༄༅། །མདོ་སྨད་ཁྲི་ཀའི་རྐང་ཚའི་ཡུལ་གྱི་སྦྲ་ནག་རིག་གནས་རོབ་ཙམ་གླེང་བ།

ཚེ་རིང་དོན་གྲུབ།

ནང་དོན་གནས་བསྡུས། དཔྱད་རྩོམ་འདིར་གཙོ་བོ་རྒན་རབས་པ་དག་གི་ངག་སྒྲོས་གཞིར་བཟུང་སྟེ། རང་གིས་མིག་མཐོང་ལག་ཟིན་དུ་གྱུར་པའི་ཁྲི་ཀའི་རྐང་ཚའི་སྦྲ་ནག་གི་ཕྱི་ནང་གི་རྣམ་པ་དང་གྲུབ་ཚུལ། རིགས་སོགས་རོབ་ཙམ་གླེང་བར་བྱས་ཡོད།

བརྡ་ཆད་གཙོ་བོ། རྐང་ཚ། སྦྲ་ནག འབྲོག་མི། འཚོ་བ།

ཉེ་ལམ་སྤྱི་ཚོགས་ཕྱོགས་ཡོངས་ནས་འཕེལ་རྒྱས་སོང་བ་དང་བསྟུན་ནས། སྔོན་གྱི་ཐོན་རྫས་གང་མང་ཞིག་འཚོ་བའི་ནང་གནས་ཐབས་བྲལ་བའི་ཉེན་ཁར་འཕྲད་ཡོད། བོད་རང་གི་མེས་པོ་དག་གི་ལག་ཤེས་ཀྱི་རྩལ་ལས་ཐོན་པའི་སྦྲ་ནག་ཀྱང་འབྱུང་བཞིའི་བག་ལ་འཐིམ་ཉེ་བའི་སྐབས་འདིར། བདག་དངོས་སུ་ཕ་ཡུལ་དུ་ལོག་ཅིང་། རྒན་རབས་པ་རྣམས་ལ་བཅར་འདྲི་དང་། འཚོལ་ཞིབ་སོགས་ཐབས་ལམ་ཅི་རིགས་སྒོས་རྒྱུས་ལོན་བྱས། ལྷག་པར་དུ་ཕ་ཡུལ་གྱི་སྦྲ་ནག་མིག་མཐོང་ལག་ཟིན་དུ་གྱུར་བ་གཞིར་བཟུང་སྟེ་རེ་རེ་བཞིན་བྲིས་ན་གཤམ་གསལ་ལྟར་རོ། ། 

གཅིག སྦྲ་ནག་གི་གནས་ཡུལ་རྐང་ཚ། 

རྐང་ཚ་ནི་བོད་ཀྱི་རུས་ཆེན་བཞི་ཡི་ཡ་གྱལ་ལྡོང་གི་ཁོངས་སུ་གཏོགས་ཤིང་། སྔོན་དུས་སུ་ཁམས་བདེ་དགེ་སོགས་སུ་ལོ་མང་པོར་འཁྱམས་ཉུལ་བྱས་ཤིང་། རྗེས་སུ་མགོ་ལོག་ལ་སྤར་ནས་བསྡད་ཅིང་རིམ་གྱིས་རྨ་ཕར་ཁའི་དར་རྒན(རྟ་སྒ)གཞུང་དུ་གནས་སྤར། རྐང་ཚའི་མི་རྒྱུད་རྨ་ཕར་ཁའི་རྟ་སྒ་གཞུང་དུ་གཞིས་ཆགས་པའི་དུས་ནི་དུས་རབས་བཅུ་གསུམ་པའི་ནང་ཡིན། སྐབས་དེར་རྐང་ཚར་ཚོ་སྡེ་དྲུག་གམ་ཡོངས་གྲགས་སུ་རྐང་ཚ་ཚོ་སྒོ་དྲུག་ཅེས་གྲགས། གོང་ནས་བཤད་པའི་རྐང་ཚའི་རྟ་སྒ་གཞུང་ནི་ང་རང་གི་ཕ་ས་ཡིན་ཞིང་། ས་དེ་ན་རྡོ་རྟ་ཡི་སྒ་འདྲ་བ་ཞིག་ཡོད་པས་རྟ་སྒ་གཞུང་ཞེས་བཏགས་པ་རྒན་པའི་ངག་ལས་ཐོས།

ས་དེ་ནི་མདོ་ཁམས་སྨད་ཀྱི་སའི་ཁོངས་གཏོགས་དེང་སང་གི་ཁྲི་ཀ་རྫོང་གི་ཤར་ལྷོའི་ཕྱོགས། སྤྱི་ལེ50ཡི་ས་རུ་གཞིས་ཆགས་པའི་འབྲོག་སྡེ་ཞིག་ཡིན། ས་བབས་མཐོ་ཞིང་མཚོ་ངོས་ལས་སྨི3500ནས4500ཡས་མས་སུ་འཁེལ་ཞིང་གནམ་གཤིས་ཧ་ཅང་འཁྱག འཚོ་བའི་གཞི་རྟེན་ཡང་ཞིང་ཕྱུགས་གཉིས་ལས་ཕྱུགས་ལས་གཙོ་རུ་གཉེར་བཞིན་ཡོད། དེ་ལྟར་ཕྱུགས་ཟོག་གིས་འཚོ་བའི་ཁྲོད་དུ་གོ་གནས་ངེས་ཅན་ཟིན་ཞིང་། དུས་ཚིགས་བཞི་བོར་རྩྭ་ཆུ་འཛོམས་སར་རུ་བ་རེས་མོས་སུ་སྤར་གྱི་ཡོད་པས། སྡོད་གནས་ལ་ངེས་གཏན་གྱི་རང་བཞིན་མེད་ཅིང་། འཚོ་བའི་གནས་སྟངས་དེ་འདྲའི་འོག་སྦྲ་ནག་ཅེས་པའི་སྡོད་གཞིས་འདི་བསྐྲུན་པའོ། ། དུས་དེ་ནས་བཟུང་སྟེ་རུ་བ་སྤོར་སྣུར་གྱི་དགོས་མཁོ་དང་མཐུན་པའི་སྦྲ་ནག་ནི་རུ་སྡེ་འདིའི་འབྲོག་པ་རྣམས་ཀྱི་སྡོད་ཁང་ལེགས་སུ་གྱུར་ཅིང་། མེས་པོའི་བློ་གྲོས་ཕུལ་ཏུ་བྱུང་བའི་ཤེས་རིག་གི་མཚོན་རྟགས་ཤིག་ཀྱང་ཅི་ལ་མིན། ཉེ་བའི་ཚེ་ནའང་། ཕ་ཡུལ་དུ་སྦྲ་ནག་སོགས་གུར་གྱི་རིགས་ཁ་ཤས་མུ་མཐུད་དུ་བཀོལ་སྤྱོད་བྱེད་བཞིན་ཡོད། ཕྱུགས་ཟོག་འཚོ་བའི་མཚེར་ས་རྣམས་སུ་རླངས་འཁོར་སོགས་འཕྲུལ་ཆས་ཀྱི་རིགས་ཕལ་ཆེ་བར་འགྲོ་མི་ཐུབ་པ་དང་། ས་ཆ་མང་ཆེ་བར་གངས་དང་། འཁྱག་རོམ། རྫ་རི། གྲོག་རོང་། གཡང་གཟར་གྱིས་གང་སར་བསྐོར་ཡོད་པའི་སྟབས་ཀྱི་ཡིན་ལ། རྒྱུན་དུ་རྟ་གཡག་གི་རྒྱབ་ལ་བརྟེན་ནས་རུ་བ་སྤོར་བསྐྱོད་བྱེད་དགོས་པས། ཕྱུགས་ཟོག་འཚོ་བའི་འཚོ་བ་སྐྱེལ་སྟངས་མཚམས་བཞག་མ་བཏང་བར་དུ་སྦྲ་གུར་གྱི་རིགས་ཉམས་མི་སྲིད། ཡིན་ནའང་། སྔོན་གྱི་མེས་པོ་དག་གི་མགོ་སྦྲ་དུ་བ་ཅན་མཐིང་སྨུག་སྦྲ་ནག་སྤྱོད་མཁན་ནི་ཇེ་ཉུང་ནས་ཇེ་ཉུང་དུ་སོང་སྟེ་ཧ་ལམ་འབྱུང་བཞིའི་བག་ལ་འཐིམ་པའི་སྐབས་འདིར།  བདག་གིས་མེས་པོ་རྣམས་ཀྱི་ངལ་རྩོལ་གྱི་སྡུག་ཡུས་དང་། བློ་གྲོས་ཀྱི་ཉིང་བཅུད། བྱམས་བརྩེ་ཡི་འོད་མདངས་སོགས་ལ་ཕྱིར་དྲན་ཞིག་བྱེད་པར་ཞོལ་ནས་སྦྲ་ནག་གི་རྒྱུ་ཆ་དང་། བཟོ་བའི་གོ་རིམ། གྲུབ་ཆ། རིགས་བཅས་རིམ་པ་ལྟར་བྲི་བར་བྱའོ། །

གཉིས། སྦྲ་ནག་གི་རྒྱུ་ཆ།

སྔོན་འབྲོག་པ་རྣམས་ཀྱིས་འཚོ་བའི་ཡོ་ཆས་ཀྱི་རྒྱུ་ཆར་ཕྱུགས་ཟོག་གི་བལ་ཁུལ་རྩིད་གསུམ་བཀོལ་གྱི་ཡོད་ལ། དཔེར་ན། ཕྱིང་བ་དང་། ཕྱིང་ཞྭ་དང་། སྒྱེ་དང་། སྒྱོ་བ་དང་། ཞ་ར་དང་། ག་མོ་དང་། ཕྱིང་ལྷམ་དང་། ཕྱིང་བསྟན་སོགས་མང་པོ་ཡོད་དེ། ཁོ་ཚོས་རང་ཉིད་ཀྱི་བློ་གྲོས་ལ་བརྟེན་ནས་འཚོ་བའི་ཡོད་ཆས་རྣམས་གཞན་ལ་བརྟེན་མི་དགོས་པར་རང་རྐྱ་ཐུབ་པའི་ལག་ཤེས་ཀྱི་བཟོ་ལས་གཉེར་བཞིན་ཡོད། དུས་རྒྱུན་དུ་དུས་ཚིགས་གཏན་འཁེལ་གྱིས་ཕྱུགས་ཟོག་གི་བལ་དང་ཁུལ་རྩིད་འབྲེག་པ་དང་སྨན་བརྒྱག་པ་སོགས་རེ་རེ་བཞིན་བཀོད་སྒྲིག་ཚགས་དམ་པོ་བྱས་ཤིང་། ལོ་རེ་རེ་ཡི་དཔྱིད་ཀའི་དུས་སུ་ཕྱུགས་ཟོག་རྣམས་ཅུང་ཙམ་ཤ་ཤེད་རྒྱས་པ་དང་བསྟུན་ཏེ། གཞོན་ནུ་རྣམས་ཀྱིས་རྟེའུ་ལ་ཁ་ལོ་བཏུལ་བ་དང་། གཡག འབྲི་སྐམ། ཡ་རུ། ཡར་མོ་སོགས་ཐབས་ཀྱིས་བཟུང་ནས་ཁུལ་རྩིད་བྲེགས། རྩིད་རིང་དང་། རྩིད་ཐུང་། ཁུ་ལུ། ཁུལ་སྙིགས་སོགས་རེ་རེ་བཞིན་ཞིབ་མོར་སྒྱེ་དང་སྒྱེ་མོའི་ནང་གསོག་ཉར་བྱས་ཏེ། སྔོན་ནས་སྦྲ་ནག་བཟོ་བར་གྲ་སྒྲིག་བྱེད་ཀྱིན་ཡོད། སྦྲ་ནག་གི་རྒྱུ་ནི་སྤྱིའི་ཆ་ནས་རྩིད་པ་དང་ཁུ་ལུ་གཉིས་ཡིན་ཞིང་། བྱེ་བྲག་ཏུ་རེ་རེ་ནས་བགྲང་ན་བལ་དང་། རྔ་རྩིད་སོགས་ཀྱང་རྒྱུ་རུ་གྱུར་ཡོད། སྤྱིར་བཏང་བོད་མིའི་གོམས་སྲོལ་དང་འགན་འཁྲི་ལྟར་བུའི་མགོ་ལ་སྦྲ་བཟོ་མ་ཐུབ་ཚེ། ཕ་མའི་ངོ་ཚ་ཞིག་གམ་སེམས་ཁྲལ་ཞིག་ཏུ་གོམས་ཡོད་སྟབས། ཁྱིམ་ཚང་སུ་ལ་བུ་སྐྱེས་ན་རྟ་དང་སྦྲ་གཉིས་ནི་མེད་མི་རུང་བ་ཞིག་ཡིན། སྔོན་དུས་ཁྱིམ་དུ་བུ་མང་ཚེ་ཕ་མ་ལའང་འགན་འཁུར་ཤིན་ཏུ་ལྕི་སྟེ། ཕྱུགས་ཟོག་མང་པོའི་དུད་ཁྱིམ་གཞན་ལ་ཁུལ་རྩིད་སོགས་བསྐྱིས་ཏེ་སྦྲ་ནག་བཟོ་བའི་སྲོལ་ཡང་ཡོད་གྲབས་ཟེར། བལ་དང་།   རྔ་རྩིད་དང་། རྩིད་པ་དང་། ཁུ་ལུ་སོགས་གོ་རིམ་ཡོད་པའི་ངང་ནས་གསེད་འཁེལ་ཐགས་གསུམ་གྱིས་ལས་སྣོན་བྱས་ཏེ་སྦྲ་ནག་བཟོ་བར་སྟ་གོན་བྱས། སྦྲ་ནག་ལའང་ཆེ་འབྲིང་ཆུང་གསུམ་ཡོད་ལ། གང་བཟོ་བར་བལ་ཁུལ་གྱིས་ཚགས་མིན་ལ་རག་ལས་ཤིང་། དེ་ཡང་མཐར་ཐུག་ན་ཁྱིམ་ཚང་རང་རང་གི་འབྱོར་བ་ལྟར་བཟོས་ཡོད་པས་ཕྱོགས་གཞན་ཞིག་ནས་ཁྱིམ་ཚང་ཕྱུག་མིན་གྱི་མཚོན་རྟགས་ཤིག་ཀྱང་ཡིན་ནོ། །

གསུམ། སྦྲ་ནག་བཟོ་བའི་གོ་རིམ་དང་གྲུབ་ཆ།

ཉིན་མ་ཤིན་ཏུ་རིང་བའི་དཔྱིད་ཀའི་དུས་སུ་གཟའ་སྐར་འཕྲོད་སྦྱོར་ལ་ལེགས་པར་བརྟགས་རྗེས་ཨ་མས་ཐོག་མར་མགོ་བཟུང་ནས། ཁྱིམ་དེའི་བུ་མོ་དང་། མནའ་མ་བཅས་སྐྱེས་མ་རྣམས་ཀྱིས་སྔར་ཉར་ཚགས་བྱས་པའི་རྩིད་པ་དང་ཁུ་ལུ་རང་རང་སར་གསེད་པ། དེ་ནས་གདབ་བུས་གཏགས་ཏེ་ཕན་ཚུན་འཐབ་ཏུ་བཅུག་རྗེས་བུད་མེད་གཉིས་ཀྱིས་མཉམ་དུ་ཟླ་སྒྲིལ་ངང་དཀྲིས་ནས་ལག་དཀྲིས་བཅོས་ཏེ་འཕང་འཁེལ་བའི་མགོ་རྩམ། ཉིན་མང་པོར་བཀལ་བའི་འཕང་རིལ་མང་པོ་གཅིག་སྒྲིལ་གྱིས་གྲུ་གུ་བཅོས། རྩིད་པའི་བཀལ་བའི་འཕང་ནི་རེ་ལྡེ་ཡི་རྒྱུ་དང་ཁུ་ལུ་བཀལ་བ་ལ་སྤུན་ཟེར།

 རྒྱུ་ནི་ཐགས་ཀྱི་གཞུང་དུ་སྣའི་རིང་ཚད་དུ་འཐེན་ཡོད་པས་རིང་ཞིང་། སྤུན་ཞེས་པ་ཐགས་ཀྱི་འཕྲེད་དུ་འདྲེན་བྱ་ཡིན་ལ་རྒྱུ་ལས་ཐུང་བ་ཡིན། རྒྱུ་སྤུན་གཉིས་ཀྱིས་གཙོ་བྱས་པའི་རྭ་བཞིའམ་རྐང་གསུམ་དང་། མགོ་ཕུར། མགོ་སྒམ། སྲོག་ཐིགགོང་གཏགས་སོགས་ཀྱིས་ཐགས་གྲུབ་ཞིང་། ཐགས་ཤིག་གི་རིང་ཚད་ཕོ་འདོམ30ཡིན་ཞིང་། ཐགས་འཐག་མཁན་ཞིག་གིས་ཉིན་གཅིག་ལ་གོམ་པ5ནས6བར་འཐག་ཐུབ་ཟེར།

 དེ་ལྟར་བརྩིས་ན་ཉིན་ལྔ་ནས་དྲུག་བར་ཐགས་སྣ་གཅིག་ཡོངས་སུ་འགྲུབ་ཀྱི་ཡོད་ལ། ཐགས་འཐག་པའི་རེ་ཞིང་རིང་པོ་བལྟེབས་ནས་ཡོད་པ་དེར་རེ་ལྡེ་ཟེར།  

 རེ་ལྡེ་ཞིག་གི་སྲིད་ཀྱི་རིང་ཚད་ལ་ཕོ་འདོམ30དང་། ཞེང་གི་ཆེ་ཆུང་ཚུན6ནས7བར་ཡོད། སྦྲ་ནག་ལ་ཆེ་འབྲིང་ཆུང་གསུམ་བཀར་ནས་བཟོ་སྲོལ་ཡོད་ལ། སྦྲ་ཆེ་བ་ཞིག་གི་སྣའི་རིང་ཚད་ལ་ཕོ་འདོམ་ལྔ་ཡོད་ཅིང་། སྦྲའི་ཀླད་ལ་རེ་ལྡེ10དང་ཁར་རེ་ལྡེ11དགོས། དེ་ལྟར་ཕོ་ཁྱིམ་མོ་ཁྱིམ་གཉི་གར་བསྡོམས་པའི་རེ་ལྡེ42དགོས། རེ་ལྡེ་མང་པོའི་རེ་ཞིང་ཕན་ཚུན་བསྒྲིགས་ཏེ་འཚེམ་བྱས་ནས་སྦྲ་ནག་བཟོས་པ་ཡིན།

   བདག་གིས་རྒན་པ་ཚོའི་ངག་སྒྲོས་གཞིར་བཟུང་ནས་ཅུང་དཔག་ཚེ་སྦྲ་ནག་ལ་ཚང་དགོས་པའི་གྲུབ་ཆ་སྟེ། ཆོན་ཐགངོ་ཐིགཕོ་ལུང་། མོ་ལུང་། ཀ་ར། ཕུར་བ། ཕུག་ཆོན། སྒོ་ཆོན། ས་འདོགས། གྲུ་ཐགཀ་རྟེན། ཁ་ཚུབ། ཐོང་སྒྲོགགདུང་མ། སྒོ་ཕྱར། ཆ་རུ། ནང་ཀ་སོགས་ཡིན་ཞིང་། སྦྲ་ནག་ཆེ་འབྲིང་ཆུང་གསུམ་གང་ཡིན་ཡང་དེ་དག་ངེས་པར་དུ་ཚང་དགོས།

 1.ཆོན་ཐག་ཅེས་པ་འབྲི་གཡག་གི་རྔ་རྩིད་ཀྱིས་བརྒྱུས་པའི་རྩིད་ཐག་གཉིས་ལྷན་དུ་བཙེམས་པ་ཞིག་ཡིན་ཞིང་། རིང་ཚད་ལ་ཕལ་ཆེར་ཕོ་འདོམ་གཉིས་དང་ཕྱེད་ཀ་ཡོད། དེས་སྦྲ་ནག་ཁ་ཆར་བུ་ཡུག་གི་ཁྲོད་བརྟན་པོ་ཡོང་ཕྱིར་སྦྲ་ཡི་གྲུ་བཞི་པོར་ཆོན་ཐག་བཞི་དང་སྦྲའི་སྐད་དུ་གཉིས་རེ། ད་དུང་སྦྲའི་ཕུག་དང་སྒོ་ལ་གཉིས་ཡོད་ཅིང་ཁྱོན་སྡོམ་པའི་ཆོན་ཐག་བཅུ་གཅིག་གིས་གྲུབ་ཡོད། 

2.ངོ་ཐིག་ནི་སྦྲ་ཡི་ནང་ངོས་སུ་འཕྲེད་དུ་འཐེན་ཡོད། དེས་སྦྲའི་ཀླད་ཐུར་དུ་མི་དཔྱངས་པར་འཕྲེད་དུ་ག་ལེར་རྐྱང་། རིང་ཚད་ལ་འདོམ་པ་གཉིས་ཡོད། ཁྱོན་སྡོམ་སྦྲའི་གཡས་གཡོན་གཉི་གར་ངོ་ཐིག་བཅུ་གཉིས་ཀྱིས་གྲུབ།

3.ཕོ་ལུང་དང་མོ་ལུང་སྦྲ་ནག་གི་ཕོ་ཁྱིམ་དང་མོ་ཁྱིམ་གཉིས་ཕན་ཚུན་སྦྲེལ་བྱེད་ཀྱི་སྒྲོག་གུ་དང་སྒྲོག་ལུང་ལྟ་བུ་ཞིག་ཡིན་ཞིང་། མི་ཞིག་ལ་མཚོན་ན་ཡར་འདེགས་བྱེད་ཀྱི་སྒལ་ཚིགས་ལྟ་བུའི་ནུས་པ་ཐོན་ཡོད། ཆ་རུ་ཡོད་སར་ཕོ་ལུང་དང་རྩིད་ཐག་གི་ཁུག་མགོ་ཅན་སར་མོ་ལུང་ཟེར། སྦྲ་ཆེ་བ་ཞིག་ལ་ཕོ་ལུང་མོ་ལུང་ཁྱོན་སྡོམ་སུམ་ཅུ་སོ་བཞི་དགོས་ཟེར།  

4.ཀ་ར་ནི་གསོམ་པ་དང་སྟག་པ་ཤུག་པ་དག་གཙོ་བྱས་པའི་རིང་ཚད་སྨི་གསུམ་ཙམ་གྱི་རྒྱུག་པ་རིལ་རིལ་ཅན་ཞིག་ཡིན། སྦྲ་ཞིག་ལ་ཁྱོན་སྡོམ་ཀ་ར་ཉི་ཤུ་ཡིས་གྲུབ་ཅིང་། དེའང་ཕྱི་ཀ་བཅུ་དང་ནང་ཀ་དགུ་ཡོད།  

5.ཕུར་བའམ་ས་འདོགས་ཆེ་ཆུང་ཉི་ཤུ་རྩ་དགུ་དགོས་ལ།（སྦྲའི་ས་འདོགས་དང་ཆོན་ཐག་གི་ཕུར་བ་བཅས་ནང་དུ་འདུ། ）སྦྲ་ས་ངོས་དང་མི་བྲལ་བར་བརྟན་པོའི་ནུས་པ་ཐོན།

6.ཕུག་ཆོན་དང་སྒོ་ཆོན། ཕུག་ཆོན་གྱི་ཀ་ར་སྤྱིར་བཏང་སྟག་པ་བྱེད་ཅིང་། སྒོ་ཆོན་ཤུག་པ་བྱེད་ངེས་ཡིན། དེ་ཡང་བཤད་སྲོལ་ལྟར་ཁྱིམ་ཚང་གི་རྒན་གཞོན་བྱིས་པ་རྣམས་ལ་ཚེ་རིང་ནད་མེད་སྐུ་ཚེ་བརྟན་པ་དང་སྒོ་ཁར་ཕྱུགས་ཀྱིས་བཀང་བའི་བཀྲ་ཤིས་ཕྱྭ་གཡང་གི་རྟེན་འབྲེལ་བརྟག་ཡོད་ཟེར།

7.ཁ་ཚུབ་ནི་བཀྲ་ཤིས་པའི་རྟགས་སུ་ལུག་བལ་དཀར་པོ་ཡིས་ཐགས་པའི་རེ་ལྡེ་གཉིས་གཤིབ་ནས་བཟོས་ཡོད་ལ། སྦྲའི་ནང་གི་དུ་བ་སོགས་ས་རྡུལ་ཕྱི་རུ་འདྲེན་ཞིང་ཁ་དབུགས་དག་གཙང་ནང་དུ་རྒྱུ་ལམ་ཡིན།

8. སྒོ་ཡོལ་ཕལ་ཆེར་རས་དཀར་པོ་ཡིས་བཟོས་ཤིང་མཚམས་མཚམས་སུ་རས་ཡུག་ནག་པོ་ཞེང་ཆུང་ངུ་རེ་འཕང་ཡོད། དེ་ལྟར་སྦྲའི་མདུན་ངོས་ཀྱི་སྒོར་ག་ལེ་མར་དཔྱངས་ཡོད་ལ། རླུང་དང་ལྷགས་པ་འགོག་པའི་དགེ་མཚན་ལྡན།

བཞི། སྦྲ་ནག་གི་རིགས།

དུས་རབས་འཕེལ་རྒྱས་ཀྱིས་མིའི་དགོས་མཁོ་ལྟར་བྱ་དངོས་རྙིང་བ་འཇིག་པ་དང་བྱ་དངོས་གསར་བའང་འཐུས་ཚང་སྟབས་བདེ་ཅན་གྱི་ལམ་དུ་སྙེག་བཞིན་ཡོད་ལ། ཕ་ཡུལ་གྱི་སྦྲ་ནག་ཀྱང་དེ་ལས་མ་འདས་པ་མེད་དོ། ། འདས་པའི་ལོ་རྒྱུས་ལ་ཕྱིར་མིག་ཅིག་བགྲད་ཚེ། རང་བྱུང་གི་ས་བབས་དང་གནམ་གཤིས་སོགས་ཀྱིས་མིའི་འཚོ་བ་ལ་ཤུགས་རྐྱེན་ཟབ་མོ་ཐེབས་ཡོད། སྔོན་མ་ཟས་གོས་སུ་ཤིང་ཏོག་དང་ཤིང་ལོ་བསྟེན་པའི་དུས་སུ་མིའི་སྡོད་ཁང་ནི་རང་བྱུང་གི་བྲག་ཕུག་དག་ཡིན་ཞིང་། རིམ་གྱིས་རི་དྭགས་རྔོན་རྒྱག་གི་སྐབས་དེར་མི་རྣམས་ཀྱིས་རི་དྭགས་ཆེ་ཆུང་གི་པགས་པའི་ཅ་ལག་དང་སྦྲ་གུར་བཟོ་བའི་སྲོལ་ཡོད་དེ། «བཀའ་ཆེམས་ཀ་ཁོལ་མ»ལས། རྗེ་གཉའ་ཁྲི་བཙན་པོ་དེ་ཡར་ལུང་བཙན་ཐང་སྒོ་བཞིར་ཆགས་ཕེབས་ནས་ཕོ་བྲང་བཏབ་པ་ཡིན། ཕོ་བྲང་ནི་ས་དང་རྡོ་ལ་མ་བརྩིགས། རི་དྭགས་ཤྭ་བ་དང་འབྲོང་། གཟན་གཅན་སྟག་གཟིག་པགས་པ་ལ་གུར་དུ་ཕུབ་ནས་བྱས་པ་ཡིན་ནོ། ། ཞེས་པ་དང་། གཞན། «ཐང་ཡིག་གསར་རྙིང»ལས། ཤིང་གི་སྣོད་མཐིལ་དུ་ཀ་བས་གཡོགས་པ་ཞིག་ཏུ་ཟས་ཟཞེས་གསལ་ཁ་བཏོད་པས་རིགས་བགྲེ་ཐུབ་བོ། ། སྦྲ་ནག་འདི་དང་ཐོག་དམག་གི་སྤྱོད་ཆས་ནས་རིམ་བཞིན་འབྲོག་སའི་ཕྱུགས་སྐྱོང་པ་ཚོས་བཀོལ་སྤྱོད་བྱས་པ་རེད་། བོད་བཙན་པོའི་དུས་ཀྱི་དམག་དང་འབྲོག་པ་གཉིས་ཀྱི་ཐུན་ཐོང་གི་ཆ་ནི་དུས་ངེས་གཏན་མེད་པར་གནས་སྤོར་བ་དེ་རེད། ཐང་ཡིག་གསར་རྙིང་དུ་མཚོ་ནག་གི་རྒྱུད་དུ་དབྱར་གཞུང་ཡང་གངས་མི་བཞུ། མི་རྣམས་དབྱར་བལ་ཕྱིང་དང་དགུན་སློག་པ་གྱོན། རྩྭ་ཆུ་གང་བཟང་ལ་བལྟས་ནས་མཚེར་ས་འཛིན་ཅིང་སྦྲ་ནག་ཏུ་སྡོདཅེས་པ་ལྟ་བུའོ། ། དེ་འདྲའི་ཆ་ནས་འབྲོག་པ་རྣམས་ལ་སྦྲ་ནག་ནི་མེད་ཐབས་བྲལ་བའི་འཚོ་བའི་གཞིས་རྟེན་དུ་གྱུར། རིམ་གྱིས་ཆུ་ལམ་རྒྱུགས་དང་། རྡོ་ལག་རྒྱུན་གྱི་ཚུལ་དུ་འབྲོག་པའི་སྦྲ་ནག་ལའང་རྣམ་པའི་ཆ་ནས་གྱུར་ལྡོག་གང་མང་བྱུང་ཡོད། ལོ་རེར་ཆར་ཆུའི་འབབ་ཚད་དང་རྩྭ་ཆུ་འཛོམ་མིན།  ཕྱུགས་ཟོག་དང་རྩྭ་སའི་བར་གྱི་གནད་དོན་སོགས་ཀྱི་དབང་གིས་ཕྱུགས་ཟོག་ཕྱིར་བཙོང་བའི་གྲངས་ཀ་འཕར་བ་དང་། དེང་རབས་ཀྱི་ཚོང་རྫས་གསར་བས་འབྲོག་པའི་འཚོ་བར་ཤུགས་རྐྱེན་ཟབ་མོ་ཐེབས་ཤིང་།  ལྷག་པར་དུ་ཕྱུགས་ཟོག་གི་གྲངས་ཀ་མར་གྲིབ་ནས་སྦྲ་ནག་ལས་ཟོར་ཡང་ཞིང་སྟབས་བདེ་བའི་སྡོད་གཞིས་ཏེ། རས་ཁྲ་དང་། རས་གུར་སྒལ་ནག། མཐར་རས་གུར་བཅས་སྟབས་བདེ་བའི་སྦྲ་གུར་གྱི་རིགས་མང་དུ་བྱུང་ངོ་། །

མདོར་ན་སྔོན་གྱི་མེས་པོ་བཀའ་དྲིན་དག་གི་རྣམ་དཔྱོད་ཀྱི་རྩལ་ལས་འཁྲུངས་ཤིང་། ཕྱི་སྣོད་ཀྱི་ཆགས་ལུགས་དང་བསྟུན་ཅི་ཐུབ་སྒོས་རང་བྱུང་གི་གནོད་འཚེར་གཞོལ་བར་བྱས་ཡོད་པ་མ་ཟད། ད་དུང་མིའི་རིགས་དང་སྐྱེས་ཁམས་བར་འཆམ་མཐུན་ངང་རྒྱུན་མཐུད་པའི་བསམ་བློ་གསར་བ་ཞིག་ཆེས་ཟབ་སར་མངོན་ཡོད།  སྦྲ་ནག་གི་རྒྱུ་ཆ་དག་ཀྱང་ཞིབ་ཚགས་ཆེ་ལ་གོ་རིམ་ལྡན་པ ། སྤུས་ལེགས་ཤིང་གྲལ་དག་པས་མེས་པོའི་ལག་རྩལ་གྱི་ཁྱད་མཚར་རང་བཞིན་ལ་དཔྱོད་ལྡན་རྣམས་ཀྱིས་དཔྱད་པའི་གཞི་རུ་གྱུར་ཡོད་ལ།  སྤྱིར་བཏང་སྦྲ་ནག་ནི་མགོ་སྦྲ་ཙམ་ལས་ཕར་བརྒལ་ཏེ་དམངས་སྲོལ་རིག་གནས་ཀྱི་སྒོམ་གཞིའི་ནང་བཅུག་ནས་ཞིབ་འཇུག་བྱེད་རྒྱུ་ནི་ཤིན་ཏུ་གལ་ཆེའོ། །

 ཟུར་བལྟའི་ཡིག་ཆ། 

[1]«ཀྲུང་གོ་བོད་རིག་པ»རྐང་ཚ་ཞེས་པའི་མིང་དང་འབྲེལ་ཏེ་ལྡོང་དང་ཚ་ཆེན་བཅོ་བརྒྱད་ལ་དཔྱད་པ། ཀུན་དཔལ་ཚེ་རིང་། P10

[2]ཇོ་བོ་རྗེ། «བཀའ་ཆེམས་ཀ་ཁོལ་མ»ཀན་སུའུ་མི་རིགས་དཔེ་སྐྲུན་ཁང་། ༡༩༨༩ལོའི༩པར་ཐེངས་དང་པོར་བཏབ། P84

[3]དོན་གྲུབ་རྒྱལ་དང་ཁྲིན་ཆིན་དབྱིན་གཉིས་ཀྱིས་བསྒྱུར།«ཐང་ཡིག་གསར་རྙིང»མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན། ༡༩༨༣ལོའི་ཟླ༦པར་ཐེངས་དང་པོར་དཔར།p6 p18

[4]དོན་གྲུབ་རྒྱལ་དང་ཁྲིན་ཆིན་དབྱིན་གཉིས་ཀྱིས་བསྒྱུར།«ཐང་ཡིག་གསར་རྙིང»མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན། ༡༩༨༣ལོའི་ཟླ༦པར་ཐེངས་དང་པོར་དཔར།p6 p18