སྟག་རི་ཐིས་བ་བཀྲ་ཤིས་ཆོས་རྫོང་ངོ་སྤྲོད་མདོར་བསྡུས།    ཕྲེང་བ་དམར་པོ་རྩོམ་སྒྲིག་ཁང་གིས། དེ་ཡང་མཁས་ཤིང་གྲུབ་པའི་བདག་ཉིད་ཆེན་པོ་སྐྱབས་རྗེ་བློ་བཟང་ཉི་མའི་གདན་ས་དམ་པ་འདི་ཉིད། རྨ་ཀློང་དལ་འབབ་རིང་མོའི་ འགྲམ་ངོགས་ནས་ཤར་ཕྱོགས་སུ་ལེ་དབར་སུམ་ཅུ་ལྷག་གིས་ཆོད་པའི་སར། དགེ་ལྡན་གྲུབ་སྡེ་སྲུང་པའི་གནས་བདག་ཆེན་པོ་དགེ་ བསྙེན་བློ་བཟང་བསྟན་སྐྱོང་གི་ཕོ་བྲང་རྡོ་རྗེ་འབར་བའི་གླང་ཆེན་འགྱིང་བ་ལྟ་བུ་རྒྱབ་རིའི་ཚུལ་དུ་ལྷུན་ཆགས་ཤིང་། དེའི་གཡས་སུ་ གནོད་སྦྱིན་དྲེགས་པ་ལྕམ་སྲིང་དངོས་སུ་འཁོར་ཞིང་བྲག་དམར་པོ་མཆོང་ལྡིང་ལྟ་བུའི་འདབས་རོལ་སུ་ཆགས་ཡོད་ལ། མཚན་ལ་ ཐིས་བ་བཀྲ་ཤིས་ཆོས་རྫོང་ངམ་དགའ་ལྡན་བཀྲ་ཤིས་གསུང་རབ་གླིང་་ཟེར་ཞིང་ཁྲི་ཀའི་དགོན་མ་ལག་ཉེར་ལྔའི་ཡ་གྱལ་དགེ་ལུགས་པའི་དགོན་པ་ཞིག་ཡིན། དགོན་པ་འདི་ཉིད་སྔོན་སྟག་རི་བླ་མ་ཟེར་པས་རྐ་མགོ་ནང་དུ་རབ་ཕྱོགས་མེ་འབྲུག་༡༦༡༦་ཙམ་ལ་སྟག་རི་གྲྭ་ཚང་བཏབ་པ་ལ། དུས་ཕྱིས་ལྷོ་བྲག་གྲུབ་ཆེན་ལས་ཀྱི་རྡོ་རྗེའི་སྒྱུ་མའི་རོལ་གར་ལྷོ་བྲག་སེང་གེ་རྒྱལ་མཚན་ཡུལ་འདིར་ཕྱག་ཕེབས་པས། སྟག་རི་བླ་མས་དགོན་གྲོང་བླ་གྲྭ་དང་བཅས་པ་རྗེ་འདིའི་ཕྱག་ཏུ་ཕུལ། མཐར་རབ་དྲག་མེ་གླང་༡༦༣༧ལོར་གནས་འདིར་གཟུགས་སྐུའི་བཀོད་པ་བསྡུས། དེ་ཉིད་ཀྱི་སྐུ་ཕྲེང་གཉིས་པ་རྗེ་བཙུན་དམ་པ་བློ་བཟང་ཉི་མ་མཆོག་ནི། ས་སྟག་ལོར་（༡༦༣༨)སྟག་རི་ཐིས་བ་ཚང་དུ་ འཁྲུངས་བར་བརྟེན། སྐུ་སྐྱེས་ཕྱི་མ་རྣམས་ལ་ཐིས་བ་ཞེས་པའི་མིང་ཆགས། རབ་དྲག་ཆུ་ཡོས་༡༦༦༣ལོར་ད་ལྟའི་དགོན་གནས་འདིར་གནས་སྤོས་ཏེ། ཐིས་བ་བཀྲ་ཤིས་ཆོས་རྫོང་ཕྱག་འདེབས་མཛད་ཅིང་བཅའ་ཡིག་ཆེན་མོ་མཛད། གནམ་བསྐོས་སའི་དབང་ཕྱུག་ཁང་ཞི་བདེ་སྐྱིད་རྒྱལ་བོས་ཨེར་ཏི་ནི་བློ་བཟང་ཉི་མ་ཞེས་མཛན་གྱིས་གཟེངས་བསྟོད། ལྕང་སྐྱ་རིན་པོ་ཆེས་དགོན་པའི་མཚན་ལ་དགའ་ལྡན་བཀྲ་ཤིས་གསུང་རབ་གླིང་ཞེས་གསོལ་ཞིང་གཟིགས་སྐྱོང་ཚད་མེད་གནང་། བློ་བཟང་ཐུབ་བསྟན་གསལ་བྱེད་ཆོས་ཀྱི་ཉི་མ་མཆོག་ནི་སྐུ་གོང་མའི་ཚ་བོར་འཁྲུངས། དཔལ་རྡོ་རྗེ་འཇིགས་བྱེད་ཀྱི་ཞལ་གཟིགས་ཤིང་། གྲུབ་པའི་གོ་འཕང་མཐོན་པོར་མངའ་བརྙེས། ཡབ་རྗེ་གསེར་ཁང་བ་བློ་བཟང་བསྟན་འཛིན་རྒྱ་མཚོས་འདི་བའི་ཞབས་ལ་གཏུགས་ཤིང་། ཁྲི་ཆེན་བསོད་ནམས་གྲགས་པ་ནས་བརྒྱུད་པའི་གཅོད་དབང་གསན། རྗེ་འདིའི་རིང་ལ་རྙེ་ཐམས་ཅད་མཁྱེན་པ་ངག་དབང་བསྟན་འཛིན་ཉི་མས་བསྟན་འགྲོ་སྤྱི་ལ་སྨན་པར་དགོངས་ནས་བསྟན་སྲུང་དམག་ཟོར་མའི་གཏོར་སྒྲུབ་དང་འཆམ་པ་གྲྭ་ཚང་བཙུགས་གནང་མཛད་དོ། དེ་ལས་སྐུ་ཕྲེང་རིམ་བྱོན་མུ་ཏིག་གི་བསྟར་ལ་བརྒྱུས་འདྲར་བྱོན་པ་འདི་ལྟ་སྟེ།      སྐུ་ཕྲེང་བཞི་བ། རྗེ་བཙུན་བློ་བཟང་བསྟན་པའི་རྒྱལ་མཚན།      སྐུ་ཕྲེང་ལྔ་བ། དགེ་འདུན་བཤད་སྒྲུབ་བསྟན་པའི་རྒྱལ་མཚན།      སྐུ་ཕྲེང་དྲུག་པ། དགེ་འདུན་ལུང་རྟོགས་བསྟན་པའི་ཉི་མ།      སྐུ་ཕྲེང་བདུན་པ། བློ་བཟང་ཐུབ་བསྟན་ཉི་མ། འདི་འདྲའི་སྐྱེས་ཆེན་དམ་པ་དག་གི་གདན་ས་ཁྱད་པར་ཅན་འདིའི་ལྷ་རྟེན་འགངས་ཆེན་དང་གནས་ཀྱི་ཆེ་བ་སོགས་མཛད་འཕྲིན་རེ་རེ་ལོ་རྒྱུས་སུ་གསལ་ལ་མང་འགྲོ་བས་འདིར་བཀོད་མེད། སྡེ་འདིར་ད་དུང་ཐིས་བ་བླ་བྲང་དང་ཀུན་བཟང་བླ་བྲང་། སྒོ་མང་བླ་བྲང་། ཐར་ཤུལ་རིན་པོ་ཆེའི་གཟིམ་ཤག་སོགས་བླ་བྲང་དུ་མ་མཆིས་ཤིང་། བླ་མ་ཡང་ཐིས་བ་ཚང་དང་ཀུན་བཟང་ཚང་། གཅན་ཆ་ཚང་སོགས་ཡོད་ལ། སྡེ་འདི་ཕྱག་འདེབས་མཛད་ནས་ད་ལྟའི་བར་ལོ་༣༤༤ཙམ་སོང་ཡོད་་པ་དང་། ཆོས་སྐྱོང་རྣམས་ཀྱི་ལྷ་འཆམ་བཙུགས་ནས་ལོ་ངོ་ཉིས་བརྒྱ་སུམ་བཅུ་ཙམ་ཕྱིན་ཏོ།།
   Places  subjects 2603 For more information about this term, see Full Entry below.Subjects Tibet and HimalayasTopicsFull EntryRelated Subjects (7)Related Texts (10)Related Audio-video (6)Related Images (14) Amdo  subjects 1079 For more information about this term, see Full Entry below.Subjects Tibet and HimalayasBibliographic ClassificationTibetan and HimalayanCultural and Environmental GeographyPlacesTibetFull EntryRelated Subjects (1)Related Texts (24) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192)