སྟག་རིག་གི་གྱོད་བཤད་སྲོལ་སྐོར་ལ་རགས་ཙམ་དཔྱད་པ་བྱུ་རུའི་མགུལ་རྒྱན།    སྟག་རིག་གི་གྱོད་བཤད་སྲོལ་སྐོར་ལ་རགས་ཙམ་དཔྱད་པ་བྱུ་རུའི་མགུལ་རྒྱན།                                                                ཤཀྱཱ་བཀྲ་ཤིས་ཚེ་རིང་།  ཀན་སུའུ།   སྟག་རིག་ནི་མདོ་སྨད་ཁྲི་ཀ་རྫོང་མཁར་ནས་ཤར་ཕྱོགས་སུ་སྤྱི་ལེ37མཚམས་སུ་ཆགས་ཡོད་པའི་རང་བྱུང་སྡེ་བ་ཆུང་ཆུང་ཞིག་ཡིན་ལ།  སྡེ་བ་ཡོངས་ལ་ཁྱིམ་ཚང186ཡོད་པ་དང་མི་གྲངས800ཙམ་ལས་མེད།  སྡེ་བར་དེར་ཚོ་བ་ཆེ་ཆུང་དགུ་ཡོད་པ་དང་ཚོ་ཁག་ཏུ་ཆགས་ཡོད་པ་ཤ་ཀྱཱ་ཚོ་བ་མ་གཏོགས་མེད།  ཤ་ཀྱཱ་ཚོ་བ་ལ་ཤ་ཀྱཱ་ཚང་དང་ཤ་ཀྱཱའི་སྤྱན་ཚང་གཉིས་སུ་དབྱེ་རྒྱུ་ཡོད།  གཞན་ནགས་ཚང་ཚོ་བ་དང་བྲ་ཚ་ཚོ་བ།  ཞོར་ཚང་ཚོ་བ་བཅས་ནི་ཚོ་བ་ཆེ་ཤོས་ཀྱི་གྲས་སུ་འདྲེན་བཞིན་ཡོད་ལ།  རྙེ་ཚང་དང་སྟག་རིག་ཚང་།  འོ་ལྡུར་ཚང་།  ཀེ་ལུ་ཚང་།  རེ་ཚང་།  ནགས་ཕྲུག་ཚང་བཅས་ནི་ཚོ་བ་ཆུང་ཤོས་སུ་རྩི་བཞིན་ཡོད།          སྡེ་བ་འདིའི་ཤར་ཕྱོགས་སུ་སྒྱོམ་སྡེ་བ་དང་དམེ་ཀྱཱ་སྡེ་བ།  ཞིང་མོ་ཆེ་སྡེ་བ་བཅས་ཡོད་པ་དང་།  ལྷོ་ཕྱོགས་སུ་རྐང་ཚ་གོང་ཞོལ་གཉིས་ཀ་དང་བདུད་ཤུལ་སྡེ་བ་བཅས་ཡོད།  ནུབ་ཕྱོགས་སུ་བྱེ་མ་ལུང་དང་རྒྱ་ཚ་སྡེ་བ་ཡོད་ལ།  བྱང་ཕྱོགས་སུ་ཨ་སྐོང་དང་ཁྲོ་བོ་རྒྱལ་སྡེ་བ་བཅས་ཡོད།  སྡེ་བ་ཆུང་ཡང་ས་ཁྱོན་ཆེ་ཞིང་རི་ལུང་མང་བས་གནའ་ནས་ད་བར་དུ་ཞིང་ཕྱུགས་གཉིས་ཀའི་ལས་ཀ་གཉེར་བཞིན་ཡོད།  འཕྲང་དམར་གཞུང་ཆུའི་འགྲམ་རྒྱུད་དུ་ཆགས་ཡོད་པའི་སྡེ་བ་གོང་མ་གོང་མས་དེ་ལ་འཇམ་པ་ཟེར་བ་དང་།  ཞོལ་མ་ཞོལ་མས་འཇམ་པ་གོང་མཐའ་བ་ཟེར་བཞིན་ཡོད།  སྡེ་བའི་མི་རྣམས་ཀྱིས་མི་རབས་ནས་མི་རབས་ལ་རང་ཉིད་ནི་འཇམ་པ་བ་ཡིན་པར་ངེས་འཛིན་གྱིན་ཡོད།  ཁ་ཅིག་གིས“འཇམ་པ་”ཞེས་པ་ནི་ཀློག་པའི་སྒྲ་མ་དག་པ་སྟེ་“འཇང་པ”ཡིན་པར་འདོད།  ཡང་ཁ་ཅིག་གིས་“འགྲམ་པ”ཞེས་པའི་སྒྲ་འགྱུར་བ་སྟེ།  རྨ་ཆུའི་འགྲམ་རྒྱུད་དུ་སྡོད་པའི་མི་ལ་གོ་དགོས་ཟེར།  གང་ལྟར་བཤད་ཀྱང་བདག་གིས་ནི་མིང་འདིའི་ནང་དུ་གནའ་བོའི་མེས་པོ་ཞིག་གི་གསང་རྣམ་ཡོད་པར་གདོན་མི་ཟ་སྙམ།  ལོ་རྒྱུས་ཡིག་ཚང་ནང་དུ་རྗེས་འཇུག“ང”དང་“མ”གཉིས་ཀྱི་འཇུག་ཚུལ་ཕན་ཚུན་འགྱུར་འགྲོ་བའམ་བརྗེས་ནས་འབྲི་སྲོལ་ཡོད་ཀྱང་།  འདིར་སྟག་རིག་གི་རྒན་ལྕགས་བྷེ་ལགས་ཀྱིས་བཤད་པ་ལྟར་འཇམ་པ་དང་འབྲོག་པ།  རོང་བ་གསུམ་ནི་སའི་ཆགས་བབས་ལ་བལྟས་ནས་བཏགས་པའི་རྗེས་གྲུབ་ཀྱི་མིང་ཡིན་ལ།  རི་མཐོ་ཞིང་ས་གཙང་བའི་དབེན་པའི་གནས་ལ“འབྲོག”ཟེར་བ་དང་།  ལུང་མཐིལ་དང་གཤོང་སའི་གནས་ལ“རོང”ཟེར།  དེ་གཉིས་ཀྱི་བར་མཚམས་སུ་ཆགས་པའི་ཁོད་ཡངས་ཤིང་ཡུལ་མཛེས་པ་ལ“འཇམ”ཞེས་ཟེར།  གནས་དེ་དག་ཏུ་འཚོ་བཞེས་བྱེད་པའི་མི་ལ་“འབྲོག་པ”དང་“རོང་བ”དང“འཇམ་པ”ཞེས་བྱུང་བ་ཡིན་ཟེར།          སྤྱི་ཚོགས་རྙིང་བར་སྡེ་བ་འདིས་ཕྱུགས་ལས་གཙོར་གཉེར་བ་དང་ད་ལྟ་ཞིང་ལས་གཙོར་གཉེར་བྱེད་བཞིན་ཡོད།  དེ་བས།  སྡེ་བ་འདི་གྱོད་སྣ་ཁ་མཆུ་དང་འཕྲད་སྐབས་འབྲོག་པའི་དཔེ་ལྟར་མི་ཤ་སྟོང་འཇལ་གྱི་གྱོད་བཤད་སྲོལ་ཡོད་ལ།  རོང་བའི་དཔེ་ལྟར་རྐུས་པ་ཉིས་འཇལ་དང་འཕྲོག་པ་དགུ་འཇལ་གྱི་གྱོད་བཤད་སྲོལ་ཡང་ཡོད།  ད་ལྟ་རྒྱལ་ཁབ་ཀྱི་ཁྲིམས་ལྟར་མི་དམངས་ཁྲིམས་ཁང་ལ་གཏུག་བཤེར་བྱེད་པའི་གྱོད་གཞིའང་ལོ་རེ་ནས་ལོ་རེར་ཇེ་མང་དུ་འགྲོ་བཞིན་ཡོད།      དང་བོ།  སྟག་རིག་གིས་འབྲོག་པའི་དཔེ་ལྟར་གྱོད་བཤད་སྲོལ།      འབྲོག་པས་གྱོད་བཤད་སྐབས།  “གྱོད་ཕར་འགེལ་ཕོ་རོག་མདའ་ཁུར་དང་།  གྱོད་ཚུར་འགེལ་དགེ་འདུན་སྤྱི་འཁུར”ཞེས་པའི་ཁ་དཔེ་ལྟར།  རང་དོན་ཁོ་ནའི་ཆེད་དུ་གཞན་སྡེ་བཙན་གཉོམ་གང་རུང་ལ་ཉེས་པ་བཟོས་ཏེ་འཇལ་བཤགས་སྤྲོད་དགོས་ཚེ།  དེ་ནི་རང་ཚོད་མ་ཟིན་པས་ཕར་བཀལ་ཡིན་པས།  སྡེ་བ་ཚོ་ཁག་དང་ཤོག་པ་སྤྱི་སྡེ་གང་རུང་གིས་དེ་ལ་རོགས་རམ་དང་རྒྱབ་སྐྱོར་ཅི་ཡང་བྱ་མི་ཆོག་པ་སྟེ།  དཔེར་ན་ཕོ་རོག་རྒྱབ་ལ་མདའ་ཕོག་པ་ནང་བཞིན་རང་སྡུག་རང་གིས་འཁུར་དགོས་པ་ལས་ཉེ་རིང་སྤུན་མཆེད་སུས་ཀྱང་སྟོང་འཇལ་རོགས་བྱ་མི་ཆོག་པ་རེད།  དེ་ལས་ལྡོག་སྟེ།  གཞན་བཙན་པོ་སུ་ཞིག་གིས་རྒྱུ་རྐྱེན་གང་ཡང་མེད་པར་བརྙས་བཅོས་བྱས་པའམ་ཡང་ན་སྡེ་བ་དང་ཚོ་བ་སྤྱི་གཞུང་གི་དོན་དུ་ཕ་རོལ་བོ་ལ་མི་ལེགས་པའི་མཇུག་འབྲས་བཟོས་ཏེ་འཇལ་བཤགས་སྟོང་གསུམ་སྤྲོད་དགོས་ཐུག་ཚེ།  དེ་ནི་རང་ལ་རང་དབང་མེད་པར་གཞན་གྱིས་གྱོད་ཚུར་བཀལ་བ་ཡིན་པས།  དགེ་འདུན་སྤྱི་འཁུར་ཞེས་པའི་དཔེ་སྲོལ་ལྟར་ཚོ་བའམ་སྡེ་བ་སྤྱི་གཞུང་ནས་འཁུར་དགོས་སོ། །   སྟག་རིག་སྡེ་བར་མཚོན་ན།  མེས་པོ་སྔ་མ་སྔ་མ་རྣམས་ཀྱིས་ས་ཆུ་དང་རི་ལུང་མང་པོ་བདག་གིར་བཟུང་མྱོང་ཞིང་།  རྟ་ནོར་ལུག་གསུམ་གྱི་འཕེལ་ཁ་དར་ནས་རྗེས་རབས་པ་རྣམས་ལ་ཕྱི་སྣོད་ཀྱི་ཁོར་ཡུག་དང་ནང་བཅུད་ཀྱི་སེམས་ཅན་མོད་པོས་ཡིད་ཚིམས་པ་ཞིག་བཞག་ཡོད་ཀྱང་།  དུས་རབས་ཀྱི་འགྱུར་ལྡོག་ནི་བཤད་མི་ཤེས་བྱིས་པའི་སེམས་འདྲ་འདྲ།  ཚོད་མི་ཐུག་དབྱར་ཁའི་ཆར་འདྲ་འདྲ་ཞིག་ཡིན་པས།  སྟག་རིག་གི་ས་ཆུ་སྐོར་ཞིག་གྱོད་སྣ་ཁ་མཆུའི་བར་ནས་སྟོང་ལ་ཤོར་བ་དང་།  འགའ་ཞིག་རང་ཉིད་ཀྱིས་བདག་གཉེར་དོ་དམ་མ་བྱས་པས་གཞན་ལ་ཤོར་བ་རེད།  དཔེར་ན།  དུས་རབས་སྔ་མ་ཞིག་ལ།  སྟག་རིག་དང་བདུད་ཤུལ་བར་ལ་འཁྲུག་རྩོད་བྱུང་ནས་མཚོན་འཛིང་བྱས་ཏེ།  སྟག་རིག་གིས་བདུད་ཤུལ་དཔོན་ཕྲུག་ཆེ་གེ་མོ་ཞིག་བསད་པས།  འབྲོག་པའི་སྟོང་འཇལ་སྲོལ་ལྟར། “དཔོན་བཙན་པོ་བསད་ན་ས་ཡིས་འཇལ།  ས་སེར་བོའི་སྟེང་ལ་གསེར་གྱིས་བཀང”ཞེས་པ་ལྟར་སྟག་རིག་ཀ་ཙེ་ཐང་གོང་མ་དེ་དཔོན་ཕྲུག་བསད་པའི་མྱི་ཤ་རུ་སྟེར་དགོས་བྱུང་བ་དང་།  རྗེས་རབས་པ་རྣམས་ཀྱིས་དེ་ལ་ངན་དམས་ཀྱི་ཚུལ་དུ“ཤི་བོའི་ཐང”ཞེས་བཏགས་པས་ད་ལྟའང་ཐང་དེ་ལ“ཤི་བོའི་ཐང”ཞེས་འབོད་བཞིན་ཡོད་པ་ལྟར་རོ། །   བཅིངས་འགྲོལ་བྱས་པའི་ཚུན་ཆད་ནས།  སྟག་རིག་འདི་སྡེ་བ་གཞན་པ་དང་མ་འགྲིག་པའི་འཁྲུག་རྩོད་ཆེན་པོ་བྱུང་མ་མྱོང་ལ།  མྱི་ཤ་སྟོང་འཇལ་གྱི་ལས་ལ་མཁས་པའི་མི་བུ་འཇོན་ཐང་ཅན་ཡང་ཇེ་ཉུང་ཇེ་ཉུང་རེད།  དུས་རབས་ཉི་ཤུ་བའི་ལོ་རབས་དགུ་བཅུའི་ནང་དུ།  རྨོ་སྐྱུར་ནགས་འདེབས་དང་ཕྱུགས་སྐྱུར་རྩྭ་འདེབས་ཀྱི་སྲིད་ཇུས་བཟང་པོ་ལག་བསྟར་བྱེད་ཆེད།  སྟག་རིག་གིས་སྒམ་ལུང་བའི་ཉིན་ངོར་ནགས་ཕྲུག་འཛུགས་སྐབས།   བདུད་ཤུལ་གྱི་གསར་བུ་འགའ་རྒྱུགས་ཡོང་ནས་མཚོན་འཛིང་བྱས་ཏེ་སྟག་རིག་གི་གསར་བུ་ལོ་ཆུང་ཞིག་བསད་པས་མྱི་ཤ་སྟོང་འཇལ་གྱི་གཡུལ་བཤམས་དགོས་བྱུང་།  དེ་དུས་འབྲོག་པའི་དཔེ་ལྟར་དགྲ་ཕྱོགས་ལ་རྫིག་འཕེན་སྐབས།  ན་གཞོན་ཚོའི་ནང་དུ་རྫིག་གཏམ་སྤེལ་ཤེས་མཁན་གཅིག་ཀྱང་མ་བྱུང་བ་དང་།  ལས་འཁྱུར་ངལ་གསོ་ལ་གནས་པའི་རྒད་པོ་ཁ་མཁས་ཤིག་གིས་རྫིག་བག་གི་གཏམ་ཞིག་བསྐུར་བ་འདི་ལྟ་སྟེ།   ང་སྟག་རིག་ཟེར་བ་སྟག་ཡིན།  སྟག་འཛུམ་དྲུག་ཉིལ་ལེ་བསྡད་ཡོད་དུས།  ཁྱོད་བདུད་ཤུལ་ཟེར་བ་བདུད་རེད།  བདུད་སྟ་རེ་བཟུང་ནས་ཐོན་ཐལ།  སྒམ་ལུང་བའི་ཉིན་ངོ་ནགས་ཡིན།  ནགས་རྒྱ་རྫོང་སྲུང་ནོ་ང་ཡིན།  ང་ལྷ་ཆེན་ཚངས་པའི་སྒོ་ཟོག་ཡིན།  ཁྱོད་ལྷར་མཇལ་རྒྱུ་ཡིན་ནམ་འབྲོ་རྒྱུ་ཡིན་ཞེས་དྲིས་པར།  རྫིག་ལན་དུ། ཁྱོད་སྟག་རིག་ཟེར་བ་སྟག་རེད།  སྟག་བསད་ན་པགས་པ་གདན་རེད།  ང་བདུད་ཤུལ་ཟེར་བ་བདུད་རེད།  བདུད་བཙན་པོ་ཞིག་གི་ཤུལ་རེད།  ལྷ་ཚངས་པའི་སྒོ་ཟོག་སྟག་རེད།  སྟག་སྒོ་ཁར་བཏགས་ན་ཁྱི་རེད།  ཁྱི་བསད་ན་རོ་བདག་སུ་རེད།  ཅེས་ལན་བརྒྱབ་ཡོང་བས་སྟག་རིག་གི་རྒད་པོ་རྣམས་ཁ་སྤོ་ཁ་ནས་ལངས་ཤིང་ཞེ་སྤོ་གཏིང་ནས་ལངས་ཏེ།  རང་ལོ་བཅོ་ལྔ་ཡན་ཆད་དང་དྲུག་ཅུའི་མན་ཆད་ཀྱི་སྐྱེས་ཕོ་རབ་ཐམས་ཅད་ལ་དམག་བརྡ་བཏང་ནས་ཤ་འཁོན་རྩོད་དུ་བརྒྱུག་རྩིས་བྱས་པ་ན།  ས་གནས་སྲིད་གཞུང་དང་ཉེན་རྟོག་ལས་ཁུངས་ཀྱིས་ཚོར་ནས།  སྟག་རིག་སྡེ་བ་ཕྱི་ནང་རིམ་པ་གསུམ་དུ་བསྐོར་ནས་མི་གཅིག་ཀྱང་ཕྱིར་འགྲོ་མི་ཐུབ་པར་བྱས།  དེ་ནས་སྲིད་གཞུང་གི་བཀོད་སྒྲིག་ལྟར་དུ།  ལག་དམར་བཟུང་ནས་ཉེས་ཆད་གཅོད་རྒྱུ་དང་སྡེ་བ་གཉིས་ཀྱིས་བོད་ཀྱི་ཡུལ་སྲོལ་ལྟར་དུ་མྱི་ཤ་སྟོང་འཇལ་གྱི་གྱོད་བཤད་རྒྱུར་ཐག་བཅད།   ཟླ་བ་གཅིག་གི་དུས་ཡུན་ཙམ་ལ་ཕྱོགས་གཉིས་ཀྱི་གཟུ་བ་དང་གྱོད་པ་ཚང་མ་ཁྲི་ཀ་རྫོང་མཁར་ལ་འདུས་ནས།  འབྲེལ་ཡོད་ལས་ཁུངས་ཀྱི་མགོ་ཁྲིད་དང་སྣེ་ཁྲིད་འོག་དཀར་པོ་གྱེན་འདེད་དང་ནག་པོ་ཐུར་འདེད་བྱས་ཏེ།  མཇུག་མཐར་གྱོད་བཤད་ན་འགྲིག་དགོས།  མེ་སྒྲོན་ན་འབར་དགོས་ཞེས་པའི་དཔེ་ལྟར།  བདུད་ཤུལ་གྱིས་སྟག་རིག་ལ་མྱི་ཤ་སྤྲོད་དགོས་པ་དང་།  དེ་ལ་ཡང་འབྲོག་པའི་དཔེ་ལྟར་དམག་བཟློག་དང་ཆིངས་རྟེན།  མགོ་བཀུག་དང་བདན་བཏིངས།  སྡིག་བོའུ་རྭ་དམར།  སྡིག་རྟ་རྨིག་དམར།  སྡིག་གྲི་སོ་དམར་དང་བཅས་པའི་གཤིན་སྟོང་གི་རྨང་འདིང་དགོས་པ་དང་།  ཕ་མའི་སྙིང་གནོན་དང་ཡུགས་མོའི་མིག་ཕྱིས།  དྭ་ལུའི་བྲང་རྡུང་།  ཕུ་ནུའི་ཟུར་ཤ   ཉེ་བོའི་ཐོང་ཤ   སྨན་རིན་དང་ལམ་གླ།  དུར་འཇུག་དང་འདས་མཆོད་སོགས་དགེ་སྟོང་གི་གནད་ཆ་ཚང་བ་དགོས་པར་མ་ཟད།  སྟོང་གི་རྔ་མ་ཆོས་ཀྱིས་བསྡུམས་ཞེས་པ་ལྟར་གླེགས་ཤིང་དང་གདོང་དར་བཅས་པའི་ཐར་མདོ་སྤུས་ལེགས་ཤིག་བླུ་དགོས་པ་ཐག་བཅད།   གྱོད་འདི་འདྲ་ཞིག་ལ་མཚོན་ན།  ལག་དམར་གྱི་ཕྱོགས་ནས་རྫིག་གཏམ་ཐལ་ཆེ་བ་ལ་རྫིག་བཤགས་དང་མི་བསད་པ་ལ་སྡིག་བཤགས་བཅས་དགོས་པར་མ་ཟད།  ཤི་བོའི་ཕྱོགས་ནས་སྡེ་བ་དང་ཚོ་བ་སྤྱིའི་དོན་དུ་རང་སྲོག་འབེན་ལ་བཞག་པ་ཡིན་པས།  “གྱོད་ཚུར་འགེལ་དགེ་འདུན་སྤྱི་འཁུར་”གྱི་དཔེ་ལྟར་སྡེ་བ་ཡོངས་ཀྱིས་ཁྱིམ་ཚང་དེ་ལ་འོས་འཚམ་གྱི་ནང་སྟོང་འཇལ་བའི་སྲོལ་ཀྱང་ཡོད།    གཉིས་པ།  སྟག་རིག་གིས་རོང་བའི་དཔེ་ལྟར་གྱོད་བཤད་སྲོལ། སྟག་རིག་སྡེ་བ་ནི་རོང་འབྲོག་གཉིས་ཀྱི་ས་མཚམས་སུ་ཆགས་ཡོད་པས།  རྐུ་ཁྱེར་འཕྲོག་བཅོམ་སོགས་ཀྱི་གྱོད་སྣ་ཁ་མཆུ་ལ་འཕྲད་སྐབས།  རོང་བའི་དཔེ་ལྟར་རྐུས་པ་ཉིས་འཇལ་དང་འཕྲོག་ན་དགུ་འཇལ་གྱིས་གྱོད་བཤད་སྲོལ་ཡོད་ལ།  དེ་ནི་ཕལ་ཆེར་སྡེ་བའི་ནང་ཁུལ་ནས་ཕན་ཚུན་ཕུ་ནུའི་བར་དུ་རྐུ་འཕྲོག་བྱེད་ན་སྔོན་འགོག་དང་གཏན་འགོག་བྱེད་པའི་ཆེད་དུ་ལོས་ཡིན་སྙམ།  རྒྱུ་མཚན་ནི་སྟག་རིག་སྡེ་བས་གནའ་ནས་ད་བར་དུ་ནང་རྐུས་མི་བྱེད་ལ།  ནང་རྐུས་བྱེད་པ་ནི་ཐན་ལྟས་ངན་པ་ཐ་ཤལ་དུ་རྩི་བཞིན་ཡོད།   དུས་རབས་ཉི་ཤུ་བའི་དུས་མཇུག་ཅིག་ཏུ་བྱིས་པ་བསམ་མེད་འགའ་ཡིས་ཕྱི་རྐུན་ནང་འདྲེན་དང་ཁྱི་སྤྱང་ངན་འབྲེལ་བྱས་ཏེ།  སྡེ་བའི་ནང་གི་བ་ལང་བོང་ལུ་དང་ར་མ་རེའུ་སྐོར་ཞིག་རྐུན་ལ་ཤོར་བས།  རྒན་པ་ཚོས་སྡེ་མི་ཡོངས་རྫོགས་སྒྲིག་འཛུགས་བྱས་ནས་བོད་ཀྱི་ཡུལ་སྲོལ་ལྟར་ལྷ་འབོད་ཀླུ་འབོད་དང་བསང་ཁ་མཆོད་འབུལ་རྒྱ་ཆེན་པོ་བྱས་ཏེ།  ནང་རྐུ་མི་བྱེད་པའི་དམ་བཅའ་རུ་བཞག་སྐད།  དུས་དེ་ནས་བཟུང་སྟག་རིག་སྡེ་བར་རྒན་མོ་གསེར་འཁུར་ཞིག་གཉིད་ལ་ཤོར་ཀྱང་བརྣབ་སེམས་དང་གནོད་སེམས་སྐྱེ་མཁན་གཅིག་ཀྱང་མེད་པའི་རྫོགས་ལྡན་གྱི་བསྐལ་བ་ཡག་པོ་ཞིག་ཆགས་སོང་བ་རེད།   སྟག་རིག་གིས་རོང་བའི་དཔེ་ལྟར་རྩྭ་འཁྱིག་དང་ཆུ་འཁྱིག  ཞིང་འཁྱིག   ནགས་འཁྱིག་སོགས་གཏན་གཡོ་གཉིས་ཀྱིས་གྲུབ་པའི་རྒྱུ་ནོར་མཐའ་དག་སྲུང་སྐྱོང་དང་བེད་སྤྱོད་བྱེད་པའི་ཐད་དུ་གང་ལ་གང་འཚམ་ཀྱི་སྒྲིག་ལམ་དང་སྲོལ་ཡིག་སྣ་ཚོགས་ལག་ལེན་བསྟར་བཞིན་ཡོད་ལ།  གཞན་ལ་ཕྲ་མ་བྱེད་པ་དང་ཚིག་རྩུབ་སྨྲ་བ།  ངག་འཁྱལ་བྱེད་པ་སོགས་ངག་གི་བྱེད་སྒོ་སྣ་ཚོགས་སྤེལ་ནས་མི་དགེ་བའི་ལས་བྱས་པ་ལ“ངག་འཁྱིག”གམ“ཁ་འཁྱིག”འཇོག་པའི་སྒྲིག་ལམ་ཡང་ཡོད་དེ།  དཔེར་ན། Aཚང་གི་མནའ་མ་རྐྱེན་ངན་དང་འཕྲད་ནས་ཤི་བའི་དོན་དེར།  Bཚང་གི་བུ་མོས་ཚིག་འཁྱལ་བཤད་ནས་ཁྱད་གསོད་བྱས་པས།  ཁྱིམ་ཚང་གཉིས་ཀྱི་བར་དུ་འགལ་བ་བྱུང་སྟེ་གྱོད་དུ་གྱུར་བ་དང་།  སྡེ་བའི་གཟུ་བཤད་ཨུ་ཡོན་ལྷན་ཁང་གིས་དུས་ལྟར་གྱོད་དེ་བཤད་ནས་གྱོད་རྔ་ཆོས་ཀྱིས་བཟླུམ་སྐབས།  ཐར་མདོ་དང་ལྟུང་བཤགས།  གནད་བཤགས་བཅས་ལ་སྒོར་ཁྲི་བཅུ་ཐམ་པས་འཇལ་བ་ལྟར་རོ། །   དུས་རབས་ཉི་ཤུ་བའི་དུས་མཇུག་དང་དུས་རབས་ཉེར་གཅིག་པའི་དུས་མགོ་དག་ཏུ།  སྟག་རིག་གིས་ད་རུང་སྔར་སྲོལ་ལྟར“བཟུང་བཀྱིགས་བཅད་ཀྱི་ཁྲིམས”ལག་ལེན་བསྟར་བཞིན་ཡོད་པ་དང་།  རྐུན་མ་བཟུང་ནས་བཀྱིགས་པ་དང་དཔྱངས་པ།  གཅར་རྡུང་བྱེད་པ་སོགས་ལ་སྡེ་བའི་རྒན་དར་གཞོན་གསུམ་ཚང་མ་སྤྲོ་བ་ཆེན་པོ་ཡོད་པ་རེད།  དེ་ཡང་སྟག་རིག་གིས་རྐུན་མ་ལ་རིགས་གཉིས་སུ་དབྱེ་ཡོད་དེ།  རྒྱུ་རྐུ་བ་དང་མྱི་རྐུ་བ་གཉིས་སོ། །  རྒྱུ་རྐུ་བ་ནི་ཕྱིའི་སྣོད་ཀྱི་འཇིག་རྟེན་དུ་ཆགས་པའི་རྒྱུ་རྫས་གང་ཞིག་བདག་གིར་དབང་བཞིན་དུ་གཞན་གྱིས་རྐང་འཇབ་ལག་འཇབ་ཀྱིས་ཁྱེར་བ་ལ་ཟེར་ཞིང་།  དེ་འདྲའི་མ་བྱིན་ལེན་གྱི་བྱ་སྤྱོད་ནི་མ་རབས་ཐ་ཤལ་ཏུ་རྩི་བཞིན་ཡོད་པས།  སུ་ཞིག་གིས་རྒྱང་ནས་མཐོང་བའམ་སྐབས་ཐོག་འཕྲད་པའམ།  རྗེས་དཔག་སྒོས་ཤེས་པ་སོགས་བྱུང་ན་མྱུར་དུ་སྡེ་བའི་གསར་བུ་ཚོར་བཤད་ནས་ཚགས་སྒྲིག་དང་བཟུང་བཀྱིགས་བྱེད་པའི་སྲོལ་ཡོད་པ་རེད།  དུས་རབས་ཉེར་གཅིག་པའི་དུས་མགོར།  སྟག་རིག་གི་ར་ལུག་སྐོར་ཞིག་དང་བ་ལང་སྐོར་ཞིག་གཅིག་རྗེས་གཉིས་མཐུད་དུ་བོར་བརླག་བྱུང་བ་དང་། མི་རྣམས་ཀྱིས་རྐུན་མ་ནི་བདུད་ཤུལ་གྱི་“རི་སྤྱང་སྔོན་མོ”ཟེར་བ་དེ་ཡིན་པར་དོགས་ནས་ལམ་སྒུག་སྟེ་འཇུ་བཟུང་བྱས།  “རི་སྤྱང་སྔོན་མོ”ཟེར་བ་དེས་རེ་ཞིག་སྟག་རིག་གི་ར་ལུག་རྐུ་ཁྱེར་བྱས་པ་ཁས་མི་ལེན་པར་མ་ཟད།  ཁ་ཕོ་ཆེན་པོ་བསྒྲགས་ནས་སྟག་རིག་ལ་ཁྱད་གསོད་བྱས་པས།  གསར་བུ་ཚོས“རི་སྤྱང་སྔོན་མོ”འབྲེང་བས་བཀྱིགས་ཤིང་སྤྱི་ཁང་གི་གདུང་མར་དཔྱངས་ནས་ཚ་འདྲི་ནན་འདྲི་བྱས་མཐར་རྐུན་མ་ཡིན་པ་ཁས་བླངས་པ་རེད།  ཕྱི་ཉིན་བཀྱིགས་ཐག་མ་གྲོལ་བར་སྤྱི་བདེ་ལ་སྤྲད་ཀྱང་ཚ་འདྲི་བྱས་པའི་བྱ་སྤྱོད་དེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་དང་འགལ་ཡོད་པས།  སྟག་རིག་གི་གསར་བུ་བརྒྱད་སྐྱོན་ལ་ཐོགས་པ་རེད་ཟེར།  དེ་ནས་བཟུང་སྟག་རིག་གི་གསར་བུ་རྣམས་ལ་མི་གཞན་གང་དགར་བཟུང་བཀྱིགས་མི་བྱེད་པ་དང་མི་མང་དཔུང་བསྡེབས་ཀྱིས་གཞན་ལ་གཅར་རྡུང་བྱེད་མི་ཉན་པའི་ངོས་ཟིན་ཟབ་མོ་ཐོབ་ཡོད་པ་རེད།     མྱི་རྐུ་བ་ཞེས་པ་ནི་གཞན་པའི་ཆུང་མའམ་མོ་ཧྲེང་གི་སེམས་བཀུག་ནས་ལུས་འབྲེལ་བྱེད་པ་ལ་ཟེར་ཞིང་།  སྟག་རིག་གི་ཡུལ་མི་རྣམས་ཀྱིས“ཕོ་ལོ་བཅོ་ལྔ་བུད་ན་བློ་ཕ་ལ་མི་འདྲི།  མོ་ལོ་བཅོ་ལྔ་བུད་ན་བྲོ་མ་ལ་མི་སློང”ཞེས་རང་ལོ་བཅོ་ལྔ་ནི་ནར་སོན་པའི་དུས་ཚིགས་ཤིག་ལ་ངོས་འཛིན་བཞིན་ཡོད་པ་དང་།  རང་ལོ་བཅོ་ལྔར་བུད་རྗེས་བུ་མོ་རྣམས་ལ་སྐྲ་སྟོན་བྱས་ནས་སྡེ་བ་ཡོངས་ལ་བསྒྲགས་པ་དང་།  དགོང་མོ་མལ་གཟིམ་གྱི་དུས་སུའང་རང་རང་ཕ་མ་དང་ཁ་བྲལ་ནས་ཁེར་རྐྱང་དུ་ཉལ་སྲོལ་ཡོད།  བུ་མོ་གཞོན་ནུ་མ་ཚོ་ཁེར་རྐྱང་དུ་ཉལ་སའི་ཁང་པ་དེ་ལ་ཁྲོང་ཙེ་ཟེར་བ་དང་།  ཕལ་ཆེར་ཁྱིམ་ཚང་རེ་ལ་ཁྲོང་ཙེ་གཅིག་གཉིས་རེ་ཡོད།  དེ་ནི་ཕ་མ་ཚོས་རང་གི་བུ་མོ་ནར་སོན་པར་གྲ་སྒྲིག་བྱས་པའི་ཆེས་དྲོད་འཁོལ་ལྡན་པའི་ལེགས་སྐྱེས་ཤིག་ཡིན་པ་རེད།  རང་ལོ་བཅོ་ལྔར་བུད་པའི་བུ་ཚ་རྣམས་ལ་རང་ཁྱིམ་གྱི་དྲོད་འཁོལ་བསྲུངས་ནས་འདུག་ས་མེད་ལ།  བུ་མོ་རྣམས་དང་འདྲ་བར་ཁེར་རྐྱང་དུ་ཉལ་ས་དེ་བས་ཀྱང་མེད།  རང་ལོ་བཅོ་ལྔར་བུད་པའི་བུ་ཚ་རྣམས“ས་རུབ་ན་འགྲོ་ས་མེད་རུང་བཞའ་ས་ཞིག   ནམ་ལངས་ན་ཡོང་ས་མེད་རུང་སྐུང་ས་ཞིག”ཅེས་པའི་དཔེ་ལྟར་དགོང་མོ་རང་ཁྱིམ་ནས་ཉལ་བའི་དཔེ་མེད་ལ།  ས་རུབ་མ་ཐག་སྲང་མྱུལ་ལ་འགྲོ་དགོས་པ་རེད།   དེ་ལྟར་སྡེ་བ་གཞན་པའི་སྲང་མྱུལ་བ་རེ་རང་སྡེ་ལ་ཐོན་ཚེ་བཟུང་བཀྱིགས་བྱེད་པའི་དཔེ་ཞིག་གནའ་ནས་ད་བར་དུ་ཡོད་པ་དང་།  སྡེ་བ་གཞན་པའི་སྲང་མྱུལ་བ་ལ་ཧྲི་སྡེ་ནས་ཐོན་པའི་མྱི་རྐུན་ཟེར།  མྱི་རྐུན་གང་ཡིན་པ་དེ་ལ་ཞེ་མཐུན་དགའ་རོགས་ཤིག་ཡོད་པའམ་ཡང་ན་ཡུན་རིང་འགྲོགས་རྩིས་ཡོད་པ་ཞིག་ཡིན་ཕྱིན་མྱུར་དུ་ཆང་ཕང་ཁ་བཏགས་བཟུང་ནས།  སྟག་རིག་གི་སྐྱེས་པ་རྣམས་ལ་ལམ་བཤགས་འབུལ་དགོས་པ་དང་།  སྟག་ཤར་ཚོས་ཆང་དེ་འཐུངས་རྗེས་ལམ་ཡངས་བྱ་དགོས།  ལམ་ཡངས་བྱས་ཟིན་པའི་མི་དེ་ནམ་ཡོང་ཡང་སྟག་རིག་གི་ཕུ་ནུ་ཚོ་དང་ལྷན་དུ་མཉམ་འགྲོ་མཉམ་འདུག་བྱས་ཀྱང་ཧྲི་སྡེ་ནས་ཡོང་བའི་མྱི་རྐུན་ལ་རྩི་བཞིན་མེད།  ལམ་བཤགས་མ་འབུལ་ཞིང་ལམ་ཡངས་མ་ཐོབ་པའི་མི་ཞིག་ཡིན་ཕྱིན།  སྡེ་བའི་སྟག་ཤར་ཚང་མ་ཚོགས་ནས་དེ་ལ་བཟུང་བཀྱིགས་བྱེད་པ་དང་།  ཁྱིམ་ཚང་གི་མཁར་ཁ་འགོས་ཤིང་མཁར་སྒོ་གཏོར།  བུ་མོའི་རུམ་ནས་ཕྱུང་སྟེ་བཟུང་སོང་རུང་།  ཁྱིམ་ཚང་དེའི་ཕ་མ་དང་ཉེ་རིང་སུ་ཞིག་གིས་ཀྱང་བཀག་འགོག་བྱ་མི་ཆོག་པ་ཞིག་རེད།  དེ་ལྟར་བཟུང་བའི་མི་དེས་མྱུར་དུ་ལམ་བཤགས་མ་འབུལ་ཚེ།  མི་མང་ལག་རུབ་ཀྱིས་གཅར་རྡུང་བྱེད་པ་དང་སྒྱིད་པའི་ཉྭ་ཁུག་ལ་ཚེར་མས་རྒྱག་པ།  ལུས་གཅེར་བུར་ཕུད་ནས་དར་ཐོག་ཏུ་འདྲུད་པ་སོགས་ངམ་ནག་ཅིང་གདུག་རྩུབ་ཆེ་བའི་མནར་གཅོད་སྣ་ཚོགས་སྤེལ་ནས་རྗེས་ཕྱོགས་འདི་ཕྱོགས་སུ་ཡོང་མི་ཕོད་པ་ཞིག་བྱེད་ངེས་རེད།   གསུམ་པ།  སྟག་རིག་གིས་ཁྲིམས་ལྟར་གྱོད་བཤད་སྲོལ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་དམངས་འདུམ་སྒྲིག་བཅའ་ཁྲིམས་དང་ཉེས་ཁྲིམས།  སྤྱི་ཚོགས་བདེ་འཇགས་དོ་དམ་ཆད་གཅོད་བཅའ་ཁྲིམས་སོགས་འབྲེལ་ཡོད་ཁྲིམས་ཀྱི་རྩ་ཚིག་ནང་དུ་གཏན་འབེབས་བྱས་ཡོད་པར་གཞིགས་ན།  རྐུ་ཁྱེར་དང་འཕྲོག་བཅོམ།  གསོད་པ་དང་རྨས་པ་སོགས་ནི་བྱ་སྤྱོད་གདུག་རྩུབ་ཆེ་ཞིང་བྱེད་ལས་ཡང་བ།  བྱས་འབྲས་གཉིས་ཕུང་གི་རྒྱུ་ཁོ་ན་ཡིན་པས།  བྱ་སྤྱོད་དེའི་རིགས་མང་ཆེ་ཤོས་ནག་ཉེས་ཀྱི་ཁུངས་སུ་ཚུད་ཡོད་ལ་ཉེས་ཆད་ལྕི་མོ་གཅོད་བཞིན་ཡོད།  དེ་ལས་རྐུ་ཁྱེར་གྱི་བྱ་སྤྱོད་དང་གཞན་ལ་རྨས་སྐྱོན་བཟོས་པའི་བྱ་སྤྱོད་འགའ་ཤས་ཤིག་རྐུས་པའི་རྒྱུ་རྫས་ཀྱི་རིན་ཐང་ངམ་རྨས་སྐྱོན་གྱི་ཚད་ངེས་ཅན་ཞིག་ལ་མ་ཐོན་ཚེ།  ནག་ཉེས་ཀྱི་ཁུངས་སུ་མི་ཐེ་ལ་གཞུང་ཕྱོགས་ནས་སྤྱི་ཚོགས་བདེ་འཇགས་དོ་དམ་ཆད་གཅོད་ཀྱི་གཏན་འབེབས་ལྟར་ཉིན་བཅོ་ལྔའི་མན་གྱི་སྲིད་འཛིན་བཀག་སྐྱིལ་བྱེད་པ་དང་རྒྱུ་ཆད་གཅོད་པ།  ཁ་ཏ་སློབ་གསོ་དང་བསླབ་འདོམས་ནན་མོ་གཏོང་བ་སོགས་ཀྱིས་ཆོག་པར་བྱེད།  དེ་འདྲའི་དོན་རྐྱེན་དང་འཕྲད་ཚེ།  སྟག་རིག་གིས་ནམ་ཡང་ཡུལ་གྱི་དམངས་སྲོལ་ལས་རྒྱལ་ཁབ་ཀྱི་ཁྲིམས་གཙོ་བོའི་ངེས་ཤེས་ཟབ་མོ་རྙེད་ཡོད་ལ།  ཁྲིམས་ཀྱི་བདའ་འདེད་ཅིག་ལ་ནམ་ཡང་བཀག་འགོག་དང་བར་ཆད་བཟོས་མ་མྱོང་།   བཅོས་སྒྱུར་སྒོ་འབྱེད་ཀྱི་སྒོ་གླེགས་ཆེས་ཆེར་ཕྱེས་པ་དང་བསྟུན་ནས།  ཕྱི་ལོག་གི་གོམས་གཤིས་ངན་པ་དང་བྱ་སྤྱོད་ངན་པ་སོགས་བཟང་ངན་ལ་དབྱེ་འབྱེད་མེད་པར་སྟག་རིག་གི་ན་གཞོན་སྐོར་ཞིག་གི་སེམས་ཁམས་མག་མོག་ཏུ་སྒྱུར་བཞིན་ཡོད་ནའང་།  ན་གཞོན་མང་ཆེ་ཤོས་ཀྱིས་ཡ་རབས་ཀྱི་དཔྱངས་ཐག་ལ་ཨུ་ཚུགས་ཀྱིས་འཇུས་ནས་ཡུལ་སྲོལ་བཟང་པོ་མ་ཉམས་ཟོ་ཆུན་འཁྱུད་མོའི་ངང་ཚུལ་རྒྱུན་སྐྱོང་ཅི་ཐུབ་བྱེད་བཞིན་མཆིས།  དེ་ཡང་རྒྱུ་ནོར་གཡོར་བསྐྱིས་འཇལ་བའི་ཁ་མཆུ་དང་བཟའ་ཟླ་མ་འགྲིག་ཐོར་བའི་ཁ་མཆུ།  ཁྱིམ་མཚེས་མ་འགྲིག་སྙོམས་པའི་ཁ་མཆུ་སོགས་དམངས་དོན་གྱི་གྱོད་སྣ་ཁ་མཆུ་ཡོད་ཚད་སྡེ་བའི་ནང་གི་གཟུ་བཤད་ཨུ་ཡོན་ལྷན་ཚོགས་ཀྱིས་བོད་ཀྱི་ཡུལ་སྲོལ་གོམས་གཤིས་ལྟར་གྱོད་བཤད་ནས་ཟླུམ་བཞིན་ཡོད་པ་དང་།  བཟླུམ་མ་ཐུབ་པ་དག་རང་རང་གི་འདོད་བློ་ལྟར་མི་དམངས་ཁྲིམས་ཁང་ལ་གཏུག་བཤེར་བྱེད་པ་དང་གོང་རིམ་མགོ་ཁྲིད་དག་ལ་ཡར་ཞུ་བྱེད་པར་གེགས་རྒྱ་ཅི་ཡང་མེད་པར་བྱས་ཡོད།  དཔེར་ན།  ཀ་བ་ཚང་དང་ཁ་བ་ཚང་བར་གྱི་བཟའ་ཐོར་གྱོད་གཞི་དེ་ཐོག་མར་སྡེ་བའི་གཟུ་བཤད་ཨུ་ཡོན་ལྷན་ཚོགས་ཀྱིས་བོད་ཀྱི་ཡུལ་སྲོལ་ལྟར་བཤད་པ་དང་།  རྒྱུ་ནོར་བགོ་བཤའ་རྒྱག་སྐབས་སུ་ཡང་མིན་ན“སྒོ་ར་ཁ་མཚམས”དང་ཡང་མིན་ན“མདའ་མོ་ལྟུང་གཤགས”ཀྱི་དཔེ་སྲོལ་ལྟར་ཁྱིམ་ཚང་དེའི་རྒྱུ་ནོར་ཅི་ཡོད་ཉིས་བགོ་བྱེད་རྒྱུ་ཡིན་ཟེར་བས།  ཨ་ཚང་གིས་བལྟས་ན“ཕ་རྒྱུ་གསེར་གྱི་ཀ་བ་དང་།  མ་རྒྱུ་དངུལ་གྱི་གདུང་མ”ནི་ཕ་མེས་ཡང་མེས་ཚོས་བཞག་པའི་ཤུལ་ནོར་ཡིན་པས་རང་གི་བུ་རབས་ཚ་རྒྱུད་མ་གཏོགས་གཞན་མི་སུ་ཞིག་གིས་ཀྱང་བདག་འཛིན་དང་བགོ་བཤའ་བརྒྱབ་མི་ཆོག་པར་འདོད།  ལྷག་པར་དུ་མནའ་མ་དང་མག་པ་ཚོ་མ་འགྲིག་པར་བཟའ་ཐོར་བྱུང་སྐབས་ཁྱིམ་ཚང་དེའི་ཡབ་མེས་ཀྱི་ཤུལ་བཞག་རྒྱུ་ནོར་ལ་བརྣབ་སེམས་སྐྱེས་ནས་བགོ་བཤའ་རྒྱག་པ་ནི་ལས་རྒྱུ་འབྲས་ལ་མི་མཐུན་པ་དང་བོད་ཀྱི་ཡུལ་སྲོལ་གོམས་གཤིས་དང་མི་མཐུན་ལ།  ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བཅའ་ཁྲིམས་དང་ཡང་མི་མཐུན་པས།  སྡེ་བའི་གཟུ་བཤད་ཨུ་ཡོན་ལྷན་ཚོགས་ཀྱིས་གཟུ་བཅད་པ་ལ་མ་འཐད་ནས་མི་དམངས་ཁྲིམས་ཁང་ལ་གཏུག་བཤེར་བྱས་པ་ལྟར་རོ། །   ད་སྐབས་གཞི་རིམ་གྱི་རྒན་གསུམ་དང་ཁ་མགོ་བ།  གཟུ་བ། སྡེ་དཔོན་དང་ཧྲུའུ་ཅི་སོགས་མིང་བཏགས་སུ་ཡིན་ཡང་ཏང་གི་སྲིད་ཇུས་དང་རྒྱལ་ཁབ་ཀྱི་བཅའ་ཁྲིམས་ཤེས་བྱ་ལ་སློབ་སྦྱོང་བྱེད་པའི་གོ་སྐབས་བཟང་པོ་ཡོད་པ་དང་།  བོད་སྐད་དང་བོད་ཡིག་གི་ལམ་ནས་ཤེས་བྱ་འདི་དག་ངོ་སྤྲོད་རྒྱག་པའི་བརྙན་འཕྲིན་དང་རླུང་འཕྲིན།  སྐད་འཕྲིན་དང་པོད་འཕྲིན་སོགས་མང་པོ་ཡོད་པས།  དེང་རབས་ཁྲིམས་ལ་རྨོངས་པའི“རྒན་གསུམ”དང་།  ཏང་གི་སྲིད་ཇུས་ལ་རྨོངས་པའི“ཁ་མགོ་བ”།  རྒྱལ་ཁབ་ཀྱི་བཅའ་ཁྲིམས་ལ་རྨོངས་པའི“གཟུ་བ”བཅས་ཀྱི་དཔུང་ཁག་དེ་ཇེ་ཆུང་ནས་ཇེ་ཆུང་དུ་འགྲོ་བཞིན་ཡོད།  ཉེ་བའི་ལོ་འདི་འགའི་རིང་ལ་སྟག་རིག་སྡེ་བ་ནས་རྒྱལ་ཁབ་ཀྱི་སྲིད་ཁྲིམས་དང་འགལ་བའི་གྱོད་དོན་ཆེར་མ་བྱུང་ལ།  ཁྲིམས་འགལ་ལུགས་འགལ་དང་དཀར་ནག་གོ་ལྡོག་གི་གཏམ་ངན་ཡང་འདི་ཟེར་རྒྱུ་ཞིག་ཐོས་མ་མྱོས་བས།  དེ་ནི་སྤྱི་ཚོགས་ཡར་རྒྱས་གོང་འཕེལ་དུ་འགྲོ་བཞིན་པའི་འགྲོས་དང་བསྟུན་ནས་མི་རྣམས་ཀྱི་གོ་རྟོགས་ཀྱང་ཇེ་མཐོར་འགྲོ་བཞིན་པའི་རྟགས་ལོས་ཡིན་སྙམ།   སྟག་རིག་གིས་སྟོང་འཇལ་སྐབས་དགུ་ཚན་དང་ལྔ་ཚན་གྱི་འཇལ་སྤྲོད་བྱེད་སྲོལ་ཞིག་ཀྱང་ཡོད་པ་ཁོ་ཐག་རེད།  ལོ་ལོན་ཚོས་སྒོ་ཟོག་ལ་སྡིག་དམོད་བྱེད་སྐབས“ལྔ་ཚན་ནང་དུ་རྒྱག་རྒྱུའོ”དང་ཡང་ན“དགུ་ཚན་ནང་དུ་རྒྱག་རྒྱུའོ”ཞེས་རྒྱུན་དུ་ངལ་ལས་ཐོལ་བྱུང་དུ་འབྱུང་བཞིན་ཡོད་ལ།  ཕྱུགས་ཟོག་དཀའ་བོ་དང་གྱོལ་བོ།  ཞ་ར།  གཟའ་རོ་བཅས་ཡན་ལག་ལ་སྐྱོན་ཤོར་བའམ་ཕྱུགས་ཁྱུ་ལ་མི་ཆུགས་པའི་ངན་ཤོར་གྱི་སྐོར་ལ“སྟོང་ཟོག”གམ་“དགུ་ཟོག”ཅེས་སྡིག་དམོད་བྱེད་བཞིན་པར་བརྟག་ན།  སྤྱི་ཚོགས་རྙིང་བར་སྟག་རིག་འདི་སྟོང་འཇལ་བའི་ལས་ལ་རྒྱུན་དུ་འཕྲད་བཞིན་ཡོད་པ་དང་།  སྟོང་འཇལ་བ་ལའང་དགུ་ཚན་དང་ལྔ་ཚན་གྱི་འཇལ་སྲོལ་ཡོད་པ།  དུས་རྒྱུན་དུ་ཕྱུགས་ཟོག་དཀའ་བོ་དང་གྱོལ་བོ།  ཞ་ར།  གཟའ་རོ་སོགས་ཡན་ལག་སྐྱོན་ཅན་དང་ངན་པ་ཁྱུ་ཤོེར་གྱི་རིགས་ནི་སྟོང་ཟོག་ནང་དུ་བརྩིས་ཆོག་པ་བཅས་གསལ་བོར་མངོན་བཞིན་ཡོད་ནའང་།  མིག་སྔར་འདིའི་སྐོར་གསལ་བོར་བཤད་ཤེས་མཁན་ཞིག་གམ་ལག་ལེན་གྱི་ཉམས་མྱོང་ཡོད་པའི་མི་ཞིག་ལ་མ་འཕྲད་པར་མ་ཟད།  འབྲེལ་ཡོད་ཀྱི་དཔྱད་གཞིའི་ཡིག་ཆའང་རིན་ཐང་ཅན་ཞིག་ལག་ཏུ་སོན་མེད་པས།  ཚིག་ངོས་ཀྱི་ངོ་སྤྲོད་ཙམ་ལས་ཆེར་དཔྱད་མ་ཕོད།  རྗེས་ཕྱོགས་འདིའི་སྐོར་གྱི་དཔྱད་ཡིག་རེ་ལོན་ནས་ཁ་གསབ་ཅིག་རྒྱག་ཐུབ་ན་ཅི་མ་རུང་སྙམ་མོ། །
   The Traditions of Peace-Making and Cutting  subjects 933 For more information about this term, see Full Entry below.Subjects Religious SectsBuddhismTibetan BuddhismOther TypologiesThe Eight Major Esoteric TraditionsFull EntryRelated Subjects (1)Related Texts (1) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192)