་ཆེན་པོ་བདག་ཅག་བཞིའི་རང་རང་གི་ཁང་བའི་སྟེང་གི་བར་སྣང་ལ་སྤོས་དང་བདུག་པ་སྣ་ཚོགས་ཀྱི་འཁྲི་ཤིང་དག་གི་གདུགས་རྣམས་སུ་གནས་པར་འགྱུར། ཞེས་དང་། ཡང་། དེ་ཉིད་ལས། སྤོས་དང་གུ་གུལ་དང་ཙན་དན་དང་། ག་བུར་དང་། དུ་རུ་ཀ་དང་། ཨ་ཀ་རུ་དང་། པོག་དཀར་བོ་ལ་སོགས་པ་འདི་དག་མཉམ་པར་སྦྱོར་བའི་སྔགས་འདི་བཟླས་པའི་རྒྱལ་བོ་ཆེན་པོ་རྣམ་ཐོས་ཀྱི་བུ་སྤྱན་དྲངས་པར་བྱའོ། །ཞེས་དང་། ཐུའུ་བཀྭན་ཆོས་ཉིས། གསང་འདུས་རྩ་རྒྱུད་སོགས་སུ། དྲི་ལ་རྣམ་གསུམ་ཤེས་བྱས་ནས། །ཞེས་པའང་ཁུངས་སུ་བཀོད་དོ། །འདུལ་བ་མེ་ཏོག་ཕྲེང་རྒྱུད<སྡེ་དགེ་བསྟན་འགྱུར﹙﹝ཤུ﹞ ༥༣ ན ༥﹚ལས། སངས་རྒྱས་སྐུ་གཟུགས་གྲོང་སོགས་སུ། །སྤྱན་དྲངས་པ་ནི་གསུངས་པ་བཞིན། །དེར་ནི་ཆག་ཆག་བྱུགས་པ་དང། །སྲང་གི་བཞི་མདོར་ས་གཞི་ལ། །སྣ་ཚོགས་མེ་ཏོག་བཀོད་པ་ཡིས། །རབ་ཏུ་མཛེས་པར་བྱེད་པ་ཡིན། །ཙན་དན་ཨ་གར་བུ་རམ་གྱི། །བདུག་སྤོས་ཀུན་ནས་དབུལ་བར་བྱ། །ཞེས་དང་། ཡང་མཉན་ཡོད་དུ་སངས་རྒྱས་བཞུགས་པའི་སྤྱན་སྔར་མཆོད་པའི་སྤྲིན་ཕུང་འཁྲིགས་པའི་ལོ་རྒྱུས་སོགས་མདོ་ལས་བྱུང་བ་རྣམས་ནི་བསང་གི་ཁུངས་སོ། །

གཞན་ཡང་ཀརྨ་ཆགས་མེད་ཀྱིས། བསང་གི་རྒྱུད་བྱུང་གང་ནས་བྱུང་། །གྲངས་མེད་བསྐལ་བའི་སྔོན་རོལ་དུ། །བཅོམ་ལྡན་ཤཱཀྱ་ཐུབ་པ་ཉིད། །རྒྱལ་བོ་ཆོས་ཀྱི་དབང་ཕྱུག་གྱུར། །དེ་ཡིས་སངས་རྒྱས་མཆོད་པའི་ཕྱིར། །སྤོས་ཀྱི་རིལ་བུ་གཅིག་བསྲེགས་ནས། །སིལ་སྙན་དཀྲོལ་ཞིང་བསང་མཆོད་མཛད། །སྤོས་སྤྲིན་ན་བུན་ཆེན་པོ་ཡིས། །ཞག་བདུན་བར་དུ་འཛམ་གླིང་ཁྱབ། །དེ་ནས་བསང་བྱུང་གང་ནས་བྱུང་། །སློབ་དཔོན་འཕགས་པ་ཀླུ་སྒྲུབ་ཀྱིས། །འཛམ་གླིང་སྤྱི་བསང་བསྡུས་པ་བརྩམས། །རྒྱ་གར་ལྷ་འདྲེ་ཐམས་ཅད་མཉེས། །རྡོ་རྗེ་གདན་གྱི་གཙུག་ལག་གྲུབ། །དེ་རྗེས་སློབ་དཔོན་པདྨ་ཡིས། །ཞི་བརྔན་བསང་གསུམ་ཆོ་ག་མཛད། །བོད་ཀྱི་ལྷ་འདྲེ་ཐམས་ཅད་མགུ། །དཔལ་གྱི་བསམ་ཡས་གཙུག་ལག་གྲུབ། །དེ་རྗེས་རང་བྱུང་རྒྱལ་བ་ཡིས། །འཛམ་གླིང་སྤྱི་བསང་རྒྱས་པ་མཛད། །ཁམས་སོགས་ས་བདག་ཀླུ་གཉན་དགའ། །སོག་གི་ཆུ་ལ་ཟམ་པ་བཙུགས། །སྔོན་གྱི་སྲིད་པ་དེ་བཞིན་དུ། །ད་ལྟ་རྣལ་འབྱོར་བདག་ཅག་གི། །བཟང་ཤིང་སྣ་ཚོགས་བསྲེགས་པ་ཡི། །འབྲུ་སྣ་ཕྱེ་མར་ཟས་ཕུད་མཆོད། །ཇ་ཆང་འོ་ཞོའི་ཕུད་ཀྱིས་མཆོད། །ཅེས་དང་།

ཡང་། སྔགས་འཆང་ཆོས་རྗེ་བས། དུག་ཁྲག་ཡུངས་ཀར་གུ་གུལ་ནག་པོ་སོགས། །དྲག་པོའི་རྫས་མཆོག་སྦྱར་བའི་མཐུན་པའི་སྤོས། །རོ་སོལ་མེ་ཡིས་བསྲེགས་པའི་དུད་སྤྲིན་འདིས། །ཞེས་དང་། རེ་མ་ཏིའི་དམག་ཟོར་གྱི་མན་ངག་ལས། གསུར་ཆེན་མ་མོ་མཉེས་པར་བྱ། །སོགས་དམར་བསང་དང་ཆ་འདྲ་བ་ཞིག་ཆོ་ག་མང་བོ་ལས་གསུངས་པ་ནི། རྒྱུད་ལས་གསུངས་པའི་སྔགས་ཀྱི་ཞལ་ཤེས་ལས་རྟོགས་པ་མ་གཏོགས་འདིར་སྐབས་སུ་མ་བབས་སོ། །

གཞན་ཡང་། རྒྱལ་དབང་ལྔ་བས་ཞང་ཞུང་ཤེས་རབ་མེས་པོའི་གཡུང་དྲུང་བོན་གྱིས་སྲོལ་བཏོད་པར་བཞེད་དེ། གངས་རིའི་དཔལ་ལྡན་སཱ་ལའི་ལྗོངས་ཆེན་པོའི། །ལྷ་ཀླུ་གཞི་བདག་དགའ་བར་བྱེད་པའི་བསང་། །ཞང་ཞུང་གཤེན་རབ་མེས་པོའི་རྗེས་འབྲང་བའི། །གཡུང་དྲུང་བོན་གྱིས་སྲོལ་བཏོད་ཐོག་མར་དར། །ཞེས་པ་ལྟར། དུས་གསུམ་གཤེན་རབ་ཀྱི་འབྱུང་ཁུངས་དང་མཛད་པའི་རྒྱུད་འདུས་པ་རིན་པོ་ཆེ་གཟེར་མིག་གི་མདོ་ལས། འཁོར་མང་བོས་ཀྱང་། ལ་ལ་ནི་སེལ་བཏབ། ལ་ལ་ནི་ཁྲུས་གསོལ་ཞེས་འབྱུང་པ་ལྟར། སེལ་གྱི་ཆོ་ག་འདི་སྟོན་པ་གཤེན་རབ་མ་བྱོན་པའི་ཡར་སྔོན་དུ་ཡོད་པ་ཡིན་ལ། སྤྱིར་བཏང་སེལ་གྱི་གཞུང་ལ་རྩ་དཀར་འཕེལ་བའི་ཡར་སེལ་བཞི། རྩ་ནག་འགྲིབ་པའི་མར་སེལ་བཞི། མཉམ་གཉིས་བསོར་བའི་བར་སེལ་བཞི་བཅས། དབྱེ་བ་ཆེན་པོ་བཅུ་གཉིས་ཡོད། དེ་དག་ལ་ཡང་སེལ་དཀར། སེལ་ནག སེལ་ཁུ་བཅས་ཀྱི་དབྱེ་བ་ཡོད་ཅིང་། དེ་རེ་རེ་ལ་དབྱེ་སྒོ་བརྒྱ་དང་ཉི་ཤུ་རེ་ཕྱེས་པས། སྲིད་པ་རྨང་ཆེན་སེལ་གྱི་སྒོ་སུམ་བརྒྱ་དྲུག་ཅུར་གྲུབ་པ་སོགས་བོན་གྱི་དྲི་མེད་གཟི་བརྗིད་དང་། དུག་དབྱུང་འབར་བ་ནག་པོ། ཀུན་བཟང་བསང་ནག་སོགས་ལས་ཤེས་ལ། མདོར་ན། བསང་གི་ངོ་བོ་ཡང་མནོལ་གྲིབ་མི་གཙང་བའི་རིགས་རྣམས་བསང་བའམ་དག་པར་བྱེད་པ་སྟེ། གཉའ་ཁྲི་ལྷ་ཡུལ་ནས་ཕེབས་ཚུལ་གསུངས་སྐབས་ཀྱང་ཡབ་ཀྱི་ཞལ་ལས། གནམ་ལྷ་དོག་ལ་གཤེགས་པ་ན། མི་ཡུལ་བཙོག་དང་མནོལ་ཆེ་བས། ཡ་ངལ་གྱིས་སྣ་དྲོངས་ཤིག མཚེ་མིའི་སྐུ་ཡི་གཡས་རྟེན་ཅིག ཙོ་མིས་སྐུ་ཡི་གཡོན་རྟེན་ཅིག ཡ་ངལ་གྱིས་སེལ་དང་སངས་ཀྱིས། གསུངས་པ་ལས་ཤེས་ལ། ཡང་བོད་རྗེ་འཚོལ་བའི་ཤེས་པ་ཅན་མི་བཅུ་གཉིས་ཀྱི་གྲས་སུ་གཙང་ཤེས་སེལ་འདེབས་ཡོད་པར་གཞིགས་ན། དེའི་ཡར་སྔོན་ནས་བསང་གི་ཆོ་ག་ཡོད་པར་རྟོགས་ནུས། འདི་ལ་ཡང་དཔྱད་གཞི་ཧ་ཅང་ཆེ་བར་སེམས་ཏེ། གནའ་རྫས་རྟོག་ཞིབ་པས་ཆབ་མདོའི་ཁ་རུབ་ནས་རྡོ་བརྩིགས་སྒོ་མོ་གཉིས་རྙེད་དེ། བསང་ཁྲི་ཡིན་པར་ངོས་བཟུང་བར་མ་ཟད། ལོ་ངོ་ལྔ་སྟོང་ལྷག་གི་སྔོན་དུ་བོད་ལ་ལྷ་བསང་ཕུད་སྲོལ་པར་བཤད་དོ། །

གཞན་ཡང་། བོད་རྒྱལ་སྲོང་བཙན་སྒམ་པོའི་དུས་སུ། དགྲ་སླེབས་ཚེ་མེ་སྦར་ནས་ཕན་ཚུན་བརྡ་གཏོང་ཞེས་པ་ལྟར། བཙན་པོའི་སྐབས་སུ་དུས་ཟིང་གི་འགྱུར་ལྡོག་གང་འདྲ་ཞིག་ལ་འཕྲད་ཀྱང་། མེ་དང་དུ་བ་ལ་བརྟག་ནས་ཆབ་སྲིད་ཀྱི་བྱ་བ་མཛད་སྲོལ་ཡོད་པས། རིམ་གྱིས་འགྱུར་ནས་ཛ་དྲག་གི་སྐབས་དེར་ལྷ་འབོད་ཀླུ་འབོད་བཏང་ནས་དཀར་བསང་དམར་བསང་ཕུད་སྲོལ་འདི་བྱུང་བར་ཡང་མངོན་ཏེ། དེབ་དཀར་ལས་བཙན་པོ་རྗེ་བློན་རྣམས་ལོ་ལྟར་མནའ་སྐྱེལ་ཞིང་། དེ་དུས་ལུག་ཁྱི་སྤྲེའུ་གསུམ་དམར་མཆོད་དུ་འབུལ། ལོ་གསུམ་རེ་ན་མནའ་ཆེན་སྐྱེལ་ཞིང་། མཚན་གྱི་དགུང་ལ་རྟ་ཕྱུགས་བོང་བུ་རྣམས་དམར་མཆོད་བྱེད། སྲོག་ཆགས་རྣམས་ཀྱི་རྐང་ལག་བཅད་ཅིང་དོན་སྣོད་མདུན་དུ་སྤངས་ཏེ། བན་དྷི་ཞིག་གིས་ཆོ་ག་གཏོང་ཞེས་པ་འདི་ཡང་སྔོན་གྱི་ཚེ་བོད་དུ་ལྷ་བསང་གཏོང་བའི་ཁུངས་ཡིན་པར་དཔྱད་གཞི་ཅུང་ཆེ་བར་སེམས་སོ། །

ཚུལ་དེ་ལྟ་བུའི་ཤན་ཞུགས་ཐེབས་ནས་གླིང་སྒྲུང་འཛམ་གླིང་སྤྱི་བསང་ལས། ཀོང་བོའི་བོན་རི་མཐོན་པོའི་གཡོན་ཕྱོགས། རི་ནག་པོ་དགུ་བརྩེགས་ཀྱི་མདུན་ངོས་སུ། མི་མགོའི་ལབ་ཙེ་རྔམ་པ། པགས་པའི་རླུང་རྟ་གཡོ་བ། རྒྱུ་མ་རློན་པའི་རྨུ་ཐག་འཐེན་པ། ཚིལ་བའི་ཅོད་པན་འཕྱང་བ་ཞིག་བྱས་ཏེ་བདུད་སྲིན་རྣམས་མཆོད། ཅེས་ནག་ཕྱོགས་པ་ལ་སེམས་ཅན་བསད་ནས་དམར་མཆོད་བྱེད་སྲོལ་དར་ལ། དེ་ལས་ལྡོག་སྟེ་གཡུལ་འགྱེད་ཀྱི་ཛ་དྲག་སྐབས། དཀར་ཕྱོགས་པ་མཆོད་ཚུལ་ཡང་ཧོར་གླིང་གཡུལ་འགྱེད་ལས། འདན་མས་ཧོར་དམར་ནག་བཅུ་གཉིས་ཀྱི་ལས་དམག་དེ་ལྟ་བ་མིག་གིས་མི་བཟོད་པ་ཞིག་བྱས་ནས་གླིང་ལ་གཏད་ཡོད་པ་མཐོང་ནས། དེ་རིང་དཔའ་དེ་བྱས་ཅིག་གི་རྟིང་མ་མ་བླངས་ན། ཕོ་ཤི་ལེ་དགུ་བས་མཐུ་བསམས་ནས། ཉིན་རི་ངོས་ནས་བ་ལུ་བཏུས། སྲིབ་རི་ངོས་ནས་ཤུག་པ་བཏུས། ཉིན་སྲིབ་བར་ནས་མཁན་པ་བཏུས་ནས། ལྷ་བསང་སྤྲིན་དཀར་ལངས་འདྲ་ཞིག་བཏང་ནས་དགྲ་ལྷ་དཔངས་བསྟོད་བྱས། ཞེས་པ་ལས་འཚུབ་ཆེ་བའི་སྐབས་སུ་ཅི་འབྱོར་གྱི་དཀར་བསང་ཕུད་སྲོལ་གྱི་རྣམ་པ་ཞིག་མཐོང་ངོ་། །

འོན་ཀྱང་། སློབ་དཔོན་པདྨ་འབྱུང་གནས་ཀྱིས་བསང་རྫས་ལ་དག་ཐེར་དང་། ལྷ་མཆོད་འདྲེ་བཀར་གྱི་མཛད་འཕྲིན་གནང་སྟེ། བསམ་ཡས་ཆོས་འཁོར་བཞེངས་པའི་སྔོན་འགྲོ་སོགས་སུ་བསང་མཆོད་མཛད་དེ་དར་སྤེལ་བཏང་བས། ད་ལྟ་བོད་ཀྱི་སྐྱ་སེར་ཕོ་མོ་ཀུན་གྱིས་ལྷ་བསང་གཏོང་སྲོལ་འདི་བྱུང་བ་ཡིན།

༢ བསང་རྫས། བསང་མེ་ལའང་ཐུའུ་བཀྭན་ཆོས་ཉིས། མེ་ཡང་རྡོ་སོལ་གྱི་མེ་མི་རུང་ཞིང་བ་ལྕི་དང་ཤིང་སོལ་སོགས་ཀྱི་མེ་གཙང་མ་སྟ་གོན་བྱའོ། །ཁྱད་པར་དུ་གཙང་ཕུད་ཡིན་པ་གལ་ཆེ་སྟེ། རྒྱལ་སྲས་འཇིགས་གྲགས་ཀྱིས། མགྲོན་རིགས་དགྱེས་པའི་མཐུན་རྫས་འབྱོར་བཞིན་དུ། །སླ་ཆོས་ཀྱིས་དོར་ཕྱེ་མར་ཅུང་ཟད་ཀྱང་། །རང་ཉིད་ཟ་ཞིང་འཁྱེར་འདོད་ཀྱིས་ཟིན་པས། །མགྲོན་རིགས་དགྱེས་པའི་ལྷ་བསང་འབྱུང་བ་དཀའ། །གསུངས་པས་ཤེས་ལ། ཡོངས་གྲགས་སུ་བསང་རྫས་ལ། རིན་ཆེན་སྣ་ཚོགས་དང་དར་ཟབ་འབྲུ་སྣ། སྨན་སྣ། ཤུག་པ། སྤ་མ། ཙན་དན། ཨ་གར། ཀུར་གུམ། སྤང་སྤོས། རྒྱ་སྤོས། བྲག་སྤོས། ཞོ་ཤ་གསུམ། གེ་སར་གསུམ། འབྲས་བུ་གསུམ། མཁན་པ་རིགས་གསུམ། ད་ལི། སྒྲོན་ཤིང་། སྤེན་དཀར་སོགས་རི་བཟང་བོའི་རྩི་སྔོན་སྣ་ཚོགས་དང་། མར་གྱིས་སྤྲུས་པའི་བསང་རྩམ་དང་། དཀར་གསུམ་མངར་གསུམ་སོགས་ཟས་སྣ་ཚོགས་གཙང་མ་མེར་བསྲེགས་ཏེ། སྤྱན་གཟིགས་མདའ་མདུང་རལ་གྲི་ངར་ཆེན། དར་ཚོན་མདའ་དར། འཕྱར་དར་སྣ་ཚོགས། གོ་ཁྲབ་སོགས་བཤམས། རོལ་མོ་རྔ་དུང་སིལ་སྙན་སྣ་ཚོགས་དཀྲོལ་ཏེ། སྔགས་དང་ཏིང་འཛིན་གྱིས་བྱིན་གྱིས་བརླབས་ནས་འདོད་ཡོན་ཉེར་སྤྱོད་ཀྱི་མཆོད་པ་དང་བཅས་འབུལ་བའོ། །དེ་མཚུངས་སུ་གླིང་སྒྲུང་འཛམ་གླིང་སྤྱི་བསང་ལས། དེའི་དུས་སུ་གླིང་གི་ལྷ་བསང་བ་རྣམས་རྨ་ཀུ་རའི་ལྷ་རི་ཁྱུང་རྩེར་འཚོགས་ཏེ། བསང་མཆོད་བྱས་ཤིང་ཕུན་སུམ་ཚོགས་པའི་བསང་རྫས་ཡངས་ཤིང་རྒྱ་ཆེ་བ་གསོས་ཁར། ཁ་དོག་སྣ་ལྔའི་དར་ཕྲེང་། གཞན་ཡང་མཛེས་སྡུག་གཟུགས་ཀྱི་བྱེ་བྲག སྙན་འཇེབས་རོལ་མོའི་སྒྲ་དབྱངས། རེག་འཇམ་ལྷ་རྫས་ཀྱི་གོས་བཏགས། གྱ་ནོམ་པའི་འདོད་ཡོན་གྱི་རྣམ་པ་འབུམ་ཕྲག་མང་བོས་མཆོད་ཅིང་། གླིང་དཀར་བསང་བ་རྣམས་ཀྱིས་སྐྱིད་པའི་གླུ་བླངས། སྤྲོ་བའི་དར་འཕྱར། སྙན་པའི་དུང་བུས། གསེར་གྱི་རྔ་ཆེན་བརྡུངས་ཤིང་། ཀི་སྭོ་ལྷ་རྒྱལ་གྱི་སྒྲ་སྐད་ལྡིར་ཞིང་མཆོད། ཅེས་བཤད་དོ། །

ཡང་། བྱེ་བྲག་ཏུ་འཕྲིན་ལས་བཞིའི་བསང་ཤིང་གི་དབང་དུ་བཏང་ན། ཀརྨ་ཆགས་མེད་ཀྱིས། སུར་དཀར་དུང་ལོ་ཞི་བའི་ཤིང་། །སྟག་པ་གསེར་ལོ་རྒྱས་པའི་ཤིང་། །ཤུག་པ་ཙན་དན་དབང་གི་ཤིང་། །ཨ་གར་དྲི་དང་དྲག་པོའི་ཤིང་། །ཞེས་དང་། འབུལ་ཡུལ་གྱི་དབང་དུ་བཏང་ན། དེ་ཉིད་ཀྱིས། བ་ལུ་དཀར་བོ་ལྷ་ཡི་ཤིང་། །འོམ་བུ་ཀླུ་ཤིང་སྨན་གྱི་མཆོག། སྟག་པ་སེར་བོ་གཉན་གྱི་ཤིང་། །སྤེན་མ་དངོས་གྲུབ་གཡུང་དྲུང་ཤིང་། །ཉ་བྲིད་ས་བདག་དགའ་བའི་ཤིང་། །ཞེས་ཀྱང་གསུངས་སོ། །དེ་ཡང་མཆོད་གཏོར་བཅའ་ཚུལ་དང་། བསང་བསྔོའི་སྔགས་འགྲེལ། བསང་རྫས། ཡས་མགྲོན་དང་མས་མགྲོན་གྱི་ཁྱད་པར། བསང་གི་དག་སྦྱོར། མཆོད་ཚུལ། མཇུག་ཏུ་གསེར་སྐྱེམས་འབུལ་བ་དང་། གཡང་འགུགས་དང་བཟོད་གསོལ་སོགས་ཞིབ་པར་ཐུའུ་བཀྭན་ཆོས་ཉིའི་བསང་ཆོག་བཀྲ་ཤིས་དབྱངས་སྙན་གྱི་ལྷན་ཐབས་བཀྲ་ཤིས་སྒོ་བརྒྱ་འབྱེད་པའི་ལྡེ་མིག་ལས་རྟོགས་པར་གྱིས་ཤིག

གཞན་ཡང་། ཆོས་སྲུང་དང་ཡུལ་ལྷ་རེ་རེ་ལ་གཏོར་མ་མི་འདྲ་བ་བཅའ་སྟངས་དང་། བསང་རྫས་ལ་ཡུལ་ལུགས་སོ་སོའི་ཁྱད་ཆོས་རེར་ཡང་ཡོད་ལ། ད་ལྟ་ལྟ་ངན་རེའི་ཤན་ཞུགས་ཐེབས་ཏེ། སེམས་ཅན་གྱི་གསོན་སྙིང་དམར་འདོན་བྱེད་པའམ། གསོལ་བ་བོའི་ལུས་ཀྱི་ཁྲག་གཏར་སྟེ་དམར་མཆོད་བྱེད་པ་ནི། ནང་བསྟན་ཆོས་ལུགས་དང་རྒྱབ་འགལ་ཏུ་གྱུར་བར་མ་ཟད། ད་ལྟའི་དུས་རབས་འདིར་འཇིག་རྟེན་མི་ཆོས་དང་ལྟག་སྤྲོད་ཏུ་སོང་བས་དགག་བྱ་ཁོ་ནའོ། །

ཡང་། ཞང་བོད་ཏི་སེའི་འོད་ཅེས་པར། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་འབྱུང་བར་གཞིགས་ན། ད་ལྟའི་བསང་རྫས་སུ། ནས་བརྔོས་པ་ལ་ཨ་མདོའི་སྐད་དུ་ཤེར་རྩིག་ཏུ་འབོད་པ་འདི་ཁྲག་གི་སྐད་དོད་ཤེ་ཚུ་བྱ་བ་དེ་བརྡ་ཟུར་ཅུང་ཟད་མ་གཏོགས་མ་འགྱུར་བར་ཡོད་ལ། སྔོན་གྱི་བག་ཆགས་ཀྱི་དབང་གིས་ནས་བརྔོས་ཚེ་མདོག་དམར་ནག་ཏུ་གྱུར་བའི་ཆ་ནས་ཁྲག་ཚབ་ཏུ་ལྷ་སྲུང་ལ་ཕུལ་བར་འདོད་དོ། །དེའི་ཤེས་བྱེད་ནི་ཀརྨ་ཆགས་མེད་ཀྱིས། ཤེལ་ཚིག་ཁྲི་དཀར་སྟོང་ནག་འདི། །རྟ་ནོར་ལུག་གསུམ་ཁྱུ་རུ་དམིགས། །ཞེས་དང་། ཤེལ་ཚིག་ཁྲི་དཀར་སྟོང་ནག་འདི། །ཁྲ་བོ་ཀུ་རུ་རྟ་བརྒྱ་ཡིན། །ཁམ་པ་འགྱིང་བ་གཡག་བརྒྱ་ཡིན། །ཟིལ་ཆུང་ཐུ་ལེ་འབྲི་བརྒྱ་ཡིན། །དཀར་བ་གཡང་མོ་ལུག་བརྒྱ་ཡིན། །གཡུ་ར་བརྒྱ་དང་ཤེལ་ར་སྟོང་། །བ་ཟོག་བརྒྱ་དང་བེའུ་ཁྲི་སྟོང་། །ས་བདག་ཀླུ་གཉན་རྣམས་ལ་འབུལ། །ཞེས་དང་། ཨ་ལགས་རྒྱལ་བོའི་ལབ་བསྟོད་དུའང་། ཀྱེ་ཀྱེ། ཤེལ་ཚིག་ཁྲི་དཀར་སྟོང་ནག་འདི་དག་ནི། །དཀར་མོ་ལུག་བརྒྱའི་འབའ་སྒྲ་འུ་རུ་རུ། །ནག་མོ་འབྲི་བརྒྱའི་ངུར་སྒྲ་ཏོངས་སེ་ཏོང་། །ཁྲ་བོ་རྟ་བརྒྱའི་འཚེར་སྐད་སི་ལི་ལི། །ཞུར་བོ་ར་བརྒྱའི་འབའ་སྒྲ་ཙེར་རེ་རེ། །འབུལ་ལོ་ས་བདག་ཀླུ་གཉན་རྣམས་ལ་འབུལ། །ཞེས་དང་། དེ་མིན། ཀརྨ་ཆགས་མེད་ཀྱིས། ཁྱད་པར་རྟ་གླང་ར་ལུག་དང་། །མཛོ་གཡག་སྦལ་སྦྲུལ་ལ་སོགས་དང་། །ཞེས་སྦལ་སྦྲུལ་སོགས་ཀྱང་བསང་རྫས་སུ་བཤད་ཀྱང་དེ་ནི་བོད་སྲོལ་དུ་མ་དར་བ་ཞིག་གོ།

བསང་རྫས་མ་དག་པའི་ཉེས་དམིགས། བསང་རྫས་མ་དག་ན་ཇི་སྐད་དུ། རྒྱལ་སྲས་འཇིགས་མེད་ཡེ་ཤེས་གྲགས་པའི་གསུང་ལས། གཙང་མིན་དབྱེ་བ་མེད་པའི་གང་བྱུང་ནས། །རྣམ་རྟོག་རྩིང་བོས་བསྒྲུབས་པའི་བསང་ཤིང་རྣམས། །གང་བྱུང་གནས་སུ་འོང་བའི་མི་གཙང་བ། །འབུ་སྲིན་མང་བོ་བཅས་ཏེ་བསྲེགས་པ་མཐོང་། །མི་གཙང་གིས་བགོས་རྡོག་པས་བརྫིས་པ་ཡི། །བསང་ཤིང་དུད་པས་སླར་ཡང་འབག་བཙོག་འགྱུར། །འབུ་སྲིན་མང་བོར་བཅས་ཏེ་བསྲེགས་པ་ཡིས། །གཞོབ་དང་སྡིག་ཚོགས་སྒྲུབ་པའི་བསང་དེ་དོར། །ཞེས་དང་། ར་ག་ཨ་སེས་མདོ་སྡེ་བཀའ་གཏེར་གཉིས་པ་ལས་བསྡུས་པ་བསང་ཤེས་པའི་ཕན་ཡོན་དང་མ་ཤེས་པའི་ཉེས་དམིགས་གསལ་བར་བཀོད་པ་ལས། བསང་དང་ཆབ་གཏོར་ལའང་མ་ཚར་བར་དུ་ཤ་ཁྲག་དང་། ཆང་སྒོག་སོགས་བཟའ་བ་དང་བཏུང་བ་སོགས་བྱས་ན་གཞི་བདག་ཐམས་ཅད་བརྒྱལ་ནས་འགྲོ་བས་མི་རུང་། བསང་རྫས་རྣམས་ལ་དམེ་ཕོ་སྡིག་ཅན་གྱིས་བསང་ཤིང་ཐུ་བ་དང་། ཡུགས་ས་མས་ཕྱེ་ཕུད་འཐག་པ་དང་། སེར་སྣས་འབག་པ་དང་། མི་གཙང་བའི་རྫས་དང་། ཚེར་མ་ལ་སོགས་པ་དུག་ཤིང་ལ་འཛེམ། ཆོ་ག་གཞན་མ་ཤེས་པ་ལ་སྐྱོན་འགལ་ཆུང་། བསང་མ་ཤེས་ན་འཇིག་རྟེན་ཁམས་ཀྱི་གཞི་བདག་ཕྲག་དོག་ཆེ། ཀླུ་དང་ས་བདག་གཉན་རྣམས་ལ་མཐོང་དུག་དང་། བལྟས་དུག ཁ་རླངས་ཀྱི་དུག་སོགས་ཡོད་པས་དམིགས་རིམ་དང་ཆོ་ག་ཤེས་པ་གལ་ཆེ། གཞན་ཡང་། ར་ག་ཨ་སེའི་བསང་བཤད་དེར། ཉིན་ཞིག་ཁོའི་ཉམས་སྣང་ལ་གཞི་བདག་མང་བོས་འོ་དོད་བོས་ཏེ། བརྒྱལ་བ་དང་། ན་བ། ཞ་བ་དང་། ལོང་བ། ལུས་ལ་རྣག་ཁྲག་ཆུ་སེར་བབས་ནས་ངུ་འབོད་བྱེད་པ་མཐོང་བར། རྒྱུ་མཚན་དྲིས་པས། ཁོ་ཚོ་དམ་ཉམས་སྔགས་པ་ཞིག་གིས་བསང་མགྲོན་དུ་བཀུགས་པས། དམེ་ཅན་ཞིག་གིས་བསང་ཤིང་འཐུས་པ་དང་། རྩི་བཅུད་འོ་ཞོ་ལ་མི་དང་ཁྱི་དམར་ཞིག་གིས་འཐུང་འཕྲོ་དང་། མར་ལ་བུད་མེད་ཅིག་གིས་མཚན་མར་རེག་ནས་ལག་པ་མ་བཀྲུས་པ་སོགས་ཀྱི་རྐྱེན་འགའ་ལས་ཉེས་ཚུལ་གསུངས་པ་ལྟ་བུའོ། །ཁྱད་པར་དུ་ཀླུ་དང་ས་བདག་ལ་དཀར་མཆོད་ཡིན་པས། མཆོད་པ་པོས་དཀར་ཟས་ལ་རོལ་ནས། གཙང་སྦྲ་སྔོན་དུ་བཏང་ནས་ཁྲུས་དང་གོས་དཀར་བོ་གྱོན་ནས་དཀར་མཆོད་བྱེད་པ་ལས། ཤ་ཆང་སྒོག་ཙོང་སོགས་ཀྱིས་སྦགས་ཏེ་ཀླུ་བསང་གཏོང་བ་མི་རུང་ངོ་། །

༤ བསང་གི་དབྱེ་བ། ཡུལ་སྲོལ་འདྲ་མིན་གྱི་དབང་གིས་བསང་གི་དབྱེ་བ་ལ་སྣ་ཚོགས་མཐོང་སྟེ། རི་བསང་དང་། གྲོང་བསང་། ཐབ་བསང་། ལམ་བསང་། ཐོག་བསང་རྣམས་སུ་མ་འདུས་པ་མེད། ༡ རི་བསང་ནི། རི་མཐོ་ས་གཙང་ངམ་ཁ་དབུགས་དྭངས་པའི་ཡུལ་ལྷ་གཞི་བདག་གི་གནས་རིར་བསང་མཆོད་ཀྱི་ཆོ་ག་བྱེད་སྲོལ་ཡོད་པ་དེ་ཡིན། ༢ གྲོང་བསང་ནི། གྲོང་དང་གྲོང་ཁྱེར་གྱི་ལྷ་ཁང་མདུན་ནས་བསང་མཆོད་བྱེད་སྲོལ་ཡོད་པ་དེ་ཡིན་ལ། དཔེར་ན། ལྷ་སའི་ཇོ་ཁང་གི་མདུན་ནས་བསང་མཆོད་བྱེད་པ་ལྟ་བུའོ། །༣ ཐབ་བསང་ནི། གནས་མཇལ་བ་དང། ཚོང་འགྲུལ། ཇག་ལས་བྱེད་པ་སོགས་ཀྱིས་ལག་ལེན་དུ་བསྟར་བ་སྟེ། ཇ་བསྐོལ་རྗེས། སུམ་ཚུགས་ཐབ་རྡོའི་བར་དུ་བསང་རྩི་གཞན་འབྱོར་ན་རབ། མ་འབྱོར་ན་རྩམ་པ་ཉུང་ཤས་ཀྱིས་བསང་གསོལ་གཏོང་སྟངས་དེའོ། །༤ ལམ་བསང་ནི། སྐུ་གསུང་ཐུགས་རྟེན་གདན་འདྲེན་པ་འམ། ཡང་ན་བླ་དཔོན་བསུ་སྐྱེལ་སྐབས་ཕེབས་ལམ་དུ་བསང་གསོལ་གཏོང་བ་དེའོ། །༥ ཐོག་བསང་ནི། ཁང་ཐོག་ནས་བསང་མཆོད་བྱེད་པ་དེའོ། །

༥ ལྷ་བསང་གཏོང་ཡུལ་དང་དགེ་མཚན། ལྷ་བསང་གཏོང་ཡུལ་ལ། རྒྱལ་དབང་ལྔ་བས། སྤངས་རྟོགས་ཡོན་ཏན་ཕ་མཐའ་གཞལ་དཀའ་ཡང་། །ཡེ་ཤེས་ལྷ་ཡི་ཚད་བཟུང་ག་ལ་ནུས། །གྱ་གྱུའི་སེམས་ཀྱི་རོལ་བ་མཐའ་ཀླས་པས། །འཇིག་རྟེན་ལྷ་འདྲེའི་གྲངས་ཀྱང་ག་ལ་གཞལ། །ཞེས་གསུངས་ལ། སྡོམ་དུ་བསྡུས་ནས་སྨྲས་ན། དཀོན་མཆོག་སྲི་ཞུའི་མགྲོན། མགོན་པོ་ཡོན་ཏན་གྱི་མགྲོན། རིགས་དྲུག་སྙིང་རྗེའི་མགྲོན། གདོན་བགེགས་ལན་ཆགས་ཀྱི་མགྲོན་ཏེ་བཞིར་འདུས་ལ། དེ་ཡང་མཆོག་ལ་མཆོད་པ་དང་། དམན་པར་སྦྱིན་པ་གཏོང་བ་ཡིན། མགྲོན་ཡུལ་གྱི་ཁྱད་པར་ཞིབ་རྒྱས་ཐུའུ་བཀྭན་བསང་ཆོག་ལས་གསལ་ལ། དེ་དག་ལས་གང་གཙོ་བྱེད་པ་ནི། རྒྱལ་དབང་ལྔ་བས། དེང་དུས་ལྷ་ཀླུ་ཞར་བྱུང་ཙམ་བྱས་ནས། །བླ་མ་ཡི་དམ་གཙོར་བཏོན་བསང་ཡིག་རྣམས། །དགོས་དོན་མ་རྟོགས་གྱ་ཚོམ་སྨྲ་བའི་ཚིག མཆོད་རྟེན་ནག་འཇམ་བྲག་ལ་དཀར་རྩི་བཞིན། །ཞེས་ཀྱང་གསུངས་སོ། །དེ་ལས་གཞན་ལྷ་བསང་གཏོང་བ་ནི། མཁས་གྲུབ་ཀརྨ་ཆགས་མེད་ཀྱིས། དེ་ཡང་ཕྱི་རབས་རྣལ་འབྱོར་བས། །གང་འདོད་འཕྲིན་ལས་བསྒྲུབ་པ་དང་། །སངས་རྒྱས་བསྟན་པ་བསྲུང་བ་དང་། །སྒྲུབ་པའི་བར་ཆད་སེལ་བ་དང་། །འཁོར་སྲུང་རྐྱེན་བཟློག་གྲགས་པ་སྤེལ། །ལྷ་ཁང་བཞེངས་དང་མཆོད་རྟེན་བརྩིགས། །མི་ནད་ཡམས་ནད་བཅད་པ་དང་། །མཁར་ལས་བྱེད་དང་བཀྲ་ཤིས་འདོད། །ཐག་རིང་མགྲོན་ལ་འགྲོ་བ་དང་། །ཆུ་ཆེན་གྲུ་ལ་འགྲོ་བ་དང་། །ལམ་འཕྲང་བསྒྲོད་དང་དམག་ལ་འགྲོ། །ལྷོ་བལ་སྦས་ཡུལ་འགྲོ་བ་དང་། །ཆེ་དྲག་བྱ་བ་ཐམས་ཅད་ལ། །སྔོན་དུ་བརྔན་འདི་བྱས་པས་འགྲུབ། །ཅེས་སོ། །

༦ བསང་ཡུལ་སྤྱན་འདྲེན་པའི་ཚུལ། བསང་མགྲོན་ཐམས་ཅད་སྤྱན་དྲངས་པ་དང་དུས་མཚུངས་སུ། འཁོར་འདས་ཀྱི་མགྲོན་ཐམས་ཅད་སྟེང་ནས་སྤྲིན་འཐིབས་པ་དང་ཁ་བ་བུ་ཡུག་འཚུབ་པ་ལྟ་བུ། འོག་ནས་ས་ཆེན་པོའི་རླངས་པ་ཐོན་པ་ལྟ་བུ་འུར་གྱིས་བྱོན་པའི་མོས་པ་དང་། འཇིག་རྟེན་པ་རྣམས་ཀྱང་གདུག་རྩུབ་ཀྱི་སེམས་ཞི་ནས་རང་ལ་དགའ་ཞིང་དགུ་བའི་རྣམ་པར་བསམ་པ་དང་། དེ་ཡང་སྟེང་གི་ཆ་ལ་བླ་མ། དེའི་འོག་ཏུ་ཡི་དམ་རྣམས་རྒྱུད་སྡེ་གོ་རིམ་བཞིན་དང་། དེའི་འོག་ཏུ་ལོངས་སྤྲུལ་གྱི་སངས་རྒྱས་རྣམས། དེའི་འོག་ཏུ་བྱང་སེམས་རང་རྒྱལ་ཉན་ཐོས་དཔའ་བོ་མཁའ་འགྲོ་ཆོས་སྐྱོང་སྲུང་མ་རྣམས། དེ་དག་གི་འོག་ཏུ་དཔལ་མགོན་དོན་ལྔ། སྡེ་བརྒྱད། འགོ་བའི་ལྷ་ལྔ་སོགས་དང་། ལོ་ཟླ་ཞག་དུས་སྤར་སྨེ། ས་བདག་ཡུལ་ལྷ་གཞི་བདག་རྣམས་དང་། འོག་གི་ས་གཞི་ལ་རིགས་དྲུག་གདོན་བགེགས་ལན་ཆགས་ཤ་འཁོན་གཉེར་བ་ཐམས་ཅད་ནག་མེར་གྱིས་འཁོད་པར་བསམ་པ་དང་།

ཡང་ན། གཏེར་མའི་ཆོག་བསྒྲིགས་རྣམས་སུ། སྤྱན་རས་གཟིགས་ཨ་རོ་ལི་ཀ་ཁ་སརྦ་ནི་ལྟ་བུ་སྐུ་ཤིན་ཏུ་ཆེ་བ་རྣམ་སྣང་གངས་ཅན་མཚོ་འདྲ་བའི་གཙུག་ཏོར་ནས་མགྲིན་པའི་བར་ལ་དཀོན་མཆོག་སྲི་ཞུའི་མགྲོན། ཐུགས་ཀ་ནས་ལྟེ་བའི་བར་ལ་མགོན་པོ་ཡོན་ཏན་གྱི་མགྲོན། སྐུ་སྨད་ཀྱི་ཆ་ལ་རིགས་དྲུག་སྙིང་རྗེའི་མགྲོན། པད་གདན་གྱི་ཆ་ལ་བགེགས་རིགས་ལན་ཆགས་ཀྱི་མགྲོན་རྣམས་འཁོད་པར་བསམ་པ་ཡང་བཤད་དོ། །

བསང་གི་དག་སྦྱོར། ལྕང་སྐྱ་རོལ་བའི་རྡོ་རྗེས་མཛད་པའི་བསང་མཆོག་ཡིད་བཞིན་དབང་རྒྱལ་ལས། ཐབས་དང་ཤེས་རབ་ཡེ་ཤེས་མེར། །སྒྲིབ་གཉིས་བསང་རྫས་བསྲེགས་པ་ལས། །ལྷན་ཅིག་སྐྱེས་དགའི་དུད་སྤྲིན་གྱིས། །མ་དག་དྲི་མ་སངས་ཕྱིར་དུ། །སྤྱན་སོགས་ལྔ་ཡི་རང་བཞིན་ཉིད། །འབྱུང་བ་ལྔ་ཡི་དྭངས་མ་ལས། །འཆི་མེད་བདུད་རྩིའི་དཔལ་རབ་སྟེར། །དྲི་ཞིམ་སྨན་གྱི་དངོས་གྱུར་བ། །རྩི་ཤིང་ནགས་ཚལ་སྣ་ཚོགས་འཁྲུངས། །ཁ་དོག་དྲི་རོ་མཐའ་ཡས་ཀྱིས། །ནད་རིགས་བཞི་བརྒྱ་རྩ་བཞི་སེལ། །གསེར་ཞུན་འཁྱིལ་འདྲའི་མེ་ལྕེ་ཡིས། །གཏི་མུག་མུན་པའི་ཚོགས་ཀུན་འཇོམས། །དུད་སྤྲིན་འཆི་མེད་ལམ་ཆགས་པས། །སྡུག་བསྔལ་གསུམ་གྱི་ཚ་གདུང་སྐྱོབ། །ཅེས་གསུངས་སོ། །

  ལྷ་བསང་གཏོང་བའི་གཟའ་སྐར། ལྷ་བསང་གི་སྐར་མ་ནི། མོན་གྲེ མེ་བཞི། མོན་གྲུ། མགོ མཆུ། ལྷ་མཚམས། ཆུ་སྟོད། ཆུ་སྨད། དབོ། ས་རི། ནམ་གྲུ། སྣར་མ། རྒྱལ། བྱི་བཞིན། ཁྲིམས་སྨད། སྨིན་དྲུག་རྣམས་ལ་བཟང་། དེ་ལྟར་བཀྲ་ཤིས་པའི་ཉི་མ་དང་འགྲུབ་པའི་སྦྱོར་བ། ཡར་ཚེས་དང་དུས་ཆེན་བརྒྱད་ལ་ཐེབས་ཡོད་པས་ལྷ་མཆོད་བཟང་། གཞན་ཡང་། ར་ག་ཨ་སེས། ཉི་ནག་བསང་བྱས་ཁྱི་ཡིས་གཡབ། །ཤར་ཕྱོགས་དམག་དྲངས་བསྟན་ལ་གནོད། །ཅེས་དང་། ཉི་མ་ནག་པོར་བསང་བྱས་ན། །ལྷ་འདྲེ་ཐམས་ཅད་འཁྲུག་པའི་གཞི། །སྟག་གི་ཉི་མར་བསང་བྱས་ན། །ལྷ་འདྲེ་ཁྲོས་ནས་ན་ཤི་དུར་གསུམ་འོང་། །ལྷ་ཀླུ་སྡེ་བརྒྱད་ལྡོག་ནས་ཕན་གནོད་མེད། །དེ་སོགས་རིགས་པས་དཔྱད་ལ་བྱོལ་བར་བྱ། །ཞེས་དང་། བསང་མི་རུང་བ་མེ་དུད་སོལ་གསུམ་ཡིན། །བསང་བྱས་བར་སྣང་ལྷ་སྲིན་ཐམས་ཅད་ལ། །མེ་ཆེན་སྣང་བ་འབྱུང་ལ་ཉེས་པ་ཆེ། །ཚེས་གཅིག་བསང་བྱས་དམེ་ངོ་ཁྲག་ངོ་གྲི་ངོ་ལྡང་། །ཚེས་དྲུག་བཅུ་དྲུག་ཉི་ཤུ་དྲུག་རྣམས་ལ། །རི་མགོར་བསང་བྱས་ལྷ་རྣམས་མི་དགའ་བས། །ལོ་ཐོག་མི་ལེགས་རྐྱེན་དུ་འགྱུར་བ་ཡིན། །ཞེས་གསུངས་ལ། རྒྱུན་བསང་ལ་ནི། ར་ག་ཨ་སེས། རྒྱུན་བསང་ཆག་མེད་ལ་ནི་བརྩི་སྲོལ་མེད། །བསང་བརྒྱ་བཏང་བ་རྒྱུན་བསང་དབུ་འཛུགས་ལ། །སྐར་སྐྱོན་མེད་ཅིང་གཟའ་སྐར་བཟང་བ་གཅེས། །གསུངས་སོ། །

ལྷ་བསང་གི་ཕན་ཡོན། བསང་གི་ལྷ་མོ་སྔོན་མོས་གཡས་བདུད་རྩིའི་བུམ་པ་དང་། གཡོན་གྱི་སྨན་གཞོང་འཛིན་པའི་བུམ་པ་ནས་བདུད་རྩིའི་ཆབ་རྒྱུན་གཏོར་ཏེ། མི་གཙང་བ་སངས་ཞིང་དག་ནས། མཆོད་པའི་སྤྲིན་ཕུང་གི་དྲི་བཟང་ཕྱོགས་ཐམས་ཅད་དུ་ཁྱབ་ནས་བསང་ཡུལ་བླ་མ་ཡི་དམ་དང་། སངས་རྒྱས་བྱང་སེམས། དཔའ་བོ་མཁའ་འགྲོ། ཆོས་སྐྱོང་སྲུང་མ། ཡུལ་ལྷ་གཞི་བདག་ཐུགས་དགྱེས་པ་ཆེན་པོས་སྡོང་གྲོགས་དང་ཕན་པ་རྒྱ་ཆེན་སྩོལ་བ་དང་། སྤྱིར་ཉེས་སྐྱོན་དང་ཁྱད་པར་དུ་གྲིབ་དང་མི་གཙང་བའི་རིགས་དག་སེལ་བྱེད་ནུས་པ་སྟེ། ཀུན་བཟང་བསང་ནག་ལས། དམེ་རྨུགས་ནད་འཚེ་མཛེ་ཡུག་དང་། །གསོན་གྱི་བང་དམེ་ཁྲག་རླངས་དང་། །གཤིན་གྱི་རོ་དུད་རོ་ལངས་སོགས། །མི་གཙང་དམེ་དགུ་ཅི་ཡང་ཤར། །འབྱུང་བ་དུག་སེལ་འདི་ཡིས་ཐུར་དུ་མནན། །ཞེས་དང་། བསང་རྒྱུད་ལེའུ་བཅོ་བརྒྱད་ལས། སྔགས་དང་ཆོ་ག་དག་ན་ལྷ་དང་བླ་མ་མཉེས་ནས་བྱིན་རླབས་འཇུག ཡི་དམ་མཉེས་ནས་དངོས་གྲུབ་འབྱུང། ཆོས་སྐྱོང་དམ་ཅན་མཉེས་ནས་ལས་བཞི་འགྲུབ། ནོར་ལྷ་གནོད་སྦྱིན་མཉེས་ནས་བཅུད་སྟོབས་རྒྱས། རིགས་དྲུག་སེམས་ཅན་ཚིམ་པས་བུ་ལོན་ལན་ཆགས་བྱང་། ཞེས་དང་། སེམས་བསྐྱེད་དམིགས་པ་གསལ་ན་ལེགས་ཚོགས་ཡོན་ཏན་འགྲུབ། །ཉེས་ཚོགས་དག་ནས་རྣམ་མཁྱེན་སངས་རྒྱས་འཐོབ། །འབྱོར་བ་ལོངས་སྤྱོད་རྒྱུན་མི་ཆད་པར་འཕེལ། །སྔགས་དང་མཆོད་རྫས་གཙང་ན་བསོད་ནམས་ཀྱི། །གཞི་མ་ཚོགས་གཉིས་རྫོགས་ནས་སྒྲིབ་པ་བྱང་། །ཕར་ཕྱིན་དྲུག་རྫོགས་མདངས་དང་གཟི་བརྗིད་རྒྱས། །འཐབ་རྩོད་དང་བྲལ་མི་ནད་ཕྱུགས་ནད་ཆད། །བཙའ་སད་སེར་བ་ཐན་པ་ལོ་ཉེས་ཞི། །རྩྭ་དང་ལྗང་བུ་ལེགས་ཤིང་ལོ་འབྲས་འཕེལ། །བཀྲ་ཤིས་དོན་འགྲུབ་དགྲ་གདོན་ཐུལ་བ་དང་། །ཚོང་དང་ཁེ་སྤོགས་དམག་ཇག་དགྲ་ལས་རྒྱལ། །འགྲོ་དོན་རྒྱ་ཆེན་འགྲུབ་པ་བསམ་འཕེལ་ནོར་བུ་འདྲ། །ཞེས་དང་། ཞུ་ཆེན་ཚུལ་ཁྲིམས་རིན་ཆེན་གྱིས་ཀྱང་། དག་བྱེད་དྲི་ཞིམ་ཆོ་ག་གང་ཞིག ཉེས་སྐྱོན་སྒྲིབ་བྱེད་ཐམས་ཅད་བྱང་ཞིང་། བདེ་ལེགས་སྟེར་བའི་ནུས་པ་དང་ལྡན་པ། བསང་གི་མཚན་ཉིད་དུ་བཞག་པ་དེའོ། །ཞེས་དང་། འཇུ་མི་ཕམ་གྱིས། འདི་ཡིས་རླུང་རྟ་རྒུད་པ་གསོ། །དགེ་མཚན་རྟེན་འབྲེལ་ཕྱོགས་མེད་རྒྱས། །སྙན་གྲགས་རྒྱལ་མཚན་སྲིད་ན་མཐོ། །མཆོག་ཐུན་དངོས་གྲུབ་ཡིད་བཞིན་འགྲུབ། །ཅེས་ཀྱང་གསུངས་ལ། གཞན་བསང་མཆོད་འགའ་ཞིག་ཏུ། རྣལ་འབྱོར་བའི་རྟོགས་པ་ལ་བག་ཐོན་པའི་ཐབས་སུ་འང་གསུངས་སྟེ། ཡོངས་གྲུབ་བདེ་གཤེགས་སྙིང་བོ་ལ། །ཀུན་བཏགས་གྲིབ་ཀྱིས་ཕོག་པ་བསང་། །འཁོར་འདས་བདེ་བ་ཆེན་པོ་ལ། །གཟུགས་འཛིན་གྲིབ་ཀྱིས་ཕོག་པ་བསང་། །ཞེས་དང་། བསང་ཤིང་ཤུག་པ། མཁན་པ། བ་ལུ་གསུམ་སྲེག་པའི་ཕན་ཡོན་ཡང་། ཐུའུ་བཀྭན་བསང་ཆོག་ལས། འཆི་བ་མེད་པའི་ཡོན་ཏན་བདུད་རྩིའི་ཤིང་། །དྲི་ཞིམ་སྤོས་ངད་དུད་སྤྲིན་ནམ་མཁར་འཁྲིགས། །ལྷ་འདྲེ་མི་གསུམ་རྨུགས་ཤིང་འཐིབ་པ་སེལ། །འོད་གསལ་མེ་ལྕེའི་འོད་གསལ་ཕྲེང་བར་འཕྲོ། །མ་རིག་རྨོངས་པའི་མུན་ནག་ཐམས་ཅད་སེལ། །མེ་སྟག་ཚ་ཞིང་བསྲེག་པའི་ངར་ལྡན་པས། །མནོལ་ནག་མི་གཙང་ལྗིན་ལྗིན་སྲེག་པར་བྱེད། །དེ་ལྟར་ཡོན་ཏན་ཁྱད་འཕགས་ཤིང་གསུམ་འདི། །ཞེས་དང་། བསང་ཤེས་པའི་ཕན་ཡོན་དང་མ་ཤེས་པའི་ཉེས་དམིགས་གསལ་བར་བཀོད་པ་ལས་ཁོང་གི་ཉམས་སྣང་ལ་ཆབ་མདོའི་ཕོ་བྲང་གི་དབུས་ནས་བསང་དུད་བཏང་བས། མཐོ་སྲིད་པའི་རྩེ་མོ་ནས་འོག་དམྱལ་ཁམས་བཅོ་བརྒྱད་རིགས་དྲུག་གི་སྡུག་བསྔལ་སེལ་བ་དང་། ཅི་འདོད་འཐོབ་ཚུལ་དང་། བསང་གི་དྲི་ཚོར་བ་ཙམ་གྱིས་ན་བ་སོས། ཞ་བ་དྲག འོན་པས་ཐོས། ལོང་བས་རིག ལྐུགས་པས་སྨྲ་ཤེས་ཚུལ་སོགས་རྒྱ་ཆེར་བསྟན་ཡོད།

སྤྱིར་ན་དེང་སང་བསང་མཆོད་འདི་བོད་མིའི་ཡུལ་སྲོལ་ཞིག་ཏུ་འཛིན་པ་ཤས་ཆེ་ཡང་། དེ་ལས་ཀྱང་གལ་ཆེ་བ་ནི་ལུས་ངག་ཡིད་གསུམ་གྱི་ལས་འབྲས་ཀྱི་རྟེན་འབྲེལ་ཚད་ལྡན་བྱེད་པ་འདི་གལ་ཆེ་སྟེ། ཇི་སྐད་དུ། སྣང་སྲིད་ལྷ་འདྲེ་སྡེ་བརྒྱད་ཀུན། །རང་སེམས་ཡིན་པར་ཐག་ཆོད་ཀྱང་། །བསང་མཆོད་དཀར་གཏོར་བསྔོ་བ་སོགས། །རྟེན་འབྲེལ་ཁྱད་དུ་མི་གསོད་པ། །འདི་ཡང་རྒྱུད་ཀྱི་དགོངས་པ་ཡིན། །ཞེས་གསུངས་པ་ལྟར། མཚན་ཡིག་རྣམས་སུའང་། ཆོས་ཀྱི་ལས་དང་འགལ་བའི་སྤྱོད་པ་དག། ལྷ་ལ་གསོལ་མཆོད་བགྱིས་པའི་ཅི་ལ་ཕན། །ལུས་ངག་ཡིད་ཀྱི་སྤྱོད་པ་ཚད་ལྡན་ན། །མཆོད་གསོལ་སྨོན་པའི་སྦྱོར་བ་དེ་ཡིས་འཐུས། །ཞེས་དང་། ཁྱད་པར་དུ་ཆོས་པ་ཚད་ལྡན་ཞིག་ཡིན་ན། ལྷ་བསང་ལ་དེ་འདྲའི་དོ་སྣང་མི་བྱེད་དེ། དཔེར་ན། བཀའ་གདམས་གོང་མ་རྣམས་དང་རྗེ་ཡབ་སྲས་རྣམས་ཀྱིས་བསང་ཆོག་ཕྱག་བཞེས་མཛད་མི་འདུག་ཅིང། པཎ་ཆེན་བློ་བཟང་ཆོས་རྒྱན་གྱིས། ཚོགས་ཀྱི་ཞིང་མཆོག་བླ་མ་ཡི་དམ་ལ། །གཙོ་བོར་མི་བྱེད་འཇིག་རྟེན་དྲེགས་པ་ཡི། །མིང་སྤེལ་དོ་ཤལ་རིང་བོས་མགྲིན་འཁྱུད་པ། །དེ་དག་གཤེན་རབ་བོན་པོའི་རྣམ་ཐར་ཡིན། །ཞེས་ཀྱང་གསུངས་སོ། །

༩ བསང་ལ་བརྟག་ཚུལ། ལྷ་བསང་ལ་བརྟག་ཚུལ་ཞིག་འཇུ་མི་ཕམ་གྱིས﹙ལྕགས་པར་དེབ་གྲངས་བཅུ་དགུ་ཤོག་ངོས༣༨༠ནས༣༨༡ བར﹚གསུངས་པ་འདིར་བཀོད་ན། དེ་ཡང་བསང་ཕོར་གྱི་ནང་དུ་བདུད་རྩི་ཅན་གྱི་ཤིང་གསུམ་ཧ་ཅང་མི་མང་ཧ་ཅང་མི་ཉུང་བ་དང་འོ་སྐོལ་བསྲེགས་ལ་ཆབ་བྲན་ནས་བཞག་པས། དུ་བ་ལེགས་པར་འཐུལ་ཞིང་འབར་སྐྱེན་ན་རླུང་རྟ་དར། དོན་འགྲུབ་པ་ལ་ཚེགས་མེད། ཤིན་ཏུ་འབར་དཀའ་ན་དོན་མི་འགྲུབ། དུ་བ་གྱེན་དུ་དྲང་ཐལ་ལེ་འགྲོ་བ་རླུང་རྟ་དར་བའི་རྟགས། གཡས་སུ་འཁྱིལ་ཞིང་ཕྱུར་ཕྱུར་འགྲོ་ན་ཕོ་ལྷ་དར། གཡོན་དུ་འཁྱིལ་ཞིང་དལ་བ་མཛེས་ན་ཕུག་ལྷ་ལྷ་མོ་དགྱེས། ཁ་དོག་དཀར་ན་ལྷ་ལ་མནོལ་བག་མེད་པས་ངོ་སོ་མཐོ། སྔོན་པོ་མཐིང་འོད་འཚེར་ན་བཟང་། སྔོ་དམར་བྱུང་ན་ལྷ་འཁྲུགས་ངོ་། དབྱིབས་བཀྲ་ཤིས་པའི་རྫས་དང་། དཔག་བསམ་ཤིང་། སྤྲིན་རིས། འབྲུག་ལྟ་བུ་བཟང་། ཚུབ་ཚུབ་པོ་ཧོར་ཆོད་ཅན་བར་ཆད་ཆེ། གནམ་རྡོ་ལྷུང་བ་དང་། རྦབ་འདྲིལ་བ་དང་། ཕད་རྩེ་ནག་པོ་དང་། བ་ལང་གི་མགོ་དང་། སྲིན་པོའི་གདོང་ལྟ་བུ་སོགས་ཡིད་དུ་མི་འོང་བ་བཀྲ་མི་ཤིས་པའི་ངོ་། དྲི་ཞིམ་ཞིང་གཙང་ལ་མདོག་དབྱིབས་ཡིད་དུ་འོང་ན་དོན་འགྲུབ། དེ་ལས་ལྡོག་ན་མི་དགེ་ཞིང་ངན། ཕྱིས་བཟང་དུ་བྱུང་ན། རིམ་འགྲོས་འགྱུར་ཏེ། དང་བོ་བཟང་། ཕྱིས་ངན་དུ་སོང་ན་བར་ཆད་ཆེ་བས་གཟབ། དུ་བ་ལྷ་གཞི་དང་རྣལ་འབྱོར་ལ་འཁྱིལ་ཞིང་གྱེན་དུ་འགྲོ་ན་ལྷས་མགོན་པས་བཟང་། ཞེས་དང་།

མཁས་གྲུབ་ཀརྨ་ཆགས་མེད་ཀྱིས་བསང་དུད་ལ་བརྟགས་ཏེ། ངན་ན་སྲུང་བཟློག་བྱ་ཚུལ་བསྟན་པ་ནི། དུ་བ་དཀར་བོས་ལྷ་དགྱེས་ཞི་བའི་ལས་འགྲུབ། ནག་པོས་བདུད་རྨུགས་གྲིབ་ཀྱི་ངོ་ཁྲུས་དང་གྲིབ་སེལ་བྱ། དམར་པོས་བཙན་དང་ས་བདག་གདོན། ས་བདག་འཁྲུགས་བཅོས་བྱེད། དཀར་ནག་འདྲེས་ན་བྱད་ཀས་གདོན། བྱད་ཟློག་བསྲུང་བ་བཟློག་པ་གསུམ། སེར་བོས་ཡུལ་ལྷ་གཞི་བདག་གནོད། བུམ་གཏེར་གཞུག་ཅིང་ཡུལ་ལྷ་མཆོད། སྦལ་སྦྲུལ་འདྲ་བ་ཀླུ་ཡིས་གདོན། །ཀླུ་མཆོད་ཀླུ་ཆོག་བུམ་གཏེར་སྦ། །སྤྲིན་ཕུང་འདྲ་ན་ལོངས་སྤྱོད་རྒྱས། །གཡས་གཡོན་དུ་ནི་མ་སོང་ནས། །དུ་བ་གནམ་དུ་ཤ་ལེར་སོང་། །གནམ་སྒོ་གཅོད་ཅིང་གནམ་ཐིལ་བཀལ། །ས་ལ་འཁྱིལ་ཞིང་གྲམ་པ་ནི། །ས་སྒོ་བྱེ་བས་ས་སྒོ་བཅད། །འགུགས་ཤིང་བན་བུན་སོང་བ་ན། །བསེ་རག་འགོང་བོ་རྒྱལ་བོའི་གདོན། །ཚག་སྒྲ་ཆེ་ཞིང་དུ་བ་འཐོར། །དགྲ་དང་ཆོམ་རྐུན་འུར་ཟིང་འོང་། །དང་བོའི་དུས་སུ་མེ་འབར་དང་། །རྗེས་ནས་མེ་ནི་འབར་ན་བཟང་། །ཐལ་བ་དཀར་དང་ཁམ་པ་རྣམས། །དངོས་གྲུབ་འབྱུང་དང་ན་ཚ་མེད། །ནག་དང་རྨུགས་ན་མནོལ་གྲིབ་འོང་། །དུ་བ་འཁྲུགས་ཤིང་འཐིབས་པ་ན། །ན་ཚ་སྡུག་བསྔལ་མྱ་ངན་འོང་། །དྭངས་ཤིང་དགུང་དུ་འཁྲིགས་ན་བཟང་། །གཞན་ཡང་ཤར་འབར་བཀྲ་ཤིས་ཤིང་། །དོན་གྲུབ་ལྷ་མཉེས་བདེ་སྐྱིད་ལྡན། །ལྷོར་འབར་ལས་བཞིའི་ཕྲིན་ལས་འགྲུབ། །ནུབ་འབར་ནད་ངོ་གྲིབ་ངོ་ཆེ། །བྱང་འབར་ཆོམ་རྐུན་དགྲ་ངོ་ཡོད། །ཤར་ལྷོར་ཞི་བའི་ལས། ལྷོ་ནུབ་རྒྱས་པའི་ལས། ནུབ་བྱང་དབང་གི་ལས། བྱང་ཤར་ནས་འབར་ན་ལོངས་སྤྱོད་ལས་རྣམས་འགྲུབ། དབུས་ནས་འབར་ན་ཡོན་མཆོད་ཀུན། བསམ་པ་འགྲུབ་ཅིང་བདེ་སྐྱིད་ལྡན། མི་ཕྱུགས་ནད་མེད་སྲུང་སྒབ་དྲོ། ཞེས་གསུངས་སོ། །

འཛམ་གླིང་སྤྱི་བསང་།

བོད་ཟླ་ལྔ་བའི་ཚེས་བཅོ་ལྔར་དབུས་གཙང་ཁུལ་དུ་འཛམ་གླིང་སྤྱི་བསང་ཞེས་པའི་དུས་སྟོན་གཏོང་སྲོལ་ཡོད། དེ་ཇི་ལྟར་དར་བའི་ཁུངས་ནི། ཉིན་དེར་གུ་རུ་མཚོ་སྐྱེས་རྡོ་རྗེས་བོད་ཀྱི་ལྷ་སྲིན་གདུག་པ་ཅན་ཐམས་ཅད་བཀའ་བཞག་དམ་འདོགས་དང་། རྣམ་དཀར་འཕྲིན་ལས་སྒྲུབ་པར་གཉེར་གཏད་དེ། བསམ་ཡས་གཙུག་ལག་ཁང་ལེགས་གྲུབ་བྱུང་བས། དེ་དག་ལ་བཏང་རག་མཚོན་བྱེད་དུ་ཧད་པོ་རིའི་རྩེ་མོར། རྒྱགས་རྔན་ལྷ་བསང་གི་འདོན་ཆོས་བརྩམས་ཏེ། བསང་མཆོད་རྒྱ་ཆེན་གནང་བ་འདི་ཡིན།

གཞན་ཡང་། རྒྱལ་བོ་མུ་ནེ་བཙན་པོས། ལྷ་ས། ཁྲ་འབྲུག བསམ་ཡས་ཆོས་འཁོར་གསུམ་ལ། སྡེ་སྣོད་གསུམ་གྱི་མཆོད་རྒྱུན་བཙུགས་པའི་ཡ་གྱལ་ལྷ་ས་འདུལ་བའི་མཆོད་པ་ཞེས་གྲགས་པའི་ལམ་སྲོལ་འཛིན་པའི་རྗེས་དྲན་གྱི་ཟླ་བ་དེའི་ཡར་ངོའི་ཚེས་བཟང་ཞིག་ལ། གཞུང་ཕྱོགས་ནས་ཀྱང་དབྱར་གསོལ་ཞེས། གནས་ཆུང། དགའ་བ་གདོང་སོགས་གཞུང་བསྟེན་སྲུང་མ་རྣམས་ལ་གསོལ་མཆོད་རྒྱ་ཆེར་བཏང་སྟེ། ལྷ་འབེབས་གནང་ནས། རྒྱལ་བསྟན་ཆབ་སྲིད་སྐོར་བཀའ་ལུང་ཞུས་པ་དང་། དབྱར་གསོལ་གྲོལ་རྗེས་སྡེ་བ་གཞུང་གི་ལས་གཉེར་ཁག་སྐྱོ་སངས་ཉིན་འགར་གཏོང་བར་མ་ཟད། ལྷ་བ་རྣམས་ཀྱིས་གཟབ་འཆོར་གང་ལེགས་སྤྲས་ཏེ། དཔལ་ལྷ་ཅོག་དང་། གཙང་བོའི་འགྲམ། གླིང་བསྐོར། རི་རྩེ་སོགས་སུ་ལྷ་སྲུང་སྤྱི་ལ་གསོལ་མཆོད་གཟབ་རྒྱས་གཏོང་། གཞུང་འབྲེལ་མ་ཡིན་པའི་ལྷ་འབེབས་གནང་བ་དང་། ས་ཆ་འགར་འཆམ་རྒྱག་སྲོལ་ཡང་ཡོད།

གཞན་གླིང་སྒྲུང་འཛམ་གླིང་སྤྱི་བསང་ལས། ཛམ་གླིང་གེ་སར་རྒྱལ་བོས་རྟ་རྒྱུགས་སྐུགས་སུ་བཞག་ནས། གླིང་དཀར་སྟོད་ཀྱི་གསེར་ཁྲི་དང་། སྒ་སྐྱ་ལོའི་འབྲུག་མོའི་སྐྲ་བདག་བླངས་རྗེས། ཟླ་ལྔ་བའི་ཚེས་བཅུ་གསུམ་ཉིན་རྨ་རྒྱལ་སྦོམ་རའི་ལབ་བསྟོད་དུ་རྒྱལ་བློན་ཧྲག་བསྡུས་ཀྱིས་རྨ་ཀུ་རའི་ལྷ་རི་ཁྱུང་རྩེར་འཚོགས་ཏེ། འཛམ་གླིང་སྤྱི་བསང་ཞིག་བཏང་བའི་རྣམ་པ་འཁོད་པ་ནི། འདིར་འབྲེལ་ཆེ་བས་འདི་ལྟར། ཕུན་སུམ་ཚོགས་པའི་བསང་རྫས་ཡངས་ཤིང་རྒྱ་ཆེ་བ་གསོས་ཁར། ཁ་དོག་སྣ་ལྔའི་དར་ཕྲེང་། གཞན་ཡང་། མཛེས་སྡུག་གཟུགས་ཀྱི་བྱེ་བྲག་སྙན་འཇེབས་རོལ་མོའི་སྒྲ་དབྱངས། རེག་འཇམ་ལྷ་རྫས་ཀྱི་གོས་བཏགས། གྱ་ནོམ་པའི་འདོད་ཡོན་གྱི་རྣམ་པ་འབུམ་ཕྲག་མང་བོས་མཆོད་ཅིང་། དེའི་སྐབས་སུ་མཁའི་སྤྲིན་སྔོན་གྱི་བླ་བྲེ། བར་སྣང་འཇའ་ཚོན་གྱི་ཀ་བ། ས་གཞི་མེ་ཏོག་གི་ཆར་བ། སྔར་མེད་པའི་དགེ་མཚན་གྱི་སྣང་བ་འབུམ་ཕྲག་གསར་དུ་བརྡོལ་ཞིང་། གླིང་དཀར་ལྷ་བསང་བ་རྣམས་ཀྱིས་སྐྱིད་པའི་གླུ་བླངས། སྤྲོ་བའི་དར་འཕྱར། སྙན་པའི་དུང་བུས། གསེར་གྱི་རྔ་ཆེན་བརྡུང་ཞིང་ཀི་སྭོ་ལྷ་རྒྱལ་གྱི་སྒྲ་སྐད་ལྡིར་ཞིང་མཆོད་པའི་ཚེ། རྩ་གསུམ་དམ་ཅན་སྲུང་མ། དཀར་ཕྱོགས་ཡུལ་ལྷ་གཞི་བདག་མང་བོས་དགྱེས་པའི་ཞལ་བསྟན། འཛུམ་པའི་མདངས་བྱུང་། སྙན་པའི་གསུང་ཐོས། མགོན་སྐྱབས་དང་སྡོངས་གྲོགས་མཛད་པར་ཞལ་གྱིས་བཞེས་ཤིང་། དེ་ནས་རྒྱལ་བློན་རྣམས་ཀྱིས་ཇ་ཆང་གི་ཕུད་སྐྱེམས། ཤ་ཐུད་ཀྱི་གསོལ་འདྲེན། ཕྱེ་མར་གྱི་སྡེར་ཁ་བསྒྲིགས། དཔའ་ཐུལ་ལ་ལས་རྟ་རྒྱུགས་དང་མདའ་འགྲན་བཅས་དགའ་སྤྲོ་ཁོལ་བའི་ངང་གནས་དེ་ནས་ཞག་མལ་གནང་སྟེ་ཕྱིར་ཕེབས། ཞེས་སོ། །

ཚ་གསུར།

༡ ཚ་གསུར་གྱི་ཁུངས་དང་སྣོད་རྫས། ཚེ་འཕོས་པ་ཇི་ལྟར་འགྱུར་བའི་མདོ་﹙བཀའ་འགྱུར་མདོ་╜ལ╝དུམ་པ ༢༣༡ ན ༢﹚ལས ། ཚེ་འཕོས་པ་སྐྱེ་བ་མི་ལེན་པར་གཤིན་པོ་འཇིག་རྟེན་ན་ཡོད་ན། བཟའ་བཏུང་དང་ཞོན་པ་དང་གོས་དང་རྒྱན་དག་བདག་པོར་བྱེད་པ་ནི་མ་ཡིན་ནོ། །ཞེས་དང་། རྒྱལ་བོ་ལ་གདམས་པའི་མདོ﹙╜ལ╝དུམ་པ ༢༣༠ ན ༧﹚ལས། ཀྱེ་རྒྱལ་བོ་ཆེན་པོ་ཚེ་འཕོས་པའི་ཕ་སྤད་དང་སྤུན་གཅིག་ལ་ཉེ་འབྲེལ་འཛིན་པ་ཕན་པར་འདོད་པ་རྣམས་ད་ལྟ་མ་ཤི་བ་ལུས་དང་ལྡན་པ་ཡང་གཅིག་ཡུལ་གཞན་དུ་སོང་ན། དེ་ལ་ཕའམ་མའམ་བུའམ་སྤུན་གང་ཡང་རུང་བས་ཟས་སྐོམ་མང་བོ་སྦྱིན་ནོ་གསོལ་ལོ་ཞེས་བསྔོས་པ་ཡང་། ཡུལ་གཞན་དུ་སོང་བའི་རྨི་ལམ་དུ་ཡང་མི་འབྱུང་ན་དངོས་སུ་ཟ་ཞིང་འཐུང་བ་ལྟ་ག་ལ་ཡོད། ཚེ་འཕོས་ནས་ལུས་དང་བྲལ་བ་ལ་བསྔོས་ཤིང་གཏད་པ་ཟ་ཞིང་འཐུང་བ་ལྟ་ག་ལ་ཡོད། ཅེས་གསུངས་པ་རྣམས་ལ་དགོངས་ནས་མེ་ལ་རྫས་བཏབ་སྟེ་གསུར་ཕུད་སྲོལ་འདི། བུ་སྟོན་སོགས་ཀྱིས་ཁུངས་མ་མཐོང་བར་གསུངས་ལ། ཁྱད་པར་དུ་རྒྱལ་དབང་ལྔ་བས། ཚ་གསུར་གྱི་ཆོ་གའི་རིམ་པ་ཡིད་བཞིན་འདོད་འཇོ་ལས། མེ་ལ་རྫས་བཏབ་པའི་གསུར་འདི་བསྟན་པ་ཕྱི་དར་གྱི་མདོ་རྒྱུད་མན་ངག་ཏུ་གསལ་བ་ཡོད་མེད་རང་གིས་བརྟགས་ཤིང་། མང་དུ་ཐོས་པའི་རིགས་དུ་མར་དྲིས་ཀྱང་ཁུངས་རྙེད་ས་མེད་པ་འདྲ། གསང་སྔགས་རྙིང་མའི་ཕྱོགས་ལ་ཡོད་དོ་ཞེས་ཐམས་ཅད་མགྲིན་པ་བཏེག་ནས་སྨྲ་ནའང་། རྙིང་མའི་རྒྱུད་འབུམ་དུ་ངོ་སྤྲོད་པ་མ་བྱུང་། བླ་མ་དགོངས་འདུས་སུ་ཡོད་ཟེར་ཡང་ལྒིགས་བམ་དང་ཐོབ་ཡིག་བསྡུར་ནས་བཙལ་ཀྱང་མ་རྙེད། གཏེར་ཁ་གོང་འོག་གི་ཡིན་ཟེར་བའི་དཔེ་འཁྱར་འདྲ་མཐོང་ཡང་། གཏེར་གཞུང་ཚད་མ་ཡིད་ཆེས་ཀྱི་ཡི་གེར་མི་འདུག་ཅིང་། ཁོ་བོས་གཏེར་ཁ་དེ་གཉིས་གཙོ་བོར་གྱུར་བའི་གཏེར་སྟོན་བརྒྱད་ཅུར་ཉེ་བའི་ཆོས་ཁ་མནོས་རུང་དེའི་ཁྲོད་དུ་ཡེ་མ་བྱུང་བ། སྔགས་རྙིང་མའི་ལུགས་ལ་ཡོད་ཅེས་མགྲིན་པ་བཏེག་ནས་སྨྲ་བར་མི་ནུས་མོད། ཅེས་དང་། ཡང་ཁོང་གིས་སྡེ་བ་བློ་བཟང་མཐུ་སྟོབས་ཀྱི་ཉམས་ལེན་ལ་གནང་བའི་གསུར་ཆོག་དང་དཀར་ཆ་བཞིའི་ངག་འདོན་ཕན་བདེའི་འདོད་འཇོ་ལས་ཀྱང་དེ་ལུགས་སུ་གསུངས་སོ། །

ཡིན་ནའང་། བསྟན་དར་ལྷ་རམས་པས། ལྔ་བ་ཆེན་པོས་ཚ་གསུར་ལ་ཁུངས་མེད་དུ་བཞེད་པ་མ་ཡིན་པར། རྒྱུད་སྡེ་ཉེར་སྤྱོད་ཀྱི་མཆོད་པའི་ནང་གི་བདུག་སྤོས་ཕུལ་བའི་ཚིག་ཇི་སྙེད་པ་དང་། འདོད་ཡོན་ལྔའི་དྲི་ཕུལ་བའི་ཚིག་ཇི་སྙེད་བྱུང་བ་ཐམས་ཅད་ཁུངས་སུ་བཞེད་ལ། དེ་ལྟར་ན། ངན་སོང་སྦྱོང་རྒྱུད﹙རྒྱུད་╜ཇ╝དུམ་པ་༤༨༧ བ ༤﹚ལས། ངན་སོང་གི་དཀྱིལ་འཁོར་གྱི་ལམ་དུ་ཇི་ལྟར་གནས་པའི་བདེ་བའི་བདག་ཉིད་གནས་སྐབས་ཅན་དེ་དག་ཀྱང་དགའ་བ་དང་མགུ་བ་དམ་པ་དང་བདེ་བ་དང་ཡིད་བདེ་བ་མྱོང་བར་བགྱི་བ་དང་། ངན་སོང་གི་རྒྱུད་ཐམས་ཅད་དུ་འཇུག་པར་ཁ་བལྟས་པའི་ལམ་ལས་བཟློག་པར་བགྱི་བའི་སླད་དུ། རྡོ་རྗེ་ཧཱུཾ་མཛད་ཀྱི་དཀྱིལ་འཁོར་དུ་འཇུག་པར་རུང་ངོ་། །ཞེས་དང་། བཟང་སྤྱོད་སྨོན་ལམ་ལས། བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ཞེས་དང་། སྤྱོད་འཇུག་ལས། སྤོས་མཆོག་ཡིད་འོང་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་འབུལ། །ཞེས་དང་། དཔེ་ཆོས་ལས། དཔེར་ན། མི་ཆུས་འཁྱེར་བ་ལ་ནུས་པ་ཅི་ཡང་མེད་པ་ལ། སྐམ་ས་ན་ཡོད་པའི་མིས་སྐྲ་འམ་གོས་ལ་སོགས་པ་གང་ནས་འཐེན་ཀྱང་སྐམ་སར་ནར་གྱིས་འདྲོངས་པ་ལྟར། སེམས་ཅན་ཤི་བ་རྣམས་ལས་ཀྱི་རླུང་གིས་དེད་ནས་གར་སྐྱེ་རང་དབང་མེད་ཅིང་། བདེ་སྡུག་གི་འདམ་ཁ་བྱ་དབང་མེད་པ་ལ། ཤུལ་ན་འདུག་པའི་ཉེ་དུའི་འབྲེལ་བ་རྣམས་ཀྱིས་ཤི་བ་དེའི་དོན་དུ་སྡིག་པ་དང་མ་འདྲེས་པའི་དགེ་བ་ལ་འབད་ཅིང་དེའི་དོན་དུ་སྨོན་ལམ་བཏབ་ན། དགེ་བའི་རྩ་བ་དེ་དག་ཕྱི་བཞིན་དུ་རྗེས་སུ་འབྲང་ཞིང་དེ་སྡུག་བསྔལ་གང་ཡིན་པ་ལས་ཐར་ངེས། ཞེས་དང་། ཡང་། པཎ་ཆེན་བློ་བཟང་ཆོས་རྒྱན་གྱིས་ཚ་གསུར་ན་མགྲོན་ཚན་བཞི་ཕྱེས་པ་ལས། དཀོན་མཆོག་སྲི་ཞུའི་མགྲོན་གྱི་དབང་དུ་བཏང་ན། ཐམས་ཅད་གསང་བ་ཞེས་བྱ་བའི་རྒྱུད་ལས། དེ་ནས་པུས་མོ་གཡས་པའི་ལྷ་ང་ས་ལ་བཙུགས་ནས་དུ་རུ་ཀའི་བདུག་པའམ། ཅི་བདོག་པས་གསོལ་ཏོ། །ཞེས་དང། ནག་པོ་ཆེན་པོའི་སྒྲུབ་ཐབས་ལས། དུག་དང་ཁྲག་དང་སྒོག་པ་དང་ཡུངས་དཀར་རྣམས་ཀྱིས་ནག་པོ་ཆེན་པོ་ལ་སྤོས་ཕུལ་ནས་དང་། གསང་བ་འདུས་པའི་རྩ་རྒྱུད་ལས་ཀྱང་། དྲི་ལ་རྣམ་གསུམ་ཤེས་བྱས་ནས་དང་། མདོ་སྡེར་གཏོགས་པའི་ལུང་ཡང་། སྤྱོད་འཇུག་ལས། བདུག་སྤོས་ཡིད་འཕྲོག་དྲི་ངད་ཁྱབ་པ་ཡི། །བདུག་པའི་སྤྲིན་ཚོགས་རྣམས་ཀྱང་དེ་ལ་འབུལ། །ཞེས་སོགས་མདོ་རྒྱུད་དང་རྒྱ་གཞུང་ཇི་སྙེད་ཅིག་གསུངས་པ་ཡང་ཚ་གསུར་གྱི་ཁུངས་སུ་འགྲོ་སྟེ། ཚུལ་འདི་ལ་དགོངས་ནས། ཀུན་གཟིགས་ལྔ་བ་ཆེན་པོས་ཀྱང་ཚ་གསུར་འདི་ཡུལ་གོང་མ་རྣམས་ལ་ཉེར་སྤྱོད་ཀྱི་ནང་གི་བདུག་སྤོས་ཕུལ་བ་དང་ཕྱོགས་མཚུངས་གསུངས་པའང་དོན་ལ་གནས་སོ། །

ཚ་གསུར་གྱི་སྣོད་ནི། གས་ཆག་ཅན་དང་། ལག་པ་ཁྲུས་པ། ཡང་ན། ཚེ་འདས་དེ་ཉིད་ཀྱི་ཟས་ལྷག་གོས་རྙིང་ཤ་ཆང་སྒོག་ཙོང་སོགས་བསྲེ་བ། འོད་ཅན་སོགས་གཏན་ནས་མི་རུང་ངོ་། །སྣོད་བསྐྱེད་པ་ནི། སྟོང་བའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས། ཞེས་རྣམས་ཞེས་མང་ཚིག་གསུངས་པ་ནི་མགྲོན་ཚན་རེ་ལ་སྣོད་རེ་བསྐྱེད་པ་སྟེ། པཎ་ཆེན་གྱི་ཚ་གསུར་ཡིད་ལ་འདོད་འཇོ་ན་གསལ་ལོ། །

རྫས་ནི་ཟས་སྣ་ལོངས་མ་སྤྱད་པ་གང་བཟང་དང་། དར་གོས་སྣམ་སོགས་གཙང་མ་དང་། འབྲུ་སྨན། དྲི་རྙིང་རིན་པོ་ཆེ་སོགས་ཕྱེ་མ་སོགས་རུང་ངོ་། །རང་བྱུང་རྡོ་རྗེའི་དཀར་གསུར་ཞིང་ཁམས་ཀུན་ཁྱབ་ལས། དཀར་ཕྱེ་གཙང་མ་མར་གྱི་ཁུ་བས་སྦགས་པ་སྣུམ་བག་ཅན་གྱི་ཁྲོད། ཤིང་ཏོག་དཀར་གསུམ། མངར་གསུམ། རིན་པོ་ཆེ། བདུད་རྩིའི་ཕུར་མ་སོགས་ཀྱང་བཏགས་ནས་འདྲེས་པར་བྱས་པ་སོལ་མེ་དང་། སོ་ཏོག་ལ་སོགས་མ་ཡིན་པའི་མེ་ཐལ་འཇམ་པོ་ལ་བཏབ། ཆུ་གཙང་ཁོ་ནས་བྲན། ཞེས་སོ། །

༢ ཚ་གསུར་གཏོང་ཡུལ་ནི། གདུགས་དཀར་མཆོག་གྲུབ་མ་ལས། ཟས་སུ་དྲི་ཟ་བ་དང་། ཟས་སུ་བདུག་པ་ཟ་བ་དང་། ཟས་སུ་སྦྱིན་སྲེག་ཟ་བ་སོགས་འབྱུང་བ་ལྟར། དྲི་ཟ་སྤྱི་དང་། ཁྱད་པར་དུ་བསད་ལྕེབས་གཡང་ལ་ལྷུང་བ་དང་། བར་དོ་འཁྱམས་པའི་སེམས་ཅན་སོགས་ལ་སྦྱིན་པ་གཏོང་བ་སྟེ། པཎ་ཆེན་བློ་བཟང་ཆོས་རྒྱན་གྱིས་མཛད་པའི་ཚ་གསུར་གཏོང་ཚུལ་ལས། དྲི་མཆོག་འདོད་ཡོན་ལྔ་ལྡན་པའི། །ཟག་མེད་གསུར་གྱི་མཆོད་པ་འདི། །བླ་མ་ཡི་དམ་དཀོན་མཆོག་གསུམ། །མཁའ་འགྲོ་ཆོས་སྐྱོང་ཐམས་ཅད་དང་། །དྲི་ཟའི་རྒྱལ་བོ་རབ་དགའ་དང། །དྲི་ཟའི་ཚོགས་རྣམས་མ་ལུས་དང་། །མར་གྱུར་རིགས་དྲུག་སེམས་ཅན་དང་། །ཡུལ་ལྷ་གཞི་བདག་ཚོགས་རྣམས་དང་། །གསུངས་པ་ལས། གསུར་ཡུལ་དུ་བླ་མ་ཡི་དམ་དང་། མཁའ་འགྲོ་ཆོས་སྐྱོང་སོགས་ཀྱང་འགྲོ་བ་གསལ་ལ། འདིར་ལྷ་བསང་དང་མི་འདྲ་ས་ནི། མཛོད་ལས། དྲི་ཟ་སེམས་ཅན་བར་མའོ། །གསུངས་པ་ལྟར། པཎ་ཆེན་བློ་བཟང་ཆོས་རྒྱན་གྱིས། ཁྱད་པར་ཁ་སང་དེ་རིང་བར། །བསད་ལྕེབས་ཤི་ནས་སྔ་ལུས་བོར། །ཕྱི་ལུས་མ་རྙེད་བར་དོ་ཡི། །ཇི་སྙེད་སེམས་ཅན་ཐམས་ཅད་ལ། །ཞེས་བར་དོ་འཁྱམས་པའི་སེམས་ཅན་ལ། འཇིགས་སྐྲག་འཁྲུལ་སྣང་དང་། ངན་འགྲོའི་སྡུག་བསྔལ་ལས་གྲོལ་ཏེ། དལ་འབྱོར་གྱི་རྟེན་བཟང་འཐོབ་པ། ས་ལམ་རིམ་བགྲོད་ཀྱིས་རྫོགས་བྱང་གི་གོ་འཕང་འཐོབ་པར་གསུངས་པ་ནི་ཚ་གསུར་གྱི་ཆེད་དམིགས་ཡིན་ལ། དེ་བས་གཙོ་ཆེར་ལྷ་བསང་ནི་ཡས་མགྲོན་དང་འཇིག་རྟེན་པའི་ལྷ་ཐུ་བོ་ཆེ་རྣམས་ལ་འཕྲིན་བཅོལ་དང་ཚོགས་གསོག་བྱ་ཚུལ་ཞིག་དང་། ཚ་གསུར་ནི་དེ་དག་ལས་གཞན། ཡི་དྭགས་དང་བར་དོ་བ་སོགས་ཉམ་ཐག་འགྲོ་བ་ལ་སྙིང་རྗེས་ཕུལ་ཏེ་བཀྲེས་སྐོམ་སེལ་བར་ཆེད་དམིགས་ཀྱིས་ཚོགས་གསོག་བྱ་ཚུལ་ཞིག་ཡིན་ནོ། །

སྤྱིར་ན། པཎ་ཆེན་བློ་བཟང་ཆོས་རྒྱན་གྱིས་ཚ་གསུར་གྱི་ཡུལ་ལ་མགྲོན་ཚན་བཞིར་ཕྱེས་ཡོད་པ་ནི། ༡ དཀོན་མཆོག་སྲི་ཞུའི་མགྲོན་དུ་སྤྱན་འདྲེན་པ་ནི། མཉམ་མེད་ཤཱཀྱའི་རྒྱལ་བོ་ལ། དྲིན་ཆེན་རྩ་བརྒྱུད་བླ་མ་དང་། །རྒྱུད་སྡེ་བཞི་འབྲེལ་ལྷ་ཚོགས་དང་། །དུས་གསུམ་བདེ་གཤེགས་དམ་པའི་ཆོས། །ཚོགས་བཅས་དཀོན་མཆོག་གསུམ། ཞེས་མཆོག་ཐུན་གྱི་དངོས་གྲུབ་སྩོལ་ཕྱིར་འདྲེན་པ་དང་། ༢ ཡི་དམ་ཆོས་སྐྱོང་ཡོན་ཏན་གྱི་མགྲོན་དུ་སྤྱན་འདྲེན་པ་ནི། ཕྱག་ན་རྡོ་རྗེ་ལ། མྱུར་མཛད་མགོན་པོ་འཁོར་བཅས་དང་། །ཆོས་ཀྱི་རྒྱལ་བོ་རྣམ་ཐོས་སྲས། །གུར་མགོན་ཞལ་དང་ཕྱག་བཞི་བ། །དམག་ཟོར་དྲེགས་པ་ལྕམ་སྲིང་དང་། །གཙང་མའི་རིས་ཀྱི་མགོན་པོ་སོགས། །ཆོས་བཞིན་སྐྱོང་བ་ཐམས་ཅད་དང་། །གནས་གསུམ་དག་ན་བཞུགས་པ་ཡི། །དཔའ་བོ་མཁའ་འགྲོའི་ཚོགས། ཞེས་བར་ཆད་སེལ་ཕྱིར་དུ་འདྲེན་པ་དང་། ༣ རིགས་དྲུག་སྙིང་རྗེའི་མགྲོན་དུ་སྤྱན་འདྲེན་པ་ནི། འཕགས་པ་སྤྱན་རས་གཟིགས་ལ། འགྲོ་བ་རིགས་དྲུག་ལམ་རྒྱུད་ལྔ། །སྐྱེ་གནས་རྣམ་པ་བཞིས་བསྡུས་པའི། །དྲིན་ཅན་ཕ་མར་གྱུར་བ་ཡི། །མཁའ་མཉམ་འགྲོ་བའི་ཚོགས་ཞེས། སྦྱིན་པའི་ཡུལ་དུ་འདྲེན་པ་དང་། ༤ གདོན་བགེགས་རྣམས་ལན་ཆགས་བུ་ལོན་བྱང་ཕྱིར་སྤྱན་འདྲེན་པ་ནི། རྟ་མགྲིན་དབང་བོ་ལ། བགེགས་རིགས་སྟོང་ཕྲག་བརྒྱད་ཅུ་དང་། །གདོན་རིགས་སུམ་བརྒྱ་དྲུག་ཅུ་དང་། །བྱིས་པའི་གདོན་ཆེན་བཅོ་ལྔ་སོགས། །སྟེང་འོག་བར་གསུམ་དབྱེ་བ་ཡི། །གདོན་བགེགས་འབྱུང་བོ། ཞེས་དང་། ཐོག་མེད་དུས་ནས་ད་ལྟའི་བར། །བསད་དང་བཅིངས་དང་བརྡེག་པ་དང་། །འཕྲོག་དང་བརྐུས་ལ་སོགས་པ་ཡིས། །ལན་ཆགས་ཤ་འཁོན་གཉེར་བ་དང་། །བུ་ལོན་ཆགས་པ་རྣམས། ཞེས་སྡིག་སྒྲིབ་བྱང་ཕྱིར་འདྲེན་པའོ། །དེ་ལྟར་མགྲོན་ཚན་བཞི་བོ་སྒྲུབ་པ་པོའི་མདུན་གྱི་ནམ་མཁར་ཁྲ་ལམ་མེར་སྤྱན་དྲངས་ཏེ་སྟེང་འོག་དང་། འོག་མའི་གཡས་གཡོན་སུ་གསལ་བཏབ་སྟེ་གོ་རིམ་བཞིན་བཞུགས་པའི་མོས་པ་བྱའོ། །མགྲོན་ཚན་བཞི་བོ་ལ་གསུར་འབུལ་ཚུལ་ཡང་། རིམ་པ་བཞིན། རྒྱལ་བོ་ལ་དཔྱ་ཁྲལ་འབུལ་བ་དང་། གྲོགས་མཆེད་ལ་སྟོན་མོ་འགྱེད་པ། ངན་སློང་ལ་སྦྱིན་པ་གཏོང་བ་དང་། བུན་བདག་ལ་བུ་ལོན་འཇལ་བའི་ཚུལ་དུ་བསྔོ་ཞིང་། ལྷག་པར་མཆོད་སྦྱིན་གྱི་འཁོར་གསུམ་པོ་རང་བཞིན་མེད་བཞིན་དུ་སྣང་བ་སྒྱུ་མ་ལྟ་བུའི་ངང་ནས། ཡས་མགྲོན་ལ་དད་པས་ཕུལ་བས་ཟག་མེད་བདེ་སྟོང་གསར་དུ་འཁྲུངས་ཏེ་དགྱེས་པར་བསམ་པ་དང་། མས་མགྲོན་ལ་སྙིང་རྗེས་བསྔོས་པས་ལུས་སེམས་ཚིམ་ཞིང་མགུ་ནས་ཐབས་ཤེས་ཀྱི་རྟོགས་པ་ཁྱད་པར་ཅན་འཁྲུངས་པའི་དམིགས་པ་འཛིན་དགོས་སོ། །

ཡང་མི་ཕམ་པས། རིགས་དྲུག་སྙིང་རྗེའི་མགྲོན་རྣམས་དང་། །ཁྱད་པར་ཕྱོགས་འདིར་རྒྱུ་བ་ཡི། །བགེགས་རིགས་ལན་ཆགས་ཤ་འཁོན་ཅན། །ཟ་འདྲེ་ཤི་གཤེད་གྲེ་ཕོ་མོ། །ནད་བདག་རིམས་བདག་གོད་ཁའི་བདག། ཡུལ་འདྲེ་རྦད་འདྲེ་ཉེ་དུའི་འདྲེ། །ཆགས་དང་འཇུངས་པའི་འདུ་ཤེས་ཀྱིས། །མི་དང་ནོར་ཕྱིར་འབྲང་བ་འམ། །ཕྲག་དོག་སྡང་བའི་བསམ་པ་ཡིས། །གནོད་པ་རྩོམ་པའི་རིགས་ཀུན་དང་། །དྲི་ཟ་སྲིད་པ་བར་མའི་འགྲོ། །ལྟོགས་འགོང་བསེ་རག་ཡི་དྭགས་རིགས། །སྲིད་པར་ལས་ཀྱི་དབང་སོང་བའི། །སྣ་ཚོགས་གཟུགས་ཅན་ཀུན་ཏུ་རྒྱུ། །སྣ་ཚོགས་ཟས་ཅན་ཡོངས་འཚོལ་ཅན། །བསམ་སྦྱོར་སྣ་ཚོགས་མི་འདྲ་བ། །གནོད་པ་སྣ་ཚོགས་ཀུན་ཏུ་སྦྱོར། །དབང་ཆེན་དབང་ཆུང་སྣ་ཚོགས་པའི། །གདོན་བགེགས་འབྱུང་བོ་ཐམས་ཅད་ལ། །ཕམ་རྒྱལ་ཕྱོགས་ལྷུང་མེད་པ་ཡི། །འདོད་དགུ་མི་ཟད་གཏེར་དུ་བསྔོ། །ཞེས་དང་། རང་བྱུང་རྡོ་རྗེའི་དཀར་གསུར་ཞིང་ཁམས་ཀུན་ཁྱབ་ལས་ཚ་གསུར་གཏོང་ཡུལ་ལ་མང་དུ་གསུངས་སོ། །གཞན་ཡང་། ཚ་གསུར་མཐོ་དམན་བར་གསུམ་དུ་གཏོང་ཡུལ་གྱི་སྐོར། སི་ཁྲོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་རྫ་དཔལ་སྤྲུལ་གྱི་གསུང་འབུམ﹝ཉ﹞དུམ་པའི་ཤོག་གྲངས ༨༩ ནས་༡༠༡ བར་གསུར་མཆོད་ཉེར་མཁོ་སྤྱི་དང་དམིགས་བསལ་﹝བ﹞ལེ་ཚན་གྱི་སྐོར་ཞེས་པར་ཁ་གསལ་ཞིང་དོན་ལ་འབྱོར་བ་མང་དུ་གསུངས་ཡོད་ཀྱང་འདིར་ཡི་གེ་མང་དུ་འཇིགས་ནས་མ་བཀོད་དོ། །

ཁ་ཅིག ཚེ་འཕོས་པ་ཇི་ལྟར་འགྱུར་བ་ལུང་བསྟན་པའི་མདོ་ལས། ཚེ་འཕོས་པ་སྐྱེ་བ་མ་བླངས་པར་གཤིན་པོའི་འཇིག་རྟེན་དུ་ཡོད་ན། བཟའ་བཏུང་དང་ཞོན་པ་དང་གོས་དང་རྒྱན་དག་བདག་པོར་བྱེད་པ་མ་ཡིན་ནོ། །ཞེས་དང་། རྒྱལ་བོ་ལ་གདམས་པའི་མདོར་བར་དོ་ལ་ཟས་སྐོམ་ཅི་བསྔོས་ཀྱང་མི་ཐོབ་པར་གསུངས་པ་དང་། རྒྱལ་དབང་ལྔ་བས། མེ་ལ་རྫས་བཏབ་པའི་གསུར། སྔགས་གསར་རྙིང་དང་མདོ་ཕྱོགས་གང་ནས་ཀྱང་བཤད་པ་མ་མཐོང་བར་མ་ཟད། བར་དོ་ལ་བསྔོ་བ་དོན་ལ་མི་གནས་པར་ཐམས་ཅད་མཁྱེན་པ་བུ་སོགས་བཞེད་ཅིང་། ཞེས་སོགས་གསུངས་པའི་ཚིག་ཟིན་ཙམ་ལ་བརྟེན་ནས། འགའ་ཞིག་བར་དོ་བ་དེའི་ཆེད་དུ་ཚ་གསུར་བཏང་བ་དགོས་པ་མེད་དོ་སྙམ་དུ་རྟོག་པ་འཆར་ཡང་། ཚེ་འཕོས་པ་ཇི་ལྟར་འགྱུར་བའི་མདོ་ལས་གཤིན་པོར་བཟའ་བཏུང་སོགས་བསྔོས་ཀྱང་གཤིན་པོར་མི་འཐོབ་པར་གསུངས་པ་ནི། སྔགས་དང་ཏིང་འཛིན་ཕྱག་རྒྱ་སོགས་ནུས་མཐུ་བསམ་གྱིས་མི་ཁྱབ་པས་ཐབས་མཁས་ཁྱད་པར་ཅན་གྱིས་མ་ཟིན་པར། འཇིག་རྟེན་པ་དག་རང་གར་དུར་ཐོག་དུ་བཟའ་བཏུང་བསྒྲིགས་ནས། གཤིན་པོ་དེར་འཐོབ་པའི་རེ་བ་རྒྱག་པ་ནི། དོན་ལ་མི་གནས་པ་སོགས་ཞིབ་ཆ་འབྱེད་དགོས་པ་ཡིན།

ཚུལ་འདི་ལ་དགོངས་ནས། རྟ་ཚག་ཡེ་ཤེས་བློ་བཟང་བསྟན་པའི་མགོན་པོས་རག་ར་སྤྲུལ་སྐུའི་དྲིས་ལན་དུ། གཤིན་པོ་ལ་ཟས་བསྔོས་པས་མི་འཐོབ་པར་གསུངས་པ་ནི། དེང་སང་རྒྱ་གར་ནག་སོགས་སུ་གཤིན་པོའི་རོ་དང་དུར་སར་ཟས་ཀྱི་རྣམ་གྲངས་མང་བོ་བསྒྲིགས་ནས་མཆོད་པ་བྱེད་པ་དར་བས། དེ་འདྲ་བ་དེ་གཤིན་པོ་སྐྱེ་གནས་གཞན་དང་བར་དོར་འཕོས་ཟིན་ནས་འགྲོ་བ་རིས་མི་གཅིག་པས་མི་ཐོབ་པར་གསུངས་པ་ནི། འཆི་འཕོ་བ་ཇི་ལྟར་འགྱུར་བའི་མདོ་ལས་ཀྱང་རྒྱས་པར་གསུངས་པ་དོན་ལ་གནས་ཀྱང་། གསུར་ལྟ་བུ་སྔགས་དང་ཕྱག་རྒྱ་ཏིང་ངེ་འཛིན་གྱི་བྱིན་གྱིས་བརླབས་ནས་བསྔོས་ན་མི་ཐོབ་པ་ཡང་མ་ཡིན་ཞིང་། དཔེར་ན། ཡི་དྭགས་ལ་ཟས་རང་གར་སྦྱིན་ཡང་མི་ཐོབ་ལ། འཇུར་འགེགས་ལ་ཆུ་སྦྱིན་གྱི་སྔགས་ཀྱིས་བསྔོས་ན་ཐོབ་པར་གསུངས་པས། གསང་སྔགས་ཀྱི་བྱིན་རླབས་བསམ་གྱིས་མི་ཁྱབ་པའི་ཕྱིར། བར་དོ་ལ་མདོ་རྒྱུད་ཁུངས་མ་ནས་དྲི་ཟ་ཞེས་བྱུང་བས། དྲི་ལ་ལོངས་སྤྱོད་པ་ལས། ཟས་རགས་པ་གཞན་མེད་འདྲ། དབང་བོ་ཀུན་ཚང་ཡིན་ཡང་ཟས་མི་དགོས་པ་ནི། བསྐལ་བ་དང་བོའི་མི་ལའང་ཡོད་པས། ཞེས་དང་། ཡང་ཨ་ལ་ཤས། བར་སྲིད་པས་དྲི་ཟ་ཚུལ་ལ་རིགས་པས་སྒྲུབ་ཡོད་པ་ནི། བར་སྲིད་པ་དེ་གསུར་ལ་སོགས་པའི་དྲི་དོན་དུ་གཉེར་བའི་གང་ཟག་ཡིན་ཏེ། ཟས་སུ་དྲི་ཟ་མཁན་ཡིན་པས་ཕྱིར། མཛོད་ལས། དྲི་ཟ་སེམས་ཅན་བར་མའོ། །ཞེས་གསུངས་སོ། །དེས་ཀྱང་གསུར་ལ་སོགས་པའི་དྲི་ལ་དངོས་སུ་སྤྱོད་ནུས་པ་ཡིན་ཏེ། དེ་ལ་དྲི་ཚོར་བའི་དབང་བོ་དང་དབང་ཤེས་དག་ཀྱང་མ་ཉམས་པར་ཡོད་པའི་ཕྱིར། དེ་ཉིད་ལས། དབང་བོ་ཀུན་ཚང་ཐོགས་མེད་རྒྱུ། །ཞེས་གསུངས་སོ། །གསུར་དྲི་བཏང་བ་དང་མཉམ་དུ་གནས་དེར་སླེབས་ནུས་ཏེ། རྫུ་འཕྲུལ་གྱིས་འགྲོ་བའི་ཤུགས་དང་ལྡན་པ་ཡིན་པའི་ཕྱིར། དེ་ཉིད་ལས། ལས་ཀྱི་རྫུ་འཕྲུལ་ཤུགས་དང་ལྡན། །ཞེས་རིགས་ལམ་བཏང་ཡོད་པ་དང་། བར་སྲིད་པའི་དྲི་ལོངས་སུ་སྤྱོད་ཚུལ་ནི། བར་དོ་བ་དེ་ཆོ་ག་བྱེད་སར་འོང་ནས་རང་ལ་བསྔོས་པའི་གསུར་དྲི་དང་གྲོགས་སོགས་ལ་རྨི་ལམ་རྨིས་པ་བཞིན་དུ་ལོངས་སྤྱོད་པར་ཆོས་མངོན་པར་གསུངས་སོ། །

རྒྱལ་བོ་ལ་གདམས་པའི་མདོ﹙╜ལ╝དུམ་པ༢༣༠ན༧﹚རང་ལས་ཀྱང་། ཀྱེ་རྒྱལ་བོ་ཆེན་པོ་ཚེ་འཕོས་པའི་ཕ་སྤད་དང་སྤུན་གཅིག་ལ་ཉེ་འབྲེལ་འཛིན་པ་ཕན་པར་འདོད་པ་སོགས་ཞེས་སྔར་དྲངས་ཟིན་པ་དེས་གྲུབ་ལ། དེ་ལ་རིགས་པས་ཀྱང་རྟོགས་ནུས་པ་ཨ་ལ་ཤའི་ཚ་གསུར་དོགས་གཅོད་ལས། བར་དོ་བ་དེ་དྲི་ཁོ་ནས་འཚོ་བ་ཡིན་པས། བཟའ་བ་དང་བཏུང་བ་གཞན་གྱི་དགོས་པ་མེད། རྫུ་འཕྲུལ་ཁོ་ནས་འགྲོ་བ་ཡིན་པས་ཞོན་པ་མི་དགོས། ཤིན་ཏུ་དྭངས་པའི་ལུས་ཅན་ཡིན་པས་གོས་དང་རྒྱན་སོགས་ཀྱི་དགོས་པ་མེད་པའི་ཕྱིར་རོ། །ཞེས་བར་དོ་དེར་དྲི་ལས་གཞན་པའི་དགོས་པ་མེད་ཚུལ་རིགས་པས་དཔྱད་ན་དེ་འདྲ་ཡིན་མཆི་ཡང་། ཁྲུས་ཆོག་སོགས་ལས་སྔགས་ཀྱི་རྣལ་འབྱོར་དང་འབྲེལ་ཏེ་ཚེ་འདས་ལྟར་བསྐྱེད་ནས་ལོག་འཚོས་མ་སླད་པའི་འདོད་ཡོན་ལྔ་ལྡན་གྱི་མཆོད་པར་བྱིན་གྱིས་བརླབས་ཏེ་དཀོན་མཆོག་གསུམ་གྱི་བདེན་པ་དང་། རིག་སྔགས་ཏིང་འཛིན་གྱི་མཐུ་སྟོབས་དང་། ཆོས་ཀྱི་དབྱིངས་རྣམ་པར་དག་པའི་བསམ་གྱིས་མི་ཁྱབ་པའི་ནུས་མཐུ་ལ་བརྟེན་ནས་བསྔོ་བ་བྱས་ན། ཕན་ཡོན་ཆེ་བར་མཁས་གྲུབ་དམ་པ་རྣམས་མགྲིན་གཅིག་དུ་གསུངས་པ་དང་། ཁ་ཅིག་གཤིན་པོའི་དོན་དུ་ཆོ་ག་བསྒྲུབས་ཚེ། རྣམ་ཤེས་དངོས་སུ་འགུགས་མི་ནུས་ཏེ། གལ་ཏེ་ཁུགས་ན་རོ་ལ་རྣམ་ཤེས་བཀུགས་ཏེ་གསོན་པོར་བསྒྱུར་ནུས་ཞེ་ན། མི་སྐྱོན་ཏེ། ཀུན་རིག་ཊྲཱྀཀ་ཆེན་རིག་པའི་རྣམ་བཤད་ལེགས་བཤད་ཐམས་ཅད་ཀྱི་སྙིང་བོ་ལས། སྟོད་ལུགས་པ་ཁ་ཅིག་ན་རེ། གཤིན་པོའི་དོན་དུ་དམིགས་ནས་ཆོ་ག་བྱས་པས་ཆོག་གི རྣམ་ཤེས་དགུག་མི་དགོས་ཏེ། བཀུགས་ཀྱང་མི་ཁུགས་པའི་ཕྱིར། གལ་ཏེ་ཁུགས་ན་རོ་ལ་རྣམ་ཤེས་ཁུགས་པས་གསོན་པོར་བྱེད་ནུས་པར་འགྱུར་རོ་སྙམ་ན། སྐྱོན་མེད་དེ། རྣམ་ཤེས་བར་དོ་ན་གནས་པ་ཁུགས་ནས་གསོན་པོར་འགྱུར་སྲིད་པ། དུས་འཁོར་གྱི་མཆོག་མི་འགྱུར་གྱི་སྐབས་ནས་ཤི་ལོག་དཔེར་བརྗོད་པའི་སྐབས་ཀྱིས་ཀྱང་འགྲུབ་ལ་ཞེས་གསུངས་པའི་ཕྱིར། ཞེས་གསུངས་སོ། །

༣ དམར་གསུར་གཏོང་སྲོལ། ཡང་། དམར་གསུར་ཕུད་སྲོལ་གྲུབ་མཐའ་གཞན་དུ་གསུངས་ཡོད་དེ། མཁྱེན་བརྩེ་ལྷས་དམར་གསུར་ལ་བརྟེན་ནས་རང་གཞན་གྱི་འཆི་བ་བླུ་བ་ལས། སྤྱིར་དུས་ལ་ངེས་པ་མེད་ཅིང་ཁྱད་པར་མུན་སྲོད་ལ་གནོད་སྦྱིན་རྣམས་གཞན་གྱི་སྲོག་ལ་འཚེ་བའི་སླད་དུ་རྒྱུ་བ་ཡིན་པས། དེའི་ཚེ་དམར་གསུར་སྦྱིན་ཞིང་རང་གི་རྒྱུད་ལ་བྱམས་སྙིང་རྗེ་བྱང་ཆུབ་ཀྱི་སེམས་དང་། ཆོས་དང་ཟང་ཟིང་གི་སྦྱིན་པ་ཐུན་མོང་དུ་འགྱུར་བ་འདི་བྱས་ན་ཕན་ཡོན་བསམ་གྱིས་མི་ཁྱབ་པ་ཡིན་ནོ། །ཞེས་དང་། གཏོང་ཡུལ་ནི། སོ་སོའི་ཡིད་ལ་གང་འདོད་པའི། །ཟད་མི་ཤེས་པའི་ལོངས་སྤྱོད་དུ། །གྱུར་ནས་ཤ་འཁོན་བུ་ལོན་བྱང་། །གནོད་སེམས་འཁོན་འཛིན་དག་པར་ཤོག །ཁྱད་པར་གཞན་གྱི་ལུས་སྲོག་ལ། །རྣམ་པར་སྡང་བའི་གནོད་སྦྱིན་དང་། །ཤ་ཟ་སྲིན་པོ་འབྱུང་བོའི་གདོན། །ཚེ་སྐུ་མདངས་འཕྲོག་སྲོག་ལེན་ཞིང་། །ཤ་དང་ཁྲག་ལ་གདུང་བ་རྣམས། །དམར་གསུར་འདོད་ཡོན་ཀུན་ཁྱབ་འདིས། །ངོམས་ཤིང་ཚིམས་ལ་མཐུན་གྱུར་ཅིག །ཁྲོ་ཞིང་གཏུམ་པའི་སེམས་བོར་ནས། །བྱང་ཆུབ་སེམས་དང་ལྡན་པར་ཤོག །ཅེས་དང་།

བཀའ་བརྒྱུད་པའི་ཞལ་འདོན་ཕྱོགས་བསྒྲིགས་ལས། ཤ་ཁྲག་འབྲུ་སྨན་སྦྱར་བ་ཡི། །གསུར་མཆོད་འདོད་ཡོན་ལྔ་ལྡན་འདི། །བདག་ཅག་དཔོན་སློབ་འཁོར་བཅས་ཀྱི། །ཚེ་དང་སྲོག་ལ་བར་གཅོད་པའི། །འཆི་བདག་གཤིན་རྗེ་མ་མོའི་སྡེ། །འབྱུང་བོ་ཤ་ཟ་གནོད་སྦྱིན་ཚོགས། །སྲིན་པོ་དྲི་ཟ་ཡི་དྭགས་ཚོགས། །མ་རུངས་གདུག་པའི་སེམས་འཆང་བ། །འཁོར་དང་བཅས་པ་ཀུན་ལ་བསྔོ། །ཞེས་གསུངས་པ་དང་།

གསུར་མཆོད་འདོད་ཡོན་སྤྲིན་ཕུང་ལས། དམར་གསུར་བྱེད་ན། སྲོད་ཀྱི་དུས་སུ་ཚིལ་གྱིས་སྤྲུས་པའི་ཕྱེ་མར་ལ་བྱིན་རྟེན་གང་འཛོམས་བསྲེ་ཞིང་། གསུངས་པ་དང་། བསྔོ་ཡུལ་ཡང་། དམར་གསུར་འདོད་པའི་ཡོན་ཏན་ལྔ་ཚང་བས། །ཧེ་རུ་ཀ་དཔལ་གནས་གསུམ་མཁའ་འགྲོའི་ཚོགས། །དཔལ་མགོན་ལྕམ་དྲལ་དམ་ཅན་རྒྱ་མཚོ་བཅས། །དགྱེས་ཤིང་ཚིམ་ནས་འདོད་དོན་གང་བཅོལ་སྒྲུབས། །གཞན་ཡང་འགྲོ་བའི་ཤ་ཁྲག་སྲོག་དབུགས་ལ། །རྔམ་པའི་འབྱུང་བོའི་ཚོགས་ཀུན་རབ་ཚིམ་ནས། །གནོད་འཚེ་བསམ་སྦྱོར་སྤོངས་ལ་བྱམས་སེམས་བསྐྱེད། །འཇིག་རྟེན་ཀུན་ཏུ་བདེ་ལེགས་རྒྱ་ཆེན་སྒྲུབས། །སྔོན་ཚེ་རང་དོན་ལ་ཞེན་གཏི་མུག་པས། །གཞན་ལ་བསད་བརྡུང་འཕྲོག་བཅོམ་ལས་བསགས་པའི། །འཁོན་འགྲས་ཞི་ཞིང་བུ་ལོན་ལན་ཆགས་འཁྱེར། །ཀུན་ཀྱང་ཕན་བདེའི་དཔལ་ལ་སྤྱོད་གྱུར་ཅིག །ཅེས་སོ། །

ཁྱད་པར་དུ་རྫ་དཔལ་སྤྲུལ་གྱིས་ཕྱུགས་ཀྱི་ནད་ཡམས་གཅོད་ཕྱིར། དམར་གསུར་གཏོང་ཡུལ་ཁ་གསལ་བ་ཞིག་གསུངས་ཡོད་པ་ནི། འབྱུང་བོ་མི་མ་ཡིན་ཤ་ཟ་ཚེ་ལ་རྐུ་བ་མདངས་འཕྲོག་པ། སེམས་ཅན་གཞན་གྱི་དབུགས་ལ་རྔམ་པ། སྡང་བ་དང་སྡུག་པའི་བསམ་སྦྱོར་ཅན་མི་ཡི་ནད་བདག གནག་ཕྱུགས་ཀྱི་གོད་བདག་ལ་སོགས་པ་རྒྱ་འདྲེ་འགོང་བོའི་རིགས་ཆེ་ཆུང་ཇི་སྙེད་མཆིས་པ་མཁོ་རྒུའི་འདོད་ཡོན་ཟད་མི་ཤེས་པའི་ལོངས་སྤྱོད་ཆེན་པོ། བཟའ་བཏུང་གནས་མལ། ཤ་ཡི་རི་བོ། ཁྲག་གི་རྒྱ་མཚོ། རུས་པའི་གྲམ་ཁྲོད། པགས་རློན་དང་སྐྲ་ཡི་བསྒོ་བ། རྐང་ཀླད་ཞག་གི་གྲུ་ཆར་ལ་སོགས་པ་རང་རང་ཅི་འདོད་ཀྱི་དངོས་བོ་བཟའ་བས་མི་ཟད་པ། བཏུང་བས་མི་བྲི་བ། བསྒོས་པའི་མི་རྙིང་བ། རི་བོ་བས་འཕང་མཐོ་བ། རྒྱ་མཚོ་བས་གཏིང་ཟབ་པ། ཆུ་ཀླུང་བས་རྒྱུན་རིང་བ། ནད་ཀུན་སེལ་བའི་སྨན་མཆོག འཆི་བ་གསོ་བའི་བདུད་རྩི། སྡུག་བསྔལ་སེལ་བའི་རྩི་ཆེན་དུ་དམིགས་ཏེ་འབུལ་ལོ། །སྦྱིན་ནོ། །བསྔོའོ། །དེ་རྣམས་ཀྱི་འདོད་པ་ཚིམ་ནས། སེམས་ཅན་ཐམས་ཅད་ལ་བྱམས་པའི་སེམས་དང་། སྙིང་རྗེའི་སེམས་དང་། སྙིང་ཉེ་བའི་སེམས་དང་ལྡན་ནས་མི་དང་གནག་ཕྱུགས་ལ་གནོད་པའི་འཚེ་བ་སྤངས་ཏེ་འགྲོ་བ་མང་བོ་སྲོག་གི་འཇིགས་པ་ལས་ཐར་བར་གྱུར་ཅིག ཅེས་སོ། །

ཡང་། ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་ཆོས་སྐོར་ལས་རྡོར་ལེགས་ལ་གསུར་མཆོད་བྱེད་ཚུལ་ལས་ར་སྐྱེས་ཁམ་པའི་བམ་གྱི་རྭ་དང་རྨིག་བཞིའི་རྩིད་སྤུ་རྣམས་དོར་ཞིང་། གྲོད་པ་དང་རྒྱུ་མ་སོགས་ཀྱི་མི་གཙང་བ་རྣམས་ལེགས་པར་བསལ་ལ། དོན་སྙིང་དབང་བོ་ནང་ཁྲོལ་ཤ་ཚིལ་རུས་པ་པགས་པ་དང་བཅས་པ་ཞིབ་མོར་གཏུབ་ཏེ་གཙང་མར་བསྐམས་ནས། སྤོས་དཀར་དང་ཙན་དན་ཤུག་པ་སོགས་སྨན་སྤོས་བཟང་བོ་བསྲེས་ནས་ཕྱེ་གཙང་དང་སྦྱར་བའི་གསུར་རྫས་དང་། མ་འབྱོར་ན་ར་ཚིལ་སྤོས་དཀར་འབྲུ་ཕྱེ་སྦྱར་བ་ཙམ་ཡང་རུང་ལ། གསུར་རྫས་དུ་བ་མ་ཡལ་བར་མི་སྒུལ་བར་གསུངས་པ་དང་། ཡང་། དེ་ཉིད་ལས། དེང་སང་འགའ་ཞིག་གིས་ར་ལུག་སོགས་གསོན་པོར་མེར་བསྲེག་ནས་དམ་ཅན་དང་ཁྱབ་འཇུག་སོགས་ལ་གསུར་གཏོང་ཁུལ་བྱེད་པ་མུ་སྟེགས་ཀྱི་ལུགས་སྲོལ་རང་ཉིད་འཇིག་རྟེན་ཕྱི་མར་དམྱལ་བའི་མེར་བསྲེག་པའི་རྒྱུ་འབའ་ཞིག་སྒྲུབ་པར་ཟད་ཀྱི། སྲུང་མ་དགྱེས་པའི་ཐབས་སུ་འགྱུར་མི་སྲིད་པས་བློ་ལྡན་རྣམས་ཀྱིས་ངན་སྐྱུགས་ལྟར་དོར་བར་བྱོས་ཤིག་ཅེས་གདམས་ཡོད་དོ། །

༤ ཚ་གསུར་གྱི་ཕན་ཡོན། གསུང་རྒྱུན་ལ་དགྲ་བཅོམ་པ་ལྔ་བརྒྱར་ཞལ་ཟས་དྲངས་པ་དང་། ཚ་གསུར་བཏང་བ་ཕན་ཡོན་མཉམ་པར་བཤད་པ་དང་། ཐ་ན་ཨ་མདོའི་དམངས་གཞས་ལས་ཀྱང་། དམྱལ་བའི་འཕྲང་ལམ་བར་མ་ནས། །ཞིམ་པོའི་ཟས་ཞིག་ཟོས་ནི་མེད། །ཞིམ་པོའི་ཟས་ཞིག་ཟོས་ནོ་འདི། །སྔས་མགོ་བླ་མའི་ཚ་གསུར་རེད། །ཞེས་གསུངས་པ་ལས་ཀྱང་དམངས་ཁྲོད་དུ་ཚ་གསུར་དར་ཁྱབ་ཇི་ལྟར་ཆེ་བ་རྟོགས་ཐུབ་པ་དང་། གཞན་ཡང་། ཚེ་ལྡན་རྣམས་ཀྱང་གནས་སྐབས་སུ་བར་ཆད་སེལ་ཞིང་། བདེ་བ་ཅན་དུ་སྐྱེ་བ་སོགས་ཆོས་མཐུན་གྱི་བསམ་དོན་འགྲུབ་པ་དང་། མཐར་ཐུག་ཚོགས་གཉིས་རྫོགས་ཏེ་འཚང་རྒྱ་བར་འགྱུར་རོ། །ཞེས་པཎ་ཆེན་བློ་བཟང་ཆོས་རྒྱན་གྱིས་གསུངས་སོ། །

ཡང་། མི་ཕམ་པས། འདི་ནི་སྦྱིན་པའི་ཕར་ཕྱིན་རྫོགས་པ་དང་། བར་ཆད་ཞི་བའི་ཐབས་ཁྱད་པར་ཅན་ཡིན་པས། སུས་ཡང་ཉམས་སུ་བླང་བར་བྱ་ལ། ལྷག་པར་དུ་དུས་ངན་གྱི་སེམས་ཅན་རྣམས་བརྣབ་སེམས་དང་བརྐམ་ཆགས་འཕེལ་བའི་སྐབས་སུ། ཟ་འདྲེ་འགོང་བོ་མང་ཞིང་མི་ཕྱུགས་ལ་འཚེ་བ་དང་། ལོངས་སྤྱོད་ལ་གནོད་པ་མང་བའི་དུས་དང་། ཟས་ནོར་གྱི་ཕྱིར་ཡུལ་སྣ་ཚོགས་སུ་རྒྱུ་བའི་སྐབས་དང་། གཅན་སྤྱང་བྱི་བ་སོགས་ཀྱིས་གནོད་པ་དང་། འདྲེ་གནོད་དང་འདྲེ་དོགས་ཆེ་བའི་སྐབས་སོགས་སུ་སྙིང་རྗེས་ཀུན་ནས་བསླང་སྟེ་བྱས་ན་འཆི་བ་བསླུ། ནད་གདོན་བྲལ། སྲིས་རྨེ། མཐུན་རྐྱེན་འཕེལ། ཚོགས་རྫོགས་པ་སོགས་རང་གཞན་ལ་འཕྲལ་དང་ཡུན་གྱི་ཕན་པའི་དགོས་པ་དུ་མ་ཡོད་པ་ནི། སྨོས་མ་དགོས་པར་ནན་ཏན་བྱའོ། །ཞེས་དང་།

ཡང་། ཀུན་བཟང་བླ་མའི་ཞལ་ལུང་ལས། དཀར་གསུར་དམར་གསུར་ལ་སོགས་པ་འདི་དག་ཀྱང་མཁའ་ལ་རྒྱུ་བའི་ཡི་དྭགས་ཀྱི་རིགས་ལ་ཕན་ལྷག་པར་ཆེ་ཞིང་། དེ་ལ་བརྟེན་ནས་སེམས་ཅན་གྱི་སྲོག་ལ་ཟ་བའི་འབྱུང་བོ་མི་མ་ཡིན་པ་རྣམས། གནས་སྐབས་དྲི་གསུར་གྱི་ཟས་ཀྱིས་ཚིམ་པ་དང་། ཆོས་ཀྱི་སྦྱིན་པས་རྒྱུད་གྲོལ་བ་སོགས་ལ་བརྟེན་ནས་སེམས་ཅན་གྱི་སྲོག་ལ་མི་འཚེ་བས་སེམས་ཅན་མང་པོ་འཆི་བའི་འཇིགས་པ་ལས་སྐྱོབ་པས། སྐྱབས་ཀྱི་སྦྱིན་པའང་ཡིན་ཏེ། དོན་དུ་སྦྱིན་པ་རྣམ་པ་གསུམ་ག་ཚང་། ཞེས་ཀྱང་གསུངས་སོ། །

གཞན་སྟོན་པ་ཞལ་བཞུགས་དུས། ཕག་རྫི་མོའི་བུ་སྐྱེ་བ་སྔོན་གྱི་དྷ་སུའི་སྐབས་ཀྱི་ཉེས་པའི་རྣམ་སྨིན་གྱིས། ཁ་མེད་པ་ཞིག་ཏུ་སྐྱེས་པ་ལ། འཆི་ལ་ཐུག་པའི་ཚེ། ཕ་མ་ཅི་བྱ་གཏོལ་མེད་དུ་གྱུར་ཏེ། ཟས་སུ་གསུར་བཏང་བས་ཁོས་ལྟོ་བ་འགྲང་ནས། ཕྱིས་སུ་ཆོས་སྒོར་ཞུགས་པ། འབྲུག་པ་ཀུན་ལེགས་ཀྱི་རྣམ་ཐར་ན་ཡོད་པ་དང་།

ཡང་། རྗེ་བཙུན་མི་ལ་རས་པས་གཉའ་ནང་བདུད་འདུལ་ཕུག་ཏུ་སྒོམ་སྒྲུབ་མཛད་སྐབས། ཉིན་མཚན་བཅོ་བརྒྱད་དུ་ཁ་བ་བབས་པས། ཟླ་དྲུག་ལ་འགྲུལ་ལམ་ཁ་བས་བཀག་དུས། ཡོན་བདག་རྣམས་ཀྱིས་རྗེ་བཙུན་མུ་གེས་གྲོངས་པར་ཐག་བཅད་ནས་དགོངས་རྫོགས་བསྒྲུབས་ཏེ། སྐུ་གདུང་གདན་འདྲེན་དུ་ཕྱིན་དུས། ཁོང་སྔར་བས་གཟི་མདངས་ཆེ་བར་མཐོང་ནས། རྒྱུ་མཚན་ཞུས་ཙ་ན། རྗེ་བཙུན་གྱི་ཞལ་ནས། ང་ཕལ་ཆེར་ཏིང་ངེ་འཛིན་གྱི་ཟས་དང་མཁའ་འགྲོའི་ཚོགས་སྐལ་སོགས་དང་། ཁྱད་དུ་ཁ་རྩང་རྟའི་ཟླ་བའི་སྨད་ལ་ཁྱེད་བུ་སློབ་རྣམས་ཀྱིས་བཟའ་བཏུང་མང་བོ་སྟེར་བྱུང་བའི་ཉམས་ཤིག་ཤར་བ་ནས་ཟ་མ་ཟ་སྙིང་ཡེ་མི་འདོད་པ་ཞིག་བྱུང་བས། དེ་དུས་ཁྱེད་ཚོས་ཅི་བྱས་པ་ཡིན་གསུངས་པར། ཁོང་ཚོས་དགོངས་རྫོགས་སུ་མཆོད་པ་ཕུལ་ཚུལ་ཞུས་པས། རྗེ་བཙུན་གྱི་ཞལ་ནས། འཇིག་རྟེན་པ་རྣམས་ཀྱིས་དགེ་རྩ་བགྱིས་པ་བར་དོ་བ་ལ་ཕན་པར་འདུག་གོ །ཞེས་སོ། །

ཡང་། བར་སྲིད་པ་ཞིག་མིའི་ཁོག་ཏུ་ཞུགས་ཏེ། འོད་སྣང་ཡོད་སར་སྡོད་མི་ཚུགས་པར་མུན་ཁམས་ནས་ང་ལ་ཟ་རྒྱུ་མེད། འཐུང་རྒྱུ་མེད། གྲོད་ཁོག་ལྟོགས་ཀྱི་འདུག་ཟེར་མཁན་ཞིག་ཁྲི་བྱང་རིན་པོ་ཆེའི་མདུན་དུ་ཡོང་བར། ཁོང་གིས་གསུར་བཏང་ཀྱང་། སྣ་ཤེས་ལ་ཚོར་བ་མེད་སྙམ་དུ་འདུག་པ་ལ། ཁྲི་བྱང་རིན་པོ་ཆེས་སྔགས་དྲུག་ཕྱག་དྲུག་ཅེས་གསུར་བསྔོས་གནང་བས། བར་སྲིད་ཁོག་ཞུགས་དེ་གསུར་ལ་ཆོབ་ཆོབ་ཅེས་ཟ་རྒྱུ་དང་ངོམས་རྒྱུ་ཡོད་པ་ལྟར་བྱས་ནས། ད་ང་གྲོད་ཁོག་རྒྱགས་སོང་། ཞེས་བརྗོད་པའི་ལོ་རྒྱུས་རྒྱལ་དབང་བཅུ་བཞི་བའི་ནང་ཆོས་ངོ་སྤྲོད་ལས་གསུངས་པ་དང་།

 ཡང་། སྤྱི་ཚོགས་རྙིང་བའི་ནང། བོད་མི་མང་བོར་མ་ཉེས་ཁ་གཡོག་ཐེབས་ཏེ་འཛིན་བཟུང་བྱས་ནས། ཉིན་ཞག་མང་བོར་ཟས་བཅད་བཏང་སྟེ། མུན་ནག་ཏུ་བཀག་ཉར་བྱས་པས། ཡུལ་མི་ཀུན་གྱིས་ཕལ་ཆེར་གྲོངས་ཡོད་ལས་ཆེ་སྙམ་ནས་ཚ་གསུར་བཏང་བས། དུས་ཚོད་འཁྲུལ་མེད་དུ་སྣ་ལམ་ལ་རྩམ་དྲི་འཐུལ་བའི་རྒྱུ་མཚན་ད་ལྟ་ཡང་དངོས་སུ་བཤད་རྒྱུ་ཡོད་དོ། །གོང་གསལ་འདི་དག་ལ་གཞིགས་ན། གསོན་པོ་ཁ་ཅིག་ལའང་གསུར་གྱིས་ཕན་ཐོགས་པར་གདོན་མི་ཟའོ། །དེ་ཡང་ཚ་གསུར་གྱི་སྐོར་ཞིབ་ཏུ་རྟོགས་འདོད་པ་དག་གིས། མ་མཐའ་ཡང་། ཁྲི་སྤྲུལ་བློ་བཟང་རྒྱལ་མཚན་སེང་གེ བསྟན་དར་ལྷ་རམས་པ། བཀྲ་ཐང་བློ་བཟང་ཆོས་ཀྱི་ཉི་མ། ཆེ་ཤོས་ངག་དབང་བཤད་སྒྲུབ་བསྟན་པའི་ཉི་མ་སོགས་ཀྱི་ཚ་གསུར་གྱི་ཆོ་ག་ལ་བལྟ་བར་བྱའོ། །

དཀར་ཟས།

༡ སྲོག་གཅོད་ཀྱི་ལས་ངོས་བཟུང་བ། རྗེ་བཙུན་མི་ལ་སྐུ་མྱ་ངན་ལས་འདའ་ཁར། མདོར་ན། ཆོས་ཐམས་ཅད་ཀྱི་རྩ་བ། ལས་འབྲས་ལ་ཡིད་ཆེས་ཀྱི་དད་པ་འདི་ཁོ་ན་ཡིན་པས། ཞེས་བཀའ་བསྩལ་བ་བཞིན། དེའི་ཚུལ་ཡང་། མདོ་སྡེ་ལས་བརྒྱ་བ་ལས། ལུས་ཅན་རྣམས་ཀྱི་བདེ་སྡུག་ནི། །ལས་རྣམས་ཡིན་པར་ཐུབ་པས་གསུངས། །ལས་རྣམས་ཀྱང་ནི་སྣ་ཚོགས་ལ། །དེ་ཡིས་འགྲོ་འདི་སྣ་ཚོགས་བྱས། །ཞེས་པ་ལྟར། སྤྱིར་བདེ་སྡུག་ཐམས་ཅད་ལས་ཀྱི་རྣམ་སྨིན་ལས་འབྱུང་ལ། འདིར་ལས་ལམ་བཅུའི་བྱེ་བྲག་སྲོག་གཅོད་པའི་ལས་ཀྱི་ངོ་བོ་ནི། ཡུལ་ཕ་རོལ་བོ་དུད་འགྲོ་སོགས་གང་ཡིན་ཡང་། དེ་ཉིད་གསོད་འདོད་ཀྱིས། གསོད་པའི་སྦྱོར་བ་དངོས་སུ་བརྩམས་ཏེ། དེའི་སྲོག་གི་དབང་བོ་འགག་པར་བྱེད་པའོ། །དེ་ཡང་སེམས་ཅན་ཕྱུགས་ལྟ་བུ་ལ་མཚོན་ན། གསོད་མཁན་གྱིས་ཡ་ང་བག་ཚ་མེད་པར་སུག་བཞི་བཀྱིགས། མཆུ་བསྡམས། ཁྲག་རྩ་བཅད། སྙིང་ཁྲག་དྲོན་མོ་རྒྱང་ངེ་ཐོན། ཧར་སྒྲ་འབྱིན། མིག་ཀླད་ལ་ལྡོག་པ་དང་། ཡང་ན། སྐེ་བྲེག་པ། གསོན་བཞིན་ཐབ་ཏུ་བསྲེགས་པ། འགྲོ་ལྡོག་བྱེད་བཞིན་ལྟོ་བ་བཤགས་ཏེ་ནང་ཁྲོལ་ཕྱུང་བ་སོགས། འཇིགས་ཤིང་སྐྱི་བུང་བའི་གསོད་ལུགས་དྲག་པོས། ཙེར་སྐད་ལྷང་ངེ། བཤང་གཅི་ཐར་རེ། མཆི་མ་ཤར་རེ། འཕག་འཚག་ལྷང་ངེ་དབུགས་ཀྱི་རྒྱུ་བ་གཅོད་པ་ནི། ཡ་རབས་དམ་པས་བལྟར་མི་བཟོད་པ་དང་། མ་རབས་ཐ་ཤལ་ཅིག་ཡིན་ཡང་། ཡིད་འགྱུར་ཐེབས་པ་འདི་དག་ནི་སྲོག་གཅོད་ཀྱི་ངོ་བོའོ། །ཞིབ་ཏུ་གཞི། བསམ་པ། སྦྱོར་བ། མཐར་ཐུག་བཅས་དངོས་གཞི་ཚང་མ་ཚང་སོགས་གཞུང་ལུགས་གཞན་ལས་ཤེས་པར་བྱའོ། །

 ༢ སྲོག་གཅོད་དང་དམར་ཟས་བསྟེན་པའི་ཉེས་དམིགས། སྲོག་གཅོད་ལ་ཉེས་དམིགས་ཆེ་བའི་རྒྱུ་མཚན་ནི། དམ་པ་ལྷ་ཆོས་ལྟ་ཅི། འཇིག་རྟེན་མི་ཆོས་ཀྱི་དྲང་ཐད་ནས་བཤད་ནའང་། རང་སྲོག་ལ་མི་གཅེས་པའམ། འཆི་བ་ལ་མི་འཚེར་བ་གཅིག་ཀྱང་མེད། ཁ་དཔེར་ཡང་། མི་བསྡད་སར་རང་སྡོད། ཟེར་བ་བཞིན། བདག་བཞན་བརྗེ་སྤོར་བརྒྱབ་སྟེ་བསམ་བློ་བཏང་ན། དེ་ལ་ཞེ་མི་འཚེར་བའམ་སྙིང་མི་རྗེ་བའི་རང་དབང་ག་ན་ཡོད། མི་སྐད་ཤེས་པ་དང་འཕྲལ་གྱི་ཀླད་པ་མྱུར་བུལ་གྱི་ཁྱད་པར་མ་གཏོགས་པ་སྡུག་བསྔལ་གྱི་ཚོར་བ་གཅིག་མཚུངས་ཡིན་པ་མཐོང་ཆོས་སུ་སྣང་སྟེ། སེམས་ཅན་དེ་དག་གསོད་ཚེ། སྲོག་གཅེས་ཀྱི་རྒྱུ་མ་དྲུད་ནས་བྱེར་བ། སྐད་ངན་མི་བཟད་པ་འདོན་པ། འཕག་འཚག་དང་། དངངས་སྐྲག་གི་རྣམ་འགྱུར་འདྲ་མིན་སྟོན་པ་སོགས་མངོན་སུམ་དུ་སྣང་བ་དེའོ། །འདི་ནི། ཚོམས་ལས། འཆི་བའི་མི་འཇིགས་གང་ཡང་མེད། །འཚོ་བའི་སྲོག་ལ་ཀུན་ཀྱང་འཛེམས། །རང་གི་ལུས་ལ་དཔེར་ལོངས་ལ། །གཞན་ལ་གནོད་པ་མ་བྱེད་ཅིག། ཞེས་པ་དང་མཐུན་སྣང་དུ་གྲུབ་བོ། །ཁྱད་པར་དུ། ཚེ་འདིའི་དབང་དུ་བཏང་ན་དམར་ཟས་ལ་བསྟེན་པའི་ཉེས་དམིགས་ཤིན་ཏུ་ཆེ་སྟེ། སྙིང་ནད་དང་ཁྲག་ཤེད་མཐོ་བ། ཁྲག་གར་མོར་གྱུར་ཏེ་ཁྲག་རྩའི་ནང་དུ་འཚངས་པ། ཤའི་ནང་གི་སྲིན་འབུ་ཕྲ་མོ་ལུས་ལ་ཞུགས་ཏེ་ནད་སྣ་ཚོགས་བསྐྱེད་པ། མི་ནི་གཅན་གཟན་ལས་རྒྱུ་མ་རིང་བས། ཤ་མི་འཇུ་བར་རྒྱུ་མ་ལ་ཡུན་རིང་གནས་པ་དུག་ཏུ་གྱུར་ཏེ། མཆིན་པའི་ཁུར་ལྗི་རུ་གྱུར་ནས། ཁྲག་ནད་བསྐྱེད་པ། རྒྱུད་དམུ་རྒོད་པོ། ཡ་ང་བ་མེད་པ། སེམས་དུག་ལྡན་པ། གཏུམ་དྲག་ཅན། ཅུང་ཟད་འགུལ་བསྐྱོད་བྱས་ཀྱང་ཐང་ཆད་པ། གཉིད་ཆེ་ཞིང་རིག་པ་མི་གསལ་བ་སོགས། རིག་གསར་ཚན་རིག་གིས་དཔྱད་བརྡར་ཞིབ་ཏུ་བཏང་སྟེ། ཚགས་པར་དང་བརྙན་འཕྲིན་ཁག་ལས་བརྒྱུད་སྒྲོགས་གནང་བ་མཐའ་ཡས་པས། དེ་དག་ལ་ཞིབ་ཏུ་གཟིགས་ན་ངེས་ཤེས་འདྲོངས་པར་འགྱུར་རོ། །

དམ་པ་ལྷ་ཆོས་ཀྱི་ཕྱོགས་ལས་བཤད་ནའང་། ལང་ཀར་གཤེགས་པའི་མདོ་ལས། བློ་གྲོས་ཆེན་པོ། སྲོག་ཆགས་ཡུན་རིང་བོ་ནས་འཁོར་བ་རྣམས་ལ། གང་ཕ་འམ། མ་འམ། སྤུན་ནམ། སྲིང་མོ་འམ། བུ་འམ། བུ་མོ་འམ། གཉེན་བཤེས་སམ། གཉེན་དང་གཉེན་ལྟ་བུར་གང་ཡང་རུང་བར་མ་གྱུར་བའི་སེམས་ཅན་དེ་ནི། རྙེད་པར་སླ་བའི་རྣམ་པ་གང་ཡང་མེད་དོ། །གཉེན་དང་གཉེན་ལྟ་བུར་གྱུར་བ་དེ་དག་ཚེ་གཞན་དུ་ལུས་བརྗེས་པ་རི་དྭགས་དང་། ཕྱུགས་དང་། བྱའི་སྐྱེ་གནས་གང་ཡང་རུང་བར་གྱུར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཆོས་འདོད་པ། འབྱུང་བོ་ཐམས་ཅད་བདག་དང་འདྲ་བ་གྱུར་བར་འདོད་པས། སྐྱེ་བོ་སྲོག་ཆགས་སུ་གྱུར་བ་ཐམས་ཅད་ལས་བྱུང་བའི་ཤ་ཇི་སྐད་དུ་བཟའ་བར་བྱ། ཞེས་དང་། གཞན་ཡང་། སྟོན་པ་བཅོམ་ལྡན་འདས་ཀྱིས་འདུལ་བ་ལས། རྣམ་གསུམ་དག་པའི་ཤ་དེ་ཡང་། གནས་སྐབས་ཐབས་ལ་མཁས་པས་གནང་བ་ཙམ་མ་གཏོགས། དགོངས་གཞི་དོན་གྱིས་གནང་བ་མིན་ཏེ། མྱང་འདས་ལས། དེ་བཞིན་གཤེགས་པས་ཅིའི་ཕྱིར་ཤ་བཟའ་བར་མ་གནང་བ་ཡིན། བཀའ་བསྩལ་བ། ཤ་བཟའ་བའི་མིར་སྙིང་རྗེ་ཆེན་པོའི་ས་བོན་མེད་དེ། འོད་སྲུང་གིས་ཅིའི་ཕྱིར་རྣམ་གསུམ﹙མཐོང་ཐོས་དོགས་གསུམ་དང་བྲལ་བའི་ཤ﹚དག་པའི་ཤ་གནང་པ་ཡིན། བཀའ་བསྩལ་བ། འོད་སྲུང་དེ་ནི་ངས་ཁོང་ཚོས་ལམ་སེང་ཤ་ཟས་གཅོད་མི་ཐུབ་པར་འཇིགས་པ་བྱེད་པ་ཡིན་པས། གནས་སྐབས་ཙམ་སྟབས་བདེ་སླད་གནང་བ་ཡིན་ཏེ། དེ་ནི་ལས་དང་བོ་རྣམས་རིམ་བཞིན་ཤ་གཅོད་དུ་འཇུག་པའི་སླད་ཡིན་པས། རིམ་བཞིན་ཤ་གཅོད་དུ་འཇུག་པའི་ཆེད་དུའོ། །འོད་སྲུང། ངས་དུས་ད་ནས་བཟུང་གཏན་ལ་འབེབས་ཏེ། སངས་རྒྱས་ཀྱི་སློབ་མ་ཐམས་ཅད་ཀྱིས་འགྲོ་བ་སེམས་ཅན་གང་གིས་ཀྱང་ཤ་བཟའ་མི་ཆོག་གོ། ཞེས་ནང་བ་སངས་རྒྱས་པ་ཞིག་ཡིན་ཕྱིན་ཤ་བཟའ་བ་གཏན་གཅོད་བྱས་ཡོད་དོ། །

དེ་ལས་གཞན་མདོ་ལས། ང་མྱ་ངན་ལས་འདས་པའི་རྗེས་ཆོས་ཀྱི་སྙིགས་མའི་དུས་སུ། ལྷ་འདྲེ་འདི་དག་འཇིག་རྟེན་དུ་འུར་ཞིང་དར་ནས། དེ་དག་གིས་ཤ་ཟོས་པས་བྱང་ཆུབ་ཀྱི་གོ་འཕང་འཐོབ་བོ་ཞེས་འཆད་དོ། །ཀུན་དགའ་བོ་ངས་དགེ་སློང་རྣམས་ལ་རྣམ་པར་དག་པའི་ཤ་ལྔ་ཟ་བར་གནང་བ་ནི། ཤ་འདི་དག་ངའི་རྫུ་འཕྲུལ་གྱིས་བསྐྱེད་པ་ཡིན་གྱི། སྲོག་དང་འབྲེལ་བ་མ་ཡིན་ནོ། །ཁྱེད་ཅག་བྲམ་ཟེའི་གནས་དྲོད་གཤེར་དང་ལྡན་པའི་སྟེང་དུ་རྡོ་བ་དང་བྱེ་མ་དང་བཅས་པའི་རྩྭ་དང་ལོ་མ་མི་སྐྱེ་བས། ངས་སྙིང་རྗེ་ཆེན་པོ་དང་རྫུ་འཕྲུལ་གྱིས་བྱིན་གྱིས་བརླབས་ནས། འདི་ལྟ་བུས་བྱམས་སྙིང་རྗེ་ཆེན་པོས་རྫུན་པའི་ཤ་ཞེས་མིང་དུ་བཏགས་ནས་ཁྱེད་ཅག་གིས་རོ་མྱོང་བར་གྱུར་ཏོ། །དེ་བཞིན་གཤེགས་པ་མྱ་ངན་ལས་འདས་པའི་རྗེས་སུ། སེམས་ཅན་གྱི་ཤ་ཟ་བཞིན་དུ་ཇི་ལྟར་ཤཱཀྱའི་སྲས་ཞེས་བྱ། ཁྱེད་ཅག་ཤེས་པར་གྱིས་ཤིག སྐྱེ་བོ་ཤ་ཟ་བ་འདི་དག་བློ་སད་ནས་བསམ་གཏན་འཐོབ་པར་གྱུར་ན་ཡང་། དེ་དག་ཐམས་ཅད་སྲིན་པོར་གྱུར་ནས། ལས་ཀྱི་འབྲས་བུ་རྫོགས་ཏེ་ངེས་པར་སྐྱེ་འཆིའི་སྡུག་བསྔལ་གྱི་རྒྱ་མཚོར་ལྟུང་ངོ་། །དེ་བཞིན་གཤེགས་པའི་སློབ་མ་ཡིན་པའི་སྐྱེ་བོ་འདི་དག་ཕན་ཚུན་གསོད་པ་དང་། མིད་པ་དང་། ཟ་བ་དག་རྒྱུན་མི་ཆད་པ་འདི་དག་ཁམས་གསུམ་ལས་ཇི་ལྟར་འབྱུང་བར་འགྱུར། ཁྱོད་ཀྱིས་འཇིག་རྟེན་གྱི་སྐྱེ་བོ་དག་ཏིང་ངེ་འཛིན་ལ་སློབ་ཏུ་འཇུག་པས་ན། གཞན་གསོད་པའི་རྒྱུན་ཆོད་ཅིག་དང་། འདི་ལ་དེ་བཞིན་གཤེགས་པའི་སྔོན་གྱི་བཅོམ་ལྡན་གྱི་ཡང་དག་པའི་རྣམ་པར་དག་པ་རྨད་དུ་བྱུང་བའི་བསླབ་པ་གཉིས་པ་ཞེས་གསུངས་སོ། །ཞེས་དང་།

གཞན་ཡང་། ལང་གཤེགས་ལས། སྔོན་གྱི་དྲང་སྲོང་གི་ཟས་བོར་ནས་ཤ་གཟན་བཞིན་དུ་ཤའི་ཟས་ཀྱིས་ལྟོ་གང་ཞིང། ནམ་མཁའ་དང་། ས་དང་། ཆུ་ལ་གནས་པའི་འགྲོ་བ་ཕྲ་མོ་སྐྲག་པར་བྱེད་པ་རྣམས། འཇིག་རྟེན་འདི་དག་ཀུན་ཏུ་རྒྱུའོ། །འདི་དག་གིས་དགེ་སྦྱོང་ཉིད་ཉམས་སོ། །ཞེས་དང་། མྱང་འདས་ལས། ཤ་ཟ་བ་ནི་འགྲོ་ཡང་རུང་འདུག་ཀྱང་རུང་སྟེ། སྲོག་ཆགས་ཐམས་ཅད་དེའི་དྲི་ཚོར་ནས། དེས་འཇིགས་ཏེ། དཔེར་ན། མིས་ཤིང་ཀུན་ནམ་སྒོག་སྐྱ་ཟོས་ན། མིའོ་ཅོག་གི་སེམས་མ་དད་པར་འགྱུར་ཞིང་། མི་མཐུན་པར་འགྱུར་ལ། མི་མང་བོ་ཚོགས་པའང་སྐྱེ་བོ་མང་བོས་གང་བའི་ནང་དུ། སེམས་ཅན་དེ་དག་གིས་ཆེ་གེ་མོ་ཞིག་གིས་ཟོས་སོ། །ཞེས་པ་སོགས་མྱང་འདས་དང་། སྤྲིན་ཆེན། སོར་ཕྲེང་གི་མདོ་ལས་གསལ་བསྒྲགས་བྱས་ཡོད་པས། ཞིབ་ཏུ་དེ་དག་ཏུ་གཟིགས་པར་བྱའོ། །

 

བོད་ཀྱི་གཤིན་ཆོས་བྱེད་སྟངས།

༡ བར་དོ་འགྲུབ་ལུགས། འཆི་ལྟས་ལ་མདོ་རྒྱུད་སོགས་ལས་མང་དུ་བཤད་ཀྱང་། གསོ་རིག་རྒྱུད་བཞི་ལས། ལུས་ཀྱི་འཇིག་ལྟས་རྣམ་པ་བཞི་ཡིན་ཏེ། རིང་དང་ཉེ་བ་མ་ངེས་ངེས་པའོ། །ཞེས་མན་ངག་རྒྱུད་ཀྱི་ལེའུ་བདུན་པར་གསལ་ཞིང་རྒྱས་པར་གསུངས་པ་བཞིན། འཆི་ལྟས་ཀྱི་མཇུག་ཏུ་རྣམ་ཤེས་འཕོ་བ་སྟེ། དེ་ཡང་མིའི་ལུས་ལ་རྩ་དབུ་རྐྱང་རོ་གསུམ་ཡོད་པ་ལས། དབུས་ཀྱི་རྩ་དབུ་མའི་ནང་སྙིང་ཀའི་ཐད་ཀྱི་རྩ་མདུད་གསུམ་ཡོད་པའི་ནང་དུ། རྣམ་ཤེས་དང་བོ་གང་དུ་ཆགས་པའི་གནས་མི་ཤིགས་པའི་ཐིག་ལེ་རྒྱ་སྲན་ཙམ་ཡོད་པ་དང་། འཆི་བའི་དུས་ཀྱང་རྣམ་ཤེས་རགས་པ་རྣམས་རིམ་གྱིས་བསྡུས་ཏེ། ལུས་ཀྱི་འབྱུང་བ་རྣམས་ཐིམ་ཚར་རྗེས། རྣམ་ཤེས་ཤིན་ཏུ་ཕྲ་བ་དེ་ཉིད་མི་ཤིགས་པའི་ཐིག་ལེའི་དཀྱིལ་ནས་ཐོན་པ་དང་། ལུས་སེམས་ཀྱི་འབྲེལ་བ་ཆད་པ་སྟེ། འཆི་སྲིད་འགག་པ་དང་དུས་མཉམ་དུ་སྲང་མདའི་མཐོ་དམན་བཞིན་བར་དོ་གྲུབ་ལ། དེ་ཡང་སྐྱེ་བ་ཕྱི་མའི་བྱད་གཟུགས་བཞིན། བར་དོ་བ་དེ་དབང་བོ་ཀུན་ཚང་མངོན་ཤེས་ཡོད་པ། ལས་ཀྱི་རྫུ་འཕྲུལ་ཅན། སྐྱེ་གནས་དང་རྟེན་བྱིན་ཅན་མ་གཏོགས་གང་ལ་འང་ཐོགས་པ་མེད་པ། རིས་མཐུན་ལྷ་མིག་དག་པས་མཐོང་བའོ། །ཐ་མལ་བ་ཤི་བའི་རྗེས་སུ་རྣམ་ཤེས་ཁ་བྲལ་ཏེ་བར་དོ་གྲུབ་རྗེས་ཞག་ཞེ་དགུའི་ཚུན་ཆད་དུ་སྐྱེ་བ་ངེས་པར་ལེན་དགོས་ཏེ། ལམ་རིམ་ཆེན་མོར། ཚེ་ཚད་ནི་སྐྱེ་བའི་རྐྱེན་མི་རྙེད་ན། རེ་ལྟར་ཐོགས་ནའང་ཞག་བདུན་དུ་གནས་སོ། །རྐྱེན་རྙེད་ན་ནི་ངེས་པ་མེད་དོ། །མ་རྙེད་ན་ཡང་ལུས་བརྗེས་ནས་ཞག་བདུན་ཕྲག་བདུན་ཚུན་ཆད་དུ་གནས་ཀྱི། དེ་ཚུན་ཆད་དུ་ངེས་པར་སྐྱེ་བའི་རྐྱེན་རྙེད་པས་དེ་ཕན་ཆད་དུ་མི་གནས་སོ། །གཞུང་ཁུངས་མ་གང་ནས་ཀྱང་དེ་ལས་རིང་བ་མ་བཤད་པས། དེ་ལས་རིང་བར་འདོད་པ་ནི་མི་རིགས་སོ། །ཞེས་པའི་ལུང་འདིས་གྲུབ་ལ། ཡང་བཙུན་པ་དཔལ་ཆེན་གྱིས། ཇི་སྲིད་སྐྱེ་བའི་ཚོགས་པ་མ་རྙེད་བར་དུ་གནས་པས་ཚེ་ཚད་མཐའ་གཅིག་ཏུ་མ་ངེས་ཏེ། བར་སྲིད་ཚེ་རིང་ཐུང་གིས་དབང་གིས་དེའི་སྔོན་དུས་ཀྱི་སྲིད་པ་ཚེ་རིང་ཐུང་དུ་གྱུར་བའི་ཕྱིར་ཏེ། མདོ་མྱང་འདས་ལས། སངས་རྒྱས་འོད་སྲུངས་འཇིག་རྟེན་དུ་བྱོན་དུས། རྒྱལ་བོ་འོད་མཛེས་ཀྱི་སྲས་རྒྱལ་བུ་གཞོན་ནུ་ཤི རྒྱལ་བོ་བཙུན་མོ་འཁོར་དང་བཅས་པའི་མྱ་ངན་གྱིས་དབང་གིས་ལོ་གསུམ་ལ་བར་དོར་གནས་ཞེས་ཀྱང་གསུངས་ལ་བརྟག་པར་བྱའོ། །

ཡང་། ཀརྨ་ཆགས་མེད་ཀྱི་ལྷོ་སྒོའི་དམིགས་རིམ་ཐར་བའི་ལམ་སྟོན་ལས། སེམས་ཅན་གྱི་སྲོག་དང་དབུགས་ལེན་པ་པོ་ཐ་དད་དུ་ཕྱེས་ནས། སྤྱིར་ནི་སྦྱོར་བ་བྱེད་ལུགས་ངོས་བཟུང་བ། །དུས་གསུམ་སངས་རྒྱས་མན་ནས་སྲིན་བུ་ཡན། །སྲོག་གཅོད་གཤེད་ནི་ལས་ཀྱི་གཤིན་རྗེར་གསུངས། །འགྲོ་བ་ཀུན་གྱི་དབུགས་ནི་ལེན་པ་པོ། །དཔལ་ལྡན་ལྷ་མོ་ཡིན་པར་རྒྱུད་ལས་གསུངས། །ཞེས་ཀྱང་གསུངས་ལ། བར་དོ་བའི་གནས་ཚད་ཀྱང་། ཀརྨ་ཆགས་མེད་ཀྱི་མཚུན་བཅོས་ལས། ལ་ལ་ནི་མི་རབས་མང་བོར་ལུས་མི་ལེན་པར་བར་དོར་འདུག་དགོས་པའང་ཡོད་ཅེས་བཤད་པ་ནི་ནང་བསྟན་སྤྱིའི་ལུགས་ལྟར་ན་དོན་ལ་མི་གནས་པའི་གཏམ་མོ། །

བར་དོ་སྣང་ཚུལ་གྱི་ཁ་དོག་གི་ཁྱད་པར་ནི། མངལ་དུ་འཇུག་པ་ལས། དམྱལ་བའི་བར་དོ་ནི་སྡོང་དུམ་ཚིག་པ་ལྟ་བུ། ཡི་དྭགས་ཀྱི་བར་དོ་ཆུ་ལྟ་བུ། འདོད་པའི་ལྷ་དང་མིའི་བར་དོ་གསེར་ལྟ་བུ་དང། གཟུགས་ཁམས་པའི་བར་དོ་དཀར་བོར་གསུངས་སོ། །གཞན་ཡང་། སྲིད་པ་བར་དོའི་སྐབས་སུ་མ་ངེས་པའི་རྟགས་དྲུག་ཀྱང་སྣང་དུ་ཡོད་དེ། གནས་ངེས་མེད་རི་རྩེ་ཐང་སྟོང་ལ་སོགས་པར་ཡུད་ཙམ་རེ་སྡོད། རྟེན་ངེས་མེད་ཟམ་པ་མཆོད་རྟེན་ལ་སོགས་པར་ཡུད་ཙམ་རེ་བརྟེན། སྤྱོད་པ་ངེས་མེད་སྐད་ཅིག་རེ་ལ་སྣ་ཚོགས་རེ་བྱེད། ཟས་ངེས་མེད་རིགས་དྲུག་གི་ཟས་སྣ་ཚོགས་མཐོང་ཡང་མི་འཐོབ་པ། གྲོགས་ངེས་མེད་ལྷ་དང་འདྲེ་སྲིན་བར་དོའི་འགྲོ་བ་སྣ་ཚོགས་དང་ཡུད་ཙམ་རེ་འགྲོགས། སྣང་ཚུལ་ངེས་མེད་འཆར་སྒོ་བདེ་སྡུག་སྣ་ཚོགས་སྐད་ཅིག་ལ་འགྱུར་ལྡོག་བྱེད་པའི་སྣང་བ་འཆར་བ་སོགས་སོ། །

ཁ་ཅིག་གཤིན་པོ་དེ་གསོན་པའི་སྐབས་ཀྱི་རྣམ་པ་དང་ཆ་བྱད་ཇི་འདྲ་བ་ཡོད་པ་བར་དོ་ལ་བསྡད་འདུག་པས། འཕྲིན་དང་ལན་བསྐུར་ཚུལ་སོགས་ཟོག་རྫུན་ཡིན། དེ་འདྲ་རེ་གཉིས་སྲིད་ཀྱང་ཕལ་མོ་ཆེར་མི་མ་ཡིན་གྱིས་གཤིན་པོའི་གཟུགས་སུ་བསྒྱུར་བ་སྟེ། མདོ་ལས། དྲི་ཟ་ཁྱབ་བྱེད་དང་། གནོད་སྦྱིན་སྨྲ་འདོད། དྲི་ཟ་འཆི་ཁའི་སེམས་ལ་ཉེ་བར་འཇུག་པ་རྣམས་ཀྱིས་ཟས་འཚོལ་ཕྱིར་ཚེ་འདས་ཀྱི་གཟུགས་ཇི་ལྟ་བ་བཞིན་གཤིན་པོའི་དབྱིབས་བྱད་ཅན་མངོན་སུམ་དུ་མཐོང་བ་དང་། མིའི་ཁོག་ཏུ་བརླམས་ནས་དན་རྟགས་མང་བོ་སྨྲ་བ་ལྟ་བུས་འཇིག་རྟེན་པ་བསླུ་བར་བྱེད་པ་ཡིན། ཞེས་དང་། ཀརྨ་ཆགས་མེད་ཀྱིས། ཕ་མཚུན་དགྲ་བླ་ཀུན་གྱི་རྗེས་འབྲང་བའི། །ཡེ་ངམ་ནག་པོ་དྲིལ་ནག་སྤུང་སྐྲ་ཅན། །དམ་སྲི་བསེ་རག་ལྟོགས་འགོང་དབུལ་སྲི་དང་། །མཚུན་མིན་མཚུན་དུ་བརྫུ་བའི་བསེ་རག་རྣམས། །ཞེས་དང་། གཞན་ཡང་དྲི་ཟ་ཀུན་ཏུ་ཁྱབ་བྱེད་དང་། །གནོད་སྦྱིན་རྟོགས་འདོད་འབྱུང་བོ་བ་ར་ཧི། །དེ་སོགས་ནག་ཕྱོགས་བདུད་རིགས་མང་བོ་ཡིས། །འཆི་ཁར་དབུགས་ལེན་ཕུང་བོ་བདག་ཏུ་འཛིན། །ཚེ་འདས་གཟུགས་བཟུང་གསོན་པོ་རྣམས་ལ་གནོད། །ཚེ་འདས་ལ་བསྔོས་ཟས་སྐོམ་བར་ནས་འཇོམས། །ཚེ་འདས་ཡིན་པར་བརྫུས་ནས་ཆ་འཕྲིན་བསྐུར། །དེ་འདྲ་དཔག་ཏུ་མེད་པ་ཡོད་པའི་ཚུལ། །ཚེ་འཕོ་ཇི་ལྟར་འགྱུར་བའི་མདོ་ལས་གསུངས། །དེ་དག་རྣམས་དང་ཕྱེ་བར་མ་བྱས་ན། །གསོན་པོ་རྣམས་ལ་གནོད་པའི་གསོན་བདུད་ཟེར། །ཞེས་གསུངས་པར་མ་ཟད། དེ་བཟློག་ཚུལ་དང་བཅས་པ་བསྟན་ཡོད་དོ། །

དེའི་ཤེས་བྱེད་ནི། སྔོན་ཤཱཀྱ་དགའ་བྱེད་ཟེར་བ་ཤི་ནས། ཀུན་ཏུ་རྒྱུ་རྣམས་ཀྱིས་གཤིན་ཆོས་བྱེད་སྐབས། གཤིན་པོ་དེ་ཀུན་ནས་གཟུགས་དངོས་སུ་སྟོན་པ་ལ་བཟའ་བཏུང་སྟེར་བ་སོགས་བྱ་སྲོལ་ཡོད་པ་དེ་བཞིན་བྱས་ཏེ། ཉེ་དུ་རྣམས་ཀྱིས་དེ་ཤཱཀྱ་དགའ་བྱེད་དངོས་ཡིན་བསམ་པ་ན། སྟོན་པས་དྲི་ཟ་ཁྱབ་བྱེད་དང་། གནོད་སྦྱིན་གཏོགས་འདོད་སོགས་ཀྱིས་གཤིན་པོར་བརྫུས་པ་ཡིན་གསུངས་པ་ལ། དེ་དག་ཡིད་མ་ཆེས་པར། སྟོན་པས་ཤཱཀྱ་བ་རྣམས་ལ་འབྲུའི་ཐུམ་པོར་ཁྱིམ་སོ་སོའི་མིང་བྱང་བཅུག་པ་རེ་ཁྱེར་ཤོག་གསུངས་པས། ཤཱཀྱའི་མི་ཁྱིམ་ཧ་ཅང་མང་བོ་ཞིག་གིས་དེ་ལྟར་ཕུལ་བས། འབྲུའི་ཕུང་བོ་གླང་ཆེན་གྱི་རྒྱབ་ཁབ་ལོངས་པ་ཙམ་བྱུང་བ་རྣམས། སངས་རྒྱས་ཀྱིས་འདི་དང་འདིའི་ཡིན་ཞེས་གཅིག་ཀྱང་མ་ནོར་བར་ངོས་འཛིན་མཛད་པས་ཡིད་ཆེས་པ་བྱུང་། ཞེས་དང་། གཞན་ཡང་། རྗེ་མི་ལས་བོན་གྱི་ཁྱིམ་ཚང་ཞིག་ནས་མི་མ་ཡིན་གཤིན་པོར་བརྫུས་པ་དེ་མཐར་སྤྱུགས་བཏང་བའི་ལོ་རྒྱུས་ཡོད་པ་ལས་རྟོགས་ཐུབ་སྟེ། དེ་ནི་མི་ལའི་རྣམ་མགུར་གཤིན་དོན་ཐུགས་རྗེ་ལྕགས་ཀྱུ་ལས། རྗེ་མི་ལ་རས་པ་གཉའ་ནང་གྲོད་ཕུག་ན་བཞུགས་དུས། ལ་ཞིང་ཞེས་པའི་ས་ཆར་མི་ལའི་སློབ་མ་བོན་པོ་ཞིག་མཆིས་པ། འཆི་ཁར་གཤིན་དོན་དུ་མི་ལ་ཞུ་དགོས་པའི་ཁ་ཆེམས་ལྟར། རྗེ་བཙུན་ཞུས་དུས། རྗེ་བཙུན་དཔོན་སློབ་སྟེང་ཁང་དུ་བཞུགས། བོན་པོ་རྣམས་འོག་ཏུ་ཆོ་ག་བྱས་པས། དཀྱིལ་འཁོར་གྱི་རྩ་ན་སྔར་ཤི་བའི་བོན་པོ་དེ་སྔོ་ཐུལ་ཞོལ་ལེ་ཆང་འཐུང་ཞིང་འདུག་པ་པེ་ཏས་མཐོང་བ་དང་། པེ་ཏ་ལ་བོན་པོ་རྣམས་ན་རེ། མི་ལ་རས་པ་དག་ངེད་ཚོ་ལ་འཐབ་སྟེ། ངེད་ཀྱི་ཆོས་གཤིན་པོ་མངོན་སུམ་དུ་ཁུགས་པ་འདི་འདྲ་ཁོ་ལ་མེད་བཤད་པས། རྗེ་བཙུན་གྱིས་རྫུན་ཁུངས་བརྟོལ་ཕྱིར། ཞི་བ་འོད་བཏང་བས། གཤིན་གཟུགས་དེའི་རྗེ་བཙུན་གྱི་ཟིལ་མ་བཟོད་པར། ང་འགྲོ། ང་བོན་པོའི་བླ་འཁྱེར་མཁན་སྣང་ཡུལ་གྱི་བདུད་ངར་མི་ཟན་ཡིན། བོན་པོའི་ཆོས་ལ་གཏད་སོ་མི་འདུག་པས་རྔན་ཆན་བྱེད་འོང་བ་ཡིན། ཞེས་སྲང་བར་ནས་མར་སྔོ་ཐུལ་ཞོལ་ལེ་སོང་བ་དེད་པས། རི་ལོགས་ཤིག་ཏུ་སྤྱང་ཀིར་སོང་སྐད། དེ་ནས་རྗེ་བཙུན་གྱིས་བོན་པོ་རྣམས་ལ་ཡིད་ཆེས་བསྐྱེད་པའི་ཕྱིར། གཤིན་ད་ལྟ་ལུང་བའི་ཕུ་ཡ་གི་ན་ལྕི་སེར་སྐམ་པོ་ཞིག་གི་འོག་ན་འབུ་ཕྲ་ལ་རིང་བ་ཞིག་ཏུ་སྐྱེས་འདུག་ཅེས་ཐམས་ཅད་དེར་བྱོན་ཏེ། གསང་མཚན་ནས་བོས་ནས། ང་ཁྱོད་རང་གི་བླ་མ་མི་ལ་རས་པ་ཡིན་པས་འདིར་ཤོག་གསུངས་པ་དང་། ལྕི་བའི་འོག་ནས་འབུ་དེ་བྱུང་ནས་རྗེ་བཙུན་གྱི་སྐུ་འཕང་དུ་ཁྱིལ་ཉལ་སོང་བ་ལ། རྗེ་བཙུན་གྱིས་ཆོས་བཤད་དང་། འཕོ་བས་གནས་སྤོར་མཛད། རེ་ཞིག་དགོངས་པ་ལ་ཞུགས་ནས་ལམ་སྟོན་མཛད་པས། རྗེ་བཙུན་རིན་པོ་ཆེ། བདག་ཐར་བའི་བདེ་བ་ལ་བཀོད་པ་བཀའ་དྲིན་ཆེ་ཞེས་བརྗོད་ཅིང་སོང་བ་ཀུན་གྱིས་མཐོང་བས་ཡིད་ཆེས་པ་ལྟ་བུ་དང་། ཁྲུས་ཆོག་ལས་ཀྱང་། ཚེ་ལས་འདས་པའི་ཆ་བྱད་བཟུང་ནས། དེའི་ཉེ་འབྲེལ་དང་། འཇིག་རྟེན་པ་རྣམས་བསླུ་ཞིང་གནོད་པར་བྱེད་པའི་གནོད་སྦྱིན་དང་། ཤ་ཟ་དང་། འབྱུང་བོ་ལ་སོགས་པ་ཐམས་ཅད་གཏོར་མ་འདིས་ཚིམ་པར་གྱིས་ལ། གནོད་པ་དང་འཚེ་བའི་བསམ་པ་ངན་པ་ཐམས་ཅད་སྤོང་ལ། ཞེས་གསུངས་པ་ལྟ་བུའོ། །

 ༢ གཉིས་པ་བེམ་པོ་བཅོས་སྟངས། བོད་ཀྱི་ཡུལ་སྲོལ་དུ་བེམ་པོ་བཅོས་སྟངས་འདྲ་མིན་ཡོད་ཀྱང་། འདིར་ཤེས་ཚོད་ཙམ་ཞིག་ཞུ་ན། སྐྱེས་བུ་དམ་པ་རྟོགས་ལྡན་ཞིག་ཡིན་ན། སློབ་མའམ་གྲོགས་དམ་གཙང་རེ་གཉིས་ཀྱིས་རེག་ནས། སེང་གེ་འགྱིང་སྟབས་ལྟར་བཅོས་པ་སྟེ། སྐུ་ཕུང་གི་དབུ་བྱང་དང་། གདོང་ནུབ། ཞབས་ལྷོར་བསྟན། རྒྱབ་ཤར་དུ་བསྟན་ཏེ། གློ་གཡས་ས་ལ་ཕབ་ནས། ཕྱག་གཡས་པ་འགྲམ་པ་གཡས་པར་བརྟེན། ཞབས་ཀྱི་པུས་མོ་ཟུང་ཅུང་ཟད་བསྐུམ་ནས། སྣ་བུག་གཡས་པ་ནས་ཞེ་སྡང་གི་རླུང་རྒྱུ་བ་འགོག་ཆེད་སྲིང་བལ་གྱིས་བཀག་ཅིང་། སྐུ་ཕུང་སྟེང་ཆོས་གོས་རྣམ་གསུམ་འགེབས་སོ། །

ཡང་། རྟོགས་ལྡན་རེ་ཟུང་ཕྱག་ཐལ་མོ་སྦྱར་ཏེ་རྡོ་རྗེ་སྐྱིལ་ཀྲུང་ལ་བཞུགས་པ་ཡིན་ན། རང་འདོད་ཀྱིས་བསྒྱུར་བཅོས་བྱེད་མི་རུང་བ་དང་། དེར་མ་ཟད་ས་པཎ་གྱི་སྐུ་སྲིང་བཟོད་པ་རིང་མོ་དང་། རྒྱ་ནག་གི་ཧྭ་ཤང་འགའ་རེ་བཞེངས་བཞིན་དུ་འདས་པའང་ཡོད། ཉེ་འཁོར་དུ་སྤོས་བཟང་མི་སྒྲོན། རྒྱུ་མཚན་ནི། ཐུགས་དམ་གྱི་ཚེ་རུས་ཚིགས་ལྷོད་ཉེན་ཆེ། ཐུགས་དམ་དུ་བཞུགས་མེད་ཀྱང་། ལ་ལས་ཁེ་གྲགས་སོགས་ལ་དམིགས་ནས་བཙན་གྱིས་ཙོག་བཞུགས་བཅོས་པ་ཡིན་ན། ཡུལ་དེར་གནོད་རྐྱེན་དུ་འགྲོ་བར་དམ་པ་གོང་མས་ཞལ་ལས་ཐོས་སོ། །སེང་གེ་འགྱིང་སྟབས་དང་སྐྱིལ་ཀྲུང་གང་ལྟར་བཞུགས་རུང་། ལམ་སྔགས་སོགས་ཞལ་ཕྱེས། སྐུ་གདུང་གི་ཉེ་འཁོར་དུ་མཆོག་གསུམ་གྱི་རྟེན་དགྲམ་ཞིང་། ཅི་འབྱོར་བའི་མཆོད་ཚོགས་རྒྱ་ཆེར་བཤམས། དགེ་འདུན་གྱི་སྡེ་ལ་བསྙེན་བཀུར་དང་། སྐྱེ་བོ་མང་ལ་སྦྱིན་གཏོང་། མདོ་རྒྱུད་དང་པོ་ཏི་ལྔའི་རྩ་བ། ལམ་རིམ་དང་སྔགས་རིམ་སོགས་ཀློག་པ། རྒྱུད་སྡེ་བཞིའི་སྒྲུབ་མཆོད་སོགས་ཅི་ནུས་བྱའོ། །ཐུགས་དམ་སོགས་ཉིན་འགར་གསང་རྒྱ་བྱས་པའི་དབང་དུ་བཏང་ན། ཐུགས་དམ་མ་གྲོལ་གོང་དུ་སྐུ་ལ་སྒུལ་བསྐྱོད་མི་བྱེད་པ་དང་། ལམ་སྔགས་རེ་ཀློག་པ་ལས། མི་མང་ཚོགས་ནས་གདུང་ཆོག་མི་འདོན་པ་དང་། ཐུགས་དམ་གྲོལ་ནས་སྐུ་ཁྲུས་འབུལ་བ། གནས་ཡིག་འདོགས་པ་སོགས་བྱས་རྗེས་ཁྲི་ཁར་བཞུགས་སུ་འཇུག་པ་དང་། དེ་ནས་གདུང་མཆོད་ཀྱི་ཆོ་ག་སོགས་གོ་རིམ་ལྟར་བྱེད་དོ། །གདུང་མཇལ་གཏོང་དགོས་པའི་གོ་རིམ་ནི་རྗེ་འཇིགས་མེད་རིགས་པའི་བློ་གྲོས་ཀྱི་རང་རྣམ་དུ་གསལ་བས་དེར་བལྟ་བ་དང་། གཞན་ཡང་། ཞབས་དྲུང་ཆོས་རྗེ་ངག་དབང་ཚེ་རིང་གི་ཤི་བའི་ཕུང་བོ་ཇི་ལྟར་བྱེད་ཚུལ་དང་། དེ་མོ་ངག་དབང་དགེ་ལེགས་རྒྱལ་མཚན་གྱི་འཕོ་བ་དང་ཐུགས་དམ་དག་ལ་ངོ་སྤྲོད་པ་ཡེ་ཤེས་སྒྲོན་མེ་སོགས་ལ་བལྟ་བར་བྱའོ། །

མི་ཕལ་བར་རོ་བཅོས་བྱ་སྟངས་ལ། མའི་མངལ་གྱི་འདུག་སྟངས་ཏེ་ཙོག་པར་འདུག་པའི་སྟངས་ཀ་བྱེད་པ་ནི་བདེན་ཤས་ཆེ་སྟེ། འཇར་པན་གྱི་དམངས་སྲོལ་མཁས་ཅན་ཀྲུང་ཧྲན་སི་ལེས། མངལ་གྱི་འདུག་སྟངས་ལྟར་གཤིན་པོ་རོ་བཅོས་བྱས་པར་དགེ་མཚན་བཞི་གསུངས་ཡོད་དེ། གཅིག་ནས་སྲ་མཁྲེགས་ཀྱི་བྲག་སོགས་ལས་པུར་ཁང་སློག་སྐབས། ངལ་རྩོལ་སྟབས་བདེར་བཟོས་ཡོད་པ་དང་། གཉིས་ནས་དང་ཐོག་མངལ་གྱི་ཚེ། ཙོག་པར་བདེ་བར་གནས་པ་ལྟར། ཐ་མའི་ཚེ་ཡང་དེ་ལྟར་དར་གོས་ཀྱིས་ལྕིབས་ཏེ། མ་ཡུམ་ས་གཞིའི་པང་དུ་ལོག་པ་དང་། གསུམ་ནས་བདེ་བར་ཙོག་པོར་གཉིད་ལ་ཡུར་བའི་ཚུལ་གྱིས་གཤིན་བཅོས་བྱས་པ་དང་། བཞི་ནས་རོ་ལངས་རྒྱག་པ་སོགས་འཇིགས་རུང་གི་སྣང་ཚུལ་འགོག་སླད། འཕག་འགུལ་མི་ནུས་པའི་ཚུལ་གྱིས་བཀྱིགས་པ། ཞེས་གསུངས་པར་ཡང་གོ་རྒྱུ་ཡོད་དོ། །འཛེམ་བྱ་ནི། བེམ་པོ་ཡོད་སར་ཁྱི་དང་བྱི་ལའི་འགྲོ་འདུག་གཏན་འགོག་བྱེད་དགོས། རྒྱུ་མཚན་ནི། སེམས་ཅན་དེ་དག་གི་སྤུ་ལ་གྲ་ཡོད་པས། བེམ་སྟེང་དུ་ལྷུང་ན་རོ་ལངས་རྒྱག་པའི་ཉེན་ཁ་ཡོད་དོ། །

༣ སྤུར་སྦྱོང་ཚུལ། སྤུར་སྦྱོང་ཞེས་པ་ནི། དག་ཡིག་གི་དགོངས་དོན་ལྟར་ན། གཤིན་པོ་དེ་གཙང་བཟོ་བྱས་ཏེ་ཡང་དག་པར་སྦྱང་བ་ལ་བྱ་ཞིང་། བོད་དུ་སྤུར་སྦྱོང་བྱེད་པ་ལ་རིགས་མང་ཡང་བསྡུ་ན། སྤུར་སྦྱངས་བྱ་སྟངས་དྲུག་གི་ནང་དུ་འདུ་བར་སེམས་ཏེ། ༡ མེར་བསྲེགས་པ། ༢ བང་སོར་སྦ་བ། ༣ ཕུང་བོ་གཟན་ལ་བསྒྱུར་བ། ༤ གདུང་རྟེན་བཞེངས་པ། ༥ དམར་གདུང་དུ་འཇོག་པ། ༦ ཆུར་བསྐྱུར་བའོ། །

༡ ཕུང་བོ་མེར་བསྲེགས་པ། ཕུང་བོ་མེར་སྲེག་སྐབས་དུར་གྱི་ས་དཔྱད་ལ་གཞིགས་ཏེ། རུས་མཐོ་བ་དང་ཡོན་ཏན་ལྡན་པ། ཡང་ཚ་མཐོང་བའི་རྒན་པོ་ཡིན་ན། གདན་ཁྲི་ལྟ་བུའི་མཐོ་ས་དང་། རུས་དམན་པ་དང་ཡོན་ཏན་ཆུང་བ། ལོ་ཆུང་དག་དམའ་སར་འཇོག གྲིར་ཤི་དང་མཛེ་ཅན། གདུག་པའི་ནད་ཀྱིས་ཤི་བ་རི་སྣ་དང་བྲག་སྣ་མནོན་པའི་དམའ་ས་ལའོ། །

༡ ཕུང་བོ་སྲེག་སྦྱངས་གཏོང་བའི་དུས་ནི། ལྷ་མོ་བློ་བཟང་ཚུལ་ཁྲིམས་ཀྱི་འབྱུང་རྩིས་དཔག་བསམ་ལྗོན་ཤིང་ལས། ཕུང་བོ་གཏོང་བའི་རིམ་པ་ལ། །ཕྲན་ཚེགས་སོགས་ཀྱི་དགོངས་པ་བཞིན། །ཐུགས་དམ་བཞུགས་པའི་རྣལ་འབྱོར་བ། །མ་གྲོལ་བར་དུ་གཏང་མི་བྱ། །བཤེས་གཉེན་ཡོན་ཏན་ལྡན་པའི་ཚོགས། །ཞག་བདུན་འདས་ནས་གཏོང་བ་གཅེས། །ཐ་མར་རྣམ་ཤེས་ངེས་མེད་ཀྱང་། །ཞག་བཞི་འདས་ནས་གཏོང་བར་བྱ། །མདོར་ན་མཆོག་དམན་གང་ལའང་། །དཀར་དམར་ཁམས་ཀྱི་ཉི་ཟླའི་འགྲོས། །སྟེང་འོག་སྒོར་ཐོན་རྟགས་མེད་པར། །བསྲེག་པ་ལ་སོགས་སྤང་བར་བྱ། །

༢ སྲེག་སྟངས་ནི། གསང་སྔགས་ཀྱི་རྒྱུད་སྡེའི་ལས་གསུངས་པ་ལྟར། རྡོ་རྗེ་སེམས་དཔའ་དང་། མི་འཁྲུགས་པ་། ཀུན་རིག་སྟེ་ངན་སོང་སྦྱོང་བའི་ལྷ་གསུམ་གང་རིགས་ཀྱི་ཆོ་ག་ལྟར། རྫས་ཆེན་བཅུ་གཉིས་དང་སྲེག་ཤིང་ལ་མར་དང་སྣུམ་བྱུགས་ནས། ཚེ་འདས་ཀྱི་ཕུང་བོ་ལྔས་རྒྱལ་བ་རིགས་ལྔ་མཆོད་པའི་སླད་དུ། མེ་སྦར་ཏེ་ཐབ་གྱི་ནང་དུ་སྦྱངས་པ་ཡིན། ཡང་ན། པུར་ཙན་དན་གྱི་སྤུར་སྒྲོམ་མར་ཁུས་བཀང་བའི་ནང་དུ་བཞག་སྟེ། སྲེག་ཐབ་ཀྱི་སྟེང་དུ་བཞག་ལ། མེ་སྒྲོན་ཚུལ་ཡང་། ཀརྨ་ཆགས་མེད་ཀྱི་རོ་སྲེག་ཆོ་ག་ངན་སོང་གནས་འདྲེན་སྡུག་བསྔལ་མཚོ་སྐེམ་ལས། རང་གིས་ཆོས་འབྲེལ་ཞུས་པའམ། །རང་གི་ཉེ་དུ་ཡིན་ན་ནི། །རང་གིས་མེ་ནི་མི་སྦར་བར། །གྲྭ་བ་ཞིག་ལ་སྦར་དུ་བཅུག། ཐ་མལ་ཕུང་བོ་མེ་སྦར་བ། །ཉེས་པ་ཡོད་ཅེས་ལ་ལས་སྨྲ། །མེ་སྦར་མཁན་གཅིག་གླ་སྦྱིན་འཚོལ། །ཚེ་འདས་དེ་ཡི་མིང་ནས་འབོད། །མེ་ཐལ་གྲོས་ཞེས་བརྗོད་པ་ནི། །བླ་དེ་རོ་ལ་གནས་པའི་ཕྱིར། །དེ་ལ་སྐྲག་སྣང་འབྱུང་དོགས་ཟེར། །དེ་འདྲ་ལོག་པ་ཡིན་པའི་ཕྱིར། །དེ་འདྲའི་མིག་ལྟོས་མི་བྱ་བར། །མེ་ནི་སློབ་དཔོན་རང་གིས་སྦར། །ཞེས་གསུངས་ལ། བླ་མ་འམ་སྐྱེས་བུ་དམ་པ་ཞིག་ཡིན་ན། ཆོས་འབྲེལ་མེད་པ་ཞིག་གིས་ཕྱག་གསུམ་བཙལ་བ་ལ་དཔལ་འབར་གཏད་དེ། ཆོ་ག་བ་རྣམས་ཀྱིས་ཕལ་བ་རྣམས་ལ་གསོན་ཤིག་དགོངས་ཤིག་རིགས་ཀྱི་བུ། ཞེས་པའི་ཚབ་ཏུ། དཔལ་ལྡན་བླ་མ་དགོངས་སུ་གསོལ། །ཕུང་བོ་ལྔ་ཡི་བུད་ཤིང་ལ། །རྒྱལ་བ་ལྔ་ཡི་མེ་སྦར་རོ། །འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི་མེ་སྦར་རོ། །དབང་བོ་དྲུག་གི་བུད་ཤིང་ལ། །བྱང་ཆུབ་སེམས་དཔའི་མེ་སྦར་རོ། །ཡུལ་རྣམ་དྲུག་གི་བུད་ཤིང་ལ། །ལྷ་མོ་དྲུག་གི་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་དུ་འགྲུབ་པར་ཤོག། མེ་སྦར་རོ་ཞེས་སྔ་མ་རྣམས་ལ་སྦོར་བའི་སྟངས་ཀ་རེ་དང་། ཐ་མའི་སྐབས་སུ་དཔལ་འབར་མེ་ཚང་དུ་འཇུག་གོ། འོན་ཀྱང་ཕུང་བོ་ཞུགས་འབུལ་སོགས་ཕྱག་ལེན་གྱི་ཆ་ལ་བན་བོན་གཉིས་འདྲེས་མང་སྟེ། དུང་དཀར་གྲུབ་མཐའ་ལས། སྔོན་མ་ཁྲི་སྲོང་ལྡེ་བཙུན་སྐབས་བོན་ཆོས་བསྣུབས་དུས་བོན་གྱི་ཆོས་བྱེད་སྟངས་ཁག་གཅིག་རང་སོར་བཞག་ཡོད་པ་དཔེར་ན། མདོས་བཞེངས་པ། གླུད་གཏོང་བ། གཡང་སྒྲུབ་བྱེད་པ། གཏོར་ཟོར་འཕེན་པ། ལྕགས་མཁར་སྲེག་པ། རྔ་རྡུང་སྦུབ་དཀྲོལ། ཕུང་བོ་ཞུགས་འབུལ་བྱེད་པ་སོགས་ཡིན། དེ་དག་རང་སོར་འཇོག་དགོས་དོན་ནི། དེ་དག་མང་ཚོགས་ནང་ས་ཁྱབ་རྡོ་ཁྱབ་སོང་ནས་ཚང་མས་ཁས་ལེན་གྱི་ཡོད་པས་ཡིན། ཞེས་གསུངས་པས་སོ། །

དེ་ལྟར་གསང་སྔགས་ཀྱི་ཆོ་ག་ལྟར་བསྲེགས་ན། དུ་བ་ཕོག་པའི་བྱ་དང་རི་དྭགས། ཐལ་བ་ཆུར་འཕོས་ན་ཆུ་དེ་འཐུང་བའི་སེམས་ཅན་ཡོད་ཚད་ལ་ཕན་པ་རྒྱ་ཆེན་པོ་འབྱུང་ལ། ཚེ་འདས་དེས་ཀྱང་རང་གི་དབང་བོ་ལྔས་མཆོད་པ་བྱས་པའི་སྟོབས་ལ་བརྟེན་ནས། བདེ་འགྲོར་སྐྱེས་པར་གསུངས་ལ། དེ་ཡང་། སྒྲུབ་པ་པོ་དང་བསྒྲུབ་ཡུལ་ཚད་ལྡན་དགོས་སོ། །ཆོས་རྒྱལ་ཁྲི་སྲོང་ལྡེ་བཙན་སྐབས་སུ་ཡང་། སློབ་དཔོན་པད་འབྱུང་དང་ཅོག་རོ་ཀླུའི་རྒྱལ་མཚན་གྱིས་བསྒྱུར་བ་ཟ་བྱེད་རོལ་བའི་རྒྱུད་དང་། དུར་ཁྲོད་ཁུ་བྱུག་རོལ་བའི་མདོ། གཤིན་རྗེ་རོལ་བའི་རྒྱུད་སོགས་དང་། སློབ་དཔོན་པད་མའི་བཀའ་ཐང་དུའང་། སྲེག་སྦྱོང་རོའི་ལས། ཚེ་འདས་གཤིན་གྱི་ལས་སོགས་མཆིས་པ་ལྟར། ཚད་ལྡན་གྱི་གཞུང་དེ་དག་ལ་བརྟེན་ནས་སྲེག་སྦྱོང་གྲུབ་རྗེས། ཐབ་ལས་རུས་པ་ཕྱིར་བཏོན་ཏེ་རུས་ཆོག་བསྐུར་དགོས་པ་སྟེ། དེ་ཡང་ར་ག་ཨ་སེའི་ལྷོ་སྒོའི་དམིགས་རིམ་ཐར་བའི་ལམ་སྟོན་ལས། ཚན་ཆེར་སྔགས་པའི་བྱེ་མ་ཡོད་གྱུར་ན། །མི་དང་དུད་འགྲོའི་རོ་དང་རུས་པ་ལ། །ཕྱིར་ལྡོག་མིན་ཀྱང་འདེབས་རྒྱུར་བསྐུར་ན་ཕན། །དེ་ནས་ཁྲུས་ཀྱི་གོ་བ་ལེན་པ་ནི། །ཐུབ་རྣམས་སྡིག་སྒྲིབ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ཏེ། །འོན་ཀྱང་གདམས་ངག་བསྟན་ནས་སེལ་གསུངས་པ། །སྔགས་དང་ཏིང་འཛིན་མེད་པའི་ཆུ་གཙང་གིས། །ཕ་མའི་རུས་པ་བཀྲུས་ན་ཕན་ནོ་ཞེས། །ཕྱི་རོལ་བ་རྣམས་སྨྲ་བ་དགག་ཕྱིར་ཡིན། །སྔགས་ཅན་ཆུ་ཡིས་རང་བཞིན་ཁྲུས་བྱས་ནས། །ལུས་ཅན་སྡིག་པ་འདག་ཅེས་རྒྱུད་ལས་གསུངས། །ཞེས་པ་ལྟར་རུས་ཆོག་གནང་སྟེ། རུས་པ་ཕྱེ་མར་སྒྲུག་ནས་རི་མཐོ་ས་ལས་རླུང་ལ་བསྐྱོན་པའམ། ཡང་ན། རུས་པ་དང་གཟུངས་ཆུ་ས་དམར་དང་སྦྲུས་ཏེ་མི་འཁྲུགས་པའི་སྐུ་དང་ས་ཙྪ་བཏབ་ནས་རི་མཐོ་སར་སྐྱེལ་བའམ་ཆུ་ཀླུང་དུ་ཕྱགས་པ་ཡིན། ཀརྨ་ཆགས་མེད་ཀྱིས་བཀྲ་རྒན་གྱི་དཀར་རྩི་བླངས་ནས་ཁྱིམ་ཕུག་ཏུ་བཞག་ན་མི་རྒྱུད་ཕྲ་བ་ལ་སྲིད་འཕེལ་ཞིང་རྒུད་པ་དར། གཡང་དང་དཀོར་བདག་འགུགས་པར་བཟང་བར་བཤད་ལ། དཀར་རྩི་མེད་ན་ཤིང་རིས་དང་མདའ་དར་ལུག་མགོ་ཤིང་རྩི་དཀྱིལ་ཀ་ལ་བཅིངས་པར་ཡང་བཤད་དོ། །

༣ རུས་པ་བཏུལ་ཚུལ་ཡང་། ཀརྨ་ཆགས་མེད་ཀྱི་རོ་སྲེག་ཆོ་ག་ངན་སོང་གནས་འདྲེན་སྡུག་བསྔལ་མཚོ་སྐེམ་ལས། ཚེ་འདས་དེ་ཡི་སློབ་མ་དང་། །ཉེ་འབྲེལ་མིན་ཅིང་སྡིག་ཆེན་མིན། །དེ་འདྲ་ཞིག་གི་རུས་པ་བཏུལ། །ཆུས་སྦྱོང་ཕུག་རོན་དང་རུ་ཙམ། །དེ་ཡིས་ས་སྤྲུས་འཇིམ་པ་བྱ། །ཞེས་དང་།

༤ རུས་པ་ཆུར་གཤེགས་པའི་ཕན་ཡོན་ཡང་། ཀརྨ་ཆགས་མེད་ཀྱི་ཞི་ཁྲོའི་སྒོ་ནས་ཕུང་བོ་སྲེག་སྦྱང་ལས། ཐལ་སོལ་ཆུ་ཆེན་ལ་དོར་བས་ཆུ་འཐུང་གི་སེམས་ཅན་སྒྲིབ་པ་དག་པའི་ཆེད་ཡིན་པས་འབྲེལ་ཚད་དོན་ལྡན་དེ་ལྟར་བྱའོ། །ཕལ་བའི་ཐལ་སོལ་ཀླུ་མེད་པའི་ས་བཀྲ་བཟང་སར་བླུགས་པས་བཀྲ་ཤིས་པར་ཡང་བཤད་དོ། །ཆུ་ཀླུང་དུ་གཤེགས་དུས་པཎ་ཆེན་བློ་བཟང་ཆོས་རྒྱན་སོགས་ཀྱི་ས་ཙྪ་ཆུ་གཤེགས་ཞེས་པའི་ཆོ་ག་འང་ཡོད་དོ། །ཕུང་བོ་མེར་སྲེག་སྲོལ་འདི་སྤུར་སྦྱོང་ལས་མཆོག་གྱུར་ཞིག་ཏུ་བཤད་དེ། རྗེ་འཇིགས་མེད་རིགས་པའི་བློ་གྲོས་ཀྱིས། བདག་ཅག་སྟོན་པ་རྣམ་འདྲེན་ཤཱཀྱའི་རྒྱལ་བའི་རིང་ལུགས་པ་ཞིག་ཡིན་ཚེ། ཁོང་གི་མཛད་པ་དང་བསྟུན་ཏེ་རང་ཅག་ལ་ཅི་འདྲས་བཀའ་དྲིན་ཆེ་བའི་བླ་མ་དང་སློབ་དཔོན་ཡིན་ནའང་། རྒྱུད་སྡེ་དང་མཐུན་པར་གདུང་ཞུགས་ལ་ཕུལ་ནས་སྦྱངས་ཆོག་བྱས་པའི་རུས་ཕྱེ་རྣམས་སྨན་འདམ་དང་སྦྱར་ཏེ། སྐུ་འམ་ས་ཙྪ་རེ་བཞེངས་ན་དེ་ལྷག་མེད་ཅེས་བདག་གིས་ཐལ་མོ་སྦྱར་ནས་གསོལ་བ་འདེབས་སོ། །ཞེས་གསུངས་སོ། །

༥ སྲེག་ཆོག་ལྟར་པུར་སྦྱོང་བྱས་པའི་ཕན་ཡོན་ནི། སྦྱོང་རྒྱུད་ལས། དེ་ཡི་མིང་ནས་བརྗོད་ནས་ནི། །མཁས་པ་འབུམ་ཕྲག་བརྒྱ་འམ་ནི། །ཡང་ན་བརྒྱ་ཕྲག་སྟོང་ཉིད་དུ། །སྦྱིན་སྲེག་བྱས་པར་གྱུར་ནས་ནི། །དམྱལ་བ་ཆེན་པོར་ལྟུང་བའི་མི། །སྡིག་པ་དེ་ལས་ཐར་བར་འགྱུར། །ཞེས་དང་། གསང་འདུས་རྒྱུད་ལས། རྣམ་ཤེས་ལྔ་བྲལ་བེམ་པོའི་ལུས། །བག་ཆགས་སྦྱང་བས་ཐར་བ་འཐོབ། །སྦྱང་ཤེས་ཕྱི་དང་ནང་གིས་སོ། །སྦྱོང་བྱེད་འབྱུང་བ་ཡེ་ཤེས་མེ། །འབྱུང་བའི་མེ་ཡིས་བག་ཆགས་སྦྱངས། །ཡེ་ཤེས་མེ་ཡིས་ཉོན་མོངས་བསྲེག །ཅེས་དང་། སློབ་དཔོན་པདྨས། དེ་ལྟར་བྱས་པའི་ཡོན་ཏན་ནི། བླ་མ་གང་ཟག་བཟང་བོ་ཞིག་ཡིན་ན། ཐུགས་ཀྱི་དགོངས་པ་མཐའ་རུ་ཕྱིན་པར་བྱེད། རྣལ་འབྱོར་པ་ཡིན་ན་ཕྱིར་མི་ལྡོག་པའི་ས་འཐོབ། སྐྱེ་བོ་ལ་སོགས་ཕལ་བ་ཡིན་ན། རིགས་དྲུག་གི་སྐྱེ་སྒོ་ཆོད་པའོ། །རང་བྱུང་ཡེ་ཤེས་ཀྱི་མེས་ལས་དང་བག་ཆགས་སྦྱོང་། སྐུ་གསུམ་ཡོངས་སུ་རྫོགས་པར་གསུངས་སོ། །

རྒྱས་པར། བཀའ་འགྱུར་བ་བློ་བཟང་ཚུལ་ཁྲིམས་ཀྱི་རོ་སྲེག་སྡིག་སྦྱོང་མུན་སེལ་སྒྲོན་མེ་ཐར་ལམ་གསལ་བྱེད་དང་། དབལ་མང་དཀོན་མཆོག་རྒྱལ་མཚན་གྱི་གཤིན་པོའི་སྦྱང་ཆོག་གི་བཤད་པ་དྲིས་ལན་དང་བཅས་པ་སོགས་སུ་བལྟ་བར་བྱའོ། །

༢ བང་སོར་སྦ་སྟངས། ༡ བང་སོ་འདེབས་སྟངས་དངོས། མིའི་རིགས་ཀྱི་ཚེ་ཚད་རྫོགས་ཏེ་རྣམ་ཤེས་ཀྱིས་བཏང་བའི་བེམ་པོ་དང་དགོས་ཆས་རྣམས་ཚགས་སུ་ཆུད་པ་ལ་དུར་དང་། དེར་ས་གནས་ཞིག་གཏན་འཁེལ་བྱས་ཏེ་ས་འོག་ཏུ་སྦས་པ་ལ་དུར་སྦས་ཞེས་བརྗོད་པ་ཡིན། དེ་ཡང་མི་ཕལ་བ་ལ་དུར་སྦས་དང་། རླབས་ཆེན་གྱི་མི་སྣ་འཇོག་ས་ལ་བང་སོ་ཞེས་བརྗོད་པ་རེད། མིང་གི་རྣམ་གྲངས་ལ། མཆད་པ། རིང་ཁང་། བམ་ཆེན། མདང་གནས། བང་ཆེན། པུར་ཁང་། དུར་ས། དུར་ཁྲོད། དུར་གནས་བཅས་ཟེར། བང་སོའི་ནང་དུ་སྦས་ནས་དུར་འཇུག་བྱེད་སྟངས་འདི། འཛམ་གླིང་རྒྱལ་ཁབ་ཁག་དང་མི་རིགས་ཕལ་ཆེར་ལ་དར་སོ་ཆེ་ལ། རྒྱུ་མཚན་ནི། དེང་སང་ཕྱོགས་ཡས་མས་ན་བང་སོ་བྲུས་ཏེ་གནའ་རྫས་སྔོག་འདོན་བྱེད་པ་ལས་རྟོགས་ཐུབ། དེ་ཡང་མི་སྣ་རླབས་ཆེན་ལ་དཔལ་འབྱོར་གྱི་འགྲོ་གྲོན་འབོར་ཆེན་བཏང་བ་དང་། མི་ཕལ་བར་རང་བཞིན་གྱིས་ས་དུར་བྱེད་སྲོལ་གཉིས་ཡོད། འདི་ནི་བོན་གྱི་ལུགས་སྲོལ་ཞིག་ཡིན་ཚུལ་བཀའ་ཐང་དང་དེབ་དཀར་ལས་བཤད་ལ། དེ་ཡང་མཚོ་སྔོན་ས་ཁུལ་གྱི་རྡོ་ཆས་གསར་མའི་དུས་རབས་ཀྱི་རིག་གནས་ཤུལ་རྫས་རྙེད་པ་ལས་བྱུང་བའི་དུར་དང་། སྤྱི་ལོ ༡༩༧༤ དང་༧༥ ལོའི་དཔྱིད་ཀའི་བར་སྔ་རྗེས་སུ་ཉིང་ཁྲི་ས་ཁུལ་ནས་རྡོ་ཆས་གསར་མའི་དུས་རབས་ཀྱི་མིའི་རུས་པའི་ལྷག་མ་དང་དུར་ས། ཆུ་གོང་གནའ་ཤུལ། ལྷོ་ཁའི་ལྷུན་རྩེ་རྫོང་། སྣེ་གདོང་རྫོང་། གཞིས་རྩེའི་རིན་སྤུངས་རྫོང་སོགས་ལས། སྔ་རྗེས་སུ་བཙལ་རྙེད་བྱུང་བའི་རྡོ་སྒམ་དུར་རམ་བང་སོ། བྱང་ཐང་དང་སྟོད་མངའ་རིས་སོགས་ལས་རྙེད་པའི་རྡོ་ཕུང་དུར་རམ་བང་སོ་དང་། ཁྱད་པར་དུ་ཆབ་མདོའི་ཁ་རུབ་ནས་རྙེད་པའི་རྡོའི་པུར་སྒམ་ནང་གི་རུས་སྒྲོམ་དང་། རྫ་ཆས་སོགས་རྙེད་པས། ལོ་ངོ་བཞི་སྟོང་ལྔ་སྟོང་ལྷག་གི་སྔོན་ལ་བོད་དུ་གདོད་མའི་ཆོས་ལུགས་ཤིག་ཡོད་པར་ར་སྤྲོད་བྱེད་པ་ཡང་། དོན་དུ་བོན་ཆོས་འདི་ལས་མ་འདས་ལ། བང་སོའི་ནང་དུ་རིན་པོ་ཆེ་དང་དངོས་རྫས་སྣ་ཚོགས་འཇོག་སྲོལ་ཡོད་པ་ལས་གཞན། བོན་གྱི་དུར་ཆོག་རྣམས་སུ། ཉ་ཕག་ར་ཤ་རྒྱུ་མ་འདི། །ཁྱོད་ཀྱི་དུར་རྒྱགས་རྫོངས་སུ་འདེབས། །འདི་ལ་དུར་གྱི་རྒྱགས་སྐལ་གྱིས། །གསོན་གྱི་ཟས་གཡང་མ་རྐུ་ཞིག། ཅེས་ཀྱང་གསུངས་ཡོད་དོ། །

དེ་ཡང་པུ་དེ་གུང་རྒྱལ་གྱི་ཡབ་གྲི་གུམ་བཙན་པོའི་སྤུར་ཟངས་ཆེན་ཁ་སྦྱོར་གྱི་ནང་དུ་བཅུག་སྟེ་གཙང་ཆུའི་གཞུང་ལ་བསྐྱུར་བ་ཀོང་པོར་བུད་པ་དེ། བླུས་ནས་འཕྱང་བ་དར་ཐང་དུ་དུར་བཏབ་པ་འདི། བོད་ཀྱི་ཡིག་ཚང་རྣམས་སུ་བང་སོའི་ཐོག་མ་ཡིན་པར་བཤད་ཀྱང་། ལོ་ངོ་སྟོང་ཕྲག་ལྔ་དྲུག་ཡན་གྱི་སྔོན་ནས་ཡོད་པ་བོད་ཀྱི་ས་གནས་སོ་སོ་ནས་བུད་པའི་དུར་རྫས་རྣམས་ཀྱིས་ར་སྤྲོད་བྱེད་ཐུབ། གྲི་གུམ་གྱི་བང་སོ་ས་ལ་བཏབ་པ་དེ། སྤ་སྟོན་བསྟན་རྒྱལ་བཟང་བོས་གསུངས་པ་བཞིན། རྒྱལ་དུར་ལ་དེ་སྔ་བས། ད་ལྟ་རྗེའི་དུར་ས་བང་སོ་ཁྲོད་བྱ་བ་ཡོད། སྲིད་པའི་བང་སོ་ས་ལ་ཟུག་པ་ཡང་དེ་ལགས་སོ། །ཞེས་པ་ལྟར་བོད་ཀྱི་རྒྱལ་དུར་ལ་སྔ་ཤོས་སུ་བཟུང་ན་འགྲིག་གོ། དེའི་ཕྱིས་སུ། བཀའ་ཐང་སྡེ་ལྔ﹙མི་རིགས་དཔེ་སྐྲུན་ཁང་གི་ལྕགས་པར་ཤོག་གྲངས༡༥༣-༡༥༦ བར་གསལ﹚ལས། རྒྱལ་བོ་ཐོ་རེ་སྙན་ཤལ་སྐུ་རིང་ལ། ཡུམ་བུ་བླ་མཁར་གོང་ཡ་ཚད་བྲག་མཐའི་སྐྱིབས་ན། བང་སོ་དམར་བོ་དང་། རྒྱལ་བོ་འབྲོང་གཉན་ལྡེ་རུའི་བང་སོ་བརྩིགས་ཚུལ་བཀོད་ཡོད་པ་དང་།

ཡིག་ཚང་རྣམས་སུ། རྒྱལ་བོ་སྔོན་མ་རྣམས་ཀྱི་བང་སོའི་དབྱིབས་ས་ཕུང་སྤུངས་པ་ལྟ་བུ་ལས། བཟོ་དབྱིབས་མེད་པ་བོད་རྗེ་གྲི་གུམ་བཙན་པོ་ནས་ཁྲི་གཉན་གཟུགས་བཙན་བར་དུ་གསལ་ལ། འབྲོང་གཉན་ལྡེ་རུ་བང་སོར་གསོན་པོར་བཅུག་སྟབས། གུར་གྱི་དབྱིབས་ལྟ་བུ་ཟླུམ་པོ་ཡིན་པ་དང་། དེའི་རྗེས་གནམ་རི་སྲོང་བཙན་ནས་བང་སོ་གྲུ་བཞི་བརྩིགས་སྲོལ་དར་ཏེ། མངའ་བདག་རལ་བ་ཅན་གྱི་བར་དང་། དེ་ཡང་གྲུ་བཞི་སོག་པའི་རུས་ལེབ་དང་འདྲ་བར་སྒབ་ཆེ་མགོ་ཆུང་ཞིག་ཡོད། ལྷག་པར་ཆོས་རྒྱལ་སྲོང་བཙན་གྱི་བང་སོ་ནི། སྲོང་བཙན་བང་སོའི་དཀར་ཆག་ནང་། སྲོང་བཙན་བང་སོ་ཆུ་བོའི་མདའ་རུ་ཆགས། །ཆེ་ཆུང་ཚད་ནི་དཔའ་ཆེན་མདའ་རྒྱང་གང་། །སྟེང་གི་ཞེང་ནི་ཉག་གི་རྡོ་རྒྱང་གང་། །ནང་དུ་ལྷ་ཁང་ལྔ་ཡི་བཞུགས་སུ་གསོལ། །བང་སོ་ནང་རྒྱན་ཅན་དུ་གྲགས་པ་ཡིན། །གསང་བའི་མཚན་ནི་མུ་རི་སྨུག་པོ་ཞེས། །འཛམ་བུ་གླིང་གི་ནོར་ཕུད་ལན་གསུམ་བསྡུས། །ལྷ་ཀླུ་མི་ཡི་སྐྱེ་འགྲོའི་བདེ་སྐྱིད་བསྐྲུན། །ཞེས་གསུངས་ཡོད་པ་དང་། ཡང་། དེབ་ཐེར་འགར། བང་སོ་འདིར་རེའུ་མིག་དགུ་ཡོད་པའི་དབུས་སུ་བཙན་པོའི་སྐུ་ཕུང་གསེར་གྱི་བཏུམས་པ་བཞུགས་ཤིང་། ནང་གི་རེའུ་མིག་ཐམས་ཅད་ནོར་གྱིས་བཀང་བ། ཕྱིའི་དབྱིབས་གྲུ་བཞི། ནང་དུ་ལྷ་ཁང་ལྔ། དབུས་སུ་རིང་ཚད་ཁྲུ་ཙི་བརྒྱད་ཙམ་ཡོད་པའི་བྱུ་རུའི་སྡོང་བོ་དང་། རྒྱལ་བོ་དང་རྒྱ་བཟའ། བལ་བཟའ་གསུམ་གྱི་འཇིམ་སྐུ་བཞུགས་ཤིང་། ཟུར་བཞིའི་མཆོད་ཁང་ནང་རིན་པོ་ཆེ་སྣ་ཚོགས་ཀྱིས་བཀང་བའི་བང་མཛོད་དང་། ནང་གི་འོག་བཞིར་རྡོ་གཅལ་བཏིང་བ། ཕྱི་སྐྱ་གྱང་ས་མཐུག་པོ་བསླངས་ཤིང་། ནང་སྐྱ་རྡོ་རྩིག་ཅན། བང་སོའི་སྒོ་མོ་ནུབ་ཕྱོགས་སུ་བསྟན་པ། བང་སོའི་ཕྱི་ར་ས་སྨུག་པོ་དང་། རྡོ་ཧྲུག་གིས་བཀབ་ནས་རི་ཆུང་དེའུ་འབུར་ཞིག་དང་འདྲ་བར་གྱུར་བ། དེའི་མཐའ་བསྐོར་དུ་ཞེང་ཚད་གོམ་པ་བརྒྱ་ལྷག་ཙམ་དང་། མཐོ་ཚད་གཞུ་འདོམ་བཅུ་གཉིས། བང་སོའི་རྩེ་མོར་ལྷ་ཁང་ཆུང་ངུ་ཞིག་བཅས་ཡོད་པར་བཤད་དོ། །སྙིགས་མའི་དུས་སུ་ཆུ་བོས་འཇིག་སྟེ། གནམ་སྒོ་ཕྱེ་རྒྱུ་ཡོད་པ་སོགས་བརྗོད་པ་ལྟ་བུ་དང་། ཡང་། རྒྱ་ནག་གི་རྒྱལ་རབས་སུ། རི་མཚམས་བང་སོ་རི་ཆུང་ནང་བཞིན་མང་བོ་ཡོད། བང་སོའི་འཁྲིས་སུ་ཁང་བ་ཆུང་ངུ་རེ་ཡོད། ཁང་བའི་སྟེང་ལ་སྟག་རིས་དཀར་བོ་བྲིས་ཡོད། ཅེས་ཀྱང་འབྱུང་། རྒྱལ་བོ་བཀའི་ཐང་ཡིག་ལས། ཆོས་རྒྱལ་སྲོང་བཙན་སྒམ་པོའི་མཛད་འཕྲོ་བསྡུས་ལུགས་ལ། སངས་རྒྱས་རྣམས་ཀྱིས་སྤྲུལ་བ་བསྡུས་པ། ནང་བློན་རྣམས་ཀྱིས་ལྷ་ལ་ཐིམ་པ། རྒྱལ་བརྒྱུད་རྣམས་ཀྱིས་ཡར་ཀླུང་སྨུག་རིར་བང་སོ་བརྩིགས་ལུགས་གསུམ་དུ་མཐོང་པ་ལས། བང་སོའི་བརྩིགས་ཚུལ། སྲུང་མཁན། མཆོད་ལུགས་སོགས་འཁོད་ཡོད་དོ། །

འདིར་བོད་ཀྱི་རྒྱལ་བོ་རིམ་བྱོན་གྱི་བང་སོ་བརྩིག་ཡུལ་དང་ལོ་ཚིགས་རགས་བསྡུས་ཙམ་བཀོད་ན། གྲི་གུམ་བཙན་པོའི་བང་སོ་སྤྱི་ལོ་དུས་རབས་དང་བོའི་ནང་ཕྱིང་ཡུལ་དར་ཐང་དུ་བཏབ། འདི་ནས་བཟུང་བོད་དུ་རྒྱལ་དུར་ཐོག་མ་དར། བྱ་ཁྲིའི་བང་སོ་དུས་རབས་དང་བོའི་ནང་གཡའ་དང་རྫ་ལ་བཏབ། ལེགས་དྲུག་བང་སོ་དུས་རབས་དང་བོ་ནས་རིམ་བཞིན་དོན་མཁར་གཡའ་སྤང་མཚམས་སུ་བཏབ། ལྡེ་བརྒྱད་བང་སོ་ཆུ་བོའི་གཞུང་ལ་བཏབ། བཙན་བཞིའི་བང་སོ་ཕྱིང་ཡུལ་དར་ཐང་དུ་བཏབ། ལྷ་ཐོ་ཐོ་རིའི་བང་སོ་ཆུ་རྟ༣༧༤ ལོར་ཕྱིང་ཡུལ་དར་ཐང་དུ་བཏབ། ཁྲི་གཉན་གཟུང་བཙན་གྱི་བང་སོ་དོན་མཁར་མདར་བརྩིགས། འབྲོང་གཉན་ལྡེའུ་བང་སོ་ཞང་མདར་བརྩིགས། སྟག་རི་གཉན་གཟིགས་ཀྱི་བང་སོ་ས་ཡོས ༦༡༩ ལོ་དང་གནམ་རི་སྲོང་བཙན་གྱི་བང་སོ་ལྕགས་སྟག ༦༣༠ ལོར་དོན་མཁར་མདར་བརྩིགས། འདིའི་སྔོན་དུ་བང་སོ་ཐམས་ཅད་ཟླུམ་པོ་ཡིན་ཀྱང་། འདི་ནས་བཟུང་བང་སོ་གྲུ་བཞིའི་སྲོལ་དར། སྲོང་བཙན་གྱི་བང་སོ་ལྕགས་ཁྱི ༦༥༠ ལོར་འཕྱོངས་རྒྱས་དང་། རྒྱ་བལ་བཟའི་བང་སོ་འཕྱོངས་རྒྱས་སུ་བརྩིགས། གུང་རི་གུང་བཙན་གྱི་བང་སོ་ཤིང་ཡོས ༦༥༥ ལོར་དོན་མཁར་མདར་བརྩིགས། མང་སྲོང་མང་བཙན་གྱི་བང་སོ་ས་ཡོས ༦༧༩ ལོར་དོན་མཁར་གླང་རིའི་གཡོན་དུ་བརྩིགས། འདུས་སྲོང་མང་རྗེའི་བང་སོ་ཤིང་འབྲུག ༧༠༤ ལོར་དོན་མཁར་དུ་མང་སྲོང་གི་གཡོན་དུ་བརྩིགས། མེས་ཨག་ཚོམ་གྱི་བང་སོ་ཤིང་ལུག ༧༥༥ ལོར་མུ་ར་རིར་བརྩིགས། གྱིམ་ཤིང་ཀོང་ཇོའི་བང་སོ་ས་ཡོས ༧༣༩ ལོར་འཕྱོངས་རྒྱས་ཀྱི་རྒྱབ་རིར་བརྩིགས། འཇང་ཚ་ལྷ་དབོན་གྱི་བང་སོ་ལྕགས་ཁྱི ༧༡༠ ལོར་མུ་ར་རིར་བརྩིགས། ཁྲི་སྲོང་ལྡེ་བཙན་གྱི་བང་སོ་ཤིང་གླང ༧༨༥ལོར་མུ་ར་རིར་བརྩིགས། འདིའི་བང་སོའི་མདུན་དུ་བཙན་པོ་རྣམས་ཀྱི་མཛད་རྗེས་བཀོད་ཡོད། མུ་ནེ་བཙན་པོའི་བང་སོ་མེ་ཡོས ༧༨༧ ལོར་མུ་ར་རིར་བརྩིགས། མུ་ཏིག་བཙན་པོའི་བང་སོ་མེ་བྱ ༨༡༧ ལོར་འཕྲུལ་རྒྱལ་མདུན་དུ་བརྩིགས། ལྷ་རྗེའི་བང་སོ་ཤེལ་གྱི་བྲག་ལ་བཏབ། ཁྲི་གཙུག་ལྡེ་བཙན་གྱི་བང་སོ་དོན་མཁར་མདའི་གཡོན་ཕྱོགས་སུ་བརྩིགས། གླང་དར་མའི་བང་སོ་མེ་སྟག་ལོར་འཕྲུལ་དང་རྒྱལ་ཆེན་བར་བརྩིགས་ཏེ། རྩིག་འཕྲོ་ལུས་ཡོད་སྐད། འོད་སྲུངས་ཀྱི་བང་སོ་འཕྲུལ་རྒྱལ་གྱི་རྒྱབ་ཏུ་བརྩིགས་སོ། །གཞན་དུ་ན་མཚོ་སྔོན་ཏུའུ་ལན་རྫོང་གཅིག་པུར་མཚོན་ནའང་བང་སོ་སྟོང་གཅིག་དང་ཉིས་བརྒྱ་ལྷག་ཡོད་པར་འབྲེལ་ཡོད་ཡིག་ཆ་ཁག་ལས་བཤད་ཡོད། དེ་མཚུངས་སུ་བོད་རྒྱལ་བཙུན་མོ་ཕལ་མོ་ཆེ་བང་སོ་བརྩིགས་པའི་སྲོལ་མེད་ཀྱང་། ཁྲི་སྲོང་ལྡེ་བཙན་གྱི་བཙུན་མོ་འབྲོ་བཟའ་བྱང་ཆུབ་རྗེ་དང་། ཁྲི་རལ་བ་ཅན་གྱི་བཙུན་མོ་ཅོག་རོ་ངང་ཚུལ་མ་སོགས་ལ་བང་སོའི་ཚབ་ཏུ་མཆོད་རྟེན་བརྩིགས་པར་ལོ་རྒྱུས་ཁག་ཏུ་འབྱུང་ལ། དེ་རྣམས་འཕྱོངས་རྒྱས་དོན་མཁར་མདའ་རུ་ཡོད་ཀྱང་། དེར་སང་ངོས་འཛིན་བྱེད་དཀའ་ལ། གང་ལྟར། དེ་རུ་བང་སོའི་ས་ཕུང་ལྟ་བུ་མཇལ་རྒྱུ་མང་ངོ་། །

༢ བེམ་པོ་འཇོག་སྟངས་ཡང་། ཕུང་བོ་གཙང་མར་བཀྲུས་རྗེས་དུར་ས་གཙང་མའི་མཐིལ་དང་། མཐའ་འཁོར་དུ་སོལ་བས་བཏུམས་པའི་དཀྱིལ་དུ་བཞག་སྟེ་མི་རུལ་བ་བྱས་ཐོག བེམ་པོའི་མདུན་དང་མཐའ་འཁོར་དུ་ཟས་གོས་དང་། གཤིན་པོའི་རྒྱུན་སྤྱོད་ཡོ་བྱད་སོགས་བཞག སྟེང་དུ་སས་གཡོགས་པའི་ཐོག ཤིང་སྣ་འདེབས་འཛུགས་བྱེད་པ་སྟེ། ཆོ་ག་རྣམས་སུ་འདས་པོའི་བླ་ནི་དུར་ན་གནས་པར་བཤད་པས། ཤིང་དེ་ལའང་བླ་ཤིང་ཟེར། ཤིང་སྡོང་འཛུགས་པ་འདི་ད་ལྟ་སྔོན་ཐོན་རྒྱལ་ཁབ་ཨ་རི་སོགས་ནའང་འབྱུང་བས། དེ་ཡང་སྔ་སོར་བོད་ཀྱི་སྲོལ་ཡིན་པར་སེམས། ཡང་། དམག་ཐོག་ཏུ་གྲོངས་ན་གནས་དེར་བང་སོ་བརྩིགས་ཤིང་སྟེང་དུ་སྟག་གི་རི་མོ་སོགས་འབྲི་བར་བཤད།

གཞན་ཡང་། རྒྱལ་བློན་བར་དུ་བྲོ་བོར་བའི་མནའ་རྟེན་དུ་རྡོ་དཀར་བོ་ཞིག་བཟུང་སྟེ་མནའ་ཚིག་བརྗོད་རྗེས་གཅིག་ནས་གཅིག་ཏུ་བརྒྱུད་ལ། ཕྱིས་མནའ་འདོར་མཁན་གཙོ་བོ་དེའི་མཆད་པའི་རྨང་དུ་འཇོག་སྲོལ་ཡོད། དེ་ནི་ངག་རྒྱུན་ཏུ་རྡོ་དཀར་མ་མོའི་གྲོད་པུ་ཟེར་བ་དེ་ཡིན་ཚོད་འདུག་ལ། མཆད་ཀྱི་རྨང་དུ་འཇོག་སྲོལ་ལ་གཞིགས་ན་བླ་རྡོ་ཟེར་བའང་འདི་ཡིན་པར་སྣང་། གནམ་རི་སྲོང་བཙན་དང་དབྱི་ཚབ་ཟུང་གིས་མནའ་རྡོ་དེ། ཕྱིས་དབྱི་ཚབ་ཀྱི་མཆད་པའི་རྨང་རྡོ་བྱས་ཚུལ་དང་། བྲོ་བོར་ཚེ་གོར་མ་ལག་ཏུ་ལེན་སྲོལ་དེ་ཉེ་ཆར་ཁམས་དང་འབྲས་ལྗོངས་ན་ཡོད་ཚུལ་དེབ་དཀར་ལས་གསུངས་སོ། །ཡང་། དེབ་དཀར་ལས། གྲོངས་པའི་ཚེ་ཤ་རུས་རྣམས་གསེར་ཕྱེ་དང་མཉམ་དུ་བསྲེས་ནས། ལྕགས་སྣོད་དུ་བཅུག་སྟེ་ས་ལ་སྦ། ཞེས་ཀྱང་གསུངས། དམག་ཐོག་ཏུ་གྲོངས་ན་གནས་དེ་རུ་བང་སོ་བརྩིགས་ཤིང་སྟེང་དུ་སྟག་གི་རི་མོ་སོགས་ཀྱང་འབྲི་བར་བཤད། དེ་ནི་དཔའ་བའི་རྫིག་ཉམས་མཚོན་བྱེད་དང་ཐོབ་རྟགས་ཡིན་པར་སྙམ་ལ། ཐང་ཡིག་ལས་ཀྱང་། མི་ཤི་ཚེ་རོ་དུར་དུ་སྦ། བང་སོར་ཚོས་སྣ་ཚོགས་བྱུག ཞེས་དང་། ཐང་ཡིག་གསར་མ་ལས། བང་སོའི་ལོགས་སུ་ས་ཁང་ཞིག་བརྩིགས་ཏེ་ཚོས་དམར་བོར་བསྒྱུར་ཡོད་ལ། དེའི་ཐོག་ཏུ་སྟག་དཀར་བོ་ཞིག་བྲིས་འདུག དེ་ཚོ་འཚོ་བའི་སྐབས་སུ་སྟག་ལྤགས་གྱོན་ཞིང་། འདས་པའི་རྗེས་སུ་སྟག་གི་གཟུགས་བརྙན་བྲིས་ཏེ་དཔའ་བོའི་རྟགས་སུ་ངོམ་པ་འདྲ། ཞེས་པ་དང་མཐུན་ནོ། །དེ་ལས་གཞན་མུ་ར་རིར་བཏབ་པའི་ཁྲི་གཙུག་ལྡེ་བཙན་གྱི་བང་སོ་སོགས་སུ་རྡོའི་སེང་གེ་བུད་པའང་དེ་དང་འདྲ་བར་སེམས་སོ། །

ཡང་སྦ་བཞེད་དུ། གསལ་སྣང་གི་བུ་མོ་ཤི་བའི་རོ་རྫའི་ནང་དུ་བཅུག་ནས། མའི་མལ་འོག་ཏུ་སྦས་ཚུལ་སོགས་ཀྱང་འབྱུང་བ་ལྟར། ད་ལྟ་བོད་ཁམས་ཀྱི་ས་ཆ་ཕལ་མོ་ཆེར་རྫ་བུམ་ལས་ཀེང་རུས་མང་དུ་འབྱུང་བས། སྔོན་དུས་སྲོལ་དེ་བོད་དུ་ཆེས་ཆེར་དར་བར་གསལ་ལོ། །རྫའི་ནང་དུ་བྱིས་པའི་བེམ་པོ་འཇུག་སྲོལ་ཁ་གསལ་ཞིག་ཡེ་ཤེས་འཕྲིན་ལས་ཀྱིས་བརྩམས་པའི་ཕུང་བོ་དུར་འཇུག་བྱེད་སྟངས་སྐོར་བོད་རིགས་ཀྱི་གོམས་སྲོལ་འགའ་ཞིག་ཅེས་པར་འདི་ལྟར་འབྱུང་སྟེ། ཕུང་བོ་རྫ་མའི་ནང་བཞག་ནས་ཁ་བཀག་པ་སྟེ། དེ་ནི་ཕྲུ་གུ་ཆུང་ངུ་ཤི་བའི་ཕུང་བོ་རྫ་མའི་ནང་བླུགས་ཏེ། ཁམ་སྟར་སོགས་ཤིང་འབྲས་སྐམ་པོ་སྣ་ཚོགས་དང་། ཀ་ར་བུ་རམ་སོགས་མཉམ་བླུགས་ཀྱིས་རྫ་ཁ་རླུང་མ་ཤོར་བར་འདག་པས་བཀག་པའི་རྫ་མ་དེ་རི་མཐོན་པོའི་བྲག་གསེབ་བམ། རི་མཐོ་སར་སྐྱེལ་ཞིང་དེ་ནི་བྲག་རི་མཐོ་སར་སྐྱེལ་བས་གཤིན་པོའི་རྣམ་ཤེས་ཡར་རྒྱུགས་ཏེ་ལྷ་དང་། མིའི་འགྲོ་བར་སྐྱེ་བའི་ཁྱད་ཆོས་ཡོད་ཅེས་ཤོད་སྲོལ་དང་། ཡང་ཕ་མ་ལ་ལར་ཕྲུ་གུ་ཡང་ཡང་ཤི་བ་དང་། ཧ་ཅང་གཅེས་སྤྲས་བྱེད་པའི་ཕྲུ་གུ་ཤི་རྗེས་གོང་བཞིན་རྫ་མའི་ནང་བླུགས་པ་དེ་ཁང་བའི་ཐོག་ཁང་ངམ། ཤོད་མཛོད་ཀྱི་ཕུག་ཏུ་བཀལ་ནས་འཇོག་པའམ། ཡང་ན། ཕ་མ་ཉལ་སའི་འོག་ལ་འཇོག་གི་ཡོད། མོན་གྱི་ས་ཆ་འགའ་ཤས་སམ་མཐའ་མཚམས་ཀྱི་ས་གནས་འགའ་ཤས་སུ་མི་རྒན་པའི་ཕུང་བོ་ཡང་ཤིང་ཟོམ་ནང་བླུག་སྟེ་ཐོག་ཁང་ངམ་ཡང་ན་ཤོད་མཛོད་དུ་འཇོག་པའང་ཡོད། དེ་ནི་གཡང་མི་ཤོར་བའམ་གཤིན་པོའི་རྣམ་ཤེས་ཁྱིམ་དེ་རང་ལ་འཁོར་བས་གཤིན་པོ་རང་ཁྱིམ་དུ་སླར་ཡང་སྐྱེ་བ་ལེན་ཚུལ་གྱི་ཁྱད་ཆོས་ཡོད་ཅེས་ཤོད་སྲོལ་ཡོད་པར་བཀོད་ཡོད་དོ། །

གཞན་ཡང་། དུང་དཀར་ཚིག་མཛོད་ལས། རྒྱལ་བོ་དང་བཙུན་མོ་བློན་པོ་བཅས་ཀྱི་བང་སོ་བརྩིགས་པའི་ནང་དུ་མི་གསོན་པོ་བང་སོའི་ནང་དུ་འཇུག་པའི་སྲོལ་ནི་བོད་ནང་དུ་གཏན་ནས་མ་བྱུང་ཞེས་གསུངས་ཀྱང་། དེ་འདྲ་གནའ་རབས་ཀྱི་ལོ་རྒྱུས་ལས་གསལ་བར་སྣང་སྟེ། བོད་རྒྱལ་ཉེར་དགུ་བ་འབྲོང་གཉན་ལྡེ་རུ་ལ་མཛེ་ནད་ཕོག་པས་རྒྱལ་བོ་དང་མཆིམས་བཟའ་ཀླུ་རྒྱལ། བློན་ཆེན་སྙགས་ཐང་བ་ཡར་རྗེ་དང་བཅས། ཡར་ལུང་ཁང་མདར་བང་སོར་བཅུག་པ་ལ། ས་ཙྪ་དང་གུར་གྱི་བཟོ་དབྱིབས་འདྲ་བས། གསོན་མཆད་ཟླུམ་པོ་ཟེར་བ་ལོ་རྒྱུས་མང་བོ་ན་ཉི་ཤར་སྤར་མོས་མི་ཁེབས་པར་གདའ་ལ། ཆོས་འབྱུང་མཁས་པའི་དགའ་སྟོན་དུའང་། རྗེས་འབངས་གསུམ་ནི་གསོན་བཞིན་བང་སོར་གཤེགས། །ཞང་མདའི་བང་སོ་གསོན་མཆད་ཟླུམ་པོར་གྲགས། །ཞེས་དང་། ཐང་ཡིག་ལས་ཀྱང་རྗེ་བློན་རྣམས་མནའ་མཆེད་བསྒྲིགས། མི་ལྔ་དྲུག་ཙམ་གྱིས་ལྷན་ཅིག་དབུ་སྙུང་། བྲོ་མནའ་བོར། རྗེ་བོ་བཀྲོངས་ཚེ་དེ་རྣམས་ཀྱང་རང་སྲོག་བཅད་དེ་རྗེ་དང་དུར་ཁུང་གཅིག་ཏུ་སྦ། འཚོ་དུས་ཀྱི་གོས་དང་། རྩེད་ཆས། ཆིབས་རྟ་སོགས་གཅེས་ནོར་གང་ཡོད་དུར་དུ་སྦས་ཏེ་བང་སོའི་སྟེང་དུ་ད་དུང་དེའུ་འབུར་འདྲ་བ་ཞིག་བརྩིགས་ནས་ཤིང་སྡོང་སྣ་ཚོགས་བཙུགས་ཏེ་དུར་མཚོད་བྱེད། ཅེས་གསུངས་སོ། །རྒྱའི་ཡིག་ཚང་གཞན་ལས་ཀྱང་། མི་ཤི་ཚེ་དུར་གྲོགས་སུ་རྟ་ནོར་གསོད། བང་སོ་གྲུ་བཞི་འབུར་མར་བརྩིགས་ཤིང་། རྡོ་མང་བོ་བསགས་ནས་བརྩིགས་པ་དང་དབྱིབས་ཁང་ལེབ་དང་འདྲ་སེ་བ་འདུག རྟ་དང་གནག་ཕྱུགས་ཀྱི་མགོ་བཅད་ནས་དེའི་མཐའ་ལ་སྤུངས། བཙན་པོ་དང་འཁོར་བློན་ནི་གྲོགས་ཀྱི་ཚུལ་དུ་བགྱིད། དེར་བྲོ་ལ་གཏོགས་པ་ཟེར་ཞིང་། མི་གྲངས་ནི་ལྔ་ཙམ་ལས་མེད། བཙན་པོ་འདས་པའི་ཉིན་དེར་བཙན་པོའི་བྲོ་ལ་གཏོགས་པ་རྣམས་ཉིན་མཚན་ཀུན་ཏུ་ཆང་འཐུང་། དུར་སྦ་དུས་དེ་དག་གི་རྐང་བ་གཤགས་ཤིང་། ཁྲག་ཕྱུངས་ཏེ་ཤིར་འཇུག དེ་ཡིས་བཙན་པོའི་དུར་གྲོགས་བྱེད། ཡང་ན། གཉེན་ཉེ་དུ་མཆིས་ན་ནི། གྲི་ཡིས་གདོང་གྱེན་དུ་གཤགས་པའམ། དབྱུག་པ་རིང་ཐུང་ཁྲེ་ཙི་བཞི་ཅན། སྦོམ་ཕྲ་མཛུབ་མོ་ལྟ་བུ་ཡོད་པ་ཞིག་གིས་རྩིབ་རུས་འབིགས། ཀུམ་པོ་ནི་བཅུ་ཆ་ལས་ཕྱེད་ཀ་ཙམ་སྲིད། དེའང་དུར་གྲོགས་སུ་སྦ་ཞེས་ཀྱང་ཟེར་རོ། །དེང་སང་དུར་སར་གསུར་གཏོང་བའང་དེའི་དོད་ཡིན་པར་བཤད་ལ། ལྷག་པར་མཉམ་འཆི་མཉམ་གསོན་ཀྱི་བྲོ་བོར་ཚེ་གཅིག་ཤི་ན་ཅིག་ཤོས་ཀྱང་དུར་དུ་སྦ་བའི་ལུགས་མཆིས་ཏེ། དེབ་དཀར་ལས། སྐབས་འགར་རྒྱལ་བོ་དང་མི་ཆེན་རྣམས། མཉམ་འཆི་མཉམ་གསོན་བྱེད་པའི་མནའ་འདོར། དེ་འདྲ་བ་རྣམས་རྒྱལ་བོ་གྲོངས་ཚེ་རང་ཉིད་ཀྱང་ལྕེབས་ཤིང་དུར་ཁུང་གཅིག་ཏུ་སྦ་བ་ཡིན། བཙན་པོའི་རྟ་དང་། གོ་ཁྲབ་གཅེས་ནོར་རྣམས་ཀྱང་དུར་དུ་འཇུག དུར་སྟེང་དུ་རི་དེའུ་འདྲ་བ་ཞིག་བརྩིགས། དེར་ཤིང་སྡོང་འཛུགས་ཤིང་། ལོ་རེ་བཞིན་མཆོད་པ་ཡིན་ནོ། །ཞེས་གསུངས་པ་ལྟར་གསོན་མཆད་འདེབས་པའི་སྲོལ་ག་ཡོད་དོ། །

དེ་ལས་གཞན། དེང་དཔའ་རིས་ཡུལ་ནས་བོད་ཀྱི་དུར་ས་སྔོག་འདོན་བྱས་པ་ལས། མི་ཆེན་གྱི་ཀེང་རུས་ལོགས་སུ་མི་འགའ་རེ་ཕྱི་ལག་ལ་བཀྱིག་ཏེ་དུར་སྦས་བྱས་པ། དེང་སང་ས་དེའི་བཤམས་སྟོན་ཁང་དུ་མཐོང་རྒྱུ་ཡོད་ལ། བང་སོ་དེ་ནི་ལོ་ངོ་བཞི་སྟོང་སྔོན་གྱི་བོད་ཀྱི་དུར་ས་ཡིན་པར། ཚན་རིག་པས་ངོས་འཛིན་གནང་ཡོད་དོ། །དེ་ལས་གཞན་རྒྱལ་བ་སྐུ་ཕྲེང་གསུམ་པ་བསོད་ནམས་རྒྱ་མཚོ་མཚོ་སྔོན་དུ་ཕེབས་དུས། ཁྱོ་ག་ཤི་ཚེ་ཆུང་མ་གསོན་དུར་དུ་འདེབས་པ་མ་བཟོད་པར། སྲོལ་ངན་དེ་བཅད་པ་ཁོང་གི་རྣམ་ཐར་ན་གསལ་ལོ། །

༣ བོད་དུ་དུར་མཆོད་ཡོད་མེད་རགས་ཙམ་བཤད་ན། གཤིན་པོའི་ཉེ་འབྲེལ་རྣམས་དུར་སར་འཛོམས་ནས་དྲན་གསོའི་མཆོད་པ་འབུད་སྲོལ་ཡང་བོད་ཀྱི་ལུགས་ལ་ཡོད་པ་སྟེ། ཀརྨ་ཆགས་མེད་ཀྱིས་རྒྱ་གར་གྱི་མཁན་པོ་ཤི་ལེནྡྲ་བོ་དྷི་དང་། ཤཱཀྱ་པྲ་ཝ། དྷ་ན་ཤཱི་ལ། བོད་ཀྱི་ལོ་ཙཱ་བ་བཻ་རོ་ཙ་ན་དང་། པྲ་ཏི་ཛཱ་ཡ་སེ་དང་། ཛ་ཡ་ར་ཏྲཱི་ཏ་ལ་སོགས་པས་མདོ་རྒྱུད་མང་བོ་ལས་བསྡུས་ཏེ་ཟས་གཏད་བང་སོའི་ཆོ་ག་མཛད་ཡོད་ཚུལ་བཤད་ཡོད། ནང་བསྟན་གྱིས་བན་ལུགས་ཀྱི་མཚུན་བཅོས་འདི་ལ། བོན་ཆོས་སུ་སྲིད་པའི་ལྷ་སྲས་བརྡར་བ་ཞེས་པ་དང་དོན་གཅིག་ཏུ་སྣང་ལ། ཀརྨ་ཆགས་མེད་ཀྱིས་འདིའི་ཁུངས་སུ། མོའུ་འགལ་མདོ་ཉུང་བ་ལས། འཛམ་བུ་གླིང་གི་མི་རྣམས་ཀྱི་ཕ་མ་འདས་པའི་དྲིན་ལན་བསབ་པའི་ཕྱིར། སྟོན་ཟླ་ར་བའི་ཚེས་བཅོ་ལྔའི་དུས་ལ། དཀོན་མཆོག་གསུམ་སྤྱན་དྲངས་ལ་མེ་ཏོག་དང་ཞལ་ཟས་ཀྱི་མཆོད་པ་ཕུལ་ཏེ། དེའི་བསོད་ནམས་ཀྱི་ཚོགས་ཀྱིས་གང་ཞིག་དེའི་ཉི་མ་ལ་གཞོང་པའི་ནང་དུ་ཟན་ཕུལ་ཏེ། འདས་པའི་ཕ་མ་ལ་བསྔོས་ན་ཟས་དེ་དག་ཐམས་ཅད་འཐོབ་པར་འགྱུར་རོ། །ཞེས་དང་། ཕ་མ་སྔར་དུས་ཤི་ལ་ལོ་དུས་བཞིན། །ཟས་བསྔོ་བྱ་ཚུལ་མདོ་ཞིག་མདོ་མང་བཞུགས། །ཞེས་སོགས་འདྲེན་ཡང་། དེ་ནི་དཀོན་མཆོག་ལ་མཆོད་པའི་ཚོགས་བསགས་ཀྱི་སྟོབས་དང་དགེ་རྩ་དེ་དག་བསྔོས་ན་ཚེ་འདས་ལ་ཕན་པའི་དོན་ལགས་ཀྱི། བང་སོ་མཆོད་པའི་ཁུངས་སུ་མི་འགྲོའོ། །དེ་བཞིན་དུ་སྔོན་ཚེ་རྒྱལ་བོ་གཟུགས་ཅན་སྙིང་བོ་ཚེ་ལས་འདས་ཚེ་བུ་མོ་སྣང་བའི་སྒྲོན་མས་ཟས་གཏད་པ་དང་། མ་སྐྱེས་དགྲ་འདས་ནས་ཚ་བོ་ཤཱ་རིའི་བུས་ཟས་གཏད་པ་སོགས་དགེ་བའི་ཕུལ་དུ་གྱུར་བའང་དེ་བཞིན་ནོ། །

ཡང་། བཤད་ཚུལ་དེ་ལས་ལྡོག་སྟེ་ར་ག་ཨ་སེའི་ལྷོ་སྒོའི་དམིགས་རིམ་ཐར་བའི་ལམ་སྟོན་ལས། སྔོན་ཚེ་བོད་འདིར་རྒྱལ་རབས་ཉེར་ལྔ་ལ། །དམ་ཆོས་མ་དར་བོན་ལུགས་དར་ཆེ་བས། །རྒྱལ་བོ་རྣམས་ལ་བང་སོའི་མཆོད་པ་ཟེར། །ཕལ་བ་རྣམས་ལ་ལོ་དུས་ཤི་བའི་ཚོད། །གཏད་ཡར་ཞེས་པ་མཆོད་པ་རྒྱ་ཆེར་དར། །བྱང་བུ་ལ་ནི་རྟ་ཡི་སྲབ་མདའ་གཏད། །བྱང་བུ་རྟ་གོང་བསྐྱོན་ལ་བྱ་རུ་ཟེར། །དེ་བཞིན་ཁལ་མའི་སྣ་ཐག་གོ་ཁྲབ་སོགས། །ཟས་དང་ཆས་ཀ་བྱང་བུ་ལ་བསྔོས་ནས། །དེ་ནས་སློབ་དཔོན་ཉིད་ཀྱིས་འཁྱེར་སྲོལ་བྱུང་། །བནྟེ་ལུགས་ལ་དེ་རྣམས་མེད་པའི་ཕྱིར། །བོད་རྣམས་མ་མགུ་བན་ལ་མ་དད་པས། །ཨོ་རྒྱན་ལ་སོགས་པཎྚི་ཏ་རྣམས་ཀྱིས། །བོན་ལ་དཔེ་བླངས་ཟས་གཏད་ཆོ་ག་ནི། །དཀར་ཆོག་ཞེས་བྱ་ཙཀ་ལི་གཏད་རྒྱུད་མཛད། །ཞེས་བཤད་པ་ནི་ལོ་རྒྱུས་ཀྱི་རྐང་དང་འགྲིག་ལ། དེ་བས་པད་འབྱུང་གི་ལུང་བསྟན་ཞིག་ལས། གཤིན་གྱི་དུར་མཆོད་རྒྱུན་མི་ཆད། །ཆད་ན་མཐའ་རྗེས་ལོངས་སྤྱོད་དབུལ། །དེ་ཕྱིར་བང་སོའི་དུར་མཆོད་བརྩོན། །ཞེས་གསུངས་པ་ནི་རྒྱ་ནག་གི་རྩིས་གཞུང་གི་བཤད་ཚུལ་དང་མཐུན། རྒྱལ་བོའི་ཐང་ཡིག་ལས། མཆོད་པའི་དུས་ནི་གུང་ལ་གཤེགས་པ་ཡི། །རྒྱལ་གྱི་ཉི་མར་སྲོང་གི་བང་སོར་མཆོད། །ཕྱི་རབས་རྒྱལ་བོ་འདས་དུས་གང་ཡིན་ལ། །རྒྱལ་བརྒྱུད་རྒྱལ་འབངས་འཁོར་དང་བཅས་པ་ཡིས། །མཆོད་པའི་ལོངས་སྤྱོད་སྤྱན་གཟིགས་སྣ་ཚོགས་བཏེགས། །ཞེས་དང་། ཡང་དེ་ཉིད་ལས། སང་གི་ཉི་མར་སྲོང་གི་བང་སོར་མཆོད། །གཤིན་པོ་ཐམས་ཅད་བྱེས་ཀྱི་ལུང་བར་སོང་། །དེ་སྐད་སྨྲས་ནས་མཆོད་པ་རྒྱས་པར་བྱེད། །ཕུད་དང་ནོར་དང་གོས་ལ་སོགས་པ་དང་། །རྟ་ཕྱུགས་རྐང་འགྲོས་མཆོད་པའི་རྫས་རྣམས་ཀྱིས། །མཆོད་པ་ཚར་ནས་ལྷག་མ་ཤུལ་དུ་སྤུངས། །གཤིན་པོ་ཤོག་ལ་དེ་ལས་ཟོ་ཞིག་བསྔོ། །ཕྱི་མིག་མི་ལྟ་རང་གི་གནས་སུ་འབྱོན། །ཞེས་གསུངས་པ་ནི། ཚེ་འདས་དེ་དག་ཡི་དྭགས་ཀྱི་རིགས་སུ་གཏོགས་པའི་ཡུལ་ལྷ་གནས་བདག་ཏུ་སྐྱེས་པ་རྣམས་ལ་གསོལ་མཆོད་བྱས་ན་ཕྱི་རབས་པར་མགོན་སྐྱབས་བྱེད་པའི་དོན་དུ་དགོངས་པར་སྙམ་མོ། །

ཡང་། བོན་ལུགས་ཀྱིས་ཚེ་འདས་ཀྱི་བླ་ཚེ་སྲོག་གསུམ་ལས་བླ་དེ་འདས་པོ་དེ་ཉིད་ཀྱི་བྱད་གཟུགས་བཟུང་ནས་དུར་དེར་གནས་པས། དེ་ལ་ཕན་གནོད་གང་བྱས་ན་འབྲས་བུ་དེ་འདྲ་འབྱུང་བར་ཡང་བཤད་ཡོད། དེ་བས་ཀརྨ་ཆགས་མེད་ཀྱི་མཚུན་བཅོས་ལས། འདོན་ཆོག་དང་མཆོད་རྫས་བཤམས་ཚུལ་སོགས་རྒྱས་པར་བཤད་ཡོད།

འོན་ཀྱང་། ནང་ཆོས་ཀྱི་ལུགས་སུ་དེ་ལྟར་བྱེད་པ་ཤིན་ཏུ་མི་རུང་ཚུལ། མཁས་པ་འགའ་ཞིག་གིས་བཀག་པ་དོན་ལ་གནས་པར་སེམས་སོ། །བོད་ཀྱི་ལོ་རྒྱུས་ཁག་ན། བེམ་པོ་གསེར་ཕྱེ་སོགས་རིན་ཆེན་བསྲེས་ཏེ་འཇོག་པའམ་དཀོར་ནོར་རྩ་ཆེན་གྱིས་བཀང་སྟེ་འཇོག་སྟངས་ཡང་། དེབ་དཀར་ལས། བང་སོ་ནང་གི་རེའུ་མིག་དགུའི་དབུས་སུ། བཙན་པོའི་སྐུ་སྤུར་གསེར་གྱིས་བྱུགས་ནས་འཇོག དཀོར་ནོར་གྱིས་བཀང་། ནང་བློན་གང་ཡིན་དེ་དུར་སྲུང་དུ་འཇོག ཁོང་རང་འཁོར་བཅས་གཤིན་པོའི་རྟགས་བཏབ་སྟེ། རྒྱལ་རྒྱུད་གསོན་པ་རྣམས་དང་འཕྲད་མི་ཆོག་པ་ཡིན། བ་ཕྱུགས་སོགས་བང་སོའི་ཉེ་འཁོར་དུ་འཁྱར་ན་ཁོང་རྣམས་ཀྱིས་བཟུང་སྟེ་གཤིན་པོའི་རྟགས་བཏབ་ནས་སླར་བདག་པོ་ལ་མི་སྤྲོད། ལོ་དུས་ཀྱི་མཆོད་པའི་སྐབས་སུ་དུང་བརྡ་བཏང་བ་དང་མཉམ་དུ། ཁོང་རྣམས་ལུང་བ་ཞིག་ཏུ་བྲོས་ནས་ཡིབ་སྟེ་སྡོད། དེ་ནས་བཙན་པོ་འཁོར་བཅས་ཀྱིས་མཆོད་པ་ཕུལ་བའི་རྗེས་སུ་སླར་འཁོར་ནས། མཆོད་པ་རྣམས་བསྡུས་ནས་ལོངས་སྤྱོད་ཚུལ་སོགས་བཤད་པ་ལྟར། ཡང་། སྐབས་ལན་རེར་ནང་བློན་གང་ཡིན་རྒྱལ་བོའི་དུར་སྲུང་དུ་འཇོག་པ་དང་། སྐུ་གླུད་དུ་བརྫངས་པ་ལ་གསོན་པོར་དུར་དུ་བཅུག ཅེས་རགས་བཤད་ཙམ་གྱི་བརྡ་སྦྱར་བ་ཡོད་དེ། བཀའ་ཐང་སྡེ་ལྔ﹙མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་ཤོག་གྲངས ༡༤༦ ན་གསལ།﹚ལས། ནང་བློན་གང་ཡིན་རྒྱལ་བོའི་བང་སོ་སྲུང་། །གཤིན་པོའི་ཚུལ་བཟུང་པུར་གྱི་འབངས་སུ་བསྔོས། །གསོན་གཤིན་བྱེ་བྱས་མི་ཡི་ཁྱུ་ནས་བུད། །རྒྱལ་བརྒྱུད་གསོན་པོ་རྣམས་དང་མི་འཕྲད་ཅིང་། །མཆོད་པའི་དུས་མིན་བང་སོའི་ཐོ་ཕྱི་རུ། །གསོན་པོའི་མི་དང་རྟ་ཕྱུགས་འཁྱམས་དབང་མེད། །མི་ནོར་བྱུང་ན་དུར་སྲུང་གཤིན་པོས་འཛིན། །དུར་སྲུང་གིས་རེག་གསོན་ཁྱུར་མི་ཚུད་ཅིང་། །གཤིན་པོའི་རྟགས་བཟུང་དུར་སྲུང་བྲན་གཡོག་བྱེད། །གཞན་གྱི་བྱ་བ་གང་ཡང་མི་འབབ་ཅིང་། །ས་ཁུལ་བང་སོའི་པུར་ཁ་ནོར་རྫས་སྲུང་། །ཞེས་དང་། གཞན་ཡང་། ས་ཁྱོན་ཡངས་སར་ལོ་ཏོག་འདེབས་ཞིང་། གཞུང་ལས་སུ་འགྲོ་མི་དགོས་པར་མ་ཟད། དམག་ལའང་འགྲོ་མི་དགོས་པར་བཤད་དོ། །དུང་དཀར་ཚིག་མཛོད﹙ཤོག་གྲངས༡༥༨༩﹚ལས། རྒྱལ་བོ་ཁྲི་སྲོང་ལྡེ་བཙན་སྐུ་ན་ཕྲ་བའི་དུས་ཀྱི་བློན་པོ﹙མ་ཞང་དྲོན་པ་སྐྱེད་དང་ཁྲོན་པ་སྐྱེས་ཞེས་པའང་སྣང﹚འདི་བོན་ལ་དགའ་བས། རྒྱལ་བོ་སྐུ་ནར་མ་སོན་པའི་རིང་འདིས། སུས་ཆོས་བྱེད་པ་ཕོ་རང་དུ་མཐར་སྤྱུག་གོ་ཞེས་ཁྲིམས་བུ་ཆུང་མཛད། བློན་ཆེན་ཆོས་ལ་དགའ་བ་མང་དབལ་གཉིས་ལ་བཀྱོན་ཕབ་སྟེ་བོད་ནག་པོར་བཏང་། སྐབས་དེར་གསེར་གྱི་ལྷ་ཤཱཀྱ་མུ་ནེ་བྱེ་དོང་དུ་སྦས་པ་དང་། མཁར་བྲག་དང་མགྲིན་བཟང་གི་ལྷ་ཁང་སོགས་བཤིག ལྷ་ས་གཙུག་ལག་ཁང་དུ་བཤས་ར་བྱས་པར་གྲགས། མཐར་རྒྱལ་བོ་དང་ཆོས་ལ་དགའ་བའི་བློན་པོ་རྣམས་གྲོས་མཛད་ནས་མ་ཞང་གྲོམ་པ་སྐྱེས་སྟོད་ལུང་དང་། སྟག་ར་ཀླུ་གོང་འཕན་པོར་རྒྱལ་བོའི་སྐུ་གླུད་དུ་བརྫངས་ནས་གསོན་པོར་དུར་དུ་བཅུག་ཅེས་ལོ་རྒྱུས་ཡིག་ཚང་དུ་གསལ། སྐབས་དེའི་གསོན་པོར་དུར་དུ་བཅུག་ཟེར་བ་ནི། མི་གསོན་པོར་སྦས་ཏེ་གསོད་པ་མ་ཡིན་པར། མི་དེ་དུར་རམ་བང་སོར་བསྡད་དེ་གསོན་པོའི་མི་དང་འཕྲད་མི་ཆོག་པ་དང་། དུར་མཆོད་བྱེད་པོ་དང་དུར་དུ་གནས་པ་རྣམས་ལ་ལྟོ་དང་གོས་སོགས་མཁོ་བའི་ཡོ་ཆས་སྐྱེལ་མི་དུར་སར་ཡོང་སྐབས་ཐག་རིང་ནས་དུང་ཞིག་གཏོང་དགོས། དེ་སྐབས་གཤིན་པོའི་མིང་བཏགས་པ་རྣམས་རང་རང་གི་ཁྱིམ་དུ་ཡིབ་ནས་སྡོད་དགོས། ཁོང་ཚོ་ཕྱིར་ལོག་རྗེས་གཤིན་པོའི་མིང་ཅན་རྣམས་ཕྱིར་ཐོན་ནས་རང་རང་ལ་ཐོབ་འོས་པའི་ཟས་གོས་ལ་ལོངས་སུ་སྤྱོད། ཁོང་ཚོའི་སྒོ་ཕྱུགས་སེམས་ཅན་ལ་ཤི་བའི་མཚན་མ་བཏབ་ཡོད་པས། གསོན་པོ་སུས་ཀྱང་བདག་གཉེར་མི་བྱེད། ཅེས་གསུངས་སོ། །

ས་དུར་ལ་འདེབས་སྐབས་ས་ཆོག་བསྡུས་པ་ནི། དུར་ས་ལ་སྟོན་ནས། སའི་ལྷ་མོ་སྤྱན་མ་ལ་ཕྱག་འཚལ་ཞིང་སྐྱབས་སུ་མཆིའོ། །སའི་ལས་བཀྲ་ཤིས་པར་མཛད་དུ་གསོལ། ཨོཾ་ཧ་རི་ནི་ས་ཤན་ཏིམ་གུ་ཀུ་སྭཱ་ཧཱ་ཞེས་བཟླས་ཏེ་སྦའོ། །

༤ དུར་རྫས་ཀྱི་རྣམ་གྲངས་བཀོད་ནི། བང་སོའི་ནང་ཁྱད་ནོར་སྦས་ཚུལ་ནི་མི་རིགས་ཕལ་མོ་ཆེའི་ལུགས་སྲོལ་ཞིག་དང་། ལྷག་པར་དུ་གནའ་རབས་སུ་བོད་ཀྱི་གོམས་སྲོལ་ལྟ་བུར་ཆགས་ཡོད། དཔེར་ན། ལྷ་སའི་ཆུ་གོང་གི་རྡོ་ཆས་གསར་མའི་དུས་མཇུག་གི་བང་སོའི་ནང་དུ་གཤིན་པོ་ཚེ་ལས་མ་འདས་གོང་གི་རྒྱུན་སྤྱོད་རྫ་ཆས་ཡོད་པར་མ་ཟད། ཆེད་དམིགས་གཤིན་པོར་བཟོས་པའི་དུར་རྫས་སོགས་ལྷང་ལ་བུད་ཡོད། པུར་རྒྱལ་གྱི་དུས་སྐབས་ལ་སླེབས་དུས་སྔར་གྱི་རྨང་གཞིའི་སྟེང་། གོང་འཕེལ་དང་འཐུས་སྒོ་ཇེ་ཚང་དུ་བཏང་ཡོད། བཀའ་ཐང་སྡེ་ལྔ་ལས། རྒྱལ་བརྒྱུད་རྣམས་ཀྱིས་ཡར་ཀླུང་སྨུག་རི་རུ། །བང་སོ་བརྩིགས་ནས་ཡབ་ཡུམ་གསུམ་གྱི་པུར། །གསེར་གྱིས་བྱུགས་ནས་དངུལ་གྱི་གའུར་བཅུག། བང་སོ་རེའུ་མིག་དབུས་མར་ཁྲི་ལ་བཞུགས། །གསེར་དངུལ་གཡུ་སོགས་བྲེ་ཡི་ཁལ་རེ་དང་། །རྒྱལ་བོའི་དཀོར་ནོར་གང་ཡིན་སྤྱན་སྔར་སྤུངས། །ཞེས་པ་ལྟར། སྲོང་བཙན་ཀྱི་བང་སོའི་ཁྱད་ནོར་བསྡུས་ཚུལ་གོང་དུ་ཟུར་ཙམ་བརྗོད་ཟིན་ལ། གཞན་སྲོང་བཙན་བང་སོའི་ནང་སྦས་པའི་དངོས་རྫས་སྐོར་ལ། འཇིགས་མེད་གླིང་བའི་གསུང་འབུམ་ལས། འཛམ་བུ་གླིང་གི་ནོར་ཕུད་ལན་གསུམ་བསྡུས། །ལྷ་ཡི་རིན་ཆེན་སྣ་ལྔ་དང་། །མི་ཡི་རིན་ཆེན་སྣ་ལྔ་སོགས། །ས་བཅུད་གསོ་ཞིང་སྐྱེ་འགྲོ་བདེ་ཐབས་བསྐྲུན། །དེ་དུས་ས་ནི་འབྲིང་གི་རི་ནས་རྙེད། །དམ་གྱི་ས་ནི་གཉན་གྱི་རི་ནས་བླངས། །སྒོ་ནི་ནུབ་ཕྱོགས་བལ་བོའི་ཡུལ་དུ་བསྟན། །ནང་གི་ཆ་ནི་རྣམ་པ་ལྔ་རུ་བཀོད། །དབུས་སུ་རྡོ་རྗེ་གཙུག་གི་དམ་སྲི་མནན། །དེ་ཡི་སྟེང་དུ་ཙན་དན་ས་མཆོག་གི། ཀ་བ་ཁོར་ཡུག་ཁྲུ་ཚད་བཅོ་བརྒྱད་དང་། །ལྟེ་བ་དེ་རུ་རྒྱལ་བོའི་ན་བཟའ་དང་། །ནོར་བུའི་རིགས་བྱེད་བསམ་གྱིས་མི་ཁྱབ་ཅིང་། །རིན་པོ་ཆེ་ཡི་པྲོག་ཞུ་བྱེ་བ་ཡོད། །དེ་ཡི་སྟེང་དུ་ཙན་དན་སྦྲུལ་སྙིང་གི །གདུགས་ནི་ཀུན་ལ་ཁྱབ་པར་ཕིབ་ནས་ཡོད། །རྒྱ་ནག་རྒྱལ་བོའི་ནོར་གྱི་སྙིང་ཐོབ་པ། །ཨུགས་ཡ་ན་ལི་ཁྲབ་ཀྱི་བལ་བོ་གཅིག །བྱང་བུ་རེ་ལ་གསེར་སྲང་བྱེ་བ་རེ། །དེ་ནི་ནུབ་ཀྱི་ཕྱོགས་ན་ཚས་བཟང་བ། །རིན་ཆེན་ཟངས་ཀྱིས་བསྒྲིལ་ཏེ་སྦས་ནས་ཡོད། །རི་རྒྱལ་ལྷུན་པོའི་ཕྱོགས་ནས་རྙེད་པ་ཡི། །རྒྱ་ནག་རྒྱལ་བོའི་ནོར་གྱི་སྙིང་ཐོབ་པ། །རིན་ཆེན་བྱུ་རུའི་རྒྱལ་མོ་ལག་གཡས་པ། །ཁྲུ་བརྒྱད་ཡོད་པའི་འོད་ཟེར་འབར་བ་ཞིག །མར་མེའི་ཚུལ་བྱས་བྱང་གི་ཕྱོགས་ན་ཡོད། །རྒྱལ་བོ་རང་གི་ནོར་གྱི་སྙིང་འཐོབ་པའི། །ནོར་བུ་མཆིང་བུའི་ཕུང་བོ་ཁྲུ་གང་བ། །དེ་ནི་དབུས་ཀྱི་ཕྱོགས་སུ་ཚས་བཟང་བ། །ཟ་འོག་དག་གིས་བསྒྲིལ་ཏེ་སྦས་ནས་ཡོད། །ཧོར་གྱི་རྒྱལ་བོའི་ནོར་གྱི་སྙིང་ཐོབ་པའི། །གསེར་གྱི་མི་རྟའི་གཟུགས་སུ་བྱས་པ་དག། ལེབ་བརྒན་འབར་བ་དར་སྣས་གྲིལ་ཏེ་ཡོད། །མི་རྟའི་གཟུགས་དང་མཉམ་པའི་འཁྲུལ་འཁོར་ཅན། །དེ་ནི་ཤར་གྱི་ཕྱོགས་ན་སྦས་ནས་ཡོད། །ཡ་རྩེ་རྒྱལ་བོའི་ཕྱག་ནས་བླངས་པ་ཡི། །མུ་ཏིག་ཁལ་དུ་གཞལ་བའི་སུམ་གཉིས་དག །ཤ་ཕྲུག་རླིད་བུར་བཅུག་ནས་ལྷོ་ཕྱོགས་སྦས། །གཞན་ཡང་ནོར་ནི་རྣམ་པ་སྣ་ཚོགས་པ། །རིན་པོ་ཆེ་ཡི་གདུང་ལ་བཀལ་ནས་ཡོད། །ཅེས་ཞིབ་ཙམ་གསུངས་ཡོད།

བོད་སིལ་བུར་འཐོར་རྗེས། བློན་པོ་ཤུད་པུ་སྟག་རྩེ་གཉགས་སོགས་གྲོས་བྱས་ཏེ། བང་སོ་རྣམས་གཉགས་དང་། ཤུད་པུ། ཁུ། སྙི་བ། འབྲོ། ཅོག་རོ་བཅས་རུས་རྒྱུད་ཚོ་བ་དྲུག་གིས་བགོ་བཤའ་བརྒྱབ་ནས་བྲུས་པ་སྟེ། གཉགས་ཀྱིས་དོན་མཁར་མདའི་སྟག་རི་གཉན་གཟིགས་དང་། གནམ་རི་སྲོང་བཙན་སོགས་ཀྱི་བང་སོ་བྲུས་པ་དང་། ཤུད་པུས་སེང་གེ་ཅན་གྱི་བང་སོ་བྲུས་པ་དང་། ཁུས་འཕྲུལ་རྒྱལ་ཏེ་འདུས་སྲོང་མང་རྗེའི་བང་སོ་བྲུས་པ་དང་། སྙི་བས་མང་སྲོང་མང་བཙན་གྱི་བང་སོ་བྲུས་པ་དང་། འབྲོ་དང་ཅོག་རོས་སྲོང་བཙན་གྱི་བང་སོ་ཕྱོགས་ཁག་གཉིས་སུ་བྲུས་པས་བང་སོའི་ནོར་རྫས་ས་ཁར་ཕུད་པ་དང་།

 དེ་མཚུངས་སུ། དུས་རབས་འདིར་བང་སོ་སྔོག་པའི་དུར་རྫས་ཀྱི་རྣམ་གྲངས་ལ། གནའ་བོའི་བོན་གྱི་དུར་མཆོད་ཆོ་གའི་ནང་བེད་སྤྱོད་བྱེད་པའི་དུར་རྫས་ལ། གྲོ ནས། བྲ་བོ་སོགས་འབྲུ་རིགས་དང་། གསེར་ཁུང་གྲོང་གི་བང་སོ་ལས་ཐོན་པའི་འབྲུ་རིགས་ལས་སྣོན་བྱེད་ཆས་གཏུན་བུ་དང་ལག་བསྐོར་དང་། ནས་ཆང་། གྲོ་ཆང་། འབྲས་ཆང་། རྒུན་ཆང་སོགས་བཏུང་བྱའི་རིགས། འོ་ཟས། ཁ་ཏོག མར། ཐུག་པ། སྐྱོ་མ་སོགས་ཟས་རིགས། མཚལ། གླ་རྩི། སྨན་རྩྭ་སོགས་སྨན་རིགས། མིག་མངས། རྡེའུ། རོལ་ཆས། ཉལ་ཆས། གོ་མཚོན། ཕྱིང་བ། སྣམ་བུ། དར་གོས། རུས་ཁབ། སྐུད་པ། ཐག་པ། འུར་ཆ། བརྡར། སྒྱེ་མོ། སྡེར་མ། རྐྱལ་བ། ཐབ་ཆས་སོགས་རྒྱུན་སྤྱོད་རིགས། གཟི། གཡུ། གཡང་ཊི། ལག་གདུབ། སྐྲ་རྒྱན་སོགས་རྒྱན་ཆའི་རིགས། གོ་མཚོན། ལྕགས་གྲི། མདའ། སྒ་ཆས་སོགས་དམག་ཆས་ཀྱི་རིགས། གཞན་གཤིན་པོའི་འཇིམ་གཟུགས་དང་། བོད་ཡིག་གི་ཤིང་བྱང་སོགས་སོ། །

རང་ཅག་གི་གདོད་མའི་སྐབས་སུ་སེམས་ཅན་མང་བོས་ལྷ་ལ་དམར་མཆོད་བྱེད་པའི་ལུགས་སྲོལ་ཡོད་པ་བཞིན། རྒྱལ་བོའམ་རླབས་ཆེན་གྱི་མི་སྣ་ནི་ལྷར་མཐོང་བའི་འདུ་ཤེས་ཟབ་པ་དང་། ལྷག་པར་དུ་གཤིན་པོའི་བླ་ནི་དུར་སར་གནས་པར་བཤད་པས། བང་སོའི་ནང་དུའང་སྲོག་ཆགས་མང་བོ་དུར་སྦས་བྱས་ཏེ་གསོལ་མཆོདབྱེད་པ་ཡིན། དཔེར་ན། སྣེ་གདོང་རྫོང་གི་མཆིམས་ལུང་རྩེ་མོའི་བང་སོའི་ནང་དུ་རྟའི་རུས་སྒྲོམ་ལྔ་ཐོན་པ་དང་། དེ་བཞིན་ལྷོ་བྲག་རྫོང་སྐྱིད་འདུས་བང་སོའི་ནང་རྟ་བོང་གཡག་གསུམ་གྱི་རུས་པ་དང་། གཅན་གཟན་གྱི་རིགས་གང་ཡིན་མི་ཤེས་པའི་རུས་པ་བུད་པ་དང་། ཡང་། གྲ་ནང་རྫོང་རྡོ་སྐུ་རིའི་དུར་ལས་རྫ་མའི་ནང་ལུག་གི་རུས་པ་དང་། ནོར་ཕྱུགས་ཀྱི་མགོ་བཅུ་གསུམ། ཁྱིའི་རུས་སྒྲོམ་བརྒྱད་ཐོན་པ་དང་། གཞན་ཏུན་ཧོང་གཏེར་ཡིག་ལས་དྲི་རྟ་དང་། དྲི་གཡག དྲི་ལུག སྣམ་རྟ། སྣམ་ལུག་ཅེས་འཁོད་པ་ལྟར་ན། སྲོག་ཆགས་དེ་དག་མི་རུལ་བའི་ཐབས་སུ་དྲི་སྣ་ཚོགས་བྱུག་པར་ཡང་གསལ་ལ། ཡང་རྟ་དོ་མ་དང་། གཡག་དོ་མ། རྟ་རྒྱན་ཅན། དོ་མ་སྙིང་དགས། སྐྱིབས་ལུག་ཅེས་པར་གཞིགས་ན། སྒ་རྒྱན་ཁལ་དང་བཅས་པ་དུར་སྦས་བྱེད་སྲོལ་ཡོད་པར་ཡང་རྟོགས་སོ། །ཁྱད་པར་དུ་རྟ་དུར་སྦས་བྱེད་པ་འདི་རྒྱ་ཆེ་བར་བསམ་སྟེ། ཏུན་ཧོང་ཡིག་རྙིང་ལས། བཙན་པོས་བཀའ་སྩལད་པ། དབྱི་ཚབ་གློ་བ་ཉེ་བས། གུམ་ན་མཆད་པྱག་དར་ཏེ་བརྩིགས་པར་གནང་། རྟ་ནི་བརྒྱའ་དགུམ་བར་གནང་། ཞེས་པ་ལས་རྟོགས་སོ། །དེ་ལས་གཞན་མཚོ་སྔོན་གཏེར་ལེན་རྫོང་གི་བང་སོ་ལས་འབྱུང་བའི་རྣམ་གྲངས་ཙམ་བཀོད་ན། ས་འདིར་པུར་རྒྱལ་དུས་ཀྱི་བང་སོ་མི་འདྲ་བ་སྟོང་ལ་ཉེ་བ་ཡོད་ཅིང་། རྒྱ་མཚོའི་ངོས་ལས་སྤྱི་ཁྲེ ༣༤༠༠ ལྷག་གི་སར་བཏབ་ཡོད། དེའི་ནང་ནས་ཆེ་འབྲིང་ཁག་བཞིའི་དུར་རྫས་སྔོག་འདོན་བྱས་པ་ནི། བང་སོ་དེ་དག་གི་ནང་དུར་རྫས་རྐུ་འཁྱེར་བྱས་པའི་ལྷག་འཕྲོ་ལུས་པ། གསེར། དངུལ། ལྕགས་རིགས། ཕ་ལམ། གཡུ་སོགས་ཀྱི་རྒྱན་ཆ་དང་། ཟངས་ཆས། ཤིང་ཆས། ཤིང་བྱང་། སི་བཏགས་དང་། ཚོན་རྩིའི་ཡོ་བྱད། རྫ་ཆས། རྡོ་ཆས། རུས་ཆས། ཀོ་ཆས་སོགས་རིགས་མི་འདྲ་བ་༨༥ ཙམ་ཐོན་ཡོད།

༥ བྱེ་བྲག་དུར་གྱི་ས་ལ་དཔྱད་ཚུལ་ནི། རང་ཅག་བོད་ཀྱི་རིག་གནས་ཁྲོད་ས་དཔྱད་ཆོ་ག་འདི། ལྷ་ཁང་བཞེངས་པ་དང་། གཞི་ཁྱིམ་བརྩིགས་པ། སྒྲུབ་ཁང་འཛིན་པ་སོགས་ལ་མེད་དུ་མི་རུང་གི་གྲུབ་ཆ་གཙོ་ཤོས་ཤིག་ཡིན། ཁྱད་པར་དུ་དུར་གྱི་ས་དཔྱད་ནོར་ན། ཤི་གསོན་གཉིས་ཀ་གནོད་སྐྱོན་འབྱུང་བར་བཤད། འགྲོ་བ་གང་ལ་མཚོན་ནའང་བླ་སྲོག་རྣམ་ཤེས་གསུམ་ལུས་ལ་བརྟེན་ལ། གྲོངས་ཚེ་བླ་ནི་དུར་ལ་གནས་པར་བཤད་པས། དུར་ས་ངན་ན་བླ་དེ་རྒུད་པ་ཡིན་པས། ཤི་གསོན་གཉིས་ཆར་ནས་བྱུར་སྣ་ཚོགས་འབྱུང་བར་བཤད་དེ། ནོར་འཛིན་དཔྱད་པ་ལེགས་ཉེས་འབྱེད་པའི་ལྡེ་མིག་ལས། སྤྱིར་ན་རི་ཁྲོད་ཁང་བ་དང་། །གཏེར་དང་དུར་ས་གང་ལ་ཡང་། །ས་དཔལ་ཐམས་ཅད་བཟང་བར་དགོས། །ཁྱད་པར་དུར་གྱི་ས་མིག་འདི། །ངན་ན་ཤི་གསོན་གཉིས་ཀ་སྡུག། སྲོག་དང་རྣམ་ཤེས་བླ་དང་གསུམ། །སྲོག་དེ་གཤེད་མ་འདྲེ་ཡིས་གཅོད། །རྣམ་ཤེས་ལས་ཀྱི་རྗེས་སུ་འབྲང་། །བླ་ནི་དུར་ལ་གནས་པ་ཡིན། །དུར་ས་བཟང་ན་བླ་ཡང་དར། །བདེ་སྐྱིད་འཛོམས་ནས་གསོན་ལ་ཡང་། །མགོན་སྐྱབས་འཚོལ་དུ་འོང་བ་ཡིན། །ཞེས་དང་། དེ་བཞིན་དུ། ཀརྨ་ཆགས་མེད་ཀྱིས་ཀྱང་། བླ་སྲོག་རྣམ་ཤེས་གསུམ་དུ་སྲིད། །སྲོག་དབུགས་གཤེད་མ་འདྲེ་ཡིས་འཁྱེར། །རྣམ་ཤེས་ལས་ཀྱི་རྗེས་སུ་འབྲང་། །བླ་ནི་དུར་ས་དེ་ལ་གནས། །ཆ་ལུགས་གསོན་དུས་གཟུགས་དང་འདྲ། །དར་ཞིང་ཕྱུག་ན་མགོན་སྐྱབས་བྱེད། །རྒུད་ཅིང་དབུལ་ན་གསོན་པོ་ལ། །ཟ་རེ་འཐུང་སྐོམ་ན་ཚ་ལྡང་། །ཕྱེ་མར་བང་སོ་མཆོད་པའི་ཆོ་ག་དར། །ཞེས་པ་ལྟར། འདིར་སྐབས་སུ་བབ་པ་དུར་གྱི་ས་ལ་བརྟག་ཚུལ་མདོ་ཙམ་བརྗོད་ན། ས་དཔྱད་རིན་ཆེན་ཀུན་འདུས་ལས། དེ་ནས་དུར་གྱི་ས་དཔྱད་ལ། །རུས་ཆེན་ཡོན་ཏན་ཆེ་བ་དང་། །སྦྲ་རྒན་ཡང་ཚ་མཐོང་བ་རྣམས། །གདན་ཁྲི་བང་རིམ་མང་བོ་དང་། །མཐོ་བའི་ས་ལ་བཞག་པར་བྱ། །ལོ་ནི་མང་ཉུང་རུས་ཆེ་ཆུང་། །དེ་དང་མཐུན་པའི་མཐོ་དམན་བྱ། །ཞེས་དང་། ས་དཔྱད་འདོད་འབྱུང་བུམ་བཟང་ལས། རབས་ཆད་གྲི་རོ་མཛེ་ཅན་དང་། །གདུག་པའི་ནད་ཀྱིས་ཤི་བ་རྣམས། །གཉའ་མནོན་ཆེ་ཞིང་དམའ་སར་བཏབ། །གཉའ་མནོན་རི་སྣ་བྲག་སྣ་ལ། །ཅུང་ཟད་གཟུར་བ་མན་ངག་ཡིན། །ཞེས་དང་། ཡང་། བཻ་དཀར་ས་དཔྱད་ལས། ཡང་ན་འདི་ལྟར་ཤེས་པར་བྱ། །ཆོས་དུར་མཆོད་རྟེན་འདྲ་བ་གདབ། །བཙད་པོ་རྒྱལ་བོ་གདན་བཞུགས་འདྲར། །རྗེ་རིགས་རི་ཐོད་བཅིངས་འདྲ་ལ། །བློན་པོ་རི་གྲལ་བསྒྲིགས་འདྲ་ལ། །འབངས་ནི་ཁྱི་ཐོད་མཆོང་འདྲའི་རིར། །བྱིས་པ་པང་ན་བུ་ཐོགས་འདྲར། །བན་བོན་རྡོ་རྗེ་འདྲ་བ་ལ། །རྩིས་མཁན་རུས་སྦལ་ལྟོ་འདྲ་ལ། །སྨན་པ་སྨན་གྱི་པུར་བུ་འདྲར། །ཀློག་མཁན་ཁྱི་མོར་འདྲ་བ་ལ། །ཕྱུག་པོ་རིན་ཆེན་འདྲ་བ་ལ། །སྤྲང་བོ་ཐུ་བ་ཁེངས་འདྲ་ལ། །མི་མགོ་མི་ཐོན་རྒན་རིམ་འཆི། །རི་དམིགས་ཞེས་བྱ་སྟོད་ལ་འདེབས། །དར་མ་གྲིར་འཆི་མང་བ་ན། །རི་སྙིང་ཞེས་བྱ་རི་རྐེད་གདབ། །བྱིས་པ་མ་སོས་ཆུ་སོ་ཞེས། །རི་ཡི་སྨད་ལ་འདེབས་པའོ། །ཞེས་དང་། གཞན་ཡང་། དེ་ཉིད་ལས། འབྱུང་ཁམས་དང་སྦྱར་ཏེ་དུར་འདེབས་ལུགས་ལ། སྤྱི་དང་བྱེ་བྲག་ཏུ་གསུངས་པ་དང་། ཕྱི་ནང་བར་གསུམ་གྱི་དུར་སྲུང་དང་། དུར་བཅོས་སོགས་འཁོད་པས། ཞིབ་ཏུ་ཤེས་འདོད་པ་དག་དེར་བལྟ་བར་བྱའོ། །

ཡང་། དུར་ས་ནོར་བའི་དཔྱད་འབྲས་ནི། ས་དཔྱད་འདོད་འབྱུང་བུམ་བཟང་ལས། རྒས་དུར་དམའ་ཞིང་གཞོན་དུར་མཐོ། །ཤི་རིས་གཞོན་ལ་འབབ་པ་ཡིན། །ཆུང་དུར་གཉའ་མནོན་ཆེ་ཆུང་དེ། །ཤི་གྲངས་མང་ཉུང་དེ་དང་བསྟུན། །གྲི་དུར་ལུང་བའི་ཡངས་དོག་ནི། །མདའ་འཕེན་ཙམ་ལས་ཡངས་མི་རུང་། །དེ་ཡང་ཕར་རི་ཚུར་རི་གཉིས། །བྲག་ཟུར་ཐད་འབབ་དུར་གྲི་ངན། །རྒྱབ་རི་འགྱིང་ཞིང་མདུན་འཇམ་དགོས། །ལོ་སྐོར་བཅུ་གཉིས་ས་མལ་ལ། །ལོ་གཞོན་ས་དགྲ་སྔར་བཞིན་ལ། །རང་རང་ལོ་བར་མི་གནོད་ཚུལ། །རིགས་པས་དཔྱད་དེ་ཤེས་པར་བྱ། །ས་དགྲ་དེ་དང་འཕྲད་གྱུར་ན། །ལོ་གསུམ་རྟགས་འབྱུང་འདིར་ཡང་འདྲ། །ཞེས་དང་། གཞན་ཡང་། ས་དཔྱད་བྱེ་མ་བརྡལ་སྤུངས་ནའང་། དུར་ས་བཟང་ངན་ལས་བྱུང་བའི་ལེགས་ཉེས་མང་དུ་གསུངས་ཡོད་པས། གཞུང་དེ་དག་ལས་གསུངས་པ་ལྟར། ས་བབ་དང་བསྟུན་ནས་ས་དུར་བྱེད་པ་གནད་ཀྱི་དོན་པོའོ། །

༣ ཕུང་བོ་གཟན་བསྒྱུར། ཕུང་བོ་གཟན་བསྒྱུར་ཏེ། བྱ་རྒོད་སོགས་ལ་སྟེར་བ་དེར་རླུང་དུར་ཞེས་ཀྱང་བརྗོད་ལ། བྱ་གཡེང་ལུགས་སྲོལ་འདི་རྒྱ་གར་དང་བོད་གཉིས་ཀར་རང་སྐྱ་ཕེར་བའི་རང་རང་གི་ལུགས་སྲོལ་རེ་ཡོད་པར་སྙམ། ཅིའི་ཕྱིར་ན། ཀླུ་སྒྲུབ་ཀྱི་ཤེར་ཕྱིན་རྣམ་བཤད་ལས། དུར་ཁྲོད་དུ་བྱ་རྒོད་འཕུར་ཡོང་ནས་མི་རོ་ཟ། ཞེས་དང་། ཐང་སན་རྟོགས་བརྗོད་ལས། རྒྱ་གར་དུ་དུར་མཆོད་བྱེད་སྲོལ་གསུམ་སྟེ། བྱར་གཡེང་། སྦྱིན་སྲེག སྙིང་རྗེའི་སྦྱིན་གཏོང་། ཞེས་དང་། སྤྱོད་འཇུག་ལས། ཁྱོད་ཉོན་མོངས་པའི་གདོང་དེ་ནི། །ད་ལྟ་མངོན་སུམ་གྱུར་བ་བཞིན། །བྱ་རྒོད་ཀྱིས་བསལ་བྱས་མཐོང་ནས། །ཞེས་དང་། བདག་གིས་འདི་ལྟར་བསྐྱངས་པ་འམ། །བྱ་རྒོད་སོགས་ཀྱིས་ཟོས་ཀྱང་རུང་། །ཞེས་གསུངས་པ་ལས། ཕུང་བོ་གཟན་བསྒྱུར་འདི་རྒྱ་གར་གྱི་ཡུལ་ཆོས་ཤིག་ཏུ་གྲུབ་ལ། བོད་དུའང་མཁས་པ་ལྡེའུ་མཛད་པའི་རྒྱ་བོད་ཆོས་འབྱུང་རྒྱས་པ་ལས། ངར་ལ་སྐྱེས་ཀྱི་མྱང་རོ་ཤམ་པོ་མཁར་གྱི་ཕ་རོལ་ན་རྒོད་ཚང་ཡོད་པ་ལ་སྙད་བཏགས་ནས། བྱ་རྒོད་ཀྱི་གསོབ་ཏུ་ཞུགས་ཏེ། མྱང་རོ་ཤམ་པོ་རྩེ་ནས་ཕབ། ཞེས་འབྱུང་བའི་ཤུགས་ལས་དེ་དུས་སུ་ཕུང་བོ་བྱ་རྒོད་ལ་འགྱེད་པའི་ལུགས་སྲོལ་རང་རེའི་བོད་དུ་ཡོད་པར་རྟོགས་ཐུབ། ཁྱད་པར་དུ་སློབ་དཔོན་པད་འབྱུང་གི་རྣམ་ཐར་ལས། རྒྱ་གར་གྱིས་གཅན་གཟན་དང་བྱ་རྒོད་ཀྱིས་མི་རོ་ཟ་རུ་འཇུག་པའི་དུར་མཆོད་ཀྱི་སྲོལ་དེ་ནི། བོད་ཀྱི་བྱར་གཡེང་དུར་མཆོད་དང་ཆ་འདྲ། ཞེས་པ་ལས་རྒྱ་གར་ལ་རག་མ་ལས་པའི་བྱ་གཡེང་དུར་སྲོལ་བོད་ལ་ཡོད་པ་རྟོགས་ཐུབ།

ཁ་ཅིག འབྲི་གུང་རིན་ཆེན་དཔལ་ལམ། ཕ་དམ་པ་སངས་རྒྱས་གང་རུང་ནས་བྱར་གཡེང་དུར་མཆོད་འདི་སྲོལ་བཏོད་པར་བཞེད་པ་ཡོད་ཀྱང་། དེ་ནི་སྔར་སྲོལ་གྱི་རྨང་གཞིའི་སྟེང་ཁྱབ་རྒྱ་ཇེ་ཆེར་སྤེལ་བ་ལུང་དེ་དག་གིས་གྲུབ་བོ། །དེ་ལྟར་བྱར་གཡེང་དུར་སྲོལ་ནི་བོད་ལ་གདོད་མ་ནས་ཡོད་ཀྱང་། འབྲི་གུང་གི་དུས་སུ་བྱ་གཡེང་དུར་གནས་གཏན་ཁེལ་བར་གསལ་ཏེ། དུས་རབས་བཅུ་གཅིག་པའི་ནང་འབྲི་གུང་བཀའ་བརྒྱུད་པ་རིན་ཆེན་དཔལ﹙༡༡༤༣ནས༡༢༡༧﹚གྱིས་འབྲི་གུང་རི་ན་སྒོམ་སྒྲུབ་མཛད་སྐབས། ཁོང་གི་ཉམས་སྣང་ལ། གནས་རི་འབྲི་གུང་འདི། སྲིན་མོ་ཞིག་གི་ལུས་སྤྲུལ་ཡིན་པར་མཁྱེན་ཞིང་། དེའི་ཤར་གྱི་ཕྱུག་པོ་རི་སྤྱན་རས་གཟིགས་ཀྱི་ཚུལ་དང་། ལྷོའི་མགོན་པོ་རི་རྣམ་པར་སྣང་མཛད་ཀྱི་ཚུལ་དང་། ནུབ་ཀྱི་རྔ་མོང་རི་གསང་བདག་ཕྱག་རྡོར་གྱི་ཚུལ་དང་། བྱང་རི་འདི་འཇམ་དབྱངས་ཀྱི་འདྲ་དབྱིབས་སུ་མཐོང་ནས། གདན་ས་ཆེན་པོའི་རྒྱབ་རི་རྨོག་པོའི་རིའི་ནུབ་རྒྱུད་འདི་ཁྲོས་མ་ནག་མོ་འགྱིང་བའི་རྣམ་པར་ཡོད་ལ། དུར་ཁྲོད་འདི་ཉིད་ཁྲོས་མའི་ལྟེ་བའི་དབུས་སུ་ཡོད། སྤེན་མའི་ཚོགས་རྣམས་ཆོས་འབྱུང་དང་། ཞབས་གཡས་ཀྱི་མཐིལ་དུ་ལོ་ཆུང་དང་གྲི་ཤིར་ཐེབས་པའི་རོ་གཏོར་ས་ཡོད།

རི་རྩེ་དང་ཁོར་ཡུག་དག་ན་ནགས་ཚལ་ཆེ་ཆུང་བརྒྱད་ཡོད་པ་རྣམས་ཀྱང་། རྒྱ་གར་གྱི་དུར་ཁྲོད་ཆེན་པོ་བརྒྱད་དང་འདྲ་བ། གནས་རི་དང་ནགས་ཚལ་དེ་དག་ཏུ་གནས་པའི་འདྲེ་སྲིན་རྣམས་རིམ་གྱིས་ཞི་ནས་ལྷར་གྱུར་ཏེ། རེ་ཞིག་ནགས་ཚལ་བརྒྱད་ནས་འོད་ཟེར་མི་འདྲ་བ་བརྒྱད་འཕྲོས་ནས། གཅིག་ལ་གཅིག་ཐིམ་གྱིས། ཁ་དོག་སྣ་ལྔའི་འཇའ་གུར་ཆེན་པོ་ཞིག་ཏུ་གྱུར་ཏེ། དེའི་དབུས་ལ་རྡོ་ཆེན་པོ་ཞིག་བྱུང་ནས། ད་ལྟའི་འབྲི་གུང་དུར་ཁྲོད་དུ་ལྷུང་ལ།

ཡང་། བཤད་ཚུལ་གཞན་ལ་རྒྱ་གར་བསིལ་བ་ཚལ་གྱི་དུར་ཁྲོད་ནས་མཁའ་འགྲོ་མ་རྣམས་ཀྱིས་འཇའི་དྲྭ་བ་ལས་དུར་རྡོ་ཞིག་འདིར་སྤྱན་དྲངས་ནས་ཕུལ་ཡང་ཟེར། དུར་ཁྲོད་འདི་དང་བསིལ་བ་ཚལ་གཉིས་སུ་མེད་པའི་རྟགས་སུ། དེ་གཉིས་ཀྱི་བར་དུ་འོད་ཟེར་འཕྲོ་བ་རྒྱུན་མི་ཆད་ཅིང་། ཞིང་སྐྱོང་གི་མཁའ་འགྲོ་དང་། ཁྲ་དང་། བྱ་རྒོད། ཀེང་རུས། རོ་ལངས་དང་དུར་བྱ། དུར་ཕག ཀང་ཀ བཞད་སོགས་ཕན་ཚུན་བར་དུ་རྒྱུ་བ་དག་སྣང་ཅན་གྱིས་རྒྱུན་པར་མཐོང་བར་གྲགས་ལ། དུར་རྡོའི་སྟེང་དུ་མ་ཎི་ཡིག་དྲུག་ཚོན་མདོག་ལྡན་པ་རང་བྱུང་བབས་པས། དུར་རྡོ་འཇའ་ཚོན་མར་ཡང་གྲགས། འོག་ཏུ་སྐྱོབ་པ་རིན་པོ་ཆེས། ངན་སོང་སྦྱོང་བའི་ཞི་ཁྲོའི་དཀྱིལ་འཁོར་བཀོད་ཅིང་། རབ་གནས་མཛད་པར་མ་ཟད། ཁོང་གི་ཐུགས་སུ། གནས་འདིར་དུར་གནས་ཞིག་གཏན་ཁེལ་བྱས་ན། དེར་བསྐྱལ་བའི་འདས་པོ་ཐམས་ཅད་སྤྱན་རས་གཟིགས་ལ་དངོས་སུ་མཇལ་བ་དང་། དམྱལ་བར་ལྷུང་བ་མི་སྲིད་དོ། །ཞེས་བཀའ་ལུང་དྲོན་མོ་བསྩལ་བས། འབྲི་གུང་བྱར་གཡེང་གི་དུར་ཁྲོད་འདི་གནས་ཁམས་ཅན་དུ་བྱས་ཏེ་གཏན་ཁེལ་བྱས་པ་ཡིན། ཡང་། སྐབས་ཤིག་སྐྱོབ་པ་རིན་པོ་ཆེ་བུ་སློབ་སུམ་ཅུ་ཙམ་རྟ་ལྕག་སྟེང་ཀར་ཕེབས་ཏེ། ཁོང་གི་སློབ་མ་ཚོར། དེ་རིང་ཁྱེད་རྣམས་ཀྱིས་གྲུབ་རྟགས་རེ་སྟོན་དགོས་ཞེས་སྐུལ་བས། མགར་དམ་པ་འཇིགས་བྱེད་ཀྱི་སྐུར་སྤྲུལ་བ་དང་། གཉོས་རྒྱལ་བ་ལྷ་ནང་བས་རྒྱ་གར་ནས་ཨ་རུ་ར་རློན་པ་སྐད་ཅིག་གིས་བླངས་པ་དང་། དཔལ་ཆེན་ཆོས་ཡེ་བླ་མའི་སྐུར་གཉིས་མེད་ཐིམ་པ་དང་། ཁ་ཅིག་རྡོ་དྲིལ་བར་སྣང་དུ་བཞག་པ། སྐུ་སྟོད་དུ་མེ་སྦར་བ། སྐུ་སྨད་དུ་ཆུ་བྲུབས་པ་སོགས་བསྟན་པ་དང་། ཐ་ན་ཇ་མ་སྤོ་བོ་བཀྲ་ཤིས་ཀྱིས་ཀྱང་གཟན་དང་གཟར་བུ་ཉི་ཟེར་ལ་བཀལ་བ་སོགས་གནང་བས། ཉེ་གནས་རིན་ཆེན་གྲགས་སྐུ་ན་ཆུང་བས་གྲུབ་རྟགས་སྟོན་མ་སྤོབས་པར་སྐུ་གཤེགས། གདུང་དུར་སྟེང་དུ་དྲངས་ནས་བསིལ་བར་བརྩམས་པ་ན་གྲི་མ་ཟུག་པས་རྗེ་སྐྱོབ་པར་ཞུས་ཚེ། ཁོང་གིས་གདུང་གི་སྙིང་ཀར་སྦ་འཁར་བཙུགས་ཏེ་འཕོ་བའི་མགུར་རྟ་ལྕག་ལྟེང་ཀ་མ་ཞེས་པ་གསུངས་རྗེས། འཇའ་འོད་བཀྲ་ཞིང་། གདུང་ཡུངས་དཀར་གྱི་རྐྱལ་བ་གཤགས་པ་བཞིན་རིང་བསྲེལ་གྱི་ཕུང་བོ་གྱུར་ཏེ་འཐོར་བས། ཕྱགས་མས་འཕྱག་པས་དེ་ཕྱིན་མིང་རྟེན་འཕྱག་སྒང་ཞེས་གྲགས་སོ། །

དེ་ནི་ཕ་དམ་པ་སངས་རྒྱས་བོད་ལ་ཐེངས་ལྔར་ཕེབས་པར་གྲགས་པའི་ཕེབས་ཐེངས་གསུམ་པ་སྟེ། དུས་རབས་བཅུ་གཉིས་པའི་མགོར་ཞི་བྱེད་གཅོད་ཀྱི་གདམས་པ། ཕུང་བོ་གཟན་བསྒྱུར་གཏོང་བའམ་བྱ་རྒོད་སོགས་ལ་སྟེར་བ་འདི་གཅོད་གཞུང་གི་ཆོ་ག་དང་སྦྱར་ཏེ་འཐུས་ཚང་དུ་གྱུར་བ་ཡིན་ལ། དེ་ཡང་། གཅོད་ཀྱི་སྐོར་ལ་ཕོ་གཅོད་དང་མོ་གཅོད་གཉིས་ལས། དང་བོ་ནི། སྨང་ར་སེར་བོ་ནས་བརྒྱུད་པ་དང་། གཉིས་པ་ནི། མ་གཅིག་ལབ་སྒྲོན་ནས་བརྒྱུད་པའོ། །མ་གཅིག་ལབ་སྒྲོན་གྱིས་བརྩམས་པའི་ཕུང་བོ་གཟན་བསྒྱུར་གྱི་གཅོད་གཞུང་ཡང་མང་དུ་སྣང་སྟེ། གཅོད་གཞུང་བཀའ་ཚོམ་ཆེན་མོ། ཡང་རྩོམ། ཉིང་རྩོམ། ལེའུ་ལག གནས་ཐེམ། ཁོང་རྒོལ། གཡང་བ་བརྡ་ཆོས་ལ་བཟླས་སྐོར་གསུམ། གཞི་ལས་སློང་བ། ཁྱད་པར་གྱི་སྨན་ངག་བཅས་བཅུ་ཡོད། དེ་ཡང་། ནང་ཆོས་ལས། རྟ་དང་གླང་བོ་བརྒྱ་འགྱུར་ཡིན། །བུ་དང་ཆུང་མ་སྟོང་འགྱུར་ཡིན། །ལུས་ཀྱི་མཆོད་སྦྱིན་འབུམ་འགྱུར་ཡིན། །ཞེས་གསུངས་པ་སོགས་ལ་ཁུངས་གཏུགས་པ་ཡིན་ནོ། །གཤིན་པོའི་ཕུང་བོ་གཟན་ཏུ་བསྒྱུར་ཚུལ་ལ། དཀོན་མཆོག་སྲི་ཞུའི་མགྲོན་ལ་མཆོད་པའི་ཚུལ་དུ་འབུལ་བ་དང་། མགོན་པོ་ཡོན་ཏན་མགྲོན་ལ་གཏང་རག་གི་ཚུལ་དུ་འབུལ་བ། རིགས་དྲུག་སྙིང་རྗེའི་མགྲོན་ལ་སྦྱིན་པའི་ཚུལ་དུ་གཏོང་བ། གདོན་བགེགས་ལན་ཆགས་ཀྱི་མགྲོན་ལ་བུ་ལོན་གྱི་ཚུལ་དུ་གཏོང་བ་བཅས་དམིགས་རྣམ་བསྐྱངས་ཏེ། དངོས་སུ་བྱ་རྒོད་ལ་སྟེར་བ་ཡིན་ཅིང་། གཤིན་པོ་དུར་ཁྲོད་དུ་བསྐྱལ་ནས་བྱ་གཏོར་བྱེད་མཁན་རྣལ་འབྱོར་རྟོགས་ལྡན་པ་ཡིན་ན་རབ་དང་། མིན་ཡང་སྦྱིན་པ་ཙམ་གྱི་ཕན་ཡོན་ཡོད་དོ། །ཚུལ་འདི་ལ་དགོངས་ནས་གཙང་བ་རྒྱ་རས་པས། བདག་ཤི་བའི་འོག་ཏུ་ཡང་མགོ་དང་། རྐང་ལག་དང་། ཤ་དང་། རུས་པ་དང་། ཡན་ལག་དང་། ཉིང་ལག་དང་། སྐྲ་དང་བ་སྤུ། སོ་དང་སེན་མོ། ཁྲག་དང་ཆུ་སེར། ཞག་དང་ཚིལ་བུ། དབང་བོ་ལྔ་ལ་སོགས་པའི་སྒོ་ནས་ཀྱང་འགྲོ་དོན་དཔག་ཏུ་མེད་པ་འགྲུབ་པར་གྱུར་ཅིག ཅེསགསུངས་སོ། །འོན་ཀྱང་། འགོས་ནད་དང་། ཁྲིམས་ཐོག་ནས་བསད་པ་ཡིན་ན། སར་སྦས་པ་ལས། ཕུང་བོ་གཟན་བསྒྱུར་བྱེད་པ་མེད།

བེམ་པོ་དོ་དམ་བྱེད་སྟངས་ལ། དབུས་གཙང་ལ་མཚོན་ན། ཆེད་བསྐོས་ཀྱི་བདག་གཉེར་མཁན་ཡོད་ལ། དོ་དམ་པས་བེམ་པོ་དུམ་བུར་གསིལ་ཞིང་། རྩམ་གསེས་བརྒྱབ་ནས། བྱ་རྒོད་ལ་ཟར་བཅུག་རྗེས། རུས་ཆེན་རྣམས་བསླངས་ཏེ་ཕུར་བུ་ལ་འདོགས་པ་དང་། མཐར་རུས་པ་རྣམས་ཆུང་ངུར་བཅགས་ཏེ་བྱ་རྒོད་ལ་ཤུལ་ལུས་མེད་པར་ཟར་འཇུག་གོ ། མདོ་སྨད་ལ་ཆ་མཚོན་ན། ཆེད་བསྐོས་དོ་དམ་མི་སྣ་མེད་ཀྱང་། རང་རང་གི་གྲོང་ཚོའི་ཤ་རུས་གང་ཡང་མ་ཉེ་བ་དུ་མ་བདམས་ནས་བྱར་གཡེང་བྱེད་དོ། །དེ་ཡང་བེམ་རོ་དུམ་བུར་བསིལ་ཏེ་བྱ་འབོད་བཏང་ན། བྱ་ཚོགས་ཀྱིས་རུབ་འཛིང་བྱས་ནས་ཁྱུར་མིད་གཏོང་ལ། བེམ་རོ་ལ་ལར་རང་གི་བླ་བྱ་མ་ཐོན་བར་དུ་བྱ་རྒོད་གཞན་གྱིས་ཁ་འཇོག་མི་ཕོད་ལ། བླ་བྱ་དེས་ཤ་རྡོག་གསུམ་བཞི་ཙམ་ཟོས་རྗེས་རུབ་ཟ་བྱས་ཏེ་ལྷག་ལུས་མེད་པར་ཟ་ལ། ཤུལ་དུ་ལུས་པའི་སྐྲ་རུས་གྱོན་པ་སོགས་མེར་སྲེག་བཏང་སྟེ། མཐུན་རྐྱེན་འཛོམས་ན་དགེ་འདུན་སོགས་ཀྱིས་སྐྲ་ཆོག་དང་རུས་ཆོག་བྱེད་དོ། །ཡུལ་གྲུ་གང་ལ་མཚོན་ནའང་། ཐོག་མར་ས་སློང་བ། བྱ་འབོད་ཀྱི་ཆོ་ག་དང་། ཚ་གསུར་ཕུད་སྲོལ་སོགས་གཅིག་མཚུངས་སོ། །

ཕུང་བོ་གཟན་བསྒྱུར་བྱ་སྟངས་ཀྱི་དམིགས་ཡུལ་དང་དགོས་པ་ནི། མི་རྟག་པར་སྐུལ་ལྕག་འདེབས་པའི་ཡང་མཆོག་སྟེ། བཀའ་གདམས་གོང་མ་ཚོས། གསང་སྤྱོད་ཁང་སོགས་སུ། བེམ་པོ་ཝ་ཁྱི་དང་བྱ་རྒོད་སོགས་ཀྱིས་ཟ་བ་འབྲི་སྲོལ་ཡང་ཡོད་དོ། །གཞན་ཚེ་འདས་ཀྱི་ལུས་ཕུང་བྱ་རྒོད་ལ་བཏང་བས་སྦྱིན་པའི་ཕན་ཡོན་དང་། བྱ་རྒོད་ཀྱི་མིང་གི་རྣམ་གྲངས་ལ། རིང་འཕུར་དང་། ནམ་འཕང་བསྟོད་ཟེར་བས། ཕུང་བོ་ཟོས་རྗེས་ཉིན་ཞག་བདུན་ལ་ཨ་སྔོན་བསྟད་ནས་འདུག་པར་གྲགས་པས། གཤིན་པོ་དེའི་རྣམ་ཤེས་མཐོ་རིས་སུ་སྐྱེས་པའི་རྟེན་འབྲེལ་དང་། བེམ་པོ་ཟོས་པའི་བྱ་བྲུན་རི་མཐོ་ས་གཙང་དུ་འདོར་པས་ཁྱད་ཆོས་ལྡན་པ་དང་། བྱ་རྒོད་ཐ་མར་འཆི་ཚེ་ཡང་བྱ་རོ་རླུང་གི་སྤུ་གྲིས་འཐག་སྟེ་ས་ལ་མི་ལྷུང་བ་སོགས་ཡིན།

བྱེ་བྲག་བེམ་པོ་ལ་བྱ་འབོད་གཏོང་ཚུལ་ལ། ལས་སྣ་ཚོགས་ཀྱི་བེའུ་བུམ་ལས་འབྱུང་བ་འདིར་བཀོད་ན། ཨོཾ་རྡོར་གླང་སྭཱ་ཧཱ། ཞེས་པ་འདི་རྡོ་ལེབ་ལ་བྲིས་ཏེ་རོའི་སྙིང་ཀར་བཞག་པས། གཤེད་སོགས་ཕྲལ་བར་བྱེད། སླར་བྱ་འབོད་སྔགས། སརྦ་ཛ་ཡེ་ཀ་ཡ། ཞེས་བརྒྱ་རྩ་བརྒྱད་བཟླས། ཕྱོགས་བཞིར་ཕུས་བཏབ། རྐང་གླིང་དྲག་ཏུ་བུས་བས། བྱ་རྣམས་ཁ་བ་བབས་པ་ལྟར་འདུས་པར་བསམ་པས་ལོན་ནོ། །

ཡང་། བྱ་འབོད་སྔགས་འདི་རྡེའུ་ལ་བརྒྱ་ཚོ་གསུམ་སྔགས། རྡེའུ་རྣམས་བྱ་རྒོད་དུ་བསམ་ལ་གཏོར་བས་བྱ་མི་འོང་བ་མི་སྲིད་དོ། །ཨོཾ་ལིང་ཁུག་ལིང་ཁུག་ཛ། ཟབ་བོ། །

ཡང་། བྱ་འབོད་ན། རང་མཁའ་འགྲོ་མ་དམར་མོ་བྱ་རྒོད་ལ་བཅིབ་པ་བསྒོམ། དང་བོ་བགེགས་བསྐྲད་དེ། དེ་ནས་གསུར་ཆེན་པོ་བཏང་། ལུས་སྦྱིན་ཚར་གཅིག་བཏོན། དེ་ནས་ཚེ་འདས་ཀྱི་ལོ་གྲངས་རྡེའུ་ལ་སྔགས་འདིས་སྔགས་ནས་ཕུང་བོར་བྲབ། ཨོཾ་རྡོར་ལིང་ཕོབ། ལྡིང་ལྡིང་ཕོབ། རྒྱང་རྒྱང་ཕོབ། ཤར་ཤར་ཕོབ། ཐིབ་ཐིབ་ཕོབ། བརྒྱ་རྩ་བརྒྱད་བཟླས་པས་ཆོག་སྟེ། ཕ་དམ་པའི་མན་ངག་གསང་རྒྱ་ཅན་ནོ། །

ཡང་། གཅིག་རྡོ་ལེབ་བཞི་ལ། བྱ་བཞིའི་གཟུགས་ནང་སྔགས་བཞི་བྲིས་ལ། ཕྱོགས་བཞི་འམ་ཕུང་བོའི་སྟེང་དུ་བཞག དེ་ཡང་འཛོམས་ན་བྱ་ལོ་བ་གཅིག་གིས་བཞག རོ་བསང་དང་གསུར་ཆེ་བ་བཏང་། བ་རི་མ་ཤམ་ཤམ། ཞེས་བཟླས་པས་མྱུར་དུ་བྱ་འབབ་པར་འགྱུར་རོ། །

ཡང་། བྱ་འབེབས་ཀྱི་ཆོ་ག་ལས། གཡམ་མ་ལ་རྡོ་རྗེ་རྒྱ་གྲམ་བྲིས་ལ། དེའི་ལྟེ་བ་ལ་ཨོཾ་པ་ཤི་ཤམ་ཤམ་པ་རི་ཤམ་ཤམ་སྭཱ་ཧཱ། ཞེས་པའི་སྔགས་ཡིག་མགོ་ནང་དུ་བསྟན་ཏེ་བྲིས། དེ་ཉིད་རོའི་སྙིང་ཁར་བཞག སྔགས་མང་དུ་བཟླས་ལ། བྱེ་མ་རོའི་ངོ་གདོང་ལ་བྲབ་ཅིང་། དམིགས་པ་ནི། ཕྱོགས་མཚམས་སྟེང་འོག་རྣམས་ནས་བྱའི་ཚོགས་དཔག་ཏུ་མེད་པ་བཀུག་ནས། བྱ་དེ་ཐམས་ཅད་ཀྱིས་རོ་ཧབ་ཐོབ་ཏུ་བཟའ་བར་སྒོམ་ལ་སྔགས་བཟླས་ཤིང་བྲབ་བོ། །

 ༤ གདུང་རྟེན་བཞེངས་པ། ༡ སྐུ་གདུང་མཆོད་རྟེན་གྱི་ཁུངས་སོགས་ནི། སྔོན་གྱི་ཚེ་མི་རྣམས་ཀྱི་ཚེ་ལོ་བཞི་ཁྲིར་སྤྱོད་པའི་ཚེ་སྟོན་པ་འཁོར་བ་འཇིག་མྱ་ངན་ལས་འདས་ནས། རྒྱལ་བོ་མཛེས་པས་སྐུ་གདུང་ལ་མཆོད་རྟེན་བརྩིགས་ཏེ། བཀུར་སྟི་བགྱིས་པ་མདོ་སྡེ་ལས་བརྒྱའི་བམ་པོ་ཉེར་བརྒྱད་པ་ལས་གསུངས་པ་དང་། ཡང་མྱང་འདས་ཀྱི་བམ་པོ་བཞི་བཅུ་རྩ་གཉིས་པ་ལས་ཀུན་དགའ་བོ། མྱ་ངན་ལས་འདས་ནས་བསྲེགས་ཏེ་འཁོར་རྣམ་བཞིའི་རིང་བསྲེལ་བསྡུས་ནས་རིན་པོ་ཆེ་སྣ་བདུན་བུམ་པར་བཅུག་ལ། མཆོག་གི་གྲོང་ཁྱེར་གྱི་ནང་ལམ་བཞི་མདོ་རིན་པོ་ཆེ་སྣ་བདུན་གྱི་བུམ་པར་བཅུག་ལ། ཞེས་པ་ནས་འཁོར་རྣམ་བཞིས་མཆོད་པར་བྱའོ། །ཞེས་དང་། ཡང་། སངས་རྒྱས་མྱ་ངན་ལས་འདས་ནས་སྐུ་གདུང་ཞུགས་འབུལ་གཏོང་སྐབས། སྡིག་ཅན་ཡུལ་གྱི་གྱད་མི་རྣམས་དང་། རྟོག་གཡོའི་ཡུལ་གྱི་རྒྱལ་རིགས་པུ་ལུ་ཀ་དང་། སྒྲ་སྒྲོགས་ཀྱི་རྒྱལ་བོ་ཀྲོ་དྷ། ཁྱབ་འཇུག་གླིང་དུ་གནས་པའི་བྲམ་ཟེ། གྲོང་ཁྱེར་སེར་སྐྱའི་ཡུལ་གྱི་ཤཱཀྱ། ཡངས་པ་ཅན་དུ་གནས་པའི་ལི་ཙ་བྱི་བཅས་ཁག་བརྒྱད། སྔ་གཞུག་ཏུ་སླེབས་ནས། སྐུ་གདུང་བསྒོ་བའི་རྩོད་ལྒིང་བྱུང་སྐབས། བྲམ་ཟེ་བྲེ་བོ་དང་མཉམ་པའི་སྐུ་གདུང་ཆ་བརྒྱད་དུ་བགོས་ཏེ། མ་གྷ་དྷའི་ཁལ་རེ་རེ་བྱུང་བས། དེ་རང་རང་གི་ཡུལ་དུ་སྤྱན་དྲངས་ཏེ། སྐུ་གདུང་ཡོད་པའི་མཆོད་རྟེན་རེ་བཞེངས་པ་བཅས་ཀྱི་ལོ་རྒྱུས་ཡོད་པ་ལ། ཞེས་གསུངས་པ་དེ་རྣམས་ཡིན་ལ། རང་ཅག་བོད་ལ་མཚོན་ན་ཡང་། རྒྱལ་སྲས་སེམས་དཔའ་འམ་རྟོགས་ལྡན་པ་ཚོའི་སྐུ་གདུང་། མེས་སྦྱངས་པའི་གདུང་རུས་དང་། ཐལ་བ་ལ་རུས་ཆོག་བྱས་ཏེ། ས་ཙྪ་གདབ་པའམ། གདུང་ཐལ་སྣག་ཚ་དང་གསེར་དངུལ་སོགས་སུ་བསྲེས་ཏེ། བཀའ་བསྟན་དང། འབུམ་སོགས་གསུང་རྟེན་བཞེངས་སྲོལ་ཡོད་པ་དང་། ཡང་ན། རིང་བསྲེལ་དང་སྐུ་རུས་ནང་གཞུག་བྱས་ནས་མཆོད་རྟེན་བཞེངས་སྲོལ་ཡོད་དེ། རྒྱལ་བ་པཎ་ཆེན་རྣམ་གཉིས་དང་། གྲུབ་མཐའ་སོ་སོའི་སྐྱེས་ཆེན་དག་གི་སྐུ་གདུང་མཆོད་རྟེན་མང་དུ་བཞུགས་པ་དེའོ། །

དེ་ཡང་། ཞིབ་ཙམ་བཤད་ན། སངས་རྒྱས་བྱང་སེམས་དང་ཆོས་འབྲེལ་དངོས་འཐོབ་ཀྱི་རྩ་བའི་བླ་མ་སོགས་ཀྱི་སྐུ་ཕུང་དེ། དུར་རམ་ས་ཕྱོགས་གཙང་མ་ཞིག་ཏུ་སྤྱན་དྲངས་ཏེ། རྡོ་རྗེ་གུར་དང་ངན་སོང་སྦྱོང་རྒྱུད་ཀྱི་ཆོ་ག་འམ། ཡང་ན། གྲུབ་མཐའ་སོ་སོའི་མཁས་པས་མཛད་པའི་སྦྱངས་ཆོག་ལྟར་ཞུགས་འབུལ་གཏོང་བ་སྟེ། བུ་སྟོན་རིན་པོ་ཆེ་དང། འབྲོང་རྩེ་ལྷ་བཙུན་རིན་ཆེན་རྒྱ་མཚོ་སོགས་ཀྱིས་མཛད་པ་ཡོད་ཀྱང་། དགེ་ལུགས་པར་མཚོན་ན། ཞལ་གསལ་ཞིང་འཇུག་བདེ་བ་ཐུའུ་བཀྭན་ཆོས་ཀྱི་ཉི་མས་མཛད་པའི་རྡོ་རྗེའི་སེམས་དཔའི་སྒོ་ནས་ཡུལ་ཁྱད་པར་ཅན་སྐུ་གདུང་མཆོད་ཅིང་སྦྱང་བའི་ཆོ་ག་རིན་ཆེན་སྒྲོན་མེ་བྱ་བ། ཁོང་གི་གསུང་འབུམ་ལྷ་ས་ཞོལ་པར་མའི་[ང]བའི་ནང་བཞུགས་པ་དེ་ལེགས་ལ། ཆོ་ག་དེར། མྱ་ངན་ལས་འདའ་ཁར་ཐུགས་དམ་གསལ་འདེབས་ཇི་ལྟར་གནང་ཚུལ་དང་། དགོངས་པ་རྫོགས་རྗེས་སྐུ་གདུང་ལྷར་བསྐྱེད་དེ། ཁྲུས་གསོལ་དང་། མཆོད་འབུལ། དགོངས་རྫོགས་ཀྱི་ཆོ་ག ཞུགས་འབུལ་གཏོང་ཚུལ། སྐུ་རུས་གདན་འདྲེན་ཚུལ། སྐུ་རུས་དང་རིང་བསྲེལ་སོགས་བདག་གཅེས་ཞུ་སྟངས། གདུང་སྦྱངས་ཀྱི་གནས་དེར་མཆོད་རྟེན་བཞེངས་ཚུལ་སོགས་ཞིབ་རྒྱས་འཁོད་ཡོད། ཡང་། གདུང་སྦྱངས་དེར་མི་གསལ་བའི་མཐོང་བརྒྱུད་ཕྱག་ལེན་སྐོར། བླ་མ་སྐྱེས་ཆེན་དམ་པ་རྣམས་དགོངས་པ་རྫོགས་རྗེས། སྐུ་གདུང་ལ་ཕྱག་གསུམ་ཕུལ་ཏེ། རས་གཙང་དཀར་བོ་ཞིག་གིས་ཞལ་གྱི་ཨོག་སྐོའི་འོག་ནས་སྐུའི་ཐུགས་ཀ་བར་བཀབ་སྟེ་བཞག་ཐོག ཐུགས་དམ་གྲོལ་བའི་རྟགས་མ་བྱུང་བར་སྐུ་གདུང་ལ་གཡོ་འགུལ་སོགས་མི་གཏོང་། ཐུགས་དམ་གྲོལ་བའི་རྟགས་ཤངས་བུག་གཉིས་ལས་བྱང་སེམས་དཀར་དམར་ཕེབས་པའི་མཚམས། སྐུ་གདུང་ལ་དར་གོས་དཀར་བོ་འམ་དམར་སེར་གང་རུང་གིས་དྲུག་ཆིངས་རྒྱག་པ་སྟེ། དྲུག་ཆིངས་རྒྱག་སྟངས་ནི། མཁས་དབང་ཚེ་ཏན་ཞབས་དྲུང་གི་རང་རྣམ་བདེན་གཏམ་རྣ་བའི་བདུད་རྩི་ལས། དྲུག་ཆིངས་ཞེས་པ་ཐོག་མར་རྡོ་རྗེ་སྐྱིལ་ཀྲུང་མཛད་པའི་ཞབས་གཉིས་ཀྱི་བསྣོལ་མཚམས་སུ་མདུད་པ་གཅིག དེ་ནས་ཕྱག་གཉིས་མཉམ་བཞག་མཛད་པའི་ཕྱག་ངར་ལ་དཀྲིས་བརྒྱབ་ནས་སྐུ་རྒྱབ་ཏུ་མདུད་པ་གཅིག དེ་ནས་ཐུགས་ཀའི་ཐད་དུ་མདུད་པ་གཅིག དེ་ནས་སྐུ་དཔུང་ལ་དཀྲིས་བརྒྱབ་ནས་གཉའ་ལྟག་ཏུ་མདུད་པ་གཅིག དེ་ནས་དཔྲལ་བའི་ཐད་དུ་མདུད་པ་གཅིག དེ་ནས་དབུ་ཐོད་ཀྱི་རྒྱབ་ཏུ་མདུད་པ་གཅིག དེ་ནས་དར་གཉིས་ཀྱི་སྣེ་མོར་དཔྲལ་བ་གཡས་གཡོན་ནས་ཁུགས་ལོ་བྱས་ཏེ་མར་ལ་དཔྱངས་པར་བྱས་པ་ནི་དྲུག་ཆིངས་ཀྱི་ཕྱག་ལེན་ཏེ། འདི་སྐྱེ་བོ་ཐ་མལ་བ་རོ་སྲེག་བྱེད་པ་ལ་ཡང་ལག་ལེན་དུ་འདེབས་རུང་བར་གསུངས་སོ་ཞེས་འཁོད་ཡོད། དེ་ལྟར་དྲུག་ཆིངས་བརྒྱབ་སྟེ། གདུང་སྒྲོམ་ནང་དུ་བཞག་ནས་ཆོས་གོས་རྣམ་གསུམ་སོགས་གསོལ་ཏེ་རབ་བྱུང་གི་ཆས་དང་། དེའི་སྟེང་ལྷའི་ཆོས་འཇུག་སྒྲོན་ཏེ། དགུང་ཞག་ཇི་ཙམ་འཇོག་རིང་གདུང་ཁྲུས་དང་། གདུང་སྒྲུབ། དད་ལྡན་ཁག་གིས་དགོངས་རྫོགས་མཆོད་འབུལ་བཅས་གྲུབ་མཚམས། ས་གཙང་ཞིག་ཏུ་སོ་ཕག་སོགས་ཀྱིས་སྲེག་ཐབ་བཞེངས་ཏེ། དེའི་སྟེང་ཟླུམ་པོའི་སྟེང་དུ་མེ་སྒོ་དོད་པ་ཞིག་གི་ནང་། སྟོད་ཀྱི་ཆར། ལྕགས་ཁྲས་བཀབ་པའི་སྟེང་དུ་སྐུ་གདུང་བཞག་སྟེ། ཤུག་པ་དང་ཙན་དན་སོགས་དྲི་བཟང་གི་ཤིང་ཕྱོགས་བཞི་ནས་བརྩིགས་ཏེ། ཏིལ་སྣུམ་མར་ཁུ་བསྲེས་པ་བླུགས་ནས་སྐུ་རུས་རྣམས་གཙང་མར་མ་ཚིག་གི་བར་དུ། ཆོ་གའི་ནང་གསལ་བ་ལྟར་ཞུགས་འབུལ་དང་། ཉིན་ཤས་སོང་རྗེས་སྤུར་ཁང་ཞལ་ཁ་ཕྱེས་ཏེ། སྐུ་གདུང་གི་ཆ་འགའ་ཞིག་སློབ་མ་དང་ཡོན་བདག་རྣམས་ལ་འགྲེམས་པ་དང་། མངས་ཆེ་བ་སྐུ་གདུང་མཆོད་རྟེན་དུ་འདྲ་སྐུ་བཞེངས་པའི་ནང་གཟུངས་སུ་ཕུལ་དགོས་པ་ཡིན། སྐུ་གདུང་ཞུགས་འབུལ་གཏོང་ཚུལ་གྱི་རིམ་པ་རྗེ་འཇིགས་མེད་རིགས་པའི་བློ་གྲོས་ཀྱི་གདུང་ཆོག་ཕན་བདེའི་འདོད་འཇོ་ལས་ཀྱང་ཞིབ་ཏུ་བརྗོད་ཡོད།

ཡང་། རིང་བསྲེལ་བབས་པ་ཡིན་ན། རིང་བསྲེལ་གསུམ་སྟེ། ཆོས་སྐུའི་རིང་བསྲེལ། སྐྲ་བལ་གྱི་རིང་བསྲེལ། སྐུ་གདུང་གི་རིང་བསྲེལ་ལོ། །དང་བོ་ནི། གཟུགས་ཀྱི་རིགས། གཉིས་པ་ནི། དབུ་སྐྲ་དང་ཕྱག་སེན་གྱི་རིགས། གསུམ་པ་ནི། སྐུ་གདུང་གི་རིང་བསྲེལ་དངོས་སོ། །ཡང་། སྐུ་གདུང་ལ་རིགས་ལྔ་སྟེ། ཤ་རི་རམ། ཆུ་རི་རམ། བ་རི་རམ། ཉ་རི་རམ། པཉྩཱ་རམ་དང་ལྔ་ལྡན་གདུང་རིགས་ལྔའི་གདུང་སྟེ་སྐུ་ཡང་འབྱུང་། དེ་རྣམས་སྐུ་འཐོབ་རྟགས་ཡིན་ཏེ་ཞེས་པས། ཤའི་རྟེན་དུ་ཤ་རི་རམ་དཀར་སེར་རིན་པོ་ཆེའི་གདུང་སྟེ། ཡང་དག་གི་རྟེན་དུ་བཞག་པའོ། །ཁྲག་གི་རྟེན་དུ་ཆུ་རི་རམ་མཐིང་ག་རྡོ་རྗེའི་གདུང་སྟེ། སྲ་ཞིང་མཁྲེགས་པས་རྡོ་རྗེ་གདུང་དུ་བཞག་པའོ། །རུས་པའི་རྟེན་དུ་བ་རི་རམ་སེར་བོ་རིན་པོ་ཆེའི་གདུང་དུ་བྱོན་ཏེ། རྒྱལ་ཚབ་ཉིད་ཀྱི་རྟེན་དུ་བཞག་པའོ། །ཡན་ལག་གི་རྟེན་དུ་ཉ་རི་རམ་ལྗང་ཁུ་ལས་ཀྱི་གདུང་སྟེ། ཤིན་ཏུ་སྲ་ཞིང་མཁྲེགས་པའི་ལས་ཀྱི་གདུང་དུ་བཞག་པའོ། །འབྱུང་བཞིའི་དྭངས་མ་ལ་པཉྩཱ་རམ་འབྱོན་ཏེ་ཁ་དོག་ལྔ་ལྡན་དེ་བཞིན་གཤེགས་པའི་གདུང་དུ་བཞག་པའོ། །ཡང་ཤ་རི་རམ་མགོ་ལས་འབྱུང་། ཆུ་རི་རམ་ཁྲག་ལས་འབྱུང་། བ་རི་རམ་སྒལ་ཚིགས་ལས་འབྱུང་། ཉ་རི་རམ་རྐང་ལས་འབྱུང་། པཉྩཱ་རམ་སྙིང་ལས་འབྱུང་བར་ཡང་གསུངས་སོ། །ཡང་། རྒྱས་པར་ཤེས་འདོད་པ་དག་གིས་ས་པཎ་གྱིས་མཛད་པའི་སྡོམ་གསུམ་རབ་དབྱེའི་ནང་རིང་བསྲེལ་སྐོར་ལ་དོགས་དཔྱོད་དང་དཔྱད་གཏམ་མང་བོ་སྤེལ་གནང་མཛད་ཡོད་པས། དེར་གཟིགས་པར་བྱའོ། །

 ༢ དམར་གདུང་དུ་འཇོག་པ། སྐྱེས་ཆེན་དམ་པ་ནུས་ལྡན་རྣམས་དགོངས་པ་རྫོགས་རྗེས། ཕྱིས་འབྱུང་གི་དགོས་པ་མང་བོའི་དོན་དུ། སྐུ་གདུང་མ་ཉམས་པར་འཇོག་པར་བཤད་དེ། དཔེར་ན། གཞོན་ནུ་ནུས་ལྡན་གྱིས། སློབ་དཔོན་ཀླུ་སྒྲུབ་ཀྱི་དབུ་རྩྭ་ཀུ་ཤས་བཅད་པའི་ཚེ། སྐུ་ཁྲག་འོ་མའི་རང་བཞིན་དུ་བྱུང་ཞིང་། དབུ་དེའི་ཞལ་ལས། ང་ནི་བདེ་བ་ཅན་གྱི་འཇིག་རྟེན་དུ། །ཕྱིན་ནས་ལུས་འདི་ལ་ཡང་འཇུག་པར་འགྱུར། །ཞེས་པ་ལྟར། ཕྱིས་སུ་དབུ་དང་ལུས་འབྱར་ནས། བསྟན་འགྲོར་ཕན་པ་རྒྱ་ཆེར་སྒྲུབ་པར་གྲགས་པ་དང་། བོད་དུ་ཡང། རྗེ་ཙོང་ཁ་པ་སོགས་ས་དགེ་ཀར་རྙིང་སོགས་སྐྱེས་ཆེན་དམ་པ་སུམ་ཅུ་ལྷག་དམར་གདུང་དུ་ཡོད་པ་དང། འགའ་ཞིག་ལོ་ངོ་ཆིག་སྟོང་ལྷག་དང་། ལོ་ངོ་བདུན་བརྒྱ་ལྷག་གི་ལོ་རྒྱུས་ཡོད་ཀྱང་། རིག་གསར་སྐབས་གཏོར་གཤིག་ཕོག་ནས། ད་ལྟ་ལྷག་མར་གྱུར་བ་བརྒྱད་ཙམ་ཡོད་པ་དུང་དཀར་ཚིག་མཛོད་ལས་གསུངས་པ་དང་། དེ་ཡང་དམར་གདུང་བྱེད་སྟངས་ནི། སྐུ་གདུང་ནང་གི་མི་གཙང་བ་རྣམས་སྨན་སྦྱོར་ལ་བརྟེན་ནས་རྩ་ཆུ་བཤལ་ཏེ། སྐམ་ཐག་མ་ཆོད་ཀྱི་བར་དུ་ཚྭ་ཡི་ནང་དུ་བཞག དེ་ནས་སྨན་སྦྱོར་བསྲེས་པའི་འཇིམ་པས། ཞལ་རས་ལེགས་པར་གསོས་ཏེ་འདྲ་སྐུ་བཞེངས། ཤིང་ཙན་དན་སོགས་ཤིང་སྣ་རྩ་ཆེན་གྱིས་བཟོས་པའི་སྒྲོམ་རིམ་པ་གསུམ་ཡོད་པ། རིམ་པ་རེའི་སྟོང་ཆ་ཡོད་པའི་ནང་། མར་དམར་གདུང་འཇོག་ཅིང་། སྒྲོམ་བར་ཕྱི་གཉིས་ལ་དྲི་བཟང་གི་ཤིང་བསྲེགས་པའི་སོལ་ཕྱེ་དང་སོལ་བས་བཀང་། ཁ་ཁེབས་ལེགས་པར་བཀབ་སྟེ་སྤྲ་ཚིལ་གྱིས་དམ་པོར་བསྡམས་ནས། འབུ་སྐྱོན་དང་རུལ་བསུངས་མི་འབྱུང་བའི་སྔོན་འགོག་བྱ་ཐབས་མཐོང་བརྒྱུད་ཕྱག་ལེན་མང་བོ་ཡོད་དོ། །འོན་ཀྱང་བླ་མ་སྤྲུལ་སྐུར་ཁས་འཆེས་ཏེ། བསྟན་པ་ཕྱི་བཤིག་ནང་གཤིག་བྱེད་པའི་ཐ་ཤལ་བ་འགའ་རེ་ཡང་། དམར་གདུང་དུ་བཞག་སྟེ། ཀུན་གྱིས་མཆོད་པའི་ཞིང་དུ་འཛིན་པ་ནི་མ་རུངས་པ་ཆེན་པོ་སྟེ། རྗེ་འཇིགས་མེད་རིགས་པའི་བློ་གྲོས་ཀྱིས། སྔོན་གྱི་ཕྱག་ལེན་ལ་སྐུ་གདུང་མ་བཞུས་པར་རིལ་བོར་འཇོག་པའང་ཡོད་ཀྱང་། ད་ལྟའི་དུས་ན་དེ་ལྟའི་ལག་ལེན་ཐལ་ཆེ་ན་ལྷ་ཁང་རྣམས་དུར་ཁྲོད་དུ་མི་འགྱུར་བའི་ངེས་པའང་མེད། གསུངས་པ་ལྟར་རོ། །

༥ ཕུང་བོ་ཆུ་ལ་བསྐྱུར་བ། ཕུང་བོ་ཆུ་བསྐྱུར་ལ་ཆུ་དུར་ཞེས་ཀྱང་བརྗོད་ལ། འདི་ནི་སའི་ལྡེ་བརྒྱད་ནས་དར་བ་སྟེ། བོད་ཀྱི་ལོ་རྒྱུས་སྔ་མ་རྣམས་སུ། དེ་རྣམས་ཀྱི་བང་སོ་ཆུ་བོའི་གཞུང་ལ་བཏབ་པར་གསུངས་ལ། ད་ལྟ་ཡང་རྨ་ཆུ་སོགས་ཆུ་ཀླུང་ཆེན་པོར་ཕུང་བོ་འདོར་བ་སྟེ། དེ་ནི་ཉ་སྲམ་སོགས་ཆུར་གནས་སྲོག་ཆགས་ལ་བེམ་པོ་སྦྱིན་པར་གཏོང་བའོ། །འདི་ལའང་ཆུ་ཁའི་ས་སློང་དང་། ས་བབ་ལ་བརྟག་ཏེ་ཆུ་བསྐུར་བྱེད་དོ། །ཡང་། ཆུའི་ལྷ་མོ་ལ་བསྐྱུར་ན། ཆུའི་ལྷ་མོ་མ་མཱ་ཀི་ལ་ཕྱག་འཚལ་ཞིང་སྐྱབས་སུ་མཆིའོ། །ཆུའི་ལས་བཀྲ་ཤིས་པར་མཛད་དུ་གསོལ། ཨོཾ་ཧ་རི་ནི་ས་ཤན་ཏིམ་གུ་ཀུ་སྭཱ་ཧཱ། ཞེས་བརྗོད་དེ་ཆུ་ལ་བསྐྱུར་རོ། །

ཡང་ཁ་ཅིག སའི་ལྡེ་བརྒྱད་ཀྱི་བང་སོ་ཆུ་ཡི་གཞུང་ལ་བཏབ་པས། ཆུ་ལ་ཁ་བ་བབས་པ་ལྟ་བུ་བྱུང་ཟེར་བ། ལྡེ་བརྒྱད་ཀྱི་སྐུ་གདུང་ཞུགས་ལ་སྦྱངས་ཏེ། རུས་ཐལ་སྐྱ་ཆིལ་ལེ་ཆུ་ཁར་གཡེང་བས་སམ། སྐུ་གདུང་ཁ་བཏགས་སམ་བལ་གྱི་རྫོང་བ་དང་བཅས་ཆུར་ཕྱགས་པས། ཆུ་ལ་ཁ་བ་བབས་པ་ལྟར་ཞེས་འགྲེལ་བརྗོད་གནང་ཡང་བརྟག་དགོས་སོ། །

༤ གཤིན་ཆོས་སྒྲུབ་ལུགས། ༡ དགུང་ཞག་ཞེ་དགུ་འཛིན་པའི་ཁུངས། བོད་ཀྱི་ལུགས་སྲོལ་ལ་དགུང་ཞག་ནང་། དགེ་སློང་བཞི་འམ་བདུན་གང་རུང་ཞུས་ཏེ། ངན་སོང་སྦྱོང་རྒྱུད་ཀུན་རིག་གི་ཆོ་ག་གསུངས་ཏེ་དགུང་ཞག་ཞེ་དགུ་འདི་གཙིགས་སུ་འཛིན་པ་ཡིན། དེ་ནི་སྔོན་སྟོན་པའི་སྐུ་དུས་སུ་ལྷ་ཞིག་ཚེ་འཕོས་ནས། ཕག་ཏུ་སྐྱེས་པ་ལ། བརྒྱ་བྱིན་གྱིས་སྟོན་པར་ཞུས་ནས། ཆེད་དུ་ངན་སོང་སྦྱོང་རྒྱུད་ཀུན་རིག་འདི་གསུངས་པ་ཡིན་པས། ངན་སོང་ལས་ཐར་བ་ལ་བྱིན་རླབས་ཀྱི་ཚན་ཁ་གཞན་ལས་ཆེ་བ་ཡིན། དེར་མ་ཟད། ཀྱེ་རྡོར་གྱི་སྐབས་ཞག་བདུན་ཕྲག་གསུམ་མམ་བདུན་ཕྲག་བདུན་གྱི་བར་དུ་བྱ་བ་ལ་བདུན་ཚིགས་ཞེས་གསུངས་པ་དང་། དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་བརྗོད་པའི་མདོ་ལས་ཀྱང་སངས་རྒྱས་སྨན་བླར་སྐྱབས་སུ་མཆི་ཞིང་། གདུགས་བདུན་ནམ་ཉེར་གཅིག ཡང་ན་གདུགས་ཞེ་དགུ་ལ་མཆོད་པ་སོགས་བགྱིས་ན། རྣམ་ཤེས་སླར་ལྡོག་ཅིང་དྲན་པ་རྙེད་པར་བཤད་པ་དང་། ས་པཎ་གྱིས་དོ་ཀོར་བའི་དྲིས་ལན་དུའང་། ཞེ་དགུའི་བར་དུ་གཤིན་པོ་ལ། །བདུན་ཚིགས་ཆོ་ག་བཤད་པ་དེ། །རྣམ་ཤེས་བཀུགས་ནས་མཛད་པར་གདའ། །ཞེས་དང་། ཡང་། ཆོས་རྒྱལ་འཕགས་པས། ཡུན་ནི་ཕལ་ཆེར་ཞག་བདུན་སྟེ། །བདུན་ཕྲག་བདུན་དུའང་ཡོད་ཅེས་གྲགས། ལོ་དང་བསྐལ་བར་གནས་པའང་ཡོད། །དེས་ན་གཅིག་ཏུ་ངེས་པ་མེད། །ཞེས་བར་དོར་ལོ་དང་བསྐལ་བར་གནས་པའང་བཤད་ཀྱང་རྗེའི་རང་ལུགས་དང་མི་མཐུན་ནོ། །

བདུན་ཚིགས་སྒྲུབ་པ་འདི་ཡང་ཁྲི་སྲོང་ལྡེ་བཙན་གྱི་དུས་ནས་དར་བར་སེམས་ཏེ། གྱིམ་ཤིང་ཀོང་ཇོ་བོད་དུ་ཕེབས་དུས། རྒྱ་བཟའི་ཞལ་ལས། ཁྱེད་བོད་ཀྱི་བློན་པོ་ཤི་ཚད་ལ་ཟས་སྐལ་མེད་པས། ངེད་རྒྱ་ནག་ལ་ཆོས་དར་བས་མི་ཤི་ཚད་ལ་བདུན་ཚིགས་ཡོད། བོད་ལ་ཆོས་མ་དར་བས་བློན་པོ་སྙིང་རེ་རྗེ། ཞེས་སྦ་བཞེད་ལས་གསུངས་ལ། ཡང་དེ་ཉིད་ལས། སྦ་གསལ་སྣང་གི་བུ་མིང་སྲིང་གཉིས་གུམ་པའི་ཚེ། ཧྭ་ཤང་རྒད་པོ་ཞིག་བཀུགས་ནས། ར་མོ་ཆེ་ནས་མིང་སྲིང་གཉིས་ཀྱི་བདུན་ཚིགས་བསྒྲུབས་པར་གསུངས་ཡོད་པས་སོ། །ཞེས་པ་ལྟར། ཞེ་དགུའི་ནང་བདུན་ཚིགས་རེ་གཤིན་ཆོས་སྒྲུབ་པ་དང་། ཁྱད་པར་དུ་སྐྱེ་བོ་ཕལ་མོ་ཆེ་བར་དོ་བདུན་ཕྲག་བཞི་ལས་མི་སྡོད་པར་སྐྱེ་བ་ལེན་པ་ཤས་ཆེ་བས། བདུན་ཚིགས་བཞི་བ་འདི་གལ་ཆེན་དུ་འཛིན་པ་དང་། བདུན་བདུན་ཞེ་དགུ་སྟེ་ཐ་མའི་བདུན་ཚིགས་ལ་བདུན་ཚོགས་སྔོན་མ་ལས་ཀྱང་གཤིན་ཆོས་རྒྱ་ཆེར་སྒྲུབ་བོ། །

ཚེ་འདས་ལ་ཕན་པ་ཆེ་ཆུང་ཡང་། བདུན་ཚིགས་བྱེད་པོ་ཡང་རག་ལས་པ་སྟེ། རབ་ཀྱིས་ལམ་བསྟན་ནས་གྲོལ་ནུས་པ་དང་། འབྲིང་གིས་ངན་སོང་གི་སྐྱེ་སྒོ་གཅོད། ཐ་མས་ཀྱང་ཆོ་ག་ཚུལ་བཞིན་བྱས་པས་གང་འཚམ་ཕན་པར་འགྱུར་བ་ཡིན། དེ་ལྟར་མ་ཡིན་པར་རྙེད་དང་བཀུར་བསྟི་རེ་ནས་རོ་རྫས་ལ་ཟ་རྔམ་ཆེ་ན། ཚེ་འདས་ཀྱི་དོན་དུ་དགུང་ཞག་ཞེ་དགུ་བཟུང་ཚུལ་ལུང་དང་སྦྱར་བ་ཕན་བདེའི་རྔ་ཆེན་ལས། དད་རྫས་དང་གཤིན་རྫས་ལ་སོགས་པ་ལའང་བག་མེད་དུ་ལོངས་སྤྱོད་པར་མི་བྱ་སྟེ། རང་སེམས་དགེ་སྦྱོར་ལས་གཡེང་བར་འགྱུར་བའི་ཕྱིར་དང་། ཚེ་འདས་ཀྱི་བདུན་ཚིགས་བྱེད་པ་ནི་རང་གི་ཚེ་ལ་གནོད་པར་བཤད་པ་དང་། རྒྱུན་དུ་གཤིན་ཆོག་ལ་རྒྱུག་པའི་གང་ཟག་དེ་རབ་གནས་སོགས་བཀྲ་ཤིས་པའི་ལས་ལ་སྤྱན་འདྲེན་མི་རུང་བར་བཤད་པ་དང་། གཤིན་རྫས་ཀྱིས་སྤངས་རྟོགས་ཀྱི་ཡོན་ཏན་སྔར་ཡོད་འགྲིབ་པ་དང་སྔར་མེད་གསར་དུ་མི་སྐྱེ་བར་བཤད་པ་དང་། རོའི་གྲིབ་ལ་སོགས་པས་ཐར་བ་དང་ཐམས་ཅད་མཁྱེན་པའི་ལམ་ལ་ཤིན་ཏུ་བསྒྲིབ་པར་བཤད་པའི་ཕྱིར་རོ། །ཞེས་དང་། ཡང་དེ་ཉིད་ལས། དེ་ལྟ་མིན་པར་ཤུལ་ན་གནས་རྣམས་ལ། །གཞན་གྱིས་འཕྱ་བར་དོགས་ནས་དེ་སྤང་ཕྱིར། །གཉེན་ཚན་ཡིན་པའི་སེར་གཟུགས་འདྲེན་སྟོན་དུ། །བཞག་ནས་ཞེ་དགུའི་བར་དུ་ཤ་དང་ཆང་། །ཟ་འཐུང་སྡིག་གྲོགས་བྱེད་ཅིང་ཡོན་རྫོང་སོགས། །ཉེ་བ་རྣམས་དང་མཉམ་ཟ་མཉམ་འཐུང་བྱེད། །དེ་འདྲའི་དགེ་རྩ་རང་གཞན་ཕུང་བའི་རྒྱུ། །ཐར་འདོད་ཡོན་མཆོད་རྣམས་ཀྱིས་སྤང་བར་བྱ། །ཞེས་སོ། །

༢ གཤིན་ཆོས་སྒྲུབ་ཚུལ་དངོས། འདས་མཆོད་སྒྲུབ་ཚུལ་འདི་ལ། ཡིག་རྙིང་རྣམས་སུ་བོད་རྒྱལ་བརྒྱད་པ་གྲི་གུམ་བཙན་པོའི་དུས་སུ། གྲི་གུམ་བཙན་པོའི་དུར་མཆོད་བོད་ཀྱི་བོན་རྣམས་ཀྱིས་བྱེད་མ་ཤེས་སྟབས། ཁ་ཆེ་དང་། བྲུ་ཤ ཞང་ཞུང་བཅས་ནས་བོན་པོ་མི་གསུམ་གདན་དྲངས་པས། གཅིག་གིས་གེ་གོད་ཁྱུང་དང་མེ་ལྷ་བསྒྲུབས་པ་ལ་བརྟེན་ནས་རྔ་ཞོན་ནས་ནམ་མཁའ་ལ་འགྲོ་བ་དང་། གཏར་བ་ལེན་པ། བྱ་སྒྲོས་ལྕགས་གཅོད་པ་སོགས་ཀྱི་ནུས་པ་བཏོན། གཅིག་གིས་ཇུ་ཏིག་དང་། ལྷ་བཀའ་དང་། སོག་དམར་ལ་སོགས་པ་མོ་བཏབ་ནས་ལེགས་ཉེས་གཏན་ལ་ཕབ། གཅིག་གིས་གཤིན་པོ་འདུར་བ་དང་། གྲི་འདུལ་བ་ལ་སོགས་ཤེད་ཀྱི་བྱེ་བྲག་རྣམས་ཤེས་པས། དེ་རྣམས་ཀྱིས་བསྒྲུབས་པར་བཤད་པ་དང་། འདུར་བཏང་བའི་ཕན་ཡོན་ཡང་། ལེགས་བཤད་རིན་པོ་ཆེའི་མཛོད་ལས། ཀོང་བོ་བྲེ་སྣར་རྒྱལ་གྱི་གྲི་འདུར་མཛད་པས། གསོན་པོ་བཀྲ་ཤིས་ཏེ་སྤུ་ལྡེས་རྒྱལ་ས་ཟིན། གཤིན་པོ་གནས་སླ་སྟེ་གྲི་རུམ་ཐར་བ་ཐོབ་བོ། །ད་ལྟ་ཡང་རྒྱལ་གྲི་རུམ་གྱི་གྲི་འདུར་ཡོག་བར་བ་སུམ་བརྒྱ་དྲུག་ཅུ་བྱ་བ་བཞུགས་སོ། །

འདུར་གཏོང་ཚུལ་ཡང་། འདུར་རྒྱུད་ལས། འདུར་བ་བླ་ཡི་འཇིགས་སྐྲག་འདུར། །སྦྱོང་བ་ཡིད་ཀྱི་བག་ཆགས་སྦྱོང་། །སྤར་བ་སེམས་ཉིད་དབྱིངས་སུ་སྤར། །བླ་ནི་ཡིད་ཐིམ་སེམས་ལ་ཐིམ། །སེམས་ནི་ནམ་མཁའ་འདྲ་སྟེ་སྟོང་། །ཞེས་དང་། ཡང་། བོན་ཤེས་པ་ཅན་བཅུ་གཉིས་ཀྱི་ནང་ཚན་འདུར་ཤེས་སྲིད་གཤེན་གྱིས་འདུར་བཏང་ཚུལ་ཡང་། གསང་བ་བསེན་ཐུབ་རྒྱུད་ལས། གང་ཞིག་གཤེན་རབ་རྩལ་སྟོབས་མི་ལྡན་པས། །ཚེ་འདས་ཐར་བའི་གནས་སུ་སྒྲོལ་འདོད་པ། །རྨོངས་པས་རྨོངས་ཁྲིད་ལག་སྦྲེལ་གཡང་སར་ལྷུང་། །ལས་ཀྱི་དབང་གིས་ལུས་དང་སེམས་བྲལ་ནས། །བླ་ཡིད་སེམས་གསུམ་འཁོར་བཞིར་བར་དོར་འཁྱམས། །རྩལ་གསུམ་ལུས་ལ་རྫོགས་པའི་སྐྱེས་བུ་ཡིས། །དམུ་རྒོད་བཏུལ་ནས་གཡུང་དུ་ཕེབས་པ་བཞིན། །ཤེས་རབ་སྟོབས་ལྡན་སྐྱེས་བུ་གང་ཞིག་གིས། །བླ་དང་སེམས་ཡིད་ཐིག་ལེར་འདྲིལ་ནས་ཀྱང་། །ཐོག་ཆགས་མེད་པའི་མཁའ་ཀློང་དབྱིངས་སུ་བསྒྲལ། །ཞེས་པར་དཔྱད་ན་རགས་ཙམ་རྟོགས་ནུས་སོ། །དེའི་ཕྱིས་ཀྱི་ཡིག་རྙིང་རྣམས་སུ་མདང་བྱ་བའམ་མདད་བཏང་བ་ཞེས་འབྱུང་ལ། དེབ་དཀར་ལས། རྙིང་མའི་ཆོ་ག་འགའ་རེ་ན། མདང་བསྐང་བྱ་བ་ཞིག་འདུག་པ་དེ་ལ། མར་མེ་དང་ཁྲག་དང་གཏོར་མ་རྣམས་རིམ་གྱིས་འབུལ་བར་འདུག་པས། ཕལ་ཆེར་དེ་འདྲ་ཞིག་མིན་ནམ་སྙམ། གསུངས་པ་དང་། ཆོས་ལུགས་ཀྱི་དབང་དུ་བཏང་ནའང་། བན་བོན་གཉིས་ཀྱི་བར་ཆོ་ག་གཏོང་ཚུལ་མི་འདྲ་བའི་དབང་གིས་ལན་རེར་འགལ་བ་ཤོར་བའང་ཡོད་དེ། དཔེར་ན། ཁྲི་སྲོང་ལྡེ་བཙན་གྱི་མདད་གཏོང་བར་བན་བོན་གཉིས་བར་འགལ་བ་ཆེན་པོ་བྱུང་བ་སྟེ། མཆིམས་བཙན་བཞེར་ལེགས་གཟིགས་དང་། སྣ་ནམ་རྒྱལ་ཚ་ལྷ་སྣང་། ངན་ལམ་སྟག་ར་ཀླུ་གོང་ལ་སོགས་ཀྱིས་འཕན་ཡུལ་གྱི་བོན་པོ་ཨ་ཤེན་དང་། བྱི་སྤུ། མཚེ་པོག ཡ་ངལ་ལ་སོགས་པ་མང་བོ་བསྡུས་ཏེ། རྒྱལ་བོའི་མདད་སྒྲུབ་པར་རྩོམ་པ་ན། ཆོས་ལ་སྤྱོད་པར་དགའ་བའི་འཁོན་ཀླུའི་དབང་བོ་དང་། མཁས་པ་རྣ་ཆ་ཅན་གཉིས་ཉིན་ལ་མཚན་དུ་རྒྱུགས་ཏེ། ཚ་བ་ཚ་ཤོད་ཀྱི་རྒྱལ་ཁམས་ནས་པ་གོར་བཻ་རོ་ཙ་ན་དང་རྒྱལ་མོ་གཡུ་སྒྲ་སྙིང་བོ་གཉིས་ཀྱི་སྤྱན་སྔ་ནས་བན་བོན་གཉིས་ཀྱིས་བརྩད་པས་བནྟེ་རྣམས་རྒྱལ་ཏེ་མདད་བཏང་བ། ལོ་རྒྱུས་ཡིག་ཚང་དུ་བཀོད་པ་ལྟར་རོ། །

དེང་སང་ཡོངས་གྲགས་ཀྱི་འདད་གཏོང་ལུགས་ནི། རྗེ་འཇིགས་མེད་རིགས་པའི་བློ་གྲོས་ཀྱིས། བསྟན་པའི་ཁུར་འཛིན་པའི་གང་དད་པའི་ཡུལ་དུ་གྱུར་བ་རྣམས་མྱ་ངན་ལས་འདའ་ཁར་སྐྱེ་བོ་ཐ་མལ་བ་བཞིན་དུ་གཉེན་ཉེ་དུ་སོགས་ངུ་སྐད་འཆོར་བ་ཅན་རྣམས་དྲུང་ནས་འདུག་མི་རུང་། ཆོས་ཀྱི་གནད་ཤེས་པའི་ཆོས་གྲོགས་སམ་སློབ་མ་ནང་གཙང་རེ་གཉིས་ཀྱིས་སངས་རྒྱས་ཆོས་ཚོགས་མ། དམིགས་བརྩེ་མ། ཁོང་བའི་རྩ་བའི་བླ་མའི་གསོལ་འདེབས། འདའ་ཁ་ཡེ་ཤེས། འདུ་ཤེས་བཅུ་གཅིག་བསྟན་པའི་མདོ། བར་དོའི་འཕྲང་སྒྲོལ་གྱི་གསོལ་འདེབས་རྣམས་སྐད་མཐོ་དམའ་རན་ཞིང་སྒྲ་དག་གསལ་གསུམ་གྱིས་དལ་བུའི་སྒོ་ནས་ཚིག་དོན་ལ་བསམ་བློ་གཏོང་ཁོམ་ཡོད་པ་དང་། ཚབ་ཚུབ་དང་ངུ་སྐད་མི་འབྱིན་པ་ཤིན་ཏུ་གལ་ཆེ། ཚར་གཅིག་གམ་ཚར་འགའ་འདོན་པ་སྐབས་དང་བསྟུན། བསྟན་འགྲོར་ཕན་འདོགས་པའི་སྤྲུལ་སྐུ་འཁྲུལ་མེད་རེ་འབྱོན་པའི་དགོས་པ་གལ་ཆེན་ཡོད་ན། དེ་ལུགས་ཀྱི་སྙན་སྐུལ་གནད་འདྲིལ་བ་རེ་ཚིག་སྒྲིག་གམ་ཕལ་སྐད་ཀྱིས་ཞུ། དེ་འདྲའི་དགོས་པ་མེད་ན། དཀོར་གཟན་ཇེ་མང་དུ་བཏང་བ་ལ་དགོས་པ་སྤུ་ཙམ་ཡང་མེད། ཅེས་དང་། ཐུགས་རིག་མི་གསལ་བའི་མགོ་རྩོམ་དུས་སངས་རྒྱས་ཀྱི་འཕེལ་གདུང་ངམ། རྟེན་འདུས་རིལ་བུ། སྐྱེས་བདུན་རིལ་བུ་(སྐྱེས་བདུན་རིལ་བུའི་ནང་ན་བྲམ་ཟེ་སྐྱེ་བ་བདུན་པའི་སྐུ་ཤ་ཡོད་ཅིང་། དེ་ཁར་རེག་ན་སྐྱེ་བ་བདུན་ལ་ངན་སོང་དུ་མི་འགྲོ་བར་གསུངས་ལ། ནམ་མཁའ་ནོར་བུས་བོད་དུ་གྲུབ་ཐོབ་ཨོ་རྒྱན་གླིང་བའི་སྐུ་ཤ་དེ་སྐྱེ་བདུན་གྱི་ཤ་རུ་ངོས་འཛིན་སྲོལ་ཡོད་ཅེས་ཀྱང་བཤད་དོ། །)སོགས་བྱིན་རྟེན་རྩ་ཆེ་འོ་མར་སྦངས་པ་ཞལ་དུ་ངེས་པར་འདྲེན། གསུངས་སོ། །

རང་རེའི་ལས་དང་བོར་བར་དོ་ངོ་སྤྲོད་སོགས་བྱས་ཏེ་སྐྲག་སྣང་འཆར་བ་ཞིག་ཡིན་ན། མ་བྱས་ན་བཟང་། རྣམ་ཤེས་ལུས་ཕུང་ལས་འཕོས་རྗེས། སྐར་མཁན་གྱི་དྲུང་དུ་གཤིན་རྩིས་ལ་བལྟས་ཏེ། སྐར་ཆོས་དང་ཕུད་སྐར། འགྲུབ་སྐར་སོགས་གཏན་འཁེལ་བྱས་ནས། ཤི་སྐར་ཆོད་ལ་ཁེལ་ཚེ་གཡང་འབོད་ཅི་མང་བྱ། འབྲིང་ལ་བཀྲ་བརྩེགས་དང་སྣང་རྒྱལ་སོགས་འདོན། ཤི་མི་རུང་བའི་སྐར་མར་ཁེལ་ཚེ། སྐར་ཆོས་བྱ་ཚུལ་གཤིན་རྩིས་ལས་འབྱུང་བ་ལྟར་དང་། ཡང་ན། སྐྱེས་བུ་དམ་པའི་གདམས་ངག་ལས་འབྱུང་བ་ལྟར་བྱ་དགོས་ཏེ། དཔེར་ན། ལས་སྣ་ཚོགས་ཀྱི་བེའུ་བམ་ལས། གཟའ་སྐར་ངན་པར་མི་ཤི་དང་རོ་འདོན་སོགས་ལ་ངན་པ་ཀུན་ཐུབ་ཀྱི་གདམས་པ་ནི། ཕུག་རོན་གྱི་སྒོ་ང་ལ་བུག་པ་བརྟོལ་བའི་ནང་དུ། ཤོག་བུ་ལ་བོང་བུའི་ཁྲག་གིས་སྔགས་འདི་བྲིས། པྲ་སོད་ཆུ་སོད་མེ་སོད་དུ་ཏྲི་ཆོད་ཁ་ལ་ཛ་ཛ་ཤག་ཤག་རྦད་རྦད་ཆོད་ཆོད། གཟའ་སྐར་སོགས་ངན་པའི་སྐྱོན་ཐམས་ཅད་ཕུང་སྲི་རྔ་མོང་ལ་བཏང་ངོ་། །དགྲ་དང་བགེགས་ལ་སྒྱུརད་ཅིག ཅེས་བྲིས་ལ་གཞུག དེ་བཞིན་ལྟས་ངན་སོགས་ལ་ཁ་བསྒྱུར་བྱས་ཆོག སྒོ་ངའི་ཕྱི་ལ་རྔ་མོང་སྐེ་གཅིག་ལ་མགོ་གསུམ་ཡོད་པ་བྲིས་ནས། ཉེར་དགུ་འམ་གནམ་སྟོང་ལ་དེའི་ཁ་དགྲ་ཕྱོགས་སུ་བསྟན་ཏེ་བསྐྱལ་བས། གཟའ་སྐར་དུས་ཚེས་ངན་པ་དང་། ལྟས་ངན་གྱི་རིགས་ཐམས་ཅད་བཟློག་པའི་ཐབས་མཆོག་ཏུ་གྱུར་བ་ཡིན་ནོ། །ཞེས་པ་ལྟར་བྱ་དགོས།

གཞན་ཡང་། རྗེས་ཤུལ་གྱི་སྐྱེ་འཚུབ་ངོ་བཟློག་ལུགས་ཀྱི་གཏོ་བཅོས་ནི། དཔེར་ན་གཟའ་ཆེན་ཉི་མར་འདས་པ་ཡིན་ན། ཉི་མ་དགུ་ཁྲིད། ཅེས་འཚུབ་ངོ་བཤད་པས། ཆག་སྒོ་བཟློག་ཆེད་སོག་མའི་ཚིགས་དགུ་དང་། ཆུ་བོ་དགུ་ཡི་ཆུ་སྣ་བཅས་ས་འོག་ཏུ་སྦོ་ཞིང་། ཕུད་སྐར་གྱི་ཉིན་བེམ་པོ་དང་མཉམ་དུ་ཟན་གྱི་ངར་མི་དགུ་ཡང་བསྐྱལ་དགོས། དེ་བཞིན་གཟའ་ཆེན་ཉི་མར་སྒྲུབ་པའི་ཚུལ་དུ་ཆུ་གྲང་ཕོར་གང་གི་སྟེང་དུ་གཟའ་ཉི་མའི་རི་མོ་བྲིས་ཏེ་ཁང་ཐོག་ཏུ་འཇོག་པ་དང་། གཞན་གཟའ་ཆེན་ཟླ་བར་འདས་པ་ཡིན་ན་དུར་ཁ་གཅོད་པའི་ཚུལ་དུ་ནས་དང་སྲན་མའི་ཚིགས་མ་དང་། ཉ་གཟུགས་ས་ཙྪ་བེམ་སྟེང་དུ་འཇོག་ཅིང་། ཤི་སྐར་གཟའ་ཆེན་སྤེན་པར་ཁེལ་ཚེ། གཡང་ཁ་མི་ཉམས་པའི་ཚུལ་དུ་བྲ་བོའི་ཟན་གྱི་ངར་མི་ལྔ་ས་འོག་ཏུ་སྦ་བའམ། འདས་པོའི་ཕུང་བོ་དང་མཉམ་དུ་དུར་ཆས་སྐྱེལ་བ་ཡིན་ནོ། །སྐར་ཆོས་དང་གཏོ་བཅོས་སྣ་ཚོགས་ཀྱི་བཅས་སྟངས་རྒྱས་པར་གཤིན་རྩིས་ལས་ཤེས་པར་བྱའོ། །ས་ཆ་ལ་ལར་བེམ་པོ་འཁྱེར་ཤུལ་དུ་གྲོང་བ་ཡིན་ན་ཐོང་ལྕགས་ཀྱི་ཡུ་བའི་ནང་ཤུག་པ་བལ་གྱིས་ལྕིབས་ནས་ཚིལ་རྡོག་དཀར་བོ་གསུམ་གྱི་བར་བསླངས་པ་དང་། ཐོང་ལྕགས་ནི་ས་མནོན་གྱི་རྟེན་འབྲེལ་དུ་བཤད། གྲྭ་བ་ཡིན་ན་གསེར་ཕོར་ནང་ཕྱེ་མར་འཇོག་ལ། ཕྱེ་མར་ཡང་ཚིལ་རྡོག་དཀར་བོ་གསུམ་གྱི་བར་དུ་འཇོག་སྲོལ་ཡོད་དོ། །

དེ་ལས་གཞན། སྤྱི་ཁྱབ་ཀྱིས་བེམ་པོའི་སྔས་མགོ་ལ་ལམ་སྔགས་གཉིས་དང་། མར་མེ་འཇོག་པ་ཡིན། དེ་ནས་རང་རང་གང་ལ་དད་འདུན་ཆེ་བའི་རྟོགས་ལྡན་པ་དང་ཨ་མཆོད་ཞུས་ཏེ། རྟོགས་ལྡན་པས་འཕོ་བ་དང་། ཨ་མཆོད་ཀྱིས་ཐར་མདོ་དང་སྨོན་ལམ་གསུངས་པ་ཡིན། དེ་ཡང་འཕོ་བ་གསུངས་པ་ནི། ཚེ་འདས་ཀྱི་རྣམ་ཤེས་ལ་གསལ་བཏབ་ནས། འཕོ་བའི་དམིགས་རིམ་སྒོམ་དུ་བཅུག་ནས། མན་ངག་ཁྱད་པར་ཅན་འདི་ལ་བརྟེན་ཏེ། འོད་དཔག་མེད་ཀྱི་ཞིང་ཁམས་ལ་འཕོ་བར་བྱེད་པ་དང་། ཐར་མདོ་གསུངས་པ་ནི། ཀུན་སློང་རྣམ་དག་གིས་ཐར་མདོ་འདི་བཏོན་ན། སྡིག་པ་སྟོབས་པོ་ཆེ་ཡང་ལྷག་མེད་དུ་འདག་སྟེ། མདོ་དེ་ལས། དེ་བཞིན་མཐོལ་མཚང་བྱེད་ནུས་ན། །རྩ་བ་བཞི་དང་མཚམས་མེད་ལྔ། །ལོག་སྤྱོད་བར་དུ་སྡིག་བྱང་སྟེ། །སངས་རྒྱས་འགྲུབ་པར་གདོན་མི་ཟ། །གསུངས་སོ། །ཡང་། བདག་འཇུག་བླངས་ཏེ་གཤིན་པོ་ལ་དབང་བསྐུར་ནའང་ཕན་ཏེ། རྡོ་རྗེ་གུར་གྱི་རྒྱུད་ལས། རྡུལ་ཚོན་དཀྱིལ་འཁོར་བྲིས་ནས་ནི། །གཤིན་ལ་གསོན་བཞིན་དབང་བསྐུར་ན། །ངན་སོང་གསུམ་དུ་སྐྱེས་ན་ཡང་། །དེ་ཉིད་ཀྱིས་ནི་ཐར་བར་འགྱུར། །ཞེས་དང་། ཡང་། སྨན་བླའི་མདོ་ལས། སྲོག་འགག་པའི་བེམ་པོའི་སྔས་སུ་ཞག་ཞེ་དགུའི་བར་དུ། བཅོམ་ལྡན་འདས་སྨན་བླ་མཆོད་ཅིང་གསོལ་བ་བཏབ་ན་དེའི་རྣམ་པར་ཤེས་པ་སླར་ལྡོག་པར་གསུངས་པ་དང་།

གཞན་ཡང་། ཁྲུས་ཆོག་བསྐུར་བ་སྟེ། དེ་ལ་དགོས་པ་གཉིས་ཡོད། གསོན་དུས་མིའི་ལུས་དང་སྲོག་ལ་གནོད་པར་བྱེད། ཤི་དུས་ཚེ་ལས་འདས་པའི་མཐོ་རིས་དང་ཐར་བ་ལ་བར་དུ་གཅོད་ཅིང་། ཚེ་ལས་འདས་པ་དེ་ཉིད་ཀྱི་ཆ་བྱད་བཟུང་ནས། འཇིག་རྟེན་པ་རྣམས་བསླུ་བའི་འབྱུང་བོ་མི་མ་ཡིན་པ་དག་དགར་བའི་ཆེད་དུ། ཚེ་ལས་འདས་པ་དེ་ཉིད་ཀྱི་སྡིག་སྒྲིབ་ཐམས་ཅད་སྦྱངས་པ་དྲུག་གི་སྒོ་ནས་སྦྱངས་ཏེ། བདེ་འགྲོའི་ལམ་བཟང་སྙེག་པའི་ཆེད་དུ་ཡིན།

ཕུང་བོ་སྦྱིན་སྲེག་བཏང་རྗེས། མི་འཁྲུགས་པའི་སྒོ་ནས་རུས་ཆོག་བཏང་ན། གཤིན་པོ་དེའི་སྡིག་སྒྲིབ་དག་སྟེ་མཐོ་རིས་དང་ཐར་བ་འཐོབ་ལ། དེ་ལྟར་མ་ལྕོགས་ན་ངན་སོང་སྦྱོང་བའི་གཟུངས་སྡེ་ལྔ་གསུངས་ཏེ། འབྲུ་དང་ཆུ། ཡང་ན། བྱེ་མ་སོགས་ལ་སྔགས་ནས་ཕུ་བཏབ་སྟེ། རུས་པའམ་དུར་སར་གཏོར་ན་ངན་སོང་ལས་ཐར་བར་གསུངས་ཏེ། གཙུག་ཏོར་རྣམ་རྒྱལ་མའི་གཟུངས་ལས། སེམས་ཅན་སྡིག་པ་བྱེད་པ་དེ་དག་ནི་ཤི་བའི་དུས་བྱས་པ་དེ་དག་གི་དོན་དུ་གཟུངས་འདི་ཡུངས་དཀར་ལ་ལན་ཉི་ཤུ་རྩ་གཅིག་བཟླས་ཏེ། དེ་དག་གི་རུས་གོང་རྣམས་ཀྱི་སྟེང་དུ་གཏོར་ན། དེ་དག་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། གཤིན་རྗེ་འཇིག་རྟེན་ནམ། ཡི་དྭགས་ཀྱི་ཡུལ་ལས་གཞན་པའི་ངན་འགྲོ་རྣམས་སུ་སྐྱེ་བར་མི་འགྱུར་ཏེ། དེ་དག་གཟུངས་འདིའི་མཐུས་ངན་འགྲོ་དེ་དག་ལས་ཐར་བར་འགྱུར་རོ། །ཞེས་སོ། །

ཡང་། སྔོན་གྱི་ཚེ་མི་ཤི་ཚེ་མྱ་ངན་ནམ་འདུན་བྱེད་སྟངས་ནི། ཐང་ཧྲུའུ་ལས། ཕ་མ་ཤི་ཚེ། སྐྲ་འབྲེག གདོང་ལ་ཚོས་ནག་པོ་འབྱུག གྱོན་པའང་ནག་པོ་བྱེད། དུར་དུ་སྦས་ཟིན་ན་འདུན་ཀྱང་གྲོལ་ཞེས་ཟུར་ཙམ་གསལ་ལོ། །དེང་སང་ཡུལ་ལུང་སོ་སོ་ན་འཇིག་རྟེན་མི་ཆོས་དང་བསྟུན་ཏེ་སྣ་ཚོགས་ཡོད་ཀྱང་། འདིར་ཉུང་ཙམ་སྨྲོས་ན། རང་གི་ཕ་མའམ་གཉེན་ཉེ་གང་རུང་ཞིག་ཚེ་ལས་འདས་ན། ལུས་ངག་གི་སྤྱོད་ལམ་ཐོག་མྱ་ངན་བྱེད་སྟངས་སྣ་ཚོགས་ཡོད། མྱ་ངན་བྱེད་པ་དེ་ལ་འདུན་ཟེར་ལ། ཞེ་དགུའི་ནང་སྐྲ་དང་སྨྲ་ར་ཁ་སྤུ་སོགས་མི་བཞར་བ་དང་། རྒྱན་ཆ་སོགས་མི་འདོགས། བུད་མེད་ཀྱིས་སྐྲ་མི་གཤད་ཅིང་། རྒྱན་ཆ་དཀྲོལ་ལ། ཡུལ་ལ་ལར། སྐྲའི་སྣེ་མོར་བལ་དཀར་འདོགས་པ་དང་། སྐྲ་ལུང་ཕྱིར་སློག་པ་སོགས་ཀྱང་ཡོད། ཕོ་མོ་གཉིས་ཀས་གྱོན་གོས་རྙིང་ཧྲུལ་གྱོན་ལ། སྐ་རགས་མདུན་དུ་བཅིངས་པ་ཡིན། ལོ་གཅིག་གི་ནང་གླུ་གར་སོགས་མི་རྩེ་བར་མ་ཟད། དུས་སྟོན་འདྲ་མིན་དུ་མི་ཞུགས་ལ། ཁང་བའི་དུད་པའང་མི་ལེན་པ་སོགས་ཡུལ་ཁམས་སོ་སོར་འདུན་བྱེད་ཚུལ་མི་འདྲ་བ་སྣ་ཚོགས་ཡོད།

ཡང་། བླ་མ་དགེ་བའི་བཤེས་གཉེན་སོགས་ཡིན་ན། གཙུག་ལག་ཁང་ལ་དཀར་རྩི་མི་བྱུགས་པ་དང་། དར་ལྕོག་ཕབ་པ། གསེར་ཏོག་དང་རྒྱལ་མཚན་རས་ཀྱིས་བཏུམས་པ་སོགས་བྱེད་ཀྱིན་ཡོད། འོན་ཀྱང་། རབ་བྱུང་བས་མྱ་ངན་གྱི་ཚེ་སྐྲ་འཇོག་པ་སོགས་མི་རུང་སྟེ། མཁས་གྲུབ་དགེ་ལེགས་དཔལ་བཟང་གིས་རྗེ་ཐམས་ཅད་མཁྱེན་པའི་དགོངས་རྫོགས་ལ། དབུས་གཙང་གི་དགེ་འདུན་གྱི་སྡེ་ཆེན་པོ་དུ་མར་ཡང་། མང་ཇ་དང་འབུལ་ནོད་ཕུན་སུམ་ཚོགས་པ་རྒྱ་ཆེར་འགྲུས་ཤིང་དེ་ཡང་ཕྱིས་ཀྱི་རབ་ཏུ་བྱུང་བ་དག་ལ། མཁན་པོ་དང་སློབ་དཔོན་དང་། བླ་མ་དག་འདས་པ་ན། ཐོས་བསམ་སྒོམ་པ་དང་། ཆོས་འཆད་ཉན་ལ་སོགས་པ་དགེ་བའི་སྦྱོར་བ་དག་རྒྱུན་བཅད་དེ། སྐྲ་ཚད་ལས་ལྷག་པར་འཇོག་པ་དང་། གོས་བསྒྱུར་བ་དང་། གཙུག་ལག་ཁང་གི་བ་དན་སྡུད་པ་ལ་སོགས་པ། གྲོང་བའི་ཆོས་ལུགས་དག་ཡོངས་སུ་གྲགས་མོད་ཀྱི། བདག་ཅག་རྣམས་ཀྱིས་ནི་རྗེ་ཉིད་ཀྱི་ཐུགས་ཀྱི་དགོངས་པ་དང་མཐུན་པར་གྲོང་བའི་ཆོས་ལུགས་དེ་དག་རིང་དུ་སྤངས་ཏེ། འདུ་བྱེད་ཐམས་ཅད་ཀྱི་མཚན་ཉིད་ནི་འདི་འདྲའོ་སྙམ་དུ་སྐྱོ་བར་འགྱུར་བའི་མཚན་མ་ཡིད་ལ་བྱེད་པས། སླར་ཡང་འོད་ཀྱི་མཚན་མར་ལོ་གཉིས་ཀྱི་བྱ་བ་ལ་ཞུགས་པར་གྱུར་ཏོ། །ཞེས་གསུངས་པ་ལ་དམ་པ་ལྷ་ཆོས་དང་བསྟུན་ན་གོ་རྒྱུ་ཆེན་པོ་ཡོད་དོ། །

༥ བེམ་པོ་སྐྱེལ་སྟངས། མི་གྲོངས་རྗེས་སྐར་མཁན་གྱི་སར་གཏུགས་ཏེ། སྐར་ཆོས་དང་། ཕུད་སྐར། འགྲུབ་སྐར་རྣམས་གཏན་ཁེལ་བྱས་རྗེས། གཟའ་སྐར་ངན་ན་སྐར་བཅོས་བྱ་ལ། དཔེར་ན། ཕུང་བོ་སྐྱེལ་སྐབས་ཁ་བ་བབས་ན། དུར་ལམ་ཁ་བས་བཅད་ཅེས་ཁྱིམ་ཚང་ལ་གོད་ཆག་འབྱུང་ཉེན་ཡོད་པས། གླུད་རྫོང་དང་བགེགས་བསྐྲད། བཟློག་བསྒྱུར་སོགས་ཀྱི་རིམ་འགྲོས་འཐུས་པར་བྱས་ནས། རུ་སྡེ་ཚང་མ་འཛོམས་ནས་མ་ཎི་དབྱངས་རྟ་དང་བཅས་ཏེ། དུར་དུ་སྐྱེལ་བ་ཡིན་ལ། བེམ་པོ་སྐྱེལ་དུས་སྨེ་སྔགས་བཏོན་ན་གཤིན་པོ་ལ་གནོད་པ་ཡིན་ཏེ། གླིང་བཟའ་ཆོས་སྒྲོན་གྱི་རྣམ་ཐར་ལས། ངུས་པའི་མཆི་མ་རྣམས་རྣག་ཁྲག་གི་ཆར་དུ་འབེབས་པ། གསུངས་པ་ལྟར་བར་དོ་བ་རླུང་ལ་བརྟེན་ནས་རྒྱུ་བ་ཡིན་པས། ངུ་ངག་འདོན་པ་སོགས་གནོད་བྱེད་དུ་འགྲོའོ། །

སྐྱེལ་སྟངས་ལ་འཚོ་གནས་ཀྱི་སྟབས་བདེ་ཁྱད་ཀྱི་ཅུང་ཟད་མི་འདྲ་བར་སྣང་སྟེ། སྐྱེས་བུ་དམ་པ་རྣམས་ཁྱོགས་ཀྱི་ནང་ཆོས་གོས་རྣམ་གསུམ་གྱིས་གཡོགས་ཏེ་ཁ་དར་སྒྲོན་ནས་སྐྱེལ་བ་དང་། གྲོང་མི་ཕལ་བ་རྣམས། བེམ་པོ་གཡག་ཏུ་འགེལ་བ་དང་། ཁྱོགས་ཀྱི་སྟེང་ལ་གདན་དཀར་བཏིང་སྟེ། མི་བཞིས་ཕྲག་པར་འཁུར་ནས། གཞན་ཀྱིས་གཡས་གཡོན་ནས་སྐྱོར་ཏེ་འགྲོ་བ་ཡིན། ཁྱིམ་ནས་བེམ་པོ་ཁ་ནང་དུ་བསྐོར་ཏེ་འཁྱེར་བ་དང་། ཕྱི་ནས་འགྱོགས་ཤིང་གོ་ལྡོག་སྟེ་འཁྱེར་བ་ཡིན། དེས་ནི་རྣམ་ཤེས་ཀྱིས་རང་ཁྱིམ་གྱི་མི་དང་རྒྱུ་ནོར་སོགས་ལ་མི་ཆགས་པར། ཡོད་ཚད་བློས་བཏང་བ་མཚོན། སྐྱེལ་མི་རྣམས་ཁ་ཕྱིར་མི་འཁོར་ལ། ངལ་གསོ་འང་མི་རྒྱག་པ་ཡིན། སྦྱིན་སྲེག་གམ་གཟན་བསྒྱུར་གྲུབ་རྗེས། ཕྱིར་ཁྱིམ་དུ་ཡ་བྱས་ཏེ་ལོག་པ་དང་། སྒོའི་ཕྱི་རོལ་གྱི་མེ་བསྒོངས་སྟེང་འགོམ་སྟེ། ཆུ་དཀར་གྱིས་ལག་པ་བཀྲུས་ནས་རྡོ་སྲེག་གི་སྟེང་དུ་ལག་ཆུ་འཛར་སྲོལ་ཡོད། དབུས་གཙང་ཁུལ་དུ་ཕུང་སྐྱེལ་བ་རྣམས་ཉིན་དེར་ཁྱིམ་ལ་མི་ཡོང་བར། གཞན་དུ་གནས་ཚང་གཡར་ནས་འདུག་སྲོལ་ཡང་ཡོད།

༦ གཤིན་པོ་ཕན་བྱེད་ཀྱི་དགེ་རྩ་གསུམ། བར་དོ་བ་དེ་ལས་ཀྱི་རླུང་གིས་བདས་ནས། གར་སྐྱེས་དང་བདེ་སྡིག་གི་གདམ་ག་བྲལ་བ་ལ། ཤུལ་ན་མཆིས་པའི་ཉེ་འབྲེལ་རྣམས་དགེ་བ་སྒྲུབ་ཅིང་། དགེ་རྩ་བསྔོས་ན་ཕན་ཆེ་སྟེ། དཔེར་ན། ཆུས་འཁྱེར་བ་སྐམ་ས་ན་ཡོད་པའི་མིས་བཏོན་པ་ལྟ་བུ་ཡིན། ཇོ་བོའི་ཞལ་ལས། མི་ཤི་བ་དེའི་མིང་མ་སྟོར་གྱི་བར་དུ་དགེ་བ་བྱས་ཤིང་བསྔོས་ན་ཕན་གསུངས་ལ། ཕ་བཟང་གི་བུ་ཞིག་ཡིན་ན། ལོ་རེ་བཞིན་ཕ་མ་སོགས་ཤི་སྐར་ལ་དུས་རན་ཞེས་རྩིས་མཐོང་གནང་སྟེ། ལྷ་དང་བླ་མ་ལ་མཆོད་པ་དང་། དགེ་འདུན་སྤྱན་དྲངས་ནས་དགེ་སྒྲུབ་གནང་བ་ཡིན། དེ་ལྟར་མ་བྱུང་ན། བུ་ངན་པས་ཕ་མའི་ཤི་སྐར་མི་ཤེས། ཞེས་འཕྱ་སྨོད་བྱེད་པ་ཡིན། དེ་ཡང་། སུ་ཐོད་ཐོད་ཀྱིས་དགེ་རྩ་བསྒྲུབས་ཤིང་བསྔོས་ན་མི་ཕན་སྟེ། རིགས་རྒྱུད་དང་། ལོངས་སྤྱོད་གཅིག་པ། ཆོས་ཀྱི་འབྲེལ་བ་གསུམ་མོ། །དེ་ལྟར་འབྲེལ་བ་གསུམ་དང་ལྡན་ན། ཆུ་ཆེན་ལ་བརྒལ་བའི་ཚེ་སྦྲེལ་ཐག་ཡོད་པ་དང་འདྲ་སྟེ། གཅིག་ཆུར་ནུབ་ཀྱང་གཅིག་གིས་འདྲོངས་ལ། སྦྲེལ་ཐག་མེད་ན་མི་འདྲོངས་པ་ལྟ་བུ་ཡིན།

༡ རིགས་རྒྱུད་དང་འབྲེལ་བའི་དགེ་རྩ་བྱས་ཤིང་བསྔོས་ན་ཕན་པ་ནི། ཇོ་བོའི་ཞལ་ལས། ད་ལྟའི་ལྡོང་གི་རྒྱངས་ལ་སོགས་པའི་དོན་དུ། ད་ལྟའི་ལྡོང་སྟོན་གྱི་མི་འདི་རྣམས་ཀྱིས་དགེ་བ་བྱས་ཤིང་བསྔོས་ན་ཕན་པར་གསུངས་པ་དང་། བཅོམ་ལྡན་འདས་ལ་ཡངས་པ་ཅན་གྱི་མི་རྣམས་ཀྱིས་ཆོས་སྟོན་འདྲེན་སྐབས། ཡངས་པ་ཅན་པའི་ཕ་མེས་མང་བོ་ཡི་དྭགས་སུ་སྐྱེས་པ་རྣམས་ཀྱིས། བཅོམ་ལྡན་འདས་ལ་དགེ་རྩ་དེ་བདག་ཅག་ལ་བསྔོ་བར་ཞུས་པས། དེར་བསྔོས་པས་ཡི་དྭགས་རྣམས་སྐྱེ་བ་འཕོས་ནས་ལྷར་སྐྱེས་པ་ལྟར་རོ། །

༢ ཡོ་བྱད་དམ་ལོངས་སྤྱོད་འབྲེལ་བས་ཕན་ཐོགས་ཚུལ་ནི། འབྲོམ་སྟོན་གྱི་ཞལ་ལས། རྭ་སྒྲེང་གི་དགེ་བསྙེན་ཀུན་ལ། ཡེ། ཁྱེད་རང་ཀུན་ཡོ་བྱད་བསྲེ་དང། གཅིག་ཤི་ཙ་ན་གཅིག་གིས་དགེ་བ་བྱས་ནས་བསྔོས་ན་ཕན་གྱིས། དེ་ཙུག་མེད་ན་བྱེད་མཁན་སོ་སོའི་དགེ་བར་འགྱུར་གསུངས་སོ། །

༣ ཆོས་ཀྱི་འབྲེལ་བའི་ཕན་ཐོགས་ཚུལ་ནི། འཕགས་པ་རྣ་བ་བྱེ་བ་རིས། ཉི་ཚེ་བའི་སེམས་ཅན་དམྱལ་བའི་གནས་སུ་ཕྱིན་སྐབས། སྐྱེ་བ་སྔོན་འཕགས་པ་ཀ་ཏ་ཡ་ན་ལ་ཆོས་འབྲེལ་མཆིས་པའི་ཉི་ཚེ་བའི་དམྱལ་བ་སྐོར་ཞིག་གིས། རྣ་བ་བྱེ་བ་རིར་འཕྲིན་བགྱིས་ཏེ། འཕགས་པ་ཀ་ཏ་ཡ་ནར་ཡོ་བྱད་ཀྱི་འབྲེལ་བཞག་ནས། དགེ་རྩ་བསྔོར་བཅུག་པས། དམྱལ་བ་ལས་ཐར་བའི་ལོ་རྒྱུས་ཡོད་པ་དང་། དགེ་སློབ་གྱིས་དགེ་རྩ་བསྔོ་རེས་བྱས་ན་ཡང་འགྲུབ། དེར་མ་ཟད། མི་ལ་གངས་ལ་ཕྱི་ན་སྒོམ་སྒྲུབ་གནང་ཚེ། ཉིན་ཞག་བཅོ་བརྒྱད་ལ་ཁ་བ་བབས་པས། ཟླ་དྲུག་ལ་ཟ་མ་ཆད། སློབ་འབངས་རྣམས་ཀྱིས་རྗེ་བཙུན་གྲོངས་ཐག་བཅད་དེ། དགོངས་རྫོགས་བསྒྲུབས། ཁ་བ་འབབ་མཚམས་ཆད་དེ་ཁོང་གི་སྐུ་གདུང་གདན་འདྲེན་དུ་ཕྱིན་དུས། མི་ལ་སྔར་ལས་སྐུ་མདངས་རྒྱས་པར་མཐོང་ཚེ། དགོངས་རྫོགས་ཀྱིས་བར་དོ་ཕན་པའི་ཚུལ་གསུངས་པ། མི་ལའི་རྣམ་མགུར་ལས། གཤེན་རྡོར་མས་ཞུས་པ། རྗེ་བཙུན་ན་ནིང་ལས་ཀྱང་སྐུ་མདངས་ཤིན་ཏུ་བཟང་བར་གདའ་བ། ལམ་སྒོ་གཉིས་ནི་ཁ་བས་ཆོད་དེ། མིའི་ཞབས་ཏོག་ནི་མེད། ལྷ་འདྲེའི་ཞབས་ཏོག་བགྱིས་སམ། རི་དྭགས་ཀྱི་ཐེད་རོ་འདྲ་རྙེད་པ་ལགས་སམ། ཇི་ལྟར་ལགས་ཞུས་པས། རྗེ་བཙུན་གྱི་ཞལ་ནས། ང་ཕལ་ཆེར་ཏིང་ངེ་འཛིན་ལ་འབྱམས་ནས་ཟས་ཟ་མ་དགོས། དུས་བཟང་གི་ཚེ་མཁའ་འགྲོ་རྣམས་ཀྱིས། ཚོགས་ཀྱི་འཁོར་ལོའི་སྐལ་བ་ཡང་བསྐྱལ། རེས་ཕྱེ་ཐུར་མགོ་ཙམ་རེ་འགམས། ཁྱད་པར་ཁ་སང་། རྟའི་ཟླ་བའི་སྨད་ལ་ཁྱེད་བུ་སློབ་རྣམས་ཀྱིས། ངའི་མཐའ་འཁོར་ནས་བཟའ་བཏུང་མང་བོ་དྲངས་པའི་ཉམས་ཤིག་ཤར་བ་ལས། ཞག་མང་བོའི་བར་དུ་ཟ་མ་ཟ་སྙིང་ཡེ་མི་འདོད་པ་ཞིག་བྱུང་། དེ་དུས་ཁྱེད་རྣམས་ཀྱིས་ཅི་བྱས་པ་ཡིན་གསུངས། དེར་ཁོང་རྣམས་ཀྱིས་དུས་བརྩིས་པས་ཐུགས་དགོངས་རྫོགས་ཐབས་ཀྱི་མཆོད་པ་ཕུལ་བ་དང་། དུས་མཚུངས་སུ་འདུག་ཚུལ་ཞིབ་རྒྱས་ཕུལ་བས། རྗེ་བཙུན་གྱི་ཞལ་ནས་འཇིག་རྟེན་པ་རྣམས་ཀྱི་དགེ་རྩ་བགྱིས་པ་བར་དོར་ཕན་པར་འདུག་སྟེ། དེ་བས་ཀྱང་ད་ལྟ་བར་དོ་གཅོད་པ་སྟོབས་ཆེ། གསུངས་པ་ལྟ་བུ། དེ་ལྟར་འབྲེལ་བ་གསུམ་གང་རུང་མི་ལྡན་པར་དགེ་རྩ་བསྔོས་ན། བྱེད་མཁན་གྱི་དགེ་བར་འགྱུར་རོ། །ཅིའི་ཕྱིར་ན་སངས་རྒྱས་ཀྱི་ཐུགས་རྗེ་ལ་ཕྱོགས་སུ་མ་ལྷུང་ཡང་། སེམས་ཅན་ཁ་ཅིག་ནི་ཐུལ། ཁ་ཅིག་ནི་མི་ཐུལ་བ་ཡང་། སྔོན་གྱི་ལས་འབྲེལ་མེད་པའི་སྐྱོན་ཡིན། ཡང་། སངས་རྒྱས་ཀྱི་མི་ཐུལ་བ་འཁོར་གྱིས་ཐུལ་བ་ཡང་། སྔོན་གྱི་ལས་འབྲེལ་གྱི་སྟོབས་ཡིན་ནོ། །

 

 

ལེའུ་བརྒྱད་པ། མོ་རྒྱག་སྟངས་སྐོར།
མོ་འདེབས།

མོ་འདེབས་ཀྱི་ཁུངས་ནི། གདོད་མ་ནས་རང་ཅག་བོད་ཀྱི་འཚོ་བའི་ཁྲོད་མོ་འདེབས་སྲོལ་འདིས་རིག་གནས་ཀྱི་གྲུབ་ཆ་གལ་ཆེན་ཞིག་བཟུང་ཡོད། ཐང་ཡིག་ལས་ཀྱང་ལུགས་ལ་འདྲེ་དང་མོ་མ་གཙིགས་སུ་ཆེ་ཞེས་པ་ལས་ཀྱང་ཤེས། སྤྱིར་ན། མོ་ལ་རྣམ་གྲངས་མི་འདྲ་མང་ཡང་། མདོར་དྲིལ་ན། ད་ལྟ་རང་ཅག་གི་བླ་མའམ་གྲུབ་ཐོབ་ཡིན་ཟེར་སྐད་ཚོས། ཤོ་མོ་འམ་ཕྲེང་བ་བཅད་དེ་མོ་འདེབས་པ་འདིའི་ཁུངས་གཏུགས་ས་ནི། དབང་གསུངས་དུས་བླ་མས་སློབ་མ་དཀྱིལ་འཁོར་ལ་གཞུག་པའི་སྐབས་སུ་མེ་ཏོག་དང་། སྟ་གོན་གྱི་སྐབས་སུ་སོ་ཤིང་འདོར་བ་འདི་ཉིད་ཡིན་ཏེ། སྟོད་འགྲེལ་ལས། དེ་ནས་མེ་ཏོག་གི་ཕྲེང་བ་དེ་དོར་ཞིང་ཞེས་བྱ་བ་ནི། ཕྲེང་བ་ཕུལ་བས་ལྷ་རྣམས་ཀྱིས་ཡོངས་སུ་བཟུང་བར་གྱུར་ན་འདིའི་དངོས་གྲུབ་རབ་འབྲིང་ཐ་མ་ཡོངས་སུ་རྫོགས་པར་འགྱུར་བའི་ཕྱིར་ཏེ། གསུངས་པ་ལྟར། རེ་ཁཱའི་ནང་དུ་མེ་ཏོག་ལྷུང་བ་དང་བསྟུན་ནས་རིགས་བརྟག་པ་དང་། ཡང་ན། དཀྱིལ་འཁོར་ན་ལྷའི་དཀྱིལ་འཁོར་ཡོད་ན་ལྷའི་མཛོད་སྤུ་འམ། དབུ་འམ། གཙུག་ཏོར་ལ་ལྷུང་ན་ཕྱག་ཆེན་དང་། སྤྱན་ནམ་ཞལ་ལ་ནི་སྔགས་ཀྱི་དངོས་གྲུབ་དང་། ལུས་སྟོད་དང་། བར་དང་། སྨད་ལ་དངོས་གྲུབ་མཆོག་འབྲིང་དམན་པ་འཐོབ་པར་འགྱུར་བ་འདི་དང་། ཡང་། སྟ་གོན་གྱི་སྐབས་སུ། གྲུ་བཞིའི་ཚད་གྱི་གྲུ་གཞིའི་དཀྱིལ་འཁོར་ལྕི་བ་ལ་སོགས་པའི་བྱུང་པའི་ནང་དུ། པདྨ་འདབ་བརྒྱད་བྲིས་ཏེ་མེ་ཏོག་གི་ཚོམ་བུ་བཀོད་པའི་སྟེང་དུ། ཨ་ཤྭད་ཐ་ཤིང་རབ་དང་། མི་རྙེད་ན་འོ་མ་ཅན་གྱི་ཤིང་ཕྲ་སྦོམ་རན་པ་སྲོག་ཆགས་དང་རྨ་མེད་པ། མགོ་མཇུག་མཉམ་པ། དྲི་བཟང་དང་བདུག་སྤོས་ཀྱིས་བྱུགས་པ་སོར་བཅུ་གཉིས་ཅན། རྩེ་མོར་མེ་ཏོག་གིས་བཅིངས་པ། དོར་བའི་ལྟས་ལ། ཤར་བྱང་ནུབ་ལྷོ་སྟེང་འོག་ཏུ། རྩེ་མོ་མེ་ཏོག་གི་འཆང་དེ་གང་དུ་ཕྱོགས་ན།       རིམ་པ་བཞིན། ཞི་རྒྱས་དབང་དྲག་དང་། རིག་འཛིན་དང། ས་འོག་གི་དངོས་གྲུབ་འགྲུབ་ཅིང་། ཕྱི་རོལ་དུ་ལྷུང་ན་དངོས་གྲུབ་མེད་པར་གསུངས་པ་འདི།     ནང་བསྟན་ཆོས་ལུགས་ཀྱི་མོ་འདེབས་པའི་ཁུངས་སོ། །

ཡང་། ཀློང་ཆེན་ཆོས་དབྱིངས་སྟོབས་ལྡན་གྱིས་ཤཱ་རིའི་བུས་མཛད་པའི་མོ་ལྟས་མཚན་མ་བརྒྱད་པ་ཞེས་པ་ཞིག་ཀྱང་ཡོད་པར་གསུངས་ཡོད་ལ། དེ་བདེན་མཆི་ན་དེ་ཡང་མོའི་ཁུངས་སུ་གཙིགས་སམ་སྙམ་མོ། །མོ་འདེབས་ཚེ་ཡང་། ཀློང་ཆེན་པས། ཕྱི་ནང་གི་རྟེན་འབྲེལ་གང་ཤར་བ་དང་། རྣལ་འབྱོར་བའི་སེམས་ལ་ལེགས་ཉེས་གང་ཡིན་འཆར་བ་དུས་དེ་ཉིད་དུ་ཐེ་ཚོམ་མེད་པར་བཟང་ངན་གང་ཤར་ཡང་ཐག་རྦད་ཀྱིས་གཅོད་པ་གནད་ཡིན་པས། ཡིད་གཉིས་ཐེ་ཚོམ་ཞུགས་ན་འཆོལ་བར་འགྱུར་བས། རིག་པ་ལ་ཧུར། ཤེས་པ་ལ་ཁྲོལ། དབང་བོ་ལ་གཟིངས་ཕྱུང་སྟེ་ཐག་བཅད་དོ། །གསུངས་སོ། །

ཡང་། གབ་ཙེ་སུམ་ཅུ་སོ་བཞིའི་མོ་དཔེ་བྱ་བའི་དཔེ་འཁྱར་ཞིག་ལས། འཕགས་པ་འཇམ་དཔལ་རི་བོ་རྩེ་ལྔ་ནས། ཟབ་མོ་སྣང་བ་ཞེས་བྱ་བའི་ཏིང་ངེ་འཛིན་ལ་བཞུགས་ཏེ། སྐུ་ལས་ཀོང་ཙེ་འཕྲུལ་གྱི་རྒྱལ་བོ་དང་། གསུང་ལས་རྒྱའི་སྨྲར་ཆུར་སྤྲུལ། ཐུགས་ལས་གནོད་སྦྱིན་དུང་ལྷ་དཀར་བོར་སྤྲུལ། དེ་ནས་སྤྲུལ་བ་དེ་གསུམ་ལ་མོའི་ལྷ་བགྱིས་ཏེ། འགྲོ་དོན་བྱེད་དགོས་པར་བཀའ་བསྩལ་ནས། མོ་འདེབས་ལུགས། མོ་ལྷ་བདར་ཚུལ། མོ་རྡེའུ་སོ་བཞི་འབབ་ཚུལ། མོ་འབྲས་སོགས་ཕོག་ནས་མོ་འདེབས་ཚུལ་སོགས་བཤད་ཀྱང་། དེ་ནི་མདོ་རྒྱུད་ཀྱི་ཁུངས་ལུང་མེད་པས། ཡིད་རྟོན་དཀའ་བ་དང་།

གཞན་ཡང་། བོན་ལ་མོ་རིགས་མང་དུ་ཡོད་ཀྱང་ཀུན་གྱི་རྩ་བའམ་ཕྱི་མོར་གྱུར་པ་ནི་ཡེ་སྲིད་འཕྲུལ་གྱི་ཇུ་ཐིག་ཏུ་གྲགས་པ་འདི་ཉིད་ཡིན་པར་བཤད་ལ། དེ་ཡང་དང་པོ་སྟོན་པ་གཤེན་རབ་མི་ཆེ་ལ་སྐལ་ལྡན་ཕྱཱ་གཤེན་ལེགས་རྒྱལ་ཐང་པོ་སོགས་ཀྱིས་ཞུས་པས་སྟོན་པ་གཤེན་རབ་ཀྱིས་བསྟན་པར་གྲགས། དབྱེ་བ་ལ་རྩ་བའི་ཆ་ནས་ཡེ་སྲིད་འཕྲུལ་གྱི་ཇུ་ཐིག ཡེ་མཁྱེན་སྒྲ་བླའི་མངོན་ཤེས﹙འདི་ནི་ཐུགས་ཀར་སྒྲ་ལྷ་དང་ཝེར་མའི་ལྷ་ཚོགས་སྒྲུབ་སྟེ་པྲ་རྟགས་ལ་དཔྱད་པ་ཞིག﹚། ཡེ་རྗེ་སྨོན་པའི་རྨི་ལམ། ཡེ་དབང་ལྷ་ཡི་བཀའ་བབས﹙འདི་ནི་གསོན་གྱི་འདྲེ་གདོན་ཁོག་ཏུ་ཞུགས་པ་འམ་དེས་བྱིན་གྱིས་བརླབས་པ་ལ་མི་ལྟོས་པར་ཡེ་དབང་ལྷ་ཡི་བྱིན་གྱིས་བརླབས་པ་ལ་བརྟེན་ནས་གང་ཟག་གིས་ལུང་དུ་བསྟན་པ་རྣམས་ཡིན﹚ཏེ་བཞི་རུ་འདུ་ཞིང་། དེ་ལས་འཕྲོས་ནས། མོའི་རྣམ་དབྱེ་འམ་ཇུ་ཐིག་གི་གཞུང་དོན་སྟོན་པའི་བསྟན་བཅོས་ཀྱང་མང་པོ་ཡོད་པ། དཔེར་ན། དཔྱད་དོན་སྒྱུ་མ་གསེར་འབུམ། གཏེར་མོ་རིག་པའི་ཁོང་བསྡོང་། བྲམ་ཟེ་གོང་རུལ། བྲམ་ཟེ་ཀླུ་ཡི་བེར་ནག མ་སངས་འཁོར་ལོ་མདོ་ཆེན། འཁྲུག་པའི་སྟོང་ཐུན་དམར་པོ། ནད་མོ་རིག་པའི་མདོ་བདུན། ཏི་ཚང་གཡི་སྒྲོན་གྱི་མན་ངག ཇུ་ཐིག་སྲིད་པའི་རྒྱུད་འབུམ། ཁོག་ཆེན་འཕྲུལ་གྱི་རྒྱལ་པོ། མ་སངས་ཐི་གུ་རང་སྨྲ། མི་སྡེ་སྲིད་པའི་གཞི་འབུམ་སོགས་ཡོད་དོ། །

མོ་རྩིས་གཏོ་དཔྱད་བཞི་ལས་མོ་འདི་སྔ་ཞིང་གཏན་ལ་བབས་ཚུལ་བོན་གྱི་མདོ་ལས་འདི་ལྟར་བཤད་ཡོད་དེ། མོ་རྩིས་གཏོ་དཔྱད་བཞི་བོ་ལས། །ཀུན་གྱི་ཐོག་མར་མོ་ཡི་སྔ། །ཡེ་སྲིད་འཕྲུལ་གྱི་རྒྱལ་བོ་དང་། །ཀུན་ཤེས་འཕྲུལ་གྱི་དྲང་མཁན་གཉིས། །མངོན་ཤེས་ཕྭའུ་གཡང་དཀར་གསུམ། །སྲིད་པའི་པྲ་ལྟས་གཏན་ལ་བབ། །བདེན་རྫུན་ལས་ཀྱི་དྲང་ཤན་ཕྱེས། །མཐོང་དང་མི་མཐོང་བརྟག་ཚད་བབ། །ཞེས་སོ། །དེ་ལས་གཞན། ཏུན་ཧོང་ནས་ཐོན་པའི་མོ་ཡིག་ལ། བྲིས་མ་མི་འདྲ་བ་ཁག་གསུམ་ཡོད་ལ། ཧྥ་རན་སིར་ཉར་ཚགས་བྱས་པའི་མོ་ཡིག་ཁག་གཉིས་དང་། དབྱིན་ཇིར་ཉར་ཚགས་བྱས་པའི་མོ་ཡིག་ཁག་གཅིག་ཡོད་པ་ལས། ཕྱི་མ་ནི་མགུར་གླུའི་རྣམ་པ་ཅན་གྱི་མོ་ཡིག་ཞིག་ཡིན་ལ། ཞིབ་ཏུ་འགོད་པར་ཡིག་ཚོགས་མངས་སུ་འཇིགས་ནས་མ་སྤྲོས་སོ། །

མ་ཎི་ཡིག་དྲུག་གི་མོ།

ཕྱིས་ཀྱི་མོ་ཡིག་ལ། ཡི་གེ་དྲུག་མའི་མོ་ཡིག་བླང་དོར་གསལ་མེ། མ་ཎི་ཡིག་དྲུག་གི་མོ་ཡིག་མངོན་མཐོང་མེ་ལོང་། མ་ཎི་ཡིག་དྲུག་གི་མོ་ཡིག་བླང་དོར་འབྱེད་པའི་ལྡེ་མིག དཔལ་ལྡན་དམག་ཟོར་མའི་སྒོ་ནས་རྣོ་མཐོང་སྒྲུབ་ཚུལ། དཔལ་ལྡན་དམག་ཟོར་མའི་ཕྲེང་མོ་གསལ་སྒྲོན། ཐོད་ཕྲེང་སྡེ་ལྔའི་མོ་ཡིག རྟ་མགྲིན་གསང་སྒྲུབ་ཀྱི་ཕྲེང་མོ། ཇོ་བོའི་རྨི་ལམ་དུ་ཤར་བའི་མོ།     དམ་ཅན་ཤོ་མོ། ཡུལ་ལྷའི་མེ་ལོང་སོགས་མང་བོ་ཡོད་ཀྱང་། དེ་དག་གི་སྔ་ཤོས་ནི་ཐུགས་རྗེ་ཆེན་པོའི་ཤོ་མོ་འདི་ཡིན། དེ་ནི་ལྷ་ཐུགས་རྗེ་ཆེན་པོས། རྒྱལ་བོ་སྲོང་བཙན་ལ་བསྟན་པ་ཡིན་པས། ལོ་ངོ་ཆིག་སྟོང་སུམ་བརྒྱ་ལྷག་གི་སྔོན་ནས་དར་བ་ཡིན།

དེ་ཡང་མོ་ཡིག་ན་གསལ་བ་ལྟར། དུང་ཤོ་གྲུ་བཞིའི་སྟེང་འོག་ཕྱོགས་བཞི་ལ། ཨོཾ་ཡིག་ལ་སོགས་པའི་ཡིག་དྲུག་བཀོད་པའམ་རྡེའུ་སྔོན་ལྔ་དང་དཀར་བོ་གཅིག ཕྲེང་བ་སོགས་མདུད་བྱས་ལ། རས་དཀར་དྲི་མེད་ཀྱི་སྟེང་དུ་དེ་དག་བཞག་ནས། ལྷ་ཐུགས་རྗེ་ཆེན་པོ་ལ་དམིགས་ཏེ་གསོལ་བ་རྩེ་གཅིག་ཏུ་བཏབ་ནས། ཕྱོགས་བཅུའི་རྒྱལ་བ་སྲས་བཅས་ཀྱིས་རང་གི་ཐུགས་རྒྱུད་བསྐུལ་ནས། མངོན་ཤེས་གསལ་ཅན་ཐམས་ཅད་འོད་དང་བདུད་རྩིའི་རྣམ་པར་བསྡུས་ནས། དམིགས་རྟེན་རྡེའུ་འམ་ཕྲེང་བ་ལ་སིབ་སིབ་ཐིམ་པར་བསམ་སྟེ། ཐུགས་རྗེ་ཆེན་པོ་དཔང་དུ་བཞག་སྟེ།       དེའི་བྱིན་རླབས་ལ་བརྟེན་ནས་ཤོ་རྡེའུ་ལ་ཕུ་བཏབ་ནས། བདེན་པ་བདར་ཞིང་། དཔྲལ་པར་འཁྱེར་ཏེ་འཕངས་པས། དོན་དྲུག་གང་ཁེལ་བར་བལྟ་བ་སྟེ། ཨོཾ་བབས་དུང་གི་རི་བོ་ལ། །གཡོ་འགུལ་མེད་ཅིང་ཤིན་ཏུ་བརྟན། །ལྷ་ངོ་དགུང་ལས་མཐོ་བའི་མོ། །ལྷ་ཆེན་ཚངས་པའི་མོ་ལྷ་ཡིན། །མ་བབས་ཉི་མའི་དཀྱིལ་འཁོར་ཡིན། །འོད་ཀྱིས་མུན་པ་སེལ་ནའང་། །དགྲ་གཅན་གདོང་དང་སྤྲིན་ནག་གིས། །གློ་བུར་གོས་ན་དགེ་བ་ཆུང་། །གནམ་བསྐོས་རྒྱལ་བོའི་མོ་ལྷ་ཡིན། །འོན་ཀྱང་ལྷ་ངོ་ཅུང་ཟད་དམའ། །བསང་དང་གསོལ་ཁ་བྱས་ན་ལེགས། །ཎི་བབས་གཡུ་ཡི་ལྗོན་ཤིང་ཡིན། །དྲི་བཟང་འབྲས་བུ་ཁྱབ་པ་མང་། །འཁོར་ལོས་སྒྱུར་རྒྱལ་མོ་ལྷ་ཡིན། །ལྷ་ངོ་ཅུང་ཟད་མཐོ་ན་འང་། །ལྷ་ལ་གསོལ་ཁ་ཆག་པའི་མོ། །སྲུང་མ་མཆོད་དང་གསོལ་ཁ་བྱ། །སྡེ་བརྒྱད་བརྔན་དང་རླུང་རྟ་ཚུགས། །པད་བབས་རྒྱ་མཚོ་ཆེན་པོ་ཡིན། །རྦ་རླབས་ཀུན་ནས་གཡོ་བར་འགྱུར། །སྲིན་པོའི་རྒྱལ་བོའི་མོ་ལྷ་ཡིན། །ཁྱོད་ཀྱི་ལྷ་ངོ་ཤིན་ཏུ་དམའ། །ལྷ་སྲུང་མནོལ་བཙོག་ཤོར་བ་ཡིན། །མྱུར་དུ་ལྷ་སྲུང་འཁྲུགས་པ་ཡིན། །ལྷ་སྲུང་འཁྲུགས་པའི་གཡང་ལྷ་ཉམས། །གཡང་སྒྲུབ་དང་ནི་ལྷ་སྲུང་མཆོད། །མནོལ་བསང་ལྷ་ཆབ་སྔོན་མོ་ཐོན། །དགྲ་སྒྲུབ་དགྲ་མནན་དགྲ་འཆིང་བྱ། །སེང་གདོང་ལ་སོགས་ཚུལ་ལྡན་དགོས། །མེ་བབས་མེ་རི་འཁྲུགས་པ་ཡིན།       །ཆེར་འབར་ཐམས་ཅད་སྲེག་པར་འགྱུར། །ཀླུ་བཙན་རྒྱལ་བོའི་མོ་ལྷ་ཡིན། །ལྷ་ངོ་ཅུད་ཟད་དམའ་བས་ན། །ཁ་ལས་རླུང་རྟ་ཉམས་པའི་མོ། །སྔོན་ལ་ལྷ་སྲུང་བཙན་པོ་མཆོད། །དེང་འདིར་རེ་ཆགས་ཕྲག་དོག་གིས། །མ་བོར་དེ་ལ་མཆོད་བསྟོད་དང་། །བསྐང་བཤགས་འཁྲུགས་བསྐང་ཅི་མང་དགོས། །ཡང་ན་མགྲོན་པོ་ངན་པ་ཞིག། འོང་བས་ཁྱོད་ཀྱི་ལྷ་ཕུག་འཁྲུགས། །མོ་འདྲེ་དགར་དང་དགུ་མདོས་བྱ། །ཧཱུཾ་བབས་སྲ་བརྟན་རྡོ་རྗེ་བྲག། རྡོ་རྗེ་བྲག་ལ་འཕོ་འགྱུར་མེད། །ཁྲི་སྲོང་ལྡེའུ་བཙན་མོ་ལྷ་ཡིན། །ལྷ་ངོ་ལྷུན་པོ་ལས་ཀྱང་མཐོ། །ཞེས་སོགས་སྤྱི་ཁྱབ་ལ་བརྟག་ཚུལ་དང་།  དེ་ལྟར་སྤྱི་བཤད་བྱས་ནས་མོ་གསུམ་འདེབས། མོ་གསུམ་བཏབ་པ་ལས། གསུམ་བཟང་མོའི་ཡང་རྩེ། གཉིས་བཟང་འབྲིང་གི་རབ། གསུམ་ངན་ཐ་ཆད། གཉིས་ངན་འབྲིང་གི་ཐ་མ་སོགས་རྣམ་གྲངས་མི་འདྲ་བ་དུ་མ་ཡོད།     

དེ་ལྟར་ཤོ་རྡེའི་བབས་པ་ལ་བརྟག་ནས། དེ་རེ་རེ་ལ་ཡང་ཆོས་ཕྭ། གཞི་ཕྭ། ནོར་ཕྭ། དོན་ཕྭ། ནད་ཕྭ། གདོན་ཕྭ་སོགས་ཀྱི་བདེན་རྫུན་གྱི་ཤན་འབྱེད་པ་དང། ལེགས་ཉེས་སྐྱིད་སྡུག གནོད་པའི་བགེགས། གདོན་པའི་རྫས། མིའི་ན་ཚ། ཕྱུགས་ཀྱི་གོད་ཁ་དང་དེའི་བཟློག་ཐབས་སོགས་ཀྱི་དཔྱད་འབྲས་ཡིག་དྲུག་གི་མོ་ཡིག་བླང་དོར་གསལ་མེར་གསལ་ལོ། །

ཡིག་དྲུག་མོ་ཡིག་མངོན་མཐོང་མེ་ལོང་།

འདིར་ལག་ལེན་ལ་འཁྱེར་བདེ་ཕྱིར། ཡིག་དྲུག་གི་མོ་ཡིག་མངོན་མཐོང་མེ་ལོང་ཆ་ཚང་བཀོད་ན།

 ༡ སྲོག་ཕྭ་བརྟག་པ། ཨོཾ་བབས་མི་འཆི་ངེས་པ་ཡིན། །མ་བབས་རིམ་གྲོ་མང་སྒྲུབ་བཟང་། །ཎི་བབས་སྨན་དཔྱད་གཟབ་པ་གཙོ། །པད་བབས་འཕྲལ་བདེ་ཕུགས་སུ་བདེ། །མེ་བབས་མི་འཚོ་ངེས་པ་ཡིན། །ཧཱུཾ་བབས་ནད་ཡུན་རིང་བར་འགྱུར། །

༢ ནད་ཕྭ་བརྟག་པ། ཨོཾ་བབས་གདུགས་དཀར་སྒྲོལ་མ་ཐོན། །མ་བབས་དགྲ་རྐུན་ཇག་འཆིང་བྱ། །ཎི་བབས་ནོར་སྒྲུབ་ཀླུ་གཏོར་བྱ། །པད་བབས་གསེར་འོད་གཡང་སྐྱབས་བྱ། །མེ་བབས་རྒྱས་འབྲིང་བསྡུས་གསུམ་འདོན། །ཧཱུཾ་བབས་འདོན་ཆོས་ཅི་འགྲུབ་བྱ། །

༣ དགྲ་ཕྭ་བརྟག་པ། ཨོཾ་བབས་དགྲ་རྐུན་ཅི་ཡང་མེད། །མ་བབས་དོགས་ཟོན་བྱེད་དགོས་ཡོད། །ཎི་བབས་དགྲ་རྐུན་མཚོ་ནས་གཟའ། །པད་བབས་དགྲ་རྐུན་རྒྱུན་དེར་སླེབས། །མེ་བབས་ཇག་རྐུན་ནོར་ལ་མཆི། །ཧཱུཾ་བབས་ཡོད་ཀྱང་བརླག་མི་ནུས། །

༤ དོན་ཕྭ་བརྟག་པ། ཨོཾ་བབས་དོན་ནི་མྱུར་དུ་འགྲུབ། །མ་བབས་འབད་ན་འགྲུབ་པ་ཡིན། །ཎི་བབས་གཞན་དང་བསྡོངས་ན་འགྲུབ། །པད་བབས་འཕྲུལ་དང་ཕུགས་སུ་འབྲིང་། །མེ་བབས་གྱོང་ངོ་དོན་མི་འགྲུབ། །ཧཱུཾ་བབས་རེ་ཞིག་དོན་རྣམས་འགྲུབ། །

༥ མགྲོན་ཕྭ་བརྟག་པ། ཨོཾ་བབས་མགྲོན་པོ་མྱུར་དུ་འོང་། །མ་བབས་སྐད་ཆ་མྱུར་དུ་ཐོས། །ཎི་བབས་ཆས་ནས་ལམ་དུ་ཞུགས། །པད་བབས་ཕྱི་དལ་ཆེ་འོང་ཡོད། །མེ་བབས་མི་འོང་ཐག་གིས་ཆོད། །ཧཱུཾ་བབས་ལམ་གྱི་བཤོལ་སྡོད་ཡིན། །

༦ བོར་ཕྭ་བརྟག་པ། ཨོཾ་བབས་མྱུར་དུ་རྙེད་པ་ཡིན། །མ་བབས་བཙལ་ལུགས་ལེགས་ན་རྙེད། །པད་བབས་དགྲ་ཡིས་འཁྱེར་བ་ཡིན། །མེ་བབས་མི་རྙེད་ཁོ་ཐག་ཡིན། །ཧཱུཾ་བབས་ཞག་འགའ་འགོར་ན་རྙེད། །

༧ རྫས་ཕྭ་བརྟག་པ། ཨོཾ་བབས་ཤར་གྱི་ཕྱོགས་ནས་འོང་། །མ་བབས་ལྷོ་ཡི་ཕྱོགས་ནས་འོང་། །ཎི་བབས་ནུབ་ཀྱི་ཕྱོགས་ནས་འོང་། །པད་བབས་བྱང་གི་ཕྱོགས་ནས་འོང་། །མེ་བབས་ཉེ་བ་བརྒྱུད་དེ་ཡོང་། །ཧཱུཾ་བབས་རང་རང་ཕྱོགས་ནས་ཡོང་། །ཞེས་སོ། །

བོན་གྱི་མོའི་སྐོར་ལ་ཅུང་ཟད་བཤད་པ།

བོན་མོ་ལ། ཕྭ་གཤེན་ཇུ་ཐིག་ཅན་ཞེས་པ་དེ་ཁོ་ན་ཡང་། པྲ་ལྟོས་མོ་དང། སྣང་མཐོང་རྩིས། ནད་གསོ་དཔྱད། འཆི་བསླུ་གཏོ་བཅས་བོན་སྒོ་རྣམ་པ་བཞི་ཡོད་ལ། ཐོག་མར་པྲ་ལྟོས་མོ་ནི། བོན་གྱི་མོ་ཡི་བསྟན་བཅོས་ཡིན་ལ། དེ་ཡང་ཡེ་སྲིད་འཕྲུལ་གྱི་ཇུ་ཐིག ཡེ་མཁྱེན་དགྲ་ལྷའི་མངོན་ཤེས། ཡེ་རྗེ་སྨོན་པའི་རྨི་ལམ། ཡེ་དབང་ལྷ་ཡིས་བཀའ་བབས་སོགས་ཡོད། ཇུ་ཐིག་སྲོལ་བཏོད་པ་པོ་ནི། གཤེན་རབ་མི་བོ་ལ་ཕྭ་གཤེན་ལེགས་རྒྱལ་ཐང་བོ་སོགས་ཀྱིས་ཞུས་ཏེ་བསྟན་པར་གྲགས་ལ།    འཇུ་མི་ཕམ་འཇམ་དབྱངས་རྣམ་རྒྱལ་གྱིས﹙༡༨༤༦ -- ༡༩༡༢﹚ཇུ་ཐིག་གི་ཡིག་ཆ་པོད་ཆེན་བཅུ་གཅིག་ཙམ་དཔྱད་གཞིའི་རྒྱུ་ཆར་བཀོལ་ནས་སྲིད་པ་འཕྲུལ་གྱི་ཇུ་ཐིག་གི་དཔྱད་དོན་སྣང་གསལ་སྒྲོན་མེ﹙མདུད་པ་རྒྱག་ཚུལ་གྱི་རི་མོ་དང་བཅས་དུམ་པ་གཅིག་ཡོད།﹚ལས། ཀུན་ལས་སྔ་བ་མོ་འདི་ནི། །ཞང་ཞུང་ཐང་བོ་ཆེ་ཞེས་པར། །ཁྱུང་ལུང་དངུལ་གྱི་མཁར་ནང་དུ། །སྟོན་པའི་སྐུ་ལས་སྤྲུལ་བ་ཡིན། །འཕྲུལ་གཤེན་ཀུན་ཤེས་ཐང་བོས་བསྟན། །དེ་ནས་རིམ་པར་བརྒྱུད་པ་ཡི། །བཀའ་དང་གཏེར་གྱི་ཚུལ་དུ་བྱུང་། །འགྲོ་བའི་བླང་དོར་མིག་ཏུ་གྱུར། །ཞེས་དང་། ཇུ་ཐིག་གི་མོ་འདི་ལ་རྣམ་གྲངས་ཀྱང་བརྗོད་ལས་འདས་པ་སྟེ། བོན་གྱི་བརྟེན་འགྱུར་ཁྲོད་ཀྱི་ཡེ་སྲིད་འཕྲུལ་གྱི་ཇུ་ཐིག་ལས། མདུད་རྫོང་ཁྲ་མོ་ཀུན་གསལ་འདི། །བསྐལ་བ་དང་བོའི་དུས་ཙམ་ན། །མཁྱེན་རབ་རྡུལ་གྱི་གྲངས་ཙམ་བསྟན། །དེ་ལས་ཉེ་བར་བསྡུས་པ་ནི། །དཀར་ནག་ཁྲ་གསུམ་མོ་མདུད་ལ། །སུམ་བརྒྱ་དྲུག་ཅུར་འདུས་པ་ཙམ། །དེ་ལ་རྒྱག་གི་བསྒྱུར་ཙམ་ན། །བདུན་བརྒྱ་ཉི་ཤུར་འགྱུར་བ་སྟེ། །ཡང་རྒྱག་བརྒྱད་ཁྲི་བཞི་སྟོང་དང་། །བྱེ་བྲག་བྱེ་བ་ཕྲག་བརྒྱ་ཡོད། །སེམས་ཅན་བློ་ལ་ངེས་མེད་ཀྱི། །སྣ་ཚོགས་འཆར་བ་དེ་བཞིན་དུ། །མོ་མདུད་སྣ་ཚོགས་བབས་པ་ལ། །བསམ་གྱིས་མི་ཁྱབ་བརྗོད་མི་ལང་། །ཞེས་གསུངས་པ་དང་། ཡེ་སྲིད་འཕྲུལ་གྱི་ཇུ་ཐིག་འདི་ནི། མོ་འདེབས་ཀུན་ལས་མཆོག་གྱུར་ཞིག་ཏུ་འདོད་དེ། དེ་ཉིད་ལས། ཡེ་སྲིད་མོ་ཡི་རྒྱལ་བོ་འདི། །འཕྲུལ་མོ་གཞན་གྱིས་འགྲན་ཟླ་མེད། །དབྱིངས་ཉིད་ནམ་མཁའ་སྟོང་བ་ལ། །ཡེ་ཤེས་ཉི་མ་རང་གསལ་འདྲ། །སྣང་བ་འོད་ལྡན་ཐུགས་ཀྱི་བཅུད། །ཡེ་སྨོན་རྒྱལ་བོའི་སྨོན་ལམ་མཐུ། །ཕྭ་བུ་གཡང་དཀར་མངོན་ཤེས་དཔྱད། །སྟོང་གསུམ་ཐམས་ཅད་གསལ་བའི་མིག །གཤེན་རབ་སྟོན་པའི་གསུང་གི་བཀའ། །ལེགས་རྒྱལ་ཐང་བོས་སྟོན་པའི་ལུང་། །རིག་འཛིན་གྲུབ་པས་མཛད་པའི་སྲོལ། །འདི་ནི་གཞན་ལས་ཁྱད་པར་འཕགས། །ཞེས་སོ། །དེ་ལྟར་ཇུ་ཐིག་གི་མོ་ཡིག་ཏུན་ཧོང་ཡིག་རྙིང་ལས་ཀྱང་མང་དུ་བྱུང་བར་མ་ཟད། མཁན་བློ་བཟང་མདོ་རྒྱུད་ཀྱིས་ཀྱང་། ཞང་ཞུང་གི་མོ་ཡིག་པོད་བཅུ་བདུན་ཙམ་གོ་བསྡུར་ནས། ཇུ་ཐིག་གི་གཞུང་རྒྱུད་ཆེན་དགོངས་པ་རབ་གསལ་ཞེས་པ་ཡང་མཛད་ཡོད་དོ། །

མདུད་པའི་རྣམ་གྲངས་ལ། སྣང་གསལ་སྒྲོན་མེ་ལས། ད་ལྟར་སྲིད་པའི་བླ་མདུད་ལ། །ཞིབ་ཚགས་བྱས་ན་དྲུག་བརྒྱ་ཡོད། །སངས་ཁྲི་ཕྲག་འབུམ་ཞེས་སོགས་བཤད། །བབ་སྐྱེན་པ་བསྡུས་པས་སུམ་བརྒྱ་དྲུག་ཅུ་ཡོད། །བརྒྱག་གི་﹙བརྒྱག་ཅེས་པ་ནི། མདུད་པའི་གཙོ་བོ་གང་འདྲ་ཞིག་བྱུང་བ་དེ་མོ་གདན་གྱི་སྟེང་དུ་བཀོད་པའི་ཚེ། མདུད་པའི་བཀོད་དབྱིབས་དང་། ཁ་ཕྱོགས་ཀྱི་འབྲེལ་བ་སོགས་ལ་ཞིབ་དཔྱད་བྱེད་པའི་རིགས་ལ་ཟེར།﹚བསྒྱུར་བ་མི་འདྲ་བ་ཁྲི་ཙམ་ཡོད། །བརྒྱག་གཙོ་བོ་བདུན་བརྒྱ་ཉི་ཤུར་འདུས། །ཞེས་དང་། མོ་མདུད་སུམ་བརྒྱ་དྲུག་ཅུ་ལ། །དྭངས་མ་བརྒྱ་དང་ཉི་ཤུ་དེ། །ལྷ་ཁམས་སྲིད་པའི་བླ་གནས་ཡིན། །མཛངས་ལ་བརྒྱ་དང་ཉི་ཤུ་དེ། །མི་ཁམས་སྲིད་པའི་བླ་གནས་ཡིན། །སྙིགས་མ་བརྒྱ་དང་ཉི་ཤུ་དེ། །འདྲེ་ཁམས་སྲིད་པའི་བླ་མདུད་ཡིན། །ཞེས་སོགས་མང་དུ་ཡོད་དོ། །

དེ་ཡང། ཇུ་ཐིག་གི་མོ་མགོ་འབུས་ཙམ་སྨོས་ན། ཇུ་ཐག་གི་རྟེན་འཆའ་པའི་ཚུལ་ཡང་། ལུག་ལ་དར་གྱིས་བརྒྱན་ཏེ་གྱེན་ཏུ་བཏང་། ཁྱི་ལ་བཟློག་གཏོ་བཀལ་ནས་ཐུར་དུ་བཏང་། ཁྱི་ནག་པོ་དཔྱི་དཀར་ལ་དཔུང་རྒྱན་བྱས་ནས་སྲུང་མར་འབུལ། དེ་ནས་རྒྱ་རྩ་བཞིན་བཟང་དང་། དམར་རྩ་མཚལ་ཁ། སྔོན་པོ་ལྕགས་ཁ། ཀ་བ་བང་རིམ་དང་བཞི། མགོན་ར་ཕྱུགས་པ་མིག་སོགས་དབང་པོ་མ་ཉམས་པ་རྣམས་ཀྱི་སོག་བལ་གཡས་གཡོན་ནས་འདབ་མ་གསུམ་རེ་བླངས་པའི་བལ་ལ་གཞི་བྱས་ཏེ། དེའི་ནང་ར་དཀར་མོའི་ཨག་ཚོམ། དྲེད་མོང་གི་སྣ་སྤུ། རི་སྤྱང་གི་རྔ་ལྗགས། འབྲོང་གི་རྩིད་པ། སྟག་གཟིག་གི་སྤུ། ཐང་དཀར་གྱི་སྟག་སྤུ། ཕུང་སྲི་རྔ་མོང་གི་དཔུང་རྩི། རྟ་མཆོག་མཚལ་བུའི་རྔོག་མ། རི་སྤྱང་སྔོན་མོས་བསད་པའི་ལུག་གི་སོག་བལ་བཅུ་གསུམ་སོགས། མཁོ་རྫས་རྣམས་ཚང་བར་བྱས་ནས་བསྲེས་ཏེ་བུ་མོ་ཕ་འཛོམས་མ་འཛོམས་གསུམ་གྱིས་ཇུ་ཐིག་འཁེལ་དགོས་པ་དང་། སྒྲུབ་ཐབས་སོགས་འཇུ་མི་ཕམ་གྱི་གསུང་འབུམ﹝ཇ﹞དུམ་པའི་རྣོ་མཐོང་མོ་ལྷའི་རྒྱལ་བོ་ཞེས་པར་གསལ་བས། ཞིབ་ཏུ་དེར་གཟིགས་པར་བྱའོ། །གཞན་ཡང་། ཇུ་ཐིག་དེ་འཁེལ་སྟངས་ཡང་སྦོམ་ན་བྱ་རྒོད་ཀྱི་སུག་པ། ཕྲ་ན་ཨབ་ཐོང་གི་རྒྱུ་མ་ཙམ་ལ་མོ་རྟའི་མཚམས་སུ་ཁ་བུན་སོགས་དང་། དེར་དངུལ་དཀར་གྱི་མེ་ལོང་བཏགས། གཞན་རིན་པོ་ཆེ་དང་དར་གོས་སྣ་ཚོགས་ཀྱིས་མཛེས་པར་བྱས། དེ་ནས་ཇུ་ཐིག་ཤར་བ་རྐྱ་དྲུག་ཏུ་འབོད་པའི་ཐ་གུ་རིང་ཐུང་དྲུག་ཡོད་པ་དེ་དག་གི་བཅོས་སྟངས། རྫས་སྦྱོར་སོགས་བོན་གྱི་མོ་གཞུང་ན་སྣང་ཞིང་། ཁྱད་པར་དུ་གཞུང་དེ་དག་ན་ཐི་གུ་ལ་མདུད་པ་མདུད་ཚུལ་ལ་བརྟག་ཏེ་ལེགས་ཉེས་དཔྱད་ཚུལ་མང་དུ་སྣང་བ། ཆོས་རྒྱལ་སྲོང་བཙན་གྱི་དུས་སུ་འང་བེད་སྤྱོད་བྱེད་དེ། ཐང་ཡིག་གསར་རྙིང་ལས། རྩིས་བྱེད་ཚེ་ཤིང་བུ་ལ་རྟགས་འདེབས་པ་དང་། སྐུད་པ་ལ་མདུད་པ་བོར་ཏེ་བྱེད། ཅེས་གསུངས་པས་ཤེས་ནུས་ལ། དེ་ཡང་། ཇུ་ཐིག་གི་བསྟན་བཅོས་འདི་རྒྱ་ཆེ་བས། དེ་ལ་བརྟེན་པའི་བསྟན་བཅོས་ཀྱང་མང་བོ་ཡོད། གཞན་ཇུ་ཐིག་ལ་བརྟེན་ནས་མོ་བཏབ་པ་གླིང་སྒྲུང་ཚུན་ནའང་ཡོད་དེ། འདན་མའི་ནས་རྫོང་ལས། ཇོ་རུ་དང་ཁྲོ་ཐུང་གཉིས་ཀ་འདན་ཡུལ་དུ་ཕེབས་ཏེ། འབྲུ་སྔོན་གཡང་གི་གཏེར་སྒོ་ཕྱེས་ནས། ཕྱིར་གླིང་ཡུལ་སླེབས་པའི་ལམ་ཁར་ཧོར་གྱི་ཡུལ་ལ་ཐོན་པ་ན། ཧོར་བླ་རི་བརྒྱ་འཛོམས་ཟེར་བ། ཚེ་འདི་ཕྱི་གཉིས་ཀྱི་སྐྱིད་སྡུག་མཁྱེན་མཁན་ཞིག་ཡོད་པ་དེར། བླ་མ་ཁྱེད་ཀྱིས་ཧོར་གུར་དཀར་རྒྱལ་བོ་དང་ཇོ་རུ་རྒྱལ་བོ་གཉིས་ལས། སུ་བཟང་གི་མོ་ཞིག་གསུང་རོགས་གནང་ཟེར་བར། བླ་མ་དེས་ཇུ་ཐིག་ལ་མདུད་པ་ཞིག་བརྒྱབ་ནས་དེ་ལ་བལྟ་ཡག་ཅིག་བྱས་ཏེ། ཧེ་ཧེ། ལྟས་ངན་འདི་འདྲ་ཞིག་བབས་སོང་ཟེར། ཁོས་ཅི་བབ་ཞུས་པས། ཧོར་གུར་དཀར་རྒྱལ་བོ་ལ་གངས་རི་དཀར་བོ་ཞིག་བབས་ཀྱང་། ཇོ་རུ་ཟེར་བ་དེར་གསེར་གྱི་ཉི་མ་ཞིག་བབས་འདུག གངས་རི་དང་རི་རྒྱལ་འདི་བླ་ཆེན་དང་དཔོན་ཆེན་གྱི་མོ་ཡིན་ཡང་། ཁྲི་གདུགས་ཉི་མ་ཤར་ན་སྔོན་མོ་ཆུ་ལ་འགྱུར་འགྲོ་བས་མི་བཟང་ཟེར། ཡང་། ཁོས་གུར་ནག་རྒྱལ་བོ་དང་ཇོ་རུ་གཉིས་ལས་སུ་བཟང་གི་མོ་ཞིག་གསུངས་ཞུས་པས། ཡང་། ཇུ་ཐིག་ལན་གསུམ་འཕངས་ནས། ཨ་ཨ། ཤི་འདྲེ་ངན་པ་ཞིག་ཅི་ཡིན་ནམ་ཟེར། ཅི་བབ་ཞུས་པས། གུར་ནག་རྒྱལ་བོ་དེ་ལ་རྔམ་བརྗིད་ཀྱི་དྲེད་མོང་ཞིག་བབས་ཀྱང་། ཇོ་རུ་རྒྱལ་བོ་དེ་ལ་གངས་སེང་དཀར་མོ་ཞིག་བབས་འདུག དྲེད་མོང་དེ་མི་ཆག་ཆེན་གྱི་མོ་ཡིན་ལ། གངས་སེང་དཀར་མོའི་ངར་སྒྲ་སྒྲོགས་ཚེ། དྲེད་མོང་བྲོས་ནས་ནགས་ལ་མི་ཆགས། ཟེར་བ་ཡིན་པས་མི་བཟང་འདུག་ཟེར། འོ་ན། གུར་སེར་རྒྱལ་བོ་དང་ཇོ་རུ་རྒྱལ་བོ་གཉིས་ལས་སུ་བཟང་བ་མོ་ཞིག་གསུངས་དང་ཟེར་བར། ཡང་། སྔར་ལྟར་ཇུ་ཐིག་ལ་མདུད་པ་བོར་ནས་ལྟ་ཡག་ཅིག་བྱས་ཏེ། ཨོ་ཧོ་ཧོ། བྱ་བ་ནག་པོ་འདི་འདྲ་བའི་མོ་ངན་ཞིག་བབས་འདུག་ཟེར་བས། ཅི་བབ་ཞུས་པས། གུར་སེར་རྒྱལ་བོ་དུང་གི་ལུ་གུ་དཀར་བོ་ཞིག་བབས་ཀྱང་། ཇོ་རུ་རྒྱལ་བོ་དེ་རི་སྤྱང་སྔོན་མོ་ཞིག་བབས་འདུག རི་སྤྱང་སྔོན་མོའི་བང་ལམ་ནས་གཡང་དཀར་ལུ་གུ་ཁན་འཇོག་བྱེད། ཟེར་བ་ཡིན་པས། མི་བཟང་ཟེར། ཞེས་གསུངས་པས་ཀྱང་ཇུ་ཐིག་གི་མོ་འདི་འདེབས་སྲོལ་ཡོད་པར་ཤེས་ལ།

ཁྱད་པར་དུ། འཇུ་མི་ཕམ་གྱི་གསུང་འབུམ﹝ཇ﹞དུམ་པ་ཡོངས་རྫོགས་ན། ཇུ་ཐིག་གི་མདུད་པ་མདུད་ཚུལ་ཀྱི་དཔེ་རིས་དང་བཅས་པ་ཆ་ཚང་དང་། བོན་གྱི་བརྟེན་འགྱུར་ཁྲོད་ཀྱི་དུམ་གྲངས་རེ་བརྒྱད་པར། ཡེ་སྲིད་འཕྲུལ་གྱི་ཇུ་ཐིག་གི་མོ་བདར་ཆུང་བ་ཉེར་མཁོ་འཁྱེར་བདེ་དང་། ཡེ་སྲིད་འཕྲུལ་གྱི་ཇུ་ཐིག མོ་མཚོ་སྲིད་པའི་སྒྲོན་མ། སྣང་སྲིད་ལེགས་ཉེས་ཀུན་གསལ་སོགས་དུམ་པ་དེར་ལེའུ་བརྒྱ་དང་གཅིག་གིས་ཕྱེ་སྟེ་གསུངས་ཡོད་པས་ཞིབ་ཏུ་རྟོགས་འདོད་པ་རྣམས་ཀྱིས་དེ་དག་དང་། ཡང་ན། གྱང་ལ་དབུ་དཀར་བས་མདུད་རྫོང་ཕྲ་མོ་གཞུང་ཁྲལ་དང་། རྐྱང་དཔྱད་གསལ་བའི་མེ་ལོང་། མདུད་རྫོང་ཁྲ་མོ་གཞུང་འགྲེལ་དང་། འབར་གཅུང་བཀྲ་ཤིས་རྒྱ་མཚོས་མཛད་པའི་མདུད་རྫོང་རྡོ་རྗེ་གསང་བའི་ཐ་རམ་དང་། ཁོག་དབུབ་ཁྱུང་ཆེན་ལྡིང་བ་སོགས་སུ་བལྟ་དགོས་སོ། །

བྱ་དྲུག་ལ་བརྟེན་པའི་མོ།

བྱ་དྲུག་ལ་བརྟེན་ནས་མོ་འདེབས་ཚུལ་འདི་ཡང་། ཇུ་ཐིག་གི་མོ་འདེབས་ཚུལ་གྱི་གྲས་སུ་གཏོགས་པར་བཞེད་ལ། ཕྱིས་སུ་ནང་བསྟན་གྱི་ཤན་ཞུགས་ཐེབས་ཏེ་བྱ་དྲུག་གི་མོ་ཡིག་རྣོ་མཐོང་གསལ་བའི་མེ་ལོང་ཞེས་པའང་ཡོད། དེ་ནི་བྱ་དྲུག་གི་ཚབ་བྱེད་རྡེའུ། ཁུ་བྱུག་སྔོན་པོ། ངང་བ་སེར་བོ། སྐྱ་ཀ་ཁྲ་བོ། གོང་མོ་དམར་བོ། ཐི་བ་དཀར་བོ། ཕོ་རོག་ནག་པོ་བཅས་འཐུས་ཚང་དུ་བསྒྲིགས་ཏེ། མཚན་མོ་སྐར་མ་ཤར་བ་ནས་མོ་བ་རང་ཉིད་དད་འདུན་ཆེ་སའི་ལྷ་དེར་གསོལ་བ་རྩེ་གཅིག་ཏུ་འདེབས་ཞོར། ཡེ་དྷརྨ་དང་རིགས་གསུམ་མགོན་པོའི་གཟུངས་སྔགས་བཟླས་ནས་བདེན་པ་བདར་བ་སྟེ། ཁྱེད་རྣམས་ཀྱིས་མཐུ་དང་མངོན་ཤེས་རྫུ་འཕྲུལ་བསམ་གྱིས་མི་ཁྱབ་པའི་སྒོ་ནས། སྲིད་པའི་བྱ་དྲུག་གི་མོ་འདི་བཟང་བོ་ངན་དུ་མ་སྟོན། ངན་པ་བཟང་དུ་མ་སྟོན། བཟང་ངན་གྱིས་ཤན་ཕྱེས། ལེགས་ཉེས་བདེན་རྫུན་གྱི་གཏིང་ཆོད། རྣོ་མཐོང་མོ་འདི་དྲང་དུ་ཕོབ། གསལ་བོར་སྟོན་ཅིག ཅེས་རྡེའུ་ལ་སྔགས་ནས་ལག་གཡས་པས་རྡེའུ་དཀྲུགས་ཏེ་ལག་མཐིལ་གཡོན་པ་ལ་རིམ་བཞིན་འཕངས་པས། རྡེའུ་ཁ་དོག་ལ་བལྟས་ཏེ། དོན་ཕྭ་དང་། རྫས་ཕུད། ལེགས་ཉེས་ལ་དཔྱད་པ་ཞིག་ཡིན། གཞན་བྱ་དྲུག་པོའི་མཚོན་བྱེད་ལ། ཐ་གུ་འམ་རིལ་མ་མི་འདྲ་བ་དྲུག་གིས་འདེབས་སྲོལ་ཡང་ཡོད་པར་བཤད།

གཤམ་དུ་རྡེའུ་ཁ་དོག་ལ་དཔྱད་པའི་འབྲས་བཤད་ནི། རྡེའུ་སྔོན་པོ་ཁུ་བྱུག་བབས་ན། བསམ་དོན་འགྲུབ། བོར་བ་ཤར་ན་ཡོད། རྫས་དམར་སེར་དཀར་བོ་བཅས་ཡིན། རྡེའུ་ཁྲ་བོ་སྐྱ་ཀ་བབས་ན། དོན་ཕྭ་བཟང་། བོར་བ་ནུབ་བྱང་དུ་ཡོད། རྫས་ལྕགས་རིགས་ཡིན། རྡེའུ་དམར་བོ་གོང་མོ་བབས་ན། དོན་ཕྭ་འགྱུར་ལྡོག་ཆེ། བོར་བ་རྙེད་དཀའ། རྫས་སྣོད་རྐྱལ་རྙིང་ཡིན། རྡེའུ་ནག་པོ་ཕོ་རོག་བབས་ན། དོན་བྱ་གང་ལའང་ངན། བོར་བ་ཤར་ན་ཡོད། རྫས་དམར་བོ་ཡིན་པ་སོགས་མང་ངོ་། །ཞིབ་ཏུ་བྱ་དྲུག་གི་མོ་ཡིག་རྣོ་མཐོང་གསལ་བའི་མེ་ལོང་ལ་གཟིགས་པར་བྱའོ། །

ཡང་། འདི་དང་ཆ་འདྲ་བ་ཀརྨ་ཆགས་མེད་ཀྱི་ལྷ་བརྒྱད་མོ་ཡིག་ཅེས་པ། རྒྱལ་མཚན། ཕོ་རོག སེང་གེ གླང་ཆེན། རྟ་བརྒྱའི་རྟོད་ཕུར། བེར་ག རུས་སྦལ། བྱ་དཀར་བརྒྱད་པོ་གང་རུང་བབས་པ་ལ་བརྟེན་ནས་དོན་ཕྭར་དཔྱད་པའི་མོ་ཡིག་ཞིག་ཀྱང་ཡོད་དོ། །

ཕྲེང་མོ།

ཕྲེང་མོ་འདེབས་སྟངས་འདི། མོ་འདེབས་སྟངས་ཧ་ཅང་སྟབས་བདེ་ཞིག་ཡིན། དེ་ནི་གཙོ་ཆེར་ན་ཚ་དང་། གོད་ཁ། བོར་བརླག རི་དྭགས་རྔོན་རྒྱག དམག་འཁྲུག་སོགས་ལ་གཙིགས་པར་བཤད། ཕྲེང་མོ་རྒྱག་སྐབས་དད་བྱའི་ལྷ་ལ་གསོལ་བ་རྩེ་གཅིག་ཏུ་བཏབ་ནས། ཕྲེང་བ་ལ་ལག་པས་འཕུར་འཕུར་བྱས་ནས། དོན་བྱ་གང་ཡིན་དེར་དམིགས་ནས། ལག་གཡས་གཡོན་གཉིས་ཀྱི་ཕྲེང་སྐོར་གྱི་རྡོག་པོའི་བཅད་མཚམས་ནས། གོང་མཛུབ་དང་མཐེ་བོང་གིས། ཕྲེང་རྡོག་གསུམ་རེ་བསྣུར་ནས། གྲངས་ཀ་མི་འདྲ་བ་ཅི་རིགས་འབྱུང་བས། གྲངས་ཀའི་མང་ཉུང་ལ་བརྟག་ནས་འགྲེལ་བརྗོད་བྱེད་པ་ཞིག་ཡིན།

ཕྲེང་མོའི་དཔྱད་འབྲས་ནི། གཅིག་བབས་ན། ལྷ་ངོ་མཐོ། མགྱོགས་ངོ་ཆེ་ཞེས་དོན་བྱ་མྱུར་འགྲུབ་ཀྱི་རྟགས་དང་། གཉིས་བབས་ན། ཕོ་རོག་ཤ་ཁྱེར་རི་མགོ་རྩེ་ལ་འགྲིམས། །གཏམ་བཟང་ལུང་བའི་སྦུག་ལ་འཁོར། །ཞེས་གྲོགས་བཟང་འཁོར་བའི་རྟགས་དང་། གསུམ་བབས་ན། གཟུགས་པོ་རིང་བས་བལྟས་པ་མཐོང་། །རྟིང་བ་བཀྱག་བཀྱག་བྱས་ན་མཐོང་། །སྐད་འབོད་ཅན་གྱིས་བོས་ན་གོ །བཙོག་སེ་སོང་ན་ཤར་སེ་ཐུག །ཉེ་བ་དང་མགྱོགས་ངོ་ཆེ་རྟགས་དང་། བཞི་བབས་ན། བྱ་རོག་སྤྱང་མའི་རྒྱུགས་ལམ་ལ། །ཁ་གཡར་སའི་བཙོང་ངོ་ཕྲན་བུ་བསམ། །ཉི་མ་དྲོས་ནས་གླིང་བཞི་བསྐོར། །ཞེས་སྤྱིར་ན་མོ་བཟང་། ཡོང་སྒོ་འགལ་རྐྱེན་ཕྲན་བུ་ཡོད་པའི་རྟགས་སུ་བཤད། ལྔ་བབས་ན། མཛོ་མོ་ལ་དགུ་ལུང་དགུར་བུད། །གྱི་ལིང་རྟ་ཕོས་འགུགས་ནས་བཀུགས། །ཞེས་བོར་བརླག་སོགས་ཀྱི་རྒྱུ་འབྱོར་ལག་སོན་ཡོང་། རྔོན་པར་རི་དྭགས་གསོད་པའི་སྐལ་བ་ཡོད་པ། མགྲོན་པོ་བདེ་བླག་ཏུ་སླེབས་པར་བཤད་པ་དང་། དྲུག་བབས་ན། རྒྱལ་བོ་གསེར་ཁྲིའི་ཐོག་ལ་བཞུགས། །བཙུན་མོ་དངུལ་ཁྲིའི་ཐོག་ལ་བཞུགས། །རྒྱ་རྒྱལ་བོས་བོད་ལ་གནོད་མི་ཐུབ། །མགོ་རྒྱ་གླིང་གིས་བརྡུངས་ཀྱང་དེ་མི་ཤི །ཞེས་དོན་ཆེ་ཕྲ་འགྲུབ་དཀའ་བའི་རྟགས་དང་། བདུན་བབས་ན། ཨ་མ་མི་ཡི་ཡུལ་དུ་སོང་། །ཁྱོས་མ་རང་གི་ཡུལ་ལ་འཁུར། །ཞེས་གྲོགས་ངོ་ཆེ་བས་དོན་བྱ་འགྲུབ་རྟགས་དང་། བརྒྱད་བབས་ན། རྒྱལ་མཚན་མགོ་ནས་ཉི་མ་ཤར། །ཕོ་སྐྱ་བོ་ཡིན་ན་རང་མགོ་ཐོན། །བན་ཆོས་པ་ཡིན་ན་ཆོས་མགོ་ཐོན། །སྐྱ་བོས་སྐྱ་སྲིད་བསྐྱངས་པས་སྲིད་དོན་འགྲུབ། །བན་བླ་གྲྭས་ཆོས་མགོ་ཐོན་ནས་སྐྱ་མི་འབབ། །ཅེས་ཆོས་སྲིད་ལ་རང་སྐྱ་ཕེར་ཞིང་། དོན་བྱ་འགྲུབ་ཞིང་གཞི་བརྟན་པའི་རྟགས་དང་། དགུ་བབས་ན། རྔ་ནག་འབྲོང་གཅིག་མ་བསད་ན། །མགོ་ཆག་མི་ཞིག་ཐུག་ས་འདུག །ཅེས་དོན་བྱ་གནས་སྐབས་འགྲུབ་དཀའ་ཡང་། ཕྱི་ནས་འགྲུབ་པ་སོགས་ཀྱིས་འགྲེལ་བརྗོད་བྱེད་དོ། །ཞིབ་པར་ཐུའུ་བཀྭན་ཆོས་ཉིའི་རྟ་མགྲིན་གསང་སྒྲུབ་ཀྱི་ཆོས་སྐོར་ལས་ཕྲེང་མོ་འདེབས་ཚུལ་ལྐོག་གྱུར་གསལ་བའི་མེ་ལོང་སོགས་སུ་ཤེས་པར་བྱའོ། །

ཇག་པའི་རྒྱུགས་མོ།

ཇག་པའི་རྒྱུགས་མོ་འདི་ཡང་ཇུ་ཐིག་གི་མོ་འདེབས་ཚུལ་ལས་དར་བར་མངོན་ལ། འདི་སྔོན་ཆད་ཇག་ལས་བྱེད་པའམ། ར་མདར་ཆས་སྐབས་བྲེལ་སྟབས་ཀྱིས་བརྒྱག་པའི་དམངས་སྲོལ་གྱི་མོ་ཞིག་ཡིན། དེ་ཡང་གང་ལ་དད་འདུན་ཆེ་བའི་ལྷ་སྲུང་ངམ་གཞི་བདག་གང་རུང་ལ་གསོལ་བ་བཏབ་སྟེ། སྲབ་མདའ་དང་ལྷམ་སྒྲོག་ལ་མདུད་པ་བརྒྱབ་ནས་ལེགས་ཉེས་འབྱེད་པའི་མོ་ཞིག་ཡིན་ལ། མོ་འདི་ལ་མདུད་པ་མི་འདྲ་བ་བཞི་མདུད་ཚུལ་ཡོད། མཛོ་མོ་གསེར་སྣ་ཞེས་ཐ་གུ་གཅིག་ནང་གཅིག་བརྒྱུས་ནས་ཡོད་ན་བརྟག་བྱའི་དོན་དེ། ལེགས་རབ་ཏུ་བརྩི་བ་དང་། ཐི་གུ་གཉིས་གཤིབ་ཞེས་ཐི་གུ་གཉིས་གཤིབ་ཡོད་ན། འབྲིང་ཤིས། ཤྭ་བོ་སྐེ་གཅུས་ཞེས་མོ་ཐིག་ཟུང་བསྣོལ་མར་ཡོད་ན་འབྲིང་། ད་ལེན་མགོ་རྡུམ་ཞེས་ཐ་གུ་རང་སར་ཡོད་ན་ཐ་མར་བཤད་དོ། །

ཡང་གླིང་སྒྲུང་རྟ་རྒྱུགས་རྒྱལ་འཇོག་ལས། གླིང་མི་རྣམས་རྟ་རྩལ་འགྲན་བཞིན་པའི་སྐབས་དེར། གེ་སར་གྱིས་གསེར་གྱི་པ་ཊ་དང་དར་བཅས། ཀུན་ཤེས་ལ་མོ་ཡོན་དུ་ཕུལ་ནས། མོ་ཞིག་འདེབས་དགོས་ཚུལ་གསུངས་པས། མོ་མས་དེ་རིང་རྟ་རྒྱུགས་འདི་ལ་སྲབ་མདའ་གང་གི་སྔ་ཕྱི། རྣ་མཆོག་གང་གི་མཐོ་དམན་ཡོད་པའི་དུས་དེ་ཙམ་ལ། མོ་བཏབ་ནས་གཞི་བཀོད། རྨུ་གབ་ཕྱེ། མོ་ལྷ་བདར་བ་སོགས་ཁོམ་ལོང་མེད་མོད། འོན་ཀྱང་། ཇོ་རུ་འདིའི་བསམ་པ་རྫོགས་ཆེད་མགྱོགས་མོ་ཞིག་མ་བཏབ་ན་མི་འོས་སྙམ་སྟེ། རུམ་ནས་ཇུ་ཐིག་བླངས་ཏེ་མོ་བདར་བ་ཞེས་སྟབས་བདེའི་མོ་འདེབས་ཚུལ་འདི་ཡང་ཇག་པའི་རྒྱུགས་མོའི་ཁོངས་སུ་གཏོགས་སོ། །

གེ་སར་ཤོ་མོ།

མོ་འདི་གླིང་གི་མེ་བཟའ་འབུམ་སྐྱིད། བདུད་ཀླུ་བཙན་རྒྱལ་བོས་འཕྲོག་ཚེ། གླིང་རྗེ་གེ་སར་བདུད་ཡུལ་དུ་བྱོན་སྐབས། འདེབས་གནང་མཛད་པའི་མོ་ཞིག་ཡིན་པར་གསལ་ཏེ། འཛམ་གླིང་གེ་སར་རྒྱལ་བོ་ནི། །ནག་པོ་བདུད་ཡུལ་བྱོན་པའི་དུས། །མགྱོགས་མོ་འདི་དག་མཛད་པ་སྟེ། །དཀའ་ཚེགས་ཆུང་ཞིང་མངོན་ཤེས་ཆེ། །བདར་མོ་ལག་ཏུ་ལེན་པ་ནི། །ནས་འབྲུ་ཏིལ་འབྲུ་རྡེའུ་སོགས་ལ། །རྡེའུ་དགུ་ནང་ལ་རྟགས་ཅན་གཅིག །གང་འཛོམས་དགུ་བོ་ལག་ཏུ་ཐོགས། །མོ་བདར་རྒྱས་པར་སྤྲོ་ན་ནི། །གེ་སེར་ཧ་འབོད་རིང་མོ་བྱ། །ཞེས་པ་ལྟར། རྡེའུ་དགུ་བསྒྲིགས་ནས་ལྷ་གང་རུང་ལ་གསོལ་བ་བཏབ་ནས་ལེགས་ཉེས་སྟོན་པ་ཞིག་ཡིན། ཞིབ་ཏུ་ཤེས་འདོད་པ་དག་གིས་མོ་དཔེ་ཕྱོགས་བསྒྲིགས་ཀྱི་ཤོག་ངོས༡༥༣ ནས ༡༥༩ བར་གསལ་བས་དེར་གཟིགས་པར་བྱའོ། །གཞན་ཡང་གེ་སར་གྱི་དགྲ་འདུལ་རྣོ་མཐོང་གསལ་མེ་ཞེས་པའང་ཡོད་ལ། ཡི་གེ་མངས་སུ་འཇིགས་ནས་འདིར་མ་བཀོད་ལ། ཞིབ་ཏུ་ཤེས་འདོད་པ་རྣམས་ཀྱིས་དོན་ཀུན་གྲུབ་པས་དག་སྒྲིག་བྱས་པའི་མོ་དཔེ་ཕྱོགས་བསྒྲིགས་ལ་གཟིགས་པར་ཞུ།

མདའ་མོ།

མདའ་མོ་འདེབས་ཚུལ་འདི་ཡང་། གླིང་སྒྲུང་འཁྲུངས་སྐོར་ལས། གླིང་དམག་རྣམས་འགོག་ཡུལ་དུ་སླེབས་པ་དང་། འགོག་ཡུལ་ས་སྟོང་དུ་སོང་བས། དེར་ཞལ་དཀར། སེང་སྟག འདན་མ་སོགས་ཀྱིས་གར་སོང་རྩར་གཅོད་དུ་འགྲོ་ཟེར། ལ་ལས། ད་ཆ་གར་འགྲོ་མི་ཤེས་ཤིང་། དམག་མང་ལ་དཀའ་ཚེགས་གཏད་པ་ལས་མེད། ཕྱིར་ལོག་ན་བཟང་ཟེར། དེ་ནས་སྤྱི་དཔོན་ན་རེ། གླིང་དམག་རྣམས་གར་འགྲོ་གཏོལ་མེད་དུ་བྱེད་ག་ལ་དགོས། སེང་བློན་གྱིས་མོ་ཞིག་ཐོབས་དང་། མོ་བབས་པ་ལྟར་བྱ་ཟེར། སེང་བློན་གྱིས་མདའ་མོ་ཞིག་བཏབ་པས། ད་ཇ་འཐུང་ཚད་ཞིག་ཏུ་སོང་ན། མཛེས་མ་མིག་གི་བདུད་རྩི། འཛད་མེད་བདུད་རྩིའི་བཅུད་ལེན། དགོས་འདོད་ནོར་བུའི་གཏེར་ཟོག་སོགས་གནང་ལ་ལོན། འཛིང་མི་དགོས་རང་ལག་ཏུ་འོང་། མཚོན་གྱི་ཤུབས་ཁ་མ་སྤར། མདའ་གཞུ་སྟེང་དུ་མ་བཞག་ཀྱང་། གཏང་མ་དབང་ཐང་གིས་ཆོད་པ་གདའ་ཟེར་བ་ཞིག་གདའ། ཞེས་པས་མདའ་མོ་འདེབས་ཚུལ་རགས་ཙམ་རྟོགས་ནུས་ལ།

དེ་ཡང་རགས་ཙམ་བཀོད་ན། གནས་གཙང་མར་ལྷ་གཞི་དཀར་བོའི་སྟེང་དུ། ནས་ཀྱི་གཡུང་དྲུང་གཡས་བསྐོར་བྱས། ཁུག་བཞི་དང་ལྟེ་བར་འབྲུའི་ཚོམ་བུ་བཀོད། ལྷ་མདའ་གཉིས་ཀྱི་མགུལ་དུ་སྲུང་སྐུད་དང་དར་དཀར་བཏགས། འདྲེ་མདའ་གཉིས་ལ་ནག་པོ་བཏགས་ཏེ་སོ་སོར་ལྟོང་སྤྲད་ལ་གཡུང་དྲུང་གི་ལྟེ་བར་བཞག མཆོད་པ་ཅི་འབྱོར་བཤམས། མདུན་དུ་གེ་སར་རྒྱལ་བོ་ལ་དཔའ་བོ་མཁའ་འགྲོ་དགྲ་ལྷ་ཝེར་མས་བསྐོར་བ་གསལ་བཏབ། དུས་བཟང་ལ་སྔགས་དང་། བདར་བ། མཆོད་པ་སོགས་ལ་ནན་ཏན་བྱས་ཏེ། ཆོ་ག་ངོས་གཙང་བསྒྲུབས། མི་གཙང་མ་གཉིས་ལ་མདའ་འཇུ་རུ་བཅུག་ནས། མོ་མས་སྔགས་བཏབ་ཏེ་འབྲུ་གཏོར་ནས་ལྷ་མདའ་དང་འདྲེ་མདའ་འཕར་ཚུལ་དང་། ཆག་པ་དང་གས་སྟངས། སྒྲ་གྲག་པ་དང་སྒྲོ་ཕྱི་ཚུལ། ཡོ་འཁྱོག་དང་གྱེན་དུ་ལངས་ཚུལ་སོགས་ལ་བརྟག་ནས་ལེགས་ཉེས་སྟོན་པ་ཞིག་ཡིན། ཞིབ་ཏུ་འཇུ་མི་ཕམ་གྱིས་མཛད་པའི་གེ་སར་མདའ་མོའི་དཔྱད་དོན་རིན་ཆེན་མེ་ལོང་དང་། མདའ་མོའི་ཟུར་རྒྱན་སྣང་གསལ་མེ་ལོང་། མདའ་མོའི་དཔྱད་དོན་གསེར་གྱི་ལྡེ་མིག﹙ལྕགས་པར་དེབ་གྲངས་བཅུ་དགུ་ཤོག་ངོས ༣༥༩ ནས ༣༧༩ བར﹚དང་། ཁང་སར་བསྟན་པའི་དབང་ཕྱུག་གི་མདའ་མོ་སོགས་ལ་བལྟ་བར་བྱའོ། །

དམངས་སྲོལ་གྱི་བྱའི་མོ།

དམངས་སྲོལ་ཀྱི་མོ་འདི། སྤྱི་ཚོགས་ཀྱི་འཚོ་བའི་ཁྲོད་ལེགས་ཉེས་ལ་དཔྱད་པའི་བྱེད་སྒོ་ཞིག་སྟེ། ཆེ་བ་རྒྱལ་ཁབ་གྱི་བདེ་སྡུག་དང་། ཆུང་བ་མི་སྒེར་གྱི་དོན་བྱ་དག་ལ་དཔྱད་པའི་རྒྱུན་མཐོང་གི་འཚོ་བའི་གྲུབ་ཆ་ཞིག་ཡིན། དམངས་སྲོལ་གྱི་མོ་འདེབས་སྟངས་ལ་རྣམ་གྲངས་མང་ལ་ལོ་རྒྱུས་ཀྱང་རིང་། ཐང་ཧྲུའུ་ལས། བོད་ཀྱི་ལོ་རྒྱུས་འཆད་སྐབས། སྲིད་སྐྱོང་བ་ལ་ཡི་གེ་ནི་མེད། ཐག་པ་ལ་མདུད་པ་དང་། ཤིང་ལ་རྟགས་བུ་བཏབ་སྟེ་རྩིས་བྱེད། ཅེས་དང་། ཁོང་རྣམས་ལྷ་འདྲེ་མང་དུ་མཆོད་། ཟླ་བ་བཅུ་གཉིས་པའི་ནང་ལ་རིའི་རྩེ་ལ་མོ་འདེབས་སུ་འགྲོ། དེ་ཡང་མོ་མས་འབྲུ་ཟན་གཏོར་ནས་བྱ་རྣམས་འབོད། དེ་ནས་བྱ་ཟེར་མོ་ལྟ་བུ་ཞིག མོ་བའི་ལག་པར་བཟུང་བ་དང་བསད་ནས་ཁོག་པ་ཕྱེ་ཏེ་ལྟ། བྱའི་ཁོག་ཏུ་འབྲུ་སོགས་བྱུང་ན་ལོ་རྗེས་མར་སྟོན་ཐོག་བཟང་བ་སོགས་ཀྱི་ལྟས་ཡིན། དེ་ལ་བྱའི་མོ་ཟེར། ཞེས་པ་ལྟར། སྔོན་གྱི་ལོ་རྒྱུས་ཡིག་རྙིང་ལས་ཀྱང་འབྱུང་ལ། ད་ལྟ་ཡང་། བྱའི་མོ་འདེབས་སྟངས་དེ་དངོས་སུ་མཐོང་རྒྱུ་ཡོད་དེ། མེ་ཏོག་རྫོང་ལྷོ་བ་ས་ཁུལ་དུ་བྱ་བསད་ནས་མོ་འདེབས་སྲོལ་ཞིག་ཡོད་དེ། བྱ་བསད་ནས་མཆིན་པའི་རྒྱབ་མདུན་གཉིས་ཀྱི་ཚོས་གཞི་དང་། ཁྲག་རྩའི་ལམ་རིས། སྦོམ་ཕྲ་སོགས་ཀྱི་སྒོ་ནས་ལྟས་བཟང་ངན་བརྟག་པར་བཤད་ལ། གལ་ཏེ་ཁྲག་རྩའི་ལམ་རིས་ཟང་ཟིང་དང་གསལ་བོ་མེད་ཚེ། ལྟས་ངན་པར་ངོས་འཛིན་བྱེད་སྲོལ་དང་། དེ་བཞིན་སྒོ་ང་བཙོས་ནས་མོ་འདེབས་སྲོལ་ཡོད་པ་ནི། བཙས་པའི་སྒོང་སྙིང་མུར་ལྡད་བཏང་རྗེས། ཤིང་ལོའི་སྟེང་བླུགས་ནས་སྒོང་སྙིང་གི་རྡོག་རིལ་མང་ཉུང་དང་། ཆེ་ཆུང་སྙོམས་པོར་ཡོད་མེད་ཀྱི་ཐད་ནས་ལེགས་ཉེས་འབྱེད་སྲོལ་ཡོད་དོ། །

གཞན་བྱ་མགོའི་མོ་འདེབས་སྟངས་ཞིག་ལ། བྱ་མགོའི་མོ་འདི་ཡང་བོད་ལ་གདོད་མའི་དུས་སུ་ཡོད་པའི་མོ་རིགས་ཤིག་ཡིན་ལ། མོ་འདི་རྒྱག་སྟངས་ཡང་། བྱ་མགོ་བཅད་པའི་ཁྲག་གི་འཛག་ཚད་དང་། ཁ་དོག ཝུ་བ་ཆགས་ཚུལ། གྲི་ཁར་ཁྲག་ཆགས་ཚུལ། ལྕེ་མཆུ་སོགས་ལ་བརྟག་ནས་བདེ་སྡུག་དང་། བཟང་ངན་བཤད་སྲོལ་ཡོད། ད་ལྟ་ལག་ལེན་དུ་བསྟར་མཁན་ཤིན་ཏུ་དཀོན་ལ། འདི་ལ་རྟགས་མི་འདྲ་བ་བརྒྱ་དང་རྩ་བརྒྱད་ཡོད་པར་བཤད་དོ། །

རྡེའུ་མོ།

རྡེའུ་མོ་འདེབས་སྲོལ་ཞིག་ལ། རྡེའུ་ཆེ་ཆུང་མི་འདྲ་བ་བརྒྱད་སྙིམ་པའི་ནང་དུ་བླུགས་ཏེ། དཀྲུག་དཀྲུག་མང་དུ་བཏང་མཐར། ལག་པ་གཡས་པའི་ནང་དུ་ཅི་ཙམ་ཐོན་པ་ལ་བརྟག་པ་ཞིག་ཡིན། གཅིག་ཐོན་ན། ལྷ་ངོ་མཐོ་ལ་མགྱོགས་པའི་ངོ་ཆེ། གཉིས་ཐོན་ན། ཁ་ཚིག་བཙུན་པའི་མིས་སྐད་ཆ་བཤད་ངོ་དང་། དེ་ཡང་ཆེ་རྡེའུ་རྗེས་སུ་བབས་ན་མཁར་ཀྱི་ཕྱི་ལ་ཐོན་པའི་ངོ་། རྡེའུ་གསུམ་བབས་ཏེ་ཆེ་རྡེའུ་སྔོན་ལ་བབས་ན་ལྷ་ངོ་མཐོ་བ་དང་། བར་དུ་བབས་ན་གྲོག་ངོ་། རྗེས་སུ་བབས་ན་གྲོག་ཕྱི་ལ་ཤོར་བས། བོར་སྟོར་ཡོང་བར་བཤད། བཞི་བབས་ན་ཁ་སོ་ཅན་གྱི་གྱོད་ཁ་ལས་ཐར་ཞེས། ནད་པ་ཡིན་ན་དྲག་བསྐྱེད་ཆེན་པོ་ཐོན་པ་དང་། དེ་ཡང་། ཆེ་རྡེའུ་སྔོན་ལ་བབས་ན་ཁམས་བདེ་བོ་དང་། བར་དུ་བབས་ན་ལམ་སེང་འགྱུར་བ་མི་ཡོང་བ་དང་། རྗེས་སུ་བབས་ན། འབྱོར་ན་ལམ་སེང་འབྱོར་བ་དང་། གལ་ཏེ་མ་འབྱོར་ན་ཡུན་རིང་འགོར་འགྱངས་ཆེ་བའི་ངོ་། །རྡེའུ་ལྔ་བབས་ཏེ་ཆེ་རྡེའུ་སྔོན་དང་བར་དུ་བབས་ན་རི་དྭགས་སོགས་བསད་དེ་དམར་ངོ་ཆེ་བ་དང་། བོར་སྟོར་ཡིན་ན་མགྱོགས་པོར་རྙེད་པ་དང་། ཆེ་རྡེའུ་རྗེས་སུ་བབས་ན་ལམ་ངོ་ཞེས་ཧ་ཅང་ཡག་པོ་བྱུང་བའི་རྟགས། རྡེའུ་དྲུག་བབས་ཏེ་ཆེ་རྡེའུ་སྔ་རྗེས་སུ་བབས་ན་བྱ་ལས་གང་ཡང་ཡག་པོར་བརྩི་བ་དང་། རྡེའུ་བདུན་ནོར་དང་ནག་མོའི་དོན་དུ་བབས་ན་ཡག་པོར་བརྩི། དེ་ཡང་ཆེ་རྡེའུ་སྔོན་དུ་བབས་ན་ལྷ་ངོ་དམའ་བས་ཡག་པོར་མི་བརྩི། རྡེའུ་བརྒྱད་བབས་ན་རྗེས་འདྲེན་ཞེས་ལམ་སེང་མི་སླེབས་པར་འགོར་ངོ་ཡོད་པར་བཤད་དོ། །

ལོ་རྟགས་བཅུ་གཉིས་ཀྱི་མོ།

ཤིང་བྱང་དང་མགྲོན་བུ་ལྟ་བུ་ནག་པོ་བཅུ་གཅིག་དང་། དཀར་བོ་གཅིག་སྟེ་བཅུ་གཉིས་ཚགས་སུ་ཚུད་པར་བྱས་ཏེ། བྱི་བ། གླང་། སྟག ཡོས། འབྲུག སྦྲུལ། རྟ། ལུག སྤྲེའུ། བྱ། ཁྱི། ཕག་བཅས། བྱི་བ་དཀར་བོ་དང་། གཞན་རྣམས་ནག་པོ་བྱས་ཏེ་ལོ་རིས་བཅུ་གཉིས་པོ་བཀོད་ནས། དང་ཐོག་བྱི་བ་ནས་རིམ་བཞིན་ལོ་རྟགས་བཅུ་གཉིས་ཀྱི་མིང་། ངག་ཏུ་གྱེར་ཏེ། འདི་སྐད་དོ། །ལོ་བསྐོར་ཟླ་བ་བཅུ་གཉིས། ཞག་མ་སུམ་བརྒྱ་དྲུག་ཅུ། གླིང་གི་དཔའ་རྟུལ་སུམ་ཅུ། སེང་ཆེན་ནོར་བུ་དགྲ་འདུལ། མོ་ཕོབ་ཞིག མོ་ཕོབ་ཞིག བླ་མ་དཀོན་མཆོག་གིས་མོ་ཕོབ། མི་ནོར་ཕྱུགས་གསུམ་ལྷ་དང་མཉམ། ཡུལ་ཟོག་གོང་ནས་གོང་དུ་སྤེལ། ཡུལ་མི་རླུང་རྟ་ཡར་འགྲོ་ཤོག ཡུལ་ལ་བཀྲ་ཤིས་ཉི་མ་ཤར། ཞེས་དབྱངས་སུ་གྱེར་བཞིན་ཤིང་བྱང་འཕེན་པ་སྟེ། ༡ བྱི་བ་དཀར་བོ་བབས་ན། བྱི་བ་དཀར་བོའི་རང་མགོ་ཐོན། །ལྷ་ཆེན་ཚངས་པས་རྒྱང་སོ་ཚུགས། །རྐང་མི་ཡོང་ནས་ར་བཞི་བསྡུས། །ཞེས་དང་། ༢ གླང་བབས་ན། གླང་བོས་སྐྱིད་པོས་རྐང་ཕར་བརྐྱངས། །དྲོད་ལྡན་ཉི་མ་ཚུར་ལ་ལྡེ། །སྡུག་པའི་བ་མོ་ཕར་ལ་ཞུར། །སྡོད་ཀྱི་ཚེ་གྲོགས་རྐང་ནས་བསུ། །ཞེས་དང་། ༣ སྟག་བབས་ན། སྟག་མི་དམར་རྟ་དམར་བཙན་གྱིས་སྐྱོབས། །སྲུང་མ་རྣམས་ཀྱིས་བདུད་དག་བཏུལ། །ཞེས་དང་། ༤ ཡོས་བབས་ན། ཡོས་ཅོག་སེ་སྡོད་ནས་བཀུག་སེ་བྱས། །འགྲོ་གོམ་པ་འདོད་ན་རླུང་གིས་བསྐྱོད། །འགྲོ་མི་ཐུབ་ཕྱག་ཞབས་ཕྱེ་མས་མནན། །ཞེས་དང་། ༥ འབྲུག་བབས་ན། འབྲུག་ངར་སྐད་ཆེ་ནོ་སྟོང་བ་རེད། །གྲག་ཆེ་ཡང་ཆར་གྱི་དངོས་གྲུབ་མེད། །འཇའ་མཁའ་ལ་ཡོད་ཀྱང་དོན་མི་སྨིན། །ཞེས་དང་། ༦ སྦྲུལ་བབས་ན། སྦྲུལ་ནོར་བུ་ཀླུ་ཡི་སྒོ་ཟོག་ཡིན། །དོན་བྱ་ལས་གང་བྱས་འགྲུབ་པའི་ངོ་། །ཞེས་དང་། ༧ རྟ་བབས་ན། རྟ་བོ་ཡུལ་ཁམས་བསྐོར་བ་འདྲ། །མི་བོ་གཉིད་ལ་ཤོར་བ་འདྲ། །འདབ་ཆགས་ཚང་ལ་ཉལ་བ་འདྲ། །གྲོག་ངོ་ཡིན་ཀྱང་ཞི་ཆེ་བ། །འགོར་འགྱངས་ཡོང་བའི་ངོ་ལ་བལྟ། །ཞེས་དང་། ༨ ལུག་བབས་ན། ལུག་གཡང་དཀར་རྒྱལ་བོ་ཁྲི་ལ་བཞུགས། །ནོར་ཕྭ་གཡང་ཐམས་ཅད་དབང་དུ་འདུ། །མཚན་སྙན་གྲགས་གཏམ་སྙན་རྒྱང་ནས་གོ །ཞེས་དང་། ༩ སྤྲེའུ་བབས་ན། སྤྲ་དང་སྤྲེའུ་ལུས་རྩལ་ཆེ། །མི་ནོར་ཕྱུགས་གསུམ་ལྷ་དང་མཉམ། །ཞེས་དང་། ༡༠ བྱ་བབས་ན། བྱ་ཁྱུང་ཆེན་རྒོད་པོ་གཤོག་རྩལ་ཆེ། །སྒྲོ་རླུང་གཤོག་ཡངས་པས་ནམ་འཕངགཅོད། །དུས་ཡུན་ཐུང་ཙམ་ལ་མ་འབྱོར་ན། །ད་ཉིན་ཞག་བདུན་ཙམ་འགོར་བའི་ངོ་། །ཞེས་དང་། ༡༡ ཁྱི་བབས་ན། ཁྱི་རྔ་ནག་གཡུགས་ནས་བྱ་ནག་སྲུང་། །ཟན་གཏོར་མ་དམར་བོ་མེ་ལྟར་འབར། །དོན་བྱ་ལས་ཐམས་ཅད་མགྱོགས་པའི་ངོ་། །ཞེས་དང་། ༡༢ ཕག་བབས་ན། ཕག་མཇུག་མ་ཟང་ངེ་ས་བཟང་སློག །བྱས་འབྲས་བཟང་ངོ་མི་ཤར་བས། །བྱ་བ་འགྲུབ་པའི་རེ་བ་མེད། །ཅེས་སོ། །

རིལ་ནག་དགུ་སྐོར།

 རིལ་ནག་དགུ་བསྐོར་གྱི་མོ་ནི། ར་ལུག་གི་རིལ་མ་དགུ་ཚགས་སུ་ཚུད་པ་བྱས་ནས། རེ་རེ་བཞིན་གཅིག་ནས་དགུ་བར་རྟགས་བཏབ་ནས། སྙིམ་པས་དཀྲུག་སྟེ་ལེན་དགོས་ལ། དཔྱད་འབྲས་ནི། གཅིག་བབས་ན། རི་བོ་འགྲིམ་ནས་བསྟན་པ་དར། །ཞེས་ཁ་རྗེ་དང་རླུང་རྟ་དར་ཞིང་། གང་བྱས་འགྲུབ་པའི་རྟགས་དང་། གཉིས་བབས་ན། མི་ཧྲེང་ཁ་ནས་གཏམ་བཟང་འཁྱེར། །ཕོ་རོག་ཁ་ལས་ཤ་བཟང་འཁྱེར། །ཞེས་གཏམ་ལ་མགྱོགས་ངོ་ཡོད་པ་དང་གྲོགས་བཟང་ཞིག་འཁོར་གྲབས་ཡོད་པའི་རྟགས། གསུམ་པ་བབས་ན། སེང་གེ་དཀར་མོ་ཁྲི་ལ་བཞུགས། །ཞེས་བདེ་སྐྱིད་ཡོང་བའི་ངོ་དང་། བཞི་བ་བབས་ན། ཉི་མ་དྲོས་ནས་གླིང་བཞི་བསྐོར། །ཞེས་བྱ་ལས་སྒྲུབ་པ་ལ་དཀའ་བ་སྤྱད་ནས་གང་སར་བགྲོད་དགོས་པ་དང་། ལྔ་བ་བབས་ན། ཟླ་བ་ལྟ་བུའི་མུན་པ་སེལ། །ཞེས་ཟླ་གཞོན་ཚེས་པ་ལྟར་ཅི་བྱས་གོང་འཕེལ་སོན་པ་དང་། དྲུག་པ་བབས་ན། ཆུ་འཐུང་ཝ་མོ་རྒ་ལ་ཐེབས། །ཞེས་དོན་བྱ་ལ་བར་ཆད་འཚུབ་ངོ་དང་། བདུན་པ་བབས་ན། ཤ་གཟན་ཕོ་སྤྱང་རི་ལ་འགྲིམས། །ཞེས་བྱ་བར་འབད་རྩོལ་བྱས་ཀྱང་ཕྱིར་ལག་སྟོང་དུ་ཡོང་ངོ་དང་། བརྒྱད་པ་བབས་ན། ཕོ་རོག་གྲོག་ཡག་ཁྱིམ་ལ་འགུགས། །ཞེས་བྱ་ལས་ཆེ་ཕྲ་ཐམས་ཅད་འགྲུབ་ངོ་དང་། དགུ་བ་བབས་ན། མིང་དང་དོན་བྱ་གྲོག་སྐད་འཐོབ། །ཅེས་ཐམས་ཅད་འདོད་བློ་བཞིན་དུ་འགྲུབ་པའི་རྟགས་སོ། །

མངའ་རིས་སོག་མོ།

སོག་མོའི་ཁུངས། སོག་མོ་རྒྱག་སྟངས་འདི་དངོས་གཙོ་རྩོད་སྒྲུབ་རིག་པ་དང་། ཚན་རིག་གི་ལྟ་བ་མཐུན་མི་མཐུན་སྐབས་སུ་བབ་པའི་ལྒིང་བྱ་མ་ཡིན་གྱི། གང་ཞིག་ཉམས་རྒུད་དུ་འགྲོ་བའི་དམངས་སྲོལ་འདི་མྱུར་སྐྱོབ་དང་། དེ་ཉིད་འཕེལ་རྒྱས་ཆེ་བའི་སྤྱི་ཚོགས་འདིའི་རིག་གནས་ལ་གདེང་འཇོག་བྱ་ཕྱིར་འདིར་ཡང་ཅུང་ཟད་བརྗོད་འདོད་པས་སོ། །སོག་མོ་ནི་ལུག་གི་སོག་རུས་སྟེང་ཤ་གཙང་མར་བཤུས་ཏེ། མེར་བསྲེགས་རྗེས། སེར་ཁ་གས་ཕྱོགས་ལ་བརྟག་ཏེ་དོན་བྱ་འགྲེལ་བརྗོད་བྱེད་པ་ཞིག་ཡིན། མོ་འདེབས་སྟངས་འདི་ནི། གཙོ་ཆེར་རི་དྭགས་རྔོན་པ་དང་། དམག་དང་རྐུན་ཇག་རྒྱག་མཁན་ལ་ཧ་ཅང་གཙིགས་པས། དེ་དག་གིས་མཐོང་ཆེན་བྱེད་པ་ཡིན། སོག་མོའི་རྒྱུ་ཆར་ཡང་། ར་མ་དང་ལུག གླ་བ་དང་ཤྭ་བ། རྣ་བ་དང་གཉན་སོགས་ཀྱི་སོག་རུས་དགོས་ལ། འོན་ཀྱང་། སོག་མོ་རྒྱག་སྟངས་འདི་རང་རེའི་བོད་དུ་མ་ཟད། དབྱིན་ཏེ་ཨན་མི་རིགས་ཀྱི་ཤྭ་བའི་སོག་མོ་འདེབས་རྒྱུ་ཡོད་པ་དང་། གནའ་བོའི་རྒྱ་ནག་གི་མིས་རུས་སྦལ་བསྲེགས་ཏེ། དེའི་རི་མོ་ལས་ལྟས་བཟང་ངན་དཔྱད་སྲོལ་ཡོད་པར་མ་ཟད། མེ་གླིང་བྱང་མ་དང་། སོག་པོ། འཇང་རིགས། དབྱི་རིགས་རྣམས་སུའང་སོག་མོ་འདེབས་སྲོལ་ཡོད་པར་བཤད་དོ། །སོག་མོ་འདིའི་ཁུངས་ནི་མ་སངས་འཕྲུལ་གྱི་རྡེལ་མོ་མངོན་ཤེས་རྣོ་གསལ་གྱི་སྒྲོན་མེ་ལས། དེ་དུས་རྣམ་མཁྱེན་གཤེན་རབ་ཀྱིས། །གནས་མཆོག་འོལ་མོ་གླིང་ཆེན་དུ། །ཕྱག་གཤེན་ཐེག་པ་གཏན་ལ་ཕབ། །མ་སངས་ཡུལ་དུ་རྡེལ་མོ་བསྟན། །མེ་ཉག་ཡུལ་དུ་སོག་མོ་བསྟན། །ཞེས་པ་ལྟར། བོན་སྟོན་གཤེན་རབ་མི་བོ་ཆེས་གཏན་ལ་ཕབ་པར་བཤད་ལ། ཞང་བོད་ལོ་རྒྱུས་ཏི་སེའི་འོད་ལས་ཀྱང། གཤེན་རབ་མི་བོ་ཆེའི་སྐུ་དུས་སུ་ཞང་ཞུང་མཐའ་མཚམས་སུ་གནས་པའི་མོ་མ་ལྡང་ང་ལྡང་ལོ་བྱ་བ་ཞིག་གིས་སྲིད་པའི་ཇུ་ཐིག་དང་པྲ་ལྟས་ལྷ་མཐོང་དང་། རྩིས་གཞི་ཡང་མིན་པའི་གཡང་མོ་ལུག་གི་སོག་པ་ལ་མཐོང་ལྟ་བ་ཞིག་བྱུང་ནས་མོ་བཏབ་ཞེས་པར་གཞིགས་ན། མོ་འདི་ནི་གདོད་མའི་དུས་སུ་བོན་ཆོས་ལས་འཕེལ་རྒྱས་བྱུང་བ་ཡིན་ལ། ཕྱིས་སུ་ཤ་ཟ་ཁྲག་འཐུང་དུ་རྔམ་ཞིང་། ཇག་ལས་སུ་སྤྲོ་བའི་མི་རྒོད་ཁྲམ་པ་དག་ལ་སོག་པ་འདི་སྟབས་བདེ་ཁྱད་ཀྱིས། རང་ཉིད་གང་ལ་དད་པའི་ཡུལ་ལྷ་གཞི་བདག་ནག་ཕྱོགས་པར་འཕྲིན་བཅོལ་གནང་ནས། སོག་མོ་འདི་གཙིགས་འཛིན་བྱས་ཏེ། ད་ལྟ་བོད་ཀྱི་དམངས་སྲོལ་ཞིག་ཏུ་གྱུར་བ་ཡིན། དཔེར་ན། སྟག་རོང་ཁྲོ་ཐུང་གིས་སྟག་གཟིག་རྟ་མཆོག་ཅང་ཤེས་གཡོ་ཐབས་ཀྱིས་བརྐུས་དུས། སྟག་གཟིག་གིས་མ་རྙེད་པས། སྟག་གཟིག་གི་བློན་པོ་གཡང་དྲུང་ལྷ་རྒྱལ་གྱིས་སོག་པ་རུམ་ནས་བཏོན་ཏེ་ལྷམ་སྒྲོག་གིས་ཕྱོགས་གསུམ་ནས་བསྡམས་ཏེ་སོག་མོ་བཏབ་པ་ལྟ་བུའོ། །འདིར་སྐབས་སུ་བབ་པ་མངའ་རིའི་བྱང་ཐང་གི་སོག་མོ་རྒྱག་སྟངས་དང་། ཨ་མདོའི་སོག་མོ་རྒྱག་སྟངས་གཉིས་སུ་ཕྱེས་ཏེ་བཤད་པ་ལ།

དང་བོ། མངའ་རིའི་སོག་མོ། ༡ མངའ་རིའི་སོག་མོ་རྒྱག་སྟངས་ནི། སོག་པའི་ཡུ་བ་ལ་ལུག་བལ་དཀར་ནག་གཉིས་ཀྱིས་དཀྲིས་ཤིང་། སོག་རྩེ་ལ་མར་གྱི་ཕྲ་རྒྱན་བཏང་སྟེ། དུ་བ་མེད་པའི་མེ་སྒོང་གི་དཀྱིལ་དུ་བཞག་ནས། གང་འཚམ་ཞིག་སོང་རྗེས། ཚག་སྒྲ་གྲག་སྟེ་སྐྱ་ཐིང་ངེར་སོང་དུས། ཕྱིར་བཏོན་ནས། འཁྱག་ཏུ་འཇུག་པ་དང་། དེ་ནས་ཚིག་རོ་ལ་ལག་པས་གཡབ་མོ་ལན་གསུམ་ཙམ་བྱས་རྗེས། མོ་བའི་ངག་ལས། མོ་ཐུག་མོ་ཐུག་ལྷ་སོག་དཀར་མོའི་མོ་ཐིག ཇུས་རྒྱུགས་ཇུས་རྒྱུགས་བཙན་སོག་དམར་མོའི་ཇུས་རྒྱུགས། བཟང་ངོ་བཟང་ངོ་ཀླུ་སོག་སྔོན་མོའི་བསྐལ་བ་བཟང་། ཞེས་བརྗོད་དེ་ལེགས་ཉེས་བརྟག་པ་ཡིན། ཡང་སོག་མོ་བརྟག་ཚུལ་ལ། ཁ་ཅིག ཉིན་མཚན་སྔ་ཕྱི་གང་ཡིན་ལ་སྲེག་ནས་བརྟག་པ་དང་། ས་རུབ་ལ་བསྲེགས་ཏེ་མཚན་གང་བོར་བཞག་ནས། ཞོགས་པ་སྔ་མོ་ནས་བརྟག་པའང་ཡོད་དོ། །

༢ མངའ་རིས་ཀྱི་སོག་མོའི་དཔྱད་འབྲས། སོག་རུས་ཐོག་རུས་ལེབ་གྱེན་བསླངས་ཀྱི་སྒ་གཤོང་ཆེ་ས་དེར་དགྲ་ས་དང་། གཡོན་གཤོང་ཆུང་ས་དེར་གཞན་ས་ཞེས་བརྗོད། གཞན་སའི་སྟེང་སེར་ག་གས་ཡོད་ན། བྱ་བཞག་གང་ལའང་བཟང་རྟགས་སུ་སྨྲ་ལ། སེར་ག་དགུང་སུམ་དཀྱིལ་ལ་གས་ན་གྲོགས་ངོ་དང་། གཞུང་གཤགས་ལ་གས་ཡོད་ན་མགྱོགས་ངོ་བརྩི་བས། རི་དྭགས་རྔོན་པ་ཡིན་ན་མང་བོ་གསོད་ཐུབ་པ་དང་། དམག་འཐབ་ཡིན་ན་རྒྱལ་རྟགས་ཀྱི་མཚོན་དོན་སོགས། བྱ་ལས་གང་ཡང་ལེགས་འགྲུབ་ཀྱི་རྟགས་སུ་བརྩི། དེ་མིན་སོག་རུས་ཀྱི་ཡུ་རྩེའི་ནང་སྣུམ་ཞག་དང་ཝུ་བས་ཁེངས་ཡོད་ན། བང་མཛོད་ནོར་གྱིས་བཀང་ཞེས་ཕྱུག་པོ་ཆགས་པའི་ལྟས་སུ་བཤད། རྔོན་པ་ཡིན་ན་རི་དྭགས་མང་ཙམ་གསོད་ཐུབ་པའི་རྟགས་སུ་བཤད། སོག་རྩེའི་སྐེད་ལ་འཕྲད་དུ་གས་ཡོད་ན། ཚེ་མཇུག་དབུལ་བའི་རྟགས་དང་། སྐེད་ནས་གཞུང་དུ་རང་སར་ཡོད་ན། ཚེ་བསྲིངས་པའི་རྟགས་དང་། ཡུ་བར་གས་ཡོད་ན་མུ་གེ་སྒྲོག་ཐག་བཅད་ཅེས། དོན་བྱ་གང་ཡང་སྒྲུབ་མི་ཐུབ་པར་བཤད། རུས་ལེབ་ཀྱི་སྒ་གཞུང་དེའི་སྐེད་ཆོད་དུ་གས་ཡོད་ན། དོན་བྱ་གང་ཡིན་འགྲུབ་རྟགས་དང་། གཞན་ཡང་། སེར་ག་གས་སྟངས་ཀྱི་མཚན་མར་དཔྱད་དེ། དོན་མཚོན་སྣ་ཚོགས་འགྲེལ་བརྗོད་གནང་རྒྱུ་ཡོད་དོ། །

ཨ་མདོའི་སོག་མོ

གཉིས་པ། ཨ་མདོའི་སོག་མོ། ༡ སོག་མོའི་རྟེན་བཅའ་བ་ནི། མོ་པྲ་བརྟག་པའི་ཐོག་མར་གཞི་ཁེབས་ཕྱིང་དཀར་གྱི་སྟེང་དུ་འབྲུའི་ཚོམ་བུ་གཡུང་དྲུང་རིས་སུ་བཀོད་པའི་ཐོག་ཏུ་མདའ་དར་བཙུགས། དེའི་མདུན་དུ་སྒྲ་ལྷ་ཝེར་མའི་སྐུ་བཤམས། གཡས་སུ་ཕྱེ་མར་དང་། གཡོན་དུ་ཆང་ཕུད་བཤམས། སྒྲོན་མེ་སྦར། བདུད་རྩི་ཤིང་གི་དུད་པ་སྦྲེང་། དྲི་ཞིམ་གྱི་ཡོས་བཏུལ། བདུད་རྩིའི་སྐྱེམས་སོགས་ཀྱིས་མཆོད་དགོས་སོ། །

༢ སོག་མོའི་སྔོན་འགྲོའི་རིམ་པ་ལ། བགེགས་བསྐྲད། དུག་དབྱུང་། ཁྲུས་བྱ་བ། བསང་གཏོང་བ། སྨྲང་གྱེར་ཞིང་མོ་ལྷ་སྤྱན་འདྲེན་པ། མོ་བདར་བ་བཅས་དྲུག་ཡོད་པ་ལས། ༡ བགེགས་བསྐྲད་པ་ནི། མོ་ལྷར་དགོངས་གསོལ་བཏང་སྟེ། མོ་པྲ་ལ་བར་དུ་གཅོད་པའི་གདོན་བགེགས་དང་མོ་ཡི་དམུ་གབ་རྣམས་ཐལ་བའི་རྡུལ་དུ་རློག་པའི་འཕྲིན་ལས་བཅོལ་བའོ། །

༢ དུག་དབྱུང་ནི། དུག་བྱབས་ཀྱི་རྫས་བསེ་ཤིང་། རེ་ལྕག ཐར་ནུ། ཐང་ཁྲོམ། བོང་བ། མུ་ཟི། སྒོག་པ། བཙའ་ཆུ། ཤུ་དག་རྣམས་སོག་པའི་དགྲ་སའི་ཐོག་ཏུ་བཞག་ཏེ་ཆོ་ག་གྱེར་ནས་མོ་ལྷ་སྤྱན་དྲངས་ཏེ་སེམས་ཅན་རྣམས་ཀྱི་དུག་དང་གྲིབ་ཕྱུང་ཆབ་གྱིས་བསལ་ཏེ། དུག་སྣ་མེར་བསྲེགས་ནས་ལྷ་གཞི་ལ་ཕྱི་བསྐོར་བྱས་ནས་ཕྱིར་བོར་བའོ། །

༣ ཁྲུས་བྱ་བ་ནི། ཁྲུས་ཀྱི་རྫས་ལ་ག་བུར། རྒྱ་མཚོའི་ཝུ་བ། གུར་གུམ། ཅོང་ཞི། བྲག་ཞུན། གླ་རྩི། གི་ཝང་། ཏི་སེའི་གངས། མ་པང་མཚོ་ཆུ། ཚན་གྱི་ལྗག་ནི་ལྷ་བྱ་གོང་མོའི་གཤོག་གཡས་ཀྱིས་གཏོར་ཏེ། ཆོ་ག་གྱེར་ནས་མི་གཙང་དྲི་མ་གང་མཆིས་པ་ཐམས་ཅད་གཙང་ཆབ་ཀྱིས་བཀྲུས་ནས། སྡིག་སྒྲིབ་བག་ཆགས་བྱང་བར་བྱེད་པའོ། །

༤ བསང་ནི། བསང་རྫས་ལ་ཨ་ཀྲོང་། སྲོ་ལོ། ཨ་བ། སྤྲ་བ་ཐོད་དཀར། འཁན་པ། གསེར་ལོ། ཤུག་པ། བ་ལུ། ཙན་དན་སོགས་དར་ཅིག་སོག་པའི་རང་སའི་སྟེང་དུ་སྤུངས་ཏེ་ཆོ་ག་གྱེར་བཞིན། བསང་རྫས་མེར་བསྲེགས་ནས་རྣོ་མཐོང་སྟོན་པའི་ལྷ་རྣམས་བསང་ངོ་། །

༥ སྨྲང་གྱེར་པ་ནི། གཟའ་སྐར་འཕྲོད་སྦྱོར་བཟང་བའི་ཉིན་མདའ་དར་ཕྱག་གིས་གཡབ་སྟེ་རིགས་ཀྱི་ལྷ་བདར། ཚིག་གི་སྨྲང་གྱེར་ནས་སྒྲུབ་གཤིན་ལ་བྱིན་གྱིས་བརླབ་པ་དང་། མོ་རྟེན་སོག་པར་དབང་བསྐུར་བ། སྲིད་པ་རྣམས་ལ་གྲོས་བཏབ་སྟེ་འབྱུང་འགྱུར་ལེགས་ཉེས་ཀྱི་རྗེན་པར་སྟོན་པའི་དངོས་གྲུབ་ཞུ་བའོ། །

༦ མོ་བདར་བ་ནི། རྣོ་མཐོང་མོ་ཡི་ལྷ་ཚོགས་ལྷང་ལྷང་དུ་འབོད་པ། ཡུག་ཡུག་རྒྱུགས་པ། དག་དག་ཏུ་སྨྲ་བ། གསལ་གསལ་དུ་སྟོན་པ། མདངས་ལ་བལྟས་པས་ཁམས་གསལ་བ། སྐད་ལ་ཉན་པས་སྲིད་གསུམ་གོ་བ། ཡིད་ལ་བསམ་པའི་དུས་གསུམ་རྟོགས་པ་རྣམས་བདར་ཏེ། འདོད་དོན་ཞུ་བ་ནི། བདག་གི་མི་ཤེས་པའི་དྲི་བ་འདི་ལ། ཐུགས་ཀྱིས་དགོངས། སྙན་གྱིས་གསོན། སྤྱན་གྱིས་གཟིགས། བཟང་ངན་གྱི་ཤན་ཕྱེས། ལེགས་ཉེས་ཀྱི་ལྟང་ཆོད། དཀར་ནག་གི་ཐིག་ཐོབས། ལས་ལ་བརྐོས་པ་གང་ཡོད། མོ་ལ་མངོན་ཤེས་བཞིན་དུ་ཕོབས། བཟང་ངན་མ་བསྲེ། ཡག་ཉེས་མ་བསྣོལ། མགོ་མ་གཡོགས། དིག་མ་བསྐོར། དྲང་དུ་ཕོབས། དྲང་དུ་སྨྲོས། རྣོ་རུ་སྟོན། གསལ་བར་སྟོན། ཞེས་བརྗོད་དེ། བསྭོ་མུ་སྤྲོས་འབར་གསལ་ཟེར་ཕྱོད་ལམ་གསལ། ངད་གྱེར་ཨ་དཀར་འོད་ལམ་ཕྱོད། མ་མིག་རྐོ་ཡེ་ས་ལེ་ཤག་སལ་སལ། ཞེས་དང་། བསྭོ་ཐ་ཐ་ཡེ་ཡེ་པྲ་མོ་ཡེ། པྲ་ཉོས་ན། པྲ་མོ་ཕོབས། ལྟོ་ཚང་ཅི་ཧོ་ཡ། པྲ་མོ་སྟོན། མོ་རྣོ་བའི་སྔགས་འདི་ཅི་མང་བཟླས་ཏེ། མེ་འཇམ་པོའི་ནང་དུ་སོག་པ་སྲེག་གོ།

༣ སྔོན་འགྲོའི་བཤད་ཚུལ་འགོད་པ། སོག་མོ་འདེབས་པ་ལ། ཐོག་མར་སོག་པའི་ཆ་ཤས་ཀྱི་མིང་བརྡ་ངོས་ཟིན་པ་གལ་ཆེ་སྟེ། སོག་དཀྱིལ་གྱི་སྒ་གཞོང་དེར་མཛོ་གདོང་དང་། མཛོ་གདོང་གིས་ཕྱེས་པའི་རུས་ལེབ་ཆེ་བ་དེར་ཕྱི་ས་འམ་དགྲ་ས། ཆུང་ས་དེར་རང་ས་འམ་ལྷ་ས་དང་། སོག་ལེབ་ཀྱི་སྟོད་ཆ་དེར་བློ་ཕུག་དང་། དེའི་ཞོལ་གྱི་ཁ་གདོང་དེར་ལམ་དང་། ཡུ་བའི་ཀོང་ཀོང་དེར་སླ་ང་། མཛོ་གདོང་མེད་ས་དེར་སོག་རྒྱབ་ཟེར། ཁྱད་པར་དུ་སོག་མོའི་གཞི་རྩར་གྱུར་བ་ནི། བློ་ལམ་རྩེ་གསུམ་ཡིན་པར་བཤད་དེ། དངུལ་དཀར་མེ་ལོང་ལས། ལྷག་པར་སོག་མོའི་བརྟག་གཞི་ནི། །བློ་དང་ལམ་དང་རྩེ་གསུམ་ཡིན། །བློ་ནི་མོ་ཡི་སྙིང་ཡིན་ལ། །འདི་མེད་མོ་ལ་སྙིང་མེད་པས། །བཟང་ངན་ལུང་སྟོན་ནུས་པ་མིན། །ལམ་ནི་འགྲོ་བའི་གཞི་ཡིན་པས། །བདེ་དང་མི་བདེ་བལྟ་བའི་གཞི། །ལྷག་པར་འགྲུལ་བའི་བལྟ་ས་ཡིན། །རྩེ་ནི་ཟ་ཁ་གྲོགས་ཁ་དང་། །ལྷ་ངོ་མཐོ་དམན་བལྟ་ས་ཡིན། །ཞེས་སོ། །

སོག་པ་ལ། རབ་ལྷ་ལུག་གྲོ་མོའི་སོག་པ་གཡས་པ་དང་། མ་འབྱོར་ན་ལུག་གང་རུང་གི་སོག་གཙང་ཆུར་བཀྲུས་ནས་ཤུག་པས་འཕུར་བྱུགས་བྱས་རྗེས། དད་བྱའི་ཡུལ་ལྷ་ལ་སྐྱབས་འཇུག་བྱས་ཏེ། ཡེ་་་་་་་་་འདི་ར་སོག་མིན། ཕག་སོག་མིན། རེའུ་སོག་མིན། དུང་གི་ལྷ་སོག་དཀར་མོ་ཡིན། མ་མོ་གྱོ་མོའི་གཡས་སོག་ཡིན། བཟང་ངན་གཉིས་ཀ་ཆ་འགྲིག་མ་བྱ། བདེན་རྫུན་གཉིས་ཀ་ཆར་འབེབས་བྱ། བཟང་ན་བཟང་ཐག་ཆོད། ངན་ན་ངན་ཐག་ཆོད། སྟོད་ཀྱི་ཆུ་ཆེན་བྲུག་ལ་མ་བལྟ། སྨད་ཀྱི་ཟམ་ཆེན་ཁུར་ལ་མ་བལྟ། བརྒྱ་ཕར་འགྲོ་ལ་མ་བལྟ། སྟོང་ཚུར་ཡོང་ལ་མ་བལྟ། ཇག་པ་རྟ་འདེད་ལ་མ་བལྟ། ཁེ་བ་མཛོ་འདེད་ལ་མ་བལྟ། བུ་ཡུག་གི་རྒྱུ་ལ་མ་བལྟ། མ་ཡག་གི་ངོ་ལ་མ་བལྟ། དཔྱད་པ་ཚུགས་ནི་ཞིག གོ་བ་འདུ་ནི་ཞིག བུ་རིག་པ་ཅན་ལ་རིག་རྒྱུ་ཡོད་ནི་ཞིག ཡིག་རྩལ་ཅན་ལ་འདོན་རྒྱུ་ཡོད་ནི་ཞིག མ་འཕྱུག མ་ནོར། དུང་གི་ལྷ་སོག་དཀར་བོ་འདིའི་སྟེང་དུ། ཤོག་བུ་དཀར་དཀར་ཞིག་དང་། སྣག་ཚ་ནག་ནག་ཅིག་བྱེད་དགོས། གསེར་གྱི་ཀ་བ་ས་ལ་ཟུག་དགོས། དངུལ་གྱི་ཀ་རྡོ་རྒྱུན་དུ་བརྟན་དགོས། སེང་གེ་དཀར་མོའི་གདོང་གི་འཛུམ་དགོས། དམར་ཡག་སྟག་གི་མཆེ་བར་ནས་ཤོར་དགོས། བཅུ་གསུམ་གྱི་རྩེ་དགོས། ལག་ཡོང་གི་ནོམ་དགོས། བསམ་ཐོག་གི་རྟ་དགོས། འདོད་ཐོག་གི་ཆར་དགོས། གསེར་གྱི་རྡབ་བུ་གཉིས་གཤིབ། དུང་གི་ངང་དཀར་གཉིས་འགྲོགས། སོག་པའི་ཁ་ཁྱིམ་ཕྱི་ས་ལ། རྩྭ་རྡུལ་དང་ཁྱི་ལུད་ཀྱི་ནོངས་ཕབ་ན། ཕྱི་ས་འདི་བཙའ་ཆགས་ཆགས། ཤིང་ཉེས་ཉེས་བྱ་དགོས། སོག་པའི་རང་ས་བཀའ་དྲིན་ཅན་ལ། འབྲུ་ཤུག་སྔོན་མོའི་ཁ་རྒྱན་ཞིག་འཐེན་ན། བཟང་བཟང་ཐམས་ཅད་རང་སར་འབབ་དགོས། རྒྱན་རྒྱན་ཐམས་ཅད་རང་གིས་ལེན་དགོས། རང་སར་བདེ་སྐྱིད་ལོངས་སྤྱོད་འཛོམས་དགོས། སྲེག་པ་ཡག གནས་པ་ཡག གས་པ་ཡག ཡག་གསུམ་ཡག་པ་ཡར་ལ་བསྟོད། ཅེས་སོག་མོའི་བཤད་པ་གྱེར་ཞོར། རང་སར་ཤུག་ལོ་ཞིག་བཞག་ནས། བཟང་ཐམས་ཅད་རང་སར་འབབ་དགོས། བརྒྱན་དགོས། ཕྱི་སའི་སྟེང་ལ་རྩྭ་ཞིག་བཞག་ནས་ངན་ཐམས་ཅད་དགྲ་སར་ཆག་དགོས། ཆོམས་དགོས། ཉོག་དགོས། ཞེས་དང་། ཡང་བློ་ཕུག་སྟེང་ལ་ཤུག་པ་ཞིག་བཞག་ནས། བློ་ཕུག་རྩེ་གཏད་ས་ཡིན་པས། བརྟན་དགོས། རྟག་དགོས་ཟེར་ཞོར། སོག་མགོ་རང་ལ་བསྐོར་ནས་མེར་སྲེག་ཏེ། དུས་ཡུན་ངེས་ཅན་ཞིག་འགོར་ནས། གས་སྟངས་ལ་བལྟས་ཏེ་དཔྱད་དགོས་སོ། །

༤ སོག་རུས་གས་སྟངས་ཀྱི་དཔྱད་འབྲས། ༡ དགྲ་སར་བརྟག་པ། ཕྱི་སའི་གཞུང་ཆེ་ཆུང་མེད་པར་གས་ན་ཕྱི་སའི་བློ་གཞུང་དྲང་། དཔྱད་འབྲས་དགྲ་ཕྱོགས་ནས་གྲོགས་བྱེད་པ་དང་། སྐྱོན་ངེས་ལེན་གྱི་ངོ་ཡིན། ཕྱི་སའི་གོར་གས་ས་གོར་རྡིབ་བྱུང་ན། ཕྱི་སའི་ལྷས་ལྷུང་བ་ཟེར། ཕྱི་སའི་ལྷའི་རྒན་སྐྱ་ལྡང་ལྷུང་ན། རྒོད་གཞུ་མོ་མ་རྟེའུ་གྱེག་གེ་འདེད་ཞེས། ཕྱི་ས་ན་ལག་ཡོང་བཟང་བས་ངོ་། ཕྱི་ས་ནས་གས་ག་ཕྲ་མོ་རང་སར་ཟུག་ན། ཕྱི་སའི་ལྕེ་རྣ་ཞེས། གྱོད་ཡའི་བཤད་ཟླ་ཡོང་དཀའ་བའི་ངོ་། ཕྱི་སའི་བློ་ཕུག་གི་གཤམ་ནས་གས་ཆག་འཕྲེད་དུ་དགྲ་དཔུང་ཆད་པ་ཞེས། དགྲ་ཕམ་རང་རྒྱལ་གྱི་ངོ་། ཡང་། དེ་ན་སེར་གོར་མོར་མཆིས་ན། བློ་རང་སར་དཀྱུས་པ་ཞེས་བཟང་ཞིང་། དྲང་གས་བྱུང་ན་བློ་ཕྱི་ཤོར་ངན་པའི་ངོ་། མཐེབ་ཀྱི་དཀྱིལ་ནས་མགུལ་དཀྲིས་ཞེས་ཕྱི་སའི་ཕྱོགས་སར་གས་ན་དགྲ་བོ་མུ་གབ་འོང་བའི་ངོ་། ཕྱི་སའི་གྲུ་སྣེ་གས་ན། ཕྱི་སའི་རྣ་འུར་བའི་ངོའོ། །

༢ རང་སར་བརྟག་པ། རང་སའི་ལྷས་ལྷུང་ན་གོད་ཁ་འབྱུང་། ལྕེ་རང་ས་ནས་ཕྱི་ས་ཟུག་ན་བཟང་བར་སྨྲ་ལ། རང་སའི་ལྕེ་གཏིང་འཁོར་ན་ཕྱི་ཟླ་བཤད་ཟླ་བཟློག་པའི་ངོ་། རང་སའི་གྲུ་སྣེ་གས་ན་རང་སའི་རྣ་འུར་བ་ཞེས། སྐད་ཆ་འདྲ་མིན་སྣ་ཚོགས་གོ་བ། རང་སའི་མི་ས་རྟ་ས་གས་ན། མི་ས་རྟ་ས་ལྕགས་ཡིན་ཞེས། ཇག་ཕར་འགྲོ་བཟང་། རང་སར་ངོ་གཞོགས་རྒྱུག་ན་རང་ཕྱོགས་མི་ཤི་རྟ་འགྱེལ་འོང་བར་བཤད་དོ། །

༣ མཛོ་གདོང་ལ་བརྟག་པ། མཛོ་གདོང་གི་དམའ་ས་ནས་གྱེན་དུ་དྲང་མོར་གས་ན། འཛུམ་ཐོད་ར་གཅིག་གིས་རྟ་བརྒྱ་འགུགས་ཞེས། ཇག་ཕར་སོང་ལ་ལག་ཡོང་ཆེ་བའི་ངོ་། ཡང་། མཛོ་གདོང་གི་མཐོ་སྣེ་ནས་གྱེན་དུ་གས་ན། རྨེད་ཨ་འཛུགས་གཅིག་གིས་རྟ་བརྒྱ་འགུགས་ཅེས་གོང་དང་གཅིག་མཚུངས་ཡིན། མཛོ་གདོང་ཡས་སྣེ་རྟིང་བ་འཕྲེད་དུ་གས་ན། རྨེད་བརྒྱུས་པ་ཞེས་ཕར་སོང་ལམ་ལ་ཆས་པའི་ངོ་། མཛོ་གདོང་མཐོ་སྣེ་ནས་མར་སོར་དོའི་མཚམས་སུ་གས་ན། སྒ་གཅིག་བསྟད་ཟེར་ཏེ་དོན་ཕྭ་བཟང་བའི་ངོ་། དེ་ལྟར་རིམ་པ་གསུམ་གས་ན། སྒ་གསུམ་བསྟད་སོག་པ་དཔྱད་རྒྱུ་མེད། །དེར་ཁ་ཞིག་བསྐུས﹙མར་ཉུང་ཙམ་གྱིས་བརྒྱན་པ﹚ཏེ་ཡར་ལ་ཞོག། ཅེས་དོན་བྱ་ཧ་ཅང་བཟང་ངོ་འབྱུང་བའི་རྟགས། དེའི་གཤམ་སོར་དོའི་མཚམས་སུ་གས་ན། མིག་མར་འཁོར་ཞེས་པ་སྟེ། བྱ་ལས་གང་ཡང་རྒྱུས་ལོན་པའི་ངོ་། རང་ཕྱི་གང་གི་སྟེང་ནས་འཕྲེད་དུ་གས་ཏེ་མིག་དང་འདྲེས་ན་སྣ་ཐིག་དང་སྲབ་མདའ་མིག་འོག་ལ་དྲངས་ཟེར། ཕྱི་ས་གས་ན་རང་ལ་ལེགས། རང་ས་གས་ན་དགྲ་ལ་དོགས་ཟོན་དགོས། དེའི་འགབ་ནས་གས་ན་མིག་ཀླད་འཁོར་ཞེས། དགྲའི་དམུ་གབ་ཀྱི་མོ། མཛོ་གདོང་རྟིང་བར་ཐུར་དུ་གས་ཁ་ཆེན་པོར་སོང་ན། སྒ་ཁོག་བཀྱགས་ཞེས། ལེགས་ཀྱང་གནོན་དཀའ་བར་བཤད་དོ། །

༤ ལམ་ལ་བརྟག་པ། ལམ་དྲང་ན་བཟང་ཞིང་ཆད་ན་ངན་པའི་ངོ་། ལམ་ནང་ན་གསེག་གས་ཡོད་ན་ལམ་ནང་མྱི་བོ་ཀེག་ལངས་ཞེས། ཇག་ལམ་རྩུབ་པ་འབྱུང་། ལམ་ཐོག་ནས་དྲང་མོར་གས་ཏེ་ལམ་དང་འདྲེས་ཡོད་ན། ལམ་ཐོག་རྟ་བོ་ཆོལ་ཅན་ཞེས། བཟང་རྟགས་དང་། ལམ་འོག་ནས་དྲང་མོར་གས་ནས་ལམ་དང་འདྲེས་ན། ལམ་འོག་འབྲི་མོ་བེའུ་ཁྲིད་ཅེས་བཟང་ངོ་དང་། ལམ་སྣེ་འཐེབ་ཐོག་ལ་བུད་ནའང་བཟང་བར་བཤད་དོ། །

༥ སླ་ང་དང་མཐེབ་ལ་བརྟག་པ། སླ་ངའི་གྲུ་རྩེ་ནས་གཡོན་སར་གས་ན་རྒྱ་འཐེབ་དང་། གཡས་སར་བྱུང་ན་དགྲ་འཐེབ་ཡིན། སླ་ངའི་ཁར་གས་ཁ་མཆིས་ན་རྟ་རྨིག་ལྷུང་བ་ཞེས། ཚེགས་ངོ་ཆེ། སླ་ངའི་ནང་ལྦོས་གས་བྱུང་བ་དང་ཝུ་བ་འཕྱུར་ཡོད་ན། ཡོང་སྒོ་ཆེ་བའི་ངོ་།

༦ སོག་རྒྱབ་ལ་བརྟག་པ། མཛོ་གདོང་དྲང་ཐད་ཀྱི་རྒྱབ་ངོས་གས་ན་སྙིང་སྒོར་ཟེར། གས་ཁ་ཁར་བུད་ན། སྙིང་སྒ་ཁར་བུད་པ་ཟེར། དེ་གཉིས་གང་ཡང་བཟང་བའི་ངོ་། མཛོ་གདོང་དྲང་ཐད་ཀྱི་སོག་ཡུ་གྱེན་གས་བྱུང་ན། ཧ་ཅང་བཟང་། གསེར་གྱི་བག་གེ་ས་ཟུག་གས་ན། ཇག་རབས་གསུམ་ལ་མོ་མི་འདེབས་ཟེར། ཕྱི་ས་དང་རང་ས་གང་གི་ཐད་ནས་ངོ་གཞོགས་ལྷུང་ན། དེར་མི་ཤི་རྟ་འགྱེལ་འོང་བའི་རྟགས་ཡིན། གཞན་སོག་པའི་མཐའ་གང་ལའང་སེར་ཞིབ་མང་དུ་གས་ན་འགོང་ཤ་ཡིན། མོ་ལྟས་མི་བཟང་བར་བཤད་དོ། །

༧ མཚར་བའི་གས་ཆག་གསུམ། སྟག་མོ་ཁ་གདངས། སྦྲུལ་ནག་ཐུར་རྒྱུགས། རྔ་མོང་རྐེ་ཆད་དོ། །

༥ སོག་པའི་ཁ་དོག་ལ་བརྟག་པ། སོག་པ་མེར་བསྲེག་རྗེས་ཁ་དོག་ནག་པོ་དང་། ཁྲ་བོ། དཀར་བོ་གསུམ་གང་རུང་འབྱུང་ལ། གོས་ཆག་གསུམ་དང་ཁ་དོག་གི་ཁྱད་པར་ཀྱི་དཔྱད་འབྲས་ཁྲོམ་བཤད་བྱས་ན་ཕན་ཚུན་བར་ལ་གོད་ཆག་འབྱུང་བར་ཉེན་ཆེ་བས་གཏེར་དུ་སྦས་པར་བཤད་དོ། །

༦ བསྟན་རྣམ་པའི་སོག་མོའི་རྣམ་བཤད་ལས་ཉེར་མཁོ་ཟུར་དུ་ཕྱུང་བའི་རེའུ་མིག

 ཨང

 དཔེ་རིས

 མིང་བརྡ

 འབྲས་བཤད

 

བློ་ཟུར་སྟོད་གས།

འགྱོད་པ་ཆེ་ཞིང་ཤུགས་རིང་འཐེན་པ། ནད་པ་དང་དོན་ཆེན་གྱི་རིགས་ལ་རིམ་གྲོས་བཟློག

 

རང་སའི་རྩེ་གས།

སྐུང་ས་བཙལ་དགོས། རང་ས་འཆོར་བའི་རྟགས། ནད་པ་ཡིན་ན་འཚོ་དཀའ། གྲོགས་ངོ་ཆུང་།

 

རང་སའི་རྩེ་གས།

ནང་འཁྲུག་ཆེ་ལ་འུར་ཟིང་གི་ངོ་།

 

ཕྱི་སའི་རྐེད་གས།

རྐུན་མ་ཡིན་ན་ར་མདའ་མྱུར་མོར་འོང་། གབ་པ་དང་བྲོས་ན་བཟང་། ཡང་ན་ངོ་ལེན་བྱས་ན་བཟང་། ནད་པ་ཡིན་ན་འཆི་བསླུ་བྱ། གྲོགས་ཕྭ་ལ་གཡང་སྒྲུབ་གནད་དུ་ཆེ།

 

བློ་ཁ་ཕྱིར་འཁོར།

བསམ་དོན་མི་འགྲུབ། བར་ཆད་ཆེ། རིམ་གྲོ་བསྒྲུབ་པ་གནད་དུ་ཆེ།

 

རྩེ་སུམ་ཐོག

དོན་ཕྭ་གང་ཡིན་ཡང་སྐབས་བབ་དང་བསྟུན་ཏེ་ལུང་བསྟན་བྱ།

 

བློ་ནང་འཁོར

གྲོས་བརྡར་མི་དགོས་པར་ཐམས་ཅད་བློ་ཁ་ནང་དུ་འཁོར་ལ། དོན་བྱ་གང་ཡིན་འགྲུབ་པའི་ངོ་།

 

མཛོ་ཐོད་དཀར།

མཛོ་ཐོད་དཀར་ཅན་གྱིས་རྟ་བརྒྱ་འགུགས། ཟེར་བས། གྲོག་ངོ་ཡིན་པས་ཁ་གྲོག་ཆེན་པོ་འཐོབ།

 

དགའ་ངོ་།

དོན་ཕྭ་ཀུན་ལའང་ཧ་ཅང་དགའ་ངོ་ཆེ།

༡༠

 

ནག་ལོང་།

དགྲ་རྐུན་གྱི་ངོ་ཆེ་བས། དོགས་ཟོན་དང་མེལ་ཚེ་བྱེད་པ་གལ་ཆེ།

༡༡

 

བློ་ནང་ཤོར།

ཕྱི་སྐད་ནང་དུ་ཤོར་བས། ནང་གི་གྲོས་ཁ་མཐུན་པའི་རྟགས་ཡིན། གྲོགས་དང་ཕྭ་གཡང་ནང་དུ་ཁུགས། ནད་པ་ཡིན་ན་རིང་དུ་འཚོ།

༡༢

 

དགྲས་ཚུར་རྒོལ།

རང་ཕམ་གཞན་རྒྱལ་གྱི་ངོ་། ནད་པ་ཡིན་ན་བླ་ཚེ་སྟོར། རིམ་གྲོར་དགྲ་སྒྲུབ་ཚེ་སྒྲུབ་སོགས་བྱ།

 

དགྲར་རྒོལ།

རང་རྒྱལ་གཞན་ཕམ་གྱི་ངོ་།

 

བློ་ཁ་ཕྱིར་ཤོར།

ངན་པས་ནང་ནས་བློ་ཁ་ཕྱིར་ཤོར་བ་ཡིན་པས། ཤོར་བ་ཕྱིར་མི་ཁུགས་པའི་རྟགས།

༡༥

 

བློ་ཁ་ཕྱི་ཤོར་ནང་ཤོར།

བློ་ཁ་ཕྱི་ནང་གཉིས་ཀར་ཤོར་བས། དོན་ཕྭ་འབྲིང་ཡིན། འཐོབ་ཤོར་གཉིས་ཀ་ཕན་ཚུན་མཉམ། ནད་ཕྭ་ཡིན་ན་ལྷ་འདྲེས་གཅོད། རིམ་གྲོར་གནད།

༡༦

 

གསེར་ཀྱི་ཟླ་བ་གཉིས་རྐྱ

རྐུ་དང་ཇག་ལ་བཟང་། གྲོགས་ངོ་ཆེ། ཕྭ་གཡང་དང་ནོར་སྒྲུབ། དོན་ཆེན་འགྲུབ།

༡༧

 

མོ་ཡི་མཆོག

འདི་གོང་ན་མེད་པའི་མོ་ཡིན་པས་འབྱོར་བ་རབ། བྱ་བ་ཀུན་ཧ་ཅང་བཟང་།

༡༨

 

གྲོགས་ངོ་ཆེ་བའི་མོ།

དགྲ་རྐུན་ཇག་པ་ལ་བཟང་། རྒྱུ་ནོར་གང་འདོད་ལག་ཏུ་ལོན་པར་མ་ཟད། ལོན་རྟིང་ཕྱིར་མི་ཤོར་བ་ཡིན། ནད་ཕྭ་དང་སྲོག་ཕྭ་བརྟན།

༡༩

 

བློ་ལ་མགོ་ར་ཐེབས་པ།

རང་གི་ད་ལྟའི་འདུན་མ་ལ་མགོ་བསྐོར་ཐེབས་ཏེ། དགྲ་བོའི་ལག་ཏུ་འཆོར་ཉེན་ཆེ། དགྲ་ཇག་རྐུན་མས་སྔོན་དུ་སྒུག་པའི་ངོ་། སྤྱང་གྲུང་འཛོམས་པ་གལ་ཆེ། ནད་ཕྭ་ཡིན་ན་ངན་པ་ཡིན།

༢༠

 

ཉ་ལོང་དུས་ལ་རན་པའི་མོ།

དགྲ་དང་རྐུན་མ་སོགས་ལ་ར་མདའ་འགྲོ་བའི་དུས་སུ་བབ་པ་ཡིན་པས། ཟ་ཁ་འཐུང་ཁ་ཕྱེས་པ་ཡིན། བདག་མེད་ཀྱི་ནོར་རྟ་འཕྲད་ངོ་ཡིན། མ་འདུག་ཟ་ཚོད་འགྲོ་བར་སོང་ན་བཟང་ངོ་། །

༢༡

 

བློ་ཕྱིར་བསྐོར།

རྒྱུ་ནོར་ལ་མྱུར་དུ་འཕྲད། དོན་གཞན་གང་ལ་བཟང་། ཁྱད་པར་དུ་གྲོགས་ངོ་ཡོད་པའི་རྟགས་སོ།།

༢༢

 

མི་ས་རྒན་གཞོན་བྱིས་པའི་ས། རྟ་ས་རབ་འབྲིང་ཐ་གསུམ།

སྣེ་ནས་མཐེབ་གང་ཡར་འཇལ་བ། །མི་ཡི་ས་ཡིན་དེ་ལ་ཡང་། །སྲིད་པ་གསུམ་གྱི་རྒན་རབས་དང་། །གཞོན་པ་བྱིས་པའི་ས་ཡིན་པས། །སོ་སོའི་ས་རུ་རིམ་པར་བརྟག། དེའི་སྟེང་མཐེབ་གང་མདོ་བ་རྟ། །ས་ཡིན་དེ་ལའང་རིམ་གསུམ་གྱི། །རྟ་ཡི་རབ་འབྲིང་ཐ་མའི་ས། །སོ་སོའི་ས་རུ་གས་པ་དང་། །ཐིག་ལེ་ལ་སོགས་ལྟས་ལ་བརྟག །མ་ནོར་ཁ་དམར་ཞིབ་བཤད་བྱ། །

༢༣

 

ལམ་ས་གས་པ།

ལམ་ནས་གས་སྲུབ་སོག་པ་ཡི་མིག་གི་མཚམས་ནས་སྟེང་དུ་སོང་ན། དྲང་ལམ་ཡིན་པས། དཀའ་ལས་མེད། དགྲ་ཇག་གིས་གནོད་མི་ཚུགས། གང་བསམ་ས་རུ་བདེ་བར་འབྱོར་རོ། །

༢༤

 

ལམ་ངན།

རྐུན་ཇག་གི་འགལ་རྐྱེན་འཕྲད་པས། བགྲོད་དཀའ་ལ། དེ་མིན་ཁ་ཆར་བུ་ཡུག་འཚུབ་པས་ལམ་འགྲོ་དཀའ་ལས་ཆེའོ། །

༢༥

 

དུམ་གཅིག་ཆག་པ།

རང་ཉིད་དགྲས་གསོད་པར་མ་ཟད། མོ་བདག་ལ་ངན་ཞིབ་བར་ཆད་འབྱུང་ངོ་ཆེ། གཞན་དོན་ཕྭ་གང་ལའང་མི་བཟང་ངོ་། །

༢༦

 

སྒ་རུ་ཐོད་ཐུག

འཕྲད་དགོས་པ་དང་གོ་དགོས་པ་ཡོད་ན་འཕྲད་ཅིང་གོ་བ་ཡིན།

༢༧

 

བློ་མེད་གས་པ།

དགྲ་ངོ་ཆེ་ཞིང་བྱ་བ་གཞན་གང་ལའང་ངན་ནོ། །

༢༨

 

ཐིག་ལེ་དགུ་རིས།

འདི་ནི་ཤིན་ཏུ་ངན་པའི་མོ་ཡིན། མགོན་སྐྱབས་བྱེད་པའི་ལྷ་བདུད་ཀྱིས་བརླམས་ནས། དམེ་གྱོད་ཀྱིས་རོ་དགུ་འབྱུང་། རྒྱལ་བོ་གདན་དང་བྲལ། རྒྱལ་མཁར་རྨང་ནས་འགྱེལ། རྒྱལ་བརྒྱུད་རྩ་ནས་ཆད། རྒྱལ་ས་འབངས་ཀྱིས་འཛིན། གྱོད་མགོ་རི་བོའི་དཔངས་ལས་ལྗིད། གྱོད་རྔ་ཆུ་བོའི་གཞུང་ལས་རིང་། གྱོད་འབྱུང་སྐད་ཅིག་གློག་ལས་མྱུར་རོ། །

༢༩

 

རྒྱབ་ནས་དུམ་གཅིག་ལྷུང་བ།

མོ་འདི་ཤིན་ཏུ་ངན་པ་ཡིན་ནོ། །དེ་མིན་སོག་པའི་མདུན་དུ་མ་གཏོགས་རྒྱབ་ཏུ་བརྟག་གཞི་མེད་དོ། །

པྲ་ཕབ།

པྲ་ཕབ་ཚུལ་འདི། བོན་ལུགས་ཀྱི་བཤད་ཚུལ﹙ནམ་མཁའི་ནོར་བུ་སོགས﹚ལ། སྣང་སྲིད་པྲ་ཡི་ལུགས་འདི་ནི། ཕྱཱ་གཤེན་པའི་ལུགས་ཀྱི་དབང་ལྷའི་བཀའ་བབས་ཞེས་བྱ་བའི་བོན་གྱི་བྱེ་བྲག་ཅིག་ཡིན་ཞིང་། དེ་ལའང་། པྲ་རྟེན་ཕོ་མོ་སུ་ཡང་རུང་བའི་མིག་གི་སྣང་ཆ་ལ་བབས་པའི་པྲ་ཞིག་དང་། རྣ་བའི་སྒྲའི་སྣང་ཆ་ལ་བབས་པའི་པྲ་ཞིག་བཅས་སྐྱེས་བུའི་ལུས་ངག་ཡིད་གསུམ་དང་འབྲེལ་བའི་པྲའི་ཚུལ་ལུགས་དུ་མ་སྲིད་པ་ཡིན། ཞེས་གསུངས་ཀྱང་། འདི་ལ་ནང་བསྟན་གྱི་ཁུངས་ཡང་ཚད་ལྡན་ཡོད་དེ། ཀྱེ་རྡོ་རྗེའི་རྒྱུད་ཀྱི་སྔགས་ལེའུ་ལས། ཨོཾ་ན་གྲྭ་ན་གྲྭ་ཞེས་པའི་སྔགས་ཀྱི་མཐེ་བོང་ལ་པྲ་ཕབ་ནས་རྫས་སོགས་སུས་ཁྱེར་ཤེས་པ་དང་། ཞེས་དང་། བདེ་མཆོག་ཉུང་ངུའི་རྒྱུད་ལས། དེ་བཞིན་སྔགས་བཟླས་རལ་གྲི་ཆུ། །མཐེ་བོང་མར་མེ་མེ་ལོང་ལ། །སྔགས་པ་བདག་ཉིད་རྟག་རྣལ་འབྱོར། །པྲ་སེ་ན་ནི་འབེབ་པར་བྱ། །ཞེས་གསུངས་པ་ནི། པྲ་ཕབ་གྱི་ཁུངས་སུ་མི་འགྲོ་ཞེས་སུ་ཞིག་གིས་སྨྲ་བར་མི་སྤོབས་ལ། དེ་བས་པྲ་འབེབས་ཀྱི་ཆོ་ག་འདི། རྒྱལ་བ་རྡོ་རྗེ་འཆང་གིས་མངོན་ཤེས་མེད་པའི་གང་ཟག་རྣམས་ལ། ལྷ་སྔགས་རྫས་དང་། ཏིང་འཛིན་གྱི་འཕྲུལ་འཁོར་མི་འདྲ་བ་བརྟེན་ནས་འབྱུང་འགྱུར་ལུང་དུ་སྟོན་པར་གནང་བ་ཡིན་ཏེ། འཇུ་མི་ཕམ་གྱིས། རྡོ་རྗེ་འཆང་གི་བཀའ་བཞིན་དུ་ལྷག་པའི་ལྷ་ལ་བརྟེན་ནས་རྫས་སྔགས་ཏིང་འཛིན་གྱི་ནུས་པས་བླང་དོར་གསལ་བའི་པྲ་ཕབ་སྟེ། དེ་ལ་ཇི་ལྟར་ཤར་བ་ལྟར་བསྟན་པ་ནི། སངས་རྒྱས་ཀྱིས་མངོན་ཤེས་མེད་པའི་གང་ཟག་རྣམས་ལ་ཆེད་དུ་གནང་བ་ཡིན་པར་གསུངས་སོ། །

པྲ་ཞེས་པའི་ཐ་སྙད་འདི་ལའང་། བོན་ལུགས་སུ་པྲ་ལྟས་མོ་སྟེ་བཟང་ངན་གྱི་རྟགས་མཚན་དེ་ལ་པྲ་ཟེར་ལ། ལེགས་སྦྱར་སྐད་དུ་པྲ་སེ་ནམ་པ་ཏ་སྟེ། པྲ་སེ་ནམ་གསལ་བར་སྟོན་པའི་དོན་དང་། པ་ཏ་ཤེལ་བའི་ཤེལ་ལ་འཇུག་པའི་སྐབས་ཡོད་དོ། །དེའི་མན་ངག་ཀྱང་། སློབ་དཔོན་ཀླུ་སྒྲུབ་ཀྱི་ཙུན་དའི་པྲ་ཕབ་ཀྱི་གཞུང་སོགས་རྒྱ་བོད་ཀྱི་མཁས་པས་བརྩམས་པ་མང་དུ་ཡོད་པར་འཇུ་མི་ཕམ་གྱིས་གསུངས་པ་དང་། འདི་ཉིད་ལ་གཞི་བཅོལ་ནས་སློབ་དཔོན་པད་འབྱུང་གིས་བོད་དུ་བསྟན་པ་སྤེལ་བའི་ཐོག་མར་འོད་ཟེར་ཅན་གྱི་པྲ་ཕབ་ནས་ཁྱེའུ་རྣམས་ལ་བསྟན་པས། ལྷ་འདྲེ་རྣམས་ཀྱི་གྲོས་དང་འདུན་མ་ཇི་ལྟ་བར་ཤེས་ནས། ལྷ་འདྲེ་མ་རུངས་རྣམས་བཏུལ་ནས་བསྟན་པའི་རྐང་ཚུགས་པ་དང་། ཇོ་བོ་རྗེ་ཨ་ཏི་ཤས་ཀྱང་། ཙུན་ད་ལ་བརྟེན་པའི་པྲ་ཕབ་པ་བཀའ་གདམས་ཕ་ཆོས་སུ་གསལ་ལོ། །

ལེགས་ཉེས་སྟོན་ཚུལ་ཡང་འཇུ་མི་ཕམ་གྱིས། པྲ་རབ་ཞིག་ཕེབས་ན། བླང་དོར་མངོན་སུམ་དུ་ཡིད་ལ་གསལ་བ་དང་། འབྲིང་ཕེབས་ན། ལྷས་དངོས་སུ་ལུང་སྟོན་པ་དང་། ཐ་མའང་། བརྡའ་དང་གཟུགས་བརྙན་གྱི་ཚུལ་དུ་འཆར་བས་རང་དོན་དུ་ཆོས་དང་སྲིད་ཀྱི་བྱ་བ་ལྐོག་གྱུར་གྱི་གནས་ལ་འཇུག་ལྡོག་གི་མིག་ཕྱེ་བར་གསུངས་སོ། །

ཞིབ་ཏུ་འཇུ་མི་ཕམ་གྱི་པྲ་ལ་སྨོད་པ་འགོག་པའི་གཏམ་དྲང་སྲོང་རྣ་རྒྱན་﹙ལྕགས་པར་དེབ་གྲངས་བཅུ་དགུ་ཤོག་ངོས ༣༤༡ ﹚དུ་གསལ་བས་དེར་བལྟ་བར་བྱའོ། །

 དེ་ལྟར་མིག་གི་སྣང་ངོར་མཐོང་རྒྱུ་ཡོད་པའི་པྲ་འབེབས་སྲོལ་འདི་ལ། བོད་དམངས་ཁྲོད་དུ་དེང་སང་ཡང་མེ་ལོང་པྲ་ཕབ་ཞེས་འབོད་སྲོལ་ཡོད་པ་དང་། རྣ་བའི་ཡུལ་དུ་ཐོས་རྒྱུ་ཡོད་པའི་སྒྲའི་ཆ་ཡི་པྲ་འབེབས་སྲོལ་འདི་སྨན་གཞུང་བདུད་རྩིའི་སྙིང་པོ་སོགས་ཀྱི་ཆ་ལག་ཏུ་རན་པའི་ཚུལ་གསལ་བོར་ཤེས་ཐུབ་པའི་སྐོར་གསལ་པོར་བསྟན་ཡོད་པ་དེ་དག་དང་། དེ་བཞིན། ཀུན་རྟོག་ཡིད་ཀྱི་སྣང་ངོར་འཆར་རྒྱུ་ཡོད་པའི་པྲ་འབེབས་སྲོལ་ནི། ཞང་ཞུང་བོན་གྱི་གནའ་ལུགས་སུ་ཕུར་ཝེར་སྲོག་ཕྱཱའི་ལྷའམ། ཡང་ན། ཤིན་ཏུ་བཀའ་གཉན་པའི་ལྷ། ཞང་ཞུང་མགོན་པོ་རྣམ་གསུམ་གྱིས་གཙོས་པའི་ལྷ་གང་ཡང་རུང་བ་ཞིག་མིར་བབས་ནས་ལེགས་ཉེས་ཀྱི་སྐོར་ལུང་སྟོན་པ་འདི་ཡང་པྲའི་ཁོངས་གཏོགས་ཡིན་པར་སེམས་སོ། །

དེ་ལྟར་སྤྱི་ཚོགས་རིམ་བརྒྱུད་ཀྱིས། པྲ་འབེབས་སྲོལ་ཡང་འགྱུར་བ་ཐེབས་ཏེ། ད་ལྟའི་པྲ་འབེབས་སྲོལ་འདི་སྔགས་རྫས་ལ་བརྟེན་ནས་ལྐོག་གྱུར་གྱི་དོན་དེ་གཟུགས་བརྙན་དུ་འཆར་བ་འམ། སྐད་ཆའི་བརྡ་ལས་སྟོན་པ་ཞིག་ཡིན། སྒྲུབ་ཐབས་སུ། ཉིན་པར་མི་བྱ་བར་མཚན་མོ་བྱ་བ་དང་། ལུང་རྒྱུན་འཐོབ་པའི་གང་ཟག་ལ་མ་གཏོགས་མི་བྱ་བར་གསང་བའི་གདམས་ངག་ཞིག་ཡིན།

པྲ་ཕབ་ཀྱི་དབྱེ་བ་ལ། དཔུང་བཟང་གི་ཞུས་པའི་རྒྱུད་ལས། མཐེ་བོང་མེ་ལོང་རལ་གྲི་ཆུ་དང་ཤེལ། །མར་མེ་ས་གཞི་ལྕགས་དང་ནམ་མཁའ་དང་། །ལྷུང་བཟེད་ནོར་བུ་དག་དང་མེ་འབར་བ། །འདི་ལ་གསལ་བོར་སྟོན་པ་དྲག་ཏུ་འབྱུང་། །ཞེས་གསུངས་པ་ལྟར། འདིར་རེ་ཟུང་བརྗོད་ན། མེ་ལོང་པྲ་ཕབ་སྐབས། ས་གཙང་དབེན་གནས་སུ་ལེབ་ཕྱིང་དཀར་བོ་གཙང་མའི་སྟེང་དུ། མེ་ལོང་སོགས་རྫས་མ་ཚང་བ་མེད་པར་བཤམས་ནས། པྲ་སྒྲུབ་ཀྱི་ཆོ་ག་ངོས་གཙང་ལྟར་བསྒྲུབས་ཏེ། རྡོ་རྗེ་གཡུ་སྒྲོན་མའི་པྲ་སྒྲུབ་ལྟ་བུར་མཚོན་ན། པྲ་དབབ་ཁར། ཁྱེད་ལ་དེ་རིང་ཞུ་བ་ནི། །པྲ་གདན་དཀར་བོ་དྲི་མེད་ལ། །འབྲུ་མཆོག་གཙང་མ་གཡུང་དྲུང་རིས། །བཀྲ་ཤིས་ཁྱེའུ་བུ་མོ་གཙང་མ་འདི། །རྣལ་འབྱོར་བདག་ཅག་ཡོན་མཆོད་ཀྱིས། །ཡིད་ལ་བསམ་པའི་དོན་འདི་དང་། །འདས་དང་མ་འོངས་ད་ལྟ་དང་། །ཁམས་གསུམ་མ་ལུས་གསལ་བར་སྟོན། །ལྷ་དང་མི་དང་འདྲེ་ལ་སོགས། །ཕན་བྱེད་གནོད་བྱེད་གསལ་བར་སྟོན། །གཞན་གྱིས་མ་ཤེས་ངེད་ལ་འདྲི། །ང་ཡིས་མི་ཤེས་ཁྱོད་ལ་འདྲི། །མ་ཅིག་རྡོ་རྗེ་གཡུ་སྒྲོན་མ། །ཞེས་བརྗོད་པ་དང་། དེ་ནས་པྲ་མཁན་གྱིས་བལྟ་བ་འམ། ཡང་ན། པྲ་རྟེན་ཁྱེའུ་འམ་བུ་མོ་གྲོང་ཆོས་ཀྱིས་མ་གོས་པ། རིགས་དང་སྐྱེ་མཆེད་གཙང་བ། ཕ་མ་ཚང་ཞིང་མིང་ལེགས་པ་ཞིག་ལ་བལྟར་འཇུག་པའི་རིགས་གཉིས་ཡོད། མེ་ལོང་དུ་བརྟག་བྱའི་གཟུགས་བརྙན་མཐོང་བ་ན། འབྲུ་ཟན་གྱིས་བྲུབས་ཏེ་མི་སྣང་བར་གྱུར་ཚེ། སླར་པྲ་མཁན་གྱིས་ལེགས་ཉེས་དང་རྟགས་མཚན་བརྗོད་པ་ཡིན། ཞིབ་ཏུ་འཇུ་མི་ཕམ་གྱི་རྡོ་རྗེ་གཡུ་སྒྲོན་མའི་པྲ་སྒྲུབ་སྣང་གསལ་མེ་ལོང་﹙ལྕགས་པར་དེབ་གྲངས་བཅུ་དགུ་ཤོག་ངོས༣༢༢ནས༣༣༧ བར﹚དང་། ཀརྨ་ཆགས་མེད་ཀྱི་ཕུར་བའི་པྲ་ཕབ་སོགས་སུ་བལྟ་བར་བྱའོ། །

མཐེ་བོང་པྲ་ཕབ་སྐབས་ཆོ་གའི་ལུགས་ལྟར་མི་གཞན་གསུམ་མམ་ལྔ་སོགས་ཀྱིས་བལྟ་དགོས་ཤིང་། མངས་ཆེ་བས་ཕྱེད་ཙམ་མ་གཏོགས་མི་མཐོང་བར་བཤད།

རྩྭ་པྲ་ནི། ཤིང་སྟག་པའི་བུ་ཆུང་སོར་བཞི་བ་ཞིག་བསྒྲུབས་ནས་རྣ་བ་དང་ཉེ་བར་སྦེད་པས། ལེགས་ཉེས་སྨྲ་བ་ཞིག་ཡིན། དེ་ཡང་། སྨན་བླ་དང་ལྷ་མོ་རྩྭའི་གླིང་བུ་ཐོགས་པ་ལ་བརྟེན་ནས་སྒྲུབ་སྲོལ་ཡོད། བསྙེན་པ་བཏང་སྟེ་རྟགས་ཐོན་རེག་བར་དུ་བསྒྲུབས་ལ། ཁྱད་པར་དུ་རྩྭ་པྲ་འདི་སྨན་པ་དག་གིས་བསྒྲུབས་ན། ནད་བརྟགས་པ་ལ་ཧ་ཅང་མཁོ་བས། ནད་གང་ཡིན་དང་། སྨན་ཅི་ཕན་སོགས་རིམ་གྱིས་འཆར་འོང་། པྲ་མཁན་འདི་འཆི་ཁར་སྟག་པའི་བུ་ཆུང་གིས་མིང་ནས་ཡང་ཡང་བོས་ནས་ཡིད་སེམས་དཀྲུགས་པར་བཤད་པའང་ཡོད།

མར་མེ་པྲ་ཕབ་ནི། མར་མེ་གཙང་སང་ངེ་བ། ནས་ཚོམ་གྱི་སྟེང་དུ་བཞག ལྷ་ཚོགས་བསྐྱེད། འཇག་མ་ཉག་རེ་ལ་གཟུངས་སྔགས་བཟླས་ཏེ་རྐོང་བུའི་ཁ་གདོང་དུ་བཞག བླ་མ་ཡི་དམ་སོགས་ཀྱི་བདེན་པ་བདར་ནས། མར་མེ་བསང་སྦྱངས་དང་བྱིན་གྱིས་བརླབས་ནས། མ་རིག་མུན་སེལ་སྒྲོན་མེ་མཆོག། དཀྱིལ་འཁོར་ལྷ་ཚོགས་རྣམས་ལ་འབུལ། །མངོན་ཤེས་རྟགས་དང་མཚན་མ་རྣམས། །སྣང་གསལ་མར་མེས་བསྟན་དུ་གསོལ། །ཞེས་གསོལ་བ་བཏབ་སྟེ། དབྱིབས་དང་མདོག མེ་ལྕེ་ཁ་གྱེས་ཚུལ། འོད་ཀྱི་རིང་ཐུང་། སྡོང་བུ་སྦོམ་ཕྲ་དང་། མེ་ལྕེ་དལ་བྲེལ། དྲི་བཟང་ངན། མེ་སྟག་དང་ཚག་སྒྲ་དུད་པ་ཡོད་མེད། མར་ཁུ་ལ་རི་མོ་ཆགས་ལུགས། ཡུན་རིང་ཐུང་སོགས་ལ་བརྟག་རྒྱུ་ཡོད་པར་འཇུ་མི་ཕམ་གྱི་བརྟག་པ་སྣ་ཚོགས་ཀྱི་སྐོར་ནོར་བུའི་མེ་ལོང་ལས་རི་མོ་དང་བཅས﹙ལྕགས་པར་དེབ་གྲངས་བཅུ་དགུ་ཤོག་ངོས ༢༩༢ ནས ༣༠༠ བར﹚པ་གསལ་བར་བཀོད་ཡོད་པས། ཤེས་འདོད་པ་དག་གིས་དེར་བལྟ་བར་བྱའོ། །

མེ་པྲ་ནི། དཔུང་བཟང་གིས་ཞུས་པ་ལས། མེ་ཡི་མཚན་མ་ཉེ་བར་བརྟག་པ་ནི། །མེ་སྟག་དུ་བ་མེ་ལྕེ་སྒྲ་རྣམས་ལས། །གྲུབ་པ་དང་ནི་མི་འགྲུབ་ཐམས་ཅད་ཀྱང་། །སྔགས་ཀྱིས་བྱིན་རླབས་མེ་ནི་སྟོན་པར་བྱེད། །ཅེས་པ་ལྟར། འདིར་མེ་པྲ་བརྟག་པ་ནི་སྦྱིན་སྲེག་གི་མེ་ཡིན་ལ། སྦྱིན་སྲེག་གི་མེ་ནི་སྔགས་ཀྱི་བྱིན་གྱིས་བརླབས་པའི་མེ་ཡིན་པས། འབྱུང་འགྱུར་གྱི་ལེགས་ཉེས་སྟོན་པ་རྒྱུད་སོགས་ལས་གསུངས་པ་བཞིན་དང་། བརྟག་དུས་ཀྱང་མེ་ལྷ་སྤྱན་དྲངས་ནས་བྱོན་ཏེ་སྐྱེམས་འབུལ་སྐབས་ཡིན་ནོ། །བརྟག་ཚུལ་དངོས་ནི་འཇུ་མི་ཕམ་གྱི་བརྟག་པ་སྣ་ཚོགས་པའི་སྐོར་ནོར་བུའི་མེ་ལོང་ལས﹙ལྕགས་པར་དེབ་གྲངས་བཅུ་དགུ་ཤོག་ངོས ༢༨༨ ནས ༢༩༢ བར﹚ཤེས་པར་བྱའོ། །

གཞན་མེ་ལོང་གི་ནང་དུ་པྲ་སྒྲུང་འབེབས་སྲོལ་ཡང་ཡོད་དེ། དེ་ནི་མེ་ལོང་གི་བཞིན་རས་ལ་ཡུལ་ལྗོངས་ལྟ་ན་སྡུག་པའི་ཁོར་ཡུག་ཏུ། ཁྲབ་མོག་འཁོར་གསུམ་བསྐོར་བའི་དཔའ་རྒོད་རྣམས་ཀྱིས་མཚོན་ཆ་ལག་ཏུ་བཟུང་ནས། རྟ་མདོ་བའི་རྨིག་སྒྲ་ལྡིར་རེ། གླུ་ལེན་དང་གཏམ་ལན་སྣ་ཚོགས་བརྗོད་པ་ཞིག་ཡིན་ཏེ། ད་ལྟ་ཡང་། ཁམས་ཆབ་མདོ་སོགས་ན་པྲ་སྒྲུང་བ་ཡོད་པར། ཡ་མཚན་ཆེ་བའི་གླིང་གེ་སར་སྒྲུང་བའི་གསང་བ་ཞེས་པར་ཞིབ་ཏུ་འཁོད་ཡོད།

གཞན་ཡང་། ཆུ་དང་ནམ་མཁའ་དང་། སེན་མོའི་པྲ་ཕབ། མིག་ལམ་དུ་ཡི་གེ་འཆར་བ་དང་། ཡིད་ངོར་སྣང་བ་སོགས་ཀྱི་པྲ་ཡང་ཡོད། པྲ་མཁན་དེས་དད་དམ་གཙང་མས་པྲ་ལུང་དང་སྔགས་ཀྱི་བསྙེན་པ་རྟགས་ཐོན་རེག་བར་དུ་གཏོང་དགོས་ལ། དེ་ཡང་རྣོ་མཐོང་པྲ་ལྷ་ནི་དཔལ་ལྡན་ལྷ་མོ་དང་། མཐིང་གི་ཞལ་བཟང་མ། རྡོ་རྗེ་གཡུ་སྒྲོན་མའི་པྲ་སྒྲུབ་དང་། པྲ་འབེབས་ལ་བརྟེན་པ་ཡིན་ནོ། །

འདིར་པྲ་འབེབས་སྲོལ་གྱི་མན་ངག་ཐུང་ངུ་འགའ་ཞིག་བཀོད་ན། འཇམ་དཔལ་དཔའ་བོ་གཅིག་གྲུབ་ཀྱི་རྒྱུད་ལས། ཨོཾ་ན་མོཿསབྟ་ནཾ་སམྱ་ཀྶཾ་བུདྡྷ་ཀོ་ཌྲཱྀ་ནཱཾ་ཏ་ངྱ་ཐཱ་ཨོཾ་ཙ་ལེ་ཙུ་ལེ་ཙུནྡ་སྭཱ་ཧཱ། བི་ཏྱ་ས་ཏྱ་བཱ་དི་ནི་པ་ར་དེ་ཀ་ཐ་ཡ་སྭཱ་ཧཱ། ལྷ་མོ་སྐལ་བྱེད་མའི་སྔགས་འདི་བཟླས་ཏེ་སངས་རྒྱས་ཀྱི་སྐུ་འམ་སྐུ་གདུང་གི་སྤྱན་སྔར་མཆོད་པ་ཅི་འབྱོར་ཕུལ་ལ། སྔགས་བརྒྱ་རྩ་བརྒྱད་བཟླས་པའི་ཆུས་གདོང་བཀྲུས་ནས་མི་སྨྲ་བར་ཉལ་ན་རྨི་ལམ་དུ་དགེ་མི་དགེ་སྟོན་པར་འགྱུར་རོ། །ཁྱེའུ་དང་བུ་མོ་གྲོང་ཆོས་ཀྱིས་མ་གོས་པ་ལ་མེ་ལོང་སོགས་ལས་པྲ་དབབ་ན་ཕྱིན་ཅི་མ་ལོག་པའི་དགོས་པ་སྟོན་ནོ། །ཞེས་གསུངས། སྔགས་འདི་ནི་སངས་རྒྱས་བྱེ་བ་ཕྲག་བདུན་གྱིས་བྱིན་གྱིས་བརླབས་པ་མཆོག་གང་འདོད་མྱུར་དུ་སྩོལ་བའི་སྔགས་ཁྱད་པར་ཅན་ནོ། །

ཁྲོས་ནག་ལས། པྲ་དབབ་པར་བུ་མོ་གཙང་མ་ཁྲུས་བྱས། མཁའ་འགྲོ་དམར་མོ་སྤྱན་གསུམ་པ་དཔྲལ་བའི་སྤྱན་གྱིས་ལྷ་འདྲེ་མི་གསུམ་མཐོང་བར་སྒོམ་ལ། ཧ་རི་ནི་སཀཾ་ཁོ་ལེ་ཆུ་བུར་མིག་གི་སྒོ་ཕྱེས་སྟོན། ཞེས་པ་ནས་ལ་སྔགས་ཏེ་གཏོར་ན་ལེགས་ཉེས་ཐམས་ཅད་མཐོང་བ་དང་། སྨྲ་བ་སྟོན་པར་འགྱུར་རོ། །ཞེས་དང།

ནོར་བུ་བཟང་བོའི་རྟོགས་པ་བརྗོད་པ་ལས། ན་མོ་རཏྣ་ཏྲ་ཡཱ་ཡ་རགྷེ་རགྟ་ཨཾ་གུ་ཥྛེ། ཡ་ད་ཀུན་ཙིད་སྭཾ་པྲ་ཏི་ག་ཏཾ་བྷ་བྱཾ་ཏ་ཏ་སརྦ་དཪྴ་ཡ་སྭཱ་ཧཱ། ཁྲི་གཅིག་བསྙེན་ལ། རྒྱ་སྐག་གིས་བསྐུས་པའི་མཐེ་བོང་ལ་མར་མེ་བཅས་ཏེ་པྲ་སེ་ན་དབབ་པས་འགྲུབ་བོ། །

དཔལ་ལྡན་ལྷ་མོའི་པྲ་འབེབས་ལ། ལྷ་མོ་སྤྱན་དྲངས་མཆོད་བསྟོད་དམིགས་བཟླས། དང་བོར། བེ་ཤ་མ་ཤ་ཤིནྟཾ་ཀུ་རུ་ཡེ་སྭཱ་ཧཱ། ཉེར་གཅིག་བཟླས་པས་ཆུ་ཁྲུས་བྱ། ལོ་བཅོ་ལྔ་མན་ཆོད་པྲ་རྟེན་ཁྱེའུ་གཙང་མ་དགོས། མཐེ་བོང་ལ་རྒྱ་སྐྱེགས་ཀྱི་ཁུ་བས་བྱུགས། མར་མེའི་སྣུམ་ཡང་བྱུགས། སྔགས་ནི། ན་མོ་རཏྣ་ཏྲ་ཡཱ་ཡ། ཏ་དྱ་ཐཱ། ཀུ་ཏ་ཀུ་ཏ་ནི། ནི་མ་ཀྱི་ཏ་པ། ཀུ་ཤ་ནི། ནི་མ་ནི་རེ་སྭཱ་ཧཱ། སྔགས་སྟོང་ངམ་ཁྲི་ཙམ་བཟླས་ནས་ལས་སྦྱོར་དུས། མར་མེ་སྡོང་བུ་ལ་བདུན། མཐེ་བོང་ལ་བརྒྱ་རྩ་བརྒྱད་བཟླས་ཏེ་བསྟན་པ་པྲ་དབབ་བོ། །མཇུག་ཏུ་ཡིག་བརྒྱས་བཤགས་གསོལ་བྱ། འདི་ཁལ་ཁ་བཟང་བོ་ནས་བརྒྱུད་དེ་དབང་ཆེན་དགྱེས་རབ་རྡོ་རྗེའི་ཞལ་སྔ་ནས་བདག་མི་ཕམ་པས་ཞུས་པ་ལགས་སོ། །ཞེས་གསུངས་སོ། །

ཡང་། འཇིག་རྟེན་དབང་ཕྱུག་གི་རྟོགས་པ་བརྗོད་པ་ལས། ཨོཾ་བི་ལོ་ཀི་ནི་ཨ་བ་ལོ་ཀཱི་ཡེ་སྭཱ་ཧཱ། སྔགས་འདི་སྟོང་ཕྲག་བཅུ་བཟླས་བརྗོད་བྱས་ན། མེ་ལོང་དང་མཐེབ་ཆེན་དང་ནམ་མཁའ་སོགས་ལ་པྲ་དབབ་པས། འགྲུབ་པར་འགྱུར་རོ། །གང་སྔོན་བྱུང་དང་། ད་ལྟ་དང་། ཕྱིས་འོང་བ་དེ་སྟོན་པར་བྱེད་དོ། །ཡང་ན། སོ་ཤིང་ལ་ཉེར་གཅིག་བསྔགས་ཏེ། ནུབ་མོར་ཉལ་ཁར་འཆོས་ནས་མི་སྨྲ་བར་ཉལ་ན། དགོས་པ་གང་ཡིན་པ་རྨི་ལམ་ན་བསླུ་བ་མེད་པར་སྟོན་པར་བྱེད་དོ། །

ཡང་། མཁའ་འགྲོ་མིག་མཐོང་གི་པྲ་དབབ་པར། བྱི་ལ་ཡུགས་པོ་འུག་པ་སྤུ་ཤུད་ཀྱི་མིག་རྣམས་ཁྱེའུ་འཐུང་ནུ་ཞོར་མེ་ལོང་སྟེང་དུ་སྦྱར། རང་ཕག་མོར་སྒོམ་ལ། འབྲུ་གསུམ་དང་དཔའ་བོ་ཕོ་ཐེམ་མོ་ཐེམ་སྔགས་ལ། ཙཀྵུ་ཙཀྵུ་མ་ཧཱ་ཧ་ར་བཛྲ་ཙཀྵུ་པྲ་ཝེ་ཤ་ཡ་ཕཊ། སུམ་སྟོང་བཟླས་ནས་མིག་ལ་བྱུགས་པས་སྲིད་གསུམ་གྱི་ལྷ་འདྲེ་མཐོང་། གཞན་གྱི་མིག་ལ་བྱུགས་ནའང་ལྷ་འདྲེ་དང་ལེགས་ཉེས་ཀུན་མཐོང་ངོ་། །

 ལས་སྣ་ཚོགས་ཀྱི་བེའུ་བམ་ནང་བརྟག་པ་སྣ་ཚོགས་ཀྱི་སྐོར་ལས། རྐུན་མ་ངོས་འཛིན་གྱི་པྲ་ཕབ་ལ། རྐུན་མ་ངོས་འཛིན་མེ་ལོང་ལ་སྔགས་འདི་སྟོང་ཕྲག་གཅིག་བཏབ་སྟེ། སུ་དོགས་པ་ལ་བསྟན་པས་དངོས་བོ་རྣམས་གསལ་བར་མཐོང་ངོ་། །ཨོཾ་ཧ་རེ་རྣེ་སྭཱ་ཧཱ། ཤིན་ཏུ་ཟབ། དམ་ཚིག་གཙང་བ་གལ་ཆེའོ། །

ཡང་། རྐུན་མ་ངོས་འཛིན་ལུགས་གཅིག་ལ། ཨོཾ་ཙི་ར་མེ་རཾ་ཡ་སྭ་ཧཱ། སིནྡྷུ་ར་དང་མེ་ལོང་ཞག་བདུན་བསྔགས། བྱིས་པ་ལོ་ལྔ་ནས་བརྒྱད་ཀྱི་བར་གང་རུང་གཅིག་ལ་རྫི་མར་དང་བོར་ཆུ། དེ་ནས་རྫས་དེ་བྱུགས་པས་རྐུན་མ་གང་ཡིན་མཐོང་ནས་སྨྲ་མ་སྨྲ་ན་ཚང་རྟིང་རྡོག་ཐོས་བརྡེག དེས་ཀྱང་ཡིད་མ་ཆེས་ན་མེ་ལོང་བསྟན་པས་དེར་རྐུན་མ་འཆར། མི་ཁྱི་གང་ཡང་མེད་སར་སྒྲུབ་དགོས། གཞན་ཡང་། པྲ་ཕབ་ཀྱི་རྣམ་གྲངས་ཧ་ཅང་མང་ཡང་། ཡི་གེ་མང་དུ་འཇིགས་ནས་མ་བཀོད་དོ། །

མངོན་ཤེས་དང་རྣོ་མཐོང་སྒྲུབ་ཚུལ།

ནོར་བུ་བཟང་བོའི་རྟོགས་པ་བརྗོད་པ་ལས། ན་མོ་རཏྣ་ཏྲ་ཡཱ་ཡ། ཨོཾ་ཨར་ཏེ་སྭཱ་ཧཱ། སྔོན་དུ་ཁྲི་གཅིག་བསྙེན་ལ། འབྲས་ཁུ་ལས་རི་ཁྲོད་མའི་གཟུགས་གཅེར་བུ་སོར་གསུམ་པ་བྱས་ཏེ། ཉི་ཟླ་གཟས་བཟུང་བའི་དུས་ལག་པར་བཞག ཇི་སྲིད་མ་གྲོལ་བར་བཟླས། སྲོད་དུས་བྱིས་པས་མཐོང་བའི་ལམ་དུ་གཟུགས་སྟོན་ཞིང་། མེ་ལོང་སོགས་ལ་དཔལ་ཆེན་མོས་བདེན་པ་སྟོན་ནོ་གསུངས།

ཡང་། སློབ་དཔོན་པད་མའི་མངོན་ཤེས་སྒྲུབ་པ་འདིས། ས་བཅུའི་བྱང་ཆུབ་སེམས་དཔའ་ཡང་མཐོང་ན་འཇིག་རྟེན་པའི་ལྷ་འདྲེ་སྨོས་ཅི་འཚལ། ལྷ་འདྲེ་རྣམས་ཀྱིས་རང་གི་རྣ་བ་ལ་གཏམ་ཚུར་བཤད་དུ་འོང་ངོ་། །རྫས་ལ་བྱ་མོ་ནག་མོའི་སྒོ་ང། སྨན་ལྔ། ཆང་ཕུད། འབྲང་རྒྱས། མདའ་བྱ་རྒོད་མ། དར་དཀར་བོ། མེ་ལོང་དེ་རྣམས་རྟེན་དུ་བཙུགས། ཕྱིང་གཙང་མའི་སྟེང་ནས་ཀྱི་གཡུང་དྲུང་རིས་དང་། རྡོ་རྗེ་རྒྱ་གྲམ་བྲིས་ལ། དེའི་སྟེང་རྟེན་རྣམས་བཞག སྔགས་ནི། ན་མ་རི་རི་ཛ་ཛ་རུཾ་རུཾ་རུཾ། ཞེས་པའི་སྔགས་དེ་ཞག་གསུམ་བཟླས་པས། བུ་མོ་གཞོན་ནུ་གཅིག་མངོན་སུམ་འོང་ནས་ངས་ཅི་བྱ་ཟེར། དེ་ལ་མིང་བོ་ངའི་གྲོགས་གྱིས་ཤིག སྲིད་པ་གསུམ་གྱི་གཏམ་ཤོད། ལྷ་འདྲེ་ཐམས་ཅད་ཀྱི་གཟུགས་སྟོན་ཞེས་བྱས་པས་རང་གི་ཅི་མནོས་པ་སེམས་ལ་སྟོན་པ་གལ་ཆེའོ། །

ཡང་། སློབ་དཔོན་པདྨས་མཛད་པའི་མིག་མཐོང་ཞིག་ལ། རྫས་ནི་བྱི་ལ་ཕོའི་མིག ཁྱི་རྒྱ་བོའི་རྫི་མའམ་མིག བྱ་མོ་ནག་མོའི་སྒོ་ངའི་སེར་བོ། བུ་རམ་བག་ཙམ་ཞིག སག་རམ་རྩི﹙ ནི་ལ་ཐོ་ཋ﹚ དུམ་གཅིག གླ་རྩི་ནས་ཙམ་རྣམས་ཞིབ་བཏགས་ཁྱེའུ་འོ་འཐུང་གི་ནུ་ཞོར་མེ་ལོང་ནང་དུ་སྦར་ལ་སྔགས་འདི་བཏབ། ཨོཾ་བྲ་མོ་ཐུན་པྲ་མོ་ཤག་པྲ་མོ་ཚལ་པྲ་མོ་ཕོབ་པྲ་མོ་སྭཱ་ཧཱ། ཞེས་ཞག་གསུམ﹙དེའི་བར་མིག་བཅིངས་ཏེ་མ་བལྟས་ན་བཟང﹚སྨྲ་བཅད་དེ་བཟླས། དེ་ནས་རྫས་དེ་མར་དཀར་ཅུང་ཟད་དང་བསྲེས་ལ། ཟླ་བ་ཡར་ངོའི་དུས་བཟང་བོར་མིག་ཕྱེ་ནས། བྱུགས་པས་སྣང་སྲིད་ཐམས་ཅད་མེ་ལོང་ལ་བལྟས་པ་བཞིན་དུ་འགྱུར། སྒྲུབ་ཚད་ཞག་གསུམ་ལས་ཧ་ཅང་ཐལ་ན། རང་ལྷ་འདྲེའི་དབང་དུ་འགྲོ་བའི་ཚོད་ཟིན་པར་བྱ། རྫས་མི་ལག་མི་བརྒྱུད་འགོམ་ལམ་དུ་མི་བཞག་ཅེས་གུ་རུའི་མན་ངག་ཟབ་བོ། །

ཡང་། ས་འོག་ས་སྟེང་ཐམས་ཅད་ལྟ་འདོད་ན་ཤིང་གཅིག་པའི་དྲུང་དུ་ཕྱིན་ནས། ཞ་ཉེའི་གོང་བུར་མི་ཞུན་གྱི་མར་ཁུ་བྱས་ལ་མར་མེ་བཏང་། ཐོད་པ་གཅིག་གིས་ཁ་བཅད། ཐོད་པ་གསུམ་ལ་སྒྱེད་པུ་བྱ། རང་རྡོ་རྗེ་ཕག་མོར་བསྒོམ། ཨོཾ་ཨཱཿཧཱུཾ་ཧྲཱྀཿཨ་ཧ་རི་ནི་ས་ར་ཙ་ཧྲི་ཡ་སརྦ་འདིས་སྟོན་ཕེམ་ཕེམ། སྔགས་འདི་ཁྲི་བཟླ། དེ་ནས་མི་རྐང་གི་ནང་ནས་མིག་གིས་བལྟ། དུད་པ་རང་གི་དྲི་ཆུར་སྦྱར་བ་མིག་ལ་བསྐུས་པས། ས་འོག་ས་སྟེང་ས་བླ་ཐམས་ཅད་གསལ་ལེར་མཐོང་ཞིང་མཁྱེན་ཞེས་པད་འབྱུང་གི་གདམས་པའོ། །

ཡང་། པད་འབྱུང་གིས་མཛད་པའི་ལྷ་མོ་སྨན་གཅིག་མའི་མངོན་ཤེས་སྒྲུབ་ཐབས་ལ། ཧ་ལོ་དང་། སྤང་རྒྱན་དཀར་བོ། རང་གི་སྲིན་ལག་གི་ཁྲག་གསུམ་ལ་ཉི་མ་གཅིག་སྔགས། སྔགས་ནི། ཙ་ན་ཁྲིག་ཁྲི་ཁྲི་ཟི་མ་ཟི་མ་ཁྲག་ལ་དུན་དུན། བཟླས་པ་རྫོགས་པ་དང་། མིག་སྔར་བུ་མོ་མཛེས་མ་རྒྱན་ལྡན་ཞིག་ཡུད་ཡུད་བྲེང་བྲེང་འོང་། དེ་ནས་རྫས་གསུམ་པོ་དར་དཀར་དུ་དྲིལ་ལ། རང་ལུས་ལ་བཅིངས་པས་སྲིད་པ་གསུམ་གྱི་གཏམ་བཟླས་པ་དང་། ཅི་དགོས་དྲིས་པས་བཤད་དུ་འོང་ངོ་། །

ཡང་། སློབ་དཔོན་ཀླུ་སྒྲུབ་ཀྱི་མིག་རྣོན་སོགས་ཀྱི་མངོན་ཤེས་ནི། རྡོ་ཕ་ཝང་གི་ངོས་ལ་ཤེས་རབ་མའི་མཚལ་དང་། གི་ཝང་གཉིས་བསྲེས་པ་ཧ་རི་ནི་ས་བྲིས་ལ། དེ་དར་གྱིས་དྲིལ་ནས་ཟངས་མའི་གའུར་བཅུག་པ་གནས་གཙང་མར་མཎྜལ་ཟླུམ་པོའི་དབུས་སུ་བཀོད། མཆོད་པ་ལྔ་དང་གཏོར་མ་གསུམ་བཤམས་ལ། གཏོར་མ་གཅིག་དཀོན་མཆོག་གམ། གཅིག་ཆོས་སྐྱོང་། གཅིག་ཡུལ་དེའི་གཞི་བདག་ལ་ཕུལ། ལས་འགྲུབ་པའི་འཕྲིན་བཅོལ་བྱ། དེ་ནས་སྨྲ་བཅད་ཞག་བདུན་སྔགས་འདི་བཟླས། ཨོཾ་ཀརྨ་ཙི་ཤ་ཆེ་ནི་སྭཱ་ཧཱ། ཞེས་བཟླས་པས། དང་བོ་བུད་མེད་གཞོན་ནུ་མིག་སྔར་འོང་། དེ་ནས་བཟླས་པ་ལ་འབད་པས་ཇེ་ཉེ་ཇེ་ཉེར་འོང་། མཐར་སྲིད་པ་གསུམ་གྱི་གནས་དང་ཅི་དགོས་དྲིས་པ་དང་མ་དྲིས་པ་ཐམས་ཅད་བཤད་འོང་། གྲུབ་ནས་གའུ་མིས་མ་མཐོང་མ་རེག་པར་ལུས་ལ་བཅངས་པར་བྱའོ། །

མངོན་ཤེས་གསལ་བྱེད་རྣ་སྒྲོག་ལ། སྲིན་བྱའི་ཤ་འམ་མཆུ། གསེར་ཐིག་པོ། གཡུ་ཆུང་མིག་མེད། དུང་ཆུང་གཅིག་དང་གསུམ་ཟ་འོག་ཁུག་མར་བཅུག མཆན་འོག་སྦ། རང་གི་ཅི་ཟ་ཅི་འཐུང་གི་ཕུད་རྒྱབ་ཏུ་མཆོད་ལ། སྨྲ་བ་བཅད་དེ་སྔགས་འདི་བཟླ། ཨོཾ་ཨ་ཏྲི་ཁ་ཏྲི་མ་ཏྲི་དྷ་རི་ཡེ་སྭཱ་ཧཱ། འགྲུབ་རྟགས་ལ། རང་གི་ལྟག་ཁུང་གཏམ་སྨྲ་བ་འོང་། སྒྲ་ཇེ་གསལ་དུས་གསུམ་གྱི་གནད་ཐམས་ཅད་སྟོན། བཤད་ཆེས་པས་ཁྱིམ་མཚེས་ཀྱི་བཟའ་བཏུང་བྱེད་པ་སོགས་སྨྲ་བ་མང་བས། དེ་མི་དགོས་པར་འདོད་ན། རྫས་ཁུག་ཆུར་བསྒྱུར། བཛྲ་ཙིཾ་ཏྟ་དུར་ཙི་ཏྟ་ནན། འདི་བཟླས་ན་ཐོས་པ་སྒྲ་སྒྲོགས་འཕྲོ་ཆད་དེ། དེ་མིན་དོན་ཐམས་ཅད་མི་སྨྲ་བ་མེད་དོ། །ཐེ་ཚོམ་མེད་པར་སྒྲུབ་པའི་ཆོག་ཅེས་གར་དབང་གི་གཏེར་མའོ། །མི་ཁྱིའི་སྒྲ་མེད་ཕུག་པ་བྱང་བལྟས་ཞག་ལྔར་བསྒྲུབ་བོ། །

ཡང་། སྟག་གི་བུ་ཆུང་སྒྲུབ་ཐབས་ཤིག་ལ། འདིའི་རྫས་ལ། སྟག་པའི་བུ་ཆུང་སྐྱེ་མཆེད་ཚང་བར་པད་གདན་བཅས་ཚོན་གང་བ་གཅིག ཙན་དན་དཀར་དམར། གུར་ཀུམ། གུ་གུལ། གླ་རྩི། ཅུ་གང་དེ་རྣམས་ཀྱི་ཕྱེ་མ་བུ་ཆུང་དང་བཅས་པ་ཟ་འོག་གི་ཁུག་མར་བཅུག་ལ། མེ་ལོང་གས་ཆག་མེད་ཅིང་མིག་མེད་པ་གཅིག་གི་སྟེང་དུ་བཞག བདག་གི་སྤྱི་བོར་ལྷ་མོ་གསལ་སྒྲོན་མ་དཀར་མོ་གངས་ལ་ཉི་ཤར་འདྲ་བ་ཞལ་གཅིག་ཕྱག་གཉིས། གཡས་ནོར་བུ་རིན་པོ་ཆེ་དང་། གཡོན་མེ་ཏོག་ཨུཏྤལ་འཛིན་པས་བདག་ལ་འདོད་དོན་ཐམས་ཅད་མངོན་སུམ་སྨྲ་བར་བསམ་ལ། ཨ་ཐན་ཕོབ། ནི་ཐན་ཕོབ། མ་ཐན་ཕོབ། ས་ཏིན་དུ་ལོ་ཀ་བྷནྡྷ་ཧཱུཾ་ཕཊ། ཞེས་རབ་འབུམ་ཚོ་གཅིག འབྲིང་ཁྲི་ཚོ་གསུམ། ཐ་མ་ཁྲི་ཚོ་གཅིག་བཟླས་པས་འགྲུབ་རྟགས་འོད་དམར་བོ་འོང་། དེ་ནས་མེ་ལོང་སྟེང་གི་གཟུགས་དེའི་བདག་གི་སྐྱེ་འཆི་སོགས་སྐྱོན་ཡོན་ཅི་ཡོད་ཀྱི་སྒྲ་སྐད་བཟློ་བར་བྱེད་དོ། །དེ་ནས་རྟེན་དེ་རྣམས་རང་གི་གོང་ཁུག་ཏུ་བཅུག་པས། རྟེན་དེས་འཇིགས་སྐྲག་སོགས་ཅི་འོང་། ཚོང་རྒྱལ་ཕམ། བོར་སྟོར་རྐུན་མ་སོགས་སྲིད་པ་གསུམ་གྱི་སྔ་ལྟས་ཕྱི་ལྟས་ཐམས་ཅད་བཟློ་བར་བྱེད་དོ། །

ཡང་། ཚེ་རིང་མའི་མངོན་ཤེས་སྒྲུབ་ན། གནས་གཙང་མར་གཏོར་མ་གཙང་མར་སྨན་བཟང་དྲུག་གིས་སྤོད་བཏབ། དཀར་གསུམ་མངར་གསུམ་གྱིས་བརྒྱན་པ་སྟེགས་བུར་བཤམས་ལ་བྱིན་རླབས་བྱ། འདས་མ་འདས་ཀྱི་མཁའ་འགྲོ་མའི་མགྲོན་ལ་བསྔོ་ཞིང་ཆང་ཕུད་དང་། ཟས་སྣས་མཆོད། རང་ལ་མངོན་ཤེས་གསལ་བའི་འཕྲིན་བཅོལ་བྱ། དེ་ནས་མཁའ་འགྲོའི་སྲོག་སྙིང་ཡང་ཟབ་གསང་སྔགས་འདི་ཞག་གསུམ་སྨྲ་བ་བཅད་དེ་རྒྱུན་མ་ཆད་པར་བཟླའོ། །ཨོཾ་པྲ་ཧེ་སྟོན་སྟོན། མ་ཤུ་སྟོན་སྟོན། མུ་ཤག་སྟོན་སྟོན། པྲ་ཤ་མ་ནི་སྟོན་སྟོན། དྷ་ཤ་མ་ནི་སྟོན་སྟོན། པྲ་མུན་སྟོན་སྟོན། ཤོ་མུན་སྟོན་སྟོན། ནི་མ་ཀ་ར་སར་སར། ཤག་ཤག་ནུར་ནུར། བསྡུས་བསྡུས། པ་ཕོབ་པྲ་ཕོབ་སྟོན་ཡཱ། ཞེས་སོ། །དམིགས་པ་རང་གི་རྣ་བ་ནས་བུ་མོ་དཀར་སེར་དམར་སྔོ་ནག་མོ་རྣམས་ཀྱིས་གཏམ་སྨྲ་བཤད་པར་བསམ་ལ། གཉིད་མ་ལོག་པར་དྲག་ཏུ་བཟླའོ། །དེས་ཞག་དང་བོ་རྨི་ལམ་འོང་། གཉིས་པར་རྣ་བར་གཏམ་སྨྲ། གསུམ་ནས་སྣང་སྲིད་གསལ་བའི་མངོན་ཤེས་ཐེ་ཚོམ་མེད་པར་འགྲུབ་བོ། །གཞན་ཡང་། འདི་ནི་མི་ནོར་ཟས་གསུམ་ཐམས་ཅད་དབང་དུ་འདུ་བའི་མཁའ་འགྲོའི་དབང་སྡུད་ཆེན་མོ་ཤིན་ཏུ་གསང་བ་ཡིན་ནོ། །

ཡང་། དམ་ཚིག་མཁའ་འགྲོའི་མངོན་ཤེས་སྒྲུབ་པ་ནི། རང་ཉིད་དམ་ཚིག་མཁའ་འགྲོ་དཀར་མོ་རབ་ཏུ་མཛེས་པ་ཕྱག་གཡས་འཕྲུལ་གྱི་མེ་ལོང་བསྣམས་པ། ཞབས་གཉིས་གར་སྟབས་མཛད་ཅིང་པད་མའི་གདན་ལ་བཞུགས་པ། གཅེར་བུ་རུས་རྒྱན་ཅན་གྱི་ཐུགས་ཀར་པདྨ་འདབ་བཞིར་ཧ་རི་ནི་ས་བསྒོམ། ཨོཾ་ས་མ་ཡ་ཊཱཀི་ནི་ཧ་རི་ནི་ས། རུ་ཊ་རུ་ཊ། མུ་མུ། ཕྱེ་ཕྱེ། སྟོན་སྟོན། སྨན་སྤོས་ཆུ་ཡིས་ཁྲུས་བྱས་བཟླས། རབ་དངོས། འབྲིང་ཉམས། ཐ་མ་རྨི་ལམ་དུ་ལེགས་ཉེས་ཐམས་ཅད་སྟོན་པར་འགྱུར་ཞེས་མངའ་བདག་མྱང་གི་ཁྲོས་ནག་ལས་སོ། །

 

ལེའུ་དགུ་བ། ཚེ་སྲོག་དང་རྣམ་ཤེས་བླ་སོགས་ཀྱི་སྐོར།
སྲོག་བཤད་པ།

མི་དང་འགྲོ་བ་གཞན་དག་གང་ཡིན་རུང་བླ་ཚེ་སྲོག་གསུམ་ལ་བརྟེན་ནས་འཚོ་ཞིང་བཞེས་ཡོད་ལ། དེ་རྣམས་མིའི་ལུས་སྟེང་ནས་ཡལ་སོང་ན། འགྲོ་བ་དེ་ཤི་ཚར་ཏེ་ལུས་དེ་ལ་བེམ་པོ་ཞེས་བརྗོད་པ་ཡིན་ཏེ། ཆོས་སྦྱིན་མའི་མདོ་ལས། ཚེ་དང་དྲོད་དང་རྣམ་ཤེས་ནི། །གང་ཚེ་ལུས་འདི་འདོར་བྱེད་ཅིང་། །བོར་ནས་དེ་ཚེ་འདུག་པ་ནི། །སེམས་མེད་ཇི་ལྟར་ཤི་བཞིན་ནོ། །གསུངས་པ་ལྟར་རོ། །འོ་ན། བླ་ཚེ་སྲོག་སོགས་ཇི་ལྟར་གནས་པ་དང་། ངོས་འཛིན་པ་ཡིན་ཞེ་ན། དེ་ནི་བདག་ལྟ་བུའི་ཆུ་བུར་མིག་གིས་མཐོང་དཀའ་ཞིང་བློ་གྲོས་ཕྲ་མོས་དཔྱད་པར་དཀའ་ནའང་། རྨོངས་བློར་ཤར་ཚོད་ཅིག་ཞུས་ན།

སྲོགཅེས་པ་ནི། གནའ་དེང་གི་གསར་རྙིང་རིག་གནས་མཁས་ཅན་རྣམས་ལ་ལྟ་ཚུལ་སྣ་ཚོགས་ཡོད་པ་རེད། འོན་ཀྱང་། དེ་རྣམས་ལས་ཁྱད་ནུས་བཏོན་ཏེ་འདི་དག་ཞིབ་འཇུག་བྱེད་པ་ནི། ཆོས་ལུགས་གྲུབ་མཐའ་ཁག་དང་། སྐྱེ་ཁམས་རིག་པ། གསོ་རིག་སོགས་ཀྱི་ཚན་ཁག་ཡིན། མདོ་རྒྱུད་བསྟན་བཅོས་གང་མང་ཞིག་ཏུསྲོགཅེས་པ་རླུང་སེམས་དབྱེར་མེད་ཀྱི་ཆ་ཞིག་ལ་ངོས་འཛིན་གནང་ཡོད་ལ། སྲོག་ཆགས་རིག་པ་པ་དང་གསོ་རིག་ལས། སྲོགནི་ཁམས་རང་གི་རྟེན་ནམ་འཚོ་ཞིང་འཛིན་པར་བྱེད་པ་ཞིག་ཏུ་ངོས་བཟུང་ཡོད། འདུལ་བ་དང་མངོན་པ་ལྟར་ན་ལུས་ཅན་གྱི་དྲོད་དང་རྣམ་ཤེས་ཀྱི་རྟེན་དུ་གྱུར་བའི་དབང་བོ་དང་། ཡང་། གསོ་རིག་ལས། སྲོགཅེས་པ་ནི། མདངས་དང་བླ་ཁྲག་དང་དྲོད་སོགས་སུ་ངོས་བཟུང་བ་ནི་ཧ་ཅང་རྩིང་ངོ་། །ནང་ཆོས་གཞན་དག་ལས་སེམས་ཅན་གསོན་པོར་འཚོ་ཞིང་གནས་ཐུབ་པའི་ནུས་པ་དབུགས་དང་བཅས་པ་ལ་སྲོག་ཏུ་བཞེད་དོ། །གང་ལྟར་སྲོག་ནི་དྲོད་དང་རྣམ་ཤེས་གཉིས་ཀྱི་རྟེན་གཞིར་གྱུར་བ་དང་དེ་ཀ་གཉིས་གནས་ཐུབ་པའི་སྲོག་འཛིན་གྱི་རླུང་ལ་ཟེར་བས། སྲོག་འཛིན་གྱི་རླུང་དེ་ཡང་སྙིང་ག་ལ་གནས་པ་དང་། རླུང་དེ་དང་ལྟེ་བར་གནས་པའི་མེ་རླུང་གཉིས་ཁ་སྦྱོར་བྱས་ཏེ་རླུང་བཟུང་ནུས་ན་ཚེ་རིང་བོ་སྡོད་ཐུབ་པ་ཞིག་ཡིན།

སྲོགནི་གཙོ་བོ་རླུང་གིས་འགུལ་བསྐྱོད་ལ་རག་ལས་པས། རླུང་དེ་ཡང་རྒྱུ་ས་གཙོ་བོ་སྲོག་རྩ་དཀར་ནག་གཉིས་སུ་ངེས་ཏེ། སྲོག་རྩ་དཀར་ནག་ཅེས་པ་ཡང་། སྙིང་དང་འབྲེལ་ཞིང་ཁྲག་རྒྱུ་བའི་སྲོག་རྩ་ནག་པོ་དང་། ཀླད་པ་དང་འབྲེལ་ཞིང་རླུང་རྒྱུ་བའི་སྲོག་རྩ་དཀར་བོ་གཉིས་སུ་ངེས་ལ། དེ་བས་རླུང་གི་རྒྱུ་བ་མ་སྙོམས་ན་སྲོག་རླུང་ཞུགས་ཏེ་སེམས་འཕྱོ་བ་དང་། གཉིད་ཡུར་བ། བརྒྱལ་བ་དང་བོག་པ་སོགས་འབྱུང་བ་བཞིན་ནོ། །དེ་བས་ཀུན་བཏུས་རང་འགྲེལ་ལས། སྲོག་ཅེས་བྱ་བ་ནི། ལུས་དང་སེམས་ལ་བརྟེན་ནས་འཇུག་པ་དེ་ལྟ་བུའི་རླུང་ཡིན། གསུངས་སོ། །ཚེ་འཚོ་བ་ལ་སྲོག་འཛིན་གྱི་རླུང་དེ་གལ་ཆེ་བས། སྒྲ་སྦྱོར་བམ་གཉིས་ལས། ལེགས་སྦྱར་སྐད་དུ་ཛི་ཝ་ཞེས་པ་ནི་འཚོ་བའི་དོན་དུ་འཇུག་སྟེ། ཛི་ཝ་ནི་ཇི་སྲིད་དུ་ལུས་འཚོ་བ་སྟེ་དེ་ཙམ་དུསྲོགཅེས་པའི་བདག་དེ་ལུས་ལ་གནས་ལ། ཞེས་གསུངས་སོ། །ཡང་། ཚེ་ལས་འདས་དུསསྲོགསོགས་འཁྱེར་ཚུལ་ཀྱང་། ཆོ་ག་རྣམས་སུ་མི་གཅིག་པར་བཤད་དེ། རྒྱུད་རྣམས་སུ་སྲོག་ནི་གཤེད་འདྲེས་འཁྱེར་བ་དང་། ལྷ་མོའི་ཆོ་ག་ལས། ཁམས་གསུམ་ཀུན་གྱི་དབུགས་ལེན་མ། །ཞེས་དབུགས་ནི་དཔལ་ལྡན་ལྷ་མོས་འཁྱེར་བར་བཤད་པ་དང་། ཡང་། སྲིད་པ་སྤྱི་མདོས་ལས། བཙན་རྗེ་ནི་ཅི་ལ་དགྱེས། །ཟ་བ་ནི་ཤ་ལ་རྔམ། །འཐུང་བ་ནི་ཁྲག་ལ་ཧབ། །ལེན་པ་ནི་སྲོག་དབུགས་ལེན། །ཞེས་བཤད་དོ། །རྣམ་ཤེས་ནི་མི་ཤིགས་པའི་རྩ་མདུད་ཕྲ་མོ་ལས་འཕོས་ཏེ་ལས་ཀྱི་རྗེས་སུ་འབྲང་བ་དང་། བླ་ནི་གསོན་དུས་ཀྱི་ཆ་ལུགས་དང་འདྲ་བར་དུར་ལ་གནས་པར་བཤད་དོ། །ཕུང་བོ་ནི་དྲི་ཟ་ཁྱབ་བྱེད་སོགས་ཀྱིས་བདག་ཏུ་འཛིན་པར་ཡང་བཤད་དོ། །

ཚེ་བཤད་པ།

ཚེཞེས་པ་ནི། ནང་ཆོས་ཀྱི་གཞུང་ལུགས་མང་བོར་ཚེ་དང་སྲོག་གཉིས་དོན་གཅིག་མིང་གི་རྣམ་གྲངས་སུ་གསུངས་ཡོད་དེ། སློབ་དཔོན་དབྱིག་གཉེན་གྱིས། སྲོག་ནི་ཚེཡིན། ཞེས་དང་། གདགས་པའི་བསྟན་བཅོས་ལས་ཀྱང་། སྲོག་གི་དབང་བོ་ནི་གང་ཞེ་ན། ཁམས་གསུམ་གྱིཚེའོཞེས་གསུངས་ཀྱང་། སེམས་ཅན་རྣམས་ཀྱི་རྟེན་གྱི་དབང་བོ་འཚོ་བར་བྱེད་པའི་རྐྱེན་གསུམ་ལ། ཚེ་སྲོག་བླ་མའི་དཔེ་གསུམ་ཡང་ཟེར་ལ། དེ་ལྟར་ན། མར་མེ་དང་འདྲ་བའི་ཚེ། སྡོང་བོ་དང་འདྲ་བའི་སྲོག མེ་ལྕེ་དང་འདྲ་བའི་བླ་ཞེས་ཟེར་རོ། །དེ་བསཚེནི། སྡོང་བོ་དང་འདྲ་བའི་སྲོག་ལ་སྣུམ་བགོ་བྱེད་ཀྱི་མར་ཁུ་དང་འདྲ་སྟེ། སྤྱོད་འཇུག་ལས། ཉིན་མཚན་སྡོད་པ་ཡོང་མེད་པ། །ཚེ་འདི་རྟག་ཏུ་གོད་འགྱུར་ཞིང་། །ཞེས་པ་ལྟར་སྲོག་གི་སྡོང་བོ་ཡུན་རིང་འཚོ་བ་ལ་མར་ཁུ་ལྟ་བུའིཚེདེ་ངེས་པར་དུ་དགོས་པས་མཚོན་ནུས་པ་དང་། ཚེ་ཞེས་པ་རྩ་ལམ་དུ་རྒྱུ་ཚུལ་ལའང་གསུམ་དུ་བཤད་ཡོད་དེ། དཔྱད་འབུམ་ཁྲ་བོ་ལས། མི་ལ་ཚེ་ཡི་རྩ་ནི་གསུམ་ཡོད་དེ། །གཅིག་ནི་མགོ་ལུས་ཐམས་ཅད་ཁྱབ་པར་གནས། །གཅིག་ནི་དབུགས་དང་འགྲོགས་ནས་རྒྱུ་བ་ཡིན། །གཅིག་ནི་བླ་དང་འདྲ་སྟེ་འཁྱམས་པ་ཡིན། །ཞེས་ཀྱང་གསུངས་སོ། །

གཞན་ཡང་། སྐྱེས་བུ་དམ་པ་ཚོས། ལྷ་དང་དྲང་སོང་བརྟན་གཡོའི་ཚེ་བཅུད་ཐམས་ཅད་བསྡུས་ནས་མི་ལ་བསྟིམས་ཏེ། མི་ཚེ་བསྲིངས་པའི་ཆོ་ག་དང་། ཚེ་འགུགས་སོགས་མཛད་ཡོད་པ་དང་། ཚེ་ལྷ་བསྟེན་པ་དང་ཚེ་གཟུངས་གསུངས་པ་སོགས་གནང་ལ། དཔེར་ན། སློབ་དཔོན་ཀླུ་སྒྲུབ་ལ་བྲམ་ཟེ་མཚན་མཁན་ཞིག་གིས། མང་ན་ལོ་བདུན་གྱི་ཚེ་ལས་མེད་པར་ལུང་བསྟན་པ་ལ། སློབ་དཔོན་ས་ར་ཧཱས་ཚེ་དཔག་མེད་ཀྱི་དབང་བསྐུར་ནས་ཚེ་ལོ་དྲུག་བརྒྱ་བཞུགས་པ་ལྟ་བུ་ཡིན། ཡངཚེནི་ཆོ་ག་རྣམས་སུ་བླ་བཞིན་འཁྱམས་ཏེ་འགྲོ་བ་ཞིག་ཏུའང་ངོས་བཟུང་ཡོད་དེ། རྟོགས་ལྡན་པས་བདེན་སྟོབས་བརྗོད་ནས། སྦྱིན་བདག་གི་བླ་ཚེ་ཡར་བ་འཐོར་བ་འཁྱེར་བ་ཉམས་པ་བརྐུས་པ་འཕྲོག་པ། རང་དབང་མེད་པར་བཀུགས་ཏེ། ཞེས་ཚེ་འགུགས་བྱས་ཏེ་མི་དེ་ལ་བསྟིམ་པར་ཡང་བཤད་ཡོད་དོ། །

གང་ལྟར། བླ་ཚེ་སྲོག་གསུམ་སོགས་གཅིག་ལ་གཅིག་བརྟེན་གྱིས་མེད་མི་རུང་བ་ཡིན་པ་མ་གཏོགས། ཚེ་སྲོག་གཉིས་གཅིག་མ་ཡིན་པ་ནི། ཚེ་དབང་དང་། ཚེ་འགུགས་དང་། ཚེ་སྒྲུབ། ཚེ་གཟུངས་སོགས་ཆོས་དཔེ་ཡོད་ལ། སྲོག་དབང་དང་། སྲོག་འགུགས་སོགས་མེད་པས་ཀྱང་ཤེས་ནུས་སོ། །

རྣམ་ཤེས་བཤད་པ།

རྣམ་ཤེས་ནི། མདོ་ལས་རྣམ་ཤེས་ཚོགས་དྲུག་ལ་གསུངས་ཀྱང་། འདིར་ཀུན་གཞི་ཁས་ལེན་པ་རྣམས་ཀྱིས་ཀུན་གཞི་དང་། ཁས་མི་ལེན་པ་རྣམས་ཀྱིས་ཡིད་ཀྱི་རྣམ་པར་ཤེས་པ་ལ་བཤད། དེ་ནི་སྐྱེ་བ་སྔ་ཕྱི་བར་གསུམ་དུ་འཕོ་བའི་རྣམ་པ་ཅན་ཞིག་ཡིན་ལ། དང་ཐོག་མངལ་དུ་ཕ་མ་གཉིས་ཀྱི་ཁུ་ཁྲག་གི་ཐིགས་པ་གཉིས་འདྲེས་ཏེ་འོ་མ་བསྐོལ་བའི་སྤྲིས་མ་བཞིན་དུ་ཆགས་པར་གྱུར་དུས། བར་སྲིད་པ་དེ་འཆི་འཕོ་ཞིང་ཉིང་མཚམས་སྦྱོར་བར་བཤད་ལ། ཐ་མར་འཆི་དུས་ཡང་། རྣམ་ཤེས་རགས་པ་རྣམས་རིམ་གྱིས་བསྡུས་ཏེ། ལུས་ཀྱི་འབྱུང་བ་རྣམས་ཐིམ་ཚར་རྗེས། རྣམ་ཤེས་ཤིན་ཏུ་ཕྲ་བ་དེ་ཉིད་མིའི་ལུས་ལ་རྩ་དབུ་རྐྱང་རོ་གསུམ་ཡོད་པ་ལས། རྩ་དབུ་མའི་ནང་སྙིང་ཀའི་ཐད་ཀྱི་རྩ་མདུད་གསུམ་ཡོད་པའི་ནང་དུ་རྣམ་ཤེས་དང་བོ་གང་དུ་ཆགས་པའི་གནས་མི་ཤིགས་པའི་ཐིག་ལེ་རྒྱ་སྲན་ཙམ་ཡོད་པ་དེའི་དཀྱིལ་ནས་ཐོན་ཚེ། ལུས་སེམས་ཀྱི་འབྲེལ་བ་ཆད་པར་བཤད་ཀྱང་། རྣམ་ཤེས་ཀྱི་རྒྱུན་ལ་ཆད་པ་མེད་པས། མདོ་ལས། སེམས་ཅན་རྣམས་ཀྱི་རྣམ་པར་ཤེས་པ་ནི་རྒྱུན་རེ་རེ་བའོ། །གསུངས་པ་རེད། དེ་བས་ཤི་རྗེས་སུ་རྣམ་ཤེས་འདིའོ་ཞེས་ཐུན་སྣང་དུ་སྟོན་རྒྱུ་ཞིག་དཀའ་མོད། སྔོན་གནས་རྗེས་དྲན་གྱི་གནས་ཚུལ་མང་བོ་འཇོག་རྒྱུ་ཡོད་པ་འདིས། བདག་ཅག་ལྟ་བུ་ལའང་དཔང་རྟགས་ཤིག་བཀོད་ཡོད་པ་རེད། རྣམ་ཤེས་དེ་ལ་ཐོག་མ་མེད་པའི་སྟེང་ནས། སྐྱེ་བ་སྔ་ཕྱི་དང་། དགེ་སྡིག་གི་བག་ཆགས། རྣམ་སྨིན་ཀྱི་ལས་སོགས་ཉོག་འཛིང་ཅན་མང་བོ་ཞིག་གི་གཞི་ཚུགས་ས་ཞིག་ཀྱང་ཡིན། དེར་བརྟེན་སྐྱེས་པ་སྔོན་གནས་རྗེས་དྲན་གྱི་གཏམ་སྣ་ཚོགས་ཤིག་དང་། ཐ་ན་རང་ཉིད་ཀྱང་ངོ་མཚར་གསང་བའི་འཕྲུལ་འཁོར་ཞིག་གྱུར་ཟིན་ཀྱང་། རང་གིས་ཀྱང་མི་ཚོར་བའི་ཞེད་སྣང་ལྟ་བུར་ཡོང་གི་ཡོད་པ་རེད། དེ་བས་ནང་ཆོས་ལས་བསྟན་པའིརྣམ་ཤེསཡོད་པ་ལ་ངེས་པ་རྙེད་པའི་སྐྱེས་བུ་རྣམས་ཀྱིས། འཆི་བ་མི་རྟག་པ་ནི་ཀུན་གྱི་ཐ་མའི་བགྲོད་ལམ་ཉག་གཅིག་ཏུ་ཁས་ལེན་ཀྱང་། ཡོད་ཚད་ཀྱི་མཇུག་རྫོགས་པའི་མཐའ་སྡོམ་གྱི་ལྟ་ཚུལ་དེ་ལ་ཤིན་ཏུ་ནས་ཀྱང་མི་འཐད་པ་རེད། རྣམ་ཤེསནི་མགྲོན་པོ་དང་ལུས་ནི་མགྲོན་ཁང་དང་འདྲ་བས། མགྲོན་པོ་དེ་སྔོན་གྱི་མགྲོན་ཁང་དུ་ཕྱིར་སླེབས་ཀྱང་ཆོག་ལ། སྔ་མའི་མགྲོན་ཁང་བོར་ནས་མགྲོན་ཁང་གསར་བ་ཞིག་ཏུ་ཞག་སྡོད་བྱས་ནའང་ཆོག དེ་ཡང་བཅོམ་ལྡན་འདས་ཀྱིས་བཟང་སྐྱོང་གིས་ཞུས་པའི་མདོ་ལས། སྤྱིར་ན། སྐྲ་བཅད་དེ་བོར་བ་རྣམས་མགོ་ལ་སླར་མི་སྐྱེ་བ་བཞིན་དུ་མི་ཤི་ནས་སྔར་གྱི་ལུས་དེ་སླར་མི་ལེན་པར་གསུངས་མོད། དམིགས་གསལ་དུ། སྨན་མདོ་བརྒྱད་བརྒྱ་བ་ལས། མི་ཤི་བའི་འོག་ཏུ་སླར་གསོན་རུང་བར་བཤད་པ་ནི། དེ་རང་ཅག་གིས་འདས་ལོག་ཟེར་བ་དེ་ཡིན་ལ། དེ་ནི་ལུས་བོརྣམ་ཤེས་ཀྱིས་བཏང་སྟེ་ཉིན་འགའི་རྗེས་སུ་རྣམ་ཤེས་སླར་ལུས་ཕུང་ལ་ཞུགས་པ་སྟེ། ཤི་གསོན་བར་གྱི་འཕྲིན་སོགས་ཀྱང་བྱེད་པ་དེ་ཡིན། དཔེར་ན། བླ་མ་བྱམས་པ་བདེ་ལེགས། བྱམས་པ་ཨ་ཀྲུང་། ཀརྨ་དབང་འཛིན། ཀུན་བཟང་ཆོས་སྒྲོན་དང་། དག་པོ་རྣམ་རྒྱལ། གླིང་བཟའ་ཆོས་སྒྲོན། ལྷ་མོ་ལྷམ་གཅུང་སོགས་འདས་ལོག་གནང་བ་ལྟ་བུ་ཡིན་ལ། དེ་དག་རེ་རེའི་ལོ་རྒྱུས་ལྒིགས་བམ་བྱས་ཏེ་བཀོད་པ་ལྟར་རོ། །དེ་ནི་མགྲོན་པོ་དེ་སྔོན་གྱི་མགྲོན་ཁང་དུ་ཕྱིར་སླེབས་ཀྱང་ཆོག་པ་ལྟ་བུ་ཡིན། ཡང་། སྔ་མའི་མགྲོན་ཁང་བོར་ནས་མགྲོན་ཁང་གསར་བ་ཞིག་ཏུ་ཞག་སྡོད་བྱེད་པ་ལྟ་བུ་ལ། བར་དོ་བརྒྱུད་པ་དང་མ་བརྒྱུད་པ་གཉིས་སུ་ཡོད་པར་སྙམ་ལ། བར་དོ་བརྒྱུད་དགོས་པ་ནི་ཡོངས་གྲགས་ལྟར་དང་། མ་བརྒྱུད་པ་ནི་འཕོ་བ་གྲོང་འཇུག་བྱེད་པ་སྟེ། དཔེར་ན། རྒྱལ་བུ་ཆོས་ཀྱི་དགའ་བ་བྱ་མགྲིན་སྔོན་ཟླ་བར་གྲོང་འཇུག་བྱས་པ་དང་། སྲས་དར་མ་མདོ་སྡེ་བཅིབ་རྟས་བརྡབས་ཏེ་དབུ་ཚལ་བ་བརྒྱད་དུ་སོང་སྐབས། ཕུག་རོན་གྱི་རོ་ཞིག་ལས་མ་རྙེད་པས། དེ་ལ་རྣམ་ཤེས་འཕོས་ཏེ་རྒྱ་གར་གྱི་དུར་ཁྲོད་ཞིག་ཏུ་གཞོན་ནུའི་རོ་ཞིག་སྐྱེལ་བ་མཐོང་བས་དེ་ལརྣམ་ཤེསསྤར་ནས། ཕྱིས་མཁས་པ་ཆེན་པོ་ཏི་ཕུ་གསང་སྔགས་སྡོང་བོ་ཞེས་པར་གྱུར་ནས། རས་ཆུང་བས་ཆོས་གསན་པའི་ལོ་རྒྱུས་ཡོད་པ་དང་། དེ་མཚུངས་སུ་སྟོང་འཁོར་མདོ་རྒྱུད་རྒྱ་མཚོ་ཡང་དུར་ཁྲོད་དུ་བོར་བའི་བྱིས་པ་ལོ་བརྒྱད་ཅན་ཞིག་ལ་གྲོང་འཇུག་བྱས་པ་ཡིན་ནོ། །དེ་ནི་རང་ག་བ་ཞིག་གིས་མི་འོང་བར་སྔགས་བླ་མེད་ཀྱི་ཚད་ངེས་ཅན་ཞིག་ལ་སླེབས་ཏེ། རླུང་སེམས་ལ་དབང་འབྱོར་སྐབས་སྒོམ་སྟོབས་ཀྱིས་བྱེད་ནུས་པ་ཞིག་ཡིན་པར་གསུངས་སོ། །ཡང་། པྲ་རྟེན་དུ་ཡུལ་ལྷ་སོགས་ཀྱིས་དབང་བསྒྱུར་བྱེད་པའང་མི་དེའི་ཁོག་ཏུ་གཞན་ཞིག་གིསརྣམ་ཤེསཞུགས་པ་ཧ་ཅང་གསལ་ལོ། །རྗེ་ཐམས་ཅད་མཁྱེན་པས། རྨི་ལམ་གྱི་གནད་གཞན་འགའ་ཞིག་དང་། རླུང་གིས་བྱེད་པའི་གནད་འགའ་ཞིག་ལ་བརྟེན་པས་མི་འཁྲུལ་བར་བྱ་བར་ལུང་སྟོན་ཚུལ་ཡོད་པར་གསུངས་པ་བཞིན། རྨི་ལམ་ལ་བརྟེན་ནས་སྲིད་པ་ཕྱིར་ལྡོག་གི་སྒྲུབ་ཐབས་ཇོ་བོ་རྗེ་སོགས་ཀྱིས་གསུངས་པ་དུ་མ་ཡོད་ལ། སྒྲུབ་ཐབས་དེ་དག་ལ་བརྟེན་ནས། གདོས་བཅས་ཀྱི་ལུས་ཕུང་བཞག་སྟེ་རྨི་ལམ་དུརྣམ་ཤེསརི་གླིང་བྱེ་བས་ཆོད་པར་རྒྱུ་བ་དང་། རྣམ་ཤེསགསལ་ཆ་ཇེ་ཆེར་གྱུར་ཏེ་སྔོན་གནས་རྗེས་སུ་དྲན་པའི་སྐྱེས་བོ་དུ་མ་ཡང་ཡོད་དོ། །དེ་ནི་མངོན་པ་ལས་གསུངས་པའི་སྔོན་གནས་རྗེས་དྲན་གྱི་མངོན་ཤེས་སྒྲུབ་ཚུལ་གྱི་རྣམ་གནས་ཡིད་བྱེད་དེ་དང་ཕྱོགས་མཚུངས་ཡིན་ནོ། །དེ་ནི་ཐོག་མེད་ནས་ལས་གང་བྱས་ཀྱི་བག་ཆགས་ཀུན་གཞིརྣམ་ཤེསཀྱི་སྟེང་དུ་བསགས་པ་དེ། ད་ལྟ་རྐྱེན་གྱིས་བསླངས་པའི་ཚེ་ན་སད་ནས་སླར་དྲན་འོང་བ་ཡིན་ནོ། །

བླ་བཤད་པ།

བླཞེས་པ་ནི། ཁ་ཅིག རང་གི་གྲིབ་མ་དེ་རང་གི་བླ་ཡིན་པར་འདོད་པས། གྲིབ་མའི་ཐོག་ཏུ་འང་བསྲུང་བྱ་མི་ཉུང་བ་ཞིག་ཡོད་པ་དང་། འགའ་ཞིག་རང་གི་ལུས་ཐོག་ཏུ་ཡོད་པའི་འབུ་ཆུང་ངུའི་རྣམ་པ་མཐེ་བོང་ཙམ་གྱི་གཟུགས་ཤིག་ལ་ངོས་འཛིན་པ་དང་། དོན་དུ་ན་བླ་ནི། འགྲོ་བ་གང་ལ་མཚོན་ནའངབླདང་། ཚེ་སྲོག་རྣམ་ཤེས་སོགས་ལ་བརྟེན་ནས་ལུས་གནས་ལ། བླནི་མི་གསོན་བཞིན་དུ་བྱ་བྱད་ཀྱིས་འཁྱེར་འགྲོ་བ་དང་། ལུས་པོ་ལས་རིང་དུ་འཁྱར་འགྲོ་བའང་ཡོད་ལ། སྐྱེ་བོ་སུ་ཞིག་གི་བླ་འཁྱམས་སོང་བ་ན། ནད་བྱུང་བ། ཤེས་པ་རྡིབ་པ། གཉིད་མི་ཁུག་པ། གཟར་བ། ཧོན་ཐོར་བ། སྐྲག་སྣང་འཆར་བ། ཁ་རྗེ་དབང་ཐང་ཉམས་པ་སོགས་ཀྱི་མངོན་རྟགས་ཡོད་ལ། དེ་ཚེ་བླ་དེ་བཀུགས་ནས་སླར་བསྟིམ་ཏུའང་རུང་བར་བཤད་ཡོད། བླ་འགུགས་ཀྱི་རིག་གནས་འདི་རང་ཅག་ལ་གདོད་མའི་དུས་ནས་ཡོད་དེ། འདུར་ཤེས་སྲིད་གཤེན་གྱིས་འདུར་ལ་བརྟེན་ནས་གསོན་པོར་བླ་འགུགས་དང་། ཤི་བོའི་བླར་བརྫུས་ཏེ་གསོན་པོར་བསླུ་ཞིང་འཚེ་བར་བྱེད་པ་ཐེར་འདོན་གནང་སྟེ་བདེ་ལ་འཁོད་པས། བོན་ཤེས་པ་ཅན་བཅུ་གཉིས་ཀྱི་ནང་གསེས་སུ་བགྲང་བ་དང་། དེ་ལས་གཞན། བན་བོན་གཉིས་ཀྱི་གཏོ་ཆོག་སོགས་སུ། བླའགུགས་སྒྲུབ་སྐབས་ཕུར་བུའི་ནང་བླ་ལུག་ཕོ་མོ་གང་ཡིན་རྟགས་དང་ལྡན་པ་ཚོན་གྱིས་བརྒྱན་ཏེ། བཤམས་པ་དང་། ཁྱད་པར་དུ་བླ་ལུག་དངོས་མདུན་དུ་བཏགས་ནས། བདེན་སྟོབས་ཀྱིས་སྦྱིན་བདག་གིབླཚེ་ཡར་བ་འཐོར་བ་འཁྱེར་བ་ཉམས་པ་བརྐུས་པ་འཕྲོག་པ། རང་དབང་མེད་པར་བཀུགས་ཏེ། མདུན་གྱི་བླ་རྟེན་ལ་བསྟིམ་ནས། ཀྱེ། བླ་ཡི་ལུ་གུ་དཀར་བོ་ལ། །ཡ་མཚན་ཅན་གྱི་དར་སྣས་བརྒྱན། །བླ་ཡི་རྟེན་དུ་ཁྱེད་ལ་འབུལ། །བླ་རྐང་གཡས་པ་བླ་ཡི་རྟེན། །བླ་རྐང་འདི་ལ་བླ་ཁུགས་ཅིག། ཅེས་བླ་རྟེན་དུ་ལུག་ཕུལ་དེ་ཚེ་ཐར་དུ་བཏང་ནསབླའཁྱར་བ་དེ་སླར་མི་དེ་ལ་བསྟིམས་པའི་ཆོ་ག་ཡོད་པ་དང་། དེ་བས། ཀརྨ་ངག་དབང་ཡོན་ཏན་རྒྱ་མཚོའི་རིང་འཚོའི་ཆོ་ག་ཚེ་དབང་དགའ་འཁྱིལ་ལས། སྲོག་གམ་ཚེ་གནས་པའི་རྟེན་ངོ་བོ་ཚེ་སྲོག་གི་དྲིས་བགོས་པ་བླ་རྩའི་ནང་ནས་སྲིན་ལག་བརྒྱུད་དེ་ཕྱི་རོལ་ཏུ་འཁྱམས་པ་ལས། མི་དབང་ཐང་ཞན་ན་མཚན་མོ་རྒྱུ་བའི་འབྱུང་བོ་རྣམས་ཀྱིས་བདག་ཏུ་བཟུང་ནས་ལོངས་སྤྱོད་པ་ལས་བླ་འཁྱམས་པ་དང་འཕྲོག་པ་བརྐུས་པ་སོགས་ཟེར་གསུངས་པ་ལྟ་བུའོ། །བླ་འཁྱམས་ཚུལ་ཡང་བླ་རྩའི་ནང་ནས་སྲིན་མཛུབ་བརྒྱུད་དེ་འཁྱམས་པར་བཤད་དོ། །

དེར་མ་ཟད། བླནི་མི་དེ་དང་ཡན་གར་གནས་རུང་བ་ཞིག་ཀྱང་བཤད་ཡོད་ལ། ཆོ་ག་དང་སྒྲུང་གཏམ་མང་བོར། བླ་སྡོང་དང་། བླ་འབྲོང་། བླ་གཡུ་ཞེས་བླ་དེ་ཕྱི་རོལ་ཀྱི་དངོས་བོ་དེ་དག་ལ་གནས་པས། དེ་དག་ལ་གནོད་འཚེ་ཐེབས་ན། མི་དེ་དྲན་པ་མི་གསལ་བའམ་ཧོར་ཐོར་བ་སོགས་འགྲེལ་བརྗོད་གང་མང་བྱས་ཡོད། དཔེར་ན། གེ་སར་གྱིས་བདུད་ཀླུ་བཙན་རྒྱལ་བོ་འདུལ་བའི་ཚེ་ནའང་། ཐོག་མར་བླ་འབྲོང་བསད། བླ་ཤིང་བཅག བླ་མཚོ་བསྐམས་པར་བྱས་ཏེ། བདུད་རྒན་ལ་འཆར་སྒོ་མེད་པར་ཧོན་ཐོར་བ་བྱས་རྗེས། བདེ་བླག་ངང་ཆམ་ལ་འབེབས་ཐུབ་པ་བཤད་ཡོད། དེ་བཞིན། གེ་སར་གྱི་བླ་རི་རྨ་རྒྱལ་སྦོམ་ར་དང་། སེང་ལྕམ་འབྲུག་མོའི་བླ་གནས་མཚོ་སྐྱ་རེངས། བཤན་པ་རྨེ་རུ་རྩེའི་བླ་གནས་འབྲོང་གཡག་དམར་བོ། གུར་དཀར་ནག་སེར་གསུམ་གྱི་བླ་གནས། འབྲོང་གཡག་དཀར་ནག་སེར་གསུམ་དང་། ཡང་། གུར་དཀར་རྒྱལ་བོའི་བླ་ལྕགས་སྲ་མཁྲེགས་ཀྱི་ཐེའུ་རང་། མོན་ཤིང་ཁྲི་རྒྱལ་བོའི་བླ་གནས་སྡིག་སྲིན་མགོ་དགུ་ཞིག་དང་། གྲུ་གུ་རྒྱལ་བོའི་བླ་གནས་འཇིགས་རུང་དོམ་ནག་ཞིག་དང་འུག་པ་མགོ་དགུ་སོགས་བཤད་ཡོད་པ་དང་།

ལྗོན་ཤིང་ལ་བླ་གནས་པར་མཚོན་ནའང་། སྟོན་པ་གཤེན་རབ་ཀྱིས་ཕྱག་བསྟར་ནས་བཙུགས་པ་ལ། ལོ་རྒྱུས་ཁག་ཏུཤིང་གི་རྒྱལ་བོ་ཀོང་བོའི་སྐུ་ཤུགཅེས་པ་མི་ལོ་སུམ་སྟོང་ལྷག་གི་ལོ་རྒྱུས་ལྡན་པ། གཤེན་རབ་མི་བོ་ཆེའི་བླ་ཤིང་དུ་གྲགས་པ་དང་། ཡང་། རྭ་སྒྲེང་དུ་མཁའ་འགྲོ་བྱེ་བ་འབུམ་ཕྲག་གི་དབུ་སྐྲ་ལས་གྲུབ་པའི་ལྷ་ཤུག་མང་དུ་ཡོད་པམཁའ་འགྲོའི་བླ་ཤིངདང་། དེར་མ་ཟད་འབྲོམ་སྟོན་པའི བླ་ཤིང་ཆུ་མིག་རིང་བོཞེས་དངོས་སུ་མཇལ་རྒྱུ་ཡོད་པ་དང་། ཡང་། ཡར་འབྲོག་གཡུ་མཚོའི་མཚོ་སྙིང་ནརྗེ་འབངས་ཉེར་ལྔའི་བླ་ཤིངཞེས་ཤུག་སྡོང་ཆེན་པོ་ཉེར་ལྔ་ཡོད་པ་སོགས་ཀྱིས་མཚོན་ལ། གདོད་མའི་འདོན་ཆོག་རྣམས་སུའང་། འགྲོ་བའི་རིགས་སོ་སོའི་བླ་གནས་མི་འདྲ་བ་ཇི་སྙེད་ཅིག་བཤད་ཡོད་པ་བརྗོད་ཀྱིས་མི་ལང་ལ། ལྗོན་ཤིང་གཅིག་པུརབླགནས་པ་བཤད་ནའང་། ཤུག་པ་ལྷ་ཡི་བླ་ཤིང་། ཙན་དན་ཕོ་ལྷའི་བླ་ཤིང་། སུར་དཀར་མཚུན་གྱི་བླ་ཤིང་། སྟག་པ་གཉན་གྱི་བླ་ཤིང་། འོམ་བུ་ཀླུའི་བླ་ཤིང་། ཚར་བུ་གཏོད་ཀྱི་བླ་ཤིང་། དབྱར་བ་ས་བདག་བླ་ཤིང་། ཉ་བྲིད་ཡུལ་ལྷའི་བླ་ཤིང་། སྤ་མ་དགྲ་ལྷའི་བླ་ཤིང་། འབོ་དཀར་མིའི་བླ་ཤིང་། གླང་མ་བུད་མེད་བླ་ཤིང་ཞེས་མང་དུ་འཕྲོས་ཡོད་པ་རེད།

དེ་བཞིན་དུར་ས་སྤོ་ཚུལ་ཆ་ལག་ཚང་བ་བདེ་སྐྱིད་ཀུན་འབྱུང་ལས། ཁྲག་གི་བླ་ནི་ཚུར་ལ་བླུ། །དབུགས་ཀྱི་བླ་ནི་ཚུར་ལ་བླུ། །ཤ་ཡི་བླ་ནི་ཚུར་ལ་བླུ། །མེ་ཡི་བླ་ནི་ཚུར་ལ་བླུ། །ཆུ་ཡི་བླ་ནི་ཚུར་ལ་བླུ། །རླུང་གི་བླ་ནི་ཚུར་ལ་བླུ། །ས་ཡི་བླ་ནི་ཚུར་ལ་བླུ། །ནམ་མཁའི་བླ་ནི་ཚུར་ལ་བླུ། །ཕོ་ལྷའི་བླ་ནི་ཚུར་ལ་བླུ། །མོ་ལྷའི་བླ་ནི་ཚུར་ལ་བླུ། །དགྲ་ལྷའི་བླ་ནི་ཚུར་ལ་བླུ། །སྲོག་ལྷའི་བླ་ནི་ཚུར་ལ་བླུ། །ཞིང་ལྷའི་བླ་ནི་ཚུར་ལ་བླུ། །ཞེས་སྣོད་བཅུད་ཐམས་ཅད་ཕལ་ཆེར་བླའི་མ་ཁྱབ་པ་མེད་པར་བསམ་པ་ནི་གདོད་མའི་རིག་གནས་ཤིག་ཏུ་གྲུབ་བོ། །

ཁྱད་པར་དུ། མི་གྲོངས་པའི་རྗེས་སུབླནི་དུར་ལ་གནས་པར་བཤད་པས། དུར་ས་ངན་ན་བླ་དེ་རྒུད་པ་ཡིན་པས། ཤི་གསོན་གཉིས་ཆར་ནས་བྱུར་སྣ་ཚོགས་འབྱུང་བར་བཤད་དེ། ནོར་འཛིན་དཔྱད་པ་ལེགས་ཉེས་འབྱེད་པའི་ལྡེ་མིག་ལས། སྤྱིར་ན་རི་ཁྲོད་ཁང་བ་དང་། །གཏེར་དང་དུར་ས་གང་ལ་ཡང་། །ས་དཔལ་ཐམས་ཅད་བཟང་བར་དགོས། །ཁྱད་པར་དུར་གྱི་ས་མིག་འདི། །ངན་ན་ཤི་གསོན་གཉིས་ཀ་སྡུག། སྲོག་དང་རྣམ་ཤེས་བླ་དང་གསུམ། །སྲོག་དེ་གཤེད་མ་འདྲེ་ཡིས་གཅོད། །རྣམ་ཤེས་ལས་ཀྱི་རྗེས་སུ་འབྲང་། །བླ་ནི་དུར་ལ་གནས་པ་ཡིན། །དུར་ས་བཟང་ན་བླ་ཡང་དར། །བདེ་སྐྱིད་འཛོམས་ནས་གསོན་ལ་ཡང་། །མགོན་སྐྱབས་འཚོལ་དུ་འོང་བ་ཡིན། །ཞེས་དང་། ཀརྨ་ཆགས་མེད་ཀྱིས་ཀྱང་། ཡང་བོན་ལུགས་ཀྱིས་ཚེ་འདས་ཀྱི་བླ་ཚེ་སྲོག་གསུམ་ལསབླདེ་འདས་པོ་དེ་ཉིད་ཀྱི་བྱད་གཟུགས་བཟུང་ནས་དུར་དེར་གནས་པས། དེ་ལ་ཕན་གནོད་གང་བྱས་ན་འབྲས་བུ་དེ་འདྲ་འབྱུང་བར་ཡང་བཤད་ཡོད། དེ་བས། ཀརྨ་ཆགས་མེད་ཀྱི་མཚུན་བཅོས་ལས། འདོན་ཆོག་དང་མཆོད་རྫས་བཤམས་ཚུལ་སོགས་རྒྱས་པར་བཤད་ཡོད། བླནི་དུར་སར་གནས་པར་བཤད་པས། བང་སོའི་ནང་དུའང་སྲོག་ཆགས་དང་སྙིང་ནོར་མང་བོ་དུར་སྦས་བྱས་ཏེ་གསོལ་མཆོད་བྱེད་པའང་དེ་ཡིན་ནོ། །

དེ་ལས་གཞན། སེམས་ཡིད་བླ་གསུམ་གྱི་ཁྱད་པར་ཡང་། གཡུང་དྲུང་བོན་གྱི་བསྟན་འབྱུང་ཕྱོགས་བསྡུས་ལས། སེམས་ནི་ཀུན་ཁྱབ་མ་འགགས་རང་བཞིན་ཏེ། །ཤུགས་འབྱུང་རྩལ་ལྡན་བཟང་ངན་འཆར་བའི་བདག། ལུས་ཅན་ཡོངས་ཁྱབ་དོན་རྟོགས་ངོ་བོ་ཉིད། །དཔེར་ན་མི་ཡི་སྙིང་བོ་ལྟ་བུ་དང་། །སྣང་རྐྱེན་གང་འཕྲད་དེ་བཞིན་ཆེ་ཆུང་སྐྱེ། །ཞེས་དང་། ཡིད་ནི་ཡུལ་སྣང་བཟང་ངན་རྟོག་དཔྱོད་ཅན། །སྒོ་ལྔའི་ལམ་ནས་ཡུལ་དྲུག་ཚོགས་ལ་སྤྱོད། །སེམས་ལས་རང་འཆར་འཕྲུལ་བའི་རང་བཞིན་ཏེ། །དཔེར་ན་མེ་འབར་འོད་དང་ལྕེ་ཕྲེང་བཞིན། །རྐྱེན་ལ་བལྟོས་པའི་ཕྲ་རགས་རྟོག་ཆོག་འགྱུ། །ཞེས་དང་། བླ་ནི་དེ་དག་ལས་འཕོས་མཆེད་པ་ཡིས། །སེམས་ཡིད་འབྲེལ་བའི་ན་ཤས་གཏད་མེད་དུ། །སྣང་བ་གང་འཕྲད་དང་འགྲོགས་ཡན་པར་འཁྱམས། །དཔེར་ན་མེ་ལས་བྱུང་བའི་དུ་བ་བཞིན། །ཡིད་སེམས་ལས་སྐྱེ་དེ་ཡི་སྲོག་ལྡན་ནོ། །ཞེས་སེམས་ནི་མེ་ཡི་སྙིང་བོ་ལྟ་བུ་དང་། ཡིད་ནི་མེ་ལྕེ་ལྟ་བུ་དང་། བླ་ནི་དུ་བ་ལྟ་བུར་ཡང་གསུངས་པ་དང་།

དེ་བས། བོན་གཞུང་རྣམས་ལས་ཚེ་འདས་ཀྱི་བླ་ཡིད་སེམས་གསུམ་གཅིག་ཏུ་དྲིལ་ནས། བོན་གཤེན་གྱིས་བདེ་ལ་འགོད་པར་བཤད་པ་དེ་ལ་འདུར་གྱི་ཆོ་ག་ཟེར་ལ། གསང་བ་བསེན་ཐུབ་རྒྱུད་ལས། ལས་ཀྱི་དབང་གིས་ལུས་དང་སེམས་བྲལ་ནས། །བླ་ཡིད་སེམས་གསུམ་འཁོར་བཞིར་བར་དོར་འཁྱམས། །རྩལ་གསུམ་ལུས་ལ་རྫོགས་པའི་སྐྱེས་བུ་ཡིས། །དམུ་རྒོལ་བཏུལ་ནས་གཡུང་དུ་ཕེབས་པ་བཞིན། །ཤེས་རབ་སྟོབས་ལྡན་སྐྱེས་བུ་གང་ཞིག་གིས། །བླ་དང་སེམས་ཡིད་ཐིག་ལེར་དྲིལ་ནས་ཀྱང་། །ཐོགས་ཆགས་མེད་པའི་མཁའ་ཀློང་དབྱིངས་སུ་བསྒྲལ། །ཞེས་ཟེར་ལ། བོན་ཤེས་པ་ཅན་བཅུ་གཉིས་ཀྱི་ནང་གསེས་འདུར་ཤེས་སྲིད་གཤིན་བྱ་བ་དེ་ཡང་། གཤིན་པོའི་བླ་འཁྱེར་མཁན་ལ་རྒོལ་ཏེ་བླ་འགུགས་ཞིང་། གཤིན་པོའི་བླར་རྫུས་ཏེ་གསོན་པོ་རྣམས་བསླུ་ཞིང་འཚེ་བར་བྱེད་པ་འདུར་གྱི་ཆོ་ག་ལ་བརྟེན་ནས་ཤི་གསོན་ཐམས་ཅད་བདེ་ལ་འགོད་པས། འདུར་ཤེས་སྲིད་གཤིན་ཞེས་མིང་ཐོགས་པ་ཡིན་ནོ། །དེ་ལྟར་བླ་ཚེ་སྲོག་སོགས་ལ་དཔྱད་པ་འདི་ནི། སློབ་བུ་བརྩོན་འགྲུས་རྒྱ་མཚོ་ལགས་དང་ངེད་ཟུང་གིས་དཔྱད་གཞིའི་རྒྱུ་ཆ་བཙལ་ཏེ་བྲིས་པ་ཡིན་ནོ། །

སྲོག་བླུ་ཚེ་ཐར།

༡ སྲོག་བླུ་བྱ་དགོས་པའི་རྒྱུ་མཚན། འཛམ་བུ་གླིང་གི་སྒང་འདིར་ཆོས་ལུགས་འདྲ་མིན་ཡོད་པ་ལས། ལ་ལས་ཤ་ཁྲག་གིས་དམར་མཆོད་བྱེད་པ་ཆོས་ལུགས་སུ་བརྩི། འགའ་ཞིག་གིས་ལས་འབྲས་ཁས་མི་ལེན་པའམ། ཡང་ན་སྣང་ཆུང་དུ་བཞག་སྟེ། དུད་འགྲོ་རྣམས་མཐོང་ཆུང་བྱས་ཏེ་དམར་གསོད་བྱེད་པ་ནི། ཤིན་ཏུ་ནས་ཀྱང་མི་རིགས་ཏེ། ཕར་ཕྱིན་ཐེག་པའི་མདོ་ལས། སྲོག་ཅེས་བྱ་བ་ནི། ཐ་ན་གྲོག་སྦུར་ཚུན་ཆད་ལའང་སྡུག་ཅིང་ཕངས་ལ་ཡིད་དུ་འོང་བ་ཡིན་ཏེ། བདག་ལའང་སྲོག་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱི། སུ་ཡང་བདག་གསོད་པའམ། གསོད་དུ་འཇུག་པའམ། བསད་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་གསད་པར་མི་བྱ། གསོད་དུ་ཞུགས་པར་མི་བྱ། གསོད་པ་ལ་རྗེས་སུ་ཡི་རང་བར་མི་བྱའོ། །ཞེས་དང་། བཤེས་སྤྲིངས་ལས། རྒྱལ་བོ་ཁྱོད་ནི་སྲོག་གཅོད་མ་མཛད་ཅིག །སྐྱེ་བོ་ཀུན་ལ་སྲོག་ནི་རབ་ཏུ་ཕངས། །དེ་བས་ཡུན་རིང་ཚེ་བསྲིངས་སུ་འདོད་པས། །ཡིད་ཀྱི་དགུ་ལ་འང་སྲོག་གཅོད་མི་བྱའོ། །ཞེས་དང་། ཚོམས་ལས། ཐམས་ཅད་ལའང་སྲོག་ནི་སྡུག །ཐམས་ཅད་ཆད་པས་འཇིགས་པས་ན། །རང་གི་ཉམས་ལ་དཔག་གྱིས་ཏེ། །བརྡེག་པར་མི་བྱ་བསད་མི་བྱ། །ཞེས་པ་ལྟར། སྲོག་ཆགས་ཡོད་དོ་ཅོག་ལ་སྲོག་ལས་གཅེས་ཤིང་ཕངས་པ་མེད་པས། འཚེ་བ་མེད་པ་དང་སྲོག་གཅོད་སྤང་བ་ནི། ནང་བསྟན་གྱི་སྲོག་ཤིང་ལྟ་བུར་གསུངས་ཡོད། འོན་ཀྱང་། རང་ཅག་དེ་ལས་ལྡོག་ཏེ། གནམ་ལ་འཕུར་བ་དང་། ས་ལ་རྒྱུ་བ། ཆུ་ལ་གནས་པའི་སྲོག་ཆགས་ཇི་སྙེད་ཅིག་ལ། ཤ་ཟིང་སྤུ་ཟིང་གི་འཚེར་སྣང་བསྐྱེད་པ་དང་། སྲོག་གཅོད་པ་ནི་ཐབས་རྡུགས་ཀྱི་གནས་སུ་ཆེ་སྟེ། ཁ་དཔེར། ལུས་ལ་ཆེ་ཆུང་ཡོད་ཀྱང་། །སྲོག་ལ་སྦོམ་ཕྲ་མེད། །ཟེར་ལ། ཉམ་ཐག་དེ་དག་བྲོས་པས་ནི་མི་ཐར། འཛིང་བས་ནི་མི་ཐུབ། སྐྱབས་དང་དཔུང་གཉེན་བཅོལ་ས་མེད་པའི་ངང་ཚུལ་འདི་ལ་དགོངས་ནས། རང་གི་ལུས་ལ་དཔེར་ལོངས་ལ། །གཞན་ལ་གནོད་པ་མ་བྱེད་ཅིག། ཅེས་པ་ལྟར། རང་ཅག་བོད་འདིར་རྒྱལ་བློན་བྱང་ཆུབ་སེམས་དཔའ་རྣམས་དང་། སྐྱེས་ཆེན་དམ་པ་རྣམས་ཀྱིས་འདུས་བྱས་ཀྱི་དགེ་རྩ་ཐམས་ཅད་ལས། སེམས་ཅན་གྱི་སྲོག་སྐྱོབ་པ་ཕན་ཡོན་ཆེ་བར་དམིགས་ནས། ལྷག་པར་དུས་བཟང་དུ་ཚེ་ཐར་དང་སྲོག་བླུ་བྱས་ན། དགེ་རྩ་བརྒྱ་འགྱུར་སོགས་སུ་གསུངས་ནས། དུས་རྒྱུན་གྱི་འཚོ་བའི་ཁྲོད་སྲོག་ཆགས་གྲོག་སྦུར་ཚུན་ཆད་ལ་ཐུགས་བརྩེས་ཁྱབ་སྟེ། སྲོག་སྲུང་བ་དང་། སྐྱབས་འགྲོ་དང་མཚན་སྔགས་སོགས་རྣ་ལམ་དུ་བསྒྲགས་ནས། སྲོག་བླུ་ཚེ་ཐར་གྱི་སྲོལ་བཟང་དར་སྤེལ་བཏང་སྟེ། ཉམ་ཆུང་དུད་འགྲོ་རྣམས་བག་ཕེབས་སོས་དལ་དང་། འཚེ་མེད་བདེ་བ་ལ་འགོད་པའི་དགེ་སྲོལ་འདི་ཚུགས་པ་ཡིན་ནོ། །

 ༢ སྲོག་བླུའི་ཁུངས། སྔོན་རྒྱ་གར་དུ་མུ་སྟེགས་པའི་རྒྱལ་བོ་འཕྲི་ཅན་བྱ་བ་དེས། ཁ་ཟས་ཤ་ཁྲག་གི་ཆེད་དུ་སེམས་ཅན་ཁྲི་ཕྲག་བསད་པའི་རྣམ་སྨིན་གྱིས་རྡོ་རྗེ་དམྱལ་བར་སྐྱེས་ཏེ། སྡུག་བསྔལ་ཚད་མེད་མྱོང་བ་ཀུན་དགའ་བོས་སངས་རྒྱས་ལ་ཞུས་པས། བཅོམ་ལྡན་འདས་ཀྱིས་དེ་ཤ་ཁྲག་ལ་དགའ་ཞིང་སྲོག་བཅད་པའི་རྣམ་སྨིན་དུ་གསུངས་སོ། །དེ་ནས་ཀུན་དགའ་བོས་ཆོས་ཀྱི་རྒྱལ་བོ་གཤིན་རྗེ་ལ་དེ་ཐར་ཐབས་ཞུས་པས། ཆོས་རྒྱལ་གྱིས་འཇིག་རྟེན་གྱི་ཁམས་སུ་ཚེ་ཐར་བྱའོ་གསུངས་པ་ལྟར། ཀུན་དགའ་བོས་དེའི་དོན་དུ་ཚེ་ཐར་བྱས་པས། རྡོ་རྗེ་དམྱལ་བ་ལས་ཐར་བ་དེ་ཡིན་ནོ། །

༣ སྲོག་བླུ་ལག་ལེན་དུ་བསྟར་ཚུལ། སྲོག་བླུ་ནི། སེམས་ཅན་གང་ཞིག་ཤན་པ་སོགས་ཀྱིས་གསོད་དུ་ཉེ་བ་ན། རྒྱུ་ནོར་སྤྲད་ནས་སྲོག་ཉོ་བའམ། ཡང་ན། མི་འཇིགས་པའི་སྐྱབས་སྦྱིན་ཏེ་ཚེ་ཐར་དུ་བཅུག་པ་ལ་ཟེར། དེ་ཡང་། འབྲི་གཡག་ར་ལུག་དང་། ཉ་སྦྲུལ་སྦལ་ལྕོང་གི་ཚེ་སྲོག་བླུ་བ་སོགས་འདྲ་མིན་ཡོད། སྲོག་བླུ་བྱེད་པའི་དམིགས་ཡུལ་ཡང་། འགའ་ཞིག་བསྟན་འཛིན་གྱི་སྐྱེས་བུ་ཞབས་པད་བརྟན་ཆེད་དང་། ལ་ལས། བསད་པའི་ཚེ་ཐུང་། བརྡུང་བས་ནད་མང་། ཞེས་པར་དགོངས་ནས། ནད་མེད་ཚེ་རིང་ཡོང་ཆེད་དང། འགའ་ཞིག་བལ་རྩིད་བྲེག་པ་དང་འོ་ཞོ་འཐུང་བ། ཁལ་འགེལ་དང་ས་ཞིང་རྨོས་པ་སོགས་ཀྱི་དྲིན་བཟོའི་ཆེད་དང་། ཁ་ཅིག གཤིན་པོའི་དགེ་རྩར་དམིགས་ནས་བདེ་འགྲོ་འཐོབ་ཆེད་དང་། ཡང་། གསད་བྱ་དེ་མཐོང་པ་ན། སྙིང་བརྩེ་བས་སྲོག་བླུ་བྱེད་སྟངས་སོགས་ཡོད། གཞན་ཡང་། ཆོས་སྐྱོང་དང་གཞི་བདག་སོགས་ལ་མཆོད་པའི་ཚུལ་གྱིས་ཚེ་ཐར་གཏོང་བའང་ཡོད་དེ། དེ་ནི་ད་ལྟ་ལྷ་གཡག་དང་། ལྷ་རྟ། ལྷ་ལུག ལྷ་ར་ཞེས་པ་དེ་རྣམས་ཡིན། ཚེ་ཐར་གཏོང་ཚུལ་ཡང་། གཡག་ལུག་སོགས་ལ། རྣམ་འཇོམས་སོགས་ཀྱིས་བུམ་སྒྲུབ་བྱས་པའི་ཆུ་འམ། ཡང་ན། ཆུ་གཙང་ལ་གཟུངས་སྔགས་ཁྱད་པར་ཅན་གང་མང་བཟླས་ཏེ་ཁྲུས་ལེགས་པར་བྱས། རྣ་ཆ་དང་དཔུང་དར་སྣ་ཚོགས་བཏགས་ནས་རྭ་དང་རྨིག་པར་སྣུམ་བྱུགས། ཡང་། ཚེ་སྒྲུབ་འཆི་མེད་སྐུ་གསུམ་རིགས་འདུས་ལས། ཅི་འབྱོར་ཚེ་སྲོག་བླུས་པའི་དཔྲལ་བ་རུ། །ཉི་ཟླའི་རྟགས་གདབ་ཕྱིན་ཆད་སྲོག་མི་གཅོད། །སྲོག་མི་གཅོད་པའི་ཁས་བླངས་སྡོམ་པ་སྦྱིན། །ཞེས་ཚེ་ཉི་ཟླ་དང་མཉམ་པའི་རྟེན་འབྲེལ་དུ་དཔྲལ་བར་མར་གྱིས་ཉི་ཟླའི་གཟུགས་བྲི་བར་ཡང་བཤད་ལ། དེ་ནས་བསང་དུད་ཀྱིས་བདུག སྣ་ཐག་དཀར་བོ་བཏགས། ཀཾ་ཀ་ནི་དང་། དུ་རྒ་ཏེ། རྣམ་རྒྱལ་མ། སྤྱན་རས་གཟིགས་ཀྱི་གཟུངས་སོགས་བརྗོད་དེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ལ་ཕྱག་འཚལ་ལོ། །སེམས་ཅན་འདིའི་དུས་མ་ཡིན་པའི་འཆི་བ་འཇོམས་པར་མཛད་དུ་གསོལ། ཚེ་རྣམ་པར་འཕེལ་བར་མཛད་དུ་གསོལ། ལས་ཀྱི་སྒྲིབ་པའི་རྒྱུན་རྣམ་པར་བཅད་དུ་གསོལ། ཐར་བའི་ལམ་ལ་ཡང་དག་པར་བཞག་ཏུ་གསོལ། གསུངས་པ་བཞིན། མེ་ཏོག་འཐོར་བཞིན་འདི་སྐད་དོ། རྟ་མཆོག་ལ། སྐྱེ་མཆེད་ཡུལ་དབང་རབ་ཚང་ཞིང་། །རྫུ་འཕྲུལ་ཤུགས་ལྡན་རྟ་མཆོག﹙རྭ་ལུག་གཡག་ཞོལ་ཡིན་ན་ཆོ་ག་ལྟར་ཁ་བསྒྱུར་དགོས﹚འདི། །བླ་མ་ཡི་དམ་ཚེ་ལྷ་དང་། །﹙དམིགས་ཀྱིས་ཆོས་སྐྱོང་ལ་སྤྱན་གཟིགས་འབུལ་ཚེ﹚ ཁྱད་པར་མྱུར་མཛད་མགོན་པོ﹙གང་དབུལ་རྒྱུའི་ཆོས་སྐྱོང་དང་གཞི་བདག་ལ་ཁ་བསྒྱུར་དགོས﹚དང་། །ཆོས་སྐྱོང་ནོར་ལྷ་ཡུལ་ལྷའི་ཚོགས། །སྐྱེས་ལྷ་ཞང་ལྷ་འགོ་བའི་ལྷ། །དགྲ་ལྷ་ཆེན་པོའི་ཚོགས་རྣམས་ལ། །འབུལ་ལོ་བསྔོའོ་དགྱེས་པར་མཛོད། །ཕྭ་དང་གཡང་གི་རྟེན་དུ་མཛོད། །མགོན་སྐྱབས་དཔུང་གཉེན་རྟེན་དུ་མཛོད། །དགྲ་ལས་རྒྱལ་བའི་རྟེན་དུ་མཛོད། །ཐར་རོ་ཐར་རོ་རྟེན་འདི་དག། དུས་མིན་འཆི་བའི་ནད་ལས་ཐར། །ལས་ངན་སྡུག་པའི་འཕྲང་ལས་ཐར། །མི་ཁོམ་སྐྱོན་གྱི་གནས་ལས་ཐར། །རྒྱལ་ལོ་རྒྱལ་ལོ་ལྷ་རྒྱལ་ལོ། །ཞེས་བརྗོད་དེ་མེ་ཏོག་འཐོར། དེ་ནས་མིང་བྱང་བྱ་ཚུལ་ནི། ཤིང་བྱང་ཆུང་ངུ་ལ། རྟ་ཡིན་ན་དགྲ་འདུལ་རླུང་ཤུགས་དང་། ཞོལ་ཕོ་ལ་སྟོབས་འཕྲོག་བརྗིད་ཞོལ། ཞོལ་མོ་ལ་བདུད་རྩི་ཁུར་ལྡན། ལུག་ལ་གཡང་མོ་འཁྱིལ། རྭ་ལ་ཚེ་ཚེ་སོགས་བརྐོས་ནས་བཏགས་ཏེ། མཇུག་ཏུ་དགེ་རྩ་སེམས་ཅན་ཐམས་ཅད་ཚེ་རིང་ནད་མེད་དང་། ཡང་ན། རྩ་བའི་བླ་མ་ཞབས་པད་བརྟན་པ་སོགས། སྐབས་བབ་གང་ལ་དམིགས་པར་བསྔོས་ཏེ། སྨོན་གནས་མི་འཕྱུགས་པར་བྱའོ། །འདི་ནི་ཉུང་བསྡུས་ཙམ་སྟེ། རྒྱས་པར་སྲོག་བླུའི་ཆོ་ག་དག་ལས་ཤེས་པར་བྱའོ། །

༤ བྱེ་བྲག་གཡག་ཚེ་བླུ་གཏོང་སྟངས། གཡག་ཚེ་ཐར་གཏོང་བ་ལ། གཞིས་རྩེ་ས་ཁུལ་དིང་རི་རྫོང་ཕུ་དགོན་པའི་གཡག་ཚེ་བླུ་གཏོང་སྲོལ་གཞི་བཞག་སྟེང་བཤད་རྒྱུ་ཡིན་ལ། རྒྱུ་མཚན་ནི། ས་ཆ་དེ་ནི་ལྷ་གཡག་གི་ཕ་ས་ལྟ་བུ་ཡིན་ཞེས་བརྗོད་ཆོག་པར་སྙམ་སྟེ། གཞིས་རྩེ་བྲེ་གཤོངས་གྲོང་ཚོའི་ནང་དུ། བྱེ་མའི་གསེབ་ལས་རྙེད་པའི་གཡག་མགོ་ཞིག་ལ། རྭ་བར་གྱི་ཞེང་ཚད་ལི་སྨིད ༩༥ དང་མགོ་རུས་ཀྱི་རིང་ཚད་ལི་སྨིད་༢༩ ཅན་ཞིག་རྙེད་ཡོད་པ། ད་ལྟ་ས་དེ་གར་ཉར་ཚགས་གནང་ཡོད་པ་ལས་ཀྱང་རྟོགས་ཐུབ།

དིང་རི་རྫོང་ཕུ་དགོན་པའི་གཡག་ཚེ་ཐར་གཏོང་བའི་དུས་ཚིགས་ནི། ས་ག་ཟླ་བའི་ཚེ་བཅུ་བདུན་ལ་གཡག་བཤད་དང་བཅས་ཚེ་ཐར་གཏོང་བ་ཡིན། དེ་ཡང་ཐོག་མར་གཡག་མང་བོ་འདེམས་སྒྲིག་གནང་ནས། དེའི་ནང་ལྷ་གཡག་བདུན་འདེམས་པ་སྟེ། གདོང་སུག་དཀར་བ་ལ་ཁད་པ། སྤུ་མདོག་ནག་ཅིང་གདོང་ཁྲ་ཅན་ལ་ཁྲ་བོ་སྦལ་བ། རོག་པོ། སྔོ་དཀར། མགོ་རོག གདོང་བོ། ཁམ་པ་བཅས་སོ། །དེ་དག་ལས་ཆོས་སྐྱོང་བཞིའི་བསྐངས་རྫས་ལ། མགོན་པོ་ཞལ་བཞི་བར་གཡག་རོག་པོ། དུར་ཁྲོད་ལྷ་མོ་ལ་གཡག་ཁམ་པ། ཟུར་ར་ལ་གཡག་གདོང་བོ། བཀྲ་ཤིས་ཚེ་རིང་མར་གཡག་དཀར་བོ་གདམས་ཏེ། གཟུངས་སྔགས་ཀྱི་ནང་དོན་ལྟར་མདོག་མི་འདྲ་བའི་ཚེ་དར་བཏགས་ནས། གཡག་བཤད་བཞིན་ལྷ་གཡག་རྣམས་ཀྱི་ལུས་པོ་ལ་མཚལ་བྱུགས་པ་དང་། མར་རྒྱན་བསྐུས་ཏེ། དགྲ་ལྷ་གསོལ་བ་དང་། ལྷ་སོ་སོར་འཕྲིན་བཅོལ་གནང་ནས་བསང་གསོལ་ཁྲུས་འབུལ་དང་། གཡག་ལ་རྩམ་པ་དང་ཆང་སོགས་བླུད་དེ། ཀི་སྭོ་དང་བཅས་ཚེ་ཐར་དུ་གཏོང་བ་ཡིན་ནོ། །གཡག་བཤད་འདི་ནི། རོང་ཕུ་དགོན་པའི་བླ་མ་རྫ་སྤྲུལ་ངག་དབང་བསྟན་འཛིན་ནོར་བུས་དུས་རབས་བཅོ་ལྔ་བར་སྲོལ་གཏོད་ལ། གཡག་བཤད་འདི་ཡང་ལོ་རྒྱུས་ཀྱི་གོད་ཆག་དང་ཉག་ཕྲ་བའི་ལམ་འཕྲང་ཀྱག་ཀྱོག་བརྒྱུད་དེ། མར་མེ་གཅིག་ལས་གཉིས་ཆད་ཀྱི་དཔེ་བཞིན། ངག་ཐོག་ནས་ངག་ཐོག་བརྒྱུད་དེ། ད་གཟོད་གསོན་ཐུབ་པ་བྱུང་བས། དཀའ་ཚེགས་ལ་མ་འཛེམ་པར་འདིར་ཆ་ཚང་བཀོད་ན་འདི་ལྟར།

བསྭོ་བསྭོ་དེ་རིང་གནམ་ལ་སྐར་མ་བཟང་། །ས་ལ་ཉི་མ་དྲོ། དུས་ཚོད་ཀྱི་ཚེས་གྲངས་འཛོམས་པའི་སྐབས་འདིར། ཡེ་ཤེས་མགོན་པོའི་གཟུགས་པོ་རོག་པོ་འདི་ལ་རྒྱན་འབུལ་ལོ། །རྒྱན་བཞེས་སུ་གསོལ། བརྒྱ་ཁྱུ་ནས་བཙལ། སྟོང་ཁྱུ་ནས་བཀུག དེའང་མགོ་ལ་རྭ་ཚང་། གདོང་ལ་མིག་ཚང་། ཞལ་བ་སོ་ཚང་། རྒྱབ་ལ་སྤུ་ཚང་། མདུན་ལ་ཞོད་ཚང་། ཁུག་ཡེ། ཁུག་ཡེ། ཕྭ་རི་བོ་བཞིན་དུ་ཡོད་ལེ་ཁུག གཡང་རྒྱ་མཚོ་བཞིན་དུ་མེར་ལེ་ཁུག གྱི་ལིང་རྟ་རྣམས་ཀྱི་རྟ་ཁུག གཡང་དཀར་ལུག་རྣམས་ཀྱི་ལུག་ཁུག ཚེར་ཚེར་ར་རྣམས་ཀྱི་ར་ཁུག སེར་ལེ་འབྲི་རྣམས་ཀྱི་འབྲི་ཁུག རྒྱ་གར་ནས་གསེར་ཁུག ཁམས་ནས་དངུལ་ཁུག ལྷོ་ནས་འབྲུ་ཁུག བྱང་ནས་ཚྭ་ཁུག ཁུག་ཡེ། ཁུག་ཡེ། རྩི་ཤིང་རྒྱས་པ་བཞིན་དུ་ཕྭ་གཡང་ཁུག བརྡབ་བོ། བརྡབ་བོ། དཔལ་གྱི་དུང་རྭ་གཡས་པ། སྡང་བར་བྱེད་པའི་དགྲ གནོད་པར་བྱེད་པའི་བགེགས། མཐོ་ན་དགའ་བ་མི་བྱེད། དམའ་ན་དགའ་བར་མི་བྱེད། ཁ་འོ་མ་ལས་འཇམ་པ། སྙིང་ཚེར་མ་ལས་རྣོ་བ་རྣམས་བརྡབ་བོ། །ཁྱད་པར་དུ་རྦད་འདྲེ་རྦོད་གཏོང་། བྱད་ཁ། ཟེར་ཁ། ཕུར་ཁ་ཐམས་ཅད་བརྡབ་བོ། །དཔལ་གྱི་དུང་རྭ་གཡོན་པ་མི་བརྡབ་བོ། །གནག་གདང་གང་བ་མི་བརྡབ་བོ། །ལུག་ལྷས་གང་བ་མི་བརྡབ་བོ། །མི་ཡི་ཚེ་ལ་མི་བརྡབ་བོ། །ཟས་ཀྱི་བཅུད་ལ་མི་བརྡབ་བོ། །གོས་ཀྱི་གདང་ལ་མི་བརྡབ་བོ། །ཡུལ་མི་ཁྱིམ་མཚེས་དགའ་བ་མི་བརྡབ་བོ། །སྤྱིར་སངས་རྒྱས་ཀྱི་བསྟན་པ་མི་བརྡབ་བོ། །དཀོན་མཆོག་གི་དབུ་འཕང་ལ་མི་གདབ་བོ། །དགེ་འདུན་གྱི་སྡེ་ལ་མི་བརྡབ་བོ། །ལག་གཡས་གོང་མ་མི་ཡི་བང་མཛོད་ཡིན། བང་མཛོད་སྟེང་ནས་ཤ་ར་ར། བར་མ་ནོར་གྱི་བང་མཛོད་ཡིན། བང་མཛོད་སྟེང་ནས་ཤ་ར་ར། འོག་མ་ཕྱུགས་ཀྱི་བང་མཛོད་ཡིན། བང་མཛོད་སྟེང་ནས་ཤ་ར་ར། བང་མཛོད་གསུམ་གྱི་སྒོ་ནས་སྐྱོར་རོ། །མི་ཡི་ཚེ་ལ་སྐྱོབས་རོགས། ཟས་ཀྱི་བཅུད་ལ་སྐྱོབས་རོགས། གོས་ཀྱི་རྡང་ལ་སྐྱོབས་རོགས། གསེར་དངུལ་ཟངས་གསུམ་གྱི་སྒོ་ནས་སྐྱོབས་རོགས། གཡུ། བྱུ་རུ། མུ་ཏིག སྤོས་ཤེལ་གྱིས་སྐྱོབས་རོགས། གདོང་ལ་བརྟན་ནོ། །བཀྲ་ཤིས་ལ་བརྟན་ནོ། །དོན་འགྲུབ་པ་ལ་བརྟན་ནོ། །གཡང་ཆགས་པ་ལ་བརྟན་ནོ། །དུང་རྭ་གཡས་པ་ལ་བརྟན་ནོ། །སྡང་བའི་དགྲ་ཐུལ་བ་ལ་བརྟན་ནོ། །རྭ་དཀྱིལ་མི་ཆག་པ་ལ་བརྟན་ནོ། །རྭ་རྩེ་ལེགས་པ་ལ་བརྟན་ནོ། །བྱམས་པའི་གཉེན་སྐྱོང་བ་ལ་བརྟན་ནོ། །ཞལ་ལ་བརྟན་ནོ། །ཞལ་དྲོ་བ་ལ་བརྟན་ནོ། །ཤ་ལ་བརྟན་ནོ། །ཤ་དྲི་ཞིམ་པ་ལ་བརྟན་ནོ། །སྤྱན་ལ་བརྟན་ནོ། །སྤྱན་གྱི་དབང་བོ་གསལ་བ་ལ་བརྟན་ནོ། །སྙན་ལ་བརྟན་ནོ། །སྙན་གསལ་བ་ལ་བརྟན་ནོ། །ལྟག་ཚང་ལ་བརྟན་ནོ། །ལྟག་ཚང་ཕ་སྤུན་བཟང་བ་ལ་བརྟན་ནོ། །གཉའ་ལ་བརྟན་ནོ། །གཉའ་དགྲ་ལག་ཏུ་མི་ཤོར་བ་ལ་བརྟན་ནོ། །ཟེ་བ་ལ་བརྟན་ནོ། །ཟེ་བ་ལྷ་རྒྱལ་འཐེན་པ་ལ་བརྟན་ནོ། །རྒྱབ་ལ་བརྟན་ནོ། །རྒྱབ་རྒྱུད་ཆུ་ལས་རིང་བ་ལ་བརྟན་ནོ། །རྔ་ལ་བརྟན་ནོ། །སྔར་དང་གོང་དུ་འཕེལ་བ་ལ་བརྟན་ནོ། །ཚང་ལ་བརྟན་ནོ། །ཚང་ནས་ལུག་འཕེལ་བ་ལ་བརྟན་ནོ། །སོག་ལ་བརྟན་ནོ། །སོག་པ་ནོར་བསོགས་པ་ལ་བརྟན་ནོ། །དཔུང་བ་བརྟན་ནོ། །མི་ནོར་དཔུང་ཚོགས་ཐུབ་པ་ལ་བརྟན་ནོ། །ཐུགས་ཁ་ལ་བརྟན་ནོ། །ཐུགས་བདེ་བ་ལ་བརྟན་ནོ། །ལྟེ་བ་ལ་བརྟན་ནོ། །ལྟེ་བ་མི་འགྱུར་བ་ལ་བརྟན་ནོ། །མཚེ་རྟིང་ལ་བརྟན་ནོ། །ས་བདག་ཀླུ་གཉན། ལྷ་ཚོགས་རྣམས་ཀྱི་ས་གཞི་ས་འོག་འདུས་པར་བྱེད་པ་ལ་བརྟན་ནོ། །རྨིག་པ་ཁག་བཞིའི་འོག་ཏུ་དགྲ་བཞི་ཐུབ་པ་བརྟན་ནོ། །བརྒྱ་ཁྱུ་ནས་བཙལ། སྟོང་ཁྱུ་ནས་བཀུག ཚང་བ་ལྔ་དང་ལྡན་པའི་ཕྱུགས་གཟུངས་འདི། ཆིབས་ན་ཆིབས་ཁ་འདི་ལས་མགྱོགས་པ་མེད། བཞུགས་ན་བཞུགས་ཁ་འདི་ལས་བཙན་ས་མེད། མི་འཆི་བའི་དོན་ལ་གཟུངས་བཅོས། གཟུངས་འོག་ཏུ་མི་འཆི་རུ་མ་འཇུག་ཅིག མདའ་མ་ཆག་པའི་དོན་ལ་འབེན་བཙུགས། འབེན་འོག་ཏུ་མདའ་ཆག་ཏུ་མ་མཛོད་ཅིག སྤྱན་མིག་གཡས་པའི་འོག་ཏུ་སྡང་བའི་དགྲ་ཐུལ། སྤྱན་མིག་གཡོན་པའི་འོག་ཏུ་བྱམས་པའི་གཉེན་སྐྱོངས། རྒྱལ་བོའི་གདུང་རབས་གྲ་རྒྱས་པ་བཞིན་དུ་བསྭོ་བསྭོ། ཞེས་པ་ལྟར། གཡག་བཤད་འདིའི་ནང་དུ་ལྷ་གཡག་ཚེ་ཐར་དུ་གཏོང་བའི་སྣང་བརྙན་གསོན་པོ་ཞིག་བཞེངས་བསྐྲུན་བྱས་ཡོད་པས། སྲོག་བླུ་ཚེ་ཐར་ཇི་ལྟར་གཏོང་བར་ལེགས་ཆ་ལེན་རྒྱུ་མང་དུ་ཡོད་པར་མ་ཟད། དམ་པའི་ཆོས་དང་འབྲེལ་བའི་བརྗོད་བྱ་ཡང་འདུས་ཡོད་དོ། །

 ༥ སྲོག་བླུ་བྱས་པའི་ཕན་ཡོན། མི་སྒེར་གྱིས་བདག་ཏུ་བཟུང་བའི་དུད་འགྲོ་རྣམས་སྲོག་ཉེན་ལས་བསྐྱབས་ཏེ། བྱམས་པས་ཚེ་རིང་བ་དང་། བདག་ཏུ་མ་བཟུང་བའི་སྲོག་ཆགས་གསོད་ཉེ་ཚེ་སྲོག་ལས་བསྐྱབས་ཤིང། གང་བདེར་གཏོང་བའི་སྲོག་བླུ་ཞེས་པར་རང་ངམ་གཞན་སྐུལ་བ་དམ་པ་གོང་མ་རྣམས་ཕྱག་བཞེས་མཛད་གནང་ལྟར། དབང་ཡོད་ཚོས་རི་རྒྱ་དང་ལུང་རྒྱ། མཚོ་རྒྱ་སོགས་བསྡམས་ནས་ཁོར་ཡུག་སྲུང་བ། ཡང་ན། འཚེ་བ་ཆོས་སུ་སྨྲ་བའི་སྡིག་རྒྱུན་གཅོད་པ་སོགས་མི་འཇིགས་སྐྱབས་ཀྱི་སྦྱིན་པ་རྣམས་སེམས་ཅན་དོན་བྱེད་ཀྱི་ཚུལ་ཁྲིམས་ཡིན་ཏེ། མདོ་དྲན་པ་ཉེར་བཞག་ལས། ཚུལ་ཁྲིམས་ཀྱི་ནང་ན་མཐོ་རིས་སུ་སྐྱེས་པའི་མཆོག་ནི་འདི་ཡིན་ཏེ། སྲོག་སྦྱིན་པའི་ཚུལ་ཁྲིམས་སོ། །ཞེས་པ་ལྟར། སའི་སྙིང་བོ་འཁོར་ལོ་བཅུ་བའི་མདོ་ལས། གལ་ཏེ་སྲོག་གཅོད་ཡོངས་སྤངས་ན། །ཀུན་གྱིས་བཀུར་ཞིང་བླ་མར་བྱེད། །རྟག་ཏུ་ནད་མེད་ཚེ་ཡང་རིང་། །བདེ་ཞིང་སྐྱིད་ལ་གནོད་པ་མེད། །སྐྱེ་བའི་གནས་ནི་ཐམས་ཅད་དུ། །སངས་རྒྱས་སྤྱོད་ཡུལ་ལམ་ལ་མོས། །སངས་རྒྱས་ཆོས་དང་དགེ་འདུན་མཐོང་། །མྱུར་དུ་བླ་མེད་བྱང་ཆུབ་འཐོབ། །ཅེས་དང་།

ཡང་། སློབ་དཔོན་དབྱིག་གཉེན་གྱིས། གསོད་སར་ཁྲིད་པ་ལེགས་བཏང་ན། །དེ་བཞིན་སྲོག་གི་ཕན་བཏགས་ཤིང་། །སྲོག་ཆགས་འཚེ་བ་ཡོངས་སྤངས་པར། །ཚེ་རིང་བ་ནི་འཐོབ་པར་འགྱུར། །ཞེས་དང་། སློབ་དཔོན་ངག་གི་དབང་ཕྱུག་གྲགས་པས། བྱ་ཉ་རི་དྭགས་རྐུན་མ་དང་། །སྦྲུལ་སོགས་གསད་བྱའི་ཕྱོགས་གྱུར་རྣམས། །སྲོག་བསྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར། །ཞེས་པ་ལྟར། ཚེ་རིང་བར་མ་ཟད། བྱམས་དང་སྙིང་རྗེ། བྱང་ཆུབ་ཀྱི་སེམས་ངང་གིས་སྐྱེས་པ་དང་། སྲོག་ཆགས་ཐམས་ཅད་ཀྱི་གཉེན་དུ་བརྩི་བ། དཀར་ཕྱོགས་པ་དགའ་བ། ཚེ་རབས་ཀུན་ཏུ་སངས་རྒྱས་ཀྱི་བསྟན་པ་དང་འཇལ་ཏེ། མཐར་ཐུག་བླ་མེད་རྫོགས་བྱང་འཐོབ་པར་གསུངས་སོ། །གཞན་ཡང། ཤུག་ཆུང་མཁའ་འགྲོ་མ་འབའ་མོས། ཡང་དག་པའི་ཞིང་ཁམས་ལ་འགྲོ་བའི་མི་རྣམས་ནི། ལ་ལས་། ཚེ་ཐར་གྱིས་བསྐྱལ། ཞེས་དང་། ཚེ་ཐར་དང་སྲོག་བླུ་བྱས་པའི་ཕན་ཡོན་ནི། ཚེ་ཐར་དང་སྲོག་བླུ་རེ་རེས་སྤུ་ཉག་མ་རེ་རེ་ནས་ཚེ་ཐར་དང་། སྲོག་བླུས་སེམས་ཅན་གྲངས་མེད་པ་འཕྲོས་ཏེ། དེ་དག་རེ་རེས་སེམས་ཅན་གྲངས་མེད་པ་ཁུར་ནས། བྱའི་རྒྱལ་བོ་ངང་བ་ནམ་མཁའ་ལ་འཕུར་བ་བཞིན། ནམ་མཁའ་རྟེན་མེད་ཀྱི་དབྱིངས་སུ་ཐོགས་མེད་དུ་འཕུར་ཏེ། ཐར་ལམ་ལ་འགྲོའོ། །ཡང་། ཚེ་ཐར་བཏང་ན་ཚེ་བསྲིངས། ནད་ཉུང། འབྱོར་བ་རྒྱས། ངན་སོང་མེད། ཐར་ལམ་འཐོབ་པ་སོགས་ཕན་ཡོན་མཐའ་ཡས་སོ། །ཞེས་གསུངས་སོ། །

 

ལེའུ་བཅུ་བ། མདོས་གླུད་གཏོ་གསུམ་གྱི་སྐོར།
མདོས།

མདོས་ཀྱི་ཁུངས་ནི། སྲིད་མདོས་ལས། བཙན་རྗེ་ནི་ཅི་ལ་དགྱེས། ཟ་བ་ནི་ཤ་ལ་རྔམ། འཐུང་བ་ནི་ཁྲག་ལ་ཧབ། ལེན་པ་ནི་སྲོག་དབུགས་ལེན། སྡོངས་པ་ནི་བགེགས་དང་སྡོངས། འགྲོགས་པ་ནི་གཉན་དང་འགྲོགས། མགོན་པ་ནི་བཙན་བོན་མགོན། འཚེ་བ་ནི་གསས་ལ་འཚེ། ཞེས་པ་ལྟར། གདོད་མའི་བཙན་བོན་སོགས་ཀྱིས་དམར་མཆོད་བྱེད་པ་དེ་གཤིན་རབ་མི་བོ་ཆེས་ཐུགས་ལ་མ་བབས་པར། དཀར་མཆོད་དུ་བསྒྱུར་བ་ཡིན་ཏེ། སྲིད་པ་སྤྱི་མདོས་ལས། བདུད་བོན་གྱི་དམར་ཐབས་ལ། །གཤེན་རབ་ནི་ཅི་དགྱེས་ཏེ། །ཁྱབ་པ་ནི་ཆམ་ལ་ཕབ། །འབྲུ་དཀར་ནི་གཏོར་མས་མཆོད། །དམར་ཐབས་ནི་འདྲེས་བྱུང་ན། །གཤེན་རབ་ནི་ཅི་དགྱེས་ཏེ། །གདོན་འདྲེ་ནི་ཆམ་ལ་ཕབ། །འབྲུ་དཀར་གྱི་ཡུ་རིས་མཆོད། །ཤེ་ཚུ་ཡི་འདྲེས་བྱུང་ན། །གཤེན་ལྷ་ལ་ནོངས་པ་མཐོལ། །ཞེས་པ་ལྟར། གཤེན་རབ་མི་བོ་ཆེ་དམར་མཆོད་ལ་ཐུགས་མ་དགྱེས་པས་དཀར་མཆོད་དུ་བསྒྱུར་བར་བཤད་ཡོད་ལ། ཁྱད་པར་དུ། ཞང་བོད་ཏི་སེའི་འོད་ཅེས་པར། དེ་དག་གིས་དམར་མཆོད་བྱེད་སྲོལ་ཡོད་པ་ལ། གཤིན་རབ་མི་བོ་ཆེ་མ་དགྱེས་ནས། བདུད་བོན་དང་གདོན་བོན་རྣམས་ཆམ་ལ་ཕབ། དེ་དག་གི་སྤྱོད་ཚུལ་དུ་སེམས་ཅན་གྱི་རིགས་གང་ཞིག་བསད་ནས་ཤ་རུས་ཀྱི་མཆོད་པ་བྱེད་སྲོལ་ཡོད་པ་དེ་དག་གི་ཚབ་ཏུ། འབྲུ་དཀར་གྱི་གཏོར་མས་འཐུས་པར་བྱས་པ་དང་། ཤེ་ཚུ་སྟེ་ཁྲག་གི་སྐྱེམས་འབུལ་སྲོལ་ཡོད་པ་དེའི་ཚབ་ཏུ་ཡུ་ཏི་སྟེ་འབྲུ་ཆང་གིས་འཐུས་པར་བྱས་པའི་མདོས་ཆོག་གི་སྲོལ་གསར་དུ་བཏོད། ཅེས་གསུངས་པ་ལྟར་རོ། །

བོན་ཤེས་པ་ཅན་མི་བཅུ་གཉིས་ཀྱི་ནང་གསེས་ལྡིང་ཤེས་ཤྭ་བ་བྱ་བ་ཡང་། ཤྭ་བ་རུས་རྒྱས་ཀྱི་མདོས་ཆོག་ལ་མཁས་པ་ཞིག་སྟེ། དེ་ཡང་། ས་ཡི་སྙིང་བོ་ལ་རིན་ཆེན་བདར་ཏེ། ཤྭ་བའི་གཟུགས་བརྙན་བཟོས། གཞོགས་གཡས་སྟོད་དུ་དཀར་བོ། སྨད་དམར་བོ། གཞོགས་གཡོན་སྟོད་དུ་སྔོན་པོ། སྨད་སེར་བོ། མཇུག་མ་ནག་པོ། འཕོངས་དཀར་བོ། སྒབ་སེར་བོའི་ཚོན་གྱིས་བསྒྱུར། རྭ་གཡས་པ་ཕོ་ཤིང་། གཡོན་པ་མོ་ཤིང་། བྱ་ངན་སྣ་ཚོགས་ཀྱིས་སྒྲོ་སྤུ་བཙུགས། སྐུད་པ་ནག་པོའི་རྒྱུད་ཁ་དར་ལ་བཏགས་པའི་རྟེན་ཞིག་བཟོ་དགོས་ལ། བོན་གཤིན་རྣམས་ཀྱིས་སྒྲུབ་རྟགས་ཐོན་ཚེ། ཤྭ་བ་དེ་མདོས་གཞིའི་སྟེང་དུ་ལྡིང་ཐུབ་པའི་ནུས་མཐུ་ཡོད་པས་ལྡིང་ཤེས་ཤྭ་བ་ཟེར་རོ། །

བོད་ཀྱི་ལོ་རྒྱུས་འགར། རྒྱལ་བོ་པུ་དེ་གུང་རྒྱལ་གྱི་དུས་སུ་འབྲས་བུའི་བོན་རིགས་ལྔ་དང་རྒྱུའི་བོན་རིགས་བཞི་དར་བའི་ནང་ནས། འཕྲུལ་གཤེན་བལ་ཚོན་ཅན་གྱིས་མི་ཕྱུགས་ཀྱི་སྲོག་ཚབ་ཏུ་བལ་སྐུད་ལྔ་ལས་སླེས་པའི་ཁང་བཟང་གི་ནང་དུ་བག་ཟན་ལས་བཟོས་པའི་གླུད་ལ་ཆས་གོས་གཡོགས་ཏེ། གདོན་བགེགས་ཀྱི་གནོད་པ་སེལ་ཐབས་སུ་སྲོལ་གཏོད་པར་བཤད་ཀྱང་། དེ་ནི་ཆོ་གའི་རྣམ་པ་ཇེ་རྒྱས་སུ་བཏང་བ་ལས་སྲོལ་ཕྱེས་པར་མི་སེམས་སོ། །ཕྱིས་སུ་རྣམ་པ་སོར་བཞག་གིས་ནང་དོན་གྱི་ཆ་ལ་སོ་སོའི་ཆོས་ལུགས་དང་མཐུན་པར་མདོས་ཆོག་བྱེད་སྲོལ་དར་བ་ཡིན་ནོ། །

རྣམ་པ་གཞན་དུ་ན། འགའ་ཞིག་རྟོག་གེའི་རིགས་པས་མདོས་ཀྱི་རྣམ་བཞག་ཅི་ཡང་མེད་པར་བརྒྱ་བཞི་དང་། ཁ་འབར་མའི་ཆོ་ག་སོགས་ལ་དཔེ་བླངས་པའི་རང་བཟོའི་ཆོག་བསྒྲིགས་བྱས་པས་སྙིང་བོ་ཅི་ཡང་མེད་པར་འདོད་ལ། ནང་བ་ཁ་ཅིག་མདོས་ཀྱི་མ་ཁུངས་སྟོན་པའི་མདོས་ཆེན་རྣམ་བཞི﹙ཤེར་སྙིང་བདུད་བཟློག བརྒྱ་བཞི། འབར་མ སྒྲོལ་མའི་གཡུལ་བཟློག་བཞིའོ། །﹚ལས་དར་སྤེལ་བྱུང་བར་ཡང་འདོད་ལ།

ཤེར་སྙིང་བདུད་བཟློག་ལྟ་བུར་མཚོན་ནའང་། སྟོན་པ་སངས་རྒྱས་ནས་བརྒྱུད་དེ། རྒྱ་གར་མཁས་གྲུབ་རྣམས་ཀྱི་ཐུགས་བཅུད། དཔལ་ལྡན་ཨ་ཏི་ཤའི་ཡི་དམ། ཁྱད་པར་དུ་གྱི་ལྗང་ལོ་ཙཱ་བའི་ཕྱག་ལེན་མཛད་པ་ཡིན། དེ་ཡང་། ཀུ་ལོར་ཞེས་པས་གཤིན་རྗེ་དམར་ནག་དང་མུན་པ་དམར་ནག་སོགས་ཀྱིས་མངོན་སྤྱོད་གནང་སྟེ་སེམས་ཅན་མང་བོ་མཐུས་སྒྲོལ་བ། ཀྱི་ལྗང་དབུ་དཀར་བས་མ་བཟོད་པར་ཉིན་གཅིག་ཀུ་ལོར་སྐྱེམས་དྲངས། གོས་སྐོན་ཏེ། ཁྱེད་ལ་མཐུ་མྱུར་བོ་ཞིག་བདོག་ཀྱང་། ཕྱི་མར་རྣམ་སྨིན་ལྕི་ཚུལ་སོགས་ཞུས་པས། ཀུ་ལོར་ཁྲོས་ཏེ། ཁྱེད་ཞག་བདུན་ཕན་དུ་མི་བཞག་ཅེས་མནའ་བོར་ཏེ་སོང་། དེ་ནས་དབུ་དཀར་བས་མདོས་འདི་བསྒྲུབས་པས། ཞག་བདུན་ན་ཀུ་ལོར་རང་ཐུ་རང་ལ་ཕོག་སྟེ་གྲོངས་པ་དང་། ཡང་། རྒྱ་ནག་གི་ཕ་འཚོ་བྱ་བ་ཞིག་ལ་རྒྱལ་བོས་གནོད་པས། རྩིས་མཁན་གྱི་ངག་བཀོད་བཞིན་བུ་ཆུང་གི་རོ་ལ་གཏོ་བྱས་ནས་ཇ་སིག་ཅིག་གི་ནང་བཅུག་ནས་དབུས་སུ་སྤྱུགས། ཇ་སིག་དེ་འཕན་ཡུལ་དུ་དགེ་སེར་གྱིས་ཉོས་པ་ལ། རྒྱལ་བོས་དགེ་སེར་ལ་གནོད་ནས་རྟ་བོང་ཐམས་ཅད་མེད་པར་བྱས་པར་མ་ཟད། རྒྱལ་བོ་དངོས་སུ་སྣང་རྒྱུ་ཡོད་པ་ཞིག་ཏུ་གྱུར། དགེ་སེར་གྱིས་ཁྱེད་ཅི་ལ་འཇིགས་ཞེས་དྲིས་པས། ང་ཀྱི་ལྗང་དབུ་དཀར་བར་འཇིགས་ཟེར། དགེ་སེར་གྱིས་དེ་ཡོད་སའི་ལམ་རྒྱུས་སོགས་ང་ལ་ཤོད་དང་དབུ་དཀར་བ་གསད་དེ་ཁྱེད་ལ་འཇིགས་པ་མེད་པ་བྱ་ཞེས་བསླུས་ནས། སྒྲུབ་ཐབས་དང་གདམས་པ་བླངས་ཏེ་བདུད་བཟློག་འདིས་རྒྱལ་བོ་བསྐྲད་ཚུལ་དང་། གནོད་པ་བཟློག་ཚུལ་སོགས་ཡོན་ཏན་རྒྱ་མཚོ་མཐའ་ཡས་སྡེའི་ཤེར་སྙིང་བདུད་བཟློག་སོགས་ན་བཤད་ཡོད་པ་དང་།

བཅས་ཐབས་ལ། གཞི་མ་དཀར་བོའི་དབུས་སུ་ཐུབ་དབང་གི་སྐུ་བྲིས་འབུར་གང་རུང་བཞུགས་སུ་གསོལ། མདུན་དུ་ཉེར་སྤྱོད་བཤམས། གཞི་དེའི་ཤར་དུ་ལྷའི་བདུད་མི་དཀར་རྟ་དཀར་ཅན། གཡས་མེ་ཏོག་དང་གཡོན་ཞགས་པ་བཟུང་བ་བདུན། ཁལ་མ། ཁྱི། ཆངས་བུ། ཤ་ཏིག མཐེབ་ཀྱུ་སོགས་ཀྱང་བདུན་རེ། དེ་བཞིན། ལྷོར་ཉོན་མོངས་པའི་བདུད་མི་སེར་རྟ་སེར་ཅན། གཡས་རལ་གྲི་དང་གཡོན་ཞགས་པ་འཛིན་པ་བདུན། ནུབ་ཏུ་ཕུང་བོའི་བདུད་མི་དམར་རྟ་དམར་ཅན། གཡས་མདུང་དང་གཡོན་ཞགས་པ་འཛིན་པ་བདུན། བྱང་དུ་འཆི་བདག་གི་བདུད་མི་ནག་རྟ་ནག་ཅན། གཡས་ཁྲམ་ཤིང་དང་གཡོན་ཞགས་པ་འཛིན་པ་བདུན་བཀོད་དོ། །གཞན་ཁལ་མ་སོགས་གོང་དང་འདྲ་ལ། དེ་རྣམས་མལ་གཞི་ནག་པོ་བཏང་ལ་དར་བཞག ཡང་སྣོད་སོ་སོར་ཞལ་ཟས་གཅིག གཏོར་མ་མེ་ཏོག་དབྱིབས་ཅན་དམར་བོ་གཅིག དཀར་གཏོར་གཅིག དམར་གཏོར་གཅིག་དང་བཞི་བཤམས། ངར་མི་རྒྱན་ཅན་ཞིག་ཁ་ཕར་ལ་བསྟན། ཐུབ་དབང་གི་སྐུ་སོགས་ཞལ་རང་ལ་སྟོན་དགོས་ལ། །སྒྲུབ་ཐབས་སོགས་ཆོ་ག་ན་གསལ་ལོ། །

མདོས་རྫས་བསྐྱལ་ཕྱོགས་ཀྱང་། ནད་པའི་ཆེད་ཡིན་ན་དུར་ཆེན་ནམ་རི་ཐོག མཐུ་བྱེད་ན་དགྲ་ཕྱོགས། སྤར་ཁ་བཅོས་པ་ཡིན་ན་གཞི། གཤེད་དང་བདུན་ཟུར་དགྲ་ཐོག་གམ་གནོད་ཕྱོགས། རིམས་ནད་བཟློག་ན་ལམ་མདོ། རྒྱལ་བོའི་གནོད་པ་ཡིན་ན། ལྷ་ཁང་ངམ་མཆོད་རྟེན་རྩར། འདྲེས་གནོད་ན་གྲོང་མདོ་འམ་ལུང་གསུམ་མདོ། ཆར་འབོད་དམ་ཀླུས་གནོད་ན་ཆུ་མིག་དང་། མདོར་ན་གང་དང་གང་གིས་གནོད་ན་དེ་དང་དེར་བསྐྱལ་དགོས་སོ། །

བརྒྱ་བཞིའི་ཆོ་ག་འདི་ཡང་། སྟོན་པ་སངས་རྒྱས་ནས་བརྒྱུད་པར་བཤད་དེ། འགྱུར་མེད་རྡོ་རྗེའི་བརྒྱ་བཞིའི་ཆོ་ག་འདོད་དོན་ལྷུན་གྲུབ་ལས། སྔོན་ལྷའི་དབང་བོ་བརྒྱ་བྱིན་བསྙུན་གྱིས་ཟིན་པ་ན། སྟོན་པ་བཅོམ་ལྡན་འདས་ལ་གསོལ་བ་བཏབ་པས་བཅོམ་ལྡན་འདས་ཀྱིས་བདུད་བཞིས་ཟིན་པར་མཁྱེན་ནས། བརྒྱ་བཞི་ཆོ་ག་འདི་མཛད་པས། བརྒྱ་བྱིན་བསྙུན་ལས་ཐར་ནས་བདེ་བ་ལ་བཀོད། དེ་ལྟར་ཕན་ཡོན་ཆེན་པོ་དང་ལྡན་པའི་ཆོ་གའི་རྫས་ལས་བརྒྱ་བཞི་མཚན་དུ་གྲགས་པ་དེ་ཉིད། འཕགས་པ་ཀླུ་སྒྲུབ་ཀྱི་ཕྱག་ཏུ་བབས་པས། རྡོ་རྗེ་གདན་གྱི་ཀ་གདན་སྤྲེའུ་འདྲ་བ་ལ་གཏེར་དུ་སྦས་པ་པཎྚིཏ་ལྔ་བརྒྱས་བཏོན་ནས་གནུབས་སངས་རྒྱས་ཡེ་ཤེས་རིན་པོ་ཆེ་ལ་བསྩལ། དེས་བོད་དུ་བསྣམས་ནས་གཞན་ཕན་འཕྲིན་ལས་རྒྱ་ཆེན་པོ་མཛད་པའོ། །ཆོ་ག་དེ་ལའང་། མདོ་ལུགས་དང་སྔགས་ལུགས་ཞེས་ཐ་དད་དུ་ཡོད་པ་ལས། འདི་ཉིད་མདོ་ལྟར་དུ་གྲགས་པའི་ལུགས་སོ། །གཞན་སྔགས་ལུགས་གཤིན་རྗེ་ནག་པོའི་རྒྱུད་ལས་བཏུས་པ། རྡོ་རྗེ་གདན་ནས་བཏོན་ཏེ་ཨོ་རྒྱན་ཆེན་པོ་སོགས་བརྒྱུད་པར་གྲགས་པའི་ཡི་གེ་ཟུར་བའི་བླ་མ་གོང་མ་རྣམས་ཀྱིས་ཕྱག་ལེན་དུ་མཛད་པ་ཞིག་སྣང་བ་ནི། ཡི་གེ་རྙིང་བ་ན་གསལ་བར་འདུག་པ་ལས་ཤེས་སོ། །བརྒྱ་བཞི་ཉམས་སུ་བླངས་པའི་ཐབས་ལ། ས་ཕྱོགས་གཙང་མར་མཎྜལ་པདྨ་འདབ་བརྒྱད་ཀྱི་ལྟེ་བར་མཆོད་སྦྱིན་གྱི་ཕྱག་གཡས་འབྲི། དེ་ཡང་མཆོད་རྟེན་ལྟར་བྱེད་ན། ཕྱོགས་བཞིར་ས་ཙྪ་ཉེར་ལྔ་བང་རིམ་སོགས་ལ་བཀོད། དབུས་སུ་མཉྫུའི་སྟེང་དུ་ཐུབ་དབང་གི་སྐུ། སྦྱིན་བདག་གི་གླུད་ཆེ་བ་མཉྫུའི་འོག་ཏུ་ཆུང་ཙམ་གཅིག་ལ་གོས་རས་གླུད་དང་རྫས་དང་ཁྲམ་ཤིང་གཟུགས། མཆོད་པ་རྣམ་ལྔ་དང་གཏོར་ཚོགས། འབྲིང་རྒྱས། རིན་ཆེན་ཕྱེ་མ་སོགས་བཤམས། ཕུང་བོའི་བདུད་སེལ་བ་ལ་སྐུ་གདུང་གི་མཆོད་རྟེན་བརྒྱ། ཉོན་མོངས་པའི་བདུད་སེལ་བ་ལ་མར་མེ་བརྒྱ། ལྷའི་བུའི་བདུད་སེལ་བ་ལ་ལྷ་བཤོས་བརྒྱ། འཆི་བདག་གི་བདུད་སེལ་བ་ལ་ངར་གླུད་བརྒྱ། མར་མེ་བརྒྱ་ནི། མཐོང་ལམ་རྙེད་པ་ལ་བརྟེན་ནས་བྱམས་པའི་སྦྱིན་པ། ས་ཙྪ་བརྒྱ་ནི། ཚོགས་ལམ་རྙེད་པ་ལ་བརྟེན་ནས་སྐྱབས་སྦྱིན་པ། གཏོར་མ་བརྒྱ་ནི། སྦྱོར་ལམ་རྙེད་པ་ལ་བརྟེན་ནས་ཟང་ཟིང་གི་སྦྱིན་པ། ངར་གླུད་བརྒྱ་ནི། སྒོམ་ལམ་རྙེད་པ་ལ་བརྟེན་ནས་སྲོག་གི་ལན་ཆགས་སྦྱོང་བས་ཆོས་ཀྱི་སྦྱིན་པའོ། །

དེ་ལྟ་བུའི་ཆོ་ག་འདི་ཡར་གྱི་ལྷ་རྒན་མཆོད་ཅིང། མར་གྱི་འདྲེ་སྲི་བཀར་བ། བར་གྱི་ཁྱིམ་ཐབ་འདོན་པ་གནད་དུ་བཟུང་བ་ལས་གཞན། དགེ་འདུན་གྱི་མདོ་སྒྲུབ་པ། འཕྲིན་ལས་རྣམ་བཞི་སྒྲུབ་པ། སྐྱེ་བོའི་ཡམ་ག་དར་བ་དང་། རྦོད་གཏོང་གནོད་པ། མི་ཁ་བྱ་བ། བན་བོན་གྱི་ཕུར་ཁ་ཟུག་པ་དང་། གཏད་ཆུད་པ་དང་། དགྲ་རྐུན་མང་བ་དང་། སྐྱེ་བོའི་ཡ་ག་ངན་པ་དང་། མིའི་ཤི་ཁ་བྱེད་པ་དང་། ཕྱུགས་ནད་གོད་ཁ་བྱུང་བ། ཡུལ་དུ་ནད་རིགས་དར་བ་དང་། ཁྱད་པར་རྒྱལ་འགོང་དང་ཡི་དྭགས་ཞུགས་པ་དང་། གཟའ་སྐར་ངན་པ་ལ་ཤི་བ་དང་། ལུས་སྲོག་དབང་ཐང་རྒུད་པ་དང་། རླུང་རྟ་ལ་དགྲ་དར་བ་དང་། ཀེག་ཆགས་ཆེ་བ། སྲིའུ་དང་ནད་པ་ཅིས་ཀྱང་མ་གསོས་པ་སོགས། མདོར་ན་མི་མཐུན་པའི་འགལ་རྐྱེན་སེལ་བ་སོགས་ཕན་ཡོན་བསམ་གྱིས་མི་ཁྱབ་པ་དང་ལྡན་པ་ཡིན་ནོ། །ཞེས་གསུངས་ལ།

གང་ལྟར་བན་བོན་གཉིས་འདྲེས་ཀྱི་མདོས་ཆོག་འདིའི་རིགས་ཆུ་ལ་ཆུ་བཞག་གི་ཚུལ་དུ་སིམ་ཡོད་ལ། རྙིང་མ་བར་མཚོན་ནའང་། སློབ་དཔོན་གྱིས་ཆོས་རྒྱལ་ཁྲི་སྲོང་ལྡེ་བཙན་ལ་གནང་སྟེ་འབུམ་ཐང་དུ་གཏེར་དུ་སྦས་པ་གཏེར་སྟོན་རྒྱལ་མཚན་པས་བཏོན་པའི་མདོས་ཆོག་འཕྲུལ་མིག་གསུམ་པ་སོགས་མདོ་ཁམས་ཕྱོགས་སུ་དར་རྒྱས་ཆེ་ཞིང། མདོས་མང་བོ་ཞིག་གཏེར་ཆོས་སུ་སོང་གཤིས་དཀྲུགས་སྡེབ་ཏུ་གྱུར་བ་དང་། གྲོང་སྔགས་བླུན་པོ་འགའ་ཞིག་གིས་རང་བཟོ་བསྡེབས་པ་དང་། ཡིག་རྒྱུན་མ་དག་པ། ཆད་ལྷག་དང་སླད་སྐྱོན་བྱུང་བ་སོགས་ཀྱང་མང་དུ་སྣང་ངོ་། །

ཁ་འབར་མ་ཡང་། སྤྱིར་ན་ཁ་འབར་མ་འདི། དཔལ་ལྡན་ལྷ་མོའི་རྒྱུད་རྣམས་ལས། ནག་མོ་ཆེན་མོ་ཁ་འབར་མ། །ཞེས་ངོ་བོ་དཔལ་ལྡན་ལྷ་མོ་དང་དབྱེར་མེད་པར་བཤད་ཀྱང་། རྣམ་པ་ཡི་དྭགས་ཀྱི་ཚུལ་བཟུང་ནས་བགེགས་རིགས་ཐམས་ཅད་ལ་དབང་བསྒྱུར་བའི་རྒྱལ་མོ་རྡོ་རྗེ་གདན་གྱི་ཆོས་སྐྱོང་དྲག་རྩལ་ཅན་ཡིན་པས། སྟོན་པའི་ཞལ་ནས། ང་ལ་སྟོན་པར་ཁས་ལེན་ན། འཕྲོག་མ་བུ་ལ་ཆངས་བུ་བྱིན། ཞེས་གསུངས་པ་ལྟར། ཁ་འབར་མར་གཏོར་མ་བཏང་ནས་ཚོགས་བསགས་པ་དང་། འཆི་བ་ཟློག་པ། བྱད་དང་དགྲ་ཟློག་པ། ལན་ཆགས་སྦྱོང་བ་སོགས་ཡོད་ལ། བཅའ་ཐབས་ཡང་། ལྕགས་གཟེར་མེད་པའི་གཞོང་བའི་ནང་དུ། ཁྲོ་ཞལ་ཁ་གདངས་པ། ཁ་སྣ་གཉིས་ལས་དུ་བ་འཐུལ་བ། ནུ་མ་རྐྱལ་བ་འདྲ་བ། ལྟོ་བ་ཆེ་ཞིང་གཉེར་མའི་གང་བ། རྐང་ལག་ཕྲ་ཞིང་མོ་མཚན་རྒྱས་པ། སོ་གཅིག་པ། ལག་གཡས་ཀྱིས་ཆངས་བུ་ལེན་པ། གཡོན་དུ་མར་མེ་ཐོགས་པ། རྐང་བ་ཕྱེད་སྐྱིལ་དང་། དེའི་མདུན་དུ་ཡོན་བདག་གི་གཟུགས་གླུད་དང་བཅས་པ། ཕྲག་གཡས་སུ་ཡོན་བདག་གི་ལོ་གྲངས་རི་མོ་བྲིས་ལ་གཟུགས། དྲི་གླུད་ཀྱིས་བསྐོར་བ། རྒྱབ་ཏུ་ས་གཞོང་གཙང་མ་ལ་ཆངས་བུ་དང་འབྲས་ཆན་ཆུ་དཀར་གྱིས་གང་བ་བཤམས་པ་སོགས་ཁ་འབར་མའི་གཏོར་མ་གཏོང་ཚུལ་རྒྱས་པར། ཀརྨ་ཆགས་མེད་ཀྱི་ཁ་འབར་མའི་ཟིན་བྲིས་སོགས་ལས་ཤེས་པར་བྱའོ། །དེ་ལས་གཞན། ཁ་འབར་མའི་གཏོར་མ་གཏོང་ཚུལ་དང་བཅའ་ཐབས་སོགས་མང་དུ་ཡོད་དེ། སྔོན་དབུས་གཙང་དུ་ཁ་འབར་མའི་དཔེ་རིགས་མི་འདྲ་བ་བསྡུ་སྒྲིག་བྱས་པ་སྒྲོམ་གང་ཡོད་པའི་ལོ་རྒྱུས་ཡང་འདུག་གོ །

སྒྲོལ་མའི་གཡུལ་བཟློག་ཡང་། རྒྱལ་བས་ལུང་བསྟན་ཅིང་སྒྲོལ་མའི་རྒྱུད་ལ་བརྟེན་ནས་གྲུབ་པ་འཐོབ་པ་ཀླུ་སྒྲུབ་ཀྱིས་མཛད་ནས། སྐལ་ལྡན་རྣམས་ལ་གནང་བ་བརྒྱུད་དེ་ཨ་ཏི་ཤས་བོད་དུ་བསྣམས་ནས་ཕེབས། ཇོ་བོ་མྱ་ངན་ལས་འདའ་ཁར་ན་བཟའི་གསེབ་ལས་བཏོན་ཏེ་འབྲོམ་སྟོན་ལ་གནང་ནས་དར་སྤེལ་བྱུང་བ་ཡིན།

དེ་ཡང་། སྔོན་རྒྱ་གར་ཤར་ཕྱོགས་ཀྱི་རྒྱལ་བོ་ཞིག་གིས། མུ་སྟེགས་སྐད་ཆེན་གྱི་བུ་བསད་པས། མུ་སྟེགས་པས་རྒྱལ་བོ་འཁོར་བཅས་ཀླུ་ལ་གཏད། སང་ནུབ་ཕོ་བྲང་དུ་ཀླུ་སྦྲུལ་ཆེན་པོ་ཧ་ཧ་ཟེར་བ་བྱུང་བས། རྒྱལ་འབངས་འཁོར་བཅས་བརྒྱལ་ཞིང་འཆི་ལ་ཐུག་པའི་ཚེ། པཎྚིཏ་ཞིག་གིས་མདོས་ཆོག་འདི་བསྒྲུབས་པས། མུ་སྟེགས་པའི་སྤྱི་བོ་མཆུས་གཞིབ་སྟེ་ཤི་བ་དང་། ཡང་། ཟ་ཧོར་གྱི་རྒྱལ་བོ་ཞིག་གིས་སྡེ་བརྒྱད་དྲག་ཤུལ་ཅན་ཐམས་ཅད་ཁྱད་དུ་གསད། མི་དགེ་བའི་སྤྱོད་པ་སྣ་ཚོགས་བྱས་པས། ལྷ་འདྲེ་ཐམས་ཅད་ཁྲོས་ཏེ། ཐབས་གང་གིས་ཀྱང་མ་ཕན་པས། མདོས་ཆོག་འདི་བྱས་པས་མི་ནོར་སོགས་རྒྱས་པའི་ལོ་རྒྱུས་ཀྱང་ཡོད།

བཅས་ཐབས་ཀྱང་། གནས་ཁང་གི་གོང་དུ་པད་འདབ་ཀྱི་སྟེང་སྒྲོལ་མའི་སྐུ་བྱིན་ཅན་བཞུགས་སུ་གསོལ། ཉེར་སྤྱོད་འདོད་ཡོན་དང་བཅས་པའི་མཆོད་པ་གང་བཟང་དང་གཏོར་མ་གསུམ་བཤམས། སྒྲོལ་མའི་དབུ་ལ་དར་དཀར་གྱི་གུར་ཕིབ། རིན་ཆེན་བརྡར་བའི་འཇིམ་པ་ལ་སྤེའུ་ལྕགས་རི་དང་བཅས་པ་ཇི་ལྟར་འཚམ་པའི་ནང་། ངར་མི་མཐོ་གང་བ་གསེར་གཡུས་བརྒྱན་པ་རྟ་ལ་བསྐྱོན། གཡོན་དུ་ནམ་མཁའ་དང་རྒྱངས་བུ་གསུམ་གསུམ། ཕོ་གདོང་མོ་གདོང་། མདའ་ཁྲ་འཕང་ཁྲ་དང་བཅས་པའང་གསུམ་གསུམ་ལས་མི་ཉུང་བ་གཟུགས། རིན་ཆེན་བརྡར་བའི་ཟན་ལ་ངར་མི་སུམ་ཅུ། མཛོ་རྟ་གཡག་ལུག་རི་དྭགས་སོགས། ས་ལ་འཛུལ་དགུ། གནམ་ལ་འཕུར་དགུ བར་ལ་འགྲིམ་དགུའོ། །ས་ལ་འཛུལ་དགུ་ནི། ༡ ཤེས་བྱ་ཀུན་མཁས་སྐྱེ་འགྲོ་མི། ༢ ཤུགས་ཆེན་བཀྲ་ཤིས་རྫས་གྱུར་དུང་དཀར། ༣ དུས་འཁོར་ཆགས་ཚུལ་ལྡན་པའི་རུས་སྦལ། ༤ རྐང་ལག་ནང་སྦས་འགྲོ་ཤེས་སྦྲུལ་ནག ༥ དགུན་དུ་ཉལ་ཆོག་སྒོམ་ལྡན་འཕྱི་བ། ༦ མི་གཙང་གྲིབ་སེལ་ཚངས་ལྡན་གྲིམ་པ། ༧ རིག་རྣོ་གཞན་སེལ་ཤེས་པའི་སྲེ་མོང་། ༨ ཀུན་ཤེས་ཚོད་ལ་མཁས་པའི་ཅོ་ག ༩ ལུས་རྐེད་ཕྲ་ཡང་རྩལ་ཆེན་གྲོག་མའོ། །གནམ་ལ་འཕུར་དགུ ༡ ཀུན་ཟིལ་ནོན་པའི་བྱ་རྒྱལ་ཁྱུང་ཆེན། ༢ དབྱར་དགུན་མཚམས་འབྱེད་སྒྲ་བརྒྱའི་གཡུ་འབྲུག ༣ འཕུར་རྩལ་ནམ་འཕང་གཅོད་པའི་རྒོད་པོ། ༤ སྐད་སྙན་དུས་ཀྱི་ཚོད་འཛིན་ཁུ་བྱུག ༥ དུག་འཇོམས་སྒྲོ་མཛེས་རྨ་བྱ། ༦ དྲན་གསལ་མི་སྐད་སྨྲ་བའི་ནེ་ཙོ། ༧ ཉིན་ཞག་དུས་ཤེས་ཁྱིམ་བྱ། ༨ ལྷ་མིའི་འཕྲིན་སྐྱེལ་ལྕེ་བདེ་ཕ་ཝང་། ༩ ཐོགས་མེད་འཕུར་ཤེས་རྫི་བྱའོ། །དེ་ལས་གཞན། གཟུགས་དང་། འབྲུ་སྣ། ཟས་སྣ། རིན་པོ་ཆེ། ཇ་གོས་སོགས་ལྕགས་རིའི་ནང་བཀང་བར་བྱས། ལ་དགུ་ལུང་དགུའི་ས་སྣ་ཆུ་སྣ། ངར་མིའི་སྟེང་དུའང་དར་དཀར་གྱི་གུར་དང་། མདའ་དར་གཟུགས་སོ། །

ད་ལྟའི་མདོས་ཀྱི་རྣམ་པ་མང་ཆེ་ཤོས་ནི། དར་སྐུད་ཚོས་གཞི་སྣ་ཚོགས་ཀྱིས་ལྷས་བཏགས་བྱས་པའི་ཁང་བཟང་གི་ནང་དུ། རྒྱལ་གཟུགས་དང་མི་ཕྱུགས་ནད་པ་སོགས་ཀྱི་གཟུགས་བརྙན་དང་། མཐའ་བསྐོར་དུ་ཤིང་བྱང་སྣ་ཚོགས་ཀྱི་ངོས་སུ། གནམ་ལ་འཕུར་དགུ། ས་ལ་འཛུལ་དགུ། རི་དྭགས་འཕྱོ་དགུ གཅན་གཟན་སྡེར་དགུ་བཅས་ཀྱི་གཟུགས་བརྙན་བྲིས་པ་བཙུགས། དེ་ཡང་། དགུ་རྫས་འདི་མདོས་ཆོག་ཏུ་མང་དུ་འབྱུང་སྟེ། དཔེར་ན། ཀརྨ་ཆགས་མེད་ཀྱི་འདྲེ་མོ་རྫ་མདོས་ལས། རྫ་མ་ཁ་དགུ་ལུང་དགུ་བཞེས། །འབྲུ་སྣ་དགུ་ལ་གཤེད་དེ་གཤེགས། །ནམ་མཁའ་དགུ་ལ་གཟིགས་ཏེ་གཤེགས། །རྒྱངས་བུ་དགུ་ལ་བལྟས་ཏེ་གཤེགས། །མདའ་བཀྲ་དགུ་ལ་གསོར་ཏེ་གཤེགས། །འཕང་བཀྲ་དགུ་ལ་གཤེད་དེ་གཤེགས། །སྲེ་ལོང་དགུ་ལ་ཞོན་ཏེ་གཤེགས། །ལྟག་རུས་དགུ་ལ་བསྐོར་ཏེ་གཤེགས། །ཐོད་རུས་དགུ་ལ་བསྣམས་ཏེ་གཤེགས། །འགལ་བ་དགུ་ལ་བབ་སྟེ་གཤེགས། །འབྲང་རྒྱས་དགུ་ལ་གསོལ་ཏེ་གཤེགས། །མར་མེ་དགུ་ལ་བཤུས་ཏེ་གཤེགས། །ར་དགུ་ཁྱི་དགུ་ཕག་དགུ་དང་། །བ་དགུ་མཛོ་དགུ་རྟོལ་བུ་དགུ། །སྦྲུལ་དང་སྦལ་བ་ལྕོང་མོ་དང་། །དགུ་དགུ་འདུས་པའི་ཡས་སྟགས་རྣམས། །ཞེས་པ་ལྟ་བུ་དང་། དེའི་མཐའ་བསྐོར་དུ་ཟས་སྣ། གོས་སྣ། དར་སྣ། འབྲུ་སྣ། རིན་ཆེན་སྣ་ལྔ། བཤོས་བུ། ཏིང་ལོ། ཆིངས་བུ། མཐེབ་ཀྱུ། ཤ་མར་ཇ་ཆང་སོགས་བཟའ་བཏུང་གི་རིགས། གོས་དར། རས་སྣམ། པགས་རིགས། ལ་དགུ་ལུང་དགུའི་ས་སྣ་ཆུ་སྣ། མདའ་ཁྲ། འཕང་ཁྲ། ཕོ་གདོང་མོ་གདོང་སོགས་ལྷ་འདྲེ་མགུ་བའི་རྫས་རྫོང་སྣ་མང་ཡོད་པ་ཞིག་ཡིན། ཆེ་ཆུང་གི་ཚད་འབྱོར་འཁོས་དང་བསྟུན་ཏེ་འཐུས་ཚང་མི་ཚང་སྣ་ཚོགས་ཡོད་ལ། ཧ་ཅང་སྟབས་བདེ་བོའི་སྒོ་ནས་འཕེན་པའི་མདོས་ཀྱང་ཡོད་དོ། །

མདོས་ཆོག་གི་རྫས་ལ། ཡ་སྟགས་ཞེས་ཀྱང་བརྗོད་ལ། ཨ་ཀྱཱ་ཡོངས་འཛིན་གྱི་བརྡ་བཀྲོལ་དུ་དེ་ནི་བོན་ཆོག་ལ་དགོས་པའི་རྫས་ཀྱི་མིང་དུ་འགྲེལ་ཡོད། དེ་ཡང་། ཞིབ་ཆ་བཀར་ན། སྟེང་མ་ལྷ་སོགས་ཀྱི་མཆོད་རྫས་ལ་ཡས་སྟགས་དང་། འོག་མ་གདོན་བགེགས་འགོང་བོ་སོགས་ལ་སྦྱིན་པ་ལ་མས་སྟགས་ཟེར་རོ། །ཡས་སྟགས་ཀྱི་རྫས་ཡང་གང་བྱུང་དུ་མི་ཆོག་སྟེ། རིག་སྔགས་འཆང་བ་རྣམས་ཀྱིས་སྔགས་དང་། བསམ་པའི་ཁྱད་པར་གྱིས་གདོན་བགེགས་སོགས་ཚིམ་པའི་ཕྱིར་བྱིན་གྱིས་བརླབས་པའམ་ནུས་མཐུས་བསྒྱུར་པ། དེ་ཡང་མང་དུ་སྤེལ་བ་ནི། ལྷ་འདྲེ་དེ་དང་དེའི་མཐུན་རྫས་ཡིན་ནོ། །

མདོས་འབུལ་ཡུལ་ཡང། ཨ་པང་གཏེར་ཆེན་གྱི་ཤེར་སྙིང་བདུད་བཟློག་ལས། འདོད་པའི་ཡོན་ཏན་རྒྱ་ཆེ་རྒྱུན་རིང་བ། །འཛད་མེད་ནམ་མཁའ་མཛོད་ཀྱི་གཏེར་ཆེན་པོ། །སྣང་ཞིང་སྲིད་པའི་ལྷ་འདྲེ་ཡོངས་ལ་འབུལ། །ཁྱད་པར་བདུད་ཀྱི་རྒྱལ་བོ་མདོས་ལ་གཤེགས། །ལྷ་ཀླུ་གཟའ་བཙན་མ་མོ་མདོས་ལ་གཤེགས། །ཡུལ་ལྷ་གཞི་བདག་གཉན་པོ་མདོས་ལ་གཤེགས། །སྣང་སྲིད་ལྷ་འདྲེ་མ་ལུས་མདོས་ལ་གཤེགས། །ཞེ་སྡང་ལས་གྱུར་རྒྱལ་བོ་མདོས་ལ་གཤེགས། །འདོད་ཆགས་ལས་བྱུང་བསེན་མོ་མདོས་ལ་གཤེགས། །གཏི་མུག་ལས་བྱུང་ས་བདག་མདོས་ལ་གཤེགས། །སྔོན་གྱི་ལན་ཆགས་བདག་པོ་མདོས་ལ་གཤེགས། །འཕྲལ་གྱི་བུ་ལོན་བདག་པོ་མདོས་ལ་གཤེགས། །མ་འོངས་ཤ་འཁོན་བདག་པོ་མདོས་ལ་གཤེགས། །ཕྱི་ཡི་དགྲ་འདྲེ་རྐྱེན་གསུམ་མདོས་ལ་གཤེགས། །ནང་གི་ནད་གདོན་བར་ཆད་མདོས་ལ་གཤེགས། །གསང་བ་དུག་ལྔའི་ལྷ་འདྲེ་མདོས་ལ་གཤེགས། །མདོས་རྫས་དཀོར་ཆས་རྣམས་ཀྱིས་ཐུགས་དམ་བསྐང་། །ཞེས་དང་། ཀརྨ་ཆགས་མེད་ཀྱི་སྡོང་བོ་རྒྱན་མདོས་ལས་ཤ་གླུད་ས་ལ་གནས་པའི་ལྷ་འདྲེ་དང་། ཁྲག་གླུད་ཆུའི་ལྷ་འདྲེ་དང་། དྲོད་གླུད་མེ་ལ་གནས་པའི་ལྷ་འདྲེ་དང་། དབུགས་གླུད་རླུང་ལ་གནས་པའི་ལྷ་འདྲེ་དང་། རུས་གླུད་བྲག་ལ་གནས་པའི་ལྷ་འདྲེ་དང་། རྩ་རྒྱུས་གླུད་ཤིང་ལ་གནས་པའི་ལྷ་འདྲེ་དང་། པགས་གླུད་ཐང་ལ་གནས་པའི་ལྷ་འདྲེ་དང་། སེམས་ཉིད་ཀྱི་གླུད་མཁའ་ལ་གནས་པའི་ལྷ་འདྲེ་ལ་འབུལ་བར་བཤད་དོ། །

མདོས་ཀྱི་དབྱེ་བ་ལ། པདྨ་གར་དབང་བློ་གྲོས་མཐའ་ཡས་ཀྱི་གཏེར་གཞུང་ལས། དབྱེ་བ་ཞི་རྒྱས་དབང་དྲག་ལས། །ནད་དང་གནོད་པ་ཞི་བའི་མདོས། །ཚེ་དང་བསོད་ནམས་རྒྱས་པའི་མདོས། །སྣོད་བཅུད་དབང་དུ་བསྡུས་པའི་མདོས། །ཕྱི་ནང་བར་ཆད་བསྲུང་བའི་མདོས། །ཆག་ཆེ་ཉམ་ང་བཟློག་པའི་མདོས། །ཞིང་བཅུའི་དགྲ་བགེགས་བསད་པའི་མདོས། །བསྐང་བའི་མདོས་དང་བཤགས་པའི་མདོས། །སྤྱི་ཡི་མདོས་དང་སྒོས་ཀྱི་མདོས། །ཕོ་མོ་དང་ནི་མ་ནིང་མདོས། །དེ་ལ་བྱེ་བྲག་བསམ་མི་ཁྱབ། །ཅེས་སོ། །

ཡང་། ཐུའུ་བཀྭན་ཆོས་ཉིས་མདོས་གླུད་ནི། འཇིག་རྟེན་པ་ཁོ་ནས་མཆོད་པ་ཡིན་ཀྱང་། དེ་ལག་ལེན་དུ་བགྱིས་པ་སོགས་བྱས་ན་སྐྱབས་འགྲོའི་བསླབ་བྱ་དང་འགལ་བའི་ཉེན་ཡོད་མོད་ཀྱང་། འཇིག་རྟེན་པ་དེ་དག་ལ་དགའ་བའི་རྫས་སོགས་བྱིན་ནས་གནས་སྐབས་ཀྱི་གྲོགས་བཅོལ་བ་ཙམ་ཡིན་པས་བསླབ་བྱ་དང་མི་འགལ་བར་གསུངས་སོ། །

རྣམ་གྲངས་ལ། རྒྱལ་མདོས། ཀླུ་མདོས། བཙན་མདོས། སྤར་ཁའི་སྤྱི་མདོས། སྡོང་བོ་རྒྱན་མདོས། སྡེ་བརྒྱད་ཁང་མདོས། ཤེར་སྙིང་བཟློག་མདོས། ཁ་འབར་མའི་མདོས། ས་བདག་མདོས། གཤེད་མདོས། ས་སྒོ་དང་ནམ་སྒོ་གཅོད་པའི་མདོས། རི་སྒོ་དང་རླུང་སྒོ་གཅོད་པའི་མདོས། གླིང་བཞི་སྤྱི་མདོས། དྲི་ཟ་བཟློག་མདོས། གཤིན་རྗེ་གདོན་མདོས། མ་མོའི་ཁྲག་མདོས། དམ་སྲི་གླུད་མདོས། སྡེ་བརྒྱད་ཁེངས་མདོས། ཐེའུ་རང་དཀར་མདོས། འགོང་བོ་དཀར་མདོས། ཕྱུགས་གླུད་དཀར་མདོས། ཆོམ་རྐུན་བཟློག་མདོས། མི་ཁ་དགྲ་མདོས། མྱ་ངན་དགུ་མདོས། ཐན་ལྟས་བཟློག་མདོས། དུར་སྒོ་བཟློག་མདོས། ཤི་འདྲེ་གླུད་མདོས། བྱིས་པའི་ཆུང་སྲི་མདོས། རྨི་ལམ་འཁྲུགས་མདོས། རྟ་ནད་གཅོད་མདོས། ལུག་ནད་གཅོད་མདོས། གྲིབ་མདོས། ཁ་ཚེ་བཟློག་མདོས། མཚོ་སྨན་དགུ་མདོས། བདུད་བཞི་གཡུལ་མདོས། ཚེ་བདུད་བཟློག་མདོས། མདོས་གཞུང་བཀྲ་ཤིས་འཁྱིལ་བ། དམ་སྲིའི་གླུད་མདོས་སོགས་མང་དུ་ཡོད་དོ། །ཡང་གཟི་བརྗིད་སྣང་གཤེན་ཐེག་པའི་མདོ་ལས། མདོས་ལ་རྣམ་པ་གསུམ་ཡིན་ཏེ། །ཕྱི་མདོས་ནང་མདོས་གསང་མདོས་གསུམ། །ཕྱི་མདོས་སོག་ཁྲིག་ལག་ལེན་རྫས། །ནང་མདོས་གླུད་ཡས་གྱེར་དང་སྨང་། །གསང་མདོས་ཏིང་འཛིན་དགོངས་པའི་རྫས། །གསུམ་ཀ་ཟུང་འབྲེལ་འགྲོ་བ་སྐྱོབ། །དང་བོ་ཕྱི་མདོས་སོག་ཁྲིག་ལག་ལེན་ལ། །རྒྱས་འབྲིང་བསྡུས་གསུམ་སྐབས་དང་སྦྱར། །རྒྱས་པ་དག་ལ་ཁྲི་འགྱུར་འབུམ། །འབྲིང་བོ་དག་ལ་སྟོང་འགྱུར་བཅུ། །ཐ་མ་དག་ལ་བརྒྱ་འགྱུར་འབུམ། །ཡང་ཐ་དག་ལ་བཅུ་འགྱུར་བཅུ། །ཞེས་ཀྱང་བཤད་དོ། །

བྱེ་བྲག་ལྷ་འདྲེ་སོ་སོའི་མདོས་བསྐྱལ་ཕྱོགས་དང་ཕན་ཡོན་ནི། ཀརྨ་ཆགས་མེད་ཀྱིས་སྡེ་བརྒྱད་ཁེངས་མདོས་ལས། གཟའ་མདོས་དེ་ཕུལ་བ། ཕུག་པ་བྱང་གྱུ་འམ། དུར་ཁྲོད་དམ། རི་མཐོན་པོའི་རྩེ་ལ་བཞག དེས་གཟའ་ནད་མི་འབྱུང་། ཐོག་སེར་མི་འོང་བསམ་པ་འགྲུབ་བོ། །ཐེའུ་རང་མདོས་ནི། ས་ཕུག་སྟོང་བའམ་གད་པ་སྟོང་བར་བསྐྱལ་ལོ། །དེ་ལྟར་བྱས་པས་ཕོ་ནད་ཞི། ར་ལུག་འཕེལ་ལོ། །ལྷའི་མདོས་དེ་ས་མཐོ་སར་བཞག་གོ །དེ་ལྟར་བྱས་པས་ནོར་གོད་ཆད། གནག་ཕྱུགས་འཕེལ་ལོ། །གཤིན་རྗེ་མདོས་དེ། ནགས་ཚལ་ལམ། ཤིང་གཅིག་སོགས་སུ་བཞག་གོ །དེ་ལྟར་བྱས་པས་དུས་མིན་འཆི་བ་བཟློག་ཅིང་ཚེ་རིང་ངོ་། །མ་མོའི་མདོས་དེ། བྲག་གི་སྐར་ཁུང་ངམ། དེའི་ཐད་དུ་འབུལ། བྲག་གམ་རིའི་གནམ་སྒྲོན་གཤིན་རྗེའི་མཆེ་ཟུར་མཐོང་ས། དེ་མ་རྙེད་ན་རི་གཉིས་གཤིབ་པའི་བར་དུ་བཞག་གོ། དེས་རིམས་ནད་དང་ཡམས་ནད་ཆད་ཅིང་མི་འབྱུང་ངོ་། །ཐན་པ་དང་ལོ་ཉེས་མི་འབྱུང་ངོ་། །བདུད་ཀྱི་མདོས་དེ། བྲག་ནག་གམ། རི་ནག་ཕ་བོང་ནག་པོའམ། གད་པ་ནག་པོའི་རྩར་བཞག་གོ། དེས་མི་ལ་ཤི་ཆད་ཉུང་། དགྲ་མི་འབྱུང་ངོ་། །བཙན་མདོས་ནི། བྲག་དམར་བོ་ཡི་རྩ་བའམ། རིའམ་དེའུ་དམར་བོ། རྒྱ་ལམ་དམར་བོའམ། ལ་བཙས་སོགས་ཀྱི་དྲུང་དུ་བཞག་པར་བྱའོ། །དེས་རྟ་ནད་དང་རྟ་གོད་ཆད། འཐབ་རྩོད་དང་གྲི་འཁྲུག་ཞིའོ། །རྒྱལ་བོའི་མདོས་དེ། ཚྭ་ཁང་ངམ། མཆོད་རྟེན་ནམ། གྱང་རལ་ལམ། མ་ཎི་བརྒྱ་མཁར་སོགས་སུ་བཞག་གོ །དེས་སངས་རྒྱས་ཀྱི་བསྟན་པ་དར། དགོན་གནས་ཡུལ་གྲོང་བརྟན། སྨྱོ་འབོག་ཞིའོ། །གནོད་སྦྱིན་མདོས་དེ། སྣང་གཡེར་ཆེ་སར་བཞག་གོ །དེས་ལྷོག་པ་སོགས་ནོར་ནད་ཐམས་ཅད་ཆད་དོ། །འབྲུ་འཕེལ་ལོ། །ཀླུའི་མདོས་དེ། ཆུ་མིག་ཏུ་བསྐྱལ་ལོ། །དེས་མཐའ་དམག་དང་དུས་འཁྲུག་ཐོག་སེར་ཀླུ་ནད་ཞིའོ། །ཞེས་གསུངས་སོ། །

ཡང་། སྤར་སྨེའི་སོགས་གེགས་རྩུབ་ལ་བལྟས་ཏེ་མདོས་གང་གཏོང་ནི། སྡེ་བརྒྱད་ཁེངས་མདོས་ལས། ལི་ལ་བཙན་མདོས་ཁོན་ལ་མ་མོའི་མདོས། །དྭ་ནི་སྐྱེས་ཕྲན་ཐེའུ་རང་སྐྱེས་བུའི་མདོས། །ཁེན་ནི་གནམ་ལྷ་ཡིན་ཕྱིར་གཟའ་མདོས་བྱ། །ཁམ་ནི་མི་ནག་རལ་ཆེན་བདུད་ཀྱི་མདོས། །གིན་ལ་དཀོར་བདག་རྒྱལ་བོའི་མདོས་བྱའོ། །ཟིན་ནི་ལྗང་གུ་གནོད་སྦྱིན་མདོས་བྱའོ། །རི་རབ་ཡོད་ཕྱིར་རི་རབ་བརྩེགས་མདོས་ཚང་། །ཟོན་ནི་གཤེད་སྒོ་ཡིན་ཕྱིར་གཤིན་རྗེའི་མདོས། །སྨེ་བ་གཅིག་དཀར་དྲུག་དཀར་ལྷ་ཡི་མདོས། །གཉིས་ནག་བདུད་དང་གསུམ་མཐིང་དམུ་བདུད་དེ། །གཉིས་ཀ་ལ་ཡང་བདུད་ཀྱི་མདོས་བྱའོ། །ཀླུ་ནི་གཙོ་བོ་ཡིན་ཕྱིར་ས་བདག་དེ་ཡི་འཁོར། །བཞི་ལྗང་ཀླུ་ཡིན་ལྔ་སེར་ས་བདག་སྟེ། །གཉིས་ཀ་ལ་ཡང་ཀླུ་ཡི་མདོས་བྱའོ། །བདུན་དམར་དགུ་དམར་ལ་ཡང་བཙན་གྱི་མདོས། །བརྒྱད་དཀར་དགྲ་ལྷའི་རྒྱལ་བོ་བེ་དཀར་མདོས། །སྤར་ཁ་གང་དང་སྨེ་བ་གང་ལ་རྩུབ། །ལེགས་པར་རྩིས་ལ་དེ་ཡི་མདོས་བྱའོ། །དེ་བཞིན་གཟའ་ནད་ཅན་ལ་གཟའ་ཡི་མདོས། །ཕོ་ལྷོག་གླང་ཐབས་དུག་ཏུ་མཁྲིས་པའི་ནད། །དེ་ལ་ཐེའུ་རང་མདོས་ཀྱིས་ཕན་པའོ། །གཞི་བདག་ཕོག་ཐུག་ཤོར་ན་ལྷ་མདོས་བཅའ། །ཤི་ཆད་མང་ན་གཤིན་རྗེ་མདོས་ཀྱིས་ཕན། །རིམས་ནད་ནོར་ནད་གཅོད་ལ་མ་མོའི་མདོས། །ན་ཚ་རྒོད་དང་གང་བསམ་ལོག་པར་འགྲོ། །དེ་ལ་བདུད་མདོས་བྱས་ན་ཕན་པའོ། །ཁྲག་སྐྱུག་རྟ་གོད་རྨ་ངོ་བཙན་མདོས་བྱ། །རྒྱལ་འགོང་གནོད་པ་ཆེ་ན་རྒྱལ་མདོས་བྱ། །གོད་ཁ་ཆེ་ཞིང་ལྟོགས་འགོང་ཞུགས་པ་ན། །གཏེར་བདག་གནོད་སྦྱིན་མདོས་ཀྱིས་ཕན་པའོ། །སྤྱི་མདོས་བཅས་པ་དེ་དག་ཀུན་ལ་ཕན། །གསུངས་སོ། །

གླུད།

གླུད་ནི་འཐུས་སམ་ཚབ་ཀྱི་དོན་ཡིན་ལ། བོན་ལུགས་ལ་མིའི་སྲོག་ཚབ་ཏུ་གནག་ཕྱུགས་སོགས་སེམས་ཅན་མང་བོ་གསོད་པ་དེ། གཤེན་རབ་མི་བོ་ཆེས་རྒྱུན་བཅད་དེ། སྲོག་ཚབ་ཏུ་སེམས་ཅན་དེ་འདྲའི་འདྲ་གཟུགས་སྔགས་དང་སྨོན་ལམ་བཏབ་སྟེ་གཏོང་སྲོལ་ཡོད་པ་དེ་ཡིན།

ཡང་། ཕྱིས་སུ་བོན་གྱི་གོམས་གཤིས་དེ་དང་འདྲ་བར། ལོ་ངམ་རྟ་རྫིས་གྲི་གུམ་བཙན་པོ་གྲོངས་ཏེ་སྐུ་ཕུང་ཉང་ཆུའི་ནང་དབྱུགས་པ་ཀླུ་ཞིག་གིས་ཉར་འཛིན་བྱས་པར། བོད་ཁམས་སུ་ནད་རིམས་སྣ་ཚོགས་དང་། བཙའ་སད་སེར་བ་སོགས་ངན་ལྟས་མང་དུ་བྱུང་བས། ལྷ་སྲས་གཉིས་ཀྱིས་སྤུར་ཚུར་ལེན་ཐབས་བྱ་སྐབས། ཀླུ་སྲིན་དེས་འདོད་པ་ལྟར་བུ་མོ་བྱ་མིག་མ་ཞིག་སྟེ། མིག་ཡས་འགབ་ཏུ་ཡོད་པ་སོགས་བརྫངས་པ་རྒྱ་བོད་ཡིག་ཚང་མཁས་པ་དགའ་སྐྱེད་ལས་འབྱུང་བ་དང་། དེ་ཡང་། ཞིབ་ཏུ་སྤ་སྟོན་བསྟན་རྒྱལ་བཟང་བོས་བརྩམས་པའི་བསྟན་པའི་རྣམ་བཤད་དར་རྒྱས་གསལ་སྒྲོན་ལས། རེ་ཞིག་ན་ཉང་སྟོད་སྟག་ཚལ་དུ་རྩིས་མཁན་མཁས་པ་ཞིག་ལ་རྩིས་བྱས་པས། རྒྱལ་བོའི་སྤུར་ནི་ཀླུ་ལྕམ་ཁོད་དེ་རིང་མོ་བྱ་བས་བསྡམས་འདུག་པས། དེ་སླུ་བའི་ཐབས་ལ་ཁྱེའུ་ངར་ལ་ངར་སོ་བྱ་བ། ཤ་རྩ་དམར་ཞིང་སྐྲ་ཁམ་པ། ལོ་བྱ་ལོ་བ། མིག་བྱ་ལྟར་མས་ཡས་འགེབས་པ། ལག་པ་ཆུ་བྱ་ལྟར་འབྲེལ་བ་ཞིག་གླུད་དུ་བཏང་ན་རྙེད་ཟེར་ནས། རུ་ལས་སྐྱེས་དཔོན་གཡོག་གིས་ཕྱོགས་ཀུན་ཏུ་བཙལ་ཀྱང་མ་རྙེད་པར། ལོག་ནས་ཡུལ་ཡར་ལུང་སོག་ཁའི་གཡིའི་གང་བ་བྱ་བར་སླེབས། དེར་རུ་ལས་སྐྱེས་ཞབས་གཅིག་ན་གཟིམས་ནས་ཡོད་ཙམ་ན། ཞིང་ཞིག་གི་སྟེང་ན་བུད་མེད་འདྲ་ཡུར་མ་བྱེད་པའི་འགྲམ་ན། བུ་ཙ་ཞིག་ཙེར་ཙེར་ངུ་ཡིན་འདུག་པས། དེའི་མ་ན་རེ། མུག་ཕྲུག་ལྷ་འདྲེས་འཁྱེར་འཁྱེར་བ། ལྟས་ངན་གྱི་ཕྲུ་གུ་ལོ་ཡང་བྱ་ལོ་ལ་སྐྱེས། མིག་ཀྱང་བྱ་མིག་བཞིན་མས་ཡར་འགེབས་པ། ལག་པ་ཡང་ཆུ་བྱའི་སྡེར་མོ་བཞིན་འབྲེལ་བ། ཤི་རུ་ནི་མི་འདོད། གསོད་དུ་ནི་མི་ཕོད། བསྐྱུར་དུ་མིས་འཕྱ་ཞེས་ཟེར་རོ། །དེར་བུད་མེད་དེའི་གམ་དུ་བྱོན་ཏེ། ཁྱོད་ཅི་འདོད་བྱིན་གྱིས། བུ་འདི་ང་ལ་བྱིན་བྱས་པས་དེ་ལྟར་ན་སྣོམས་ཤིག་ཟེར་ཏེ་བུ་འཁྱེར་ནས་ཆུ་ཁར་བྱིན་པས་ཀླུ་ལྕམ་ཁོད་དེ་རིང་མོ། ཁྱེད་འདོད་པའི་ཁྱེའུ་ངར་ལ་ངར་སོ་ཡོད་དོ། །རྒྱལ་བོའི་སྤུར་ཐོངས་བྱས་ནས་ཁྱེའུ་ཆུ་ལ་འཕངས་པས། དེ་སྟེང་དུ་སླེབས་ཙམ་ན་སྤུར་ཆུ་ཁར་ཐོན་ནས་བྱུང་། དེར་ཡར་ལུང་གི་དྲང་མོ་དྲང་ཆུང་གི་གཡའ་ལ་བང་སོ་བཏབ། ཅེས་དང་།

དེ་བཞིན་སྲས་དོན་ཡོད་དོན་འགྲུབ་སོགས་རྣམ་ཐར་འགའ་རེའི་ནང་དུ་བུ་ཆུང་འབྲུག་ལོ་བ་དང་སྟག་ལོ་བ་སོགས་མཚོ་མཆོད་བྱེད་པ་སོགས་ཀྱང་གོང་གསལ་གཏམ་རྒྱུད་འདི་དག་ལ་ཁུངས་གཏུགས་ཏེ་བྱུང་བ་གོར་མ་ཆག་གོ །

ཡང་། གླང་ནག་ཐུར་སེལ་ཞེས་པའི་དཔེ་ཆའི་ནང་གླང་ཁམ་པ་ཞིག་ལ་ཡས་བཏགས་དང་ཕོ་གླད་མོ་གླད་བཀལ་ནས། དེའི་སྟེང་དུ་བུ་ཆུང་ལོ་བཅོ་ལྔ་ལོན་པ། དུང་སོ་འཁོར་ནས་སོ་བར་མེད་པ་ལག་པ་ཆུ་བྱ་ལྟར་དྲ་བས་སྦྲེལ་བ། མགོ་བར་པུའི་དབྱིབས་སུ་ཡོད་པ། སྐྲ་སུ་ལི་ཅན་གྱི་གལ་བུ་ཞིག་བསྐྱོན་ཏེ་བོན་རུས་མི་གཅིག་པ་བཅོ་བརྒྱད་བསྡུས་ནས་ཉི་མ་ལྷོ་ནུབ་མཚམས་སུ་གླུད་དུ་བརྫངས་པར་བཤད་ཡོད། གོང་གསལ་ལོ་རྒྱུས་འདི་གཉིས་ལ་མཚོན་ན་བུ་མོ་བྱ་མིག་མ་དང་ནལ་བུ་དེ་གཉིས་ནད་ཡམས་སོགས་འཁྱེར་ཡོང་བའི་སྣ་ནག་མར་ངོས་འཛིན་གནང་སྟེ་མཐར་སྤྱུགས་གནང་བ་མངོན་གསལ་དོད་པོར་ཐོན་ཡོད། ཡང་། དུས་རབས་བརྒྱད་པའི་ནང་བཻ་རོ་ཙ་ནས། རྒྱ་གར་དུ་ངན་སྔགས་བསྒྲུབས་པ་དང་། བློན་པོ་འགའ་ཞིག་གིས། ཁྲི་སྲོང་ལྡེ་བཙན་གྱི་བཙུན་མོ་གབ་མཐུན་ལ་སྙད་འདོགས་དང་། ཚེ་སྤོང་བཟས་ཛ་དྲག་གི་འཐབ་རྩོད་ཀྱིས་བཻ་རོ་ཙ་ན་གྲོངས་དགོས་པའི་ཁ་ཆད་བྱས་ཚེ། རྒྱལ་བོ་འཆལ་གཏམ་དེ་དག་ལ་ཡིད་མ་ཆེས་ནའང་། ཨུ་ཐུག་ཐབས་ཟད་ཀྱིས་བཻ་རོ་ཙ་ན་དང་ངོ་རིས་འདྲ་བ་ཞིག་གཙང་ཆུར་གཡུགས་ནས། ལོ་ཙཱ་བ་བསམ་ཡས་དགོན་པའི་གདུང་གསེབ་ཏུ་གསང་རྒྱ་བསྡམས་ཏེ་བཞུགས་པ་བཻ་རོའི་འདྲ་འབག་ལས་གསུངས་པ་དེ། མཁར་རྨེའུས་གླུད་ཚབ་ཏུ་བཏང་བ་འདྲ་ཞིག་བཤད་ཀྱང་། དེ་ནི་ཆབ་སྲིད་ཀྱི་གཡོ་ཇུས་ཡིན་པ་ལས། གླུད་ཀྱི་ཆོ་གའི་ཕྱོགས་གཏོགས་ཙམ་མ་ཡིན་ནོ། །

བོད་ཀྱི་ལོ་རྒྱུས་ཁྲོད་སྐུ་གླུད་དུ་བཏང་ཞེས་འབྱུང་བ་ནི། རྒྱལ་བོའི་སྐུ་ཚེ་དང་གོད་ཆག་བཟློག་ཆེད་ཡུལ་སྤྱུགས་བཏང་བར་ཟེར་ལ། བོན་དཔེ་ཞིག་ལས། མུ་ཁྲི་བཙན་པོ་ལ་སྐུ་བོན་འགའ་ཡོད་པའི་ཁྲོད་ན་སྐུ་གླུད་ཀྱི་ཆོ་ག་སྤེལ་མཁན་ཞིག་ཡོད་པར་གཞིགས་ན། རྒྱལ་བོའི་སྐུ་གླུད་ཀྱི་ཆོ་ག་སྤེལ་སྲོལ་གདོད་མ་ནས་ཡོད་པར་སེམས།

དཔེར་ན། ཆོས་བློན་རྣམས་ཀྱིས་གྲོས་མཛད་ནས་མ་ཞང་གྲོམ་པ་སྐྱེས་སྟོད་ལུང་དང་། སྟག་ར་ཀླུ་གོང་འཕན་པོར་རྒྱལ་བོ་ཁྲི་སྲོང་ལྡེ་བཙན་གྱི་སྐུ་གླུད་དུ་བརྫངས་པ་ལྟ་བུ་ཡིན།

དེ་ལས་གཞན། མི་གསོན་པོ་གླུད་དུ་བརྫངས་པའི་སྲོལ་དེ། བོད་ས་གནས་སྲིད་གཞུང་གིས་སྲིད་དབང་བཟུང་བའི་སྐབས་སུ། ཚོགས་མཆོད་གཏོར་རྒྱག་བྱེད་སྐབས། མི་མང་གི་འཐུས་ཚབ་ཏུ་གླུད་འགོང་རྒྱལ་བོ་ཟེར་བ་མི་གཉིས་གླས་ཏེ། གཏོར་སྒྲུབ་ཟོར་འཕེན་དང་བཅས་ནས། ཁ་ཕྱིར་བལྟས་ཙམ་ཡང་སློག་མི་ཆོག་པར། གཅིག་བསམ་ཡས་པེ་ཧར་ལྕོག་དང་། གཅིག་འཕན་པོ་རྒྱལ་ཁང་དུ་སྤྱུགས་སྲོལ་ཡོད། གསོན་གླུད་དེའི་རྣམ་པ་ནི། ཆས་གོས་འགོ་སྣམ་སྔོན་པའི་ཚལ་ཕྱུ་མ་དང་། དེའི་སྟེང་རྭ་པགས་དཀར་བོ་ཕྱི་ནང་སློག་པའི་མགོ་ཤུབས། སྨྱུག་མའི་ཞྭ་མོའི་རྩེ་ལ་དར་ལྕོག་ནག་པོ་ཡོད་པ་ཞིག་གྱོན། ངོ་གདོང་ཕྱེད་ཀ་དཀར་བོ་དང་ཕྱེད་ཀ་ནག་པོ་བཟོས། སྐེད་པར་ཤོག་བུས་བཟོས་པའི་འབོ་དང་། བྲེ། ཉག་ག ཤོ་བཅས་བཏགས། ལག་ཏུ་གཡག་གི་རྔ་ནག་ཐོགས་པ། རས་དཀར་གྱི་ཞྭ་ཙོག་རྩེ་རིང་ལ་རྔ་ནག་གི་ཏོག་དང་། རས་ནག་གི་ལྕོག་དར་ཅན། གླུད་འགོང་རྒྱལ་བོའི་གཟུགས་སུ་བྱས་པའོ། །

གླུད་འགོང་དེ་གཏོང་སྲོལ་ནི། གླུད་འགོང་དེ་གཉིས་ལྷ་ལྡན་གཙུག་ལག་ཁང་གི་ཁྱམས་རའི་སྒོ་འཕྱོར་འོག་ཏུ། ཆུ་ཤུལ་གྱི་རྙིང་དགོན་བྱང་ཆུབ་གླིང་གི་གྲྭ་བ་རྣམས་ཀྱིས་ཆོ་ག་བཏང་རྗེས། སློབ་དཔོན་གྱིས་ཞྭ་ནག་གི་ཆས﹙ཞྭ་ནག་གི་ཆས་ནི་ཕྱུ་བ་ཕུ་ཐུང་ཆེན་པོ་ཞིག་དང་ཞྭ་མཐའ་ལ་པགས་པ་དང་། སྟེང་ལ་རྨ་བྱའི་སྒྲོ་མདོངས། སྟེང་དུ་སྲོག་ཆགས་སྒང་གི་གཟུགས་བརྙན་སྒྲོ་གཟེངས་སེ་བ་ཞིག་བྲིས་པ་དེའོ། །﹚སྤྲས་ཏེ། གླུད་འགོང་གཉིས་ལ་ཤོ་རྒྱག་དགོས་པ་དང་། ཤོ་རྒྱག་སྐབས་ཏཱ་ལའི་བླ་མའི་ཆས་ལྟར་སྤྲས་པའི་གྲྭ་བ་ཞིག་གིས། ཁོང་གི་སྐུ་ཚབ་ཡིན་ཁུལ་གྱིས་དེར་ཡོང་དགོས། གླུད་འགོང་གཉིས﹙དུང་དཀར་བློ་འཕྲིན་གྱིས་གླུད་འགོང་དེ་གཉིས་ལྷ་ས་ཞོལ་གྱི་ཁྱིམ་ཚང་གཉིས་ནས་རེས་མོས་སུ་གཏོང་བར་གསུངས་པ་དང་། ཡང་ལ་ལས། འཕན་ཡུལ་དུ་གཏོང་བའི་གླུད་འགོང་ལྷ་ས་ཀུན་བདེ་གླིང་དགོན་ནས་གཏོང་དགོས་པར་བཤད་པ་དང་། ཏཱ་ལའི་སྐུ་ཕྲེང་བཅུ་གསུམ་པའི་རྣམ་ཐར་ལས་གླུད་འགོང་དེ་འབྲི་གུང་གི་ཁྱིམ་ཚང་ཞིག་ནས་གཏོང་དགོས་པར་བཤད་ཡོད﹚གཏོང་ཁར་སྡེ་བ་གཞུང་ནས་ཤ་མར་དང་། འབྲས། ཚྭ་བུལ་སོགས་ལམ་རྒྱགས་གྱ་ནོམ་པ་སྤྲད་རྗེས། བསམ་ཡས་ལ་འགྲོ་མཁན་དེ་ལྷ་ས་ནས་ཐོན་ཏེ་བསམ་ཡས་བེ་ཧར་ལྕོག་ཏུ་རྒྱལ་བོའི་དབུགས་ཁང་གི་སྒོ་འགྲམ་དུ་ཞག་གཅིག་ཉལ་དགོས་ཀྱི་ཡོད། རྒྱལ་བོའི་དབུགས་ཁང་ཟེར་བ་དེ་ལོ་ཧྲིལ་བོ་སྒོ་ཐེངས་རེ་ལས་ཕྱེ་སྲོལ་མེད་པ་དང་། ལོ་ལྟར་སྒེའུ་ཁུང་ལས་ཤ་གཙབ་བྱེད་ཀྱི་ཨན་རྡར་དང་གྲི་རེ་འཕེན་ལ། ལོ་འཁོར་གཅིག་གི་རྗེས་སུ་ཨན་རྡར་གྱི་ཞབས་བརྡོལ་བར་མ་ཟད། གྲི་ཡང་རྩེ་ཚང་མ་ཆག་པ་སོགས་མཐོང་རྒྱུ་ཡོད་ཟེར། གླུད་འགོང་དེ་ཞག་གཅིག་སྒོ་ཁ་དེར་ཉལ་རྗེས། རང་གི་འདྲ་གཟུགས་བཟོས་ནས་དབུགས་ཁང་དུ་བསྐྱལ་རྗེས། དྲུང་འཁོར་དཀྱུས་མའི་ཆས་སྤྲས་ཏེ་གླུད་རྫོང་གི་ཟས་གོས་སོགས་ལྷོ་ཁ་ཁུལ་དུ་བཙོང་ནས་ཚུར་ལོག་པར་བཤད་དོ། །གླུད་འགོང་རྒྱལ་བོའི་ཆོ་ག་གཏོང་སྲོལ་འདི་རྒྱལ་དབང་ལྔ་བའི་སྐུ་དུས་ནས་ཡོད་པར་འདོད་དེ། ལྔ་བ་ཆེན་པོའི་རང་རྣམ་ལས། སྤྱི་ལོ༡༦༨༠ ལོར་སྡེ་སྲིད་སངས་རྒྱས་རྒྱ་མཚོར་སྙུན་གཞི་ཕོག་ཅིང་། ཞོལ་དུ་སྔགས་འཆང་ཆུ་སྤེ་སྟེང་བས་སྒྲུབ་བཞག་དགུ་སྔོན་དུ་བཏང་སྟེ། རྒྱལ་བོ་རྩེ་མདོས་ཕྱིར་ཐོན་པ་དང་གློ་བུར་དུ་འཚུབས་ཤིང་འཆམས་དང་བཅས་འགོང་བོ་འགྲོལ་ཕྱོགས་སུ་རླུང་རྣམས་བརྒྱུགས་པའི་ལྷོངས་རྟགས་ཤིན་ཏུ་ཆེ་བ་ལྟར་སྡེ་བའི་ཁམས་ཀྱང་རིམ་བདེར་སོང་བའི་འཕྲོད་ངོ་ཆེ། ཞེས་པ་ལས་རྟོགས་ནུས་སོ། །

གླུད་འགོང་རྒྱལ་བོའི་ཆོ་ག་དེ་རིགས་ཉེ་ཆར་ཡང་། རྒྱལ་རོང་དང་སོག་ཡུལ་དུའང་སྤེལ་སྲོལ་ཡོད་པར་བཤད་དོ། །

ཡང་། གྲོང་ཚོ་འགའ་ཞིག་ཏུ། ལོ་མཇུག་གི་ཚེས་ཉེར་དགུའི་དགུ་ཐུག་གི་རྗེས་སུ། མི་གཅིག་གིས་གྲོང་ཚོའི་ནང་གི་ཐེམ་དུད་ཚང་མའི་ཚབ་བྱས་ཏེ། གྱོན་པ་ནག་པོ་གོན། གདོང་ལ་ཀྲེ་ནག་བྱུགས། མགོ་བོར་སྨྱུག་ཞྭ་རྩེ་ལ་དར་ལྕོག་ནག་པོ་བཙུགས་པ་ཞིག་གྱོན། མི་གཞན་ཞིག་གིས་དཔལ་འབར་འཁྱེར། ཡང་། གཞན་མི་ཞིག་དཔལ་འབར་གྱི་སྟེང་དུ་གམ་པ་བཏབ་སྟེ་མེ་འབར་ཤུགས་ཆེ་རུ་བཏང་ནས། གདོན་འདྲེའི་ཆས་སྤྲས་པའི་མི་དེའི་རྗེས་དེད་ནས། ལོ་གཅིག་ཟླ་བ་བཅུ་གཉིས་ཞག་མ་སུམ་བརྒྱ་དྲུག་ཅུའི་གེགས་བར་ཆད་ཐམས་ཅད་ཁྱོད་ཀྱིས་འཁྱེར་ཅིག ཅེས་གདོན་འདྲེ་བསྐྲད་ཐོག གླུད་དེ་ཐག་རིང་གི་སུམ་མདོ་འམ་བཞི་མདོ་སླེབས་ཚེ། གདོང་གཙང་བཀྲུ་དང་གླུད་ཆས་བརྗེས་སྤོར་གནང་སྟེ། ཕྱིར་བལྟས་ཙམ་ཡང་མ་སློག་པར་ཚུར་གྲོང་ཚོའི་ནང་དུ་སླེབས་ནས། གྲོང་ཚོའི་དུད་ཁྱིམ་ཚང་མས་ཁོ་ལ་ཇ་ཐུག་ལྡུད་པ་དང་། གསོལ་རས་སྤྲོད་སྲོལ་ཡོད།

དེ་བཞིན་དུ། རེབ་གོང་གཉན་ཐོག་ལ་མཚོན་ནའང་། གསོན་གླུད་དེ་དགུན་གྲང་ངར་གྱི་སྒང་ལ་ཤ་རྗེན་སྟེང་སྟག་རིས་བྲིས་ཏེ། ལག་ཏུ་དབྱུག་པ་རིང་བོ་ཞིག་ལ་འཁུར་བ་མང་བོ་རྒྱུན་ཏེ། ཁ་ནང་དུ་ཤ་དུམ་ཞིག་བཟུང་ནས། གྲོང་ཚོའི་དུད་ཁྱིམ་གྱི་སྟེང་འོག་ཀུན་ཏུ་རྒྱུགས་ཏེ་ཁ་ཟས་ཇི་ཡོད་ཟ་ཞོར་དང་འགྲོ་ཞོར་བྱས་ནས། རྗེས་སུ་ཆོ་ག་སྔགས་ཏེ་དེད་ནས། སྡེ་འདབས་ཀྱི་ཆུ་འགྲམ་དུ་ཕྱིན་རྗེས་གཙང་བཀྲུ་བྱེད་སྲོལ་ཡོད་པ་དང་།

གང་ལྟར། དེང་སང་གྲོང་ཆོག་པ་ཀུན་གྱི་གཏོང་བའི་གླུད་ནི་ཡོན་བདག་གི་ནད་གདོན་སྡིག་སྒྲིབ་དང་། ཆག་ཆེན་ཉམས་ང་སེལ་བྱེད་དུ་སྲོག་ཚབ་ཏུ་ཟན་གླུད་གཏོང་བ་འདི་ཡིན་ཏེ། དེ་ཡང་། རྩམ་པའི་གླུད་ལྟ་བུ་ལ་ཤ་ཁྲག་དྲོད་དབུགས་བླ་དང་ནད་དང་བགེགས་སོགས་ཀྱིས་ཟིན་པ་མེད་ཀྱང་། རིག་སྔགས་འཆང་བ་རྣམས་ཀྱིས་སྔགས་དང་། བསམ་པའི་ཁྱད་པར་གྱིས་གདོན་བགེགས་སོགས་ཚིམ་པའི་ཕྱིར་བསྒྲུབ་བྱ་དེའི་འཐུས་ཚབ་ཏུ་བྱིན་གྱིས་བརླབས་པའམ་ནུས་མཐུས་བསྒྱུར་བས། ལྷ་འདྲེ་དེའི་སྣང་ངོར་དངོས་སུ་རིག་རྒྱུ་ཡོད་པར་བྱས་ནས་རྫོང་འདེབས་དང་བཅས། རྒྱ་མཚོའི་ཕར་འགྲམ་ལྟ་བུར་བསྐྲད་དེ་བསྒྲུབ་བྱ་དེ་གདོན་བགེགས་དང་ནད་སོགས་ཐར་བར་བྱས་པའོ། །གཟི་བརྗིད་ལས། ཆབ་ནག་སྲིད་པའི་བོན་པོ་ཡིས། །སེམས་ཅན་འགྲོ་ལ་ཕན་གདགས་ཕྱིར། །མཉམ་གཉིས་བརྗེ་ལ་གླུད་རེ་བཟང་། །ཞེས་དང་། བླ་ཆེན་དྲན་པ་ནམ་མཁས། རྣམ་སྨིན་ཐ་སྙད་མི་དགོས་པར། །ན་བ་ཐམས་ཅད་གླུད་ཀྱིས་གསོ། །ཞེས་པ་ལྟར། ཕོ་གླུད་དང་མོ་གླུད། བྱིས་གླུད་སོགས་ལ་རང་གཟུགས་ལྟར་བཅའ་བ་ནི། ཚེའི་གཡུང་དྲུང་ལས། ཕོ་གླུད་སྐྱེས་པ་སྟག་རིས་ཅན། །གོ་མཚོན་སྣ་དགུའི་རྒྱན་གྱིས་བརྒྱན། །མོ་གླུད་བཙུན་མོ་བག་ཆས་ཅན། །རིན་ཆེན་སྣ་ལྔའི་རྒྱན་གྱིས་བརྒྱན། །ཆུང་གླུད་བྱིས་པ་ལྟ་ན་མཛེས། །མཚར་སྡུག་དར་ཚོན་སྣ་ཚོགས་ལྷུབས། །ཞེས་དང་། དེ་ཡང་། མི་ལ་ཅི་ཚང་ཟན་གླུད་ལ་ཚང་བར་བསྔོ་བ་སྟེ། ཐུའུ་བཀྭན་རིན་པོ་ཆེའི་ནད་བདག་འཇོམས་བྱེད་ཀྱི་ཆོ་ག་འཁྱེར་བདེ་ལས། ངར་གྱི་གླུད་བཟང་རིན་ཆེན་འདི། །ལུས་ངག་ཡིད་གསུམ་འདི་ལ་ཚང་། །དབང་བོའི་སྒོ་ལྔ་འདི་ལ་ཚང་། །སྐྱེ་མཆེད་བཅུ་གཉིས་འདི་ལ་ཚང་། །ཕུང་བོ་རྣམ་ལྔ་འདི་ལ་ཚང་། །རྣམ་ཤེས་ཚོགས་བརྒྱད་འདི་ལ་ཚང་། །ཞེས་དང་། དེ་མ་ཟད་ཡོན་བདག་གི་ཤ་རུས་ཁྲག་སོགས་ཀྱང་། ཟན་གླུད་དུ་བསྟིམས་ནས་བསྔོ་བ་སྟེ། བླ་བླུའི་ཆོ་ག་རིན་ཆེན་སྲོག་གི་ཆད་མཐུད་ལས། རྒྱུ་འབྱོར་ཡོན་གྱི་བདག་པོ་ཡི། །རྣམ་ཤེས་གླུད་དང་རུས་པའི་གླུད། །ཤ་ཡི་གླུད་དང་ཁྲག་གི་གླུད། །དྲོད་ཀྱི་གླུད་དང་དབུགས་ཀྱི་གླུད། །གནོད་བྱེད་ལྷ་འདྲེ་ཡོངས་ལ་བསྔོ། །ཞེས་དང་། དེ་ཡང་། དབང་བོ་སོགས་རྫས་ཀྱི་འཐུས་ཚབ་བྱེད་པ་ནི། ཏུན་ཧོང་ལས་ཐོན་པའི་གླུད་དཔེ་ལས། ངར་ཟན་ངར་གླུད་འཕད་དུ་བགྱིས། །མི་རུ་བགྱིས་པ་ཞལ་རེ་ལེགས། །རྟ་རུ་བགྱིས་པ་བང་རེ་མགྱོགས། །ངར་གླུད་མགོ་ལ་སྐྲ་མེད་ན། །རྦབ་སེར་བྱ་སྤུ་མགོ་ཡི་སྐྲ། །ངར་གླུད་དཔྲལ་ན་མིག་མེད་ན། །སྤུ་གཟི་ཁྲ་བོ་བལྟ་བའི་མིག། འགྲོན་བུའི་འཐོང་བཤད་ཚེམས་སུ་བགྱིས། །ལེབ་རྒན་དམར་བོ་ལྗགས་སུ་བགྱིས། །ངར་གླུད་ནང་ན་དྲོད་མེད་ན། །སྣང་མ་སྒྲོན་ཤིང་དྲོད་དུ་བགྱིས། །སླས་མེ་དྲི་ཞིམ་སྙིང་དུ་བགྱིས། །སེ་མོ་ལོ་དྲོས་ཤ་རུ་བགྱིས། །མཚལ་ཆེན་ལྕོག་ལ་ཁྲག་ཏུ་བགྱིས། །རྨ་བྱའི་གདོངས་ཆེན་ཞལ་དུ་བགྱིས། །ཞེས་གསུངས་ལ། ཡང་། གླུད་ཀྱི་འཐུས་ཚབ་ཀྱི་རྫས་གང་དགོས་པ་བརྒྱ་བཞིའི་ཆོ་ག་འདོད་དོན་ལྷུན་གྲུབ་དང་། འཆི་བདག་དཔུང་བཟློག་ལས་འབྱུང་བ་ཞིབ་ཚགས་སུ་བརྗོད་ན། སེམས་ནམ་མཁའ། སྙིང་ཞོ་ཤ གློ་བ་གླ་གོར་ཞོ་ཤ མཆིན་པ་མཆིན་པ་ཞོ་ཤ ཚེར་བ་མཁལ་སྲིན་བྱིའུ། མཁལ་མ་མཁལ་མ་ཞོ་ཤ མཁྲིས་པ་ཏིག་ཏ། རྒྱུས་པ་བྱ་རྒོད་ཀྱི་རྒྱུས་པ། རུས་པ་དུང་དཀར། ཤ་བསེ་རུའི་ཤ ཁྲག་ཚོས་དམར་བོ། ལྤགས་པ་སྲོག་ཆགས་གྲུམ་པའི་ལྤགས་པ། སྤུ་པུ་ཤེལ་རྩི། དྲོད་མེ། དབུགས་རླུང་། ཆུའི་ཁམས་ཆུ། མགོ་ཀ་བད། སྐྲ་ཟེར་མོ། ཀླད་པ་མུ་ཏིག ཞལ་རྨ་བྱའི་མདོངས་སམ་རྩི་ཤིང་ཞིག སྣ་ཟངས་ཀྱི་ཊམ་ཀ མིག་ལུང་ཐང་། རྣ་ཤིང་སྟག་པའི་གྲོ་ག སོ་མགྲོན་བུ། ལྕེ་ལེབ་བརྒན། ལག་པ་དབང་བོའི་ལག་པ། རྐང་ལྕགས། གོས་དར﹙ཚབ་མཚོན་གྱི་རྫས་དེ་རིགས་ཀྱི་འགྲེལ་བཤད་དྲི་མེད་ཤེལ་ཕྲེང་དང་མཛེས་མཚར་མིག་རྒྱན་ལས་གསལ་ལོ། །﹚བཅས་ཀྱིས་མཚོན་པར་བྱེད་དོ། །

གླུད་རྫོང་ལ། སྲིད་པ་སྤྱི་མདོས་ལས། ཟས་གླུད་ལ་གཏོར་མས་བརྔན། །སྐྱེམས་གླུད་ལ་ཡུ་ཏིས་བརྔན། །གོས་གླུད་ལ་དར་སྣས་བརྔན། །ཞེས་པ་ལས་གཞན། ཕྱུགས་ཟོག་ལ་འབྱུང་བོས་གནོད་འཚེ་ཐེབས་ནའང་། ཕྱུགས་ཚབ་ཏུ་ཟན་གླུད་གཏོང་བ་ནི། ཐུའུ་བཀྭན་ཆོས་ཉིའི་ཕྱུགས་གླུད་གཏོང་ཐབས་འབྱུང་བོ་ཚིམ་བྱེད་ལས། ཁམ་ས་ལ་ནི་ཕྱུགས་ལྷས་ས། །བསྲེས་ཏེ་ར་བ་གྲུ་བཞི་བྱ། །ཁམ་ས་བཟང་བོ་རིན་ཆེན་བསྲེས། །དྲི་བཟང་ཆུས་སྤྲུས་འཇིམ་པ་ལ། །རྟ་དྲེལ་མཛོ་འབྲི་བ་གླང་དང་། །ར་ལུག་ལ་སོགས་གཟུགས་སྣ་ཚོགས། །རང་རང་སྤུས་བརྒྱན་ཁ་དོག་བསྒྱུར། །མཚེ་ཡི་རུས་པ་ཡུངས་མོའི་རྐང། །གླ་སྒང་ནང་ཁྲོལ་ལྡན་པར་བྱ། །དབང་བོ་ཚང་ཞིང་ཉམས་དོད་པ། །བཟོས་ལ་ར་བའི་ནང་དགང་བྱ། །ཞེས་ཟན་གླུད་བཅོས་ཐབས་བསྟན་པ་དང་།

ཕྱུགས་གླུད་འབུལ་ཚུལ་ནི། ཁམ་སའི་རྟ་ནི་བང་རེ་མགྱོགས། །ཁམ་སའི་འབྲུ་ནི་ཞོ་རེ་ཆེ། །ཁམ་སའི་ལུག་ནི་བལ་རེ་ཆེ། །ཁམ་སའི་མཛོ་ནི་ཐེག་རེ་ཆེ། །ཁམ་སའི་གླང་ནི་རྨོ་རེ་བཟང་། །ཁམ་སའི་ར་ནི་འོ་རེ་ཆེ། །ཁམ་སའི་མཁར་ནི་གནས་རེ་བཟང་། །ཕྱི་ནས་བལྟས་ན་ཁམ་ལགས་ཀྱང་། །ནང་ནི་རིན་ཆེན་སྣ་དགུ་ཉིད། །རང་རང་མཚན་པ་སྤུ་ཡི་གླུད། །ཤ་ལྷུ་བཅུ་གཉིས་ལུས་ཀྱི་གླུད། །མཚེ་མ་ཉག་གཅིག་རུས་ཀྱི་གླུད། །ཡུངས་མོ་རྐང་བཟང་དོན་སྙིང་གླུད། །མོན་ལུག་གླ་སྒང་ནང་ཁྲོལ་གླུད། །འདི་འདྲའི་ཕྱུགས་གླུད་ཡ་མཚན་ཅན། །ལྷ་བདུད་ཆེན་པོའི་ཕྱག་ཏུ་འབུལ། །ཞེས་ཟེར་ལ།

གླུད་ཀྱི་ལམ་བསྟན་པ་ཡང་། མདོས་ཆོག་རྣམས་སུ། ད་ནི་གླུད་ཀྱི་ལམ་བསྟན་ནོ། །རི་གསུམ་རྩེ་དང་ལུང་གསུམ་མདོ། །རྒྱ་གྲམ་ལམ་དང་འབབ་ཆུའི་གཞུང་། །ཉི་ཟླ་གྲིབ་སོ་གླུད་ཀྱི་ལམ། །འདྲེ་ལྔ་བདུད་གཅོད་གླུད་ཀྱི་ལམ། །ལམ་དེར་ཞུགས་ལ་ཕྱོགས་དེར་སོང་། །ལན་ཆགས་བུ་ལོན་ཁྱེར་གྱུར་ཅིག། ཅེས་གསུངས་ཡོད་དོ། །ཞེས་པ་སོགས་ལ་དབྱེ་ཞིབ་གནང་ན་གླུད་ཅེས་པ་མདོས་ཆོག་ལས་ཆེད་དམིགས་སྲོག་ཚབ་གཏོང་བ་གསལ་ལོ། །

ཕན་ནུས་ཡང་། ལྷ་སྲིན་སྡེ་བརྒྱད་ཐམས་ཅད་ལ། །ངར་གླུད་བརྒྱ་ཡི་གླུད་འབུལ་ལོ། །སྲིད་པའི་ལྷ་འདྲེ་ཀུན་མཉེས་ནས། །ནད་དང་གནོད་པ་ཀུན་ཞི་ནས། །ལྷ་འདྲེ་ཞལ་ཁ་བསྒྱུར་དུ་གསོལ། །ཞེས་སོ། །དེ་ལ་རྒྱལ་གླུད་དང་བླ་གླུད། ཐ་ན་རྟ་གླུད་དང་ཕྱུགས་གླུད་ཚུན་ཆད་ཡོད་དོ། །

གཏོ།

༡ གཏོ་ཞེས་པའི་ཐ་སྙད་དང་བྱུང་ཚུལ། གཏོ་ནི། འཇུ་མི་ཕམ་གྱི་གཏོ་ཆོག་བཀྲ་ཤིས་འདོད་འཇོ་ལས། གཏོ་ཞེས་པ་ཉེས་པ་ལེགས་པར་འཆོས་པའི་ཐབས་རྣམས་ཀྱི་མིང་དུ་གསུངས་པ་བམ་བཤད་དུ་སོང་ལ། ཡིན་རྒྱུ་ནི། བོན་སྒོ་བཞིའི་ནང་ཚན་གཏོ་བཅོས་ཞེས་པ་དེ་ཡིན། དེ་ཡང་བོན་གཞུང་ལྟར་ན། གཏོ་ཞེས་པའི་ཐ་སྙད་དེའི་མ་ཁུངས་ནི་གཏོད་ཅེས་པའི་སེམས་ཅན་ཞིག་གི་སྒྲ་ཟུར་ཆགས་ནས་གཏོ་བཏགས་པར་གྲུབ་ལ། སེམས་ཅན་དེ་ནི་གཤིས་ཀ་མི་བརྟན་པར་དགའ་སྡུག་འགྱུར་སླ་བ། འཁོན་འཛིན་ཤིན་ཏུ་ཆེ་བ་ཞིག་ལ་ངོས་བཟུང་ཡོད་ལ། སུ་ཞིག་གིས་གཏོད་རིགས་ལ་ཕོག་ཐུག་བཟོས་ཚེ། བྱད་མ་འམ་དགྲ་རུ་བཟུང་ནས་བྱུར་གཏོང་བ་ཡིན། རང་ཅག་གི་ཆོ་ག་རྣམས་སུགཏད་འོག་ཏུ་བཅུགཟེར་བ་ཡང་། གཏད་རྫས་རྣམས་ཚགས་སུ་ཆུད་པར་བྱས་ནས། ཀླུ་དང་ས་བདག་གནས་སའི་གཉན་སར་སྦས་ཏེ། སེམས་ཅན་གཏད་རིགས་དེ་གཏོད་པ་ཡིན་ན། མི་སྒེར་དང་ཡུལ་སྡེ་དེ་ལ་གོད་ཆག་དང་བཀྲ་མི་ཤིས་པའི་མཚན་མ་སྣ་ཚོགས་འབྱུང་སྟབས། གཏད་རྫས་ཕྱིར་འདོན་དང་། གཏད་རུལ་གྱི་ཆོ་ག་ལ་བརྟེན་ནས་གཏད་ཁ་ལས་དགྲོལ་དགོས་པ་ཡིན་ནོ། །

དེ་བས། སེམས་ཅན་དེའི་གནོད་པ་འགོག་པའི་ཐབས་ལ་མཁས་པ་ལ་གཏོ་བའམ་གཏོ་བུ་བྱ་བ་ཟེར། ཕྱིས་སུ་སྟོན་པ་གཤེན་རབ་གྱིས་གཏོ་བཅོས་ཀྱི་ལུང་དང་ཆོ་ག་རྣམས་སྲས་ཆེ་བ་འབུམ་སངས་ལ་གནང་སྟེ་སྲས་འདི་གཏོ་བཅོས་ལ་མཁས་པས། གཏོ་བུ་འབུམ་སངས་ཟེར་ལ། དེས་གཏོ་བཅོས་ཀྱི་ཆོ་ག་ལ་བརྟེན་ནས་སེམས་ཅན་མང་བོ་སྡུག་བསྔལ་ལས་གྲོལ། ཡང་། མུ་ཁྲི་བཙན་པོས་སྤྱི་སྤུངས་བོན་གྱི་ཆོས་རྣམས་བསེ་སྒྲོམ་བུར་སྦས་ནས། མི་རབས་གསུམ་དུ་མ་སྤེལ་བར་རྒྱལ་བོ་ལ་དམུ་བདུད་བཙན་གསུམ་གྱིས་དལ་ཡམས་བཏང་སྟེ་སྐུ་མ་བདེ་བས། སྐུ་གཤེན་མཚེ་གཉིས་སོགས་ཀྱིས་གཏོ་བཏང་བས་རྗེའི་མངའ་ཐང་དགུང་དང་མཉམ་པར་བླ་ཆེན་དྲན་པ་ནམ་མཁས་བསྒྲགས་པ་རིན་ཆེན་གླིང་གྲགས་ལས་བཤད་ཡོད། ཡང་། ཞང་ཞུང་མལ་གྲོས་བྱ་བར་དེད་དཔོན་ཟླ་བ་བཟང་བོས་ས་རྐོ་རྡོ་སློག་དང་། གཏེར་རྔོག་ནགས་སྲེག་བྱས་པས། ཡུལ་མི་ཐམས་ཅད་ལ་ནད་ཡམས་བྱུང་། དེད་དཔོན་གྱིས་ཤེལ་དཀར་གྱི་ཟོ་བ་ཞོས་བཀང་སྟེ་སྟོན་པ་གཤེན་རབ་ལ་ཕུལ་ནས་བཅོས་ཐབས་ཞུས་པས། སྟོན་པའི་ཞལ་ནས། རྐྱེན་ངན་ཐམས་ཅད་ས་བདག་གཏོད་ཀྱི་ཆོ་འཕྲུལ་ཡིན་གསུངས་ཏེ། ནད་ཡམས་ཞི་བའི་གཟུངས་གནང་བ་ས་བདག་སྤང་སྐོང་ལས་གསུངས་སོ། །དེ་བས། གདོད་མའི་ཆོས་ལུགས་ཀྱི་བག་ཆགས་དབང་གིས་གཏོད་འདི་རྡོ་བྲག་རི་སོགས་ལ་གནས་པར་ཡང་འདོད་དེ། གཏོ་ཆོག་རྣམས་སུ། རྡོ་ལ་གནས་པའི་གཏོད་རིགས་རྣམས། །གཏོད་དང་འགྲས་པ་བཅོས་སླད་དུ། །མཆོད་པའི་གནས་འདིར་གཤེགས་སུ་གསོལ། །བྱམས་པའི་སེམས་ཀྱིས་གཤེགས་སུ་གསོལ། །གཏོད་ཀྱི་འཁྲུགས་པ་སེལ་བར་མཛོད། །གསུངས་སོ། །

ཡང་། ཀརྨ་ཆགས་མེད་ཀྱིས་གཏོ་འབོད་གསང་བ་ཀུན་འདུས་ལས། གཏོ་འདི་དང་བོ་སུས་མཛད་ན། །སྔོན་གྱི་བསྐལ་བ་དང་བོ་ལ། །འོག་མིན་ཆོས་ཀྱི་ཕོ་བྲང་ནས། །སྔོན་གྱི་བསྐལ་བ་དང་བོ་ལ། །འཕགས་པ་འཇམ་དཔལ་གཞོན་ནུས་མཛད། །བར་གྱི་བསྐལ་བ་དབུས་མ་ལ། །དགའ་ལྡན་ལྷ་ཡི་ཕོ་བྲང་ནས། །རྣམ་པར་རྒྱལ་བའི་ཁང་བཟང་དུ། །ལྷ་ཡི་རྒྱལ་བོ་ཚངས་པས་མཛད། །དེ་ནས་བསྐལ་བ་ཐ་མ་ལ། །རི་བོ་མཆོག་རབ་སྟེང་ཤོད་ནས། །ཀླུ་ཤིང་ཏ་ལའི་ལོ་མ་ལ། །ལྷ་མོ་རྣམ་རྒྱལ་མ་ཡིས་མཛད། །དེ་ནས་གཏོ་འདི་སུས་མཛད་ན། །རི་བོ་མཆོག་རབ་རྐེད་པ་ནས། །རྒྱལ་ཆེན་རིགས་བཞི་ལྷ་ཡིས་མཛད། །དེ་ནས་གཏོ་འདི་སུས་མཛད་ན། །རི་བོ་མཆོག་རབ་རྩ་བ་རུ། །ཀོང་ཙེ་འཕྲུལ་གྱི་རྒྱལ་བོས་མཛད། །དེ་ནས་གཏོ་འདི་སུས་མཛད་ན། །རྒྱ་མངོན་པར་ཤེས་པ་མི་བཞིས་མཛད། །ཅེས་དང་། ཡང་དེ་ཉིད་ཀྱིས་མི་ཁའི་གཏོ་ལས་རྒྱལ་བུ་དོན་གྲུབ་ལ་ལྷས་སྦྱིན་གྱིས་མི་ཁ་བྱུང་བས་འཇམ་དཔལ་གྱིས་ཡས་བསགས་ཏེ། གཏོ་བཅོས་བྱས་པས་མི་ཁ་ལས་ཐར་བ་སོགས་བཤད་པ་ནི་ནང་བསྟན་གྱི་ཞེན་ཁོག་ལས་གསུངས་པ་མ་གཏོགས། ད་ལྟའི་གཏོ་ཆོག་དང་བཅས་ཐབས་འདི་ལྟ་བུའི་མདོ་རྒྱུད་ཀྱི་ཁུངས་མ་མཐོང་ངོ་། །

༢ གཏོའི་རྣམ་གྲངས། འཇུ་མི་ཕམ་གྱི་གཏོ་ཆོག་བཀྲ་ཤིས་འདོད་འཇོ་ལས། གཏོ་དེ་ལ་དཀར་ནག་ཁྲ་གསུམ་དང་། གཏོ་ཐབས་སུམ་བརྒྱ་དྲུག་ཅུ་སོགས་རྣམ་གྲངས་མཐའ་ཡས་པ་ཡོད་ཅིང་། དོན་བསྡུས་ན། ཕན་བྱེད་ཀྱི་གཏོ་དང་གནོད་བྱེད་ཀྱི་གཏོ་གཉིས་སུ་འདུ་བར་བཤད། གཏོ་ཆོག་དེ་ལས་ལྷ་ཆེན་ཚངས་པ་སོགས་འཁོར་མང་བོས་འཕགས་པ་འཇམ་དཔལ་ལ་ཞུས་པའི་གཏོ་སྒྲོམ་འབུམ་ཏིག་ལས། ཕན་བྱེད་གཏོ་སྨན་གྱི་ནགས་ཚལ་ལྟ་བུའི་སྐོར་དང་། གནོད་བྱེད་ཀྱི་གཏོ་དུག་གི་སྡོང་བོའི་ལྟ་བུའི་སྐོར་ཚོ་གཉིས་བསྟན་པར་གསུངས་ཡོད་ལ། དེ་ལྟར་ན། བོན་ཆོས་ལ་རག་མ་ལས་བར་ནང་བསྟན་དུ་རང་རྐྱ་ཕེར་བའི་གཏོ་ཆོག་ཅིག་ཡོད་དམ། གང་ལྟར་མི་ཕམ་གྱིས། སྔ་མའི་སྐོར་ཚོ་དེ་ཁོལ་དུ་ཕྱུང་ནས་རྣམ་གྲངས་འདི་ལྟར་དགར་ཡོད་དེ། བསྒྱུར་ཐབས་རྣམ་པ་ལྔའི་གཏོ་ནི། རྒྱལ་མོ་ཁྲོམ་བསྒྱུར། གླང་ཆེན་སྣ་བསྒྱུར། གྲི་ཁ་མཚོན་བསྒྱུར། འབྱུང་བའི་དལ་བསྒྱུར། སྲིད་པ་ལྟེ་བསྒྱུར་ལྔ་སོ་སོའི་ནང་གསེས་དང་བཅས་པ་དང་། བསྒྲལ་ཐབས་རྣམ་པ་གསུམ་གྱི་གཏོ་ནི། ཤི་འདྲེ་ལྷས་སྒྲོལ། གཤིན་རྗེ་གྲུ་སྒྲོལ། ས་བདག་འཕྲང་སྒྲོལ་གསུམ་དང་། ཁ་ཆིངས་རྣམ་པ་ལྔའི་གཏོ་ནི། ཕུང་སྲི་ཁ་ཆིངས། ཆུང་སྲི་ཁ་ཆིངས། དམ་སྲི་ཁ་ཆིངས། རྒྱལ་འགོང་ཁ་ཆིངས། ས་བདག་ཁ་ཆིངས་སོ། །གདབ་ཐབས་རྣམ་པ་ལྔའི་གཏོ་ནི། བླ་ཕུར་དང་། སྲོག་ཕུར། སྲིད་ཕུར། ཚེ་ཕུར། དཔལ་ཕུར་གདབ་པ་ལྔ་དང་། དེའི་ཡན་ལག་གེགས་ཕུར་གདབ་པ་དང་བཅས་པའོ། །བཅད་ཐབས་གསུམ་གྱི་གཏོ་ནི། སྐྱེ་འཕྲོ་དང་། ཤི་རྒབ་དང། གོད་ཁ་གཅོད་པའོ། །དབྱེ་ཐབས་གསུམ་གྱི་གཏོ་ནི། ཕ་སྤུན་དབྱེ་བ། སྤུན་དང་ཕ་སྤད་དབྱེ་བ་དང་། བཟའ་མི་དབྱེ་བ་གསུམ། འདུན་གྲོས་ངན་པ་དབྱེ་བ་དང་བཅས་པའོ། །བསྐྱེད་ཐབས་རྣམ་པ་བཞི་ནི། སྲོག་ལུས་དབང་ཐང་བསྐྱེད་པའོ། །བཟློག་ཐབས་གསུམ་ནི། འབྱུང་བ་གཡུལ་བཟློག བྱིས་པ་ཀླུང་ལོག་བཟློག་པ། ཕྱོགས་ངན་བཟློག་པ་གསུམ་མོ། །ཡང་བཟློག་ཐབས་གསུམ་མམ་དྲིལ་ཐབས་རྣམ་པ་གསུམ་ནི། བྱད་ཁ་ཕུར་དྲིལ། མི་ཁ་རྡོག་དྲིལ། ཐུབ་ཆོད་ཀུན་དྲིལ་གསུམ། གེགས་བསྒྱུར་རྣམ་པ་བཞི་ནི། སྲོག་ལུས་དབང་རླུང་ལ་དགྲ་དར་བའི་གེགས་བཟློག་པའི་ཐབས་བཞིའོ། །ཆིངས་ཐབས་གསུམ་ནི། མི་རྒོད་ཇག་ཆིངས། རྟ་ཆིངས། ཆིངས་གསུམ་གནད་ཀྱི་གདམས་པ་གསུམ་མོ། །ཉེས་པ་གསུམ་བཅོས་པའི་གཏོ་ནི། བག་མ་བླངས་ཉེས་པ། ཁང་བ་བརྩིགས་ཉེས་པ། དུར་གདབ་ཉེས་པ་དང་གསུམ་མོ། །མི་རིགས་བདུན་གྱི་གཏོ་ནི། རྒྱལ་བོ། བན་ཏེ། བོན་པོ། ཞང་བློན། དམངས། བུད་མེད། བྱིས་པ་བདུན་གྱི་གཏོའོ། །གཞུག་ཐབས་གཉིས་ནི། ས་གཏེར་དང་བར་གཏེར་རོ། །ཞེས་སོགས་རྣམ་གྲངས་མང་དུ་གསུངས་ལ། ཞིབ་ཏུ་ཤེས་འདོད་པ་དག་གིས་གཏོ་ཆོག་བཀྲ་ཤིས་འདོད་འཇོ་ན་གསལ་ལོ། །

གཞན་ཡང་། གཏོའི་རྣམ་གྲངས་ལ་ཀརྨ་ཆགས་མེད་ཀྱི་འདི་ལྟར་གསུངས་ཏེ། གཏོ་བསྒྱུར་སུམ་བརྒྱ་དྲུག་ཅུ་ལ། །སུམ་བརྒྱ་སྣོད་ལ་ཞུག་ལ་བཞུས། །སླད་ནས་དྲུག་ཅུ་མཆིས་པ་ལ། །སྤྱི་བསར་སྒོ་བརྒྱག་རྒྱ་གར་གཏོ། །སུམ་བརྒྱ་ཐ་རམ་དྲུག་ཅུ་སྟག་གཟིག་གཏོ། །འགྲེང་བཙན་དགུ་བདུན་སོག་པོའི་གཏོ། །རྨང་བྱེད་ཁ་སྦྱོར་ཧོར་གྱི་གཏོ། །དམུ་བདུད་མདའ་འཕེན་གེ་སར་གཏོ། །ཟོར་ཤིང་ཚེ་ཕུར་མེ་ཉག་གཏོ། །དེ་ལ་མ་གཏོགས་གཏོ་རྣམས་ནི། །ར་ཐོམ་ཐུག་གཏོང་འོད་འབར་བོད་ཀྱི་གཏོ། །ཟོར་མདའ་ནག་པོ་གཏོང་བ་བོད་ཀྱི་གཏོ། །མཉམ་གཉིས་བརྗེ་བ་བོད་ཀྱི་གཏོ། །གླུད་ཟན་བསྔོ་བ་བོད་ཀྱི་གཏོ། །བྱེ་བྲལ་ལ་བརྒལ་བོད་ཀྱི་གཏོ། །གཉན་བཅོས་བྱ་གཏོང་བོད་ཀྱི་གཏོ། །ཤིང་བཙན་གཏོར་སྐུ་བཙུགས་པ་བོད་ཀྱི་གཏོ། །ས་བཅོས་རྡོ་བརྩིགས་བོད་ཀྱི་གཏོ། །ཤི་འགབ་རྡོ་བསམ་བོད་ཀྱི་གཏོ། །དེ་ལ་མ་གཏོགས་གཏོ་རྣམས་ནི། །ཀོང་ཙེ་ཁ་རྒྱང་གཏོ་འདི་ལ། །འགྲིང་བཙན་ཡེ་ཕུར་བསྒྱུར་བ་ཀོང་ཙེའི་གཏོ། །ལོ་ཤིང་ཚེ་ཕུར་འཇུག་པ་ཀོང་ཙེའི་གཏོ། །རྒྱ་ཆད་སྲུང་ལམ་ཀོང་ཙེའི་གཏོ། །ཟོར་ཤིང་ཐར་ཆ་ཀོང་ཙེའི་གཏོ། །གཏོ་བསྒྱུར་སྣ་ཚོགས་གཏོང་བ་ཀོང་ཙེའི་གཏོ། །ཞེས་ཀྱང་གསུངས་སོ། །

གཏོ་གཞུང་ལ་མཚོན་ནའང་། བོན་གཞུང་དུ་གཏོ་འབུམ་ནག་པོ་དང་། གཏོ་ཐབས་སུམ་བརྒྱ་དྲུག་ཅུ་སོགས་ཡོད། གཞན་ཡང་། ར་ག་ཨ་སེ་མཛད་པའི་གཏོ་འབུམ་སོགས་ཀྱང་ཡོད། བྱེ་བྲག་ཏུ། སྤར་ཁ་བྲལ་བའི་གཏོ་བཅོས། རོ་བྱུང་ནག་པོའི་གཏོ། དུ་ཧ་ར་ལུགས་ཀྱི་གྱེར་གཏོ། དུར་མིག་ནས་བཏོན་པའི་གཏོ། གསོན་གཤིན་ལག་སྦྲེལ་བྲལ་བའི་གཏོ་བཅོས། མི་ཁའི་གཏོ། ཆུང་གླུད་བཅུ་གསུམ་གྱི་གཏོ་བཅོས། གཏོ་ནག་མགོ་གསུམ་གྱི་ཆོ་ག མཐུན་གསུམ་གྱི་གཏོ་བཅོས། བསྐྱེད་པ་བཞི་ལྡན་གྱི་གཏོ་ཆོག དབང་ཐང་བསྐྱེད་པའི་གཏོ། རླུང་རྟ་བསྐྱེད་གཏོ། དྲུག་ཅུའི་ལོ་བསྒྱུར་གྱི་གཏོ། ལོ་ཟླ་ཟ་མ་དུས་ཚོད་ངན་པ་སོགས་བསྒྱུར་བའི་གཏོ་སོགས་ཡོད་དོ། །

༣ གཏོ་གཏོང་ཡུལ་ནི། འགྲོ་བ་དམའ་རིམ་དུ་གཏོགས་པས། ཀརྨ་ཆགས་མེད་ཀྱིས་གཏོ་དབྱིབས་ཀྱང་ཀོང་ཙེའི་སྒོག་གཏོ་འདི་ལ་འབག་དང་འདྲ་བའི་ཁ་མིག་བཏོད་དེ་གླུད་ཀྱི་ནང་དུ་བཞག་ནས་ལམ་མདོར་འཕེན་པ་ནི་སྙིགས་མའི་རང་མཚང་དང་ན་ཚ་སོགས་རྒོད་པའི་རྐྱེན་དུ་འགྱུར་བར་བཤད་དོ། །

༤ གཏོའི་རྣམ་པ་དང་ཡས་སྟགས། གཏོའི་རྣམ་པ་དང་ཡས་བསགས་ཚུལ་འགའ་མདོར་བསྡུས་ཤིག་བརྗོད་ན། འདྲེ་དགུ་སྐྱས་འདེབས་ལས། མི་ལ་ལ། དང་བོ་ཀེང་རུས་ཀྱི་མི། ཁྱི་གུ། ཕེ་གུ རེའུ་ཚེ། ལུ་གུ བྱིའུ་ཆུང་། སྐྱ་ཀ སྦལ་བ། རྨོང་ཙི། སྲེ་མོང་དང་དགུའི་གཟུགས་བྱ། རྫོང་ལ་བྱི་ལ། སྲེ་མོང་། ཁྱི། དབྲེ་སྐྱེ་མ་སྨིན་ཟས་གླུད་རྫོང་། བསེ་རག་བཀར་བ་ནི། མི་ལུས་ལག་ན་ཁྱི་སྤྱང་བཟུང་བ་གཅིག ཁྱིམ་བྱ་འཇོལ་མོ་ལ་བསྐྱོན། སྐྱ་ཀ་རོལ་དུ་ཁྲིད་པར་བྱ། ཡས་ནི་འབུ་སྐོགས། བྱ་ཐོད་རུས་བསྐྲེན་རྣམས་བསགས། འགོང་བོའི་ཡས་ནི། མི་ལུས་རི་བོང་ལ་ཞོན་པ་གཅིག་བྱ། གླ་བ་རོལ་ཏུ་ཁྲིད་པ་གཅིག་བྱ། ཡས་ནི་གླ་བའི་རིལ་མ། རྒྱལ་རོང་། ཟོམ་སྟོང་། འགོང་ཡས་བསགས། གྲི་བོ་བཀར་བ་ནི། གྲི་བོ་བཀར་བ་ཤ་ཕོ་རུ་བཅུ་ལ་ཞོན་པ། ཕག་ནག་རོལ་ཏུ་ཁྲིད་པ། གྲི་བྱ་ཕོ་རོག་ཀླད་ན་ལྡིང་བ། གྲི་ཁྱི་སྤྱང་ཀི་རོལ་དུ་ཁྲིད་པ། ཡས་ནི་ཕག ཕོ་རོག ཤ་རུ། མདའ་ཆག གཞུ་ཆག ཕུབ་རྣམས་རྫོང་བར་བྱ། གོད་འདྲེ་བཀར་ན། གཅན་གཟན་འཕར་སྤྱང་ཝའི་མགོ་ཅན། ཕག་ནག་ལ་ཞོན་པ། ཕོ་ཁའི་སུ་ལུ་ཞྭ། གོད་ཀོ་ཡི་གསོ། རྒྱུ་མའི་སྐེ་རགས། གཡས་བཤའ་གྲི གཡོན་གོད་སྒྱེ་བསྣམས་པ་གཅིག་བྱ། ཡས་ནི་རྡང་དུམ། ཁེབས་ཐག སྣ་གཅུ། ཤ་ཁྲག་རུས་གསུམ། བཙོག་ཆངས་རྫོང་། ནད་འདྲེ་བཀར་བ་ལ། མི་གཟུགས་འུག་པ་ཞོན་པ། གཟེ་མོ་རྐང་རིང་རོལ་དུ་ཁྲིད་པ་བྱ། ཡས་ལ་ངར་གླུད། ཞྭ་གོས་ལྷམ་གསུམ། ཤ་ཁྲག་རུས་གསུམ་རྫོང་། མུག་འདྲེ་བཀར་བ་ནི། མི་ལུས་མཛོ་དྲེལ་གླ་བའི་མགོ་ཅན། སྲིན་བྱ་ཁུ་བྱུག་ལ་བསྐྱོན། ར་ཡུ་ལུག་ཡུ་རོལ་དུ་ཁྲིད་པ་གཅིག་བྱ། ཡས་ནི། སྤྲེལ། གྲུམ་པ། བྱ་མ་བྱིའུ། ངར་གླུད་རྣམས་རྫོང་། ཐེའུ་རང་བཀར་བ་ནི། སྐྱེས་བུ་མིག་གཅིག ལག་པ་གཅིག རལ་བ་གཅིག ནུ་མ་གཅིག ར་རྒན་རུ་གཅིག་ལ་ཞོན་པ། ཡས་ནི་རའི་ཤ་ཁྲག་རུས་གསུམ། ཆོ་ལོ་དུང་ཤོ དར་ཟབ་སྣ་ཚོགས་རྫོང་། མི་ཁ་བཀར་བ་ནི། མི་ཁ་བ་རུ་བྲ་བ་ལ་ཞོན་པ། སྲེ་མོང་རོལ་དུ་ཁྲིད་པ། ལྕམ་པ་གཡེར་མ་ཚྭ་སྒོག་རམ་རུག་ཐུམ་པོ་ཁུར་དུ་བཅུག ཤང་ཤང་བྲ་མཆུ། མི་ཁའི་ཡས་དང་བྲ་བ་རྫོང་བའོ། །

དེ་བས། འགྲོ་བ་དམའ་རིམ་དེ་དག་གི་གཏོ་རྫས་ལ་སླ་ངའི་ནག་དྲེག་དང་། ཐལ་སྐྱ། རུས་གོག སྣོད་སྟོང་དབྲད་པའི་ཟས། ཟས་ལྷག་འཐུང་ལྷག ཤ་ཆང་སྒོག་ཙོང། ལ་ཕུག ཚ་སྒོག་གཡེར་གསུམ། ནས་སྙིགས་དང་སྦང་རམ། ཞོ་ལད་ཆང་ལད། ཤ་རོ་ཚུན་ཆད་ཀྱང་དགོས་པ་ལས་གཞན། ཤེར་སྙིང་བདུད་བཟློག་ལས་རྒྱ་ནག་གི་ཕ་ཇོ་ཞིག་ལ་རྒྱལ་བོས་གནོད་པ་ལ། རྩིས་མཁན་གྱིས་རྩིས་བྱས་པས། བུ་ཆུང་གི་རོ་ལ་གཏོ་བྱས་ཏེ་ཇ་སིག་གཅིག་གི་ནང་དུ་བཅུག་ནས་དབུས་སུ་བསྐུར་ཚུལ་ཡང་བཤད་ཡོད་དོ། །

༥ གདོན་བགེགས་འདུལ་ཐབས། དེ་ཡང་གདོན་བགེགས་འབྱུང་བོའི་ཚོགས་ལ་གདོས་གླུད་གཏོ་གསུམ་རྫོང་འདེབས་དང་བཅས་ཏེ་བསྒྲུབ་བྱ་ལ་ཕན་གང་ཐོགས་བྱེད་པ་ནི། ཐོག་མར་ཞི་བའི་སྒོ་ནས་ལས་བྱེད་པ་ཡིན་ཏེ། ལག་ན་རྡོ་རྗེའི་དབང་བསྐུར་བའི་རྒྱུད་ལས། ཉེས་པ་ཅུང་ཟད་ཙམ་གྱི་ཕྱིར། །བགེགས་རྣམས་ལ་ཡང་གནོད་མི་བྱ། །ཞེས་གསུངས་པའི་དགོངས་པ་དང་བསྟུན་ལ། གལ་ཏེ་ཞི་བའི་མི་ཐུལ་ན་སྙིང་རྗེ་དང་ཐབས་ཀྱི་རྒྱུ་ལས་ངོ་བོ་ཡེ་ཤེས་ཁྲོས་པའི་དྲག་པོ་མངོན་སྤྱོད་ཀྱིས་འདུལ་བར་བྱ་སྟེ། རྒྱུད་དེ་ཉིད་ལས། བདེན་པའི་བཀའ་ལ་མི་ཉན་ཞིང་། །རྒྱུ་འབྲས་ཚུལ་ལ་མི་སེམས་པའི། །མི་སྲུན་བགེགས་ཀྱི་ད་དུང་ཡང་། །བདག་ཅག་གཏོང་བར་མི་བྱེད་ན། །ཕྱོགས་བཅུའི་སངས་རྒྱས་བྱང་སེམས་དང་། །འཇིག་རྟེན་སྐྱོང་བ་ཐུ་བོ་ཆེ། །མངོན་ཤེས་དྲང་མཁན་གྱུར་བ་རྣམས། །བདག་གིས་མ་ནོངས་དཔང་བྱས་ཏེ། །བདག་གིས་བགེགས་འདིར་ཆད་པའི་ལས། །སྣ་ཚོགས་རྣམ་པར་སྦྱར་བར་བྱ། །སྲོག་ལ་འཁོར་ལོ་བསྐོར་བ་དང་། །སྔགས་ཀྱི་མེ་ཡིས་བསྲེག་པ་དང་། །དུག་གསུམ་ཁུང་བུར་མནན་པ་སོགས། །སྡུག་བསྔལ་སྣ་ཚོགས་མྱོང་བར་བྱ། །ཞེས་གསུངས་སོ། །

༦ གཏོ་བཅོས་ཀྱི་ཕན་ནུས་ནི། ཕྭ་གཤེན་ཐེག་པའི་མདོ་ལས། ན་བར་གྱུར་བ་གཏོ་ཡིས་གསོ། །ཞེས་དང་། བར་དུ་གསོ་རྐྱེན་གཏོ་ཡིས་བྱེད། །ཅེས་པ་ལྟར། ནམ་མཁའ་ནོར་བུས། བོན་གནའ་ལུགས་སུ་གྲགས་པའི་གཏོ་ནི་གསོན་པོ་བདེ་བ་དང་ནད་པ་གསོ་བ། འགལ་རྐྱེན་བཟློག་པ། འཆི་བ་བསླུ་བ་ལ་སོགས་པའི་དགོས་དོན་དུ་མ་ལ་བརྟེན་པའི་དཔྱད་ཀྱི་བྱེ་བྲག་ཅིག་ཡིན་གསུངས་པ་དང་མཐུན་ནོ། །

གཞན་ཡང་། གཏོ་བ་རྣམས་ཀྱིས་གཙུག་ལག་གཏོ་ཡིས་གསོ་མི་ཐུབ་པ་གཅིག་ཀྱང་མེད་པར་སེམས་པ་སྟེ། ཀརྨ་ཆགས་མེད་ཀྱི་གཏོ་གཞུང་ལས། ཀོང་ཙེའི་གཏོ་ཡིས་མི་འགྱུར་གཅིག་ཀྱང་མེད། །འབྱུང་བ་ལྔ་ལ་མི་བརྟེན་གང་ཡང་མེད། །ལྷ་འདྲེ་དམ་ལ་མི་གནས་གང་ཡང་མེད། །ཟོར་མོ་མདའ་ཡིས་མི་ཕུག་གང་ཡང་མེད། །རྣོ་བའི་མཚོན་ཆས་མི་འཇིགས་གང་ཡང་མེད། །སྲིད་པའི་ཆུ་ལ་མི་འཐུང་གང་ཡང་མེད། །གཙུག་ལག་གཏོ་ཡིས་མི་འགྱུར་གང་ཡང་མེད། །ཅེས་སོ། །ཁྱད་པར་དུ་གཏོ་རྩིས་གཉིས་གཅིག་ལ་གཅིག་བརྟེན་གྱི་ཚུལ་དུ་གནས་པ་སྟེ། ཀ་རྨ་ཆགས་མེད་ཀྱིས། ལར་ནི་གཏོ་ཕུག་རྩིས་ཡིན་རྩིས་ཕུག་གཏོ། །རྩིས་མ་བྱས་པར་གཏོ་ནི་བཅའ་དགོས་མེད། །གཏོ་དེ་མ་དར་རྩིས་དེ་དགོས་པ་མེད། །ཐུབ་པས་གསུངས་པའི་ཆོས་ཚོ་རྩིས་ལ་འོང་། །ཀོང་ཙེས་མཛད་པའི་གཏོ་ཚོ་རྩིས་ལ་འོང་། །རྩིས་འདི་དགེ་སྐུལ་ཆེན་པོ་འོང་བ་ཡིན། །ཞེས་གསུངས་སོ། །

 

ལེའུ་བཅུ་གཅིག་པ། དུས་ཆེན་གྱི་སྐོར།
ཆོ་འཕྲུལ་སྨོན་ལམ་ཆེན་མོ།

ཆོ་འཕྲུལ་སྨོན་ལམ་ཆེན་མོ་ནི། སྤྱི་ལོ་སྔོན་གྱི ༥༡༡ ལོར་མེ་འབྲུག་ཟླ ༡ ཚེས ༡ ནས ༡༥ བར་སྟོན་པ་སངས་རྒྱས་ཀྱིས་མུ་སྟེགས་པའི་སྟོན་པ་དྲུག་འཁོར་དང་བཅས་ལ་རྫུ་འཕྲུལ་འགྲན་པ་དང་། ཁྱད་པར་དུ་ཚེས་བརྒྱད་ཉིན་རྫུ་འཕྲུལ་གྱི་དངོས་གཞི་ཚུགས་ནས། གདུལ་བྱ་རྒྱ་མཚོའི་མིག་སྔར་མུ་སྟེགས་སྟོན་པ་དྲུག་པོ་ཚར་བཅད་དེ། སྟོན་པ་ཐུབ་པའི་དབང་བོ་རྣམ་པར་རྒྱལ་བ་དེར། ཆོས་རྒྱལ་མྱ་ངན་མེད་ཀྱིས་དྲན་གསོ་ཞུ་ཆེད། ཆོ་འཕྲུལ་མཆོད་པའི་དུས་ཆེན་འཛུགས་གནང་མཛད་པ་ནས་བཟུང་། ཡུལ་ལུང་ཀུན་དུ་བཀྲ་ཤིས་ལོ་ལེགས་དང་། དུས་བདེ་ཞོད་འཇགས་སུ་བྱུང་བར་གྲགས་པ་དང་།

དེར་མཚུངས་སུ། རབ་བྱུང་བདུན་པའི་ས་གླང་ལོར ༡༤༠༩ ལོར་རྗེ་བླ་མ་ཙོང་ཁ་པ་ཆེན་པོས། སྣེ་གདོང་མི་དབང་གྲགས་པ་རྒྱལ་མཚན་དང་། སྣེའུ་རྫོང་དཔོན་ནམ་མཁའ་བཟང་བོར་སློབ་སྟོན་མཛད་ནས། དད་ལྡན་སྦྱིན་བདག་ཁག་ནས། གཙུག་ལག་ཁང་ཞིག་གསོ་དང་། ཇོ་བོ་མ་འོངས་པར་ཀླུ་ཡུལ་དུ་གཤེགས་པར་ལུང་བསྟན་ཡོད་པ། ཕྱིར་བསྲིངས་ཕྱིར་ལོངས་སྐུའི་ཆ་བྱད་དུ་བསྒྱུར་ཞིང་། ཚེས་བརྒྱད་ནས་བཅོ་ལྔ་བར་མཆོད་བཀུར་བློས་མི་ཤོང་བ་མཛད་ཅིང་། ཕྱོགས་སྐྱོང་གི་དར་ཆེན་བཅོ་ལྔ་རང་རང་ཕྱོགས་སུ་བཙུགས་ལ། དགེ་འདུན་ལ་བསྙེན་བཀུར་དང་། རྒྱལ་བསྟན་ཡུན་རིང་རྒྱས་ཆེད་སྨོན་ལམ་གཙོ་བོར་གྱུར་བའི་ཆོས་སྒྲ་བར་མེད་སྒྲོགས་པའི་སྲོལ་བཏོད་པས། ལྷ་ལྡན་སྨོན་ལམ་ཆེན་མོ་ཞེསཡོངས་སུ་གྲགས། ཕྱིས་སུ་གདན་ས་སེ་འབྲས་དགའ་གསུམ་དང་། དགེ་འདུན་བགྲང་ལས་འདས་པ། ལྷ་ལྡན་གཙུག་ལག་ཁང་དུ་འཚོགས་ནས་དགེ་བཤེས་འདེམ་སྒྲིག་གིས་དགེ་འདུན་མང་བོའི་དབུས་སུ་མཚན་ཉིད་དམ་བཅའ་བཞག་སྟེ། སྔ་དྲོ་ཚད་མ་རྣམ་འགྲེལ། ཉིན་གུང་དབུ་མ་དང་ཕར་ཕྱིན། དགོང་དྲོར་འདུལ་བ་དང་མཛོད་བཅས་གཞུང་ལུགས་བཀའ་པོད་ལྔ་བགྲོ་ལྒིང་བྱས་ཏེ། དགེ་བཤེས་ལྷ་རམས་པའི་དམ་བཅའ་བཞག་ནས་ཨང་ཀི་མཐོ་དམན་དང་། བྱ་དགའ་སོགས་སྟེར་སྲོལ་མཆིས་ལ། དགེ་འདུན་མང་ལ། བཞེས་ཐུག ཚ་ར། སྐུ་འགྱེད་སོགས་གཏོང་ལ། སྐྱ་སེར་ཕོ་མོ་མང་བོས་མཇལ་བསྐོར་དང་། ཚོགས་གསོག་བློས་མི་ཤོང་བ་སྒྲུབ་གྱིན་ཡོད། སྨོན་ལམ་འདི་དང་ཐོག་ཆོ་འཕྲུལ་ཟླ་བའི་ཚེས་གཅིག་ནས་བཅོ་ལྔའི་བར་ཡིན་ལ། ཕྱིས་སུ་རྒྱལ་དབང་བློ་བཟང་རྒྱ་མཚོའི་འདས་མཆོད་མགོ་ཚུགས་པ་ནས་བཟུང་། རྒྱལ་བ་རིམ་བྱོན་གྱི་དགོངས་རྫོགས་མཆོད་སྤྲིན་ལ། ལྷ་སའི་སྨོན་ལམ་རིམ་འཕར་གནང་སྟེ། ཧོར་ཟླ་དང་བོའི་ཚེས་བཞི་ནས་མགོ་ཚུགས་ཏེ། ཚེས་ཉེར་བཞི་བར་སྨོན་ལམ་གཏོར་རྒྱག་དང་། ཚེས་ཉེར་ལྔ་ལ་བྱམས་པ་གདན་འདྲེན་གྲུབ་རྗེས་སྨོན་ལམ་གྲོལ་བ་ཡིན། དཔེ་དེ་བཞིན་དུ། ཕྱིས་སུ་བོད་ཀྱི་དགོན་པ་མང་ཆེ་ཤོས་ལ་ཆོ་འཕྲུལ་སྨོན་ལམ་ཆེན་མོ་འདི་དར་རོ། །

ས་ག་ཟླ་བ།

རྒྱུ་སྐར་ས་ག་འཆར་པའི་ཟླ་བ་འདི་ལ་བདག་ཅག་གི་སྟོན་པ་ཤཱཀྱ་ཐུབ་པ་ལྕགས་སྤྲུལ་ས་ག་ཟླ་བའི་ཚེ་བདུན་ཉིན་ལུམ་བུའི་ཚལ་དུ་སྐུ་བལྟམས་པ་དང་གཅིག ཤིང་རྟའི་ལྔ་བའི་བཅོ་ལྔའི་སྲོད་ལ་བདུད་བཏུལ་ཏེ། ཐོ་རེངས་མངོན་པར་རྫོགས་པའི་སངས་རྒྱས་པ་དང་གཉིས། ལྕགས་འབྲུག་ས་ཟླའི་ཚེས་བཅོ་ལྔར་རྩྭ་མཆོག་དྲུང་དུ་མྱ་ངན་ལས་འདས་པའི་ཚུལ་བསྟན་པ་གསུམ་བཅས་ཀྱི་དུས་ཆེན་གསུམ་འཛོམས་སམ། ཡང་ན་བདུད་བཏུལ་བ། བྱང་ཆུབ་བརྙེས་པ། མྱ་ངན་ལས་འདས་པའི་དུས་ཆེན་གསུམ་མམ། ལྷུམས་སུ་ཞུགས་པ། སངས་རྒྱས་པ། མྱ་ངན་ལས་འདས་པའི་དུས་ཆེན་ཁྱད་འཕགས་ཅན་འདི་ལ་མཆོད་འབུལ་སོགས་བྱས་ན་དགེ་རྩ་འགྱུར་ཆེ་ལ། དགོན་གྲོང་ཁག་ན་ཡང་བཞི་བ་ཆོས་ཟླ་ཞེས་མཐོང་ཆེན་བྱེད་ཅིང་། ཆོས་ལུགས་ཀྱི་ཆོ་ག་སྣ་ཚོགས་སྤེལ་ལ། མང་ཚོགས་སེར་སྐྱ་མང་བོས་རང་རང་གི་འབྱོར་འཁོས་དང་བསྟུན་ཏེ་མཆོད་འབུལ་དང་སྦྱིན་གཏོང་གི་ལས་དང་། སྨྱུང་གནས་སྲུང་བ་ལ་འབད་ཅིང་། ཁྱད་པར་དུ་ཟླ་འདིར་བོད་མི་ཕལ་ཆེ་བའི་ཤ་ཟ་བ་སྤངས་པ་སོགས་གོམས་གཤིས་བཟང་བོ་ཆགས་ཡོད།

ལྔ་བའི་ལྷ་ཚོད།

ལྔ་བའི་ཚེས་ལྔ་ནི། ཨ་མདོ་སོགས་སུ་ཆེད་དམིགས་ཀྱིས་ལྔ་བའི་ལྷ་ཚོད་ཅེས་ཡུལ་ཁམས་ཀུན་ཏུ་ཀེའུ་ཚོད་ཟ་བའི་དུས་ཚིགས་ཤིག་ཡིན། དེ་ནི་ཁྲུའུ་རྒྱལ་ཁབ་ཀྱི་སྐུ་དྲག་ཆུས་ཡོན་བྱ་བ། རྒྱལ་ཁབ་ཉམས་དམས་སུ་འགྲོ་བར་བློས་མ་བཟོད་པར། ཁོས་ལམ་ལུགས་གསར་བཅོས་མང་བོས་ཐབས་ལམ་སྤྱད་ཀྱང་། མཐར་ཁྲུའུ་རྒྱལ་ཁབ་ཆིན་རྒྱལ་ཁབ་ཀྱིས་དབང་བསྒྱུར་བྱས་པས། ཆུས་ཡོན་སྐྱོ་གདུང་དྲག་པོས་མནར་ནས་ཉི་ལུའི་གཙང་བོར་མཆོངས་ཏེ། རྒྱལ་ཁབ་ཀྱི་ཆེད་དུ་རང་སྲོག་བཏང་། དེ་ལུགས་རྙིང་གི་ཟླ་ལྔ་བའི་ཚེས་ལྔ་ཡིན་པས། ཕྱིས་སུ་རྒྱ་ནག་པ་རྣམས་ཀྱིས། གཙང་བོ་དེར་འབྲུག་དབྱིབས་ཅན་གྱི་གྲུ་བཏང་ནས་རྩེ་བ་དང་། འབྲས་ལོ་བཏུམ་ཟ་བ་སོགས། ཆུ་ཡོན་ལ་དྲན་གསོ་བྱེད་པའི་དུས་ཆེན་དུ་གྱུར། རིམ་གྱིས་བོད་དུའང་ལུགས་སྲོལ་དེ་དར་བར་འདོད་ལ། རྗེ་འཇིགས་མེད་རིགས་པའི་བློ་གྲོས་ཀྱི་བསྟན་རྩིས་ཀུན་བཏུས་ལས། སྤྱི་ལོ་སྔོན་གྱི ༢༧༨ ཆུས་ཡོན་ཆུ་ལ་ལྕེབ། འདི་ལ་རྗེས་དྲན་གྱི་དོན་དུ་ལྔ་བའི་ཡ་ཏུང་ཞེས་སྲོལ་ཆགས་ཞེས་འབྱུང་། གཞན་བོད་ཀྱི་ངག་རྒྱུན་ལ། ལོ་རེའི་ཟླ་ལྔ་བའི་ཚེས་ལྔ་ལ་སངས་རྒྱས་སྨན་བླས། རྩི་ལྗོན་ཆུ་བོ་ཐམས་ཅད་བདུད་རྩི་སྨན་དུ་བྱིན་གྱིས་བརླབས་པའི་དུས་ཆེན་ཞིག་ཏུ་ངོས་འཛིན་པས། ཉིན་དེའི་ཞོགས་པར་ཆུ་གཙང་རང་ཁྱིམ་དུ་ལེན་པ་དང་། ཁྲུས་བྱས་ཏེ་ལུས་གཙང་མར་བྱེད་པ། སྡོང་ལོ་སྔོན་པོ་དང་རི་སྐྱེས་མེ་ཏོག་སོགས་སྒོ་ཁྱིམ་སོགས་སུ་འཛུགས་ལ། ཡུལ་མི་ཐམས་ཅད་ཀྱིས་ཀེའུ་ཚོད་ཟ་བའི་སྲོལ་དང་། སྨན་པ་རྣམས་ཀྱིས་ཀྱང་སྔོ་སྨན་སྣ་ཚོགས་བཏུས་ཏེ། སྨན་སྦྱོར་བྱེད་པའི་ཕྱག་སྲོལ་ཡོད་དོ། །

དྲུག་པའི་ཚེས་བཞི།

དྲུག་པའི་ཚེས་བཞི་ནི་སྟོན་པ་ཤཱཀྱ་ཐུབ་པས་བདེན་བཞིའི་ཆོས་འཁོར་བསྐོར་བའི་དུས་ཆེན་ཡིན། དེ་ཡང་། སྟོན་པ་དགུང་ལོ་སོ་ལྔ་ལ་ཕེབས་པའི་ཧོར་ཟླ་བཞི་བའི་ཚེས་བཅོ་ལྔའི་ཐོ་རེངས་མངོན་པར་རྫོགས་པའི་སངས་རྒྱས་པའི་ཚུལ་བསྟན་ནས། ཞག་ཞེ་དགུའི་རིང་སྐལ་ལྡན་གྱི་གདུལ་བྱ་མ་རྙེད་པར་ཆོས་མི་གསུངས་པར་བཞུགས་ཏེ། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་དབུས་སུ་གནས་པར་བྱ། །ཞེས་གསུངས་ནས་ཐུགས་ལས་ཆུང་བར་བཞུགས་པ་ན། བྱང་ཆུབ་སེམས་དཔའ་དང་། དཀར་ཕྱོགས་ཀྱི་ལྷ་བགྲང་ལས་འདས་པས་ཆོས་སྟོན་པར་གསོལ་བ་བཏབ་ཅིང་། ལྷག་པར་དུ་ཚངས་པ་བརྒྱ་བྱིན་གཉིས་ཀྱིས་གསེར་གྱི་འཁོར་ལོ་དང་། དུང་དཀར་གཡས་འཁྱིལ་ཕུལ་ཏེ་ཆོས་འཁོར་བསྐོར་བར་གསོལ་བ་བཏབ་པ་ལྟར། ཞལ་གྱིས་བཞེས་ཏེ། ཐོག་མར་རིང་འཕུར་དང་ལྷག་སྤྱོད་གཉིས་དབང་བོ་རྣོ་ལ་འདུལ་སླ་བས། ཆོས་སྟོན་པར་དགོངས་ཀྱང་དེ་གཉིས་འདས་ཟིན། དེ་ནས་ཐོག་མར་འདུལ་སླ་བ་དང་། དུག་གསུམ་ཤས་ཆུང་བ་རྣམ་པར་ཤེས་པ་ལྐོག་ཏུ་མ་གྱུར་བའི་འཁོར་ལྔ་སྡེ་འདུལ་བར་དགོངས་ནས། ཝ་ར་ན་སི་ནས་ལེ་བར་བཅུ་ཙམ་ཆོད་པའི་དྲང་སྲོང་ལྷུང་བ་རི་དྭགས་ཀྱི་ནགས་སུ་བྱོན་པ་ན། ལྔ་སྡེ་དག་གིས་རྒྱང་རིང་བོ་ནས་གཤེགས་པ་མཐོངསྟེ། དགེ་སྦྱོང་གཽ་ཏ་མ་མང་དུ་ཟ་བ། སྤོང་བ་ཉམས་པ། འདི་འོང་ཚེ་བདག་ཅག་རྣམས་ཀྱིས་སྨྲ་བར་མི་བྱ། ལྡང་བར་མི་བྱ། ཕྱག་མི་བྱ། སྟན་སྟོབ་པར་མི་བྱ་ཞེས་ཁྲིམས་བཅས་པ་ལ། བཅོམ་ལྡན་འདས་འབབ་ཆུ་གནོན་པ་ཅན་གྱི་འགྲམ་ལྔ་སྡེའི་གནས་སུ་བྱོན་མ་ཐག དེ་དག་སངས་རྒྱས་ཀྱི་གཟི་བརྗིད་མ་བཟོད་དེ། ཐམས་ཅད་སྟན་ལས་ལངས་ནས། ཀཽའུ་དི་ནས་རིམ་གྲོ་བྱས། རྟ་ཐུལ་གྱིས་བསུས་ཏེ་ཆོས་གོས་དང་ལྷུང་བཟེད་བླངས། རླངས་པས་གདན་བཤམས། མིང་ཆེན་གྱིས་ཞབས་སྟན་སྟོབ། བཟང་ལྡན་གྱིས་ཞབས་གསིལ་ཕུལ་ཏེ། ཚེ་དང་ལྡན་པ་གཽ་ཏ་མ་བྱོན་པ་ལེགས་སོ། །བཞུགས་ཤིག ཅེས་གསོལ་བ་ན། བཅོམ་ལྡན་འདས་ཀྱིས་ལྔ་སྡེ་དག་ལ་དགའ་དགུས་གསུང་ལྒིང་མཛད་མཐར། དགེ་སློང་དག ངས་ཁྱེད་ཅག་ལ་ཆོས་བཤད་གྱིས། ཚུར་ཤོག ཉོན་ཅིག ནན་ཏན་གྱིས་ཤིག་ཅེས་ཧོར་ཟླ་དྲུག་པའི་ཚེས་བཞི་ལ་བདེན་བཞིའི་ཆོས་འཁོར་བསྐོར་བས། ལྔ་སྡེ་བཟང་བོ་རིམ་པར་དགྲ་བཅོམ་ཐོབ་པའི་དུས་ཆེན་ཡིན་ནོ། །དེ་ཡང་བཟླས་པ་གསུམ་དང་། རྣམ་གྲངས་བཅུ་གཉིས་ཡོད་དེ། སྡུག་བསྔལ་བདེན་པ། ཀུན་འབྱུང་བདེན་པ། འགོག་བདེན། ལམ་བདེན་བཅས་བདེན་པ་བཞི་བོ་དེར་ངོ་བོ་ལ་བཟླས་པ་བཞི། བྱ་བ་ལ་བཟླས་པ་བཞི། བྱ་བའི་འབྲས་བུ་ལ་བཟླས་པ་བཞི་སྟེ། རྣམ་གྲངས་བཅུ་གཉིས་ཡོད། ཞིབ་ཏུ་ཕར་ཕྱིན་དང་བུ་སྟོན་གྱི་ཆོས་འབྱུང་ན་གསལ་བས་དེར་གཟིགས་པར་བྱའོ། །

ལྷ་བབས་དུས་ཆེན།

བོད་ཟླ་དགུ་པའི་ཚེས་ཉེར་གཉིས་ཉིན་སྟེ། ལྷ་བབས་དུས་ཆེན་ནི། སྔོན་སྟོན་པ་ཐུབ་པའི་དབང་བོའི་སྐྱེད་ཡུམ་སྒྱུ་འཕྲུལ་མ་སྐུ་གཤེགས་ཏེ་ལྷ་གནས་སུམ་ཅུ་རྩ་གསུམ་དུ་སྐྱེས་པས། སྟོན་པ་དེར་ཕེབས་ཏེ་ཆོས་གསུངས་ཤིང་། དབྱར་གནས་པར་ཞལ་གྱིས་བཞེས་ཏེ་བཞུགས་སྐབས། རྒྱལ་བོ་གསལ་རྒྱལ་སོགས་ཀྱིས་སྟོན་པའི་སྐུ་ཡོན་དྲན་དྲགས་པས། མོའུ་འགལ་གྱི་བུ་བརྒྱུད་སྟོན་པ་མི་ཡུལ་དུ་ཕེབས་པར་གསོལ་བ་བཏབ་པ་ལྟར། ཞལ་གྱིས་བཞེས་ཏེ། ལྷ་མི་འཁོར་དང་བཅས་པ་རྫུ་འཕྲུལ་གྱི་འཇའ་ཚོན་གྱི་སྐས་གདང་ལས་འཕགས་ཡུལ་གསལ་ལྡན﹙དགེ་ཆོས་ཀྱིས་དེང་སང་སང་ཁ་ས་ལ་ཞེས་པ་དེ་ཡིན་པར་བཤད﹚དུ་བྱོན་པའི་ཉིན་མོར་ཁེལ་བས། དུས་ཆེན་ཁྱད་པར་ཅན་དུ་བརྩི་བ་ཡིན། རང་རེ་བོད་དུའང་བོད་ཟླ་དགུ་བ་ཚེས་ནས་བཟུང་། པོ་ཏ་ལ་དང་གཙུག་ལག་ཁང་ཆེ་ཆུང་། གྲོང་ཁྱིམ་ཀུན་ལ་རྩིག་པར་ས་དཀར་དང་སྒོ་དང་སྒེའུ་ཁུང་ལ་ནག་རྩི་བྱུགས་ཏེ། ཚེས་ཉེར་གཉིས་གོང་དུ་ཚགས་སུ་ཆུད་པར་བྱས་ནས། ཚེས་བཟང་འདི་ལ་དུས་དྲན་དང་། རྣམ་དཀར་དགེ་ལས་འགྲུབ་པ་སྟེ། ཕྱག་མཆོད་དང་། བསྙེན་བཀུར། སྦྱིན་གཏོང་སོགས་བྱེད་སྲོལ་དང་། བླ་མའི་ཁྲི་སྟོན་དང་། ཆོས་ཀྱི་མཛད་སྒོ་སྣ་ཚོགས་འཚོགས་སྲོལ་ཡོད། ཟླ་དང་བོའི་ཆོ་འཕྲུལ་དང་། བཞི་བ་ས་ག་ཟླ་བ། དྲུག་པའི་ཚེས་བཞི། དགུ་བ་ལྷ་བབས་དུས་ཆེན་བཞི་ལ། སྟོན་པའི་དུས་ཆེན་རྣམ་བཞི་ཡང་ཟེར་རོ། །

ཚེས་བཅུའི་དུས་ཆེན།

༡ ཚེས་བཅུའི་དུས་ཆེན་བྱུང་ཚུལ། རང་རེའི་བོད་འདིར་སློབ་དཔོན་རིན་པོ་ཆེའི་མཛད་འཕྲིན་བསམ་གྱིས་མི་ཁྱབ་པ་མང་དུ་བསྟན་པས། ཟླ་རེའི་ཚེས་བཅུ་ལ་དགེ་སྒྲུབ་དང་ཆོས་ཀྱི་ཆོ་ག་མང་དུ་སྤེལ་བ་ལ། ཚེས་བཅུ་ཞེས་ཀྱང་བྱའོ། །རྒྱུ་མཚན་ནི། རིག་འཛིན་འཇིགས་མེད་གླིང་བའི་ཚེས་བཅུའི་ཕན་ཡོན་གསོལ་འདེབས་ལས། གུ་རུ་ང་བསྒོམ་ང་བསྒྲུབ་ང་རྗེས་སྙོགས། །ང་མཐོང་སངས་རྒྱས་ཀུན་མཐོང་ང་ཉིད་ནི། །བདེ་གཤེགས་འདུས་པའི་ངོ་བོ་ཉིད་ཡིན་པས། །ཚེས་བཅུ་བྱུང་རེས་བོད་དུ་འབྱོན་ཞེས་གསུངས། །ཞེས་དང་། གཞན་ཡང་། དུས་ངན་སྙིགས་མའི་མཐའ་ལ་ཐུག་པའི་ཚེ། །ནངས་རེ་དགོང་རེ་བོད་ཀྱི་དོན་ལ་འབྱོན། །ཉི་ཟེར་འཆར་སྡུད་མདངས་ལ་ཆིབས་ཏེ་འབྱོན། །ཡར་ངོའི་ཚེས་བཅུའི་དུས་སུ་དངོས་སུ་འབྱོན། །ཞེས་པ་ལྟར། སློབ་དཔོན་པད་འབྱུང་ཞབས་ཀྱིས་གུ་རུ་མཚན་བརྒྱད་དང་། པདྨ་ཐོད་ཕྲེང་རིགས་ལྔ། ཡང་སྤྲུལ་ཉེར་ལྔ་སོགས་སྤྲུལ་བའི་རོལ་གར་ཕལ་མོ་ཆེ་ཡར་ངོའི་ཚེས་བཅུ་ལ་བསྟན་པ་དང་། ལྷ་སྲིན་སྡེ་བརྒྱད་རྣམས་བཀའ་བསྒོས་དམ་བཞག་ཀྱང་ཚེས་བཅུ་དང་། རྗེས་འཇུག་བུ་སློབ་རྣམས་ཀྱང་ཚེས་བཅུ་ལ་རྗེས་འཛིན་ཞལ་གྱིས་བཞེས་པས། དུས་ཀྱི་རྒྱལ་བོ་ཚེས་བཅུ་འདི་ལ་རྙིང་མ་བས་གཙིགས་འཛིན་བྱེད་པ་ཡིན་ནོ། །གཞན་ཡང་། ཚེས་བཅུ་ལ་མཁའ་འགྲོ་འདུ་བའི་དུས་ཆེན་ཡང་ཡིན་ནོ། །

༢ བྱེ་བྲག་ཟླ་བ་སོ་སོའི་ཚེས་བཅུ་ངོ་སྤྲོད། ཧོར་ཟླ་བདུན་པའི་ཚེས་བཅུ་ལ་སློབ་དཔོན་སྐུ་འཁྲུངས་པ་དང་། བརྒྱད་པའི་ཚེས་བཅུ་ལ་ཆུ་བོ་གང་གཱ་གྱེན་དུ་ལྡོག་པ། དགུ་བའི་བཅུ་ལ་མུ་སྟེགས་པའི་དུག་ཆུ་དྲངས་ཀྱང་སྐུ་ལ་གཟི་དཔལ་ལྷག་པར་རྒྱས་པ། བཅུ་བའི་བཅུ་ལ་ཧེ་རུ་ཀའི་མཆོག་གི་དངོས་གྲུབ་སྒྲུབ་ཚེ་བྱི་དུར་གློག་མ་སྤྲིན་སོགས་ཀྱི་བར་ཆད་རྡོ་རྗེའི་ཕུར་བུ་གཟིར་མནན་དམ་འདོགས་གནང་བ། བཅུ་གཅིག་པའི་བཅུ་ལ་བོད་ཡུལ་དུ་ཕེབས་ཏེ་ལྷ་སྲིན་དམ་འདོགས་དང་ས་སྟེང་གཏེར་གྱིས་གང་བར་བྱས་པ། བཅུ་གཉིས་པའི་བཅུ་ལ་བོད་ཀྱི་གངས་བཞི་ཡུལ་བརྒྱད་སོགས་བྱིན་གྱིས་བརླབས་ནས་སྲིན་ཡུལ་དུ་གཤེགས་པ། དང་བོའི་བཅུ་ལ་ནུབ་ཕྱོགས་ཨོ་རྒྱན་གྱི་རྒྱལ་སྲིད་བཟུང་བ། གཉིས་པའི་བཅུ་ལ་རྒྱལ་སྲིད་སྤངས་ཏེ་བསིལ་བ་ཚལ་གྱི་དུར་ཁྲོད་དུ་མཁའ་འགྲོ་སྟོང་གི་ཚོགས་དཔོན་མཛད་པ། གསུམ་པའི་བཅུ་ལ་སློབ་དཔོན་པྲ་བྷ་ཧ་སྟི་ལས་ཡོ་གའི་རྒྱུད་གསན་ཏེ། ཡོ་ག་རྡོ་རྗེ་དབྱིངས་ཀྱི་ལྷ་ཞལ་གཟིགས་པ། བཞི་བའི་བཅུ་ལ་ཟ་ཧོར་རྒྱལ་བོ་གཙུག་ལག་འཛིན་གྱིས་མེར་བསྲེགས་ཀྱང་། མེ་དཔུང་མཚོ་རུ་བསྒྱུར་བ། ལྔ་བའི་བཅུ་ལ་ཟ་ཧོར་རྒྱལ་བོས་མེ་ལ་སྦྱངས་ཀྱང་། མེ་དཔུང་མཚོ་རུ་བསྒྱུར་ཏེ་སོལ་བའི་གུར་ཁང་དུ་པདྨའི་སྡོང་བོ་ལ་ཐོད་པའི་ཕྲེང་བ་སྐུ་ལ་གསོལ་ནས་བཞུགས་པ། དྲུག་པའི་བཅུ་ལ་མུ་སྟེགས་པ་རྣམས་གནམ་ལྕགས་ཐོག་གིས་བསྒྲལ་བ་བཅས་སོ། །

༣ ཚེས་བཅུའི་དུས་ཆེན་ལ་མཆོད་བསྙེན་བྱས་པའི་ཕན་ཡོན། རིག་འཛིན་འཇིགས་མེད་གླིང་བའི་ཚེས་བཅུའི་ཕན་ཡོན་གསོལ་འདེབས་ལས། དེ་ཕྱིར་བྱུང་ངོ་ཅོག་གི་ཚེས་བཅུ་ལ། །ཁྱོད་ཀྱི་མཛད་པ་འཕྲིན་ལས་དུས་ཆེན་དང་། །མ་དང་མཁའ་འགྲོ་འདུ་བའི་སྐབས་ཡིན་པས། །ནང་དུ་རྡོ་རྗེའི་ལུས་ལ་རྩ་ཐིག་རླུང་། །འདུ་བ་ངོ་མཚར་ཅན་གྱི་རྟེན་འབྲེལ་ལས། །རྣམ་བཞིའི་འཕྲིན་ལས་ཀུན་ལ་དབང་འབྱོར་ཞིང་། །ཆར་ཆུ་འབེབས་ཤིང་མི་ཕྱུགས་ནད་རིམས་ཞི། །སད་སེར་དབུལ་ཕོངས་དམག་འཁྲུག་གོད་ཁ་སོགས། །འཇིག་རྟེན་དུས་ཀྱི་རྒུད་པ་ཇི་སྙེད་ཀུན། །ཚེས་བཅུའི་དུས་མཆོད་བཟུང་ནས་གསོལ་འདེབས་ཀྱི། །བྱིན་རླབས་ཁོ་ནས་ཞི་བ་མངོན་སུམ་ཕྱིར། །ཞལ་བཞེས་དུས་ལ་བབ་པོ་ཐུགས་རྗེས་གཟིགས། །ཞེས་དང་།

གསང་འདུས་ཞལ་གདམས་ལས། དབང་ཆེན་སྤྲེལ་ཟླའི་ཚེས་བཅུ་དང་། །དུས་ཀྱི་ཚེས་བཅུ་ཐམས་ཅད་ལ། །སྤྲུལ་བའི་འཛམ་གླིང་ཁྱབ་པར་འགྱེད། །མཆོག་ཐུན་དངོས་གྲུབ་ང་ཡིས་སྟེར། །ཞེས་པ་ལྟར། ཟླ་བ་ནམ་ཚེས་ཀྱི་ཚེས་བཅུ་ལ་མཆོད་བསྙེན་བྱས་ན། དགེ་རྩ་ལྡབ་འགྱུར་གྱིས་འཕེལ་བ། ཚད་མའི་བསྟན་བཅོས་དག་ལས་མང་དུ་གསུངས་སོ། །ཡང་ཚེས་བཅུ་ལ་མི་དགེ་བ་སྒྲུབ་ན་རྣམ་སྨིན་ཧ་ཅང་ལྕི་བ་ཆོས་གཞུང་ན་མང་དུ་གསུངས་པས། འདིར་མི་སྤྲོ་ལ། དམངས་ཁྲོད་གཏམ་རྒྱུད་ཚུན་ནའང་ཁྱབ་ཆེ་སྟེ། ཚེས་བཅུ་ལ་ར་རེ་བསད་ན། ཟངས་མདོག་དཔལ་རི་ར་རོས་བསྒྱངས། ཞེས་པ་ལྟ་བུ་སྟེ། དེས་ནི་ཚེས་བཅུར་སེམས་ཅན་སྲོག་གིས་ཟ་རྒྱག་སྤྱོད་གསུམ་བྱས་ན། རྣམ་སྨིན་ཚེས་གྲངས་གཞན་ལས་ཆེ་བ་དང་། ཚེས་བཅུ་ལ་སྡིག་ལས་བྱེད་པ། དམ་པ་ལྷ་ཆོས་དང་མི་མཐུན་པ། རྣག་ཐོག་བཙག་ཁེལ་ལྟར་དགག་རྒྱག་དང་ཐེར་འདོན་བྱས་ཡོད་དོ། །

དགའ་ལྡན་ལྔ་མཆོད།

འབྲོག་རི་བོ་དགའ་ལྡན་དགོན་པ་ནས་རྗེ་ཐམས་ཅད་མཁྱེན་པས། སྐུ་བེར་དང་དབུ་ཞྭ་སྲས་ཀྱི་ཐུ་བོ་དར་མ་རིན་ཆེན་ལ་གནང་སྟེ། རྒྱལ་ཚབ་ལ་བསྐོ་བཞག་མཛད་ནས། ཟླ་བཅུ་བའི་ཚེས་ཉེར་ལྔ་ཉིན་གཟིམ་ཁང་འོད་གསལ་སྦུག་ཏུ་སྐུ་གཤེགས་པའི་ཉིན་མོ་ལ་དགའ་ལྡན་ལྔ་མཆོད་ཟེར། རྗེ་སྐུ་གཤེགས་པའི་ཕྱི་ལོ་དགའ་ལྡན་དུ་དགེ་འདུན་པ་མང་བོས་བདེ་གསང་འཇིགས་གསུམ་དང་། ཀྱེ་རྡོར། དུས་འཁོར། ཚེ་དཔག་མེད། ཀུན་རིག་སོགས་ཀྱི་དཀྱིལ་འཁོར་ལ་བསྟེན་ནས་དགོངས་རྫོགས་ལ་སྒྲུབ་མཆོད་མཛད་པ་དང་། ར་ཁ་བྲག་ཏུ་ཆོས་རྗེ་ཡེ་ཤེས་དབུ་མཛད་དེ། དགེ་འདུན་པ་མང་བོས་སྒྲུབ་མཆོད་རྒྱ་ཆེར་གནང་བ་ནས་བཟུང་། ད་ལྟའི་བར་དགེ་ལྡན་ལྔ་མཆོད་ཆེན་མོ་ཞེས། བོད་རྒྱ་ཆེའི་མི་དམངས་ཀྱི་སེམས་ཁོང་གི་ཉི་མ་ལྟ་བུ་འཇམ་མགོན་བློ་བཟང་གྲགས་པ་ཞི་བར་གཤེགས་པའི་རྗེས་དྲན་དུ་རྣམ་དཀར་གྱི་ལས་ལ་བརྩོན་ཅིང་། ཁྱད་པར་དགོན་སྡེ་ཁག་དང་དུད་ཁྱིམ་ཡོངས་རྫོགས་ཀྱིས་ཁང་བའི་ཡང་སྟེང་དུ་མཆོད་མེ་བསྟར་ཕྲེང་བསྒྲིགས་པའི་གླིང་མེའི་མཆོད་པ་རྒྱ་ཆེར་འབུལ་སྲོལ་ཚུགས་ཤིང་། ཡུལ་ལུང་མང་ཆེ་བར་མར་མེ། གཞིས་ཀའི་སྟེང་འོག་དང་ཁོར་ཡུག་ཀུན་དུ་འཁྱེར་ཏེ། དམིགས་བརྩེ་མ་གདངས་དབྱངས་སྙན་མོས་གྱེར་ཏེ། རྗེ་ཐམས་ཅད་མཁྱེན་པའི་དགོངས་རྫོགས་སྒྲུབ་སྲོལ་ཡོད་པ་འདིར་ས་ཁྱབ་རྡོ་ཁྱབ་ཏུ་སོང་བ་ཡིན་ལ། ཐ་ན་དམངས་གཞས་ཚུན་ནའང་ལེན་སྲོལ་ཡོད་དེ། བོད་ཁ་བ་ཅན་ན་དུས་ཆེན་གསུམ། །གཅིག་དེ་བཅུ་བའི་ལྔ་མཆོད་རེད། །མར་མེའི་འོད་ཀྱིས་མུན་པ་སེལ། །སེམས་དྲན་པ་གསལ་བའི་བཀྲ་ཤིས་ཤོག །ཅེས་སོ། །

རྟ་ལོར་གངས་སྐོར་འགྲོ་དོན།

གངས་རི་ཏི་སེ་ནི་སྟོད་མངའ་རིས་སུ་ཡོད་ལ། དེ་ནི་ཆོས་ལུགས་གྲུབ་མཐའ་ཁག་གིས། སོ་སོའི་བཞེད་ཚུལ་མི་འདྲ་བ་དུ་མ་ཡོད། ནང་བསྟན་པས་དེ་ནི་དཔལ་འཁོར་ལོ་བདེ་མཆོག་དང་། གནས་བརྟན་ཡན་ལག་འབྱུང་སོགས་གནས་བརྟན་མང་བོའི་གནས་རིར་ངོས་འཛིན། མུ་སྟེགས་རིག་བྱེད་སྨྲ་བས་ལྷ་ཆེན་དབང་ཕྱུག་གི་གནས་དང་། གཡུང་དྲུང་བོན་གྱིས་གཤེན་རབ་མི་བོ་ཆེའི་ཞབས་ཀྱིས་བཅགས་ཤིང་བྱིན་གྱིས་རླབས་པའི་གནས་སུ་ངོས་འཛིན་ནོ། །གང་ལྟར་གནས་རི་འདིར་ཆོས་ལུགས་གྲུབ་མཐའ་མང་བོས་ཕྱག་མཆོད་དང་བསྐོར་བ་བྱ་སྲོལ་ཡོད། ཁྱད་པར་དུ་རྟའི་ལོ་བར་རང་ཅག་ནང་བསྟན་པ་རྣམས་གནས་བསྐོར་བྱེད་པའི་རྒྱུ་མཚན་ནི། གྲུབ་པའི་དབང་ཕྱུག་མང་བོས་སྒོམ་སྒྲུབ་བྱེད་པའི་གནས་བྱིན་ཅན་ཞིག་དང་། ཁྱད་པར་དུ་རྗེ་བཙུན་མི་ལ་རས་པའི་གནས་དེར་དཀའ་སྤྱད་དཔེ་མེད་མཛད་མཐར། ན་རོ་བན་ཆུང་དང་རྫུ་འཕྲུལ་འགྲན་ཏེ། ན་རོ་བན་ཆུང་ལ་ཕམ་ཁ་བྱིན་པར་མ་ཟད། ཁོ་གཉིས་ཀྱིས་གཡས་བསྐོར་དང་གཡོན་བསྐོར་གྱི་ཐད་ལ་ཕར་འཐེན་ཚུར་འཐེན་བྱས་པས། ཕ་བོང་སྟེང་དུ་གཉིས་ཀའི་ཞབས་རྗེས་བྱུང་སྟེ། མཐར་རྗེ་བཙུན་གྱི་ཐུགས་དམ་གྱི་ནུས་པས། བོན་པོ་གཡས་བསྐོར་ལ་ཁྲིད་པ་སོགས་ཆོས་ཀྱི་མཛད་འཕྲིན་རྒྱ་ཆེར་སྤེལ་བ། རབ་བྱུང་བཅུ་གཉིས་ལོའི་ལྕགས་རྟ་ལ་ཁེལ་བས། སྐབས་དེའི་དུས་དྲན་དང་གནས་བསྐོར་ཀྱི་ཕན་ཡོན་ལ་དམིགས་ནས། རྟའི་ལོ་ལ་ཆོས་དད་མང་ཚོགས་གནས་བསྐོར་ཏུ་འགྲོ་སྲོལ་རྒྱ་ཆེར་དར་རོ། །

གངས་རིན་པོ་ཆེའི་བསྐོར་ཚད་ནི། རྗེ་བཙུན་གཙང་རྒྱ་རས་ཀྱིས། ཕོ་བྲང་ཆེན་པོ་ཏི་སེ་འདི་ལ་བསྐོར་བ་ལན་གཅིག་བསྐོར་གྱུར་ན། སྐྱེ་བ་གཅིག་གི་སྒྲིབ་པ་འདག དེ་བཞིན་བསྐོར་བ་བཅུ་གཉིས་བསྐོར་ན། བསྐལ་བ་གཅིག་གིས་སྒྲིབ་པ་འདག བསྐོར་བ་བརྒྱ་རྩ་སོང་བ་ན། ཕྲག་བཅུའི་ཡོན་ཏན་བརྒྱད་རྫོགས་ནས། ཚེ་གཅིག་སངས་རྒྱས་འཐོབ་པར་གསུངས་པ་བསྐོར་ཚད་དངོས་ཡིན་ནོ། །

ཡང་། ངག་རྒྱུན་ལ། བསྐོར་ཚད་བཅུ་གསུམ་ཡིན་པར་བཤད་དེ། དེ་ཡང་སྒྲོལ་ལའི་སྟེང་གི་མཚོ་ཆུང་དེར་སྔོན་གནས་བསྐོར་ཁམས་མོ་ཞིག་གིས་བུ་ཚ་རྒྱབ་ཏུ་འཁུར་ནས། ལུས་སྒུར་ཏེ་ཆུ་བཏུངས་པས། བུ་ཚ་ཆུར་ལྷུང་བས། མཚོ་ཞལ་ཁ་མ་ཕྱེས་པ་ཡིན་སྐད་དང་། ཁམས་མོས་བུ་ཚ་བསད་པའི་སྡིག་བཤགས་ལ། བསྐོར་བ་བཅུ་གསུམ་སོང་སྐབས། སྡིག་སྒྲིབ་དག་པའི་རྟགས་སུ། རྡོ་ལ་ཕྱག་ཞབས་རྗེས་བྱུང་ཞིང་། འཇའ་ལུས་བརྙེས་ཏེ་མཁའ་སྤྱོད་དུ་གཤེགས་པར་བཤད་པས། བསྐོར་ཚད་བཅུ་གསུམ་ཡིན་ཞེས་གནས་འཛིན་པ་དག་སྨྲའོ། །

ཞོ་སྟོན།

ཞོ་སྟོན་དུས་ཆེན་འདི་ཇི་ལྟར་བྱུང་ཞེ་ན། སྔོན་འཕགས་ཡུལ་དུ་དབྱར་གནས་སྐབས། དབྱར་བཞུགས་པ་རྣམས་ལ། འོ་མ་དང་ཞོའི་སྟོན་མོ་ཐེངས་འགར་དྲངས་སྲོལ་ཡོད་པ་ལྟར། བོད་ལ་ཡང་དགོན་སྡེ་ཁག་ནས་རིམ་བཞིན་བརྒྱུད་དེ། རྒྱལ་དབང་བདུན་པ་སྐལ་བཟང་རྒྱ་མཚོའི་དུས། ནོར་གླིང་དུ་སྐལ་བཟང་ཕོ་བྲང་གསར་བཞེངས་ལེགས་གྲུབ་བྱུང་བས། ལས་བཟོ་བ་དང་གླ་དཔོན། འབངས་མི་སེར་རྣམས་ཀྱིས་ཞོ་སྟོན་བཏང་བ་ནས་བཟུང་། དུས་ཆེན་འདི་དབུ་ཚུགས་པར་བཤད། དེ་ཡང་། བོད་ཟླ་དྲུག་པའི་གནམ་གང་ལ། འབྲས་སྤུངས་ནུབ་རིའི་ལྡེབས་སུ། སྟོན་པའི་གོས་སྐུ་ཞལ་འབྱེད་སྐབས། ལུང་པ་སོ་སོ་ནས་དེར་ཕེབས་ནས་ལྷ་མོ་འཁྲབ་སྲོལ་ཡོད་ལ། ཞོ་སྟོན་གྱི་དངོས་གཞི་བོད་ཟླ་བདུན་པའི་ཚེས་གཅིག་གཉིས་ནས་ཡིན། ཕྱོགས་ཡས་མས་ནས་ཐོན་པའི་ཞོ་སྟོན་གྱི་གཟིགས་མོ་བ་རྣམས་གླིང་ག་གཏོང་ཞིང། རིག་རྩལ་ཚོགས་པ་གཞན་རྣམས་ཀྱང་སྐབས་དེར། འཁྲབ་སྟོན་སྣ་ཚོགས་བྱ་རྒྱུ་ཡོད་ལ། དེ་དང་སྒོ་བསྟུན་ཏེ་ཁེ་ལས་པ་རྣམས་ཀྱིས་ཚོང་རྫས་མང་དུ་བཤམས་པས། ཚོང་འདུས་ཀྱི་ཁྲོམ་ཚོགས་ཀྱང་ཆེ། གཞན་རྒྱལ་ཁབ་ཕྱི་ནང་གི་ལྗོངས་རྒྱུ་བ་རྣམས་ཀྱང་བོད་ལ་ཕེབས་ཏེ། དགའ་སྐྱིད་ཀྱི་དཔལ་ལ་རོལ་ཏོ། །

སྐར་མ་རི་ཥི།

བོད་ཀྱི་ཁ་དཔེར་དཔྱིད་ཆུ་ངན། སྟོན་ཆུ་བཟང་ཞེས་པའང་བརྒྱད་པའི་ཆུ་སྐར་ཞེས་སྐར་མ་རི་ཥིའི་རྩི་སྦྱོར་ལ་བསྟེན་ནས་ཆུ་བོ་ཐམས་ཅད་ཡན་ལག་བརྒྱད་ལྡན་དུ་གྱུར་བ་དེ་ཡིན། བོད་ཀྱི་སྐར་རྩིས་རིག་པ་སྨྲ་བ་རྣམས་ཀྱིས་དུས་ཚིགས་ངེས་ཅན་ཞིག་རྟགས་སུ་བཀོད་ནས་སྐར་འབྲས་ལ་བསྟེན་ཏེ་ཆུའི་བཟང་ངན་འབྱེད་པ་ཡིན། དཔེར་ན། སྐར་མ་མཆུ་དང་དབོ་ཡིས་ནམ་སྐྱེལ་བའི་དཔྱིད་དུས་སུ་ཁ་རུལ་དང་མི་གཙང་བ་རྣམས་སོས་ཀའི་མཁའ་རླུང་དང་འཐབ་པས་ཆུ་ལྕི་བ་དང་། རྩུབ་པ་དང་དྲི་ང་བ་སོགས་འབྱུང་ལ། ཁྱད་པར་ཉི་མ་འཁྲིག་ཁྱིམ་དུ་སླེབས་ནས་ཞག་བཅུ་བདུན་འདས་ནས་ཞག་བདུན་གྱི་བར་ལྷོ་འཛམ་བུ་བྲི་ཀྵའི་ཤིང་ལ་དུད་ཞག་འཛེག་པས། ཆར་བབས་དུག་ཏུ་འགྱུར་བས་སྨན་དཔྱད་ཆུ་ཡི་ལས་ལ་འཛེམ་པར་བཤད། སྐར་མ་སྣྲོན་དང་སྣུབས་ཀྱིས་ནམ་སྐྱེལ་བའི་དབྱར་དུས་དྲག་ཆར་བབས་རྗེས་ཆུ་རྙོག་པ་ཡིན་པས། ཆུ་ལ་བརྒལ་མི་ཉན་པ་དང་། སྐར་མ་མགོ་དང་རྒྱལ་གྱིས་ནམ་སྐྱེལ་བའི་དགུན་ཉི་ལྡོག་གི་དུས་ཀྱི་ཆུ་ཤིན་ཏུ་གྲང་བས་ཆུ་ལ་བརྒལ་མི་ཉན་པ་དང་། སྟོན་ཟླ་འབྲིང་བོའི་ནང་དུ་ལྷོ་རིའི་རྩེ་ནས་སྐར་མ་རི་ཥི། ཐོ་རེངས་དུས་སུ་བརྒྱད་པའི་ཆུ་སྐར་ཤར་བར་བཤད་ལ། དེ་ཡང་། རྩིས་གཞུང་ལས། བརྒྱད་པའི་དབུགས་ཐོབ་ཉིན་དེ་ནས་ཞག་བདུན་པར་སྐར་མ་རི་ཥི་འཆར་ཞིང་ཆུ་ཀུན་བདུད་རྩིར་འགྱུར་བས་ཆུར་ཞུགས་ན་ནད་དང་སྡིག་སྒྲིབ་འདག་ཐུབ་ཟེར་ལ། བཻ་སྔོན་ལས་ཀྱང་། རི་བྱི་ཤར་བས་དུག་མེད་པ། །ཉིན་མཚན་གཉིས་ཀ་སྦྱངས་ཆུ་འཐུང་། །དྭངས་པ་དྲི་མེད་ཆུ་ཞེས་པ། །དྲི་མེད་དྲི་མ་སེལ་གྱུར་བ། །མི་འགྲུབ་རྩུབ་པ་མ་ཡིན་པ། །བཏུང་བ་ལ་སོགས་བདུད་རྩིར་མཚུངས། །ཞེས་དང་། ཁྱིམ་ཞག་ཉི་བར་གྱི་ཚད༡༠ ༤༣ ༣༠ ༠ ཡིན། ཡང་བཻ་དཀར་ལས། དྲང་སྲོང་རི་ཥི་ཞེས་པ་ནི། །གོ་ལའི་གདུགས་ཀྱི་ཤམ་བུའི་ཚུལ། །ཟླ་དྲུག་མཚན་འཆར་ཟླ་དྲུག་ཉིན། །འཆར་བ་རྒྱུ་སྐར་སྤྱི་འགྲེ་བཞིན། །ཉིན་མོར་ཞུགས་ནས་ཐོ་རངས་ལ། །ཐོག་མར་དོན་པ་དེ་ཉིད་ཀྱང་། །གདགས་རི་མཐོ་བ་ལ་སོགས་ནས། །སྲིབ་རིའི་ལྡེབས་ནས་མཐོང་བའི་བར། །ཟླ་བ་ཕྱེད་གཉིས་ལྷག་བཅས་འགོར། །དེ་ཕྱིར་མིག་མཐོང་འཆར་བ་ཡི། །ཚད་བཟུང་ངེས་པར་དཀའ་ནའང་། །ཞག་བདུན་ཡན་ལག་བརྒྱད་པའི་ཆུར། །འགྱུར་བར་དྲང་སྲོང་དམོད་པ་དང་། །སྐར་མ་དེ་ཡི་གཞལ་ཡས་ཁང་། །ཀེ་ཏ་ཀ་ལས་གྲུབ་པ་སོགས། །སྔོན་གྱི་མཁས་པ་ཕལ་ཆེར་གྱིས། །འཁྲུལ་བ་མེད་པར་ཚད་འཛིན་ཞིང་། །དེ་ཡང་རབ་བརྒྱད་ཐོག་མ་རུ། །བྱེད་པར་དྲག་པོ་རྐང་བྲལ་ལ། །རི་ཥི་འཆར་བར་ཕུག་པ་བ། །མཁས་དབང་ལྷུན་གྲུབ་རྒྱ་མཚོས་མཛད། །ཅེས་ཀྱང་གསུངས་སོ། །

དུས་དེར་བོད་མི་རྣམས་ཀྱིས་དྭངས་གཙང་ཡན་ལག་བརྒྱད་ལྡན་གྱི་ཆབ་ལ་ཁྲུས་བྱེད་སྲོལ་ཡོད་ཅིང་། དབུས་གཙང་སོགས་སུ་སྐབས་དེར་སྐར་མ་རི་ཥིའི་ཆབ་བཞེས་ཀྱི་སྐྱོ་སངས་ཚུགས་པ་དང་། དགོན་སྡེ་ཁག་གི་ཆབ་ཞུགས་ལ་ལྷ་མོ་འཁྲབ་པ། ན་གཞོན་ཚོས་བྱ་འཕུར་གཏོང་སྲོལ་ཡོད། ཁྱད་པར་དུ་སྐར་མ་རི་ཥི་འདི་ནོར་བུ་ཀེ་ཏ་ཀ་ལས་གྲུབ་པའི་སྐར་ཁྱིམ་ཡིན་སྟབས། དེའི་འོད་ཟེར་ཆུ་དང་རྩྭ་ལ་ཕོག་པས་ཆུ་བོ་ཡན་ལག་བརྒྱད་ལྡན་དང་། རྩྭ་བཅུད་བཟང་བོར་གྱུར་བས་མི་རྣམས་ཆབ་ལ་ཁྲུས་བྱས་ན་གྲིབ་དང་འབག་བརྩོག་སེལ་བ་དང་། ཕྱུགས་རྣམས་རྩྭ་ལ་ལོངས་སུ་སྤྱད་ན་རྩྭ་བཅུད་ཕུན་སུམ་ཚོགས་པར་བཤད། དམངས་གཞས་ལས་ཀྱང་། ལྷོ་ཡི་སྐར་མ་རི་ཥི། །སྐར་མའི་ནང་གི་ནོར་བུ། །རྒྱ་མཚོའི་རླབས་ཀྱི་ཆུ་མོ། །བཟང་དྲུག་སྨན་ལ་འགྱུར་ཆོག །ཅེས་དང་། སྐར་མ་རི་བྱི་ཤར་སོང་། །སྨན་པ་དགོས་པ་མི་འདུག །ཅེས་ཟེར་རོ། །

གཞན་ཡང་། ངག་རྒྱུན་དུ་དབུས་གཙང་དུ་ཆབ་ཞུགས་དུས་སྟོན་གྱི་བྱུང་བ་ལ། སྔོན་གྱི་ཚེ་བོད་ཁམས་སུ་མི་ཤི་དོན་རྐྱེན་གྱི་བྱུར་ཆེན་པོ་ཞིག་བྱུང་དུས། འཕགས་པ་སྤྱན་རས་གཟིགས་ཀྱིས་ལྷ་ཆབ་བུམ་པ་བདུན་བཅུས་ཏེ། ལྷ་མོ་བདུན་ལ་གཏད་ནས། མཚོ་རྫིང་གཙང་བོ་རྣམས་སུ་བདུད་རྩི་གཏོར་བར་མངགས། ཉིན་དེའི་མཚན་མོ་གྲྭ་བཙུན་ཡོངས་ཀྱི་རྨི་ལམ་དུ་སྐམ་རིད་ལུས་མཚག་ངན་པའི་བུད་མེད་ཅིག་ཡར་ཀླུང་གཙང་བོར་ཆབ་ཞུགས་བྱས་ཏེ། ཕྱིར་ཐོན་རྗེས། ལང་ཚོ་དར་ལ་བབ་པའི་གཞོན་ནུ་མ་ཞིག་དུ་གྱུར་བར་རྨིས་ལ། ཉིན་དེར་སྐར་མ་རི་ཥི་ཤར་བ་དུས་མཉམ་དུ་སོང་རྐྱེན། ཕྱིས་སུ་ཆབ་ཞུགས་དུས་སྟོན་འདི་དར་བའི་ངག་རྒྱུན་འདྲ་ཆགས་ཞིག་ཀྱང་བཤད་རྒྱུ་ཡོད་དོ། །

ངན་པ་དགུ་འཛོམས།

 དབུས་གཙང་གི་ས་ཁུལ་མང་ཆེ་བར་ལོ་ལྟར། བོད་ཟླ་བཅུ་གཅིག་པའི་ཚེས་དྲུག་གི་ཉིན་ཕྱེད་ནས་ཚེས་བདུན་གྱི་ཉིན་ཕྱེད་བར་ངན་པ་དགུ་འཛོམས་ཀྱི་དུས་སྐར་ལ་ཁེལ་བས། བོད་མི་རྣམས་ཀྱི་དུས་རྒྱུན་གྱི་འཚོ་བའི་ཁྲོད་བྱ་ལས་ཆེ་ཕྲ་གང་བྱེད་ཀྱང་། གཟའ་སྐར་འཕྲོད་སྦྱོར་ལ་བརྟགས་ཏེ་སྒྲུབ་སྲོལ་ཡོད། དཔེར་ན། གཅིག་གསུམ་མགྲོན་གྱི་གནམ་སྒོར་མགྲོན་བསུས་ན་གུད་པར་འགྱུར་བ་དང་། གཉིས་གསུམ་ཚོང་གི་གནམ་སྒོར་ཚོང་བྱས་ན་གོད་ཁ་འབྱུང་བ་དང་། གསུམ་གསུམ་བུ་ཆུང་གི་གནམ་སྒོར་བུ་ཆུང་བཙས་ན་བར་ཆད་དང་། བཞི་གསུམ་དམག་སྒོར་དམག་དྲངས་ན་དམག་ཉེས་དང་། ལྔ་གསུམ་གཉེན་སྒོར་གཉེན་བྱས་ན་འགྲས་པ་དང་། དྲུག་གསུམ་མཁར་གྱི་སྒོར་གྱོད་འོང་བ་དང་། བདུན་གསུམ་བག་མའི་སྒོར་བག་མ་བྱས་ན་ཡུགས་སར་འབབ་པ་དང་། བརྒྱད་གསུམ་དུར་སྒོ་དུར་བཏབ་ན་ངན་པ་དང་། དགུ་གསུམ་ཤིད་སྒོ་གཤིན་ལས་བྱས་ན་གྱོད་འོང་བ་དང་། ཟླ་རེའི་བོད་ཚེས ༢ ༨ ༡༤ ༢༠ ༢༦ བཅས་སྐར་མ་ཚུ་ཚགས་ལ་ཁེལ་ཚེ། རྟ་ཤི་ནོར་མེད་ཁ་མཆུ་འོང་བ་དང་། ཡང་། བོད་དབུས་གཙང་གི་ས་གནས་མང་ཆེ་བར་ལོ་ལྟར་བོད་ཟླ་བཅུ་གཅིག་པའི་ཚེས་དྲུག་གི་ཉིན་ཕྱེད་ནས་བདུན་གྱི་ཉིན་ཕྱེད་བར་ས་བདག་ངན་པ་དགུ་འཕྲད་པའི་དུས་ཚོད་ཡིན་པས། ངན་པ་དགུ་འཛོམས་ཟེར། ངན་པ་དགུ་འཛོམས་བརྩི་ཚུལ་ལ། ཁ་ཅིག ཚེ་ཐུང་བ། ནད་འོང་བ། མི་ཁས་ཉེན་པ། ནོར་ཟད་པ། དགྲ་སྡང་བ། འཇིགས་སྐྲག་འོང་བ། དོན་མི་འགྲུབ་པ། རྒྱལ་བོའི་བཀའ་ཆད་ཕོག་པ། བོར་སྟོར་བྱུང་བ་སྟེ་དགུ་ཟེར་ལ། ཉིན་དེར། རྒྱལ་བའི་བཀའ་མི་སྒྲོགས་པ་དང་། ཁ་སྨྲས་ལྒིང་གཞིའི་ཟས་མི་ཟ་བ། རྣམ་དཀར་གྱི་ལས་འཕར་མ་དང་། འཁྲུག་ལོང་མི་བྱེད་ཅིང་། ཁྱོད་ངན་པ་དགུ་འཛོམས་ཡིན་ན། ང་བཟང་བོ་བཅུ་འཛོམས་ཡིན་ཞེས། དེའི་ལྡོག་ཕྱོགས་དགའ་ཉེ་སྤུན་མཆེད་མགྲོན་འབོད་བཏང་སྟེ། ཐུགས་སྤྲོ་སྤྲོའི་གསོལ་སྟོན་གནང་བའི་དུས་སྟོན་ལ་རོལ་ལོ། །

བོད་ཀྱི་དུས་ཆེན་འགའ།

བོད་མི་རིགས་ལ་མཚོནའང་། མི་རིགས་གཞན་དག་བཞིན། ལོ་རྒྱུས་ཀྱི་ཆུ་རྒྱུན་རིང་མོའི་ཁྲོད་འཚོ་གནས་དང་སྲོལ་རྒྱུན། ཆོས་ལུགས་སོགས་ཀྱི་འཕེལ་རིམ་ཁྲོད། དམ་པ་ལྷ་ཆོས་དང་། འཇིག་རྟེན་མི་ཆོས་གཉིས་ཀའི་དུས་ཆེན་ལ་རོལ་སྟངས་སྣ་ཚོགས་ཤིག་བྱུང་ཡོད་པ་ལས། གལ་ཆེ་བ་འགའ་གོང་དུ་བརྗོད་ཟིན་ལ། འདིར་དེ་དག་ལ་མ་འདུས་པ་ཆེ་ལོང་ཙམ་བརྗོད་ན།

བོད་ཟླ་དང་བོའི་ཚེས་གཅིག་ལ་མདོ་དབུས་ཁམས་གསུམ་གྱིས་ལོ་སར﹙ལི་ཐོ་བརྩི་ལུགས་མི་འདྲ﹚གྱི་དགའ་སྟོན་ལ་རོལ། དེ་ཡང་། ལུང་བ་རེ་ལ་ཆུ་རེ་དང་། ས་ཆ་རེ་ལ་དཔེ་རེ། ཞེས་པ་བཞིན། གཅིག་གྱུར་གྱི་ལོ་སར་ལུགས་ཤིག་བརྗོད་ཐབས་བྲལ་ཡང་། སྤྱི་བམ་པ་ནི། གྲོ་སོ་ཕྱེ་མར་སོགས་མཆོད་ཤོམ་སྤྲོ་ཞིང་། དཀར་གསུམ་མངར་གསུམ་དང་། ཤ་མར་ཐུད་གསུམ་སོགས་སྡེར་ཁ་བསྒྲིགས། སོ་སོར་འགྲོན་འབོད་བཏང་སྟེ། དགའ་སྟོན་སྣ་ཚོགས་སྤེལ་ནས། གླུ་ལེན་གར་རྩེད་དང་། ཞལ་ཟས་སྣ་ཚོགས་ལ་རོལ་བ་སྟེ། ཁ་དཔེར། ཟས་ཞིམ་པོ་རྒྱལ་ལོ་ཚེས་གཅིག་ཟ། །གོས་ཡག་པ་དྲུག་པའི་ཀླུ་རོལ་གོན་ཟེར་རོ། །

དབུས་གཙང་ལ་མཚོན་ན་བོད་ཟླ་བརྩི་གཞིར་བཟུང་སྟེ།

ཟླ་དང་བོའི་ཚེས་བཅོ་ལྔར་མཆོད་པ།

ཟླ་དང་བོའི་ཚེསབཅོ་བརྒྱད་ལ་ཐོག་མདའ།

ཟླ་དང་བོའི་ཚེས་ཉེར་གཉིས་ལ་ཀླུ་སྦུག་སྒར་སྒྲིག

ཟླ་དང་བོའི་ཚེས་ཉེར་གསུམ་ལ་གྲྭ་བཞི་རྩིས་བཤེར།

ཟླ་དང་བོའི་ཚེས་ཉེར་བཞི་ལ་སྨོན་ལམ་གཏོར་རྒྱག

ཟླ་དང་བོའི་ཚེས་ཉེར་ལྔར་ཇོ་བོ་རགས་གསོ།

ཟླ་དང་བོའི་ཉེར་ལྔ་ལ་བྱམས་པ་གདན་འདྲེན།

ཟླ་དང་བོའི་ཚེས་ཉེར་དྲུག་ལ་རྫོང་རྒྱབ་ཞར་འཕེན།

ཟླ་དང་བོའི་ཉེར་བདུན་ལ་གནམ་མདའ།

ཟླ་གཉིས་པའི་ཚེས་གསུམ་ལ་དགའ་ལྡན་སྒྲུབ་མཆོད།

ཟླ་གཉིས་པའི་ཚེས་བཅོ་བརྒྱད་ལ་ཚོགས་མཆོད་ཆེན་མོ།

ཟླ་གཉིས་པའི་ཚེས་ཉེར་དགུར་གླུད་གཏོང་།

ཟླ་གཉིས་པའི་ཚེས་སུམ་ཅུར་ཚོགས་མཆོད་སེར་སྦྲེང་།

ཟླ་གསུམ་པའི་ཚེས་བརྒྱད་ཉིན་བརྒྱད་གཏོར་མཛད་སྒོ།

ཟླ་བཞི་བའི་ཚེས་བཟང་གང་རུང་ཞིག་ལ་ཆིབས་བསྒྱུར་ཆེན་མོ།

ཟླ་བཞི་བའི་ཚེས་ཉེར་བཞི་ལ་བཞི་མཆོད།

ཟླ་བཞི་བའི་ཚེས་བཅོ་ལྔ་ལ་སྤོ་ཆུ་ལུང་དྲུག་དུས་ཆེན།

ཟླ་ལྔ་བའི་ཚེས་ལྔ་ལ་གོང་ས་མཆོག་གི་འཁྲུངས་སྐར་དུས་ཆེན།

ཟླ་དྲུག་པའི་ཚེས་བཅོ་ལྔར་དགའ་ལྡན་སིའུ་ཐང་།

ཡང་དྲུག་པའི་བཅོ་ལྔ་ལ་རྫ་ཁྲོམ་དུས་ཆེན།

ཟླ་བདུན་པའི་ཚེས་བརྒྱད་ལ་འབྲས་སྤུངས་ཀླུ་འབུམ།

ཟླ་བརྒྱད་པའི་ནང་གཟིམ་ཆུང་ཆབ་ཞུགས་དང་སྐར་མ་རི་ཥི།

ཟླ་བཅུ་བའི་ནང་དཔལ་ལྷའི་རི་ཁྲོད།

ཟླ་བཅུ་གཅིག་པའི་ཚེས་དྲུག་ལ་ངན་པ་དགུ་འཛོམས།

ཟླ་བཅུ་གཉིས་པའི་ཚེས་ཉེར་བདུན་ལ་སེར་བ་ཕུར་མཇལ།

ཟླ་བཅུ་གཉིས་པའི་ཚེས་ཉེར་དགུ་ལ་རྩེ་དགུ་གཏོར།

ཟླ་བཅུ་གཉིས་པའི་ཚེས་སུམ་ཅུ་ལ་ར་ཆེ་སྨོན་ལམ།

གོང་གསལ་དུས་ཆེན་འདི་དག་གི་ཚོགས་ཡུལ་དང་དགོས་པ། གསལ་བཤད་བཅས་ཞིབ་ཕྲ་ཤེས་འདོད་པ་དག་གིས་དུང་དཀར་ཚིག་མཛོད་ལས་ཀ་ཕྲེང་གི་གོ་རིམ་ལྟར་བཀོད་ཡོད་པ་དང་། ཀྲུང་གོའི་ལོ་རྒྱུས་རིག་གནས་གྲགས་ཅན་གྲོང་ཁྱེར་ལྷ་ས་ཞེས་པའི་ཤོག་གྲངས ༤༨༢ ནས ༥༢༠ བར་གཟིགས།

ཨ་མདོ་མཚོན་ན།

གསུམ་པའི་བཅོ་ལྔ་ལ་དུས་འཁོར་སྒྲུབ་ཆེན།

བཞི་བའི་ཚེས་བརྒྱད་ནས་བཞི་བའི་སྨྱུང་གནས།

བདུན་པའི་རིགས་གྲྭ་སོགས་དུས་ཆེན་གཏོང་སྲོལ་མང་དུ་ཡོད་ཀྱང་འདིར་དེ་ཙམ་གྱིས་འཐུས་པར་བྱའོ། །

དུས་ཆེན་ཁག་གི་དགེ་བའི་འགྱུར་ཁྱད།

མདོ་རྒྱ་ཆེར་རོལ་བ་ལས། བསོད་ནམས་རྣམ་སྨིན་བདེ་སྟེར་སྡུག་བསྔལ་ཐམས་ཅད་སེལ། །བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །ཅེས་པ་ལྟར། རང་ཅག་མིའོ་ཅོག་ནི་བདེ་བ་འདོད་ཅིང་། སྡུག་བསྔལ་མི་འདོད་པ་གཞི་མཐུན་དུ་གྲུབ་པས། དེ་དོན་ཐོག་ཏུ་སྨིན་པ་ལ། བསོད་ནམས་བསགས་པ་ལ་རག་ལས། དེ་ཡང་། བསོད་ནམས་བསགས་པའི་ཐབས་ཚུལ་ཀྱི་རྟེན་འབྲེལ་འགྲིག་ན། འབད་པ་ཆུང་ངུའི་བསོད་ནམས་ཀྱིས་རླབས་ཆེན་གྱི་འབྲས་བུ་མངོན་དུ་མཛད་ཚུལ་མང་དུ་ཡོད། དེ་ཡང་། ཡོན་ཏན་གྱི་ཞིང་ས་དམ་པ་སངས་རྒྱས་བྱང་སེམས་དང་། དྲིན་ཆེ་བའི་ཞིང་ས་དམ་པ་ཕ་མ། ཉམ་ཐག་པའི་ཞིང་ས་དམ་པ་དབུལ་བོ་དང་ནད་པ་དང་། བསམ་པ་བྱང་ཆུབ་ཀྱི་སེམས། སྦྱོར་བ་ཁེངས་དྲེགས་དང་ཁྱད་གསོད་མེད་པར་གུས་ཞབས་དང་བཅས་ཏེ་རང་གི་ལག་བསྟར་ནས་བསྒྲུབས་པ། དུས་ཆེན་གྱི་ཁྱད་པར་ལ་ལྟོས་པ་སྟེ། དཔེར་ན། ཞིང་ས་གཤིན་པོ་ཞིག་ལ་དུས་སུ་སྨིན་ཚེ་ལུས་སེམས་གཉིས་ཆར་ནས་འབད་པ་ཆེན་པོས་ས་བོན་བཏབ་ན། གྲུབ་འབྲས་གཞན་ལས་ཁྱད་འཕགས་ཐོན་པ་ལྟ་བུ་ཡིན། དེ་བས་འདིར་དགེ་རྩ་གང་བྱས་དུས་འགྱུར་ལ་བརྟེན་ཏེ་ཕན་ཡོན་ཆེ་བ་བརྗོད་ན།

ཆུ་མགོ་གངས་དང་། ཆོས་རྒྱུན་སངས་རྒྱས་ལ་ཐུག ཅེས་པ་ལྟར། དུས་ཆེན་ལ་དགེ་རྩ་འགྱུར་ཁྱད་ཆེ་བ་འདི་གང་བྱུང་བྱུང་ལབ་པ་མ་ཡིན་པར་མདོ་རྒྱུད་དང་། སྐྱེས་ཆེན་དམ་པའི་བསྟན་བཅོས་ལས་གསུངས་ཡོད། དེ་ཡང་། མཁའ་འགྲོ་རྒྱ་མཚོ་ལས། ཚེས་བརྒྱད་དང་ནི་ཁྱད་པར་དུ། །བཅོ་ལྔ་དང་ནི་ཚེས་བཅུ་བཞིར། །གྲུབ་འདོད་རྣལ་འབྱོར་རྣམས་ཀྱིས་ནི། །འབད་པས་གཏོར་མ་སྦྱིན་པར་བྱ། །ཞེས་དང་། སྤྱི་རྒྱུད་ལས། ཉི་ཟླ་གཟའ་ཡིས་ཟིན་པ་དང་། །ཡ་མཚན་ཆེ་ལྟས་བྱུང་བ་དང་། །ཆོ་འཕྲུལ་གྱི་ནི་ཟླ་བ་ལ། །མཁས་པས་དཀྱིལ་འཁོར་འབྲི་བར་བྱ། །ཞེས་དང་། འདུལ་བ་མདོ་རྩ་ལས། དེ་ལ་དུས་སྟོན་བྱའོ། །བལྟམས་པ་དང་། གཙུག་ཕུད་དང་། དབུ་སྐྲ་དང་། བྱང་ཆུབ་པའི་དུས་སྟོན་ཀྱང་ངོ་། །གསུངས་པ་ལྟར། དཔེར་ན། སྟོན་པ་རབ་ཏུ་བྱུང་དུས་དབུ་སྐྲ་བསིལ་ཚེ་བརྒྱ་བྱིན་གྱིས་ལྷ་ཡུལ་དུ་འཁྱེར་ནས་དུས་སྟོན་བྱས་པ་དང་། ཡང་། སྟོན་པས་དཀའ་སྤྱད་གྲུབ་ནས་ཁ་ཟས་རགས་པ་གསོལ་བའི་ཡོལ་གོ་ཀླུའི་རྒྱལ་བོ་རྒྱ་མཚོས་མཆོད་རྟེན་དུ་འཁྱེར་སྐབས། བརྒྱ་བྱིན་མཁའ་ལྡིང་དུ་སྤྲུལ་ནས་འཕྲོག་སྟེ་སུམ་ཅུ་རྩ་གསུམ་དུ་འཁྱེར་ནས་ཡོལ་གོའི་དུས་སྟོན་བྱས་པ་དང་། པཎ་ཆེན་ཤཱཀྱ་ཤྲྀས། མངོན་བྱང་ཆུབ་དང་ཆོས་འཁོར་བསྐོར། །ལྷ་བབས་ཆོ་འཕྲུལ་ཆེན་པོ་སྟེ། །དད་ལྡན་བསོད་ནམས་གསོག་བྱེད་པའི། །ཁྱད་པར་ཅན་གྱི་དུས་ཆེན་ཡིན། ཞེས་པ་ལྟར། སྟོན་པ་མྱ་ངན་ལས་འདས་པའི་ཚེ། རྩྭ་ཅན་དང་། སྡིག་པ་ཅན་གྱི་གྱད། ཡུལ་རྟོག་པ་གཡོ་བ། རྒྱལ་བོ་མ་སྐྱེས་དགྲ་སོགས་ཀྱིས་སོ་སོའི་ཡུལ་དུ་དུས་མཆོད་བཙུགས་པ་སོགས་འདུལ་བ་རྒྱ་ཆེར་རོལ་བ་རྣམས་ལས་བཀའ་ཇི་སྙེད་ཅིག་བསྩལ་བ་ནི་དུས་ཆེན་གྱི་ཁུངས་དང་བྱུང་ཚུལ་ལོ། །

ཚུལ་འདི་ལ་དགོངས་ནས་བྱང་ཆུབ་ལམ་རིམ་ལས་ཀྱང་། དུས་རྒྱུན་པར་ནི་དེ་དག་ཅི་རིགས་པར་བྱ་ལ། དུས་བཟང་དང་དུས་ཆེན་གྱི་ཚེ་ན་རང་གི་ནུས་པ་དང་བསྟུན་པའི་མཆོད་པ་བཟང་བོ་རེ་བྱའོ། །གསུངས་སོ། །

བདག་ཅག་གི་སྟོན་པ་བཅོམ་ལྡན་འདས་ཀྱི་དུས་ཆེན་རྣམ་བཞི་ནི། ༡ བོད་ཟླ་དང་བོའི་ཚེས་གཅིག་ནས་བཅོ་ལྔ་བར་ཆོ་འཕྲུལ་བསྟན་པའི་དུས་ཆེན། ༢ བཞི་བའི་ཚེས་བདུན་ལ་སྐུ་བལྟམས་པའི་དུས་ཆེན། ༣ ཚེས་བཅོ་ལྔ་ཉིན་ལྷུམས་སུ་ཞུགས་པ་དང་། དེའི་སྐྱ་རེངས་འཆར་ཀར་སངས་རྒྱས་ཀྱི་གོ་འཕང་འཐོབ་པ། སྲོད་ཡོལ་ལ་མྱ་ངན་ལས་འདས་པ་སྟེ་དུས་ཆེན་སུམ་འཛོམས﹙ཡང་ན་བདུད་བཏུལ་བ། བྱང་ཆུབ་བརྙེས་པ། མྱ་ངན་ལས་འདས་པའོ། །﹚ཡིན། ༤ དྲུག་པའི་ཚེས་བཞི་ལ་བདེན་བཞིའི་ཆོས་འཁོར་བསྐོར་བའི་དུས། ༥ དགུ་བའི་ཚེས་བཅོ་ལྔ་ལ་ཞལ་གྱིས་བཞེས་པ་དང་། ཚེས་ཉེར་གཉིས་ལ་དངོས་སུ་ལྷ་ལས་བབས་པའི་དུས་ཆེན་ཡིན། དུས་ཆེན་འདི་དག་ལ་དགེ་བའི་འགྱུར་ཁྱད་ནི། འདུལ་བ་ལུང་རིགས་གཏེར་མཛོད་ལས། དེ་ལྟར་དུས་ཆེན་རྣམ་བཞི་ལ། །དགེ་བ་ཅུང་ཟད་བགྱིས་པ་རྣམས། །ས་ཡ་ཕྲག་བརྒྱའི་འགྱུར་དུ་གསུངས། །དེ་དག་ཞིབ་ཏུ་རྩིས་པ་ན། །ལྷག་བསམ་དག་པས་ནས་ཕུལ་གང་། །སྦྱིན་པ་བཏང་ན་ནས་ཕུལ་དེ། །ས་ཡ་ཕྲག་བརྒྱར་འགྱུར་བའི་ཕྱིར། །ནས་ཁལ་བརྒྱད་འབུམ་སུམ་ཁྲི་དང་། །སུམ་སྟོང་སུམ་བརྒྱ་སུམ་ཅུ་གསུམ། །བྲེ་དྲུག་ཕུལ་བཞིའི་འབྲས་བུ་ནི། །འབྱུང་བ་རྒྱལ་བ་ཉིད་ཀྱིས་གསུངས། །གསུངས་པ་དང་།

དེ་ལས་གཞན། སའི་སྙིང་བོས་ཞུས་པའི་མདོ་ལས། ཚེས་གཅིག་དང་། བརྒྱད། བཅུ་བཞི། བཅོ་ལྔ། ཉེར་གཅིག ཉེར་གསུམ། ཉེར་བཞི། ཉེར་བརྒྱད། ཉེར་དགུ། གནམ་སྟོང་བཅས་དུས་བཅུ་བོ་ལ་ལྷ་དང་གཤིན་རྗེ་འཁོར་བཅས་འཇིག་རྟེན་ན་ཉུལ་དུ་མཆི་བས། གོང་གི་ཚེས་གྲངས་དང་མཐུན་པར་རིམ་བཞིན་སངས་རྒྱས་ཏིང་འཛིན་འོད་ཀྱི་རྒྱལ་བོ། སྨན་བླ། སངས་རྒྱས་སྟོང་རྩ་གཉིས། སྣང་བ་མཐའ་ཡས། སྤྱན་རས་གཟིགས། རྣམ་པར་སྣང་མཛད། སའི་སྙིང་བོ། སྣང་བ་མཐའ་ཡས། སྨན་བླ། སངས་རྒྱས་ཤཱཀྱ་ཐུབ་པ་བཅས་ཀྱི་དུས་ཆེན་ཡིན་པས་དེའི་ཉིན་སངས་རྒྱས་སོ་སོའི་མཚན་ནས་བརྗོད་པ་དང་། ཕྱག་འཚལ་བ་སོགས་བྱས་ན་སྡིག་པ་བྱང་ཞིང་དགེ་བ་གང་བྱས་འགྱུར་ཁྱད་བསམ་གྱིས་མི་ཁྱབ་པ་ཡོད་པར་གསུངས།

ཡང་། དུས་ཆེན་དྲུག་ནི། བཅོ་ལྔ། གནམ་གང། ཚེས་བརྒྱད། ཉེར་དགུ། ཡར་ངོའི་ཚེས་བཅུ། མར་ངོའི་ཉེར་ལྔ་དང་།

ཡང་། དུས་བཟང་བཞི་ནི། ཟླ་བ་བྱུང་ངོ་ཅོག་གི་ཚེས་བརྒྱད་སྨན་བླའི་དུས་ཆེན། ཚེས་བཅུ་མཁའ་འགྲོའི་དུས་ཆེན། ཚེས་བཅོ་ལྔ་སངས་རྒྱས་དུས་ཆེན། གནམ་གང་སངས་རྒྱས་འོད་དཔག་མེད་ཀྱི་དུས་ཆེན་ནོ། །

ཡང་། ཉ་སྟོང་བརྒྱད་གསུམ་ལ་དུས་བཟང་གསུམ་དུ་གྲགས་ཆེ་བ་དང་།

ཡང་། དབྱར་དགུན་གྱི་ཉི་ལྡོག་སྐབས་དགེ་སྡིག་གང་བྱས་བྱེ་བ་འབུམ་འགྱུར་དང་། ཉི་ཟླ་གཟའ་འཛིན་སྐབས་ཀྱང་དགེ་སྡིག་གང་བྱས་ཀྱི་འགྱུར་ཁྱད་ནི། ཉི་འཛིན་སྐབས་དགེ་བ་འབུམ་འགྱུར་དང་། ཟླ་འཛིན་སྐབས་བྱེ་བ་བདུན་འགྱུར་ཏེ། དུས་ཆེན་བཞི་དང་གཟའ་འཛིན་འཛོམས་ཚེ་དེ་བས་ཀྱང་བསོད་ནམས་ཁྱད་པར་དུ་འཕགས་པར་གསུངས་སོ། །

གཞན་ཡང་། འཕགས་བོད་མཁས་གྲུབ་དག་དང་། ཆོས་སྡེ་འདེབས་མཁན། རང་གི་ཆོས་འབྲེལ་དངོས་འཐོབ་ཀྱི་བླ་མ་སྐུ་བལྟམས་པ། མཛད་ཆེན་སྐྱོང་བ་སོགས་དུས་ཆེན་ཁག་ཉེ་བར་བཟུང་ནས་སྒྲུབ་ཅིང་མཆོད་པ་སོགས་ཚོགས་རླབས་ཆེན་སྒྲུབ་ན་དགེ་བ་འགྱུར་ཁྱད་ཆེ་སྟེ། དུས་འཁོར་རྩ་རྒྱུད་ལས། དེ་བཞིན་མོས་གུས་ལྡན་པའི་སློབ་མ་ཡིས། །བླ་མ་འདས་ནས་གདུང་བས་མཆོད་བྱས་ན། །ཐུགས་ཀྱི་དགོངས་པ་གོང་དུ་ཡོངས་རྫོགས་ཤིང་། །སློབ་མས་བླ་མའི་རྣམ་ཐར་སྙོགས་པར་འགྱུར། །བླ་མ་འདས་པའི་ལོ་ཟླ་ཚེས་གྲངས་ནས། །ངེས་པར་བཟུང་སྟེ་མཆོད་པ་བྱས་གྱུར་ན། །བསྐལ་བ་བྱེ་བར་བསགས་པའི་སྡིག་བཅོམ་ནས། །ཤིན་ཏུ་མི་ཟད་གཤིན་རྗེ་གྲོང་ལས་ཐར། །སྟོང་གསུམ་སྐྱེ་བོ་མིག་བྲལ་སྲོག་ཉམས་ལ། །མིག་སྲོག་བྱིན་ཀྱང་དེ་ཡིས་དཔེར་མི་ཕོད། །དེ་སྙེད་སྐྱེ་བོས་དགྲ་བཅོམ་ལ་བཀོད་ནས། །བསྐལ་བར་མཆོད་པའི་དགེ་བས་དཔེར་མི་ཕོད། །བསྐལ་བ་གྲངས་མེད་བསགས་པའི་སྒྲིབ་པ་ཡང་། །མུན་ལ་ཉི་མ་ཇི་བཞིན་མ་ལུས་སེལ། །ཞེས་དང་། བླ་མ་ཉག་གཅིག་མཉེས་བྱས་ན། །བསྐལ་བ་བྱེ་བ་ཐེར་འབུམ་དུ། །བྱས་དང་བྱས་ཀུན་ཡི་རང་བའི། །སྡིག་ཆེན་བཅོམ་ནས་སངས་རྒྱས་འགྱུར། །ཞེས་དང་། བླ་མ་འཕགས་ཚུལ་ཡང་། ས་སྐྱ་པཎྚི་ཏས། ཉི་མའི་འོད་ཟེར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་འཕྲིན་ལས་ཀྱང་། །བླ་མ་མེད་པར་འབྱུང་མི་འགྱུར། །ཞེས་པས་རྟོགས་ནུས་སོ། །

གཞན་ཡང་། ཨ་ཀྱཱ་ཡོངས་འཛིན་བློ་བཟང་དོན་འགྲུབ་ཀྱིས། ས་ལུག་ས་གའི་བཅོ་ལྔ་ལ། །སྒྱུ་འཕྲུལ་ལྷ་མོའི་ལྷུམས་སུ་ཞུགས། །ཆུ་སྟོད་བཤོལ་བཅས་ལྕགས་སྤྲེལ་གྱི། །མཆུ་ཟླའི་ཡར་ཚེས་བཅོ་ལྔར་བལྟམས། །ཉི་ཤུ་རྩ་དགུ་ཁབ་ཏུ་བཞུགས། །ས་བྱའི་ས་གའི་ཚེས་བརྒྱད་ལ། །ཁབ་ཏུ་བྱུང་སྟེ་རབ་བྱུང་མཛད། །ལོ་དྲུག་དཀའ་བ་སྤྱད་པ་ན། །ཤིང་ཕོ་རྟ་ཡི་ས་གའི་ཚེས། །བཅོ་ལྔའི་ཐོ་རངས་རྫོགས་སངས་རྒྱས། །བདུན་ཕྲག་བདུན་མཐར་ཆུ་སྟོད་ཀྱི། །ཡར་ཚེས་བཞི་ལ་ཆོས་འཁོར་བསྐོར། །ཞེ་དྲུག་གདུལ་བྱའི་དོན་མཛད་ནས། །གྱ་གཅིག་བཞེས་ཚེ་ལྕགས་འབྲུག་གི། ས་གའི་ཉ་ལ་མྱ་ངན་འདས། །དེས་ན་ངོ་མཚར་མཛད་པ་ཡི། །དུས་ཆེན་རྣམས་ནི་འདི་ལྟ་སྟེ། །གཉིས་པའི་ཡར་ངོ་ཆོ་འཕྲུལ་ཆེ། །བཞི་བའི་བཅོ་ལྔ་རྫོགས་སངས་རྒྱས། །དྲུག་པའི་བཞི་ལ་ཆོས་འཁོར་བསྐོར། །དགུ་བའི་ཉེར་གཉིས་ལྷ་ལས་བབས། །ཡོངས་གྲགས་དུས་ཆེན་རྣམ་པ་བཞི། །ས་གའི་ཡར་ཚེས་བཅོ་ལྔ་ལ། །ལྷུམས་ཞུགས་མངོན་པར་བྱང་ཆུབ་དང་། །མྱ་ངན་འདས་པའི་མཛད་པ་སྟེ། །རྣམ་གསུམ་འཛོམས་པའི་དུས་ཆེན་ཡིན། །མཆུ་ཟླའི་དཀར་ཚེས་བཅོ་ལྔ་ལ། །ལུམ་བིའི་ཚལ་དུ་སྐུ་བལྟམས་དུས། །ས་གའི་ཡར་ངོའི་ཚེས་བརྒྱད་ལ། །རབ་ཏུ་བྱུང་བའི་དུས་ཆེན་ཡིན། །ཞེས་གསུངས་སོ། །

དུས་ཆེན་དེ་དག་སངས་རྒྱས་བཅོམ་ལྡན་འདས་ཁོང་རང་ཉིད་ཀྱིས་བྱིན་གྱིས་བརླབས་པའི་དུས་ཁྱད་པར་ཅན་ཡིན་སྟབས། དགེ་བ་གང་བྱས་ཐམས་ཅད་ཕན་ཡོན་ཆེ་ལ། དུས་བཟང་དུ་དགེ་བ་འཕེལ་འགྱུར་ཆེ་བ་དེ་བཞིན་དུ་སྡིག་པ་བྱས་ནའང་ཉེས་པ་ལྷག་པར་ཆེ་བས་གང་ཐུབ་ཀྱིས་མི་དགེ་བའི་ལས་ལ་འཛེམ་དགོས་སོ། །

གཞན་ཡང་། ཚོགས་ཀྱིས་འགྱུར་སྟོབས་ནི། སྒྲུབ་པ་པོ་བརྒྱ་རྩ་ལྷན་ཅིག་ཏུ་འདུས་ཏེ་སྒྲུབ་ན། སྒྲུབ་པ་པོའི་གྲངས་སྙེད་ཀྱི་དགེ་རྩ་རེ་རེ་ལ་འཐོབ་པར་གསུངས་པ་དང་།

སྔགས་ཀྱིས་འགྱུར་སྟོབས་ནི། ཨོཾ་སྨྲ་ར་སྨྲ་ར་བི་མ་ན་སྐ་ར་མ་ཧཱ་ཛ་བ་ཧཱུཾ། སྔགས་འདི་ལན་བདུན་བརྗོད་པས་ཉིན་ཞག་གཅིག་གི་དགེ་བ་གང་བྱས་སྟོང་འཕེལ་ལོ། །

ཨོཾ་སམྦྷ་ར་སམྦྷ་ར་བི་མ་ན་སཱ་ར་མ་ཧཱ་ཛ་ཝ་ཧཱུཾ། སྔགས་འདི་ཚར་གཅིག་བརྗོད་པས་སྔགས་གང་བཟླས་པ་དེ་བརྒྱ་སྟོང་དུ་འགྱུར་རོ། །

ཨོཾ་སྨྲ་ར་སྨྲ་ར་བི་མ་ན་སཱ་ར་མ་ཧཱ་ཛམྦྷ་ཡེ་སྭཱ་ཧཱ། སྔགས་འདི་ལན་བདུན་བརྗོད་པས་དགེ་བ་གང་བྱས་འབུམ་འགྱུར་རོ། །

བྷ་ར་སོ་བྷ་ར་བྷི་མ་ན་ས་ར་མ་ཧཱ་ཛམྦྷ་ཧཱུཾ་ཕཊ། སྔགས་འདི་ལན་གཅིག་བརྗོད་པས་དགེ་བ་གང་བྱས་འབུམ་འགྱུར་རོ། །

ཨོཾ་དྷ་རེ་དྷ་རེ་བྷནྦྷ་རེ་སྭཱ་ཧཱ། སྔགས་འདི་ལན་གཅིག་བརྗོད་པས་དགེ་བ་གང་བྱས་གྲངས་མེད་དོ། །

ཨོཾ་གྷ་དྷ་ར་བི་དྷ་ར་སྭཱ་ཧཱ། རཏྣ་ཤ་ཁོ་ན་ཏ་ཐཱ་ག་ཏཱ་ཡ་ཨ་པྲ་ཏི་ཧ་ཏ་ཤཱ་ས་ན་ནཾ། ཨོཾ་ཁ་ཁ། ཧཱུཾ་ཧཱུཾ། ཛྭ་ལ་ཛྭ་ལ། ཏིཥྠ་ཏིཥྠ། ཕཊ་ཕཊ་སྭ་ཧཱ། སྔགས་འདི་བཏོན་པས་འདོན་པ་འབུམ་འགྱུར་དུ་འགྲོ་བར་བསྔོ་བ་འཁོར་ལོའི་མདོ་ལས་གསུངས་སོ། །

ཨོཾ་སམྦྷ་ར་སམྦྷ་ར་བི་མ་ན་ས་ར་མ་ཧཱ་ཛ་བ་ཧཱུཾ། ཨོཾ་སྨྲ་ར་སྨ་ར་བི་མ་ན་སྐ་ར་མ་ཧཱ་ཛ་བ་ཧཱུཾ། སྔགས་འདི་ལན་བདུན་བཟླས་ན་དགེ་སྦྱོར་འབུམ་འགྱུར་དུ་འགྲོ་བར་ཡོངས་སུ་བསྔོ་བའི་འཁོར་ལོའི་མདོ་ལས་གསུངས་སོ། །

ཨོཾ་རུ་ཙི་ར་མ་ཎི་པྲ་ཝརྟ་ཡ་ཧཱུཾ། སྔགས་འདི་ལན་བདུན་བཟླས་ནས་ཕྲེང་བ་ལ་ཕུ་བཏབ་ན་དེ་བཞིན་གཤེགས་པའི་གསུངས་པའི་གསང་སྔགས་ཐམས་ཅད་བྱེ་བ་ཁྲག་ཁྲིག་བརྒྱ་སྟོང་དུ་མ་བཟླས་པར་འགྱུར་བ་ནོར་བུ་རྒྱས་པའི་གཞལ་མེད་ཁང་ལས་གསུངས་སོ། །

ཨོཾ་དྷུ་རུ་དྷུ་རུ་ཛ་ཡ་མུ་ཥེ་ཡེ་སྭཱ་ཧཱ། ཡང་ན། ཨོཾ་མ་ཎི་པདྨེ་ན་ར་དྷ་ཤ་ཧཱུཾ་སོགས་འགྱུར་སྔགས་ལ་བརྟེན་ཏེ་དགེ་རྩ་དུང་ཕྱུར་མང་བོ་འཕེལ་བ་དང་།

ཨོཾ་ན་མོ་མཛྙྲ་ཤྲཱི་ཡེ། ན་མ་སཱུ་ཤྲཱི་ཡེ། ན་མ་ཨུཏྟ་མ་ཤྲཱི་ཡེ་སྭཱ་ཧཱ། སྔགས་འདི་ལན་རེ་བརྗོད་ཅིང་རྐྱང་ཕྱག་ལན་གསུམ་འཚལ་ན། སྡེ་སྣོད་གསུམ་ལ་ཐོས་བསམ་སྒོམ་གསུམ་བྱས་པའི་བསོད་ནམས་འཐོབ་ཅིང་། ཉིན་རེ་རེ་བཞིན་དེ་ལྟར་བྱས་ན། ཚེ་འདི་ལ་མཐོང་ལམ་དང་། ནད་དང་གནོད་པས་མི་ཚུགས་ཤིང་ཕྱག་རེ་རེ་ཡང་སྟོང་འགྱུར་དུ་འགྲོ་བ་སོགས་ཕན་ཡོན་མཐའ་ཡས་པར་གསུངས་སོ། །

གཞན་ཡང་། གཟུངས་སྔགས་དུམ་རེ་བཏོན་པས་པོ་ཏི་མང་བོ་ཀློག་པའི་བྱིན་རླབས་འདྲ་བ་དང་། བསྐལ་བ་གྲངས་མེད་ཀྱི་སྡིག་པ་འབྱང་བ། མངོན་རྟོགས་ཁྱད་པར་ཅན་འཁྲུངས་པ་སོགས་ནང་བསྟན་ལྷ་ཚོགས་ཆེན་མོའི་ལས﹙ཤོག་གྲངས་༡༢༡༤༦ ནས ༡༢༦ བར﹚གཟུངས་སྔགས་བྱིན་ཅན་མང་བོ་གསུངས་ཡོད་དོ། །

ཏིང་འཛིན་གྱི་འགྱུར་སྟོབས་ནི། སྤྱིར་བཟླས་བརྗོད་གང་ཡིན་ངག་བཀྱལ་དང་མ་འདྲེས་ན་ཕན་ཡོན་ཆེ་ཞིང་། ལྷག་པར་དུ་ཏིང་འཛིན་གྱི་འགྱུར་སྟོབས་ནི། ཇི་སྐད་དུ། དག་དང་མ་དག་བརྒྱ་འགྱུར་ལ། །སྨྲ་བ་བཅད་ན་སྟོང་འགྱུར་ཡིན། །ཏིང་འཛིན་ཡོད་ན་འབུམ་འགྱུར་ཡིན། །ཞེས་པ་ལྟར། ཏིང་འཛིན་ལའང་སྤྲོས་བཅས་སྤྲོས་མེད་ཀྱི་ཚུལ་དུ་མ་ཞིག་ཡོད་པ་ལས། མདོར་ན་ལྷ་གང་ཡིན་གྱི་བསྐྱེད་རིམ་ཐུགས་སྲོག་ས་བོན་ལ་སྔགས་ཕྲེང་བསྐོར་བའི་འོད་ཟེར་གྱིས་རྒྱལ་བ་མཆོད་ཅིང་སེམས་ཅན་གྱི་དོན་བྱེད་པའི་སྤྲོ་བསྡུའི་དམིགས་གནད་དང་། སྣང་གྲགས་ལྷ་སྔགས་ཆོས་ཉིད་ཀྱི་འཁོར་ལོར་བཟླ་བ་གནད་ཀྱི་སྙིང་བོར་བཟུང་བས། གྲངས་མེད་དཔག་ཏུ་མེད་པར་འགྱུར་བ་རྡོ་རྗེ་ཐེག་པའི་ཁྱད་ཆོས་སོ། །

 

ལེའུ་བཅུ་གཉིས་པ། བཟོ་རིག་གི་སྐོར།
ལྷའི་དཀྱིལ་འཁོར།

ཤེས་བྱ་ཀུན་ཁྱབ་ལས། དོན་གཉེར་རྗེས་འཛིན་བཟོ་རིག་མཐའ་ཡས་ཀྱང་། །སྒོ་གསུམ་བཟོ་ལ་ཤེས་བྱ་ཀུན་ཀྱང་འདུ། །ཞེས་པ་ལྟར། བཟོ་རིག་ལ་ལུས་བཟོ། ཡིད་བཟོ། ངག་བཟོ་གསུམ་དུ་ཡོད་ལ། དེ་ཡང་ལུས་བཟོ་ནི་བྲིས་སོགས་ལག་པས་བཅོས་པའི་བཟོ་རིག་དང་། ངག་བཟོ་ནི་བཀའ་བསྟན་དང་། མིང་ཚིག་ཡི་གེའི་བརྗོད་པ་གདངས་དབྱངས་སུ་གྱེར་བ་ཐམས་ཅད་དང་། ཡིད་བཟོ་ནི་ཐོས་བསམ་སྒོམ་གསུམ་དང་ས་བཅུ་ལམ་ལྔའི་རྣམ་བཞག་ཡོད་ཚད་དོ། །འདིར་བཤད་པ་ནི་བྲིས་འབུར་སོགས་ཀྱི་ལུས་བཟོའོ། །

སྐབས་སུ་བབ་པ་དཀྱིལ་འཁོར་ཞེས་པ་ལྷ་གཙོ་འཁོར་རྟེན་དང་བརྟེན་པའི་བཀོད་པ་སྟེ། རྒྱལ་བ་རྡོ་རྗེ་འཆང་གིས་གདུལ་བྱ་དང་འཚམ་པར་རྒྱུད་དེ་དང་དེ་གསུང་སྐབས། ལྷ་དེ་དང་དེའི་དཀྱིལ་འཁོར་གྱི་བཀོད་པ་དངོས་སུ་སྤྲུལ་ཏེ་དབང་སྐུར་ཞིང་རྒྱུད་བསྟན་པ་དེ་ལ་ཟེར་ཏེ། བཀོད་པ་ལྷའི་འཁོར་ལོ་མ་ལུས་པ་རྫོགས་པར་སྣང་བ་ནི་དཀྱིལ་འཁོར་གྱི་ངོ་བོར་གསུངས། སྤྱིར་དཀྱིལ་འཁོར་གྱི་རྣམ་བཞག་ནི། ས་ཐོབ་འཕགས་པ་ཁོ་ནའི་སྤྱོད་ཡུལ་ཏེ། སོ་སྐྱེས་རྣམས་ཀྱིས་བློ་ཡུལ་ལས་འདས་པས། དེའི་རྣམ་བཞག་ནི་འདི་ཙམ་ཞེས་འཇོག་དཀའ་བ་ཞིག་ཡིན་ཡང་། ལོགས་པར་མི་སྒྲུབ་པའི་ཕྱིར། སམྦུ་ཊི་ལས། བཅོས་མ་ཕྱིའི་དཀྱིལ་འཁོར་དང་། གྲུབ་པ་ནང་གི་དཀྱིལ་འཁོར་གཉིས་སུ་གསུངས་པ་དང་། མངོན་བརྗོད་བླ་མ་ལས། ཡི་གེའི་དཀྱིལ་འཁོར་དང་བོ་སྟེ། །གཉིས་པ་མཚན་མའི་དཀྱིལ་འཁོར་ཡིན། །ལས་ཀྱི་ཕྱག་རྒྱ་གསུམ་པ་སྟེ། །གཟུགས་བརྙན་འགོད་པ་བཞི་བའོ། །མེ་ཏོག་བཀྲམས་པ་ལྔ་བ་སྟེ། །དྲུག་པ་ཚོགས་ཀྱི་དཀྱིལ་འཁོར་རོ། །དཀྱིལ་འཁོར་འདི་དག་བྲིས་ནས་ནི། །རྟག་ཏུ་སྒྲུབ་ཞིང་མཆོད་པར་བྱ། །ཞེས་དྲུག་ཏུ་བཤད་པ་དང་། ཡང་། འདུས་པ་ཆེན་པོའི་མདོ་ལྟར་ན། རང་བཞིན་དང། ཏིང་འཛིན། གཟུགས་བརྙན་དང་ཚོགས་དཀྱིལ་གྱི་དཀྱིལ་འཁོར་བཞི་སྟེ། རང་བཞིན་གྱི་དཀྱིལ་འཁོར་ནི། དབྱིངས་སྤྲོས་བྲལ་ཀྱི་ཡེ་ཤེས་ཇི་བཞིན་པའི་དཀྱིལ་འཁོར་དང་། ཏིང་འཛིན་དཀྱིལ་འཁོར་ནི། རང་བཞིན་དཀྱིལ་འཁོར་དང་རྗེས་སུ་མཐུན་པར་སྒོམ་པ་ཞིག་ཡིན། གཟུགས་བརྙན་དཀྱིལ་འཁོར་ནི། རས་སམ་གྲོ་ག ཡང་ན། ཤིང་ཤུན་དང་ཏ་ལའི་ལོ་མ། དུར་ཁྲོད་ཀྱི་རུས་པ་སོགས་ལ་ཕྱག་རྒྱའི་གཟུགས་སུ་བྲིས་པ་ཞིག་ཡིན། ཚོགས་ཀྱི་དཀྱིལ་འཁོར་ནི། ཞི་ཁྲོའི་ལྷ་ཚོགས་ཚོམ་བུའི་དཀྱིལ་འཁོར་རྣམས་ཡིན་ནོ། །ཡང་། འགའ་ཞིག་གིས། རས་བྲིས། རྡུལ་ཚོན། བསམ་གཏན། ལུས་དཀྱིལ། བྷ་ག་ཀུན་རྫོབ། བྱང་སེམས། དོན་དམ་བྱང་སེམས་ཀྱི་དཀྱིལ་འཁོར་སྟེ་བདུན་དུ་བཤད་པ་སོགས་གསུངས་ཚུལ་གཞན་ཡང་མང་།

༡ དཀྱིལ་འཁོར་གྱི་རྣམ་གྲངས། རྡོ་ཕྲེང་ནས་བཤད་པའི་དཀྱིལ་འཁོར་ཞེ་གཉིས། མི་ཏྲ་ཛོ་ཀི་ནས་བརྒྱུད་པའི་མི་ཏྲའི་དཀྱིལ་འཁོར་བརྒྱ་དང་བརྒྱད། དཀྱིལ་ཆོག་ནོར་ཕྲེང་ནས་བཤད་པའི་ཟུར་བཀའི་དཀྱིལ་འཁོར་མི་འདྲ་བ་རེ་དྲུག་དང་། གཞན་ཡང་། ཞང་ཀུན་དགའ་དོན་འགྲུབ་ཀྱིས་རྣལ་འབྱོར་རྒྱུད་ཀྱི་གཞལ་ཡས་ཁང་བཞེངས་སྐབས། བུ་སྟོན་གྱིས་ཐུགས་བཀོད་མཛད་དེ། རྩ་རྒྱུད་ཀྱི་དཀྱིལ་འཁོར་ཉིས་བརྒྱ་བཅུ་གསུམ། བཤད་རྒྱུད་ཀྱི་དཀྱིལ་འཁོར་བརྒྱ་ཉེར་དགུ། དཔལ་མཆོག་གི་དཀྱིལ་འཁོར་བརྒྱད་ཅུ་རྩ་བཞི། སྦྱོང་རྒྱུད་ཀྱི་དཀྱིལ་འཁོར་བཅུ་གཉིས། རྡོ་རྗེ་སྙིང་རྒྱན་གྱི་དཀྱིལ་འཁོར་སོ་བདུན། ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་ཉེར་བཞི་དང་། གཙུག་ལག་དགུ་ལ་སོགས་ཀྱི་ལྷ་འབུམ་མཛད་པ་དང་། ཡང་། བུ་སྟོན་དཔོན་ཆེན་རྒྱལ་བཟང་གི་ཕྱོགས་སུ་གདན་དྲངས་ཏེ། ཕྱག་རྡོར་དབང་བསྐུར་བའི་དཀྱིལ་འཁོར་བཞི་སོགས་བཞེངས་པ་ནི་བུ་སྟོན་རྣམ་ཐར་ན་གསལ། དེ་ལས་ཕལ་ཆེ་བ་ནི་སློབ་དཔོན་མཚན་ཉིད་དང་ལྡན་པས་དབང་མ་འཐོབ་ན་བཤད་དུ་མི་རུང་བ་དང་། རི་མོའི་ལམ་དུ་བཤད་དུ་རུང་བ་འང་མ་ཡིན་ནོ། །དཀྱིལ་འཁོར་གྱི་རྣམ་བཞག་ལ་བརྟེན་ནས། ཚོགས་གཉིས་སྒྲུབ་ཚུལ་གྱི་མན་ངག་ཞིབ་པར་རྒྱུད་སྡེ་སོ་སོ་ནས་བསྟན་ཡོད། དཀྱིལ་འཁོར་འདི་རང་རེའི་བོད་དུ་དར་ཚུལ་ནི། བོད་རྒྱལ་སོ་གཉིས་པ་ཆོས་རྒྱལ་སྲོང་བཙན་གྱི་དུས་སུ། ར་ས་གཙུག་ལག་ཁང་དུ་འཇམ་དཔལ་དྲག་པོའི་དཀྱིལ་འཁོར་དང་། ཐུགས་རྗེ་ཆེན་པོའི་དཀྱིལ་འཁོར་སོགས་བྲིས་བཞེངས་མཛད་པ་དང་། ཁྲི་སྲོང་ལྡེ་བཙན་གྱི་སྐབས་སུ་གསང་སྔགས་ཀྱི་དཀྱིལ་འཁོར་ཆ་ཚང་བཞེངས་པར་མ་ཟད། དེའི་ནང་སློབ་དཔོན་གྱིས་ཕྱག་བྲིས་མཛད་པའང་ཡོད། ཁྱད་པར་དུ་ཕོ་བྲང་པོ་ཏ་ལ་ནི། ཕྱི་རྒྱལ་བའི་ཕོ་བྲང་གི་རྣམ་པ་དང་། ནང་གཙུག་ལག་ཁང་དང་། གསང་བ་བླ་མེད་ཀྱི་དཀྱིལ་འཁོར་གྱི་རྣམ་པར་བཞེངས། དེ་ནས་ས་ཆེན་གོང་མ་ན་རིམ་དང་། བུ་སྟོན་གྱིས་དཀྱིལ་འཁོར་བཞེངས་པ་དང་། ནང་དགོས་སུ། རྗེ་བདག་ཉིད་ཆེན་པོས་བདེ་གསང་འཇིགས་གསུམ་སོགས་ཀྱི་དཀྱིལ་འཁོར་དང་། བློས་བསླངས། བརྒྱུད་ལྡན་བླ་མ་དམ་པའི་ཕྱག་བཞེས་བཞིན་བཞེངས་པ་སོགས་རིམ་གྱིས་དར་བའོ། །

དེ་ཡང་སྔ་སོར་རིན་པོ་ཆེ་དང་། གསེར་དངུལ། ཟངས། མུ་ཏིག ཙན་དན། སའི་རྒྱུ་སྣ་ཚོགས་ཀྱིས་བཞེངས་པ་ཡོད་དེ། དགའ་ལྡན་སྒྲུབ་མཆོད་དུ་གསེར་ཟངས་ལས་གྲུབ་པའི་གསང་འདུས་བློས་བསླངས་ཀྱི་དཀྱིལ་འཁོར་སོགས་དང་། ཀ་ཐོགཿརྡོར་གདན་དུ་སྔོན་གཞི་ཙན་དན་ལ་བ་སོ་རྐོ་དཀྲོལ་ཅན་གྱི་ཟངས་མདོག་དཔའ་རིའི་བློས་བསླངས་དཀྱིལ་འཁོར། པོ་ཏ་ལར་བཙུན་མོ་ཚི་ཤིས་རྒྱལ་དབང་བཅུ་གསུམ་པར་ཕུལ་བའི་མུ་ཏིག་གི་དཀྱིལ་འཁོར། འབྲི་གུང་དུ་རྒྱུ་གསེར་དངུལ་ལས་གྲུབ་པའི་བློས་བསླངས་སོགས་མང་ཡང་། ཕལ་ཆེར་དུས་དབང་གིས་འཇིག་པ་ཡིན། དེ་ཡང་། བློས་བསླངས་ཞེས་པ་བློ་ངོར་སྒོམ་དོན་གྱི་དཀྱིལ་འཁོར་ཏེ། གཟུགས་སུ་བསླངས་པ་དང་། རྡུལ་ཚོན་རིན་ཆེན་བྱེ་མ་སོགས་གང་རུང་གིས་འབུར་ཐོན་དུ་བཀོད་པ་སྟེ། རྡུལ་ཚོན་གྱི་རྒྱུ་ནི། འབྱོར་བ་ཆེ་ཆུང་ལ་བརྟེན་ནས། རབ་རིན་ཆེན་རིགས་ཀྱི་ཕྱེ་མ། འབྲིང་འབྲས་དང་འབྲུ་སྣའི་ཕྱེ་མ། ཐ་མ་མེ་ཏོག་གི་ཕྱེ་མ་དང་ཁམ་ས། བླ་མེད་ལ་དུར་ཁྲོད་ཀྱི་སོལ་བ་དང་། རུས་ཕྱེ་སོགས་ལས་ཀྱང་འབྲི། དེང་སང་ཅོང་ཞི་སྒྲུག་པའི་རྡུལ་ཚོན་འདི་དར་ཁྱབ་ཆེ་ལ། དེ་ཡང་ཅུང་ཞིའི་ཕྱེ་མ་འདི་ཁ་དོག་མི་འགྱུར་བ་དང། སྨན་རྫས་ཁྱད་པར་བ་ཞིག་དང་། མི་རུལ་བ། འབུ་སོགས་ཀྱིས་མི་གནོད་པས་མཆོག་ཏུ་བཤད་དོ། །

རས་བྲིས་ནི། རབ་རིན་ཆེན་གྱི་ཁུ་བས་བྲིས་པ་དང་། ཕལ་བ་ཚོན་དང་སྣག་ཚའི་བར་རོ། །ཀུན་ཀྱང་དཀྱིལ་འཁོར་དངོས་ཀྱི་དོད་ཐུབ་སྟེ། དེ་ཡང་དཀྱིལ་འཁོར་གྱི་ལྷ་ཚོགས་དང་། ས་བོན་ཕྱག་མཚན་སོགས་ཚོམ་བུར་བཀོད་དེ་བཞག་པའོ། །

༢ དཀྱིལ་འཁོར་གྱི་ཚད། སྤྱིར་དཀྱིལ་འཁོར་གྱི་ཆེ་ཆུང་གི་ཚད་ལ། ཇི་སྐད་དུ། རིག་འཛིན་བྱེ་བའི་འབྱུང་གནས་ལས། །དང་པོ་ཚད་ལ་ལྷ་དང་སྦྱིན་བདག་གི །སྒོ་ནས་བཞག་པ་གཉིས་ཏེ་ཚད་མ་ངེས། །ཁྲུ་གང་ནས་ནི་སྟོང་གི་བར་ཡང་རུང་། །ཞེས་གསུངས་པ་ལྟར། ལྷ་དང་སྦྱིན་བདག་གི་སྒོ་ནས་བཞག་པ་གཉིས་ཡོད་ལ། དང་པོ་ལྷའི་སྒོ་ནས་བཞག་ན། མི་བསྐྱོད་པའི་རིགས་ལ་ཁྲུ་གསུམ་དང་། རྣམ་སྣང་ལ་ཁྲུ་བཞི། རིན་འབྱུང་ཁྲུ་ལྔ། འོད་དཔག་མེད་ལ་ཁྲུ་དྲུག དོན་གྲུབ་བདུན་དུ་བྱ་བར་བཤད་དེ། གུར་ལས། རྡོ་རྗེ་ཅན་གྱི་ཁྲུ་གསུམ་སྟེ། །སངས་རྒྱས་དཀྱིལ་འཁོར་ཁྲུ་བཞི་བ། །ཁྲུ་ལྔ་བ་ནི་སྣང་བྱེད་ལའོ། །གར་དབང་ཕྱུག་གི་ཁྲུ་དྲུག་པ། །རྟ་ཡི་རྒྱལ་བོ་ཁྲུ་བདུན་པ། །ཞེས་གསུངས་སོ། །

 གཉིས་པ་སྦྱིན་བདག་གི་སྒོ་ནས་བཞག་ན་འབྱོར་བའི་ཚད་དང་བསྟུན་པ་མ་གཏོགས་ཚད་ལ་ངེས་པ་མེད་པར་གསུངས་ཏེ། མར་མེ་མཛད་ཀྱིས། སེམས་ཅན་བསམ་པ་ལ་བརྟེན་ནས། །ཚད་ལ་སོགས་པ་ངེས་མཛད་ཀྱི། །ཐབས་ཤེས་ལས་བྱུང་དངོས་གྲུབ་ལ། །ཚད་སོགས་ངེས་པས་ཅི་ཞིག་བྱ། །དེ་ནི་ཁྲུ་གཅིག་ནས་བརྩམས་ཏེ། །ཇི་སྲིད་ཁྲུ་སྟོང་བར་དུ་བྱ། །དེ་ལྟར་འཁོར་ལོ་དེ་ཐིག་གདབ། །ཅེས་གསུངས་པ་ལྟར་རོ། །

༣ དཀྱིལ་འཁོར་གྱི་མཚོན་དོན། འདིར་དཀྱིལ་འཁོར་གྱི་མཚོན་དོན་ཅུང་ཟད་བརྗོད་ན། དཀྱིལ་འཁོར་གྱི་སྒོ་བཞི་ནི་ཚད་མེད་བཞི་མཚོན་བྱེད་དང་། རྟ་བབས་བཞི་ནི་དྲན་པ་ཉེར་བཞག་བཞི། རྩིག་པ་ལྔ་ནི་ཡེ་ཤེས་ལྔ། ཀ་བ་བརྒྱད་ནི་འཕགས་ལམ་ཡན་ལག་བརྒྱད། དྲིལ་བུ་དང་ཟ་ར་ཚགས་དང་ཉི་ཟླའི་ཕྲེང་། རྔ་ཡབ་དང་། ནོར་བུ་བཅས་ལྔ་ནི་དབང་བོ་དང་སྟོབས་ལྔ། གདུགས་ནི་ཆོས་ཀྱི་དབྱིངས། འཁོར་ལོ་བཞི་འཕགས་པའི་བདེན་པ་བཞི། ཕ་གུ་ནི་སེམས་ཉིད་མི་འགྱུར་བ། དྲ་ཕྱེད་ནི་བྱང་ཆུབ་བདུན། མདའ་ཡབ་ནི་ཐུགས་རྗེ་ཆེན་པོ། པུ་ཤུ་ནི་བསམ་གྱིས་མི་ཁྱབ་པའི་ཆོས་ཉིད། བུམ་པ་ཟླུམ་པོ་ནི་ཆོས་ཀྱིདབྱིངས་ཀྱི་ཡེ་ཤེས། གློ་འབུར་བཞི་ནི་ཡེ་ཤེས་ལྷག་མ་བཞི། གདན་ལྔ་ནི་དུག་ལྔ་བོ་ངོ་བོ་ཉིད་དུ་དག་པ་སོགས་སོ། །

༤ དཀྱིལ་འཁོར་མེད་པའི་སྐྱོན་དང་མཐོང་བའི་ཕན་ཡོན། ལོ་པཎ་བཀའི་ཐང་ཡིག་ལས། དཀྱིལ་འཁོར་མེད་ན་སྐྱོན་བཞི་ཡོད། །ཕྱི་ཡི་དཀྱིལ་འཁོར་མེད་པའི་སྐྱོན། །གསང་སྔགས་ཐེག་པའི་དོན་ལ་སྒྲིབ། །ནང་གི་དཀྱིལ་འཁོར་མེད་པའི་སྐྱོན། །རྐྱེན་གྱིས་ལོག་པར་སྣང་བ་ཡིན། །གསང་བའི་དཀྱིལ་འཁོར་མེད་པའི་སྐྱོན། །རང་ངོ་མ་ཤེས་སྒྲིབ་དང་བགེགས། །སྟོང་གཟུགས་དཀྱིལ་འཁོར་མེད་པའི་སྐྱོན། །ལམ་ལ་ཕྱོགས་འཛིན་འཕྲེང་དུ་ཚུད། །ཅེས་དང་། ཡང་། དེ་ཉིད་ལས་དཀྱིལ་འཁོར་མཐོང་བའི་ཕན་ཡོན་ནི། མཐོང་བའི་ཕན་ཡོན་བཅུ་བཞི་སྟེ། །གང་ཞིག་རྡུལ་ཚོན་མཐོང་བས་ཀྱང་། །སྐྱེ་ཞིང་སྐྱེ་བར་མཐོ་རིས་འཐོབ། །མ་རིག་སྒྲིབ་པའི་ཚོགས་རྣམས་འདག །རྒྱུ་དང་འབྲས་བུའི་ཚོགས་རྣམས་རྫོགས། །བུམ་དབང་བསོད་ནམས་ཚོགས་ནི་རྫོགས། །ཇི་སྲིད་དུད་འགྲོའི་ལུས་སྐྱེས་ཀྱང་། །དབང་ཆེ་རྩ་ཆུ་འཛོམ་པར་སྐྱེ། །མིར་སྐྱེས་ཁ་དྲག་དབང་ཆེའོ། །བདེ་བར་གཉིད་སད་བདེ་བར་ཉལ། །ནད་མེད་གཟུགས་བཟང་ལོངས་སྤྱོད་ཆེ། །གཟི་བརྗིད་ཆེ་ཞིང་ཚེ་ཡང་རིང་། །རིགས་མཐོ་ཤེས་རབ་གསུམ་དང་ལྡན། །ཕྱི་རུ་མི་ནོར་ཟས་གསུམ་འཕེལ། །ནང་དུ་བུ་ཚ་རིགས་རྒྱུད་འཕེལ། །གསང་བ་ཁམས་གསུམ་དབང་དུ་འདུ། །བླ་ཚེ་ཟད་ཀྱང་བསྲིང་བར་ནུས། །ཞེས་སོགས་རྒྱ་ཆེར﹙མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་བཀའ་ཐང་སྡེ་ལྔ་ཤོག་གྲངས༣༩༧﹚གསུངས་སོ། །

གཞན་ཡང་། སྔགས་རིམ་ཆེན་མོ་ལས། སྔགས་ཀྱི་ལུགས་ཀྱིས་དང་པོར་སྣོད་རུང་དུ་བྱེད་པ་ལའང་དཀྱིལ་འཁོར་དུ་བཅུག་ནས་དབང་བསྐུར་བ་དགོས་ལ། བར་དུ་རིམ་གཉིས་ཀྱི་རྣལ་འབྱོར་བས་ཀྱང་རྟེན་དང་བརྟེན་པའི་དཀྱིལ་འཁོར་གྱི་རྣལ་འབྱོར་གྱིས་ལམ་བགྲོད་དགོས་ཤིང་། མཐར་འབྲས་བུ་མངོན་དུ་གྱུར་བ་ནའང་རྟེན་དང་བརྟེན་པའི་དཀྱིལ་འཁོར་གྱི་ཚུལ་གྱིས་འཚང་རྒྱ་བས། དེ་ཐམས་ཅད་ལ་དཀྱིལ་འཁོར་གནད་ཆེ་ཞིང་དེའི་མཚན་ཉིད་ཐིག་གིས་གཏན་ལ་འབེབས་ལ། ཞེས་དང་། །རིག་འཛིན་བྱེ་བའི་འབྱུང་གནས་ལས་ཀྱང་། དབང་བསྐུར་ནས་བཟུང་འཚང་རྒྱའི་བར་དུ་ནི། །དཀྱིལ་འཁོར་གནད་ཆེ། ཞེས་གསུངས་པ་ལྟར་དཀྱིལ་འཁོར་ནི་གཞི་ལམ་འབྲས་གསུམ་གང་གི་སྐབས་སུའང་ཧ་ཅང་གལ་ཆེའོ། །

མཆོད་རྟེན།

༡ མཆོད་རྟེན་གྱི་ཁུངས་དང་རྣམ་གྲངས། མཆོད་རྟེན་ཞེས་པ་ལེགས་སྦྱར་སྐད་དུ། དུ་སྟུས་ཞེས་ཟེར་ལ། གཞན་དུ་སྟུས་ཞེས་པ་རྟེན་མཆོག་དང་བང་སོ་ལ་ཡང་འཇུག རྟེན་མཆོག་ཅེས་པ་དྲན་རྟེན་གྱི་བཟོ་སྐྲུན་ལྟ་བུ་ལ་ཟེར། སྟོན་པ་མ་བྱོན་པའི་གོང་རོལ་ནས་ཀྱང་། རྒྱལ་བོ་སོ་སོའི་བང་སོ་ལ་སྟུས་ཞེས་འབོད་ལ། །རང་ཅག་བོད་ལ་མཚོན་ན་བོན་ཆོས་དར་བ་ནས། ཡུལ་ལྷ་གཞི་བདག་དང་། བཙན་དང་། རྒྱལ་བོའི་རྟེན་མཁར་གྱི་བཟོ་རྩལ་གྱིས་བོད་ཡུལ་གྱི་མཆོད་རྟེན་ལ་ཤན་ཞུགས་ཐེབས་ཡོད་པར་སྣང་། དགེ་ཆོས་ཀྱི་གཏམ་རྒྱུད་གསེར་ཐང་ལས། རང་རེའི་མཆོད་རྟེན་ལའང་བོན་གྱི་དམུ་མཁར་བང་རིམ་ཅན་གྱི་རྩེ་མོ་ལ། གཡག་རྭ་གཉིས་དེའི་བར་དུ་མཁར་གོང་བཞག་པ་དེའི་སྲོལ་མང་དུ་འབྲེལ་བར་སེམས། མཆོད་རྟེན་གྱི་ཐིག་ཚད་རང་རེ་ལ་གྲགས་པ་འདི་ཡང་། རྒྱ་གར་བའི་སྲོལ་ཡིན་མིན་ད་དུང་ཡང་། རྒྱ་གར་མཆོད་རྟེན་ཞིག་རལ་ཏུ་སོང་མ་སོང་འབུམ་ཕྲག་ལས་ལྷག་པ་མཆིས་པས་དེའི་ཁྲོད་ན། རང་རེའི་མཆོད་རྟེན་གྱི་དབྱིབས་ཅན་གཅིག་ཀྱང་མེད་པ་ལ་བལྟས་ན་ཤེས། རྒྱ་གར་བ་རྣམས་ལ་ཝུ་བ་ལྟ་བུའི་མཆོད་རྟེན་དང་། གཙུག་རྒྱན་དང་། དྲིལ་བུ་དང་། འབྲས་སྤུངས་ཏེ། མཆོད་རྟེན་རིགས་བཞི་གྲགས་ཤིང་། ཐམས་ཅད་ཀྱང་བཟོ་དབྱིབས་ཁོ་ན་ལས་མིང་བཏགས་ཞེས་གསུངས་སོ། །

གང་ལྟར་མཆོད་རྟེན་ནི། ཆོས་ལོངས་སྤྲུལ་གསུམ་ལས་ཆོས་སྐུའི་རྟེན་དང་། སྐུ་གསུང་ཐུགས་གསུམ་ལས་ཐུགས་རྟེན་ཡིན་ཏེ། ལུང་ཞུ་བའི་འགྲེལ་བ་ལས། མཆོད་རྟེན་གྱི་གནས་ནི་ཆོས་ཀྱི་སྐུ་སྟེ་དེ་བཞིན་གཤེགས་པའི་ཆོས་ཀྱི་སྐུའི་བདག་ཉིད་དྲན་པ་ཉེ་བར་བཞག་པ་དང་། རྫུ་འཕྲུལ་གྱི་རྐང་བ་དང་། དབང་བོ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་དང་། མཁྱེན་པ་དང་། སྟོབས་དང་། ཐུགས་རྗེ་ཆེན་པོ་ལ་སོགས་པའི་ཡོན་ཏན་རྣམས་ཀྱི་གཟུགས་བརྙན་ཉིད་དུ་བསླབ་པ་ཡིན་པའི་ཕྱིར་རོ། །གསུངས་པས་སོ། །

རང་རེའི་ནང་བསྟན་ནས་གསུངས་པའི་ཐུགས་ཀྱི་མཆོད་རྟེན་ལ། རང་བཞིན་ལྷུན་གྲུབ་དང་། བླ་ན་མེད་པ། བྱིན་གྱིས་བརླབས་པ། དངོས་གྲུབ་འབྱུང་བ། ཐེག་པ་སོ་སོའི་མཆོད་རྟེན་ཏེ་ལྔ་ལས། དང་བོ་ནི། རི་རྒྱལ་ལྷུན་པོ་དང་བཅས་པ། གཉིས་པ། བྱམས་པ་རྡོ་རྗེ་བརྩེགས་པ། སྙིང་རྗེ་རིན་ཆེན། དགའ་བ་པདྨ། བཏང་སྙོམས་རྒྱ་གྲམ་བརྩེགས་པ་ཚད་མེད་བཞིའི་ངོ་བོར་གྱུར་བའོ། །གསུམ་པ། སངས་རྒྱས་ཀྱི་སྐུ་གདུང་ཆ་བརྒྱད་དུ་ཕྱེས་པའི་མཆོད་རྟེན་དང་། བུམ་པའི་མཆོད་རྟེན། སོལ་བའི་མཆོད་རྟེན་བཅས་བཅུའོ། །བཞི་བ། ཡུལ་ཆེན་བརྒྱད་ཀྱི་དུར་ཁྲོད་དུ། ཀྱེ་རྡོར་ལྷ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་དོ། །ལྔ་བ། ཉན་རང་བྱང་སེམས་དང་། སངས་རྒྱས་ཀྱི་གདུང་རྟེན་མཆོད་རྟེན་རྣམས་སོ། །དེ་ལྔའི་ཁུངས་ནི། རང་བཞིན་ལྷུན་གྲུབ་ནི། དྲི་མེད་འོད་ལས། ལྷུན་པོ་དང་འཇིག་རྟེན་གྱི་ཁམས་ནི་མཐའ་དག་རྒྱལ་བའི་སྐུ་སྟེ་མཆོད་རྟེན་དངོས་སོ། །ཞེས་དང་། བླ་ན་མེད་པའི་མཆོད་རྟེན་ནི། ཐིག་ལེ་དབང་གི་རྒྱུད་ལས། ཤར་དུ་བྱམས་པ་རྡོ་རྗེ་བརྩེགས། །ལྷོ་རུ་སྙིང་རྗེ་རིན་ཆེན་བརྩེགས། །ནུབ་ཏུ་དགའ་བ་པདྨ་བརྩེགས། །བྱང་དུ་བཏང་སྙོམས་རྒྱ་གྲམ་བརྩེགས། །ཞེས་དང་། བྱིན་གྱིས་བརླབས་པའི་མཆོད་རྟེན་ནི། འཁོར་ལོ་འབྱུང་བའི་རྒྱུད་ལས། བྱིན་བརླབས་སྐུ་གདུང་ཆ་བརྒྱད་གླིང་བཞིར་སྣང་། །ཞེས་དང་། དངོས་གྲུབ་འབྱུང་བའི་མཆོད་རྟེན་ནི། བདུད་རྩི་ཆེན་པོ་མཆོག་གི་རྒྱུད་ལས་གསུངས་པ་ལྟར། ཡུལ་བརྒྱད་ཀྱི་དུར་ཁྲོད་ཀྱེ་རྡོར་ལྷ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་གསུངས་པ་དང་། ཐེག་པ་སོ་སོའི་མཆོད་རྟེན་ནི། མདོ་མྱང་འདས་ལས། བང་རིམ་བཅུ་གསུམ་འཕང་ལོ་དང་བཅས་པ། རང་སངས་རྒྱས་ལ་བང་རིམ་བཅུ་གཉིས་སོགས་གསུངས་པ་དེ་རྣམས་སོ། །མདོ་རྩ་ལས། མཆོད་རྟེན་ནི་རྣམ་པ་གཉིས་ཏེ། གཙང་ཁང་ཅན་ཉིད་དང་། ཀ་བ་ལྟ་བུ་ཉིད་དོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ། །གལ་ཏེ་དགེ་བ་ཡིན་ནའོ། །སངས་རྒྱས་རྣམས་ཀྱིས་ནི་རྣམ་པ་ཐམས་ཅད་དོ། །རྣམ་པ་ནི་བང་རིམ་བཞི་དང་། འདབ་མ་དང་། བུམ་པ་དང་། པུ་ཤུ་དང་། སྲོག་ཤིང་དང་། གདུགས་བཅུ་གསུམ་དང་། ཆར་ཁེབས་དག་གོ། རང་སངས་རྒྱས་རྣམས་ཀྱི་ནི་ཆར་ཁེབས་མེད་པའོ། །ཉན་ཐོས་རྣམས་ཀྱིས་ནི་འབྲས་བུའི་ཚད་ཀྱིས་དེའི་གདུགས་གཅིག་ལྷག་པའོ། །སོ་སོའི་སྐྱེས་བོ་རྣམས་ཀྱི་ནི་བྱི་བོའོ། །ཞེས་གསུངས་སོ། །

དེ་ཡང་། མཆོད་རྟེན་དང་གདུང་རྟེན་གྱི་དབྱེ་བ་ནི། དུང་དཀར་ཚིག་མཛོད་ལས། དེ་ཡང་། ད་སྐབས་མཆོད་རྟེན་དང་གདུང་རྟེན་གྱི་དབྱེ་བ་དེ་ཙམ་འབྱེད་མི་ཤེས་པ་འང་མང་བས། སྤྱིར་མཆོད་རྟེན་ལ་སྐུ་རུས་སམ་པུར་ཐལ་མེད་པ་དང་ཡོད་པ་གཉིས་ལས། སྐུ་རུས་པུར་ཐལ་ཡོད་པ་ལ་གདུང་རྟེན་ཞེས་འབོད་ན་གོ་བདེ་བ་དང། མཆོད་རྟེན་ཡིན་ན་གདུང་རྟེན་ཡིན་མ་དགོས་ཀྱང་། གདུང་རྟེན་ནི་མཆོད་རྟེན་གྱི་བྱེ་བྲག་གོ། དེ་དག་ལས་ཡོངས་གྲགས་བདེ་གཤེགས་མཆོད་རྟེན་བརྒྱད་ནི།

༢ བྱེ་བྲག་བདེ་གཤེགས་མཆོད་རྟེན་བརྒྱད། ༡ སྟོན་པ་སེར་སྐྱར་སྐུ་བལྟམས་མ་ཐག ཕྱོགས་བཞིར་གོམ་པ་བདུན་བོར་བ་ལས། མེ་ཏོག་པདྨ་བདུན་སྐྱེས་པར། དེའི་རྗེས་དྲན་གྱི་ཚུལ་དུ། ཡབ་རྒྱལ་བོ་སྲས་གཙང་གིས་བཞེངས་པའི་པད་སྤུངས་མཆོད་རྟེན།

༢ སྟོན་པ་རྡོར་གདན་དུ་སངས་རྒྱས་པའི་མཚོན་བྱེད་དམ་དེའི་རྗེས་དྲན་དུ། ཤུན་ཙ་ཏས་བཞེངས་པའི་བྱང་ཆུབ་མཆོད་རྟེན།

༣ བཅོམ་ལྡན་འདས་ཀྱིས་ཡུལ་ཝ་ར་ཎ་སིར་ཆོས་འཁོར་རིམ་གསུམ་བསྐོར་ཚེ། བདེན་བཞི་དང་རྣམ་ཐར་བརྒྱད་མཚོན་བྱེད་དུ་སྒོ་བཅུ་དྲུག་ནས་བརྒྱ་རྩ་བརྒྱད་སོགས་མཆིས་པའི་སྒོ་མང་མཆོད་རྟེན།

༤ སྟོན་པས་གཉན་ཡོད་དུ་རྫུ་འཕྲུལ་བསྟན་ནས། མུ་སྟེགས་པའི་སྟོན་པ་དྲུག་སོགས་རྫུ་འཕྲུལ་གྱིས་ཕམ་པར་མཛད་ཚེ། དེའི་རྗེས་དྲན་གྱི་ཆེད་དུ། རྒྱལ་བོ་གསལ་རྒྱལ་གྱིས་བཞེངས་པའི་གློ་འབུར་ཅན་ཆོ་འཕྲུལ་མཆོད་རྟེན།

༥ སྟོན་པ་བཅོམ་ལྡན་འདས་སུམ་ཅུ་རྩ་གསུམ་ལ་གཤེགས་ཏེ། ཡུམ་སྒྱུ་འཕྲུལ་མ་སོགས་ཀྱི་སར་ཆོས་གསུངས་ཞིང་། དབྱར་ཞལ་བཞེས་ཀྱིས་བཞུགས་པར། མི་ཡུལ་ནས་རྒྱལ་བོ་གསལ་རྒྱལ་དང་འཁོར་རྣམ་བཞིས་སྟོན་པ་དྲན་དྲགས་པས། མོའུ་འགལ་གྱི་བུ་བརྒྱུད་དེ། སྟོན་པ་གདན་དྲངས་ནས། བོད་ཟླ་དགུ་བའི་ཚེས་ཉེར་གཉིས་ཉིན། གསལ་ལྡན་དུ་ལྷ་ལས་བབས་པའི་ཚེ་ན། དེའི་རྗེས་དྲན་དུ། ཨིནྡྲ་ཝརྨིས་བཞེངས་པའི་ལྷ་བབས་མཆོད་རྟེན།

༦ སྟོན་པ་འོད་མའི་ཚལ་དུ་ལྷས་བྱིན་གྱིས། རང་ལ་འཁོར་གྱི་གནང་བར་ཞུས་པ་ལ། སངས་རྒྱས་ཀྱིས་མ་གནང་བས། ཞེ་སྡང་གིས་འཁོར་མང་བསྡུས་ཤིང་། སྟོན་པ་ལྟར་བཞུགས་པ་ལ། དགེ་འདུན་བགྲང་ཡས་བརླག་པར་བརྩམས་པའི་ཚེ། སངས་རྒྱས་ཀྱི་ཐབས་མཁས་ཀྱིས་དབྱེན་ཟླུམ་ཚེ། དེའི་རྗེས་དྲན་དུ། གྱད་བུས་བཞེངས་པའི་དབྱེན་ཟླུམ་མཆོད་རྟེན།

༧ སངས་རྒྱས་ཡངས་པ་ཅན་དུ་བདུད་ལས་རྣམ་པར་རྒྱལ་ནས། སྐུ་ཚེ་བྱིན་གྱིས་བརླབས་ཚེ། དེའི་རྗེས་དྲན་དུ། ལི་ཙི་བྱི་རྣམས་ཀྱིས་བཞེངས་པ་རྣམ་རྒྱལ་མཆོད་རྟེན།

༨ རྩྭ་མཆོག་དྲུང་ནས་སྟོན་པ་མྱ་ངན་ལས་འདས་ཚེ། དེའི་རྗེས་དྲན་དུ། རྒྱལ་བོ་མ་སྐྱེས་དགྲས་བཞེངས་པའི་མྱང་འདས་མཆོད་རྟེན་ཏེ། བདེ་གཤེགས་མཆོད་རྟེན་བརྒྱད་དོ། །

༣ མཆོད་རྟེན་བཞེངས་ཡུལ། གྲོང་དང་གྲོང་ཁྱེར་གྱི་བཞི་མདོ། དགེ་འདུན་གྱི་གནས་མལ། སྐྱེ་བོ་འདུ་ལོང་ཆེ་ས་སོགས་སུ་བཞེངས་པ་སྟེ། འཕགས་པའི་དགེ་བའི་རྩ་བ་ཡོངས་སུ་འཛིན་པའི་མདོ་ལས། ལམ་པོ་ཆེའི་བཞི་མདོ་སྐྱེ་བོ་མང་བོ་འདུ་བའི་སར་མཆོད་རྟེན་དང་ཁང་བ་བརྩེགས་པའམ། རྡོ་བའི་ཀ་བ་འམ། དེ་བཞིན་གཤེགས་པའི་སྐུའམ། དེ་བཞིན་གཤེགས་པའི་ཡོན་ཏན་རྗེས་སུ་དྲན་པ་གང་ཡང་རུང་བ་བྱེད། ཅེས་དང་། ཡང་ན། དཔུང་བཟང་གིས་ཞུས་པའི་རྒྱུད་ལས། གཙང་ཞིང་དབེན་པ་ས་ཡི་ཕྱོགས་སུ་ནི། །འཇིམ་པ་འམ་ནི་བྱེ་མ་ལས་བྱས་པའི། །བདེ་གཤེགས་མཆོད་རྟེན་རྟེན་འབྲེལ་སྙིང་བོ་ཅན། །སྡིག་པ་སྦྱང་བའི་ཕྱིར་ནི་གདབ་པར་བྱ། །ཞེས་དང་། ཡང་། གསང་བ་སྤྱི་རྒྱུད་ལས། མཐོ་དམན་སྙོམས་ཤིང་གཙང་ལ་སྣུམ། །ཟུག་རྔུ་ཉེས་པ་རྣམ་པར་སྤང་། །ཤར་དང་བྱང་དུ་གཞོལ་བ་ཡི། །ས་གཞི་ལས་རྣམས་ཀུན་ལ་ཤིས། །ཞེས་སོ། །

བཞེངས་མི་རུང་བའི་གནས་ནི། མཐོ་དམན་ཅན་དང་ཚེར་མ་ཅན། །གྱོ་མོ་དུམ་བུ་ཅན་དག་དང་། །ངམ་གྲོག་རུས་པ་སྡོང་དུམ་ཅན། །གྲོག་མཁར་ཐལ་བ་ཚྭ་སྒོ་ཅན། །གསེག་མ་རྡོ་དང་རྡུལ་དང་སྐྲ། །སྲིན་བུ་གྲོག་སྦུར་ལ་སོགས་མང་། །དེ་ལྟ་བུ་ཡི་ས་གཞི་ནི། །མཁས་པས་ལས་རྣམས་ཀུན་ལ་སྤངས། །ཞེས་སོ། །

༤ མཆོད་རྟེན་བཞེངས་པ་པོ་སློབ་དཔོན་བཤད་པ། སྐུ་གཟུགས་མཆོད་རྟེན་བཞེངས་པ་ལ། བཞེངས་པ་པོ་སློབ་དཔོན་མཚན་ཉིད་ལྡན་པ་ཞིག་དགོས་ཏེ། རབ་དགེ་སློང་རྡོ་རྗེ་འཛིན་པ། འབྲིང་དགེ་ཚུལ། ཐ་མའང་དགེ་བསྙེན་གྱི་སྡོམ་པ་ལ་གནས་པ་ཞིག་དགོས་ལ། ཁྱད་པར་དུ། དཀྱིལ་འཁོར་འདི་དག་གི་དབང་འཐོབ་ཞིང་། དམ་སྡོམ་ལ་གནས་པ། བསྙེན་པ་སྔོན་དུ་སོང་སྟེ་ཆོ་ག་དང་མཆོད་རྟེན་གྱི་ལག་ལེན་ལ་མཁས་པ་སོགས་དགོས་ཏེ། གསང་བ་སྤྱི་རྒྱུད་ལས། སློབ་དཔོན་བསྟན་བཅོས་ཀུན་ཤེས་པ། །ཚུལ་ཁྲིམས་ལྡན་ཞིང་སྙིང་རྗེ་བདག། དྲང་ཞིང་བཟོད་ལ་གཙང་སྦྲ་ཅན། །དད་དང་དྲང་བདེན་སྙིང་སྟོབས་ལྡན། །སྨྲ་མཁས་མི་འཇིགས་བསྲན་ཐུབ་པ། །སྒྱུ་རྩལ་དག་ལ་མཁས་ཤིང་གསལ། །མཛེས་དང་ལྡན་ཞིང་དེ་བཞིན་དུ། །གུས་ལྡན་དུལ་ལ་ཁོང་བཟོ་བ། །རྟག་ཏུ་དམ་པའི་ཆོས་ལ་དགའ། །ཐེག་པ་ཆེ་ལ་མོས་པ་ཅན། །གསང་སྔགས་སྤྱོད་པ་ལ་བསླབས་ཤིང་། །དཀྱིལ་འཁོར་དག་གི་བྱེ་བྲག་ཤེས། །སློབ་མ་དག་གིས་ཚུལ་ཤེས་ཤིང་། །དེ་བཞིན་གསང་སྔགས་རྒྱུད་ཀྱང་འཛིན། །རྗེས་སུ་གནང་ཞིང་དབང་བསྐུར་བ། །ཆོག་ཤེས་བཟླས་བརྗོད་ལྷུར་ལེན་པ། །སློབ་དཔོན་རིགས་ལ་བསྙེན་བཀུར་བྱས། །དཀྱིལ་འཁོར་ཐམས་ཅད་ཁོང་དུ་ཆུད། །གསང་སྔགས་ཀུན་དང་བླ་མ་དང་། །དེ་བཞིན་གློ་བུར་མགྲོན་མཆོད་བྱེད། །ཕྱག་རྒྱ་ལ་སོགས་བཅིང་བ་དང་། །དཀྱིལ་འཁོར་འབྲི་བའི་ལས་རྣམས་དང་། །གསང་སྔགས་སྤྱོད་པའི་མཆོད་པ་ལ། །སློབ་དཔོན་གྱིས་ནི་མཁས་པར་བྱ། །ཞེས་པ་ལྟར། ཡོན་ཏན་ཀུན་ལྡན་ཞིག་དགོས་ལ། དུས་དབང་གིས་དེ་འདྲ་ཞིག་རྙེད་དཀའ་བས། སྐྱོན་ཡོན་གཉིས་ལས་ཡོན་ཏན་ཤས་ཆེ་བ་ཞིག་ངེས་པར་དགོས་སོ། །

༥ ཐིག་རྩ་ལྟར་བཞེངས་པའི་ཚད་ལྡན་གྱི་མཆོད་རྟེན། མཆོད་རྟེན་ཚད་ལྡན་ཞིག་ལ་མཚོན་ན། བཞུགས་ཁྲི་དང་རྒྱུའི་མཆོད་རྟེན། འབྲས་བུའི་མཆོད་རྟེན་གསུམ་ངེས་པར་དུ་ཚང་དགོས་ཏེ། ས་འཛིན་ནས་བ་གམ་མན་ཆོད་བཞུགས་ཁྲི། བང་རིམ་དང་བོ་ནས་བྲེ་མན་ཆོད་རྒྱུའི་མཆོད་རྟེན། བྲེ་ནས་ཏོག་གི་རྩེ་མོའི་བར་འབྲས་བུའི་མཆོད་རྟེན་ནོ། །མཆོད་རྟེན་གྱི་ཆ་སོ་སོ་ནི། འོག་རིམ་ནས་ས་འཛིན། ཐེམ་སྐས་དང་བོ་ནས་གསུམ་པའི་བར། ཁྲི་གདོང་། གཟུངས་སྣེ། པདྨ་བ་གམ་བཅས་རིམ་པ་བརྒྱད་ནི་ཁྲི་ཡིན། དེའི་སྟེང་དུ་དགེ་བཅུ། བང་རིམ་དང་བོ་ནས་བཞི་བའི་བར། བུམ་རྟེན། བུམ་པ། བྲེ་རྟེན། བྲེ་བཅས་རྒྱུའི་མཆོད་རྟེན་དང་། གདུགས་འདེགས་པདྨ། འཁོར་ལོ་བཅུ་གསུམ། ཐུགས་རྗེ་མདོ་གཟུངས། གདུགས། གདུགས་ཁེབས། ཟླ་བ། ཉི་མ། ནོར་བུའི་ཏོག་བཅས་སོ། །

བདེ་གཤེགས་མཆོད་རྟེན་བརྒྱད་གང་ཡང་རུང་། ས་འཛིན་གྱི་ཟུར་བཞིར་རྡོ་རིང་བསླངས་ཏེ། རྡོ་རིང་ཁ་ཕྱིར་བལྟས་བྱས་ལ། མེ་ཏོག་སོགས་གདུགས་འོག་ནས་དྲངས་ཏེ། རྡོ་སེང་གི་མགུལ་དུ་བཏགས། གཞན་ཡང་། དྲིལ་བུ་དང་། དར་གྱི་ཅོད་པན་དང་གདུགས་རྒྱལ་མཚན་སོགས་ཀྱིས་སྤུད་པར་བྱའོ། །བདེ་གཤེགས་མཆོད་རྟེན་གྱི་ཐིག་རྩ་སྤྱི་ལྟར་བྱ་ལ། བང་རིམ་འགྱུར་བའི་ཁྱད་པར་ཡོད་དེ། སྤྲུལ་སྐུ་ང་ལ་གཟིགས་ཀྱི་མཆོད་རྟེན་ཐིག་རྩ་ལས། དེ་ལྟར་བྱང་ཆུབ་མཆོད་རྟེན་གྱི། །ཐིག་རྩ་དེ་ཉིད་གཞིར་བཞག་ནས། །བང་རིམ་འགྱུར་བའི་ཁྱད་པར་གྱིས། །པདྨ་སྤུངས་པའི་མཆོད་རྟེན་ནི། །བང་རིམ་བཞི་ལྡན་པད་རིས་ཅན། །ཆོས་ཀྱི་འཁོར་ལོའི་མཆོད་རྟེན་ནི། །བང་རིམ་གྲུ་བཞི་སྒོ་མང་ཅན། །ཆོ་འཕྲུལ་ཆེན་པོའི་མཆོད་རྟེན་ནི། །བང་རིམ་སུམ་ཆ་གློ་འབུར་ལྡན། །ལྷ་བབས་མཆོད་རྟེན་ཁྱད་པར་ནི། །གློ་འབུར་སྟེང་དུ་སུམ་སྐས་བཙུགས། །དགེ་འདུན་དབྱེན་འདུམ་བང་རིམ་ནི། །ཟུར་བཞི་བཅད་པའི་ངོས་བརྒྱད་མཉམ། །སྐུ་ཚེ་བྱིན་རླབས་མཆོད་རྟེན་ནི། །བང་རིམ་གསུམ་དང་དགེ་བཅུ་ཟླུམ། །མྱང་འདས་མཆོད་རྟེན་བང་རིམ་མེད། །རྨང་དགེའི་སྟེང་དུ་བུམ་སྟན་བཞག། བུམ་སྨད་རིང་ལ་བུམ་པའི་དབྱིབས། །དྲིལ་བུའི་ཁོག་པ་འདྲ་བ་ལ། །ལྕགས་འཁྱུག་གཉིས་ཀྱིས་བསྡམས་པ་ཡིན། །ཞེས་སོ། །

༦ མཆོད་རྟེན་གྱི་མཚོན་དོན། སྤྲུལ་སྐུ་ང་ལ་གཟིགས་﹙འདི་བ་འཕྲང་ཁ་བ་ཡིན་ལ་སྐབས་ཤིག་དབྱངས་ཅན་མའི་སྐུ་ཞིག་བཞེངས་ཏེ་ཕར་བཞག་པས་དབྱངས་ཅན་མས་སྤྲུལ་སྐུ་ང་ལ་གཟིགས་དང་ཞེས་གསུང་འབྱོན་པས་མཚན་ལ་དེ་ལྟར་ཐོགས།﹚ ཀྱི་མཆོད་རྟེན་ཐིག་རྩ་ལས། དེ་ལྟར་སངས་རྒྱས་ཐམས་ཅད་ཀྱི། །རྒྱུ་དང་འབྲས་བུའི་མཆོད་རྟེན་ནི། །གཞི་རྨང་དགེ་བ་བཅུ་ཡིན་ནོ། །དེ་ལྟར་བང་རིམ་བཞི་བོ་ཡི། །དང་བོ་དྲན་པ་ཉེར་བཞག་བཞི། །གཉིས་པ་ཡང་དག་སྤོང་བ་བཞི། །གསུམ་པ་རྫུ་འཕྲུལ་རྐང་བ་བཞི། །བཞི་བ་དད་སོགས་དབང་བོ་ལྔ། །བུམ་སྟན་སྟོབས་སུ་གྱུར་བ་ལྔ། །བུམ་པ་བྱང་ཆུབ་ཡན་ལག་བདུན། །བྲེ་ནི་འཕགས་ལམ་ཡན་ལག་བརྒྱད། །དེ་ལྟར་བྱང་ཆུབ་ཕྱོགས་ཀྱི་ཆོས། །སུམ་ཅུ་རྩ་བདུན་རྣམ་པ་ཡིས། །སངས་རྒྱས་ཉིད་དུ་བྱེད་པ་ཡིན། །རྒྱུ་འམ་ལམ་གྱི་མཆོད་རྟེན་ཡིན། །འཁོར་བའི་སྐྱོན་བྲལ་པདྨའི་སྟེང་། །ཆོས་འཁོར་བཅུ་ནི་སྟོབས་བཅུ་སྟེ། །ལྷག་མ་དགོངས་པ་ཉེར་བཞག་གསུམ། །ཐུགས་རྗེ་མདོ་གཟུངས་ཐུགས་རྗེ་དང་། །སྟོང་ཉིད་བཅུ་དྲུག་དབྱེར་མེད་དངོས། །གདུགས་དང་ཆར་ཁེབས་ཐབས་ཤེས་ཏེ། །ཟ་ར་ཚགས་ནི་འཕྲིན་ལས་བཞི། །ཟླ་བ་ཉི་མ་མཁྱེན་པ་གཉིས། །ཏོག་ནི་གཉིས་མེད་ཟུང་འཇུག་སྐུ། །མེ་ཏོག་ཕྲེང་བ་སངས་རྒྱསཀྱི། །མ་འདྲེས་ཆོས་ནི་བཅོ་བརྒྱད་དོ། །རྡོ་རིང་མི་འཇིགས་བཞི་ཡིན་ནོ། །གསེར་དྲིལ་དཀྲོལ་བ་ཚངས་པའི་གསུང་། །བ་དན་བསྟན་པའི་གྲགས་པ་དངོས། །ཤེས་རབ་སྒྲོན་མེ་འཕྲེང་བ་སྟེ། །ཏིང་འཛིན་སྒོ་བརྒྱའི་རྒྱན་ཕྲེང་མཛེས། །དེ་དག་འབྲས་བུས་སངས་རྒྱས་ཀྱི། །ཡོན་ཏན་རིན་ཆེན་མཆོད་རྟེན་ཡིན། །ཞེས་དང་།

སློབ་དཔོན་ཞི་བ་སྙིང་བོའི་མཆོད་རྟེན་གྱི་དོན་བཤད་པ་ལས། བང་རིམ་དང་བོ་དྲན་ཉེ། གཉིས་པ་ཡང་དག་སྤོང་བ། གསུམ་པ་རྫུ་འཕྲུལ་གྱི་རྐང་བ། བཞི་བ་དབང་བོ་ལྔ། བུམ་རྟེན་སྟོབས་ལྔ། བུམ་པ་བྱང་ཆུབ་ཡན་ལག་བདུན། པུ་ཤུ་འཕགས་ལམ་ཡན་ལག་བརྒྱད། སྲོག་ཤིང་ཤེས་པ་བཅུ། འཁོར་ལོ་བཅུ་གསུམ་སྟོབས་བཅུ་དང་མ་འདྲེས་པའི་དྲན་པ་ཉེར་བཞག་གསུམ། ཆར་ཁེབས་སྙིང་རྗེ་ཆེན་པོ་སྟེ་མཆོད་རྟེན་དངོས་ཀྱི་མཚོན་དོན་དང་། རྡོ་རིང་མི་འཇིགས་པ་བཞི། ཐེམ་སྐས་སྲུང་བ་མེད་པ་རྣམ་པ་བཞི། ཆུ་སྲིན་རྒྱལ་མཚན་རྣམས་བདུད་ཀྱི་རྒྱལ་མཚན་བསྙལ་བ། མེ་ཏོག་གི་ཕྲེང་བ་བླ་ན་མེད་པའི་ཚུལ་ཁྲིམས་ཀྱི་ཕུང་བོ། འཇིག་རྟེན་སྐྱོང་བ་རྣམས་འཕགས་པའི་བདེན་པ་བཞི། དྲིལ་བུ་རྣམས་གསུང་ཚངས་པའི་དབྱངས། གདུགས་འགྲོ་བ་རྣམས་ཀྱི་མཆོག་ཏུ་གྱུར་བ། ཟླ་བ་བླ་ན་མེད་པའི་ཡེ་ཤེས་ཀྱི་སྣང་བ། དར་གྱི་ཅོད་པན་བླ་མེད་བྱང་ཆུབ་ཀྱི་ཅོད་པན་ཐོགས་པ། བ་དན་ཆོས་ཀྱི་གྲགས་པ་སྟེ་དེ་བཞིན་གཤེགས་པའི་ཆོས་ཀྱི་སྐུའི་རྐྱེན་དུ་འབབ་པའི་ཡོ་བྱད་རྣམས་ཀྱི་མཚོན་དོན་ནོ། །ཞེས་གསུངས་པ་དང་། ཀུན་མཁྱེན་གུ་ཎའི་ཤེས་བྱ་མཛོད་ཀྱི་འགྲེལ་བར་ཡང་མཆོད་རྟེན་གྱི་དག་སྦྱོར་རྒྱས་པར་གསུངས་ཡོད་པས། ཤེས་འདོད་པ་དག་གིས་དེར་བལྟ་བར་བྱ་བ་ལས། འདིར་ཡི་གེ་མང་དུ་འཇིགས་ནས་མ་བྲིས་སོ། །

༧ མཆོད་རྟེན་བཞེངས་པའི་ཕན་ཡོན། དམ་ཆོས་པད་དཀར་ལས། ས་དང་སོ་ཕག་དག་ལ་རྩིག་པ་ཡིས། །རྒྱལ་བའི་མཆོད་རྟེན་འགའ་ཞིག་བྱས་པ་དང་། །དེས་ནི་ས་རྡུལ་ཕུང་བོ་དག་ལས་ཀྱང་། །མྱ་ངམ་དགོན་པ་གང་དུ་བྱས་པ་དང་། །བྱིས་པའི་རྩེད་མོ་དེ་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་འགའ། །བྱེ་མ་ལས་ནི་ཕུང་བོ་བྱས་པ་ཡང་། །དེ་དག་རྣམས་ཀྱང་བྱང་ཆུབ་ཐོབ་པར་འགྱུར། །ཞེས་དང་། ཁྱད་པར་ཏུ་རང་གི་ལག་བསྟར་ནས་མཆོད་རྟེན་བཞེངས་ན་ཕན་ཡོན་ཆེ་སྟེ། འཇམ་དཔལ་རྩ་རྒྱུད་ལས། ལུས་སྦྱང་བར་བྱས་ལ་རང་གི་ལག་གིས་མཆོད་རྟེན་བྱས་ན། མཚམས་མེད་པ་ལྔ་བྱས་པས་ཀྱང་འགྲུབ་བོ། །མཆོད་རྟེན་འབུམ་བྱས་ན་རིག་པ་འཛིན་པའི་འཁོར་ལོས་སྒྱུར་བའི་རྒྱལ་བོར་འགྱུར་ཏེ། བསྟན་པ་དང་ཐམས་ཅད་མངོན་པར་ཤེས་པ་དང་ལྡན་ཞིང་བསྐལ་བར་གནས་ལ་ཤི་ནས་ཀྱང་སྐྱེ་བ་རྣམས་སུ་རྒྱལ་བོ་བྱེད་ཅིང་ངན་སོང་དུ་མི་འགྲོའོ། །ཞེས་དང་། ཡང་། མདོ་ལས། དེ་བཞིན་གཤེགས་པའི་མཆོད་རྟེན་བཞེངས་པའི་ཕན་ཡོན་བཅོ་བརྒྱད་ནི། རྒྱལ་བོ་ཆེན་པོའི་རིགས་སུ་སྐྱེས་པ་དང་། གཟུགས་བཟང་བ། མཛེས་ཤིང་མིག་ཏུ་སྡུག་པ། དབང་ཆེ་བར་གྲགས་པ། གཡོག་འཁོར་རྒྱ་ཆེ་བ། གཡོག་འཁོར་མི་ཕྱེད་པ། ལོངས་སྤྱོད་ཆེ་བ། སྐྱེ་བོ་རྣམས་འཁོར་ཞིང་འདུ་བ། ཀུན་གྱི་རྟེན་དུ་གྱུར་བ། ཕྱོགས་བཅུར་སྙན་པར་གྲགས་པ། ལྷ་དང་མིས་མཆོད་པ། ཕྱུག་ཅིང་ནོར་མང་བོ་དང་ལྡན་པ། འཁོར་ལོས་བསྒྱུར་བའི་རྒྱལ་སྲིད་འཐོབ་པ། ཚེ་རིང་བ། ལུས་རྡོ་རྗེ་ལྟར་མཁྲེགས་པ། ལུས་མཚན་དང་དཔེ་བྱད་ལྡན་པ། མཐོ་རིས་སུ་སྐྱེ་བ། མྱ་ངན་ལས་འདས་པའོ། །ཞེས་མདོ་རྒྱུད་དུ་མ་ནས་རྒྱ་ཆེར་གསུངས་ཀྱང་མ་སྤྲོས་སོ། །

ཡང་། ཉེ་བར་འབྲེལ་བའི་སྔོན་བྱུང་གི་ལོ་རྒྱུས་འགའ་བརྗོད་ན། སྔོན་ཤཱཀྱའི་ཡུལ་ནས་ཁྱེའུ་དྲི་ཞིམ་ཞེས་པ། ལྟ་སྡུག་པ། ཁ་ནས་ཨུཏྤ་ལའི་དྲི་དང་། ལུས་ལ་ཙན་དན་གྱི་དྲི་བསུང་འཐུལ་ཏེ་གྲོང་ཁྱེར་ཐམས་ཅད་ཁྱབ་པ་ཞིག་སྐྱེས་པས། སངས་རྒྱས་ལ་དེའི་རྒྱུ་ཞུས་པས། སྔོན་ཚེ་སངས་རྒྱས་རྣམ་གཟིགས་ཀྱི་མཆོད་རྟེན་ལ། དད་པས་སྤོས་བྱུག་དང་། མེ་ཏོག་སྣ་ཚོགས་མཆོད་པའི་རྒྱུར་ལུང་བསྟན་པ་དང་། ཡང་། ཁྱེའུ་བྱད་བཟང་ཞེས་པས། སྔོན་གྱི་ཚེ་སངས་རྒྱས་རྣམ་གཟིགས་ཀྱི་མཆོད་རྟེན་ལ་མེ་ཏོག་རྙིང་བ་རྣམས་བླངས་ཏེ་གད་བདར་གཙང་མ་བྱས་ནས། དད་པས་སྨོན་ལམ་བཏབ་པས། བྱད་གཟུགས་ལྟ་ན་སྡུག་པ་ཞིག་ཏུ་འཁྲུངས་པ་དང་། ཡང་། སྔོན་ཕག་ཞིག་གི་ལུས་ཀྱི་འདམ་བག་གིས་མཆོད་རྟེན་ལ་དྲུད་པས། སྟབས་ལེགས་ཏེ་གས་ག་ཟུམ་པས་ལྷ་ཡུལ་དུ་སྐྱེས་པ་སོགས་མང་ངོ་། །

༨ ཞར་ཞུང་མཆོད་རྟེན་ནག་པོ་བརྩིགས་ཚུལ་བརྗོད་པ། མཆོད་རྟེན་ནག་པོ་བཞེངས་པའི་ལོ་རྒྱུས་ནི། སངས་རྒྱས་སྐུ་མྱ་ངན་ལས་འདས་ནས་སྐུ་གདུང་ཆ་ལྔར་བགོས་ཏེ་ལྷ་ཀླུ་མི་སོགས་ཀྱིས་སྤྱན་དྲངས་དུས། འདྲེ་སྲིན་རྣམས་ལ་སྐལ་བ་བཅད་པས། མཆོད་རྟེན་ནག་པོ་འདི་བཞེངས་དགོས་པ་བྱུང་བར་བཤད་པ་སྟེ། ཀརྨ་ཆགས་མེད་ཀྱི་མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་ལས། འདྲེ་སྲིན་རྣམས་ལ་སྐལ་བ་བཅད། །སྐུ་གདུང་རིང་བསྲེལ་མ་ཐོབ་པས། །འདྲེ་སྲིན་གདོན་བགེགས་ཐུགས་ཁྲོས་ནས། །མི་ལ་གདུག་པ་སྣ་ཚོགས་བཏང་། །ཁྲོ་ཆུ་ཁོལ་མའི་མདའ་ཡང་འཕངས། །མི་ནད་ཕྱུགས་ནད་སྣ་ཚོགས་འབྱུང་། །སྲིན་ཡུལ་ལིང་ཀ་པུ་རི་ནས། །སྲིན་པོ་མང་བརྒྱ་ཉུང་བཅུ་ཡང་། །རོ་ཡི་གཞོབ་དང་གསུར་ལ་ལངས། །སྲིན་པོ་ཤ་ཟ་མང་བོ་ཡིས། །འཛམ་གླིང་མི་ལ་གདུག་པ་བཏང་། །དེ་ནས་ཉན་ཐོས་མཆོག་བརྒྱད་ཀྱིས། །དགེ་སློང་གཞོན་ནུ་བྱ་བ་དེ། །འདྲེ་སྲིན་ཡུལ་ཁམས་བརྟག་ཏུ་བཏང་། །སྲིན་ཡུལ་ལང་ཀ་པུ་རི་དེ། །དབྱིབས་དང་ཁ་དོག་ཇི་ལྟར་འདྲ། །དེ་ན་གནས་པའི་སྲིན་པོ་ཀུན། །གོས་སུ་ཅི་གྱོན་ཟས་སུ་ཅི་ཟ་རྣམས། །དགེ་སློང་གཞོན་ནུས་བརྟག་པ་ལ། །སྲིན་ཡུལ་ལང་ཀ་པུ་རི་དེ། །མདོག་ནི་ནག་ལ་ཟླ་གམ་འདྲ། །སོལ་ཕྱེ་བཏབ་པའི་རི་བོ་འདྲ། །ཟས་སུ་ཤ་དང་ཁྲག་ལ་དགའ། །གོས་སུ་རེ་བ་ནག་པོ་གྱོན། །དེ་སྐད་ཅིས་ནི་གསུངས་པ་དང་། །དེ་ཚེ་ཉན་ཐོས་མཆོག་བརྒྱད་ཀྱིས། །བྲམ་ཟེ་བི་ན་ཡ་ག་བསྙག །བྲམ་ཟེའི་ཆོས་གོས་ནག་པོ་གྱོན། །ཡུངས་དཀར་ཕོ་ཉ་ཕྱོགས་བཅུར་བཏང་། །སྐུ་གདུང་བསྲེག་པའི་ཐལ་བ་དང་། །སོལ་བ་དང་ནི་ངན་སྙིགས་དང་། །ས་ཚིག་རྡོ་ཚིག་ཕྱེ་ཕྱེ་དང་། །འཁོར་ར་ཡུག་ཡུག་བསྡུས་ནས་ནི། །ལང་ཀ་པུ་རི་མདོག་འདྲ་བའི། །མཆོད་རྟེན་ནག་པོ་བཞེངས་སུ་གསོལ། །མདོག་ནི་ནག་ལ་ཁྲོས་པ་འདྲ། །ལྷ་འདྲེ་འཇིགས་པའི་རི་བོ་བརྩེགས། །སྲིན་པོ་སྔགས་པའི་ཁྲི་འཕང་ཅན། །གདོན་བགེགས་བརྒྱལ་བའི་འོད་ཟེར་ཅན། །དེ་ལ་མིང་དང་མཚན་བཏགས་པ། །གདུག་པ་འདུལ་བའི་མཆོད་རྟེན་ལགས། །ཞེས་གསུངས་སོ། །

མཆོད་རྟེན་ནག་པོ་བཞེངས་པའི་དགོས་པ་ནི། ཡུལ་དུ་ཐན་ལྟས་དང་འཁྲུག་ལོང་བྱུང་བ། མུ་གེ་དང་ནད་ཡམས་མཆེད་པ། བྱད་ཁ་ཕུར་ཁ་བཟློག་པ། གོད་ཁ་དང་ས་དགྲ་བཟློག་པ། མ་རུངས་གདོན་འདྲེ་གནོན་པ་སོགས་ཀྱི་ཆེད་དུ་བརྩིགས་པ་ཡིན།

ཐོག་མར་སྒྲུབ་པའི་ཞག་གྲངས་བསྟན་པ་ནི། བསྙེན་སྒྲུབ་ཚུལ་བཞིན་བྱས་ལ་ཡི་དམ་དང་ཆོས་སྐྱོང་ལ་བསྐང་བ་དང་བསྐུལ་བ་བྱ། རང་མདུན་དུ་ཐུན་ཁུང་ནང་དུ་གཟུགས་བྱ་རྣམས་བཞག་ལ། གང་གནོད་པའི་དགྲ་བགེགས་གདུག་པ་ཅན་རྣམས་བཀུགས་ཏེ། གཟུགས་བྱང་རྣམས་ལ་བསྟིམ། དེ་ནས་ཟོར་དང་ཐུན་གྱིས་བྲབ་ལ། རབ་ནི་ཞག་བདུན་དང་། འབྲིང་གསུམ། མ་མཐའ་ཡང་ཞག་གཅིག་ལ་བསྒྲུབ་དགོས། དེ་ནས་འབྱོར་ན་གཟུགས་བྱང་རྣམས་སཙྪ་ནག་པོའི་ནང་དུ་གཞུག་དགོས་ལ། མ་འབྱོར་ན་རས་ནག་གིས་བཏུམ་ལ། ཤི་སྐྲ་ཚོན་སྐུད་སྣ་ལྔས་རྒྱ་གྲམ་ལྟར་བཅིངས། ཚེར་མའི་ཤིང་གི་བར་དུ་ལྟེམ་ལ་བྲ་མའི་ཤིང་གིས་ཁ་བསྡམས་ཏེ་མནན་པ་བྱའོ། །

མཆོད་རྟེན་ནག་པོའི་ཞབས་སུ་གནོན་རྒྱུའི་རྫས་ནི། ཀརྨ་ཆགས་མེད་ཀྱི་མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་བྱ་བ་ལས། སམ་ནག་ཚེར་མ་གདུག་པ་ཅན། །དྲག་པོའི་ཤིང་ལ་སྲོག་ཤིང་བྱས། །འདྲེ་སྲིན་མང་བོའི་བླ་ཡང་བྲིས། །ལང་ཀ་པུ་རིའི་གཉའ་མནོན་བྱས། །འཛམ་བུ་གླིང་གི་མི་རྣམས་ཀྱིས། །གྲོ་ག་ཤ་ཤུན་སྟག་སྡེབ་ལ། །སོལ་ཕྱེ་ནག་པོའི་སྣག་ཚ་དང་། །ཕག་རའི་ཁྲག་གིས་འདྲེ་ལིང་བྲིས། །ལིང་ག་གཟུགས་ཅན་བྲིས་ནས་ནི། །དཀར་ནག་སྐུད་པས་དམ་དུ་བཅིངས། །ཤེལ་ཚིག་རམ་པ་རུག་པ་དང་། །ཟན་དྲུག་དང་ནི་ཡོས་སྙིགས་དང་། །ཙ་སྦྲུལ་ཐོད་དགུ་རུས་བཅུ་དང་། །འདྲེ་སྲིན་གདོན་བགེགས་གནོད་བྱེད་རྣམས། །དཀར་དང་བྲབ་པའི་ཡས་སྟགས་རྣམས། །མཆོད་རྟེན་ནག་པོའི་ཞབས་སུ་བཅུག། ཅེས་གསུངས་པ་ལྟར་རོ། །

 མཆོད་རྟེན་ནག་པོ་གདབ་པའི་ས་ནི། ལུང་གསུམ་མདོ་དང་། སྒང་གསུམ་སྣ། ལུང་བ་ངན་པའི་ཁ། ས་ངན་ཐ་མའི་རྟེན་ཕུར། ས་དགྲ་རྩུབ་པའི་གཉའ་ནོན། ཆུ་ཆེན་གྱི་འགྲམ་དང་སྣ་ཁ། བྲག་དམར་སྲེ་མོ་འདྲ་བ། བྲག་ནག་སོག་པོ་ཁྲོས་འདྲ། གཅན་གཟན་གྱི་ཁ་གདངས་པ་ལྟ་བུའི་བྲག་རྩ། ཆུང་སྲི་རྨང་འདྲེ་གོད་འདྲེ་ནོན་པ། བྱད་ཁ་ཕུར་ཁ་གནོན་པ། ཤི་སྒབ་གཅོད་པ། མཆོད་རྟེན་ཐུར་རྒྱུ་ལྟ་བའི་སྣ། ཆུ་སྲིན་ཁ་གདངས་པ་ལྟ་བུ་དང་། སྦྲུལ་ནག་ཐུར་རྒྱུགས་འདྲ་བའི་ཁ། གྲུ་གསུམ་ཕུར་སོ་འདྲ་བ་སོགས་ལ་གདབ་པར་བྱའོ། །

མཆོད་རྟེན་བྱ་བའི་ལས་ཐབས་བསྟན་པ་ནི། སྒྲུབ་པ་པོ་ཡོན་བདག་གི་ལོ་ལྷའི་ཕྱོགས་སུ་རྒྱབ་བརྟེན་ལ་གནོད་ཕྱོགས་སུ་ཁ་བསྟན་ནས། ས་བདག་ལ་སྐྱེམས་དང་གཏོར་བསྔོས་བྱས་ཏེ། བཀའ་བསྒོ་དང་སྡོངས་གྲོགས་བཅོལ་ནས་ས་བསླང་བར་བྱ། དེ་ནས། རང་ཉིད་ཡི་དམ་དུ་བསྐྱེད་དེ་འཆམ་གྱི་སྟངས་སྟབས་དང་བཅས། ས་བདག་དམ་ལ་བཏགས་པའི་ས་འདུལ་དང་གཉེན་པོ་རྫས་ཀྱིས་འདུལ་བའི་ས་འདུལ་བརྒྱབ་ཏེ། སྒྲུབ་པ་པོའི་ཐུ་བ་གཡོན་པ་ས་ལ་ལན་གསུམ་བརྡབས་ནས་སྐག་ལེ་བརྒྱབ་པས། ས་ཁ་དྲུག་ཏུ་གས་ཏེ་འོག་གི་རྒྱ་མཚོ་སྔོ་མེར་མཐོང་ནས་ཆུ་སྲིན་ཁ་གདངས་པའི་གྲེ་བར་གཤིན་རྗེ་གྲོང་ཁྱེར་དུ་དམིགས་ནས་དམར་གཏོར་གཤིན་རྗེ་ཁ་རུ་བརྒྱབ་ཏེ་སྡང་དགྲ་གནོད་བྱེད་གཏད་པའི་ཡོན་དུ་ཕུལ། གཤིན་རྗེ་ལྟོ་བ་ཞབས་མེད་མུན་པའི་འཁོར་ལོ་ཞིག་ཏུ་སྒོམ་ལ། སྦྱིན་བདག་ལ་གནོད་པའི་དམ་སྲི་སོགས་གང་ཡིན་པ་ཆུ་བོ་གྱེན་དུ་ལོག་པ་དང་བསྐལ་བ་ཆགས་འཇིག་མ་བྱུང་བར་དུ་མནན་ཏེ། དྲག་སྔགས་བཟླ་ཞིང་ཐུན་དང་ཟོར་གྱིས་བྲབ་བོ། །དེ་ནས། ཡས་གླུད་རྫོང་འདེབས་རེ་སྒྱེ་ནང་དུ་བླུགས་ཏེ་རྔ་མོང་ག་བར་བཀལ། དེ་སྟེང་ཐོད་དགུ་རུས་གསུམ་བཀྲམས། ཐལ་སོལ་མང་བོས་སྟེང་ནས་དགབ་པར་བྱ། དེའི་སྟེང་རོ་ཡམ་ལ་རོ་སོལ་གྱིས་རྒྱ་གྲམ་བྲིས་ལ་མནན། དེའི་གྲོད་པ་རླུང་གིས་བཀང་ལ་བཞག དེའི་མེ་བླུགས། ས་ཡིས་དགབ། དེའི་སྟེང་ས་ཁོད་རིམ་དགུའི་བར་མཚམས་ལ་རྒྱ་གྲམ་རིམ་བཞིན་དགུ་བྲིས་ཏེ་རྒྱས་གདབ་བོ། །དེ་ནས། བྲོ་ར་བཅའ་ལ་གང་ཤེས་བརྡུང། དེའི་སྟེང་མཆོད་རྟེན་བང་རིམ་གསུམ་པ་བྱ། དེ་ནས། སྲོག་ཤིང་བཙུགས་ལ་སཙྪ་ནག་པོ་བྱས་ལ་རྣམ་སྣང་ནག་པོར་སྒོམ་ཏེ་རྩ་བར་བཞག་ཏེ་བརྩིགས་དགོས་སོ། །

རྗེས་ཀྱི་བྱ་བ་ནི། མཆོད་རྟེན་ནག་པོ་བཞེངས་གྲུབ་བྱུང་ན། ཡོན་བདག་སྔོན་དུ་བཏང་ནས། རང་ཉིད་རྗེས་སུ་ཁྱུང་སྔགས་འདོན་བཞིན་འོང་དགོས་པར་བཤད་ལ། རབ་ཡིན་ན། གནས་དེར་སྦྱིན་སྲེག་དང་ཚོགས་འཁོར། བཀྲ་ཤིས་དགུ་བརྩེགས་དང་བསྐང་གསོ། སཙྪ་དང་ས་བདག་འཁྲུགས་བཅོས་བྱས་ན་ལེགས་པར་བཤད་དོ། །ཞིབ་ཏུ་ཤེས་འདོད་པ་རྣམས་ཀྱིས་ཀརྨ་ཆགས་མེད་ཀྱི་མཆོད་རྟེན་ནག་པོ་གདུག་པ་ཀུན་འདུལ་ཅ་ཏི་དང་། མཆོད་རྟེན་ནག་པོའི་ལྷན་ཐབས་ལ་བལྟ་བར་བྱའོ། །

བོད་ཤོག་བཟོ་ཐབས།

༡ ཤོག་བུ་བཟོ་ཐབས། བོད་ཀྱི་ཤོག་བཟོ་བྱེད་ཐབས་འདི་ལ། རབ་འབྲིང་ཐ་གསུམ་ཡོད། རབ་གྱི་རྒྱུ་ནི། དམ་ཤོག་ལྡུམ་དུང་ལོ་མ་བྱ་བ་དེ་ཡིན། དགེ་མཚན་ནི་སྲབ་མཐུག་སོགས་གང་འདོད་སྒྱུར་ཆོག་ལ། དེ་ཡང་། སྐྱེས་ས་བཟང་ངན་གྱིས་རབ་འབྲིང་ཐ་གསུམ་ཡོད། ས་ནག་དང་ཤུག་པ་རྫ་བྲག་མེད་སར་སྐྱེས་པ་དེ་རབ་དང་། བྱེ་མ་དང་ས་དམར་སོགས་ཀྱི་ནང་དུ་སྐྱེས་པ་དེ་སྲ་ཞིང་ཚོས་དཀའ་ལ། ཁ་དོག་ཀྱང་སེར་བས་འབྲིང་། ཤུན་ལྤགས་མཐུག་ཅིང་འབུ་ཟན་བརྒྱབ་པ་ནི་ཐ་མའོ། །ཤོག་ལྡུམ་བཏུས་ཏེ་ཤུན་ལྐོགས་བཤུ་བ་སོགས། གཙང་བཟོ་ལེགས་པར་བྱས་ནས། སྙིང་བོ་བླངས། བྱ་རྡོ་བསྲེགས་པ་ཆུ་འཁྱག་ཏུ་འཕངས་ནས་དར་བ་ཙམ་ཏུ་བྱས་པ་ཏེ། དེ་ལྕེ་ཐོག་ཏུ་བླངས་ན་ལྕེ་འབིགས་པ་ལྟར་སྣང་བ་ལེགས་རབ་ཡིན། ཚོས་རྗེས་ཟན་ཕྱེ་ལྟར་ཞིབ་པར་བརྡུང་སྟེ་ཆུས་ནང་དུ་བཏབ་ནས་ལེགས་པར་དཀྲུགས། དེ་ནས། ཤིང་གཞོང་གི་མཐིལ་དུ་སེང་རས་ཀྱིས་གཡོགས་པའི་ཚགས་ལྟ་བུ་དེའི་ནང་དུ་བླུགས་ནས། མ་ཡོ་བར་རྫིང་ཆུའི་ནང་དུ་བཙག་དཀྲུག་བྱས་ཟིན་པ་དང་། བླངས་ནས་སྐམ་དུ་འཇུག་དགོས་སོ། །

འབྲིང་གི་རྒྱུ་ནི། ཨ་ག་རུའི་ཤུན་པ་ཡིན། བཙོ་བརྡུང་བྱེད་ཐབས་ནི། དེ་ཤུན་པ་བཤུས་ཏེ་བར་ཤུན་དེ་ཡུད་ཙམ་བཙོས་ནས་ཁུ་བ་འཕོ། གཞན་རྣམས་གོང་ལྟར་ལ། རྒྱུ་འདིའི་ཤོག་གུ་ནི་མཐུག་པོ་ཡིན་པས། ལྒིགས་བམ་གྱི་འབྲི་གཞིར་མཆོག་གོ །

 ཐ་མའི་རྒྱུ་ནི། རེའུ་ལྕག་གི་རྩ་བ་ཡིན། བཙོ་བརྡུང་བྱེད་ཐབས་ནི། ཤུན་ལྐོགས་དང་ནང་ཉིང་དོར་བའི་བར་ཤུན་དེ་ཐལ་ཁུའི་ནང་དུ་བཙོས་པས། བལ་ལྟར་ལྷོད་པར་འོང་། དག་འདོན་དུ་ཨ་རུ་ར་ཐུམ་གཅིག་འདེབས་དགོས། གཞན་གོང་ལྟར་ལ། འདི་རྒྱུ་ཐ་མ་ཡིན་ཀྱང་དུག་ཡོད་པས་འབུ་སྲིན་གྱིས་གནོད་པས་མི་ཚུགས་ཀྱང་། ཡུན་དུ་མི་གནས་པར་བྱེད་དོ། །

ཤོག་གུ་སྤུ་གཅོད་དང་སྦག་འདོན་བྱེད་ཐབས་ནི། ཤོག་གུ་བཟོས་ཚར་ནས། རྡོ་དཀར་གྱིས་བྲད་རྡོལ་མ་ཤོར་བར་དབུར་བརྡར་བྱ། བག་ཆུ་ཆུ་ནང་དུ་དཀྲུགས་པའི་ལྦུ་བ་དོར་ཏེ། དྭངས་མ་ཆ་གཉིས་སུ་བགོས་པའི་ཆ་གཅིག་ཚོས་པར་བསྐོལ་ནས་ཕོག་ལ། མ་བསྐོལ་བའི་ཆ་གཅིག་པོ་དེ་ཡང་བསྲེས། དེ་ནས་དར་བག་ཆུའི་བཞི་ཆ་ཙམ་དང་། སྦྱིན་ཆུའི་དྭངས་མ་ཅུང་ཟད་བཏང་། ཚ་ཆེ་ན་ཤོག་གུ་འཚིག གྲང་ཆེ་ན་བག་ཆུ་མི་འགོ་བས་ཤོག་གུ་སྲ་འཐིང་མི་འོང་། དེ་བས་ཚ་དྲོད་རན་པར་བྱ། རྫས་དེ་དག་གི་ཡོན་ཏན་ནི། དར་བས་དཀར་ཞིང་དྭངས། བག་ཆུས་སྲ་ལ་འབོལ་བ་འབྱུང་། སྤྱིན་ཆུས་སྲ་ཤིང་མདངས་ལྡན་ཞིང་ཡི་གེ་མི་འབྱམས་པ་འོང་། དེ་ནས་ཤོག་ཚན་བྱས་ཏེ་སྐམ་རློན་རན་པར་བསྡམས་ནས། རྡོ་མཁྲེགས་ཞིང་འཇམ་པོའི་སྟེང་དུ་གཡག་རྭ་འམ་སྲ་ཤིང་གི་བེར་ག་འཇམ་པོས་དལ་བུར་བརྡུང་ལ་སྐྱོན་མི་འབྱུང་བར་བྱའོ། །ཤོག་བཟོ་ལེགས་རབ་ནི། སྲབ་མཐུག་དང་བུག་རྡོལ་མེད་པ། ནག་དྲེག་དང་བརྡར་ཤུལ་མེད་པ། འབོལ་ཞིང་དཀར་ཤད་ཆེ་བ་དེའོ། །དེ་ལྟར་ཤོག་བཟོ་ལེགས་པར་གྲུབ་རྗེས་ཐིག་རྩ་འདེབས་སྟངས་མཁས་པ་སོ་སོའི་ཕྱག་རྒྱུན་ལྟར་བྱའོ། །

༢ ཤོག་བུར་ཚོས་བྱེད་ཐབས། ཤོག་བུ་ལ་ཚོས་བསྒྱུར་སྟངས་འདི། ད་ལྟའི་དུས་འདིར་ཕལ་ཆེར་ཉམས་དམས་སུ་གྱུར་ལ་ཉེ་ཡང་། རང་ཅག་གི་མེས་པོ་གོང་མའི་ཕྱག་རྒྱུན་ཁྱད་པར་ཅན་ཞིག་ཡོད་པས། འདི་དག་སྲུང་སྐྱོབ་བྱེད་པ་ནི་ཕྱི་རབས་པའི་འོས་འགན་ཡིན་ལ། འདིར་ཅུང་ཟད་ཙམ་བརྗོད་ན།

༡ ཤོག་དམར་ཚོས་བསྒྱུར་བ་ལ། དང་བོར་གཙོད་ཁུ་གར་མོ་སྟེ་སླ་བོ་ཡིན་པ་དྲངས་ནས་སྐེམ་དགོས། དེ་བུལ་ཆུ་འམ་རྡོ་ཞུན་གྱི་དྭངས་མ་སྔོ་སིང་ངེ་བ་ལ་དྲངས། ཡང་ན། རྒྱ་ཚོས་ཚ་ལ་མ་སོང་བའི་ཁུ་བ་ལ་དྲངས། ཡང་ན། འོ་རྐྱལ་ནང་དུ་འོ་ཤིང་བླུགས་ལ་དེའི་ནང་དུ་འབྲི་མོག་གི་རྩ་བ་སྦུན་མ་མང་དུ་བསགས་ལ་བཏབ་ནས་ཁུ་བ་ཞག་གཅིག་བཞག ནངས་པར་ཁ་དམ་པར་བྱས་ལ་ཕྱི་ནས་ལག་ཕུར་ཡང་ཡང་བྱས་པས་ཁུ་བ་བཏོན་པ་ལ་དྲངས།

༢ ཤོག་སེར་ནི། ཞུ་མཁན་བཟང་བོ་ཚ་ལ་བཏབ་ནས་ཁུ་བ་བཏོན། གར་མར་དྲངས་པས་དམར་སེར་འོང་། ཡང་ན། སྔར་བག་སེར་གྱི་ཚོས་དེ་དེར་དྲངས། དེ་རྡོ་ཞོ་དྭངས་མ་ལ་དྲངས་ན་དམར་སེར་འོང་། ཡང་ན། མེ་ཏོག་ལྕང་ཤོག་ཁུ་བར་དྲངས་ནས་སེར་ཚུར་ཅུང་ཟད་བཏབ་པ་ལ་དྲངས། ཤིན་ཏུ་སེར་བོ་དགོས་ན། མྱང་རྩིའི་སྤྲས་ཀྱི་ཁུ་བར་དྲངས་ན་ལེགས་པོ་འོང་ངོ་། །

༣ ཤོག་སྔོན་ནི། ཧོར་ཟླ་ལྔ་བའི་ནང་གི་ཤིང་སཱ་ལ་ཆེན་པོའི་མེ་ཏོག་དམར་ལ་སྔོ་མདངས་ཡོད་པ་ཐོན་དུས་བཏུས་ཏེ། ལྕགས་སྣོད་ཁུ་བ་བཏོན་ལ། ནང་དུ་ལྕགས་བྱང་མ་བཅུག་ལ་ཚི་ཞག་བཅད་ལ་ཕོ་ནས། ཞག་གཉིས་ཙམ་བཞག བུལ་ཏོག་ཅུང་ཟད་བཏབ་བསྲེས་པ་ལ་དྲངས་དགོས།

༤ མོག་སྔོན་བྱ་ཚུལ་ནི། མེ་ཏོག་ཤིང་དྲིལ་བསྐམ་པ་ཆུར་བཏབ། མཛུབ་མོ་ཚུགས་ཙམ་བསྲོས་ལ། ཁུ་བ་ཡང་ཡང་སྔ་ཕྱིར་བྱུང་བ་སྡོམ། ཚིགས་མ་དོར། དེར་ཚ་ལ་ཅུང་ཟད་བཏབ་པ་ལ་དྲངས་པས་འགྲུབ་བོ། །

༥ ཤོག་ལྗང་ནི། བཤད་མ་ཐག་པའི་མེ་ཏོག་ཁུ་བ་འདི་ལ་བུལ་ཏོག་དཀར་བོ་སླད་མེད་བཏབ་པ་ལ་དྲངས་པས་འབྱུང་ངོ་། །

༦ སྣག་ཤོག་ནི། སེམས་ཅན་གང་རུང་གི་ཀླད་པ་བཙོས་ལ། ཁྲག་ཁུ་དོར་ནས་རུལ་དུ་བཅུག་ན་གསེར་དངུལ་མི་གཡའ་བའི་དགོས་པ་ཡོད། ཀླད་སྤྱིན་གྱིས་དམ་སྦྱར་བའི་སྣག་ཚ་འདུལ་ལེགས་སྲབ་མཐུག་མེད་པར་གཟི་མཆོང་གིས་དབུར་རོ། །ཞེས་སོགས་ཤོག་ཚོས་བྱུགས་སྟངས་སྣ་ཚོགས་ཡོད་པས། དོན་དུ་ན་མཐོང་བ་བརྒྱུད་པའི་ལག་ལེན་ལ་ཞུགས་པར་བྱའོ། །

མཐིང་ཤོག་བཟོ་ཐབས།

བོད་འདིར་མཐིང་ཤོག་བཟོ་ཐབས་ནི་གནའ་སྔ་མོ་ནས་དར་བ་སྟེ། སད་ན་ལེགས་མཇིང་ཡོན་གྱི་བཀའ་གཙིགས་ལ། སྲས་ཁྲི་སྲོང་བཙན་གྱི་སྐུ་རིང་ལ། ཤོག་གུ་མཐིང་ག་ལ་གསེར་བྲིས་ཏེ་འཕྲ་མྱེན་གྱི་སྒྲོམ་བུ་བསྩལ་ཞེས་འབྱུང་བ་ལ་ལྟར། གསེར་དང་དངུལ། ཡང་ན། རིན་ཆེན་སྣ་བརྒྱད་གྱི་བྲི་གཞི་ཞིག་གོ། མཐིང་ཤོག་བཟོ་ཐབས་ལ། དང་བོར་ཤོག་གུ་སྦྱར་ག་རྒྱག་བྱེད་ཀྱི་གྲོ་ཞིབ་བསྐོལ་བའི་བག་ཆུ། ཞག་མང་ཙམ་ལ་བཞག་ནས་ལྡུར་དུ་བཅུག དེ་ནས་གཉེར་དང་ཁ་ཁུམ་མ་ཤོར་བར་ཤོག་གུའི་སྲབ་མཐུག་ལ་བལྟས་ཏེ། སྦྱར་དགོས་ལ། སྐམ་ཟིན་ཙམ་ན་ཤོག་གུ་བམ་པོ་རེའི་བར་དུ་འགའ་རེ་སྦངས་ནས། སྤང་ལེབ་ངོས་འཇམ་པོའི་བར་ལ་སྣེམ་ཏེ་མནོན་རྒྱུ་གལ་ཆེ། མཐིང་ཤོག་བཟོ་བའི་སྣག་ཚ་སྒྲོན་མེའི་ཤིང་ཞེས་པ་དེས་བཟོས་པ་ཡིན་ཞིང། སྣག་ཚ་དེའི་ནང་གཡག་ལུག་གི་ཀླད་པ་བསྐོལ་ནས་བསྲེ་རྒྱུ་དང་། དེ་ལག་པས་མཉེད་དེ་དྭངས་བཞུར་བྱས། དེ་ནས་ཤོག་གུའི་ངོས་ལ་ལན་འགར་བྱུགས་དགོས་ཞིང་། ཤོག་མཐའི་ཚད་ལ་དམིགས་ཏེ་དེང་གི་སྨྱུག་ཆུ་སྔོན་པོས་བྱུགས་དགོས། གཞན་ཡང་། མགྲོན་བུ་བསྲེགས་པའི་ཕྱེ་མ། གྲོ་ཆང་དང་ཛཱ་ཏི་བསྲེས་ཏེ་གདུས་པའི་དྭངས་མ་ཤོག་གུར་དྲངས་ན་མཐིང་ཤོག་འབྱུང་ཞིང་། སྐམ་ནས་ཆགས་བྱས་པས་ཨ་རུ་འགའ་ཞིག་བརྡུང་སྟེ་དྭངས་མ་ཚགས་སུ་བཙགས་པ་ཤོག་སྟེང་ལ་བྱུགས་ན་མཐིང་ཤོག་གྲུབ་བོ། །

ཤོག་གུའི་དབུར་རྡོ་ནི། དབུར་རྡོ་དུང་ལས་བྱས་ན་འཇམ་པོར་འོང་ཡང་མདོག་སྔོན་པོར་འགྲོ། རྡོས་དབུར་ན་ཤོག་གུ་ཚིག མཆོང་གིས་རི་མོ་དོད། ཟངས་ལྕགས་ཀྱིས་གཡའ་འབྱུང་། དེ་བས་དབུར་རྡོ་ཐམས་ཅད་ཀྱི་མཆོག་ནི་གཟི་སེར་ཁྲ་ཡིན། དེས་དབུར་ན་འབོལ་ཞིང་འཇམ་ལ། མདོག་ལེགས་པ་འོང་། མ་རྙེད་ན་རྭ་དང་དཀར་ཡོལ། མ་ན་ཧོ་སོགས་རིན་ཆེན་གྱི་རིགས་སྲ་མཁྲེགས་ཅན་རྣམས་བཟང་ངོ་། །

དབུར་གདན་ལ། གས་འཛེར་མེད་པའི་ངོས་འཇམ་པའི་སྲ་ཤིང་གི་སྟེང་ལ། མཐའ་དབུས་མ་ཁྱབ་པ་མེད་པར། ཤེད་ཤུགས་རན་པར་ཡུན་རིང་དབུར། དབུར་ངན་པའི་རྟགས་སུ། དབུར་ངན་དབུར་དང་མཉེད་ངན་གྱི། །དཀྱིལ་ནས་འདུལ་བཞིན་མཐའ་ནས་གྱོང་། །ཞེས་པ་ལྟར་འོང་བས། དེ་ལྟར་མ་ཤོར་བ་གལ་ཆེ། མཐིང་ཤོག་གི་དབུར་རྡོ་དང་དབུར་གདན་འདི་བཞིན་རས་གཞི་ལའང་སྦྱར་ན་འགྲིག་གོ།

 ཡང་། རྒྱ་ནག་གི་ལུགས་ལ། མགྲོན་བུ་བསྲེགས་ཏེ་ཞིབ་བཏགས་བྱས། གྲོ་ཆང་དང་ཛཱ་ཏི་བསྲེས་ནས་གདུས་པའི་ཁུ་བར་ཤོག་བཟང་དྲངས་པས་མཐིང་ཤོག་འབྱུང་ཞིང་། བསྐམས་ནས་ཆགས་བྱས་ལ། ཨ་རུ་རའི་ཆུ་གོང་ལྟར་བཏོན་པར་བྱའོ། །

ཤོག་གུའི་ཕང་དུ་ཐིག་རྒྱག་བྱེད་ཀྱང་། གང་བྱུང་གི་སྨྱུ་གུའི་མི་ཆོག་པར། བརྡར་རྡོ་སྨྱུ་གུ་དེ་བཟང་བར་བཤད། ཤོག་གཞི་ལ་ཡི་གེ་ཡང་གོ་རིམ་བཞིན། ཡིག་ཕྲེང་དང་བོ་ལ་གསེར། དེ་ནས་རིམ་བཞིན་དངུལ། བྱུ་རུ། ལྕགས། ཟངས། དུང་བཅས་རིན་ཆེན་སྣ་བདུན་གྱིས་འབྲི་བའི་སྲོལ་ཡོད་ལ། དེང་སང་རྒྱུགས་ཆེ་བ་ནི་གསེར་བྲིས་སོ། །

སྨྱུག་བཟོ་དང་ཡིག་གཟུགས།

༡ ད་ལྟའི་ཡིག་རྒྱུན་གྱི་ཁུངས། བོད་ཡིག་ཁུངས་གཏུགས་ས་ལ་མཁས་པའི་བཞེད་ཚུལ་མང་ཡང་། ལཉྫ་ལ་དཔེ་བྱས་ནས་དབུ་ཅན་དང་། ཝ་རྟུ་ལ་དཔེར་བྱས་ནས་དབུ་མེད་བཟོས་པར་ཀུན་ལ་གྲགས་སོ། །དེ་ཡང་། ཐོན་མིའི་སྐུ་དུས་ནས་དབུ་ཅན་དར་བ་སྟེ། དུས་རབས་བདུན་པའི་སྨད་ཀྱི་ཆར། ཐོན་མིས་ཡི་གེ་གསར་བཏོད་བྱས་ཏེ་སྲོང་བཙན་ལ་ཆེ་བརྗོད་གནང་བ། ལྷ་སའི་ཤར་རྒྱུད་ཛེན་ཁོག་སྣ་རྡོའི་ལྷ་ཁང་གི་བྲག་ལྡེབས་སུ་བརྐོས་ཡོད་པ་དེར། སྦལ་ནག་ན་ལ་བགྲད་འདྲ་གསུངས། དེ་ནས་རིམ་བཞིན། ཆ་ངར་རིན་ཆེན་འབར་གྱིས་བྲིས་པ་སོ་ཕག་ཞིབ་འདྲ། ཆབ་དཀར་བེའུ་ཚེས་བྲིས་པ་བྱ་ཕོ་འཇོལ་འདྲ། གཙང་དགེ་བསྙེན་དཀོན་མཆོག་དབང་གིས་བྲིས་པ་ནས་ནག་བཀྲམས་འདྲ། བྷེ་ཤོ་ཁྲམ་གྱིས་བསམ་ཡས་རྡོ་རིང་ལ་བྲིས་པ་མུ་ཏིག་བསྟར་འདྲ། ཚེ་སྤོང་བྱང་ཆུབ་གྱིས་བྲིས་པ་སྦུར་ནག་བགྲད་འདྲ། འབྲེ་བ་ཡོན་ཏན་གྱིས་བྲིས་པ་ཉ་མོ་ཆུ་ནས་ཕྱུང་འདྲ། གྲ་ཤོད﹙དུང་དཀར་ཚིག་མཛོད་ལས། སྐ་ཅོག་ཟུང་ཡིན་པར་འདྲ་གསུངས﹚རྣམ་གཉིས་ཀྱིས་བྲིས་པ་སེང་གེ་གནམ་དུ་མཆོང་བ་ལྟ་བུ་སྟེ། འདི་རྣམས་བསྟན་པ་སྔ་དར་གྱི་ཡིག་མཁན་དང་། ཕྱི་དར་གྱི་ཚེ། སྒྲོ་ཉ་ཤ་རི་ནས་མཐོང་བ་རྡོ་རྗེ་བར་གཟབ་ཆེན་གྱི་འབྲི་སྲོལ་རིམ་པ་དགུ་བྱུང་། དེའི་རྗེས་ཁྱུང་བོ་གཡུ་ཁྲི་འབར་གྱིས་དཀྱིལ་འཁོར་གྱི་ཆ་ཚད་ལ་དཔེ་བླངས་ཏེ། ཆ་ཆེན་ཆ་ཆུང་གི་སྲོལ་བཏོད་པར་མ་ཟད། སྨྱུ་གུ་དང་སྣག་ཚ་ཤོག་གུ་བཟོ་ཚུལ་སོགས་ཀྱི་བཀའ་རྩོམ་གནང་སྟེ། སློབ་རྒྱུན་བསྐྱངས་ནས་ད་ལྟའི་འབྲི་སྲོལ་འདིའོ། །དབུ་མེད་འདི་ཐོན་མིའི་སྐུ་དུས་སུ་དར་བ་མ་ཡིན་ཡང་། ཡིག་མཁན་ཚོའི་ལག་བྱང་གི་གོ་རིམ་ལས་བྱུང་བར་མངོན། དེ་ཡང་། ཡིག་གཟུགས་འདི་མི་འདྲ་བ་དྲུག་ཏུ་དབྱེ་ཆོག་སྟེ། ཀོང་སྤྲུལ་ཡོན་ཏན་རྒྱ་མཚོས། བོད་ཡིག་གཟབ་ཆེན་གཟབ་ཆུང་འབྲུ་ཆེ་ཆུང་། །གཤར་མ་དཀྱུས་ཡིག་དྲུག་ལ་ཐམས་ཅད་འདུ། །གསུངས་པ་ལྟར་རོ། །དབུ་ཅན་ལ་རྗེ་ཙོང་ཁ་བ་ནས་པར་འདེབས་ཀྱི་བྲིན་སྒོ་ཆེ་བས། འགྱུར་བ་ཆེར་མ་སོང་ལ། དབུ་མེད་ལ་དབུས་བྲིས། ཁམས་བྲིས། ཨམ་བྲིས་གསུམ་བྱུང་ཡོད་དོ། །

༢ སྨྱུ་གུ་བཟོ་སྟངས། ཤེས་བྱ་ཀུན་ཁྱབ་ལས། སྨྱུ་གུའི་མཆུ་ལ་མཁས་གྱུར་ན། །ཡི་གེའི་འབྲི་ལ་མཁས་པར་བཤད། །གསུངས་པ་ལྟར། ཡིག་གཟུགས་ལེགས་པོ་ཞིག་འབྲི་བ་ལ། །སྨྱུ་གུ་བཟོ་སྟངས་ལ་མཁས་དགོས། །སྨྱུ་གུའི་རྒྱུར་འོས་པའི་སྨྱུག་མ་ནི། སྦུ་གུ་ཕྲ་ལ་ལྕི་བ། སྨྱུག་ཤ་མཐུག་ཅིང་མ་འཆུས་པ། མདོག་སེར་ལ་འོད་ལྡན་པ། རྩི་འཇམ་ལ་སོས་མནན་ན་འདྲེད་པ་དེ། རིན་ཆེན་སྣ་བརྒྱད་མཚལ་སྣག་གང་འབྲི་བ་ལ་མཆོག་གོ། བྱེ་བྲག་ཏུ་འཇང་སྨྱུག་ནག་པོ་དེ་དཀྱུས་ཡིག་འབྲི་བར་བཟང་། ལྕགས་སྨྱུག་དང་ལྷོ་སྨྱུག་རོང་སྨྱུག་གསུང་རབ་ཆེན་པོ་འབྲི་བར་བཟང་ངོ་། །

སྨྱུག་མ་སྲ་བཅོས་བྱེད་ཐབས་ནི། སྨྱུག་རྣམས་ཡུན་རིང་དུད་ཁང་དུ། །བཏགས་ལ་བ་རྐང་རྙིང་བ་རབ། །མ་རྙེད་རྐང་མར་རྙིང་བ་བྱུགས། །ཡོས་ཚན་ནང་བཅུག་འཇམ་གྱིས་ཕྱིད། །རུས་པ་ལྟ་བུར་མཁྲེགས་པར་འགྱུར། །ཞེས་སོ། །

༣ སྨྱུ་གུ་བཟོ་ཐབས། ཤེས་བྱ་ཀུན་ཁྱབ་ལས། སྨྱུ་གུ་མཐོ་བས་མི་རིང་ཞིང་། །མཛུབ་པས་མི་ཐུང་ཕྲ་སྦོམ་རན། །མཐེབ་མཛུབ་ཚད་སྦྱར་འགྲིམས་བདེར་གཞོགས། །རྩེ་སོར་ཕྱེད་གཉིས་གཞལ་བའི་སར། །སུམ་གཉིས་རྫིང་ལ་སུམ་གཅིག་མཆུ། །གཟོབ་འདོད་གས་ཆུང་མགྱོགས་འདོད་ཚེ། །རྫིང་འདྲ་ཡུར་བ་འདྲ་བ་ཞེས། །རྒྱབ་ནས་བལྟས་ཏེ་གཡས་གཡོན་སྙོམས། །རྫིང་ཆུ་ཧ་ཅང་མ་སྲབ་ལ། །བཅད་ཁ་གྱེན་གསེགས་རིམ་གཅོད་བྱ། །གསུམ་ལྡན་ལྔ་འཛོམས་ཞེས་པའི་དོན། །ཞེས་དང་། ཚེག་བྲིས་འབྲི་ན་མཉམ་པར་བཅད། །ཟླུམ་བྲིས་འབྲི་ན་ཉིས་ཆོད་བྱ། །སྨྱུག་ཁ་ཆིག་ཆོད་བྱས་གྱུར་ན། །ཡི་གེ་ལེགས་པའི་གནད་གཅིག་ཡོད། །སྨྱུག་ཁ་ཉིས་ཆོད་བྱས་གྱུར་ན། །སྨྱུག་ཁ་སྲ་བའི་གནད་ཅིག་ཡོད། །ཅེས་གསུངས་སོ། །དེང་སང་ལྕགས་སྨྱུག་དང་སྨྱུག་ཆུ་སྣ་ཚོགས་ཡོད་ཀྱང་། བོད་ཡིག་ལེགས་པོ་ཞིག་འབྲི་བ་ལ་ཤིང་སྨྱུག་འདི་ཧ་ཅང་བཟང་ངོ་། །

༤ སྨྱུག་གྲི་བཤད་པ། བཟོ་གནས་ལེགས་ཉེས་གྲི་ལ་རག །ཅེས་པ་ལྟར། ལྕགས་རྒྱུ་བཟང་ངན་རན་ཞིང་། ཕོ་ལྕགས་སམ་མོ་ལྕགས་འདྲེས་མ་འམ། མཉེན་ལ་ངར་འཛིན་པའི་རྣོ་ཅན་གྱི་ལྕགས་ལ། མར་དང་བུར་སྦྲང་བསྲེས་ཏེ། ལྕགས་ཞུན་བྱ་དགོས་སོ། །སྨྱུག་གྲིའི་དབྱིབས་ལ། གྲི་རྩེ་གཟོང་ལྟར་མཉམ་པ་སྨྱུ་གུ་བཟོ་བ་ལ་བཟང་། གྲི་རྩེ་ལྟག་སོ་བྱས་པ་རྫིང་དང་ལྟག་རིས་འབྱེད་པར་བཟང་། བལ་ཚིལ་ཁྲག་དང་ཨ་རུ་ར་ངར་ལྡུད་པ་ལ་བཟང་ངོ་། །

༥ སྣག་ཚ་བཟོ་སྟངས། ཀོང་སྤྲུལ་རིན་པོ་ཆེས། སྣག་ཤོག་སྨྱུ་གུ་མི་གཟོབ་པར། །ཡི་གེ་གཟོབ་འདོད་ཡིག་མཁན་འཁྲུལ། །ཞེས་པ་ལྟར། ཡི་གེ་བྲིས་བཟང་ངན་སྣག་ཚ་ལ་རག་ལས། སྔོན་གྱི་ཚེ་སྣག་ཚའི་རྒྱུ་དགུ་ཡོད་པ་ལས། ཆེས་བཟང་བ་ནི། མར་ནག་གི་མེ་ཏོག་དང་། སྒྲོན་ཤིང་། ཉ་སྦྲིད། གྲོ་ག ཐང་ཚིལ་ལྔ། དེ་དག་ལས་རབ་མར་ནག་གི་མེ་ཏོག་དང་སྒྲོན་ཤིང་། འབྲིང་ཉ་སྦྲིད་དང་གྲོ་ག ཐ་མ་ཐང་ཚིལ་ལོ། །སྣག་ཚའི་བཟོ་སྟངས་རྒྱས་པར་བཟོ་གནས་སྐྲ་རྩེ་ཆུ་ཐིགས་ལས་ཤེས་པར་བྱ་ལ། འདིར་དེ་དག་ལས་མ་བཤད་པ་འགའ་བརྗོད་པ་ལ། མེ་ཏོག་གི་བཟོ་ཚུལ་ནི། སྣུམ་གྱི་མར་མེའི་རྩེར་ཆགས་པའི་མེ་ཏོག་གི་སྣུམ་དྲེག་ལ། ཧ་ལོ་ནག་པོ། རྒྱ་ལྕམ་མེ་ཏོག་བཅས་སོ་སོར་སྦངས་ཏེ་ནག་པོར་གྱུར་བ་དང་ལྷན་ཅིག་ཏུ་བསྲེས་པས་གྲུབ། ས་ལས་བྱེད་ཚུལ་ནི། ས་སྨྱུག་གཤིན་པོ་སྦྱིན་ཆ་གསུམ། ཞིབ་ཟན་ཆ་གཅིག་བསྲེས་ཏེ་གོང་ལྟར་བྱ་བས་འཐུས། ཕ་བ་དགོ་དགོ་ལས་བཟོ་ཚུལ་ནི། ཕ་བ་དགོ་དགོ་མེ་ལ་བཙན་བསྲེགས་བྱས་རྗེས། དམར་དྭངས་པ་དེ་ཆུ་ལ་བསྐྱུར། ཡུན་ཙམ་ནས་བཏོན་ཏེ་གཏུན་ཁུང་དུ་མཉེས། སྐམ་ཐག་ཆོད་སྐབས་བསྔོས་ཏེ། སྦྱིན་ཆུ་དང་བཅས་པར་ཡུན་རིང་མཉེས་པས་མདོག་ནག་བོངས་བྱུང་བ་དེ་ཡིན། བའི་ལྕི་བ་ལས་བཟོ་ན། ལྕི་བ་མེར་བསྲེགས་ཏེ་ཆུ་ལ་བསྐྱུར་ནས་འདོན་དགོས་པ་དང་། དེ་ནས་ཞིབ་ཟན་མཐེབ་ཀྱུ་སྐམ་པོ་བསྲེགས་པ་ཆུར་བསྐྱུར་བ་ཉུང་ཙམ་བསྲེས་ན། གཏུན་དུ་བསྒྱུར་ཚུལ་གོང་སྨྲས་ལྟར་དང་། ཡང་། ཙི་ཏྲ་ཀའི་འབྲས་བུ་སྨིན་སྐབས་ཁབ་ཀྱིས་གཙགས་ཏེ་ཁུ་བ་ལྕགས་སྣོད་ཀྱི་ནང་བླུགས་རྗེས། ཉི་མར་དུལ་བས་ཁུ་བ་སྨུག་ནག་འབྱུང་བ་དང་། དེར་ཐར་རྒྱུ་དང་མཚུར་ནག་གི་ཁུ་བའི་དྭངས་མ་བླུགས་ན་མཆིན་མདོག་འབྱུང་ལ། ཡི་གེ་བྲིས་ཚེ་འདྲེན་བདེ་མོ་འབྱུང་ངོ་། །སྣག་ཚ་སྐ་སླ་ནི་བོད་ཡིག་འབྲི་ཚུལ་མཐོང་བ་ཀུན་སྨོན་ལས། སྨྱུག་རྗེས་སྲབ་ཆེ་ན་རེའུ་ཤེད་ངན་ཟེར། མཐུག་ཆེ་ན་ཕག་མོ་ཚིལ་རྐྱལ་ཟེར། སྲབ་མཐུག་མཉམ་ན་ལྕོང་མོ་མགོ་ལྡོག་ཟེར། མཐུག་སྲབ་རན་པར་སྒེག་མོ་ཡིད་འོང་ཟེར་བ་ལྟར་དམ་ལྷོད་ཤེས་དགོས་སོ། །སྣག་ཚ་བཟོ་སྲོལ་ནི་འཇུ་མི་ཕམ་གྱི་བཟོ་རིག་ཉེར་མཁོའི་ཟ་མ་ཏོག་ན་འང་གསལ་ལོ། །

༦ སྨྱུ་གུ་འཛིན་སྟངས། ཡི་གེ་འབྲི་སྐབས་ལུས་བོ་དགྱེ་སྒུར་རན་པར་བྱ་སྟེ། ཧ་ཅང་དགྱེ་ན་ཡི་གེ་མི་འགྲིག སྒུར་ཆེ་ན་ལུས་ཁམས་ལ་གཟན་པས། ལུས་ཕུང་དྲང་བོར་བསྲངས་ཏེ། སྨྱུ་གུ་འཐེབ་མཛུབ་དང་གོང་མཛུབ་གཉིས་ཀྱི་བར་དུ་དམ་ལྷོད་རན་པར་བཟུང་སྟེ། དཀྱིལ་མཛུབ་མན་གྱི་མཛུབ་མོ་རྣམས་དེ་གཉིས་ཀྱི་འོག་ཏུ་ཅུང་ཟད་བསྐུམས་ལ། ལག་པའི་སྤར་ཁྱིམ་དུ་ཕུག་རོན་གྱི་སྒོ་ང་ཙམ་གྱི་སྟོང་ཆ་དང་། ཡི་གེ་ཆེ་ཆུང་ལ་གཞིགས་ཏེ། ཆུང་ན་སྨྱུག་ཁམས་ཡན་ཚོན་གང་ངམ། ཆེ་ན་དེ་མཐོ་བར་འཛིན་དགོས་སོ། །

༧ ཡི་གེ་འབྲི་ཐབས་དངོས། ཡི་གེ་འབྲི་བའི་ཐོག་མར་ཆ་ཚད་དང་དབྱིབས་ལ་བསླབ་པ་གལ་ཆེ་ཞིང་། ཁྱད་པར་དུ། འབྲི་ལུགས་སྣ་ཚོགས་ཀྱི་གཞི་མ་དབུ་ཅན་ལ་གཅེས་པ་བརྒྱད། འདོན་པ་བཅུ། མ་ཆོས་ཉེར་གཅིག བུ་ཆོས་བཅུ་དྲུག སྤྱི་ཆོས་གསུམ་སོགས་ཀྱི་བྲི་ལུགས་ལ་ཕྲ་ཞིང་ཞིབ་པར་ལག་ལེན་ལས་ངེས་པར་བྱས་ཤིང་། ཁྱད་པར་དུ་སྨྱུག་འགྲོས་དང་འཐེན་སྟངས། སྨྱུག་ཁ་བསྐོར་ཚུལ་སོགས་བྱང་ན་གསེར་གཞོང་ལ་མར་ཁུ་བཀང་བ་ལྟར་ཡི་གེ་མཛེས་ཉམས་ལྡན་ལ། གཞན་ཡང་བྲིས་ཀྱི་མན་ངག་ལས། སྤྱིར་ནི་ཡི་གེ་མཉམ་པ་བདུན། །མགོ་མཉམ་མགུལ་མཉམ་དཀར་མཉམ་དང་། །སྣག་མཉམ་ཚེག་མཉམ་ཤད་མཉམ་ལ། །རྐང་མཉམ་བྲིས་ཀྱི་མཉམ་བདུན་ཡིན། །ཞེས་པ་ལྟར། ཡི་གེ་མགོ་རྐང་རིང་ཐུང་གི་ཁྱད་པར་སོགས་ཞིབ་ཕྲ་མཐོང་བ་བརྒྱུད་པའི་ཕྱག་ལེན་ལས་ཤེས་དགོས་སོ། །དེ་ལྟར་ཡིག་གཟུགས་གང་བྲིས་ཀྱང་མཁས་པར་གྱུར་བའི་ཚད་ནི། ས་པཎ་གྱིས། གང་དག་ཡི་གེ་འབྲི་བ་བོ། །སྙོམས་གཙང་འགྲིག་གསུམ་ལྡན་པ་དང་། །ལེགས་མགྱོགས་དག་གསུམ་དྲུག་ཚང་ན། །མཁས་པའི་གོ་ས་འཐོབ་པ་ཡིན། །ཞེས་སོ། །

༨ ཡིག་གཟུགས་སྦྱོང་དགོས་པ། རང་ཅག་གི་ཆོས་སྲིད་ཀྱི་གཙུག་ལག་ཐམས་ཅད་ཀྱི་བརྗོད་བྱ་ཟབ་ལ་རྒྱ་ཆེ་བ་ཇི་སྙེད་པ་ཡིག་གཟུགས་ལ་བརྟེན་ནས་གནས་པ་ཡིན། དེ་བས་སྔ་རབས་མཁས་པས་ཀྱང་འབྲི་ཀློག་གཉིས་ལ་ཡོན་ཏན་ཀུན་གྱི་གཞི་མ་ཟེར་བ་འང་དེ་ཡིན། སྔོན་ནས་ད་ལྟའི་བར་དུ་བྲིས་གཟུགས་ལ་འཕེལ་འགྱུར་ཅུང་ཟད་ཡོད་ཀྱང་། རྩ་བའི་ཆ་ནས་གཅིག་མཚུངས་ཡིན། ཡིག་གཟུགས་འདི་ཉིད་མི་རིགས་ཀྱི་བླ་སྲོག་དང་། གཞུང་ལུགས་ཀྱི་མཛོད་སྒོ་འབྱེད་པའི་ལྡེ་མིག་ཡིན། ཚུལ་འདི་ལ་དགོངས་ནས། བསྟན་དར་ལྷ་རམས་པས་ཀྱང་། རྩོམ་པ་ལེགས་ཀྱང་སུག་བྲིས་མ་འབྱོར་ན། །དཔའ་རྩལ་ཆེ་བའི་དཔའ་བོ་ལག་རྡུམ་འདྲ། །ཞེས་དང་། སློབ་དཔོན་པད་འབྱུང་གིས། ཆོས་ཀློག་འདོན་བྱེད་པའི་ཡོན་མཆོད་རྣམས། །དང་བོ་གཞོན་དུས་འབྲི་ཀློག་ལེགས་པར་སྦྱོང་། །དཀར་ཆ་ཆ་མཉམ་རིང་ཐུང་མེད་པར་བྲིས། །ཞེས་མི་ལོ་སྟོང་དང་ཉིས་བརྒྱ་ལྷག་གི་སྔོན་ནས་གདམས་ཡོད་པ་དང་། འདབ་ཆགས་མི་ཆོས་སུ་བཤད་པ་རིག་པའི་གཏེར་མཛོད་ལས། མཐའ་རྒྱ་ཆོད་ལ་ཡིག་སྣ་སྦྱོངས། །སྨྱུ་གུ་གཟོབས་ལ་ཁྲིགས་སུ་ཆུད། །མཛེས་པ་གཟུགས་ཀྱི་ཁྱད་དུ་ཐོན། །སྟོབས་ཆེན་ཆད་ལྷག་མེད་པར་གྱིས། །འདི་ནི་ཡོན་ཏན་མཆོག་ཏུ་འགྱུར། །ཞེས་དང་། དེ་ལས་ལྡོག་ན། ཁ་དཔེར་ཡང་། བྲིས་ངན་མི་ཡིས་མི་ཤེས། ཞག་གཅིག་འགོར་ན་རང་གིས་མི་ཤེས། ཡིག་འབྲི་ངན་པ་ཤིག་གིས་སྒུལ། ཟེར་ལ། ཁྱད་པར་དུ་མཁས་དབང་ཚེ་ཏན་ཞབས་དྲུང་མཆོག་གིས། ཡིག་གཟུགས་མ་དག་པའི་ཉེས་སྐྱོན་དང་། དག་པའི་དགེ་མཚན་འདི་ལྟར་གསུངས་ཏེ། ཡི་གེ་དག་སྙོམས་མཛེས་གསུམ་ལས། །མ་དག་སྐྱེས་བུ་སྙིང་མེད་འདྲ། །མི་དག་རྐང་ལག་འཁྱོར་བ་འདྲ། །མི་མཛེས་གོས་ངན་གྱོན་པ་འདྲ། །དག་སྙོམས་མཛེས་གསུམ་ཆ་གང་ཡང་། །མི་ལྡན་ལམ་ཁར་བོར་བ་ཡི། །གོས་ཧྲུལ་ངན་པ་སྐྱུག་བྲོ་འདྲ། །དེ་ཕྱིར་སྔ་མ་སྔ་མ་གཙོ། །གསུམ་ག་འཛོམས་ན་བཞིན་མཛེས་པའི། །དཔའ་བོ་ཟ་འོག་གོས་ཀྱིས་བཀླུབས། །ལུས་དང་ཡན་ལག་ལྟ་ན་སྡུག། ཚོགས་པའི་ཁྲོམ་དུ་འགྲིམས་པ་འདྲ། །ཡི་གེ་སྦྱོང་འདོད་ཐོག་མ་རུ། །འདི་འདྲའི་ཚུལ་གྱིས་ལམ་ལ་བཀྲི། །ཞེས་གསུངས་ལ། དེ་ཡང་གཏམ་ཁ་བྱང་། བྲིས་ལག་བྱང་། ཟེར་བ་བཞིན་ལག་ལེན་དུ་ཁེལ་བ་གནད་ཀྱི་དོན་པོ་ལགས། མདོར་ན། སྲིད་འབྱོར་རིག་གསུམ་གང་ལའང་ཡི་གེ་ནི་ལག་ཆ་ལྟ་བུར་སོང་གཤིས། དེ་ཡང་ཡི་གེ་དག་སྙོམས་མཛེས་གསུམ་སོགས་དེ་དག་ལ་ལྕགས་ཐོག་ཏུ་རྣོ་བཞག་པ་ལྟ་བུ་ཡིན་ནོ། །

 ༩ ཡིག་གཟུགས་འབྲི་བའི་གོ་རིམ། ཡིག་གཟུགས་འབྲི་བའི་གོ་རིམ་གྱི་དབང་དུ་བཏང་ན། མ་དཔེ་གང་ལེགས་བདམས་ཏེ་ཡིག་མཁན་གྱི་དྲུང་དུ། ཐིག་ཁོང་དུ་དྲངས་ན་དགེ་མཚན་ལྡན་ལ། མ་ཡིག་ལྟར་སྨྱུག་ཁའི་ཆ་ཤས་དང་། སྲིད་ཞེང་གི་ཐིག་གང་ནས་འཐེན་སྟངས། སྣག་ལམ་སྦོམ་ཕྲ། ཐིག་རིས་འཕྲོད་མིན། སྣག་ཚ་སྙོམས་ཏེ། སེམས་ཀྱིས་ཚོད་འཛིན། ལག་པའི་རྗེས་སྙེག ཐིག་ཚད་ལྟར་འབྲི་ཞིང་། ལག་རྩལ་བྱང་ན་ཐིག་མ་བཏབ་ཀྱང་། ཡིག་ཚད་ལ་ཆ་རྒྱུས་ལོན། གོ་རིམ་ནི་ཐོག་མར་ཀ་མད་སུམ་ཅུ་ནས་མགོ་བརྩམས། དེ་ནས་དབྱངས་བཞི། མགོ་འདོགས་སྦྱོར་ཚུལ་བྱང་བར་འབྲི་ཞིང་། དེ་ནས་ཡི་གེ་རྣམས་ཆ་སྙོམས་པའི་ཕྱིར། མཁས་པའི་ལེགས་བཤད་གང་རུང་སྤེལ་ཏེ། གྲལ་མཉམ་ཞིང་རགས་ཕྲ་མེད་ཚེ། དབུ་མེད་སྣ་ཚོགས་འབྲི་སྦྱངས་དང་། ཐང་ཡིག་སྣ་ཚོགས་ལེགས་པར་བྱང་ཆུབ་ནས། སྔགས་ཡིག་དང་བརྩེགས་མ། མཐུག་པོ་ལྔ་དང་ལོག་ཡིག་ལྔ། གུག་གུ་ཕྱིར་ལོག་ཅན། གཟབ་གཤར་གཉིས་ཀའི་སྟེང་ལག་རྩལ་བྱང་བ་དང་། དེ་ནས་ལཉྫ་དང་ཝརྟུ་སོགས་ཞིབ་ཏུ་སྦྱངས་དགོས་ལ། དེ་དག་ཐིག་ཚད་འབྲི་བར་ཁྱད་ཆོས་གསུམ་ཡོད་དེ། རིང་ཐུང་དང་ཞེང་ཚད་སྙོམས་པ། མཐོ་དམན་དང་ཆེ་ཆུང་སྙོམས་པ། ཡ་ཡོ་ཁྱ་ཁྱོག་མེད་པའོ། །དེ་ཡང་སྨྱུག་ཁ་སྦོམ་པོ་ནས་ཕྲ་བར་འབྲི་བ་བཟང་སྟེ། ལྷ་ཆེ་དཀའ། ཡི་གེ་ཆུང་དཀའ། ཞེས་པ་ལྟར། ཆེ་འོག་ནས་ཆུང་ཐོན་ཟེར་བའི་རྒྱུ་མཚན་ཡང་དེ་ཡིན་ནོ། །

རིན་ཆེན་སྣ་བརྒྱད་ཀྱི་ཡིག་བྲིས།

ཤེར་ཕྱིན་གྱི་མདོ་སྡེ་རིན་པོ་ཆེ་ལས། སངས་རྒྱས་ཀྱི་སྐུ་ལས་སངས་རྒྱས་ཀྱི་གསུང་གལ་ཆེ་བར་བཤད་པ་དང། ཤེར་ཕྱིན་ཚིགས་བཅད་གཅིག་བྲིས་ན་སངས་རྒྱས་འབུམ་ཕྲག་ལ་མཆོད་བསྟོད་བྱས་པ་ལས་ལྷག་པའི་ཕན་ཡོན་ཆེ་བར་གསུངས་པ་ལྟར། ཁ་བ་ཅན་འདིར་ཐོག་མར་བོད་རྒྱལ་ཉེར་བརྒྱད་པ་ལྷ་ཐོ་ཐོ་རི་གཉན་བཙན་གྱི་སྐུ་དུས་སུ། ཕོ་བྲང་ཡུམ་བུ་བླ་མཁར་སྟེང། གསེར་ཤོག་ངོས་ལ་བཻ་ཌཱུ་རྱའི་སྤང་སྐོང་ཕྱག་རྒྱ་སོགས་བབས་པ་འདི་ལས་དར་བར་མངོན་ལ། རིམ་གྱིས་དཔོན་རྟགས་མཐོ་དམན་ཡང་རིན་ཆེན་ཡིག་བྲིས་ཀྱིས་འབྱེད་ཚུལ་ཡོད་དེ། ཐང་ཧྲུའུ་ལས། གཡུ་ཡི་ཡི་གེ་བླ་ན་མཐོ། གསེར་གྱི་ཡི་གེ་དེ་ལས་དམན། ཕྲ་མིན་དེ་ལས་དམན། དངུལ་དེ་ལས་ཀྱང་དམན། ཐ་མ་ཟངས་སུ་བྱེད་ཅིང་ཆེ་ཆུང་དབྱེ། དེ་རྣམས་དཔུང་བར་བཏགས་ཏེ་མཐོ་དམན་འབྱེད་པ་ཡིན། དེ་ཡང་། རིན་ཆེན་གྱིས་བཟོས་པའི་བྱང་བུའི་སྟེང་དུ་གོ་གནས་སོགས་འདི་ལྟར་བཀོད་དེ། དགུང་བློན་ཆེན་པོ་ལ་གཡུ་ཡིག དགུང་བློན་འབྲིང་དང་ནང་བློན་ཆེན་པོ་ལ་གཡུ་ཡིག་ཆུང་ངུ་། བཀའ་བློན་ཐ་ཆུང་སོགས་ལ་གསེར་ཡིག་ཆེན་པོ། ནང་བློན་ཐ་ཆུང་དང་བཀའ་བློན་འབྲིང་ལ་གསེར་ཡིག་ཆུང་ངུ་། བཀའ་བློན་ཐ་ཆུང་ལ་ཕྲ་མིན་གྱི་ཡི་གེ གཞན་ཡང་། ཆོས་གྲྭའི་སློབ་དཔོན་དང་། སྐུའི་སྔགས་མཁན་སྟོད་སྨད་ཀྱི་དབང་བློན་རྣམས་ལ་དངུལ་གྱི་ཡིག་ཆེན། སྐུ་འཚོ་བའི་བོན་པོ། གཟིམ་མལ་བརྩིགས་ཁབ། བྱང་ཐང་གི་ས་མཁན། མཐའི་སོ་སྲུང་དང་། སྐུ་མཁར་གྱི་རྩེ་སྲུང་སོགས་ལ་དངུལ་ཡིག་ཆུང་བ། ཡབ་འབངས་རུས་དྲུག་སོགས་ལ་འཁར་བའི་ཡི་གེ སྟོང་དཔོན་རུ་དཔོན་སོགས་ལ་ཟངས་ཡིག གཡུལ་དུ་དཔའ་བ་ལ་ལྕགས་ཡིག ཡང་། ཐ་ཤིང་སྐྱ་ཆུ་རུས་ཀྱི་ཡི་གེ་ནི་འབངས་ཕལ་བ་རྣམས་ལ་གནང་ཚུལ་ཆོས་འབྱུང་མཁས་པའི་དགའ་སྟོན་ལས་གསལ་བ་ལྟར་རོ། །

ཕྱིས་སུ་གསེར་བྲིས་རིམ་བརྒྱུད་ཀྱིས་དུས་རབས་བཅུ་གཅིག་པའི་དུས་དཀྱིལ་དུ་ཇོ་བོ་རྗེ་བོད་དུ་ཕེབས་པའི་སྔ་ཕྱི་ལ། ཆོས་ཕྱོགས་སུ་དར་ཁྱབ་ཧ་ཅང་ཆེ་སྟེ། དཔེ་ཆོས་ལས། ཇོ་བོ་བོད་དུ་མ་བྱོན་ཙ་ན། བོད་ན་གསེར་འབུམ་མང་བོ་བཞུགས། ཞེས་དང་། སྔོན་བྱང་ངམ་རར་གསེར་བརྡོལ་ཙམ་ན་ཐམས་ཅད་ཀྱིས་གསེར་འབུམ་བྲིས་ཏེ། ཉུག་རུམ་པ་ཡང་བྲི་བར་འདོད་པས་ཞེས་གསུངས་པ་ལས་ཤེས་ཐུབ།

དུས་རབས་བཅུ་གསུམ་པའི་ནང་འགྲོ་མགོན་ཆོས་རྒྱལ་འཕགས་པའི་ཐུགས་དམ་གྱི་རྟེན་དུ་རྗེ་བཙུན་སྒྲོལ་མའི་སྤྲུལ་བ་རྒད་མོ་ཞིག་གམ་དགེ་སློང་བཞི་སྡེ་ཞིག་གིས་གསེར་ལྗང་གིས་བཞེངས་པའི་བརྒྱད་སྟོང་བ་སྟེ་པུ་ཏི་ལྕགས་ལུང་མ་ཞེས་པ་སྲིད་ལ་ཀུང་ཁྲི་གཉིས་དང་ཞེང་ལ་ཀུང་ཁྲི་གཅིག་ཡོད་པ། དེང་སང་པུ་ཏི་དེ་ས་སྐྱ་དགོན་པའི་ཆེ་བ་བཞིའི་ཡ་གྱལ་དུ་བརྩི་བར་མ་ཟད། འཛམ་གླིང་དུ་གསུང་རྟེན་ཆེ་ཤོས་སུ་འཇོག་ལ། དབུ་ཤོག་གི་ཡི་གེའི་ཕྲ་སྦོམ་བྱིས་པའི་མཛུབ་མོ་ཙམ་ཡོད། གཞན་འགྲོ་མགོན་ཆོས་རྒྱལ་འཕགས་པའི་ཡུམ་མ་གཅིག་ཀུན་སྐྱིད་ཀྱིས་ཐུགས་དམ་གྱི་རྟེན་དུ་བཞེངས་པའི་བཀའ་འགྱུར་གསེར་ཆོས་ཆེན་མོ་དང་། ཡུམ་མཆོག་བསྟན་འཛིན་བཟང་མོས་ས་སྐྱའི་གདུང་རྒྱུད་འཕེལ་ཆེད་བཞེངས་པའི་བཀའ་འགྱུར་གསེར་ཆོས་ཆེན་མོ། དེ་ལས་གཞན་ས་སྐྱ་ན་གསེར་བྲིས་དང་། དངུལ་བྲིས། གཡུ་བྲིས། དུང་བྲིས་སོགས་མང་དུ་ཡོད་པ་ལ་ཆོས་བརྩིགས་བྲག་རི་མར་འབོད་པས། ཁ་དཔེར་ཡང་། དཔལ་ས་སྐྱའི་འདུ་ཁང་གི་ཕྱིའི་རྩིག་པ་ཞིག་ཀྱང་ནང་གི་ཆོས་བརྩིགས་མི་ཞིག ཅེས་པ་འདི་བྱུང་ངོ་། །

ཕྱིས་སུ་རྒྱལ་དབང་སྐུ་ཕྲེང་ལྔ་བའི་དུས་སུ། ཁོང་གིས་སྡེ་སྲིད་བློ་བཟང་མཐུ་སྟོབས་ལ་བཀའ་བཀོད་གནང་བ་ལྟར། བོད་རབ་བྱུང་བཅུ་གཅིག་པའི་ལྕགས་ཕག་སྤྱི་ལོ ༡༦༧༡ ལོར་བཀའ་འགྱུར་གསེར་ཆོས་གསེར་སྲང་ལྔ་བརྒྱ་བཞི་བཅུ་ལྷག་བཏུལ་ནས་བཞེངས་པར། ཞལ་ཁེབས་ཧོར་གོས་དང་། སྟོང་སྐུད་ཁྲ་ལྷས་ཀྱི་ལྒིགས་ཐག རྒྱ་རག་ཚ་གསེར་མའི་ལྒིགས་ཆབ། ཙན་དན་དམར་བོའི་ལྒིགས་ཤིང་གི་གདོང་ལ་བ་སོ་བརྐོས་མ་བཅས་ཀྱི་སྤུས་ལེགས། རྒྱུ་ཆའི་གསེར་ཕུད་བཟོ་བའི་གླ་ཕོགས་དང་བྱ་དགའ་བཅས་ཀྱི་འགྲོ་གྲོན་ལ་འབྲུ་ཁལ་བརྒྱད་ཁྲི་ལྔ་སྟོང་དྲུག་བརྒྱ་བཅུ་དགུ་ཅན་གྱི་རིན་ཐང་ལྡན་པ། ཡོངས་གྲགས་སུ་བཀའ་འགྱུར་འཛམ་གླིང་གཡས་བཞག་ཏུ་འབོད་པ་དེ་ཡིན་ལ། ད་ལྟ་འབྲས་སྤུངས་འདུ་ཁང་གི་ཡང་སྟེང་བཀའ་འགྱུར་ལྷ་ཁང་དུ་ཆ་ཚང་བར་རང་ཅག་གི་བསོད་ནམས་ཀྱི་དཔལ་དུ་བཞུགས་ཡོད།

ཡང་། རྒྱལ་དབང་ལྔ་བ་སྐུ་གཤེགས་ནས་ལོ་བཅུ་གཉིས་ལ་གསང་རྒྱ་བྱས་རིང་སྡེ་སྲིད་སངས་རྒྱས་རྒྱ་མཚོས་ཁོང་གི་དགོངས་རྫོགས་ལ། རིན་པོ་ཆེའི་སྣ་ལྔའི་བཀའ་འགྱུར་དང་། བསྟན་འགྱུར་སྐྱ་ཆོས﹙སྣག་ཚས་བྲིས་པ﹚བཞེངས་པ་དང་། དེ་བཞེངས་དུས་དང་། མ་དཔེ། བཞེངས་པའི་མི་གྲངས། ཡུན་ཚད། འགྲོ་གྲོན་སོགས་ཀྲུང་གོའི་ལོ་རྒྱུས་རིག་གནས་གྲགས་ཅན་གྲོང་ཁྱེར་ལྷ་ས་ཞེས་པའི་དཔེ་ཆའི་ཤོག་གྲངས ༡༥༩ ན་གསལ་བ་དང་།

བོད་རབ་བྱུང་བཅུ་གསུམ་པའི་ལྕགས་སྤྲེལ་༡༨༠༠ལོར་རྒྱལ་དབང་བརྒྱད་པ་འཇམ་དཔལ་རྒྱ་མཚོའི་སྐུ་དུས་སུ་ལྷ་ལྡན་གཙུག་ལག་ཁང་དུ་རིན་ཆེན་སྣ་བརྒྱད་ཀྱིས་བྲིས་པའི་བསྟན་འགྱུར་རིན་པོ་ཆེ་པོད་ཉིས་བརྒྱ་དང་བརྒྱད། དེ་དང་འདྲ་བར་རྗེ་ཙོང་ཁ་བ་དང་། རྒྱལ་དབང་སྐུ་ཕྲེང་ལྔ་བ་དང་བདུན་པ། པཎ་ཆེན་སྐུ་ཕྲེང་ལྔ་བ་དང་དྲུག་པ་བཅས་ཀྱི་གསུང་འབུམ་པོད་རེ་དགུ་བཅས་གསར་བཞེངས་བྱས་ཚུལ་ལོ་རྒྱུས་རྣམས་སུ་གསལ་ལ། འོན་ཀྱང་། དེ་ལ ༡༩༨༤ ལོར་མེ་སྐྱོན་ཆེན་པོ་བྱུང་ནའང། སླར་ཡང་ཆེད་མཁས་པ་གདན་དྲངས་ནས་བསྐྱར་གསོ་བྱས་ཏེ། པོ་ཏ་ལའི་ཕོ་བྲང་དམར་བོའི་ཤར་རྒྱུད་བྱམས་ཁང་ན་རང་ཅག་གི་བསོད་ནམས་ཀྱི་ཞིང་དུ་བཞུགས་ཡོད་ལ། དེང་སང་དར་ཆེ་བ་ནི་གསེར་བྲིས་སོ། །

གསུང་རབ་དེ་དག་བཞེངས་ཚུལ་ཡང་སྣ་ཚོགས་ཡོད་དེ། བྲི་གཞི་མཐིང་ཤོག་ངོས་སུ་གསེར་ཀྱི་ཕྲ་ཀོང་ནང་གཡུ་བྱུར་མུ་ཏིག་སོགས་ཀྱིས་བསྟར་ནས། ཡིག་གཟུགས་སུ་བཀོད་པ་དང་། ཡང་ན། མཐིང་ཤོག་གམ་ཤོག་ནག་སྟེང། གསེར་དངུལ་ཟངས་ལྕགས་དང་། དུང་དང་མུ་ཏིག གཡུ་བྱུར་གྱི་ཆུས་བྲིས་པ་སོགས་སོ། །གང་ལྟར་རིན་ཆེན་སྣ་བརྒྱད་ཀྱི་རྒྱུ་ཆ་དེ་རྣམས་བཞུ་བཏུལ་བྱེད་སྟངས། ཡི་གེ་འབྲི་སྲོལ་སོགས་མཐོང་བ་བརྒྱུད་པའི་ཕྱག་ལེན་ལྟར་ཉམས་མྱོང་ཚད་ལྡན་གྱིས་འབྲི་དགོས་སོ། །

གསུང་རྟེན་བཞེངས་པའི་ཕན་ཡོན་ནི། འཕགས་པ་སྡུད་པ་ལས། ལ་ལས་གང་གཱའི་ཀླུང་གི་ཇི་སྙེད་ཞིང་རྣམས་ན། །སེམས་ཅན་ཇི་སྙེད་འཁོད་ཀུན་དགྲ་བཅོམ་གྱིས་བཏུལ་བས། །གང་གི་ཤེས་རབ་ཕ་རོལ་ཕྱིན་ཡིག་འདི་བྲིས་ཏེ། །སེམས་ཅན་མཆོག་ལ་ལྒིགས་བྱིན་བསོད་ནམས་ཁྱད་པར་འཕགས། །ཞེས་དང་། བརྒྱད་སྟོང་བ་ལས། དེ་བཞིན་གཤེགས་པའི་བྱིན་གྱིས་བརླབས་པའི་ལྒིགས་བམ་ཆེན་པོ་ལ་ཡི་གེ་གསལ་ཞིང་རབ་ཏུ་གསལ་བ་ལེགས་པར་བྲིས་ཏེ་མེ་ཏོག་དང་། བདུག་པ་དང་། དྲི་དང་། འཕྲེང་བ་དང་། བྱུག་པ་དང་། ཕྱེ་མ་དང་། རོལ་མོ་དང་། ན་བཟའ་དང་། གདུགས་དང་། རྒྱལ་མཚན་དང་། དྲིལ་བུ་དང་། བ་དན་དང་། ཁོ་ར་ཁོར་ཡུག་ཏུ་མར་མེ་འཕྲེང་བ་དང་མཆོད་པ་རྣམ་པ་མང་བོ་དག་གིས་བཀུར་སྟི་བྱ། བླ་མར་བྱ། བརྗེད་པར་བྱ། མཆོད་པར་བྱ། རི་མོ་བྱ། བསྙེན་བཀུར་བྱ་སྟེ། ཀུན་དགའ་བོ། འདི་ནི་ངའི་རྗེས་སུ་བསྟན་པའོ། །དེ་ཅིའི་ཕྱིར་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ལ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ། །ཞེས་དང་། སྒོ་མཐའ་ཡས་པ་སྒྲུབ་པའི་གཟུངས་ལས། མདོ་སྡེ་ཐོས་ནས་རྗེས་སུ་ཡི་རང་དང་། །ཡི་གེར་བྲིས་དང་བཟུང་དང་བཀླགས་པ་ཡི། །བསོད་ནམས་ཆུ་བོ་ཇི་ཙམ་བསྐྱེད་པ་ནི། །སེམས་ཅན་ཀུན་གྱིས་ཤེས་པར་ཡོངས་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལའང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མཆོག་འཚང་རྒྱ། །བླ་མེད་བྱང་ཆུབ་མ་རེག་བར་དུ་ཡང་། །དེ་ནི་ཏིང་ངེ་འཛིན་དང་མངོན་ཤེས་དང་། །གཟུངས་རྣམས་དང་ནི་གཟུགས་ཀྱང་ལོངས་སྤྱོད་དང་། །སངས་རྒྱས་མཐོང་ལས་ཉམས་པར་ཡོངས་མི་འགྱུར། །ཞེས་དང་། སྙིང་རྗེ་པད་དཀར་གྱི་བམ་པོ་བཅོ་ལྔ་ལས། མ་འོངས་པའི་དུས་ལྔ་བརྒྱ་བ་ན། ཐ་ན་བྲིས་ཏེ་འཆང་བར་བྱེད་ན། དེ་བསོད་ནམས་ཆེས་མང་དུ་བསྐྱེད་པར་འགྱུར་གྱི། བྱང་ཆུབ་སེམས་དཔའ་གང་དག་བསྐལ་བ་ཆེན་པོ་བཅུའི་བར་དུ་ཕ་རོལ་ཏུ་ཕྱིན་པ་དྲུག་ལ་སྤྱོད་པའི་བསོད་ནམས་ཀྱི་ཕུང་བོ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ་དང་། གནོད་སྦྱིན་དང་། ཀླུ་དང་། དྲི་ཟ་དང་། གྲུལ་བུམ་དང་། ཡི་དྭགས་དང་། ཤ་ཟ་དང་། མི་འམ་ཅི་དང་། ལྷ་མ་ཡིན་དང་བཅས་པའི་འཇིག་རྟེན་གྱི་སྡང་བའི་སེམས་རབ་ཏུ་དང་བར་བྱ་བ་དང་། ནད་དང་འཐབ་མོ་དང་། རྩོད་པ་འགྱེད་པ་ཐམས་ཅད་ཉེ་བར་ཞི་བར་བྱ་བ་དང་། དུས་མ་ཡིན་པའི་རླུང་དང་། ཆར་བ་དང་། འཆི་བ་དང་། ནད་ཐམས་ཅད་རབ་ཏུ་ཞི་བར་བྱ་བ་དང་། མུ་གེ་ཐམས་ཅད་རབ་ཏུ་ཞི་བར་བྱ་བ་དང་། བདེ་བ་དང་ལོ་ལེགས་པར་བྱ་བ་དང་། དགེ་བའི་རྩ་བ་རྣམ་པར་འཕེལ་བར་བྱ་བ་དང་། ངན་སོང་གསུམ་གྱི་སྡུག་བསྔལ་ལས་ཐར་བར་བྱ་བ་དང་། ཐེག་པ་གསུམ་པོ་དག་གི་ལམ་ཡང་དག་པར་བསྟན་པར་བྱ་བ་དང་། ཏིང་ངེ་འཛིན་དང་། གཟུངས་དང་། བཟོད་པ་ཐོབ་པར་བྱ་བ་དང་། སེམས་ཅན་ཐམས་ཅད་ཉེ་བར་འཚོ་བར་བྱ་བ་དང་། རྡོ་རྗེ་གདན་ལ་འདུག་པར་བྱ་བ་དང་། བདུད་བཞི་གཞོམ་པར་བྱ་བ་དང་། བྱང་ཆུབ་ཀྱི་ཕྱོགས་མངོན་པར་རྫོགས་པར་འཚང་རྒྱ་བར་བྱ་བ་དང་། ཆོས་ཀྱི་འཁོར་ལོ་བསྐོར་བར་བྱ་བ་དང་། འཕགས་པའི་ནོར་བདུན་དང་བྲལ་བའི་སེམས་ཅན་རྣམས་བྱང་ཆུབ་ཀྱི་ཕྱོགས་དང་ལྡན་པར་བྱ་བ་དང་། འཁོར་མང་བོར་བྱ་བ་དང་། མི་འཇིགས་པའི་གྲོང་ཁྱེར་གྱི་གནས་སུ་འཇུག་པར་བྱ་བའི་ཕྱིར་ངའི་ཆོས་ཀྱི་རྣམ་གྲངས་འདི་བཤད་པའི་ཕྱིར་རོ། །ཞེས་གསུངས་སོ། །

ཐང་ག

༡ རི་མོའི་འབྲི་སྲོལ་བྱུང་འཕེལ། རང་ཅག་ཁ་བ་རི་བོའི་ལྗོངས་འདིར། ཆེས་སྔ་མོ་ཞིག་ནས་རི་མོ་འབྲི་སྲོལ་ཡོད་དེ། ལོ་རྒྱུས་ཆོས་འབྱུང་ཁག་ཏུ། ཆབ་མདོ་དང་དིང་རི་སོགས་སུ་རྡོ་ཆས་དང་རྫ་ཆས་རུས་ཆས་སོགས་ཀྱི་སྟེང་། བསྐོས་རིས། འཐག་རིས། སྨྱུག་གཟེབ་ཀྱི་རི་མོ་སྣ་ཚོགས་ཡོད་ལ། ཆབ་མདོ་མཁར་རོར་བུད་པའི་རི་མོའི་ཁྲོད་ལས་རྒྱན་རིས་གཅིག་པུར་མཚོན་ནའང་རིགས་མི་འདྲ་བ་སུམ་ཅུ་ཙམ་ཡོད་ལ། དེ་རྣམས་ལ་ཁ་དོག་ཀྱང་མང་དུ་ཡོད་པར་མ་ཟད། མངས་ཆེ་བ་ད་དུང་ཡང་འཇམ་ཤ་དོད་ལ་སྤུས་དག་པོ་ཡོད་པར། ཚན་རིག་པའི་བརྟག་དཔྱད་བྱས་པ་ལྟར་ན། ལོ་ངོ་བཞི་སྟོང་ལྷག་གི་ལོ་རྒྱུས་ཡོད་པར་བཤད་པ་དང་། སྤྱི་ལོ་སྔོན་གྱི་ལོ་ཉིས་བརྒྱའི་སྔོན་ལ་ཕོ་བྲང་ཡུམ་བུ་བླ་སྒང་དུ། རྒྱལ་བོ་གཉའ་ལ་བཏེགས་ནས་འགྲོ་བའི་རི་མོ་ཡོད་པར་བཤད་པ་དང་། དེ་ནས་རི་མོའི་ཕྱག་རྒྱུན་འདི་རིམ་བཞིན་དར་རྒྱས་བྱུང་ནས། སྲོང་བཙན་གྱི་སྐབས་སུ་རི་མོའི་ལག་རྩལ་འདི་ནང་བསྟན་གྱི་ལྷ་སྐུ་སོགས་ཀྱི་རི་མོ་འབྲི་སྟངས་དང་བསྟུན་ཆེད། རྒྱ་དཀར་ནག་དང་། བལ་བོ་ནས་བཟོ་བོ་གདན་དྲངས་ནས་ཕལ་ཆེར་དེ་དག་གི་ཤན་ཞུགས་ཟབ་མོ་ཐེབས་ཏེ། གཙུག་ལག་ཁང་སོགས་སུ་སངས་རྒྱས་བྱང་སེམས་དང་། ཆོས་ལུགས་ཀྱི་རི་མོ་དར་རྒྱས་ཆེན་པོ་བྱུང་། ཕྱིས་སུ་བྲིས་རྒྱུན་ཁག་མང་དུ་གྱེས་ཚུལ་ནི། ཤེས་བྱ་ཀུན་ཁྱབ་ལས། བལ་རིས་རྒྱུན་ལས་སྨན་མཁྱེན་གཉིས། །བྱིའུ་ལུགས་གསུམ་དང་བཀྲ་ཤིས་རྣམ་གསུམ་ནས། །སྒར་བྲིས་སྲོལ་བཀོད་འབུར་བཟོ་འང་རིམ་མཁས་གྱུར། །ཞེས་པ་ལྟར།

 ༡ དུས་རབས་བཅུ་གསུམ་པའི་དུས་དཀྱིལ་ཙམ་ལ་བྱུང་བའི་བྱེའུ་བྲིས་ནི། སྤྲུལ་སྐུ་བྱེའུ་སྒང་བའི་ཕྱག་བྲིས་ལ་ཟེར་ཞིང་། ཁོང་ལྷོ་ཁ་ཡར་སྟོད་དུ་འཁྲུངས། སྐུ་ཚེ་གང་བོར་རི་མོར་འབད་པས་པིར་དང་ཤོག་གུ་འབྲལ་མེད་དུ་བསྣམས་ཤིང་། མདོ་དབུས་ཁམས་གསུམ་དུ་ཕེབས་ཏེ། རི་མོ་བརྟག་དཔྱོད་མཛད་པས། འདྲ་བའི་ཆ་ནས་བྱེའུ་ཐོགས། ཁྱད་པར་དུ་བལ་བྲིས་ཀྱི་ཉིང་ཁུ་བསྡུས་ནས། ལེགས་བཅོས་ཁ་སྐོང་གིས་ཟུར་བརྒྱན་ཏེ་ཞིབ་ཚགས་ལྡན་པས། བྱེའུ་བྲིས་ཞེས་སྙན་གྲགས་འབར།

༢ དུས་རབས་བཅོ་ལྔ་བའི་དུས་དཀྱིལ་དུ་བྱུང་བའི་སྨན་ལུགས་ནི། སྨན་བླ་དོན་འགྲུབ་རྒྱ་མཚོའི་བྲིས་རྒྱུན་ལ་ཟེར་ཞིང་། ཁོང་ལྷོ་བྲག་སྨན་ཐང་དུ་འཁྲུངས། སྐུ་ནར་སོན་ཏེ་ཆུང་མས་རྐྱེན་གྱིས་ཡུལ་འཁྱར་བྱས། ལམ་དུ་པིར་མདོང་དང་བྲིས་དཔེ་ཤོག་དྲིལ་ཞིག་རྙེད་པས་བྲིས་ལ་བློ་ཁ་ཕྱོགས། རྡོབ་བཀྲ་ཤིས་རྒྱལ་བོའི་ཞབས་ལ་གཏུགས། སྐུ་སྐྱེ་སྔོན་མ་རྒྱ་ནག་གི་རི་མོ་མཁས་ཆེན་ཞིག་ཏུ་འཁྲུངས་པས། སྔོན་གནས་རྗེས་དྲན་བྱུང་སྟེ། རི་མོ་ཚེགས་མེད་དུ་མཁྱེན། ཁོང་གིས་གོང་མ་ཡུང་ལོས་རྒྱ་ནག་གི་གོས་ཆེན་འཐག་གྲུབ་མའི་ཐང་ག་མང་བོ་ཞིག་རྗེ་ཙོང་ཁ་པ་དང། ཀརྨ་བ། ཕག་གྲུ་སྡེ་སྲིད་སོགས་ལ་བསྐུར་བ་ཁག་གཅིག་གཟིགས་པར་བརྟེན། རྒྱ་ནག་གི་རི་མོ་འབྲི་སྟངས་ལ་སློབ་གཉེར་བྱས་ཏེ། རྒྱ་བོད་ཀྱི་བྲིས་ཟུང་དུ་སྦྲེལ་ནས་བྲིས་རྒྱུན་གསར་བ་ཞིག་བྱུང་བར་མ་ཟད། གསེར་བྲིས་དང་། མཚལ་བྲིས། ནག་ཐང་དང་སྲིད་གསུམ་རྣམ་རྒྱལ་བྲིས་བཅས་ཀྱི་སྒྱུ་རྩལ་གསར་བ་མང་བོ་གསར་གཏོད་གནང་བས། སྨན་ལུགས་ཀྱི་བྲིས་རྒྱུན་བྱུང་།

༣ ཡང་། དུས་རབས་བཅོ་ལྔ་བའི་དུས་དཀྱིལ་དུ་བྱུང་བའི་མཁྱེན་ལུགས་ནི། མཁྱེན་བརྩེ་ཆེན་མོའི་བྲིས་རྒྱུན་ལ་ཟེར། ཁོང་ལྷོ་ཁ་གོང་དཀར་སྒང་སྟོད་དུ་འཁྲུངས། ཆུང་དུས་ནས་བྲིས་ལ་དགའ་བས། སྲོག་ཆགས་དང་། རྩི་ལྗོན་སོགས་མ་བསླབས་ཀྱང་ཤེས་རྟོགས་བྱུང་། ནར་སོན་རྗེས་རྡོ་བ་བཀྲ་ཤིས་རྒྱལ་བོའི་ཞབས་ལ་གཏུགས་ཏེ་རི་མོ་བསླབས། ཚེ་ཞིག སློབ་དཔོན་གྱི་ཕྱག་རྩལ་ལས་བརྒལ། སྨན་མཁྱེན་གཉིས་སློབ་དཔོན་གཅིག་གི་སློབ་མ་ཡིན་ཀྱང་། བྲིས་ལུགས་མི་འདྲ་བའི་ཁྱད་ཆོས་གང་འདྲ་ཞིག་ཡོད་པ་ནི། རྒྱལ་དབང་ལྔ་བའི་རང་རྣམ་ལས། ལྷ་སྐུ་ཞི་བའི་རིགས་རྣམས་སྨན་ཐང་གི་བྲིས་རྒྱུན་ཧ་ཅང་ལེགས་པ་དང་། ཁྲོ་བའི་རིགས་རྣམས་མཁྱེན་བརྩེའི་བྲིས་རྒྱུན་ལེགས་པ་ཡོད་སྟབས། པོ་ཏ་ལའི་ལྡེབས་བྲིས་དང་། ཐང་ག་མང་བོ་ཞིག་སྨན་མཁྱེན་སོ་སོའི་ཁྱད་ཆོས་དང་བསྟུན་ནས་བཞེངས་བཅུག་པར་གསུངས་སོ། །

༤ ཡང་། དུས་རབས་བཅོ་ལྔ་བའི་དུས་མཇུག་ཏུ་བྱུང་བའི་ཀརྨ་སྒར་བྲིས་ནི། མཁས་དབང་ནམ་མཁའ་བཀྲ་ཤིས་ཀྱི་བྲིས་རྒྱུན་ལ་ཟེར། ཁོང་ལྷོ་བ་ཡར་སྟོད་དུ་འཁྲུངས། བསྐྱེད་བསྲིངས་ནས་ཨེ་བ་ཅོན་མཆོག་ཕན་བདེའི་དྲུང་ནས་རི་མོ་སྦྱངས་ལ། ཀརྨ་མི་བསྐྱོད་རྡོ་རྗེའི་ཞབས་པད་བསྟེན་སྐབས། ཉིན་ཐང་འཐག་དྲུབ་མ་ཡུག་གྲོས་ཆེན་མོ་ཞེས་པ་མཚུར་ཕུ་དགོན་གྱི་ནང་རྟེན་ཏུ་བཞུགས་པ་ཞིབ་མཇལ་གནང་བས། བྲིས་རྒྱུན་གསར་གཏོད་བྱ་རྒྱུའི་བློ་བསྐྱེད་འཕེལ་ཏེ་ཀརྨ་སྒར་བྲིས་ལུགས་གསར་གཏོད་གནང་། ཞིབ་པར་སི་ཏུའི་མཛད་པའི་བཀའ་བརྒྱུད་གསེར་ཕྲེང་ལས་གསལ། ཁམས་བྲིས་ནི་ཕྱིས་སུ་སི་ཏུ་ཆོས་ཀྱི་འབྱུང་གནས་ཀྱིས་སྒར་བྲིས་ལ། ཁོ་རང་གིས་ཁྱད་ཆོས་གསར་བསྣན་མཛད་པས་བྲིས་རྒྱུན་ལ་སྒར་བྲིས་གསར་མ་གྲགས་ཤིང་ཁམས་ཁུལ་དུ་དར་ཁྱབ་ཧ་ཅང་ཆེ་བས་ཁམས་བྲིས་ཀྱང་ཟེར།

༦ མདོ་སྨད་རེབ་གོང་གི་བྲིས་རྒྱུན་ནི། རེབ་གོང་གི་མཆེད་ཁུངས་བཤད་དུས། སྦྲ་རོག་རོག་ཅན་ལ་ཁྲི་སྡེ་སོགས་ནས། གཙང་ལ་སྟོད་ནས་ཆད་པའི་ལྷ་བཟོ་སྡེ། ཞེས་གསུངས་པ་ལྟར། གནའ་སྔ་མོ་ཞིག་ནས་ཡུལ་འདིར་ལྷ་བྲིས་ཀྱི་ཕྱག་རྒྱུན་དྲི་མ་མེད་པ་ཞིག་ཡོད་པ་དང་། ད་ལྟ་ཡང་རེབ་གོང་སྒྱུ་རྩལ་ཞེས་སྙན་པ་དོན་དང་ལྡན་པ་བྱུང་བ་ཀུན་ཀྱིས་མཁྱེན་གསལ་ལོ། །

༢ ཐང་ཀའི་རྣམ་གྲངས་བཤད་པ། བོད་ཀྱི་ཐང་ཀའི་བཟོ་རྩལ་ལ་ཆེས་མང་བོ་ཞིག་ཡོད་ལ། འདིར་རྣམ་གྲངས་ཙམ་བརྗོད་པ་ལ།

༡ སྐྱ་ཐང་ནི་རས་གཞི་དཀར་བོའི་སྟེང་དུ་སྐྱ་རིས་བྲིས་པ་ལ། མཐིང་གི་ཆུ་དྭངས་མས་ནམ་མཁའི་མདངས། དེ་ནས་སྤང་གི་ཁ་ཆུ་དྭངས་མས་ས་གཞིའི་མདངས། དེ་ནས་རྒྱབ་མདུན་རིམ་བཞིན་ཚོན་བྱུག་ལ། མདངས་ཀྱི་གཙོ་བོ་བྱས་ཤིང་བྱུག་ཚོན་སླ་ཞིང་དྭངས་པ་སྐྱ་ཐང་གི་ཁྱད་ཆོས་ཡིན། དེ་ནི་སྣུམ་ཞིང་བརྗིད་ཆགས་པ། བཅད་རིས་གྲིམ་ཞིང་མཉེན་པ། གོས་ཆེན་གྱི་རི་མོ་སོགས་ལ་ཞིབ་ཚགས་ཆེ་བ་རིན་ཆེན་དང་བོའི་འོད་ཀྱིས་མིག་དབང་འཕྲོག་པ་ཞིག་ཡིན།

༢ ཐང་ནག་ནི། རས་གཞི་ལ་སྣུམ་ནག་བྱུགས་ཏེ་བྲིས་པ་ཙམ་མ་གཏོགས་པ། ཕལ་ཆེར་གསེར་བྲིས་ཉམས་དང་ལྡན་པ་བྲིས་པ་ཡིན། མཚོན་བྱུགས་སྟངས་ནི། རས་གཞི་དཀར་བོའི་སྟེང་དུ་མཚལ་སྙོམས་པོར་བྱུགས་པའི་ཐོག གསེར་གྱི་རི་མོ་ཐང་ནག་གི་བཅད་རིས་ལྟ་བུ་བྲིས་པ་དེ་ཡིན།

 ༣ གསེར་ཐང་ནི། མཚལ་ཐང་ལས་ལྡོག་ཏེ་རས་གཞིའི་སྟེང་དུ་གསེར་བྱུགས་པའི་ཐོག མཚལ་སོགས་རིན་པོ་ཆེའི་རིགས་ཀྱིས་ཉི་མའི་ཉམས་དང་ལྡན་པར་གྲུབ་པའོ། །

༤ གོས་སྐུ་ལ་རིས་བཞི་སྟེ། རས་དྲུབ་ཀྱི་གོས་སྐུ། གོས་སྐུ་འབུར་མ། འཚལཐང་། འཐག་ཐང་བཅས་སོ།

༥ མུ་ཏིག་ཐང་ག་ནི། བཞེངས་བྱའི་སྐུ་བརྙན་གྱི་རི་མོའི་ཁ་དོག་ལྟར་གཡུ་བྱུར་མུ་མིན་སོགས་བསྟར་ལ་བརྒྱུས་པའི་བར་དུ་མུ་ཏིག་གི་སྐུ་བརྙན་མཚོན་པ་རས་གཞིའི་སྟེང་དུ་ཕྲ་བཀོད་པ་བཞིན་བཀོད་པ་དེའོ། །དཔེར་ན། ལྕགས་པོ་རི་ན་བཞུགས་པའི་ཐང་རྒྱལ་ཀྱི་བྱུ་རུའི་ཚེ་དཔག་མེད་དང་། གཡུ་ཡི་སྒྲོལ་མ། དུང་གི་ཐུགས་རྗེ་ཆེན་པོ། ཁྲ་འབྲུག་དགོན་དུ་མུ་ཏིག་གི་སྒྲོལ་མའི་ཞལ་ཐང་སོགས་སོ། །

༦ ཆུ་རིས་མ་ནི། རྒྱལ་བོ་གཟུགས་ཅན་སྙིང་བོས་སྒྲ་སྒྲོག་གི་རྒྱལ་བོ་ལ་ཁྲབ་རིན་ཐང་བྲལ་བ་ཞིག་བསྐུར་བས། སྟོན་པས་ཐུགས་བཀོད་ལྟར་སྐྱེས་ལན་དུ། གཟུགས་ཅན་སྙིང་བོས་སྟོན་པའི་སྐུ་ཞིག བཟོ་བོར་འབྲི་བར་གདམས་པ་ན། བཟོ་བོས་སྟོན་པའི་སྐུ་ལ་གཟི་འོད་འབར་བས་འབྲི་མ་ནུས། དེ་ནས་སྟོན་པ་ཆུ་རྫིང་གི་ཁར་ཕེབས་ནས། ཆུ་ནང་གི་གཟུགས་བརྙན་ཇི་བཞིན་རས་གཞི་ལ་བྲིས་པ། བྲིས་སྐུ་ཆུ་ལེན་མ་ཞེས། བསྟན་པ་འདིའི་བྲིས་སྐུའི་ཐོག་མ་དེ་ལ་དཔེར་བྱས་ཏེ་བྲིས་པ་རྣམས་སོ། །

༣ བཟོ་བོ་དང་སྦྱིན་བདག་གི་ཚུལ་བཤད་པ། སྐུ་གཟུགས་དང་ཐང་ཀ་བཞེངས་སྐབས་བཟོ་བོ་དང་ཡོན་བདག་བཟང་ངན་ཀྱི་ཚུལ་ལ་རྟོག་དཔྱད་བྱ་དགོས་ཏེ། དེ་ཡང་། བཟོ་བོ་ངན་པ་ནི། བཟོ་བོའི་ཡོན་ཏན་མི་ལྡན་ཞིང་ང་རྒྱལ་ཆེ་བའི་ཁར། གཡོ་སྒྱུ་ལྡན་ལ་ངང་ཐུང་ཅན། གླ་རྔན་གྱིས་ཡིད་མི་ཚིམ་ཞིང་ད་དུང་རྒྱུ་ཆ་རྐུ་འཕྲོག་སོགས་བྱེད་མཁན་སྟེ། དཔལ་འབྱོར་རྒྱ་མཚོར། ཡོན་ཏན་མི་མཁས་ང་རྒྱལ་ཆེ། །འགྲོགས་པ་མི་བདེ་བཀུར་སྟི་འདོད། །འཕྲལ་དུ་ཚིག་རྩུབ་ཕུགས་འདོད་ཆེ། །ཡོན་རྒྱགས་གླ་ཐང་ཚད་མེད་འབེབས། །དེས་ཀྱང་མི་ཚིམ་རྒྱུ་ཆ་རྐུ། །ཅུང་ཟད་ཙམ་ལ་བཟོ་འཕྲོ་འཇོག། འགྲོ་སྡིགས་བྱེད་ཅིང་ཆང་ནག་འཚོལ། །དགེ་ལས་སྡིག་པར་སྒྱུར་མཁན་ཡིན། །ཞེས་གསུངས་པ་ལྟར། བཟོ་ངན་གྱི་བྱ་སྤྱོད་སྤངས་ནས། ཚད་ལྡན་གྱི་བཟོ་མཁན་བསླབ་དགོས་ཏེ། དཔལ་འབྱོར་རྒྱ་མཚོར། འདོད་པ་ཆུང་ཞིང་བཀུར་སྟི་སླ། །མཁས་ཤིང་ཁེངས་མེད་ཁ་ལ་ཉན། །ལྷ་ལ་གུས་ཤིང་སྤྱོད་ལེགས་པའོ། །ཞེས་དང་། སམྦུ་ཊི་ལས། དུལ་ཞིང་དད་ལྡན་ལང་ཚོ་བབ། །དབང་བོ་རྣམ་གསལ་རྣམ་རྟོག་མེད། །ཁྲོ་མེད་ལྐོག་འཕྱས་མི་བྱེད་ཅིང་། །ཤིན་ཏུ་མཁས་ལ་སྤྲོ་བ་ཆེ། །བཟོད་ལྡན་སྙིང་རྗེ་ཆེན་པོ་ཅན། །ཞེས་གསུངས་པའི་མཚན་ཉིད་ཚང་དགོས་ལ། ཁྱད་པར་དུ་བཟོ་བོ་ཁྲུས་དང་གཙང་སྦྲ་ཆེ་ཞིང་། བསྙེན་གནས་དང་དམ་ཚིག་གི་སྡོམ་པ་དང་ལྡན་ལ། ལྷས་དབང་བསྐུར་ཞིང་རྣལ་འབྱོར་དང་ལྡན་པས། མཚམས་བཅད་དེ་མཆོད་བསྟོད་དང་དམ་རྫས་ཕུལ་ཏེ། བཟོ་བོ་རྣམ་སྣང་ངམ་བགེགས་མཐར་བྱེད། སྐུ་རྒྱུ་དང་ལག་ཆ་ཡང་རྣམ་སྣང་དུ་བསྐྱེད་དེ། ཐིག་ཚོན་རྣམས་ནི་ཆོ་ག་ནས་འབྱུང་བ་ལྟར་བྱིན་གྱིས་བརླབས་དགོས་སོ། །གཡའ་སེལ་ལས་ཀྱང་། འཇུག་ལྡོག་གི་གནས་བཟོའི་གནས་ཀུན་ལ་མཁས་ཤིང་། ཐིག་རྩ་སོགས་ཀྱི་གཞུང་ལུགས་ཁོང་དུ་ཆུད་ཅིང་ལག་ལེན་ལ་མཁས་ཤིང་། བཟོ་ལ་སླ་བཅོས་དང་རྙེད་པ་དོན་དུ་གཉེར་བ་མ་ཡིན་པར་ལྷག་པའི་བསམ་པ་དང་ལྡན་ཞིང་། དཀོན་མཆོག་གསུམ་ལ་སྐྱབས་སུ་བཟུང་བའི་གསག་སྦྱངས་གི་སྒོ་ནས་རང་ལྷའི་རྣལ་འབྱོར་དང་ལྡན་པ་ལ་རས་གཞི་སོགས་ཡུམ་དང་ལག་ཆ་རྣམས་ཀྱང་ལས་ཀྱི་ལྷར་བསྐྱེད་པ་སོགས་ཚད་དང་ལྡན་པ་ཞིག་ངེས་པར་དགོས་སོ། །ཞེས་སོ། །ཁྱད་པར་དུ། དམ་ཚིག་གི་བྲིས་སྐུ་ནི་སྐུ་བརྙན་རྣམས་ཀྱི་མཆོག་གྱུར་ཡིན་ལ། དེ་བཟོ་བ་བོ་དང་། འབྲི་ཚུལ། བྲི་གཞི་སོགས་ལ་གཟབ་པ་གལ་ཆེ་སྟེ། དགྱེས་རྡོར་རྒྱུད་ཀྱི་བརྟག་པ་ཕྱི་མ་ལེའུ་དྲུག་པ་ལས། འདིར་ནི་འབྲི་མཁན་དམ་ཚིག་ཅན། །སྒྲུབ་པོའང་དམ་ཚིག་ཅན་གྱིས་ནི། །བྲིས་སྐུ་འཇིགས་པ་བྲི་བ་ཉིད། །སྐྱེས་པའི་ཐོད་གནས་ཁ་དོག་ལྔ། །རོ་ཡིས་སྐྲ་ཡིས་པིར་ཉིད་ཀྱིས། །བྲིས་སྐུ་བླ་མ་བྲི་བ་ཉིད། །གང་གང་སྐུད་པ་འཁལ་བ་དང་། །གང་གང་རས་ཡུག་འཐག་པ་དང་། །དེ་ཡང་དམ་ཚིག་ཅན་ངེས་ནས། །གསུངས་སོ། །

ཡང་། སྐུ་གཟུགས་བཞེང་བྱའི་སྦྱིན་བདག་ལའང་སྐྱོན་ཡོན་གཉིས་ཀྱིས་བལྟ་དགོས་ཏེ། བཞེང་བྱའི་ཡོན་བདག་གི་སྐྱོན་ངོས་བཟུང་པ་ནི། དཔལ་འབྱོར་རྒྱ་མཚོར། སྡིག་ལ་མི་འཛེམ་དང་འཇུན་ཆུང་། །ཕན་ཡོན་མ་མཐོང་ཡིད་མི་ཆེས། །སྒྲུབ་བློ་མེད་པའམ་ཡོད་ན་ཡང་། །ཚེ་འདིའི་ལོ་འདོད་གྲགས་འདོད་ཕྱིར། །རྐྱེན་དང་མི་འཚམ་བློ་རྒྱ་བསྐྱེད། །ངང་ཐུང་བློ་དོག་བཟོད་བསྲན་ཆུང་། །ལྷ་དང་བཟོ་བོ་སྨོད་བྱེད་ཅིང་། །འགྱོད་པ་སྐྱེས་ནས་འཕྲོ་འཇོག་པའོ། །ཞེས་པ་ལྟར། ངན་སྤྱོད་འདི་དག་འདོར་དགོས་པ་དང་། ཡོན་བདག་བཟང་བོའི་བྱ་སྤྱོད་ནི། དེ་ཉིད་ལས། ཕན་ཡོན་མཐོང་བའི་ཤེས་རབ་ཅན། །རྩེ་གཅིག་སེམས་པའི་བསམ་གཏན་ཅན། །བརྟན་ཞིང་སྤྲོ་བའི་བརྩོན་འགྲུས་ཅན། །དཀའ་སྤྱད་མི་སྐྱོ་བཟོད་བསྲན་ཅན། །ངང་རིང་ཚིག་འཇམ་ཚུལ་ཁྲིམས་ཅན། །གཡོ་མེད་གཏོང་ཕོད་སྦྱིན་པར་ལྡན། །ལྷ་དང་བཟོ་བོར་དད་གུས་ལྡན། །རིམ་གྱིས་དགའ་སྤྲོ་སྒོམ་པའོ། །ཞེས་པ་ལྟར་བྱ་དགོས་ལ། བཟོ་བོ་ཚད་ལྡན་གྱིས་བཞེངས་པའི་ལྷ་སྐུ་ལ་ཡོན་སྦྱིན་ཚུལ་ཡང་། མི་གཡོ་བའི་རྒྱུད་ལས། བྲིས་སྐུ་ཚད་དང་ལྡན་པ་ཡོངས་སུ་ཟིན་པ་དང་། འབྲི་མཁན་ཁོ་རང་ཇི་ལྟར་འདོད་པའི་ཡོན་ཕབ་པ་བཞིན་སྦྱིན་པར་བྱའོ། །གསུངས་ལ། རྒྱུ་མཚན་ནི། བཟོ་བོ་སུན་དབྱུང་བའི་ལྷ་ལ་བྱིན་རླབས་མི་འཇུག་པར་གསུངས་ཏེ། རབ་གནས་ཀྱི་རྒྱུད་ལས། བཟོ་བོ་མ་མཉེས་པའི་ལྷ་ལ་ནི་ཡེ་ཤེས་མི་འཇུག་སྟེ། རབ་གནས་གྱི་ཐོག་མར་བཟོ་བོ་མཉེས་པར་བྱའོ། །གསུངས་སོ། །དེ་ལས་ལྡོག་སྟེ་དེང་སང་བཟོ་བོ་དང་ཡོན་བདག་གིས་ལྷ་སྐུ་ལ་ཉོ་ཚོང་གི་བསམ་པ་བཟུང་སྟེ། དྲིལ་བསྒྲགས་དང་ཁྱབ་སྤེལ་གཏོང་ཅི་ཐུབ་བྱེད་ཅིང་། ཁྱི་ལྟོགས་གློ་བར་འཕྲད་པ་བཞིན་དཔལ་འབྱོར་རྔམ་སྡུད་བྱེད་པའི་ཚོང་རྟེན་དུ་འཛིན་པ་ནི་རང་གཞན་གཉིས་ཀ་ཕུང་བཀྲོལ་གྱི་ལས་ལ་སྦྱོར་བ་སྟེ། རང་ཉིད་རང་གིས་དམྱལ་བར་བརྫངས་པ་ལས་མ་མཆིས་སོ། །

༤ ཐང་ག་བཞེངས་པའི་ཕན་ཡོན། དམ་ཆོས་པད་དཀར་ལས། གང་གིས་རྩིག་ངོས་གཟུགས་ཀྱི་རི་མོ་དག། བསོད་ནམས་མཚན་གྱི་ཡོངས་སུ་རྫོགས་པའི་སྐུ། །བདག་གིས་བྲིས་སམ་འབྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་འཐོབ་པར་འགྱུར། །སྐྱེས་བུ་དག་གམ་འོན་ཏེ་གཞན་ཡང་རུང་། །གང་དག་ལ་ལ་དེ་ན་སློབ་པའི་ཚེ། །རྩེད་མོ་དག་གམ་ཚད་པར་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་འཐོབ་འགྱུར་ཏེ། །ཞེས་དང་། སྤྱན་རས་གཟིགས་ཀྱི་མདོ་ལས། གང་གིས་སྟོན་པ་མི་མཆོག་གཟུགས་བྱེད་པ། །རས་སམ་རྩིག་ངོས་འབྲི་འམ་གསེར་ལས་བྱས། །དེ་ཡི་ཆོས་ཀྱི་ཁྱད་པར་གང་ཡིན་པ། །དེ་དག་མ་ལུས་རབ་ཏུ་རིམ་གྱིས་ཉོན། །མིག་ལྟ་མ་ཡིན་ལོང་བ་ཞར་མི་འགྱུར། །རྒུར་པོར་མི་འགྱུར་ཡན་ལག་མི་སྡུག་མིན། །དེ་ནི་གཟུགས་དང་ལྡན་ཞིང་ཁ་དོག་ལྡན། །སུམ་ཅུ་རྩ་གཉིས་མཚན་གྱི་གོ་ཆར་འགྱུར། །ལུས་ནི་རྣམ་པར་དག་ཅིང་ཁྱད་པར་ཐོབ། །སྤོབས་པ་ཐོབ་ཅིང་སྒྲ་སྙན་ཡིད་དུ་འོང་། །ཤེས་བཞིན་ལྡན་ཞིང་འཇིག་རྟེན་ཀུན་གྱི་གཙོ། །དེ་མཐོང་སེམས་ཅན་ལྡན་ཞིང་དགའ་བར་འགྱུར། །སྡིག་བྱེད་མི་འགྱུར་ཞེ་སྡང་མེད་སེམས་ལྡན། །གཡོ་སྒྱུ་མེད་ཅིང་རྒྱལ་བོ་འཁྲུག་མི་བྱེད། །མཐུ་དང་ལྡན་ཞིང་དབང་ཆེ་གྲགས་པར་འགྱུར། །བྱམས་ལ་གནས་ཤིང་མི་དམན་སེམས་དང་ལྡན། །ཞེས་སོགས་མདོ་རྒྱུད་དུ་མ་ལས་རྒྱ་ཆེར་གསུངས་ཀྱང་མ་སྤྲོས་སོ། །

ལྡེབས་བྲིས།

ལྡེབས་བྲིས་ནི། དགོན་སྡེ་དང་གཙུག་ལག་ཁང་སོགས་ཀྱི་གྱང་ལྡེབས་སུ་ཞལ་བ་བྱས་ཏེ། འཇམ་བརྡར་དང་དཀར་གཞི་སྤུས་གཙང་སྟེང་། རེ་ཁཱ་སྣ་ཚོགས་བྲིས་པ་དེ་ཡིན་ལ། འགའ་ཞིག་གིས་འདི་ལ་ལོགས་རིས་ཀྱང་ཟེར། ད་ལྟ་འདི་ནི་དཔྱད་གཞི་ཆེས་རིན་ཐང་ལྡན་པ་ཞིག་ཆགས་ཡོད་དེ། བོད་འདིར་ཆེས་སྔ་བའི་ལྡེབས་རིས་ནི་ཕོ་བྲང་ཡུམ་བུ་བླ་སྒང་བཞེངས་སྐབས། རྒྱལ་བོ་གཉའ་ཁྲི་བཙན་པོ་བོད་མི་རྣམས་ཀྱིས་གཉའ་བར་ཁྲི་བྱས་ཏེ་བཏེགས་ནས་བཙད་པོར་གསོལ་ཚུལ་མཆིས་ཀྱང་། རིག་གསར་གྱི་ཆག་འཇིག་སྐབས་ཁྱུར་མིད་བཏང་ནས་ད་ལྟ་སྣང་རྒྱུ་མེད་ལ། དེང་སང་རང་ཅག་གི་མིག་ལམ་དུ་སྣང་རྒྱུ་ཡོད་པ་ནི། སྲོང་བཙན་སྐུ་དུས་སུ་བྲིས་པའི་ལྷ་ལྡན་གཙུག་ལག་ཁང་དུ་བྲིས་པའི་གཅེར་ཚུགས་ཅན་གྱི་སྒྲོལ་མ་གཙོ་འཁོར་དེ་ཡིན་པར་བཤད་ལ། མཐའ་འདུལ་ཡང་འདུལ་གྱི་གཙུག་ལག་ཁང་བརྒྱ་རྩ་བརྒྱད་རྣམས་ལའང་ལྡེབས་བྲིས་རྒྱས་བསྡུས་སྣ་ཚོགས་ཡོད་ཚོད་འདུག དེ་དག་ནི་ཕལ་ཆེར་རྒྱ་དཀར་ནག་གཉིས་ཀྱི་རི་མོའི་འབྲི་སྲོལ་ཡིན་པར་བཤད། དཔེར་ན། རྒྱལ་བོ་སྲོང་བཙན་གྱི་ལྷ་ས་གཙུག་ལག་ཁང་གསར་བཞེངས་ཀྱི་ལྡེབས་རིས་སུ་རོ་སྒྲུང་དང་། གབ་ཚིག་གི་སྒྲུང་སྣ་ཚོགས་དང་། གཙུག་ལག་ཁང་བཞེངས་ཚུལ། རྒྱ་བཟའ་བོད་དུ་ཕེབས་དུས་བོད་འབངས་རྣམས་ཀྱིས་སྣེ་ལེན་གནང་ཚུལ་དང་། ཁྲི་སྲོང་གི་སྐུ་དུས་སུ་བསམ་ཡས་གཙུག་ལག་ཁང་གི་སྟེང་འོག་བར་གསུམ་དུ། རྒྱ་དཀར་ནག་དང་བོད་ལུགས་ཀྱི་བཟོ་རྒྱུན་རང་རྐྱ་ཅན་དུ་བཞེངས་བསྐྲུན་བྱས་ཡོད་ལ། ཁྱད་པར་དུ་བར་ཁྱིམས་ཀ་ཕིབས་གཡས་གཡོན་དུ། བསམ་ཡས་གཙུག་ལག་ཁང་བཞེངས་པའི་ལོ་རྒྱུས། བཞེངས་གྲུབ་བྱུང་རྗེས་ཀྱི་དགའ་སྟོན་རྟེན་འབྲེལ་གྱི་ཟློས་གར། ལུས་རྩལ་རིགས་མི་འདྲ་བ་སྣ་ཚོགས་ལྡེབས་བྲིས་གནང་ཡོད་ལ། ཁ་ཅིག་ད་ལྟ་འང་སྣང་རྒྱུ་ཡོད། ཁྲི་གཙུག་ལྡེ་བཙན་གྱི་སྐུ་དུས་སུ། ཏུན་ཧོང་ལྡེབས་རིས་སུ་རྒྱ་བོད་རི་མོ་འདྲེས་མའི་ལུགས་སུ་བྲིས་པ་དུས་འཁོར་ལུགས་ཀྱི་སྣོད་བཅུད་སྒྲུབ་ལུགས། སངས་རྒྱས་བྱང་སེམས་ཀྱི་སྐུ་བརྙན་དང་སྐྱེས་རབས་སོགས་བྲིས་ཡོད། གླང་དར་སྐབས་སུ་ཇོ་བོ་རྣམ་གཉིས་དང་བྱམས་པ་ཆོས་འཁོར་སྦས་པའི་གཙང་ཁང་གི་འདག་ཞལ་བྱས་པ་ལ་ཆོས་བྱེད་རྣམས་ལ་ཟུར་ཟའི་རི་མོ་བཙུན་པ་ཆང་འཐུང་བ་སོགས་བྲིས་པ་དང། ལྡེབས་བྲིས་ཕལ་ཆེར་གྱི་ནང་དོན་ཆོས་ཕྱོགས་ཡིན་ལ། འོན་ཀྱང་དུས་ཡུལ། ཆབ་སྲིད་ཀྱི་དགོས་པ། ཟུར་ཟ་སོགས་ཀྱི་དོན་དུ་བྲིས་པའང་ཡོད། བོད་ཀྱི་འབངས་ཁེང་ལོག་གི་རྗེས་སུ། ར་ས་སོགས་གཙུག་ལག་ཁང་མང་བོར་སྤྲང་ཚང་བཅོས་ཤིང་། ལྡེབས་བྲིས་ཀྱང་དྲི་མ་བསྒོས་པའི་ཚེ། ཟངས་དཀར་ལོ་ཙཱ་བ་དང་། མདོལ་ཆུང་དཔོན་སྐོར་ཟུང་གིས་སྤྲང་ཁང་ལོགས་སུ་བརྩིགས། ཕྱི་རོལ་དུ་སྤྲང་འགྱེད་བཏང་བའི་ཐབས་ཤེས་དང་། དམག་དཔུང་གིས་ཤུགས་ཀྱིས་སྤྲང་ཚང་བཏོན། ཁོང་རྣམ་པ་ཟུང་དང་རྗེ་སྒོམ་པ་ཚུལ་ཁྲིམས་སྙིང་བོས་ལྡེབས་རིས་ཐམས་ཅད་གཞི་ནས་བཅོས་ཞེས། ཆོས་འབྱུང་མཁས་དགའ་ལས་གསུངས་པ་ལྟར་དང་། གཞན་རྗེ་ཙོང་ཁ་བ་སོགས་ཀྱིས་ཀྱང་སླར་གསོ་མང་དུ་མཛད་དེ་འཕོ་འགྱུར་དུ་མ་བྱུང་བས། ད་ལྟའི་ལྡེབས་རིས་ལ་བལྟས་ཏེ། སྔ་རབས་ཀྱི་རི་མོ་གྲྭ་ཟུར་མ་ཉམས་པའོ་ཞེས་བཤད་མི་རིགས་སོ། །

གཞན་ཁྱུང་ལུང་དངུལ་མཁར་གྱི་འདབས་ན་མཆིས་པའི་ཇོ་མོ་ཕུག་ཀྱི་ལྡེབས་རིས་རྣམས་ཚོན་མདངས་དྭངས་ཤིང་མཐའ་ཤན་སྔོན་པོ་དང་དམར་བོ་བརྒྱབ་ཡོད་ལ། ལྷ་སྐུ་འདི་དག་ནི་བོན་ལྷའི་བཞེངས་ཚུལ་གྱི་ཤན་ཞུགས་ཡོད་ལ། ལོ་རྒྱུས་སྨྲ་བ་དག་གིས་འདི་དུས་རབས་བཅུ་གཅིག་གི་སྐབས་ཡིན་པར་འདོད་དོ། །

ཡང་། སྤྱི་ལོ ༡༠༠༣ ལོར﹙བསྟན་རྩིས་ཀུན་བཏུས་ལས༡༠༢༧ ལོར་ཕྱག་བཏབ་པར་བཞེད﹚ཕྱག་བཏབ་ལ། དེའི་ལྡེབས་རིས་རྣམས་ནི་བོད་ཡུལ་གྱི་ལྡེབས་རིས་ཁག་ལས་མཛེས་རྩལ་ཕུལ་ཏུ་བྱུང་བའི་ལྡེབས་རིས་གྲས་སུ་གཏོགས་པ་མཇལ་བ་ཙམ་གྱིས་རྟོགས་པར་ནུས་པ་དང་།

ཡང་། སྤྱི་ལོ ༡༠༨༡ ལོར་གྲྭ་བ་མངོན་ཤེས་ཅན་གྱིས་བཏབ་པའི་གྲ་ཐང་དགོན་པའི་ལྡེབས་རིས་དང་། ངོ་མཚར་བ་ཞིག་ལ་དེའི་ནང་སངས་རྒྱས་ཀྱིས་ཞབས་ལྷམ་གསོལ་བའི་རྣམ་པ་ཅན་ཡང་རེ་གཉིས་མཆིས་པ་དང་།

བསྟན་པ་ཕྱི་དར་གྱི་དུས་མགོར་ཡང་། བླ་ཆེན་དགོངས་པ་རབ་གསལ་དང་། ཁོང་གི་སློབ་བརྒྱུད་ཇོ་བོ་ཡབ་སྲས་དང་། ས་སྐྱ་པཎ་ཆེན། མར་བ་དང་དྭགས་པོ་ལྷ་རྗེ། ཐང་སྟོང་རྒྱལ་བོ། བུ་སྟོན་རིན་ཆེན་གྲུབ་སོགས་ཀྱིས་ལྡེབས་བྲིས་དར་སྤེལ་བཏང་བ་དང་། གཞན་ཡང་། སྨན་ཐང་བའི་ལུགས་དང་། གཙང་བ་ཆོས་དབྱིངས་རྡོ་རྗེ་ནས་བརྒྱུད་པ། སི་ཏུས་རྒྱས་པར་མཛད་པའི་སྒར་ལུགས་གསར་རྙིང་གི་ལྡེབས་བྲིས་སོགས། གངས་ལྗོངས་གཙོ་བོར་གྱུར་བའི་གཙུག་ལག་ཁང་བགྲངལས་འདས་པར་ལྡེབས་བྲིས་རྒྱ་ཆེར་དར་བ་དང་། གཞན་ནོར་གླིང་རྟག་བརྟན་མི་འགྱུར་ཕོ་བྲང་གི་ནུབ་བྱང་བར་དགའ་ལྡན་ཁང་གསར་བསོད་ནམས་རིན་ཆེན་སོགས་ཀྱིས་བྲིས་པའི་བོད་མིའི་འགྲོ་བ་བྱུང་ཚུལ། ཆོས་ཀྱི་དབུ་བརྙེས་ཚུལ། གསང་སྔགས་རྙིང་མ་བྱུང་ཚུལ། བསྟན་པ་ཕྱི་དར་ནས་བཀའ་གདམས། བཀའ་བརྒྱུད། ས་སྐྱ། དགེ་ལུགས་སོགས་ཀྱི་གྲུབ་མཐའ་བྱུང་ཚུལ། རྒྱལ་བོ་རིམ་བྱོན་གྱི་རྣམ་ཐར་སོགས་མུ་འབྲེལ་དང་། ནོར་གླིང་སྤྱན་རས་གཟིགས་ལྷ་ཁང་དུ་སངས་རྒྱས་ཀྱི་འཁྲུངས་རབས་དག་དང་མ་དག་པའི་སྐྱེས་པ་ལྔ་བརྒྱ་བཞེས་ཚུལ་དང་། གཞན་པོ་ཏ་ལ་དང་། སྡེ་དགེ་པར་ཁང་སོགས་སུ་འང་ལྡེབས་རིས་རྒྱས་པར་གནང་ཡོད་པ་དང་། རྒྱལ་ཁམས་གཞན་དུའང་། ཁྲི་གཙུག་ལྡེ་བཙུན་གྱི་དུས་སུ་ལི་ཡུལ་དང་ཏུན་ཧོང་། ས་སྐྱ་བའི་སྲིད་སྐྱོང་སྐབས་རྒྱ་ནག་དང་སོག་ཡུལ། ཀརྨ་སྐུ་ཕྲེང་རིམ་བྱོན་གྱིས་འབྲུག་ཡུལ་དང་འཇང་། ལྔ་བ་ཆེན་པོ་སོགས་ཀྱི་དུས་སུ་པེ་ཅིན་གྱི་དགའ་ལྡན་བྱིན་ཆགས་གླིང་། སོག་པོའི་ཧལ་ཧ་དང་ཧོ་པེ། ཁྲན་ཏེ་དགོན་པ་སོགས་བོད་ལུགས་ཀྱི་ལྡེབས་བྲིས་འདི་རྒྱ་ཆེར་དར་རྒྱས་སུ་བྱུང་ལ། རེབ་གོང་གི་ལྡེབས་རིས་སྔ་ཤོས་ནི་གཉན་ཐོག་བྱམས་པ་གླིང་དུ་ཡོད་པའི་གནས་བརྟན་བཅུ་དྲུག་དང་། སྟོན་པའི་འཁྲུངས་རབས། རྒྱལ་བ་དང་པཎ་ཆེན་སྐུ་ཕྲེང་རིམ་བྱོན་གྱི་ལྡེབས་རིས་འདི་ཡིན་པར་བཤད་དོ། །

གོས་སྐུ་ཆེན་མོ།

བོད་དུ་གོས་སྐུ་བཟོ་སྲོལ་ནི། བསྟན་པ་ཕྱི་དར་གྱི་དུས་བོད་ལ་ཡོན་གོང་མས་དབང་སྒྱུར་བྱེད་པའི་དུས་སུ་དར་ཞེས་མཁས་པ་ཁ་ཅིག་བཞེད་ལ། འདིར་བཤད་དགོས་པའི་ཡང་སྙིང་གོས་སྐུ་ཆེན་མོ་ནི། ཀརྨ་རོལ་བའི་རྡོ་རྗེ་རྒྱ་ནག་ལ་ཕེབས་པའི་སྐབས། རྒྱལ་བོ་རིན་ཆེན་དཔལ་གྱི་བཙུན་མོ་པུ་ནེ་དྷ་རིའི་རྨི་ལམ་དུ། བ་དན་ཡང་དབེན་གྱི་རི་དང་མཉམ་པའི་སངས་རྒྱས་ཀྱི་སྐུ་བཞེངས་དང་འགྲུབ་པར་འགྱུར་རོ་ཞེས་རྨིས་བྱུང་བ། ཀ་རྨ་རོལ་བའི་རྡོ་རྗེ་ལ་ཞུས་པས། དེ་ལྟ་བུ་ཞིག་བཟོ་བོ་སུས་ཀྱང་ཁོང་དུ་མ་ཆུད་པས། ཀརྨ་རོལ་རྡོར་ཁོང་གིས་ཆ་ཚད་རན་པའི་སྐྱ་བྲིས་རྡོ་དཀར་གོང་གིས་རྣམ་བཅད་མཛད་ནས་གོས་སྐུ་ཆེན་མོ་འདྲུབས་པའི་སྲོལ་ཕྱེས་པ་དཔའ་བོ་གཙུག་ལག་ཕྲེང་བའི་ཆོས་འབྱུང་དུ་གསུངས། གོས་སྐུ་དེ་ནི་ཧོར་གོས་བཟང་བོ་བཀབ་ཅིང་སྐུ་གསེར་མདོག་དང་ན་བཟའ་ཏ་ཧུན་སོགས་ལས་བྱས། སྙན་གཡས་གཡོན་བར་འདོམ་བཅུ་གཅིག ཚད་དེས་སྐུ་ཡོངས་རྫོགས་སྟེང་ནས་ལྷས་མཆོད་ཅིང་འོག་ནས་པད་གདན་དང་བྱེའུ་ཕྲུག་ཁ་ཅན། གཡས་གཡོན་དུ་བྱམས་པ་དང་འཇམ་དཔལ། སྐུ་དངོས་ལ་དོས་ཆེན་པོ་སོ་གཉིས། ལྡེམ་གཉིས་ལ་དོས་བརྒྱད་རྣམས་བཏང་སྟེ་ཧ་ཅང་བྱོན་ལེགས་གྲུབ། གོས་སྐུ་འདི་རི་དེ་ཉིད་ལ་ཞལ་ཕྱེས་ཏེ་རབ་གནས་ཀྱི་མཛད་སྒོར་མེ་ཏོག་གི་ཆར་བབས་པ་སོགས་རྟེན་འབྲེལ་ཕུན་སུམ་ཚོགས་པ་བྱུང་། བཞེངས་ཡོན་ཡང་རྒྱུ་གང་སོང་གི་བཅུ་ཆ་ཕུལ་ཏེ་གསེར་སྲང་སྟོང་དང་དགུ་བཅུ་བཏང་ངོ་། །ཕྱིས་སུ་གྲུབ་མཐའ་སོ་སོའི་བཞེངས་ཡོན་འབོར་ཆེན་བཏང་སྟེ་གོས་སྐུ་ཆེན་མོ་བཞེངས་པའི་སྲོལ་དར་བ་སྟེ། དཔེར་ན། རྗེ་དགེ་འདུན་གྲུབ་པས་པིར་ཐོགས་སྨན་བླ་དོན་གྲུབ་པ་སོགས་སྤྱན་དྲངས་ཏེ། ཟླ་ངོ་གསུམ་གྱི་རིང་ལ་དཀྱུས་སུ་འདོམ་བཅོ་བརྒྱད་དང་། ཞེང་དུ་འདོམ་བཅུ་གཉིས་ཅན་གྱི་སྟོན་པའི་གོས་སྐུ་བཞེངས་པ་གཙོས། ད་ལྟའི་བར་དུ་གཙང་བཀྲ་ཤིས་ལྷུན་པོར་པཎ་ཆེན་སྐུ་ཕྲེང་འགའ་ཞིག་ནས་བཞེངས་གྲུབ་གནང་བའི་གོས་སྐུ་ཁག་བརྒྱད་ཙམ་ཡོད་པར་གྲགས་པ་དང་། དེ་བཞིན་ཕོ་ལྷ་བ་བསོད་ནམས་སྟོབས་རྒྱས་གྱིས་གོས་སྐུ་ཆེན་མོ་ཞིག་བཞེངས་ཏེ་སྨིན་གྲོལ་གླིང་དགོན་པར་ཕུལ་བ་དང་། ཡང་། དགའ་ལྡན་ཁྲི་ཐོག་ཉེར་བཞི་བ་ཁྲི་ཆེན་བྱམས་པ་རྒྱ་མཚོས་བཞེངས་པའི་རྒྱལ་བ་བྱམས་པའི་གོས་སྐུ། སྡེ་སྲིད་སངས་རྒྱས་རྒྱ་མཚོས་བཞེངས་པའི་གོས་སྐུ་ཆེན་མོ། ༡༩༨༩ ལོར་འབྲས་སྤུངས་དགོན་པའི་དུས་ཡུན་ཟླ་བ་དྲུག་ཙམ་ལ་བཞེངས་པའི་གོས་སྐུ་ཆེན་མོ་དེའི་དཀྱུས་ལ་རྨི ༣༡ དང་། ཞེང་ཚད་རྨི ༢༠ ཙམ་ཡོད། གཞན་ཡང་། མཚུར་ཕུའི་གོས་སྐུ་ཆེན་མོར་མཚོན་ན། གོས་སྐུ་ཆེན་མོ་མཐོང་གྲོལ་ལྷུན་གྲུབ་འཛམ་གླིང་རྒྱན་མཚན་གསོལ་གནང་བའང་ཡོད། དེ་ལྟར་གྲུབ་མཐའ་ཁག་གི་དགོན་སྡེ་རྣམས་སུ་དར་ཁྱབ་བྱུང་སྟེ། ཆོས་ལུགས་ཀྱི་མཛད་སྒོ་ཆེན་པོ་དང་སྒོ་བསྟུན་ནས་ཞལ་འབྱེད་གནང་སྟེ་བྱེད་སྒོ་མང་དུ་སྤེལ་བ་དང་། དད་ལྡན་མང་ཚོགས་ལ་མཇལ་སྲོལ་འདི་བྱུང་བ་ཡིན་ནོ། །གོས་སྐུ་ཞལ་འབྱེད་ཡུལ་གྱི་དབང་དུ་བཏང་ན། གཙུག་ལག་ཁང་གི་རྩིག་ལྡེབས་དང་། ཡང་ན་། དགོན་པའི་ཕྱི་ལོགས་ཀྱི་རི་ངོས་སུ་རྡོ་གཅལ་བཀྲམས་ནས་དེའི་སྟེང་ཞལ་འབྱེད་བྱེད་སྲོལ་ཡོད་དོ། །

བརྐོ་བཟོ་པར་ཤིང་པར།

༡ ཤིང་པར་གྱི་བྱུང་རིམ། བོད་རྒྱལ་སྲོང་བཙན་དུས་སུའང་ཤིང་གི་ལྡེབས་ལ་ཤིང་ལོ་དང་མེ་ཏོག སྲོག་ཆགས་སོགས་བརྐོ་ཤེས་ཀྱི་ཡོད་ཀྱང་། དེའི་ཚེ་རྐོ་རིས་པ་ཚོས་རང་གི་ལག་རྩལ་མཐོ་དམན་གྱིས་གང་འདོད་དུ་བརྐོ་བ་ལས། སྒྲིག་གཞི་ཆ་ཚང་ཞིག་བྱུང་མེད།

ཡོན་རྒྱལ་རབས་ཀྱི་གོང་མ་ཨུ་ཙུང་ཧུའི་ཧྲན་གྱི་དུས་སུ། དབུས་པ་བློ་གསལ་བྱང་ཆུབ་ཡེ་ཤེས་དང་། བཅོམ་ལྡན་རིགས་རལ་གཉིས་ཀྱིས་བོད་དུ་ཡོད་པའི་བཀའ་བསྟན་ཆ་ཚང་བསྡུས་པ་བསྒྲིགས་ཐེངས་བཞི་བ་ཡིན། དེ་དུས་ནས་མཚུར་ཕུ་དགོན་པ། ས་སྐྱ། མངའ་རིས། ཁམས། སོག་ཁུལ་རྣམས་སུ་དར་ཁྱབ་བྱུང་བ་བྲིས་མ་ཤ་སྟག་ཡིན། བོད་རབ་བྱུང་བདུན་པའི་ས་བྱི ༡༤༠༨ ལོར་གོང་མ་ཡོང་ལོས་ཉུག་རུམ་པ་ཐའི་ཀྱེན་བཞི་བོད་དུ་མངགས་ནས་རྗེ་ཐམས་ཅད་མཁྱེན་པ་དབུ་བླར་ཞུས་སྐབས། རྗེ་ཉིད་མ་སླེབས་པར། བྱམས་ཆེན་ཆོས་རྗེ་ཤཱཀྱ་ཡེ་ཤེས་ཕེབས་སྐབས། གོང་མ་ཡུང་ལོས་ནན་ཅིན་དུ་བོད་ཡིག་བཀའ་འགྱུར་ཟངས་དཔར་དེ་ཐོག་མར་པར་བརྐོས་བྱས་ཏེ། ས་སྐྱ་བ་དང་། ཀརྨ་བ། རྗེ་བདག་ཉིད་ཆེན་པོ་བཅས་ལ་བོད་ཡིག་ཟངས་དཔར་གྱི་བཀའ་འགྱུར་ཆ་ཚང་རེ་ཕུལ། མཁས་པ་མང་བོ་དགའ་ཚོར་ཆེན་པོ་སྐྱེས་ཤིང་། མཐོང་རྒྱ་དང་མིག་རྒྱ་བསྐྱེད་པའི་ས་བོན་དུ་གྱུར་བ་རེད། ཕྱིས་སུ་མ་དཔེ་ཟངས་ལ་གཞིགས་ཏེ། ཤིང་ཐོག་ཏུ་ཡི་གེ་བརྐོ་རྒྱུ་འདི་དར་བ་ཡིན་ལ། དེ་ཡང་། ཟངས་དང་ཁྲོ་རིགས་ཀྱི་གཏེར་ཁ་བོད་ན་དཀོན་པས་ཤིང་དཔར་གྱི་སྲོལ་བཏོད་པ་ཡིན། བོད་ས་གནས་ཀྱི་བརྐོ་རིས་ཐད་ཤིང་བརྐོ་དང་རྡོ་བརྐོའི་ལག་རྩལ་ཁྱད་པར་བ་འདི་དང་སྒོ་བསྟུན་ནས། ཕག་གྲུ་སྡེ་སྲིད་ཁྲི་རབས་ལྔ་བ་དབང་གྲགས་པ་རྒྱལ་མཚན་གྱིས་ཐོག་མར་ས་སྐྱ་གོང་མ་རྣམ་ལྔའི་གསུང་འབུམ་དཔར་དུ་བརྐོས་ཤིང་།

རྗེ་བདག་ཉིད་ཆེན་པོའི་དགོངས་པ་ཆོས་དབྱིངས་སུ་བསྡུས་རྗེས། སྣེའུ་རྫོང་དཔོན་ནམ་མཁའ་བཟང་བོས་སྦྱིན་བདག་བྱས་ནས། རྗེ་བདག་ཉིད་ཆེན་པོའི་གསུང་འབུམ་ཆ་ཚང་པར་བརྐོས་གནང་བ་དེ་ལ། ཡོངས་གྲགས་སུ་དགའ་ལྡན་དཔར་རྙིང་ཟེར་བ་དེ་ཡིན། ཤིང་པར་དེ་ལས་ཐོར་བུ་དེང་སང་སེ་ར་དང་འབྲས་སྤུངས། པོ་ཏ་ལ་བཅས་ན་མཐོང་རྒྱུ་ཡོད། རྗེ་བདག་ཉིད་ཆེན་པོའི་སྐུ་རིང་ནས་ཤིང་པར་རྒྱ་ཆེར་དར་བ་འདིས་བཀའ་དྲིན་གྱིས་ད་ལྟ་ཡང་དབུ་ཅན་གྱི་ཡིག་གཟུགས་མ་འགྱུར་བར་གཅིག་ཚུགས་སུ་གནས་པ་འདི་བྱུང་བ་སྟེ། ཐོན་མིའི་ཞལ་ལུང་ལས། བོད་དབུས་གཙང་དུ་ལོ་ལྔ་བརྒྱའི་སྔོན་རྗེ་ཙོང་ཁ་བའི་སྐུ་རིང་ནས་གསུང་རབ་བསྟན་བཅོས་ཀྱི་ཤིང་དཔར་མང་བོ་སྤེལ་བའི་སྲོལ་དར་བ་ནས་བཟུང་། དབུ་ཅན་གྱི་ཡི་གེ་ཕལ་ཆེར་འབྲི་ཚུགས་སྣ་གཅིག་པ་ལས་སྣ་མི་མཐུན་པ་མང་བོ་གཏན་མ་བྱུང་ལ། དབུ་མེད་ཀྱི་འབྲི་ཚུགས་ལ་དེ་ལྟ་བུའི་དཔར་འདེབས་རྒྱུགས་ཆེ་བ་མ་བྱུང་བའི་རྐྱེན་དང་། ཡུལ་གྲུ་ཕན་ཚུན་ལ་འགྲིམ་འགྲུལ་ཉམས་དམའ་བའི་དབང་གིས་དབུས་བྲིས། ཁམས་བྲིས། ཨམ་བྲིས་ཞེས་འབྲི་ཚུགས་མི་འདྲ་བ་གསུམ་བྱུང་། ཞེས་གསུངས་པས་སོ། །

སྤྱི་ལོ ༡༦༤༢ ལོར་འཇང་རྒྱལ་བོ་བསོད་ནམས་རབ་བརྟན་གྱིས་བཀའ་འགྱུར་ཆ་ཚང་ཤིང་པར་དུ་བཏབ་པ་དེ། ཕྱིས་སུ་ལི་ཐང་དགོན་དུ་བཞུགས་པ་ལ་ལི་ཐང་ཚལ་པར་མ་ཟེར།

སྤྱི་ལོ ༡༧༢༡ ལོར་ཅོ་ནེ་དཔོན་པོས། ནན་ཅིང་པར། ལི་ཐང་ཚལ་པར་མ། དབུས་བྲིས་བཀའ་འགྱུར་བཅས་ལ་མ་དཔེ་བྱས་ཏེ་དཔར་དུ་བསྐྲུན་པ་ལ། ཅོ་ནེ་བཀའ་འགྱུར་ཟེར།

རབ་བྱུང་བཅུ་གཉིས་པའི་ལྕགས་བྱ ༡༧༤༡ ལོར་ཕོ་ལྷ་བ་བསོད་ནམས་སྟོབས་རྒྱས་ཀྱིས་བཀའ་བསྟན་ཆ་ཚང་བརྐོས་གནང་མཛད་པ། པཎ་ཆེན་སྐུ་ཕྲེང་ལྔ་བ་བློ་བཟང་ཡེ་ཤེས་ལ་ཕུལ་བ་དེ་སྣར་ཐང་དགོན་པར་བཞག་པས་སྣར་ཐང་བཀའ་འགྱུར་ཟེར་བ་དེ་ཡིན།

 རབ་བྱུང་བཅུ་གཉིས་པའི་ཤིང་བྱི ༡༧༤༤ ལོར་སྡེ་དགེ་རྒྱལ་བོ་བསྟན་པ་ཚེ་རིང་གིས་བཀའ་བསྟན་སོགས་ཆོས་དཔེ་ཧ་ཅང་མང་བོ་པར་བརྐོས་བྱས་པས་དཔར་ཁང་བཞེངས་པ་དེ་ལ་སྡེ་དགེ་དཔར་ཁང་ཟེར་ཞིང་། བོད་ཁམས་ཀྱི་དཔར་ཁང་ཆེ་ཤོས་ཡིན།

 གཞན་ཁྲོ་སྐྱབས་ནས་ཐོན་པའི་གཟི་བརྗིད་པར་མ༡༧༥༢ ནས་༡༧༦༥ ལོར་གྲུབ་པར་པར་བྱང་ལས་གསལ་བ་དང་། ཡང་། རབ་བརྟན་ནས་ཐོན་པའི་གཟི་བརྗིད་སྟོན་པ་གཤེན་རབ་ཀྱི་རྣམ་ཐར་རྒྱས་པར་སྤྲོས་པའི་དཔེ་ཆ་པར་མ ༡༧༦༦ནས༡༦༧༧ པར་བརྐོས་བྱས་པ་སྟེ་པར་གཞི་རིག་གསར་སྐབས་བོར་བརླག་ཏུ་སོང་ཡང་པར་དཔེ་དེང་སང་མཇལ་ཏུ་ཡོད་པ་དང་།

 རབ་བྱུང་བཅུ་གསུམ་པའི་ཆུ་སྤྲེལ ༡༧༥༢ ལོར་ཅོ་ནེ་དཔོན་བསྟན་སྲུང་ཚེ་རིང་དང་མེ་མོ་རིན་ཆེན་དཔལ་འཛོམས་གཉིས་ཀྱིས་དབུས་པར་དང་། པེ་ཅིན་པར་མ། སྣར་ཐང་པར་མ་བཅས་ལ་ཕྱི་མོ་བྱས་ཏེ། དཔར་བསྐྲུན་བྱས་པ་ཅོ་ནེ་དཔར་ཁང་དང་།

 དུས་རབས་ཉི་ཤུ་བའི་དུས་མགོར། ཏཱ་ལའི་བླ་མ་སྐུ་ཕྲེང་བཅུ་གསུམ་པས། སྔ་སོར་རྒྱལ་དབང་ལྔ་བ་ཆེན་པོའི་སྐབས་སུ་ཡོད་པའི་དཔར་ཁང་རྙིང་བའི་མ་རྩའི་སྟེང་། བཀའ་འགྱུར་སོགས་ཆོས་དཔེ་མང་བོ་པར་བསྐྲུན་གནང་བ་དེ། ཞོལ་པར་ཁང་ཡིན།

གཞན་འབྲུག་ཡུལ་གྱི་བཀའ་འགྱུར། ར་རྒྱའི་བཀའ་འགྱུར། སེ་འབྲས་དགེ་གསུམ་དང་། བཀྲ་ཤིས་ལྷུན་པོ། བླ་བྲང་། སྐུ་འབུམ། རོང་བོ་སོགས་གྲུབ་མཐའ་ཁག་གི་ཆོས་སྡེ་དག་ན། ས་དགེ་ཀར་རྙིང་ཇོ་ནང་བོན་དང་བཅས་པའི་སྔོན་བྱོན་མཁས་དབང་རྣམས་ཀྱིས་མཛད་པའི་གསུང་འབུམ་གྱི་པར་ཤིང་དང་། བརྡ་སྤྲོད། ལོ་རྒྱུས། སྨན་གཞུང་། ལྷ་སྐུ། ཐིག་རྩ། དཔེ་རིས་སོགས་ཀྱི་པར་ཤིང་རི་བོའི་གཏོས་དང་མཉམ་པ་འམ་འཛམ་གླིང་ན་མཐོང་དཀོན་པའི་རིག་གནས་ཀྱི་ཤུལ་བཞག་བདག་ཅག་གི་སྤྱོད་ཡུལ་དུ་གྱུར་བ་འདི་དག་གོ།

༢ པར་ཤིང་ཇི་ལྟར་བརྐོ་ཚུལ། པར་གཞི་ལ་སྟག་པའམ་ཆང་བ་ལི་སོགས་ཀྱི་སྲ་ཤིང་དགོས་ལ། དེ་ནི་པར་ཤིང་མི་ཟད་པ་དང་རྐོ་ཚེ་ནང་དུ་མི་རྡིབ་པ་དང་གས་ཆག་ཉུང་བའི་དགེ་མཚན་ལྡན། དབྱིབས་ནི་དགེ་ཆོས་ཀྱིས་གསུངས་པ་བཞིན་ཏ་ལའི་ལོ་མའི་ཆོས་དཔེ་ལ་བསྟུན་ཏེ། སྣ་རིང་ཐུང་གང་རུང་ངོས་སྙོམས་པོར་ལན་བརྒྱབ་ཏེ། སྒང་གཤོང་མེད་པར་བྱས་ཐོག་པར་གཞི་ལ་མ་ཡིག་བྲིས་དཔར་གང་རུང་། བག་ཆུ་སྡེབ་ཁ་དང་བསྟུན་ཏེ་ཡ་ཡོ་མ་ཤོར་བར་སྦྱོར་དགོས།

སྦྱར་ཚེ་ཇི་ལྟར་བརྐོ་བའི་རིམ་པ་ནི། ༡ ཤིང་པར་ལ་དགོས་པའི་ལག་ཆ་ནི། དབོར་འབིག སྦོ་འབིག﹙མ་ཀོར་དང་ན་ཀོར་སོགས་འབྲུ་བྱེད།﹚ རྐོ་གྲི། གསེག་གྲི། གྲི་སྐེ་འཁྱོག ལན་བཅས་སོ། ༢ གསེག་གྲིས་ཡིག་མགོའི་ཐིག་ཕྲེང་དྲང་བོར་འཐེན་དགོས། ༣ དབོར་འབིག་གིས་མ་གོར་ན་གོར་སོགས་བསལ་དགོས། ༤ རྐོ་གྲིས་ཡི་གེ་མེད་པའི་བར་སྟོང་ཆེ་ཤོས་བསལ་དགོས། ༥ ཡི་གེའི་དྲང་ཕྱོགས་སུ་བཟུང་ནས་རྐོ་གྲིས་གསེག་གཟུགས་ཏེ་བརྐོས་དགོས། ༦ ཡི་གེ་རང་གི་ལྡོག་ཕྱོགས་སུ་བཟུང་ནས་རྐོ་གྲིས་ཞིབ་ལས་བྱེད་དགོས། ༧ གསེག་གྲིས་གཡས་གཡོན་གྱི་མཐའ་གཉིས་བསལ་དགོས། དེ་ནི་པར་རྒྱག་སྐབས་མཐའ་གཉིས་སུ་ནག་པོ་མི་འབབ་པའི་ཆེད་དུ་ཡིན། ༨ པར་ཤིང་གི་ལོགས་གཉིས་སུ་ལན་བརྒྱབ་ཏེ་སྟེང་འོག་གི་མཐའ་ཐིག་ཡ་ཡོ་མ་ཤོར་བར། བུམ་རིལ་བཟོ་དགོས། ༩ པར་ཤིང་མར་དང་གཡིས་སོགས་ཀྱི་སྣུམ་ནང་དུ་འཚེད་པ་འམ། ཡང་ན་སྣུམ་མང་བོ་བླུགས་ནས་ཉི་མར་ལྡེས་ཏེ་ནང་ལ་ཐིམ་དུ་འཇུག་དགོས། དེ་ནི་པར་ཤིང་ཡུན་རིང་བཞག་ཀྱང་མི་རུལ་བ་འམ། སྣག་ཆུས་སྦངས་ན་ཡིག་ཚུགས་མི་འཆོར་བ་སོགས་ཀྱི་དགེ་མཚན་ལྡན། ༡༠ དཔར་ཤིང་གི་ཤོག་རོ་རྣམས་ཆུ་ཁོལ་གཙང་མས་བཀྲུ་བྱབས་ཡང་དག་པར་བྱས་ཏེ་སྤར་དགོས། ༡༡ དཔར་རྗེས། ཞུས་ཆེན་པར་རིམ་བརྒྱུད་ཀྱིས་ཚིག་དོན་གཉིས་ཆར་ལ། ཡང་ཡང་ཞུ་དག་བཏང་སྟེ་ནོར་འཁྲུལ་བྱུང་རིགས་ལ། པར་རྐོ་བའི་ཆད་གསབ་རྒྱག་པ་སྟེ། དེ་ནི་ལྷག་པ་རྐོ་གྲིས་ལེན་ཞིང་། ཆད་པ་དང་ཆག་སྐྱོན་གྱི་རིགས། སུར་ཤིང་དང་སྟག་པ་སོགས་སྲ་ཤིང་གི་རིགས་ལ་སྤྱིན་བསྐུས་ཏེ། པར་ཤིང་ངོས་སྙོམས་སུ། ཆད་ལྷག་ཞིབ་ཚགས་ལྡན་པའི་སྒོ་ནས་བསྐྱར་གསབ་བྱེད་དགོས་པ་ཡིན་ནོ། །

༣ པར་ལོག་བྱེད་སྟངས། པར་གཞིའི་ངོས་ལ་དྲག་འཐས་ཀྱིས་མཚལ་དང་སྣག་ཚ་འོས་འཚམ་བྱུགས་ནས། པར་ཤིང་སྟེང་ཤོག་གུ་དགབ་པ་ལ། རྩིད་པ་སོགས་རྩུབ་ཤོས་ཆེ་བའི་རིགས་ཀྱིས་སྟེང་དུ་དབུར་ནས། དཔར་དགོས་ལ། དེ་ཡང་སྣག་ཚ་དང་། དྲག་འཐས་བྱུགས་སྟངས། རྩིད་ཕོན་དབུར་སྟངས་སོགས་ཀྱི་དམ་ལྷོད་ཤེས་ན། ད་གཟོད་ཡི་གེ་གསལ་ཞིང་སྙོམས་ལ་གནག་ནུར་མི་ཤོར་ཡིན་ནོ། །

 ༤ གསུང་རབ་བཞེངས་པའི་ཕན་ཡོན་ནི། མདོ་ལས། ཀུན་དགའ་བོ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ལྷ་ཡུལ་བའི་ནོར་བུ་རིན་པོ་ཆེ་དང་འདྲ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡི་གེ་ལ་བྲིས་ཏེ། གང་དུ་བཞག་པ་དེར་གནོད་པ་ཅི་ཡང་མི་འབྱུང་བར་ཤེས་པར་བྱའོ། །ཞེས་དང་། ལྷ་དང་མི་དང་ལྷ་མ་ཡིན་གྱིས། འཇིག་རྟེན་ན་བསྟི་སྟང་བྱ། བླ་མར་བྱ་ཞིང་། རིམ་གྲོ་བྱེད། མཆོད་པར་བྱེད་དོ། །ཞེས་དང་། སེམས་ཅན་དག་པ་ངོ་མཚར་ཆེ། །བསྟན་བཅོས་ཀུན་ལས་བསླབ་གྱུར་ཀྱང་། །འཇིག་རྟེན་འཇིག་རྟེན་རྗེས་བསྙེགས་ཕྱིར། །ཡི་གེ་གྲྭ་ནི་བྱོན་པར་འགྱུར། །ཡི་གེ་གང་གི་མིང་དག་ཀྱང་། །བདག་གིས་ཤེས་པར་མ་གྱུར་བ། །དེ་ལ་འདི་ནི་བྱང་གྱུར་ཀྱང་། །ཡི་གེ་སློབ་པའི་གྲྭར་བྱོན་ཏེ། །འདི་ཡི་ཞལ་ནི་མཐོང་མོད་ཀྱི། །སྤྱི་གཙུག་འཕགས་པ་ལྟར་མི་སྣང་། །ཡི་གེ་ཤེས་རབ་མཐར་ཕྱིན་ན། །བདག་གིས་འདི་ཀོ་ཇི་ལྟར་བསླབ། །ལྷ་ཡི་ལྷ་ཆེན་ལྷ་འདི་ནི། །ལྷ་རྣམས་ཀུན་གྱི་མཆོག་མཁས་པ། །ཁྱད་པར་འཕགས་ཤིང་མཉམ་པ་མེད། །ཅེས་དང་། མདོ་སྡུད་པ་ལས། ལ་ལས་གང་གཱའི་ཀླུང་གི་ཇི་སྙེད་ཞིང་ཁམས་ན། །སེམས་ཅན་ཇི་སྙེད་འཁོད་ཀུན་དགྲ་བཅོམ་ཉིད་བཏུལ་བ། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་ལྒིགས་ཕྱིན་ཁྱད་པར་འཕགས། །ཞེས་དང་། ཕལ་ཆེན་ལས། ལྔ་བརྒྱ་ཐ་མར་གྱུར་བ་ན། །ང་ཉིད་ཡི་གེའི་གཟུགས་སུ་སྣང་། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་པ་ལྟར། སྙིགས་མ་ལྔ་བདོ་དུས་སུ་སྟོན་པ་ཐུགས་རྗེ་ཅན་ཐ་མལ་བའི་མིག་ལམ་དུ་བཟོ་བོ་སྤྲུལ་སྐུའི་རྣམ་པར་བྱོན་པ་ཡིན་ཏེ། དཔལ་སྤྲུལ་རིན་པོ་ཆེས། སྲིད་པའི་ཁམས་ན་ཕན་བདེའི་དངོས་གྱུར་བ། །གང་ཡང་ཐུབ་པའི་སྤྲུལ་བར་བཀའ་བསྩལ་ན། །བློ་མཆོག་བློ་ལ་ཤེས་པའི་མིག་སྦྱིན་པ། །ཡི་གེའི་གཟུགས་འདི་བཟོ་ཡི་སྤྲུལ་སྐུ་ཡིན། །ཞེས་སོགས་མང་དུ་གསུངས་སོ། །

གསེར་བཟོ།

བོད་ཡུལ་འདིར་གནོད་སྦྱིན་སོགས་བཅུ་ཡིས་དབང་བསྒྱུར་བའི་སྐབས་ནས་ཆུ་གྲི་དང་དགྲ་སྟ་སོགས་བྱུང་ཡོད་པར་གཞིགས་ན། གསེར་དངུལ་ཟངས་ལྕགས་ཀྱི་བཙོ་སྦྱངས་བྱེད་ཐབས་ཆེས་སྔ་མོ་ནས། ཡོད་པར་གསལ་ལ། ཁྱད་པར་པུ་དེ་གུང་རྒྱལ་གྱི་སྐབས། ཤིང་བསྲེགས་ནས་སོལ་བ་བཟོས་པ་དང་། གསེར་དངུལ་སོགས་བཞུ་བཏུལ་ཐོག་མར་བྱས་པ་ནི། བཙན་པོའི་བཀས་སྐུལ་ཏེ་སྒྲིག་འཛུགས་ལྡན་པའི་སྒོ་ནས་ཁྱབ་སྤེལ་བཏང་བར་སྣང་། དེའི་རྗེས་བོད་རྒྱལ་འབྲོང་གཉན་ལྡེ་རུའི་བང་སོ་བརྩིགས་པའི་རེའུ་མིག་དགུ་བའི་དབུས་མར་རྒྱལ་བའི་སྐུ་གཟུགས་དང་མཉམ་པའི་གསེར་གར་བླུགས་ཀྱི་སྐུ་བརྙན་རྒྱལ་བོའི་ན་བཟའ་གསོལ་བ་བཞེངས་ནས་ཟངས་མོ་ཆེ་མཚལ་གྱིས་བཀང་བའི་ནང་དུ་བཞུགས་ཚུལ་འཁོད་པ་དང་།

ཆོས་རྒྱལ་སྲོང་བཙན་གྱི་སྐབས། གུང་བློན་ཆུང་བ་དང་། ནང་བློན་འབྲིང་བ། བཀའ་བློན་ཆེ་བ་གསུམ་ལ། གསེར་བྱང་ཆེན་པོའི་ཡི་གེ་དང་། ནང་བློན་ཆུང་བ། བཀའ་བློན་འབྲིང་བ་ལ། གསེར་བྱང་ཆུང་བའི་བྱ་དགའ་བསྩལ་ཞེས་གསེར་གྱི་བྱང་བུ་གནང་བར་གསུངས་པ་ལ་གཞིགས་ན། རང་ཅག་ཁ་བ་ཅན་གྱི་གསེར་ལས་སྣོན་གྱི་ལག་རྩལ་མཐོན་པོར་སོན་ཡོད་པ་ཤེས་ལ། གསེར་སྐུ་བཞེངས་ཚུལ་འང་། རྒྱལ་བོ་འབྲོང་གཉན་ལྡེ་རུའི་སྐུ་བརྙན་བཞེངས་ཚུལ་གོང་དུ་བཤད་པ་ནི། ཆེས་སྔ་ཤོས་སུ་གྲུབ་ཅིང་། སྲོང་བཙན་གྱི་དུས་སུ་ཡར་ལུང་ཁྲ་འབྲུག་གི་ལྷ་ཁང་དུ་གསེར་ཕྱེ་བྲེ་བརྒྱད་དང་བདུན། དྲུག ལྔ། བཞི་བཅས་ཀྱིས་རིམ་བཞིན། རྣམ་སྣང་། རྡོར་སེམས། རིན་འབྱུང་། སྣང་མཐའ། དོན་ཡོན་གྲུབ་པ་རྣམས་ཆ་ལུགས་མི་འདྲ་བར་བཞེངས་པ་དང་། ཁྲི་སྲོང་ལྡེ་བཙན་གྱི་ཇོ་མོ་ཚེ་སྤོང་བཟས། དབུ་ཚལ་གསེར་ཁང་རྡོ་རྗེ་དབྱིངས་ཀྱི་དཀྱིལ་འཁོར་གྱི་ནང་ཟུར་བཞི་ན། གསེར་གྱི་སེང་གེ་ལུག་ཙམ་པ་བརྒྱད་བཟོས་པར་བཤད་པ་དང་། གྲུབ་ཆེན་ཐང་སྟོང་རྒྱལ་བོའི་རྣམ་ཐར་ལས་ཀྱང་། ལྷ་སའི་ཇོ་མདུན་དུ། མཁའ་འགྲོ་མས་ཕུལ་བའི་སངས་རྒྱས་རིང་བསྲེལ་ཅོ་གའི་སྒོང་བ་ཙམ་དང་། དེ་ལས་འཕེལ་བ་རྣམས་ནང་སྙིང་བྱས་ཏེ་འཇམ་དབྱངས་ཀྱི་སྐུ་དང་། དབུས་སུ་མུ་གེ་འགོག་ཆེད་གསེར་སྲང་བརྒྱ་དང་ཉེར་བདུན་གྱིས་ལྷུང་བཟེད་ཆེན་པོ་ཞིག་བཞེངས་པ་དང་། དེ་བཞིན་གསེར་གྱི་སྐུ་འདྲ་བཞེངས་ཚུལ་རྣམ་ཐར་ཆོས་འབྱུང་སོགས་ན་བགྲང་ལས་འདས་པ་ཡོད་པ་དང་།

ཁྱད་པར་དུ་དུས་རབས་བཅུ་དྲུག་པར། སྡེ་སྲིད་སངས་རྒྱམ་གྱིས་བོད་ཀྱི་བཟོ་བོ་མཁས་པ་ཐམས་ཅད་ལྷ་ལྡན་དུ་བཀུགས་ཏེ། རྒྱལ་དབང་ལྔ་བའི་གསེར་གདུང་འཛམ་གླིང་རྒྱན་གཅིག་ནི། ཕྱི་གཏུམས་གསེར་ལྷད་མེད་རྒྱ་ཐུར་གྱི་སྲང་ཆིག་འབུམ་ཆིག་ཁྲི་དགུ་སྟོང་ཉིས་བརྒྱ་གྱ་གཉིས་ལས་བཞེངས་པ་དང་། མཐོ་ཚད་ཐོག་སོ་གསུམ་ཡོད་ཅིང་། ནང་རྟེན་དུ་འང་གསེར་བྲིས་ཀྱི་བཀའ་བསྟན། རྗེ་ཡབ་སྲས་གསུམ་གྱི་གསུང་འབུམ། རྒྱལ་བ་སྐུ་ཕྲེང་རིམ་བྱོན་གྱི་གསུང་འབུམ་བཅས་གཟུངས་གཞུག་མང་བོ་ཡོད་ལ། གཞན་སྐུ་འབུམ་གསེར་སྡོང་དང་། བྱ་ཁྱུང་གསེར་གདུང་། རྒྱལ་བ་སྐུ་ཕྲེང་བཅུ་གསུམ་པའི་གསེར་གདུང་དགེ་ལེགས་འདོད་འཇོ་ཡང་གསེར་རྒྱ་ཐུར་གྱི་སྲང་ཆིག་ཁྲི་ལྷག་གི་བཞེངས་པ་སོགས། སྐྱེས་ཆེན་དམ་པ་ཇི་སྙེད་ཅིག་གི་གསེར་གདུང་བགྲང་ལས་འདས་པ་ད་ལྟ་ཡང་། ཕྱི་ཐོགས་པའི་མིག་རྒྱན་དུ་གྱུར་བ་དང་། མི་རིགས་ཀུན་གྱིས་ངོ་མཚར་གནས་སུ་འཛིན་པ་དེ་ཉིད་དང་། དེ་བཞིན་མདོ་དབུས་ཁམས་གསུམ་ན་གསེར་བཟོ་ལས་གྲུབ་པའི་སྐུ་གསུང་ཐུགས་རྟེན་དང་། མཆོད་རྫས། རྒྱན་ཆ་གསེར་བྲིས། གསེར་རྐོང་སོགས་བདག་ཅག་གི་མིག་གི་སྤྱོད་ཡུལ་དུ་གྱུར་བ་འདི་དག་གོ།

དངུལ་བཟོ།

དངུལ་བཟོའི་ལག་རྩལ་ཡང་། གོང་སྨྲས་པུ་དེ་གུང་རྒྱལ་གྱི་དུས་སུ་གསེར་དངུལ་ཟངས་ལྕགས་བཙོ་སྦྱངས་བྱས་པ་ནས་དངུལ་བཟོའི་ལག་རྩལ་མཆིས་ལ། ཁྱད་པར་དུ་སྲོང་བཙན་གྱི་དུས་སུ་བློན་པོ་རིམ་པ་གསུམ་སྟེ། བྱང་ཐང་གི་ས་མཁན། མཐའི་སོ་སྲུང་། སྐུ་མཁར་གྱི་རྩེ་དྲུང་བཅས་ལ་དངུལ་གྱི་བྱང་བུའི་ཐོབ་རྟགས་བསྩལ་བ་དང་། དམར་བོ་རིར་རྒྱལ་བོ་དང་བཙུན་མོའི་སྐུ་མཁར་བར་གཤེགས་ལམ་དུ་དངུལ་ཟམ་བཙུགས་ཚུལ་དང་། བསམ་ཡས་ཨ་རྱ་པཱ་ལོའི་གླིང་དུ་དངུལ་ཤན་གྱིས་གཡོགས་པའི་ཁྲི་སྲོང་ལྡེ་བཙན་གྱི་འབག་ཞིག་བཞེངས་ཚུལ་སྦ་བཞེད་ལས་བཀོད་པ་སོགས་ལ་དཔྱད་ན། སྔ་སོར་ནས་བོད་ཀྱི་དངུལ་བཏུལ་རྡུང་དང་། ཕྱག་རྩལ་ཚད་མཐོན་པོར་གཤེགས་པ་མཚོན་ནུས་ལ།

དངུལ་གྱི་སྐུ་གསུང་ཐུགས་རྟེན་བཞེངས་ཚུལ་ལ་ཆ་མཚོན་ནའང་། ཐུབ་བསྟན་རྡོ་རྗེ་བྲག་གི་དགོན་དུ་སློབ་དཔོན་ཡབ་ཡུམ་གསུམ་གྱི་དངུལ་སྐུ་དང་། འབྲས་སྤུངས་སུ་དངུལ་སྲང་ལྔ་བརྒྱ་ལས་གྲུབ་པའི་ཇོ་བོ་རིན་པོ་ཆེ་སྲིད་ཞིའི་འཇིགས་སྐྱོབ་མ། སྐུ་འབུམ་གསེར་སྡོང་དུ་བདེ་གཤེགས་སོ་ལྔའི་དངུལ་སྐུ། ལྷ་ལྡན་གཙུག་ལག་ཁང་དུ་གནས་བརྟན་བཅུ་དྲུག་གི་དངུལ་སྐུ་སོགས་མང་དུ་བཞུགས་པ་དང། བྱ་ཁྱུང་དགོན་དུ་དངུལ་གྱི་བྲིས་སྐུ་དང་། རྒྱ་ཕིབས་མཛེས་པར་སྤྲས་པ་དང་། དགའ་ལྡན་དགོན་གྱི་བདེ་གཤེགས་ལྷ་ཁང་། བླ་མ་ལྷ་ཁང་། གསེར་གདུང་ལྷ་ཁང་གསུམ་ནའང་། དངུལ་བཟོའི་མཆོད་རྟེན་སོ་གཅིག་བཞུགས་ཚུལ་འཁོད་ཡོད་པ་དང། རྩེ་པོ་ཏ་ལར་རིན་ཆེན་སྣ་བདུན་གྱི་ཡིག་བྲིས་ལས་དངུལ་བྲིས། དགོན་སྡེ་གཞན་དུ་འང་དངུལ་བྲིས་མང་བོ་དང་། གཞན་ཡང་། རྒྱ་དངུལ་སླད་མེད་ལུགས་སུ་བླུགས་པའི་ལྗིད་ཚད་སྲང་ལྔ་བཅུའི་བཟོ་དབྱིབས་རྟའི་རྨིག་པ་དང་འདྲ་བའི་རྟ་རྨིག་མ། བོད་དངུལ་སྲང་བརྒྱད་ལ་དངུལ་བྲེ་གང་ཟེར་བ་དང་། དངུལ་སྲང་བཅུ་ལུགས་སུ་བླུགས་པའི་དངུལ་ལ་བཅུ་ཁོག་གམ་ལུག་རྨིག་མ། དངུལ་གྱི་དུང་ཙེ་སོགས་རེ་ཞིག་དངུལ་སྒོར་དུ་བེད་སྤྱོད་བཏང་བ་དང་། རྒྱལ་དབང་སྐུ་ཕྲེང་དྲུག་པ་དང་བདུན་པའི་སྐབས་སུ་དངུལ་རྟ་རྨིག་མ་ཡོད་པའི་མི་ཚང་དངུལ་གྱི་ཕུག་རོན་ཡོད་ཅེས་ཧ་ཅང་འབྱོར་ལྡན་དུ་བརྩི་སྲོལ་ཡོད་པ་དང་། གཞན་དངུལ་གྱི་རྣ་རྒྱན་དང་། ཡོ་བྱད། དངུལ་རྐོང་སོགས་ད་ལྟ་དངུལ་བཟོའི་རྣམ་གྲངས་མང་དུ་མཐོང་རྒྱུ་ཡོད་པ་ལས། དངུལ་མགར་གྱི་ཕྱག་རྩལ་མཐོར་འདེགས་ཇི་ལྟར་གོང་འཕེལ་དུ་སོང་བ་རྟོགས་ནུས་སོ། །

ཟངས་བཟོ།

ཟངས་བཟོའི་སྒྱུ་རྩལ་ནི། མདོར་བསྡུས་ན། ཟངས་བཙོ་སྦྱངས་བྱས་ཏེ་བརྡུང་བ་དང། ལུགས་སུ་བླུགས་པ། ཟངས་ཤོག་དང་། ཟངས་ཕྱེ་བཟོ་བ། རྒྱན་ཆས་དང་ཡོ་བྱད། རྟེན་གསུམ་མགར་བ་སོགས་ལ་བརྗོད། བོད་ཀྱི་ཟངས་བཟོའི་སྒྱུ་རྩལ་འདི་ཇི་ལྟར་དར་བ། ལོ་རྒྱུས་ཡིག་ཚང་ལ་གཞིགས་ན། སྤྱི་ལོ་དུས་རབས་དང་བོའི་ཡས་མས་སུ་གྲི་གུམ་བཙན་པོ་དང་། བློན་པོ་ལོང་ངམ་གཉིས་འཐབ་ནས། རྒྱལ་བོ་བཀྲོངས་བའི་པུར་ཟངས་ཀྱི་སྒམ་དུ་བཅུག་སྟེ། ལྕགས་གཟེར་བཏབ་ནས་ཉང་ཆུར་བསྐུར་ཚུལ་འདི། ཟངས་བཟོའི་ལག་རྩལ་སྔ་ཤོས་སུ་གྲུབ། དེའི་ཕྱིས་ཆོས་རྒྱལ་སྲོང་བཙན་གྱི་དུས་སུ་ལྷ་སའི་དམར་བོ་རིར། རྒྱལ་བོའི་ཤར་སྒོའི་ཕྱིར་འདོམ་དགུ་བརྒྱ་ཅན་གྱི་ཟབ་དོང་སྟེང་ཐམས་ཅད་ཟངས་མས་གཡོགས་པ་དང་། ད་དུང་ཁོང་གིས་བློན་པོ་རིམ་པ་བཞི་བ་ལ་ཟངས་ཀྱི་བྱང་བུའི་ཡི་གེ་བྱ་དགར་བསྩལ་བར་མ་ཟད། སྐུ་གཤེགས་ཁར་ཞལ་ཆེམས་བསྩལ་བ་ཟངས་ཀྱི་བྱང་བུའི་སྟེང་ཡི་གེ་བཀོད་དེ་བང་མཛོད་དུ་མནན་པ། ཕྱིས་རྒྱལ་བོ་ཁྲི་ལྡེ་གཙུག་བརྟན་གྱིས་གཟིགས་ནས། ནང་བསྟན་དར་སྤེལ་བཏང་བ་དང་། ཁྲི་སྲོང་ལྡེ་བཙུན་གྱི་དུས་སུ་བསམ་ཡས་གཙུག་ལག་ཁང་གི་གཉྫིར་གསེར་ལ་ཤེལ་གྱི་ཏོག་ཅན་བཙུགས་པ་དང་། ཁྲི་བཙུག་ལྡེ་བཙུན་རལ་བ་ཅན་གྱིས། ལྷ་ཁང་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙང་ཁང་དགུ གསེར་གྱི་གཉྫིརའི་གསེར་ལ་ཤེལ་གྱི་ཏོག་རྒྱབ་རི་དང་བཅས་པ་བཞེངས་པ་སོགས། ལོ་རྒྱུས་ཡིག་རྙིང་དག་ལས་འབྱུང་བར་དཔྱད་ན། ལོ་ངོ་ཆིག་སྟོང་སྔོན་ནས་བོད་ཀྱི་ཟངས་བཟོའི་ལག་རྩལ་ཁྱད་དུ་འཕགས་པ་ར་སྤྲོད་བྱེད་ཐུབ། རྗེ་ཙོང་ཁ་པའི་དུས་སུ་དགའ་ལྡན་སྒྲུབ་མཆོད་ཁང་དུ་ཟངས་གསེར་ལས་གྲུབ་པའི་གསང་འདུས་བློས་བསླངས། སྡེ་མཆོག་ལི་ཨུ་བའི་བློས་བསླངས། རྡོ་རྗེ་དབྱིངས་ཀྱི་བློས་བསླངས་སོགས་བཟོ་བཀོད་ཁྱད་དུ་འཕགས་པའི་དཀྱིལ་འཁོར་དང་། གཞན་ལྷ་སའི་ཇོ་ཁང་དང་། གཙང་བཀྲ་ཤིས་ལྷུན་པོ་སོགས་གཙོ་བོར་གྱུར་བའི་མདོ་དབུས་ཁམས་གསུམ་གྱི་གཙུག་ལག་ཁང་ཇི་སྙེད་ཅིག་གི་གསེར་གྱི་རྒྱ་ཕིབས་དང་། གཉྫིར་ཇི་སྙེད་ཅིག་གིས་སྐྱེ་བོ་ཀུན་གྱི་མིག་དབང་འཕྲོག་པ་ཐམས་ཅད་ཟངས་གསེར་ལས་གྲུབ་པའི་བཟོ་རྩལ་དང་། དུས་རབས་བཅུ་གཉིས་པ་དང་བཅུ་གསུམ་པའི་ནང་བོད་ཀྱི་ཟངས་བཟོའི་སྒྱུ་རྩལ་མཐོ་འདེགས་སུ་སོང་བ། མཚུར་ཕུ་དང་། གདན་ས་མཐིལ། འབྲི་གུང་། འབྲུག་ར་ལུང་། ཚལ་གུང་ཐང་བཅས་ཀྱི་དཀར་ཆག་ནང་བོད་རིགས་ཀྱི་ཟངས་བཟོ་མཁས་པ་འགའི་མཚན་བཀོད་ཡོད་པ་དང་། གསེར་གདུང་འཛམ་གླིང་རྒྱན་གཅིག་བཞེངས་སྐབས། བལ་བོད་གཉིས་ཆར་བསྡུས་པའི་ནང་། བོད་ཀྱི་ཟངས་བཟོ་བ་རིམ་པ་གཉིས་སུ་ཕྱེ་བའི་རིམ་པ་དང་བོ་སྟེ། ཟངས་མགར་དབུ་མཛད། ལྷོ་བ་ལྷས་ནང་བ་སོགས་མི་བཞི། རིམ་པ་གཉིས་པ་བྱིངས་གྲས་བྱང་བ་ཁྲི་ཚང་ངག་དབང་སོགས་མི་ཞེ་གཉིས་འཁོད་ཅིང་། ཟངས་བཟོའི་ལག་རྩལ་སྐོར་དེར་གསལ། ད་ལྟ་གསེར་ཟངས་ཀྱི་རྟེན་གསུམ་བཞེངས་པའི་ལག་རྩལ་རྩེར་སོན་ཏེ། ཁང་བརྩེགས་མང་བོའི་མཐོ་ཚད་དང་མཉམཔའི་སྐུ་འདྲ་དང་། མཆོད་རྟེན་ག་ས་གང་ན་མཐོང་རྒྱུ་ཡོད་པ་དག་གོ །དགོན་སྡེ་ཙམ་དུ་མ་ཟད་གྲོང་ཁྱིམ་དཀྱུས་མའི་ནང་དུའང་། ཟངས་གསེར་གྱི་སྐུ་དང་། མཆོད་རྫས། རྒྱན་ཆ། ཡོ་བྱད་སོགས་ཁྱབ་གདལ་དུ་སོང་ཡོད་དོ། །

 

ལྡེར་བཟོ།

བཟོ་རིག་སྒྱུ་རྩལ་ནི། གདོད་མ་ནས་ད་ལྟའི་བར་མི་རྣམས་ཀྱི་རྣམ་དཔྱོད་བཙོ་སྦྱངས་བྱས་པ་ལས་ནར་སོན་པའི་ཤེས་རིག་རིན་ཐང་བྲལ་བ་ཞིག་ཡིན། དེ་བས་དེ་ཉིད་ཀྱི་བྱེད་པོ་བཟོ་བོ་ནི། ཀུན་གྱིས་ཡིད་སྨོན་དང་བཀུར་སྟི་བྱ་ཡུལ་སྟེ། བསོད་ནམས་སྟོབས་ཀྱི་རྟོགས་པ་བརྗོད་པའི་མདོ་ལས། དེ་བས་ན་བཟོ་འབའ་ཞིག་མི་རྣམས་ཀྱིས་ཉམས་སུ་དབེན་པ་ཡིན་ཏེ། བཟོ་བོ་ནི་རིགས་དམའ་བར་སྐྱེས་སུ་ཟིན་ཀྱང་། རྒྱལ་བོ་རྣམས་དང་། བློན་པོ་རྣམས་དང་། བྲམ་ཟེ་དང་། ཁྱིམ་བདག་རྣམས་ཀྱིས་གདོན་མི་ཟ་བར་བཀུར་རོ། །ཞེས་པ་ལྟར། བཟོ་བོ་དང་དེའི་འདུ་བྱེད་ལས་ཐོན་པའི་སྒྱུ་རྩལ་ནི། མི་རྣམས་འཚོ་སྡོད་ཀྱི་རྟེན་གཞི་ཡིན། བོད་རྒྱལ་སྲོང་བཙན་གྱིས་ཀྱང་། བོད་འབངས་རྣམས་བཟོ་ལ་སོགས་པའི་རིག་གནས་ལ་སྐུལ་ཆེད། ཡོན་ཏན་ཅན་གོང་དུ་བཀུར་བ་དང་། ཁོང་གིས་ཀྱང་བཟོ་རིག་ལ་ལེགས་པར་བསླབས་ཏེ། ཕྱག་བསྟར་ནས་བཞེངས་པའི་བརྐོས་བཟོའི་དངོས་བོ་ཡོད་པར་ཉིད་ཀྱི་རྣམ་ཐར་ལས་བཤད་པ་དང་། ཉེ་ཆར་ལྷ་སའི་མཆོད་ཀོང་གནའ་ཤུལ་ལས། སྤྲེའུ་མགོ་ཞིག་ཐོན་པ། གནའ་རྫས་རིག་པ་སྨྲ་བའི་ཚན་རིག་གི་དཔྱད་འབྲས་ལ། འཇིམ་བཟོའི་ལག་རྩལ་དེ་ལོ་ངོ་སྟོང་བཞིའི་གོང་རོལ་ཏུ་བཟོས་པར་ངོས་འཛིན་པ་དང་། དེ་ནས་ལོ་རབས་མང་བོའི་རྗེས་ནས་བོད་རྒྱལ་ཐོག་མ་གཉའ་ཁྲིའི་སྔོན་དུ་བོན་ཆོས་དར་སྐབས། བོན་ཤེས་པ་ཅན་མི་བཅུ་གཉིས་ཀྱི་ནང་ཚན་ལྡིང་ཤེས་ཤྭ་བ་ཟེར་བས། འཇིམ་པ་ལ་མི་དང་སྲོག་ཆགས་སྣ་ཚོགས་བཟོ་ཤེས་ཚུལ་བཤད་པ་དང་། ནང་ཆོས་ཀྱི་དབང་དུ་བཏང་ན། སྟོན་པ་ཞལ་བཞུགས་པའི་སྐབས། སྦྱིན་བདག་གིས་གསོལ་ཚིགས་སུ་ཞུས་ཚེ། ཁོང་རེ་འགར་ཕེབས་ལོང་མེད་སྐབས། ཁྱིམ་བདག་མགོན་མེད་ཟས་སྦྱིན་གྱིས། གདུགས་ཚོད་སྐབས་གཟི་བརྗིད་མེད་པར་མཐོང་ནས། སྟོན་པར་ཞུས་ཏེ། སྟོན་པའི་སྐུ་བརྙན་ཞིག་བཞེངས་ནས། གྲལ་མགོ་བཞུགས་སུ་གསོལ་བ་སོགས་ལ་དཔེར་བླངས་ནས། སྲོང་བཙན་གྱི་སྐབས། ལྷ་ས་གཙུག་ལག་ཁང་གི་འཇིམ་སྐུ་ཕལ་ཆེ་བ་བལ་བོའི་ལྷ་བཟོས་བཞེངས་པ་དང་། དེ་དུས་ཀྱི་བཟོ་རྩལ་ནི་ཇོ་བོ་རྣམ་གཉིས་ལ་འདྲ་དཔེ་བླངས་ཡོད། བོད་རྒྱལ་ཁྲི་སྲོང་ལྡེ་བཙན་གྱི་དུས། བསམ་ཡས་གཙུག་ལག་ཁང་གི་འཇིམ་སྐུ་བཟོ་སྐབས། མཁན་ཆེན་བོ་དྷི་ས་ཏྭ་དང་། རྒྱའི་ལྷ་བཟོ། རྒྱལ་བོ་སོགས་སོ་སོའི་སྐུ་བརྙན་གྱི་འདྲ་དཔེ་གང་ལ་བྱ་བའི་བཀའ་བགྲོས་མཛད་པ་ལ། མཐར་རྒྱལ་བོའི་ཞལ་ཐོག་ཏུ་བཞག་སྟེ། བོད་ལུགས་ལྟར་བཞེངས་པ། སྦ་བཞེད་ལས། ལྷ་བཟོ་ན་རེ། ལྷ་རྒྱ་གར་དང་རྒྱའི་གཟུགས་གང་བགྱི་ཞེས་གསུངས། དེར་འཚོགས་ཏེ་གྲོས་བྱས་པས། མཁན་པོའི་ཞལ་ལས། སངས་རྒྱས་རྒྱ་གར་དུ་བྱོན་པ་ཡིན་པས། རྒྱ་གར་ལུགས་སུ་བགྱི་གསུངས། བཙན་པོའི་ཞལ་ལས། བོད་ཀྱི་ལུགས་སུ་བགྱིས་ན་བོད་ནག་པོ་ལ་ཞེན་པ་རྣམས་དད་པ་སྐྱོ་རེ་བ་ལགས་པས། ལྷ་བོད་ལུགས་བྱ་བར་ཅིས་ཀྱང་གནང་ཞེས། སློབ་དཔོན་ལ་ཞུས་པས། འོ་ན། བོད་འབངས་ཀུན་བསྡུས་ཤིག བོད་ཀྱི་ལུགས་བྱའོ་གསུངས་ནས། བོད་ཀྱི་ལུགས་སུ་བགྱིད་པའི་དཔེ་བོད་འབངས་ཀུན་འཚོགས་པ་ལས། ནང་ན་གཟུགས་བཟང་བ་ཁུ་སྟག་ཚས་ལ་དཔེ་བྱས་ཏེ། གཙོ་བོ་ལ་ཨ་རྱ་པཱ་ལོའི་ཁ་ས་པཱ་ཎི་བཞེངས། རྨ་ས་ཀོང་ལ་དཔེ་བྱས་ཏེ་ཨ་རྱ་པཱ་ལོའི་རྟ་མགྲིན་སྒོ་སྲུང་དུ་བྱས། ཐང་བཟང་སྟག་ལོད་ལ་དཔེ་བྱས་ཏེ་ཨ་རྱ་པཱ་ལོའི་སྤྲུལ་བ་ཡི་གེ་དྲུག་མ་གཡས་སུ་བྱས། ལྷ་མོའི་དཔེ། བུད་མེད་ལ་མཛེས་པ་ཅོག་རོ་བཟའ་ལྷ་བུ་སྨན་ལ་དཔེ་བྱས་ཏེ། སྒྲོལ་མ་གཡས་སུ་བྱས། ཅོག་རོ་བཟའ་ནུ་ཆུང་ལ་དཔེ་བྱས་ཏེ་ལྷ་མོ་འོད་ཟེར་ཅན་གཡོན་དུ་བྱས། ཞེས་གསུངས་པ་ལས། སྐབས་དེ་དུས་འཇིམ་བཟོ་བོད་ཀྱི་མིའི་རྣམ་པར་བཞེངས་པ་རྟོགས་ཐུབ།

ཁྲི་རལ་བ་ཅན་གྱི་དུས་སུ་འུ་ཤང་རྡོ་དཔེ་མེད་བཀྲ་ཤིས་དགེ་འཕེལ་གཙུག་ལག་ཁང་བཞེངས་ཏེ། དེའི་ས་ཕུད་ལྷ་སར་བྱམས་པ་ཆོས་འཁོར་གྱི་སྒོ་སྲུང་ཚངས་པ་དང་། བརྒྱ་བྱིན་བཞེངས་ཚུལ་སོགས་བཤད་པ་དང་།

དུས་རབས་བཅུ་བའི་མཇུག་ཏུ། དགེ་སློང་ཀླུ་མེས་འབྲོམ་ཆུང་། རྒྱ་ནག་གི་ཁྲང་ཨན་དུ་ཕེབས་ཏེ། ཐང་གི་གོང་མ་མིང་ཙུང་སྐབས་བྲིས་པའི་གནས་བརྟན་བཅུ་དྲུག་གི་པར་རིས་འདྲ་བཤུས་གནང་བ་ལ་དཔེ་བྱས་ཏེ། དེ་བཅུ་དྲུག་གི་འབུར་སྐུ། བྲག་ཡེར་བའི་གནས་བཅུ་ལྷ་ཁང་བཞེངས་པ་དང་།

དུས་རབས་བཅུ་གཅིག་པ་ནས། བཀའ་གདམས་པའི་ཆོས་ལུགས་འཕེལ་རྒྱས་བྱུང་ནས་བཟུང་། སྣར་ཐང། ས་སྐྱ། རྭ་སྒྲེང་། དྭགས་ལྷ་སྒམ་པོ། ཞ་ལུ། གསང་ཕུ་སོགས་ལ་འཇིམ་བཟོའི་ལྷ་སྐུ་བཞེངས་མཁན་ཕལ་མོ་ཆེ་ནི། བོད་རིགས་ཡིན།

དུས་རབས་བཅུ་བཞི་བ་ནས་འཇིམ་སྐུ་བཟོ་བའི་སྒྱུ་རྩལ་ཚད་མཐོན་པོར་གཤེགས་ཏེ། རྩེ་པོ་ཏ་ལའི་ཕོ་བྲང་དམར་བོ་ཁོ་ན་འང་སྐུ་བརྙན་སུམ་བརྒྱ་དང་བཅུ་བཞེངས་ཡོད་ཚུལ་འཁོད་པ་དང་།

སྡེ་སྲིད་སངས་རྒྱམ་གྱིས་མཆོད་སྡོང་འཛམ་གླིང་རྒྱན་གཅིག་བཞེངས་སྐབས། འཇིམ་བཟོ་ལ་རིམ་པ་གསུམ་དུ་བཀར་བས། རིམ་པ་དང་བོ་སྟེ། འཇིམ་བཟོའི་བུ་ཆེན་ཆོས་འཕེལ། རིམ་པ་གཉིས་པ་སྟེ། བུ་ཆུང་གི་གྲས་འཇམ་དབྱངས་སོགས་མི་བཞི། རིམ་པ་གསུམ་པ་སྟེ། བྱིངས་གྲས་བཙུན་ཆུང་སོགས་མི་སུམ་ཅུའི་མིང་ཐོ་བཀོད་ཡོད་དོ། །གཞན་ཡང་། མདོ་དབུས་ཁམས་གསུམ་དུ་ས་དགེ་ཀར་རྙིང་བོན་སོགས་ཀྱིས་འཇིམ་སྐུ་ཇི་སྙེད་ཅིག་བཞེངས་གྲུབ་གནང་བའི་ཚུལ། འདིར་བརྗོད་ཀྱིས་མི་ལང་བས། སོ་སོའི་ལོ་རྒྱུས་དང་དཀར་ཆག་ལས་ཤེས་པར་བྱའོ། །

འཇིམ་སྐུ་བཞེངས་ཚུལ་ས་འདམ་ཁོ་ན་ལས་བྱས་པ་མ་ཡིན་ཏེ། སྨན་སྣ་རྩ་ཆེན་གྱི་རིགས་དང་། རིན་ཆེན་བརྡུང་བའི་ཕྱེ་མ། བྱིན་རྟེན་རྩ་ཆེན་བསྲེས་པ་དང་། ས་ཁྱོར་བ་གང་རེ་ལའང་གང་བཞེངས་པའི་སྐུ་བརྙན་དེའི་གཟུངས་སྔགས་ཐེར་འབུམ་སོགས་ཀྱི་གྲངས་བཟླས་བགྱིས་ནས་གྲུབ་པ་སྟེ། སྐུ་འབུམ་འཇམ་དབྱངས་ཀུན་གཟིགས་ལྷ་ཁང་། ཆེ་ཤོས་ལྷ་བཟོ་བློ་བཟང་བཤེས་གཉེན་གྱིས་སྨན་འདམ་ལུག་མགོ་ཙམ་རེ་ལ་དགེ་འདུན་མང་བོས་ཨ་ར་པ་ཙ་འབུམ་ཕྲག་བཟླས་ཏེ་བཞེངས་པ་ལྟ་བུའོ། །

ཕན་ཡོན་ནི། གསལ་རྒྱལ་གྱིས་ཞུས་པའི་མདོ་ལས། སུ་དག་འདིར་ནི་རྒྱལ་བའི་གཟུགས་བྱེད་པ། །དེ་དག་གཟུགས་བཟང་འོད་དང་ལོངས་སྤྱོད་ལྡན། །དབང་བོ་གསལ་ཞིང་འོད་འབར་ཉི་མ་བཞིན། །འཇིག་རྟེན་དག་ན་མིག་ཏུ་སྡུག་པར་འགྱུར། །སུ་དག་བདེ་བར་གཤེགས་པའི་སྐུ་གཟུགས་བྱེད། །དེ་ཡི་ལུས་ནི་དྲི་མ་མེད་པ་དང་། །པདྨའི་སྙིང་བོ་ལྟ་བུར་འཇམ་ལ་ཡང་། །ནད་དང་མྱ་ངན་སྡུག་བསྔལ་འཇིགས་ལས་ཐར། །ཞེས་དང་། འཕགས་པ་ཀུན་དགའ་བ་ཆེན་པོའི་མདོ་ལས། གླིང་བཞི་ཐམས་ཅད་རྒྱུན་དུ་ཞུགས་པ་དང་དགྲ་བཅོམ་པས་གང་བ་ལ། ཇི་སྲིད་འཚོའི་བར་དུ་ཡོ་བྱད་ཐམས་ཅད་ཀྱིས་བསྙེན་བཀུར་བ་ལས། དེ་བཞིན་གཤེགས་པའི་སྐུ་གཟུགས་ཚོན་གང་བ་གཅིག་བྱེད་ན་བསོད་ནམས་འབུམ་འགྱུར་གྱིས་ཆེ་བར་གསུངས་པ་སོགས་མདོ་རྒྱུད་དུ་མ་ནས་མང་དུ་འབྱུང་ཡང་མ་སྤྲོས་སོ། །

ལི་བཟོ།

རིན་ཆེན་ལི་འདི་ལ་ནང་གསེས་ཀྱིས་དབྱེ་ན། རང་བྱུང་དང་བཅོས་མ་གཉིས་ཡོད། རིན་ཆེན་བརྟག་པ་ཞེས་པའི་བསྟན་བཅོས་ལས་གསུངས་པ་ལྟར་ན། རང་བྱུང་གི་ལི་ནི། རྒྱ་གར་དང་། སིང་ག་ལ། བལ་བོ། ལི་ཡུལ་བཅས་ནས་ཐོན་གྱི་ཡོད་པ་དང་། ཁྱད་པར་དུ་གྱུར་བ་ནི། རྒྱ་གར་ཤར་ལི་སྟེ། དེ་ནི་རྒྱ་གར་ལི་ཡུལ་གྱི་རི་ལ་ཐུབ་དབང་བཞིས་བྱིན་གྱིས་བརླབས་པའི་ལྷའི་གཏེར་རྡོ་བཞུས་པ་ལས་བྱུང་བས། བྱིན་རླབས་ཆེ་ཞིང་། མཆོག་ཏུ་གྱུར་བ་ཞིག་ཡིན། བཅོས་ལི་ནི། པནྟི་ཏ་རི་ཀའི་ཞལ་སྔ་ནས། བོད་ལི་ནི་སྟོད་ཀྱི་བཤས་དཀར་དང་། ཟངས་གཉིས་བསྲེས་སྦྱོར་གྱི་ལག་རྩལ་ལ་བརྟེན་ནས་བྱུང་བ་ལས་རང་བྱུང་གི་ལི་མེད་གསུངས་ལ། རིན་ཆེན་བརྟག་པ་ལས། བཅོས་མའི་ལི་ནི་ལྕགས་རིགས་ཀྱི་རིན་པོ་ཆེ་སྣ་དགུ་བསྲེས་ནས་བཟོས་པ་སྟེ། གསེར་དངུལ་ཟངས་ལྕགས། གཤའ་དཀར། ཏི་ཚ། ཟི་ལ། ཁྲོ། ཞ་ཉེ་བཅས་བསྲེས་ཡོད་ཅིང་། དེ་ལ་ཡང་ལྕགས་རིགས་སྣ་ཚོགས་ཆ་མཉམ་དུ་བསྲེས་པ་དང་། འགའ་ཞིག་གཙོ་བོ་དང་། འགའ་ཞིག་ཡན་ལག་གི་ཚུལ་དུ་བྱས་ནས་བསྲེས་པ་བཅས་རིགས་མི་འདྲ་བ་ཡོད། གཞན་ཡང་། མདོག་ལི་ཞེས་པ་ནི། ལི་དཀར། ལི་སྨུག ལི་དམར། ལི་ནག ལི་ཁྲ་བཅས་ལྔ་བོ་དེ་ནི། ལྕགས་རིགས་སྣ་དགུའི་ནང་ནས་གང་མང་བསྲེས་པ་དེ། མདོག་མི་འདྲ་བ་འབྱུང་བའི་ཆ་ནས་བཏགས་པ་ཡིན། སྐད་ལི་ནི། ལྕགས་རིགས་སྣ་དགུ་ལ་ཟི་ལ་མང་ཙམ་བསྲེས་ན། སྐད་སྙནའཁྲོལ་བས་ཆ་ནས་བཏགས་པའོ། །ལི་མ་ཛྷཻ་ཀྵིམ་ནི། ས་འོག་ནས་ཐོན་པའི་རང་བྱུང་ཟངས་ལ་གཤའ་དཀར་དང་དངུལ་མང་ཙམ་དང་། གསེར་སྤུས་ལེགས་ཉུང་ཙམ་བསྲེས་ནས་བཞུ་བླུགས་པ་ལ་ལི་མ་ཛྷཻ་ཀྵིམ་ཟེར་ལ། ཞིབ་པར་ཀརྨ་རང་བྱུང་རྡོ་རྗེས་མཛད་པའི་རིན་པོ་ཆེ་སྣ་ཚོགས་བརྟག་ཐབས་དང་། དེའུ་དམར་དགེ་བཤེས་ཀྱི་རིག་པ་བཟོ་ཡི་གནས་ལ་འདོད་རྒུར་བསྒྱུར་བ་འོད་ཀྱི་སྣང་བརྙན་ཞེས་པའི་ནང་། རིན་ཆེན་བརྟག་ཐབས་དང། ལག་ཤེས་བཟོ་ལས་རྫས་སྦྱོར་སྣ་ཚོགས་ཞིབ་ཏུ་གསུངས་ཡོད། རང་རེའི་གངས་ཅན་གྱི་ལྗོངས་འདིར། རྒྱ་གར་ནག་དང་། བལ་བོ། ཁ་ཆེ། བོད་ལི་སོགས་འབྱམས་ཀླས་པ་ཞིག་བཞུགས་པ། འདིར་རེ་འགའ་བརྗོད་ན། ལི་སྐུའི་ཐོག་མ་བཟོ་རྒྱལ་བི་ཤྭ་ཀརྨས་བཞེངས་པའི་སྟོན་པ་དགུང་ལོ་བརྒྱད་དང་བཅུ་གཉིས་ཀྱི་རྣམ་པ། ཇོ་བོ་ཤཱཀྱ་མུ་ནེ་དང་། མི་བསྐྱོད་རྡོ་རྗེ་ད་ལྟ་རང་ཅག་གི་བསོད་ནམས་ཀྱི་ཞིང་དུ་བཞུགས་པ་དེ་ཡང་། སྐུའི་རྒྱུ་གཙོ་བོ་ལི་དང་གསེར་དམར་ལ་རིན་པོ་ཆེ་སྣ་ཚོགས་བསྲེས་པ་ལས་གྲུབ་པས། ལི་སྐུའི་གྲས་སུ་གཏོགས་ཚུལ་ལོ་རྒྱུས་ཕལ་མོ་ཆེར་འབྱུང་བ་དེ་དང་། འཕགས་ཡུལ་དུ་མུ་སྟེགས་པའི་བསྟན་པ་བསྣུབས་པས། སྐུ་གསུང་ཐུགས་རྟེན་མང་བོ་ལི་ཡུལ་དང་སིང་ག་ལ། རྒྱ་ནག་སོགས་སུ་དྲངས་པ་དང་། དེ་ནས་དུས་ཀྱི་དབང་གིས་རྒྱ་ནག་སོགས་ལས་བསྟན་པ་བསྣུབས་པས། འགྲོ་མགོན་འཕགས་པ་དང་། ཀརྨ་སྐུ་ཕྲེང་རིམ་བྱོན་སོགས་གོང་མའི་དབུ་བླར་བཞུགས་པས། གོང་མས་ཕུལ་བའི་རྟེན་རྣམས་བོད་དུ་གདན་དྲངས་པ་དང་། ཡང་། ཇོ་བོ་རྗེ་བོད་དུ་ཕེབས་སྐབས། ཆོས་རྒྱལ་མྱ་ངན་མེད་ཀྱི་སྐུ་དུས་ཀྱི་ཤར་ལི་དང་ནུབ་ལི་ལས་བཞེངས་པའི་པད་སྤུངས་དང་རྣམ་རྒྱལ་མཆོད་རྟེན་གདན་དྲངས་པ། བཀའ་གདམས་མཆོད་རྟེན་ཞེས་གྲགས་པ་སོགས་རྟེན་ཇི་སྙེད་ཅིག་དང་། ཕོ་བྲངཔོ་ཏཱ་ལའི་ལི་མ་ལྷ་ཁང་དུའང་ལི་སྣ་ཚོགས་ལས་བཞེངས་པའི་ལྷ་སྐུ་བརྒྱད་བརྒྱ་ཙམ་བཞུགས་ལ། དེའི་ནང་རྒྱ་དཀར་ནག་གི་ཤར་ལི། ནུབ་ལི། ཁ་ཆེའི་ལི་མ། བལ་བོའི་ལི་མ། ལི་ཡུལ་ནས་ཐོན་པའི་ལི་མ་སོགས་ཡོད།

གཞན་ཡང་། ད་ལྟ་བཀའ་གདམས་ལི་རྙིང་ཞེས་པ་ཡང་། དེ་སྔོན་བཀའ་གདམས་པའི་བསྟན་པ་ས་ཁྱབ་རྡོ་ཁྱབ་ཏུ་སོང་བའི་ཚེ། དབུས་གཙང་གཉིས་སུ་དགོན་སྡེ་མང་བོ་བྱུང་སྐབས། བལ་བོད་ཀྱི་བཟོ་བོས། ལི་དཀར་དམར་དང་། ལི་ཁྲ་སོགས་ཀྱིས་སྐུ་བརྙན་སོགས་རིགས་མང་དུ་བཟོས་པ་དེ་ཡིན་ལ། ད་ལྟ་ཡང་རེ་གཉིས་འབྱུང་བ་དེའོ། །ད་ནི་སྐབས་སུ་བབ་པ་བོད་ཀྱི་ལི་བཟོའི་སྐོར་བརྗོད་ན། རྒྱ་བོད་ནོར་རྫས་བརྟག་ཐབས་ལས། ལྷ་ཐོ་ཐོ་རི་གཉན་བཙན་གོང་ནས་ཁྲོ་ལི་ནག་པོའི་གཤང་དང་དྲིལ་བུ་བྱུང་ཚུལ་བཤད་པ་དང་། ཆོས་འབྱུང་མཁས་དགའ་ལས། སྲོང་བཙན་གྱིས་ཁྲ་འབྲུག་ལྷ་ཁང་དུ་གསང་འདུས་ལྷ་བཅུ་དགུ་བཞེངས་པའི་འཁོར་སེམས་དཔའ་རྣམས་ལི་ལས་བླུགས་པར་བཤད་པ་དང་། ཁྲི་སྲོང་ལྡེ་བཙུན་གྱི་དུས་སུ་དགེ་རྒྱས་གཙུག་ལག་ཁང་དུ་སྐུ་ཐམས་ཅད་བླུགས་མ་བྱས་པར་འཁོད་པ་དང་། མངའ་བདག་ཁྲི་རལ་གྱི་དུས་སུ་འུ་ཤིང་རྡོ་དཔེ་མེད་བཀྲ་ཤིས་དགེ་འཕེལ་གཙུག་ལག་ཁང་གི་སྐུ་རྟེན་ཐམས་ཅད་བླུགས་མ་དང་། ལྷ་སའི་བྱམས་པ་ཆོས་འཁོར་གྱི་སྒོར་ཅོང་དྲིལ་ཆེན་པོ་ཕུལ་བ་དང་།

ལྷག་པར་བོད་ཁ་བ་ཅན་འདིར་ཆོས་ལི་སྔ་ཕྱི་བར་གསུམ་བྱུང་ཞེས་ལོ་རྒྱུས་རྣམས་སུ་བཤད་དེ། སྲོང་བཙན་གྱི་སྐུ་དུས་སུ་གསེར་དམར་རམ་རིན་ཆེན་ཛྷཻ་ཀྵིམ་དང་ལི་དཀར་དམར་བྱས་པ་སོགས་ལས་སྐུ་བརྙན་ཅོང་དྲིལ་སོགས་ཀྱི་ལུགས་བཟོ་བྱས་པ་གུང་དཀར་སྟོད་སྨད་ཀྱི་ལུགས་གཉིས་སུ་གྲགས་པ་ཆོས་ལི་བར་མ། ཁྲི་རལ་གྱི་སྐབས་ལི་དཀར་དམར་དང་ཟངས་ཐང་མ་སོགས་ཀྱིས་བཞེངས་པ་ཆོས་ལི་ཕྱི་མ་ཞེས་གྲགས་སོ། །བོད་འདིར་ལི་མའི་སྐུ་འདྲ་ཆེས་ཆེ་བར་གྲགས་པ་འཕན་པོ་ནཱ་ལེནྡྲའི་ཚོགས་ཆེན་གྱི་དྲི་གཙང་ཁང་དུ་ཐུབ་པ་གངས་ཅན་འཚོའི་ཐོག་བརྩེགས་གཉིས་ཀྱི་སྐུ་ཚད་ཅན་བཞུགས་པ་དགོན་དེའི་དཀར་ཆག་ན་གསལ་བ་དང་། གཙང་བཀྲ་ཤིས་ལྷུན་པའི་འདུ་ཁང་སྟེང་གི་ལི་མ་ལྷ་ཁང་ཁོ་ན་དང་། རྗེ་ཙོང་ཁ་བའི་ཚད་ཀྱི་ལི་མ་གཙོས་ལི་གསར་རྙིང་གི་ལྷ་སྐུ་ཆིག་སྟོང་བརྒལ་བ་བཞུགས་པར་གསུངས་པ་སོགས་ལ་གཞིགས་ན། བོད་གངས་ཅན་འདིར་ལི་བཟོའི་ལག་རྩལ་རྒྱ་ཆེར་འཕེལ་བ་རྟོགས་ནུས་སོ། །གཞན་ཡང་། རང་ཅག་ཁ་བ་ཅན་འདིར་ཤིང་ལས་དང་པ་ཏྲ། ར་གན་དང་ལྕགས་སོགས་མགར་བཟོའི་ལག་རྩལ་ཧ་ཅང་དར་ཁྱབ་སོང་ཡོད་དོ། །

རྡོ་བརྐོས་རིག་གནས།

 ༡ རྡོ་བརྐོས་རིག་གནས་ཀྱི་བྱུང་རིམ། སྤྱིར་སྣོད་བཅུད་ཀྱི་ཁམས་འདིར་མི་རིགས་གང་ཡིན་ཡང་། ས་སྒང་འདིར་ལ་དབང་བསྒྱུར་བའི་བརྒྱུད་རིམ་ཁྲོད། ཡི་གེ་མ་དར་བའི་གོང་རོལ་ནས་བརྡ་འཕྲིན་གཏོང་བ་འམ། མི་བརྗེད་པའི་རྟགས་སུ་ཤིང་རྡོ་ལ་རི་མོ་བརྐོ་བའམ། མཛེས་ཆེད་དུ་རྡོ་དང་རུས་པ་སོགས་ཀྱིས་རྒྱན་ཆ་བཟོས་པ་ནི། མི་རིགས་འཕེལ་རྒྱས་ཀྱི་ཆོས་ཉིད་ཡིན་པ་ལྟར། རང་ཅག་བོད་ལ་མཚོན་ན་ཡང་ལ་དྭགས་ཀྱི་བྲག་བརྐོས་རི་མོ་མང་བོ་ཞིག་གིས། ལོ་ངོ་སྟོང་ཕྲག་མང་བོའི་སྔོན་ནས་རྡོ་བརྐོས་ལ་བྱང་ཆུབ་ཡོད་པ་བདེན་དབང་བྱས་ཡོད། དེ་དག་ནི་རི་དྭགས་རྔོན་པ་དང་། ཞིང་རྨོ་བ། གླུ་ལེན་གར་རྩེ། རྭ་རྒོད་ཀྱི་གཟུགས་དང་། མིའི་ལག་ན་ཤིང་རྡོ་ཐོགས་པ་འམ། རྟར་ཞོན་པ། ཆོས་ལུགས་ཀྱི་བྱེད་སྒོ་སྤེལ་བ་སོགས་མདོར་བསྡུས་ན། མི་དང་སྐྱེ་དངོས། ཡི་གེའི་བརྡ་རྟགས་ཉི་ཟླ་སྐར་གསུམ་གྱི་བགྲོད་ལུགས་མཚོན་པ་སོགས་བྲིས་པ་འདི་དག་ནི་ད་ལྟའི་རྡོ་བརྐོས་རི་མོ་ཇི་སྙེད་ཀྱི་ས་བོན་ལྟ་བུ་ཡིན་ལ། གཞན་ཡང་། རྨ་འབྲི་རྫ་གསུམ་གྱི་ཆུ་བོའི་བརྒྱུད་དང་། ཆབ་མདོ་ཁ་རུབ་སོགས་ནས་ལོ་རབས་ཁྲི་ཕྲག་མང་བོའི་སྔོན་གྱི་རྡོ་ཆས་གསར་རྙིང་གི་ཡོ་བྱད་མང་བོ་ལྷང་ལ་འབུད་རྒྱུ་ཡོད་པ་འདིས། རང་རེའི་མེས་པོའི་རྡོ་བཟོ་ཕྱག་རྩལ་ལ་ལོ་རྒྱུས་རིང་ཞིང་ཁྱད་མཚར་ལྡན་པ་བདེན་དཔང་བྱེད་ཐུབ་པར་མ་ཟད། བོད་ནི་རྡོ་བརྐོས་ཤེས་རིག་གི་ཕ་ས་ལྟ་བུ་ཡིན་པ་རྟོགས་ཐུབ་ལ། དཔེར་ན། མཚོ་སྔོན་ཐེམ་ཆེན་རྫོང་ཐེམ་ཕུང་ཤང་གི་ཁོངས་སུ་གཏོགས་པའི་ཀླུ་མང་བྲག་བརྐོས་རི་མོ་སྟེ། རྡོ་ཕ་བོང་ཆེན་པོ་ཞིག་གི་སྟེང་དུ་རི་དྭགས་འབྲོང་དང་། ཤྭ སྟག རྔ་མོང་སོགས་ཀྱི་རི་མོ་བརྐོས་ཡོད་པ་དེ་ཡང་ལོ་རྒྱུས་སྨྲ་བ་དག་གིས་ལོ་བཞི་སྟོང་ལྷག་གི་ལོ་རྒྱུས་ཡོད་པར་བཤད་པ་དང་།

སྤྱི་ལོ་སྔོན་གྱི ༡༢༦ སྐབས་སུ། བོད་རང་གི་རྡོ་བརྩིགས་སྒྱུ་རྩལ་ལ་བརྟེན་ནས་ཕོ་བྲང་ཡུམ་བུ་བླ་སྒང་བཞེངས་གྲུབ་བྱུང་བར་མ་ཟད། ཕོ་བྲང་གི་ཉེ་འདབས་སུ། རྡོ་ཕ་བོང་དང་བྲག་ངོས་ལ། རྒྱལ་བོ་གཉའ་བར་བཏེགས་ནས་ཁྲིར་གསོལ་བའི་རི་མོ་ཡོད་པ་དང་། ཞང་ཞུང་རྒྱལ་བོའི་རྡོ་བརྐོས་མངའ་རིས་གུ་གེའི་བརྒྱུད་དུ་ཡོད་པར་གྲགས་པ་དང་། གྲི་གུམ་བཙན་པོའི་སྐབས། སྐུ་མཁར་ཕྱིང་བ་སྟག་རྩེ་སོགས་ཀྱི་ལྡེབས་རིས་ལ་གྲུང་ཤ་དོད་ཅིང་གསོན་ཉམས་ལྡན་པའི་རི་མོ་ཡོད་པའི་བཤད་རྒྱུན་ཡོད་པ་དང་། དེ་མིན་བོད་བཙན་པོའི་སྐབས་སུ། སྲོང་བཙན་གྱིས་བཞེངས་བཟོར་གྲགས་པ་རྒྱལ་མོ་ཚ་བ་རོང་གི་ཁྲོ་སྐྱབས་ཐུགས་རྗེ་ཆེན་པོའི་ནང་རྫོང་རྡོ་སྐུ་དང་། ཐོན་མིས་རྒྱལ་བོ་ལ་ཕུལ་བའི་ཡིག་ཕུད། ཞལ་རས་གསལ་ལ་ངང་མདངས་གང་བ་བཟང་། །སོགས་ཇེན་ཁོག་སྣ་རྡོའི་ལྷ་ཁང་གི་བྲག་ལ་བསྐོས་པ་རྒྱལ་རབས་གསལ་མེར་འབྱུང་བ་དང་། ཁྲི་བཙུན་གྱིས་ལྷ་སའི་གཙུག་ལག་ཁང་བཞེངས་སྐབས། ཀོང་ཇོས་སྤོར་ཐང་བརྩིས་པའི་ནང་གསལ་བ་ལྟར། ས་བཅོས་ལ། ཤར་དུ་དབང་ཕྱུག་གི་རྟེན། ལྷོར་བྱ་ཁྱུང་། ནུབ་ཏུ་མཆོད་རྟེན། བྱང་དུ་སེང་གེ ཤར་ལྷོར་དུང་བཅས་རྡོ་ལ་བརྐོས་ཏེ་རྩིག་ལྡེབས་སྦྱར་བ་ད་ལྟ་འང་ཡོད་པ་དེ་དང། གཞན་ཕ་བོང་ཁར་སྲོང་བཙན་ཡབ་ཡུམ་གསུམ་གྱིས་སྒྲུབ་པ་མཛད་སྐབས། རིགས་གསུམ་མགོན་པོ་ཞལ་གཟིགས་ནས་རྡོ་ལ་ཐིམ་པ་རང་བྱོན་བལ་བོའི་ལྷ་བཟོས་ཇི་བཞིན་བརྐོས་པ་དཔྱིད་ཀྱི་རྒྱལ་མོའི་གླུ་དབྱངས་ལས་འཁོད་པ་དང་། སྒོ་འཕྱོར་འོག་ཏུ་མ་ཎི་འབུར་ཐོན་ཞིག་བསྐོས་ཡོད་པ་དེ་འང་ཐོན་མིའི་ཕྱག་རྩལ་ཡིན་པར་བཤད་པ་དང་། ཡང་། སྲོང་བཙན་གྱི་བཙུན་མོ་རུ་ཡོང་བཟས་བྲག་ལྷ་ཀླུ་སྒུག་གི་རང་བྱོན་རྣམས་གསལ་བར་བརྐོས་པ། བྲག་ཕྱེ་བྲེ་རེ་ཕད་བར་ཚ་རེ་སྦྱིན་ནས་བྲག་ལ་སྐོར་ཁང་བརྐོས་པ་དང་། སྐོར་ལམ་དུ་ཐུབ་དབང་གི་སྐུ་བརྙན་སོགས་བརྐོས་པ་དང་། ཁྲ་འབྲུག་ལྷ་ཁང་བཞེངས་སྐབས་རྟེན་གཙོ་རང་བྱོན་གསུམ། ཟོ་དང་གོང་བོ་རི་ནས་སྤྱན་དྲངས་པར། སླར་བཟོ་བོས་རྣམ་པར་དོད་པར་བརྐོས་ཞེས་ཆོས་འབྱུང་མཁས་དགའ་ལས་གསུངས་པ་དང་།

ཕྱིས་སུ་ཆོས་རྒྱལ་ཁྲི་སྲོང་ལྡེ་བཙན་གྱིས། བོད་རང་གི་རྡོ་བརྐོས་ཀྱི་རྨང་གཞིའི་སྟེང་། བལ་བོའི་རྡོ་བཟོའི་སར་སློབ་སྦྱོང་བྱེད་བཅུག་ནས་ཕུན་སུམ་ཇེ་ཚོགས་སུ་བཏང་སྟེ། རྐོ་བཟོ་མཁས་པ་ཨུབ་ས་ཉག་བྲེད་ཤབ་དང་། ཤོད་ལེགས་ཀོང་སོགས་གྲགས་ཆེན་མང་དུ་བྱོན་པ་དང་། ལྷ་སའི་ལྷོ་ཁའི་སངས་རྒྱས་དགོན་ཞེས་པའི་བཙུན་དགོན་ཞིག་ཡོད་པ་དེའི་འགྲམ་བྱེ་མའི་ཁྲོད་དུ་བཙུགས་པ་ལོ་རྒྱུས་ཀྱི་ཡིག་རིས་སྣ་ཚོགས་བརྐོས་པ། ཕྱིས་ཆག་སྐྱོན་ཤོར་ནས་དུམ་བུ་གཉིས་སུ་སོང་བ། ད་ལྟ་ནོར་གླིང་དུ་ཉར་ཚགས་བྱས་པ་དང་། ཡང་། ཁྲི་སྲོང་གི་དུས་སུ་བཙུགས་པའི་བློན་སྟག་སྒྲ་ཀླུ་གོང་ལ་གནང་བའི་བཀའ་གཙིགས་ཀྱི་ཡི་གེ རྡོ་རིང་གི་ནུབ་ཏུ་ཡིག་ཕྲེང་དྲུག་ཅུ། ཤར་དུ་ཡིག་ཕྲེང་བཅུ་དྲུག ལྷོར་ཡིག་ཕྲེང་དོན་བཞི་བརྐོས་ཡོད་པ་དང་། ཡང་། ཁྲི་སྲོང་ལྡེ་བཙུན་གྱིས་གྲྭ་ནང་ཟུང་མཁར་དུ། ཟུང་མཁར་རྡོའི་མཆོད་རྟེན་ཞེས་བྲག་རྡོར་མཆོད་རྟེན་ལྔ་བརྐོས་པ་དང་། པད་འབྱུང་རྣམ་ཐར་ཡིད་ཆེས་སུམ་ལྡན་སོགས་སུ། ཁོང་མཁར་ནག་ཏུ་བྱོན་སྐབས། མཚོ་དེར་ཀླུ་གདུག་པ་ཅན་ཞིག་ཡོད་པ་དམ་ལ་བཏགས། བྲག་ལྡེབས་སུ་རྡོ་རྗེ་སེམས་དཔའི་སྐུ་དང་ཤྭ་བ་བརྐོས་ཞེས་འབྱུང་ཡང་། རིག་གསར་སྐབས་སུ་གཏོར་བཤིག་ཐེབས་པས། ད་ལྟ་རང་ཅག་གི་མིག་གི་སྤྱོད་ཡུལ་དུ་མི་སྣང་།

གཞན་སྔོན་གྱི་ལོ་རྒྱུས་རྣམས་སུ། ཀོང་པོ་དེ་མོའི་བྲག་བརྐོས་ཡི་གེ་ཞེས་པ་ནི། བཙན་པོ་ཁྲི་ལྡེ་སྲོང་བཙན་གྱི་དུས་གདུང་རུས་གཅིག་པའི་ཀོང་རྗེ་དཀར་པོ་ལ་དམིགས་བསལ་གྱི་བཀའ་གཙིགས་གནང་བ་དེ་བོད་ལྗོངས་ཀོང་པོ་དེ་མོས་ཁུལ་དུ་བྲག་ངོས་སུ་ཕལ་ཆེར་སྤྱི་ལོར ༧༩༨ལོ་ནས་སྤྱི་ལོ ༨༡༥ མགོའི་བར་ལ་བརྐོས་པ་འདྲ་ཞིང་ཡིག་འཕྲེང ༢༡ མཆིས་པ་དང་། ཡང་ལྡན་མ་བྲག་དེང་སྐབས་ཆབ་མདོ་བྲག་གཡབ་རྫོང་བྱམས་མདུན་ཤང་གི་ཁོངས་གཏོགས་རི་མདའ་ཞེས་པ་དེར། རྟེན་གཙོ་སངས་རྒྱས་རྣམ་སྣང་ལ། ཉེ་སྲས་བརྒྱད་ཀྱིས་བསྐོར་བ། གཤམ་དུ་གཞི་བདག་ལྷ་མི་དཀར་བོའི་སྣང་བརྙན་སོགས་བརྐོས་ཡོད་པ་དང་། དེ་ལྟར་དུས་རབས་བདུན་པར་རྡོ་བརྐོས་ཀྱི་ཡིག་གཟུགས་དང་། སྐུ་བརྙན། བྲག་ཕུག་འབྲུ་བ་སོགས་ལ་གཞིགས་ན་རྡོ་བཟོ་ལག་རྩལ་དུས་རིམ་ངེས་ཅན་ཞིག་ཏུ་སླེབས་ཡོད་པ་གསལ། ལྡན་མ་རྡོ་བརྐོས་འདི་ལོ་རྒྱུས་མང་བོར་རྒྱ་བཟའ་ཀོང་ཇོས་བཞེངས་པར་བཤད་པ་དང་། བྲག་ངོས་རང་ན་བཙན་པོ་ཁྲི་ལྡེ་སྲོང་བཙན་གྱི་སྐབས་སུ་དགེ་སློང་ཡེ་ཤེས་དབྱངས་སོགས་ཀྱིས་བཞེངས་པའི་རྒྱུ་མཚན་འཁོད་ཡོད། གཞན་ས་དེར་ཀློང་རོང་དུ་ཐུགས་རྗེ་ཆེན་པོ་བཅུ་གཅིག་ཞལ། རྣམ་སྣང་སོགས་ཀྱི་རྡོ་སྐུ་དང་། གཞན་ཡང་། ཡུལ་ཤུལ་ཁུལ་ཐོག་དང་ཐག་མི་རིང་བའི་སར་འབིས་རྣམ་པར་སྣང་མཛད་ཀྱི་རྡོ་བརྐོས། འབིས་ཁོག་གི་བྱང་རྒྱབ་ན་ཡོད་པའི་ལེབ་ཁོག་གི་བྲག་བརྐོས་རི་མོ་སོགས་ཀྱང་ཡེ་ཤེས་དབྱངས་ཀྱིས་བཞེངས་པར་བཞེད་པ་དང་། ཨ་རིག་ཐུ་བྷོད་བྲག་བརྐོས་རི་མོ་ཞེས་པ་འདི་ཡང་། ད་ལྟ་ཆིན་ལེན་རྫོང་མཁར་དམར་ནས་ཀན་སུའུ་ཀྲང་ཡས་ལ་འགྲོ་སའི་ལམ་དུ་ཡོད་ལ། རྒྱའི་གྲྭ་བ་ཞིག་གིས་ལྷ་ཁང་སུམ་ཐོག་ཞིག་བཞེངས་ནས་བདག་གཉེར་བྱེད་བཞིན་ཡོད། བྲག་བརྐོས་རི་མོ་འདིའི་གཤམ་དུ། ༄ ། །བཙན་པོའི་སྐུ་ཡོན་དང་། །སེམས་ཅན་གྱི་དོན་གྱི་ཕྱིར། །དགེ་སློང་པ་གོར་ཡེ་ཤེས་དབྱངས་ཀྱིས་བགྱིས། །ཞེས་འཁོད་ཡོད་དོ། །

གཞན་སྤུ་ཧྲེང་རྫོང་གི་ཁོངས་ཞི་སྡེ་ལྕོག་བྱ་བ་དེ་ཐུགས་རྗེ་ཆེན་པོ་ཀེར་བཞེངས་ཤིག་བརྐོས་ཡོད་ལ། དེའི་ཕྱོགས་གཉིས་སུ་ཡི་གེ་ཕབ་ཡོད་པ་འདི་ལྟར། སེང་གེ་ཞང་ཆེན་ཕོ་འབྲོ་ཁྲི་བརྩན་སྒྲ། མགོན་པོ་རྒྱལ་གྱིས། ཞེས་གསལ་ཞིང་། ལོ་རྒྱུས་སྨྲ་བ་དག་གིས་འདི། ཁྲི་སྲོང་ལྡེ་བཙན་དང་། ཁྲི་རལ། འོད་སྲུངས་ཀྱི་རྒྱུད་པས་བཙུགས་པས་བཤད་སྲོལ་དུ་མ་ཡོད་ཀྱང་། ཕལ་ཆེར་བཙད་པོ་ཁྲི་ལྡེ་སྲོང་བཙན་གྱི་དུས་ཡིན་པར་བཞེད་པ་མང་ངོ་། །གཞན་ཏུའུ་ལན་རྫོང་ཆུ་ཁོལ་ཤང་གི་གློའུ་སུན་ལུང་བ་རུ་ཡོད་པའི་ཀེར་ལངས་སྐུ་གསུམ་དང་། པད་བཞུགས་སྐུ་གསུམ། རྟ་དང་། གཟུངས་སྔགས་ཀྱི་ཡིག་འབྲུ་རེ་གཉིས་བཅས་ཡོད་པ། བཙན་པོ་གང་ཡིན་དུས་ཀྱི་གསལ་ཁ་མ་ཆོད་མོད་སྐུ་ཉམས་དང་བཞེངས་ས་གཡང་ས་ལ་གཞིགས་ན་ཁྲི་ལྡེ་སྲོང་བཙན་སྐབས་ཡིན་ནམ་ཞེས་མཁས་པ་དག་བཞེད་དོ། །

ཡང་། མངའ་བདག་ཁྲི་རལ་གྱི་དུས་སུ། ལྷ་སའི་གཙུག་ལག་ཁང་གི་མདུན་དང་རྒྱ་བོད་ཀྱི་ས་མཚམས་རྨེ་རུ། ཁྲང་ཨན་དུ་བཙུགས་པའི་རྒྱ་བོད་ཤན་སྦྱར་གྱི་རྡོ་རིང་སོགས་ལ་གཞིགས་ན། སྐབས་དེར་རྡོ་བརྐོས་ཡིག་རིས་འདི་སྲིད་ཕྱོགས་སུ་དར་ཁྱབ་ཆེ་བ་རྟོགས་ཐུབ། དུས་རབས་བཅུ་གཅིག་པའི་ནང་འབྲོམ་སྟོན་གྱིས། རྭ་སྒྲེང་དགོན་པར་ཕྱག་བསྟར་མའི་མ་ཎི་རྡོ་བརྐོས་གནང་བ། ད་ལྟ་འང་མཇལ་རྒྱུ་ཡོད་པ་དང་། ཡང་སྟོད་ལུང་བདེ་ཆེན་རྫོང་དང་ཆུ་ཤུར་རྫོང་གཉིས་ཀྱི་ས་མཚམས་སུ་མཉེས་ཐང་ལྷ་ཆེན་པོ་ཞེས། སྟོན་པ་ཤཱཀྱ་ཐུབ་པའི་རྡོ་བརྐོས་སྐུ་བརྙན་ཐོག་ཚད་གསུམ་བཞུགས་ལ། དེ་སུས་བཞེངས་དང་དུས་ཚིགས་ཀྱི་ཐད་གསལ་ཁ་ཆེར་མ་བྱུང་ཡང་། ངག་རྒྱུན་ལ། དུས་རབས་བཅུ་གཅིག་པའི་ནང་། ཇོ་བོ་མཉེས་ཐང་དུ་བཞུགས་སྐབས། སྐྱིད་ཆུ་བྲུབ་ནས་ལམ་བཀག་པར་བརྟེན། ཆུའི་ཁ་གནོན་དུ་བཞེངས་པར་བཤད་པ་དང་། ལ་ལས། གཙང་བ་སྡེ་སྲིད་སྐབས་ཤུན་པ་སྡེ་བའི་སྐྱིད་ཆུའི་ཁ་མནོན་དུ་བཞེངས་པ་དང་། འགའ་ཞིག་ས་དེར་མི་གསོད་ཁྲག་སྦྱོར་རྒྱུན་པར་བྱུང་བས། དེ་བཟློག་ཐབས་སུ་འདུ་ཁོངས་སྤྱི་ནས་བཞེངས་ཟེར་སྲོལ་ཡོད་པ་དང་།

དུས་རབས་བཅོ་ལྔ་བའི་ནང་། དགའ་ལྡན་དགོན་དུ་རྗེ་ཙོང་ཁ་བའི་ཕྱག་བསྟར་མའི་སྤྱན་རས་གཟིགས་ཕྱག་བཞི་བ་འབུར་གཟུགས་ཞིག་དང་། མཁས་གྲུབ་རྗེའི་སྐུ་བརྙན་དང་། མཁས་གྲུབ་རྗེའི་ཕྱག་བསྟར་མའི་རྗེ་ཙོང་ཁ་བའི་སྐུ་བརྙན་ཡོད་པ་དང་། རྒྱལ་བ་སྐུ་ཕྲེང་དང་བོ་དགེ་འདུན་གྲུབ་པས་རྡོ་བརྐོས་གནང་བ་རྣམ་ཐར་དུ་གསལ་ལ། ད་ལྟ་བཀྲ་ཤིས་ལྷུན་པོའི་རྡོ་གཅལ་ཆེན་མོའི་ཁྱམས་བསྐོར་གྱི་གྱང་ལྡེབས་སུ་སངས་རྒྱས་སྟོང་སྐུའི་རྡོ་བརྐོས་ཡོད་པ་སོགས་ཡིན་ནོ། །

ཡང་། འབྲས་སྤུངས་ཀྱི་འཇམ་དབྱངས་རྡོ་སྐུ་དང་། དུས་རབས་བཅུ་དྲུག་པའི་ནང་རྗེ་བཙུན་ཆོས་རྒྱན་སེ་རའི་མཁན་ཁྲིར་བཞུགས་སྐབས་གཙང་བ་རྡོ་བརྐོས﹙མིང་མི་གསལ﹚ཀྱིས་རྗེ་ཙོང་ཁ་བ་དང་། དམ་ཅན་ཆོས་རྒྱལ་སོགས་ཀྱི་སྐུ་དང་ཡི་གེ་མང་བོ་བརྐོས་པ་དང་།

དུས་རབས་བཅུ་བདུན་པའི་སྐབས། ལྷ་སའི་ཕྱོགས་བཞིར་རིགས་གསུམ་ལྷ་ཁང་ཁག་ཏུ་རྡོ་བརྐོས་ཀྱི་སློབ་དཔོན་དང་། མི་གཡོ་བ། ཐུབ་དབང་སོགས་གསར་བརྐོས་མཛད་པའི་གྲས་ཤིག ད་ལྟ་པོ་ཏ་ལའི་ཤར་ངོས་ཁ་ལྔ་གདོང་དུ་ཡོད་པ་དང་། ལྷ་སའི་ནུབ་ངོས་གདོང་དཀར་གྱི་བྲག་ལྡེབས་སུ་རྡོ་བརྐོས་ཤིག་ཡོད་པའང་དེ་དུས་ཀྱི་ཡིན་པར་བཤད།

ཡང་། ལྷ་སའི་ལྕགས་པོ་རིའི་ནུབ་ངོས་བྲག་ལྡེབས་སུ། རྒྱལ་དབང་བདུན་པས་བཀའ་ཤག་གསར་འཛུགས་གནང་སྐབས། བཀའ་བློན་རྡོ་རིང་པནྟི་ཏས་ཡོན་སྦྱར་ནས་བརྐོས་པར་གྲགས་པའི་མི་འཁྲུགས་པའི་སྐུ་དང་། སྐུ་དེའི་གཡོན་ངོས་སུ། གངས་རི་ར་བས་བསྐོར་བའི་ཞིང་ཁམས་འདིར། །ཕན་དང་བདེ་བ་ལུས་འབྱུང་བའི་གནས། །སྤྱན་རས་གཟིགས་དབང་བསྐལ་བཟང་རྒྱ་མཚོ་ཡི། །ཞབས་པད་སྲིད་མཐའི་བར་དུ་བརྟན་གྱུར་ཅིག། ཅེས་བརྐོས་ཡོད་པ་དང་། ལྷ་སའི་གྲོང་མི་འདས་གྲོངས་སུ་སོང་བའི་སྐྱེས་རྟགས་བཞེངས་མི་ཐུབ་མཁན་ཡིན་ན། དེ་གར་སྐུ་དཀར་སྒྲོན་ན་འཐུས་ཚུལ་གྱིས་སྲོལ་དང་། ཕྱིས་སུ་རྡོ་བརྐོས་དེ་དག་ལ་ཚོན་རྩི་བྱུགས་སྐབས་ཚོན་གསོས་བྱེད་ཀྱི་ཡོད།

སྤྱིར་མ་ཎི་སོགས་གཟུངས་སྔགས་དང་ཐར་མདོ་སོགས་གསུང་རབ་མང་བོ་རྡོ་ལ་བརྐོས་པ་དང་། སྒོས་སུ་ཁམས་དང་ནག་ཆུ། མགོ་ལོག་སོགས་བོད་ཀྱི་ས་ཆ་ཕལ་མོ་ཆེར། མི་རྣམས་ཚེ་ལས་འདས་ཚེ་མ་ཎི་དང་ཡིག་བརྒྱ། འབུམ་སོགས་ལྒིགས་བམ་ཇི་སྙེད་པ་རྡོ་ལ་བརྐོས་ཏེ། རྡོ་འབུམ་སྤུངས་སྲོལ་འདུག་པས། ད་ལྟའི་རྡོ་འབུམ་རྩིག་སྲོལ་ཀྱང་འདི་ལས་བྱུང་བར་མངོན། གཞན་ཡང་། བཀའ་བསྟན་དང་བརྒྱད་སྟོང་བ་སོགས་ཀྱི་ཆོས་དཔེ་རྡོ་བརྐོས་བྱེད་པ་རྣམས་ཀོང་ཀོང་བྱེད་ཅིང་། དེ་མིན་མ་ཎི་ལྟ་བུའི་ཡིག་འབྲུ་ཉུང་ཤས་རྣམས་འབུར་བརྐོས་བྱེད་ལ། རྒྱལ་བ་རིགས་ལྔའི་ཁ་དོག་དང་མཚུངས་པའི་ཚོན་རྩི་གཏོང་བ་དང་། ཡང་ཁྱིམ་ཚང་འགའ་རེ་བུ་ཕྲུག་གི་མིང་དང་སྐྱེས་པའི་དུས་ཚོད་རྡོ་ལ་བརྐོས་ཏེ་ཁང་ཐོག་ཏུ་འཇོག་པའང་ཡོད་པར་བཤད། གང་ལྟར། བོད་རིགས་གར་ཁྱབ་ཏུ་རྡོ་བརྐོས་གསུང་རྟེན་གྱི་རྡོ་འབུམ་རྩིག་སྲོལ་དང་། ལྷ་སྐུ་མཆོད་རྟེན་སྣ་ཚོགས་ས་ཁྱབ་རྡོ་ཁྱབ་ཏུ་གྱུར་ལ། ལྷག་པར་དུ་མདོ་སྨད་རེབ་གོང་གཏེར་སྟོན་ཆོས་སྒར་སོགས་ན་བཀའ་བསྟན་གྲངས་མང་གི་རྡོ་རྩིག་དང་། གསུང་རབ་ཇི་སྙེད་པའི་རྡོ་བརྐོས་རི་བོའི་གཏོས་དང་མཉམ་པ་ད་ལྟ་བདག་ཅག་གི་མཐོང་སྣང་དུ་ཡོད་པ་དང་། དེ་མིན། སྲོག་ཆགས་སྣ་ཚོགས་དང་། ལྷ་སྐུ། དུས་ཀྱི་འཕོ་འགྱུར་དང་བསྟུན་ཏེ་འཚོ་བའི་ཡོ་བྱད་སོགས་རྡོ་བརྐོས་བཞེངས་བསྐྲུན་གསོན་ཉམས་ལྡན་པ་སྣང་བ་ནི། གཅིག་ན་བོད་རིག་པའི་མཛེས་རྒྱན་དང་། གཉིས་ན་རྡོ་བརྐོས་སྒྱུ་རྩལ་གྱི་ཁྱད་ཆོས་ལགས་པས། དགའ་འོས་པའི་དོན་བཟང་ཞིག་ཡིན། ཡང་སྒོས་སུ་གཏེར་སྟོན་ཆོས་སྒར་སོགས་ན་རྡོ་བརྐོས་སློབ་གྲྭ་བཙུགས་ཡོད་པ་ནི། རྡོ་བརྐོས་ཀྱི་ཕ་ས་འདི་ནས་ཕུན་སུམ་ཚོགས་པའི་རིག་གནས་འདི་འཛམ་གླིང་གི་སྤྱི་ནོར་དུ་འགྱུར་བའི་དན་རྟགས་ཤིག་ཀྱང་ཡིན་ནོ། །

༢ རྡོ་རིས་བརྐོ་སྟངས། རྡོ་རིས་བརྐོ་སྟངས་ལ་ཝ་མ་ཞེས་པ་ཡིག་འབྲུ་ཀོང་ཀོང་དུ་བརྐོ་བ་དང་། འབུར་མ་ཞེས་པ་སྟེང་འོག་གི་གཡས་གཡོན་བྲུས་ཏེ་བརྐོ་བ་དང་། ཝ་འབུར་ཁ་སྤྲོད་ཅེས་རྒྱབ་མདུན་དང་དཀྱིལ་ནས་བྲུས་ཏེ་ཡི་གེ་གཉིས་གཤིབ་བརྐོ་སྲོལ་ཡོད། སྐུ་འདྲ་མཚོན་ནའང་། བལ་བོའི་བཟོ་རྒྱུན་དང་འབྲེལ་བའི་བོད་བཟོ་ནི་མགྲིན་པ་ཅུང་རིང་ལ། དཔུང་ཞེང་ཆེ་བ་ཕྱག་ཞབས་རིང་བ་སོགས་དང་། རྒྱ་བཟོ་དང་འབྲེལ་བ་རྣམས་ནི་ཞལ་དཀྱིལ་སྒོར་བ། སྐུ་སྐེད་ཅུང་སྦོམ་ཤས་ཆེ། རྡོ་རྐོའི་ལག་ཆ་ནི། གཟོང་ཁ་ལེབ་དང་། ཁ་རིལ་ཐོ་བ་སོགས་བརྐོ་གཞི་དང་བསྟུན་ཏེ། ལག་ཆ་ཆེ་ཆུང་ཚགས་སུ་ཆུད་པ་དགོས། ལྷ་སྐུ་དང་ཡིག་གཟུགས་སྣ་ཚོགས་གང་བརྐོ་སྐབས། ཐོག་མར་ཐིག་བཏབ་ནས་གཟུགས་དབྱིབས་ལེགས་པོར་བྲིས་རྗེས། གཟོང་གིས་བརྐོ་དགོས་ཤིང་། འབྱར་མ་བརྐོ་ཚེ་བར་སྟོང་ནས་རིམ་བཞིན་བརྐོ་བ་དང་། མི་གཟུགས་ལྟ་བུ་ལ་ཤངས་མཐོ་བ་དང་གདོང་། རྣ་འབྱོག་རིམ་བཞིན་དམའ་བར་འབྲུ་དགོས་ཤིང་། འབུར་མ་བརྐོ་བ་ནི་དཀའ་ཚེགས་ཆེ། རྡོ་རིང་དང་གསུང་རབ་གྱི་ཡིག་གཟུགས་ཕལ་ཆེར་ཝ་མའི་ལུགས་སུ་བརྐོས་ཡོད་ལ། དེ་ནི་སྐུ་འདྲ་དང་ཡིག་གཟུགས་ཡིན་ཡང་རི་མོ་འབྲི་བ་ལས། བར་སྟོང་འབྲུ་མི་དགོས་པས་འབུར་མ་ལས། ལས་སླ་བོར་ཡོད་ལ། ཝ་མ་ལ་གཟོང་ཁ་རིལ་དང་། འབུར་མ་ལ་ཁ་ལེབ་སྤྱོད་པ་ཡིན་ནོ། །

རྡོ་བཟོ།

བོད་ཀྱི་རྡོ་བཟོའི་ལག་རྩལ་གྱི་ཐད་ལ་དུས་ཡུན་རིང་བོའི་ལོ་རྒྱུས་ལྡན་ཞིང་། ཆེས་འབུར་དུ་ཐོན་པའི་ཁྱད་ཆོས་ཐོན་པ་ནི། སྤྱི་ལོ་སྔོན་གྱི ༡༢༦ ལོར་བོད་རྒྱལ་གཉའ་ཁྲི་བཙན་པོའི་ཕོ་བྲང། རྡོ་རྩིག་གིས་བཞེངས་པ་ཡུམ་བུ་བླ་སྒང་ཡིན། ཕྱིས་སུ་ཆོས་རྒྱལ་སྲོང་བཙན་གྱི་རིང་ལ། དམར་བོ་རིར་ཁྱད་མཚར་ལྡན་པའི་རྩེ་པོ་ཏ་ལ་རྡོ་རྩིག་གིས་བཞེངས་ཤིང་། ཐོག་སོ་དགུའི་ཚད་དང་མཉམ་པ། ད་ལྟ་ཡང་། ཀུན་གྱི་སྤྱན་སྔར་གྲོང་ངེར་འགྱིང་པ་དེ་ཡིན། ཁྲི་སྲོང་ལྡེ་བཙན་གྱིས་བསམ་ཡས་གཙུག་ལག་ཁང་གི་ཐོག་སོ་འོག་མ་བོད་ལུགས་ཀྱི་རྡོ་རྩིག་ཡིན། གཞན་ཡང་། མི་ལའི་སྲས་མཁར། ས་སྐྱའི་ལྷ་ཁང་ཆེན་མོ། ཞ་ལུ་ལྷ་ཁང་། དཔལ་འཁོར་ཆོས་སྡེ་ལྷ་ཁང་། རྡོ་རྩིག་མཆོད་རྟེན་ངོ་མཚར་ཅན་སོགས་ལ་གཞིགས་ན། བོད་ཀྱི་རྡོ་བཟོའི་ལག་རྩལ་ག་འདྲ་ཞིག་ལ་སོན་པ་ར་སྤྲོད་བྱེད་ཐུབ་ལ། ཁྱད་པར་དུ་རྒྱལ་དབང་ལྔ་བའི་སྐབས་པོ་ཏ་ལའི་ཕོ་བྲང་དཀར་བོ་དང་། དམར་བོ་བཞེངས་སྐབས། བོད་ཁམས་ཡོངས་ནས་རྡོ་བཟོ་མཁས་པ་བསྡུས་པའི་ནང། རིམ་པ་བཞིར་བཀར་ཡོད་ལ། དེ་དག་གི་སྐྱེས་ཡུལ་དང་མིང་། ལས་འགན་བཅས་ཞིབ་གསལ་བཀོད་ཡོད། རིམ་པ་དང་བོ་དབུ་ཆེན་རྒྱུ་སྨོན་དར་རྒྱས་ཏེ། འོས་འགན་ནི། ཤིང་བཟོ་ཆེན་མོ་དང་མཉམ་འབྲེལ་གྱིས་ཁང་བའི་ལས་འཆར་དང་། ས་ཁྲ་བཟོ་བ། རྡོ་བཟོ་བ་རྣམས་ལ་སྤྱི་ཁྱབ་བཀོད་འདོམས། ཐིག་ཚད་འཛིན་པ་དང་། བཅག་གདོང་སོགས་གལ་ཆེའི་སོགས་རང་ཉིད་ཀྱིས་ལག་བསྟར་ནས་རྩིག་རྒྱུ་བཅས་ཡིན། རིམ་པ་གཉིས་པ་དབུ་ཆུང་དོལ་རྣམ་ལི་སོགས་མི་བདུན་དང་། འོས་འགན་ནི། དབུ་ཆེན་ལ་རོགས་རམ་དང་། མགོ་ནས་མཇུག་བར་རྩིག་པ་བརྩིག་རྒྱུ། རིམ་པ་གསུམ་པ་ནི། བྱིངས་གྲས་ཏེ་ཟ་དམ་དགོས་འདོད་སོགས་མི་གྲངས་བརྒྱ་དང་ཞེ་ལྔ། འོས་འགན་ནི། རྩིག་ལས་གལ་ཆུང་གི་རིགས་བཟོ་བ་དང་། རྩིག་རྡོ་འོས་པའི་རྡོ་ཆེན་སྣ་ཚོགས་བཟོ་བ། རྡོ་རིང་དང་། རྡོ་བརྐོས་ལ་དགོས་པའི་རྡོ་ཆེན་བཟོ་རྒྱུ། རྡོ་བརྐོས་རི་མོ་སྣ་ཚོགས་བརྐོ་རྒྱུ་བཅས་སོ། །རིམ་པ་བཞི་བ་དཀྱུས་མའི་གྲས་ནི། གུ་རུ་སྐྱབས་སོགས་མི་གྲངས་ཉིས་བརྒྱ་ཉེར་གཅིག་དང་། འོས་འགན་ནི། རྡོ་ཆེན་གཤགས་ལས་དང་། རྩིག་བར་གྱི་ཅབ་ལྷེ་བཟོ་རྒྱུ། རྩིག་བར་སྒྱོང་བྱེད་རྡོ་ཧྲག་ཆེ་ཆུང་སྣ་ཚོགས་བཟོ་རྒྱུ། རྡོ་གཡམ་བཟོ་དབྱིབས་འདོན་རྒྱུ་སོགས་ཞིབ་གསལ་དང་། བརྒྱུད་རིམ་ལྡན་པར་འཁོད་པ་འདིས། བོད་ཀྱི་རྡོ་བཟོའི་སྒྱུ་རྩལ་དང་། སྣང་བརྙན། ད་ལྟ་ཡང་དྲན་ངོས་སུ་ལྷམ་མེར་བཀྲ་ལ། ཕྱིས་སུ་ནང་བསྟན་གྱི་རྩིག་ཁང་ཕལ་ཆེར་དང་། ཁམས་ཕྱོགས་སོགས་ན་དུད་ཁྱིམ་ཇི་སྙེད་ཅིག་དང་། ད་དུང་རྒྱལ་རོང་སོགས་ན་གཡུལ་འཐབ་ཀྱི་བཙན་རྫོང་དུ་སྤེའུ་མཁར་གནམ་ལ་ཟུག་པ་ལྟ་བུའི་རྡོ་མཁར་གྱི་ཤུལ་བཞག་འདི་དག་ལས། བོད་ཀྱི་རྡོ་བཟོའི་ལག་རྩལ་ཞིབ་ཚགས་ལྡན་ཞིང་མཐོར་འདེགས་ཇི་ལྟར་བྱུང་བ་བདེན་དཔང་བྱས་ཡོད་དོ། །

ཀོ་བཟོ།

སྒང་བ་བོད་འདིར་གདོད་མའི་སྤྱི་ཚོགས་ནང་། རི་དྭགས་རྔོན་ཏེ་འཚོ་བ་རོལ་བའམ། འབྲོག་ལས་ཀྱི་ཐོན་སྐྱེད་གཉེར་བའི་གོ་རིམ་ཁྲོད། རི་དྭགས་དང་སྒོ་ཟོག གཅན་གཟན་སྣ་ཚོགས་ཀྱི་ཀོ་བ་མཉེད་འདུལ་བྱས་ནས། གོས། ཞྭ། ལྷམ། ལྟོ་ཕུད། ཕོར་བ། སྡེར་མ། འབྲེང་བ། སྒམ། ཁྲབ། ཀོ་གྲུ། ཐབ་ཀའི་ཁ་ཤར། ལྒིགས་ཐག འཕྲེང་ཐག མི་དང་སྲོག་ཆགས་གཞན་གྱི་འདྲ་གཟུགས་མང་བོ་བཟོ་ཤེས་པ་དང་། ཁྱད་པར་དུ་དུས་རབས་དང་བོ་ཡས་མས་སུ་ཀོ་བཟོས་ཕོར་བ་དང་། སྡེར་མ། གོ་ཁྲབ་བཅས་བཟོ་ཤེས་པ་བྱུང་བ་དང་། དུས་རབས་བརྒྱད་པའི་དཀྱིལ་དུ། ཆོས་རྒྱལ་ཁྲི་སྲོང་གི་བལྟ་ཀློག་བྱེད་སའི་ཕྱག་དཔེའི་གྲས་སུ་ཡུམ་རྒྱས་འབྲིང་བསྡུས་གསུམ་དང་། གལ་ཆེའི་སྨན་གཞུང་འགའ་ཞིག་ཤ་བའི་པགས་བཟོས་ཀྱི་སྒམ་ལ་བཞུགས་པའི་དབང་གིས། མིང་ལ་ཡུམ་ཤ་སྒྲོ་མ་དང། རྒྱལ་བོའི་བླ་ཡིག་ཤ་སྒྲོ་ཅན་ཞེས་འབོད་པ་བཀའ་འགྱུར་དཀར་ཆག་སོགས་སུ་བཀོད་ཡོད། ཡང་། གནའ་དུས་ཀྱི་གོ་ཆ་འདི་ཡང་། ཀོ་བ་མཐུག་པོའི་བཟོས་པ་དེ་ལྟར་གྲགས་པ་དང་། གཞན་ཀོ་བས་ཀོ་གྲུ་བཟོས་ཏེ་ཆུར་གཏོང་སྲོལ་འདི་ཡང་། རྒྱ་བཟའ་བོད་དུ་བསུ་སྐབས་དམངས་གཞས་ཤིག་ཏུ། ཆུ་མོ་རྒྱ་ཆུ་རོང་ལ་ཞེད་དགོས་མེད། །ཀོ་བ་ནག་ཆུང་བརྒྱ་ཡི་བསུ་མ་ཡོད། །ཅེས་གཞས་གཏོང་སྲོལ་ཡོད་པ་ལས། སྲོང་བཙན་གྱི་སྔོན་དུ་ཀོ་བཟོ་ཡོད་པ་ཤེས་རྟོགས་བྱུང་ཐུབ། དུས་རབས་བཅུ་གཅིག་པའི་ནང་བུ་མོ་སྣང་ས་འོད་འབུམ་མྱང་ཆུར་ཀོ་གྲུ་བཏང་ནས་བྲོས་པའི་ཤོད་རྒྱུན་ཡོད་པ་དང་། ཁྱད་པར་དུ་མཆོད་གདུང་འཛམ་གླིང་རྒྱན་གཅིག་ལས། ཀོ་བ་བཞི་ཆ་མཉམ་བགོས་མཇུག་ཏུ་སྦྲེལ་བའི་སྟེང་དུ་སྤང་ལེབ་རྣམས་བཞག་ཐོག ཀ་ཆེན་དང་། རྡོ་ཆེན། ཀ་རིང་དང་། རྡོ་རིང་བཅས་བསྙལ་ནས་བཞག་པས་ཆུ་ཐོག་གི་སྐྱེལ་འདྲེན་ལ་སྟབས་བདེའི་ཁྱད་ཆོས་མང་བོ་ཡོད་པར་བཟོས་ཐོག པོ་ཏ་ལའི་ཕོ་བྲང་དམར་བོ་བཞེངས་སྐབས་ཆུ་ཐོག་སྐྱེལ་འདྲེན་གྱི་གཙོ་བོ་ཀོ་གྲུ་ཡིན་པ་དང་། དེས་ཉིན་ལམ་གཅིག་གི་སར་འགྲུལ་བསྐྱོད་བྱེད་ཐུབ་པར་བརྟེན། ལྷོ་ཁ་ནས་རྒྱུ་ཆ་འབོར་ཆེན་དྲངས་པ་རེད།

ཀོ་གྲུ་བཟོ་སྟངས་ལ། ཕྱིས་སུ་ཚགས་ཇེ་ཞིབ་ཏུ་བཏང་བ་འདིར་བཀོད་ན། གཡག་གི་ཀོ་བ་གཉིས་སམ་བཞི་གང་རུང་རྒྱུན་བུས་ཚེམ་བཟོ་བྱས་པའི་ནང་། ཤིང་གི་ཀོ་སྒྲོམ་ཁ་ཤིང་དང་བཅས་བཟོས་པའི་སྲུབས་ཀར་སྣུམ་ཞག་བསྐུས་ཏེ་ནང་དུ་ཆུ་མི་ཡོང་བར་བྱས་ཡོད། ཐག་རིང་སྐྱེལ་འདྲེན་ལ་ཀོ་གྲུ་བེད་སྤྱད་བྱས་ཏེ། རྟ་ལམ་གཉིས་ཉིན་གཅིག་ལ་བགྲོད་ཐུབ་པའི་མགྱོགས་ཁྱད་ཡོད། གཡག་ཀོ་བཞི་སྒྲིག་བྱས་པའི་ཀོ་གྲུ་ལ་སྐྱ་བ་གཉིས་དང་། ཉིས་སྒྲིག་ལ་སྐྱ་བ་གཅིག་གིས་འཐུས་པར་བྱས་ཡོད། ཀོ་གྲུ་གཏོང་མཁན་ལ་གཉན་པ་འམ་མཉན་དཔོན་ཡང་ཟེར། ཀོ་གྲུ་གཏོང་སྐབས་མཉན་པས་གཞས་གདངས་རིང་མོ་སྐྱོ་གླུ་འདྲ་བ་ཞིག་གཏོང་རྒྱུ་ཡོད་པ་དང་། མཉན་པས་ཀོ་གྲུ་སྒལ་བར་ཁུར་ནས་འགྲོ་སྐབས། བཟའ་ཆས་འགེལ་བའི་ལུག་གཅིག་ཡོད་པར་ལྟོ་ཕུད་གཉིས་བཀལ་ནས་མགྲིན་པར་དྲིལ་བུ་དང་ཐག་པས་བཏགས་ཐོག ཐག་སྣེ་མཉན་པའི་སྐེད་པ་འམ་ཀོ་བར་བཏགས་ཏེ་འཁྲིད་འགྲོ་བ་དེ་ལ་ཀོ་ལུག་ཟེར།

ཡང་། ཀོ་རྡར་བཟོ་ཐབས་ཞིག་ལ། དེའུ་དམར་གྱི་བཟོ་རིག་ལས་ཚོགས་པྲ་ཕབ་ལས། ལ་ཆའི་ཕྱེ་མ་ཆ་གསུམ་ལ། ཀོ་རཉྫཱའི་ཕྱེ་མ་ཆ་གཅིག་བསྲེས་ནས། གླ་ཧེལ་ནང་དུ་ལྷོད་པར་བཏུམས་ནས། ཆུ་ཚ་མོའི་ནང་དུ་བཙོ། ཞུ་ཚེ་ཕྱི་ནས་འདྲེས་པར་མཉེལ་ལ་བཟོ་ལྟ་བཅོས། དེ་གྲང་ནས་ཆུ་གྲང་གིས་བྲན་ཅིང་བརྡར་གང་དགོས་བརྡར་རོ་གསུངས་སོ། །

གཞན་ཡང་། ཀོ་བཟེ་བཟོ་ཐབས་ལ། ཀོ་བཟེས་སྒམ་དང་ཕུབ། གའུ་དང་ཕོར་ཤུབས་སོགས་བཟོ་ཚུལ། བཟོ་གནས་སྐྲ་རྩེའི་ཐིགས་པ་ལས་ཞིབ་པར་བཤད་ཡོད་ལ། དེ་ལས་གཞན། འབྲེང་བ། རྒྱུན་བུ། ཀོ་ལྷམ། རྐེད་འཆིང་། སྒྲོ་བ། ཀོ་ཟེའུ། ཀོ་བའི་འོ་མ་དཀྲུགས་སྣོད། ཀོ་ཁུག རྐྱལ་བ། ཀོ་ཚགས། ཀོ་སྒྲོགས། ལྕག་ཚན། ཀོ་དམ། ཀོ་གདན། ཀོ་རྡར། ཀོ་སྡེར། ཀོ་གཞོང་། ཀོ་འཕྱར། ཀོ་འབོ་སོགས་བོད་ཀྱི་ཀོ་བཟོའི་ལག་རྩལ་སྐོར་ཚན་རིག་དང་མཐུན་པའི་བེད་སྤྱོད་བཏང་བ་དེས། བོད་དམངས་ཚོགས་ཀྱིས། ཀོ་བཟོས་སྒྱུ་རྩལ་མཐོར་འདེགས་བཏང་བ་མཚོན་ཐུབ་ལ། ལྷག་པར་དུ་ཀོ་གྲུ་ལ་བརྟེན་ནས་ངལ་རྩོལ་བདེ་བླག་ཏུ་འགྲུབ་པའི་ཁེ་ཕན་འབུར་དུ་ཐོན་སྟབས། དམངས་ཁྲོད་དུ་ད་ལྟ་ཡང་རྗེས་དྲན་གྱི་ཚུལ་དུ་ཀོ་རྩེད་གནང་སྲོལ་དང་ཀོ་གྲུ་གཏོང་གླུ་ཡོད་ལ། འདིར་ཀོ་གྲུ་གཏོང་གླུ་འགའ་ཞིག་དྲངས་ན། སྟོད་ཡུལ་བདེ་ཆེན་རྫོང་གི་གླུ་ནི། ཀོ་བ་འཕྲེད་ལ་བཏང་བས། །ཆུ་མོའི་གཞུང་ལ་འཁྱེར་སོང་། །ཀོ་བ་ཁོ་རང་ལས་འཕྲོ། །ཆུ་མོའི་གཞུང་ལ་ཡོད་འགྲོ། །ང་ཚོ་ཆོས་གྲོགས་ལྷན་རྒྱས། །ཀོ་བ་གང་གི་འགྲུལ་བ། །ཀོ་སྟོད་འགྱུར་བ་མ་གཏོང། །ཀོ་སྨད་ལས་ཀྱིས་འཁོར་ཡོང་། །ཞེས་དང་། སྣ་དཀར་རྩེ་རྫོང་གི་ཀོ་གྲུ་གཏོང་གླུ་ནི། ཆུ་མོའི་གཞུང་ལ་འགྲོ་དུས། །ཆུ་བརྒྱུད་རྒྱལ་བོས་མཁྱེན་ནོ། །རང་མགོ་རང་གིས་ཐོན་དུས། །ཆུ་བརྒྱུད་རྒྱལ་བོ་གསོལ་ཆོག། ཀོ་བ་བྱ་ལས་མགྱོགས་པ། །མཉན་དཔོན་ལྷ་ལས་མཚར་བ། །དེ་འདྲའི་མཉན་དཔོན་མཚན་ལ། །བྱ་མགྱོགས་ལྷ་མཛེས་ཞུས་ཆོག །ཆུ་མོ་རབ་ཆེན་རབ་ཆུང་། །ག་བར་བརྒལ་བརྒལ་བཞག་ནས། །སྨན་ཆུང་ཀོ་བའི་ནང་ལ། །གྲུ་རྫོངས་སྐྱོན་པ་མ་གནང་། །ཆུ་མོའི་འཁྲིས་ལ་བཞེངས་པའི། །ཕོ་བྲང་ནོར་རྒྱས་ཁང་གསར། །ཆུ་མོས་ཤང་ཤང་མ་ཟེར། །ནོར་རྒྱས་ཁང་གསར་དྲན་བྱུང་། །ཆུ་མོ་རྒྱང་མཁར་ཆུ་མོ། །འཕར་ཆག་དེ་འདྲས་ཆེ་བ། །དབྱར་ཁ་མཛོ་ཕོས་མི་འཐུང་། །དགུན་ཁ་ཇ་ཆུ་མི་ཉན། །ཀོ་བ་ཆུ་མོའི་དཀྱིལ་ལ། །ཡོང་གི་བསམ་པ་མ་གཏོགས། །ཀོ་བའི་ནང་གི་ཡིད་འཕྲོག། ཡོད་འགྲོ་བསམ་པ་མ་བྱུང་། །ཞེས་དང་། ཆུ་ཤུར་རྫོང་གི་གླུ་ནི། ཀོ་བ་ནམ་ཕྱེད་གཏོང་རྒྱུ། །སྡེ་བ་གཞུང་གི་བཀའ་རེད། །འོད་གསལ་མཆི་མ་མ་གཏོང་། །ཀོ་གྲུ་བཏང་ནས་སླེབས་ཡོང་། །གྲུ་དེ་ལྷ་མཐོང་ཤན་ཁར། །གྲུ་རྫོངས་བསྐྱོན་པ་མ་གནང་། །གྲུ་གླ་ང་རས་སྤྲད་ཆོག། སྡུག་སྲོག་བསྐྱལ་སྙིང་འདོད་ཡོང་། །ཞེས་དང་། གཞན་མཚོ་སྨད་དང་གོང་དཀར། སྣེ་གདོང་རིན་སྤུངས་རྫོང་སོགས་སུ་ཡང་ཀོ་གྲུ་གཏོང་གླུ་ཡོད་ཀྱང་འདིར་ཡི་གེ་མང་དུ་འཇིགས་ནས་མ་བཀོད་དོ། །

དེ་ནི་གཙོ་ཆེར་ཡར་ཀླུང་གཙང་བོའི་འགྲམ་བརྒྱུད་དང་། ལྷོ་ཁ་སོགས་གྲུ་ཁའི་ས་ཁུལ་དུ་དར་ཁྱབ་ཆེ་ཞིང་། ནང་དགོས་སུ་ལྷོ་ཁ་ས་ཁུལ་གོང་དཀར་རྫོང་ནུས་པ་གྲོང་ཚོའི་ཀོ་རྩེད་ནི་སྐད་གྲགས་ཆེ་ཤོས་ཡིན་ནོ། །

ཤིང་བཟོ།

བོད་ཀྱི་ཤིང་བཟོའི་ལག་རྩལ་ནི། འཛམ་གླིང་མཐོ་སྒང་འདིར་སྤྲེའུ་སྲིན་ལས་མཆེད་པའི་འགྲོ་བ་མི་བྱུང་བ་ནས། ཁད་ཀྱིས་བློ་རིག་ཅུང་ཟད་འཕེལ་རྒྱས་བྱུང་སྟེ། རང་ལུས་སྲུང་བྱེད་ཙམ་དུ་ཤིང་གི་ལྕུག་མའི་བླ་གབ་བཟོས་པ་ནས་བྱུང་པར་འདོད་ལ། སྤྱི་ལོ་སྔོན་གྱི་ལོ་ཉིས་བརྒྱའི་སྔོན་ནས་བོད་རྒྱལ་གཉའ་ཁྲི་བཙན་པོས་ཕོ་བྲང་ཡུམ་བུ་བླ་མཁར་བཞེངས་པ་དང་། རྒྱལ་རབས་དགུ་བ་པུ་དེ་གུང་རྒྱལ་གྱི་དུས་སུ། བློན་རུ་ལས་སྐྱེས་ཀྱི་མཛངས་ལས་ལ། ཤིང་ལ་མིག་ཕུག་གཤོལ་དང་གཉའ་ཤིང་བྱས། །བརྒལ་བས་མི་ཐར་ཆུ་ལ་ཟམ་པ་བཙུགས། །གསུངས་པ་དང་། ཡང་། མཛངས་བློན་ལྔ་བ་ཁྲི་བཟང་ཡང་སྟོན་གྱིས། རི་ཁྱིམ་ཀླུང་དུ་སྤོས་ཏེ། མཛངས་ལས་བྱས་པ་ནས་བོད་ཀྱི་སྡོད་ཁང་བརྩིགས་ནས་ཤིང་བཟོའི་ལག་རྩལ་དམངས་ཁྲོད་དུ་དར་ཁྱབ་བྱུང་བ་དང་། ཁྱད་པར་དུ། གཡུང་དྲུང་ལས་རྣམ་པར་དག་པའི་རྒྱུད་ཅེས་པའི་དཔེ་ཆ་དེའི་ལེའུ་བཅུ་བའི་ནང་། སྐྱ་བོའི་སྡོད་ཁང་འཛུགས་སྐྲུན་གྱི་ཇུས་བཀོད་དང་། གཤེན་གྱི་ཕོ་བྲང་བཞེངས་བསྐྲུན་སྐོར་ཞིབ་རྒྱས་གསུངས་ཡོད་པར་མ་ཟད། མདའ་འཕངས་ནས་འཛུགས་བསྐྲུན་ཕྱོགས་ཆའི་གཞི་ཁྱོན་ཐག་གཅོད་པ་དང་། མདའ་ལྷུང་སའི་རྩ་བའི་ཁ་ཕྱོགས་བཞི་ལ་རྟོད་ཕུར་བཙུགས་ཏེ། བཞེངས་བསྐྲུན་བྱ་སྲོལ་གཏན་འབེབ་གནང་ཡོད། ལུགས་སྲོལ་དེ་ནི་དུས་རབས་བརྒྱད་པའི་ནང་བསམ་ཡས་གཙུག་ལག་ཁང་བཞེངས་སྐབས། སྔར་སྲོལ་མ་ཉམས་པར་ལག་བསྟར་གནང་ཡོད་པ་སྦ་བཞེད་ལས་གསལ་ལ། དེ་ལྟར་རྒྱུད་དེ་ལས་བོད་ཀྱི་སྡོད་ཁྱིམ་ཇུས་བཀོད་སྐོར། དེ་དུས་ཀྱི་རྒྱབ་ཁབ་གཞན་ལས་ཁྱད་མཚར་ཞིག་བཀོད་ཡོད་པ་ལྟར་ན། བོད་ཀྱི་ཤིང་བཟོའི་ལག་རྩལ་ནི་འཐུས་ཚང་ཞིག་ཡོད་པ་དཔག་ཐུབ། ཕྱིས་སུ་ཆོས་རྒྱལ་སྲོང་བཙན་སྒམ་པོའི་དུས་སུ། ལྷ་ཁང་མང་བོ་བཞེངས་ཏེ་ཤིང་ལ་པ་ཏྲ་ཁྱད་མཚར་ཅན་བརྐོས་པ་སྟེ། ལྕམ་སྣ་ལ་སེང་གེ་གདུང་མ་དང་། གཞུའི་ལྡེབས་ལ་རོ་སྒྲུང་དང་། དམངས་ཁྲོད་ཀྱི་གཏམ་རྒྱུད་སྣ་ཚོགས་ཤིང་ལ་བརྐོས་པ་དེང་སང་ཡང་སྣང་ལ། དེའི་རྗེས་རྒྱལ་བོ་རིམ་བྱོན་གྱིས་ལྷ་ཁང་བཞེངས་པ་ལོ་རྒྱུས་དང་ཡིག་ཚང་དག་ན་འབྱུང་བ་ལྟར་དང་། གཞན་ས་སྐྱའི་ལྷ་ཁང་ཆེན་མོ། ཞ་ལུའི་གསེར་ཁང་ཆེན་མོ། དཔལ་འཁོར་ཆོས་སྡེ། གཙུག་ལག་ཁང་བཅས་བཞེངས་ཏེ། བོད་འདིར་ཤིང་བཟོའི་ལག་རྩལ་དར་རྒྱས་ཆེན་པོ་བྱུང་བ་ཀུན་གྱིས་མཁྱེན་གསལ་དང་། དུས་རབས་བཅོ་ལྔ་བའི་ནང་རྗེ་ཐམས་ཅད་མཁྱེན་པའི་སྐུ་དུས་སུ། བོད་ལ་ཤིང་པར་ལག་རྩལ་དར་རྒྱས་བྱུང་བ་དང་། ལྷག་པར་དུ་རྒྱལ་དབང་ལྔ་བའི་སྐུ་རིང་ལ་པོ་ཏ་ལའི་ཕོ་བྲང་དམར་བོ་བཞེངས་སྐབས། བོད་ཀྱི་ཤིང་བཟོའི་ལག་རྩལ་ཆེད་མཁས་པ་མང་བོ་བསྡུས་པའི་ནང་། ཤིང་བཟོའི་དབུ་ཆེན་དོལ་གནས་གསར་བ་འཇམ་དབྱངས་དབང་བོ་དང་། དབུ་ཆུང་རྩེ་ཁ་ཆོས་སྐྱོང་སོགས་མི་བཅུ་གསུམ། ཤིང་བརྐོས་དབུ་ཆེན་རྒྱ་རི་བསྟན་འཕེལ་དང་མི་གཉིས། ཤིང་བརྐོས་ལག་རྩལ་ཨང་དང་བོའི་གྲས་ས་གླང་གྲོང་བ་སོགས་མི་གྲངས་གོ་ལྔ། འབྲིང་རྒྱ་རི་ཙན་དན་སོགས་མི་བཅུ། དཀྱུས་མ་རིན་སྤུངས་ཐང་དཀར་ཚེ་བདག་སོགས་མི་གྱ་དགུ། ཤིང་བཟོ་ཙག་ཙིག་བྱེད་མཁན་པ་སྣམ་མགོན་པོ་སོགས་མི་ཞེ་གསུམ་བཅས་རྩ་འཛུགས་གནང་ཡོད་ལ། ཤིང་བཟོ་དབུ་ཆེན་གྱི་འོས་འགན་ནི། རྡོ་བཟོ་དབུ་ཆེ་ཆུང་དང་མཉམ་འབྲེལ་གྱིས་ས་ཁྲ་བཀོད་རྒྱུ་དང་། ཐིག་ཚད་གཏན་འཁེལ་བྱེད་རྒྱུ། ཤིང་བཟོའི་ལས་ཀར་བཀོད་འདོམས་བྱེད་རྒྱུ་བཅས་ཡིན། དབུ་ཆུང་གིས་དངོས་སུ་ཤིང་བཟོའི་ལག་ལེན་ཡོངས་རྫོགས་ལག་བསྟར་བྱེད་རྒྱུ་དང་། དབུ་ཆེན་ལ་རོགས་རམ་བྱེད་རྒྱུ་དེ་ཡིན། དཀྱུས་མ་རྣམས་ཀྱིས་ཐིག་ཚད་གཏན་འཁེལ་ལྟར་ཤིང་གཅོད་རྒྱུ་དང་། རགས་བཟོ། འབུར་ལེན་རྒྱག་རྒྱུ། ཁོད་སྙོམས་བཟོ་རྒྱུ། ཤིང་བརྐོས་པ་རྣམས་ཀྱིས་ལྷ་བྲིས་པས་ཤོག་དཔར་བྲིས་པ་ལྟར། རི་མོ་བརྐོ་རྒྱུ་བཅས་ཡིན། དེ་ལྟར་སྡེ་སྲིད་སངས་རྒྱམ་གྱི་གསེར་སྡོང་འཛམ་གླིང་རྒྱན་གཅིག་ལས་ཞིབ་པར་འཁོད་ཡོད་དོ། །

ལྡེབས་ཞལ།

བོད་ཀྱི་ཞལ་བའི་ལག་རྩལ་འདི་ཡང་། སྤྱི་ལོ་སྔོན་གྱི་ལོ་ཉིས་བརྒྱའི་སྔོན་ནས་ཚད་མཐོན་པོར་སོན་ཡོད་པར་མངོན་ཏེ། རིག་གསར་གོད་ཆག་མ་བྱུང་བའི་སྔོན་ལ། ཕོ་བྲང་ཡུམ་བུ་བླ་སྒང་གི་ལྡེབས་བྲིས་རི་མོ། ཕྱི་རྒྱལ་གྱི་མིས་པར་བཤུས་ཡོད་པར་གོ་ཐོས་སུ་ཡོད་པ་ལས་གསལ་ལ། དེ་ལོ་ཉིས་སྟོང་ལྷག་ལ་མ་འཇིག་པར་གསལ་བའི་ཁྱད་ཆོས་ལྡན། ཡང་། སྲོང་བཙན་སྐབས་སུ་བཞེངས་པའི་ར་མོ་ཆེ་དང་། དགོན་སྡེ་ཁག་གི་ལྡེབས་རིས་པགས་བཤུས་བྱས་ཚེ། རིམ་པ་གསུམ་མཐོང་རྒྱུ་སྣང་སྟེ། རྩིག་སྟེང་དུ་བྱེ་མ་ཚགས་མ་བརྒྱབ་པའི་བྱེ་ཧྲོབ་དང་ས་དཀྱུས་བསྲེས་ནས་རྩུབ་ལས་བྱས་པ་དང་། དེའི་ཐོག་ཚགས་བརྒྱབ་པའི་ཕྱེ་ཞིབ་དང་ས་དཀར་བསྲེས་ནས་བར་ཞལ་ཏེ། རིམ་པ་གཉིས་པ་བཏང་། དེའི་རྗེས་ས་དཀར་དམར་བསྲེས་པའི་རིམ་པ་གསུམ་པ་བྱས་ཐོག་རྡོ་དཀར་གོང་ངོས་སྙོམས་པོར་དབུར་བརྡར་བྱས་ཏེ་འཇམ་ཤ་དོད་པའི་སྤུས་ཚད་ཧ་ཅང་མཐོ། པོ་ཏ་ལའི་ཕོ་བྲང་དམར་བོ་དང་། དཀར་བོ་ལྡེབས་ཞལ་རྒྱག་དུས། ཞལ་བ་རྒྱག་མཁན་རིམ་པ་གསུམ་ཕྱེས་འདུག རིམ་པ་དང་བོ་དབུ་མཛད་མཁན་རྒྱ་རི་ཙན་དན། བྱིངས་གྲས་ཟ་དམ་བསམ་འགྲུབ་སོགས་མི་དགུ། དཀྱུས་མའི་གྲས་མི་བཅུ་གཉིས་ཡོད། རིམ་པ་དང་བོས་ལྷ་ཁང་དང་གཟིམ་ཆུང་ཁག་གི་ཞལ་རིམ་པ་གསུམ་རྒྱག་པ་དང་། གཞལ་མེད་ཁང་བྱིངས་ལ་བཀོད་འདོམས་བྱེད་དགོས། རིམ་པ་གཉིས་པས་བར་ཞལ་རྒྱག་རྒྱུ་དང་། དབུ་མཛད་ལ་ལས་རོགས་བྱེད་རྒྱུ། རིམ་པ་གསུམ་པས་རྩིག་ཐོག་ལ་རྩུབ་ཞལ་དང་། འདམ་ཆུ་བཟོ་རྒྱུ་སོགས་སྡེ་སྲིད་སངས་རྒྱམ་ཀྱིས་བཀོད་ཡོད་དོ། །

སྤོས་བཟོ།

སྤོས་ནི་སྦྱོར་བྱུང་གི་དྲི་རྫས་ཤིག་སྟེ། མཆོད་རྫས་དང་། གྲིབ་སྦྱངས། འཕྲོད་བསྟེན་སོགས་ལ་མཁོ་བ་ཞིག་ཡིན། སྦྱོར་སྤོས་ཀྱི་མན་ངག་འདི། གསང་སྔགས་བླ་མེད་ཀྱི་རྒྱུད་དུས་འཁོར་དང་། གསང་འདུས་སོགས་ལས་བསྟན་པའི་བཟོ་རིག་གི་གྲུབ་ཆ་ཞིག་ཡིན། སྤོས་སྦྱོར་བྱེད་སྟངས་ལ། དུས་འཁོར་གྱི་རྒྱུད་ལས་བཤད་པའི་ལྔ་སྦྱོར་བཅུ་གཉིས་དང་། དཔལ་གསང་བ་འདུས་པའི་རྒྱུད་ནས་གསུངས་པའི་ཕྱག་ལེན། མགོན་པོ་ཀླུ་སྒྲུབ་ནས་བརྒྱུད་པ་རིན་སྤུངས་པའི་ལྔ་སྦྱོར་བརྒྱད་པ། པཎ་ཆེན་ལུགས་ལ་ལྔ་སྦྱོར་ཚ་སྦྱོར་གཉིས། ཁ་ཆེའི་པཎ་ཆེན་ཤཱཀྱ་ཤྲྀས་ལུགས་ཀྱི་ཉུང་སྦྱོར། ཨ་ཏི་ཤའི་ལུགས་ཀྱི་སྤོས་སྦྱོར་བྱ་ཚུལ། ཟུར་མཁར་སྤོས་སྦྱོར་དང་། རྒྱ་ནག་ལུགས་ཀྱི་སྤོས་སྦྱོར་བྱ་ཚུལ། གཞན་ཡང་། གཏོར་མའི་སྤོས་སྦྱོར་སྣ་ཚོགས། གདོན་བགེགས་འདུལ་བའི་སྤོས་སྦྱོར། ཆོས་སྐྱོང་སོ་སོའི་མཐུན་རྫས་ཀྱི་སྤོས་སྦྱོར་སོགས་མང་ངོ་། །

འདིར་སྤོས་སྦྱོར་སྤྱིའི་ལག་ལེན་ཞིག་བཤད་ན། སྦྱོར་རྫས་ལ། ན་གི་ཙན་དན་ཨ་ཀ་རུ། །ཀ་ར་གླ་རྩི་ལྔ་སྦྱོར་བྱ། །ན་གི་གླ་རྩི་ཛཱ་ཏི་དང་། །ཨ་ག་རུ་ཡིས་བཞི་སྦྱོར་བྱ། །ན་གི་ཀ་ར་གླ་རྩི་དང་། །བ་ལུ་སྤང་སྤོས་གླ་རྩི་སྦྱར། །ཕུར་མོང་བ་ལི་སྨན་སེ་སྦྱར། །སྤུ་ནག་ཏང་ཀུན་བུ་རམ་སྦྱར། །ཤིང་ཚ་ཅི་གང་གླ་རྩི་སྦྱར། །སུག་སྨེལ་གླ་རྩི་བ་རུ་ར། །འདི་སྐད་གང་ཡང་དྲི་མངར་ལྡན། །ཞེས་པ་སོགས་སྦྱོར་རྫས་ཚགས་སུ་ཆུད་པར་བྱས་ནས། དེ་དག་བསྲེས་ཏེ་རྡོ་གཞོང་དུ་འདམ་འཐག་གིས་འདྲེས་ངེས་བྱ། དེ་ནས་ཆང་བཟང་གིས་གར་སླ། ཟན་སླ་ཤོས་ཙམ་དུ་བྱས་ནས་ནམ་ཟླ་དང་བསྟུན་པའི་ཆང་དྲོད་ཀྱིས་ཆང་ཡན་མ་ལོངས་ཙམ་བསྙལ། ཡང་ན། ཤིང་མཁྲེགས་ཀྱི་གཞོང་བ་ལྟ་བུའི་ཁོད་སྙོམས་པོར་ཕྲ་སྦོམ་གང་དགོས་ཀྱི་རེང་བུའི་ལམ་ལྕགས་བསྲེག་གིས་མང་དུ་ཕུག སྤོས་ཟན་ཁོད་སྙོམས་པོར་བཞག སྤོས་ཟན་སྟེང་ནས་གཞོང་བའི་སྟེང་རྒྱ་དང་མཉམ་པའི་པང་ལེབ་ཀྱིས་བཀབ། དེའི་སྟེང་ཀ་བ་བཙུགས་པ་ལ་ཁང་བའི་འཇའ་ཁེབས་ཀྱིས་མནན་པས། སྤོས་མིག་ནས་རེང་བུ་ཐམས་ཅད་དུས་གཅིག་བར་མ་ཆད་པར་པང་ལེབ་ཀྱིས་བསུས་ལ་བླངས། དུས་གཅིག་སྔོན་མ་གཅིག ཐིག་རྒྱུད་དུ་བཞག་པ་ལ་བཅར་ནས་ཐམས་ཅད་བཤིགས་ལ་བསིལ་སྐེམ་བྱེད། དེ་མི་འབྱོར་ན་མར་ཐག་ལྟར་དྲངས་ཏེ། བྲེ་བར་སོར་གང་ལས་མི་སྲབ་པ་ར་རྩེ་ལས་བྱས་པ་ཁ་ནས་ཕྱིར་བཏང་ལ་སྤྲད་པས་འཐེན་ཆོག སྟེང་དུ་ལྡིང་བའི་ཡོ་འཁྱོག་མི་འོང་བའི་ཕྱིར་དར་སྲབ་མོས་ཅུང་བསྡམས་ལ་སྐེམ་མོ། །དེ་ཡང་། ཁ་དོག་དམར་བོ་ཙན་དན་ནམ་ཚ་ལ་སྤངས་པའི་རྒྱ་ཚོས། སེར་བོ་གུར་ཀུམ་སོགས་ཀྱིས་གང་འདོད་སྤྲས་ཆོག་གོ །

ཡང་ཤུག་པའི་སྡོང་རྒན་དང་། ནཱ་གི གུར་ཀུམ། གུ་གུལ། སིཧ་ལ། གླ་རྩི། གུར་གུམ་འདུལ་སྦྱོངས་བྱ་སྟངས། གླ་རྩིས་ཀླུ་ལ་གནོད་པས་དུག་འདོན་སྟངས། བསྲེ་འདུལ་དང་འདམ་འཐག་བྱ་ཚུལ། སྤོས་སྨན་གྱི་ཚད་འཇལ། ཆང་གིས་སྙལ་སྟངས་སོགས་འཇུ་མི་ཕམ་གྱི་བཟོ་རིག་ཉེར་མཁོའི་ཟ་མ་ཏོག་དང་། དེའུ་དམར་གྱི་བཟོ་རིག་ལས་ཚོགས་པྲ་ཕབ་འོད་ཀྱི་སྣང་བརྙན་ལས་ཞིབ་ཏུ་འཁོད་ཡོད་དོ། །

ཡང་། གདོན་སེལ་གྱི་སྤོས་སྦྱོར་ཞིག་ལ། རིག་པ་མཆོག་གི་རྒྱུད་ལས། ལོ་སོ་གཉིས་ལོན་པའི་མར་ཕུལ་བཞི། སྦྲང་ཕུལ་བཞི། བ་ལང་ཀོ་བ་བསྲེག་པ་ཡི། །ཕྱེ་མ་དག་ཀྱང་ཕུལ་བཞི་སྟེ། །སྒོག་སྐྱ་བརྒྱ་དང་ཨ་རུ་སྲང་སུམ་ཅུ། །ཚ་བ་གསུམ་ནི་ཉིས་འགྱུར་སྲང་དྲུག་ཅུ། །ཞིབ་བཏགས་སྨན་མར་བྱས་པའི་མར་དེས་ནི། །མི་ཡི་འཇིག་རྟེན་འདིར་གནས་གདོན་ཀུན་འཇོམས། །ཉེས་གསུམ་ཀུན་དང་ཁྱད་པར་འདུས་གདོན་སེལ། །རྡོ་རྗེ་ལྷ་ཡི་མར་ཞེས་བྱ་བ་སྟེ། །དེའི་མིང་དྲན་ཀྱང་གདོན་གྱིས་གླགས་མི་རྙེད། །ཁོང་དུ་འཐུང་དང་སྣ་རུ་བླུག་གྱུར་ན། །གདོན་ཀུན་ཞི་བྱེད་འཇིགས་བྱེད་གཏོང་བར་བྱེད། །ཅེས་གསུངས་སོ། །

སྤོས་ཕུལ་བའི་ཕན་ཡོན་ནི། ལས་རྣམ་པར་འབྱེད་པའི་མདོ་ལས། སྤོས་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་སྤོས་ལྟ་བུར་འགྱུར་བ་དང་། སྣའི་དབང་བོ་རྣམ་པར་དག་པར་འགྱུར་བ་དང་། ལུས་ཀྱི་དྲི་མི་ཞིམ་པ་རྣམ་པར་དག་པར་འགྱུར་བ་དང་། རྟག་ཏུ་དྲི་ཞིམ་པར་འགྱུར་བ་དང་། གཟུགས་བཟང་བར་འགྱུར་བ་དང་། འཇིག་རྟེན་གྱི་མདུན་དུ་འགྲོ་བར་བྱ་བར་འགྱུར་བ་དང་། སྡུག་པའི་ཆོས་རྣམས་ཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་སྤོས་ཕུལ་བའི་ཕན་ཡོན་ནོ། །

བོད་རིག་པའི་ཆ་ལག་ཏུ་ཉེ་བར་མཁོ་བ་རྒྱུན་ཤེས་དཔྱད་མཛོད་ཆེན་མོ་ཞེས་བྱ་བ་བཞུགས་སོ།། སྟོད་ཆ།
Collection Rebgong Geshe Kmap Book
Visibility Public - accessible to all site users (default)
Author ལྕང་སྐྱ་དགེ་འདུན་བཀྲ་ཤིས།
UID mandala-texts-42871
DOI
All rights reserved.