སུམ་བྷའི་གྲུབ་གནས་ཀྱི་ཆེ་བ་དད་ལྡན་འགུགས་པའི་ལྕགས་ཀྱུ།
（ཟི་ལིང）རིན་ཆེན་བཀྲ་ཤིས།
༄༅། ། ན་མོ་གུ་རུ་བཛྲ་དྷ་ར་ཡ། དོན་དམ་མི་ཤིགས་བདེ་ཆེན་ཐིག་ལེའི་རྩལ། ། འགག་མེད་རང་བྱུང་འཁོར་འདས་མངའ་དབང་བསྒྱུར། ། བགྲེས་རྒུད་སྐྱེ་འཆིས་གཞོམ་བྲལ་རྡོ་རྗེའི་སྐུ། ། སྣང་སྲིད་ཟིལ་གནོན་གསང་གསུམ་དགེ་ལེགས་སྩོལ། ། ཞེས་ཤིས་པར་བརྗོད་པའི་བདེན་ཚིག་ལྷའི་མེ་ཏོག་མནྡཱ་ར་བའི་ཕྲེང་བ་མཁའ་ལ་འཐོར་བས་མདུན་བསུས་ཏེ་གང་ཞུ་ན། ལྟག་གི་ལྷ་རིའམ་སུམ་བྷའི་སྒྲུབ་གནས་སུ། སྔོན་གྱི་དུས་སུ་སློབ་དཔོན་ཆེན་པོ་པདྨ་སམྦྷ་ཝ་སྐུ་དངོས་སུ་བྱོན་ཏེ་སྲིན་པོ་ཕོ་མོ་དམ་ལ་བཏགས་ཤིང་། ཕྱི་རབས་སྐལ་ལྡན་པའི་དད་རྟེན་དུ་དབུ་རྗེས་དང་ཕྱག་རྗེས་སོགས་དང་། མཁའ་འགྲོས་བྲོ་འཁྲབ་པའི་ཞབས་རྗེས་དང་། སྡེ་བརྒྱད་ཀྱིས་ལྕགས་སེར་འདྲིལ་བའི་རྡོ་སོགས་བཞག་ཡོད་དོ། །
གནས་འདི་ནི་སློབ་དཔོན་ཆེན་པོས་སྐུ་དངོས་ཀྱིས་བྱིན་རླབས་མཛད་པའི་གནས་ཆེན་ཞིག་ཡིན་པས། སྔ་ཕྱིར་ཁམས་ཀྱི་བླ་མ་ཞེ་ཆེན་དང་། སྒོ་མེ་གྲགས་པ་རྒྱ་མཚོ། ཏིང་ཀྱཱ་སྙན་གྲགས་རྒྱ་མཚོ། གྲུབ་ཆེན་ཆོས་དབྱིངས་རང་གྲོལ། གྲུབ་དབང་འཇིགས་མེད་བསམ་གཏན། ནེའུ་ལུང་སྐུ་ཕྲེང་ལྔ་པ་བསྟན་འཛིན་མཆོག་ལྡན་ཚུལ་ཁྲིམས་རྒྱ་མཚོ། བྲག་དཀར་རྒྱའི་བླ་མ་ཀ་རིང་སྔགས་འཆང་བདུད་འདུད་རྡོ་རྗེ། རིག་འཛིན་དཔའ་བོ་སྟོབས་ལྡན། ཨ་ལགས་གསང་ལུང་། ཨ་ལགས་ཚེ་ཐར། རེབ་གོང་གི་བླ་མ་དགེ་འདུན་འཇམ་དབྱངས་ཤེས་རབ་རྒྱ་མཚོ། ཨ་ལགས་མཁྱེན་བརྩེ། དཀར་བརྗིད་ཨ་ཁུ་རྣམ་གཉིས་སོགས་དང་། ཉེ་དུས་སུའང་སྒ་ཐུབ་བསྟན་དགོན་གྱི་གྲུབ་པའི་དབང་ཕྱུག་ཆོས་དབྱིངས་རྡོ་རྗེ་དང་། སྐེ་ཀྱཱ་ཐམས་ཅད་མཁྱེན་པ། ཏིང་ཀྱཱ་པདྨ་རྣམ་རྒྱལ། ཨ་ལགས་ར་ཞོལ་མ། ཤང་ཁྲིའི་སྤྲུལ་སྐུ་བསྟན་འཛིན་སྙན་གྲགས་སོགས་གསར་རྙིང་གི་སྐྱེས་ཆེན་མང་པོས་སྒྲུབ་པ་ཉམས་བཞེས་གནང་ཞིང་། གནས་འདིའི་དགོན་པའི་མཚན་ལ་བསམ་གཏན་འཕེལ་རྒྱས་གླིང་ཞེས་བྱ་ཞིང་། སྒྲུབ་པ་ཉམས་བཞེས་མཛད་མྱོང་བའི་སྐྱེས་ཆེན་རྣམས་ཀྱི་མཚམས་ཁང་གི་རྗེས་ཤུལ་ཡང་ད་ལྟ་དངོས་སུ་མཇལ་རྒྱུ་ཡོད་དོ། །