མེ་ལོང་དགོན་མཁའ་སྤྱོད་དཔལ་གྱི་གུར་ཁང་།    མེ་ལོང་དགོན་མཁའ་སྤྱོད་དཔལ་གྱི་གུར་ཁང་།         དགེ་ལུགས་པའི་དྲ་བ་ལས་དྲངས།   གནས་ཡུལ་ནི་རྨ་ཤར་ཡུལ་ཚོ་སྐེ་བ་ཚོ་དྲུག་གི་ཁོངས་གཏོགས་རི་ཁྲོད་བདེ་ལྡན་ཟེར་བའི་སར་ཡོད། དེ་ཡང་སྒྲུབ་སྡེ་འདི་རབ་བྱུང་བཅུ་གཉིས་པའི་སྟོད་དུ་བྲག་དཀར་སྔགས་རམས་པ་བློ་བཟང་བསྟན་པ་རབ་རྒྱས་ཀྱིས་འཇམ་དཔལ་ནཱ་ག་རཀྵར་གཟིགས་སྣང་བྱུང་བའི་ཡུལ་ལྷའི་རྒྱལ་བོ་སྲིན་པོ་རིའི་དུང་སྙན་ལུང་ཟེར་བའི་སར་ནགས་ཚལ་དང་རི་བྲག་ངོ་མཚར་བ་དུ་མ་ཡོད་ལ་དེ་དག་གི་མདུན་ཕ་བོང་ཆེན་པོ་གསུམ་ཆོས་འབྱུང་གི་དབྱིབས་སུ་ཡོད་པ་དེའི་སྟེང་སྒྲུབ་ཁང་ཕུབ་ནས་དཔལ་རྡོ་རྗེ་འཇིགས་བྱེད་ཀྱི་བསྙེན་སྒྲུབ་མཛད། དེ་ལྟ་བུའི་སྒྲུབ་ཁང་དེར་བསྔགས་བརྗོད་ཀྱང་མང་པོ་གནང་སྟེ། དཔལ་ཆོས་འབྱུང་མ་བཅོས་ལྷུན་གྲུབ་གནས། ། སྐྱིད་རང་བྱུང་ཕུག་པ་དེ་ན་ཡོད། ། ཅེས་སོགས་རྣམ་ཐར་ལས་བྱུང་བ་ལྟར་རོ། ། གནས་འདིའི་རྒྱབ་རི་ནི་སྒྲོལ་མའི་གནས་རི་ཡིན་པ་དམ་པ་འདིས་མཛད་པའི་གནས་བསྟོད་ལས་བྱུང་། ཆོས་འབྱུང་གཡས་ལོགས་ཀྱི་བྲག་ལ་ཆོས་རྒྱལ་དང་ཡིག་འབྲུ་རང་བྱོན་སོགས་ཡོད་ཅེས་གྲུབ་དབང་རང་གིས་གསུངས། སྒྲུབ་ཁང་གི་ཉེ་འཁོར་དུ་བྲག་ལ་བརྐོས་པའི་གྲུབ་ཁུང་སོགས་མཇལ་རྒྱུ་འདུག དེ་ལྟ་བུའི་མ་བཅོས་ལྷུན་གྱིས་གྲུབ་པའི་གནས་འདུ་འཛིས་དབེན་ཞིང་བག་ཕེབས་པ། ཐ་མལ་བའི་སྣང་ངོར་ཡང་གནས་དེར་སླེབས་པ་ཙམ་གྱི་སྣང་བ་བསྒྱུར་ནུས་པ། ཆོས་སྒྲུབ་པའི་མཐུན་རྐྱེན་ཀུན་ནས་ཚང་ཞིང་ཁྱད་པར་གསང་སྔགས་སྒྲུབ་པ་ལ་རྒྱུད་ནས་གསུངས་པའི་མཚན་ཉིད་ཡོངས་སུ་ཚང་བའི་སར་ཀུན་བཟང་བྲག་དཀར་མེ་ལོང་ཞེས་སྒྲུབ་སྡེ་འདི་ཉིད་གསར་དུ་བཙུགས་ཏེ། མཁའ་སྤྱོད་དཔལ་གྱི་གུར་ཁང་ཞེས་མཚན་གསོལ། དེར་འདུ་ཁང་དང་གྲྭ་ཤག་སོགས་ཐོག་མ་བྲག་ཁུང་དང་བྱ་སྐྱིབས་སོགས་སུ་གཞི་བཅོས་ཏེ་རིམ་པས་འཕེལ་རྒྱས་སུ་སོང་། དུས་དེར་བསླབ་གསུམ་ལྡན་པའི་དགེ་འདུན་བཅུ་དྲུག་ཙམ་བཞུགས་པ་ཐམས་ཅད་ཐུགས་མཐུན་ཁྲིམས་གཙང་ངོས་ཚོང་བུན་སྐྱིས་སོགས་ཀྱི་དྲི་མས་མ་སླད་པར་འཚོ་གོས་གང་ཐད་ནས་འདོད་ཆུང་ཆོག་ཤེས་ཚུལ་བཞིན་བསྟེན་ཏེ་ཟླ་གཉིས་པ་དང་གསུམ་པར་མཆོད་པ་བྱེ་བ་རེ་ཕུལ་ནས་གྲྭ་པ་ཕལ་ཆེར་ལོ་མཚམས་དང་ཟླ་མཚམས་སོགས་ཀྱི་སྒོ་ནས་བསགས་སྦྱང་ལ་འབད་པ་ཤ་སྟག་བྱུང་ངོ་། །          ཕྱིས་དགོན་གནས་སྤོས་པའི་ཚུལ་ནི། སྒྲུབ་པའི་གནས་འདི་ཧ་ཅང་དབེན་ཞིང་ཐ་མལ་རང་ག་བས་བསྟེན་དཀའ་བ་དང་། གཅན་གཟན་ཆོམ་རྐུན་གྱིས་གཙེས་པས་ལོ་བརྒྱ་ཡས་མས་ཙམ་ནས་ད་ལྟའི་གནས་རི་ཁྲོད་བདེ་ལྡན་དུ་སྤོས། སྡེ་འདིའི་སྲུང་མའི་གཙོ་བོ་ནི་ལྷ་མོ་དམག་ཟོར་མ་ཡིན་ལ་ཐོག་མར་གནས་སྤོ་སྐབས་ལྷ་མོའི་ཞལ་ཐང་བཀལ་བའི་དྲེའུ་ཞིག་ཡོད་པ་ད་ལྟའི་འདུ་ཁང་གི་གནས་འདིར་ཉལ་ནས་ཐབས་ཅིའི་ཡང་སློང་མ་ཐུབ་པའི་སྐབས། གནས་དེའི་ཕྱོགས་མཚསས་ཀུན་ལ་ཞིབ་པར་བལྟས་ཚེ་སའི་དཔྱད་ཕུན་སུམ་ཚོགས་པ་དུ་མ་ཚང་བ་དང་། ཤར་ལྷོ་ནུབ་བྱང་གི་ས་སྲུང་བ་བཞི་སོགས་རང་གྲུབ་ཏུ་ཡོད་པར་གཞི་བཏིང་། ཐོག་མར་ས་བརྐོ་སྐབས་ཚོགས་ཟངས་ཆེན་པོ་ཞིག་གི་ནང་དུ་མཆོད་རྫས་དང་དངུལ་ཕྲན་བུ་ཡོད་པ་ཞིག་བུད། དེ་ནས་འདུ་ཁང་དང་གྲྭ་ཤག་རྣམས་རིམ་པས་གསར་བཞེངས་བྱས། མདུན་རིའི་ངོས་སུ་ལུང་ཤུར་ཆུང་ངུ་ཞིག་ཡོད་པ་སའི་དཔྱད་ཅུང་མི་ལེགས་པར་དོགས་ནས། སྔར་གྱི་དགོན་ཤུལ་སྙན་ལུང་ནས་གསོམ་པའི་སྡོང་ཕྲུག་མང་པོ་ཕྱུགས་ལ་བཀལ་འོངས་པ་མདུན་རིའི་ངོས་སུ་བཙུགས་ཏེ་ལུང་ཤུར་མི་མངོན་པར་བྱས། རིམ་པས་སྡེ་འདིའི་ཆོས་སྲིད་ཟུང་གི་བྱ་བ་མཐའ་དག་དབྱར་གྱི་དཔལ་ལ་འགྲན་པ་བཞིན་ཡར་རྒྱས་བྱུང་སྟེ་དགེ་འདུན་ཞལ་གྲངས་སུམ་ཅུ་ལྷག་བཞུགས་ཤིང་། སྔར་སྔགས་རམས་པའི་དུས་ནས་བཙུགས་པའི་གཞི་གསུམ་གྱི་ཕྱག་ལེན་སོགས་མ་ཉམས་པར་ངོས་གཙང་དུ་ཡོད།          བསྟན་འཛིན་གྱི་སྐྱེས་ཆེན་དག་རིམ་པར་བྱོན་ནས་བསྟན་པའི་བྱ་བ་མཛད་ཚུལ་ནི། ཐོག་མར་སྡེ་འདི་ཕྱག་འདེབས་གནང་བ་པོ་བྲག་དཀར་སྔགས་རམས་པ་བློ་བཟང་བསྟན་པ་རབ་རྒྱས་ཡིན་ལ། ཁོང་རབ་དྲག་མེ་ཕག་ལོར་རེབ་གོང་བྲག་དཀར་སྡེ་ཁྲོད་དུ་སྤྲུལ་བའི་ཟློས་གར་བསྒྱུར། དགུང་ལོ་བཅུ་གསུམ་སྟེང་གྲུབ་ཆེན་སྐལ་ལྡན་རྒྱ་མཚོ་ལས་རབ་ཏུ་བྱུང་། བཅུ་བདུན་སྟེང་དཔལ་ཧེ་རུ་ཀའི་གནས་མཆོག་དབེན་གནས་བཀྲ་ཤིས་འཁྱིལ་དུ་སྒྲུབ་པ་ལ་བཞུགས། ཉི་ཤུ་བ་ཆུ་བྱི་ལོར་རྒྱལ་སྲས་རིན་ཆེན་གྱི་དྲུང་དུ་བསྙེན་པར་རྫོགས། ཉེར་དགུ་བར་གྲུབ་ཆེན་སྐལ་ལྡན་རྒྱ་མཚོའི་ཞབས་པད་བསྟེན་ཏེ་དབང་ལུང་རྗེས་གནང་མན་ངག་སོགས་ཟབ་རྒྱས་ཀྱི་གདམས་པའི་བདུད་རྩིས་ཐུགས་ཀྱི་བུམ་བཟང་ཡོངས་སུ་གཏམས། སུམ་ཅུ་བར་བླ་མའི་བཀས་དབུས་འགྱུར་ཆོས་ཀྱི་ཞིང་དུ་བྱོན་ཏེ་དཔལ་ལྡན་སྨད་རྒྱུད་གྲྭ་ཚང་དུ་ཞུགས། སྔ་ཕྱིར་མཚན་ལྡན་གྱི་བླ་མ་སོ་ལྔ་ཙམ་བསྟེན་ཏེ་ཤིན་ཏུ་དཀོན་པའི་ཆོས་རྒྱུན་རྣམས་གསན་བཞེས་མཛད། སྐབས་དེར་མཁས་དབང་སྡེ་སྲིད་སངས་རྒྱས་རྒྱ་མཚོའི་བཀས་བསྟན་འགྲོ་སྤྱིའི་ཆེད་དུ་ལྕགས་མཁར་ཆེན་མོ་འཛུགས་པའི་རྡོ་རྗེ་སློབ་དཔོན་དུ་གྲུབ་དབང་འདི་ཉིད་མངའ་གསོལ་བས་ནག་ཕྱོགས་ཆམ་ལ་ཕབ་པའི་གྲགས་པ་མདོ་དབུས་ཀུན་ཏུ་ཁྱབ། དགུང་ལོ་ལྔ་བཅུ་ཙམ་ལ་སླར་མདོ་སྨད་དུ་བྱོན། རབ་བྱུང་བཅུ་གཉིས་པའི་སྨད་ཙམ་ལ་སྒྲུབ་སྡེ་འདིའི་གཞི་བཏིང་ནས་སྒྲུབ་པ་ལྷུར་ལེན་མཛད། རབ་ཉིའི་མེ་སྤྲེལ་ལ་དཔལ་ལྡན་བྱ་ཁྱུང་གི་ཁྲི་བགེགས་བཏུལ་ནས་མཁན་ཁྲི་ཟླ་གཅིག་ཙམ་བཞུགས་ཤིང་མཁན་པོ་གནང་ནས་བསྟན་འགྲོའི་དོན་རླབས་ཆེན་མཛད། ལོ་ཤས་རྗེས་སླར་བྱ་ཁྱུང་དུ་གདན་དྲངས་ཏེ་དབང་ལུང་རྗེས་གསུམ་མང་དུ་གནང་།       སླར་འདིར་ཕེབས་ནས་དཔོན་སློབ་འཇམ་མོ་ཚང་དང་། ཚིས་ཀའི་སྔགས་རམས་པ་སོགས་གཞིས་བྱེས་ཀྱི་སློབ་མ་མང་པོར་བདེ་གསང་འཇིགས་གསུམ་དང་ཀུན་རིག་སོགས་ཀྱི་དབང་། ནཱ་རོ་ཆོས་དྲུག་དང་ཕྱག་ཆེན་གྱི་ཁྲིད་སོགས་ཆོས་རྒྱུན་མང་དུ་སྤེལ། དེའི་རྗེས་མི་ཉག་ཞབས་དྲུང་ཚང་དང་། དཔོན་སློབ་འཇམ་མོ་ཚང་སོགས་ཀྱིས་གདན་དྲངས་ཏེ་དབང་ལུང་རྗེས་གསུམ་གྱི་ཆོས་རྒྱུན་རྒྱ་ཆེར་སྤེལ་བ་དང་། འདི་ཕྱོགས་ཀྱི་སྐེ་བ་ཚོ་དྲུག  སྨད་པ་ཚོ་བདུན། གཤོང་བ་ཚོ་དགུ་སོགས་གཅན་ཚའི་རོང་ཕྱོགས་ཀྱི་ཡུལ་སོ་སོར་མ་ཎི་དང་མཆོད་འདུ་སོགས་ཀྱི་རྒྱུན་བཙུགས་པའི་སྲོལ་ད་ལྟའི་བར་དུ་གནས། ཕྱིས་མེ་ལོང་ནས་གཞི་རྫོགས་པ་ལྟར་གནས་མཆོག་བཀྲ་ཤིས་འཁྱིལ་དུ་ཕེབས། དེ་གའི་རི་ཁྲོད་པ་དང་སློབ་མ་ཡོངས་ལ་ཟབ་ཆོས་ཀྱི་རྒྱུན་མང་དུ་སྤེལ། རྗེ་འདི་བའི་གསུང་འབུམ་པོད་གསུམ་ཙམ་བཞུགས། དག་ཞིང་དུ་ཕེབས་ལོར་བཀྲ་ཤིས་འཁྱིལ་དུ་བཞུགས་སྐབས་ཉེ་གནས་ལ་ཕྱག་བརྡ་གནང་བས་ཇ་ཕུད་ཅིག་ཞོག་གསུངས་ནས་ཕུད་བཞག་རྗེས་མགོན་པོ་ཧཱུཾ་རིང་ལན་དྲུག་གསུངས་ནས། ང་ད་མི་ནག་པོ་འདི་དང་འགྲོགས་ནས་འགྲོ་དགོས་གསུངས་ནས་ཞི་བར་གཤེགས་པའི་ཚུལ་བསྟན་ཏོ། །          དེའི་སྤྲུལ་སྐུ་བློ་བཟང་བསྟན་པའི་རྒྱལ་མཚན་ཡང་རེབ་གོང་བྲག་དཀར་དུ་འཁྲུངས། དགོན་ཆེན་དུ་ཐུགས་གཉེར་གནང་། ཤར་སྤྲུལ་བའི་སྐུ་སོགས་ལས་ཆོས་བཀའ་མང་དུ་གསན། སྡེ་འདིར་ཕེབས་ནས་ཁྲིར་བཞུགས་པ་སོགས་ཀྱི་གཟིགས་པ་ཆེ། དེའི་སྤྲུལ་སྐུ་དོན་ཡོད་བསྟན་པའི་རྒྱལ་མཚན་འཕྲང་དམར་རྐང་ཚའི་ཕྱོགས་སུ་འཁྲུངས་པ་དགུང་གྲངས་བཞི་བཅུའི་བར་བཞུགས། དེའི་སྐུ་རྗེས་མའི་མཚན་དང་འཁྲུངས་ཡུལ་དངོས་མི་གསལ་ཞིང་། སྐབས་ཤིག་ཁོང་ཇོ་ཇོ་ལྷ་ཁང་དུ་བཞུགས་སྐབས་དམ་པ་དེ་ཉིད་ཀྱིས་དགོན་པར་ལྷ་དར་ཅིག་བསྐུར་གནང་མཛད་པ་དད་རྟེན་དུ་ཐོབ་ཅེས་རྒན་པ་འགས་གླེང་། ཕྱིས་འདུ་ཁང་ནང་ཁྲི་ཆེན་ཞིག་གསར་བཞེངས་གྲུབ་འཕྲལ་དམ་པ་འདི་ཉིད་སྡེ་འདིར་ཐོག་མར་ཕེབས་སྐབས།     ཁོང་སྨུག་པ་སྟུག་པོ་ཞིག་དང་འགྲོགས་ནས་རྡོ་རྗེ་འཇིགས་བྱེད་ཞལ་འདོན་གནང་བཞིན་རྡོ་རྗེ་རྟ་སྐད་དྲག་པོ་ཧ་ཧར་བཞད་ཅེས་པའི་ཚིག་མཚམས་དེར་འདུ་ཁང་སྟེང་ཚོགས་དུང་བཏང་བ་དང་དུས་འགྲིག་པའི་རྟེན་འབྲེལ་མ་བསྒྲིགས་རང་འགྲིག་ཏུ་སོང་། བླ་མ་རིན་པོ་ཆེ་ཐུགས་དགྱེས་བཞིན་ཁྲི་ཆེན་སྟེང་ཕེབས་ཏེ་ད་རེ་ང་ཚོ་བླ་སློབ་ཡོངས་ལ་སྒོ་ཀུན་ནས་རྟེན་འབྲེལ་ལེགས་པོ་བྱུང་། མ་འོངས་པར་འུ་ཅག་བླ་སློབ་རྣམས་ཚེ་རབས་ཀུན་ཏུ་མཇལ་བའི་ལེགས་པའི་ལྟས་ཡིན་གསུངས། ཡུལ་འདིའི་རྒན་རབས་པ་ཁ་ཤས་ཀྱི་ངག་རྒྱུན་དུ་མཚོ་སྔོན་རྐང་ཚའི་ཕྱུག་ནོར་དུ་སྤྲུལ་སྐུ་གསུམ་འཁྲུངས་ཤིང་དེའི་ནང་གཅིག་དགུང་ལོ་བཅུ་གཉིས་ཙམ་ནས་སྐུའི་མེ་ཏོག་ཡལ་ཞེས་གླེང་འདུག ད་ལྟའི་སྤྲུལ་སྐུ་འདི་རབ་རྒྱན་མེ་བྱི་ལོར་རྐང་ཚའི་ཕྱུག་ནོར་དུ་འཁྲུངས་ཤིང་ཁོང་གི་གཅེས་མིང་ལ་ཨ་རྒ་བྲག་ལོ་ཞུ།  དགུང་ལོ་བཅུ་གསུམ་པ་རབ་རྒྱན་ས་བྱི་ཕྱི་ལོ1948ལོར་སྡེ་འདིར་ཆིབས་ཀྱི་ཁ་ལོ་ཐོག་མར་བསྒྱུར་ཏེ་དབང་ལུང་ཕྲན་བུ་རེ་གནང་། དེའི་རྗེས་སྔ་ཕྱི་ཐེངས་གཉིས་ཙམ་ལ་ཕེབས་མྱོང་། ད་ལྟ་རྐང་ཚའི་ཕྱུག་ནོར་དགོན་དུ་ཆོས་སྲིད་ཀྱི་ལེགས་ལམ་གོང་འཕེལ་ངོས་བཞུགས་བཞིན་པའི་སྐབས་ལགས་སོ། །          གཞན་ཡང་སྡེ་འདིར་ཡོངས་སུ་གྲགས་པའི་སྐྱེས་ཆེན་ཐར་ཤུལ་ནོ་མོ་ཧན་དུ་འབོད་པ་སྐུ་ཕྲེང་གསུམ་པ་ངག་དབང་ཆོས་འཕེལ་དཔལ་བཟང་བོའི་ཞབས་ཀྱིས་ཡང་ཡང་བཅགས་ཤིང་བྱིན་གྱིས་བརླབས་ནས་ཆོས་རྒྱུན་རྒྱ་ཆེར་སྤེལ་བ་དང་། སྡེ་འདིར་གཟིགས་གཏོགས་གང་ལེགས་གནང་། ཆོས་དང་ཟང་ཟིང་གིས་བཀའ་དྲིན་བླ་ལྷག་ཏུ་བསྐྱངས་ཏེ་རྒན་པ་བཞི་དང་དགེ་བསྐོས་དབུ་མཛད། གཉེར་བ་སོགས་རྩ་འཛུགས་ཀྱི་ལམ་ལུགས་གསར་དུ་བཙུགས། དེའི་རྗེས་བདེ་ཆེན་མར་ཁའི་སྐུ་ཕྱོགས་སྐུ་ཕྲེང་གིས་བསྐྱངས་ཏེ་ཀུན་རིག་གི་སྒྲུབ་མཆོད་གསར་དུ་བཙུགས་པ་སོགས་གཟིགས་པ་རྒྱ་ཆེ། དེའི་རྗེས་སྡེ་འདིར་བཀའ་དྲིན་གཞན་ལས་མཆོག་ཏུ་ཆེ་བ་ནི། མཁས་ཤིང་གྲུབ་པའི་དབང་ཕྱུག་མཚུངས་མེད་དམ་པ་ཐར་ཤུལ་རིན་པོ་ཆེ་སྐུ་ཕྲེང་བཞི་བ་དགེ་འདུན་ཆོས་སྐྱོང་རྒྱ་མཚོའི་ཞབས་ཀྱིས་བཅགས་ཤིང་ཟབ་རྒྱས་ཆོས་ཀྱི་འཁོར་ལོ་རྒྱུན་མི་ཆད་དུ་བསྐོར་བས་ཡུལ་འདིའི་སྐྱེ་བོ་མཐའ་དག་དགེ་བཅུའི་དཔལ་ལ་བཀོད། རབ་ཡིད་མེ་སྦྲུལ་ཕྱི་ལོ1857ལོར་ཐུགས་ཁུར་ཆེ་བཞེས་ཀྱིས་ཕྱག་རྫས་མང་པོ་དང་ཞལ་བཀོད་གང་རྒྱས་གནང་སྟེ་སྡེ་འདིའི་འདུ་ཁང་བཟོ་བཀོད་ཕུན་སུམ་ཚོགས་པ་ཞིག་གསར་བཞེངས་མཛད། ནང་རྟེན་གསེར་འབའ་ཞིག་ལས་གྲུབ་པའི་འཇམ་པའི་དབྱངས་ཀྱི་སྟོང་སྐུ་གྱན་ཐང་གསུམ། རྗེ་ཡབ་སྲས་གསུམ་ལ་འཁོར་དག་པ་རྣམ་བརྒྱད་ཀྱིས་བསྐོར་བའི་གསེར་ཐང་ཁྱད་འཕགས་དང་། མཐོང་བསྐོར་སོགས་ཕུལ་བས་གཟིགས་པ་རྒྱ་ཆེ། རབ་ཚེས་ས་ཡོས་ཕྱི་ལོ1879ལོར་སྡེ་འདིར་བཞུགས་སྐབས། ཐུགས་སྲས་རྐང་ཚ་རིན་པོ་ཆེས་གསོལ་བ་བཏབ་པ་ལྟར། གོང་ས་ལ་མོ་ཞབས་དྲུང་མཆོག་སྐུ་རིན་པོ་ཆེས་རྗེ་འདི་ཉིད་ལས་རབ་ཏུ་བྱུང་སྟེ་མཚན་དགེ་འདུན་བསྟན་འཛིན་ནོར་བུ་ཞེས་གསོལ། དེའི་རྗེས་སྐྱབས་རྗེ་ཐར་ཤུལ་རིན་པོ་ཆེའི་སྐུ་ཕྲེང་ལྔ་པ་དགེ་ལེགས་དབང་ཕྱུག་ཆོས་སྐྱོང་རྒྱ་མཚོ་ཡང་སྡེ་འདིར་ཤས་ཆེར་བཞུགས་ཏེ་གང་ལ་གང་མཚམས་ཀྱི་དབང་ལུང་རྗེ་གསུམ་སོགས་ཟབ་རྒྱས་ཆོས་ཀྱི་འཁོར་ལོ་ལེགས་པར་བསྐོར་ཏེ་གདུལ་བྱ་རྣམས་སྨིན་གྲོལ་གྱི་ལམ་ལ་བཀོད་པ་སོགས་ཆོས་དང་ཟང་ཟིང་གཉིས་ཀས་སྐྱོང་ཁུར་གང་ལེགས་མཛད། དགོན་གཞུང་གིས་ཁོང་ལ་གཟིམ་ཁང་གྱན་བརྒྱད་ཅུ་ཙམ་གསར་བཞེངས་བྱས་ནས་དབྱར་ཕལ་ཆེར་སྡེ་འདིར་བཞུགས། དེ་ལས་གཞན་ཨ་ལགས་ཕུན་ཚོགས་རིན་པོ་ཆེའི་སྐུ་སྔ་ཕྱིར་སྡེ་འདིར་གཟིགས་སྐྱོང་གང་ལེགས་གནང་། དགོན་པས་ཁོང་ལ་གཟིམ་ཁང་གྱན་བཅུ་དགུ་ཙམ་གསར་བཞེངས་བྱས་ཏེ་ཕལ་ཆེར་རྒྱུན་བཞུགས་གནང་། ཡོངས་ཀྱི་དགེ་བའི་བཤེས་གཉེན་ཆེན་མོ་པཎ་ཆེན་ཡོངས་འཛིན་རིན་པོ་ཆེའི་ཨ་ཁུ་འཇིགས་མེད་ཚང་གིས་གཡུ་བཟང་ཐང་དུ་བཀའ་འགྱུར་གྱི་ལུང་གནང་བའི་མཇུག་དེའི་ཕྱི་ལོ་ཤིང་སྤྲེལ་ལོར་སྡེ་འདིར་ཕེབས་ནས་ལུང་རྫོགས་པར་གྲུབ། དུས་དེར་གསན་མཁན་སྐྱབས་རྗེ་ཐར་ཤུལ་ཆོས་སྐྱོང་རིན་པོ་ཆེ་གཙོ་བྱས་སྐུ་འབུམ་ཨ་རྒྱ་ཚང་། རྒྱ་ཡག་ཚང་། གསེར་ཏོག་ཚང་། ར་གོ་ཚང་སོགས་གཞིས་བྱེས་ཀྱི་བླ་སྤྲུལ་བཤེས་གཉེན་དུ་མས་ཞབས་ཀྱིས་བཅགས་ཤིང་། བཀླག་ལུང་གསན་པ་དང་བཀྲ་ཤིས་ཀྱི་བྱིན་ཆར་ཕབ། དུས་དེ་ཉིད་ན་སྡེ་འདིའི་ཆོས་སྲིད་ཟུང་གི་བྱ་བ་མཐའ་དག་དབྱར་གྱི་དཔལ་ལ་འགྲན་པ་བཞིན་བྱུང་ངོ་། །     གཙུག་ལག་ཁང་དང་སྐུ་གསུང་ཐུགས་རྟེན་གྱི་དཀར་ཆག་འགོད་པ་ལ། འདུ་ཁང་ནི་གྱན་ལྔ་ཡིན་ལ་ཕྱིའི་བཟོ་བཀོད་ཕུན་སུམ་ཚོགས། དེ་ཡང་ནང་རྟེན་གྱི་གཙོ་བོ་ནི། སྐུའི་རྟེན་ལ་ཀུན་གཟིགས་སྣང་བ་མཐའ་ཡས་པཎ་ཆེན་ཐམས་ཅད་མཁྱེན་པ་བློ་བཟང་ཡེ་ཤེས་ཀྱིས་བྲག་དཀར་སྔགས་རམས་པར་གནང་བའི་གསེར་གྱི་འབྲལ་སྤོང་སྟོན་པའི་སྐུ་བྱིན་རླབས་ཀྱི་གཟི་འོད་འབར་བ། ཡང་པཎ་ཆེན་བློ་བཟང་ཡེ་ཤེས་ཀྱིས་གནང་བའི་བསྟན་སྲུང་དམག་ཟོར་མའི་ཞལ་ཐང་བྱིན་རླབས་ཀྱི་ཚན་ཁ་འབར་བ་བཀའ་གཉན་ཅན་གཙོ་བྱས་པའི་ཐང་ཀ་དུ་མ་བཞུགས། གསེར་ཟངས་ལས་གྲུབ་པའི་ལི་སྐུ་སྣ་ཚོགས་ལྔ་བཅུ་ཙམ། སྨན་སྐུ་ཆེ་ཆུང་ཉིས་སྟོང་ལྷག འཇམ་དབྱངས་སྟོང་སྐུའི་གྱན་ཐང་གསུམ། རྗེ་ཡབ་སྲས་གསུམ་སོགས་གསེར་ཐང་འགའ། གསུང་རྟེན་དུ་བཀའ་བསྟན་གཉིས་ཀ་ཚར་རེ། ཡུམ་པོད་བཅུ་གཉིས། རྗེ་ཡབ་སྲས་གསུམ་དང་བྲག་དཀར་སྔགས་རམས་པའི་གསུང་འབུམ་སོགས་གླེགས་བམ་སྣ་ཚོགས་བརྒྱ་ཕྲག་ལྷག ཐུགས་ཀྱི་རྟེན་ལ་དངུལ་གྱི་མཆོད་རྟེན་རིན་པོ་ཆེ་སྣ་ཚོགས་ཀྱི་ཕྲ་རྒྱན་ཅན་གཉིས། གཞན་ཡང་རྗེ་གསེར་ཁང་བའི་ཕྱག་ཕྲེང་། ཕྱག་མཁར། ཕྱག་གྲི། གཏོར་གཞོང་། ན་བཟའ་ཆ་ཚང་། ཐར་ཤུལ་ཆོས་སྐྱོང་རྒྱ་མཚོ་སྐུ་སྔ་ཕྱི། རྙེ་ཐམས་ཅད་མཁྱེན་པ། ཨ་ལགས་ཕུན་ཚོགས་རིན་པོ་ཆེ་ཚང་སོགས་ཀྱི་ན་བཟའ་དང་བྱིན་རྟེན་ཕོན་ཆེ་བ་དུ་མ་བཞུགས། གཞན་ཡང་སྐྱབས་རྗེ་ཐར་ཤུལ་རིན་པོ་ཆེ་དང་། ཨ་ལགས་ཕུན་ཚོགས་ཚང་རྣམས་ཀྱི་གཟིམ་ཁང་ཀུན་དགའ་ར་བར་ཡང་སྐུ་གསུང་ཐུགས་ཀྱི་རྟེན་བྱིན་རླབས་ཅན་མང་དུ་བཞུགས་སོ། །          གཞན་ཡང་སྡེ་འདིའི་འདོན་རྟ་དབྱངས་གསུམ་དང་། ཆོ་ག་ཕྱག་ལེན་ཕལ་ཆེར་ར་རྒྱ་ལྟར་ཡིན་ལ། ཚོགས་འདོན་གྱི་རིམ་པ་ཡང་ཟླ་དང་པོར་ཆོ་འཕྲུལ་སྨོན་ལམ་ཉིན་དྲུག ཚེས་བཅུ་ཉིན་སྡེ་འདིའི་གྲྭ་མང་ཡོངས་རྫོགས་བོད་ཇོའི་གྲྭ་ཚང་དུ་ཕེབས་ནས་བཅུ་དྲུག་བར་དུ་བཞུགས་དགོས། འདོན་པ་གཙོ་བོ་འཇིགས་བྱེད་ལྷ་བཅུ་གསུམ་མ་དང་སྨོན་ལམ་ཡར་ཚོགས་སོགས་འདོན་པ་བོད་ཇོའི་གྲྭ་ཚང་ལྟར། ཉིན་ཤས་རིང་འགྲིག་ལམ་དང་ཚོགས་སྐལ་སོགས་བོད་ཇོ་དང་འདྲ། ཟླ་གཉིས་པར་དུས་མཆོད་ཉིན་གཅིག  ཟླ་གསུམ་པར་ཀུན་རིག་སྒྲུབ་མཆོད་ཚེས་བརྒྱད་ནས་བཅོ་ལྔའི་བར། ཟླ་བཞི་པའི་བཅུ་གཅིག་ནས་བཅུ་གསུམ་བར་སྒྲོལ་མ། བྱམས་པ། རྗེ་སྟོང་མཆོད་སོགས་གསུང་དགོས། བཅུ་བཞི་བཅོ་ལྔ་གཉིས་ལ་སྨྱུང་གནས། ཟླ་ལྔ་བའི་ཉི་ཤུ་ནས་ཉེར་ལྔའི་བར་མཆོད་པ། གྲྭ་པ་རེ་ནས་ཏིང་ཕོར་བརྒྱ་རེ་དང་ཉིན་རེ་ཚར་བདུན་རེ་འབུལ་དགོས། ཟླ་དྲུག་པར་སྨོན་ལམ་ཚེས་བཞི་ནས་བརྒྱད་བར་བཟང་སྤྱོད་ཁྲི། བཅུ་གཉིས་ནས་བཅུ་གསུམ་བར་གྲྭ་པ་རྣམས་རི་ཁར་ཕེབས་ནས་སྤྲོ་གསེང་དང་སྲིན་པོ་རིའི་ལབ་ཙེ་བསྟོད་དགོས། བཅོ་ལྔ་ནས་བརྒྱད་པའི་ཚེས་གཅིག་བར་དབྱར་གནས་ཕྱི་མཚམས་ཆེན་མོ། དེའི་རིང་ཉིན་ལྟར་དབྱར་གནས་པ་རྣམས་ཀྱིས་བདེ་མཆོག་ཆོག་རྐྱང་གསུང་སྟེ་དྲོས་ཇ་བཞེས་རྗེས་གྲོལ་དགོས། ཟླ་དགུ་པའི་ཚེས་གཅིག་ནས་གསུམ་བར་ཨ་ལགས་ཕུན་ཚོགས་ཚང་གི་དུས་མཆོད་མི་འཁྲུགས་པའི་ཆོ་ག་གསུང་དགོས། ཉེར་ལྔ་ནས་མགོན་ལྷ་དང་ཆོས་རྒྱལ་བསྐངས་བཤགས་ཁྲི། བཅུ་བའི་ལྔ་མཆོད་ཉིན་བདུན་རས་བྲིས་ལ་བརྟེན་པའི་བདེ་མཆོག་སྒྲུབ་མཆོད། དགུའི་ཉིན་མགོན་ཆོས་དང་དྲུག་ཅུ་བ་གསུང་དགོས། བཅུ་གཅིག་པའི་ནང་ཉི་ལྡོག་ནས་བཟུང་ལྷ་མོའི་གཏོར་སྒྲུབ་དང་། ཁྲོ་བཅུ་དང་སེང་གདོང་གཉིས་ཀྱི་བཟློག་པ་ཉིན་ལྔ་རེ། ཚེ་སྒྲུབ་ཉིན་གསུམ། བོད་ལོའི་བཅོ་ལྔ་ལ་རྒྱུན་གཏོར་རྗེས་ནས་མགོན་ཆོས་གསུང་དགོས། ཉེར་ལྔ་ནས་དགུའི་བར་ལྷ་མོའི་བསྐང་བཤགས་ཁྲི། ཟླ་དང་པོའི་ཚེས་གཅིག་གི་སྔ་མོར་ལྷ་མོའི་ཚེས་གཏོར་བཅས་ཡིན། རབ་རྒྱལ་ས་ཁྱི་ཕྱི་ལོ1958ལོའི་ཡར་སྔོན་དུ་ཆོས་ཐོག་སོ་སོའི་གཏོང་ཐེབས་སུ་དགོན་པར་ཞིང་ས་མུའུ་ཆིག་བརྒྱ་ཉི་ཤུ་ལྷག་ཡོད་པ་ཐམས་ཅད་ས་ཞིང་གི་བརྔོ་ཐོག་འདེབས་མཁན་དང་དགོན་པ་གཉིས་ཀྱིས་ཕྱེད་བགོས་བྱས་པ་ཡིན། །        ཉམས་པ་སླར་གསོ་བྱས་པའི་ཚུལ། ཆོས་དད་རང་མོས་ཀྱི་སྲིད་ཇུས་ལག་བསྟར་བྱས་རྗེས་རབ་རྒྱལ་མེ་སྟག་ཕྱི་ལོ1986ལོར་གོང་ནས་ཆོག་མཆན་དངོས་སུ་གནང་བ་རྟེན་འབྲེལ་གྱི་ཐོག་མ་ལྟ་བུར་གྱུར་ཏེ། དགོན་པ་དོ་དམ་ལྷན་ཚོགས་སྒྲིག་འཛུགས་བྱས། ཐོག་མར་སྔོན་གྱི་གྲྭ་པ་རྒན་པ་ཁ་ཤས་གདན་སར་འདུས་ཏེ་དགོན་པ་སླར་གསོ་བྱེད་པའི་སྦྱོར་བ་བརྩམས། རབ་རྒྱན་ས་སྦྲུལ་ལོར་རང་གཞན་གྱི་སྡེ་ཁྲོད་དུ་མ་ནས་དད་པ་དང་གཏོང་ཕོད་ཆེ་བ་མཆོག་གསུམ་ལ་སྲིད་ཞུ་བྱེད་མཁན་དག་གིས་སྔ་ཕྱིར་མཐུན་རྐྱེན་གང་ཡོད་སྦྱར་ཏེ་རབ་རྒྱན་ས་འབྲུག་ཕྱི་ལོ1988ལོར་འདུ་ཁང་གྱན་ལྔ་བཟོ་བཀོད་ལེགས་པ་ཞིག་གསར་བཞེངས་བྱེད་མགོ་བརྩམས་ཏེ་ཕྱི་ལོ1989ལོར་བཟོ་སྐྲུན་ལེགས་པར་གྲུབ། ད་ལྟར་བཞུགས་པའི་ནང་རྟེན་གྱི་རིམ་པ་ཡང་རྒྱལ་བོའི་བཀའ་འགྱུར་རིན་པོ་ཆེ་གཙོ་བྱས་སྐུ་གསུང་ཐུགས་རྟེན་དུ་མ་དང་། གསར་དུ་ལས་པའི་གྲྭ་ཤག་བཅུ། གྲྭ་བ་བཅོ་ལྔ་ཙམ་བཞུགས་ཤིང་ཆོས་ཐོག་གི་རིམ་པ་ཡང་རྒྱ་ལོའི་སྨོན་ལམ་ཉིན་གསུམ་ནས་ལྔའི་བར། དྲུག་པའི་སྨོན་ལམ་ཉིན་གསུམ། ལྔ་མཆོད་ཉིན་ལྔ་ནས་བདུན་བཅས་འདོན་པ་གོང་ལྟར་ཡིན། བོད་ལོའི་ཉེར་ལྔ་ནས་ལྷ་མོའི་བསྐང་བཤགས་ཉིན་གསུམ་བཅས་སོར་ཆུད་པ་བྱུང་། གཞན་ཡང་དགོན་པས་རང་ཁ་རང་གསོའི་རྩ་དོན་ལྟར་མདུན་རིའི་ངོས་ཀྱི་ནགས་སྡོང་མུའུ་སོ་ལྔ་ཙམ་ལ་བདག་གཉེར་བྱེད་བཞིན་པའོ། །
   Meditation Cave  subjects 108 For more information about this term, see Full Entry below.Subjects Geographical FeaturesReligiousBuddhist & Bön Religious SettlementsFull EntryRelated Subjects (1)Related Places (8)Related Texts (3)Related Audio-video (2)Related Images (116) cave  subjects 2913 For more information about this term, see Full Entry below.Subjects Geographical FeaturesNaturalmountain & rock-relateddivisionsFull EntryRelated Subjects (1)Related Places (4)Related Texts (1)Related Images (2) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192) གུར་ཁང (0, 1, 2, 3, 4)  terms 26397  Wyliegur khang /ExpressionFor more information about this term, see Full Entry below.Definitions 0, 1, 2, 3, 4Terms gagun gsab gyi dngul/Full EntryRelated Texts (1)