Skip to main content Skip to search
སྟག་རིག་སྡེ་བའི་རྒན་བཀུར་ལོ་སར་ངོ་སྤྲོད་མདོར་བསྡུས།

སྟག་རིག་སྡེ་བའི་རྒན་བཀུར་ལོ་སར་དུས་སྟོན་གཞིས་བྱེས་ལྷན་འཛོམས་ཞེས་བྱ་བ་ནི་སྟག་རིག་ལས་བྱེད་གཙོ་བྱས་པའི་སྡེ་མི་རྣམས་ཀྱིས་མང་མོས་ཞལ་འདེབས་བཞག་སྟེ་ཡ་རབས་ཀྱི་སྤྱོད་བཟང་གསོ་བར་སྐུལ་བའི་བྱ་འགུལ་ཞིག་ཡིན་ཞིང་། སྤྱི་ལོ་༢༠༠༥ལོ་ནས་སྤེལ་མགོ་ཚུགས་པ་ནས་ད་བར་ཁྱོན་བསྡོམས་ལོ་འཁོར་བཅུ་སོང་བའི་རིང་སྤེལ་རྒྱུན་ཟམ་མ་ཆད་པར་ཇེ་ལེགས་ཇེ་རྒྱས་ངང་ཡང་དག་སྐྱོང་མུས་སུ་མཆིས། བྱ་བ་འདི་ནི་༢༠༠༤ལོའི་དབྱར་ཟླ་དྲུག་པའི་ནང་གནའ་མཁར་ཟི་ལིང་དུ། སྡེ་འདིའི་ལས་བྱེད་པ་འགའ་ལན་ཅིག་ལྷན་དུ་འཛོམས་པའི་བསྐལ་བ་བྱུང་བར། ད་ལྟ་སྡེ་བའི་སྔར་གྱི་རྒན་བཀུར་ཆུང་སྐྱོང་གི་དཔེ་སྲོལ་བཟང་བོ་དེ་དག་ཉམས་པར་འདུག་ལ། རང་རེ་ཕྱི་ན་ཡོད་པའི་ལས་བྱེད་ཕལ་ཆེར་ཞིག་ཀྱང་ལོ་རེར་ཕ་ཡུལ་དུ་ཐེངས་གཅིག་གམ། ལ་ལ་ཐེངས་གཅིག་ཙམ་ཡང་ལོག་ཕེབས་ཐུབ་པ་མི་འདུག་པས། དུས་རྒྱུན་རྒན་པ་རྣམས་ལ་ལྟ་སྐྱོང་འདྲི་སྐོར་རྒྱག་ཐུབ་པ་ཕར་ཞོག ལོ་སར་སྟེར་བ་དང་ཐ་ན་ཚེ་དུས་རྣམས་ཀྱི་གཤིན་དགེའི་སྟེང་ལ་ཡང་སླེབས་ཐུབ་མཁན་རྒྱ་ལམ་ཡིན་ན། དེ་ནི་སྡེ་འདིའི་ཁོངས་ཞབས་སུ་སྐྱེས་པ་རང་རེ་རྣམས་ཀྱི་ངོ་ཚ་ཆེན་པོ་ཞིག་སྟེ། སྲོལ་ངན་དེ་རིགས་མི་མཐུད་རྒྱ་ཡན་དུ་བཏང་ཚེ་སྡེ་བ་ཡ་རབས་སུ་སྐོར་བའི་བཀག་རྡོར་འགྲོ་ཞིང་། དཔེ་སྲོལ་ངན་པའི་ས་བོན་འདེབས་ཉེན་ཡོད་པ་དང་། སྔར་བྱོན་པའི་རང་སྡེའི་རྒྱན་དང་ན་ཟླའི་དཀྱིལ་དུ་གྱུར་བའི་སྐྱེས་བུ་རྣམས་ཀྱིས་རང་སྡེར་བཞག་པའི་རྒན་བཀུར་ཆུང་སྐྱོང་གི་ལག་རྗེས་མཐའ་དག་ཀྱང་རྨེག་མེད་དུ་འཇོམས་དོགས་ཆེ་གཤིས། ད་འདི་ལྟར་སྡོད་རིན་མིན་པར་ཡ་རབས་ཀྱི་བྱ་བ་སྣ་གཅིག་གི་དཔེ་སྲོལ་བཟང་བོ་ཙམ་ཞིག་ཅི་ནས་ཀྱང་རྒྱུན་སྐྱོང་ཨེ་ཐུབ་ངེས་པར་བལྟའོ་ཞེས་གྲོས་མགོ་བཏོན་པ་ན། དེར་ཡོད་ཚང་མས་ལེགས་སོ་ཞེས་བྱ་བ་ཤིན་ཏུ་འཐད་པའི་ལན་བྱིན་ཅིང་། ལྷག་པར་ས་ཆ་སོ་སོ་ན་རེ་ཞིག་བུ་དང་མནའ་མས་ཕ་མ་མི་གཅེས་པ་དང་། ཆུང་ཕྱོགས་པས་རྒན་པ་མི་བཀུར་བ་སོགས་རྒན་བཀུར་གྱི་བྱ་བ་ཤིན་ཏུ་ཉག་ཕྲ་ཞིང་ཉམས་ཐག་པར་ཡོད་པ་ལ་དགོངས་ཏེ། མཐར་སྡེ་བའི་ལོ་ལོན་རྒན་པ་རྣམས་ལ་ལོ་རེར་ལོ་སར་གྱི་ལེགས་སྐྱེས་དབུལ་བའི་དུས་སྟོན་བཤམས་པ་དེར་དགོས་པ་ཆེ་བར་ཐག་གིས་བཅད་པ་ནས་བྱ་བ་འདིའི་དབུ་བརྙེས་ཤིང་། དེ་ཡང་བྱ་བ་འདི་མགོ་བརྩམས་ལེགས་པ། བར་རིམ་པ་ཚང་བ། མཇུག་རྔ་མ་རིང་བ་ཞིག་ཡོང་ཆེད། གཉེར་ཡུན་སྐོར་གཅིག་ལོ་གསུམ་དུ་ཐག་གཅོད་བྱས་ནས་སྐོར་དང་པོའི་གཉེར་བ་ལྕགས་ཐར་རྒྱལ་དང་རྟག་མགྲིན་རྒྱལ་གཉིས་ཀྱིས་འཁུར་དགོས་པར་ལས་བྱེད་པ་རྒན་གྲས་རྣམས་ཀྱིས་དུས་དེར་བཀའ་བསྒོས་བྱས་པ་བཞིན། ༢༠༠༤ལོའི་ལུགས་རྙིང་ལོ་སར་ནས་༢༠༠༦ལོའི་ལོ་སར་བར་ལོ་གསུམ་གྱི་གཉེར་འགན་ཕྲག་ཏུ་ནན་གྱིས་བླངས་ཤིང་། དེའི་འཕྲོར་གཉེར་བ་གོང་མའི་ལོ་ཡི་མས་བབས་ལྟར་བཀྲ་ཤིས་ཚེ་རིང་དང་གནམ་ལྷ་ཚེ་རིང་གཉིས་ཀྱིས་༢༠༠༧ལོ་ནས་༢༠༠༩ལོའི་བར་ལོ་གསུམ་གྱི་ལོ་སར་གཉེར་འགན་ཡོངས་སུ་ལེགས་པར་བཞེས། དེའི་རྗེས་ཀུན་བཟང་དང་བསོད་ནམས་རབ་བརྟན་གཉིས་ཀྱིས་༢༠༡༠ལོ་ནས་༢༠༡༢ལོའི་ལོ་སར་གྱི་གཉེར་འགན་ལོ་གསུམ་པོ་སྔར་སྲོལ་བཞིན་ཕྲག་ཏུ་ལེགས་པར་བཞེས་བཞིན་གདའ་འོ།།

ལོ་སར་དུས་སྟོན་འདིའི་དམིགས་འབེན་གཙོ་བོ་ནི་རྒན་པར་བཀུར་བསྟི་དང་ཆུང་བར་བྱམས་སྐྱོང་བྱེད་རྒྱུ་དེ་ཡིན་ལ། སྤྱིར་རིགས་མཐོ་བ་དང་རྒན་པར་བཀུར་བསྟི་བྱེད་པ་དེ་ཆོས་རྒྱལ་སྲོང་བཙན་སྒམ་པོའི་རིང་ནས་གངས་ཅན་གྱི་ལྗོངས་སུ་ལུགས་གཉིས་ཁྲིམས་ཀྱི་རྣམ་པས་དར་སྤེལ་བཏང་བའི་མི་ཆོས་གཙང་མ་བཅུ་དྲུག་གི་ནང་དོན་གལ་ཆེན་ཞིག་ཡིན་ཞིང་། ད་བར་ལོ་ངོ་སྟོང་གཅིག་དང་དྲུག་བརྒྱར་ཉེ་བའི་ལོ་ཟླའི་ནང་བོད་རྣམས་ཡ་རབས་ཀྱི་ཕྱོགས་དང་སྤྱི་ཚོགས་འཆམ་མཐུན་གྱི་ལམ་དུ་ཡང་དག་འགྲོ་བར་ནུས་པ་གལ་ཆེན་བཏོན་ཡོད། ང་ཚོས་བྱ་བ་འདི་ལོ་སར་ནང་འཇོག་དོན་ཡང་ལོ་སར་གྱི་ཁྲོམ་ཚོགས་བེད་སྤྱད་དེ་སྡེ་བའི་རྒན་པ་ལ་ལོ་སར་ལེགས་སྐྱེས་སྟེར་བ་དང་ཆབས་ཅིག་རྒན་པར་བསྙེན་བཀུར་བྱེད་དགོས་པ་དང་ཕ་མར་གཅེས་སྐྱོང་བྱེད་དགོས་པའི་སློབ་གསོ་བརྒྱབ་སྟེ། སྔར་ཡོད་ཀྱི་རྒན་བཀུར་ཆུང་སྐྱོང་གི་དཔེ་སྲོལ་བཟང་བོ་མི་ཉམས་གོང་སྤེལ་གཏོང་རྒྱུ་དེ་ཡིན། ལོ་སར་ལེགས་སྐྱེས་སྟེར་ཡུལ་ནི་རང་ལོ་བདུན་ཅུ་ཡན་དུ་སླེབས་པའི་གྲོང་རི་དགོན་གྱི་སེར་སྐྱ་རྒན་རྒོན་རྣམས་ཡིན་ཞིང་། ལོ་རེར་ཆ་སྙོམས་བཅད་ལོ་དེ་ཐོག་ཏུ་སླེབས་ཡོད་པའི་ལོ་ལོན་བདུན་ཅུ་ཐམ་པའི་གྲངས་ཀར་ལོངས་པ་ལ་ལོ་སར་ལེགས་སྐྱེས་གནང་གི་ཡོད། ༢༠༠༩ནས་བཟུང་ལོ་སར་སྟེར་ཡུལ་གྱི་ཁོངས་རྒྱ་བསྐྱེད་དེ་དྭ་ཕྲུག་དང་། སློབ་མ་དབུལ་བོ། རྒྱུགས་འཕྲོད་སློབ་མ། ཡ་རབས་བླ་གྲྭ་བཅས་གསར་དུ་བསྣན་ཏེ་དེ་དག་ལོ་སར་ལེགས་སྐྱེས་གནང་ཡུལ་གྱི་གྲས་སུ་བཞག་ཅིང་། སོ་སོར་ལྷ་རྫས་དྲི་མ་མེད་པ་དང་སྨོན་ལམ་ཡང་དག་གིས་མཚམས་སྦྱར་བའི་སྟེང་སྒོར་རྐྱང་ཚད་དུ་ལོངས་པ་ལོ་སར་ལེགས་སྐྱེས་སུ་བྱིན་ཏེ། ཁྲོམ་ཆེན་པོ་འདུས་པ་རྒྱ་མཚོའི་དབུས་སུ་གཟེངས་བསྟོད་བགྱིས་ནས་རིག་པའི་གནས་ལ་བརྩོན་པར་རྟིང་སྐུལ་བྱས། ཁྱད་པར་དགོང་གི་ཉི་ཟླ་ཁ་སྤྲོད་པའི་ཟོལ་གྱིས་སྡེ་འདིའི་དཔལ་དུ་ཤར་བ་རྙེ་དང་ཐིས་པ་དགོན་གཉིས་ཀྱི་གདན་ས་འཛིན་པ་པོ་རྩ་བའི་བླ་མ་ཐིས་པ་རིན་པོ་ཆེ་དང་ཨ་ལགས་ཀུན་བཟང་། རྙེ་རིན་པོ་ཆེ་རྣམ་པ་གསུམ་ཡང་རྒན་བཀུར་ལོ་སར་དུས་སྟོན་སྟེང་སྐུ་དངོས་ཀྱིས་ཕེབས་ཅིངས་བཞུགས་གདན་འཇགས་ནས་ལུགས་གཉིས་དང་མཐུན་པའི་བསླབ་བྱ་གནད་དུ་སྨིན་པ་གནང་བ་ལ། རྒན་བཀུར་ལོ་སར་རྩ་འཛུགས་པས་ལོ་སར་གྱི་སྐྱེས་གང་འཛོམས་མཆོད་སྤྲིན་དུ་སྤྲོས་ནས་གྲོང་རི་དགོན་གྱི་བསྟན་སྲིད་བྱ་བ་མཐའ་དག་རྒྱས་ པའི་འཕྲིན་ལས་ཆེད་དུ་བཅོལ་གཏད་བྱས། རྒན་བཀུར་ལོ་སར་དུས་སྟོན་སྤེལ་བའི་དུས་ནི་ལོ་རེའི་ལུགས་རྙིང་གི་རྒྱ་ལོའི་ཚེས་པ་གཉིས་ཀྱི་ཉིན་གཅིག་གི་རིང་ཡིན་ཞིང་། སྡེ་འདིར་ནང་གསེས་ཤོག་ཁ་གསུམ་ཡོད་པའི་ནང་ཁུལ་ནས་གོ་རིམ་བཞིན་ལོ་སར་དུས་སྟོན་རེས་སྤེལ་བྱེད་དགོས་ཤིང་། ལོ་དེར་སྤེལ་རེས་བབས་པའི་ཤོག་ཁ་དེས་ཉིན་དེ་ཡི་རྩེད་མོའི་རྣམ་གྲངས་གྱ་ནོམ་་པ་དང་ཇ་ཆང་གི་སྡེར་ཁ་གང་འཛོམས་བསྒྲིགས་པ། ཁྲོམ་ཚོགས་ཀྱི་འགྲིག་ལམ་བསྡམས་པའི་འགན་སོགས་ཕྲག་ཏུ་ལེན་དགོས་པ་ཡིན། ལོ་སར་ནི་ལོ་གཅིག་ནང་གི་དུས་ཆེན་གལ་ཆེ་ལ་རྟེན་འབྲེལ་ཅན་ཞིག་ཡིན་གཤིས། ལོ་སར་གྱི་སྐབས་ཐ་ན་ས་མཐར་འཁྱམ་པའི་མི་ཞིག་ཡིན་ཡང་རང་གི་ལྟེ་ཁྲག་སྟོར་བའི་ཕ་ས་གང་དེར་ལོག་ཐབས་ཅི་ནུས་ཀྱིས་ཉེ་མི་རྣམས་དང་ལྷན་དུ་འཛོམས་ནས་ལོ་གསར་བའི་དགའ་སྟོན་མཉམ་རོལ་བྱེད་པས་ན་ལོ་སར་ནི་ངེས་པ་དོན་གྱི་གཞིས་བྱེས་ལྷན་དུ་འཛོམས་པའི་བཀྲ་ཤིས་དུས་བཟང་ཞིག་ཡིན་ཞིང་། ལོ་སར་གྱི་ནང་མི་སུ་ཡིན་ཡང་རང་ཉིད་དྲིན་གྱིས་བསྐྱངས་པའི་མི་རྣམས་ལ་ལོ་སར་གྱི་ལེགས་སྐྱེས་རང་གི་འཛོམས་ཚོད་ཅིག་ངེས་པར་འཁྱེར་ནས་སྟེར་དགོས་པ་དང་། ལོ་སར་ལ་སྐྱེས་མཆོག་དམན་གང་ཞིག་སྟེར་ཡང་། སྟེར་ཡུལ་གྱིས་ཀྱང་རྩ་བ་གང་ཆེ་གང་བཟང་ལ་མི་བལྟོས་པར་མ་བྱིན་པ་ལ་ཤིན་ཏུ་རེ་ཆེ་ཞིང་བྱིན་པའི་ལོ་སར་དེ་ཧ་ཅང་འདང་ཅན་ཞིག་ཏུ་བརྩི་ངེས་ལ། ལོ་སར་ཆག་ཆད་ཤོར་པ་དེར་ལོ་གསར་གྱི་སྐལ་བཅད་སོང་ཟེར་ནས་འཁང་ར་དང་མི་ཁ་གཏོང་འོང་བ་ཞིག་ཡིན་ཕྱིར། སྟག་རིག་གི་རྒན་བཀུར་དུས་སྟོན་དེ་འདི་ལྟ་བུའི་དོན་སྙིང་ལྡན་པའི་ལོ་སར་འདེམས་ནས་སྤེལ་དོན་ཡང་ཕྱི་ལོག་ན་འཚོ་བའི་ལས་བྱེད་པ་རྣམས་ལོ་སར་སྐབས། ཕ་ཡུལ་དུ་ཅི་ཐབས་ཀྱིས་སླེབས་ནས་ཡུལ་མི་སྤུན་ཟླ་དང་ལྷན་དུ་རྒན་བཀུར་གྱི་བྱ་བར་ཞུགས་ཏེ་རང་སྡེ་རྒན་པ་ཡོངས་ལ་སོ་སོའི་སེམས་ཀྱི་རྒན་བཀུར་གྱི་བསམ་པ་རྨ་མེད་པ་དེ་ལོ་སར་ལེགས་སྐྱེས་ཀྱི་ཚུལ་དུ་འབུལ་འདོད་པ་དེའོ།།

   ཞལ་འདེབས་ཀྱི་ཡོང་ཁུངས་གཙོ་བོ་ནི་ལས་བྱེད་པ་ཡིན་ཞིང་། དེ་ལས་བྱ་བ་འདིའི་གྲོས་མགོ་འདོན་མཁན་གྱི་ལས་བྱེད་པ་རྣམས་ནས་ལོ་ལྟར་ཁྱིམ་རེས་སྒོར་སུམ་བརྒྱ་ཞལ་འདེབས་གཏན་འཇགས་སུ་དབུལ་དགོས་པ་དང་། ལས་བྱེད་གཞན་རྣམས་རང་མོས་བཞིན་སྟེར་ཆོག་པ་ཡིན། གཞན་ཡང་སྡེ་འདིའི་གྲྭ་བ་དང་ཚོང་བ། འབངས་མི་ཕལ་བའ་ནང་དུའང་སྤྱི་སེམས་ཅན་མང་དུ་འབུལ་མཁན་བྱུང་བས་ཡ་རབས་ཀྱི་སྤྱོད་པ་ལ་དགའ་བའི་དཔུང་སྡེ་ཞིག་སྟོབས་ཤུགས་ལྡན་པ་དང་། གཞི་རྒྱ་ཆེ་བའི་ངང་ཆེ་ཆེར་འཕེལ་ཏེ་ཉམས་དགའ་བའི་རྣམ་པའི་ཕྱོགས་སུ་འགྲོ་བཞིན་པའི་ཚུལ་འདི་མཐོང་སྟེ། ཡུལ་ཕྱོགས་འདིའི་བླ་སྤྲུལ་མང་པོ་ཡུལ་སྡེ་གང་དུ་ཕེབས་ས་ནས་སྟག་རིག་གི་རྒན་བཀུར་གྱི་བྱས་པ་ལ་ཡི་རངས་དང་སློབ་སྦྱོང་བྱེད་དགོས་པའི་འབོད་སྐུལ་གཏོང་ཞིང་། ཁྲི་ཀ་རྫོང་རྫོང་མགོ་སྡེ་བ་སོགས་ས་ཆ་འགས་སྟག་རིག་མིག་དཔེར་བཟུང་ནས་དགུན་གནང་སྐབས་དགེ་རྒན་དང་སློབ་ཆེན་སློབ་མ་ཆེད་བསྐོང་གིས་རང་སྡེའི་སློབ་གྲྭ་ཆུང་འབྲིང་གི་སློབ་མར་སློབ་ཁྲིད་ཤུགས་སྣོན་རྒྱག་པའི་རྦ་རླབས་འཕྱུར་མགོ་བརྩམས་ཡོད།

 

   

སྟག་རིག་སྡེ་བའི་རྒན་བཀུར་ལོ་སར་ངོ་སྤྲོད་མདོར་བསྡུས།
Collection Modern Writing from Qinghai Province
Visibility Public - accessible to all site users (default)
Author Tamdrin Gyel
Year published 2018
Subjects
Places
UID mandala-texts-49881
DOI
PDF View | PDF icon Download (71.23 KB)
Rights All copyrights held by the original author(s). Published by the University of Virginia Tibetan and Himalayan Library
Creative Commons Licence