རྒན་པོའི་ནད་མེད་ཚེ་བསྲིང་གི་སྐོར་མདོར་ཙམ་གླེང་བ།           དེ་ཡང་མི་རྣམས་ཀྱི་འཚོ་བའི་ཆུ་ཚད་ཇེ་ལེགས་སུ་འགྲོ་བའི་དུས་དང་བསྟུན་ནས་ཕྱི་ནོར་གྱི་བདེ་བ་ཙམ་ཁོ་ནའི་མི་ཆོག་པར་ནང་སེམས་ཀྱི་ལོངས་སྤྱོད་དང་སེམས་ཀྱི་བདེ་སྐྱིད་བསྐྲུན་ཐབས་ཀྱི་ཐད་ལ་དེ་ལས་ཀྱང་རེ་འདུན་དང་འཚོལ་སྙེགས་བྱེད་མཁན་མང་ནས་མང་དུ་འགྲོ་བཞིན་ཡོད་པར་མ་ཟད། ཚང་མས་རང་ཉིད་ལ་བདེ་ཐང་གི་སེམས་ཁམས་ཤིག་དང་བདེ་ཐང་གི་ལུས་པོ་ཡག་པོ་ཞིག་ཡོད་དགོས་པའི་འདུ་ཤེས་བཟང་པོ་ཞིག་ད་ལྟའི་དུས་རབས་འདིར་ཀུན་གྱིས་དོ་སྣང་བྱ་ཡུལ་གལ་ཆེན་ཞིག་ཏུ་གྱུར་ཡོད། དེ་ནི་སྤྱིར་འགྲོ་བ་མིའི་རིགས་ཀྱི་ཤེས་རིག་འཕེལ་རྒྱས་ལས་བྱུང་བའི་རྟགས་མཚན་ཞིག་དང་ཡང་ན་དཔལ་འབྱོར་དར་རྒྱས་ཀྱི་འབྲས་རྟགས་གང་ཞིག་གི་སྣང་ཚུལ་ཡིན་ནའང་འདྲ། གང་ལྟར་གོམ་གང་མདུན་སྤོས་ཀྱི་རྟགས་མཚན་བཟང་པོ་འདི་དང་འབྲེལ་ནས་འཇིག་རྟེན་གྱི་ཕ་མ་ཡོངས་ཀྱི་སྐུ་གཟུགས་བདེ་ཐང་དང་ནད་མེད་ཚེ་རིང་ཡོང་པའི་ཐད་ལ་རང་གི་ཞིབ་འཇུག་གི་ཁ་ཕྱོགས་དང་མཐུན་པའི་སྒོ་ནས་བསམ་ཚུལ་མདོར་བསྡུས་ཤིག་རང་དང་སྐལ་བ་མཉམ་པའི་གྲོགས་པོ་ལྷན་རྒྱས་དག་ལ་དྲན་སྐུལ་གྱི་ཚུལ་དུ་གླེང་ཁུལ་བྱས་པ་ཡིན།    དང་པོ། རྒན་པོའི་མིང་གི་གོ་དོན་དང་ན་ཚོད་ཀྱི་དབྱེ་མཚམས།     རྒན་པོ་ཞེས་པ་ནི་དཔལ་ལྡན་གསོ་བ་རིགས་པའི་གཞུང་ལས། འཕེལ་འགྱུར་བདུན་ཅུའི་བར་དུ་དར་མ་སྟེ།། དེ་ལས་ཟད་པ་ཕན་ཆད་རྒན་པོ་ཡིན།།ཞེས་གསུངས་པ་ལྟར་ལོ་ན་བདུད་ཅུ་ལས་འདས་ཏེ་ལུས་ཀྱི་ཟུངས་སྟོབས་དང་དབང་པོའི་ནུས་པ་རྣམས་བྲི་བའམ་ཡང་ན་ཟད་པས་ཕན་ཆད་ནི་རྒན་པོ་ཡིན་ཞེས་འདོད་པ་རྣམས་ནི་ཚེ་ལོ་བརྒྱ་བའི་དབང་དུ་མཛད་པ་ཡིན།དེང་སྐབས་འཛམ་གླིང་འཕྲོད་བསྟེན་རྩ་འཛུགས་ཀྱིས་གཏན་འབེབས་ལྟར་ན་ལོ་༦༥མན་གཞོན་ནུ་དང་། ལོ་༦༥ནས་༧༤བར་དར་མ། ལོ་༧༥ནས་༩༠བར་རྒན་པོ། ལོ་༩༠ནས་༡༢༠བར་ཤིན་ཏུ་རྒན་པོའི་ཁོངས་སུ་བརྩི་བཞིན་ཡོད་པས་སྐྱེ་ཁམས་རིག་པའི་ཆེད་མཁས་པ་སོགས་ཀྱིས་ཕྱོགས་བསྡོམས་བྱས་པ་ལྟར་ན་མིའི་ཚེ་ཚད་ཐུང་ཤོས་ཡང་ལོ་༡༠༠དང་རིང་ཤོས་༡༥༠བར་ཡིན་པར་འདོད་དེ། བོད་ལུགས་གསོ་རིག་གི་ཚིག་མཛོད་ཆེན་མོ་ལས། རྒན་པོ་ཞེས་པ་ནི་མི་ཕྱུགས་སོགས་ན་ཚོད་ཡོལ་བའམ་ལུས་ཀྱི་འབྱུང་ཁམས་རྒུད་པའི་རྒ་བའི་མིང་། ཅེས་གསུངས་པ་དང་། གནོད་བྱ་གནོད་བྱེད་ལ་སོགས་པས་གྲུབ་པའི་མིའི་ལུས་ཕུང་འདི་ཉིད་ལོ་ཟླ་དུས་ཀྱི་འཁོར་ལོ་རིམ་གྱིས་བགྲོད་པ་དང་འབྲེལ་འབྱུང་བའི་སྟོབས་རྣམས་ཀྱང་རིམ་པར་འགྲིབས་པས་ལུས་ཀྱི་དབྱིབས་དང་ནུས་པའི་སྟོབས། དབང་པོའི་ཚོར་བ་སོགས་རིམ་གྱིས་ཟད་ནས་སྔོན་རྟགས་སུ་ལུས་ཁམས་ཀྱི་ཤེད་ཤུགས་ཉམས་པ་དང་པགས་པའི་བཀྲག་མདངས་ཤོར་བ། ངོ་གདོང་གཉེར་མས་ཁྱབ་པ། ཤེས་པ་རྨོངས་ཤིང་འདོད་པའི་བྱ་བ་ཉམས་པ་སོགས་པའི་རྟགས་རྣམས་མངོན་པ་ལ་རྒས་པ་ཞེས་བརྗོད། གང་ལྟར་ཀྱང་ལུས་ཟུངས་ཀྱི་སྟོབས་བྲི་བའི་འགོ་ཚུགས་པ་ནས་བཟུང་རྒན་པོའི་དུས་རིམ་ལ་ངོས་འཛིན་གྱིན་ཡོད་པ་ནི་གཞུང་ཚད་མར་འཛིན་པ་མང་པོ་ཞིག་གི་ནང་དུ་གསལ་བོར་བསྟན་ཡོད་པས་ན། སྐབས་འདིའི་གླེང་བྱ་དང་དམིགས་ཡུལ་ནི་རྒན་པ་རྣམས་ཀྱི་ལུས་སེམས་བདེ་བར་གནས་པ་དང་ནད་མེད་ཚེ་རིང་ཡོང་བར་བསྲུང་འཛིན་བྱེད་ཐུབ་པའི་ཐབས་ཤེས་གང་ཡོད་ལག་ཏུ་བསྟར་རྒྱུ་ནི་བརྗོད་བྱ་དོན་གྱི་སྙིང་བོ་ཡིན།      གཉིས་པ། རྒན་པོའི་ནད་མེད་བདེ་ཐང་གི་ཐབས་ཤེས་དང་ལག་ལེན།    ༡  སེམས་ཁམས་ཀྱི་སྤྱོད་ལམ།        རྒན་པོ་ཞེས་པ་ནི་རླུང་གི་རང་བཞིན་གྱི་མི་ཡིན་པས་ལོ་ན་ཆེར་བགྲེས་པ་དང་ལྷན་དུ་སེམས་ཁམས་མི་སྙོམས་པ་དང་མིག་ལ་ སོགས་པའི་དབང་པོ་མི་གསལ་བ་བཅས་ཀྱི་དབང་གིས་རྒན་པ་ཚོའི་སེམས་ཁམས་ལ་ཚད་མི་འདྲ་བའི་གནོད་པ་གང་མང་ཞིག་ངང་ངམ་ཤུགས་ཀྱིས་ཐེབས་བཞིན་ཡོད་པ་རེད། རྒྱུ་མཚན་དེའི་ཕྱིར་དུ་རྒན་པོའི་སེམས་ཁམས་བདེ་ཐང་གི་ཐད་ལ་རང་གི་ལྟ་ཚུལ་འགའ་རེ་བཏོན་ཡོད་པ་གཤམ་གསལ་ལྟར།     རྒན་པོའི་སེམས་ཁམས་བདེ་ཐང་ཡོང་དང་མི་ཡོང་པ་ལ་རྐྱེན་གཉིས་ཀྱི་སྒོ་ནས་འཇོག་དགོས་ཏེ། དང་པོ་ནི་ཕྱིའི་རྐྱེན་དང་གཉིས་པ་ནི་ནང་གི་རྐྱེན་གཉིས་ལ་རག་ལས་ཡོད་པར་བསམ། ཕྱི་རྐྱེན་ནི་བུ་ཕྲུག་ཡ་རབས་རྣམས་ཀྱིས་རང་གི་ཕ་མའི་སེམས་ཁམས་སུ་ཕོག་ཐུག་རང་བཞིན་གྱི་གནོན་ཤུགས་སོགས་མི་སྟེར་པར་སེམས་ཁམས་བདེ་བོ་དང་འཚོ་བ་སྐྱིད་པོ་ཞིག་གི་ངང་ནས་ཕ་མའི་སེམས་ཁམས་བདེ་ཐང་ཡོང་པར་དོ་སྣང་དང་ཁག་ཐེག་ཡག་པོ་ཞིག་བྱེད་རྒྱུ་དེ་གལ་ཆེ་ལ། གང་སྒོས་སུ་དུས་རྒྱུན་གྱི་འཚོ་བའི་ནང་དུ་གཞོན་པ་རྣམས་ཀྱིས་རང་གི་ལུས་ངག་ཡིད་གསུམ་གྱི་སྤྱོད་པ་གཙང་མ་ཞིག་གི་སྒོ་ནས་རྒན་པོའི་རིགས་ལ་བཀུར་བསྟི་དང་ཞབས་ཞུ་གང་ལེགས་བྱས་ན་ད་གཟོད་འཇིག་རྟེན་གྱི་ཕ་མ་ཡོངས་ཀྱི་ལུས་སེམས་བདེ་ཐང་དང་ནད་མེད་ཚེ་རིང་ཡོང་བར་ཕན་པ་ཆེན་པོ་འབྱུང་གི་རེད།      ནང་རྐྱེན་ནི་རྒན་པ་རང་ཉིད་ཀྱི་སེམས་ཁམས་དང་འགྲོ་འདུག་ལ་སོགས་སྒོ་གསུམ་གྱི་སྤྱོད་པ་ཐམས་ཅད་ལ་རག་ལས་ཡོད་པ་རེད། དེ་ནི་རྟག་ཏུ་རྒན་པ་རང་ངོས་ནས་སེམས་ཁམས་དྭངས་མོ་ཞིག་ཡོད་དགོས་པ་ནི་སེམས་ཁམས་བདེ་ཐང་གི་གཞི་རྩ་ཡིན་པ་དང་། ད་དུང་ཨུ་ཚིགས་ཆེ་བའི་གཤིས་ཀ་གྱོང་པོ་དང་། ཡིད་མུག་པོ། དོགས་པ་སྣ་དགུ་ཅན། ཁེར་འགྲོ་ཁེར་འདུག གཤིས་ཀ་མི་ཁྱུ་དང་མི་འདྲེས་མཁན། ལས་ཀ་གང་བྱས་ཀྱང་ཐེ་ཚོམ་ཆེ་བ། རང་གཤིས་རང་གི་ཁྱིམ་མི་དང་ཡང་ན་མཐའ་འཁོར་གྱི་མི་དང་འགལ་བར་གྱུར་བའི་རྒན་པོ་སོགས་ནི་ནམ་ཞིག་རང་ཉིད་སེམས་སྡུག་དང་ཞེ་སྡང་ཁོང་ཁྲོའི་རྒྱུ་རུ་ཟད་འགྲོ་བས་ངེས་པར་དུ་རྒན་པ་རྣམས་ཀྱིས་རང་གི་ལུས་ངག་ཡིད་གསུམ་གྱི་སྤྱོད་པ་སྟེ། རབ་ཡིན་ན་ཉིན་རེར་ཞིབ་གཤེར་ཐེངས་རེ་བྱེད་རྒྱུ་མ་ཟད་རང་གིས་རང་གི་སེམས་ཁམས་སྙོམ་སྒྲིག་བྱེད་ཐབས་ཀྱི་ཐབས་ཤེས་གང་ལེགས་ཤིག་བསྟེན་དགོས། དེང་གི་དུས་འདིར་ཕྱོགས་སྒོ་མོ་ནས་སེམས་ཁམས་རིག་པ་སྨྲ་བ་དག་གིས་སེམས་ཁམས་བདེ་ཐང་གི་སྐོར་ལ་ཞིབ་འཇུག་གི་ཐབས་ལམ་མང་པོ་ཞིག་བཏོན་ཡོད་ནའང་དམིགས་ཚད་ཆེས་མཐོ་བའི་སེམས་ཁམས་བདེ་ཐང་གི་ཐབས་ཤེས་ནི། ནང་པ་སངས་རྒྱས་པའི་དགོངས་པ་ལྟར་ཐོག་མར་སྐྱབས་འགྲོ་དང་། སེམས་བསྐྱེད་ལ་སོགས་པའི་བསླབ་བྱ་དག་ལ་བློ་སྦྱོང་དང་ཚོགས་བསགས་སྒྲུབ་སྦྱོང་གི་ལས་གང་རུང་ལ་བློ་གཅིག་སེམས་གཅིག་གིས་འབད་པ་བྱས་ན་རང་གི་སེམས་ཁམས་སྐྱིད་པོ་དང་སྣང་བ་སྤྲོ་པོ་ཞིག་ཡོང་ཐུབ་པ་ལས་གཞན། མར་གྱུར་སེམས་ཅན་ཐམས་ཅད་ཀྱི་སེམས་ཁམས་བདེ་ཐང་གི་ཐད་ལའང་ནུས་པ་བསམ་གྱིས་མི་ཁྱབ་པ་ཞིག་ཐོན་ཐུབ་ཀྱིན་ཡོད། བདག་ཅག་གི་སྟོན་པ་ཐུགས་རྗེ་ཅན་གྱིས། ངས་ནི་ཁྱེད་ལ་ཐར་བའི་ལམ་སྟོན་གྱིས།། ཐར་བ་རང་ལ་རག་ལས་ཤེས་པར་གྱིས།། ཅེས་གསུངས་པ་ནང་བཞིན་སེམས་ལས་བྱུང་བའི་ནད་རིགས་ཡོད་ཚད་དེ་གཙོ་བོ་རང་གི་སེམས་ལ་ཐུག་ཡོད་པ་ནི་ཤེས་དགོས།   ༢ ཟས་སྐོམ་གྱི་བདེ་སྲུང་།     རྒན་པོ་ནི་རླུང་གི་རང་བཞིན་ཅན་ཡིན་པས་ན་ཟས་སྐོམ་གྱི་རིགས་ཡང་ནུས་པ་དྲོད་བཅུད་དང་ལྡན་པའི་ཟས་སྐོམ་རིགས་རི་དེའི་རང་བཞིན་དང་ལུས་ཁམས་སོགས་ལ་བསྟུན་ནས་གང་ལ་གང་འཚམ་རེ་བསྟེན་དགོས་རྒྱུ་རེད། དཔེར་ན། ལུག་ཤ་དང་། ཚགས་ཤ ཁྱིམ་བྱའི་ཤ་སོགས་འོས་ཤིང་འཚམ་པ་རེ་བསྟེན་ན་བཟང་ལ། གལ་ཏེ་ཤ་ཡི་རིགས་སྤང་ནས་དཀར་ཟས་ཁོ་ན་ལ་རོལ་ནའང་ལུས་ཟུངས་ལ་མི་གནོད་པའི་གཏན་ཚིགས་རང་བཞིན་གྱི་རྒྱུ་མཚན་གླེང་མཁན་ནི་དེང་དུས་ཀྱི་རིག་པ་སྨྲ་བ་དག་གིས་གསུང་གི་བདུད་རྩི་མང་པོ་བསྩལ་ཡོད་པ་དེ་དག་ལ་གཟིགས་ན་ཤེས་ཐུབ་ལ། ཟས་ནི་སྤྱིར་ན་གྲོ་ནས་སྲན་གསུམ་དང་སྲོ་བ་སྲེ་ད་སོགས་རྒན་པོའི་ལུས་ཁམས་སུ་ཤིན་ཏུ་འཕྲོད། ལྷག་པར་དུ་ནངས་སྔ་མོ་སྦྲང་དཀར་རྩམ་པ་དང་སྤྲི་ཞོགས་ལ་སོགས་བཅུད་ལྡན་གྱི་རིགས་ཅུང་ཟད་རེ་བསྟེན་པ་དང་། ཉིན་གུང་ཁྱིམ་བྱའི་སྒོང་ཁུ་དང་དཀར་ཤ། རྩམ་ཁུ་དང་བག་ལེབ་བཅས་བསྟེན་པ། དགོང་མོ་འབྲས་ཐུག་དང་སྔོ་ཚོད་བཅུད་ལེན་གྱི་ནུས་པ་དང་ལྡན་པའི་ཟས་རིགས་ཏེ་རང་གི་ལུས་ཟུངས་ཀྱི་ཁམས་དང་བསྟུན་ནས་མཁྲེགས་པོ་དང་ཁོངས་པོ་རུལ་སུངས་དང་སྔོ་ངན་རློན་པ་སོགས་ཀྱི་རིགས་མ་ཡིན་པ་དག་བསྟེན་དགོས།   རྒན་པོའི་སྐོམ་གྱི་རིགས་ནི། གོང་དུ་གསུངས་པ་བཞིན་བུར་ཆང་དང་རུས་ཆང་ལ་སོགས་ཆང་གི་རིགས་གང་ལ་གང་འཚམ་རེ་དང་། དུས་རྒྱུན་དུ་ཞོགས་པ་སྔ་མོར་ཆུ་བསྐོལ་ཕོར་གང་རེ་རྒྱུད་མཐུད་ཀྱིས་བསྟེན་ན་ཁྲག་གི་ནད་རིགས་སྤྱི་དང་སྒོས་སུ་ཕོ་བའི་མེ་དྲོད་སྐྱེད་ཅིང་ཕོ་རྒྱུ་ དྭངས་གཙང་དང་ལུས་ཁམས་ཡོངས་ཀྱི་རླན་གཤེར་གྱི་ཆ་གཟུང་འཛིན་བྱེད་ཐུབ་པ་ལས་ཆམ་པ་ལ་སོགས་པའི་ནད་རིགས་མང་པོ་སྔོན་འགོག་བྱེད་པར་ཡང་དགེ་མཚན་ཆེན་པོ་ཡོད། སློབ་དཔོན་ཕ་ཁོལ་གྱིས། འོ་མའི་སྦྱོར་བ་ཡང་སེང་ལྡེང་གི་ཁུ་བ་མ་གཏོགས་པ་མར་དང་སྦྲང་རྩི་དང་ལྡན་པ་བཏུང་ཞིང་ཁ་ཟས་སུ་ཤ་ཁུ་ཉི་ཚེ་འཐུངས་ན་ལོ་ཉིས་བརྒྱ་ཐུབ་པར་འགྱུར་རོ།། ཞེས་གསུངས་པ་ལྟར་བ་འབྲི་མཛོ་གསུམ་གྱི་འོ་མ་དང་ཞོ་ཕྲུམ་ལ་སོགས་རང་གི་རང་བཞིན་དང་ཡུལ་དུས། གཟུགས་པོའི་གནས་ཚུལ་སོགས་ལ་གཞིགས་ནས་བསྟེན་ན་ལུས་ཕུང་བདེ་ཐང་དང་ནད་མེད་ཚེ་རིང་ཡོང་པར་ནུས་པ་བླ་ན་མེད་པ་འབྱུང་ངོ་།།    ༣ སྤྱོད་ལམ་གྱི་བདེ་སྲུང་།     སྤྱིར་སྤྱོད་ལམ་ཞེས་པ་ནི་མི་ཞིག་གིས་སྤྱི་ཚོགས་སྟེང་ལུས་ངག་ཡིད་གསུམ་གང་རུང་གི་སྒོ་ནས་འཚོ་བ་སྐྱེལ་བ་དང་ཡང་ན་བྱ་བ་གང་སྒྲུབ་པའི་འགུལ་སྐྱོད་ཀྱི་རྣམ་པ་རེ་རེ་ལ་སྤྱོད་ལམ་ཞེས་བརྗོད་ན་ཆོག་ལ། ལྷག་པར་དུ་སྐབས་རུ་བབ་པ་ནི་བགྲེས་པོ་དག་གི་སྤྱོད་ལམ་ཡིན་པས་ན་ཐོག་མར་ཁོ་རང་ཚོའི་རང་བཞིན་དང་གཟུགས་པོའི་གནས་ཚུལ་སོགས་ལ་བསྟུན་ནས་གང་ལ་གང་འཚམ་གྱི་སྤྱོད་ལམ་ཞིག་བསྟེན་ཤེས་ན་ཁོ་རང་ཚོའི་ལུས་སེམས་གཉིས་ཀྱི་བདེ་ཐང་གི་ཕྱོགས་ལ་ཕན་པ་རྒྱ་ཆེན་པོ་ཡོད་པ་མ་ཟད་རང་གི་ཚེ་མཇུག་གི་བྱ་གཞག་གང་ལའང་ཐད་ཀར་འབྲེལ་བ་ཟབ་མོ་ཞིག་ཡོད་པ་རེད།   ༡ འགྲོ་འདུག་གི་སྤྱོད་ལམ།    རྒན་པོའི་རིགས་ནི་ལོ་ན་བགྲེས་པའི་དབང་གིས་བྱིས་པ་དང་དར་མ་ལས་ཅུང་འགྲོ་འདུག་གི་ཚད་ནི་ཇེ་ཉུང་དགོས་པ་ཞིག་རེད་མོད།འོན་ཀྱང་དེང་སྐབས་གྲོང་གསེབ་དང་གྲོང་ཁྱེར་གང་ན་ཡང་རྒན་པོའི་འགྲོ་འདུག་གི་ཚད་ནི་ཇེ་མང་དུ་འགྲོ་བཞིན་ཡོད། རྒྱུ་མཚན་དེ་ནི་གྲོང་ཁྱེར་དུ་རྒན་པ་རྣམས་ཀྱིས་རང་གི་ཚ་བོ་དང་ཚ་མོ་དེ་དག་ནངས་སྔ་ལངས་དང་དགོང་འཕྱི་ཉལ་གྱིས་སློབ་གྲྭར་ཡར་བསྐྱེལ་མར་ལེན་བྱེད་པའི་འགན་ཁུར་ཡོད་པར་མ་ཟད། དར་མ་རྣམས་ལས་ཀར་སོང་རྗེས་ཁྱིམ་ཚང་ཞིག་གི་ལས་ཀ་ཆེ་ཆུང་ཐམས་ཅད་ལོ་ན་དྲུག་ཅུ་ནས་བདུན་ཅུ་ཡན་གྱི་རྒན་པ་ཚོའི་ཕྲག་ཐོག་ཏུ་བབས་ཡོད་པས་ན་ཁོ་རང་ཚོའི་འགྲོ་འདུག་གི་ཚད་དང་སེམས་ཁུར་ཧ་ཅང་ཉུང་ཉུང་མ་རེད། དེའི་སྟབས་ཀྱིས་རྒན་པ་རྣམས་ཀྱི་གཟུགས་པོ་ཡམ་ཡོམ་དང་གོམ་པ་ཁྱར་ཁྱོར་གྱི་ངང་ནས་སྲང་ལམ་ག་གེ་མོ་རུ་རླངས་འཁོར་སོགས་ཀྱི་འཇིགས་སྐྲག་དང་བདེ་འཇགས་ཀྱི་ཉེན་ཁ་སོགས་མང་བོར་ཕྲད་དང་འཕྲད་བཞིན་ཡོད་པས། ཕ་བཟང་གི་བུ་དང་མ་བཟང་གི་བུ་མོ་རྣམས་ཀྱིས་རང་གི་ཕ་མའི་འགྲོ་འདུག་གི་བདེ་ཐང་ལ་སེམས་ཁུར་དང་དོ་སྣང་བྱེད་དགོས་ལ། ལྷག་པར་དུ་འཇིག་རྟེན་གྱི་རྒན་པོ་ཡོངས་ཀྱི་འགྲོ་འདུག་གི་བདེ་ཐང་ཐད་ལ་དོ་སྣང་དང་སེམས་ཁུར་བྱེད་རྒྱུ་ནི་གལ་འགངས་ཤིན་ཏུ་ཆེའོ།།   ༢ གཉིད་ལོག་གི་སྤྱོད་ལམ།      རྒན་པོ་རྣམས་དུས་རྒྱུན་གྱི་འཚོ་བའི་ནང་གཉིད་ལོག་ཆེས་དྲགས་པ་ཡང་མ་ཡིན་པར་ཆུང་བ་ཡང་མ་ཡིན་པར་རང་གི་ལུས་སྟོབས་ཀྱི་ཁམས་དང་འཚམ་པའི་གཉིད་ལོག་ཐབས་ཤིག་དགོས་ལ། ཁྱད་པར་དུ་ཉིན་མཚན་གཅིག་གི་ནང་མ་མཐའ་ཡང་ཆུ་ཚོད་༧-༨བར་གཉིད་དགོས་པ་རེད། དཔལ་ལྡན་གསོ་བ་རིག་པའི་རྒྱུད་ལས། སྤྱོད་ལམ་གཉིད་ལོག་དལ་དང་སེམས་དགའ་བརྟ།། ཞེས་གསུངས་པ་ལྟར། གཉིད་ལོག་གི་སྤྱོད་ལམ་དེ་དུས་རྟག་ཏུ་བདེ་བར་གཉིད་ལོག་ཅིང་འགྲོ་འདུག་དལ་བར་འདུག་པ་བཅས་ཀྱི་གཉིད་ལོག་ཐབས་ཤིག་དུས་རྒྱུན་དུ་གོམས་པར་བྱས་ན་རང་གི་སེམས་དགའ་བར་བྱེད་པ་དང་ནད་མི་འབྱུང་བ་སོགས་གཉིད་ཀྱི་བརྟ་བའི་མཆོག་ཏུ་གྱུར་རོ།།    ༣ ཁྲུས་བྱེད་ཐབས།    དུས་རྒྱུན་དུ་རྒན་པོའི་ལག་པ་དང་རྐང་པ་བཀྲུ་པ་དང་། ད་དུང་མགོ་བོ་དང་ཁ་སྣ་སོགས་གཙང་མར་བྱེད་པ། སེན་མོ་གཅོད་པ། རྣ་སྤབས་ལེན་པ། མ་མཐའ་ཡང་གཟའ་འཁོར་གཅིག་གི་ནང་དུ་ཆེས་ཉུང་ནའང་ཁྲུས་ཐེངས་གཅིག་རེ་བྱེད་དགོས།    ༤ ལུས་སྦྱོང་བྱེད་ཐབས།    རྒན་པོ་དར་མ་དང་བསྡུར་ན་འབྱུང་བའི་ཁམས་དང་ལུས་སྟོབས་སོགས་རིམ་གྱིས་ཉམས་རྒུད་དུ་འགྲོ་བཞིན་ཡོད་པས་ན། ལུས་སྦྱོང་གི་གདམ་ག་ནི་རང་གི་གཟུགས་པོའི་གནས་ཚུལ་དང་། དུས་རྒྱུན་གྱི་འཚོ་བའི་གོམས་གཤིས། ཁོར་ཡུག་གི་གནས་ཚུལ། དུས་ཚིགས་ཀྱི་རང་བཞིན། གནམ་གཤིས་ཀྱི་འགྱུར་ལྡོག་སོགས་ལ་གཞིགས་ནས་ལུས་སྦྱོང་བྱེད་ཐབས་ཀྱི་ཆོ་ག་དངོས་སུ་ལག་ཏུ་ལེན་དགོས་པ་ནི་ཐོག་མའི་སྔོན་འགྲོ་རེད། སྤྱིར་བ་གང་ཡིན་རུང་རྒྱུན་མཐུད་རང་བཞིན་གྱི་གོམས་གཤིས་བཟང་པོ་ཞིག་ཡོད་དགོས་པ་ནི་གཙོ་བོ་ཡིན་ལ། དེ་བཞིན་དུ་ལུས་སྦྱོང་བྱེད་ཐབས་དེ་ཡང་རང་ཉིད་ཀྱི་དགའ་ཕྱོགས་དང་བསྟུན་ནས་དཔེར་ན། ཞོགས་རྩལ་རྒྱུག་སྦྱོང་བྱེད་པ་དང་། ལྒང་གི་རྩེ་བ། བསྐོར་བ་བྱེད་པ། ཕྱག་འཚལ་བ། མ་ཎི་བསྐོར་བ། སྐེ་སྦྱོང་བ། ལག་པ་སྦྱོང་བ། གཞན་ཡོ་གའམ་སྒོམ་རྒྱག་པ་སོགས་གང་ཡིན་རུང་འོས་ཤིང་འཚམ་པ་དང་། རྙོག་དྲ་མེད་པ། སྟབས་བདེ་བོ་ཡིན་པ་སོགས་ཀྱི་སྒོ་ནས་ལུས་སྦྱོང་བྱེད་ཐབས་ཤིག་རྒྱུན་འཁྱོངས་བྱེད་དགོས།   ༤  སྨན་གྱི་བདེ་སྲུང་།    རྒན་པོ་གང་ཞིག་འབྱུང་བ་རྒུད་པའི་ནད་ཀྱིས་གདུངས་ཏེ་རྒས་མགྱོགས་སུ་འགྲོ་བ་ལས་ཚེ་བསྲིང་བར་བྱ་བ་ནི་འོག་ནས་འབྱུང་བར་གྱུར་པའི་སྨན་སྦྱོར་གྱི་ཆོ་ག་ཚུལ་བཞིན་བསྟེན་ན་ཕན་པར་འགྱུར་བ་སྟེ། དཔེར་ན།ནད་དྲག་པོས་ཡུན་དུ་མནར་བ་དང་། ལྟོ་གོས་ཀྱིས་འཕོངས་པ། དཀའ་ངལ་གྱིས་མནར་ཏེ་ཟུངས་སྟོབས་ཇེ་ཞན་དུ་སོང་བ་རྣམས་ཀྱིས་ཀྱང་བཅུད་ལེན་སྨན་སྦྱོར་རིགས་བསྟེན་དགོས་ལ་ལྷག་པར་དུ་རྒན་པོའི་ ཟུངས་སྟོབས་གསོ་བའི་སྨན་ཡང་ཐོག་མར་རྒས་པ་ཉིད་ཀྱི་རང་བཞིན་དང་ཡུལ་དུས། ལུས་ཁམས་དང་ཟུངས་སྟོབས་ཆེ་ཆུང་། གཟུགས་པོའི་གནས་ཚུལ་སོགས་ལ་བལྟས་ནས་གང་ལ་གང་འཕྲོད་པའི་བཅུད་ལེན་སྨན་སྦྱོར་གྱི་རིགས་གང་རུང་ཞིག་བསྟེན་དགོས་རྒྱུ་རེད། སྨན་བསྟེན་ཐབས་ནི་དགུན་ཉི་ལྡོག་གི་ཉིན་དང་པོ་ནས་བཟུང་ཉིན་རེར་འབའ་སམ་སྨན་མར་དང་སྒོག་སྐྱའི་སྨན་མར།ཡང་ན་དབང་ལག་སྨན་མར་དང་མཁལ་གསོ་སྨན་མར་སོགས་ལས་གང་རུང་ཞིག་རྒྱུན་དུ་བསྟེན་ན་ཟུངས་སྟོབས་རྒྱས་ཤིང་ལུས་མདངས་འཕེལ་བ་དང་། ལྷག་པར་དུ་མིག་ལ་སོགས་པའི་དབང་པོ་རྣོ་ལ་དབང་ཤེས་ཇེ་གསལ་ནས་ཇེ་གསལ་དུ་འགྲོ་བ་ལས་ལུས་སྟོབས་ནི་སེང་གེའི་རྩལ་དང་ལྡན་པ་ཞིག་ཏུ་གྱུར་ཡོང་གི་རེད། དུས་ཚིགས་གཞན་དུ་ཡང་མཚམས་མཚམས་སུ་གསོ་བྱེད་ཉི་མའི་དཀྱིལ་འཁོར་དང་ཟླ་ཤེལ་བདུད་རྩི་མ། གྲུབ་ཐོབ་རིལ་དཀར། ཨ་གར་སོ་ལྔ་། དཀར་པོ་དྲུག་སྦྱོར། ནོར་བུ་བདུན་ཐང་སོགས་ཅུང་ཙམ་རེ་བསྟེན་ཤེས་ན་ཕོ་བའི་མེ་དྲོད་སྲུང་བ་དང་ཁྲག་ནད་ཀྱི་རིགས་མི་འབྱུང་བར་སྔོན་འགོག་བྱེད་ཐུབ་པར་མ་ཟད། འབྱུང་ཁམས་བདེ་ཞིང་རྒས་ཀ་སྲ་ལ་གཉེར་མ་དང་སྐྲ་དཀར་མི་འབྱུང་བ། དྲན་པ་སྔར་བས་གསལ་ཞིང་བློ་རིག་སྔར་ལས་རྣོ་བ་སོགས་ཀྱི་དགེ་མཚན་བླ་ན་མེད་དོ།།   ༤ དཔྱད་ཀྱི་བདེ་སྲུང་།    རྒན་པོ་གང་ཞིག་ལ་ནད་མེད་ཚེ་བསྲིང་གི་དཔྱད་བཅོས་ཤིག་བསྟེན་དགོས་བྱུང་ན་ཐོག་མར་མི་དེའི་རང་བཞིན་དང་ལུས་སྟོབས་ལ་འཚམ་པའི་དཔྱད་བཅོས་ཀྱི་ཕྱག་ལེན་ཞིག་བེད་སྤྱོད་བྱེད་དགོས་པ་རེད། དཔེར་ན། རླུང་མཁྲིས་བད་ཀན་གྱི་རང་བཞིན་ལ་བལྟས་ནས་ཞུན་མར་དང་ཏིལ་མར་ལ་སོགས་པའི་སྣུམ་རིགས་བཞིས་རྐང་མཐིལ་དང་ལག་མཐིལ། ཡང་ན་ཟུངས་ཟད་ཀྱི་རླུང་གསང་དྲུག་ཏེ་སྤྱི་གཙུག་ལ་སོགས་པ་སྣུམ་བྱུག་དང་བསྐུ་མཉེ་བྱེད་པ་དང་། དབྱུག་བཅོས་བྱེད་པ། མེ་བུམ་རྒྱག་པ། རླུང་གསང་ལ་མེ་བཙས་གསོ་བ་སོགས་བདེ་ཐང་དཔྱད་བཅོས་ཀྱི་ཐབས་ཤེས་རྣམས་ཁོང་དུ་ཆུད་པར་བྱས་ཏེ། རྒྱུད་ལས། སྨན་དཔྱད་ཤེས་ལོ་མ་བྱེད་རྟོག་དཔྱོད་གཟོབས།། མི་སྲོག་ཚོད་ལེན་མ་བྱེད་གདེངས་ལྡན་སློབས།། ལག་འཛུད་མ་སྔ་ནད་ཀྱི་སྐད་ལ་དྲིས།། དཔྱད་སྙིང་མ་ཆེ་སྨན་པས་ལག་དགྲས་འཕུང་།། ཞེས་གསུངས་པ་རྣམས་ཡིད་ལ་དམ་པོར་བཟུང་ནས་དེའི་ཕྱོགས་ལ་གཞོལ་བའི་འཚོ་བྱེད་པ་དག་གིས་སྔ་མོ་ནས་སྨན་དཔྱད་ཀྱི་ཕྱོགས་ལ་སློབ་སྦྱོང་དང་ལག་ལེན་ནང་བྱན་ཆུབ་པ་ཞིག་བྱས་ཏེ་བདེ་ཐང་དཔྱད་བཅོས་ཀྱི་མན་ངག་རྣམས་རྒན་པོ་ཚོའི་ལུས་སྟོབས་དང་གཟུགས་པོའི་གནས་ཚུལ་སོགས་ལ་བསྟུན་ནས་གང་ལ་གང་འཚམ་རེ་བསྟེན་རྒྱུ་ནི་རྒན་པ་ཚོའི་ལུས་སེམས་སྐྱིད་པོ་དང་ནད་མེད་ཚེ་རིང་ཡོང་ཐབས་ཀྱི་ཐབས་ཤེས་མེད་དུ་མི་རུང་བ་ཞིག་ཡིན་ནོ།།    གསུམ་པ། མཇུག་བསྡུ་བའི་མཆིད།      རྒན་པོའི་ནད་མེད་ཚེ་བསྲིང་སྐོར་གྱི་རྩོམ་ཡིག་འདི་ནི་《ཕྲེང་བ་དམར་པོ》ཞེས་པའི་རིག་གཞུང་དུས་དེབ་སྤེལ་ནས་བགྲང་བྱ་བཅུའི་འཁྲུངས་སྟོན་ལ་ཕུལ་བའི་ལེགས་སྐྱེས་ཤིག་དང་ལྷག་པར་དུ་སྟག་རིག་རྒན་བཀུར་ལོ་སར་ལ་ཕུལ་བའི་ལེགས་སྐྱེས་ཆུང་ཆུང་ཞིག་ཡིན་པས། ལྗགས་རྩོམ་འདིའི་རྩོམ་སྟངས་ནི་བོད་ཀྱི་གསོ་བ་རིག་པའི་དཔྱད་རྩོམ་འབྲི་སྟངས་ལྟར་བྲིས་ཡོད་པ་དང་ཚིག་སྦྱོར་དང་བརྡ་ཆད་མང་པོ་ཞིག་སྤྱིར་ཡིན་ན་གསོ་བ་རིག་པའི་སྐོར་ནས་འབྲི་དགོས་བ་ཞིག་རེད། འོན་ཀྱང་ད་རེས་བདག་གིས་ཅི་ནུས་གང་ཐུབ་ཀྱིས་གསོ་རིག་སྐོར་གྱི་ཐ་སྙད་མང་པོ་ཞིག་བེད་སྤྱོད་མ་བྱས་པར་གསོ་རིག་སྐོར་མ་སྦྱངས་ཀྱང་བོད་ཡིག་ཤེས་པ་ཙམ་གྱིས་དོན་གོ་སླ་ལ་ཡིད་ལ་འཛིན་བདེ་བ་ཞིག་འབྲི་ཁུལ་བྱས་ཡོད་པས་དཔྱད་བརྗོད་འདིས། རྗེ་གཡུ་ཐོག་པའི་ལུང་བསྟན་བཞིན། ནམ་མཁའ་དང་མཉམ་པའི་སེམས་ཅན་ལ།། ནམ་མཁའ་དང་མཉམ་པའི་ཕན་ཐོགས་པར་ཤོག། ཅེས་གསུངས་པ་ལྟར་འཇིག་རྟེན་གནམ་འོག་གི་ཕ་མ་རྒན་པ་ཡོངས་ཀྱི་སྐུ་གཟུགས་བདེ་ཐང་ཡོང་བ་དང་། ནད་མེད་ཚེ་རིང་ལོ་བརྒྱ་ཡོང་བའི་ཐད་ལ་ཅུང་ཙམ་སྨན་ཐོགས་པར་སྨོན།  
   Personal Events  subjects 2744 For more information about this term, see Full Entry below.Subjects EventTibetan EventFull EntryRelated Subjects (13)Related Audio-video (112)Related Images (142)Related Texts (1) Amdo  subjects 730 For more information about this term, see Full Entry below.Subjects Cultural RegionsTibetan and Himalayan Cultural RegionsCultural TibetNortheastFull EntryRelated Subjects (5)Related Texts (26)Related Audio-video (42) Ziling  places 1149 For more information about this term, see Full Entry below.Feature Type Collected Urban UnitsPlaces EarthAsiaChinaQinghaiXiningFull EntryRelated Subjects (1)Related Places (5)Related Texts (6)Related Audio-video (1)