ཁྲི་ཀའི་རྫོང་མགོ་སྡེ་བས་བཀྲ་ཤིས་ཐོང་ཁ་ཕྱེས་སོང་།    ཁྲི་ཀའི་རྫོང་མགོ་སྡེ་བས་བཀྲ་ཤིས་ཐོང་ཁ་ཕྱེས་སོང་།                        （ཁྲི་ཀ）མགོན་ཚེ།   དཔྱིད་ཀྱི་དཔལ་མོའི་དྲོད་འཁོལ་ནོར་འཛིན་གཡང་གི་ར་བའི་དཀྱིལ་ལ་འཕོས་པ་ན། རིན་ཆེན་འབྱུང་གནས་ཀྱི་མཛེས་རྒྱ་ལྷུག་པོར་གྲོལ་ཞིང་། སྐྱེ་རྒུའི་ལང་ཚོ་ཡི་གསོན་ཤུགས་ཀྱང་མཐོ་རི་བོའི་རྩེ་ནས་སྨད་རྒྱ་མཚོའི་གཏིང་རུམ་གྱི་བར་དུ་རྒྱས་ཏེ། སྣོད་བཅུད་ལེགས་ཚོགས་རྒྱས་པའི་བཀྲ་ཤིས་ཀྱི་སྒོ་མོ་ཕྱེ་ཞིང་། ལོ་འཁོར་མོ་གཅིག་གི་རྟེན་འབྲེལ་ལ་དབུ་ཁྱུད་བྲིས་བྱུང་། མི་རབས་ནས་ཚེ་རབས་ལ་ཞིང་ས་ནི་རོང་བ་མང་ཚོགས་ཀྱི་འཇིག་རྟེན་གྱི་གཞི་དང་། ཚེ་སྲོག་གི་རྟེན། འཁོར་བའི་འཇུ་ཐག་ཏུ་གྱུར་ཡོད་པས། དཔྱིད་མགོར་བདེ་སྐྱིད་ཀྱི་ས་བོན་ཞིང་ས་གཡང་གི་ར་བར་བཏབ་ནས་དགོས་འདོད་ཀྱི་ནོར་བུ་སྦྲུམ་པར་བྱེད་པ་ནི། ཞིང་བ་མང་ཚོགས་ཀྱི་ལོ་གཅིག་གི་བྱ་བའི་བཀྲ་ཤིས་ཀྱི་རྟེན་འབྲེལ་ཉིད་དུ་ལགས་ལ། ཁྲི་ཀ་རྫོང་གི་རྫོང་མགོ་སྡེ་བས་ཀྱང་དཔྱིད་ཀའི་སོན་འདེབས་ཀྱི་གྲ་སྒྲིག་ལེགས་པོར་བགྱིས་ནས། ལྷ་ཀླུ་དགའ་བའི་ཆོ་ག་དང་བཅས་ཐོང་སྐར་དང་བསྟུན་ནས་ཐོང་ཁ་ཕྱེ་སྟེ་སོ་ནམ་གྱི་ལས་མགོ་བརྩམས་སོང་།   ཐོང་སྐར་དུས་ཆེན་ནམ་ཡང་ན་ཐོང་ཁ་འབྱེད་པ་ནི་ཞིང་ལས་ས་ཁུལ་གྱི་དཔྱིད་ཀའི་སོན་འདེབས་དུས་ཆེན་ཞིག་ཡིན་ལ། ས་ཆ་ལ་ལས་དེ་ལ་གཉའ་སྦྲེལ་དུས་ཆེན་ཡང་ཟེར། ཨ་མདོའི་ས་ཆ་ནས་ཞིང་རྨོད་བྱེད་ཀྱི་ཡོ་བྱད་གཤོལ་མདའི་སྣེ་མོར་སྤྲད་པའི་ས་ལ་ཟུག་པའི་རྩེ་རྣོན་པོ་དེ་ལ་ཐོང་ཟེར་ཞིང་། ཐོང་གི་སྣེ་ལ་སྤྲད་ཡོད་པའི་ལྕགས་ཟུར་གསུམ་པ་དེ་ལ་ཐོང་ལྕགས་ཟེར་བ་ཡིན། སོ་ནམ་པ་ཚོས་དཔྱིད་ཀར་ཞིང་འདེབས་མགོ་རྩོམ་པའི་སྟ་གོན་ཆོ་ག་ལ་རྨོན་དོར་ཟུང་གི་གཉའ་ཤིང་སྟེང་ཐོང་གཤོལ་སྤྲེལ་ཏེ་ཐོག་མར་ཞིང་འདེབས་རྨོ་སློག་བྱེད་པ་དེ་ལ་ཡོངས་གྲགས་སུ་ཐོང་སྐར་ཕྱེ་བའམ་ཡང་ན་ཐོང་ཁ་གསོ་བ་ཟེར།   བོད་ཡུལ་གྱི་ས་ཁུལ་སོ་སོའི་ས་བབ་མཐོ་དམའ་མི་འདྲ་བའི་དབང་གིས། ཆུ་མ་ས་ཆ་དང་རི་མ་ས་ཆའི་དཔྱིད་ཕར་འདེབས་དང་སྟོན་ཚུར་ལེན་གྱི་དུས་ཚོད་ཀྱང་གཅིག་མཚུངས་མིན། དཔྱིད་ཀར་ཞིང་གདབ་རན་པའི་དུས་ལ་བསླེབས་ཚེ། གནམ་གཤིས་དྲོ་བའི་དམའ་གཤོང་ས་ཆ་ཁ་ཤས་ནས་བོད་ཟླ་དང་བོའི་ཚེས་བཅུ་གཅིག་དང་ཚེས་སུམ་ཅུ་ཉིན་ལྷ་གསོལ་བསང་གཏོང་གིས་རྨོ་འདེབས་ཀྱི་ཐོང་སྐར་ཕྱེ་བའམ་ཐོང་ཁ་གསོ་བ་ཟེར།   ཡུལ་ལུང་འགའ་རེས་བོད་ཟླ་གཉིས་པའི་ཚེས་གསུམ་དང་ཉེར་གསུམ་གང་རུང་ལ་སོན་འདེབས་ཀྱི་གཟའ་སྐར་འཕྲོད་སྦྱོར་ཡག་མིན་བརྟགས་ནས་ཐོང་སྐར་དུས་ཆེན་གྱི་བྱེད་སྒོ་སྤེལ་བ་རེད། ཉིན་དེར་སྔ་དྲོའི་ཆུ་ཚོད་དགུ་བ་ཡོལ་ཙམ་ན།  དགེ་འདུན་པ་ཞིག་གིས་བཀྲ་ཤིས་སྨོན་འདུན་གྱི་ཆོ་ག་འདོན་པ་དང་། དེ་ནས་སྡེ་བའི་རྒན་པོ་བསམ་ཤེས་དག་གིས་ལྷ་གསོལ་བསང་གཏོང་གིས་ལོ་ལེགས་ཕུན་ཚོགས་འབྱུང་བར་གསོལ་མཆོད་འབུལ་བ་དང་། ཐོང་སྐར་ཕྱེ་མཁན་གྱི་སོན་འདེབས་པ་དང་སྐྱེ་ཕོ་མོ་མང་ཤོས་ཀྱིས་གྱོན་གོས་གཟབ་མཆོར་སྤྲས་ཏེ་གཉའ་སྦྲེལ་རྟེན་འབྲེལ་བྱེད་སའི་ཞིང་ས་གཤིན་པོ་ཞིག་ཏུ་འདུ་འཛོམས་ཀྱིས་བཀྲ་ཤིས་ལོ་ལེགས་ཀྱི་རྟེན་འབྲེལ་མཚོན་བྱེད་དུ་གྲོ་སོ་ཕྱེ་མ་དང་ཇ་ཆང་ཟས་རིགས་སྣ་ཚོགས་བཤམས།     སྤྱིར་བཏང་དུ་སྔོན་བྱོན་མེས་པོ་གོང་མ་རྣམས་ཀྱི་ཉམས་མྱོང་ལྟར་སྐྱ་ཀའི་ཚང་སྒོ་ལ་བསྟུན་ནས་རྨོ་འདེབས་ཀྱི་མགོ་རྩོམ་ས་གཏན་ཁེལ་བྱ་བ་རེད། བཤད་རྒྱུན་དུ། སྐྱ་ཀའི་ཚང་སྒོ་ཤར་ལ་གཏད་ན་ལོ་དེར་ཆར་ཆུ་མོད་པ་དང་ཤྭ་འོད་ཆུ་ལོག་འོང་བའི་རྟགས་ཡིན་ཟེར་ལ།  ཚང་སྒོ་ཀླད་པ་གཏད་ན་ལོ་དེར་གནམ་གཤིས་ངན་པ་དང་ཐན་པ་ཆེ་རྟགས་ཡིན་ཟེར། བྱང་ལ་གཏད་ན་ལོ་ལེགས་དང་ལྷོ་ལ་གཏད་ན་ཕྱུགས་ཟོག་འཕེལ་རྟགས་ཡིན་ཟེར།   རྫོང་མགོ་ཞེས་པ་ནི་མཚོ་ལྷོ་ཁུལ་ཁྲི་ཀ་རྫོང་ལ་ཟེ་བ་གྲོང་རྡལ་མངའ་ཁོངས་ཀྱི་སྡེ་བ་ཞིག་སྟེ། ལ་ཟེ་བ་གྲོང་རྡལ་སྲིད་གཞུང་གི་བྱང་ཤར་ཕྱོགས་སུ་སྤྱི་ལེ3ཙམ་གྱི་མཚམས་ན་ཆགས་ཡོད་ཅིང་། འདིའི་ཁོངས་སུ་རྫོང་མགོ་དང་། ཨ་བསེ་ཁུག  སིལ་ར་བཅས་སྡེ་ཆུང་གསུམ་ཡོད། སྔོན་ཆད་སྡེ་བ་འདི་ནི་ལུང་བ་འདིའི་ནགས་རྫོང་སྟུག་པོའི་ཕུ་མགོ་ན་ཆགས་ཡོད་པས་མིང་ཡང་དེ་སྐད་དུ་ཐོགས་པར་བཤད། འདི་ལ་རྡོ་རའི་རྫོང་མགོ་ཡང་ཟེར།   ས་དེའི་ཞིང་པ་རྣམས་ཀྱིས་དགུན་གྱི་དུས་སུ་ཞིང་ཁར་ལུད་གསོག་ཐལ་གསོག་བྱས་ནས་དཔྱིད་འདེབས་ལ་གྲ་སྒྲིག་གང་ལེགས་བྱས་ཏེ་དཔྱིད་ཀ་ཐོན་པ་ན་ཞིང་འདེབས་པའི་ཉིན་མ་སྐར་མ་ལ་བརྟགས་ཏེ་ཐོང་སྐར་ཕྱེ་བའམ་ཡང་ན་ཐོང་ཁ་གསོ་བ་རེད། ཟླ་དང་པོའི་ཚེས་ཉེར་གཉིས་ཉིན་གྱི་སྔ་དྲོའི་ཆུ་ཚོད་དགུ་ཙམ་དུ། རྫོང་མགོ་ཡུལ་གྱི་ཕོ་མོ་རྒན་གཞོན་ཚང་མ་གཞི་གཅིག་ཏུ་རྟེན་འབྲེལ་བྱེད་སའི་ཞིང་ས་གཤིན་པོ་ཞིག་ལ་འཛོམས་ནས་སྔོན་ནས་བྱུང་བའི་ཡུལ་སྲོལ་གོམས་འདྲིས་ལྟར་ཞིང་སའི་ལུད་ཕུང་ཞིག་གི་སྟེང་དུ་སྤོས་བསྒྲོན་ནས་འཛུགས་པ་དང་། གཞི་བདག་དང་ས་བདག་གི་ཐུགས་མཉེས་ཕྱིར་བསང་ཕུད་ནས་མཆོད་ཆང་གཏོར་བཞིན་བཀྲ་ཤིས་ལོ་ལེགས་འབྱུང་བའི་ཞལ་གཡང་བརྗོད་པ་དང་མཉམ་དུ་རྨོ་འདེབས་མཁན་དང་གཤོལ་མདའ་འཛིན་མི་ལ་ལོ་དེའི་ལོ་རེས་སྤར་ཁ་དང་མཐུན་པ་ཞིག་བདམས་ནས་རྨོན་ཆས་ཀྱི་རྭ་མགོར་མར་གྱིས་བྱུགས་པ་དང་བལ་མདའ་འདོགས་པ། ཐོང་གཤོལ་གྱི་སྟེང་དང་རྨོ་འདེབས་མཁན་གྱི་ཐོད་པ་ཡང་མར་གྱིས་བརྒྱན་རྗེས། ལོ་དེའི་ལོ་ལྷ་གང་དུ་བཞུགས་པའི་ཕྱོགས་སུ་འཁོར་ནས་ཕྲུ་སློག་བྱེད། ཐོང་དབོར་སྣ་ཚོགས་མིག་གི་མཛེས་རྒྱན་དུ་ཕུལ་བ། ཞིང་འདེབས་མགོ་རྩོམ་དུས། རྒན་པ་ཡ་རབས་བསམ་ཤེས་ཤིག་གིས་ཐོག་མར་སྙན་མོ་དབྱངས་ལ་བཀུག་ནས། སྟོད་རྒྱ་གར་རྒྱལ་པོའི་ལོ་ཡག  སྨད་རྒྱ་ནག་རྒྱལ་པོའི་ལོ་ཡག  སྐུ་རྒྱལ་བོད་ཀྱི་ལོ་ཡག  ཁམས་གསུམ་ལོ་ཡག་འདིར་འདུས་ནས།  འབྲུ་དྲུག་ལོ་ཡག་མཛོད་དུ་བལྟམས་ནས། ཟས་གོས་འཛོམས་པོ་ལྷ་ཡུལ་དང་ཀླུ་ཡུལ་ལ་འགྲན་པ་བྱུང་ནས། མི་ཕྱུགས་ཐམས་ཅད་སྐྱིད་ཀྱིས་ཁེངས་པར་ཤོག་ཅིག་ཟེར་བཞིན་ཞིང་འདེབས་མགོ་རྩོམ་པ་དང་། ཉིན་གུང་ཐོན་ཚེ་ཚང་མས་མཉམ་གཅིག་ཏུ་དྲོས་ཇ་འཐུང་ནས་ཆེད་དུ་གྲ་སྒྲིག་བྱས་པའི་ཁྱིམ་ཚང་སོ་སོའི་གོ་རེ་གང་ཞིམ་དང་ཆང་གང་བཟང་ལ་རོལ་ནས་ཐོང་སྐར་དུས་ཆེན་ནམ་ཐོང་ཁ་གསོ་བར་རྟེན་འབྲེལ་ཞུ་བ་ཡིན།  
   Local Festival  subjects 5411 For more information about this term, see Full Entry below.Subjects Tibet and HimalayasMonastery CharacteristicsFull EntryRelated Subjects (3)Related Texts (2)Related Audio-video (19)Related Images (8) Festivals of Tibet  subjects 6005 For more information about this term, see Full Entry below.Subjects CollectionsTibetan and Himalayan CollectionsFull EntryRelated Subjects (11)Related Texts (3)Related Audio-video (15)Related Images (532) Festivals  subjects 6224 For more information about this term, see Full Entry below.Subjects CollectionsTibetan and Himalayan CollectionsReligion in TibetFull EntryRelated Subjects (1)Related Audio-video (15)Related Texts (1)Related Images (202) Festivals  subjects 2584 For more information about this term, see Full Entry below.Subjects Tibet and HimalayasTopicsFull EntryRelated Subjects (1)Related Images (365)Related Audio-video (14)Related Texts (1) Overview of Festivals in Tibet  subjects 6006 For more information about this term, see Full Entry below.Subjects CollectionsTibetan and Himalayan CollectionsFestivals of TibetFull EntryRelated Subjects (1)Related Audio-video (2)Related Texts (1) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192) ཡུལ་སྲོལ  terms 182553  Wylieyul srol/ExpressionFor more information about this term, see Full Entry below.Terms yayul ring /Full EntryRelated Texts (3)Related Audio-video (3)ཡུལ་སྲོལ་གོམས་འདྲིས  terms 182554  Wylieyul srol goms 'dris/ExpressionFor more information about this term, see Full Entry below.Terms yayul ring /Full EntryRelated Texts (1)ཡུལ་སྲོལ་གོམས་གཤིས  terms 182555  Wylieyul srol goms gshis/ExpressionFor more information about this term, see Full Entry below.Terms yayul ring /Full EntryRelated Texts (1)Related Audio-video (1)