ནེའུ་མགོའི་མ་ཎི་ཆུ་འཁོར།    ནེའུ་མགོའི་མ་ཎི་ཆུ་འཁོར་ནི་ཁྲི་ཀ་རྫོང་འཕྲང་དམར་གྲོང་བརྡལ་སྟག་རིག་སྡེ་བའི་ཡ་མགོ་མའི་ལྷོ་མཐར་ཡོད་ལ། གནས་དེ་གར་འཁྱིལ་བའི་ནེའུ་མགོ་མཚེའུ་ཞེས་བྱ་བ་ལས་བཞུར་བའི་ཆུ་དང་། ཉེ་འཁོར་གྱི་ལྟེང་ཀ་མང་པོ་ནས་བརྡོལ་བའི་ཆུ་རྣམས་ལྷན་དུ་འདྲེས་པའི་ཆུ་རྒྱུན་གྱིས་ཉིན་མཚན་ལྟོས་མེད་དུ་བསྐོར་བའི་མ་ཎི་ཆུ་འཁོར་ཞིག་ཡིན། ནེའུ་མགོའི་མ་ཎི་ཆུ་འཁོར་འདི་ནི་༡༩༥༨ལོའི་ཡར་སྔོན་ནས་ཡོད་ཅིང་། དང་ཐོག་ཏུ་བཞེངས་སྐྲུན་གནང་མཁན་ནི་སྐུ་ཞོགས་སྒོ་མང་ཚང་གི་སྐུ་ཚེ་སྔོན་མ་ཞིག་ཡིན་ལ། སྐབས་ཐོག་དེར་ཆུ་འཁོར་མ་ནི་འཁོར་ལོ་ལྔ་བཞེངས་ཡོད་པ་དང་། མ་ཎི་འཁོར་ལོ་རེའི་གཟུངས་གཞུག་ཏུ་མ་ཎི་དུང་ཕྱུར་རེ་དཀྲིས་ཡོད་པའི་ཐོག་དྲངས། གཞན་རྣམ་རྒྱལ་གཟུངས་རིང་། སྟོང་བཤགས། རྣམ་རྒྱལ་མ། སེང་གེ་སྒྲ། ཡིག་བརྒྱ་སོགས་གཟུངས་སྔགས་རྣམས་ཡོད། ༡༩༥༨ལོ་ནས་༡༩༥༩ལོའི་ནང་གཏོར་བཤིག་ཚབས་ཆེན་ཐེབས་པ་དེ་ནས་བཟུང་ལོ་ངོ་༢༠ལྷག་གི་རིང་ལ་ཉམས་གསོ་བྱེད་མ་ཐུབ་པར་ལུས། ༡༩༨༠ལོའི་སྔ་གཞུག་ཏུ་སྤྱི་སེམས་ཅན་གྱི་སྡེ་བའི་རྒན་པ་སྐོར་ཞིག་གི་གྲོས་འདོན་ལྟར་སྣང་རའི་ཡུལ་ཚོའི་མ་ཎི་ཁང་གི་དཔེ་དབྱིབས་ལྟར་བསྐྱར་བཞེངས་བྱེད་པའི་ལས་དངོས་སུ་མགོ་བརྩམས། མ་ཎི་ཆུ་འཁོར་བཞེངས་བསྐྲུན་བྱེད་པའི་ལེགས་བྱས་ལ་རྒན་གྲས་སྐོར་ཞིག་གིས་མ་བསྐུལ་དང་བླངས་ཀྱི་སྒོ་ནས་རོགས་རམ་བླ་ལྷག་མཛད་པ་ནི་རིམ་པ་བཞིན་ཤིང་ལས་ཕྱོགས་སུ་ཨ་ཁུ་ཡུམ་འབུམ་རྒྱལ་དང་ཨ་ཁུ་དགེ་ལེགས་གཉིས་ཀྱིས་འགན་དུ་བླངས་ཏེ་ཚེགས་ཆེན་པོ་ཕུལ་བ་དང་། མ་ཎི་ཆུ་འཁོར་གྱི་ཁང་བའི་ནང་ཕྱོགས་ཀྱི་གྱན་ཐང་གི་རི་མོ་དང་ཚོན་མདངས་ཀྱི་བྱ་བ་ཡོད་ཚད་ཐིས་པ་སྐུ་ཕྲེང་སྔ་མའི་སྤུན་མཆེད་ཨ་ཁུ་སྐལ་ལྡན་གྱིས་གཙོ་བོར་དང་དུ་བླངས་པ་དང་། དེའི་ཕྱག་རོགས་སུ་ཨ་ཁུ་ཤ་བོ་གཙོ་བྱས་སྡེ་མི་ཡོངས་ཀྱི་རོགས་རམ་ལ་བརྟེན་ཏེ་ཁང་བ་གྱན་གཅིག་ཏུ་མ་ཎི་འཁོར་ལོ་གཅིག་ཡོད་པའི་བདག་ཉིད་ཅན་ལེགས་པར་འགྲུབ་ཅིང་། ནེའུ་མགོ་མཚེའུའི་ཆུ་རྒྱུན་ལ་བརྟེན་ནས་ཉིན་མཚན་བར་མེད་དུ་འགྲོ་བ་སེམས་ཅན་ཡོངས་ཀྱི་མཆོད་པའི་རྟེན་དང་དད་པའི་ཞིང་དུ་སོང་ནས་འཁོར་བསྐྱོད་བྱེད་ཐུབ་པ་བྱུང་། མ་ཎི་ཁང་གི་གླིང་བཞིའི་རྩིག་སྨད་དུ་སྡེ་འདིས་བཀུར་བའི་ཨ་མྱེས་བསྟན་སྐྱོང་། སེ་བོ། ནག་ཀྱྰ། དམར་གདོང་སོགས་གཞི་བདག་རྣམས་ཀྱི་གཟུགས་རིས་བྲིས་ཡོད་པ་དང་། དེ་དག་ནི་མཁས་ཤིང་གྲུབ་པའི་བདག་ཉིད་ཆེན་པོ་ཐིས་པ་སྐུ་ཕྲེང་གོང་མ་ཞལ་བཞུགས་དུས་སུ། ཁོང་ལ་དྲིས་པའི་ཐུགས་བཀོད་ལྟར་བྲིས་སུ་བགྱིས་པས་གཞི་བདག་དེ་དག་གི་གཟུགས་རིས་ཆེས་ཁུངས་བཙན་པ་དེ་ཡང་ཡིན་ནོ།། ༢༠༠༥ལོར་སྡེ་ཨུས་ནེའུ་མགོའི་མཚེའུའི་ཉེ་འཁོར་དུ་ཆུ་མགོ་འགའ་ཡོད་པ་འཐུང་ཆུར་འདྲེན་རྒྱུའི་འཆར་འགོད་ཀྱི་ལས་རྩོམ་སྐབས། ཆུའི་ཐོན་ཁུངས་ལ་ཞིབ་ཏུ་བརྟག་དཔྱད་མ་བྱས་པར་མཚེའུའི་འདབས་རོལ་ནས་འོབས་གཞགས་ཏེ་ཆུ་དྲངས། ཁོར་ཡུག་ནང་དོང་བྲུས་ཏེ་སྡོང་འཛུགས་བྱས་པས་སྔོན་གྱི་མཛེས་ལྗོངས་ཉམས་དགའ་བོ་དེ་ཅུང་མི་སྡུག་པ་བྱས་ཤིང་། ལོ་འགའ་ཡང་མ་སོང་པར་གནས་དེར་ཡོད་པའི་ཆུ་རྣམས་རིམ་གྱིས་ས་འོག་བརྒྱུད་གྲམ་པར་འགོག་མེད་དུ་འཐིམ་པས། མཚེའུ་ནི་བྲི་བསྐམས་བྱུང་སྟེ་འདམ་ཁུར་ལུས། མ་ཎི་ཆུ་འཁོར་ཡང་ཆུ་རྒྱུན་ཆད་དེ་ལོ་མང་པོར་སྡོད་དགོས་བྱུང་བ་རེད། དགའ་འོས་པ་ཞིག་ལ། ༢༠༡༦ལོར་སྡེ་བའི་སྡེ་དཔོན་དང་རུ་དཔོན། རྒན་པ་སྤྱི་སེམས་ཅན་རྣམས་གུར་གཅིག་ཏུ་གདན་འཛོམས་བྱུང་བའི་སྟེང་། མ་ཎི་ཆུ་འཁོར་ཞིག་གསོ་བྱེད་པར་གྲོས་མཐུན་ཏེ་སྡེ་མི་རྣམས་ཀྱིས་མི་སེམས་ཁབ་དང་སྐུད་པའི་དཔེ་བཞིན་འཛོམས་ཚོད་ཀྱི་དཀར་ཐིགས་དད་འབུལ་བྱས་ཤིང་། ལས་བྱེད་པ་ཚོས་ཀྱང་རྒྱ་མཚོའི་ནང་ལ་ཆུ་ཐིགས་ལྟར་དུ་རང་མོས་སྒོས་ཞལ་འདེབས་གནང་བ་ལ་བརྟེན། སྔོན་གྱི་རྣམ་པ་ལས་གཞི་རྒྱ་ཆེ་ཞིང་ཐོག་སོ་ཉིས་བརྩེགས་ཅན་གྱི་མ་ཎི་ཆུ་འཁོར་ཞིག་གསར་སུ་བཞེངས་སྐྲུན་བྱས་པ་དང་། ཐོག་སོ་གཉིས་པར་ཡར་སྔོན་གྱི་མ་ཎི་འཁོར་ལོར་ཟངས་དམར་གྱིས་བཏུམས་ནས་རྒྱུན་འཁོར་བྱེད་དུ་བཅུག་ཡོད་པ་དང་། འོག་སོ་རུ་ཐར་བ་ཆེན་པོའི་མདོ། གསང་བདག་འཁོར་ཆེན། སྤྱན་རས་གཟིགས། སེང་གེ་སྒྲ། མ་ཎི་ཡི་གེ་དྲུག་མ། འཕགས་པ་བརྒྱད་སྟོང་བ་བཅས་ཀྱི་གསུང་རྟེན་ལས་གྲུབ་པའི་མ་ཎི་ཆུང་ཆུང་ལྔ་ཟངས་དམར་གྱིས་བཏུམས་ཏེ་སྡེ་བའི་མང་ཚོགས་ཡོངས་ཀྱི་མཆོད་པའི་ཞིང་དུ་གྱུར་ཡོད་དོ།།
   Amdo  subjects 730 For more information about this term, see Full Entry below.Subjects Cultural RegionsTibetan and Himalayan Cultural RegionsCultural TibetNortheastFull EntryRelated Subjects (5)Related Texts (26)Related Audio-video (42) Sacred Places  subjects 2992 For more information about this term, see Full Entry below.Subjects Geographical FeaturesReligiousFull EntryRelated Subjects (5)Related Places (41)Related Texts (2)Related Images (58)Related Audio-video (20) mani wheels  subjects 3043 For more information about this term, see Full Entry below.Subjects Geographical FeaturesReligiousReligious Structuresexternal architectural spot featuresFull EntryRelated Subjects (1)Related Places (1)Related Texts (1)Related Images (139)Related Audio-video (2) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192)