རྗེ་ཙོང་ཁ་པ་མཆོག་གི་གསུང་ནི་བོད་ཀྱི་སྤྱི་སྐད་ཚིག་སྦྱོར་གྱི་དཔེ་སྲོལ་དུ་བྱ་འོས་པ།    རྗེ་ཙོང་ཁ་པ་མཆོག་གི་གསུང་ནི་བོད་ཀྱི་སྤྱི་སྐད་ཚིག་སྦྱོར་གྱི་དཔེ་སྲོལ་དུ་བྱ་འོས་པ།               （ཟི་ལིང）   ལྕགས་ཐར་རྒྱལ།       ད་ལོ་ནི་རྗེ་ཙོང་ཁ་པ་བློ་བཟང་གྲགས་པ་མཆོག་སྐུ་མྱ་ངན་ལས་འདས་ནས་བགྲང་བྱ་དྲུག་བརྒྱ་ལོན་པའི་ལོ་ཡིན་ཞིང་།  ལོ་འཁོར་དྲུུག་བརྒྱའི་རིང་ལ་ཁོང་གི་གསུང་གི་མཛད་པའི་འོད་སྣང་གིས་འཇིག་རྟེན་གྱི་མ་རིག་པའི་མུན་པ་སྟུག་པོ་མཐའ་རུ་སྤྱུགས་ཤིང་།  སེམས་ཅན་མང་པོའི་རྒྱུད་ལ་མངའ་བའི་སྤང་བླང་ལེགས་ཉེས་ཀྱི་རིག་པའི་མྱུ་གུ་བསྐྱངས་ཤིང་སྐྱོང་བཞིན།  འཇིག་རྟེན་ཧྲིལ་པོ་ཕན་བདེའི་ཕྱོགས་ལ་བསྐུལ་ཅིང་སྐུལ་བའི་མཐུ་ལས།  མཁས་པའི་ཉི་མ་འོད་པོ་ཆེ། །ངག་གི་མེ་ལོང་ལ་ཐོབ་པས། །བགྲང་བྱ་ཕྲེང་བའི་གྲངས་བདས་ཀྱང་། །འཇིག་རྟེན་ཐམས་ཅད་སྣང་བར་བྱེད། །དེའི་ཕྱིར་གུས་པས་སྐབས་འདིར་ཁོང་གི་གསུང་གི་ཚིག་གི་སྦྱོར་བའི་ཁྱད་ཆོས་ལ་བརྟེན་ནས།  བོད་ཀྱི་སྤྱི་སྐད་ཀྱི་ཚིག་གི་སྦྱོར་ལུགས་གང་ལ་དཔེར་བྱ་འོས་པའི་སྐོར་ཅུང་ཙམ་གླེང་བར་བྱའོ། །   དང་པོ།  བོད་ཀྱི་སྤྱི་སྐད་ཀྱི་ཚད་གཞི་སྤྱིར་གླེང་བ།   ད་ལྟར་འཛམ་གླིང་གོ་ལ་ཟླུམ་པོ་གདུགས་གཅིག་གི་ཁོར་མོ་ཡུག་ཏུ་འདུ་ཞིང་།  ཕན་ཚུན་འགྲོ་བཞུད་སྔར་བས་སྟབས་བདེར་འགྱུར་བཞིན་པའི་སྐབས་འདིར་རང་རེའི་བོད་པའི་སྐད་ཆ་རིགས་གཅིག་གི་མུ་ཁྱུད་དུ་འཚོ་བའི་བོད་པ་བྱིངས་ཀྱིས་ཀྱང་ཀུན་གྱིས་གོ་ཞིང་ཡུལ་གྲུ་ཀུན་ལ་ཁྱབ་པའི་སྐད་ཆ་ཐུན་མོང་པ་ཞིག་ཆགས་པའི་ཐབས་ལ་བརྩོན་ཆེད།  དབུས་གཙང་གི་སྐད་ནི་རྒྱལ་ཁབ་ཕྱི་ནང་ཀུན་ལ་ཁྱབ་ཅིང་སྐད་ཆ་སྤྱིའི་འཕེལ་ཕྱོགས་དང་མཐུན་པས་དེ་ཉིད་གཞིར་གཟུང་འོས་པར་སྨྟ་བ་དང་།  ཁམས་པའི་སྐད་ཆ་ནི་མདོ་དབུས་གཉིས་ཀྱི་སྐད་ཆའི་བར་བརྒལ་གྱི་མཚམས་སུ་མཆིས་པས་དེ་རང་གཞིར་གཟུང་རུང་བར་རེ་བ་དང་།  ཨ་མདོའི་སྐད་ནི་འཕུལ་རྟེན་མགོ་འདོགས་རྫོགས་པར་འཐོན་ཞིང་གནའ་བོའི་བརྗོད་སྲོལ་མང་པོ་ད་དུང་དེ་བཞིན་དུ་བདོག་ཕྱིར་དེ་ག་གཞིར་གཟུང་ན་ལེགས་པར་འདོད་པ་དང་།  དེ་ལྟའི་ཡུལ་སྐད་ཕྱོགས་རེ་བའི་ཕྱོགས་སུ་མ་ལྷུང་བར་མདོ་དབུས་ཁམས་གསུམ་གྱི་སྐད་ཆའི་བརྗོད་པ་ཐུན་མོང་པའི་ཁྱད་ཆོས་ཕྱོགས་སུ་བསྡུ་བ་དང་།  ཡུལ་ལུང་ཐ་དད་པའི་བརྗོད་སྟངས་ཕྱོགས་རེ་བ་ཡོངས་སུ་དོར་ཏེ།  སུམ་རྟགས་དག་གསུམ་གྱི་དགོངས་པ་དང་མཐུན་པར་སྐད་ཀྱི་སྒྲ་གདངས་ནི་དབུས་གཙང་དང་ཉེ་བར་འབྱིན་པའི་ཐབས་ཀྱིས་རྗོད་མཁན་རང་གི་ཅི་ཞིག་བརྗོད་པའི་དོན་རྣམས་ཕ་རོལ་པོ་ལ་གོ་བརྡ་ཨེ་འཕྲོད་ཀྱི་ཐབས་ལ་བརྩོན་ཞིང་།  རྗོད་མཁན་རང་གི་ཡུལ་སྐད་ཀྱི་བརྗོད་སྟངས་ཕྱོགས་རེ་བ་ཅི་ཐུབ་ཀྱིས་འདོར་ཞིང་།  བོད་པའི་མི་རིགས་ཡོངས་ཀྱི་སྐད་ཡིག་གི་རྨོངས་པ་དགྲོལ་ཅི་ཐུབ་ཀྱི་སྒོ་ནས་རིག་གནས་ཀྱི་ཆུ་ཚད་མཐོ་རུ་གདགས་པར་བརྩོན་དགོས་པའི་འདུ་ཤེས་ཐུན་མོང་པ་ཞིག་འཆག་པར་བརྩོན་པར་གདའ་ན་ཡང་།  ཡིག་ཐོག་ཏུ་སྤྱོད་པའི་ཚིག་གི་སྦྱོར་བ་ལ་ད་དུང་ཡུལ་སྐད་ཀྱི་ཁྱད་པར་ཧ་ཅང་གསལ་པོ་བདོག་པ་གཅིག་མཐུན་དུ་བྱ་དགོས་ན།  སྐད་རིགས་གཞན་དག་དང་མཐུན་པར་ཚིག་གི་སྦྱོར་བ་ཇི་འདྲར་བྱ་བའི་དཔེ་གཞི་ཞིག་ངེས་པར་ཡོད་དགོས་ཤིང་།  དེ་ནི་དུས་སྐབས་ནམ་ཞིག་གི་མཁས་པ་གང་དག་གི་གསུང་ལ་གཞིར་བྱ་བའི་ཚད་གཞི་ཞིག་ཀྱང་ངེས་པར་བྱ་དགོས་པར་གདའ་འོ། །   གཉིས་པ།  བོད་ཀྱི་སྤྱི་སྐད་ཀྱི་ཚིག་སྦྱོར་གྱི་ཚད་གཞི་གང་ལ་བྱ་འོས་པ།   དེ་སྔར་སྤྱི་ལོ་དུས་རབས་བདུན་པའི་ནང་དུ།  བོད་ཀྱི་བཙན་པོ་སྲོང་བཙན་སྒམ་པོའི་ཐུགས་དཀྱེལ་ཆེན་པོའི་མཐུ་ལ་བརྟེན་ནས།  དང་པོའི་སློབ་དཔོན་ཐོན་མི་སམྦྷོཊ་མཆོག་གིས་བོད་པའི་སྐད་ཆའི་བརྗོད་པའི་རྩ་བ་ཕྱོགས་སུ་བསྡུས་ཤིང་།  དབྱངས་གསལ་ཡི་གེའི་སྦྱོར་བ་དང་བརྡ་སྤྲོད་པའི་གཞུང་ལུགས་གཏན་ལ་ཕབ་པའི་འཕྲིན་ལས་ཀྱི་དབང་གིས།  ཐོག་མར་ཆོས་སྲིད་ཀྱི་བརྗོད་བྱ་ཐ་དད་པའི་ཚིག་གི་སྦྱོར་བ་ལ་རིང་ཐུང་དང་།  རྐྱང་འབྲེལ་གྱི་ཁྱད་པར་ཅུང་ཟད་ཡོད་པ།  རིམ་གྱིས་ཡི་གེའི་ནུས་པ་ལ་བརྟེན་ནས་ཡུལ་སྐད་ཀྱི་སྦྱོར་བ་མཐུན་པར་བསྡུས་པ་དང་།  སྐད་གསར་བཅད་ཀྱི་བཀས་བཅད་རིམ་པ་སྔ་ཕྱིར་མཛད་པ་དང་།  གནམ་གྱིས་ས་བཀབ་པ་ལྟ་བུའི་མཁས་པ་གསེར་རིའི་ཕྲེང་བ་ཟམ་མ་ཆད་པར་བྱོན་པ་རྣམས་ཀྱི་བཀའ་དྲིན་གྱི་དབང་གིས།  བོད་པའི་སྐད་ཆ་འདི་ལ་བསྟན་བཅོས་སྨྲ་བའི་སྐད་ཆའི་སྦྱོར་བ་ཚད་དང་ལྡན་ཞིང་བླ་ན་མཐོ་བ་ཞིག་ཆགས་པའི་གྲས་སུ།  རྗེ་ཙོང་ཁ་པ་མཆོག་ནི་མདོ་སྨད་ཙོང་ཁའི་ཡུལ་དུ་སྐུ་འཁྲུངས་ཤིང་།  ཁམས་ཀྱི་ཡུལ་གྲུ་ཞབས་ཀྱིས་བཅགས་ཏེ་དབུས་གཙང་དག་པའི་ཞིང་དུ་ཆིབས་བསྒྱུར་མཛད་ཅིང་།  དུས་སྐབས་དེ་ཉིད་ལ་བོད་དུ་ཞལ་བཞུགས་པའི་ཆོས་བརྒྱུད་གྲུབ་མཐའ་རིས་མེད་ཀྱི་མཁས་པ་ཞལ་མཇལ་ཐུབ་པ་ཀུན་གྱི་གསུང་གི་བདུད་རྩི་ཅི་དགར་བཞེས་ཏེ།  ས་ཡི་འཛིན་མ་འདི་ཡི་ཕང་བར་བཞུགས་པའི་སཾ་བོད་སྐད་ཆར་ཉར་པའི་བསྟན་བཅོས་ཇི་སྙེད་པ་ལ་གཟིགས་ཞིབ་ནན་ཏུར་གནངས་ཤིང་།  རྒྱ་གར་དང་བོད་ཀྱི་མཁས་པ་སྔ་མ་རྣམས་ནས་བརྒྱུད་པའི་བསྟན་བཅོས་རྩོམ་པའི་ཡོན་ཏན་ཇི་སྙེད་ཡོངས་སུ་ཐུགས་བཞེས་གནངས་པར་མ་ཟད།  བོད་ཀྱི་སྐད་ཡིག་གི་ལམ་ནས་རྒྱལ་བ་ཤྰཀྱ་ཐུབ་པའི་མདོ་སྔགས་ཀྱི་ལྟ་བ་ཟབ་མོ་ཇི་ལྟར་གནད་ཐིངས་ཤིང་གཏན་ཚིགས་གྲུབ་པ།  ཀུན་གྱིས་གོ་སླ་ཞིང་གཟུང་བདེ་བར་བརྗོད་པའི་སྐད་ཆའི་ཚིག་སྦྱོར་གྱི་ངག་གི་དཔལ་ལ་ཅི་དགར་མངའ་མཛད་ཅིང་།  ཁོང་ནི་རྙིང་མ་བཀའ་གདམས་ས་སྐྱ་བཀའ་བརྒྱུད་ཞི་བྱེད་ཇོ་ནང་བོན་པོ་དང་བཅས་པའི་ལྟ་གྲུབ་ཀུན་འདུས་ཀྱི་གཏེར་བདག་ཏུ་མངའ་བརྙེས་པ་དང་།  ཐོན་མི་འཇམ་པའི་དབྱངས་ནས་བཟུང་བའི་མཁས་གྲུབ་ཡོངས་ཀྱི་གསུང་གི་ཡོན་ཏན་བདག་གིར་མཛད་པ་དང་།  གངས་ཅན་བོད་པའི་སྐད་ཆའི་སྦྱོར་བ་ལ་བརྗོད་དོན་ཟབ་མོ་ཇི་ལྟར་བརྗོད་པའི་ཐུགས་རྩལ་ཡོངས་སུ་རྫོགས་པའི་ངག་གི་དབང་ཕྱུག་ཏུ་གྱུར་ཅིང་།  ཁོང་ནི་བོད་སྐད་ཀྱི་སྐད་ཆའི་ཁོ་ལག་ཡོངས་སུ་རྫོགས་པར་བྱེད་པའི་མཁན་པོ་དང་།  ལྷག་པར་ཁོང་གི་གསུང་ནི་བོད་ཀྱི་བསྟན་བཅོས་སྨྲ་བ་ཀུན་གྱི་གསུང་གི་མཚོན་དཔེ་རུ་གྱུར་པ་ཀུན་ལ་བསྙོན་མེད་དུ་གྲུབ་པ་དང་།  ཁོང་གི་གསུང་དུ་འབྱུང་བའི་ཚིག་གི་སྦྱོར་བ་ནི་ལུང་སྟོན་པ་སུམ་རྟགས་དག་གསུམ་གྱི་དགོངས་པ་དང་ཀུན་ནས་མཐུན་ཞིང་།  རྒྱ་གར་གྱི་སྒྲ་ཚད་སྙན་ངག་མངོན་བརྗོད་ཀྱི་རིག་པས་ཡོངས་སུ་ཕྱུག་པའི་ཁར།  བོད་ཡུལ་ཐུན་མོང་ལ་གྲུབ་པའི་སྐད་ཆའི་སྦྱོར་སྲོལ་ཀུན་ནས་གྲུབ་ཅིང་།  བོད་སྐད་ཀྱི་སྦྱོར་བ་ལ་དགོས་ངེས་ཀྱི་མིང་གི་བྱེ་བྲག་དང་།  ཚིག་ཕྲད་ཀྱི་སྦྱོར་བ།  ཚིག་གི་སྡེབ་ལུགས།  རྒྱན་གྱི་སྤྲ་ལུགས།  བརྗོད་དོན་གྱི་གཏན་ཚིགས་གང་ཆ་ནས་འདི་མ་ཚང་བ་དང་དེ་མ་རྫོགས་པའི་ཀླན་ཀ་གཏན་ནས་བཙལ་དུ་མེད་པའི་བོད་སྐད་ཀྱི་ཚིག་གི་སྦྱོར་ལུགས་ཀྱི་མཚོན་དཔེ་བླ་ན་མེད་པ་ཉག་གཅིག་ཏུ་གྲུབ་པའོ། །   གསུམ་པ།  རྗེ་ཙོང་ཁ་པའི་གསུང་ལས་ཚིག་ལྷུག་གི་ཁྱད་ཆོས་མདོར་བསྡུས་པ།   སྤྱིར་བརྗོད་བྱ་དོན་གྱི་རྗོད་ལུགས་ལྟར།  ཚིག་གི་སྦྱོར་བ་སྤེལ་ལུགས་ལ་ཚིག་ལྩག་དང་།  ཚིགས་བཅད་དང་།  བཅད་ལྷུག་སྤེལ་མའི་ཁྱད་པར་གྲུབ་ཅིང་།  དེ་དག་གི་སྦྱོར་བའང་དམངས་ཡོངས་ཀྱི་གྲས་སུའང་གང་མཁོ་དེར་བསྟུན་དུ་སྦྱོར་གྱིན་ཡོད་ན་ཡང་།  བོད་མི་རྒན་དར་གཞོན་པའི་ཚོགས་ལ་ཐོག་མར་གྲུབ་ཅིང་ཚིག་གི་སྦྱོར་བ་གཞན་གྱི་རྩ་བར་གྱུར་པ།  དོན་གྱི་བརྗོད་པ་ཀུན་ལ་རྒྱལ་པོའི་རྒྱལ་སྲིད་ལྟར་ཡོངས་སུ་ཁྱབ་པ་ནི་ཚིག་ལྷུག་གི་སྦྱོར་བ་ཡིན་པས།  སྐད་ཆ་ཞིག་གི་ཚིག་སྦྱོར་གྱི་ཚད་གཞི་ཇི་འདྲ་ལ་བྱེད་པའང་ཚིག་ལྷུག་གི་སྦྱོར་བ་ལ་བྱེད་པ་སྐད་རིགས་ཀུན་ལ་གཅིག་མཐུན་དུ་གྲུབ་པའི་ཕྱིར་ན།  འདིར་ཡང་རྗེ་ཙོང་ཁ་པ་མཆོག་གི་གསུང་དུ་འབྱུང་བའི་ཚིག་ལྷུག་གི་ཁྱད་ཆོས་རགས་ཙམ་ཞུ་བར་བྱའོ། །   ༡  ཚིག་སྦྱོར་གྱི་ཁོ་ལག་རྫོགས་ཤིང་བརྗོད་བྱ་སྣ་ཚོགས་རྩལ་དུ་ཐོན་པ།   སྤྱིར་རང་རེའི་སྐད་ཆ་འདི་ཡང་སྐད་རིགས་ཕུན་སུམ་ཚོགས་པ་གཞན་དག་དང་འདྲ་བར་མིང་གི་བྱེ་བྲག་སྣ་ཚོགས་པ་སྔ་མོ་ནས་བྱུང་ཞིང་།  མིང་དག་གི་སྦྱོར་ལུགས་ཀྱང་གཏན་ཆགས་སུ་གྲུབ་པ་ལྟར།   སྐབས་བབ་ཀྱི་བརྗོད་དོན་ཅི་ཞིག་བརྗོད་པའི་དགོས་མཁོ་ལྟར་དུ།  རྗེ་རིན་པོ་ཆེ་མཆོག་གི་གསུང་དུ།  ཁྱད་གཞི་བརྗོད་པའི་མིང་དང་།  བྱ་བ་བརྗོད་པའི་མིང་དང་།  ཁྱད་ཆོས་བརྗོད་པའི་མིང་དང་།  ངེས་བཟུང་གི་མིང་སོགས་ཀྱིས་ཚིག་གི་སྦྱོར་བའི་གཞི་བཏིང་བ་ལ།  སྐབས་འཐོབ་ལྟར་གྲངས་ཀ་བརྗོད་པའི་མིང་དང་།  འཇལ་བྱེད་ཀྱི་མིང་དང་།  ཤུགས་འདོན་པའི་མིང་དང་།  གནས་པ་གསལ་བྱེད་ཀྱི་མིང་དང་།  དཔེ་དོན་མཚུངས་པ་གསལ་བྱེད་ཀྱི་མིང་དང་།  རྒྱུ་མཚན་གསལ་བྱེད་ཀྱི་མིང་དང་།  དགོས་པ་གསལ་བྱེད་ཀྱི་མིང་དང་།  དུས་གསལ་བྱེད་ཀྱི་མིང་དང་།  གཞན་ཡང་སྦྲེལ་ཚིག་སྣ་ཚོགས་པ་གང་མཁོ་དེར་བསྟནུ་དུ་སྦྱར་ཏེ།  ཚིག་རྐྱང་པའི་ཁོ་ལག་རྫོགས་པར་བསྐྱེད་ཅིང་།  ཚིག་དོན་སྔ་ཕྱིའི་བརྗོད་པ་གསལ་བར་བྱས་ཏེ།  གང་ཞིག་བརྗོད་པའི་དོན་ལ་མི་གསལ་བའི་ཆ་གང་ཡང་མེད་པར།  སྐབས་བབ་ཀྱི་བརྗོད་བྱ་དཀའ་སླ་ཅི་རིགས་པ་རྩལ་དུ་འདོན་པའི་ངག་གི་དཔལ་མཆོག་ཏུ་གྲུབ་པའོ། །   ༢  ཚིག་སྦྱོར་ལ་ལྷོད་ཤ་ཆགས་ཤིང་བརྗོད་དོན་གྱི་གནད་ཐིངས་པ།   ཚིག་གི་སྦྱོར་བ་ཐུང་ངུ་རིང་པོར་བསྐྱེད་པ་དང་།  ཚིག་སྦྱོར་རིང་པོ་ཐུང་ངུར་བསྐུམ་པ་དང་།  ཚིག་རྐྱང་པ་སྦྲགས་མར་བསྒྲུབ་པ་ནི་བརྗོད་དོན་གང་ཞིག་ཇི་ལྟར་བརྗོད་པའི་དགོས་པ་ལ་བལྟ་དགོས་པ་དང་།  ཚིག་ཕྲད་ཀྱི་སྦྱོར་སྡུད་དང་།  ཚིག་དག་གི་ཆ་ཤས་བསྡུ་ལུགས་ཀྱང་གནས་སྐབས་ཀྱི་བརྗོད་པའི་དབང་དང་བསྟུན་དགོས་པ་ལྟར།  རྗེ་རིན་པོ་མཆོག་གི་གསུང་དུ།  ཚིག་གི་སྦྱོར་བ་རིང་པོ་ལ་འདི་མི་དགོས་སྙམ་པའི་སྤྲས་པ་གང་ཡང་མེད་ལ།  ཚིག་གི་སྦྱོར་བ་ཐུང་ངུ་ལ་ཆ་ཤས་འདི་ནི་ཆད་འདུག་ཟེར་བའང་གཏན་ནས་མེད་པར།  གང་ཞིག་བརྗོད་པའི་དོན་རྣམས་སྔ་ཕྱིར་རང་བཞིན་དུ་འབྱུང་བ་ལྟར།  ཇི་ལྟར་བརྗོད་ཚུལ་བརྗོད་དོན་གྱི་བབ་དང་འབྱོར་ཞིང་།  གང་ལྟར་སྦྱོར་བ་ལྷོད་ཆགས་པར་འབྱུང་ཕྱིར།  བརྗོད་དོན་དཀའ་སླ་གང་ཞིག་ཡིན་ཡང་གནད་གསལ་ཞིང་ཐིངས་པར་སྣང་བ།  དཔེར་ན།  དེ་ནས་སེམས་དཔའ་ཆེན་པོ་དེ་ཤིང་རྟའི་ནང་དུ་ཞུགས་པ་བཞིན་དུ་བདག་དགེ་བའི་བཤེས་གཉེན་གྱི་དྲུང་དུ་འགྲོ་བ་ནི་ཚུལ་དང་མཐུན་པ་མ་ཡིན་ནོ་སྙམ་དུ་བསམས་ནས་རང་གི་ཤིང་རྟ་ལས་བབས་སོ། །དེ་བབས་པ་དང་དུས་མཉམ་དུ་བུ་མོ་ལྔ་བརྒྱ་ཡང་ཤིང་རྟ་ལས་བབས་སོ། །ལྟ་བུས་མཚོན་ཏེ།  ཚིག་གི་སྦྱོར་བ་ཅི་བྱུང་ཐམས་ཅད་ལྷོད་ཆགས་ལ་དོན་གྱི་བབ་དང་འབྲེལ་བ།  ཅི་ཞིག་བརྗོད་པའི་དོན་རྣམས་གསལ་ཞིང་གནད་གྲོལ་བར་སྣང་བས།  བོད་སྐད་ཀྱི་སྦྱོར་བ་ལ་འདི་ལས་ལྷག་པ་གཏན་ནས་འབྱུང་མི་སྲིད་པའི་ཡོན་ཏན་ལྷུར་བཞེས་པའོ། །   ༣  ཚིག་རྒྱན་གྱི་སྦྱོར་བ་ངེས་སླ་ཞིང་བརྗོད་དོན་ལ་གཏན་ཚིགས་གྲུབ་པ།   སྤྱིར་ཚིག་གི་སྦྱོར་བའི་བརྗོད་བྱ་ངེས་དཀའ་བ་ནི།  ཚིག་གི་སྦྱོར་བ་བསྡུས་ཤིང་བརྗིད་པ་དང་།   བརྗོད་བྱ་རྟོགས་དཀའ་བ་གང་རུང་ལས་མི་འདའ་ཡང་།   རྗེ་རིན་པོ་མཆོག་གི་བཀའ་གསུང་སྤམ་མཐོ་བ་དག་གི་བརྗོད་བྱ་གཏིང་ཟབ་ཅིང་བརླིང་བ་དང་།   བརྗོད་གཞི་རྒྱ་ཆེ་ཞིང་དཔག་དཀའ་བ་མ་གཏོགས་པར།  ཚིག་གི་སྦྱོར་བའི་ཆ་རུ་དམངས་ཡོངས་ལ་མ་གོམས་ཤིང་ཀུན་ལ་གྲགས་མི་ཆེ་བའི་མངོན་བརྗོད་དང་།   བརྡ་རྙིང་པ།  ཚིག་རྒྱན་སྦྱོར་དཀའ་བ་གང་གིས་ཀྱང་མི་སྤུད་པར།  བོད་འབངས་བྱིངས་ལ་གྲགས་པའི་མིང་བརྡ་ཕལ་པ་དང་།  རང་བཞིན་བརྗོད་པའི་རྒྱན་གྱིས་གཙོས་པའི་ཚིག་རྒྱན་རྒྱུགས་ཆེ་བ་དག་ཀྱང་ཇི་ལྟར་གོ་སླ་བ་དེ་བཞིན་དུ་སྦྱར་ཏེ།  གང་ཞིག་བརྗོད་པར་འདོད་པའི་དོན་རྣམས་ཞལ་གསལ་ཞིང་གོ་སླ་བར་སྤེལ་པའི་མཐུ་ལས།  ཚིག་གི་སྦྱོར་བ་ལ་བརྟག་ན།  ཁོང་གི་གསུང་ཚིག་ནི་བོད་མི་ཕལ་པའི་སྐད་ཆ་རང་ཡིན་ཞིང་།  ཇི་ལྟར་སྦྱོར་བའི་ཐབས་ཀྱང་བོད་པ་ཀུན་ལ་གྲགས་པ་དེ་ཁོ་ན་ཡིན་པའི་དབང་གིས།  མི་སུ་དང་གང་ཞིག་གིས་ཀྱང་ཁོང་གི་གསུང་དུ་འབྱུང་བའི་དོན་ལ་དཔྱད་པར་བྱ་བ་ལས།  ཚིག་གི་སྦྱོར་བ་འགྲོལ་བའི་ཐད་ལ་འབད་པ་གང་ཡང་བསྐྱེད་མི་དགོས་པའི་ཁར།   གསུང་ཚིག་གང་ལའང་ཡུལ་སྐད་བྱེ་བྲག་པ་གང་གིའང་ཞད་མ་འདྲེས་པར་སྔོན་ནས་ད་ལྟ་ལ་ཐུག་གི་བར་དུ་བོད་པ་རྒན་དར་གཞོན་པའི་ངག་ལ་འབྱོང་ཞིང་གཟུང་སླ་བར་བརྟེན།  བོད་དུ་བྱོན་པའི་མཁས་པའི་གསུང་ཚིག་ཀུན་ལས་དམངས་ཡོངས་ཀྱིས་ངག་ཏུ་ཁ་ཏོན་དུ་བྱེད་པ་ལ་རྗེ་རིན་པོ་ཆེ་འདི་བའི་གསུང་ལས་ལྷག་པ་གང་ཡང་མེད་པའོ། །   བཞི་པ།  ཡིག་ཐོག་ཏུ་ཚིག་སྦྱོར་ཅི་སྤེལ་རྗེ་ཙོང་ཁ་པའི་གསུང་ལ་དཔེར་བྱ་དགོས་པ།   ཡི་གེ་ཡོད་པའི་མི་རིགས་གང་གི་སྐད་ཆ་ལའང་ཡུལ་སྐད་དང་།  ལུང་སྐད་དང་།  འཕྲལ་སྐད་ཀྱི་ཁྱད་པར་གང་ཡང་མེད་པ་མི་སྲིད་པ་ནི།  མི་རིགས་གཅིག་གི་ཁོངས་མི་རྣམས་ལ་ཐོན་སྐྱེད་ལས་སྒོ་དང་།  ཕོ་མོ་རྒན་གཞོན།  རིག་གནས་ལས་སྐལ་སོགས་ཀྱི་ཁྱད་པར་གང་ཡང་མེད་པ་གཏན་ནས་མི་སྲིད་པ་ལ་ཐུག་ཅིང་།  མི་སུ་དང་གང་གིས་ཀྱང་དུས་དང་ནམ་པ་ཀུན་ཏུ་སྐད་ཆ་ཅི་བརྗོད་པ་ཡིག་ཐོག་ཏུ་དབབ་དགོས་པར་ཡང་མ་ངེས་ལ།  ཡིག་ཐོག་ཏུ་འབེབས་པའི་སྐད་ཆ་ཡོད་ཚད་སྤྱི་སྐད་ཀྱི་སྦྱོར་བ་ཁོ་ན་ལྟར་སྦྱར་དགོས་པར་ཡང་མ་ངེས་པ།  དམངས་ཁྲོད་ཀྱི་གཏམ་དཔེ་དང་།  བཤད་པ་སྣ་ཚོགས་དང་།  གླུ་གཞས་ཁ་ཤགས་དང་།  སྒྲུང་གཏམ་ངག་རྒྱུན་སོགས་ལ་ཡུལ་སྐད་ཀྱི་ཁྱད་པར་གསལ་ཞིང་།  དེར་མཐུན་གྱི་རིན་ཐང་མངོན་པར་སྣང་ཕྱིར།  དེ་དག་ལ་ཡུལ་སྐད་ཀྱི་བརྗོད་པ་གལ་ཆེ་བར་གྱུར་ན་ཡང་།   ལོ་རྒྱུས་རྣམ་ཐར་དང་།  བཟོ་གསོ་སྙན་ངག  བརྡ་སྤྲོད་རྩོམ་རིག  ལེགས་བཤད་བསླབ་བྱ།  དཔྱད་རྩོམ་རིག་གཞུང་གི་སྐོར་ནི།  ཇི་ལྟར་ཀུན་གྱིས་གོ་ན་རིན་ཐང་དེ་ལྟར་ཆེ་ཞིང་།    ཡུལ་གང་དུའང་བྲིན་པ་ལ་ཀུན་གྱིས་གོ་བའི་སྐད་ཆ་ལྟར་བྱེད་པ་དང་།  བརྗོད་བྱ་དོན་གྱི་གནད་ཇི་ལྟར་ཐིངས་པར་བྱ་བ་ལ་ཚིག་གི་སྦྱོར་བ་དེ་ལྟར་གཏན་ཚིགས་གྲུབ་ཅིང་།  ཀུན་ལ་གོམས་ཤིང་རྟོགས་སླ་བའི་ཚིག་གི་སྦྱོར་བ་ལ་བརྟེན་དགོས་པར་མ་ཟད།  སྐད་ཆའི་སྦྱོར་བ་བརྡ་སྤྲོད་རིག་པའི་གཞུང་དང་མཐུན་ཞིང་ཕྱི་རོལ་དོན་གྱི་གནས་ལུགས་དང་མི་འགལ་བར་བྱ་དགོས་པ་ནི།  ད་ལྟར་མི་རིགས་གཅིག་གི་ནང་ཁུལ་དུ་གཅིག་མཐུན་གྱི་སྤྱི་སྐད་ཚད་ལྡན་མངའ་བའི་སྐད་ཆ་ཀུན་གྱི་མཐུན་ཆོས་སུ་གྲུབ་པ་ལགས་པས།  ངེད་ཅག་གིས་ཀུན་གྱིས་གོ་ཞིང་ཡོངས་ལ་ཕན་པ།  སྤྱི་ལ་བསྒྲག་ཅིང་ཀུན་ཏུ་བྲིན་པའི་རྩོམ་ཡིག་རིང་ཐུང་གང་ཞིག་སྤེལ་ན།  རྗེ་ཙོང་ཁ་པ་སོགས་ཚད་མར་གྱུར་པའི་མཁས་པ་དག་གི་གསུང་དང་བསྟུན་ཅི་ཐུབ་ལ་འབད་པ་ནི།  སྐད་ཆ་འདི་ཀོ་ཡུན་རིང་དུ་གནས་ཤིང་བོད་པའི་རིག་གནས་ཀྱི་ཞིང་ས་གཤིན་པོར་བསྐྲུན་པའི་ཐབས་མཆོག་ཉག་གཅིག་ཏུ་ངེས་པའོ། །
   Tibetan Literacy  subjects 5619 For more information about this term, see Full Entry below.Subjects Community Services Project TypesEducation & TrainingFull EntryRelated Subjects (1)Related Texts (1) Triga  places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Texts (116)Related Audio-video (81)Related Images (192) སྐད་ཡིག (0, 1, 2, 3)  terms 8853  Wylieskad yigExpressionFor more information about this term, see Full Entry below.Definitions 0, 1, 2, 3Terms kaskad 'dzer/Full EntryRelated Texts (1)