མདོ་ཁམས་ཕྱོགས་སུ་ཆེས་སྔ་གྲས་ཀྱི་རྟེན་བྱིན་རླབས་ཅན་མཆོད་རྟེན་དྲིལ་གསིལ་མ་ནི་མདོ་སྨད་རྟེན་རྫོང་ངམ་ཁྲི་ཀ་གསེར་མོ་ལྗོངས་ཞེས་ཡོངས་སུ་གྲགས་པ། གངས་ཅན་ལྗོངས་ཆ་གཉིས་སུ་ཕྱེ་བའི་ཞིང་། མདོ་ཁམས་སྨད་ཀྱི་ཆ། བ་ཡན་ཧ་རའི་ཚུར་ལྟོས་ཆུ་ཐམས་ཅད་ཕྱོགས་འདྲེས་ཀྱིས་རྨ་གཡང་ཕྱུག་མོའི་གཞུང་དུ་འབབ་པའི་རྒྱ་གར་ཆུ་བོ་གངྒྰ་གཉིས་པ། ཡན་ལག་བརྒྱད་ལྡན་གྱི་ཀླུང་ཆེན་དལ་གྱིས་འབབ་པའི་འགྱུ་ཁུགས་སྟེ། ཤར་ཕྱོགས་ན་སྲིན་པོའི་རི་བོ་རྔམ་བརྗིད་ལྡན། ལྷོ་ཕྱོགས་སུ་བྲག་དཀར་གྱི་རྩེ་མོ་དགུང་དུ་སྙེགས། ནུབ་ཕྱོགས་སུ་རྨ་ཀླུང་དལ་འགྲོ་རིང་མོ་ཕྱོགས་གཅིག་ཏུ་འཁྱིལ་བའི་ཆུ་མཛོད་དང་པོ་ཡོད་པ། བྱང་ཕྱོགས་ན་ཨ་མ་ཟོ་དགུའི་རི་བོ་རྒྱལ་མཚན་སྒྲེང་བ་ལྟར་བརྟན་ཅིང་བརྗིད་ཆགས་པར་གནས་པའི་ཡུལ་དབུས་ཀྱི་ཤར་ཕྱོགས་སུ་བཞུགས་ཡོད་ལ། འདི་ཕྱོགས་སུ་ཆོས་རྒྱལ་ཁྲི་རལ་དང་ཚྀག་ཙ་ནམ་ཀའྀ་སྙྀང་པོ། སྤུག་ཡེ་ཤེས་དབྱངས། མཁས་པ་མི་གསུམ། རྒྱ་གར་ཕ་དམ་པ་དང་རོས་རྗེ་ས་པཎ་སོགས་ཞབས་ཀྱིས་བཅགས་པ་ཆོས་འབྱུང་མང་པོར་གསུངས་པས་སྙན་གྲགས་ཆེའོ།།

དེས་ན་མདོ་སྨད་མཆོད་རྟེན་དྲིལ་གསིལ་མ་ནི་ཁྲི་ཀ་རྫོང་སྲིད་གཞུང་ཆགས་ས་ནས་སྤྱི་ལེ་༢༩ཡོད་པའི་འཕྲང་དམར་མེ་བརྒྱ་སྡེ་བའི་བྱང་ཕྱོགས་མཆོད་རྟེན་སྐེ་ཞེས་པའི་གནས་སུ་སྟོན་པ་ཐུགས་རྗེ་ཆེན་པོའི་བྱིན་རླབས་ཀྱིས་སའི་རྒྱན་དུ་གནངས་པ་ལྟར་བཞུགས་འདུག་ལ། འདི་ནི་དུས་རབས་བཅུ་བར་གྲུབ་པའི་དབང་ཕྱུག་ཕ་དམ་པ་སངས་རྒྱས་རི་བོ་རྩེ་ལྔར་ཕེབས་སྐབས་མདོ་སྨད་ཁྲི་ཀའི་གནས་འདིར་བྱོན། ནམ་མཁར་འཕུར་བ་སོགས་རྫུ་འཕྲུལ་སྣ་ཚོགས་བསྟན་པ་རྒན་པོ་ཞིག་གིས་མཐོང་ནས་ཁོ་བོ་དད་དེ་བསྙེན་བཀུར་ཞུས་པས། རྣལ་འབྱོར་བས་དབྱུག་པ་རྟེན་སྐལ་དུ་བཞག དེ་དང་སངས་རྒྱས་བྱང་སེམས་དུ་མའི་སྐུ་གདུང་། ཆོས་སྐུའི་རིང་བསྲེལ་མང་དུ་བསགས་པ་ནང་བཞུགས་ཀྱིས་མཆོད་རྟེན་བཞེངས་ལ། རྣལ་འབྱོར་བ་ཆོས་གཡུང་དྲུང་བྱ་བས་རབ་གནས་མཛད། མཆོད་འབུལ་སྨོན་ལམ་གནང་བས་འཇའ་དང་མེ་ཏོག་གི་ཆར་དང་ངོ་མཚར་བའི་ལྟས་བྱུང་། ལོ་རྒྱུས་རྣམས་མངོན་ཤེས་ཀྱིས་གཟིགས་ནས་གསུངས་བ་བཅས་ལུ་ཀྱྰ་དཔོན་པོ་ཤེས་རབ་དཔལ་བཟང་གི་དཀར་ཆག་ལས་བྱུང་ཡོད་པ་དང་། ནམ་མཁའ་ལས་དྲིལ་ཆུང་གི་སྒྲ་བྱུང་བར་ཡུལ་མི་རྣམས་ཀྱིས་བལྟས་པས་ཕ་དམ་པ་རྫུ་འཕྲུལ་གྱིས་གཤེགས་པ་མཐོང་བའི་ལོ་རྒྱུས་དང་། ད་ལྟ་ཡང་དུས་བཟང་རྣམས་སུ་དྲིལ་བུའི་སྒྲ་ཐོས་རྒྱུ་ཡོད་པས་མཆོད་རྟེན་དྲིལ་གསིལ་མར་གྲགས་པར་གསུང་། ཡང་ངག་རྒྱུན་དུ་ཆོས་རྒྱལ་མྱ་ངན་མེད་ཀྱིས་ཞག་གཅིག་ལ་མཆོད་རྟེན་བརྒྱ་རྩ་བརྒྱད་རྫུ་འཕྲུལ་གྱིས་བཞེངས་བར་གྲགས་པའི་ནང་ཚན་ཡིན་པ་དང་། འབྲས་སྤུངས་སྐོར་ལམ་དུ་ཡང་འདི་འདྲ་གཅིག་ཡོད་ཅེས་ཐར་ཤུལ་སྐུ་ཕྲེང་བཞི་བའི་གསུངས་ཞེས་མདོ་སྨད་ཆོས་འབྱུང་དུ་བཀོད་ཡོད། འདི་དག་ཆོས་འབྱུང་སོ་སོར་བཀོད་ཡོད་པ་མ་ཟད་མཆོད་རྟེན་ས་གནས་ཀྱི་རྒན་གཞོན་སུ་ལའང་ཐོགས་བྱ་མེད་པར་ངག་རྒྱུན་རིང་མོ་ལྷད་མ་འདྲེས་བར་ལྷུག་པོར་བཤད་རྒྱུ་ཡོད། ཡང་ཤར་སྐུ་ཕྲེང་དང་པོ་སྐལ་ལྡན་རྒྱ་མཚོའི་གསུང་འབུམ་དུ་མཆོད་རྟེན་དྲིལ་གསིལ་མས་དུས་བཟང་འགའ་རེ་དྲིལ་བུ་བསིལ་བའི་སྒྲ་སྒྲོགས་ཞེས་དང་། རབ་བྱུང་བཅུ་གཉིས་པའི་ཤིང་སྤྲེལ་ཏེ་སྤྱི་ལོ་༡༧༠༤ལོར་འཁྲུངས་པའི་མཁས་དབང་སུམ་པ་ཡེ་ཤེས་དཔལ་འབྱོར་གྱིས་སྤྱི་ལོ་༡༧༤༨ལོར་བརྩམས་པའི་ཆོས་འབྱུང་དཔག་བསམ་ལྗོན་བཟང་ལས། ས་གནས་འདིར་སྔར་རྒྱ་ནག་དམ་པ་སངས་རྒྱས་དང་བོད་ཀྱི་མཁས་པ་མི་གསུམ་སོགས་གྱིས་དངོས་སུ་བྱིན་གྱིས་རླབས་མྱོང་ལ། མཆོད་རྟེན་དྲིལ་གསིལ་མར་གྲགས་པ་དྲིལ་བུའི་སྒྲ་ཡང་ཡང་འབྱུང་བ་ཞེས་གསུངས་ཡོད།

 མཆོད་རྟེན་གྱི་མདུན་དུ་རྟེན་རྡོ་（རྡོ་ལབ་ཆུང་ངུ་ཞིག）ཞིག་ཡོད་པའི་སྟེང་དུའང་གོང་སྨྲས་ལོ་རྒྱུས་དང་ཇི་འདྲ་བར་བསྐོས་ཡོད་པ་ད་ལྟའང་བཞུགས། འདི་ལྟར་གྲུབ་པའི་དབང་ཕྱུག་རྒྱ་གར་ཕ་དམ་པ་སངས་རྒྱས་ཁོང་ཕྱི་ལོ་༡༡༠༡པ་རབ་བྱུང་གཉིས་པའི་ལྕགས་སྦྲུལ་ལོར་རྒྱ་ཡུལ་དུ་ཕེབས་པར་གྲགས་པ་ལྟར། ངག་རྒྱུན་དང་ལོ་རྒྱུས་སུ་གྲགས་པ་བཞིན་ཕ་དམ་པ་རྒྱ་ནག་རི་བོ་རྩེ་ལྔར་ཕེབས་པའི་ལམ་བར་དུ་ཁྲི་ཀ་མེ་བརྒྱ་ས་ཆ་བརྒྱུད་ནས་དབྱུག་པ་རྟེན་སྐལ་དུ་བཞག་པ་དང་བསྟུན། སྡེ་འདིའི་དད་ལྡན་མང་ཚོགས་དང་། བོད་མི་ཡོངས་ཀྱི་བསོད་ནམས་བསགས་པའི་ཞིང་ས་རུ་མཆོད་རྟེན་འདི་བཞེངས་སྐྲུན་བྱས།

 དེ་ལྟར་ན་རིན་ཐང་གཞལ་དུ་མེད་པའི་མཆོད་རྟེན་འདི་ལ་ལོ་ངོ་དགུ་བརྒྱ་དང་བཅུ་ཡས་མས་འགོར་ཟིན་པས། ལོ་རྒྱུས་ཀྱི་རྒྱུན་རིང་ལ་བྱིན་རླབས་ངོ་མཚར་ཆེ་བ་སྨྲ་མེད་དུ་གྲུབ། སྔོན་གྱི་མཁས་པ་དུ་མའི་གསུང་རྒྱུན་ལས་ཀྱང་མདོ་ཁམས་ཀུན་ལ་སྔོན་ནས་སྙན་གྲགས་རྒྱས་ཡོད། འདི་ལྟ་བུའི་ཡུན་རིང་གི་ལོ་རྒྱུསལྡན་ལ་སྙན་གྲགས་ཆེ་བའི་རྟེན་བྱིན་རླབས་ཅན་འདི་ལ་ལྔ་བརྒྱད་དང་རིག་གསར། རྐུན་ཇག་གི་གནོད་པ་སོགས་ཅི་ཡང་མ་བྱུང་བར་ད་ལྟ་ད་དུང་འགྲོ་བའི་བསོད་ནམས་ཀྱི་དཔལ་དུ་གྱུར་ཡོད། དེ་སྔོན་སྐེ་བའི་སྔགས་རིམ་པ་ངག་དབང་འཇམ་དབྱངས་རྒྱ་མཚོའི་ཞལ་ནས། མཆོད་རྟེན་འདི་ཁྲི་ཀའི་ཡུལ་གྱི་མཆོད་རྟེན་ཐོག་མའམ་མདོ་ཁམས་ཡུལ་ན་འགྲན་ཟླ་བྲལ་བའི་མཆོད་རྟེན་ཞིག་ཡིན་པར་གསུངས་པའང་དོན་ལ་གནས་ཏེ། མཇལ་བ་མང་པོས་ད་ལྟའང་ལྟོས་ཡ་མཚན་པ་མཐོང་བ་མང་མང་ལ་བཤད་རྒྱུ་ཡོད་པ་མ་ཟད། མཆོད་རྟེན་ལ་བསྐོར་བྱས་པ་དང་རྟེན་གྱི་ས་སྤྱད་ན་སྨྲ་རིགས་སྐྲངས་རིགས་ལ་ཕན་པ་དང་། སྦྲུམ་མ་བུ་སྐྱེས་པ་དང་ནད་པ་ཚབས་ཆེན་གྱི་ནད་སངས་པའི་དངོས་བྱུང་གི་དོན་ཡང་བཤད་རྒྱུ་མང་ངོ་།། རྒྱུ་མཚན་དེ་དག་གི་དབང་གིས་ཁྲི་ཀའི་ཡུལ་སྐོར་ས་གནས་དང་། རིག་དངོས་སྲུང་སྐྱོབ་ཀྱི་གྲས་སུ་བཞག་སྟེ། མྱུར་བར་ཞིག་གསོ་དང་བརྒྱུད་སྒྲོགས་བྱེད་དགོས་ལ། དེ་ལྟར་བྱས་ཚེ་ཁྲི་ཀ་ས་ཆའི་མཛེས་ལྗོངས་སྔར་ལས་གསོན་ཉམས་ལྡན་པ་ཞིག་ཏུ་འགྱུར་བ་དང་། ཡུལ་སྐོར་ལྗོངས་རྒྱུའི་གནས་ཡུལ་གྲགས་ཅན་ཞིག་ཏུ་འགྱུར་བར་ཡང་ཐེ་ཚོམ་མེད། ད་དུང་འདི་ལ་དོ་སྣང་མ་བྱས་ན་སྤྱི་ལོ་༢༠༠༨ལོ་དང་། ༢༠༠༩ལོ། སྤྱི་ལོ་༢༠༡༡ལོ་ཐེངས་དུ་མར་རྐུན་ཇག་གིས་གླགས་བཙལ་ཏེ། རྙེད་པར་དཀའ་བའི་རྟེན་བྱིན་རླབས་ཅན་ཤུལ་མེད་དུ་བཟོ་བར་བརྩམས་པ་ལུང་ཁོག་དེའི་ཡུལ་མི་ཀུན་ལ་གསལ། ཡིན་ཡང་སྟབས་ལེགས་པ་ཞིག་ལ་མཇལ་མི་ཚོས་ཚོར་བས་བརྐུ་མ་ཐུབ། འདི་ལྟར་གནའ་བོའི་རྣམ་པ་མ་ཉམས་པར་བརྗིད་ཆགས་སེ་ཀུན་གྱི་ཡིད་དབང་འཕྲོག་པའི་རྟེན་འདི་དངོས་པོ་མ་ཡིན་པའི་ཤུལ་བཞག་རིག་གནས་སྲང་སྐྱོབ་ཀྱི་གྲས་སུ་མ་བཞག་ཚེ། ནམ་ཞིག་གླགས་པའི་སྐབས་མཆིས་པས་འབྲེལ་ཡོད་ལས་ཁུངས་དང་ཡུལ་མི་ཀུན་གྱིས་བདག་གཉེར་དོ་དམ་གཙིགས་སུ་འཛིན་དགོས་པའང་ཞོར་དུ་སྨྲས་པ་ལགས། ཞེས་མེ་བརྒྱ་སངས་དོན་ནས་ཟླ་ཚེས་བཟང་པོར་མཆོད་རྟེན་འདིའི་ལོ་རྒྱུས་ཀྱི་ཟུར་རེ་བཀོད་དེ་ཀུན་ལ་ངོ་སྤྲོད་ཀྱི་ཚུལ་དུ་བྲི་ཁུལ་བྱས་པ་ཡིན་ནོ།། སརྦམངྒལམ།