ཨ་མདོའི་རྡུང་ལེན་ཐད་ཀྱི་བསམ་གཞིག་ཕྲན་བུ།    ཨ་མདོའི་རྡུང་ལེན་ཐད་ཀྱི་བསམ་གཞིག་ཕྲན་བུ། རྐང་ཚ་ཁྱུང་སྐྱབས་རིན་ཆེན།  ༼ ཁྲི་ཀ༽ སྲིད་གསུམ་སྒྱུ་མའི་ཞིང་ན་ངལ་དུབ་པའི།། མཐོ་དམན་སུ་ཡི་རྣ་བར་འདི་ལྷུང་ན།། མྱ་ངན་ནག་པོའི་བཞིན་རས་ཞི་གྱུར་བ།། ཡིད་ཀྱི་གསོས་སྨན་སྙན་པའི་རོལ་མོ་ཡིན།། 《བོད་ཀྱི་རོལ་མོའི་ལོ་རྒྱུས་ལ་ཐོག་མར་དཔྱད་པ》ལས།   གཅིག སྤྱིར་བཏང་གི་རྡུང་ལེན་པ་དང་མི་རབས་གསར་བའི་རྡུང་ལེན་པ་གཉིས་ཅུང་ཙམ་གླེང་པ། ཇི་སྐད་དུ།གངས་ཅན་འགྲོ་བའི་སྐྱབས་གཅིག་ཆོས་རྗེ་ས་སྐྱ་བས།རོལ་མོ་ལ་དབྱེ་ན་གཉིས་ཏེ་ལྷན་གཅིག་སྐྱེས་དང་རྐྱེན་གཞན་ལས།།བྱུང་བའི་རོལ་མོ་གཉིས་སུ་འདོད་ཅེས་རོལ་མོ་ལ་ལྷན་སྐྱེས་ངག་གི་རོལ་མོ་དང་རྐྱེན་གཞན་ལས་བྱུང་བའི་ཡོ་ཆས་ཀྱི་རོལ་མོ་གཉིས་སུ་དབྱེ་བས།ཨ་མདོའི་སྒྲ་སྙན་རྡུང་ལེན་ནི་གླུ་ལེན་པའི་ངག་གི་རོལ་མོ་དང་སྒྲ་བརྡུང་བའི་ལག་གི་སྒྲ་སྙན་ནམ་ཡོ་ཆས་ཀྱི་རོལ་མོ་ཟུང་སྦྱོར་བྱས་པ་ལས་གྲུབ་པ་ཡིན་ཕྱིར།བོད་ཀྱི་གནའ་དེང་ཉེ་གསུམ་གྱི་གླུ་གཞས་རིག་གནས་གཞན་དག་དང་བསྡུར་ན་ཐུན་མོང་མ་ཡིན་པའི་ཁྱད་གཤིས་མཆོག་ཏུ་གྱུར་པ་ཞིག་ཡོད།སྒྲ་སྙན་བརྡུང་པ་དང་གླུ་ལེན་པ་ཁོ་ནར་བརྩོན་པ་ནི་སྤྱིར་བཏང་གི་རྡུང་ལེན་པ་དག་གི་བསྐྱར་ཟློས་ཀྱི་ལམ་དུ་གོམས་ཟིན་པས་དེ་མི་རབས་གསར་བའི་རྡུང་ལེན་པ་དག་ལ་མཚོན་ན་སྤང་བྱ་གལ་ཆེན་ཞིག་རེད།མདོར་ན།དེ་ནི་སྤྱིར་བཏང་གི་རྡུང་ལེན་པ་དང་མི་རབས་གསར་བའི་རྡུང་ལེན་པ་གཉིས་ཀྱི་བར་ཁྱད་དང་ཧེ་བག་ཀྱང་ཡིན་སྲིད།   ཆོས་རྗེ་ས་པན་མཆོག་གིས་གསུངས་པ་ནང་བཞིན།༼སྔོན་གྱི་དབྱངས་མཁན་ཚིག་ལ་མཁས།།ད་ལྟ་རྣམས་ནི་དབྱངས་ལ་སྦྱོངས།།ཕྱི་མའི་དུས་ཀྱི་དབྱངས་མཁན་རྣམས།།བློ་ཆུང་མི་མཁས་གླུ་ལ་དགའ།།༽ཟེར་བ་ལྟར།ད་ལྟའི་སྤྱི་ཚོགས་ཀྱི་གཞས་པ་གཞས་མ་དག་ནི་གླུ་ལེན་པ་ཁོ་ནར་བརྩོན་ཏེ་སྙན་གྲགས་ལ་གཡམ་བརྒྱུགས་ཆེ་ཞིང་གར་སྟེགས་ཀྱི་འཁྲབ་སྟོན་ཁོ་ནར་བརྩོན་ལེན་བྱེད་པའི་གླུ་བ་ཆེས་མང་པའི་སྤྱི་ཚོགས་ཤིག་ཀྱང་ཡིན་ལ་སྤུས་ཚད་ཆེས་ཞན་པའི་དཔུང་ཁག་ཅིག་ཀྱང་རེད།ཚིག་དང་དབྱངས་ཀྱི་སྦྱོར་བ།འདྲེན་འགུགས་ལྟེངས་བསྒྱུར་གྱི་ངག་གི་ང་རོ་རྣམ་བཞིའི་ཁྱད་ཆོས་དོད་ལུགས།སྤོབས་པའི་གནད་དང་དུས་ཀྱི་གནད།སྦྱངས་པའི་གནད་བཅས་ཀྱིས་མཚོན་པའི་གནད་གསུམ་གྱི་དགོངས་པའི་ལག་ལེན་སོགས།དཔེར་ན།སློབ་དཔོན་ཙནྡྲ་གོ་མིས་༼དབྱངས་ཀྱི་བསྟན་བཅོས་བློ་གསལ་མགུལ་རྒྱ་ལས༽།མི་ཤེས་ལེན་དགའ་ལད་མོའི་དབྱངས་དང་ལེགས་པར་མ་བསླབས་བབ་ཆོལ་དབྱངས།།ཅོལ་ཆུང་གཏད་སོ་མེད་པའི་དབྱངས་སོགས་ཀྱིས་མཚོན་པའི་དབྱངས་ཀྱི་དགེ་སྐྱོན་སེལ་ཞིང་གཞུང་ལུགས་དང་ཉམས་མྱོང་ཟུང་དུ་སྦྱོར་བའི་བློ་གྲོས་ཀྱི་ཐབས་རྩལ་དབེན་པ་སོགས་ཀྱིས་མཚོན་པའི་ཞན་ཆ་མང་པས།མི་རབས་གསར་བའི་རྡུང་ལེན་པས་འདི་དག་གིས་མཚོན་པའི་ཞན་ཆ་གང་ཡོད་སྐོངས་དགོས་ཤིང་།ཚིག་དབྱངས་རང་ངོས་ནས་གསར་རྩོམ་དང་རྡུང་ལེན་འགྲན་འཚོགས་ཀྱང་སྐད་ངག་དང་སྒྲ་བརྡུང་སྟངས་ཀྱི་ཁྱད་ཆོས་ཁོ་ན་ལ་མ་བལྟས་པར་རྨང་གཞི་ཤེས་བྱ་དང་ཕ་སྐད་ལམ་ནས་སྨྲ་བརྗོད་ཀྱི་སྤོབས་པ།རང་གི་གླུ་གཞས་བརྩམས་ཆོས་དེའི་ཚིག་དབྱངས་མཚམས་སྦྱོར་དང་རོལ་མོའི་ལོ་རྒྱུས་དང་གཞུང་ལུགས་ཤེས་སྤྱི་སོགས་ཀྱི་འདྲི་ཚིག་སོགས་རྡུང་ལེན་འགྲན་ཞུགས་པ་དང་དཔྱད་འཇོག་པ་སྐར་འགོད་པ་སོ་སོར་གཅིག་མཐུན་གྱིས་དགོས་པ་གཙོ་བོ་བྱས་ཏེ་སྒྱུ་རྩལ་པ་ཕྱོགས་ཡོངས་ཀྱི་སྒྱུ་རྩལ་གྱི་འཇོན་ནུས་མཐོ་རུ་འདེགས་དང་རོལ་མོའི་ཤེས་བྱ་སྣ་ཚོགས་ལ་སློབ་སྦྱོང་བྱེད་ཐུབ་དགོས་པ་ཞིག་རེད།རང་བློ་ཤེས་བྱ་ཀུན་ལ་མ་སྦྱངས་ན།།ཐམས་ཅད་མཁྱེན་པ་ནམ་མཁའི་མཐའ་ལྟར་རིང་གསུངས་པ་ལྟར་སློབ་སྦྱོང་དང་དཔེ་ཀློག་ལའང་གོམས་དགོས་པར་མ་ཟད་ད་དུང་འདི་དག་གི་ཟ་དང་ཟུར་དུ་སྒྲ་སྙན་རྡུང་ལེན་འདི་ལའང་སྐུལ་ལྕག་གི་དབྱུག་པ་ཚ་པོ་བསྟེར་བའི་ཨ་མ་བཙན་པོ་འགའ་རེ་ཡང་མི་རབས་གསར་བའི་རྡུང་ལེན་པ་དག་གི་ཁྲོད་དུ་བྱུང་ན་ཧ་ཅང་དགའོ།།   གཉིས། རྡུང་ལེན་དང་དཀྲོལ་ལེན་གཉིས་ལས་ཕྱོགས་གཅིག་གཏན་ཁེལ་དང་དེའི་དགེ་མཚན།   རྡུང་ལེན་ཞེས་པའི་ཐ་སྙད་རང་སྟེང་གི་དགེ་མཚན་གྱི་ཆ་ནས་བཤད་ན་རྡུང་ལེན་ཞེས་ང་ཚོའི་འཚོ་བའི་གཏིང་ལ་འཐིམ་ཡོད་པས་ཁ་སྐད་ཅན་དང་འཚོ་བ་ཅན་གྱི་དགེ་མཚན་དང་།ཐོག་མ་ཉིད་ནས་རྡུང་ལེན་ཞེས་ཀུན་གྱིས་ཡོངས་ཁྱབ་ཀྱིས་བཀོལ་སྤྱོད་བྱས་ཟིན་པ་དང་བྱེད་བཞིན་ཡོད་པས་སྤྱོད་བདེ་ཅན་དང་དར་ཁྱབ་ཅན་གཅིག་གྱུར་རང་བཞིན་གྱི་དགེ་མཚན་ལྡན་པ།ད་དུང་དམངས་ཁྲོད་རིག་གནས་ལ་ཞིབ་འཇུག་དང་འཚོལ་བསྡུ།གཞུང་ལུགས་ཅན་དུ་སྤེལ་བ་སོགས་མཐུན་རྐྱེན་ལེགས་པོ་འཛོམས་པ་ཞིག་ཡིན་པས་ལྷ་སྐུ་རྙིང་བར་ཚོན་རྩི་གསར་བ་ཕྱུག་དགོས་དོན་མི་འདུག་པར་བསམས།དཀྲོལ་ལེན་ཟེར་ན་བརྡ་ཆད་གསར་བའི་རིགས་སུ་གཏོགས་པས་ཡོངས་ཁྱབ་ཀྱིས་བེད་སྤྱོད་ཐུབ་ཀྱི་མེད་ལ།རེ་འགའ་ཞིག་གི་ཨ་གསར་ཁོ་ན་ཞིག་གི་དབང་དུ་གྱུར་ནས་རྡུང་ལེན་ལ་དཀྲོལ་ལེན་དང་།དཔེར་ན་འོད་སྡེར་སོགས་ལ་བརྙན་འཁོར།འོད་འཁོར།གསེར་སྡེར།གསེར་འཁོར་སོགས་ཟེར་ནས་རྒྱུ་མཚན་དང་དམིགས་ཡུལ་གང་ཡང་མེད་པར་བཟོ་བཅོས་གཏོང་པ་ནི་བོད་རང་གི་མིང་བརྡ་གཅིག་གྱུར་དང་སྐད་ཡིག་གཅིག་གྱུར་ཕྱོགས་ལ་བསམ་བློ་མ་བཏང་བའི་སྐྱོན་ཆ་ཞིག་རེད།རྒྱུ་མཚན་དེའི་དབང་གིས་མངའ་རིས་སྒྲ་སྙན་བཀོལ་ཏེ་བླངས་བའི་གཞས་དང་མེན་ཐོ་ལིན་བཀོལ་ཏེ་བླངས་བའི་གཞས་གང་ཡིན་ཡང་༿སྒྲ་སྙན་རྡུང་ལེན༾་ཞེས་བྲིས་ན་ལེགས་པའི་དགེ་མཚན་མི་དམན་པ་འདུག།མངའ་རིས་སྒྲ་སྙན་ནི་ལོ་རྒྱུས་ལྟར་ན་སྟོད་མངའ་རིས་ས་ཁུལ་ནས་དབུས་གཙང་ཁུལ་དང་དེ་ནས་རིམ་བཞིན་དར་བས་རྡོ་རིང་བསྟན་དཔལ་འབྱོར་སྐབས་སྒྲ་སྙན་ཞེས་པའི་ཆེད་སྤྱོད་ཀྱི་ཐ་སྙད་གཏན་ཁེལ་ཆགས་པ་ཡིན་པས་༿སྒྲ་སྙན་རྡུང་ལེན༾་ཞེས་བྲིས་ཤིང་བཀོལ་སྤྱོད་བྱས་ཚེ་ལོ་རྒྱས་ཀྱི་ཐ་སྙད་བེད་སྤྱོད་དང་ཞིབ་འཇུག་མཐུན་རྐྱེན།བཀོལ་བདེ་འབྲི་བདེ་སྤྱོད་བདེ་སོགས་ཀྱི་མཐུན་རྐྱེན་ཧ་ཅང་མང་བས་འོ་མའི་རྒྱ་མཚོའི་ནང་ལ་ཁྲག་གི་ཐིགས་པ་འཕེན་དགོས་དོན་མེད་པའི་ཁར།ང་ཚོའི་བསམ་དགོས་པ་ངོ་མ་ནི་རྡུང་ལེན་ཞེས་ལོ་རྒྱུས་སོགས་ཀྱི་བཀོལ་སྤྱོད་དགེ་མཚན་ཆེར་ལྡན་པའི་ཐ་སྙད་དག་བཟོ་བཅོས་གཏོང་རྒྱུ་དེ་མ་ཡིན་པར་དེ་ལས་གོང་འཕེལ་དང་གསར་གཏོད་ཀྱི་ཕྱོགས་སུ་བལྟ་རྒྱུ་དེ་མ་ཡིན་ནམ།   གསུམ། མངའ་རིས་སྒྲ་སྙན་དང་མེན་ཐོ་ལིན་གཉིས་ལས་མེན་ཐོ་ལིན་འདོར་དགོས་མིན་ཐད་གྱི་ལྟ་ཚུལ་ཐུང་ངུ་།   ཡང་གཞན་ལ་ལས།མེན་ཐོ་ལེན་ནི་བོད་རང་ས་ནས་གསར་གཏོད་བྱས་པའི་རོལ་ཆ་ཞིག་མིན་པ་དང་མི་རིགས་གཞན་ནས་ནང་འདྲེན་བྱས་པ་ཞིག་ཡིན་སྟབས།མེན་ཐོ་ལིན་འདོར་དགོས་ཤིང་མངའ་རིས་སྒྲ་སྙན་ཏེ་རང་མི་རིགས་ཀྱི་རོལ་ཆ་སྒྲ་སྙན་ཁོ་ན་སྤྱད་ན་འགྲིག་ཟེར་བ་དང་།མེན་ཐོ་ལིན་གྱིས་སྒྲ་སྙན་གྱི་ཚབ་བྱས་ན་ཉེན་ཁ་ཞིག་རེད་ཟེར་བ་སོགས་ཀྱི་སྒྲ་སྙན་དང་མེན་ཐོ་ལིན་བཀོལ་སྤྱོད་ཀྱི་ལམ་ཐིགས་གཉིས་སུ་ཕྱེས་ཏེ།དཔེར་ན་བར་སྐབས་ཤིག་ལ་བླ་བྲང་ཕྱོགས་སུ་མངའ་རིས་སྒྲ་སྙན་སྤྱོད་མཁན་མང་བ་དང་མཚོ་ལྷོའི་ཕྱོགས་སུ་མེན་ཐོ་ལིན་སྤྱོད་མཁན་མང་སོགས་ལྟ་བུའི་ས་ཁུལ་གྱི་དབྱེ་བའང་མངོན་པར་བཀར་ཡོད་པས་འདི་ལ་རང་གི་ལྟ་ཚུལ་ཐུང་ངུ་དྲངས་ན།མེན་ཐོ་ལིན་བོད་ཀྱི་རོལ་ཆ་མིན་པས་འདོར་དགོས་ཟེར་ན།ང་ཚོའི་འཚོ་བའི་དངོས་པོ་མང་པོ་འདོར་དགོས་ཏེ་ཁྱིམ་གྱི་སྣོད་ཅ་ལག་དང་ཁ་པར་རླངས་འཁོར་སོགས་བོད་རང་གི་ཐོན་རྫས་མིན་པ་ཚང་མ་འདོར་པ་མིན་ནམ།དེ་བཞིན་སངས་རྒྱས་ཆོས་ལུགས་ཀྱང་རྒྱ་གར་རིག་གནས་ཡིན་པས་འདོར་དགོས་རྒྱུ་རེད།བོད་རང་ས་ནས་བྱུང་བའི་ཆོས་ལུགས་ནི་བོན་ཆོས་རང་ཡིན་པས་ང་ཚོ་སླར་ཡང་སངས་རྒྱས་ཆོས་ལུགས་གཡུགས་ཏེ་བོན་ཆོས་ལ་སྐྱབས་སུ་འགྲོ་དགོས་པ་མིན་ནམ།སྒྱུ་རྩལ་དང་ཆོས་ལུགས་གཉིས་སོ་སོ་ཡིན་ཀྱང་རིགས་པ་དང་དཔེ་གཞི་འདི་ལྟར་དྲངས་ཆོག་གི་ཡིན་པས།བོད་དུ་དར་ཁྱབ་བྱུང་བའི་སངས་རྒྱས་ཆོས་ལུགས་ལ་བོད་རིགས་རང་གི་འཚོ་བའི་གོམས་གཤིས་དང་དད་མོས་ལུགས་སྲོལ།ཆོ་ག་སྤེལ་ཕྱོགས་སོགས་དང་བསྲེས་པས་༿བོད་རྒྱལ་ནང་བསྟན་ཆོས་ལུགས༾་ཞེས་ཀུན་གྱིས་འབོད་པ་ཤེས་གསལ་ལྟར།མེན་ཐོ་ལིན་ནུབ་ཕྱོགས་ཀྱི་རོལ་ཆ་ཡིན་ཀྱང་།ང་ཚོའི་མི་རིགས་རང་གི་སྒྱུ་རྩལ་གྱི་རིན་ཐང་དང་སྲོལ་རྒྱུན་གླུ་གཞས་རིགས་ཀྱི་དབྱངས་གཤིས་སོགས་མ་འགྱུར་མི་རིགས་རང་གི་གླུ་གཞས་སྒྱུ་རྩལ་གྱི་བྲོ་བ་མ་ཡལ་བའི་ངང་རིག་གནས་སྤེལ་བའི་ལག་ཆར་བསྒྱུར་ནུས་ན་འདོར་དགོས་པའི་རྒྱུ་མཚན་གང་ཡང་ཡོད་པ་མིན་ཏེ།མེན་ཐོ་ལིན་འདིའང་ཁྱེར་བདེ་བ་དང་འཛིན་བདེ་བ།སྐད་གདངས་དྲག་ཞན་གྱི་ཚད་ཐིགས་སོགས་མངའ་རིས་སྒྲ་སྙན་དང་མི་འདྲ་བའི་ཁྱད་ཆོས་མང་པས་འདི་གཉིས་ཟུང་འབྲེལ་གྱིས་བཀོལ་སྤྱོད་བྱས་ན་ལེགས་སོ་སྙམ་པ་ལས་འདོར་དགོས་པའི་རྒྱུ་མཚན་མེད་པར་བསམས་སོང་།།   བཞི། ༼རྐྱང་གཞས༽་ནི་སྒྱུ་རྩལ་བྲན་དུ་བཀོལ་སྟངས་ཤིག་ཏུ་གྱུར་ཉེན་འདུག་པ།   ཆ་འཕྲིན་གྱིས་གོ་ལ་ཧྲིལ་བོ་འཁོར་སྒུལ་བྱེད་པའི་ཡོ་ལང་འོག་འཛམ་གླིང་གི་ས་ཁོངས་སོ་སོར་གང་འཚམ་གྱིས་འགྱུར་ལྡོག་འགྲོ་བའི་གོམ་སྟོབས་ཤིག་ཡོངས་སུ་དར་ཟིན།དཔེར་ན་རང་རེའི་བོད་གཞས་རིག་གནས་ཐད་ལའང་འགྱུར་ལྡོག་བྱུང་ནས་གནའ་བོའི་སྒྲ་ཐག་ནས་འོད་སྡེར་དང་ཆེད་སྒྲིག་བརྒྱུད་དྲ་སྒང་ནས་ཤར་གཏོང་བྱེད་པའི་རྐྱང་གཞས་ཀྱི་གོ་རིམ་ཞིག་བརྒྱུད་ཡོང་།དེ་ནི་སྤྱི་ཚོགས་འཕེལ་རྒྱས་ཀྱི་འགྲོས་སྟབས་དང་ཆ་འཕྲིན་འཁོར་བསྐྱོད་ཀྱི་ཁ་ཕྱོགས་དང་བསྟུན་ནས་དཔྱད་ན།འགྱུར་ལྡོག་འབྱུང་ངེས་པ་ཞིག་ཀྱང་ཡིན་ལ་བྱུང་བར་འགྲིག་པ་ཞིག་ཀྱང་རེད།   སྤྱིར་རིག་གནས་གསར་རྙིང་གི་འགལ་འདུ་དང་གདོང་ཐུག་ནི་དུས་ཚོད་དང་གོ་རིམ་ངེས་ཅན་ཞིག་བརྒྱུད་མཐར་དེ་གཉིས་གཙུབ་བརྡར་གྱི་གོ་རིམ་ཁྲོད་ནས་འཕེལ་རྒྱས་ཀྱི་ཁ་ཕྱོགས་ཤིག་འབྱུང་སྲིད་པ་ཡིན་ཞིང་།གསར་བས་གསར་བ་གླེང་ཆོག་ལ་རྙིང་པས་རྙིང་པ་སྤེལ་ཆོག་པ་ཡིན་མོད།འོན་ཀྱང་།ང་ཚོ་མི་རེ་རེའི་རིག་གནས་ཀྱི་བག་ཆགས་དང་བསྐྱེད་འབྲས།བསམ་པའི་ཁྱེར་སོ་དང་སྒྱུ་རྩལ་མཛེས་རྟོག་༼审美༽གི་མྱོང་རོལ་སོགས་མི་མཚུངས་པ་ཡིན་ཀྱང་།ཆེས་གནད་དུ་འཛིན་དགོས་པའི་རྩ་དོན་ཆེ་ཤོས་ནི་༼ང་ཚོ་རིག་གནས་གང་དེར་ལ་སྐྱབས་སུ་འགྲོ་བ་ལས།རིག་གནས་བྲན་བཀོལ་རིང་ལུགས་པ་ཞིག་ཏུ་འགྱུར་མི་རུང་བ་དེ་རེད༽།དེ་བཞིན་ང་ཚོ་བོད་གཞས་རིག་གནས་འདིའང་དེ་དང་དེ་བཞིན་ཡིན་ནོ།།   ད་ལྟའི་གླུ་བ་མང་པོར་རྐྱང་གཞས་ལ་ཕྱོགས་ནས་གཅིག་འཕྲོ་གཅིག་ལ་རྐྱང་གཞས་སྤེལ་བའི་འགྲན་རྩོད་ཀྱི་འུར་ཆ་ཞིག་ལངས་འདུག།དེ་ནི་ཕྱོགས་གཅིག་བོད་གཞས་རིག་གནས་སྤེལ་བའི་དགེ་མཚན་ཞིག་དང་ཐབས་ལམ་ཞིག་རེད།འོན་ཀྱང་།འགྲན་རྩོད་ཀྱི་ཁྲོད་དུ་ཉོབ་ནས་དང་རྨོངས་ནས་འཐོམ་སྦྲིད་ཀྱི་དབང་དུ་གྱུར་མི་རུང་པ་དེ་གཙོ་བོ་རེད།བློ་ཕམ་པ་ཞིག་ལ་ང་ཚོའི་སྒྱུ་རྩལ་པའི་དཔུང་སྟོབས་ཞན་པ་དང་སྒྱུ་རྩལ་ལ་བཅིངས་བའི་ལྷག་བསམ་དཀར་གཙང་གི་དབང་གིས།བོད་གཞས་རིག་གནས་ཀྱི་གར་སྟེགས་སུ་༼ཉོབ༽ཅེས་པའི་ཡིག་འབྲུ་ཞིག་ལྡིག་སེ་ལྷུང་ཡོང་པ་ནི་༼རྐྱང་གཞས༽ཟེར་བ་དེ་ཡིན་པར་གྱུར་སོང་།རྐྱང་གཞས་ཏེ་དྲ་སྒང་ཁོ་ན་ནས་ཤར་གཏོང་བྱེད་པའི་གླུ་གཞས་རིག་གནས་སྤེལ་འདི་ཐབས་ལམ་ཡགས་པོ་ཞིག་ཡིན་ཀྱང་།ང་ཚོས་གང་འདོད་གང་བྱུང་གིས་རྩེད་མོ་ལྟ་བུའི་རྣམ་འགྱུར་ཞིག་གིས་སྤེལ་མི་རུང་ངོ་།དཔེར་ན་ནི།ང་ཚོས་རྐྱང་གཞས་ཤིག་སྟ་གོན་བྱེད་པའི་དབང་དུ་བྱས་ན།ཐོག་མར་གཞས་ཚིག་ཡག་པོ་ཞིག་འདེམས་དགོས་པ་དང་གཉིས་པར་དེ་ལ་དབྱངས་ལེགས་པོ་ཞིག་སྦྱོར་ཤེས་རྒྱུ་ཧ་ཅང་གལ་ཆེ་བར་བསམས།རིམ་བཞིན་སྦྱོང་བ་ཡང་ཡང་བྱེད་པའི་གོ་རིམ་དང་ཚིག་དབྱངས་ཀྱི་རིམ་པ་སྐྱོ་བ་དང་དགའ་བ་གང་དུ་གཏོགས་པར་དེ་དང་འཚམ་པར་ཕྱི་ནང་གི་འཁྲབ་སྟོན་ལ་གོམས་པར་བྱ་རྒྱུ་སོགས་གཙོའོ།།   གལ་སྲིད།དབྱངས་སྦྱོར་ལ་རྨོངས་པ་དང་གཞས་ཚིག་བདམས་པར་རྨོངས་པ།དེ་སྦྱོང་བར་རྨོངས་པ་དང་རོལ་མོའི་ཤེས་བྱ་ཏུལ་ཙམ་ཡང་མེད་པར་རྨོངས་པ་སོགས་ཅི་ཡང་གཏད་སོ་མེད་པར་ལྡ་མ་ལྡིང་གིས་སོང་པ་ཡིན་ན།ང་ཚོ་གླུ་བ་ནད་པ་ཞིག་ཏུ་གྱུར་སོང་པ་ཡིན།ལྷག་པར་ཁྱོད་ཀྱིས་གཞན་གྱི་ཚིག་དབྱངས་གང་བྱུང་གིས་བརྐུས་ནས་ལེན་པ་དང་བསྐྱར་ལེན་བྱེད་པ་སོགས་ཡིན་ན་ང་ཚོ་གཞན་གྱི་བསྐྱར་དཔར་གླུ་པ་ཞིག་ཏུ་གྱུར་སོང་པ་ཡིན་ཞིང་།འདི་ལྟ་བུའི་ངང་རྐྱང་གཞས་སྤེལ་བ་ཡིན་ན་ཁྱོད་ཀྱི་རྐྱང་གཞས་ཀྱི་རིན་ཐང་ཡང་ལར་ནས་ཉམས་སོང་པ་ཡིན།དེ་བཞིན་གླུ་བ་ནད་པ་ཞིག་ཏུ་གྱུར་བའང་ཡིན་ནོ།།མི་རབས་གསར་བའི་གླུ་བ་ཚད་ལྡན་ཞིག་ལ་མཚོན་ན།ཆེས་མ་མཐའ་ཡང་ཁྱོད་ཀྱིས་ཚིག་དབྱངས་རང་ཉིད་ནས་གསར་རྩོམ་ཐུབ་དགོས་ཤིང་ཐོལ་བརྒལ་གྱི་བྲག་ཅ་གནམ་ས་གཡོ་བ་ཞིག་ཨེ་འཁྱོངས་འབད་པ་གཙིགས་འཛིན་ནུས་དགོས་སོ།།                                  ཚན་བཤུས།    
   Amdo  subjects 1079 For more information about this term, see Full Entry below.Subjects Tibet and HimalayasBibliographic ClassificationTibetan and HimalayanCultural and Environmental GeographyPlacesTibetFull EntryRelated Subjects (1)Related Texts (24)Related Sources (5) Modern Creative Literature  subjects 1603 For more information about this term, see Full Entry below.Subjects Tibet and HimalayasBibliographic ClassificationTibetan and HimalayanTibetan LiteratureFull EntryRelated Subjects (1)Related Audio-video (42)Related Texts (20) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192)