ཐིས་པ་དགོན་པའི་འཆམ་པ་གྲྭ་ཚང་གི་ལོ་རྒྱུས་མདོར་བསྡུས།    སྤྱིར་ནང་པ་སངས་རྒྱས་པའི་གར་འཆམ་ནི་སངས་རྒྱས་ཀྱིས་གསུངས་པའི་རྒྱུད་སྡེ་བཞིའི་ནང་གི་རྣལ་འབྱོར་རྒྱུད་དང་རྣལ་འབྱོར་བླ་མེད་རྒྱུད་འགའ་ཞིག་ལས་གསུངས་པའི་རྡོ་རྗེ་གར་ཞེས་པ་དེ་ཡིན་ལ། རང་དགོན་དུ་གར་འཆམ་དར་བའི་ལོ་རྒྱུས་ནི་《བྱ་ཁྱུང་གདན་རབས་གཏམ་གྱི་ཉིང་ཁུ》ལས། མཁན་རབས་ཉེར་བཞི་བ་ངག་དབང་ཚུལ་ཁྲིམས་ཏེ་མཚན་གཞན་ལ་ཡེ་ཤེས་རྒྱ་མཚོའི་རིང་ལ་མངའ་རིས་ཕྱོགས་ནས་འོངས་པའི་ བག་ཙེའི་འཆམ་པ་མཁས་པ་ཞིག་གིས། ཛ་ཛ་ཀྱེ་ཀྱེ་ཞེས་པའི་དྲག་སྐུལ་དང་སྦྲགས་པའི་སྒྲོག་འགྲོས་ཀྱི་འཆམ་དར་ནས་ཡུན་རིང་མ་ལོན་པའི་དུས་ཤིག་ན། བོད་རབ་བྱུང་བཅུ་གཉིས་པར་རྙེ་སྐུ་ཕྲེང་གཉིས་པ་ངག་དབང་བསྟན་འཛིན་ཉི་མས་བསྟན་འགྲོའི་སྤྱི་ལ་སྨན་པར་དགོངས་ནས་དགོན་ ཡར་ནང་ལྷུན་གྲུབ་ཆོས་རྫོང་དུ་ཆོས་རྒྱལ་ལྕགས་མཁར་ཟུར་དགུ་བ་དང་། སྡེ་འདིར་བསྟན་སྲུང་དམག་ཟོར་མའི་རྒྱས་པའི་གཏོར་སྒྲུབ་དང་འཆམ་པ་གྲྭ་ཚང་གསར་འཛུགས་གནང་སྟེ་མཆུ་ཟླའི་ཚེས་གསུམ་ ནས་ཉ་ལ་འཆམ་དཔོན་དང་འཆམ་པ་རྒན་གྲས་ཀྱིས་གཙོས་པའི་འཆམ་པ་གྲྭ་ཚང་ཟུར་དུ་ཕྱེ་སྟེ་བྱ་ཁྱུང་གི་ཕྱག་རྒྱུན་ལྟར། ཡི་དམ་རྡོ་རྗེ་འཇིགས་བྱེད། མགོན་པོ། ཆོས་རྒྱལ། ལྷ་མོ། ཙ་མུ་ཊི། བག་ཙེ་འཁོར་གསུམ། ཆུ་སྲིན་སེང་གེ་གཉིས། ཁྲ་བྱ་རོག་གཉིས། ཞྭ་ནག་པ་གཉིས་བཅས་ཆོས་སྐྱོང་བཅུ་བཞིའི་གར་འཆམ་དང་། གཞན་ཡང་བན་བོན་གཉིས། ཨ་ཙ་ར་གཉིས། ཐོད་སྐམ་གཉིས། ཀེང་རུས་བཞི། ཤྭ་བདའ་འཁོར་དྲུག་བཅས་ཀྱི་གར་འཆམ་བཙུགས་ནས་ད་ལྟའི་བར་དུ་ལོ་རྒྱུས་སུ་འཁོད་པ་ལྟར་ན་ཕལ་ཆེར་ལོ་ངོ་༢༣༠ནས་༢༦༠ཙམ་ཕྱིན་པར་གྲགས་ཤིང་། དུས་དེ་ནས་བཟུང་ལོ་ལྟར་མཆུ་ཟླའི་ཚེས་བཅུ་བཞིའི་ཞོགས་པར་མགོན་ཆོས་ལྔའི་གཏོར་ཆོག་གསུངས་རྗེས། གདན་ཞུས་ལྟར་རྙེ་མཆོག་སྤྲུལ་རིན་པོ་ཆེ་གཙོས་པའི་དགོན་གོང་མའི་གཞིས་བྱེས་ཀྱི་བླ་གྲྭ་ཡོངས་རྫོགས་འཆམ་གཟིགས་ལ་ ཕེབས་ཏེ། ཉིན་དེའི་རོལ་མོ་འབུབ་དཀྲོལ་རྡུང་གསུམ་གྱི་འགན་ཁུར་ཕྲག་ཏུ་བཞེས་དགོས། འཆམ་དང་བསྒྲལ་ཆོག་སྦྲགས་ཏེ་མཇུག་ཏུ་གཏོར་རྒྱག་དང་བཅས་ཕྱག་ལེན་རྒྱས་པའི་ལུགས་ལྟར་བྱེད་པ་ད་ལྟ་ཡང་མ་ཉམས་རྒྱུན་མུས་སུ་སྐྱོང་བཞིན་ཡོད་དོ།།
   History  subjects 2586 For more information about this term, see Full Entry below.Subjects Tibet and HimalayasTopicsFull EntryRelated Subjects (1)Related Texts (6)Related Audio-video (17)Related Visuals (1) Amdo  subjects 1079 For more information about this term, see Full Entry below.Subjects Tibet and HimalayasBibliographic ClassificationTibetan and HimalayanCultural and Environmental GeographyPlacesTibetFull EntryRelated Subjects (1)Related Texts (24) Tipa Gön Trashi Chödzong  places 22842 For more information about this term, see Full Entry below.Feature Type MonasteryFull EntryRelated Subjects (6)Related Places (1)Related Texts (2)