ནེའུ་མགོའི་མཚེའུ། ____ངའི་བྱིས་དུས་ཀྱི་ཤམ་བྷ་ལའི་ཞིང་མཆོག

ངའི་བྱིས་དུས་ཀྱི་འཚོ་བ་དྲན་སྐབས་ཆེས་བརྗེད་དཀའ་བ་དེ་ནི་ནེའུ་མགོའི་མཚེའུ་དང་འབྲེལ་བའི་གཏམ་རྒྱུད་དག་ཡིན། དེ་ཡང་ལོ་རབས་བརྒྱད་བཅུའི་སྔོན་དུ་ཕ་ས་སྟག་རིག་ནས་ནར་སོན་པའི་བྱིས་པ་དག་ལ་མཚོན་ན། ང་དང་ཀུན་ནས་འདྲ་བར་ནེའུ་མགོའི་མཚེའུ་ནི་དྲན་པའི་མེ་ལོང་ངོར་གསལ་ལེར་འཆར་བའི་ཆེས་མཛེས་སྡུག་གི་ཕྱིར་དྲན་དེ་ཉིད་ཡིན་ངེས།

ནེའུ་མགོའི་མཚེའུ(尼谷湖)བྱ་བ་དེ་ནི་ཁྲི་ཀ་རྫོང་འཕྲང་དམར་གྲོང་བརྡལ་སྟག་རིག་སྡེ་བའི་ཡ་མགོ་མའི་ལྷོ་མཐར་ཡོད་ལ། ཇི་སྐད་དུ།《མཚོ་ལྷོའི་དམངས་ཁྲོད་ཀྱི་རིག་གནས་དཔེ་ཚོགས》ལས། རྫིང་བུ་དེ་ནི་ནེའུ་གསིང་སྔོན་མོ་གཡུ་ཡི་མཎྜལ་ཕྱིས་འདྲར་སྔོ་ཞིང་། ཡུལ་དེའི་ཡུར་ཆུའི་འབྱུང་ཁུངས་དང་ཕྱུགས་ཀྱི་འཚོ་རྟེན་དུ་གྱུར་ཅེས་འབྱུང་བ་ལྟར། ང་རང་བྱིས་པའི་དུས་སུ་གནས་དེ་ནི་དེ་ལྟར་འཁྲུལ་མེད་ཁོ་ན་ཉིད་དུ། སའི་དགེ་མཚན་ཇི་བཞིན་མངོན་པར་བཀྲ་བའི་ཡུལ་ལྗོངས་སྣང་བ་སྐྱིད་ལ་ཉམས་དགའ་བ་ཞིག་ཡིན་ཞིང་། དེའི་ཆུ་རྒྱུད་ནི་བྲག་དཀར་སྔགས་རམས་པའི་ཉམས་སྣང་དུ་འཇམ་དཔལ་ནྰ་ག་ཀྵར་གཟིགས་པའི་སྲིན་པོ་རིའི་རྫ་ཆུར་གཏོགས་ཤིང་། མཚེའུའི་ཆེ་ཆུང་ལ་རྨིད་གྲུ་བཞི་མ་ཉིས་བརྒྱ་ལྷག་ཙམ་དང་། དབུས་སུ་དེའུ་འབུར་ཆུང་ཆུང་ཞིག་ཡོད་པའི་སྟེང་འདམ་ཤིང་མང་པོ་སྟུག་ཅིང་ཚོམ་པོར་སྐྱེས་ཡོད་ལ། དེའུ་འབུར་དང་མཚེའུ་ཡི་མཐའ་འཁོར་གྱི་བར་ཐག་ལ་ཆ་སྙོམས་སུ་གོམ་པ་དྲུག་བདུན་ཙམ་ཡོད། མཚེའུའི་ནང་གི་ཆ་འགའ་རེ་ནས་དབུགས་གཏོང་བ་ལྟར་སྐབས་རེར་ཟེགས་ཆུ་ཕྱིར་ལྷོག་ལྷོག་ཏུ་འཕྱུར་ནས་ཁོལ་བའི་རྣམ་པ་ཀུན་ནས་སྟོན་པར་བྱེད་པ་ཡོད། བྱིས་པ་རྣམས་ཀྱིས་སྣང་ཚུལ་དེ་མཐོང་སྐབས། ཆེ་བོ་རྣམས་ལ་ཚུལ་དེ་ཅི་རེད་དྲིས་ན། ལན་དུ་ཨ་ཅེ་འདྲེ་མོས་ཇ་བསྐོལ་བཞིན་ཡོད་ཟེར་ལ། དེ་ལྟར་ཐོས་པའི་མོད་ལ་ལྷག་ཏུ་ཚུལ་དེ་ངོ་མཚར་དུ་འཛིན་ཞིང་ཡང་ཡང་ལྟ་བར་བྱེད། མཚེའུའི་ནང་དུ་ཉ་མོ་དང་ཉ་ཐོམ་འབུ། སྦལ་བ། འབུ་གཤོང་བ། གཞན་ཡང་མིང་མི་ཐོགས་པའི་ཆུ་གནས་སྲོག་ཆགས་དུ་མ་མཆིས་ལ། དེར་མ་ཟད་བྱེ་མའི་ནང་ནས་སྐབས་རེར་འབུ་སྐོགས་རྡོ་འགྱུར་དུ་སོང་བའི་དབྱིབས་ཡ་མཚན་ཅན་མང་པོ་ཡང་རྙེད་དུ་ཡོད། མཚེའུ་དེ་ནི་ཉམས་དགའ་བ་ཞིག་ཡོད་སྟབས་ངང་བ་ཕོ་མོ་འགའ་དང་འགའ་རེ། དབྱར་གསུམ་གྱི་དུས་སུ་དེའི་ནང་བབས་ནས་ཁྲུས་རྩེད་བྱས་ཏེ་མཚོ་ལ་སྤྲོ་བས་འཇུག་པའི་གནས་སྐབས་ཀྱང་མང་བོ་མཐོང་རྒྱུ་ཡོད། བཤད་ཚུལ་དུ་མཚེའུ་དེ་ནི་ཀླུ་རྒྱལ་ནོར་རྒྱས་དཀར་པོའི་ཕོ་བྲང་དུ་གྲགས་ཤིང་། ཞིང་ལས་གཙོ་བོའི་ཡུལ་ཕྱོགས་འདི་ལ་ཙད་ནག་ཁོལ་ཞིང་ཐན་པ་བྱུང་བའི་ཚེ་སྡེ་འདིའི་གྲྭ་པ་རྣམས་མཚེའུའི་ཁར་ལྷན་ཅིག་ཏུ་ཕྱག་ཕེབས་གནང་སྟེ། ཀླུ་དབང་རྒྱལ་བོ་བསྒྲུབས་ཤིང་ཆར་ཆུའི་དངོས་གྲུབ་བསླངས་ནས་ཆར་ཆུ་དུས་སུ་འབེབས་པར་བརྩོན་སའི་ཀླུ་གནས་གཉན་པོ་ཞིག་ཏུ་བྱེད་པས། ཡུལ་ཡར་མར་འདིའི་གཅོད་དབང་ཐོབ་པའི་རྣལ་འབྱོར་བ་རྣམས་ཀྱང་ནམ་རྒྱུན་མཚེའུ་དེའི་ཁར་ཕེབས་བཞུགས་མཛད་ནས། ས་དེ་ནི་ཆུ་མིག་བརྒྱ་རྩའི་ཉམས་ལེན་བྱེད་ཡུལ་གཙོ་ཞིག་ཏུ་འཇོག་པ་ཡིན་སྐད།

ངའི་བྱིས་དུས་ནི་རིག་གནས་གསར་བརྗེའི་རླུང་འཚུབ་ཆེན་པོ་འཇགས་མ་ཐག་པའི་གནས་སྐབས་ཉིད་དུ་འཁེལ་ཞིང་། དེ་དུས་ད་དུང་ཆོས་ལུགས་སྲིད་ཇུས་དངོས་འབབ་དང་མར་གཏོང་གི་དཀྱིལ་འཁོར་ཡོངས་སུ་རྫོགས་པར་འཆར་མེད་སྟབས། ནེའུ་མགོའི་མཚེའུ་དེ་ལ་ཡང་ཀླུ་ས་གཉན་པོར་མཆོད་པའི་བསྐལ་བ་བྱུང་མེད་ལ། ཅི་སྟེ་ཕ་མ་རྣམས་ཀྱིས་རང་གི་ཕྲུ་གུ་དེ་ལ་འགྲོ་དོགས་ཀྱིས། དུས་རྒྱུན་དེ་རུ་ཆུ་རྩེད་སོགས་བྱེད་མི་ཉན་ཚུལ་མངོན་ལྐོག་ཅི་རིགས་དང་ཞེད་སྣང་གིས་ཡང་ཡང་བསྒྲགས་ན་ཡང་། དུས་སྐབས་ཀྱི་རིག་གནས་ནི་དེ་ལྟར་མཐུ་དབང་བཙན་པས། གནས་དེ་ནི་རང་དབང་མེད་པར་སྡེ་འདིའི་བྱིས་པ་རྣམས་ཀྱི་རྩེད་འཇོའི་རོལ་མཚོར་ཀུན་ནས་གྱུར་ཡོད། དེ་དུས་ཀྱི་ནེའུ་མགོའི་ཁོར་ཡུག་དང་འཚོ་བ་རྣམས་ནི་ད་དུང་ཡང་མིག་ལམ་དུ་ན་མར་སྣང་འོང་སྟེ། མཚེའུ་དེའི་ཆུ་དེ་འདྲའི་གཏིང་ཟབ་མ་ཡིན་སྟབས། དབྱར་གསུམ་གྱི་དུས་བྱིས་པ་པྲ་ཚག་རྣམས་དེར་སོང་ནས་ཆུ་རྩེད་ཆུ་རྐྱལ་བྱེད་ཚུལ་ཡང་། མཚེའུའི་ཁ་ནས་རང་རང་གི་རྐང་སྣམ་ཕུད་པ་དང་། དེ་ནས་སུག་བཅག་གཉིས་ཀྱི་ཁ་ཐ་གུས་སམ་སྐྱེར་མས་དམ་པོར་བསྡམས་པ་དང་། རྐང་སྣུམ་གྱི་ཁ་ཀོར་ནང་རོལ་ལ་ཤིང་ཐུར་གཉིས་བཞི་བཀྱིགས་ཀྱིས་བརྒྱངས་ཏེ་བཞག་རྗེས། ལག་པས་སུག་བཅག་ནས་བཟུང་ཁ་མར་བསྐོར་ཏེ་ཆུའི་ངོས་ལ་ཤུགས་ཀྱིས་ཅལ་སྒྲ་དང་བཅས་ཏེ་འཕངས་པ་དང་། དེ་མ་ཐག་རྐང་སྣམ་དུ་རླུང་བཅུག་པས་གཏོས་ཆེར་སྦོས་ཏེ་རྟ་སྒའི་དབྱིབས་ལྟ་བུའི་རླུང་རྐྱལ་དུ་གྱུར་པ་ན། དེའི་སྟེང་བཞོན་ནས་ཡར་རྐྱལ་མར་རྐྱལ་གྱིས་རྩེད་འཇོར་རོལ་ཞིང་། སྐབས་དེ་དག་ཏུ་སྡེ་བ་རྣམས་ལ་སྟོན་ཆེ་བའི་གློག་བརྙན་ནི་མིང་ལ་《ས་ཀྱ་པང་(沙家浜)》ཟེར་བ་དེ་ཡིན་ཞིང་། དེའི་ནང་དུ་ཡུལ་ལྗོངས་མང་ཆེ་བར་མཚོ་ཡི་དཀྱིལ་གྱི་འདམ་ཤིང་གི་ནགས་ཚལ་ཞིག་ཏུ་པྰ་ལོ་དམག་གིས་ཁེ་ཤིང་འཁུར་ཏེ་ཕར་རྐྱལ་ཚུར་རྐྱལ་བྱེད་པ་ཞིག་ཡོད་པ་ལ་ཡང་ཡང་བལྟས་དྲགས་པའི་རྒྱུ་མཚན་གྱིས། བྱིས་པ་ཆེ་བ་རྣམས་ཀྱིས་རང་རང་གིས་བཟོས་པའི་ཁེ་ཤིང་སོགས་བོའུ་ཆེ་ཆུང་རྣམས་བཟུང་ནས། མཚེའུ་དེའི་དེའུ་འབུར་སྟེང་གི་འདམ་བུའི་ཚལ་དུ་སོང་སྟེ་གློག་བརྙན་དེ་ལ་ལད་ཟློས་ཀྱིས་པྰ་ལོ་འཁྲབ་སྟོན་བྱེད་པ་དང་། བྱིས་པ་ཆུང་ངུ་རྣམས་ཕལ་ཆེར་མཚེའུ་ལ་བརྒལ་བར་སྐྲག་སྟེ་འགྲམ་ངོགས་ནས་ཙོག་པོར་བསྡད་དེ་ཁོ་ཚོ་ལ་ལྟད་མོར་ལྟ་ཞིང་། སྐབས་རེར་དེ་དག་གི་དགོད་བྲོ་བའི་བཟོ་ལྟ་རྣམས་ལ་ཧབ་ཆ་དི་རེར་རང་ས་ན་སྤྲོ་དགས་ཚིམ་ཡོད། མཚེའུའི་མདུན་རོལ་ན་རང་བྱུང་གི་ན་ཁུག་གོས་གདན་ས་ལ་བཏིང་བ་ལྟ་བུ་འཇམ་ལ་ཁོད་ཅུང་ཡངས་པ། མེ་ཏོག་རྣམ་པར་བཀྲ་ཞིང་། གཡས་གཡོན་གྱི་ཉེ་ཁོར་དུ་སྐྱེར་མའི་མེ་ཏོག་དང་ར་མ་རིས་ཅོག་གི་མེ་ཏོག་ལྷུག་པར་གྲོལ་བ། མགོ་རྔ་རིང་བ། ཐང་ཆུང་ཆུང་ལྟ་བུ་ཞིག་ཡོད་པའི་སྟེང་བྱིས་པ་མང་པོས་རྐང་རྗེན་དུ་མཆོང་རྒྱུག་ལྡིང་གསུམ་དང་སྦེ་གའི་འགྲན་རྩ་ངོམ་པ་དང་། ལུང་བ་འདིའི་སྡེ་ཡར་མར་དག་གི་དྲུག་གཅིག་བྱིས་པའི་དུས་ཆེན་ཡང་ཐེངས་དུ་མ་ལ་གནས་འདིར་ཡོང་སྟེ་མཉམ་དུ་འཚོགས་མྱོང་བ་དང་། དེ་དག་གི་སྐབས་ཕ་མ་རྣམས་ཀྱིས་རང་རང་ཡུལ་ལུགས་ཀྱི་ཧུབ་རིང་དང་ཀེའུ་ཚོད་སོགས་ཟས་མཆོག་གཞན་མང་པོ་དེར་འཁྱར་ཡོང་སྟེ་ཕ་མ་བུ་ཕྲུག་ཞལ་འཛོམས་ཀྱིས་དུས་ཆེན་གྱི་དགའ་སྟོན་ལྷན་དུ་རོལ་བའི་དེ་དུས་ཀྱི་བྱིས་སེམས་སྐྱིད་པོ་དེ་འདྲ་ནི་མི་ཚེ་འདིར་འབྱུང་དཀའ་བ་ཞིག་རེད།

མཚེའུའི་འདབ་རོལ་དུ་ནགས་ཚལ་སྐྱེས་ལེགས་པ་ཞིག་ཡོད་པའི་ནང་ཁུ་བྱུག་སོགས་བྱ་རིགས་ཀྱིས་སྐད་སྙན་པོར་གཏོང་ཞིང་། ཟུར་ལོགས་ཀྱི་མི་རིང་བའི་ས་ན་མ་ཎི་ཆུ་འཁོར་ཞིག་དང་ཡུལ་ལྷའི་ལྷ་ཐོ་ཞིག་ཡོད་པར་དུས་རྒྱུན་བསང་གཏོང་མཁན་དང་མཇལ་མཁན་རྒྱུན་མི་ཆད་པར་འོང་ཞིང་། ཁྱད་པར་དབྱར་གྱི་དུས་སྤྲོ་བསང་དང་མཆོད་མཇལ་གཉིས་འགྲུབ་ཀྱི་ཆེད་དེར་ཡོང་མཁན་མི་ཚོགས་མང་ཞིང་འདུ་འཛིན་ཆེ་བ་དང་། མཚེའུ་དེ་ནས་བཞུར་བའི་ཆུ་དང་། ཉེ་འཁོར་གྱི་ལྟེང་ཀ་མང་པོ་ནས་བརྡོལ་བའི་ཆུ་རྣམས་ལྷན་དུ་འདྲེས་པའི་ཆུ་རྒྱུན་གྱིས་མ་ཎི་ཆུ་འཁོར་དེ་ཉིན་མཚན་མཚམས་ཆད་པ་མེད་པར་བསྐོར་བར་ཡོད་ལ། ཆུ་རྒྱུན་དེ་རྣམས་ཡ་མགོ་མ་དང་མ་མགོ་མའི་སྡེ་འདབས་བརྒྱུད་སུལ་རིག་སྐེའི་ཕྱོགས་སུ་ཐུར་དུ་བཞུར་བ་ཡིན། ཆུ་རྒྱུན་དེ་སྡེ་འདབས་སུ་བཞུར་སྐབས་ཁྱིམ་ཚང་མང་པོའི་ཚོད་དྲ་དང་སིལ་སྡོང་གི་ཡུར་ཆུ་དང་། ཕྱུགས་ཟོག་གི་འཐུང་ཆུ་དང་མཁར་གྱང་གི་གྱང་ཆུ། རྐ་འོག་མའི་ཡུར་ཆུ་གཙོ་བོ་བཅས་ཡིན་པར་མ་ཟད། སྐབས་ཤིག་སྟག་རིག་ཤོག་ཁ་བཞིའི་ནང་ཚན་ཨ་སྐོང་སྡེ་བའི་ཡང་ཡུར་ཆུ་གཙོ་གྲས་སུ་གྱུར་ཡོད་པ་ནི། ཆུ་འདི་ལ་ཀོའུ་ཆུ་སྒྱོམ་ཆུ་ཞེས་ཐོག་མྱོང་བ་དེས་ཤེས་ཏེ། དེ་ཡང་ཨ་སྐོང་ལ་ཡུར་ཆུ་དཀོན་པོ་བྱུང་བས་ཀོའུ་བ་ཚང་དང་སྒྱོམ་ཚང་གི་རྒད་པོ་གཉིས་ཀྱིས་མཛོ་འགའ་ལ་དོར་བཅོས་ཏེ། སུལ་རིག་སྐེ་རྒྱུད་ལ་ཐོང་ཁ་ཕྱེ་ཞིང་ཁིས་གའི་ཉག་ག་ལ་ཐུག་པའི་བར་ཆུ་རྐ་གཤགས་ཏེ་སྟག་རིག་གི་སྡེ་འདབས་ནས་བཞུར་བའི་ནེའུ་མགོའི་ཆུ་རྒྱུན་ཡུར་ཆུར་དྲངས་པས་དེ་ལྟར་ཐོགས་པར་གྲགས་སོ།། དབྱར་ཟླ་དྲུག་པར་སྟག་རིག་ཡ་མགོ་མས་ནག་ཀྱྰའི་ལབ་ཙེ་བསྟད་ཚར་རྗེས་གནས་དེ་དག་ཏུ་ཡོང་ནས་གུར་ཕུབ་ཐབ་བཟུང་སྟེ། ཉིན་ཞག་འགའ་རེར་དེ་རུ་སྡེ་བ་སྤྱི་གཞུང་ནས་རྩ་འཛུགས་བྱས་པའི་གླུ་ལེན་གར་རྩེད་བྱེད་པ་སོགས་ཀྱི་སྲོལ་ཡང་ཡོད་ལ། དེ་དག་གི་རིང་སྡེ་བའི་ཕ་ཁུ་ཞང་ཚན་དང་ཁ་ཡ་ན་ཟླ་ཚང་མ་གུར་གཅིག་དང་ཆང་ཁ་གཅིག་ཏུ་མཉམ་དུ་འཛོམས་ནས་སྐྱིད་པའི་གླུ་ལེན་ཞིང་། དགའ་བའི་བྲོ་འཁྲབ་བ། ཞིམ་པའི་ཟས་ལ་རོལ་པའི་ལྷན་འཛོམས་ཀྱི་འཚོ་བའི་རྣམ་པ་དེ་དག་ད་ལྟ་ཡང་ལན་མང་དུ་ཡིད་ལ་འཁོར་ཡོང་།

༢༠༠༥ལོར་སྡེ་ཨུས་མཚེའུ་དེའི་ཉེ་འཁོར་དུ་ཆུ་མགོ་འགའ་ཡོད་པ་འཐུང་ཆུར་འདྲེན་རྒྱུའི་འཆར་འགོད་ཀྱིས། དོན་དེ་གསང་བདག་འཁོར་ཆེན་གྱི་རྣལ་འབྱོར་བ་ཆེན་མོ་མཚན་བརྗོད་པར་དཀའ་བ་ཁོང་ཨ་ཁུ་ཆོས་གྲགས་ཚང་ལ་སྙན་དུ་སྒྲོན་པར། ཁོང་གི་ཞལ་སྔ་ནས་ཀྱིས་“དེ་ན་ཀླུ་དཀར་པོ་ཞིག་གནས་འདུག་པ་ལ། ཐོ་ཅོ་ཆེ་དྲགས་ན་མི་རྟག་པར་མཐོང་ངོ”ཞེས་ཆུ་དྲངས་ན་མི་ལེགས་ཚུལ་གདམས་མོད། ཨུ་ཚུགས་ཅན་འགས་མ་ཉན་པར་མཚེའུ་དེའི་འདབ་རོལ་ནས་འོབས་གཤགས་ཏེ་ཆུ་དྲངས། ཁོར་ཡུག་ནས་དོང་བྲུས་ཏེ་སྡོང་འཛུགས་བྱས་པས་སྔོན་གྱི་མཛེས་ལྗོངས་ཉམས་དགའ་བོ་དེ་ཅུང་མི་སྡུག་པ་བྱས་ཤིང་། ལོ་འགའ་ཡང་མ་སོང་པར་གནས་དེར་ཡོད་པའི་ཆུ་རྣམས་རིམ་གྱིས་ས་འོག་བརྒྱུད་གྲམ་པར་འགོག་མེད་དུ་འཐུམ་པས། མཚེའུ་ནི་བྲི་བསྐམས་བྱུང་སྟེ་འདམ་ཁུར་ལུས། མ་ཎི་ཆུ་འཁོར་ཡང་ཆུ་རྒྱུན་ཆད་དེ་ལོ་མང་པོར་སྡོད་དགོས་བྱུང་བ་ལ། ༢༠༡༤ལོར་སྡེ་མི་ཡོངས་ནས་ལས་ཤུགས་རང་འབུལ་བྱས་པའི་ཐོག་དམངས་སྒོར་དྲུག་ཁྲི་ཡས་མས་གྲོན་གཏོང་མཛད་དེ་ཆུ་རགས་གཏིང་རིམ་ཅན་མང་པོ་བརྩིགས་ནས་ཆུ་ལེགས་པར་བསྐྱིལ་པས། ཆུ་མིག་རྣམས་ཕྱོགས་ཕྱོགས་ནས་སླར་ཡང་རྒྱས་པ་བྱུང་སྟེ་མཚེའུ་དང་མ་ཎི་ཆུ་འཁོར་སྔོན་ལྟར་མཛེས་པའི་དཔལ་ལ་འཕེལ་བཞིན་པའི་སྐབས་སོ།། དེས་ན་ཁོར་ཡུག་སྲུང་སྐྱོང་ཞེས་བྱ་བ་ནི་ངེས་པར་དུ་ཡུལ་ཆེ་ས་ཞིག་ལ་འབྱར་དགོས་པ་ཞིག་མ་ཡིན་ལ། ཡུལ་གཞན་ན་མ་གཏོགས་རང་ལ་མེད་པ་ཞིག་ཀྱང་མ་ཡིན་པས། འདི་འདྲའི་ཡུལ་ལྗོངས་ཡག་པོ་ལ་གཏོར་བརླག་མི་ཐེབས་པར་བྱེད་པ་ནི་སྡེ་འདིའི་ཁོངས་ཞབས་སུ་སྐྱེས་པའི་རང་རེ་ཐམས་ཅད་ལ་འོས་འགན་མི་དམན་པ་ཡོད་གཤིས། ཚང་མས་རང་ས་རང་ཡུལ་གྱི་ས་ཆུ་ནགས་གསུམ་གྱི་བདག་སྐྱོང་ལ་ཡར་གཏོགས་དང་རྒྱབ་སྐྱོར་གང་ལེགས་བྱེད་པར་ཤོག

Modern Creative Literature Amdo Triga

Contents

About

Collection Modern Writing from Qinghai Province
Visibility Public - accessible to all site users (default)
Author Tamdrin Gyel
Year published 2018
Subjects
Places
Rights All copyrights held by the original author(s). Published by the University of Virginia Tibetan and Himalayan Library
Creative Commons Licence